ZUNZAM (MIZO LOVE STORY) by Ahmangaihi violette Khiangte (Completed)

Moderator: writers

Ahmangaihi violette
Posts: 148
Joined: February 1st, 2020, 3:14 pm

Re: ZUNZAM (MIZO LOVE STORY) by Ahmangaihi violette Khiangte

Unread post by Ahmangaihi violette » September 7th, 2021, 10:53 am

ZUNZAM -by Ahmangaihi violette khiangte


Chapter - 13




"A chhuah pawh chhuak tawhlo ang che, hriatloh hlanin i lo khawlo nek mai a, Mawii lah naute zilh pawh tumlo ngawi reng ringawt bawk si, i zep pui zawk em maw ni, in hahthlak unau emai" ka nu awki chu a zawi ta deuh a, TV lam melh paha a ṭawng hlak hlak takah chuan ka che chang ngam ve ta chauh a, ṭhu khawmuang loin ka pindan lam ka pan zui nal nal bawk.



Ka inthlak sawk sawk a, ka thin tawt urh vang chuan ka che reng reng chu ka che hlawk hlawk a, ka thawk lah chu a ipik ṭup mai bawk a, Aumawii lakah chuan ka thinrim hlur mai bawk. Sawi dan tur ka hrilh vek a, engvanga min lo puan ringawt nge maw a nih le, lo chho teh se, ka chhuah chhal dawn khawp a lawm.


Ka phone ka on a, signal a awm hnu lawkah Message leh Missed Call a lo lut zut zut a, ka chhungte chuan vawi 20 dawn min lo call chu ni in, a zahve chu Lalmawipuii a la ni zui a, Message lo awm ho chu en rihloin Ufamkima ka call hmasa te te a, rei min lo ti tawh ngawtin ka ring a ni.



"In thlenna a rei tawh em, inhnuaiah engemaw ka ti khawtlai lawk a" tiin chhuanlam ka va siam hmasa zeta, an ni chu an hawlam a ṭhiante inah an peng kawi anih hmel e, ka biak lai mek pawh chuan an la haw lo a, in an thlen huna in be leh turin kan in mangṭha ta rih a.


Au Mawii Message ka en chuan min rawn tur chiam chiam a, "Lo haw rawh" tih leh "Biak theihin awm ta che" tih angreng a ni, ka phone chu khumah thehthlain Bathroom ah ka luhsan a, chutihlaia min lo au ri ka hria chu ka thinrim thar leh tet tet a, ka lo inhumruh nasa mai bawk.



Ka room a a lo lut chiah leh Bathroom aṭanga ka chhuak ve chiah chu kan intawk chawt a, eng khaw sawi set set loin ka han melhrum nghal em em ringawt a, chutih laiin a nin ṭi dekin min en thung.


"I ti awm anglo khawp mai, vawiin chauh te chu lo tuar ve hram hram ta che, a harsa viau a mi, i ngawi thei tawh thlawt lo a mi a" ka aw ki chu a ngeiawm lek lek ta ve ang, hmai zangthal deuh ha chuan ka melh bawk a, a insawithiam zuah zuah ka lo beisei laiin "Hmmhp.." tih zawng chuan mi chu a chhang lehta nghal a.



"Lalmawipui, ka plan i ti chhe vek a lawm, engtin nge Ufamkima pawh lengah ka sawm ngam tawh ang" vin ang reng zeta ka tih laiin "Ka hrilh a ni bawk lo e" kei aia vin mah chuan a lo ti ve hlak a, enge a awm zia? Anin a sawi lohin tu nge lo sawi anga!



"Nangin i sawi lohin engtin nge ka nuin a hriat ngawt theih a?" ka ti leh chiam a, "Zothankimi a lo kal a, a rawn sawi a lawm maw le" tih leh hluk pahin ka khum lam chu a pan a, hahthlak chuan a, Ukimkimi pawh chuan sawi awm leh awmloh te pawh hriat ve tur a sin maw le.


"Engtin nge i sawi tir ringawt theih a, i awm ve miahlo a mi, min lo phatmar sak ve mai tur che a lawm" ka ti leh hram a.


"Ka sawitir a nilo, ka buailaiin an lo inkawm a, ka nuin a hre ve a maw tiin a lo sawi ringawt a nih zawk kha, nang aiin min hau nasa zawk, min dem viau lo mai teh" a tih leh chuan tih ngaihna tak pawh ka hre tawhlo, an tan chuan thil ho te a ni a, ka tan erawh a pawi thui viau a ni, Ufamkima nena kan inkar an ti khawlo zo vek a lawm maw le, engtia han tih zui tur nge mawni.



"Tun kar tawpah Ufamkima lo len a tum a sin" ka ti leh hap a.


"Aw, lo len tir la ti nia, i bang tawh tho a ni lawm ni" a ti leh mai a, hahthlak chuan a.


"Ka pa'n ṭhen rawh a tih kha i hrelo a mi?" ka rawl a ring leh viau tawh, thinrim lai laia awlsam zet zeta min lo chhang chuan min ti thinrim zual bawk.



"Anih i ṭhen dawn tihna a mi?"


"A teuhlo mai" ka ti nghal hluk a, kan inkawp ṭan dawn chauh a ṭhen leh nghal ngawt te chu ka phal bik teuhlo mai.



"Anih chuan lo len tir la a ni mai a lawm" a ti leh. Ka va melh nghal rawm a, "Engtin nge nia nga?" beidawng zeta ka tih laiin a dar a lo chhin uk a, ṭah ti chhuak zawk chuan.



"Ka hre tawh bik nang...a fel a.. an duh tho ang" a ti bah deuh niai a, ka chhang zui peih tawhlo.


Ka ke huh hruk mawlh mawlh pahin khum tlangah chuan ka va ṭhu a, "Mimite, an duh lo anih chuan lungloh ah la lo la, i tan a ṭha zawk tur kan duh vek a, chhungte duh loh zawng neih luih tlat te hi tluan loh na a nia, bakah nang chu i la naupang a, i hmelṭha bawk a, tlangval ṭha tak tak an la rawn lang zut zut dawn a......." a sawi lai chuan ka Bag aṭanga ka Envelope phawrh a hmuh vang chuan a niang a ṭawng tawp riai riai a, a hmel chu en pawh ka en peihlo.



"Hlawh i la a law?" Ka chhang lo.


"Engzah nge a pek che a?" Ka chang chuanglo.


"Hmm....thla chanve chauh i thawk a a tam awmlo emai" a tih chuan ka va melh ralh a, chutah pawisa ka phawrh chhuak lai chu a rawn thlek dak dak a, keiin lehlamah ka lo inher pui nghat a, a rawn tawlh hnai hrut hrut tih chu ka hre reng.


Ka hlawh chu singkhat ania, tam ka ti khawp mai, a chhungah chuan lehkha danga intuam enge maw ni a awm bawk a, "Mimi-i bazar na tur' tiin, pawisa dang alo la awm cheu a.


Ka dara Aumawiin lo dak dek dek nen chuan kan inmelh ralh a, "Kiri" ka lo ti hlak chu beisei nei tih hriat lutuk hian a mit ko a lo san euh euh a, a zamlo ham ham ṭhin a nia.


"Min pek leh tak tak kha ka ringlo reng a ni" a tih chuan ka ding hluai a, "I fel leh felloh a ni mai" ka tih chuan zawhna ngah hmel lutukin min lo en zui a.


"Zirtawp zanah Ufamkima a lo leng dawn a, ṭha takin lo bia la, chhungte bulah a sawi hnawng zawngin ṭawngkam i nei tur a ni lo" ka tihlaia a hmel aṭang chuan kan inrem theih hmel khawp mai.


"E...naktuk aṭangin dawr ka nghak tawh dawn ania, ka nu leh pa bulah min thlawp zawngin lo ṭawng zel tawh ang che, chuti anihloh chuan pawisa a kan inremna kha ka sawi vek dawn ania, Umawipuiin inhlawh turin min tir a lawm ka ti tlat tawh ang" ka tih chuan a hmui a pet sawi duh lek a.


"A vai khan engzah nge a" a lo ti teh daih a, chu erawh ka hrilh kher kher lo ang, 'Mimi-i Bazar na tur' a ni tlat.


"Ka bialpa kan be lawk teh ang" tih pah chuan ka chhuahsan a, a rawn la phun zui hram tak nain ka ngaihven tawh lemlo. Bathlarah dingin Ufamkima pawisa min pek chu ka chhiar ṭha leh ngat a, ka khi ṭhaw reng ringawt tawh, pawisa vanga hlim ta viau phei chu ka nilo, duhsakna nasa tak ka dawng miau a, enge ka han lei ang aw...



"Ufamkim, i haw tawh em?" tiin Message ka thawn hmasa a, a chhan letna nghah pahin lehkha a thil inziak chu ka en leh vang vang a 'Mimi-i Bazar na tur' tih te mai chu a ni.....Ufamkima Handwriting mawi tak mai chu en in ka nui leh ṭhin.


Rei vakloah a lo phone a, ka lak rualin "Hei kan thleng phei chiah e" a lo ti var a.


"Envelope kha ka hawng chiah a, tinge heti zat zat min pek a, ka thawk reilo bawk si....Vawiinah i insen hnem tawh tehlul nen" ka lo ti hap a.


"A...kha chu i hlawh a nih kha, i Bazar na tur kha i hmu maw, thil leisak tur che ka hrelo a, i duh zawng i lo lei mai dawnnia" muangruih leh damthluam a a lo tih chuan a hmuhloh lamah ka khi ṭha reng tawh.


"Ka lawm e aw, thil ṭha deuh ka lo lei dawn nia" lai angreng deuh chuan ka lo ti ve a, eng engemaw sawiin kan inbe zui luam a, naktukah a nu a lo haw dawn vanga hna a chawlh rih tur thu te a sawi a, "Mamuana a kan hnenah a awm rih dawn a, keini pawh kan ngaihtuahawm loh ang" a lo tih vang chuan rilru a nuam ve huai mai.


"Dawr ka nghak tawh dawn a, i hman chang changin min lo tlawh ve ṭhin dawnnia, thil tui deuh deuh ka lo siamsak ṭhin ang che" ka tih chuan a nui ri suk a, "Ni e, kan inhmu leh vat dawn nia" a tih leh hnuah kan inbiakna chu kan ti tawp a, Room a luh tuma ka inher chiah chu Aumawii lo ding ka hmu thut a, ka phu nasa lutuk chu ka phone ka thlauhlo chauh a ni! Rapthlak hian!


"Tihdanthiam-a chu a va zei hawi reuh ve a" ngeiawm zet hian a lo ti hlak a, mai mai chuan a.


"A zei loh ten, Pathlawi a lawm" ka ti let ve kher a.


"A hawih hailoh hmel chuar chuar nen, mi thlem a thiam duan duan hle mai" ve leh ngawt chuan, ani bak baka mi thlem thiam!


"I duh dan danin ngai teh" a beng bulah ka va kun hnai kher a, "A hausa sia, a thil phal rap" tih leh kalpelh ka rual a, "Chu vang renga Tihdanthiam-a......" a rawn tih leh laimekin Room ah ka luhsan a, kawngka ka kalh zui hmak a, Aumawii bula ka awm reng chuan ka rilru a insual buai reng nimaiin ka hria, a chang leh min sawi phur pui hlut a, a chang leh min sawi hnawn sak a, min duhpui leh duhpui loh pawh ka hre thiam tawh neklo e a.



Tukṭhuan eilaiin ka nu chuan min la zilh mawlh mawlh a, dawr kal ka tum chu a phal vaklo a, keiin ka ban tawh thu leh dawr ka nghah tak tak tur thu hrilhin ka tum lui ve tlat thung.



Inchei deuhin dawr lampanin kan chhuak dun a, choka lamah ngawt ka awm vangin ka awlthawng khawp mai, Customer an tam lutuklo a, kan buai viau hranlo bawk a, kan eisiamtupa Pa Rela nen zai play in ring deuh deuhin kan zai dun a, ka awm hi chuan midang pawh hian nuam an ti vein ka hria, Aumawii hi chu an hlau ve deuh a, kei ang em chuan an pawh ve lo bawk.



"Saii.....i ex a lo kal" a rawn tih chuan ka lehhawi zawk a, "Tu ka ex?" ka tih laichuan rin dan erawh ka nei thiam thung, a kutin min lo hui zauh a, ka Apron phelhin hmanhmawh deuh chuan ka kalchhuak ve nghal a.


Table hmasa bera Romawia lo ṭhu chu ka va hmu nghal a, min lo nuih var var mai. "Tehhlawl che chuan, i dam maw?" ka lo ti ve vat a.


"Hmanni ah ka lo kal tawh, i lo awm lo a" a lo ti var a.


"Nia tunlai chu dawrah ka awm vaklo a, helam ah i awm tawh em ni?"


"Kumin chu ka awm rih ang, kum tharah Delhi ah inkhel turin ka chhuk dawn a" a landan ka enchian takah chuan a lo lang dang ve tawh khawp mai, a pian pawh a nalh zaih maia, Sportsman a ni tih a hriat hliah hliah mai bawk, ruih theihthil ti ngailo tih takah a hmel pawh alang nung sarh a, kan hnathawk nula ho pawn an hmu duh viau mai.



Eng engemaw sawiin kan titi dun luam a, "Biak i van har ve, min hua emaw tih mai tur a lawm" a tih chuan ka inthiamlo ve lek lek a ni.


"Ka buai thei lutuka, phone pawh ka khawih vak hmanlo" tiin chhuanlam ka siam a.


"Bialpa i nei a mi?" a tih chuan a mitmengah beisei a nei tih ka hrethiam a, tlang deuhin ngaihzawng ka neih thu chu ka hrilh bawk.


"Ngaihzawng i neih tawh pawn induh kher lo la, ṭhian tal kan la chang pha ve ang chu ti raw" nuisang hian a ti leh a, "Tehreng mai" ka lo ti ve mai bawk a, a hmel hnual deuh rawih pawh chu ka lo hmu thiam khawp mai, kan inṭhen chhan kha keima lam vang a ni a, min duh hle ṭhin tih lah ka hai heklo, ngaihzawng anga inkawm aichuan ṭhian anga inkawm chuan kan inkar pawh a hma aia a ṭhat zawk ka ring, tlangval fel leh kawmnuam tak kha a ni miau a.


A haw hnu chuan Aumawii chuan "Hmelṭha ka tih zawng tak a ni, a fel hmel bawk si, tinge i ṭhen duh zawk a?" a ti hlut a, "Ka hre bik nang, ka duhzawng a ni ve vaklo aniang" ka lo ti sam mai a, "Val Senior zuna i uai vang bak anih loh chu a, Prof.Tihdanthiama zunah i uai zawr hnup hnup em a lawm, a thlalak te pawh i zuk keng thla hram a ni lawmni, i khum bulah i tar anga, I bialpa niloin zantin Tihdanthiama ringawt i dream a nia nga, i bialpa tan chuan a Fair lo ve ngawt ang" a ti niah niah a, a la sawi dik vek tak tak zui a.



Chu mi ni aṭang chuan min lo be fo a, zirtawp tlaiah pawh a ṭhiante nen thil eiin anlo chawl a, a engemaw zawng ngaihmawh awm zawnga min biak ngai lemloh vangin keipawn ṭha takinka be ve ṭhin a, Aizawla awm tamlo anih vangin a thil lei duhna dawr te hi min lo zawt leh khauh ṭhin a, Phone hmangin kan inkawm ve leh ta fo mai, eng rilru nge ka lakah chuan a la put ang ka hre lo nain keima lamah erawh chuan han danglam tehchiam a awm hranlo.



Zirtawp tlaia a ṭhiante nen an lo kal chu thil an ei zawh hnuah a ṭhiante chuan an kalsan a, kei countera ka phone bih mual mual a ka lo ṭhu chu ka chalah a rawk kuk lawlh a, "I bih nasa lutuk, i mit a tla a nge" nui var var chung hian a lo ti a.


"Kal i tum tawh a law, i puar em?" ka lo ti ve vat a.


"La tum lo, in haw tlai dawn em?"


"Dar 5 velah kan inkhar ang"


"In vengah Pu Lianhmingthanga i hria em?" a ti teh daih a, kan kohhran upa kha em mawni dawn le ka tih rilruk laiin "Kohhran upa a nia" a lo ti leh khauh a.


"Hria e, tinge?"


"Ka nu u a nia, an inah chaw ka eidawna, a awmna lai ka hrechianglo a min kawh hmuh rawh aw, ka lo nghak ang che" a tih leh chuan "Ka tlai dawn a sin, i hmanhmawh lo ami?" a lu a thing nghut a, "Ka lo nghak ang che, hmanhmawh phah lo la, saw tah thil ka va lei lawk anga, ka lo let leh ang" tiin a kal chhuak zui a, chutia min nghah dawn si chuan Umawii nen kan haw rual thei dawn chuanglo bawk a, kei chu haw hma deuh mai ila ṭhain ka hria, zanah inleng ka nei dawn bawk si a, lo inbual fai sar te pawh ka duh dawn a, a remchang viau ang chu.



Ka lo ngaihtuah laimekin Ufamkima chu a rawn lut ve hlawl mai, a Class bang a lo peng kawi anih hmel, a kamis dum lah chu a han i hmeh em em lehnghal a, a pian a lang nalh leh zaih mai bawk. a rawn pen lut chuan dawr chhung boruak a rawn her dang hlawk ni mai hian ka lo hria, midang lo awm ho rengin an en duh mai a, amah lah chuan an en hrek hrek tih te chu hre ve awm pawhin a lang lo.



Counter hma ah chuan lo dingin min rawn nuih hmasa zet a, "Vawiin in tluang maw?" zawi deuh sup a a lo tih chuan ka chhan hma hmain Umawipuiin a lo chhang a.



"Vawiin chu mi an tlem lutuka, min lo dawr ṭeuh teh" a lo ti leh hmiah tawh.



Eitur a lam a, a hawn turin eng engemaw a pack tir bawk a, a thil eiman lo free ka tum lah chuan a duh hauhlo lehnghal a, min dawr hnem bawk nen keimah zawk chu ka inthlahrung a ni, Coffee thlit sakin ka va pe hram a, a bula ṭhu tura minlo mitmei vang chuan a ep chiah ṭhutthlengah chuan ka ṭhu thla ve nghal a.



"Dar 8 velah ka lo kal ang" a tih chuan ka lo nui var var a, "I nu chu enge a an a?" tiin ka lo zawt let a.


"A zia zel e, a la indim deuh a"



"Christ a tunge awm ta?"


"Mamuana a awm a, an inawm thiam khawp mai, in an ti hnawk deuh ṭhin tih loh ah chuan" a kiai deuh suk a, hmeichhe dang awmpui an neilo chu engmaw zawng tak chuan ka lawm angreng, sawi chhuah chi phei chu a ni lo nasa.


Coffee in paha kan titi laimekin Romawia a lo thleng ve leh a, Umawipuiin a lo be vat a, ka va hawi leh laichuan Counter aṭangin an pahnih chuan min lo en a, Aumawii chuan a lo hrilh ve mai anih hmel e, Romawia pawh a rawn khi vur vur a lawm.


"In in khar har a ngem, dar riat chu hma i tih chuan lo sawi la, i inpeih hun hun ah kei chu ka hman ang" ka hma a miin a lo tih leh chuan ka haw hma tur thu ka lo hrilh vat a, "Ka thlah dawn che u mi, vawiin chu ka hmanhmawh vak lo a sin" a tih erawh ka hnial thung.



"Taxi in kan haw mai ang, Aumawii nen kan ni dawn bawk sia a buaithlak" ka tih chuan a aw ve leh mai bawk.



A chhuah dawn chuan pawn thleng ka zui chhuak a "Vawiin chu i nalh hle mai" a tih chuan min ti lai ve ram ram mai, Umawiin min lo koh vangin ka luhsan leh thuai a, ka pawisa nawi dahna an lo hmu lo chu niin.



"Kha kha maw kan cho loh val chu" ti a Romawian min lo fiam chuan a ban puamah ka lo chum sak a. "Lo awm rawh, chhang ka va pack lawk anga, kan kal dawnnia" tiin choka ah ka luhsan zui a, zana inleng ka neih huna chhawp tur chhang tui deuh Pa Rela ka siam tir a, ka va luh chuan aman a lo pack fel diam tawh hi a lo nia, ka eichak zawng zawng hi ka siam tir mai zel a, i he loin a nin min lo siam ve mai zel bawk.



Choka aṭanga ka chhuah leh laichuan ka ṭhianpa chuan Lassi a lo in a, "Min lo nghak rawh" a lo ti ve leh thung.


Minute sawm vel hnuah kan inzui chhuak a, "I bialpa chu eng hna thawk nge a, a upa deuh tawh lo maw?" a Bike lampana kan kal laichuan a lo ti a, "Ka sawi duh lo, i thik zual lutuk ang" uang fe a ka lo tih chuan a nuih a za khawp mai.


"Ka thik peih tawhlo zawk, kan nih laipawn i room bangah a thlaklak i tar kha ka hmu reng" a tih chuan phawk deuhin ka lo en a, nuih insum zeta min lo melh pahin ka darah a rawn kuah salh a.


"I lo hmu a law?" ka ti he haw a.


"Hmu e, thlalaka a hmai zawna i hmui thla pawh kha ka hmu" a nui zui kur kur a.


"Chu kher chu ka va han awihlo tak" a nakah chuan ka nghawk sawk a, nui hawk hawk chungin a Bike dahna chu kan thleng a, tlan chhuak tura kan ṭhu fel vek tawh tih ah chuan kawng chhaklam ka han hawi chu ka phu chiang kher mai!



Kan ep chiah dawr aṭanga Ufamkima lo chhuak nen chuan kan in en ren rawn a, a kal daih tawh emaw ka tih laiin!



Engmah pawh ka sawi hman lo, ka hma a mi dara ka ben zawt rualin Bike chu a tlan chhuak zui a, ka lehhawi leh laichuan Ufamkiman min lo en zui vung vung chu ka va hmu thei bawk.




Rilru bet lo deuh chuan ka ṭhu ngawi ta reng a, ka phone chu ka en leh ringawt ṭhin, ka va be hreh riau lehnghal a, va insawifiah dan tur pawh ka hrethiamlo. A bulah lah khan 'Taxi-in Umawipuii nen kan haw ang' ka ti bawk si a, tinge maw khatia ka lo sawi kher kher ni, keimah ka insawi awk zo ringawt a lawm mawle.



"Khawilam ah nge ka tlan dawn" a lo tih takah chuan ka inthing harh vat a, kan veng kan lo thleng der tawh chu niin, Romawia pu te nen chuan kan inhnaih lutuk lo a, an in thlen hma daih anih bakah kawng chung lamah anih vangin ke a ka haw thlak a ngai dawn bawk. Ama bulah phei chuan ka sawi duh lemlo a, kan in a rawn hriat ka duh vaklo, chuloah Ufamkiman min lo hmu lehzel nen Romawia bula awm reng chu ka awm a nuam zan tawhlo bawk.


A pu te in kan thlen chuan ka chhuk vat a, "Ka lo lut kawilo ang, ka ṭhiante inah pen kawi lawk ka ngai a" ti a kal mai ka tum chu ka banah a lo vuan chawt a, "I va hman hmawh ve, la ding lawk teh" a tih laia a Helmet a phelh chu ka lo nghak leh rih a.



"Khawi laiah nge in in a awm?" a rawn ti ta chiah mai.


"Kan tlan lohna lamah daih hian, he ta ṭang chuan sawi mai a har, a inhlat deuh a" tiin dawt ka hrilh zat a, lane hnuai maiah kan awm tih hria sela chuan lo len a tum emaw ania nga, a tih in a tih chi loh reng reng.



"A hlat chuan ka lo thlah lawk ang che" tih paha chet zui mai a tum chu a bana lo ben thawk pahin "Pen kawina tur ka nei a, ngailo mai rawh se" ka lo ti nghal thuai a, kan han in en leh ren rawn a, "Anih aw, chaw i ei ṭeuh dawnnia" ka ti chu min hnial zui ta em lo.


Hmanhmawh deuhin pumpelh lamah ka haw thla a, Step thui zeta ka chhuk laichuan ka Phone bawk chu ka en leh ṭhin a, tinge engmah a lo sawi loh le! A thinrim tihna em mawni dawn le? A mizia ka la hre chiang lutuk bawk silo a, ka hlauthawng ru khawp mai, pa zaidam thin thawk chu a na an tih ka hre ve a, a lo tawrhhlelhawm viau mai ang a tih te chenin a nia ka ngaihtuah ni.


A Number chu hmet chhuakin Call Button chu ka kutin ka tin zuau zuau a, ka zam riau mai, ka inngaihtuah leh rih a; insawihfiah hrim hrim pawh ka ba a lawm, dawt ka sawi te pawh a phat theih ang angin ka pha tawh mai aniang chu.


Step rem laiah chuan ṭhuin ka Call ta a, a Ring rei khawp mai, a la duhlo nge maw ni dawn le, a vawikhatna chu a Ring zo ta ṭhak a, ka lakah a thinrim a nih ka ring nghet bur tawh, keilah chu ka thinphu a rang dup dup a, ka ṭah a chhuak hlur bawk a, a hrehawm duh kher mai.


Rilru hah leh ngaihtuahna buai zeta ka ṭhutlai chuan ka phone a ri ve leh a, min lo call tu ka hmu chu thawk ka la hluai ringawt a, lawm viau e tilo chuan ka chhang hupurh bawk si, ka chhang lo phal chuang bawk silo.



Chutah ka lakrualin "Ka laklawh deuh a" aw ki dam thluam hian a lo ti a, ka thaw huai ringawt tawh.


"Ufamkim, nichin kha..." ka tih lai mekin "Dawt min hrilh a" a lo ti khauh a, ka ngawi chiang khawp mai.



"Tu nge kha pa kha?" a rawn tih leh chuan hrilh vek law law mai tur em mawni ka ti rilru a, ka bialpa hlui anih thu hrilh ila a lawmloh zual sauh ka hlau bawk si, engpawh nise, ka sawi kiam biai lohpawhin thudik chu ka hrilh tur a ni.



"Ka classmate anih kha, Shillong a ka zirpui a nia, kan vengah a pu te inah chaw a eidawn a, an awmna a hresilo a, ka haw rualpui ringawt a...." ka ti deuh duah a, a ngawih vung vung chhung chu rei ka lo ti hman leh pek tawh. "A ..pawi ..i ti em?" ka ti nawn leh zat a, thawk a la ri ka hre zui bawk.



"Chutiang anih tak tak chuan a pawina a awm hleinem mahse, dawt inhrilh tawh loh ah kan ti ang" thu tak zet in a rawn ti ta a, "Aw, dawt ka sawi miahlo, ngaihloh lamah i lo ngaih ka hlau lutuka, engmah khalam kha a ni lo a nia aw...." ka sawi laimek chuan min lo pawt chat lehin "Ka ring che a lawm" a rawn ti a, a aw chu ring viau lo mahse, a thuk deuh ruih mai, min ring takzet tih pawh ka hailo.



"Zanah chuan lo kal rawh aw, eitur te pawh ka lo inbuatsaih ang" ka tih leh chuan "Ka lo kal dawnah la lo hrilh ang che, ka thleng chiah a, kan intifai ve dawn ange" tiin kan inbiakna chu kan ti tawp zui a, ka phone hum chuan boruak ka hip vang vang a, hnara hlit phawi ang huai a lawm maw a nih le, hetiang em em hian ka ngaihzawng neih tawh te tih lungawiloh hlaua ka awm pawh ka la hrelo zawk hial a ni.



In ka thlen chuan ka nuin ei a lo rel mek a, "Khawnge i u?" a lo tih nghal zat a, "A lo tlai deuh ang, ka inthlak anga ka lo pui ang che" tih leh room lam pan ka rual a.


Ka inthlak zawha ka chhuk leh chuan ka nu ei rel ka pui sawk sawk a "Chaw ei hma ang u aw, chhunah thil ka eilo a ka ril a ṭam lutuk" ka ti leh zaih a, inbual tura ka chhoh hnu lawkah Umawipuii pawh a lo thlenga, ka inbualzo ka inthlak laiin alo lut a "Prof Tihdanthiama chu a lo leng dawn ta em?" a lo ti leh pek a, enge maw chutia a han koh teivet ziah chu.



"Len chu a tum a lawm, i hming i sawi dan kha a mawilo emai" ka lo ti kha kha chu min ner khum duh lek thung.


"Sangzuala pawh a lo leng dawn a" a tih chuan ka ngei ang reng, U sangzuala chu ka nu leh pain an nel bawk si a, Ufamkima lo len zan kher kher chuan lo leng ve lo se ka duh a sin mawle.



"Lo len tir rih lo la, min chawk bam vek palh ange" ka ti leh hap a, eng he hu ah a ngai lem hleilo a, "A ho e, a nuam daih zawk ang chu, Tihdanthiama pawn midang kawm tur an awm chuan nuam a ti zawk ang" a ti leh mai a, ngaihdan pawh ka nei thiam tawhlo.



"Aumawi, lo be ve bawrh bawrh ang che aw, a zak zum angreng lutuk a nia, biak hmasak loh phei chuan sawi tur a hre leh mang miahlo ang, ka nu in a zawh che pawn lo fak ve la" ka ti leh rih a, "Ka sawi ngailoin ka nu chuan a hre leh vek tho ang, mi mizia a hre thei lutuk, Sangzuala pawh hmuh tirhin a fel tih a hre nghal a lawm" a ti sam mai a, hman zan thil vang khan kei chu ka ngaih a ngam zanlo, Pathlawi anih vang khan an duh vaklo khan ka hria a, a lo kal hun ka nghahhlelh rualin ka huphurh ru em em bawk.



Zanriah eikham chuan Room ah ka chho leh nalh a, ka awmhmun kawr nalh ve ber ka tih chu hain ka sam la ro chianglo chu ka thlah bawk a, Makeup langsar vaklo in ka hmang bawk, ka inpeih thawkhat ta viau mai, sana ka en lah chuan dar sarih a pel zawt chauh a, thil nghah theilo chi ti takah ka za leh ruai tawh.



Dar 7 pelh hretah Usangzual a lo kal a, Sitting room ah ṭhuin ka pa leh Aumawii nen an titi bawrh bawrh a, kei leh ka nuin Choka ah Cup cake kan siama, sana leh ka phone chu ka melh khat tawk reng ringawt tawh a, dar riat chu ri har ka ti takzet tawh a ni.


Ka phone a lo ti ṭat a, Ufamkima Message a ni, a lo kal dawn chiah thu min lo hrilh a, ka thil tih lai dahin Sitting room lamah ka ṭhu phei ta thuai a, "Zanin chu i inbual ve ngei a law, i va fai ve a" Usangzualan min lo fiam zauh chu ka melh rum nghal rawm a, zan dangah hi chuan room lamah ka tawm daih zel a, inleng ka nei dawn tih a hre ve tho aniang, mitmei hmangin min lo chhaih leh zuk zuk ṭhin.



Rei vakloah kawngka kik thawm ka hre zui a, hawihhawm zetin Umawipuii a lo chhawn a, chutah kawngka lam ka hawi ran ran laichuan Ufamkima ngei mai chu a lo pen lut a, a hmel ka hmu chu ka lo nuih nghal var var mai, ani erawh chuan tawi te in min rawn nuih a, "Helamah lo ṭhu rawh" ka tih lai chuan kan ṭhutna lampanin a lo kal ve zat bawk.



Ka bula a lo ṭhu chu ka lo en chik leh khawp mai, T-shirt dum leh Leather jacket dum, a kekawr leh a pheikhawk thlengin a dum veka, a inhmeh em em mai bawk, chutih laia kan piah lawka ṭhu ka pain a lo en vung vung chu ka va hmu bawk a, zawhna a ngah hmel khawp mai.



"Ufamkima anih hi" ka pa en chuan ka lo ti nghal tawng a, ka pa chuan chiang leh zuala lo enin "Khawi veng nge ni? Ka hmuh hnu chu i ang viau mai" a lo ti ve chuar chuar a.


"I la hmu lo ang, Zarkawt veng a nia" ka tih laiin "Tv ah i lang tawh lo maw, ka hmu tawh tlat che a ni" a lo ti leh a.



"Tv ah chuan ka lang chiahlo, Radio ah chuan thu ka sawi tawh a" Ufamkiman a lo ti thung, a aw chu a lawi deuh lek lek a, a inthlahrun hmel em em mai bawk.



"Khawiah emaw i hmu tawh aniang pa, MZU Professor ania, Seminar inneihna velah i hmu tawh aniang" Umawipuiin alo tih chuan "Aniang, ka pa hi Higher zirtirtu ania" a lo ti ve vat a, Ufamkima a buk nghut nghut laiin ka pa thung chuan thlek meuh hian a lo en a, keimah zawk chu ka lo zak ang reng, ka bula mi chuan a kut a tuai rauh rauh a, ka lo nui tawi tak tak ringawt tawh, sawi tur lah chu a la vang em em zui a.


"Damdawi chu in eizo ṭep tawh em?" Umawipuiin a lo ti leh ta hlauh a, chutah Ufamkima nghawk zauh pah chuan "Member ah luh tir che a tum teh mai ania" ka lo ti ve zat a, Umawii hahawlh zawng kan sawi takah chuan a thlun phelh ang zar zar a ni leh ta, a Business plan book lo la chhuakin Ufamkima chu a rawn ṭhutchilh a, in leng a nei ve tih pawh a theihnghilh ta aniang U sangzuala pawh a lo kut chilo hawi vel mai mai tawh a ni ber, ka tan erawh chuan a lawmawm viau thung.



Ka nu lo ṭhu phei chuan ka pa aimah a chik zawkin a rawn thlek a, engmah phei chu a sawi lemlo, sumdawnna thil sawidun a Ufamkima ṭawng ve bul bul chu ka lo ngaithla ve renga, Umawii lah in zanin la la a sawm hlawhtlin chu a tum viau tawh bawk.



A reia reiah chuan an insawm hlawhtling ta a niang Bio data te an inpe a, phone number te in pein an duh tawk ta hram a, ka nu in Umawii sumdawnna a tuipui bawk a, chutia Downline thar a hmu chu a lo lawm ve hmel viauin ka hria, a haw hunah engtin tak chuan sawi zui ang maw tih mawlh ka lo ngaihtuah leh tawh.



Thingpui in pahin Umawii leh ka nu nen an titi luam a, ka pa leh Usangzualan erawh chuan inkhel enin an ṭhu ngawi reng a, ka nu chuan an chhungkaw chanchin te zawt in a zawt dilchhut ṭhin khawp mai a, Umawii nen kan in melh leh ralh ṭhin, Nu fing ngang a ni bawk a, mawilo thleng thleng chuan a zawt biklo mahse, a chik hle tih erawh ka hre thung.



Dar kua leh a chanve vel thleng a leng a, a haw tur chu pawn ah ka va thlah thlap a, "Nuamlo i ti em, Umawii thil sawi kha chu ngaih khatah ngaila, tih ngei ngei a ngai miahlo ania" ka tih chuan a nuih a za khawp mai.



"Pathianni hi Christa piancham a nia, chaw ei turin lo inring la" a ti khauh a, ni dawn tak maw, ka lo mangnghilh leh der tawh chu niin.



"Ka lo tum ang" ka ti ve mai a, chutah ka kut rawn hum vang vangin ka chalah a rawn fawp zauh a, "Ka nu bulah i chanchin ka sawi a, hmuh hlan che a nghakhlel khawp mai" a ti leh chu ka beiseiloh lam daih a ni.



"Chutia law?" ka lo ti hap a.



"Kum hnih thum in ngaizawn hnua inneih i tih kha ka lakah chuan i ti kher lo ang chu ti raw?"a rawn tih leh chuan chhan ngaihna pawh ka hrelo, enge a awmzia! Ufamkima hian nupui neih a duh leh tawh tihna a mi?






(End of chapter -13)



Link:
BBcode:
HTML:
Hide post links
Show post links

Ahmangaihi violette
Posts: 148
Joined: February 1st, 2020, 3:14 pm

Unread post by Ahmangaihi violette » September 7th, 2021, 10:54 am

ZUNZAM - by Ahmangaihi violette khiangte

CHAPTER - 14




A Motor ah chuangin ban min rawn vai zauh a, a tlan liam zui chu thlirin ka dinna ngaiah ka ding reng a, nichin lawka a thil sawi kha a ni ka la ngaihtuah chu, uang hmel a pu lo a, a thutak hle a nih kha maw! Inneih thu sawi nan chuan a la hma khawp mai, a tih tak tak ring ngam silo chuan ringhlel ru deuh siin ka awm a, a nupui a tan min duh thlap a ni tih hriat erawh chuan awm a ni ti nuam hle thung.



Mahse le, thla em pawh kan la inzui lo a, chuti lam hawi thu sawi dun nan chuan a la hma mah mahin ka hria, induh tawnna ringawt hi nupa a insiam tur chuan a tawk zo lo, chu chu amah Ufamkima ngei pawn a hrechiang tawh khawp ang.



In chhunga ka pen luh rual chuan Usangzualan min lo ko a "Lo kal lawk teh" Sitting room aṭang chuan a lo ti lang lang a.



"I bialpa kha MZU Professor i tia mi?" ka va phei chuan a lo ti vat a.



"Um..ni e..tinge?"



"Nupui leh fa a nei tawh tlatin ka hria" a lo ti leh a.



"Nei tawh e mahse, an inṭhen tawh a" ka tih laichuan ka nu chu ka va melh zauh a, min lo en kar vang chuan ka tim leh hnuhnawh khawp mai.



"A fel tak tak a ni, min dawr ziah lehnghal a, a zaidam dup mai bawk sia, hrawn nuam lutuk tur chi maw le" Umawiin a lo tih chuan ka nu chu a ngawi rauh rauh a.




"Mimitei chu ka rin aiin i duh Senior a, kum sawm chuang daih in inthlau lo maw" U Sangzuala bawk chuan a lo ti leh a. "A la upa bik vaklo, sawm thum leh tih chauh a lawm, a Smart thei em a a upa emaw i ti mai mai anih chu" ka lo tihsan a.



"Fa pakhat a mi a neih?" ka nu chuan a lo ti ve khauh mai.



"Umm..mipa kum 3 mi a nia" ka lo ti var a.



"An nu nen an inṭhenna a rei tawh em?" a tih leh chuan chulam engmah hriat ka lo neih hauhlo, an nupa an inṭhen tih ka hriatna kha chu a la rei tehchiamlo a, an inṭhen hun tak erawh ka hre hauhlo thung.




"Rei vak lo a ni lawm ni, Zothankimi sawi danah chuan nikum kum tawp lam a ni in ka hria" Aumawiin a lo ti a, a ni dawn tak e, ka hriat ve meuh kha chuan thla engemaw zah chu a liam tawh tak a lawm.




"An inṭhen fel chiang em, mi nupa inṭhen zawk kara lo tla zep ve lek te i ni ang tih a hlauhawm ania, fa an neih tawh phei chuan insuihzawm leh hun te pawh a awm leh thei a" ka nuin a tih leh chuan ka lo nui tawi tak a. "An inṭhen fel chiang tawh a lawm, an nu hlui pawn ngaihzawng dang a nei ve leh tawh a, an fapa Christa vang chuan an la intlawhpawh ve zeuh zeuh a mahse, hetiang te chu loh theihloh ania, fa an nei tawh miau a" ka lo ti sap sap a, an dinhmun ka lo hriatthiam pui dan em em chu keimah ngei pawh mak ka inti zawk dawn a lawm maw le.




"Fel thei a nia" meinei zeta Umawipuiin a lo tih chuan ka lo nui mai a, Usangzuala leh ka nu chuan Ufamkima te chhungkaw chan chin leh eng engemaw min zawt luam a, a nu ho a an khawsak thu leh a nu damloh thu te, an buai zia thu te hrilhin ka va puih chhan te nen lam chuan ka sawi deuh duah a, ka nu pawn a ṭawngkamah min thiamlo lutuk ta biklo in ka hria.



Ka pa erawh chuan "Tlangval ngei lo chu" a ti deuh tlat a, a sawisel phei chu a sawisel hranlo, keimah zawk chu nungchang uluk tur leh fimkhur turin min chah mawlh mawlh bawk.




Mut pahin Ufamkima nen kan inbia a, a haw dawn khan ka hamhaih em vangin mumal pawn ka chhang lo a, phone aṭang tala sawipui leh chu ṭhain ka hria.



A bulah chuan "I haw dawna i thilsawi kha eng i tihna nge ni?" ka va ti ve leh a.




"Kha kha lo ngaihtuah rawh aw, i hriat angin tleirawl anga ngaihzawng nei hman ka ni tawh chiahlo a, ka duhzawng tak nang ka tawng che a, neih ngei che pawh ka duh a, kan inchhung khurin kan mamawh zia che pawh i inhriat ka ring, ka nawr lo che anga mahse, chulam chu ka vei ber tih hria la ka duh a" ti a min lo chhanna chuan ngaihtuah a ti thui angreng khawp mai.



"Mahse, kan la inkawp reilo e" ka lo ti hap a.




"Nia ka hria a lawm, ka ti hlauthawng che em? Ka rilru dik tak hre sa la ka duh vang a nia" a lo ti leh a, a sawi awmzia chu ka hrethiam khawp mai, ngaihzawng niloin nupui a duh a, an inchhung khurin an mamawh zia lah ka hai heklo mahse, tunah rih chuan chhanna mumal ka nei thei tlat lo, kan inkawp rem zel te anih chuan ti chi kha ka nia, thu lo intiam lawk lah chu ka hreh em em bawk.




"Ka hrelo, hun te han liam ve phawt se, tunah rih chuan....engmah ka hrethiam rihlo" ka ti niah niah a, "A pawilo, tunah a ngai hleinem, hria la ka duh chauh a ni" a aw chu a inthlahrun hmel khawp mai, keipawh chutiang tho chu ka ni.




"Zan a rei dawn tawh e, muhil tawh rawh" a lo tih leh a, biak zawm zel chu duh viau mahila kan titi a tawp leh tlat tawh, sawi leh tur pawh ka hre tawh biklo. "Muttui' tiin kan inbiakna chu kan ti tawp a, Phone ka dah hnu chuan ka ngaihtuah zui rauh rauh a, ka duh takzet tih chu ka chiang, ka hmangaih hle zawk maithei a ni, neih ka hreh hauhlo bawk a mahse, engemaw kimlo riau hi a awmin ka hria, ani hian keimah hi nge min duh a nupui tur chauh tih chu ka inzawt ṭhin a, ngaihdan pawh ka nei thiam chiahlo.




Inrinni chu kan buai khawp mai, bazar ka duh thu Umawii bulah ka sawi a "Customer awm loh deuh hunah i kal dawn nia" a ti tak nain dawr kan khat mup reng bawk si a, kal chhuahna hun pawh ka nei theilo, naktukah Christ a piancham lawmna ah ka kal dawn a, thil pek tur lei te ka duh a, ka thawmhnaw hak tur te pawh zawn kual ka duh bawk.




Dar 4 velah ka chhuak thei hram a, naupang Toys zawrhna dawr ah ka kal hmasa a, in a tuam leh ngai tawhloin dawrah ka tuam tir nghal a, chumi hnuah ka kawr leiturin ka kal a, sana dawr ka kal pel tur chu let lehin pawn aṭang chuan ka thlek dak dak a, ka tan a inseng hnem tawh si a, engemaw chu leisak ve ṭhain ka hria.




Dawr a ka let leh chuan haw turin an lo insiam ve mek hlawm a, Umawii erawh a lo la buai khawp mai "Ka awmloh hunah engtin tak enkawl zui ang che maw, ṭha hnem i ngai lo nasa mai bawk si a, thla hnih khat lekah i tla chhe der in a nia ka rin ni" a lo ti niah niah a, "Kan kutzala a tlak chiah hian ṭhahnem ngaihna chu a lo awm ve mai zel a lawm" ka ti chu min nuih zat hle ringawt.




Kan haw tur pawna kan chhuak chu Romawia lo kal tur nen kan intawk hlawl a, "In la haw lo chu a va tihzia e, nizanah khan lo len ka tum deuh a, in in awmna ka hre silo a, khawi laiah tak khan nge in awm, ka pu te in aṭangin a hla em?" a lo ti zung zung a, 'Lo leng suh' tih tlat chi ni heklo, ṭha deuh chuan ka hrilh a, zana lo len a tum a nih hmel e.




Taxi in kan haw a, in kan thlen chuan khua a thim fel der tawh, zanriah eikham hnu lawkah Romawian min lo phone a, 'Ka lo tlan thla dawn a kawtah lo ding lang teh" a rawn ti leh mauh mai. Hmanhmawh deuhin ka chhuak a, reilo teah a rawn lang ve mai bawk.




A lo leng chu Aumawi nen an inhre sa tawh bawk a, an titi bawrh bawrh a, ka pa in a chhungte a zawh chuan a pu hming a hrilh a, "Chuti chu Ralzikpuii fapa i ni maw?" ka pa chuan alo ti teh hluai a, Romawia nu chu ka pa ṭhian ṭha tak a school kalpui ṭhin a lo ni awm e.




"I hmai tlangah i nu pawh i chhun hle tak a lawm" tiin an phul zui hlut a, kar lo ah kan inah chuan a tlangnel nghal der mai a, a haw tur pawh "Lo leng fo rawh aw, chaw te la rawn ei nghe nghe la a ṭha ang, kan nau a lawm maw i lo nih reng le.." tiin ka pa chuan a ṭha takin a thlah ta kha a nia, a zawng chhang viauin ka ring a ni.




"Shillong-a Mimitei Ex a nih kha" inchhung ka va luh leh laia Umawipuiin a tih ri chu ka va hre hman a, "Leh hman hmawh a che, ṭhian bak kan ni tawh lo" keiin ka lo ti hlur thung.




"Chaw eiah ila sawm dawn nia, Zikpuii fapa a lo ni renga kha" ka pa'n a tih leh laichuan Umawii chuan min lo mitmei ralh ralh a, a lo ngai kawi leh pek tawh chu niin, engmah lah chu a hre ve tak tak tawp silo.




Pathianni chhun inkhawm kan bang chu ka insiam nghal mawlh mawlh a, ka chhungte bulah pawh zep tawhloin ka kalna tur chu tlang takin ka hrilh a, ka nu chuan min hnial hranlo, ka pa erawh chuan "Rawn haw tlai lo ang che" a ti deuh hmuk a, zan chhuah hi chu a phal vak ngailo hrim hrim a, chuloah hetiang piancham lawm tih angreng hi a ngaisang lo ve hle bawk, keini unau pawh hi kan kum khatna piancham chiah min la lawmsak a, kan len hnu hi chuan keimahni kan intuituah a, lawm hming pu chuan engemaw hi chu kan ti ve ngei ngei ṭhin, mahse, midang piamcham lawmna ah hian kan kal manglo tih tur chu a ni tho mai.




Nidang zawng aiin ka inchei uluk a, Umawiin ka sam min herh kir sakin ka sam chu ka thlah siau a, ka kawr leithar ka ha chu ka lang nalh ve khawpin ka hria, "Smart pants ha rawh aw, Jeans tih vel i hak chuan awmpui emaw an lo ti palh ang che" a lo tih vang chuan ka hak tura ka lakchhuah chu ka thlak leh a, ka inpeih hnu chuan khawilai Function pui taka kal tur te pawh ka angin ka hria.




"I nalh lutuk tlat, i mawng bawr pawh a nalh khawp mai" Aumawiin a lo ti zauh a, darthlalangah chuan ka mawng chu ka va en leh kher a, thil ṭul lo deuh ka hre chhuak lehta nghal a.




Ufamkiman kal hma tura min chah vangin dar 2 bawrah ka kal chhuak a, Taxi hman mai tur ka hmuhloh vangin thui deuh kein ka kal a, pheikhawk sang ka bun vangin ka ke a kham urh mai bawk.




An Gate ka hawn laichuan an thawm ri nak nak ka hre pha tawh a, mahni tea han lan chu ka hreh ang reng khawp mai. Step ah chuan dingin Ufamkima chu ka phone a, rei lo teah lo chhuakin min lo hruai a, ka rin ai daihin mi an lo tam a, ka inchei suallo khawp mai, hmeichhe dang awm ve ho pawh an inpenparh hlawm viau a ni.




Ka present bawm khai chu tlangval pakhat hian a lo la chhawng vat a, "Mamuana anih hi" tiin chupa chu min chibai tir a, Mamuana chu tlangval ṭawng nem deuh chi hi ania, min lo be ṭha hlei hlei khawp mai, mipain nau a awm tur kha ka lo huphurh pui deuh kha a nia, amah ka han hmu ta chu ka huphurh pui tawhlo nasa a ni.




"Awi, i van lo kal har ve, tih tur kan lo ti zo vek tawh a sin, Balloon tal chu i ham puar ve a ngai ang aw" tih leh Sitting room lama min pawh phei a rual a.




Sitting room a ka va lut chu ka tum loh deuhin Lucy ka va hmu a, bawp khawkherh at a lo ṭhuin ka va lut chu min lo ṭhen khum sak a, "Lallucy te an laktlakloh lutuka, keimah vekin ka hampuara, ka biang a kham tawh lutuk" Mamuanan tih leh pahin Balloon pack chu min lo pe a.




"Tih tur tawk te te a awm ve a lawm, kei chuam Cake ka lei tawh a" Lucy'n a lo tih chuan "Decoration ho hi ka lei vek anih hi, i cake man aiin a to zawk ang" pakhat chuan a lo ti ve zat a, ngawirengin Balloon chu ka hampuar mial mial a, chutih laia room aṭanga pitari lo chhuak nen chuan kan inmelh fuh chiang khawp mai.




"Nang chu..." a tih laimekin "I dam ṭha zel maw ka pi? ka lo ti var a.




"Dam ṭha ve zel e, khawiah nge kan inhmuh tawh khah?" a lo ti let ha a. Hamhaih zetin ka lo nuih a, engtin nge ka han sawi dawn ni.



"I monu hual anih hi Nu Nghak, Mimi-i lah chuan i lo pi daih lehnghal a" Mamuana nui hawk hawk chu bangbo deuhin ka nuih ve ringawt a, "E, nangmah hi maw Mimi-i" tih pahin Pitar chuan min lo chibai a, ka hmuh hnuhnun ber ṭum ai khan a cher zawk a, zai pui a tawh vang nge ni a lo lang tar ve bawih tawh mai.




"Han ti zung zung rawh u Mamuan, mi an lo thleng khawm dawn tawh ang" Balloom kan hampuar sa ṭawn khawm mawlh mawlh pah chuan a ti a, chutah ka lam lo hawiin "Christa kha a thawmhnaw inlo va thlak dawn em ni, a kawr thar kan lei sak kha i UKim-an khawnge a dah han zawt rawh" a lo ti zui a, thawh nghal mai ka tum chu "Ka hak tir tawh" ka piah aṭangin Lucy'n a lo ti khauh a.




"Suit pawl kha a ni em?" Mamuanan a tih laiin "Ni e, Ufamkiman hak tir tura min pek a lawm" a lo ti leh a, chutih laimekin hmeichhe dangin Lucy chu an lo ko a, a kal tur chuan nuihzat hmel zet hian min lo enin ka hria.




"Rosy hi a lo kallo a mi le?" zawt em em lo hian ka ti hlawl a, a hmel ka hmu miahlo chu mak ka ti deuh viau a ni.



"A lo kal lo ang, nizanah Ufamkima nen an inhau hrep a lawm, Bawipuia Birthday hi Hotela lawm a duh a, heta lawm a duhlo a" ka bula mi chuan a lo ti mai a.



"A va zialo ve aw" ka tih leh laiin ka nakah a rawn nghawk sawk a, "Lawm zawk rawh, a awm ve te chuan nuam pawh i ti nang" a nui deuh huk huk chu za lo zetin ka lo nuih let a, Rosy hi ka ngaihmawh em em pawh ka hrelo, a fapa a ngaihzia ka hre ve renga, ka lainat zawk tlat tawh, tinge maw hetiang tawh hnu ah pawh thil ho te te a an la intih buai reng mai hi ka hrethiam theilo.




Ufamkima lo kalin ka thiltih laichu min lo pui a, Balloon ka ham puar laichu min lo thlekin a kiai leh suk suk ṭhin a, vawiin chu a incheidan vang nge ni ka hmu tlangval riau lehnghal a, a lang naupang takzet a ni.




"Rosy a lo kal ve dawn na nge?" Mamuana kalsawn hnu chuan ka ti vat a.



"Ka hrelo, a lo kal maithei" tih zawngin min chhang a.



"I zawt lo a mi?" ka ti leh a, zep loah chuan vawiin ang an fapa tana ni pawimawh angah hi chuan lo kal a chak dawn lutuk hian ka ring a ni.



"Lucy khan a phone tawh in ka hria" a ti leh mai a, ka lakah zep neiloin engkim min hrilh se ka ti takzet, tunah tak hi chuan a tan ṭangkaina neilo riauin ka inhria.



"Ufamkim, nangman va...." ka sawi mekin a nu kha a lo kal a "E, takah ka nu hi chibai rawh" a lo ti var a.



"Ka chibai tawh a lawm" Pitari nen chuan kan lo ti rual zawt a, chutah min nuih var varin room lamah min luhsan a, ka bula ṭhuin ka kut a rawn hum rual chuan ka lehhawi nghal thuai bawk.



A hawi kual leh thuak hnuah ka hmuiah a rawn fawp zauh a, kei ka lo nui hak a, Balloon a ṭawn mawlh mawlh laichuan a biangah ka va fawp ve vat a, a kiai ve suk suk mai. Chutih laiin aw thian kharh ri ka hre zui a, ka hawi rang viau a ni. Sitting room luhna bul aṭangin Lucy chuan min lo en reng chu niin!




"Christa nu chu tlaiah a lo kal dawn anih chu" a lo ti zauh a. "A ṭhat chu" tih zawngin ka bula mi chuan a lo chhang thung.




"Kima ka damdawi lehkha kha khawiah nge i dah?" Ufamkima nuin Room aṭanga a lo tih chuan Ufamkima chu a tho nghal vut a, Room-ah a lut fel chiah tih ah chuan Lucy chu ka hma ah tak a rawn ding a, "Ka hrilhlawk che sia, ka vau na che kha i lo hlau vak lo a ni maw?" a lo ti hlak a, ka chhang lemlo.




Ka thil tih lai ka tihsan mawlh mawlh a, ka hmaah dingin a nin min en reng thunga, awm chu a ti nuamlo ve rauh rauh mai. "Naupang te siin i ngeng reuh hle maia" a rawn ti leh sak a.



Ka la chhan loh cheu vang chuan a dawh thei ta vak lo ania nge ka Balloon ken lai chu a rawn beng thla hmak a, ka hawi chho chu thip fahran hian min lo melh a.




"I ti fuh vak dawnlo aw nau-i, Famkima duh ber emaw inti hi nang chauh lo pawh midang an awm nual ania, nang pawh midang anga a nupui nih zirlai pakhat ve mai chauh i ni" za loh zet leh ngeiawm fahran hian a nui hak a, a thil sawi chu thu taka ngaih chi pawh ni nghallo chuan, a lo ngaihzawn ve vang bak a nih ka ringlo.




"Kal sawn teh, min dal ania" ka tih chuan a ding sawn ve mai a. A la ṭawng duh tawk mailo "I hriat duh chuan ka hmuh tir ang che, tu te nge Prof.Famkima nupui nih zirlai dang te chu i hmu duh em?" a rawn ti nawn leh a.




Mamuana alo rik tak hlut vangin Lucy chu a kal sawn thuai a, chutih laichuan midang an lo thleng a, hmanni a Birthday lawmna a kan kal ṭum a mi te pawh an lo lang ve nuk a, min la hre ve deuh a niang hmeichhe pakhat chuan min lo nuih var var bawk.




Tlai lamah chuan kan ṭhahnem tawh khawp mai, eirelna ah Mamuana nen kan awm dun chawt a, Ufamkima chuan inleng a kawm vangin kan inbe ve hman meuhlo, tleirawl ṭhenkhatin min lo puiin Salad kan siam a, Mamuana fiamthu kan nuih pui leh dar dar ṭhin.




Lucy erawh neitu chan chang zetin a ṭhu a, mi lo kal chu lo chiau auin thilpek a lo dawng zel bawk nen Christa nu emaw tih mai tur a ni. Ka en vung vung laichuan Mamuanan min lo nghawk zauh a "I thik a mi?" ka beng bulah a lo ti sar sar a.




"Aih...teuh nang" nui chunga ka tih laiin "Ka hrethiam che a lawm" a lo ti leh kher a, amah lah chu a nui pat pat zui a.




Tomato sil tura ka kal laichuan min lo zuiin min lo pui leh sawk sawk a "Thik tham pawh a nilo, mi zaktheilo a nih saw" a lo ti leh hlak a, min ti hamhaih angreng.




"Ka hrechiang vak lo a, ka lo thik hran pawh ka hre hleinem" ka ti liam mai a.



"Awi...dawt sawi kher a ngailo, ka mawllo ania" te chu a la rawn ti tak deuh deuh a, ka en dan kha thik hmel ka lo pu em mawni!



"Nizanah Rosy chu a lo kal a mi?" ka ti ta daih a.



"Kal pawh ka hrelo, mut dawnah phone in an inhau a, vawiin pawh a lo kal hreh phah a nih hi, Nu nghaki a awm sia alo kal hreh ve aniang" a ti leh mai a, he pa pui hian thil a hriat hmel nek a, ka zawt chiam dawn emaw ni.




"Ufamkima nu nen an inmil nange?" ka ti leh zauh a.



"Umm...millo lutuk ti ila a hma te kha chuan an inmil ṭhin lutuk zawk a mahse, Rosy'n ngaihzawng a neih hnu kha chuan an buai nuai a ni mai, a damdawi tih te kha a man sak ta bawk sia, a mâk sak hmak a lawm" a sawi lai chuan ka hau chungin ka lo en a, inṭhen pangngaiin an inṭhen a maw ka lo tia, Ufamkima nu zawkin a lo mâ tih chu ka lo la hre miahlo.



"A mâk sak tih ka lo hre miahlo" ka tih chuan ṭawng zawi turin minlo khap nghal chul a.




"Midang pawn an hre vek biklo ania, Rosy chuan a hnuah pawh lo haw leh a duh a, Ufamkiman a hruai duh tawhlo a lawm, Rosy Cousin Lucy saw a rawn inrawlh nasa a nia, milem a nih saw, Ufamkima a rawn ṭan lutuk te saw ka awih lo reng reng" a ti leh hlak hlak a, ka beng a tivir lak lawh a zawhna ka zawt mawlh mawlh a ni ber, mi lah chu a chhang ṭha duh vei phian a, ka rin loh deuh deuh ka hriat phah nawk mai.




Rosy nu leh Lucy pa chu unau an lo nia, piang hmun an ni emaw ka lo ti kha ka lo hre ṭhelh deuh a ni, Mamuana sawi danin Lucy zawk hian Rosy leh Ufamkima hi a lo inhmel hriattir a ni awm e, chu thil chu a ngaihna ka hre vaklo, Lucy zawk chu hriat chian lehzual ka chak bawk.




"Rosy chuan ngaihzawng a nei tak tak a mi, engtin nge an hriat chhuah a?" ka zawh laimek chuan midang an lo kal vangin "Nakkinah kan sawi leh dawn nia" tiin min kalsan a, tleirawl ho awmna a ka va let leh chuan Mamuana chuan thil dang sawiin an lo nui leh ham ham tawh a, an bula ka ṭhut leh hnu pawh chuan kan thil sawilai mawlh mai chuan ka rilru a luah a, ka rilruin ka zel din kual a, ka inngaihtuah buai ve hle ringawt mai a ni.




Zanriah ei hma deuh chuan Rosy chu a lo thleng a, mipa pakhat nen lo inzuiin Present bawm lianpui hi a lo keng a, chutah Mamuanan "Saw pa saw anih saw Rosy bialpa chu" a lo ti zauh a, chu pa ka va en chuan mipa lian zuah mai leh hmai tlang ṭha deuh hi a ni a, a hmel aṭang chuan a fel hmel riauin ka lo hre leh pek a, a lo lut te chu a inthlahrun hmel khawp mai.




An che vel chu ka lo en zui renga, Rosy in an Present ken sitting room a a dah lai chuan mipa zawk chu choka lamah lo kalin dawhkan bulah chuan a ding a, kan lam a lo hawi laichuan Mumuana nen kan lo en ve reng a, "Ṭhian angin an inkawma mahse, Ufamkima hna kal hlanin a lo leng fo a niawm e" Mamuana a lo tih chuan thil awmzia tur chu ka hrethiam ve ta ruakin ka hria.




Rosy in Christa pawma thla a lakpui hnuah rei pawh ṭhu loin an inzui chhuak leh a, Ufamkima chuan biak pawh a lo be miahlo a nih hmel, Lucy erawh chuan pawn thleng a va zui chhuak a, Step bula an indinchilh chu thlek meuhin ka va en a, an ni ho inkar thu hi a ngaihna ka hre pha chiahlo mahse, tu emaw chu he mi te in karah hian a ding anih ka ring thung.




"Lucy hi a awmzia ka hrethiam lo tawp" Mamuana bulah chuan ka ti leh tawl a. Ufamkima lam a ṭang reng chunga Rosy nen an inti chhe chuang miahlo chu mak ka tih chhan a ni.




"Ka hre tawh biklo mahse, nang chuan be tam vak suh" ka bula mi chuan a lo ti leh mai a, chu chu keipawn a ṭha berin ka hria, a tir a ṭang reng khan kan inmil zan tawhlo kha a nia, Ufamkima lah chu a ngaizawng deuh tlatin ka hre bawk a, nichin lawka a thil sawi dan pawh khan ngaihtuahna a ti buai khawp mai.




Lucy lo lut leh chuan kan lam a lo pan a "Christa nu chu a va haw leh hma ve a, chaw te ei ve tal tur a lawm" Mamuanan a lo ti var a.




"A chi dawn a mi, pasal hlui te bialnu awm ve lai te chuan tu nge nuam ti ang, Mimi tan pawh a awmloh chuan a nuam zawk ang chu" a sawi zawng chuan min rawn melh ralh a, Rosy chuan kan chungchang a lo hre vek tawh anih hmela, engtin nge min ngaih ang aw, ka lakah a ṭha bawk si a, ka inthlahrung ru khawp mai mahse, ani pawn ngaihzawng a nei ve tho a, min haw zui em bik lo turah ka ngai a, rilru erawh a nuam fahran biklo.




"Heta awm renglo in va ṭhu phei ve la, mo nu Interview hun a nih hi" ka bula rawn ṭhut paha Lucy'n a tih chuan ka lo melh zawk a. "Interview turin ka lo kal lo" ka tihsan mai a, ani a lo nui hak thung.



"I van zeilo ve, Ufamkima a zei bawk silo, nupui nih zirlai chu ṭan ve tur a sin" ka beng bulah a rawn ti sar sar a, enge maw nupui nih zirlai pawh chu a tihsek le.



Mamuana thawh tum chu "Khawnge i kal dawn?" ka lo ti hluai a, "Dawrah ka kal lawk dawn" a tih chuan zui ve mai ka duh rum rum a ni, Lucy lah chuan Cigarette a lo chah nghal zat a.




"Zan thleng awm rawh, i zirlaipui dang te pawh an lo kal maithei ania" Mamuana kal hnu chuan a rawn ti leh a, kan inmelh rum hnai khawp mai, ani erawh a nuisang reng a, nui heuh heuh chung hian mi pawi a sawi peih phian dawn a nih hmel hi.




"I ṭawng dan chu a ngeiawm mah mah lo maw, Ufamkiman a chungchang i sawi dan hi hria se a lawm vakin ka ringlo" ka lo ti nghat a, hetia a tih reng chuan ka hrilh duh tak takin ka ring.




"Insawifiah tur a ngah dawn emai a, duhsak taka ka thil hrilh che hi fing deuhin lo chik tawp rawh, a mi thar ber i ni bawk a midang zawng zawng khum tumin a fapa te saw han duat sak zawk la, i chungnung ber thei mai ang" a ti leh a, kan inbe ru sar sar reng chu kan ṭhutpui tleirawl ho chuan min lo en leh zawk ṭhin a, ka thinrim dawn dawn nain a thilsawi lah chu lo chawtak khukpui hluai tur awmin ka hre bawk silo, min ṭawng el khum vel ni berin ka hria, men a thlak chi a ni zawk mah ang.




Ufamkima a lo kal a "Mimi, lo ṭhu phei ula hunserh hmang dawn tawh ang u" tiin Mamuana awmna min zawt zui a, ka lo chhan mek laia Lucy tho tharh chu a en zui vung vung bawk.



Sitting room lama Ufamkima a let leh hnu chuan tleirawl ho chuan "Kan lo ti tawh ang" an tih vangin kut ka sil a, tui ka in leh laimekin Lucy bawk chu ka bulah a lo kal leh a, "Va phei vat ta che, zirlai thiam thei deuh i ni dawn lo anih hmel, i hawihhailo riau mai" ngeiawm zet hian a lo ti leh a, mai mai chuan a.




"Zirlai Pass zo lo ho lak aṭangin engmah thurawn ka mamawh lo" tih leh kal san ka rual a, nupui nih zirlai min ti sek chu ka helh viau tawh, engteh ual ani bikin ka hrelo bawk.




Sitting room a ka va lut chu Ufamkiman a bula ṭhu turin min lo mitmei a, ka ṭhu fel chiah tih ah chuan a pi malchung aṭangin Christ an min lo au lauh a, a kut a a Toys ken lai chu min lo hmuhin a lo nui var var bawk. Chutah ring leng lawng hian "Batman kha maw lian tawk a piin a lei a" a lo ti leh reuh a, midang ho chuan min rawn en ṭhap ni mai hian ka hria, ka zah viau rualin a nuam ve reuh kher mai.




Ufamkima nu chu lo ding chhuakin lawmthu sawina leh ṭawngṭaina te a nei a, chumi hnuah zanriah eiturin kan inbuatsaih a, va puih ve leh ka tum chu "Mamuana leh naupang ho khan ti rawh se" tiin Ufamkiman ka puih a rem ti ta tlat lo a, dawhkan kil zingah ka tel ve dawn anih hmel.




Kan ṭhut ṭhap tawh hnua dawhkan a Lucy leng ve lo inchawi thla hna hna chu a lawmloh hmel khawp mai, min rawn en deuh kher vang chuan min mawhpuh deuh em mawni lehnghal ni.




"Mimi, inthlahrun miahlo tur aw" Ufamkima nuin a lo ti var a.



Ufamkiman chawhmeh min lo suah sak zung zung a, chutih laiin tleiawl ṭhenkhatin pawnah ṭhutthleng an chawi chhuak a, an zingah chuan hmanni a a piancham kan lawm hmeichhe tleirawl te kha a tel ve a, a ṭhutthleng zawn pui mipa pawh chu hmanni a a bula ka hmuh tho kha a ni.




"Suzanne-i te kha i sawm ve lo a mi?" Ufamkima bula ka tih chuan "Vellore ah an kal a" a lo ti mai a, an naute kha a damlo em mawni dawn le. Number kan inpe ve tak nain kan inbe zui leh ta miahlo a, min rawn hre zui bik vak lo anih hmel.




Kan chaw ei chu chawhmeh pawh ka suak ve hman meuhlo, Ufamkima min suah sak zung zunga, an thilsiam a tui bawk a, ka eipuar khawp mai, mi zinga chaw ka ei hian puar taka ei hi ka nei ngai meuhlo a, kan eipui ten an zir te pawh a nia nge, Ufamkima nu lah chu ka lakah a ṭha em em a, min be seuh seuh reng a, mi sawi dan leh ka laka a awm dan chu a inpersan rih viau a ni.




Zanriah eikham chuan Cake zaina hun kan hmang leh a, Mamuana naupang ho a kawikhawm a, an ri dar dar reng a, Christ a pawn nuam a ti viau aniang, a nui hak hak reng a, a hmel hmuh pawh a nuam khawp mai.




"I hmanhmawh tawh em?" Ufamkiman a lo tih chuan ka hmanhmawh loh thu ka hrilh a, an mi sawmte haw hma a inthlah tir chu ka hreh ve rih deuh a chuloah ka chhungten ka kalna an hriat tawh vangin ka hmanhmawh viau hranlo.




Phone call a dawnga midang an beng chhen em vangin chhang tur chuan pawn lamah a chhuak a, chutih laiin Mamuanan hawlh pawp a siam chu a rawn khai chhuak a, naupang lah phur em emin an lo chiau chul a, an thawm a ṭha ham ham viau a ni.



Kawngkhar lam ka va hawi chuan Lucy'n min lo hui zauh zauh chu ka va hmu a, kal mailo chuan ka en renga, a turin min rawn tur a ni ber ang chu, phur lo zeta ka va pan chu a bul ka thlen rualin "Hmanhmawh ta che" tih leh pawm lamah min pawh chhuah chu a rual a, min pawt kal dawt dawt chu bangbo deuhin ka zui ve zel a "Enge i hriat a?" ka tih laichuan pangpar hunna kan thleng fel der tawh.



"Railing bulah sawn va kal la, va hawi thla rawh" tih leh min nam phei a rual a, "Enge maw i hriat le?" ti niah niah chunga ka va hawi thla chuan ka tum loh deuh ka zuk hmu a.



"I zirlaipui te zinga pakhat anih kha, Regina-i MZU ah chuan i bialpa chhass tih an hre fur ang" ka hnunga mi chuan a ti leh zauh a, Ufamkima leh nula pakhat Scooty bula indinchilh lai chu bang bo zetin ka en reng ringawt tawh!



Nula chuan Ufamkima banah a vuan deuh ṭunga, an landan aṭang chuan thil pawimawh tak sawi te pawh an ang a lawm, Ufamkima kal tuma a che hrut chu nula zawk chuan a banah a la vuan tlat a, kalsan mai lo chuan Scooty lamah chuan an inpawt phei leh a, Ufamkima chu ka ringhlel phallo chungin chutia nulain a ban a vawnna a thing thla miah lo chuan ka rilru a ti buai lo theilo.



"Regina-i nen khuan in inkhing tawk viau ang, midang chu enghlelh vak tham an awm lo" ka hnunga ding chuan a lo ti leh zela, chu nula chu ka hmuchiang theilo nain nula nalh thawkhat tak a ni tih ka dinna aṭang chuan ka zuk hmu thei thung.



Ka taksa chu a sa pup pup mai a, ka din na bula Railing chu ka hmer ngar ngar ringawt tawh. Chutah ka hmuh lai ngei mai chuan hmeichhia chuan Ufamkima biangah a fawhsak zui a!




(End of chapter - 14)

Link:
BBcode:
HTML:
Hide post links
Show post links

Ahmangaihi violette
Posts: 148
Joined: February 1st, 2020, 3:14 pm

Unread post by Ahmangaihi violette » September 7th, 2021, 10:57 am

ZUNZAM - by Ahmangaihi violette khiangte


CHAPTER - 15




Enge thil awmzia hi ka hrethiam lo, rin dan erawh ka nei, Ufamkima hi ringhlel phallo viau pawh ni ila tuna ka thil hmuh ang hi chu tu hmeichhia mahin an en liam mai thei bik lo ang, ni e....ka lakah insawifiah tur a nei a lawm, mi sawi ka hria a nilo a ka mit ngeiin ka hmu tlat.



Step lampana kal mai ka tum chu Lucy chuan ka banah lo man chawtin "Enge tih i tum a?" a lo ti hluai a.



"Ka chhuk dawn" kei in ka lo ti tawl mai.



"I ti awm ang lo lutuk, tuna i hmuh chin te chu a pha mar vek ang, tikhan thil awmzia i hria a, i enthla zui dawn a lawm" kal luih ka tum chu ka hmaah lo dingin "Thil ti phut phut suh, ngaihtuahna hmang hmasa lo a chet hi a ṭhalo a nia" a lo ti leh a, kan ngaihdan chu a in anglo takzet a ni, keichuan zuk kal a thil awmzia zawh nghal tawl ka duh rum rum a, a bianga a fawh chhan pawh kha sawifiah tir nghal ka duh bawk.




Lucy min vawnna chu phihthlak sakin ka kal lui ta tho a, Step a ka pen thlak hlawk hlawk laichuan Scooty thawm ri vut vut ka hriat vangin ka hmanhmawh kher mai, Gate ka hawng fuhlawk theilo chu ka thinrim hlur ringawta, kha nula kha lo la tlan chhuak hmanlo se ka ti takzet.



Gate ka hawng a ka penchhuak chiah chu Ufamkima nen kan intawk hlawl a, min hmu thut chu ka phawk ve lek lekin ka hria, kawngpui ka va melh zauh chuan nula kha alo awm tawhlo a, ka tlai hret a ni.




"Ti nge i lo chhuah tehhlawl a?" a lo ti var a.



"Nangmah zawk, enge i tih a?" ka lo ti let ve thung.



Chutih laichuan Polythene dum a thil khai lo lek zauh hian a kiai deuh suk a "Birthday Gift ka la lawk mawle" a lo ti sam leh mai a, Polythene ka lo thlek chuan engthil emaw lehkhamawia intuam hi a keng a, kha nu pek kha a nih hmel e.



"Chutia .. law..?" a hmel chiang taka en chungin ka ti a, enge maw amah ah chuan ka zawng a ni ber ang chu, a biang ah Lipstick a kai em tih te pawh a ni maithei mahse, engmah a lang lem hleilo a, ka mitthla ah erawh nulain a biang a fawhsak lai kha chiang fein a rawn lang thung.



"Tirawh, chho ila?" tih leh ka dara min kuah a rual a, ka lo ṭang deuh ṭung chu phawk lek lekin min en zui a, min mawlhtu awm tlat vang chuan sawi leh maitur ka hrelo, chutia che chang lawklo a ka ding chu; a nin ngun em em a min thlek laiin kei erawh ka rilru a buai ru khawp mai.



"Present chu khawi aṭangin nge i dawn a?" ka tih leh ta hram a.



"Ka student te aṭangin a nia" a lo ti leh mai a, tuna a nuisang hmel chu ka ngaina lo, a nui hmel chuan ka awm a ti nuam hauhlo bawk.



"Min lo zawng em ni a?" zawhna ngah hmel takin min en ta a.



"Aw, nichin khan...." ka sawilai mek chuan Step hmawrah Lucy a lo lang a, "Khatah in lo awm daih a ni maw, inleng ho saw haw an duh tawh a, lo chiau au la" Ufamkima zawk en chuan a lo ti a, ka thilsawi laichu min lo pawt chat chiang khawp mai.



"Tirawh.." tih leh min kuah chhoh a rual a, chutih laia Lucy hmel ka han en chuan a mitmei hmangin engemaw hi a sawiin ka hria, ka hrethiam pha hauhlo, ka hriat zawng chu he nu pawh hi ka tana mi rintlak a ni lo tih hi, ka rilrua zawhna awm hi chu Ufamkima ngei hian min chhang bawk se la ka duh.




"Tinge in lo chhuah bo daih a, inleng awm lai lai a" kawt zawl kan thlen chuan Lucy chuan a lo ti leh a.



"Hei Botany Department hoin Present an rawn ti ve a, ka lam lawk a lawm maw le" damthluamin Ufamkiman a lo ti thung.



Lucy chuan ka lam a lo hawi a, hetia hrelo der lemchan vel ang hi ka peih zawng a ni ve leh peklo, lawmlo lek lek chunga ka lo melh bak chuan ka chhang let lo bawk. Chutah Ufamkima chuan min lo enin "Haw i lo tum em ni?" a lo ti khauh a.



"I hman chuan haw mai ka duh" tih pahin ka sana ka bih zawk a, dar 8 a ri der tawh a haw pawh chu a hun tawh viau mai, min thlah sela haw kawngah titi dun ila a ṭha ang, helai ah zawng khumfa ang maia chimawm vang hian duh ang pawh kan sawi dun thei ngut lo ang.




"Midang ho haw lo nghak leh lawk rawh rawh aw, a rei tawh lo ang" a tih leh chuan inchhung lamah kan inzui lut a, midang lo awm ve ho nen chuan Sitting room lamah inbia in an indinchilh a, Ufamkima nui hmel chu ka va en leh ṭhin, chutih rualin nichin lawka ka thil hmuh khan min mawlh tet tet thunga, ka thaw te chu a ipik ṭup maiin ka hria.




"Haw i tum hnai a mi a?" ka bulah Mamuana lo kalin a thei vel lai chu min pe a, "A tlai ve tawh a lawm" tih pah chuan ka lo ban sak a.



"A la hma e, nang te chu awm ve rih la, inkawm na hun pawh kan la nei mang hleinem" enghelh neihloh hmel takin a thil ei chu a ṭhial ri hmarh hmarh a, han kawm zel pawh a chakawm viau mai mahse, tunah rih chuan ka rilru ah thil dang a awm tlat a, a fala Ufamkima chu biak hmasak phawt ka ngai.



Midang haw tur thlah a Ufamkima chhuak zawk chu a lo lut leh thuai a, Lucy lah chuan a zui ve sek reng a, ka mit a ti kham viau tawh, he nu hi ka ngaitheilo takzet a ni.




Dawhkan bula Mamuana nen kan lo ding chu min lo panin "Lo ṭhu rih rawh ka hman ṭep a nia, Lucy kha kan ruala haw a tum em maw ni aw" hawi kual thuak pahin a ti a, chutia Lucy hming a sawi chuan ka thin a ti rim deuh thut a, "Ufamkim kan pahnihin kal ang, i haw hunah duhleh a hranpain thlah zawk mai rawh, anih loh pawn thlah hmasa la, ka lo nghak ang" ka ti khawl a, Mamuana nen chuan min en phawk khawp mai, engmah phei chu a sawi zuilo, a hmel ah erawh tuna ka thil sawi khan a ti hamhaih deuh tih chu ka hmu thiam thung.




"Ni e, Ukim a malin thlah rawh i zeilo ṭet ṭut emai" nui hawk hawk a Mamuanan a lo tih ve takah chuan Ufamkima chuan min lo nuih suka, "Lucy chu nangman i lo va thlah dawn nia?" tiin Mamuana chu a hrilh zui a, ka thawk a ven phah huai pawh ka hre hranlo, ka thinrimna a ti sosang lo mai chuah a ni zawk ang.




"Jacket kan ha lawk anga kan kal dawn nia" tiin a Room lam a pan a, Nu Nghaki nen eng thil emaw sawiin Room ah chuan an awm reng a, a rei reuh zek mai.



Mamuanan Cake an eibang ho chu "A tam sia hawn ve rawh, Bawihpuian a ei ṭha duh silo" tiin min lo Pack sak mawlh mawlh a, "Chawhmeh bang te hi i hawn duh em?" a ti lehzel a, chu erawh ka hnial a, leng leh vat turin min chah mawlh mawlh a ni ber e.



"Min lo zui lawk teh" Chair a ka ṭhut lai chuan ka beng bulah Lucy'n a lo ti a, chhaklam bathlar pana a kal nal nal chu phur fahranlo chuan ka zui a, eng thil eng maw sawi leh a tum ni.



"Regina-i chung chang kha zawh i tum a mi?" a bul ka thlen rual rualin a lo ti nghal a.



"Tum e, engah nge ka zawh loh ang?" ka lo ti chu a meng râng khawp mai. "Ka hrilh che kha, a in sawithiam hnehsawh dawn lutuk, 'Regina-in min ngaizawnga ka duhlo' a tia nga a zo der a ni mai, chumi hnuah a fimkhur sauh anga, nang hian engtikah mah i man chhuak tawh lullo ang, chu aichuan ngawi rengin en zui zawk rawh" a ti kha kha a.




Chhang lo a let leh mai ka tum chu ka banah pawtin bathlar thim laiah chuan min pawt phei dawr dawr a "Ngaithla chiang rawh Ufamkima hi nang aiin ka hre chiang zawk a nia, reilo teah inneih puiah a sawm ang che, anih loh pawhin inneih lam hawi engthil emaw a sawipui ang che, a hrilh hunah che chuan nupui nih zirlai i ni ta nihna a ni mai, Regina-i te ho bulah pawh a sawi ve ṭheuh tih hria la" a ti leh sar sar a, ka hau chunga ka lo en vang chuan a mak a tih hmel zualin ka hria.




"Eh...a sawi tawh zawk a mi?" a rawn ti leh a, he nu bulah hian eng hi nge sawi a; sawiloh tur hriat a har khawp mai.



"Aih" tih zawng chuan ka chhang a, a thil hre lutuk hi mak ka ti riau zawk a ni.



"A la sawi vat dawn chu a" a lo ti leh a.



"Engtin nge chutiang te chu i hriatpui vek theih zawk a, in inṭhian ṭha viau a niang maw" zawt em em lo a ka tih leh chuan ka aw chu a ngeiawm lek lek maithei.



"Ka ṭhian ṭha a nih bakah, engkim min hrilh ṭhin a lawm" a ti mai a, chuzawng ka awih lemlo.



"I lo chhui ru reng a ni zawk ang a" ka ti leh kher a, ka sawi dik anih ka ring, a mitmeng a danglam deuh tlat a, chutah min rawn nuih pah hian "Ka sawidik leh dikloh chu i hre mai dawn a lawm, mak i ti zawk mai thei" ti lehin inchhung lam a thlek dak dak a.




"Nangmah hi mak ka ti zawk daih che, tu lam ṭang nge i nih a, ka lam i ṭang chuan ka ring hauhlo, chutiang bawkin Ufamkima lam i ṭang lo a, i unaunu lam pawh i ṭang heklo" a mitah tak en chungin ka ti sak sak a, a ner nasa khawp mai.



"I landanah hi chuan Ufamkima hi i ngaizawng hle tih a lang reng" ka ti leh ngat a.




"I va han mawl tak!" a rawn ti teh fahran a, fing viau ah a in ngai emaw ni zawk chu le?



"Ka bialpa nena kan inkarah chuan lo inti buai ve vak duh suh, ka lo inchingfel ve thei lutuk a nia, i puihna pawh ka mamawh miahlo" ka tih leh chuan a nui hul hak ringawt tawh.




"Ka hrilh duh che hi lawm hle ta che" a sawilai chuan rum zetin ka lo melh a, "I chunga lawm chhan tur ka neih awm ka hrelo, nakkin zelah pawh chutianga lawm chhan tur neih ka duhlo bawk, min puih ka ngailo" tih leh kalsan ka rual a, a rawn phun zui hluk chu hrelo derin inchhung lamah ka luhsan zui a.




"Enge Lallucy khan a sawipui che a?" Mamuanan a lo ti sur sur a, nichina kan inzui chhuak kha a lo hmu ni ngei tur a ni.




"Thil ho deuh deuh mawle" ka tihsan mai a, min zawt zui tak nain hetiang thuartham hi chu midang nena sawiloh a ṭha in ka hria, mi ngaihdan leh hmuhdan ringawta rilru lo siam aichuan Ufamkima nena sawidun hmasak phawt ka la duh fan, chumi hnuah ngaihdan ka siam thei chauh ang.



Ufamkima lo phei chuan "Kal ang le" a lo ti var a, chhaklam kawngkhar aṭanga Lucy lo lut chu enin "Mamuanan a thlah ang che" a ti bawk a, Lucy ngawi reng chu ka va en laichuan tawite hian min lo nuih a, ka nuih let ve lo thung.



Pawna kan inzui chhuah hnu chuan ka darah min lo kuah a, a rimtui inkhah rim chu a lo hiplut vang vang a, a laka ka rilru a chiri viau chung pawhin a kuahna erawh ka thlahlel takzet tih ka hre rauh rauh a, kuah let ve ka chak hle bawk.



"I chau em, han zik luih luih hi chuan a boruak hi a dang ve ṭhin a nia" nui suk hian a ti a, chhang lemlo chuan Gate a hawng lai chu ka lo en a, nichin thil bawk kha la vei hek le, pheikhai a zang duh fahran lo khawp mai.



"Lo awm rawh aw" ti a kal sawn laichuan nichina nula nena an lo dinna laiah tak chuan ka ding a, inchunglam ka han hawi chho chu Lucy lo dak ka han hmu leh kher a, am zetin thawk ka la hluai a, ka rilru te a chhuak a niang, ka thin a rim leh hlur tawh, ka awmdan chu mipui zi luih luih kara kal ngaihna hreloa tang ang mai niin ka inhria, ka thawk a ipik hluah hluah mai a ni.




Ufamkima lo thlen chuan Motor ah ka ṭhulut thuai a, kan tlan chhuak chiah chu a lam hawiin ka in her nghalzat a, ani pawn min rawn en rang viau mai.



"Ufamkim...." a bu nghut a, thawk lain ka ngawi leh rih a, pehhel loa zawh phawng mai chu a ṭha ang, a duh leh a insawifiah ve tawh aniang chu, eng chhuanlam nge a neih tehreng ni.



"Nichina Scooty khalhtu nula kha tu nge?" ka ti tawl a.



Hamhaih deuha min lo en laiin amah ngawt chu ka lo en ve reng a, "Ka lo hmu che u a" ka ti nawn leh ngat a.



"E...Kha kha maw, ka zirlai naupang anih kha, Christa Brithday lawmna thil pek an lo pe ve a" a sawi awlsam khawp mai, ka ngawi vung vung chu min lo en leh zawk a, keiin a sawi chhunzawm leh beiseiin ka lo en let ve reng bawk.



"Tinge, sawi duh nei i van ang ve" a tih chuan ka sawi duh chu a hre chiang hlein ka ring, a hmel buai nak chu ka hmuh hmaihlo, a sawi chhuak hreh a ni maithei.



"I bianga a fawh chhan che kha a nia zawh che ka tum zawk chu, i kuta a kaih chhan che pawh sawi bawk la" amah ka zah ruk na em em kha an bo ta emaw tih mai turin ka aw chu a chang a, ka lawmlo ve bawk em a ni.



A aw a thin kharh a, min rawn en leh zawkin a mit a la sawn leh thuai a, a ngawi zui vung vung chuan min ti hah zual kher mai, ka duh loh deuh chhanna ka dawng dawnin ka hria. Chutah engmah ka sawi leh hmain kawng sir zau laiah chuan motor a ti ding a, min en loin hmalam a melh vung vung a, kei pawh ka insiamrem a, amah hmachhawn zawng loin ka ṭhu ngil at tawh.



"Regina-i a nih kha, ka zirlai a nia" a ti zawi sup a.



"Regina-i chu tunge?"



"Reilo te ka kawp ve hman a, Rosy nen kan inṭhen tirh vel kha a nia, kar hnih khat vel chauh a ni" a tih chuan chu chu a fawh ngawt chhan tlingah ka ngailo, a engemaw anih chu ka rinsa a ni hrim hrim a, zanin chung chang zawk kha a ni ka hriat duh chu.



"Tinge i biangah a fawh che" hma lam hawi reng chung chuan ka ti leh zat a.



"Kha chu keipawn ka ka hre chiah biklo, nangmah ang thoin kha thil khan min ṭhawng ve a" ka lam a lo hawi a, ka en ve lo thung, ka kut a rawn ban a mahse, ka kut chu chet duhlohin ka humruh tlat a, ka rilru a rawn na thar riau mai bawk.



"Engtin nge i lo ngaih ang tih chu ka hria a lawm mahse, i ngaih ang kha engmah a awm tawhlo a nia, Regina nen chuan Professor leh a zirlai kan nihna bak in zawmna kan nei tawhlo" a hmel ka va en chuan a thutak hle a, ka kut rawn hmer vang vangin ngunthluk zetin min en a, rin ka duh lutuk chuan min ti ipik zual a ni ber e, ka ringlo phallo a, ka phalloh vangin ka rin phah chuang silo chuan min ti hah a ni mah zawk.



"Mahse, a fawh che khan engtin mah i ti silo a" ka aw chu a lawi lek lek mai.



"Ka ti a lawm" a lo tih chuan "I tih loh kha, ka hmu che a lawm" ka ti ve tlat a.



"I kutah pawh a kai che a...." thawk a lo la hawk a, chutah ka kut chu la kangin a kut khing hnihin a rawn hum a, "Ka ṭawng i hre phalo anih chu Mimi" tawi te a min nuih chung hian a ti a.




Kei hian hriat sual emaw hriat hmaih ka nei em ni tiin rei lo te chhung chu ka rilru a buai hmana mahse, rinhlelhna bawkin ka rilru a luah leh nghal thuai a, chuti maiin ka la duhtawk theilo.



"Ufamkim zep loah chuan tunah hian ka awm a nuam miahlo, ka mit ngeiin ka hmu bawk si che a, chuvangin awlsam te chuan ka ring thei lo che, ka rin theihnan che engemaw ti mai rawh" ka thil sawi chu keimah zawk chuan angaihna ka hrelo a ni mahse, a dik zia fiahna tur engemaw tal nei hram sela ka ti.



"Engtin nge ka tih ang, min rin siloh chuan tih ngaihna ka van hrelo ve" a ti tawl mai a, bei a ti dawng chiang khawp mai.



"Tak tak maw" ka aw chu a zawi khawp mai, a hre pha kher lo maithei, pawn lam hawi chuan ka inher a, tukverh ah chuan dakin boruak ka hip vang vang a, ka thaw a ven phah chuang hauhlo, ka ipik sawt emaw tih zawk tur a ni, thil thleng khan min tih lungngaih tawh tehlul nen, ani hian min ti beidawng zual ting mai si a.



"Mimi" a rawn tih chuan muang changin ka inher a, "Ka tih palh aw" a rawn tih leh chhan erawh ka hrethiamlo khawp mai.



"Engthil ah maw?" ka zawt let lo theilo, a chhan chu engthilah nge a inthiamloh ka hre duh, amah ngeiin thil tihsual a nei tih a inhria a lawm.



"Khatianga i hmuh tur a ka awm vang khan" a mi chhanna chu ka van duh khawplo tehlul em.



"Ka hmuh loh ah khati khan i awm ṭhin em ni?" ka insum theih hmain ka ka aṭangin a rawn chhuak phawng a, ka sawi chhuah takah chuan ka rilru a na zual hle bawk.



"Aih, teuhlo mai, tunah chuan ka neih chhun i ni" thutak lutuka min en chungin a ti leh a, chu chu rin ka duh a, ka rin theihna tur engemaw amah chuan tih theih nei sela ka duh bawk, a sawi ringawt vang hian i he lo a ka pawm a beisei em ni le? Tunah pawmsak mahila ka rilru ah a awm reng dawn tho a sin.



"I hmuhlaiin ka bialpa hluiin min fawp ve se engtin nge i awm ang, rin che chu ka duh a alawm mahse, ka rilru hi ana tho bawk sia, ka awm dan hi i hrethiam miahlo a mi" ka kut a rawn ban leh a, "Min ring phawt mai teh, mipa a nupui in a bum tawh ka ni tih i hria, bumna avanga hun harsa tak paltlang tawh hian engtin nge i lakah chutiang chu ka tih theih ang, Regina nen chuan hun reilo te tak tak a ni, sawi tur chanchin dang pawh kan neilo" ngenngawl zeta min en in a ti leh dap dap a.



"Lucy khan i bialnu a nih thu min hrilh a" ka tih chuan a ṭhu ngil hluai a, za lo zetin a nui bawk.



"Lucy thil sawi ring suh, i ṭhatna tur a duh ngailo ang" a ti chang khawl a, Lucy chung changah pawh zawhna ka ngah khawp mai.



"Lucy hian a ngaizawng che ti raw?" ka ti leh hap a.


"Ka hrelo" ka beiseiloh dan deuhin min chhang tlat.



"Engtin nge i hriat loh theih" ka ti leh ringawt a, a ngaizawng tih chu keiman ka chiang khawp mai.



"Ufamkim i nunah hian hmeichhia an tam lutuka, eng rilru nge put tur ka hre tawhlo" chu chu ka rilru tak taka sawi ka ni, tu nge rin tur pawh ka hre tawhlo, amah lah hian zep a nei nge ni, ka ngaih ṭhatna tur engmah a sawi thiamlo zawk pawh ka hrelo.



"Lucy chuan i bulah engpawh sawi sela ring ngai suh, a mizia i la hre chianglo a anih kha Mimi, engthilah mah ringlo tawp rawh, i duh chu min zawt mai zel la, thu dik tak keiin ka lo hrilh ang che" a ti leh a.



"Lucy chu ka ring lo, nangmah pawh ka ring ngam rih lo che, ka mita ka hmuh vang zawk khan alawm ka rilru a buai" hma lam en ngal chunga ka tih leh laichuan ka lamah a rawn awn a, ka sam rawn huiin min thlek vang vang bawk.



"Haw tawh ang" ka tih chuan min chhang loin a ngawi renga, tunah chuan inah haw a ngun taka mahni a ngaihtuah ka duh.



"Min nei duh em?" a rawn ti leh tawl a, a lam ka hawi chu kan inmelh hnai khawp mai, a thutak hmel em em lehta nghal a.



"Ti nge min zawh teh thut a?" a hma pawn kan sawi tawh a, hmanhmawh lo ang kha kan tih tawh sia.



"Min ringlo anih chuan innei mai ila" a ti leh a, chu chuan kan buaina a ching fel dawnin a ngai emaw ni zawk le?



"Ka rinloh lai chein engtin nge ka neih theih ang che, a hma pawn kan sawi tawh kha, kan in hre chiang ve dawn chauh a nih hi" ka ti leh hap a.



"Anih i duh siloh chuan min ring tawp mai rawh, ngaihzawng dang ka neilo, Regina nen engmah a awm tawhlo, Lucy phei chu a teuhlo lutuk" a aw ka chhuak a ṭangin a lawm vaklo tih ka hre thei.



"Anih chuan khatiang khan awm tawh suh, kuta invawn te, bianga infawh sak te kha inngaizawng lo tan chuan thil pangngai a nilo, kei chu ka rilru a zau ve miahlo a nia, thil ho te ah pawh ka chi ai vek a, ka buai zo vek zel..." ka sawi lai chuan ka kut a rawn hum nghet sauh a.



"A thleng tawh miahlo ang" a tih chu lungdam zanlo chunga ka pawm rih mai a ngai in ka hria, hahdam tak chuan ka awm thei dawn lo tih erawh ka hre thung.



Kan tlan chhuah leh hnu chuan kan inbe tlem khawp mai, ka nuin min lo phone a ka haw mek thu ka hrilh a, Phone ka dah hnua "Ka lo leng dawn em?" a rawn tih chuan "Ka hrelo" tih zawngin ka chhang a, ani nen sawidun leh pawh ni ila awmzia vak a neih tawh chuan pawh ka ringlo.



"Zan dangah ni mai rawh se" a ti zuai deuh ruih a, ka rilru tak chuan ka inthiam lo deuh a, chu erawh tih lan chiam ka tum hranlo, lungawilo tak angin min ngai zui bawk sela ka duh a ni.



Kan inkawta ka chhuk laichuan "Ka en liam ang che, va lut rawh" a lo ti nghal thuai a, ka hnial lemlo. Inchhung ka luh hnuah a Motor tlan chhuak thawm ka hre zui a, zep loah chuan ka ngai khawp mai, ka haw tel tho bawk si a, ka beisei ang a ni dawnlo tlata hriatna te ka nei a, ka hlauthawng tel bawk.



"A nuam bawk em" Sitting room aṭangin Umawipuiin a lo ti lang lang a, "Ka chau, ka ke a na" tih leh Room lampan ka rual a.



Ka inthlak sawk sawk a, ka phone pawh ka en chak rihlo, muturin ka insiam zui a, ka inpeih fel chuan dar 9 chu a ri ve leh reng tawh, ka mu fel chiah tih ah ka room khawng khar a rawn kik a, "I bulah ka lo mu teh ang, a vawt thei emai" a lo tih leh ta pek a, a dawklak leh tawh a nih hmel.



Kawngka ka va hawnsak chuan a lukham nen a lo lut a, "Muthilh nghal i tum a law, a la hma e" a ti zui zat a, "Engmah ka tihpui peihlo che ka muhil nghal dawn" keiin ka lo ti ve thung.



"I mood a ve chhe awm ve, Prof. Tihdanthiama nen in in hau a mi?" a tih chuan tawitein ka nuih a, "Sawi la" a ti leh zel a, lehlam ka hawisan hmak chung pawhin min kuai let leh a, ka hrilh hrep dawn zawk emaw ni chu?



"I ninawm mu mai mai teh"


"In inhau a mi?"


"Haulo.."



"In inṭhen a ni maw?"a ti leh hram a.



"Chutiang engmah a awmlo, ka mut a chhuak" ka tih laimekin ka phone a rawn êng a, en duhlo a ka awm ngaia ka awm reng na chuan Aumawii zawhna chu ka chhang a ni mahna "Enge a chhan ni a?" ka beng bulah a rawn ti nghal sur sur a, ka phone a rawn ban zui vang chuan ka ṭhu chuak rang khawp mai, a phone ken chu ka chhuhsak nghal thuai bawk.



Prof chuan a rawn call a, ka la duh lo lui tlat dawn emaw ni ka tih laimekin ka rilru hria niawm tak hian "La duh miah suh, in duh ve larh larh tur, tikhan i zunah a uai nasa zawk daih ang" a lo ti leh hmiah a, ka la duh ta em biklo.



Umawipuii chuan min zawh min zawh takah chuan ka hrilh ve leh ta nge nge a, ka hrilh ta chu mi thinchhia tih takah a sa phat phat a, "Tinge min hrilh ve mai loh hruai tur chein ka lo kal anga, chu nu chu kan vel nek mai dawn a lawm" te a ti thul.



"A tu zawk?" ka tih lahin "Tu zawk nge khah?" a lo ti he haw a.



"Aumawi, hetiang lam hi chu hmeichhe lam thiamloh anih rualin Ufamkima pawh a fel biklo ah keichuan ka ngai, a laka hmeichhia an huangtau ngam anih chuan diklo na a nei ve a ni mai" ka lo ti erawh min pawm pui ve vaklo a niang.



"Mate, tunlai hmeichhia hi an nasa tawh a lawm, mipa tibuai char char chi an awm ve a, Tihdanthiama te ang mizia phei chuan a hnar hreh ṭhin a nih ka ring mah zawk, an mahni zartu hnar thiam miahlo mipa te hi an awm ve a" a ti leh sap sap a, patling puiin chutiang mai mai hreh a; thiamloh chhan tur a awm dawn em mawni ka ti deuh.



"Anih pawh ka ringlo, a bianga a fawh sak lai ka hmu chiang emai, a kutah chelhin a pawt kal dawr dawr a nia, a haw lo tih a lang reng" ka ti leh hram a.



"Aw, ngaihtuah chiang la, a ni ang mipa mize zawi leh inthlahrung lutuk chi khan engtin vak nge lo ti sela i tih, nang pawh i ngaizawng tih a hre reng chungin i lakah a ṭhat em kha, tiang mipa hi an tam lutuk, mi hnar dawt hi an hreh ṭhin a, an duhloh te chu pehhel dan an zawng ringawt a, mi rilru tih natsak hi an duhlo ber a" a tih leh chuan ngaihtuahna a ti buai ve dawn dawn mai, Aumawiin a sawi hi chuan 'A ni mai ang a?' tih hi a awl leh riau ṭhin.



"A nupui unaunu zawk chu chik deuh a ngai anih chu" a ti erawh ka thlawp khawp mai.



"Aumawi, Lucy hian a ngaizawng chiang lutuk, a inrawlh peih teh a nia, ṭhian kan ni ti mah se, ka awihlo" Lucy min biak dan leh awmdan ka hrilh nghal mawlh mawlh a, "Ka van vel chak e" a ti deuh sek a, a vel a zawng chuan a....



"Nang aiin a upa zawk aw" ka tih pawh chuan "Ka la velh sak dawn che nia" a ti leh mauh mai a, keia thinrim ṭeuh tawh chu min ti nui leh rih ṭhin.



"Lucy chuan a ngaizawng in i ring ve tho em?" ka ti leh a, "Ring e, chu bak baka chiang" a lo ti ve hmak a.



"Mahse, Ufamkiman 'Ka hrelo' a tia, a hrelo der aniang a" ka ti erawh "Nilo mai thei' a ti leh teh tlat a.



"Mipa ngawng tawh hi chu a ngawng chhah thei teh mai ania, Tihdanthiama bulah a lo inthup viau phei chuan a hrelo ve thei tho" Aumawii thil sawi chu ring zanlo chuan ka ner ka ner a, a hriatloh hulhual chu ka van ring chiahlo em, a bialnu hlui a ni bawk si a, hman deuha a lo kal pawh khan a awmfal pui hreh hle a nih kha maw.



"Ufamkima hi chutin a ngawng viaulo aw, a zakzum tih chu ka hria mahse, a duhna ah chuan chutiang a ni bik miahlo" ka lo ti ve leh a, "Lungngai suh, an vaiin kan enthla vek dawn nia" a ti sam leh mai a, in khata cheng pawh nilo, chuta kara veng khat a khawsa ho pawh ni lemlo in enthlak chu a har khawp ang le.



Thawhṭan tuk chu kan tho hma khawp mai, tukṭhuan eiloin dawrah kan kal a, khua a nuam zanlo a, mi pawh an tam lo hle a, kan awl thawng khawp mai. Ufamkima tlai bang a lo peng kawi a, ṭha tak chuan kan inbia a, vawiin lamah Regina-i nen an inhmuh ka ring ringawt a, engti kawng zawng pawn ngaih a ṭha tak tak thei tawhlo chu a ni ber, a phone khawih te thleng chuan ka ringhlel zo tawh.



Ka rinhlelh thu vanga lo tawng chiam zel erawh a mawilo ang, zanah chuan ṭha takin kan inbia a, a ni hmandan te; a tih tur ruahman ang te min hrilh a, kan sawi tam ber hi chu Christ a chanchin a ni ṭhin, rei deuh kan inbe ngailo a, a hun awlah chuan min lo be fo a, chutiang chuan kar kan tluan a ni ber. Hna ah kan buai dun hle a, inhmuh fala len chhuah tih vel nan hun kan nei meuhlo, kan hman hun a inrual ngailo bawk.



Pathiani chiah chawlh kan neih vangin in lamah ka tawm chawt zel a, Ufamkima nen pawh kan inhmu khat ta viau mai. Mamuana a lo kal ve zauh ṭhin a, a lo kal hi chuan kan titi luam a, Lucy a rawn rel chiam ṭhin. Mak ka tih deuh chu Mamuana pawhin Lucy'n Ufamkima a ngaizawng ni a ka hriat kha a chiang thei bik tlatlo chu a ni.



"A chang chuan ka ring ve deuh ṭhin a mahse, nula dang te hi tihpui a tum leh daih zel a, a ngaizawng chiah biklo aniang ka ti leh ṭhin a, Rosy leh Ufamkima pawh ama suihzawm an nia" tiin ka bulah chuan a sawi a, chutiang vang chu a maw ni dawn le Ufamkima pawn 'Ka hrelo' ti a min lo chhan nachhan kha.



Inrinni tuk khat chu ka pain Romawia chaw ei a sawm turin min ti a, ka sawm chu a lo phur khawp mai, "Ka inbual anga ka lo kal nghal ang" a lo ti sam et a.



"Tlai ah dawrah lo kal la, kan haw rual dawn nia" ka tih pawh chuan "Ka hman a lawm, ka lo kal hma ang" a ti leh zel a, ka hnial duh bik ta lo. Dar 11 velah a lo thleng phei a, Umawii nen Counter ah an ṭhu dun a, an nui ring thei khawp mai.



Choka a ka awm laiin Romawia chu a lo lut a "Mimi, phone dawrah min va kalpui teh, ka phone hmai hi bel ṭhat a ngai" a lo ti lang lang a, a sawi takah chuan Phone cover lei ve tho ka ngai tak a lawm.



Ke in kan inzui chhuak a, phone dawr hnai berah chuan ka duh ang an lo neihloh vangin hla deuh a mi dawr dang kan pan a, kan va kalna chu dawr lian tak a ni a, kan duh ang pawh an lo nei ngei a, phone cover ka lo en kual laiin Romawian a phone a lo khawih tir ve thung a, kan duh ang kan ti zo chhuah leh mai kan tum laichuan mipa leh hmeichhe pakhat lo inzui lut chu ka hmu a, a tir chuan ka hmuh hnu ang ka ti deuh a ka hre chhuak thei mailo nghe nghe.


Mahse, an lo kal hnaih takah chuan ka hre leh hnuhnawh a, ani phei chuan min hre ve kherin ka ringlo, a hmeichhia zawk erawh chu ka hriat ngai a ni lemlo thung, a mipa pawh chu ka vawi hnih hmuhna chauh a ni bawk.



"I hmel hriat a mi?" ka en chik em vang chuan Romawian a lo ti ru sar sar a.


"Ni chiahlo e, i hman chuan kal tawh ila" ka tih laimekin "Duata, hei hi lo en teh" tiin hmeichhia zawk chuan mipa chu a ko a, chhuahna lampana ka kal uk tawh chu ka lehhawi rang khawp mai.



Tunah khan 'Duata' tiin a ko chiang a lawm, ka hresual hauhlo.



"Duata, lo kal teh" hla deuh hleka mipa phone en lai chu a ko nawn leh a, enge maw a awmzia le? He pa hi Rosy bialpa ni khan ka hre sia !




(End of chapter - 15)

Link:
BBcode:
HTML:
Hide post links
Show post links

Ahmangaihi violette
Posts: 148
Joined: February 1st, 2020, 3:14 pm

Unread post by Ahmangaihi violette » September 7th, 2021, 11:01 am

ZUNZAM - by Ahmangaihi violette khiangte

CHAPTER- 16




"Enge i tih a?" ka bula dingin a lo tih leh takah chuan "Eng nilo e" ti leh kawngka a chhuah ka rual a.




Ka rilru ah chuan zawhna a rawn lut zut zut a, tuna ka thil hriat kha engemaw a awmzia ni ta le! Rosy leh a bialpa kha an inṭhen tawh tihna em ni, kar hmasa lam mai pawh khan Christa piancham lawmna ah an la rawn inzui dun a, an inṭhen a ni thei mai a ngem?




Nge ni a, a ngaihzawngpa khan a lo kawp zawk ni ang le? An inngaizawnglo te hi a ni zawk angem, Mamuana pawh khan ṭhian a ti anih kha. Mahse, nupa inṭhen phahna em thil chu chuti ngawt zawng a nih ka ring chiah silo. He mi te ho inlaichinna hi a buaichuar nuaih mai, Lucy leh Regina, kha pawh mak ka tih tawh tehlul nen, Rosy pawh hian eng engemaw thuruk chu a lo nei ve nual anih hmel.




Dawr a kan let leh hnu pawh chuan ka ngaihtuahna a luah nasa khawp mai, thil hrang hrang ka ngaihtuahnain ka zeldin kual a, UFamkima leh Rosy inkar mawlh mai chu a ni, ka ngaihtuah nasat poh leh a buai chuar nasa a, engthil emaw felhlel deuh chu a awm a ni. An nupa inṭhen dan tak chu chiang taka hriat ka chak a, hriat theih dan tur kawng ka neih chhun lah chu ka tih a mawilo thil a ni lawi si.



"Mimite, inkhar dawn ang u" Umawiin a lo tih pawh chuan che chang lawk loin ka ṭhutna ngaiah ka la ṭhu reng a.



"Enga ti nge saw tia a awm ber bur reng a, in chhuahna ah in va inhau nge ni a, ek ṭhing a va tawng zawk" Umawiin Romawia bulah a tih ri chu ka hre pha nain ka nghaihsak duh lemlo.



"A bialpa hlui a hmu a niang" pakhat lah chuan a lo ti sam mai a.



"Aw haw.....a che chhia a mi a?" Aumawiin a ti leh zat a, "Che chhelo e mahse, a bialnu nen an lo kaldun a" Romawian a tih leh chuan ka beng an ti kham dun riau tawh. Ka ṭhutna aṭang chuan muang changa thoin Counter lam chu ka pan a, an ni pahnih lah chuan min lo melh dun hrek hrek reng a, an nuih insum hmel chu ka en peihlo, ka phone ka en chuan Ufamkima Message a lo awm a, ka haw tawh em tih min lo zawt a, vawiin thil kha a bulah chuan sawi chi a ni chiahin ka hre silo a, engthil emaw zawh erawh ka chak viau mai.



Ka haw dawn tawh thu hrilhin a Message chu ka chhang let a, kawta kan chhuah rualin Usangzuala a lo thleng ve zat a, anni an inphur a, kei leh Romawia kan inphur ve thung.




"Tlaia kan hmuh kha i bialpa hlui a mi?" a rawn ti ta chiah a, ka bialpa hlui anih a lo ring tak tak chu niin, nichin khan a fiamthu mai mai turah ka lo ngai a nia.




"Ni teh nang, ka hmelhriat pakhat bialpa zawk a nia" ka tih chuan ka lamah a rawn thle deuh a. "I ṭhiannu chu a kawp tihna a mi?" a lo ti leh a.



"A ni maithei, ka hrethiam chiah biklo, an inṭhen tawh pawh a ni maithei" ka ti niah niah a, ka ngaihtuah leh ngut ngut tawh. Rosy leh a bialpa chung chang ringawt vanga mak ti viau ka ni lo a, Ufamkima aṭang tawhin hriatthiam harsa tih deuh deuh tur thil a tam in ka hria, a bikin Lucy hi.




In kan thlen chuan intifai hmasa loin chawhmeh ka siam ve leh te te a, ka nuin bawngsa a lo chhum hluah a, Romawia leh ka pa chu TV en pahin an titi dun a, Football chung chang an sawia an ti ti tui khawp mai, Usangzuala chu chaw ei ve nghal turin ka nuin a sawm a, nidangah pawh a lo ei fo tawh a, engtik lai pawh hian chawei a sawm hi a awlsam em em reng ṭhin a, ka nuin a han sawm pawh chuan " A pawi hleinem" a lo ti sam leh et mai.




Ufamkiman "Zanah ka lo leng phei ang" a lo ti ve teh tlat a, kei a phur leh ta pheng chuan chaw pawh ka ei mumal meuhlo, a lo thlen hmaa inbual ka duh a, lo intuaihnum ve deuh te pawh ka ngai ang, anih loh chuan bawngsa rim ka nam deuh tlatin ka inhria.



Ka inbual zawh chuan Sitting room ṭhut thlengah ke thluang duaiin ka lo ṭhu a, Ufamkima lo thlen chuan kan mikhual chaw ei pahnih pawh chu an la awm ve a, midang awm ve a hmuh chuan a inthlahrun hmel khawp mai. Ka nuin a lo chhawn vat a, "I va rawn lang khat ve" a lo ti ve luam a.



Ka bula a lo ṭhu chu Romawia chuan a lo melh rauh rauh chu ka lo hmu ve reng a, Ufamkiman ka bialpa hlui tih a hre ve lemlo chu a lawmawm zawk angreng, Romawia erawh chuan a en duh hle a, Ufamkima a lo thlen ve aṭang khan a ṭawng leh ta miahlo bawk.



Thingpui te in in kan titi ho a, ka pa a len chhuah hnu ah ka nu hoin Tv kan en a, Romawia ngawi ngul leh min rawn en leh zauh ṭhin chu Ufamkima chuan a lo hrethiam ve ang tih mawlh ka hlau tawh.



"Mamuanan naktuk chhuna lengah lo sawm rawh a tia, i hman chuan inkhawm banah ka lo hruai che anga" Ufamkiman a tih chuan ka lo bu nghat nghat a, Mamuana hmuh hlan chu ka nghakhlel viau tawh zawk a ni, ani pawn sawitur a lo nei leh ṭeuh tawhin ka ring.



Dar 9 pelh hnuah chuan Romawia chu a tho tharh a, "Min lo thlah ve tal rawh" a ti mauh mai a, a bei awm anglo ti dawn ila, ka tih tur ve reng chu niin ka hre lawi bawk si, Ufamkima awm ve reng lai anih vang erawh chuan ka tim ru khawp mai.



"Kawt thleng ka va lawk ang aw" tiin Ufamkima pawh en lemlo chuan ka tho zui a, pawn kan chhuak dun chu a hnungah ka ben sak dawp a, "A na" ring leng lawnga a lo ti chu bengchheng lo turin ka khap leh rih a.



"I bialpa hi i duh tak tak loin ka hria, in awmdan hi induh tak tak in ang lo" a tih chuan ka lo ner nasa mai. "Ve leh ringawt a che, ka duh zia i hriat loh vang a nih chu" ka lo tihsan a.



"In hlim dun vaklo ti raw?" a ti leh zel a, min ti dang dawn a lawm mawle, a sawi dik lo hauh silo.



"Kal vat mai teh" ti a a awma ka nam chu ka kut a lo man a, a awmah chuan a nem hnan hmiah bawk a, hamhaih deuha ka en laiin "Kan inhmeh ka ti zawk daih" nui vur vur hian a ti zui a, a zam lo thei a nia.



"Ka luh vat a ngai a nia, kal tawh rawh" ka tih leh pawh chuan a la che chang mai lo "Ti nge tlangval ka awm laia pathlawi zawk i thlan chhan hi ka la hrethiam theilo" a ti leh hluai a, a va han buaithlak ṭhin.




"Hetiang hi maw hmangaihna an tih hi a nia" uang deuh takin ka lo ti a, ani erawh a nui ve hauhlo, "In boruak kha a nawm loh hmel emai, ka khawngaih dawn zawk che a lawm" a tih leh erawh chuan ka nui tawp riai riai thung, ka duh loh dan deuhin ngaihdan dang min neih tir ringawt dawn a lawm mawle.



Aw thian kharh ri ka hriat rualin ka hawi let zawk a, kan Veranda aṭanga Usangzual lo chhuk thla chu a lo khi ṭhaw a, rang lutukin Romawian ka kut a vawn beh chu ka pawt thla nghal bawk. "Mimite, i bialpa saw i ti hawihai rei lutuk ange aw" rawn tih leh zauh pahin Usangzuala chu a Bike awmna awmna lamah a kal nul nula, "Ka lut dawn" tih paha inher nghal mai ka tum chu ka darah rawn vuanin min kuai her sawk a, min ti bangbo hle ringawt.



"Thil hrilh duh che ka la nei a lawm" a ti leh zet a, "Sawi vat rawh" ka tih laichuan Usangzualan min lo tlan pel a, a ban a rawn vai zauh chu kan chhang let lemlo.




"Mimi, i bialpa nen in inṭhen a nih chuan keimah min hrilh hmasa ber ang che aw" a rawn ti a nih chu mawle. Ka lo nui chhuak hak a, ani erawh a thutak em em lehnghal a, a thu tak hmel te hlei hlei chuan ka nuih a ti za zual.




"Ka uanglo a nia, in inṭhen anih chuan ka lam lo pan ang che, ka lo nghak reng dawn che nia" a la ti tak deuh deuh a, a chhan pawh ka chhang buai peihlo. Chutah ka kut chu la kangin a awmah a nem hnan leh vang vang a, "Ka lo nghak tak tak dawn che a nia, saw pa nilo midang i lo nih pui leh vaih chuan i chaklo ang" tiin min la vau kha kha zui a, a ngeiawm duh zawk angreng.



"Kal thuai thuai teh, ka rei tawh a nia" ka tih chuan "Aw ti phawt la" a ti leh mauh mai, hepa tak hi chu aw.



"Kan inṭhen dawn ringawt lo" ka tih laiin "Ṭhen dawn ka tilo, ta se tih thil thu" a ti ve leh tlat a, ka 'Aw' hma chu min thlah tum heklo "Ni mai mai teh se" ka ti ve ta ngawt a, a lawm hmel em em lehta nghal a.



"Mimi" rawn tih ri ah chuan ka lehhawi rang khawp mai, Ufamkiman kan Veranda aṭangin min lo en reng chu niin "Ka lo kal" tih paha kal mai ka tum chu ka bula mi chan ka kut a lo la vuan nghet em em zuia "I va mak e!" tih leh phih thlak ka rual a.



Ufamkima lam ka va pan rual chuan ani pawh a lo kal phei ve mek a, ka awm a nuamlo nghal em em ringawt mai a, ka thinphu te chu a rang dup dup maiin ka hria, Romawia lah pek chuan "Muttui aw" a la rawn ti tak ṭalh a, kan boruak a ti khawlo zo vek dawn anih hi.



"Lo la ding teh" Ufamkiman Romawia lam hawia a tih chuan ka hamhaih viau a ni.


Enge tih a tum?


"Ka kal phawt a nge" pakhat lah chuan nui heu chungin a rawn ti a, a run luih zawk emaw ni!



"Lo ding teh ka tih chu" kei min kalpel vuta Romawia lam a pan chu ka umzui thuai a, chutih laia chak lutuk tak mai a Romawi tlan chhuak chu a ngaihna hrelo zetin ka en liam zui a, ka hma a min hnungchhawn zawnga ding chuan a kut a hum ruh ṭawlh ṭawlh tih chu ka hmuh hmaih hauhlo, engtia tih tur nge maw ni, chu pa mai mai chu ka hmuh leh hunah a chaklo ang mawle.



Ka lam hawia a rawn inher chu ṭi dakin ka lo en a, a hmel ah chuan ṭhinrim insehruh hmel niloin lungawilo tak leh mitmeng thutak zet ka hmu thung, a zahawm kher mai.




"Kha pa nen khan enge in lo tih?" a aw chu a ring lo nain a chang hle a, a thinurna thunun a tum nasat zia lah ka hai heklo, a ti zualkai zawnga ṭawngkam ka chheh loh hram a ngai dawn a nih hmel.



Thawk la leh zetin a lamah ka pen hnai a, a kut va vawn sak mai kan tum chu a ṭang ṭauh mai a, a inthlahrunawm duh takzet mahse, min rawn hmuh dan kha a huatawm ve dawn lutuk tih ka hria, keipawn Regina nena an awm dun ka hmuh khan ka nain ka thinur hle chu anih kha, a awmdan tur chu ka hriatthiam pui takzet.



"Lut i la" ka ti hap a, a ngawi ngul ringawt a, a lungawilohna sawi chhuah pawh a tum chuang lo chuan awm a ti nuamlo zual.



"Ufamkim, i ngaih ang kha a ni miahlo a nia" keimah zawk chuan ka ti hmasa tawl a. Chutah vin hauh silo khauh zet hian "Engthil maw in lo tih?" a rawn ti nawn leh a, engtia han sawifiah tur nge maw ni.




"Kan lo titi satliah a lawm englo....." ka mitah tak min en vang chuan ka tim leh deuh a, a hrethiam a niang "A ngaizawng che em ni khapa khan?" a rawn ti ta khauh a. Dawt hrilh ka duh hauhlo, chutin a lakah zep neih ka duhlo bawk, chu chu keipawn a hnen a ṭanga ka phut kha a ni miau a.




Pehhel miah loin ka hrilh tawl a "Min duh thu a sawi a mahse, ka duh loh thu ka hrilh a, kei chuan ṭhian ang chiahin ka ngai" ka tih lai chuan thawk a lo la hawk a, min ring rawh tih melh tak hian ka lo melh tawh.




"Mimi, ka lakah hian zep i nei em?" a tih leh chuan ka lu ka thing rang khawp mai. "Aih, i ngaih ang kha a nilo tak tak, keichuan hman aṭang tawh khan nangmah chiah hi ka duh reng ṭhin che" ngenngawl lutuka en chungin ka ti leh a, a mitmeng damthluam reng chu ka chhiar thiamlo mahse, a kut humruh erawh a thlahdul tih ka hria, a kut chu vuanin tawite in ka nuih bawk.



"Khapa kha kawm tawhlo la ka duh" a tih chuan chhan lawk ngaihna ka hrelo. "I thei a ngem?" a rawn ti leh a.



"Umm.." tih zawnga ka chhang chu a duhkhawp lo aniang "Min chhang rawh" a rawn ti leh ngat a. "Aw, ka kawm tawhlo ang" ka tih takah chuan thaw huai hmel a pu in ka hria.



"Mahse, i ngaih ang em em kha chu a awm lo ania, ka hnar tawh a, engmah kan inkarah inrawlh a tum biklo asin" ka ti leh hram a.



"A en dan ṭhin che kha ka hmu a lawm, i bul hnaiah hmuh leh ka duh tawhlo" ka darah rawn vuanin kawngpui lam hawi chuan kan ding dun vang vang a, kan boruak tih zangkhai nana sawi tur thil dang ka ngaihtuah rauh rauh a, a vang hrep mai, kan ngawi dun vang vang a, boruak chu a rit churh mai hian ka hre bawk.




Min rawn en a nuih tak sukah chuan ka hahdam ve huai mai, "I thik a mi?" ka tih chuan a lo bu nghat a, chutah min rawn kuah nghet salhin "Ka thik khawp mai" a rawn ti zawi sup a, ka laka thik thu a pe chhe ve chuan engtin emaw hian awm a ti nuam ve rauh rauh thung.



"Lut i la" ka tih chuan a sana a bih vut a, "Haw mai ka lo tum tawh zawk a, naktukah kan inhmu dawn tho bawk a" min rawn deuh hian min lo en a, a pawi ka ti hranlo a lo tlai ve tawh angreng a, tlangval tlahlang a ni bawk silo a, in lam a ngaihtuah ve tawh ang.




A motor lampanin kan inzui phei a, lut ta mailo chuan Motor bulah chuan kan indinchilh leh ren rawn a, "Naktukah chuan chaw i lo einghal dawn nia aw" ka sam rawn chul thuakin ka biang a rawn nul thuak a, a kut chu lo vuanin ka biangah a dawm hnan a, a kut chu a lum vung vung mai, lo kun hniamin min rawn fawp zui a.




Ṭum dang zawng aiin a duh thawh a, keipawh ka bang biklo midangin min lo hmu ang tih hlau thawng tak chung leh duhthawh takin ka fawp let ve a, ka thinphu rang lutuk vang nge ni ka mur seng seng mai bawk. A duhtawk mai dawn emaw ka tih laiin Motor bang ngheng chuan min din rem tir leh rih a, a motor dahna a lo thim hlauh chu a tihzia viau mai.




Ka biang tawn tawn ah a kut khing hniha dawmin uar zetin min rawn fawp leh a, a kawngah lo kuah leta ve a kan am dun mial mial laichuan a phone a rawn ri a, inlakhran pahin a phone chu a dap rak rak a, chhang loa a Off ringawt chu zawhna mitmengin ka lo en ve thung.



Min rawn hnaih leh nghal mai a tum chu "Tu nge a?" ka lo ti vat a, min chhang loin ka hmui a lo khar zui a mahse, ka rilru a bet vak tawhlo, ka zawhna min chhang lo miau a.



A kekawr ipte ka zen sak laichuan ka inla hrang leh thuai a, a phone ka phawrhsak lai chu min enin engmah a sawi lo a a phal nihmiang ka ti mai, phone ka en laitak chuan call a lo lut leh a 'Rosy' a ni, Lucy emaw Regina emaw anih ka beisei nge pawh ka hrelo Rosy a ni chu ka hamhaih viau lehnghal a, ani lah chhuan chhan tum hmel a pu hauhlo, vawiin thil thleng vang khan Rosy chuan engthila lo biak tum nge anih hriat ka chak deuh tlat a, min dang lemlo bawka tiin Phone call chu ka chhang zui a.




"Mut a hun dawn tawh a, inhnuaiah zawk ka riak dawn a, i lo chhuk tlang dawn nia" Phone ka lak rual chuan lehlama mi chuan a lo ti a, min ti bangbo khawp mai. Ufamkiman phone chu a lo ban zuau a rang deuhin kei ka lo tawlhsawn thung.


"Hello..." ka ngawih reng vangin lehlam a mi chuan a lo ti leh a, Speaker chu On-in Ufamkima chu chhang turin ka mitmei a, a lo la ve mai bawk.


Ufamkiman a chhan hnu chuan "I lo thlen hunah lo sawi la, pawnah ka lo awm zawk dawn nia" a lo ti leh a, "Naktukah ka rawn lam mai dawn nia" Ufamkiman a lo tih chuan lehlama mi chu a ṭeu khawp mai, "Kar hmasa pawn i ti tawh a, i rial rei tawh lutuk" a rawn ti deuh hlur a, engthil nge an sawi chu ka hrethiam ve lo tawp mai.


"Zanin chu ka hman tlat lo" damthluamin Ufamkiman a ti leh a.


"Tunah i chhuak a ni lawmni, lo kawi lawk la, biak duhna che pawh ka nei a" awki nem zawka a rawn tih leh lai chuan Ufamkima chuan min en vung vung a, min ngaichang ve deuh anih hmel e.


Lu ka lo buk takah chuan "Kan lo kal ang" tiin phone chu a dah a, "Kan" a tih vang chuan zawh mitmengin ka lo en nghal zat bawk.


"Mimi, Rosy te inah thil lam ka ngai a, i lo kal ve lawk duh em? Ka dah lehnghal dawn che nia" a ti nghal thuai a, "Reilo ang aw" tih leh Motor kawngkhar chu hawn ka rual a, ka ṭhulut chu ka rilru a buai ru khawp mai, a thuphungin min sawm tih ka hre reng tak nain hnial turin chakna ka nei lo a, tun dinhmunah hian induhtawkna ka lantir thei heklo, zan tlai tawh takah a nupui hlui hmu tura a kal tur chu ka ngai ngamlo a ni ber ang chu.


Ufamkima lo ṭhulut ve chu ka lo en ran a, engmah sawi zui tawhloin Motor a ti nung a, "Enge kan tih ber dawn?" ti a ka zawh chuan "Christa thil a leisak kan lam lawk dawn nia" a ti mai a, ka zawt zui ta biklo.



"Lungawilohna i nei em?" a rawn tih leh chuan tawitein ka lo nuih a "Nei hranlo e" ka ti ve mai a, zep loah chuan hetiang hian inhmu fo lo sela chu ka duh ve tho a, chu zawng ka sawi ve theih phei chu a nilo ang, an fapa an enkawlna thil ah phei chuan inrawlh loh ka duh a, a hnawksak lo thei ang bera awm pawh ka duh a, zanin erawh ka zui ve ta phawt chu a nia.



Rosy te inkawta kan din laichuan a phone a rei vakloah Rosy ngei mai chu a lo langa, mutkawr pante nena a lo chhuak chu Motor aṭang chuan ka lo en ve reng a, Ufamkima chhuak chu nui sang hian a lo chhawn a, min hmu ve lo nge ni ka lam a rawn hawi lo a, Motor engin a chhun phak avangin ka hma a an inbia chu chiang takin ka hmu thei thung.



Ufamkima chu a lo hawi zawk a, ka lampana a lo kal laichuan a hnungah Rosy chuan a lo zui a "Inhnuaiah chhuk ila" a lo tih laichuan a ngaihna ka hrelo kher mai. Rosy lo thleng phei ve chuan min lo en vung vunga, ka kal ve chu a lawm vaklo tih a hmelah chuan ka hmu thiam bawk.



"Hetah hian ka lo nghak zawk ang che" ka ti ta ngawt a, min hnial lemlo a niang a kal nghal nul nul a, Rosy rawn lehhawi zauh chu rilru bet lo deuh chuan ka en reng a, an kal liam hnu chuan thawk la hluaiin ka Seat ka ngheng dawt a, ka kal ve chu ka inchhir leh der tawh.



An rei khawp mai, ka sana ka bih sek a, ka ṭhu hle hle thei tawh meuhlo. Motor aṭang chuan chhukin pawnah chuan ka ding reng ringawt a, ka chhungte pawh hrilh lo a veng danga ka kal daih chu a zialo lam a ni. Umawii Message ka thawn a thil awmzia ka va hrilh zung zunga "Lo haw har suh, ka nu a mu tawh a, room ah i awm tawh thu ka hrilh ringawt a nia" a lo ti hlauh a, ka thaw huai mai.



An kal aṭangin darkar chanve a liam tawh a ka dawh thei ta meuhlo chu a ni, an chhuk thlakna Step bulah chuan dingin inhnuai room tukverh eng chu ka zuk en vang vanga, engemaw chu chen chen an tih chu le, ka ngaih a ṭha tawhlo takzet, Ufamkima pawh ka haw rum rum tawh ka nghak tih a hre ve reng awm si a.



Thawm dim takin ka pen thla a, inhnuai kawt zawl zau vaklo ka thlen chuan inchhung lama ṭawng ri bul bul chu ka hre pha tawh a, kawngka bulah chuan ding hnaiin an inbe thawm chu ka ngaithla ta chu a nia, tlawm ka inti in ka chet dan chu a atthlak takzet a ni, ka thiltih mek chu ka duhloh dan em em ṭhin a ni a mahse, ka ti miau si.



"Bawiha tal hi ka enkawl ang, a bak chu i duh dan danin awm mahla a pawilo, min enkawl tir rawh" ti a Rosy insut faih faih ri ka hre zui a.


"I enkawl theilo ang, amah vangin a lawm nupui neih ka tum" Ufamkiman a lo tih chuan ka beisei loh deuh thil an sawi a, an thil sawi laiah chuan ka telve tlatin ka inhria. "Nuhrawn a hrawn ka phallo a sin, keiman ka lo ṭulpui zawk ang" Rosy'n a tih leh laiin Ufamkima thaw hawk ri ka hre zui a.



"Min runluih nana nupui neih tum i ni ti raw, Mimi hi i duh tak tak vanga neih tum i ni chiah em, min runluih nana ti inih chuan a ngai miah lo a nia, Bawihpuia kan ti hrehawm mai mai zawk ang" Rosy'n a tih leh laichuan ka thau ah hian min man deuhin ka hria, ka lungphu chu a rawn inthumrawn tluk tluk a, Ufamkima chhan letna ka ngaichang ran bawk.



"Inrunluihna thil ah engtin nge maw i lo ngaih theih le" Ufamkima chuan thamlo zet hian a lo ti a.


"Regina-i chungchang pawh kha Lucy'n min hrilh tawh, min runluih nan i ti tih ka hria a lawm" Rosy ṭawng chu a zawi sawt hle a, ka thil hriat duh em em kha an sawi dawnin ka hria.



Chutah pen thawm ka hria a, kal mai ka tum laiin pen thawm chu a tawp leh rih a "Regina chungchang kha chu ka tih sual a ni, Mimi nen ka kan inkar nen a in anglo" pakhat zawk chuan a ti leh hmuk a, "Lucy'n min hrilh tawh" Rosy'n a lo ti ve leh thung.



"Lucy'n engmah a hrelo, Bawiha chu ngaihtuah suh ka enkawl thei ka tih kha" UFamkiman a ti leh a, an thil sawi chu hriat zel pawh ka chak tawhlo, ka hriat chin pawh chuan ka rilru a ti na a, inthiar fihlim tur ka ni tawh zawkin ka hria.



"Kan pahnih hian kan ṭha leh mai thei lo em ni, kan insiamṭha tawn anga, Bawihpuia vang tal pawn tum leh ila, ka nu rilru chu kan hmin leh thei mai ang" ti a Rosy zawhna chu a chhanna ka hre duhlo, hmanhmawh takin kailawn lam chu ka pan a, ka thin tawt urh chu tih kian tumin am zetin thawk ka la kawk kawk a, Motor bul ka thlen ruala pen thawm ka hriat vang chhuan ka ṭhu lut nghal thuai a, reilo teah Ufamkima a lo lang ve zat bawk.



Percel lianpui pawm chunga a lo kal chu a hnungah Rosy chuan a lo zui a, a landan aṭang chuan a ṭap zo chiah tih chu hai theih a nilo, min en miahloin Rosy chuan min kalpel a, Motor hnunga Ufamkima thil dahlut chu a va pui nge ni, an phun sar sar thawm chu ka hria a, ngaihsak miahloh tum pawn a tih hleihtheihloh. Ka lehhawi rualin Ufamkima lo kal ka hmu zui a, Driver side kawngkhar lo hawngin a lo ṭhulut a "Tih palh aw, duh aiin ka rei deuh a lawm mawle" a ti zuai ruih a, chhang loin ka ngawi reng thung.



Kan tlan chhuah leh hnu chuan min lo melh zauh zauh reng a, tukverh lam hawiin kei ka ṭhu a, min lo biak pawhin a rul tawk te tein ka chhang a, ka taksa te chu a zawi zo ta vek ni ber hian ka hria, ka ngaihtuahna lah a mang duk a, ka hah hlui reng bawk si a, ka thin tawt lutuk vang chuan ka ṭah a chhuak hlur mai bawk.



"Mimi, lungawilohna i nei em?" a rawn tih chuan a lu ka thing mai a, ka ngaihtuahna ah chuan thil pakhat chiah a awm a, kei hi inngaihtuah nawn leh ka ngai a ni.



Hei hi Ufamkima ka ngaihtuah changa ka duhthusam ang kha a nilo, ka duh em em ṭhin mipa kha ka nei ta ngei a, a nupui a tan hial pawh min duh tih chu ka hre teh meuh mai, ka beisei phak bakin a nunah ka intat luta, a chhungkaw tana mi hlu tak pawh ka ni ve maithei mahse, kan awmdan te, kan pahnih inkar te, engthil mah hi ka lo suangtuah dan nen khan a in anglo, a inanglo satliah mai pawh niloin a inpersan takzet a ni.



Kan inkawt kan thlen chuan ka chhuk nghal thuai a, min lo koh zui vang chuan ka ding leh rih a "Naktukah chuan ka lo hruai ang che" a lo ti a. "Kan inbe dawn nia" tih zawng sawiin ka kalsan a, inchhung ka lut chu ka luak a chhuak hlui thei mai, am zet zetin thawk ka la a, chutih laia Sitting room aṭanga Umawipuii lo chhuak chuan phawk fein min lo en bawk.



"Tinge a?" zawhna ngah tih hriat deuh hian a lo ti a.


"An mu vek tawh a mi?"



"Aw, ka pa pawh a mu deuh chiah, i rei lutuka, ka mut san che chuan i thawmah an harh ka hlau a ka lo nghak hram hram che a lawm" phawk lek leka min en chungin a ti leh a, "Aumawi, Ufamkima hi ka ṭhen mai dawn em ni?" ka tih chuan mak a ti hmel leh zual.



"Enge a chhan?" a lo ti nghal thuai a.



"Ka hrelo, ka rilru a buai lutuka, mutna ah ka hrilh ang che" inchunglam panin kan inzui chho a, Bathroom ah lut tlangin ka inphihfai mawlh mawlh a, darthlalanga ka hmel lo lang chu enin rei deuh chu ka ding a, ka rilru a la insual buai nasa khawp mai.



"I va rei ve" a rawn tih takah chuan ka chhuak zui thuai a.



"Enge i buaina chu ni a?" a bulah chuan muthlain ka kuah nghal chunga, ngaihṭhalo deuhin a nin min lo thlek bawk.



"Ufamkima nen hian kan inkawp rem tak tak dawnloin ka hria" ka ti leh hap a.



"Engvangin maw?" a lo ti he haw a, ni e...ka awmdan hi Umawipuii tan chuan hriatthiam a har ngawt ta ve ang, Ufamkima ka atchilh ṭhin zia kha a hre miau a.



"A nupui hlui hmu turin kan kal a, a nupui hlui chuan a la duh lutuk tih te ka hria a, a fapa vanga insuihzawm leh pawh a duh a, an chhungkaw inzawm theihlohna ka ni ta berin ka inhria" ka tih chuan inbeng kang meuh hian min thlek a.



"Tinge chutiangah te i kal duh a? A zialo emai a, Famkima chuan a nupui chu a la duh ve reng reng em, i bulah ṭawngkam a nei em ni?" a ti nghal mawlh mawlh a.



"Ani chuan engmah a sawilo mahse.....ka hrethiam lo, a buaichuar tehnuai lutuka ka sawi thiamlo" ka ti leh tawl a, sawifiah vak ngaihna pawh ka hrelo.



"Ka hrilh sa che kha, i duh hluah hluah lutuka ka dang duhlo mai mai zawk che a, inlaichinna hmasa a hlawh chham tawh hi engteh ual a ni dawnlo pawh ka tia i ti lui ṭalh a, ka thusawi i awih duhloh man anih kha" nidang chu nise chutia Umawiin a sawi chu ka haw leh maithei mahse, ka hun tawn mek hian Umawii sawi kha a dik zia min hrilh mek bawk si.



"Ka ṭhen mai dawn em ni?" ka ti nawn leh a.



"Ka hre nang, amah nen sawidun ula, keia lo sawi ve vak theih pawh a ni tawh hleinem, thutlukna i siam tawh a, inṭhen leh tih te chu i bialpa nena insawidun tawh tur a lawm, nangma rilru damna tur ang ang khan awm tawp mai rawh, chu chu a ṭha ber" a lo tih chuan ngaihtuah a ti thui khawp mai.



Ka muhil theilo chu ka inlet tawn chhen a, ka phone a Ufamkima Message awm chu ka en a, in a thlen tirh a min lo thawn a ni a, engmah ka chhang let lo, rilru fim taka inngaihtuah ka ngai, tunah erawh ka rilru a fimlo takzet.



Pathianni tuk chu zinglamah mut ṭhing ka awm a, ka lu a na ngut ngut mai a, ka inkhawm ve peih ta lo, ka nu inkhawm bang chuan min hau hlak hlak a "Zanah rei deuh deuh Movie i en a, Pathianni inkhawm theilo khawpin meng rei tawh reng reng suh" tih angreng a ni.



Usangzuala te ṭhianho inkhawm bang an lo peng kawia, an rawn rik tak hlut vangin Room lamah ka chhohsan a, Ufamkima te inah kal pawh chu ka chaklo, Message thawnin ka kaltheih loh thu chu ka nawmsamloh chhuanlamin ka va hrilh a, chumi hnuah ka phone chu Flight mode ah dahin Movie ka en san a, ka lo chhing sek a niang ka harh leh chuan ruah a lo sur a, sana ka en chuan chawhnu her a ni ruai tawh a, nilengin ka tho chhuak lo a ni ber ang chu.



Dar thum bawrah Umawii ka roomah a lo lut a "In inṭhen ta a mi?" a lo ti he haw a.


"Kan la inbe leh lo" ka tih chuan "An inah i kal dawn emaw ka tia" a ti leh zat a.


"Ka kal ta lo mai" tih zawngin ka chhang a.



"Mimite, ṭhen mahla a pawilo, inhlimdun lo emai, in kum a inupat hleihsia in mizia a in ang lo bawk si a, in titi pawh a rual theilo ang, inkawprem tur chuan inkawm ngeih te hi a ngai ve a, i tana Pathian ruatsak che anih ka ringlo" a ti leh sap sap a, ka chhang lemlo nain chu chu tuna ka rilru put ve mek a ni.



Ka khum banga ka thlalak tar chu ka en vang vang a, ka duh em em ka atchilh loh chauh he mipa nen hian inkawp ta ila duhaisam nun nei turah ka lo inngai a mahse, mihring nun hi a mak ve ngawt mai, suangtuah na leh a takram hi heti khawp hian a lo inpersan thei a ni maw!



Hmangaihna a luanliam ka lo tum lutuk em mawni zawk le, kei hi nge diklo a, Ufamkima nena kan inkar zawk hi, inkawp tura ruat kan ni reng em tih te chenin ka ngaihtuah a, ka ngaihtuahna chuan kil tin a dap kuala, rilru erawh ka la siam fel thei ta chuanglo.



Zanriah eikhama Sitting room a ka ṭhut laiin Phone call ka dawng a, a beisei loh deuhin Rosy a lo nia "Mamuana i Number ka dil a, naktukah i hman chuan inhmu ila, titi dun mai mai ang aw, in dawrah ka lo kal ang nge ka dawrah i lo kal zawk ang?" a lo ti zung zung a, ka hnial lemlo, Rosy nena titi dun chu a ṭha khawpin ka ring.



"Keimah zawk ka lo kal dawn nia" tiin ka lo chhang let a.





(End of chapter - 16)


(SMILE SQUAD....Kan story kallai hi Love story in lo chhiar ṭhin te anga changtupa leh changtunu thawnthu ang kha a ni ve lemlo a, nula la naupang tak, hmangaihna thawnthua luangliam ve em em ṭhin in a nuna a thiltawn ang kan tarlanna a ni ber a, thawnthu dang nena khaikhin vak chi a ni lo ang aw, ka thawnthu dang te ang bawkin Message engemaw kha a keng ve leh tho a, chu erawh a lo thlir thiam ho khan in hmu leh kiau turah ka ngai a, a thlir thiamlo deuh te pawh khan hmuh thiam tumin in lo hai ve a niang chu)

Link:
BBcode:
HTML:
Hide post links
Show post links

Ahmangaihi violette
Posts: 148
Joined: February 1st, 2020, 3:14 pm

Unread post by Ahmangaihi violette » September 7th, 2021, 11:07 am

ZUNZAM - by Ahmangaihi violette khiangte


CHAPTER - 17





Thawhṭan tuk chu ka thawhtlai deuh vangin Umawiin min kalsan a, ka insiam laimek chuan min lo phone in kan dawra Ufamkima a awm thu min lo hrilh a, ka Phone ka en lah chuan Ufamkima Message leh Call a lo awm ṭeuh a, Silent ah ka lo dah daih chu niin, ka inthiamlo zawk ang reng khawp mai.



Ka tho nuam em tih leh enge ka an te min lo zawt a, a Message hnuhnung lamah chuan "Ka lakah lungawilohna i nei em ni?" tiin min lo zawt hial a, ka awm dan chu a tan pawh ngaihṭhat thlakloh ve tak tur chu a ni.



Ka call zui nghal thuai a, "Ka lo kal dawn chiah a, i hmanhmawh tawh em?" ka va ti nghal tawng a, aw ki dam thluama "Ka lo nghak ang che" a lo ti takah chuan ka insiam zung zung a, in aṭanga ka chhuah chuan dar kua a pel fel der tawh a, a hna kal tur chu ka ti khawtlai viau dawn anih hmel e.



Taxi in ka kal a, ka thlen chuan dawhkan thlanglamah tukverh lam hawi hian Coffee a lo in mek a, "Taxi ka hmu mai lo a" tiin chhuanlam ka va siam a, a hmelah chuan lungawilo hmel ka hmu lemlo, ka hah dam phah deuh huai bawk a, nimin lama ka rilru leh tun dinhmuna ka awm dan chu a inpersan leh viau mai, tih lungawiloh ka hlau em em si chu a nia, enge maw kei hi ka awmzia le!



"I phone i en em?" a tih chuan ka bu nghat a, min zawt zui loin a ngawi vung vunga, a khat tawkin a Coffee in lai chu a lem leh hlak ṭhin, engthil emaw ngaihtuah ve rauh rauh hmel a pu a, keilah chu ar khawi ngam loh ang maiin ka ṭi dek reng mai bawk.



"Sawi duh te i nei em?" dar kan ak chung hian a rawn ti a, sawi duh kha ka nei ṭeuh a mahse, tunah tak hi chuan an bo duak mai, ka ang zau ringawt a, chhuna Rosy nena kan inhmuh tum kha ka hrechhuak leh a, ka ngawi leh ta zawk.



"I banah i lo peng dawn em?" ka ti teh daih a.



"I duh a ngem?" kiai sukin a nin a lo ti let ve a.



"Duh e" ka tih chuan ngaihawm zet hian min lo nuih a. "Tun kar chho chu nitin rawn tlawh che ka tum dawn nia" damthluam hian a ti leh a, chu chu a ṭha tak ang, inkawm tam kan mamawh, kan la innel tak tak lo tih chu kan hre ve ve anga, chu mi vanga inṭhen lo ngaihtuah nghal ringawt pawh a ṭha lo ang.



A kal dawn chuan pawn thleng ka va thlah a, "Ka lo haw hunah kan bazar dun dawnnia" a tih chuan ka lo phur ve takzet ni, pangngai taka len chhuah dun sawi tur pawh kan la nei mang hauhlo, ngaihdan thar ka nei zui a, kan inlaichinna hum him tura theihtawp chhuah tur ka ni zawk lo maw? Beih ve hma hawta beidawn ringawt chu ka tih loh tawp tur niin ka hre ta bawk, Ufamkima pawn a tum em hi maw.....theihtawp kan chhuah dun zawk aniang chu.



"Enge in awmzia, in va ṭhat hmel leh tawh si ve" inchhunga ka luh rualin Umawipuiin a lo ti a.



"Ka lo thlen hma khan sawi a nei em?" ka lo ti let thung a, "Nei hran nang, a ṭawng mawh angreng sia i ṭhen thu i va hrilh tawh a nih ka lo ring ve ringawt a, engtin nge i tih taka?" zawhna ngah tih hriat tak hian min en zui a.



"Aumawi, kan la awmdun tlem lutuk vang hian kan inpawhlo niin i hre ve tho em, awmdun tamin in hmu zing deuh ta ila, kan buaina hi a zia mai lo maw ka ti deuh a" ka lo ti ha a, a hmui a pet sawi duh vel lek a ni.



"A nupui hlui vangin inbuai emaw ka tia" a lo ti zauh a.



"Buai ka tih loh kha, i hriat sual a nih chu, chuloah aman a la duh a nih loh chuan buaiphah nan ka hmang tawh dawnlo" ka sawi laimek chuan "Ni chiah e" a lo ti ve hluai a.



"Pathlawi a ni tih hresa in i nihpui a, khatiang thuartham kha chu i tawn ve tur rengah ngai rawh, bialnu hlui nena neuh neuh hi chu tlangval ngaihzawn pawn a tam a, ani phei chu nupui leh fa nei tawh a nia, rilru zau tak put i ngai a lawm, let but but reng lo la a ṭha ang" a ti leh chu ka lo thlawp khawp mai, keimah hi insiamrem thiam tur ka ni, kan inṭhen chhan tur thil ngaihtuah tawhloin kan inṭhenloh dan kawng ka dap zel tawh ang tiin rilru ka siam a.



Rosy nen kan inhmuh tur thu ka hrilh chuan "A van ṭullo reuh" a ti deuh hluk a, aman min hmuh a duh thu leh min lo Phone thu ka hrilh chuan "Khatiang lam kha chu buaipui vaklo la a ṭha a sin" a ti niah niah, ka kal tur phei chu min hnial zui hranlo.



Chhunah Ukimkimi a lo kal a, ka lo hau nghal tawng chu a nui hauh hauh renga, kei a hauhna ve chu eng he hu ah min ngaihsak duh derlo a, "A nuam em, Pathlawi ngaihzawn chu zun an ngah an ti bawk sia, a zunah i uai viau tawhin ka ring tlat" tih angreng chuan min chhaih zuk zuk a.



"Rosy bialpa kha i hria em?" ka tih chuan a bangbo khawp mai. Rosy IG enin a bialpa thlalak chu ka zawng a, vengkhat te an ni bawka engemaw tal a lo hriat beisei vanga zawt ka ni.



Thlalak pakhat chu ka hmu ta hlauh a, mi panga vel an ni a, khawilai Hotel emaw a an lak a ni, a bialpa chu a sir berah a dinga, Ukimkimi ka hmuh chuan "Hei te chu BZA a nih hi" a lo ti sam mai a, a lo hre chiang nasa mai chu niin.



"Ṭhian anni lawm ni, Bz-a te chuan bialnu nghet a nei a lawm, an innei ṭep tawh zawk maithei a ni" a ti leh zel a, Rintei a tih Bza bialnu ni a a sawi thlalak min hmuh lah chuan; nimin piah a Phone dawra Bza ruala ka nula hmuh kha a lo ni reng mai a, rilru a ti buai leh ta nak mai.



"Rosy nen chuan an inngaizawng lo ang, i hriatsual mai mai aniang" a tih leh chuan chhang tawh lemloin ka ngaihtuah zui rauh rauh a "Taka Mimite, Lucy nen in in ti ṭha thei maw?" a tih erawh chuan ka beng a verh viau thung.



"Lucy kha maw, a mizia a mak lutuk" ka ti deuh hluai a.



"A phutkhat deuh tiraw" nui hak chungin ani lah chuan a lo ti leh mai a, a hrechiang viau anih ka ring.



"Ufamkima bialnu hlui a lo nia" ka tih erawh a awih vaklo a, "Ṭhian inkawm reng an nia lawm, tleirawl lai aṭanga inkawm an nia mahse, an lo inngaizawng tawh tih pawh ka lo hre hleinem, Ufamkima KṬP a a inhman lai kha chuan an inzui ve nasa ṭhin a mahse, an inngaihzawn tak chu ka hrelo" a ti niah niah a.



"Regina-i i hre ngai em?" ka tih erawh chuan a bangbo khawp mai, "Tu nge chu chu?" a lo ti he haw a, ka sawi zui duh ta lo. "Zawt zawt suh" Umawiin a lo ti leh ṭhin a, UKimkimi bulah chuan ṭawngkam fimkhur turin min lo mitmei deuh reng bawk.



Ukimkimi haw hnu lawkah keipawh ka kalchhuak ve a, Rosy dawr ka va thlen chuan Customer an lo awm huang a, lut ta mai lo chuan pawnah ka lo ding rih a, ka phone ka bih laimekin "Mimi" a lo tih ri ka hre zui a.




"Eh...i lo thleng tawh a law, lo lut ta che" a lo ti var a, ṭhutna min khawhhmuh lam chu ka pan zui thuai a, a la buai em vangin a thil zawrh te chu ka lo thlek kual ve a, a dawr nghak dang nula pahnih chu ka piah deuhah ṭhuin an titi dun melh melh a, Rosy lo hawi leh ṭhin nen chuan kan innuih leh ngawt zel a, "Min lo nghak lawk rawh aw, ka laklawh deuh a" a tih chuan ka lo bu ve nghat a.



"Coffee i duh em?" a lo tih leh chuan ka hnial ve tak nain min lo thlitsak tho a, ka bulah chuan lo ding hnaiin "Hman zan khan kan inbe lem silo a, ka inthiamlo hnuhnawh lutuka, rilru buai deuh chang hi chuan ka hawihhawm lo ṭhin lutuka" a lo ti sap sap a.



"A ho lutuk" nuisangin ka lo ti ve a, hman zan thil vel chungchang kha min sawipui a tum chuan ka ring silo, engthil chiah nge a sawi duh chu rindan ka nei thiamlo khawp mai. Ufamkima laka inthiar fihlim tur te hian min lo ti mai ang a tih te ka ngaihtuah a, lo ti ta se tiin chhan let dan tur ka ngaihtuah rauh rauh bawk.



Customer an chhuah hnu chuan "Tirawh helamah ṭhu ang" tiin chhak lama dawhkan awmna lamah chuan a kal a, a dawhkan anih ka ring, ka va ṭhutphei hnu chuan parda in kan ṭhutna chu a zar hliah zui a, nula pahnih te nen chuan kan ṭhutna chu a inhlat deuh bawk a, an ṭawngthawm pawh ka hre pha mang meuh tawhlo.




Chutih laiin a Chair chu ka lamah lo herin inhmatawn chuan kan ṭhu ta ran a, nelawm taka a nui chu han nuih let ve pawh ka tan a mawi in ka ring mahse, ka awm a nuam tehchiamlo khawp mai.



"Ihh...englo ania, hmuh che ka duh chhan chu.....thil min tih sak tura ngen che ka duh a" a rawn ti hmasa te te a. Ka Coffee no dah chuan ka lo insiamrem ve nghal thuai a.


"Ka inthlahrung viau nangin tihdan kawng dang ka hre tawh mang silo a" a tih leh chuan a thil sawi tum chu ka la bo viau mai.



"Inneih chu in tum hnai viau tawh em?" chu zawhna teh daih chuan min ti hamhaih zawk a ni, chutiang em em Ufamkima nen pawh kan la sawi dun hauh silo. Ka lo nui ringawt chu hnual rawih hmelpu hian min lo en a, ka nui tawp riai riai thung.



"Engtik nge in tum a?" a lo ti leh a.



"Chutiang pawh engmah kan la sawi hleinem" ka tih laiin "Tum chu intum hnai tho ti raw" a ti leh hram a. "Enga ti teh daih nge chutiang te min zawh a? Ufamkiman a sawi a mi?" tiin ka lo zawt let ve zat a.



"A...ka lo hriatdan a nia" bah deuh naka a tih leh chuan "Engtin nge i hriat a?" ka lo ti leh zel a, Ufamkiman a bulah chutiang chuan a lo sawi em mawni ka ti deuh, hman zana an inbia ka ngaihthlak pawh khan chutianga ngaihtheih tak tur chuan aṭawng tawh anih kha maw le.



"Kiman Lucy bulah a lo sawi a, ka nu pawhin a duh viau che anih hmel" a sawilai chuan a kiai sak a, dawhkana a kut a chet dat dat chu ka hmu reng bawk, ka mitah chiang takin min en duh hauhlo tih te pawh ka hmu thiam bawk a, kei ang thoin helhkam nei ṭeuhin a awm ve anih dawn hi.



"Engmah chutiang...." ka sawilai chu min lo pawt chat lehin "Fumfe deuhin in la sawi lo a mi?" a ti leh zat a.



"Sawilo e" ka ti ṭha ve mai bawk.



"Eng lo a nia, Christa hi enkawl ka duh a" a rawn ti ta a, a ngaihna hrelo deuh a ka lo en laiin "Min lo sawipui la" a lo ti leh a, engthil nge maw min beisei hi le, keia sawi ve phak tur thil pawh ni nghallo chuan.



"Urosy....awi...engtin nge keiin ka lo tih theih ang" ka ti hluai ringawt a. Chutah min lo ṭhut hnaih sauhin "Kima bulah lo sawi la, ka hnena awm tir turin i lo ti anga, nangin i sawi te chuan a rilru pawh a dang ve deuhin ka ringa" a ngen tak te hian min ngen a ni ber tawh, chhan ngaihna pawh min ti hrelo.



"A remti lo viau khan ka hria" ka ti leh hap a.



"Nia, tinge mawni mi hi a ring duh tlat lo a mahse, nang chuan min pui thei ang chu...." Urosy hian engtia ka puih theih ring ringawt mai nge a nih hi ka hrethiam theilo, Ufamkima nena kan inkar lah heti te mai kan la nih laiin Christa chung changah ber kher phei chuan, a....a ngaihna chai ka hrelo!



"Mimi, theihtawp min lo chhuah pui teh, i tan pawh ka hnena Bawihpuia a awm chuan a hahdamthlak zawk ang, i chanah min han dawn pui ve la, Christa i lo enkawl tawh ṭhinna ah pawh i duhsak ve takzet a nih chuan nu tello a ṭhanlen chu i duh bik in ka ringlo" a ti leh sap sap a, a sawi zawnga a aw lawi lek lek te chu khawngaih viau mahila, an thil min dil ber kher chu ka tih theih piahlam daih niin keichuan ka ngai, ka tih a mawilo thil niin ka hre bawk.



"I bula a awm te chu a ṭha lutuk a lawm, a ngaih ṭhin zia che pawh ka hre tho a mahse, kei chu engmah ka nih loh hi, ka thu neihna lam a ni ve bawk silo a...." inthlahrung deuh taka ka tih laichuan "Kima chu lo sawipui chhin la, ka enkawl theilo ang te pawh ti mai la" a lo ti sawk sawk a, ka hau chungin thawk ka lo la hawk thung, a ti awm anglo ka ti deuh riau tawh.



"Mahni hma sial deuh angin ka lang dawn a sin" ka ti deuh hmuk a, ngaihtuah zawng ringawt pawhin ka thauah min man thei a lawm mawle, bialnu ve mai chauh hian engtin nge chutiang thil te ka sawi ngam zawk ang.



"I lo sawi anga keiman ka lo sawifiah sak leh dawn che nia, Christa ka enkawl min thlawp ang zawng talin ṭawngkam lo nei la" a ti leh zel a, ka thawk a ti ipik zo vek tawh, chhang tawhlo chuan ka ngawi ran a, a sawi ang chuan Ufamkima bulah sawi ta ila min ṭhen vang vang duh zawkin ka ring a ni, mahni hmasial lutuk leh a bialpa fapa ngaithei miahlo chan tak ka chang dawnin ka hre bawk a, mahni hma ka sial hrehlo dawn rau rau anih chuan a mi ngenna hi ngaihthah ila ka tan a ṭha zawk bawk ang.



"Min hrethiam mai rawh Urosy, hetiang thilah chuan inrawlh ka duh lo" ka tih chuan a nui tawi khawp mai, a hmui a seh neuh neuh a, a awmdan chu khawngaih viau mahila hethilah hi chuan ka pui thei tlat silo a ni.



Rei awm tawhloin ka chhuahsan thuai a, muang changin dawr lam ka pan a, ka chawmawlh zo vek maiin ka hria, dawr ka thlen chuan dawhkan hnung ber lampanin tukverh bulah chuan ka va ṭhu a, Umawii min lo biak pawh chuan ka ngaihsak zui lo.



Ka phone Message lo thleng chu Rosy hnen aṭang bawkin a ni a "Mimi, kan thilsawi kha Ukima hrilh suh aw, i lakah pawh ka inthlahrung lutuk mahse, ka dinhmun chu i hriat ve tho kha, ka rilru a buai em a ni" tih hi min lo thawn a, ka chhang letlo mahse, ka awm a ti nuamlo zual deuh deuh mai.



Umawii lo kalin ka phone chu a rawn bih a, "Eng thil nge in va sawi dun a?" tiin min lo zawt bawk a.



Ka hrilh chuan a lo ṭeu leh viau ka rin laiin a ngawi rauh rauh a chutah ka beisei loh deuh thil a lo sawi a "Naupang vanga ti a ni chiah pawn ka van ringlo Mimite, inṭhen tir nan che u a hman a tum a nilo maw, Tihdanthiama bulah a sawi ang chuan ti ta la, a ṭhen duh mai dawn che tih a chiang reng a, a reng rengah a bialnu mai i nia, mi pangngai tan chuan i inrawlhna chi a nilo tih a hriat thiam theih vek a lawm, a rilru a kawi anih dawn kha, hmu duh tawh reng reng suh" a ti sap sap a.



Chutiang zawnga ngaihtuah nachang ka lo hre miahlo, sawi ta ila kan inṭhen phah hial lawng maw ti chuan ka ngaihtuah ve tho nain ka laka rilru chhia pu turin Rosy chu ka lo ngailo a, ka tan nelawm tak khan a awm ṭhin bawk si a, min lo ngaimawh ru ve hle a ni thei angem, hmanzana a thil sawi ka hriatah khan Ufamkima nena bul ṭan ṭhat leh a duh thu te kha a sawi anih kha maw, khai aw......ani hian min beih a lo tum reng em mawni dawn le...!




Dar thum rik hmain Ufamkima a lo thleng hlawl a, "I hman tawh em?" a lo ti nghal mai si a, hmanhmawh deuh chuan ka intuai ṭha thuak thuak a, chutih laiin "Khawiah nge in kal dawn?" tiin Umawipuiin min lo zawt sek sek a.



"Kan han leng khawthawng ve lawk a nge" tiin Ufamkiman a lo chhang a.



Kan chhuah hnu chuan MC ah kan lut kawi a, kawr min leisak a tum a nih hmel, "I duh ber i thlang dawn nia?" a ti leh ta nghal a, bialpa te thil inleitir hi ka ti vak ngailo nain Ufamkima hi chu hnial hi ka hreh riau zela, thil inleisak chungchangah chauhlo thil dangah te pawh a niang chu.



Kawr nalh leh man to angreng deuh hi min leisak a, chumi hnuah tlereuh dawrah kan peng a, rangkachak ṭhi nalh deuh min leisak bawk a, a Locket ah chuan Fairy ang deuh tereuh te hi a awm a, ka ngainat zawng tak a ni.



A Motor dahna kan pan thlak laichuan ka Bag-a a sana tur ka leisak chu ka lo phawrh zal zal a, Motora kan luh hnu chuan a kut lain ka buntir mawlh mawlh a, a sana lo bun sa lakah chuan keia thil leisak ve chu engtham mah a nilo mahse, ka ti ve laklawh si a, ka buntir lui ta tho a, amah lah chu a lawm thiam khawp mai a, a sana bunlai chu a phelh nghal hmiah mai bawk a, ka buntir zawk a thlek vang vang laia a lungawi hmel chu hmuh a nuam takzet a ni.



"Enge tih i chak sawi la?" a rawn tih chuan ka inngaihtuah vang vang a, khaw pawn vela Ride ka chak thu ka hrilh chuan min hnial loin a tlan chhuak nghal a, "Kal duhna bik i nei em?" ti a min zawh leh chuan "I duh duhna lamah a ni mai" ka lo ti ve zat a.



Bawngkawn lam panin kan tlan vang vang a, "Beraw tlangah kan kal dawn ami niang?" ka tih chuan a bu nghat nghata, ka kal lohna a rei tawh khawp mai, Shillonga ka kal hma a ka bialpa nen khan kan leng dun fo ṭhin a, chu mi hnua ka kal lehna hmasa ber tur a ni nghe nghe.



"Tlaiah heti hian kan leng dun ṭhin dawnnia" min rawn en zauh pah hian a ti a.



"A nuam dawn hle mai" ka tih laiin ka kut a rawn bana, ka lo vuan let ve zat a, in enin kan innuih ringawt a, a bula ka awm takah chuan ka rilru tawt zawng zawng kha an bo ta duak mai hian ka hria.



"Tunlai i buai vak lo ami?"



"Buai tho e mahse, ka ngai che a" a tih ri chu hriat nuam tak a ni.



"Min lo ngai ve ṭhin em?" a lo ti leh a.



"Ngai ṭhin e, i buai sia ka lo be hreh ṭhin zawk che a" lai angreng taka ka tih chuan ka kut chu a rawn hmer salh a "Inthlahrung mah ta che, i duh hun hunah min lo be ṭhin dawn nia, i bulah hian ka nelawm loh ṭhin lutuk em aw?" a zawhna chu chhan vak dan pawh ka thiamlo, zep lo ah chuan chutiang chu kan ni in ka hria.



"Ka nel tho che" ka ti zawi sep a, a nui hmel chu ka hmu hmelṭha zual kher lehnghal.



"I thil tih chak te lo ngaihtuahla, hun kan neih chuan tihpui zel che ka tum dawn nia" a ti zawi sup a, tunah tak hi chuan a awma bei tluka chak ka neilo, duat deuhin anin min lo kuah bawk sela, ka thil ngaihtuah vang chuan ka nui sak a, min lo en rang khawp mai.




Beraw tlang kan thlen chuan Motor aṭanga chhukin khawthlirna lampanin kan kal chho a, tleirawl rual lo awm ho chuan min lo en duh hlawm khawp mai, Ufamkiman ka darah rawn kuahin min chhohpui zel a, khawthlirna ah chuan inngheng chialin kan ṭhu dun a, thli thaw heuh heuh chuan hah a ti dam sawng sawng mai bawk.



Puitling kan awm ve vang aniang tleirawl ho chu an kalsawn thuai a, kan pahnih te chauh chuan kan ṭhu dun a, ngaihawm zeta min rawn melh leh chang chuan ka lungphu a rang leh dup dup ṭhin.



Chutah min rawn kuahin "Lo hnai teh" tih leh a awm nghenga min pawm a rual a, a rimtui inkah rim chu hip vang vangin thawk ka la zui a, a taksa lum ka nghen takah chuan keimah ah danglamna a rawn awm chawp chilh a, "Boruak a nuam hle mai" ti a a ṭawng zawnga a hrawk bawk che ralh ka hmuh te chuan ka mur sung sung thei hial a ni. A lo hawi thla nen chuan kan mit a intawng hnai viau mai, min fawp turin a rawn kun hniam nghal bawk a.



Thli thawin ka sam a chhem len chu hui kiangin am deuh tak hian min rawn fawp a, a thaw ham ham ri te chuan ka thisen kal lai chen hian a fan raih raih thei in ka hria, a kut lum vung vung chuan ka biang rawn dawmin hnai takah min en a, a mitmeng thuk ruih leh zûn nei fahran chuan ka mitah tak min en bawk.



"I hmelṭha takzet a ni" zawi deuh supa tiin min fawp nawn leh ngat a, ka hlim a ni, ka hlim takzet.



Rei deuh chutah chuan ṭhu dunin ka titi a, a zin tawh na hmun te min hrilhin ka kal chakna te min zawt a, "Shimla ah ka kal chak" ka lo tih chuan "Kan inneih hunah Honey moon hmang turin kan kal dawn nia" a lo ti zauh a, chuta min rawn en leh chuan awmzia a nei hle in ka hria.



"Engtikah nge kan inneih dawn a?" uang deuh tak hian ka lo ti a, a ngawi vung vunga chutah a jacket ipte zenin zungbun bawm hi a rawn phawrh a, awi leh.....engthil nge maw tih a tum le!



"U famkim!" a chet lak dan en chung chuan ka ti deuh hluai a.



Ani ka hma ah rawn ṭhu hniamin zungbun bawm chu a hawng a, "Lo hlauthawng viau lo la, a hun pawh i duh hunah ni sela.....i pawm thei ang ti raw?" thawk ka lo la hluai ringawt a, min ti dang zo vek a lawm mawle.



"Tinge hetiang te i tih a?" ka nui a, ani pawh a nui ve tho, ka malchunga ka kut dah chu rawn la kangin a hmui a tawh tir leh vang vang a, ka awmchhunga ka lungphu chu a rawn ri dup dup tawh maiin ka hre hial a ni.



"I bun duh em?" a ti leh tawl a, a zeilo ti dawn ila hei bak a zei turin ka duh chuanglo, ka tan hi chuan Ufamkima hi a ṭha FAMKIM ve chiang em a sin.



Ka lu ka buk takah chuan zungbun chu phawrhin ka kutah a rawn rawlh lut a, Silver zungbun niin mit eng mawi tak mai a nei a, ka kutah chuan a de set set maiin ka hria.



Kan haw meuh chuan khua a lo tlai ve lek lek tawh a, Umawipuii ka phone chuan dawra a la awm thu a lo sawi vangin chulam pan chuan kan tlan a, ka kuta zungbun chu ka bih khat tawk reng a, keimah te chuan ka nui leh ṭhin, Ufamkima Motor khalh ka va thlek chang chuan min lo en ve nghal thuai a, chutah zahloh chhuahin inti tlangnel fahran chuan a beng ka va khawihsak niap niap a, hma lam en chungin a nui ve suk suk mai.



Dawrah lo lut tawh loin min let san a, Umawii bula ka zungbun ka hmuh chuan "Ka ta nen inthleng ang" a lo ti ve leh thawra, a uang mai mai emaw ka ti chu ani a lo thu tak em em lehnghal a, tih tak meuhin a ni min dil ni, fing viau ṭhin e tilo hian a mawl leh huih ṭhin.



Ufamkima chu a tukah pawh a lo kal leh a, dawr thar changkang deuhah thil eiturin kan chhuak a, hun nuam tak kan hmang dun leh a, chutiang chuan kar tluanin tlai tin ka tan hun a rawn insiam a, kan inkara daidangtu awm ni a ka hriat kha a bo ve ta tial tialin ka hria.



Ni a liama thla a tawp veleh dawn ta reng a, Umawipuii te inneih hun tura ruat pawh ni nga chiahin a dang ta, dawr kan khar a inlamah inbuatsaihin kan buai hle a, ani Umawii bazar reng rengin hun a hmangral a, inchhung lam buai chu ka kut zalah vek a tla a, khaw danga kan chhungte an lo thleng khawm ve tawh bawk nen eirel pawh hna a tling thaw thang mai.



Ufamkima pawh ka sawm a, Inrinnia kan bazar pahin an inah ngei sawmna lehkha ka va pe ve a, a nu pawn min lo be ṭha viau mai, Umawii chungchang te pawh min lo zawt ve luam a, chaw ei nghal turin min sawm zui nghe nghe a, ei phei chu ka ei lemlo.



"Hman zanah Ukiman i chungchang a sawipui a, nu ber lakah mark i score ṭha teh a nia, chuvang chuan lo leng ve fo rawh" Mamuanan a lo ti ru sar sar a.


"Engtin nge a sawi a?" keiin ka lo ti var a.


"Nupui a tan pawh a duh thu che a sawi a, Nu nghakin kan va rim dawn em ni a tia, Ukiman i u pasal neih tur thu hi a hrilh a, hmanhmawh lo ang a ti anih kha, kum thar lamah chuan in ti ve rup mai ang a?" a tih chuan ka lo nui pat pat a, a nu bulah meuh min lo sawi tawh anih chuan a lo thutak hle a nih dawn hi.



Ufamkima inbual ka nghak a, a inbual zawh hnuah kan inthlengin min va thlah thingpui in a a lo lut kawi chu ka ni te ho in an lo fiam nak nak a "Makpa chet hun a nia, makpa hual interview hun a ni bawk a" tiin an nui dar dar a, Ufamkima chu a zak ru hle tih ka hre thei a mahse, zak lo ang tak chuan lan a tum ve anih hmel e.



Ka cousin te ho chuan hmelṭha an han ti em em khawp a, hmai a lo uang ve hle ringawt, rei awmlo in a let leh mai a, ka ni Hminglianin hahipin a chungchang chu min zawt zui a, "MZU ah Professor a nia" tih chu ka sawi hmasa ber a, midang pawh chuan an beng an rawn tun hru hlawm lehnghal a. Mahse, Umawiin "Pathlawi a nia" a lo ti zauh pek a, a kamtam thlak hi kan ti khawp a, keiin ka lo sawi changtupa ve mek lai lehnghal chuan, a sual ka ti tak tak a ni.



"A chhe lo a, a fel te chuan a ṭha tho a lawm" ka Cousin ten an lo ti hlauh mai. Ni Hmingliani lah chuan "Pathlawi hi an ṭha, tih sual leh an hlau tawh a, an fimkhur a, chinchang an hre tawhin mi duat dan an thiam zawk" a lo ti ve mauh mai bawk a, nui pat pat chunga Umawii ka va en laimek chuan Nute Thanzualin "I u aiin i nei ṭha zawk dawn anih hmel chu" a lo ti leh zel a, Umawipuii chuan a hmui a pet sawi nang nang ringawt tawh.



Thawhṭan zanah man inhlan an ti a, chumi ni nileng chuan Ufamkima biakna hun ka neilo a ni ber, zanriah eidawnah ka va Call a Phone a chhang miahlo mai a, a buai a niang tiin ka call zui duh ta lo a, a hmuh hunah min lo be ve maiin ka ring.



Man hlan turin mipa lam an lo thlenga, ka Cousin te nen keinin thingpui kan lum a, Umawii pawn nuam a tih hmel khawp mai, man hlan hun a zawh veleh ah Ukimkimi ho chuan an hmai facial tir turin Room lamah an chho a, thil ka tih fai zawh a ka han chhoh ve chuan ka room zawkah an lo awm a, reilo te ka lut zawk a, an rik luai luai vang chuan phone hmang turin bathlar lamah ka chhuak zui a.



Ufamkima chu ka la be thei ta chuanglo enge maw atih dawnni, a Last seen lah chu chawhnu lam dar hnih kha a ni daih mai a, lehkhabu a chhiar nge ni ang aw, tun angah te chuan kan inbe ve ziah ṭhin sia, tinge min rawn hriat chhuah miahloh le ka ti rilru neuh neuh a, midang bula ka let leh hnu pawh chuan ka mood a ṭha lo zui khawp mai.



Mut dawnah chuan Mamuanan ka status a lo comment, "Min sawm ve dawn em?" tih hi a lo thawn a, "Inchhungin ka sawm vek che u a nia, rawn kal vek rawh u aw" ka tih hnu chuan "Ukima ai ka lo kal mai ang" a lo ti leh a.



"Rawn zui rawh, nalh tawkin aw" ti a uang fe a ka chhan leh chuan "Christa a Accident kha i hria em?" a rawn ti ta mai a, min ti bangbo hle ringawt.



"Engtin nge a awm a! A na viau em?" ka ti nghal hlut a.



"Kawta a Cycle khalh kha Stepah a lum a, a lu a sawh kak a, thinsen te kan va pe a, tunah chuan a zia tawh, zantir khan ka haw san a, Ufamkiman a hrilh che anga i lo hre tawh turah ka lo ngai asin, i rawn lang lo pawh tinge mawni ka lo ti zawk a" a lo ti leh mai si a, ka hlauthawng lutuk chu ka phili ruai mai a ni. Thisen pek ngai khawp chu a na viauin ka ring a, engtin nge maw Ufamkima chuan min hrilh ve miahloh theih zawk le.



"Khawi Damdawiinah nge a awm a, tunah tunge awmpui?" ka ti lehnghal sawk sawk a.



"LRM Hospital ah mahse, va kal duh kher suh, a muhil a engmah tih theih a awm rih chuanglo, a nu in a riahpui dawna Ukima pawh a lo haw ṭep ang" a ti leh zat a, kan inbiak zawh chuan ngaihṭha lo deuhin khumah ka ṭhu renga, Ufamkima va call leh pawh chu ka inthlahrung ru riau tawh, min hrilh ngai a ti ve lo anih te ka ring thul, ka rilru a hah ṭun a, ka ṭah a chhuak dawn dawn mai.



Ka zing tho chuan ka phone ka en hmasa bera, Ufamkima Message ka hmuh chuan rang lutukin ka hawng a, "Vawiin chu ka lo kal thei dawn tlat lo hei, min lo hrethiam mai rawh hna lam kan indaih lo deuh a" tih zawng hi min lo thawn a, ka rilru a na veng veng mai, message ringawt a min lo biak vanga na ka nilo a, a lo kal theih dawn loh vanga na ka ni hek lo, a nuna thil pawimawh leh harsatna liantham tak min hrilh loh vang zawk chuan ka na a ni.



Tinge min hrilh mai loh le, a tan inhnemna tlak ah min ngai nganglo tih na em niang? Ka tello a a tih theih vek thil mah nise, min hrilh sela ka ti takzet, hnem ka duh a, Chirst chu ka ṭawngṭaipui tur thu te, Pathian in a tihdam leh vat dawn thu te pawh hrilh ve ka duh a mahse, ka lakah a zep tlat si.



Aumawii chuan "A tan i pawimawh tawklo tihna anih dawn chu" a ti leh mai a, insumkarna nei lek lo hian a ngaihdan hi a sawi phawng zel a, ka rilru nat zualna tur tih hi a ngaihtuah ve leh ṭhin tawhlo.



Inneih inkhawm tura ka insiam pawh chu ka phurlo khawp mai, kan kal dawn chuan Ufamkima chuan Message min lo thawn leh a "Vawiin nuam deuhin i hmang dawnnia, i u pawh lawmpuina thu min lo hlan sak dawn nia" tih thu a rawn thawn chuan ka rilru a ti mang zo vek mai.



Mamuana lah chuan Christa chu a khawsik a san thu leh Ufamkima pawn chaw a la ei miahloh thu te a rawn sawi tak deuh deuh a, ka awm a nuam thei tawhlo, inneih hunserh chu awm nuam manglo zetin ka tlingtla hram a, helhkam nei ṭeuh chung chuan mi hmuha hlim hmel han lantir chu ka ti hleithei meuhlo a ni.



Biakin aṭanga kan let hnuah Usangzuala te inlama lawiturin an inbuatsaih leh mawlh mawlh a, kei inchung room ah Umawii te ṭhiandun inthlak laichuan ka lo ṭhu kun tlawk tlawk thung. "Saitluangpuii pathlawi zun phur hi chu ka kham tak tak a ni, a unaunu min thlah mek tih pawh zuk hre chang hauhlo chuan" Umawiin chuan Ukimkimi bulah a ti hlak hlak a, "In inhau a mi a Mimite?" Ukimkimin a lo tih pawh chuan ka va uksak peih lemlo.



"Ufamkiman engmah min hrilh ve lo a mahse, ka lo kal tho ang aw" tiin Mamuana chu Message ka thawn a. Reilo te ah min lo chhangin "Lo kal duh rih lo mai rawh, hei kan boruak a rit reuh lutuka, Rosy chhungte lam hi an lungawilo a, Christa ngaihsak tawklo ah puhin Ukima hi khin an tum a, ngaihzawng a neih thu te an hre ve bawk sia, i lo inlan rihloh mai aṭha ang, chanchin chu ka lo hrilh zel ang che" tih thu hi min lo thawn a.





(End of chapter - 17)

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ahmangaihi violette
Posts: 148
Joined: February 1st, 2020, 3:14 pm

Unread post by Ahmangaihi violette » September 7th, 2021, 11:09 am

ZUNZAM - by Ahmangaihi violette khiangte


CHAPTER - 18




Mamuana thil min hrilh chu ka rilru ah a awm tluk tluk a, a khat tawkin ka Phone chu a en leh ṭhin a, Ufamkima mawlh mai chu a ni ka ngaihtuah ni, Christa chu eng em a tilo turah ngai ila, Rosy'n a fapa enkawl a duh zia lah ka hriat sa a ni bawk. Ufamkiman engtin nge a lo tih ang aw, a phallo ngeiin ka ring a, an buai hle dawn a ang riau mai.


Umawipuii lawi tur chu phur zanlo chung chuan ka zui ve a, mi an tam bawk si a, ka boruak hap fuhlo laklawh nen ka lu te chu a rit luk mai hian ka hre tawh, thaw a venglo in ka ipik ṭun mai bawk nen, rei awm ve tawhloin a rukin ka haw san a, inthlak sawk sawkin ka intifai thuak thuak a, chumi hnuah khumah muin Ufamkima chu ka va Call a.


A Ring ral leh hman dawn emaw ka tih laiin a rawn chhang ta hlauh mai, ka mutna aṭanga tho chhuak hluaiin lehlam a mi chu ka ngaithla ran a "Mimi..." a rawn tih chuan ka lung a chhe dawn dawn mai nia mawle.


"Enge i tih a?" zawi deuh taka ka tih chuan thawk ala hluai ri ka hre zui a, chutah awki dam zet hian "Ka kal chhuak a, hun in hmang zo tawh em ni?" a lo ti zui zat bawk.


"Aw,.ka haw tawh a, ka mu mai mai tawh" ka tih leh lai chuan a kalsawn nge mawni, thawm a ri sat sat a.


"Khawiah nge i awm a?" min hrilh ve mai beisei tak chuan ka ti leh a.


"Damdawiinah ka awm a, Christa a tlu sual palh a" a tih takah chuan thu lawmawm ni hauh silo chu ka lo thaw huai mai. "Ana viau em, tunah enge a an a?" ka chhang rang viau a ni. "A ṭha tawh e, kan ngaihtuahawm lo" a aw aṭang chuan dawt a sawi tih ka hailo, tinge maw min hrilh hreh viau mai chu le.



"Ka lo kal ve ang aw?" ka tih leh chuan "I buai lo a mi?" a lo ti vat a, a inthlahrun hmel khawp mai, ka buailoh thu ka hrilh leh chuan min hnial ta biklo a, phone chu dahin ka insiam nghal mawlh mawlh a, Taxi lo tlan hmasa ber lain Damdawiin lam chu ka pan a, kal kawngah Ufamkima chuan min lo phone lehin an awmna min lo hrilh chiang a, Rosy chhungte an awm angem tih chu ka ngaihtuah rauh rauh a, ka kal ringawt chu a fuhlo viau em lo ang chu maw, rilru a nuam zanlo khawp mai.


Damdawiin ka thlen chuan kawtah min lo nghak a, a hmel pawr fap chu hla deuh tak aṭang pawh chuan ka hmu thiam a, ka kalhnaih takah phei chuan mut khamlo tih hriat lutuka a mit sen rum chu ka hmu chiang hle bawk.


"Tunah tunge awmpuia?" ti a ka zawh chuan ka beisei lawk ang ngeiin Rosy a chhungte an awm thu chu min lo hrilh a, "Nakkin deuhah kan lut dawn nia, thil eiphawt teh ang" a tih vang chuan Damdawiin piah a dawr lam chu kan pan a. A zei zia chu ka chik ru renga, min hruai lut hreh anga a lan chuan lut emlo a haw leh mai pawh pawi ka ti hranlo, a tana harsatna thlen emaw hnawksak zawnga awmloh chu ka duh ber a ni rih.


Kan eitur chah nghakin inhmatawn chuan kan ṭhu dun ta ran a "Engtikah nge Christa chu a Accident a, chiang deuh hlekin min hrilh teh" ka tih leh chuan ka lam lo hawiin mitmeng dul ruih chuan min en a "Nimin tlaiah khan a nia, ka kal chhuah dawn khan kawtah a infiam a, ka thleng thui hmanlo ka nuin min lo Phone a, Damdawiinah kan inphur phei nghal a lawm, lo hrilh nachang che ka hre lawklo a" a ti mai a.



"I biak tlang theih mang bawk silo a, min ti mangang lutuk a lawm" chhuahchhal awka lo thei ang ber tur chuan ka ti ve leh a. "Inneih thil velah i buai si a, i rilru ka tih buai ka hlau maw le" zawi deuh taka a tih chuan ngawi rengin a lo en tlawk tlawk thung.



"Min hrilh har lutuka ka vui mai dawn a lawm, Mamuanan min lo hrilh a, nangman engmah i sawi bawk silo a, ka rilru a lo hah lutuka, min hrilh i tum lo emaw ka ti a" tlang takin ka rilru chu ka sawi chhuak phawng a, chutah dawhkana ka kut chu rawn banin a hmer vawng vawng a, hnem tu zawk tur ka nih laia chutiang lo sawi chu ka inthlahrung ru angreng viau a ni.



"Lo hrilh che chu ka tum a lawm, inneih hunserh leh a behbawm te han hmang zo phawt ula ka ti anih kha, chutia ngaihtuah awm em em a ni tawhlo bawk a, nang rilru nuamlo taka i lo awm ve kher a ngai hran hleinem" tawi tea min nuih chunga a tih chuan vui hmui ka pu lian leh viau tawh.



"Min lo hrilh nghal la keichuan ka duh daih zawk, harsatna in tawh laia inneihna hmuna nuam taka lo awm te chu ka duh bik reng reng lo, Mamuanan min lo hrilh hlauh zawk a, tun a chinah chuan engthil pawh harsatna i neih chuan min hrilh ve zel tawh ang che" ka tih dan chu thupek pe te pawh ka ang lek lek ta ve ang. "Ni e" a lo ti ṭha ve mai bawk a.



"Rosy te i chungah an lungawi vaklo a law?" a meng rang deuha "Mamuanan a sawi em ni?" a ti zui zat a.



"Aw...ih....Ufamkim, engmah zep bik lo la, tlang deuhin min hrilh ṭhin rawh, ka pui thei lo che anih pawhin ka thlawp ang che, i hlimna ah hlimpui che a i lungngaihna pawh ṭawmpui ve tur che ka nia lawm, i tana mi pawimawh ka ni em ka chiang lo nain ka tan chuan i pawimawh lutuk a nia" ka ti sap sap a.


Min en vung vunga a mitmeng chuan enge maw sawi duh a neiin ka hria, ṭawng tumin a ang hman zuau a kan eitur chah a lo thlen vangin a ngawi leh rih a, "Nakkinah kan sawi dawnnia, ei phawt rawh le" ka eitur min lo chhawp hnaihsak pahin a ti zui a, ka zawt zui ta rih lo.



Thil a eitlem khawp mai, keipawn ka ei thei vak biklo, "Kan thil ei chu a mawm mah mah anih hi mawle" zawi supa tiin a duhtawk nghal mai a, chhang leh theitui tih ang reng chu ka lei a, tlaiah a haw dawn em tih ka zawh chuan inthlak tura a haw tur thu a sawi a, Damdawiinah a riak leh dawn anih hmel e.


"Urosy i a awm tho sia, hahdam ve rih la" ka tih chuan a nui mai a, Chirsta kalsan chu harsa a tih tur zia erawh ka hriatthiam pui khawp mai.



"Ka Phone batry hi a Low ṭep a, Motorah kan Charge lawk a nge" a tih vangin a Motor dahna lampan chuan kan inzui a, Damdawiin kawt kan thlen chuan nu pakhat hi kan tawk a, min rawn en chat danah Rosy chhungte lam an nih ka ring.



"Famkim, i haw dawn em ni?" a lo ti nghal reng bawk a.



"Dawn lo e, tlai ah ka haw zawk anga, zanin chu ka riahpui leh ang" Ufamkiman a lo tih chuan "Ka lo chhawk mai dawn che nia" chu nu chuan a lo ti leh a, chutah kei chu min lo en hian "I ṭhiannu a mi?" a tih chuan tawi te in ka lo nuih a, min nuih let ve lemlo.




"Mimi-i anih hi, Mimi hei hi Rosy i nu" Ufamkiman a tih chuan ka lo bu nghat a.




"Zanin chu inlamah lo va riak la, Rosy nen kan lo awm ang" a tih leh chuan Ufamkima chu angawi vung vunga, a hreh hmel khawp mai. "Motor chu saw lamah sawn ka dah a" tih pahin min lo mitmei zui bawk a.



"Phone kan charge lawk anga kan lo lut ang" a tih laimek chuan chu nu chuan tum deuh bur chung hian "Christa pu te an la awm a, nakkin deuha in lo lut dawnnia" a rawn ti ram deuh hmuk a, Ufamkima lawm vaklo hmel chu ka hmu ve renga, keimah vang anih ka ring ringawt bawk.



"Ufamkim, ka lo kal hi a fuh vakloh chuan ka lut ve kher lo mai dawn a mi?" Motor bul kan thlen chuan ka ti tawl a.


"I lo hmu ve phawt dawn nia" a tih chuan ka rilru erawh a nuam zan lo khawp mai, "Reilo te kan nghak dawn nia" a tih leh takah chuan Motor ah chuan ka ṭhulut ve nghal a, a lam hawia ka inher leh laichuan a Seat nghengchhan nghengin a mit a chhing siar siar a, a chauh hmel ngawih ngawihin ka hria, ka lainat lutuk chu tihsak theih neih ka chak hle bawk.



In be loa kan ṭhut reng hnuah chuan "Christa hi ka enkawl tir mai dawn em ni?" a rawn ti chhuak hlawl a, a lam ka hawi leh rang khawp mai.



"I duh dan tak a ni em?" ka tih chuan alu a thing a, ni e....a duh hauhlo ang, khati khawp khan Rosy pawh a lo hnial tawh a, enkawl a tum ruh ve hle ṭhin anih kha.



"Ka hrelo le, ṭha i tih ang ang khan ti tawp mai rawh" tih bak chu han sawi zui chiam dan tur ka hre lo.



"Hna leh thil dang vang hian a bulah ka awm reng hmanlo a, a tawp mai dawn bawk silo" a aw chu a zawi hle a, a mit chhingin thawk ala ham ham a, a ngaihtuahna a buai ve hle tih leh a thil sawi ngei pawh chu a duh dan a ni biklo tih chu a awmdan aṭang chuan a chiang khawp mai.



"A hringtunu hnena a awm chu a pawilo maithei, i chân dawn ta tihna a ni chuanglo a, i fapa pawh a la ni reng dawn tho a lawm" ka rilru ah Rosy'n puih min ngenna kha a rawn lang rauh rauh a, chumi vanga sawi chhuak ta phei chu ka ni chuanglo.



"Ni lo e, tunah chuan mihrang kan ni tawh a lawm, mahni fa midang hnena kaltir hi a awmzia i hre lo a ni" awki damthlupin sawi mah se, a aw ri ah na a tih zia a lang thung.



"A nu a nia lawm, nu hmangaihna leh enkawlna hi naupang hian an mamawh a, ṭha takin i enkawl thei ang tih chu ka ring a mahse, nu enkawlna telloa seilen tir aichuan a ṭha zawkin ka van ring em, i bulah awmlo mahse, i thlahthlam dawn tihna a ni chuanglo bawk a" ka sawilai chuan lo meng chhuakin ka lam a rawn hawi a, ka thilsawi chuan a ṭhawng deuh em mawni chu aw...



"Rosy hi ka ring ngamlo a ni" tih zawng a sawi a, chhanna min pe chiang kelh kawlh viau nain zawhna ka la nei ta cheu.


"Tinge i rinloh chhan?"


"Mimi, amah i hriat chian loh vang a ni" a ti leh mai a, a sawi dik tho mai, ka hrechiang ve tlat lo.


"Min hrilh thei mai em?" ka ti leh zela, rinthu mai maia rilru lo sen reng hi ka ning ve takzet tawh.


"Ka nupui hlui nena kan inkar hi hrilh che ka duh ngailo a, i tan hian hriatnuam pawh ani bik lo ang" a tih leh laiin "A pawilo, keichu i lam ka ṭang reng anga ka thlawp zel ang che" tiin a kut chu ka lo vuan vat a, chutah min en vang vangin thawk a la leh rih a, zawhna ngah tih hriat takin keiin ka lo en ve reng bawk.



"Kan inneih laikhan ngaihzawng a nei a, a ṭhian ni a ka lo ngaih kha a nia, rin hlelhna chang ka lo hre ngailo a mahse, ka hriat ve meuh chuan an lo kalthui viau tawh" min rawn melh ralh a, "Anih chuan i man chhuak tihna a mi?" ka lo ti ve zat a.


"Umm...a ni ber ang chu, zan kan mut hnu hian tho chhuakin a be ṭhin a, an inbe thawm pawh ka hre ve fo mai, hun rei tak chhung chu ka palzam a mahse, nikhat chu a hun aia hmaah ka haw a, a ngaihzawng nen chuan an lo awmdun ta ngei a, midang ka aṭanga ka hriat leh danin chupa nen chuan pawn lamah pawh an lo inzui chhuak fo niawm tak a ni"



"Ufamkim, chupa chu Christa Birthday a lo a lokal pui kha em ni?" ka lo tih chuan a bu nghat nghat a.


"Khapa khan bialnu nghet a nei tlatin ka hria" zawhna ngah takin ka en zui a.



"Ka hrelo le, ṭhian ṭha tak an ni ṭhin a, ṭhian aia thui kaldun tur khan ka ring biklo mahse, keimah ni ta la karhnih chhunga nitin i nupui hmu tura lo kal fo chuan chhan dang a nei ngei ang tih chu i ring ve tho ang, chhunah in hmuin, zan lamah phonein tlaivar dawn dawnin an in be ṭhin a" a sawilai chuan a nui deuh suk a, keichuan chiang ka la ti lo khawp mai, ka tawn ve anih loh vang nge mawni, an chesual lai a phawk thu a sawi bawk silo.



"Engtin nge i man chhuah a?" ka ti leh hap a.



"Finfiah ka duh vangin kar hnih zet chu kan inchhak dawr aṭang khan ka thlithlai ṭhin a, khapa kha ka chhuah hnu lawkah lo kalin darkar tam fe a leng ṭhin a" a tih leh chuan ka hrethiam ta viau mai, an lo inngaizawng ngei anih ka ringhlel ta lo bawk.



A kut chu ka hmer sak vang vanga, a lungngaihna te chu ka ṭawmpui pha ve hial a ni. "I hre zel duh em, i bialpa hi mi fel ka ni biklo a nia, ka hrilh che anga min huat phah angem?" thutak zeta a rawn tih chuan lu ka thing rang khawp mai. "Khatih laikhan Regina khan min hel ve reng ṭhin a, ka rilru sehhel ve ta khan ka tih ngailoh lutuk thil ka tih phaha, min bumtu leh min phatsan tu kha rulhlet chaknain ka khat a, ka rullet ta reng bawk a" a tih leh laichuan ka nghilh dup maiin ka hria.



"Inchesual tihna a mi?" ka lo tih chuan a lu a thing nghut a, "Chu em chu ni lo e, Regina chu ka hmang ṭangkai ve mai chauh a ni mahse, khatiang nupa nun kha ka ngawihbopui reng theih a nilo a, ani a lo huangtau ve zel nen inbakkaih chang kan ngah a, Damdawi a lo ti reng ṭhin tih te ka hre leh zela, chuvang ania Bawiha enkawl tir hi ka duhloh em em chhan chu" enge i ngaihdan ti nimai awma chiang hian min lo en zui a, sawitur pawh ka hre tawhlo, ka dang a ro zo ta vekin ka hria, am zetin thawk ka la hluai a, anin ngunthluk em emin min en veleh tawh thuang a, sawi tur a vang duh kher mai.



"Ka diklo viau em, ka fapa hi enkawl tir duhloin ṭanglui tlat ila misual chan ka chang reng dawn a mahse, ka fapa hi nun ṭha zawk ka pek phawt chuan ka ti ṭhin a" min zawt niloin min hrilh a ni mah zawk.



"I enkawl ṭha zawk dawn tih ka hria, a Accident hi i thiamloh ah i ngai em ni, naupang chuan hetiang chang hi an nei fo a lawm" ka kut a rawn hmer zui vawng vawng a, tawi tein min nuih bawk.



"Court ah chuan hnehna an chang kher lo ang mahse, ka rilru tibuai tu zawk chu Bawiha hian ka bula awm aiin a nu bula awm hi nuam a ti zawk a, a nuin a lak changa hruai ka tum a piangin a ṭap ṭhin a, a duhlo chungin hi tih luihna in ka hruai haw ṭhin, tuna a Accident hi engtin nge ka thiamloh a ka ngaihloh theih tehlul ang, ka ngaihsak lo a, ka enkawl ṭha tawk lo a, ka chan ṭep anih zawk hi" ti leh hrawkin Seat chu a nghet ri dawp a, mit chhingin a lu a tuai vut bawk, a bek pawng ṭawlh ṭawlh leh a insehruh fan fan hmel chu lo enreng tu tan pawh a nuamlo takzet a ni.



"Mimi, nang awmla chuan a awlsam deuh maithei a sin" mit la chhing reng chung chuan a lo ti leh a. Inneih a hmanhmawh chhan kha Christ a vang ani pakhat ang tih chu ka rinsa a ni a, heti em em phei chu a nih ka lo ring lo a, ka dem heklo, keimah zawk chu ka indem lek lek a, rilru siamfel daih tawh tur ka ni zawkin ka hria.



"Ufamkim" ka aw chu a lawi khawp mai.


"Umm..." tih zawngin min lo chhang a.


"Ka nei ang che mahse, min nghak la tunah mai chuan ka la thei lo a" ka tih chuan min rawn en nghal vat a, a mitmengah chuan beiseina tam tak hmuin ka inhria, a beiseina ang ka puitlin zo angem hrelo mahila ka theihtawp ka chhuah ang tiin rilru ka siam thung.



"Hmanhmawh suh, ka nghak thei lutuk che a nia" a ti ve tak nain a rilru a hmanhmawh hle tawh tih ka hre ve reng bawk a.



"Mahse, thil pakhat zawh leh duh che ka nei a" ka tih chuan a lo bu nghat nghat a.



"Ih e....min neih vat i duh chhan hi Christa vang ani tih chu ka hre tho a mahse, ka laka i rilru dik tak hi min hrilh rawh, nang hian min duh takzet em?" chu zawhna chhanna chu ka hriat chak leh chaklohna a inzat thuak ta ve ang, ka rilru ah a awm fo a, ka zawh ngei a ngai a ni.



"Christa vang chauh kawp che ka ni lo, ka duh che a lawm, min hmangaih tih ka hria a, kei min hmangaih ang thoa ka fapa i hmangaih ve ka beisei zawk a ni, i lakah hian beisei ka nei sang a sin" a tih leh chuan ka mittui a lo hnam ṭiam ṭiam a, ka hmangaih takzet tih a hria, ni e....ka hmangaih a lawm, ka hmangaih em vangin tunah pawh hian ka lung a chhia a, rawl chhuah meuha ṭah hawm hawm ka chak a ni.



"Anih min hmangaih ve em?" ka aw chu a zawi hle a, ani lah chuan min chhang let hauhlo, hmalam en vang vangin "An lo chhuak e" a ti zawi sup a, ka va hawi chuan Rosy-i leh a nu leh pa niawm tak hi an lo chhuak a, engemaw sawiin Damdawiin kawtah chuan an ding a, Motor ah chuanga an tlan liam thlengin ka bula mi nen chuan kan inbe leh tawhlo bawk.



A phone a rawn ri zui zat a, chutih laiin kan piah hla deuh hleka ding Rosy chuan a phone a hmang ve mek bawk a, Ufamkiman chhan paha "Kan lo kal" a tih laichuan kan awmna lam chu a lo hawi vang vang a, "Ti rawh le" ka bula ṭhuin a lo tih takah chuan ka tho chhuak ve nghal thuai a.



Rosy'n min lo nghahna hmun kan thlen chuan "I van fel ve, Bawihpuia chu ala muhil rih a, a lo tho har tawhlo ang" a lo ti sawk sawk a, an awmna Ward lam kan pan lai pawh chuan kei chu ka ngawi ran a, eng engemaw thil sawiin an ni pahnih chu an inbe mawlh mawlh reng.



"Zanin chu va haw phawt teh, i hmel hmuh a hahthlak emai" Rosy'n a tih laiin "Va haw zawk rawh, Mamuanan zingah min lo thlak mai ang" Ufamkiman a lo ti hluk a, "Ka haw dawn reng reng lo" pakhat zawk chuan a lo ti ve tlat thung.



Christa mutna kan thlen chuan a lo la mutui khawp mai a, ka rinai daihin a lo inhliam nasa a, a lu a sawh kak bakah a ngal ruh a lo tliak tel a ni awm e, naupang tawrh a tan chuan a tawrh chu ana ka tiin ka lainat takzet a ni.



Eitur ka ken sak ho chu Rosy ka pe a, lawmthu te min hrilh ve luam a, rei vakloah Christa chu lo harhin a nu a rawn lama, Rosy chuan pawmin khumah a ṭhutpuia, a ṭap reng mai bawk si a, hnuk a ti ulh ve ṭeuh mai a, Ufamkima lah chu a chiai deuh tlat hian ka hria, a awm hle hle theilo a, Christa pang te chu a va dek leh ringawt ṭhin a, kan awmdan chuan lung a ti zing khawp mai.




"A pang a lum leh ṭan anih hi" Rosy'n a tih chuan Ufamkima chu Nurse duty awmna lamah chuan a nghal nghal nul nul a, Christa kut ka va khawih chuan a lo lum hiam a, ka lam hawia min lo enin a ṭap hliam hliam mai bawk a, nau tlei fel em em ṭhin anih hre ve tu tan chhan a lainatawm zual kher mai.



"Tlem a tlemah a thi lo chauh a, ka lung hi a awi theilo" hnuk ulh ṭeuha Rosy'n a lo tih chuan chhan vak ngaihna ka hrelo a, Christa kut chu ka hum reng ringawt a, chutih laiin Rosy lah chuan a mittui a hru ve zauh zauh reng bawk a, han hnem dan tur pawh chu ka bangbo riau tawh.



"Mimi, lo en teh" tiin Christ a hliam an ṭhuina laite chu min kawhhmuh a, an tuam tlat vangin a hmuh theihloh mah se, a zau thaw khat tih erawh a hriat theih, "A lu ruh a sawh khawlo zo vek ang tih a hlauhawm a sin, ka khawngaih emai a, ka bula a awmloh aṭangin damṭhat ni hmel reng reng a la hmu theilo" a ti leh niah niah a.



"Lungngai miah suh u, naupang chu Pathian in a veng him bik an tih kha, an dam chak bik bawka reilo teah a ṭha leh mai ang" ka lo ti ve sap sap a.



Ufamkima lo let leh chu Nurse nen an lo inzui phei a, Nurse chuan damdawiin a chiu a, rei vakloah Christa pawh na chhawknain a chhawk ta a niang; a nu awm ngheng chuan a bei ta hle hle a, mittui la tling pam chungin min lo melh ve kiau a, a pa chuan a be sawm reng tak nain a chhang ṭha duh vaklo a, a hnuah phei chuan a nu awmah a hmai a phum tlat a, a enkawl tamlo tu zawk nimahse, nu te nge nge chu a dan a dang deuh ṭhin chu a ni.



Tlaiah Mamuana leh Ufamkima nu an lo thleng ve leh hlawl a "Kiman a riah pui dawn chuan Rosy chu va haw mai la, naktuk lamah duh leh i lo thlak anga" Ufamkima nu chuan a lo ti nghal zung zung a. Rosy chu lawmlo tih hriat zet hian lehlam hawiin a ngawi reng thung. Nu Nghaki chu a la duh tawk mai lo "I hman loh tak leh Mamuana pawn a thlak thei a" a ti leh deuh kher a, Rosy ngaihdan a ni ta vaklo aniang "Keimah ka riahpui dawn" a lo ti bak hluk a, an inmelh hrak hrak ringawt tawh.



Ufamkima a lo inrawlh a "Zanin chu awm mai rawh se" a tih takah chuan Nu Nghaki pawh chuan a sawi zui ta lo, keichu min lo enin "I van fel ve, i u pasal neih hi a ni si a kan lo beisei miahlo che a sin" a lo ti sawk sawk a, chutia min be zui siam siam reng chu Rosy chuan min lo en leh zauh ṭhin a, ka tan tak pawh chuan a nuam fahran biklo chu a ni.



Dar 4 bawrah min thlah a, kan haw dawn chuan Mamuana te pawh an la awm a, Christa pawh a khua a sik tawhloh vangin ngaihtuahawm em em a ni tawhlo. A nuin a awmpui tur chu thlamuanpui deuhna rilru ka nei lehta nghal a, Ufamkima erawh chu a lungngaih hmel khawp mai.



"Thingpui lo inkawi ta che" a tih chu ka hnial lo a, Usangzuala te in lamah midangin chaw an eidawn a ka hmanhmawh duh vak biklo, an buai ema ka awm lo tih pawh an hre kher lo ang.



An in chu a lo inkalh ṭhiap a, Mamuana te chhuak tur khan eirawng an bawl diam tawh a, Ufamkima inthlak laiin thingpui ka lo lum a, a inthlak zo chu Sitting room sofa ah bawkkhup zawng hian a mu a, a chau viau a ni ngei ang. Thingpui ka va chawi phei laichuan lo tho chhuak thuaiin "I hmanhmawh tawh em?" a ti zuai ruih a.



"Hmanhmawh lo e, mo neitu te inlamah hun an hmang hlawm a, an ni pawh an la haw lo ang" ka tih laimek chuan min lo banin a malchungah min pawt ṭhu zui a, min kuah nghal hlunin ka kokiah a khabe a rawn nghat dat a, a biang ka lo dehsak ve nghal thuai bawk.



"I rilru ti hah suh, a dam leh vat dawn a lawm, inthiamlo deuhin awmlo la, i thiamloh eng mah a awmlo" ka ti sap sap a.



"Min thlah duh lo mai rawh" ka ti tak nain min thlah lui ta tho a, ka nutei leh ka pa te hoin chaw an lo eimek a, ka unau te ho chu zanlam Programme awm an tum a niang, ka nu hoin an la rawn haw lo a, "I nu a la rawn haw ve nange?" Ka pa'n a lo tih chuan ka riat nawi khawp mai.



Umawipuiin min lo phone a "Present kan hawng dawna rawn thlawk phei rang rawh" a lo ti deuh hlur a, ka thawmhnaw thlakin intifai tawh lemlo chuan ka phei ve ta nghal a, ka va thlen phei chuan mi an lo la tam khawp mai, Umawii hlim nuisang hmel chu hmuh a nuam hle a, a awhawm rum rum mai hian ka hria.



Thilpek a dawng tam hle a, a hlim bawk a a nui ring ṭhin khawp mai, thingpui kan inlai chuan kan unau ho ṭhutna bulah chuan alo kal a "Mimite, ṭhi thar i nei a law?" a lo ti hmasa ber a, ka ṭhi chu rawn banin a thlek vung vunga "Ufamkima min leisak anih hi" ka lo ti ve zat a.



"Gold a mi, a va sial reuh ve a" a awt hle tih a hmelah a lang reng a, engmah pawh ka sawi leh hma chuan "Min lo kawltir rih teh a" a rawn ti zui leh ta reng bawk a.



"I neih ve reng kha" ka tih laiin "Mo thar ka nih hi, mi mit fukna ka nih lai te chuan nalh ve a ngai a lawm, reilo te ka kawl anga ka pe leh ang che" ka beng bulah a rawn ti sar sar a, "Mo thar pawh nimahla, an ṭhenawm khawveng te pawn ngaiah an nei vek tawh che sia, inchei leh incheiloh in awmzia a nei tlem dawn emai, hawh lo mai rawh aw, ka hausak hunah nalh deuh ka leisak dawn che nia" nui chunga ka lo tihsan chu uikawm min tih hmel khawp mai.



"Dawr kha enkawl ṭha ang che, ka rawn tlawh zauh zauh dawn che a nia, ngaihsak ṭha ang che" tih angreng chu min hrilh zui duah a, hna dang a nei silo a min rawn tlawh ngun viau chuan ka ring a ni.



Cake te kan zai a, kan ri lelu mai a, rilru tawt zual pawh a reh ve huaiin ka hria, Umawipuii te room tur pawh a zau nuam khawp mai, kan beisei ang aiin a thuam chhawm pawh a ṭha a, kan chhungte ho duhsak rawn a ni bawk a, an thuam mawi tak zet a ni.



Kan haw hnuah Ufamkima nen kan in be zawk a, "Naktuk hi Seminar a kal ka ngai dawn a, Mamuana Damdawiinah a awm ang, nang dawr i hawng dawn em?" a lo tih chuan ka la hawn rihloh tur thu ka lo hrilh a, inlamah chetna tur a la tam em a, ka buai dawn khap mai. "Tlaiah min lo sawm la, damdawiinah chuan rawn lan ve leh ka duh dawn a" ka tih chuan a lo aw ve mai bawk.



Zinga ka thawh ruala ka phone ka en chuan kan Unau ho Whatsapp group ah an lo phusa chiam hlawm a, an thilsawi ka en nak chuan Umawii an ho nuih hi a lo nia. Umawii chuan kan unau Group a USangzuala Add ve a lo dil a ni awm e, ka ni Hmingliani fapa UThanan "Nizan khaw awmdan sawi phawt la kan Add ang?" uang fein a lo ti a, midang ho lahin an lo tui hnih luai luai bawk a, Umawii lah chuan "Van khi Pit dawr tia lekin ka hmu" tiin a lo chhang pek anih chu.



Inhnuaia ka chhuk chuan Umawi chungchang mawlh chu an lo sawi a, kan chhungkaw whatsapp group ah pawh a lo va dil tho a ni awm e, kei ka awm ve lemlo a, an lo nuihpui bawk bawk hlawm a, a la tharlam emai ti a Usangzuala an Add sak duh rihlo chu "Intuithlar ang u" a lo ti leh pek chu niin.



"Fel deuh khan awm ang che aw Mawipui, fanu ang taka an en che a an duat vang che khan mo i nihna theihnghilh lo la, helaia i tih ṭhan zawng zawng kha tih vek tum lo la, a lan pawh rawn lang zut reng reng suh, kan ta i ni tawhlo a, i pasal chhungkaw ta ini tawh a, kan thu aiin an thu in i lakah thil a ti thei tawh zawk a nia" Patean a lo ti dap dap a. "Tunge i nih a?" tih ngawtin Aumawii lah chuan a lo la chhang zui a, a chimawm ṭhin a nia.



Nilengin inchhung sekrek khawihin ka buai a, bel ka nawh laimekin Umawipuiin min lo Phone a "Mimite, kan mo kawr hak kha ka Room bangah khan kan khai a, vawiin ah i dah nghal loh chuan Late fee kan chawi dawn a nia, lo va dah lawk mai rawh" a rawn ti chuk chuk a, sana ka en lah chuan dar hnih a ri dawn thuak tawh a, chawpchilh deuh deuha thil a ti ṭhin hi chu ka ning ngawt mai.



Ka insiam laimekin Romawian min lo Phone a, "Tinge dawr i hawn loh a?" a lo ti he haw a, Umawii pasal neih thu ka hrilh chuan ka sawm ve lo chu a vui khawp mai a, keipawh chu ka inthiamlo ru hle a, ka lo mangnghilh daih a, a vui pawh awm ka tih pui a ni.



"Tlaiah chaw lo ei la" ka ti ta ngawt a, a phur leh ta pheng chuan "Ka rawn kal nghal" tih leh Phone dah a rual a, keia chhuah tum mek pawh chu min ti khawlhkham zo leh tawh.



An mokawr lah chu ka Cousin te hoin ha chhinin thla an lo lakpui a, ka dah dawn vang chuan ka khungtir sawk sawk a ka han khai chu a rit zek mai, bawrluka inhnuaia ka khai thlak laichuan Romawia a lo thleng ve chiah a, Taxi lak ngailoin ani hian min hruai mai sela a ṭha ang.



"Hei hi min va dah pui teh" ka tih chuan min hniallo nasa mai. Ka thil khailai chu lo banin a khai chhuak nghal tharh a, kawng tluan mai chuan ka sawm ve lo chu a vui a, ka lo nuihsan ringawt chu min phun khum hluk hluk bawk.



Mo kawr kan dah zawh ah thil eiturin MC ah kan lut kawi a, kan thil ei zo kan chhuak leh chuan Lift aṭanga Lucy leh Regina te lo inzui chhuak ka hmu hawla, ka pen lai ka tawp chiang hle a ni! Regina-i ngei a ni tih ka hailo, khami zan khan hmu chiang viaulo mahila, Social media ah a thlalak ka hmu tawh tlat a, a hmel pawh ka hrechiang tawh khawp mai.



Min hmu lo hlauh a, ti ti mawlh mawlh pahin min hnungchhawn zawngin an kal zui a, ka rilru ah ngaihtuahna mak deuh a rawn awm nghal a, keimah ngei pawh chuan ka awihlo dawn dawn a mahse, ka mit ngeiin ka hmu zo chiah bawk si a.



Kha mi te pahnih kha an lo inhre ṭha hle anih chuan khami zana ka thil hmuh khan chhan dang a nei thei tlatin ka hria, ka ngaihtuah let rauh rauh a kha mi zan khan Lucy khan hmanhmawh deuhin min lo ko chhuakin an ni pahnih awmdun laikha min khawhmuh ta kha a nia, inthurualin an lo tum rêng zawk tihna em ni?



Chutiang anih chuan Lucy leh Regina te inkawp hian chhan ṭha tak a nei ngeiin ka ring. Lucy chu Ufamkima ṭhian a tleirawl lai aṭanga a kawm tawh a ni a, Regina zawk hi khawilai aṭang khan nge a lo tel ve?



Awi leh!....Ufamkima te nupa inkara buailai khan ani hi Ufamkiman a kawp anih kha! Engthil nge maw ka hriat tak hi le?





(End of chapter - 18)

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)