GOMENASAI by Ahmangaihi violette khiangte (Completed)

Moderator: writers

Ngaia
Site Admin
Posts: 25813
Joined: April 30th, 2016, 4:07 pm

GOMENASAI by Ahmangaihi violette khiangte (Completed)

Unread post by Ngaia » March 28th, 2021, 12:00 pm

Tuman kan nunah tunge kan tawn dawn kan hre lâwk lo, miṭhenkhat chu hnunglama sabarh an sawi ang maiin kan nunah an lo lut ṭhin a, ani nena kan intawn dan pawh chutiang chu a ni, a lo lang ve hlawla, enge tih ka neih? Ani chuan maw ka sawi ve hma hauhin ata ah min siam a ni, engtin nge chutiang chu a thlen theih! Nge ni a ka hriatloh lai zawng khan hmangaihna chuan ka velah min lo hel reng ṭhin tawh zawk?
3aqen0vn.jpg
GOMENASAI - By Aviolette



CHAPTER - 1



images (67).jpeg
images (67).jpeg (33.5 KiB) Viewed 19715 times




"Christmas a thleng ve leh dawn ta reng mai, hun hi a kal chak telh telhin i hre ve em Mam?" Coffee no khu hlat hlat min pek pahin Alawmin a ti a, hriatloh karin December thla kan kai leh dawn ta reng mai.









Thawhpui te pawn Advance Christmas hman dan tur an sawi sap sap a, kei erawh kan khua Thingtlang lamah nge hetah ka patea te kiangah Christmas chu ka hman ang ka la rel fel theilo a ni. Alawmi erawh a bialpa Rinmawia te khuaah hman a tum a, Rinmawia chhungte nen an inti tlangnel tawh bawk a hun nuam tak a han hmang dawn tih lah a chiang reng, kei ve hi engtin nge ni ang, kan khua ah chuan ṭhen leh rual te chu ka nei ve ngei mai a mahse, ka awmlohna a rei tawh si a, ka han mikhual dêk dawnin ka hria a ka phur mawlh lo.









Ka pa in min boralsan hnuah ka pi leh pu te kiangah ka seiliana, ka nu erawh la damin khawdangah pasal anei leh a, a pasal pawmlai nen chuan fa pawh pathum lai an nei leh tawh nghe nghe a, kan khua Lungleng ah chuan High School thleng ka kal hnuin ka pa chhang chiah Pate Hruaia te kianga awm turin Mumbai-ah ka chhuk ve a, chutah chuan zirna pawh ka chhun zawm ta a, kum 10 zet a liam hnuah Patea te rual bawkin Mizoramah ka kir ve leh ta a ni.









Sawrkar office pakhatah mi aikalin Data entry Operator hna ka thawk a thla thum zen zawn chu ka thawk ve ta, a ai ka kalsak hi kan ṭhenawm lawka mi Uramte ti a kan koh mai ṭhin a ni a, Cancer natnain a tlakbuak avangin Treatment a lak a ngai a, kei hnathawh tur ka zawn laitak alo ni veinen inbe remin a ai ka kal rih ta a, ka ṭhiannu Âlawmi hi LDC in a awm ve thunga ani pawh thawk nghet chu a nilo, a thawhna a la rei bik vaklo a, mithar ve ve ta nafam chu kan inkawm ngeihin kan inthurual zui ta viau nghe nghe.









"Paper tlem Print tur ka nei a, tlai chu Rin-a nen kan inhmu dawnlo bawka ka thlah haw nghal thei ang che" tih pahin a dawhkan lam a pan a, ka coffee no chawi chunga thlanglam bathlar a ka chhuk lai chuan ni zungin bathlar chu a rawn chhun chiang hle a, thli lah chu a thaw vawt ver ver reng bawk nen a boruak chu a nuam kher mai.








Ral lehlam tlang romeiin a bawm khah chiai lam thlira ka Coffee ka lem khalh khalh laichuan "Mambawih hei i thil tur a awm ania" inchhung lam aṭangin Uzodinan a lo ti lang lang a. Inchhungah lutin "Engthil nge?" ka tih lai mek chuan Funny face cake tuihnai em em mai hi min lo pe a.









"Ui leh! Uzodin min leisak em ni?" tiin hamhaih angreng tak chuan ka lo ban a, "Enge a, ka duhve a nia aw" tih pahin Alawmi a lo tlan phei hlak hlak bawk a.








"Ka leisak che pawh a nilo, Gate bula Security khuan in office a mi Mambawihi ta tur a tia lawm" a lo ti mai a, ka bangbo viau a ni!








"Haa...mipa a mi, Mambawihi hi a ngaizawng tihna ami?" Alawmin a lo ti zung zung a, "Hmeichhia a ni lawmni?" keiin ka lo ti ve thung. "Hmeichhia a lawm, a patil deuh emaw ni dawn le?" Uzodina chuan a ti niah niah a, keini aimahin angaihna chu a hriatloh hmel lehzual a.








A Cake min pek lah chu han ei ngawt mai pawh ka hreh lek leka, ka ngaih a ṭha zan lo a ni. Thawhpui te ho chuan an zai a tlem chu ka tem sak ve a, a hmel a mawi ang chiahin a tui viau mai, Funny face cake ka hmuh tawh ah chuan a la duhawm ber bawk.








Banah chuan Alawmi leh Uzodina nen Cake min pe tu ni a a mi sawi chu kan va thlithlai deuha Gate bula Security mipa cher deuh chu kan hmu a, chu erawh "Cake min pe tu kha a nilo" Uzodinan a ti tlat a, Cake lo pe tu chu hmeichhia a nih ngei thu a sawi a, min hriat chian hmel fu bawk si a a ngaihna ka hrelo telh telh mai!









Alawmi Scooty in kan inphur haw a, Taxi hire man a to angreng si a ani nena kan inzui chu ka tan pawh a ziaawm phah viau.








"Mambawih zanah inbe CK ang aw" min tlan pelh thuak paha Uzodin-an a lo tih chuan "Zobâl, i lerh thak" Âlawmin alo ti hmanhmawh a, anni pahnih hi chu an inngamtlak ṭhin a ni.









"Vawin chu ka Star tê kha hmuh ka inrin nen" a tih chuan ka nui mai a, a sawi ve ziah a, a tu ber hi nge a Star chu ka hre ve der chuanglo, kan office ami chu anilo phawt mai a, inhnuai lampang ami anih ka ring ringawt, bialpa nghet nei chung pawh hian Star te hi ala nei ta zui a, he khawpuiah hian ka la awmrei loh vang em mawni tlangval hmelṭha han tih em em tur hi ka la hmu ve hauhlo.









In kan thlen chuan Nu Muanin eirawng alo bawl mawlh mawlh a "Mambawih inthlak fel la bungrua kha lo chhiar teh aw" alo ti nghal vat a, Irene-i sofa ah ṭhuin a ke tin alo hnawih hlarh hlarh a, a fanu hi chu a tir ṭha ngam derlo, tir pawh nisela a peih leh dawnlo tih lah ka hrechiang.









Hmanhmawh takin ka inthlak a, sitting room a ka lêt leh chuan thawmhnaw Bag lian pui pui intiang urh chu zai hawngin ka thliar hranga, heng thawmhnaw ho hi Dawra pek chhawn tur a ni a, Nu muani eizawnna thil a ni.









"Mate i nau kha lo pui teh" a hming chuan a ti ve tak nain Irene-i erawhin a bengkhawn lo nasa mai, tlai thim dawn thlengin thawmhnaw chhiar chuan ka vir buai a, zanriah eikhamah chauh ka intifai ve leh hman ang, hei chu ka tih fo ṭhin dan.








Zanriah eilaiin Patea chuan Christmas kan hman duhdan min zawta, ani pawn thingtlanga hman a duh a, Nu Muani erawhin a peihloh hmel kher mai "Hetah hmang zawk ang u, thingtlangah chuan a nuam leh awmlo emai" Irene-in a lo ti ve chiah bawk.









"Mambawih nang khawia hman nge i duh?" a tih chuan "Ka hrelo le" ka ti tak nain Thingtlanga hman chu ka chak zawk mah. Mahse, ka duhdan ka sawi ve anih chuan Irene te nufa duhdan ani silo a, ka sawi ve ngam hauhlo thung.








"I piin a lo bia che em?" Patea bawk chuan a ti leh a. "Nizanah kan inbia a, Christmas dawnah inentirin ka lo kal ang chu a tia" tiin ka chhang a. "An bulah i hmang chak em?" a tih leh takah chuan "Chak ve deuh tho" tiin ka chhang a.









"I chak peih mai mai e, a nawm loh loh nen an nula leh tlangval te an ṭhing hlawm si, eitur avang bawk si, lenchhuahna tur pawh a awmlo ania" Irene-in a lo ti hlak hlak a, engmah ka sawizui duh tawhlo.








Zanah chuan mut pahin Lehkhabu ka chhiar a, Sitting room aṭanga Nu Muanin min lo koh vang chuan hmanhmawh deuhin ka chhuak phei a "T-shirt hi i duh pakhat thlang la" a lo ti a, mipa T-shirt hlir ania 'Ka duhlo' ti ngam chuang heklo le pakhat chu ka thlang ta tho a.








"I ha duh mi khatiang?" Irene-in a tih chuan ka nui mai a, "Tleirawl te te pawn lian deuh deuhin an ha a, a nalh lutuk Office ah pawh a hak tlak vek alawm" Nu Muanin a lo ti a. "I bialpa pe daih rawh" Irene-in a tih leh chuan phawk lek lekin Nu Muanin min en a.





"Bialpa i nei em ni?"






"Aih, nei nang" ka sawi ruala Irene-i lo nui hawk chu ka en a, "Mambawihi hi chu a laklawh a lawm, mipa tamzawkin an Bem ngamlo ting tanga, hmelṭha deuh hian maw amah ang hi chu an dawng lel zel a, a tawpa chhe deuh an hmuh chhun hi an nei nulh duh" nui hawk hawk chungin a ti a, a sawidan kher chu ka ngei lek lek ṭep a ni.








"Ngaihzawng thlan fimkhur tur aw, nang phei chu i dinhmun ngaihtuah ranin fing kar rawh, i thawhna ang te kha remchangah la thiam la" Nu Muanin a tih leh chuan a hmuhloh lamah ka lo ner nang a.







"Keiman ka zawn pui dawn a lawm, hmelhriat tir tur pawh ka nei, hausa leh hmelṭha deuh ṭhian ka nei a lawm" Irene-in a ti leh zat zat a, Nu Muani beng a verh nghalzar a, "Tunge? Khawi ami nge?" a zawt nghal mawlh mawlh a.








"Ka ṭhiannu ṭhianpa a nia, Electronics dawr an nei, an hausa rapthlak" Irene-in a tih chuan "Chutiang te chu a ṭhat chu inhmelhriat tir ngei ngei rawh, pasal tlak law law hi ngaihzawn tur, tun ang laiah phei chuan hausa deuh te hi zawn tur, nakina in nawmsakna tur hi fing takin thlir rawh u" Nu Muani chuan a lo ti ve leh a, an ni nufa hi chuan hausa hi an thupui hlur maiin ka hre tawh.








"Hausa ringawt niloin mipa rintlak leh innghahna tlak, nangmahni hmangaih taka enkawl thei tu tur che u zawn zawk tur" Patean a lo ti ve thung.








"Pawisa a awmloh chuan a hlim theih tak tak loh, retheih chuan nakin zelah fa inneih hunah pawh in hrehawm zawk ang, ka ṭawng huatthu suh ah in unau chuan inhmelṭhain thiamna lamah pawh in iaiawm loh a, tlangval engemaw mai mai ngaihzawn duh miahloh tur, vantlang chunglam deuh chauh melh rawh u" Nu Muanin a ti veleh a, an nufa chuan a titi zui bawrh bawrh a, an sawi leh tur pawh ka hriat ṭhan hnu vek a nih vangin ngaihthla zo duhloin room ah ka luhsan a, a chang hi chuan an titi hian ka thaw a ti ipik ṭhin a ni.








Mut hmain ka pi ka be leh a, min ngaihthu a sawi bang lo a, an hnena Christmas hmang turin min chah awllo bawk. "Office chawlh veleh ah ka lo zin ang" tiin ka chhang a, a phur tawh ngang mai chutiang bawkin keipawh.








A dan ngaitein chhun lamah Office ka kal a, buai em em siloin kan buai a chawl meuh lo. Alawmi te angin ka ṭuan a rang ve silo a, nileng daih hna hi chu ka nei ve reng ṭhin.








Sawma leh Uzodina Coffee la lo let leh chuan "Hei hi Mambawihi ta tur" tiin ka dawhkanah Cake an lo dah leh a, Funny face cake tho a ni, ka ngaih a ṭhalo tak zet tawh, kan Office chhung a mi bak hmelhriat ka nei silo a, tunge chutianga Cake min lo pe ringawt tu chu ni ang.








"Uzodin, ka ta tur anih pawh ka ring chiah lo, min hai a nih ka ring tlat" ka lo tih chuan "Ka hrebik hleinem in Office a mi Mambawihi ta tur ti miau hek, nangbak kan Office ah Mambawihi an awm silo a" a lo ti awlsam mai a.








Chupawh ni tehreng se, kan Office te pawh a lo hriatsual a ni talin ka ring, kei phei chu ka thawhna ala rei silo, mi aikal ka nih bakah tu vak mah hmelhriat ka la nei silo a.







"Office dang a mi nen min hriat pawlh a nih ka ring tlat" ka ti hap a, Alawm-in cake alo ei hman hmawh chu ka lo khap a, ka ta anih ka ring thei tlatlo.








"Nangmah i niang, 'Lalthanpuii maw?' ka ti ve thlap alawm, nimin khan i hamhaih angreng sia keipawn a hriatsual che anih ka ring deuh a mahse, min pe tu khan i hmingpum ka sawi pawh khan min pe tho a" Sawm-an a lo ti a, a ngaihna chai ka hrelo e.








"Luck heih heih hi zawng, chhelo deuh hi chu an heti tlat zel" nui ruh ruh chunga Sawm-an a tih chuan an nui ho dar dar a, nuih aza duhlo kher mai. Alawmi lah chuan a ei mawlh mawlh mai si.







Tlai kan ban rual chuan Alawmi nen Cake min pe tu chu kan va enchiang leh ta kher a, Uzodina sawi ngei mai chu kan va hmu a, ka sawithiam dan ber chuan hmeichhe palianpui mai a ni, mipa ang maia hriam hrak mai leh chak hmel deuh mai, en pawh ka en rei ngamlo a zahthlak ka ti!








"A ngaizawng che a ni hrim hrim" ka beng bula Alawmin a rawn tih sar sar lai chuan Paliani chuan kan lam a lo hawi a, ka chil ka lem khawlh ringawt a, ka hmulthi te chu an ding sung sung maiin ka hria, min en zawk bak chu a hawisawn leh thuai a, "A zak ve aniang a?" nui tet tet chunga Alawmin a tih leh pawh chuan ka ngawi kara ka awm anuamlo zo vek tawh.








Ngaihzawng hi pakhat chiah ka la neia chu chu High school ka kal ve lai tleirawl er er chauh kan nih lai kha a ni a inngaizawng han tih falua tur pawh kan niin ka hrelo ṭhiante dem bel ang chi deuh hi kan ni ber, Patea te kianga ka awm hnu khan kan Flat bula lo awm ve ṭhin Mizo tlangval nen khan rei vaklo chu kan inbe ṭhin a, a hnuah ngaihzawng a nei tih ka hre leh hnuhnawh si a ka be duhlo zui ta kha a nia, pawn chhuak mang ngailo mi hawiharhlo chi ka lo ni ve bawk nen mipa hi chu ṭhian takngial pawh ka neilo, tuna kan thawhpui te hi ka mipa ṭhian awmchhun te chu an ni mai a, chutiang khawpa mipa laka inla hrang chu nimahila kawppui atan chuan mipa ngei chu ka duh ve alawm.








"Luck theih bik ve le" nui hak hak chungin Alawmi chuan min chhaih zuia, ka ner nang nang a hmuh rualin min nuihzat zual sauh a "Nui vak vak suh a zahthlak" inhnuai lam Office bang an lo chhuah rual chuan ka lo ti nghal thuai a, a Scooty dahna lam kan pan lai chuan "Ding lawk teh, a lo chhuak dawn kan thlir leh lawk teh ang" tiin a dinhmun a siam rem te te a, a hawina lam ka en laimek chuan Social Welfare Department lam gate aṭang chuan Staff ho chu an lo chhuak mek hlawm a, a tu hi nge maw uluk taka a thlir ṭhin ni kan haw dawn apiang hian saw lam Gate saw a en a "Vawin chu a haw hma aniang" a tihloh leh "A zin chhuak a niang" a ti thul chuti chung chuan ala thlir zel tho chu ania.








"Saw saw a Assistant a niin ka hria, vawin chu office a kal chiang mai" phur fahrana a tih leh chuan nuichungin ka kalpel a, a Scooty dahna bulah chuan dingin "Lo kal mai mai teh" ka ti zui a, "Hmuhfuh hi a har a ni, kan Officer hmelṭha-a hi chu" ti niah niah chungin a lo phei a, a tu tak chu ni maw?









"I awmdan hi Rinan han hmu che sela a lawmlo awm mange ka ti" uangthuang taka ka lo tih chuan a nui hak hak a, "Thîk ve bawk ang chu mahse, JH-a hi chu ka ralkhat Star ve a nia, kam khat pawh a la be chuang miah silo hian ka Star ve em a sin" Social welfare Department lam hawileh vang vang pah chuan ati a, keiin "Tunge JH-a chu?" bangbo zetin ka lo ti ve thung a.








"I thawh rei ve tawh tehlul nen aw, Officer hmelṭha-a an tih luai luai hi ila hre ve nange?" maktih hmel lek lekin min en a, "Ngaihven loh zawng hi chu a hriatloh theih khawp mai" ka lo ti awlsam et thung a.









"Lo chuang phawt mai teh" pawr zeta a tih leh takah chuan ka ṭhukai nghalthuai a, "Ih maw....JH.Lalhruaitluanga chu Social welfare Department ah khan Under Secretary hna chelhlai ania, kum 30 bawr vel chhelo lutuk tak mai mawle, tlangval ngat lehnghal, nikum hmasa MCS Batch a mi kha ania, an Department a thawk hmeichhe ho phei chuan an pak huam hlawm ang chu, Department dang a mi te pawn a hmel hmuh chakin kan ring kan fan uak uak hi, a chanchin ka hriat zel dan phei chuan milian nuho hian an fanu te sawipui tumin an be ṭha duam duam e an tia lawm" a ṭawng mawlh mawlh laichuan keiin ral hla taka tlang panga nitla tur engno riaiin a chhunlam chu ka lo thlir a, a thilsawi te chu hre tho mahila ka rilruah a chamzui lo kher mai, Christmas ka hmandan tur mawlh mai chu a ni ka la ngaihtuah ni.








"Âlawm, khawpuiah nge Thingtlangah Christmas hi hman nuam zawk ang?" tiin ka zawt phawng a. "E le...khawpuiah lê" a lo ti mai a, khawpuiah chuan ka hmang fo a, nikuma Aizawla kan hman kha chuan nuamlo ka ti nasa mai kha ania, kumthar erawh kan vaiin Lunglengah kan hmanga kar khat pawh cham tlinglo mahila nuam chu ka ti zawk daih chu anih kha maw.








"Thingtlangah ka hmang ve dawn emawni ka tia, ka pi leh pu te bulah" ka ti a, "A ṭha a lawm, tak takah chuan maw khawi hmun pawh hmun nuam deuh kan tih hi chu a chhan han chhui han chhui mahila, a tawpah chuan mipa hnih khat vang bak hi a lo ni ngailo reng reng ania, chuvangin keipawh Rina te khua ah ka hmang dawn" nui har har chunga a tih leh chuan hnunglamah ka lo nui ve sak a, thliin ka sam a lo chhem thawt hlap hlap chu hui ṭhain ral lehlam chu ka thlir a ka lung a leng kher mai, tunge ka ngaih pawh ka hrelo, ka pa em mawni ka ngaih le?







In ka thlen rualin thawmhnaw buaipui ngai bawkin min lo hmuak a, Irene-i kal chhuak lo haw chuan "Thil sawidun tur kan nei ania ti zo thuai thuai teh" tiin min lo tur nghal tet tet a. "Engthil maw?" ka tih lahin "Zo phawt la room ah kan sawidun dawnnia" a lo ti leh tlat a.







Zanriah eina kan sengfel zawhah "Lo kal vat teh" ti a min lo koh leh chuan a room ah kan inzuilut a.






"I hmaite kha phihin va intuaihnum deuh teh aw, ka ṭhiante an lo leng dawn a" a tih chuan angaihna ka hrelo, ani ṭhiante lo len dawn vanga kei ka lo intuaihnum kher angaihna chhan chu!








"Tu i ṭhiante maw, ka lo awm ve kher a ngai em ni?" bangbo angreng taka ka tih chuan "Niminah ka sawi tawh kha, hmelhriattir tur che ka nei a lawm" phur fe mai hian a ti a, leh ringawt ṭhin a. Inleng neih hi ka chak viau lo, a bikin hmelhriat mangloh lo kawm phei chu a thiam pawh ka thiam lo ang.







Min nawr lehnghal tut tut mai si a, a tihloh theihloh. Ka hmai phihin Cream ka hnawih deuh tawp a, inthlak ta lem chuangloin Sitting room ah chuan ka ṭhu phei a "Lo be ṭha viau rawh aw, i lo induh khum ve ringawt ange, bakah min ti zak miahsuh Aizawl mihlun fate an nia Class hniam deuha lo awm kha a chi miahloh" ka bengbulah a rawn ti nghal sar sar a, awm a ti nuamlo telh telh lehnghal.







Rei vaklo ah Doorbell a lo ri a, Irene-in a lo chhawn hnuah tlangval lianpui pui pathum hi an lo inzuilut a, en rei duhloin Tv lam ka melhsan vat a, Irene-in a lo be nghal bawrh bawrh a, min lo koh chuan ṭang ru ṭeuhin ka hawi a.








"Ka nau Mambawihi chu anih hi"tiin min in hmelhriat tir a. Jonak-a atih chu min hmelhriat tir a tum ber chu a ni tih a hriattheih, chupa chuan min chibai hmasa ber a, midang pahnih Sawmkima leh Hriata te pawh chuan min chibai a, an inchei dan ngawtah pawh chhungkaw awmthei tak aṭanga chawrchhuak an ni tih haitheih rual an ni lo.









An titi barh barh a, ka ṭawng ve meuhlo. Sawmkima chuan min be ve zauh ṭhin a, ka chhang tawi thei viau mai, min biak zui vak ngaihna a hrelo aniang, Jonak chuan min en deuh reng avangin a hmel chu ka en chiang ngamlo a, kan inchibai laia ka en thuak khan a hmel chu ka hmu a abak chu a tu a te mah chiang takin ka en leh tawhlo.







"Mambawihi chu i van ngawichawi ve" Jonak-an alo tih chuan ka nui leh mai a, ka awm dan vang chuan Irene-i chu a lawm teh chiamlo ang chu.







An haw hnu chhuan "I van ṭhing tak" min ti teh hluai a, min melh rum ṭha viau bawk.







"Nula tamtakin an ngaihzawn rawn Jonak-a te angin an rawn rim che ania, i awmdan kha a rukin an nuihzat ngawt ang che" a ti zui hlak hlak a, Room aṭanga Nu Muani lo chhuk vangin ka chhang zui lo a, ahnu deuhah chuan "Enge ang itih chhelo i tih zawng a ni em?" tiin min zawt leh a.







"Ka hre lo e a" nui chunga ka lo ti mai chu ngei hmel lek lekin min en a, "I van chut e aw" chek tlat tlat chunga a ti a, ka chhang buai peihlo, Jonak-a tak kha chu a hmel chhe hauhlo, mahse a ṭawngkam ah khan ka tan chuan a changkang mah mah in ka hria, a titi te pawh ka ṭawmpui thiam pha lo ang, ka kawm duh zawng hi chu an ṭawngkam tawite aṭang pawn ka thliar hrang ve thiam a lawm, Jonak-a kha chu ka Type a ni lo deuh tlat.







"Tute nge lo leng kha?" Nu Muanin a tih chuan "Mambawihi inleng te" Irene-in a lo ti hman hmawh a. "Eh...inleng te a nei ve ta maw?" hlim sarh mai hian ka lam a lo hawi a, "Ka inleng pawh an ni chiah lo, Irene-i ṭhiante" ka lo ti ve vat a.







"I inleng te an niber a lawm, an lo len chhan che a" Irene-in a tih leh takah chuan Nu Muani hahawlh zawng tak a ni leh ta. "Khawilam mi nge?" Irene zawk a zawh vangin kei chu ka lo ngawi thung.







"LB AND SONS neitu fapa te ṭhianho an nih kha, Jonak Zosangliana" a sawizawng chuan a chhuan hmel kher mai, keichu min rawn melh ralh a, "Kan Mambawihi hi a ngaihzawng deuh tihna a mi?" Nu muani zawhna chuan min ti ṭim sung sung theiin ka hria.







"A la inngaihtuah chauh ang chu, ka hmelhriattir ang che ka tia lengah ka sawm anih kha, a duh anih chuan Mambawihi chu a van nei khawp ang chu, Jonak te chu nula lamah a tla na mai bawk sia" Irene-i thilsawi dan vang chuan ka tuilo zual ting mai, min duh malek sela tih rilru ka lo pu hman hmawh tawh, ka duhzawng a ni bik tawp silo a, min duh pawh nise ka duh let ve ngawt lo ang, duh chhan tur engmah hmu hawt heklo le.







Mipa changkang leh thawlian satliah hi ka duhzawng an ni ngailo, inngaihzawn dawn phei chuan rilru chhungril taka inpawhna Romantic thil awm ve turah ka ngai a, chuti maia ngaihzawng tur pawh inthingfawm chawp te chu ka duh bik lo, tleirawl ka ni tawhlo a, ngaihzawng ka nei dawn anih chuan pasal atana ka iai miahloh tur chi chiah ka ngaizawng ang, khawsak phung inthlau lutuk pawh ka duhlo, mipa hausa kher niloin mipa rintlak ka duh a, chutiang mi chu Jonak-a pawh alo ni anih chuan ka kawp duh leh duhloh tur ka ngaihtuah chauh zawk ang, Irene-in alo inngaihtuah dawn a ti kher chu ka la na ve deuh tlat.









(Ka lo let leh ta, Like and comment, Ads click kha in chan ve aw)



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 28th, 2021, 12:00 pm

GOMENASAI - By Aviolette




CHAPTER - 2

(A HNUAIA FOOTNOTE KHU CHHIAR RAWH)

images (73).jpeg
images (73).jpeg (25.66 KiB) Viewed 10439 times


Rei ṭhu tawhloin mu turin ka tho zui a, ka mu fel deuh awrh tih ah tu emaw hian ka room kawngkhar a lo beng ri dat dat a, hawnsak tuma ka tho uk tawh chu "Keimah, lo hawng duh kher suh, englo ania.....i Number ka pe a nia aw.. ṭha deuh khan" a nui ri har har ri chu ka mut hmun a ṭangin ka ngaithla kar a, ka Number a lo pe hmanhmawh chu ka lawmlo lek lek.









Ka Phone pawh en zui tawh lemloin ka mu ṭha leh nghal mai a, zanah reitak ka meng ngailo a muthilh hi chu ka sam viau, zing eirawngbawltu ka nih vangin ka tho tlai ngai hauhlo bawk.









Tukṭhuan eilaimekin Alawmi a lo thleng a, nidang ang bawka hlim hmelpuin a rawn ṭawnglut barh barha, reilo te chauh la inkawm mahila Pate Hruaia pawn fel a tiin a nel ve viau a, Irene-i erawhin "Ka eizawng a nilo" a ti leh mauh mai thung.









December thla tir chauh la ni rih mahse New secretariat complex lam boruak chu vawt nuam tawh tak a ni, Alawmi Scooty bawk chuan kan inchhawm thla leh a, tlan pahin a zai al al reng a, a mood hi nitin hian a fuh em em reng mai niberin ka hria.









Kan office kan luh rualin "Mambawih vawin chu i Cake in a lo thlen khalh che anih hi" Sawman a lo ti lang lang a. Ka dawhkan sira Funny face cake bawm lo awm chu melh vang vangin thawk ka la hluai a, engtia han tih chi nge ni ang tih ka ngaihtuah buai viau.









"Ka ngaihdan chuan maw Mambawih fel viau mahse i duhzawng a ni silo a, hrilh tlang tawp mai a ṭha ka ti" Alawm-in a tih chuan dik ka ti hle a, ni e tlang takin ka hrilh tawp anga, cake pawh min pe duh tawhlo turin ka hrilh ngei ang.









"Ka pe lêt nghal dawn em mawni le?" ka ti niah niah a, "Â...pek let em em chu a chiloh deuh ka ti, a thuphungin i sawi tawp zawk dawnnia, hau vak kher lo la a khawngaihthlak ve a" nui rah rah chunga Alawmin a tih chuan "Aw..a Star ve che a ni mai a, a pek chhung che chu tikhan eisak mai mai rawh" Sawma leh Uzodin-an nui chungin an lo ti a. Hetiang ringawt chu ka duh biklo a zah pawh a zahthlak a lawm thawhpui te zawng zawngin an hre bawk si, min pe tu lah Patil em mawni lehnghal ni. Â...Patil chu a ni chiang a lawm, ka nilo pawh tise a ruangam kha chu a pa ve chiang a ni.









Chhun chawlh ah Alawmin nen chuan Gate duty awmna lamah chuan kan inzui chhuak a, Paliani leh a ṭhiante ho lo ṭhut khawm ve laihna lam kan pan laichuan ka zam ru riau mai lehnghal a, ka sawitum dan ka ngaihtuah lawk pawh ka bangbo leh riau tawh.









An bul kan ve thlen lai chuan kan lam an lo hawi ṭhap a, "Nangman sawi rawh aw" tiin Alawmi chu ka keuh ru zauh a, "Hê....anih chuan ka ko hrang mai dawn a mi?" a lo ti a, chu chu a pawilo zawk ang a ṭhiante awmve laia va sawi tawl aichuan.








"Ṭhianpa..ah ka tih...ṭhiannu kan lo be fal lawk che" Alawmi ṭawng bah nak vang chuan midang awmve ho chu an lo nui hak a, kei ka lo ip ru ngar ngar thung.









"Engthil nge ni ta?" aw thum deuh dut a Palianin alo tih chuan Alawmin min lo melh a, "Kan lo be lawk che" ka lo ti ve nghalthuai a, min en vang vang laichuan sirlam ka melh leh ringawt a, ka awm a nuam lo takzet.









"Ka kalsawn thei rihlo a, nakin deuh ah ti ila" Confi tak maia min en chunga atih chuan ka zak zawk lek lek a ni. Amah lah chu a nui hui lehnghal a.









"Nia..keini pawh thil kan eilawk dawna, kan lo let leh lamah ni rawh se aw" tih leh Alawm-in min pawh a rual a, Canteen lampanin min kai phei dawr dawr a "A ṭhiante zingah chuan a zak ve aniang, nakinah kan be dawnnia thil eipuar phawt ang" a ti zui a, ka hnialzui biklo keipawh ka ril aṭam ve tawh viau mai.









Canteen ah ṭhu dunin Menu ka thlek kual laimek chuan " Awi Lalpa leh! Kei chu ka thi ṭhak" a rawn ti teh hluai a, ka malah min sik nghal hlawk hlawk bawk a. "Enge!" ti a a hmel ka en chuan kawngkhar lam a melh a, chutah ka lamah rawn thle hnaiin "JH-a te an lo kal a nia, Canteen ah a kal ve ṭhin tih ka hrelo" a aia na a min rawn sih leh takah chuan ka lo chek hlak a.








A hawina lam ka en ve chuan Mipa Suit ha pathum hi an lo inzuilut a, Counter bula ṭhu nu thaupui chu an be mawlh mawlh a, JH-a a tih fo chu tu ber nge ka la hrelo.








"Awi a nuam chiang e.." chung mipa pathum te lam hawi chuan an ti leh hluai a. A awmdan chuan nuih te lam lam a ti za zawk a ni.








Min hnungchhawn zawnga ding mipa chu lo hawiin kan hnunglam banga Menu intar chu a rawn melh a, "A lo hawi..." ka malah bawk a lo sih leh rualin a kut chu ka lo man bet a, JH-a a tih chu ka lo en nghalvat bawk.









Mipa sangṭha deuh mai a ni, phat ruallohin a chhelo hle bawk. Mitkhur thuk lam mitmeng thim lam deuh leh inkhaithli thlarh mai a ni, a hmelṭha han tih chiam aichuan a landan chu a pa hle ti ila ka sawifiah zawk ngei ang. Mahse, a tum deuh hmuk a a nelawm hmel tehchiam loh.








An pathum chuan dawhkan hmasa berah chuan an ṭhu a, an zinga mi pakhat chu Social welfare department a an Director pakhat a ni tih ka hria a kan veng a mi ani nghe nghe, pakhat zawk erawh ka hriat zawng a nilo.









"TALL, HANDSOME AND NICE SHOULDER sawpa ah sawn ka duhthusam a kim vek nia mawle" ka bengbula a rawn tih leh sar sar laichuan "Insum ve deuh teh" tiin ka lo nghawk zauh a, nui pat pat chungin kan hmaa ṭhu te chu a en dauh dauh reng a, eitur chah lam reng reng a ngaihtuah leh tawhlo.









"Enge i ei ve dawn?" ka tih chuan "I duh duh chah rawh" a lo ti vat a, he nu hi a khawlo zo vek mai, nidangah a duh a thlan nasat theih tehlul nen.









"Rina i theihnghilh ania, lerh viau suh aw"ka tih chuan nui hak hak chungin min en a "Ka theihnghilh kher lo" tiin hmalama ṭhu chu a la en ta renga, a tih ngaihna tak pawh ka hrelo e a.









Hnathawk ho chuan kan hma a ṭhu te pathum chu an vil rawn chawt niber in ka hria, thil kan ei mawlh mawlh laichuan "Nâ....ka kal rihlo se kan van ti e" ka bula mi chuan a lo ti a, kan hma a mite tho chhuak chu ka va melh zawk a, chutih laiin JH-a chuan kan lam a lo hawi ve chiah bawk a, kan mit a intawng chiang kher mai.








Ka mit ka lasawn nghalthuai a, min rawn endan chuan min ti mur sung sung thei hialin ka hria, Alawmi ka en chuan a Chow eilai alo melh daih a, tuna chiang taka kan lam alo hawi kha a lo hmu ve hman miahlo chu niin. "A lo en che" zawi tea ka tih chuan hawi chhuak leh rang tak a ni.








Kawngkhara an chhuak chu enzui vawng vawngin "Hepa hawiher han dik em em zia hi chu" an ti zui leh hlak a, em em ṭhin a.






"Nang hi i rilru hi a uire tlat"






"Rilru mai mai te chu thil tihin a zui chuang hleinem" a ti ve leh mauh mai a. "A ruk tê hian ilo Stalk char char lo maw lé?" ka tih leh chuan "A teuh bik nang, chutin ka rinawmlo viaulo e aw, bakah JH-a chu hetia ka ralkhat Star hi ania, Social media engmah a khawih bawk silo a, chutia Stalk chiam theih pawh a nilo, kan Department thawhna a inang bawk silo a a hmel pawh kan hmuh phak mangloh hi" lawmlo fe hian a ti zui niah niah a. Tun lawka a awmdan ringawt pawh kha Rina chuan hria se chu a lawm lo ve khawp ang chu.








Canteen aṭanga kan chhuah leh laichuan Paliani kha min tawk zawngin a lo kalphei nulh nulh a "Aw haw le, lo chapchar tak tak teh ang" ka bula mi chuan a lo ti zauh a.








Kan bul a lo thlen rualin "Thil in eitawh a mi, Cigarette ka va lei lawk anga min lo nghak rawh u" kan chhanna pawh nghak lemlo chhan min kalpel leh vut lawi a, Alawmi nen sawitur hrelo zetin kan inmelh a "A inla pa ve hle mai a" nui hak chunga a tihlaiin kei ka lo ner nang nanga, biak kher chu ka chak fahran lo.









Rei a rial biklo a lo let veleh thuai a, a kuva eitur siam mawlh mawlh pahin "Enge insawi duh a" tiin kemah zawk chu min zawt a. "Englo a nia..a...Cake chungchang kha ania" ṭi ru deuh taka ka tih chuan phawk fe mai hian min en a "E..Mambawih" kuva chu hmuam ṭawlh ṭawlh chungin min en vang vanga, Alawmi lah a lo nui heu reng mai si a, sawidan tur thiam a har fu mai.









"A tui em?" min nuihsuk pah a a tih leh chuan ka lo ṭang ru ṭeuh tawh. "Ka sawiduh zawk chu tiang zawng kha chuan lo ti tawh suh, thawhpui te i lo hlan mai bawk sia i ngaih ang kha ka nilo ania...ih.. bialpa ka nei a" ka ti teh tawp a. "Nia a bialpa ngaih a ṭha vaklo a, bakah Mambawihi midangin fiamnan an hmanga a chiloh emai" Alawm-in a lo ti ve bawk a.








"A va zialo ve, kan lo hre tawh dawnnia" tih zawng sawiin min kalsan nghal nal nal a, a thinrim ta mai em emaw ni!








"A va zamlo reuh e " Alawmin a tih chuan ka ngawi renga, lungawilo pawh nise ka pawiti biklo, khatianga Cake inpek ringawt ṭhin te chu midang pawhin eng angin nge min ngaih ang ni, min pe leh tawhlo sela a ṭha zawk.









Office-a kan let leh hnu chuan Uzodin-an "I cake chu kan eidawn lo a mi?" a lo ti sek reng a, ka ei duh dawn chuanglo tiin ka pe vek a, "Kan mit a uihlit em lo ang chu" nui vur vur chunga tiin Pi Sangi hoin an zai a, Malsawma lah chuan ringhlelh hmel fe hian min melh ṭhina a nuamlo duh kher mai.








"Amah kha i hre ngailo tak tak maw?" Uzodina hmelah pawh min rinhlelhna chu ka hmu thei. "Hre ngailo, nangpawh lo la ve ringawt tawh suh, beisei let a lo neih te pawh a hlauhawm a lawm" Alawmin a lo ti kha kha a, "Âw...Chutiang lam ka lo ngaihtuah tawh hleinem, Mambawihi ta tur a tih vang khan ka la mai a nia" tiin hmel pha dai hian min en a.








"In inngaizawng emaw ka ti hmana, ka ui zia mai che chu" Malsawman a lo ti ve bawk "Awm anglo e" nui chunga ka lo tih chuan an nui ho dar dar a, Cake chu min eitir ve ngial an tuma ka lo hnial fithla ṭhak thung.









Tlai banah Alawmi chu Rina nen inhmuhkawi an tum vangin Uzodina rualin ka haw a, kan tlan chhuak tur chu Gate a ṭanga Palianin min lo thlir chu ka va hmu thei a, chuveleh Uzodina dar ballo pui chu ka ben sak thak thak a, ka bialpa anga lantir tum taka ti ka ni, ka va hawi leh pawh chuan min lo la en reng a, ti hian a Cake min pek chu thil tih chi loh tawp a ni tih a hre ve mai turah ka ngai.








"Mambawih ngaihzawng i neilo tak tak a mi a?" tlan paha Uzodinan a tih chuan "Tinge, ka neihloh hmel a mi?" ka lo ti lêt a. "Alawmin a neilo a ti che a, mak ka ti zawk mawle kan office ho chuan i lo thawhtirh aṭang khan ngaihzawng nei turah kan ngai vek che a, i neilo tih a sawi ta sia phur fe fe pawh an awm kha" nui hawk hawk chungin a ti a.








"In ti ho e a, neihloh chhan te pawh ka nei ve thei a" uang taka ka tih leh chuan "Malsawman min tihpui rawh a ti ania, engtin nge niang?" a lo ti a. A thilsawi chu ka awihlo lek lek a ni, Sawma nen te chuan kan inbe ve fo a, min ngaihmelh ngai a zeng pawh a ni silo, chuloah Office khata thawk chutiang ang zawnga in en chu ka hreh zawng tak a ni.









"Chutiang sawi suh" ka ti leh ngawt a. "A ti tak tak a lawm, a hma aṭang khan a duhru viau tawh zawk che a, bialpa nei turah kan ngaihvek che avangin a bem duhlo mai mai che a lawm" ka ṭhu ngawi reng chu ka lamah lo thle deuhin "Duh ve mai la" nui chungin a ti leh a, hetiang thuar tham vel hian ka thawk a ti ipik riau zel, ti nge maw tute pawh hian min nawr tet tet ni, Alawmi lahin a ṭhiante min sawipui a tum awllo a, in lamah Irene-i a lo ni bawk, Nu Muani lahin ngaihzawng thlan dan tur min hrilh chhen reng a, tinge Single hi thil zahthlak a ni em mawni, ka awm awm hian min awmtir ve hlawm mai sela ni tur.








"I duhzawng a nilo nge, Sawma te chu a fel teh a nia aw, a kohhran mi bakah fapa mal ania, innei ta pawh ni ula a nu nen chauha khawsa an la nizuia, an inah pawh i lal thei nghal dawn teh ania" uang mai maia sawi angin ṭawng mahse a ti tak viau lawi a, chhan vak ngaihna pawh ka hrelo, thil dang dang sawiin ka ne ne kual a, min sawipui theih tak vakloh ah chuan a sawi zui ta reng biklo.








In ka thlen rualin Nu Muani inthlak rihlo turin min lo ti nghalthuai a " Bazarah thawmhnaw hi min va pek pui rawh, ba khawn nen ka indaihlo eirawng chu i û in lo bawl mai rawh se" a lo ti zung zung a, mawng pawh hung hmanloin kan in khai chhuak a, Dawr hrang hrangah kal kualin thawmhnaw Sample te chu kan entira, kan ken sa chu kan pe bawk a, Bag a rit si a kan luhna apiangah inphawrh angai ziah bawk nen a chauhthlak duh kher mai.








Kan haw leh meuh chhuan khua a thim dawn ruai tawh, Patean tum bur chungin chaw chhum a lo siam a "Eirawngbawl hunah tinge in chhuah zawh vek" a lo ti bul bul a, "Matei a lo la haw lo a mi?" Nu Muanin a ti dek dek chu "Ka ṭhiante inah chaw ka eidawn a ti lehpek anih kha" a lo ti vin hlur a.








"Pate khawi ka lo ti ang" a chaw chhum siamlai chuh rawk rawk paha ka tih chuan min lo pe ve mai a, a phun zui hluk hluka eirawng ka bawl chawp leh vangin chaw pawh kan eitlai ngang mai, kan inpeihfel meuh chuan keipawh ka chau ve hnap a, ṭhu khawmuang tawhloin ka mu nghal hmiah a, ka ban te chu a rawl deuh ṭhum in ka hria.









Ka Phone ka en chuan Message a lo tlar dul a, Malsawma Message pawh a awm! Ani pui hi min lo beisei tak tak anih dawn hi, tih chi loh lutuk.








Number ka hriatloh hnen aṭangin Message ka dawng bawk a Jonak Zosangliana ani tih ka hriat vangin ka chhang lo, "I u a awm em? Zaninah ka lo leng dawn a nia" tih min lo thawn a, Irene-i biak mai tur alawm ka lo ti rilru a.








Engvanga mipa laka inla hrang tlat nge ka nih hi midang bulah ka sawi ngailo, ka ṭhian ṭha ber Alawmi bulah tak ngial pawh ka la sawilo a, bum ka nih tawh vangin mipa hi ka ring ngamlo a chhan chu tihsual leh hi ka hlau a ni, chuloah kha min bum tupa vanga ka rilru natna hi a la damkim tlat lo.








Khapa min bumtu kha mipa duhtak ka neih awmchhun ala ni, tun thlengin ami phuarna te pawh a la phelhlo, Mumbai-ah khan khawhar taka ka awm tur kha min hnemin minti hlim em em ṭhin a, pasala neih hial pawh hrehlo a ka thinlung zawng zawnga ka rin laiin Mizoramah ngaihzawng nghet alo nei reng tih ka hre ta kha ania, a khawhar hnemah kei kha minlo hmang mai mai chauh a, ka ngaihtuah ringawt pawhin ka na thar leh ṭhin. LALRINHLUA a hming ringawt pawh hian min la ti na a ni.







Ka room kawngkhar ri rak vang chuan ka harh zawka, ka lo chhing hman sek chu niin. "I van mu hma em em ve a, lo tho vat rawh inleng i nei ania" Irene-in a lo tih chhuan ka tho peihlo kher mai, "Tu nge a?" mit nuai chat chat chungin ka tho chhuak a "Jonak, i hmai te kha phih rawh" tih leh kawngkhar khar rik ṭhuai a rual a, enge maw a hriat teh vak vak ni!









Sitting room a ka phei lai chuan bawp lehlama ke hlang ar ar chunga Jonak-an min lo nuihsang chu ka va hmu a, ṭhutthleng danga ka ṭhu chu rum zetin Irene-in min lo melh a, ka ngaipawimawh duh biklo, tunah tak phei chuan ka chauin ka mut a chhuak takzet.









"I van mu hma ve?" Jonak a hmel pawh enlo chuan "Vawin chu ka nuamsam vaklo a" tiin chhuanlam ka siam a, "Patea te hi an awm nange?" Irene-i chu ka zawta "An leng chhuak" tih zawngin min chhang a, jonak a biak chuan nuisangin a chhang a, kei erawh min be bung nghut nghut a, ka laka a lawmloh ngawt chhan chu ka hrethiam pha derlo.









Rei pawh kan ṭhutho hmain a tho nulh a, a room lamah ava tawm ta tlat a, Jonak nen chauha kan ṭhut tak reng avang chuan sawi tur ka van kher mai. Tv kan en duna min be zauh zauh chu arul tawk lek lekin ka chhang a, aning ta deuh nge ni a tho thut a, haw a tum ta mai emaw ti a ka lo en laichuan ka ṭhutna bulah min si chet hian a lo ṭhu ta mai a, min ti hamhaih lek lek a ni!









Tv lam chu ka melh lui ngar a, ka awm a nuam zanlo kan ban a insi ran a a hmel enlo mahila hnai takah min enreng tih lah ka hrechiang viau.









"Ka message kha i chhanglo a?" zawi supa a tih chuan "Ka..lo muhil daih a" ka ti leh ngawt a, min enreng pawh tih tawh naklaiin kan inṭhuthnaih lutuk mawlh mai chuan min ti hrehawm zual.







"I û khan a hrilh tawh che em?"




"Eng thil maw?"





A nuih deuh hak vangin a hmel chu ka en a, ka tum aia hnaiah min lo en vangin ka mit ka la sawn leh thuai a. "I van zakzum tak" a tih chuan za lo zetin ka lo nui ve a.









"Ih maw...ka duh che a" a rawn ti tawl mai, a uang em mawni zawk le! A nui bawk si a a uang anih ringin ka nui ve ngawt a, chutah min fawh tumin min rawn hnaih nghal ruaka.









Ka ding chhuak hluai chu phawk lutuk maiin min en a, tunah khan ka hmuisir a rawn thawi thuak hman a ni, keipawh ka hamhaih ve tho "Enge..maw..i hriat le?" ka ti bah nak a. "Ka hrilh che kha, ka duh che" a nui hmel chu ka haw rum rum mai, hepa hian hmeichhe easy tak turah min ngai chu ani chek ang, zaktheilo reuh lutuk.









"Min hrethiam teh" ka ti chang fak a. "Ti nge min duhlo maw?"a nui hmel leh a ṭawng rik danah chuan chapo na a lang tlat tawh.









"I mizia ang hi chu ka hrehnem tawh a lawm, inla zakzum vel duh suh ka thiamloh a nih kha tihpalh aw" mit min siai zauh paha a tih leh chuan thawk ka lo la hak a, a ṭawngkam hman duh danah min zahpah loh zia chu a lang chiang viau, ngaihdam min dilṭha ta mailo a ka mizia a sawi tel zauh chuan amah ka eiloh rukna kha a ti zual ting mai bawk.








"Enge ka mizia chu?" ka ti chang leh fak a.







"Engmah nilo e, lo ṭhu rawh engtin mah ka ti dawn lo che" tih leh min pawh a rual a, ka inrin hmain ṭhutthlengah chuan min pawt ṭhu hnawk ani ber. Rang takin ka tawlh hla nghal thuai a "Min rawn dek tawh hlek suh" ka lo ti vin hlar a. Chutihlai mekin Irene-i chu room aṭangin a lo chhuak a, a hmel ka hmuh rualin ka tho vat a, kan ṭhutna lama a lo phei mek chu kalpel hmakin room ah ka lut a, kawngka ka kalh zui hmak bawk.









"I mu a mi lo chhuak leh rawh, ka tih palh anih kha" Jonak-a message chu enin ka ner sawk a, a number chu Block nghal hmak mai ka duh rum rum a ni.









Patea te lo haw thawm ka hriat takah chuan ka hahdam huai a, an ṭawng ri nak nak chu ka hrepha a "Mambawih" ti a Nu Muanin min lo koh chuan ka muhil der tlat thung, thingpui lum turin min ko anih chu ring tho mahila Jonak-a len laia chhuah phei leh chu ka tum tawh hauhlo.









A haw ta a niang thawm chu a reh dak a, reilo teah ka room kawngkhar chu a rawn ri dawt dawt a, Irene bawk a ni. "Lo hawng teh" aw vin lek leka a tih chuan ka tho chhuak leh ta nge nge a.









"I van che ṭhing thei ve a, min ti zak lutuk" ka room a rawn luh pahin min nek deuh sawka, Irene-i hian ka tana ṭhahnem ngaih lam aimahin a ṭhianpa tan ṭhahnem angai zawk tih chu ka hreve kar, zanin pawh khan chu chu a ti langchiang viau a ni.









"A zaktheilo emai" ka lo ti chu min chek khum hlak a. "Nang hi chu a, thingtlanga i awmlohna a rei tawh tehreng nen tinge i changkan theih miahloh le" a sawi ṭhan fo danin thingtlang nula ka nih thu chu a sawi leh a, min hmuhsit dawn apiangin chu thu chu a sawi ziah, keiaiin lehkha a thiam a zeng pawh a nilo, min hmuhsitna tur a hriat ve chhun hi ka laka a lungawiloh chang apiangin a sawi ṭhin.









"Jonak hi i hnawl anih chuan i mawl ngawt ang" a thusawi chu ngaithlalo zetin khumlam ka pansana "Nangte hi ngawireng hian i luhlul zek mai, ka pi leh pu te pawh ngaihtuah ve la, pasal ṭha tak i neih angai ania, mi ngaihzawng te kha ilo chuhpui leh ngawt ange" a rawn tih rual chuan ka inpetruh ṭeuh a, "Engtik aṭangin nge ka pi leh pu te chu ilo ngaihtuah ve a" tih nghat pahin ka mutsan a, a thusawi duhdan kher chu ka la na ngang mai, ka dinhmun engkim hre vek tuin mi ngaihzawng chuhpui chhuah a min chhuah chu na ka ti.










"Jonak khan a lo biak che chuan ṭha deuhin lo chhang ang che" a tih leh hnuah ka room chu a chhuahsan a, ka thawk a ipik tak zet, ṭah chhuah hawm hawm mai te pawh ka chak a ni. Ka awmdan chu ngaw thim khup hnuaia thingkung tereuh te ang vel niin ka inhria.









Mal riaua inhriatna te khawhar rukna te hi chu ka nei reng ṭhin, ka nunah hian hlimna em em han sawi tur hi ka nei ve meuhlo, thil tum pakhat chiah ka neia, chu chu pawisa thawh chhuaha ka pi leh pu te damlai ngeia kan in sak a ni, a bak chu. hmalam hunah ruahmanna engmah ka neilo a bik takin ka tan.









"I van inngaihtuah mûk em em ve a" ka dawhkan rawn ben thak paha Alawm-in a tih chuan ka lo phu deuh zawk a, Vawin chu minlo sawmlo a Patea Hruaia Office dawr tur chhuah ruala ka kal avangin ka thlen khalh a ni.









"Mambawih Coffee kan la dawn a i duh ve em?"Malsawman a tih chuan lu ka lo thing a, Uzodina thil sawi vang khan ka be hreh zo vek tawh, Office khatah thawkin nitin kan inhmu si a, in bahsualpalh ka hlau a ni ber mai.









Alawmi nen an inzui chhuahlai chuan hna ka lo thawk mawlh mawlh a, rei vakloah Coffee no chawiin an lo inzuilut leh a "Hei...thil ṭha deuh hrilh tur che ka nei i buai em?" min kal pelh paha Alawmin a tih chuan rindan ka lo nei hman hmawh a, Malsawman enge maw a sawi ani ngei ang, ka buairih thuin Alawmi chu ka chhang a, a sawitum ni a ka rin chu ka hre chak hlawllo.









Chhun chawlhah ka dawhkan bulah lo kalin "Zo vat vat teh, thil ṭha lutuk ka hria a nia" a rawn ti leh sar sar a, "Ti khan sawi maila" ngaihsak manglo zetin ka lo ti a.









"Social welfare department ah LDC hna a ruak a dil ve la ka tia" ka beisei loh lamdaih alo sawi vang chuan ka thil type lai chu ka chawl dat a "Form an pe chhuak tawh em?" ka ti nghal thuai a. "Online-in kan submit dawnnia, i hmu ve hlauh anih chuan a ṭha dawn emai, hna nghet ang tluk a nimai a" a ti zui mawlh mawlh a.










Keimah zawk chu phur tak ka ni, mi aikal reng chu tawp chin a awm leh vat dawna, hna dang ka zawn ngei ngei a ngai.









"Ka dil ve chak e" Alawmin a tih chuan hrethiamlo fein ka lo en a "Enge chak tur awm, i hna thawh nen a in ang reng a lawm le" ka lo ti a.










"Aw....JH-a te Office ah ania lawm..ka chak ve ê...hna i hmuh hlauh chuan kan in kal thleng ṭhin tal dawn nia aw" hmui petsawi nang nang chunga a tih leh chuan ka nuilo theilo.



(Story hi kal chak vut2 chi anilo a mahse, uluk deuha in chiarloh chuan nakinah inla keu let sek ang)

Give away kan ti dawna hetiang hian rules kan siam ang aw.

1. CHAPTER tina comment pe zat zat, pe kim vek chauh a huam ang.
2. COMMENT satliah niloin a chapter chhungthu ah story behchhan zela feedback pek tur.

Lawmman hi Christmas cake lianṭha tawk tak Lucky winner pakhatin a dawng dawna, fair takin kan kalpui anga in comment na kha kan lo ss thlap thlap anga kan chhin chhiah vek dawn ania.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 28th, 2021, 12:01 pm

GOMENASAI - by Aviolette



CHAPTER - 3





Zanah chuan kan inbe zui a, hna dilna form pawh min thehluh sak nghal a duh vangin ka Resume min lo dila, ti ve thei tho mahila a phur teh hawrh lutuka amah chu ka tihtir vek law law ta mai.







Kan veng ṭhenawm lawka an awm avangin kartawpah pawh kan inhmu ve zauh zauh ṭhin a, kan inhriatna la rei fahranlo mahse ka ṭhian neihchhun leh ka ṭhian ṭha ber a ni lawi a, amah vang hian aikal hna pawh hi ka lo thawklo ang tih te pawh ka hlau rum rum tawh zawk a ni.








Uramtei bulah hna ka dil ve thu ka hrilh chuan ṭha minlo tihpui khawp a "Mambawih sawrkar hna chu hna hniam tê pawh nise dil vek mai tur, keini ang tan chuan ṭha ve deuh mai ania, i vawikhat hna dilna ah i tling nghallo anih pawhin i hmuh apiang dil zel la, i chan pual chu a la rawn awm ve em em ang" tiin min chah zui mawlh mawlh a.








"Lo tling ve hlauh ta ang ila, i aikal tur hi i hmuh leh thei mai ang chu tiraw?" inthlahrung ru ang reng taka ka tih chuan "An awm veleh mai ang, chuloah keipawh Chemo ka khai zawh ah ka zia deuh chuan kal ve leh te pawh a ṭha tawh a lawm, pûte lakah pawh a inthlahrunawm ve mai dawn" a ti sap sap a, "Ka tlin kher pawh ka ringlo mahse, tlin ve tak hlauh chuan a tihzia dawn emai.








Kar tawp inrinni chu nilengin Nu Muani nen bazarah thawmhnaw semin kan buai a, bazar huhang hi ka zo meuh ṭhinlo, chumi ni pawh chuan ka chau hle a, zanriah eikham hlim aṭangin ka lu a na bur reng a, inkhawm ngei ka duh si avangin ka insiam lui ta tho a, Sermon ngaihthlak laite chuan ka lu chu a na ngut ngut a ni ber, ka mit a kham urh mai bawk a, inkhawm ban ṬKP ṭawngṭai pawh awm khawmuang ve tawhloin ka haw nghal nal nal a, In ka luhruala Jonak-a te ṭhianho ka hmu chu nuih a za duhlo kher mai.








"In van inkhawm rei ve, kan nghakchhuak zo lo mai dawn che emaw kan lo ti hman alawm" Jonaka ṭhianten an lo tih chuan "Nia ka rin aiin Speaker in thu a sawi rei a lawm mawle" tiin ka room lam ka pan zui a. Mut hmak mai ka han chak tawh tehlul nena.







Tawm bo reng theih ni heklo le, phurlo fe chungin Sitting room lam chu ka pan ve leha "Mambawih thingpui han lumsak rawh, an nghak rei tawh che emai" Nu Muanin a tih chuan ka tho leh thuai a.








Thingpui no chawia ka let leh laichuan Nu Muani hoin an lo ti ti barh barh a, Nu Muani chuan Jonak chu thil a zawt chîk khawp mai a, an chhungkaw chanchin leh an sumdawnna lam thlengin a zawt chip chiar kher mai, ka lo ip ru deuh a Jonak chuan ngaihloh lamah a lo ngaih daih mai ka hlau a, Nu Muani lahin a pak nghal huam mai bawk si.








Chumi zan aṭang chuan zantin deuh thaw a lo leng a, Irene-i ṭhian mah nise keimah min lo rim tura lo kal anih ve tlat avangin lo tawm bo daih theih lah a nibik silo a, Irene-i lah chuan min suihzawm a tum khawp mai a, a nu leh pa hriata min chhaih chang phei chuan thin a rim lek lek ṭhin, Jonak chu chungkaw dinhmun, sum leh pai lamah chuan ka cho rual a nilo a lawm mahse, a mihring mihrinna ang zawng takin ka ngaina lo a ni tawp mai a ni.








Zantin deuh thaw a inhmu ta nafam chu kan in be tlangnel ve ta deuh hlek a, Irene-i bulah hian lenchhuah ho puia min lo sawm tur hian a lo chah fo a, Irene-i lahin min tur sek sek reng a, chhuanlam ka siam mai zel tak na in chuti chung chuan a beidawng duh hauh chuanglo.








Bazar pui tur ang te leh thil pawimawh deuha kalpui tur anga min hruai chhuakin an ṭhian ho thil tihna leh Jonaka tel ve na hmuna min hruai te a ching a, tum loh deuhin an zingah chuan ka tel ve ta fo a, Jonak pawh nel ka tumlo a ni biklo, ṭha taka min bia chu tiin nel chu ka tum ve ṭhin mahse ka hrechiang telh telha ka duh zawng a nilo telh telh thung, mipa lêm si ah chuan a dak thei lua deuh a ni, a thiante incheina nuihsawh te, mahni insawi theih te bakah mi rel a sam tlata chu chu ka ngaina lo.







Irene-i bulah chuan "Jonak nen hian min suihzawm tum tawh suh, ngaihzawng ka nei" tiin dawt ka hrilh ta tawp a, hetia ka tihloh chuan min tibuai chhunzawm zel dawn tlat, Irene-i bula ka sawi ṭum chuan "I â sia a, thingtlang tlangval ṭhing deuh neila i inhmeh tawk chiah" min nuihzat fein a ti a, ani rui deuh chu ka chhang zui duh lemlo thung, a an a chhe angreng si a lo inhnialin lo inhau ve fo tawh mahila ani nena buaina hi chu pumpelh hram hram dan zawn zel chu a fin thlak ber.







Jonak chuan min la be chhunzawm ta zel tho a, Irene-i bula ka sawi chiahin a bulah chuan ka sawi ve bawk"Ṭhen mai rawh, ka duh ve tawh che a lawm" tih zawngin min lo chhang a nih chu, a tihngaihna tak pawh ka hre tawhlo ka ten lamah a kal ṭan tlat tawh.








Chhun zan zawmin Message leh Phone call a rawn ti tluk tluka, min runluih zawk emaw tih tur a ni, Alawmi bula ka sawi chuan min ngeipui nghal hle a "Ka ten zawng tak a ni, a lo Call leh che chuan lo ṭim hrep rawh" a ti zui hlak hlak a.








Zan khat chu Sunday zan ka inkhawm bang hi kawtah min lo nghak a "I u te nen ka Birthday kan lawm ho dawna, tunah khan an ni chu an kal liam chiah a ka lo la nghak che anih hi" a lo ti sawk sawk a, a meng sen deuh ram a a rui tih ka hailo.








"Ka lo kal ve lo mai ang, u Irene-i a lo kal tho chuan" tiin ka hnial a, inchhung lampana kal mai ka tum chu na zet hian min pawt lek sawk a min ti phu chiang kher mai!








"I va ti mak e aw, min thlah vat teh" tih leh a kut chu thinthlak ka rual a. "I chhungte pawh kan dil vek tawh, min lo zui mai teh" ti lehin a Car hunna lamah chuan min pawt phei dawr dawra, ka ṭang viau nain pheikhawk sang ka bun bawk nen duh angin ka ṭang hleithei lo.








Car hma kawngkhar chu hawngin min namlut rawk rawk a, min namluhna kawngkhar aṭang bawk chuan amah chu a lo lut a, a tihdan chuan min ti hlauthawng viau tawh, au vak maitur emaw ni ti a ka ngaihtuah laimekin Irene-in min lo call a "Hmanhmawh rawh u, Jonak kha khalh chak deuh tir rawh naupang hoin Cake zai an chak tawh a nia" a rawn ti lang lang a, lawmlo viau mahila min hruai a tum ruh nasa mai si a, sawibuai lo a zui mai chu aṭha zawkin ka hria.







Kawng tluanin ka ṭhu tum bur a, min biak pawhin a rul tawk lekin ka chhanga ka lungawilohna chu thup ka tum heklo, Irene-i bulah pawh ka sawi leh ngei ang. "Min thinrim khum tawhlo la, ka birthday te anih ve hi" nui hau chunga a lo tih chuan hmalam ka melh lui ngar a, duhlo chunga inpawh luih ngawng ngawng te an thiltih apiang a telve tura min tilui fo te pawh hi ka kham ve zo zai ta.







"Hetianga in ti fo hi ka bialpa ka hrilh hunah chuan a lawmlo khawp ang" vau ti tih hian ka han ti a, ka biak laia a hmel phei chu ka thlek buai peihlo, a nuiri suk suk erawh ka hre tho.







" I bialpa kha tunge min hrilh tak teh, a hnenah chuan nanghi ka dil duh che ania" nui kur kura a tih leh chuan ka insehruh ṭeuh a. A zaktheilo ka ti lehpek ngang mai.







"Ṭawng liam mai mai lo la anih chu, in thiltihna ah hian vawikhat mah min tel leh tawh bawk suh u" ka ti leh hmak a, " I tello in kan kim thei nang" ka lam a rawn hawi leh rualin tukverh lam ka hawisan vat a, min biak leh pawh chuan chhang buai duh tawhloin pawn lamah chuan ka dak chhuak a "Khawi ami maw i bialpa chu han sawi chiang tak tak teh" ala ti ta ṭalh a.







Khawpawn lam pana kan tlan ka hmuh rualin ka ṭhu ngil hluai a "Zosanglian khawnge min hruai i tuma" ka ti vin nghal hlar a, ka rilru a hlauhthawnna leh thinurna chu a inzat thuak ta ve ang.








"Aw....ka Birthday lawmna ah" awlsam fe hian a lo ti duh lek a, kan tlanna lamah chuan in a tam tawhlo kher mai, kawngpui pangngai aṭang khan kan peng hrang daih lehnghalin ka hria, ka Phone chu ka hum rauh rauh a, leimin thar lam tak tak awmna kan tlanpelh laite chuan ka awm a nuam tawh mawlhlo a ni.







Rilru hahna ti zualtur ting chuan "Kan ru bo daih teh ang che"a la rawn ti tak deuh deuh a, ani zurui phial phual ngaihsam bawk si hian tiloh loh a ti duh mai ang tih ka hlau et et tawh.







Vengchhung kan tlan luh leh hnu chuan ka thaw deuh huai a, henglam veng hi ka la kal ngailo, khawpui chhung nilo in khaw daifemah kan awm niin ka hria " Hei hi khawi veng nge" ka tih lah chuan "Kan inneih huna kan awmna tur veng anih hi, nuam iti em?" tiin uang thuang zet zet hian minlo chhang a, hahthlak chuan!







Khawi vengah nge kan awm tih hriat tumin kawtthler vela an Signboard tar vel chu ka melh kual ruai a 'Chawlhhmun' tih nimaiin ka hria, in awmna ah chuan ding ta mailoin a tlan zui zela, kan thleng hla tawh mai si a ngaih a ṭha tawhlo takzet. Irene-i biak tumin Phone chu ka hmet mawlh mawlh a, chutih leimek chuan ka chuanna Car chu a ding ta dat a, ka hawi chhuah chuan In pakhat kawtah kan lo ding fel der tawh.








"Hei, tute in nge a?" Jonak te in chu Zarkawtah a awm tih ka hriatchian em vanga zawt ka ni. "Keimahni in tho anih hi" tih leh kawngkhar hawn a ruala, keipawh ka chhuk ve nghalthuai a.








In chu changkang leh nalh thawkhat tak a ni, a landan maiah chuan sak thar tih a hriat hle bawk, kawtah chuan Motor leh Two wheeler enge maw zah hi a in hung tlar dala, awm an ṭha hnem viau aniang an thawm pawh a ṭha ham ham viau mai.








Gate a kan inzuilut chu pawna tlangval lo ṭhu bial laih ho chuan min lo chhawn a, Jonak chu lo fiamin an nui dar dar a, chumi hnu ah inchhungah kan inzuiluta nula leh tlangval an lo awm nak nak a, a ṭhenphei chu ruih hmel tak tak an ni, Jonak chu ka hriat ve ber anih vangin a zui zel loh theihloh, Rap music ring deuhin an play a thawm bengchheng zet karah chuan Irene-in min lo au lauh lauh a.








"In van rei em em ve, kawnglakah inding zeuh zeuh a nilo maw?" meinei zeta Jonak leh kei min melh pah chuan a lo ti ham ham a, engemaw zawng tak chuan a ngeiawm ve lek lek.








Cake an zai laichuan Irene-i chuan min rawn din hnaih salh salh a " I at i so lehpek em ni, hetiang te a rawn inthuam reng reng" tiin ka incheidan chu a melh lawr dan dan a "Ka inkhawm alawm" chiang fek fawka ka lo tih chuan a ngawi ta daih a "Hetiang thil ah hian ka telve peihlo tih i hrereng sia tinge min tihluih tlat zel, i thu hmuloin ani khan engmah an ti dawnlo a, nidangah chuan min râwn loin engmah lo ti tawhlo ang che" vin lek lek a ka tih chuan ngei hmel fe hian min melh ve a.








"Be ṭha viau rawh, i rualin ka haw dawnlo ania, i inthlah tir angai leh dawn" ngeiawm zeta min nuih hnuah a kalsawn zui a ka unaunu chu ani tak sia! Min ngaihtuahna hi pakhat te mah anei hauhlo, hetiang chuan rindan leh pawh dan tawk thiam angai dawn tlat, chuti lo zawng amah vang hian ka duhloh danin ka la awm nulhin ania ka rin tawh ni.








Cake zai zawh hnu chuan Irene-i emaw Jonak-a hmel chu ka hmu ta miahlo a, hmelhriat ka nei bawk silo a haw vat ka duh ber tawh, Irene-i ka phone a a bengchhen em vangin eng ri mah ka hre hleithei derlo a, inhnung bathlar ah chuan chhuak pheiin Irene-i chu ka Call ṭha leh a, mipa ṭhenkhat an lo awm avangin va kal chi ani lo tlat zu an in in ka hria, hetiangah hian ka hlauthawng ruai nghal zel lehnghal.








Inchung zawl chhohna Stepah chuan ka tlan chho hlawk hlawk a, mipa ho khan min hmu hmanloin ka hria a, zawl ka thleng chho chu ka thaw huai a, chulai chu a rehin boruak pawh a nuam viau, Room lian angreng deuh hi alo awm a, a kawtzawl ah chuan ṭhutthleng ṭhutmut theihna tur chi leh dawhkan a inhung a, pangpar a vul chik chek lo nain a in an sakdan chuan min hip em em thung.







Irene-i ka phone tlang theilo lutuk chu ka phun zui hlak hlak a, ka ruala haw tumlo eng ang mahse min ngaihsak ve deuh tur chu a ni, Patea bula zualko hial ka duh, kei min hnuklut tel ve zel ringawt pawh hi ka lawmlo takzet. Jonak inthlahtir leh aichuan Alawmi phone mai ṭhain ka hria, min lo hruai peih thoin ka ring.







Alawmi ka phone leh dawn laitak chuan tu emaw hian hnunglam aṭangin ka kawngah min lo kuah chawt a, ka phu nasa lutuk chu ka rak chhuak ṭhat a, ka inher ruala Zosangliana hmel ka hmu chu ka thinrim hlur ringawt mai a ni. Zu rim lah chu a nam nasa em em mai leh tanghal a.







"Min thlah vat teh" tiin a kut chu ka pawt chawt chawt a, a sak ṭalh mai.







"Enge i hriat a?" a awmdan chu ngaihdan ka nei thiam ruak tawh, thawk la huam huam chungin min pawm bet rawk rawk a, ruih hmel viauin lang mahse mipa nge nge chu tha ah ka la hnehlo nasa a ni.







"Min thlah vat loh chuan ka au nghek dawn ania aw" ka tih pawh chuan min fawh tumin a la rawn hnai deuh deuh a, ka lo thle sawn a anin a tumlui ngar ngar a, kan insual titih ani ringawt tawh. "Zosanglian" thinrim ṭah chhuak ṭeuha ka tih pawh chuan a ngaipawimawhlo kher mai. Ka kut chu hnung lamah ka kherh beh tlat vangin ka chet thei der lo a, min fawh a tum laia lo thlek sawn leh tal chiam bak chu kan tan ṭanlak a har takzet a ni.








Chutia kan inchai buai fat fat laichuan kawngkhar a rawn inhawng ri rak a, "Min pui ru" tiin kei ka lo au nghal chul a. Mipakhat lo chhuak ka hmuh rualin Zosangliana pawn min thlah ve nghalthuai a, chupa lamah chuan ka tlanphei nghal hlawk hlawk a ni ber e.








Dawhkan bulah chuan dingin thawk ka la te te a, ka kut a chelh behna na ṭhum chu ka tuai vat vat bawk a, mipa lo chhuak khan min kalpelin Jonak chu a pan phei a "I rui lehpek elaw?" aw thum deuh dut a a tih ri chu ka hre pha.







"I chet dan mawilo tak hi ipa ka hrilh hmain haw nghal vat rawh" mipa chuan a ti chang leh bawl a, "Utluangte ka bialnu anih kha, i ngaih ang kha ani reng renglo" Jonak-an alo tih chuan "I bialnu ka nilo" ring fahranin ka lo ti a, ka thinrim lutuk chu ka sa pup pup a ni ber mai.







Chutah mipa chuan ka lam a lo hawi a, ka hmuhhnu a ang viaua mahse ka hmuh tawhna ka hrechhuak thei mailo. " Haw rawh ka tih che kha i hria em?" Jonak-a lam hawi a tih leh takah chuan ka lo thaw huai a, pakhat zawk lah chu a lo la duai duh hauhlo.








"Mi inngaizawng inkarah chuan inrawlh lo teh aw" a lo la ti chher chher a, a ngaihzawng anga min sawi chuan minti thinrim zual telh telh bawk. "I bialnu ka nilo" a lampan kal pahin ka ti zui zat a, mipa pawh chuan mak a ti deuh aniang a bul ka thlen rual chuan min lo en vung vung a, hnai deuha a hmel ka hmu ta chu tu nge anih ka hrechhuak ta chiah a, ka zak thar kher mai.








"Enge in awmzia?" Jonak leh keichu min entawn a, "Utluangte ka bialnu nen kan inhau anih hi mawle?" vin fahrana Jonak-an alo tih leh chuan keimah zawk chu min en daih thung a, ka chhang ṭha ngam tawhlo, ka lu ka lo thing ringawt chu a hrethiam em ang chu maw?







"Zo-a hmeichhia in i bialnu anihloh thu a sawi mek hi" inkuangkuah at in keimah zawk chu min la melh ngara, a tu zawk lam nge a ṭan ka hrethiam tawh lo.








"Dawt ka sawilo a nia, min ring rawh JH....hepa hi ka bialpa a nilo" ka sawidan chu keimah ngei pawh mak ka inti, khawngaih dil ang mai a lawm ka nih le.







"I nilo ang" ti leh nghutin Jonak zawk chu a en ta a "Inhnuaia i ṭhiante khu khawmla haw tawh rawh u" awki ring hauh silo chang zet mai hian a ti a, Jonaka lo nui hak chu haw em em in keiin ka lo melh thung.







"Cousin te bialnu pawh i chhuhsak dawn elaw" Jonaka kawr awmah chuan a ṭham nghal ṭawk a, "I ruih laia sawisak hrep nge i duh i harhfim deuh hnu ah, nge ni a ka thu zawmin i haw zawk dawn?" a tih leh chuan a dawhthei bik vak tawhlo tih a hriat hle, Jonak chuan kamkhat pawhin han chhang leh sela chuan a hneksawk duh dawn tih a hriat reng tawh.








Rum zeta min melh leh hnuah Jonak chu a chhukthla a, ka thaw huai mai. Mahse, ka bula ding mek vang chuan ka awm a nuamlo telh telh thung, a hmel chu ka en chho ngam derlo leh nghala.







A awm zawna melh ngar chung chuan "Ka lawm e aw" zawi deuh tak hian ka ti a, min chhang hauhlo.







Kal mai tuma ka inher chu "Haw na tur i nei em?" a lo ti khauh a.







"Aw...ka ṭhiannu ka Phone dawn a min lo hruai thei mai ang" ka ti leh a, a hmel ka en chuan lawmlo hmel a pu lek lekin ka hria. Nichin khan a hmingin ka ko mai bawk sia mak chu a ti ve ngawtin ka ring.







Min chhang leh tawh bawk silo a, lai angreng zet hian ka ding a "Anih...ka ..kal ..phawt mai ang" bah nak nak a tih pahin ka inher leh a " Ṭhu rih rawh, an chhuah hunah i kal dawnnia" hnung lam aṭanga alo tih chuan ka ding chiang kher mai. Ngaihtuahna chang ka lo hre miahlo, Zosangliana khan inhnuai lamah min lo la nghak lo ang tih ka hre reng reng hleinem mawle.








" I ṭhiannu chu Phone la" a tih leh chuan Alawmi chu ka phone nghal thuai a, ṭhutna tur min kawhhmuh lam ka pan lai chuan a dinna ngaiah dingin ka che vel chu min lo en reng thung a, ṭawng dam dup siin lungawilo hmel a pu reng chuan awmdan min ti thiamlo lek lek bawk.







Alawmi chu ka call a a tlang thei hauhlo mai a, ka tih nawn leh pawn awmzia a awmlo, ka phone ka en chuan Signal ka lo nei reng reng lo a, ka piah deuha ding lah chuan min en ran mai si a, ka rilru a buai ta kher mai.







"I be thei em?" a tih chuan inthlahrung fe hian "I phone min lo hman tir" ka ti ta ringawt a, ka lampana a rawn pen phei hlawk hlawk lai chuan a hmel a danglam miahlo, mi inthunun thei tak anih ka ring ringawt a, anih loh vek chuan a nui ngailo ani maithei.








Rooma a luh hnu reilo teah Phone kengin a lo chhuak leh a, "Kha" pawh ti hranloin min rawn pe thawr a, ka Phone hmangri hriat ve tum niawm taka min en reng chu nuam lo ve duh tak a ni. Tho chhuakin hla deuh hlekah chuan Phone chu ka va hmang a, Alawmi chu ka phone a vawi hnih vel a ringa a in Off daih a, ka tih nawn leh pawn a Off zela, ka hrethiamlo kher mai! Tinge maw a Off zel le?








Ka lampana JH-a lo kal ka hmuh rualin Phone chu ka bengah ka chuktuah nghalthuaia, ka be der ta ringawt mai. Signal awmna hmun ka thlen hunah ka be thei tho turah ka ngai.









"Enge a sawi?" Phone ka dah ruala ka hnung a miin a lo tih chuan "A lo kal dawna, Ramhlun aṭangin a Scooty in engtia rei nge thang ngai ang aw?" nuilui sak chungin ka ti a.







"A tlanchak chuan a lo thleng har lo ang, lo va ṭhu rawh" tih leh inher a rual a, sawi tur a pai tamlo ve ngang anih hmel.








Ṭhutthlenga ka ṭhut leh hnu chuan Room aṭangin a lo chhuak veleh a, Energy drink hi min lo pe a "Vawt i ti em?" a tih chuan 'aw' nge 'aih' ti a chhan tur ka hrethiamlo.







"Vawt vaklo e" tih chuan ka chhang ta tho a, puan ka bih vangin a tawrh theih viau rih a, ka banlam erawh a hit veng veng reng thunga chu erawh ka sawi ngamlo nasa.








"Vawt iti anih kha" a lo ti leh khauh a, a sawidan chu "Vawt lo" ti a lo chhan chi ani tawhlo, a puhin min puh ni berin ka hria. Room a a luh leh hnu chuan keimahin ka ṭhensaka, a mizia chu ngaihdan neih thiam har tak a ni, a nelawm loh hmel hle a mahse, a nelawm ru riau lawi si.








A aw lah chu country hla a sakthiam hmel em em leh nghal, aw ki thuk ruih leh thum dut mai anei tih hi Alawmin a hre tawh angem le? Phone han chhang thei sela chuan JH-a nen an inhmu thei mai tur ania, pawi ka lo tih pui ani, a hriat huna a awmdan tur mawlh ka ngaihtuah.









"Ha rawh" tih ri ka hriat rualin ka hawi chhuak zawk a, ka mal chungah kawrlum a rawn thehthla nghal tawp a, "Ka neih tet ber a nih kha" tih pahin ka piaha ṭhutthlengah chhuan a ṭhu a. A kawr min lo pek chu Hoodie senduk a ni a, a lian ṭha viau mai, kekawr ka hakloh vangin ka han ha chu ka lang hnawk ṭup lehnghal a, pheikhawk sang ka la bun zui nen nuih a za duh viau.








Minute 20 vel hnuah chuan "Kawngah ka lo zuk nghak teh ang" tiin ka tho thut a, "Minute 20 dang la nghak leh rawh" a lo tih chuan phawk zetin ka en a, dawt ka sawi fuh chiah lo chu a ni, Dar a tlai zela Signal awmna hmun ka thlen vat a ngai tawh zawk a sin mawle.








Minute sawm vel chu inbe miahlo in kan ṭhu a, a phone a en daih bawk si a, han biak hmasak chu ka hreh ve tumhranga, ṭhut hle hle pawh chu ninawm ve duh tak a ni. A hmel ka va en chuan sir lam min chhawn a, tinge maw a awm mai mai pawn tum hmel a put reng mai le!








"I duh chuan chhuk tawh la" ka en reng laia a lo tih chuan ka phu deuh zawk a, a kawrlum ka hak chu ka phelh nghal sawt sawt a "Jonak te kha an kalliam vek tawh angem le?" biak loh aiah chuan ka ti leh hram a.







"Kawngah an lo chang mai thei che" a Phone khawih mual mual pah a a tih chuan ka meng tal tap a, ka hlauthawng nghal tet tet bawk, min lo chang anih teh chuan Alawmi nghah ka ngai dawn bawk si a, ka che chhe khawp ang le!







"Ka uang anih kha" a tih leh rualin rang lutukin a hmel chu ka en a, alo nuisuk mai. A nui hmel chu a ṭha ka ti, ka ti takzet!




(Mikhual ka neia, ka tlai phah ta vek a ni e, comment lamah lo lang vek ru aw)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 28th, 2021, 12:01 pm

GOMENASAI - by Aviolette



CHAPTER - 4



images (57).jpeg
images (57).jpeg (18.95 KiB) Viewed 10221 times


"An chhuak fel tawh" a phone hmai ka lama rawn lek zauh pahin a ti a, ka bih hnaih chuan CCTV camera in a lak chin inhnuailam inchhung leh Gate pawnlam thleng chuan a lang thei a. Tumah midang awm an awm tawhlo tih hriat takin a reh ṭhuap tawh.








Step-a ka chhuk thlaklai chuan ka hlauthawng deuh tlat a, kan in leh tuna ka awmna inkar inhlatzia leh a fal zia te chu ka hrenawn a, Zu rui emaw tlangval awm ṭha duhlo tawn fuh mai te pawh chu hlauhawm tak a ni, Alawmi nghah chhung ringawt pawh mahnia kawngpuia lo awm chu ka hreh ru riau a, inchunga awm tlangval lah chu min lo nghahpui turin ka phut ngam der mai silo.









Kawtah chuan chhuak pheiin Gate chu thawm dimtakin ka pan a, thla a eng bawk silo Light in a chhun phakloh chin ka thlen aṭang chuan ka zam titih der mai! Ka phone ka en chuan Signal chu pakhat lekin a lo awm va va a, Alawmi ka Phone nghalthuaia mahse, beiseiloh tak maiin Switch off a ti ta tlat!






Tihngaihna a vang duh kher mai.






Kawngpuiah chuan chak takin ka pen phei hlawk hlawk a, Patea Phone mai chi em ni ang tih chu ka ngaihtuah buai nasa tawh, ka Phone a nih chuan ka laka a thinur dan tur chu hriat sa a ni, chhuanlam siamin awmzia a nei leh dawn derlo bawk. Uzodina ka be zawk mai dawn em mawni tiin ka phone chu ka bih leh vang vang ṭhin a, hetiang thila thawhpuite han tihbuai tawp mai chu nithei ngangin ka hre bawk silo. Ṭhian ka neihloh em vanga hrehawm ka tih ber ṭum ala ni hial ang chu.








Chawlhni zan alo ni vei bawk nen Motor tlan hmuh tur pawh an awm lo a, khaw daifem tak mai ah ka la awm zui lehta nghala, kawtthler zau lai pawh kha va chhuak phei pawh ni ila Taxi hman tur chu hmuh ka inbeiseilo, mahse a awm tak mialin ka pan tho chu angai.








Ka panlam kawng kawi hmuhphak loh chinah chuan thawm ka hriat tak vangin ka ding dat a, mipa rualkhat nui ham ham ri a ni, an thawm ri vang ringawt pawh chuan ka tiril a khur titih der mai.








Rang lutuka inher lêtin ka kalsan tak lam kawngah chuan ka tlan phei hlawk hlawk a, ka hmanhmawh em vang nge hlauh luat vang ka hrelo ka thlan a bawl nghal ṭiam ṭiam a, thinphu a rang zaih zaih reng bawk.







Inah khan let lehin hauh tuar tur pawha Pate Hruaia Phone mai chu a ṭha zawkin ka hria, Gate bul ka thlen dawn lai tak chuan JH-a lo chhuak nen kan in tawk hlawl a, maktih hmel fe a min en laichuan ka pen chu ka tawp chiang hle. Ka hnunglam chu a thlek kual thuak a, chutah mitmeng dur khapin min melh a "Ka thlah dawn che nia" tiin a inher leh vut a. Engmah ka sawi ve hmanlo mahse, thawk erawh a veng huai thung.







Gate sirah chuan dingin ka lo nghak tawpa, ka diklo ka rilru a buai nuai nuai a ni ber mai. Hetianga dinhmun laklawh leh hrehawm tak hian ka la awm ngailo ka zak hle bawk. Ka khawsak dan chu a mawiloh mai bakah a zahthlak tak zet a ni.







Gate aṭanga Scorpio var lo tlan chhuak chuan ka vel chu a rawn chhun êng ut a, min thlah tur chu lawm viau mahila phei khai a zanglo kher mai, eng ang takin ani sawn min ngai ang maw, hmeichhe fel tak ang chuan min ngailo tawp ang le.








Ka bula Motor a rawn din rual chuan a lampanin ka kal a, Motor kawngkhar hawnga ka ṭhutluh laipawh chuan a hmel chu ka en ngam tawhlo, a Phone kha a en anga Alawmi nen khan kan inbe miahlo tih chu a hre tawh ngei bawk ang.








Kan tlan chhuah rual chuan thawk la hawkin hmalam chu ka en tlawk tlawk ringawt a, min be lo chuan awm ti nuamlo viau mahse ka lawm hle thung, zawhna min zawt buai miahlo te hlei hlei chu ka lawm bawk.







"Khawivengah nge in awm?"





"Chanmari ah" zawitein ka lo ti a, min zawt zuiloin a ngawi leh vang vang a, chutihlai mek chuan nichin lawka ka thlen pheina kawng kawi kha kan tlan thleng a, kawngsira tlangval rualkhat ruih hmel fe fe lo ṭhu khawmlaih ka hmuh rual chuan ka hmulthi a ding sung sung hial a ni. Lo va thleng phei hman ta ila engtak va tawng ang i maw?








Kan tlan pelh pah chuan ka melh zui ṭawk ṭawk a, ka dang te chu a ro nghal huam mai bawk. Engvanga Jonak kha lo zui duh ngawt nge maw ka nih le, min pawtlui viau mahse lo ṭang tlat tur ka nih vei nen, Irene-i ka ngaihtuah chhuak chu ka haw nghal hlur mai bawk a, ani tehhrep khan heng buaina ah hian min barhlut a ni.








"Engtin nge an koh che?" tih ri vang chuan ka hawi let thuai a, "Mambawihi ka nia" inthlahrung aw tak maia ka tih laichuan a nui suk a, "Lalthanpuii ka nia" tiin ka chhang ṭha leh ta kher a.







"Mambawih" a aw ri thuk raih maiin ka hming a lam chuan engtin emaw riau hian ka awm.







"I ṭhiannu kha i Phone miahlo a" zawi supa a tih chuan ṭi dêkin ka en a, ka dawtsawi chu aman chiang hle a ni. " A tlang theilo a" ka tihlaia ka aw chu a zawi viau.







"I sawi si lo a" ka lam a rawn hawi zawk a, chhan ngaihna ka hrelo ka inthiamlo ru ve ṭeuh.







Inbe lo chuan kan ṭhu leh ta renga, kawng chhe takah pawh a Motor khalh chu a damdupa a amah pawh chu a damdup maiin ka hria, a aw ri ang chiahin.







"Lo kal tur hi ka ni miahlo mawle, a zialo tak tak ani ka tibuai bawk si che a" ka tih chuan min en loin hmalam a melh ngar a, engthil tak ngaihtuah ang maw. Ka sana ka en chuan dar 10 a pel fel der tawh a, ka chhungte chu an sa tawh ngawt ang chu kei aia Irene-i a thleng hmasa anih phei chuan.








Thawk ka la leh hluai a, hmabak a ko duh kher mai. "Zosangliana kha ka cousin a nih kha" a thil rawn sawi tehdaih chu chhan mai dan tur ka hrelo. "Ka unaunu nen an inkawm ṭhin a" ka ti ve ta ngawt a, min rawn en leh zawk a, min zawt zui leh chuang miahlo.





Tukverh pawnlam hawichuan ka ṭhu ngawi leh ta reng a, Motor chhung boruak chu a uap deuh churh maiin ka hria, chhan sawi tur em em awm silo ka awm a nuam thei mawlh lo a ni.








Dawrpui phei kan tlan laichuan a phone a lo ri a, "Ka chhuak rih a naktukah ka lo hrilh dawn che nia, Additional Secretary hnenah ka thlen tawh kha" tiin lehlama mi chu a bia a, hna chung chang an sawi niin ka hria. An inbiakna chu ka lo ngaithla ve renga, hriatthiam phei chu ka neilo.








"Mambawih" a rawn tih chuan ka lo phu deuh zawk a, a Steering her kual paha min thlek zawkin "Khawnge in In?" a ti a. Kan veng kan tlan lut mek tih ka hre chawpchilh a, kan In awmna lam ka hrilh chuan a bu nghat a, Motor chhung eng dul riai hnuaia a hmel landan chu ka ennawn leh ngat a, Alawmin a lo ngaizawng em em kha awmlo ka ti ta hauhlo, mipa zahawm tak a nih mai piahlamah a landan chuan mi tupawh a hip theiin ka ring.








"Sawlai In sen zawnah sawn ding rawh aw" ka tih chuan ka lam a lo hawi a, kan mit a intawng chiang kher mai, min be dawn emaw ka tihlaiin a ngawi lehta daih a, min bia se ka ti nge mawni sawitur ka ngaihtuah kual ruaia, a vang hrep lehnghal a. Ka melh leh rih ṭhin a, ka be hmasa ngam tawh derlo.








Kan inkawtah chuan Motor chu a tiding a, leng lut tura sawm chi nge mangṭha nghal mai chi ni ang tiin ka inngaihtuah buai leh a, amah lah chuan min en vung vung ringawta "Anih mangṭha aw, ka lawm lutuk ania" ka ti ta ngawt a, a lu a bu leh nghat a, sawi leh tur a awm tawhlo Motor aṭang chuan ka chhuak a, min bia se ka tih tehlul nen, duh ang pawn lawmthu ka hrilh miahlo lehnghal a.







A tlan chhuak chu ka thlirzui vawng vawng a, ka rilru a a cham zui dan chu ka sawifiah thiam lo, a mak a ni. Mipa dang ka hriat ṭhin te anglo takin keimah ah a cham zui a, a tlan liam ta chuan ruak deuh huaiin min inhriattir bawk.







Inchhung ka lut chu a lo thim ṭhiap a, ka chhungte chu an mu tawh ani phawt maia Irene-i a thleng ve tawh em tih ka hriatloh vangin kawngkhar chu kalhloin ka mut san a, mut a chhuak theilo ka ngaihtuahna vak kualruai reng chu mi pakhatah ah a in sawrbing vek tawh a ni ber e, engvanga ngaihtuah reng nge maw ka nih le? Ka ngaizawng chu ani hauh silo.







Tukṭhuan eilaiin ka chhungte chuan min hau ta chiah reng a "I inkhawm bang khawnge i len kawi a? Zan chhuah chin hi ka duh hauhlo ania" lawmlo ti hriat fe maia Pate Hruaian a tih chuan Irene-i nen birthday lawmna a kan kal thu ka lo hrilh a, a hmelah chuan a awihloh hmel kher mai.









"Zanah nula chhuah fo loh tur, Lalnunkimi pawh chu a va tho har ve, chu chen chen nula mut tur a nilo, tun aṭang chuan zan len chhuah a theih tawhloh ang chin tawk in hre dawnlo tlat" a ti zui bul bul a. Nu Muani ngawi reng chuan nizan kan kalna chu a hria tih ka hrethiam mai a, chuti nilo sela chuan amah zawk hian min hau ngei ang.








Hna kaltur ka insiam zo Sitting room a ka chhuak phei chu phak zeta Irene-i lo tho chhuak nen kan intawk a, "Jonak khan alo bia che em, ngaihdam min lo dilsak rawh a tia" a sawilai chuan ka lo nui hak a. Phawk lek leka min lo en chuan ka lo tumkhum hmak a "A hming kha ka hriatah sawi tawhlo zawk teh, i duh anih chuan nangman ngaizawng rawh" tih leh kalpelh ka rual a.








"Enge nizan khan thlenga ka kai lutuka ka hre mumal lo reng reng, Puia te rualin ka haw daih lehnghala engtin nge ilo haw ve, Jonak-an a lo thlah che a mi?" a ti zui leh a.







Nizana ka haw dan min zawt te chu ka haw hlur "Ka sawi buai peihlo e a" Fridge hawngin tui bottle ka la chhuak a "In inhau ami a, ngaihdam dil te kha alo sawi a" a lo ti leh a, a hma aia rum maha ka melh vang chuan tim hmel a pu deuh a, "I ṭhianpa khan min sual a tum lo chauh a nih kha, vawikhat mah a hmel hmuh kha ka duh tawhlo, nangpawn engmah ka chungchang lo sawipui tawh suh, i chungah pawh ka lawm miahlo" ka ti chang ta bawl a, "Ava awihawm loh tak, Jonak te chu chutiang mi a nilo" a ti leh kher chuan min ti thinur zual.








"Dawt ka sawi i ring em ni?" chang fel fawlin ka ti a. "I hriatsual palh vang mai mai a niang" a ti leh hram a, "I ngaih dan dan khan ngaiteh" chhang zui duh tawhloin ka kalsan a, kei a unaunu min ngaihtuahna nei hauhloin Jonak zawk a ṭan hlur mai chu ania, amah ah khan engthil nge maw alo hmuh bik dawn ni.






Office ka thlen rualin Alawmi hmel ka zawng a, tlai deuhah file pawmbawr ṭeuh chungin a lo tlan lut hlawk hlawk a "Awi...Mambawih nizana i missed call kha tukinah ka hmu a, zingah ka scooty a nuar leh bawk sia ka lo be hman miahlo che" a dawhkana a file chu remfel mawlh mawlh paha a tih chuan "A pawilo, ka lo call mai mai che anih kha" ka lo ti ve vat a.








"Coffee i duh ve dawn em?" ka computer min lo bih pui pahin Malsawman a lo ti a, Uzodinan a lo koh tak avang chuan a kalsawn leh thuai a. Ka chhang miahlo nain Coffee chu minlo lak kep tho a, vawin chu a hna a awl deuh nge ni, ka dawhkan bulah a lo titi hlut a, midangin an lo zawm ve bawk a an nui ham ham renga, Advance christmas hman dan tur an sawilai chuan ka thil tih lai chawl meuhin beng ka lo chhi a.









"Pu Rammuansangan an resort ah hmang ho ang senso zawng zawng ka tum ang a ti aniawm e" ka dawhkan piah maia ṭhu Nu Dingi chuan a ti a.








"Kan Department ho a hrangin ti zawk ila, Social welfare pawn a hrangin ti se" Malsawman a lo ti ve thung a. "Kan thu lo ve e, Joint Secretary meuhin a sawi te chuan kan pu te pawn an duh dawn lutuk, kan pute lam an pawklo nasa mai sia Social welfare Secretary te ho an han pawk tehlul nen" Nu Dingin a tih chuan 'Dik chiah an uikawm hlawm lutuk a nih hi" midang ho chuan an lo ti tliar tliar hlawm a.









"Han hmang ho thei ila aw, a nuam dawn a sin le" tih pahin Alawmin min lo siai zauh a, a sawichhan ni a ka rin hi a dik viau ang chu, ka ngaihtuaha Department dang te nena han hman ho chu keipawn a nuam phian zawkin ka ring.









Kartawpah thu an lo tichiang a Advance christmas chu Social welfare department leh Revenue Department ho in kan hmang ho dawn a, chu pawh a zawng zawng kan tel thei kher lo ang, Department dang an tel ve miahloh chhan chu kan hotute lam an lo inpawh bik vang anih mai ka ring, a kar leh inrinni atan hun chu an ruat a, a ṭhalai deuh leh a tlawngawl chin bak chu an kal kher lo ang. Social welfare Chief Secretary hna chelh lai pension maitur thlahna nipah fawma chu hun chu buatsaih anni bawk.








Alawmi a phur tawh ngang mai hahipin a sawia, a thawmhnaw hak turah a buai nghal em em mai bawk a "Bazar ka ngai, tui chen te ka duh dawn phei chuan thawmhnaw hakthlak leh makeup te pawh ken a ngai ang" a ti siam siam a, kei ve thung chu han phur chiam ngaihna ka hrelo, Alawmi kal dawn lo sela chuan ka kal kher pawhin ka ringlo zawk a ni.








Jonak nen chuan kan inhmu leh ta lo vang vang a, Phone aṭanga min biak a tum fo avangin a number chu ka block ta daih a, Irene-in ṭawngkam ngeiawm deuh deuha min khei fek fek a ching erawh chu ngaiah ka nei thei mai ang.








"I ṭhianpa te kha an va rawn leng ngai ta lo ve" chaw eilaia Nu Muanin a tih chuan Irene-i chuan min rawn melh nghal thuai a, "Len hreh chhan an nei aniang" ner sak chungin a ti leh a. "Enge hreh tur awm a, an tlangnel tawh em kha" Nu Muanin a tih leh chuan "Kan inhmuh hunah leng turin ka sawm ang" min runluih tih hriat fe hian a ti a, engahmah ka ngai duhlo lui taknain a ruk tak chuan ka ngei a ni.








"Jonak te chuan kan in lo lenna tur angah lutuka a sawm a sawm ṭang ṭang angai tawh, nula lamah a tla na ve em a ni, mihausa nuho lah hian an fanu te tan an kherh ngat ngat mai bawk sia, Mambawihi hian a lo lenleh hmasak berah lo char hmak mai sela a ṭha ang" nui rah rah chunga a tih chuan ka huat tawk a lo tling leh kher mai.








Hna lam kan buai lutuk ta lo a, chhunah chuan kar tawp hun hman dan tur sawiin kan titi ho a, Malsawman "Ka kal thei dawnlo a, a ui hle mai Inrinni ah ka nu incheckup pui a ngai dawn sia, kan haw hma chuan tlai lamah chawei tur chauhin ka lo kal ang" a ti a. Kan kalna tur resort te chu a thlalak min hmuh hlawma, a nawmhmel em em lehnghala, Alawmi a a phur lutuka keipawh ka phur ve zo vek tawh.








Zirtawp ni ah chuan "Banah min bazar pui rawh" a ti a, inrinni a a thawmhnaw hak tur lei a tum a nih ka ring. "Dawrah min kalpui lawk teh" keiin ka lo ti ve thunga.








Kan pahnih chuan inhnuai lamah kan inzui thla a, Corridor a kan kal lai chuan "Lo awm lawk teh Pu Siama ka va hmu lawk teh ang, a lehkha tur ka kawla" tiin I&PR Department lamah min phei sana, hnunglam ka hawi leh chu Paliani nen chiang fe maiin kan in en a, "I va phu nasa ve" tiin min lo nuih sawng a.








"Ka phu hleinem" nui tawi tak chunga ka tih laichuan "I sam te kha ṭawn mah ta che thlahin i inhmeh daih zawk" nui vur vur chunga min kalpelh paha a tih chuan ka lai ve ṭut nia. A van zialo thei tak.








Alawmi kalna lam chu ka pan phei a chutihlaia hla deuh hlek aṭanga JH-a leh mipa khat lo inzui phei ka hmuh chuan ka inher nghalthuaia, ka tawk hreh deuh tlat chu keimah pawh ka inhrethiam chiahlo. Bang ngheng chuan ka ding chawt a, an lo kal hnai ve zela, a kamis var hak te chu a inhmeh takzet, ka lo enreng laichuan ka lam a lo hawi ta chiah a, lai fe maiin keiin ka lo nuih a, min en a min kalpel tawp mai chu ka zak ru kher mai, tunah khan hmelhriatloh ang maiin min kalpela a ṭhianpa lah chuan ka lo nuih lai kha min hmu ve vek si a, min kalpelh hnu pawh chuan a lo hawi let a, ka zak lutuk chu ka beng a sa hat hat a, ka biang a sen ṭan ṭan in ka ring.








"Lalmambawih" tih ri ah chuan rang lutukin ka hawi a, "Koh iva hre theilo ve, lo kal ta che" Alawmin a lo tih chuan ka kal nghalthuaia. Tun maia thil thleng khan ka awm a ti nuamlo zo a Alawmi ṭawng mawlh mawlh pawh ka ngaihtuah hleitheilo, kan let leh lamah chuan kan tawk leh ang tih mawlh ka hlau tawh.








Banah Alawmi Scooty dahna bula kan din laiin Annexe building aṭanga alo chhuak chu ka hmu leh a, Alawmi chu khawhhmuh pawh tumloin ka en renga, hman hmawh hmel deuh hian a kal hlawk hlawk a thinrim hmel a puin ka hria, ngainatawm riaua ka hriatna te kha a bo nghal vek mai. Ka lo nuih ta kher kher kha ka inchhir hle bawk, kan inhmu leh anih pawn min lo bia te anih ngawtloh chuan ka nuih tawh lo chiang ang chu.








Bazar ah kalin ka ṭhiannu chu thawmhnaw ka en puia, a duhkhirh reuh zek avangin tum aiin kan rei a, Nu Muani ba khawn kan tawk a "Thil khai haw tur a awm ania, ka rualin haw rawh" a lo tih vangin Alawmi chu ka kalsan a, in kan thlen chuan dar 5 a ri thuak tawh a, eirawng ka bawllai te chuan vawin thil thleng chu ka ngaihtuah let leh ṭhin, ka zak thar telh telh mai. Naktuka kan hun hman tur pawh ka phurlo zo veka, a hmel chu ka hmu hreh a ni deuh ber tawh.








Alawmi bulah "Naktuk chu ka van kal peihlo e" ka ti dek dek chu a rawn ṭeu nghal hlar a, "I kal loh ten kawm tur ka nei dawn hleinem, Malsawma a kal dawn bawk silo" a lo ti vin hlak hlak a.








"Kal loh kha lo ngaihtuah reng reng suh, ka lo sawm dawn che ania, lo insiam ang che" tiin Phone a dah zui daih a, hnial luih zel theih pawh a nilo.








Zingah chuan kan chawei laiin a lo thleng fel leh der tawh a, keipawh ka insiam ve ta nge nge a, kan kalna hmun lah chu rinai takin a lo hla a, a hmun erawh duhthusam in a nuam thung.








Tui chen ka peih ve loh avangin Swimmingpool chhaka ṭhutna ah chuan Nu Dingi hoin kan lo ṭhu a, an tui cheng chu kan lo thlir a, puitling hlir awm khawm kan ni bawka boruak pawh a reh ruih renga, lo lem tawk chu awm ve bawk mahse tumah rui nawi an awm velo chu a nawmna chhan niin ka hria.







Ka phone en a ka kun laitak chuan thawm a ri hlut a, Alawmi a ni!







Hmanhmawh takin ka tlan thla a, chutih laiin mipahnih hian Swimming pool aṭangin an lo pawm chhuak mek a, a bul ka thlen chuan min lo vuan chawt a, a tui hak chu a khuh zui bawrh bawrh a, "Ka ke kha ana lutuk" tih leh ṭah a rual ta mai a. A ke ka en chuan a lo pawng ul a, a ruh a a sawh a nih ka ring.








"A ding sang kha ka nek tlu palh a, Pool sira sawn a ke kha a vua a niang" Pakhat chuan a lo ti a, han tih vak ngaihna ka hrelo ka awmah hmai phumin a ṭap hliam hliam a. A hnungah keiin ka lo chul ringawt bawk a, midangin a ke chu an en saka, " A pelh ani maithei Damdawiinah hruai teh u" Nuhoin an lo tih chuan an zawn sawn nghalthuai a.







Zui ve ka tum chu Uzodinan alo phallo a "Kan han tuam tir anga kan lo let leh mai dawn a lawm lo awm rawh" a ti tlat a, "Kal ve kher duh suh, nangni in awmloh vekin a nuamlo" Nu Dingin a lo ti bawk a. Rilru bet manglo zet chuan Nu Dingi te ṭhianho bulah chuan ka awm a, tlaiah pawh an lo la let loh vang chuan nuam pawh ka ti tawhlo.








Chawei dawnah Uzodina alo leta "A ke ruh kha a lo tliak a, ka kal thei bawk silo a ka kal ve tawhlo mai ang a ti anih kha" a lo ti mai a, a pelh ringawt turah ka lo ngaia a tliah em em chu ka lo ringlo a sin mawle.








Chawei tur chuan choka ah kan inzui phei ta hlawm a, kan ṭhu fel deuh awrh ang tih ah kan Director hoin JH-a leh midang ho chu an lo inzuiluta, a kal ve miahlo emaw ka tihlaiin a lo awm ve reng tih ka hrelo reng reng.








"E...in rawn thleng ve thei hlawm maw" Social welfare department ami pathau deuhin tiin a lo chiau-au hlawm a, JH-a hmel chu ka lo en renga, nimin aingawt chhuan a mood pawh a ṭhat hmel a lawm. T-shirt dum leh Denim kekawr a ha a Formal taka a inthuamloh vang nge ni a lang nelawm sawt bawk.








Ka en reng laichuan ka lam alo hawi a, min ti phu chiang kher mai, min rawn nuih nia mawle! Ka nuih let tawh awmlo chiang e, rang lutukin ka mit ka la sawn a, Uzodina chu ka be nghal mawlh mawlh a, a lam chu ka hawi leh tawh hauhlo bawk.








Tawitein hun serh an hmang a, Chief Secretary PU Sapkaia thlahna thu sawiin ngaihhruihna te an hlana, chumi hnuah zanriah eitur chuan kan tho ta sang sanga.







"Mambawih dawhkan lo va hauhla, chaw ka lo dawhsak ang che" Uzodinan a tih vang chuan dawhkan lamah hmanhmawh takin ka let a, Catering an koh avangin eitur pawh a tui hmel hlawm ngang mai. Uzodina lo let leh chuan thleng pahnih a lo chawi pheia ka thleng ka hmu chu ka pum a let but maiin ka hria, sa a tam lutuk, sa ka ei ngailo tih ka lo hrilh theihngilh daih a ni.








"Uzodin sa hi....."ka hawi chhuak leh chiah chu ka hma ah JH-a alo ding reng a, Uzodina zawk chu kan piahah ṭhuin a chaw a lo bar mawlh mawlh tawh.







"Ṭhutna hi a awl em?" ka hmaa dingin a tih chuan ka bu nghat a, ka hma ah kher kher chuan ṭhu lo sela ka van ti tehlul, hetiang te chuan chaw ka eipuar thei nang le. Nu Dingi thlengah ka sa te chu ka pe ṭhena chutih laiin ka hmaah chuan alo ṭhu fel reng tawh a, min la en reng vang chuan ka beng a sa leh hat hat tawh mai, inhmachhawna han ṭhut chiah phei chhuan min uap run maiin ka hria.







"Nangmah hi ami JH.Lalhruaitluanga under secretary kha?" Nu Dingin a lo tih chuan "Aw" tih zawngin a chhanga, " I nih duh hmel ka ti reng a, Zopui hei hi a lawm Offcer hmelṭha-a an tih luai luai chu" tiin a piah a nu ho chu a hrilh zui a, an nui ham ham hlawm a " I chaw eizawh ah khan thla kan lakpui dawn che a nia" midang chuan an lo ti a, ka hma a mi chuan a chhanglo, a hmel ka enlo a mahse, a nuiin ka hria.







Chaw ka ei dawn chiah tih ah chuan ka thlengah vawksa kan hi min rawn pe a, a hmel ka han en chuan min enloin a chaw chu a hawlh kuala a nuisuk lehnghal a, a uang em mawni!







Chutah rawn hawichhuakin "Bawngsa i duh em?" a rawn ti leh a, chhan mai nachang pawh ka hrelo, a awmdan chuan minti hamhaih zo vek.







"Aih..duh..nang" ka ti bah naka mahse, min suah leh ta tho a, a awmdan vel chu ka bialpa ang maiin a lawm a awm le!








Zah zelah chaw chu ka bar mawlh mawlh a, ka hawi chhuak ṭha ngam tawhlo, ka thinphu te chu a rang zo vek tawh, kan bula midang ṭhu ho lah chuan min enduh nasa mai si a, engmah sawi lo mahse ngaihdan chu an nei vekin ka ring.








"Ka rualin i haw dawn nia" a rawn tih chuan ka thil eilai ka phuh ṭhawt lo chauh a ni, chaw hmuam ṭun chungin a hmel chu ka en a, chuveleh rang lutukin vawksa min rawn barh anih chu! Ka hawikual vut a, tumah phei chuan min hmu hmanlo ang.








A hmel ka en chuan min lo nuih a, hman zana 'Ka uang anih kha' a tihlai hmel ang kha a pu a a nuih hian a van hmelṭha tak, Vawksa berkher min barha chhak leh thei pawh ka ni tawhlo, ka ṭhiala ka lem bawk mahse, ka rinnaiin a tui daih mai lehnghala, a ṭha vek mai e. Ngawiteh, tun maikhan 'Ka rualin i haw dawnnia' minti tlatin ka hria!

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 28th, 2021, 12:02 pm

GOMENASAI - by Aviolette



CHAPTER - 5


images (30).jpeg
images (30).jpeg (11.65 KiB) Viewed 9469 times


"Uzodina rualin ka haw dawn a" ka ti vat a, Uzodina phei chu ka la hrilh lo, midang phurh tur a neihloh hram ka beisei.







"Tunge Uzodina?" ka lamah rawn awn hnai deuhin chiang fe mai hian min en a, min chhuahchhal te pawh a ang zawk lek lek a ni. "Kan thawhpui" ka lo tih chuan engmah sawilo chuan min en leh vung vunga, ahnu deuhah chuan "Ka rualin haw zawk rawh?" a rawn ti ṭha leh a, enge maw a hriat le!








Chhanglo chuan ka nuiliam ta vel mai mai a, "Vawksa i duh leh em?" nuichunga alo tih leh chuan lu ka thing rang kher mai, ka eitui phiana rinaiin ka eitam bawk, tui ti taka sa ka ei vawikhatna ala nihialin ka ring.







Mipakhat hi lo kalin JH-a hnungah chuan a lo beng thawk a "Kan bulah i lo kil ve dawn emaw tih a" nui hui chunga tiin kei chu min lo en a, inhmatawna JH-a nen kan lo ṭhu chu hrechhuak thut niawm takin "I bialnu a mi?" tiin a zawt zui a, ka lo zak ru chem chem mai, Nu Dingi ṭhutna lam chu ka hawi nghal thuai a "Nilo e, ka ṭhiannu anih hi" JH-an a tih chuan chupa chuan "Ka va awihlo ê" ala ti ta hram a.








Kalsawn mai pawh tumloin kan chawieina bulah chuan chupa chu a lo ṭhu ve ta reng a, Kuva a ṭhial nuau nuau a a ti ti barh barh reng bawk a a ṭawng zawng lah chuan a ṭawngper thei em em mai bawk nen ka thil ei a tituilo zo veka; ka bula mite thawhrual chuan ka tho ve ta vata, a mawitawk fang chuan ka puar ve tho, kut sil zawha kan let leh laichuan JH-a chawei chu a ṭhianpa khan ala ṭhutchilh reng tih ka va hmu theia, ṭhutchilh satliah mai pawh niloin a darah a kuah kher bawka, a chaw ei chu a tui bik vakin ka ringlo, a ṭhianpa lah chu a ṭawngper nasa mai bawk si a, a ruk chuan a ner ve nang nang ang chu.








Zanriah kan eikham fel hnu chuan kan Office staff ho bik chu kawtah kan ding khawm laiha, thla te la hoin haw dan tur kan rel sap sap a, chutih laiin U Zodina chuan "Mambawih i ṭhiannu scooty kha kan khalh haw nghal daih sia, khawiah nge i chuan haw dawn?" tiin min zawta, 'Ka lo phur ang che' a tih nghal ka lo beisei ruk ve tehlul nen.








Ka rilru hria niawm tak hian "Pu Mawian i rualin ka haw dawn a ti tlat sia, nilo sela chuan ka phur haw tur che ania" a ti zui a. Pu Mawia chu Uzodina te ṭhenawm hnai a mi kan office a Group D hna thawk lai a ni .








"A pawilo Nu Dingi te rualin ka haw thei mai ang" ka lo ti a. "Ka bulah i chuang dawn nia, duh leh kan inpawm bawr ṭeuh anga a vawtlo zawk ang chu" kan ṭawng hriain Nu Dingi ṭhiannu Pi Zopuii chuan a lo ti ve vat a, Uzodina te kalliam hnu chuan keini pawh Nu Dingi hoin kan chuanna tur Bolero ah chuan kan inhnawhlut a, an inbeisei aiin kan lo tam deuh nge ni, Motor neitunu chu a tum deuh bar reng a, a inthlahrunawm duh viau mai.








"Mambawih ka pawm mai ang che"Nu Dingin a tih chuan ka hreh hle a, a ṭhalai zawk nimahila ka zâng ber dawn bawk si a, an ni ho lah an thau mût hlawma a pawm awmber ka nih bawk si a vangin tlawmngaih chhuaha han hnial tlat theih lah a nilo.








Nu Dingi malchunga ka ṭhu tur tho kang chiah chu kan chuanna Bolero chu a insawh dawta kang awkin Motor chungah ka han intauh pek a lu a chhah nghal mup mupa a na duh kher mai.








"Awi..i insawh na em?" ka bula mi te chuan an lo ti nghal chula "Na lo e" ka ti tak nain an hmuhloh lamah ka inpetruh fan fana mittui a hnam sawk thei a lawm mawle.








Resort kan tlan chhuahsan hnu rei vakloah chuan kawng kawia tui khawhthla awmna bulah hian kan ding leh a, kan hmaah chuan Scorpio var a ding a "In tawt em, kan Motorah hian a chuan theih ania" tih ri vang chuan ka hawichhuak zawk a, JH-a ṭhianpa ṭawngper deuh kha an lo ni a, tui bulah chuan dingin an inphihfai niawm tak a ni.








"Tui kan thun lawk ange" tih paha kan Driver a chhuk laichuan "Hnunglam ho kha va insawn ṭhen ula, khatiang te chuan in indelh sil awng vek anga sin" seat hmaa ṭhu Motor neitunu chuan a lo ti hlak hlak a. "Mambawih hrehawm itih chuan duhleh va insawn daih la" Pi Zopuiin a lo ti vat a, ṭhutdan hrehawm lam aimah chuan ka inthlahrung zawk a ni. Feet 5 leh inches 4 sa pan zawk zawk lo tak ka ni bawk nen Nu Dingi te ang nu thau thahrui neilemlo in a kawngtluana han pawm aralah chuan ka zuamawm fahran bik loh tawp ang le.







"Kan va insawn dawn em ni?" Nu Dingin a tih chuan "Pawi chuanglo va insawn ila" ka lo ti ve thuai a. "I insawn ve dawn maw?" Pi zopuiin a lo tih hluai avang chuan Nu Dingi tello a han chuan hran chu a hreh ru deuh tih ka hre thei.






"Nula kha chuang phei sela midang chu inleng tawk chiah ang chu" Seat hma a ṭhu chuan a lo ti vei khauh a, keipawh ṭhului reng bikloin ka chhuk ta sawk sawk a, kawngkhar ka khar laia ka lampana JH-a lo kal chu ka lo hmu vat a, "Inthawl tak tak maw, ka lo chuang dawn a sin" tiin ka lo nuih a, a kawr chu ha loa a ken daih avangin a awmbawr lang phiar fat chu melh loh hram ka tum thung.







Chutah ka beng bulah lo kun hniamin "Pu Biaka lo ṭhut hmain Seat hma ah lo ṭhu rawh" tiin min rawn kalpel thuak a, a Motor lampana a pen phei hlawk hlawk chu ka enzui a, ka thinphu ran zia mai chu mak tak a ni!







Motor kawngkhar a hawn laichuan a rawn lehhawi zawk a, a thim deuh nain Motor engah chuan a pianzia chu a lang chiang viau tho, Alawmi sawi ang chiah kha a ni tak tak 'Tall, Handsome and Nice shoulder'!







"Mambawih nangmahin i chuang hreh em, anih chuan ka chuanpui che anga, i hreh lemloh chuan hei Pi Rami te nen hian vengkhat kan nia kan haw na tur a inchen a" Nu Dingin a tih chuan "Hreh hranlo e, ka va chuang ange" ka lo ti thuai a, kan inmangṭha leh te te hnuah JH-a motor lampan chuan ka kal a, Seat hmaa ka ṭhutluh rualin boruak lum hak chu ka hre zuia "A vawt hle mai" a lo tih ri nen chuan.







"Vawt iti sia, tinge i intihhuh a?" ka tih chuan a kawr awm chu a kawk zauh a, a awmzia ka hrethiam hauhlo.







"Ka biang leh ka awmah te hian kuva in min per alawm mawle" nuisuk suk chungin a ti a, a nuihzawnga a mitsir chuar lang ralh ṭhin chuan anui hmel landan chu a ti danglam ta riau niin ka hria, a nuihloh lai hmel chu thinrim a ang tlat thung a, a nuihmel erawh hmuh a hahdam leh em em lawi thung.








Pu Biaka lo let hnu chuan kan tlanchuak zui thuai a, kan hma a tlante nen chuan kawi khat velin kan inthlau a, an Motor eng erawh kan hmu pha zauh zauh reng. JH-a nen chuan kan ngawidun kara, hnunglam aṭangin Pu Biaka chu a titi barh barh reng thung a, a titi kar lakah tukverh hawngin chil a pik leh puat a, a titi chu kan lo nuihpui leh hak ṭhin, a awmve lo ang tih mawlh a hlauhawm, ani awmlo sela chuan ka bula ṭhu nen chuan kan inbe leh mang dawnlo tih chu a chiang reng.






Thui angreng tak kan tlan hnu chuan kan hnunga mi chu a hnar kak kak tawh a, kawng biboh deuh laia Motor ain sawh changa harh chiang manglo a a lo thum leh dut ṭhin chu JH-a nen kan lo nuih ṭhin a, kan nui dun tih bak chu han inbiak zui dan tur a vang a ni.







Pakhat zawkin 'A mutui hle mai' a ti a, 'Nia' ka lo ti ve a, a bak erawh sawitur a bo riau zel, "Khua a vawt tawh hle mai' ka tih lahin 'Ni e, heater hi kan ti sang ange' tih pahin a a Motor heater chu a ban a, chumi hnuah kan ngawi dun leh vang vang a, a changin kan in en zawk a, lai taka ka lo nuih lah hian a nui veleh ngai tawh silo a, a zakthlak lek lek zel lehnghal a, a nuihmawi tehlul nen engah nge maw nuih ve hun tur hi a hriat miahlo le, a nui hmel hi a ui zawk anih te pawh ka ring rum rum tawh.







Ka taksa lum pup pup vang chuan ka kawrlum hak hmalam chu ka hawng deuh a, ka pum let but but ri chu ka hrethei a, ka rilṭam vang erawh a ni hauhlo tih chu ka hrechiang viau a ni.








Kei hi ka dik miahlo mai! Ka pum chu a mar ṭung a ana deuh riai riai bawk, thawk a ti hah deuh riau lehnghal a. Kawng chhia a Motor in min sawh zawng te chuan ka awmdan a dik hleithei meuh tawhlo.







Thui kan tlan leh hma chuan ka pum chu na tawh tak a ni, a nat dan chu a mumallo hle bawk, a na a reh riai riai a a hnu lawkah tawrh hrehawm khawp hian a rawn na leh ṭhin a, a reh leh a chutiang chuan a rawn na nawn leh ṭhin, ka bulah mi lah chuan ka awmdan chu hrethiam heklo le, motor chu a khalh chak ngaiin a khalh chak renga, kei erawh ka ṭhutna seat vuanin ka inhumruh ngar ngar mai thung a.







"Enteh...tlan muang... deuh hlek la" ka tih chuan ka thlan a sa hluam tawh. "Hlau suh" ka lam rawn hawi zawkin min en a, ka lo nuihlui ngiala, ani erawh a tum leh hmuk tawh mai, ka nui hmel a hua emaw tih mai tur hmel min hmuh ziah hi chu ka hrethiam theilo, chu aimah chuan ka pumna mawlh chuan ka rilru a luah a ni.







"Khua.. kan thleng ve..ṭep tawh angem le?" ka tih leh chuan "A hla tawh lo" tih zawngin min chhang a, engtiang chiaha hla tawhlo nge niang le.








"A la hla viau em?" Ka khur titih der mai! ka pumna chuan ka taksa chungah thu a nei mah mah tawh a, ka inthunun hleitheilo ṭep tawh hialin ka ring, ka bawp pahnih chip chawihin ka ṭhu a ka ṭhu ngil hleithei der tawhlo.








"A vawt ila ti ami, Heater hi ka ti sang leh dawn em ni?" a tih chuan "A ngailo" rang lutukin ka lo ti a, a hmel chu ka enzui tawhlo, tukverh lamhawiin ka inpetruh fan fan a, ka awmdan chu a rawn hrethiam ang tih mawlh ka hlau bawk.









"Kawngpui kan chhuah chhoh hunah Restaurant hmasa ber ah Coffee kan in dawnnia, i lum deuh mai ang" a tih chuan a lam pawh hawi tawhlo chuan ka ngawi reng a, ka thlan bawl ṭak ṭak chu hruk takngial pawh ka thei rihlo.





"I duh em?" a rawn ti a.





"Aih..duhlo" ka chhan dan teh tawp chuh!







Ka tukkhum za mer merah chuan min enzui tih ka hrethei a, ka chhan dan chu mak a ti ve ngawt ang chu mahse, tunah tak chuan ka na rih em a ni, coffee a rawn sawi ringawt pawh khan ka luak a ti chhuak deuh hlui mai.








"Khawkar kawnga dawr te khan Coffee an nei tui lutuk" thum deuh dut hian a rawn ti leh a.







"Duh leh nei tui se" ka rilruin ka lo ti hman hmawh a, engemaw coffee pawh chu a sawi sek le.







Kan tlan zela, ka chhan dan chu a lawm vak biklo aniang ani pawh angawi ta vang vang a, ka taksa erawh a diklo zual telh telh a, ka pumna chu engvang nge tih ka hrechiang telh telh bawk, ka vawksa ei phiangsen kha a ni! Ka pum ri kual rawih rawih te chu ka bula mi chuan a rawn hre pha ve hialin ka ring.








"Ih....Restaurant chu a la hla em?" a lam hawia ka tih chuan "Kan thleng ṭep" tih te maiin min lo chhang a, "Ṭep maw?" tunah hian ka thlen vat angai tih engtin nge ka hrilh ang?








"Tlan chak deuh rawh aw" ka aw chu a khur thei hial mai, "Ti nge a, i pum ana a mi?" a rawn tih chuan "Aih nalo" ka lo ti ve tlat a.







"Nichin deuh aṭang khan i pum i dawm deuh reng a" maktih hmel fe a a tih leh chuan ka nui tawi tak tawh, chutih rualin ka pum chu a rawn na nghal zawk zawk mai. "Khawngaihin tlan chak rawh" inpetruh fan fan chungin a hmel chu ka en a, ṭah vak mai te pawh ka chak zawk.








" Engtin nge i awm a?" tiin a tlanchak ve ta sauh a, seat-ah chuan ka mal bawhin ka kun hniam a, ka taksa te chu an zawi zo vek maiin ka hria. Ka hnung a rawn chul lai te chuan chet pawh ka che sawn peih tawhlo.






"Eisual i nei em ni?"




"I ṭha em? Zawhna min zawh te chu chhang loin ka insehruh ngar ngar a ni.






"I ek a chhuak a mi?"a rawn tih leh chuan ṭah vak mai ka chak ber.






Mittui tlingpam chungin a hmel chu ka en a, hlauhthawn hmel zetin anin minlo en bawk. "Ka kua a ṭhalo dawnin ka hria" ka tihlai chuan ka ṭap titih der mai.





"Ekhai aw!...." hmalam enin a tlanchak zual sauh a, a kut lehlamin ka ban a rawn vuan tlat bawk a " Lo insum ṭang ṭang rawh aw" a tih te chuan a hmel chu ka en ngam tawhlo.







Motor ding dawtah chuan ka hawichhuak zawk a, JH-a chhuk vut chuan Motor kalhualin ka seat lam kawngkhar chu a lo hawng a, "Lo kal rawh" tih leh min pawh a rual a, kawngthlang Motor engin a chhun phaklloh chin a kawrte a min chhukpui chuan hrethiamlo zetin a hmel chu ka en a "Enge kan tih dawn" ka tih chuan " Hetah hian ti mai rawh, tui ka lo lak ang che" a tih mauh mai a, karei leh!







Ka zahna leh ka natna chu a inchen vel thuakin ka ring, ka te chem chemin ka inhre bawk, tunah hian enge ka duh ber min zawt sela "Khuk ral ka duh" tiin ka chhang ngei ang.







Ka dinngil takah chuan ka pum na chu tlem chuan azia deuhin ka hria a mahse, rei anilo, a rawn na leh riai riai a, chumi hnuah ahma aimaha na zawk hian chhungril lamah min rawn ṭham a, duhthlan tur a vang ngang mai mahse, helai hmunah ani awm ve lai lehnghalin...Aw lalpa!..Ka duhlo hulhual a ni.








"Enteh, muang thei kan ni tawhlo ania, tlan vat vat zawk ang" a banah vuanin ka hmer ngawt ngawt a, ka pum nazual leh vang chhuan ka ding ngil hleithei meuhlo, chutah min pawm nawlhin Motor lamchu min panpuia "Hetah hian duh maila i tan a ṭha zawk a sin mawle" a ti hluk a, "Ka duh bawk lo" keiin ka lo ti vin hlar thung.







Kan tlanchhuah leh hnu chuan tlan chak fia fia tawh tak a ni, min rawn ban chu a kut ka lo hum chawta laksawn a tum biklo, ka hmer ngawt ngawt a, chutihlaiin kan hnunga ṭhu Pu Biaka intauh zawnga a rum leh nghut ṭhin chu ngaimawh duhloin chak takin kan tlan a, JH-a kut lehlam ka hum chu ka hum thlandap tawh, ka tlinlo tak ngial dawn anih hi tih rilru ka put laia Restaurant kawta kan ding ta chiah chua ka thaw huai mai.







Hmanhmawh takin ka inzuilut a, "Khawnge in Bathroom" Dawr kawngka kan thlen rualin ka bula mi chuan alo ti sawk sawk a. Dawr nghak tuten min kawhhmuh rualin chu lampan chuan min kalpui nghal dawr dawr bawk, kei aimahin a hmanhmawh zawk emaw tih mai tur a ni!







Bathroom ah chuan reife mai ka awm a ka chhuak lawk ngam tawhlo, ka ngaihtuah nasat poh leh ka zak telh telh a, ka bing chuk chuk lehnghal. A hmel ka hmuh huna ka awm dan tur chenin ka ngaihtuah a, a hmel hmuh phei chu ka zak ru riau tawh, hmanzanah lah khatiang tehhrep kha ka ni a, tunah lah hetiang zawng kher kher hian.








Bathroom kawngkhar ka hawn laichuan ka bul lawkah bang nghenga dingin Coffee a lo in a, ka chhuak chu nuisuk chungin min lo en a "Tikha chuan i hmel hmuh pawh a nuam ta deuh a lawm" a lo ti zauh chu ka biang a sa nghal hat hat a, ka sen ṭan ṭan in ania ka rinni.





"Coffee i duh ve em?"





"Duhlo mai" a hmel pawh enhleiloin hmanhmawh takin pawn lam ka pan a, inhmuh leh tawh hi ngai miahlo sela a ṭha zawk ang. Mahse, chu a hnekin a Motor-ah ka chuan a la ngai lehta zui a, zanin ang reng renga zah hi ka neih awm reng ka la hrelo.






Motor-a a lo ṭhutluh laite chuan Seat nghengin sir lam ka hawi tlat a, a tlan chhuah hma chuan min en tih chiang takin ka hre bawk. Ka en duhlo a hmel hmuh chu tun dinhmunah ngat phei chuan ka hreh tak zet, hriamhrei leh ṭawngkam engmah tello chungin ka induhtawkna neih ve zawng zawng te kha min phehsak nita berin ka hria.









(Muthluk hmain dah vat ang, zanin chu a tawi deuh anih hi, chuan a hnuaia ka link dah hi ka youtube channel ania min lo subscribe ve ru aw)

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 28th, 2021, 12:02 pm

GOMENASAI - by Aviolette



CHAPTER - 6

images (58).jpeg
images (58).jpeg (28.81 KiB) Viewed 9989 times


A lam hawi duhloin a che sawt sawt ri chu ka ngaithla ran a "I pum chu ala na a mi?" thum dûta a rawn tih chuan a hmuhloh lamah ka ner zui chiam a. A zawhna pawh chu ka chhang lem hleilo a.








"Aaaaa......Bawihno" bah naka a rawn tih chuan ka lo mengphawk hra a, a lam ka va hawi chu engthil emaw hi "In rawh" tih pahin ka kutah a rawn hmehbel chawt a, chutihlai zawng pawh chuan a hmel chu ka en duh hauhlo, motor tinungin a tlan chhuak zui a. Tunlawkah khan 'Bawihno' tiin min ko in ka hria, ka hming kha a theihnghilh tihna em mawni le!








A thil min pek ka enchuan ORS a lo ni a, lawmthu ka hrilh laichuan min melh zawk tihloh chu min enzui leh tawhlo a, thui angreng deuh kan thlen hnuah "I nuam deuh tawh em?" a rawn tih leh chu kan inbiak leh hmasak ber na a ni.








"Umm" tih te maiin ka chhang a, a hmel phei chu ka en nawn leh tawhlo hrim hrim, ka awmdan chu zahnain min tuam hlup hlup ti ila ka sawi sual in ka ringlo. 'I ngaizawng pawh anih silo enge i zah em em' tiin keimah leh keimah chu ka inzawt thul, mahse, ka zak em a ni.








Khua kan lut a, kan veng kan thlen phei hma deuh chuan kan hnunga ṭhu pawh chu a rawn harh ve a "Kan va thleng hma ve" tih pahin Motor darthlalang chu a hawng a, engthil emaw hi a ti ri rawk rawk a kuva a eileh tawh dawn a nih ka ring.








"I ORS kha in rawh, sa i eihnem leh lutuka i zo lo anih kha" zawi supa a lo tih chuan a hmel chu ka lo en a, min tizak thar leh ani ringawt, kan hnung a mi chuan a hrethiam ve lo hlauh zawka. "Sa ka ei ngailo a" ka lo tih chuan rang lutukin min rawn melh a, "Enga ti nge i eisi?" lawmloh hmel fe hian a rawn ti a, zawkzamah chuan a!








"Nangmah zawk khan min barh anih kha" ka lo tih chuan a kiai suk duh lek a ni, hmalam ena ka ṭhu tum bar chu a nui ri ka hriat rualin ka en vat a, ka lam a lo hawilo mahse, a nuihza insum hmel chu ka ngei takzet.








Kan inkawt kan thlen chuan rang lutukin ka chhuk nghal a "Bawihno" a rawn tih leh chuan ka penlai chu ka tawp chiang kher mai, Motor aṭangin a lo chhuk ve mek a, enge maw rawn tih a tum le?








"I number min la pe lo a" tiin a kekawr ipte a zen rak rak a, hepa hian ka number min dil a nia, enga tan nge a tih, min biak zui a tum tihna em ni! "I nawmloh zel chuan min lo hrilh dawn nia, keimah vanga pumna i ni bawk si a" a phone min pek pahin a ti a, ka number ka type sawk sawk a, a phone chu pek let leh pahin rang lutukin ka inher a, biak leh hman tawhloh tur khawpa rangin ka pen nghal hlawk hlawk bawk.








In chhung ka lut chu ka thaw huai mai, khapa bula awm kha a hahdamthlakloh tak zet a ni, ka thinphu lah chu a rang nasa em em mai lehnghal a.







"Tinge i va rawn lut hmanhmawh ve a?" Patean a lo tih chuan "A vawt lutuka" tih pahin ka room lam ka pan sawk sawk a, ka inthlaka ka inbual laite chuan haw kawnga ka chunga thil thleng chu ka ngaihtuah lêt a, ngaihtuah ringawt pawh chu hrehawm ngar ngar tak a ni, ani berkher kha nilo se hetiang tak hian ka zak angem le tih te chenin ka ngaihtuah. A....amah anih vanga ka zah bik em em chhan tur lah ka hre chuang der silo.








Mut hmunah pawh ka ngaihtuah zawm ta zela, thildang engmah ka ngaihtuahna ah a awm hleitheilo. JH-a hmel lah chu ka mitthla ah a lang reng mai lehta nghal a, ka number kha min dila, min lo biak ka ring rilru ngawt bawk, engê maw rawn sawi tura ka beisei le.








Zep loah chuan chhelo chu ka ti a lawm mahse, khatiang hnuah kha chuan a mitah pawh ka en ngam tawhlo a nia, min belo zawk law law sela ka ti.








Alawmi nen kan inbia a, ka rilru kap tu chu hrilh chak viau mahila ka sawi hreh ve tumhranga, JH-a chanchin sawia ka zah zia thu te ka sawi chiam anih chuan ka ngaizawng emaw a ti ngawt ang tih ka hlau deuh tlat.








Kar khat zet a chawlh hnuah Alawmi chu hna a lo kal veleh a, a ke chu anla tuam var lûk a, mi harhvang ngang ani bawk a a awm mai mai thei chuanglo, a zakdawh tiang nen pawh chuan a teikual chhen reng a, tlai lamah Rinan a lo lam ṭhin vangin kan haw rual ngailo a, min thlah theih loh vangin Uzodina hnenah "Mambawihi phur haw rawh" a lo ti niawm tak a ni.








"Kar lehah kan chawl tawh mai dawn sia, kan chawlh veleh ah Rina te khua ah kan kal dawna, nang engtin nge i awm dawn?" Rina kan nghahlai chuan min zawt a, "Keipawh kan khua ah ka hmang ang, ka chhungten thingtlanga Chirstmas hman an peih ve silo a, keimahin ka kal ang" ka ti a, "A nuam zawk daih ang chu, heta i chhungte bulah chuan i hmangnuam tak tak lo ang, an ngaihthah bawk che si" ner nanga a tih chuan "Chuvang pawh ani chiah lo ka pi leh pu te vang zawk ania" ka lo ti ve vat a.








"Nuam deuhin i hmang dawn nia, ka lo be ziah ang che, chanchin te pawh ka lo hrilh ang che" phur hmel takin a ti siam siam a, ke na chunga bialpa te khuaa han zin chu kei ka chakloh zawng tak a ni. Mahse, Alawmi zawng khawi hmunah pawh a han leng leh halh dawn tih erawh ka hria.








"Ka nu in a phal vaklo a mahse, Rina nuin lo hmang ngei ngei rawh min tia" nui var var chungin a ti a. Rina chu a lo thleng har phian mai "Planning Department ho bang har thei bik lutuk hi chu" phun hlak hlak chunga a tih lehlai chuan rang lutukin hnunglam ka hawi a, ral aṭanga ka mi hmuh chuan min lo hmu ve hman ang tih chu hlau tak ka ni.








"Awi....Mambawih JH-a ka hmu a nia" ka bula miin a tih chuan "Umm" tih zawngin ka chhanga, min pawt nghal ṭung nain ka hawilet duh tawhlo. "En ve vat rawh, a chhelo lehpek a nia" a tih chuan inher loin ka lehhawi zauh a, kan lampana mipakhat nen an lo phei chu ka va hmu thei a, an hnungah inpawm bawr ṭeuhin Uzodina leh Malsawma an lo phei ve mek bawk. Min hmu velo nain ka hawilet leh rang kher mai.








"An lo phei zel ania, ka be dawn chiang lutuk, engtin nge ka biak ang" ka banah chuan a rawn pawt leh ṭhin, "Be mai mai lo ang" tiin ka Phone chu ka bihlui ngar a, "Aih, biak ringawt a lawm, vawikhatmah ka la be hleinem, engtin nge ka biak dâwn" a la ti cheu a, ṭalh ṭalh chuan a. "Biak dan tur pawh i hriat loh chu biak biak a ngailo" ka lo ti hlur thung.







"Aiii...Mambawih min rawn nuih ania"





"Awihawm loh e" nui hak chungin ka Phone chu ka la bih ngar ngar a, ka hnungzang hit mup mup vang chuan kan lampanin an lo kal tih chu ka hrechiang viau lawi si. "Hei...keimahni min lo pan, min hria emaw ni le, Nu Dingi te hoin ka Star tih an lo hrilh ani ngei ngei ang, Resort a kan kal ni pawh khan Nu Dingi te ṭhianhoin thla an lakpui a" maktih hmel zeta Alawmin a tih leh laimek chuan "Bawihno.." tih ri ka hre nghalzat a.







A va han zialo tak, min rawn koh dan lah chuh!






"In haw tawh dawn a mi Sir?" Alawmi a ni, a zam hauhlo lehnghal.






"I ṭha zel maw?" Alawmi a be lo, keimah zawk a ni min biak ni! Alawmin min pawh leh rual chuan ka inher ta hram a, chutah kan indinchilh ta ran a, sawitur ka hrelo ka laiṭut ringawt mai.







"In inhria a mi?" Alawmin a tih chuan Alawmi enloin keimah zawk chu min en daih a, ka lo nuih ringawt chu a inchhirawm nghal ram ram mai, min nuihlêt lehpek miahlo.







"I pum chu enge a an a?" a ti zawi ruih a, a hmel thutak zet chu a nelawmloh lek lek a, chutih laiin Alawmin makti fêin min lo en bawk. Min be loin kaltlang mai sela ṭha tur "Ka ṭha vek tawh" lungawilo lek leka ka tih chuan a nui ta suk a, hun lo loah hian a nui ziah lehnghal a.








Alawmi lam ka hawi chuan a tum deuh barin ka hria, keimah vang ani tih ka hriat vangin nuamlo ka ti kher mai "Hei hi ka ṭhiannu Alawmi anih hi, hmanni resort a kan kal ṭum khan a ke a ti na a" lai ang reng zetin a ti ta ngawt a, chawp leh chilhin Alawmi hmel pawh a phur lehnghal sarh a, "Revenue Department ah hian kan thawk a" nuisangin a lo ti ve nghal a.








"Hei hi ka Assistant Liansanga anih hi" keimah min en chungin JH-a chuan a ti a, Alawmi chu a mitsir pawn a melh duh hauhlo, Liansanga lo nui hui chuan "I pum chu a ṭha tawh maw?" a lo ti zauh a, mai mai chuan á, hmanzan thil thleng kha hepa bulah hian a lo sawi vek anih dawn hi, a va han ṭul lo em em ve.








"Ṭha tawh" hnunglama Uzodina te lo thleng phei ve mek lam chu melh nghal daih pahin ka ti a. "I number kha ka save dawn khan ka tibo palha" a tih leh chuan ka lo ip ru nasa tawh mai, ti nge maw a kal nghalvat loh le? Alawmi lahin min entawn chhen tawh mai si.








"Uzodin i hman tawh a mi?" tiin anni pahnih lo thleng phei chu ka be sawk sawk a. Ka hmaa ding lah chuan kalsawn mai ala tumlo, a phone a lo lek chhuaka, ka enlo der tlat thung. "Alawmi hi Rina nghahpui lawk ila, i hmanhmawh loh chuan" tiin Uzodina bawk chu ka bia a, "A pawi hleinem, hmanhmawh hran chuanglo" a lo ti ve mai bawk a.






"Bawihno" a rawn ti leh, lehpek chuan!







Nur fe a a hmel ka en chuan tum hmuk chungin min lo melh ngur mai a "Ka tibo tawh lo ang" tih pahin a phone chu min pe a, a va han hrehawm ngar ngar tak, Alawmi lakah mawlh mai chuan ka inthlahrung, thil thleng engmah lah ka la hrilh ve bawk silo a.








Tinge maw ka bul hnaia a rawn kal apiang hian thil ṭhalo hi min rawn thlen ziah zel le? A phone chu lak sakin ka number ka type mawlh mawlh a, ka pek lai pawh chuan ka melh ṭha duh tawhlo kalsawn vat vat sela ka duh ber tawh.







"MAMBAWIHI nen inlo inhresa ami a?" Alawmi chuan a lo ti leh a, ka hming a sawilai chhuan a lamfiah bik hle bawk, JH-a min koh danah khan zawhna a nei tih chu haitheih rual a nilo.








"Hre sa ani tawh mai ang chu" nuisuk chunga JH-an a lo tih chuan " Engtin nge in inhriat?" Alawmi bawk chuan a ti a, chutah keichu min rawn en pah hian "Min hrilh ve lâ" tiin min nek talh talh a, nuih a za fahranlo chu a nî.








"Sir, Mambawihi anih chu aw a hming, Bawihnoi ani reng renglo" nui hawk chungin Liansanga chuan a lo ti a, Alawmi chu a bo telh telh mai. Uzodina lah hnunglamah a lo khi ṭhaw a, Malsawma a ding ngawi ngul thung.








"Kan kal ange?" atih takah chuan ka thaw huai, an kal tak hnu chuan ka hnung a ri nghal dawp a "Lalmambawih kha kha enge a awmzia" ring fahrana Alawmin a tih chuan "Avan Luck deuh vé" Malsawman a lo ti zat a.







"Picnic chu nuamti fal an lo awm animaw" Uzodinan alo ti bawk.






"Sawi chiang vat teh u, Mambawih a koh dan che te kha, bakah engthil nge hmanni chuan thlenga?" zawhna ngah fahran chuan a ti zui mawlh mawlh a. "Chaw an eidun aṭang khan ka ringhlel daih tawh keichu" Uzodinan ala rawn ti tak deuh deuh a.







"Nakinah ka hrilh ang che" ka tih chuan a chek tlat tlat a "I van inzep thei tak, min hrilh vek ang che, ka hre vek duh ania" a ti leh kha kha a. "An awmloh hunah hian ka hrilh ang che" ka ti ve tlat thung.







Reilo teah Rina a lo thleng a, an kal dawn chuan "Zanah ka lo be dawn che ania, kan sawi tur kha aw" a la ti tak ṭawk ṭawk a.







In ka thlen rualin Alawmin min lo be nghal a "Sawi vat vat teh" a rawn ti nghal chung chung a, "Hmanni khan a Motor -ah ka chuang haw a" ka tih chuan a lo phul nghal hlut a. "Awii...chung te chu sawi vat tur a lawm, a fel em...awi a nuam dawn e, enge a sawi, ka van tel ve chak tak mahse, tel ila chuan kan pahnihin kan inphur haw dawn bawk si" a ṭawng zui barh barh chu ka lo ngaithla a, a thinrim miahlo chu kei ka lo hahdam huai thung.








"Mambawih a ngaizawng che ani chiang mai, i number te a dil che sia, aaa....ka van thik tak che, ka kawm tawhlo tawp dawn che emawni zawk le" nui hak hak chunga a tih chuan keipawh ka lo nui hak a, "Ngaizawng teuhlo mai, a Motora ka chuan laiin ka kua a ṭhalo a, ka talbuai hrep a lawm" ka tih chuan a nuih a za ngang mai.








Thil thlen dan te chu ka hrilha, kan nuidun bâwk bâwk a, hmanzana Jonak-a Birthday a ka kal ṭuma kan inhmuh kha chu ka sawichhuak duhlo thung, kha chu hriattir aṭangkai kherin ka ringlo.







"A ngaizawng che anih ka ring tak tak, Bawihno te a ti che ania, in inhmeh dawn ê, mahse, ka ṭah i ti chhuak lutuk, ka lawmpui bawk che sia, ka thik bawk che sia, chhuah miah suh aw....na...ka thik che" a ṭawng mawlh mawlh a, a ṭawng tawp lam phei chu a ṭap deuh purin ka hria.







"I van ti ho tak e aw...min ngaizawng teuhlo mai, vawksa kha ama min pek ania a inthiamlo anih kha" ka tih lai chuan alo ṭahnuih hmanhmawh a.







"Ni ru...a pawilo, keichuan Rina ka nei alawm JH-a te chu ka ralkhat Star mai mai ania" insut faih faih chungin a ti leh a, "Teuhlo mai" tih bak chu han chhan zui vak ngaihna ka hre tawhlo. Kan titi zui luam a, JH-a chungchang bak chu kan pel hleithei meuhlo chu a ni. Kan inkarah engthil mah awmlo mahse, Alawmi rilru ṭhatna erawh ka hriatchian phah hle thunga, engti zawng emaw tak hian hlimna deuh min neihtir lawi si.








Alawmi nen kan inbiak zawhhnu chuan kan thilsawi te chu ka ngaihtuah let tluk tluk a, JH-an min duh ni a a ring tlat chu ngaihdan ka nei thiam velo, min duh anga a awm pawh ka hre heklo, ka number min dil ringawta min be chuang silo a, min duh rinna chhantur engmah ka hmu ve der bawk silo a, mahse ngaihtuahna erawh a kalthui duh a ni.








Thil nilo lo ka ngaihtuah phah, JH-an min duh tur angin! Atthlak lutuk....mahse, ka ngaihtuah miau si. Lo inkawp ta ila ti ten ka ngaihtuah mawle, keihi ngaihzawng neiturin ka lo inpeih reng tawh zawk em mawni dawnni?








Chumi zan aṭang chuan minlo biak ka beisei ṭan ta tlat pek anih chu, ka phone ka en hian a Call emaw a Message a lo awm ka beisei ru deuh ṭhina mahse, engmah phei chu a awm ngailo, Office lamah lah a hmel hmuh ka inring a, ka phur ru tlat zel lehta nghala, mi inthup thei tak ka nih vangin Alawmi bulah erawh ka sawiduhlo thung, JH-a chungchang a sawi laichuan ka lo Um e liam mai mai ṭhina, a ruktak chuan ka ngaihtuah zui rauh rauh ṭhin.








Office kan kaltawp ni chuan a hmel hmuh tumin ka mit ka len ruai a, Christmas hmanga ka zin chhuah dawn vangin vawikhat tal hmuh ka chak kher mai, biak phei chu ka tumlo nain a hmel hmuh hrim hrim chu ka chak a ni ber.








Chhunchawlh laia Alawmin "JH-a chu a zin an tia, a Office a mi ka ṭhiannu ka zawt a, han inhmuin chawlh hma hian han tichiang vat ula ṭha tur" a ti sap sap a. "I ti awm anglo thei lutuk" ka lo ti vat thung.








Zanah Irene-i ka room ah a lo kal a "Ka ṭhianten Winter Event an Organise dawn a, Usher turin kan hming ka pe ania, hlawh pawh a ṭha viau ang, kawr leina tur tuak nan Usher ila dar 10 thleng chauh ania kan haw leh hma dawnnia" a rawn ti a.








"Pate-an zan chhuah a phal tawhlo kha" ka lo tih chuan "Kan dil dawn a lawm, he heu mai mai tur kan nilo a, kan inhlawh dawn a lawm, i telve chuan ka pa chuan a phal leh mai dawna, keimah chauh chuan a phallo ang, min kalpui rawh aw, lo din mai mai paha midang ṭhutna lo kawhhmuh vel kha a ni mai a" a ti leh zat zat a.








"A hma a i tih dan ang khan Jonaka te thil tihna alo ni leh zawk lo maw?" ka tih chuan a duhlo kher mai. "Jonak a tel dawnlo hrim hrim, tun ṭum te chu mi pangngai deuh deuh mi puitling chin thil tih khawmna tur ania, Usher tur pawh model lar chin hlir" a ti leh hmak hmak a.






"Kan telve na chi anih loh chu" ka lo ti mai a, "I telna chi zawk a lawm, inches khat velin han sang phei la chuan model zaih tur inia" min tlawn titih hian a ti a, a sawmna erawh ka aw duhlo thung.







A tukah chuan zanriah eikham aṭangin min vil deuh chawt a, a thil tih tawh hi chu a ti tluk tluk zela, Patea lahin ka telve dawn chuan tiin a lo phalsak a, hnial tlat theih pawh hi a ni ṭhinlo. Ka insiam chu minlo puiin thawmhnaw hak tur te min zawn pui a, in aṭanga kan chhuah chuan dar 7 a pel fel der tawh.








A hmun kan thlen chuan mi Sawmhnih bawr vel lek hi an niin ka hria, mihausa ho intelkhawm an ni tih chu hai theih rual a nilo, Event Organise tute pawh ṭhianho an ni, kan Usher pui te chu Model te an ni hlawm a, TV ah pawh ka lo hmuh ve fo tawh ṭhin te pawh an awm ve nawk mai.







Hlawh aṭhat ang aiin kan thil tih chu a holam ang reng a, kei tihloh Irene-i chenin zu leh Beer an in a, an boruak hap pawh a san hmel viau tawh.







Banah chuan haw mai kan tum chu an zinga pakhat chuan "Kan thlah dawn che u" a lo ti a, "A ngailo" ka ti chung pawhin min thlah chu a tum ruh hle a, Irene-i ka hrilh lahin "A pawilo, misual an nilo a tikhan inthlahtir rawh a lo ti ve tlat thung si. Irene-i chu ka ruala haw alo tum lehpek miahlo.








"A hranin ka ṭhianpain min thlah dawn a ti tlat a, ka thinrim ṭeuh reng ringawt. Mahse, ka hriat chian tak hnu chuan Model dang ho te nen a mal ṭeuha min thlah an lo tum hi a lo ni a, an thil tihdan chu ka duhzawng a nita hauhlo.








Min thlah tum tupa lah chu an zinga thuber emaw tih mai turin midang hoin an thlah turin hmeichhe ho chu a sem kual a, anin kei min thlah a tum thunga, hmeichhe Usher ho zingah chuan chutianga inthlah chu keimah chauh emaw ni hreh awmchhun ka ti rumrum a, hmeichhe dang ho lahin sawibuai an nei eih silo, chu a hnekin an phur hmel em em vek zawk a ni.





(Mutthluk hmain duhtawk leh rih phawt ang aw..tunlai chu taksa a chaklo lutuka story hmasa angin thui tak tak kan ti thei meuhlo a, mahse dah theih chhunah regu ve hle mai ang, in comment chhiar anuam thei khawp mai..ka lawm em em vek ania)

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)