ZUNZAM (MIZO LOVE STORY) by Ahmangaihi violette Khiangte (Completed)

Moderator: writers

Ahmangaihi violette
Posts: 148
Joined: February 1st, 2020, 3:14 pm

ZUNZAM (MIZO LOVE STORY) by Ahmangaihi violette Khiangte (Completed)

Unread post by Ahmangaihi violette » September 7th, 2021, 10:05 am

ZUNZAM - by Ahmangaihi violette khiangte

CHAPTER - 1



Nula la naupang tak te hian an ngaihzawng an ṭhen hian engtin nge an awm tlangpuia i lo rin? "Hmeichhia chu kan rilru a no a, kan duh reng vanga ngaihzawng kan ṭhen anih pawhin engtin emaw khawhar ruk riau na hi chu kan nei tho ṭhin" tiin ka laizawnnu chuan a sawi a mahse, kei chu chutiang chu ka ni ve ngailo, khawharna emaw rilru han natna vak hi ka nei ve ngai miahlo a, mak ka inti lehling zawk a ni.




Ka laizawnnu chuan "I duhtak i la tawn loh vang a nih chu" min tihsak a, chu chu a chhan niin keipawn ka ring ta, ngaihzawng pali ka ṭhen ve tawh a, pahnih chuan hmeichhe dang min biaksanin min ṭhen a, a dang pakhat chu ka duhthu ngeia ṭhen ka ni thung a, tuna ka ṭhen zawh tak erawhin kan inkawp ṭhatlai rengin nupui min ruksan a ni, ka chhungte chuan ka rilru nat an hlau hle a, mahse, an ngaihdan ang chuan ka awm lo, ṭum dang ang thoin a ni ka awm, a tu a te mah chu ka vei zui hauhlo bawk.



Min duhtu hi chu ka hmu ve zel zula, tun hma kha chuan an hmel ka duhzawng leh mifel tak an nih chuan inzawmna ka siampui hreh ngailo a, tun hnu ah erawh ka hreh riau zel tawh, ngaihzawng mai mai ni tawhlo, damchhung kawppui tur ka duhtawh vang a ni mahna, kum a lo tam a rilru puthmang pawh a dang ve ta viau mai.



Thilmak deuh chu maw, tu emaw beisei hi ka nei a, hun lo la awm tur a mi tu emaw, ka duhthusam anga ṭha famkim tak la tawng dawnin ka inhre ṭhin, Movie leh hmangaihna thawnthua kan lo hmuh leh hriat ṭhin ang mipa hi chu ka beisei hranlo a, ka kawppui tura ruatsa erawh a awm ka ring tlat thung.



Chuvang chu a nia, ka ngaihzawng ten min ṭhen emaw keiin ka ṭhen emaw a nih pawh a ka lungngaih ve ngai miahlo. Ka u bulah chuan "Pathian in ka tan ṭha deuh min ruatsak tawh a, chupa chu ka tawn theihnan ka tana ṭhalo tur chu min dah kian sak ah ka ngai" tiin ka sawi a, a nuih a za deuhin ka hria. "Chutianga i ngai thei chu a lawmawm a nih chu" a ti liam mai a, ka nu bulah chuan "Mimi chu hnem buai a ngailo reng reng, amahin a inhnem nghal vek" uangthuang takin a lo ti ṭhin.




College ka zawh hlim hlawl a ni a, zirzawm lam rilru ka pu hranlo, lehkha thiam thei tak ka nilo bawk nen lehkha han zirzawm leh aichuan engthil emaw thildang tih ka rilruk a, tih tur ka hriat mailoh vangin chhun lamah U Mawipuii dawr ka nghahpui ta ṭhin a, a dawr chu eitur zawrhna dawr lun angreng tak a ni.




A dawr aṭanga hla vaklo ah chuan College a awm a, College naupang te pawh an lo chawl ve fo ṭhin, tun ang November thla bawr hi a dawr a lûn hun laitak a ni bawk. Kei chu counter ah ka ṭhu a, U mawipuii ka ṭhutpui a ni mah zawk, tihtur awm em em ta lo eitur sem te ka pui ve ṭhin a, chutiang chuan ni ka tum tawi ṭhin.



Nikhat chu kan buai a zual hle a, eitur semin kan phar buai zak zak mai, countera ṭhu ka u Mawipuii pawh biak hman a ni meuhlo, dawr chhung chu kan khat mup a, pawnah lo luh hun nghak an awm nual bawk.



Dawhkan palina a ṭhu pitar chu a muang fal hle a, a thil ei sawisela a phun leh hluk hluk ṭhin chu college naupang ho chuan an ṭih deuh em mawni, an en leh hrek hrek ṭhin, lo lut thar te pawn a dawhkan va kilpui chu an hreh niin ka hria.




"Thingpui min lo pe leh rawh, sa deuh loin han ti tawh ang che u, lei a kang zo takngial dawn" a awmhnai ber kei chu min en pahin a lo ti a, a thingpui laksak tura ka kal ka let leh laichuan lehkhabu eng engmaw keu hian a lo inchap hnawk nasa mai a, a la muangchang sur sur khawp mai, a dawhkan nilo dawhkan dang zawng zawng chu a khat tawh a, a kiang chauh awl tawh mahse ṭhalai ho chu an ṭhu duh tlat silo a, amah lah chuan eng he hu ah a ngailo tih a hriat viau bawk.



"Tui deuhin in rawh aw" tiin thingpui chu ka va dah a "In siamtui a thu le" a lo ti vei khauh mai. Ka nuih a ani pawh a nui ve tho, nelawm loh tak phei chu niin ka hre hran lo. Kal mai ka tum laichuan "Enteh in thilsiam hi a al lo thei lutuk a nih hi, a tui dan turin a tuilo" a lo ti a.



"Pi, i dawhkanah khan chi kan chhawp a sin" nuisangin ka lo ti a.



"Plate a albelh leh chu a tui tur angin a tui tawh ngai hleinem" a ti ve leh tlat.



"Ee..kan lo hre tawh dawn nia" ṭha tak chuan ka ti ve mai a, min nuih var var mai. Chef bula han sawi pawh ka tum hranlo, Counter ah U mawipuii ka va ṭhutpui leh hnu reilo teah pitari pawh a rawn thochhuak ve ta hram a, U Mawipuiin a eiman a lo hrilh chuan. "Unau em ni in nih a?" a lo ti deuh haw a.



"Ni e, ka nau a nih hi" U mawipuiin a tih chuan ka lam hawiin min rawn nuih a, a landan mai aṭang chuan pitar invawng tak leh changkang ru tak niin ka hria, a thawmhnaw leh a sam te pawh a felfai hle a, rimtui a inkap nam ve chak bawk a, a hmel pawh zur tawh viau mahse a vanglai chuan hmelṭha tak a ni ang tih ala hriat theih.



A chhuah hnu chuan "Khawilam tar Modern nge mawni le?" ka ti nang nang a, "Aw, sawlai kawng chhak lama Higher Principal a nih kha, a pension tawh zawkin ka hria?" U mawipuii chuan a lo ti a, enge maw tak anih kha ka ring deuh reng a ni.



Waitress pakhat a lo kala "U mawipui, hei dawhkan pali naah Lehkhabu an theihnghilh a" tiin Diary ang tak note lian vaklo hi dawhkanah a lo dah a, "Tu ta nge mawni le?" ka u chuan a ti niah niaha, "Pitar kha" ka lo tih chuan "E, va um thuai rawh" a ti nghal ta mai si a, hmanhmawh deuha thoin ka tlan chhuak a, kawt kai mai chu kawngpui a ni bawk nen, khawilam nge a pan ka va hmu hman tawh der lo.


Ka u in a thawhna hlui a sawi Higher school thleng thlenga va kal chu ka peih mang silo a, a lo kal leh hunah ka pe mai ang tiin ka let leh ta zawk a.



"I va hmu hman nange?" Ka u in a lo tih chuan "A lo kal leh tho ang" ka ti mai a, chutah Chaira ka ṭhu leh tur lehkhabu ka keng lei deuh chu engemaw a rawn tla rak a, thlalak niin ka hria.




Ka enchian chuan nufa nimai awm te thlalak hi a ni a, nu zawk chu pitari ngei kha a ni bawk, khaileh... fapa a nei hmelṭha kher mai ka ti!



"Enteh, a fapa hi a hmelṭha a sin" tiin ka u chu ka hmuh a. Ani pawn ṭha a ti ngang mai. Thlalak ah chuan sofa ah pitari chu nalh leh inrintawk hmel takin a lang a, mipa thung chu sofa ban ah ṭhuin pitari chu a dar tawn tawn ah a kut khinghnihin a vuan a, a nui mawi ka tiin a mitmeng dam ruih te chuan engtin emaw riau hian min hip a, ka en nawn sek reng mai a ni.



Lehkhabu ah chuan engvak mah a in ziaklo, pawisa chinfelna thil eng engemaw niin ka hria, hming te pawh a inziak thla dula 'Sawmtur list te' tiin a ziak bawk a, ngaihtuah a ti thui riau lehnghal, engthil ah ege maw sawm tur ni ang le? Thlalaka mipa hian nupui a nei dawn tihna a ni mai a ngem? Thlalak chu ka bih leh zawka, mahni ta ni hawtlo chu ka ui dawn dawn mai nia mawle.



Pitari chu a lo kal leh mai ka rin tehlul nen khami ni bak kha a lo kal nawn leh tawhlo reng reng, a lehkhabu leh thlalak chu Countera Drawer ah chuan ka dah reng ṭhin a, thla chuang fe a lo kal takloh ah chuan a lo lam leh rinna pawh ka nei ta lo.



In mumangah hian in hmelhriatloh tu emaw in hmu ve nawlh tawh ngai em, mak deuh maiin ka hmu a, kha...khapa...thlalak a mi kha!



Amak ka ti a sin aw, ka mumangah chuan chiang tak maiin hmaichhana inhmu anga chiang hian ka hmu a nih chu mawle? Zinga ka ngaihtuah let leh pawh chuan min ti mur sung sung thei hial a, keihian khapa kha hmelṭha ka lo ti viau em mawni aw ti tein ka ngaihtuah zui rauh rauh a, mumang a hmu tur ema ka vei lah chu ka hre mang der silo a.



Dawr ka thlen veleh ah Drawera ka thil dah chu lakchhuah tumin ka hai a mahse, ka hmu zo ta tlat lo, Umawipuii ka zawh chuan "Nimin piahah khan ka paih tawh, i dah renga Drawer chhung a ti hnawk mai mai, a lo lam tawh dawn chuanglo a" a lo ti ta mai a, ka lawmlo nasa mai.



"Engah nge i lo paih ngawt, mite pawh hrilh ve tur a lawm" lungawilo taka ka tih chuan "Hnawmbawm va en rawh, a la awm maithei" a lo ti sam mai a.



Hnawmbawm chu ka va hai chiam a, a mawng lamah lehkhabu chu ka hmu ta hlauh mai a mahse, thlalak kha a awm ta tlat lo, thinrim ru ṭun a ka hai leh ngial hnu ah chuan thlalak bal kai nian chu ka hmu leh ta hlauh a, ka hahdam huai mai nia mawle!



Lehkhabu erawh chu ka la ta lo a, thlalak chauh chu tifaiin ka hawn a, ka khum bul bangah tarin ka en fo ṭhin, "Tu thlalak nge?" ti a ka nuin min zawh chuan "Ka bialpa thlalak a nih hi" tiin dawt ka lo hrilh a, a awihlo em em lehnghal a, a upat hmel deuh tawh a ti pawh a ni maithei.



A mak a sin, ka khum bula ka tar aṭang chuan ka mumangah ka hmu ta zut mai a, a biak te pawh kan inbia nia mawle, a nelawm em em mai bawk si, a hmel lah a taka hmu tawh ang maia chiang hian ka mitthla ah a cham ta ṭhin a, a vei tak tein ka vei zui ta ber anih chu!




Ka u chuan "Ramhuai a nih chu" min tihsak a. Ka ṭhiante chuan "Kan zawng chhuak dawnnia, i pasal tur pawh a lo ni thei" min tisak thung, ka lo phur ve em em a, mahse, zawn chhuah lah chu a har hrep mai, a thlalak chauh kan nei a, a hming em pawh hrelo ta chu Social media ah a in dah dan kan hre mang silo a, Plan a fail chiang hle ringawt.



Chawlhni tlai khat chu Umawipuiin thu thar a rawn nei ta a, Patari thawhna School hluia thawk a hmelhriat a lo zawt ni ngei tur a ni. "Thlalak a mipa kha maw pitari fapa a nih kha, a fapa neih chhun a nia, MZU Department of Botany a an Professor chhuan tawlawl anih kha, a student te ngaihzawn rawn luai luai mahse, bawihte a pawi khawp mai nupui leh fa a neih tawh tlat mai" tih pahin min nuih kur kur a.



I hriat rualin tu emaw chan i nei ve tawh ngai em? Tuna ka dinhmun hi chutiang chu a ni, a zahthlak hle mai ka ti, ka ṭhiante bulah te khan ka lo seprawtui ve nasa tawh mai si a, a sawipawh sawichhuah leh chi ni tawh nghallo chuan.



A hmingte pawh ka hre ta a, Lalfamkima a lo ni a, a mawi ka tiin a inhmeh ka ti a sin aw, a nupui chu Aizawla tlereuh dawr lar deuh neitu a la ni zui a, Social media ah te pawh an nupa thlalak te chu ka hmu ve ta a, thik phak rual an nilo, tu hriatpui manglohin ka zak ru chem chem ringawt mai a ni.




Kum thar ah chuan Shillong lamah M.A zawm turin rilru ka siam a, ka kaltur ka han insiam chu ka khum banga thlalak ka tar chu kan keng tel zauh pek a, UMawipuii min nuihzat leh ngang mai, ka haw leh har dawn si a ka awmloh hlana an lo paih daih ka hlauh vanga keng ka ni ber a, en leh ka duh thut takah la kawl ve mai mai ka duh, Instagram vela a nupa thlalak aingawt chuan ka tan pawh hmuh a nuam deuh zawk a lawm.



Kum 2 zen zawn Shillong ah chuan ka awm a, ngaihzawng te pawh ka nei ve et et ṭhin a mahse, ka dan ngaite in rei kan daih leh ta lo mai pawh a, rilru pe taka mi va ngaihzawn hi engtia harsat viau nge maw ka nih dawn le? Dik lohna ka nei em mawni dawn ni!




Ka bialpa chuan ka ngaihsak tawklo min ti a, inbiak reng te, len chhuah dun te, han awm dun changa inkuah thuak thuak ang te hi ka nuam tih zawng a ni ve tlatlo, ka duh tak tak lo anih hi tiin ka ṭhen leh mai pek a, ngaihzawng dang neih chu ka peih buai ta lo law law a ni.




Ka zirlai ka zawh hnu a ka haw leh hnu chuan hna ka zawn ve tak tak a ngai ta, sawrkar hna lam ka beisei lemlo bawk a, U Mawipuiin pasal neih a tum ut ut nen a dawr chu enkawl zui turin ka chhungte chuan ka kutah an dah a, ka pawm khawp mai, nuam ka tih zawng tak a ni bawk.



Nikhat chu dawrah ṭhu a, U mawipuii nen kan titi dun melh melh laiin hmana Pitari kha a lo lang hlawl a, Umawipuii chuan a lo hre ve tawh hauhlo, zantam a lanna thlalak en ṭhin ta chuan ka lo la theihnghilh lo nasa mai a, a hmel ka hmuh rualin "E he, ka pi i dam maw?"ka lo ti hluai a, chutih laia a hnung lawka Prof.Famkima lo lut ka hmu thut chu ka lehhawi rang teh e.




Ka thinphu han ran nasat zia mai te chu, a hmel pawh ka melh ṭha ngam lo, a lo luh pahin min melh zawk a, a lo pen luh rual chuan ka vel boruak chu a thunun ta vek emaw tih tur khawp hian danglam a awm, chu chu keimah chiahin ka hre thung.




Mipa naupang kum 3 mi vel tur hi a rawn pawmlut a, ka mumanga ka hmuh ang chiah chiah kha a landan chu a ni, a ṭha a sin, a zahawm khup maia, a takah chuan tlemin a upat hmel deuh a mahse, a ṭha ka ti a nia aw.



Umawipuii malah ka sik hlawk hlawk a, phawk deuhin min lo en a, a hrethiam ve ta a niang, thokang meuhin Prof, Famkima te an dawhkan lampana an kal chu a en zui a, "Mimite mi pa ngaihmelh chu a ṭha lo ang" min nuih suk suk chungin a ti a, "Heti hian ka en ringawt dawn a lawm" kei chuan ka lo ti ve tlat.



Ka en char char a, a chezia te chu hmuhnawm ka ti, a fapa leh a nu a duat hmel em em mai lehnghal a, a fapa tui a intir laia a nui suk suk hmel te chu hmana ka mumanga ka hmuh dan nen kan a inang em em mai lehnghal. Ka lam a rawn hawilai chuan thawk ip ngar ngarin a nia ka lo thlir ni.



Min rawn en dan ah chuan min hria te pawh a ang a lawm mawle, enge maw sawitum nei a ang hle bawk. Umawipuii chuan "Va kal la, Order va la rawh" tih leh ka hnunga ben a ruala, chutih laichuan min lo la thlir reng, hupurh ru deuh chuan ka va kal a, an dawhkan ka thlen ruala lehkha min lo pek laite chuan ka hmulthi a ding sung sung thei hial.



Ka ha a lan ṭhaw hlauin ka hmui ka pet fan a, a order lehkha min lo pek ka ban laia kan kut a han intawh zawng te chuan ka hit seng seng maiin ka hria, ka let leh lam chu ka ṭhen ṭha mai a, Umawipuii thung chuan min zahpui hmel ngang mai.




An thil eichhung zawng chuan counter aṭangin ka lo en reng a, "I zaklo ka ti bawk sia, ka khawngaih tho bawk che sia" U mawipuiin alo tih chuan "Ral aṭangin ka en mai mai anih hi, engtin mah ka ti chuang hleinem" nui ver vera Prof te lam hawipah chuan ka ti a, ani chuan a fapa eitur a lo barh mek a, a ep chiah a nu sira ṭhutna awl chuan ngaihtuah a ti thui leh ta, saw tah sawn han ṭhu mai ila aw, ka hma chiaha ṭhu saw ka pasal han ni mai sela, a bula mi saw ka fapa han ni bawk sela, duhaisam a van kim dawn tehlul em, ngaihtuah zawng ringawt pawhin min ti mur chem chem thei mai nia!




Ngawi lawk! Ti nge ṭhutna saw a awl le? Naute nu hoin an chhuak lo em maw ni aw? "Tinge a nupui a tel ve loh le?" zawt em em chuang loin Umawipuii bulah chuan ka sawia, naupang an hruai chhuak si a, a nu tel ve awm tak tiin ka lo ngaihtuah deuh a.




An thil eiman pe tura counter lama an lo kal chu hnai takah ka lo en a, a fapa chu a be mawlh mawlh a, a aw ri ah te chuan ka lo luangliam leh tawh, ka lo en ngawih ngawih laichuan Umawipuiin min rawn nghawk sawk mai a "Enge?" Ka lo ti he haw a, hriattham loh a a phun hluk chu ngaipawimawh duhloin Prof lamah chuan ka inher leh nghat a, min rawn melh ve ta chiah mai, a mit a la sawn rang hle a, a zakin ka hria, a awmdan chu mi zakzum tak a ang, ka duhzawng tak a ni leh pek dawn tlat mai ka ti!




"In eitui em?" Umawipuiin a tih chuan Patari zawk chuan a lo chhang a, Prof pawh a bu ve nghat nghat a, ka lo nui var var reng chu Pitar chuan min en duh deuh viau a, min nuih ve ringawt bawk a, a fapa vanga ka awmdan chu han hre ngat sela min van nuih dawnlo rua em aw...




"I naute chu a van hmelṭha em em?" ka tih chuan Prof chuan min lo melh zawka, "Chuti maw, kan va lawm ve" tih pah hian a nui suk a, hnai taka a nui hmel han hmuh phei chu e mi pa a nih lam a lang thei tawhlo reng reng a, ka en ngawih ngawih ringawt tawh, an chhuah hnu chuan U mawipuiin min chek tlat tlat a, "I awmdan kha chu a hrethiam vek ang che, i ti lang nasa em em lutuka, a zah hmel zia te kha i hmu ve lo a mi" a bawrh bawrh a, ka zak leh hnuhnawh kher mai.




Chuta ṭang chuan ka vei leh ta tluk tluk mai a, nula pangngai mi lerh leh awmherh pawh ni silo in a mi pa han vei tak em em mai chu a zialo kher mai, engtia tam nge an nu Instagram Ac te chu ka check tawh pawh ka hre senglo, hetiang ngawt zawng aichuan rilru lakpen nana ngaihzawng neih leh vat ka ngawi dawnin ka hria.




College ka kal laia ka classmate ṭhin Samuelan min lo ve zeuh zeuh ṭhin a, kan kal ho lai aṭang renga min ngaizawng tawh tu a ni a, rilru lakpen nan hrim hrim ti a be ṭha zui ve ta chauh ka ni, ani pawn chutia ka be ṭha ta chu ka hawi lam a lo man thiam rang kher mai, inngaizawng angreng deuh chuan thla hnih vel zet chu kan inbe ve awm e mahse, chutih chhung zawng pawh chuan Prof.Famkima laka ka rilru chu a ti damglam pha eihlo nia mawle! A thlathumna ah phei chuan kan in be mumal leh tawh meuhlo.



Inrinni tuk khat dawra ka kal chu choka ah eitur ka dap melh melh laiin "Lo kal vat teh, thil ṭha deuh i hriat duh chuan" tiin Umawipuiin minlo ko lang lang a, ka va chhuahphei laichuan Zarkawta a ṭhiannu Kimkimi nen counter bulah an lo ṭhu dun a, an bul ka thlen rualin "Mate, Famkima te nupa an inṭhen tih i hre tawh em?" Umawipuiin a lo ti ta mai! Ka hau chungin "Eng a!" ka lo ti haw a, "Hrilh ve vat teh, a vei teh mai ania" tiin a ṭhiannu chu a nghawk a, an pahnih chuan min enin an nui tet tet a, hriat chak luatah thinphu chu rang ṭha duh zaih zaih tak a ni.




(END OF CHAPTER -1)



Link:
BBcode:
HTML:
Hide post links
Show post links

Ahmangaihi violette
Posts: 148
Joined: February 1st, 2020, 3:14 pm

Unread post by Ahmangaihi violette » September 7th, 2021, 10:07 am

ZUNZAM - by Ahmangaihi violette khiangte

CHAPTER - 2




Famkima chu ka lainat reuh khawp mai, U kimkimi sawi danah mipa fel, zaidam leh pasalṭha tâwp a ni mahse, a nupui Rosy leh a nu Pi Nghaki te chu an inmil hleitheilo a, chuvang chuan an lo inti taurau ni awm tak a ni, Famkiman a nu a thlauhthla thei silo a, a nupui nen chuan an lo inṭhen phah ta a ni awm e.



"U Famkima nu pawh hi hrawn harsa chi mi khirh lutuk a ni hrim hrim a, Rosy te lah hmeichhe modern lutuk an lo ni ve bawk nen" U Kimkimi chuan a ti zui barh barh a, keichuan Famkima chiah ka lo ngaihtuah a, a rilru a na ngawtin ka ring, hman deuh a kan dawra an lo kal pawh khan a hmel kha a ngui nghiai a nih kha mawle.




"Pathlawi lungleng hnem tum kan awm lo turah ngai ang" Umawipuii a lo ti zauh pek a, "I ti awm anglo e a" ka lo ti ve hlak a.




"Mimite a Number i duh chuan ka pe ang che, YMA group ah kan awm ho tak a lawm" a phone rawn phawrh pah a a tih chuan ka lo hnial a, "A...Ukimkim ka duh lo mai, mi nupa inkar buailaia lo inrawlh tum te chu, ka hmelhriat ṭha pawh a ni silo a" ka tih chuan Umawipuii zawk chu a lo nui hak a, "Ka nau hi chu a fel a nia, a reng rengah vawikhat nulat ve manah pathlawi lo deuh te pawh kan zawng ve phawt ang chu" tih pahin a darin min rawn nek talh talh a. Chutiang zawng kher a a sawi erawh ka helh deuh a, Famkima te chu a ṭha famkim ve em a sin.




Ukimkimi chu rei deuh a lo leng a, chawhma chhung zawng chu Prof.Famkima chungchang kan sawi ho a ni ber, veng khata awm an ni bawk a, a chanchin lah a hrehnem na ngiang mai. A sawidanah chuan a nupui nen pawh inngaizawng em em lo a chhungte sawirema in nei an lo ni awm e, Famkima chu mipa ṭawngtlem leh zakzum chi a ni a, a nupui Rosy erawh Professor mi ze letling thawk a ni thung. "Tu nge thu zawk tur pawh i ring thiam mai em Mimi?" tiin min zawt zui a. "Mipa zaidam tak leh damthluam chi a ni ang tih chu ka ring a.." tiin ka lo chhang ve.




"Mahse Rosy te pawh lehkhathiam an nia, mi hmuh ah pawh a pasal hi a zah der thiam a sin, a fing bawk a, bel chiang tak tak lo chuan an inkar hria an awmlo ang, a hmelṭha bawk sia mi hausa chhungkua aṭanga seilian a lo ni ve bawk nen mi zawng zawngin nupa inhmeh an tia, mize in ang lo deuh si hi an pawnlam landanah chuan an inhmeh thlup lawi a" a tih leh laichuan ka lo bu nghat nghat a, Prof nupui kha a hmelṭha ve bawk em a ni, tupawn inhmeh ti se ka demlo ang, kei ngeipawn inhmeh ka ti.




"Bia la, i kawm ve mai mai dawn a lawm, a lungleng te pawh i hnem ve a ni maia, va ngaizawng kherlo pawn ṭhianah a siam theih a lawm" Ukimkimi chuan a ti leh a, ka lo nui mai mai thung, kum kha leh chen kha ka lo vei tawh a, va biak te chu ka chak lutuk, ṭawngkam khat lek pawn min lo chhang sela ka lawm tawk leh em em ang mahse, enge maw hian min dal tlat a, ka hrelo le; ka zuamlo a ni ber ang chu.





Mipa ka duhthusam ka lo suangtuah ṭhin ang. Mahse, ka neih phak loh tur a ka ngaih ang kha ania, biak buai loh ka thlang zawk, ka inti khawngaihthlak mai mai dawnin ka hria, ka huaisenna in a tlin lo. Chulo ah inchhungkhur buaina nasa tak a tawh laia lo va inrawlh ve chu thil ṭha pawh a nilo ang, ka rilru a thianghlim silo, ngaizawng rilru pu chung lehnghal phei chuan Ukimkimi thilsawi ang pawh chu ka ti theilo tawp ang.





In a kan haw hnuah Umawipuiin min chhaih leh zuk zuk ṭhin a, "Kimkimi pawh khan a star ṭhin a nia, i lo infuihpawrh tir a nge, hmeichhia in a va biak hmasak te kha a zahthlak teh a nia, bakah an inṭhen hlenlo ang fa an nei tawh lehnghala, karah fa an awm tawh chuan a buaithlak tawh ṭhin a, pathlawi fa nei tawh aichuan tlangval ngei neih a ṭha zawk, buaina a awm lo a a hahdam thlak zawk bawk, mahni hrinloh naupang hmangaih te hi mi nazawngin kan theilo a nia" a ti sap sap a.





Pathlawi a nihna leh fa aneih tawhna lamah phei chuan engmah a laka ka rilru a danglam lo a, a heti chung pawhin ka cho nganglo zawk a nia ka laizawnnu hi chuan hrilh chiam pawh ni ila ka rilru put hmang hi a hrethiam phakin ka ringlo.




Zanah chuan ka nu nen Mochi kan siam laiin Ukimkimi message a lo thleng a Professor famkima number chu min lo thawn tak tak hi a lo nia, a number ka hmuh ringawt pawhin engtin emaw riau hian ka awm a, ka thinphu te thlengin a rang thei!




Number chu ka save ve ta tho a, a whatsapp dp erawh ka hmu thei tlat lo. A last seen ka en sek a, a online khat hle a niang a last seen chu dar sarih ah a tang tlat a, dar sawmpakhat ka mut dawn thleng pawhin a danglam leh tawhlo.




Zinga ka en leh chuan '10 minutes ago' a lo inti kalh a, ka nui nghal var var mai, kan van online rual teuh em. Ka status ah '10 Minutes ago' ka ti ve nghal thawr a, UMawipuiin a lo la en hmasa ber zui.





Dawr ka thlen chuan "10 minutes ago chu enge?" a lo ti var a, ka sawi duhlo min hau palh ang. Nileng mai chuan a last seen ka check a ni ber, darkhat ah a online a, darhnih leh a chhanve ah leh dar li ah nen, ka hlimpui a sin aw, a thiltih ka hriatpui ve chhun kha a ni miau a.




Ukimkimin ka biak leh biakloh min lo zawt a "Ka ngam teuhlo" ka lo tih chuan min nuihzat hle ringawt, "Be mai mai rawh, enge a tih te zawt la, anih loh pawn 'In damṭha maw?' te va ti satliah mai mai la, a hre dawn chuang hleinem che" nui kar kar chunga a tih chuan "Ka zak e a, min lo reply lo ta se ka rilru a na dawn emai" nui chungin ka lo ti ve a.





"Mimite, nanglo hmeichhe tam tak hian an be dawn tih ring tawp mai rawh, pa anih lai pawn a luck a tunah a pathlawi tawh lehnghal ania, a intatlut thiam thiam leh a zei zei a ni tawh mai, U Famkima te zawng nula han chhai hmasa chi a ni miahlo a nia aw bia la i inchhir lo zawk ang" a rawn tih leh chuan reilo te chhung chu ka rilru a buai ve hman a mahse, ka ṭhulh leh nghal thuai.





Zirtawp zanah Umawipuii bialpa Usangzuala a lo lenga, ka nu leh pa te an mut tawh avangin keipawn mutsan tumin room lamah ka luhsan a, ka muhil dawn siar siar tih ah Umawipuii chu ka bulah lo muin min lo kuah nghal sawt sawt a "Mimite pasal ka neihsan dawn che" tiin a nui var var a.




"Nei daih rawh, keima pualin dawr saw ka nei anga ka hausa thur thur anga a nuam khawp ang" ka lo ti hlak a, zep loah chuan ka laizawnnu pasal neih chak lutuk hi ka lungawilo ṭhin, ka ngai ṭhin si a ka khua a lo har lawk em em zel, ani lah hian min ngai ve ngai hauhlo ni mai awm hian "Pasal ka neihsan dawn che" a ti thla zen zel mai a. Mahse, kum sawmthum a hnaih ve ruak tawh a neih hun tak a ni ve tawh bawk si.




"Palai a lo tir dawn a, ka nu leh pa ten an lo remti dawn chiang bawk sia, inbuatsaih ruk nghal a ngai ang" tiin a titi siam siam a "Dawr pawisa lo hmang ru miah suh" ka ti leh hram a, chu lam erawh a enghelh ve vaklo "Engtik thla hi nge inneih nan ṭha ang aw, September emaw November vel hi ni sela a ṭha angem?" a ti leh a, ka chhang buai peih tawhlo.




Ukimkimi nen kan inbe zeuh zeuh a dawrah pawh a lo leng ve ta fo mai, kan awmdun tawh hi chuan Prof.Famkima chanchin ngawt kan sawi ṭhin a, Umawipuii thung chuan a ning ru riau tawh, be tur hian min ti ve ziah bawk si a Umawipuii chuan "Kawm tamlo teh, Kimkimi chu mi pa nupui neilai biak zuk zuk te a ching a nia, in lo inkai ve reu reu a nge" a ti kha kha zel a, ka va be buai hranlo bawk a ka nui liam mai zel thung.




Nikhat chu an rawn lang leh ta hlawl mai, a nu leh a fapa leh tlangval la naupang deuh pakhat nen dawhkan palina ah an ṭhu a, hmuh a nuam kher mai, a cher ve deuhin ka hria mahse, a la hmelṭha em em reng tho, hnathawk nula ho pawn an en duh viau a, an piah dawhkan pathumna a ṭhu nula ho pawn an melh hrek hrek tih ka va hmu thei, a phone a khawih rualin a online em tih ka lo en ve vat a, a online chiang bawk, tunge a biak ang aw?




Umawipuiin order ka va lak a phallo a, keipawn ka duh vaklo ka zak deuh titih tlat, engmah lah chu an hre ve der silo a, order kan lak hun nghaka a lo hawi chu counter aṭanga kan lo thlir deuh ṭhap min hmuh chuan a laih hmel ngang mai. A hrethiam a nih ka ring a keipawh chu ka lo lai ve em em ringawt mai a ni.




Ka laizawnnu lah chuan min tirh bo na ringawt a ngaihtuah a, enge maw a rilru ah awm le? Choka aṭanga ka chhuah leh laichuan an thil eizo chu eiman pe turin an lo phei ve mek a, hmanhmawh deuhin counter ah chuan ka lo ṭhu a, a wallet phawrh lai chu ka lo nghak ran a, a hmel ka lo en reng laia a rawn hawi chu kan mit a intawng leh ta siah mai.




Ka lo nuih ringawt a, ani pawh a nui ve tho. "I eitui em?" ka lo ti pek a, ka ṭawngsual chu ka hre leh hnuhnawh a ka zak ram ram, 'in eitui em?' ti tur zawk ka ni a sin, a va pawi....




"Insiam tui khawp mai" tiin polite takin min chhang a, zah zelah "Ka pi nang i eitui em?" tiin a nu chu ka zawt leh ta ringawt. Mipa naupang a buaipui vangin pitar chuan min en lo a "Kan puar khawp mai, in thilsiam a tui bawk" a lo ti ve a, ka zah zualpui chu tlemin a zia. An kalchhuah hnu chuan thawk ka la hawk a, Prof bulah zawng thawk a chham thei mai dawn a lawm mawle!




Ka mumangah lah hian ka la hmu fo mai a; ani zet zawng ka vei tawp thei dawn lo niin a lang, mipa dang min be tute lakah hian rilru ka pe hleithei der bawk silo. Hetiang taka mipa vei hi ka la nei ngailo a, ka ralkhat hmelhriat min hre ve hauhlo tu lakah hian engtin nge heti taka ka han luanliam theih zawk mai ni! Kan inhmuh ṭum khan eng angin nge minlo hmuh ve ang aw tih te nen lam ka ngaihtuah ṭhin, hmelṭha a tih zawng te han ni ve tal i la titen duhthu ka sam fo a, suangtuahna mai mai chauh chu a chauhthubarawh ṭhin ngei mai.




A chanchin ka hriat leh ah chuan a nupui hlui te khan bungrua an la fel ta a ni awm e, a hmeichhe lam chuan Prof chu indan a duh a nihloh chuan tiin an nawr a mahse, Prof chuan a lo hnar ni ngei tur a ni, a nu leh a nupui inkara duhthlan a ngai chu ka lo khawngaih hle a ka mumang ram thlengin ka lo hmuh zawm a, mumang ah pawh ka lo hnem ve nasa mai. Ngaihtuah let pawn nuihzatthlak zawk tak a ni, midang bula sawi chhuah chi pawh va ni suh.





Inrinni ṭum khat, an nufa ho a anlo kal hnu rei vaklo ah a ṭhianpa nen dawrah an lo kal a, chumi ṭum chuan ka lo awm lo a mahse, Umawipuiin a lo haw hnuah min hrilh a "Damlo a ang lutuk, a lang upa sawt bawk si" a ti a, ka lo rilru hahpui ve em em ringawt a, thildang ka ngaihtuah thei meuhlo.



Chawlhni ah Ukimkimin min lo text a "Mimite, vawin hi i forever crush birthday a nia, va wish ve hnap rawh, huat theih miahlo lai chance a nih hi" a lo ti a, a piancham a ni tih ka hria chu engtin emaw hian ka awm a, helhkham nei run hian ka awm a, ka rilru a insual buai hle ringawt.




Khumah ṭhuin ka phone chu ka hum rauh rauh a, ka wish ve ang nge ve lo ang tih ah chuan ka la inkhap buai hle, dar 9 a ri tawh a, a piancham a pel har tawh dawnlo, va wish ve ngei ka duh si a, ka zak bawk si, a tawp a tawpah chuan ka huaisenna zawng zawng sawm khawmin "Happy birthday" tih ka va thawn ta, mitchhing chungin a nia send button pawh ka hmeh ni.





A hmulo 'engtikah nge a hmuh ang aw' tih mawlh ka ngaihtuah leh ta. Dar kua, dar sawm, a la hmu chuanglo. Awi aw, keihi ka tifuh dawnlo in ka hria.




Dar sawmpakhat a ri ta; Tick pakhat chiah a la awm. Ka muhil thei silo a ka nghak chhuak dawnin ka inhre chuang bawk silo. Khumah chuan ka tal sek a, ka inlet tawn chhen mai bawk. A pawilo, ngaiawh a ni mai a lawm ka rilru chuan a ti ve taknain min mawlh reng mai bawk si.




Ka phone chu lukham bulah dahin ka khum lu lam banga thlalak intar chu ka melh reng a, ka thin phu dup dup ri chu ka hre thei, a ring ṭha hle mai, ka thisen te hi a rawn so ta mai em mawni le, ka taksa chu a lum pup pup a, ka ṭah a chhuak ringawt lehnghal.




Hei chu a ṭhalo hle mai, vawikhat mah ka text tawh tur a ni lo, keimah ka inti khawngaihthlak mai mai dawn tih kha ka inhre sa reng sia, tinge Ukimkimi thil sawi vanga ka lo phul ve hlut ni, ka ti leh tawh miahlo ang.




Mu turin ka insiam a, ka ṭawngṭai melh melh laichuan ka message tone a rawn ri ta ṭat mai a, ka phu dut lehnghal! Ka thinphu a rang nghal zaih zaih a mahse, ka ṭawngṭai laklawh si, thawk ka la hak a ka thil chham lai ka theihnghilh daih bawk.




Ka chil ka lem dak a, naa...nakinah ka ṭawngṭai ṭha leh mai dawn emaw ni le, 'Mimite Pathian hrem i duh loh chuan ṭawngṭai leh vat rawh' tiin keimah chu ka inhrilh a, a bula ṭangin hmanhmawh hlau tak si thinphu rang dat dat chungchuan ka ṭawngṭai ṭha leh a, ka ṭawngṭai zo ka meng chiah chu ka taksa pumpui hi a hit mum mum maiin ka hria.




Rang lutukin lukham chunga ka phone chu ka ban a, Message min thawntu hming ka hmu chu ka au chhuak ṭhawt mai, ka chhungte an mu tawh tih ka hre leh hnuhnawh sia Bathroom ah ka tlan lut nghal hlawk hlawk a, engvanga Bathroom a tlanlut ringawt nge ka nih pawh ka inhrelo.




"Ka lawm e" tih te zawng a ni, a message en chuan ka nui var var a, tun dinhmunah hian khawvela thumal pathum mawi ka tih ber a ni hial ang, tu te emaw 'I love you' tih thumal aipawn ka tan chuan a mawi daih zawk.




Reply tur nge hetia duhtawk mai tur hi ni ta ang le? Awi aw...heti hian a tâwp tawp mai a, Reply chu ka duh a mahse, engtin nge ka va reply ang, Umawipuii ka zawt ngam bawk silo.




'I van meng rei?' Âa....a ni theilo 'I hmang nuam em?' Â...zahthlak e a, 'I kum engzah nange?' Awi....a chiloh hulhual....huiha.




"You're welcome" ṭhen ṭha chungin Send button chu ka hmet a, Minutes 4 liamta chauh a last seen a la nih vangin ala cham rih tur ah ka ngai.




Bathroom chhuatah chuan kelawngin ka ding khawng renga, ka Message chu a rawn Double tick ta chiah mai, thinphu dep depin ka phone chu ka en ran tawh a, second tin chu ka rilru in a chhiar bawk.



A pawlta....typing a rawn inti zui bawk, Bathroom chhuat vawt zetah chuan ka ke chu ka per at at reng, a type rei phian mai a, keilah chu ka ha hmai a lang ṭha reng a, ka kutzungṭang pawn mission pawimawh tawpkhawk tih a hria a niang, Message lo thlen ruala hawn inpeih atin a lo inring ran tawh.




Message lo thleng chiah chu ka hawng rang teh e, hei baka rang chuan tuman an hawng bik lo tawp ang, a message chu "Ka van hre mai lo che ve?" tih a ni.



A nuam eeee.......



Mahse, engtin nge ni leh ta ang?



'Mimi. Saitluangpuii ka nia' va ti ringawt ta ila min lo zawt chiang si se la engtin nge ka chhan zui ang, ka va inpuang ringawt dawn a sin, ka insawi theilo ang.



A buaithlak eeeee....



Mipa ṭhenkhat ka lo biak tawh ṭhin te ang a uang mai mai a va chhan chi ni bawk silo, ka va insawi awk dawn tih a chiang bawk si, biak zawm chak biak dan tur awm silo; a van hrehawm ngar ngar tak.




Ka chhang ta lo, ka rilru chuan a chhang mawlh mawlh 'Keimah Mimi-i ka nia, ngaisang em em tu che' tiin, hre pha se engtin tak min chhang ang maw.




Mut hmunah kan inbiakna tawi te chu ka chhiar nawn tluk tluk a, ka message zawh khan reilo te a online a tunah chuan a last seen leh ka tana a message type tlem te chauh hmuh tur a awm tawh. Prof. Famkiman ka tan message a han type ve ngei a nia, a va nuam tak!




(End of CHAPTER - 2)

* He thawnthu hi 'Phuahchawp rawk rawk rawk thawnthu' ti a whatsapp group ah ka ziah mai mai kha a nia, post chhuah tum deuh a ziak ka nilo a, part hmasa lam phei kha chu a kal vut deuh vut vutin ka ring, ka ṭhianten a chhiar tlak e an tih ve tak si ah chuan tihian ka rawn dah chhuak a, in ṭhian te ka story chhiar ve ṭhin, he story chhiar tur duhsak te inneih chuan inlo kawhhmuh ve zel dawn nia, chuan ka ban tha a ka ti fuhlo deuh a tun ṭum chu a tawi ta deuh a ni e.)

Link:
BBcode:
HTML:
Hide post links
Show post links

Ahmangaihi violette
Posts: 148
Joined: February 1st, 2020, 3:14 pm

Unread post by Ahmangaihi violette » September 7th, 2021, 10:09 am

ZUNZAM - by Ahmangaihi violette khiangte


CHAPTER - 3



Thawhṭan ni tlaiah Ukimkimi dawrah alo leng a, choka lamah ka ko lut thuai a, Prof piancham ka wish thu ka hrilh chuan kan phul nghal hlut a, kan ri teng tung mai.


"A lo reply che em?"

"Ka lawm e a tia" kan au nghal chul, "Awi, nuam i ti e, chuan engtin zel nge?" a ti zui zat a.


"Engtin vak mah a tih theih loh, tunge ka nih min zawta ka sawi ngam silo a, ka chhang tawhlo tawp" ka tih chuan a chek hlak a, "I va han zeilo tak" min lo ti hlak a, zei chu ka inti biklo nain mahse kha thilah kher kha chuan zei chiam ngaihna a vang ve em bawk a ni, inhriattir kha ka duh miau lo a lawm mawle.



"In hriattir ka duhlo a lawm" ka ti mai a. "Zak duh mahta che nula be hmasa tu a ngah dawn lutuk ka tih kha, be hmiah hmiah rawh, bul va ṭan hmasa chi a nilo ka tih kha, tun laiah te chuan hmeichhia in bul an ṭan hmasa fo a lawm" a ti zui barh barh a, nileng chuan ka ngaihtuah ve ngial nain ka thisenin a ngam nganglo a ni e.



Umawipuii pawn inleng a nei ta a, ka nu leh pa te chuan "Chhungkua kan lo inrawn khawm ve hmasa phawt ange" an lo ti ve a, an rem dawn tih erawh a chiang khat viau, Umawipuii pawh a phur tawh khawp maia, a chhawm tur list pawh a ziak thla dul tawh, keilahin "Dawr pawisa hmang miah suh" tiin ka lo chah ve mawlh mawlh bawk.



Nikhat chu choka ah kan chef nen Mushroom soup siamdan kan inzirtir a, ka phone la tura counter lama ka va chhuak chu ka tum loh deuhin Prof. Famkima te pafa ka va hmu nawlh a, Suit dum dak zaih mai hi a ha a alang smart zual kher mai, a fapa naupang te pawh chu a chawlhni kawr niawma mawiin a inthuam a khawilai function ah emaw an kal a nih mai hmel, an hmuhnawm pafa ngei mai.




An pafa te chauh an ni bawk si a, engtin emaw zawng tak hian rilru an dek riau a, ka en ngawih ngawih mai a, ka va hmuh phat aṭangin khawdang hi ka hawi sawn hleithei meuhlo. A fapa chu eitur a barh mawlh mawlh a, a ṭawng ri bul bul te chu hriat phak tumin ka beng ka lo dawh ve ṭhin a, mahni in ka lo khi leh suk suk ṭhin, Umawipuii lo lutin min tirh a tum ringawt chu ka melh rum kher mai, Prof te pafa a va hmuh ve takah chuan min ner khum nang nang a "Nang hi i leng rei dawn khawp mai" a ti zauh a, ka chhang zuilo.



An thil eizawh chuan counter lam an lo pan a, ka ve text zurh zurh tawh vang nge ni ka zak ta tlat pek a, hmanhmawh deuhin ka bula Magazine phek chuan ka in hliah thak a, Umawipuii chuan min melh no lo leh viau tawh.




"Engzah tur nge?" Umawipuii chuan an ei man zat a hrilh a, 'In puar em?' mawi hawihah te pawh han tih ve awm ka lo ti rilru a, naupang te pawh chu han chhaih ve tal tur a nia, ka ngei dawn lek lek a lawm mawle, inla nelawm loh reuh lutuk.



Magazine a inhliah chung chuan ka mitsirin ka melh ve ngar ngar a, a perfume rim nam chem chem te chuan min fan chiai chiai maiin ka hria, Prof perfum rim chu a rimtui a sin aw, eng perfume nge niang le, hre ngat ila chuan ka lei ve khawp ang, Citrus rim te a nam deuh a, pawm chilhin han hnim veng veng mai ila aa....a van nuam dawn tak.




"Saitluangpui, pathlawia te dawhkan saw va hru rawh" a rawn ti chang fak mai, ka ṭhu ngil nghal hluai a, Prof te chu an lo chhuak fel der tawh.




Nui pat pat chungin pawnchhia nen dawhkan lam chu ka pan a, ka hrukfai mawlh mawlh laichuan dawhkan hnuai chhuata Spiderman lem lo tla bal te chu ka hmu a, ka chhar nghal thuai a, umm....hei chu Prof fapa ta a ni chiang mai!



"Au Mawi, hei Prof fapa ta a nih hi" ka tih chuan a lo thlek vat a, "Trophy angin i dahṭha leh dawn ami?" a lo ti haw a, a ngeiawm thei reuh a nia, "Ka pe let dawn mawle" ka lo tih chuan a ner leh nak. "Va insawi lut law law la, i awm nghal law law mai anga" a ti leh hram a, ka chhang zui peihlo, ka chhan zel chuan a thinchhe bawk si, kan inti taurau leh ringawt ang.




Spiderman chu ka bag ah ka khungṭha tharh a, ka kawl tawh dawnlo reng reng mipa naupang spiderman lo kawl te chu ka tlawmla ve tawh em em bawk a lawm le, ka pe let anga amah hmelhriatna chance anih theih phei chuan a ṭha zawk viau maithei a sin.




Ukimkimi ka text a Prof te in awmna ka zawt a, a lo sawi ve mai a, kal dawnah tak tak chuan ka ngam leh lo ka ṭhulh leh ta zawk a, rilru erawhin pek let a duh viau a, dawrah an lo kal hunah ka pe tawh mai aniang chu, an lo kal leh harlo turah ka ngai.



Chawlhni ah Ukimkimi nuin Umawipuii chu "Lo leng phei la, i man eia ka leisak tur che sawi dun teh ang" a lo ti a, Ukimkimi nu hi kan chhung hnai tak ani ve a, ka nu leh pa te nen pawh an inti ṭha viau a, Umawii leh a fanu naupan tet aṭanga inkawm chawt an ni bawk a, Umawii hi chu duat ve tak a ni, kei erawh min chuti ve tehchiamlo, Umawii angin ka va pawh ve vaklo hrim hrim bawk a.




Kan va lenphei chuan eitur tui hnai deuh deuh an lo siam ṭeuh a, Ukimkimi chuan Balcony ah min ko chhuakin Prof.Famkima te in chu min kawhhmuh a, an in chu chhawng thum a ni a, a Building pawh a nawm hmel viau, kawngpui an ah a ni a, a hnuai chu dawr leh office a ni a, a chhung berah an cheng a, an kawt zawlah ah chuan foreign lam pangpar niawm hi a vul chik chek bawk a, ral aṭang pawn nawm hmel tak a ni.



Spiderman lem ka bag a ka ah chu ka hrechhuak rauh rauh a, engtikah tak dawrah lo kal leh ang maw, pek hlan mawlh ka nghakhlel tawh.



Chawei nghal turin min sawm a Umawii chuan awlsam deuh hian a lo aw mai a, keichuan hreh tak tein ka hreh, ka tlangnel ve vak silo a, chuloah sa ka ei duh ve bawk silo, miin a chaweia koh kal harsa chi ka ni bawk. "Ka damdawi ei a ngai" tiin chhuanlam ka siam a, haw san daih ka rilruk a, Umawipuii min chelh tlat bik lemlo bawk nen "I duh leh haw mai la, Sangzuala ka inlam tir mai ang" a tih chuan ka hniallo nasa.




Tlai dar thum vel dawnah ka haw san a, kawnga ka kal lai chuan Prof te in chu ka thlek chho dauh dauh a, step chhohna bul dawr bathlar ah chuan ka ding renrawn a, eng ka ti phei chu a nilo, chutih laichuan ka nuin min lo phone a "In lo haw dawn tawh em, i nutei te an lo leng a" a lo ti var a, ka haw mek thu ka hrilh ve zat bawk.




Kal mai ka tum laichuan Gate inhawng ri rak thawm ka hria a, ka lehhawi chiah chu Prof nen chuan kan inhmachhawn ta ran mai, hamhaih deuhin kan en haw a, Gate chu hawng zau deuhin "Lo kal rawh" tih leh min hnungchhawn a rual a, a kal zui chu ka hau chungin ka en reng ringawt!




A rawn lehhawi leh a "Gate kha lo khar ṭha leh mai rawh aw, ui a chhuak ṭhin a" tih pahin a kal leh mai a, engin nge maw min mawlh tehreng ni, ka lut ve ta thawr mai. Gate ka khar leh lai te chuan ka rilru a buai nuai a, ka lawm deuh bawk sia, ka zam ru riau lehnghal.




Ka kut te chu a khur deuh titih a chuti chung chuan Step ah chuan ka pen chho ve zel tho, inchung zawl ka thlen chuan pangpar rim anam veng veng a, an in lah chu a mawi em em lehnghal a, ral a en mai aipawhin a mawiin a nuam zawk.




Kawngka ah lo lang lehin min lo en vung vung a, ka luh hun a nghak tih ka hailo, zam ru deuh chung chuan ka pan phei a, an inchhung pawh a nalh thlawt mai, Sitting room aṭanga lo kalin "I lo kal dawn lo emaw kan lo ti hman a, kan lo mangang hman lutuk a lawm" a ti ti zawi deuh sup a, a bangbo hle ringawt.



"Engtin nge an koh che?"


"Mimi-i"


"Vawin tlai pawh ka chhuah a ngai dawn a, a chaw ka siam sak tawh a, lo tih luma lo pek tawp a ni mai, ka haw harlo ang, chhuarah sawn calcium a awm a, i lo eitir bawk dawn nia" chhuarlam panin damdawi bur hi min hmuh zauh a, kei ka ding ngawiran thung.




Professor hian min hai a nih hmel, tu emaw nau awmtu an lo beisei mek a nih dawn hi, a va tihchi loh mai mai tak, keilah pek chuan zawt hmasa ve eihloin ka zui chho ve thawr ringawt a, han sawi leh hnuhnawh pawh chu a zahthlak tawh a lawm mawle.




Mahse le, awmloh na tura awm ta na chuan ka sawifiah mai loh chuan tiin inthlahrung deuh chuan ka en a "Zanriah einghal ta mai che, chawhmeh siamsa a awm a, rice cooker ah sawn chaw i lo inchhum mai anga, Christophera thawh hma a ka kalchhuah nghal mai loh chuan" a ti leh charh charh a, a ṭawnglai zawng pawh chuan min en manglo a, a hmanhmawh nge ni a a awmdan chu a phili riau maiin ka hria.




"Ih ..englo a nia.." ka tih laimek chuan a phone a lo ri a, "Lawk aw" ti a phone chhan pah chuan sitting room lam a pan a. A ṭawngri chu ka ngaithla reng a, a Call volume a dah ring ṭha bawk a lehlama mi ṭawng lang lang pawh chu ka hre pha, hriat chian lehzual tum chuan sitting room lamah chuan ka tawlh hnai hrut hrut a, ka insawifiah dan tur ka ngaihtuah nasa mai bawk.



Lo phone tu chu a nu a niin ka hria "Lo kal tur kha a thei leh dawnlo ni khan a insawi a, ka theih thut chuan ka lo sawi ang a tia, midang i lo zawng mai dawn a mawni le, a rinbur chi dawnloh tlat" a lo ti lang lang a, ka lo zak ru chem chem mai, a lo phei leh hma a tlanchhuah nal nal tur em mawni dawn ni.



"Hei, a lo thleng chiah a lawm, keipawh ka la chhuak lo deuh" Prof chuan a ti a.



"E, chutia law a tihzia hlauh chu, ka ngaihtuah lutuk che u a lawm, enge Christ-a chu a an a a khua te a la sik em?" lehlam a mi chuan a ti leh a.



"Nimin aṭang khan a sik tawhlo hei, kan ngaihtuah awmloh e, nangmah kha ka ngaihtuah zawk viau che a nia, in zai hma a i BP tih normal vat angai anih kha" Prof chuan ti lehin damdawi lam chungchang an sawi zui luam a. Ka chungchangah let lehin lehlama mi chuan "A awm chilh nghal thei dawn che u em?" tiin a lo zawt a.



"Ka hrelo, ka la zawt chiahlo a, a thei mai turah ka ngai a, a remchan dan a zir te pawn zanlam chu hmanlo mahse ka ti thei mai ang, chhunlam ber hi a nia" Prof in a tih leh bul bul lai chuan ka ngaihtuahna a lo buai ve hle ringawt.




"Lo thei hlauh se kan va ti ve, hlawh te pawh sang deuh hlek khan tihsak mai la, a mangan thlak rih a nih hi" lehlam aṭang chuan a rawn ti leh a, Prof in "Ni e, ka lo ti dawn nia, ka haw hunah ka lo be leh ang che" tiin an inbiakna chu a ti tawp zui a, keipawh a hma a ka dinna ah ka let leh nghal thuai bawk.




Sitting room aṭanga a lo chhuak leh chuan min rawn en vung vung a "Riakin nge langin i lo kal theih ang?" a rawn ti deuh sup a, a inthlahrun hmel khawp lehnghal a.



"A....ka pu" ka tih laimekin "I riah theihloh pawn lang tal chuan nitin lo tum ta che, i hlawh pawh kan ti sang dawn nia, ka nu an zai chhung tal chu min puih mai a ngai a ni" a ti leh zat a, ka awm a nuam lo lehzual, chuti taka puih mamawh an mi beisei lo kal thei lo ni a lang bawk si chu hriatsual palh ti a lo sawi pawh ka hreh ru riau tawh.




"Engti tur berin nge min mamawh a?" ban charh a ka tih chuan "Ka fapa lo awmpui a ni mai, chhun lam hna ah ka kal angai a, in tihfai tih angreng hi chu i peih chen chen i lo ti a nga, tlai dar thum bawrah kei ka lo thleng hman zel turah ka ngai a, hna hahthlak a awm lo ang" a lo ti zung zung a.



A thilsawi laichuan inthlahrung hmel a pu reng a, puih min ti chak zo vek lehnghal. Engtin nge ka tih ang aw, ka rilru a buai ru takzet.



"I fapa chu a damlo a mi a?" a ngawih tak vung vang chuan ka zawt phawng a. "Tunkar liamta khan a hritlang a, a ṭha tawh" ka lo en ran vang chuan a mit a la sawn thuai a, "Kum thum a nia" a ti leh sup a, a lai deuh ṭutin ka hria, rei deuh min en duh miahlo.




"Umm, lang chuan ka theih ka ring a mahse, zinglam hi ka hma thei vak dawn lo a, tlailam chu ka hman rei thei thung anga" ka tih chuan a bu nghat nghat a.



"Zinglam chu dar engzat velah nge i lo thlen theih ang?"



"Dar kaw hma chuan ka theih ka ring" ka tih chuan "A ṭhat chu" a ti leh mai a, sitting room lamah inherin a lut zui a, keilah chu lai deuhin ka ding reng a, engtia han awmzui tur nge pawh ka hrelo, ka chhungte lah ka rawn der silo a.


A lo lang leh vat a, Smart deuh a rawn inthuamin a necktie a rawn suih phei mawlh mawlh a, amah a palianin a lang zahawm khup mai a, a pian inkhaithli zaih nena inchhung dunga a vei thauh thauh te chu a hmuhnawm hranpa riau a, ka en zui dauh dauh reng.



"A lo thawh hunah min lo phone dawn nia, ka phone number hi la la" a rawn tih chuan ka lo phu deuh uih a, a nin min lo en ran a, ka sen ṭan ṭanin ka ring, a phone number lah chu ka phone-ah ka save sa ran bawk si.



A number a rawn sawi a, save ang deuh chuan ka han awmder vel ta chu a nia, ka phone ka dahthlak rual chuan enge maw sawitum hian a ang deuh zuau a, "Ka save tawh e" nuihsak paha ka tih chuan "Engtin nge i save a?"a lo ti khauh mai.


Awileh..!



"UFamkim min ti dawn nia, i duh leh christ a room ah i lo awm dawn nia" tiin fridge lam a pan a, tui a va inkhawlh khawlh a, rei awm tawhloin a chhuak zui thuai a, a kal ta chu ka thaw huai huai mai in ka hria. Nuamtih na riau ka nei a, chuti chung chuan ka rilru a hah em em lawi bawk si.



Ka nu ka bia a "Ka ṭhiante inah chaw ka eidawn" ka va ti thawr a, tu ka ṭhiante nge min zawh chuan "Rinsangi" ka ti ve leh ngawt bawk a, Rinsangi tih hmingpu ṭhian pawh ka nei chuanglo, ka nu bulah erawh shillong ka kalpui tiin ka sawi a, a lo awih ve mai bawk.




Prof Fapa room a ka va luh chuan a lo la muhil tui khawp mai, a thaw ri sak sak a a lo thlan hliam mai bawk a, a pa a chhun fuh bawk nen a hmelṭha em em lehnghal a, puan te sin ṭhat ṭirin a muhil lai en chuan ka nui ka nui a, Umawiin min han hmu sela chuan "I chhul a ṭhalo a mi?" min ti leh duh ngei ngei ang chu.




A....Umawipuii hi engtin nge ka tih tak ang? Ka rilru ah a rawn lang zawk a, heta nitin kal ka duh chuan Umawipuii ka hrilh ngei a ngai dawn, ka nu leh pa te chu ka bum thei mai dawn a, Umawipuii ber hi buaina rallian tur chu a ni.




Nitin dawrah tlai thim thlengin kan awm ṭhin a, Umawii nen inremna kan nei thei anih ngat chuan harsatna awmlo turah ka ngai, a phal ngut a nge maw, a inla fekfawn der leh chiam lo turah ka ngai.




Choka lamah ka phei leh a, tihtur ber pawh ka hrelo, chaw lo inchhum rawh te kha a tia, a chhuahna ah chaw a einghal dawn anih hmel, a lo haw har deuh a nih pawhin chaw inchhum chawp lehnghal tur phei chu tih buailoh law law ka duh zawk, an mi beisei tak ka nilo tih ka inhre ve kar bawk sia midang awm loh lai pawh chuan ka ṭi dak reng mai a ni.



Hmun te ka hawlfai vel thul a, ngaihtuahna lah chu a vakkual nasa ngang mai bawk, pawn pangpar te chu thla ka la kual mai mai a, chutih laimek chuan mipa naupang inchhung lam aṭanga lo pen chhuak mek chu ka va hmu a, hmelhriatloh min hmu thut chu a ṭi deuhin ka hria, a hawi kual hrak hrak a, a pa a zawng a niang, a hmu ta mai silo chu a men deuh par a.



"Christ, apa chu sawtah a kal lawk a, a lo haw ṭep a " ka tih chuan ṭah tum inpetsawi nang chung chuan min en chho ha a, "Apa khawiah nge a kal?" aw tham ṭiak hian a ti a.



"Ih...dawrah a kal a, i eitur a lei a" ka ti ta ngawt a, pawm mai tuma ka kun chu amah zawk chuan min lo ban hmasa a, ka pawm rualin ka taksa ah a rawn bei thlam a, a mu tho hlawt a ni bawk a, a zawi ngial mai a, a duhawm kher mai.



Kawtah chuan ka awi hliau hliau a, Umawipuiin min han hmu sela engtin tak min ti ang maw, a mak a tih viau loh chuan zaktheilo chu minti ve khawp ang mawle. Vannei ka intih zia hre ve leh dawn heklo.



Inchhunga kan luh veleh Prof chu ka call a, a Ring laite chuan ka thinphu hi a rang det det mai a ni. "Hello" thum deuh a a lo tih chuan langlo lamah ka lo khi ṭhaw ringawt, "Hello" a rawn ti nawn leh a "Aw, hei...a lo tho tawh a" ka va ti bah deuh nuai a, "E, chaw kha lo pe la" a lo ti var a, chuzawng chu a ni kan inbiakna chu a ni.



Christa chu chaw ka siam sak a, a eiṭha duh viau mai a, nau enkawl nuam tak tur chi a ni, min ti phur zual hle bawk, ṭahbelh deuh pawh nise ka phur surh surh tho chuan ka ring a, mi a han ngaina hma lehzel chu ka vanneihna a kaltluang ka ti mai.




Apa awmna min zawt leh ṭhin a, a kal dawn khan Prof khan a kalna tur a sawi miahlo a, a inchei smart thlup ringawt a, khawiah nge maw a kal dawn ni, ani hi nula te hi alo rim dawn a ni lek ang a!




Eee....Nula nen chaw an eidun te hi alo ni mai angah, keiin a fapa ka lo awih dur dur lai hian a lo fawr ziai ziai anih na chuan ka chan chuan maian chan a tluk vel lek mai dawn a sin!



Ngaihṭhalo leh awmnuam zanlo chuan ka awm ve ta reng a, Christ-a chu ka phone ka en tir a, kei erawh rilru ka kawm melh melh renga, a khat tawkin pawnlam ka hawi leh ṭhin, khua a thim tawh a, haw ka hmanhmawh pawh ni silo chuan helhkham nei runin ka awm a, nupuiin a pasal leng haw hun a nghak te pawh ka in chan deuh reuh.




Dar 7 velah chuan a lo haw ve ta hram a, kawngka a a lo lut chu a fapa chuan a lo ban nghal chung a, fapa inngai ve tak chu an nih hmel e, "Zanriah i ei tawh em?" a ti nghalthuai a, chhangta mai lo chuan chik deuhin ka lo en a, ka lu ka thing ringawt bawk.




"Ril a va ṭam duh awm ve, ei nghal la" a tih leh chuan "Ngawirawh chaw chu eilo ang" tiin ka ding hluai a, an pafa inbe mawlh mawlh chu enin ka nui var var a, "Khawi vengah nge in awm?" a rawn tih chuan ka nui tawp chiang hle, min lo en reng tawh.




Ka veng chu ka sawi a, "Kan thlah dawn che nia" a tih chuan ka hnial ve thung, "I haw ngam ang maw?" a lo ti leh a. "Ngam e, tiang hunah te chuan ka haw fo a lawm" ka ti leh mai a, min hnial zui tawhlo.




In ka thlen veleh ah Umawipuii ka hrilh a, a puihna ka dil chamchi bawk a, mi chhan pawh tum lo hian rapthlak min tih hmel zetin min melh a "A pawimawh tawpkhawk a nia, min pui hram teh" ka tih te chuan a chek hlak duh chauh a ni. A rilru ka hmin thei anih loh chuan ka tan Prof te ina va kal theihna tur kawngdang ka neilo, engkim chu Umawipuii kutah a innghat tawp tawh.




A kalna a piangah ka zui kual a, min zilhna pawh ngawirengin ka ngaithla chhuak vek a, tih lungawiloh mai mai ngam chi pawh a nilo. "Va ngaihzawn a va kherh ka tum lo a, nauawmtu an mamawh em em a an mangan laia puih ka duh mai a ni" ka tih pawh chuan a hmui a pet sawi duh lek a, engtia tih zui tur nge pawh ka hre tawhlo.





(End of CHAPTER - 3)

Link:
BBcode:
HTML:
Hide post links
Show post links

Ahmangaihi violette
Posts: 148
Joined: February 1st, 2020, 3:14 pm

Unread post by Ahmangaihi violette » September 7th, 2021, 10:14 am

ZUNZAM - by Ahmangaihi violette khiangte

Part - 4




Thawhṭan tukah chuan ka tho hma hle a, Umawipuii rawn thawh ve chuan kalchhuak turin ka lo inpeih diam tawh, zinglamah hi chuan dawrah eng engmaw in kan inhnawh puar mai ṭhin.



Dawr kan thlen chuan nidanga ka tih ṭhin dan anglo taka ka Bag ka ak ta reng chu min rawn enin "Nangte hi va kal ṭalh te kha i tum ange, zahthlak lutuk" a ti kha kha a, "Ka kal loh ten hna a kal thei nang" ka tih chuan min melh rum kher mai.



"I mawl a mi, an nau awm tu tur lo kal leh si sela engtia tih nge i tum a?" a lo ti vin hlur a, chulam chu ka lo ngaihtuah miahlo mahse, tunah chuan nau awmtu an neilo a, anu a damlo bawk a, an buai em em tih chauh chu ka rilru ah a lian ber rih. Ṭanpui thei dinhmuna ka din laia lo ngaihthah hmiah te chu ka thei nang, min sawm laia a hmel lungngaih hmel lutuk te kha ka mitthla ah a cham reng bawk si a, chhungril ah hian min mawlh ve reng a, chuvang chuan kallo thei ka nilo, kal lo ta pawh ni ila helai ah hian awm nuamlo reng rengin ka awm dawn tlat.



"Aumawi, ka kal mai ang, dawrah te chuan min mamawh ve vak chuang lo a" ka ti ta ṭalh a, "A va mak ngawng ngawng e aw, enge a lakah inbeisei a!" a ti teh thlawt a, "Beisei neih lampang pawh a nilo" ka ti ve tak nain beisei chu ka nei ngei tih ka inhai hauhlo, ka puihna avanga a lawmtur te, a rilru hahna kiang huai tur te, chutiang lo deuh te pawh ka beisei.



"A reng rengah engtin nge a hai theih che a, heta an lo kal pawn a hmu tawh che a, i ngaizawng tih a hre zawk a nilo maw?" a rawn ti leh a, nia...chu chu keipawn mak ka ti deuh a. Mahse, a mi en danah khan min hria ang pawhin a lang chuang silo a, min hai let der ni zawkin ka hria.



"Chutiang mai mai" ner nang nanga ka tih lai chuan "Kal kal a ngailo" a ti leh hluk a, hahthlak ti zetin thawk ka leh ringawt a, tih ngaihna tak pawh ka hre tawhlo.



"Hlawh ṭha deuh min pe dawn a" inthlahrung deuh a ka tih leh chuan a phone en lai dahin min rawn melh kur a, engmah phei chu a sawilo. "I duh chuan ka hlawh chu i pasal neih huna hmanah ka pe vek ang che, keichuan puih chiah ka duh a" ka ti leh ta a, tlem chuan a hmin ve ta deuh aniang, a thle bar bar a, "Eng zah nge i hlawh dawn a?" a ti deuh hmuk a.



"Ka la hre chiahlo mahse, a ṭha thawkhat ang chu a tia, a chhan chu nau awmtu tur an mamawhna a sang em a" beisei nei deuh a ka tih leh lai chuan "Engtia rei nge i thawh ngai dawn a?" a ti leh a.




"Thla hnih thum vel bak chu a rei berah pawh a ngaih ka ringlo, an buaizual lai té a ni mai, rei deuh te chu ka hman bik hleinem" pawr ang reng deuh hian ka lo ti a, a ngaihtuah vung vung hnuah "Ka hmang hman awm chuanglo emai a" a lo ti leh khauh a, a va buaithlak thei.



"Inneih te chu Ber thla ah ti mai ula, Usangzuala bulah sawila a ni mai a lawm, sing thum vel te ka lo thawh chhuah hman phei chuan..." amah chu ka melh pah ralh ralh a, "Nang pawhin Ber thla vela pasal neih i duh khâ" ka ti leh sap a.



"Nitin a mi kal ngai dawn a, lâng in lo kal rawh a ti reng reng che a mi? Riah kha chu a theihloh bur a nia" a ti ta.



"Langin ni e, zing a hna kal hma aṭanga tlai dar thum bawr vel a hna ban leh thleng, khaw en hmain hetah ka lo let leh hman zel dawn a, i rualin ka haw thei bawk anga" ka lo ti zung zung a, a pawm ta a niang a bu nghat nghat a, chutah ngun fe a min rawn en pahin "I lo va che khawlo ange aw?" a ti leh mauh mai.




"A teuhlo emai a" ka lo ti hlar a, "Anih chuan va kal la, i sawi anga i awmloh chuan a pawi dawn a nia" min vau awka deuha a tih chuan ka lo nui var var a, a nui ve duh derlo, a inla khirh ṭhin a ni. "Ka nu leh midang bulah sawi miah suh, kan thuruk aw, pawisa i hlawh ṭeuh dawn kha" ka kal hma chuan ka ti leh hram a.



Hmanhmawh deuhin Prof te in chu ka pan a, ka va thlen chuan Gate a lo la inkalh a, inthlahrung deuh chuan amah chu ka phone a, reilo teah a lo lang a, a lo chhukthla chuan Apron a rawn ha vei ṭat a, ka nuih a za lek lek a ni, "Morning" ka tih chuan a bu nghat a, a la insiam miahlo, ke kawr bul a ha a, a chawn lah chu a sei in a hmul thiap a, zingkarah pawh a chhelo hluah hluah reng zel a nih hmel, inchhung luh hma aṭang hawtin kal man awm ka ti em em ringawt mai a ni, a chawn te ka han hmu ta vel a nia.



"Chaw i la eilo ang ti raw?" a lo tih chuan ka ei tawh thu ka lo hrilh vat a, a che vel chu a dam dup a, a ṭuan a rang tehchiamlo. "Christ-a a la mu a mi?" ka tih chuan "Khawvar hmain a harh a, a mut lehna a la reilo, i duh leh a chaw tur lo buatsaih lawkla" min hnungchhawn zawnga ding chung chuan a ti a, Artui a kang mek bawk a, ka lo en leh veng veng ṭhin.



Rice cooker chu ka hawng de de a, chutih laichuan Choper awmna min lo hrilh a, a Apron hak lai chu pelhin min pe a, sir zawng min chhawn deuh tlat bawk. "Engin nge ka chawm sak ang?" ti a ka zawh chuan Bawnghnute bel min kawhhmuh leh mai a, a ṭawng tuitamlo ve ngang mai, mi lah chu a en ṭha duh der lo a, ka en dauh dauh reng tih a hria a nih ka ring a, keimah zawk chu ka zak leh hnuhnawh zawk a ni.



Christ-a chaw tur choper a ka her mawlh mawlh laichuan "Dawrah khan engzah nge i hlawh ṭhin?" a rawn ti hlawl a, ka bangbo kher mai!



"Ahma khan dawrah i thawk ṭhin ti raw?" a tih chuan hrechhuak zawkin ka bu ta ringawt a, ka nuih a za ru deuh tlat lehnghal.




"Chhan a nuam chiahlo maithei a, engzah chiah nge i hlawh ṭhin tih ka hre duh a, tun hmain awmpui hi kan la nei ngai biklo a, inthlahrung lo la, i tha natlohna tur ang zanin kan ti dawn nia" tih pahin ka bula dawhkan rawn kil chuan hnai deuh takah a rawn ṭhu a, a chawhmeh tur chu ka khawngaih reuh lutuk, Artui leh sausage deuh tlawng a hmeh dawn a, sana a en zauh zauh a, a hmanhmawh tawh a nih ka ring, a zawhna lah chu chhan mai dan tur pawh ka hrelo.




Ka chhan mailoh vang chuan ka lam a lo hawi a kan mit a intawng chiang ngang mai, chhungrilah hian engthil emaw che dawt hi a awm. Amah zawk chuan a mit a la sawn thuai a "Hlawh chu.... i tih zah zah min pe tawp rawh" ka ti ban charh a, min en leh rual chuan ka hawisawn vat thung.




"A tawk tawh kha, ha a nei tawh a ti chip lutuk duh suh" a tih chuan ka tawp ve nghal a, a sausage ei lai ka en fuh leh chu a awm a nawmloh hmel lutuka a phone te a bih ta vel a, enga tinge maw heti em em a a han zahzum chu le, a zirlai ten an enlai fo dawn a nih hi, a khawngaihthlak zawk a lawm mawle.



Inthiar fihlim sanin sitting room te chu ka phiat fai a, chutih lai chuan choka lama a phone hmang ri chu ka hria a, English-in tu emaw hi a bia a, a ṭawng ri chu a mawi ka tiin a class lecture pawh ngaihthlak a nuam dawn khawpin ka hria.



Ka va let leh laichuan dawhkan a lo thawhsan chiah a, "Ka lo silfai ang" ka tih chuan ngawirengin a kalsawn ve mai a, a room lamah a luh tak hnu chuan keimahin ka nui ka nui mai, mi pawh a tir ṭha ngamlo chu a ni tak sia.



Gas leh tuikhawihna vel te chu ka nawt fai a, tih tur a vang riau mai a, chhuat nawh chu a chhuah huna tih ka rilruk a, a awmlaia chet vut vut chu intifel min tih te pawh ka hlau deuh.



Perfume rim a rawn nam ta chak chak a, ka rimtui tih tak mai kha a la ni zui a, sitting room a a rawn ri khup khup chu ka hre zui bawk, he ina awm hi ngaia neih a har dawn hrep mai, ka awmdan hi a diklo tunah pawh hian ka tiril ah engemawni ching cheng a awm, hawilet chakin ka tukkhum lah chu a za miai miai lehnghal! Lo en he haw reng lo tura insum ka ngai, a awm ka tinuamlo anga min ban leh daih ang tih pawh a hlauhawm a lawm, a zak zum bawk si a.



"Ka kal ange, a lo harh ṭep ang, TV bula Box chhungah sawn a toys ho a awm aw" a rawn tih rual chuan ka hawilet thuai a, ekhai leh! A hmelṭha uchuak lutuk.




"Thil dang chu ti duh vak suh, a zualpui chauh kha ti rawh" tiin tawi te hian min rawn nuih a, awi leh....!



A kalchhuak chu ka enzui vawng vawng a, am deuh deuhin thawk ka la sek sek bawk, lo hmutu nula ten an lo enzui nasat dan tur te chenin ka zeldin a, a fapa ka awm thei bik leh tuktin tlaitina a hmel ka han hmu thei bik tur chu vannei ka inti em em ringawt mai a ni.




Christ-a lo harh hnu chuan chaw ka pe a, a toys ka khalh pui a, a tlei angreng viau mai, dar hnih velah a muhil leh a, chumi hlan chuan chhuat te nawtin thawmhnaw suk ngai te ka su a, tih tur em em a awm takloh ah chuan tlailam ei ka relsak zui a, eitur zawrhna dawr kan nei a, eitur tuihnai kan hnianghnar bawk nen tukin a Prof tukṭhuan zet kha chuan ka khawngaih thla a la deuh tlat a ni.



Dar thum leh a chanve velah a lo haw a, chhuanlum mai theih turin ei ka rel peih diam tawh a, chaw erawh ka chhumsak lo, a dai a ei duhloh takah.




"Vawiin a tlei em?" tiin min zawt a, "Buaipui vak a ngailo reng reng, mut a duh sia a muhil rei lutuka" nuisangin ka lo chhang a.



"A ṭhat hlauh chu, i duh leh haw tawh mai la" a tih takah chuan a rang a rangin ka insiam a, ka chhuak tur chu min en reng bawk si a, min ning a nih ka ring rum rum a, ka awm a nuamlo dawn dawn mai.



Dawr ka thlen phei chuan Customer an lo tam laitak a ni, "Eh...i va lo bang hma ve!" Umawipuiin a lo ti hluai a, ka nui vur vur min hmuh chuan min ngaihtheihloh hmel leh viau tawh. "Lung i ti zing" a ti deuh hluk a, eng he hu ah ka ngailo, nuam ka tih mah nak a lai a enge a lung te a lo zin ngawt.



Nitin in chutiang chuan kar kan tluan ve ta reng mai, nikhat ni kha kan inbiak hnem ber ṭum a ni mai a, a bak nidangah chuan a lo insiam peih diam zel a, ka thlen hnu lawkah a chhuak a, tlai a lo haw hian ka haw theih thu hi min hrilh nghal mai zel bawk a, a holam angreng ka ti dawn nge ni, ka hmu reilo ṭhin lutuk chu a pawi ka ti zawk mah a, awm khawtlai luih tlat thu a awm bik silo.




Inrinni ah chuan "Chawhmeh i lo bazar dawn em ni?" tiin min zawt a, i he loin ka lo aw mai a, bawngsa leh thei leh thlai tlem a zawng ka lei a, ka thillei chu engmah sawisel a neilo, mipa tih tam chi a nilo ve ngang a ni. A thawmhnaw pawh ka kal hmasak bera ka suk bak kha chu ka su leh ta miahlo a, balbawmah hian Christ a thawmhnaw bak a awm tawh ngailo, amahin a lo su mai zel a, mi a tir mai mai lo bawk a, hna a a kal ni bak hi chu min mamawhna em em a nei lo tih ka chiang ta viau bawk.



Chawhnu lamah chuan a inbual zo chu a insiam mawlh mawlh a, pawna Christ a ka awmpui mek laia "Mimi" a lo tih chuan ka hawi vat a, ka hminga min koh vawi khat na a ni a, ka lawm teh a sin aw.



"Kal chhuah lawk ka ngai a, ka lo haw har lo ang" zawi deuh sup a a tih chuan awm a nuam ru ve rauh rauh thei.



Inchei deuh hian a chhuak a, khawiah nge a kal ang tih ka ngaihtuah neuh neuh a, a phone te hi a khawih ve nuap nuap zel a ngaihzawng a nei em maw ni dawn le? Inrinni ah pawh chhuah tho a ngai si chu ngaihzawng a neih ka ring ta ber, nalh leh inchei takin a kalchhuak miau a ni.



A chhuah aṭanga rei pawh a la ni hman lo ang tih a, tu emaw hian kawngka a lo kik a, ka va hawn sak chuan nula samkir hmelṭha vir ver hian phawk lek lek hian min lo en a, kei pawh ka bangbo angreng viau mai.



"Lo ....lut rawh" ka ti bah deuh nak a, chutah mawi fahrana min nuihin "U Famkima a awm nange?" a lo ti var a.



"Aw a chhuak deuh chiah a"


"An awmpui a mi i nih?"


"Aw" ka tih rual chuan lo pen lutin a hawi kual thuak thuak a "A chhuahna a rei tawh em?" a rawn ti leh a.



"Reilo" tih zawngin ka chhang a, a polythene rawn khai chu dawhkana dah pahin "Fridge ah dah rawh aw" min rawn melh zauh hian a ti leh a, fridge chu hawng zuiin a en kual dan dan a "A bazar ve ngei a ni maw" nui kar kar hian a ti a, a inthlahrun hmel loh viau a, an chhungte nge maw ni dawn ni, zawh dawt lah chu ka ngam chiah silo.



"Tunge i hming?" ka lam hawia a rawn tih chuan "Mimi" ka ti leh mai.


"Christ a mu a mi?"


"Tunah khan a muhil chiah"


"Langin a mi i kal ṭhin?" zawhna min zawt reng chu ka ngei hman ṭep tawh.



"Aw ni e" pangngai deuh chuan ka ti leh a.



"I duh leh haw tawh la, tlai eirawngbawl vel chu ka lo tihsak dawn nia" a tih chuan ka nui ta ringawt a "Ngawiteh, amah a awm silo a, tunge i nih ka hre chiah bawk silo che a" ka ti ve ta ngat a.



"Christophera nutei ka nia" a tih laia a aw ah chuan a intithei deuhin ka hria, "E, chutia law" ka ti hul hak a.



Christ-a nutei maw, ber kher chuan a!



"U Famkima chuan ka lo kal dawn tih a sawi nange" a tih leh laichuan a thei rawn ken ho chu Fridge ah ka dah lut mek a, "Aw, sawi miah lo" ka tih chuan a nui hak hak a, "Hepa pui hi chu aw, a van haihawt ṭhin tak" a ṭawnglai hmel chu ka va en deuh kher a, ngaihdan mak deuh ka nei.



Tunge mahni unaunu pasal ṭhentak te inah mahni chauha kal daw daw duh ang le! "Eirawng ka bawl ang" te chu a la ti zui a, Professor chung chang a sawi dan awki vel lah chu a ngaizawng emaw tih mai tur a lawm mawle!




(End of chapter - 4)

Link:
BBcode:
HTML:
Hide post links
Show post links

Ahmangaihi violette
Posts: 148
Joined: February 1st, 2020, 3:14 pm

Unread post by Ahmangaihi violette » September 7th, 2021, 10:18 am

ZÚNZAM - by Ahmangaihi violette khiangte


CHAPTER - 5



"Nu Nghaki hi enge a an i hria em?"



"Ka hre miahlo" Prof khan a nu chungchang chiang takin min hrilh lo a, a damlo a inzai turin hmun dangah a awm tih zawng chu ka hriat a ni mai a, khawiah nge a awm a, a enge an zai dawn tih tak ngial pawh min hrilh lo, keilah chuan zawhna chang ka hre derlo a, ani lahin zawhloh chuan sawi a tum mang silo a.



"A lo haw hun tur pawh a sawi na nge?" ka hma taka ding al chung chuan a ti leh a.



"Sawi chuang nang" ka ti leh mai a, a meng râng ralh chu ka hmu reng, chumi hnuah Christ-a room lam a pan a, lo chhuak leh tawh mailo chuan a va awm renga, a thawm reh dak si chu ka ngaihven ru reng bawk, Prof chu Phone a hrilh mai tur em maw ni?



Umawipuiin min lo Text a Grape dum chi lei haw turin min lo chah a, ka tlai deuh ka rin thu hrilh a Phone ka lo hmeh mual mual laichuan "Thingpui min lo lum la" tih ri ah chuan ka hawi chhuak zawk a, Sitting room luhna bula ding chungin min lo en leh ran tawh, ngawireng chuan ka che zui mai a, Christa room lamah bawk chuan a let leh ta niin ka hria.



Thingpui pe tura ka va lut chu Christa bulah Phone khawih pahin a lo mu a, min hmuh veleh ah lo tho chhuakin Side table a ka thingpui dah chu a lo thlek a "Awi aw! Bawnghnute ka duhlo tih ka lo hrilh theihnghilh daih che a ni" a ti hap a. "Chutia law" tih zawng chuan ka chhang a, reilo te chu kan in en a, a mi en dan chu siam ṭha leh turin min duh deuh a maw ni?



"Ka siam ṭha leh dawn a mi?" ka tih chuan "Ngailo mai rawh se, keiman kan siam ange" tho chhuakin min kalpel a, a hnungah ka zui ve mai bawk a.



Choka a thingpui a insiam rak rak lai chu ka lo en ve reng a, min be mang silo chu sawitur a vang duh khawp mai. Min lo en leh zuk ṭhin vang chuan awm a ti nuamlo hle lehnghal. "Ufamkima chu ka Phone sak dawn che a mi?" ti a ka zawh chuan a nui deuh sak a.



"Ka duh chuan ka Phone ve thei a lawm" min melh ralh hian a ti a, ka nui tawi tak tak ringawt.



A thingpui no chawia min kalpelh hnu chuan a chetna huh velh chu ka hru fai nghala, "Mami" a tih ri vang chuan Sitting room lam chu ka hawi leh thuai a.



"Lo kal lawk teh" hmanhmawh deuh chuan ka kal phei a, Sitting room ka va thlen rual chuan TV hma ah a lo ding a.



"Furniture vel hi a paw deuh a nih hi" a tih chuan ka nuih a za vaklo. "Chutia law...." ka tih laimekin "Lo hru la, tih tur em em i neih chuan loh chuan" a ti zui zat a. Furniture chu a bal lo tih ka chiang khawp mai, Bazar tura ka chhuah hma khan ka hrufai diam tawh a, he inlengnu hian intineitu deuha min tirh vel a tum vang bak a nilo tih ka hre chiang viau a ni.




Chhang buai duh lemloin choka lam ka pan san a, puan them nena ka let leh laichuan Sofa ah ṭhuin a Phone a lo khawih leh tawh a, Center table ka hruk laichuan a no lakangin ka che chu min en ve reng a "Inleng zahawm deuh deuh hi an nei ve fo sia, hmeichhe che tur an neihloh lai hi chuan i theihtawkin i lo tihfaisak ṭhin dawnnia" nuisang hian a lo ti leh a.



"Ka awmchhan a lawm" ka ti mai a, min en zui reng mahse ka melh ve duh tawh lemlo thung.



"Kum engzat nge i nih?"



"Kum 24 na ka hmang mek" min be tawhlo se ka ti mawle, a awmdan vel chuan min lemlo nasa mai bawk si, ka kawm peihloh zawng tak a ni. "Daily in a mi hlawh a pek che?" ka va melh zawk a, "Ni lo e" ka tih laia ka aw ah chuan ka ning deuh tawh tih a hriat theih ang.



"Nu Nghaki zin hnuah a mi i thawh?"


"Ummm"


"Engtin nge, Famkima nen in inhresa nge?" ka ning tak tak a ni, enge maw ka chungchang pawh chu a ngaihven viau le.



"Ni ber e, awmpui an mamawh a" ka ti leh mai a, min biak leh hmain ka thil hruk lai chu ka hru zung zung a, ka hruk zawh chuan hmanhmawh deuhin ka chhuahsan nghal a. Choka lamah tihtur neuh neuh ka dap kual a, a vang pharh lehnghal, a thingpui in na no ruak kenga a lo phei leh laichuan hmunphiah lain pawn lamah ka chhuahsan ta daih a, Pangpar Pot hunna bul vel te chu ka va phiat sawk sawk a, chu nu pui roh chuan kawngka bul aṭangin min la rawn thlir hram nia mawle!



Pawn hmun ka phiah zawh hnu pawh chuan lut tawh mailoin Pangpar Pot te chu ka hung rem ṭha a, Plastic ṭhutthleng hniam awmah chuan ṭhuin ka Phone ka bih leh melh melh a, inchhung lam chu ka ngaihven peih rih vaklo, tih tur a awm tawh chuanglo a Christ a a lo harh a nih pawhin a nutei a awm tho kha mâw.



Darkar chanve dawn chu ka ṭhu hman awm e, eirel a hun tawh vangin ka lut ta chauh a, ka va luh leh chuan Room lamah a awm leh tawh a ni ngei ang a hmel ka hmu hauhlo. Ka chawhmeh lei ho chu lachhuakin ka siam mawlh mawlh a, pindan lam thawm awm miahlo vang chuan ka thil tih lai dah rihin ka va pan phei a, room kawngkhar hawnga ka va bih dek dek chuan kan inleng nu chu Christa bulah a lo muhil tui khawp mai.



Khua chu a tlai ve lek lek tawh a, heta chawei a tum anih ringin eirawl ka bawl kep ta ringawt a, a awmdan mawlh chu a ni mak ka tih ni, a unaunu pasal hlui te inah heti em em a han ngampat mai chu, an inneih lai chu nise ka hrethiam thei mai a, tunah an inṭhen laimek a ni bawk si.



Ngaihtuah zui rauh rauh chunga chawhmeh ka siam laimek chuan Gate inhawng ri ka hria a Prof a lo haw tawh a nih hmel, kawngka lam ka hawi rualin kawta a lo lang chu ka va hmu nghal a, Pangpar Pot ka hung ṭhat ho chu a en zui vung vung a, sawisel nei hmel phei chu a pu lemlo.



"I lo haw tawh maw?" ka lo ti deuh tawng a, lo chhawn dan dang vak hre heklo.



"Aw, in lo buai em?" a lo ti var a.



"Buailo e, Christ-a chu a la muhil a"



"A va mu lai ve aw, zan kan van mengrei duh dawn ve le" nui suk hian a ti a, inthlak tura kal ta mailo chuan dawhkan kil chuan a lo ṭhuthla a, thingpui a duh em tih ka zawh chuan a lo duh ve mial a.



"Eirawng te i lo bawl duh a, keimah chauh ka nih hi chuan bawl hran em em a ngailo a sin, i hmanhmawh tawh em?" a aw chu a thum ṭhain a damdup mai a, a hmel hmuh a hahdam hle reng bawk.



"Zanin tlai chu nangmah chiahin i ei dawnlo a nih hmel" nui chunga ka tih chuan a nui ve mai a, Christ-a nutei lo kal thu chu a hre sa tawh a nih ka ring.



"Enge i siam a?"



"Vawksa rep ka chhum a" a bu nghat nghat a, ka thawhtirh aṭang khan ka chawhmeh siam hi engmah a la sawisel ngailo a, a ei duh zawng leh duhloh zawng pawh ka la hre barlo.



"I hmanhmawh loh chuan ka thlah dawn che nia" a tih chuan ka en leh rang kher mai.



"A...a ngai hran chuanglo, i lo thleng ve chauh sia, hei hi so leh se ka haw ang" ka tih chuan "Chaw i ei dawn emaw ka tia" a thingpui no dahin phawk lek lek hian min lo en a, ka thilsawi kha a lo hriatsual a nih hmel.



"Kei te chuan ei dawn nang, Christ-a nutei a lo leng a lawm" a hmel chu ka en chik hle a, danglam tehchiam phei chu a awmlo.



"Khawnge a awm a?"


"Christ-a a mutpui a"


"A muhil ve a mi?" tho chhuakin Room lam chu a pan zui a, kawngka ah dakin Room chhung chu a bih a; reilo teah a lo let leh vat thung.



"A lo thlen na a rei tawh em?"



"Rei ve leh deuh tawh, dar hnih bawr vel a niang" a lawm vaklo em mawni chu tih tur hmel a pu ta in ka hria, ka rilru ah hian zawhna hi a lo lut zung zunga, hriat chian lehzual ka chak et et mai bawk.



"Chaw ka ei dawn a tia mi?"



"Ti hranlo a mahse, eirawng ka lo bawl ang te kha a ti sia, a ei dawn a niang ka lo tia chaw ka chhum kep mai a sin" ka sawilai chuan thawk a lo la deuh halh a, zawhna ngah deuh hian ka lo en ve reng bawk a, a sawi hmel loh nasa mai bawk si.



"Kan inthlak lawk ange" tiin a room lam min pan san a. Hmeichhe rilru tih takah thil hrang hrang ka lo ngaihtuah kual a, kan inleng nu hian Prof hi a ngaizawng a nih ka ring bur tawh, zawhna awm ta chu Prof hian a ngaizawng ve em tih hi a ni? A awmdan ah kha chuan a ngaizawng nge ngaizawnglo rindan neih thiam a har khawp mai, an nupa inṭhen chhan te hi a lo ni lek mai angah tih te chenin a nia ka ngaihtuah hman ni.



"Mimi" a rawn tih chuan ka phu deuh zawk a, "Chaw chu ei ve nghal ta che" a ti zui zat a. "Ngawi rawh, chaw chu eilo ang" ka lo ti nghal thuai a, a T-shirt leh Half pants hak chu a inhmeh viau mai, a hmel chu a chauh hmel deuhin a lang cool ruih mai bawk.




"Lucy chu i kai tho dawn a mawni le" Fridge hawnga tui Bottle lakchhuah pahin a ti niah niah a, ka kaihthawh chi ni pawhin ka hre chiahlo. "Tinge?" ka lo ti he haw chu kei aimah chuan a bangbo hmel zawk.



"A....a nuam duh vaklo" a ti zuai raih a, awi....chu chu a lawm ka hriat chak, a nuam vaklo a tih chhan chu enge niang le?



"Ti nge a nawmloh a?" ka ti leh ta hram a, dil chhut min tih phei chu ka hlau angreng mahse, ka lei hian a zawt chak et et mai si a, ka veng hnehlo ti tawh mai teh ang.



"Rosy nau a nia" a ti mai a, zep a nei em tih hriat tum fe hian ka lo melh a, a mimal thil tawh em vangin zawh zui erawh ka tan a mawi tawh lo ang, aman a duhthu renga min hrilh te a nih loh phei chuan hriat tum ve chhen pawh thil tih chi a nilo.



"I lo hrethiam vaklo ang a nangpawn?" a tih chuan ka nui mai a, "Hrethiam tho e" ka ti ve ta ngawt a.



Chutih laimek chuan Room kawngkhar inhawng ri kan hre zui a, a rawn pen thawm chu a zawi khawp mai, ngawirenga Prof nen kan lo ngaihchan lai chuan Christ-a a lo lang hlawl a, mit nuai chat chat chung hian min lo en a, a pa a hmuh chuan a lo pan rang hle bawk.



"A chaw ka lo siam sak dawn a mi?" ka lo ti thuai a.



"Ti duh suh, a la hma deuh emai" Prof in a tih vang chuan ka ding leh rih a. "Apple lo vel sak la" a tih chuan ka che leh vat thung.



Ka Apple vel laichuan dawhkan kilin an lo ṭhu ve reng a, Christa chuan Apple kawr chu a lo khal niap niap bawk a, an fapa chu hmuh a nuam viau a ni mahna ka melh leh zauh zauh ṭhin. Prof chuan a Phone a khawih vangin min en lemlo a, ka hmuhlaia Phone khawih niap niap a chin vang hian nula biak a neih ka ring deuh a, ani ang tan chuan a awmlo hranlo, nula hmelṭha tak takin an zar khu ruai reng zawk maithei a ni.



"I duh ve em?" ti a ka zawh chuan a lo bu nghat a, a ta tur chu ka vel sak veleh a, ka pek laia kan kut a intawk zawng chuan Zawlaidi min tat chu a ni hauh silo mahse, ka taksa pum chu a hit sung sung mai hian ka hria!



"Christ-a hian nangmah a chhun zawk che em?" zawhna mawl mang te te zawta han biak hi a nuam ve riau zel, a bak sawi tur dang hre heklo.



Chutah ka mita chiang lutuk tak maia min lo en hian a nui a "Kan in ang chu an tia lawm, min han en dun la kan in ang em?" hlim hmel pu sarh a a tih chuan ka nel sawt mai nia. An pafa chuan uluk fe hian ka thlek a, ka tirila min fan raih raih tu awm vang chuan ka hmui ka pet fan fan bawk, Prof hi a ṭha ka ti a sin aw, chiang taka en phei chuan ṭha ka ti lehzual a ni.



"Keipawn in in ang ka ti" ka rilru tak chuan 'Tlemin a pa a hmelṭha zawk' a ti ru rauh rauh a, sawichhuah ngam chi pawh ni nghallo chuan.



Lucy lo tho chhuak chu a rawn phul hlut a, Prof malchung aṭanga Christ-a chawithla in a pawm zui a, a be siam siam chu keini pahnih chuan kan lo en ve reng a, Christa biang a fawp chuk chuk chu a lo duh vaklo a niang a pa lam a rawn ban leh zuau ṭhin.



Ka thei velna kawr paih tuma ka tho uk tawh chu "Khawmaw min lo vel sak ve teh" a tih vang chuan ka ṭhu leh rih a, chutih laia Prof hmel ka va hmuh aṭang chuan hriatthiam a awl deuh ta ruak mai, a ngaithei vaklo tih ka va hmu tlat.



Ka tihtur ṭul te ka tih zawh tak si ah chuan haw mai bak chu tihtur awm tawh heklo, ka Bag akin kal mai tum chuan ka ding uaih a, chutihlai chuan Lucy chuan Christa chu sitting room lamah a pawm phei a, Prof erawh chuan ka Phone a la bih ran thung.



"Ka kal mai dawn a sin" ka tih chuan a lo hawi chhuak vut a, Lucy te lam chu hawi leh te tein a kut chuan min lo vai zawk a. Lo ding chhuak vutin ka banah min vuana Fridge awmna lamah chuan min pawt phei dawt dawt a; min ti hamhaih angreng.



"Zanin tlai chu i haw har deuh mai dawn a maw ni le, Over time a i thawh man chu ka pe mai che a nga" a ti tawl mai.



"Ti nge a?" rindan chu ka nei thiam riai ruai.



"Aa..." sawi hreh hmel a pu nain ka hriat ngei a ngaiin ka hre ve leh tlat tawh.



"Lucy haw hunah sawn haw la ka duh a" a ti leh mai a, chu aia chiang chuan min hrilh thei sela ka ti takzet.



"A ngaizawng che a mi a?" ṭawng ringlo turin min lo khap vat a, "A mi?" zawi te chuan ka ti leh hram a, a bu nghut mai.



Karei leh! Ka rindan sa mah nise min ṭhawng tho, a chhan chu a Prof hi a makpa a ni si a, mahni laizawnnu pasal han ngaihzawn mai chu!



"I nupui nau a ni sia" ka ti leh hliai a.



"Ka bialnu hlui a nia" chu zawng ka beiseiloh lam daih, a aw chu a zawi hle nain ka bengah chuan a ri ring hle thung.



"Awm rih lawk mai rawh" a ti leh a, a mi ngenna hi chu ka tan hnial rual a nilo mahse, engvanga hlau nge anih erawh ka hrethiam lo khawp mai, mipa chuan a duhloh chuan a hnar thei mai turah ka ngaia, nge ni a a tan han hnar mai harsatna riau a awm zawk tih chu ka ngaihtuah a hriatchian ka chak telh telh ringawt tawh.




Choka lama an lo phei thawmah chuan kan in din hlat nghal thuai a, "A chaw chu han siam sak la" Prof chuan a ti nghal zat a. "Ka lo siam dawn a mi?" Lucy in a lo tih rual chuan "Keiman kan siam ange" tih leh chêt ka rual a.




Lucy chu a awm rei zek mai, sana ka en leh ṭhina Umawipuii lah chuan "I lo haw dawn tawh em?" a lo ti ve sek reng bawk nen ka hmanhmawh ru ve riau tawh.
Christa chaw ka barh laichuan Prof nen sitting room ah an awm a, an inbe ri chu ka ngaithla reng a, an ṭawng zawi viau nain ka ngaithla uluk em a ka hre pha vek tho.



"Rosy chuan a lo be lo che a mi, Nu Nghaki in zai tur thu pawh a hre tho sia, Christa awmpui rih sela nangman i nu chu hruai mai la ṭha tur a nia, ka u hi chu a pharvar leh lutuka a buaithlak emai, U te mah nise ka dem ve ṭhin" Lucy chuan a ti hlak hlak a.



"Mamuanan a hruai thei a lawm, helamah hna kal ka ngai bawka" Prof in a tih chuan "Chu pawh nise, nidang reng rengah pawh nu a nih anga a mawhphurhna hi a hlen lo ka ti tlat, a rui reng ringawt a" Lucy bawk chuan a ti leh a, Prof ṭawng thawm ka hrelo thung.



"Harsatna in neih chuan min lo hrilh ve mai tur a nia nangpawh, awmpui lak ngai kherloin ka pui hman tho che u a" vui hmuipu awka taka Lucy in a tih chuan ka lo ner sak a, a in pe zo mah mah chu a ni, a beisei lah ka hre kar tawh lehnghala.



"Mimi a awm a lawm, kan buai hranlo" Prof chuan a ti veleh a.



"Engtia i hriat nge a, mi hi i ring hma thei leh lutuka, naupang enkawl tur phei chuan mi nazawng hi tih loh tur a sin" eng hmuhin nge maw min lo hmuh le, ka ṭhat tawk lohna hria niawm ang ziazang a.



"Va haw tawh rawh" pakhat zawk chuan a ti mai a, a aw ri ah chuan thinrimna a lang lemlo a, zawldawh takin a la be zel thei chu mak ka ti deuh a, inzawmna enge maw tak an la nei nge maw ni dawn ni.



"Ka message te kha chhang ve ṭhin la, lo kal fo hi ka tan a zahthlak ve tho a nia" a tih leh laia Lucy aw chu a pangchang aw viau a ni.



"Kan ngaihtuah awmlo, lo kal duh tawh lem suh" Prof chuan a ti sam leh mai a, chutih laiin Lucy aw erawh a vin lek lek a "In ngaihtuah loh theihloh a nih hi" a ti deuh hlar mai.



"Tun hnaiah Rosy nen chuan in inbia em?"



"Be lo, sawi tur a awmlo" Prof aw pawh a vin ve lek lek tawh hian ka hria.



"Lo haw leh duh ta se engtin nge i tih ang?" Lucy a ni thung.



"Chutiang a thlen hmel loh"



"I rin ang ngawt a ni awmlo emai a, a laka i ṭhatna a hmu chiang anga rawn let leh a duh dawn tih ka chiang viau a ni mahse, buaithlak zawk chu mi rinawmlo laklawh hi chuan rinawm leh hi an harsat tlat tawh, Christa hi ka ngaihtuahlo theilo, nu telloa khawsa tur chuan ka khawngaih emai, U Rosy lah tih ngaihna a awm der silo" Lucy chuan eng rilru nge maw a put le, a laizawn ai pawhin Prof te pafa chu a duhsak hmel zawkin ka hria, a sawi danah Rosy lah chu a khawloh hmel nasa mai bawk a, thil awmzia tak tak hre ve silo chuan ka hriat ang angah chuan ngaihdan ka lo siam ve lo theilo.




Rosy chu a rinawmlo tihna em mawni dawn ni? Ruihtheihthil a khawih te a nih hmel bawk a, Ukimkimi sawi dan nen kha chuan a inpersan viau mai mahse le, pawnlam mi aichuan chhunglam mi te hian min hrechiang zawk a lawm maw, Prof pawhin a pawm viau a nih hmel bawk a, ka lo ral hriat dan kha chu a ni chiahlo te pawh a niang.



"Engmah buaina tur a awm loh chu, va haw phei tawh rawh" Prof chuan a ti leh a a, chutah choka lama a lo pen thawm ka hre zui zat a, ka lo insiam ṭha rang khawp mai.



"A eiṭha duh em?" a fapa lu a lo tuai sak pahin kan bulah chuan a lo ṭhu a, "A ei duh lutuk vawiin chu tlaiah thil dang a eilo bawk a" ka tih laimekin Lucy chu a lo lang ve leh a, "Ka haw phawt ang, ka hman veleh ah ka lo tlawh leh dawn che u nia" a tih chuan ka lo thaw huai a, Umawipuii pawh a thinrim lek lek tawhin ka ring, min lo tur na a rei tawh bawk si a.



Lucy haw hnu chuan haw turin ka intintuah ve nghal a, Prof in pawisa min pek a tum chu ka la duh biklo, darkar khat em pawh a tlinglo a ka tlawm ngai ve tlat, zan khaw tairek thleng te chu nisela lak pawh ka la mahna le.



"Ka thlah dawn che em ni?" a ti leh hrama, "A ngailo, Taxi-in ka haw thei a lawm, thil lei kawi ngai te pawh ka la nei a" ka ti zung zung a, ka mangṭha hnuah hmanhmawh deuh chuan ka chhuak hlawk hlawk a, Umawipuii chuan min lo hau dawn tih ka chiang viau a ni.




(End of chapter -5)

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ahmangaihi violette
Posts: 148
Joined: February 1st, 2020, 3:14 pm

Unread post by Ahmangaihi violette » September 7th, 2021, 10:27 am

ZUNZAM - by Ahmangaihi Violette khiangte


CHAPTER - 6




Kawng tluanin Prof leh a nupui hlui te unau mawlh mai chuan ka ngaihtuahna an luah a, ka lo ngaihtuah tui deuh a niang kan dawr ka thlenphei lai pawh ka hre barlo.




Dawr ka thlen phei chuan khua a thim lek lek tawh a, hnathawk ho haw tur chu pawnah ka tawk a min hmuh rualin "Piber a sa tawh teh a nia" nui ruh ruh chung hian an lo ti a, ka va lut chu counterah pawisa ziak felin a lo la buai khawp mai.



"Ka rei em?"



"A zawh pawh mi zawt ngam e a" a lo ti hluk a, min en lemlo chuan a thil ziah lai chu a ziak mawlh mawlh a.



"Au Mawi vawiin chu hrilh tur che ka ngah rap" a bula va ṭhut tharh pah a ka tih chuan "Pathlawia chungchang a nih chuan ka hre peih lo" a ti hmuk mai.



"Enteh, a nupui nau a lo kala a rawn ngampa lutuk mawle, a mak ka ti a sin aw mahse, Prof khan a bialnu hlui a nih thu min hrilh a, engemaw tak chu a awm a ni" a thil ziah lai dah meuhin a tarmit chhan aṭang chuan min lo melh kar a.



"A nupui nau nen an inngaizawng a?" a ti he haw mai.



"Ngaizawng lo ang Prof khan a duhloh hmel lutuk mahse, kha nu kha chuan ala ngaizawng chiang a lawm"




"I inrawlh lohna turah i inrawlh ange, dawr kan buai em hi bang vat rawh" tiin a ziah lai chu a chhunzawm leh mai a, "U Kimkimin a hria a ngem le, ka hrechiang chak riau" ka tih leh chuan min chhang zui tawh lo, a inkhung fel hnu chuan in lampanin kan inzui haw a, kan chhungte pawn zanriah eiturin min lo nghak ran tawh.




"Mimite Hnahthial ah i zin ve dawn em?" zanriah eilaiin ka nu chuan a ti hlawl a, ka nu u fa ka Cousin tlangval Senior tawhin nupui a nei dawn a ni awm e. Ka chak hle rualin kal thei ni chiah pawhin ka inhrelo, hna ka nei laklawh si a, a timing lo kher mai.



"Dawr in khar rih mai dawn nia" ka pa in a tih laichuan Umawipuii nen kan inmelh dun hrek hrek a, mitmeia chhuanlam siam tura ka tih chuan a lawmloh hmel khawp mai.



"In pahnihin kal mai ula, dawr khar ringawt chu a uihawm e" ka ti niah niah a, "Tunlai inbuai chuanglo a ni lawm ni?" ka nu in a tih chuan "Buai e" rang fein ka lo ti a, Umawipuii ner nang nang ringawt chu ka ngei lek lek mai.



"I u in lo nghak mai sela khar tawp in hreh chuan, i nu nen kan pathumin kan kal anga" ka pa chuan a ti lehzel a, dawhkan hnuaiah Umawipuii ke ka tlawh leh ṭhin a, engmah lah chu a sawi duh derlo.



"Tunlai chu kan inhralh ṭhat lai a nia, kan indaihlo a sin" a rawn ti ve ta hram a.



"Nia, chhungkua a zin chu a hautak mai mai a lawm, Umawii pasal neihna turin pawisa khawl a ngai bawk si" ka lo ti var a, "In kal chak viau ka lo ring a nia" phawk lek lek a min en in ka nu chuan a ti a, hun dang ang nisela chuan ka kal chak viau ang chu mawle.



Zanriah eikham hlawtah ka inbuala, ka inbual zawh a mu tura ka insiam laimekin Umawipuii chu a lo lut a, "Mimi Pathlawia nen chuan in in nel deuh tawh em?" a rawn ti ve fahran a, a Oriflame catalogue ken lai chu a rawn lek va va bawk a, a va han ti awm anglo thei.



"Nel vak lo" ka lo ti sam mai a, vawiin lam ka ngaihtuah erawh chuan kan in nel sawt khawp chuan ka hre ru rauh rauh thung.



"Perfume chah tir la"


"Ani te chuan hman bik a nei a lawm"


"Enge a hman a?"


"Ka hre nang" ka chahtir ngam a ring reng reng emaw ni.



"Thawhṭan ni ah hei hi keng la, lo entir rawh aw, bialnu a neih phei chuan hmeichhe Perfume discount a ṭha a nia" a thil rawn sawi vang chuan ka melhno lo nghal khawp mai.



"A bialnu a ni lo ka tih kha" ka lo ti vin hlak a, "A teh vak a che, chung ka sawilo, a reng rengah mipa te chuan an neilo emaw tih pawhin an hung fer fur zel a lawm, pathlawi te phei chuan a nei awm emai a" ka khumah chuan bawk duai chungin a Catalogue chu a keu mial mial a, phun se se hian min ti thinrim hlur zel a, ka lawm zawng thil hi a sawi duh ngai manglo reng reng, chuvang a nia Prof chung chang pawh amah aia Ukimkimi ka sawipui tam zawk chhan.




"A MRP aia tlawm hlek in i zawrh dawn nia, i hralh to theih chuan 200 i hlep thei ang" a mitmeng chuan 'Sum, sum, sum' a rawn ti mai hian ka hre tawh. "Khatiang kha ka zuar ve thiamlo ka tih tawh kha" ka ner zui nang a, awmpui mai mai nih laia lo sumdawn te chu, a zah pawh ka zak e a.



"Skin care anga fak chiam a ngai hleinem, a lem hi i en tir anga 'min dawr ve rawh' i tia nga a tawk der a lawm, e chuan; mipa Products ho hi i entir tel dawn nia, Wellness lam te pawh hi a duh maithei a sin, i hralh ṭhat chuan Nail polish ka present ang che" a la ti tak deuh deuh a.



"Ka peihlo, hnathawk tura awm a lawm ka nih"



"Saitluangpui mawl mawl lo khan tirawh, anih loh chuan Hnahthial ah kan kal ang" kan han inmelh ren rawn a, ka unaunu zet hi chu a hlawkna tur ah chuan a thluak hi a hmang ve a nia, ka hlawh zawng zawng a chang dawn lehnghal.



"Chhimbuk" ti pah a bathroom lam ka pan chu "Engmaw?" a rawn ti zui hram a, ka chhang zui tawh lemlo.



Bathroom aṭanga ka chhuah leh chuan a lo awm tawhlo a, a catalogue erawh ka khumah a lo let bal a, ka ken loh chuan min zawt khu leh ruai dawn tho tiin ka Bag ah ka khung ve mai a, Prof biak chhuanlam atan ka hmang tawh anga a ni mai mahse, lei tir ngei ngei chu ka tum chuanglo ang ka ti rilru hram a, ngaihtuah zawng pawn ka zak deuh tlat a ni.



Pathianni chu ka mu nileng a ni ber, UKimkimi ka Text a, "I buai em?" tih ka va thawn a, a en reng nain min chhang hauhlo, ka text nawn duh lemlo a, ka ngei deuh tlat, min hmuh hunah min be ṭha leh hawrh sia nga.



Mumanga Prof ka hmuh hi a reh theilo, ka khum bul banga a thlalak ka la tar vang hi nge ni ang, nitin ka hmuh ziah vang zawk, reilo te tal ka mumangah hian ka la hmu fo a, kan inbiak awm phei chu ka hre tawhlo, zinga ka thawh chuan ka mumang chu ka ngaihtuah let neuh neuh a, Car-a nula nen an inphur lai zawng kha ka hmuh dan chhun chu a ni mai a, ka ngaih a ṭha vaklo, bialnu a nei anih ka ring deuh tlat a, ka zing chhuak tur pawh chu min ti phurlo zo vek mai hian ka hria.



"Catalogue chu i keng em?"



"Keng keng, ninawm" ka lo ti hlur a.



"Hriat thiamloh in neih chuan min lo Phone mai dawn nia, a ṭul chuan ka tlawm thei aw" hram hram chuan a.



Dawr aṭanga ka chhuah dawn chuan Christ-a eitur Beef Burger ka fun sak a, "A fapa kha duat sak hliau hliau la tikhan, nupui a neih hunah pawh a sawm ve maithei che a sin" ngeiawm zet hian ka U Chhimbukin a ti zui hram a.




Ka va thlen phei chuan chhuak mai turin a lo inpeih diam tawh, vawiin chu kamis dumpawl a ha a, a ban chu a thlep chhoin Necktie thawl takin a suih a, a pian inkhaithli zaih chu a langsar hle bawk, a sam a huh danah a in bual zo hlawt a nih hmel, a rimtui hle bawk.




"Vawiin chu ka lo haw hma ang, kawngka hi kalh la, engmah tih tur a awm chuan loh hi i lo mutpui mai mai dawn nia, nizan kan mengrei lutuka" a lo tih lai chuan ka Catalogue ah lai kha ka hre rauh rauh a, a hmanhmawh hmel tawh bawk si a ka hmuh ta rihlo.




Christ-a Toys khal ka va ṭhutpui lai chuan Choka luhna bul aṭangin min lo be leh a "Mimi, Lucy kha a lo kala Christ a hruaichhuah a tum chuan ka rem ti lo tih i hrilh dawn nia" thutak deuh hian a lo ti a, "A lo kal dawn a mi?" ka tih chuan min chang lemlo, A Car chahbi lain a chhuak zui a, Lucy chu a lo kal tawh lo se ka ti rilru hle ringawt, a mi uap a na si, a mizia pawh ka ning.




Zan lam an men rei vang nge Christ-a chu a zia zawi ruih mai a, a ninhlei ṭha peih meuhlo, TV ka enpuia, min ngheng chungin a mu zawi ngiai mai a, a damlo emaw ka ti rum rum a ni. Burger ka ken sak chu a ei neuh neuh a, tui a ti vak lo a niang a ei muang khawp mai.




"A na..." a rawn tih chuan ka phone khawih lai chu dahin ka en vat a, a Burger eilai chu chhuatah a chhak pharh pharh a, a luak zawk nge ni! "Khawi lai nge na?" tih pahin a chalah chuan ka dawm sak vat a.




Ka lam hawiin a lei a chhuah deuh a, a mittui a tlingpam bawk nen ka khawngaih reuh khawp mai, a lei ka en sak chuan a lo sen bawl deuh a, "A thip a mi?" a tih chuan a ṭap ta ringawt a, engtia han tih tur nge mawni, naupang chinchang ka hre silo, ka lei a nat chuan keichu Vitamin C te ka ei a a reh ve mai zela, pek ve ringawt chi em mawni dawn ni.




Ka pua a, reilo teah a ṭap bang ve leh mai a bawk, a pa in damdawi lo lei haw sela ṭhain ka hria, ka Phone ta ringawt a "Class ka la laklawh a, a zawh hunah ka lo bia ang che" a tih vang chuan la dah leh vat a. Minute 5 hnu velah min lo Phone leh a.




"Christ-a hi a lei a na a, a pum lampang a ni mai thei, damdawi lo lei haw la" ka tih chuan a lei tur thu leh a lo haw har loh tur thu a rawn sawi a, "Tunah a tlei em?" a tih chuan ka puak mek thu ka lo hrilh a, "I hah lutuk a nge, khumah mutpui zawk rawh" a rawn tih chuan a nuam ve veng veng mai, Prof Famkiman ka hah a hlau, hah min ti chak zawk daih mai nia mawle.



Dar hnih vela Prof a lo haw lai chuan Chirst-a mutpuiin ka lo chhing ve sek a, kawngka ka kalh vangin pawn aṭangin min lo phone a, ka va hawnsak chuan eng engemaw hi a lo khai bawr ṭeuh a, "A muhil a mi?" ka chhanna pawh nghak lemlo hian a thil khai chu min pein room lam a pan zui nghal a.



A thil lo hawn chu chhang leh damdawi tih angreng a ni, rei vaklo ah lo chhuak lehin damdawi chu a lo la a, a pek dan tur te min hrilh hnuah keimah min pek tir ta mailo chuan amah zawk chuan a pe a, keiin thingpui ka lo lumsak sawk sawk a.



Thingpui ka siam laia a lo chhuah leh chuan a lo inthlak fel diam tawh, "A harh nange?" ka lo ti vat a. "Ka ti mu leh rih, zan lam a meng thei lutuka chhunah hi chuan mu tluk tluk rawh se, a lakhuihthei eina em mawni dawn le, a lei chu" a ti niah niah a.



"A ni maithei, a nih loh chuan a pum a niang" ka lo ti ve a, a hmel ka en chian chuan ani pawn mut a kham vak biklo ni in la hria, a mitmeng pawh a dik zanlo a, mut khamlo hmel a pu bawk. "Zanah a men reng zel che a ni maw?" a nui deuh suk a, nu tel lo a naupang a enkawl chu ka khawngaih viau mai, a zei hawi vak bik silo.



Thingpui kan inlaichuan "UFamkim, Catalogue i en duh em?" ka ti deuh thawr a, ka zak ru ram ram. "Eng Catalogue nge?" a tih chuan phur fein ka Bag dahna lam ka pan a.



"Oriflame a nia, mipa Perfume vel...te" bah deuh nuaia tih pahin a hma a dawhkanah chuan ka va dah a, a lo ban ve mai bawk a. "Network Marketing lam te i lo ti ve a ni maw?" a enkual vut vut a, ka ta anih loh thu sawi chu a fuhlo deuhin ka hria, "Min dawr ve la" ka ti leh thawr a, a ruk tak chuan a mamawh uk loh ka ti lui ang tih ka hlau angreng.



"I mamawh loh chuan a ngai chuanglo a nia aw" te chu ka han ti leh rih a.



"Perfume chu lei ka ngai a" a ti ta hlauh a, ka phur thar leh surh mai.



"Khawi hi nge rimtui ang, Oriflame lam hi ka hmang ngai lemlo a" a tih lai chuan a rimtui ka tih ho chu ka lo kawhhmuh zung zunga.




"Mipa Perfume tak chu Discount a awm lo anih hi" a ti khauh a, kei ka ngawi ran thung, hmeichhe Perfume chu a thlek kual dan dan a, a bih uluk viau mai lehnghal a. "Hmeichhe Perfume te kha Discount ṭhatlai a nia, i bialnu tan i duh lo a mi?" thutak fe a ka tih chuan a nui deuh suk a, awi....bialnu a nei tak tak emaw ni le.



"Ka nu tan eng hi nge ṭha ang, pitar hman tur" a tih chuan ka lo thaw huai mai.



"Delicacy hi rimtui ka ti, Love potion hi chu a tleirawl deuh a ti maithei, a rim a sexy a" tiin Catalogue a mi chu ka va kawk zauh a, "Hei hi lo ti rawh, engtik ah nge a lo thlen ang?" a ti zui zat a, ka rin aichuan a awlsam a, ka kawhhmuh lah chu a man tlawm pawl a ni miahlo lehnghal.




"Tunkarah chuan thlen hman awm tak" a dang a la bih leh vang chuan ka enpui leh vat a, "I bialnu ta tur a mi?" ka tih leh laia a rawn hawi nen chuan kan inmelh hnai khawp mai, ka kun hnaih laitakin a lo hawi a, ka mitah tak min lo en zui, ka thinphu han ran em em zia lah chu!



"Bialnu ka nei hleinem" a ti zawi sup a, ê khai! Beng thleng thlenga bawp khai mai a nia ka duh ni.



"Hmeichhe Perfume i hmang ṭhin a mi?" ka tih laia ka aw chu a lawi deuh rut mai.



"Hmang lo e, ka en kual mai mai" a zak ve deuh nge ni a keu kual thuak thuak a, a tawp lama Wellness chu a en ran ran a, "Christ-a eitur chi te hi a awm lo maw?" a tih chuan enge kawhhmuh chi lah chu ka hre derlo a, "Ka u ta a nia, ka zawt ang" tih leh U mawipuii Phone ka rual a.



"Au mawi, naupang eitur chi a duh a, eng hi nge ṭha ang?"



"Englam nge a duh a?" ka chhan laichuan midang a be mawlh mawlh a, ka ṭawng chu a ngaihsak lo khawp mai a, ka ngei leh ram ram tawh, a inhralhna tur buaipui lai laiin, chu loah Prof chuan min lo la en ve reng bawk si, ka rilru chuan 'Chhimbuk'a ti mawlh mawlh tawh.




A rawn ṭawng leh chuan lak tama a tlawm theih dan te a rawn sawi teh nuai a, a sawi pawh ka sawi chhawng thiam vel lo e a, Company dang te a sawi in ka hria "I sawidan ka hrethiamlo" ka tih laiin Prof chuan "Ka lo be dawn a mi?" a lo ti zauh a, Phone chu Speaker On in dawhkanah chuan la dahthla nghal a. Chutih laiin "Khawimaw i pathlawi hmelṭhaa chu ka lo bia ang" a la rawn ti lang lang zui a.



A va han ti zahthlak ve le!!



Prof lah chu a nui miahlo lehnghal a, Phone chu enin a ngawi reng ringawt. "Au mawi kan ngaithla dun che" ka tih rual chuan " Naupang eitur chu Company dangah ṭha lutuk mai kan nei a mahse, aman a to a, bur khatah pawh a result alang ang, Course khat eitir la, singkhat sanghnihin a nia, singkhatin ka pe dawn che nia" ka chil ka lo haklo chauh a ni! 'Lei duh suh' lo tih mai ka nap.




An inbiak zawm mawlh mawlh a, inthlahrung deuhin ka ṭhu ngawiran ringawt tawh, Perfume min dawr tawh bawk si, Au mawi chuan a lo bum hrep ang tih te pawh ka hlau, a thil zawrh a fak ar ek nasa thei si, awi.....a hlep ṭha thei bawk si.



"Nang pawn ei la, a ṭhat zia chu bur khatah pawh a hriat a lawm" rei dawn an inbiak hnuah chuan Umawipuii chuan a lo ti leh a "Nia, Nutraceuticals chu a ṭha tih ka hria a lawm, anih chuan ka ei awm tur chi te a awm ve em?" Prof chuan a ti zui zat a.



"Awm tehreng mai" lehlam a mi chu a phur hmel khawp mai.



"In sawiselna enge maw te i nei em, zunthlum; thisen sang emaw, thau chhe paih ngai tih angreng te?" Umawiin a tih leh laia "Pre Diabetes ka ni mek a" Prof in a lo tih chuan ka lo en rang khawp mai, a han sawi takah chuan tun hnai hian a cher deuh hlekin ka hre reng a ni, a chauh hmel ka ti ṭhin hle bawk anih kha.




"Anih chuan Coffee ṭha deuh ka chawh ang che, Sangthum leh tih man a nia mahse, a ṭha lutuk, regular deuha i consume chuan Diabetes i neilo hrim hrim ang, Pre Diabetes nih lai kha in enkawl ṭhat hun lai, a pawimawh lai tak a nia, damchhunga zunthlum damdawi eiloh theihna chance ṭha lutuk i la nei a nia" ka lo nui hawk a, Prof erawh a thutak hle thung, Au mawii chuan sum tam tak a sawichuak leh thei mai dawn a nih hi ka lo ti rilru a.



Ka rin ang ngeiin an in chah ta tak tak a, chutah ka u mawipuii pek chuan a la duhtawk mai lo, thil ṭul lo lutuk tak mai a rawn zawrh a nih chu!



"Mipa lam damdawi te i mamawh em, Sugar a san hi chuan heti lama chakloh hi a awl a, ṭha deuh ka nei a sin" a ti leh mauh mai.



"Eng damdawi a?" Prof pawh a nuih a za deuhin ka hria.



"A hnawih chi leh ei chi a awm a, a thawk tak tak a nia aw" a sawi lai chuan ka lo kut chi lo hawi vel a ni ta ber, Mawichhimbuki chuan min ti zak kher mai, ka hmuh hun chu a chaklo mai mai ang chu aw.




"Ngailo e, chulam chu ka mamawh lo, ka thil chah chu min lo neihsak thuai dawn nia" damthlupa Prof in a tih lai te chuan ka zak ru chem chem tawh, an inbiak zawh chuan ka Phone chu lain pawn kawt zawlah ka chhuahpui nghal daih a, na deuh deuhin thawk ka la sek sek ringawt a, thli thaw vuk vuk chuan awm a ti nuam huai huai mai bawk.




Mipa damdawi berkher han zawrh, chulam harsatna a sawi pawh ni tawp silo, a ti awm anglo ka ti lutuk a, nuihzat lamah pawh a kallo, thin a ti rim a lawm le, Prof lah a la upa lo a, Diabetes em pawh a la ni lo a, a pian en pawn.....aaa....Umawipuii chu ka hau dawn.



Inchhunga ka luh leh laichuan TV hma ah ṭhuin Laptop a lo bih a, khua a dur em vangin tukverh inhawng te chu ka khar sawk sawk a, van lamah chuan ruahtui pai tih hriat takin chhum a dum chhah nguk mai bawk. Thli a thaw vuk vuk renga pawn pangpar te chu a ṭil zo mai ang tih ka lo hlau ru hle a, kawngka bulah dingin pawn lam chu ka thlir reng a, Prof thung chuan Christ a mutna room a Check a niang, room lamah a awm daih thung.



Rei vaklo ah khua rawn thim deuh mupin ruah chu a rawn sur buan buan a, thli a tlehtel deuh bawk a, rial lian vakloin a tla phuar phuar bawk, Pangpar ṭhenkhat tal chu bathlara hun a ṭhain ka hria, hetiang chuan a chul chhe zo vek thei mai ang.



Hmanhmawh deuh chuan ka tlanchhuak a, Pot lo awm hnai hmasa sa chu bathlarah chuan ka dah zung zung a, ka huh anih pawn ka haw ṭep tawh tho a, ka pawi ti em em lo, dawrah ka kawr hakthlak ka dah tho bawk a, vawiin chu ka haw hma theih ni tur a ni bawk.



Thli a thaw nasa lutuka chet pawh a har lam mah a ni, a vawi ruk nana ka tlan phei leh chiah chu Pot hunna hnu leinawi ruahin a nan diak laiah chuan mawng sawh dawtin ka tawlhthlu ta pek a lawm, ka tluk rualin ka tukkhum ka vaw zawt bawka, ka taksa chu a hik mup a, ka thal chiang khawp mai.



Thawh mai ka tum laichuan Prof Famkima aw ka hre zui a, "A na em?" tih paha ka lam pana a lo pen chhuak chu ka hmu zui a, chutihlai chuan ka lo ṭhu chhuak tawh, ka ke ala nat vangin ka tho mai thei rihlo thung.



Mahse le, rinloh tak maiin ka tlukna nalah chuan a rawn tlu ve leh ta zawt a, a bawp sei zet chuan ka mawngah tak min rawn tlawh zawt mai, hmalamah bu nghal dawrhin ka bula Pot inhung chu a bawhtla nuaih mai bawk.



Rei a rial lo, ka zak tawn tawnah rawn dawmin min tung tho nawlh a, "A va zia lo e aw, Floor tile hi a nal lutuk a nih hi" ti niah niah chungin min pawm kang leh nawlh a. Ruah a la sur em? Thli a la thaw em? Engmah chu lam chu ka hre tawh barlo, Professor awm lum vung vung nghengin a taksa ah ka bei mek tih zawng chu ka hria a, a lungphu ri dup dup pawh chiangtakin ka hria, hnuailam aṭang chuan a khabe kual mawi zet leh a hrawkbawk sexy lutuk mai te chu chiang fein ka hmu thei bawk.



Ka thinphu a rangin thaw lak a tawi mat mai bawk a, ka hmulthi te chu an ding sung sung hialin ka ring a ni, Prof chuan tihrawl chak tak a nei tih pawh ka chiang ngang mai, chutah bathlar kan thlen rual chuan min rawn en in, a rawn vei nuihsuk a, min bia a mahse, enge a sawi ka hre miahlo!



Professor enge tunah khan i sawi le?




(End of chapter - 6)

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)