ZUNZAM (MIZO LOVE STORY) by Ahmangaihi violette Khiangte (Completed)

Moderator: writers

Ahmangaihi violette
Posts: 148
Joined: February 1st, 2020, 3:14 pm

Re: ZUNZAM (MIZO LOVE STORY) by Ahmangaihi violette Khiangte

Unread post by Ahmangaihi violette » September 7th, 2021, 10:32 am

ZUNZAM - by Ahmangaihi violette khiangte

CHAPTER - 7




Bathlar chhuata min nghah ruala din mai ka tum chu ka ke a zawithla hnawk a, ka sawp thla mai tur chu min rawn pawm bet ve rawk a, tum lawklo zeta rawn che chhuak thut a ni vei nen min pawm beh dan chu a fuhlo kher mai, ka zak bawrah a kut lehlam chuan a vuan a, a ban puam chuan ka hnute chu pher bawih khawp hian a rawn nawk bawk a, ka hriat chhuah rualin ka thawk a tawp chawt lehnghal!



"I ke i ulh a mi?" min pawt thoin ka ke chu a bih vut a, "Bilh chiahlo, a na vaklo" ka ti tak nain na chu ka ti ve reng, awmlo sela chuan ka ṭhen chawk chawk ang chu mawle.



"Ti rawh, inchhungah" tih paha min luhpui mai a tum chu "Ka huh nasa emai, kan ding thlithlawr phawt ang, lo va lut rawh" nui lui zetin ka ti a. "I hritllang mai anga sin" tih pah chuan min luhpui ta tho a, ka rah zawng chuan ka ke chu a hit mup mup mai hian ka hria a, a na ril ngaih ngaih khawp mai, ka bilh sual ve deuh chu a nih hmel e.




Dawhkan bul Chair-a min ṭhuttir hnuah "Towel kan la a nge" tih pahin Room lam a pan a, a hnunglam aṭanga a kekawr mawng bal huh hnuang ka hmu chu ka nuih a za ru khawp mai a, a rawn tlu lai posi ka mitthla zui kher nen tum loh deuh chuan ka nui chhuak hawk a, phawk fe a a rawn lehhawi rual chuan lehlam ka hawi nghal vat thung.




Rei vak lo ah a rawn chhuak a, a thawmhnaw huh pawh a la thlak biklo. a Towel min rawn pek chuan ka inhru sawk sawk a, ka ke na pawh chu a zia ve telh telh chuan ka hria, a tir ang em em chuan a na lutuk ta lo, ka ban ka hruk zawng chuan a thip ser ser a, ka en nak chuan a lo philh sen sung chu niin.



"Ka tlawh na em lo che maw, ka hmanhmawh lutuk a" a tih ri chu a inthlahrun hmel kher mai.



"Na lo e" ka ti mai a, ka mawng leh kawngbawr kham ut ut erawh ka hre ru rauh rauh thung a mahse, na chu ka ti duh em lo, nuihzat lamah a kal zawk tlat.



"Ka nu kawr ha rih mai ta che, i ban te kha damdawi kan hnawih dawnnia" lo kun hniamin ka ban chu a lo en a, a kuta ka ban a rawn khawih laichuan ka thin a phu dêp dêp mai hian ka hria, a lo kun hnai angreng si a, a Hair gel rim pawh ka hre hnai viau a ni, a rimtui em em lehnghal a!



"Lo kal la" a ding mar vut chu ka lo en chho ha mai a, a nu kawr hak em chu ka hreh deuh a mahse, ka thawmhnaw hak lah chu a la far tluk tluk lawi bawk si, hnial duh viau mahila hnial thei dinhmunah chuan ka ding chiahlo a ni.



A nu room lamah chuan bai suih suih chungin ka zui phei a, chhuat ka rap chiau phei a ni hawt mai. Room kawngkhar bulah chuan dingin ka lo nghak ran a, thawmhnaw bawm a hai mual mual laichuan kelawngin a awm tih te ka va hmu a, a ke sir lah chu a han no em em lehnghal a, hmeichhe kesir ang mai a lawm maw anih le!



"Lo kal ta che" a rawn tih takah chuan lai angreng zetin ka pen lut a, a thawmhnaw min lo pek chu lak paha chhuah leh mai ka tum laichuan "Hetah hian inthlak mai rawh" tih leh min kal pelh a rual a. A chhuah hnu chuan ka inhlip nghal sawt sawt a, a nu kawr chu thawl deuh takin ka ha thei mai a, a kekawr erawh ka ha mawi lo hniang hnuang khawp mai, a kap a fualin a bawp a tawi leh turh a, ka ṭawp hnuk mai hian ka hria.



Room kawngkhar ka hawn leh chuan choka chhuat huh a lo nawt hrut hrut chu ka va hmu a, chhuak phei ta lawklo chuan ka thlir reng a, pawn lam thawm a ri ring ṭha bawk a ka thawm a hre hauhlo, ka thawmhnaw huh keng chuan ka phei zui thuai a, min hmuh rualin ka thil hak chu a rawn melh vung vung lehnghal a, mawi chu a tih bik hmel vaklo, engmah phei chu a sawi lemlo a.



Inhnunglam bathlarah chhuakin ka va zar a, ka luh leh laichuan Sitting room lamah chhuat huh a lo la hru a, "Ufamkim, khawi keiman ka lo hru ang" tih pah chuan a chhuat nawhna kenlai chu ka va chuh rawk rawk a, min lo pe ve mai bawk.



Patari room chhung thleng chuan ka va hru a, ka chhuah leh chuan a lo awm tawhlo a, a inthlak ve niawm tak a ni. Choka lama a nawh kimloh lai te chu ka hru leh thuak thuak a, kan tawlhthluk dan ngaihtuahin ka nui leh suk suk ṭhin, vawiin zet chu ka che fuhlo tih phal chi ziazang a nilo.


"I kekawr chu!" a rawn ti ri ah chuan ka ding ngil zawt a, ka hnung lawkah a lo ding leh reng tawh chu niin, a Hoodie senduk hak lah chu a han inhmeh laileng khawp a!



"Tinge?" ka ti let thuai a.



"A....eng ni lo e" inher vutin Sofa lam a pan a, min hnungchhawn zawng chuan ṭhuin a murem sawt sawt a, keimah chuan ka nui ka nui ringawt mai.



Mahse le....ka kekawr mawng ka han en leh nak chuan ka kekawrte sen lang kulh khawpin a lo val kuau chu niin, kekawrte thlak ve tawh heklo, ka zah a ka zah zia mai chu!



Hmanhmawh deuhin Bathroom ka pan a, zau deuh deuhin ka va ṭhen vak vak ringawt a, awmzia a awmlo kher mai, Bathroom darthlalanga ka en lah chuan ka mawng thla te pawh a lang thei riak mai hian ka hria, zah luatah ka sa pup pup mai a, ka taksa hit sung sung te chu khawvawh vang a nilo tih ka chiang khawp mai, tiang te chuan va chhuah phei leh ngam chi pawh a ni tawhlo reng reng, min hmuhlai khan chhuat nawtin ka lo kun mek emaw a nia nga, awi leh.......!!!



Rei deuh chu Bathroom ah chuan ka tawm a, ka chhuat nawhna pawh chu vawi thum zet ka su nawn tawh, ka zah lutuk vang chuan ka ṭap lo chauh a ni mai a, vawiin nuam ka tih na kha a bo chiang leh ta khawp mai.



Dar kar chanve bawr vel chu ka awm mai thei a ni, Bathroom kawngkhar lo kik ri vang chuan a thochhuak thuai a, ka hawn rualin UFamkima hmel ka hmu zui bawk a, ngaihṭhatloh hmel deuha min lo en chung hian "Thingpui ka thli a, enge i tih reng a" ngainat awmtaka awki dam hian a rawn ti a, eng khaw sawi set set loin ka kekawr mawng chu ka pawt khawr nghal thawr a, a hmuh hlau zetin ka chhuak ṭhem ṭhem bawk. Min lo enzui hlau chuan ka inher let leh vut a, zah zelah ka han nuih tlawn ringawt pek a.



"I inti sil awng viau e law?" phawk lek lek hian min en a.



"Umm...sil deuh" ka kawng dawm chuan inchhung lamah ka tawlh lut hrat hrat a, min kalpel mai loh vang chuan ka inher mai ngam biklo, hnungchhawn zawng chuan ka tawi khawmuang lui a, pawn ruah sur leh chhum zing phui mup te chuan ka lung a ti zing deuh deuh mai.



"Thingpui a dai ṭep a nia" tih pah chuan min kal pel ta hram a, chu veleh hmanhmawh deuh chuan ka zui nghal a, ka mawng lam chhawn lo thei ang ber chuan Chair ah ka ṭhu thla a, a hmu vek tawh nain hmuh nawn tir leh kher chu ka duh bik ṭhak nang.



"I khawi laiah nge na a?" a thingpui in zauh pah chuan min lo zawt a.



"A na ṭhem ṭhum vek" ka kawng hnunglam chu ka han dawm leh rih a, ding ngam tawh heklo, ka ṭhut tawp a ngai miau a, ka na der vel tawh mai aniang chu.



Dawhkan kil chuan Phone ka khawih reng a, Umawipuii text-in ka chet chhiat dan te chu ka va hrilh luam a, a rawn nui ringawt a, mi chu a hnem lo ve ṭhin khawp mai. Ufamkima chu Room lamah a awm ta hlauh a, ka awm a nuam huaiin ka hria.



Dar li velah ruah chu a rawn han ta hlauh a, ka Bag akin haw turin ka inbuatsaih zung zung a, ka bag chu ka mawng hliah tur tawka fualin ka ak bawk a, Bag lian zawk ka ah ni a ni hlauh chu a tihzia viau a ni, ka thawmhnaw huh Polythene a ka khung mawlh mawlh laiin Christ-a te pafa chu an lo inpawmphei a, "Khua a chhe sia, kan thlah dawn che nia" Ufamkiman a lo tih chuan ka hnial rang khawp mai.



"Nihliap tal kha hawn rawh, kawng lakah a rawn tla leh mai thei a nia" a tih erawh ka hnial ta biklo.



"I nawm loh chuan min lo hrilh dawn nia" a tih chuan ka lo nui sak a, "I lo inthlahrung a nge" a ti nawn leh sup a, amah zawk chu a inthlahrun hmel zawk hian ka hria, hmmm...pawilo mai; enge ka mawng a rawn tlawh thawr ni.



Christ-a biang ka piai leh zet hnuah pawn lampanin ka kalchhuak a, Christ-a chuan min ngen deuh a, an inthlem ri te pawh ka hre pha reng nain ka hawi let duh tawh lemlo, ka hnung lama ka Bag ah chu a tawlh sawn loh nan ka vuan nghet hle ringawt tawh.



Pawn lam chu a vawt ṭha khawp mai, ka khur phei hlak hlak a, ka kal chak sauh sauh bawk, ka hnar thip tuk vang chuan ka hritlang dawn a nih ka ring, in ka thlen veleh ah damdawi ka ei anga ka mu hmak ang mawle.



Kan dawr kawt ka thlen chuan Umawipuiin kawngkhar a lo kalh mek hi ka va hmu a, "I va rawn thleng fuh chat chat ve, a vawt lutuka hawsan che ka lo tum hman a" a tih chuan chhang loin ka ding ngawi reng a, a kawngkhar kalh zo lo kal phei chuan "Khawimaw ka lo en chhin ang" tih leh min pawh her a rual a, " A ro deuh tawh a, a lang vak tawhlo" ka tih lai mekin ka mawng chu a rawn beng thawk thawk a.



"I kekawr hak a pan em anih hi" nui hawk hawk hian a ti a, rang lutukin ka Bag chuan ka lo khuh leh nghalvat thung.



"Pathlawia chuan i mawng bawl pawh a hmu vek dawn anih chu" a la ti zui hram a.



"A bawl bawk lo e" vin zeta ka tih chuan ngeiawm fe maiin a mitko a san ak ak a, "A biang veilama khuavang tal chu a hmu hrim hrim" a ti leh kher, min ti zak thar leh ringawt a lawm mawle.



Kawngtluan chuan min sawisa phei a, ka thin a tirim hlur mai a, min biak leh pawn ka chhang ṭha peih tawhlo "I mawng i hmuhtir hma mah mah, a kum a kum ka ngaihzawng Sangzuala takngial pawhin ka mawng a la hmulo hrim hrim kei chu" a ti zat zat a, ka melh thip hle ringawt mai a ni.



In ka thlen veleh ah ka inbual a, hritlang damdawi eiin ka mu nghal hlun a, chawei tura ka nuin min lo koh pawh chuan ka tho chhuak peihlo, chaw eikhamah Umawii lo lutin min rawn nuih nghal kur kur a, "Kal teh i ninawm" ka tih pawh chuan kal duh mailoin ka bulah chuan rawn mut teh ṭalh a tum a, "I la na anih kha, khilai ang zawngin kal tir mai rawh" te chu a la ti tak deuh deuh a. Ka bula rawn inthawlh pahin min rawn kuah nghal sawt sawt a, lehlam ka lo hawisan hmak thung.



"Mimite, vawiin chu i che ṭha khawp mai, ka Nail Polish Stock zinga mi saw i duh ber i thlang dawnnia" a rawn sawi chhuah takah chuan ka hrechhuak leh zawk a, "Enga tinge vawiin khan mipa damdawi te i rawn zawrh ve ringawt a" vin fe a tih pah chuan ka inher thut a, a beng bulah ka va au a ni ber.



"Vak vak che chuan" a ti deuh hluk a.



"Min ti zak leh lutuk mai" ka ti zui hluk chu a nui vur vur duh chauh a ni.



A phone khawihin rei deuh chu ka khumah chuan a mu ve a, Order a siam anih hmel tu tu te emaw Phone a be kualin a thil zawrh chung chang ngawt a sawi a, Prof. Famkima dawmdawi tur te pawh chu a chah telin ka hria.



Ka room a chhuahsan laichuan dar riat a pel tawh a, ka mut a chhuak mailo a; ka ril a ṭam hle tawh thung, inhnuaiah chhukin Bawnghnute leh Chocos ka chawhpawlh rawk rawk a, ka ṭam tawh bawk a niang ka ei ṭeuh mai.



Ka khuma ka let leh hnuah lukham hnuaia ka phone dah chu la chhuakin Message awm ho chu ka en a, Prof.Famkima Message lo awm ka hmuh chuan ka ṭhu chhuak hluai ringawt.



"Enge i an a, i nuamlo viau em?" tih hi min lo thawn a, zah lam kha chuan rilruah hmun a chang leh tawh manglo, chutia min rawn ngaihven ve chuan min ti hlim veng veng mai a ni.



Chhan let dan tur ngaihtuahin a Type ṭha sek a, a tawp a tawpah " Ka sil lutuk" tiin ka va chhang a, chuti teh tawpa chhan chu a fuh lo ang ka ti leh hnuhnawh a, Delete leh ka tum laimekin a lo en a; ka delete hman tawhlo, Typing tih a rawn lang zui tlat.



"A van zialo ve, vung te i nei em?" a lo ti leh a, ka phone en chuan ka nui leh vur vur ṭhin.



"Vung hranlo e, ka sil deuh mai mai a niang, zingah chuan a reh leh mai ang" tih ka thawn let a.



"I nawmloh chuan naktuk chu i chawl dawnnia, Christ-a chu duh leh a nu te in lamah pawh ka dah thei tho a, inthlahrung duh lo la" min ngaihtuahna ah ka lawm viau rualin chawlh erawh ka tum lo nasa mai, chawlh pui hluai thamin ka na pawh a nilo a, bakah a nu te ina Christa dah kha a duh vaklo tih ka hrereng.



"Chawlh kher pawh ka ngai lo ang, ka lo kal dawnnia" ka ti leh a, a Typing rei hle a, ṭhu chhuak meuhin keiin ka lo nghak ran bawk.



"I theih chuan lo kal la, i mu mai mai dawn nia, ka rawn tlawh na che kha a ni em i na lai chu?" a message ka chhiar lai chuan ka nui chhuak huk a.



"Ni e mahse, a na vaklo" ka chimawm chhuah chuan ka va tih leh a.



"Engtin chiah nge a awm?"



"A sil deuh a"



"A vunglo tak tak maw?" a tih leh chuan ka nuih a za telh telh mai.



"Vung pawn ka hrelo, delh zawng chuan a na ve deuh"



"A ruh te a ni lo maw?" chhan dan tur ka van riau, tunah hian Prof nen ka mawng chung chang kan sawi dun mek a ni, kan sawi sexy bawk si, insum deuh chuan kan sawi ve ve in ka ring a ni.



"A ruh chu a ni lo ang, min ngaihtuah suh a dam leh vat mai ang" engtin tak lo chhang leh ang maw ka tih laichuan "Ka ngaihtuah khawp mai che, i mut theihloh phah te a hlauhawm a" a rawn ti a, ka ṭhen nghal ṭhâ mai, ni e....keipawh hian ka muttheih loh phah ka hlau lutuk tlat, a chhan chu ka hlim em a lawm mawle.



"Nangpawh i tlu sil awng ve lo maw?" tiin ka zawt let ta daih a.



"Kei chu engtin mah ka awm lo mahse, ka hritlang dawnin ka hria" Message a chhang rang thei reuh lutuk chu nuam ve mai mai tak a ni.



"Tui lum te in la, i in enkawl ṭha dawnnia, inthuam lum ṭha bawk la" ka va ti deuh duah a, ka zak leh hnuhnawh angreng, ngaihloh lamah a lo ngai ang tih pawh ka hlau, ka ngaizawng tih a hria a nih phei chuan a fuhlo chho vek ang tih pawh a hlauhawm a lawm.



"Ni e, nangpawh i in enkawl ṭha dawnnia, muttui le" a rawn ti ta a, 'Muttui' tih ka thawn let thuai a, kan inbiak zawh hnu chuan a mu nghal aniang a Online zui ta lo a, kei erawh ka muhil theilo tak tak dawn anih hmel, kan inbiakna chu vawi sawm chuang ka chhiar nawn tawh a, banga a thlalak ka tar nen chuan ka bih tawn chhen a ni ber e.




Zing ka tho chu ka sil urh tak tak a, ka ke rek ah chuan na hluah silo hian min kalh relh relh mai a; a duk deuh lek lek bawk. Ka mawng pawh ka inṭawng chhiat nge mawni han ṭhut vel a nuam zan lo. Mahse, chawlh phah erawh ka tum hauhlo thung, ka hna hi ka tui bawk a; rintlak tak zelin te pawh ka ti ve a niang chu.



"Vawiin chu Hub-ah peng kawi ila" Umawipuiin a tih chuan ka chakloh lam tak a ni. "Ka tlu sil awng deuh a, nangman lo deliver mai la" ka lo ti chu min hniallo ve teh tlat a, "Tlaiah ka lo kawi dawnnia" a ti hlauh mai.



Kan chhuah hma chuan a Nail polish Stock zinga mi chu ka duh ber ka thlang a, a man tlawm te te hlir chauh chu a lo Stock a, nge ni a a man to ho a dah thukru zawk ni, min entir ho chu za leh tih man ho hlir a ni a "A dang ka hralh zo tawh" a ti deuh tlat a, min melh hruk hruk danah chuan ka ring vaklo.



Dawrah pawh pengkawi tawh loin ka kal tlang a, ka va thlen chuan Christ a chu kawtah lo ṭhuin JCB a lo khal a, min hmuh chuan min lo be ve vat a "Garbage Truck ka hmu a sin, a lian lutuk" a lo ti var a, "Bawlhhlawh in paih a mi?" ka tih chuan a bu nghat nghat a. "I van tho hma em em, mam mam i ei tawh em?" ka tih erawh min chhang zui tawh lemlo.



Kawngka ah Prof chu a lo lang ve vat a, ka va en chuan chik deuh hian min lo en a, engmah ka sawi hma a min lo nuih suk vang chuan ka lai titih der lehnghal. Vawiin chu Kamis chhawhchhi buhpawlh rawng a ha a, a inhmeh kher mai.



"I nuamsam meuh maw?" nui lek lek a tih chuan kawngka lampan chuan ka kal ve zat a, "Nuam e, enge i hritlang chu a an a?" ka ti nghal luam a.



"Kei chu ka ṭha viau e, vawiin lam pawh ruah a sur maithei a ni hei" a sawi pah chuan pawnlam a thlek zauh a, fur lai a ni bawk a, tunkar chhung chu khawchhia chuan a awh ka ring a, keipawh ka inha lum sa khawp mai.



"Tak a, i nu thawmhnaw kha ka su a a la ro silo a, ka lo keng rihlo a nia" a Phone bihlai chu lo hawi chhuakin "A pawiloh chu, vawiin chu insu duhlo la, bawiha lo awm rawt mai rawh" nuisangin a ti leh a, tukkin chu a hmel hmuh a nuam takzet a ni, a nuisang reng bawk si a rilru a tibuai lek lek zawk dawnin ka hria.




Kal mailo chuan a la ṭhu ve reng a, hmun te phiata chhuat ka nawh zawh chuan dar 9 a pel thui viau tawh, Vanglaini chhiara choka lama a ṭhu chu ka va melh leh zauh ṭhin, chutih laiin Christ a chuan min lo ko a "Ânu.." a rawn ti chu a pa nen kan lo hawi phawt khawp mai!




A ṭawngsual tih inhre lehin "A nu Mimi ka JCB kawngpuiah a tla" hlauhthawn hmel deuh hian a lo ti a. Rang deuh chuan tlan chhuakin Step ah ka penthla hlawk hlawk a, inhnuai dawr kawta JCB lo let bal chu ka zuk hmu ve mai a mahse, a hma lam lei haina chu a lo tla hrang nawlh a, in chung ka han hawi chhoh chuan an pafa in min lo thlir reng a, ka thil ken lai an hmuh chuan an meng hnual deuh hian ka hria.




Step a ka chho leh laichuan Step hmawrah Christ a chuan men ṭiau chung hian min lo nghak a "JCB kha a chhia mi?" ṭah chhuak aw deuh hian a lo ti a, ka kut a ka ken lai chu lo banin a mittui a luang ngiai ngiai reuh a, tih ngaihna tak pawh ka hrelo.




"Bawiha" a pa in a lo tih rual chuan inherin a pa lamah chuan a tlan phei a, a pa chuan alo en sak vat a "A thar lei a ngai a nih hi, Bruder kan lei dawnnia" a fapa lu a chul sak hian a ti damthluam a, Christ pawh a lungawi chawpchilh ve mai a, inchhunga an inzuilut chu hnunglam aṭang chuan ka lo thlir dauh dauh reng, ka rilru chu sawichhuah ngam chi pawh a nilo, mihring damlai han awh ngawt mai chu! An pafa chuan ka awt miau mai bawk si, a.....'Ânu' ti a min rawn koh vang vek a ni, ka pasal leh fapa han ni mai sela tih rilru min puttir ringawt a lawm mawle.



"Mimi tlaiah Toyland ah i lo va kalpui dawn a mawni le?" inchhung ka luh hnua UFamkima'n a lo tih chuan "A pawi hleinem" ka lo ti ve vat a. "Duh leh ka rualin lo chhuak ula, ka enpui nghal dawn che u nia" a ti leh a, ka hniallo kher mai.



Christ-a thawmhnaw ka thlak leh te te hnuah kan inzui chhuak a, Prof-an a Motor seat hma min lo hawnsak vel te chu nuam duh ve mai mai tak a ni, a changtunu ka ni ta emaw ka inti rum rum mai a lawm; ka ṭhut zawnga ka mawng na erawh ka hre ru rauh rauh thung, Christ-a ka pawm bawk nen ka ṭhu nuam vaklo.



"Vawiin chu i hmanhmawh vak nange?" Prof-a lo ṭhulut chu ka lo zawt vat a.



"Vawiin chu Class ka nei dawnlo a, chawhnu lamah Meeting naah ka tel ang" a sana chu a bih vut a, chumi hnuah a tlan chhuak zui a, a Motor khalh te reng reng chu a damdup mai a, a kut che vel te chen chuan ka tan hmuhnawm tham a tling zel hi ka thiam loh nge ama thiamloh zawk ni?



Toyland kan thlen phei chuan ka naupawm lai chu a phur khawp mai, a pa in 'I duh thlang rawh' a tih pawhin thlan tur ber hreloin a hawi kual a hawi kual ringawta, dawr nghaktunu ho chuan kan lo nuih leh ringawt ṭhin.



Garbage Truck lian zet chu a awt tih ka hrereng mahse, a ngen ngam chiahlo niin ka hria, a pa lah chuan "JCB chiah kan lei ang" a lo ti deuh tlat a.



Ka enpui laimek chuan dawr nghaktunu chuan "Fapa in van nei hmelṭha em em, thu a awih hmel sia" ka bulah chuan a lo ti zauh a, ka lo lai em em ringawt a, Prof hmel ka va en chuan thildang en paha a lo nui ve suk chu ka va hmu a, a nuam ve reng mai.



"Mama inchungah pawh kan nei a sin, en ang aw" Dawr nghaktuin a tih chuan Christ chuan a zui ve vat a, Prof thung chuan Lego a en mual mual a, lei a tum a nih hmel viau mai, a en ho lah chu Christ-a thluakin a la pha lo nasa mai a; ama tan a ti anih ka ring.



"UFamkim, Garbage truck a awt zawkin ka hria" va kal hnaih paha ka tih chuan "A Birthday Gift ah ka lo hual a, JCB a neih loh chuan haw hunah a sawi leh tho ang" min en lemlo hian a ti mai a, a thil en chu a en uluk ngang mai bawk.



"Engtik nge a Birthday?"



"Thlathar ni 4 hi a nia" ka rin aichuan a hnai, tunah thla a tawp leh ṭep tawh.



"Puzzle hi i tih pui peih em, school a lut ve ṭep tawh a, thluak sawi zawi nan" a ti leh chuan ka lo bu nghat a, Numbers leh Alphabet Puzzle cho chu ka laksak nual a, Christ a te lo chhuk leh chuan a duh zawng an han hmu lo aniang kut ruakin an lo chhuk a, "In naute hian a ṭha chi a hre reuh lutuk" dawr nghaktuin a tih laiin Christ chuan dawhsana JCB man to chi chu a lo kawk va a, a pa chuan a hnialsak hauhlo lehnghal, a man lah chu an to laileng khawp a sang ruk man dawn a ni.




In a min dah leh zet hnuah a kal ta chauh a, a kal chhuah hnu lawkah ruah a sur lehta zui nen Christ chu khumah ka mutpui a, ka Phone ka khawih laiin anin khumah chuan a JCB thar chu a khal a, rei vakloah chuan a mut a chhuak ta deuh a niang min rawn ngheng hnai talh talh a, a meng khup lap lap tawh mai, a JCB dahṭhat sak ka tum chuan a duh tlatlo, ka mut ṭhat tir hnu pawh chuan a la kuah bet ṭai a, a thla te ka laksak a ka Status ah ka hmang zui bawk a, Umawipuiin a rawn hmu leh hmasa ber a, mi rawn chhan let dan lah chu...



"I awt thlawn a nge" a rawn ti. Engtin nge ka awt tih te a lo hriat leh hmanhmawh tawh ni?



"Ka awt bawk lo"



"A pa i awt" hram hram chuan "Awt e, awt e" ka va ti deuh chiam a, min chhang let duh tawh hauhlo.




Chhunah Prof.Famkima chuan min lo Call-a "Enge lei ngai mamawh kan nei em?" a rawn tih chuan choka ah pheiin ka va enkual dan dan a, Surf leh thlengsilna tur sahbawn ka chah a, Phone a dah dawna "Ka lo haw har lo ang" a ti deuh sup chu hriat nuam tak zawng a ni, ni 'e....lo haw hma teh pa a' han tih deuh hnap a chakawm viau mai, kei hi ka diklo telh telh, beisei ka nei miahlo ang ti a hna thawk kha ka nia, ka thil ngaihtuah ṭhin hi a zahthlak lam mah chu a ni, insum ka ngai khawp mai.




Dar thum dawnah a lo haw a, ka thil chah ho pawh a lo hawn thlap a, theihai hmin a lo khai haw ṭeuh bawk, a inthlak laiin thingpui ka lo lumsak a, ka siamlai mek chuan Christ a nen sitting room ah TV an en dun a, chutih lai chuan kawngka ah hmeichhe pakhat a lo lang hlawl a, ka hmuh thut vangin ka hamhaih deuh e tihloh ah chuan tunge tih ka hailo.



"An awm em?" a ti zawi sep a, thlalak aipawhin a takah Rosy chu a hmelṭha zawk, nu lianpui leh ngo suah mai a ni.



"Aw.. saw lamah sawn" Sitting room lam ka thlek zauh hnu ah lo lutin Prof te pafa chu a pan phei nghal a. "I va bang hma ve" a tih ri ka hre zui zat bawk.



"Tinge i lo kal duh a, a remlo ka tih kha" Prof chuan a ri bul bul a, "Enge a remloh na, awmpui kuta dah ringawt ka duh hleinem" Rosy chuan a ti ve thunga, an fapa chungchang an sawi anih hmel.



"I bulah pawh awm se i enkawl tak tak hman chuanglo" Prof-an a tih leh laiin "Engmah i hrelo, ka enkawl hman vangin a lawm lo lak ka tum le" pakhat zawk chuan a ti ve hlak a.



"Tum buai duhlo mai rawh, i tan a buaithlak mai mai zawk ang" Prof aw chu a damthlup reng thung.



"Buaithlak se ka tum bik nang, a buaithlak loh vang a lawm, a reng rengah a va cher sawt ve a damlo a mi a?" an thawm chu a reh zui dak a, thingpui lo va chawi phei pawh chu ka inthlahrung angreng.



"Bawiha, ka bulah i lo awm duh em?" Rosy'n a tih leh chuan Prof rum nghut ri ka hre zui a. Christ a lah chuan a lo aw ve mai bawk, a nu chu a ngai ve deuh tawh a niang ka va phei laichuan an nufa in an lo inpawm ran a, pa ber erawh a hmelah a lawm vaklo tih a hriat theih.




"Min lo siam kep a law?" a thingpui ka chhawp sak laia Rosy'n a lo tih chuan "A hang a nia, Kurtai i duh em?" ka lo ti ve vat a. Chutih laiin "Mimi, Bawiha kha room ah lo va luhpui lawk teh" Prof chuan a lo ti hluk a, Rosy'n rum zetin a lo melh zui bawk nen awm an tinuam lo viau mai, Christ a lah a nu malchungah a ṭhu mek bawk si a, chet ngaihna min ti hrelo zo a ni ber.



"Kaltir rawh" Prof bawk chuan a ti leh a.



Lai deuha kei ka lo ding chu Rosy chuan min lo en hian "Lo va luhpui lawk rawh" tih pahin Christ chu min lo hlan a, lo ban ve vatin Room lam chu ka pan pui a, kawngka ka khar hnu chuan an ṭawng thawm ka ngaichang ran bawk.



"Enge i rilruah hian awm ṭhin le, ngaihzawng nei reng chungin naupang i enkawl ka remtilo, ka fapa hian pahrawn a hrawn ka phal hauh hleinem" Prof aw chu a ringlo nain a chang ṭha ta khawp mai.



"Tunge ngaihzawng ka nei ti, i hriat sual anih chu, nangmah zawk anih kha ngaihzawng nei, keipawn ka fapa hian nuhrawn a hrawn ka phal biklo" Rosy'n a tih laiin Prof chu a lo nui hawk a. "Sawi zawh vek tawh hnu sawi leh ṭhin hi ka peihlo a nia, Bawiha enkawl hi chu rawn tum buailo mai rawh" a tih leh laichuan Christ chuan ka kawr hmawrah a rawn pawt a "Ka zun a chhuak" a lo ti reuh a, a va buaithlak tak.



"Lo nghak lawk rawh aw" ka ti ta ringawt a, ka Phone chu ka entir zui bawk a, thu awih deuhin khum lam chu a pan veleh mai bawk.



"I awmpui lak hi i bialnu te zinga mi a ni hial lo maw?" Rosy'n a tih lai chuan ka lo ip chawih mai.



"Min leh puh tum ran khan ṭawng tawh suh, khang thil kha sawi sawi a ṭul tawhlo, i duh duhin khawsa la keipawh chutiang chuan ka awm ang" an ṭawng danah mai chuan a tu zawk nge thiam a thiamlo hriat a har khawp mai.



"Bawiha chu ka hruai phawt ang, duh leh i nu lo haw hunah ka lo dah leh dawnnia" zawi deuh taka Rosy'n a tih leh chuan "I hruai lo ang" Prof chuan a ti chang bul a.



"Engvanga ka bula a awm chu phallo viau nge i nih a, amah pawn min ngai em em a, keini inṭhen tawh mahila a nu ka nihna a bo lo, i fapa a nih angin ka fapa a ni ve tho" Rosy thinrim aw chu a ring ṭha tawh viau a ni, kawng lehlamah chuan nu a nihna angin a dik ve na chen a awm a lawm, Prof pawh a dik vek biklo, reilo te a kawl ve te chu thil awm lutuk nizawkin ka hria, a chanvo niin ka hre bawk. Mahse, a hruai tir chuan ka hna a la daih dawn a...ê khai, enge maw ka ngaihtuah leh tak chu.



"Pa aichuan nu zawkin naupang chu kan enkawl ṭha thei zawk" Rosy bawk chuan a ti leh hlak a.



"Nunphung pangngaiin nungla chuan ka phallo hrim hrim a ni biklo, i awmdan kha inchhut chiang zawk teh" khauh angreng taka Prof-an a tih leh laiin "Engtin nge ka awm vak?" ṭeu zetin Rosy'n a lo ti thung.




"I rui a, i fawr kual reng bawk a, ka hre ve lo turah che i ngai em ni, tilui ṭalh lo zawk rawh" a sawi danah chuan Christ a chu a nu bula awmloh a him anih chu ka lo ti rilru ve leh a, a nu aichuan a pa zawkin a enkawl ṭha thei zawk dawn tih pawh a chiang reng a lawm.



"Lalfamkim, mi i lo va ngai tenawm em em ve, nang kha in enfiah zawk teh, i student ngaizawnga pawnlama hun i hman ṭhin lai zawng zawng khan kan fapa nen khawhar takin inah kan lo awm ṭhin a sin, damdawi ka ruih chu ka pha lo mahse, i thiamloh a awm ve bawk a nia" aw khur dar dar leh rilru nat hmel tak aw ri a Rosy'n a tih chuan chil ka lo lem dak a, nichin lawka ka ngaihdan kha a let leh but tawh, a ṭawng hnuhnung zawk zawk chu a dik zawk emaw tih mai ka tan chuan a awl riau a ni, engmah an inkar hre ve tak tak heklo.



"Midang an awm ve hi, duhtawk la haw tawh rawh" awki dam zawka Prof.Famkiman a tih leh chuan an phun bul bul ri chauh chu ka hre pha tawh a, an la inhnial tih ka hre nain an ṭawng ka hrepha tawh manglo thung.



Rei vaklo ah kawngkhar an lo kik a, ka hawn chuan Prof chu lo dakin "Lo chhuak ru le" a lo ti var a. Christ a lam a pan laiin kei ka lo chhuak nghal vat thung, Rosy'n min lo melh hrak hrak chu hmu lo derin ka kalpel a, choka ah tihtur ka va zawng ruai bawk.



Prof te pafa lo inpawmphei chuan Bathroom lam an pan a, chutih laiin Surf vel chu a bawmah ka lo khunga, Rosy erawh sitting room ah a la ṭhu reng thung, Bathroom kawngkhar a inhawn rik hnu lawkah Christ a a lo lut a, Prof erawh Bathroom ah a la awm anih hmel.




Dawhkana theihai a lo ban chuan "Ka vel sak ang che aw" tih leh lo chhuhsak ka rual a, ka bulah chuan ṭhuttirin ka vel sak nghal mawlh mawlh a, Rosy lo chhuak chuan "Khawnge Famkima kha?" tiin min lo zawt khauh a. Bathroom a a awm thu ka hrilh ruala min ner khum sawk vang chuan ka hawi san rang viau mai.



Theihai zailep na tur Plate la a ka thawh laichuan Rosy chuan Christ a chu pawm lawkin pawn lamah a tlan chhuahpui ta mai a, "Awi, lo ding rih teh" tiin ka au zui chul a, hmanhmawh deuh chuan ka umzui nghal thuai bawk.





(End of CHAPTER - 7)



Link:
BBcode:
HTML:
Hide post links
Show post links

Ahmangaihi violette
Posts: 148
Joined: February 1st, 2020, 3:14 pm

Unread post by Ahmangaihi violette » September 7th, 2021, 10:37 am

ZUNZAM - by Ahmangaihi violette khiangte


CHAPTER - 8




"U Rosy lo ding rih teh" step a a tlan thla tur chu ka umzui zel a, a rawn lehhawi zawk bak chu engmah a sawilo, Gate a hawn buailai chuan chu ka zuk nang ve mai bawk a, "Lo inrawlh suh, chhungkaw buaina a nih hi" a lo tih vang chuan ka tim ru khawp mai.



"UFamkima kha hrilh ve phawt la" ka ti niah niah a, "A phal loh vangin a lawm maw hetia ka tih le" a lo ti hlar thung. Awmpui ve mai hian engtia ka lo tih ve chiam theih a ni lo, ka nau awmlai mah nise tlanpui tu hi a hringtunu a ni tlat bawk si, ka huanglo ka nawr mai dawn hian ka hre deuh tlat a, ka rilru a buai ru hle ringawt.




Gate a hawnga a chhuah laimek chuan Christ-a chuan min lo Bye Bye reuh a, a nu kiangah chuan a hlim hmel viau mai bawk si, nui lui zetin ka vai liam ve ta ringawt chu a nia, an kal liam ta chu ka chhaw deuh chhuih maiin ka hria. Prof bula sawi pawh ka chaklo, ka lakah a lawmlo viau em lo ang chu.



Kawt zawl ka thlen chho leh chuan Choka a a hawikual vut vut chu ka va hmu nghal pang mai a, inthlahrung rilru deuha ka va lut chu "Khawnge an awm a?" a lo ti nghal ta reng a, ka ṭawng chhuah hma chuan kan in en ran mai bawk.




"Christ a chu a nuin a hruai haw a?" ka ti chiah chu "Mai mai chuan" tih leh ka lam rawn pan a ruala, kut min thlak dawn ta mai emaw ti a thinphu dep dep a ka lo enlai chuan; min kalpel fua in pawn lamah a pen chhuak zui a, ka zui chhuak ve tak nain Gate a hawng ri bak ka hre hman lo.




A thinrim hmel khawp mai, engtin va inti zui ang maw? Pawnah chuan dingin an lo let hun ka nghak ta ringawt a, khua a tlai lam tawh a , ka hmanhmawh tawh bawk si, keima thuin ka haw ringawt dawn emaw ni mahse, Urosy ka nau awm ka lo hruai tir tawh bawk nen haw ringawt chu ka ngam chiah biklo, min hau hrep mai ang tih ka hlau a; min ban duh mai ang tih ka hlau tel bawk.




Ban hrim hrim chu ka hlau pawh a nilo, ka ti lungawilo fe anga chhe deuhin kan inchhuah zui ringawt ang tih ka hlau a ni mah zawk, chutiang anih ngat chuan ral khat aṭanga lo Star pawh a nuam tawh nang.




Reilo vaklo ah chuan Gate inhawng thawm a lo awm a, hmanhmawh deuhin inchhung lamah ka tlan lut nghal a, zah zelah eng engemaw tih tur ka va zawng ruai a, pen thawn awmna lam pawh chu ka melh duh lo, kawngka ah chuan a ding tih ka hre tak nain hawi duh loin tui khawihna ballo pui chu ka nawt fai hluau hluau a, a rawng ṭawng mai lo te chuan ka awm a ti nuamlo lehzual.




"Chhuri" a rawn ti tak chiamah chuan ka phu zawk a, ka lehhawi rang kher mai.



Ka UMawipuii lek.



"Enge khatia min lo induh khum vel a, i tlan lut chawn chawn kha ka rawn hmu vek che" min melh ram ramin a ti zui a, a thil khai rih hmel zet chu dawhkanah a rawn chhawp hnawk mai bawk.



"Min lo hrilh hmasak tur che a lawm, vawiin chu lo kal a fuh vaklo a sin" ka tih chuan a hmui a pet sawi duh lek a.



"Khawnge pathlawia chu" a hawi kual hruk hruk a, ka hrilh ve duh a ngem aw tih ka ngaihtuah laimekin "I nau awm pawh chu khawnge?" a rawn ti leh vat a.



"Naute nu a lo kala, Ufamkima zun hlanin a tlan haw pui daih a lawm, tunah Ufamkiman a umzui mek"



"iiihiiii...an ve chhang chhe ve" a lo ṭhen chiam chu tum buau chungin ka en a, "Min ngei viau mai thei a ni, Gate thleng ka zuk thlah a" ka tih chuan nuihza insum zet hian min en a, a rawn nui phuh ang ṭhawt a, ṭawp thei lutuk.




"I pu in a phal loh te chuan lo dan ve mai tur a lawm" nui hui chunga a tih chuan "I mawl a mi, awmpui ve mai ka nih hi, naute nuin a lawm hruai, Christ an a nu a ngai bawk si a, a nu in a pawm lai pawhin min lo Bye Bye zawk a nia, dan chi pawh a nilo" thiam inti vaklo chungin ka inthiam chawp a ni ber.



"I hna chiah i ngaihtuah lo tih ka hre tak" a lo nui huk a, deuh kher ṭhin chuan a.



"Nang ni la, i chhuhsak lui duh bik dawn a mi?"



"Chhuhsak ang chu le, ka nau awmlai ka hna a nia, ka pu duhdan kha ka zawm tur a ni mai a, hlawh min pe tu zawk na na na chu" thawk ka lo la hawk a, a sawi pawh ka sawizawm pui peih tawh lo e a, hnemhnana a awm dawn lo tih hriat reng.



"Vawiin chu i thil hi hawn leh rih mai rawh, a mood aṭha vak pawn ka ringlo" ka tih chuan min en phawk khawp mai. "Hei, a return theih tawh loh, Point kan thun vek tawh a, a khul ngei ngei a ngai" a ti hlak hlak a.



"Naktukah ka ken sak mai dawn a lawm" ka lo ti hlar thung, ka hrechhuak leh hnu hnawh a, Christ-a a awm loh chuan naktukah enge hetah ka tih tawh anga, kal chhan tur a awm tawh si nang, a va buaithlak tak.



"Anih i la bang dawn hnailo a mi, ka haw san dawn che nge?" a tih leh chuan ka phal leh lawi silo, "A lo haw ṭep ang, a man pawh nangman i dil nghal dawn nia" ka ti sawk sawk a, ṭha deuh chuan a aw ve leh mai bawk.



Gate inhawng ri rak thawmah chuan kan inmelh zuk a, rei vak loah Prof chu a amah chauh chuan a rawn lang a, ka hna chu a bo dawn ta a nih hi ka lo ti rilru ruah rauh, a ho duh ang reng khawp mai. Kawngka a a lo lut chuan Umawipuii lo awm chu a rawn hmu ve nghal zat a, hamhaih hmel a pu deuh bawk.



"Ka u a nih hi" ka tih laimekin Umawii chuan "I thil tur kha ka lo keng a" a lo ti var a.



"E, a ni tak maw, i van rawn nei hma angreng ve" hawihawm takin Prof chuan a lo ti vat a, a aw ri ah boruak nuamlo a tawng tih hriat tur a awm lo. Polythene a damdawi eng ilo ho chu Umawiin a phawrh zung zung a, Prof chuan a bulah ṭhuin a lo en bawk a, keimah min be miahlo mai chuan ka awm ala ti nuam chuanglo, ka laka a thinrim leh rim loh pawh ka la hre thei mai tlat lo a ni.



Pawisa an in pe fel a, an inbe zui luama mahse, kei erawh min la be ta lo fo a, ka rilru a nuamlo ta khawp mai. Naktuk kal ngailo ta se, a nu kawr ka kawl kha pe tur chuan kal leh tho ka ngai dawn a, ban nih hnu a va lan leh ngai tur chu ka huphurh zawng tak a ni, awi aw....a van nuamlo duh dawn tak.



"Kan haw thei a ni lawm ni?" Umawipuiin a lo tih chuan ka chhanglo, "Hei, a lo tlai duai tawh a lawm, vawiin chu ka ban hma niah pawh i bang hma thei ta lo anih hi" min rawn en in a ti dam ta dup a, ka thaw huai huai mai.



"Christ-a chu engtin nge a awm dawn a?" inthlahrung deuh chung chuan ka ti ta hram a.



"Zanin chauh chu duh leh a nu bulah riak rih mai rawh se, naktuk zingah ka va lam ang" lawmlo hmel a put loh mai bakah ṭha takin min chhang a, ka thil lo zeldin dan nen chuan a inpersan ngauh ngauh khawp mai, ka laka thinrim viau turah ka lo ngai hman kha a nia, tuna aṭawng danah chuan min ban a tum miahlo niin a lang bawk, in ka thlen hnuah min rawn ban hram em lo ang chu maw.



Ngaih la ṭha zanlo chuan Umawipuii nen kan inzui haw a, "Au Mawi, min ban ka hlau riau mai" ka tih chuan "Pawi hleinem, dawrah kan buai a lawm" a lo ti sam mai a, ka sawi zui duh ta lo, a mawl thei emai a.



In ka thlen hnuah ka inbual a, USangzuala zan tirah a lo peng kawi a, ka chhungte chu an ri hlut a, an bula a awm ve peihloh vangin inchung lamah ka chhosan a, Movie en a men rei viau pawh pawi ka ti hranlo, en tur ka zawng kual a, The Hobbit ka en tui ṭan dawn chauh tih in ka whatsapp message tone a lo ri ṭat a, ka en chuan Prof-a message a ni tlat.



Ka ṭhu chhuak zawt a, ka phone chu ka en reng tak nain Message chu ka en mai ngam ta tlatlo a, min ban thu a rawn sawi mai ang tih ka hlau a ni ber ang chu, a zahthlak dawn bakah, ka rilru ana dawn lutuk hian ka hria, tunah pawh ka awm a nuamlo nghal pang tawh.



Hawng kher lo a lang thei chinah chuan 'Naktuk zing chu kal chhuah.......' tih zawng a lang a, a hawn loh theih tlatlo, phurlo ru deuh chuan ka hawng a, ban lam thu chu engmah a rawn sawi lem hleilo a, zing chhuah a ngaih vangin lo hmanhmawh lo turin min rawn ti mai zawk a ni, ka chhiar zo chu ka khi vun vun a, ka awm a nuam huai maiin ka hria.



Message chu chhangin movie ka en leh mai a mahse, rei lo teah Message a lo thleng leh a, "I duh leh lo kal hma tho la, Pot sen hnuaiah hian chahbi ka lo dah dawn nia" a rawn ti leh a, an awm chuan loh chuan ka kal hma peih bik chiahlo nain "Aw le" ti chuan ka chhang ta tho. Phone chu dahin Movie bawk ka en leh a, minute 10 vel chu a liam hman awm e, Message a rawn ri leh a Prof bawk a ni!



"I mu tawh em?" mauh mai a, ka ngai kawi chiang lutuk, min be chak a ni chiang mai, ka chiang......em le? Mahse, a nih hmel e, min rawn text a chak hmel e.



"Mu der tawh, Movie en pahin" nui tat tat chung chuan ka chhang let a, Minute reilo teah a lo chhang a, "I nau a awm silo a, khua a har reuh khawp mai" tih hi a lo thawn a, ni dawn tak maw, tunah hian amah te chauhin a awm tak a lawm; khawngaihthlak hnup hnup mange.



"A niang, keipawn ka ngai reuh ṭhin a nia, nilenga in awm phei hi chuan a ngaihawm ṭhin a lawm" te ka va ti ve luam a, sawi tur lah chu a vang phian a, titi vawrh hi ka thiamloh zawng tak a ni lehnghal a mahse, min biak peih chhung chu keichuan ka chhang let peih dawn chiang sa.



"Eng movie nge i en a?"



"The Hobbit ania, i en ve tawh em?" zawhna in zawh hian titi a kal ṭha duh deuhin ka hria.



"Ka en tawh maithei, ka hre ta mai lo, i u damdawi chu hei zanin aṭangin ka ei a, a ei pawh a nuam khawp mai" a rawn ti duah a, kha maw... min kawm chak chiang a ni.



"Ṭha deuhin ei la, a result a ṭhatloh chuan a zuartu nu kan hau hrep dawn nia" uang deuh tak hian ka ti let a, min chhang tawhlo chuan a reh daih, ka thil sawi chu ho mai mai a ti deuh nge maw ni le, en reng si chuan lo Like zeuh tal sela aw, min veitir run ringawt mai a.



Min lo Text leh chuan chhang lawk tawhlo ila a ṭha ang ka tih rilruk neuh neuh laichuan Message a lo thlenga, ka en rang leh em em lawi a, ka chhang let lo phal leh teuh nang "I mu dawn tawh em?" a rawn ti tlat.



"Mu dawn rihlo e, zan ka mengrei ṭhin a"



"Keipawh zanin chu ka muthilh theih ka ringlo, a reh lutuka a ninawm riau a"



"Movie te en ve daih la, a nuam ve a lawm"



"Ka mit vang hian ka en vak ngai tawh lo, lehkhabu chhiar nan mit ren a ngai a" a nih ka ring, Movie tih vel hi chu a en ngai ka ring lo.



"I nu enge a an a?" ka ti teh daih a.



"A zia zel e, Guwahati ah ka nutei te hnenah a awm dam rih phawt ang, in zai zawh hnu lawka zin chhuah chu a zual phah a hlauhawm deuh a" chhan let dan tur ka ngaihtuahna nasa khawp mai, a Message te chu a ṭawng ri ang maiin a dam dup lehnghal a, ka rilru ah a aw phawiin ka chhiar deuh tlat zel bawk.



Mimal thil deuh zawh ka chak a, min chhan ṭhat duhlo ka hlau bawk si, zak theilo min ti viau mai ang tih pawh hlauhawm tak a ni mahse, ka hrechiang chak reuh khawp mai, vawiin ah lah khan chhum bung deuh deuh khan ka hre mai a, a awmzia tak tak hre silo khan an inkarah ka ding kha a nia.



"Ufamkim mimal thil ka lo zawt lawk ang che" ka va ti deuh tawng a, beisei loh deuh chuan a lo aw rang viau mai.



Rosy nen an inṭhen chhan a nia hriat ka chak chu mahse, va zawh tawl chu 'Em a!' ka ti ve si, zawhna tur huatthlala awm loh deuh ka ngaihtuah a ngai, ka type a ka type ṭha sek renga, rei chu min ti ve khawp chuan ka ring a ni.



"Ih maw...Christ-a nu kha a hmelṭha ka ti tawp a, engtin nge i ṭhen phal le?" deuh teh thlawt chuan, ka rilru chiah pawh a nilo, Rosy chu hmelṭha ka ti em em tho a mahse, Prof.Famkima hian a phu ve chiang em a sin.



"Aa...kan pahnih thutlukna a inṭhen zawk kan nia" tih zawng hian min lo chhang a, ka zawhna chu eng angin nge a lo ngaih ang aw, a haw em lo turah chuan ka ngai a mahse, min chhang duh chiah lo niin ka hria, zawt zui tawhlo ila a mawi tawh zawk ang.



"Message chuan sawi thui a ngai lutuka ka lo call dawn che em ni, i mu duh tawh em?" hlauh mai a, "Mu dawn lo e, min lo call rawh" ka ti let thuai a, rei vaklo ah a call a lo lut zui a.



"Hello..."


"I movie en ka ti buailo che maw?" a rawn ti hmasa phawt a, a nui deuh aw ri chu ngaihthlak a nuam em em lehnghal.



"Buai lo e, ka en hnu a nia" ka lo ti var a, a sawi tur a ngaihtuah aniang a ngawi vung vung a, keitak pawh chuan han sawi leh dan tur ka hre bik tawhlo, ka zawt tim ru ve riau.



"Sawi ṭan mai dan tur ka hre lo riau, min zawt la ka chhang mai dawn che em niang?" damthlup hian a rawn ti leh a, chuti na na na te chu ka zawt phawng phawng anga a ni mai a lawm.



"Ka hriat thiamloh chu maw, Lucy kha ka bialnu hlui i ti bawk sia, i nupui nau a ni bawk sia" ka ti hmasa phawt a.



"Nia Lucy kha ka tleirawl lai ngaihzawng a nia, inkawp nghet phei chu kan ni lo, tun hnuah phei chuan engmah a awm zuilo a, mi hi a rawn ti ṭha reng thung a"



"Christ a nuin a hre ve em?"


"Hre ve tho e mahse, engmah a awm tawh lemlo a, amah vanga inṭhen ah min ngai deuh em ni?" a rawn ti let khauh a.



"Ka ngai hran chuanglo a mahse, a rawn kal ṭum khan ngaizawng che a ang em a?" thu khuh vaklo chuan ka ti tawl a, ani a lo nui hawk thung.



"A mizia hi a dang ve deuh a" tih zawng hian min lo chhang a, zep chu a nei chiang mai.



"Christ a nu hi neih leh i tum lo a mi?"



"Ani chuan ngaihzawng a nei tawh a lawm" rang deuh hian a lo ti a, ka zawh chin te te chauh min chhan vang chuan zawh zel chi a ni em tih ka ingaihtuah rauh rauh a, ka ngawihreng vang chuan amah zawk a lo ṭawng leh a "Kan inneih tawh ka ringlo" a rawn ti khawl a, a aw chu a zawiin fiah viau thung.


"I duh tawhlo a mi?"


"A ni ber ang chu"


"Aman a la duh che em?"


"Duh biklo a niang" a nui deuh tlatin ka hria.


"Bialnu i nei ve lo tak tak a mi a?" ka ti ta daih a.



"Nei miah nang, nang zawk bialpa i nei em?"



"Keipawh nei miah nang" ka nui hak a, a ni pawh a nui ve suk tho, a nuam riau, ka tihrawl a za ching cheng tlat tawh.



"Kum engzah nge i nih tawh a?"



"Kum 24 ka ni mek a, nang zawk?" ka rualpui biak ta vel ni mai hian ka hria.



"Kum 36" awi leh....kum sawm chuangin kan inthlau a nih chu! Rualpui biak chi loh lutuk.



"Bialpa neih i hun tawh a nih chu, pasal nei rual pawh i ni tawh a lawm" a rawn tih chuan ka nui kar kar a "Min duh tu an awm si lo a, duh duh a neih ngawt theih pawh a nilo" te chu ka han ti ta vel a, hmuh loh lamah ka lei ka chhuah ru tat tat ringawt.



"Hmanhmawh a ngai hleinem i la naupang a lawm, duh tu che i hmuh vat ka ring" a rawn tih chuan "Nia mahse, kei chu in zui ve deuh phawta inneih chauh ka duh a, a tlem berah kum hnih thum in zui phawt ila" ka tih chuan leh lam ami chu a ngawi vung vung a.


"U Famkim?...."


"Min duh em ni a?" a rawn ti, awileh...deuh teh thlawt chuan a!



"Maw....?" ka lo ti he haw.



"A....i sawi ka hre sual a ni maw?" a rawn tih leh laichuan ka thinphu chu a rang ṭha zaih zaih viau a ni.




Ngaihtuah letin ka nui ru pat pat a, ka kut lehlamin ka mal ka ṭham ngar ngar bawk. Eng rilru tak pu ve ang maw; Keilah chuan sawi leh mai tur ka haihchham a, ka lai deuh ṭut bawk a ani pawh chu a lai ve tho nge maw ni a ngawi zui vung vung mai.



"Invengah ruah a sur ve em?" ka ti ta ringawt.



"Hei, sur ṭep" min chhang rang khawp mai.



"Keini pawh a sur seng seng a" ka tih chuan "A ninawm tawh khawp mai" a lo ti ve sup a.



"Kei chu zanah hi chuan mut a ti nuam ka tia, ka mutui thei lutuk" ka ti leh hap a, ka ṭawng te chu a lawi rut lehnghal.



"Nia, keipawh" a lo tih chuan ka lo nui ri hak a, lehlama mi erawh a reh hmuk thung. A ṭawng leh hun chu ka ngaichang ran a, ka nuih rik loh nan ka hmui ka pet fan fan bawk a, kan inbiak laia a hmel landan tur chu ka mitthla chhin a, tunah hian a phone a beng bula hum chungin a ngawi rauh rauh anga chik deuhin thil a ngaihtuah in ka ring a ni.




"Mu ve dawn tawh rawh, zan a rei dawn tawh a lawm hei" zawih ruih a a rawn tih leh takah chuan "Muttui aw, naktukah kan inhmu dawn nia" ngaihnobei thei ang ber tur chuan ka lo ti ve a "Umm" tih zawng te chuan min chhang a, ka phone ka dah chiah chu thawk ka la hluai ringawt, ka zauthau a, helhhawlh an tih ang hian ka awm, ka za ching cheng a, ka awm hle hle thei meuhlo.




Movie pawh en zawm tawhloin khumah chuan ka bawk duai a, kan inbiak dan chu ngaihtuah letin ka khi reng mai, Prof.Famkima khan ka laka eng rilru emaw tak chu a pu ve a lawm, min Star chu ka ti ngamlo 'mahse' tih a awm thung, beisei san loh hram hram tum chung chuan ka beisei ru hle thung bawk si.




Muhil theilo chuan ka inlet tawn sek a, naktuk thleng thuai thuai se ti rilru chung chuan ka huphurh ru lawi a, kan inhmuh hunah engtin nge ka biak ang aw, ka zam nghal ringawt lehnghal. Tho chhuak lehin ka thawmhnaw bawm ka va hai rawk rawk a, enge naktukah ka hak ang, inchei vura kal chu a chi loh anga mahse, ṭhing deuh chuan ka kal thei nang, ka ngaihtuah kual nasa lutuka ka thawmhnaw hak tur pawh ka thlang fel thei lo, ka thawmhnaw lak chhuah ho chu enkual dan danin zingah ka ha chhin anga chuta thlan leh tur chuan tiin ka khai chhuak a, bialpa thar nei dawn tlata inhriatna te ka nei in ka hria, ka va zaktheilo tak.



Ka mengrei khawp mai, thil ka zeldin vak vak ka muthilh tak chuan dar a tlem viau tawh in ka ring. Umawipuii ṭawng ri ah ka harh hlawl a, ka hming a lamin ka hria.



"Mimi kawr anih kha, Secondhand a thing a niang" a tih leh chuan ka beng ka chi kar tawh.



"A va tar kawr ve" ka nuin a ti ve zat a, Ufamkima nu kawr ka pho kha an sawi anih hmel viau mai. Tho chhuak vatin khum ka siam sawk sawk a, ka hmai ka phih laimekin Umawipuii chu a lo lut a "Mate, hmanni a i kawr lo hak haw kha i ken theihnghilh a nih saw, ka nuin a man chhuah hma chein zuk la vat rawh" a rawn ti sar sar a, ka inphihfai zawh inhnuaia ka chhuk laichuan ka nu chu a lo awm lo a, pawn lamah a ṭawng ri erawh ka hria.




Thawmhnaw chu Sitting room ṭhutthlengah a lo thlepfel than a, la vatin ka chhopui lehnghal a, ka thawmhnaw hak tur bawk chu ka buaipui leh a, "Au Mawi, lo kal lawk teh" a room lama a awm chu ka au lang lang a, rei vakloah chuan lu tuam bur hian a lo luta.



"Khawi ber hi nge ka hak ang"



"Khawiah nge i kal dawn?"



"A ngai ah" a lo ner sawk a, ka thawmhnaw dah chhuah ho chu a thlek dan dan bawk a "Ka hre nang, i duh ber kha ha mai la" a ti sam leh mai a, a rawn tlak loh thei.



"Inchei vak silo mahse, nidang aia nalh ve deuh hleka lan ka duh a" ka tih chuan min melh run run a, "I lerh em mai a, bang vat zawk teh, i thil tih hi a ṭha dawnlo riau mai" a ti leh kha kha a.




Ngaihsak zui duh miahlo chuan thawmhnaw chu ka la sawk sawk a, "Ngaizawng tak tak miah suh" a tih leh pawh chuan ka chhang duh tawhlo, ka lo rawn kher kher chu ka inchhir deuh a, nidangah chuan ka rawn tawh miahlo ang, Prof nena kan inbiak dan pawh chu sawipui chak viau mahila hrilh chi pawh ni nghallo chuan.




Chaw ka ei tlem khawp mai, ka helhhawlh vang nge mawni ka kham hmasa ber a, room ah insiam turin ka chho nghal tharh a, vawi thum lai ka thawmhnaw hak chu ka thlak hman bawk. Khua a vawh deuh surh vangin T-shirt hain a chungah Jacket senno leh a dum in pawlh ka ha a, a senno hian min ti lang nu deuhin ka hria, ka sam pawh ṭawn loin ka thlah a, Makeup pawh ka hmang ve a, ka hmui erawh ka hnawihsen vak ngamlo.




"Vawiin chu i va rimtui ram ram ve a" Dawr lam pan tura ka chhuah hnu chuan Umawipuiin a ti a, chhang duhloin ka nui mai mai thung. "Saitluangpui, ngaizawng miah suh ka tih che kha, ka nu leh pa pawn an duhpui lo ang che, bakah a upa tawh si, zunthlum a neih phei chuan neih chi a ni miahlo a nia" ka melhrum nghal rawm a, ani pawn min melh no vak biklo.



"Zunthlum a nei bawk lo"


"A nei awm emai a" a la ti hram.


"Nei pawh nise enge pawi" ka thilsawi dan vang chuan a lawmloh hmel khawp mai.




"Nihpui lo la a ni mai, Running chawp ngai te i duh a mi?" a ṭawng ring lutuk a, kan Taxi Driver pawh a lo hawi zuk mai, min ti zak a lawm mawle.




"Engmah i hrelo, bakah kan ni bawk lo" a beng bulah chuan ka va ti kha kha a, "Thu i awihloh chuan i kal tawh lo ang" a ti vin leh hluk thung, ka melh rum leh chu min hawisan hmak a, kei Taxi kawngka sir lehlamah ka tawlh hla nghal vat a, inbe tawhloin dawr kan thleng a, ka thinrim em em phei chu ka hrelo a; ani erawh a thinrim tak tak a nih hmel, thil ka zawh leh pawhin bung deuh deuhin min chhang a, a tih dan ber bur chu ka ngei khawp mai, engtin nge maw min duhpui loh theih zawk le, a bialpa Sangzuala aipawn ka la duh daih zawk, Running chawp ngai te chu a la ti zui a, a bialpa ve kha a....a sek ṭeng ṭung si.




"Ka kal dawn a nia" lo hawi duhloin a phone a bih mual mual a. Ka chhuak tur chu "Rawn haw tlai suh, ka nghak dawn lo che a nia" a rawn tih chuan ka lehhawi zawk a, min en loin a phone ngawt a bih a, ka mood a ṭhat ve tehreng nen min ti khawlo zo vek dawn a lawm mawle.




Ka va thlen chuan Gate a lo inhawng tawh a mahse, kawngka erawh a inkalh thung, kawngka hnaih bera pangpar pot sen chu ka chawisawn a, chahbi chu a lo dah tak tak a, ka hmu chu ka nui leh var var tawh. Phur zetin ka hawng a, inchhungah lutin tihtur ka ti zung zung a, nitina intihfai chuan chet a sam tawh viau, karloah ka ti zo thuai a; ka sana ka melh deuh sek tawh bawk.




Pangpartui ka pek laimekin Gate inhawng ri ka hria a, Christa ṭawng ri pawh ka hria. Nuisanga ka hawi phei laichuan Rosy leh Christa an lo langa an hnungah Prof.Famkiman a lo zui bawk a, chawp leh chilhin ka phurna kha a reh vek a, ka nui tawi tak ringawt tawh. Ka awmdan chu mawilo ka tiin ka zak ru chem chem mai a ni, Prof lah chuan min be loin min kal pel mai bawk si a, ka awm a nuam lo kher mai.



"Balhla leisa a awm ang ti raw?" Rosy'n a lo tih chuan ka bu nghat a.



"Bawnghnute nen chawhpawlhin chhunah Christa hi lo pe rawh aw" inchhung lamah kan inzuilut a, Prof chu a room ah a lut a nih ka ring. Rosy chuan Fridge hawngin a enkual dan dan a, keiin Christa phone khawih lai chu ka lo bih pui thunga, a thil en lai chu min lo hrilh ve zat zat a, a ṭawng duh ṭhin khawp mai.




"Chaw hi engzah vel nge i pek ṭhin?" a rawn tih chuan ka tho chhuak thuai a.



"He mi Bowl khat hi ka pe tlangpui" Christ a chaw ka siamna ṭhin Bowl chu ka hmuh a.



"A tlem deuh dawn anih kha, naupang chu an eipeih tawhloh hnu pawh hian tih luih deuh an ngai a, a chanve vel tal pek belh leh rawh, a cher lutuka puar khawpin a ei ngailo a niang" a ti niah niah a, thinrim a sawi phei chu a nilo mahse, ka inthlahrunh ru khawp mai, Christ an chaw a eitlem thei bawk si a, ka pek ṭhin Bowl khat pawh chu a ei tling ngailo, keilahin ka lo tilui chiam ngai bawk silo a, nau khawih zeilo chi tih takah ka dimdawi bawk nen a duh lo chung han tih luih kha ka hreh ṭhin a a tleiloh mawlh kha ka hlau ṭhin, zep loah chuan min ngaina lo ang tih mawlh kha ka hlau a ni.




"Chaw ka pe tawh a, a eina a rei deuh tawh a nidang aia hmain thil i eitir dawn nia" ti lehin Room lam panin a kalzui a, enge maw chen chu Prof room ah chuan a awm a, an ṭawng thawm hriat tur awm bawk silo chuan engti zawng emaw tak hian min mawlh a, an lo chhuah hun chu ka ngaichang reng ringawt a, ka thawk te chu a ipik ṭup mai bawk.



"Anu Mimi, Jeep kha maw chirh ah atang miahlo, JCB in a hnuk chhuak daih" Christ an a lo ti lang lang a, "A ni maw, JCB chu a van chak em em" ka tih laimekin Room kawngkhar a lo inhawng rawp a, ka hawi rang kher mai.




Prof chu insiam peih at hian a lo chhuak a, a thinrim hmel deuhin ka hria, min hmuh chuan reilo te chu min melh a, a phone a lo rik vangin a hawisawn leh vat thung. Phone chu chhangin bathlar hnung lamah a chhuak phei a, a ṭawng danah a nu nen an inbia in ka hria, a thinrim hmel ang aiin a aw chu a dam a, a nu a biak vang pawh a ni mai thei.



A lo luh leh chuan tui a in a, lo biak hmasak ngaihna ka hrelo, ka khawr ru riau a ka awm a nuam zanlo bawk.



"I thlen na a rei tawh em?" a lo tih takah chuan ka hawi thuai a, Fridge bula ding chung hian min lo en ve reng a, "Rei lo e" tih zawngin ka chhang a, ka phur tehchiam tawh lo a ni ber.



"Ka lo haw har lo ang" a ṭawng chu a zawi viau nain a ril deuh ruihin ka hria. A chhan chu min en reng a, a hmel cool ruih leh a mitmeng dam thluam vang te pawh chuan a ni mahna, danglam awm ni a ka hriat kha awmlo tawp zawng a nih bik loh hmel mahse, engmah ka ring chhin ngam tawhlo.



Rosy lo chhuak leh chuan engthil emaw hi a lo khai chhuak a "Mami kha Balhhla lei belh tir rawh, nitin bawnghnu te nen pe rawh se" a lo ti phei lang lang a. "Ka haw pahin ka lo lei mai dawn nia" UFamkiman a lo ti mai a, a sana a en zawka a hmanhmawh hmel viau tawh bawk.



"I kal dawn lo em ni?" ti a Rosy a zawh chuan "I duh leh kal rawh nakkin deuhah ka kal ang" a lo ti mai a, "Ka rualin chhuak rawh" Prof chuan a ti veleh tlat, Rosy nui hmel pawh ka hmu zui a, Prof.Famkima hmel erawh ka en duh tawhlo, Rosy chuan eng engemaw Christa enkawl dan tur min hrilh nual a, chu mi hnuah an pahnih chuan an inzui chhuak a, an kal liam ta chu thawk ka la hawk a, an awm ve chhung zawng khan ka thawk a lo ipik awm hle mai ka ti, ka awmdan teh hrep chu a ṭha lo khawp mai, a atthlak takzet a ni.




An ṭha leh ta anih ka ring deuh a, chu chuan nilengin ka ngaihtuahna a luah a, ka lawma ka lawmloh viau ka hre hranlo mahse, keimah ah hian danglam a awm, ka hnim ruih mai. Inthiar fihlim vat ka tan a mawi tawh zawkin ka hria, nau awm sak lamah harsatna nei lemlo mahila ka rilru thianghlimlo leh min chhawrtupa ka duh tlatna rilru vang ringawt pawh hian inthiarfihlim chu ka ngai, he hmun hi ka tan hian a hrisel dawn lo tlatin ka hria.




Dar thum pelha Prof chu a lo haw a, Balhla a lo khai haw ṭeuh a, Christ-a a muthilh vangin keimah chauhin Tv ka lo en a, inchhung a lo luhlai pawh ka lo hre lawk lo nghe nghe.



"Khua a va har duh awm ve" a thil lo hawn ka dah ṭhat laimek chuan alo ti a.



"Har hranlo e, TV ka lo en mai mai a" min en reng vang chuan en duh lemloin Balhla chu chhuarah ka dah lut zung zung a.



"Ei la" a tih chuan ka en ve leh ta chauh.



Ka lu ka thing mai a, tawi te in ka nuih bawk.



"I nuamsam nange?" tih leh min rawn ban a rual a, ka chal a rawn deh rual chuan ka lo ip chawih mai, hnai takah kan inmelh a, a kut a lak sawn leh rualin a vei nuih suk a, che changlo chuan mit ka khap sak sak ringawt tawh.



"I pang a lum deuh a nih kha" a tih leh chuan ka chal chu ka khawih vat a, vawiin lam chu ka awm a nuam lo riau a, ka hritlang ve deuh bawk nen ka pang chu a lo lum ve deuh tak tak hi a lo nia, na em em phei zawng ka nilo.



"Damdawi ei rawh aw" tih leh chhuarlam pan a rual a, damdawi mum lo la chhuakin min pe a, ka lo en vut vut lai chuan ka hma ah tui Bottle a lo lek leh vat a, amah chu enin ka nui ta ringawt a, ani pawh chuti tho, a la nui hmelṭha em em lehnghal a.



"In enkawl ṭha viau rawh, i damloh hlauh chuan kan buai viau dawn ania" a tih dan chuan min ti lai ṭut a, ngawi rengin damdawi chu ka ei a, tui ka in lai te chuan chik deuh hian min lo en a, vawiin kan boruak inlet thawk thawk chuan awmdan min ti khawr khawp mai, awm dan chu sawiloh rilru put dan tur pawh ka hrethiam tehnuai tawhlo e a.



"I hritlang a mi?" a tih leh chuan "Hritlang ve deuh a niang, ka hrawk a thip deuh a" ka ti ve mai a, "Keipawh ka nia lawm, tui lum kan in dawn nia" chet leh mai a tum chu "Prof keiman ka lo ti ang" ka lo tih vang chuan a tawp leh chawt a, lehhawi meuh hian min lo en a.



"Engtin maw min koh" a rawn nui suka, ka koh dan ka hre chhuak chu ka zak leh ram ram.



"Keiman ka lo chhuang ang" Gas awmna lam ka pan zui zat a, ka tui chhuan lai chuan dawhkan kilin a ṭhu a, a phone a khawih a a kut lehlamin a kamis ban a thlep mual mual bawk a, min biak hmasak loh chuan ka be ngam tawhlo reng reng, ka awmdan aṭang hian min hrethiam vek tawh ni berin ka hria.



Lo hrethiam ta se awmpui ve mai ka ni si, a ruk chuan zaklo chu min ti ve ngawt mai thei, a fel em a ṭha deuhin min be mai mai zawk a nih ka ring mahse, nizan lama kan inbiak dan ah kha chuan amah pawh hian min duh ve emaw tih mai theih tur chuan a awm ve in ka hria, aaa...ngaihtuah tawh loh ka duh, tinge chutiang ringawt pawh chu ka ngaihtuah reng le.



Tui lum ka va chhawp dawn laichuan a lo ban a, kan kut a innawk pawh chuan ka melh ṭha duh vaklo, chutah ka rinloh lutuk mai hi min lo zawt a.




"Engtin nge ka Birthday i hriat a?" a rawn ti anih chu!





(End of chapter -8)

Link:
BBcode:
HTML:
Hide post links
Show post links

Ahmangaihi violette
Posts: 148
Joined: February 1st, 2020, 3:14 pm

Unread post by Ahmangaihi violette » September 7th, 2021, 10:43 am

ZUNZAM - by Ahmangaihi violette khiangte


CHAPTER - 9




Min en reng chunga a thil min zawh chu chhan lawk ngaihna ka hrelo, hamhaih luatah che changlo leh mitkhap lo lekin keipawh chuan ka en ve reng ringawt a, ani a nuih suk laiin kei chu ka nuih a za ve lo tawp mai, tun dinhmunah hian ka te chem chem maiin ka inhria, ka zak lutuk chu ka vai deuh riai mai bawk.




"Tun hmain min lo hre tawh em ni?" a rawn tih leh phei chuan ka thaw dep dep ringawt tawh. Ka chhanna nghakin anin min en reng a, a nui deuh lek lek hmel chu ka chhiar thiamlo, zah vanga ral riai riai theih nise tunah hian ka ral mekin ka ring.



"Apa" Room lam aṭangin a rawn ti ta hlauh a, kan hawi rual zawt awm e. A tho vuta Christa mutna room lam pan chuan a kal nghal a, kei ka lo thaw huai huai thung.




Engtin nge ka tih tak ang, eng chhuanlam nge ka siam ang? Tunah chuan ka ngaizawng ru tih a hre vek tawh dawn anih hi, heta ka thawh hma daih tawh a ka Message thawn kha a hre miahlo emaw ka tih laiin a lo hre reng a, khai leh! Hetah ka thawh chhan pawh hi a ngai kawi zo vek ngei ang, min van ngai khawlo nasa dawn ve le.




Choka chhuat dungah chuan ka vei tawn chhen a, a hmel hmuh leh pawh ka zak riau tawh, a lo phei leh mai hlau chuan room lam chu ka va thlek leh rih ṭhin, a ṭawng bul bul ri te chuan ka thau ah min man deuh tlat tawh mai nia, ka taksa chu a sahal emaw tih mai turin chungrilah hian min ṭham tu a awm a, ka lum pup pup maiin ka hria, ka thlan a rawn bawl ṭiam ṭiam a, ka thinphu pawh a mumal lo kher mai, ka haw vat a ngai a ni.



Ka Bag ka ak sawk sawk a, hmanhmawh deuh chuan Sitting room lam chu ka pan phei a "UFamkim, ka nuin min lo call a, ka kal mai aw" min chhanna pawh nghak tawh loin kawngka lam ka pan a, enge maw a rawn sawi tih chu ka hria, min rawn hmuh hman hlauin chak lutukin kei ka kal thung. Gate ka hawng tur te chu ka ti fuh lawk theilo lehnghal a, ka phih sawk sawk a ni ber.




Tinge maw ka at em em le, ka thawh tirh te khan ka Number lo thlak daih awm hi a nia, amah lah khan phone a kan inbiak tirh te khan engmah hre awmin a awmlo a, awi...khan hun chhung zawng zawng pawh khan a lo hre vek chu a ni awm sia, min van ngai khawlo dawn tehlul em.



Umawii ka Phone a "Ka haw tlang a nia, ka nuamsamlo a" ka va ti tawl a, hmanhmawh deuhin In lam ka pan nghal nal nal bawk.




Inah ka nu a lo awm a, kan ṭhenawm nu nen thingpui an lo in dun mek a, min biak pawh chuan a rul tawk leka chhangin ka room lam ka pan zui a, khumah bawk thlawpin ka tal chiam chiam a, ka ṭah te lam lam a chhuak, ka Phone ka en chuan engtin mah min rawn be zui lemlo a, eng tiang takin mi chu ngai zui ang maw?




Inthlak loin khumah chuan ka mu ṭha sauh sauh a, puanin ka invur hlun bawk a, puan hnuaiah chuan ka mu meng kur lawi a, a khat tawkin ka Phone chu ka en leh ṭhin, ka ngaihtuah chian poh leh ka zak zual telh telh mai bawk si, an ina ka va thawk te chu ka inchhir hluah hluah tawh.




Tlai thim dawn thleng chuan ka mu ta reng a, Umawipuii lo haw inhnuai lama a ṭawng ri lang lang chu ka hre pha reng a, ka nuin "I nau kha han ko nghal rawh, tinge a lo thlen ruala Room ah a tawm sen reng, chaw ei a hun tawh a nia" a tih ri te pawh ka hria a, chaw ei pawh ka chaklo, engtih mah ka chaklo, ka chhungte chuan engmah hreve lemlo mahse ka awmdan hrehawm lutuk chu a kian phah chuang lo.



Rei vakloah ka Room kawngkhar a rawn kik ri karh karh a "Chhuri chaw ei a hun a nia" pen thawm a ri zui zat a, a Room lam a pan a nih hmel. Che changloin ka la mu ta reng a, inhnuai aṭanga ka nuin min lo koh pawh chuan ka chhang lo a, Au Mawii a ko leh a "Kan lo chhuk dawn" Au mawiin a ti lang lang thung.




"Saitluangpui i muhil a mi?" Ka Room kawwgkhar bawk a lo kik leh a, ka muhil der ta hmiah mai, "Chaw kan ei dawn" ring leng lawnga a rawn tih leh takah chuan "Ei ru, ka ei rih dawnlo" ka ti ve ta hram a.



"Enge i tih a, rawn ei mai mai la anih chu, i thleng sil hun a nia aw" a la rawn ti tak ṭalh a.



"Ka ei dawn lo ka tih chu, ka nuamsam lo anih hi" vin zeta ka tih takah chuan a rawn ti zui ta biklo a, kailawna a pen thla hlak hlak ri ka hre zui zat bawk.




Ka Phone chu ka Switch off a, keimah ber chuan ka ti hleithei lo, ka On leh ṭhin a, min lo bia a min lo zawh leh ka hlau a ni ber ang chu mahse, min biakloh pawh chuan ka awm a nuam chuanglo, engtin nge min ngaih ang tih ringawt ka ngaihtuah a, kan inbiakna hlui te chu ka chhiar nawn a, a changin ka inthiam chawp a, thiam ve reng a ka inhriat hnu lawk ah zahna bawkin ka chhungril aṭang hian min rawn ṭham leh ṭhin.




Duhthlan tur pahnih ka nei, pakhat chu hetiang hi a ni. Pha lo leh zak awm a awm miahloin ka in puang ang, amah pawh kha beisei awm deuhin a awm ve tho a ka duh tih a hriat hnuah pawhin min lo bia in Message ten min lo kawm anih tak kha maw, min haw hranlo tih a chiang reng a. Mahse, ka huaisenna hian a tlin dawnlo tih erawh ka hre chiang viau thung, ka ngaihtuah zawng ringawt pawn ka ṭim er er thei, hetiang zawng kher hi chuan a lakah ka awm theilo ang, ka ngaizawng tih hriattir phei chu ka zak hlumlo chauh zawkin ka ring, tuna a hriat chin ringawt pawh hian ka khua a ti sik lo chauh a nia.



Duhthlan tur pahnihna zawk chu tawpsan hmak a ni, ka hna ka bansan anga ka hmu leh tawh miahlo ang, chutianga ka tih chuan zah leh zualna ka pumpelh anga, vawiin lama ka zahna te kha chu reilo teah a reh ve leh mai bawk anga, amah pawn a hre zui reng bik nang. Thla reilo teah ka ban a ngai tawh dawn hrim hrim bawk a, tuna ka mualpho tam hma a ban mai chu a ṭha zawk bawkin ka hria.



"Saitluangpui" a rawn ti leh tawh, min awmtir ve mai mai sela aw. "Chaw chu i eidawn lo tak tak a mi?" a tih chuan "Ei dawnlo, ka rilṭam hunah ka rawn ei ve mai ang" ka lo ti vin hlur a. "Engtin nge i awm a, lo hawng teh" a teh ṭalh chuan a, keimah chauha awm ka duh a sin mawle.



Ka nu aw ka hre zui a " A muhil a mi?" tih pahin Room kawngkhar chu a rawn beng ri dat dat a, "Bawihi, Mimite" a hawnsak loh theih ta lo.




Ka va hawnsak chuan "Engtin nge i awm a, vawiin ah i u nen in inhau a mi?" a lo ti nghal zat a, ka hritlan deuh thu leh ka hnar pin vanga chaw ka eichak rihloh thuin keiin ka lo chhang a, "Chaw tlem tal bar phawt la, damdawi i ei dawn nia" a tih chuan ka chaklo khawp mai, a ti leh sek sek dawn tih ka hriat vang erawh chuan hnial buailoh chu ka tan a fin thlak ber thung.




Chaw chu tlemte tak tak ka bar a, ka hritlang tho bawk nen damdawi pawh chu ka ei a, ṭhu khawmuang tawhloin ka Room lam bawk ka pan leh a, khumah ka mu fel deuh awrh ang tih ah chuan ka lukham hnuaia ka Phone dah chu a lo ri ṭat a, amah em mawni dawn le? Inchung Ceiling melh chung chuan ka mu ta renga, ka en hreh deuh tlat a ni.



Rilru ah a awm run reng bawk si a ka en leh ta nge nge mahse, ka beisei loh zawk a lo nia, Shilong a ka awm laia ka bialpa Romawia a lo nia, Aizawla a awm thu leh inhmuh a duh thu a lo sawi a, chhan phei chu ka chhanglo, tunah rih chuan tumah biak ka chaklo, Movie en ila a ṭha in ka hria, hetia ka inngaihtuah zui reng chuan mahni ka inti hah zual mai mai zawk a ni.




Ka Movie en pawh chu ka entui ta chuanglo, vawiin lam thu mawlh khan ka rilru a la luah mai a, ka ngaihtuah nawn leh ṭhin, naktukah engmah sawilo a va kalloh nghal ringawt pawh chu a ṭha ber dawn emaw ni le, hrilh lawk ve ila nau awmtu tur midang te pawh a zawng duh tak ang chu.



Phone call chuan ka be ngam lo phawt a, Message thawn pawh chu ka phur fahranlo khawp mai, nidangah lem ka phur ching cheng zel kha nia, keimah zawk bawkin a va biak hmasak leh pawh chu.




Ka hrilh lawkloh chuan zingah a buai viau ka hlau bawk si a, ka hrilh tho tho chu a ngai. "UFamkim ka lo kal thei tawh dawn lo a, chhungkaw lam buaina vangin, min lo hrethiam mai dawn nia" tih zawng chu ka va thawn a, a Online khat bawk si a, a hmu leh lawk pawhin ka ringlo, chu loah engemaw kha min zawh leh ka hlau a, min lo chhang miahlo se ka duh zawk mah.



Ka Phone chu lukham hnuaiah rawlh lut lehin Laptop bawk ka bih leh a, rei vakloah Umawipuii lo lutin ka Movie en laichu a lo en ve a, a Phone a khawih pah mial mial bawk a, inbe manglo chuan ka ṭhu dun reng a, ka thil en chu ka lo en tui ta deuh a niang ka Phone ri pawh ka lo hre lawklo nghe nghe.




"I Phone a rik chu" a rawn tih chuan ka hawi chhuak zawk a, hmanhmawh deuhin Phone chu ka phawrh a, hlauh ang ngeiin Prof.Famkima a ni, na....tinge Message a min lo chhan mai loh le, Call a inbiak kher kher chu ka duhlo a sin mawle.



"Tu nge a?" ka chhan lawkloh vang chuan Umawipuiin min lo zawt a, "Kan chhang lawk" tih leh thawh ka rual a, a hmelah chuan min rinhlelh hmel khawp mai mahse, ka ṭawng a lo hriat ve kher ka duh lo a, insawifiah leh hran ka peih tawhlo bawk.



Pawn bathlarah chhuakin ka va ding ren rawn a, hreh deuh chuan Phone chu ka chhang zui a, a rawn ṭawng mai biklo, keipawh chu ka ngawi reng a "Hello" a rawn tih ri ka hriat rual chuan ka ipik leh ṭun tawh.




"Aw UFamkim, ka Message kha i lo hmu em?" zangkhai thei ang ber leh awki pangngai thei ber tur chuan ka ti a, "Ka hmu chiah a, chuvang a nia ka lo Call che, enga timaw i lo kal theih tawh dawnloh a?" damthluam a a tih chuan rilruin chhuanlam tur a dap chuk chuk a ni ber.



"Englo a nia, ka u hmeichhia khan pasal a nei dawn a, in lamah kan buai tawh dawn lutuk a" ka ti ta ngawt a.



"Engtik nge ni dawn a?" a rawn ti ve leh tlat, Umawii te inneih ni tur lah chu a la hla ang reng sia, chhuanlam a tling dawn lo riau hian ka hre mai.



"Thla thar mai hi a ni tawh a, in lamah inbuatsaih neuh neuh tur a tam a" inthlahrung deuh tak chuan ka ti leh a.



"Anih chuan tunthla te chu lo tluan hram la, ni tam a awm tawh chuang hleinem, thla thar ah chuan ka nu pawh a lo haw ve tawh mai dawn a, midang han lak leh kha thla a lawklawh ve riau a" a aw ri a ngenna langtel chuan ka awm a ti nuam zanlo mahse, hnar ngei ka duh ve tawh si.




"A....ka theih pawh ka ring tawhlo, ka chhungte hi an zahawm ve riau a" ka ti niah niah a, ani erawh a ngawi rauh rauh mai, sawitur a vang takzet tawh, kei aimah chuan sawitur a van zawk anih hmel bawk, dah mai tur em mawni ka tih laimekin "Vawiin vang kha em ni?" a rawn ti teh hlawl a.



"Awi a......a teuhlo mai, kha chu...." ka ṭawng bah deuh nuai mai a, min ti dang zo vek a lawm mawle.



"Ka lo hriatsual mai mai a lawm, nangmah... i lo ni lo a ..vawiin ka sawi kha chu, Mimii tih Number dang Save ka nei ve tho a... ka lo hriatsual a nih kha" tinge dawt a sawi ringawt le, enge a ngaihtuah ang le, min hriatsual miahlo tih chu ka chian tluk zetin a chiang ve ang chu, kan Chat hlui aṭangin ngaih hai palh theih a ni lo reng reng, tinge hetia a sawi ringawt chhan hi ka hrethiamlo takzet.



"A va mak ve" ka ti hap a, ka awm a ti nuamlo leh zualin ka hria.



"Tun kar tal chu lo kal la, midang zawn chhung ni hnih khat emaw vel pawh" a tih leh zel a, kan Topic a rawn thlak leh daih bawk sia, kan sawilai kha sawi zawh law law ka duh, ka inpuang rawt mai dawn emaw ni ti tein ka ngaihtuah bawk, 'Ka hriat sual' a tih chhan kha sawi zau deuh bawk se ka ti, enge maw tak chu min hrilh tur a neih ka ring tlat a ni.



"U Famkim i Birthday a lo wish tu che kha keimah ka nia lawm" ka ti tawl a. A ngawi deuh vung vung a, chumi hnuah "Nia, ka hria a lawm" a ti leh lawi a, enge a awm zia?



"Ka hai che i ti sia?" ka ti leh ngat. A rawn nui deuh suk a, kei lah ka thinphu a rang leh zaih zaih tawh a, ka awm a nuamlo hle bawk.



"Naktuk chu i lo kal ang ti raw?" a rawn tih leh chuan thawk ka lo la hluai a, engmah pawh ka hrethiam teh nuai tawhlo e a.



"Ka hre lo, ka chiang thei rihlo" ka tih laiin "Kan lo ring ang che, i lo kal theilo anih chuan kan buai dawn lutuk a nia" a rawn ti leh a, a awki danglam deuh chu ka hailo, mi mizia ka chhiar thiam ve viau ṭhin emaw ka intih laiin Lalfamkima mizia hi tinge maw ka chhiar thiam mang miahloh le, tunah te hian ka lakah eng rilru tak pu ang maw!



"Zingah ka lo hrilh leh ang che" tiin kan inbiakna chu ka titawp a. Ka kal leh dawn em mawni le mahse, ka hlauthawng deuh riau tawh a, mi dawih chi takah ka mualpho hrep ang tih ka hlau a ni, kal lo ringawt dawn ila, nikhat pawh inhrilh lawk awmlo a chawlhsan ringawt chu thil mawi chu a ni bik silo, an buai dan tur lah hriatsa a nia, Christa chu a nu te bulah emaw a dah a ngai anga, chu tak chu hreh zia ka hre ve reng bawk.



Room a ka va luh leh chuan ka khumah Umawii a lo bawk duai a "Zanin chu i bulah ka lo riak teh ang" a tih chuan ka chhang lemlo, Prof-an 'Ka hriatsual' a tih ringawt chhan tur kha a ni ka la ngaihtuah buai chu.



"Enge khatia i inngaihtuah vung vung a?" Umawipuiin a lo tih chuan ka zawt phawng dawn emaw ni, enge a ngaihdan ve reng reng pawh hriat ka chak.



"Au Mawi, UFamkima te ina ka thawh hma khan maw a Birthday ah ka va Wish a, chu chu keimah ka ni tih a hre chhuaka vawiin khan....." ka sawilai mek chuan "Zahthlak ve" a lo ti zauh a.



"Mahse, zanin khan 'Ka hriatsual mai mai, midang Mimi zawk a nia' a ti leh lawi sia, keimah ka ni tih ka chiang, ani pawn ka ni tih chu a hre tho ang, tinge chutia a rawn tih chhan chu niang le?" ka ti he haw a, min en chunga a hmui a pet sawi nang nang chu zawhna mitmengin ka lo melh ve reng bawk.



"Awmzia a awmlo, i duh tih a hre lutuk a nih chu" a ti deuh tawl a, awi...lehzel chuan a.



"A tih vel danah a duh ve che anih chu mahse, a va han zeilo em em ve" a ti leh hluai a.




Ka inngaihbel nge ni thil ni thei tak chu a ni vein ka hria, min be ṭha thei sia, hman zanah pawh sawi tur pawmawh awm miahlo ah Message te min lo thawn anih kha maw, ka Wish lah kha a lo hre ru kar tawh bawk a. Eh....Prof.Famkima hian kei hi minlo duh ru ve reng tawh zawk a maw ni dawn le?



"Au Mawi, min duh i ring tak tak em?" a Phone khawih lai dahin min lo en ha a, "Hlau hle rawh, pathlawi lung fing tawh anih saw, i rilru a thianghlim bawk si a a bum let tawp mai ang che, i tan chuan ṭah leh haṭhial a ni mai" a ti kha kha a, leh ta mai mai chuan a.



"U Famkima te chu chutiang mi a nilo hrim hrim, a fel lutuk, a zei vakloh danah a rilru pawh a ṭhat ka ring, bakah Pathlawi mah nise tlangval tam tak aipawhin keichuan ṭha ka ti daih zawk" ka ti ve leh tlat.



"Pathlawi an zei tih te mai mai a ho set sut emai a, inlaichinna hmasa a hlawhchham tawh hi eng teh ual an nih ringlo phawt rawh" a ti sam leh et a, chhang zui duhloin ka Phone ka en san a, a la duh tawk mailo "I lo inngaihzawn pui tak tak a nge aw, engtik thleng nge i kal ngai dawn, ka awm i ti nuam miahlo ania, ral khat aṭanga star kha a tawk, fa a nei tawh bawk si, ka duhpui lo tak tak che a nia" a rawn ti leh a.



"Min duh i ring tak tak em?" ka lo ti nawn leh chu min melh rum viau tawh.


"Mawh...."


"A chiang reng tawh a lawm" a tih chuan ka nui var var, Au Mawii hi chu nula fing deuh a nia, a thilsawi hi chu a dik thawhkhat viau zela, tuna a thil sawi phei hi chu ka tan pawm a nuam lutuk tlat a ni.



Naktuk chu ka va kal leh phawt anga ka awm zel dan tur pawh ngaihtuah leh ṭhain ka hria, ban chu ka tum ta tho a, duh leh midang ka aiawh tur a hmuh hun te pawh nghak ve rih mahila a pawilo ang chu.



Zing ka tho chu ka hritlang pik viau tawh a, damdawi ka ei a, ka khua a sik hlauh takah tiin nachhawkna te pawh ka pai a, ka va thlen phei chuan an lo reh ṭhiap a, Room lamah an awm em mawni ka tih laimekin pawnah an thawm ka hre zui a, an pafa in khawiah emaw an lo kalchhuak a nih hmel.




"Ka lo Phone dawn chiah che a, vawiin chu sawrkar chawlh ania in buai viau chuan i duh leh chawl mai ta che" min hmuh veleh ah a lo ti a, ani pawh a hritlang zual deuh aniang a aw a tham deuh ṭuak a, a mit lah chu a sen deuh rumin ka hre bawk.



"Vawiin tak chu buai rihlo" ka ti ve mai a.



"Anih chuan a ṭhat hlauh chu, ka nuamsam vak lo a Exam paper khawih tur ka nei nual bawk sia, lo in awm leh mai ru aw" tawi te hian min nuih sak a, kei ka lo bu nghat thung.



"Anu Mimi hi kawlbahra rawh kha pe ve rawh le" tiin Christ-a chu a be zui a, Christ an a Polythene khai min lo pek chuan lai angreng deuhin ka lo ban a, Polythene chhungah chuan kawlbahra rawh a lo awm ṭeuh mai a, "Kawnah an lo rawh a, i nau hian a ngen tlat a" Ufamkiman a lo tih leh chuan tlem chu ka eisak ve a, ka ngaina ve tehchiamlo.



Gas ah chuan tui a lum a "I in ve duh em?" a lo tih chuan ka hnial lo a, "I hritlang a zual a law?" ka lo ti vat a, "Nia, nizan ka mengrei deuh a" min en pah hian a rawn nui a, kei ka lo lai leh em em a, ani erawh a lai ṭha duh vak tawhlo, Christ-a kawlbahra ka kheh sak laite chuan min lo en deuh rengin ka hria a, ka awm a nuamlo em em ringawt mai a ni.



Tui lum chu min lo chhawp sak a, chumi hnuah no ah chuan engthil emaw rim na deuh hi a lo pawlh a, zawhna mitmenga ka lo en laichuan "Hritlang damdawi ṭha lutuk anih kha" a lo ti deuh sup a. Ka inchhin chu a rim nat vang nge ni a hiar deuh tein ka hria.



Ka ngaih bel deuh nge min ngaihsak deuh riau hian ka hria a, ka awmdan chu ka hrethiamlo nuam ka tihna leh nuamlo ka tihna chu a inzat thuak ta ve ang, ka inthlahrung bawk a, ka hlauthawng deuh tlat bawk.



"Lo in awm ru aw" a tih leh hnu ah room ah min luhsan a, ka awmdan tur kha sawi chian deuh ka duh rilru hle a, midang a zawng miah lo ang tih pawh ka hlau ru deuh a, ban ka sawi ve laklawh tawh si a, nizan kan inbiakna vanga han ṭhulh leh ringawt pawh chu em a ka ti ve deuh bawk si, awmdan tur pawh ka hrethiam teh nuai tawhlo.



Chhun lamah chuan ruah a tla cherh cherh renga, thawmhnaw bal tlem a zawng awm pawh chu ka su ta rihlo a, Christ-a khumah mutpui pahin zai ka ngaithla a, engtik laiin nge ka lo muthilh hman ni, ka ṭhanharh chuan ruah a lo sur bur bur tawh a, kan mutna room tukverh in khar nghetlo ka hmuh rual chuan rang deuha tho chhuakin ka va kalh ṭha a, Christ-a erawh mut duh tih takah a harh eihlo a, a muttui hmel khawp mai.



Puan ka sin ṭhat tir laimek chuan Room kawngkhar chu a lo inhawng riai riai a, Ufamkima lo dak zawk chu ka va hmu ve nghal a, engmah phei chu sawilo, lo kal hnaiin Christ-a chu a lo en deuh vung vung a, "Thil ei a hun tawh a sin mawle" tih zawng a sawi a, chumi hnuah a chhuak leh mai a, ka Phone sana ka en chuan dar 1 a lo ri reng tawh hi a lo nia, Ufamkima chu a ril a ṭam tawh anih ka ring.



Choka a ka va chhuah pheilai chuan inhnunglam bathlar kawngkhar bulah chuan kawngka biang nghengin a lo ding a, ruah a sur nasat vangin ka pen thawm a hrelo a ni ngei mai.



Thingpui ka chhuanga ka thawmah chuan a lo hawi ve vat a, dawhkan bul Chair-ah lo ṭhu pheiin a Phone a bih a, chhangthawpa Butter ka tah mawlh mawlh laichuan min lo en vung vung tih ka mitsirin ka hmu renga, min biakloh chuan biak dan mai tur ka hre tawh biklo.



"Ufamkim" ka tihlaia min lo enreng vang chuan ka tim khawp mai.



"Umm" a tih ri chu ruahsur ri karah chuan ka hre zawi viau bawk.



"Midang chu i lo zawng ta em?" ring deuh fahran chuan ka han ti leh a. Chutah ka lamah a Chair chu rawn hnuk hnai hrutin hnai set sawtah kan inmelh ta ran a, a mitah pawh ka en ngam meuhlo chu a ni.



"Zawng nang, kar hnih vel chauh chu lo theih tum la, i hlawh pawh kan ti sang mai anga" a tih chuan ka rilru chu a hmin leh vek tawh a mahse, ka chhang nawi khawp mai.



"Ka hre thiamlo, ka...." ka chemte ken lai chu a lo ban vut a, Butter ka lo tat hnem lutuk tih ka hre chawp chilh a, ka heh ka pet ka pet ringawt mai a ni.



"Jam kan nei tawh nange?" a tih teh daih a.


"Awm e, i duh zawk a mi?"



"Duh zawk lo e" a tih leh lawi a, chhangthawpa Butter a tat mawlh mawlh lai chu ka lo en ve reng a, "I thingpui a so ania" a lo tih chuan hrechhuak thutin ka tho nghal thuai a, ka che reng reng chu ka khawr ṭut tawh, thingpui thlit mai ka tum chu ka chhuanna thir sa ah chuan ka indep sawk a, ka aiah ṭhat rualin ka thlauh baw nghal hawk a, tlem a tlemah tuisain ka ke ka ti kang lo chauh a ni.



"I intih buak em?" hlauhthawn hmel fein hnunglam a ṭang chuan ka dar tawn tawnah a rawn vuan a, chhuata ka tuiso tih buak na chu a khu vung vung a, ka zak bawk si chu a hrehawm duh kher mai.



Ka thingpui bel tih tlak chhar mai ka tum chu ka darah a rawn vuan nghet salh a, "Khawi maw" tih pahin min kuai her zui zat bawk.



Ka kut zunglai sen deuh ṭul chu a tuai hauh hauh a, kan indin hnaih lutuk mawlh mai chu a ni, ka kut a vuan mek lehnghal a, tun dinhmunah hian pawn lam ruah sur ri reng reng ka hre tawhlo, engkim mai chu an reh duk mai hian ka hria, ka lungphu rang zaih zaih erawh ka hrechiang viau thung.



"Lo kal teh" tih pahin tui khawihna lamah chuan min kai phei a, ka kut chu la hum rengin tui vawt chuan a rawn leih a, a dai seng seng mai, chumi hnuah Toothpaste a rawn hnawih ta mai a, "E he...!" ka lo tih laiin ani chu a nui suk a, "A zia deuh em?" a tih leh chuan a sawi ang tak takin a zia huai huai maiin ka hria, a va mak ve, hetiang kanga Toothpaste te han hnawih mai chu!



"Lo va ṭhu rawh, ka lo siam ang" a tih chuan "A ngailo, ka lo ti zawk ang" ka ti ve vat a, ka darah nama Chaira min nem ṭhut takah chuan awm nuam zanlo chuan a che vel chu ka en ta ringawta, thingpui a chhuan laia chhuat huh hruk ka tum chu ka chuatnawhna ken lai a lo ban leh a, "Lo ṭhu mai mai rawh" tih pah chuan min nem ṭhu leh a, a zialo ka ti lutuk tlat.



"UFamkim ka hna a nia, i tih zel te chuan a nuam lo a sin" ka lo ti hap a, a nui suk duh chauh a ni.



Thingpui a siam zawh chuan min lo chhawp sak thlap a, keiin chhangthawp Butter tah chu ka lo pe ve bawk a, ka kut ṭang var luk en chuan ka nui ru leh tat tat ṭhin, tu hriatpui siloh chuan ka awm a nuam ru veng veng mai bawk.



"Thla tharah ka nu a lo haw dawn a, chumi hma chu kan ring mai ang che aw, midang sawm tur pawh ka hrelo, i lo thawh hma khan kan lo zawng hrep tawh zawk a, mi hi ka duhtui ve angreng bawk si a" a ti sap sap a.



"Kei kha min van chhawr awlsam si em em" ka lo tih vang chuan chiang fe mai hian min lo en a, chutah ka beiseiloh deuh thu a lo sawi a, "Ka hmuhtirh che khan mi ṭha deuh i ni tih ka hre thei nghal a lawm, i mitmeng inngaitlawm deuh aṭang khan ka rin zawng chi tak i nia" a tih chuan ka lai leh ṭut tawh, hmaichhanah lehnghal a hnen aṭanga fakna dawn chu nuam ve mai mai tak a ni.



"Ka va lawm ve, min bawl a ni lo maw" nui pat pat chunga ka tih chuan a nuih a za kher mai. Ka sawi sual emaw ka inti leh rum rum a, ka nui ṭha vak ngamlo.



Tlaiah ka haw tur chu "Khua a chhe emai Motor in kan thlah ang che" a ti tlat a, chhum a zing nasa in a vawt hle a, ka hritlang bawk nen ka hnial duh ta biklo, Christ-a lah a pain "Nu Mimi kan thlah dawn nia" a tih vang chuan a phur em em a "A nu Mimi, kan thlah dawn che apa'n a ti" a ti sek sek a, min kai deuh tlat bawk a, ka kalsan a hlauh hmel khawp mai.



Umawipuii chu ka hawsan leh ta phawt chu a nia, kan veng kan thlen chuan leng lut tura sawm duh viau mahila ka ngam ta tlatlo a, ka chhungten zawhna an lo ngah dawn hian ka hria, Aumawii ka hawsan chhan pawh min lo zawt leh ngei dawn a, UFamkima hmel ka nuin a lo la hriat ve phei chuan a tih chi loh khawp ang.



Kan inpiah deuh kawn kan thlen chuan "Ka lo chhuk tawh ang" ka ti vat a, "Khawi lai nge in In?" a tih chuan "Saw lai deuh ah sawn" tih zawng chuan ka chhang a.



"In in kawtah chhuk law law la" a ti lehzel a, a va buaithlak.


"Ih..englo, dawrah sawn kal kawi ka ngai a" ka ti ta ngawt a, min rawn en zuk bak chu a sawi zui ta biklo.



Ka chhuk tur chuan Christa biangah piaiin ka mangṭha a, UFamkima ka va en chuan min lo nuih suk a, ka nuih let ve zet hnuah ka kalsan zui a, dawr kawt ka thlen lai chuan a in Turn ve mek a, Prof-a lo hawi leh zawk chu hla deuh aṭang chuan ka lo nuih leh a, a ban a rawn vai zauh mai.



An tlanliam hnu chuan muang changin In lam ka pan a, ka tirilah hian min ṭham ni mai hian ka hria, ngaihzawng neithar hlim ang maiin ka awm a, ka nui leh rih ṭhin.



In ka thlen hnuah tuilum sa ver vawrin ka inbual a, "Ti nge i u i lo hawsan a, a inkhar har dawn a mi?" ka pa'n a lo tih chuan "A lo haw mek ang" ka ti thla ve rawk a, a hnu rei vaklo ah a lo thleng ve mai bawk a, min hmuh rualin min rawn chhuahchhal nghal pang a, "Engmah sawi bawk silo, ka nghak rei lutuk che a lawm" a ti hluk hluk chu ka mitmeiin ka lo khap chul a, a la hrethiam lawklo zui.



"Khawiah nge i kal a?" ka nuin a lo tih takah chuan a hre ve leh chauh a, "Bazarah ka kal lawka" tiin dawt ka sawi leh ta ringawt chu a nia, mi inah nau ka awm tih hria se min vaw duh hialin ka ring a ni, ka va kalna pa lah a hmel hmu na sela chuan tunge tih a hre ve dawn nasa mai bawk si.



"Vawiin chu engtin nge a lo biak che a?" zanriah eikhama room a ka chhoh hnu chuan Umawiin min zawt a.



"Engtin vak mah min be lo mahse, a fel lutuk" sawi phur hlut ka hreh deuh a, a sawi hnawng leh vak dawn tih ka hrereng, mi duhpuiloh thu a sawi reng bawk nen a bula thu thlen chu a tihchi vaklo tlat.



"Bem nachang che pawh a hre na nge?" a ti leh mauh mai a, ringawt ṭhin a, mangramah pawh ka la mangphan chhin miah hleinem, ngaihtuah lah chu a ti thui em em lehnghal a.



"Aumawi, mipa i duh deuhin ṭha deuh deuhin be ve ṭhin ta che sela engtin nge i tih ang?" ka tih chuan za zetin a nui uar uar a, min hi hamhaih lek lek mai.



"Ka sawi awmzia i hrelo anih kha" ka ti hap a.



"Ka hria a lawm, keite chu dan theih ka nilo, Sangzuala pawh kan Class ah te chuan a Luck ber ṭhin a, ngaizawngtu pawh a ngah lutuk, ka nih hma lawk hian bialnu a ṭhen bawk a, an inṭhen laichuhin hma ka la thak mai mawle" a tih chuan ka lo ner nak a, Usangzuala zawkin a Bem turah ka lo ngai a nia, a hmeichhia zawkin a bem hmasa tihna maw? Nasa reuh ve...



"I va bem tihna ami?" ka ti leh hluai a.



"Bem tih ah bem chu a ni ber ang chu, ṭhian kan nia, kan inbe reng zel a, ka duh bawk si vang khan inkawm kha a nuam vak biklo a" a ti leh a.


"Engtin nge i va tih a?"



"Sangzual, ka duh che tih i hrereng, inkawm tawhlo ang ka tan a nuamlo, nangpawn min duhlo anih chuan min be duh tawh lem suh, ka va ti tawp mai maw le, chuan min rawn bem zui a, kan ni nghal mai" a ti awlsam et a, a tih dan chu a ṭhing ka ti tak tak a ni, ka ti ve duh lo nasa mai.



"Bem ve i tum a mi a?" a tih leh chuan "Awi a, ka ngam teuhlo mai" ka lo ti hluai a.



"Bem a ngai hleinem, Pathlawi lungfing tawh te chuan a tih tur a hria ang chu" a ti leh mai a, ka beisei loh lam tak a ni, innel taka kan inbe ṭhin pawh ka lungawi pui viau a ni keichuan.



"Va text la, thil ho te te sawia inkawm aṭangin bul ṭan la a ni mai a lawm" a tih chuan phawk lek lekin ka lo en a, min duh pui lo khan ka hre sia, leh lawi si chuan a.



"A chi dawn a mi?"



"A awmdan ah khan a hnar hmelloh che emai" zial zuk hlat hlat pahin a ti liampuat a, min ti phur em em lehnghal, Aumawiin a sawi tawh hi chuan ka lo phur ve leh surh zel.



"Engtin nge ka va tih ang?"



"I mu tawh em? Va ti rawh" hmmm...teh tawp a. "Anih loh pawn, Naute a tlei em? te va ti la" a ti leh a, ka Phone chu la kangin ka en rauh rauh a, ka hreh bawk sia, ka chak ve tho bawk sia, zahthlak ka ti deuh bawk si.



Ka tum ngial a, ka ngam nganglo, Aumawii nui kur kur chuan min bawl deuh tlat hian ka hria a, ka ṭhulh leh ta zawk, ka tihsual chuan min nuihzat leh vak dawn tih ka hre reng.



Ka phone dah mai ka tum laichuan Message a lo thleng a, ka beisei loh lutukin UFamkima a ni tlat mai! Message chu ka hawng rang hle a, "I mu tawh em?" tih hi min lo thawn a.






(End of Chapter - 9)

Link:
BBcode:
HTML:
Hide post links
Show post links

Ahmangaihi violette
Posts: 148
Joined: February 1st, 2020, 3:14 pm

Unread post by Ahmangaihi violette » September 7th, 2021, 10:45 am

ZUNZAM - by Ahmangaihi violette khiangte


CHAPTER- 10




"Au Mawi, aman min lo bia ania!" ka Phone chu a hmai zawnah ka lek vut a, Phone pawh en hleilo chuan keimah zawk chu min rawn melh nghal rawm a "In ngaihzawn chu inlo tum tak tak a law?" a ti nghal hlur a, tun lawkah khan min tihpui ang deuh khan a ṭawng reng sia, Minute thum dan lek lekah a rilru a thlak ṭhin em maw ni le?



"Pawnah kan chhuak lawk" tih leh thawh ka rual a, Umawii a awm ve reng chuan duh angin ka chhang thei dawnlo tlat hian ka hria.



Pawn bathlarah ka za ṭhutung ut a, UFamkima zawhna chu awlsam tea chhan theih ni mah se ka chhan dan tur chu ka ngaihtuah leh fe tho mai. Chutah "La muhil lo e, nang i mu tawh em?" ka va ti ta a, zawhna inzawh nghal zel loh chuan titi hi a tawp leh daih zela, thluak hman ve deuh hlek a ngai a ni.



Min lo chhang zui tawhloin a rawn Call nghal a, ka chhan rualin "Bawiha ka mutpuia, naktuk chu i buai viau loh chuan Birthday lawmna lo kal ve ta che" a lo ti zui zat a.


"Buai... hran chuanglo, hna ah i kal dawn lo a mi?" ka tih chuan "First Period chiah ka kal ang, kan thawhpui te nau piancham lawmna ah kan kal a ngai dawn a, Bawiha nen chauh chuan kan chhangchhe dawn em a" a ti leh sup a.


"Khawiah nge an lawm dawn a?"


"Liando Resort ah a nia, dar 11 bawrah kan chhuak hman anga, ka rawn lamkawi mai che u anga" a tih leh chuan ka hnial biklo, ka beisei ang em em rawn sawi lo mahse, min sawm ve chu ka lawm rilru viau mai.


"Khua a chhe leh mai ang a" ka tih chuan a ngawi zui vung vung a.


"I hritlang enge a an?" a tih ri chuan min ti mur sung sung thei, a aw rilruih ah chuan min ngaihtuahna ka hre rang hle bawk.


"Ka ṭha ve zel e, nang zawk?" ka ti let ve leh zat a.


"Keipawh ka zia, lo inthuam lum lawkla, khua a chhiat loh chuan tui chen te pawh i duh maithei lo inkeng lawk bawk la, zanriah kan ei nghal bawk dawn a nia" a ti leh sap sap a, ka chhungte bulah chhuanlam siam ngei ka ngai dawn anih hmel e, Picnic nuam ti ngai hawt silo chu ka phur em em lehnghal a, hritlang khawsik hluah pawh ni ila ka hnial phal hauhin ka ringlo zawk hial a ni.



Kan inbiak zawh hnu chuan zing lama ka hak tur leh ken tur te ka siam nghal sawk sawk a, Umawipuiin min lo zawh chuan kan Picnic dawn thu chu ṭha deuhin ka hrilh a, "A ngaizawng che anih mai mai chu a, chu Pathlawia chu zeiloh hmel deuhin a zei ru riau mai ka ti, Mimite a Bem loh che chuan Bem reng reng suh i hria em, in lak Value hun anih kha, awmpui mai inih vang khan in zuam tir reng reng suh" a lo ti niah niah a, kei ka lo nui mai mai tawh thung.



Umawii ka bulah a lo riak a, ka helhhawlh leh tawh nge mawni dawn ni ka harh leh ṭhin a, ka mu nghet lo khawp mai, ka hritlang zual ta deuh a niang ka hrawk a thip hlur mai bawk a, ka pang lah chu a lum hiam a, ka zing tho pawh ka lu a rit hle a, ka hnar a ping ṭup mai bawk.



Ka chhungte bulah ṭhianho a chaw kan eikhawm dawn thu ka hrilh leh ta thawr a, ṭhian kawma hun ka hman khat vang hian ka tih chhunah min hnial ngai lemlo, haw hma turin min chah a, Pocket money te pawh ka pa in min pai ve nghe nghe. Dawrah peng kawiin eitur ka pai ṭeuh a, ka chhuah dawn laimekin Prof chuan min lo Call a "I lo kal dawn tawh em, tih tur neuh neuh ka nei a" a lo tih vang chuan hmanhmawh deuhin ka kalchhuak a.



Ka va thlen chuan chhuak turin a lo inpeih leh diam tawh a, "Nakkinah ka lo Phone che anga, kawngpuiah in lo chhuk dawnnia, ṭhutthleng a mi saw kan bag ken tur aw, Wrapping paper lo leila, Sitting room a ka Percel dah saw i lo pack dawn nia" a lo ti zung zung a. A present pek tur chu a lian ṭha khawp mai, Toys man to tak chu a nih hmel bawk, toys ani lo zawm emaw ni? A rit em em lehnghal a.



"Christ a lo hmuhtir lo la, a ngen palh ang" a tih leh laichuan "Ufamkim ka mut tir hmasa dawn em, a laklawh viau ang a" ka lo ti vat a. "Dar 11 velah kan kal dawn sia, lo muttir rihlo mai rawh" a ti leh mai a, ni a la vui zo bawk silo a, a hmunah kan inpuak mut a ngai dawn anih hmel e. Sitting room lam pan nghal mai ka tum chu ka chal a rawn dek vut a, ka pen tawp chiang khawp mai!



Mit khap sak sak a ka en laichuan a kut chu a la let vut a, ngawireng chuan pawn lam a pan zui a, min ti hawihai hle ringawt. Ngaihtuahna ti buai tawk lek leka awmdan a thiam hi ka tia, tunah pawh ka vei zui leh reng ringawt tawh.



Christ a hruaiin dawrah wrapping paper chu kan zuk lei a, kan let leh hnu lawkah Ufamkima chuan min lo phone leh a "Pawisa ka lo pek theihnghilh daih che a" a rawn ti a, ka lei tawh thu ka hrilh chuan a inthiamlo deuhin ka hria. "Sawmhnih manin a daih a lawm" ka ti nawn leh kher a, "Nakkinah ka pe leh dawn che nia, eitur chu ka lo lei haw ang" tiin phone chu a dah a.



Rei vakloah min lo Phone leh a "Kawngpuiah ka awm lo chhuk rawh u le" a rawn ti ta mai a, MZU pawh a thleng hmanin ka ringlo, hmanhmawh deuhin Christ a kai chuan ka chhukthla sawk sawk a, Stepa a lo chho nen kan intawk chu ka ding chawt a, "Kawngka i kalh em?" a tih chuan ka bu nghat a, ka Present bawm ken chu min lo laksak thuai a, a lo let lehchhan ka zawh chuan "Midangin ka class min lo dil a, ka pe ta mai" a ti sam mai a, sana ka en chuan dar 9 a ri thuak chauh a ni, kan chhuak hma khawp mai.



Christ-a pawmin Seat hma ah ka ṭhu a, min lo melh leh zauh ṭhin a, ka va hawi chuan kan in melh fuh ṭhin em em lehnghal a, sawi duh nei hmel te pawh a puin ka hria.



"Mimi" a rawn tih chuan ka hawi rang viau a ni.


"Eng lo..." ka lo en ran vang chuan tim hmel a pu a, chutah nui suk hian a rawn hawi leh a.


"Ka bialnu angin ka hruai mai che a nia" a rawn tih chuan ka hau chungin ka lo en tawh, enge a awm zia?


"A.....nau awmtu anga awm chu a nuam lo ang" a ti zawi deuh sup a, ka nui heu ringawt mai, ka lai chhe em em lehnghal a, kei aimahin amah zawk chu a laih hmel zawk.



"Tu te ho nge awm dawn a?" lai angreng deuha ka tih chuan "Ka thawhpui te leh an ṭhiante an nia, kan tam vak lo ang" a lo ti var a, engmah sawi tawhloin kan ngawidun vang vang a, Christa ṭawng barh barh chu kan nuihpui leh suk suk ṭhin. Ka tiril lah chu a khur ru deuh a, a bialnu anga min hruai mawlh mai chuan awmdan minti khawr a, engtin nge a ṭhiante bulah ka awm ang tih te chenin ka ngaihtuah a, hawihhawm leh zahawm tak anga ka lan ve te pawh a ngai dawn a, ka zam a ni.



"Lucy'n thil a zawh che chuan ka sawi ang chuan i lo chhang mai dawn nia" a rawn ti leh a.


"Lucy a?"


"Christ-a nutei kha" a tih chuan ka bangbo khawp mai, an awmpui ka ni tih a hre vek sia, engtin nge a bulah chuan dawt ka sawi theih ang, awih pawh a awih dawn em mawni, a engamah hma chuan ka huphurh nghal pang mai.



Vaivakawnah thil lei turin kan ding zawk a, a ṭhianten an lo phone chuan kawnga kan thang mek thu a hrilh a, kan tlan leh hnu rei vakloah kan hnunglama Scorpio var lo tlan chuan min lo tlan pelh pahin Driver chuan ban a lo vai zauh a, kal ve tur tho te an nih hmel e.



Tui khawhthla awmna kan thlen chuan Scorpio kha a lo ding a, a chuang te pawh an lo chhuk a, Christa ang rual vel tur hi mipa naupang an nei ve a, "Ka ṭhiante an nih saw, thla te in la ve duh em?" a Motor a tih din rualin a lo ti a, engmah pawh ka sawi hma chuan a chhuk zui a.


Chhuk ve vatin Christa pawm chung chuan a hnungah ka zui a, an dinna bul ka thlen phei rualin "Mimi-i a nih hi" tiin min lo hmelhriattir vat a.



"Mimi hei hi, JH-a leh a nupui Mambawihi" a tih laimek chuan mipa zawk chuan min lo chibai a, a nupui chuan Christ-a chu a lo be sawk sawk a, Prof.Famkima bulah chuan "A van hmelṭha ve a" nuisang hian a ti zui a, a bialnu tur ah min ngai nghet hmiah a nih hmel.



"Sahuanah kawi lawk ila, haw lam chu ruah te hi a sur leh mai ka ring" JH-an a tih chuan UFamkiman min rawn deuh hian min lo thlek a, "Zawngte kan enpui lawk dawn nia, a hmunah tih tur em em a awm chuanglo ang" JH-a nupuiin a lo tih ve takah chuan "A pawi hleinem" ka ti ve ta ngawt a, UFamkima nui suk chu ka hmu reng, a bialnu lem mai mai mah nila nuam ka ti ve takzet a ni.



Thla te kan la ho a, JH-a nupui nen naupang chung chang sawia kan inbiak mawlh mawlh laichuan "Bawihno, kal dawn ang u sahuana pen kawi kan tum chuan" JH-an a lo ti a. Chutah UFamkima chu lo kal hnaiin "Bawihi" mi rawn ti ve thawr mai, phawk deuh hian ka lo en a, "Bawihi kal ang ule" a rawn ti leh ngat a, ka laihchhiat zia mai chu! Ka beng a sa hat hat thei a, Christ-a a rawn pawm lai te chuan ka hawi chhuak ṭha ngamlo a ni ber.



Rei vak kan tlan tawhlo, kawng chungah kan peng chho a, kan tlanna kawng chu a zim sawt khawp mai. Kan hma a Scorpio tlan chu kan hmu hman meuh tawhlo, "Nichina mi te kha MZU a thawk ve tho a mi an nih a?" ti a ka zawh chuan "Ni lo e, Social welfare Department a Secretary hna chelh lai anih kha, a nupui kha chu enge a thawh ka hrelo" a lo ti nghal thuai a, vawiin chu mi zahawm deuh deuh zingah ka khawsa dawn tih a chiang viau mai, keilah chu awmpui mai mai ka ni sia, hmelhriat an lo awm ve ang tih mawlh ka hlau a ni.



Sahuan awmna kan thlen chuan kan hma a Scorpio tlan kha a lo dinga, naute nu kha kan lampanin a lo kal mek bawk. Ka chhuk laichuan "JH-an Ticket a la mek a, lo va lut ang u" a lo ti lang lang a, a fapa hming ka zawh chuan "Johna anih hi, Christa nen kum khat chhuak an nia, Johna hi thlahnih in a chhuak hmasa a" a lo ti var a, a hriat chian danah UFamkima nupui pawh a hrechiang ngawtin ka ring ta, ka inthlahrung angreng amah lah chu a nelawm em em mai lehnghal a.



Naupang pahnih chuan sahuan chu nuam an ti ngang mai a, an rak teng tunga, an kawhna lam a piangah kal an ngen nghal zel bawk a, Mambawihi nen chuan kan enkualpuia, hnungah muangchangin mipa pahnih te chuan min lo zui ve zel bawk.



Kan let leh lamah chuan an ṭhian dangte Sahuan kal ve tur kan tawk a, "Prof, Ramdinzuala anih hi" ti a UFamkiman min hmelhriattir pa chu mipa sang leh hang lam deuh hi a ni a, chupa chuan min lo en pahin "In nu thar maw?" tih pah chuan min lo chibai vat a, "Hei hi, ka nupui Suzanne-i" tiin a hnunga mi chu min chibai tir ve leh bawk a, a nupui erawh sa pan lam deuh niin a ngo var a, ka rualpui vel tur a ni thung, a incheidan pawh a zahawm lutuk biklo, an fa chu ala te deuh a, a pain a puak tlat vangin a muhil a nih ka ring.



"Nuberin Sahuanah kal ang a ti tlat a, kan han teihawi ve lawk ange, min lo va kalsan rawh u" mipa zawkin a lo tih vang chuan khawmuang tawhloin kan kalsan a, kan thlen chuan tu vakmah an lo la awm lo, a hmun lah chu ka rin aiin a zau lo a, a hmun hma erawh a nuamin a felfai viau thung.



Minute sawm vel kan awm hnu chuan an lo thleng ṭak ṭak a "Kan Birthday nei tu te pawh an lo thleng ta a lawm" Mambawihin a tih laichuan thlanglama lo kal mek te chu ka lo en ve vat a, nu te lam deuh samkir lek lek leh a fanu niin ka hria hmeichhe tleirawl er er hi thil khai bawr lukin an lo kal chho a, an hnungah midangin an lo zui nual bawk.



"Sir Thomson-a khan eirawngbawlna a awmsa a tia kan lo ring ringawt a" samkir chuan a lo ti lang lang a, "Kan en ange?" tih paha JH-a a kal laichuan chumi te chu an lo thleng chawpchilh ve a, Ufamkiman min hmelhriattir pahin a lo chibai vat a, a fanu tleirawl piancham chu kan lawm dawn anih hmel e, a kum zat an sawi lah chuan ka rinai daihin a lo la nau a, amah lah chu a lian zuah mai bawk si.



Prof.Vanlalhlani chu Prof.Famkima thawhpui an Junior ani awm e, an thawhna Department erawh a in anglo a, an inbiak danah an inngaina hle anih hmel bawk, a fanu Aruati tia an koh lah chu a hmelṭha em em mai lehnghal a, a pa awm ang erawh ka hmu tel hauhlo, a tumah lah chuan an sawi lang miahlo bawk.



"Nuam i ti em?" Ufamkiman a lo tih chuan ka lo nui mai a, nuam ka tih em em pawh ka hrelo, tumah ka hre ve bawk silo a, chutih lo ah chuan nuamlo ka tih hran vak pawh ka hre chuanglo.



Christa nen pipu awmna lamah kan kalsan daih a, pipu a uai chu nuam a ti ngang mai, ka then lai chuan a nui leh hawk hawk ṭhin a "Anu Mimi lo chuang ve rawh" a ti deuh chul a.



Chutih laichuan Ufamkiman min lo ko a, ka va hawilai chuan miṭhenkhat lo thleng thar te nen kan lam hawi hian an lo ding hlawm a, min hmelhriat tur a nei leh anih ringin Christ a chu ka kaiphei zui a, kan va thlen rual chuan Prof.Vanlalhlani zawk chuan min lo hmelhriattir a "Ka ṭhiante an ni hi, Maggie hei hi Ufamkima ṭhiannu anih hi" a lo ti zung zung a, min lo chibai tu hmeichhia chu Model ang maia piannalh a ni, "Gabriela ka nia" tiin mipakhat chuan min lo chibai a, ka nui heu ringawt mai a, chhan vak dan tur pawh ka hre hlawmlo.



An ni chu inhresa vek an ni a, min chibai dan dan danah chuan mi pawimawh tak te pawh ka ang vein ka hria, chutih laichuan UFamkima chu ka bulah a lo ding a, ka darah a rawn kuah deuh kher bawk a, zam viau e tiloin chutia min lo kuah chuan ka thla a muang huai huai thung, min lo enin min nuih suk a, a bialnu tak tak ni mai hian ka inhre tawh, eng ang takin ngai ve ang maw?



"Anute" tih paha Christa tal phut chu umzui ka tum laitakin kan piah deuha Lucy lo ding chu ka va hmu ta chiah a, mak tih hmel deuhin anin min lo en ve bawk a, a lampana Christ a tlan chu umzui tawhlo chuan ka en reng ringawt a, a hmelah chuan zawhna a ngah hmel khawp mai, a chhan chu Ufamkiman ka darah min kuah meka, insi rialin kan lo ding dun mek bawk a, chu chu a rawn melh fuh chiang hle bawk.




"In thlenna a rei tawh em?" tiin UFamkima chu a lo bia a, kei chu min melh leh ralh ralh ringawt thung, zawhna ngah hmel viau e tilo chuan ka chungchang engmah a sawi lemlo a, UFamkiman min kuahna a lakthlak rual chuan thaw huai hmel a puin ka hria.



Midang lo awm ve te ho nen chuan innel takin an in be bawrh bawrh a, Lucy chuan Christ a a pawm daih bawk nen tih tur hrelo deuh chuan ka ṭhu ve reng a, mipa ho chu mipakhat Nunsanga tih hming pu hian a lo ko a, eirawngbawlna ah an kal thla diak a, Lucy'n a zui ve bawk avangin ka ṭhutpui te chu ka hmelhriat tumah an awm lo a, a nuam duh fahranlo khawp mai.


Pool sir ah chuan ka va tei hawi a, tleirawl te te ho hian tui an cheng a, a piancham kan lawm ber hmeichhe naupang kha pool chhaka in teah chuan a rualpui vel tur mipa nen hian an ṭhu a, in ngaizawng te pawh an ang viau mai.



Ka lo thlir laimek chuan "Ṭhiannu min lo hmehsak lawk teh a" tih ri ka hre zui a, sahuana kan hmuh hmeichhia kha a ni, a hming kha ka hre chhuak thei ta mailo. A phone min lo pek chuan ka lo ban ve mai a, vawi li vawi nga vel chu ka hmehsak a, ka la thiam a ti vak lo aniang, amah chuan a in hmeh leh mawlh mawlh a, fa sen deuh kha a neiin ka hre sia, a pasal ngawt chuan nau a khawih em mawni, amah lah chu a inchei vur a, fa nei tawh pawh a ang meuhlo.



In te lampana kan inzui phei laichuan Prof Vanlalhlani ṭhiannu sang deuh kha a lo kal phei hlak hlak a "Zopui, Cedric i lo hmu em, a pa Camera a keng daih a, an eirawngbawl lai khu thla laksak ka duh sia" a lo ti phei lang lang a, ka bula miin "Hmu miahlo" a lo tih laichuan "Aruati nen khan an inzui khan ka hria a, khawiah nge maw an kal ni" tih pahin Pool lamah chuan a phei a.



In te kan thlen rual chuan Prof Famkima lo chho nen kan intawk hlawla, "E...ka rawn zawng dawn che a, i duh chuan lo chhuk ve la" a lo ti var a, Lucy kha a awm ve bawk sia, chhuk chu duh viau mahila nuam ka ti zan lo a, inhmuh tam loh tir hram ka duh a ni.



"Lo kal rawh" tih leh pah chuan ka hnunga mi chu a thlek zauh a, "Suzanne inpa khu nau lo lak chhawk ta che Ar talhin a buai teh a nia" uang deuh tak hian a ti zui a, "Ka paw muhil thei ve lo a lawm, ka hnung hi a ruh lutuk a niang" thutak deuhin ka hnunga mi chuan a lo ti a, Prof chuan min nghak reng bawk si a, a kal loh theihloh, rilru nuam zanlo chung chuan ka zui thla a, Step zim deuha kan chhuk laia ka ban a rawn vawn chuan kan in melh zawk a, "Muangchangin kal rawh i tlu ange" kiai suk hian a ti zui a.



Ka awmdan hi ka hrethiam zan lo, a bialnu anga min sawngbawl hian nuam ka tih viau rualin inthlahrun deuhna ka nei a, a bialnu ka nilo tih ka inhriat chian em vang pawh a ni maithei, awm nuamlo leh helhkam nei ran hian ka awm a ni ber e.



Choka a kan lut chu an lo ṭhahnem phian a, a ṭhenin sa an chan a, an ri le lu mai a, patling nui ham ham ri leh ui bauh ri nen an thawm a ṭha ham ham khawp mai. "Dodo, Dumtea hi inchungah lo han thlung teh" tih pah a Prof Vanlalhlani ui rawn pawm chu ui var thianghlim zet mai a ni a, Dumtea a ti teh daih chu ka hrethiam lo khawp mai.



Ṭhutna awl ka hmu mailo a, thlang lam kilah chuan Lucy chu zial zu hlat hlat chungin a lo ṭhu a, a bul ṭhutna chauh a awl vang chuan pan hreh deuhin mipa ho sa channa bulah chuan ka ding a, Prof pawh ka bulah dingin sa chan lai chu a en ve reng a, Lucy chuan min lo en leh reng tawh tih ka hria, ka va hawi laichuan a Phone-a min lo tin lai chu ka va hmu a, ka hawilet rang khawp mai, Prof.Famkima sir lehlamah chuan ka ding sawn nghal thuai bawk.



Ka chesawn chu ka bula ding chuan zawhna mitmengin min lo en a, "Kan haw har i ring em?" sawi tur ka hriat loh vanga zawt ka ni mah awm e.



"Har deuh mai thei, chaw kan ei hma dan a zir a niang, i hman hmawh deuh em ni?" damthluam hian a lo ti let ve a.


"Haw hma a chi biklo ang, zanah Cake te pawh ka zai dawn a lawm, Jh-a te pawh zan thleng awm turin ka lo ti zo chiah a" Prof Vanlalhlani chuan a lo ti vat a, chutah Ufamkima chu lo kun hniam deuhin "Kan haw har dawnlo nia, tui pawh cheng ve lo mai rawh, i hritlang zual palh ang" min biak dan chu keimah ngei pawh hian a bialnu tak tak emaw ka inti rum rum tawh.



Putar pakhat hi a lo lut a, "Kan Officer chu sa in lo chantir a ni maw" tih pahin JH-a hnungah a rawn beng thawk a, chutih laichuan Ufamkima chuan min lo din hnaih a "Pa Thanga anih hi, VLi pa a nia, Social welfare department a Officer ve tho a nih hi" a lo ti zung zung a.



A sawilai mek chuan putar chuan kan lam a lo hawi a, "Eh..Famkim, i nu phaiah i kalpui an ti emaw tia?" a lo ti he haw a, kei chu min en hian a nui hau bawk a, zawhna ngah tih hriat deuh hian Ufamkima chu a melh leh a, "Mamuanan a kalpui a, hei hi ka ṭhiannu a nih hi" a tih chuan Putar chuan ka ban bulah a rawn beng thak thak a "I van fel ve, nuam deuhin hmang rawh u aw, kan belelut lutuka, hei nizanah kan tum chawp chuk chuk a, kan buai nuai nuai rih a nih hi " a ti zui luam a.



"Rosy te hi an lo kal ve lo em ni?" a tih laichuan "Ka pa" mitmei zauh pahin Prof, Vli chuan a lo ti a, a hrechhuak leh thut a niang ka lam chu a lo hawi a, min nuih suk suk ringawt a, sawi tur a vang duh angreng viau mai.



"Lucy a lo kal a lawm" a tih chuan Lucy ṭhutna lamah an pafa chuan an inzui phei a, enge Lucy te unau nen an inzawmna niang le ka ti ru rauh rauh a, ṭhian satliah lo deuh an nih hmel ka lo ti deuh a. Ufamkima chu ka zawt phawng a, ka rin ang ngeiin chhungkhat hnai tak an lo ni a, Prof.Vli nu leh Rosy nu chu unau an lo nia, Prof. Vli nu pawh tlereuh lama sumdawng lian tak a lo ni ve tho tih te ka hre leh zel a, Rosy zawk lo kallo a Lucy zawk a lo kal chu ka lawm hle ringawt tawh.



Ka phone a lo ri a Aumawii anih vangin thil pawimawh a nih ka ring deuh a, midang ṭawng a ring bawk nen chhang turin pawnah ka chhuahsana, "I lo haw tlai dawn tak tak a mi, thil hrilh tur che ka ngah a sin" a rawn ti hap a, "Sawi mai la tikhan" ka lo ti mai thung. "Kan inneih hun tur chung changah Sangzuala chhungte nen kan thu a inhmu vaklo a, ka duhthua tawlh tir ringawt theih pawh a ni biklo, thla lehah hian kan tih ka ring deuh" a rawn ti deuh luam a, a lawm vakloh hmel khawp mai.



"A va zialo ve" ka ti leh mai a.



"I va ngai holam angreng ve, i pawisa ka hmang hman dawn lo tihna anih chu Chhuri" a rawn tih takah chuan ka hre chhuak zawk a, ni dawn tak maw, a lehzel chuan a.



"Engtin nge kan tih tak anga?" ka ti leh tawng a.



"Engtin nge ni tawh vak anga, dawrah ṭan lak a ngai tihna a ni mai" a rawn ti leh hluk a, hahthlak chuan a. Eng pawh nise Ufamkima nu thla tharah a lo haw tawh dawn bawk a, ka ban vat ka ring tho bawk nen harsatna em em a awm hranin ka ringlo, "Lo lungngailo phawt la, dawr lam chu kan ṭang dawn nia" ka ti ve leh mai a, a hlawkna tur awmlo thilah hi chuan ka u hi chu thurualpui har tak a ni.



Kan inbiak zawh hnu chuan kawng thlanglam hawiin rei vaklo chu ka ding a, let leh tuma ka lehhawi chiah chu ka hnungah Lucy a lo ding reng chu niin, min ti phu chiam lehnghal a!



"Thil hriat chian duh ka nei a nia" a lo ti chang fak a, min zawh tum chu rindan ka nei thiam nghal mai bawk. Engmah pawh ka sawi hma hauh chuan "Enga tinge midang ho hian Ufamkima bialnu emaw an tih ngawt che?" a rawn ti nghal tawl a, ka chil ka lem dak ringawt.



"In inngaizawng a mi?" a zawhna chu ṭawngka a chhang loin lu ka thing ringawt a, a lawm hmel chuanglo khawp mai.



"In awmdan kha ka hmu ve a lawm, zep buailo khan sawi mai rawh, ka makpa hi i lo ngaizawng em ni a?" zawi te vin zet a a tih chuan ṭawng ngaihna pawh min ti hrelo, kei aia a upat chu thuhran nise a mize huaisar zet vang chuan min ti ṭi dak mai a, lo inthlahrun sa nen a lawmloh zawng ka sawi ang tih te pawh ka hlau deuh reuh.



"Ngaizawng lo e, i hriatsual palh mai mai a niang" ka tih chuan min la melh rum cheu a, "Fimkhur rawh aw, ka unaunu pasal anih saw, ka mit ti kham zawnga in awm anih chuan kei aia nasa i hrelo ang" ti leh fakin in chhunglam pan chuan a kal zui nal nal a, a kal liam ta chu thawk ka la huai ringawt a, a insawi ang tak tak mizia a pu ang tih chu ka ring hlello, a mitmeng aṭang rengin a hriat theih a lawm.



Inchhunga ka va luh leh laichuan Lucy leh Ufamkima lo dingdun chu ka va hmu a, Christ a ka zawng ru deuh a, mipa pakhat khabe hmul nei hian a lo pawm a, an lampana ka va kal chu Christa chuan min lo ban vat a. "In nau hi a hritlang anih hi" chupa chuan a lo ti a, kan hritlang kan kai anih ka ring, a kawrlum ka kensak lah chu Motor ah ka dah daih lehnghal a.



"J-a ka nia, Famkima ṭhiannu i ni ti raw?" a lo tih chuan aw ka ti ṭha ngam tawh meuhlo.



Christa chu ka pawm thuai a "Anu Mimi pipu ah uai leh ang" a tih chuan ka nuih sak a, thli thaw a awmpui chi pawh niin ka hre tawhlo, inchung lamah chhohpui mai ṭhain ka hria.



Chhohpui mai ka tum laichuan "Khawnge in kal dawn?" Lucy chuan a lo ti fak a, ka lehhawi rualin Ufamkima nen min lo en reng tih ka va hmu chawpchilh a, "Inchungah ka chhohpui dawn, a hritlang ve deuh a" Ufamkima zawk chu en in ka ti a, ani a lo bu nghut a, Lucy erawh chuan min melh thip ṭhin khawp mai.



Engmah sawi tawhlo chuan ka chhohpui ta tho a, hmeichhe dang pawh an lo awm nual a, nutling pui pui pawh an lo awm ṭeuh tawh, pawna naupang ho infiamna ah chuan Christa chuan kal ve a ngen a, tui chen a ngen ka hlauh vangin chhuahpui duhlo chuan ka Phone ka entir a, rei kan ṭhu hman lo Prof.Famkima a lo lang thuai a, kan lampanin a lo kal nghal zat bawk.



"Bawiha chu a hritlang i tia mi?"



"Aw, a pang a lum deuh a, ka hritlang bawk sia ka kal anih ka ring" ka tih chuan "Keimah zawk ka niang, hritlang awmna hi a la hma hrim hrim lutuka" a lo ti var a.



"Motor ah a kawrlum ka dah daih a" ka tih chuan "Kan present tur pawh lak a ngai a lawm" tih leh kal a rual a, a hnungah ka zui ve nghalthuai bawk.



"Lucy khan enge i bulah a sawi a?" Motor lampana kan kallai chuan min zawt a, "Engvak mah a sawilo" ka ti chu a awihloh hmel kher mai.



"Zep lo la" a ti deuh sup a.


"In inngaizawng a mi a tia" ka sawilai chuan a lo nui deuh a "Engtin nge i lo chhan?" tiin min zawt let a.



"Ka hrilh tawp, min hre bawk sia, a nuam vaklo a" ka lam rawn hawi hian a ngawi vung vung a, engtak chu ngaihtuah ang maw?



"A pawi em?" ka tih chuan a nui leh mai a, sawi rawh a ti lawk bawk sia, ka sawi bawk silo chu ka inthlahrung leh zawk angreng.



"Pawilo e" a Motor dahna kan thleng chawpchilh a, Christa mut chhuak chu a ham bai bai tawh. "Hetah hian ka ti mu lawk mai dawn a mawni le" ka ti chuan "A pawi hleinem" tih leh pahin Motor seat hnung chu min hawnsak a, kawrlum ka haktir tur chu min lo pui vat a, ka malchunga muchungin Christa chuan Phone a la en a, Prof chu let leh mai lo chuan pawnah a ding renga, ka lam hawia a rawn nui chu lai deuhin ka lo nuih let ve a.



"I duh chuan va let rawh, a mut thawh hunah ka lo phei pui leh mai ang" a awm ve reng chuan a ṭhiante ngaih kan ti ṭhalo ang tih ka hlau deuh, a bikin Lucy kha.



Tukverh ah chuan lo dakin a fapa chu a lo en a, a sam a rawn chulsak deuh thuak thuak a, chutah chiang deuha min lo enin ka chalsam tla chu ka bengah a rawn hui a, ka hmel ka en chuan kan mit a intawng chiang hle a ni, engmah sawilo chuan kan in en reng a, a duhtawk mailo, a kut lum vung vung chuan ka biang a rawn dawm a, sawi duh nei ṭeuh hmel a pu bawk.



"Nangpawh i pang a lum deuh a nih hi" zawi deuh sup hian a ti a, chhangloin amah ngawt chu ka en a, a kut a la sawn mailo, ka biang dawma min en reng vang chuan ka awm chhung a mi chu a phu dut dut a, ka tiril a khur titih der mai, min ti zam chhe ringawt a lawm mawle.



"Min duh ti raw?" a rawn tih chuan chhan dan tur ka hrelo. Christa chu ka melh zawk a, Phone a entui hle a, a pa thil sawi chu hre ve awm pawhin a langlo.



Chutah ka khabe ah rawn dawmin a lamhawi chuan min kuai dak a, a hmelṭha zet nen chuan hnai takah kan in en a, thawk a chham lo chauh a ni.


"I inthup rei tawh khawp mai Mimi?"



"Ka inthup em ni?" ka aw chu a zawi hle a, a ri chang chang chauh a ni.



"Min hrilh teh, min duh em?" enge thleng ta hi le, ka rinloh leh beiseiloh thil, sawmna nge zawhna pawh ka hrethiamlo.



"Tinge min zawh a, i hre vek tho sia" ka ti ta ringawt a, pehhello zeta ka duh thu hrilh tawl mai chu ka ngamlo, a hria a lawm, a hre chiang a ni, ka sawi ngailo pawn a hria tih ka chiang.



"Sawta awm ho zawng zawng bulah sawn ka bialnu i nih thu ka sawi tawh a" a sawi zawng chuan a kiai deuh suk a. "Nia...." ka lo ti ve hap a, chutih rualin ka khabe a a dawmna chu a ti nghet ve sauh bawk.



"I duh chuan i sawi ve thei ania, tu bulah pawh sawi la keichuan ka pawm tih i hre dawnnia" a mitmeng de sar sar chu ka en renga, sawmna chu a ni ngei e, mawihnai tak leh pehhel lo taka sawmna, a thusawi chuan min ti a riai mai hian ka hria.



"Min.. duh.. ve em ni?" ka ti bah naka, ka aw te chu a khur hialin ka hria.



"I hre tawh emaw ka tia" awi leh....engthu nge maw ka hriat tak hi le, Prof.Famkima hian min duh anih chu, engtik aṭang khan nge min lo duh a, ka hriatsual em mawni zawk le, ka rindan leh ka duhthusam mai mai kha a tak tak a ni tih na maw?



Chutah ka chhan leh hma hauhin ka lamah a lo kun hnai a, ka khabe rawn kuai dak leh sauhin ka hmui a rawn fawp a, ka viai riai mai, a banah ka lo vuan nghal vat a, hnai takah min enin a vawihnih nan min rawn fawp nawn leh ngat a.




(End of Chapter - 10)

Link:
BBcode:
HTML:
Hide post links
Show post links

Ahmangaihi violette
Posts: 148
Joined: February 1st, 2020, 3:14 pm

Unread post by Ahmangaihi violette » September 7th, 2021, 10:46 am

ZUNZAM -by Ahmangaihi violette khiangte


CHAPTER - 11




Ka kut la kanga a hmui a a chuktuah leh laichuan Christa chu a lo tho uaih a, "Muhil rawh aw" tihpahin a fapa lu ah chuan a lo tuaisak hauh hauh a. Sawitur ka hrelo takzet a ni, zawh duh chu tam tak ka nei a mahse, sawi ṭan mai dan tur pawh ka hrelo, ani pawh chu a nih ve tho ka ring, min en vung vung a, a nui leh ringawt ṭhin.



"Va kal tawh rawh" min en reng vang chuan ka hmui chu ka tuai ringawt a, ani a nuih laiin ka zak lutuk chu ka beng a sa hat hat mai, a hmui huh deuh hliam chu seh zauh pahin ka biang a rawn piai hlak a, engmah sawi zui tawhlo chuan a kal nul nul a, ka tihdan teh tlawng chuan ka nuih a ti za ang reng.



Hla deuh hlek a thlen chuan a lo hawilet leh a, ka va hawi laichuan In te awmna ko chhak lam aṭanga Lucy lo hawi thla ve reng chu ka han hmu a, khai leh! Nichin lawka thil thleng kha a rawn hmu hman em lo ang chu maw.


A lan theih tawp thleng chuan ka thlira, Christ a tal sat sat chu kan puanlum ken chuan ka tuam ṭha a, Ufamkima chuan kan Present chu a ken chhuah theihnghilh leh ta tho mai.


Rei vaklo hnuah Christa chu a muhil a, hla deuha midang ho thawm chu ka hre pha nain ka awmna hmun chu a reh angreng viau a, ngaihtuahna pawh a kal ding duh viau a ni, thil hrang hrang ka ngaihtuah kual a, nichin maia thil thleng khan min la chenchilh bawk nen ka nui leh suk suk ṭhina, ka thinphu te pawh chu a la mumal hleithei meuhlo.


Heti hian kan inngaizawng ta ringawt chu a nih hmel a, awih a harsa zawk a lawm mawle! A rilru puthmang hrechiang miahloin ka ring em em bawk a, min duh ve takzet niin ka ngai bawk mahse, kan pahnih inkar thu hi fumfe deuh hleka la sawichian chu a ṭulin ka hria, engtia min duhna rilru pu ve nge anih te pawh ka hrechiang chak khawp mai.


Inlaichinna kan nei dawn tak tak anih chuan inhriatchian lehzual chu kan mamawh ang, keichuan engkim hrilh ka inpeih a, kum kha leh chen ka lo vei tawh dan te, an hnena ka thawh dan te thleng pawhin a niang chu, ani pawn engkim min hrilh ve sela, inkawp remtak kan nih theih ka ring tlat a ni.


Motor seat ngheng chuan ka chhing ve siar siar a, ka hrawk rawn za leh ṭhin vang chuan ka muhil thei lo thung, Christa pawh chu ka khuh zawng chuan a lo phu leh uih ṭhin a, ka tih harh hlau chu ka insum ngar ngar a, ka malchungah a mu bawk si nen ka awmdan chu a hrehawm kher mai, ka dang a ro huam a, ka hrawk a za reng bawk si a, pawna va chhuah a va khuh bawrh bawrh mai ka chak ber tawh.



Tui lah chu Motorah a kawl miahlo anih hmel a, ka zawn ngial pawhin ka hmu tlat lo, Ufamkima chu ka Phone ta ringawt a, rei lo teah kan lampana a lo kal ka va hmu nghal a, tui Bottle pawh chu min lo ken sak a, "Bawiha chu mu rih sela, thingpui te lo in ta che" a tih chuan kalsan ringawt chu nitheiin ka hrelo. "A tho har tawh lo ang" ka tih laichuan Motor kawngkhar chu lo hawngin a rawn ṭhu lut a, dimtea Christa chu pawmkangin a malchungah a hlang a, a rum ṭiah ṭiah nain a harh lemlo.


"A mu nghet ṭhin a sin" a ti zawi sup a, ruah sur bur bur lai pawh a harh ngai miahlo kha a ni miau a.


Chhuk mai ka tum chu ka banah min rawn vuan chawt a, "Khawiah nge i kal dawn?" a tih chuan chhan pawh ka chhang hman tawhlo, ka chhuk sawk sawk a, kawngsirah chuan ka va khuh zui bawrh bawrh a, ka khuh nasa lutuk chu ka luak lo chuah a ni ber e.



Motora ka let leh chuan ka pang a rawn dek vut a, "Ka khua a sik lo" ka tih pawh chuan a ngaih a ṭhat hmelloh khawp mai. "I awm a na tel a ni maw?" a tih laiin "Ka dam dawn ṭan tawh a niang ka hritlang tawp lamah hian hrawk za hi ka nei ṭhin a" ka ti sam mai a, chutah tawlh phei hratin ka ṭhutna tur Seat chu a beng thak a, ka ṭhulut ve nghal thuai bawk.


A kut lehlam chuan min rawn kuah hlun a, a pang ngheng chial chuan min pawt hnai zui bawk a, kan vawikhatna zel anih vang nge mawni, ka lai ru ṭut a, ka hahdam hleitheilo, ka tirilah min ṭham ṭauh mai bawk a, ngaia neih a har dawn hle hian ka hre mai, ka bialpa ang pawhin ka la ngai miahlo bawkin ka hria, ani erawh chuan chutiang ngaihdan chu nei ve awmin a lang hauh silo a, engtiang tak chuan mi chu ngai ve ang maw?



"Heta i awm ve daih chuan an lo zawng che ange?" ka tih chuan min kuahna chu a ti nghet salh a, "An buai lutuk kan awmlo tih pawh an hrelo ang" chuzawng ka awih vaklo, Lucy emaw tal chuan a zawng du duin ka ring a ni.


Ka en leh ṭhin vang chuan a niang "Sawi la?" a lo ti var a, chutah pehhel miahloin ka zawt phawnga "Min duh tak tak a mi a?" thutak fe in ka ti a, "Duh tak tak e, min awih vak nange?" a lo ti let a.


"Ka hrethiamlo, i ti teh thut lutuka" ka ti chu a nuih a za viau mai.


"Engtin nge min duh ve ngawt dan hi ka hrechiang duh" ka ti leh ngat a.


"I dawr thawhna a ka hmuh hmasak ber che khan min en duh lutuk kha hriat zui i awl em a lawm, chumi hnuah kan hnenah i lo thawk a, i hmelṭhat ang chiahin i fel bawk a, ka ngainat zawng tak i nia, duh i har hleinem Mimi, kan pafa hian kan ngaina hle tawh che anih hi" a aw chu damin a thilsawi pawh hriat a nuam takzet a ni.


"Anih nang ve hi le, kan ina i lo thawh hma khan min hre tawh a ti raw? Ka Birthday pawh min lo wish a?" zawhna ngah tih hriat deuhin min en vung vunga, a sawi hmasa a a ṭan takah chuan ka zak ta lutuk biklo, ka lu ka bu nghat nghat chu a duhkhawp loh hmel viau mai.


"Ka hriatna che a rei tawh mai, Rosy nen in inneih hlim vel a ni maithei a ni" ka tih chuan mit tizim san hian min melh a. Engmah a lakah chuan ka zep lo, a nu kan dawra a lo kal ṭuma a thlalak ka neih tak dan te chu ka hrilh a "Tunah pawh i thlalak chu ka la nei a lawm, Shillong-a ka kal hma kha a nia, ka kawl reng ṭhina, ka paih phallo a" ka tih chuan lungawi hmel zet hian min en tawh a, min kuahna thlahin ka kut chu a rawn hum zui rauh rauh bawk.



"In kawp tur reng kan nih dawn chu" a lo ti zawi ruih a, in enin kan in nuih leh rih ṭhin, "Mahse, in Ina ka lo kal kha chu tum loh deuh a thleng a nih kha aw?" ka ti leh hap a, kha kher kha chu ka beisei lawkloh thil thleng palh tak tak a ni.


"Chu chu eng i tihna nge?"


Dawra an lo kal ṭuma Christ-a Spiderman lem ka chhar chungchang chu ka hrilh a "In awmpui tur emaw min tih khan hnial che chu ka tuma mahse, in mamawh hmel lutuk kha ka khawngaih che u a, ka lo pawm ve ringawt a nih kha" ka ti leh a, a ngaihtuahna a buai hmel nak tawh.



"A...min zawt tawh lo mai rawh, min hriat hma daihin keichuan ka hre tawh che, dawr inlo kal fo ṭhin na kha kan dawr a nia, hna zawnga lo kal ka nilo, Spiderman lem kha pek let che u chiah ka tuma, ka lo thawh chhan chu puih che u ka duh vang liau liau zawk ka nia, a chhan pawh i hriat kha.....in buai bawk sia" ka ti niah niah a, chutah ka biang a rawn fawp zauh a, kei ka lo ip chawih thung, mi lah hi a ṭhawng dawt dawt reng mai a!



"I chungah lawmthu sawi chhan tur ka ngah hle mai a chu" a hmel hlim leh nung sarh a ṭang chuan sawilo mah se ka hmuthiam tho mai.



"Ufamkim Christa nu nen hian intawp hlen tawh tak tak em ni, ka inrawlh na lo tura inrawlh hi ka hlau" min melh dan vang chuan ka tim angreng, a chal a ti chuar nanga, zawhloh tur tawp ka zawt emawni "Ih....Aumawii pawn a hlau a..." ka ti ta ngawt a.



"Engmah a awm tawhlo" a ti deuh tawl a, hmanni a thil thleng chung chang kha hriat chian ka la chak reng mahse, ka hriat chi a nih a, aman min hrilh ṭul a tih chuan ka zawh ngailoin min hrilh mai turah ka ngai a, chuvangin sawi chhuak tura nawr emaw an nu hlui chungchang sawipui fo chu a tih chi berin ka hrelo, tunah rih chuan kan pahnih chung changah chauh rilru sen rih a ṭha zawk bawkin ka hria.



"Rosy chuan ngaihzawng min neihsana kan tawpdan a ṭha tehchiamlo a chuvangin inrem leh thei kan nilo, tunah chuan nang i awm tawh a lawm" a aw chu a zawi khawp mai, a rilru a na thar em mawni ka ti rilru deuh a, min hrilh erawh ka lawm viau thung.



"A va zialo ve aw, anih Ufamkim induh tawna innei i ni reng reng em, Ukimkimi min hrilh dan chuan chhungte sawirema innei a ti che u a" ka sawilai mek chuan a lo bu nghat nghat a.



"Ni bik chiahlo e, thla hnih thum chu kan inzui ve hman a lawm, duhtaka ka neih pawh a nia mah se....a...thil a kal fuhlo chho a ni ber, damdawi a rui lai ka nuin a man a, kei nena kan inkar ngawr ngawr vanga inṭhen kan nilo a, ka nu nen an inmil loh vang khan chenho kha a buaithlak ta lutuka" Seat ngheng chuan a dak deuh vang vanga, hriat belh duh viau mahila sawipui tawh rihloh ṭhain ka hria.



"I nu hi enge a an a?" ka ti ta daih a.



"A ṭha zel e, kar thar lamah chuan a lo haw thei tawh ang" a tih chuan ka rilru a buai nak a, "Chuti chu ka chawlh a ngai ṭep tawh a nih chu a" lo tho kang deuh hian min lo en vat a "I lo kal hman tho lo em ni, kan la mamawh tho che a sin" a tih chuan, "A tih chi tawh nang" ka lo ti vat a.



"A tih chi loh na a awm em ni? Ka nu a la che thei vak dawnlo a, innghak tur kan mamawh reng dawn a" a ti leh a. Kan pahnih inkar vang ringawt pawh chuan a tih chi tawhin ka ringlo, bialpa te in a awmpui hnathawka inhlawh chu ka duh bik vaklo a ni.



"Kan hnena i la thawh chuan nitin kan inhmu ziah thei dawn zawk a" a aw ka chhuakah chuan min thlem deuh titih a mahse, hei chu ka hnial ve angai tlat tawh, chuti anih loh chuan induhtawkna nei thei lekloin ka khawsa mai dawn hian ka hria.



"Dik tak chuan, hetia hna ka lo thawk hi ka chhung ten an hrelo a, Umawii chiahin a hria a, ka nu leh pain hria sela chuan an lawm vak lo ang" ka tih chuan a hmel chu chawp leh chhilhin a danglam a, a inthlahrun hmel tawh viau mai.



"Umawiin thla tharah pasal a nei anga, dawr ka enkawl zui angai tawh dawn bawk a" ka ti leh a, ngawireng chuan ka kut chu a hum rauh rauh a "I tih dan dan a ni mai" a tih takah chuan ka awm a nuam ve huai thei.



Chutihlai chuan a Phone a lo ri a, a chhang thawmah chuan Christa pawh a lo harh a, a pa malchung aṭang chuan ka lo pawm sawn ve thuai a, pawna chhuahpuiin ka zun tira Ufamkima Present bawm nena a lo chhuak ve takah chuan kan pathum chuan midang ho awmna lam chu kan pan zui a.


"An lo zawng che a mi?"


"Aw, hun serh hman an ti a nih hmel" Christa ban lehlamah chuan a lo kai vat a, Step a kan chho lai mekin Lucy kan lampana lo kal chu ka hmu zui a, "Bawihpui, khawiah nge i lo awm daih a" tih leh Christa chu lo pawm a ruala, kei chu min melh zawk bak chu engmah sawi zuiloin a kalpui nal nal a, In te kan va luh chuan midang ho pawh an lo ṭhu far hlawm tawh.



Ufamkiman Chair min lo laksakah chuan ka ṭhu a, ka bul chiahah a ni a ṭhu bawk a, kan piah sir lama Lucy ṭhu chuan min melh no lo ṭhin khawp mai, ka va en fuh thei viau lehnghal a, a mitmeng thip zet lak aṭang chuan mit ka la sawn leh hrat hrat ṭhin, Christ-an kan bula lo kal a ngen thawm chu ka hrereng a, va lak lah chu ka ngam derlo, buaina insiam loh hram ka duh ber rih.



Ka phone ka khawih laimekin ka sir lehlamah chuan tu emaw hi a lo ṭhu sawt sawta, ka en chuan sahuana ka hmuh hmeichhia kha a ni. "In haw daih emaw ka tia" a lo ti zauh a. "Motorah nau ka mutpui lawk a" ka tih chuan tawite hian min nuih a, a naute pawmsak ka tum chu naute chuan min duhlo nasa mai a, a ṭap rawng rawng mai a, an han in awi leh rih a, kei aimah chuan nau khawih a zeilo zawkin ka hria.



"Kum a tling ve tawh em?" ka tih chuan "Kum khat leh a chanve a ni dawn tawh, a la kal ṭha theilo, a sawngnawi tak tak a ni" a ti niah niah a, a sawi ang tak takin an naute chu a hriselloh hmel khawp mai, kum khat leh a chanve hmel a pu meuhlo.



"A pa kha i puak tir leh lo anih kha" ka tih chuan a nui hak hak a, "A phun a phun tawh, nau nena chhuahvah hi a ning lutuka" uang angreng deuh hian a lo ti a, a sawilai mekin a pasal chu kan bulah a lo ṭhu a, chutih laiin rawlthar sang ṭha zet zawt leh Birthday Girl khan eitur an lo sem a, mipa pakhatin hawlhpawp siamin naupang ho chu a lo ko khawm a, Christ pawh a kal ve hnak hnak chu ka va hmu a, Lucy'n phone a ensan daih vang chuan ding meuhin ka enzui a, ka bula mi chuan "Lo kal rawh va chhar ve ang" tih leh min pawh phei a rual a.



Eng engemaw chu ka chhar ve nual mai, ka kalpui nu chuan a chhar hnem zawk mahin ka hria, Christa chu kai vatin kan ṭhutna lamah ka phei pui a, kan thlen phei rualin a thil chhar ho chu a pa bulah intithei deuhin a hmuh bawka, ka malchungah ka ṭhuttir lai mek chuan Lucy chuan min lo en leh reng tawh tih ka va hmu chawpchilh a, ka hmu lo der awm hmiah hmiah ringawt tawh.



Ka kalpui nu kha an pain a lo nuih kur kur a, "Ka pe ve dawn lo che" a la ti ham ham mai, a mizia aṭang chuan kei aiin a naupan ka ring ringawt a, a hming lah chu ka hre leh pek tawhlo, a pasal chu College Professor anih si chuan a zirlai a nei anih kan ring ringawta.



Hunserh hmangin lawmthusawi ṭawngṭaina te kan nei a, kan Programme buatsaihtute chhung chu Roman catholic an nih hmel viau mai, an sawi danah hmeichhe naupang pa chu a boral tawh niawm tak a ni.



Dar thum velah chaw kan ei a, chhunah thil kan eilo bawka ka ei ve ṭeuh mai a, Christa pawh vawiin chu a eitam khawpin ka hria, naupang ho zinga ei a duh tlat vangin puitling ho bulah pawh ka kil ve ta lo a, ka ṭhiannu pawh khan kan bulah a lo ei ve a, a ṭawng duhin kawm a nuam viau maia, rei tak inkawm tawh ang maiin mi a be bawrh bawrh a, ka kawm duh zawng chi tak mai a ni.



Chawei khamah chuan an naute tleiloh vangin haw an rawt a, keini erawh Ufamkiman engmah a la sawi silo a, zan lam awm kan la tum nge pawh ka hrelo. Kan ṭhiannu nen chuan Number te inpein kan in mangṭha a, an haw hnu phei chuan tumah biak lumlam tur pawh ka nei ta lo, naupang ho bulah chuan ka awm ve renga, UFamkima bula Lucy awm deuh reng chu ka hmu ning dawn dawn mai bawk.



"Mimi, keini pawh haw dawn ang u" a rawn tih chuan ka ṭhutna aṭangin ka tho chhuak thuai a, chutih laia "In rualin ka lo haw dawn" Lucy'n a rawn ti chu ka lo en rang viau mai, Motor lampana kan kal laichuan kan hmaah Ufamkima nen an kal duna, Seat hma a a ṭhu lut tharh chu ka ngei ang reng, Bialnu Seat tur a ni tawh a sin mawle.




Lucy chu a ṭawng duh bawrh bawrh khawp mai, ti ila mi a rel a ni mah zawk ang chu, a Cousin te chhung leh an ṭhiante chanchin mawlh mai chu a sawi a, ka hriatloh ṭha ṭha ka hriat phah te pawh a ni ta ber ang chu.



"Aruati hi chu vannei ve tak a ni, a nu takin a ngaihsak lo bawk si a, U Vite-in a enkawl hi chu a nihlawh ngawt mai, ani lahin pasal nei loin a ṭulpui ṭhak a, Pa Thanga te chhungin an duat nasa mai bawk si, chhungkaw naute a ni ringawt a lawm" a ṭawng mawlh mawlh laichuan kan ngawi ran a.



"Uvitei pasal nei fuhlo lutuk hi chu ka khawngaih zawk a nia, a luhlul lutuka nei suh ka ti ngawih ngawih chungin a neilui a, Remtluanga te kha lo nei sela chuan tun ang ngawt hi chu a ni lo ang mawle" a ti leh hlaih hlaih a. "Amah pawhin a inenkawl zawh khawp hi" Ufamkiman a lo tih laiin "Aw, rilru ah ser a nei tawh a, ngaihzawng dang pawh a neih theih tawh loh hi, tihian fa pawh neiloin a tar thi ringawt mai dawn a nia, a uiawm em a sin" a lo ti leh hlak a.



"Fanu a nei reng a lawm maw" Ufamkiman a lo ti leh hram a, "A thisen zawm pawh a ni hleinem, fahrah a enkawl a ni ber a lawm" pakhat chuan a lo ti ve thung. "A pasal fa a lawm, a fanu a nihna a bo hleinem" Ufamkiman a tih leh chuan Lucy chu a lo nui hak a.



"Chutiang ngawt a ni biklo, mahni hrin leh hrinloh na na na hi chu a dan dang deuh mai a nia" a tih leh chuan Ufamkima chuan min lo en zawk a, chutah Lucy chu lo hawiin "Tiraw Mimi?" a rawn ti deuh kher a.



"Eng chu maw?" bangbo zeta ka lo tih chuan "Mahni fahrin nilo enkawl hi mawle, fahrin ngei nen a in ang thei tak tak lo ka ti anih chu" chiang fek fawk hian a ti zui zat a, chulam tehdaih chu ka lo la ngaihtuah ngailoh lam tak a ni.



"Ka hre ve nang, a hmangaih tho te chuan a danglam bik vak dawn a mi?" ka ti mai a, Ufamkima nui deuh suk chu ka va hmu reng.



"Anih i hrin leh i hrinloh enkawl dun ta la, duat bik chu i nei lo ang maw?" Lucy bawk chuan a lo ti leh a.



"I sawi nu chuan a pasal fa a enkawl i ti bawk sia, a fa ve tho anih chu, a pasal a boral tawh in ti bawk a, kei chu a dinhmunah ding ta ila, ka pasal fa chu ka hmangaih em emin ka ring" ka sawilai chuan Christ-a chu ka kuah nghet sauh a, ka dinhmun ve mek pawh a nia lawm, ka mipa hmangaih fa chu engtin nge ka hmangaihloh theih tehlul ang, Ufamkima nen lo inneiin fa nei dun pawh ni ta ila, Christ-a hi ka enhrang kherin ka ringlo.



"I sawi ve mai mai anih chu a, a taka tawn hi chuan a dan dang deuh mai a nia" a ti leh hram a, ka chhang zui duh tawh lemlo. Kawngtluan chuan tu tu te emaw chanchin sawiin a titi renga, UFamkiman min lo biaka ka chhang ve zauh zauh tihloh chu ka ṭawng ve meuh tawhlo thung.




Aizawl kan thlen chuan Lucy chuan "Mimi thlah hmasa rawh" a ti deuh tlat a. Mahse, engmah ka sawi hmain Ufamkiman a lo chhang a "In veng a hnai zawk a kan thlah hmasa ang che" a tih chuan Lucy chu a ngawi ran a, kei ka lo nui ru tat tat thung a.



"Pathianni ah ka lo leng phei ang" a chhuk hma chuan a ti leh tawng a, a ruk hi chuan ka ngei thei maw le, enge maw a beisei reuh ni.



Lucy chhuk hnu chuan kan veng lampanin kan tlan a, "Lo ṭhu thla la" a rawn tih chuan "A ngai chuanglo, kan thleng ṭep tawh a lawm" ka ti ve tlat, min rawn en zawk a, ka lawm vaklo emaw a ti anih ka ring.



"Chaw kha i eipuar em?" a lo ti leh a.



"Puar e, ka rin aiin ka eitui a" ka lo ti var a.



"I thlen hunah intilum ṭha la, i hritlang zual palh ange"



"Nangmah zawk kha i aw pawh a dik lo a lawm, Christ-a pawh a hritlang a; lo in enkawl ṭha viau rawh u" ka tih chuan Motor khalh pahin a bu nghat nghat a, "Kan lo peng kawi a ngem?" a tih erawh ka chhang lawk lo a, ka rilru a ti buai angreng.



"I duh...chuan...lo peng la" ka ti bah niai a, ka hreh hmel a ti deuh a niang, "Kar leh lamah pangngai deuhin ka la rawn leng zawk mai ang" tiin a nui suk suk a, nia....kar leh lam chu keipawn a ṭhat ka ring, an ina ka thawh tawhlo hnu tal nise tih chu ka duhthusam a ni, ka chhungte hmelhriat tir te pawh ka duh dawn a, tunah rih chuan ka dinhmun hi ka duhdan a ni chiahlo.



Kan inpiah dawr kawt a hma a min Drop na ah kha Motor chu a ti ding a, ka chhuk laimek chuan "Zanah ka lo bia ang che" tih pah hian a kiai suk a. A tlan chhuak chu ka thlir liam leh te te a, kan inlampana ka pen zet tawh chu dawr kawt aṭangin ka nuin min lo thlir reng ti chu ka va hmu nghal a, Ufamkima Motor aṭanga ka chhuk lai kha a lo hmu ve reng a nih hmel e.



"Tu Motor nge?" a lo ti nghal pang mai.


"Ka ṭhian te" ka ti ve thawr ringawt.


"I ṭhian rual chu a nih chiah loh kha?" a tih chuan nui lui zet hian "A ni a lawm, i hmu chianglo mai mai anih kha" ka ti leh tawng a, a awih vak hmello khawp mai. "I bialpa a ni maw?" a tih leh chuan min ti dang titih ringawt lehnghal a.



"Nakkinah ka la hrilh ang che" a banah vuanin ka kalpui hlawk hlawk a, engmah min zawt zui ta lo hlauh a, ka bialpa anih chu a ring tho chuan ka ring a ni.



Zanah Ufamkima nen reilo te kan inbia a, "Inrinni chu chawl mai rawh, Christa hruaiin inneihna ah ka kal dawn a" a lo tih vang chuan a tuk Inrinni chu Umawipuii dawr ka nghahpui a, Ukimkimi a lo lenga kan ti ti dun luama, Prof-a nen kan chungchang zep ka tum ve ṭang ṭang laiin Aumawiin a lo hrilh vek chu niin, min zawt dilchhut em em mai lehnghal a, engmah ka zep buai peih ta ting tanglo.



Tlai kan haw kawngah chuan Umawiin min zilh kawngtluan a ni ber, "Ngaihzawnga i tluanglo mah tih tawh naklaiin Pathlawi kher i ngaizawng leh a, ka nu leh pa bulah sawi miah suh, a rukin tikhan nihpui la, pasala neih kher te kha tumlo la, Time pass nan hmang mai mai rawh, a bak chu a tih chiloh ang" a ti kha kha a, chu zawng ka duh dan a ni ve lo nasa mai, kar tharah hna ka chawl anga Ufamkiman a duh phawt chuan ka chhungte chu ka hmelhriat tir dawn khawp a lawm.



Zana kan inbiak leh chuan a nu lo haw hun tur te a lo sawi a, nilainiah a nu chu a lo haw dawn a, awmpui tur midang pawh a zawn mek thu te min lo hrilh a, a nu lo thlen hma ni thleng chiah keiin kal ka tum vang chuan a rilru a buai ve deuhin ka hria, "Ka lo zawnpui ang che" ka ti ve ngawt a, han zawn pui vak ngaihna pawh chu ka hre chuanglo.



Pathianni chhun chu Lucy kha a lo va leng ngei nitur a ni, engahmah ngaih loh tum viau pawn ka hmuh phakloh china an awmdun tur chuan ka ngaih a ti ṭha theilo. 'Ring tawp rawh, Famkima chu mi puitling a nia lawm' tiin ka inhrilh a, rin tawp lah chu har ka ti bawk si, amah aimah chuan Lucy zawk chu ka ringlo a ni mah zawk, a rilru a thianghlimlo tih ka hre chiang em a ni.



"U Famkim, Lucy khan a la ngaizawng che ti raw, zep miahloin min hrilh teh" tiin zana kan inbiak chuan ka zawt tawl a.



"I bulah engemaw a lo sawi em ni?" a lo ti let daih a, tinge maw tlang deuha min hrilh ve mai loh le, ka bialpa ni tawh mahse, kan kum in upat hleihna leh kan inkawpna a la reiloh vang hian ka zah ru bawk si a, tun hma a ka bialpa te angin ka ti bawrh bawrh ngam bawk silo, ka awmdan chu a hrehawm hluah hluah ringawt mai a ni.



Thawhṭan tukah hma deuhah ka va kal a, an zan mengrei an lo tho chhuak deuh chiah a, Christ a chaw ka siam sak mawlh mawlh laiin ani chu dawhkan kilin a ṭhu a, dar kua a ri dawn tawh a tukkin chu a hmanhmawh lo khawp mai. "Tlaiah chaw einghal rawh aw" a lo tih vang chuan ka thil tih lai chawl meuhin ka va en a.



"A tih chi lo ang...." ka ti hap a.


"I chhungten an la hrelo tak maw.." a ti zawi ruih a, lawmlo hmel phei chu min hmuh hauhlo na chu a lawm fahranin ka ringlo, heta ka la kal chhung chu zep ka la duh miau a ni.



Hna kal tura a chhuah dawn chuan ka thleng silna bulah chuan a lo kal a, ka hnunglam aṭangin ka kawngah a rawn kuah at a, ka bianga dimtea a lo fawh laichuan ka tim dai mai. "Ka lo haw har lo ang" a lamah min kuai her zat a, keilah chuan ka thlengsilna nawhfe ka lo lek uaih si chu; a kekawr leh pheikhawkah te chuan a tui ka tihfar zawih zawih a, "Ekhai aw!" tih pahin a tawlhhnung dawrh a, awi....a van zialo thei tak.


Ka kut hru hul sawk sawkin puanchhe fai chuan a kekawr huh chu ka va hruksak a, a pheikhawk hruk tuma ka kun tur chu min pawt ding zawt mai! Chutah eng khaw sawi set setlo hian min fawp thawr bawk a. Prof.Famkima chu infawh zei tak a ni hranlo, a che chu a dam dup a, a ngaihnatawm em em thung.



Christa nen pawn thleng kan va thlah a, a kal liam hnu chuan inchhung ka tifai a, Christa chu Puzzle te ka rem puia, ka tih mut hnuah ka insu leh a, insuk pho a pawna ka chhuah laimekin Gate inhawng ri ka hria a, tunge maw ni dawn ni tia ka thlek lai chuan Rosy a rawn lang hlawl a, inchei nalh thlarhin engthil emaw a rawn khai bawr luk mai bawk.



"Bawihpuia a mu a mi?" a lo ti var a.


"Aw..." a thil khai chu ka lo thlek pah a, eitur lam chi thil niin ka hria.



"Thil i eipuar tawh em, Kfc ka lo lei a thingpui lo lum la kan eidun dawn nia" tiin inchhung lam chu a pan a, a kal ta chu ka enzui rauh rauh a, ka awm a ti nuam zanlo deuh a, Ufamkima nen kan inkar thu vang a ni mahna.



Ka thawmhnaw suk ka pho zawh a ka va luh chuan thingpui chu a lo chhuang a, bungbel dahna te chu a bel khawp mai, a che vel ka lo en dauh dauh lai chuan "He no chu an va tlo reuh ve aw" tiin a nui hak a, a no ken laichu no var sin te te a a hringdal rawnga par a ni, a Design pawh a mawi khawp mai.



"Kan inneih a Present kan dawn a mi a nia, pathum chu ka ti keh tawh" a ti leh zauh a, chutah ka lam lo hawiin "Arsa kha Oven ah lo ti lumla, Bawihpuia eitur Sausage kan siam sak nghal a nge, a mutna a rei tawh em?" a ti zui zat a.



"Rei ve deuh tawh a lo tho ṭep tawh ang" arsa chu ka ti lum nghal a, chet pah chuan a ti ti siam siam a, a ṭawngduhin min ti ṭha em em bawk si a, a laka rilru chhia put chu a har a ni, UFamkima chungchang min sawipui lo hlauh erawh ka lawm khawp mai.



Thingpui kan in duna, nizan lama a thlalak Designer fashion show a a kal na te min hmuhin a Instagrama a pho chhuahtur min thlan tir a, Model ho tlereuh inbel chu ama Sponsored a lo ni bawk a, a thlalak ka thlansak chu a Post nghal bawk a, ani a nuisang renga kei erawh a ṭi ru dek ringawt thung, ani pawh hian Ufamkima nen kan inkar hria se hetianga min nel hi ka ring bik chiahlo, mahni inhriat kar si chuan a rukin awm a nuamlo rauh rauh mai a ni.



"Tun karah ka nu a lo haw dawn ti raw?" a tih chuan nilai ni ah a lo haw dawn thu chu ka hrilh a.



"I hah deuh dawn a nih chu, ka nu hi chu a khirh ṭhin lutuka, hlau miahloa tih ve bawrh bawrh ngai chi hi a nia, a sawisel che pawn haw duhlo la, i huat chuan nangmah i hreawm mai mai ang, a ang bawrh bawrh a a hnu lawkah a theihnghilh leh mai zel ania" a ti sap sap a.



Ka ban dawn tawh thu ka hrilh chuan "Ti nge, la bang lo la" a rawn ti hluai a, a tih dan chuan ka nuih a ti za ang reng.



"Ka hman tawh lo a" ka ti ṭha ve mai a.



"Thawk reng thei la ka duh a sin le, Bawihpuia hian a ngaina bawk si che a, a pa hna ah a kal phei chuan a khua a har dawn emai, i awm hi chuan Ufamkima pawh hi a ngaih a ṭha in ka hria" a ti leh sap sap a, min ui derna awka chu ka tan hriatnuam tak zawng a nilo min ti inthlahrung zual ting mai hian ka hre tawh.



"Awmpui dang a zawng mek a, midang ṭha deuh a hmu leh mai ang" ka lo ti ve leh a.



"Naupangin ngainat zawng an lo nei ve ṭhin hi a nia buaithlak chu mahse, Bawihpuia hi chuan mi hi a ngaina nghal mai zel a, a van neihthlak ang reng, hmangaih deuha enkawltu hi an pawimawh leh a, hna anih vang ngawt nilo a enkawl hi naupang hian an mamawh a, lak ka tum lah hian a pa hian a ui tlat zel a, a tlawmla deuh nge mawni" a ti leh chuan chhang tawhloin ka lo nui ringawt a, a fapa chuan a rilru a luah ve nasa ṭhin a nih hmela, ka hmuh danah chuan nuthlawi mahni fa ngaihsaklo a fawr kual ṭhin chu a ang chiahlo, a ṭawngkam a ṭang rengin nu rilru ṭha tak pawh a niin ka hria.



Christa a lo harh hnu chuan an nufain sitting room ah ṭhuin Tv an endun a, Christa chu a ṭawng barh barh a, a nu lo kal chu nuam a ti ve hlein ka hria, kei choka dawhkan kilin ka Phone ka khawih a Ufamkima Message a lo awm a, thil ka ei tawh em tih te min lo zawt a, Rosy lokal thu chu hrilh chi a ni em ka hrethiamlo khawp mai.



Class a neih dawn vangin rei kan inbe lo, Rosy pawn haw a tum a niang choka ah lo pheiin dawhkana a Bag chu a lo la a, "A ruka ka haw loh chuan min ngen ang" a ti deuh sar sar a, "Lo va ṭhutpui rawh, chuan ka kal ang" a tih laimekin "Anu" pakhat zawk chuan a lo ti lauh a, Rosy'n min lo mitmei takah chuan hmanhmawh deuhin ka kal phei a, rei vakloah kawngkhar inkhar thawm ka hre zui a, a kal ta anih hmel e.



Ka ngaihtuahna a vak kual nasa a ni, thil ṭul lo deuh deuh ka zeldin kual a, ka hah hlui thei mai, engpawh nise a thleng tur chu a thleng tawh a, ka lo ngaihtuah buai vak vak hian awmzia a nei tawhlo, UFamkima nen kan induh tawn a, chu chu a pawimawh ber chu ni zawk ang, Rosy chu a nun hlui a ni tawh a, fa hial lo nei dun tawh mahse, inkawp leh tumna an nei chuanglo a, ka tan lo inkiltawih viau chhan tur a awm bik dawn em ni?





(End of chapter - 11)

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ahmangaihi violette
Posts: 148
Joined: February 1st, 2020, 3:14 pm

Unread post by Ahmangaihi violette » September 7th, 2021, 10:50 am

ZUNZAM - by Ahmangaihi violette khiangte


CHAPTER- 12




UFamkima lo haw laichuan ka thawmhnaw sukfai ho chu ka lo thlep ṭha mek a, "I chau em?" tiin Sitting room a a lo lut phei chu ka lo be vat bawk.



"Ka khua a sik a, a vawt ka ti riau mai" tih pahin ṭhu khaw muanglo chuan room ah a lut tlang a, ka thawmhnaw thleh sa dah tura ka va luh laichuan khumah bawkkhup zawngin a lo mu a, a khawsik chu a na viau em mawni dawn ni?



"Damdawi i ei tawh em?" a hnungah chuan ka va beng dat dat a.



"Ei tawh e, min chhawk ṭan dawnin ka hria" zuai ruiha a tih laiin a pang chu ka lo dehsak a, a lo la sa vur tak tak a, amah lah chu a thlan hluam mai bawk. A bula ka va ṭhut rual chuan lo insiamrem sawt sawtin ka malchungah a lu a lo nghata, "Insuk ka la thlep zo lo a sin" ka tih pawh chuan ka kal mai a phal tlatlo, "La awm rih rawh" a ti deuh tlat a, Prof.Famkima pawh a damsamloh meuh chuan a lo pangchang ve ṭhin tho anih dawn hi a.




"Thingpui ka lum ang che aw" ka tih leh pawh chuan min chhangloin ka dulah a hmai a rawn nawr tlat a, a thaw lum ham ham bawk a, kei chu ka ṭhu ngil at reng ringawt tawh a, ka awmdan chu a hahdam lo kher mai chuti chung chuan rilru erawh a hlim ru veng veng thung.




"Inthlak la mu ṭha zawk la" lai ru deuha ka tih chuan a che zui ve mai bawk a. Ka awm lairenga a kawr a phelh vang chuan kei ka lo lai leh pek tawh a, hmanhmawh deuhin a thawmhnaw chu ka lo laksak zung zunga.



"Chaw chu ei ve mai la ṭha tur"



"Engmah ka sawi lawk bawk silo, a buaithlak rih emai" ka tih chuan ka banah rawn vuanin khumah bawk chuan min pawt ṭhu leh a, chutih laia Room kawngkhar inhawng thawmah chuan kan hawi rang khawp mai. Christa chu kawngka ah a lo dak dek dek a, a pa nena inkuah deuh titih a kan lo ṭhu min hmu chu ṭi dek hian min lo en a, han tal hran mai ka tum lah chuan pakhat zawk chuan min lo la chelhbet tlat bawk si.




"A zak a nih saw" ka beng bulah a rawn ti zawi sup a, "Bawiha lo kal ta che" a ti zui zat a, Christ a chu a lo lut hreh a niang kawngka ah chuan a ding reng a, a inthlahrung hmel chu ka khawngaih zawk ang reng. "A ril a ṭam a niang, thingpui ka va lum ange" ka tih takah chuan min thlah ve vat a.



"Christ thingpui lum ang aw" ti a ka chhuak phei chu min lo zui ve mai bawk. Thingpui ka lum saka, eirawng ka bawl bawka, ka inpeih meuh chuan dar 5 a ri dawn thuak tawh, an pafa chauha han kalsan chu ka hreh deuh riau a, pa ber a damsam lo vei nen, Ufamkima lah chuan ka haw tur chu min ui bet ngam chiah silo hian a ne ne kual reng a, "Ka thlah ang che" a ti thul.



"Chhuak chi pawh i nih loh kha, chaw ei hma ula, mu lum leh vat zawk rawh" ka lo tihsan a, "Naktukah lo kal hma rawh aw" a ti leh hram a, ka haw tur chu Step bul thleng min lo zui chhuakin pawnah chuan kan han indinchilh leh ren rawn a.



"I thlen hunah min lo hrilh dawn nia" a hmel ngui bur chu enin ka nuih var var a, damdawi ei tura kan inchah leh zet hnuah ka hawsan a, an pafa chuan ngaihtuahna an luah renga, an inenkawl thei ngut a nge maw? Rilru an ti nuamlo khawp mai.



Dawr ka thlen chuan Umawipuii chauh a lo awm tawh a, "I va tlai angreng ve, i phone tlang theih bawk siloh a, tlaiah khan i ṭhian pakhat a lo kal a, a nghak reng che a" a lo ti luam a.




"Tu ka ṭhian nge?" ka tih chuan "Tlangval chhelo deuh mai, a lehkha zirpui ṭhin ka nia a ti che a" a tih takah chuan rindan ka nei nghal a, engtin nge kan dawr te a lo hriat chat theih zawk le ka ti rilru a, a hming chauh kha ka hrilh a, a rei tawh angreng sia a hriat pawh ka ring tawh lemlo a nia.




"I Ex a ni maw?" a nui zui kar kar a, "A rei tawh lutuk, a hmel pawh ka hre tawhlo" ka lo ti liampuat a, kum 1 leh tih chauh la liam mahse, ka sawi ang tak takin Romawia hmel chu ka mitthla thiam mang tawhlo, ka vei zui loh zia chu chutah chuan a chiangin ka ring.



Haw kawngah chuan uang deuh deuhin min zawt a, keiin ka sawi ṭha duh manglo a, sawi vak tur pawh ka hrelo, Shillong a ka awmtirh thla reilo te chhung chauh a inkawp kha kan nia, a tu ve ve mah chuan kan inkar kha kan la thutak pawhin ka hrelo, kan inṭhen tirh khan ka chungah a lawmlo hle a, ka ngaihsak tawklo tiin a vui hle bawk anih kha.



In ka thlen hnuah Ufamkima chu ka Phone a, a lo la rang viau mai. "Chaw in ei dawn tawh em?" ka ti hmasa ber a.



"Bawihan a ei tawh a, keichu ka chak rihlo" a aw zuai ruih vang chuan a khua a la sik anih ka ring.



"Damdawi i ei dawn chuan tlem tal eirawh aw, pum ruak lutuka damdawi ei chu a ṭhalo a nia, inthuam lum la, mu hma daih rawh, hritlan chuan muttam tluk a awmlo a nia" ka ti ve luam a.



"I nau hi a muthilh loh chuan ka muhil thei mai bik lo ang" a ti leh a, a va buaithlak tak, Christa zan mengrei thei lutuk hi aw, hetiang tur tih hriata vawiin chhun khan lo muthilh tir loh tur a nia, an pafa chauhin an awm bawk si a, Ufamkima tak chu ka lainat, han buaipui thei ziazang ka ni bawk silo.



Zanriah eikhamah ka inbuala, ka inthlak laimekin Umawii ka room ah a lo lut a, "Mimite sawtah bungrua va Deliver lawk ila, i peih em?" thil min dil dawn leh min tirh duh hunah hi chuan a ṭawng nem thei diai diai ania.



"Khawiah maw, ka awm ana a ka chhuak peih vaklo a sin"



"Kimkimi te inah, kan reilo ang" a ti leh zat a, a sumdawnna thil lam anih hmel e.



"Engin nge kan kal dawn, Taxi hman tur pawh a awm nang, zingah pe mai la" ka ti leh hram a, a zan a zana va dah kher pawh a ngai emaw ni ka ti deuh a.



"Zaninah a ngai alawm, naktuk zing sumo chhuaka thawn tur a nia, thingtlang lama kan Downline te ta tur a nia" chhang tawhloin ka insiam mawlh mawlh a, "Pa Hruaia Scooty kan hawh dawnnia" a lo ti leh zat a.



"A phal awmlo emai a, kein kan kal dawn nia, a hla chuang hleinem" ka tih chuan a phur hmel ta khawp mai, Pa Hruaia chu kan ṭhenawm pa a nia, mi uikawm lutuk tak mai a ni, Bike chu ka pa'n a nei ve a, mahse, keini pahnih tan chuan tih ngaihna chai a awmlo, ka pa pawn a khalh chhuak khat khawp mai.



Ka inthlak zawh hnu chuan muangchangin kein kan kal chhuaka, zanriah eihun bawr vel khan ruah a tlak leh sek vangin kawngpui chu a hnawng deuh viau a, Current a thim bawk nen tuitling dai palh ka hlau chu ka Phone ti engin fimkhur fe chuan ka kal den den a, Aumawii kalchak lutuk chu ka ngei lek lek zawk a ni.



Zarkawt kan thlen chuan Current a lo awm bik hlauh mai, Ufamkima te Building kan kal pel tur chu engemaw tih tak hian pen kawi ka chak tlat a, ka hma a Umawii kal vuk vuk chu auin ka ding ren rawn a.



"Hetah hian ka lo peng rih ang, va kal la, i hman hunah min lo hrilh leh mai rawh" ka tih chuan a ner nasa mai a "Va han khawlo reuh tak" te chu min la ti zui a.



"Tih tur ka nei ve chuang hleinem" ka tih chuan a kal tau zui hmawk hmawk a, a thinrimna hi a ho thei ka ti ngawt mai, ṭha deuha min kaltir ve mai awm a nia, phallo lui tlat chuang silo hian awm nuamlo deuh hian min siam kher zel a.



Ufamkima ka Phone a a mu tawh nge mawni Phone a la thei lawklo a, ka Call ṭha leh a a vawihnihna ah chuan a rawn la ta hram a.


"I mu tawh a mi?"



"La mu lo e, Room ah ka phone ka lo dah daih a, nang zawk" a lo ti var a, "Hei ka u nen Ukimkimi te inah thil kan dah dawn a, i phal chuan ka lo pengkawi lawk ang, Gate pawnah ka awm mek a" ka tih chuan "Lo awm rawh" a lo ti vat a, a thawm a ri zui sat sat a, rei vaklo ah Stepa a lo chhuk chu ka han hmu nghal a.



Gate a lo hawn hnu chuan kan han in en leh ren rawn a, chutah ka banah a rawn vuana. "Khawiah maw i kal?" Stepah chuan kan inzui chho a, kan inkai a ni ber ang chu.


"Umawipuii bungrua kan dah lawka"


"Tinge nangmah chauh?"



"Ukimkimi te inah a la awm a, a hman hunah min lo hrilh mai ang" inchhungah kan in zuilut a, a pang ka dehsak chuan a khawsik chu a awmtawhlo anih hmel e, Christ a pawh a lo la menga, mu chungin TV a lo la en dauh dauh mai.



"Chaw chu i ei em?" min chhang loin min rawn fawp nghal tawnga, min ti hamhaih zawk ang reng. Christ an min hmuh hlauin choka lamah chuan ka pawt phei ta ringawt a, chutah dawhkan ngheng chuan uluk fein min han fawp ṭha leh a, tunah zet chuan ka chhang let ve ta, infawh a zeilo ka tih kha chu ka lo hresual chhiava a ni, a zei rapthlak!



Ka inrin hmain dawhkanah chuan min hlang chho nawlh a, ka malah rawn vuanin min hnuk hnai hrat bawk a, a mitmengah chuan thu neitu zawk anih zia ka han hmu theiin ka hria.



A nghawngah ka lo kuah let chiala, ani dawhkanah chuan inbengkhalh runin a lo kun hniam bawka, a hun leh hmunin a zir bawk aniang, ngawirengin kan am dun mial mial a, inla hranga ka han inen leh chu kan lung a awi duh kher a sin.



"Chaw chu tlem tal ei la, chaw ei ka siam sak ang che aw" a lo aw ve mai bawk a, chaw ei ka siam laichuan min lo pui a, min rawn kuah leh deuh thuak ṭhin a, min thlahlel ve tak zet aniang, keimah ngawt chu min en reng bawk a, a chaweina bulah chuan ṭhu ve turin min ti deuh tlat bawk.



Umawipuiin min lo phone a "Pizza kan siama i ei ve duh chuan lo phei rawh" a lo ti a, "Ka eichaklo, lo hmanhmawh duh suh" ka lo tih chuan a phone chu a dah zui hmak a, kei ka lo nui hak thung. Chumi hnu lawkah Message a lo thawn a "VIRGIN IN LO HAW LEH ANG CHE" tih hi hrawppuia Type ngatin min lo thawn a, leh ta mai mai chuan a.


"I u chu a hman tawh a mi?"


"La hman lo e, a rei deuh dawn anih hmel" tiin ka lo nuih var var a.



"Engin nge in lo kal a?"


"Ke in" ka tih chuan min en rang viau mai.



A sana a bih zawk a "Zanah chuan fimkhur tur a sin, i u chu hrilh la, ka va thlah dawn che u nia" a tih chuan ka hniallo khawp mai.




Chaw a eikham hnu chuan Sitting room ah ka ṭhu phei a, Christa bulah ṭhuin ka va kuah hluna, room aṭanga Ufamkima lo chhuak chuan puanlum a lo la chhuaka kan pathum chuan Sofa ah ṭhuin puan chu kan inzawn a, tuna kan awmdan chu ka duhthusam ang chiah kha a ni, chhungkua ang mai a lawm maw kan nih le, keiin Christa ka kuah laiin hnunglamah Ufamkiman duat zetin min lo kuah a, a awm ngheng ar ar a han ṭhut chu a hahdam thlakin a nuam veng veng mai a ni.




Darkar chanve vel hnuah Umawipuiin min lo phone a alo kal mek thu min lo hrilh a, Ufamkiman min thlah dawn ṭhu ka hrilh chuan a duh vaklo "A ṭul kher kherlo, chhungte bulah engtia sawi nge i tum?" a lo ti kha kha a, a zawhna chu chhang loin "Kawngpuiah lo awm rawh kan lo chhuk dawn" ka tihsan thunga, engmah a sawi leh hmain phone chu ka dah hmiah bawk a, lawmlo viau mahse, ke a haw aichuan a duh zawk ve thoin ka ring, chu loah intihtheih khum ve hlak pawh ka duh a lawm mawle.



Kan pathuma kan inzui thlak laichuan dawr bathlarah Umawii chuan phone a lo khawih mual mual a, "Motor kan la chhuak lawk ange" ti a Ufamkima kal lai chuan nui pat pat chungin a bulah ka va dinga "I chhaw mai sia maw, vuak nek che ka chak a nia" a lo ti hlak a, Christ a a hmuh erawh chuan a nuih sanga, kei anglo takin Umawii hi chuan naupang a lawma, mi nau hmelchhe deuh deuh pawh hi a pawm a pawm peih zel.




Christ a chu a be siam siam a, chutih laichuan kan hma ah SUV a lo ding a, Seat hma hawn zat paha Umawii ka va melh chuan thawk la hak hian min lo ner khum a, huhhh....a bialpa Bullet ṭawng deuh a hriat chhuahloh hram ka beisei.



"Sumdawnna lam chu i tluang zel maw?" ti a Ufamkiman a zawh chuan ka Seat hnung rawn bawh urh pahin a rawn tawlh hnai ruak a.



"Tluang e, i thil chah kha i ei zo dawn tawh em?" a lo ti var a.



"A la awm nual mai, naupang ei chi kha kan duh leh ang" Ufamkiman a tih chuan a phur fal leh tawh. " Next ah chuan member rawn ni ve la, a tlawm in i lei thei dawn a" a ti a, a sawi chhunzawm nghal zat zat a, a thil sawi chu a By heart emaw tih mai tur a ni! 'Insum deuh teh' tih melh tak hian ka han melh a, insum chu khawilam Prof chu a Downline a luh tir ngei ngei a tum niberin ka hria.



"Kan tum dawn nia" Ufamkiman a lo tih chuan a khi vun vun tawh. Khabe sep thiami ka ti mai, a rik zaih zaih tawh hi chuan pawisa hi a hlawh leh nge nge ṭhin, a thawk rimin a tum ngar ngar ṭhin bawk a, hausak hi chu a phu ngawt hian ka hre ṭhin, hausak pui tham lah hi a la sawi chhuak thei bik der lo thung a.



Kan veng kan thlen chuan "Kawtah min thlah ringawt rawh aw, kartawpah i lo leng dawnnia" ka lo ti zauh a, Aumawii lo khuh kharh chu a chhan ka hre reng, min zahpui tihna. Mahse, tunah rih chuan ka chhungte bula sawifiah tur a tam dawn lutuka a tih chi rih vak lo.



"Mawiah lo leng lut rawh, thingpui te i lo in ang chu, sumdawnna thil te pawh chu kan inhrilhfiah anga" Umawiin a lo ti ve vat a.



"Hotunuin kartawpah a ni chauh sia, zanin chu ka lo lut rihlo mai ang, damdawi chu kan ei zawh hunah ka lo hrilh dawn che nia" damthluama Prof-an a lo tih chuan hmai a uang ve rauh rauh mai.



Dawr kawta a din dawn lai chuan "Kan in awmna i la hre nange" Aumawiin a lo ti hman hmawh a, min ti zak angreng mahse, Prof-a chuan engmah a sawi lo hlauh a, chutah kei chu min lo enin "Muttui aw" min nuih suk pah hian a ti zui a.



"Muttui le, i thlen hunah kan inbe dawn nia" nuisanga ka lo tih laichuan seat hnunga ṭhu chu a lo nui huk a, ka han melh zawk laichuan hmui hup chungin a chhuak vut a, ka chhuk ve nghal thuai bawk.



An tlan liam thleng chuan kan thlir dun a, an tlan liam ta maw tih ah chuan ka hnung zangah tak a rawn bawng ri dawp a, "Ka rin aiin i nasa tlat, Pathlawia hian a bum che pawn ka hre tawhlo, i kherh et et anih ka ring tawh zawk" a ti kha kha a, "Ve leh ringawt che chuan a, aman min bem a sin aw" ka tih pawh chuan "I cho chhuak tal aniang" a la ti hram a.




In kan thlen chuan kan rei deuh aniang ka nuin min lo hau deuh hlak hlak a, mu tura ka Room a ka chhoh chuan dar 9 a lo pel thui viau tawh a ni. Ufamkima Message lo awm chu ka chhang a, ani pawh Christa nen an mufel deuh chiah a, rei tak kan inbe hranlo.



Message a thil sawi hi a peih vak ṭhin lo a a lo phone mai zel a, Call a han inbiak hi chuan sawitur hi a vang riau zel a, nitin kan inhmuh vang te pawh a ni mahna, sawitur chu a paitam lo ṭhin khawp mai, amah lah se se thu lam han sawi ve duah chi a ni mang si lo a.



Zingah chuan ka thlengphei hma khawp mai, Ufamkiman thingpui a lo in mek a, ka Bag dahin ka che nghal zung zung a, "Lo ṭhu rih teh" a khat tawkin a lo ti leh ṭhin a, "Lo va insiam rawh" ka tih lah chuan a che duh mai biklo. Chawhmeh ka siam laichuan min lo puih ṭalh chu a tum a, Christa lah chuan ka Alu vel sa a lo suasam bawk a, an pafa chuan an lo buai dun ve hle ringawt.



"Tlaiah ka ṭhiante dawrah chaw kan eichhuak dawn nia" a tih chuan ka hnial biklo, ka ni tawp ni tur a ni tawh bawk a, ka chhung te bulah chuan chhuanlam enge maw ka siam leh mai a niang chu.



Chhunlamah inchhung ka tifel fai a, bang leh inchung te pawh ka hawlfai thlap a, pawn pangpar ho pawh a hnah ro te paihin awmze nei deuh zawkin ka hung ṭha a, ka duh ang thala ka intihfai hnu chuan chawhnu her a ni ruai tawh.



Vawiin chu Christa pawh a mu miahlo a, tih mut ka tum lahin a muhil duhlo a, a meng kara, chhun mut a thlah ve ṭan a nih ka ring, Umawiin min lo bia a "Ka nu a lo kal a, engtin nge chhuanlam ka lo siam dawn?" a lo ti a, "A ṭhian te Pass lawmna ah chaw an eikhawm dawn lo ti rawh" ka va ti leh thawr a, engmah a lo sawi zui tak loh ah chuan a sawifel ni hmiang ka ti mai.



Ufamkima lo haw chuan Christa ka lo bualfai zo chiah a, "Kal hma ila haw har lo ang u" ka lo ti var a, ani pawh a insiam nghal a, kan inpeih tlan chuan dar 4 chauh a la ri a, duh aichuan a la hma deuh chu a ni.


"Kan kal mai dawn a mi?"


"Ala hma i ti em?" ka lo ti vat a.



"Ti hran chuanglo e, i duh chuan khaw en laiin i haw hman anga" a lo ti mai a, a pawi lo khawp ang, dawrah ka nu a kal tih ka hriat vang khan ka awm anuam bik zanlo, min lo Call hlauin ka Phone lah Flight mode ah ka dah daih a, phili chi tih takah min lo biak hlauh chuan ka chi ai leh ruai dawnin ka hre tlat, vawiin na na na chu luangmuang taka hun hman pui ka duh a, khaw en laia ka let leh theih chuan a ṭha zawk hlei hlei a ni mai.



Christa kawrlum ka hak tir leh zet a, Sitting room a kan awm laiin Ufamkima chuan Room aṭangin min lo ko a, "Lo kal lawk teh" a tih vang chuan ka pan phei thuai a.



Envelope hi min lo pe a, "Engthil nge?" tih paha ka en vut vut laiin "I hlawh a nih kha, en loin ak hmiah rawh" a nui lek lek chu enin thawk ka la hak a, inhlawh ka ni tak nain chutia hlawh min han pe chu a engmaw tih nawm loh riau a, ka inthlahrung nge pawh ka hrelo.



"Ka en dawn?" ka tih chuan a lu a thing tlat a.


"Ti nge?" ka lo ti hap a.


"I haw hunah i en dawn nia" a ti leh mauh mai a, ka thawh zatin a phu bak aia tam min pek ka hlau ru viau a ni.



"Engzah nge a?" ka tih leh hram a.



"Sawi chi loh" tih pah chuan ka kawngah a rawn kuah at a, a taksa thlawp zaihin min pawt hnai nghal a, chutihlaiin Envelope chu ka tuai rauh rauh a, ka en hram dawn a mawni, min pek tam viau chuan pek kir leh pawh ka duh ang ka tih rilruk laimekin min lo pawh thlaksak a, ka Bag ah laiah chuan a lo khung nghal hmiah mai bawk.



"Engtikah maw ka lo len dawn a?" beisei nei tih hriat takin ka mitah min lo en a, keiin ka lo nuih var var thung.



"Ka hrelo le, i hman remchan hun hun a ni tawh mai aniang chu" ka tih chuan a phur ve hmel khawp mai.



"Dam chuan zirtawp zanah ni rawh se" a tih chu hnialna ka nei lemlo, a tuk inrinni a ni a, a tan chuan a remchang khawp ang chu, inrinni hi chu dawrah kan awm rei ṭhin a, zirtawp zan chu ka tan pawh a remchang zawk mah ang.



"I sam hi thlah rawh aw" tih leh ka sam ṭawnna rawn pawh phelh a rual a, ka sam hi a sei em vangin ka ṭawn reng ṭhin a, a hmuh lai phei hi chuan ka la thlah miahlo zawk a, sam thlah a ngaina tih hriata lo thlah fo tur hi a nia.



"I inchei sia, ka ṭhing bik e" zanriah kan eichhuak dawn tih hria ila chuan ka inchei ve deuh tur.



"I hmelṭha tho a lawm, i ṭhing reng reng lo" ka hmai zartu ka sam chu lo hui kiangin ngaihawm zet hian min en vung vunga, chutah ka lamah a rawn kun hnai zui a, a rimtui inkah rim chuan min zem chiai chiai a, ka hmui a rawn tawh rual chuan ka ṭang at mai bawk.



Ka kawnga a vawnna chu thlahin ka biang tawn tawnah a rawn dawm a, lungchim zeta min fawh leh takah chuan ka inthlahdul ve ta riai riai a.



Room kawngka inhawng thawmah chuan kan in awmhlat rang kher mai, "Anu Mimi" a rawn ti nghal lauh a, zah zelah ka aw ka thian kharh chu ka bula mi chuan min lo nuih suk a, Christa lo pen lut chhat chhat lam hawi chuan ka inher ve ta nghal a.



"In inchuk a mi?" mipa naupangin a lo tih chuan chhan ngaihna pawh ka hrelo!



Ka zak ram ram mai, ani te lah chuan phawk deuh hian min en chho ha mai a, Ufamkima ka va melh ralh ringawt a, ani pawh a hawihai ve hle tho. "Bawiha JCB kha ken loh tur aw, kal ang ule" a rawn tih takah chuan Christ-a chuan a JCB pawm lai chu a ngaihsak zawk ta hlauh a, kei ka lo thaw huai ringawt.



Room aṭanga kal chhuah pah chuan "A va tih chi loh ve" hmui phunin ka va ti a, a lo nui suk duh chauh thung.



Chaw eichhuak tura kan kal chu chhungkua tak tak hi kan anga, nu ber chan tak hi ka chang hian ka hre mai a, midang min lo hmu ve tu te pawn chutiang tho chuan min hmuh ve ka ring. Dawr chhungah chuan Cabin hran kan Book a, kan Cabin lah chu a nuamin a zau ṭha hle a, kan mamawh lam turin hna thawk pakhatin min vil bawk a, Ufamkiman chaw leh eitur tui hnai tam tham zet a chah chu keini pathum chauh tan chuan a lua deuhin ka hria, a in seng hnem viauin ka ring a ni.



Pawn lama chaw eichhuah chu Christa pawn nuam a ti viau a niang, a ṭhu hle hle theilo a, thlanglam tukverhah chuan a va dak leh ṭhin a, an Vase hun mawi te chu a khawih a khawih a, a tih tluk ka hlau chu ka ṭhu reng thei biklo.



A pa in a lo hauh takah chuan a ṭhu ṭha ta hle hle a, Ufamkima chu a inthlahrung ni ngei tur a ni "Nidangah kan pahnih chauhin kan la eichhuak leh dawn nia" a lo ti zauh a, "Hetia kan pathuma chhuah pawh hi nuam ka ti lutuk a lawm" keiin ka lo ti ve vat thunga, chutah ka kut rawn humin dawhkan chungah chuan a hmer rauh rauh a, a lungawi hmel khawp mai.



"Thla la ang u" tiin ka Phone ka phawrh zui a, ka hmeh mawlh mawlh laia ka Phone a rawn bih chian takah chuan ka dah thla zal zal thung, Flight mode ah ka dah tih a lo hmu a ni ngei mai, engmah phei chu a sawi zui lo a, chutih laiin kan eitur chah a lo thleng zui ve bawk a.



"Bawiha kha hetah lo ṭhuttir rawh, khati chuan i eipuar ve hman nang" Christa chaw ka barh laichuan a lo ti a, "Ka ti thei a lawm, lo ei rawh" ka tih pawh chuan min la ngaichang renga, kan inkarah Christa chu ka ṭhuttir ta ringawt a, an pafa a chaw an in eitir lai chu hmuh an nuam takzeta, hriatloh karin ka lo en leh reng ṭhin.



"Dawrah i kawi leh dawn a mi?"



"Ka haw tlang ang, Umawii ka hrilh tawh a, min nghak lo ang" ka tih chuan a bu nghat nghat a, "Ka hmanhmawh hranlo a nia aw" ka ti leh hram a, min chhang lem hleilo a.



Chaw kan eikham chuan chaw eikhama eichi min chahsak leh a, Ice cream ei a phalloh vangin Vanilla Milkshake leh Chocolate Mousse min chahsaka, chaw ka eipuar tawh tehlul nen ka la ei ṭeuh thei tho mai. Ani erawh chuan a tem ve hlek chauh a, Christa thil ei berh ngawt chu a buaipuia, an thla ka lo laksak deuh reng chu min sawisel chiah silo hian min lo en leh zauh ṭhin, thlalak chu nuam a ti vak lo a nih hmel e.



Kan thil eizo kan ṭhut khawmuan laichuan Bill an lo la a, kan ei man bakah chuan Tips a dah tela, a hranpa in Bill la tu nula chu cheng Za a pe tel bawk a, nui var var chungin nula chuan a kekawr ip teah a ak nghal tharh a, a lawm hmel khawp mai.



"Kal ang ule" tih pahin Christa chu a pawm nawlh a, Common Room a kan chhuah phei laichuan Countera ṭhu chuan lawmthu a lo sawi luam a, kan piah deuhah chuan thlalakna rem tak a awm a, tleirawl te te hian thla an lo la ka va hmu bawk a, pangngai taka thla lak ve reng reng a ṭhain ka hria.



"Ti ru, thla la ve ang u" ka tih laimekin Cabina min vil tu nula te kha lo kalin "Ka lo hmeh sak ang che u" a lo ti var a, Ufamkima banah chelhin Photo Booth lamah chuan ka pawt phei dawt dawt a, min hnial em biklo.



"In naute hi a hmelṭha e, a nu leh pa in hmelṭha bawk a, a chhun fuh hle mai che u" nula in a lo tih chuan ka lo nui var var a, a nu tak tak pawh ni ila heti bak bakin ka lawm chuanglo ang, Ufamkima pawn a hmel aṭang chuan pawm ve viau a nih hmel.



Pawn kan chhuak chu khua a lo thim fel der tawh a, ka rinai tak chuan hun a kal chaka, en laia ka haw hman ka rin tehlul nen, "Taxi ka la tawh mai ang" ka tih chuan min rawn melh ralh a, a ṭawngka in sawilo mahse a remti lo tih a lang nghal pang mai.



Christ a min lo pek vut pah chuan "Lo ding rawh u" tih leh kal a rual a, rei vaklo ah kan hma ah chuan a motor a lo ding a, ka ṭhu lut ve leh ta nge nge.



Kan in thlen hma a dawr kawtah bawk chuan chuan ka din tir leh a, lengtura sawm awm tak pawh ka ni a mahse, ka dawt sawi laklawh khan ka dinhmun a ti lai rih riau a, ka sawm leh ngam ta peklo, Motor aṭanga ka chhuk chu min en zui vung vunga, a mitmengah beisei a neih zia lah ka hailo, ka nuihtlawn titih ringawt a, hmel hlim min hmuh duh pawh ka ring tawh meuhlo mahse, Gentleman a nih zia min hmuhtir leh ta zawk a.



"Anu Mimi-i mangṭha rawh le" Christa bulah a ti a, chutah ka lam lo hawiin "Lut tawh rawh, kan thlen hunah ka lo hrilh dawn che nia" a lo ti bawk a, lungawi tak chuan kan inthlah leh ta phawt mai. An tlan liam dawn thlengin Christa chuan ban min lo vai a, an tlan liam ta chu an ngaihawm nghal der leh nghala, naktuk aṭang chuan kan inhmu khat viau tawh a nia nga, Christa mawlh mai chu ka ngai dawnin ka hria.



Muang changin kan in lampanin ka kal a, inchhung ka lut chu thawm a lo reh dak a, Sitting room a an lo ṭhu chu ka thawmah an lo hawi rual ṭhap hlawm a, an landan aṭang rengin engthil ṭhalo emaw a thleng tih haitheih rual a nilo.



"Saitluangpui, hetah lo kal teh" ka nu aw chu a chang ṭha khel khawl khawp mai, 'Mimite' ti lo a, 'Saitluangpui' a tih fak tawh hi chuan ka chungah lungawilohna engemaw tak a nei tih ka hrethiam bawk.



Bangbo angreng zet chuan Sitting room lam chu ka pan phei a, ka pa hmel pawh chu hmuh a nuam fahran biklo, Aumawii lah chuan min en hrak hrak duh chauh a, ka nu lahin min melh thip hle mai bawk si.


"Enge a?" ka va ti he haw a.



"Khawiah maw i kal a?" ka pa a ni, a vin bawk si a, min ti phu chiam lehnghal!



"Chaw...kan ...eikhawm" ka tih laichuan Umawipuii chu ka va melh a, TV lam ringawt a hawi chu ka ngei kher mai, eng thil nge maw a lo sawi le!



"Khawiah nge chaw in eikhawm?" ka nu zawkin a lo ti ve leh a.


"Sawtah, Nunmawii... te inah" ka ti bah nak a, Nunmawii chu ka School kalpui ṭhin a ni a, tunah rih chuan kei aiin a pawl hniam zawka, MZU ah a kal ve mek bawk.



"Nunmawii te inah i kal tak tak a maw, dawt i sawi lo maw?" ka nu aw ki chuan hriat engemaw chu a nei phawt mai.



"Zep lo khan i nu kha ṭha deuhin hrilh rawh" ka pa chuan a lo ti leh a, sawi tur chin tal Aumawii chuan min lo hrilh sela ṭha tur, min phiarru ang hrima a ngawi tlat chu enge a awmzia pawh ka hre tawh lo.



"In tih dan chu enge in hriat a?" zamlo ang tak chuan ka ti let ve nghat a, ka nu chuan min melh tur khai ringawt tawh.



"Pathlawi i ngaizawnga, a fapa i awmsak ṭhin a ni maw?" a rawn ti chang ta fawl a, ka lo ip ru chawih mai a, Umawipuii chu ka va melh nghal hrak bawk.



Phat ngaihna pawh ka hre tawhlo e a, Aumawiin a lo sawi vek tih a chiang reng, Sitting room chhuat laiah chuan ka ding ngawi renga, ka nu leh ka pa in min en reng laiin keiin Umawipuii ngawt chu ka melh a, ani lah pek chuan a Phone a en loh leh TV a en a, min en duh hauhlo lehnghal a.



"Nitin min bumin i kalchuak a, i u i pui emaw kan tih laiin i khawsa zia mai mai chu ka va lawmlo em em ve, nula lehkhathiam i ni lawm ni, mi chiahhlawh ni turin lehkha kan zirtir che em ni, i zirna hautak zia te kha ngaihtuah ta che, kan lo inseng thlawn mai mai a ni maw...!" ka nu chuan a ti hlak hlak a, a thinrim bawk a niang khabe sai dar dar chungin min melh a, chhang let ngat ila chuan min bengthlu tawp duhin ka ring hial a ni.



"Tu maw i bialpa chu ni a?" ka pa zawk in a lo ti ve leh a, an pahnih hniha min chhuah chhal vang leh ṭan der tu eih pawh ka neihloh vang chuan ka rilru no a lo chhuak a, ka hnuk a ulh ṭeuh mai.



"Vawiinah ka bang tawh a lawm" ka ti zawi sep ringawt a, a tu amah mah chuan min chhang lo.



"Ka hmelhriat te an nia, reilo te chhung ka pui lawk a lawm" ka ti leh tawl a, Ufamkima chungchang zawng zawng a lo la hrilh loh hram ka la beisei fan chu a nia.



"I awmdan chu ṭhenawm khawveng ten an lo hria ang tih a hlauhawm hle mai, khaw hawi ngaihna pawh kan hre dawn hleinem hetiang te chuan" ka nu chuan a ti leh hlak hlak a.



Chutih laiin "I bialpa chu ṭhen ang che, i u in Pathlawi a ti lehnghal a, a tih in a tih chi loh reng reng, in lo kal thui hman em lo turah ngai ila, thlah fel hmak ang che, ṭhenawm khawveng ten an hria ang tih pawh a hlauhawm a lawm, a zahthlak lulai lutuk emai" ka pa chuan a lo ti ve leh a, zep rual lohin an hre fai kelh tawh a nih hmel e, tih ve theih nei ta lo chu hah zetin thawk ka la hluai ringawt tawh.




(End of Chapter - 12)

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)