ZUNZAM S2 by Ahmangaihi violette Khiangte (Completed)

Moderator: writers

Ngaia
Site Admin
Posts: 25813
Joined: April 30th, 2016, 4:07 pm

Re: ZUNZAM S2 by Ahmangaihi violette Khiangte (Completed)

Unread post by Ngaia » March 6th, 2022, 7:47 pm

ZUNZAM - by Ahmangaihi violette Khiangte

CHAPTER - 19




Victor.Liansangzuala chu palian pui mai leh nelawm hmel deuh mai a ni, min nuih vur vur renga min ti lai dawn dawn mai. A zawhna lah chu ka chhang fum fe meuh lo a, min ṭhawng teh thut em a ni.





"I khua a la sik em?" ti a min zawh chuan lu ka thing mai a, Usamua chu ka va melh leh ringawt ṭhin, ani lah chu thutak hmel deuh hian tukverh thlang lamah a dinga, a kut a kuangkuah hlun bawk a, thil awmzia chu min hrilh chiang deuh se tiin ka va mitmei leh ṭhin a; chutih laiin ka bula ṭhu pa chuan min be mawlh mawlh a, a zawhna chu ka chhang tawi ṭhin khawp mai.





"Ei chak te i nei em, tlaiah ka rawn kan leh dawn che nia" nelawm zetin a ti leh a, rei tak min hre tawh te pawh a ang zawk lek lek!




"I khua chu a sik tawh lo maw?" min en chik ngang mai, "Tunah chuan sik tawh lo e, ka zia sawt lutuk" ka tih lai pawh chuan min la thlek vung vung a, ka pa thlalak ka hmuh nen pawh an in chhun fuh khawpin ka hria.





"Engtin nge an koh ṭhin che?" a tih leh chuan "Mimi-i" tih zawngin ka chhang a, "Tlaiah ka rawn kal leh dawn nia, hna thawk turin ka tlai ṭep tawh a" ti lehin a sana a bih vung vung a, Usamua nena an inzui chhuak chu ka en zui ve reng a, kawngkhar bul aṭanga a lo lehhawi laichuan tawi tein ka lo nuih ve a, engtia rawn lang ve nawlh nge maw anih le, Usamua hian a lo va hruai em maw ni?




Usamua a lo let leh chuan thil awmzia ka lo zawt thuai a, "Zingah ka va kal a, a hna kal tur ka rawn hruai kawi anih kha" a ti ringawt a, eng vanga rawn hruai nge tih ka la hre duh cheu.




"I hrilh vek bawk sia..?" ti a zawhna ngah taka ka en chuan a dar a chhin uk a, ka hrethiam lo telh telh mai.



"Enga ti nge i hrilh a?" ka tih leh hap a, muang changa ka bulah lo ṭhuin ka mitah min en ran a, keiin zawhna mitmeng nen ka lo en ve bawk.




"I pa hnenah palai tirh ka tum a" a ti mauh mai, chhan ngaihna pawh ka hre lo, min ti hamhaih tak zet a ni.




"A ngai kher em ni?" ka tih laia ka aw chu a bung viau bawk.




"I nu in i man a dawng duh si lo a, nupui man pe lo a neih tawp chu ṭhain ka hre lo" a thilsawi chu ka beisei loh lam daih a ni, ka duh dan lah a ni lo hek lo, tun thlengin ka pa nena in biakpawh hi ka duh tak tak em tih pawh ka la chiang thei lo a, min rawn miah lo a a lo ti chu ka lawm lo lek lek bawk.





"Min hrilh hmasak tur a lawm, ka ni Hmingliani pawh a awm a, ka pa tihbuai kher chu a ngai lo a sin" lawm vak lo a sawi ka ni bawk a, ka aw aṭangin ka lungawi lo tih a hre ngei ang.




"I duh dan a ni vak nange?" a tih chuan ka ngawi ran a, ka rilru a buai nuai mai, buaina dangah kan lut leh dawn tlatin ka hria a, ka hlauthawng bawk.





"Mimi, i unaupa khan i pa chu a lo hrilh dawn a, kan ngaichang phawt dawn nia, min lo chhawn dan a zirin kan leng ang" a tih leh zel a, eng rilru nge put tur pawh ka hrethiam tawh lo, ka pa nen kan la inhmu bawk si lo a; chumai ni loin ka piang ve tih pawh a hriat loh laia chutiang thu hrilh chu a laka beisei nei pawh a ang zawkin ka ring.




"Man inhlan kher chu a ngai em ni, heti hian min nei tawp thei a lawm" ka tih laia a lo nui suk chu phawk zetin ka en a, ka rindan ang hi chu ni lo hram sela ka duh.




"I pa nena in inhriat hi i tan a ṭha zawk ang, inneihna pangngai tak kan nei thei bawk ang chu, Victora ṭawngkam aṭangin an ngaihthah hauh lo ang che" a tih leh chuan ka ngaihdan a ni tawh lo takzet, hetiang zawng hian thil a kal ang tih ngaihdan ka lo nei thiam lo a, thil ṭha niin ka hre lo.





"Pangngai taka inneih i duh kher tih ka lo hre lo a, keimah chauh hi min pawm emaw ka lo tia sin.." ka ti tawl a, khum tlanga a lo ṭhut rual chuan ka hawisawn thuai bawk. Dim tein a kut a rawn vuan a, "I lungawi nange?" a tih chuan ka chhang lo, ka awmdanah chuan a lang vek tawh zawk.





"Hriat pawh kan in hre pawh lo a, pasal ka neih dawn vanga ka va tih buai chuan beisei ka nei emaw an ti ang, Victora kha be leh la, engmah sawi lo turin ti zawk rawh" khumah chuan mu thla lehin puan ka sin ṭha a, boruak chuan min delh rit churh mai hian ka hria a, ka thaw a ipik zo leh vek tawh.




"I man dawng tur ringawtin kan ti dawn a lawm, thil dangah chuan kan tibuai lo ang" a tih leh pawh chuan ka lung a dam thei meuh lo.




"Ka duh lo" ka ti leh tawl a, nakinah te chuan inbiak pawh te chu ka la duh mahna, tun dinhmun ah hi chuan ka duh lo hulhual a ni.




"An chhanna te pawh ngaichang ve phawt ila.." a tih leh vang chuan ka ṭhu chhuak hluai a, "Ka duh lo ka tih chu, ti nge i tih luih ṭalh a, ka piang ve tih pawh a hre miah hleinem, ka pa hnena man i hlan dawn aichuan ka man chu pe lo mai rawh.." ka aw chu a vin viau tawh, "Chutianga tih ngawt chi a ni lo a lawm" a tih leh zel a, a tihdan chu ka duh lo takzet.




"Kan dinhmunin a zir lo a engkim i hre vek sia, ti nge inneih pangngai kher chu i duh, i tan a buaithlak viau em ni?" ka ti ta thlawt a, awlsam tak tura ka ngaih laiin; chutiang thuartham vel a ani ber kher a buai chu ka hrethiam thei lo.




"I tana ṭha tur zawk a nia sin, ka nu in..." a tih leh chuan ka melh no lo viau tawh, "I nu te vang maw, ka pa hnen aṭang chuan eng thil nge in beisei, lawm taka min lo tuam hlawm in ring em ni, thuamchhawm lam vang chu a ni em lo maw.." ka sawilai chuan ka hnuk a ulh ṭeuh mai.





"Chutiang engmah ka beisei lo, ka nu in inneihna pangngai taka buatsaih a duh a, i pa a awm ve chuan i tan pawh a nawm zawk ka ring mai a ni, i duh lo anih chuan ka ti lui lo ang" a ti charh charh a, awki vin hmang lo mah se a ṭawngkam chu ka ngai kawi lo thei lo. A chhan chu inneih na pangngai nei thei dinhmunah ka ding lo miau a, tunah ngei pawh engthil mah pangngaiin a kal tawh lo zawk a, kan awmdan leh a thil duh chu a inpersan hle in ka hre bawk.




"Inneihna chung changah chuan buaina i neih ka lo ring lo a sin, hetiang leh tur si chu enga ti nge min hruai haw, ka ti ve thei lo tih i hre sa vek sia.." ka bianga mittui luang chu ka hru zauh a, khumah chuan mu thla lehin lehlam ka hawisan ta bawk, zep loah chuan ka rilru a na a ni, Usamua lehzel chuan hetiang rilru hi a put ka lo ring miah lo a.




"Tlaiah i u chu ka lo hrilh leh dawn nia, ka hrilh chhan kha ngaikawi suh, i rilru tihnat ka duh bik lo ania" a tih chuan chhang loin ka ngawi ran a, ka pang a rawn deh lai pawh chuan ka che sawn tawh lo. Min thlek vung vung reng a, rei deuh chu in be loin ka awm zui a, Cabin chhung chu a reh tlawk tlawk mai.




"I ril a ṭam em?" chhang loin ka la ngawi reng a, dimtea ka dar rawn chulin min thlek leh ringawt ṭhin.




"Min nei duh tak tak em?" ka tih chuan thawk a la hawk a, min lo ṭhuthnaih thuai bawk.




"Duh tehlul mai" dawt a sawi lo tih ka hria; mahse, kan duh dan a in ang lo tlat chu a ni buaina ni ta chu.





"Anih chuan ka ni hnenah ka man chu hlan mai rawh, mi te pawh man an inhlan a an innei mai a lawm, inneihna buatsaih kher pawh a ngai hleinem, tu vak mah sawm tur pawh ka nei chuang lo a" ka ṭawng chu a zawi viau a, ka beidawn vanga sawi ka ni mah ang.




"Ni e, ngaihtuah duh tawh suh" a tih ri chu a ring bik vak lo. A lam ka va hawilai chuan ngaihawm zetin min lo nuih a, a mitmeng chu a dam dup reng a, a hmelah chuan lungawi lo hmel a lang miah lo bawk.





A kut lum vung vung chuan ka biang a rawn dawm a, ka sam hnawk chu hui kiangin tawi tein min nuih bawk a. "Ti nge kan buai reng bik le..." ka tih chuan "Kan buai hleinem, ka thil sawi kha chu vei duh suh" a ti leh mai a, engtin nge ka vei loh theih tawh ang?




"I duh dan anih ka rin vang mai mai anih kha, kan pahnih kan awmdun chuan a tawk lutuk a lawm" a ti leh lawi sia, eng rilru nge a put ang rindan pawh ka nei thiam tawh lo.




Rei vak loah Umawipuii a lo lut a, kan in aṭangin ka thawmhnaw leh eng engemaw a rawn la chhuak nual a, Usamua haw tur chu pawn thlengin a zui chhuak bawk. A lo luh leh chuan Usamua thilsawi te chu ka lo hrilh a, thu min râwn tur a neih ka beisei vang a ni.





"Ka rindan chuan a nuin inneihna buatsaih a duh bawk si a i tan a nawm loh a hlau a niang, nangmah a ngaihtuah vang zawk che anih dawn chu" a ti teh daih a, ani pawn ka pa te hnena inhriattir chu a lo thlawp zawk mah a, Victor-a lo kal thu ka han hrilh phei chuan a phur hmel viau a, "An pawmthiam hmel viau chu, in hriat pawh hrim hrim pawh a ṭha ang" a ti leh sap sap a, rilru siam thiam a har khawp mai.




"Mi pasal nei te anga bungraw ṭha tak tak nen ka luh theih loh vang hian a nuin a lo nawr em mawni ka ti hman a, ka pa hnen aṭanga mawi hnai taka ka lawi an duh anih i ring em?" ka tih chuan a awih ve leh tlat lo.




"Chutiang ni se a hruai haw tawp lo ang che, engmah hre sa lo a ni hleinem, i mal ve angreng si a; i pa te lam nen in inpawh theih chuan i tan a ṭha dawn em a, chuvang zawk aniang chu, han ngaihtuah ve mahla nangpawh rilru nuam deuhin i va lawi thei zawk dawn a sin, hetiang tawp hian va khawsa la chuan i inkiltawih reng maithei zawk a nia" a ti zui luam a, a han sawi takah chuan ka thil ngaihtuah dan chu a atthlak riauin ka hre leh a, keimah zawk hian rilru chhia ka lo pu a nih mai hmel e.





"I mo pui tur lah an awmthei bawk si a, inneihna pangngai nei lo a va awm ve tawp kha thil nuam a ni dawn miah lo a nia aw, engmah lo sawi nawi lo mah se; nangmah zawk kha awm nuam lo tur zawk i nia, inneihna an buatsaih anih chuan keini pawn theihtawp kan chhuah ve dawn a lawm, ka ni Hmingliani te pawh an la awm ve a, man ei tur neuh neuh te pawh an awm bawk a, kan theih ang angin kan thuam mawi ve ang che chu" a ti zui siam siam a, ka ngaihtuah zui zel takah chuan a dik ve riauin ka hria a, ka pa te chhung erawh tih buai loh theih hram ka la duh thung.




"Usamua chuan man pe loa nupui neih a duhloh thu a sawi a" tiin Umawii chu ka hrilh leh a, "A ti dik chiah a lawm, mipa kei ka ni inti ve tan chuan nupui man pek ngei chu a tih tur a ni, i hma khua a ngai tak tak anih dawn chu" a ti leh mai a, ngaihtuah a ti thui ṭhin khawp mai.



"Ka hmakhua a ngaih vang maw?" ka lo ti he haw a.




"Ni chiang e, kan Mistiri-a chu a va khawngaih thlak zawk e, mo chhungte leh mo neitu lam nih a fawm anih chu, a ko ah a dah vek bawk che sia a va indaih lo reuh e" tiin a nui hawk hawk a, eng a sawi tumna nge maw ni?




"Man pawh inhlan buai loin kan in kawl nghal tawh mai ang chu ka lo tia, amah khan a ngaipawimawh leh ang reng si a?" ka tih chuan a ngaihdan a ni lo hle a.





"Hmeichhe man hi pawisa tlem te ringawt a ni hleinem, inneihna thuthlung kengtu pawimawh tak ania, i pasal laka i zahawmna tur leh i inchhuan ve na tur a nih kha, nakinah dinhmun chhe takah pawh i la ding thei a, man i neih loh chuan sumchhuah duh pawh ni la i thei dawn reng reng hleinem, i pasala chhungte lakah pawh i thlavang kan hauh thei hek lo ang, mikhual chamrei ang lek i va ni mai dawn a sin, chuti niloa i chhungten i man kan dawng anih chuan thu delhkilh neiin i kal anga, harsatna i tawh hunah pawh i thlavang kan rawn hauh ngam anga, cheng 420 man lek ni siin hmeichhe hlu lutuk i ni tawh thung ang" a ti sap sap a, Au Mawii a han ṭawng ve hi chuan engkim hi a dik thlupin ka hre ṭhin, thu dik emaw dik lo pawh sawi mah se, engemaw zawng tak hian awm a ti nuam ve riau zel.





Chhun thil ei hun vela Usamuan min lo Phone chuan ka lo chhang vat a, "Tukin zinga ka thilsawi kha chu ka ngaihtuah thui loh vang anih kha, lo ngai haw suh aw, ka lu nat vangin ka thluak a fim lo deuh aniang" fiamthu titak deuh leh inthlahrung ru takin ka va ti a, a lo pawm thiam viau thung, "I duh dan i sawi kha a ṭha zawk, nidangah pawh tlang takin i sawi zel dawn nia" tiin thil ka ei tawh em tih min zawt zui a, tlai lamah a lo kal tur thu min hrilh bawk a, Victora pawh kha a lo kal leh dawn tho anih hmel e.




Tlai dar 3 pelh hret ah Usamua chu a lo thleng a, Victora lo thlen tak chu dar 4 vel anih ka ring, thei chi hrang hrang hi Busket mawi zetah hian a lo khai a, a nui sawng reng chu lo chhawn dan pawh ka hre meuh lo. Usamuan a lo be hlauh zawk a, zawhna min zawh changa ka chhang tih loh chu ka ṭawng tam lo hle a, an titi ka lo ngaithla a ni ber ang chu.





"Mimi hian nuam a ti zan lo a, nakin lamah keimahni in kan la rawn be pawp zawk ang kan ti leh si a nih chu" ti a Usamuan a hrilh chuan Victora chuan min lo melh vat a, "Nuam lo tih chhan tur a awm hleinem, keiman ka lo hrilh mai dawn a, chanchin te pawh ka rawn hrilh leh mai dawn che u a" a ti zui zat a, a sawi awlsam angreng.





"Inneih.. zawh..lamah..ka la rawn leng zawk ang" ban charha ka lo tih chuan ka lamah a rawn tawlh hnai sawt sawt a, "Pasal i nei ṭep tawh sia, chhungkaw in tlawhpawh na remchang tak a lawm, ka pa pawh a lawm viauin ka ring" a ti leh a, a phur hmel riauin ka hria.




"A lawm dawn em maw ni?" ka tih chuan a bu nghat nghat a, rindan vak pawh ka nei thiam lo.




"Usamuan ṭha a tih dan dan a ni mai" ti lehin Usamua chu ka va melh a, min chhang mai lo chuan a ngawi vang vang thung.





"Hei, i u ka nih hi aw, i u in ṭha ka tih chu a ṭha ah ngai tawp rawh, engmah zah tur a awm lo" ka bula mi chuan a rawn ti leh khauh a, ka zak ni chiah pawhin ka hre lo, ka hlauthawng a ni mah zawk.




"Anih chuan lo sawi la, an chhan dan che zep miah loin min lo hrilh rawh aw, an chhan dan che a zirin ka hmu chauh dawn nia" ka ti ve ta nge nge.




A haw hnu chuan in lama haw ka duh thu ka sawi a, Usamua leh Umawipuii chuan an remti lo ve ve a, in lampang chanchin hre miah lo a awm chu rilru a nuam thei tak tak lo. Usamua hnenah chanchin zawh lah chu a ṭha lam hlir chhanna ka dawng a, engthu chhia mah min thlen a tum lo ni mai hian ka hria.





Kar khat dawn Damdawiina ka awm chhungin Victora chuan min lo tlawh nitin a, a lokal apiangin eitur tuihnai chi hrang hrang min lo ken a, a nu leh pa zin an haw hunah a hrilh chauh dawn niawm tak a ni. Usamua chhungte pawn min rawn tlawh fo a, Nu Rengpuii pawh a lo kal zing ve malh malh viau a, a lo kal chang chuan eirawng a rawn bawl hluah a, biak phei chu kan in be tam ngai lem lo.





Ka nu chuan Umawipuii lo Phone-in ral aṭangin min lo tawng ṭhin a, min biak a duh thu a sawi lahin Umawii chuan a phal lo a, Umawii thleng chuan a rawn an khum ṭhin, Damdawiinah ka awm tih ka hre nain vawikhat mah a rawn lang lo bawk, chu erawh pawi ka ti lem lo a, a hmel hmu chu ka chak fahran bik lo a ni.





Ka ni Hmingliani chuan ka pa rawn turin min ti a, ka nu nena in bakkhaih a duh lo niawm tak a ni, "I pasal neih hunah chuan thil ṭha deuh leisak che chu ka tum a; mahse, man leh mual vel chu i pa kutah dah zawk rawh" a ti teh tlat a, Umawipuii a lawm lo ngang mai a, chutia min buaipui hreh deuh anga ṭawngkam a neih vang chuan a kutah innghah chu ka duh bik lo a, tih dan kawng dang a awm mai ka beisei.





Ka ning tawh lutuk chuan zirtawp zanah haw ka dil leh a, Usamua bulah chuan a ngenin ka ngen a ni ber. Doctor hnenah a tuk inrinni a chhuah a lo dil a, ka Doctor chuan a lo phal ve mai bawk. Inrinni zingkar hma takah Usamua a lo thleng a, thlanglam tukverh bulah Umawipuii nen ṭhuin an titi dun a, ka chungchang an sawi niin ka hria.




Kan Bill vel tifel tura Usamua a kal chhuah hlanin Umawipuii chu ka lo zawt a, "Ka ni Hmingliani hnena palai an kal theih loh chuan ka hnenah a ni mai" a lo ti sam et a, ka pa te chhung chuan thu an rawn nei ta anih ka ring, ka beisei hran lo bawk a, min ti hamhaih lem lo.




Suzanne-i leh Nu Rengpuii an lo thlen takah chuan kan insiam zung zung a, khawsik ka nei tawh lo a: ka taksa erawh a chak lo hle thung a, Motor kan han chuang te chu ka lu a hai deuh a, in kan thlen rualin khum ka pan ruak a ni ber.





"Mo thar tirha damloh hrehawm zia chu ka hre ve a lawm, inthlahrung miah suh, i mamawh chu min hrilh zel dawn nia" Suzanne-in a ti siam siam a, khumah chaw min pek mai a tum erawh ka hnial ve tlat thung a, an vaiin ka chungah an ṭha em em a, inthlahrung suh ti eng ang mah se, inthlahrun loh a har a ni, ka pa te lam chungchang an sawi lang ngai lo a, ngaihdan ka lo nei ngawt kha ka inthiam ru hle tawh.





Pathianni chu nilengin khumah ka tap a ni ber, ruah a sur cherh cherh renga khua lah chu a vawt em em bawk. Usamua chu ka sirah muin lehkhabu a chhiar a, a la meng ve reng emaw ka tih laiin a lo muhil daih hi a lo nia, puan ka sin ṭhattir laichuan a harh aniang min rawn kuah nghal sawk sawk a, tlai thim dawn thleng chu kan mu a, zan lam erawh kan meng rei dun viau thung.





Inkuah rialin kan titi dun a, Christmas hma a inneih a duh thu a sawi chuan engmah hnialna ka nei lo, "Tunkarah palai kan tir ang" tiin a pa nen an remruat dan te min hrilh a, Umawipuii hnena palai han kal tir ngawt chu rilru a dam zan lo khawp mai, tih ngaihna dang lah chu a awm mang si lo a.




Thawhṭan tuk chu ka tho nuam ve ta deuh, Suzanne-i eirawngbawl puiin kan titi pah bawrh bawrh a, chutih laia kawngka a Victora lo lang hlawl chuan min ti hamhaih lek lek a ni.




"Ka pa in va hruai rawh a tia, lo phei lawk la, ka thlah leh dawn che nia" a rawn ti mauh mai. Usamua nen Sitting room lamah an inbia a, rei vak loah lo inzui phei lehin "Ka kalpui ang che" Usamua chuan a lo ti ve leh a, ka tan hnial chi ziazâng a ni tawh lo.





Ka pa te inlam kan pan chu ka zam hle a, engthil nge ka va sawi ang tih mawlh chu ka ngaihtuah a, ka awm a nuam lo hle bawk. Ka man dawng tur chuan ka phut ngam lo ang, chu lam hawi chu engmah sawi loh ṭhain ka hre bawk.





"U Vic...inneih chungchang i lo sawi tawh em?" ti a ka zawh chuan a la sawi rih loh thuin min chhang a, "Anih chuan sawi lo ang aw, nakinah a ni te kan ruat fel hunah kan hrilh mai dawn nia" ka ti leh a, a ngawi vung vunga min chhang lem hlei lo a.




Gate ah tlan lutin a inkawtah ka ding a, chutih laichuan hman deuha ka hmuh tawh nutling kha a lo chhuak a, min rawn pawh loin a let leh daih thung. "Ka nu chu..!" Victor-an a lo ti hluk a, min ti zam zual sauh lehnghal.





Inchhunga kan inzui lut chu an lo reh ṭhiap a, Victora nu pawh chu ka hmuzui chuang lo, "Kan lo thleng e.." Victoran a tih hnu rei vak lo ah inchung lam kailawn aṭangin ka pa ngei mai chu a lo penthla a, min rawn en nghal chat bawk.




Min rawn nuih nghal var a, awm a nuam deuh huaiin ka hria. Chutah, kan bul a lo thlen rual chuan chik fahranin min en a, "Mimi maw i hming?" a tih chuan ka bu nghat a, ka khur ru der der lehnghal. Ka pa chu hnai taka han hmuh takah chuan a zahawm ngang mai, Victor-a ang tho a palian leh nelawm hmel tak a ni, an hmel pawh an inchhun fuh tak zet.





"I dam ṭha tawh em, Liansangzualan i damloh thu a sawi a, eng nge i an tawh a?" a tih chuan "Ka ṭha tawh lutuk e, inrinni khan Damdawiin aṭangin ka chhuak a" ka lo ti ve thuai a, ka aw te chu a khur deuhin ka hria.




"Hei hi in pa em ni?" tih paha Samuela a lo chibai lai te chuan nelawm tak hmel a pu reng a, Victora kha khawiah nge a lo kal hman ka hre lo, ka hawi kual laichuan ka pa chuan min lo en reng a niang a hmel ka en rual chuan kan in melh fuh hle a, sawi tur chu vang duh tak a ni.





"Kan lo inhre har hle mai a, hei nang lah chu i lo puitling der tawh a, fanu ka nei tih reng reng ka lo hre lo a, Liansangzualan a sawi khan min ṭhawng khawp a, ka rawn lam tir chuk chuk che anih hi" ka pa chuan a ti leh a, ka sawi tur hre lo chuan Usamua chu ka va melh ṭhin a, ka awmdan chu a hrethiam a niang a lo inrawlh ve thuai a.




"Rawn tlawhpawh che a hreh ṭhin a, i chanchin kan hriatna chu a rei deuh tawh" a tih chuan ka pa chuan min rawn en leh a, "Engah nge hman hmanah min rawn tlawh tawhloh le aw, chu kan hriat lohin i lo damlo viau lehnghal a, a chhe ber thleng ila hmel in hmu miah loin kan awm mai dawn a sin" hlim hmel pu sarh hian a ti leh a, kei ka lo nui tawi tak thung.





"Khawnge i nu pawh kha a awm daih chu le" Victora lo lut a hmuh rual chuan a ti leh thuai a, "Choka ah a awm, thingpui a siam a, a zak deuh aniang" a tih chuan ka pa chu a nui hawk a, chutah a nupui chu koin "Liansangzuala nu, lo phei ve teh..hei fanu thar i neih hi, han chibai ve thuai rawh" a ti lang lang a.




"Ka nu hi chu a zak zum deuh a" Victoran a lo ti ve zat a, ka beisei aiin kan boruak chu a zangkhai daih mai.




"Liansangzuala nu.." ti a ka pain a koh leh hnuah in neitunu chu a rawn phei ve ta chauh a, thingpui no chawi chunga muang fahrana a lo phei chu kan lo en ṭhap a, min hmuh rualin min nuih var var a, "Khawi ka lo chibai ve ang che, i va lian tawh ve" a ti ve luam a, a lai deuh ṭut in ka hria, keipawh ka bang chuang lo.





"A piang ve tih pawh kan hriat loh laiin fanu nula kan lo nei reng mai a hei...ani lah chuan min hriatna a lo rei tawh a ni awm a" ka pa in a tih chuan "A nula tawh chiah lo" Victoran a lo ti leh zauh a, min ti lai dawn dawn mai.




"Hei hi a pasal anih hi" ka pain a tih leh chuan Usamua chuan a lo chibai ve thuai a, an landan aṭang ringawt pawhin nupa inzah thiam tak an ni tih a hriat theih.





"I nuin nau a pai tih kan hriat tirh khan kan nu nen hian hmu turin kan va kal a, i nu khan ka fa anih loh thu khan min lo chhang mai si a, chuvang ania ka ngaihven zui loh che ni, i nu boral pawh khan kan lo kal a, ka fa i ni tih hria ila chuan ka hlamchhiah hauh lo ang che, min hrereng a min pawh duh loh vangin i thiamloh ah ka ngai mai dawn a sin" nui chunga ka pain a lo tih chuan ka lo ṭhen ṭha a, "Tunah pawh hmuh che ala duh chuang lo" U Vic-a chuan a lo ti leh a, ka pa chuan min en phawk viau tawh.




"Engah nge mi hmuh chu i hreh viau a, i pasal hnen aṭanga ka hruai daih che i hlau em ni?" a ti zui khauh a, "A...chutiang pawh a ni lo" ka lo ti bah nak a, "Anih ka ring tlat" U Vic-a chuan a lo ti leh pek a, an nui dar dar hlawm.





"Liansangzualan i chanchin min lo hrilh nual tawh a, engtikah maw inkutsuih in tum a?" Victora nu chuan a lo ti ve thuai a, "Kumin hi chuan kan tum a, engmah sawi chian a la awm lo" ka tih laimekin "Ka sawi tawh ang kha a ni mai, ka pa hian a man dawng sela an duh a" Victora chuan a lo ti leh a, ka unaupa zet chu...ka duh aiin a ṭawngthei deuh chu a ni.




"Kan va phu lo ve aw...dawng tlak pawh kan ni ngut dawn em maw ni" min en vang vang chungin ka pa chuan a ti a, chhanna ka nei lo chiang hle.




"Mizo danah chuan i nu chhungte lama i pu te dawn tur a nia, an lawm lo viau a nge " ka pain a tih leh chuan tumloh thleng thleng sawi a ngai dawn tih ka hre nghal a, ka huphurh ru khawp mai, an ni nupa lah chuan chhanna beisei deuhin min en a, zep leh rih chi pawh a ni tawh lo.





"A pu te lamah man dawng thei an awm tawh lo a, a ni chu a la dam a, chhungkaw lama buaina neuh neuh a awm vangin a nia nangman dawng la kan tih" Usamuan a tih chuan zawhna an ngah hmel hle a, keimah ngeiin ka sawifiah a ngai tawh.





"Kan inneih hi rem an ti chiah lo a, ka pa a boral tawh bawk si a" ka tih takah chuan an hrethiam ta aniang an nupa chuan an bu nghat nghat a.




"Min chuhpui tu an awm lem loh te chuan kan lawmthu aniang chu le, a nilawm ni nu-i" an nu lam hawi chuan a ti zui a, "E...i in huam a thu aniang chu, khalam chu i thutlukna ang ang a ni mai" Victora nu chuan a lo ti dam thluam a.





"Fanu ka hralh ve ang tih hi rin ngaihna pawh ka lo hre hleinem, kawng lehlamah chuan ka phu lo zawk khawp mai, ka chawm leh hrai pawh nilo man ka han tel dawn a ni a, ka vannei dawn hle anih chu" ti a ka pa ṭawngkam chu kan thu tih tlukna a ni ta.





Darkar khat dawn kan titi ho a, chhungkaw chanchin pawh min zawt kim khawp mai, ṭawng ka insum viau nain a dil chhut si a, zep hleihtheih pawh a ni bik lo, kan inneih an phalloh chhan kha a hre duh miau a, ka lakah an inhawng ta sa sa tiin ka hrilh ta vek chu a nia, engkimah min dawngsawng thiam a, hnuk a ulh lek lek hial a ni.





Kan haw dawn chuan ka beisei loh deuh thil a rawn sawi leh a, "Thu neihna min pe ta sa sa, inneihna pawh pangngai takin kan ti ve anga nang pawh kan rawn lam thuai ang che, hetah i pa in aṭang ngeiin pasal i nei a niang chu" a ti ta kha a nia, Usamuan palai an tirh vat tur thu a sawi bawk a, thil kaldan chu ka beisei phak bak a ni.




Thil pakhat hriat chian em em ka nei a, a chang chuan hlimna hi kan ban phak maiah a lo awm ṭhin a, dawihzep luat vangin kan lo hel fo zawk tih hi.




Zanah min hruai turin ka pa leh Victora an lo kal a, thingpui te in hoin Sitting room-ah an ṭhu khawm a, Suzanne-i nen pindanah keini kan lo insiam thung. "I chhung te chu an fel hle mai, pasal ka neih dawn khan kei chu ka rilru a hah thei lutuka, inruk a awmtlang tawp kha kan inneih theih dan tur ni khan ka hria a, ka haw duh lo reng a lawm" tiin a chanchin min hrilh ve luam a, hun harsa tak an lo paltlang ve tawh ni ngei tur a ni.





Usamua lo lut chu khumah a ṭhu awn duai a, kan che vel chu min lo melh leh run run ṭhin a, hlim hmel a pu miah lo chuan ka ngaih a ti ṭha lo deuh a, a chhan ka zawh lah chuan "Haw tir leh che hi ka lo tum lo a" a ti mai a, 'Ka ngai dawn lutuk che' min tih na angah ka ngai.




"I damdawi te kha i theihnghilh a nge, ka bulah i awm dawn si lo a; dam loh a chi tawh loh ang" a ti bul bul a, a hreh hmel lutuk chu hmuh nuam ka tih zawng a ni ve tlat. "Min ngai lutuk anga i lo muttheih loh phah a nge" ka ti fiamthu a, a nui suksuk duh chauh.





Kawt kai thleng min lo thlah a, kan in mangṭha leh a ngaih tawh loh nana inthlah kan ni, engkim tan hun ruat a awm...ka tan pawh hun min ruat sak a, A hun ruat chu tunah ka thleng mek bawk.







(END OF CHAPTER - 18)



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 6th, 2022, 7:47 pm

ZUNZAM - by Ahmangaihi violette Khiangte


CHAPTER - 20





Ka pa te inah chuan tu tu te emaw an lo awm nual a, kan va thleng chu min lo chibai sap sap a, nula leh tlangval ṭhenkhatin thingpui an lo lum laih laih bawk. "Kan chhungte an nih hi" tiin U Vic-an min lo hrilh zung zunga, nu pakhat chuan lo fiamin "Vawiin tlai a rawn kal chu a rawn intithei lutuka, 'Farnu thar ka nei a, rawn hmu ve rawh u, ruai te kan ṭheh thut maithei' a rawn tia, kan lo awih ṭha duh lo a, Usangpuii ka zawh hnuah kan rawn kal ngam chauh a lawm" nui hawk hawk chungin a lo ti a, min en duh hlawm em vang chuan ka hawi chhuak ṭha ngam meuh lo.





"Kan tunu thar chu hetah lo ṭhu teh" putar pakhatin a lo tih chuan Uvic-an min nam phei nghal rawk rawk a, chu putar chu U Vic-a nu Nu Sangpuii pa a ni awm e.





"I va hmelṭha em ve aw, Liansangzuala nen pawh in in ang hle tak mai a" tiin min thlek vung vung a, zawhna min zawt zui mawlh mawlh bawk a, 'Khawi vengah nge i khawsak? Enge i thawh ṭhin?' tih angreng a ni.





Ka pa leh Uvic-an zawhna tam zawk an chhang a, a tu a te pawh chu an ṭawngkam a ṭha em em vek a, min lo lawm thiam khawp mai. "Kar hmasa khan Malaria vangin Damdawiinah a awm renga, a la damsam vak lo a, chawl hahdam rih rawh se" U Vic-an a tih hnuah choka lamah kan inzui phei a, ṭhalai lo awm ho chu min hmelhriat tir leh te te a, kei aimahin ka unaupa chuan nuam a ti in ka hria.




"Vic Luliana chu i intithei deuh tlatin ka hria" nui pat pat chungin nula pakhat hian a lo ti a, "Loh theih nang, kan Princess-i aipawn a hmelṭha daih zawk a lawm" a tih chuan an nui ham ham a, min ti lai lek lek a ni.





"Apuii ka nia" tiin nula chuan min lo chibai a, tlangval lo awm ve pakhat chuan "A bem theih nghal em, Vacancy a la awm em?" uang zet hian a lo ti a a, Uvic-an a lo duh lo nasa mai, "Taken na a rei tawh, chu loah makpa atana ka duh zawng i ni lo" fiamthu ti tak deuh hian a ti hluk hluk a, chupa chuan nui heu chunga en pahin "Ṭawng mai mai suh aw, kan duh bik lo mai tur che a nia" a lo ti let a, a ṭhiante nge an nih a a unaute tih pawh ka hrethiam ta chiah lo.




Nula la naupang deuh pakhat hian thingpui min lo pe a, dawhkan kila kan ṭhut laichuan an ri bawrh bawrh hlawm a, an nui ring ṭhinin fiamthu an duh hlawm hle a, min lo be hmasa ber tu nula kha 'U Apui' ti a an koh vek vangin unau an nih ka ring ta deuh.





'Fiona' ti a an koh leh Uvic-a chu an chhaih leh zuk ṭhin a, nula chu a zahzum hmel hle a, Uvic-a thung chuan zak hmel a pu ve hauh lo, Fiona bulah chuan ṭhuin a hrilhru zauh zauh reng a, nula zak chu a sen leh ṭan ṭan ṭhin; a bialnu a nih ka ring.





"Apuii i u te chu an rawn kal ve dawn emaw ka tia" Uvic-an a tih chuan "Dear John-a a hritlang lutuka, Mambawihi a chhuak thei bawk si lo a, 'Naktukah ka kal mai ang' a ti anih kha" nula chuan a lo ti a, hmeichhe zinga sambuang ber chuan lo tuihnih ve in "A thaibawih thlak emai a, fa pathum nei te pawh a ang" a lo ti hlak a, an khi ṭha hlawm mai.





"A raino leh tawh a, niminah Doctor-in Bed rest a chawh a, a rai hi a hrisel lo thei em a lawm" Apuii bawk chuan a ti leh a, tu chungchang nge an sawi ka hre ve hauh lo.




"Mimi, kan inah te la rawn leng ve rawh aw" tlangval khan min nuih sang chungin a lo ti a, "Naktukah ka rawn len pui ang, chaw eiah te sawm ta che u" Uvic-an a lo ti thuai a, phawk deuha ka va en takah chuan "An upa ber hi ka Bestfriend a nia, i man pawh a ei dawn a" tiin min lo hrilhfiah a, midang chuan zawhna an ngah zui hle a.




"Pasal i nei dawn a mi?" sambuang 'Judy' ti a an koh chuan a lo ti thuai a, keiin lu ka bu nghat thung.




"E heu..a va nuam dawn ve, heng ho hian huau huau an chak lutuka, pasal nei turin min nawr sek hlawm a, a va tihzia ve" Apuiin a lo ti ve leh a, "In lo kal vek dawn nia" ka tih chuan an phur hmel hlawm khawp mai.





"Victora mai mai chu, beisei neiin ka lo kal a sin mawle, pasal a nei dawn tih sawi sa ta che" tlangval bawk khan a ti leh a, UVica thawk la hawk chu ka en ve thuai a, "I tan ka phal lo" a lo ti mauh mai.




"A intithei e...." Fiona-in a lo tih chuan an nui dar dar a, Uvica hmel chu hmuh a nuam ṭhin ka awm ve hi a lawm hle tih a hmelah a lang reng a, awm a ti nuam takzet bawk.




Nu Sangpuii lo pheiin min lo koh takah chuan ka thawhsan thuai a, inchung lamah inzui chhoin ka pindan tur te min kawhhmuh a, "I u nen vawiinah kan lo siksawi ve nual a, inhnuaiah mut i hreh takah tiin i u in a pindan a pe che anih hi" nui var var a a tih chuan chhan ngaihna pawh ka hre meuh lo, pindan zau nuam tak a ni a, engkim chu duhthusama mawi leh ṭha a ni, ka phu lo zawk hial in ka hria.





"Naktukah Bed sheet thar te kan lei dawn nia, pasal la nei mai loin kan hnenah han cheng ve rih la ṭha tur a nia, i u lah chuan chelh rih dan ngaihtuah ang u a tia, i pa in 'Pasal neih kan phal lo mai dawn em ni' a tih lahin a ngaingam bik si lo a, vawiin chu i chanchin ngawt kan sawi nileng mai" a ti siam siam a, ka tan hriat nuam tak zawng a ni.





Khumah chuan ṭhuin min rawn melh vang vang a, "U Vic-a chu khawiah nge a mut dawn a?" inthlahrung ru deuha ka tih chuan "Inhnuaiah pindan awl a tam a lawm, a duh duhna ah mu tawh mai rawh se" a ti mai a, a bulah ka va ṭhut rual chuan ka lam a rawn hawi zat a, min nuih var var reng mai.




"I pasal tur te chu eng ang chhungkua nge an nih, amah kha chu a fel hmel viauin ka hria a, a chhungte lam chanchin hriat kan nei mang si lo a, i pa pawn hriatchian hmasak a duh deuh a" tiin min zawt zui a.





"Ka chungah an fel khawp mai, chhungkaw ṭha tak an niin ka hria" ka tih chuan thaw huai hmel a pu a, chuti taka min ngaihtuah chu hnuk a ulh lek lek a, ka mittui a hnam leh der tawh.





"I pa chhungte lam hi Aizawl ah hian an awm vak lo a, ka chhungte hi an awm ve nuk thunga, i man eitur pawhin ka chhungte an tam dawn a, ka pa lah kha kha a inti thu nasa tawh mai bawk si a, i lo hrethiam lo lutuk a nge, keipawh hi phur sa loh lohin ka phur a, ka fanu ah ka ngai nghet hmiah che a nia aw, i pa nupui ang chauhin min ngai lo la; i nu ang takin min en ve dawn nia, fanu ka hring ve bawk si lo a, nang i lo lang hi ka lawm viau a nia" a ti sap sap a, a ṭawng chu a bah viau nain a rilru dik tak a sawi tih ka hre thei tlat, a mitah chuan hmangaihna leh duhsakna tam tak ka hmu a, nuin a fa duat tih hriat taka a en dan ang chiahin min en bawk.





Ka bianga mittui luang chu hruk pahin lehlam ka hawi vat a, "Akhai....!" a tih laichuan ka ṭah nuih hak a, ka dara a rawn vawn leh laichuan ṭah a chhuak tak zet tawh. "Sawi tur pawh ka hre lo...in vaia chungah ka lawm lutuk" tiin ka ṭawng chhuak thei hram a ni.





"E..keini deuh a nia lawm, kan lo inhre har em zawk a, duat pawh kan duat ve hman hleinem che.." tih pahin ka sam a rawn chul hliau hliau a, kuah vawng vawng tak ka nap a, chu erawh ka ngam ngang si lo.




Khumah ṭhu a kan titi melh melh laiin Uvic-an ka Bag a rawn khai chho a, "Nangni nufa chu eng nge in sawi a, in tawm bo daih?" a lo ti hluk hluk a, "Apuii te unau chu an haw tawh em?" Nu Sangpuiin a lo tih chuan an haw chiah thuin a chhang a, "Fifi ka va thlah lawk ang, ka pu te an la awm khu, tawm bo daih suh u" a ti leh mai a. Chutih laiin Nu Sangpuii chuan ka Bag hawngin thawmhnaw chu khumah a phawrh chhuak mawlh mawlh a, ka damdawite chu a en chik hle bawk.





"Va rei suh aw" ti a Uvic a kaltur a biak leh chuan a lo hawi let thuai a. "Nula ka rim ve ang chu" a lo ti khauh a, "A hun rih lo emai, va thlah la lo let leh vat zawk rawh" a nuin a tih chuan a ner suk a, a chhang let lem lo.





A chhuah hnuah "Zahau colony ah hian a va leng zantin a, nupui lah hi a rawn hawn thei mang si lo a" nui kur kur chungin NuSangpuii chuan a ti leh a, ka hriatthiam loh hmel a ti deuh nge ni "Tleirawl a ngaizawng a, a nghak nula leh phawt dawn aniang, mo kan mamawh tawh tehlul nen hian i u hi chu a hmanhmawh lo khawp mai" a ti leh zel a, thil awmzia chu ka hrethiam ve ruai tawh, ka nu nula sawi chu Fiona kha a nih mai hmel e.





Inhnuaia kan chhuk leh hnu chuan ka pain min lo ko thuai a, kan luhtirha min lo be tu putar khan lawmthu sawi ṭawngṭainate a nei a, a vawihnih nan min chibai leh bawk. "Sangpuii fanu i ni tawh a, ka tunu dik tak i nih tawh hi aw, i pu ka nih angin palai te pawh keiman ka lo chhawn dawn nia, fanu hi pathum ka hralh ve tawh a, tunu ka vawikhat hralh na tur a ni dawn a, ka fate hian tupa hlir min pe hlawm a, nangzawng Pathian hnen aṭanga kan dawnah ka ngai hmiah che a, ka tum anga thil a kal thei anih chuan ran lukimin kan thlah ngei ang che" a ti charh charh a, chuzawng beisei piah lam a ni, ka duh ang pawhin lawmthu ka sawi thiam lo a; ka lawmna hi sawi maia fiah zo a ni hek lo, ka phu lo ka ti takzet.





Mut hmunah Usamua nen rei deuh kan inbia a, "Naktuk zanah palai an lo kal dawn a, i chhungte i lo hrilh dawn nia.." a ngawih vung vung hnuah "A hrehawm i tih chuan min lo hrilh vat la, ka lo hruai ang che" a rawn ti leh a, a nuih a ti za lek lek.




"Min ngai der e law?" ka lo tih chuan a nui ri ve suk a, "Ka la mu lo, i awm lo a pindan hi a ruak lutuk" a ti zawi ruih a, min ngai tihna, 'Ka ngai che' tih thu hi a sawi ṭha duh lo ve ziah a, a awmdanah a lang vek tho sia.




"Usamu..." ka tih chuan "Umm.." zawi deuh tak hian a ti a, ka lo nui leh rih...




"Sawi la.." a tih rualin "Ka duat.." ka lo ti zauh a, a reh zui vung vung mai, a hmel landan tur ka mitthla zui a, ka hmu chak tak tak a ni.




"Tunah khan i nui em..?" ka tih chuan "Nui lo e, i damdawi i ei tawh em?" a ti leh daih a, a lai tih ka hre reng sia.




"Ei tawh e, mu ve dawn tawh rawh" ka ti let thuai a, "Ka mu dawn chiah e, in sin lum ṭha la, i nawm loh chuan min lo hrilh dawn nia" a ti leh a, a mu nghal nge ni a thawm a ri sawt sawt a, a khum lianpuiah amaha a mu tur ka ngaihtuah zui nen ka khawngaih ve lek lek.




"An duat che em?" a rawn tih laia a aw ah chuan min ngaihtuah zia ka hre thei.




"Min duat lutuka, awm reng mai ka duh ang tih a hlauhawm zawk a lawm" ka tih chuan thawk a la hluai a, "Awm reng lo e; a chi nang, keiman ka duat zawk daih che a lawm" a tih ri chu ngaihthlak nuam tak zawng a ni.





Rei deuh kan inbia a, kan inbiak zawh chuan dar 12 a lo pel der tawh, ka mu tui viau a niang mumang ka nei awm pawh ka hre lo, ka harh chuan tukverh aṭangin nizung a lo lang ruih tawh a, sava chiar nak nak thawm chu ka hriat hmasak ber a ni, thochhuak vatin ka inphih fai a, ka hmai hruk mawlh mawlh pahin banga Uvica thil tar ho chu ka en kual a, unaupa lehkha thiam thei deuh ka nei anih hmel e, thlalak pakhata mipa lang ve chu ka hmuh hnu a ang hle a, hmelṭha deuh leh zahawm deuh mai a ni a, ka hmuh tawh na ka hrechhuak mai thei lo.




"Mimi-i a la tho nange?" ka pain a tih ri ka hriat takah chuan pindan ka chhuahsan thuai a, inhnuaia ka thlen thlak rualin Nu Sangpuii chuan thingpui ka duh em tih min lo zawt nghal var a, Sitting room ah ka pa chuan chanchinbu a lo chhiar mek bawk.




Dawhkan ka kil fel awrh ang tih ah Uvic-a a lo tho a, "Hna ka kal anga tlaiah kan leng dawn nia, ka rawn haw hma ang" a ti zung zung a, "Khawiah nge kan len dawn?" ka lo ti let ha a. "Zahau colony ah" a tih chuan a bialnu te in anih ka ring ringawt a, ka hnial bik lem lo.




"Bazar pui ka lo tum asin, Bed sheet te pawh lei a ngai a" nu Sangpuiin a ti ve thunga, "Chhunah lo va chhuak rawh u" ka u chuan a ti sam leh mai a, Boxer nen a vei thauh thauh reng a, a bialnu nen khan kum engzatin nge an inthlauh ang tih lam daih a ni ka lo ngaihtuah ni.





Chhun lamah Nu Sangpuii nen kan bazar a, Bed sheet thar te pathum ngawt kan lei a, "Chhawm tur chu a hranpa in kan lei dawn nia, palai hmel te pawh hmu ve phawt ila, thu rel fel hmaa lo bazar chu a chi loh ang, man ei tur te pawh han sawifel phawt ila, a hranpa in kan la bazar leh dawn nia" a ti sap sap a, engmah neih nei lo an mahni rinchhan tawp ka nih vang chuan ka inthlahrung lo thei lo, ka laka an ṭhatna leh an inhuamna te chuan min ti inthlahrung zual ting mai a, Usamua hnenah ka va sawi leh ringawt ṭhin.





Tlaiah Uvic-a nen kan lengchhuak a, kan va kalna te chu Apuii te in kha a lo ni a, Uvica ṭhianpa te nupa in min lo chiau au a, chaw eiah te min lo sawm a, zan lamah inleng kan neih dawn vangin kan hnial thung. Mipa naupang ṭahbelh deuh an nei a, han lawmsak ka tum viau nain a ṭap pur reng a, a tih hleihtheih meuh lo.




UVica ṭhianpa JH-a chu hmuh tawhna ka nei tlatin ka hria a, mi hmel hi ka hre rei thei viau nain ka hmuh tawhna hi ka hrechhuak thei mai ṭhin lo; mahse, a nupui hmel ka hmuh takah chuan ka hre chhuak leh hnuhnawh a, hman deuh tawh a Ufakima nen kan chhuah dun ṭuma ka hmuh te kha an ni ngeiin ka hria, Ufamkima ṭhiante nen thiltih kan neih ṭuma kan kalpui te kha an nih ngei ang, Chris-a ang rual fa an nei ve bawk tak anih kha maw...





Kan haw tur chu an nupain Gate thleng min lo thlah a, in kan thlen meuh chuan khua pawh a tlai lam lek lek tawh, hma deuhah zan riah kan ei a, ka pa chuan inneih chu hmanhmawh loh a duh thu a sawi leh ṭhin a, Usamua ngaihdan chu a ni vakin ka ring lo. Mahse le...an hnenah ka tlu lut ta bawk a chulam thuartham chu an thu thu a ni tawh turah ka ngai a, hnialna ka nei lem lo bawk.





Zanah chuan palai chu an lo kal ta ngei a, Usamu pa pawh a tel ve nghe nghe, Christmas hma inneihna buatsaih an duh laiin ka pa thung chuan kum thar lam a tih a duh a, ka pu erawhin a rang thei ang ber a duh thung. An duh dan a in ang lo ṭheuh a, ka pain hmanhmawh a duh loh chhan chu an hnena ka awm rei ve deuh a duh vang a ni a, min ui ve a ni ber ang chu.





Ka puin ka duh dan min zawh chuan "I thu thu a ni mai" ka ti ta kha a nia, ka pu duh dan kha ka duh dan ni ve miau hek le. Inleng vawihnih an lo kal hnuah a ni tur chu an ruat fel a, December ni 4 ah tiin thu an ti tlu a, hun rei a awm tawh lo a, inbuatsaihna pawh a kal zung zung tawh. Engkim a kaltluang em em a, ka tih ve ngai hauh loin a ṭul ang ang ka nu leh pa ten min buaipui a, mihausa fa te pawn hetiang bak hi an dawng bikin ka ring lo, ka pa ka ngaizual ṭhin khawp mai, tun hun te hi min han hmuhpui ve thei se la, min van lawm pui dawn tehlul em..




Umawipui leh ka nu nen thuamchhawm tur leiin kan bazar ho a, Uvic-an Furniture min Order sak bawk a, a ṭhianpa Jh-a khan nuṭa man a ei ve a; Dressing table man to zet min leisak bawk, Nu Sangpuii chhungte leh ka pa lama ka man ei hoin ka beisei phak bak thil min tih sak ṭheuh a, mi zawng zawng duhsakna leh lawm puina ka dawng a ni ber.





Ka nu chuan min la be leh ta miah lo a, Ununfeli takngial pawh a chanchin ka hre meuh lo, ka nu chu Umawipuiin man a ei tur thu a hrilh tawh ngei a, ka rilru ah hian a awm ve reng ṭhin, kan inlaichinna a lo chhe ta anih pawhin ka nu anihna a bo thei tawh lo a, min enkawl seilian tu anih na lah ka theihnghilh ngai hek lo ang, ka tana a hlutna pawh a danglam dawn lo, tunah leh nakin thlengin ka nu a la ni reng dawn a, a duhdan ni ve lo pawh ni se; chu chu keimaha a nihna englai maha danglam tawh lo tur a ni.





Ka pu khan inneih hmain ka pasal tur hmel hmuh a duh thu a sawi a, man inhlan zanah kal ngei turin a chah bawk. December ni 3 zanah man kan inhlan a, Usamua lo kal chu Apuii te unau khan an lo fiam hlut a, a nui tawi ṭhin khawp mai a, a lai leh tawh a nih ka ring. "A hmelṭhain a palian bawk si a, a dam dup maia, a zahawm hliah hliah bawk si" tih ang reng chu Usamua an sawi zuina a ni a, intithei rilru tak chungin hmai a uang ve dawn dawn alawm.




Ka pu leh ka pa te nen kil khatah ṭhuin an ti ti a, U Vic-a te ṭhian dunin an va pawh ve thuai bawk. Thingpui kan inho lai te chuan ka va en leh ṭhin a, midang zingah chuan a langsar bik emaw tih mai tur a ni, zanin chu a hmelṭha zual hle lehnghal a, a Denim kekawr leh T-shirt var hak te chu a inhmeh hliah hliahin ka hria, khunkhan deuha a ṭawng laite chuan choka lam aṭangin kan lo thlir reng a, engemaw changa a han kiai suk ṭhin te chu ka ṭhuthmun ṭangin ka khikpui ve leh sak ṭhin, lung a ti awi ve chiang em a sin...





An haw tur chu kawt thlengin ka va thlah a, kut insuih rialin a Bike bulah chuan kan indinchilh bawk. "Zanin chu i hmel hmuh a nuam hle mai" a tih chuan ka nuih var var a, "Nangpawh, ka lo thlir reng che a lawm" ka sawilai chuan mit tizim sunin min en a, ka kut chu la kangin a fawp vang vang a, naktuk a lo thlen hunah chuan keini hi nupui leh pasal kan ni tawh dawn a, hun rei lo te chiah nghah kan ngai ta.




"A tawp nan mangṭha aw" ti a kal mai a tum chu ka pawt let rang khawp mai.




"Ti nge a tawp nan i tih a?" ka lo ti he haw a, awm te pawh a ti nuam lo dawn a lawm maw le!




"Naktuk aṭanga chuan mangṭha kan tih a ngai tawh dawn hleinem" ka bianga rawn piai zauhin ngaihawm fahran hian min nuih a, chuti lam chu ka thil ngaihtuah loh lam daih a ni.




"Ni e, mangṭha tih kan sawi tawh miah lo ang" ka ti ve thuai a, Bike a a lawn tur a mawnga ka ben sak chu Uvic-a min lo hmu pek a, "Ehh.." a rawn tih chuan ka zak ram ram mai.





Chutah Usamua chu ka beng bulah rawn kun hnaiin min rawn hrilhru a "Naktuk zanah i duhthala ben ka phalsak ang che" a tih chuan hmui ka pet fan fan a, min ti lai tak tak a ni, ani lah chuan a sawi thutak phian lehnghal a.





A tlan liam thleng chuan ka thlir zui a, inchhunga ka luh leh chuan Apuii te unau ho kha an lo la awm a, choka lama an rik luih luih vangin ka va pawh duh lem lo. Hmun ka phiat a, chhuat ka nawh leh laimekin Phone call ka dawng a, Suzzane-i a ni.





"Hello" ka tih rualin thawm a ri ṭawk ṭawk a, "I hre thei em?" ka tih pawh chuan min chhang mai lo, dah leh mai ka tum laimekin "Mimite, Usamua a accident" a rawn ti ta mai a, min ti bangbo takzet a ni!





"Eng nge i sawi awmzia, tunah khan ka rawn thlah zo chiah a sin" ka aw ah chuan rinhlelhna leh hlauhthawnna a inpawlh nuk ta ve ang.





"Truck nen an insu a, tunah Damdawiin kan pan mek, thisen pe tur kan zawng mek bawk a, i theih anga rangin lo kal rawh aw, " a ti leh sawk sawk a, ka rilru a fim lo nasa hle tawh, ka awm chhung chu a tawt up up a, ka vai riai mai. Thisen pek ngai khawp chu a na viau a ni ngei ang.



(Zawmna)



Hlauthawng tak chungin choka lam ka pan a, midang ho bula Uvica ṭawng mawlh mawlh lai chu ka va pawt hrang dawr dawr a, "Damdawiinah kan kal a ngai a nia,...Usamu kha...a chesual a, tunah kal ang" ka ti bah niai a, ka dang te chu a awk zo vek mai.




"A chesual a, engtin nge a chetsual a?" phawk zeta a tih chuan ka hriat dan ang ang chu ka hrilh a, ka sawi lai te chuan ka thinphu chu a rang hle a, ngaihtuahna a chi ri hle bawk.




"Pawnah lo va chhuak rawh, chahbi kan la a nge" tih leh Sitting room lampan a rual a, hmanhmawh lutukin pawnlam ka pan zui a, Uvica nghaka ka din laichuan ka khur dar dar tawh, ka hlauthawng a ni...ka hlauthawng tak zet, rilruin a chhe ber a ngaihtuah thleng lo thei lo a, 'Ta se' tih thu ringawt pawh chuan ka thau ah min man a, ka mit sulh sulhin ka hria.




"Mimi.." Nu Sangpuiin a tih ri ah chuan ka hawichhuak thuai a, ka lampana Uvica nen an lo kal chu chhang lem loin ka en mawl tawp thung.




"Inleng an la awm si a, i u nen lo va kal rih mai rawh u aw, chanchin min lo hrilh ula" a tih chuan ka bu nghat a, "Engtia Accident nge maw anih le, a na viau em lo ang chu maw..?" ka darah rawn vuanin min en vang vang a, chu zawhna chu chhanna ka nei bik hauh lo, Garage lama Uvica kal ta chu kan lo nghak dun a, ka hmanhmawh lutuk vang nge a thang rei ka ti takzet.




Garage aṭanga a lo chhuak ka hmuh rualin ka tlan phei hlawk hlawk a, ka ṭhu lut chu kan kalna tur min lo zawt thuai a, chu takngial pawh chu ka lo hre lo, Suzanne-i ka Phone leh rih a, min lo hrilh hnuah an awmna Damdawiin lampan chuan kan tlan zui a, "I hlauthawng lutuk a nge, hei keini pawh kan thleng ve chiah a, UValpuia leh ka ṭhianpa Jona ten thisen an pe dawn mek" a lo tih chuan ka rilru ah zawhna a lo lut zung zung a.




"Amah a harh em, a hliam na em, engtin nge a awm, a khawilai nge na?" ka lo ti nghal mawlh mawlh a.




"Nikhua a hre rih lo a, a lu a sawh kak a, a nakruh pawh a tliak an tia, a ke pawh" a tih chuan ka ṭap chhuak lo chauh tawh, ka mittui luang chu hruin thawk ka la leh hak ṭhin.




"Kan lo thleng ṭep" tiin kan inbiakna chu ka ti tawp a, Uvica chu hmanhmawh deuh turin ka tur reng bawk. "A Serious viau em ni?" a lo ti ve thuai a, Suzanne-i min chhan dan aṭang ngawt kha chuan ngaihdan ka siam thiam rih lo.




"Thisen an pe dawn mek a, ruh tliak pawh a nei nual a niang" ka tih chuan ka lam lo hawiin "Zai a ngai dawn a ni maw?" a ti leh zat a, ka chhang tawh lo thung. Ka rilruin ka ṭawngṭai mawlh mawlh a, chubak chu tih theih dang leh inhnemna tur dang ka nei chuang lo, kan Pathian chuan beidawn luat vanga ṭawngṭaina pawh beiseina A siam leh ṭhin a, keipawhin beiseina sang tak ka nei a ni.





Tukverh lam hawia ka inhruk zauh zauh laichuan Motor chu a ding thut a, hma lamah ka bawk phei rawk a; ka va intauh chawrh nghe nghe. "Mai mai chuan le..!" Uvican a tih hluk ri ka hriat chuan ka hawi chhuak vat a, kan hma ah chuan Bike pathum vel hi an lo ding a; a hnung bera chuang chu a lo chhuk mek bawk.




"Nang kha eng vangin nge i din thut?" Uvica chuan a ti vin hlur a, Bike khalh tupa lo kal phei tum chu a hmeichhe phurh chuan a pawt chawt chawt a, an ruih hmel hlawm khawp mai.




"Ka ding thut maw, ding ve thut mai ta che, ka Back light i rawn sut hi i hria em Zawnga" chupa chuan a rawn ti lang lang a, "Mai mai a, naupang te te" tih paha Uvica chhuah tum chu ka lo pawt veleh rih a, hmanhmawh tawh nak a laichuan, ka boruak tawn mek leh kan tun dinhmun chu inrem lo tak a ni.




"Ka su thal tawp lo che kha i vannei anih kha, tlan nal nal rawh" ti a Uvican a auh leh takah chuan a rawn pawr zual sauh a, "I duh anih chuan rawn chhuak rawh Putar, kuttum hmangin lo chingfel ilá" a la rawn ti chher chher a, a pawt bet tu nula khan a pawt hneh meuh tawh lo.




"Lo awm teh, ka va khawih hlek teh ang" Uvica chu a insum thei bik vak tawh lo, "En liam mai mai rawh zu rui an nih saw, Damdawiin chu pan vat zawk ang" ka tih takah chuan a in thlahdul ve leh deuh a; mahse, chu zuruipa chu a la rawn phei chher chher mai.




Uvica awmna lam tukverh chu a rawn chum ri nghal dawp a, za lo zetin Uvica a lo nui bawk, "Hawng reng reng suh, buaina dang nei thei kan ni lo a nia" ka ti chul a, min ti hlauthawng chhiava a ni. Zuruipa phurh nula kha rawn tlan pheiin chupa kawrah chuan a rawn ṭham chawt chawt a, "Kal mai teh" tih pahin chupa pui chuan a lo nam kat dawrh a, a tlu lo chauh a ni ber.




A hmel ka va en laichuan rum theihtawp hian Uvica chu a rawn melh a, a kut zungchala rawn kawh pahin a la rawn cho khar khar a. "Uvic, tlan tawh rawh" ka tih lah chuan ka unaupa chu a tlan chhuak duh mai bik lo, chupa lam chu hawiin hnai takah an in bih run a, ka thinphu chuan mu leh mal a nei tawh meuh lo, ka ṭah a chhuak hlur mai a; ka hmanhmawh takzet tawh, hetiang thuartham vela buai hman pawh hi kan ni lo maw le.





"Avis...Rambuatsaiha hi rawn buaipui hmasa teh u" tiin nula chuan midang a ko a, kan hmalama ṭhalai ṭhenkhat ding chu an Bike ke a chhia ni ngei tur a ni, an buai hmel viau mai. Chutih laichuan tlangval pakhat hi a rawn kal phei hlawk hlawk a, sang lam deuh pianṭha zet mai a ni, Motor engin a chhun phak chin a rawn thlen chuan a mit ko leh khabe bawr duk ruih chu ka hmu chiang hle a, heng ho nena buaina neih hi kan tih loh tawp tur tih ka chiang hle tawh.




"U Vic, tlan vat teh ang, hel mai rawh" tih pahin a banah ka va pawt hlawk hlawk a, kan hma taka an din miau vangin hel loh theih an ni lo.




"Over, khatah buaina siam suh, i Bike ah let rawh" rawn ti tu chu kan Motor hma takah a rawn ding at a, a ṭhianpa chu en loin Motor chhung chu a rawn en daih thung. "Hmela, kan la inhmu leh ang, nep zel zul lutuk" tih pahin kan sir lama ding chuan darthlalang chu a beng ri leh dawp a, "In khamawm mange" ti a au ṭhawt pahin Motor hma a ṭhianpa ding chu a va su her lawih a, chu pa chuan a zui ve mai bawk.




An kal kiang ta chu ka lo thaw huai a, Uvic-an an Bike a hel dawn lai te chuan zurui pa khan a la rawn en run run a, a hmel te chu rapawm ka tih zawng tak a ni.




Kan tlan pelh hnu chuan Uvica chu a phun hluk hluk a "Awm ve lo la chu ka chhuk ang maw le, khatiang naupang zakthei lo kha chu an inchhir ram ram na tur khawpa khawih an ngai, aia upa zahna an nei lo, tunah pawh khan a din thut vanga va su chauh ka nia, Signal Light a pe bawk si lo, Traffic duty pawh awm se a thiam zawk kan ni ang" a ti duah a, a la lungawi bik lo khawp mai.




"Engah mah ngai duh suh, khawmuang thei kan ni lo a lawm" ka tih chuan a tlan chak zui ve thuai a, kan tlan chak viau chungin kan thleng har ka ti tawh ngang mai, rilru a hmanhmawh chu thuhran ka thinphu chu a rang hle a, ṭhut mai mai pawh chu harsa ka ti riau tawh.




Damdawiin kan thlen chuan Nu Rengpuii leh Suzanne-in pawnah min lo nghak a, "Zai turin an nawr lut chiah a, thisen a hloh hnem ang reng sia thisen pe tur dang zawn a la ngai ang" tiin min lo hrilh thuai a, "O+ ka nia, ka pek ve theih mai ka ring" Uvic an a lo tih chuan Muantea hoin an thisen pekna tur lamah kan inzui a, keipawh O+ chu ka ni a mahse, ka pek ve a rem ta tlat lo, Malaria dam hlim chauh ka ni a, Doctor ten ka pek ve an remti lo a ni, thisen pek takngial pawh ka ti thei lo lehzel chuan min ti hrehawm zual takzet.




An zaina Room pawnah chuan kan lo nghak ṭhap a, darkar chanve zet chu an thang tawh, Uvica leh Muantea pawh an lo let tawh a, Suzanne-i te nupa chuan min be zauh zauh tak nain sawi ve tur hlawl ka hre lo, ka bula ding Nu Rengpuii pawh a ngawi ran a, tumah chu inhnem thei kan awm lo a ni ber e.




"Kan ṭhian te ho ka hrilh kuala, naktukah thisen pe tur chu an lo kal nual ang, Mamit aṭang pawhin lo chho tur chu an awm a" Uvalpuian a tih chuan kan Phone kan pawrh sap sap a, Usangzuala leh UThana ka hrilh ve a, Romawia Delhi ah a let leh tawh bawk si a, midang han hrilh mai tur ka hre tawh lo, ṭhian ka nei lo lutuk hi chu pawi ka la ti zel dawn chu a nih hi.




"Ka thawhpui te kan sawm ve ange" Uvican a lo ti a, Suzanne-in a lehkha zirpui te a be ve mek bawk. In zaina Room lam mawlh chu ka va melh leh ṭhin, ka ṭawngṭai reng tak nain ka hlauhthawnna chu a reh thei tak tak lo, Usamua hian min boral san ta se engtin nge ka awm ang tih te chenin ka ngaihtuah a, tum ve viau mahila ka insum thei ngang lo a ni.




"Puan hi ka zawn ang che" tih pahin Nu Rengpuii chuan a puansin laiin min lo tuam sawk sawk a, ka dara a rawn kuah takah chuan ka insut hlawp hlawp a, midang pawh ka ti hamhaih viau a ni ngei ang an ngawi ṭhap tawh. "Thlaphang reng reng suh, Lalpa kan lamah A ṭang a lawm, an zai zo anga a ṭha leh thuai mai ang" tiin Nu Rengpuii chuan min hnem ve a, hnemna thu sawitu pawh chu eng ruai a ni bik lo. A hnuk a ulh ve ṭeuh a; a aw khurh nasat danah te chuan a hlauhthawn zia chu a lang reng bawk.




Minute sawm hnih vel zet a liam leh hnuah an rawn nawr chhuak a, a Cabin tur lampana kan nawr laite chuan mitthi ang maiin a mit a chhing a, a pang ka va deh chuan a sa huam thung, chu chuan tlemin ka awm a ti nuam deuh, a vawt vek ang tih kha ka hlau hman lutuk a...




"Mimite, zanin chu haw leh rih ula, keiman ka riahpui a nge aw" Nu Rengpuiin a tih chuan ka chhang thei mai lo, Usamua bulah chuan kal hnaiin ka va thlek vang vang a, kalsan chu hreh tak tein ka hreh, ka haw hlanin thil engemaw a lo thlen palh mai ka hlau a ni.




"Mimi, a harh mai lo ang, haw san rih ila zingah hma deuhah kan kal leh dawn nia" Uvic-an a lo ti ve thuai a, midang pawn an lo thlawp khawp mai, "Nu Rengpui, a hmai pem vel hi damdawi hnawih angai anih hi" tiin ka ṭhu rem sauh sauh a, Suzanne-i te nupa damdawi lei turin an kal chhuak thuai bawk.





"Thisen a hloh hnem lutuka, a dâng nghal vek a lawm le" tih pahin Nu Rengpuii chuan a fapa sam chu a chul sak hliau hliau a, a sawi ang tak takin Usamua hmel chu a dang a, a hmai leh bek bawr vel chu a pilh phung bawk nen rilru a ti na zual ting mai. Suzanne-i te damdawi lei an lo let leh chuan ka lo laksak vat a, Usamua hliam ka hnawihsak laichuan a rawn rum ve ṭiah ṭiah a, na a tuar tih chu hai rual a ni lo.




A mit mu chu a che kual reng a, a meng chhuak miah lo thung, a thawlak a rang hle a, a khua a sik hluah bawk, hetiang anih te chuan engtin nge rilru nuam takin ka haw san theih ang ni. "Ka awm ve rih mai dawn a mi?" ka ti leh ṭhin a, a tu a mah chuan aw min pawh duh bawk si lo, Nurse ho lah chuan haw ṭhen turin min lo ti sek tawh a, ka tih ngaihna hre lo lutuk chu ka ṭah a chhuak hlur ringawt.




"Pawnah a harh hun kan lo nghak mai dawn nia" UValpuian a tih chuan Uvica pawn a lo aw ve thuai a, Nu Rengpuii tel loin midang zawng chu kan inzui chhuak a, Damdawiin pawna ṭhutna awmah chuan ṭhuin Usamua Accident dan chu an sawi ho a, kawng kawiah Truck nen an in tai niawm tak a ni, "A su chiah chu a ni lo, a tai a ni mah zawk, a hmuna hmu tu te khan a invawrh kang deuh bawk an tia, sir lamah tleng zui lo sela chuan Truck ke khan a chil zui dawn a, a vannei zawk khawp mai" Muantean a ti charh charh a, a haw tur kan inthlah laia a ṭawngkam ka ngaihtuah let a, min mangṭha dan mawlh kha, a Accident tur hre lawk ang mai alawm maw anih le..




'Usamu, a tawp nan ka mangṭha ve lo che ania aw, hetiang anih aichuan vawitam tak mangṭha tih thu hi sawi dun leh ka la duh, i tel lo chuan ka mal dawn lutuk a, ngaihtuah pawh ka ngaihtuah thui ngam lo, engkim min pein chhungkaw thar nei tawh mahila ka duh ber chu nangmah chauh i ni, chuvangin min kalsan thei i ni lo, i tel lo chuan ka nung zo lo ang, khawngaihin min kalsan lo ang che'.




Suangtuahna in hma lam hun thui tak a thlir a, beiseina nen kan tum ram lampana ke kan pen laiin engkim a danglam zo tawh, naktuk hun pawh engtin nge kan hmachhawn ang hriat phak a ni tawh lo. Kan suangtuahna chu a thamral a, kan tum ram pawh khawi hmun nge ka chiang thei ta lo, lungngaihna in min tuam hlawp hlawp a, mittui chu ka lungngaihna min hriatpuitu ka ṭhianṭha tak ang mai a ni.




Dar thum a rik thleng pawhin Usamua chu a la harh thei lo a, sawi chhuak lo mahila kan mangang tlang takzet tawh, chutih laiin Damdawiin chhevel chu ṭiau chhumin a bawm luk reng a, khua lah chu a vawt em em bawk nen thaw khu hlat hlat chungin kan ṭhu hlawm a, tumah chu ṭawng ṭha peih pawh kan awm tawh meuh lo.





"Mimi, va hawsan tawh mai ula, zingah in lo kal leh mai dawn a lawm, Phone in engkim kan inhrilh thei tho a" Uvalpuian a tih chuan Suzanne-in a ṭhianpa chu haw turin a lo ti ve thuai a, keichuan haw tumna ka nei lem lo, a harh hma chu nghah ve tlat ka tum a; mahse, Uvica erawhin haw a duh niin ka hria.




"I la damkawr bawk si a, nang tal chu i inenkawl ṭhat a ngai a nia" a ti zawi sup a, "Ni e ti rawh, a lo harh tak leh kan rawn hrilh thuai dawn che nia, ngaihtuah awm a ni lo ang, thlamuang deuhin va hawsan rawh u" Usamua pain a lo ti ve leh a, midang awm ka ti nuam lo deuh riau tawhin ka hria a; ka hnial zui ta bik lo.





Haw kawng tluanin kan inbe lo a, kawt thler dung reh ruih lam chu hawiin thawk ka han la vang vang a, ka ngaihtuahna ruak lutuk chu ka â riai a ni ber, ka Phone ken lai chu ka hum nghet sauh sauh a, a rawn ri ang tih mawlh ka hlau a ni, tun dinhmunah hi chuan engthu thinṭhawng mah ka dawng sawng theiin ka ring lo, sana chu ka bih vat a, dar thum leh a chanve a ri mek a, khua chu a la var har dawn hlein ka hria.




In kan thlen chuan choka ah kan inzuilut a, tui Bottle min lo pek chu banin Uvica chu ka melh vang vang a, "A harh har tawh e ti raw, a hlauh thawnawm viau em?" tiin ka zawt phawng a, thil nih dan bak a ni tawh ti a min chhan ka hlau ru kher mai.




"Zingah chuan a harh mai ang, hnim hlum in a hneh deuh anih dawn kha" a ti mai a, ka awm a nawm phah sawt pawhin ka hre lo.




"In ngaihtuah lungpuam lo la aw, Doctor pawn hlauh thawnawm a nilo a tih kha, muthilh tum la hma deuhah kan va kal dawn nia" a tih chuan chhang loin tui chu ka lem khawlh khawlh a, ka dang ro zia te chu ka hre chhuak hnuhnawh a, chutih rualin ka lung a chhe em em bawk.




"Ka muthilh theih pawh ka ring lo" ka tih chuan ka sam a rawn chul thuak a, "I chau lutuk ang, mut tum lui rawh" a ti leh zet a, aw ka pawh tak loah chuan a hawi kual vut vut a, "I ril a ṭam ve em?" tiin min rawn zawt leh a.




"Ṭam lo" ka tih rual chuan Uvica pum chu a ri raih raih thung. "Lo va intilum la, ei tur kan lo siam ang" a tih takah chuan min ti bangbo deuh a, "Kan tlaivar dun law law mai dawn nia" a ti leh ta khauh a, tlem chuan ka awm a nuam ta deuh.




Sitting room ah inzui pheiin Tv min On sak a, Heater leh puanlum min lo lak sak thuai bawk, Bawnghnute leh chhang a rawn chhawp laichuan Bawnghnute chauh chu ka lo ban a, a khat tawkin ka Phone bawk chu ka bih leh ṭhin.




"JH-a te unau pawh thisen lo pe turin ka hrilh a, naktukah an lo kal ang" a tih chuan lawmthu ka lo sawi ve luam a, "Ka makpa tur a nia lawm, ka lakah lawmthu sawi reng reng suh" a ti sam mai a; mahse, ka lawm miau si a ni..




Engtik laiin nge ka lo mutthluk reng ka hre lo Uvica ṭawng ri ah ka harh hlawl a, ka piah lawkah ka Phone hmangin mi a lo be mek bawk. "Ka kaitho anga kan lo kal nghal dawn nia" a tih chuan ka tho nghal sawk sawk a, thil ṭha lo thleng tlata ka hriatna ka nei a, thinphu chu rang duh zaih zaih tak a ni.




"Tu nge?" ka lama a rawn in rualin ka lo ti zat a, "Suzanne-i a nia?" a tih chuan zawhna mitmengin ka en ran a, "A harh tawh e, a khawsik a sang riau a, in phihharh la kan phei dawn nia" muang ban charh hian a ti a, kei erawh mawnga hawlh ang ruai ka ni thung. Ka hmai ka phih thuak a, Uvica inthlak tura a kal laichuan ka inpeih fel leh der tawh.




A pindan aṭanga a lo chhuah leh chuan kawngka bulah ka lo ding a, "I in hnawh puar hmasa duh lo maw?" tiin min lo zawt a, lu ka thing rang viau mai, inhnawh puar lam reng reng ka rilru ah a lang rih lo.





Damdawiin lampana kan tlan laiin UFamkiman min lo Phone a "Hei kan thawhpui te hoin Group ah an lo Post a, eng eng in chanchin ni zel?" tiin min lo zawt khauh a, UValpuia khan a lo hrilh hlawm a nih hmel e. Chanchin chu ka hrilh ve luam a, thisen a pe ve thei lo chu a inthlahrung hle bawk.




"Inthlahrung reng reng suh, vawiinah thisen pe tur an awm nual dawn a lawm, kan mamawh ang chu kan hmu ve maiin ka ring, min lo ṭawngṭai pui zawk dawn nia" tiin ka chah ve luam a. "Ka pe ve thei mang si lo a, ka ṭhiante kan lo hrilh kual ange" a tih chuan ka hnial lem lo, kan inbiak zawh hnu lawkah Uvica Phone a lo ri ve leh a, a biak danah chuan JH-a anih hmel viau bawk.





"JH-an Apuii leh Michaela a lo hruai dawn a, hmeichhia hi chuan an pe thei lo leh khut ṭhin a, mipa lo hruai thei sela a ṭha zawk a sin maw le" a ti niah niah a, Usangzuala te chu an rawn thei ve em ang chu maw, engmah lah chu a rawn sawi zui bawk si lo.




Damdawiin Cabin kan va thlen chuan an lo awm leh nual tawh a, ka hmelhriat loh te pawh ka va hmu nawk mai, Usamua chu nula samtawi pakhat leh Nu Rengpuiin an lo ṭhut chilh a, "E hei...Niniaui a lo thleng a nia" ka va luh rualin Nu Rengpuiin a lo ti vat a, ṭhutna min lo kian nghal thuai bawk.




Usamua hmel ka hmu chu thawk ka la hawk mai. Ka lam a lo hawi a, min hmu chu natuar hmel leh hahdam huai hmel hi a pu a, ka kut lo banin a hmer vang vang a, engmah a sawi lo. Min en tlawk tlawka, engthil emaw sawi turin min duh tih a hmelah chuan ka hmu thei.




"I khua a la sik em?" tih leh a chal chu deh ka rual a, ka aw chu a lawi rat bawk. A pang chu a sa vur a, a khabe leh biang vel ka deh sak lai pawh chuan mit la lek loin min en ngawih ngawih a, a mitmenga ka thil hmuh chu ka duh lo, inthiam lo lutuk hmel a pu a, ngaihdam min dil mai tur hmel a pu.




"I khawsik a la sang lutuk a nih hi.." hlauthawng taka ka tih laichuan ka kut chu a hmer nghet sauh a, "Tih palh aw" a ti zuai ruih mai.




"I lo harh har lutuka, kan lo mangang hman a lawm" nui var varin ka lo ti a, ka ṭah nuih te pawh a ni mah ang chu, mittui a hnam leh der tawh.




"I lo tlaivar a ni maw kha, nula Senior hmel ka hmu tlat" a nui tur chu a ṭhen chak chak a, a nak an zaina lai chu na a ti anih hmel, "Fiamthu thawh thei pawh i nih loh kha, nui ve reng reng suh" ka tih leh chuan a mit a chhing vang vang a, "Tah khan ṭhu rawh" a ti tak nain a bulah chuan ka la ding reng a, anin ka kut a la vuan ve reng bawk.





A chau viau a niang ka biak leh chuan min chhang mumal meuh tawh lo, ka bula nula ṭhu chuan min lo be mawlh mawlh a, Usamua ṭhiannu a ni awm e. "Chawitei anih kha, Samuela ṭhian ṭha ber a nia" tiin Nu Rengpuiin min lo hrilh a, a hming chu ka hre ve fo tawh a, a hmel erawh pangngai taka ka hmuh vawikhatna chauh a la ni.




Dar 8 bawrah thisen pe tur an lo thleng a, UVica leh U Valpuia ten an lo buaipui zung zung a, Uvica sawi ang ngeiin Apuii kha chuan a pe thei lo a, mipa pahnih te khan an pe thung, Umawipuii leh Usangzuala pawh an lo kal a, an thisen a lo inmil lo tlat mai a, keini chhung chu kan ṭangkai lo tlang deuh chu a ni e.




Mahse, vanneih thlak deuhin Ufamkima ṭhianpa leh Mamuana an lo kal a, UFamkima ṭhianpa chu JH-a te unau nen pawh an lo inhre ṭha viau a, an zarah kan mamawh ang zat thisen kan nei thei ta bawk.




Nilengin Damdawiin lamah ka tap a, kan tum angin thil kal sela chuan vawiin hi kan inneih ni tur a ni. Pathian remruat te pawh a nia nge, vawiin zet chu engkim ka hmuh dan hi a dang zo a ni ta ber. Usamua a rawn harh ṭha tawh a, ka biakna te pawh ṭha takin min chhawn thei a, thisen a mamawh ang a dawng tawh bawk. Tluang takin lo innei thei ta pawh nila tun ang bak hian ka hlim chuangin ka ring lo, ka hlim tak zet a ni. Ka lo beidawng hman lek lek a; mahse, ka beidawn chang a piangin chhanna duhawm ka beisei phak loh ka dawng leh ṭhin.




Hun harsa chu kan tawnga mahse, hlimna hlirin ka khat thung, tunah chuan ka kiangah a awm a, khawiah mah min kalsan loh tur thu a sawi bawk. Ni e...min kalsan dawn lo, eng hun harsa pawh tawng mahila ka kiangah a awm reng anga, kan pahnihin kan paltlang dun zel bawk ang.




Tlai lamah chuan kan pahnih chauhin kan awm dun a, ka kut chu a vuan rauh rauh reng a, zawi te tein fiamthu thawh bawk. "Nula Senior i nih hma a pasal neih tir che ka tum a sin maw le" a tih chuan ka lo nui hak a, tel ve lo ang maiin a in sawi thei nia. "I lo harh leh hnu hian nula Senior hmuhin min hmu nghal ngawt a, zan khat chiah ania aw i la mut" ka tih chuan a khi ve suk a, "I pasal neih kum tur a ni tawh a sin le" a tih leh chuan a awmah ka chum hman ṭep a, hrechhuak lehin ka kut chu ka la let leh riai riai thung.




"Dam vat ang che, nula Senior ka nih hma a pasal min neih tir ngei ngei a ngai a nia" ka tih ve takah chuan a awm a dawm vang vang a, mit chhingin a kiai suk mai, a nui ṭha ngam lo insum hmel chu hmuh a nuam hle bawk.




"Min han ko leh teh" a mit la chhing reng chung chuan a ti zawi sup a, "Eng tin maw..?" keiin ka lo ti let ha a.




"Min koh dan kha ka hre leh duh" a tih chuan rei lo te chhung chu ka hamhaih hman a; mahse, rei lo te tak tak a ni.



"Usamu...ka duat.." ka lam a rawn hawi a, "Ṭap miah suh, i ṭah loh nan ka bei mek a nih hi" tiin ka kut a hmer vang vang a, ka ṭap hauh lo ang, vawiin hian ka hlim em asin.





Hringnun hi hlimna hlira khat turin duhthu ka sam a; mahse ka duhthusam anga thil a kal loh chuan ka beidawng leh mai ṭhin a, damchhan awm lo tiin ka inngaihtuah lungpuam ṭhin anih kha, tunah chuan hei hi ka chiang tawh, khawdurin kumtluan a daih ngai lo, Chhimbal mawina pawhin thamral hun a nei ve bawk.





Lungngaihna ten kiam hun an nei a, hlimna pawh chhum rei lo te lo zing ṭhin ang chauh a ni. Hlimna ringawt hi hringnun ti famkim tu a ni hek lo, tawrhna hian beidawnna chauh niloin tawrhchhelna min pe fova, hlimna hi engtia lo awm thei nge a nih zawk le, natna vanga duhawm mai chauh a ni.







(End of Chapter - 20)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 6th, 2022, 7:48 pm

ZUNZAM - by Ahmangaihi violette Khiangte


CHAPTER - 20





Ka pa te inah chuan tu tu te emaw an lo awm nual a, kan va thleng chu min lo chibai sap sap a, nula leh tlangval ṭhenkhatin thingpui an lo lum laih laih bawk. "Kan chhungte an nih hi" tiin U Vic-an min lo hrilh zung zunga, nu pakhat chuan lo fiamin "Vawiin tlai a rawn kal chu a rawn intithei lutuka, 'Farnu thar ka nei a, rawn hmu ve rawh u, ruai te kan ṭheh thut maithei' a rawn tia, kan lo awih ṭha duh lo a, Usangpuii ka zawh hnuah kan rawn kal ngam chauh a lawm" nui hawk hawk chungin a lo ti a, min en duh hlawm em vang chuan ka hawi chhuak ṭha ngam meuh lo.





"Kan tunu thar chu hetah lo ṭhu teh" putar pakhatin a lo tih chuan Uvic-an min nam phei nghal rawk rawk a, chu putar chu U Vic-a nu Nu Sangpuii pa a ni awm e.





"I va hmelṭha em ve aw, Liansangzuala nen pawh in in ang hle tak mai a" tiin min thlek vung vung a, zawhna min zawt zui mawlh mawlh bawk a, 'Khawi vengah nge i khawsak? Enge i thawh ṭhin?' tih angreng a ni.





Ka pa leh Uvic-an zawhna tam zawk an chhang a, a tu a te pawh chu an ṭawngkam a ṭha em em vek a, min lo lawm thiam khawp mai. "Kar hmasa khan Malaria vangin Damdawiinah a awm renga, a la damsam vak lo a, chawl hahdam rih rawh se" U Vic-an a tih hnuah choka lamah kan inzui phei a, ṭhalai lo awm ho chu min hmelhriat tir leh te te a, kei aimahin ka unaupa chuan nuam a ti in ka hria.




"Vic Luliana chu i intithei deuh tlatin ka hria" nui pat pat chungin nula pakhat hian a lo ti a, "Loh theih nang, kan Princess-i aipawn a hmelṭha daih zawk a lawm" a tih chuan an nui ham ham a, min ti lai lek lek a ni.





"Apuii ka nia" tiin nula chuan min lo chibai a, tlangval lo awm ve pakhat chuan "A bem theih nghal em, Vacancy a la awm em?" uang zet hian a lo ti a a, Uvic-an a lo duh lo nasa mai, "Taken na a rei tawh, chu loah makpa atana ka duh zawng i ni lo" fiamthu ti tak deuh hian a ti hluk hluk a, chupa chuan nui heu chunga en pahin "Ṭawng mai mai suh aw, kan duh bik lo mai tur che a nia" a lo ti let a, a ṭhiante nge an nih a a unaute tih pawh ka hrethiam ta chiah lo.




Nula la naupang deuh pakhat hian thingpui min lo pe a, dawhkan kila kan ṭhut laichuan an ri bawrh bawrh hlawm a, an nui ring ṭhinin fiamthu an duh hlawm hle a, min lo be hmasa ber tu nula kha 'U Apui' ti a an koh vek vangin unau an nih ka ring ta deuh.





'Fiona' ti a an koh leh Uvic-a chu an chhaih leh zuk ṭhin a, nula chu a zahzum hmel hle a, Uvic-a thung chuan zak hmel a pu ve hauh lo, Fiona bulah chuan ṭhuin a hrilhru zauh zauh reng a, nula zak chu a sen leh ṭan ṭan ṭhin; a bialnu a nih ka ring.





"Apuii i u te chu an rawn kal ve dawn emaw ka tia" Uvic-an a tih chuan "Dear John-a a hritlang lutuka, Mambawihi a chhuak thei bawk si lo a, 'Naktukah ka kal mai ang' a ti anih kha" nula chuan a lo ti a, hmeichhe zinga sambuang ber chuan lo tuihnih ve in "A thaibawih thlak emai a, fa pathum nei te pawh a ang" a lo ti hlak a, an khi ṭha hlawm mai.





"A raino leh tawh a, niminah Doctor-in Bed rest a chawh a, a rai hi a hrisel lo thei em a lawm" Apuii bawk chuan a ti leh a, tu chungchang nge an sawi ka hre ve hauh lo.




"Mimi, kan inah te la rawn leng ve rawh aw" tlangval khan min nuih sang chungin a lo ti a, "Naktukah ka rawn len pui ang, chaw eiah te sawm ta che u" Uvic-an a lo ti thuai a, phawk deuha ka va en takah chuan "An upa ber hi ka Bestfriend a nia, i man pawh a ei dawn a" tiin min lo hrilhfiah a, midang chuan zawhna an ngah zui hle a.




"Pasal i nei dawn a mi?" sambuang 'Judy' ti a an koh chuan a lo ti thuai a, keiin lu ka bu nghat thung.




"E heu..a va nuam dawn ve, heng ho hian huau huau an chak lutuka, pasal nei turin min nawr sek hlawm a, a va tihzia ve" Apuiin a lo ti ve leh a, "In lo kal vek dawn nia" ka tih chuan an phur hmel hlawm khawp mai.





"Victora mai mai chu, beisei neiin ka lo kal a sin mawle, pasal a nei dawn tih sawi sa ta che" tlangval bawk khan a ti leh a, UVica thawk la hawk chu ka en ve thuai a, "I tan ka phal lo" a lo ti mauh mai.




"A intithei e...." Fiona-in a lo tih chuan an nui dar dar a, Uvica hmel chu hmuh a nuam ṭhin ka awm ve hi a lawm hle tih a hmelah a lang reng a, awm a ti nuam takzet bawk.




Nu Sangpuii lo pheiin min lo koh takah chuan ka thawhsan thuai a, inchung lamah inzui chhoin ka pindan tur te min kawhhmuh a, "I u nen vawiinah kan lo siksawi ve nual a, inhnuaiah mut i hreh takah tiin i u in a pindan a pe che anih hi" nui var var a a tih chuan chhan ngaihna pawh ka hre meuh lo, pindan zau nuam tak a ni a, engkim chu duhthusama mawi leh ṭha a ni, ka phu lo zawk hial in ka hria.





"Naktukah Bed sheet thar te kan lei dawn nia, pasal la nei mai loin kan hnenah han cheng ve rih la ṭha tur a nia, i u lah chuan chelh rih dan ngaihtuah ang u a tia, i pa in 'Pasal neih kan phal lo mai dawn em ni' a tih lahin a ngaingam bik si lo a, vawiin chu i chanchin ngawt kan sawi nileng mai" a ti siam siam a, ka tan hriat nuam tak zawng a ni.





Khumah chuan ṭhuin min rawn melh vang vang a, "U Vic-a chu khawiah nge a mut dawn a?" inthlahrung ru deuha ka tih chuan "Inhnuaiah pindan awl a tam a lawm, a duh duhna ah mu tawh mai rawh se" a ti mai a, a bulah ka va ṭhut rual chuan ka lam a rawn hawi zat a, min nuih var var reng mai.




"I pasal tur te chu eng ang chhungkua nge an nih, amah kha chu a fel hmel viauin ka hria a, a chhungte lam chanchin hriat kan nei mang si lo a, i pa pawn hriatchian hmasak a duh deuh a" tiin min zawt zui a.





"Ka chungah an fel khawp mai, chhungkaw ṭha tak an niin ka hria" ka tih chuan thaw huai hmel a pu a, chuti taka min ngaihtuah chu hnuk a ulh lek lek a, ka mittui a hnam leh der tawh.





"I pa chhungte lam hi Aizawl ah hian an awm vak lo a, ka chhungte hi an awm ve nuk thunga, i man eitur pawhin ka chhungte an tam dawn a, ka pa lah kha kha a inti thu nasa tawh mai bawk si a, i lo hrethiam lo lutuk a nge, keipawh hi phur sa loh lohin ka phur a, ka fanu ah ka ngai nghet hmiah che a nia aw, i pa nupui ang chauhin min ngai lo la; i nu ang takin min en ve dawn nia, fanu ka hring ve bawk si lo a, nang i lo lang hi ka lawm viau a nia" a ti sap sap a, a ṭawng chu a bah viau nain a rilru dik tak a sawi tih ka hre thei tlat, a mitah chuan hmangaihna leh duhsakna tam tak ka hmu a, nuin a fa duat tih hriat taka a en dan ang chiahin min en bawk.





Ka bianga mittui luang chu hruk pahin lehlam ka hawi vat a, "Akhai....!" a tih laichuan ka ṭah nuih hak a, ka dara a rawn vawn leh laichuan ṭah a chhuak tak zet tawh. "Sawi tur pawh ka hre lo...in vaia chungah ka lawm lutuk" tiin ka ṭawng chhuak thei hram a ni.





"E..keini deuh a nia lawm, kan lo inhre har em zawk a, duat pawh kan duat ve hman hleinem che.." tih pahin ka sam a rawn chul hliau hliau a, kuah vawng vawng tak ka nap a, chu erawh ka ngam ngang si lo.




Khumah ṭhu a kan titi melh melh laiin Uvic-an ka Bag a rawn khai chho a, "Nangni nufa chu eng nge in sawi a, in tawm bo daih?" a lo ti hluk hluk a, "Apuii te unau chu an haw tawh em?" Nu Sangpuiin a lo tih chuan an haw chiah thuin a chhang a, "Fifi ka va thlah lawk ang, ka pu te an la awm khu, tawm bo daih suh u" a ti leh mai a. Chutih laiin Nu Sangpuii chuan ka Bag hawngin thawmhnaw chu khumah a phawrh chhuak mawlh mawlh a, ka damdawite chu a en chik hle bawk.





"Va rei suh aw" ti a Uvic a kaltur a biak leh chuan a lo hawi let thuai a. "Nula ka rim ve ang chu" a lo ti khauh a, "A hun rih lo emai, va thlah la lo let leh vat zawk rawh" a nuin a tih chuan a ner suk a, a chhang let lem lo.





A chhuah hnuah "Zahau colony ah hian a va leng zantin a, nupui lah hi a rawn hawn thei mang si lo a" nui kur kur chungin NuSangpuii chuan a ti leh a, ka hriatthiam loh hmel a ti deuh nge ni "Tleirawl a ngaizawng a, a nghak nula leh phawt dawn aniang, mo kan mamawh tawh tehlul nen hian i u hi chu a hmanhmawh lo khawp mai" a ti leh zel a, thil awmzia chu ka hrethiam ve ruai tawh, ka nu nula sawi chu Fiona kha a nih mai hmel e.





Inhnuaia kan chhuk leh hnu chuan ka pain min lo ko thuai a, kan luhtirha min lo be tu putar khan lawmthu sawi ṭawngṭainate a nei a, a vawihnih nan min chibai leh bawk. "Sangpuii fanu i ni tawh a, ka tunu dik tak i nih tawh hi aw, i pu ka nih angin palai te pawh keiman ka lo chhawn dawn nia, fanu hi pathum ka hralh ve tawh a, tunu ka vawikhat hralh na tur a ni dawn a, ka fate hian tupa hlir min pe hlawm a, nangzawng Pathian hnen aṭanga kan dawnah ka ngai hmiah che a, ka tum anga thil a kal thei anih chuan ran lukimin kan thlah ngei ang che" a ti charh charh a, chuzawng beisei piah lam a ni, ka duh ang pawhin lawmthu ka sawi thiam lo a; ka lawmna hi sawi maia fiah zo a ni hek lo, ka phu lo ka ti takzet.





Mut hmunah Usamua nen rei deuh kan inbia a, "Naktuk zanah palai an lo kal dawn a, i chhungte i lo hrilh dawn nia.." a ngawih vung vung hnuah "A hrehawm i tih chuan min lo hrilh vat la, ka lo hruai ang che" a rawn ti leh a, a nuih a ti za lek lek.




"Min ngai der e law?" ka lo tih chuan a nui ri ve suk a, "Ka la mu lo, i awm lo a pindan hi a ruak lutuk" a ti zawi ruih a, min ngai tihna, 'Ka ngai che' tih thu hi a sawi ṭha duh lo ve ziah a, a awmdanah a lang vek tho sia.




"Usamu..." ka tih chuan "Umm.." zawi deuh tak hian a ti a, ka lo nui leh rih...




"Sawi la.." a tih rualin "Ka duat.." ka lo ti zauh a, a reh zui vung vung mai, a hmel landan tur ka mitthla zui a, ka hmu chak tak tak a ni.




"Tunah khan i nui em..?" ka tih chuan "Nui lo e, i damdawi i ei tawh em?" a ti leh daih a, a lai tih ka hre reng sia.




"Ei tawh e, mu ve dawn tawh rawh" ka ti let thuai a, "Ka mu dawn chiah e, in sin lum ṭha la, i nawm loh chuan min lo hrilh dawn nia" a ti leh a, a mu nghal nge ni a thawm a ri sawt sawt a, a khum lianpuiah amaha a mu tur ka ngaihtuah zui nen ka khawngaih ve lek lek.




"An duat che em?" a rawn tih laia a aw ah chuan min ngaihtuah zia ka hre thei.




"Min duat lutuka, awm reng mai ka duh ang tih a hlauhawm zawk a lawm" ka tih chuan thawk a la hluai a, "Awm reng lo e; a chi nang, keiman ka duat zawk daih che a lawm" a tih ri chu ngaihthlak nuam tak zawng a ni.





Rei deuh kan inbia a, kan inbiak zawh chuan dar 12 a lo pel der tawh, ka mu tui viau a niang mumang ka nei awm pawh ka hre lo, ka harh chuan tukverh aṭangin nizung a lo lang ruih tawh a, sava chiar nak nak thawm chu ka hriat hmasak ber a ni, thochhuak vatin ka inphih fai a, ka hmai hruk mawlh mawlh pahin banga Uvica thil tar ho chu ka en kual a, unaupa lehkha thiam thei deuh ka nei anih hmel e, thlalak pakhata mipa lang ve chu ka hmuh hnu a ang hle a, hmelṭha deuh leh zahawm deuh mai a ni a, ka hmuh tawh na ka hrechhuak mai thei lo.




"Mimi-i a la tho nange?" ka pain a tih ri ka hriat takah chuan pindan ka chhuahsan thuai a, inhnuaia ka thlen thlak rualin Nu Sangpuii chuan thingpui ka duh em tih min lo zawt nghal var a, Sitting room ah ka pa chuan chanchinbu a lo chhiar mek bawk.




Dawhkan ka kil fel awrh ang tih ah Uvic-a a lo tho a, "Hna ka kal anga tlaiah kan leng dawn nia, ka rawn haw hma ang" a ti zung zung a, "Khawiah nge kan len dawn?" ka lo ti let ha a. "Zahau colony ah" a tih chuan a bialnu te in anih ka ring ringawt a, ka hnial bik lem lo.




"Bazar pui ka lo tum asin, Bed sheet te pawh lei a ngai a" nu Sangpuiin a ti ve thunga, "Chhunah lo va chhuak rawh u" ka u chuan a ti sam leh mai a, Boxer nen a vei thauh thauh reng a, a bialnu nen khan kum engzatin nge an inthlauh ang tih lam daih a ni ka lo ngaihtuah ni.





Chhun lamah Nu Sangpuii nen kan bazar a, Bed sheet thar te pathum ngawt kan lei a, "Chhawm tur chu a hranpa in kan lei dawn nia, palai hmel te pawh hmu ve phawt ila, thu rel fel hmaa lo bazar chu a chi loh ang, man ei tur te pawh han sawifel phawt ila, a hranpa in kan la bazar leh dawn nia" a ti sap sap a, engmah neih nei lo an mahni rinchhan tawp ka nih vang chuan ka inthlahrung lo thei lo, ka laka an ṭhatna leh an inhuamna te chuan min ti inthlahrung zual ting mai a, Usamua hnenah ka va sawi leh ringawt ṭhin.





Tlaiah Uvic-a nen kan lengchhuak a, kan va kalna te chu Apuii te in kha a lo ni a, Uvica ṭhianpa te nupa in min lo chiau au a, chaw eiah te min lo sawm a, zan lamah inleng kan neih dawn vangin kan hnial thung. Mipa naupang ṭahbelh deuh an nei a, han lawmsak ka tum viau nain a ṭap pur reng a, a tih hleihtheih meuh lo.




UVica ṭhianpa JH-a chu hmuh tawhna ka nei tlatin ka hria a, mi hmel hi ka hre rei thei viau nain ka hmuh tawhna hi ka hrechhuak thei mai ṭhin lo; mahse, a nupui hmel ka hmuh takah chuan ka hre chhuak leh hnuhnawh a, hman deuh tawh a Ufakima nen kan chhuah dun ṭuma ka hmuh te kha an ni ngeiin ka hria, Ufamkima ṭhiante nen thiltih kan neih ṭuma kan kalpui te kha an nih ngei ang, Chris-a ang rual fa an nei ve bawk tak anih kha maw...





Kan haw tur chu an nupain Gate thleng min lo thlah a, in kan thlen meuh chuan khua pawh a tlai lam lek lek tawh, hma deuhah zan riah kan ei a, ka pa chuan inneih chu hmanhmawh loh a duh thu a sawi leh ṭhin a, Usamua ngaihdan chu a ni vakin ka ring lo. Mahse le...an hnenah ka tlu lut ta bawk a chulam thuartham chu an thu thu a ni tawh turah ka ngai a, hnialna ka nei lem lo bawk.





Zanah chuan palai chu an lo kal ta ngei a, Usamu pa pawh a tel ve nghe nghe, Christmas hma inneihna buatsaih an duh laiin ka pa thung chuan kum thar lam a tih a duh a, ka pu erawhin a rang thei ang ber a duh thung. An duh dan a in ang lo ṭheuh a, ka pain hmanhmawh a duh loh chhan chu an hnena ka awm rei ve deuh a duh vang a ni a, min ui ve a ni ber ang chu.





Ka puin ka duh dan min zawh chuan "I thu thu a ni mai" ka ti ta kha a nia, ka pu duh dan kha ka duh dan ni ve miau hek le. Inleng vawihnih an lo kal hnuah a ni tur chu an ruat fel a, December ni 4 ah tiin thu an ti tlu a, hun rei a awm tawh lo a, inbuatsaihna pawh a kal zung zung tawh. Engkim a kaltluang em em a, ka tih ve ngai hauh loin a ṭul ang ang ka nu leh pa ten min buaipui a, mihausa fa te pawn hetiang bak hi an dawng bikin ka ring lo, ka pa ka ngaizual ṭhin khawp mai, tun hun te hi min han hmuhpui ve thei se la, min van lawm pui dawn tehlul em..




Umawipui leh ka nu nen thuamchhawm tur leiin kan bazar ho a, Uvic-an Furniture min Order sak bawk a, a ṭhianpa Jh-a khan nuṭa man a ei ve a; Dressing table man to zet min leisak bawk, Nu Sangpuii chhungte leh ka pa lama ka man ei hoin ka beisei phak bak thil min tih sak ṭheuh a, mi zawng zawng duhsakna leh lawm puina ka dawng a ni ber.





Ka nu chuan min la be leh ta miah lo a, Ununfeli takngial pawh a chanchin ka hre meuh lo, ka nu chu Umawipuiin man a ei tur thu a hrilh tawh ngei a, ka rilru ah hian a awm ve reng ṭhin, kan inlaichinna a lo chhe ta anih pawhin ka nu anihna a bo thei tawh lo a, min enkawl seilian tu anih na lah ka theihnghilh ngai hek lo ang, ka tana a hlutna pawh a danglam dawn lo, tunah leh nakin thlengin ka nu a la ni reng dawn a, a duhdan ni ve lo pawh ni se; chu chu keimaha a nihna englai maha danglam tawh lo tur a ni.





Ka pu khan inneih hmain ka pasal tur hmel hmuh a duh thu a sawi a, man inhlan zanah kal ngei turin a chah bawk. December ni 3 zanah man kan inhlan a, Usamua lo kal chu Apuii te unau khan an lo fiam hlut a, a nui tawi ṭhin khawp mai a, a lai leh tawh a nih ka ring. "A hmelṭhain a palian bawk si a, a dam dup maia, a zahawm hliah hliah bawk si" tih ang reng chu Usamua an sawi zuina a ni a, intithei rilru tak chungin hmai a uang ve dawn dawn alawm.




Ka pu leh ka pa te nen kil khatah ṭhuin an ti ti a, U Vic-a te ṭhian dunin an va pawh ve thuai bawk. Thingpui kan inho lai te chuan ka va en leh ṭhin a, midang zingah chuan a langsar bik emaw tih mai tur a ni, zanin chu a hmelṭha zual hle lehnghal a, a Denim kekawr leh T-shirt var hak te chu a inhmeh hliah hliahin ka hria, khunkhan deuha a ṭawng laite chuan choka lam aṭangin kan lo thlir reng a, engemaw changa a han kiai suk ṭhin te chu ka ṭhuthmun ṭangin ka khikpui ve leh sak ṭhin, lung a ti awi ve chiang em a sin...





An haw tur chu kawt thlengin ka va thlah a, kut insuih rialin a Bike bulah chuan kan indinchilh bawk. "Zanin chu i hmel hmuh a nuam hle mai" a tih chuan ka nuih var var a, "Nangpawh, ka lo thlir reng che a lawm" ka sawilai chuan mit tizim sunin min en a, ka kut chu la kangin a fawp vang vang a, naktuk a lo thlen hunah chuan keini hi nupui leh pasal kan ni tawh dawn a, hun rei lo te chiah nghah kan ngai ta.




"A tawp nan mangṭha aw" ti a kal mai a tum chu ka pawt let rang khawp mai.




"Ti nge a tawp nan i tih a?" ka lo ti he haw a, awm te pawh a ti nuam lo dawn a lawm maw le!




"Naktuk aṭanga chuan mangṭha kan tih a ngai tawh dawn hleinem" ka bianga rawn piai zauhin ngaihawm fahran hian min nuih a, chuti lam chu ka thil ngaihtuah loh lam daih a ni.




"Ni e, mangṭha tih kan sawi tawh miah lo ang" ka ti ve thuai a, Bike a a lawn tur a mawnga ka ben sak chu Uvic-a min lo hmu pek a, "Ehh.." a rawn tih chuan ka zak ram ram mai.





Chutah Usamua chu ka beng bulah rawn kun hnaiin min rawn hrilhru a "Naktuk zanah i duhthala ben ka phalsak ang che" a tih chuan hmui ka pet fan fan a, min ti lai tak tak a ni, ani lah chuan a sawi thutak phian lehnghal a.





A tlan liam thleng chuan ka thlir zui a, inchhunga ka luh leh chuan Apuii te unau ho kha an lo la awm a, choka lama an rik luih luih vangin ka va pawh duh lem lo. Hmun ka phiat a, chhuat ka nawh leh laimekin Phone call ka dawng a, Suzzane-i a ni.





"Hello" ka tih rualin thawm a ri ṭawk ṭawk a, "I hre thei em?" ka tih pawh chuan min chhang mai lo, dah leh mai ka tum laimekin "Mimite, Usamua a accident" a rawn ti ta mai a, min ti bangbo takzet a ni!





"Eng nge i sawi awmzia, tunah khan ka rawn thlah zo chiah a sin" ka aw ah chuan rinhlelhna leh hlauhthawnna a inpawlh nuk ta ve ang.





"Truck nen an insu a, tunah Damdawiin kan pan mek, thisen pe tur kan zawng mek bawk a, i theih anga rangin lo kal rawh aw, " a ti leh sawk sawk a, ka rilru a fim lo nasa hle tawh, ka awm chhung chu a tawt up up a, ka vai riai mai. Thisen pek ngai khawp chu a na viau a ni ngei ang.



(Zawmna)



Hlauthawng tak chungin choka lam ka pan a, midang ho bula Uvica ṭawng mawlh mawlh lai chu ka va pawt hrang dawr dawr a, "Damdawiinah kan kal a ngai a nia,...Usamu kha...a chesual a, tunah kal ang" ka ti bah niai a, ka dang te chu a awk zo vek mai.




"A chesual a, engtin nge a chetsual a?" phawk zeta a tih chuan ka hriat dan ang ang chu ka hrilh a, ka sawi lai te chuan ka thinphu chu a rang hle a, ngaihtuahna a chi ri hle bawk.




"Pawnah lo va chhuak rawh, chahbi kan la a nge" tih leh Sitting room lampan a rual a, hmanhmawh lutukin pawnlam ka pan zui a, Uvica nghaka ka din laichuan ka khur dar dar tawh, ka hlauthawng a ni...ka hlauthawng tak zet, rilruin a chhe ber a ngaihtuah thleng lo thei lo a, 'Ta se' tih thu ringawt pawh chuan ka thau ah min man a, ka mit sulh sulhin ka hria.




"Mimi.." Nu Sangpuiin a tih ri ah chuan ka hawichhuak thuai a, ka lampana Uvica nen an lo kal chu chhang lem loin ka en mawl tawp thung.




"Inleng an la awm si a, i u nen lo va kal rih mai rawh u aw, chanchin min lo hrilh ula" a tih chuan ka bu nghat a, "Engtia Accident nge maw anih le, a na viau em lo ang chu maw..?" ka darah rawn vuanin min en vang vang a, chu zawhna chu chhanna ka nei bik hauh lo, Garage lama Uvica kal ta chu kan lo nghak dun a, ka hmanhmawh lutuk vang nge a thang rei ka ti takzet.




Garage aṭanga a lo chhuak ka hmuh rualin ka tlan phei hlawk hlawk a, ka ṭhu lut chu kan kalna tur min lo zawt thuai a, chu takngial pawh chu ka lo hre lo, Suzanne-i ka Phone leh rih a, min lo hrilh hnuah an awmna Damdawiin lampan chuan kan tlan zui a, "I hlauthawng lutuk a nge, hei keini pawh kan thleng ve chiah a, UValpuia leh ka ṭhianpa Jona ten thisen an pe dawn mek" a lo tih chuan ka rilru ah zawhna a lo lut zung zung a.




"Amah a harh em, a hliam na em, engtin nge a awm, a khawilai nge na?" ka lo ti nghal mawlh mawlh a.




"Nikhua a hre rih lo a, a lu a sawh kak a, a nakruh pawh a tliak an tia, a ke pawh" a tih chuan ka ṭap chhuak lo chauh tawh, ka mittui luang chu hruin thawk ka la leh hak ṭhin.




"Kan lo thleng ṭep" tiin kan inbiakna chu ka ti tawp a, Uvica chu hmanhmawh deuh turin ka tur reng bawk. "A Serious viau em ni?" a lo ti ve thuai a, Suzanne-i min chhan dan aṭang ngawt kha chuan ngaihdan ka siam thiam rih lo.




"Thisen an pe dawn mek a, ruh tliak pawh a nei nual a niang" ka tih chuan ka lam lo hawiin "Zai a ngai dawn a ni maw?" a ti leh zat a, ka chhang tawh lo thung. Ka rilruin ka ṭawngṭai mawlh mawlh a, chubak chu tih theih dang leh inhnemna tur dang ka nei chuang lo, kan Pathian chuan beidawn luat vanga ṭawngṭaina pawh beiseina A siam leh ṭhin a, keipawhin beiseina sang tak ka nei a ni.





Tukverh lam hawia ka inhruk zauh zauh laichuan Motor chu a ding thut a, hma lamah ka bawk phei rawk a; ka va intauh chawrh nghe nghe. "Mai mai chuan le..!" Uvican a tih hluk ri ka hriat chuan ka hawi chhuak vat a, kan hma ah chuan Bike pathum vel hi an lo ding a; a hnung bera chuang chu a lo chhuk mek bawk.




"Nang kha eng vangin nge i din thut?" Uvica chuan a ti vin hlur a, Bike khalh tupa lo kal phei tum chu a hmeichhe phurh chuan a pawt chawt chawt a, an ruih hmel hlawm khawp mai.




"Ka ding thut maw, ding ve thut mai ta che, ka Back light i rawn sut hi i hria em Zawnga" chupa chuan a rawn ti lang lang a, "Mai mai a, naupang te te" tih paha Uvica chhuah tum chu ka lo pawt veleh rih a, hmanhmawh tawh nak a laichuan, ka boruak tawn mek leh kan tun dinhmun chu inrem lo tak a ni.




"Ka su thal tawp lo che kha i vannei anih kha, tlan nal nal rawh" ti a Uvican a auh leh takah chuan a rawn pawr zual sauh a, "I duh anih chuan rawn chhuak rawh Putar, kuttum hmangin lo chingfel ilá" a la rawn ti chher chher a, a pawt bet tu nula khan a pawt hneh meuh tawh lo.




"Lo awm teh, ka va khawih hlek teh ang" Uvica chu a insum thei bik vak tawh lo, "En liam mai mai rawh zu rui an nih saw, Damdawiin chu pan vat zawk ang" ka tih takah chuan a in thlahdul ve leh deuh a; mahse, chu zuruipa chu a la rawn phei chher chher mai.




Uvica awmna lam tukverh chu a rawn chum ri nghal dawp a, za lo zetin Uvica a lo nui bawk, "Hawng reng reng suh, buaina dang nei thei kan ni lo a nia" ka ti chul a, min ti hlauthawng chhiava a ni. Zuruipa phurh nula kha rawn tlan pheiin chupa kawrah chuan a rawn ṭham chawt chawt a, "Kal mai teh" tih pahin chupa pui chuan a lo nam kat dawrh a, a tlu lo chauh a ni ber.




A hmel ka va en laichuan rum theihtawp hian Uvica chu a rawn melh a, a kut zungchala rawn kawh pahin a la rawn cho khar khar a. "Uvic, tlan tawh rawh" ka tih lah chuan ka unaupa chu a tlan chhuak duh mai bik lo, chupa lam chu hawiin hnai takah an in bih run a, ka thinphu chuan mu leh mal a nei tawh meuh lo, ka ṭah a chhuak hlur mai a; ka hmanhmawh takzet tawh, hetiang thuartham vela buai hman pawh hi kan ni lo maw le.





"Avis...Rambuatsaiha hi rawn buaipui hmasa teh u" tiin nula chuan midang a ko a, kan hmalama ṭhalai ṭhenkhat ding chu an Bike ke a chhia ni ngei tur a ni, an buai hmel viau mai. Chutih laichuan tlangval pakhat hi a rawn kal phei hlawk hlawk a, sang lam deuh pianṭha zet mai a ni, Motor engin a chhun phak chin a rawn thlen chuan a mit ko leh khabe bawr duk ruih chu ka hmu chiang hle a, heng ho nena buaina neih hi kan tih loh tawp tur tih ka chiang hle tawh.




"U Vic, tlan vat teh ang, hel mai rawh" tih pahin a banah ka va pawt hlawk hlawk a, kan hma taka an din miau vangin hel loh theih an ni lo.




"Over, khatah buaina siam suh, i Bike ah let rawh" rawn ti tu chu kan Motor hma takah a rawn ding at a, a ṭhianpa chu en loin Motor chhung chu a rawn en daih thung. "Hmela, kan la inhmu leh ang, nep zel zul lutuk" tih pahin kan sir lama ding chuan darthlalang chu a beng ri leh dawp a, "In khamawm mange" ti a au ṭhawt pahin Motor hma a ṭhianpa ding chu a va su her lawih a, chu pa chuan a zui ve mai bawk.




An kal kiang ta chu ka lo thaw huai a, Uvic-an an Bike a hel dawn lai te chuan zurui pa khan a la rawn en run run a, a hmel te chu rapawm ka tih zawng tak a ni.




Kan tlan pelh hnu chuan Uvica chu a phun hluk hluk a "Awm ve lo la chu ka chhuk ang maw le, khatiang naupang zakthei lo kha chu an inchhir ram ram na tur khawpa khawih an ngai, aia upa zahna an nei lo, tunah pawh khan a din thut vanga va su chauh ka nia, Signal Light a pe bawk si lo, Traffic duty pawh awm se a thiam zawk kan ni ang" a ti duah a, a la lungawi bik lo khawp mai.




"Engah mah ngai duh suh, khawmuang thei kan ni lo a lawm" ka tih chuan a tlan chak zui ve thuai a, kan tlan chak viau chungin kan thleng har ka ti tawh ngang mai, rilru a hmanhmawh chu thuhran ka thinphu chu a rang hle a, ṭhut mai mai pawh chu harsa ka ti riau tawh.




Damdawiin kan thlen chuan Nu Rengpuii leh Suzanne-in pawnah min lo nghak a, "Zai turin an nawr lut chiah a, thisen a hloh hnem ang reng sia thisen pe tur dang zawn a la ngai ang" tiin min lo hrilh thuai a, "O+ ka nia, ka pek ve theih mai ka ring" Uvic an a lo tih chuan Muantea hoin an thisen pekna tur lamah kan inzui a, keipawh O+ chu ka ni a mahse, ka pek ve a rem ta tlat lo, Malaria dam hlim chauh ka ni a, Doctor ten ka pek ve an remti lo a ni, thisen pek takngial pawh ka ti thei lo lehzel chuan min ti hrehawm zual takzet.




An zaina Room pawnah chuan kan lo nghak ṭhap a, darkar chanve zet chu an thang tawh, Uvica leh Muantea pawh an lo let tawh a, Suzanne-i te nupa chuan min be zauh zauh tak nain sawi ve tur hlawl ka hre lo, ka bula ding Nu Rengpuii pawh a ngawi ran a, tumah chu inhnem thei kan awm lo a ni ber e.




"Kan ṭhian te ho ka hrilh kuala, naktukah thisen pe tur chu an lo kal nual ang, Mamit aṭang pawhin lo chho tur chu an awm a" Uvalpuian a tih chuan kan Phone kan pawrh sap sap a, Usangzuala leh UThana ka hrilh ve a, Romawia Delhi ah a let leh tawh bawk si a, midang han hrilh mai tur ka hre tawh lo, ṭhian ka nei lo lutuk hi chu pawi ka la ti zel dawn chu a nih hi.




"Ka thawhpui te kan sawm ve ange" Uvican a lo ti a, Suzanne-in a lehkha zirpui te a be ve mek bawk. In zaina Room lam mawlh chu ka va melh leh ṭhin, ka ṭawngṭai reng tak nain ka hlauhthawnna chu a reh thei tak tak lo, Usamua hian min boral san ta se engtin nge ka awm ang tih te chenin ka ngaihtuah a, tum ve viau mahila ka insum thei ngang lo a ni.




"Puan hi ka zawn ang che" tih pahin Nu Rengpuii chuan a puansin laiin min lo tuam sawk sawk a, ka dara a rawn kuah takah chuan ka insut hlawp hlawp a, midang pawh ka ti hamhaih viau a ni ngei ang an ngawi ṭhap tawh. "Thlaphang reng reng suh, Lalpa kan lamah A ṭang a lawm, an zai zo anga a ṭha leh thuai mai ang" tiin Nu Rengpuii chuan min hnem ve a, hnemna thu sawitu pawh chu eng ruai a ni bik lo. A hnuk a ulh ve ṭeuh a; a aw khurh nasat danah te chuan a hlauhthawn zia chu a lang reng bawk.




Minute sawm hnih vel zet a liam leh hnuah an rawn nawr chhuak a, a Cabin tur lampana kan nawr laite chuan mitthi ang maiin a mit a chhing a, a pang ka va deh chuan a sa huam thung, chu chuan tlemin ka awm a ti nuam deuh, a vawt vek ang tih kha ka hlau hman lutuk a...




"Mimite, zanin chu haw leh rih ula, keiman ka riahpui a nge aw" Nu Rengpuiin a tih chuan ka chhang thei mai lo, Usamua bulah chuan kal hnaiin ka va thlek vang vang a, kalsan chu hreh tak tein ka hreh, ka haw hlanin thil engemaw a lo thlen palh mai ka hlau a ni.




"Mimi, a harh mai lo ang, haw san rih ila zingah hma deuhah kan kal leh dawn nia" Uvic-an a lo ti ve thuai a, midang pawn an lo thlawp khawp mai, "Nu Rengpui, a hmai pem vel hi damdawi hnawih angai anih hi" tiin ka ṭhu rem sauh sauh a, Suzanne-i te nupa damdawi lei turin an kal chhuak thuai bawk.





"Thisen a hloh hnem lutuka, a dâng nghal vek a lawm le" tih pahin Nu Rengpuii chuan a fapa sam chu a chul sak hliau hliau a, a sawi ang tak takin Usamua hmel chu a dang a, a hmai leh bek bawr vel chu a pilh phung bawk nen rilru a ti na zual ting mai. Suzanne-i te damdawi lei an lo let leh chuan ka lo laksak vat a, Usamua hliam ka hnawihsak laichuan a rawn rum ve ṭiah ṭiah a, na a tuar tih chu hai rual a ni lo.




A mit mu chu a che kual reng a, a meng chhuak miah lo thung, a thawlak a rang hle a, a khua a sik hluah bawk, hetiang anih te chuan engtin nge rilru nuam takin ka haw san theih ang ni. "Ka awm ve rih mai dawn a mi?" ka ti leh ṭhin a, a tu a mah chuan aw min pawh duh bawk si lo, Nurse ho lah chuan haw ṭhen turin min lo ti sek tawh a, ka tih ngaihna hre lo lutuk chu ka ṭah a chhuak hlur ringawt.




"Pawnah a harh hun kan lo nghak mai dawn nia" UValpuian a tih chuan Uvica pawn a lo aw ve thuai a, Nu Rengpuii tel loin midang zawng chu kan inzui chhuak a, Damdawiin pawna ṭhutna awmah chuan ṭhuin Usamua Accident dan chu an sawi ho a, kawng kawiah Truck nen an in tai niawm tak a ni, "A su chiah chu a ni lo, a tai a ni mah zawk, a hmuna hmu tu te khan a invawrh kang deuh bawk an tia, sir lamah tleng zui lo sela chuan Truck ke khan a chil zui dawn a, a vannei zawk khawp mai" Muantean a ti charh charh a, a haw tur kan inthlah laia a ṭawngkam ka ngaihtuah let a, min mangṭha dan mawlh kha, a Accident tur hre lawk ang mai alawm maw anih le..




'Usamu, a tawp nan ka mangṭha ve lo che ania aw, hetiang anih aichuan vawitam tak mangṭha tih thu hi sawi dun leh ka la duh, i tel lo chuan ka mal dawn lutuk a, ngaihtuah pawh ka ngaihtuah thui ngam lo, engkim min pein chhungkaw thar nei tawh mahila ka duh ber chu nangmah chauh i ni, chuvangin min kalsan thei i ni lo, i tel lo chuan ka nung zo lo ang, khawngaihin min kalsan lo ang che'.




Suangtuahna in hma lam hun thui tak a thlir a, beiseina nen kan tum ram lampana ke kan pen laiin engkim a danglam zo tawh, naktuk hun pawh engtin nge kan hmachhawn ang hriat phak a ni tawh lo. Kan suangtuahna chu a thamral a, kan tum ram pawh khawi hmun nge ka chiang thei ta lo, lungngaihna in min tuam hlawp hlawp a, mittui chu ka lungngaihna min hriatpuitu ka ṭhianṭha tak ang mai a ni.




Dar thum a rik thleng pawhin Usamua chu a la harh thei lo a, sawi chhuak lo mahila kan mangang tlang takzet tawh, chutih laiin Damdawiin chhevel chu ṭiau chhumin a bawm luk reng a, khua lah chu a vawt em em bawk nen thaw khu hlat hlat chungin kan ṭhu hlawm a, tumah chu ṭawng ṭha peih pawh kan awm tawh meuh lo.





"Mimi, va hawsan tawh mai ula, zingah in lo kal leh mai dawn a lawm, Phone in engkim kan inhrilh thei tho a" Uvalpuian a tih chuan Suzanne-in a ṭhianpa chu haw turin a lo ti ve thuai a, keichuan haw tumna ka nei lem lo, a harh hma chu nghah ve tlat ka tum a; mahse, Uvica erawhin haw a duh niin ka hria.




"I la damkawr bawk si a, nang tal chu i inenkawl ṭhat a ngai a nia" a ti zawi sup a, "Ni e ti rawh, a lo harh tak leh kan rawn hrilh thuai dawn che nia, ngaihtuah awm a ni lo ang, thlamuang deuhin va hawsan rawh u" Usamua pain a lo ti ve leh a, midang awm ka ti nuam lo deuh riau tawhin ka hria a; ka hnial zui ta bik lo.





Haw kawng tluanin kan inbe lo a, kawt thler dung reh ruih lam chu hawiin thawk ka han la vang vang a, ka ngaihtuahna ruak lutuk chu ka â riai a ni ber, ka Phone ken lai chu ka hum nghet sauh sauh a, a rawn ri ang tih mawlh ka hlau a ni, tun dinhmunah hi chuan engthu thinṭhawng mah ka dawng sawng theiin ka ring lo, sana chu ka bih vat a, dar thum leh a chanve a ri mek a, khua chu a la var har dawn hlein ka hria.




In kan thlen chuan choka ah kan inzuilut a, tui Bottle min lo pek chu banin Uvica chu ka melh vang vang a, "A harh har tawh e ti raw, a hlauh thawnawm viau em?" tiin ka zawt phawng a, thil nih dan bak a ni tawh ti a min chhan ka hlau ru kher mai.




"Zingah chuan a harh mai ang, hnim hlum in a hneh deuh anih dawn kha" a ti mai a, ka awm a nawm phah sawt pawhin ka hre lo.




"In ngaihtuah lungpuam lo la aw, Doctor pawn hlauh thawnawm a nilo a tih kha, muthilh tum la hma deuhah kan va kal dawn nia" a tih chuan chhang loin tui chu ka lem khawlh khawlh a, ka dang ro zia te chu ka hre chhuak hnuhnawh a, chutih rualin ka lung a chhe em em bawk.




"Ka muthilh theih pawh ka ring lo" ka tih chuan ka sam a rawn chul thuak a, "I chau lutuk ang, mut tum lui rawh" a ti leh zet a, aw ka pawh tak loah chuan a hawi kual vut vut a, "I ril a ṭam ve em?" tiin min rawn zawt leh a.




"Ṭam lo" ka tih rual chuan Uvica pum chu a ri raih raih thung. "Lo va intilum la, ei tur kan lo siam ang" a tih takah chuan min ti bangbo deuh a, "Kan tlaivar dun law law mai dawn nia" a ti leh ta khauh a, tlem chuan ka awm a nuam ta deuh.




Sitting room ah inzui pheiin Tv min On sak a, Heater leh puanlum min lo lak sak thuai bawk, Bawnghnute leh chhang a rawn chhawp laichuan Bawnghnute chauh chu ka lo ban a, a khat tawkin ka Phone bawk chu ka bih leh ṭhin.




"JH-a te unau pawh thisen lo pe turin ka hrilh a, naktukah an lo kal ang" a tih chuan lawmthu ka lo sawi ve luam a, "Ka makpa tur a nia lawm, ka lakah lawmthu sawi reng reng suh" a ti sam mai a; mahse, ka lawm miau si a ni..




Engtik laiin nge ka lo mutthluk reng ka hre lo Uvica ṭawng ri ah ka harh hlawl a, ka piah lawkah ka Phone hmangin mi a lo be mek bawk. "Ka kaitho anga kan lo kal nghal dawn nia" a tih chuan ka tho nghal sawk sawk a, thil ṭha lo thleng tlata ka hriatna ka nei a, thinphu chu rang duh zaih zaih tak a ni.




"Tu nge?" ka lama a rawn in rualin ka lo ti zat a, "Suzanne-i a nia?" a tih chuan zawhna mitmengin ka en ran a, "A harh tawh e, a khawsik a sang riau a, in phihharh la kan phei dawn nia" muang ban charh hian a ti a, kei erawh mawnga hawlh ang ruai ka ni thung. Ka hmai ka phih thuak a, Uvica inthlak tura a kal laichuan ka inpeih fel leh der tawh.




A pindan aṭanga a lo chhuah leh chuan kawngka bulah ka lo ding a, "I in hnawh puar hmasa duh lo maw?" tiin min lo zawt a, lu ka thing rang viau mai, inhnawh puar lam reng reng ka rilru ah a lang rih lo.





Damdawiin lampana kan tlan laiin UFamkiman min lo Phone a "Hei kan thawhpui te hoin Group ah an lo Post a, eng eng in chanchin ni zel?" tiin min lo zawt khauh a, UValpuia khan a lo hrilh hlawm a nih hmel e. Chanchin chu ka hrilh ve luam a, thisen a pe ve thei lo chu a inthlahrung hle bawk.




"Inthlahrung reng reng suh, vawiinah thisen pe tur an awm nual dawn a lawm, kan mamawh ang chu kan hmu ve maiin ka ring, min lo ṭawngṭai pui zawk dawn nia" tiin ka chah ve luam a. "Ka pe ve thei mang si lo a, ka ṭhiante kan lo hrilh kual ange" a tih chuan ka hnial lem lo, kan inbiak zawh hnu lawkah Uvica Phone a lo ri ve leh a, a biak danah chuan JH-a anih hmel viau bawk.





"JH-an Apuii leh Michaela a lo hruai dawn a, hmeichhia hi chuan an pe thei lo leh khut ṭhin a, mipa lo hruai thei sela a ṭha zawk a sin maw le" a ti niah niah a, Usangzuala te chu an rawn thei ve em ang chu maw, engmah lah chu a rawn sawi zui bawk si lo.




Damdawiin Cabin kan va thlen chuan an lo awm leh nual tawh a, ka hmelhriat loh te pawh ka va hmu nawk mai, Usamua chu nula samtawi pakhat leh Nu Rengpuiin an lo ṭhut chilh a, "E hei...Niniaui a lo thleng a nia" ka va luh rualin Nu Rengpuiin a lo ti vat a, ṭhutna min lo kian nghal thuai bawk.




Usamua hmel ka hmu chu thawk ka la hawk mai. Ka lam a lo hawi a, min hmu chu natuar hmel leh hahdam huai hmel hi a pu a, ka kut lo banin a hmer vang vang a, engmah a sawi lo. Min en tlawk tlawka, engthil emaw sawi turin min duh tih a hmelah chuan ka hmu thei.




"I khua a la sik em?" tih leh a chal chu deh ka rual a, ka aw chu a lawi rat bawk. A pang chu a sa vur a, a khabe leh biang vel ka deh sak lai pawh chuan mit la lek loin min en ngawih ngawih a, a mitmenga ka thil hmuh chu ka duh lo, inthiam lo lutuk hmel a pu a, ngaihdam min dil mai tur hmel a pu.




"I khawsik a la sang lutuk a nih hi.." hlauthawng taka ka tih laichuan ka kut chu a hmer nghet sauh a, "Tih palh aw" a ti zuai ruih mai.




"I lo harh har lutuka, kan lo mangang hman a lawm" nui var varin ka lo ti a, ka ṭah nuih te pawh a ni mah ang chu, mittui a hnam leh der tawh.




"I lo tlaivar a ni maw kha, nula Senior hmel ka hmu tlat" a nui tur chu a ṭhen chak chak a, a nak an zaina lai chu na a ti anih hmel, "Fiamthu thawh thei pawh i nih loh kha, nui ve reng reng suh" ka tih leh chuan a mit a chhing vang vang a, "Tah khan ṭhu rawh" a ti tak nain a bulah chuan ka la ding reng a, anin ka kut a la vuan ve reng bawk.





A chau viau a niang ka biak leh chuan min chhang mumal meuh tawh lo, ka bula nula ṭhu chuan min lo be mawlh mawlh a, Usamua ṭhiannu a ni awm e. "Chawitei anih kha, Samuela ṭhian ṭha ber a nia" tiin Nu Rengpuiin min lo hrilh a, a hming chu ka hre ve fo tawh a, a hmel erawh pangngai taka ka hmuh vawikhatna chauh a la ni.




Dar 8 bawrah thisen pe tur an lo thleng a, UVica leh U Valpuia ten an lo buaipui zung zung a, Uvica sawi ang ngeiin Apuii kha chuan a pe thei lo a, mipa pahnih te khan an pe thung, Umawipuii leh Usangzuala pawh an lo kal a, an thisen a lo inmil lo tlat mai a, keini chhung chu kan ṭangkai lo tlang deuh chu a ni e.




Mahse, vanneih thlak deuhin Ufamkima ṭhianpa leh Mamuana an lo kal a, UFamkima ṭhianpa chu JH-a te unau nen pawh an lo inhre ṭha viau a, an zarah kan mamawh ang zat thisen kan nei thei ta bawk.




Nilengin Damdawiin lamah ka tap a, kan tum angin thil kal sela chuan vawiin hi kan inneih ni tur a ni. Pathian remruat te pawh a nia nge, vawiin zet chu engkim ka hmuh dan hi a dang zo a ni ta ber. Usamua a rawn harh ṭha tawh a, ka biakna te pawh ṭha takin min chhawn thei a, thisen a mamawh ang a dawng tawh bawk. Tluang takin lo innei thei ta pawh nila tun ang bak hian ka hlim chuangin ka ring lo, ka hlim tak zet a ni. Ka lo beidawng hman lek lek a; mahse, ka beidawn chang a piangin chhanna duhawm ka beisei phak loh ka dawng leh ṭhin.




Hun harsa chu kan tawnga mahse, hlimna hlirin ka khat thung, tunah chuan ka kiangah a awm a, khawiah mah min kalsan loh tur thu a sawi bawk. Ni e...min kalsan dawn lo, eng hun harsa pawh tawng mahila ka kiangah a awm reng anga, kan pahnihin kan paltlang dun zel bawk ang.




Tlai lamah chuan kan pahnih chauhin kan awm dun a, ka kut chu a vuan rauh rauh reng a, zawi te tein fiamthu thawh bawk. "Nula Senior i nih hma a pasal neih tir che ka tum a sin maw le" a tih chuan ka lo nui hak a, tel ve lo ang maiin a in sawi thei nia. "I lo harh leh hnu hian nula Senior hmuhin min hmu nghal ngawt a, zan khat chiah ania aw i la mut" ka tih chuan a khi ve suk a, "I pasal neih kum tur a ni tawh a sin le" a tih leh chuan a awmah ka chum hman ṭep a, hrechhuak lehin ka kut chu ka la let leh riai riai thung.




"Dam vat ang che, nula Senior ka nih hma a pasal min neih tir ngei ngei a ngai a nia" ka tih ve takah chuan a awm a dawm vang vang a, mit chhingin a kiai suk mai, a nui ṭha ngam lo insum hmel chu hmuh a nuam hle bawk.




"Min han ko leh teh" a mit la chhing reng chung chuan a ti zawi sup a, "Eng tin maw..?" keiin ka lo ti let ha a.




"Min koh dan kha ka hre leh duh" a tih chuan rei lo te chhung chu ka hamhaih hman a; mahse, rei lo te tak tak a ni.



"Usamu...ka duat.." ka lam a rawn hawi a, "Ṭap miah suh, i ṭah loh nan ka bei mek a nih hi" tiin ka kut a hmer vang vang a, ka ṭap hauh lo ang, vawiin hian ka hlim em asin.





Hringnun hi hlimna hlira khat turin duhthu ka sam a; mahse ka duhthusam anga thil a kal loh chuan ka beidawng leh mai ṭhin a, damchhan awm lo tiin ka inngaihtuah lungpuam ṭhin anih kha, tunah chuan hei hi ka chiang tawh, khawdurin kumtluan a daih ngai lo, Chhimbal mawina pawhin thamral hun a nei ve bawk.





Lungngaihna ten kiam hun an nei a, hlimna pawh chhum rei lo te lo zing ṭhin ang chauh a ni. Hriatthiam theih mai loh harsatna te hian theihnghilh theih tawh loh tur hringnun duhawm min daitir fo. Hlimna ringawt hi hringnun ti famkim tu a ni hek lo, tawrhna hian beidawnna chauh niloin tawrhchhelna min pe fova, hlimna hi engtia lo awm thei nge a nih zawk le, natna vanga duhawm mai chauh a ni.







(End of Chapter - 20)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 7th, 2022, 6:10 pm

ZUNZAM - by Ahmangaihi violette Khiangte



LAST CHAPTER - 21




Lal Isua piancham lawm turin mitin mai chu an mahni ṭul na lam lamah an phe buai a, keini lam erawh boruak a muang ruih thung, Damdawiin lamah Usamua ka riahpui a, thlasik khawvawt vang chu nge ni a dam sawt lo riau a; a khua a sik leh zauh ṭhin, Christmas chu in lamah kan haw thei dawn lo tih kan hre chiang tawh bawk. Kan inneih hun tur pawh rel ṭhat leh a ni a, Usamua dam hun nghah tawp chu an thutlukna a ni ta.




Keini chuan kan nghakthei a lawm, kan nghak leh anga hun ṭha zawk ka la nei leh ngei ang.




Urlawk ni chuan kan chhungten min rawn kan ṭak ṭak a, thilpek pawh kan dawng hnem hle a, an eitur min ken sak pawh kan ei in seng meuh lo chu a ni. Suzanne-i hnenah "Mimi-i hi bazar pui turin hruai chhuak rawh" a lo ti a niang chu Suzanne-i chuan min sawm ngawrh hle a, tlai lamah Doctor-in a lo en leh dawn vangin ka lo hnial ve tlat thunga, rei awm loin anni pawh an kalchhuak a, Uvica leh Nu Sangpuiin ka Pocket Money tur min pe tak nain mamawh tehchiam ka nei lo a, pawisa pawh ka hum thiam tawh viau mai.




Doctor in a lo en leh laichuan an bulah ka lo ding ve ran a, an zaina hliam pawh pawnlam chu a ziaawm viau in a lang; mahse, a ke lam ber chu a buaithlak a ni, a la kal thei har dawn khawp mai. "I hliam dang hi chu a ṭha chhawm leh mai dawn a, i ke hian hun a duh rei dawn anih hi, kumthar lam aṭang chuan inlamah i inenkawl thei tawh mai ang" a tih chuan awm a lo nuam ve huai a, Damdawiina awm chu a ning tawh lutuka; haw a chak thu hi a sawi ve sek reng a, hna ringawtin a rilru a kap tawh bawk.




"Hna thawh ringawt ngaihtuah suh aw, i ke a dam hunah pawh rei deuh chhung chu in dim i ngai dawn a nia, inzaina kha dim a ngai lutuk, thil rit pawh a chawi chi miah loh ang" ka tih chuan ngaihtuah nei niawm tak hian chunglam a melh vung vung a, "Inneih vat kan ngai a, mahse; engmah ti thei lo a inneih chu a va zia lo dawn ve" inchunglam melh pah chuan a nui suk suk a, a thil sawi awmzia ka hria chu ka lo ṭhen nasa ngang mai.




"I va ho tak" a darah ka va chum taih a, ka kut lo manin a bulah chuan min pawt ṭhu a, kan ṭhu mu a ni mah ang.




"I dam var var hunah kan innei chauh dawn nia, ka tlanbosan dawn hleinem che, lungngai reng reng suh" ka ti fiamthu a, "Inneih ṭhulh leh anih hnua kan rial rei leh lutuk chuan kan pamṭul hlen mai a hlauhawm, hetianga inneih ṭhulh leh hi a malsawm lo an ti tlat, ṭhulh hlen ta pawh an tam viau a nia, chuvangin kan inneih vat a ngai" a ti sup sup a, a fiamthu awm pawhin a lang lo, a nui bawk si lo a; a hmel chu a thutak phian bawk si.




"Ṭhulh chhan tur kan nei hleinem, kan dam a Pathianin rem a tih chuan inneihna hun ṭha tak min pe dawn a lawm, min nei duh a keiin i nupui nih ka duh bawk a, kan chhungte an inrem a, Pathian pawh khi kan tan A hmanhmawh zawk tawh ngawtin ka ring" ka tih chuan a nui mai a, ka darah rawn kuah pahin a puansin chu min lo zawn a, a khua a sik lo chung pawhin a pang chu a sa huam a, keilah chu ka vawt em em thung, ka ke te chu a hit chhah mupin ka hria.




Midang ṭawng thawmin min ṭhawng harh hlawl a, "Engemaw i dawhthla a nia?" ka beng bulah a rawn ti nghal sar sar a, ka ṭhutchhuah rualin Suzanne-i te nupa ka hmu nghal zat a, zingkar hma tak a la ni.




"In mu ṭha thei em, nimin piah aṭang khan khua a dur a, a vawt sawt khawp mai" Uvalpuian a tih laichuan Suzzane in Present bawm intuam ṭha thlap hi khumah a rawn dah a, ka ta tur a nih mai hmel e.



"Min pek maw?" ka lo ti he haw a.




"Usamua hnen aṭanga i dawn zawk anih hi, niminah ka buaipui nasa lutuka, ka chau teh a nia" nui var var a tih pahin ka lamah a rawn hung hnai a, Usamua ka va en chuan "I dawhthlak anih kha" a lo ti zauh a, keilah chuan engmah tihsak ve nachang pawh ka lo hre lo.




Bawm chu ka han thinga, a ri rak rak thei a, engtak chu ni ang maw, Tuboh te hi a ni leh em lo ang chu maw...?




"Eng nge i rin?" Suzanne-in a lo tih chuan rindan ka neithiam hauh lo. Tuboh chiah chu ka ngaihtuah chhuah theih awmchhun a ni.




"Ka hawng nghal dawn a sin?" Usamua lam hawia ka tih chuan a bu nghat a, chuveleh Present bawm chu ka hawng nghal a, Suzanne-in min lo hawn pui thuai bawk. Bawm chhunga awm ka hmuh chuan ka beiseiloh deuh ka zuk hmu a, kawrlum mawi zet mai a ni, a rawng pawh ka ngainat ber a senno a ni a, ka duhzawng hi chu a hrechiang ve a lawm, rawng senno ka ngaina tih pawh a lo hre leh diam tawh.




Kawrlum ka lak chhuah hnu chuan engthil emaw a lo la awm cheu a, Chocolate leh Christmas Card bakah bawm sen uk kharh mai hi a awm a, zungbun bawm niin ka hria.




Ka lakchhuah rualin Usamuan a kut a lo phar a, engmah sawi buai loin ka pe ve thuai a, zungbun chu a lo ni ngei a, a mawi em em bawk. "Inneih zungbun kan thlan laikhan hei hi i duh riauin ka hria a" a tih chuan ka va bih chiang a, khami ni khan kan hmanhmawh hle a, inneih zungbun tur anih vangin a mit nei kha ka thlang ngam lo a, Umawipuii lah khan 'A mit nei chu i bunreng peih dawn lo, a Simple thei ang ber thlang rawh' a ti bawk si a, Silver kual Simple deuh tak ka thlang ta kha a nia, tuna min pek a tum hi vawithum zet ka inthawlh ṭha nghe nghe a nih kha.




"Mahse, Usamu...kan..inneih zungbun tur pawh kha..ka duh tho a sin" ka ti niah niah a, ka inthlahrung ru khawp mai, a man a to bawk em a ni.




"Hei hi chu thilpek mai a lawm, i bun tawk chiah kha" ka kut a rawn ban a, eng ka hria ni maw ka zam deuh riau lehnghal a. Ka kuta zungbun min buntir laichuan Suzanne-i te nupa chu an lo nui ruh ruh a, min ti lai dawn dawn mai.




"Lo nui hlek suh u, ka zak teuh lo ania" Usamuan a tih chuan an nui chhuak huk a, engmah sawi loin Veranda lamah an inzui chhuak thuai bawk.




"A va nuam lo tak, thilpek engmah pawh ka lo siam ve lo a, hetiang i ti dawn tih hria ila chuan ka lo siam ve tur" ka kuta zungbun chu lungawi zetin ka en a, a pangah chuan engthil emaw sin zet in a inziak bawk a, ka enchiang nghal thuai a.




'I LOVE YOU TO THE MOON AND BACK' tih a ni.



"Ṭah phal loh" a rawn tih chuan ka insut faih a, ka mitah chuan mittui a tling khat leh hman vek tawh. "Ka ṭap vak dawn" ka nui lui ngiala; ka mittui rawn luang erawh ka hlimna hrilhfiahtu a ni tawh thung.




"Lo kal teh" ti lehin a kut a rawn phar chhuak a, a awma ka bei laichuan a ṭhen chak chak a, a ke ka lo delh tih hrechhuakin ka tho kang leh uaih a, a awmah min pawm bet rang khawp mai.




"Inneihna zungbun an inpek hian thutiam a keng tel ṭhin a, tuna ka zungbun pek che hi chuan eng thutiam mah a keng lo tih hria la, i hnena ka lawmthu sawina ah i ngai dawn nia, ka nupui ni tura i lo pian vangin ka lawm a, min hmangaih vangin ka lawm bawk, ka hrilh tawh che em le...?" min en vang vang pahin a ti zat a.




"Eng maw?" ka tih chuan a kiai suk a, keiin zawhna mitmengin ka lo en let ve ran a.




"Uar taka i nuih hian i hmelṭha ka ti..Mahse, tunah i nuih ang kha chuan nui fo suh ka fawp chak ziah che a nia, ka fawp che anih chuan ka thisen kal hi a dik lo ṭhin a, ka la chet theih loh hi" tih pahin a pum an zaina lai chu a dawm a, ka hmui hupa ka lo nui chu ngaihawm zet hian min rawn nuih let a, zawi te te hian fiamthu a thawh a, min ti lai chhiava a lawm mawle...




"Insum deuhin min lo fawp rawh" a tih chuan ka nui chhuak lo thei lo.




"Khawiah..?" ka tih leh chuan a kutzungchalin a biang a khawih zauh a, fawh mai ka tum chu min lo chet khalhin ka hmuiah tak a rawn fawp a, duat leh lungchim zetin min fawp bawk.




Christmas kan hmang liam a, innei kan la nih loh vangin ka riahpui reng chu a mawi loh na chen a awm a, ka pa pawn min rawn Phone zing tawh viau mai, "Ka nu a lo kal mai dawn a lawm, min ngaihtuah suh" Usamua chuan a ti sam mai a, midang mitmei ven ngai lo sela chuan han awmpui tluan law law pawh pawi ka tihloh tehlul nen...




Ka haw san dawn ni chuan zingkarah ka insiam mawlh mawlh a, ani khumah ṭhu awn dar dar chungin a nu a bia a, hna chungchang ngawt a sawi chu ka lo melh leh ralh ṭhin a, a ke ruh tliak lo sela chuan a za zek zek tawh zawkin ka ring.




"Kawr chu i va inhmeh ve" a Phone hmang zoin a rawn tih chuan ka va melh zawk a, a kawrlum min leisak ngei mai kha ka ha a, rawng senno kher hi chu keipawn inhmeh ka inti ve takzet.




"Chaw eikhamah a mi a lo kal dawn" ka tih chuan a mit ti zimin Sexy fahran hian min lo en a, a kutin min rawn hui zauh zauh mai, tilui leh uar zeta ka lo nuih laichuan "Ka bulah hian lo mu lawk teh, ka nu lo thlen hmain ka lo kuah lawk ang che" a ti leh a, hre lo derin darthlalang ka bih san a, Lipstick chu sen lutuk tak maiin ka inhnawih bawk a, hetiang em em sen hi chuan ka la inhnawih ngai bik lo.




Ban then lauh lauh chungin ka va pan a, a bul ka thlen hma chuan min lo thlek uluk viau tawh, ka hmui hnawih mawlh chu a ni a en ni. Nui duh miah loin a bulah chuan ka va ṭhu a, a hmui a fawh tuma ka va kun hnai chu a lo ip ṭung a. "Ti nge a..?" ka tih laia a hmel buai nak chuan ka nuih a ti za ve hle a; mahse, ka la insum ve fan a, min en danah chuan min fawp hreh tih ka hrereng.




"I biangah khan ka lo fawp mai ang che" a tih chuan ka nui hak a.



"Ka hmuiah zawk hian.." ka ti leh ngat a, a nui tawi khawp mai.



"Ti nge i duh loh a?" ka tum lui bar bar a, a inthiam lo leh deuh a niang "I ui lo em ni?" tih pahin ka hmui chu a rawn tuai a, "Ka inhmeh em?" ka ti leh kher chu min nui suk duh chauh.




"Inhmeh e, mithmula an hnawih ang kha i hnawih hmaih anih kha" ka lo nui chhuak hawk a, hmeichhe inchei uchuak chu a ti thei vak lo tih a hmelah a lang reng. Ka Tissue paper ken lai chuan ka hmui chu ka hru reh ṭhen a, ka hruk laite chuan min en ve reng a, engmah phei chu a sawi zui tawh lo.




A bula ka va inthawlh takah chuan duat deuhin min lo kuah a, "Kar tharah velah chuan kan lo chhuak thei mai ang, min lo tlawh zut duh lo la, i pa ten an thlakhlelh ve em che kha, tun hun hi in chhungkaw inpawh zual nan pawh hun remchang tak a nih hi" a ti sap sap a, chu chu keipawh ka ngaihdan chiah a ni. Vanduaina angin ngai mahila kawng lehlamah chuan USamua sawi chu a dik na chen a awm ve a, ka tan tak pawh hian thil ṭha zawk anih ka beisei.




"Hna thawh i chak tawh tih chu ka hria a; mahse, dam hi a pawimawh ber a nia, kan awmdun hunah pawh tunhma ang em em chuan hna i thawh ka rem ti tawh dawn lo a nia aw.." a chhanna beiseiin ka en kar a, min chhang dawn lo emaw ka tih hnuah "Dawr siam i duh em?" a rawn ti khauh a.




"Eng dawr maw..?" ka lo ti he haw a, hmanni lawkah a Furniture dawr a kang a, tunah pawisa pawh a nei tawh reng reng em maw ni.




"Mistiri hna hi bansan ila Hardware dawr te siam ila ka ti deuh a, i nghak ṭhin a nga" phur hmel fe a tih chuan "Eng nge i tih tak ang?" ka lo ti zauh a, "Hna ka thawk ang" a ti mai a, a va buaithlak thei...




"Eng hna nge i thawh tak ang?" ka tih leh chuan "Mistiri hna.." a ti leh lawi sia, Bansan chu a hlat hmel khawp mai.




Dar 9 pelh hretah Nu Rengpuii a lo thleng a, ka haw san tur chu keimah zawk ka lung a leng dawn hian ka hre mai a, Cabin ka chhuahsan rualin ka hnim ruih thei. Haw pahin Umawipuii ka tlawh a, ka nu te chanchin pawh ka zawt a, ka pa Pension pawh an lo ti fel tawh a ni awm e. "A Gp te kha a tam tham sia, ka nu chuan 'Mimii pek ve a ngai ang, a dawr hralhna pawisa ka hmansak bawk si a, a thuam chhawm leina tur pawh a mamawh ang, nangman pe ang che' a tia, i la duh em ka zawt phawt ang che ka lo ti a" a ti luam a, chu zawng ka beisei loh lutuk thil a ni.




"Min la haw viau turah ka lo ngai a, chutiang rilru a put pawh ka lo ring lo a sin" ka ti zawi sep a, ka rilru a ti buai deuh riau.




"Tam tham tak pek che pawh a tum chuang nang, Lalnunfeli te chu Car a leisak a lawm, i dawr hralhna ang tal kha dil let rawh, ani teh thlawt aichuan ka pa tan i hlu zawk daih, keini lah hi awm phei turin min phut a kan duh bik si lo a, min pe tlem viau maithei a ni" a ti bawrh bawrh a, pawisa chungchang chu ka lungkham pawh a ni chiah lo.




Umawipuii te in aṭangin ka pa in lam ka pan ding a, ka nu mawlh chuan ka rilru a luah a, pasal ka nei dawn tih a hria chu a ni phawt a, engmah a rawn uksak loh danah min thlauhthla ta a nih ka ring tawh a; mahse, Umawii bula a ṭawng dan chuan rilru a ti buai lo thei lo.




Ka pa chuan Damdawiin chanchin min lo zawt luam a, zanriah eilai te chuan inneih chhung chang ngawt chu kan sawi a, "February thla hi kan han tinzawn leh deuh a, Samuela pawh a ziaawm tawh turah han ngai ila, kan rial rei lutuk chuan a ṭha lo ang, inngaizawng te inkar hi chu vul hluai a chuai leh mai ṭhin hi ania, inneih hnu hi chuan min phuartu hi a nghet tlat tawh a, in thlun fel vat a ṭha ang" ka pa chuan a ti charh charh a.




"Hmanhmawh vak pawh a ngai lem em ni, kan bulah heti hian awm reng mai sela" Uvic-an a lo tih chuan Nu Sangpuiin a lo chhaih zauh a, "Nupui a nei ve tawh ang chu tih laimeka ngaihzawng ṭhen leh ṭhin aichuan tleirawl at laia neih te hi a ṭha zawk a sin, nangpawh hman hmanah lo neih tir tawh che ila ṭha tur a nia" a tih chuan Uvica chu a ner nang a.




"A hman mah mah, a sam a eng emai, a kut a ṭial emai, tih velah khan buai rei viau lo la chuan ka nei daih tawh tur a nia, i duhzawng hi an vang ve bawk em a ni" a ti hluk hluk a, "Tuna mi pawh ka duh reng a lawm, i thlem thlu thei lo zawk a nih kha" a nuin a tih chuan a chaw bar lai ṭhulh meuhin a nu chu a en a, "Engmah i hre lo anih chu, ka duh hun hunah ka rawn hawn thei a lawm, min atchilh nak a laia, an chhungkua a min pak huam te hi i lo hre ve nange?" a ti zui duah a, a nu chuan a awih loh hmel viau thung a.




"Anih chuan rawn hawn la, ka nu pawn chet chhawk tu tur a mamawh tawh hi, zantin i leng a, i chhai thlu thei lo an tiin ka hria a nia aw" ka lo ti zauh chu a duh lo nasa mai.




"Ka bang.." tih leh thawh a rual a, tuihmun aṭang chuan rawn au lehin "Kumin chu nupui neih kumah puang teh ang" a rawn ti lang lang a, Nu Sangpuii nen kan innuih tet tet tawh.




Chaw eikhamah thleng ka sil a, ka thleng sil zo Sitting room lam ka pan laichuan Uvica pindan lama ṭawngthawm chu ka hre pha a, ka hming an lam avangin ka ding ren rawn a, "Mimi-i khan 'Ka nu' min ti a sin" ti tu chu Nu Sangpuii a ni.




"Aw...a nu i nia lawm" Uvica chuan a ti mai a, ka thil hriat chuan min mawlh reuh reuh mai.




"Aman a sawi khan a nuam ve riau a lawm, ka ṭhiante pawn a nu tak i ang, i hmai fang a chhun riau che min ti hlawm a, a lian bik vak si lo a, pianah pawh kan in ang a sin, Zokimi phei chuan ka fa bik emaw a tia, ka hrilh duh lo law law anih kha" Nu Sangpuii chuan a ti sap sap a, ka inthiam lo zawk tak tak a ni, heti khawp hian ka lakah inhawngin min lo dawngsawng thiam a, a fanu ang taka min ngaih laiin 'Ka nu' tiin ka lo la ko miah lo chu a nia, ṭul lo loah ka lo inthlahrung a nih hrep hi a, a lo lawm viau dawn tih hria ila ka ko mawlh mawlh tawh tur.





Sitting Room a ka ṭhut phei hnu rei vak loah Chana kheh tur nen a lo inchawi phei a, Tv hma ah chuan ṭhuin a kheh nghal mial mial a, nichina ka sawi awlsam tehlul nen ka han ko tur chu ka zam nge ni ka ti hleithei tlat lo, koh ngei chu ka duh mah se ka tum ulh deuh nge ni 'Nu' tih thumal chu lam chhuah har ka ti ta tlat anih chu.





Ka ang hman zuau ṭhin a, ṭhulh leh in thawk te chu ka han la leh rih a, ani erawh Chana kheh mawlh mawlh pahin chanchin thar a ngaithla a, a ngaihthlak tui hmel hle bawk. 'A pawi reng reng lo Mimite..amah pawn i koh a duh zawk a lawm' tiin ka inhumruh sauh sauh a, 'NU' ka ti chhuak hlawl mai!




A rawn hawi phawk hle a, ka zak leh deuh ram ram a, zah zelah "Naktuk zinga hmeh tur a mi?" te chu ka han ti ta vel a, nula pui si 'Nu' tih thumal vangin ka biang a sa hat hat a lawm maw le.




"Aw, i pain chhum han ka ei chak e a tia, zinga kheh chawp ngai loin kan kheh lawk anih hi" zangkhai deuha a lo tih chuan ka thaw huai a. "Khawi ka lo kheh pui ang che" tih leh thawh ka rual a, a bula ka va ṭhut rualin Chana Plate chu min lo hun hnaih thuai a, a nuam ka ti... rilru a hlim takzet.




Chanchin thar kan en zawhah Film Mizoṭawnga lehlin te kan en dun leh a, ka la en ngailoh anih vangin a thawnthu kalhmang te chu min hrilh siam siam a, a bula awm chu hah a dam sawng sawngin ka hria, a hmuh loh lamah ka nui leh ṭhin a, mite chuan malsawmna fanau rochhan an dawng ṭhin a, kei erawh Nu min pe a ni, thil pek hlu tak a ni ka ti lo thei lo. Nu nei tawh lo fahrah mai ka nih laiin min enkawl seilian turin nu min pe a, ani nen khan kan inkar a hla a; tunah ka mamawh em em laiin nu bawk min pe leh a, kan Pathian hian nu nei lo a ka awm hi A lo phal reng reng lo, A thilpeka lawmna chang ka hriat loh laipawhin min pek A ṭhulh chuang lo a, mihring finna hian a van chhui phak lo tehlul em, kei hi A malsawmna vanga lawm ngawih ngawih tur zawk ka lo ni.




U Samua nen mut hmunah kan inbia a, vawiin lama ka thil tawn te ka hrilh mawlh mawlh a, ka pa Pension chung chang te chu sawiin ka rawn ve bawk a, keimah maichuan thu han tihtluk dan pawh ka thiamin ka ring lo.




"I rilru nawmna tur ang khan ti tawp mai rawh, engmah chân tur i nei lo tih hria a, i damna tur anga i tih mai kha a ṭha ang, pawisa i lak leta i rilru a nuam dawn anih leh la la, i lak let loh a i rilru a nawm zawk leh la lo la, keichuan engmah demna che ka nei lo" a ti charh charh a, pawisa chung chang chu ka lo ngaihtuah lem loh vang nge ngaihdan pawh ka nei hran lo.





"Pawisa chu ka mamawh chiah pawhin ka hre lo, min pek duhna rilru a nei pawh kha ka lawm tawk lutuk, eng rilru nge a put ka va hrechiang viau lo nain min haw tawh lo niin ka hre deuh a, kan inkar hi siam ṭhat theih anih chuan siamṭhat ka duh a" tiin ka rilru dik tak ka hrilh a, min pawmpui ve niin ka hria.




"I mamawh tak chu i hre mai a lawm chu, a chang hi chuan kan thiam loh ni miah loa kan inphah hniam a ngaih chang a awm a nia" tiin thu min rawn a, ka inngaihtuah buai khawp mai, rei deuh thleng ka meng a, bul ṭan dan tur ka hre lo tak zet a ni.

*******



Kum a lo thar a, beiseina nen hma hun ka thlir a, ka hun nghahhlelh em em pawh kan hnaih ve zelin ka hria, Usamua pawh in lamah a awm tawh a, tih tur em em ka neih loh vangin chhun lamah hi chuan ka va awmpui chawt ṭhin a, Uvica hna kal turin min thlah a; tlaiah min lo lam haw leh mai ṭhin bawk.




An inah lah ka tlangnel tawhin a tu a te pawh ka lakah an ṭha em em vek a, ka nuna hlimna ka tawng san laiber a ni hialin ka hria, hei bak hi chu a ngaihtuah pawh ka ngaihtuah chhuak thiam tawh lo.




Ka nu erawhin ka ngaihtuahna a la luah ve reng mai, keimah zawk hian va biak mai tur nge maw ni tiin ka ngaihtuah fo bawk a, ka la insum ve zel thung. Ṭum khat chu ka pain a chanchin min zawt nawlh a, kan boruak neih dan hre sa tawh anih vangin ka hrilh ve mai bawk.




"Inphahhniam tak leh zawldawh takin va bia la, nu leh pa te hi fa te lakah kan lungawi lo rei thei tak tak lo a nia, chutih rualin nu leh pa te hian fa te lakah beisei hi kan nei ve ṭheuh a, kan beisei anga kan fa te an awm loh chuan han rik hluai a, inthunnun theih loh chang te pawh hi a awm ve ṭhin bawk a, faten nu leh pa te an hriatthiam a ngaih chang te, nu leh pa zawkin fa te an hriatthiam a ngaih changte a awm ṭhin, a tu a te pawh in inhrethiam a in dawm tawn tur kan ni, kan tihsuala ngaihdam han indil tawn te hi chhungkua min phuar nghet tu zawk a ni leh ṭhin" ka pa chuan a ti dap dap a.




Zan khat chu ka nu hnen aṭangin Call ka dawng hlawl a, "Engtik maw in inneih ni?" a rawn ti tawl a, min ti ham haih lek lek a ni.




"Kan ṭhulh leh rih a, a ni kan la ruat fel lo" ka tih chuan a ngawi ren rawn a, "A hun a chian theih hunah ka lo hrilh dawn che nia" ka tih chuan "Pawisa i mamawh em?" a rawn ti khauh a, a aw chu nelawm ti a sawi tur a ni lo ang, a ṭawng rangin a bak ang reng hle.




"Mamawh hran lo e..." ka ti mai a, "Hmmp'' ti chiahin min chhang thung.




"Nikum khan mamawh ho chu kan in leifel tawh a, lei belh ngai pawh a awm rih lo" ka ti leh zat a, insawifiah tum hi ka ang ber.




"I pa te an nei nung bawka mamawh vak pawh i nei nang" a ti tak nghatah chuan sawi tur ka van riau tawh.




"Nia, ka rin aiin min thuam mawi a, ka phu lo zawk khawp mai" ka sawi zawh hnu chuan ka inthiam lo leh deuh a, insawitheih na angah a ngaih loh hram ka beisei.




(Zawmna)




"Khua rei ah eng nge thleng dawn a hriat loh a nia, i dawn thui lo hle mai, dinhmun ngai rengah a din theih loh, pasal chhungte nena inbah sual palh te pawh a awm thei a, midang rin chhan reng renga i khawsak chuan hun rei tak a daih chuang lo ang che" a rawn ti duah a, eng rilru pua chutiang thu sawi nge a nih ang tih ka ngaihtuah a, han chhan let dan tur pawh ka hre lo.




"A dik a lawm.." ka ti sep a, a thil sawi chu dik ve miau a ni.



"Thil han sawi hian thu awih hmel deuh hian i awm a, i awih ngai lem hlei lo a" a ti leh hluk a, chutih rual chuan ngaihdan mak deuh mai ka nei a, a ṭha ber angem tih hre lo mahila ka chhungrilah chuan tih duhna lian tak a awm thung a, a nawrin min rawn nawr ni mai hian ka hria.




"Nu, min ngaidam rawh aw" ka ti phawng a, ka nu chu a ngawi ran mai.




"Min enkawl seiliantu i nihna angin ka zah em em che a, i thu hnial kha ka duh dan a ni bik lo, Usamua neih loh ka hlau a, nangmah ka hlau bawk si che a, ka tih ngaihna hre loin ṭawngkam mawi lo te ka hman khum che a, Ununfeli chungchang pawh kha; ka nu neihchhun liau liau ni a ka ngaih lai chein khang thil kha a rawn thleng zung zung a, a lam i ṭang kha ka thik em a ni, tih ngaihna ka hre tawh bawk si lo a, i lung ka tih awi lohna te; ka tihsual zawng zawngah khan min ngaidam dawn nia, pawisa emaw engmah ka mamawh lo, min haw lo la, inrem takin awm leh thei ila tih chauh ka duh" ka aw chu a khur nasa khawp mai, ṭang ṭeuh chungin ka sawi chhuak thei hram a, ka duh ang pawhin ka sawi chhuak thei lo zawk a ni.





"Hmanah khan sawi daih tawh ta che, min runluih ah ngaiin ka thinur ve a, i nu ka ni lo tih i hriat hnuah min zah lo ta ah ka ngai bawk, i pa i zawnga kei min do bawk a, ka tan a nat loh bik i ring em ni, tunah pawh i nu ah min ngai tak tak la chuan i man te pawh ei ve tur ka nia lawm, engmah min hrilh ve hleinem" a tih chuan a awmzia ka hre thiam lo khawp mai.




"Ka hrilh lo che maw, Aumawii pawh lehkha ip ka lo thawn kha a pe lo che em ni?" ka ti hluai a, "Engmah chutiang min pe lo, i pasal neih tur thu min insawitheih khum vak a, i pain thuamchhawm ṭha tak tak a leisak thu che hahipin a sawi bawk, i u ve hi e....ka telloa nung thei tak tak si lo hi mi do ve dan phet a zawng a, in hahthlak unau emai" a ti zui hlak hlak a, Umawipuii chuan lehkha ip chu a pe lo tihna em mawni le!



"Aumawii chu ka lo zawt leh ang" ka ti ta ngawt a.



"Pawisa chu ka pe ang che, a hma a i dawr ang em em chu i siam thei kher lo anga, eichawp dawr emaw vel i siam mai dawn nia, anih loh pawhin Delhi ah min zui thei a, dawr siam aichuan a hlawk zawk bawk, nangmaha thawh chhuah i neih chuan i pasal chhungte pawn an ti chhe lo ang che" a ti ta daih a, ka nu thil sawi teh daih chu, min ti bang bo zawk!




"Nu...pawisa chu min pe let duh suh, kei aichuan mamawhna i ngah zawka i hmang ṭangkai zawk bawk ang" ka tih chuan a ngaihdan a ni vak lo. "Chutiang anih te chuan i pa a zahawm lutuk a lawm, thla tharah Delhi ah ka kal dawn a, chumi hma chuan lo leng phei la, i pawisa chu ka puk anih kha, ka pek let loh chein nuam ka ti bik hleinem" a ti leh hluk hluk a, ṭha deuh chuan ka kal tur thu chu ka hrilh ve ta chu a nia, ka inbe zo chu engtin emaw tak hian ka ruak huai in ka hria.




Ka nu nena kan inkar dik loh ṭanna ka ngaihtuah let a ka fel lohna tam tak ka hmu bawk, ka laka lungawi lohna a neih kha ka lo chhem alh zual zel a, mei alh lian takah ka siam ta a nih kha, ka tum a ni lo mahse, ka ti tlat si. Ka nu tak a ni lo tih ka hriat khan ka nu dik tak a ni lohna ka hmu lian em em a, amah dem thei ka lo ni bik reng reng lo, kamchhuak engmah ka neih hmain ka thinlung khan ka nu kha a hlat tawh zawk anih kha.




Zan khuain ka ngaihtuah zawm a, chhin khat te mah ka chhing lo a tih theih ang, zingkar hma takah ka tho chhuak a, Umawipuii ka Phone a, a la muthilh ka ring nain ka Call ta tho. Rei vak loah a lo chhang a, ka lehkha ip thawn kha ka nu a pe em tih ka lo zawt nghal mawlh mawlh a, lawm lo zetin a pek loh thu min lo hrilh a, "Ani in man a ei ve zel a ngai lo, a duh a a tuithlar tawh che a lawm, sawm pawh sawm lo zawk teh" a ti khar khar a, ka nu tan chuan lo hmuh ngaihna a awm lo reng a ni.


*****



Usamua ke pawh a dam ve viau tawh a, a la khawr deuh e tih zawng a ni tawh, palai an lo kal leh a, a ni tur an ruat fel leh ta diam a, ka nu pawh keimah ngei kala va hrilh ve chu ṭhain ka hria a, ka kal tur thu ka pa ka hrilh chuan min hnial lo a, "Kalpui i duh em?" tiin min lo zawt var a, keimaha kal chu ṭha zawkin ka hria.




Inrinni tlai a ni a, ka nu in ka va thlen chuan ei a lo rel mek a, min hmu chu mak a ti tih a hmelah a lang thei, man eina lehkha chu ka pe a, a en vung vung hnuah a kekawr ipteah a ak tharh a, chaw ei ve nghal turin min sawm bawk. Haw leh vat ka ngaih thu hrilhin ka hnial a, thingpui ina kan titi lai pawh chuan ṭawngkam kan insum dun ngang mai.




Ka nu hrawn in min duat em tih ang reng leh inneih chungchang thil te chu min sawipui ve luam a, kan inbiakna chuan hma a sawn takzet a ni, hun rei tak hnua kan nuih dun leh hmasak ber na a ni a, hnuk a ulh thei hial a, ka let leh lam te chu pheikhai a zâng em em tawh, hnara hlit phawi ang huai a lawm maw anih le.




Ka va tlawh aṭanga rei vak loah min lo Phone leh in Umawipuii pawisa a lo thawn thu a rawn sawi a, ka hnial leh zet nain "I lak vat loh chuan i u in a ti chingpen hman leh mai ang, pawisa a hum theih loh zia chu i hriat vek kha" a rawn ti zung zung a, Umawipuii buaithlakna laitak a ni, pawisa chu a thawk chhuak chak a, thawhchhuah dan pawh a hre tehmeuh mai mahse, a hmang chak lutuk mawlh mai hi a ni.




Mahse, tun ṭum erawh a lo hmang ṭhen lo ve tehmial a, min rawn pe kim ve biai mai, ka nu chuan ani pawh dawr siamna tur pek a tum a ni awm e. Amah pawh a phur khawp a, dawr luah tur a lo zawng leh diam tawh. Ka nu pawisa min pek chu a tam tham hle a, a vai pawhin ka la ta lo, a zahve zet chu ka pe let leh nghe nghe.




"Sumdawnna tenau deuh chu ka tih theih ka ring a, eichawp dawr te siam ila a ṭha ang a, ka lo puih ve theih che chuan nang pawh i thawk rim lo deuh anga" ka tih chuan Usamua chuan aw min pawh lo a, a sawi nawi khawp mai a.




"Anih loh pawhin ka nu ka zui thei a, kan chhungten an phal chuan.." beisei ru deuh chungin ka ti leh a, min la hnial ta tho.




"Eizawnna chungchangah chuan buai suh, ka chawm zo lutuk ang che, ka ke hi a dam fel ṭep tawh a, hna ka thawk leh thei tawh dawn bawk a" thutak deuh hian a ti a, amah vangah a ngai niin ka hria, inneih hnuah ka sawipui leh ang tiin rilru ka siam ta zawk a.




April thla tirah kan inkutsuih a, Umawipuiin min dinpui a, Usamua chu Mamit lama a thianpa Mistiri ve tho Zodina tia an koh chuan a dinpui thung, U Vic-an maicham thlengin min kai lut a, kan chhungte, Pathian leh kohhran mite hmuhah thu intiamin kan suangtuahna chu kan puitlin dun a. Khawvel hmeichhia azawngah ka hlim ber mai awm e. Pasal min hmangaih em em tu leh chhungkua; engkima ka engkim te ka ti lo thei lo, vawiin ka pasal neih hi hian anmahni vang a mawi ve chauh ka ni.




Ka nu leh Nu Thani bakah ka ni te chhungkua an lo kal a, Hnahthial ho kha ka nu nen kan boruak vangin kan hrilh tlai deuh a, ka Nutei chiah ka hrilh a, a rukin ka man a ei ve bawk. U Bza te nupa leh ka nutei te nupa in min rawn telpui thei a, kan belebut em vangin han inbiakna hun thawl pawh kan nei meuh lo.




Inneih boruak chu a hlimawma a chauhthlak hle thung, zan rei thlengin kan ri laih laih a, kan mut ve theih meuh chuan dar 12 a pel der tawh. Midang mut hnuah Usamua nen bungrua kan rem fel a, kan pindan chu zau viau mah se, kan khat hneh angreng hle a, chu erawh a lawmawm lam a ni.




"Inchung kan khawih theih hunah zau deuh hlekin kan ti dawn nia, he pindan hi chu mikhual pindan tura ruahman a ni reng reng a" a thawmhnaw thlak pahin a ti bul bul a, keiin vawiin lam thlalak te ka lo en kuala, Usamua chu a inbual ta niin ka hria.




Ka intihfai ve meuh chuan dar 1 a ri dawn tawh a, chau viau e ti loin mut a chhuak thei der lo, Usamua pawh chu a muhil mai bik lo a, inkuah rialin kan titi dun a, zan reiah minti nui kur kur reng.




"In lamah i awm tam ve deuh ang chu ti raw, khawdanga rei deuh deuh cham ngai ang kha chu thawk lo thei la ka duh" ka tih chuan a bu ve nghat a.




"Zodina nen engthil emaw tih chu kan rilruk a, Mistiri hna bak thiam ka nei lo tih chu i hre tho ang chu maw.." a tih zawi sup a.




"Usamu....Mistiri hna hi ka haw miah lo a nia, hna thiam tak i nih zia leh i taimak zia pawh ka hria, ka duh tak zawk chu in duat ve deuh rawh, i thawk rim lutuka, nakin lawkah insawiselna i nei mai ang tih ka hlau a lawm, damchhung khawsak tih ziaawm nan hna chu kan mamawh ṭheuh a; mahse, taksa hriselna chhe rak khawpa i thawk anih si chuan eng nge awmzia a neih ang, i hun tam zawk hnathawh nan i pe tawh a, in i sa tawh bawk a, tunah chuan i phurrit chhawk ṭhen turin kei min nei tawh a lawm, nangmah chauha i tih vek a ngai hleinem" ka sawilai pawh chuan a remti lo tih a hmelah a lang thei a, a rilru thlak thei hram sela ka ti. Chhungpuinu anga awm awl tawpa pasal te thawhchhuah rin chu ka hreh ve riau a, ka nu pawisa min pek hmang khan eng sumdawnna emaw chu ka tan ve thei dawn a, ka pasal remti lo chunga tih erawh ka hreh ve deuh a ni.




"I sumdawn bul ṭanna tur chu pawisa ka nei a, Furniture dawr i duh anih pawhin kan ti thei mai ang, bungrua pawh ka siamthei a, puitu ka neih ṭhat phei chuan a hlawk zawk maithei" ti lehin a mitmei hmang chuan min rawn pah a, ka phur ta viau mai.




"Ti ila, keipawn dawr nghah bak thiam ka nei bik hleinem..." ka lo ti hluai a, "Hna ringawt ngaihtuah lo tura min duh anih chuan ka rilru i lak pen viau a ngai a ni mai" a ti chu ka lo nui hak a, ka khabe rawn dawmin min kuai dak vah a, ka kawnga a kuahna chu a nghet viau bawk.




"Pawisa thawh chhuah ringawt hi ngaihtuah lo bawk la ka duh, ka duhdan phei chuan in lamah awm la ka duh a, nau i lo awm anga, keiin in mamawh ka thawk chhuak ang" a tih leh chuan ka lo melh ralh a. "Tu nau nge ka awm ang, Dinsangan School a kal tawh dawn sia" ka lo ti he haw a. Nau awm tur pawh awm hawt lo a.




"Dinsanga ka ti hleinem, kan fa a lawm ka tih?" a tih leh chuan "Fa pawh kan la neih ve loh hi, fa neih hma a nau awm tura intih nghal te chu " ka lo ti niah niah a, dawr siam a ṭhulh leh daih ang tih chu hlau tak ka ni.




"Tunah ka siam dawn reng a lawm" tih paha a tho uaih chu phawk zetin ka en a, "Tunah maw?" tehthut chuan a! Ka zawhna chu min chhang loin chet a rawn la zui a, ngenngawl zeta min fawh takah chuan ka hnial ta bik lo.




"Fa pa hmelṭha deuh ka hrin sak ang che" a beng bula ka tih chuan a nui suk a, "Fa nu a lawm ka siam dawn" a ti mauh mai.




"I duh lo em ni, pa ber thu an hnial tlat ngai lo?" a ti leh a, zahthlak thin mange..zak lo ang takin a mitah chuan ka en let a, "Fiamthu thawh reng lo khan ka pasal i nihna chu han fiah ta che" ka tih takah chuan hrilh nawn a ngai lo kher mai.


*****


Kan inneih aṭangin hun tam a la liam lo tih ah Usamua chuan dawr siam chu a ti tlu ta a, kan chhungten min phur pui hle bawk, "Inchhung sekrek ka khawih theih lai hian in duh ang chu thawk ula, nakinah chuan ka ti thei reng bik lo ang, kan buaipui theih lai che u hian fa te pawh nei zung zung rawh u" ka nu chuan a ti mai a, keini nupa aimah chuan kan fa neih hun chu a nghakhlel bawk.




Kan dawr tur siamin Usamua leh Uzodina an buai dun hle a, zing kar aṭanga thim rak thlengin hna an thawk a, chutih laiin kohhran lamin ṭhutthleng tam tham tak an lo Order ve bawk nen kumin chhungin dawr chu kan ti hman meuhin ka ring tawh lo.




Ka nu chuan "Dawr siam te chu a hmanhmawh thlak hleinem, nau hi pai vat zawk ula a ṭha ang" a ti leh ṭhin a, kan tum lo pawh a ni bik lo mahse, pai vat dan chu ka hre bik lo a ni. Pasal te hnathawk chau lutuka an lo haw laiin nupui zawkin lo nawr chu thil tih chi niin ka hre lo bawk.




Chutia dawr kan siam leh theih tak mai loh ah chuan chhunlam chu ka awl thawng viau a, Uvalpuia te fapa Dinsanga nen chhun lamah kan in awm ṭhin a, min ngaina em em bawk. A School kal tur te hi keima hruai ngei a duh ṭhin a, a nu aipawhin min ngai zawk emaw tih tur a ni, zan lamah lah kan bula riah a ngen a, a nuin a phal loh chang chuan a nuar nasa ṭhin hle a, a pa a ṭawng ve tawh erawh hi chuan a nuar ngam ngai miah lo thung, a pain a melh rum tawh hi chuan eng ang pawhin ṭap uar mahse a ṭap tawp hmiah zel a, a hau bik pawh a ni lo; a pa hi a hlau ni berin ka hria.





Zan khat chu kan hnena riah a ngen leh a, Usamuan a lo phalsak vangin Suzanne-i pawn min hnial lem lo a, ka nu leh Uvalpuia chuan an remti lo hle thung, "Lo mu rawh se, a nu a damsam loh kha" Usamuan a tih hnuah kan pindan lamah a pawm lut a, thawmhnaw nawh mar pahin khuma an ṭawng thawm chu ka ngaithla ve reng a, a pa puia chuan thawnthu a hrilh ni ngei tur a ni. Usamua hian naupang a ngaina ve hle a, Dinsanga nena an han inchhaih vel ka hmuh chang hi chuan fa neih hi ka chak zual ṭhin a, ngaihtuahna pawh a kal thui duh ṭhin khawp mai.




Ber thla kan kai a, ka taksa ah chuan danglam awm tlatin ka hria a, ka thi neih hun pangngaiah ka nei ta mai lo bawk nen ka rai niin ka inhria, bazar ka chhuah hmasak berah Test kit ka lei a, in ka thlen veleh ka in Test nghal bawk. Mahse, naupai ang chuan a lang leh chuang si lo a, ka awmdan chu ka hrethiam lo takzet.




October thla ah pawh thi ka la nei lo cheu a, vawi 6 zet chu ka in Test nawn leh tawh a, Result erawh a la ngai reng thung, ka chawei a tui a, zing kar luakchhuak tih angreng ka nei ngai bawk si lo a, thi neih ka awl ringawt chu a ni ka hriatthiam loh chu.




"Ka nuin a nawr vang chein i hmanhmawh mai mai anih kha, naupang te chu Pathian hnen aṭanga kan dawn turah ngai la, ṭul A tih hunah min la pe ve mai ang" Usamua chuan a ti mai ṭhin a, a sawi ang takin ka lo hmanhmawh mah mah a nih ka ring.




"In entir chu ka ngai a, thi ka nei thei bawk si lo a" ka tih chuan a ngaih a ṭha bik vak lo, hna an awl ni hmasa berah in entir turin kan kal dun a, kan nupa chuan Test min lo neih sak ve ve bawk.




Result ah chuan Usamua ṭhat lohna a awm lo a, keima lam zawk chu harsatna ka nih mai hmel e. Ka chi a nung ṭha lo a, ka thi neih mumal lo chuan naupai a ti harsa bawk, damdawi te min lo chawh a, hriselna lam ngaipawimawh zual turin Doctor chuan min chah a, han inenkawl vak dan pawh ka hre lo.




Internet lam ka bih ngun hle a, hmeichhe naupai theih loh chhan hrang hrang te pawh ka enkual ve ṭhin, taksa hrisel a pawimawh ang chiahin rilru hrisel a pawimawh tih te ka hre leh zel a, ka nu lah chuan eiṭha thinreng min hlui a, Vitamin thlengin min leisak a, a inthlahrun awm duh ngang mai.




Zep loah chuan ka hlauthawng a ni, nau pai thei lo ta ila tiin ka ingaihtuah fo a, ka rilru a hah zual ting mai, zan ka mu tlem a, ka thil ei tui em em ṭhin kha a reh ta hmiah bawk, na sawi tur awm si loin ka dam lo takzet a ni.




Kum thar kan chuangkai a, thi ka la nei leh ta miah lo, Doctor ka rawn zing hle a, hetiang anih reng chuan nau ka pai thei lo hlen mai dawnin ka hre tawh. Umawipuii lah chuan ka chhul a Cancer a nih a ring a, ka inring hlel ve lo thei lo.




Mahse, ka Doctor in Cancer ka neih loh thu min hrilh a, tlem chuan ka awm a nuam ve ta deuh. Chutiang thuar tham vela ka rilru a buai em em laiin Usamua chu a hna ah a buai ve hle thunga, engemaw chang phei chuan zu a in niin ka hria a, rui hmel a put ngai loh vang leh amah ah danglam a awm ngai loh vangin ka chiang thei mai lo thung.




Ṭum khat chu a thawmhnaw suk tur zawnga a Closet ka hai ṭumin zu bur ka haichhuak ta nawlh a, a chanve zet chu a la awm nghe nghe, inchhungkhur leh ka lakah lawm lohna a neih awm ka hre lo a, ka tan phei chuan a ṭha em em reng a, ka mihring hriat tawh a zawnga chenpui nuam ber a ni bawk, engvanga zu in ṭhin nge anih ang tih mawlh chu ka ngaihtuah a, ka hriatpui loh hian harsatna a lo nei reng em maw ni, keimah hi a zuin chhan ka ni a ngem tih te thlengin ka ngaihtuah buaia, rin thu mai mai pawh chuan min ti hah hlui thei.




Umawipuii chuan "Hna a thawk nasa a, a chauh vang anih dawn chu, mipa te chuan han lem sek chang hi an nei ve ṭhin a lawm, in nupa kar ah buaina a awm loh chuan enghelh vak duh suh" a ti sam mai zel a, pasal te zuin ngaihthah ringawt chu thil dik niin ka hre thei lo.




Mut hmunah Usamua chu ka zawt a, "Keimah ah hian lungawi lohna emaw i rilru tih hahna ka nei em?" ka ti tawl a, ngaihṭha lo zeta min en chungin ka biang a rawn dawm a, "Ka rilru i ti buai khawp mai" a lo ti khauh a.




"Eng thilah?" min chhan hma hauhin ka hlauthawng a, keimah ka nih kha ka rinsa a ni reng bawk.




"Nau pai ringawt hian i rilru a kap a, a pawi lo ka tih tawh kha, fa kan nei lo anih pawhin engmah a pawi lo, i rilru ti hah tawh suh, kan pahnih chauh nih reng hi pawi ka ti ve lo a nia" tiin ka beisei loh lam daihin min chhang a, a thu sawi chuan min ti na veng veng bawk, a beidawng tihna a ni angem?




"A la rei loh em hi, thi ka neih theih loh vangin i beidawng em ni?" a lu a thing a, "Beidawng lo e, chutiang zawngin ka sawi hleinem, vei run suh ka tihna zawk a nia" a ti zawi leh sup a, a thu sawi chuan ka awm a tih nawm phah chuang lo.




"Anih ti nge zu i in?" ka tih takah chuan rei lo te chhung chu a meng phawk deuh a, chutah inlet thawkin inchung lam chu a melh vang vang a "Ka in zen zen lo a sin, i awm ka lo ti nuam lo a ni maw?" a tih chuan ka chhang lo. Dinsanga a lo luh tak vangin kan sawi chhunzawm lo a, a chau viau tak tak aniang a muhil hma hle a, kei erawh ka muhil thei mai lo thung.




Usamua muhil hmel chu ka en reng a, fa hrinsak ka duhna chu ka rilrua lian ber a ni, chu chuan hlauthawnna te, chiai na min siam a, fa hrinsak kher tura min phut loh thu a sawi takah phei chuan ka hlauthawng zual bawk.




"Dinsanga vang hian in nupa in in ngaihsak thei lo tlatin ka hria, ti lutuk lo rawh u, nang pawh inchhung thilah hi chuan in ham buai rih lo la, in pa hi ngaihsak deuh rawh" tiin ka nu chuan min hrilh a, nupa nun lamah chuan harsatna kan nei lo, kan Test Result kha Usamuan midang hrilh a rem ti lo a, engthil mah min khap sak ngai loh vangin a remtih loh thil hi chu tih luih ka duh bik lo a; mahse, ka chhungrilah hian natna ka chhekkhawl mek niin ka hria, chu chuan min ti chau a ni.





Favang hun a rawn inher a, kan chhungkaw boruak chu danglam vak a awm lo, Usamuan zu a in ngai ta lo a, ka dawr tur siamin a buai thei hle thung, keichuan ka phurna ka hloh ta niberin ka hria, sum leh pai, hna tih angreng hi hlimna min thlen tu ber a lo ni lo anih dawn hi. Pathian hnenah ka inkawl tir reng a, chhan sen loh khawpa tam ka dil tawh ngei ang. Fapa ka neih theih nan ka dil ṭhin a, tunah zet chuan fanu pawh ka awt hluah hluah tawh.




Dawr kan hawnni chuan Umawipuii pawh a lo leng a, Company damdawi eng engemaw min lo zawrh pah a, Usamua chu mipa damdawi te a zawrh a, Usamua lah chuan a lo leisak ve mai bawk a, "Tihdanthiama kha chuan ka mamawh lo a ti tlat kha a nia, in pa hi chuan a mamawh a inti deuh anih dawn hi" tiin a nui kur kur a, ka nuih a za ve vak lo.




"In pa hi chu a ṭha ve ngawt mai, engkimah hian a hrethiam em em zel che a, mipa te hi amah ang vek hi ni sela ṭha tur" a ti erawh ka pawm zawng tak a ni. "Chu vang a lawm fa hrinsak theih ka chak em em, a thlah kal zel turin fapa hrinsak thei ila, amah hi chhun em em bawk sela" ka lo ti ve sap sap a, keimah vanga fa nei thei lo tura ka chan ringawt pawhin ka hnuk a ulh ṭeuh mai.




"Ka lo ṭawngṭaipui dawn che nia" Umawipuiin a tih chuan engti zawng emaw tak hian ka awm a nuam a, ṭawngṭai puitu chu ka mamawh takzet a ni.




Tlaia ka haw chu ka nuin min lo ko thuai a, "Bawngsa ka chhum hluah a, a tui hi in ṭeuh ang che aw, tunlai chu i ngurchuai riau mai a, i raino em ni?" a lo ti luam a, ka harsatna te hi ka nu hnenah hian hrilh mai tawh ila ṭhain ka hria.




Usamua ka rawn hmasa leh zet a, min hnial lem lo, ka nu eirawng bawl pui tura ka phei leh laichuan thingpui min lo siam mek a, dawhkan ka kil rualin min lo chhawp thuai bawk. Min duat em em chhan hi ka hria a, a duh ang ka pe thei lo erawh pawi ka ti takzet.




"Ka nu, nau ka pai thei lo niin ka hria, ka thi neih a tawp daih a, thla engemaw zat chu thi pawh ka nei tawh lo" ka tih chuan a hamhaih hmel khawp mai.




"A va mak awm ve, thi hul rual pawh i la ni si lo a!" a ti hluai a, ka lo inpetruh ṭeuh thung.



"Nia..mahse, ka thi a hul bawk si a" ka ṭap lo chauh a ni.




"A ni thei dawn em ni, han awl chang te hi chu a awm ve ṭhin a lawm, in la naupang a, in inneihna pawh a la rei hleinem, hmanhmawh mah ta che" a tih chuan ka mittui a lo hnam ṭiam ṭiam a, ka nu hmel hamhaih lutuk chu en pawh harsa ka ti.




"Kan inneih hnu lawk aṭang khan a ni tawh a, awl zeuh ang kha a ni lo, Doctor pawh ka rawn hnem tawh a, an damdawi min chawh pawh ka ei hnem tawh, awmzia a awm thei lo" ka ṭap tak zet ta. Ka nu chu ka bulah lo ṭhuin ka hnung a rawn chul a, duat takin min kuah bawk.




"Samuela chu keiman ka lo hrilhfiah vek dawn nia, hrehawm ti duh reng reng suh, keimah pawh hian ka lo nawr ve sek che u a, engmah ka lo hriat ve loh vang anih chu" a ti sap sap a.




Chumi tlai zanriah kan eidawn chuan chhung in khawmna kan nei a, ka nuin thu a sawi laichuan ṭawngṭai ho a rawt a, kan nupa tan a ni, ka nu chuan tih tak zetin min ṭawngṭai sak a, nau kan pai theih nan niloin engdin hmunah pawh lungawina kan neih theih nan te, inhmangaih taka nupa kan nih zel theih nan te min dil sak a, ka nu ṭawngṭaina chuan keimah ah danglam a siam a, ka hahdam huai huaiin ka hria.




Ka nu chuan Doctor min pan pui leh a, damdawi dang min lo chawh leh mai bawk a, ka damdawi ei vang ni hauh loin ka damta in ka inhria. Ka nu min ṭawngṭai sakna chu chhan in a awm ka ti lo thei lo, kha mi ni aṭang khan rilru hahna emaw hrehawm tihna ka nei tawh lo a, fa nei lo pawh ni ila pasal leh chhungkua ṭha tak mai ka nei a lawm tiin ka inhnem ṭhin. Ka ta ni lo thil duh vanga indawm kun aichuan ka neihsa hlimpui chuan ka nun a ti hlim tawh zawk a, thil ṭha tinrenga vur ka nih lai hian vui tur ka ni lo tih ka inhre chiang tawh bawk.




Tlai khat hna aṭanga ka haw chu ka awm a nuam lo hle a, chhun lama kan thil ei kha ka ngeih vak lo nge ni ka pum a nuam lo reih reih reng a, midang rualin zanriah pawh ka kil ve peih lo a, thim hlim a ṭangin ka mu zawi reng bawk. Usamua bawnghnute min lo pek chu in tumin ka ṭhu chhuak thuai a, ka tho chiah chu ka tai a rawn na zawk zawk a, rang lutukin Bathroom lam ka pan a, thil awmzia ka hria chu ka beisei loh lutuk thil a ni!




"Usamu..!" ka ti chul a, "Eng thil nge?" Bathroom kawngka bula aṭangin a lo ti thum dut a, chawp leh chilhin ka thin phu te chu a rawn rang a, ka chawna thisen luang chu han hrilhfiah dan pawh ka thiam lo zawk.




"Thi ka nei a nia" ka tih chuan kawng khar pawn lama mi chu a ngawi vung vung a, "Usamu, thi ka nei ka tih chu.." ka ti leh hap a.




"Umm..eng nge i mamawh" a tih chuan "Stayfree.." tih zawngin ka chhang.




A kalsawn chhung chuan ka lo ding tlawk tlawk a, hmeichhe dang te hian an thi nei hi hetiang tak hian an lawm ve tawh hlawm a ngem le, lawm nachang an hre lo anih chuan lawm viau hlawm teh se, kei chu ka lawm em a sin.




Rei vak lo hnuah Usamua chu lo let lehin ka thil lak tir chu min rawn pe a, "Pawhdawh ah khan ka Underwear a awm, min lo lak rawh" ka ti leh zat a, a kal ve leh mai bawk.




Kan inthlak laichuan a thawm ka hre lo a, kal sawn loin a la ding niin ka ka hria, "I la awm e law?" ka tih chuan aw a rawn thian kharh a, "A na em?" thum duta a lo tih chuan kei ka lo nui hak thung.




"Na lo e.." ka tih chuan a reh leh vung vung a, eng tak chu ngaihtuah ang maw.




Ka nu chuan 'I damdawi kha i ngeih hle anih dawn kha, kan ṭawngṭai chhanna a ni bawk ang, naupai lam thung kha chu ngaihtuah lo la, i damṭhat kha a pawimawh ber a nia, tikha chuan thaw pawh a veng huai a lawm" a ti ve luam a, chhungkaw titi nana ka thi neih chungchang kan sawi hi ka lo ring pha ngai lo, mipa ho chuan sawi ve tur an hre lo hlawm hle a, Suzanne-i erawhin min lawmpui khawp mai.




"Mipa ho hi chuan a pawimawh zia hi an hre pha lo a lawm, Tumbua pawh hian ka taina hi a hrethiam lo ve ziah" tih pahin an pa chu a han melh rum kha kha a, "Kha lai tereuh te ah khan neuh neuh in ngah emai, hriatthiam vek sen pawh ni nghal lo chuan" ti hluk pahin an pa chuan a thawhsan a, Usamua thung chuan engmah sawi ve lo mahse, min lawmpui hle tih ka hre thung.




Ka thlabi chhiar a pangngai chho zel dawn emaw tih laiin thla thum hnuah ka awl leh ta tlat a, ka hlauthawng leh ruai a ni ber, ka nu ka hrilh thuai a, "I damdawi kha i ei zo tawh em ni? A va mak teh fo ve" a lo ti chul bawk.




Mahse le...Bawnghnute ka in tur chu ka luak a chhuak ta tlat pek a, tui khawihna ah ka va uak ṭhat ṭhat a, zing kar pum ruah lai anih vangin engmah luak chhuah tur phei chu ka nei lo. Ka kam ka ṭhuah laichuan ka ngaihtuah chhuak thut a, hmanhmawh lutukin kan pindan kan ka pan a, Test kit chu pakhat a lo la awm hlauh mai.




Hlauthawng leh thinphu dep dep chungin Bathroom ah ka va in Test a, rin sen pahnih lo lang kalh ka hmu rual chuan ka au chhuak lo chauh a ni. Nau ka pai! Nu ka ni dawn, naute kan nei dawn....




"Nu...lo kal vat teh" keimah zawk chuan ka va pan hlawk hlawk a, khuma ka pasal mu chu ka hrechang miah lo thei nia mawle.




Ka Test kit ka nu ka va hmuh chuan a han bih vang vang a, "Ka chhiar thei hleinem maw le, ka tarmit kha han la teh" a la ti zui...




"Nau ka pai tihna anih kha, rin sen pahnih awm kha i hmu em?" nui var vara ka tih chuan a han bih ṭha leh ngat a, "Anih hi maw le, a va la te ve.." a tih chuan ka lo nui chhuak hawk hawk a, ka hrilhfiah hman tawh si se lo.




Kan pindan lamah tlan let lehin Usamua mutui laichu ka va pawt chung chung a, Pathian ni tuk anih vangin a mut rei theih ni a ni bawk a, a che chang duh ṭhak lo. "Usamu tho vat teh.." sir lam hawia a inlet thawk chu ka kuai let leh a, "Usamu..ka duat, i thawh vat loh chuan ka hrilh ve dawn miah lo che a nia" ka ti leh rih a, peih mang lo zeta a rawn meng chu a biangah ka lo sawi nawk nawk a. Dinsanga zing tho rawn tlan lut nen kan ri chel chul mai.




Thil awmzia ka hrilh chu a lawm viau dawn emaw ka tih laiin a chal a ti chuar tup a, a nui suk duh chauh.




"I lawm ve vak nange a?" ka tih chuan "Engtin nge ka tih ang, kha tah khan a la awm daih bawk sia" a ti mauh mai.




"I nuih ve var var ka ring a nia" ka tih chuan mawi fahran hian a rawn nui a, ka ṭhawng ve deuh bawk a ni e, a hlim lutuk ang tih ka hria a lawm, a nghakhlel tawh hle zawk ang chu.




Rin ang leh beisei lawk ang ngeiin ka pasal chu a phili ti mai teh ang, hna lama ka kal pawh a phal tawh lo a, mu turin min ti reng mai a, awmdan pawh min ti thiam lo lek lek a ni. Ka nu nen Doctor kan va in entira, ka naupai chuan kar thum a lo tling reng tawh a, ka bp a hniam deuh vangin ei in ti ṭha turin min lo hrilh a, chu kher chu ka nu ngaihpawhmawh zawng tak a ni.




Ka mo pui nu a fel bawk a, engmah ka tih ve min phalsak lo a, dam reng chunga mut mai mai chu a nuam bik vak lo, min duhsakna ah erawh ka lawm takzet. Nidang zawnga thim dawna lo haw ṭhin ka pasal pawh dar thum velah a rawn thleng fel der tawh a, ka ngainat em em Walnut min lo hawn bawk.




Mut hmunah a thil min lo hawn chu ka kheh melh melh a, a kawr khehsa anih loh vangin kheh a har hrep lehnghal a, Tuboh Romantic ngat khan ania ka chhut ni.




Ka naupai chuan thlakhat pawh a tlin hmain a mamawh tur ang chu a nei vek a tih theih ang, ka nu leh Suzanne-i an bazar a, naupuan te chu an han leihnem khawp a, phir pawh pai ila kan hmang sengin ka ring lo. Thil duhawm deuh chu naute pa hian hna a thawk hleithei ta tlat lo a, "Vawiin chu awl mai ang, ka awm ang che" a ti leh ṭhin a, nilengin lehkhabu chhiar pahin min vil run mai a, a buaithlak dawn a ang riau.




"I nupui leh fa te chawmna turin hna i thawh a ngai a nia" ka tih lah hian a nui suk ringawt a, eichak ka sawi erawh hi chuan a tho rang ṭhin khawp mai.




Ka pa te chhungin chawei turin min sawm a, kan nupain Inrinni tlaiah zanriah kan va ei nghe nghe a, ka pa chuan mamawh leinan pawisa min pe ṭeuh bawk, ka Nu Sangpuii hlei hlei chu a phurah a ṭang a, naute pian hun chu tlumtea thlir takin kan thlir a ni ber.




Kan nau paiin thla thum a tlin hnu lawkah Umawipuiin nau a pai veleh a, Usangzuala farnu a pasal te in aṭangin a lo haw bawk a, a fate pali nen an chep deuh vangin ka nu inlamah an insawn phei ta bawk a, ka nu pawh a zin ngai tawh lo niawm tak a ni.




"Naupai lai hi pangchan nawm lai ber a nia, kei chu thil lei ka ngen nasa thei lutuk" a rawn ti luam a, engmah hi han ngen ve tur pawh ka hre lo, ka duh ang hi chu ka ban phak maiah a awm vek tawh zawk a, duat taka ka pasalin min kuah tawh hi chuan engkim hi a famkim em em mai a ni.




Champhai lam aṭangin Urokimi te nufa an rawn zin a, kar khat an cham hnuah Usamuan a han thlah leh a, zankhat chauh a riak dawn chungin min Phone zing khawp mai, "Eng nge i tih, thil i ei tawh em, damdawi i ei em?" tih angreng hi min zawt sek a, a tuk maia rawn haw a tum chu Urokimin naupang ho khum siam sak turin a lo chelh leh rih a, min rawn biak chuan a lawm vak lo niin ka hria.




Mut hma zawng kan inbia a, sawi tur a hria a zeng pawh a ni lo min ngai a ni ber ang chu. Dar 11 velah kan mu a, ka muhil tui dawn chauh tih a, thawm engemaw hian min ṭham harh a, Suzanne-i te nupa inhau ri niin ka hria!




Phawk lutukin ka ṭhu chhuak hlawl a, ka ngaihthlak chian takah chuan inhau ri a ni lo "Zosangpui, i harh em..Duati..min en teh" tih ri ka hriat leh takah chuan ka tho chhuak thuai a, an kawngka bulah chuan dingin ka ngaithla leh rih a, rei vak loah Dinsanga ṭap ri ka hre ta bawk.




"Uvalpui" ka aw hriaiin "Lo nghak lawk" a lo ti thuai a, "Bawiha, i nu Mimii kawngka va hawn rawh le, api te i kaitho bawk dawn nia" Uvalpuia chuan a ti leh a, chutih laiin ka nu te chu an lo tho chhuak der tawh.




Kawngka a rawn inhawn takah chuan ka lut thuai a, Uvalpuian Suzanne-i a lo pawm ka hmuh chuan ka pan phei ruak a, khawsik sang tak nei ang maiin Suzanne-i chu a thlan nasa a, a pang chu a sa hle bawk. "Pawhdawh ah khan damdawi a awm" Uvalpuian a tih chuan ka lo laksak vat a, ka nuin puanin a lo hru mawlh mawlh bawk a, "Motor kan la chhuak ange" tih pahin Uvalpuia chu a kal chhuak zui bawk a, an pa thang laichuan a rawn harh ve leh deuh tawh; mahse, a taksa erawh a dang hle thung.




Kan vaia kal vek a rem loh vangin Dinsanga ka lo awmpui a, a nu awmdan vang khan a hlauthawng ve aniang a ṭap reng mai a, khumah mutpuiin thawnthu te ka hrilh a, a muthilh hnuah ka nu ka Phone a, Suzanne-i chu an Admit a ni awm e.




Ka nuin a riahpui a, midang an lo let leh chuan dar 3 a ri tawh a, mut pawh a chhuak tawh meuh lo, "Tunlai chu a ṭha viau a sin maw le, a in Checkup hun hi kar leh a nia, a ziaawm deuh chuan kal hma mahila a pawi lo ang" Uvalpuia chuan a ti sap sap a, a rilru a hah hmel hle bawk.




Khawvar dawnah ka muhil ve chauh a, ka harh leh chuan ka pa a lo tho tawh a, Uvalpuia erawh Damdawiin lamah a kal leh tawh thung. Chhunah Dinsanga School ah ka va dah ah, Damdawiin lamah ka tlang zui a, Suzanne-i chu a lo harhṭha viau a, a chhungte ho pawh an lo awm ṭhap a, an ṭhahnem angreng khawp mai.




"Thisen var a lo tlachham deuh a, vawiin ah an khaisak leh anga, ngaihtuahawm a ni lo ang" ka nuin a tih chuan ka thaw huai a, Dinsanga lam leh ka ngaih vangin ka awm rei lo, in kan thlen chuan Usamua ka hmu hlawl a, engtik laiin nge a lo let leh ni, engmah pawh chanchin ka la hrilh hman lo lehnghal a.




"Kar tawpah i lo haw dawn emaw ka tia?" ka ti he haw a, "Ka nuin min lo bia a, ka lo haw nghal a lawm" a lo ti sam et thung.




"A zia tawh lutuk a sin, vawiin pawh a khua a sik lo a" ka tih leh chuan a bu nghat a, "A pawi lo, Suzanne-i a dam bawk si lo a, kei ka awm loh chuan duattu i nei lo palh ang" a ti leh mai a, lo lawmloh chi pawh a ni lo, ka tai a na ve renga, a lo haw hlauh chu a tihzia zawk mah ang.




Zan khat dang Damdawiina an riah leh hnuah an rawn haw a, Vellore a kalna tur an buaipui nghal bawk a, Suzanne-i unaupa Faka leh Uvalpuian an kalpui dawn a ni awm e.




An kal ni chuan an chhungte an rawn lang ṭak ṭak a, Usamua pawn Lengpui thleng a zui ve a, amah Suzanne-i tak phei chu a ṭhat hmel viau a, hmel hlim a pu sang reng a, hmeichhe tuarchhel ve tak niin ka hria.




Zantin hian min rawn be ṭhin a, Dinsangan a pi te ina awm a duh loh vangin ka kutah a tla a, zanah pawh kan bulah a riak mai zel a, kan nupa min ngaina hlauh chu a tihzia tak tak a ni, a nu leh pa a lam ngai lo a, a duhloh zawngah a thinchhe deuh e tih lohah chuan naupang enkawl nuam tak a ni.




Vellore ah chuan a ṭha chak viau aniang min rawn rawn biak pawhin a ṭawngkam a zângkhai thei hle a, a awm rei deuh dawn vangin a inthiamloh thu te a rawn sawi luam a, "Pui tur chein Lily ka rawn tir ang" a tih chuan ka lo hnial ve thung, Usamua ṭhiannu Chawitein min rawn tlawh fo a, Usamuan a rawn tir niin ka hria, thi put zeuh zeuh ka neih vangin insuk takngial pawh ka tih min phalsak lo a, Chawitein engkim a rawn ti vek ṭhin a, a inthlahrun awm duh tih mai lohah chuan ka lawm khawp mai, Usamua ṭhian ṭha ber a nih vangin ka ngaina hle bawk.




Thla khat chuang Vellore lama an inenkawl hnuah an lo haw a, Suzanne-i hmelah chuan dam lo hmel a lang leh tawh lo, a rawn thau haw ve zawk hialin ka hria, ka nau neih dawn hnaihah Urokimi te chhung an lo zin leh a, keipawh insawiselna ka nei tawh lo a, ka nau neih hun chu beiseina nen kan thlir a ni ber tawh.




Kan nghahhlel em em chu a lo thleng a, Pathian malsawmna dawngin fanu duhawm tak mai Kg 3 leh a chave zeta rit ka hring a, a pianhlim a ṭangin a pa a rawn chhun nghal em em bawk, a pi Rengpuii duhthu a sam viau a niang midangin pawm kan chang ve meuh lo.




A puin a hmingah 'LALHLIMPUII' tih a sa a, ka pa in 'DAPHNE' tih a rawn belh bawk a, Daphne Lalhlimpuii chu naute vannei tak a ni, mi zawng zawng hmangaih a hlawh a, ṭhil ṭha zawng zawng duhsak rawn a ni bawk. A pa chuan a hming pawh a ko loin "Ka Savate' ti ngatin a ko ṭhin.




Ka hun hman liam tawh ka thlir letin ka fa nu tana entawn tlak loh thil tih ka nei em tih ka in zawt fo a, ka hun paltlang ang hi nakinah ka fanu hian a la rawn zawh ve ngei anga, entawn tur thil ṭha ka hnut chhiah loh mawlh ka hlau a ni. Duhthlan tur dik ka hrilh thei a ngem, kawng dik lam ka kawh hmuh thei a ngem?




Tu te pawh hian thawnthu kan nei ṭheuh a, kan thawnthu hming erawh a in ang lo ṭheuh awm e..ka hringnun thawnthu hi Lehkhabu ah chuang dawn sela a hming ah chuan 'ZUNZAM' tih ka duh ngei ang.




Kan thawnthu ah chuan hmangaihna Zun a zam a, chu zunzam chuan kan zavaiin min phuar khawm a ni, hmangaihna ngahtak nu an awm a, mi thlamuan thei tak pa nen, mi duatthiam tak pasal leh venhima awm naute pawh, sawi hmaih theihloh ka u Mawipuii tiamin, an ni ho nen chuan tawp chin nei lo Hmangaihna Zunzamah kan hringnun kan chhiar ho tawh ang.







* A tawp ta *

(Smile squad, kan thawnthu kal lai kan lo zo leh ta, min phurpuina te, min duhsakna te vangin ka lawm e, thawnthu kan nei leh thuai turah ngai ila, min han tel pui zel rawh u aw, chawlh kan nei lawk anga thawnthu thar nen inhmuh leh vat kan tum dawn nia)

*** KAN WEBSITE A FAKNA LAM THIL MILEM LANG THIN I LO HMEH ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)