GOMENASAI by Ahmangaihi violette khiangte (Completed)

Moderator: writers

Ngaia
Site Admin
Posts: 25813
Joined: April 30th, 2016, 4:07 pm

Re: GOMENASAI by Ahmangaihi violette khiangte (Completed)

Unread post by Ngaia » March 28th, 2021, 12:12 pm

GOMENASAI - by Ahmangaihi violette khiangte



CHAPTER - 42

images (87).jpeg


"Ka hrelo le nu, zep lo ah chuan han inkawl leh pawh ni ila kan hlim tawh kherin ka ringlo a, ka tan leh ama tan pawh, nupa hlim lo tak nih reng kha kan inhrem tawn mai mai thei bawk a" ka ti leh ngawt a, Judy a lo tla zep veleh bawk si a, ka chhungten a lam a awn leh dawn tih chu chiangsa a ni bawka, JH-a lah ka lakah a hel tlat bawk nen engti kawngzawng pawhin inṭhen chu kan tan a ṭha ber ta in ka hria, ka nu ngaihdan erawhin rilru a ti buai viau tho a mahse, ka damna tur zawk ni a ka hriatah chuan ka intipaukhauh lui ve tlat thung.







"A...nangmah berin i duh zawk tawh tlat si chuan i lungdamna anga awm kha a ṭha mai a lawm" ka nu chuan a ti ve ta a.






Darkar chanve vel a liam ta ang tihah chuan ka Ni Tlanin min lo bia a "I bungrua chu kan la fel tawh e, sum pawh kan chhuah nghal a, i puin khalamah khan awm rih mai rawh a ti bawk che anih chu, i rilru ti hah lo la, pawisa i mamawh chuan kan lo thawn dawn che a nia" a lo ti a, sawitur reng ka hrelo, ka ruak huai nimaiin ka hria, "Chutia engkim an lo ti fel ta chu thawveng huai tur zawk i ni a lawm" tiin keimah chu ka inhrilh a mahse, chutiang ngawt zawng a nilo.







"Ni engtin nge an lo tih a?" ka ti zuai raih a, "Sawi pawh a zahthlak zawk i naupai kha an fa anih an ringlo a nih chu, an rapthlak hlawm ania, tir lui ngawng ngawng che pawh kan nibik lo, mawihnai taka min rawn dil vangin kan kal tir che a, an duh ve tak zet che anih ringin huphurh ru ṭeuh chungin a nia kan neihtir che, hetiang tur tih hriata lo neih lekloh tur" a ti zui hlak hlak a.







"JH-an a mi chutiang chuan sawi?" ka ti nawn leh kher a, a tupawn sawi se danglamna phei chu a awm hran chuanglo mahse, bungrua an la ta chu JH-an eng angin nge a lo chhâwn hriat chian ka chak tlat a ni.







"Room ah i pu an ko luta, chutah chuan an sawi mawle, a rawn chhuak leh kha a rawn thinur nasa maia, i ṭhiannu a awm ve hlauh a, i bungrua pawh hmaih kan neiin ka ringlo, in pa lah chuan mi rawn zui pawh a tum lo a, a farnu leh i pasal pa khan min zui a" keimah zawk min rawn an khum ang maia aw rawl nelawmloh chuan a han ti leh sak sak a, Chawlhhmunah daih ka bungrua zuk lak an ngai a, JH-an a zui miahlo chu huatthlala awm ka ti ve takzet.






"Nu la pakhat a awm ve em an inah khan?"





"Ka hrelo, nula chu pahnih an awm, enga tan nge i tih?" dawhtheihloh hmel zeta a lo tih leh chuan "Ka zawt mai mai che" ka lo ti vat a, chumi hnuah a ang zui hluk hluk a, amah zawk chu a infuihpawrh a ni ber e, "An ni angin kan hausa lo mahse, naute pakhat nanana hi chu tlin takin kan enkawl ve thei, i Ni ka awm a lawm engmah nghei i nei lo ang, i rilru te kha i lo ti na hlek ange, a reng rengah i nu bula awm reng lo khan rawn haw zawk teh, khatah khan inlo inti zuau reu reu ange" a ti leh bawrh bawrh a, ka ni biak hi chu a sawi duh a sawi a, ka ṭawng ve ngaichang lek lo hian a ri buan buan mai ṭhin a, kei min ṭan em vanga a thinrimna chu lo ngaihmawh theih lah a ni heklo.







Kan ni nen kan inbiak zawh hnu chuan roomah lutin khumah ka va mu zal a, ka
nu lo lutin thil awmzia min lo zawt a ṭha takin ka hrilha, ngaihtuahna a tawi tup e tihloh ah chuan tun hma anga rilru na tak ang khan ka awmlo a, ka ṭap miahlo bawk.







Alawmi nen kan inbe renga kan inṭhen chu pawi a ti ngang maia, "JH-an a lo bia che em, nangman bia la in pahniha in inbiak phawt angai ania, inbe miahlo a hetia inṭhen ringawt chu nakinah in inchhir ka hlau emai, vawi khat na reng reng chu va be hram teh, keimah vangin i puin a hrechhuak a in inṭhen phah nghal rum rum si a, ka awm a nuam theilo, mut pawh ka muhil theilo, JH-a chu be ngei ngei rawh aw" tiin min rawn chah mawlh mawlh a.







Keilah chuan biak ka tum loh thu ka lo hrilh tawl a "Thil engkim anih tur ang a ni zo tawh, heti hian kan ṭha tlang zawk" ka tih chuan kan ngaihdan a inpersan ngang mai bawk.







"Ṭhiannu mipa hi chu hmeichhia ang an ni ve lo, nangchuan i damchhungin i tuar dawn, nang chauh niloin i fa pawn a tuar ang mahse, JH-a chuan tun aṭangin hmeichhe dang a hawi der a nia, i buaina ang khan ani chu a ti buai ve dawn lo, nangmah zawk kha tlawm hreh tlat lo la, a hmangaih ṭhin zia che ka ngaihtuah let pawhin a lo hnar lui tlat chein ka ringlo, in pahnih inkar a ṭhat phawt chuan i pi leh pu te chu an rilru a dam leh mai dawna, nangmah i pawimawh ber" ka ṭhiannu chuan a ti sap sap a. 'Aw' leh 'Aih' ka pawhlo a, ka rilru ka siam nghet sauh sauh thung.







"Ih maw, Alawm....ngaihzawng duh deuh mai ka nei ṭhin tih ka hrilh che kha, ani khan min duh tak tak loa min lo kawp tih ka hriat hnu pawh khan ṭhen mai kha harsa ka la ti a, ka laka ṭawngkam nem a hman hlek tawh chuan ka rilru a nem leh mai ṭhin, a mak a sin! Ka tan a ṭhalo a, hma hun hlimawm tak neidun tura ka inbeisei ngailo chungpawh khan kalsan ka hreh tlata ka ṭhen phallo a ni, a chhan chu khawhar ka hlau a, a tello a awm kha ka ngaihtuah ngam lo a, a tello a hlim zo lo turah ka inngaia, khawhar em em turin ka inngai ṭhin.






Mahse, tunah chuan chutiang chu ka ni tawhlo, JH-a hi ka hmangaih em em a kalsan hi ka duh hrim hrim bik pawh a nilo, mahse, hetiang dinhmuna ka din tawh hnu ah hi chuan maw, keimah hi ka inhmangaih tawh zawk a nia nge, a hlimna a pawimawh ang tho in ka hlimna a pawimawh ve bawk a, ani chu a ngaihtuah awmlo tih nang pawhin i hriat kha, tunah pawh nula dang a nei der tawh tih min hrilh a nilawmni?" ti a ka zawhna chuan a ti bangbo hle a niang a ngawi veng veng a, engmah chulam hawi chuan awka a chhuah zui ta biklo.







Kar khat zet a liam leh hnu ah Apuiin min lo bia a "Ka u leh Judy te an accident a" tih thu min lo hrilh a, min ti hamhaihin min ṭhawng hle bawk. An dinhmun zawtin pangngai tak anga lantumin ka insuma, hmai chhanah inhmu ni ngat ila chuan ka pangngailoh zia chu a hrethei ngei ang.







Lo ngaihven turin Alawmi ka tir leh ngawt a, damdawiinah pawh kalin a lo va kan nghe nghe mahse, JH-a leh Judy awmdun mawlh chu hahipin a lo sawi a "Keipawh min zahpah tawhlo reng reng in inṭhen ta bawka an ti aniang, an induat dun hliau hliau khawp mai" a rawn ti hlak hlak a, sawi zui tur a vang duh ngang mai.







Ka puin "Lo haw rawh, khata i awm reng chuan i pi ngaih a ṭha theilo, natukah emaw lo haw tum rawh" tiin min rawn chah leh thut a, ka niin ṭawngkam a lo nei deuh a nih ka ring, ka nu hnena ka awm chu a lawmlo hle bawk si a, a tir pawn amah hrilh ve miahlo a kal ka ni nghe nghe, hrilh ngat ila chuan min phalsaklo chiang khawp ang chu.







"He lamah nau ka nei law law ang" tiin ka hnial zet a mahse, "Chhungkua a thil sawi ho ngai a awm, lo haw phawt mai rawh" a ti leh tlat a, a zan zanin Sumo ticket kan la a, a tuk ka chanloh vangin a tukleh Inrinni a tan ticket chu ka la a, ka nau chuan thla sarihna a pum ve tawh bawk nen ka pum a rit tawhin chet vel pawh ka harsat tawh viau a; thui tak motor han chuan chu ka huphurh ru ngang mai.







Zirtawpni chhun ka muhil chu ka nuin min lo kaitho a, "Lo thochhuak rawh tu emaw a lo kal a nia" ka nu chuan a rawn ti sar sar a, "Tunge a?" bangbo taka ka lo tih chuan "Sitting room ah" ti a min chhangin a chhuak leh mai a, Alawmi anih ka ring ringawta, min la rawn tlawh tur thu a sawi tak a lawm, "Thla 2 lai a la awm asin le" ti rilru chungin khum chu ka thawhsan ve nghal thuai a, phang zeta ka tho chhuak chu kan sitting room a ka mi hmuh vang chuan ka hamhaih let der a ni!







Ṭawng nachang hreloin ka lo en reng a, chutah a ṭhutna aṭanga lo tho chhuakin ka dul puar lian tawh tak chu a rawn melh fuh chat bawk a, rinloh lutuka a lo lang thut chuan min ṭhawn em em laiin ani erawh hahdam huai hmel a pu thung.







Inngaihtuah harh vatin a lampan chuan ka kala "Enge helai laiah te i rawn tih a?" tih pahin a ep chiaha ṭhutthlengah chuan ka ṭhu a, a hmel landan chu a khawngaih thlakawm reuh khawp mai, a mitkhur a tla dawk a, a cherin a biang hmul a chhah hle bawka, JH.Lalhruaitluanga ka hriat ṭhin dan anglo takin a bawrchhawr hle, hre ṭhanglo tan chuan pa zaidam leh invawngfel tak ṭhin kha a ni ang tih rinthiam a har lammah a ni.







"Hna thil vangin Thingkah ka lo kal a, ka rawn tlawh kawi che" hmelpha deuh daia min en chungin a ti a, ka lo melh sa la viau laichuan tawite hian min rawn nuih a, awihawm loh zawk hial a ni! Nam chhuah rawk rawk tak mai ka nap a, ka naupai ritin duh duhin han che mar thei ila chuan ka ti tak tak duh hialin ania ka rin ni.







"Tinge min rawn tlawh duh a, i hmel kan hmu chak viau lo a sin" hawisan hmak pah a ka tih chuan a ngawi ran a, minute sawm dawn chu chutiang chuan kan ngawidun awm e, ka va en leh chuan a mitmeng thim lam lek lek nen chuan kan inmelhfuh chiang hle a, mak tak a ni, min ti zam nge ka hrelo ka mur sung sung thei mai! A mitah chuan na tuar hmel ka hmu a, min thlakhlelh hmel em em bawk, nge ni a kei hian ka ngaihbel a ka beisei ang thil amah ah chuan hmuh ka tum zawk tih pawh ka hrelo.







Ngaihruatna mai mai tiin ka inhrilh ru a, a hmel chu ka enrei duh lo, hmaichhana han inhmuh takah chuan keimah a hmangaihna meisi la awm kha a rawn zap alh leh a ni ber, chu chu kan pahnih inkar atana ka duhloh ber thil a ni.






"I dam ṭha em?" zawi sup a a rawn tih chuan chhanglo in ka lo melh tur khaia, chutih laimekin thingpui no chawiin ka nu a lo lut ve mek bawk, ka muthilh laikhan a lo ṭhu reng tawh zawk anih ka ringa, ka nu nen chuan an lo titi luam tawh anih hmel.







"Kawng a chhe viau lo maw, tunlai chu veivah pawh a ninawm khawp mai" ka nu in a tih chuan "Chhe em em lo ,a khu deuh tihloh ah chuan" zangkhai vah hian a lo ti a, chutia pangngai em em a ka nu nen an han inbia chu ka ngaitheilo kher mai.







"Tinge i lo luh tir a, a hmel hmuh leh hi ka duh tawhlo a sin" ka lung a rawn chhe thar a, ka aw chu a lawi lek lek bawk.






"A....chuti tur a mi?" mitmeia min khap pahin ka nu chuan a ti a, tinge JH-a hi a ṭan tlat ka hrethiamlo, min natpui em em ka beisei laiin huatna rilru engmah pu velo ang maia a awm chu awih harsa ka ti, ka ni kha chu ni sela tun ang hunah hi chuan a ter leh at tawh zawk ang chu. A vawikhatna atan ka ni khan minlo hmangaih zawk em mawni le ka ti rilru hial a ni.







"Hepa hi i makpa a ni tawhlo a nia, zah taka i biak kher a ngai tawhlo" ka ti tawla, bangbo zeta ka nuin min enlai chuan tho chhuakin kan inlengpa lam hawi chuan ka ding ren rawna, "Haw rawh, vawikhatmah ka hmuh phakah lo inlan leh tawh suh" ti hlukin pindan lam ka pan san a, pindan kawngkhar ka khar fel rualin am zetin thawk ka la zui kawka, lungphu a rang ṭha duh kher mai.







Khumah chuan thlanglam tukverh hawizawng chuan ka ṭhu ngawiran a, sitting room a phun sap sap thawm chu ngaihven loh tum viau pawhin rilru a luah hneh ngang mai thung. Reilo teah ke pen ri a rawn awma, ka pindan chu a lo pan mek tih ka hre thei bawk.






Lukham chunga ka shawl dah chu la kangin ka in sin hlun a, pen thawm chuan pindan a lo lut fel der tawh tih chu Boruak rit nghal churh a ṭang chuan ka hre thei, hawi duh loin huan thlanglam chu ka thlir vang vanga, tunah hian khum tlangah lo ṭhuin min en mek a ni.







"Engtin nge ka hmuh ah ila rawn i lan ngam zawk le, min lo van ngainep em em ve, ka lakah hian enge duh i la neih a?" a mah pawh en lo chuan ka lo ti a, a ngawireng ringawt a, insawifiahna tur takngial pawh a neilo anih hmel e, a pawilo; insawifiahin awmzia a nei tawh reng reng hleinem mawle.







"Naktukah haw i tum tih ka lo hria a, vawin ah ka rualin haw ta che" a sawi rual chuan za lo zetin ka lo nui hak a, a sawi pawh a sawi ngam zawk mange.







"A teuhlo lutuk emai" ka ti hlak a, "Sumo a chuan aichuan a nuam zawk ang, i nau a lian tawh bawk si a, indim i ngai a nia" a tih leh chuan awihlo fein ka melh a, min ngaihtuah ve tak tak te pawh a ang dawn dawn a lawm.






"Insiam la tlai nemah kan chhuak dawn nia" damdupin a ti leh a, hrep taka! Min runluih zawk em mawni.






"Vawinah haw ka tum reng renglo, naktukah ka haw ang, kan in aṭang hian kalchhuak vat zawk mai teh" chang felfawla ka tih leh chuan hmel danglam pu eihloin min en a, a che zui duh miahlo chu engtia han tih zui tur nge ka hre thiam tawh hrep lo.






"Min la thamlo tluang zel a ni maw?" ka ti hap a, chutah rawn che hrutin a dul chu a rawn dawma, min ti phu nasa em em mai lehnghal!






A nui suk hmel chu ngaitheilo zetin ka en tlawk tlawk ringawt. "Pa ka ni teuh tawh hle mai" a ti chu ka sa zak mai, a kut chu vai thlaksak zawt pahin ka tawlh sawn dawrh a ni ber.






"Ka fa a nilo i ti a ni lawmni, sawi pawh i va sawi ngam zawk ve?" ka aw chu a vin ṭha kher mai. "Ngawiteh nang hi, i rawn tlanna lamah i insawh khawlo te hi a ni lo maw" elsen awka zetin ka ti leh a, a kuta min rawn ban leh a tum chu ka lo vai sawn leh zat bawk.





"Thingkah ah ka kallo, hruai tur chein ka lo kal" a ti leh mauh mai!




"Huhh..Engvangin?"




"Chhungkua inhmuh khawm kan ngai"




"Ha...chhungkua inhmuhkhawm kan ngai a! i theihngilh a mi a, chhungkua kan mi tawh reng reng hleinem" thamlo zeta ka lo tih chuan a mitmeng fiahṭha zet chuan min en ran a, "Nangnen hian engmah kan ni tawhlo" ka ti nawn leh kher bawk.






"Naute chungchang hi kan sawi ho angai" ka dul a rawn melh leh rual chuan ka inkhuh ṭha rang kher mai. "Enge naute chungchang sawiitur awm a?" ka ti bak hlar a, min ti hlau thawng nghal ruai bawk.






"I Bungrua an lak dawn khan i pu nen kan inremsiam vek tawh, naute hi chu ka hnenah a awm ang" Ka rei leh! Hei kher chu ka beiseilo lutuk a ni.






"I fa a ni hleinem, i a zawk a nilo maw, i fa nilo chu engah nge i enkawl ngawt ang?" ka zawhna chhang loin min en leh ran ringawt tawh a, ka thinrim luatah ka ṭap lo chauh thung.






"Ka fa nih theihna chance a awm a lawm, Vasectomy pawh za ah za a chiang biklo a" ti a awki damthluama min chhang te chuan min run hluah hluah a ni.






"I fa a nilo" ka ti chang leh bawl a, min tih dan chuan ka rilru a tina takzet, khatiang khawp khan naute kha a hnawl tawh a, thla 6 zet min hmu duhloin min awmhran tira tun a taka naute a rawn beisei leh chu a huatthlala awm tak zet a ni.





"I bula a awm aichuan kan hnenah awm sela kan enkawl ṭha thei zawk ang"





"Kan i tia law?" a zawhna chu ka hrechiang ngang mai.





"Inhauh buai ka peihlo, insiam la chhuak tlai lutuk lo teh ang" tho chhuak vutin khum bulah chuan a ding run a, ka zawhna a chhanglo chu hrilhhai fein ka lo en ve thung "Lalhruaitluang, naute hi ka pe dawn reng renglo che" chang fel fawl a ka tih leh pawh chuan a kiaisuk duh chauh a ni.






"I pu i sawipui dawn nia" zawi supa tiin pindan aṭang chuan a chhuak zui daih a, ka umzui ve nghalthuai bawk. "Nu, hepa zah loh ziah hi, naute hi min chhuh a tum a nih chu, ka fa ani lo a tih vanga inṭhen kha kan ni zawk sia.....eng...." ka aw chu a zuih ral hle, ka nu hmel ka hmuh rual chuan ka ṭap chhuak hlawp hlawp a, kan piah a min enreng tu ka va melh chuan engamah min ngailo tih hriat tak hian min en reng ringawt a, thinlung leh rilru a nei ve lo anih ka ring rum rum hial tawh.






Lalhruaitluanga aimah chuan ka nu ṭawng miahlo chu mak ka ti zawk, ṭhutthlengah min ṭhuttirin ka ke min siamrem sak a "Chawei khamah law law chhuak ula?" tiin JH-a chu a râwn a, pawm tih hriat taka a lo bu nghat te chuan min ti hamhaih lehzual!






Ka nu kalsawn leh tur chu ka melh zui ṭawk ṭawk a, thil mak tawp khawk a thleng mek a ni, engtin nge kei nilo a he mi tenawmpa lam hi a ṭan theih zawk!






"Engthil nge i tih?" ka aw a hlauhthawnna lang chu a haiin ka ringlo, min en chîk ema ka rilru thleng chuan a rawn hmu tlang vek hialin a nia ka rin ni.






"Naute hmakhua tur kan sawi ho tawh a, ka lak an rem ti vek tawh, kan inṭhenna thu kan tihfel dawna i pu nena kan inremna a ni bawk" dawt sawi hmel a pu silo a, ka nu lahin sawinawi a nei miah bawk silo, an zavaiin min lo phiarru zawk em ni?




"Ka pu chuan a tilo ang"




"Ti e, i hrisel bawk silo a, nangmah chauha naupawm turin a duhlo che a" thinrim ve theilo emaw tih mai tura awki dam chuan a ti leh a, a thilsawi chu awih harsa ka la ti fan, ka pu ngeiin min hrilh anih loh chuan he mihring thu sawi hi chu ka ring theilo ang.






"Ka fa a nia, hei chu ka thu neihna anih hi, nang emaw, ka pu pawh nise inlo inrawlh ve na tur engmah a awmlo" ka ti ram hmak a, ka pu pawn lo sawi eng ang mahse ka tih tir hauhlo ang.






"Nang aiin kan enkawl ṭha thei zawk dawn tih ka sawi tawh kha, naute i hmangaih tak tak anih chuan i remti zawk tur ni ah ka ngai" thawk ka lo la hak a, engtia han enkawl nge maw a lo rilruk ve ni.






"Remremi takngial pawh in enkawl hleitheilo a, engtia enkawl nge i lo tum a, kei aia in enkawl ṭhat theih na chhan tur chu ka hre hauhlo, i hna i bansan te anih ngawt loh chuan a tan hun takngial pawh i neilo ang tih chu chiangsa a ni" chiang fek fawk a ka tih takah chuan a ner sawk a, min hnial ngaihna vak a hre ta lo anih hmel.







Ti fuh inti zeta ka lo en laichuan "Buaina vak a awmlo, nupui ka nei dawn a lawm, Judy in enkawl a inhuama chuvang zawk ania, i pum ah khan kan chhungkaw ro khawmtu tur i pai meka, i luhlul chuahlo loin naute hma i ngai tak tak a nih chuan ka thu zawm tawp zawk rawh, chuti anih loh chuan i fa khan nakinah ala rawn dem let zawk mai thei che a ni" a thil sawi vang chuan ka chawmawlh vek mai in ka hria, naute leh Judy, Aw Lalpa.....ka â thei mai dawn.





Room ah lutin ka inkalh khum hmiah a, naktuk haw ka rilruk pawh chu ka ṭhulh fel der tawh, ka pu ka va bia a "In lo chhuak dawn tawh em?" tiin min lo zawt heu mai a, Lalhruaitluanga lo kal thu a lo hriatpui tak tak chu niin, ka van hrethiamlo tehnuai ve le.







"Pu, naute hi enkawl tir i lo tum em ni a?" lawmlo fe a ka tih chuan a ngawi rauh rauh a, "Lo thleng ve phawt la, chhungkuain kan sawi ṭha leh dawn nia" a lo ti khauh a, anih chuan ka thil hriat zawng zawng kha thudik vek tihna maw.







"Enkawl tir ka remti miahlo ania, sawi nawn leh pawh a ngailo,keiman ka enkawl ve thei ania aw" ka ti vin nghal hlar a, ka thinur em a ka pu bulah pawh ka insum thei meuhlo chu a ni.







"Kan sawi ṭha leh ang ka ti a lawm maw aw...." ka pu in a rawn tih leh chuan inpetruh ṭeuh chungin phone chu ka dah a, ka ṭap chhuak hawk ringawt a, han insum thei zia zâng ka nilo, tu te pawn min phatsan vek tawh a lo nih hi, eng em em nge ka han tihsuala heti tak mai a Pathian hian ka lakah a thinrimna a leihbuak mai le, natna te chu kan tawrh zawh tawk te te in a lo thleng ṭhin an ti a, mahse, he ti em em chu ka tuar zo ngang tawhlo a ni.







Alawmin min lo phone a "Vawinah Bazarah Judy ka hmu a, ka ko dinga kan inbakkaih deuh a, in ka thlen veleh ah ka lo hrilh nghal che a nih hi, ka ngei tak tak a ni, mizingah pawh a zaktheilo a sin aw, min ti zak let hrep a lawm" a rawn ti nghal mawlh mawlh a, ani biak pawh chu lung ti zing zual tu chauh a ni.







"A va zialo ve, mi zingah te chuan khin duh tur a ni hleinem" ka lo ti mai a. "Ka khinglo theilo" alo ti bak hlar a, min ti dang lel mai.







"A ṭawngkam i hre velo anih kha, a ngeiawm a sin aw, JH-a te chuan min ṭhen hlen thei tak tak lo, Lalthanpuii kha a rawn inrawlh ve zawk te a ti che a, mi zing nilo sela chuan ka kek hrep ang, in inneih laia amah vanga inbuaina te kha ka rilru ah a rawn thar a, ka insum theilo teuh a sin aw" a ti leh barh barh a.







"Alawm, JH-a hetah a lo kal a sin" tiin a ṭawng lai chu ka lo pawt chat a "Enga...Ekhai .Enge a lo tih a?" phawk fe a a lo tih chuan thil thleng zo chiah chu ka lo hrilh nghal mawlh mawlh a, ka sawi zawng te chuan ka ṭap ṭeuh reng.







"A va zak theilo ve, ka ngaihdan a dang te hle mai ka ti, haw tura ka lo duh che pawh kha i lo haw ang tih hlauhawm zawk khawp a nih chu, an va han chak dawnlo mai mai e aw" a rawn ti khar khar a, "Eng ang pawhin Judy nen chuan khawsa dunin innei mahse pawi ka tilo, naute hi chu pek ka tumlo hul hual, min chhuhluih an tum anih chuan ka theih tawkin ka bei let ang" ka ti ve sak sak a.







"Lungngai reng reng suh, i lam ka ṭang tlat dawn a lawm, Judy chu a in turah tur pawlha hrai hlum ka va chak ve....." a rawn ti deuh hluai a, "Judy lam aichuan JH-a zawk hi ka tan chuan a huatthlala awm zawk a lawm" keiin ka lo ti thung. Engkim hi JH-a vang vek zawk a ni, naute duh loh vangin min ṭhena, kan inṭhen ta chenga ka naupai chu ka fa a rawn ti leh lawia, hepa hian min ṭhen a duh hrim hrim vangin chhuanlam tlinglo lutuk a siam mai mai a ni.







"Thil awmdan pawh hi ka hrethiam tawhlo....JH-a hian min ṭhen a lo duh sa reng tawh zawk aniang?" ka ti hap a.






"Mate, JH-a hi ka ringhlel tlat a nia, a mak ka ti e, a hnena i awm aṭanga i buaina te hi, ka rindan chuan maw Judy hi nupui ah neih a duh anga, a rai thei silo anga naute neih nan nang hi a hmang che a nih ka ring"






"Enga....?" ka lo ti he haw a, eng ang ngaihdan nge maw ni ngai le.






"Han ngaihtuah chiang teh, engkim plan sa vek a ang lutuk, Judy in i naupai a tih tlak sak che a ni thei bawk a nia, a chhan chu a thik vang che in, JH-a nen hian an lo inthurual fuhlo pawh a ni thei a....ni thei a tam lutuk, hei tunah an pahniha inkawpin naute chhuhsak che an tum hi" Alawmi thilsawi chu ngaihdan ka nei thiam ve chiahlo, JH-a erawh ka rin ang a nilo hle tih chu a chiang a, chutia ruahmanna nei felsa thlapa kei min nei tur ang chuan ngaihtuah pawh ka la ngaihtuah ngailo.






"Chutiang te a ni thei dawn a mi?" zep loh ah chuan zeldin thu mai mai mah nise JH-a nena kan hun hman liam te kha chutiang anga ngaih ringawt pawh chu ka phallo a ni. A tak ang tur phei chuan ngaihtuah pawh ka ngaihtuah thui ngamlo.







"Ngaihtuah chiang rawh, JH-an inneih a hmanhmawh em em zia te kha, in inhriat aṭanga thla reilo teah inneihpuiah a sawm che a, enteh a sawm hun che a hriat dan che kha, i chhungte nen an lo la inhre sa zui a, a farnu bialpa ngaihzawng hlui i ni bawk a. A mak ka ti telh telh, hresa leh tum nei sa ran chunga rawn hnaih che a ang ka ti" Alawmi aw ah chuan hlauhthawnna ka hre thei chu chuan ka thinphu a ti rang hle bawk.





"Anih chuan eng vang berin maw ni ang?" ka aw chu a khur lek lek tawh.






"Ka chiang chiah lo a mahse, tuna naute an rawn dil danah che khan ngaihdan chu ka nei deuh, i naupai i chhiat kha chu Judy anih ka ringa, thikthu vang anih ka ring bawk, in khuma nautihtlakna damdawi lo awm ringawt te kha palzam mai mai chi anih loh laiin i pasal khan a bawhzui ṭha duh derlo a, urlawk zan lah kha kha ti teh tawp khan a palzam leh a, zep loah chuan a ngaihthah mah mah a lawm, pawngsual i tawk emaw tiin a hlauthawng viau turah ka ngai a mahse, a ni miahlo, i naupai chungchangah ringawt anih kha a buai.
Judy nen an inlungrual silo hian a duh ang diak diakin thil a ti theilo anih ka ring" a ti leh sap sap a.







"A chhan tur awm ang pawh chu avan chianglo ve, judy chuan nau a pai theilo anga maw? Chu aia chiang zawk ngaihdan chu i nei thiamlo a mi?" hriat belh duh enge maw ka neih vang chuan ka ti nawn leh a, thil thlir dan ka thiam lo lutuk hi min lo bum char char ṭhin a lo nih pek hi.







"Mate, Judy chuan damdawi a ti ṭhin tih kan hriat kha, damdawi ti ṭhin ho chu naupai thei lo an tam alawm, ka hmelhriatah pawh pathum lai chutiang chu an awm alawm" a lo ti leh a.






"Anih leh Alawm, urlawk zan kha JH-a a awm silo a?" ka lo ti he haw a.






"Umm...mahse, Judy a awm kha, a tirh mai theih turin mipa rual an awm bawka, thla laksak tu che pawh kha judy anih hial ka ring" a ti leh zat a.







"JH-an a hriatpui i ring em?" ka tih chuan "Hriatpui ka ring, a man chhuah chat theih danah che khan, chuti nilo sela in room chahbi pawh a pe tawp nang" a rawn ti leh a.






"Chahbi kha a lo neih i ring ve tho elaw?" ka lo ti hluai a.






"Nei lo sela i kalh chung khan a lo lut thei dawn a mi, JH-an Drawer ah chahbi i dah tih a hrilh anga kan hriatloh laiin a lo han la tihna a ni maia, chuan an duh anga an tih zawh hnuah an dah leh tihna anih dawn kha"







"A rapthlak hle mai" ka lo ti hap a. "Tenawm tak a ni"Alawmin a lo ti ve hlak bawk.






"JH-a hi ka lo zui haw anga, hmai chhanah inhmuin kan sawidun dawn nia aw, tih dan kawng enge maw kan zawn ve ngai a nia, nanglo min puitu tur ka nei miahlo, min pui ang che" ka ti zui mawlh mawlh a.






"Lungngai reng reng suh i ṭhiannu ka nia lawm, harsatna ah chuan kan inpui zel ang, i laka pawi khawihtu te chu ka hmelma ve tho a lawm an nih, an phu tawk hremna kan pe ngei tur a ni" ka ṭhiannu chuan a ti leh hmak hmak a, ka rilru na lutuk chu ka mittui a luang zung zung thung.




"Mate ṭap reng reng suh"




"Naute, hi min chhuhsak ka hlau em a ni" insut hlawp hlawp chungin ka ti a, "An chhuhsak lullo ang che, theihtawpin kan beilet anga an phu tawk hremna kan pe bawk ang, chhel deuhin awm rawh, rawn thleng phei vat la a ṭha a ni mai, JH.Lalhruaitluanga kha i hre chhuak a ni tih in hriattir miah suh" a rawn ti leh chula, ka rilru ana zual ting thung.






"Awle, ka lo thlen veleh ah inhmuh kan tum dawn nia" tiin kan inbiakna chu kan ti tawp a, phone ka dah chiah chu ka â riai maiin ka hria, ka awm chu dawmin ka thinphu rang dup dup chu ka ngaithla a, rilru nat luat vangin ka awm chhung chu a thip vawng vawng mai bawk.







Engtin nge kha leh chen kha min lo bum theih le, ka rin em em laiin, amah chauh kha ka neih chhun kawng engkima ka rin em em a ni a sin, ka hmangaih em em in min phatsana ka hriat miahlo laiin min lo bum reng tih hriat chu taksa leh thlarau thlengin ka chau chhe der mai.






Ring satliah mai pawh niloin ani phei kha chu midang zawng zawng aipawha ka rin zawk a ni a, ka neih chhun liau liau ti a ka sawi ṭhin a ni, hetiang rilru hi engtin nge ka lakah a put theih, engtik aṭangin nge ka lakah hian rilru chhia a lo put le?






Ṭap tur pawhin chakna ka nei tawhlo, ka nun hi an sawp chau zo takzet zet a ni.






Amah nena kan hun hman liam te ka ngaihtuah let a, ka van han ui vawng vawng tehlul em, ka tan a hlut zia te kha a ngaihtuah phaklo em ni le, hetiang nilo hian hlim tak leh inhmangaih tak kan ni thei a, tunah lem eng hun nge kan tawn tak hi.






A duhthlan a ni miau si a, hetianga ka lakah a che duh tlat anih si chuan keipawn ka enliam bik lo ang, aman thungrul lo theilo in min siam miau a, ka nat a ngai anih pawhin hei bak chuan ka na leh thei tawh chuanglo ang, min ti na em a, na leh chuang tur pawh ka awm tawhlo.






Ka mittui hru hulin ka in ti paukhauh a, 'Midangin i nun hi in fiamnan an hman i phal tur a nilo, rilru fim tak nen i laka suahsual rawngbawltu chu hmachhawn tum rawh' tiin ka infuih bawk.






Pindan kawngkhar ka hawn rualin JH-a hmel ka hmu a, ngawi rengin ka phone hmang lai kha min lo ngaithla anih hmel.






"I lo hria em, Alawmi!" ka tih rualin a lu a bu nghat a, ani chuan a lo hre sa diam tawh, kahpathir a siam ka ni em ni, ti nge maw min den dawt dawt hlawm mai le!







"Kan haw vat angai" a rawn tih rualin a awmah ka lo beithlawp a, anin nghet zetin min kuah bawk, ka vai riai a, mu leh mal ka neilo engkim chu an fiahlo zo a, ka pil riai riai maiin ka hria.







Youtube link - https://youtube.com/channel/UCgrfLHcNoil3P1eCUhFLPqA

(Youtube ah Ahmangaihi violette khiangte channel kha lo subscribe ve ru aw, thawnthu thar te ka rawn nei dawn ania, tin ka chawlh huna min lo ngai tur ho khan ka fb group kha lo join bawk ula, Ads kha min lo click sak leh hram hram bawk dawn nia)



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 28th, 2021, 12:12 pm

GOMENASAI - by Ahmangaihi violette khiangte



CHAPTER - 43

IMG_20210323_224415.jpg


Hmeichhe rapthlak tak a ni! Ka ṭhian neihchhun ka rin em em a ni a, engtin nge hetianga ka rilru a tihnat theih? Nilo....ka nun zawng zawng tih chhiat a duh a ni!






Ka mutna khum tlangah chuan rawn ṭhuin ka kut a hum chawt renga, chutih laichuan ka nu lo lutin an inbe dun sar sar a, ka nu chuan ka thawmhnaw bag a siam nghal mawlh mawlh bawka, min biak pawh chuan ka um e peih meuhlo.






Sangsangi school bang lo haw chu "I u eitur Rasgula leh Energy drink va lei sak lawk rawh" tiin a tir zui a, JH-an a wallet phawrhin a zui chhuaka, engthil thil emaw an inchah ri te chu ka hre pha tho nain ka ngaihtuahna chu hmun dang daih ah a awm vangin ka chehvel boruak ah chuan ka cheng hleitheilo. Rilru a vak kual nasa lutuka ka tawt up up a ni ber.






Pindana JH-a a lo let leh laichuan inbengkangin ka lo ṭhu chhuak ve a, ka bula a lo ṭhut rual chuan ṭah hmuam ṭeuh chungin ka lo en bawk. "Tunah chuan ngaihtuah vak rih suh, kan haw hunah chhungkua inrawn in tihdan kan ngaihtuah dawn nia" ka kut rawn humin a hmer zui vang vanga, engtin nge maw ka han ngaihtuah loh theih tehlul ang, min ṭhawng lutuka ka thinphu thlengin a la mumal theilo, amah thleng thleng chuan ania ka huat ni.







"I hrereng a, engtin nge engmah i sawiloh theih a, i thiltih dan te hi enge a awm zia?" ka kut a chelh mek chu pawhsawn vat pah chuan ka ti a, ka nu a lo lut leh a "Thil awmzia kha han sawi chiang tak tak teh, engtin maw Matei ṭhiannu chu?" a lo ti ve nghal chul a.





"Amah a ni tih engtin nge i hriat?" tiin min lo zawt let khauh a.





"A ṭawng danah khan ka hria, khami ni khan damdawi kha khumah an chhar tih kha a hria a, a hnenah chutiang lam engmah ka sawi silo a, Drawer ah chahbi ka dah tih te a lo hre vek a, a dang pawh a tam....." ka mittui luang chu lehlam hawiin ka hru leh rih a, ka rilru a na ema ṭaplo tur pawhin ka inthunun hleitheilo.






Damdawi an chhar tih zawng a hnenah ka hrilh a, keipawn khawiah nge an chhar ka hre biklo mahse, a hnuah ka khuma an chhar thu chu ka hre leh tho a, chu erawh Alawmi hnenah ka sawi hauhlo, khatia a rawn sawi mai si kha mak ka ti deuh viau a, dilchhut takin thil ka zawt zui a, mak ka tih tur tak thil a rawn sawichhuak leh ta reng a nih kha.






Kan room chahbi lah kha! Kawngkhar kha pawh zawnga inkalh thei mai chi a ni a, a hawnnan chah bi angai thung, Drawer a chahbi kha midangin an hriat ka rin hauhloh laiin Alawmi khan a lo hre leh zel a, khata ṭang khan amah a nih ka ring nghet hmiah tawh. Kan inbiak laia a ṭawng dan te reng kha, thinrim sosang lutuk ang maiin a ri buan buan mai a, insum karna nei leklo a a ṭawnglai khan ṭawng a chheh sual tih reng a in hrelo.






"Khami zana Princess-i nen in inbakkaih chhan kha i la hria em?" ti a min rawn zawh chuan ka lo en vat a, "Aw, kha chu Lalrinhlua vang a nia" ka lo ti a. "Reny ka biak aṭangin a nia i ṭhiannu hi a inrawlh tih ka hriat, kha mi zan khan Reny hnenah Rinhlua kha i bialpa hlui a nih thu leh pawnah in inzui chhuak a hmuh thu lo hrilh tu kha Alawmi a nia" a ti chu ka hamhaih lehzual, Alawmi a ni tih hre vek tawh mahila ka laka a chet dan chuan min la ṭhawng em em reng tho a ni.






Ka bulah lo kalin kei min ṭan leh ka thlavang hauh ang takin a rawn awmzui kha a ni a, engvangin nge hetiang thil hi ka chungah a tih le, hetiang taka ka laka a chet duh na tur khawp hian a lakah enge tihsual ka lo neih? Chu zawhna chhanna chu ka hma a ṭhu hi a nih ngei ka ring e.






Mahse, a tir aṭang rengin engmah lung nihlohna a nei silo a, min lawmpuiin min phur pui em em reng zawk a nih kha, ka van hrethiamlo em, khang hun chhung zawng te khan a rukin ka lakah a lo lungawilo hle tihna a ni ngei ang, a tir khan a sawi ve mai theilo em mawni, "Ka thik lo, ka duhpui che" tiin nei turin min nawr zawk kha a ni a, khatianga ka bula a sawi te pawh kha dawt vek maw.






"Nangmah a duh vang chein hetiang hi a ti anih hi" ka aw chu a zawi ṭha kher mai. kan hun paltlang tawh zawng zawng te, naute ka chhiat ṭum te, chhungkua a buaina kan neih chang te, a chet dan kha a lansarh tehlul nen engtin nge chhete tak tak pawh a rinhlelhna ka lo neih miahloh theih le, a rukin hnung lamah min lo nuih ru reng ṭhin dawn alo nih hi.






"Enteh, tunah chuan ngaihtuah rih suh, zawhna i ngah ang tih pawh ka hria mahse, i duh ang thal chhanna chu a hun takah ka pe vek ang che, inti hahdam la zanriah eikhamah kan chhuak dawn nia" ngunthluk zeta min en chunga a tih lai chuan ka nu a lo inrawlh ve vat a, "Inbe fal lawk teh ang, ka lo zui ve thei dawn silo che u a" tiin JH-a a ko hranga, zawh duh leh hriat duh tam tak nei mahila zawh ber tur pawh ka hrelo, zawhna hlir ka rilru ah chuan a in hawr khawm a ni ber a chutih laiin ka hriat tawh chhun tlem te chauh pawh hian min ti chau chhe der mai bawk si.






Engmah ka eitheih loh vangin ka nu chuan Tiffin min siamsak a, "I pasal zai ngai la, nangmahin ro hran rel tum suh aw, ruahmanna fel tak anei sa tawh a, a thu angin awm tawp mai rawh, i tana ṭhalo tur engmah a ngaihtuah lo a nia" tiin ka nu chuan kan kal tur chu min hrilh mawlh mawlh a, ka thawmhnaw Bag khaia JH-a lo chhuak chu enin ka ding ngawi reng thung.






Motor bul thleng ka nu chuan min lo thlah a, JH-an ka ṭhutna tur a siam rem mawlh mawlh chu Motor bulah chuan dingin kan lo nghak a "In ti chakla i rilru tina duh miah suh, engmah chân i neilo a nia, khatianga derdep taka i awm chuan i ṭhiannu khan tihnat che a tumna ah a hlawhtling hle tihna a ni mai, phuba i lak theihdan ṭha ber chu a thiltum engmahin i nun a khawih danglam lo tih i lantir kha a nia" ka nu chuan a ti leh sap sap a.






Ka ṭhutna tur seat a tih awn sa ah chuan ṭhu lutin ka nu chu ka mangṭha a, kan tlanliam thleng chuan ban min vaia, ruahman lawk leh beisei anga thil a kal ta lo chu enge ka tih ber tur pawh ka hrethiam ta lo, ka haw anga engthil in nge min lo hmuak leh ang tih chuan rilru a luah rauh rauh a, engtih mah phurna ka nei heklo.






"I ṭhu nuamlo em, seat hnungah sawn lukham dang ka dah a nia" JH-an a lo tih chuan ka lu ka thing mai a. Chutih laia ka kut rawn vawn a tum chu ka lo la sawn vat bawk, a hamhaih deuh aniang min en ren rawn a, tukverh lam hawiin pawnlam chu ka thlirsan a, kan inkar boruak chuan motor chhung boruak chu a ti rit churh mai in ka hria, thawk a ti harsa lam mah a ni.







"Zawhna i neih chuan min zawt thei a nia?" a rawn tih leh takah chuan ka seat chu nghengin ka ṭhu ṭha leh a, enge ka zawh duh ber pawh ka hrelo, a lakah chuan ka lawmlo hle tih chauh ka hria.






"Thil i zep hnem hle mai, enge i rilru chu ka hre lo a mahse, ka laka i awndan ah hi chuan engmah lungawina tur ka neilo, khang zawng zawng hre chung khan ral aṭangin min lo thlir a...." sawi zo theilo in thawk ka la leh rih a, pawn lam chu ka hawi leh vang vang a, ka lung a chhe thar leh dawn dawn mai.







"Ka tih palh, khatianga ka tih kha a ngai tlat a, hrehawm ka ti lo biklo a sin" ka kut a rawn hum chawt a, a lam chu ka hawi duhlo, ka mittui hnam chu a tlak mai loh nan ka inpetruh ṭeuh bawk.






"Enga tinge khatianga i tih kher kha a ngaih ang, a tir aṭang khan tlang takin min hrilh ni zawk la, hetiang em em hian ka rilru a na lo zawk ang" ti a ka kut lak sawn mai ka tum chu a hum nghet sauh a, lawmlo zeta a lam ka hawi takah chuan ka inen chiang hle bawk.






"I ṭhiannu hi nangmah ngeiin man chhuakla ka duh vang a nia, in inkar engkim ka hria a lawm, i rin zia te pawh, khatianga ka tih vang khan nangpawn i hre ta chauh zawk a nih hi"





"Min hrilh mai thei lo em ni?" ka lo ti vin hlar a.





"Hrilh ta che i la min awih a ngem? I ṭhianu hian mi tu emaw ruaiin a blackmail che a, nau i chhiat theih nan damdawi a pe che a ti ta ila i awih a ngem, nang chuan Judy emaw midang an nih i ring zawk a ni lawm ni?" Motor ti ding zuiin thu tak zet hian min zawt a. "I thu sawi ka ringlo ngai tawh che em ni?" keiin ka lo ti ve thung.






Alawmi a nih thu min hrilh sela chuan ka ring hauhlo ang tih chu keimah zawk chuan ka hre chiang em em lawi a, khang hun chhung zawng khan ka bulah a awm a, harsatna ka tawh lai pawha min hnem tu a ni bawk, puh ngawt sela ka awihlo kher ang chu. Mahse, ka bula mi lakah chuan ka lungawilo em a a thilsawi a piang chu ka lawmlo vel vek a ni, min ngaihsaklohna te min thlahthlamna te khan ka thinlungah ser lian tak min siam tawh a, tunah min bumtu min hrilh vang ngawtin a laka ka rilru natna kha a dam thei chuanglo.






"I tan vek a nia hetiang thil hi ka tih, i rilru natna kha i ṭhiannu hnenah i thlen ṭhin a, i laka ka awmdan zawng zawng te kha i hrilh dawn tih ka hriat vangin i lakah ka zep anih kha" a tih chuan hrethiamlo zetin ka en a.






"Judy nen inkawp anga kan lan lai khan i ṭhiannu khan i hnenah enge a sawi?" ti in min zawt leh a.






"Be tur che leh i bula haw turin min ti" ka lo ti zawi sep a. "Ni chiah e, kha kha kan tum anih kha, khata ṭang khan a tal buai tawh ru hle tawh zawk a, i pu in thil awmzia min zawta min lo biak khan engkim kan lo hrilh a, bungrua lo la tur pawh khan keiman ka ti a, i ṭhiannu awm ngaihna hrelo khan Judy a lo vau nghe nghe bawk, khatah khan i lo man thiam ka rin tehlul nen nanglah i ngawi reng a" a thil min hrilhfiah chu ka hrethiamlo telh telh zawk, Alawmi awmdanah khan engtin nge ka lo man theih ang, engmah rinhlelh tur a awm ka hrelo.






"Ka tana ṭha tur a ngaihtuah vang leh pa tello a nau ka pawm tur min ngaihtuah em vangah ka ngai a lawm" ka tih chuan nuih za lek lek hmel a pu.






"I ṭang hma hai tak tak ni sela chuan khatiang tawh hnu ah khan ka hnena lo let turin a ti lo ang che, kei min rawn bia in thil awmzia min rawn zawt lo a, lo haw turin a duh em em ringawt che anih kha, a chhan chu kei leh Judy inkawp kha a duhloh vang leh nang chu duh hun hunah awlsam taka a dah bo mai theih ah a ngaih vang chein lo haw turin a duh che a, a tum loh dan anga thil a kal khan a ti chi ai zo ta vek anih kha.






Tichuan a rawn be fo che a, kha kha ka rawn biak miahloh chhan che chu a ni. I tawrh nasat poh leh ani kha a buai zual ve tlat a" ka hre thiam em tih hriat tum tak hian zawhna mitmengin min en a.






"Naute chungchang i rawn sawi chhan kha a ni maw, Alawmi ka hrilh leh tur a tan i ti a" ka tih chuan a bu nghat nghat a, a thil sawi awmzia chu ka hrethiam riai ruai a mahse, ka tan chuan han lawm viau tur a awm chuan ka hrelo, min hrilh tlang mai kha awlsam ka la ti zawk fan.






"Engvangin nge nangmah kher in man chhuak tura ka duh che i hria em?" a zawhna chu chhangloin ka en reng ringawt. "A chhan chu he thil hi nangmah chiahin i chingfel thei a ni" a aw chu a ringlo mahse, a chiang hle thung.






"Engtin nge ka tih ang?" ka zawhna chu "In kan thlen hunah kan sawi dawn nia" ti a min chhangin Motor a ti nung a, ka ngaihtuah zui pawhin engtia han tih zui tur nge chu ka bangbo lutuk tlat. Ka tiril khur dar dar chu ka rilru nat vang nge ka hlauhna vang ka hrelo. JH-a hmel chu ka en leh rih ṭhina, ka lung a che zual ting mai.






Ka pum rawn nghawr dat dat chu dawmin ka ṭhu ngawiran a, ka rilru ah thil dang daih a lo lut bawk, hemi chungchang hi a la sawifiah reng reng hleinem mawle.






"Thlalaka mipa kha i hrechhuak ta em?" ka ti hluai a, min en rang khawp mai. "Ngaihtuah duh suh, ani kha chu pawisa hlawh tura tirh mai mai anih kha" a lo ti maia, chu chu ka hriat duh tak a nilo. "I zawt chiang lo em ni?" ka ti nawn leh ngat a.






"Zawt chiang e, a sawiduh hma chu kan sawisa a i ṭhiannu hming hi a lam ta a lawm" ner sawkin hmalam a melh ran a, lawmlo lutuk hmel a pu bawk. "Anih engthil nge thleng a?" ka ti ban charh a, ka naupai lai hi a fa alo nih loh hram ka beisei.






Ka thil zawh chu a hrethiam ta a niang ka dul a rawn melh vat a "Engkim a ṭha vek, naute kha ka fa a ni" min nuihsuk a, kei ka bangbo hle thung.






"Mahse, Vasectomy i ti sia?" ka ti hap a, a nui hmel chuan min ti bangbo lehzual.






"Vasectomy kha a lo Reverse daih a" hlim tih hriat fe hian a ti a, lawm tur nge lawmloh tur pawh ka hre tawh nek lo. "Zingah khan Clinic ah ka kal nghal a lawm, a lo inphelh tih minlo hrilh a" ka kut a rawn hum a, kei chu ka â riai maiin ka hria.






"Tunah chuan ka hlim ve thei ta anih chu" beidawng zeta ka tih laichuan ka kut a rawn hum nghet salh a. "Naute nen hian ṭha takin ka enkawl ang che u, tu mahin buaina an siam tawhlo ang che, thlamuang deuhin awm tawh rawh" a ti sap sap a.






"Tumah in buaina min siam tawhlo ang" ka hriat tawk lek chuan ka lo ti ve a.





"Muthilh tum rawh i chau lutuk ang, kan thlen hunah ka hrilh dawn che nia" a tih chuan ka seat chu nghengin ka ṭhu rem sat sat a, kawngtluanin ka muhil thei lo, ngaihtuahna ka kawm zui melh melh, ka mittui a lo luang leh ṭhin.






Ka pu chuan engkim a lo hre lawk vek tawh a, JH-a chhungte zawng zawng pawh an bang biklo. Kan thlen tukah Aizawl aṭangin an lo kal a, an mi lainatna thu leh min duatna awka te chu ka tan chuan lungchhiat ti zual tu chauh a ni.






An remruatna te an sawi laichuan ngawirengin ka ngaithla a, an thurawn te chu 'aw' leh 'aih' pawh lo mahila ka tihtur erawh ka hrechiang ngang mai, ka chunga a thil tih hi ka rul anga ka hlim phah emaw hlim phahlo emaw amah vanga ka tawrhna zozai hi haiderin ka uipui tuilian thlir tawp bik lo ang. Ka intipaukhauh lui a keimah a huatna leh chakna tlem ka la neih te chu rulh let nan a tawk zo lo anih pawhin a tih makmawh a ni.






Alawmi chu ka bia a, ka haw tawh thu ka hrilh chuan a lo phur hmel ngang mai "Lunglengah ka lo kal dawn nge Aizawlah kan inhmu dawn?" a lo ti var a, "Ka lo kal ang in inah ka lo thleng anga, tih dan tur kan sawi dun dawnnia" ka lo ti ve vat a, phur hmel taka aṭawng siam siam reng te chuan luak a ti chhuak hlui a ni ber e.






Aizawl ka thlen chuan Alawmi te in pan hmasa loin Khatla ah Planning department lam ka pan nal nal a, ka thleng hma deuh nge ni ka mi hmuh duh tak chu a lo la thleng lo a, pawnah ṭhuin darkar chanve dawn chu ka nghak awm e.






A lo thlen chuan min hmu chu a hamhaih deuh a "Enge i lo tih a, Office i rawn dawr em ni?" tiin nui hmel pu sang hian min zawt a, "Nangmah ka lo nghak che a, i lo thleng har lutuka ka lo haw leh hman ṭep a lawm" ka tih chuan a bangbo leh zual.







Indin chilhin kan ti ti dun mawlh mawlh a, a thil min hrilh chu ka beisei loh lam daih thil a ni a, ka zawt chu ani pawn mak min ti zawk viau nghe nghe. "I hre daih tawh turah ka lo ngai a, i pasal neih lai bawr vel kha a ni sia" a ti niah niah a, "Engmah min hrilh lo a, inneih boruak vel vangin a sawi hreh a niang" ti a nui chungin ṭha tak chuan ka chhang a.







Alawmi leh Rinmawia chu JH-a nen kan in neih dawn bawr vela an inṭhen kha an lo inkawp ṭha leh reng reng tawh lo alo ni, ka bulah dawt a sawi chiang hle a, urlawk zan kan hman ho ṭum te pawh khan an intithiamlo angin ka bulah khan a sawi a, keilah khan chuti na na na chu hmanpui tur a neilo tiin riak ah ka lo sawm anih kha.







Judy vanga inneih zana kan buai te chu ka ngaihtuah let zel a, Alawmi khan ka buaina kha JH-a hnena sawiturin min ti a, khata ṭang khan ka chhungte nen kan inkar a fello chho ta bawk a. Khatiang thil kha a thlen a beisei sa angem le tih chu zawhna lian tak a ni. JH-a mizia a hrechiang hle a, khatiang khan a che zui buan buan dawn tih kha a hre lawk sa vek a ngem?







Zawhna hrang hrang hi ka thluakah hian an lam mup mup ni berin ka hria, chhanna ka dawn chhun te pawh zawhna tho an ni.






Alawmi te in ka thlen chuan insiam peihsa atin min lo nghak tawh a, hlim hmel taka min lo nuih var var chu nuihlet ve a harsa ka ti kher mai, "Insum hram hram rawh" tiin ka infuih ru sauh sauh reng mahse, a harsa a ni, tunah tak hian insumkarna nei lo lek a chet mai tak ka nap.






"Thingpui te in phawt ila, hmanhmawh lo ang, inrinni ah chuan a chhuak ngailo in ka hria" a lo ti a, 'JH mizia leh khawsak phung hi chu kei aimahin i lo hrechiang zawk anih hi' ka ti rilru neuh neuh a.






Titi pahin thingpui kan in a, a thingpui siam chu in ngam chi ni pawhin ka hre lo, engemaw sawi mawlh mawlh pahin a hmuhloh lai chuan tukverh ah ka leihbaw vek a, he hmeichhe rapthlak lutuk hian min hrai hlum duh mai lo ang tih a hriat der hleihnem mawle.






"Chuan ka va awm deuh tawp dawn tihna a mi?" ka tih chuan "Umm....i awm anga i pu te chu zanah i bia anga" a lo ti sam et a, "Judy a awm ve maithei" ka tih chuan a ner nasa mai.






"Enteh JH-a rilru i hneh angai ania, Judy aichuan a hmangaih zawk che a, naute kha a duh em em bawk a nia"






"Min hmangaih zawk lo maithei a sin" ka lo ti zauh a "Ka hrechiang a hmangaih zawk che a lawm, i bulah a awmdanah te pawh khan i la hre theilo a mi" a ti zui hlaka, hetia min let tir leh hian enge maw han tihzui a tum le! Enge maw chu a ngaihtuah ve chu a ni chêk ang.






"Enge awmzia a neih ang?" chik zeta enchung chuan ka ti leh a.






"A hmasa berah chuan Judy nen an inkarah a ṭhalo phawt anga, Judy chuan naute kha a rawn ngaimawh leh viau mai ang, chuan remchang hmasa berah i pum i tina der vak anga, nau tih tlaksak tumah che kan puh dawn nia in damdawiin kalna ṭhin ah khan Doctor ka ṭhianpa a thawk a, kha lam kha ka lo buaipui thei bawk anga" a sawi laichuan hnung lamah ka kut ka hum ruh ṭalh ṭalh tawh.





"A ṭhat dawn chu, anih JH-a ve hi le?"






"Ani chu a awlsam lutuk, naute pa a ni hleinem, naute pa hnenah kalin i thlauhthla hmak mai dawn a lawm, naute pa anih loh miau chuan enge tih theih a neih" henu hi a â deuh a ni lo mâw le, "Ka kalbo san hnu ah Judy nen inkawp leh ta si se" a nui hmel chu a tum nghal hmak a, a thinrim hmel nghal hlur mai bawk, "Chutiang a thleng lo ang, a kawp leh na anih chuan keiman....." sawi zo loin ka lam hawi chuan a rawn nui a, rapthlak tizet chung chuan ka lo nuih let ve a, kei hi Judy nena pawh ṭhenna hmanrua atan min hman chu a tum vei tak chu a ni sia.






"An thil tum kan ti Flop vek dawn nia, mi tenawm ho chu an chawh khawp ang" a ti zui hlak hlak a, a pangngailo tlat henu hi engmah ruih a neih awm ka hre silo, rilru lam fellohna a nei zawk em mawni le. Eng pawh nise JH-a te in a hruai thlen hmasak phawt ka ngai.







Kan kalchhuak ta chu a phur hmel riau a, ka banah vuan chawtin min kalpuia, zam leh hupurh hmel a pu lo reng reng, "JH-a bulah chuan inenkawlna ṭha ka mamawh a, hetah naute hi neih ka duh thingtlangah chuan thil a harsa lutuk i ti dawn nia, chuan a rinhlelh miahloh nan che i inenkawl zuina tur pawisa dil bawk la" a ti sap sap a, a sawi apiang chu ka lo aw a ni ber.







JH-a te Gate kan thlen chuan a phur hmel zual sawtin ka hria "JH-an ka awm remti lo ta se" ka ti leh zauh a. "Nau te i duh chuan ka awm angai i ti dawn nia" a lo ti leh vat a. Ni e...a ṭha vek e, i duh ang chu han ti ta poh che.







Inchhung kan lut fel chiah chu ka hma a a kal chu a rawn hawilet leh rang teh e, a tum loh pui pui a hmu nge ni phawk zetin min lo en a chutih laiin kawngkharpui chu Michaelan a lo kalh fel der tawh.






Ka chhungte zawng zawng an lo awm si chu a hamhaih viau a ni chek ang, a nui tawi tak tak a chutih laiin "Lallawmsang hetah rawn ṭhu teh" Alawmi pa chuan a lo ti vin hluk a.






Hei hi a ni kan remruat dan chu, Alawmi nu leh pa an awm ve bawk a, an hnathawhna hmun aṭangin JH-an a va hruai nghe nghe, thil awmzia pawh an lo hrilhfiah tawh ngei ang. Ka pu chuan ding meuhin min lo en a, chutih laiin Michael-an Alawmi ding khawng reng chu a nam phei dawt dawt bawk.






Chair vawnchhan hrawl zet awmah chuan ṭhut tirin Michaela leh Liansangzualan an din chilh nghalran a, hlau thawng zeta a hawi kual hrek hrek chu ka lo en ve reng bawk a, ka lam lo hawia min chhan rawh tih melh a min lo melh laichuan ner sakin ka kalpel zui a, a ep chiah ah chuan ṭhuin ka en ve ran bawk.







"Mi laktlakloh nu, mi chhungkua i lo va han ti buai nasa em em ve mawle, hetiang tur hian em ni ka enkawl che" Alawmi nuin aw khur dar dar chunga a tih chuan midang chu kan ngawi ṭhap hlawm.






"Ringawta enge tih ka neih a?" a thiltih a hre chiang ngang bawk a, a ṭawngpawr ngam lo nasa mai. Reny lo kalin center table ah chuan Laptop a lo hunga, Video engemaw hi a play zui bawk a.






Mipa natuar rum hawk ri kan hre zui a, Liansangzuala aw ri in "I sawilo anih chuan i kut hi kan tan dawn ania" a tih chher chher laiin "Chem kha lo la teh" JH-a aw in a lo ti ve bawk.







"Khanu khan min tih tir a lawm" mipa chuan a ti nghal ruai a. "Khanu chu tunge" JH-a aw chu a khauh ṭha fel fawl hle.






"Hmeichhe awm ve kha, Lawmi khan pawisa min pe a, i nupui kha thla lakpui turin min tia, khawih loin a muhil lai thlalak pui chauh turin ania min tih" hlauthawng aw zetin mipa chuan a ti leh a.






"I khawih em?" JH-an a tih leh laichuan ka lo ip chawih chawih a, ka mit ka chhing ringawt bawk.






Thawm ri hrawkin a zui a "Aih ...aih...ka khawihlo, a kawr ka phelh a ka kuah ringawt a bak ka tilo, nula khan thla alo la a, kan chhuak lehnghal a lawm" pakhat chuan a lo ti chul a, "Chuan i blackmail zui a ni lawmni" Michaelan a lo ti ve leh a.






"Nula khan titur in min ti a, keichuan pawisa vang chauhin a lawm ka tih, mahse, khanu khan FIR thehluh a tum tak tak a, Lawmi bulah ka tih duh tawhloh thu ka hrilh a, a bak engmah tih ka neilo, min ring ru, michael....engmah ka tilo tak tak a nia" an khawih zui a niang thawm a ri ṭawk ṭawk a, video chu hmu velo mahila a thawm ringawt pawh chuan min ti tawt ṭuna, thawk a sak duh kher mai. Apuiin leh ka nuin min lo kuah vat a, thawk ka han la leh rih ṭhin.







"Puii lo han chhoh pui mai rawh" JH-an a lo tih chuan "A ngailo" ka lo ti vat a, Alawmi lam ka va hawi chuan a lo ṭap pur tawh. "Mate, dawtin min puh an tum anih hi" a rawn ti chiah chu a ṭhutna aṭangin a pa in a hnuk thla tawp mai. Khawih zui mai a tum chu midang chuan an lo danga, Alawmi nu chu a lo ṭap hlawp hlawp bawk.






"Lalbawihno i duhtawkin nangman va khawih rawh" Reny in a lo ti bawk. Che lo changloin Alawmi tlu sawp niai chu ka melh ngawt ngawt a, che hleitheilo e tiloin ka taksa chu a khur dar dar thung.






Chutah lo tho chhuakin rum lutuk mai hian JH-a chu a melh a, pakhat lah chuan thip zetin a lo en reng bawk. "Kha addict thusawi vang mai mai khan min puh reng reng suh, i nupui hian i thil tih sual zawng zawng kha a hre vek tawh, Judy nen inkawpin Mambawihi hi fa neihnan hman i tum a ni lawmni" ring fahran hian a rawn ti a, a dawt phuah chawp pawh ala pawr pui ngam viau tho mai.






"I bialnu Judy phiangsen khan ka ṭhiannu naupai tihtlak sak a tum zawk anih kha" ka lam lo hawiin "Mate, an thusawi kha ring reng reng suh, an chhungkua hian mi rapthlak chhungkua an nih hi, ṭangrualin bum leh che a kei min puh an tum anih hi" tih pahin a rawn che zui ruai a, ka lampana lo pen a tum chu Michaelan a pawt let rang kher mai.






"Dawt sawiloin inpuangla, i pa hian i tan an ngaihdamna ka dilsak thei zawk ang che" beidawng zeta Alawmi pain a lo tih chuan ka pu a lo inrawlh ve a, "Ṭha taka i inpuan chuan jail em thleng loin i chungthu kan ngaihtuah dawn nia" ka pu chuan a ti ve charh charh a.







"In puan tur ka neilo, hepa hmeinu khan ka ṭhiannu nau a tih tlaksak a lawm, engvanga kei min puh nge in nih" JH-a kawk sawk sawk chung chuan a ti leh a, a awmdan chuan bei a ti dawng zual tak zet a ni.




"Nau tih tlakna kha i dah a nih kha" Apuiin a lo ti vin hlar a.




"Dawt sawi suh" pakhatin a lo ti ve thung.




"Khami ni khan nang bak ka u te roomah i lut lo, Judy lo leng kha inchungah a chho lo hrim hrim" Apuii bawkin a ti leh a.






"Engmah i hrelo, nangnu pawh kha inah i awm ve renga nangmah zawk kha i ni lo maw, Mambawihi i hua a ni lawmni" a aw ri aṭang chuan a pangngai tawhlo nasa mai, rawn thawh leh mai a tum chu an lo chelh beh tlat vang chuan a tal fat fat bawk.







"In ah ka awm tih i hria maw, kei te chu inchung room ah ka awm char chara i lo chhoh siloh chuan engtin nge ka awm tih i hriat a" Reny chuan a lo ti khauha, Alawmi hmel chu a buai zual sauh emaw tih tur a ni.







"Min thlah ru, min khawih su, ramhruai in nih hi" tiin a ṭe teng tung a, ka nu lam chu rawn hawiin "Nangmah i nih kha" a rawn ti thul, a pa ngaihdan a ni ta nganglo aniang a samah ṭham tho lawpin a biangah a hnek sak sawk sawk a, midangin an lo chelh chung pawhin kut chu a thlak nual hman tho.






Muang changa thoin inchung room lam ka pan a, kan nupa room ṭhinah chuan lutin khuma ka ṭhu a, ka bing chuk chuk a ni ber e, JH-a a lo lang zui thuai a "Ka lo chhuk ang, reilo te kan awm fal lawk" ka lo ti vat a.






"Engtin nge an tih dawn an rel meka, engtia tih nge i duh?" tiin min zawt a.





"A damlo anih kha" ka lo ti hap thung.





"Nia, a pangngailo khawp mai" mitmeia min rawn chungin a ti leh a.





"Damdawiinah hruai rawh u" ka ti zuai raih a, min chhangloin min en vawng vawng ringawt.





"Lo awm hahdam rawh, ka lo chho leh vat ang" tiin a chhuak zui a, a kal hnu chuan am zetin thawk ka la a, chutiang chuan vawi engemaw zah ka ti a mahse, ka thawl phah chuanglo, ka rilru ana lo a ka chawmawlh zo a ni ber.






Khumah chuan ka mu zal a, ka chau deuh nge ni ka lo chhing sek a, ka harh leh chuan chawhnu her a lo ni der tawh. "I ril a ṭam em?" JH-a aw ri ka hriat rualin ka hawi vat a, khum bula chair ah ṭhuin min lo en reng a, ka rilṭam lo a, ka chau hluah hluah thung.





"Engtin nge in tih tak?"




"Apa khan mi a dahna ah a dah dawn aniang?" a lo ti hluk a.




"Khawiah nge ka pu kha?"




"I patea te inah a phei tawh a"




"Tinge min hawsan ngawt a" tih leh thawh ka ruala.




"Hei hi i in a lawm, i pu khan ala hrilh lo che a mi?" a thil rawn sawi vang chuan bang bo zetin ka lo en haw ringawt a. "Bawihno, kan la inṭhen reng reng hleinem" a ti zawi sup a.




"Tak tak maw?"




"Aw ni e, bungrua an la der ringawt anih kha?"




Hei hi chu keipawn ka lo ngaihtuah fel ve tawh a lawm, tlang takin tunah hian sawi nghal mai ṭhain ka hria, "Ih maw, in ruahmanna chu engpawh nise kei chu ka tel ve hleinem, vawinah ka pu rualin ka haw ang, khawngaihin engmah lo tih tum suh" kal chhuah mai ka tum chu min pawt let lehin ka hma ah chuan a rawn dinga.





"Tihsual ka nei anih chuan min ngaidam rawh" thutak zetin a ti leh a.








(Zaninah tawp ka han tawp ngawta rinaiin a lo la sei leh sia....next ah kan tawp tak tak tawh ang)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 28th, 2021, 12:13 pm

GOMENASAI - by Ahmangaihi violette khiangte


CHAPTER - 44 (Last chapter)

IMG_20210324_204455.jpg



"Enge i tih sual?" tiin ka zawt let a.




"I duhloh zawnga ka awm anih chuan min ngaidam dawn nia" a ti nawn leh a,
"Chhan mumal awmloin ngaihdam an indil ringawt ngailo" zawi sep a ka tih leh laichuan ka lungchhe lek lek hial a ni. Khatih hun chhung zawnga ka rilru natna khan ka thinglungah ser liantak min siamsak a, ngaihdam min dil vang maia awlsam te a reh thei lah a nilo.






Thlahthlam leh bumna vanga midang laka rinna nei tawhlo he thinlung hian tu emaw laka hmangaihna dawn takngial pawh thlakhlelhna a nei tawhlo tlat a, chu chuan mal tlat duhna rilru min neih tir a ni, tichuan.... midang rinchhan lo in, tumah tina lo leh tihnat theih loh in chutiang chuan nun chu a hahdam zawk tawh ngei ang.






"Ka thiltih dan vang khan i lungawi zan lo anih chuan kha kha kan tana ṭha ber tur ania, chhungkua a engkim relho te kha nakinah i tan a ṭhat zawk a beisei bawka, tunah pawh i ṭhiannu vanga i tawrhna te hi an lainatin an khawngaih em em che a nia" ka dar tawn tawnah rawn vuana min en ran chung chuan a ti leh a, chu chu hrelo bik ka nilo, harsatna kan tawka chhungkua kan inlungrual phah tih chu ka hre teh meuh mai mahse, buaina zawk chu keimah ah hian a ni.





"Awm hran rih ka duh, kan inkar pawh hi ngaihtuah ṭhat ka duh" ka ti tawl mai.





"Bawihno...awm hrang thei kan ni lo, naute kan neih dawn hi....nu leh pa kan ni tawh dawn a sin" ngenngawl zetin a ti leh a.





"Awm hrang thei e, kha leh chen kha kan awm hrang tawh a lawm, thla tlem teah kei chu Nu ka ni tawh dawn a mahse, nang hi pa i ni ve a ngem ka la hrelo, ka ngaihtuah ṭha leh ang" ka dar a vawnna chu phelhsakin ka chhuahsan zui a, ka hnungah min rawn zuiin ding turin min koh na chu ka haider lui hmiah mai bawk.






Kailawn bula ṭhutkhawmna pindan ka thlen rual chuan min pawt ding chawta, "Hey, i rilru ka tina a pawi ka ti lutuk, rulh let theihna che hun min siam la ka theihtawka ṭha in enkawl che ka tum ang, a hma aikhan ka duat che anga, i duh ang a piang ka tihsak ang che, i lungdam hma chu Lunglengah awm i duh anih pawhin a pawilo a nia" a kut pahniha ka biangah rawn dawmin ka remtih sak loh hlau lutuk hian a ngenin min ngen a ni ber.






"I thiamloh a nilo tih chu ka hria a lawm, midang vangin kan tuara kan nupa kar a hlat phah tih pawh ka hre tho mahse, keimah hi ka damlo a ni, min hrethiam la min nawrlui loin ka duhdan hi min pawm sak zawk rawh, ngun takin ka lo ingaihtuah anga, kan sawidun leh zawk dawn nia" tiin ka lo ngen let ve thung.






"Inṭhen lam chu ka sawipui lo ang che, i damna tur zawk chu kan ngaihtuah dawn nia, keiman lunglengah chuan ka va dah ang che" a tih laia a lawmlo awka chu ka hailo, min chelh pawh tum viau mahse awmzia a awm dawnlo tih erawh a hrechiang viau anih hmel.






Ka nu leh pa te chuan ka haw lehnghal chu an phallo hle a min uibet viau ngam biklo, ka lakah chuan an inthlahrung em em bawk a ni. "Duh leh i nau neih hma te chu awm leh rihla, helamah engkim ngaihtuah ngai chu kan lo ngaihtuah vek mai ang, rilru ti hah loin lungmuang takin awm rawh" ka nu chuan a ti sap sap a, thei leh eng ilo ka hawn tur te chu a siam mawlh mawlh bawk a. "Chawlhni ah tal chuan lo haw ṭhin i tum anga keini pawn kan thlahlel ve tawh che a nia" ka pa chuan a lo ti bawk.






"Lawmeki vangin kan chhungkua kan ṭanrual phah ta daih a, a lawmawm lam mah a ni e" min nuih var var chunga Apuiin a tih chuan tawi te in ka lo nuihlet a, chhungkaw inlungrual a inhmangaih taka chen ho chu ka duhthusam a ni a mahse, Alawmi ka chân chuan min ti na em em reng si, ka ṭhianṭha ber a ni a, ani aia rin leh chuan midang ka neih awm pawh ka hrelo, huatna rilru ka pu hleithei der lo a, chu a hnekin ka ṭhianṭha ber ka chân ta chuan min ti na daih zawk, keimah ka inthiamlo a hrehawm ka ti ngawih ngawih mai a ni.






Ka patea te inah ka pu kan lamkawia, haw kawngah chuan ka pu leh JH-a chu an titi dun mawlh mawlha, an ṭawng chu ngaithla ve reng e tilo chuan ka rilru ah thildang daih ka ngaihtuah thung.






"Hetianga hmeichhe rilru chhia hi ka la hrelo reng reng, a la naupang si a a hma khua a ngaihtuahawm khawp mai, a pa te khan min rawn umzui vatin ka ringa, a nu leh pa kha an khawngaihthlak zawmah anih kha mawle" ka pu chuan a ti charh charh a.






"Ni e, chanchin kan han hrilh te khan an hamhaih dun teh a sin, Lungleng lamah anlo kal anga, a hnu leh thil kha chu i rorel dan ang ang kha ni tawh rawh se" JH-an a lo tih leh chuan ka pu chu a inngaihtuah zui rauh rauh a.






"A...ngaihdamna tak tak rilru hi chu kan pu theilo anih pawhin thil kal phung pangngai hi a awm ve a, ngaihdam min dil vang ringawt lahin Mambawihi pawh a rilru a dam phah dawn tihna a ni chuanglo mahse, engkim anih tur ang a ni tawh a, an tawrhna pawh kha kan hmuhpui a, an fanu suahsual rawngbawl vangin nutling leh patling khati tak khan an kimki tawh a, chuvangin keini pawn ṭha takin kan lo chhâwn a niang chu" ka pu chuan a ti dap dap a.






"Mambawih, engtia han tih zui nge i duh sawi ve reng reng la?" JH-an a lo tih chuan "Ni e, a tuar tu ber i ni a, han sawi ve tak teh?" ka pu chuan a lo ti ve bawk.






"Ih maw...Alawmi kha thiamlo viau thei ka nilo, JH.... a tir aṭangin a duh zia che hrereng chungin ka nei che a, a ṭhianṭha ka nihna angin a nui hmel phena a natna kha hmuhthiam sak tur ka ni zawk a, keimah chauh inngaihtuahin a rilru tur kha ka ngaihtuahpui ngailo, khatia keiin ka mamawh lai zawng zawnga ka tana a awm chung khan keichuan a ngaihzawng a ṭhen thu takngial pawh ka hriatpui lo a, keimah zawk hi ṭhian laktlakloh ka ni hmasa a, ka tana a rilru a dang ta hi ka dem thei nganglo" hnuk ulh ru ṭeuh chunga ka lo tih chuan an ngawiran a, ka rilru dik tak sawi pawh ka ni.






Alawmi kha lo chîk in lo belchiang ve ṭhin ila chuan ti zawng tein ka ngaihtuah kuala, JH-a nen kan pathuma kan inhmuh hmasak ber ni te pawh Album keu let ang maia chiangin mitthla ah a lo lang leh a, kha mi ni a JH-an ka phone number min lo dil laia Alawmi hamhaih lutuk hmel mawlh mai kha, a hnu ah khan ṭap ṭeuh chungin min lawmpui thu min hrilh zui anih kha, khati khawpa JH-a lakah Feelings a neih laikhan tinge kei khan amah venthawnna rilru chhe te pawh putna chang ka lo hriatloh le?






Keilah chuan kan inneihna ah ṭhian atan ka la sawm tak deuh deuh a, min phur pui tak anga a lan laite khan a rukin a lo na vawng vawng zel dawn chu a ni si a.






"Nangmah kha indem reng reng suh, engmah tih dikloh i neilo, rilru chhia pu zawk leh buaina siam duhtu zawk chu amah a ni a, nangin engtin mah itih loh laia kher ngar ngar tu che kha keichuan ṭhian ṭha niin ka hrelo, anih na hailang a a thiltih kan hrechhuak thei hi a lawmawm ah ngai zawk rawh" in kan thlen hnua JH-an a tih chuan ṭawngka in ka chhanglo nain ka pawm hleithei meuhlo.






Ṭhiante duh em em kha lo kawplo tawp ni ila ṭha tur ti tein ka ngaihtuah thul a, JH-a nen hian lo inkawplo ta ang ila Alawmi nen kan inkar a chhe tho angem tih te chenin ka ngaihtuah zui bawk. Chutiang nisela chuan a tu a te mah inti na tawn loin hlim takin kan la awm ho thei maithei a sin, enge maw diklo ta ber hi le, JH-a nena kan lo inhmangaih hi em ni ang? Nge ni a keima thiamloh hulhual zawk?






Zanriah eikhamah Nutei a lo leng thla a "Ṭhamawla chu khawnge?" ka beng bulah a rawn ti nghal sar sar a, chutih laimek chuan pindan aṭangin a phone charge na tur extension keng chungin JH-a chu a lo chhuak ve mek a, Nutei chuan a lo nuih rah rah a "Lungleng makpa sial chu a hmel kan hmu har kan lo ti sup supa, a tawp a tawpah chuan a rawn lang ve ta hlawl mai a lawm" a lo ti zauh a, JH-a pawh a lo nui suk mai.





"Min hmu kur zut tawh ang" a lo ti ve khauh a.





"A rualin i haw dawn nge?" ti a min zawh chuan ka la awm rih tur thu ka lo hrilh a, "Chuti chu Lungleng makpa chu rawn lan deuh sek angai a nih chu, Mambawihin rimtu a ngah nasa mai si a" min kheuh zeuh pah hian a han ti leh a, pakhat lah chuan "A va chiloh ve, anih chuan ka awm chilh ve nghal law law angai anih chu" fiamthu ti tak deuh hian a lo ti ve a, a ti tak tak ang tih phei chu ka hlau ru angreng.






Nutei haw dawn chuan dar 9 a ri thuak tawh, pawn thleng ka thlah a, "A awm chilh tak tak dawn che a mi?" a ti sar sar a.





"Dawnlo e, min lo thlah lawka zaninah a let leh ang" ka lo ti ṭha ve mai a.





"A damlo a ang hle mai, a la chhelo viau tho nangin tunhma a anglo, a cher sia a bawrchhawr bawk sia, damdawi ti ṭhin te pawh a ang dawn a lawm" a sawilai chuan ka lo nui hak a, "Ani teh tak e ti raw" ka lo ti fiam ve hlut a.






Kan in mangṭha hnu chuan inchhungah ka lut a, ka pu lehkhabu chhiar pawh a duhtawk ta a niang, muturin an pindan lamah a lut tawh a, kan ṭhutthleng seia Lalhruaitluanga la mu chu haw mai tum hmel pawh a pu lo.






"Zanin ah let i tum nange?" ka tih chuan "Naktuk zingah ka haw mai ang" a phone khawih mual mual pah chuan a lo ti a. A hmel chu ka en chianga, a biang ki leh khabe ruh kual te pawh an lo langsar lehzual tawh tih ka hre ve chiah a ni, a hmel chu a nelawmloh em em lehnghala, a ṭawng damdup mahse, lungawilo emaw tih mai tur hmel a pu.






"Anih chuan ka mutsan dawn che a nia?" tiin pindanah ka luhsan ve mai a, a puansin tur chu dawhkanah ka dahchhuah sak bawka, khumah ṭhu a ṭawngṭaina hun ka hman laimek chuan lo lutin ka sirah chuan a rawn inthawlh ve ringawt mai!






Ka ṭawngṭai zo chuan rum lutukin ka melh zuia, "Lalhruaitluang, ka thilsawi awmzia kha i hre miahlo a mi?" ka ti vin nghal hlar bawk. "Khum khata mut ringawt!" a chek zui hlak a "I pasal ka nih hi?" maktih hmel fe hian min melh zui a, zawk zawmah chuan!






"I lakah hian ka lungawilo a, ngaiawh leh turin hun ka mamawh tih ka sawi kha i hre lo em ni, ka sawilai khan i beng lehlamah a chhuak lehnghal nge ni a keihian i hriatthiam tura sawidan ka lo thiamlo zawk?" ṭawngring ngam silo chuan ka ti kha kha a, chutah min rawn pawtin "Lo mu mai mai teh, pasal ṭha tak nih tumin ka theihthawp ka chhuah mek anih hi" min pawt mut mai tum chuan a rawn che zui a.






"Haw rawh, i bula awm ka duh rihlo vangin a lawm hetah ka awm" ka ti bak hlar a, "Lo mu la, ka kuah ang che" a lo la ti tak deuh deuha, min runluih em maw ni zawk ni.






"Hetianga i tih luih tlat chuan kan inṭhen mai a ngai dawn anih hi" ka tih tak khawlah chuan min thlah rang kher mai. Inngaihtuah chianna hun ka mamawh thu pawh tlang takin ka hrilh tawh a, ka thusawi te min ngaih pawihmawh sak a hnek a min runluih zawnga a che chuan min ti thinrim hlur mai.





"I bula mut i phallo maw?"




"Aw phallo" ka lo ti hmuka, a kiai suk a rum lutukin min melh zui bawk.




"Anih khawnge ka mut dawn?"




"I duh duh na ah khan va mu la ti nia" a aia vin mah chuan ka ti leh a, chutih laichuan rawn tho in hnunglam aṭang chuan min lo kuah a, ka lo tal deuh phat a min kuah nghet sauh thung.






"Tihpalh aw, tih thinrim che ka tum miahlo ania, ka ngaih em vang zawk che ania, i rilru dam hun ka nghak zo lo a nih hi" ka darah a khabe rawn nghat chung chuan a ti sap sap a.





"Hetianga i awm hian ka thaw i ti ipik vek a nia aw, ka hun mamawh ang chhung hi chu i hmel hmuh miahloh ka duh, min nawr luih chuan ka rilru a na zual zel zawk anga, loh theihlohin inṭhen kan hmabak zawk ang" ka sawi laimek chuan ka pum a chul riak riak a, ka awmdan chu ka hrethiamlo, ka thaw a ti ipik em em a, a ṭah a chhuak hlur bawk.






"Kal rawh" in la hrangin a kut chu ka lo dahsawn vat a. "Bawihno, kan awmdun a ngai zawk a sin, hetianga ka hlat chhunzawm che anih chuan kan inkar hi a hla telh telh zawk ang, i bulah min awm tirla keimah vanga i rilru na te kha ka lo thawidam leh thei zawk dawn a lawm, chutianga ka tilo a ka hlat zawk che anih chuan ka tello a awm ngaiah i nei vat zawk ang, chu chu ka duh reng reng hleinem" ngenngawl leh thutak zet hian a ti a, a aw ri ah chuan kei ang thoin a tuar ve tih ka hrethei.






"Naute nen kan mamawh em em lai che khan i awmlo a, i aw ri hriat kan chak chang te, i pangtilum kan ngaih em em laite khan khawiah nge i lo awm, zan mutna ah ngaihtuah chung che hian vawi engzah nge ṭap chunga ka muthilh ṭhin i hria em, naute a rawn chet changte, damloh nain min tlakbuak laite khan awmve la ka ti ṭhin, ka mamawh che a i laka pangchan te pawh ka chak ṭhin, mahse, nangchu i ngawi tlat a, khatianga i awm kha ka thiamloh tiin hrehawm takin ka awm a sin.





Mahni inhmangaih ka zir a, pa tello a naute enkawl theih tumin ka chakna zawng zawng ka fawm khawm bawk mahse chutih laiin nang ilo lang leh a, ruahmanna leh beiseina ka lo neih ve te kha thawk leh khatah an chhe leh vek a, ka paltlang tawh emaw ka tih kawng kha zawh ṭha leh turin min ti a, thinlung leh rilru neilo ka ni bik lo asin...."ka mittui a rawn luanga ka insut zui hlawp hlawp bawk.






"Ka tihpalh, min ngaihdam lul teh" a thinlung takin a sawi a, a rilru diktak a nih pawh ka ringhlello mahse, chu chu ka mamawh chhanna a ni tlat silo. Ka dam phah lo a, min ti lungchhe zual tu chauh a ni.






"Tunah chuan ka thlahthlam tawhlo ang che, engtikah mah ka thlahthlam lo che anga i bulah ka awm tlat tawh ang" ka mittui luang chu rawn tuai hulin, ngunthluk em emin min en a, "Ka hmangaih lutuk che a nia" awki thuk raiha ti lehin min kuah vawng vawng bawk.





Khumah chuan min mutṭhat tirin puan min sintira, a tho chhuak zui mai bawk a, khum bulah chuan ding renrawnin pindan chhung chu a enkuala, ka khawngaih reuh khawp mai, chutah dawhkana puansin tur ka dah chhuah chu lain pindan chu a chhuahsan a, a thawm ri sat sat chu ka ngaichang ve reng bawk.






Ka muhil theilo a ka inlet tawn sek reng, ngaihtuahna ka kawm zui melh melh a mutchhuak lam reng a lang theilo, zan a rei telh telh a ka harhchiang telh telh emaw tih mai tur a ni. Ani chu a muhil ta a niang a thawm a reh hmak mai a, a thaw ri tak ngial pawh ka hre phalo, ka mutna sir ruak hiai chu ka chula, tunah tak hian ka ngai hle bawk.






Khawvar lamah mut ṭhing ka âwm a, ka harh ve meuh chuan ni a lo tlangsang viau tawh a, ka lu lah chu a rit luk mai bawk. "Mambawih, inpa kha a hmanhmawh si a, chaw kan eisan tawh che a nia, lo tho la va ei ve vat tawh" ka pi chuan a lo ti lang lang a. Chaw eichakna pawh ka neilo "Nakin deuhah ka ei ang" tiin ṭhutthleng seiah chuan ka tlu zal leh rih a.







"Tluanga kha tlaiah ka lo lêt leh dawn a ti em?" ka puin a lo tih chuan "Chutiang a sawiawm pawh ka hrelo" ka piin a lo ti var a. "Mambawih han zawt teh, a lo let leh dawn chuan kan ar ke na pakhat hi talh ila a ṭha ang" ka pu bawk chuan a lo ti leh a. "A hman tawhlo ang, naktuk Office kal te angai dawn a lawm" tiin ka lo pha thung a, JH-a chu text in lo kal fo lo turin ka hrilh zui bawk.







Chhun inkhawm banah Health worker hnenah kalin ka BP ka check tir a, ka BP chu a lo la hniam viau mai. "I nau neih a hnai ve tawh si a, i BP hi tih Normal vat a ṭha ang, in enkawl uluk viau rawh" tiin min lo chah nghe nghe a, han inenkawl zui vak ngaihna ka hre derlo, a hma pawn ka theih ang tawk tawkin damdawi leh eiin te chu ka han ti ṭha ve ṭhin a, awmzia a nei thui tehchiam ṭhinlo a, tih vak ngaihna pawh ka hre tawhlo, rilru lam hian taksa a thunun hneh lutuka chulam chu ka puh ber tawh, rilru hahdam leh thlamuang taka ka awm theih chuan ka zia phah te pawh ka ring zawk mah tawh a ni.







Ka text kha a chhang lo a, a lawm vaklo anih ka ring. Mahse, mutdawnah min lo bia a sawi tur ka hrelo em em mai lehnghala, mut chhuak chhuanlamin ka dahsak daih nghe nghe.






Thawhṭan tlaiah ngaihdam dil turin Alawmi chhungte an lo kal a "Chawlhni in min nang si a ka lo hma theilo nganglo a ni e" tiin thupha an chawi hamsa te te a, an inthlahrung ngang mai, Alawmi chu rilru lam Doctor an panpui a, tunah damdawiinah a awm mek a ni awm e. Ngaihdam dil nan tiin cheng Sing nga an lo keng a, chu erawh ka puin a lo hnar fithla ṭhak thung.






"Pathian in a zawm tawh nupa pawh ṭhen tum chu Pathian pawi khawihna a ni a, chuvangin Pathian hnenah zawk ngaihdam dil aṭha ang, kan ngaihdamna thu vanga in awm a nawm phah dawn chuan keini chuan Pathian hming chauhin kan ngaidam ang che u, mahse, kan rilru ah erawh a reh thei mai dawn lo a, ka thinlung a na tak zet zet tih in han hre thung dawn nia" ka pu chuan a ti charh charh a, a mimal taka ka lo hriat nel tawh te an ni vei nen kan inhmu chu lung a chhe zual duh ngang mai.






Hna thilah a buai bawka a zin chhuak zuta min rawn tlawh hman meuhlo, a lo haw changin chawlhni hmangin a lo kala, a tuk thawhṭan tukah a let leh vang vang ṭhin, a lo kal apiang hian amah zui haw tur hian min sawm a, ka chhungte lahin min nawr ve reng bawk.






3rd Trimester thla hnuhnung ber chu damtak leh insawiselna awm hauhloin kan thleng a, ka BP pawh a Normal ve ṭan viau tawh a, nau neih hun kan nghak hlel tlang tawh ngang mai. Apuii mangangin min lo bia a "A ṭul ang ang kan inlam khawm tawh sia nang lah i lo la haw silo a, enga tinge hetah lo haw i tum tawhlo a mi, ka u hi a khua a har bawk si a, amah in a tei rek rek zela, zan a mu thei ngai bawk silo a" a lo ti zung zunga, rilru a buai duh khawp mai.






Zantin muthmun ah ka inngaihtuah a, zawhna tam tak ka inzawt ṭhin bawk. Ka nu ka râwn ṭhin a, ani thu min râwn chu a tir aṭangin a la ngai reng "Mate, khatia awm kha tinge maw i duh tlat le, i hlim phah viau chuang em mawni?" a ti leh ngawt ṭhin a, "Ka hre lo le, nupa hlimlo tak nih ka hlau a niang, ka rilru a dam silo a, tun hma angin ṭha takin ka be thei tawh kherlo anga, nupui ka nihna anga ka tihtur pawh ka hlen theih ka ringlo, chutianga chendun chu inhremna ang chauh a ni dawn a" tiin ka nu bulah chuan ka sawi a.






"Hlauhthawn ngah lutuk hi mahni intih hrehawm na mai mai a sin, Pathian rinchhan la inti huaisen rawh, in nupa inṭangrual anga i hlauh ang kha chu engmah a thleng lo ang, JH-an a hmangaih che a, chu chu nangpawhin i hrechiang a lawm" ka nu chuan a ti leh a, chhan zui zel dan tur ka hre tawh ṭhin lo, a chang chuan haw chu ka duh ṭhin a mahse, tih a awm leh ṭhin.







A lo kal chang chuan pangngai takin ka be thei mai zel a, a pangngai mah mah ṭhin maithei bawk. A zawhna te hi "Ka lo inngaihtuah dawn nia" tih bak chhanna ka nei ngailo. Naute lo piang sela rilru pawh a inthlak danglam maithei tih chu ka innghahna a ni ta ber e.






Inrinni vawikhat chu Reny a lo lang hlawl a "In in awmna ka lo zawng nasa lutuk" min nuih var var chungin a rawn ti a, eng ti tih ah heng ah daih daih te a lo kal ni.







"Ka nuin keimah vangin i lo haw duh lo a ti a, ngaihdam dil la a lo haw duh mai ang a tia, ka lo kal anih hi" ner nang nang chunga a tih chuan nuih a ti za lek lek. "Ngaihdam dil ngai engmah i nei hleinem, nangmah lamah engmah harsatna ka neilo ania" ka tih chuan a lawm ve hmel khawp mai.






"Anih chuan lo haw la, U Puii nen kan bazar hnem tawh teh mai ania, naute room tur te pawh siam kan tuma mahse, U Puiin a lo haw lo maithei a ti che sia engmah ka la ti ngamlo a" a ti leh mauh mai a, a tu a te pawh chuan min nawr tet tet maia, kei lah ka rilru a chi ai na sa em em bawk.






Reny lo kal hnu a kar leh ah JH-a alo kal a, a lo thlen laichuan kan inkawtah Hriatpuia Electric bill khawn nen kan indinchilh lai tak alo ni a, min rawn en dan chu min rinhlelh hmel ngang mai, engmah phei chu a sawilo a, a lawmlo hle tih a hriat theih thung.






Ṭum khat dang leh chutiang chuan min hmu bawk a, chumi ṭum chuan in chekup turin Aizawlah ka kal a Hriatpuia motorah a ni nghe nghe, ani Falkawnah a kal dawn a a ruala kal a remchan em vang a ni a inthurual sa em em pawh kan ni hranlo, inrinni tukah kan tum chawp chuk chuk a ni.






Chumi kan kal lam chu JH-a lo kal lam nen kan intawka, kan inhmu chiang ngang mai, Hriatpuia a tlan tlang mai si a, JH-a motor kha a ding zui ta em tih tak ngial pawh ka hmu hman lo. Ka in entir laiin a ni falkawnah a kala, chawhnu lamah min lo lam leh a, Kan haw leh lamah chuan kawng siamin min dan vangin kan tlai hle bawk, in kan thlen chuan khua a thim chhulh tawh a kawtah a motor a lo la ding ka va hmuh chuan awm a nuam lo duh kher mai.






In chhung ka lut tur chiah chu a lo chhuak tur nen kan intawk hlawl a, thip zeta min melh hnuah min kalpela, "Haw nghal i tum em ni?" ti a ka koh zuina chu chhanna a awmlo, engmah sawiloin a inkhalh chhuak zui a, a hmel ah a thinur zia a lang reng bawk.






In a thlen hnu a min lo biak chuan "Ngaihzawng i nei em ni?" a rawn ti nghal tawng a, "Neilo" ti a ka lo chhang chu a awih vak lo aniang "Enge i lo haw hreh viau chhan ni a?" nelawmloh zet hian a ti leh a.






"I hriat kha" tih zawngin ka chhang a. "Ngaihzawng i neih chuan zep loin min hrilh ang che, ka rawn ti buai zui tawhlo ang che" ti hlukin phone chu a dah nghal hmaka, khatiang kha a ni let leh ka chak tawhloh chhan pakhat chu, tun hma ang kan ni tawhlo a, thil danglam a tam tawh lutuka, kan inrintawnna thlengin a chhe zo tawh.






Hreh chhan chu tam tak ka nei mahse, chhuanlam a han sawifak tur chu ka hre miahlo, a bula chên leh ka chak tawhlo ni ta berin ka hria, nat nawn leh ka duh tawhlo nge ni a, tuna ka nun danah hian ka lungawi tawk tih chu ka hrelo le. Zep lo ah chuan tuna ka awmdan hi a hahdam thlak a, rilru hahna tur engmah ka neilo bawk, pasal ka neih lai aikhan nuam ka ti zawk ti mai teh ang.






Hetiang anih si chuan inṭhen mai chu a ṭha ta in ka hria, ka pu ka râwn a a ngaihdan a ni vaklo a mahse, ka duhthlanna chu min hnial lui em em biklo. JH-a lo kal leh hmasak berah chuan ka sawi a, "Kan inṭhen lo ang" tih zawngin min chhang a, min ti dang lel a ni.







"Inrintawnna awmlo leh inpawhlo deuh a nupa nih i duh em ni?" ti a ka zawh laia min en dan vang chuan min ti zam lek lek hial!






"Ngaihzawng i nei a mi?" chang fel fawla a rawn tih chuan thawk ka lo la hak a, inṭhen ka duh chhana mipa dang awm tura a ngai tlat hi ka hrethiam theilo. "Ngaihzawng ka neilo, inṭhen ka duh chan chu thil dang daih a ni" ka tih chuan "Ka neilo i tih chuan ka ring che, inrintawnna a awm tihna anih chu,chuan nang aia hmeichhe pawh ka neilo, nupa kan ka ni reng bawk ang" a lo ti chang bawla, sawipui tum chu awmze awmlo tak a ni.






Ka nau chu zai chhuah tura tih a ni a, ka BP a hniam leh ṭhin vangin a hlauh thawnawm duh ngang mai mahse, naute hmel ka hmuh chakna chuan ka hlauhna chu a hliahkhuh vek a ni ber, nitin zantin hian ka ṭawngṭaia, rilru zawng zawng a luahkhat zo a ni.






Min zai dawn ni chuan zing hma lutuk tak maiah JH-a a lo kal a, "I hna kal rawh, dar 1 ah daih a lawm min zai dawn chhun chawlh hunah i lo kal leh mai dawn a lawm" ka lo ti a, ka nu leh Apuii te unau an lo thlen ve tak bawk avangin hreh tak chung chuan min kalsan a, a kalchhuak tur chu ka enzui renga, a lungngaih hmel riauin ka hria.






Zai tura kan inbuatsaih laichuan a zamawm ve duh ngang mai, JH-an min lo phone kan lut dawn tawh em tih min lo zawt a "Dawn ṭep hei, enteh...tihian nau nei tur chuan kan lut dawn chu a ni ve ta mai sia" ka lo ti a, ka phur zia leh ka zam ruk zia chu ka aw aṭang chuan a hre theiin ka ring.






"Ka lo chhuak ṭep, thil ṭha zawng zawng ka duhsak che a nia chuan, ka hmangaih che" zawi supa a tih ri chuan min fan reih reih mai. Ka awmdan chu mak ka inti JH-a chu ka ngai lutuka awm ve sela ka ti takzet bawk.






Dar 1 ah min zai a, inzaina room aṭanga min nawr chhuah laia fapa ka neih thu an sawi ri te chu ka hre pha a, ka nun ka hman liam tawh zawng zawnga hlimna ka tawn san lai ber a ni hial ta ve ang. Naute hnute an lo hnektir laichuan a hmel chu ka lo en vat a, ka naute hmuh tawh zawng zawngah ala hmelṭha ber awm e!






"KG 4 a tling ṭep ania, lianṭha tak a ni, ka u a ang em em lehnghal" Apuiin a tih ri chu ka lo nuih leh rih a, lawm avangin mittui a hnamlo theilo.






"Bawihte, dam taka i lo pian chhuah vang hian i nu hi ka van hlim tehlul em, i lo pian vang hian maw i nu leh pa te hian nihna thar kan nei a, nupui leh pasal ni ṭhin kha Nu leh Pa ti a koh kan ni tawh dawn a nia" ka sawi awmzia hrelo mahse, ka ṭawngri chu a hre thei chiang a ni! A kut tereuh te chu a ti phu ve ak ak a, ka mitin a hmuh tawh a zawnga duhawm ber a ni hial ta ve ang.






"U...fapa i nei a nia" tih ri vang chuan ka hawi chhuak vat a, keimah zawk chu min rawn enin "I ṭha em, tunah khan na i nei em?" a lo ti nghal thuai a, Apuiin naute a lo entir lai chuan a hmel chu hmuhnawm tak a ni. Naute chu a pawm a a en ngawih ngawih a, midangin an biak pawhin a mit a la sawn theilo reng reng.






Apuiin John tih a duh tlata, ka puin a laiah hmingah Vanlalrinhluzuala tih a sa ve thung. A len hunah chuan a hming chu sei a ti ve ngawt in ka ring.






"Dear John, kan ti anga a ni mai a lawm" Reny in a lo ti a, "Teuhlo emai" JH-an a lo ti hluk thung a, an thawm a ṭha ham ham viau mai.






Nu nih chu zing thawh hma ringawtah a lo inṭan lo, nunphung engkim a buai zo a ni ber, Lunglenga kan haw pui hnu aṭangin a ṭahbelh em em mai a, a ṭap hnang lek lek zel bawk, rilru a hah duhin keichu ka chiai nghal ruai zel. Zan ka mu theilo a, kan inpawm zankhua a ni thaw thang zel.
Zing lamah ka ni a lo kala min lak chhawk ṭhin vangin zingkarah hian ka mu ve thei chauh ṭhin.






JH-a nen kan inkar a danglam phah hle thunga, a hunawl hlekah chuan minlo bia in chanchin min lo zawt reng ṭhin, kar tawpah riak turin a lo kal ziaha, Apuii te unau an rawn lang awllo bawk.






Kan nau te chuan inrinni tuk a pianga ngaihthlak bik hla a nei a, a ri ka hriat tawh chuan a nuih loh theih ṭhin loh, Aw thum dut maiin "Ka fanu ṭial din denin, ka fapa ṭah belh ṭah belh" a tih tawh hi chuan mut chhuak eng ang mahila ka nui leh nge nge ṭhin, JH-a nau awih hla hriat ve chhun a ni miau bawk si a.






Ka nu chuan "Tawrhna a nasat poh leh tawrh chhuah hunah hlimna a nasa zawk ṭhin" tiin min hrilh a, tunah hian ka nuna ka hlim lai ber hun ka tawng mek a ni. Anih chuan tawrhna chu ka kalpel ta tihna em ni?






Mihring nunah hian lungngaihna leh hlimna hi hrui hrual ang maiin a inherh chho chiata, hlimna chu lung ngaihna in alo thlaka, lungngaihna pawh hlimna in, chu chu kan nun kalchhoh dan chu a ni, tunah kan hlim a nakinah chuan kan la lungngai leh ṭhin ang mahse, lungngaihna chu tawpna a nilo.






Hun hlimawm chauh hriatreng chu enge aṭangkaina, hun hrehawm pawhin zirchhuah tur min pe a nilawmni, kan nun pumpui hi hriatreng tur zawk a lo ni. Keiin ka zirchhuah chu tun hun a hlim thei ang bera hman hi a ni, nakin hun a tan ngaihtuahna ka sen vangin ka hlauthawng ṭhin a mahse, nakin hun niloin tun hun hi a ni pawimawh ber chu.






Nu nih chu tu emaw nu nih ringawtah a tawp lo a, mawhpurhna sang tak leh damchhan ṭha tak min neih tir a ni, naute vang chuan ka pasal nen kan inkar hla tak kha suihzawm leh a ni a, ka hah leh chauh changa naute min lo pawmsak ṭhin ringawt te, kan muhil ṭha thei em tih min lo zawt fo te, engtik laiin nge a ngaihsakna dawn ka lo thlakhlelh zuala engtik laiin nge ka lo hmangaih zual tak em em pawh ka inhrelo hial zawk.






Thla khat hnu ah min zawh fo ṭhin zawhna kha min zawt leh a, "Ka rualin lo haw tawh ta che?" tiin.






(A TAWP TA)


* GOMENASAI thawnthu chu kan lo zo leh ta a, in mi ṭawiawmna leh fuihna vang liau liau a ni, ka lawm ṭhin teh e, in comment chhiar a nuamin in mi duhsakna zawng zawngah lawmthu ka sawi mawlh mawlh a, kan la ziak chho leh zel turah ngai ila min lo ṭawiawm zel turin ka han sawm nghal bawk che u ni rawh se, story hi youtube lamah ka chhiartir bawk vangin hmanhmawh bakleng an tih ang khan ka ziak a, a phuailuai deuh maithei a, in beisei ang a pha lo anih pawhin min lo pawmzam sak hram aniang chu, chuan hemi zawh lamah hi chuan ka reh ve tawh rih dawn a, min ngai deuh in awm chuan AHMANGAIHI VIOLETTE STORY GROUP ah khan min lo zawng dawn nia, ti chuan a tawp nan ads kha min lo click sak leh ula, story pumpui aṭanga feedback zanin chu ka lo beisei teh ang*



#Love you all Vsmile squad#


*** KAN WEBSITE A FAKNA LAM THIL MILEM LANG THIN I LO HMEH ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)