ZUNZAM S2 by Ahmangaihi violette Khiangte (Completed)

Moderator: writers

Ngaia
Site Admin
Posts: 25813
Joined: April 30th, 2016, 4:07 pm

Re: ZUNZAM S2 by Ahmangaihi violette Khiangte (Completed)

Unread post by Ngaia » March 6th, 2022, 7:45 pm

ZUNZAM - by Ahmangaihi violette Khiangte


CHAPTER - 13




Kan inkawtah min mangṭhain min let san a, rin aitakin kan thleng hma a; kan tlan chak deuh bawk a ni. Inchhunga ka luh chuan ka chhungte chu an lo reh ṭhiap a, Sitting room ah Tv chu On sa in a lo awm bawk a, inchung lamah an awm a nih hmel e.




Kailawna ka pen chhoh laichuan ka nu lo chhuk tur chiah nen kan intawk a, "Zanin chu in van inhawng rei ve, i pa khi a nuam sam lo reng a, a Result pawh ka la hrilh lo a; i u in a hrilh che em?" a tih chuan ka bu nghat a, ani pawh chu a nuam sam lo emaw tih mai tur hmel a pu a.




"A bulah chuan engmah la sawi chi a ni lo ang" a ti leh a, "Engtikah nge an zai dawn?" ti a ka zawh chuan "Kar tharah hian an zai ang, a taksa a Fit rih lo a tunah chuan, a Bp te kha a hniam a" a ti leh a, a rilru a buai hmel viau bawk.




"Tunah mu a mi.." tih pahin ka nu chu ka kal pel a, ka pindan ah pawh lut tlang loin ka nu te pindan lam ka pan a, khum a ka pa lo mu ka hmuh chuan ka rilru a hnim leh ruai tawh. "E, i lo haw chiah a law, chaw i ei tawh em?" a lo ti thuai a, chhan pawh ka chhang lawk thei lo.




A khum bulah chuan va ṭhuin a kut chu ka va chul ringawt a, "I hrawk kha a la na reng em?" tiin ka en tlawk tlawk a.




"A nuam lo sawt khawp mai, hetah hian bâwk a awm a" tih pahin a na lai chu min lo hmuh ve mai a, a pang lah chu a sa vur mai si a, a mit sen rum aṭang pawh chuan a na hle dawn tih chu a hriat reng. "Ka Cancer anih ka ring deuh a" a tih leh chuan a hmuh loh lamah mittui ka hru zauh a, sawi tur a vang khawp mai, ka hnuk a ulh ṭeuh a, ka hrawk chu hnawh tu awm ang mai hian a tawt tlat bawk a, lo hnem chu duh ve sateh mahila; ka ti hleithei meuh lo chu a ni.




"Pa, an zai che a nga i ṭha leh vat mai ang, ṭawngṭai i duh em?" tiin ka zawt a, kan damloh nikhua hian damna dilin min ṭawngṭai sak ziah ṭhin a, naupan lai aṭanga kan tih dan ṭhan a ni a, ka theihtawka ṭawngṭai sak chu tun dinhmuna ka rilru a lang awm chhun a ni.




"E...i lo hlauthawng lutuk ange, hetiang bâwk te chu Doctor ten an zai dam zung zung mai a lawm" tiin min rawn nuih a, a Cancer tih chu kei kher chuan ka hrilh ngam hauh lo ang. A kut chu nghet deuha vuanin ka ṭawngṭai sak a, chumi hnuah a mutna chu ka siamrem sak a, chhuahsan mai tuma ka inher uk tawh chu "Eng nge i ah puar luah kha?" ti a min lo zawh vang chuan ka ding leh rih.




"Eng lo..?" ka tih laiin "Lo ṭhu leh lawk teh" a lo ti leh a, ngaih ṭha zan lo hmel a pu.




"Inruk te hi in lo tum mai mai a nge, i ṭhianpa kha chuan i nu lung a thlu lo emai a, ti lui lo rawh aw, nu leh pa thu awih hi a ṭha ngai, nakina i inchhir leh na tur thil i tih ka hlau riau a nia" a ti dap dap a.




"Tum lo e" ka ti tak nain keimah chu ka in hre ru rauh rauh thung. "Chaw chu zuk ei ve thuai rawh, nizan ka mu tlem deuh a zanin chu mut hma kan tum a nge" a tih takah chuan ka chhuahsan a, chawei pawh chu ka chak chuang lo.




Ka pindana ka inthlak zawh hnuah Nu Thani mutna lam ka pan a, min lo hmuh chuan nuisangin min lo bia a, "I chau em, i thawkrim ve bawk si a, hmuh pawh kan inhmu thei hleinem maw le" a lo ti var a. "Eng nge i an?" ka tih chuan a ṭhat thuin min chhang leh thuai a, a hmel a ṭang pawhin a zia hmel viau tawh.




"Naktukah i U Feli a kal leh tawh mai dawn sia, ka khua a har lawk khawp mai, a nau lah hi Hostel-ah a lut laklawh bawk si a" a ti nuah nuah a, Rintei chu Exam hmachhawn tur a nih vangin thla tharah pawh a la rawn chhuak thei kherin ka ring lo.




"Ka nu a awm a lawm, in inawm nitin anga, keipawh ka pa a ṭharai si lo a, inlamah ka awm tam ve tawh ang" ka tih chuan "I pa chu a zia lo tak tak a ni, i ni te ho lah kha tlaiah khan an rawn ṭap pur a, a rilru a lo hrehawm ka hlauthawng khawp mai" a ti leh a, chutianga ka ni te ho an rawn awm anih chuan ka pa chu a lo inhre ru reng tawh zawk maithei.




"Kan taksa dinhmun inhre lo a awm reng hi ṭha ka ti lo a keichuan, i nuin a hrilh hreh anih chuan nangman hrilh rawh aw, a pawm thiam lo viauin ka ring lo" a tih chu ka pawm zawng tak a ni; mahse, hrilh kher chu ka hreh ve takzet.




"Nu Than..thil zawh duh che ka nei a" ti a ka va ṭhu hnai chu zawhna ngah hmel deuh hian min en a, "U Nunfeli pa kha.." sawizawm loin ka ngawi vung vung a, chumi hnuah "A hmel ka hre chiang miah lo" ka ti ta ngawt a, zawh duh chu ka nei na meuh mai, thu mu hnu; anni puitling zawkin kan hriat loh tura an thup ve ṭang ṭang han zawh chu thil nuam a ni tlat lo.




"A boral na a rei ve tawh bawk em a lawm, in hmuh ve lai te kha chuan in la te em a" zang khai deuh hian a lo ti a, ka zawt phawng mai dawn em maw ni.




"Ti nge pasal dang hi i neih leh miah loh a, Pa Zuala boral te chuan i la valai awm hle sia" ka ti chu a nuih a za deuh a. "Nupa hi chu tisa ringawt ka in nei si lo a lawm, min duh der tu te chu kan tawng lo pawh a ni bik lo, rilru hian châng dang a kan thei tawh lo tlat a ni" thawk la vang vang chunga a tih laichuan a lung a len hmel riauin ka hria.




"Pasal i neih ve hunah i la rawn hrethiam ve mai ang, in unau hi chu in fel a, in nunchang a ṭha bawk a, pasal ṭha deuh in neih ka beisei tlat che u a nia" a tih zawm leh a, a hmel ka en chuan engthil emaw min hrilh duh a nei tlat hian ka hre leh a, ka rilru te hi rawn hmu tlang thei sela, ka hriat duh thil te hi min hrilhfiah sela ka ti takzet.




"Ununfeli te chu...a hmelṭhat bakah hna nghet te a nei bawk a, nupui a tana duhthusam a nia lawm, a ngaihtuah awm nang" ka tih chuan ka lamah a rawn tawlh hnai a "I bialpa kha i nuin a duhpui lo viau che tih ka lo hria a" a rawn ti ta khauh a.




"Nia..Ununfeli bialpa emaw a ti hmasa sia" a mitah tak chik zetin ka en a, ka nu rilru ang chu a pu ve lo a ngaihna a nei ta tlat.




"Tlangval khan a duh hmel riau chein ka lo hria a, Hnahthial aṭang daih tawh khan a en dan ṭhin che kha a danglam riau a.." a tih lehzel takah chuan ka ringhlel ta hauh lo.



"Ununfelin i bulah engtin nge a sawi?" ka ti tawl mai.




"A....Afeli hi chuan a sawi zing ṭhin khawp a, a duh hneh ve hle chuan ka hria mahse, mipa in duh a thlang miau a lawm ti raw" tih pahin tawi te hian min nuih a, ka rilru ah chuan zawhna a rawn lut zut zut tawh.




"Ka nu hian i ngaihdan ang hi nei ve sela ṭha tur a nia" ka ti hap a; chutah, ka kut rawn vuanin chik leh zual hian min en a, "Min hmangaihtu te nge kan hmangaih te hlu zawk tih zawhna chhanna ka hrilh ang che" thutak deuh hian a ti a, midang an lo luh a hlau nge ni kawngka lam chu a melh ruai a, thawm engmah phei chu a awm lo.




"Hmeichhia hi chuan kan hmangaihte hi kawng engkimah kan dah pawimawh ṭhin a, an tan chuan kan inhuamna pawh a sang thei khawp mai; mahse, thil pakhat kan hriat hmaih ṭhin chu maw, kan hmangaihte aichuan min hmangaihtu te kiangah hian hahdamna kan hmu zawk a nia, kan hmangaih te zawk hi min tina tu leh kan rilru hliamtu an ni fo a, min hmangaihtu erawhin chutianga kan awm chu an phal ngai lo, hmangaihte awmna tur dik tak chu hmangaihtu kiangah a ni" a tih dap dap a, keichuan ka hrethiam pha ve hauh lo.




"Hmangaihtu tan chuan hmangaih te tluka hlu an awm si lo a lawm" ka ti zawi sep a, "Chutiang chu Hmangaih tu rilru chu a ni ṭhin a lawm, keipawn i rilru ang chiah hi ka lo pu ve tawh ṭhin a, ka tisual ṭhelh a sin, nula leh tlangval inngaizawng te hmangaihna hi mihring hmangaihna ah chuan a chim chin a sang ber awm e, chuti chung pawhin Agape hmangaihna nena tehkhin rual chu a ni lo anga; mahse, hmangaihtu rilru i hriatthiam theih nan han tehkhin chhin ta che, i hmuh thiam hunah chuan hmangaihtu hlut zia i hrethiam ngeiin ka ring" a ti leh charh charh a, Agape hmangaihna nen ka dinhmun chu tehkhin ngaihna chai ka hre lo.




"Pathian hmangaihna leh mihring te hmangaihna chu ka tehkhin thiam lo, ka hriat duh zawk chu maw...nangin eng kawng nge i zawh tih zawk min hrilh rawh..?" ka ti leh tawl a, min en phawk viau nghe nghe.




"Keiin ka zawh zawk maw..?" a ti deuh haw a. "Ka tisual ṭhelh i ti sia, hetiang hi i tawng tawh a nih ka ring a" a mitah tak en a ka tih leh takah chuan a mak ti hmel chu a danglam chawpchilh a, engthil emaw ngaihtuah let nimai awmin a melh ngai a melh reng a, keiin min chhan hun ka lo nghak ve ran bawk a.




"I hun tawn ang chiah hi hmanah khan ka lo tawng ve tawh a.." a rawn tih chuan "Ka hria a lawm" ka lo ti thuai a, "Engtin nge i hriat?" a tih chuan "Min hrilh phawt rawh, ka hriatna chu a pawimawh lo" ka ti leh tlat a, min zawt lui loin a sawizawm a.




"Kan innei tawh mai dawn emaw ka tih laiin insiksawi fuh loh hun kha a lo thleng a, chu chuan hun rei lo te chhungin kan chhungkua min ṭhen hrang hlawk a ni ber e, ka nu leh pa, ka u leh nau te chuan min phatsan vek emaw tih mai turin ka unaunu lam an ṭang a.




Keilah ka la mawlin ka hma ka sial thiam lo a, chhungte do rawn nih kha ka hlau em em ringawt mai a ni, ka tlangvalpa hnenah chuan inṭhen ka duh thu ka sawi ta a, ani lungawi lo khan min runluih ve bawk a, Afeli hi a lo pian phah ta a" a sawi laichuan lo pawt chatin "Tichuan i pawm leh a maw?" ka lo ti vat a, a ni a bu nghat thung.




"Rei tak chhung chu Afeli nu nei tur hian ka ti lui a, ani lah khan ngaihdam min dilin ka hma ah a ṭhingṭhi hial a, min neih loh chuan dam kha thlahlel mawlh hek lo, ka chhungte chuan ka nei anih chuan min thlauhthlak tur thuin min vau ve reng bawk a, chutah chiah chuan a lawm ka rilru a dang lam tak chu.." ka lam rawn hawiin nuisang hian min en a, zawhna mitmeng nen thutak zetin keiin ka en let a.




"Kei hi hmangaihtu leh hmangaih ka ni ve ve, ka hmangaihte erawh ka tel loin an awm thei a, min thlauhthlak pawh an hreh lo, an kianga ka awm chung pawhin min diriam reng zawk ṭhin, min hmangaihtu erawh kha chu ka tel loin a awm thei lo a, ka kalsan kha hlauin min pawt ṭawk ṭawk reng.." ka lam a rawn hawi leh chuan a mitah thil danglam tak ka hmu a.




'Ka tih ang hian lo ti ve ang che' min ti nimai hian ka hria.



"I huaisen bik hle mai a" ka ti thei ṭawk, a huaisen ka ti, keichuan ka tluk lo takzet a ni.




"Nangpawh i huaisen a lawm, kei ka inruk tir laiin nang chuan i ti ve tlat lo a, i huaisen ka ti khawp mai che, i ngaihzawng hmasa chanchin te pawh ka lo hria a, fanu huaisen leh tuarchhel tak kan nei che ka lo ti tawh zawk a, i hrehawm dawn tih i hre reng chung pawhin i tuar ngam zel a, ka tluk lo zawk mah che anih hi, thil pakhat hre tel ka la duh chu, i tlangvalpa in a thlang tawh che a, inhnukdawk pawh nila Afeli hian a duh ang a hmu kher dawn lo a, amah vang hian timna neih miah suh, hetiang hun ṭha hi kan tawng zen zen lo tih hria la, vawikhat i duhthlanna erawhin damchhung a daih tawh ang" tih pahin ka ban chu a rawn chul hliau hliau a, huaisen kan tih zawng chu a in ang lo kher mai.




Ka pindana ka let hnu chuan Nu Thani thil sawi chu ka ngaihtuah let neuh neuh a, Ufamkima nena tawpna kan siam lai kha ka ngaihtuah let lo thei lo, kei hi hmangaihtu zawk ka lo ni miah lo em maw ni le...!




Ka kaltir theih tur thu ka hrilh laiin Urosy kha chuan a kianga awm dan ngawt a zawnga, a kalsan hleithei der lo a nih kha, keiin duhsakna nen ka thlah laiin Urosy kha chuan.....khai a!...Urosy zawk hi hmangaihtu dik tak zawk tihna em ni..?




Ka thil ngaihtuah chuan ka awm a ti nuam huai huai mai a, eng ka hria chu ni maw, hmangaihtu zawk ka ni lo tih thu ka hre chhuak chuan awm nuam takin min siam tlat chu a nia, Ufamkima kha ka duh em em a, Usamua thung hi ka tan engnge anih ve..tuna chiang taka ka hriat chu min hmangaihtu a ni a, kei hi a hmangaih ka ni tih zawng hi. Hmangaih te awmna tur chu hmangaihtu kiang anih si chuan Usamua hi ka awmna tur chu a ni.



Zing karah Ununfeli Mamit lampanin a liam a, ka nuin Sumo Counter thlengin a va thlah nghe nghe a, chaw eikham a Usamua nen kan inbiak chuan a nu leh pa te nen an insakna tur an en tur thu leh kan dawra an lo pen tur thu a rawn sawi a, ka kal lo mai ang ka ti zet tawh chu hmanhmawh deuh chuan ka insiam leh a, Umawii erawh kan inlama lo awm turin ka hrilh thung.




Chhuna Usamua te an lo thlen laichuan Counter-ah ka lo ṭhu a, ka nu Rengpuii pawh a rawn hawisang vah tawh, a lo kal hmasak a kan boruak vang khan kan nau te ho lah chuan an lo melh hrek hrek a, a inthlahrun awm zawk lek lek a ni.




Usamua pa chu pa lianpui mai tlem a hang lam deuh a ni a, Ramtumbuliana nen khan an in chhun fuh viau a, Usamua hian a nu a chhun zawk anih dawn hi, ani chu a ngoin a sar vung mai a, a pianzia erawh a pa ruangam a phawk fuh hle thunga, a hmelah chuan a nu leh pa hmel ṭha lai lai a chhun anih ka ring.




Pa Rela chu Counter-ah ka ṭhuttir rih a, Usamua te dawhkan ka va kilpui chu a pa nen min lo inchibai tir vat a, apa chu pa zaidam tak a ni ang tih a aw ah a hriat theih, "Eitur chu han lam thuai rawh, Malawmi thingpui lum kha a thlum lo lutuk a, ṭam pawh a hnem hleinem" Nu Rengpuii chuan a lo ti hluk hluk a, ka hriat belh leh ta...Usamua hian mizia ah a pa a chhun zawk a nih dawn hi.




An eitur chah apiang chu ka lam sak a, kan Special menu chu ka chah tel bawk a, an ruala ei ve mai ka rilruk bawk. Chhungkaw chaw eikhawm hi ka inchan a, rilru a hlim ru khawp mai, ka bula ṭhu pawh chuan ka ngaihtuah ang tho chu a ngaihtuah ve anih ka ring.




Suzanne-i eng nge a an ka zawh chuan "A zia rih viau e, kar tharah an in entir ang" pa ber chuan a lo ti thuai a, an chhungkua ah hian lawi ta ila ka te ber dawn anih hi ka ti rilru a, Nu Rengpuii lah a nu lian si a, Suzanne-i a sang bawk si, an mipa te lah chu..ka thil ngaihtuah vang chuan ka nui kar kar a, ka hawi chhuah nak chuan min lo en ṭhap chu niin.




"Hei pawh hi a Su-i ang chiah tur anih hi" Nu Rengpuiin a tih chuan Usamua a lo nui suk a, pa ber chu ka lam lo hawiin "Kan awmlaiin chaw la rawn ei ta che" tiin min sawm a, hnial phal chi ziazâng a ni lo.




"Pathianni chiah hun awl a nei a" Usamuan a lo tih laiin "Kan cham leh rih anga a ni mai a lawm" pa ber chuan a ti khauh a, a ṭawngdan te thleng chuan Usamua nen anin chhun ka ti tak tak a ni.




"Aizawla awm reng hi ka ning riau tawh a nia keichu, nilum aitur awm bawk si lo, upat lamah hi chuan hmun vawt te hi kan ngeih tawh lo" Nu Rengpuiin a ti hlak hlak thunga, Usamua te pafa chu an nui ruh ruh ringawt.




"Republic a kan awmna tur kha ni a kang ṭha a lawm, inchung zawlah nilum i ai ṭhin anga, i tar hunah kan pho chhuak ṭhin che a nga" pa berin fiamthu a a tih chuan kan nui dar dar a, chutah Nu Rengpuii chuan min lo enin "I pa chu eng nge a an a, nghah rei viau te hi i ngai mai ang a?" a rawn ti zui zat a. An chhungkua hian ngaihzawng chungchang pawh tlang deuhin an sawi ho ṭhin a nih dawn hi a..




"Kar tharah hian an zai dawn a" ka ti ve mai a, a zawhna dang erawh ka chhang lem lo.




"Mampuia hi a rial rei ve tawh si a, rei deuh te chu kan nghak thei bik nang, tu mawng ka beng hman lo ang tih pawh ka hlau a nia.." nui chungin a rawn ti leh a, keichu ka lo nui tawi tak ringawt.




"I beng tawh reng a lawm maw...Dinsanga a awm reng a" Usamuan a tih chuan "Tunu ka duh a lawm, Dinsanga zawng a pa siar a nia, a thinchhe hlur a, pawm pawh a pawm ṭhat theih hleinem" a nuin a lo ti hluk hluk a.




"A pi a chhun anih hi mi in a ti zel asin" Usamuan a ti leh a, an pafa chuan an nui kur kur reng.




"Khawiah mah min chhun awkawng lo e, a pa naupan lai hlauh a lawm a nih, in fa chuan min chhun hle sela a ṭha ang" tih pahin min rawn melh kher a, chutia chhungkaw mi ang maia min sawi tel vang chuan kei ka awm a lo nuam ve em em a, ngaihtuahna lah a kal thui duh ngang mai.




An haw dawn chuan eiman min pek an tum a, ka la duh lo chu Nu Rengpuiin min vin hlak hlak a, a lak loh theih loh, kawt thlengin ka zui chhuak a, an Motor a an ṭhutluh hnuah Nu Rengpuii chuan min rawn au leh a "Pathianni chu kan lo beisei dawn che nia" a tih chuan bu nghatin ka nuih var var a, a nui ve lem lo nain min haw lo tih ka chiang em tawh a, a tum bar bar hmel te pawh chu a ngainat awm ta riau hian ka hria.




Zana kan inbiak chuan "Ka pa khan inneih a hmanhmawh riau a, In tharah kan rualin lut ve hman la a duh che a" tiin min lo hrilh a, kum thar lamah chuan luah theih an inbeisei a, rilruin tin zawn ve lo thei lo.




Zirtawp ni a ka pa kan va entir leh chuan zai vat a ngaihthu an lo sawi a, a tuk inrinni ah an zai chuk chuk a, Zemabawk lamah daih kan awm ta bawk nen Pathianni chu loh theih loh a ka ṭhulh a ngai ta, Usamua hnenah inthiam lo deuhin ka va hrilh a, anin min lo hrethiam em em thung a, a nu leh pa lakah mawlh mai chuan ka inthlahrung a ni.




Ka nuin min rawn thlak ve zawk ṭhin tih loh chu ka awmpui chawt a tih theih ang, ka nu aiin ka buaipui chu a duh zawk reng reng a, ka dem hran lo. Ka tan tak pawh a lungawi thlak zawk mah.




Tlai khat chu Umawipuii te nupa haw hnu lawkah ka pa nen chiah Cabin-ah kan ṭhu a, a in tura thei tui ka siam mawlh mawlh laiin Usamua a lo lut hlawl a, ka pa ei theih tur chi eng engemaw a rawn keng nual a, a lo kal tur thu a sawi miah lo bawk. Ka bulah chuan lo kalin ka pa chu eng nge a an a rawn zawt hmasa te te a.




"A la ṭawng ṭha thei rih lo a" ka tih lai chuan zaizir hian ka pa chuan ṭhu turin a lo hui a, ka bula a rawn ṭhu chu ka pa chuan a en duh ṭhin khawp mai, kan inbiak lai te pawh chuan a lo en leh vung vung ṭhin a, a mizia a zir chiang emaw tih mai tur khawpin a en chik bawk.




"I nu te chu an rawn zin leh dawn em?" ka tih chuan "Ka lo zin peih tawh lo a tih hmak hnuah a haw" nui suk suk chungin a ti a, an awmlaia chaw ka ei ta lo chu a lawm lo ru viauin ka ring a ni.




A haw dawn chuan khua a thim ruai tawh a, "In enkawl ṭha rawh aw, chaw te i eiṭha em, i cher riau in ka hria" a haw tur thlah a kan kal dun laichuan a ti mawlh mawlh a, "Chaw ka eitui thei lutuk, ka thau mawh ve a nih hi" ka ti sam mai a.




"Insak kan ṭan tawh a, ka rawn tlawh zing thei lo ang che, zan lamah ka hman chuan lo kal ka tum anga, i eichak te rawn sawi ṭhin la" a ti leh sup sup a, ka nuih a ti za lek lek zawk.




"Dam lo zawk ka nih loh hi aw" nui chunga ka tih chuan "I cher tlat, i dam lo aniang" a ti leh a, a sawi thutak em em lehnghal a.




"Ka mut tlem vang a nih dawn chu" ka tih laiin "Vitamin ka lo lei dawn em ni?" a ti leh zel a, damdawi dawra kal a rawt tak zelah chuan kan han inhnial leh rih a, aw ka pawh hma chu kal tum hmel a pu miah lo. "Anih leh lei ila" ka ti ta ringawt a, a damdawi min leisak chu Hnahthiala ka pi ei atana kan leisak ṭhin ang a la ni zui a, pitar Vitamin ka ti mai.




"Damdawi i eiṭha anga inthau tung tung mai ang" tih pahin a thil lei chu min rawn pe a, "Pitar Vitamin anih hi.." ka lo ti zauh chu a hawi chhuak hluai a, damdawi zuar lam chu en in "Min pek sual a nia, hei...ama ei tur hi a nia..Pitar a ni lo" a ti zui zat a, ka nui chhuak lo chauh.




"Pitar lo pawn a eitheih a lawm" dawr nghak tuin a tih laiin "Nula ei chi a awm lo em ni?" a ti leh kher a, ka inrawlh buai duh lo, nuihzat lamah a kal tlat.




"Kha pitar a nih reng kha.." nui chunga dawr nghak tuin a lo tih chuan ka damdawi ken lai chu min rawn chhuhsak vut a, "Kum 28 chauh a la ni" tih pah chuan na zet hian a va dah ri bur a, a lungawi lo tak tak em maw ni!




Ka va thlek dak dak laichuan chal ti chuar tap chungin min lo en a, "Damdawi dik lo ei hi a hlauhawm a" a ti leh sup a, dawr nghaktu nuih a za viau mai.




"Ka pu hei hi puitling chin chuan a ei theih vek a lawm, chaw ei te a ti tui a, mut ti chhuak thei in duh a ni lawm ni.." dawr nghaktu in a tih leh chuan "Nula hoin an eiṭhin min lo pe rawh" a ti lui tlat a, vawiin chu a thu a duh reuh tak tak a ni.




Dawr nghaktuin a dang min rawn pek pawh chu a en uluk viau tawh, a bura hmeichhe lem awm vang chuan a lungawi ta a niang Polythene-ah a khunga, a Bike dahna lam kan pan laite chuan ka la nui kar kar a, ani erawh a ngawi run thung a, "Vawiin chu i tih a tam riau mai, i hah deuh a mi a?" ka tih chuan a bu nghat ringawt.




"Palian pui thu awih lo deuh i ang dawn tlat" ka tih leh chuan min melh rulh a, min chhang lem hlei lo a. Chutah, Bike-a a lawn tur a mawnga ka ben sak chiah chu a rawn inher rang khawp mai.




Min en run run a, a lungawi lo emaw ni, min en dan chu a inthlahrunawm zawk. "Tinge..?" ka tih chuan "Tinge hmeichhe ho hian ka mawng hi in ben ziah le?" a rawn ti.




"Tu nge i mawng lo beng a, a va ti awm lo ve" ka tih laiin "Mawng ben hi chu mipa tih tur ah ka ngai a" a ti leh mauh mai.




"A ni bik lo a niang chu, ka beng a lawm" ka nui hak a, ngun deuha min en pahin "Min it em mawni?" a ti leh pek a..ka lai dawn dawn.




"It e..." ti a ka fiamthu laiin "Keipawn" thu tak deuh hian a lo ti ve a, a hmel landan mawlh chuan ka nuih a ti za, a duhawm ka ti.



"Kal tawh rawh, tumah i mawng ben tir tawh lo la" ka tih chuan a nui ta suk a, a nui hmelṭha em em mai lehnghal a.



"Mistiri.." Bike a ṭhut hnuah lo hawi chhuak lehin phawk lek lek hian min rawn en a. "Ka duat..." ka tih chuan a lai ngang mai, a laih ka rin viau changa lai duh ngai miah si lo.




"Kal rawh.." tih pahin ka dulah min rawn nam a, nuam ka ti ve laklawh tlat.



"Usamu..ka duat.." ka tih leh chuan ka lam a lo hawi duh tawh lo.



"Usamu...ka duhlai.."


"Saitluangpui..Va mu tawm tek la anih chu" hma lam en vung vung chungin a ti a, hetiang hian a lo lai chhe ve thei ang tih ngaihna pawh ka lo hre hleinem, enga tinge he mihring hian ka duhthusam ang zawng zawng mizia hi a neih mai le, mihring ni loin Angel a ni tak takin a nia ka rin tawh ni.


(Zawmna)


Cabin lama ka let leh chuan ka pa chu a lo muthlu lup lup tawh a, Umawii Tiffin min lo pek chu a zahve pawh ka ei lo ang tih tur a ni, ka pum ṭha lo a zual a, hmuihmer lam ka eithei meuh lo. Chaw eikham ah tihtur em em a awm loh vangin ka mutna tur ka siam a; ka mu nghal thuai a, kan chhungkaw Whatsapp group ka en chuan ka Ni Hmingliani te nufa ho an lo titi a, ka pa chanchin te min lo zawt sap sap a, "Thlak i ngaih chuan lo sawi rawh aw, kan hman reng a nia" U Thanan a lo ti bawk.




Thil dang daih ka lo ngaihtuah a, tunah chuan ka Ni pawh ka Nutei a ni ta chu a nia, ka nu chungchang sawipui ka duh a, chumai niloin ka pa chanchin thlenga zawh vek ka duh, engkim ka hre tawh tih hi hria sela ka duh a ni.




Ka inngaihtuah ngut ngut laichuan Usamua Message a lo thleng a, In a thlen tawh thu min lo hrilhin eng nge ka tih mek min zawt a, "Ka mu tawm tek.." ti a ka lo chhan hnu lawkah min lo call a. "Zanin chu i uang riau mai.." nuihza aw lek lek hian a lo ti a.



"Min ti hlim em a lawm" ka tih chuan a chhan min zawt leh zat a.



"Aw...Nula Vitamin te min lei a.." tiin ka lo nui kar kar a.



"I in sin lum tawh em, Phone khawih rei lo la, muthilh kha tum lui rawh aw" a tih laiin "La inbia ila" ka lo ti leh a, a lai leh ṭut tawh a ni chek ang chu a nui suk ri ka hria.




"U Samu, ka duat.." ka ti leh chiah chu a rawn chek hluk a.



"Ti ziah suh, keiman a lawm duat che" a rawn tih chuan a nuam veng veng.



Rei deuh kan inbia a, a piancham te ka zawt a, ani chu June ah a pianga, kei July ah ka piang thung, Fur laiin kan piang ve ve anih chu. A ngainat zawng thil hrang hrang ka zawt kual a, a rawng duh ber chu rawng pawl a ni a, a Music ngainat zawng chu ka rin loh deuhin Classic rock a ni mauh mai, Super heroes Movie leh Epic Fantasy lam a ngaina a, chutah kher chuan kan inmil thlap, Lord of the rings ka la enpui ang mawle.




"Ngaihzawng engzat nge i neih tawh?" ka tih chuan a nui mai a, a sawi ṭha duh vak lo.




"Nang zawk?" a tih chuan ka sawi zak deuh a, keichuan ka nei nual tawh, thawk khat laikhan reilo te te ngaihzawng ka nei a ka ṭhen leh mai ṭhin a, rilru pe taka ka ngaihzawn erawh amah tiamin pahnih chauh an la ni.




"Keimah chiah ngaihzawng i la nei a mi?" ka zawhna chu a zawttu ngei pawh chuan ka awih lo.




"A pahnihna i ni" a ti phei chu ka awih lo lehzual.



"Ti nge a, ka van.. awih chiah lo..." ka ti niah niah a, tupawh zawt ila an awih bikin ka ring lo, tlangval hmelṭha leh pianthiam tak nungchang duhawm tak nei a ni miau a.




"Ka lerh hma viau a sin" a tih leh chuan ka lo nui hak a, a chanchin chu hriat belh zel ka duh vangin ka dilchhut ngang mai.




"Tunge, a hmelṭha em..?" tih ang reng ka zawt mawlh mawlh a, chuta min lo chhanna vang chuan ka zawh loh tawp tur ka zawt niin ka hria.




"Kum 18 mi anihin a boral a, a rei tawh a; keipawh naupang te ka la ni" a tih laichuan sawi nuam a ti vak lo tih ka hre thei. Thil dang ka sawipui thuai a; mahse, kan inbiak zawh hnu thlengin ka ngaihtuah zui ta reng a, ngaihzawng pahnih chiah a la nei a nih si chuan; a ngaihzawng hmasa boral ta chu a sun rei viau anih ka ring a, engtianga boral nge maw anih le? Chu erawh ka tana zawh mawi a ni tawh lo.




Usamua chungchang ngawt chu ngaihtuahin rei deuh thleng ka meng a, kan intawn tirh laia a hmel lang dam ruih te, khawkhen tuar hrep tawh ang maia a mitmeng zuai ṭhin te kha, ka ngaihbel nge ni mi khawhar tak niin ka hre thar a, ka lainat ti ila ka sawisual in ka ring lo, ka theihtawka duat let ve chu ka thupui ber a ni ta bawk.




Rei vak lo Damdawiina kan awm leh hnuah in lama inenkawl turin kan haw a, kan haw zan chuan Usamua pawh a lo leng ve nghe nghe a, a lo luh lai chuan ka nu nen Sitting room ah kan lo ṭhu a, ka pa erawh Tv en chungin a mu thung. Ruah a tlak cherh cherh vangin a sam chu a hnawng deuh a, zanin ang khaw chhe hnuaiah chuan ka lo beisei ngam lo zawk a, a lo leng erawh ka lawm ngang mai.




"I chau awm si a, i lo lan pawh ka lo beisei lo a sin" ka bula a lo ṭhut lai chuan ka lo ti var a, "Vawiin chu laklawh kan nei lo a, eng nge in an zel?" a lo ti ve thuai a, a dar huh vel ka lo bensak laichuan ka nu chuan min melh kar reng.




"A zia sawt lutuk, thil pawh a ei ṭha thei tawh lutuk" ka tih laiin ka nu chu a tho thut a, min hmu peih lo te pawh a ni mahna inchung lamah a chho ta daih a, a rawn lang leh ta miah lo.




Ka pa chu a muhil a, a muttui bawk aniang a thaw ri sak sak reng a, rei vak loah ruah a rawn sur zui ta bawk nen inngheng chialin Tv hma ah kan ṭhu a, ruah sur vanga Tv thawm hriat ṭhat theih loh chu pawi kan ti lo dun kher ang chu.




"Nuam lo i ti em, inthlahrung miah suh aw, i hman changin i lo leng ziah tho dawn nia" ka ti a, ka nu awmdan vang khan nuam a tih loh phah ka hlau a ni. Min chhang loin ka kut chu a hum nghet salh salh a, la kangin a hmuiah a chuk tuah vang vang bawk a, thu a sawifiahna kan mamawh lo kan rilru chu kan inhmu chiang dun em a, a ngawih vang vang na chuan ka zawhna chhanna chu min pe zawk a ni.




"I sam hi a rimtui lutuk" a rawn tih chuan ka hawi ve vat a, a lo awm hnaih em vangin kan inthawi thuak a, thawk a rang phat thei. Chutah zawimuanga rawn hnaiin ka hmui a rawn fawp a, muang leh ril raihin a nia min fawh ni. Ka awmah chuan a kut a rawn nghat a, ka lungphu dup dup chu a hria a ni ngeiang a duhthawh sawt hle a, ka tan chhan let loh phal rual a ni lo.




A kut lum vung vunga ka awmbawr a rawn ṭham rual chuan thawk ka lo la hak a, a mal chunga ka ṭhut lai reng ka hre lo a, a kut lawnga ka kawr chhung a rawn zen lai pawh chuan ka hnar hek lo, min fawhna vang chuan ka vai riai ringawt tawh. A thaw lak na lutuk te chuan phurna mak deuh min neih tira, a chet lak rem turin ka lo insiamrem ve sauh sauh a, kan am dun sawt ngang mai. Chutih laiin ka pa chu kan lam hawiin a rawn inlet thak a, Usamua malchung aṭang chuan ka persawn nawlh a ni ber.




Hamhaih deuha min en laichuan awm dawm meuh hian ka lo en let a, la kham lo tih hriat lutukin min rawn hnaih leh zat bawk. "A chiloh ka pa a harh ang" ka lo tih chuan a va thlek ve zawk a, ka pa chu a la harh mai bik lo. Mahse, ka hlauthawng a ni, pa te mutna bul lawka infawh chu thla a muang thei meuh lo a.




"Bathroom ah kal ang" zawi sup hian a rawn ti a, a mitmeng chu a nalh ngang mai, eng nge a duh pawh ka hai lo, ṭawng tuma ka an zuau laichuan min rawn fawp leh a, ngenngawl leh duhthawh fahranin...




"Inneih hma chuan kan chesual thei lo ang, kan innei ṭep tawh a, insum ang aw" ka sawilai chuan a hmuiin ka nghawng a nul thla dan dan a, thawk ka lo la leh hak ṭhin. "Ka fawp ringawt ang che" a tih chuan ka ring thlap, min nawr lui dawn lo tih hi ka hria a, a sawmna chu hnar loin ka zui ta chu a nia, inkai chungin thawmdim lutuk a Bathroom kan pan lai chuan nuih a za lek lek a ni.




"Thawm dim rawh aw" Bathroom kawngkhar ka hawn hma chuan ka ti leh te te a, a lo bu ve nghat mai. Kan lut fel chiah tihah ka kawr a rawn hlim a, keilah chu remlo lutukin Washing machine ngheng chuan ka ding a, ka dik hleithei tawh lo, nichin ang khan rilru nuamin ka awm tawh tlat lo.




"Tinge a..?" hnai deuhah min en chunga a rawn tih chuan ka hmui ka pet fan fan ringawt a, ani erawh a nui suk thung.




"Min hlau suh" a tih chuan "Ka hlau lo che" ka ti ve leh lawi a, kan kalthui lutuk ang tih erawh ka hlauthawng hle tawh, a chhan pawh ka tana hnar awlsam a ni tlat lo a, chuta min rawn fawh lehna erawh a dan a dang ta deuh, lungchim zetin min fawp a, min fan hneh ngang mai.




A duh ang thal a min fawh hnu chuan a inla hrang a, a insum nasa ve hle tih chu a hmel ah chuan ka hmu thei, a biang tawn tawnah dawmin kan han innuih leh rih a, "U Samu.." ka tih rualin "Aw..ka duat" a lo ti ve zat a.




"Duat che ka tum a sin.." nui var var chunga ka tih leh chuan "Keiman a lawm duat che" a ti leh khauh a, duattu zawk nih a duh miau chuan duat zawk nih chu ka hreh lo nasa, hnial buai lo tak ka ni.




Bathroom aṭanga kan chhuah chuan ruah pawh a lo han titih tawh a, "Ruah han laihian ka va haw a nge, nangpawh mu har lo la, min lo nghah pahin i lo mu tawm tek dawn nia" nui suk suk a tih chuan a mawngah ka lo beng ri thlawp a, a phu zuk lehnghal.




A kalchhuak tur chu Veranda hulhliapin a zar hliah chin thleng chuan ka thlah a, ruah chu a han ṭha duh meuh lo, a la tla seng seng renga, hritlan a awl duh dawn riauin ka hria. "Helmet ka khum dawn a lawm, ka thleng har lo ang" a tih mai vang chuan ka chelh duh ta lo, dar pawh a tlai lam deuh tawh reng reng a.




Kawngpui a rah thlak hmachuan a kawngah ka va kuah leh rih, a Helmet khum ṭhat mawlh mawlh pahin ka lamah a rawn thle hnai a, keiin a biangah ka lo fawh sak zauh a. "Lut rawh le.." a tih takah chuan luhsan tumin ka inhera; mahse, ka banah a pawt leh tlat lawi a, eng a hria chu ni maw!




Min pawt letin kawngpui lamhawi chuan min dintira, ani ka hnungah dingin min rawn kuah hlun a, a rimtui inkah rim chuan min zem chiai chiai mai, a lungphu leh a pangtilum chen chuan chiang takin ka hre thei a, 'Tlai mah var ila kan in ning chuang hlei lawng e' tih ang tak tak kha kan ni ber e.




"Mangṭha tih hi ngai tawh lo se ka van ti ve" ka lu-ah a khabe rawn nghah pahin a ti sup sup a, kawt kaia Motor tlan zut zut thlir chuan engemaw chen chu kan han ding dun leh a, sawi tur kan hria a zeng pawh a ni lo, 'Mangṭha' tih sawi a hun tawh a; kan sawi thei lo ve ve lawi si a.




Darkar chanve zen zawn kan din hnuah kan inthlah ta hram a, "Lut hmasa rawh" a ti tak nain "Ka en liam ang che" ka ti ve thung, inkham lo tak chungin kan inthlah leh ta phawt chu a nia, a tlan liam hnu phei chuan khua a har vawng vawng mai a ni.




Inchhunga ka luh leh hnuah ka pa ka kai tho a, mu tura pindan lam a pan chu ka zui ve zel a, an Room chu a lo thim ṭhiap tawh a, ka nu lah chu a lo mu hlun tawh, ka rilru tak chuan ka lawm vak lo, tun hma kha chuan rilruin heti lam zawngin thil a thlir ngai lo hrim hrim a, han ngaihmawh deuh tur ang pawh engmah ka hmu thiam ṭhin lo a, tuna kan han hetih takah chuan ngaihmawh tur a tam ta riau a, rilru a na hma em em mai bawk.




Mihring te famkim lohna ka ti dawn nge famkimna ka ti zawk dawn ka hre lo, ka mit tih var a a awm tak hnu hian ka nu leh pa inkar hi tun hma a ka ngaihdan nen chuan inpersan tak a ni tawh, nupa inhmangaih tak emaw ka tih ṭhin kha an lo ni lo nasa hle in ka hre ta, an inhau ngailoh vang khan an in kar kha a ṭha em em ah ka ngai a, an inpawh loh lutuk vang zawk a ni tih ka lo hmuh ṭhelh reng zawk a, ka nu ka dem lo thei lo.




Ka pa chu Damdawi te ka eitir leh hnuah ka pindan lam ka pan ta chauh a, rei vak lo Usamua nen kan inbia a, zing karah hnathawh a ngaih vangin zan lam hi chu ka be rei hreh ṭhin a, kei erawh ka muhil thei lo hi eng engemaw ngaihtuahin ka meng reng ṭhin, mut hmunah ngaihtuahna a vak thui duh ṭhin khawp mai.




Dawr pawh ka kal ve leh zauh ṭhin tih loh chu Umawipuii kutah ka dah chawt a ni ber e, Pa Rela a fel a; engkimah a rintlak bawk a Umawipuii indaih loh chang pawhin a lo pui lawp lawp ṭhin a, an buai ka hlauh vangin tlailam inhawng rei lo turin ka ti ta ngawt kha a nia.




Ka ni Hmingliani te nufa in min rawn tlawh awl lo a, a lo kal chang hian ka nu chanchin sawipui ka tum ziah a, a fala biakna hun a van em vangin sawina remchang ka la nei thei lo thung. Phone-a ka sawi chuan zep a neih ka ringa, hmai chhanah ngei zawh ka duh ve tlat bawk.




USamua chu in sa in a buai hle a, a sawi danah an inhmun chu tun hma a an unau luah ṭhin bul mai a ni awm a, hmun zau deuh leh Motor kawngpui bul mai a ni bawk a, vengchhung mi te nen pawh an inhre nel sa viau ni tur a ni. Slab an khawih ṭan vangin an bang tlai thei hle a; zan lamah pawh kan inhmu hman meuh tawh lo, amah zawk chu a inthlahrung zawkah a ṭanga, ka han hriatthiam ve tehlul nen chuan.




Mak tih deuh mai thil pakhat ka nei, chu chu ka nu hian Usamua nena kan chungchang hi a sawi ngai ta miah lo a, ka pa hian ṭawngkam a lo nei nge ni ka ti deuh, Ununfeli nen erawh Phone-in an in be ngun hle a, an rilru a dam ta nge maw ti ka ti hial a, ka beisei ang aiin thil chu a pangngai a ni ber, Chutih rualin kan inchhung boruak erawhin tun hma chu pha lo tak a ni.




Ka pa dam loh ve tak zelah chuan Nu Thani pawh Hnanthial lamah a awm phei rih a, Urinkimi lah chuan Ununfeli nen kan chung chang chu min rawn zawt chik hle a, Urampuiin a lo sawi darh niawm tak a ni, "Ka nu chuan a lo ringhlel daih tawh che u a, an thiam lo vek che a nia, Afeli dinhmun lo chhe ve bawk nen" a ti sap sap a, amah tak chuan min thiam lo ve lem loin ka hria.




"Thil an hriat chian loh vang a nih dawn chu, an hriat chian hunah an ngaihdan an thlak ve mai ang" ka lo tihsan a, ka ngaihthah lui ve a ni ber e.




Inrinni tlaikhat chu Ni Hmingliani bazar haw a lo kawi a, ka nu bazara a chhuahlai a ni nghe nghe, ka pa eiturin Coconut leh Theibuhfai tih angreng a rawn lei ṭeuh a, ka pa nen pindanah kan pathumin kan titi a, chu chu hun remchang tak niin ka hria, ka pa awmlaia sawi erawh ka hreh ru viau thung.




"Ni, ka nu nge ka chhun ka pa zawk?" ka ti hmasa te te a, "In unau hi chu kan lamah in kal ve ve, i Umawii hi chuan keimah ber hi min chhun in ka hria" tiin a nui hak hak a, "Ka nu ka chhun ve tho em?" ka tih leh chuan "Chhun em em pawh ka hre lo, vun rawngah te chuan i chhun ve deuh lo maw...i nu hi chu a ngo vur lo nain a vun hi a nung sar reng a" a ti leh siam siam a, ka tum chu a la hrethiam lo ngang mai.




"U Nunfeli nu ni loin ka nu tak tak a nia ka tih" ka tih takah chuan ka pa nen an rawn hawi phawk ta khawp a, keiin thutak zetin ka lo melh tawn ve bawk, ka thil zawh chuan a ti hamhaih dun viau a ni ngei ang min chhan lawk nachang pawh an hre lo.





(END OF CHAPTER - 13)



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 6th, 2022, 7:46 pm

ZUNZAM - by Ahmangaihi violette Khiangte


CHAPTER - 14




"Ka nu hi ka nu hrawn tih ka hre tawh a, Ununfeli nu zawk anih thu pawh ka hre vek tawh" ka tih nawn leh chuan an inmelh dun ringawt a; chutah, ka pa zawk chu ka lam lo hawiin "I nu a nia lawm, i nuhrawn a ni hleinem" hmel pha dai chungin a rawn ti a, a mitmeng chu a tlanchhiain a lungngaih hmel viau mai.




"Ka hre vek tawh pa, ka nuin Umawipuii bula a sawi lai ka hria a lawm, engmah zep loin min hrilh tawh rawh u" a mitah tak en chunga ka tih takah chuan phat ngaihna vak a hre lo nge ni ka kut chu a rawn vuan chawt a, "I nu hian a hrin ang chiahin a hmangaih che tih hre reng rawh aw, i sen lai aṭanga duat taka chawilian tu che a ni a, a en hrang bik reng reng lo che a nia" a ti charh charh a, chulam thuartham erawh ka hriat duh ber a ni lo.




"Min hringtu ka nu chanchin zawk chu min hrilh rawh u, tu nge ka pa tih te ka hre vek duh" ka ti leh hap a, a ngenin ka ngen a ni mah ang.




Ka ni chu enin "Ni, tu nge ka pa?" ka ti leh tawl a, "Aaa...ka hre..hleinem" a ti niah niah a, a riatnawi hle ringawt a..hahthlak hian a...




"I nu khan tu hnenah mah i pa chanchin kha min hrilh duh lo a, a boral dawn thleng khan a sawi duh lo a" ka pain a tih chuan bei a dawng tak zet a ni.




"Zawn chhuah dan a awm lo em ni? Rin dan pawh in nei thiam miah lo a mi?" an pahnih chuan ka melh tawn a, a ngaihna an hriat loh hmel hle ringawt.




"A ṭhiannu Maruati kha kan zawt ṭhin a, a hriat loh thuin min chhang zel a" ka Ni in a tih laiin "Zawn chhuah a ngai chuang hleinem Bawihi, a la dam anih pawhin nupui fanau te a nei anga, mi chhungkaw buaina kan thlen zawk ang, kei i pa ka awm a, chhungkua i nei reng a lawm, i pa lam chu ngaihtuah duh mah ta che" ka pa in a lo ti ve charh charh a, chutiang ngawt chu ni theiin ka hre lo, tunge a nih chauh hriat ka duh a, ka hre ta anih pawhin va inhriattir kher chu ka thil duh a ni lo bawk.




"Ka nu ṭhiannu Maruati chu khawiah nge a chen, engemaw hriat a neih ka ring" ka tih chuan ka pa chu a lawm ta vak lo niin ka hria. "I pian hmain ka zawt vek tawh, i pian hnuah pawh ka zawt leh a engmah hriat a nei lo" a ti ta hluk a, a sawi ping viau nain kei erawh ka la beidawng ngawt thei lo.




"UZaitei khan a sawi duh tlat loh danah pawh buai chi an ni lo anih kan ring a, Mimite...i nu meuhin kan hriat a duh loh chuan a chhan a awm ah ngai la, i nu duh dan pawh a ni zawk ania" ka darah min rawn kuah pahin ka ni chuan a ti sap sap a, chu chu ka rindan ve tho a ni, chutih rualin ngaihdan tam tak ka nei tho bawk a.




"Ka hrilh che kha awih rawh aw, i nu leh pa te hian kan fanu dik takah kan ngai che a, chuvang chu a nia i hriat kher kha ṭul kan tih loh chhan pawh, i nu pawhin.." a sawilai chu lo pawt chatin "Ka nu ka aṭanga hria ka ni a, a sawi chhuah danah i ngaihdan ang a pu lo anih ka ring zawk, ni lo sela Umawipuii bulah pawh a sawi miah lo ang" ka ti ve ta tlat a. Ka nu min enkawl danah hian lungawi lohna emaw vuina ka nei lo, chu a hnekin vui ngam tur pawh ka ni hek lo; mahse, Umawii bula a ṭawngkam erawh ngaih kawi loh har ka ti a ni.




"Ka nu ṭhiannu chu hmuh ka duh a, a hre tur awm min kawhhmuh tur tal a lo nei maithei a sin, ka pa chu ka zawng chhuak anih pawhin va inhriattir kher tum ka ni lo a, tunge anih chauh hriat ka duh, a hmel hmuh ringawt pawh ka duh tawk ang" ka tih leh takah chuan min hrethiam ve ta in ka hria.




"Maruati chu i nu ṭhian kawm ber ṭhin ania, School khatah an thawk dun ṭhin a, tunah chuan Kanan-ah an khawsa in ka hria, kan inhmuh lohna a rei tawh a; an la awm reng em pawh ka hre chuang lo, a thawhna School ah khan a la thawk anih chuan a zawn chhuah theih mai ang" ka ni in a tih chuan beiseina ka nei lian leh hle tawh.




Ka pa chu a hlauthawng a, ka nu laka ka lungawi loh vanga min hringtu ka pa chu zawn ka tum ah a ngai a ni, chutiang rilru chu ka pu lo a, a hnena ka sawi ang tak kha ka rilru a ni, ka pa chu a la dam anih phawt chuan a hmel hmu lo a awm chu ka tum lo hle thung, eng ang mi nge a nih a, engtin nge a khawsak ṭhin tih te hriat ka duh a, mahni hringtu pa hre miah lo a awm chu ka duh lo hle bawk.




Ka pa muthilh hnuah ka ni nen inhnuaiah kan titi a, ka nu chanchin te min hrilh mawlh mawlh a, "I hman hunah lo leng la, a thlalak te ka lo pe ve ang che, i sen laikhan ka chhangchhe si a, ka enkawl thei ngang si lo che a, i pa hian a hmangaih em che a; a hnenah i nawmsak zawk kha ka ring bawk a" a tih laichuan a inthlahrun hmel ngang mai. Ka nu thlalak chu ka hmu ve fo tawh a; mahse, ka pa kawl chhun pawh ka hmuh na a rei tawh a, a hmel pawh ka mitthla thiam meuh tawh lo.




Ka ni chuan ka nu ṭhiannu te chenna chu min zawh chian sak tur thu a sawi a, ka pa a hre dawt lo anih pawhin rin dan tal a neih thiam ka la ring fan a, beisei erawh a chaurau viau thung.




"Mimite, i nu chuan Mawipuii bulah engtin chiah nge a sawi?" ti a min zawh chuan ka hriat dan ang ang chu ka hrilh a, "Hetiang hi chu a la thlen ka ring ṭhin a, i pa khan U Thanzuali te chhung he lamah an awm dawn tih min hrilh khan ṭha ka ti lutuk lo a, ho teah neuh neuh hi a awm ṭhin bawk si a; mahse, i nu hi nu sual tak chu niin ka hre lo, nangpawh hei leh chen a enkawl tawh che a, a lakah vui lo la, beisei chin tawk i hre mai dawn nia, a hrin i nilo a, a lo tilang ta deuh anih leh a tur ve rengah te pawh ngai zawk la, i rilru pawh a dam zawk ang" a ti dap dap a, chu chu ngaihdan ṭha tak a ni.




Mahse le....thawk leh khata nu chan thut ka ni a, ka nu min enkawltu hmangaihna ka lo dawn tawh ang kha ka laka lantir ve tawh lo tur anga ka ngaih hian ka na lo thei ṭhin lo.




Zan mut hmunah Usamua nen kan inbia a, chhun lama ka chhungte nen kan inbiakna te pawh chu ka hrilh ve vek a, beisei loh deuhin min lo phur pui a, "Kan zawng chhuak thei mai ang, ka kalpui dawn che nia" a lo ti var a, engtia tih vak ngaihna la hre lo mahila awm erawh a ti nuam ve viau tho.




"Ruah tui a tlak chhung chu kan chawl rih dawn a, ka hman lai tak a ni ang" a ti tak nain ka ni Hmingin thu thar a rawn nei anih loh chuan bul ṭan dan tur a vang rih hle.




Ka pa Doctor-in min lo Phone a, Chemo kan khai ṭan thei tawh dawn anih hmel a, tun ṭum erawh ka nuin "Ka va kalpui ange, dawr lamah inbuai ang" a tih vangin keipawh dawr lamah ka kal leh tawh a, kan dam sawt ta deuh bawk nen rilru pawh a hahdam ve takzet tawh.




Tlai khat chu ka ni Hmingin min rawn Phone ta hlawl a, "Maruati te chu Khatla ah an lo insawn tawh a, a School thawhna ngaiah chuan a la thawk a mahse, amah tak ka la be lo a, nangman i be dawn nge ka biak sak dawn che?" tiin min zawt a, keimah ngei an ina kal ka duh thu ka hrilh thung.




A tuk inrinni ah Usamua nen kan va kal a, a in awmna tak kan hriat loh vangin kan zawng chawp viau nghe nghe, vanneih thlak deuhin an hmelhriat te dawrah kan zawt fuh hlauh a, an in awmna te min lo hrilh a; kan va kal chuan a lo awm lai tak a ni bawk a, ka han insawi erawh a hamhaih hmel ngang mai a, min lo chhawn dan chu thil ṭha lo va thlen tum te pawh kan ang lek lek zawk a ni.




Thil awmzia ka hrilh hnu chuan a inngaihtuah ngun ta khawp mai a, a sawi hreh viau aniang "I chhung ten an hriatpui che em?" a ti leh rih a, "Ka ni in min lo tir a, ka pa pawn min hriatpui thlap e" tiin nuisangin ka lo chhang a.




"Mimi-i maw i hming kha, i nu nen in in ang hle mai a" min thlek vang vang pahin a ti leh a, keiin kan kal chhan leh kan hriat duh ang te chu ka lo sawi ve mawlh mawlh a, Usamu chu thlekin ka pasal a ni em tih min zawt hmasa te te a, "Ka pasal tur" tiin ka hrilh ve mai bawk.




"Pasal i neih dawn vangin em ni i pa chu zawn chhuah i duh?" a tih chuan chhan dan tur ka bang bo khawp mai. "Aw ni e" ti a Usamuan a lo chhan na chu sawisel ka nei lem lo.




"A...i beisei ang chu a ni lo maithei a ni, nupui fanau nei lai a nia, i piang ve tih hi a hre miah lo bawk a, chuvang a nia i nu khan a zep tlat ni" a tih chuan min ṭhawng lem lo, ngaihdan hrang hrang kha ka nei sa a, ka pa chu mi pawmlai anih loh vek pawhin ka nu zirlai naupang emaw a nih ka ring a, thup chhan ṭha tak a awm tih chu ka rin sa a ni.




"Amah hriat ka duh a, anin min hre ve se ka ti hran miah lo a nia, khawngaihin i hriat ang zawng zawng chu min hrilh rawh" min hrilh loh ka hlau bawk a; ka ngenngawl sawt khawp mai.




"I pa te nen chuan School khatah kan thawk ho ṭhin a, i pa chu kan Principal a ni ṭhin, khang hun laikha i pa pathlawi lai a ni a, i nu ang nula nungchang ṭha leh fel lakah kha chuan tlangval tupawh an nem thei ang chu.




Mahse, i nu kha i pa pathlawi; fa pawh kum 12 mi nei tawh zunah khan a uai ta tlat a, nang a pai che tih a inhriat kha chuan i pa nupui kha a lo haw leh hman tawh a, nangchu i nu thuruk i ni ta ngawt mai a ni, School aṭangin i nu kha a bang zui a, damtein i piang anga tia beiseina sang tak nen kan thlir laiin i nu kha a boral leh ta si a, i pianhlim khan ka pawm ve nghe nghe che a sin.




I nu boral kha chu a pawi ngawt mai, a rai laiin a hrisel lo a; a naupai kha titla mai turin thu ka rawn hial a, ani lah khan hrin che a tum ruh em em thung a, 'Ka tihsual rah a ni a, ka fain a tawrh ka rem ti lo, tuar zawk kan awm anih chuan kei a tisual tu hi tuar tur ka ni' a ti ngar ngar zel a, vawikhat mah tihtlak che tumin ngaihtuahna a hmang duh ngai lo, a hrin che khan thisen a hloh nasa a, i pian aṭanga darkar tam pawh a ral hmain a boral ta a ni" a ti charh charh a, zawhna ka ngah tehlul nen ka rilru a chawmawlh zo a, ngaihtuahna a mang duk tawh.




"I pa chu mi piangthar ṭha tak a ni tawh a, tunah hian an lawina kohhran ah pawh kohhran upa a ni mek a, an khawsak pawh a harsa lo, College principal ni tawhin vengchhung ah pawh awmthei pawl an ni nghe nghe. Mahse, ka sawitawh ang khan nupui fanau nei a ni a, i piang ve tih lah a hre si lo a, engtin nge an lo chhawn ang che ngaihdan ka nei thiam lo khawp mai" a ti leh sap sap a.




"A damṭhat chuan a lawmawm anih chu, a hming leh a Address min hrilh la, a hmel tal ka hmuh ve chuan ka duhtawk ang" zangkhai fahranin ka ti a, tunah tak hi chuan ka thaw a ipik riau a, keimah chauhin awm ila chuan ka ṭah theih mai ka ring. Ka awm dan a hrethiam nge ni Usamua chuan zawitein ka hnungah a lo beng thak thak a, a lam ka va hawi chuan a mitmei hmangin engemaw hi min lo hrilh a, hahdam turin min ti nimai hian ka hria.




"I pa hming chu Dr.Lalfakzuala a nia" tiin Nu Maruatin ka pa te veng leh an in awmna min hrilh a, ka pa chu a damṭha a, a khawsak pawh a nuam tih ka hria chuan min tih hahdamin awm a ni nuam ve riau a ni, ka ṭanpuina a mamawh lo a; ka piang ve tih lah a hre hek lo, chhungkaw dinin nun nuam tak anei tih hriat ringawt pawh ka lawm tawk a tling hle zawk.




Kan haw lamah dawrah tlang loin Usamua te inah kan kawi a, Suzanne-i te nufa chu Dawrpuia a pu te inlamah an leng phei a ni awm e, Ramdinzuala erawh kan thlen hnu lawkah a kal chhuak a, tumah midang awm ta lo chu Usamua khumah inkuah riala muin kan titi a, ka pa thawhna College ka zawh theihnghilh chu pawi ka tih thu ka hrilh ve sap sap a.




"Beisei sang lo la, i rilru a nat phah hlauh a nge, engmah chân tur i nei lo a, i rilru tihah duh miah suh" a tih chuan ka lo bu ve nghat nghat a. "Ka inhriat tir loh hi ṭha i ti ve tho em?" ti a ka zawhna chu a ngaihtuah vung vung hnuah "Hriat tir chu a ṭha zawk ang" a ti khauh mai.




"Ti nge..?" inchung lam hawia a mu chu a biangah han dawmin ka kuai her a, hnai deuhah kan in melh ran a.




"Mi tih loh dan a ni hleinem, puitlin hnua in zawng chhuak chauh hi nang lo pawh tam tak an awm a lawm, Mamit a kan ṭhenawm pa pawhin a hriat lohin fa pahnih lai a lo nei a, in hriattir la ka duh chhan tak erawh i thisen zawmpui i pa ngei anih vang a ni, ka hnena i lo kal hreh chhan hi i chhungkua chân i hlauh vang niin ka hre bawk a" a tih chuan ka ngaihtuahna a buai ve ta riau a, engnge ṭha ber tur erawh ka hrethiam lo tak zet.




"I duh dan ang kha a ṭha ka ti lo chuang miah lo, nangchu ka hnenah i awm daih dawn a, i pa in a hriat loh che pawn danglam tur a awm hleinem" nui suk chunga ti lehin min rawn kuah nghet salh a, a hmuiin ka chal a rawn tawh rual chuan mit ka lo chhing vang vang thung.




"Thil hi ka ngaihtuah thui lutuk nge ka hre lo, ka hlauthawng ṭhin a, hmeichhia hi chu kan chan a chhe hma si a, pasal neih hnu thleng pawhin.." ka biangah rawn fawp lehin "I chan chhiat ka phal lo" a ti leh sup a, mipa hi chuan hmeichhe ngaihtuahna hi an hmu phak ve tak tak ṭhin lo.




"Hetiang hian min dawhthei reng dawn em ni, nakin lawkah min hmangaih lo ta la, duh dang te nei ta la engtin nge ka awm ang.." fiamthu titak deuh a ka tih chuan min en kar mai.




"Hmangaihna chuan eng ang pian nge a neih?" tiin min zawt khauh a, rang lutukin ka kut pahnih chuan Love Sign ka lo siam a, "Keini chu khatiang a ni lo ang" lu thin pah ah a tih leh chuan zawhna mitmengin ka melh let zat a.




"Hetiang zawk hi kan ni ang" tiin boruakah a kut a lek kanga, a kut zungṭanga bial a thai kual lai chuan a ngaihna ka hre ta chiah lo.




"Thinlung lem hi hmangaihna entir nan an hmang a.." ka tih laimekin ka chal a rawn fawp leh a "Circle hi ka hmangaihna che entir na a ni" a ti nawn leh a.




"Tawpna awm loin kan pahnih ah chauh a kalkual reng ang, Circle chuan tawpna a nei lo.." ka lo tih chuan a bu ta nghat a, "I van Sweet ve.." nui var var a ka tih chuan a mit ko a san duh lek chauh.




A hmuia ka han fawp zauh chu "I kawr hi phelh ang aw..." tih leh ka kawr chung chu rawn ban a rual a, "E he.. a tih chi dawn a mi, khumah ka mu si a.." phawk deuh a ka tih chuan "A hnuai a mi hi chu i ha thei ang.." a ti leh mai a, ka kawr chung ka phelh laichuan a T-shirt a hlip ve thuai a, kawrbah nen ka mut laiin a ni erawhin kawr a ha tawh lo.




"I bula mut dawn chuan kawr hak theih loh te i ti tlat a nge aw..." ka lo ti kha kha chu a nuih a za khawp mai. "Chhah deuh chu phal lo ang" tih leh min kuah a rual a, a pangtilum chu ka hrechiang ngang mai a, a rim pawh chiang takin ka hre thei, a rimtui ka ti.



"Kuminah in chu in sa zo hman angem?" tiin ka zawt a.




"A chung leh a hnuai chu kan zo hman ang, inchung sanga Room neih i duh ka ring a, i lo awm hunah i duh angin kan khawih dawn nia" a ti leh mauh mai a, chutiang thleng thleng chu ka la ngaihtuah ngam rih lo, duh aiin ka phur mah mah dawn tlat.




"Ka hriat tirh che khan i ṭawngmawh hmel ka ti lutuk che a; mahse, ka hriat chian che hian i ṭawng duh hle sia" ka tih chuan a nuih a za viau, "Tumah hian min hrechiang tak tak lo, chu chu i danglam ka tihna a nia, kan inhmuhtirh aṭangin nelawm takin min be nghal a, thil ho deuh deuh min zawt ṭhin mahla chhan loh che kha a har riau zel a" a tih chuan ka ngaihtuah let a, ka zawt ho chu ka in ti ve tho mai.




"Ka zawhna ho deuh deuh kha min chhang ho ve tho a nia, 'Bang in a dawl zawh loh ruah a sur' te i tih kha aw..." ka ti nang nang a, kha mi ṭuma min chhanna kha chuan ka nuih a la ti za reng.




"Ka mitah tak min en kiau chungin min zawt a, i duhawm bawk si a, ka zam deuh aniang" a tih chuan ka fawp lo thei lo.




"Min hmuh tirhin hmelṭha min ti em..?" nui chungin ka ti leh a, a lu zu han thing reuh chuan.



"Anih enga tinge min bem si.." ka ti hlak a.



"Ka hre lo le, pindan chhung thim deuhah khan i zun a zam nasa lutuk a nih ka ring" a tih chuan ka ner nang ringawt.




"Ka hip ve hle che i tihna anih chu.." ka ti leh erawh min hnial lo, "Min hip a lawm, i ṭawngdan te, min en dan te, i engkim hi ka tan chuan a hmuh nawm bik riau ṭhin.." a ti sap sap a.




"Heti hian hmaichhanah kan infak reng dawn a mi.." ka tih chuan "Ṭawngka hi chu engmah a ni lo, heti hian a fiah duh zawk" tih leh min fawh a rual a, a duhthawh ngang mai. Khumah mu chunga nula leh tlangval an infawh tawh chuan thil dang vak thleng tur a awm lo, duh aiin kan kal thui hman ṭep a ni.




Dar 3 rik hmain dawrah min thlah a, Coffee te in dunin rei vak lo chu a ṭhu ve rih a, a haw hnu lawkah ruah a rawn sur ta bawk nen kan inkhar thuai a, in ka thlen chuan dar 7 a ri awrh chauh.




Ka nuin ka pa Treatment lak dan tur min lo hrilh a "Ni 21 danah Chemo khai tur a nia, kum thar lamah chuan a hem theih ka ring, a taksa a fit ṭhat reng a ngai a, a ṭhat chak viau chuan hem pawh a ngai lo maithei, Afeli helama a awm chuan a tihzia viau ang, Nurse pangngai enkawl chu a dan pawh a dang deuh ang chu" a ti luam a, ka chhang lem lo nain chak awm lem loh tak a ni.




Thawhṭan tuk chu hma deuhah ka chhuak a, ka Scooty la chhuakin Nu Maruatin ka pa te in a sawi lam chu ka pan a, Ufamkima te veng piah lawkah a ni nghe nghe, an in chu Building uk kharh mai a ni a, a lian viau lo nain a pawn lam aṭang pawhin an awmthei thawkhat tih a hriat a, engzat nge cheng tih takngial pawh ka lo zawt hauh lo.




An kawt lan theihna laiah chuan ka ding ren rawn a, sana ka en chuan dar 9 a la ri lo a, a College kal tur ka lo chang a ni ber. Chutia an in lam hawia ka din reng laichuan nu pakhat hi puan bih chungin a rawn chhuak a, a inchei dan chu inkhawm tur a ang hle bawk.




Ka lampan chuan lo kalphei zelin a Bag khai a hai pah rak rak a, theih nghilh a nei a niang ka piah lawkah chuan a ding a, nulian ti a sawi tur a ni lem lo; chutah, inher lehin "Mama..."tiin tu emaw hi a au lang lang a, ka pa nupui a ni ngei ang le.




"Vic-a....Liansangzual...." a tih leh chuan inchhung lam aṭangin mipa aw hian a rawn chhawn a, "Ka Phone kha mi han lak rawh, choka dawhkanah khan a awm ang" a tih hnu lawkah mipa lianpui hi kekawr leh tawn zau hain a lo chhuak a, Usamua te ang rual vel tur a ni, ka unaupa anih hmel....




A nu chu a let leh vangin mipa lo chhuak chu a lo thleng thui ve lo a, a hmel pawh ka hmu chiang vak lo, "I pa a lo haw dawn kha, kal hma lutuk lo mai rawh, JH-a pawh hrilh la, zin haw laia tumah lo awm loh chu a fuh lo ang" a tih ri ka hriat takah chuan ka hnual deuh rawih a, vawiin chuan ka hmu thei dawn lo niin a lang.




Dawr ka thlen phei leh hnuah ka ngaihtuah neuh neuh a, ka unaupa ka thisen zawmpui ngei hmel chu ka hmu ta phawt chu a nia, ral aṭang chauhin hmu mahila nuam ka ti ve tak zet. Usamua Phone-in ka va hrilh a, "I pa kha Ramdinzuala te Principal a lo nia, tlaiah ka lo hruai dawn che nia, i hriat duhzawng sawi tur a nei ang" a tih chuan phur tak ka ni.




Ka helhhawlh deuh nge ni; dar thum velah chuan kawngka lam ka thlir sek reng tawh, Umawipuii lah chuan "An chhungkua an intihthiam loh phah a hlauhawma va in hriattir miah suh" a lo ti ve reng bawk a.




Darkar chanve hnuah Usamua a lo thlenga, "Kal nghal ila" ka lo ti var a, "Ramdinzuala a lo la bang lo a sin" ti mahse, kal chu ka rawt ta tho, "Nizanah kan lo sawi dun a, i pa chuan fapa a nei a, Secretariat ah a thawk a ni awm e" tiin min hrilh a, Nu Maruati sawi naupang kum 12 mi kha a ni ngeiin ka ring.




An inkawt kan thlen chuan Ramdinzuala lo haw tur nen kan intawk a, chutia keini pathum inzuilut chu Suzanne-in mak a lo ti ngang mai a, "Chaw kan eikhawm dawn a mi a?" a lo ti he haw a, Usamuan a hrilhfiah ta in ka hria, Sofa ah ṭhu a kan titi laiin ka ṭhiani chuan thingpui min lo lum sak a, Ramtumbuliana chu zawhna ka zawt mawlh mawlh a ni ber.




"Pa fel deuh mai a nia, a Pension ṭep tawh, kum thar lamah hian a chhuah hman ka ring, a fapa pawh sawrkar hna thawk tho a nia, an nu kha chuan eng mah a thawh awm ka hre lo" a ti ve luam a, ka pa thlalak te chu min hmuh nghe nghe a, a upat hmel viau tawh nain a ṭhatlai chuan pa hmelṭha tak anih ka ring, thlalakah chuan Suit dum a ha a, a samṭuak var veu chuan a ti langsar zual a, a nuisang hmel chu hmuh a nuam hle bawk.




"An inah ka kalpui dawn che a mi?" a tih erawh ka hnial a, kal chu ka chak lo a ni bik lo; mahse, Umawipuii thil sawi vang khan ka rilru a buai leh deuh a, keimah vang a ka pain buaina a neih chu ka duh lo a, eng harsatna mah thlen loh ka tum bawk ang.




In a ka haw hnu thlengin thildang ka ngaihtuah thei meuh lo, ka pa hnena Ramdinzuala thlalak min pek ka Phone a mi chu ka entir a, "Khawiah emaw ka hmu tawh, ka hre chhuak thei mai lo" a ti niah niah a, a hnu lawkah "I nu boral khan a lo kal vein ka hria" a ti leh a, ngaihtuah a ti thui leh viau a ni, a chhan chu a lo kal a nih chuan ka nu boral chhan a hre ve ngei anga, kei hi a fa ka ni tih pawh a hre mai thei, chutiang chu lo ni ta se a duhthlanna ngeia min ngaihthah a ni thei bawk.




Zanriah eilaiin ka nuin ka beisei loh deuh thil a rawn sawi a, "Afeli Transfer chu an ti fel thei a, thla thar aṭangin helamah a awm tawh ang, Civil-ah a thawk dawn" a ti bawl mai a, min en dan chu Warning min pe te pawh a ang lek lek.




Pathianni hmasa berah Umawipuii te nu pa leh ka nu hoin inhnuai kan sing sa a, kar thar aṭangin Nu Thani pawh a lo let leh tawh dawn a, Rintei a rawn hruai bawk ang, kawng lehlam zawnga ngaihtuah chuan kalsan pawh an huphurh awm dawn lohin ka hria a, chu chu ka inhnemna ber a ni, ka pa pawn enkawltu a ngah sawt anga, ngaihngam deuhin pasal ka neih san thei ang chu.




Zanah chuan mut hmunah Usamua nen kan inbia a Ununfeli lo haw tur thu te chu ka hrilh ve a, sawi zui tur vak a hre lo, ka pa eng nge a an min zawt a, "Ka hman veleh ah ka rawn kan ang" tiin min hrilh bawk.




Thawhṭan tuka dawr ka thlen hnu rei vak lo ah Suzanne-i hnen aṭangin Call ka dawng a, "Ramdina hi i pa te inah kal a ngai a, a rualin i kal duh em, i va kalpui anga a hmel te i hmu ve anga" tiin min lo zawt a, ka rilru ka siam fel nghal thei lo, "I duh em?" a lo tih leh takah chuan ka aw ta ringawt a, thlalak ringawta hmuh aichhuan hmaichhana hmuh ve chu ṭha in ka hria, ka phur viau rualin ka zam ru viau lawi a, ka awm a ti nuam lo dawn dawn a; chhungrilah min mawlh rauh rauh reng.




Umawipuii lo thlen veleh ah Suzanne-i te in lam ka pan a, Usamuan min lo Phone tir a nih ka ring. Ka va thlen chuan kawngka an lo khar a, pawh hawn mai ka tum laia Suzanne-i ṭawng thawm vang chuan ka ding leh rih a, an choka a inbe ri anih vangin ka dinna aṭang chuan chiang takin a hriat theih bawk.




"A chhungten phal ringawt mahse, ka nu hi a buaithlak dawn a ni, Nurse khan thil a lo hrilh nasa bawk si a, a tih tawh loh lamah chuan ka nu chu i hriat kha, Usamua chungchang ah ngat phei chuan a huatthu a chhe nasa si, Mimi chhung ten an duh lo tih a hriat aṭangin ṭhen turin a rawn ti nghal chuk chuk duh a nia...ka hrilfiah pawn min hrawk let nek a lawm..." tih thu chuan min ṭhawng mai ni loin min deng dawp a ni ber.




Kawngka ka vuan uk tawh chu ka thlah leh rih a, ka thaw a ipik tup tup mai bawk nen Step lam hawi chuan ka ding ran a, tunah mai khan Usamua chhungten Usamua hnenah min ṭhen turin an lo ti tih ka hre ve chauh a, engtia rei nge ka lakah a lo thup tawh le, Ununfeli kalna lah thla tam a liam leh tawh a, min hrilh a tum miah lo em maw ni?




"Chuvang a lawm a pa tak te hi pawh sela kan tih, miṭha chhungkua an nia, an hnen aṭangin pangngai takin pasal a nei thei ang chu.." Ramdinzualan a tih pawh chu ka beisei loh thil a ni.




"Usamuan chutiang a ngaipawimawh ve vak lo, ka hlauh thawn zawk chu a nei lui anga ka nu hi Mimi lakah a tawrhhlelhawm viau ang tih ka hlau zawk" Suzanne-in a ti ve leh a, an thil sawi chuan min ti chau nghulh thei, haw leh mai tur em mawni ka ti hial a, tun dinhmunah chuan mahni chauha awm ka mamawh.



(Zawmna)



Usamua khan ka pa tak hnenah inhriattir turin min duh thu kha a sawi a, anih chuan Suzanne-i te nupa thil sawi kha a lo tum ve reng tih na em ni, ka tana ti nge anih a atan zawk ngaihdan ka nei thiam lo hle mai. Thil ṭha a ni em tih takngial pawh ka hre lo, ka rilru a lian ber zawk chu ka laka a chhungte rilru put dan mawlh chu a ni, min hrilh loh hian enge thil ṭha a thlen chuan ang.




Ka laka a nu rilru hetiang anih laiin ka pa lo va inhriattir chu thil atthlak tak niin ka hria a, tunah chuan hmu miah lo ila a ṭha zawk bawk, haw leh zawk ila a ṭha ang, rilru fim zawka ka ngaihtuah theih hma chu engthil mah ka ti tur a ni lo.




Step a pen thlak ka tum laichuan lo pen chho thawm ka hria a, Step ka rap uk tawh chu ka ding leh rih a, pen thawm chu a lo hnai zel a; rei vak loah Usamua ngei mai chu a rawn lang hlawl a, thawk ka lo la hluai nghe nghe.




Min hmu chu a phawk ve deuh a, "I lo kal a law?" zawi deuh tak hian a ti a.




"Ka lo thleng chiah, Umawiin min lo Phone leh sia let leh nghal ka ngai" ka tih laichuan ka bul a lo thleng chho der tawh, "Motor ka va la chhuak lawk a, lut leh phawt ila, ka va thlah dawn che nia" a ti ve mai a, ka darah min kuahin inchhung lam min pan pui a, Ramdinzuala te nupa in nuisanga min lo chhawn chu ka nuih let hleithei meuh lo.




"Seal kan va chhut tir lawk dawn nia, Office dawr ka ngai dawn a hmanhmawh chu a ngai ang, rei tak pawh kan awm hman kher lo ang" Ramdinzuala chuan a ti zung zung a, "Ka kal lo mai ang" ka ti chu an nupa chuan min en phawk hle a, chutiang bawkin Usamua pawn.




"Tlawh pawh ka duh chiah lo a, a dam ṭha tih hriat hi ka duh tawk mai" tiin ka insawifiah leh a, zawhna an la ngah hmel viau thung.




"I ti tak tak maw, a remchan lai a sin" ka ṭhiannuin a tih pawh chuan ka hnial leh a, "Pa chu ka nei tawh reng a lawm, ka mamawh bik chuang hleinem, ani pawh ka tel loin a khawsa thei tho a" nuilui zeta ka tih laiin Usamua chu a ngawiran a, engmah a sawi ve lem lo.




"Chibai tal i duh lo a mi?" Ramdinzuala bawk chuan a ti leh a, "Duh hran lo" tih zawngin ka chhang.




"Ka thlah pah chein sawtah kan va kal lawk dawn nia" Usamuan a lo ti takah chuan ka ṭhu zet tawh chu ka tho uaih a, "Hmanhmawh rawh aw, kan buai deuh a" ka ti nghal thuai a.




"Kan inthlak lawk ange" ti a pindan lama a luh vang chuan ka lo ṭhu leh rih a, choka lama Suzanne-i te nupa in be sar sar ri chuan ka awm a ti nuam lo hle tawh, ka hriat loh hian engthil chiah nge maw lo thleng chu le? Nu Rengpuii chuan engtin nge a fapa hnenah ka chungchang a sawi ang? Usamuan engtin nge a lo chhan tih te ka ngaihtuah kual a, zawhna hlirin ka khat a ni ber e.



"Valpui, Motor kan hmang dawna, Bike in kal mai rawh aw" Usamua lo chhuak lehin a tih chuan ka tho ve thuai a, "Kal i duh tak leh min lo hrilh la, tih dan dang pawh awm leh mai ang" Ramdinzualan a tih chuan ka nui tawi khawp mai.




Kawtah Motor a lo inhung a "Khawiah maw kan kal dawn?" ti a ka zawh chuan "Chuang phawt la i hre mai ang" a lo ti et a, thil phurawm tak ti tur hmel a put laiin kei erawh ka phur lo takzet.




Motora kan ṭhut luh hnu chuan min en deuh vang vang a, "I pa chu i hmuh duh ka ringa, ka lo koh tir che anih kha" tiin chhanna hre duh tih hriat takin min en a, ka rin dan kha a dik a nih ka ring ta, Usamua pawh hian a nuin min pawm theih nan chhungkaw dang nen min suih zawm a tum anih mai hmel.




"Duh lo ka tih tawh kha, inhrepawh ta pawh ni ila engmah danglam vak a awm chuang lo ang, an chhungkua a va intahluh ka duh hleinem" ka aw ah chuan lawm lo awka a lang deuh maithei. Min chhang lem loin a tlan chhuak a, rei deuh chu kan ngawi dun vang vang bawk a, a khat tawkin ka va thlek leh ṭhin, engtika min hrilh nge a tum le? Nge ni a min hrilh a lo tum miah lo zawk ni.




Republic lama kan tlan thlak takah chuan ka va thlek vat a "Khawiah nge kan kal dawn?" ka ti nawn leh a. "Ka in sak ka hmuh ve lawk ang che, i lo chhuak remchang bawk a" tiin a nui suk suk a, ka boruak tawnin a zir lo em a; ka phur fahran lo chu a ni.




"I nuamsam vak lo a mi, i va nguai ve?" Min lo thlek zauh pah a a tih chuan tawi tein ka nuih a, "Nuam e.." tiin ka chhang ve mai bawk.



"I lo kal tho sia, i pa chu i hmu leh duh bawk si lo a.." a rawn tih leh chuan ka thin a tawt ṭeuh tawh.




"Ka pa chungchang chu sawi tawh lo ang, a la dam tih ka hria a ka duhtawk" sawi zui tawh lo sela ka duh vangin tukverh lam ka hawi a, a ngawih tak reng vang chuan ka awmdan chu a hre thiam a nih ka ring.




Rei vak lo kan tlan leh hnuah Motor chu a ti dinga, thlanglam ka hawi chuan in sak lai lian ṭha zet hi a lo awm a, a bang ṭhenkhat an khawih tawh a, an la khawih tam hman lo bawk a; a la awng huau a, eng ka ti zo ta nge ni chu in ringawt pawh chuan ka lung a ti zing riau a, pheikhai a zâng duh lo hle bawk.




Motor aṭanga chhukin an In sak chu ka thlir vang vang a "Eng nge a an le?" ka hnunglam aṭanga a rawn tih chuan a "A lian hle mai" ka ti zawi sep a. "Han lut chhin ila" a tih chuan ka hnial ta em lo. In chu chhawng hnihin an sa a, a hnuai zawk chu Slab an chhun bak engmah an la khawih lo tih a hmuh theih nghal a, kawngpui an chiah chu a bang an khawih nual tawh thung, thlang lam bang erawh Brick tlem an rem a, bang chhung lam chu Plaster loh a ni bawk a, a chhuat pawh hnawk ṭha tak a ni.




"He lam hi choka tur a ka hisap a nia, hetah hian Bathroom" tiin a sak tum dan chu min hrilh zung zung a, min lo en changin ka lo bu ve zauh ṭhin a, engmah la hre lo ni ila chuan ka phurpui viau ngei ang; mahse, tunah chuan sawi tur ka hre lo takzet.




"Inchungah khian kan nupa Room awm sela i duh ka ring a, pangpar i phun duh chuan a phunna tur pawh kan siam nghal anga" a sawilaia a hmel nung sarh te chuan ka ṭah a ti chhuak lek lek tawh.




"Pangpar i phun duh a ngem?" a rawn tih leh chuan "Duh hran lo" ka ti leh mai a, a ngaih a ṭha ta vak lo a niang, "Ṭha i ti chiah na nge, i duh dan sawi la, a sawi hun laitak anih hi" a rawn ti leh a, min en reng takah chuan ka han thlek kual leh rih a.




"He tah hian choka i dah dawn maw?" ka ti ta daih a, "Aw, Cabinet pawh i duh danin ka siam dawn nia" a tih chuan nuih chu za duh lo tak a ni.




"Ti nge ka duh dan kher, midang duh dan la zawk la" ka ti hap a, ka in tur ang maia thil a sawi chu ka tha a na deuh tlat.



"Valpuia te nupa hi chu an awm rei lo ang, in pui chang tur zawk ka nia, i duh dan a pawimawh a lawm" te chu a la ti tak deuh deuh a.




"Mistiri ka ni ve si lo a, engmah ka hrethiam ve lo" ka aw chu a zawi hle tawh.



Thlanglam bang awng awmna chu ka pan san a, leirawhchan an dahna bulah chuan va dingin kawmthlang lam chu ka thlir vang vang a, tunah hian ka zawt tawl mai dawn em maw ni?




"Hetah hian Veranda kan dah anga, a zau thei vak lo ang, inchungah chuan kawtzawl a awm thei dawn a, zan thla eng i thlir duh chuan nuam i tih zawk ka ring" ka bula rawn din pahin ka dar a rawn vuan a, min thlek danah chuan engemaw sawi ve sela min ti tih a lang reng a, a hriat duh tur ang chu sawi tur hlawl ka hre lo.




"Bathroom lian deuh i duh bawk ang ti raw..?" zawhna a ngah lutuk chuan ka thin a ti ur lek lek zawk. "I in tur a nia, i thu thu a lawm" ka tih tak hluk ah chuan a ngawi ta ran a, a inthiamloh hmel viau bawk, ka chhan dan vang chuan nuam lo ka ti hnuhnawh hle a; mahse, ka sawi zo vek tawh.




"Ka in a la ni si lo a; sawi ve vak tur pawh ka hre lo, ka inrawlh na tur chi a ni lo deuhin ka hria" pangngai deuh chuan ka ti ṭha leh a. Chutah ka lam lo hawiin "I in tur a nia lawm, kum thar lamah chuan.." ka lo nuih dan vang chuan a ṭawng lai chu a tawp chawt a, mak min ti tih a hmelah chuan a lang reng bawk a, tunah hian zawt vek law law i la ṭhain ka hre ta, ani hi chuan engtikah mah min hrilh a tum hmel loh tlat.




"I in tur ti ringawt mah ta che..kan in nei ngei dawn tih pawh hriat a ni hleinem?" ka ti ta nghat a.




"Eng nge i sawi awmzia, ka hriatthiam turin han sawi law law teh.." inhma tawnin kan indinchilh ran a, a mitah chiang taka en chungin "I chhung ten min neih an rem ti em ni?" ka ti leh khawl a. A lu a buk laichuan ka insum thei tawh ngang lo "Dawt sawi suh" tih leh a awma ben ka rual a, ka kut a lo man chu ka pawt let rang hle.




"Suzanne-in eng nge a hrilh che?" a ti ve ta nge nge.



"Nangmah ngei hian min hrilh tur i nei zawk lo maw?" tiin kan zawt let vat a, kan thutak dun ta viau mai.




"Engmah buaina tur a awm lo" tih paha min rawn ban leh mai a tum chu a ban ka lo vai thla sawk a, "Buaina tur a awm lo maw, i nuin min ṭhen turin a tih che kha" ka ti vin hlak a, a ri meuha ka sawi chhuak chu ka rilru a na zualin ka hria.




"Ka nei ang che ka tih kha; ka la ṭhulh miah lo" a rawn ti leh khauh a.



"Usamu...tinge engmah i sawi loh, buaina ka neih zawng zawng ka hrilh lai che in tinge i zep tlat bik a" ka aw chu a vin lo a, a zawi lam mah a ni.




"A pawimawh lo ka tih kha, thil hriat sual vang mai mai a ni" a tih chuan "Hriat sual chu a hrethiam tawh em ni?" ka ti leh a, min chhang lo a min en reng vang chuan chhanna chu a chiang viau mai.




"Sawi tawh lo teh ang, eng rilru nge put tur pawh ka hrethiam tawh lo" ka pen sawn tur chu min pawt let vat a, "Ka nu chu buaina a tling lo, thinrim laia ri hluai chi a nia, a nem leh vat mai ang" tiin min ring rawh tih melh hian min melh a, a hmel chu thutak viau mah se; tun dinhmun ah chuan rin a har a ni.




"Min hriattir i tum miah lo a mi a, ti nge i sawi miah loh, engtin nge awm sela min tih a?" ka mittui a rawn hnam a, ka aw a lawi lek lek bawk, ṭah loh hram tumin ka inpet ruh fan fan a, kan boruak tawn tawh te ka ngaihtuah let zui nen ka insum hleithei meuh lo.




"A rem loh chuan kawng dang ka ngaihtuah ang, engmah lungngaihna tur a awm lo, lo ngaihtuah buai lo la; min ring tawp mai rawh" a ti charh charh a, kawng dang ngaihtuah chu a ni ka duh loh chu. Keiin ka chhungte remti lo chung ka tum lui pawh tih tawh laiin ani leh zelin ka tih ang a tih chu ka duh lo hulhual a, chhungte rem ti lo ve ve chunga inneih chu kan tluang tawh pawhin ka ring lo.




"Haw phawt ang, nakinah kan sawi ṭha leh dawn nia" ka tih pawh chuan min thlah duh mai lo, ka kut chu a hum vang vang a, ka lak aṭangin a mit a la sawn miah lo bawk.




"Dawrah ka thlah ang che mahse, a thim zawngin ngaihtuahna lo seng lo la, ka lam aṭang chuan buaina a awm lo ang" a ti leh rih a, he laia kan thilsawi hi chuan awmzia vak a nei chuangin ka hre lo a, haw vat a Ununfeli biak ka duh a ni.




Motor a kan let leh laichuan kan inbe lo a, a khat tawkin min rawn thlek leh ṭhin a; kei erawh hma lam enin ka ṭhu ngawi ran a, Motor chhung boruak chu a rit churh hian ka hria. Ka kut a rawn ban laichuan ka lo melh ve vat a, ngawi renga ka kut la kangin a hmui a tawh tir vang vang a, sawitur a vang duh kher mai.




"Ununfeli chuan engtin chiah nge a sawi a?" ka ti ṭha leh a, min chhang dawn lo emaw ti a a ngawih vang vang hnu ah "I nuin min duh loh thu a hrilh a 'Unau kan ni' a ti bawk" a rawn tih chuan thawk ka la hak a, a pawi chin chiah a hrilh ka ring reng a ni.




"I nuin Ununfeli bulah an rim tur thu a hrilh tawh ti raw?" ti a ka zawh chuan a bu nghat a, chutiang a nih phei chuan Nu Rengpuii chuan min pawm lo viau ngei ang, ka dem hauh lo.




"A rei tawh, kan inzui hma a ni" a ti leh a, rei tawh eng ang mah se unau kan lo ni reng tih a hriat chuan min ngaihdan tur chu rindan ka nei thiam a, Ununfeli erawh a inhuam thui khawp mai.




"Ununfeli pawh a duh dawn loh chu" ka tih leh chuan a bu leh mai a, chuti anih chuan amah inngaihthahin keini min tih buai a la tum tak ṭalh chu a nia, ka unaunu Umawipuii thisen zawm ngei ani hi ka awih lo lek lek zawk.




"Ka sawi tawh kha, kumthar ah kan innei ang" a ti leh khawl a, "Chhungte rem tih pui lohin maw?" awih lo fe a ka tih laiin "A ṭul chuan kan in dang nghal ang" a ti leh zel a, chu zawng lung ti zing zualtu mai a ni e.




Kan dawr kawt kan thlen chuan ka chhuk vat a, muangchangin ka hnungah min lo zui a, "Mimite, i zungbun ka lo keng.." Umawiin a lo ti chu chhang loin choka ah ka luhsan a, tui ka va in ṭeuh ringawt a, ka awm a nawm phah lo nasa mai.




Ka va chhuah leh chuan Usamua nen Counter-ah an lo ṭhu dun a, ngawirenga ka va ṭhu chu min melh leh zauh zauh ṭhin a, Umawipuii pawh chuan kan boruak a hrethiam aniang engmah min zawt lo, Usamua erawh a be bawrh bawrh a, chhanna a dawng tawi ṭhin hle thung.




"In inhau a mi a?" a tih chuan kan chhang lo ve ve.



"Ka va phei a nge aw.." Usamuan a rawn tih chuan ka bu nghat a, tho chhuak tawh loin a kal chu ka thlir liam a, a liam chiah tihah Ununfeli ka Call ve zat bawk. Mahse, a la duh hauh lo, a ri a; a Off nghal zel thung a, ka sawi tur a hre lawk te pawh a ni mahna.




"Eng buaina nge in neih a?" Umawiin a tih chuan "Ununfelin Usamua nu hnenah ka nuin a fapa a duhloh thu a hrilh" ka ti bak hluk a, thinrim zetin Ununfeli Number chu ka Call leh ṭhin, chhang duh lo eng ang mahse min pehhel thei chuang lo ang ka ti rilru a, ka thimrim viau laiin Umawii chu kei aimahin a thinrim zawk a, "Keiman kan lo bia a nge, a ni em em tawh lo, zakthei lo lutuk" a ti hlak hlak a.




"Ka nu tihtir te a ni lo maw?" a tih leh chuan ngaihdan ka nei thiam lo, chutiang em chu ka nuin a tih tir duh dawn em maw ni?



Dawhkana ka zungbun a rawn dah chu laiin ka en vang vang a, ka ṭah a chhuak hluah hluah, ka tan chuan a thawl mah mah a, ka bun tawk ngang lo a ni, ka duh em em a; ka tawk lo chung pawhin ka ngaihlu a mahse, ka tana siam ni lo tlata hriatna ka nei tawh, rei tak pawh ka kawl hman lo a nih kha.




"Mate, Samua nu chuan a duh viau che khan ka hria a, thil awmzia a hriat chian hunah chuan a rilru a thlak leh mai ang" tiin ka unaunu chuan min hnem ve a, rilru erawh a dam phah chuang lo.




"Usamua chu a duat lutuk a, ka chhungten an duh lo tih a hriat chuan a thinrim viau ang" ka ti zuai raih a, ka nuin inṭhen tura min duh thu Usamua ka hrilh lai khan a rilru a lo hrehawm dawn hian ka hria a, ka hrilh laikhan eng rilru nge a put ve ang le, keilah khan a ngaihdan tur dawn lo lekin ka lo hrilh lehnghal a.




Tlai a ka haw chu ka pain min lo ko hrang a, "I ṭhianpa kha lengah han sawm rawh, engemaw sawipui duh ka nei a" a lo ti khauh a, engthil nge ka zawh chuan "Engemaw chung changah biak duhna ka nei" a ti leh mai a, ka bulah chuan a sawi ṭha duh hauh lo.




Zanriah ei laiin ka insum zo lo chuan ka nu ka chhuahchhal titih a "Ununfeli chuan Mamitah thil ṭul lo deuh deuh a lo zuk sawi a, ka lawm lo khawp mai; mahse, a tum angin engmah a thleng dawn lo, ka Phone call a la duh lo a, a lo bia che anih chuan ka thinrim hle tih i lo hrilh dawn nia" ka tih chuan ka nu chuan min en phawk hle a, ka pain thil awmzia min lo zawt thuai bawk a.




"Amah bia ula a lo hrilh vek ang che u, thu vaivir leh zualko te chu a thiam zawng tak a lawm, Nurse ni loin Ukil hna thawk zawk sela a inhmeh ngawt ang" thinrim anga lang duh miah loin ka ti leh a, ka ṭawngkam chuan ka nu a ti lawm chiah lo aniang min melh nghal rawm a, ka lo haider lui hmiah thung.




"Nangpawh ka hrilh lawk che a, unau in intih thiamloh ka hlauh vangin ṭhen rawh ka ti che a.." ka nuin a tih laimekin "Ununfeli hrilh ta che, in duh dan a lo in ang lo tih ka hre ve chiah anih chu" ka ti sam mai a, a haw khawp mai.




"Mai mai a che, khatin min ti reng reng suh, tun hnai aṭang hian min zah lo riau mai, mi i do ngar ngar duh mai a, i Ni hnen aṭangin i thil tih ka hre lo bik lo ania, pa hausa deuh i neih vang emaw ni i huaisarin i in luling sawt riau, ka hrilh tawp ang che Saii...i chhiat ṭhata tuam hlawm tur che in engmah an rawn ti lo ang, keini bawk a ni buaipui tu tur che chu" a ti kha kha a, min en reng tih ka hriat vangin ka en duh lo a, ka chaw bar ka ṭhulh phah hek lo, ka inti luhlul lui a, rilru ka sawh nghet sauh sauh bawk.




"Duhtawk rawh u, Feli rawn haw sela chhungkuain kan sawi fel ang" ka pa in a tih chuan ka nu bawk a lo inrawlh leh a "Min do a duh vanga a pa zawng chhuak ngat kha a nia, tlan tauh nan a hmang thei em kan en ang chu, ngai reng mah rawh chhiat ṭhat tawk se an rawn buaipui lo khawp ang" a ti leh hlak a, ka lo nuih vang chuan a ṭhu ngil nghal hluai a.



"Mi awih vak nange a..?" a aw chu chang ṭha tak a ni.



"Ka awih lo ngai hleinem che, ka chhiat ṭhata min buaipuitu i nia lawm, i hnen aṭang ngeia pasal neih ka duh bawk a, tunah pawh min buaipui ka duh" tih leh thawh ka rual a, kut ka sil lai leh Sitting room lam ka pan thleng chuan min en zui a, a ang hlak hlak ri in a zawm zat bawk.




Mut hmunah rei lo te Usamua nen kan inbia a, vawiin lama a sawi ngai tho kha a ni a sawi ni. "Lo ngaihtuah hah lo la, ka nu chu buaina tur a awm lo" a ti tawp mai si a, hmeichhia a zawnga thil ngaihtuah nasa lutuk chi hian engtin nge ka ngaihtuah loh theih tehlul ang.




Rilru buai deuhin kar ka hmang liam a, thu thar engmah phei chu ka hre zui chuang lo, a chang chuan ka in ti paukhauh ve ṭhin hle a, a changin ka inngaihtuah lungpuam leh thul, ka nu Thani leh Rintei lo thleng boruak nen kan inchhung boruak chu a nuam lo zual a, ka pa damṭha tal hi nisela chuan awm a nuam deuh maithei a ni.




Pathian ni zan thimhlim hlawtah Number hriatloh hnen aṭangin Phone Call ka dawng a, "Mimi-i a ni em?" nelawm lem loh zeta lo ti tu chu Usamua nu ngei a ni bawk. Rei lo te tak tak kan inbia a, thu tlem te chauh a sawi bawk a, mahse...a thu min hrilh chuan min vilh ngut ngut a, ka ṭap chhuak hial mai.




"Ka fapa hi i nuin a duh lo tih ka lo hria a, 'Palai lo tir suh se' a lo ti lehnghal a, eng anga awmthei leh chapo pawh ni ula ka fapa hi in phu ka ti ngai bik lo ang, nupui hmu zo lo a ni bik lo a, nangni chhungkua nena inzawm kha kan chak bik hran lo e, ṭhen la, ka fapa chu nupui dang ka neih tir dawn nia" vin hauh lo leh fiah fek fawk hian a rawn ti a, chhan let ngaihna hlawl ka hre lo, ka hre lo mai pawh niloin ka ngam lo hulhual a, ka rilru erawh a na vawng vawng thung.




Chumi zan chuan ka ṭap zan khua a ni ber, midang ṭawngka aṭanga ka hriat lai khan na ka ti viau tawh a, amah ngeiin min hrilh chuan a na leh zual, ngaihtuah lo tum sateh mahila ka thei lo, a aw ri kha ka bengah a chiang em a, a ri nawn tluk tluk reng.




Kar tluanin ka inngaihtuah buai a, inṭhen tih thu hi Usamua nena kan inkarah a thlen ka lo ring pha lo a, ka chhungte vanga harsatna kan tawh laipawh khan amah vangin rilru dam takin ka awm thei ṭhin a; mahse, tunah chuan khatiang ngawt kha a ni thei tawh lo. A hnena ka tlan tauh a rem tawh lo a, a in lah ka pan ngam hek lo.




Chhungte kalsana min nei turin ka ti thei lo a, ka chunga thleng mek hi a chunga a thlen ve ka phal lo bawk, eng nge tih theih ka neih chuan le....duhthlan tur dang ka nei lo a, he kan in hmangaihna kawng hi rin bial tereuhte ang vel a ni, kawng pakhat chauh zawh tur kan nei a, thui tak zawh dun tum mahila a kawng a tawi em a a ngaiah bawk kan kual leh ṭhin.




Beisei ngaihna pawh ka hriat tawh loh hnuah ka pa hnen aṭangin zawhna ka dawng ve tehmial a "Inneih chu in duh takzet anih chuan rem kan lo ruat dawn em niang, i nu ka rawn lo na a i ṭhianpa chu rawn len tir la; ka lo sawipui a nge?" tiin. Mahse, thutlukna ka siam tawh a, ka pa hnenah chuan tlang takin ka hrilh bawk. Zawhna a ngah hle a, chhanna erawh ka pe tlem viau thung.




"Engkim pangngai lai kha ka ngai a, khatiang khan kan awm leh tawh ang" ka ti ta kha a nia, a pangngai leh tawh dawn lo tih erawh kei aiin ka pa chuan a chiang zawkin ka ring.



Ani chu ka duhthusam leh ka lo nghah ṭhin ang chiah kha a ni, ka tana a inpekna te pawh ka suangtuah phak aia mawi leh duhawm a ni bawk. Hmangaihna a beisei nei tawh lo kha thim aṭangin engah min hruai thleng a, Thlipui in a nuai hrep hnua Ni êng mawi tak lo lang ang maiin ka nunah a lo lang a nih kha; mahse, chu êng chu keimah ngeiin ka tih mih a ngai leh ta si a....




Usamua a lo len leh hmasak ber zanah chuan a haw tur pawn thlengin ka zui chhuak a, ṭum dang ang bawkin min mangṭha a, ka kut a vawn ruala ka thil pek erawhin a ti hamhaih ngang mai. "Eng nge a awmzia?" a tih laia a hmel chu engtikah mah ka theihnghilh tawhin ka ring lo. Mitmeng hriatthiam har, zawhna leh natna hlira khatah khan min hmangaihna meisi kha ka hmu thei.




"I zungbun hi la kir leh rawh" tih zawngin ka chhang a, a kutah chuan hum tirin nghet takin ka vuan bawk, kha ZUNGBUN ka tana lian leh rit zet kha....ka pe let leh ta a ni.







(End of chapter - 14)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 6th, 2022, 7:46 pm

ZUNZAM - by Ahmangaihi violette Khiangte


CHAPTER - 15




"Enge a chhan, sawifel theih loh thil a awm em ni?" ti a a zawhna chu "Ka chau tawh, engkim hi ka ninga, lungmuang leh hahdam taka awm ka duh tawh" tiin ka chhang a, a hriatthiam loh hmel khawp mai.




"In inchhungah thil thleng a awm leh tawh em ni?" tiin ngaihṭhat loh hmel deuhin min en a, keiin a kut chu ka thlah riai riai a, ka zungbun pek chu enin min rawn en leh vang vang a, a mit meng buai lutuk chu ka khawngaih takzet.




"Inkawp tur kan ni lo aniang Usamu, a tir aṭangin kan bul ṭanna a fuh lo em a, tunah chuan kan chhungte pawh kan ti hel zo vek tawh anih hi.." ka tih laichuan ka aw ri chu a zawi hle a, ka ṭah loh nan ka inpet ruh ṭeuh reng.




"Engtin nge an tih che, zep loin sawi rawh, ka tih theih ang ang ka ti ang, a ṭul chuan ka tlan pui ang che" a hmel chu a thutak ngang mai, a ti duh tak tak ang tih pawh ka ringhlel lo; mahse, hetiang buaina kara a awm ve hi ka duh lo a, keimah vanga a nu nen an inlaichinna a chhiat leh lek phei chuan ka inthiam thei ngai lo ang, ka tawn ang tawng ve lo turin ka duh a, mihrang nilo a kan laichinte ngeiin min do hi chuan a na em a, thinlung a kehsawm tak meuh a ni.




"Engmah tih duh ka nei tawh lo, hetah ka chhungte kianga awm a, tunhma anga nun leh kha ka duh, kan vaiin kan ṭha tlang zawk bawk ang, duh ka thlang fel angah min ngaih sak la, min hrethiam mai rawh aw" ka ti leh sap sap a, min en vung vung bak chu engmah a sawi lo.




Rei deuh kan ngawihdun hnuah "I duh dan a ni tak tak em, an nawrlui che anih chuan.." a sawi lai chu lo pawt chatin ka duh dan a nih ngei thu ka lo hrilh a, "Hriatthiam che hi ka tum reng ṭhin" a ti zuai ruih a, chhang loin ka bu nghat thung. A hmel ka en chiah chu ka darah a rawn hmer salh a, a na lam mah a ni. Ka lo chet deuh vangin a inthlahdul leh thuai a, chumi hnuah muangchangin vawi hnih a rawn beng dat dat a, a kut humruhin min hnungchhawn zui ta bawk.




A Bike lampana a kal chu mittui tling pam chungin ka thlir a, a ṭhutfel hnu pawh chuan a tlan chhuak mai lo, hma lam en chuan a ṭhu ngawl ngul a, a awmdan chuan min ti hrehawm ve takzet a ni. A rilru ka tina a, kan inkawp chhung zawng pawhin hlimna ka siam ve meuh lo, buaina leh rilru hah na chauh ka thlen ṭhin a, ka tan engkim a inhuam tih ka hai hek lo, ka tana duhthusam mipa a lehpek awm tawh ngai lo tura ṭha anih laiin a tan hian ka ṭha ve thlawt si lo a, tuna ka thutlukna pawh hi a tana thil ṭha zawk anih ngei ka beisei a; thil ṭha ka tih sak ve chhun pawh a ni maithei a sin.




'Usamu...min ngaidam ang che aw, kei chu i tan buaina thlensak tu tur chauh ka ni, mi dik lo i tawng angah in ngai zawk la, min han hrereng duh hauh suh, i hmangaihna chelh turin ka huaisen tawk lo a, ka derdep em vangin ka phatsan ta che anih hi. Kei ang mi dawihzep laka hun i khawhral zozai kha pawi ka ti takzet, ka dikloh zia ka hria a, min lo ngaidam ang che' ka rilruin chu thu chu ka sawi mawlh mawlh a, ka biangah mittui a luang zung zung bawk.




Bike tinungin a inkhalh chhuak a, vawikhat mah a rawn hawi let lo. A tlan liam hnu pawh chuan inchhungah lut loin Step-ah ka ṭhu ta reng a, ngaihtuahna a mang duk a, thawk a ipik in ka tawt ṭeuh reng bawk. Ka phone Gallery a kan thlalak dun ka neih chhun chu ka en vang vang a, Mamit kawnga kan din laia kan thlalak kha a ni a, a hmelṭha tak leh a nui hmel chu tuna a hmel landan a ni dawn lo tih ka chiang si...




Ka duh danin thil ka ti a, ka duhthlan lam kawng zawhin keimah ngeiin thutlukna ka siam bawk; mahse, inthiam lohna liantak ka nei reng ṭhin, zan ka muhil thei lo a, chaw ka ei thei hek lo. Ka khua a har a, chhungril lama khawharna chuan ka vel boruak thlengin a ti ngui a, ka eng tih tha mah a tho thei lo, natna sawi tur hre si loin ka chau a, thlarau ang mai ni tain ka inhria!




Ka pa chuan ka nu bulah a lo sawi ni ngei tur a ni zan khat chu ka Room-ah lo kalin thil awmzia min lo zawt a, "I duh dan ang thlapin thil a thleng a, i awm pawh a nuam deuh tawh ang chu; mahse, ka rilru a danglam ta tihna a ni lo a, ka la dem reng tho che, nangmah vanga inlamlet erawh ka ni miah lo" tiin ka chhang a, ka bulah ṭhuin a ngawi zui rauh rauh a, a inthlahrun hmel khawp mai.




"Ṭhen la ka duh chhan chu ka hrilh vek tawh che kha, keimah ngeiin ka lo tawn ve tawh a ni a, unau inhmel mak leh inchhungkhur boruak chhiat vek theihna a ni a, ka tihsual ang kha tisual ve lo tura ka duh vang che a ni, i la naupang a, mipa ṭha tak tak i la tawng dawn a, i rilru tina reng reng suh aw" a ti dap dap a, a thusawi chuan min hnem hauh lo, chu a hnekin thin a tirim et et zawk.




"Nu...ka dinhmunah hian Ununfeli zawk ding ta sela hetiang hian i ti tho angem, Ununfeli zawk hi ni ta ila engtin nge i tih ang?" Chu ka zawhna chuan a ti hamhaih nge ni min en ran a, "Ka en hrang angah che i la ngai a ni maw, Afeli hi thik tur i ni hleinem, nang chu kum kha leh chen duat takin ka enkawl che a, Afeli tan hian engmah ka la tihsak ngai miah hleinem" a ti leh charh charh a, kan ngaihtuah a in ang lo em a, kan inhrethiam thei tak tak a lo ni ber e.




"Usamua ka ṭhen vang hian Ununfeli nen an inzui mai i ring em ni?" ka tih leh chuan a lo chek hluk a. "Kha chu ka hriatsual vang a ni, Afeli pawh ka hrilh a, inrawlh buai lo turin ka tih tawh kha, he pa kher hi chu in unau hian hnimhnai tawh lo zawk rawh u, i U Afeli pawh a lo haw ṭep a, boruak chhia neih tawh loh hram kan tum dawn nia" min râwn deuh hian a rawn ti a, ka chhang tawh lem lo. Khumah muin puan ka sin ṭha sauh sauh a, a ṭawng chu ngawi rengin ka ngaithla a, hriat erawh ka nei tlem hle thung.




Usamua nen kan inbiak tawp ber aṭangin kar hnih a liam tawh a, a chanchin engmah ka hre lo a, a Message leh Call takngial pawh ka dawng lo. Tunah chuan min haw viau ngei ang chu, ni e....min hua sela a tan pawh engkim a awlsam phah zawk ngei ang.




Christmas a hnai tawh hle a, dawr lamah ka hun zawng zawng ka hmang a tih theih ang. Ka pa pawhin Chemo a khai zo tawh a, Pathian zarah a taksa a chak ṭha a, a Chemo khai chuan a sam a ti tla kawlh tih loh ah chuan harsat na a nei zui lo a, a thil ei a tui ṭan bawk nen a thau ve leh deuh tawh a, a hmel hmuh pawh a nuam ṭhin
khawp mai.




Chhunah hian dawrah min lo tlawh ve leh zauh ṭhin, a hna ah aikal kan la bawk a, in lama awm chawrh chawrh chu a ning ve deuh a nih ka ring. Umawipuii chuan chanchin min zawt nasa thei hle a, a lakah chuan engmah zep nei loin ka hrilh bawk.




"I ṭhen theih chuan a ṭha zawk ah ngai ang, ka nu te lam chu han pal lui viau pawh nila i pasal tur nu berin chutia a tih si chuan; ṭhen mai kha a ṭha ber a lawm, amah pawn a tuar thiam khawp aniang a reh emai, nangpawh in thingharh ve deuh rawh, kum 30 em pawh i la tling lo a, ngaihzawng neih leh na khua ala tlai lo, i tana khuanu ruat pawh i la tawng miah lo zawk a ni ve thei a" a ti luam a, ngaihtuahna ka kawm nasa ṭhin bawk a, chung thleng chuan ka ngaihtuah kim vek tawh.




"Ngaihzawng neih leh ka tum tawh lo, hmangaih neih pawh ka duh tawh lo. Hetiang hian kei chuan ka nun hi hmanral ka duh a, thil ropui tih tum ka nei lo a, beisei tumah ka nei tawh lo bawk" tiin a bulah chuan ka sawi a, ka rilru dik tak a ni. Hmangaih neih chu ka zuam tawh lo mai ni loin ka hlau lutuk tawh zawk, 'Rilru na chu hun in a dampui ṭhin' an ti a, engtikah emaw chuan ka la dam ve mahna.




Ka nunah hian thil ropui engmah tih tum ka nei lo a, ka ṭhatlai hun pawh ala thamral thuai anga, tu khawkha hriatpui lohin ka hringnun hi ka vuiliam ngei bawk ang, kha ka mipa hmangaih erawh kha chuan nun hlimawm tak nei sela ka duh a, kei ang hi chuan a thamral ve lo turah ka ngai. A tel lo a damchhung hun hman liam chu a kawng a thui dawn khawp mai, duhthu kan lo sam ve ṭhin te, hma hun hlimawm kan lo suangtuah ṭhin te erawh mitthla ah a ral thei tak takin ka ring lo. Nunhlui ngaih lunglen changa ka ngaihtuah let fo tur hun; ka theihnghilh thei ngai loh tur kha a ni miau a.




Tlai khat chu dawrah Suzanne-i te nufa an rawn lang hlawl a, "USamuan a lo be ngai che em?" a tih chuan kan inbiak lohna a rei tawh thu ka lo hrilh a, kan inṭhen thu a la hre lo em mawni ka ti rilru a.




"In chanchin ka lo hria a, Mamit-a a dawr kan thu te kha i lo hria em?" a tih chuan min ti bangbo khawp mai.




"Engtik ah nge...engtin nge a kan theih?" ka ti nghal hluai a.



"A la rei vak lo, tunah Mamit-ah a la cham a, zanlaia kang a ni sia; bungrua engmah chuh hman lohin a kang ral vek a, in inṭhen boruak nen a rilru a hah ve ngawt ang" a ti leh hap a, sawi tur pawh ka hre lo hrehawm ka ti takzet.




"In inṭhen hlim khan a tuar ve lutuka, engmah phei chu a sawi lo nain a awmdan kha a dang ve riau a" a tih chuan ka zawt let thuai a.




"Zingkarah Workshop ah a kal a, chhunah in a sa a; tlai thim dawnah a lo haw chauh ṭhin, zanah chuan a mu hma thei lutuk" a ti sap sap a, engmah pawh ka sawi ve hma chuan lo sawi zawm lehin "Mahse, ngaihtuah duh suh, Usamua te chu a ngaihtuahawm loh" a ti leh zat a, a thilsawi letling thawk chu a rilru tih ka hrethiam a, 'Ngaihtuah hle rawh' min tih na ang vel a ni.




"Be turin min duh deuh a mi a?" ka tih chuan a nui ringawt a, "Ka nawr che angah ngai lo la aw, dik tak chuan inṭhen lo thei hram ula ka duh a, Usamua nen hian inhmeh ka ti lutuk che u a; mahse, amah khan inṭhen kha a duh tho ang khan a ṭawng a" a tih leh chuan zawhna ka nei leh nghal pang mai.




"Ka bulah chuan ti hian a sawi a, 'Rilru tih thawven a mamawh aniang, inchhungkhur boruak hrehawm deuh a tawn laiin keinin kan lo belhchhah sak veleh si a, a tawngkhawng ve rih a nia nge, a duh angin awm phawt sela, ka tibuai rih lo ang' a tia, be hmasa lo mahla amah zawkin a lo biak tho che chu ka ring, a lo haw hunah ka lo titi pui a nga, chanchin kan inhrilh zel dawn nia" a tih chu chhan dan tur a vang duh khawp mai.




A sawi ang takin Usamua chu a awm niin ka hria, min hrethiam lo chung pawhin min hriatthiam a tum lui ṭhin a, tunah pawh chutiang tho chuan a ti leh a ni. Hetiang hian ti lo zawk sela, min hrethiam loin min haw hle zawk sela a tan a ṭha zawk daih tur, hepa hian a hma sial dan takngial pawh a thiam lo anih hi, khawngaihthlak lutuk mai...




Zanah chuan ka inngaihtuah buai nasa ngang mai, biak ka duh a; mahse, ka hreh em em lawi a, ka Phone chu humin pindan chhungah chuan ka tei kual sek reng. A Number chu hmet chhuakin ka tin zuau zuau a ka ṭhulh leh ṭhin. Ka va bia a nih chuan a hrehawm ka belhchhah sak anga; a lung a ti leng zual ringawt ang tih ka hlau a, chutiang bawkin keimah ngei pawh hi.




Rilru buai deuha Phone ka bih ngut ngut laichuan ka pain min lo ko a "Kumthar aṭangin min hem thei tawh dawn anih chu, hei ka Doctor-in min lo hrilh a, ka in Checkup result kha a ṭha viau a ni awm e" tiin min lo hrilh a, chu erawh thu lawmmawm lam a ni. "Keiman ka kalpui dawn che nia" ka ti ve thuai a, ka pindan a ka let leh hnu chuan khumah ka bawk thlawp a, ka call ta lo, ka insum a; insum harsa ka tih ber ṭum a la ni.




Ununfeli a lo haw a, kan in be tam lo ṭhin khawp mai, thil kal tawh sawichhuah thar leh chu ṭhain ka hre bik lo a, ka ngawi rih ta phawt chu a nia, a chang hi chuan ngaihtuahna sual a lo langa ka insum hman lo lek lek ṭhin, hna ah kan buai dun ve ve bawka; kan inhmu tam lo hlauh zawk a, chuti ni lo sela chuan kan boruak chu a alh leh hluai maithei. Min vengthawng ve deuh nge ni a rawn lang ngai meuh lo a; ka nu erawh a leng thla deuh reng thung.




December thla kan kai a, Suzanne-i hnen aṭangin Usamua a lo haw tawh thu ka hria a, in sak lamah a buai leh tawh a nih hmel e. "A Workshop thar tur pawh a khawih tawh rih lo, a bungrua a kang ral vek sia, a bul aṭanga ṭan ṭhat leh a ngai a, a thawhrim ve tehlul nen.." a rawn ti vang vang a, a chanchin hlimawm hriat tur awm miah lo chuan; ka thiltih vang khan min inchhir tir leh ṭhin.




Zan khat chu mutura ka insiam laiin a Phone Call ka dawng ve leh hlawl a, ka chhang tur chu ka zam ru angreng khawp mai. 'Hello' takngial pawh ka ti hman lo "I mu tawh em?" a lo ti zawi deuh sup a.




"Mu lo e..." kan ngawi dun vang vang a, sawi tur ka haihchham ve takzet.




"I damṭha em?" a ti leh a, a aw chu a zawi hle a, a mu tawh anih ka ring.



"Um..Dam ṭha e, nang zawk?" tiin ka lo zawt let a.



"Keipawh ka ṭha e, hna lam i tluang em?" a tih chuan a dawr kan thu kha ka ngaihtuah chhuak nghal a, zawt hmasa zawk tur ka nia sin le.




"Ka tluang rih viau e, i dawr a kang tih ka lo hria a, a van pawi tak.." ka ti ringawt a, ka sawithiam lo lutuk chu ka inhaw lek lek.




"A...bungrua mai ania, a pawi thui lutuk lo e" a tih laichuan thil hriat chhuah ka nei a, a aw chu a chau viau anih loh chuan a rui aw tlat hian ka hria, zu a in chuan ka ring si lo.




"I mu tawh a mi?" ka tih chuan "Ka mu chiah, mu ve dawn tawh rawh, i inthuam lum em?" tiin min zawt zui zat a, a aw chu a rui tih ka chiang viau tawh, zu a in ngai tih ka lo hre miah lo!



"Zu i in a mi?" ka ti hap a, a ngawi vung vung thung.



"Usamu, tinge zu i in?" ka ṭah a chhuak lutuka ka aw chu a lawi lek lek a ni.




"Chhun lama hna ka thawh hah deuh hi chuan ka in ve fo a lawm.." a ti mai a;mahse, vawiin hi Pathianni a ni a, chhunah hna a thawk lo, chuti a nih chuan a rilru nat vang a ni ngei ang.



"Zu i in ṭhin tih ka lo hre miah lo" ka ti zawi sep a, ka hnuk a ulh ṭeuh mai.




"Nangpawn min lo hrechiang bik lo anih dawn chu" tiin a nui suk a, keimah vanga zu a in phah anih ngat chuan ka inthiam thei ngai lo ang. A dawr kan vang pawh a ni thei tiin ka ngaihtuah leh rih a, keimah vang chu ni lo hram sela ka ti.




"Zu in tawh suh aw, i rilru a hah viau anih pawhin Zu lamah kher chuan ṭuan suh, Pathian hnenah inkawl tir la, i thil chân zawng zawng kha Pathian pek che a nia, a aia ṭha pawh a la pe leh em em ang che.." tiin ka thiam tawkin ka fuih ve a, zankhat thil thu a a thawhrimna thlawn ta vek chu ka chana ka dah hian a na dawn tih ka hria. Sumdawng tan chuan hma hun thlenga nghawng vek thei thil a ni tlat a.




"Ka neih tawh sa aia ṭha ka duh hleinem, ka neih tawh sa ngei kha ka duh" a tih chuan sawi tur reng ka hre lo, kan thil sawi chu a inpersan lutuk tlat, ka hlauh ang chiahin keimah vanga zu in a ni.




"Zu chu in tawh miah suh, ka rilru i ti na lutuk, hlim deuha i awm loh chuan nuam ka ti thei bik lo a nia, harsatna i tawk lehzela, min ti hrehawm lutuk" ka ti sap sap a, a hmuh loh lamah mittui chu ka hru leh rih a.




"Ka tihpalh anih chu, i rilru tihnat ka duh hleinem" dam ruih hian a lo ti a, chu chu ka sawitum a ni lo lutuka hah zetin thawk ka la hluai ringawt.




"I thiam loh engmah a awm lo, khatiang zawngin ka sawi lo a nia, ka sawitum chu maw..." min lo pawt chatin "Min ngai ve em?" a rawn ti leh daih a, ka ngaihzia thu hi engtin nge ka hrilh theih ang, a ngai ang khan rin bial tereuh te chhungah khan kan kual dun leh ringawt dawn a sin.




"In enkawl ṭha rawh aw, ka ringtawk che a, ngaihtuah ngaiin awm lo la, ngaihtuah lo che a lungmuang taka awm ka duh a nia" ka tih takah chuan engmah a rawn sawi tawh lo, Phone ka dah hnu thlengin ka thilsawi hnuhnung ber kha ka ngaihtuah let a, ka hma ka sial ka inti a, ka huatawm ngawtin ka ring.




Chumi zan aṭang chuan min rawn be ta fo mai, a Phone call ka hmuh tawh hi chuan chhan loh hi harsa ka ti ṭhin, a chang hi chuan haider luih ka tum ve fo a; mahse, ka chhang leh nge nge ṭhin a, rei tak phei chu min be ngai lo, kan inbiak a piangin a rui a, rui chhia tia sawi tur ni lo mahse, zu a in kher kher chu pawi ka ti a ni.




Christmas chu Mamit lamah an chhungin an hmanga, keini Hnahthial lamah kan hmang ve thunga, midang chuan nuam a ti tlang viau a, kei erawh ina tawm chawt ka ni vei nen ho lam angreng takin ka hmang liam a tih theih ang. Kar khat zen zawn kan cham hnuah kei leh ka nu leh pa te nen kan let leh a, ka Nu Thani te nufa thum erawh kar khat hnua lo haw an tum a, Umawiin kumthar hman ho loh a hlau em a, chuvanga haw hma ta pawh kan ni nghe nghe.




Kum hlui thlah zana kan inbiak chuan pawnah Thla eng a thlir thu min lo hrilh a, a rui miah lo niin ka hria. "Mamitah chuan thla bial zan hi kan lawm ṭhin a" tiin zangkhai deuh hian a lo sawi a, a ṭhiante nen an inah Ar an kan thu te min hrilh zui a, "Engtin nge i hman ve?" a tih chuan ka pa nen TV kan en thu ka lo hrilh a, a nuih a zat viau ka rin laiin "Hetiang tur tih hria ila hman pui tur chein ka lo chho tur" a lo ti khauh a.




"Min ngaihtuah mah ta che" ka tih chuan "Ka ngaihtuah reng ṭhin che a lawm, min ṭhen hlen i tum lo turah ka ngai a, ngaia ka neih mai loh nan ngaihtuah reng che ka duh" a ti leh a.




"Ngaia i neih chuan a ṭha zawk maithei a sin" ka ti chu a duh vak lo.



"Chu chu inṭhen hlen i duh tih na maw?" a rawn ti chang bawl mai. Ka ngawi zui daih a, chhanna ka nei tlat lo, tunah chuan keimah ngei pawh hi ka inhrethiam rih lo, ka duh angin chhungkua chu pangngai takin kan kal ngei a, ka nun ruak ruak em em hi thil pangngai a ni lo tih ka chiang em a ni.




"A ṭha e, engtin nge awm tura min duh han sawi la, i duh angin ka awm dawn nia.." a tih chuan "Chulam sawi tawh lo ang" ka lo ti vat a, a thinrim tak tak niin ka hria.




"Mimi..keichuan ṭhen che ka duh lo a, theihnghilh che pawh ka duh lo, tunah pawh rei ka ti tawh lutuk; mahse, maw, mihring thinlung chuan a phatsan lo anga; hun leh ni zawk hian a phatsan ṭhin, kan rei palh hlauh ange" thutak zet hian a ti a, ka chhan leh hmain Phone chu a hmet tawp zui bawk.




Khami zan aṭang khan min be leh ta lo vang vang a, kum a thara an lo haw tawh ngeiin ka ring a, engmah a chanchin erawh ka hre zui ta lo. Kum hlui thlah zan khan ka lakah a lawm lo deuh tih chu ka hria a, ka rin ang aiin a lo thutak deuh nge ni a reh zui vung vung mai.




Ka pa chu an hem ṭan a, na a ti khawp mai a, an hem ngun hnuah chuan a khua te a ti sik a, nachawkna kan hmang deuh reng ṭhin, thil a ei theih loh vangin a cher sawt hle a, kan lo hem tir ta chu ka inchhir hle ringawt tawh.




"Kan ṭhenawm pa saw chu an hem hnuah a dam hlauh sia, ka pa hi a fuh vak lo em maw ni le.." Umawii chuan a ti leh ṭhin a, nilenga awm a ngai vei nen dawr pawh ka kal hman meuh lo chu a ni.




Ka pa an hem zawh hnu ni tam pawh a la liam lo ang tih ah a hrawk chu a rawn na zual hle a, an hem na lai aṭang chuan tuifim hi a rawn chhuak leh ṭhin a, ka ngaih a ṭha thei lo, a vun chu a pawp dawn tlatin ka hria a, ka rilru a hah hluah hluah bawk.




Ka pa anga Cancer dang te chanchin ka ngaihven kual a, hem hnuah ṭhatpui hlauh an awm laiin fuh lo deuh deuh an lo awm nawk a, kan Doctor lah chuan Pipe a chaw thun turin min ti ta bawk nen ka pa dinhmun chu a ṭha lo sawt hle a, nakin lawkah a hrawk chu a vun a rawn pawp anga thil a ei thei lo thuai dawn tih lah a chiang reng.




"Phaiah kalpui mai ang u" ti a Umawipuii rawtna chu kan ngaihtuah khawm a, kan pawisa neih ang ang a kalpui chu kan relthlu bawk a;mahse, duhthusama ṭha a inenkawl tur chuan kan pawisa neih sa chu a tlem lam hret chu a ni.




"Mimite...i dawr hi kan ti ral mai dawn em ni?" ti a ka nuin min rawn chuan ka hamhaih deuh a, 'Aw' ka pawh maithei lo. Ei zawnna ka neih chhun a ni a, sawrkar hna pawh dil miah lo a hun ka khawhral ve na a ni bawk. Mahse le...pa te tan na na na chuan 'Aih' lo ti theih tlat a ni bik lo a, ka eizawnna chu ka pa nunna aia pawimawh a ni tlat lo. 'Ka pa tan a lawm ka hman dawn' tiin ka 'Aw' ta chu a nia, a tirah ka inngaihtuah buai deuh viau nain 'Aw' ka pawh takah chuan ka awm a nuam huai huai thung a.



(Zawmna)



Umawipuii chuan ti hian a sawi a "A chang chuan kan duhber aiin a dawttu hi kan thlan zawk a ngai ṭhin, kan duhloh zawk chu kan tana ṭha zawk anih chang a awm a, beisei neih hi a pawi lo, chakna thar min pe tu a ni fo ṭhin" tiin, chutiang hun chu ka tawng mek niin ka hria.




Chawlhkar hmasa berah dawr tih ral na tur chu kan buaipui a, Urinmawiin a hmelhriat te min lo biak kual sak ve bawk a, lo en pawh an awm zeuh zeuh tawh, aman kan chhiar chu a to tham em a; a man thu hla ah kan la inrem hleithei lo a, ka pa kalpui vat a ngaih vangin kan hmanhmawh em em bawk si a, rilru a buai ṭhin khawp mai.




"Ti to lutuk lo mai rawh, hetiang chuan kan tlai khaw lo zo takngial dawn" tiin ka nu chuan min nawr ve reng bawk a, dawr lah chu kan chei ṭhat hlim chauh a nih bakah a vanglai a hmang ṭan ve mek a, tlawm te a hralh chu ka ui ve takzet a ni.




Ka pa thung chuan phai kal chu a duh vak lo niin ka hria. "Dawr tih ral kher ngai loin he lamah in enkawl zawk mai ila" a khat tawkin a ti leh ṭhin a, ka nu ngaihdan erawh a ni hauh lo, "I pa hi chu a beidawng hma a, phaia kal a duh loh chhan pawh dam phah tura a inngaih loh vang zawk a nia, a rang thei ang bera kan kalpui vat zawk a ngai" tiin min hrilh a, keichuan ka pa damna lam tur a piang pan a, a dam phah emaw dam phah lo emaw kan tih theih ang ang chu tih vek ka duh.




Chawlhkar hnih lai kan nghah leh hnuah a man kan chhiar aṭanga a chanve dawna hniamin kan hralh thei ta hram a, rilru a dam zan lo khawp mai, a neitu thar te chuan thawmhnaw dawr siam nan hman an tum a, kan bungraw neihsa te pawh Usangzualan Sawrkar office pakhat Canteen a hman turin min tihral sak a, kan hnathawk te mawlh chu a ni ka lainat chu, hun kha leh chen kan thawk ho a, tunah eizawnna tur dang an zawn a ngai ta a, kei aimah chuan an rilru pawh a hah zawk mai thei a ni.





Dawra kan ni hnuhnung ber thlengin min tel pui hlawm a, inthlah nan thingpui in ho na te kan nei a, hun hlimawm tak angin lang mahse a nihna takah chuan kan lungngai vek a, hlim tak anga an nui hmel phenah chuan lungngaihna an thup ṭheuh tih ka hria. A bikin Pa Rela, Umawii nena an bulṭan a ni a, a tir te aṭanga min puitu a ni, a tel loin tun dinhmun kan thleng thei kherin ka ring lo.




"Mimite, dawr i hralh tlawm ang reng si a, i pa inenkawl nan engemaw zah hi i hmangral ngei anga, bul ṭan leh na tur i nei tlem viau lo ang maw, hmanhmawh lutuk lo ni ula chuan hei aia to hian kan hralh thei ang maw le" a ti leh vang vang ṭhin a, a bulah chuan ka pa in enkawlna tur a awm phawt chuan a tawk mai thuin ka chhang a, ngaihtuahna erawh a ti kal thui duh ngang mai.




Umawipuii chuan "Sum tlemte hmanga eizawnna ṭha tawk neih theih dan ka hria, engmah lungkham buai duh miah suh" tiin min lo hnem ve a, Network marketing lampang bawk kha anih ka ring a, ani pui hian eng Company berah emaw hi chuan min la ziak lut ve nge nge in ka ring a ni.




Midang an haw vek hnu chuan inchungah Light off turin ka han chho a, engkim chu a ruak huai a, zan dang zawng aiin eng pawh chu a dul zual emaw tih mai tur a ni, inchung leh bang te thleng chuan Usamua kuthnu a ni a, mitthla in a chhui kir lo thei lo. Storage room chu ka va hawng rawk a, tuiluan kawr te reuh lah chu luang tur pawh awm tawh loin a kang chat der tawh a, eng nge ka ngaihtuah ni ngawi rengin kawr te bulah chuan ka ṭhuthla a, ngaihtuahna a chawmawlh riau a, hnuk a ulh dawn dawn mai.




In ka thlen chuan dar 8 a ri dawn thuak tawh a, ka chhungte pawn zanriah an lo ei fel tawh hlawm a, ka Nu Thani te chhung leh Ni Hmingliani te chhung nen an lo awm laih laih a, "Inthlak la, lo chhuk leh thuai rawh" ka nu chuan a lo ti var a, kan zin tur chungchang rel ho an tum anih hmel e.




Ka inthlak zo inhnuaia ka chhuk leh chuan Umawipuii te nupa pawh an lo thleng ve chiah a, Ununfelin ka pa hrawk a lo Dressing ve mek bawk. Ka pa chu ka nu nena kalpui kan rel thlu a, kan dinhmun a zirin ka nu a haw hma ang, a ṭawng thiam zawk leh chin chang hre zawk ka ni reng reng a, chu loah ka pain ka awmpui loh a hlau em a awm zawk lo thei ka ni lo.




Kar leh mai kan kal hun tur anih vangin kal hma a Usamua chanchin hriat ka duh khawp mai, ani lah chu a reh leh ta vang vang a, hna ah a buai viau nge ni a; kan inbiak hnuhnun ber ṭuma ka ṭawngkam vang khan a thinur ni ang tiin ka ngaihtuah ṭhin, biak hmasak chu ka inthlahrung telh telh a, ngaihtuah loh erawh a har hle si a, nitin hian ka inthiam lohna a zual ṭhin.




Chawlhkar thar ni hmasa berah ka pa chu Vellore lam kan pan pui a, Ununfelin a ṭhian te Vellore a awm min lo biak sakin an nin Airport ah min lo hmuak thlap a, hmun danga innghat loin an inluah lamah min hruai haw a, min lo duat thiam khawp mai. Unaua inluah an ni a, mipa leh hmeichhia niin a upa zawk mipa chu Chhuanawma a ni a; Doctor a Training mek a, a nau hmeichhia zawk Zirtei chuan College a la kal thung. Ununfelin ka pa chu an bulah a pa angin a lo sawi anih ka ring a, "Afeli pa" tih hlirin ka pa chu an ko a, ka nu lah chu ti bawk.




An fel unau takzet a ni, mi ramah chuan ṭawng thiam ringawt a lo tawk zo lo a, an ni unau an lo awm hlauh chu kan tan engkim a awlsam phah ti ila ka sawi sualin ka ring lo, UChhuanawma Training na Hospital a lo ni kher bawk a, anin a ṭul ang ang min tih fel sak zel a, damdawi leh eng ilo lei ngai lah a lo lamkhawm zung zung a, a zuan a zângin a che ka umpha meuh lo ti ila a chiang zawk mah ang.




Tlaikhat chu ka nuin min rawn thlak a, Uchhuana Duty zo nen chuan kan haw ruala, haw pahin Big Bazaar ah kan kawi a, an chenna aṭanga hnai te a ni nghe nghe. "Zirtei a rawn tlai hmel si a, Fast food a lo inhnawh puar mai i duh em?" a ti chu ka hnial loh zawng tak a ni. "A pawi hleinem, eng nge kan ei ang?" ka lo ti thuai a, kawngkam dawr a kawh zauh lamah chuan kan inzui phei dun a.




Grilled chicken Burger kan ei a, rin ai tak chuan keipawn ka eithei ve phian a, "He lama ka haw chang hi chuan ka ei fo a, aman a tlawm a, eirawng bawl aichuan a awlsam zawk a, Western food lo hi chu ngaiah neih a har riau, an Maggi te hi kan ei ve thei der lo a" thil ei pah chuan a ti mawlh mawlh a, "Pa Rela Maggi siam chu a tui lutuk a sin" ka tih chuan a nui suk a, "Mizo siam chu a tui ang chu, Mizo pa ka ah hi chuan heng vai ho masala hi a tla na thei tak tak lo a ni e" a ti leh mai a, ka chhang tawh lem lo.




"Eng nge khi lamah chuan i tih ve ṭhin a?" ti a min zawh leh chuan dak meuhin ka en a, "Dawr ka nghak ṭhin" ka ti mawl tawp a, tunah chuan engmah hnathawh sawi tur pawh ka nei ta lo chu a nia, hmai a uang fahran lo khawp mai.




"Hmeichhia chu hna ah buai inngai hleinem ti raw, Zirtei pawh hi eng engemaw zir leh a rilruk a, a ṭul pawh ka ti em em lo maw le" a tih chuan "Enga ti maw buai a ngaih loh" ka ti ve vat a, "Pasal ṭha deuh in nei anga, in pasal ten an chawm mai dawn che u a lawm" nui chung hian a lo ti a, tunlai mipa ah hian chutiang ngaihdan pu chu an tam lo ngawtin ka ring.




"Tun laiah chuan mipa innghahna tlak an vang tawh em a lawm, hmeichhia pawh pasal te kutah kan innghat thei tawh lo a, a ṭul ṭul kan thawh a ngai a, kan ramah pawh chhungkaw eizawngtu hmeichhia hi an tam tawh a sin" ka ti ve luam a.




"Nangni ang nula hmelṭha tan chuan buaina tur a awm chuang nang, tlangval hlawh sang tak tak nei duhthlan tur i ngah ang chu" a rawn tih chuan ka nui chhuak lo chauh a ni.




"Ram dangah i awm rei tawh deuh a nih dawn hi" ka ti mai a, "Enga ti maw?" a tih chuan "Mizo nula hmelṭha tak tak an tam tawh a lawm, keini te chu a ziaawm pawl pawh kan ni pha hleinem" tiin ka chhang a, "Ka awih lo" a ti mauh mai.




"Coke i duh em?" a tih leh chuan "Haw pahin kan in dawn a mi?" ka lo ti zauh a, Sana ka en chuan duh aiin a tlai lek lek tawh, a farnu pawh a haw tawhin ka ring.




"Bottle hi kan keng sawn thei lo a, Refill leh nan an duh a" tih pahin Glass bottle chu min lo pe a, ṭha deuh chuan ka la ve leh mai bawk a.




"U Afeli te nen engtin nge in inhriat a?" ti a ka zawh chuan "A pa tak kha ka patea a nia" tiin min lo chhang a, chu kher chu ka beisei loh lam daih thil a ni, chuti anih chuan ka nu hi an hre ve tho angem tih te chu ka inzawt rilru a, ka nu hian a hre lo chu a ni phawt anga.




"Unau in lo ni reng a ni maw chu.." ka tih leh chuan a bu nghat a, "I nu hi chuan a hre lo in ka hria, i duh chuan i hrilh dawn nia" a ti leh mai a, Ununfeli chanchin chu engkim a hre vek anih ka ring tawh, ka nu pawh a hriat chian hmel viau mai.




"Engtik thleng nge i Training dawn a?" tiin thudangah ka pakai a, "Thla thum vel ka la nei" a ti leh mai a, "E heu...he lamah em ni i thawh ang" ka lo ti var a, a lu a thing thung.




"Kei hi chu zo pa deuh mai ka nia, ka thiamna te hi kan ram tana hman chhuah ka duh a, chu loah he lai hmun hi ka kham tawh, nupui zawn te pawh ka duh a" tiin a nui a nui a, a thil thlir dan chu ṭha ka tih zawng tak a ni.




"Ka lo haw hunah chuan min lo kawm ve duh a ngem?" nuisanga min en chungin a ti leh a, a naupang chhia angreng. "Mahna le.." ka ti mai a, a lawm hmel viau tho.




Muang changin kein kan haw dun a, a ṭawng a chatlak meuh lo, kawng chanve vel zet kan kal tawh ang tihah "Bialpa i nei em?" a rawn ti khauh a, kan thilsawi chu a mimal thil ta mah mahin ka hria.




"Nei e.." thawk ka la hak a, ka mitthla ah Usamua a rawn lan rualin lung a leng vawng vawng a, engtia rei nge kan inbiak tawh loh, zantin a Phone call ka chang ṭhin a; mahse, a lo thleng ngai si lo, ka be hmasa hreh a; biak erawh ka chak em em reng thung, tunah te hian engtin tak hun lo hmang ve ang maw.




"Inneih lam te a hnai em?" ka bula miin a tih ri chuan rilru a la peng leh thuai a, "Chutiang kan la hawi rih lo, a hna ah a buai rih a" ka ti leh mai a, "Eng hna nge a thawh a?" tih zawhna in a zui zat bawk.




"A...eng lo.." ka tih laichuan "Chhang duh lo mai rawh" a lo ti zauh a, ka chhang duh ta bik lo.




"Eng ang mi nge, kohhran a in hmang chi nge, keimah ang chi" uang lek lek a a tih leh chuan ka ngaihtuah vang vang a, "I sawi ang chu a ni lo ve ve, ani chu kohhrana in hmang ka hriat tamtak aipawha rintlak leh innghahna tlak zawk a nia, In ang maia thlamuanpui awm, nang anga thiamna sang nei lo mahse, a hna a in pe zo em em leh hlawhtlin phu ngawih ngawiha thawk ṭhin a ni, a tawi zawngin thil ṭha zawng zawng ani tluka phu an awmin ka ring lo" ka ti deuh duah a, ka duh aiin ka ṭawngtam lek lek.




"Chuvang anih chu nang a neih che, thil ṭha zawng zawng phu tupa chuan" a darin min rawn nek salh a, a thil sawi erawh chuan min ti hnual rawih thei. Kei chu a vanduaina thlensak tu mai ka ni, hlimna tam tak nei tura ka duh kha keimah ngei hian a rilru ka tih natsak a nih kha; mahse, tunah chuan kan kar a hla tawh a, a vanduaina thlentu chu ka kal kiang tawh a lawm, a hlim ve thei tawh ngei ang chu.




In kan thlen chuan Zirtei a lo haw tawh a, eirawng a lo bawl mek bawk. UChhuana nen chuan chaw kan kilpui peih lo ve ve a "Mi te lo hawn ve tur che u a nia, nangmahni vangin ṭhiante bulah ka kal lo a sin le, in va phakar reuh" a ti niah niah a, a chaw eikham hnuah Big Bazaar a ka Ser lei kan bawl a, thei thur a lo ngam ve bawka kan ei hnem dun kher mai.




Zan ka mu chu ka bet lo tak zet, ka khat tawkin ka tho a, ka Phone bawk chu ka bih leh ṭhin. A tawp a tawpah chuan ka insum thei ngang loin ka Call a, a la miah lo. Ka call nawn leh a; mahse, a la chuang lo. Rilru a mang duk a, ka mittui lah chu luan chhuah chak lutukin ka mitah a tling khat vek a, ka awm chhung chu a na ngut ngut mai bawk.




Balcony ah chhuakin khawpui pe un mai chu ka thlir vang vang a, Thla lah chu dul zetin a lang bial kulh lawi a, van zawlah chuan Arsi an de sep sep bawk, min van hnem lo tehlul em, Usamua hmel ka mitthla ṭhin a, zungbun ka pek kir zana min en dan mawlh kha, kha mi ṭuma a mitmeng kha mitthla ah a rawn thar leh ṭhin.




Ka ngai tak zet a ni, tunah hian Mamit-ah nge a awma Aizawl-ah tih takngial pawh ka hre lo, a muhil tawh nge ni a; ka Phone call chu a haider tih pawh chu ka hre chuang lo, a tana awm thei si lo hian ka kalsan thei tak tak chuang lo a, chu erawh hrehawmna min belh chhahtu chauh a ni.




Rei deuh Balcony a ka din hnuah mu turin khum lam ka pana, sana ka en chuan dar 10 a pel der tawh, ka Phone chu lukham hnuaiah rawlhin mit ka chhing vang vang a, engmah hian pangngai tih a nei tawh dawn lo tih chu ka hrechiang tawh ngang mai, pangngai thei ngai lo tur chu keimah ngei hi ka ni bawk.




Engtia rei nge ka muthilh hman ka hre lo, ka Phone ri vang chuan ka harh hlawla, Damdawiin lam an nih hlauthawng zeta Phone ka en chuan Usamua Call zawk a lo ni a, hun engemaw chen a liam hnua a Phone call ka dawng chu hnuk a ulh dawn dawn a, thinphu a ti rang em em bawk.




"I Missed call ka lo hmu a" phone ka chhan rual chuan a lo ti zawi sup a.




"Zan tirah khan ka lo Call che a...i buai a mi?" ka ti bah niai a, ka inthlahrung ru khawp mai.




"Buai lo e, pindanah Phone ka lo dah daih a, eng nge in an zel?" a tih takah chuan ka lo thaw huai a.




"Kan ṭha zel e, nang i tluang em, i insak te chu i zo dawn hnai em?" ka ti sawk sawk a, "Kar leh lamah chuan kan zo tawh ang, muang changin inchung lam khawih leh chu ka tum" a ti ṭha ve mai a, ka zawh chin chiah min chhan vang chuan sawi tur a vang takzet.




"I dam ṭha em?" ka ti leh tawl a, ani a ngawi vung vung thung.




"Ka dam ṭha e" rei deuh hnua a rawn tih chuan sawi tur ka hre tawh lo, rei deuh biak chu ka duh mahse, a bulah chuan eng nge sawitur ka hre lo a ni, kan inbiak dan chu tunhma ang a ni lo a, daidanna ka siam ngei kha min dang tu a ni ta.




Kan ngawidun rauh rauh a, chutah aw a rawn thian kharh a "Mimi..ka nuin a lo bia che tih ka lo hria a..." a lo tih chuan min ti bangbo hle. Engtin nge a hriat theih zawk le...Umawipuii chauh ka hrilh si a, a nuin a hrilh tihna em ni!




"A pawi ka ti khawp mai, a tir khan i thutlukna kha ka hrethiam lo a, thil dang vang anih ka lo ring a, i lakah ka inthlahrung takzet a ni" a ti charh charh a, ka mittui a tling leh pam tawh.




"A pawi lo...engmah i thiam loh a awm hleinem, ka laka i inthlahrun a ngai lo a nia" ka aw chu a lawi rat a, a zawi hle bawk.




"Ka thiam loh ni e, engmah hre loin ka lo nawr che a, ka a ngawt mai, i rilru a na ngawt ang ti raw..." chhang loin ka ngawi reng a, ka ṭawng chhuak anih chuan ka ṭap tih a hre ngei dawn.




"Tunah chuan ka hrethiam vek tawh che, keimah vangin i rilru tina tawh lo la, i duh angin awm tawh rawh, i harsatna belh chhahtu ka ni tih ka inhriat hnu hian nep ka inti khawp mai, min lo ngaidam la..." a sawi lai chuan ka mittui a rawn lum thla pap a, ka hmui ka hup ṭang ṭang bawk.




"Ka nawr tawh lo ang che, kei aia miṭha zawk tawng la, hlim deuhin awm tawh ang che..." ka mittui ka hru hul sawk sawk a, ṭawng leh ka tum laichuan Phone chu a tawp zui daih a, min ti hawihai ngang mai. Eng nge thil awmzia hi, tunah khan Usamuan min ṭhen ve ta tihna maw...




Engkim a tawp ta tihna em ni...a ngawi reng ṭhin a, Zungbun ka pek pawh khan ka rilru natna tur engmah a sawi lo, kha ti chung pawh khan ka na em em tawh a, tunah leh lek phei chuan....mittui te hian he natna hi a sawifiah zo in ka ring lo, thinlung hliam tawh sa chu a hliam laia chi phul belh ang mai a ni...






(End of Chapter - 15)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 6th, 2022, 7:47 pm

ZUNZAM - By Ahmangaihi violette Khiangte


CHAPTER - 16




Ka muhil thei lo a, Balcony ah chhuakin ka va ṭhu tlaivar a ni thawthang mai, khawvar lam hnaih ah chuan vana Arsi te pawh an khat pharh tawh a, a run tur tingin thla eng lah chu a dul hle bawk. Ngaihtuahna a kal thuiin engkim mai chu rilru ah a rawn thar a, ka suangtuahna chu mel sang tam taka hla ah a cheng tlat a; chu erawh lung ti zing tu mai chauh a ni.




Khawvar dawn a ruaiah rei lo te ka chu ka chhing ve a, ka nuin min lo Phone vangin ka tho hma leh viau bawk a, Uchhuanawman kawnga thil ei leh mai a rawt vang chuan ka insiam zung zung bawk. Kan kal chhuah chuan dar 7 a pel awrh a, Chinese dawrah thil kan ei a, zan lam ka mut tlem vang nge ka boruak tawn vang chuan ka chawmawlh hle a, Uchhuana titi pawh ka aw e liam a ni ber e.




"An Shezwan rice hi he lai bawrah chuan a tui ber a nia, eng nge ang i tih?" a lo tih chuan ka phu zuk ringawt a, ani lah chuan phawk lek lek a min enin "A tui i ti ve vak na nge?" a ti leh zat a.



"Tui e.." ti a ka chhang chu a awih hmel vak lo.



"Vawiin chu i nguai hle mai a, i pa vang em ni?" a tih leh chuan ka bu nghat a, chutih laia ka Phone lo eng chu ka la kang thuai a; Suzanne-i a ni.




"Usamuan lo ngaihven ve deuh rawh a tia, ka lo Phone nghal che a nih hi" zangkhai deuha a tih chuan Uchhuana chu ka mitmeia, pawnlam ka pan zui thuai bawk a.




"Eng nge in an, i pa a ṭha zel em?" tih ang reng min zawt luam a, "A dam chak lo riau a, Chemo kan khai ṭha leh ang" tiin ka hrilh a, Usamua chung chang sawipui ka duh ru khawp mai.




Ka rilru hria niawm takin a rawn sawi chhuak a "A lo bia che em, eng nge in an zel?" a tih chuan chhan dan tur a vang duh viau a ni. "Kan ṭha vak lo" ka ti tawl a, Usamua hnen aṭangin a hre vek tawh chuan ka ring a, sawifiah vak dan tur pawh ka hre lo.




"Ka nuin a lo biak thu che kha ka hrilh a, ka nu nen hman zanah an inhau a" a tih chuan zawhna hlirin ka khat a, "Engtin nge i hriat a, Usamuan i bulah sawi a nei em?" ka ti sawk sawk a, an beng a lo thleng ve lehzel chu mak ka ti deuh tlat.




"Ka nuin min hrilh a, I unaunu Nurse nen a an inbiak lai ka lo hre fuh bawk sia ka zawt a lawm, i rilru a na ngawt ang a...keipawh ni ila ka rilru a na viau ang" a tih chuan "Usamua zawk kha.." ka lo ti hap a.




"Umm..a thinrim ve lutuk a, ka nu nen pawh an la inbe ṭha hleithei lo hei, ka nu lah a titau tlat a, a lo chho duh rih si lo a; in thar pawh kan la luah lut thei rih lo..." a ti niah niah a, keimah vanga an chhungkaw boruak chhia chu hrehawm ka ti ve takzet.




"Usamua chu i lakah a inthiam lo lutuk a, amah vangin buaina i tawk hnem bawk si a, i pa dam loh lai a ni bawk nen..." a ti leh a, nizana kan inbiak dan ka ngaihtuah let a, engkimah amah a in burbun vek tih chu a chiang reng mai.




"A thiam loh engmah a awm lo a sin le.." ka han ti leh ringawt a. "Keini nupa chuan inṭhen lo turin kan duh che u a, boruak daih hun nghak ula, nakin lawkah ka nu hi chu a nem leh mai dawn a, Usamua bulah pawh kan lo sawi a; mahse, 'Mimii duh dan a ni lo' a ti tlat a, eng rilru nge i put ve chiah le?" a tih chuan thawk ka hluai a, inṭhen duh ngawr ngawr angin Usamua chuan min ngai a ni ngei ang.




"Ka hrethiam tawh bik lo, ka pa vang hian rilru fim tak pawn thil ka ngaihtuah thei rih lo a, kan awmdan tur lah sawi lawk theih a ni si lo a, boruak daih hun nghah chu a ṭha maithei a sin, tunah rih hi chuan thil a harsa rih em a ni" ka tih takah chuan a phur hmel ta viau a.




"Usamua chu ka lo hrilh ang, inṭhen i duh angin a sawi a, kan bulah chuan a sawi lo nain a beidawng riauin ka hria a, in a sa a; a hah vang pawh a ni maithei. Mahse, i thusawi hi ka lo hrilh anga; in inkar a ṭhat phawt chuan kawng a la awm em em ang, nang mahni pahnih hi in kalsan lo phawt ula" a ti sap sap a, a thilsawi chu engmah hnialna ka nei lo a, tunah zet chuan inṭhen ka duh em tih ka chiang thei tawh tlat lo a ni.




Kan inbiak zawh hnu chuan ka ngaihtuah vang vang a, ka thinlung hi chuan inṭhen chu ka duh lo tih ka hria a, chutih rualin hlauhthawnna ka la nei fan a, eng pawh thleng se Usamua thu hnial loh erawh ka tum tawh thung. Ka dinhmun lah heti mai a ni a, ka pa han awm lo chiah se Usamua lo belh tur tu nge maw ka neih chuan le; mahse, nizana a thil sawi dan mawlh kha, a rilru a la thlak loh hram ka beisei.




"Damdawiin lam a mi?" ka hnung lam aṭanga Uchhuan-an a lo tih chuan ka lehhawi vat a, "Mizoram aṭangin a nia, i puar tawh em ni a?" ka tih chuan a bu zauh a, chumi hnuah Uber lain Damdawiin lam kan pan ta thuai a. Ka pa pawh tukin chu a tho nuam ve deuh a niang, kan va thlen chuan Bathroom ah a lo lut mek a, Uchhuana chu ka pa Doctor be turin a kal nghal thuai bawk.




"Chhuanawma kha Afeli Cousin a lo ni reng a kha, Afelin min lo hrilh a, kei lah chuan ka lo hre reng reng lo a, a ṭhian pangngai turah ka lo ngai ringawt a" ka nu chuan a ti luam a, ka chhang zui lem lo.




Ka pa chaw ka eitir laichuan Uchhuana chu a lo let leh tawh a, thlanglam tukverh bulah ka nu nen ṭhuin an titi dun a, Ununfeli hming te an sawi riin ka hria. Ka pa theitui ka in tir chu hlauh ruk ang ngeiin a hrawkah a rawn put leh ta mai a, mi chiai hma chi tih takah ka talbual loh chauh zel chu a ni.




Uchhuanan a rawn buaipui thuai a, Doctor in an lo en hnuah thil eitir tawh rih lo turin min ti zui a, Pipe kan hman leh mai a ngai dawn a ni. Ka pa lah chuan a thil eichak a sawi ve reng bawk a; hmuh a hrehawm duh ṭhin khawp mai. "Kan haw hunah sangha rep Hnahthial ho chah i la a ṭha ang" tih ang reng a sawi chang chuan ka lo inpet ruh nasa ṭhin hle a, a eichak zawng a piang han eitir thei tal ila; heti lutuk hi chuan ka hrehawm lo deuh tur.




Tlaiah damdawi lei turin ka kalchhuak a, zan lama ka eiturin dawrah theitui leh eng ilo ṭamhnem tur ka lei pah bawk a, Damdawiin a ka let leh hnu chuan ka Purse ka hmu zo ta hauh lo, ka Polythene bag ka han dap ngial pawhin ka hmu ta reng reng lo mai a, hmanhmawh lutukin ka thil leina dawr lam chu ka va pan leh a, dawr nghaktu lah chuan a tih ngaihna a hre lo hle ringawt a, CCTV lah an nei der bawk si lo a.




Pawisa chu hman chawp chauh ka lo ak chhuak hlauh a; nimin ang te chu ni sela ka chan ṭeuh maithei a ni; mahse, ka Cell phone ka hloh tel tlat mai a, chu mawlh chuan ka rilru a ti hrehawm zual a, pawisa ka inren ve tehlul nen Phone lei ka ngai ngei ngei dawn a nih hmel a, ka inthlahrung angreng viau mai.





"I pa Phone kha hmansak rih mai la, haw hunah i lei mai dawn a lawm" ka nuin a tih chuan ka ngawiran a, engtia rei nge kan cham la ngai dawn ka hre lo a, Usamua chanchin engtin nge ka hriat tak ang, Suzanne-i Number takngial pawh chu ka hre der si lo a.




"Phone chuang chu ka nei a, inah ka dah daih a, naktukah ka lo ken sak dawn che nia" Uchhuana haw turin a lo tih chuan ka hreh ru deuh riau a, "A...a ngai pawhin ka ring lo, ka pa hian a hmang vak chuang lo a, ka hman sak rih mai ang" tiin ka hnial a, Phone ber awm mah se ka biak duh Number ka hre tlat lo chu ka buaina ber a ni.




Zanah chuan ka pa Phone chu ka kawl ve ngei a, hmanna tur a vang duh rauh ruah khawp mai, Umawipuii nen kan inbia a; ka pa chanchin ka hrilh chuan a rawn ṭap pur a, rei tak pawh ka inbe lo.




Zantirah nachhawkna a an Jection vangin ka pa chu a muhil thei hlauh a, kei erawh Nghate rep an sawi ang maiin ka meng kar reng a, zan men hi ngaiah ka nei ta deuh a ni mahna; mut chhuak reng reng a lang thei tawh lo a, kum a lo tam ve ta deuh pawh a nia nge.




Suzanne-i khan Usamua a be tawh angem tih te ka ngaihtuah rauh rauh a, vawiina kan inbiak na a hrilh hunah engtin nge a lo chhan ang tih te ka ngaihtuah thul. Rilruin a zeldin a, duhthu ka sam bawk a; mahse, kan awmna Cabin zimte ah chuan ka suangtuahna chu a tawp nimai hian ka hria, reh vung vung thawm chu ka hriat theih awm chhun a ni tlat si a.




Ka pa Contact list a Ununfeli Number pawh chu vawi tam ka hmet chhuak tawh, Usamua Number a nei a, dil thei reng pawh ka ni; mahse, ka induhtawk na hian a tlin ngang lo a, heti taka chapo hi ka lo ni ang tih ka inhre lo hial zawk. Dil pawh ni ila min pe duh kherin ka ring lo, han intih mualpho chu hreh tak tein ka hreh ve bawk si a, tih theih ka nei lo chu a ni ta ber e.




Ni a liam ve zel a, ka pa erawhin ṭhatlam a pan meuh lo a tih theih ang, a chang chuan a han tho nuam ve deuh ṭhin a; mahse a na chu a chawl tak tak chuang lo, a nat zual chang chuan vawikhat Jection maiin a hneh ṭhin lo a; kei chu ka beidawng titih der tawh. Ka pa chuan a ni telin a kal hun a hnaih tih ka hrethiam a, min kalsan hma hawtin ka sun ṭan chu a ni der mai.




In lam a ngaihtuah awm tawh em vangin ka nu chu haw turin ka ti ta ringawt a, min hawsan a hreh viau a, "A ṭul leh kan inchah leh zawk dawn nia, a chauh zualpui han reh sela kan lo haw ve thei tawh mai ang" ka ti ta kha a nia, ka beidawng awka chu a haibik in ka ring lo, helai hmuna kan awm reng hian awmzia vak a nei tawh tlat lo a. A Chemo khai vangin a chau zuala, a khai hmasak ang khan a taksa ah chuan ṭhatpuina awm a lang tawh lo a, a kulcho phah zawk mahin keichuan ka hria.




Zan khat chu a muhil reng emaw ka tih laiin a rawn ṭhu chhuak ve hlawl a, "Na i nei em ni?" ka lo thuai a.




"Na lo e, muhil leh rawh" a ti ve tak nain a hmelah chuan na a nei tih a lang reng lawi a, ka tho chuak ve nghal thuai bawk. A bulah chuan va ṭhuin a khum chu ka siamrem sak a, a puan ka sin ṭhat tir laichuan a ban a kham thu leh a hnungzâng thla chu na a tih thu a sawi a, ka han ensak chuan a lo sen ṭuak a, a delh ngai a delh nasat lutuk vang a nih hmel.




Tih ngaihna vak ka hre lo chuan Uchhuana ka hrilh a, "A saisir zawng khan mut tir rawh, a delh lam kha thlak zeuh zeuh sela, anih loh chuan Bed sore a awm mai ang" tiin min lo hrilh a, zinga a lo kal chuan hnawih turin engthil emaw hi Bottle te ah a lo keng a, zu rim a nam ham ham mai a, Damdawi a ti bawk si a, zu ni ngeiin ka hre bawk si. Ringhlel deuh chung chuan ka hnawih ta tho a, a enkawltu Doctor hnena ka lo hrilh chuan a ṭhat thu min lo hrilh ve mai bawk.




Tukkhat chu nilum ai turin kan innawr chhuak a, Phone ah PBK Liankhuma zai ngaithlain a mit a chhing diar diar reng a, zawi tein a zai ve sup sup bawk a, a landan chuan hnuk a ti ulh ṭeuh mai.




"I ṭhianpa kha i be thei ta lo a mi?" a rawn tih chuan phawk deuhin ka en a, ngunthluk zetin a nin min lo thlek ve bawk a, Usamua chung chang min zawt hlawl chuan min ti hamhaih lek lek a ni.




"Aw, ka Phone a bo daih sia, a Number ka hre lo a" ka tih chuan "Kan haw tawh mai dawn em ni?" a ti leh khauh a, a inthlahrung hmel chu a lainatawm takzet.




"Tunah chuan nangmah i pawimawh ber a lawm, engmah thil dang vei lo la, i dam ṭhat veleh kan haw dawn nia" nuisanga ka tih chuan a inngaihtuah ngun hmel hle a, haw a chak deuh tawh niin ka hria.




"Kan awmna hi i ning deuh tawh em ni?" ka ti chuan a bu nghat a, "Heng laia boral mai hi ka hlau a, kan inah haw ila ka duh zawk mah, i Umawipuii pawn min ngai ve tawh ang" a ti leh a, a haw chak tawh hle zawk anih hmel.




Thla khat chuang zet ka awm hnu chuan in lama haw kan rilruk ta a, hmun dang pan buai miah loin Uchhuanawma te inah kan khawsa tluan a, kan ti buai viau nain kan lakah an inhawng em em reng. Ka haw dawn zana ka pain lawmthu a hrilh chuan "Kan chhungte a lawm in nih, lo ni lo pawh ni ula Mizo in nia, lo buaipui che u chu kan tih tur a ni" tiin Uchhuana chuan a lo chhang a, hnam dang kara han khawsak chiah hian Mizo nih nawmna hi a chiangin ka hre ṭhin, Shillong a lehkha ka zir lai leh tun thleng pawhin chu ka ngaihdan chu a la danglam lo.




Kan haw dawn tih ka hrilh aṭang khan ka pa chu a phur viau tawh a, a helhhawlh a ni mah zawk ang, Phone-in kan chhungte a be kual a, hmuak turin a chah hlawm a, kan thlen tukah chawei khawm an rel thu ka nuin min lo hrilh ve bawk a, haw hma tlai aṭangin insiam ringawt chu ka pa rilru ah a awm a, "Chumi chu i khung tawh em?" a khat tawkin a lo ti ve reng a, mahni in lum nge nge chu patling tan pawh thlakhlelh a lo na deuh chu a ni e.




Uchhuanan Airport thleng min thlah a, kan thlawhna chhuah hun kan nghah laichuan ka darah min rawn kuah tharh a, hmalam a hawi vang vang chu mak ti lek lekin ka lo en bawk. "Ka lo haw hunah ka lo hrilh ang che, chaw eiah min sawm a ngai ang" fiamthu ti tak deuh hian a ti a, "E..ka ba che a lawm" ka lo ti erawh a duh vak lo.




"Engmah min ba lo a nia, Afeli te nufa rawn tlawh pahin chaw kan eikhawm dawn nia" a ti leh a, ka lo aw ve mai bawk.




Lengpui Airport ah kan chhungten min lo hmuak a, Ununfeli leh Uthana te pawh an lo tel a, ka ni te chhung an kokim hle a, Umawipuii ten in lamah min lo nghak thung. In kan thleng pawh chu ṭhenawm khawveng te nen kan ri le lu a, ka pa pawh a hmel hmuh a nuam ṭhin khawp mai, a chauh ka ringa lo han mu tura ka tih pawh chuan a duh bik lo a, lo leng lut a piang chu a lo chibai zung zung a, ṭhu hle hle thei loin a tei ve reng bawk a, hmuh a nuam em a ka khap duh ta lem lo.





A tuk tlaiah ka ni te chhung leh NuThani te chhung nen chaw kan eikhawm a, Umawipuii te nupa erawh Bawihpuia a nawmsam loh vangin an lo tel thei lo thung a, eirawng bawl an indaih bawka tiin pindan lamah ka pa ka ṭhutpui chawt a, a bawnghnute in tur ka tihdaih sak laichuan chik deuh hian min en leh ṭhin. Rei vak lo hnuah "I ṭhianpa kha lengah sawm ta che" a lo ti ta khauh a.




"Biak duhna i nei em ni?" ka tih chuan "Engemaw sawipui mai mai ka duh a" a ti ve mai a, englam tak chu ni ang maw?




"Ka chungchang thil em ni?" ka tih leh chuan min chhang mai loin min rawn thlek vang vang a, "Ka dam rei tawh lo ang, ka damlai hian innei rawh u, ka boral hunah chuan inneih pangngai pawh i nu hian a buatsaih sak ngut lo ang che" a tih chuan kan in en ran a, Usamua nen kan inkar ngaihtuahin ka pa sawi anga awlsam chu a ni tlat lo.




Ani dam lo, mahni pawh inbuaipui thei lo hnenah hian ka harsatna hi hrilh chi a ni angem? A rilru hahna ka siamsak mai mai lo ang maw?




Inhnuaia ka chhuk leh chuan an lo reh diak a, choka ah Ununfelin ei a lo rel a, midang awmna ka zawh chuan an in lamah an chhuk a ni awm e. "Ka pa chuan a in thei em?" tiin min lo zawt nghal thuai bawk. "Vawiin i duty hun a ni lo nge, chawlh i la" ka tih chuan "Ka Night dawn a, ka peih lo tak tak a ni, tun lai chu mut ka kham thei lo" a ti niah niah a, pangngai taka kan inbiak lohna pawh a rei ta khawp mai.




"Taka Mimi...Uchhuana khan i chanchin min lo zawt reng a, a duh hmel khawp mai che" a rawn tih chuan ka hamhaih lek lek.




"A va ropui ve" ti a ka nui tawi tak chu nuisang hian min lo en a, "Doctor in a ngaizawng che a nia, Uchhuanawma te chu a hmelchhe bawk si lo, a fel bawk si, i nei anih ngat chuan a duat viau ang che, i vannei dawn lutuk tlat" a ti leh zel a.




"A bulah bialpa ka neih thu ka hrilh tawh a lawm" ka tih chuan a hmel chu a danglam chawpchilh a, thutak zeta min rawn melhin "In inṭhen tawh a ni lawm ni?" a ti chang fak a.




"Ṭhen lo" ka tih leh chuan hmun leh hmunah kan in melh ran tawh.




"A nuin a duh lo chung chein engtin nge i la ngaihzawn theih a?" a ṭawng sual tih a in hre leh nge ni a ṭawng chu a zui ral khawp mai; chutah, va kal hnaihin hnai set sawtah ka va dinchilh a "I thil sawi zawng zawng kha ka hre vek, engmah hlawkna tur i nei lo, hetianga i tih hian nangmah i in ti te mai mai a ni" ka ti khar khar a, a chawhmeh chan lai melhin a nui sak a, "Kan nei lo ve ve anga, tihian a ṭha zawk" a ti mauh mai.




"I hma i sial vang a nih chu" vin zeta ka tih takah chuan rum theihtawp hian min rawn melh a. "Tu nge hma sial zawk chu, a tir aṭangin i in zep a, ka hriat loh hlanin i lo kherh a nih kha" min ti let erh a, a thinrim hmel viau bawk.




"Eng nge in lo sawi a?" ka nu in a lo tih takah chuan ka ding sawn thuai a, "In lo inhau em ni a?" a ti leh kha kha a, a tu a mah chuan kan chhang lo ve ve.




Sitting room ah ka pheisan a, rei vak lo ah ka Ni te an lo chho a, ka nu lo phei ve takah chuan choka lam chu ka pan leh thuai bawk. "USamua Number min pe teh" ka va ti thawr a, min lo melh ha ringawt.




"Ka Phone ka ti bo a" tih leh ka pa Phone phawrh ka rual a, "In inṭhen anih zawk kha, va tihbuai ṭalh chu i la tum a law.." a nui chhuak hawk a, min melh dan chu a ngeiawm duh kher mai.




"A nu kha i ngaih ang mai mai a ni lo ang, Samuela hi nu te thuawih chi tih te i hria em, a nu thu loin engmah a ti ngam lo, a nuin 'Nei suh' a tih chu a ti lui lo tawp ang, nang aiin ka hre rei tawh a, ka hre chiang zawk bawk" a ti leh sak sak a.




"Usamua chu keiman ka hrechiang" ka tih chuan a chek hlak duh chauh.




"Ka pasal tur min chhuhsak ang a ka ngaih chhan kha i hria em, Samuela nuin min duh miau a, nang hi awm lo la chuan Samuela khan 'Aih' a ti tlat dawn lo, hmeichhia kha a ngaihsak ve vak lo a, a nu duh zawng a piang a duh mai ṭhin, keipawh kha min hnial dawn lo tih ka hre miau a lawm, chuvang a nia min chhuhsak anga ka ngaih" a hmelah chuan intithei hmel a lang a, a Phone chu la kangin a nui ruh ruh a, "Ka lo biak sak dawn che em ni, eng nge i hrilh duh sawi la" a ti chuan mi run kher mai.




"Ngai lo mai rawh se" tih leh kalsan ka rual a, ka lo dil kher kher chu inchhir tak ka ni, lo dil miah lo ila ṭha tur.




Zanriah pawh chu ka kilpui lo a, ka pa nen kan pahnihin pindanah kan ei a, midang bula kil chu a chak ru viauin ka ring, a chawei hi naupang chaw pek taka pek a ngai tawh a, khumah ngawt kan inhrai ṭhin a, a thawh nawm ve deuh chang hi chuan amahin a ei ve mai ṭhin bawk.




Ni a liam zel a, ka pa chu a hniam sawt viau mai, a na chu a zual zel a, zan pawh kan mu mang ta meuh lo, Ununfelin a Jection ṭhin a, na chhawkna tel lo chuan kan khawsa thei lo a ni ber tawh, ka vil chawt a, ka hmel a hmuh loh hlek chuan min lam ruai ṭhin. Damdawiina kalpui lah chu a duh lo nasa mai a, ka ni chuan "Ama in ah ngei a hun tawp hman a duh anih dawn hi, i ti lui lo ang u" a lo ti bawk si a, tih theih a vang takzet a ni.




Hnathial lama kan chhung te pawh an lo thleng phei tawh a, rei a daih kan ring tawh lo ṭheuh a, kan chutih laimekin Umawipuii fapa Septicemia vangin Damdawiinah an lut bawk a, kan chhung buai a ni ta ber.




Kan vanduaina chuan tawp chin a nei ta lo emaw tih mai tur a ni, kar khat em pawh Damdawiinah an la awm lo ang tih ah Bawihpuia chu a kaih chiam a, ICU ah an dah luh hnu rei lo te ah min boral san zui a, kan tuar khawp mai. Ka pa lah ven ngai reng a ni tawh a, Bawihpuia boral thuin min han deng leh ta vei nan a chau zual a, chhungte hoin kan in singsak an rawt ta chuk chuk bawk.




Kar tluanin chhin khat te mah kan chhing lo, a tu a te pawh kan chau a, mittui nen chhun zanin hun kan hmang liam a ni ber, Umawipuii lusun lah bawihsawm ngaiin a awm a, bei a dawng tak zet a ni.




Inrinni zan a lo nih chuan ka pa chu a thaw lak a zawi sawt hle a, "Khua kan var zo tawh lo ang" ti a U Bzan min hrilh chuan ṭap tur pawh ka awm tawh lo, ka chawmawlh a ka vai riai ringawt mai a ni.




Pathianni tuk zinglam dar 2:30 ah ka pa chuan min peih lohsan te nge nge a, midang ho chu an ṭap nasa hle a; chutih laiin kei erawh ka ṭap thei hauh lo, Umawipuii ṭap lah ka hnem thei hek lo. Ka pa bulah chuan ṭhuin a hmel chu ka en reng a, "Tunah chuan i dam ta" tih thu chauh chu ka rilru a awm chhun a ni. Ni e...ka pa chu a dam tawh, tunah chuan natna a nei tawh lo a, Bawihpuia nen an pu tuin an inhmu tawh ngei ang chu, a natna kha a na em a, Pa khawngaihna dawngin damna a chang ta tih chu ka inhnemna a ni. Bawihpuia pawn a pu a hmu anga an hlim dun ngawtin ka ring....



(Zawmna)



Ka pa'n min boral san aṭangin kar a liam a, Hnahthial lam pawn min hawsan leh tawh a, inleng lut chhuak erawh kan la nei zut reng, ṭhenawm khawveng an fel em a, khawhar lutuk chuan kan awm bik lo. Chutih laiin Umawipuii lusun chu a taksa lamin a tuar ta deuh a, a BP te a hniam a; ka hming a lam reng vangin Inrinni tlaiah Usangzualan min lo hruai a, awmpui rih turin ka thawmhnaw tlem a zawng nen ka zui phei ve ta kha a nia.




Han buaipui vak dan tur a vang ṭhin khawp mai, thil a ei thei lo a; a muhil thei lo chu khumah ka awmpui chawrh chawrh a ni ber, Usangzuala nu leh pa an fel a, an duat thiam hle a, vannei ka ti lo thei lo, chhungkua amah hmangaih em em tu a nei miau a.




Zankhat chu khumah mut mai mai pahin ka ti ti a, ka pain a bulah thu chah a neih thu te min hrilh sap sap a, ka pa chuan ka lama ṭang reng turin a lo chah a ni awm e, "I nu nena an inkar ah palai hna lo thawk la, nakinah pasal a chhia a ṭha a la nei anga, nang lo unau dang a nei lo tih hria la, i mawhphurh ah lo la ngei ngei ang che" tiin ka pa chuan a lo chah a.




"Ka pa khan ka nu lakah beisei a nei miah lo a nih ka ring a, ka nu laka a nem zel chhan pawh nangmah hi i nih ka ring, fahrah tir che a hlau pawh a ni mahna" a ti sap sap a, ka pa chhanchin sawi hi chuan mittui a hnai ruai ṭhin, khati khawp khan min ngaiin ka tel lo khan a awm thei lo a, enga ti nge ka pa tak a lo nih mai loh le ti tein ka ngaihtuah thul, piang nawn leh dawn ni ila ka pa fanu tho a pian hi ka duh a, a fa lak ni leh dawn pawh ni ila amah tho hi ka pa atan chuan ka duh ngei ang.




"Chhimbal mawitaka zam i hmuh duh chuan ruahsur pawh i ngaihtheih a ngai an tih kha i hre ngai em, hun thim leh hrehawm tak kan tawng a; mahse, hetiang reng hi kan ni lo ang, kan harsatna te hi midang te harsatna nena khaikhin chuan engmah tham a la ni lo, mi te hrehawm tawrh hi mahni inhnem nan hmang ila, kan la vanneih zawk zia hi hre tlat ang aw, Bawihpuia leh ka pa kan chân a mahse, hei keini chu kan la awmdun a, nangin kei min nei a, keiin nang ka nei bawk che a" tiin ka thiam ang tawkin ka hnem ve a, a hnem tu zawk lah chuan mittui ka hru zauh zauh reng.




"A chang chuan i nun hi ka awt ṭhin ngawt mai, vanduai ka tih em em lai che pawhin nang chuan hma hun i thlir tlat zel a, i beidawng ve ngai lo hi ka awt che" a tih chuan za lo zetin ka nui a, Umawii min hmuh dan ang chu ka nih bik loh zia ka inhrechiang hle thung.




"Beidawng ṭhin tehlul mai; mahse, thawh leh chhan tur ṭha tak ka nei anih chuan thawh leh hi ka duh reng ṭhin" tiin ka chhang a, hma hun chu ka suangtuah ngam lo, a hmuh phak chin chu chhum dum chhah takin a hual vel ang a ni, beisei tur pawh ka hre tawh lo, engthil emaw beisei neih chu ka duh a, chu takngial pawh chu ka zawn chawp a la ngai cheu a, engthil mah awh awm tih tur reng ka nei lo.



"In dang thei ni ila chuan kan hnenah lo awm la ṭha tur a nia..." a aw chu beidawng lutuk aw ri a ni. Ka chhang lo a, inchung lam chu ka melh reng ringawt.




"Pasal nei daih mai ta che, inchungkhur a nawm loh hi chuan chhungkaw thar din mai hi a ṭha zawk a nia, Mistiri khan a nei duh che a ni lawm ni, nei la... in dan pui daih mai la.." a sawi laichuan ka va melh vat a, "Ani pawh inpui changtu tur tho a nia, tunah chuan kan inbiak lohna pawh a rei tawh" ka tih chuan a tho kang uaih a, zawhna a ngah hmel hle bawk.



"In la inbe reng ang chu ka tia sin, in inṭhen hlen ta a mi?" a tih chuan chhan dan pawh ka thiam meuh lo.




"A Phone Number ka nei tawh lo a, biak pawh dan tur pawh ka hre rih lo" ka ti hap a, "An in awmna i hria a ni lawm ni?" a tih chuan thil tih chi niin ka hre lo, nula zawkin va pan chu a mawi pawh a mawi lo deuhin ka hria.




"Sawifel lo a han inṭhen tawp chu nakinah i inchhir a nge aw, 'Biak pawh dan ka lo ngaihtuah lo a ni' i la ti vawng vawng a nge" a ti leh zel a, ka nui mai tak nain a thilsawi chu ka rilru ah a cham reng a, mut hmunah ka inngaihtuah buai nasa khawp mai.




Ka pa boral thu pawh a hre lo ngei anga, khang kan inbiak loh chhung khan min biak pawh dan tur a lo ngaihtuah ve reng a ngem, Ununfeli a dil a ngem, lo dil ta sela ani kher chuan a pe duh lo ngei bawk anga, keimah ang tho hian rilru buai takin a lo awm ve reng maithei, chutiang thuartham vel ngaihtuah chuan zan rei tak thleng ka meng a, zawhna pakhat erawh ka rilru ah a lian hle a, min hmu tura a lo kal miah lo hi eng nge a chhan ni ang, kan in be lo rei ta em a, a rilru a danglam zo ta tih em ni ang?




Hetianga inkhap buai reng hian eng nge awmzia a neih, Umawipuii sawi ang khan nakina ka inchhir vawng vawng loh nan keimah ngeiin ka hmuh a ngai a ni, ka biak theih loh chhan te ka hrilh anga, biak ka duh ṭhin zia thu te, ka chanchin pawh....min lo ngaithla duh a nih phawt chuan....




Pathianni tuk a ni a, Umawipuii bula va hmuh ka tum thu ka hrilh chuan min lo thlawp khawp mai. "Tunlaiah chuan a zahthlak reng reng loh a nia, an mo pawh i ṭhian a nih kha, ka pa damlo enkawl reng rengin i buai a, kan chhiat tawh nen ani pawn a lo hrethiam lutuk ang che" a tih chuan ka rilru pawh a nuam ve ta deuh.




Chawhma chu Umawii ka inkhawm pui ve zawk a, tlainema kal ka rilruk vangin hmanhmawh em em lo chuan ka insu leh rih a, ka in su zo pindana ka va lut chu "Ka nuin a lo Phone che a, cham rei a ti deuh tawh che a niang" a lo tih chuan ka hnual rawih thei.



"Lo haw rawh se a ti em?" ti a ka zawh chuan a bu nghat a.



"Delhi ah Silver la turin a ṭhiante zui a duh anih hmel 'Tlaiah lo haw tawh rawh se' a tia, i duh leh va phei tawh mai rawh, ka dam tawh tho a lawm" a ti leh a, ka nu hi Silver zuara sumdawng reng ṭhin a ni a, zin tak hi chu a zin khat angreng a, nidangah chuan a ṭhiante pawisa a thawn a, an nin an lo kep ve mai ṭhin a, tun ṭum chu kan boruak tawn vangin hawi khawthawn a duh ve anih ka ring.




"Anih chuan ka kal zawh ah ka haw tlang mai ang aw" ka tih chuan a bu nghat a, "Mistiri-a khan inruk puiah a sawm che anih chuan i Yes nghal dawn nia, ka nu chu vengthawng duh suh, i nawmsak na tur lam apiang pan hmiah hmiah rawh" ka hmai ka chei lai chuan a ti mawlh mawlh a, a sawi anga awlsam hi han ni ṭhin sela ṭha tur.




Dar 3 rik dawnah ka kal chhuak a, Taxi a vang khawp mai, rei deuh chu kawnah Taxi ka chang a, a ruak pakhat lo tlan chu ka lo phar a; ka kal duhna ka han sawi chuan a ti to em em lehnghal a, rilru dam lo deuh chuan ka chuang ta tho a, dar thum a pel thui tawh a; a dang nghah khawtlai leh chi a ni tawh tlat lo.




Usamua te veng kan thlen takah chuan ka zam riau a, ka tirilah chuan min mawlh tet tet reng, a bula ka sawi dan tur te chu ka ngaihtuah kual a, ka buai deuh niai tawh. Engpawh nise ka hmel inlan hrim hrim ila, a bak chu a tla chawpin ka ngaihtuah tawh mai ang.




An kawmthlang kawngpuiah chuan ka chhuk a, an in chhohna Step chu ka thlir vang vang phawt a, ka lungphu chu a mumal lo tak zet, chho mai ngam loin Step hmawrah chuan ka ding leh rih a, let leh mai te a ni ka ngaihtuah leh tawh ni, ka thinsenin a ngam ngang lo, engtin nge min lo chhawn dawn ka hre si lo a, a hlimchhawn te tal kha ni se a zia deuh tur, kan inbiak hnuhnun ber kha a rei tawh mah mah deuh a ni.




Rilru buai zeta ka dinlai chuan kum hlui thlah zana a thu min hrilh kha ka hrechhuak a "Mihring thinlung chuan a phatsan lo anga; hun leh ni zawk hian a phatsan ṭhin" tiin min hrilh a nih kha, anih chuan kan tlai zo tawh tihna em ni ang, hun chuan min phatsan takzet em ni...?




Ni lo e...amah ngeiin a sawi kha, 'Mihring thinlung chuan a phatsan lo ang' a ti a, chu chu ka hmuh chhan tur chu a ni. Step ah chuan ka pen chho hlawk hlawk a, Step tawp ber ka rah ruala ka thil hmuh vang chuan ka pen tawp chiang hle..!



Kawngka chu Tala lian puiin a lo inkalh a, beidawn luatah nuih a za hial zawk..! Stepah chuan ka ṭhu hnawk a, thaw a ipik takzet, tih ngaihna lah chu ka hre der bawk si lo.



Ka ṭhut reng laichuan ka nuin min lo Phone a "I lo haw dawn tawh em?" a rawn ti lang lang a, ka haw mek thu ka hrilh a, ka aw chu a zawi kher mai.




"Afeli te inah chaw kan eithla dawn a, lo hmanhmawh rawh aw, zan inkhawm kan duh a" a ti leh a, chu zawng ka phur lo ngang mai. Ununfeli chu ka haw thar ngawih ngawih a, inhnimhnaih leh hi ngai tawh miah lo sela ka ti a ni.




Usamua te chu hmun dangah chaw an eichhuak em ni aw, nge ni a Mamitah an haw zawk ni ang le? Nghah chi an ni angem tih ang reng chuan ka inkhap buai a, khua lah chu a tlai zela Taxi a vang bawk nen awm reng chu a fuhin ka hre bawk si lo. Mahse, ka nghah chhuah hlauh chuan aman min thlah thei tho ang ti tein ka ngaihtuah kual a, chu erawh duhthusam ve mai chauh a ni...




Darkar chanve zen zawn ka nghah hnu chuan beidawng zetin kawngpui lam ka pan a, ka vanneih a siamin Taxi ruak ka hmu leh hlauh a, awmze nei hlei loah pawisa ka seng ṭeuh ringawt mai, In ka thlen chuan ka nu chu inhnuaiah a awm tawh anih ka ring, chawei pawh ka chak meuh lo, eng engemaw a inhnawhpuar mai ka rilruk a, inhnuaiah pawh chhuk ve loin ka pindan lam ka pan zui bawk a.



Rei vak lo ah ka nu chuan min lo Call leh a, Chaw ka ei chak loh thu ka hrilh mai a, "I eidawn loh te chuan engah nge min innghah tir reng" a ti bak hlur a, ka chhang let lem lo thung.



Mu chunga Phone ka khawih melh melh laiin Instagram lama Urosy min lo biakna ka hmu fuh hlauh mai a, ka pa boral min tawrhpui na thu te min lo thawnin min Phone tlang theih loh thu te a lo sawi a, kan chanchin Ukimkimi hnen aṭangin an lo hria a ni awm e.




"Ukima nen kan ngaihtuah lutuk che a, i pa boral ni pawh khan kan lo kal a, inchhung lam kha a khat si a, i Ukima a ṭhu rei thei si lo a, kan lo lut ta lo anih kha. I nu kha chu kan bia a, i Phone number dil nachang ka lo hre pek lo a" tih ang reng a lo sawi luam a, kha mi ni khan ka belebut lutuk a, Umawipuii ka buaipui bawk nen tu tu nge lo kal ka hre fumfe meuh lo, Urosy chuan ka biak theihna Number min lo dil vangin ka Phone Number chu ka thawn nghal thuai bawk.




Ka rilru ah thil pakhat a lo lut chawpchilh a, Social media hmangin Usamua chu ka biak theih mai ka ring ta, mah se...buaina ni ta chu eng Social media mah a khawih ve tlat lo...




Hmanhmawh deuhin Suzanne-i hming ka zawng a, ani emaw a pasal chuan an khawih ngei ngeiin ka ring. Suzanne tih chu a tam ngang mai a, ka biak duh tak pawh a lo awm ve ngei a, a hming ka hmu chu ka thaw huai huai mai.




Message chu ka Type a, ka Type ṭha zing malh malh viau a, sawi tura khat ṭun e ti lo chuan ka hul huk lawi a, Usamua hnena a hrilh chhawn leh tur anih vang te pawh a ni mahna, "Kan inbiak lohna a van rei ta ve, ka Phone ka hloh daih a, in Number ka nei ta si lo a, hei hi ka Number thar aw.." tih zawng ziakin ka Phone Number ka dah tlawng a, ka awm a nawm phah huai pawhin ka hre lo.




Ka inngaihtuah nawn lehzet hnuah Message dang ka ziak leh a. "Kar kalta mai khan ka pa a boral a, Usamua kha min han hrilh sak rawh" tiin.



Ka muhil dawn ṭan siar siar tih ah ka pindan kawngka kik thawmin min ti harh a, "Mimi lo hawng lawk teh" ka nuin a tih ri ka hre zawm zat bawk.




Kawngka ka va hawn sak chuan "I va mu hma ve, i nuamsam lo a mi?" tih leh lo luh a rual a, "Nuam e, Umawii nen kan mengrei ṭhin lutuka, mut ka kham vak lo" ka ti ṭha ve mai a, ka khum tlanga a ṭhut takah chuan engthil emaw sawi duh a nei a nih ka ring a, khum lam chu ka pan phei ve nghal thuai a.




"Dawr kan nei ta bawk si lo a, eizawnna dangah ṭan lak kan ngai dawn khawp mai" a tih chuan ka lo bu nghat a, "Hna zawn ve chu ka tum a, naktukah ka Document vel ka buaipui ang, Employment ah va kal hmasak te ka ngai dawn a" ka ti ve sap sap a.



"Ni e, hna zawn chu a ṭha, lehkhathiam i ni a, engemaw tak chu i tan a awm ve mai ang, keipawn sumdawnna lamah ṭan te kan la ve anga, kan nufa chauh kan ni bawk a, kan dam ṭek ṭek chuan kan nghei bik lo ang" a ti zui luam a, ka nu hi a thla a phang deuh em ni aw ka ti rilru a, a hmel ka en chik chuan thlaphang hmel phei chu ka hmu lem lo.




"Sawrkar hna ka hmu mai lo anih chuan Private school velah pawh ka thawk thei mai ang" ka tih leh chuan a bu nghut nghut a, eng thil emaw ngaihtuah rauh rauh hmel a pu bawk.



"Ka pa Pension pawh..." ka tih laimek chuan a lo hawi vut a, "Kha chu a tih chi loh ang, Sumdawnna hi chu a Risky emai, nang lahin pasal min la neih san te emaw a nia nga; fapa ka nei si lo ka tar huna ka inenkawl ve na tur ka in dah ṭang ṭang a ngai" a ti zung zung a, a rilru a hah hmel riau hian ka hre tawh.




"Capital i nei lo em ni..?" ka tih takah chuan min en ran a, ka zawhna chu a chhanna a nih mai hmel e.



"Dawr hralhna pawisa kha engzat nge la awm?" a ti ta khauh a. Ka pa inenkawl nana kan hman bakah a boral tirh khan mamawh eng ilo lam nan ka hmang leh nual a, tam tham chu bang a awm tawh lo.




"A tam vak tawh lo, ka hmang nasa..." ka tih laimekin "Engzat maw awm..?" a lo ti leh a, a zat ka sawi chuan tlem a tih hmel khawp mai.




"Engpawh nise, bul ṭan nana kan hman phawt loh chuan a tih ngaihna a awm rih lo, Vellore ah khan kan pawisa khawlsa kan hmang ve ṭeuh a, nitin khawsak man a sang si a, chet hlekin sum a chhuak zel si, kan neihsa kan ei zawh hma a kan tihpun loh chuan kan talbuai lutuk ang" a ti leh malh malh a.




"Eng zat nge i hman ang?" ka ti chu min melh tur viau tawh. "Capital a tlem chuan a hlep a tam thei lo, Capital a san leh a hlep a ṭha" a ti hmuk a, eng zat chiah nge maw min beisei le..?




Ka ngawih rauh rauh laichuan "Han la ta che maw aw..." a lo ti leh a, ka ATM card ka lakchhuah laichuan ka rilru a buai rih khawp mai, ka neih chhun a ni rih a, ka nu kuta a luh vek chuan bul ka ṭan leh tawh maiin ka ring lo a ni. Mahse le...Dawr pawh an kut aṭanga ka neih tho a lawm tiin ka inhnem leh rih a, ka rilru chhungril erawh a hah ru tak zet.




"Nu, i hmang rei a ngem...Umawipuii nen sumdawn kan tum ve deuh a...." ka tih chuan "Ka zin zawhah a hriat mai ang, sumdawn i peih tho te chuan mi te pawh i zui ve zawk anga, kan nufa in kan ti mai dawn a lawm" nuisang hian a ti a, chu lam kher chu ngaihdan pawh ka nei thiam rih lo.




Ka nu te zin chu kar khat dawn an thang a, pawisa a la chhuak fai leh lutuka Phone thar pawh ka leithei ta rih lo, ka Phone hman laiah chuan ka mamawh ang chu a tih ve theih ṭawk ṭawk a, ka Pa Phone anih vanga ka roh hrim hrim tih loh ah chuan Phone ṭha tak pawh a ni tawh lo a, nula tan chuan a mawi hnai tehchiam lo bawk nen a thar chu ka mamawh viau mai.




Ka nu lo haw chu a rawn bazar haw nasa mai a, Kurta ringawt pawh pathum lai min lo hawnsak a, ka Nu Thani te chhung a hawn vek bawk a, sawihmaih theih loh rangkachak ṭhi lian ṭha zet a rawn awrh haw bawk a, a hralh tur a nih hram ka beisei.




Phone leina ka dil chuan pawisa a la khawn khawm loh thuin min chhang a, a hmuh hmasak ang anga bungrua lak lehnghal a ngaih thu te, dawra pekna tur awm laia tih zung zung a ngaih thu te chu min hrilh luam a, "Ka phone hman hi a ṭha lo lutuka, mi zinga lek chhuah a nuam vak lo a sin" ka tih pawh chuan "Khatiang Phone i hmang kha miin an ngaisang zawk daih ang che, Phone ṭha deuh deuh huma thawhchhuah nei si lo aichuan a zahawm zawk, thla hnih khat vel han nghak leh la ka hlep aṭangin ṭha deuh ka lei dawn che nia" a ti sam mai a, engmah hi a kal dik tawh lo, hna ka hmuh vat a ngai tih chu ka rilru a lian ber a ni ta.




Urosy chuan min lo be pawp thuai a, Ufamkima nen pawh kan inbe luam a, kan inbiak chuan leng turin min sawm cham chi a, len chu ka duh tehmeuh mai; mahse,hun remchang ka nei thei der lo a, hnaruak awm apiang dilin ka phar kual a ni ber. Sawrkar hna hmuh a harsa hle tih chu ka hre ve ngei a, heti em em a ni ang tih erawh ka hre phak lo.




Kei aia thiamna sang zawk te nen Group D hna thlengin kan inchuh laih laih a, hnaruak pakhat dil pawh sang kan chuang a ni zel a, bei a dawng ṭan der tawh. Keini ang Political fitness nei lo tan hian sawrkar hna hi a awm ve lo em mawni ka ti hial a, thlan chhuah nalh tur lahin thiamna chungchuang ka nei mang si lo, Exam leh Interview ka nei indawt zut a, ka neih tam poh leh bei a dawng tawlh tawlh thung a, engkim chuan min ti hah a; ka chau tak zet tawh.




Usamua te an la reh vang vang a, Suzanne-i lah chuan ka Message a hmu thei bawk si lo a; taksa chau nen rilru a chiri nuai reng a, Usamu lakah pawh beisei ka nei ta meuh lo. Hun leh ni ten min phatsan tawh tih chu ka pawm mai a ngai dawn a ang, va kal leh chu hreh tak tein ka hreh tawh a, ka beisei ang thil ka tawng dawnin ka inhre lo a ni. Tunah chuan an in tharah an insawn tawh ngei anga, a nu leh pa te nen hlim takin an khawsa mek bawk ang.




Zan khat chu beisei loh deuh in leng ka nei a, Uchhuanawma a rawn lang hlawl mai! Ka nu nen Silver kan lo buaipui laimekin a lo lut a, "Ka lo haw tirh khan rawn ral che u ka tum a, Lunglei lamah hmanhmawh deuha kal ka ngai leh sia" a ti ve luam a.




"Chaw te la rawn ei rawh aw, Afeli pa lah i rawn hmu ve hman ta si lo a" ka nuin a tih laichuan ka rilru a lo na riau a, Afeli pa a ti chu ka duh lo a ni ber. Ka pa kha chu kei leh Umawipuii pa liau liau a ni.




Ka pa boral hma chanchin te sawiin kan titi a, ka pa chu tuarchhel a tih thu te a sawi ve sap sap a, "Vellore ah khan ka bei a dawng ru tawh lutuk zawk a, in haw tur ka chelh duh loh chhan che u pawh kha a nia, amah kha a tuarchhel em a, vairam a thih kha a tum lo bur a, chuvanga daih rei thei zawk chu niin ka hria" a tih chuan ka pawm khawp mai, ka pa kha a tuarchhel tak zet a ni, ka enkawl chhung khan vawikhat te mah na a tih thu hi a sawi ri ngai lo.




"I khawi lai nge na?" ti a ka zawh apiangin na a neih loh thuin min chhang zel a, chuti chung chuan "Jection leh tawh ila" tiin nachhawkna min dil tho ṭhin...a taksa kham ka hmehsak chang pawhin "I hah tawh ang, duhtawk tawh rawh" a ti thuai zel a, a inthlahrung lutuk mawlh mai kha ka lainat a ni.



"Afeli Nu chu ka zuk kan ve a nge?" tih pahin Uchhuana chu a ding hluai a.



"Thingpui te in ve phawt rawh" ka tih chuan "Ngawi rawh, zan dangah ni rawh se" a ti deuh tlat a, ka nuin inhnuaia a chhukpui takah chuan keimahin Tv ka en a, ka nu chu a rawn let leh har hle a, a lo chhoh chuan dar 10 a pel fel der tawh.




"Mimite...Chhuanawma khan a duh che a ni awm e, Afeli bulah a lo sawi a, i hre ve tawh reng reng em?" a tih chuan "A ti ve mai mai anih chu" ka tihsan mai a, ka nu chuan min rawn ṭhuthnaih rang khawp mai.




"A ti mai maiin ka ring lo, mipa rilru nghet chi niin ka hria, Doctor a ni lehnghala i duhzawng a ni lo em ni?" a tih laichuan a phur hmel riau hian ka lo hria a.




"Duh lem lo" ti a ka chhang chu min melh tur khai a, "Ununfeli Cousin a nih kha, kan la inchhung pha a lawm" ka tih chuan a ṭeu viau ka rin laiin a ngawi kar mai a, min rawn melh leh zauh ṭhin a.




"Unau in ni ve chuang hleinem..." a rawn tih leh chuan "Mi ten mak min ti lutuk ang" ka lo ti leh a, a lawm ta vak lo a niang "I phu loh tehlul nen, ani ang mipa in a duh che chu lawm ta viau zawk che" a ti ta hlak a, ka chhang tawh lo chiang hle.



Zana ka mu tur chu Number hriatloh hnen aṭangin Phone Call ka dawnga, beisei sang viau lo mah se; Number hlang hnen aṭanga Call ka dawn hi chuan Usamua anih ka ring leh ṭhin a, ka chhang lo ngai lo a tih theih ang. Mahse, tun ṭum chu Uchhuanawma a ni tlat.



"I mu tawh em?" a rawn ti zawi sup a.



"Ka mu dawn chiah" ṭha deuh chuan ka ti ve a.



"Afelin thil a hrilh che em?" nui lek lek a a rawn tih chuan rin dan ka nei thiam a mahse, min hrilh loh thuin ka chhang thung.




"Anih chuan keiman ka sawi mai a ngai dawn a ni maw?" tih pahin a nui leh suk a, sawi lo se ka ti takzet, tunah pawh ka awm a ti nuam lo nghal pang a nia.



"Mimite..." a tih chuan "Aw.." pawr angreng zetin ka lo ti a, a zia lo deuh chu a ni.




"Ka duh lutuk che a, i pawi ka sawi em lo ang chu ti raw..?" chhan dan a vang kher mai, 'Aw' emaw 'Aih' tiin chhan chi a ni lo ve ve, khati khawp khan kan lakah a ṭha a, be chhe thei lah ka ni hek lo.



"Heh...I ti lawmawm.." tiin ka nui tawi tak a, ka awmdan chu hrehawm ngar ngar tak a ni.




"Karleh ah ka Appointment thar lawmna party kan nei dawn a, Hotel Regency ah ka rualin kal rawh aw" a ti leh zel a, heti hi chuan a fel dawn lo, a tir aṭanga beiseina siam loh a ṭhain ka hria.



"Uchhuanawm bialpa ka neih kha.." inthlahrung zeta ka tih chuan thawk a la hawk ri ka hria a "Afelin in inṭhen tawh thu min hrilh sia" a rawn ti mauh mai, Lalnunfeli lehpek chu....




"A hresual anih dawn chu, kan la inṭhen hleinem" ka ti ṭha leh a, a ngawih tak reng vang chuan nuam ka ti bik vak lo.



"Anih chuan ṭhian ang talin i rawn tel ve ang chu, chawei a sawm kha min bat hrim hrim kha, i lo kal anga kan intlak ni mai rawh se" a tih leh takah chuan 'Aih' tih tlat theih ni tawh hek lo le, rilru nuam lo deuh chungin ka 'Aw' ta chu a nia, ka inchhir loh hram ka beisei.




Kar tluanin Uchhuanawma fakna thu ka nu leh Ununfeli hnen aṭangin ka dawng a, Nu Thani pawh a bang chuang lo, ka nu chuan Umawipuii bulah pawh a lo sawi a, "Doctor-in a ngaizawng che a mi?" tiin min lo zawt nghe nghe.



Uchhuanawma chu Sunday tlaiah Ununfeli te inah a lo leng a, Ununfelin kan inah a lo chhohpui a, min biak hian mawihnai lo leh engemaw zawng takin min be ngai lo a, pangngai leh puitling takin min be mai ṭhin, ka tana biakchhiat mawi a ni lo a, chu mai niloin kan tan a thil min tih sak zozai vang khan a laka ṭha em em tur zawk ka ni.




Mahse, ka duhzawng a nih loh vang ni hauh loin ka duh a nih loh vang zawkin a lakah chuan ka in hawng thei lo a ni. Mi ṭha tak, puitling tak leh zahawm tak chu a ni ngei a, rilruin a ṭhatna hmu thiam viau mah se; thinlung zawkin a duh a thlang tawh a, hmangaihna zunzam in a phuar tawh thinlung hi chuti maia awlsam chuan phelh theih a ni tawh tlat lo. Ka lo la beisei reng a ni mahna, hmangaih dang a tawnga bul a ṭan ṭha anih loh chuan keichuan ka ti hmasa hauh lo ang.




Uchhuanawma Appoinment thar lawm ni chuan inah ka awm a, Ununfeli pawh a lo haw hma hle a, ka nu lah chuan ka kal ve loh mawlh a hlau a, tlai eirel lai aṭangin min tur sek reng a, kal loh tum pawh ni ila min tur lui duh hialin ka ring a ni.




Tlai thim dawn ṭepah Uchhuanawman a Motorin min lo hruai a, Ununfelin Seat hma ah ṭhu turin min ti lui tlat bawk a, a hmun kan thlen lahin tumah hmelhriat dang ka nei si lo a, Uchhuanawma bulah ngawt chuan ka tap a, a bialnu emaw ti a mi in min chibai leh ṭhin chu ṭha ka ti lo khawp mai, lo sawifiah duh viau mahila a rem teh ṭeuh si lo. Uchhuanawman nuam a tih hmel viau laiin keichu ka awm a nuam lo takzet, ka thaw te chu a ipik ru riau a, ina haw vat ka chak a ni.




Uchhuanawma bulah chuan haw mai ka duh thu ka hrilh ta ringawt a, "Karaoke ah i kal ve duh lawm ni?" a tih pawh chuan ka hnial zel a, tih ngaihna a hre ta vak lo aniang, "Ka va thlah lawk ang che" a ti ve ta hram a. Kan chhuak tur te chu Ununfeli te ṭhian hoin min lo chhaih zuk zuk a, ka nui tawi ṭhin khawp mai.




"Nuam i ti vak nange, chaw i eitlem bawk si a, i puar ve pawhin ka ring lo" a tih chuan ka puar thu ka hrilh ve mai a, "Thu dik tak min hrilh teh, i bialpa nen khan in inṭhen tawh em? Nge min duh loh hrim hrim vang?" a tih chuan kan in en ran a, ka buaina zawng zawng pawh a hriat vek ania ka rin ni.




"Kan la inṭhen lo" tih bawk chuan ka chhang leh a. Kan inbe ta mang lo, min en leh zauh ṭhin tih chu ka hria a, a lakah chuan ka inthlahrung ve deuh a, ka hnawl dan chu a ngaih huat loh hram ka beisei.




Kan kawt kan thlen chuan Motor aṭangin ka chhuak vat a, a let leh nghal mai dawn emaw ka tih laiin a lo chhuak ve a, min rawn pan leh rih vang chuan ka kal nghal mai bik lo, chutah engkhaw sawi set set loin min rawn fawp thawr a, Motor tlan tam lutuk lai lehnghalin!




Ka hamhaih lutuk vang chuan chetsawn mai nachang ka hre lo a; mahse, rei a ni lo, ka tawlh hnung vat a, "Haw rawh" tih leh inher ka rual bawk. Kan kawngkhar lam ka pan leh tur chiah chu ka pen tawp chiang viau a ni, ka beisei loh lutuk ka hmu a, pen sawm vel a hla ah dingin min lo thlir reng bawk!




"Usamu..." a rawn pen thla a, ka lam pana a lo kal laichuan ka chawmawlh vek tawh, "I ṭhianpa chu a mi?" Uchhuanawman a lo tih chuan ka chhang lo chiang hle.




Ka lampana Usamua leh a ṭhianpa lo kal chu ka en ran a, ka hmuh hnuhnun ber aikhan a hmelṭha daih tawh zawk, a mitmeng chu a dur ṭha hle a, ka lakah a lawm hauh lo, tlangval dangin min fawp lai a hmu miau a.




"Usamu..ka phone..." hnai taka a hmel ka hmuh takah chuan ka tawp leh rih a, ka thinphu rang lutuk vang chuan ka aw te chu a khur thei hial a, engtin nge tuna thil thleng kha ka sawifiah tak ang.



"I pa kan lo ral a" a ṭhianpa chuan a lo ti a, keiin amah ngawt chu a en thung a.




Ani chuan min en a, min be lo a, min kalpel mai bawk.



Lehhawi a ka koh pawh chuan min chhang lo, a lampanin ka tlan phei hlawk hlawk a, a Bike-a a ṭhu chu a ban ka va vuan hman thuak tih ah a tlan chhuak a, min tlansan....!?



Samuela ka tawn leh hmasak bera thil thleng chu kha zawng kha a ni. Min en a, min kalpel mai a, chubak engmah a thleng lo...mahse, ka rilru a na lutuk a, ka â thei mai dawnin ka hria....







(End of chapter - 16)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 6th, 2022, 7:47 pm

ZUNZAM - by Ahmangaihi violette Khiangte

CHAPTER - 17




Mittui hi lungngaihna leh natna hrilhfiahtu a nih ngai chuan; tuna ka mittui luang hian ka natna te hi an hrilfiah zoin ka ring lo, a tlanliam takna lam thlir chuan ka la ding ta reng a, ka thawk ipik lutuk vang chuan ka awmchhung chu a na ngut ngut a, ka â deuh riai mai. Kan inhmuh leh hun tur ka lo suangtuah dan leh tuna ka awmdan chu inpersan tak a ni.




"Mimite.." tih ri ah chuan ka inher thuai a, chutih rualin Usamua ṭhianpa khan min lo tlanpel ve chiah bawk.




"Tu nge ni a?" Uchhuanawman a tih chuan ka melh ran ran a, ka van haw tehlul em.




Ka lampana a lo kal chu lawm lo zeta en chungin ka pan phei ve a, kan indinchilh takah chuan ka awmdan chu a hrethiam a ni chek ang "Kha kha em ni i bialpa chu?" a ti leh khauh a.




"Uchhuanawm tlang takin ka hrilh tawh che a, engkim i ti khaw lo zo vek a nih hi, kan laka i ṭhatna vang chauhin huat loh che ka tum anga mahse, biak che emaw hmuh leh che ka duh tawh lo, min lo hrethiam dawn nia" kal mai ka tum chu ka banah a rawn vuan chawt a, ka thing thla leh rang khawp mai.




"Min khawih hauh suh, tunah chuan i lakah ṭawngkam ṭha hman tur engmah ka nei lo" ka ti leh fak a, inthlahrun hmel taka min en laiin kei erawh ka thinur takzet a, min ṭanpuitu a ni tih hre reng mahila a lakah chuan rilru ṭha ka pu thei tawh tlat lo.




"Tihpalh aw, a awm tih ka lo hre lo a.." a sawi laichuan ka din hnaih sauh a, a thilsawi chu ring lo tak ka ni, hnai takah kan in en a, hepa hian min hrechiang hle tawh zawk ang chu, ka mi hriat tawh a zawnga dakthei ber Ununfelin hnenah thu a la ṭhin tlat.





"A awm emaw awm lo emaw i che mawi lo a, ka pawi i khawih bawk, i tihpalh takzet anih chuan ka hmuh ah lo inlan tawh suh" ka tih laia ka aw chu a chang ṭha khel khawl hle a, ṭawngtuma a ang leh zuau chu inhersanin In lam ka pan hlawk hlawk a, min lo ko leh tak nain ka hawilet tawh lo chiang hle.




Inchhunga ka luh rualin Tv thawm ka hria a, Sitting room a ka va luh chuan ka nuin phawk zetin min lo en a, "I va lo haw hma ve...Afeli te an lo haw ve tawh em?" a lo ti nghal zat bawk.




"Usamua bulah khan sawi i nei em?" a zawhna pawh chhang lo chuan ka ti tawl a, a mitmeng tlan chhe ruai chu ka hmuh hmaih lo.




"Engthil nge i lo sawi?" ka ti vin hlur a.



"Eng nge sawi vak tur awm, i pa an lo ral a, i kalchhuah thu ka lo hrilh anih kha" damthluam hian a ti a, chu zawng ka ring hauh lo mai.




"Engmah thil dang sawi i nei lo maw?" ka ti kha kha chu a lawm ta lo hle a, min melh thip ram ram chungin a rawn ding chhuak a, "I mi biak duh dan mai mai chu, eng buaina nge i neih leh tak, khatiang aw ki vin kha chuan mi be hlek tawh suh" a ti khar khar a, thawk a ipik takzet...





"Min lo Phone thei mai lo em ni, eng buaina nge ka neih pawh i hre lo a maw?" ka ṭap lo chauh. Ka nu chu ka melh tlawk tlawk a, a lakah chuan ka beidawng hluah hluah a ni, 'Ka nu' ti a ka koh reng ṭhin hian min ngaihtuahna chhe te mah a neih loh chu thuhran ka tan thil engkim a ti harsa zel a, awm ngaihna pawh min ti hre lo zo tawh.




"I fanu ang hian min en tawh miah lo ti raw.." a chhanna hriat ka duhloh ber zawhna chu ka zawt tho, ka rilru a na em a, inbun ruah na tur ka mamawh takzet a ni.




"A sawi pawh i sawi ngam zawk mange ka ti, khatiang rilru i pu anih chuan i nu angin min en lo zawk anih reuh kha.." a ti leh hluk a, ka insum hle anih loh chuan ka chhungril tawt lutuk hi a puakkeh thei mai ang. Ngaihtuahna a fim lo a, ṭawngkam chhe tak tak bak ka rilru ah a awm lo.




"I ngaihzawngpa vanga inhnial fo hi a khamawm tawh lutuk, midang ngaihtuahna nei loa mahni chauh in ngaihtuah hi sim rawh, inchhungkhur boruak chhe vek khawpin buaina i rawn lalut a, thu ka rawn che lah i awih duh der lo a, Afeli te chuan ṭha takin a thlah mai a, i tih mawh lutuk bik reng mai" a ti hlak hlak a.





"I fanu khan ṭha takin a 'aw' reng reng lo, Usamu nu hnenah engtin nge min sawi i hre lo anih kha, kan inkar tihchhiat dan bak a ngaihtuah lo, hmasial zawk chu amah kha a nih kha" ka tih chuan a thinurna ka chem alh zual sauh a ni ngei ang; a kutzung chala min rawn kawk vah chungin "Zak rawh, i sentet aṭanga enkawltu che ka nih hi Saitluangpui, i duh a nih chuan va um ta che, ka thu kalh a i awm anih ngat chuan kan in mi hran dawn chiang khawp" a ti ta sak sak a, chu erawh ka tan thil thar a ni lo a, min ṭhawng hauh lo bawk.





"Tunah pawh mi hrang ang maiin kan awm tawh a lawm, hmanah khan i mitmei veng buai loin lo um zawk ila ṭha tur" ka ti ve sak a, a in sehruh ṭeuh chu enzui duh tawh loin inchung lam ka pansan a, kailawna ka chhoh lai te chuan min la rawn tawng nasa hle a "I duh phawt chuan kal nal nal rawh, ka dang lo khawp ang che" tih ang reng a ni. A ṭawngkam chuan min tih nat belh tawh lo a, na leh tur chuang ka awm tawh loh vang zawk a ni.




Inthlak loin khumah ka let hlawm tawp a, ka rilru tawt lutuk vang chuan thawk ka la leh hluai ṭhin a, tunah hian kal nal nal chu ka duh a lawm, kal na tur nei ila chuan ka kal ngei bawk ang.




Usamua hmel mawlh kha, min en dan te leh min kalsan tak dan te, min van ngai dik lo nasa dawn tehlul em, Motor aṭanga ka chhuk lai khan engtin nge ka hmuh miah loh theih le, Chhuanawma kha chuan a hmu ngeiin ka ring a, a hmuh vanga khatianga rawn che kha anih ka ring bawk, ka rilru chu keimah ngei pawhin chhia ka ti a ni, tumah hi ka laka rilru ṭha pu an awm pawh ka ring tawh lo, Usamua ngei pawn min haw mek chu anih si hi...




Ka Phone ṭangkai lo zet chu ka tuai rauh rauh a, Suzanne-i ka hriatchhuah rualin ka DM ka en nghal thuai bawk a, a message panga zet lo awm ka hmuh chuan ka thu chhuak rang kher mai, hlauhthawn vang ni hauh si loin thinphu a rang dup dup lawi a, tun dinhmuna beisei ka neih chhun liau liau a ni.




"Ka be thei lo reng che sia enga ti nge niang ka lo ti ve a, tunah in Checkup in kan zin daih a, ka lo ṭha lutuk lo aniang ka Doctor in haw a la phal si lo a, Usamua chu i Number ka pe tawh e.




Usamua chu Champhaiah a awm rih a, an unau zinga Upa ber Urokimi pasal a pa a boral a, a kalna pawh a rei leh tawh, Urokimin thil a siamtir a; a lo chelh khawtlai ve rih a nih chu.




I pa boral chu pawi ka ti hle mai, Cancer hi chu a huatthlalaawm em a ni tiraw, Usamua pawh ka hrilh nghal a; a ngaihtuah khawp mai che. Naktukah lo haw thlak nghal a tum a, a rawn hmu nghal dawn che a nih chu, lo lungngai lo la, engkim a ṭha leh vek mai ang.




Mimite, ṭawngṭai tam rawh aw, in ngaihtuah hah lo la, Pathian hnenah inkawltir la, keipawn ka lo ṭawngṭaipui reng che a nia.




Usamua chu Aizawl a lo thleng tawh a, 'Zanah ka va kal ang' a ti aw, ṭha deuhin lo inbe rawh u, inṭhen i duh bik loh thu pawh ka hrilh tawh a, a duh zia che chu i hriat sa anih kha, a rilru a tluang viau nain a tih tawh lam ah chuan bur ngut ngut chi a nia; chuti maiin a rilru a thlak bik lo ang, lo ṭha zel ula kan lo haw hunah chuan chanchin lawmawm kan lo beisei dawn nia" tih ang reng a rawn sawi luam a, ka chhiar zo chu ka ṭah a chhuak takzet. Insum thei lo lekin ka ṭap a, ka ṭah na lamah ka hnar a ping ṭup a, ka lu lah chu a rit em em bawk, zanin khan lo chhuak ve miah lo zawk ila ti tein ka ngaihtuah thul...





Ka Call list ka en chuan Number hlang tawp hian zantir ah vawi hnih lai min lo Call a, in aṭanga kan chhuah hlim vel hlawt a ni nghe nghe, Usamua Number a nih ka ring a, ka call nghal thuai bawk a; mahse, a chhang thei lo.Tunah chuan ka Phone Number a nei tawh a, ka Phone Call a lak duh loh danah zawhna a nei lo chu a ni phawt ang, min van ngaisual nasa dawn tehreng em...




Number chu ka Call nawn leh a, vawi hnih chiah a ri hman tih ah lehlama mi chuan a hmet tawp daih a, min ti hamhaih takzet a ni!




Ka laka a rilru tur chu ka hrethiam a, a na pawh ka ti, insawifiah ka duh a; min ngaihthlak sak duh miau si loh chuan eng nge tih theih ka neih? A rilru dam hun nghah maw....a dam kher a ngem tih chu hriat phak a ni tawh lo, Suzanne-i hnena sawi pawh chu ka inthlahrung zo tawh a, heti reng reng chu a nuih te pawh ka ti za tawh zawk hial ang.





Zan ka men rei vangin ka tho tlai deuh a, ka thawhchhuah tak phei chuan dar 9 a ri ṭep tawh, ka pindan aṭanga ka chhuah rualin ṭawng bawrh bawrh thawm ka hria a, mipa ṭawng ri ni a ka hriat vangin kailawnah chuan ka penthla hlawk hlawk a, Sitting room a Chhuanawma hmel ka hmuh rual erawhin ka hnual rawih thung.




"Hei a rawn tho ve ta hram a lawm, Senior hri a kai ve ṭan a zan men te hi a thei sawt a nia" nui hawk hawk chunga ka nuin a tih chuan nuih a za ve hauh lo.




"Eng nge i lo tih dawn?" ka ti tawl a, phawk lek leka min lo en laiin ka nu erawh a meng rang viau a, ka ngaipawimawh lem lo. Chhuanawma ngawt chu ka en a, nizan khan ka sawi chian tehlul nen tukin zing maia a rawn lang leh nghal chuan min ti thinur ṭha leh hial a ni.





"Afeli te unau ka lo thlah lawk" zawi ruiha a rawn tih chuan chhang tawh loin ka kalpel a, tui ka in laia ka nu nui ri chu a ring ṭhin khawp mai, engtik aṭang khan nge lem deuh deuh a nuih hi a lo chin le.




"Hna te hi a la nei ve si lo a, keini ang tan hna ṭha a vang bawk si a, pasal ṭha deuh a hmu ve hlauh te anih leh a vannei a ni tawh mai, tun laiah chuan sawrkar hna a vang emai" ka nu chuan a ti bawrh bawrh a, ka chungchang an lo sawidun a nih hmel.




"Mimi te ang nula hmelṭha tan chuan pasal an vang hleinem" mipa aw in a tih chuan ka lo inhumruh chiam a, ka chungchang sawi kher chuan inkawm lo se ka duh. Ka nu hnenah tlang taka ka hrilh leh a ngai dawn a nih hi ka ti rilru a.




"Rual hi a pawl lo lutuk a, a u Mawipuii nena inkawm chawt hi an ni bawk si a ṭhian te hi a nei mang lo, lo leng fo teh, mi ningkhawng te hi a hre lo lutuk, hruai harh ve deuh a ngai" ka nuin a tih chuan ka ner nang ringawt.




"Keipawh ṭhian ka kawm tam bik lo, he lama ka awmna a la rei lo bawk a; ṭhian tih tur pawh ka la nei meuh lo" kan inlengpa chuan a ti leh a. "A ṭhat hlauh chu, inkawm tak rawh u; in mizia pawh a in mil dawn khawp a lawm chu" ka nu chuan a ti lehzela, a duhna lamah chuan a ṭawngnem thiam ngang mai.





"U Chhuan...ka hman a sin" tih paha Ununfeli lo lut thawm ka hria a, rei vak lo hnu chuan an inzui chhuak leh ta niin ka hria.





Dawhkan kila ka ṭhu chiah tiha ka nu a lo lut a, "Doctor Chhuana kha be ṭha rawh aw, a duh hmel em che kha, ani ang mipa ṭha lutuk i hnawl mai a nih chuan i ti fuh lo hle ang" a rawn ti nghal thawr a, kan inmelh no lo viau a ni.





"Nangman nei zawk rawh" ka lo ti chu a haw kher mai, "Saii, i nu ka nih hi" a ti chang fak a, ka lo nui chu min melh thip leh ram tawh.




"I nawmsakna tur ka hrilh che chu awih la, i la inchhir lo zawk ang, i ngaihzawngpa ve kha zawng, mi hnuaia inhlawh ringawta khawsa a nia; Chhuana nena khaikhin chi pawh a nih loh kha, a nuin a la duh lo lehzel che nen i hrehawmna tur hlir a ni" a ti zui kher a, a ṭawng duh dan chu ka ngawihsan mai thei lo.




"Pasal ka nei dawn lo, ka nei anih pawn Chhuanawma kher kha chu ka nei lo ang" ka tih khum ve ta nghat a, min en dan chu mawl min tih hmel khawp a, min en tlawk tlawk chu thil ka eisan mial mial thung a, a ṭawng leh hmain ka thawhsan daih bawk.





Nilengin pindanah ka tawm chawt a; khum ka thawhsan meuh lo. Tlaiah ka nu chuan min lo ko a, "Hnahthiala i pi a ṭha lo riau a, naktukah kan kal a ngai dawn a nia, lo insiam rawh, Rintei te unau nen a lam a lam che u a, Afeli leh Mawipuii an kal thei dawn si lo, Rintei lah Exam a nei hnai si a, in unau ai i va awh mai loh chuan" tiin min hrilh a, ka pi chuan Ashma a nei a, a kum a tam tawh vei nen rei tak a daih tawh kher lo ang.





Zanah chuan phur lo deuh chungin ka insiam a, ka nu lo lut chuan "In keng tam deuh rawh aw, kan cham rei maithei" a la rawn ti tak deuh deuh a. Cham rei viau theiin ka inhre lo, hna zawn kan ngai a, kum lah chu a tawp leh ṭep tawh a, kumin chhung ngeia hna eng nge maw tal thawh ve ka ngai.





Ka insiam laichuan inhnuai aṭangin min lo ko leh lang lang a, ka zuk chhuk chuan kan Doctora leh Nu Thani an lo awm a, "Thingpui han lum lawk rawh, i u Chhuana Lunglei kal tur a lo remchang hlauh a, a rualin kan kal thei dawn anih chu" nuisangin a lo ti a, phur loh sa nak a laichuan...




"Ticket i la tawh emaw ka tia" nur fe a ka tih laiin "Pawisa kan la pe chuang lo a, Cancel leh a har lo" a ti liampuat a, ka nu zawng a phur hmel khawp mai.




Thingpui ka va pek hnuah ka chhohsan leh thuai a, engtia rei nge Doctor-a chu a len pawh ka hre lo. Umawipuii nen kan inbia a chanchin kan inhrilh mawlh mawlh a, "Mistiri-a chu a thinrim ve hle dawn anih chu, in zin hmain va hmu zawk thei la a va ṭha ve" a tih chuan ka rilru a buai deuh a, hmuh ngei chu keipawn ka duh, ka Phone chhang duh lo mah se, hmaichhan ah tal chuan min ngaithla duh mial mahna.





Umawii ka biak zawh hnu ah Suzanne-i message ka thawn a, intharah an insawn tawh em ka zawt a, kan boruak chhia erawh ka hrilh lo; a zahthlak zozai tawhin ka hria. A pa hna vanga an la insawn rih loh thu a rawn sawi chuan ka thaw huai mai, tunah amah chauhin a awm tihna a nih hmel a, midang mitmei ven tur an awm loh chuan ka tan va kal pawh a inthlahrunawm loh deuh ang chu.




Zingkar hma deuhah ka tho a, ka kal chhuah chuan ka nu a la tho lo a, Taxi lo tlan remchang chu pharin Usamua te veng lam ka pan a, ka va thlen chuan dar 7 a pel zawt chauh a; mahse, an kawngkhar a lo inkalh leh ṭhiap tawh. Khawiah emaw a chhuak lawk anih ringin an inbul dawrah chuan ka lo nghak a, dawr nghaktunu nen chuan kan inbe ve luam a.




"Zan dangah hi chuan zial a rawn lam ziah ṭhin a, nizan ka inhawn rei tehreng nen a lo kal miah lo mai a, a riak chhuak a nih dawn chu a" a ti niah niah a, a bialnu ka ni em ti a a zawhna erawh ka chhang fumfe meuh lo.




Ka sana chu ka bih sek tawh a, dar sawm a kan chhuah dawn vangin ka hmanhmawh ru tawh khawp mai. Haw mai ka rilruk tawh laiin a rawn thleng ve ta hram a mahse, phurh a rawn nei tlat..!




Nula pakhat kei aichuan a la nau deuh maithei tih tur hi a rawn phur a, Bike aṭanga an chhuk lai chu dawr nghaktu nen chuan kan lo thlir a, nula chu samsei hnap mai leh hmelṭha tak mai a ni bawk. Polythene hian eng engemaw a khai bawr ṭeuh a, Step lama Samuela pen uk tawh chu let lehin nula thil khai chu a va laksak a, nula chu a nui var var reng.




"Eirawng ka bawlsak law law ang che, chaw i ei mumal lo thei lutuka; i nu pawn lo va thlithlai rawh min tia lawm" a tih chuan ka lo na veng veng a, an inkar chu rindan pakhat chiah ka nei, a chhan chu nula zawkin a melh dan chu hmeichhia ve tho tan chuan hai theih a ni tlat lo a.




"I chawhmeh siam a thak thei emai, ngai lo rawh se" ti a Samuelan a lo fiam chuan an nui dun leh rih a, nula zawkin a bana a chum sak lai te chuan che chang tur hi ka awm lo reng reng.




"Chaw ei phawtin i chhuak dawn nia, tlai lam chu duh leh lo ei phei leh la, ka nu pawn min lo fin rih rawh a tih che kha" Step a an in zui chhoh tak vangin an ṭawng ka hre pha tawh lo a, ka chawmawlh zo vek a; an kal liam hnu chuan thawk ka la vang vang bawk. Dawr nghaktuin min rawn melh pawh chuan sawi tur engmah ka hre lo. Tawi tein ka nuih a, ka awmdan chu hrethiam a niang "An va tihbuai chi loh hmel ve" a ti ve sap a.




Tho chhuakin kawngsirah chuan ka ding ren rawn a, an Step lam ka va melh laichuan chungril lamah hian min hnawhtu a awm a, ka ṭah a chhuak tak zet. Heti mai chuan ka let thei bik lo, engmah insawifiahna nei lo a ka kal leh mai anih chuan tawpna tak tak kan nei dawn tih a chiang reng a, bei ti dawng tur tal pawhin ka biak ngei ngei a ngai.




Number chu ka Call leh a, rei vak loah hmeichhe aw hian a lo chhang a, "Samuela...Phone..a ni em?" ka ti bah nak a, ka inrintawk loh zia chu ka aw ah a lang thei ngei ang.




"Aw ni e, a inbual lawk a" nula chuan a lo ti var a, "Usamu...i zo ṭep em?" a ti zui lang lang bawk.




Samuela ṭawng ri ka hre pha lo a, nula bawk chuan min lo chhang lehin "A laklawh deuh a niang" nelawm tak hian a lo ti leh a, "A pawi lo" zuai raiha tiin Phone chu ka dah a, ka hnunglam ka va hawi chuan dawr nghaktu khan min lo la thlir ve reng tih ka va hmu bawk a, min khawngaih hmel takin a nia min thlir ni.




Taxi lo tlan leh hmasa ber pharin kan veng lam ka pan nal nal a, haw kawng tluan chuan ṭah ka insum a ni ber. In ka thlen rualin Bathroom ah ka lut a, Darthlalang hma ah chuan mittui a sur zung zung a, hei bak hi chuan ka kehchhe leh tawh lo ang, a chhan chu thawm ṭhat leh ka ni tawh ngai dawn lo.




Hun harsa ka paltlang zawng zawng te ka ngaihtuah let a, engemaw chang chuan ka ke chhep sualin ka tlu fo ṭhin. Mahse, thawh leh chhan tur ṭha tak ka nei anih phawt chuan thawh leh ka duh ṭhin a, tunah erawh chutiang chakna chu ka nei tawh lo, Ball ang maia lum kualin a remna na ah ka tawp anga, hetiang chiah hi ka landan a ni reng tawh bawk ang, Darthlalanga min lo en let tu lungngai hmel ang chiah hi.




(Zawmna)



Tukṭhuan kan ei laiin Umawipuii te nupa an lo thleng ve hlawl a, "Hnahthial Sumo in a mi in kal dawn, Mimitei chu a va rui leh nasa dawn ve le" U Sangzualan a lo ti lut bawrh bawrh a, chhang lem loin ka nu chu ka melh ringawt a.




"Afeli unaupa Doctor Chhuana Motor ah kan kal ang, ani Lunglei kal tur a lo rem chang hlauh a" ka nu chuan a lo ti var a, a piah a ṭhu Umawii ner nak chu ka hmu chiang hle a, ka nu chu a melh tur nghal viau bawk.




"A va remchang tak ve...a lo in ti remchang chawp te a ni lo maw" a ti deuh kher a, "Lunglei khua an nia lawm, chuan man chawi ngai loin kan kal thei dawn a, pathum lai kan ni leh nghal a, a tih zia khawp mai" ka nu chuan ka ti leh zat a, Umawiin min lo melh laichuan dar ka lo chhin ak a, ka nu chuan min lo en ve reng bawk.




"Vellore a in zuk innghahna kha a ni lawm ni, a fel hmel viau kha.." Usangzualan a tih chuan ka nuin a lo sawizawm phur khawp mai. "Fel tak a ni, Mimi hi a rawn rim ve deuh a ani lah hian a lo uksak ṭha duh mang si lo a, Doctor Chhuana te chu kan cho loh val a ni zawk maw le" a tih laia Umawipuii lo nui chu kan en ṭhap a, a antui hawp lai a rawn phuh chhuak ṭhawt mai.




"Khatiang tlangval lehkhathiam hawihawm lo deuh kha maw, ṭhing ka tih zawng tak, min duh ni se kei chu ka duh lo sa" tih pahin a nui hawk hawk a, a ṭawng duh dan chu ka nu chuan mak a tih hmel hle a.




"A ve leh ngawt che chuan, a hriat pawh i hre ve ngawt em maw ni..." a ti niah niah a, "Lalnunfeli unaupa a ni bawk a; mi tana hnawksaka awmdan pawh a thiam khawp kha, Doctor ve lai si" a ti leh hlak a, ka nu chu a lawm ta vak lo aniang a meng nur hle tawh.




"Kei te chu thil hre thei deuh mai ka nia, makpa tan i lo it hman a ni maw, Zawngnunfeli unaupa anih vang te khan lo pak hawrh reng reng suh, ka makpa atan ka duh ve teuh lo a nia, ka nau hi chuan a aia ṭha a phu ve tlat" a ti leh zet chu ka nu ngaihdan a ni ta lo. "Lalmawipui i ṭawngkam kha fimkhur rawh, Afeli hi i unaunu anih hi, khatiang te a i koh reng reng, zak thei lo pang pang lutuk" a ti ta erh a, U sangzualan "I ṭawngkam i thlahdah lutuk" tiin a lo khak ve bawk.




"Zawng ang lekin khawsa lo sela a ni mai a lawm, mahni ṭanghma hai lutuk mihring hi a, Mimi bak unau ka nei lo, i fanu pawh ni ve mah se, unau rilru kan pu pha lo ve ve, kan chhungte zingah ka lo telh ve mai dawn nia" a ti leh hram a, awlsam zetin a ṭawngliam puat puat a, a thil sawi erawh ka nu tan chuan a ngeiawm duh khawp ang.




"I zakthei lo mange, Mimi nen hian in lo in unau ber a nih tak hi, mahni nu te zahna chang pawh in hre lo" a tih hlak hlak laiin kawtah Motor thawm a lo awm a, kan kalna tur chu a nih mai hmel.




"Chhuana a lo thleng a nih chu, engemaw zawng te khan i lo be ringawt a nge, i dak tam nasa mai si.." tih leh pahin ka nu chu a tho nulh a, "Ti rawh, keini pawh kal vat teh ang" Usangzualan a ti ve bawk a, Umawii erawhin antui a hawp kiang kianga, a tu amah chu a chhang lem hlei lo a.




Ka nu leh Uchhuana in be thawm a awm hnu ah Usangzuala pawh a chhuak phei ve mai a, an kal chiah tih ah, "Mimi, a zui ve chi ang maw?" Umawii chuan a lo ti thuai a, "Engah mah ngai suh, a thlawna kal theihna chu a ṭha mai a lawm" ka tih chuan mak min ti deuhin ka hria.




"Ka nu leh Nunfeli te hian tihpui che an tum nasa bawk si a, an remruatna te a lo ni lek a nge" a tih leh chuan "Ka duh lohna ah min ti lui thei tawh chuang lo ang, ngaimawh vak duh suh" ka ti leh mai a.





"Ni e ti raw, eng thilah mah in nawr luih tir reng reng tawh suh, pasal neih te phei chu in nawr luih chi a ni lo reng reng, i duh zawng tak chauh i nei dawn nia" nui var var hian a ti a, tawi te chuan ka nuih let ve. Chumi hnuah "I kal peih vak loh chuan kal kher pawh a ngai hleinem, a hrangin nangmah pawn i kal thei a, Sumo a Service reng tho a lawm" a ti leh a.




"An ruala kal pawh pawi ka ti chuang lo, he khawpui hi kal bo san rih ka duh, ka cham rei deuh maithei bawk" ka ti sap sap a, "Tinge...Mistiri a nen chuan in in be fuh chuang nange?" a ti leh hluai a.




"Ngaihzawng dang a nei niin ka hria" ka tih chuan min en phawk hle, "Ka be rih lo, nula dang nen ka hmu a, nizan pawh an inah a riak anih ka ring" ka tih chuan a lo chek hlak a.




"Mipa hi chu an mak ngawt mai, a rintlak viau emaw ka tia sin le, a lo chutih vang anih dawn chu" a ti zui vang vang a.




Ka nuin min rawn tur tak vangin ka inti fel zung zung a, "Han insiam rawh, thleng chu ka lo sil mai ang" Umawiin a tih chuan inchung lamah ka chhohsan a, ka thawmhnaw Bag ka siam sa tawh vangin insiam vak ngai ka nei tawh lo, ka sam ka khuih thuak a, Makeup pawh in hnawih lem loin puanlum ka bat a, inhnuaia ka chhuk leh chuan ka nu te chu pawnah an ṭawng bawrh bawrh a, Usangzuala Sitting room ah a lo ṭhu thung.




Choka lama ṭawng thawm a awm vang chuan ka pan phei zui a, Dawhkan bula Umawipuii leh Ununfeli hnai taka lo indinchilh ka hmuh chuan ka din chawt a, in sual a tum emaw tih mai tur an ni. "Eng nge in tih a?" ka ti he haw a, an ṭawng zui duh miah lo!




Ununfeli zawk chuan min rawn kalpel thuak a, Umawipuii chu a tum bar bawk. "Eng nge in lo sawi a?" ka tih leh chuan "Kan lo kamkhat hlak anih kha" tih zawngin min chhang a, hahthlak hian...



"Chhuanawma chungchang chu maw..." ka ti leh a, a lu a thing mai thung.



"Anih eng thil ah?"



"Ro chungchangah maw le, ka hrilh lawk loh chuan ka nu nen hian an inthurual palh ang, i chuh ve lo anih pawn keichuan ka chuh ngei ngei dawn" a ti nghat nghat a, chuzawng a tih dan danin ti teh se, ka inrawlh ve hauh lo ang.




Dar 10 pelh hlekah kan tlan chhuak a, Nu Thani nen Motor hnungah kan ṭhu dun a, midang an titi bawrh bawrh laiin kei chu ka ngawi ran a, tukverh lam hawi chuan ngaihtuahna ka kawm melh melh bawk. A lungpuam zawnga inngaihtuah loh hram ka duh a, chu erawh a har tak zet. Chhungrilah hian mal riaua inhriatna ka nei a, ka khua a har a ni.





He dinhmun mal riaua inhriatna te, khawharna te hi keima insiam anih zia lah ka hai lo, ṭhian ka siam lo a, in bun ruahna tur ka neih chhun pawh Umawipuii a ni mai tawh, mi te lak aṭanga inla hrangin keimahin hun ka hmang ṭhin a, kha kha ka nuna ka thil tih dik loh lian tak a ni ta, mihring hi mahni chauha kan famkim lohzia ka hriat meuh chuan ka tlai lek lek tawh chu a nih hi.





'Mi nun ka awt ngai lo' ti ṭhin khan ka awt hle tawh zawk a, tun dinhmun ah hian khatiang thu kha sawi ta ila dawt chiang tak ka sawi ngei ang, ka awh em em chu ṭhian tam tak nei te nun hi a ni, an hlim hmel te chenin ka awt zo tawh. Hun hi ko kir theiin emaw nun bul ṭan leh thei ni ila chuan ṭhian hi za lai siam ka duh ngei ang, chutianga ka ti anih chuan mal leh khawhar in ka awm lo maithei a sin.




"Mimi...thingpui in ang aw" tih ri ah chuan ka hawi chhuak hlawl a, ka mutthluk lai reng ka hre lo. "Motor i rui a mi?" Uchhuanawman a tih chuan lu ka thinga, dawr kawta ka nu leh nu Thani dinna lam chu ka pan thuai bawk.




Thil ka ei thei meuh lo, Motor ka chuan hi chuan ka nih dan ve reng a ni, "I nuamsam vak lo a mi?" Nu Thanin a tih chuan zun ram thiar ka duh thu ka hrilh a, "Ti rawh, keipawh ka zun a chhuak a lawm" a lo ti ve thuai a, inhnuai zunin lama kan chhuk laichuan ka Bag ka ak chhuak lo tih ka hre leh hnuhnawh a, ka nu khan a lo ngaihven em ang chu maw...





Kan chhoh leh hnu chuan Motor bulah ka nuin ka Bag chu a lo keng a, ka phone a lo lek chhuak ka va hmu zat bawk. "Phone Call ka dawng a mi?" ka tih chuan "Mawipuiin a lo Phone a" a ti mai a, ka Call list ka en chuan a lo ni ngei bawk a, engmah ka sawi zui lem lo, Usamua Call ka lo la beisei hrep a, min ti hnual leh ringawt tawh.




Kan tlan leh hnu chuan ka awm a nuam lo ṭan riau a, ka pum a dik thei meuh tawh lo, darkar 3 kan tlan leh chhungin vawi 6 teh meuh mai ka luak a, ka chau chhe hneh ngang mai, ka tih fuh loh ṭum hi chuan ka heti leh ṭhin a, ruih miah loh chang erawh ka nei tho a "I pumpui chakloh vang anih dawn kha" min tih sak a, Uchhuana damdawi min pek pawh ka luak chhuak leh zel a, awmzia vak a nei lo.




Hnahthial kan thlen chuan khumah ka let hlawm tawp a ni ber, zanriah pawh ka eipeih lo a, ka nu leh nu Thani erawh Damdawiin lamah an kal a, Ubza te nupain ser min rawn ken sak chu ka ei lui a, tlem chuan min ti harh ve ta deuh.




Urinkimi nen a tuk lamah Damdawiinah kan kal dun a, nilengin ka pi chu kan awmpui chawt a, ka hmel a hmu chu mi biak ve teh a tum a, a thawk zawnga a awm insep dawrh dawrh ṭhin chu a lainatawm takzet a ni.




Zan lamah chuan a hniam sawt khawp mai, in vel kan sing sa a, in leng lut chhuak an tam vangin thingpui kan lum awl lo a, puitling ho Damdawiin lama an kal vangin keinin in kan lo nghak a, Umawipuii pawn inrinni a lo kal a tum a ninawm e.




Chhuanawma lo let leh lam chu a rawn peng ve zawk a, ka nu a awm loh vangin a hmelhriat awm chhun chuan ka lo chhawn lo thei lo a, Urampuii lah chuan min fiam nan tak a hmang a, ka bialpa emaw a ti ni ngei tur a ni. "Mistiri ai kha chuan a ṭha zawk daih, neih ngei ngei chi" a ti zauh a, nuih a za duh vak lo. Chhunah a lo thlenga, tlailamah Aizawl lampanin a inkhalh chhuak leh a, a haw tur chu ka nuin a va thlah liam ta niin ka hria.




Zirtawp zanah Umawipuiin min lo Phone a, "Vawiin ka bazar chu Samuela nen kan inhmu a, dawrah hmeichhe pakhat nen an lo ṭhu dun a, an in duh hmel khawp mai" tih ang reng a lo sawi a, ka zawt thui duh lo, ka rilru a ti na thar leh ṭhin a, a chanchin hriat tam loh chu ka tan a ṭha ber bawk.




A tuk inrinni ah Umawipuii te nupa chu an lo thleng chho a, Samuela nen an inhmuh dan min hrilh mawlh mawlh a "Dawra ka va luh chuan inhnaih deuhin an lo ṭhu a, an sawi ril hmel lutuk a, ka ngei reuh a nia. Mahse, min hmu kha chu nuam a ti bik vak loin ka hria, i lo haw tawh em tih min zawt a, i cham rei tur thu ka lo hrilh kha, awm hlen tur angin ka sawi ṭep che a ni" a ti luam a. Ngaihtuah a ti thui viau mai.




Samuela hnenah khan ka zin tur thu ka hrilh si lo a, engtin nge a lo hriat tih chu ngaihdan ka nei thiam nghal mai bawk. Ka hnen aṭang ni lo a midang hnen aṭanga ka chanchin hriat a duhtawk chuan a thu thu a ni tawh, ka insawifiahna ngaithla loin ngaihdan a siam a, eng nge tih theih ka neih tawh chuan le..min ngaithla duh lo miau a.




"I rilru ti na duh reng reng suh, a bialnu thar kha a hmel ṭha lo emai, nang aipawn ṭha ka ti lo daih zawk" Umawipuii chuan a ti leh a, "A hmelṭhat em kha, kei aiin a ṭha daih zawk a lawm" ka ti chu a pawm lo hle a.




"A hmelṭha ka ti lo zawk daih" a ti leh a, a landan a sawi hmangah chuan a sam a tawi a ti ta daih sia, kha mi ni a ka va hmuh nula kha a ni lo em maw ni ka ti leh deuh a, Bike a a phurh hmeichhia ka hmuh kha chu ngo leh hmelṭha tak samsei hnap mai kha a ni a, Umawipuii sawi dan nen chuan a hrang viau lawi si, chuzawng ka ngaihven loh a ṭha zawk ang, hetianga a chanchin ringawt ka ngaihtuah reng chuan kei hi ka inti na zual mai mai a ni.




Ka pi chu a ziaawm deuh a, a zual leh ṭhin a, chuti reng chu kan ni, kan mu tlem a, Damdawiin kan inkal chhawk reng ṭhin, ni thum an cham hnuah Usangzuala hna vangin Umawipuii ten min haw san a, U Bzan an in lama insawn turin min sawm nain Urinkimi nuin a phal lo a, ka nutei hi Hnahthial lama ka ngainat ber leh ka pawh ve ber a ni bawk a, an hnena awm chu ka duh zawk reng reng bawk.





Kar hnih zen zawn a liam hnuah ka pi chuan min kalsan ta a, a zan mu a mu tlang a ni ber e, zanlamah khan a thawh a hah deuh hlek a, zan rei lamah zia leh deuhin Oxygen pawh an phawi a, a boral lai tak kan hre lo, zinga an en chuan a lo vawt vek tawh a, Doctor te chuan 'Hahdam takin a kal ang' tiin an sawi bawk. Ka pa kal dan nen chuan in ang lo tak a ni, ka pa kha chu a tawp thlengin na a tuar tluan ṭhak a nih kha.





Umawipuii amahin a lo chho leh a, thlan nghah ni pawh a cham ve a, a chhungte a ngaihtuah vangin a haw leh thuai thung. Ka nu nen chumi kar chu kan la cham a, haw leh chakna pawh ka nei rih lo. Ka nutein "La cham rih la, Sangha dil ah te kan kal anga" tiin min chelh dan tur mawlh a ngaihtuah a, ka rilru pawh a hmin ve riau tawh, Aizawl lam boruak rit tak kha zuk hip leh ka chak vak lo bawk nen cham rih chu ka duh zawk mah a, ka nu erawhin haw a duh tawh hle a, a ṭhiante nen Electronics thil vel la a kal an tum a ni awm e.





"I duh leh cham rih la, ka lo haw hunah i lo chhuk mai dawn nia" a tih takah chuan cham chu ka ti thlu ta a, ka nutei lah chuan Private school thawhna tur te min lo zawn sak a, min chelh rei dan ngawt a ngaihtuah a, ka tan erawh thil lawmawm tak a ni, hetianga min thlahlel tu hi ka tawng zen zen tlat lo a, Ball ang mai chu ka lo ni tak tak a nia nge, chelh din ka nihna hmuna tawp mai chu Ball nen danglamna kan nei chuangin ka hre lo.




Ka nu haw hnu chuan Nutei nen an huanah kan kal nitin a, thlasik thlai te chingin eng engemaw kan ti dun a, nuam ka tih ve zawng tak a ni, khawpui nun aiin thingtlang nun hi a nuam ta mahin ka hria. Ka nutei chu ka lakah a ṭha em em a, kan titi dun nasa ṭhin bawk a, a lakah chuan sawi hreh ka nei bik lo, ngaihzawng chungchang thlengin kan sawi dun a, Usamua nen kan chanchin pawh ka hrilh kim viau mai.





Ani chuan ti hian a sawi a, "Pathianin i tana a ruat anih chuan eng hun harsa leh khirhkhan pawh tawk mah ula in ṭha leh em em ang, in ṭha ta lo anih leh Pathianin i tana a ruat anih loh vangin a lak kian sak che ah ngai la, i rilru ti hnual duh reng reng suh, amah beisei kha inthlahrung lo la, i hmangaih takzet anih chuan beisei tur i nia lawm, hmangaihtu tih tur reng anih kha, inhmangaih em em te inkar ah pawh a ngai rengin thil a kal thei bik lo a, hmangaihtu nih chang te, hmangaih nih chang te hi a inchhawk ve ṭhin a lawm" tiin.




Thla a liam a, Christmas pawh a hnai tawh hle a, haw mai ka tum tawh laiin cham turin thutlukna ka siam leh thut a, ka eng tih tha mah a tho thei tawh lo. Thil ka ei thei lo a, zan ka mu tlem em em bawk.




A chang hi chuan ka ngaihtuah let a, khang kan hun hman liam tawh zawng zawng te kha engmah lo maia ral tur chuan uiawm ka ti ṭhin, duat taka min kuah lai te, duhthu kan sam duh lai te kha engmah lo mai atan chuan ka phal lo, bul ṭan ṭha leh thei ni ila tiin duhthu ka sam fo a, anih loh pawhin duh ka thlan theih hun lai kha tawng leh ngat ila chuan inngaihtuah buai hauh loin ka zui ngei ang, chutianga ka ngaihtuah chang chuan a thil min hrilh bawk kha ka hrechhuak leh ṭhin, in hmangaih te chu an in phatsan leh fo a mahse, keini chu hun leh ni zawkin min phatsan a ni.




Chu thu chu engtin nge ka chian em em theih....a chhan chu maw Usamu-an nupui a neih dawn thu ka hre miau a....




Chu thu ka hriat tirh chuan min ṭhawng khawp mai, ka la dam lo takzet a, amah ngawt ka ngaihtuah ṭhin laiin a nupui neih tur thu ka hria chuan min deng na takzet. Suzanne-i bulah khan engmah sawi ve tur pawh ka hre lo. Zawhna min zawt mawlh mawlh a, chhanna pek tur pawh ka hre lo hial a nih kha.




"In inbe leh tawh turah ka lo ngai a; mahse, kan lo haw khan ka nuin palai an tirh dawn thu a lo sawi a, Usamua ka zawh khan a lo dik tak tak sia, eng nge in awm zia?" tiin makti takin min zawt a, ka laka a rilru a danglam zo tawh tih bak chu chhanna ka nei lo.




Ni e...Usamua chu a danglam tawh, hmana min hmangaih em em tu, min hrethiam a ka inpeih hun min nghak ṭhin tu kha a ni tawh lo, a thinlunga in min sak saktu ngei khan ka luh ve theih ngai tawh loh turin kawng min khar sak tawh a, kik leh ngam turin chakna lah ka nei hek lo, ngam pawh ni ila ka chanvo a ni tawh tlat lo a....




Hmangaih tu ka nih hun a lo thleng a, hmangaih nih ka duh leh lawi si a, chutah chiah chuan mahni hma sial na chang hre ngai reng reng lo hian ka hma ka sial ve a; mahse, hunin a phatsan tawh miau si chuan he hmasialna thinlung pawh hian inchhir bak tih theih a nei tawh lo, a hun ṭha a liam tawh tlat a ni. Nakin lawkah chuan ral aṭanga ka lo hmangaih ve pawh hi thil mawi lo leh zahthlak mai a ni tawh ang.




November thla bial zan a ni a, Nutei hoin pawn Veranda ah thingpui hang kan in a, Hnahthial ah chuan khua pawh a vawt ṭha tawh khawp mai, ṭhenawm tlangval an lo leng a, Football chungchang sawiin a titi bawrh bawrh a, ti hian zantirah an lo lenga; a rawn rik bawrh bawrh hnuah an chhuak leh diak ṭhin a, zantin an lo kal tak nain a hming mala koh theih a bar ka nei lo.




Zanin pawh darkar chanve vel an rawn ṭhu a, thingpui an in zawh hnuah an kalna tur an sawi ho a, pakhat chuan "Christmas hmang ho ang u aw, Ar te kan kang ve ang chu" nuisang hian a lo ti a, "Ni e, i lo haw daih ange" midangin an lo ti ve bawk, "Kan hmang ho dawn nia" ka tih chuan an phur ve hmel viau a.




An kal hnu rei vak loah ka Phone ah lai a lo ri a, Suzanne-i a nih vangin inhnuai pindan lamah ka chhuk thuai a, ka lak rualin "Phone tlang i har lutuk" a lo ti hlut a, tunlai chu Signal ka nei ṭha lo riau a, Umawipuii pawn biak tlang har min ti fo mai.




"Signal hi a chiang lo lutuk a, Company lam thiam loh" ka lo tih chuan a nui hak a, "Usamua nen thil kan lo sawidun a" a rawn ti nghal zat bawk.




"Niminah Mamit ah a chhuk lawk a, inthar pawh kan luah lut tawh" a ti zung zung a, a sawi duh ang a sawi zawh hma hi chu ṭawng hun ka chang ngai lo.




"A dam ṭha maw.." ka tih laimekin "Muantea pawh ka zawt a, i pa ral tura an lo kal zan khan i nu in a lo tawng hrep a, Doctor ngaihzawng i neih thu te a lo insawitheih khum a nih dawn kha, Muantea phei chu a lawm lo lutuka.." a ti zui mawlh mawlh a.




"Kha mi zan khan pawnah kan in hmu a lawm" ka ti hluai a, kan inhmuh dan lah kha...




"Nia...Doctor nen khan a hmu che u a.." a tih chuan ka na veng veng, rilru ah a rawn thar leh ruai bawk.



"Usamua chu a rilru a na lutuk a, Hnahthiala in zin dun thu te kha a hre leh sia..." a tih chuan thil awmzia chu ka chiang viau tawh. Mahse, ti nge min zawh ve mai loh le...




"Ka insawifiahna a ngaithla duh bawk si lo a, in inah khan amah hmu turin vawihnih lai ka lo kal a sin" ka aw chu a khur lek lek a, ka thin lah chu a tawt em em bawk a, thinrim na leh natna nen ka ṭah a chhuak hlur mai.




"Umm...in kal ni khan a lo Phone che a; mahse, i nu bawk khan a lo chhanga, kumina pasal i neih tur thu te a lo hrilh a, be tawh lo turin a lo ti bawk a" a tih leh chuan a ngaihna ka hre lo hle mai, kan kal ni khan Usamuan min lo Call awm reng ka hre lo.




"Chuvang chu em ni nupui neih a tum a" ka ti hap a.



"Aw...ka nu hian a nawr ve reng a, kum 40 a tlin hma a nupui neih tir ngei ngei hi a duh sia, Republic-a kan in lei na te fanu khan hman aṭangin a ngaizawng tawh a, Usamua rilru buai khan a aw ve ringawt a nih kha.." a tih chuan thawk ka la hak a, tunah chu thu chu ka hre chauh a, amah lah a ngawi vung vung a, ani pawh hi a, buaithlak thei lutuk mai.




"Pasal neih ka tum lo, ka nu chuan dawt a hrilh a nih chu, amah kha lo hrilh rawh, naktukah ka lo haw ang.." ka tih zet hnuah "Keiman ka lo bia ange" ka ti leh hnuhnawh a, kan inbiak zawh chuan ṭah chhuak insum ṭeuh chungin ka call a, a la tlang thei lo zui..





Ka Call nawn zing khawp mai, a tlang thei lo zel a, vawiin 20 dawn chu ka tum tawh. Kan kal ni a ka Call History chu ka en let leh a, Umawipuii Call lah chu ama lo call ni loin ka Call zawk a ni, a lan dan chuan Call list a lang turin a ti ve lek a nih hmel.




Nutei bulah ka hrilh a, anin min hrethiam takin Sumo ticket min buaipui sak a, tukṭhuan eikhamah chhuak mai turin a lo be fel diam a, Usamua chu biak hmasak phawt ka duh tehlul nen zankhuain ka be thei ta chuang lo.




Zing ka tho chu ka lu a rit khawp mai, darthlalanga ka in en chuan ka mit chu a eng pap a, ka mut ṭhat loh vang a nih ka ring. Thil dang ti khawtlai tawh loin ka insiam a, Suzanne-i tak pawh chuan Phone a chhang thei lo a, engpawh ni se ka thleng thla anga engkim chu a fel leh mai turah ka ngai.





Dar 7 bawrah chuan kal mai thei turin ka inpeih diam tawh a, ka nu te Guwahati kal lai a ni a, Chahbi a dah tho vangin Umawipuii chu ina lo awm turin ka hrilh a, chanchin pawh ka hrilh ve nghe nghe, Umawipui chu kei aimahin a phur zawkin ka hria.




Tukṭhuan eilai chuan ka khur dar dar reng, vawt ka ti lutuk chu ka hritlang dawn a nih ka ring hial a, ka nutei thung chuan "Zingkara i inbual vang anih kha" a ti mai a, mut hmuna ka ṭah nasat vang anih te pawh ka ring deuh.





Dar 9 bawr velah ka chuanna tur Sumo chu a lo thlenga, a hnung berah ka ṭhu nain hetiang renga zinkawng zawh phur hi ka la nei awm lo e, ka phur tak zet, eng hun nge kan tawn zel dawn tih hre lo mahila beiseina sang tak ka nei a, ka thiamloh zawng zawnga ngaihdam dil turin ka inpeih bawk. Ka chân thei lo, ka hmangaih em a sin, a tel lo nun hrehawm zia ka tem tawh a, mahni hmasial takin chan nawn leh ka tum tawh lo, zak thei lo ka inti ngawt mai, mi pawn min ti ve ṭheuh in ka ring a ni.





Kawng tluanin vawt tiin ka khur a, thingpui ina kan chawlh laite chuan ni sa ah ka ding reng a, chuti chung pawh chuan ka la khur thei cheu a, ka hritlang dawn tak tak anih ka ring. Bawnghnute lum vat vat ka in takah chuan tlemin ka zia ta deuh a, ka tlan leh hnu ah erawh vawt tak a ni. Motor ka rui lo a mahse, ka lu ana em em thung.




Umawipuiin in a lo nghak a, ka chau lutuka ka be sawm peih meuh lo, nachawkna leh hritlang damdawi ka ei a, ka mu nghal hmiah bawk a, ka harh leh chuan khua a lo thim lek lek tawh.




"Eirawng ka bawl a, chawhmeh siam tur vak pawh a awm lo, Artui ka kanga, dal ka chhum hang ringawt a, Nu Thanin Mai kan min lo suah a" Umawiin a tih chuan chaw ka ei chak loh thu ka hrilh a, tuilum in ka mamawhin ka hria, tun thlengin vawt ka la ti reng mai.




"I inbual dawn em?" a lo ti leh a.



"Bual lo mai ang, vawt ka ti lutuka, ka insil ringawt mai ang" ka tih laichuan hnai zetah min lo en a, "Hna i han thawk vak em ni a, i va han chauh hmel em em" a ti hluai a.




"Zan ka mu ṭha lo thei lutuka, inhnuaiah keimahin ka mu peih si lo a, ṭhutthlengah Tv en pahin ka mu ṭhin a" ka ti mai a, ka muthilh theih loh chhan ber erawh thil dang daih a ni.





"Samuela chu i be tawh em?" a tih chuan ka Phone ka dap rak rak a, "Ka be tlang thei lo reng reng" ti niah niah chung chuan ka Call a, a la tlang thei ta chuang lo. Suzanne-i zawk ka Call a, an pa in lo chhangin Dawrpuia a pu ICU ah a awm a, a chah ṭep thu min lo hrilh a, biak buai chi a ni bawk si lo.




Rilru nuam lo deuh chungin zan chu ka hmanga, ka khua lah chu a sik hluah a, zinga Umawipuii lo kal leh chuan ka tho chhuak peih lo a, sana chuan dar 10 a lo kawk va tawh bawk.




"I hritlang chu a ang chiah si lo a, eng nge i awmzia ni dawn ni...!" a ti niah niah a, ka hrethiam bik lo khawp mai, inentir a rawt a, ka chau lutuka ka chhuak peih ngang lo, chu loah pawisa pawh ka nei tawh lo.





"Zanah ka nu te an lo thleng dawn a, a lo haw phawt loh chuan pawisa pawh ka kawl tawh lo" ka ti leh a, amah pawh chuan a nei bik vak lo aniang a aw ve mai bawk a.




Nilengin ka mu a, ka khawsik chu a sang viau a niang thlanin min bual hneh hle a, chuti chung chuan vawt ka ti em em reng, ka lu na lutuk chu chet pawh a harsa lek lek a, ka mittui a tla reng bawk.




Tlaiah Suzanne-i hnen aṭangin Call ka dawng a, "Mimite, thil hrilh hmaih che ka nei a" inthlahrung deuh hian a lo ti a, min ti hlauthawng nghal khawp mai.




"Eng thil nge a..?" zam ru deuh chunga ka tih laiin "Palai an leng tawh a, a vawi hnihna chu an la kal lo, tunkar zirtawp zana kal leh tur hi an nia, a ni ruat fel chiah a ngai tawh" a tih chuan ka nghilh dupin ka hria.




"A va buaithlak tawh awm ve" ka ti zawi sep a, tah chiam mai ka chak a ni.




"Ih maw..Ka tan thil lo tih ve hi a nawm lohna chen a awm a, kan pa nen ka inhauh phah reng bawk a, tunah pawh a rukin ka lo bia che anih hi, ka nu phei chuan hria se min hnawt chhuak duh maithei a ni" a ti leh a, ka tibuai lutuk chu ka inthlahrung khawp mai, an pa nen an lo intihthiamloh phah lehnghal chu a nia.





"Min pui nasa lutuk a lawmthu hrilh ngaihna che ka hre lo, ka mamawh viau na chein i tana ṭha lo tur thleng thleng chuan min pui suh aw, harsatna i tawh phah chuan nuam ka ti bik lo ang" ka ti sap sap a.





"Naktukah Usamua a lo haw dawn a, kan be tlang thei si lo a, a lo haw hunah ka lo hrilh anga, lo ngaichang tawp mai rawh aw" a tih hnu ah kan inbiakna kan ti tawp a, rilru put dan tur pawh ka hrethiam tawh lo, tunah palai an leng tawh a, mi innei tur tihbuai tum chu ka ni mai a, ka duh ang thil a thleng anih ngat chuan tu te emaw chu an na vawng vawng dawn, mi hlimna leh ka hlimna ah hian duhthlan ngai fo lo se ka van ti em..




Tlailam dar 7 velah ka nu te an lo thlenga, pindana ka mu chu min lo ko lang lang a, thei leh thei loin ka thochhuak a ni ber, kailawna ka chhuk lai te chuan ka luakchhuak lutuk chu pum dawmin ka ding leh rih a, vawn chhan tel lo phei chuan ka ding hleithei der lo.





Ka nu chuan bungrua a lo thiarlut mek a, pui lem lo chuan Sitting room ṭhutthlengah ka va bawk thlawp a, "I nuamsam nange?" a lo tih pawh chuan ka chhang fumfe meuh lo, ka lu chu a puak mai dawnin ka hre tawh.




Ka pang a rawn dek a, ka mit te chu a rawn keu a, Ununfeli a lo zui bawk a, rei vak loah Ununfeli lokalin min rawn en a, "I thin a lian a nih ka ring; i mit a eng vek a lawm" a tih chuan ka hlauthawng khawp mai, khum beta na thei ka ni rih lo a sin le.





Damdawi min pe a, ka pindana ka let leh hnu chuan ka khawsik pawh a ziaawm ve ta deuh a, Umawipuii Phone-in min riahpui turin ka va sawm a, "Zanin chu ka nu nen chiah kan ni sia naktukah ka lo kal mai ang" tiin min lo chhang a.




Nachhawkna chuan min chhawk rei lo ngang mai, ka khua a sik zan khua ṭhak a, ka nuin Rasgula leh thei tui min lei sak chu ka melh peih ṭawk a ni.





Zingah chuan Umawipuii pawh a lo thleng hma hle a, ka nu nen pindan pawn lama an in be ri chu ka hre pha a, "Silcharah kan bungraw phur Motor a tanga; kal ka ngai dawn a, i nau hi lo riahpui mai rawh, vawiinah a thisen te lo va Test ula" ka nu chuan a ti a, pawisa pawh a pein ka hria.




Chhunah Umawipuiin nen thisen Test turin kan kal a, rei lo te ṭhut pawh harsa ka ti takzet. In a kan haw leh hnuah Result lam turin amahin a kal leh a, tlailama ka khawsik chu ka tuar hleithei meuh lo, keimah te chuan ka ṭap ka ṭap maia, ka pa ka ngai takzet, Usamua pawh..





Dar 4 vela Umawipuii lo haw chuan ka Result chu a rawn hawn a, Malaria PF ka lo vei hi a lo ni a, Damdawi te pawh a rawn lei nghal a, vawikhata ei tur a tih chu a tam bakah a kha em em lehnghal a, ka ei zo chu ka luak chiam mai.




Zankhuain kan inbuaipui a ni ber, ka khawsik chu ka thluakah a lut ni tawh maiin ka hria, Suzanne-i Call pawh ka chhang thei lo a, Umawii chuan a lo chhang a, ka damloh thu a hrilh chu ka hre viai viai chauh.




Zingah damdawi chu min eiṭhat tir leh a, Ununfelin min rawn Jection bawk a, chhun lam chu khawsik pawh ka nei ta lo. Mah se, ka damdawi ei kha ka rui a, ka meng thei der lo mai a, mumal ka nei lo a ni ber e.




Ka harh leh meuh chuan khua a lo thim fel leh reng tawh, ka zun a chhuak hle a, ka che thei der lo thung, engkim chu ka hmu phir a, Umawipuii pawh pathum vel laiin ka hmu. Bathroom lama min kuah phei laite chuan a uaiin ka uai a ni ber.




"Ka nu te pawh an lo thleng ṭep a, i dam loh chhung chu ka awmpui tawh ang che, Sangzuala pawh i duh leh lo phei ve mai rawh ka tih kha" a tih chuan "Haw suh" ka lo ti bur a, min haw san chu hlauh taktein ka hlau.





Khuma ka mut leh hnu pawh chuan kalsawn miah lo turin ka hrilh a, ka thi dawn tlata inhriatna ka nei a, ka hlau a ni. Dam hi hetiang tak hian ka la thlalel ngai lo, ka rilruin Pathian hnenah dam ka dil mawlh mawlh bawk. Miten thih thlamuanna an nei ṭhin hi mak ka ti hial zawk, keichuan ka hlau tak zet a ni.




"Tuilum ip ka lo lak ang che" a tih ri chu ka hre riai ruai a, ka tlun nasat em vangin ṭawng pawh chu harsat tak ka ni, ka chhang dawn ṭhin a; ka hmui takngial pawh chu ka chet thei lo, chuti chung chuan ka taksa chu a khur dar dar reng thung.





Ka vai riai a, tui thuk taka pil ang mai ka ni, ka rilruin Pathian ka au a, he thihna tuipuia ka pil lohnan ka lu chu min dah chhuah sak turin ka ngen a, thawk ka mamawh, ka thaw a chham dawn...'Lalpa, ka nunna i kut ah a awm a, ka hun hnuhnungah hian nangmah nei lo che a ka kal mai phal suh, ka la inpeih lo, khawngaihin thawk ka lak theihnan min dawmkang lul rawh'.





Ka bekah mittui lum thla pap chu ka hriat leh hmasak a ni. A bak chu mumang ang riaiin ka hria, ka mumangah chuan Usamua ka hmu a, duat taka min chul hliau hliau chungin a awmah min pawm a, dam ka thlakhlelh chhan chu amah ngei hi a lo nih dawn hi, ka hun hnuhnungah pawh amah chauh a ni ka la ngaihtuah ni.





Engtia rei nge ni khaw hre loin ka awm le, tukverh aṭanga nizung lo lut chu ka hmu thei a, ka awmna chu khawilai nge tih ka hre chhuak thei tlat lo, Vanram chu niin ka hre lo a; Damdawiin pawh niin ka hre chuang lo, ka lu rit lutuk vang chuan chet a harsa a, sir lama inlet tur pawn ka tha neih zawng zawng ka sawmkhawm a ngai, ka inleh rual chuan ka bek a na zawk zawk mai.




Pindan chhung chu ka enkuala, a ngaihna ka hre lo takzet, chutih lai chuan pindan pawn lama ṭawng thawm ka hria a, nu pakhat ang hlak hlak ri a ni.




"Engah nge i rawn pawm haw ngawt, palai an kal tawh a, tun angah te ṭhulh chi a ni tawh hleinem, Malawmi chhungte pawh an thinur khawp ang, mite pawn engtin nge an sawi ang che" ti tu chu a thinrim hmel khawp mai, eng nge thil awmzia ti a ka ngaihtuah laimekin midang aw ka hre leh a.




"A nupui tur kalsanin nupui dang a ru min ti rawh se" ti tu chu Usamua aw ngei a ni!






(End of chapter - 17)





(Hmangaihna hi kan ṭah pui reng dawn em ni, a chang te hi chuan kan hlimpui ve bawk bawk ang chu le....zanin hian nangni pawn min han hmangaih thar ve riau teh u)

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 6th, 2022, 7:47 pm

ZUNZAM - by Ahmangaihi violette Khiangte



CHAPTER - 18





Pindan chhung chu ka han melh kual leh zet a, thil awmzia chu a chiangkhat viau tawh. Usamua pindanah a khum chungah ngei a ni ka mut ni, engtin nge a nih theih! Ka mumang em ni zawk!




"I mak mange, hetiang te chuan ṭhenawm khawveng te hmel pawh kan hmu ngam tawh nang" Nu Rengpuiin a tih leh laichuan ka inbeng kang ve thuai a, a chawhmeh siam rim ka hriat takah chuan ka mumang a ni lo tih ka chiang hle a, lawm tur nge pawh ka hrethiam meuh lo, min ṭhawng takzet a ni.





"Tlaiah Cabin a awl dawn a, mipa in riahpui an phal lo a, nangman i riahpui mai dawn nia" Usamu bawk chuan a ti leh a, a va han buaithlak mai mai em...




"Nupui hrisel lo deuh deuh hi in rawn ru haw a, buaipui ngai ziah mai" a nuin a tih hlak hlak lai chuan hrehawm ka lo ti ve takzet.




"Saw tah chuan duat taka enkawltu a nei lo, a u pasal nei tawhin a lo riahpui a, i theihtawkin lo duat rawh, hmeichhia chuan an dam lohin an nu te an ngai ber a nia, a nu chungchang chu ka hrilh tawh che kha" Usamua chuan a ti charh charh a, ka thil hriat chuan hnuk a ti ulh ṭeuh a, khumah chuan mittui tling pam chungin ka ṭhu tlawk tlawk a, eng ber nge tih tur pawh ka hre tawh lo.





"Amah ringawt ngaihtuah loin nangmah kha inngaihtuah ve ta che, i mualpho hle dawn tih te hi i hre ve em, miin hnung lamah an sawi sep sep che anga, mi le lo hmuhin a nia an hmuh tawh dawn che" Nu Rengpuii a tih leh chuan ka inthiam lo zual hle a, a lakah chuan ka inthlahrung kher mai, an chhungkaw boruak pawh ka ti chhe zo vek ngei ang.





"Tui chu i lum em?" Usamua aw chu a dam dup reng. "Lum mek e, a la rawn harh lo em maw ni le?" tih leh ka lampana pen ri ka hre zui a, ka mut ṭhat leh laite chuan ka lu chu a na ngut ngut a, chet vel chu a nuam mawlh lo. Ka mu ṭha vel awrh ang tih ah pindan kawngkhar inhawng ri riai riai thawm ka hria a, ka mit ka chhing rang hle.




A rawn pen hnai a, ka puansin chu rawn keuin min rawn bih nimai hian ka hria a, ka lungphu te chu an han rang em em khawpa; thawk pawh ka la ṭha ngam meuh lo. Chutah, ka pang chu a rawn dek thut a, mipa kut tih ka hriat rual chuan ka phu zawk a, ka la che chang mai lo.




"A la harh nange?" Nu Rengpuii a ni thung, kawngkhar bul ah a ding tih ka hre thei.




"Drip kan khai kha a ngeih a nih dawn hi, a u khan a mu ṭha lo a tia, a theih chen chen muhil rawh se" phun sup sup a Usamuan a tih chuan ka inthlahdul riai riai a, engvanga mengchhuak mai lo nge ka nih pawh ka hre lo, Nu Rengpuii hmachhawn chu ka hreh a ni ber mai.




"A khua chu a la sik reng em ni?" Nu Rengpuii chuan a ti leh a.




"A la lum deuh" a sawi rual chuan ka mutna chu a hniam salh a, ka bul maiah chuan lo ṭhuin min rawn bih leh a, ka sam a rawn hui kian lai te chuan insum harsa ka ti hle tawh, duat deuhin ka sam a rawn chul hliau hliau a, a awmah bei a kuah vawng vawng tluka chak engthil dang mah ka nei lo.




"I pa pawh chu khawiah nge maw a kal chhuah leh hman ni, keimahni kala ngaihdam te pawh kan va dil angai ang chu" a tih leh hluk hnuah kawngkhar inkhar riin a zui a, ka lo thaw huai mai.




A nu a chhuak chiah tih ah chuan ka puan sin rawn keuin ka bulah a rawn inthawlh a, ka kawngah rawn kuahin a pang si cheta min kuah takah chuan ka hahdam sawng sawngin ka hria.





A lamah min kuai her a; mahse, ka la meng ngam mai lo, ka sam chhawl leng chu hui kiang thuak thuakin ka chal leh bek vel te chu a chhem hauh hauh a, a nuam ka ti. Lum ka tih zia pawh ka hre chhuak leh chauh nghe nghe, tunah hi chuan ka thlan nasa hle a, ka dang a ro huam huam bawk. Ka rim a tui loin ka bal bawk si a; damdawi rim ka nam huam ang chu.




"Ka duatte.." ka harh ru reng tih a hria a niang a awmah min pawm bet sauhin ka chal a rawn fawp a, ka bal bawk si a a zia lo ka ti deuh riau tawh, ka meng chhuak hlawl a, lehlam hawia inleh ka tum chu ka che thei der lo.





A rawn hawi thla nen chuan kan mit a intawng chiang ta hle a, ani a nuih suk laiin kei chu ka lai ngang mai. Ka nui ngam miah lo, ka ha ka nawh loh na chen pawh ka hre tawh lo, nimin kha chuan ka nawt lo chiang a lawm. Tal phutin sir lehlamah ka inlet thawk a, ka ring chu a ri ṭhawt a, a na em em lehta nghal a.




"Ka lakah i lungawi lo em ni?" min kawih her leh mai a tum chu ka ṭang ṭak a, ka tawlh hlat dawn lahin min rawn kuah ṭha sauh sauh a, ka ṭang leh chu ka bawp a rawn kerhbet ta tlat a; a chet hian ka che thei tawh der lo.




"Nizanah ka lo kal a, ka hruai haw che a nih hi, i thinrim em?" a zawhna ka chhan mai loh vang chuan min rawn thlek a, "Aih" ka ti zawi sep ringawt.




"I thinrim lo maw, i haw ka phal tawh dawn lo a nia" a ti leh a.




"Lo hawi teh" min kawih her mai a tum lai chuan a banah ka lo man chawt a, inkuah ṭhat tir pahin "Ka lawm e" ṭap ṭiau chungin ka ti leh a, lukhamah ka hmai nawrin thawk ka la hak a, ka mittui a luang zung zung bawk.





Ka chal a rawn dek leh vut a, "I eng nge na?" a ti chul bawk a, a tho kang nghal uai mai. "Ka ṭha..." lukhama hmai la phum chung chuan a ban chu ka beng ringawt a, ka ṭahbelh lutuk chu zia lo ka ti tak tak a ni.





"Lo hawi la, min en teh.." a aw a min duatna te chuan ka lung a ti chhe zual a, duhtawk ka la ngah thei lo. A lamah in let rawk rawkin a awmah hmai ka phum tlat a, nghet lutukin ka kuah bawk. "Tlaiah Damdawiinah kan kal anga, i dam leh vat mai ang" tih pahin ka hnungzang chu a chul pah riak riak a, sawi ve tur reng ka hre lo, a kam chhuak apiang chu ka tan damdawi ṭha lutuk a ni tawh zawk.




Engemaw chen chu che lo chang loa kan awm hnuah "Engtin nge ka damlo tih i hriat?" tiin ka zawt a.




"Suzanne-in min hrilh a, ka lo Call che khan i u in a lo chhang a, hruai tur chein ka lo kal nghal a lawm" a tih chuan ka rindan chiah a ni, engtia min hruai ringawt nge anih chu zawhna ka la nei cheu...





"Ti nge min hruai a, Umawipuii leh ka nu an awm ve lo nge?" ka tih leh chuan "I u a awm" a ti mai a, Umawipuii chuan a lo phal viau anih hmel e.





"Nupui i nei dawn an ti si a, ka ti buai zo vek dawn che anih hi" chu mawlh chuan ka rilru a ti hrehawm a ni, ka hlim em em a mahse, heti taka ka hlim hi dikin ka hre bawk si lo, inthiam lo zet chungin a thil tih dan chu ka haw phal chuang lo a, min lo hruai lo ni sela thil thleng tur chu ka hre ve reng bawk.





"Chutiang ngaihtuah mah ta che, ka bulah i awm tawh hi" tih pahin ka chalah a rawn fawp vawng vawng a, he hun hi a ral leh mai ang tih ka hlau a ni, ka hringnun Ball ang maia lum kual vel hi hetah hian chelh din hlen ni sela ka duh a, hei hi ka tawpna hmun tur pawh ni se vuina ka nei hauh lo ang, ka hun neih ang zawng zawng hi a kianga hman ral tluka chak ka nei lo.




"Ka ngai thei lutuk che, biak che ka tum ṭhin a, i biak theih ngai bawk si loh a.." a awma bei chungin ka ti sep sep a, khang hunlaia ka khawharna leh amah ka ngaihna te kha ka hrechhuak a, ka rilru a la na veng veng thei.





"Min ngaidam rawh, engkim kha ka thiam loh a ni, chhuanlam ka nei lo. Khang hun chhung khan ka ngaihtuah reng ṭhin che, vawi tamtak lo hmuh che ka tum ṭhin a; mahse, engthil emaw hian min dang leh ṭhin a lawm mawle. Kei hi chuan i rilru ka tina reng mai a...." min rawn melh lai chuan a mitah ka lo en ran a, a thutak hmel hle a, ka nu dawt hrilh te khan a rilru an tih hrehawm dan tur chu ka hrethiam ve ruak a, keimah tak pawh hi ka thiam lo a ni.





"Ka rilru i tina angin ngai mahta che, nangte chu ka inhnemna ber a lawm i nih zawk, harsatna ka tawh laia ka belh ṭhin ka tana In ang mai a lawm i nih" ka tih chuan ngaihawm zet hian min lo nuih a, "I In hi luah lum reng tawh ang che" a hmelah chuan a tih tak zia ka hmu thei.





"Umm..midangin an luah ka phal teuh lo, chuvang chuan miin min sawisel luai luai anih pawhin ka cheng lui tlat tawh ang" ka tih chuan a nui suk suk a, chutah a kut lum vung vung chuan ka biangah rawn dawmin "Nupui neih chungchang kha min ngaidam dawn nia; mahse, i in hi chu tumah pek ka tum ngai lo, hei hi chu i tana ka sak a ni a, i chenna tur chauh a nih hi, tu hmeichhia mahin an chhuhsak lo ang che" a ti leh charh charh a, a nui hmel chu hmuh a nuam takzet.





"Ka hmangaih che tih hi hrereng bawk la" a rawn kun hnaih rual chuan lo chet khalhin a nghawngah ka lo fawp a, thawk a la halh chu ka hre nain ka ti lui tho, ka chhuanlam a ni mah ang chu.





"Intihfai ka ngai.." ka tih chuan kawngkhar lam chu a melh vut a, "Tui a so tawh mai thei" a tih laimekin kawngkhar chu a rawn inhawng a, ka tawlh sawn rang khawp mai.




"Mampui tui a so a nia.." a tih hnuah a rawn pen lut a, "A harh tawh e law?" a ti leh zat a, ka mit ka chhin vangin a hmel chu ka hmu thei lo a, Usamuan ka la harh loh thu a hrilh lai chuan ka zak ru chem chem mai. Hetiang teh hrepa han khawsak mai chu..a zialo lam deuh chu a ni.




"A vawt a ti anih dawn kha.." tih pahin a la rawn pen hnai tak deuh deuh a, ka thinphu chu a rang dup dup tawh.




"Mimite.." Usamuan ka puan a rawn a rawn keu chuan ka lo sin ṭha sauh sauh a, a nui suk ri ka hre zui bawk.




"I kawrlum te hak tir ta che, in nu chu a khua a sik leh tawh anih dawn kha" a tih chuan ka meng kawk mai. Tunah khan 'In nu' a ti in ka hria, a ti ngei a lawm....ka hresual miah lo.




"Khawi maw, i khua a sik em?" nui chungin Usamua chuan ka chal a rawn dawm a, "I thlan hluam bawk sia, i sahal em maw ni..?" Nu Rengpuiin a rawn tih chuan ka ṭhen ṭha ringawt.





"Tui a sa tawh a, i duh chuan intifai ta che, ka pawm phei ang che aw" Usamuan a tih leh takah chuan ka tho kang sawk sawk a, "A lum lo..a..a vawt lo" ka ni bah nak a, Nu Rengpuii lah chuan nur zetin min lo melh a, a va nuam lo duh mai mai tak.




"Chaw ei phawt ta che, eichak te i nei em?" Usamua bawk a ni.




"Chak lo...." Nu Rengpuiin chal chuar tapa min lo en vang chuan ka ṭi dak reng.




"Ka nu hian i duhzawng siamsak che a chak viau a nia, eng nge i ei chak sawi tawp rawh.." Usamua chuan a ti leh zel a, mi mah inthlahrun nak a lai chuan, eichak zawng lo sawi te chu ka ngam teuh lo; mahse, ka dang a ro tak zet tawh.




"Eng nge i ei duh a?" nelawm vak loa a lo tih chuan kan in en ta ran a, "Tui lum" ka ti tawl mai.




"Bawnghnute ka lo siam ang che, thosilen te i zar ngai lo em mawn ni, kha thosi in an ei fep lo chauh che a nih kha, i inbual dawn chuan tuilum laisawn va inbual thuai rawh.." a tih hluk hluk hnuah a kal chhuak a, a chhuah hnu thleng chuan ka lungphu a la mumal hleithei lo.





"Lo tho chhuak la, inbualna tui chu ka lo va siam ange" Usamuan a tih hnu chuan muangchangin ka tho chhuak a, pindan a chhuahsan laichuan ka chapal ka zawnga ka hmu zo hauh lo, ka ding chu ka lu a hai bur a, ka awn leh riai riai ṭhin.





Chapal ka hmuh tak mai loah chuan kil khata pheikhawk bawm lam chu ka pan a, Usamua chapal lianpui chu ka han inthawlh ve ngawt a, ka bun tawk lo lulai lutuk chu a chhungah ka kal a ni hawt mai.





Pindan kawngkhar chu hawngin ka dak chhuak dek dek a, pawn lamah Nu Rengpuii ṭawng lang lang a, Bathroom niawm taka Usamua che vel thawm chu ka hria a, hmanhmawh lutukin Bathroom lam chu ka pan a, a lo chhuak tur nen kan intawk chiah bawk.




"Bucket sen a mi kha tui sa anih kha, inbual rei lo la, chaw kan ei vat dawn nia" a tih hnuah a chhuak zui thuai a, ka kalh fel chiah tih ah "Puih i ngai em?" pawn lam aṭang chuan a rawn ti thum leh dut a.





"Ngai lo e, ka rei lo ang" ka tih chuan min chhang tawh lem lo, a kalsawn thawm ka hriat hnuah ka inphelh ve ta chauh a, tuilum sa ver vawra ka inleih meuh chuan ka nuam sawng sawngin ka hria, Choka lamah chuan ṭawng thawm a awm leh ṭhin a, eng nge an sawi erawh ka hre pha lo thung.




Darkar chanve vel zet chu ka inbual awm e. Ka inbual zo Towel ban mai ka tum chu ka lo keng lut hauh lo, kawngkhar chu zim thei ang bera hawngin ka va dakchhuak a, tumah lah chu ka hmu der lo a, khawiah nge an lo kal daih chu ni.




"Usamu.." min chhang miah lo.



"Usamu..i awm em?" a reh vung vung ringawt.




Kawngkhar chu ka khar leh rih a, vawt ka ti ṭan riau tawh, a khat tawkin ka va dak leh ṭhin a, an thawm takngial pawh ka hre lo. Minute sawm vel hnuah thawm ri rak rak ka hria a, ka va dak leh chu Nu Rengpuii thil khai chunga a lo kalphei ka va hmu a, ka khar leh rang ngei mai.





A thawm chu a ri sat sat reng a, ka va dahchhuah leh laichuan min hnungchhawn zawnga dingin engthil emaw hi a chawk ri rak rak a, ka be ngam lo chuan kawngka chu ka khar leh ṭhin, vawithum lai chu chutiang chuan ka ti tawh, a vawt lutuka ka khur dar dar tawh lehnghal a, ka taksa huh te pawh an ro zo tawh hial a, ka kawr hak hnu lah chu thlan rim leh damdawi rim a nam a; hak leh chi ziazâng a ni tawh lo.





Kan inpehhel reng thei dawn chuang lo ti rilru chungin kawngkhar chu ka hawng leh a "Ih...Nu Reng.." ka ti chiah tih a, "Rawn dak duk duk reng lo khan lo chhuak vat ta che maw le" a lo ti bak hlur a, ka ip chawih mai. Chutih laichuan kawngkharah thil khaibawr ṭeuh chungin Usamua lo lut a, "Towel ka keng lut lo a" hmui phunin ka lo ti mawlh mawlh a, a hrethiam a niang pindan lam a pan nghal nul nul bawk.




Rei lo teah a lo let a, Towel lianpui leh Tootbrush thar hlak hi min lo pe a, "I ril a ṭam tawh em?" tiin min zawt zui a.




"Kha Bawnghnute hi rawn in phawt rawh" tih paha Nu Rengpuiin Bawnghnute min lo pek chu lain pindan lam ka pan a, khumah ṭhu chungin ka ina, ka Bawnghnute in tawh a zawngah a la tui ber awm e.





"Ka kekawr hi i ha tawk awm si lo a.." ti niah niah chungin a kawrlum min lo pe a, chumi hnuah a chhuak nghal daih a, a lo luh leh laichuan ka lo inha fel diam tawh. "Hei hi ha rawh" tih paha min lo pek chu enin ka ner nang a, kekawe par lian hlek hluk deuh hi a ni a; a nu kekawr ni ngei tur a ni, kekawrte takngial pawh ha lo a han hak chu a va zia lo thei tak.





"Ka eng lo kha ka su daih a" ka tih chuan a thawmhnaw bawm lam a pan leh thuai a, a che chu a chu vut vut reng. A rawn let leh chuan mipa kekawrte a bawp nei chi hi min lo pe a, a hma lah chu a puar sa lehnghal a.




"Ka ha tawk dawn a mi" ka ti hap ringawt.



"I tawk chiah ang, a aia te ka nei lo, lo in ha la, chaw kan ei thei a ni mai" tih leh kawngkhar lam pan a rual a, amah pui chu a lai ve deuh em maw ni.




Duhthlan tur dang awm hek lo, pasal te thawmhnaw a lawm ti a hak mai bak chu. Ka inthlak mawlh mawlh laiin kawngkhar pawn lamah chuan thawm a ri hlut a, "Khawnge, kan mo thar chu..." Suzanne-in a rawn ti lang lang.




"Dinsanga chu i rawn hruai haw nange?" Nu Rengpuiin a lo ti thuai a, "Hruai haw lo, ka puin a ngai lutuka, khawnge Mimitei chu?" a tih zawm leh a.




"Ka haw tir daih tawh" Nu Rengpuiin a lo ti hluk thung.



"Eng a....i haw tir maw!" Suzanne-i aw chu a phawk lek lek.




"A mawngah Ticket ka bela ka thawn haw ta anih kha" mipa nui huk ri ka hre zui a, chutih laichuan pindan kawngkhar a rawn inhawng ve chiah bawk. Min hmu chu a phul hlut a ni ber, "I dâng vek a lawm le, kei aipawn i hrisel loh hmel tawh zawk, i van khawngaihthlak reuh tak" a ti chul a, chutah ka kekawr hak chu min nuih zui chiam a.




"He kekawr ber kher chu, kan inruka ka hak kha anih hi" a la ti tak deuh deuh a. Kan chhuah phei hnu pawh chuan an nupa in min nuih ru tet tet reng.





"I hak kha a ni awzawng lo, a thar ka lei leh daih tawh" Nu Rengpuiin a lo ti ve mauh mai. Chawei laichuan an titi bawrh bawrh a, chawhmeh chhawpna thleng lah chu an in pe kual sek hlawm a, kan ina kan chawei dan nen chuan in ang lo tak a ni.





"Hawp rawh, Bawng mei chhum tui a nih hi" tih paha Usamua satui min lo pek chu ka lo ban ve thuai a, "Tlaiah chuan Damdawinah in kal dawn em?" tiin ka ṭhiannu chuan min lo zawt ve zat a.





"Cabin chu kan hauh lawk tawh a, mipa in awmpui an remti si lo a, ka nuin a awmpui mai ang" Usamuan a tih chuan ka lo inrawlh vat a, "Damdawiin kal kher pawh ka ngaih ka ring lo, ka khua pawh a sik tawh lo a, ka zia tawh lutuk" ka tih chuan zawhna ngah hmel deuh hian min en hlawm a, "I ngai lo chiah maw?" Nu Rengpuiin a lo tih laiin "Ka awmpui mai dawn che nia" Suzanne-in a lo ti ve bawk.




"Ka zia lutuk a lawm, damdawi ka eiṭhat chuan inlamah pawh ka inenkawl dam thei mai ang" ka ti leh a, Usamua chu a la inngaihtuah vung vung thung. A malah ka va piai zauh a, "I zia deuh chuan a pawi lo" a ti ve ta hram a.





"Mahse, In a inenkawl ringawt chu.." Suzanne-in a ti leh chiah chu an pain a lo khap a, "Ka awmpui thei tho a lawm.." a ti leh chu an inmelh ram ram mai.




"Enge..?" pawr zeta pakhatin a tih takah chuan "Inruk zan anih hi" Ramdinzualan a lo ti hluk a, Usamua nen kan ṭhu ngil hluai ringawt.




"Zah te hi zak rawh u, i pa lo haw sela, ro kan rel ang" Nu Rengpuiin a lo tih vang chuan kan reh ta ṭhiap a, Usamua chuan chawhmeh min la rawn suah mawlh mawlh reng a, kan chawhmeh a tuihnai viau nain ka ei hleithei meuh lo, ka vawt ti chu ka khur ka khur mai a, midangin an hriat loh nan ka inthup ve ṭang ṭang thung.





Chaw eikham chuan ka chet ve an phal lo a, Ramdinzualan hmun a phiat a, Suzanne-in thleng a sil a, an chet sang sang laia lo awl bik chu nuam lo duh tak a ni, "Lo va mu lum rawh, a vawt i ti anih kha" tih pahin Usamuan pindan lamah min nawr lut a, khum a mu chungin an nui ri te chu ka ngaithla reng a, keimah te chuan ka lo nui leh hak ṭhin.





Rei vak loah Usamua a lo lut a, "Hna thawka ka chhuah lawk a ngai a, darkar hnih khat lek a niang, tih tur ka va hrilh anga, ka lo haw leh thuai ang, Suzanne-i bazarah a kal dawn a, i mamawh chah ang aw" a ti zung zung a, keiin a Phone hman ka lo dil thung a, Umawipuii biak hmasak phawt ka duh.




Usamua insiam zawh hnu lawkah Suzanne-i a lo lut a, eng engemaw ka lo chah a, a man tur a chhut thlap hnuah Usamua pawisa a dil a "Chhun thil eina tur Bonus rawh" a la ti zui a, tum loh deuh hian min ti nui huk zel mai.





"Khum lo thawhsan lo la, eichak i neih chuan Suzanne-i i Phone dawn nia, Phone ka rawn lei ang che" tih leh a Cell Phone min pek a rual a, "Inah ka Phone chu a awm a, Umawipuii chah ka lo tum a sin" ka tih chuan a lu min thin khum mai a, a kal chhuah dawn thleng chuan khum thawhsan lo turin min chah reng bawk.





An kalchhuak ta chu an reh ṭhiap mai, Umawipuii ka Phone a engmah pawh ka sawi hmain "A nuam em?" a rawn ti thawr a, a phur hmel em em lehnghal a.





"Ka nu a lo thleng tawh em?" ka ti hmasa ber a, "A lo thleng ṭep ang, engmah lo ngaihtuah buai suh, ka lo sawifel vek ang" a lo ti var a, chanchin min zawt zui luam a, "A duat che em?" tih ang reng a ni, nizan lam chanchin ka lo zawt let ve thuai a, khatia mu leh mal nei mang lo a ka awm laikhan Usamuan a lo Phone a, Usamua leh Ramdinzuala lokalin min lo hruai a ni awm e.





"A pawm chhuak lawp lawp che kha chu Zawngnunfeli pawh a hawihai khawp mai, a chawh ka ti a nia aw" nui hawk hawkin a rawn ti a, ham ham ṭhin hian a....




"Chanchin min lo hrilh dawn nia, ka bungraw pawimawh ho kha in inah lo va la phei rawh aw, thil a kal fuh loh viau chuan i hnen aṭanga lo lak a rem zawk ang" tiin ka chah ve thlap a, a phur zawng tak a nih hmel e.





Dar sawm velah Usamua pa a lo haw a, pindan pawn lama an ṭawng ri chu ka hre pha a, "Engmah thu mum pawh kan la nei lo, rawn lam phawt sela palai te nen ro rel ṭhat a ngai ang, inneih ṭhulh ngawt chu a tih chi loh emai" Nu Rengpuiin a tih laiin "Lo inrawlh teivet suh, mipain thutlukna a siam tawh chuan a duh danin ti rawh se, i fapa hi ring la, a duhthlan hi zahsak viau zawk teh" patling aw hian a ti bul bul a.




"Heti hian an inkawl ringawt dawn tihna a mi, Niniaui chhungten an duh lo hi keichu ka tha a na riau a nia, Malawmi chhungte lemin neih loh an han hlauh tehreng nen" Nu Rengpuii chuan a ti leh a.




"Ka sawi tawh kha, i ngaihdan an zawt lo che, a innei tur te an induh chuan a tawk, inneihna pawh tihchiam a ngai lo, Samuela pawn a sawi tawh kha, i mo te hi duat la, an hmangaihna i dawng let thei zawk ang, Samuela nupui hi i chenpui reng tur anih hi, ṭawngkam te kha a lakah insum deuh rawh" Usamua pa chuan a ti leh a, awm hmunah ka rilru a lo buai ve hle a, ngaihdan siam har pawh ka ti. Mahse, Usamua pa chuan min haw lo tih ka hria a, chu chuan tlemin ka awm a ti nuam ve ta deuh.




Chhunlamah chuan ka khua a sik leh hluah a, engtik laiin nge ka muthilh pawh ka hre lo, ka bula ka Phone dah kha a lo awm tawh lo a, Side table ah chuan Phone thar a lo awm thunga; Usamua a lo haw tawh anih hmel.




"A nu chuan rawn haw tawh suh se a ti a maw, a va nasa deuh ve, hetiang ah te chuan an inlam leh ṭhin a ni ngai a, mi pangngai a pha zan lo a ni lo maw?" tih ri ka hriat rual chuan ka thu chhuak thuai a, ka thawh zawng chuan ka lu chu na tak a ni, vawt ka ti luatah ka khur nasa mai bawk.




"Haw tir ka tum tawh lo hrim hrim a" Usamua aw in a tih ri ka hre leh a, a ṭawng chu a dam dap thung.




"Haw tir loh ngawt chi a ni hleinem, in innei dawn anih chuan palai te kan tir ve phawt ang chu, tih dan phung te a awm ve a lawm" Nu Rengpuii bawk a ni.




"Tih dan phungin a tih theih loh a nih hi maw le.." Usamua pa a ni ve thung.



"Sawi tawh lo teh u, amah ber hetah a awm a, heti hian kan ṭha mai" Usamuan a tih leh laiin "I nupui neih dan tur hi ka duh dan a ni miah lo, man leh mual sawifel pawh awm lo a inneih ringawt chu" Nu Rengpuii chuan a la ti niah niah a.




"Keimahni lamin kan buaipui thei a lawm, a nu berin lo haw tawh suh se a tih miau chuan kan nei nghal thei tihna a nih mai chu, amaherawh chu Pathian leh kohhran hma a inkutsuih ngei chu a ṭha ang, Pastor ka lo sawipui dawn nia" Usamua pa chuan a ti dap dap a, ka lu na lutuk vang chuan ka ṭhu hleithei meuh tawh lo, ka vai riai a, khuma ka mut ṭhat leh hnu chuan ka khur nasa hle a, an ṭawng ri pawh ka hre mumal meuh tawh lo.





Chiang lo riaiin ka harh leh ṭhin a, ṭawng ri nawk nawk leh Motor tlan thawm te pawh ka hria a, Damdawiin kan pan lai pawh chiang lo takin ka hria a, Umawipuii pawh a awm ve niin ka hria, mumal taka thil ka hriat leh meuh chuan Damdawiin khumah ka lo mu tawh a, Umawipuii leh Nu Rengpuiin min lo ṭhutpui a, inhma tawna ṭhuin an lo titi dun mek bawk.




"A lo van khawngaihthlak reuh ve aw kan Niniautei chu..."Nu Rengpuii chuan a ti vang vang a, engthil tak Umawii chuan lo hrilh ang maw. Nurse lo kalin min lo Jection a, rei vak lo ah ka muhil leh thuai a, zanlaia ka harh leh chuan Umawipuii ka piah a ṭhutthlengah a lo mu hlun a, ka khum bulah chuan eitur chi hrang hrang a lo inchhawp ṭeuh bawk a, Usamua hmel reng reng hmuhtur a awm ve lo.




Thei leh thei loin ka inbeng kang a, Umawipuii a lo harh ve thuai bawk. "I va harh laklawh ve, muthilh tum leh rawh" ti a rawn thawh pahin theitui min lo thlit sak a, "Midang an awm ve na nge?" ka tih chuan an haw tawh thuin min chhang a.




"Usamua a lo kal em?" ka ti nawn leh a, ka hlauthawng ringawt mai, ka nu te lokala min hruai haw ka hlau a ni ber.




"A awm renga, pakhat chiahin riahpui an phal si a a haw leh ta anih kha, zingah a lo kal ang" a ti mai a, a theitui min pek chu tlem ka lem a, ka kâ a tui lo em a tam pawh ka in thei lo.




"In pa nu bulah khan i chanchin ka lo hrilh a, a khawngaih lutuk che a, 'Inneihna pawh keimah niin kan buatsaih vek ang, a nuhrawn tih buai a ngai reng reng lo' a tia, i lam aṭang nasa tawh khawp mai, i u hi chu ka van ṭangkai tak ti raw" nuisang hian a ti a, a mut kham lo chu a ham bai bai bawk.




Ka khumah chuan lo mu vein rei deuh chu kan ti ti dun a, ka muthilh leh lai reng ka hre lo, ka harh chuan ni a lo eng ut tawh a, ka khum bula mipa ṭawng thum bul bul chu ka hriat hmasak ber a ni.




A lam hawi chuan ka inlet vat a; mahse, ka hmuh ngai a ni tlat lo. Chutih laiin Usamua chu thingpui no chawi chungin a lo lut ve chiah a, ka bul mipa ṭhu chuan a Phone hmanlai dahin chiang fahran hian min lo en a, ka hmelhriat chu a ni lo phawt ang, ka hmuh tawhna awm reng ka hre lo.




"Mimite, i unaupa anih kha" Usamuan a lo tih chuan min ti hawihai hle a, chupa chu ka va en nawn leh kher bawk.




"I khua a la sik em?" ti a min zawh chuan lu ka thing ringawt a, "I u ka nih hi aw" a tih leh pawh chuan chhan ngaihna hre loin ka en reng ringawt, "I pa fapa Victor. Liansangzuala a nih kha" Usamuan a tih leh takah chuan ka hrethiam ve ta chiah a, chutih laiin Victora chuan nuisangin min lo en thung.







(KAN VAN ZO TEUH TAWH TAK...ads lo click ru aw....comment te pawh kha)

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)