ZUNZAM (MIZO LOVE STORY) by Ahmangaihi violette Khiangte (Completed)

Moderator: writers

Ahmangaihi violette
Posts: 148
Joined: February 1st, 2020, 3:14 pm

Re: ZUNZAM (MIZO LOVE STORY) by Ahmangaihi violette Khiangte

Unread post by Ahmangaihi violette » September 7th, 2021, 11:11 am

ZUNZAM - by Ahmangaihi Violette khiangte


Chapter - 19




Ka rindan hi a dik anih ngai chuan Ufamkima te nupa inkarah hian Lucy hi a inrawlh a ni ngei ang, chu chu engtia chiang viau thei nge ka nih? A chhan chu Lucy hian a ngaizawng tih kha ka rindan a ni sa a, Rosy lah khan Ufamkiman ngaihzawng a nei angin ṭawng kam a nei a, "I student i ngaizawng" a ti bawk a nih kha maw! Thil fello awm ni a ka hriat kha Lucy hi a tawpna anih ka ring nghet bur tawh.




An ni pahnih ka hmuhdun hma zawng kha chuan Ufamkima thil min hrilh kha thil nih dan ni ah ka ngai a mahse, tunah chuan a dik thei tlat tawhlo, Rosy bialpa ni a a sawi lah khan ngaihzawng nghet a nei bawk a, thil awmzia chu a chiang khat viau tawh a ni.



Ka rilru ah zawhna chhan sen loh a rawn lut zung zung a, ka ngaihtuah nasat luatah ka lungphu thlengin a mumal lo hial a, ka tawt up up maiin ka hria. Rosy lah chu zawh dawt ka ngam mang silo a, a ti chiang thei ber tu tur chu amah Rosy ngei a ni bawk si.



Ka hai der mai dawn em ni? Mahni hmasial takin chutiang chuan ti ila, eng hun nge ka hma chhawn zel ang tih te chenin ka ngaihtuah kual a, ka rilru a buai tak zet a ni.



"I va ngawichawi ta ve a" kan inlampana kan tlanlai chuan Romawian a lo ti a, dawr aṭanga kan chhuah hnu khan kan la inbe leh miah lo. Chhang lo chuan ka lo ngawi ta reng a, "Mimi..." a rawn tih leh takah chuan "Min be rih lo teh, thil ka ngaihtuah lawk dawn" ka lo tih san a.



"A va mak thei, enge i ngaihtuah a, ka hre ve duh" tih leh ka mala rawn ben a rual a, "Rilru buai lai laiin lo ṭawng sek suh" ka lo tih leh chuan a nuih a za khawp mai, "Ngaihtuah zo vat vat la, inkawm ang" a tih erawh ka chhang zui tawh lemlo.



Ka rindan chuan Lucy hian lehlam lehlamah thu a vai vir anga, an ni nupa inṭhen theih nan game a khel a nih ka ringa, Regina hi a chawchah mai anih ka ring bawk, ka rilru chawh buai nana Regina a hmang ang chiah khan Rosy lakah a hmang tihna a ni ngei ang.



Anih chuan Ufamkima ve thung hi, Ufamkima chu rilru tluang tak a ni a, Lucy te ang hmeichhe fing lutuk chuan a bum hnehsawh khawp ang chu mawle, engtin nge a nupuiin ngaihzawng nei anga a rin bur theih tura a tih kual dan chu hriat ka chak khawp mai.



In kan thlen chuan ka pa pawh a lo awm a, Romawia chu a lo be sawk sawk a, ani lah chuan inneihna a ka sawm lo a vui thu chu hahipin a lo sawi bawk a, mi lah chu a han puh chhe em em mai bawk a, ka pa chuan min thiamlo hle ringawt mai a ni.



Sitting room a ka pa nena an ṭhu chu "Lo inkawm rawh u, damlo kanin ka chhuak dawn a, ka han insiam ange" tiin room ah ka chhoh san a, ka insiam mawlh mawlh laiin ka phone a lo ri a Ufamkima a ni, "Ka lo kal meka, lo inpeih sa rawh" a lo ti var a. Ka insiam peih rualin ka nuin inhnuai lam aṭangin min lo ko lang lang a, Ufamkima a lo thleng tawh a nih hmel e.




Engmah finfiahna chiang tak sawitur awm lo chuan engthil mah ka tilo ang tiin ka rilru ka siam a, awm pawh nise ka ti kher a ngem tih pawh ka chiang chuanglo, heng an nunhlui buaina hi chu mena thlak mai ṭhain ka hre bawk, a chhan chu a tuar tu ka ni ve thei tlat a ni, tunah chuan tu laka fimkhur tur nge tih chiang takin ka hre tawh a, engtikah mah inhneh tir loh ka tum anga, Ufamkima hi ka vuan tlat bawk ang, mahni hmasial inti ru tak siin keimah ka inthiam chawp a, hetianga ka ti lo anih chuan ka mipa duh em em hi ka chan thei mai dawnin ka inhre tlat a tin a ni.



Ni e, ka sawilo ang, ka hai der anga, ka sawi leh sawiloh chuan kawngro pawh a su vak chuang lo ang te ka ti thul, a nghawng theih tur lah ka hre chiang nasa mai si, ka ngaihtuah fet hnuah haider ka thlang a, thil sual ti ang mai a inthiam lohna erawh chuan ka chhungril lamah min fan rauh rauh thung.



Inhnuaia ka chhuk leh chuan Sitting room ah a lo ṭhu a, Romawia a awm ve vang chuan ka inthlahrung ru khawp mai, a awm tinuam tur zawnga ṭawngkam neih tum tak chuan Romawia chu ka va bia a "Ka pa nen khan lo inkawm ru aw, ka lo haw harlo ang" ka tih chuan min lo melh tur khaia, ka tihdan chu a tan pawh lawmawmloh ve tak tur chu a ni.



Ufamkima chuan lungawilo hmel a pu lemlo a, ka ngaizawnglo tih a hre chiang ta a nih ka ring. "Vawiin lam tunge awmpuia?" ka tih chuan Mamuanan a awmpui thu a sawi a, tlaiah Rosy chuan a thlak leh dawn a ni awm e.



Damdawiin kan thlen chuan Mamuana leh Lucy an lo awm a, engtik laiin nge maw a lo thlen phei veleh hmanni! "I chawl dawn emaw ka tia?" tiin Ufamkima chu a lo bia a "Chawlh theih pawh a nilo vawiin chu, Presentation ka pe a" Ufamkiman a lo ti vat a.



"Court tur chuan i inbuatsaih ve ta em, engtin nge i tih dawn taka?" ti a Lucy'n a lo zawh leh chuan ka hawi rang khawp mai, Ufamkima chuan a sawi tim deuh a "Engmah a la chianglo, kan Court lo ang" a ti niah niah a.



"An tum em kha, a hma pawn enkawl an tum nasa tawh a, an hunṭha a ni tih an hre ve reng a lawm, a landan maiah chuan i chak ka ringlo, inlamah i awm ngai mang silo a, Accident thil a ni vei nen i chan a chau dawn riauin ka hria " Lucy chuan a ti leh a, Ufamkiman ka lam a lo hawi chuan kei chu ka lo bangbo khawp mai.



"A chan a chauh bikna a awm hleinem, nau enkawl turin Rosy pawh eng a ni bik chuanglo, damdawi te a tia, ṭan chhanah kan hmang ve thei a lawm" Mamuanan anlo ti ve leh khauh a.



"Ringawt a che, Rosy in ka ti lo a tih tlat chuan awmzia a awmlo ang, Court ah mi i puh dawn chuan thil reng reng finfiahna neih zel a ngai a lawm, tun ṭum chu Ufamkima chan a ṭha vaklo ang" Lucy chuan a ti leh hmarh hmarh a, Ufamkima ṭhu ngawi ngul chuan engtak chu ngaihtuah ve ang maw?



"Kan tlawm biklo ang, ka tih theih ang ang kan ti ang, Rosy enkawl aiin kan enkawl ṭha thei zawk, ziakloh dan kan neih ah pawh naupang chu mipa ta zawk a lawm an nih, kan Nature Law hi a pawimawh ve tho, nuin a duhthu a a chuh ve ngawt theih a ni lo " Mamuanan a tih leh laiin "Tun angah chutiangin awmzia a nei tawhlo, miin Court ah an chingfel zel tawh, ngaihtuah chiang ta che Ufamkima nitin a kalchhuah angai a, Nu Nghaki a tar tawhin a hrisello bawk si a, chumi chu an ṭan chhan dawn, enkawltu a neih ṭhatloh vanga Accident ah anih hi an ngaih" Lucy bawk chuan a lo ti leh a.



"Court thlen kher pawh angailo, an chapo vang mai mai a ni, palai nen a sawifel theih vek a nia lawm, ti raw Mimi" tih leh pah chuan Mamuanan min lo melh a, ka lo nui tawi tak ringawt thunga, sawi ve tur ber pawh ka hrelo, a lehlam lehlam ah ka thiam tawn ve vein ka hria. Mahse le, keima lam zawn aṭanga ngaihtuah chuan Ufamkiman enkawl chhunzawm sela ka ti takzet a ni.



"Kima ngaihzawng neih vang hi a ni bawk mai thei" Lucy'n a rawn tih leh chuan a lam chu kan hawi rual ṭhap a.



"A lawmawm fahran dawnloh em a" a ti sam leh mai a.



"A eng vang ngawt chuan maw, a uire hmasa pawh ni hleilo, zawnglai ania ngaizawng te chu a nei ve bawk ang chu" Mamuanan a lo ti leh hlak a.



"Tunah Rosy'n ngaihzawng a nei tawh pawn ka hrelo an inṭhenin ka hria, chuloah Bawihpuia nuhrawn hrawn tur an ngai ngamlo te pawh a ni ve thei a" a ti leh zat a, Lucy ṭawngkam chhuak reng reng chu men ah ka thlak zel ang ti tawh mahila rilru erawh a la ti buai pha kher mai a, ngaihtuah zui pawh a awl khawp mai.



"Sawi tawhlo teh" ngaithei vaklo awka a Ufamkiman a tih takah chuan ka lam rawn hawiin a nui sak a, min en dan ṭhin hi chu aw, mi hi a tham lo ngawih ngawih ni berin ka hria.



Lucy kal hnu ah Mamuana nen kan titi dun a, Ufamkima chu kan piah chiah a damlo awmpui ve tho pa pakhat nen chuan an titi dun a, Christa erawh a la mutui khawp mai. "Lucy ṭawng thei lutuk hi chu a khamawm ṭhin ania, engah mah ngai duh suh, Bawihpuia chu an enkawl chuanglo ang" Mamuanan a ti leh hlak hlak a.



"Rosy chuan a lo thlak dawn che a mi?" ka lo ti ve vat a.



"Tlaiah ka lo kal ang chu a tia, a lo thleng ve ṭep ang" a tih hnu rei vakloah Rosy chu a lo thleng a, "Ka rei em, ka inbual leh phawt a, ka Scooty chahbi dahna ka theihnghilh a ka zawng rei lutuk a lawm mawle" a lo ti hlut a, chutah min rawn enin "I va fel ve" tih pah chuan ka bulah a lo ṭhu a, Mamuana nen Christa chungchang an sawi a, kei chu ka ṭawngtuitam lo khawp mai.



"Urosy Christa hi kan ngaihtuahlo bik a nilo a nia, hetiang hi chu Accident a nia lak nat viau chi pawh a ni lo" vui hmui pu lek lekin Mamuana chuan a ti leh ṭhin a, Rosy chuan a chhang ṭha duh vaklo thung.



Ufamkima kan bula a lo kal rualin haw ka duh tawh mai thu ka lo hrilh a, Mamuanan "Kan haw rual dawn nia u" a lo ti ve bawk. Rei awm tawhloin kan pathum chuan kan inzui haw a, Mamuana a awm ve vangin a lo peng kawi tawh lo a, in chhung ka lut chu an lo reh duk a, ka nu eirawngbawl chuan "Khawnge i kal chhuah daih a, i ṭhianpa kha i ti hawihai leh lutuka" tiin min lo hau nghal pang mai.



Romawia chu ka Cousin te ho nen an lo leng chhuak a ni awm e, ka inbualsan a, ka zawh hnu pawh chuan an la rawn thleng lo a, zanriah eidawn ṭepa an lo haw chu an rawn hlim dar dar viau mai a, kei min hmu erawh a hmui a pet sawi duh chauh thung a, a lawm loh hmel khawp hian ka hria.



Mi lah chu a be ṭha duh hauhlo a, ka unau te ho bulah lem a nui hawk hawk thunga, ka va biak te chuan a kiai suk ringawt a, a ti tau ve deuh em maw ni! Chaw kan eilai pawh chuan ka bulah ṭhu duhloin Uthana bulah a ṭhu tlat a, a ho ka ti tak tak a ni, a bialnu pawh ka nilo a, a lo kal hma daih tawhin Ufamkima nen chhuah kan tum tawh a, ani lo kal thut vanga ṭhulh leh thu awm heklo, a tih dan chu ka hriat thiam zawng a ni ve hauhlo.




Chutia min be ṭha duh manglo e tilo chuan a leng rei phian lawi a, Sitting room ah ka pa hoin Card an denga an ri ham ham reng a, a haw tak chu dar sawm vel a nih ka ring, pawn thleng chuan ka va zui chhuak a, "Muttui aw, i lo leng leh dawnnia" kal pah deuh taka ka tih laichuan rang ralh hian min lo melh a.



"Kal ta che" nuisanga ka lo ti leh chuan min chek khum hlak hnuah a Bike lampanin a kal zui nul nula. A hnunglam a ṭang chuan ka lo nuih var var thung, hepa hi engtia han kawp mai nge maw ka nih le, Shillong ka awm tirh khaan an ṭhian ho kha kan Dorm ah lo len an ching a, ka Roommate ṭhianṭha tak niin ani khan min inhmelhriat tir kha a nia, kei a lungleng kawm tur duh em em khan mipa ṭhenkhat aiin ka be ṭha deuh tih chu ka pha thei lo ang.



Kan inngaihzawn ṭan ringawt dan erawh a nawi angreng khawp mai, rei tak phei chu kan inkawp lem lo a, ka duh tak tak lo ni a ka inhriat laiin ani pui hian ka ngaihdan kha min ṭawmpui lo hle thung a nih kha, pakhat zawkin inṭhen duhlo mahse, a hel zawk awm tlat si chu kan inṭhen ta tho a mahse, hei tunah ṭhian angin kan inkawm leh ta der chu a nia, ṭhian tak tak kan ni em pawh ka chiang chuanglo, ka bialpa bula ka kalsan vanga titau bur bur ngam a la ni tlat mai bawk si a....a tih ngaihna tak pawh ka hre tawhlo.



A tuk zing aṭangin keipawn dawr ka hawng leh ta a, kan hnathawk nula pahnih an khaw lamah an lo haw hman vangin kan indaihlo hle mai a, Pa Rela leh hnathawk thar tleirawl te nen chauh kan ni a, ani lah a la zeilo bawk nen keimah ber chu ka buai mai a, Counter ah pawh ka ṭhu hman mang meuhlo, Order lain ka vir buai ve nileng a ni ber e.



Tlai lamah ka cousin te ho bazar an lo peng kawi a, "Min lo pui rawh u, kan indaihlo nasa lutuk" ka lo ti nghal chul a, min puih tak sap sap ah chuan ka ṭhu ve hman ta chauh a mahse, an puihna dawn chu a hlawkthlakloh ṭhin a ni, a thlawn a thil ei an beisei leh pek a, kei lahin ui ngam heklo, Aumawii ka hrechhuak rauh rauh mai, ani chu awm sela chhungte an nih vang ngawt pawhin ṭangpui ngai zawk anih thu sawia a indawr tir ngei ngei ka ring a ni.



Kar tawp lamah chuan kan mikhual te pawh an haw hlawm tawh a, kei nitin dawrah ka kal a, buai ana ṭhin khawp mai, a hma khan ka lo awm awl ṭhin zia te pawh ka hre thar a, ka sawi tawh ang tak takin mahni kut zala thil a han tlak chuan ṭhahnem ngaih a na duh hle a, inhawn tlai emaw haw hma tih ang reng chu thlakhlelh ngaihna pawh ka hre tawhlo hial a ni, dawr luah man leh bawl hlo engilo a to si a, buai manglo a nilen ka hlau riau tawh zawk a ni ber ang chu.


Christ a pawh ka la tlawh leh ta miahlo a, Mamuanan kal puiah min lo sawm ve leh zawk ṭhin tak nain ka va lan ve fo pawh chu a rem teh ṭeuhin ka hrelo, Rosy lakah tak pawh chuan ka inthlahrung ru riau a, Damdawiin an awm laia va kal tawh rihloh chu ka tan pawh a mawi tawh zawkin ka ring, an chhuah hunah chuan duhleh an in lamah te pawh ka la kan ve leh zawk ang ka ti rilru a, ngaihtuahna erawh a luah ve reng thung.


Ufamkiman tlaiah min lo tlawh leh zauh ṭhin a, counter ah ṭhuin kan titi dun a, Christa chungchang leh ka dawr chung chang bak hi chu kan titi a peng thuilo ṭhin khawp mai.


Kan inkar chu a dap dup reng a, amah ang chiah a ni, hmangaihna thawnthu a ka lo hmuh ṭhin anga han vul chuk thil a awm lemlo ti mai teh ang mahse, kan lungawi dun tho chuan ka la ti fan a, ani lah in han sawisel a nei heklo, rei tak inngaizawn hnua phurna tur thil awm tawhlo ang mai hi kan ni.


Aumawii chuan "Nangmah chiahin i ngai zawng" min ti a.



"Mahse, ka bialpa chu a ni mek sia" ti a ka chhan chuan "A hnar lo ringawt che a nih zawk kha Mimite, a rilru ah pawimawh dang an tam lutuka, ngaihzawn nan che hun thawl a mamawh zel anih kha, kha tiang kha a buaithlak, ramropui inthleng dun dawnin ka hrelo" a rawn ti deuh duah a, ka nuih liam mai tak nain mut hmunah erawh ka ngaihtuah let rauh rauh a, engtin nge kan inkar hi a kal zel dawn tih chu ngaihtuah thiam a har tak zet a ni.



Kar hnih hnu ah Christa chu inlama inenkawl turin an chhuahpui ta a, Ufamkiman haw pui a tum laiin Christ-an a nu zawk a ngen tlat a ni awm a, "U Rosy'n a haw pui rih a, nakkinah kan la phei leh ang" tiin Mamuanan min lo hrilh a.




Ufamkima nena kan inbiak chuan "Han damṭha deuh phawt sela, a damkawr deuh chhung chu awmpui rih mai rawh se ka ti a nih kha" a lo ti ve mai a, an Court dawn ta em tih ka zawh erawh chuan engmah chuti lam thu chiang an la neih rih loh thu a sawi leh a, Court thlenpui ngailo an inrem theih a beisei a ni awm e.



Thawhṭan ni tlaiah a hna bang a lo peng kawi a, tunlai a rimtawng bawka a cher ve dawk mai a, a lang upa sawt riauin ka hria, Counterah chuan lo ṭhuin engthil emaw hi min lo pe a, ka lo en chuan Teddybear lem duhawm zet mai hi a nia, beiseiloh deuh hian a che ve leh khut ṭhin.


"Ka piancham pawh a ni silo a, enge a awm zia?" nuisanga ka tih laiin ka kut a lo hum rauh rauh a, "Ka dawr kalna ah an lo zuar a" tih te mai chuan min chhang a.



"Christa chu i ngai em?" ka tih chuan a kiai deuh suk a "Min ngai ve vaklo" a ti leh mai a, a ngai hle ang tih erawh ka hria. Coffee a in hnu ah rei awmloin a haw a, a thlen veleh ah min lo be leh a, message in kan inkawm zui a, a tih tur hrelo lungleng nge pawh ka hre bik chiah lo, ho te te sawiin min lo be reng a, ka haw hnu thlengin zan muthmunah pawh kan inbia a, kan mengrei dun khawp mai.



Kan ṭha chho viau dawn emaw ka tih laiin boruak dang kan tawng leh a, Rosy chhungte chuan Court ah Christa enkawl chu an lo dil ta ngei a, an Court dawn ni chuan Ufamkima leh a nu dawrah an lo peng a, Ufamkima hmel nguai zet chu ka khawngaih tak zet a ni.



"Mipa fa a nia, an nei lo ang, kan lo hawn tir chu a pawi khawp mai" Nu Nghaki chuan a ti hlak hlak a, Ufamkima erawh a ngawi reng thung. Han hnem vak ngaihna pawh ka hre biklo, Mizo dan angah chuan Ufamkima enkawl tur zawk a ni a mahse, Christ an a nu bula awm a duh tlat si chuan thil a ti buaithlak ta a ni ber e.



An kal liamtak hnu chuan ka vei zui ve reng a, eng thu tak rawn hawn ang maw, Rosy te lam ṭan chhan tur tinga Christ-an Accident a lo tawk leh kher si chu a pawi thui em lo turah ngai ila, ka chungchang Lucy'n a sawi zawk kha a pawi viau angem tih te chen chuan ka ngaihtuah a, ka rilru a lo buai ru ve takzet a ni.



Aumawii bazar lo peng kawi bulah chuan ka lo sawi mawlh mawlh a, "A nuin awmpui se a ṭha zawk ang chu, chuti anih loh te chuan an rawn inham buai ve reng ang tih te pawh a hlauhawm a, Famkiman a enkawl loh na na na chuan a hmeichhe lam kha chu an reh zui ve mai dawn a, Famkima rilru pawh a lang chiang deuh turah ngai la, i hun a lo thleng dawn ta ah ngai rawh" a lo ti teh daih a, ka lo ngaihtuah loh lam tak a ni.



"Keima lam vanga rilru hah ka ni lo ania aw, Ufamkima zawk hi ania ka khawngaih lutuk a, Christa tello hian a lung a leng bawk si a, a awm hleithei pawhin ka ringlo" ka lo tih chuan "Chu reng chu a lawm keipawn ka sawi" a lo ti ve leh zat a.



"Famkima hian a duh tak tak che em tih pawh a hriat mai ang" a tih leh pawh chuan a sawi tum tak chu ka hre fuh theilo, "I a emai, ka sawifiah peih tawhlo, a sawia sawi harh ngai chi inih hi, Warning chi pawh i lo, han tawng baw phawt la, i chiang kuar kuar mai ang" a ti hlak hlak a.



"Enge maw keima lam zawnga thil i lo ngaih tlat le, Ufamkima leh a fapa ṭhenhran an ni mai tur chung changa ka rilru hahna ka hrilh che anih zawk chu" kan thil sawi in manlo dun lutuk vang chuan kan inmelh no lo viau a, a thin chhe bawk si a, keilah ka dawhthei bik bawk silo, thil pangngailo deuh sawiin kan inhnial hi a ni thaw thang zel.



"I khawngaih thlak dim dem mange" ka ngawih tawh hnuah chuan a rawn ti leh hram a.


"Engmah i hrethiam lo a nih kha, fa nei la i hrethiam ve mai ang" ka lo tihsan thung.



"Ka hrethiam lutuk zawk a lawm, I bialpa hi keichuan ngaihngam taka ka ngaihzawn theihloh tur chi ania, chuvang chuan Pathlawi niloin tlangval zawng rawh ka ti che a, Famkima te chu a fel lutuk tih ka hre tho mahse, maw ka nau, i hahchawlhna tur darah midang phur rit hlir a awm chhung chuan i hlim thei lo ang, Famkima ka thiamlo tihna lam niloin, i tan hahchawlhna a pe thei chein ka ringlo, tunah pawh han in enla, a buaina lo thlen belhsak hlau reng rengin i awm anih hi" a ti deuh duah a, min ti dang lel ringawt tawh.



"I rilru tina kher lo la" nem deuh zawka a rawn tih leh chuan ka lo nui tawi tak a.



Chutah min rawn nek salhin min rawn nuihtlawn deuh sang a "Mimite, ka sawi ang pawh kha a nilo maithei tho, Pasal neih te hi chu Risk thil vek hi a nia, zu in mi fel zui ta hlauh te an awm a, in ngailo in leh hlauh an awm bawk a, chutiang chu a ni mai i Risk ngam chuan Risk rawh" a ti leh sap sap a.



"Engmah ka hrethiam tawhlo, a hlimna ka duhsak em em a, Christa vanga a lungngai hmel hmuh hi hrehawm ka ti bawk a" ka ti leh chuan ka darah min rawn kuah tharhin "Fa neih sak ve la, a fel mai ang" nui hak hak chungin a rawn ti a, a teh daih ṭhin chuan a.



Dar thum velah Umawipuiin min hawsan a, a haw hnu Customer kan nei manglo bawk nen ka Phone ka en deuh sek tawh a, Ufamkima chuan chanchin min lo hrilh har ka ti tawh khawp mai. "Lo peng kawi leh rawh" tiin Message ka hnutchhiah zui a.



Ka inkhar dawn thleng chuan min lo la chhang lo a, ka nghak rilru deuh nen nidanga ka inkhar hunah pawh chuan ka la inkhar lo a, midang erawh ka haw tir tawh thung, ka phone ngaichang chungin ka ṭhu ta reng a, Romawia Message ho deuh deuh chu ka chhang pah bawk a, chutih laimeka Ufamkima lo pen lut chu a hmel aṭangin thil thleng tur awm ang ka lo hre thei.



"I va inhawng rei ve, zan ah ka lo leng ang ka tia i Message ka hmu a ka lo tlang leh a" tih pahin ka bulah chuan a lo ṭhu a, zu rim a namin ka hria, a in ngai silo a, ka hamhaih khawp mai.


"Zu i in!" ka lo ti nghal tawng a.


"No khat chauh ka in" a lo ti ve nghalzat bawk.


"Tinge i in kher, zu in chin hi a ṭhalo a sin, i buaina a fel phah dawn chuang silo" ka tihlaiin ka darah a rawn kuah ah "Hei bak hi chu ka in tawh lo ang, min hrethiam rawh" a ti zuai ruih a.


"Enge in thutlukna chu ni ta?" ka lawmloh na thupin pangngai thei ang ber chuan ka ti a, a zuin chu khel bera lo neih rih chu ka duh chiahlo, a sawi angin nidangah chuan a in tawhloh ka beisei.


"Kum sawm a hnih hunah ka hnenah a awm thei chauh ang, a nuin a enkawl rih dawn" a aw chu a zawiin a beidawn hmel ngawih ngawih a, kan ṭhutna hmalama dawhkan ruak lam chu melh vang vangin thawk a la ham ham bawk.



"A van pawi ve aw, kum sawm aia reilo tal nise a ṭha tur" ka lo ti ve sap sap a.



"A rei khawp mai, kum sawm hnuah chuan ka hnena awm pawh a duh tawhlo zawk maithei" hnem ngaihna hrelo chuan a tukkhum sam ka va chulsak ringawt a, "Ufamkim lungngai lutuk chu, a hringtunu chuan ṭhatakin a enkawl ka ring, i fa a nihna a bo lo a, ral aṭang pawn i enkawl thei tho a lawm, i chân ta ah ngailo la" ka tih leh chuan a bu ve nghat nghat a.


"Ni e, a ṭha zawk turah ngai ang, ka hna vangin hun hi ka nei mang silo a, nakkin lawkah School te a lut ve anga, a nu te lam hmeichhia an rual a, an duat bawka kan hnen aichuan nuam pawh a ti zawk reng reng a, ka nu ber hi a ni; a lung a leng dawn khawpin ka hria" zangkhai deuh zawka a tih chuan "Pathian remruatah ngai tawp mai ang, a nu pawn pasal te pawh a nei leh anga i hnena a rawn tluk luh leh hun a awm ngei ngei dawn a, tunah rih chuan ala naupang em a, nu enkawlna a dawn chu a ṭha zawk maithei" ka lo ti veleh a, a pawm ve viau chuan ka hria.



Dawr ka khar zui a, kan inthleng min thlahin a inkhalh haw leh nghal a, chumi zan chuan kan inbe zui lo a, a rilru hah deuh aniang a reh zui vung vung a, va biak chu duh viau mahila hun thawl pek rih ṭhain ka hre ve bawk si a, ka be zui ta rih lo.



A hlimchhawn anih vangin hriathiamna sang tak ka nei ve in ka hria 'Mahse' tih a awm leh ta, Ufamkima chu a reh rei khawp mai, kar khat zet in be mumalloin kan awm a, Mamuana an khua ah a awm daih bawk si a, a chanchin lah hriat tur a awm mang silo, min biak ṭul tilo nafam chu va ka be hreh ve tumhrang tawh a, a duh hunah min be mai rawh se tiin ka insawh tau leh ringawt ṭhin.



Kar khat hnuah ka be leh ta hram a mahse, aman lo chhang loin a nu zawkin a lo chhang a, "Tunlai chu zan a mu manglo a, a Thesis buaipui hi Room ah a tawm renga, nizan ah a zo chiah a, hei vawiin chu a mu tluk tluk mai, a lo thawh hunah ka lo hrilh dawn nia, lo manganglo la aw" a lo ti dap dap a, eng engemaw sawiin kan inbe zui luam a, a sawi danah Christa pawh a dam ṭha ve zel a ni awm a, an chanchin hriatloh tawp aichuan thawkkhat chu a veng ta deuh a mahse, lung erawh a awizan lo deuh chu a ni.



Zanah chuan min lo call a, a phone call ka chhan rualin "Ka inthlahrung hle mai a" a rawn ti zawi deuh ruih a, sawi tur pawh ka hre lo ka ngawi rauh rauh a, chutih laiin "Naktuk chu kan leng chhuak dawn em niang?" a lo ti leh a.



Ka rilru a hel nge pawh ka inhre biklo, ka laka a inthlahrun vang ngawta min lenpui tum a nih kan ring nghal ringawt a, min thlahlel hran vak pawn ka hrelo, chutiang kara lo va mawm sek chu tlawmah ka la ve deuh tawh, "Naktuk chu chhungkaw chaw eikhawm an tia ka hman ka ringlo, remchang hmasa berah kan tum dawn nia" tiin ka lo chhang a, lawmlo awka ka tilang hranlo bawk a, pangngai tak chuan kan inbe bawkin ka hria.



Mahse, kan inbe tam zawmlo khawp mai, a khat tawkin chanchin kan inhrilh a ni mai a, kan awmdan chu inngaizawng kan anglo tak zet a ni.



Inrinni tlaikhat chu Umawipuii te nupa an lo peng kawia, an awmlai chuhin bazar turin ka kal chhuak a, eitur zawhna dawr lian angreng taka ka lutkawi chu tumloh deuhin Rosy ka va hmu a, ka va hmu ti ila aman min lo hmu hmasa a ni mah zawk.



"Inhmuh a va khat ve?" nuisang a lo tih chuan, "Enge Christa a an, in ṭha zel em?" ka lo ti ve luam a.



"Kan zia zel e, a ke pawh kan phelh ve thei ṭep tawh, naupang dang nen an inkawm ṭhina, awm mai mai harsa a ti lutuk hi pakhatin ven deuh chawt angai a, a pu nen an inpaw kual deuh reng mai" a ti siam siam a.



Kan thil lei man pe tura kan kal dun laichuan "I hmanhmawh em?" a lo ti leh a, zawhna mitmenga ka lo en laiin "Thil ei ila, ka Treat dawn che nia" a ti leh chu hnial ka tum zeta, engmah ka sawi hmain amah zawk chuan "Thil sawipui duh che ka nghah a nia" a lo tih leh vang chuan ka hnial ta em biklo.



Thingpui dawr lampanin kan inzui a, kan ṭhu fel chauh tih ah chuan "Min dem viau lo maw?" a rawn ti hmasa ber a, "Dem lo e" hamhaih angreng taka ka tih chuan a nui tawi khawp mai.


"Ka enkawl theih dan kawng awmchhun a ni tlat sia, a nawm chu a nuamlo duh khawp mai, Christa pi lah chuan min huat zual phah nasa mai a, Ufamkima lakah pawh ka inthiam bik chuanglo" a ti leh sap sap a.



"I bula awm a duh zawk bawk si a, amah Christ a hlimna kha a pawimawh ber a lawm" tih zawngin ka chhang thung.



"Nia...a pa hian ka enkawl ṭha lo turah mi hi a ngai ringawt a, zep loah chuan ka inthiam ve tho, lo ngai haw lo la Bawihpuia vang hian Ukiman ngaihzawng min neih san lai pawh khan inṭhen ka duh ngailo a, fa te tih fahrah aichuan tiin tawrh hram hram pawh ka tum ve a mahse, ka duh dan nimiahloin thil a kal anih hi" a tih laichuan ka tui in chu ka lem sual a, ka khuh zui bawrh bawrh a, ka ṭawng chhuak mai theilo.



"Enge....i sawi chu a awm zia...Ufamkiman ngaihzawng a neih san che a maw?" ka lo ti bah nak a.



"A ṭhawng deuh che a mi, i rilru tih buai tuma sawi ka nilo ania, awi....engahmah ngai suh.. a rei tawh emai..." tiin a riat nawi zui a mahse, ka hre thawi ting tang tawh a, ka thil hriat tawh sa nena inkalh a nih vangin hriat chian ka duh a ni.



"Nangmah zawkin ngaihzawng i neihsan emaw ka lo ti a?" insumkarna neilo zetin ka ti khawl a, a sawifiahna ka ngaichang nghal hmiah bawk.



"Chutiang chuan an hrilh che ka ring reng a ni, ngaihzawng nei chu amah zawk a lawm, a student ania Regina-i nula hmelṭha deuh mai a nia" ner sak chungin a rawn ti a.



"Englo, Urosy bialpa chu i neilo tak tak a mi?" ka ti nawn leh ngat a.



"Neilo ti ila, Ukiman ngaihzawng a neih vang khan ka ṭhian hlui pakhat chu ka be ve hman a, Qatar-a awm daih ania, rei tak chu kan inbe hmanlo, midang inhnem nana hman aichuan Damdawi tih ka thlang leh ta zawk a min chhawk zawk bawkin ka hria" nui deuh hakin min lo en a, holam tak anga thil a sawi mai laiin kei erawh ka ipik hluah hluah tawh, ka ngaihtuahna te chu an vir kuai muai muai mai hian ka hre bawk.



"Christa Birthday a i lo kalpui kha i bialpa emaw ka tia?" ka tih chuan a nui hak a.



"Kha chu BD-a a nih kha ka ṭhianṭha ve ber a lawm, hmanni khan nupui a nei chiah" a nui hmel chu enin ka chil ka lem dak ringawt a, ka vai riai mai hian ka hria!



Rosy hi a lo uire tak tak lo tihna maw? Ufamkima thilsawi kha hriatsual palh vek tihna a nih chuan.... khai leh!....ka duh aia tam ka hre tawhin ka hria, aw....ka duh aiin ka hre tam mah mah a ni.




(End of chapter - 19)



Link:
BBcode:
HTML:
Hide post links
Show post links

Ahmangaihi violette
Posts: 148
Joined: February 1st, 2020, 3:14 pm

Unread post by Ahmangaihi violette » September 7th, 2021, 11:13 am

ZUNZAM - (LAST CHAPTER) by Ahmangaihi violette khiangte


CHAPTER - 20




"Min ngaihdan tur chu a hria a lawm, pawmlai nei chunga ngaihzawng nei angin min ngai anga, Damdawi te ti a awm khawlo takah min ngai ngei ang chu, chu chu Ukima te nufa pawhin a min ngaihdan a nia mahse, in ngaih ang em em chu ka ni biklo a nia.



Qatara ka ṭhianpa nen pawh khan inngaizawng kan ni chiahlo, ka nulat lai aṭanga min ngaizawng ṭhin tu chu a ni ngei a, khatiang dinhmun harsa a ka din laikhan rilru khan hnemtu a zawng ve a, ka thiamloh chu a ni teh meuh mai chunglam hmuhah uire chu ka ni der a, a chhan chu ka pasal uire hua a ka nat pui em em laia a tih ang tih ve tumna rilru ka pu ringawt pawh kha thil diklo hulhual a ni.



Mahse, tunah chuan Damdawi ka ei tawh ngailo a, ka nun pum hi Bawihpuia enkawl nana hmanral ka duh tawh a, tunah chuan ka nuna mi pawimawh ber a ni, chuvangin hetianga chet ka la hi chu min ngaithiam mai dawn nia u aw, Nu dinhmun aṭangin nangpawn min thlir pui zawk dawn nia, Ukima chuan engtikah mah min ngaidam tawhlo maithei mahse, Bawiha hi ṭha takin ka enkawl anga, min la ngaidam ve mahna" ti a min hrilh lai chuan a thutak hle a, a mitmengah chuan lunglenna thuk tak ka hmu thei hial a, a nuihmel phena lungngaihna leh khawharna chu hmuhhmaih theih lah a ni heklo.



"Nu ṭha tak i ni" ka aw chu a zawi hle a, a ri che che chauh tawh.



"Ka ṭha lo aniang, Nuthlawi mai ka nih hi" nui hakin a ti leh a, chhang tawhloin ka bula tui chu ka ban rawk rawk a, ka lem nghal khawlh khawlh laichuan "Tui i in vak vak a, thingpui chah tel ka tum a sin" a lo ti hluai a, a hmel pawh chu en nuam ka ti tawh meuhlo, ka zah ru khawp mai, ka inthlahrung a ni mah zawk ang.



Haw thuai thuai ka duh a, ka ngaihtuahna buai zet leh ka thawk ipik mup reng vang chuan tuivawta inleih bawrh bawrh mai ka nap a, ka sahal lutuk leh ka rilru tawt chu a ziaawm phah huaiin ka ring.



Waitress lo kalin kan eiduh min lo zawt a, Rosy'n min lo zawh chuan "I tih ang ang kha ka lo duh ve mai ang" ka lo ti zawi sep a, ka phone ka enlai meka Ufamkima Call lo lut chu tun dinhmunah hian chhang turin huaisenna ka neilo, ka tlawm ngawih ngawih nimaiin ka inhria.



Kan thil ei chu a tui leh tuiloh pawh ka hre barlo, ka ei mial mial ringawt a, ka bula mi erawh chu kan thil eichhung zawng chuan a ti ti siam siam a, Christa chung chang a sawi chu za vak loin ka lo nui pui leh sak ṭhin.



Dawr aṭanga kan chhuah hnu chuan kan in mangṭha zui a, ka kal chhan chawhmeh pawh lei tawhlo chuan kan dawr lampanin ka let nal nal a, kei nge ka ngaihtuahna chu vakthui zawk pawh ka hrelo, hriatloh karin kan dawr kan lo kalpel thui viau tawh.



Ka awmdan chu atthlak ti zetin ka kalna ngaiah bawk chuan ka let leh a, ka va thlen phei meuh chuan khua a thim dawn ruai tawh a, hmaisen ṭawn ṭawn khawpa Umawii lo ang chu kalpelin choka ah ka lut tlang a, hna thawk ho pawh an lo bang vek tawh chu niin, chhuatah chuan ṭhutung atin ka hmai ka hup thawk a ka inrin hma hauhin ka ṭap chhuak hawk mai!




Ka ṭah chhan ber pawh ka hrelo, ka ngaihtuahna a mang duk a, ka tawp up up mai bawk si a, ka awmchhung lam chuan min hnawh ul mai hian ka hria. Chhan ṭha tak neiloin ka la ṭap ngailo mahse, tuna ka ṭah ringawt chhan hi ka hre biklo takzet a ni.



Ufamkima ka ngaihtuahna a a lo lan rualin ka ipik zuala, Rosy thusawi te lah ka bengah an ri nawn awn awn mai bawk. Thil tihsual nei ang maia inhriatna ka nei a, enge ka tihsual ber pawh ka hre chuanglo.



"Engemaw i hriat chu le? I rawn thleng tlai pawh tih tawh nak a laiin" kawngkhar bul aṭanga Umawiin a lo tih leh takah chuan ka hmui hupin ka insut hlawp hlawp a, chutih laiin Usangzualan Umawii chu a lo khap ve bawk a.



"Insum ve deuh ṭhin teh, khati vak vaka lo tih a ngai hleinem mawle" Usangzualan a tih ri chu ka hre pha ve reng tak nain an mahni hnungchhawn zawng chuan ka la ṭhu kun ngar ngar a, "Ṭah ringawt chhan tur a awmlo, a lo thleng tlai ka hau mai a lawm" Umawiin a lo ti vin hlur thung.



Ka lampana ke pen thawm ka hre zui zat a, ka bula Usangzuala a lo ṭhut rual chuan inhruhul sawk sawkin tukverh darthlalang lam chu ka en vang vang a, "Mimite...." inthlahrun hmel taka alo tih pawh chu ka chhang heklo, tun dinhmunah hi chuan tumah ka be chaklo a, keimah chauha awm rih ka duh.



"Lo thlem ta che mawle" vin zeta Usangzualan a tih leh chuan ka ding hluai a, "A ṭahbelh thlak emai a, ka thlem awm lo" a aia vin mah chuan ka hnunga mi chuan a lo ti let a, an mahni vanga ṭap emaw min lo ti chu niin, ka va han ning mai mai tak.



"Ṭap duh reng reng suh, haw hma pawh kan ngai hranlo a, i u thinchhiat zia te chu i hriat ṭhan anih kha, bang daih rawh" tih pahin Usangzualan ka hnung a rawn beng dat dat a, "Va haw teh u" ṭah chhuak aw ṭiau a ka tih leh chuan Umawii chuan min lo chek deuh hlak a, a hmel chu en pawh ka en peihlo.



"Ti rawh haw san ang, kan tlai tawh lutuk" a rawn tih chuan Usangzuala chuan min lo thlek lehin a tawi khawmuang hrut hrut a, chutihlaiin ka Phone chu a lo ri leh a, Ufamkima bawk a ni.



"Chhuak teh uuuuuu...." an la din reng vang chuan ka ti nghal chiam a, "Sangzual, lo kal ta che mawle, khatiang mihring mawl chhi chhe lutuk kha ka thlem peihlo, huat ho leh lutuk, i lo kal nghal loh chuan ka hawsan dawn che a nia" ti a Umawii pen chhuak hlawk hlawk chu "A va mak ṭhin e aw!" tih nang nang pahin Usangzualan a umzui a, an kalsawn tak hnu chuan thawk ka lo la hluai ringawt.



Ka aw ka thian kharh kharh a, ka ṭap zo tih a hriat hlau tak chung leh pangngai thei ang ber tur chuan Phone chu ka chhang zui a, "Chaw i ei tawh em, lo len phei ka tum a" tih ri ka hre nghal zat bawk.



"Dawrah ka la awm a, hetah lo kal rawh" ka tih chuan "I va tlai ve aw, zan dangah ka lo leng mai dawn em niang?" a lo ti a, chuvang ngawt pawh chuan ka rilru a na leh riau tawh.



"He tah lo kal rawh ka tih chu" aw lawi zet chuan ka lo ti leh chiam a, a hamhaih deuh a niang a rawn ṭawng mailo, inthiamlo leh hnuhnawh takin ka aw kan ṭhian leh rih a.



"Leng chhuak ang, dawrah ka awm a min lo lam rawh" ka ti ṭha leh ngat a, "Ka lo kal ang, lo awm rawh" a rawn tih chuan engmah sawi tawhloin ka Phone chu ka dah nghal hmiah bawk.



Engtia awm tur nge ka hrethiam tawhlo, ka thil hriat zozai te kha theihnghilh leh vek ila ka ti ber mai, hre miahlo zawk ila, anih loh pawn Pencil a thuziak kan nawhreh ṭhin ang hian nawt reh vek thei ila...



Ka hai der leh thei a ngem, hai der ta ila khang thu zozai hre chung khan Ufamkima mitah pawh ka en ngam tawh dawn em ni, kha naupang pawi sawilo kha kumkhuain ka pumpelh thei a ngem, kan inhmachhawn hun a awm leh ngei anga, chutih hunah chuan engmah hrelo ang maiin ka awm ang maw, ngaihtuah zawng ringawt pawn ka ṭim sung sung thei mai.



Hre reng chung ka haider anih chuan an chhungkaw kehchhiatna thlentu nen enge danglamna kan neih ang? Angai te bawkin 'MAHSE' tih a awm leh ta, ka thinlungin titura min duh ang hi ka ti anih chuan ka mipa hmangaih ber hi ral aṭanga ka thlir leh a ngai dawn tihna ania, a hma ang chiah khan...



Ka theih ka ringlo, 'Tunah chuan engkim anih tur ang a ni zo tawh a, nangmah vanga inṭhen pawh an nilo a, ti nge ilo intih hrehawm ve duh ang' tiin keimah leh keimah chu ka inhrilh mawlh mawlh a, angai te bawkin 'MAHSE' tih ah a tawp leh tawh.



Ufamkima chu a lo thleng harlo, Choka tuikhawihna a hmai ka phih laimek chuan dawr chhungah lo lutin min lo ko a, ka va chhuak chu mak ti lek lek hmelpu hian min lo en bawk a, zawhna a ngah hmel khawp mai.



Ka hmai hrukhul mawlh mawlh pahin "Lo ṭhu rawh, Coffee ka lo lak ang che" tiin Coffee machine lam chu ka pan zui a, "I la haw dawn lo em ni?" a rawn tih chuan "Umm" ka lo ti mai a, che changloin ka hnungah chuan a ding renga, min enzui reng tih ka hre thei.



Coffee ka va pe chu kun hnai meuh hian min lo en a, keiin ka lo nuih sak thung. "Tinge i mit chu?" a lo ti a. Chhang lo a ṭhutna lampan mai ka tum chu ka banah rawn vuanin min pawt let dawrh a, "I chhung te nen buaina in nei nge?" a ti zui zat bawk.



Ka lu ka thing a, a mitah tak melhin ka en vang vang a, ka ngaihtuahna chu a chawmawlh zo ta vek hian ka hria, a hmel ka hmuh leh takah chuan ka duhna leh ka thlakhlelhna te an rawn thar ni mai hian ka hre bawk a, chan mai dawna ka inhriatna chuan min ti hrehawm takzet a ni.



"Sawi la" a tih chuan chhangloin ka kuah vawng vawng ringawt a, "Engthil nge thleng a?" tih pahin min lo kuah nghal hlun a, a awmah hmai phumin thawk ka la ham ham thung.



"Kan inhmu khat si a ka ngaiche a, zanin chu awm ve reng rih rawh aw" ka tih chuan a nui suk ri ka hre zui a, min rawn kuah nghet sauh sauh bawk.



Ka rilru chuan thuthlukna a siam fel leh ta der mai, chu thutlukna chu Ufamkima hi ka chân theilo tih hi a ni, rilru nuam takin ka awm zui lo ang tih pawh ka hre ve tehmeuh mai mahse, chân ta ila chu ai chuan ka hrehawm leh zual zawkin ka ring. Mahni inthiam chawpin hmasial tak leh dawihzep takin chu thutlukna chu ka siam a ni.



Ka chhungte phone-in ka ṭhiannu Nunmawii te inah ka kawi a, chaw min lo eisan mai turin ka hrilh a, hmun dangah pawh chhuak tawh hranlo chuan dawrah chuan kan ṭhu dun reng a, ka rilru tih thawven chu ka tum khawp mai, Ufamkima erawh chuan ka chhungte nen buaina kan neih vangin ka haw hreh emaw a tia, "Ka hruai haw dawn che a mi? Haw duhloh ringawt chu a va ṭhalo ve" a ti leh ṭhin a.



"Chutiang engmah a awmlo" keiin ka ti ve tlat thung.



Inkuah rialin kan ṭhu dun a, hetianga hunthawl kan neih dun lohna a rei tawh a, ani pawn nuam a ti ve tho chuan ka hria, a nui hmel pawh ka hmu ve leh ta a, hman ang tho khan a nuihmel chuan ka lakah nghawng a la nei a, ka boruak tawn in a zir nge ni tunhma zawng aiin zanin hian amah ah ka luangliam thar hle bawk.



"Inneih kha i la duh reng em?" ka tih chuan ngun zetin min lo en a, "Christa a awm tawh silo a, min mamawh vak tawhlo ang a?" ka ti nawn leh a, a hmanhmawh chuk chuk chhan kha Christa vang kha a ni miau a.



"Ka duh a lawm" a lo tih chuan ka lo thaw huai mai.



"Kum thar lamah kan tum dawnnia, ka innghah rei tir tawhlo ang che" a lo nui deuh suk a, chutah "Hman
hmawh suh" ti a minlo chhan chuan ka rilru a buai leh nak tawh.



"Tinge..?" ka lo ti hap a.



"I rilru a fimlo tlatin ka hria, thinrim laiin thutlukna siam loh tur" ka biangah dawmin a rawn ti zawi sup a, "Ka duh tak tak a lawm" ka lo ti leh hram a, a rilru a thlak mawlh a ni ka hlauh tawh ni. A hma a hmanhmawh em em si a hmanhmawh leh tawh lo nia ka hriat vang chuan keimah zawk chu ka hmanhmawh riau tawh bawk, kan inneih vat loh chuan kan inkar hi a zuzi vek mai ang tih te thlengin ka ngaihtuahna ah a rawn lut a, rel tak rial chi kan ni dawn tlat lo.



Dar 8 vel thleng dawrah chuan kan awmdun a, a sana a bih zauh zauh reng tawh vangin haw ka rawt a, min hnial lemlo. "Kal chhuahna tur dang i nei a mi?" ka tih chuan "Ka nu amah chauhin a awm a, a nuamsam vaklo" tiin min lo chhang a.



"A va zialo ve, anih chuan kawtah min dah tawp mai rawh" ka lo ti ve a, a inzaina a la damfel lo a, thla tharah incheckup tura a kal leh tur thu a sawi zui zat a.



"Nangman i hruai tawh dawn em?" ka ti leh a.



"Mamuanan a hman chuan a hruai leh ang" a tih chuan a lam ka hawi rang khawp mai.



"Chuti chu nangmah chauhin i awm dawn a mi?" ka lo ti let ha a, ani a lo bu nghat thunga, ka rilru hi a dik tawhlo, thil ho te te ah ka chiai riau zel tawh, amah chauha a awm tur pawh chu...



"Anih chuan dawrah thil lo eiṭhin la, eirawng te pawh kan bawl mai anga" ka tih chuan a nui mai a, aw min pawh lem hleilo a.



Kan inkawt kan thlen chuan chhuak ta mailoin ka la ṭhu khawmuang rih a, "Ka luhpui dawn che em?" a lo ti leh pawh chu ka ngaikawi nghal dawn dawn mai.



"Min ngai ve miahlo tiraw?" ka ti leh tawl a.



"A...i lut hreh emaw ka ti a, reilo te ka lo lut ve dawn a mi?" inthiamlo awka deuh a a tih chuan ka duh leh lawi si lo, "Hreh lo e, ka kal ange, i thlen hunah min lo hrilh dawnnia" tiin a Motor aṭang chuan ka chhuak zui a.



Inchhung ka luh hnuah a tlan chhuak chauh a, chaw pawh eitawh loin Room lam ka pan zui a, ka chau takzet a ni. A thlen hnuah min lo biain chanchin min lo zawt a, ka chhungte nen buaina kan nei emaw a la ti fan a, engmah ka sawi duh lo a, chutiang chuan ngai mai sela ka ti zawk bawk.



Lehkha chhiar a ngaih vangin kan inbe rei lo a, muthilh ka tum ṭhin a ka muhil thei hauh lo, Movie ka en thul mahse, rilru a bet hleitheilo a ni ber. Ngaihtuahloh tum pawhin vawiin chungchang bawk chu ka ngaihtuah leh ṭhin.



Rilru hian taksa hi a lo thunun hneh khawp a, ka engtih tha mah a tho theilo, inkhawm kal tura ka insiam pawh ka phurlo hle a pheikhai a zang lo khawp mai. "I nuamsam vak lo ami a?" ka pa'n a lo tih chuan ka mut ṭhatloh thu ka hrilh a.



"Niminah i u nen in inhau a mi a, min rawn phone a :Mimi-i kha lo hau rawh' te a lo tia, eng buaina nge in neih a?" ka nu chuan a lo ti ve bawk. "Engmah a nilo, thil a hriatsual mai mai a nih kha" tih zawngin keiin ka chhang a.



Chawhnu lam inkhawm pawh chu ka peihlo zui ta reng a, Nunmawiin min lo sawm laichuan Sitting room ah ka lo mu zal a. Ka nuin "Va ti veleh hramla" a tih pawh chuan ka peih ta chuanglo, ka ṭhiannu kal hnu chuan "I awmdan hi a fuhlo khawp mai, nula pui inkhawm ṭhulh mai i sam lutuka, Nunmawii te kohhrana an inhman tehlul nen, i thlarau nun hi a chau khawp mai, i ngaihtuahawm tlat" ka nu chuan a ti zui bawrh bawrh a.



Inthiamlohna rilru lo neih sa nen ka nu thusawi chu a dik ka ti ve reng mai, ka taksa leh rilru mai bakah ka thlarau nun thleng hian a chau a ni, ka eng hi nge diklo ber ni ta ang le, keichuan tu emaw ka hmangaih vangin chelh ka duh a, mahni inthiam ru tak si a thilsual ti a ka inhre leh tlat si hi a awmzia ka hre tawh lo, Pathian hnen aṭanga chhanna beisei mai chi em ni ang?





Zan ka mutur chu ka ṭawngṭai uluk khawp mai, Pathian hnenah thutlukna ka siam tawh kha a diklo ni a a hriat chuan kawngdik min kawhhmuh turin ka dil tawp mai a ni, mahni tana ṭha ber tur pawh thliar thiamlo chungin ka ṭanghma ka hai ve a, ka hma ka sial viau em tih chu ka inzawt nawn leh ṭhin bawk.



Chhana chu ka dawng chuang pawhin ka hrelo, a chhan chu ka rilru a danglam lo a, Ufamkima chelh ka duhna pawh a la pangngai renga, ka thu hriat zawng zawng te pawh keimah a vawn ka la thlang fan a, ka thlanloh zawk kawng chu zawh ka zuam heklo, a nih nih kan ni tawh mai ang tih bawkah ka thu chu tlu leh ta.



University lam thilah Ufamkima chu a buai viau a inhmuh a khat leh ta khawp mai, zirtawpni tlai khat min rawn tlawh chu a rawn bawr lut viau mai a, Customer awmloh lai tak anih vangin dawhkan hmasa berah chuan a File a sam ṭha mawlh mawlh a, Coffee va pek pahin a thil khawih lai chu ka en pui a, Seminara a paper Present tur a ni awm e.



"Engtik a mi tur nge" ka tih chuan thawhṭan lama Seminar an neihna a mi tur a ni awm e " Lo kal ve ta che, ICFAI university ah a ni dawn a" a tih chuan ka lo nuihsan mai a, ani pawh a thutak vak bik lo.



A file chu ka dawhkanah lo dahin Coffee in pah chuan kan titi dun a, zana leng tura ka sawm chu a nu a damsam loh vanga zan a chhuah theihloh thuin minlo chhang a, kar thar lamah a nu pawh in checkup turin a kal leh tawh dawn a, Mamuana pawh thawhṭan lamah a lo thlen ve leh tawh tur thu te chu min hrilh luam a.



A haw tur ka thlah hnua ka lut leh chuan Countera Ufamkima File lo awm chu ka va hmu a, ka phone nghal thuai a, "I file i theihnghilh a nia" ka va tih chuan a rawn chek hlak a "Inah lo hawn mai la, Pathianni ah ka rawn lam mai dawn nia" a lo tih vang chuan ka Bag ah ka khung ṭha zui mai bawk.



Ka ngaihtuah zui rauh rauh a, Seminar an neihna a kal ve chu ka chak leh hnuhnawh khawp mai, a Paper present lai pawh hmuh a chakawm viau a ni, hetiang hunah hi chuan pawn lam aṭang pawhin chhim tu an ṭhahnem ṭhina, kalpui pawh thil mawilo zawk zawk nibikin ka ringlo, duhleh Aumawii dawr min nghahsak turin ka ti mai anga, hun hman dunna remchang tak pawh anih ka ring.



Tlai ka haw chuan Umawipuii te nupain chaw an lo eidawn thu ka nuin min lo hrilh a "An rawn kal har riau mai, chaw ei a hun mai dawn ania han Phone rawh" a tih vang chuan ka call nghal a, an lo kal mek a ni awm e.



An lo thlen chuan Umawii bulah thawhṭan lam chungchang chu ka lo sawi a "Hman tho e mahse, hlawh min pe la" a lo ti zat a, ka pawiti hran biklo.



Ufamkima hrilh tum a ka call chu a Ring ral ṭhak a, zanriah ei hun bawr chauh anih vangin a buai anih ka ring, dar 9 vel thleng Umawii te chu an lo leng a, Sitting room ah Tv en pahin kan ṭhu khawm a, a pasal te in lama a chet chhiatna te sawiin kan nui ho leh dar dar ṭhin.



An haw hnu chuan keipawh muturin ka Room lamah ka chho a, ka phone ka en chuan Ufamkiman engmah chanchin a la rawn neilo a, ka phone call kha a la hmulo em mawni dawn le? Ka call leh pawh chuan a la chhang thei ta chuanglo.



Message hnutchhiahin thawhṭana ka zui ve hman tur thu chu ka hrilh a, chumi hnuah intifai turin Bathroom ah ka luhsan a. Ka inpeih fel hnu thleng chuan a la reh vung vung mai, a ni em em tawhlo deuhin ka hria a, ka call nawn leh ta ngat a, ka tum loh deuhin naupangin a lo chhang a, Christa aw a ni tlat!



"Bawihpui, a pa te inah i awm a mi?" ka lo ti hap a.


"Anu Mimi" a lo ti ve lauh mai.



Ka ṭawng leh dawn laimek chuan nu tling aw hian "Mampui i pa phone a ni lawm ni" a tih ri ka hre zui a, Ufamkima nu aw chu a mi hauhlo, Urosy nu zawk niin ka hria, thawm a ri sat sat a, Call chu a tawp zui mai bawk.



Ufamkima chuan Christa a va kan anih ka ringa, awm nuam zanlo mah se, ka ngai haw hranlo a, a phone a en hunah min lo be ve mai chuan ka ring, mut san mai tum chuan ka intintuah zui a, ka muthil thei mai lo chuan Facebook a en kual a, College ka kal laia ka ṭhiante ho thlalak te en kualin rei deuh chu ka meng a, sana chuan dar 11 a kawk tawh tih ah pawh Ufamkima chuan engmah a la rawn sawi ta chuanglo a, ani hi a muhil tawh anih ka ring, a haihawt bawk si a, a lenna ah a phone a theihnghilh zawk pawh a ni maithei.



Zing ka harh chuan ka phone ka en hmasa ber a, engmah a la rawn sawi chuanglo, ka awm a nuamlo leh riau tawh, chanchin engmah sawilo a reh daih hi ka tih ngailoh thil anih vangin Ufamkima awmdan hi ka hrethiamlo zual ṭhin.



Dawr ka thlen hnu lawkah a lo lang ve leh hlawl a "Nizanah Bawiha ka va kan a, ka phone ka theihnghilh daih a, tlaiah ka lam ang" a lo tih takah chuan kei ka lo thaw huai a, "I File kha inah ka dah daih a sin, thawhṭan chu ka lo kalpui ang che ka ti leh sia, a tih chi angem?" ka lo ti ve nghal thuai a.



"Kan hun neih dan tur hi ka hrethiam chiahlo a, a rem chuan kan inhrilh leh dawnnia" a ti leh lawi a, kei a lo inring sa tawh chu min ti lai leh angreng khawp mai.


"Anih i File chu engtin nge nidawn?" ka lo ti let zat a.



"Naktuk ah emaw Thawhṭan zingah ka lo lam ang, naktuka ka lo kal loh chuan dawrah i lo keng anga" a ti leh a, a ṭawngkam a ṭang chuan min hnar riau hian ka hre mai a, ka sawi zui duh tawh biklo.



Chawhmeh bazar turin kan chhuak dun a, kan bazar zawh hnuah ani a haw tlang a, kei dawr lamah ka let leh a, a phone a kawl loh vang chuan tlai ka haw dawn thlengin kan inbe lo a, engtikah nge maw lam a tum ni.



Min lo biak hun chu a nghak ru ve renga, zan thlengin a la reh vung vung mai, a tih dan chu ka ngaihdan a ni tawhlo takzet a ni, lungawilo deuhin ka mu a, Romawia message lo awm ho pawh chu ka chang peih meuhlo, kan mood in ang lo lutuk vang chuan ka kawm peihlo a ni ber ang chu.



Pathianni chu ka inkhawm kim thlap a, ka rilru lam erawh ka kimloin a khingbai em em thung lawi a, a chhan chu Ufamkima a la reh ta reng a, nimin tlaiah ka lam ang a ti kha a nia, tun thlengin a phone chu a la lamlo anih hmel a, a nu phone tala min lo biak ka la beisei fan laiin engmah chutiang pawh a ti chuanglo, a ni em em tawhlo, ka lungawiloh zia ka hriattir ve ngei chu a ngai ang, min palzam mah mah in ka hria.



Ka mut dawna Instagrama ka lut chu Rosy thil post ka va hmu fuh hlauh mai, Ufamkima leh Christa Sofa a an mulai hi a ni a, tun lawka a lak anih chu a thlalak ah chuan a sawi tel bawk a; pafa inngai tak an nih thu vel a rawn tarlang a ni ber ang chu. Sana ka en chuan dar 11 a ri dawn thuak tawh.



Chu thlalak ka en zo chu ka hnim ruih mai, a thleng phei tawh ngei a, a phone pawh a hmu tawh ngei ang chu....?



Ka ṭap lo a ka rilru a chawmawlh vek thung, Ufamkima thinglungah chuan hmun te reuh te chu ka chang ve ngei mai a mahse, a hlimna thlen tu leh a vei ber, a rilru a pawimawh ber chu a fapa leh a chhungkua chauh an ni tih ka chiang hle ringawt tawh, kei chu a tan chuan a hminga a bialnu ve mai chauh ka ni.



Zankhuain ka inngaihtuah a, ka ṭawngṭai chhanna kha ka hmu ta niin ka hria, Ufamkima hi ka kalsan mai ṭhain ka hre ta bawk, ka hlim leh hlimloh chu buaina ber a nilo, amah zawk hi ka kiangah a hlimlo a, ka lakah a rilru a bet miahlo zawk hi a nu buaina chu.



Ka hmangaih ber ka kiangah a hlimlo tih hre chunga chelh luih tlat chu ka thei bik lo ang, lo ti pawh ni ila rei a daih dawn chuanglo, kan inti na tawn mai mai zawk dawn a, chu chu hmangaihtu zawkin a a tih loh tawp tur thil chu a ni, hmangaihtu zawk chu keimah ngei hi ka ni bawk.



Zingah chuan ka tho hma khawp mai ti ila ka mu miah lo zawk, chaw eiloin dawr lam ka pan a, Pa Rela lo thleng ve chiah nen dawr kawtah kan intawk a, chahbi pein dawr lo hawng mai turin ka ti zui a, kei erawh Ufamkima te in lampanin ka kal nal nal thung.



Ka va thlen chuan a nu chiah a lo awm a, min hmu thut chu a hamhaih hmel khawp mai "Kima chu... khawhar inah a tlaivar ve a" a lo ti a, a mitmeng tlan chhe deuh leh a aw lawi zet aṭang chuan dawt a sawi tih haitheih a nilo.



"E....mitthi in nei a law?" ka ti ṭha ve mai a, "Lo ṭhu rawh thingpui kan in dawn nia" a tih laichuan ka File ken chu ka lo phawrh mawlh mawlh a, "Vawiin a a Paper Present tur a nia, ka dawrah a theihnghilh a" ti a ka pek laichuan inthlahrung hmel a la pu reng a, "I va fel ve, a lo haw hunah a rawn hmanhmawh leh viau ang" min nuihsanga a tih laichuan za vakloin ka lo nui ve a, thingpui siam a tum chu ka hmanhmawh thu sawiin ka lo hnial thung.



"A lo haw ṭep ang i nghak dawn em?" a tih leh laichuan ka lo ding chhuak tawh a "Nghak lo mai ang, dawr kan hawng tawh a, an lo buai lutuk ang" ka tih chuan min hnialloh hmel khawp mai, pawna ka kal chhuak chu min lo zui ve nghal bawk a, Step kan thleng ṭep tawh tih ah chuan ka rilru a let but a, ka inherlet leh zat bawk.



"Ufamkima chu a riak phei a law?" ka tih chuan min chhang lawk lo, a riat nawi khawp mai, dawt min hrilh tih lah ka hrechiang nasa mai si.



"A....aw...Bawiha a zual deuh a" a ti bah nak a, "Chutia law" ka lo ti ṭha ve mai a.



"Engtin nge a awm a?" ka ti leh zel a.



"Inrinni aṭang khan a khua a sik a, a pa a lam a lam a, va riahpui rih rawh ka ti anih kha" a tih chuan ka inpetruh ṭeuh tawh, Inrinni zan aṭangin a riak phei tawh anih hmel e, zep loa min hrilh ve mai tur a nia sin mawle, ti nge hetia a tih kher le?



"A zia lo ve" ka ti hap a.



"Nia, a ṭha leh mai ang, a ngaihtuahawm loh ang, i lo hrethiam ṭhin dawn nia, Bawihpuia hi chu a neih chhun liau liau ania, Rosy nen inṭhen tawh mahse, kan thlahthlam theih a ni biklo a, an innei leh tawh dawn chuanglo bawk a, huatah lo lalo la aw, aa....an mahni pahnih pawh an i duh tawhlo reng reng a" Ufamkima nu chuan a ti dap dap a, ka lo nui tawi tak tak ringawt tawh.



Dawr ka thlen phei hnu rei vaklo ah Ufamkima chuan min lo Call a mahse, ka chhanglo, Umawipuiin dawr min nghahpui a, kan chanchin min zawh vang chuan ṭha deuhin ka hrilh a, tun ṭum chu kan ngaihdan a in ang ve teh tlat a, ka thil tum ka hrilh pawn min lo thlawp khawp mai.



"Mimite, nangpawh i hlim tak tak lo, ani pawh a hlim chuanglo a, mahni inhrem reng tur a ni ngailo, an nupa inṭhen chhan lah an hriat loh thleng i hriatpuia, i hmangaih viau anih chuan i tih tur dik tak zawk aniang, suihzawm leh rawh, i hlim phah daih zawkin ka ring" ka samah rawn chula Umawipuiin a tih laichuan ka mittui a lo hnam ṭiam ṭiam a, midangin ka ṭap an hriat ka hlau bawk si a, insum ṭeuh chuan ka inpetruh a, ka thinlung rum vawng vawng ri chuan ka mipa hmangaih hnen a thleng zo dawnlo tih hre reng mahila, ka tan erawh a ri ring viau thung si.



Nithum zet chu ka be zuilo a, ka phone pawh ka Bag ah ka ak ṭawl mai mai a ni ber, a rawn rik chang hi chuan ka thinphu hi a rang nghal dawt dawt ṭhin. Ka rilru ka siam fela ka inpeih ta tih ah chauh a phone call chu ka chhang a, inrinniah an ina ka len phei tur thu ka hrilh bawk.



Inrinni chuan Umawipuii te nupa in dawr min lo nghahsak a, "Ṭha deuhin aw, kan thlawp tlat che a nia" tiin ka kal tur chu min thlah bawk a, thil mak deuh chu he thutlukna siam hi harsa ka tih tehlul nen ka rilru ka siam fel tak chiah aṭang khan ka awm a nuam huai huai a, ka rilru hahna leh ipik na te kha lakkian in a awm hlauh zawk a, chu chuan thil dik tak ti dawn niin min inhriattir bawk.



Ka va thlen phei chuan min lo nghak ṭhap tawh a, "Enge min koh chhan?" Lucy'n a lo ti hmasa ber a, "Lo ṭhu phawt rawh" tih zawngin ka lo chhang a, Ufamkima mawlh chuan zawhna a ngah hmel khawp mai a, a ngaih a ṭhatloh hmel hle bawk.



"Mimi, eng sawitur pawimawh nge i neih a?" Rosy chuan alo ti veleh a, a zawhna chu chhangloin "I ṭhianpa chu i ko em?" ka lo ti let a, "A lo kal mek" bangbo fein a lo ti zui a, nizan khan ka hrilh lawk tawh a, 'Sawitur pawimawh tak a awm, in nupa inṭhen dan chungchangah thil hriatloh tam tak innei a, naktukah Ufamkima te inah lo kal la, i ṭhianpa Bda lo sawmla in lo kal dawnnia' tiin ka hrilh lawk tawh a, nizan khan min zawt nghal chung nain engmah ka la hrilh lo a mahse, vawiin hrilh ka tum a ni.



Ufamkima chuan lawm vaklo hmel a pu a mahse, ka ngaipawimawh duhlo lui thung, Bda a lo thlen lai pawh chuan Room ah a lo va lut hman a, a nuin a koh takah chuan a lo chhuak ve leh mai bawk a, ka bula a lo ṭhu chu ka lo nuih a, min nuih let ve lemlo a, a nupui bialpa ni a a ngaih ka ko tel ve kher chu a lawmlo te pawh a nimahna ka hre tawh biklo le.



"Ufamkim, Urosy hian a uire san lo che a, nangpawh Urosy Ufamkima hian ngaihzawng a neihsan tak tak lo che, inhriatpui tawn lemloh thil innei mai zawk a ni" ka tih chuan an ngawi ṭhap hlawm a, Ufamkima lo thaw hawk ri chuan ka thilsawi chu a awihlo hle tih a lang bawk.



"U Bd, nangmah hi Urosy bialpa niin kan lo hria che a" ka tih chuan an rawn ṭawng chhuak ve ta chauh a, "Ka ṭhian a lawm a nih, a ni te chu ka ṭhian ṭha ber a nia" Rosy'n a lo tih chuan "Enge in awmzia ni a, in inngaizawng tho a ni lawmni?" Nu Nghakin a lo ti he haw mai.



"Ngaizawng lo e, chutiangin inlo ngai tih ka hre miah hleinem, a va zialo e aw" U Bda chuan a lo ti niah niah a, Ufamkima chuan keimah ngawt min en thung.



"Ngaihzawng i nei kan tih khan i pha miah hleinem" Nu nghakin a ti leh a.



"Ni e, a chhan chu kha tih laikhan mipa khat biak ka nei a, Qatar a awm ka ṭhian hlui a nia mahse, inngaizawng kan nilo, Ukima ngaihzawng neih vanga ka rilru hah khan ka be ve chauh a ni" Rosy' a tih chuan Ufamkima chu a lo ṭhungil deuh hluai a, a rilru a buai hmel khawp mai.



"Qatar a awm a? Zan reia i biak ṭhin kha hepa hi a nilo a maw?" U Bda melh chungin a lo ti bung nghut a.



"Aw, Zothanmawia chu i hriat kha, hmanah pawh i hmu tawh, zan reia kan inbiak chhan pawh an ni lamah zan rei a ni ve lo a" Urosy chuan a lo ti vat a, an insawi pawp thei dawn ta in ka hria.



"U Rosy, Reginai chungchang kha nangpawn hriatsual i nei ve tho a nia aw" ka lo tih chuan Ufamkima chuan min lo en vut a, "Hrilh ve la" ka tih chuan engmah sawiloin min en vung vung a, enge a ngaihtuah ang tih hriat thiam a har khawp mai.







"Chhuna he i ṭhianpa lo kal ziah chhan kha in sawi phawt a ngai in ka hria" a lo ti teh daih a.



"A....kha chu sumdawnna thil a nia, phai lama vaiho hian min lo be ṭhin a, an English hi ka hre ṭelh deuh ṭhin a, Order ka siam dawn hian Rosy hi ka biak tir ṭhin a" inthlahrung taka UBd-an a lo tih chuan kan inmelh hrak hrak ringawt tawh.



"Reginai chungchang chu enge?" Urosy'n a lo tih chuan Ufamkima chu a ṭawng duh miahlo a, ka inrawlh leh mai a ngai anih hmel e.



"U Rosy, Ufamkima leh Regina te kha an inngaizawnglo, in inṭhen hnuah reilo te chu an inkawp ve chauh zawk a, mahse, i pasal hian a phatsan lo che" i pasal ti a ka sawi ri chu ka rilru in a lam nawn a, ka hrilh a te aimahin ka chiang zawk hialin ka ring.



"Mahse, in inphur ka hmu fo a, i phone ah lah in biakna call List ah a tlar thla dul a, inthlalak te pawh...." Rosy'n a tih laichuan "I ngaih ang kha engmah a awm lo, ka inphurh chhan chu thil dang daih a ni" Ufamkima a lo ti deuh hmuk a.



"In infawp lai thlalak pawh ka hmu" lawmlo awka taka Urosy'n a lo tih chuan ka hriat duh tak thil an sawi dawnin ka hria. "Eng thlalak maw?" Urosy lam chu kan hawi ṭhap a, ani lah chuan Lucy a en daih thung a.



"Regina kha i tih tir a ni tiraw, ka nupui ringhlel turin nang hian min ti a, engtia tam nge dawt min hrilh, hmeichhe dang kawp tur min kawhhmuh tu pawh nang hi i ni a, i naunu bulah chutiang tho chuan min lo sawi a maw?" Ufamkima aw chu a chang ṭha tawh viau a ni.



An in man chiang khawp mai, Lucy chuan Urosy bulah Ufamkiman ngaihzawng nei angin a sawi a, Ufamkima bulah Rosy'n ngaihzawng a nei angin a sawi bawk a, finfiahna tur eng engemaw a lo neih sak ve ve ṭhin a ni awm e, Regina chu Lucy hmanrua anih thu chenin tunah chuan a chiang vek tawh.



"I lo va zak theilo em em ve le, fanu ang hialin ka en che a, hetianga kan chhungkua min ti kehdarha ka fapa te nupa kara in han tlakzeh ngam chu" Ufamkima nu chuan a ti hlak hlak a, Lucy ṭhu chu a lu ah a va nam thle sawk bawk a, "Haw vang vang la, vawi khat mah lo lang leh tawh suh" a ti zui hluk a, Ufamkiman lo beng dai lo sela chuan a hnuk chhuak duh hial maithei a ni.



Lucy chhuak tau nghawng nghawng chu Rosy chuan a umzui a, pawnah chuan an va inhnial hrep a, Rosy lo lut leh chu a rawn ṭap pur mai bawk a, kan boruak chu a hlimawm dan a hahthlak ti mai teh ang, thil diklo ti a nupa inkawprem lai inkar tikhi tu man chhuah a ni ta leh an in ngaih thiamloh tawnna te ka hailan sak thei erawh ka thawveng huai thung, kei chu ka awm dan tur ka chiang tawh a, midang te hian engtia awm ve nge an tum erawh ngaihdan ka nei thiamlo.



Ufamkima nu leh Rosy chu inṭhutchilhin an ṭawng bawrh bawrh a, Ufamkima nen chuan kan in en leh ringawt ṭhin, "Lo kal teh" tih pahin min lo hui zauh a, Choka lama a phei chu ka zui ve nghal thuai bawk.



"Hengthil hi engtin nge i hriat a, engvanga ti nge i nih?" lawmlo awka lang lo mahse, lawm hmel a lang a chuanglo.



"Ufamkim, tu te mah hi i chik ve tak tak ngailo anih ka ring, thil langsar lutuk pawh i hmuhkan thei a, nangmah aipawhin midang i ring zawk a chu chu i buaina inṭan na chu a ni, kei chuan ka chik che a, ka tan hmuh thiam a har hleinem" ka beisei aidaihin ka aw chu a zangkhaia, kan pahniha sawi dun kha ka hupurh tehlul nen.



"Tinge keimah min hrilh mai loh a?" a mitmengah chuan zawhna tam tak ka hmu thei.



"Hetia tih hi a ṭha a lawm, in nupa buaina hi ka chinfel theih a ni lo a, inpahnih chauh bakah midang hriatpui tu inneih a ngai bawk a, tunah chuan a fel vek tawh hi" nuisanga ka tih laiin chal chuar tap chung hian min en a a meng nur khawp mai.



"Kei chu min ngaihtuah suh, hetia ka tih hian keipawh ka hlima, chhungkua in inzawm leh theih phei chuan ka hlim zual ngawt ang" ka tih leh laichuan min en vawng vawng ringawt tawh.



"Ka inthlahrung hle mai, ka phulo che ka ti fo ṭhina, ka lo phulo takzet che anih hi" thu tak zeta a rawn tih chuan ka lu ka lo thing a, "Chutiang sawi suh, vawiin thil vang hian lawmthu min hrilh la a tawk mai aw, ahma pawn ka hrilh tawh che kha, he inah hian ṭanpui tur chauh chein ka lo kal ka tih tawh kha, ka thil tih ah hian i lawm anih phawt chuan ka lo kal chhan ka ti hlawhtlingah ka inngai ang" ka tih leh chuan ka aw chu a lawi lek lek a ni.



"Kal bo tur ang mai a lawm i nih le?" a tih chuan ka lo nui hak a, "Ka kal bo dawn reng renglo, chhungkua nei leh a i hlimlai thlir tur chein ka awm ve tlat dawn" ka tih chuan ka sawi awmzia chu kan hrechiang dun viau in ka ring.



"Tunah hi chuan thil a danglam nasa tawh lutuka, a buaithlak zo tawh...." a sawi lai chu lo pawt chatin "Nangmah i danglam chuang hleinem" ka lo ti ve zat a.



"Christa nu hi nu ṭha tak a ni, i fapa hmangaih pui thei tu che i zawng ṭhin a mahse, U Rosy aia hmangaih tu hi tumah an awm lo, thil danglam ta ni a i hriat kha chu an pangngai leh vek mai ang, nupa mi leh ula, inring tawn leh inhmangaih takin awmdun tawh rawh u, Christa pawn nuam a ti ngawtin ka ring" a mit chu a sen deuh ram a, a rilru a buai hmel khawp mai.



Chutah "Nang i hlim ve a ngem?" tiin min lo zawt a.



"Tehreng mai, ka lo kal chhan ber ka ti a lawm" nui chungin ka lo ti mai a, ka kut a lo hmer vang vang a, engmah a sawi zui tawhlo.



Inchhungah lutin ka haw tur thu ka va sawi a, min chelh tak nain ka hmanhmawh thu sawiin kal luih ka tum a, Rosy chuan min lo zui chhuak a, a hnuk a ulh lek lek bawk nen a ṭawng mumal thei meuhlo, 'Kan inbe leh dawnnia' tiin kan in mangṭha ta phawt chu a nia, kawngka bul aṭangin Ufamkiman min lo thlir renga, muang changin keiin ka inhersan ta thung a.



Kha kha Ufamkima nena kan thawnthu tawpna chu a ni, mite chuan lung chhiattlak an lo ti maithei, ka tan erawh hriatreng tawh tur hun duhawm tak a ni, keimah vangin chhungkaw kehdarh tawh kha an inzawm leh a, hmangaih chan anga min ngaitu tan chuan hmeichhe khawngaihthlak ka ni mahna, keimah ka inngaihdan nen erawh a inpersan viauin ka ring.



Aumawii chuan "I rilru ana ngailo khan ka hria, tunah khan a na em?" tiin min zawt a, a chhanna chu "Na e" tih a ni, ka na ngei a lawm mahse, Ufamkima kha ka duhsakna zawng zawng nen ka thlah a, ka hmangaih vangin a hlimna ah ka hlimpui bawk, hmangaihna hi thil ropui tak intihsak lam a nilo, thil ṭha kan induhsak tawn na te, kan inhriatthiam tawnna te, thil ho te a kan inlawmpuina te hi hmangaihna chu a ni mai, chu chu mi zawng zawngina kan pek chhuah theih a ni.



Kha mi hnu khan vawi engemaw zah chu kan inhmu leh tawh a, keini pahnih chu ṭhian ṭha tak kan ni zui bawk, kan dawrah an lo kal fo ṭhin a, an nupa tan ṭhian ka ni a, ka tan pawh chutiang tho chu an ni.



Kum hnih hnuah chuan an ni pawn naute an nei leh tawh a, fanu duhawm tak an nei a, Umawii fapa nen an piangrual teuh khawp mai, a tu te pawhin kan kawng ṭheuh kan zawh a, keipawn kan sumdawnna ti lian zelin buaitak chungin hun ka la hmang a, ngaihzawng lam erawh ka rilru ah a awm ta meuhlo, Romawia lah Delhi ah inkhelin a awm a, kum khat leh thla ruk zet kan inhmu ta lo bawk.



Ka umawipuii te nupa hian tlangval tu tu emaw min sawipui hi an tum ṭhin a mahse, hmangaihna a luanliam tih angreng hi ka chak tawhlo a ni ber e, "Pasal neih ka duh tak leh kum sawm thum hnuah ka hmuh hmuh ka nei ang" ka ti fiamthu mai mai zel a, a hma ang thoin ka tana Khuanu ruat ka nghak leh mai aniang chu, he kan khawvel ah hi chuan lalfapa emaw kan tih te hi Uṭawk zawk ah an chang leh ṭhin a, Fairytale nen chuan danglam tak a ni.



Nikhat chu dawra ka lo ṭhutlaiin hmana ka ṭhiannu Suzanne-i kha a lo lang hlawl a, a hnungah a pasal leh mipa pakhat hian an lo zui bawk a, min hmu chu min lo la hre ve khawp mai a, kan phul hlut a, ka Phone Number a neihna Phone kha a lo ti chhe daih a ni awm a, Number te chu kan han in pe leh rih a, an naute pawh an lo changkang tawh viau mai.



"Muante, Lo va ṭhu phei ru" tiin an lo kalpui pa chu a naupawm lai a hlan a, chutihlaiin a pasal zawk chu dawhtheihloh hmel zetin a kalsawn tawh thung.



"Invan lang dang ve" ka lo ti hluai a, damlo na deuh a ang berin ka hria, a hmel phei chu a ṭha var reng nain a dâng hle a, a cher deuh riak bawk.



"Nikum khan ka inzai a, ka dam fel deuh chauh a, in chanchin te pawh ka lo hre ve a, biak zawm dan che ka hre silo a, ka lo hre ve rauh rauh ṭhin che a lawm" a ti ve luam a, rei pawh kan inbe hmanlo midangin an lo koh vang chuan a kalsawn thuai a, an thil ei zo an chhuah dawnah chuan "Nidangah kan la inkawm tak tak dawn nia" tiin min mangṭha bawk a.



Kar khat zet hnuah zat khat chu min lo be leh hlawl a, "Naktukah dawr i nghak dawn em, ka chhuak dawna ka lo tlawh kawi ang che" a lo ti var a, ka awm dawn thu ka lo hrilh ve mai bawk.



A tukah chuan dar 2 velah a lo kal a, amah chiahin bawr deuh hian a lo lut a, a bazar a nih hmel e.



Ufamkima nena kan chungchang mawlh mai chu min zawta, sawinuam ka ti vaklo, an nupa inhruai leh daih chu min lo thanat pui viau chu niin, kei ka lo nui mai mai thung, "Hnem che ka tum nen" a ti niah niah a, kan nuih a ti za ang reng khawp mai.



"Anih ngaihzawng i nei em?" a ti teh hluai a, "Nei nang, kum 30 ralah chiah ka nei tawh ang" ka tih chuan min nuih chiam a, a nui ring ṭhin khawp mai, Customer dangin min lo en duh ṭhin viau bawk.



"Anih chuan tlangval Senior kan kawl a, kan pa u hi ania, Prof.Famkima te ang rual vel tho ania, ka tihpui ang che i duh em?" a rawn tih leh chuan ka lo ner nang a.




"Duh lo mai, val Senior ngaihzawn hi ka peih tawhlo" ka lo tih san a, hmanni a a lo kalpui pa te kha a lo nih teh chuan ka duh zawng a ni lo hrim hrim a, chuloah ngaihzawng neih lam buaipui leh chu ka chak loh lam tak a ni tawh.




"I Number ka lo pe anga, ka lo biak tir dawn che" a la ti tak ṭalh a, kan inkhap nghal chul mai.




"Anih Prof.Famkima hi i la duh reng a mi?" tiin min zawt leh a, ka nuihsan mai taknain a haw hnu thleng chuan chu zawhna chu ka bengah a ri a.




A chhanna chu "Aw, ka la duh reng" tih hi a ni.



A ZUNZAM in min la phuar renga, tun thleng hian a mi phuarna te pawh a la phelh lo a mahse, chu a Zûn chu par chhuang thei lo tura a kung thliah a ni tawh, a zung erawh chuan thuk tak thlengin ka thinlungah zung a kaih a, engtikah emaw chuan a la rawp ral ve mahna le, chu hun chu ka nghak mek a ni.







(ZUNZAM tih thawnthu kan lo zo leh ta, SEASON -2 in phut chhuak zo angem aw? Kan lo thlir ang, he thawnthu min lo chhiarsak tute zawng zawng chungah ka lawm tak meuh e)

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)