ZUNZAM S2 by Ahmangaihi violette Khiangte (Completed)

Moderator: writers

Ngaia
Site Admin
Posts: 25813
Joined: April 30th, 2016, 4:07 pm

Re: ZUNZAM S2 by Ahmangaihi violette Khiangte (Completed)

Unread post by Ngaia » March 6th, 2022, 7:44 pm

ZUNZAM - by Ahmangaihi violette Khiangte

CHAPTER - 7




"Saitluangpui nang hi ngaihzawng i nei a ni lo maw, i Phone en chungin i nui vur vur reng mai" tih leh ka Phone rawn bih a rual a, kei lahin ka lo thukru rang em em khawp a, ka tih dan chu a lawm loh hmel nasa mai bawk.




"Eng nge kha tia i thuruk a, thil zepruk i nei a ni maw?" a ti kha kha chu ka uksak duh lem lo, sir zawnga in her sanin ka Phone bawk chu ka bih leh a mah se, Umawipuii thil hre chak tawh laileng hi chu dan theih a ni ṭhin lo, min kuai her sawka ka tlu ṭhelh nghe nghe. Samuela nen kan lo inbe mek a, chaw chhun ei a an chawlh laiin min be thut nen ka lawm hmel ka lo ti lang nasa deuh a ni mahna.



"Usamu-a chu tunge?"



"Hriat ve chiloh" ka ti chu a duh lo teh e, ka Phone a pawt thla thut a, a hriat hma chu min zawt dawn tih ka chian em vangin ka chuh buai duh ta lo mai.




"Bialpa i nei a law?" ka Message en chung chuan a ti niah niah a, "Mi message te chu chhiar kher lo la, ka hrilh mai dawn che lawm le" ka tih takah chuan zawhna ngah hmel deuhin min en a, kan unau hian thuruk kan nei ngai lo a tih theih ang, ngaihzawng chung changah ngat phei chuan Umawipuii hi ka thurawn lakna ber a ni.




"Mistiri Samuela kha..." ka ti dek dek chu "Awi.." a lo tih hluai vang chuan ka ngawi leh rih a, "In ni maw?" a phur hmel ka hmu chawp chilh a, Umawipuii duhzawng tak a ni chu keipawh ka lawm ru viau mai.



"Engtik aṭangin?"


"In nihna a rei tawh em?"


"A rawn bem che a mi?"



Zawhna min zawt nghal mawlh mawlh a, pahnih chauh e tilo chuan kan ri hluai a, "He pa hi chu ka rinzawng a nia, i ti fuh ang, a hmel chhiat loh chu thuhran..." a ngaihtuah vung vung hnuah "Eng ang chhungkua nge, an rethei em?" a ti leh phawnga, a ngaihtuah thui hman ṭhin a nia.




"Sum ah hian buai reng suh, amah a fel chuan a tawk" awlsam fe a ka tih chuan a ner nang a, "Chutiang a ni ngawt lo, tun angah chuan min chawm zo tu neih a pawimawh, keipawh inchhir ruk nak alaia.." a ti niah niah a, a pasal nei a inchhir thu a la sawi ngai miah lo a, chutia a rawn sawi phawng chu mak ka ti lek lek a ni.




"Tinge, pasal neih chu nuam i ti viau emaw tih a?" a nui tawi tak a, "Nuam vek bik nang, kan inchawm zo meuh lo anih hi, a tir te kha chuan dawra rawn inhnamhnawih leh ka tum tawh lo kha a nia mahse, loh theihlohin ka pawt buai leh che anih hi" a ti nghat nghat a, hnual rawih hmel a pu bawk.




"In ṭang dun anga, in pahniha in thawh theih te chuan in nghei bik nang" ka tih laimek chuan hrechhuak thut niawm tak hian min rawn en a, "I lo duh leh bur ange, hriat chian tum hmasa la, tun ang kum tawh ah chuan thlan sual a chi tawh lo, anih loh chuan i bantlang a ni tawh mai, a lo retheih viau phei chuan a neih chi miah loh" a ti zung zung a, chulam kher kher chu ka sawithui pui duh lo, ka enghelh ve loh lam tak a ni.




"Prof.Tihdanthiama aia hnasang zawk leh hlawh ṭha zawk han nei thei la ka ti a sin maw le" a rawn ti chhuak leh hlawl a, ka va melh kawk ringawt.



"Ringawt a che" ka ti zui hlak a.



"Prof aṭanga Mistiri chu.." a lei a chhuah zauh a, tun lawkah min duhpui thu a sawi hlut a, a tih dan chu ka ngei tak tak a ni, min tih phur ve hman tawh tehreng nen, Ufamkima chanchin sawi chuan ka Mood a chhe nghal vek zel tih a hrereng si a.




"A hna thawh lamah ka buai lo, mi fel leh ṭha, min hmanagaih tak tak tu anih chuan rethei mahse ka pawi ti lo, hna te chu keipawn ka thawk thei a lawm" ka ti leh mai a, Ufamkima chungchang chu ngaihtuah zui loh hram ka duh, Usamu-a nen kan inbiak hnuah ka la ngaihtuah chhuak miah lo anih laiin min hriatchhuah tir leh hlawl a, tlem chuan ka awm a ti nuam lo deuh a; Usamua laka ka inthlahrun vang a ni pakhat.




"Tihdanthiama te nupa in a hriat hunah engtin nge an ngaih ang tih ka lo ngaihtuah vang a lawm, kei te chuan ka duhpui reng che" a tih leh pawh chuan ka chhang zui tawh lo. "Inchungah ka han chho lawk ange" ti leh thawh ka rual a, engmah phei chu ka han ti lo, kan thilsawi te chu ka ngaihtuah let mai mai a, USamua call lo lut chuan ka ngaihtuahna a la peng ta chauh a, ka thil ngaihtuah kual na lamah a Message ka la chhang lo tih ka hrechhuak chiah bawk.




"I in eipuar ve tawh em?" tih angreng min lo zawt a, engthil nge a ei ka zawt let thuai a, Sachek leh Paratha a ei a ni awm e.




"I puar em?" ka lo ti var a "A tih ve theih mai" a puar vak lo anih ka ring deuh a "I puar lo a ni maw?" ka ti leh kher a. "Sa hi ka ngaina ve vak lo a, sa tui hi ka ngaina ve deuh " a tih chuan ka rinloh lam daih a ni, mipa chuan sa an ngaina viau vek turah ka lo ngai a.




"Naktuk aṭangin i dawr ṭhenawm ah kan rawn thawk ang, nitin kan inhmu thei maithei a ni" a aw ah chuan phurna a lang a, keipawh ka phur khawp mai, a chhan chu kan in ngaihzawn tak hnuah kan la inhmu leh miah lo a, ka helhhawlh rualin ka zam tel bawk, kum 28 mi hian kum 18 rilru lek ka pu thar leh a ni ber e.




Tlaiah chuan kan haw har viau a, Usamua pawh chuan min la rawn be leh miah lo a, an hna an laklawh anih ka ring deuh, in kan thlen hnu ah ka haw tawh thu Message-in ka hrilh a, chhanna ka dawn meuh chuan dar 9 a pel leh der tawh a, a Phone hi a en khat viau em mawni! Ka ngaihtuah neuh neuh a, zep loah chuan ka duhkhawp lo khawp mai, ka rilru zawng zawng pek ka duh a, beiseina sang tak ka nei bawk. Mahse, tuna kan awmdanah hi chuan ka beisei ang thil chu a hlat riauin ka hria a ni.




"Kan dawr ṭhenawma i lo thawh hunah chuan chaw chhun kan eidun thei ang chu ti raw?" ka ti tawl a, nitin chuan ka beisei ngam lo nain nikhat te chu hun a rawn nei ve thei turah ka ngai.



"Helper pathum ka nei dawn a, a hranga thil ei chu a fel lo deuh ang" tih zawngin min chhang a, 'nidangah kan eidun dawn nia' a ti hauh lo lehnghal.




"Anih chuan nidangah thil i lo la eidawn nia, thil tui deuh ka lo siam ang che" ka thil sawi duh kha ka sawingam mai lo, thil ho mai mai ti a ni lo a; hna thawk a ni bawk si, hmeichhe dawh theih lo lutuk ang mai a rawtna lo siam chu em a ka ti ve deuh.




Zan dang zawng aiin kan inbe rei lo a, a reh vung vung vang chuan a muhil a nih ka ring a, a chau deuh pawh a ni maithei. Zingah min lo Call a a rawn in sawifiah ve luam a, "Chaw chhun ka lo ei thei dawn si lo a, tlaiah ka thlah zawk mai dawn che nia" a tih chuan ka phur leh viau tawh, "Hun awl i neih veleh min lo be dawn nia" tiin ka chah ve thlap a.




Dawr ka thlen chuan ṭhenawm dawr chu a la inhawng lo a, nidang ah chuan an lo inhawng hman tawh ṭhin. Mahse, sana ka en chuan dar 8 chauh a la ni tih ka hmu chawpchilh a, keimah zawk ka hma lek chu niin.




Pa Rela nen Coffee kan in dun lai mekin ṭhenawm dawr inhawng ri chu ka hria a, vawiin chu pawn lamin rilru a la viau mai. Samuela chu a rawn penkawi hmasak ka rin tehlul nen dar 10 thleng pawhin a hmel ka hmu lo a, a lo thleng tawh ngei chuan ka ring a, ngaihtuahna a luahin min mawlh ve reng bawk.




Chaw chhun eihun velah Umawipuii a lo thleng a, kei inchung lamah ka han ṭhu a, bathlar aṭang chuan ṭhenawm te dawr kawt chu a lang chiang hle a, ka zuk hawithlak laichuan hnathawk tlangval pahnih hian Pickup hnung aṭangin hmanrua an lo thiar thla mek a, pakhat zawk chu hman zana kan ina lo leng Muantea ngei kha a ni.




Ka en reng laichuan Samuela chu a lo chhuak a, an hmanrua vel zawn luh pah a kan dawr lam a lo hawi chu ka zuk hmu fuh hle bawk. Min hmuh ve lemloh vangin ka thlir ta reng a, a rit chawi lai te chu hmuh a nuam riau lehnghal a, keimah te chuan ka nui ka nui mai.




An inthiar luh fel hnu chuan Muantea nen khan an lo chhuak leh a, a ṭhianpa zawkin Pickup driver a biak laichuan kan dawr lam lo hawi lehin a Phone a phawrh a, ka Phone hum lai chu a lo ri ve chiah bawk a, phur fahranin Call chu ka chhang a, "Thil i ei tawh em?" tih pahin kan dawr kawt lamah chuan ka pen phei hlek a, ka lo chhan laimek chuan ding leh rihin a kawr hma leh kekawr mawng te chu a bengfai thuk thuk a, ka nui chhuak ṭep a ni.




"Ka bal angreng lutuka, ka lo lut rih lo mai ang aw" a ti zawi sup a, chuti chung chuan ala inbengfai pah reng tho.




"Tlaiah chuan ka lo nghak dawn che em?" nuihza insum deuhin ka lo ti a, "Min lo nghak la, kan bang har vak lo turah ka ngai" inchung lam a rawn hawi dawn tlata ka hriat vangin ka ṭhu pil zawk a, a kalsawn niin ka hria, ka zuk hawi leh laichuan Pickup bulah a dinga, min hnungchhawn zawnga a din vangin a kekawr mawng bal te pawh ka zuk hmu thei.




"Thil chu ei rawh...keini pawh.." a tih laimekin "Awi ha...a mawng khu ka ben sak chak lutuk" Umawipuiin a rawn tih chuan Phone chu ka hmet tawp rang ngei mai. Samuela lah chu a rawn inher vut a, Umawii ṭawng kha a hria ni ngei tur a ni inchunglam chu a rawn hawi chho rang hle bawk, zah zelah ka lo Bye Bye ta ringawt chu a nia, ka zak ru chem chem lehnghal..




Tawi te hian min rawn nuih a, chutih laiin a ṭhianpa zawk kha a lo khi hui thung. "A mawng a khal rap.." Umawiin a tih leh chuan ka melh rawm a, zaizira thil han hrilh ve lah hian a hrethiam duh lo der tlat ṭhin.




"Mipa mawng khal hi ben sak a nuam a nia aw" a tih leh phei chuan ka ner nang a, "A khal thlawt lo, in pa Sangzuala mawng anih chu khal" ka tih laichuan thlanglam a la hawi reng a, Samuela lo kal hnai ka hmuh chuan ka thil sawi a hre pha ang tih ka hlau leh hnuhnawh a, "Ṭawng ring thei si, a hre phak a nga sin" ka ti kha kha, ka sawi zawh rual rualin "Thingpui lo in kawi rawh aw" tiin a la au tak deuh deuh a, ham ham zel hian a....




A rawn hawi chhoh leh chuan a lai ve deuh tlatin ka hria, engmah sawi loin min rawn nuih ringawt a, chumi hnuah a ṭhianpa nen chuan min luhsan a, Umawiin 'A mawng a khal' a ti kher chu ka duh vak lo, Usamua chu a paliana a pian nen a inrem thlap zawk a, Usangzuala mawng anga mawng ṭawih khal a ni ve lo bawk.




"A hmel leh pian en chuan a ngaihzawn awm anih kha, hna ṭha deuh nei se chuan i chang lo chiang sa" meinei zeta lo ti tu chu ka melh rum viau a ni, hna ṭha a tih chin chu eng ang hna nge ni ang aw ka ti rilru a, Mistiri hna chu hniam a ti viau tih lah a lang reng bawk si.




"Keimah hi min han teh zawk teh, mi hna leh an nihna a buai aichuan keimahni lam zawk hi in relfel ila, thil chu a rem vek zel a lawm, Usamua nihna zawng zawng te pawh hi ka duhzawng tak a ni maithei a nia" tiin nuisangin ka lo chhang a, maithei ka ti tak nain Usamua hi ka duhzawng tak ka lo zawn ruk ngei kha anih ka ring, mi tu emaw ka rilruin a nghah ṭhin kha amah ngei hi ni bawk sela ka ti a ni.




"Enge i duh chhan ber ni a, hmelṭha tih te mai mai hi chu maw, inneih hnuah chuan engmah a ni tawh lo, pawisa a awm loh chuan hmel pawh a ṭha thei lo" fiamthu titak deuh hian a ti leh a.




"Amah ah danglam ka zawng hleinem, keimah a danglam a awm vangin a lawm ka duh" ka tih chuan "I ka a kua a; i sawi ve mai mai anih chu" tih pahin awihloh hmel zetin min en bawk. "Usamu a chu In ang mai a ni, a bulah chuan ka hahdam riau zel, ka awmna hmun tur dik taka awm ang mai ka ni" chu thu ka sawi laichuan nuam tihna riau kan nei a, Samuelan ka hnena a sawilai ka ngaihtuah let a, 'In ang mai i ni' min tih laia ka rilru awmdan kha chiang takin ka la hre thei.




"I ti fuh ve tawh em ang chu maw, pathlawi a nih lohna hrim hrim pawh a ṭha.." a tih leh hnuah min luhsan a, bathlarah chuan dingin kawngpui lam chu ka thlir a, ngaihtuahna a kal thui duh khawp mai, tunah chuan hlauhthawnna engmah ka nei lo, rah sual palh hlau reng renga ke pen aichuan engkim tuar inhuama hmalam pan ka duh tawh zawk a, thawh leh ngei pawh ka duh, Usamua hi thawh leh chhan tlak ṭha takah ka ngai bawk.




Kan eisiamtu thar khan chhun eitur tui deuh min lo siam sak a, Customer awm tlem lai chuhin choka ah kan ei khawm laih laih a, eisiam a thiamin kan Menu thar te pawh fakna hlir kan la dawng a, Pa Rela nen lah an inkawm ngeih bawk a, a tir aṭangin a hlawh pawh kan tisang viau nghe nghe.




Kan thil ei zo ka va chhuak phei chu Urinmawii a lo awm a, Counter bulah Umawipuii nen an lo titi dun a, Samuela chungchang a sawi tlata ka hriat vangin ka pan phei rang hle bawk. "Mistiri khan nithum velah chuan an zawh mai a ring a, ka u fanu te pahnih dawr ka nghah tir a, keiin an hnathawk ka vil a, mizo chu an fel a, vai ho anga vil vak pawh an ngai lo" a ti siam siam a, an bula ka din rual chuan Umawiin min lo mitmei a, ṭul lo lo a sawi ang tih ka lo hlau leh viau tawh.




"Mistiri chhelo deuh chhawr te chuan vil chawt tur a lawm" min melh ralh chungin a ti leh pek a, Urinmawii sawi phur zawng tak a ni lehnghal. "Chu vang a lawm an mahni kher ka tih tir, in dawra an thawh lai pawh khan tlangval ho kha ka fiam zauh zauh ṭhin a; mahse, a Mistiri ber saw chu a ṭawng mawh a nih saw, biak te hian min chhang tawh dawn lo emaw tih hnuah min chhang chauh zel" a ti nghal bawrh bawrh a, "A va chut awm ve" Umawiin a lo tih chuan ka va melh rang khawp mai.




"A chut pawh a ni lo ang; hna a thiam emai, a induh anih dawn saw, ka kherh buai chak zawng tak, han kherh tak tak ila chuan min atchilh leh hle sia nga" tiin a nui har har a, a hnung lamah hmui ka lo pet sawi nang nang a, Umawipuii nuih insum chu ka va melh rum hle thung.




"I chhaih lai pek a ni lo maw, nang hi i zei thei bawk sia" Umawiin a ti leh a, "A lai pawn ka hre lo e a, a tum bur reng ringawt a, chhaih pawn min en ṭha duh vak lo, hetiang hi ngaihzawn an nuam duh, an nghet churh zel, ka tleirawl laia ka bialpa ang deuh" a ti leh ham ham a, "Chhuah chi miah loh a nih chu, in sak te pawh in tum a ni lawmni, bialpa Mistiri neih hun laitak" fiamthu ti tak deuhin Umawipuiin a lo ti leh zel a, Urinmawii lah chu a phur tawlh tawlh emaw tih tur a ni.




Dawr aṭanga a chhuah dawn te chuan "Nuthlawi zunah kan uai zawr tir hnap ange" tiin a nui phei bawk bawk a, a liam chiah tih ah Umawipuii a rawn nui phuh ṭhawt a, Urinmawii han bawl kual hi hman aṭanga a hrat tawh a ni, Usamua chhaih tura a ti kher erawhin ka nuih a ti za ve vak lo.




Urinmawii hi kawng ṭhenkhatah fing viau e ti loin bawl nuam tak a ni lawi a, fak a lawm em vang hi a ni maithei Aumawii hian a bawl hnehsawh riau ṭhin, a incheina te hi a faksak luam a, Urinmawii hian tak tak emaw tiin Umawii hi a be ṭha em em reng bawk a, kei hi chu min hmuh chang pawhin min be ngai mang lo thung.




Tlai thim dawnah pawh ṭhenawm te chu an la buai hmel khawp mai a, Usangzualan Mampuia hruaiin an nu an rawn lam a "I duh leh haw hmasa la, kan rawn inkhar mai dawn nia" an ti tak nain Samuela chu ka la nghak ru ve deuh a, ka Call lah chuan a chhang thei der lo a, kawtah chuan dingin ka va thlek leh ṭhin.




Khua a thim chhulh tawh a, pawna ka va chhuah leh chuan an thawm ka hre mang tlat tawh lo, min hawsan daih em mawni le? Hmanhmawh deuhin ṭhenawm te dawr kawt lamah chuan ka phei a, ka thleng phei ṭep tih ah Muantea kha dawr chhung langthei china a ding ka va hmu leh sia; ka ding chawt a, let leh mai ka tum laia a rawn hawi nen chuan kan inmelh chiang hle bawk.




Let leh ngawt chi ni tawh hek lo, zak ru deuh chung chuan ka pen phei ṭhem ṭhem a, dawr kawngka zawn ka thlen chuan Muantea chu a lo pen chhuak a, "Khawiah nge i kal dawn a?" nelawm deuha tiin min lo nuih a, a din loh theih loh.




"Saw lai dawrah sawn thil ka va lei lawk" chhuanlamah dawt ka sawi ta ngawt a, inchhunglam ka va melh pah zauh bawk a, midang ka hmu mai lo lehnghal.




"In la bang dawn nange?" a lo bu nghat a, "Kan laklawh deuh a, kan zo har tawh lo ang" a ti leh a, a la ding reng tak nain kei chu ka kal vat a ngaiin ka hria, Samuelan min lo hmuh ka hlau deuh bawk nen "Ka va kal lawk" tih leh kal ka rual nghal a, kan kal hlat hnu chuan thawk ka la hluai a, ka thin phu chu a rang ringawt nia! Enge ka hlauh pawh ka hre chuang lo, ka awmdan chuan ka nuih te lam lam a ti za, kum 18 mi pawh hetiang hian an che nawi tawh dawn em maw ni.




Tum loh deuhin dawrah chuan ka va kal a, Mampuia ei tur nepnawi eng engemaw ka lei a, ka let leh lamah chuan Muantea pawh kha a lo lut leh tawh a, ka lawm ru ang reng, Urinmawii dawr chu chak deuhin ka kal pel ang ka tih rilruk laiin an dawr kawt ka thlen chuan ka ding leh dat a, Urinmawii nui har har ri chuan min pawt ding a ni ber e.




An bangchhak kil lamah chuan leihlawn an dawh a, Urinmawiin leihlawn a vawn laimekah chuan Usamua chu a lawn a, "Nupui i neih tawh chu ka va ring chiah lo e aw, i nei tak tak lo ang a" Urinmawiin a tih lang lang ri pawh chu ka hre pha.




"A nei tak tak a mi a, zep loin sawi teh u" tiin midang ho chu a zawt a, Muantea khan "A nupui chu ka la hmu miah lo" a lo ti zauh a, chutih laia Samuela lo chhuk chu Urinmawiin a mawngah a lo ben sak thlawp a, keimah zawk chu ka lo phu zuk lehnghal..! Chu nu pui reuh chu...Tenawm hian...




Hmanhmawh deuhin dawr lam ka pan a, ka thlen chuan Umawipuii te haw tumin an lo insiam mek a "Ka nu te inkhawm an duh sia, i hman tho bawka kan haw hma leh si mai ang" a tih chuan ka hnial lem lo, Mampuia chu ka thil leisak ka pe a "Keini pawh kan inkhar har dawn lo, inchung ka han enfel lawk ange" tiin inchunglam ka pansan a, inkhar phawt ila duh leh Samuela chu ka nghak tawh zawk mai ang, chuti anih loh chuan Customer an awm ve zel a, duh aiin kan tlai dawn tlat.




Dawhkan leh ṭhutthleng ka remfel zung zung a, tukverh ka khar ṭhat laimek chuan Stepa lo pen chho thawm ka hria a, a thawm aṭang chuan kan naute niin ka hre lo deuh a, a lo lan hma chuan ka lo thlir reng tawh. Beiseiloh deuhin Samuela a rawn lang hlawl a, Current ka lo ti thim ṭhen tawh bawk nen a hmel chu a lang rorum hle a, ka lampana a lokal lai te chuan Movie vela misual pa in a mi sawisak tur a pan lai hi a ang lek lekin ka hria, Urinmawii khan a lo chhaih kawlh deuh nge ni ka ti rum rum..!




Phawk fe a ka lo en laichuan "I hman tawh a mi?" tih pahin min kalpel vut a, kan tui Pipe vuahna lam chu a pan zui bawk, "Han ti êng lawk teh" a rawn tih chuan ka che chhuak ve chauh a, Light ka tih en hnu a a lam ka va hawi leh chuan chhuatah a lo bawk a, a bang verhna lai kha a lo bih mek chu niin.




"A put tawh loin ka hria" ka tih chuan a rawn tho chhuak a, "Put tawh lo, heti hian kan char hnan dawn nia" tih pah chuan a in bengfai a, a kawr leh kekawr velah chuan rawng a kai nuan a, tum loh deuhin a mawng bawr chu melh a awl leh nghal. Urinmawii pek khan...awi a..zahthlak zawk hian.




Min rawn pan hnai tih ka hriat rualin ka ding ṭha sawk sawk a, ka bianga a rawn fawh chuan ka zak ve chem chem thei, hnai deuha min en pahin min nuih a, a nui mawi bawk si. "Nula Senior zakzum maw.." a tih chuan min ti zak zual sauh.



"Nula senior ka la ni lo, kum 28 chauh ka ni aw" ka ti ve tlat.



"Nikum khan kum 28 ka ni i ti tawh si a" nui suk chungin a ti leh a, "Kum tawpah bak 29 ka ni dawn lo" ka ti leh hram a, "Min sawi upat phet tum suh, kum 28 ka la ni a lawm" ka tih leh chuan a nuih a zat hmel viau.




"Vawiin chu i van hmelṭha ve" nui lek lek hmel a put vangin ka lai leh viau tho. "Nidangah ka hmelṭha lo a mi?" lai lo ang taka ka tih chuan min rawn hnaih sauh a, "Ka kawr a bal lutuka, mahse, ka fawp tho ang che" tih leh min fawh a rual a, ka inring hman meuh lo a ni e..




A banah chuan ka uai deuh titih a, chuti anih loh chuan dawhkanah chuan ka mu ringawt dawnin ka hria, ka thinphu chu a rang hle a, min fawh laia a taksa ṭang deuh ṭalh chu ka hre chiang hle bawk, a duhtawk angah hnu chuan ka chal a rawn tauh dat a, keiin thawk ka lo la kawk a, a rim chu ka hip lut chiang ngang mai, Usamua rim chu Paint Thinner rim a nam, a rimtui ka ti...




Ka kawngah kuah a min rawn hnaih leh takah chuan ka ke in chhuat a rap tawh hauh lo, dawhkanah chungah ka mu lek lek tawh, ka kiuin ka inbengkhalh vat a, ka hawi chhuak leh chiah chu ka hmui a rawn khar zui a, tun ṭum chu ka chhang let ve ta, infawh zei tak a ni hran lo mahse, mipa ka fawh tawh a zawngah chuan fawh a la nuam ber chiang a lawm.


(Zawmna)



Inhnuaiah a ṭhiante pahnih khan an lo la nghak a, min thlah tur thu a hrilh hnuah an haw san a, keini pawh kan inkhar chu a ni zui der, kawngka bula min lo nghah laichuan Pa Rela bulah dawr lo khar turin ka ti a, zingah a kal hma ṭhin vangin dawr chahbi Spare hi a kawl ve mai ṭhin, kal hma loh chang ka ngah ṭhin vangin ka tan tak pawh a remchang khawp mai.




Kan inzui chhuak chu inhnaih fe hian kan kal dun a, a ngawi vung vung chu ka melh leh zauh ṭhin, a hmel ka en apiang chuan ka thinphu lah chu a rang dup dup a, ka hlim ru veng veng lawi bawk si. Kan ṭhenawm te dawr kan kalpelh hnu chuan ke a min hawpui a tum a nih ka ring a, ke a haw nan em chuan kan veng chu a hla deuh a, ani hna thawk chau ve tho a ni vei nen; Taxi lak mai tur em maw ni, a induhtawkna ka tih hniam sak erawh ka hlau deuh a, ka sawi ngam mai lo.




Thui vak lo kan kal leh hnuin kawng sirah a ding a, thil awmzia hriat tuma ka thlek chuan Scooty a nei tih ka hre ta thuai a, kawngsira Scooty dum lo ding chu a ti nung nghal vut vut bawk a, a palian angreng bawk si a Scooty chu a lang te rawih thei mai, a inhmeh lo hle bawk.




"Lo chuang rawh le" a tih takah chuan ka chuanga; amah phei chu a la ṭhu ve lo, "Tun ang hunah hian Jam a awm lo a, a haw hun chiah zawk anih hi" tih paha a rawn ṭhut chuan a hniam suai suai lehnghal a, a ke a thep nge maw ni!



Kan tlan chhuah hnu te chuan ka awm a nuam lo ru deuh a, kan chuanna chu a ke a thep mai dawnin ka hria a, ka ṭang ṭeuh reng. Amah lah chu a ngawi vung vung a, ngaih ṭhat lohna a nei lo nihmiang ka ti mai, a tlan chhuah aṭangin kan la inbe leh miah lo bawk.




Min fawh lai kha ka ngaihtuah let neuh neuh a, a hmui lum thar thar leh a rim nam châk châk te, a thawk la ri leh a lungphu te chenin ka la hre chiang ngang mai, chutia ka ngaihtuah laichuan min rawn thlek a, "I lungawi em?" a rawn tih ri ah chuan hlauhthawnna leh min ngaihsakna ri ka hre tel a, a zawhna erawhin min ti bangbo deuh thung.




Side glass aṭanga min lo en chu ka va hmu a, Satel Helmet a khum vangin a hmel chu a hmuh theih a, ka hriatthiam loh hmel a ti deuh nge ni "Ka fawh vang che khan i lawm lo em loang chu" nui suk chungin a rawn ti leh a, chutiang rilru ka put loh zia chu a hre ru vekin ka ring, min fawh lai pawh khan ka chhang let ṭha viau a nih kha maw....




Ka chhan hma chuan ka kut a rawn ban a, a kawngah chuan min vawntir zui a, ka hmel chu hmu thei ila ka sen ṭan ṭan ngei ang, ka khawr bawk si; ka lai ṭut zel mai.




Kan in thlen hma dawr leh kan in inkarah a dinga, ka chhuk fel chiah tih ah ka kut rawn vuan lehin min pawt hnai deuh a, min en dan chu ka ngei zawk tak tak a ni, ka lai tih a hria a lawm, sir lam ka hawi ringawt chu nui ruh ruh chungin min thlek a, "Ka lo en liam ang che" a ti nain ka kut a vawn chu a thlah chuang hlei lo a.




"Khawi, ka kut thlah la" ka sawilai mekin ka kut chu a hmer nghet salh a, sawi duh nei ṭeuh hmel a pu in ka hria, min en leh vung vung hnuah "Kal rawh le" tih te zawng chu sawiin ka kut a thlah a, mangṭha zuiin ka kalsan ve mai bawk.




Ka inbual laichuan khuma ka Phone dah chu a ri leh ṭhin a, min tih hmanhmawh deuh vangin rei pawh ka inbual awm lo e, Samuela a nih ring deuh a ka va en chuan a lo ni lo nasa mai a, beisei loh lutukin Ufamkima zawk a ni!




"Naktuk tlaiah kan rawn kal dawn a, i dawr thar lah chu kan la rawn hmu mang silo a, hrilh lawk che ṭhain ka hria a" a tih chuan lawm tur nge pawh ka hre lo, ṭha tak leh pangngai takin ka chhang a, ka rilru erawh a nuam zan lo thung, URosy hmel ka hmuh hreh vang te pawh a ni maithei.




Kan inbiak zawh hnu rei pawh a la ni lo ang tih ah Urosy Message a lo thleng a, "Naktuk ah i dawrah thil lo ei kan tum a, i ṭhianpa te nen ei ho ila" a tih chuan naktuk hi Valentines day a ni tih ka hre chawpchilh a, chhanna han pek mai dan tur erawh ka hre lo, rei deuh ka inngaihtuah hnuah "Ka ṭhianpa ka lo zawt dawn nia" ka ti ta ngawt a, Usamu-a hrilh chi a ni a ngem tih ah ka buai leh deuh a, Ufamkima nenna kan inkar a hre tawh bawk si a, chu loah inhmelhriat sa an lo ni vei nen ka inthlahrung deuh tlat a ni.




Zan mut dawna kan inbiak laichuan ka ngaihtuah rauh rauh a, a thilsawi pawh hre mang loin ka lo ngawi leh vung vung ṭhin, ka sawi duh angem; duh lo a ngem tih ah mawlh chuan ka inkhap buai a, naktukah Ufamkima te an lo kal si chuan ka lo chhawn ngei a ngai dawn a, bang piah lawk; dawr ṭhenawm maiah Usamua a awm ve dawn bawk si, hrilh ve mai chu a ṭha berin ka hria.




"Naktukah ka ṭhiante nupa an lo kal dawn a, lo tel ve ta che, i hman hun kan lo nghak mai che a nga" tiin pehhel angreng takin ka sawi a, "Ka tel na chi a ni ang maw, hnathawh kawr nen ka ni dawn a sin" a aw ah chuan a chak vak lo tih ka hre thei a, ka rilru pawh a buai khawp mai.




"Hmuh che an chak lutuka; mahse, i hman loh pawn a pawi hran lo a nia" ka ti leh rih a, lo tel se ka duh na leh tel lo se ka duh na chu a in zat reng maithei a ni.




"A pawimawh viau chuan tel theih awm tak a nia, nangman nuam i tih loh ka hlauh vang zawk maw le" a ti leh a, chu tak chu keipawn ka lo ngaihtuah a, ani hnathawk hah lo pawh buai chu thuhran ka bialpa hlui te nena thil eitur kan ni a, nuam a ti dawn lo tih lah hriat sa a ni, engtin nge niang aw....




"Zingah kan sawidun leh dawn nia" tiin kan inbiakna chu kan ti tawp rih a, Urosy bulah chhuanlam siam rih mai ṭhain ka hria, sawi dan tur ka ngaihtuah ṭhin a, ka ngaihtuah hleithei meuh lo. Zep loah chuan Usamu hi hmu ve se ka duh a ni, a pasal nen kan inkar a fel tih pawh hmuhtir ka duh a, kan inkar ṭha lo tak pawh a reh zuiin ka ring bawk. Ka ngaihtuah laimek chuan ka Phone a rawn ri leh a, Usamu bawk chu niin!



"Naktuk hi ni 14 a ni maw?" a rawn ti khauh a.



"Aw....V-day.. a nia" keiin ka lo ti ban charh a.




"I sawi si lo a; ka lo hre hleinem.." a tih chuan a nui deuhin ka hria, "I hman loh chuan a pawi miah lo, ka ṭhian te nupa khan an rawn rawt chawp lutuka, ka lo pha thei tho a nia" ka ti leh a, "A ngai hleinem" a rawn tih chuan ka hriatsual emaw ni ka ti hial a; mahse, ka hriatsual miah lo.




"Chutia Valentines day te anih si chuan hman ka lo tum dawn nia" a ti nawn leh a, ka lawmzia chu pui tak a ni.




"Hnathawh kawr nen pawh nila ka zak miah lo a nia aw, nangmah zawk khan nuam i tih loh ka hlau deuh a, keima lam chu venthawn a ngai lo a nia" tiin ka rilru dik tak ka hrilh a, "A khai...in thil ei te ka ti tui lo anga sin" a tih chuan ka rilru a buai leh nak tawh.




"Naktuk chu ban hma ka lo tum dawn nia" a rawn tih leh takah chuan ka thaw huai huai a, a bang hma thei anih chuan a tihzia khawp ang chu.




"Tu i ṭhian te nge, Classmate te em ni?" ti a min zawh chuan ka inthlahrung khawp mai. Ufamkima hming sawi loin Urosy hming zawk ka sawi a, "Ka ṭhiannu Rosy te nupa an nia" tih zawngin ka sawi a, a hmuh hunah a ngai haw em lo turah ka ngai.




Zing kar hma deuhah dawrah ka kal a, Umawipuii pawh Phone-in lo kal hma turin ka hrilh a, dar 8 bawra midang an lo thlen chuan ka lo inhawng fel diam tawh a, hmun te pawh ka lo tifai tawh nghe nghe, Valentines day pualin Menu thar chhawpchhuah ka rilruk a, ka mikhual te eitur pawh tuihnai tak buatsaih sak ka duh a, chawhma chhung chu choka lamah ka tap a ni ber.




Umawipuiin inchung lam chu inngaizawng te pualin a ti a, a lo chei vul ve chuk bawk a, hetiang ni bik ah hi chuan kum dangah pawh kan inhawng rei thei hle a, fakna kan tih hma hauhin kan dawr chung pawh miin an hre tam ve viau tawh.




Thlanglam tukverh bul dawhkan chu ka hauh thu ka sawi chuan a chhan min zawt nghal pang a, ka zep lem lo, zep pawh ni ila a hun a lo thlen hunah a hre leh dawn tho a; awmzia vak a nei chuang lo ang tiin ka hrilh ta vek a, a lo phur viau ka rin laiin a hmui a pet sawi chiam a, "Mistiri-a te chuan hna a thawh daih saw, bal deuhin lo kal se i tia mi a?" a ti kha kha a, a tui loh hmel hle bawk.




"A bang hma dawn a lawm, a hmanhmawh thlak loh a" ka tih pawh chuan "Mi hnathawh hah lai lai a, Tihdanthiama a rawn nalh leh zaih bik awm sia; i sit leh rum rum ange aw, in pahnih chauh te pawn ti zawk ula, an ni nupa sawm kher te chu" a ti leh a, ka sawm a nih loh thu leh an lo tum sa thu te chu ka sawi ve mawlh mawlh a, "Ti khawm rih lo rawh u, a chi loh ang, Mistiri-a pawn nuam a ti lo ang" a ti leh zel a, a sawi nawi; a sawi nawi takah chuan ka awm a nuam lo ve riau tawh.




"Mistiri-a hi chu a hmel hi ka khawngaih chi a nia, a zah zum hmel bawk si" a tih leh chuan awih lo deuhin ka va melh a, Ufamkima a tel dawn vangin Usamua a inti ṭan der vel tih ka hrereng, a tih loh lamah hi chuan a he ti tlat zel.



"A zakzum reng reng lo, a puitling lutuk aw" ka lo tih chuan min chang loin a ngaihtuah vung vung a, "Famkima te nupain an hnuai en theih miah loh tur han ngaizawng zawk la ṭha tur" a ti leh hap a, he nu pui hian tu lam nge a ṭan pawh ka hrethiam tawh lo e a.




"Engah nge an hnuai en ngawt ang, an ni pawh mi puitling an nia lawm" ka ti leh a, a thilsawi awmzia hi hre tho mahila a rilru puthmang zawk hi ka hrethiam pha meuh lo, ṭhian angin thil kan ei ho dawn a, Umawipuii rilru ang hi chu a tu a te mahin an put ka ring lo bawk.



"Msa zawk kha sawm ta che vawiin angah te chuan" a ti chu ka awih lo lek lek a ni.



"Engah ngawt maw, bialpa ka nei ve reng a..." ka sawi zawh hma chuan min lo pawt chat leh a "Ti zawk daih rawh, ani kha chu a Class a sang ve thawkhat bawk a, an hmuhdan che pawh a dang khawp ang" a nui hmel chu ka en phawk hle ringawt a, chu kher chu ka duh loh zawng tak thil a ni.




"Usamua chu eng nge a ṭhat loh na, hnathawh kawr nen lo kal pawh nise keichuan pawi ka ti teuh lo mai" ka ti nghal pang pang a, "I tih loh a hnu, hnathawh kawr nen kal tir la, a zak tur te chu nangmah a lawm" a ti deuh hmak a, vawiin chu a rilru hi a mak ka ti tak tak a ni, thurawn ṭha tak tak min pe ṭhintu ka Umawipuii kha ang tlat lo.




"Nangmah zawk hian Usamua hi i hmusit a ni lo maw" ka ti erawh a duh lo hle, "Hmuhsit lam anih loh chu, Tihdanthiama te nupa hmuha i mawina ka ngaihtuah vang zawk a lawm" te chu a la ti tak deuh deuh a, Usamua laka a rilru puthmang erawh a puang chiang viauin ka hria.




"Umawi, Usamua hi ka bialpa ania, amah hi ka mawi leh mawi lohna ringawt a ni lo, keimah hi a mawi leh mawi lohna ka ni ve tho a nia, bialpa mawhphurhna a neih rualin kei hian a mawhphurhna ang zat chiah bialnu mawhphurhna ka nei ve, vawiin hi inngaizawng te ni a nia, a tana awm tur ka ni tihte i ngaihtuah ve em, mahni chauh in ngaihtuah ṭhin mi ka ni lo tih i hriat kha" ka ti ta fak fak a, min chhang zui tawh lem lo nain eng ualah a ngai leh pek lo ang.




Dar hnih vela inhnuaia ka zuk chhuk laichuan mi an lo tam hle a, Counter lo ruak ka hmuh chuan Umawipuii ka zawnga, pawnah Samuela nena an ding dun ka va hmuh chuan rang lutukin ka pan phei a, ka thleng phei hman ṭep tih a an thilsawi vang chuan ka ding dat a, ka pen leh tawh lo chiang hle.




"A bialpa hlui a nia, tum lo deuhin a inbarhlut a, hmingchhiat zawng zawng a phurh phah a, keichuan an nupa hi ka lawm vak lo" ti tu chu Umawipuii ngei a ni.




"Nizanah a sawi a, ka hre tawh a lawm" Usamu-an a tih chuan nizanah engthil nge ka sawi ka hrechhuak zo hauh lo.



"Engtin nge a hrilh che a?" Umawipuiin a lo ti he haw a.



"A...hetiang thuartham ah hi chuan ka sawi ve tur a awm loin ka hria, kal tura min duh chuan ka kal anga, a duh lemloh pawn ka vui hran lo" Usamuan a tih chuan ka lo ip ru ṭeuh a, engtia thui nge an lo sawidun tawh ni!




"Kal rawh, a sawm che a lawm, chu lo ah a bialpa i nia, Tihdanthiama....Oh...Prof.Famkima nupui lakah pawh a insawifihlim ve na tur i nia lawm" Umawiin a tih leh chuan ka inpetruh ṭeuh a, Usamua chuan ka sawm chhan chu an ni nupa vang chauh ah a ngai ang tih ka hlau viau a, Umawipuii sawidan lah chu..




"Ka va phei phawt ange" tih pahin Umawii ṭawng leh tum chu a inher san vut a, Urinmawii dawr lama a pen phei chu ngawi rengin ka lo thlir a, ka duh loh dan deuhin min ngai dawn anih hi.



Umawii lo inher chu a phu deuh zawk a, keiin rum theih tawpin ka lo melh bawk. "Engthil nge i lo hrilh kha?" ka aw chu a chang viau mai, ka thinur takzet.




"Thil pawi engmah ka sawi lo" a inthlahrung hmel chu ka la melh rum viau tho. "Engthil nge i lo hrilh?" ka ti vin leh ṭhat a, ka va thlen hma khan engthil chiah nge a lo sawipui chu rindan ka nei thiam vek tawh zawk.




"I bialpa hlui te nupa an nih thu ka hrilh a, a lo kal ve i tan a pawimawh thu vel...anih loh chuan..."




"Tinge chutiang i lo sawi a, sawi turin ka ti che a mi" ka aw te chu a khur deuhin ka hria.



"Au vak vak suh, midangin an hria anga sin" min rawn kalpelh mai a tum chu a banah ka man lawk a, choka lamah ka pawt phei dawr dawr bawk. Kan nula pakhat lo chhuak tur chu "Counter-ah lo va ṭhu rawh" tih leh Umawii chu nam luh ka rual a, tui khawihna bula ka pawh phei lai te chuan eisiam ho chuan min melh hrek hrek tih ka va hmu a, midang mitmei veng thei pawh ka ni rih lo.




"I hrilh vek em?" ka ti nghal thawr a, a lu a buk zeuh rualin thawk ka la hawk thung.




"Hei, ka hrilh hmain a hre vek tawh aw" a tih laiin a banah ka beng zawt a, "Tinge i hrilh, hre vek pawh nise tinge i hrilh kher, ka u i nia, a hnena i thilsawiin awmzia a neih thui dan tur te i chhut ve em.." a auin ka au a ni ber.




"A hre vek tawh tih tih pawh a, thil pawi engmah ka sawi lo" vin zeta a tih chuan ka mittui a hnam ringawt a, ka thaw a ipik zo vek tawh. "Engtin nge i sawi?" beidawng zetin ka ti ṭha leh a, ka awki pawh a ring ta vak lo, ka chhungril lam erawh a hrehawm takzet a ni.




"Famkima nupuiin a tih dan che kha ka hrilh maw le, a hriat vek a ṭha zawk, in inhmuh khawm huna awmdan tur pawh a hre zawk ang" awlsam fein a tih leh a, hrep hian a...



"Lalmawipui..." ka ti hap a, sawi tur pawh ka hre tawh lo.



"A ho lutuk, engmah hre loin a awm mawl tawp ang tih ka hlau a lawm, an thik turin an hmuh ah.." a darah chuan ka beng leh zawt a, "I mawl lutuk" ka ti chiam ringawt.



"A hriat a ṭha zawk, tikhan.."



"An thik turin engmah a ngai lo, an thik chu ka duh i ring em ni? An ni nupa lam chu kan buaina tur an ni tawh lo, Usamua rilru tur zawk ngaihtuah ta che, ka hmang ṭangkai anga a inngaih ka duh reng reng hleinem, an ni nupa thik a tan ka ti lo" ka ti leh sak sak a, sawifiah ngaihna pawh ka hre lo. Mahse, thil pakhat chiang takin ka hria, Usamua hi ka rilru zawng zawng ka lo pe tih hi, heng ka hlauhthawnna leh thinurna te hi chumi vanga lo piang chauh chu a ni bawk.




Tlai thleng chuan Samuela chuan min lo be lo a, a lo kal chu ka beisei ngam meuh tawh lo, Umawipuii lah chuan a ngai thutak duh der lo a, "A lo kal loh leh Msa kha Phone mai rawh" te a ti duh lek a, kan inmelh rum ngun hle ringawt mai.




Dar 5 velah Ufamkima te nupa chu an lo thleng a, Counter bulah dingin ka lo chiau au a, beisei ang aiin Urosy pawh hmuh a nuam a, a mitin zawn ruk a nei tih erawh ka hai lo, kan nula pakhat chu koin inchung lamah ka hruai chhoh tir a, "Ka lo zawm vat ang che u" ka tih hnuah muangchangin an inzui chho a, chutih laiin dawr ṭhenawm te inkhar thawm ka hre zui bawk.




Pawna ka va chhuah laichuan hnathawk ho leh Urinmawii chu dawr kawtah an lo dinga, kawngpui lam hawia Samuela ding chu ka en reng a, engthil emaw sawi a rei tawk fang an din hnu chuan Urinmawii zawkin a kalsan a, a ṭhiante an la awm ve vangin ka pawh mai hreh ve si; an in mangṭha a niang chu a ṭhiante pahnih chuan an kalsan a, chumi hnua ka lam a rawn hawi nen chuan kan in en chiang ta viau mai. Ka lo nuih var var laiin a nui ve hauh lo, chu chuan ka awm a ti nuam lo zual hle bawk.




"I chau em?" ka lo tih chuan tawi tein min nuih a, ka lampana a rawn kal phei chu chik deuhin ka lo en a, lungawilo hmel ka zawng a ni ber.




"I ṭhiante chu an lo thleng tawh em?" ka bulah rawn dingin ka mitah tak min en a, ka zam riau lehnghal.




"Aw, an lo thlen na a la rei lo, inchungah min nghak a" a ner sawk dawn emaw ka ti hman a, ka lo ip nasa mai bawk.



"Tum angin kan hma thei si lo a.." a kawr hak lai chu a bih vut a, Sleeveless pawl a hma a Marvel movie character lem chuang hi a ha a, "A pawi lo, ti khan a ṭha" ka lo tih chuan min en chiang leh viau tawh.



"Tak tak maw" a aw chu a thumin a chang lam mah a ni.



"Um...i inhmeh" nuihtlawn deuh chunga ka tih chuan awih vak lo hmel a pu.



"Anih chuan kal i la" a ti leh nghut a, 'Anih nih chu ni ang hmiang' ti hmel te pawh a pu deuhin ka hria.




Inchhungah kan inzui lut a, inchung kailawna ka chho chu ka hnungah min lo zui ve zel a, pheikhai a zang fahran lo a ni, tunah tak hi chuan ka rilru chu Ufamkima te nupa reng rengin ka rilru an luah lo, Usamua mawlh chu a ni, ka lakah a rilru a hel zo ang tih ka hlau a, min ngai dik lo mai ang tih te pawh ka hlau, kan pahnih chauha hun hman ka lo ti mai lo chu ka inchhir ru hle tawh.






(End of Chapter -7)



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 6th, 2022, 7:44 pm

ZUNZAM - by Ahmangaihi violette Khiangte



CHAPTER - 8




UFamkima te min lo nghahna lampana kan kal laichuan ka en leh zauh ṭhin a, a hmelah chuan danglam tehchiam a awm hran lo, kan thlen dawn hnaih ah chuan ka kalmuang deuha, chutih laichuan kan bul maia ṭhu hmeichhe pakhat hian Usamu-a chu a lo vuan chawt a, "Tehhlawl chuan, he lamah i awm em ni?" lo ti tu chu nula sapan lam deuh niin ka la hmuh awm reng ka hre lo.




"Awm ve reng e, i nu te an dam maw?" Usamua pawh chuan a lo ti var a, Ufamkima te ṭhutna lam ka va hawi leh chuan Urosy'n min lo hui zauh zauh chu ka va hmu a, an la inbiak laklawh em vangin nghak lo chuan ka kalsan rih a, dawhkan bul ka va thlen rual chuan "Khaw nge i ṭhianpa chu?" Urosy chuan a lo ti zat bawk.




"Min lo zawm ve thuai ang, a hmelhriat a hmu lawk a" nuisanga ka tih laiin Ufamkima chuan phawk lek lekin, "Ṭhianpa a?" a lo ti khauh a, a nui tak nain zawhna mitmengin min en thung, ṭhian ka nei dawn tih a hre lawk lo anih hmel.




Usamua dinna lam chu ka hawi leh zet a, kan ṭhutna lampanin a lo kal ve mek bawk. Kan bul a lo thlen rual chuan a ṭhutna tur ka lo siamrem sawk sawk a, Urosy lo nui var var chu enin "In damṭha maw?" nelawm deuh hian a ti a, "Ṭha a lawm" Urosy'n a en dan aṭang chuan inhmelhriat tir an ngai lo tih chu a lang reng tawh a, Ufamkima hmelah erawh mak ti hmel a la hmuh theih.




"Mimitei bialpa anih hi" Urosy'n a tih takah chuan a lo bu nghat a, a la hamhaih hmel viau tho.



"Tunlai khawi lamah nge i ṭuan a?" zangkhai takin Urosy chuan a ti leh a "Bang lehlamah mai sawn" Usamuan a ti sam et thung a.



"I nau te hi, eng nge an an a?" Ufamkiaman a tih chuan "An ṭha e" tih zawngin a chhang a, nuam a ti vak lo nge beh loh hmel deuh hian a ṭhu a, a hmanhmawh viau emaw tih mai tur hmel a pu bawk.




"Eng nge kan ei ang, in lo thlang tawh em?" ti a ka zawhna chu tuman min chhang lo, ka melh kual hrek hrek a, Usamua chuan ka lam a lo hawi a, Urosy erawh a nui var var reng a, Ufamkima lam ka va hawi chuan "I thlang thiam zawk ang kan tia, ka lo nghak che" a lo ti a, Menu chu ka ban ve zat bawk.




Urosy'n min lo thlan pui hnuah eitur ka chah a, kan chah bakah chuan Menu a tel lo ka lo buatsaih thu te chu ka sawi a, Urosy nui reng chu a chhan ka hrethiam in ka hria. Usamua chu a be seuh seuh reng a, pakhat lah chuan a rul tawk zelin a chhang a, eng thil nge a rilruah awm ang tih chu ngaihdan neih thiam har tak a ni.




Ufamkima chuan min en leh vung vung ṭhina, chutiang bawkin Usamua pawn, mipa pahnih te chuan kan dawhkan chu an uap rit churhin ka hria, sawi tur a vangin awm a nuam lo ru hle a, ka ipik ṭup mai.




"Engtin nge Mimitei nen in lo inhriat a?" ti a Usamua zawh pahin Urosy chuan min lo en a, Samuelan ka lam a lo hawi chuan tawi tein ka lo nuih ringawt a, engtin tak chhang ang maw ka tih rilruk laiin "Tlangval ka nia lawm, nula hmelṭha awmna te chu ka hre ve ang chu" a lo ti hmiah a, a chhan dan chu Urosy lawm zawng tak ni ngei tur a ni; a nui zui hak hak a, chutia Usamuan fiamthu a thawh takah chuan thaw a veng deuh huai mai.




Kan chaw eitur chu dawhkanah an rawn chhawp mawlh mawlh a, kan dawhkan chu eitur hlirin a khat hnuk tawh, "Vawiin chu Food Paradise ah kan kal a ni ringawt a lawm" Urosy'n a ti hluai a, ka hawi chhuak chiah chu Ufamkima nen kan mit a intawng chiang hle a, min en dan chu.. min en a piangin zawhna ngah hmel a pu reng a, en loh hram tumin ka pehhel ve reng bawk a, inhmatawna ṭhu reng si chu in en loh a har lam mah chu a ni.




"Bawihpui, Sa kha ei vak suh aw, khawi.. Sangha ruh kha ka lo then sak ang che" tih pahin Urosy chuan an pa hma a Sangha chu a ban zui zat a, an nupa in duatlai chu ka tan hmuh nuam tak an ni. Urosy zawk chuan titi pahin chawhmeh te chu a suah sak zung zunga, keini pahnih erawh kan ṭhu ngawidun kar a, Usamua chu a inkiltawih ve deuh nge ni a ngawi rauh rauh mai, han biak lumlam dan tur chu ka vai em em lehnghal a, nichin maia thil thleng vang khan ka khawr zo a ni ber e.




Dawhkan sir lama chawhmeh te chu suah sak ve duh viau mahila ka ngam tlat lo, a chhan pawh Umawii thil sawi vang bawk kha a ni, kan hma a ṭhu te hmuh a tan ka ti mai mai emaw a tih ka hlau a, ngaih loh lamah min lo ngaihsak daih ka hlau. Urosy'n a theihtawka a pasal a ngaihsak laia lo tih ve pawh chu a mawi lo deuhin ka hre bawk a, a tih thik te pawh ka ang ta ve ang.




Samuela lam ka va hawi laichuan kan hma a ṭhu te chu a en ve tih ka va hmu a, chutih laichuan Ufamkima chuan Urosy Bowl a lo pe mek a, heti ngawt chuan kan dik lo zo dawnin ka hria, ka kawppui lakah ngaihsakna tih lan ve chu a mawi lo bikin ka ring lo.




Bowl ruak chu la kang vutin ka ṭhu ngil hluai a "Usamu, satui i duh em?" ka ti ve ta thawr a, duh ai aichuan ka ṭawng ring lehta nghal a, ka lam lo hawi pahin lu a thing a; ka zak leh hnuhnawh angreng.




"Ka lo lak ang che" tih paha ka Bowl ken lai a lo ban chuan ka thaw huai mai, a chhan pawh satui chu Usamua lamah daih a awm a, min laksak nachang a hre hlauh chuan ka zak lutuk tur min hliahkhuh hlauh zawk a, Bowl min lo pek leh laite chuan lai deuh chungin ka lo ban a, Urosy-in min mitmei reng tih ka hriat vangin lai lo ang takin ka awm thung.




"In ve rawh, hnathawh hah chuan Bawngsa tui hi a ṭha a nia, a hrisel lutuk" ka lo tih chuan a nui mai a, "Nangman in ṭeuh rawh" damthluama tih pahin chawhmeh dang chu min lo suahsak zui a, tunah tak hian kan pahnih chauha dawhkan kil ka chak a ni, ani pawn ka ngaihdan chu min ṭawmpui ve ngei ang.




"Samuela chu i unaupain a sawisa nasa ṭhin che si a; mahse, hei a sawi ang lo hlirin ka hmu bawk che si" Urosy'n a tih chuan Usamua lam chu kan hawi ṭhap a, "Thiamthil ka ngah tih a hrelo anih dawn chu" Usamuan uang deuha a tih chuan ka nuih a lo za angreng.




"Mamit lamah i awm emaw ka lo ti a, i la zin kual ngai em?" Ufamkiman a ti ve leh a, "Zin deuh reng zawk" Usamuan a tih laiin "In van inhmeh dun tak, in mizia te hi a in ang dun reuh si, inkawp tur tak in nih dawn hi" Urosy chuan a lo ti leh hluai a, chutah an pa lam chu hawiin "I ti ve em, Samua hi Mimitei kawppui awm tak a ni" a ti zui zat a, Ufamkima hmel chu ka en rei duh lo.




Chawei khamah thingpui kan in ho leh a, ka boruak tawn a dang deuh bik nge ni rilru hahdam takin ka awm lo a tih theih ang, ka che te chu ka khawr hle a, ka thingpui in te chu ka intihbuak thul, sawitur lah chu ka van em em reng a, hmelhriat ṭha te bula awm e tilo chuan ka inthlahrung dek mai bawk, Usamua erawh engmah danglam a awm lo emaw tih turin a landan a ngai reng a, Urosy nen an inbiak pawhin a ṭawngkam a zangkhai thei zel a, a chezia pawh chu a zahawm hliah hliah mai.




Umawipuiin thei min lo chhawp sak a, amah kher a lo kal chu ka lo hrethiam mai bawk. Chutah, a kal lehnghal mai dawn emaw ka tih laiin kan sira ṭhutthleng awl ah chuan a lo ṭhu ve a, Samuela chu hnai set sawtah rawn en in "Sunday tlaiah Matei nen chaw lo ei ta che u" a ti mauh mai a, eng thil nge maw a rilru ah awm leh tawh ni, min ti bangbo hle ringawt!




Usamuan min lo en chuan chhan mai ngaihna pawh ka hre lo, Umawipuii bawk chu lo ṭawng lehin "I chawhmeh duh ber ka lo siam sak ang che, lo ei ngei ngei rawh u" tih leh thawh a rual a, a kal hma chuan Ufamkima lam chu a va hawi kher a "In puar em" tih pah chuan ala nuih tak sawng a, Urosy zawkin lo chhangin "In thilsiam a tui khawp mai, lo kal fo tur a ni" a lo ti var a, Urosy erawh zuk melh duh hlek lo chuan.



"Sunday tlai chu aw Makpa hual" tih pahin Usamua darah chuan a beng salh a, ka thingpui in lai ka lemsual lo chauh a ni, ka melh rum hma chuan a kal zui daih a, min ti zak zawk tak tak...




Rei lo te kan ṭhut ho leh hnuah inhnuai lamah kan inzui thla a, pawn thlengin Ufamkima te nupa chu kan va thlah a, "Nidangah thil kan la ei ho leh dawn nia" hlim hmel pu sarha Urosy'n a tih chuan ka lo aw ve mai bawk.




An tlan liam hnu chuan bathlarah kan ding dun ran a, sawitur a vang duh kher mai, insawifiah ka duh a; sawi dan tur ka ngaihtuah buai nasa mai a, engemaw tal rawn sawi hmasa se ka tan a awlsam deuhin ka ring.




A lam ka va hawi laichuan a Bag a zen ruk ruk a, "I hmanhmawh em?" ka tih chuan min chhang mai lo, ka en reng laichuan engthil fun emaw ni sei zit zet hi a rawn phawrh a, chanchinbua tuam ṭhat thlap Present bawm a ni a, "I ta tur" a tih takah chuan ka lo ban ve vat a, a tet ang aiin a rit zek lehnghal.




Kan chawei khawm tur ka lo buaipui a talangin engmah thilpek lam ka lo inbuatsaih ve der lo a, ka inthiam lo ru khawp mai. Hawn mai ka tum laichuan Ka darah rawn hmerin "Nakinah i hawng dawn nia, kal phawt ang" a lo ti a, "Khawiah maw?" ka tih chuan a nui suk ringawt.



"Kalna tur i nei a mi?" ka ti leh hap a.



"Kan inah kal ang" a tih leh chuan phawk deuhin ka en a, "Eng nge kan tih dawn?" ka ti deuh ha a.




"Thil ṭha lo deuh" tih leh kawt lama min nam a rual a, thil ṭha lo deuh engthil nge tih tur awm ang le, ngaihdan ka neih chhun lah chu an han ṭha lo em em lehnghal a, ngaihtuah thui chi pawh a ni lo.




A Scooty a kan inphurh chhuah hnu chuan "Inah chuan eng nge kan tih dawn?" ka ti leh ṭhin a, min chhang ṭha duh loin a nui leh mai a, ngaihṭha lo deuh chung chuan ka zui ve ta zel chu a nia, an in kan thlen dawn te chuan ka awm a nuam lo leh viau tawh.




An kawngkhar chu tala in a lo inkalh ṭha thlap a, tumah an awm lo anih hmel e. "Khawiah nge midang hi?" Chahbi a vuah rak rak laichuan lo hawiin "An zin bo" a ti nghut a, awi leh....




"Khawiah nge an zin a?" ka aw ah chuan ka zam zia a lang thei ang.



"Kan khua ah, lut ang le" tih leh pahin min nam lut a, inchhung chu a thim ṭhiap mai.



"Usamu.."



"Tah khan lo ding rawh" a tih ri ka hria a, a kalsawn tih ka hre zui bawk.




Rei vak lo ah inchhung chu a rawn eng uar a, inchhung dunga a pen thauh thauh chu ka lo thlir ve reng a, che lo chang lo a ka ding reng chu min ngaihsak awm pawhin a awm lo, a Room ah rei lo te a lut a, a lo chhuah leh chuan Towel a rawn bat chhuak a, "I inbual dawn a mi?" ka lo tih chuan a bu nghut a, Bathroom lam a pan zet tawh chu hrechhuak thut niawm takin a rawn lehhawi leh a, ka lo ip chawih mai!




Mitmeng Sexy fahrana min rawn melhin ka lam a rawn pan a, ka thinphu chu rang zaih zaih tak a ni. Ka hma tak a a lo din takah chuan ka chhoh en vah a, chutah rawn kun hniamin ka hmui bul chetah hian a rawn fawp a, "Bathroom a lo luh ve i duh loh chuan lo va ṭhu la" nui suk chunga tiin ka dul a rawn tuai thuak a, ṭawng nachang pawh ka hre lo.




"I lo lut duh em?" a hmuiin ka biang a rawn nul leh thuak a, ka tiril te chu a khur deuhin ka hria "Duh lo" ka tih takah chuan min en vung vung a, a nuih a za hle tih ka hmu nghal thuai bawk.




"Ka rei lo ang" ti lehin a inher a, Bathroom a a luh tak hnu chuan ka thaw huai huai tawh. A inbual laichuan thlanglam bathlar ah ka chhukthla a, tunah hian kan pahnih chauhin inah kan awm a, inngaizawng te ni ah kher lehnghal.




Rei lo teah a lo chhuak thawm ka hria a, ka va lehhawi laichuan Towel veng chhungin a lo dinga, a kuta min hui zauh hnuah a Room ah a lut zui a, ka la che chang duh mai lo. Chutia ka din reng laichuan a lo chhuak leh a, kekawr a ha nain a chung lamah chuan engmah a ha lo a, a awmbawr lah chu...ka mit ka la sawn rang kher mai.




"Ser i eiduh em?" Choka lam aṭanga a rawn tih leh takah chuan ka lut ta chauh a, choka lam ka pan phei laichuan kan intawk leh ang lawi a, engmah pawh ka sawi hmain ka darah a rawn vuana min pawt her sawk a. Chutah, a Room lamah chuan min nawr phei a, "Usamu..." ka tih laiin a Room kawngkhar kan thleng der tawh.




Kawngkhar hawngin min nam lut zel a, a Room chhung chu a zau thawkhat viau, khum lianpui inhung lamah chuan min nam pheiin "Lo ṭhu rawh, ka hman ṭep" tih leh a Closet lam pan a rual a, ṭhu mai loin ka hawikual leh rih a, a bungrua ho chuan mit a la viau a ni, Mistiri pindan tih takah engthil thil emaw thing hmanga ker mawi a tam hle a, kil khat a dawhkan inhung phei chuan ke a ngah hle a, Octopus lem te pawh a ang deuh reuh.




"Usamu..." min chhang loin a rawn hawi a, engmah phei chu ka sawi zui lo. Khum tlangah chuan ṭi ru deuh chungin ka ṭhu a, ka lama a lo kal leh laichuan T-Shirt body fit a ha a, kawr a ha tawh chung pawhin a taksa ruangam chu a la lang riak thei a, a pian a lang nalh hle bawk.




Khum bula Chair chu rawn pawt hnaiin ka hma ah tak chuan a rawn ṭhu a, inhma tawnin kan in en ta ran mai, sawi tur chu vang duh tak a ni. "Zawh duh che ka nei" a tih takah chuan a mitah tak ka lo en a, rei ka en lo, a mitmeng zahawm tak lakah chuan ka zam a ni, a thil min zawh tum chu rindan ka nei thiam tlat a.



"Min en teh" a aw chu a khauh hle a, thu min pe a ni ber ang chu.



Ka hawi chhuah rualin a lo ṭhu hnai sauh a, "Tinge zam hmel hi i put reng le, thil ti ru ang mai a lawm i nih" a tih takah chuan ka inthlahdul riai riai a, a hmel en loin a awm zawn chu ka la melh reng tho, "Mimite.." a rawn tih chuan rang deuhin ka en a, tun hi min koh vawikhatna a ni, 'Mimite..' ti ngatin min lo lehnghal a.




"Khapa kha i la duh reng em?" ka mitah tak min enin ka lo beisei zawhna chu min zawt ta ngei bawk.




Lu ka thin rualin "Min chhang rawh" a ri leh nghat a, thinrim hmel a pu lo chungin a thu tak viau thung.




"Aih...Duh lo..Umawipuii thil sawi ang kha chu a ni miah lo a nia" ka ti nghal thawr a, "Anih engthil nge?" a tih chuan a zawhna chu ka hrethiam lo hle ringawt.



"I sawi awmzia ka hre lo" ka ti hap a.



"Ka bulah i awm hi, engmah hlauh tur a awm lo" a tih chuan min ti dang chiang khawp mai.



"Engmah ka hlau hleinem.." ka malchunga ka kut dah chu la kangin a hmui a tawh tir vang vang a, "Engmah hlau suh" a ti leh sup a.




"Ka hmang ṭangkai lo che; mahse, zanin kha chu i awm ve lo ang tih ka hlau khawp mai, i awm ve kha ka lawm bawk.." ka ti ta thlawt a, a hre ta sa sa zep leh chuan tur a awm tawh chuangin ka hre lo a ni.




"I la duh em ni?" a tih chuan lu ka thing sawk sawk a. "Anih chuan tinge ka awm ve chu lawmawm itih chhan?" a ti leh a, chu tak chu keipawn ka hrethiam lo, engvanga a awm ve kha lawm nge ka nih, ngun takah ngaihtuah chuan keimah hi ka inbum nimaia hriatna ka nei.




"Ih maw...tunhma a thil thleng kha keichuan tihsual ah ka ngai lo a, ka pawm thlap a, ka rilru pawh a na lo, ti nge i awm ve kha ka lawm em em le, an lak aṭanga inthiarfihlim ka duh a, keimah vanga an nupa inkar ṭha lo te pawh a reh ka duh a, Ufamkima khan tu emaw hmangaih dang ka nei tawh tih hria a a hlim ka beisei te pawh a niang" ka ti sap sap a.




"Min hmangaih em ni?" a lo tih chuan chhan na ka nei hauh lo, hmangaihna chu induhsakna anih si chuan Usamua lakah engmah duhsakna thil ka la lantir ngai lo a, chutiang a tan chuan a la hma mah mahin ka hre bawk.




"Kan inhriatna a la rei si lo a" ka ti zawi sep a, "Min hmang ṭangkai tih chu i pha si a maw?" a ti leh zel a, min ti dang zo vek tawh.




"Aih..ka hmang ṭangkai lo che.." ka sawi zawh rualin "I chiang em?" a ti leh khauh a, ka kut a humna chu a hmer nghet viau tawh. Rei deuh chu kan ngawidun vang vang a, ka inngaihtuah nasa ngang mai. Ka pha thei lo ang, phat rual lohin ka hmang ṭangkai chu anih si kha...a chhan pawh Ufamkima ka duhsakna vang bawk a ni, induhsakna chu....ni lo...ka la hmangaih tih chu pawm leh ka duh tawh lo, thil theih pawh a ni tawh hek lo.




"Tihpalh aw, ka hmang ṭangkai che a nih kha.." ka hnuk a ulh a, ka mittui hnam ringawt chu a tlak mai hlauin ka khap sak sak a, awmzia vak a nei lo; ka biangah a rawn luanga, ka bialpa hmuh lai ngeiin, mualphona mai chauh a ni.




"I hmangaih ang hian a hmangaih ve che em?" lu ka thing a, chu zawhna kher chuan min vit ngawt ngawt a ni ber, ka lungchhe zual a, hman ang khan mahni inkhawngaihna ka nei bawk, engkim chan dawn angin ka inhria a, amah Usamua ngei pawh hi...




"I thinur ngawt ang, min ṭhen i duh pawn ka dem lo ang che" min chhang loin a ngawi reng a, hawi chhuak lo mahila min en tih ka hria. Hetiang thil thleng tur hi ka lo beisei lawk bik lo, hman ṭangkai ka tum ngai lo a, chutiang atana sawm pawh chu ka ni hek lo; mahse, a nih na tak ah chuan ka hmang ṭangkai a lo ni reng si.




"Min hrethiam mai dawn nia, ka tihpalh takzet" kalchhuah mai tuma ka ding chu a malchungah min pawt ṭhu zawt a, ka kawngah nghet zeta rawn kuahin ka darah a khabe a rawn nghat zui a. "Hriatthiam chhan tur che, chhan ṭha tawk tak i nei em ni?! a tih ri ah chuan a rilru ka ti na tih ka hre thei.




"Engmah hi ka hrethiam tawh lo, hman ṭangkai che hi ka tum lo a sin, Ufamkima hmangaihtu nih pawh ka duh tawh lo, theih ngat sela chuan..." sawi zo loin ka ngawi vang vang a, Ufamkima tel loa nun hman ka duh tih hi hrilhfiah dan thiam ila ka ti takzet.




"Anih kei hi le, engti turin nge min duh?" chu zawhna chhan awlsam tak a ni, Samuela hi engti turin nge ka duh tih chu thil tamtak ka hrilh hnu ah hian; ka zep bik tur a ni dawn em ni?




A lamah inherin a biangah chuan ka dawm a, a mitah chiang takin ka en bawk, "Thil ṭha engkim, i pek chhuah theih ang zawng zawng min pe rawh, mipa dang lak aṭangin engmah dawn ka duh lo, nangmah ngei hian min pe vek ang che" ka aw chu a lawi lek lek a, a tawp lam phei chu a ri chhuak mang meuh lo.




"I ṭah reng chuan ka thlem dawn miah lo che a nia, ṭap inthlem hi thil ṭha zingah chuan i chhiar tel lo ang chu ti raw" kiaisuk chunga a tih chuan ka insut faih a, ṭah chhuak deuh chhung chuan ka nuih leh lawi a, chumi hnuah a awmah beiin nghet deuhin ka kuah a, a lungphu dut dut ri chu chiang takin ka hria.




"I thinlung hi a pianhmang ka hre lo a, a len zawng takngial pawh ka hre lo; mahse, ka beisei thilṭha zawng zawng kha a awm dawn tih ka hria a lawm, i theih tawk aliam ka dil lo che a, i theih tawk a tam ka dil ang che" ka biang a rawn chul laichuan mit ka chhing a, tunah chuan engmah sawi tur ka nei tawh lo, hmangaihna ah luanliam ka duh a, tudang ni loin Samuel Lalrambeiseia, a vai hming Mistiri-a lakah ngei hian a ni ka duh ni.




Ka Phone ri ah chuan ka harh hlawl a, meng mang lo a ka khum sir ban mai ka tum chu ka dap fuh thei tlat lo, engthil emaw rit deuh hian min delh niin ka hria, ka ke lehlam lah chu a che thei eih lo bawk. Chutah meng chhuak thutin ka mut na chu ka en kual a, karei leh....ka khumah awzawng ka mu lo, engtin nge anih theih zawk...! Nizan khan ka muhil tlang tihna em ni?




Ka ṭhu chhuak hluai a, hla deuh taka Side table chunga ka Phone eng zak zak chu ka va hmu a, Room banga Sana intar ka en chuan zinglam dar khat a ri der tawh, ka bula tlangval hmelṭha zet mai tui taka a muhil chu enin thawk ka la hluai a, ka kawr lah chu ka hmu mai lo lehnghal....ka rilru hah lutuk chu ka ṭap lo chauh a ni.


(ZAWMNA)



Phone ri a tawp zui mai bawk nen, ka kawr chu ka zawng leh rih a, kawrbah pan te chauh hain Samuela bulah ka mu chu a nia, a ni lah chu a ruak tung lehnghal a! A zia lo deuh chu a ni...




"Usamu.." a darah ka sawi a, a la harh chuang miah lo, ka kawr chung lah chu a delh bet vek a, pawh chhuah ka tum ṭhin a; a delh nghet nasa mai bawk si, engtik laiin nge ka phelh ka hre lo reng reng, min lo phelhsak em mawni!




Nizan khan a la hma tho a tiin khumah kan titi dun a, inhriat chianna hun ṭha tak ah ngaiin haw pawh ka hmanhmawh duh lem lo kha a nia, engemaw ni bik angah hi chuan kan inhawng reia ka chhungte pawn ka haw tlai an ring sa tho chuan ka ring a mahse, heti em em hi chu, harh lo phei ila chuan a va pawi lehzual dawn tak.




"Usamu" a biangah dawmin ka sawi nawk nawk a, a rawn men chuan a phu deuh zawkin ka hria. "Tho thuai teh, a tlai tawh lutuk" ka kawr a delhbeh chu ka pawt chawt chawt a, "Dar engzat nge?" tih paha a rawn ṭhutchhuah chuan a kekawr lam chu ka lo en vat a, kekawr a ha hlauh mai. Ka lo thaw huai a, ka kawr chu ka ha ṭha mawlh mawlh bawk.




"Tlai tawh lutuk..." a lam hawi vutin "Ka kawr hi inphelh em ni?" ka ti leh rih a, a bu nghut ringawt.




"Ti nge i phelh?" a Phone sana a en laimek chuan lo hawi lehin "Ka thlah dawn che em ni?" a lo ti khauh a.




"Aw, thlah loh ten..." ka ti hap a, khum aṭanga chhukin ka Phone chu ka va en a, ka nu leh Umawipuii missed call a lo awm nual a, ka rilru hah lutuk vangin ka lungphu te chu a mumal meuh lo. Min hau nasa dawn hian ka hria, hetiang thleng thleng ka leng chhuak ngai lo a, an mangang ve ngawtin ka ring a ni.




Ka nu chu ka be nghal mai ngam lo a, Umawipuii zawk chu Call-in a ri chu ka ngaithla ran a, chhuat vawtah chuan ke lawngin ka per et et reng bawk. "Saii...khawnge i awm a?" tih ri chu ka hriat hmasak ber a ni.




"Ka haw dawn chiah a, engtin nge....an lo bia che em?"



"Be ngun lutuk tawh, Phone la thei bawk si lo, khawiah nge i awm?" a ti vin leh hlur a, ka va han sawi hreh tak.




"Hetah...Usamua te inah" ka ti zawi sep a.



"Awi leh...inruk tir nghal i tum em ni a, enge i tih reng reng" a hma aiin a aw chu a zawi ta deuh.




"I ngaih ang kha a ni lo aw, ka lo muthlu palh..." ka tih laimekin "Ka muthlu a..engnge in tih dun?" a ti leh chiam a, a ngaikawi a ni hrim hrim.




"Engmah kan ti dun lo, ka haw dawn chiah hei, ka nu chuan engnge a sawi?" mahni lo maha hrehawm tih ve nak laichuan, awm a ti nuam lo leh zual.




"Vday party ah an kala, an bang tlai ṭhin ka ti a nih kha, haw vat rawh, Vengchhung information ah an puantir hman ṭep che a lawm le, ka pa phei chu a thinrim lutuk" a ti hlak hlak a, chu tak chu ka rilru ti hrehawm zualtu a ni, in thlen hun chu ka huphurh ru ngang mai, an lo la meng a nih ngat phei chuan...




Umawii nen kan inbiak zawh hnu chuan, khum sira ka pheikhawk chu ka va chuh rawk rawk a, ka che vel thlira khuma lo ṭhu chu en in "Hmanhmawh la" ka ti leh rih. Ka tur takah chuan a rawn tho chhuak thuai a, ka kawr a lo phelh ringawt kha ka la hrethiam thei lo, ka awmbawr a lang thui dawn hian ka hria.




"A pawi viau em?" a kawr hak paha a tih chuan "Min vaw maithei" ka lo ti zauh a, vuak em chu min vaw lo ang mahse, min hau hrep dawn.




"Engtin nge niang, i chhungte chu ka biak sak dawn che em ni?" a tih leh a, chu ngat phei chu tih chi loh tak a ni, mipa nen kan ni tih an hriat vaih chuan min ngai khawlo dawn lutuk.




"Haw phawt ang, a tlai tawh lutuk" tih leh Room aṭanga chhuah ka rual a, ka hnungah inthlahrun hmel deuh hian min lo zui ve zel a, "A zia lo hle mai, ka lo muhil ve daih a lawm maw le" a ti bul bul a, ka kawr a lo phelh chhan kha ka la hrethiam chuang lo.




A scooty ah inphurin chak deuhin min tlan pui a, boruak a vawt bawk nen ka tiril te chu a khur titih a, Senior lamah naupang chhe khawsak takin ka khawsa a nih ber hi, keimah chu ka inzahpui thei mai dawn a lawm le.




"Engtin nge i awm, i hlauh viau chuan ka lo lut hreh lo a nia" a ti leh a, min ngaihtuah vanga sawi ni mahse, a lo luh chu a ṭha lo lehzual tih a hre lo a niang.




"A ho lutuk, nula Senior leng chhuak te chu chhungten engteh vakah min ngai tawh hleinem" uang deuhin ka ti leh hnuhnawh a, a rilru ka ti buai deuha ka hriat vangin hlauthawng ang chuan ka awm duh tawh lo, tunah tak phei hi chuan kei aimahin hrehawm a tih hmel zawk.




"Min lo kuah rawh" a tih rual chuan a kawngah ka va pawm chawt a, a hnung zang lum vung vungah chuan ka bei thlam a, ka hahdam huai huai in ka hria. "Tleirawl inngaizawng te pawh kan ang a lawm le" ka nui chhuak hak a, ani erawh a ngawi reng.




"I haw hreh viau em?" a tih leh takah chuan ka va thlek dak dak a, "Hreh hran lo e, duh aiin ka tlaia a nuam vak lo deuh a, nichina ka thilsawi te kha chu ka hmanhmawh vangin ka sawi mai mai" ka ti leh zaih a, a awih ngut a nge maw?




Duh aia len rei palh a; haw ngam loh vanga inru ta te dinhmun pawh ka hrethiam ta in ka hria, kan hmelhriat te pawh sawi tur an awm nawk a lawm, tleirawl inngaizawng ni ta ila kan hmabak ve tur tho a ni mai lawng maw ka ti deuh.




Kan kawt thlen hma hla deuh hlekah ka dintira, kawtah Scooty a din tir chuan kan thawm an lo hriat ka hlau a ni, kein muangchangin kan inzui phei a, kan kawt kan thlen hma deuha kan in ka va en chuan inhnuai lam a thim deuh ruih a, ka thaw huai huai tawh, kan chhungte chuan min nghak lo hlauh mai.




"Ka chhungte chu an mu tawh anih dawn saw" nur var var chunga ka tih takah chuan thaw huai hmel a pu a, a awmdan chuan ka nuih a ti za angreng zawk, ka ti chiai ve fe chu a nih hmel e.




Ka kutah nghet deuhin a rawn vuan a, kan in lama pana kal zel pahin ka han thlek leh ṭhin a, tlem a tlemah kan riak dun lo chauh chu a nia, ka harh hlim ka ngaihtuah let a, pang insi riala kan mut lai te, ngaituah zawng chuan ka tirilah min ṭham er er tu a awm a, a nuam lehling phian mai.




"Haw ngam lo ta ila engtin nge i tih ang?" ka ti chhuak phawng a, chutah min rawn en vutin "I haw ngam lo em ni?" a ti khauh a, a hmel chu a thutak em em mai bawk.




"Haw ngam loh vanga inru hi an awm fo a sin, ngam lo ta ila engtin nge niang?" a rilru hriat tum takin ka en ran a, "Haw phawt la, thil fel lo a awm tak leh..." a bu deuh nghat nghat a, uangthuanga ka zawh kha min chhang thutak ngang mai.




"Kan inru ang maw..?" ka tih chuan a nui suk a, "I haw ngam lo anih chuan ka hruai haw ang che ka tih kha, chhungte phalloh pawh awm hma a inru rual chu kan ni tawh lo deuhin ka hria, ka sawi ang khan fel lo a awm tak leh ka tlan chhe bik lo ang" a ti charh charh a, dawtsawi hmel a pu lo a; a thutak em em reng.




Ka en reng laichuan ka kawr nghawng thlehna laichu min lo siamṭhat sak a, "Thil thleng a awm chuan min lo hrilh dawn nia" a ti nghet charh a, engthil pawh thleng se a tlanchhe dawn lo tih ka hria, a mitah a thutak zia ka hmu a, ka ringhlel hauh lo bawk.




Kawtthler reh ruih ah chuan dingin kan inpawm vawng vawng a, chumi hnuah in lampanin ka kalsan a, ka lehhawi leh pawh chuan kan ṭhenawm te in kawt aṭangin min lo la thlir ve reng a, Minute tam a la ni lo, ka hmuh theih laireng pawh chuan ka ngai a ni.




Inchung ka luh chuan a reh ṭhuap a, thawm dim thei ang berin kailawnah chuan ka pen chho a, ka Room kawngkhar ka hawng fel chiah tihah ka Phone a lo ri a, Umawipuii leh bawk.




"I la muhil nange, zan a rei tawh si..." ka lo ti nghal zat a, "Min ti muhil thei hleinem" a lo tih chuan ka ner nang ringawt.




"In chesual a mi?" a tih leh lek phei chuan ka ṭhen ṭha tawh. "Chesual lo" ka tih lahin min ringhlel ve tlat si, "In ṭhut mai mai loh danah, engemaw chu a awm a ni, ka bulah engmah zep a ngai lo, thilsual chu zep theih a ni lo, a lang leh ngei ngei" a ti hlak hlak a, min chetsual tir phet chu zuk han tum zawk chuan.




Zing ka tho chu Sitting room aṭangin ka pain min lo ko a, nizan lamah ka kalna chu dilchhut angreng deuhin min zawt a, 'Vday party ah ka kal' tiin Umawipuii dawtsawi sa chu ka chhunzawm a, Party tih angreng a kal chu ka pa lawm loh zawng tak a ni tih ka hre reng nain Umawiin a sawi tawh si a, chhuanlam dang siam theih a ni tlat lo.




"Nidangah chuan i kalna tur sawi lawk loin chhuak tawh suh ang che, kan rem tihna tel lo a zan chhuah kha ka duh hauh lo a nia, naupangchhia i ni tawh lo a, Party tih ang renga tal mai mai tur i ni tawh lo, tawhsual te pawh tawh theih a ni a, ching tawh hlek suh" a ti hluk hluk a, "Tum aiin kan tlai a, ṭhian te rual loa haw ka hreh si a" tiin chhuanlam ka siam ve tak na a; keimah zawk chuan hrehawm ka ti ru kher mai.




Ka insiam laichuan ka dawhkan a Present bawm chu ka va hmufuh a, phur zeta ka hawng chu ka beisei loh deuh thil ka hmu a, Samuela Valentines day thilpek chu TUBOH tereuh te a ni, a ngaihna ka hre lo hle ringawt, nuih te a za lek lek a..mi hmuh laia hawn chi pawh ni nghal lo chuan, Umawiin hria sela chuan min fiam nuam a ti viau ang chu. Ka thawmhnaw bawmah ka dah ṭha a, hman ṭangkaina mual mual te pawh a la awm mahna.




Dawr a ka kal tlai vangin Usamua nen kan inhmu hman lo a, tlaiah pawh an hna an zawh hma vangin ka inhmu hman lo leh zel a, Umawipuii lahin dawp tak tein min dawp ve reng bawk. Kan chesual turah a ngai tlat a, "I rai a nge aw, i inrinhlelh chuan i bialpa kha hrilh vat la, a ranglama inneih a ngai a ni mai, miin an hriat hman chuan a zahthlak dawn lutuk, Famkima nen sawisep inkai tawh si, an hmu khaw lo viau tawh ang che" tih ang reng chu a khat tawkin a sawi reng a, a chhan pawh ka chhang buai peih tawh lo.




Zana Usamua nen kan inbiak chuan Mamita a haw tur thu min lo hrilh a, Furniture siam a ngaih vangin kar hnih zen zawn a cham dawn a ni awm e. Zingkar hma deuhah a chhuak dawn a, kan inhmu leh hman dawn ta lo.




Ka nu chuan Umawii hnen aṭangin ka ngaihzawng neih thu a lo hria a, "Eng ang mi nge ni?" tiin min zawt leh ṭhin a, "Tlangval taima deuh a nia, a buai thei lutuka, a zin a lo haw hunah lengah ka lo sawm dawn nia" ka ti mai a, kan inah a lo leng tawh tih erawh ka sawi duh rih lo a, ka rilru hi a la buai deuh tlat ṭhin, Ununfeli bialpa anga an ngaih kha ka mi sawi hi a ni tih a hriat hunah eng ngaihdan nge a neih ang tih ka hria a, min thlawp viau chuan ka ring lo bawk.




Pathianni tuk ka tho chu Ukimkimi hnen aṭangin Phone Call ka dawng a, "Mate, Fakima nu boral thu kha i hria em?" a rawn ti ta mai!




"Eng a, engtikah khan nge?" ka ti hluai a, ka thu hriat chuan min ṭhawng takzet a ni.




"Tukin zing khan, nimin piah khan a na a zual a, nizan pawn ICU ah a awm tawh a lawm" a ti lehzel a, an reh zui vang vang ka lo tih rilruk kha chhungkaw lamah harsatna liantak an neih vang zawk a lo ni.




Chaw pawh eitawh lem loin ka insiam sawk sawk a, "Puanin i tuam ve dawn em?" ka nuin a lo tih chuan ka rilru a mang duk a, "Ka hre lo...a tih chi a ngem le?" ka aw chu a lawi lek lek a, Ufamkima ka ngaihtuah em a, ka hnuk a ulh lo thei lo. A nu a hmangaih zia leh a nu fapa hliah hliah a nih zia ka hrechiang em a ni.




"Chi lohna a awm hleinem, pangpar ken aichuan puanin va tuam ve zawk rawh" ka nu chuan a ti leh a, ka ngaihtuah pawh ngai loin min lo ngaihtuah sak zung zung a, Ufamkima te veng lam pana ka kal laichuan inkhawm tur an kal vel mek a, an Building kawt kawngpui ka thlen rualin zai ri ka hre thei tawh.




Step ah chuan ka pen chho a, kawt zawl ka thlen chuan min an lo tam hle a, ka lut hreh angreng khawp mai. Pawna ṭhut mai tur nge ni ang ka tih laimekin kawngka a Mamuana lo chhuak ka va hmu a, "Mimi.." a rawn tih nghal vang chuan ka pan phei ve thuai a.




"Hei.. puan ka lo keng a, min va dahsak lawk rawh" ka tih chuan min lo laksak vat a, pawn ṭhutna awl lam pan leh mai ka tum laiin "Va in lan ve reng reng rawh, i lokal tih pawh an hre nang" tih leh ka bana min pawh a rual a, mi zinga lo ṭan ṭung chu thil tih chi ni hek lo, ruang kil ho ṭhutna ah chuan kan inzui phei a, khuang vua a zai ri bak chu thawm dang ka hre lo, ruangkil ho zinga Ufamkima ṭhu kun lup ka va hmuh chuan ka rilru a na veng veng thei.




Midang ho chuan ṭhutna min lo kian a, tum loh deuhin ruang ka kil ve ta chu a nia, rei deuh ka ṭhut hnu pawhin Ufamkima chu a la rawn hawichhuak lo a, ka va en leh ṭhin a, a kuta a hmai a hliah tlat vangin a hmel ka hmu thei hek lo, a kut khur dar dar erawh ka hmu chiang hle thung.




"Khawnge U Rosy te hi?" ti a Mamuana ka zawh chuan naupang ho chaw a ei pui lawk thu min lo hrilh a, "UFamkiman a ei tawh em?" ka tih leh chuan lu a thing a, "Engmah a eithei lo ang, zingkar aṭangin tisawn a la ṭhu tlawk tlawk mai" a ti zuai raih a.




Ṭahpui tur leh hnemtu tur takngial pawh awm lo a a ṭhu kun tlawk tlawk chuan min run a ni, a chhungrilah engtiang chiah a na nge a tawrh ang, thihna hi zawng a tawp chiang em a, a nat zia pawh a tuartu te chauh lo chuan a hrethiam hek lo ang.




Rei vak loah Urosy te nufa an lo lut a, ka epah chuan ṭhuin min lo bia a, zai ri a rin em vangin eng nge a sawi ka hre thei lo. Chutih laia Ufamkima lo hawi chhuak nen chuan kan mit a intawng chiang hle a 'I va fel ve' a rawn ti nimaiin ka hria, a mit chu a sen rum a, a bui deuh lak bawk. An chhungte khualkhua a mi an lo thlen tak vangin ka inthiarfihlim ta thuai a, kawngka a ka chhuah dawn laichuan an ṭap rawng rawng hlawm.




Ka pi nena kan inhmuh hmasak ber ṭum kha mitthla ah a lo lang a, engkim bul ṭan na ka ti lo thei lo, amah vangin Ufamkima ka tawng a, khang hun Ufamkima nena kan inzui chhung tawi te ah khan ka chungah a ṭha hle ṭhin a nih kha.




Vui zawh lamah ka hawsan a, kan in lampana ka inkhalh haw laite chuan mitthla in nunhlui a chhuikir ruak a, Christ-a piancham kan lawm ho lai te pawh a rawn thar leh uar uar mai. Ufamkima mawlh kha a ni, a hmelah khan a khehchhia tih ka hai lo, hnem duh eng ang mahil ka chanvo a ni tlat lo a, thlirtu nih chu ka tihtheih awmchhun a ni.




"Professor, ka ngaihtuah i ngai miah lo ti raw, kei chuan tihsak theih che engmah ka nei tawh lo, tunah chuan ṭahna turin i nupui dar i nei a, i lungngaihna hnem tur chein i nupui i kiangah a awm tih ka hria, inti pachang la, i tuar chhuak thei em em ang" keima hriat tawk lekin ka ti sap sap a, ka hnuk a ulh ṭeuh a, ka mittui a luang zung zung bawk.




In ka thlen veleh ka Room lam ka pan a, khumah bawk thlawpin ka mu zawi hle hle a, ka boruak va tawn rit zet vang chuan ka chau nghulh thei. Tlai thlengin khum chu ka thawhsan lo a, Samuel-an min lo call laichuan ka lo chhing hman sek a, Phone ri chuan min ṭhawng harh zawk nghe nghe.




Ka inkhawm em tih min lo zawt a, hrilh ve mai ṭhain ka hria, "Tukin khan Ufamkima nu a boral a, ka va kal ve a" ka tih chuan "Ramdinzualan min lo hrilh zo chiah a, a zia lo khawp mai, keini chhung lah kan awm ve mang si lo a" a lo ti ve luam a, sawi leh tur hre loin ka ngawi zui vang vang ringawt.




"I ṭha em?" a lo tih leh chuan aw ka thian kharh a, "Kei chu ṭha e" ka ti tham ṭiak a, ka hnuk a ulh leh ringawt tawh.




"I va ṭap ve em?" zangkhai deuh hian a ti leh a, kei hi ka inthunun hram hram a ngai.




"Ṭap lo e...ti ila hnuk a ulh ve duh lutuk, ka pi nen khan kan inngaina ve reuh a, chuloah ka ṭahbelh ve hrim hrim a" ka tih chuan a nui suk ri ka hria a, a ngaimawh zawnga ṭawngkam ka chheh loh hram ka beisei.




"Tunah khan i ṭap chak riauin ka hria" a tih leh a, "Teuh nang, midang ṭap ri ka hriat lai chiahin ka ṭah a chhuak a lawm.." ka ti sawk sawk a. "Ṭahbelh damdawi ka pek che kha hmang la, i ṭah a chhuak lo reng reng ang" a tih chuan engthil nge a sawi ka hre mai lo.




"I Tuboh te kha" a tih chuan ka thawmhnaw bawm lam ka hawi vat a, "Ṭahbelh damdawi a?" ka ti nawn leh kher a.




"Va tuk ri keuh keuh la, i ṭah chu a chhuak tawh lo reng reng ang" a aw aṭang chuan a nui tih ka hria, "Awih awm loh e" ti niah niah chungin ka pan phei ta tho a, ka han lek kang chu ka nuih a za deuh tlat a, tuin nge Valentines day ah bialnu te Tuboh pe ngai ni.




"Lo haw vat rawh, ka nuin hmuh che a duh a" ka ti ve tak nain ka rilru ka la siamfel thei mai lo.




"Zawh duh che ka nei" a rawn tih chuan beng ka chhi vat a, "Engtikah nge nupui neih ka hun ang?" a rawn ti mauh mai.




"I hun tawh reng lawm ni" ka tih laiin "Ka hun viau tawh em?" a ti leh a.




"Viau tawh e, kum 40 thlenga tlangval i tum te anih loh chuan, tuna i kum kha nupui neih nan chuan a ṭha tawk chiah a lawm" ka ti leh mai a, "Nupui neih nan hun ka nei lo" a tih tlat lai kha ka ngaihtuah chhuak lo thei lo.




"Anih chuan nupui tur min lo zawn sak dawn em niang?" a tih leh chiah chu a sawi awmzia ka hre ta chiah a, "Phakar lutuk" ka lo ti hlak a.




"Kumin chhungin min lo zawn hmuh sak ang che aw" rang lutukin ka lo aw a "Tehreng mai, nula hmelṭha ka lo vai char char dawn nia" ka ti fiamthu a, a ṭawngtam lo nain a thil sawi hian min ti nui leh ṭhin.




Kar hnih vel chauh cham tura haw kha a ni a, hna an laklawh zel vangin thlakhat dawn chu a cham ta reng mai a, tunah pawh a lo haw hun tur a la sawi chiang thei lo, Suzanne-i nupa lah inentir turin phaiah an kal leh tawh bawk. Min lo biak chang hian sawitur hre lo deuh chung pawhin rei deuh hi inbiak a duh ve kher ṭhin a, a lung a leng ve deuh tawh anih ka ring.




Dawr lama kan buai deuh vangin zanlamah ka inbual hman chauh ṭhin a, "Inbual rual ang" lo tih tlat chang te hi a nei ṭhin, ani pawh zan lamah a inbual ve ṭhin a, kan ban tlai deuh chang phei hi chuan min lo nghak ngar ngar zel.




"Kan inneih hunah pawh a rualin kan inbual ṭhin ang" a ti leh pek a, "Min lo Dream a ni maw?" ka tih chuan a nuih a za hle a, "I tar huna ka bual hun tur che thlengin ka Dream chhuak vek tawh" a ti sam et mai.




Inrinni tlaiah Ufamkima te pafa an lo lang hlawl a, kan inhmuh khat ta em a; Christa pawn min nel ta vak lo, Counter-a an eiman pe tura an lo kal laichuan ka lo be bawrh bawrh a, a chhang duh ber ṭhin ka fun sak laichuan thawm a awm hluta "Apa.." tih ri leh dawr chhunga mi te lo au ri a inpawlh nuka, ka hawi chhuah rualin Ufamkima tlu tur chu ka va hmu chiang hle!




Midang ho chuan an lo bawr nghal tuau a, kaihthawh ka tum lai te chuan mitmeng â ruai hian min melh a, tih ngaihna ka hre lo lutuk chuan a banah ka lo vuan ṭung a, nikhua a hre lo zui titih der bawk nen ka chiai tak zet a ni.




"Thisen sang ka nei lo" ti a min hrilh vangin zunthlum chauh a nei turah ka lo ngai a, Doctor ten a Stroke thu min hrilh laichuan min ṭhawng tak zet a ni, Damdawiin Corridor-ah chuan Christ-a pawm chungin ka ṭhu tlawk tlawk a, ka ngaihtuahna chu a bing mup ringawt.






(End of Chapter - 8)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 6th, 2022, 7:45 pm

ZUNZAM - by Ahmangaihi violette Khiangte


CHAPTER - 9




"Mimi.." tih ri ka hriatna lam chu ka hawi vat a, hmanhmawh taka Urosy lo tlan phei hlawk hlawk chu ka va hmu a, ka Call aṭang khan Minute 10 a liam awrh chauhin ka ring, a rawn thleng rang khawp mai.




"A Stroke an tia, tunah Drip an khai mek a" hlauthawng deuh a ka tih laichuan a ṭap lo chauh tih ka va hmu thei, "Tuman an awmpui lo a mi?" inthunun a tum hle tih a aw ah chuan a hriat theih bawk a, a in petruh fan fan reng.




"Ka u leh Pa Rel-a an awm a, Christ-a hi a ṭap reng sia, kan lo hmuak tawp che" ka ti hap a, Christ-a a lo ban lai pawh chuan a kut a khur dar dar a, "Tunlai chu a taksa a chak lo zual lutuka, lu a sun bawk si a, hna lamah a awl thei chuang bawk si lo a" Corridor a kan kal laichuan a ti phei mawlh mawlh a, ngaihtuahna a mang em vangin han hnem dan tur pawh ka hre lo.




Ufamkima mutna kan va thlen chuan nikhua a la hre lo a, "Drip kan khai zawh hian a dang khai leh nghal a ngai dawn, a zawh veleh min lo hrilh dawn nia" Nurse chuan a lo ti var a, Ufamkima hmel ka en chuan a dâng hle tawh, a mitkhur te chu a tla kuam a, a biang ki pawh a langsar hle tih ka hre leh hnuhnawh a, vawiin khan ka lo en chiang awm lo hle mai ka ti!




"Mimite, Bawihpuia hi lo awmpui lawk rawh, Cabin ka va buaipui lawk ange" tiin Urosy chuan hmanhmawh deuhin min kalsan leh a, Umawii te nen UFamkima chu kan kil ṭhap a, Pa Rela nen chuan an in be leh sar sar ṭhin a, an thil sawi ka hre thawi vei nen ka chhungril chu a tawt up up mai.



"Stroke tawh hi chu an awngrawp zui zelin ka hria" Umawiin a tih laiin "Kan kawmchhak pa chu kum 6 a liam tawh, a la che sawn thei lo, a pangkhing a zeng tlat a" Pa Relan a ti ve thung a, Ufamkima hmel ka en leh rual chuan am deuhin thawk ka la a, ka bing chuk chuk a ni ber.



Rei vak loah Urosy chu a lo let a, "Tiru, Cabin-ah kan insuan dawn" a lo tih vang chuan kan tho thuai a, Nurse hoin min lo puiin Cabin lamah kan innawr phei a, kan tihchet zawnga Ufamkima lo rum ṭiah ṭiah ṭhin chu hmuh a hrehawm kher mai, Urosy nen chuan kan in en leh ringawt ṭhin a, inhnem thei bik pawh kan awm lo.




Cabin-a kan indah fel takah chuan Urosy pawn a chhung te a bia a, "Hna kan kalsan bawk sia, dawr a ngaihtuah awm" tiin Umawipuiin let a rawt a "Midang lo thleng phawt rawh se" keiin ka lo ti ve tlat thung.



Rei vak lo ah an chhung te chu an lo thleng a, chhungkaw hung tak an ni bawk a lo kal pawh an ṭhahnem viau a; mi sawm chuang chu an ni awm e. Prof.Vanlalhlani pawh kha a rawn lang ve hlawl a, mi hre tawh lo niin ka hria.




Chutia midang ho an lo thlen takah chuan kan tan awm ve reng a rem lohna chen a awm tawh. "Tu te nge?" ti a midangin Urosy an zawh chuan a hamhaih deuh a, ka lam a lo hawi vung vung hnuah "Ukima ṭhiante an nih hi, an dawrah a tlu sual a" a ti zawi sep a, "In lo buaipui a in van fel ve" ti a min lo chibai tu te chu URosy chhungte zawk an nih ka ring, thil awmzia min zawt luam a, ka sawi chak loh em vang chuan chhang turin Umawii chu ka mitmei ta ringawt a.




Umawiin thil thlen dan a sawi mawlh mawlh laiin Urosy chu ka lo bia a, "Kan va let leh phawt a nge aw, dawr kan chhuahsan ringawt sia naute ho an lo buai palh ang" ka tih chuan a lo pawm thiam khawp mai. "I lo awm hlauh a a tihzia tak tak a ni, nangmah kher awm lo phei la chuan..." a inpetruh ṭeuh a, chutah "Ka mangang hman lutuka, Bawihpuia a awm ve bawk nen" ti lehin a mittui a hru zauh a ka banah a rawn hmer zui vang vang bawk.




Urosy chuan Corridor thleng min lo zui chhuak ve leh a "Chanchin kan inhrilh zel dawn nia, Damdawiinah kan awm tawh bawk a nangni pawh ngaihṭha deuhin haw rawh u" a ti sap sap a, Umawipuii leh Pa Rela kal hran deuh hnu chuan min pawt ding dat a "Lokal fo rawh aw, tunlai chu kan khua a har thei lutuka" a ti leh a, a hmel chu inthiam lo tak hmel a pu a, a ngui nghiai in ka hria.




Taxi-a kan let leh laichuan ka bula mi te pahnih chu an ṭawng bawrh bawrh a, Ufamkima awm dan an sawi chuan rilru a tih hah zual a, a ṭha chhuak leh tawh lo ang tih mawlh mai chu ka hlau a, a fa te an la te bawk si a, ngaihtuah a ti thui duh khawp mai.




Dawr kan thlen hnu chuan inchungah ka chho vat a, rilru tawt ṭeuhin Usamua ka call a; a tlang thei hauh lo. Tlai lamah biak ka tum leh a, a Phone chu a ri tak nain a chhang thei lo a, a buai deuh a nih ka ring.




Dawr aṭanga kan haw chuan dar 6 a pel tawh a, inthlak loin chaw ka ei a; chawiei khamah ka inbual ziah a, ka nitin tih ṭhan a ni, Usamua chu a la reh vung vung a, nidangah chuan tun ang hun ah hian a hnathawk a la intifai bik lo ṭhin a, ka inbual rual thei ṭhin anih kha. Mahse, zanin tlai chu a lo Call miah lo a, a la bang lo nge maw ni?




Ka inbual zawh hnu pawh chuan engmah a la rawn sawi lo, dar 8 a ri dawn thuak tawh a, hnathawk ban loh a hun tawh tlat lo, inthlak mawlh mawlh pahin ka Call leh ta nge nge a, a la chhang thei ta lo fo mai.




Ka Phone chu Charge-in inhnuaiah ka chhuk san a, ka thawmhnaw tlem suk tur chu ka kengthla bawk a, insuk pahin chhuat ka nawt a, ka inpeih fel meuh chuan dar 9 a pel leh tawh a, mu tura ka chhoh leh hnu pawh chuan Usamua call chu a la awm ta lo fo mai, Message takngial pawh ka dawng lo a, ngaih chu a ṭha zan tawh lo a ni. Ani hi a hnathawhna ah a lo chesual em mawni dawn le tih te thlengin ka ngaihtuah a, vawiin lam boruak vang te pawh a ni mahna ka hlauthawng nghal hle tawh.




Suzanne-i be ringawt dawn ila phaiah daih an awm lai a ni a, Usamua chanchin zawt ringawta biak chu a zahthlak ka ti bawk si a; ka zawt ta em lo. Mut pahin Phone chu ka hmet kual a, tum loh deuha ka thil hmeh chhuah chuan min ti hamhaih kher takzet a ni!



Ka thil hmuh chu Ununfeli Status a ni a, midang te nen zanriah an kil lai niin a bulah chuan Usamua ngei mai a ṭhu bawk!



Hna a thawk lo, a inchei a; a nalh hle bawk!



Eng nge a awmzia? Chaw an eikhawm tihna em ni ang? Mahse, enga tinge ka Phone call a chhan theih miah loh le, ngaih kawiloh tum pawhin rilru a nuam miah lo, Ununfeli berkher a ni bawk si a, ka lungawi lo dawn dawn mai.




Dar sawm pelh thlengin min lo biak hun chu ka la nghak ta tho a, Ufamkima chu ngaihtuah viau mahila Usamua awmdan chuan ka rilru a luah mah zawkin ka hria, Ununfeli Status chu ka bih nawn leh ṭhin a, an ṭhu dun kher te pawh chu ka hrethiam lo hle ringawt tawh.




Hetiang hian ka thikthu a lo chhia ang tih ngaihna pawh ka hre lo zawk a ni, ka mut a chhuak thei lo a, ka rilru a hah tet tet thunga, ka Phone bawk chu ka en leh ṭhin, Ununfeli thil sawi te kha ka lo ring lo ringawt kha a nia; tunah hi chuan ngaihdan ka nei thiam ta hauh lo, ka ringhlel chu a nih tak ber hi.




Zan rei deuh thleng ka meng a, dar 12 pelh hnuah pawh a la ngawih tak reng vang chuan lungawi lo deuhin ka muthilh san a, zinga ka thawh thleng pawhin a Call emaw Message ka dawng lo a, inkhawm tura ka insiam lai te chuan ka hnim ruih thei. Urosy Phone-in chanchin ka zawt a, Ufamkima chu a la harh lo a ni awm e.




Tlai lamah chuan rei lo te ka va kan ve a, Ufamkima a la harh lo a, midangin an lo awmpui rih vangin ka va ṭhu ngawi reng a "Rosy intifai turin a haw lawk a, a kal hlana Kima a lo harh a hlau lutuka, ka tir haw lui anih kha, a awm loh chuan naupangin chaw an eiṭha duh lo zel a" Urosy nu in a lo ti mawlh mawlh a. Rei awm loin ka haw leh a, in ka thlen chuan Umawipuii te nufa an lo leng a, ka nguai em vang chuan an zinga awm pawh ka chak lo.




Ka mu chu ka lo muhil sek a, ka Phone ri ah chuan ka harh hlawl nghe nghe, min lo be tu chu Urosy a ni a, Damdawiinah a awm leh tawh a ni ngei ang. Phone ka lak rual chuan a rawn ṭawng nghal bawrh bawrh a, a nuin ka kal thu a hrilh a nih hmel.




"Hei, Drip kan la khai a, a zun te an siak bawk a, " tiin min lo hrilh a, naktuk chhun lama ka tlawh tur thu ka hrilh chuan a lo lawm thiam khawp mai, "Lo kal rawh, i hman chang apiangin lo kal teh, chhangchhiat nen chuan ka indaih lo lutuka, Lucy kutah ka dah hreh ve bawk si a, ka nu kutah naupang ka dah a, a harh laia lo awm loh ka hlau bawk si, a harh laia nang tal i lo awm chuan a bangbo lutuk lo ang chu" a ti luam a, hmeichhe naupang ven rual lek an nei bawk si a, nu leh pa ber Damdawiin a awm chu a buaithlak ve viauin ka ring a ni.




Zan inkhawm banah chuan; thingpui in a Sitting room a kan ṭhutkhawm laiin Phone call ka dawng a, a Number chu ka hriat ngai a ni lo, "Ka han inthlak ange" tih leh thawh ka rual a, Call chu ka chhang zui bawk.



"Mimite.." a rawn tih chuan ka phu deuh zawkin ka hria, phawk deuhin Number chu ka en ṭha leh a, tu Phone nge maw a rawn hman chu le?




"Hello.." thum dut a a rawn tih leh chuan thawk ka la hmasa te te a, "Ti nge i Phone?" pehhel lo zetin ka ti nghal tawng bawk.



"Ka hnathawh na ah ka ti chhe daih a, a Screen a thim daih" inthlahrung tih hriat deuh hian a rawn ti a, ka va awih chiah lo em..!



"Hei hi tu Number nge?"



"Ka nu" a rawn tih chuan tlemin ka awm a nuam ta deuh.



"Nizan aṭangin i reh hmak sia, ka ngaih a lo ṭha lo hman a lawm" pangngai deuh zawkin ka ti leh a, "Nia, i Number kha ka hre si lo a, Suzanne-i ka dil a, min pe har deuh a lawm maw le" a ti niah niah a, a aw ah chuan inthiamlohna a la lang reng a; mahse, hriat chhuah zawk ka nei tlat.




"Ka Number i duh te chuan Ununfeli kha zawt mai ta che, chaw in ei ho reng sia" ka ti zauh a, a ngawih vung vung hnuah "A...." tih zawng chuan min la chhang zui a, ka van lungawi lo tak.



"Tinge i zawh mai loh" min chhang ngei se ka duh vangin ka zawt nawn leh ngat a, "Ka be peih lo" a rawn tih chuan ka awih lo hle ringawt.




"Ka va han awih lo" chu thu chu ka ka aṭangin a rawn chhuak phawng mai, ka insum hman lo a ni.




"Ka be chak lo" a ti leh nghut a, a hmuh loh lamah ka ner nasa ngang mai.




"Be peih si lo, thlalak pui peih tho si.." ka ti leh hram a, ka sual thiam a sin, ka thik em a ni, vawikhatmah thla kan la lak dun ve loh laiin khatiang thlalak kha ka hmu a, Ununfeli ni lo sela chuan heti lutukin ka ngai lo maithei, Ununfeli anih vangin ka thik zual bawk, a chhan chu Ununfelin a duh zia ka hriat vang a ni, chu loah....ka awm hnai ve si lo a, ka hlauthawng pawh a ni mahna.




"Engtin nge i hriat a?" a tih chuan "In thlalak ka hmu" ka lo ti sam et a, "Ho lutuk, ngaih thutak tur a awm lo a nia" a tih chuan "Eng kha nge ka ngaih thutak loh tur chu, ka thik te i ring ve lo a mi?" ka ti hluai a, eng kawngah mah hian ngaihsam lutuk nih ka duh tawh lo, tihsual zeuh neih pawh ka hlau tawh.




"Thik tur a awm hleinem, thik turin ka awm miah lo" a ti nghet charh a, a inthlahrung ta vak lo tih a hriat theih bawk.




"Khatah i awm daih a, nula dang nen chaw in eidun bawk a, chu chu ka thik loh chuan ka duh che em tih hi inzawh nawn ka ngai zawk ang, nang chu i thik thu a chhe ve lo a ni maithei a, kei chu ka thikthu a chhia a nia" ka ti zui duah a, engtin tak ngai ang maw ka tih rilruk lai chuan "Ka thikthu a chhia" a rawn ti leh khauh a.




"Ka la hre ngai lo anih dawn chu" ka ti hap a, a thikthu a tih lan awm ka la hre miah lo tak tak.



"I hre lo reng ang, ka hmuhtir ngai hleinem che" a tih chuan zawhna ka ngah nghal viau.




"I thik turin ka awm ka la hre miah lo" dil chhut deuh hian ka ti a, zat loh hmel fe a nui ri chuan min ti bang bo zual.




"Thil ṭangkai anih loh vangin ka tilang lo mai a ni, kan sawi thui dawn duhtawk ang" a ti leh nghat a, ka hrechiang chak tlat, a thil sawi chu rin dan ka nei thiam riai ruai a, eng rilru tak tak nge a put hriat ka duh a ni.




"Ka hriatthiam theih turin sawi teh" ka tih chuan a ṭawng mai lo, min chhang tawh dawn lo emaw ka tih hnuah "Min chik ve ngai miah lo em ni, keichuan i mitmeng aṭang ringawt pawhin i hlim leh lungngaih te, i hlauhthawnna te thlengin ka hre thei a sin, mipa dang i ngaihtuah lai khan ka thik loin i ring em..." a ngawi leh rih a, engmah ka sawi tawh bik lo, a thilsawi vang chuan sawi ve tur engmah ka hre tawh tlat lo.




"Ka dem miah lo che mahse, ka thikthu a chhia tih hi chu min hriatsak dawn nia, tumah min thik tir suh, i hnuleh hi chu midang an awm tawh lo ang, ka duh zia che i hriat tawh kha" a tih ri chuan min fan hneh ngang mai, "Naktukah ka lo haw anga, ka rawn hmu dawn che nia" a tih hnuah kan inbiakna kan titawp a, kan inbiak zawh hnu te pawh chuan a thil sawi chu ka bengah a cham reng a, 'I hnu leh hi chu midang an awm tawh lo ang' a tih ri mawlh kha a ni.




Thawhṭan tuk dawr ka thlen hnu rei vak loah Urosy'n min lo Phone-in Ufamkima harh tawh thu min lo hrilh a, hmanhmawh deuhin Damdawiin lam ka pan nghal a, ka va thlen chuan an chhungte pawh an lo tam viau tawh.




"Mimite, hetah lo ṭhu rawh" Urosy chuan ka ti sawk sawk a, Ufamkima lo meng diar diar ka hmuh chuan ka thaw huai huai thei, chutah...ka ep chiah a Lucy ṭhu ka hmuh chuan ka kimki chawih thung.




Nuihzat hmel fahrana min melhin a bula nula ṭhu chu a hrilh ru a, ka chung chang a hrilh a ni ngei ang nula pawh chuan min lo melh vat a, a nuam duh tehchiam lo. "A pang lehlam hi a la ti che thei lo a. Mahse, Doctor khan Therapy lakin hei hi chu a dam leh thei ang a tia, hun erawh duh rei thung anga" Urosy chuan a ti sap sap a, midang an haw hnu pawh chuan Urosy'n min chelh rih a, Umawiin "Dawr lam kan buai lo" a tih vangin ka ṭhu ve ta reng a, Ufamkima hmel pawh hmuh a nuam sawt viau mai.




Urosy'n a biak chuan hmui phun hian a chhang ṭhin a, a aw a chhuak hleithei meuh lo a, a lei chu a che ṭha thei lo anih ka ring. Doctor ten thil tuiril lam chauh pe rih turin an lo hrilh a, chu pawh chu a lem ṭha thei meuh lo a, a kam sirah a baw liam zung zung ṭhin a, a lainatawm tak zet a ni.




"Canteen ah ka va kal lawk ange" ti a Urosy chhuah hlan chuan ka lo ṭhutpui a, ngawi renga ṭhut aiah tiin ka be seuh seuh a, chiang deuh deuha min en bak chu min chhang lem lo thung, "I ke hi hmehsak i duh em?" ka tih chuan a bu nghat a, a taksa veilam thla zawng chu a che thei lo lai anih hmel bawk.




"Dawrah i bialpa a lo kal a, i awm si lo a engtin nge ka sawi dawn?" ti a Umawipuiin min lo zawh chuan awm a nuam lo kher mai, "Hrilh mai rawh" ka ti ta ringawt a, zep loin hrilh zel mai ila ṭhain ka hria, Ufamkima lakah chuan engmah han thik chiam tur a awm tawh pawhin ka hre lo a, mi puiting tak anih vangin a pawm thiam lo viauin ka ring bik lo a ni.




A ban hmehsak leh ka tum laichuan a kut che thei lam chuan min lo ban vut a, ka kut chu a hmer zui vawng vawng bawk a, sawi duh engemaw nei niawm takin a ang deuh zuau a, a ṭawng ve taknain engmah a sawi ka hre thei lo. "A tawk tawh a mi?" ka tih chuan a bu leh nghat a, chutah ngaihawm zet hian min nuih a, hetianga Ufamkima nui hmel hi engtia rei nge ka hmuh tawh loh ang le...




"Ufamkim, i rilru ti hah tawh miah suh aw, i nupui leh fa te tan i hrisel ṭhat em em a ngai a nia" ka lo tih chuan a bu leh nghat nghat a, Urosy lo lut mek a hmuh chuan a en vat a, a lo ban thuai bawk. A nupui bulah chuan thlamuang hliah hliah hmel a pu a, damdawi an inpe laite chu an hmuh nawm ka ti takzet a ni.




"Mimite, i ṭhianpa Samuela kha ṭha kan tihpui lutuk che a, Ukima hriat chian deuh a lo ni bawk a, ani pawn a fak teh a nia" Urosy'n a lo tih chuan Ufamkima zawk chu ka va en a, min lo nuih leh tawh, a mitmengah chuan an nu thilsawi chu a pawmpui zia ka hmu thei, chu chuan engti zawng emaw hian awm a ti nuam veng veng bawk.



Damdawiin aṭanga chhuah pahin Usamua chu ka Call a, a tlang thei miah lo, a hnuah a Phone a tih chhiat thu kha ka hre leh hnuhnawh a, a dang leina hman pawh a la awm reng reng hleinem maw le.



Dawr ka thlen rualin dawhkan hmasa bera Usamua thingpui lo in lai chu ka va hmu a, min hmuh rualin min lo nuih suk a, a chhe lo lehpek ngei mai, a lu a met thar nge a hmuihmul a zuah buk loh vang zawk chuan a lang fai vung a, a Denim jacket hak chu a la inhmeh em em zui!




"Eng nge a lo an a?" a bula ka va ṭhut rualin a lo ti nghal var a, ka inthlahrung zawk tak tak a ni.




"A zia ve zel... a taksa veilam thla a che thei lo a, amah chu a harh ṭha" ka ti niah niah a, min ngai kawi angem tih hriat tum chuan ngun tawkin ka thlek pah a, a mit ko a san rulh danah a ngai kawi lo niin ka hria.




"Naktukah chaw lo ei ta che, ka nu nen kan lo kal a, hmuh che pawh a duh a" a tih chuan ka hawi phawk hra a, "Teh thut chuan, ti nge..?" ka ti hap a, ka zam nghal der mai.




"I chanchin ka hrilh a?" a ti sam leh mai a, a ngaih awlsam hmel angreng.



"A tih chi dawn a mi, Suzanne-i te an awm bawk si lo" ka tih chuan a nui suk a, "An awm loh hian a ṭha zawk, an awm chuan an buaithlak mai mai" tih pahin a thingpui chu a lem hlak a, a hmel chu an han lungawi hmel em em lehnghal a.




"Ka van hreh reuh e..." ka ti leh ringawt ṭhin a, min hrilh chawp chilh bawk si a, ni lo sela chuan vawiin te hian Parlour ah sam te va siam tir ila ṭha tur hi a nia.




"Chhunah hna ka thawk lawk anga, tlaiah ka lo lam mai ang che" a tih laiin "A chi loh, chaw ka lo eidawn chuan hma deuhah min lo hruai rawh, eirawng bawl pui hman miah loh kha ka duh lo a nia" ka ti zung zung a, mi in a chawei hi tun thleng hian nuam ka la ti thei lo, ka ei dawn anih chuan eirawng te bawl pui ve ka duh a, anih loh chuan inthlahrun ana dawn lutuk a, tun ṭum phei chu a nu a ni lehnghal a.




"Dar hnih velah aw niang" a tih chuan ka hnial lem lo, a haw tur chu kawt thleng ka zui chhuak a, "I nu chu ka chungchang eng nge i hrilh a?" nui chunga ka tih chuan amahin a nui suk suk a, engtak chu hrilh ang maw?




Chutah ka beng bulah a rawn kun hnaia "Kan riah dun thleng chiah kha ka la hrilh" a tih rualin a awmah ka lo beng dawp a, kher kher a...tih chi loh berkher emai a....!




"I hrilh tak tak em?" nui chunga a bu nghat nghat chu phawk fahranin ka en a, awi....dawt sawi hmel zuk pu miah lo chuan!




"Engtin nge i sawi a, khatiang te han hrilh.." ka aw chu a ring lo, sawi zawng ringawt pawh chuan zak tak ka ni.



"Engmah kan tih loh kha.." a tih leh takah chuan tlemin ka awm a nuam deuh, a rawn kun hniam leh deuha "A te te chiah ka la hmu, a lehlam chiah ka la khawih bawk" a nui ri suk a....reuh chuan a.




"I zak thei lo lutuk" a nakah chuan ka sik hlawk hlawk a, ani a lo indang ve bawk nen kawng a kal ho chuan min hmu duh khawp mai a, a zia lo lam mah a ni.




"Naktukah kan inhmu dawn nia" ka bianga piai zauh pahin mit min siai sak a, a kal nghal nul nul chu ka thlir reng bawk a, a bulah hi chuan hah hi a dam sawng sawng zel, khawvel dang daihah hian min chentir ṭhin ni berin ka hria, ka hlima; ka nui reng ṭhin chu a nih hi.




"A nu a hmelhriat tir dawn che chuan inneih lam a sawi hnai dawn anih chu" ti a Umawipuiin min hrilh chuan ngaihtuah a thui hle a, inneih chung chang hi a hma pawh khan fiamthu angreng deuhin a sawi tawh a, nupui neih a hmanhmawh tawh tih ka hai lo bawk, amaherawh chu mi pahnih inkar mah nise mipahnih te thutlukna ringawt a tawk lo a, kawng erawh a la thui viauin ka hria.




"Pasal ah i duh reng reng em?" Umawipuiin a tih chuan lai deuhin lu ka bu a, "Pet put a che, rawp ve deuh tawh a ni maw" a ti kher lehnghal a, a sawi duh dan ṭhin hi a..



"A fel a, a taima bawk a, pasal tlak i ti ve lo a mi?" intithei rilru deuha ka tih chuan min rawn melh ralhin "Kum hnih kum thum inngaihzawn hnuah inneih i duh chauh emaw ka tia" tiin min chhang a.




Chu chu hmana ka duh dan ṭhin kha a ni a; mahse, tunah chuan a danglam tawh, Usamua hi ka duhzawng a ni em tih hriat nan hun ka mamawh lo, ka duhzawng a ni. Innei tam tak te hi kum hnih thum an inngaizawng vek kher hleinem, inneihna hi chu Risk fuh leh fuh loh te pawh a ni tain ka hria, chuan....Usamua hi ka Risk ngam sak.




Zanah a nu Phone-in min lo bia a, "Naktukah Phone min lei pui la a ṭha ang" a tih chuan ka lo aw ve mai a, tlai lo turin kan inchah ngun hle bawk. "Ka nu chu biak bawrh bawrh a nelawm chi a nia, i hmu anga i ngaina nghal mai ang" a tih vang chuan ka phur ve viau a, chawei kham lama eitur engemaw keng ve ila ṭhain ka hria.




Zinga ka dawr kaltur te chu nidang zawng aiin ka insiam rei a, thawmhnaw senno ka hak hi chuan ka lang dik ve thlupin ka hre ṭhin, a senno hi ka ngaina a; inhmeh ka intih ve ber a ni. Dawr ka thlen chuan naute hoin min lo fak sap sap a, vawiin chu nidang aiin ka lang nalh a ni mahna, nidang angrenga lan kha hlau tlat hek le...




Counter-ah ka va ṭhu fel awrh tih a Urinmawii a lo lut a, "Mimi, mi harsa te ṭanpuina tur bawm a nia, kawngka bulah hian dawh ve ang aw" ka chhan hma hma chuan kawngka bulah a rawn hung sawk sawk a, a bawm rawn dawh chuan chhin pawh a nei lo a, ama siam chawp te pawh a ang zawk lek lek.




"Khawilam mi harsa te?" ti a ka lo zawh chuan "An khaw hming ka theihnghilh, lo halna ah an pa ber a kang hlum a, an nu ber chhul ṭha lo a ni bawk si a, tikhan lo dawh la, ka hming a ka pek tur" tih pahin ban a vai thuak a, a kal zui nal nal mai. A phakar ka ti deuh dawn a; mahse, thil ṭha ti tur anih vangin phakar ka ti duh ta em lo, a duh na ah hi chuan a fel ve riau zel, fak a lawm thei em mai pawh a.




Chutia mi ṭanpuina tur te anih chuan tiin pawisa chu ka thlak ve a, Umawipuii lo lut pawhin a en vung vung hnuah cheng 50 a rawn thlak ve tehmial a, "Tu dawh nge?" ti a min zawh a ka chhan chuan lak let leh a tum ut ut a, "La let lo ang" ka tih tlat vangin a la ta em lo. Lo lut chhuak apiang chuan an thlak belh ve zel a chawhnu lamah phei chuan a tam ve viau tawh.




Samuela chu dar hnih velah pawh a lo la kal lo a, ka va Phone chuan "Hmanhmawh suh, ka nu pawh a la bazar mek, ka rawn lam tir zawk dawn che mi?" a tih chuan ka hnial nasa mai, "Nangman min lo hruai rawh, lo hmanhmawh ve la" ka ti lui tlat a, chutih laiin Urinmawiin "Thei ka bawl a, lo ei ve rawh u" tiin min lo ko a, Phone ka dah hnuah Umawipuii kal chu ka zui ve thuai bawk a.




Ser a lo bawl hluah a, thei thur ngaina lo tan pawn Urinmawii ser bawl chu tui tak a ni, ka ei ṭeuh mai. An kham lo chuan a dang an bawl leh a, "Ka ha a ṭim tawh emai, ka lo va phei ang" tiin ka chhuahsan a.




Dawr ka lut tur chuan thil mak deuh ka va hmu a, kan bawm dawh chhunga pawisa kha nu pakhat hian a lo la nghauh nghauh a, a Bag ah zuk han khung nghal daih chuan! Hmanhmawh deuhin ka va pan a, a Bag chu ka pawt nghal lawp a. "Eng nge ni?" a lo ti vin hlur a, keiin rum em em in ka melh thung.




"Ka pi i pawisa ruk kha lo dah let rawh" pangngai thei angberin ka ti hmasa a, ani a ṭeu nghal hlar thung. "Ka ru awzawng lo, naupang te te i va zak lo em...ka dah zawk anih kha" a ti mauh mai a, a la lai leh a Bag-a a dah lai kha ka hmu chiang ve tlat.




"I Bag-a i khung kha ka hmu che" ka ti chang fak a, a Bag hrui chu ka pawt nghet sauh bawk.



"Thlah vat rawh, rukru emaw te min han tih mai mai chu" tih leh Bag chu pawh a rual a, keiin ka lo chelh nghet ve bawk nen a hruai chu a ri ṭhawt a, a chat tih hriat takin a uai nel nel mai, a Bag chat a hmuh rual chuan a rawn sa leh phat a, kawngka lamah chuan min nam phei rawk nghe nghe.




"Mimi...eng nge thleng a?" Umawipuii lo lutin a tih chuan thil awmzia chu ka lo sawi zung zung a, kan pi-i chu a lo insawifiah ve nasa mai bawk a, kan inṭawng chhawk a ni ber ang, intihbuaina a tel hi ka mizia a ni ngai lo; mahse, mi harsa te pual tur ah hi chuan ṭhahnem ka ngai ve tlat a lawm le.




"Ka ru awzawng lo, ka thil ei man pek tur hi a tlang si a, khatah khan pawisa thlak ve ka duh vangin Zanga ka dah a, ka inkir a nih kha.." a ti fak fak a, "Hei, enrawh...hei hi ka pawisa chu a nih hi" tih leh pahin bawma Zanga tlang chu min hmuh a, chutah...a Bag chu hai lehin pawisa a lo pawrh a "Hei, chhiar rawh..cheng zali chiah chiah a ni em?" ka hmai bula a pawisa rawn lek chu Umawiin a lo ban a, a ri meuha a chhiar chuan cheng Zali chiah a ni.




Umawipuii chuan min lo melh rulh rulh a, ka va han zak mai mai tak, "Ui leh..." tih chiah ka sawi, kal sawn mai ka tum chu "Hrechiang mang lo chuan tumah khatin puh tawh hauh suh, mi pawisa hi ka damchhungin ka ru ngai lo ang, ka mamawh tawk chu ka faten an thawk chhuak ve" a ti leh hmarh hmarh a, mahni lo maha inthiamloh sa nak a laichuan.




"Ka lo hriat sual a nih kha ka pi, ka tihpalh lutuk" ka ti zawi sep a, a hmel chu en pawh ka en ṭha ngam tawh lo, Usamua lo thleng vat vat sela, min lo hruai daih sela ka ti.




A Bag hrui chat chu sam chungin a la phun hluk hluk a, min lo en leh rualin ka hawisawn rang ngang mai, "Tunlai hmeichhe ho hi inlo rapthlak a nih hi" a tih leh hnuah a chhuak nghal hlawk hlawk a, Umawii lam ka va hawi chuan a nuih a za hle tih ka va hmu thei.




Dar thum rik hmain Usamua chu a lo thleng ta hram a, a rawn thlan hluam mai; Mahse, rimtui ka tih deuh rim kha a rawn nam a, a chal leh bek vela a thlan bawl ṭiam ṭiam te chuan a ti lang pa zual hle a, a hah lai hian a hmel ṭha zual zawk emaw tih maitur a ni.




A Scooty ṭawng deuhah khan kan inphur phei bauh bauh a, "Pawisa te hi i khawl ve lo a mi, i mamawh tho sia Bike te emaw lei la, i duh chuan ka Scooty kha tlawm deuhin ka leitir ang che" a tih chuan a nui kur kur a, " Bullet ka nei a lawm, Scooty hi hmanraw phurh nan a ṭangkai zawk a" a ti mai a, a sawi dik veleh reng mai.




An in bul kawngpuiah Scooty chu a hung ṭha a "Kan dah lut nghal a nge, haw lamah chuan Bike-ah ka phur tawh dawn che nia" nui chungin a ti leh a, inhnuai Garage- a a dah luh laichuan la chho duh mai loin ka lo nghak a, "Ka sam a hnawk em?" a lo thlen ruala ka tih chuan ka sam chu a rawn hui ṭha mawlh mawlh a, engmah phei chu a sawi lem lo.




Step ah kan inzui chho a, kawngka a kik laichuan phurna leh zamna in ka tiril min fan a, ka lam hawia min lo nuih chuan tawi tein ka ṭhensak a, zam viau e ti lo chuan ka awmdan chu a nuam ka ti, chutih laiin kawngka chu chhunglam aṭangin a rawn nam hawng a, Usamua chu a pen lut zui bawk.




Mahse le..luh ve mai ka tum chu ka pen tawp chiang hle! Phawk zeta min lo en tu chu a aia phawk maha ka en let ka ring!



Ka hma a nutling ding chu tudang ni loin kan dawr lo kal; pawisa chungchanga ka inhnial pui nu ngei kha a ni!



(Zawmna)



"Aw haw....nang chu!" ka hma a dingin a lo tih rual chuan tawi tein ka lo nuih a, min nuih let lo chiang khawp mai.




"Mimitei chu a nih kha" chhunglam aṭangin Usamu-an a lo ti a, ka pi lah chuan kawng min ken mai a tum lo nge ni ka hma ah a la ding ran a, a phawk ve fe chu a ni ngei ang min melh run run a, engmah phei chu a sawi zui bik lo. Chutih laiin ka thaw a ipik tup tup a, ka ṭah te lam lam a chhuak zawk.




"Ih...." ka ti hap ringawt a, sawitur ber pawh ka hre lo, ka zak lutuk chu khuk chem chem a khuk ral daih mai ka nap a. Usamua nu lah chuan a mitmeng aṭang rengin min hai lo tih lang vek si, ka ṭhen leh chak ṭhin a, tun ang renga zah hi ka tawn leh tawh pawh ka ring lo hial a ni.




"Eng nge in tih reng a?" ti a Usamua a rawn lan leh tak vutah chuan ka pi chu a kalsawn ta chauh a, Usamua hmel ka hmuh chuan kan awmdan chu mak a ti tih ka hria, ka pi chu ngawirengin choka lamah a phei nghal nal nal a, ka pen lut te chu ka ṭi dâk tawh.




"Ka nu chu..!" tih leh pahin choka lam a hawi vut a, chutah min rawn en lehin "Eng nge tunah khan a sawi?" a lo ti leh a, dar ka kan ak ringawt a, chhan ngaihna pawh ka hre lo.



"Lo ṭhu hahdam la; kan intifai phawt ange" tih paha Sitting room lam pan mai a tum chu a kawr ah ka lo pawt a, "Intifai lo ang, kal daih suh" tiin ka pawt bet ṭung bawk a, mak ti deuh a min en hnuah min rawn nuih a, "A zahthlak loh, ka nu pawh kha a lai deuh anih dawn kha" a ti zawi sup a, a nu kal nal nal chhan chu a laih vang a nih loh zia ka hrechiang mai bawk si a, ka awm a nuam thei hlawl lo.




"Nakinah intifai mai rawh" ka tih leh takah chuan zawhna mitmeng hian min melh tawh a, engtin nge ka hrilhfiah dawn ni.




Sitting room a kan phei hnu pawh chuan bet lo lutukin ka ṭhu a, thawm awm hlek ah chuan ka hawi leh hrak hrak ṭhin a, Usamua chuan min thawhsan daih ang tih ka hlauh vangin ka melh chhen reng bawk.




"Ka va inbual lawk ang chu, ka rei lo ang" a tih pawh chuan "Nakinah" ka ti deuh tlat a, min thawhsan chu hlau tak ka ni. Tv on turin a tho a, chumi hnuah a pheikhawk a phelh zui mual mual a, thin phu dep dep a ka lo ṭhu chu mak min tih hmel deuh hian min lo en ṭhin a, a awm ka ti nuam bik chiah lo niin ka hria.




"Mapui, thingpui in duh em?" choka lam aṭanga a nuin a lo tih rual chuan ka ṭhu ngil zawt a ni ber.




"A thlum nge i duh a hâng?" Samuel-an a tih chuan lu ka thing vat a, "Duh lo tak tak?" a ti nawn leh a.




"Aw, ka ril pawh a ṭam lo" zep loah chuan ka ril a ṭam lutuk a; ka pum a ri a ri tawh zawk a; mahse, tunah tak hi chuan thingpui in thei ziazâng ka ni lo, ka hrawk te chu a tawt zo vekin ka hria.




"A hâng ka lo duh ang" Usamuan a tih chuan "I ṭhiannu khan a hâng tho a mi a duh?" a nu chuan a lo ti leh a, ka duh loh thu a lo hrilh chuan a lo chhang let tawh lo a, a thawm ka hre pha reng bawk nen choka lam chu ka hawi leh ṭhin a, a rawn lang thut ang tih ka hlau a ni mah ang chu.




"Lo ṭhu lawk rawh" tih leh choka lam pan a rual a, chu veleh kei bathlar lamah ka chhuk vat a, thawk ka va la kawk kawk ringawt a, ka awm dan chu a hahthlak ru kher mai, rei deuh ka din hnu chuan Usamua lo pen thawm ka hria a, thingpui no chawi chungin ka bulah chuan a lo ding a, "Chaw kan eihar dawn lo nia" a tih chuan ka chhang lem lo.




"Tikhan lo awm la, ka nuin ei a rel peih tawh a, chawei hmain kan intifai law law ang" a tih leh takah chuan ka aw ve ta chauh a, "Rei lo la aw, mahni chuan a nuam lo ve a" tiin ka chah zui hram a, a inbual chhung chu bathlar a awm ka rilruk bawk.




Usamua luh leh hnu ah ka Phone ka hum chhuak lo tih ka hre leh a, Sitting room ṭhutthlengah ka dah daih mai, la tura ka va luh rualin an nufa inbe thawm ka hre zui zat a, "Rawn chibai ve la" Samuelan a tih chuan a chhan na ri ka hre miah lo a, chu chuan ka awm a ti nuam lo zual.



"Thei tui a awm em?" Usamua bawk a ni.




"Thingpui i in zo chiah emaw tia?" a nu chuan a lo ti vat a, "Mimitei ta tur" Usamua chuan a ti thung a, "Thingpui in mai sela, theitui leisa pawh a awm hleinem, Fridge a hawnsa in dah kha a rei tawh hmel ema ka paih hlawm a nih kha" a nu chuan a ti leh niah niah a, a awki aṭang chuan a nelawm fahran loh chu a ni.




"Sertui hi a duh mai ang a, khawpui nula ho hi chuan thingpui an ngaina ve vak lo a" Usamuan a ti leh a, ka lo ip ru ṭeuh mai.




"Khawnge a awm a?" a tih chuan "Bathlarah sawn" Usamuan a ti mai a.




"A tet reuh nen a va khirh ve" lo ti hlak tu chu USamua nu a ni. Tinge maw Usamua pawh chu le...engmah ka duh loh thu hrilh ruk ka chak tak tak a ni. Va phei ve lah chu ka ngam der bawk si lo a.




"Hmeichhe te hi chu an rilru a te duh a nia" a nu chuan a ti leh zel a, Usamua chu a nuiin ka hria. "A va ho e aw" a tih laiin a nu chuan a sawi zawm leh a "Khawpui nula awm no satliah te chu neih chi pawh va ni suh, nang te chu inpui changtu tur i ni lehnghal a, ka thu hi awih mai la ṭha tur a nia, i tana ṭha hi chu ka hre viau a sin maw le" a ti leh hlak hlak a.




"I hriatchian hunah chuan i lawm zawng tak a nih ka ring, a fel viau a nia" Usamuan a tih chuan ka awm a lo nuam ve huai huai mai.




"Inngaihzawn laichuan tumah an sual hleinem, a fel lo e ka ti pawh a ni lo mahse, ka en thuak khan Manuni aia a ṭhat bikna ka hmu miah hleinem, a nu te daih zawk lehnghal a, a hmel a bichit reuh bawk si a, a hmelṭha ka tih zawng pawh a ni lo" Samuela nuin a tih leh chuan ka hnual leh nghal rawih thei.




"Duhawm viau lawm ni" nui chungin pakhat chuan a ti leh mai a.



"Khatiang duhawm tih te chu a, naute lem a ang emai" a nu bawk chuan a ti leh a, chutih laiin ka Phone Screen ah chuan ka lo in en vat a, ka hmel chu a chhe thar riauin ka hria, ka hnar leh mit bawr te chu ka hmu bichit zo vek tawh.




"Eng nge chawhmeh i siam a?" ti a Samuel an a zawh chuan "Bawngsa siam rawh i ti sia, ka chhum hluah mai" a nu chuan ṭha deuh chuan a ti ve leh a, Samuela lo phei thawm ka hriat takah chuan hmanhmawh deuhin bathlar lam chu ka pan a, ka thleng fel awrh tih ah a lo lang ve thuai a, nelawm fahranin min rawn nuih sang bawk a.



"I la inbual na nge?" ka lo ti hluai a.




"Bual dawn chiah, nuam i ti meuh maw, ka duh aiin i zakzum dawn a ang riau" nui chunga a tih chuan dar ka kan ak a, "Ka nu saw lo kawm rih la, ani pawh tleirawl zahzum hian a la kalsan bik lo a" uangthuang deuha a tih chuan ka ṭhen ve sak a, engtin nge ka kawm ngam reng reng ang ni, min hau nek ang tih ka hlauh mah nak a laiin.




Inbual tura a luh hnu chuan Sitting room lam chu ka pan phei ṭhem ṭhem a, ṭhutna ka thleng ṭep tih ah Samuela nu lo phei nen chuan kan intawk hlawl mai, ka ding mar nghal at a, ani pawh chuti tho.




"Bawngsa hi kan i duh em?" a rawn ti bung deuh nghut a, "A..a..aih, a ngai..chuang lo..ang,..ngai chuang lo..mai" ka ti bah nak a, ka dang awk a rawn chhuak leh tlat tawh.




"Chhum tawp i duh maw?" a tih leh chuan hmui petin ka bu nghat ringawt.




A kal leh hnuah thawk ka la hluai a, bathlar lam chu ka pan leh nal nal a, rei vak lo hnua Usamua ṭawng thawm niawm tak ka hriat chuan ka lut leh chauh a, "Chaw ei hma ang" a tih ri ka hriat hnu lawkah Towel bat chungin a lo lang a, "Lo kal teh" a rawn tih chuan ka lo en hau ringawt a, a kuta min rawn hui leh takah chuan phur lo deuhin ka zui a, dawhkan kila a nu lo ṭhu chu ka va hmu nghal thuai bawk.




Awm ti nuam lo zual tur tingin dawhkan chungah chuan a Bag hrui chat kha a lo let ngat a, melh pawh ka melh rei duh lo, ka awm dan chu rawn hria sela chuan min khawngaih lehling zawk in a nia ka rin ni. A nu bula Chair chu min pawhchhuah sak a, kimki deuha ka ṭhu chu an nufa chuan min en ran lehnghal a, sawi tur a vang duh kher mai.




"Engtin maw an koh che?" a lo tih chuan "Mimitei a nih hi" Usamuan a lo ti var a, chhan tuma ka ang zuau hman chu ka tawp leh rih.




"Ka nu hi Nu Rengpui tiin i ko dawn nia" Usamua chuan a ti leh a, Nu Rengpuii lam ka va hawi chuan min lo en ve chiah a, kan in en hnai em em mai bawk a.




"Chimchawk i ei duh em?" a tih chuan phawk deuhin ka lo en a, Chimchawk chu eng thil nge ka hre hauh lo, "Aw, duh e" tiin ka chhang ta tho.




"Baibing rep ka chhum bawk a, i ei ngai em?" a ti leh zel a, chu kher chu ka duhzawng tak a ni.




A chawhmeh siam ho chu a sawi dan dan a, ka ei ngai em tih min zawt zel bawk a, "Aw" tiin ka chhak thla vek mai, 'Aih' tih thumal lam rik chu hreh tak tein ka hreh a ni ber.




"Duhloh pawh i nei nange chu.." tum hmuk chunga a tih chuan chhan sual ka nei em mawni ka ti leh rum rum a, "Ka nu ang chiah i nih chu" Samuelan a lo tih takah chuan ka thaw huai thung.




"Ei duh loh neih chu mi ina chaw eiin a buaithlak duh, hmeichhia ngat phei chuan eiduh loh neih loh tur, mi ina awm tur in nia, ei duh loh in ngah chuan insiamrem in harsat lutuk ang" a ti nghat nghat a, min bia nge pawh ka hre lo nain ka lo bu ve zel tho a, ka awm dan chu mawl min ti dawn hian ka hria, a tih ngaihna chai hre hek lo le, kan inhmuh hmasak khan khatiang thil tehhrep kha thleng lo sela; ka heti lutuk bik lo tur.




"Kawr kan ha lawk a nge?" ti a Usamua tho chu ka va melh ṭawk ṭawk a, a kal liam hnu phei chuan ka ṭi lehzual a, ka bula ṭhu chu ka melh ngam miah lo.




Kan ngawih vung vung hnuah "Ka Bag hrui lah chu i pawt chat daih mai a, len chhuahna Bag ka neih chhun a sin maw le" tih leh dawhkana Bag chu ban a rual a, ka va inthlahrung lehzual tak.




"Nia..ka lo hriatsual chiang lutuk a, pawisa i la lai chiah kha ka lo hmu sia, i dah lai ka hmu lo a" ka ti zawi sep a, ka ṭawnglai pawh chuan ka melh ngam chuang lo.




"Mi te pawh zawhfiah hmasak tur a nia, engah nge i rawn tih phawr phawr ni" a ti leh kher a, a Bag hrui a sam lai chu enin ka ngawi ran mai.




"Engtin maw Mapuia nen in inhriat a?" a tih takah chuan tlemin ka phur ve ta deuh. "Kan dawr Ceiling an lo siam a...chuta..ṭang chuan..a nia" ka ti hap a.




"I dang a awk deuh a ni maw?" a lo ti khauh mai. 'Awk lo' tih tlat chi ni hek lo "A lo awk.. leh..palh ṭhin a" ka ti bah nak a. "Aw..haw.." tih zawng chuan min chhang a, min iai phah ka hlau ngei mai.




"Kum eng zat nge i nih?" a tih leh a.



"Kum 28 na ka hmang mek" ka tih rual chuan min rawn thlek vut a, "Rin aitak chuan i upa bawk sia, i nutet vangin i lang naupang a nih dawn hi" a ti chuan ka lo ip ru ṭeuh a, a ṭawng dan ve reng em mawni dawn le, ka thla a ti ngam thei lo reng reng.




"Ka Senior tawh a lawm; Mahse, Usamua nen chuan kan la inthlau deuh a" ka tih laichuan min rawn thlek nawn leh a, chuta a rawn nui ṭhen ṭha chuan min ti mur sung sung thei!




"Pawl engzah thleng nge i zir ve?" a ti leh daih a. M.A ka zawh thu ka hrilh chuan "Aw haw...!" a ti leh hluai a, eng nge a rilru ah awm ang ngaihdan ka nei thiam hauh lo.




"Hna thawh tur i hmu rih nange?" a ti leh zel a, "Dawr kha ka enkawl a, hna dang pawh ka zawng lo, bakah tunlaiah chuan sawrkar hna a vang tawh a, Political fitness a ngai zel tawh sia" ka ti ve luam a.




"Ni e tiraw, Politik hi a buaithlak emai a, Ramdinzuala pawh rei deuh hna nei loin a awm ve reng phah a lawm, hna a hmu tawh emaw ka tih laiin 'Hna hmuhna tur Exam ka nei' a ti leh rih ṭhin a, kan hunlai te kha chuan zir chhuak hmasa kha sawrkarah an lut deuh zel kha a nia, tunah chuan kawng a thui tawh emai" a ti zui duah a, kan titi zui takah chuan kan boruak rit zet chu a kiang ta deuh a, keipawh ka inthlahdul ve thei deuh tawh.




Usamuan Sitting room ah Tv a en a, min rawn pawh duh rih lo a nih ka ring, Nu Rengpuii a titi tui bawk nen chutia kan pahniha inkawm falna hun kan nei chu a ṭha zawkin ka hre ta a, keipawh ka inkiltawih viau duh ta lo, a zeizia ka man ṭanin ka hria, Usamua nu chu ngamtlak taka biak bawrh bawrh chi a nih hmel e.




"Mapui, chawi kan ei tawh dawn em niang, Niniau-i ril pawh a ṭam tawh ang" a tih chuan ka ṭhu ngil hluai a, ka hming a sawidan chu ka lo hre fuh ngang mai.




Chaw ei kan siam dun a, chet ṭhan lohna tih takah han tih vak ngaihna ka hre tlem hle a, chaw ka lo khawrh lai mekin "Niniaute, a nem laikha min lo pe rawh, ka ha pui hi a nghinga dimdawi a ngai tlat" a lo ti zung zung a, dawhkan kil chungin Usamua pawh a lo nui kur kur a, ka hming chu hre ṭhelh ve tak a ni.




"Mimitei a lawm.." Usamuan a lo tih chuan "Niniautei tih a inhmeh zawk daih a lawm" a ti sam mai a, chawei chhung zawng pawhin Niniau tih hlirin min ko a, ka tan lo huat chi pawh va ni suh, lawm taka ka 'Aw' zel mai loh chuan; ka bialpa nu a ni tlat a.




Nu Rengpuii chu chawhmeh siam a thiam khawp mai, hmarcha tel loa chaw ei hleithei ngai lo pawn ka ei ṭeuh a, hmarcha a ngam lo nge ni a Thlairah baiah takngial pawh a thlak lo a, eng chawhmeh mah chu thak eih pawh a awm lo.




Chaw eikhamah Usamua nen bathlarah kan ṭhu dun a, Thla a êngin boruak a nuam hle a, ka beisei ang aia hun ka hmang ṭha chuan min ti hahdam sawng sawng a, kan thlen hlim ngaihtuah chuan tun hun chu beisei phak bak a ni. Nu Rengpuiin thingpui hang min lo pek lai te chuan ka hlim hmel ka lo ti lang leh mah mah ṭhin.




"Engtikah nge i chhungte min hmelhriat tir ve ang?" tiin beisei nei zet hian min zawt a, "Engtik nge niang aw, Pathian ni te hi kan awm kim lai a ni ṭhin a, nangpawh i hman ni a ni bawk anga, a ṭha mai ang a" ka tih chuan a phurna chu a mitmengah a lang thei.




"Ka nupui tur chu i lo zawng ṭan tawh em?" ka kawnga min rawn kuah salh pahin a ti a, "Zawng e, mi buai lutuk chu hmasawn pui a har deuh an tia, tlemin hun thawl te hi han nei ve thei deuh la" ka tih chuan a nui suk a, "Ni e tiraw..tunkar bak chu mimal thil ka khawih tawh lo ang, Workshop luah tur ka hmu tawh alawm" a tih chuan ka lo en let ha a.




"Mamita ka dawr khu tihtawpa helama dawr hawn ka rilruk a" tiin min lo hrilhfiah a, ni dawn tak maw; Mamit-ah Furniture dawr a nei tak a lawm.




"Anih chuan i zin chhuah fo a ngai tawh lo anga, mahni hna i thawh hunah chuan hunthawl pawh i nei ve thei tawh ang chu" ka ti ve sap sap a, amah aimah chuan ka lo phur zawk a, a chhan pawh kan inhmuh fo theih ka beisei vang a ni, tuna a hnathawh danah hi chuan Phone a inbiak na hun pawh kan nei mang lo a ni a, zan lam lah a chauh em vangin rei tak a meng peih tawh ṭhin lo, keini dawr aṭanga kan haw a kan inpeih fel ve meuh chuan mut a lo hun leh mai ṭhin a, hun tam zawk kan hmangdun thei anih chuan kan inkar pawh a ngheh zual zel ka beisei a ni.




"Nang awm lo la chuan ka insawn kher lo ang, min pawt hneh viau anih dawn hi" min thlek vang vang pahin a ti a, chutah min rawn kuah nghet zual sauhin ka ban chu a chul pah riak riak a, ka lama a lo kun hnaih laichuan ka lo inpeih viau tawh, chumi hnuah thla eng hnuaiah chuan lungchim zetin min fawp a, a duhthawh thiam ngang mai.




A nu thawm kan hriat tak vangin kan ṭhu ṭha thuai a, kan no ruak a lo lak lai te chuan ka thingphu la rang zaih zaih tak a ni. Ka awmdan hriain ka kut a rawn hmer vang vang a, ka kut chu vawt a ti deuh a niang la kangin a thawkkhum ham ham a, chumi hnuah a kawr chhungah thunin a awm chu min deh tir a, thawmhnaw ha lo a ka hmuh tawh vang nge chutia ka han tawh takah chuan ka mur sung sung thei.




Mipa hleitling leh pianthiam tak a ni a, chumai ni loin; a taksa ah chuan thau chuangliam a awm lo ang tih tur khawpin ṭha hrui a nei bawk. Movie a kan lo hmuh ṭhin changtupa te ang mai a ni a, Model te aia a pian a nalh loh bik na ka hre lo, amah ah hian ka duhthusam a kim ve em a sin, a hmelṭhatna leh pianthiamna aimah a min hip tu chu a mize duhawm em em hi a ni.




Umawipuiin a haw dawnah min lo Phone a, dar 7 a rik tawh vangin keini pawh kan inzui chhuak ta thuai a, a Bullet a kan inphur chu miin min hmu ngat sela chuan Bike chuang ngai lo emaw min ti ngei ang, hetianga rilru hahdam leh enghelh nei lo a ka awm lohna chen pawh ka hre tawh lo. Tunah hi chuan engkim a kal tluang dawn tih rinna lian tak ka nei a, beisei aia ṭha hun ka va tawn vang te pawh a ni mahna, a nih loh pawhin he mipa in ang maia thlamuanna min pe ṭhin tu vang hi a ni ngei ang.




Pathian ni ah ka chhungte hmelhriat tir ka tiam vangin a lo lut kawi lo a, mut hmunah inbe zuiin a nuin ka chungchang a sawi dan min lo hrilh a "Niniau-i chu en chianin a hmelṭha a nih kha" a lo ti a ni awm e.




Ningani ah dawra ka awm laiin ka nuin min lo Phone a "Lo inkhar hma mai rawh, i Nu Thani pumna Aizawl lam an rawn Refer a, mi panga in an lo zui a, i pa nen Damdawiinah lo hmuah kan ngai dawn si a, eirel ka buai dawn emai, " a lo ti a, inkhar tawp aiah tiin Umawii ka Phone a, kei chawhnu lamah ka haw thung a, Nu Thani chu an ṭhenawm ten an lo hruai a ni awm a, an rawn zing chhuah a nih hmel e. Ka nu sawi danah chuan Hnahthial-ah reilo te an ding a, UBiakzuala te nupa in an rawn zui tel bawk a, Lunglei lam aṭanga lo zuitu te chu an let ṭhen veleh thung a, lokal ho chu an vaiin kan hnenah innghat mai turin a ti bawk.




Inah eirawng ka lo bawl a, Nu Thani te an lo thlen chuan khua a thim lek lek tawh a, ka nuin min lo Phone pawh chuan eirel ka lo peih diam tawh, "Casualty ah an lut mek a, an Jection a a zia rih e, khum awl a awm bawk si lo a, kan lo haw thla dawn, naktuk lamah Damdawiin dang kan pan mai ang" a lo ti luam a.




In an lo thlen chuan Nu Thani chu a ṭhat hmel rih viau a, chaw pawh a ei peih a, amah rawn hruai tu te pawn mak an ti viau nghe nghe. Lunglei ho chuan zanriah eikhamah an Motor lo ken chuan an let san a, UBiakzuala te nupa erawh an la cham thung.




Zan reiah chuan a pum a na leh a, zing thlengin a na chu a chawl meuh lo, zingkarah Aizawl Hospital ah kan va hruai a, a Rilphir zai a ngai hi a lo ni a, chawhnu lama zai turin an lo Admit nghal bawk a.




In zai hma chuan ka va awmpui ṭhap a, "Lungleiah chhungkhat laina kan nei si lo a, i hrisel lo ber bawk si, helamah lo awm tawh mai rawh, i damloh chhung chu hetah cham la, inhnuai khu luahturin kan siam anga, in nufa chauh chuan in leng tawk lutuk ang" ka nuin a ti sap sap a, Ṭum danga a sawm chuan a hnial ziah a; tun ṭum erawh a hnial hauh lo, a damlo ngun tawh em a, chuvang anih ka ring.




An zai zan chu Ubiakzualan a awmpui a, kan chhungte damlo Damdawiin riah ngai an awm hi chuan Ubiakzuala hian a riahpui mai ṭhin a, kan chhehchhawl ve ber a ni a, a zeihawi ber a ni bawk.




Zanah chuan ka nuin Ununfeli a Phone a; rei deuh an in bia a, kan inhnuai luah te chu a sawipui luam bawk a, Ununfeli ah pawh harsatna a awm lo ni in a lang, "I tan pawh Aizawl chu a hnai zawk a, Mamit te chu hnai te a lawm, Mawipuii pain tihdan ngaihtuah sela helamah lo insawn thei nghe nghe la a ṭha ang" a ti zui hlut a.




UBiakzuala nupui leh ka pain Ununfeli Transfer theih dan tur an sawi dun laichuan ka ngaihtuahna a lo kalthui hman viau a ni. Ununfeli chuan chawlh a la dawn a, engemaw chen chu a nu damlo a rawn enkawl dawn a, chuti a nih chuan in khatah kan chen ho rih a ngai dawn tihna a ni, naktukah a lo chhoh tur thu ka nu a rawn hrilh diam tawh a, chu tak chuan min ti buai deuh tlat.




Pathianni ah Usamua a lo leng dawn a, kan boruak tehnuai chu ani lo len na chi niin ka hre lo, an ni nufa bakah Ubiakzuala te nupa an awm ve a, Usamua chu an hre sa fur anih kha maw, a hre chiang lo ber tu ka nu pawhin a hriat chian phah ngei dawn a, sawi hmaih theih miah loh Ununfeli pawh, thil thleng thei tam tak ngaihtuahin a rem thei dawnin ka hre lo.




Engtin nge ka tih tak ang, a nih nih ka nihpui mai dawn nge, Usamua chu lo leng rih lo turin ka ti mai zawk dawn? Rilru ka siam fel thei mai lo, nakina lang leh vek tur tho chu tuna lo pehhel hian awmzia a nei tehchiam chuan ka ring lo a; mahse, ka chunga midang te rilru tur ngaihtuahin ka zuam lo hle bawk si a.





(END OF CHAPTER - 9)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 6th, 2022, 7:45 pm

ZUNZAM - by Ahmangaihi violette Khiangte


CHAPTER - 10





Inrinni ah Ununfeli a lo thleng chho a, Damdawiin lama a tlang nghal vangin kan inhmu lawk lo a, a riahpui nghal dawn thu ka nuin min hrilh lai pawh chuan ka rilru a la buai hle tawh, Usamua hnena han sawi em chu ka hreh ve deuh a, lo leng rih lo tur pawh chuan ka ti hreh tho bawk si a, rilru siam a har rih khawp mai.




Keimah chu nep ka inti a ni, hetiang thuartham mai mai a buaitur hi ka ni lo maw le. Mut hmunah ngun taka ka ngaihtuah hnu chuan thutlukna ka siam ta a, 'Ka kaltlangpui tur a ni' tiin. Ni e..ka chhungte pawh ka hrilh ngei ang, an ngaihdan pawh kan hre ve phawt a niang chu, keimah lam chauh inngaihtuah thei ka ni tlat lo a, ka bialpa rilru tur ka dawn pui ve a ngai bawk.




Pathianni tuka chaw kan eilai mekin; ka nu chuan Damdawiin lama ken tur Tiffin a siam a, Ununfeli a awm tawh vangin Ubiakzuala a lo haw thung a, an ni nupa pawh naktip lamah haw an tum a ni awm e, "Chaw kha ti tam duh suh, Afeli bak chuan a ei vak lo ang" UBiakzuala chuan a lo ti sawk sawk a, ka nu chuan min lo enin "I kal ve dawn em, keini chu inkhawm banah kan kal mai dawn a mi?" tiin min zawt a.




"Vawiin chu ka kal lo mai ang, naktuk lamah dawr aṭangin ka kal ang" ka ti sam mai a, "Inkhawm ban chu Mawipuii te inah kan va leng dawn a mi?" Urampuiin a lo tih pawh chuan ka pha leh a, "Inkhawm ban te chuan tih tur dang i nei dawn chuang a mi, va kalpui rawh" ka nuin a lo ti leh tak zelah chuan inleng ka neih tur thu ka hrilh ta ngawt a, an inmelh hrek hrek chu ka hmu lo der a ni ber.



"I bialpa maw?" Ubiakzualan nui lek leka a tih chuan tawi tein ka nuih a, ka chhang zui lem lo.



Ubiakzuala te chhuak tur chuan ka nu bulah zanin lam riahpui a tum thu a hrilh leh a, "Afeli a chau lutuk ang, nizan hmasa a Duty tlaivar bawk si a, rawn mu hahdam ve phawt rawh se" a ti sap sap a, ka nu pawn a lo thlawp khawp mai.



Inkhawm dawnah Usamua nen kan inbia a, "Inkhawm banah lo leng rawh, zan lam chu mikhual kan ngah lutuka, chhun lamah an awm dawn lo a, nuam i ti deuh zawk ang" tiin ka va hrilh a, harsatna a nei lem lo niin a lang. Ubiakzuala te nupa an kalchhuah dawn vangin ka nu leh pa chauh an awm anga; a remchang dawn khawpin ka hria.



Kan inkhawm chu nidang zawng aiin kan bang hma a, Urampuii pawh a lo let leh diam tawh. "Tlai lamah chaw pek pahin Bza mamawh tur ken a ngai ang" a lo ti luam a, "I hmanhmawh loh chuan ka va hruai hman ang che" ka lo ti ve thuai bawk.




Inthlak tura chhohsan mai ka tum chu "Afeli nen Mawipuii te inah kan va leng a nge" Urampuiin a lo tih vang chuan kailawna ka pen chho tur chu ka ding dat a, kan hriatsual em maw ni..!



"Afeli a?" ka tih laimekin kailawn aṭanga Ununfeli lo pen thla chu ka han hmu chawpchilh a, "In lo bang der a law?" nuisanga a lo tih chuan chhan mai nachang pawh ka hre lo a.



"I inbual dawn a mi?" a thil rawn ken chu enin ka lo ti hap ringawt. "Aw, i Room a tui lumna khi hman ka tum a, Current a awm si lo a, Gas-ah ka chhuang ringawt mai" a tih leh laichuan ka nuin a lo ko a, "Afel, i tui a so a nia" a lo ti lang lang a, hmanhmawh deuhin Ununfeli chu a kal a, choka lama ka nu nen an in be thawm ka hre zui thuai bawk a, ka thil tum ruk ve rauh rauh chuan awmzia a nei thui ta vak lo.




Ka inthlaka lai te chuan ka awm a nuam lo hle tawh, chutih laiin ka Phone ah Message a lo thleng a, Usamua chuan a lo kal chhuah thu min lo hrilh hi a lo ni a, tih theih dang awm tawh hek lo le, ka sawibuai ngai loin an hre vek anga a ṭha zawk ta mah in ka hria. Usamua ngeiin Ununfeli pawh hrilh zawk sela thil a fel deuh zawkin ka ring.



Kan inthlak zawh chuan inhnuai lamah ka chhuk thuai a, ka pa leh Urampuiin Tv an lo en a, ka nuin chhangban a lo kang mek bawk a, Ununfeli erawh a inbual a nih hmel.



"Mimi, min lo pui lawk rawh" ti a ka nuin min lo koh vang chuan ka ṭhu zet tawh chu ka tho leh a, ka nu chuan a lo ti ṭan leih leih chauh, a chhangphut hmeh bang chu ka va hmet sawk sawk a, kan turin ka buatsaih nghal zel bawk a, a tam angreng si a, Usamua a rawn thlen thuai ka rin vangin ka hmanhmawh ru viau tawh.




"Nu, i ti tam e, kan ei zo seng nang" ka ti niah niah a, "Zanah Mawipuii te an lo leng dawn a, Bawihipuian an rawn duh leh khawp ang" a ti sam mai a, tunah hian Umawipuii chu lo kal se ka ti angreng, ani awm sela chuan ka awm te pawh a nuam deuh ngei ang.



Door bell a rawn rik chuan ka ding hluai a, ka nu pawn min rawn thlek vut nghe nghe "Ka va hawn ange" tih leh kal ka rual a, kawngka ka va hawn chuan ka tum loh deuh ka va hmu thung!




"Tehhlawl chuan..!" nui vur vur chunga Romawia lo lut chuan min ti hamhaih zawk hle a, an lo haw tawh tih engmah a rawn sawi hauh lo. "Mak i va ti ve, Shillong-ah kan cham reng a, kan rawn chho lawk lo a" a ti zung zung a, "In nu a lo kal ve lo a mi?" ka tih leh chuan "Naute a hritlang lutuka" a ti leh mai a, a hnungah ka lo beng sak zawt thung, nau an nei tawh tih takngial pawh ka lo hre lo.




"Hmeichhia kan nei a" tiin naute thlalak te chu min hmuh a, ka pa bulah va ṭhuin an titi bawrh bawrh a, "Chaw ei ve nghal ang che" ka pain a tih chuan a aw leh hmiah mai bawk a, a la danglam lo reng reng, a thawven ngaiin a la thawveng reng a, chawei sawm pawh ala awl reng bawk. Ka pa chuan a nu chanchin leh a inkhelhna Club chanchin te a lo zawt luam a, chhang nuai chungin an titi chu ka lo ngaithla ve a, ka nu pawn va panin a va chibai ve nghe nghe.




Ununfeli inbual zo chu Towel a lu tuam chungin a lo chhuak a, "Ka sam kan ti ro phawt anga ka lo hmehpui ang che" tih paha Sitting room lam a pan laichuan Doorbell a lo ri leh a, Ununfelin a hawn sak laichuan thaw dep dep chungin ka lo ngaichang a, Ununfeli phul hlut ri vang chuan tunge lo lut chu ngaihdan ka nei thiam mai bawk.



"Awi, engtin nge hetah ka awm tih i hriat?" Ununfelin a tih laiin "Helamah i awm tih ka lo hre miah hleinem" Usamuan a lo ti let a, a aw aṭang chuan a hamhaih ve deuh tih ka hre thei.



"Niminah ka lo chho a lawm, ka Duty zo ka rawn tlang nghal a" Ununfelin a ti leh a, Sitting room lamah an inzui phei ta niin ka hria.




Rei vak loah min pui turin Urampuii a lo phei a, "Feli bialpa a lo lenga, i ṭhianpa saw va kawm ve rawh" Urampuiin a tih chuan ka nu chu ka va melh ringawt a, "Ei khawp lekin kan kang rih dawn nia" a lo tih ve takah chuan ka tho thuai a, ka kut ka sil lai te chuan ka phur zan lo, engtia va awm tur nge pawh ka hrethiam lo a, ka mang deuh duk mai hian ka hria.



Sitting room a ka va phei chu min lo en deuh ṭhap a, ka ṭhutna turah ka buai nghal pang mai, a chhan chu Usamuan min en reng vang a ni. Tawi te hian ka va nuih a "Hetah lo ṭhu teh" Romawian a tih vang chuan ka pa nena an ṭhutna sirah chuan ka va ṭhu ta ngawt a, ka ep chiah ah Ununfeli leh Usamua chu an ṭhu thung.




Vawiin chu Kamis var sar mai a rawn ha a, inkhawm bang tih hriat takin a inchei dan chu a Smart thlap a, a hmel hmuh a nuam hle bawk. Ununfeli chuan a be siam siam a, "Nu Rengpuii kha a lo chho ve tih pawh ka hre lo a, nimin piah khan i pa hna kal tur nen kan inhmu a ka hre chauh a lawm" tih angreng chu a sawi a, an ṭawng ka lo ngaithla uluk lutuka Romawia min lo biakna pawh ka lo hre lo.



"A va mak vung vung e aw" a lo tih chuan ka en zawk a, "Form chu ka lak kep dawn che em?" a lo ti leh a, "Eng Form?" ka lo ti let ha a.



"Social welfare hna kha han dil ve ang ka ti" a tih leh laiin "He lamah Transfer dil kan tuma" Ununfelin a lo ti ve mek bawk a, Usamua ka ve en chuan min lo la en reng a, a lawm vak lo tih a hmel ah a lang thei a, ka inthlahrung khawp mai.



Ka nu leh Urampuiin thingpui an lo chawi phei a, ka nuin Usamua a hmuh chuan "Aw haw..Nang chu..!" a ti hluai a, min rawn en dan ah chuan hriat chhuah a nei anih ka ring.



"Ka nu, hnahthial ah pawh ka lo hruai tawh kha, Urinkimi te inneih na ah khan" Ununfelin a tih te chuan mak a tih hmel khawp mai, "Nia..." tih pah chuan min lo en leh ṭhin a, "Kurtai han chhawp tel la" ka pain a lo tih vangin engmah phei chu a sawi zui lo.




Nuam lo ka tih em em chhan pakhat chu a lo luh aṭangin ka la be miah lo a, Ununfeli lahin a inleng ni ah a ngai a; a ṭhutchilh chawt mai si. Ka chhungte takngial pawhin ka inleng zawk a ni tih an hriat miah lo laiin keimah tein ka hre ru reng lawia, biak ve duh viau mahila sawi tur hlawl ka hre si lo. Ka va en laichuan sawi duh nei ṭeuh hmel hi a pu a, min thlakhlelh hmel deuh hian min en vung vung reng bawk a, kan awm dan chu a hahthlak lam mah a ni.




Ka nu lo let chu Ununfeli te ṭhutna lamah chuan a lo ṭhu a, Ununfeli transfer chung chang leh kan inhnuai luah mai sela ṭha a tih thu te chu a sawi barh barh a, "I nu a upa ve tawh a, chungkua a chen ho theih tluk a awm hleinem" ti a Usamuan a lo chhan chuan Ununfeli chu a phur khawp mai. "Mamit lamah nge mawni kan awm dawn ka lo ti a, chhung leh khat awm ve lohna a pem chu ka nu hian a hreh a, ka pa thlan kan kalsan dawn rau rau a nih chuan kan chhungte awmna ah a ti zel a" a lo ti ve sap sap a.



"Keipawh he lamah inben bel ka tum a lawm" Usamuan a tih leh chuan "A van tih zia, i nau te chhung an awm bawk sia, pem ve law law ula" Ununfelin a ti leh a, a hmel aṭang pawhin a phur zia a lang thei.



"Ni e, ka nu pawn a hreh lem loin ka hria, inhmun pawh kan lei vek tawh zawk a, kum tawp lamah hi chuan kan sa ṭan thei tawh ang" Usamua chuan a ti charh charh a, "Tlangval puitling tak inih chu a chu...nupui neih hmain in leh lo din hmasak nachang i hria a, tunlai ṭhangthar tam tak hian nachang an hre lo, nupui pasal te hi tawnsabawp hian an nei ngam mai tawh a" ka nuin a tih leh laiin Romawian min lo nghawk zauh a, amah a lo inngaih bel nitur a ni, tuna a nupui nen hian nihnih chiah an la inhria ang tih ah an inru ta kha a nia.




"Afeli pawh hi kan chhuang ṭhin a nia, tleirawl lerh takngial pawh nei loin inchhungkhur tan ṭhahnem a ngai a, a nau lehkha zir a chawm bawk a, pasal neih pawh kan phal lawk lo a; mah se hei, kan chelh khawtlai zo mai dawn..." chutiang thu ka nuin a sawi chhan chu ka hriatchian em vangin ka lo ip ru ṭeuh mai.




"Ka nu hi, min hmu Senior e, pasal neih kan hun chho chauh zawk a lawm" nui hak hak Ununfelin a tih chuan Usamua nui suk chu ka va hmu a, ka lam rawn hawi loin a ṭhu kun deuh a, a khat tawkin a kut a tuai leh ṭhin, a beisei ang engmah a rawn hmu dawn si lo a; a ning ru tawh ngawt zawkin ka ring.



A haw tur chuan min rawn melh leh ṭhin a, ka nu leh Ununfeli vang chuan ṭawngka pawn ka thlah ngam ta lo chu a nia, ka inthiam lo tu ngang mai. "Lo leng fo rawh aw" tiin ka nu chuan a thlah a, Ununfelin kawngkhar thleng a zui chhuak bawk. Hrehawm ka ti lutuk chu ka engtih tha mah a tho thei lo a, Romawia pawh chu ka be lumlam peih meuh tawh lo.



Ka nu eirelna bulah ka va ṭhu tum bur reng a, chutih laiin Romawia leh ka pa chu an la inkawm tui hle bawk, Urampuii leh Ununfeli leng chhuak tur chu an insiam nghal a, keiin ka Phone chu ka bih khat tawk reng bawk a, a Call a lo luh hun chu hupurh tak tein ka huphurh a ni ber.



Ununfeli te an chhuak chiah tih a, ka nu chu ka bulah a lo ṭhu a "Mimi, Afeli bialpa nen khan in inkawm ve ṭhin em ni?" a tih chuan "Maw...?" ka lo ti hluai a. Chutah, chik deuha min lo enin "Ka bialpa i tih kha amah chu a ni em lo maw?" a rawn ti leh a, ka nu hi chu thil a chik peih bawk a, nichin aṭang khan a ngaih a ṭha lo tih ka hrethiam tawh, min zawh chian phawt a duh vangin a lo la insum mai mai anih ka ring.



"Ununfeli bialpa a ni hleinem" chiang khel khawla ka tih chuan zawhna a ngah hmel lehzual a, "Ka bialpa zawk anih kha" ka tih leh takah phei chuan a mak a tih hmel hle tawh.



"Afeli bialpa a ni lo a maw?" a ti nawn leh a, chhang loin ka lo bu nghat thung.



"Eng nge in awmzia ni a, nichin maiah Afeli a rawn rim zo chauh a, nang pawh i awm reng a.." a tih leh chuan thawk ka la hluai a, kha chu keima nep vang vek a ni, chhuanlam tur dang ka nei lo.




"Ununfeli khan a inleng emaw a ti sia, engtin nge ka lo tih chuan ang.." ka mitthla ah Sitting room ka va luh laia an lo ṭhu dun lai kha a rawn lang a, an inkara va ṭhut chi ni hek lo, inla hrang lo thei lo khan ka awm a lawm tiin thiam ka inchan chawp leh a, chu erawh a chauhthubarawh ngei mai.



"Afeli nen an awmdan en chuan engemaw a awm ve deuh a ni lo maw, Hnahthial thleng thleng a hma pawn a rawn zui tawh kha" ka nu chuan a ti niah niah a, "An Furniture siam an leisak a, Lungleia kal pahin a rawn dah anih kha" ka lo tih pawh chuan a awih hmel vak lo.




"Kan tlangval fel loh kha anih dawn chu" a ti mai a, kan ngawih vung vung hnuah "Afeli chu kan lo zawt ve ange" a ti leh a, "Engtin nge i zawh ang, ni lo lo te kha i sawi a nge aw?" ka tih chuan "Thil awmzia ka hriat vek a ngai, anih loh chuan unau in ngaihzawng in inchuh a ni thawthang a, a tih chi loh reng reng" a ti ta hmarh hmarh a, a lawm ta vak lo niin ka hria.




Ka phone lah chu a ngawi miah miah mai a, Message takngial pawh a rawn thawn lo, zanriah eidawn thleng pawhin engmah a lo sawi lo a, Ununfelin a Phone a khawih lai te chuan an inbia angem tih mawlh ka ngaihtuah a, ka awm a nuam thei hauh lo.



Zanriah eikhamah ka nu chuan Ununfeli chu an Room-ah a ko a, Usamua chung chang an sawidun ngei dawn tih ka hria, Romawia haw tur ka thlah zawh ah ka Room lam ka pan a, an ṭawng thawm chu hriat tumin ka ngaichang reng a, ka nu ṭawngri takngial pawh chu ka hre hleithei lo.




Rei vak loah kawngkhar inhawng thawm ka hria a, ka Room a Ununfeli lo lut chu a hlim hmel riau hian ka hria; a nui deuh sang reng. "Mimite, kawrchung min lo hawh la, zanin chu kan inkhawm ve teh ang" a tih chuan ka thawmhnaw ka pe ve mai a, inkhawm tura kan insiam laizawng pawh chuan Phone-in tu emaw a bia a, mipa ni a ka hriat vangin Usamua a nih ka ring ringawt bawk a, a khat tawkin ka va en leh ṭhin.



"Ka nu khan eng nge a lo sawi a?" ka tih chuan "Ka bialpa chung chang min zawt a" a ti sam et a, a sawi awlsam khawp mai.



"Engtin nge a zawh che a?" ka ti leh zel a.



"A hrechiang chak ve satliah niin ka hria, ka duh tak tak em tih te min zawt a, 'Mipa khan a duh che em?' tih ang reng, i nu hi chuan mi hi a ngaihtuah ve a, ka nu te unau ah chuan min hmangaih ber tu ania lawm" nui var var hian a ti a, chu mawlh chu a ni a laka ka inthlahrun chhan em em chu.



Ununfeli te nufa ho hi ka nuin a hmangaih takzet a, pa an neih tawh loh vang leh ka nu Thani hrisel loh vang te hi a ni pakhat a, Ununfeli ngat phei chu a naupan laiin kum 6 zet kan hnenah a lo khawsa ve tawh nghe nghe.




"A ngaihsak ṭhin khawp mai che, i pasal tur pawh a zawn pui lo chauh che anih hi" nui chunga ka tih chuan a bu nghat nghat a, "A duhzawng ni lo te chu neih ngam pawh a ni lo, i nu hi chu a zahawm em a sin. Mahse, Usamua hi chu min duhpui vein ka hria, vawiina a lo biak dan te kha i lo hria em?" a ti leh zel a, ka chhang zawi sep ringawt tawh.




Kawmthlang aṭangin kan ṭhenawm nula in min lo au a, "Min kalsan rawh i nu rualin ka lo kal mai ang" a tih vang chuan ka kal chhuahsan a, kan kal hma bawk a; ṭhutna pawh kan chang hma hle a, inkhawm pawh a rei thawkhat viau a ni.



Inkhawm banah ṭhatlai ho ṭawngṭaiin kan ṭhu hnufual a, kan hma lawka bialpawn fehchhuah leh Programme neuh neuh kan neih dan tur te an sawi a, kan ban ve meuh chuan dar 9 a pel thui lek lek tawh.




Biakin aṭanga kan chhuah chuan Current a awm loh vangin kan Phone ṭheuh kan phawrh sap sap a. Ka Phone ka en chuan Missed call a lo awm va va a, Samuela call ngei a ni. Usangpuii te chu kal hlat deuhin ka Call let a, rei a ri hman lo a lo chhang thuai a, a aw ka hria phei chu ka thinphu a rang dup dup a, ka zam lek lek bawk.



"Inkhawm in bang tawh em?" a rawn ti zawi ruih a. "Aw, kan bang chiah a, ka haw mek" aw ki hniam thei ang berin ka ti ve a, a ngawi zui vung vung mai.




Chumi hnuah "Keini pawh ka bang chiah, ka lo tlang ang, kawtah khan min lo nghak rawh" tih leh Phone chu dah a rual a, hnial buai phei chu ka tum hauh lo nain a dah rang tehvut lutuka engmah ka sawi hman lo, a thinrim anih ka rin vangin ka rilru a nuam zan lo bawk.




Kan inkawt kan thlen chuan ka kalpui te ho nen chuan kan in mangṭha sang sang a, kan in kawtah tak lo nghah chu dik lo deuha ka hriat vangin kan inpiah lamah chuan ka kalphei zel a, kan ṭhenawm te dawr ka pel fel chiah tih ah Umawipuii te nupa ka tawk a, min hmu lo aniang min tlanpel hlauh mai.




Dawr sir a Step chhukna bulah chuan ka ding vang vang a, Minute sawm dawn chu a liam tawh, Umawii chu Message ka thawn a, "Chhuanlam min lo siam sak lawk rawh, Usamua ka hmu lawk dawn" ka va ti thawr a, Umawipuii a ni tlat a; a lo sawifel dawn tih ka chiang viau a ni.



Rei vak lo ka nghah leh hnu chuan a lo thleng a, a lo chhuk ve mai dawn emaw ka tih laiin "Lo chuang rawh" a ti bung nghut a, hma lam a melh daih vang leh a thim em vangin a hmel chu ka hmu ṭha thei lo, hnial chi ni a ka hriat loh vangin ka chuang ve thuai a, pan lam chu a nei a ni chek ang; mahse, an in lamah chuan kan tlan lo phawt mai.



Kan tlan zel a, Chaltlang lamah kan tlan chho a, kham ko reh ruih kan thlen chuan Bike chu a ti ding a, a hun ṭhat laite chuan a bulah ka lo ding mawl tawp a, thli a thawt nasat vangin boruak chu a vawt lam mah a ni. Ka lam a lo hawi rual chuan a Blazer hma kilhna chu a hmet phelh a, chutah thlanglam hawia min pawt herin hnunglam aṭang chuan min rawn kuah a, a Blazer chuan min rawn khuh ṭha sauh sauh bawk.



A lam ka hawi tur chu a lo kun hnai nen chuan kan inmelh hnai hle a, a thawk zawngin ka hmui a rawn chhem pha hial a ni.



"I chungah ka lawm lo hle mai" a tih takah chuan ka inthiam lo zual hle a, sawi tur pawh ka hre lo hial zawk.



"Ka tihpalh lutuk.." ka ti hap a, insawifiah ngaihna chai ka hre lo.



"Engtia awm nge i duh a, i chhungte hriat loh a; a ruka inngaizawng rual chu kan ni tawh lo asin" a nui pah hawk a, a nuih a za lo tih erawh a hriat reng.



"Tunah chuan Ununfeli.." ka ti leh chiah chu min kuahna a rawn ti nghet salh a, "Feli chungchang hi duhtawk tawh rawh, a mitmei i ven ngai khawpin a lakah engmah ka ti lo, ani chhuanlama i hmang hi ka duh miah lo bawk, unau in ni a, chuvang chuan ani lo tel ve hi ka duh lo lehzual" a ti nghat nghat a.



"I sawi awmzia chu ka hria a; mahse, a tir aṭangin a tel sa zawk lo maw, nangnen ka inhriat hma pawn a lo hre tawh che a, a lo duh daih tawh bawk che a" ka tih chuan thawk a la hluai ringawt a, a hmel en ka tum leh chiah chu ka nghawngah a rawn fawp a, ka ip chawih thei!



"Usamu" thawk la hakin a ban chu ka hmer a, anin min pawm nghet zual sauh thung a.



"Ti nge maw i buai nuai reng mai le, hahdam tir viau che ka tum pawh hian nangmah hian i tal hnawk leh ṭhin anih hi" ka bengbulah a rawn ti sup sup a, "Ka inhrethiam tawh bik lo" ka ti zuai raih ringawt.



"Min nei duh em?" ka beng bula a rawn tih chuan ka lehhawi vat a, "Innei ang" tih paha a nui hmel chuan ka lung a ti chhe deuh a, chhanna erawh ka pe lo, thlanglam hawi lehin thawk ka la vang vang a, chutih laichuan thli a thaw vawt har har reng.



A hmuiin ka beng kawm chu a rawn nul thuak a, ka nghawng a rawn fawh leh laichuan a awm nghengin ka ding zawi ngiai tawh. Ka kawr hmalam ah chuan a kut a rawn zen chho a, ka dul lawngah chuan a chul pah riak riak a, "Min chhang dawn nange?" a tih leh takah chuan ka ngilh deuh dupin ka hria.



Ka lungphu chu a rang hle a, a lama ka inher rualin a thutak zia ka hmu thei bawk. "Palai ka rawn tir ang aw" ka chhanna ngaichangin min en ran a, a rang teh thut lutuka chhan ngaihna ka hre mai lo.



"Mimi.." a tih leh laichuan ka lo nui ringawt a, ani pawh a nui ve tho.



"In nei ang aw" a ti nawn leh a, kei ka lo bu nghat nghat thung.



"I duh tak tak em?" a la awih lo aniang hnai deuh ah hian min lo en a, "Duh e; mahse, chumi hma chuan in inkara thil hriatthiamloh awm hi Ununfeli hrilhfiah rawh, ka sawi chuan a tuar thiam lo maithei a, i sawi a ṭha zawk ang" min chhang loin min en vung vung a, a duh chiah lo nge maw ni?



"Hrilh rawh aw, kan hlimna vanga midang an lo hrehawm chu a ṭha lo ang, ka chhungte pawn nuam an tih loh phah dawn a, i hrilh chuan Ununfeli pawn a lo hriatthiam ve mai ka ring" ka ti leh sap sap a, "Ka lo hrilh ange" a tih takah chuan ka thaw huai mai.



Kan let leh lamah chuan Umawiin min lo Phone a "Haw kan duh tawh a, 'Nunmawii damlo a kan' ka ti ringawt che a nia" a lo tih chuan ka haw mek thu ka hrilh a, kan in bul kan thlen chuan a lo eng uar tawh a, ka chhungte pawh an la men ka ring.



Kawtah chuan rei vak lo kan ding dun leh a, "Ka nu ka lo hrilh chiang anga, nangin Ununfeli i lo be dawn nia" ka tih chuan min chhang loin min lo fawp thut a, keiin a awmah ka lo nam chawt chawt thung. "Miin min lo hmu ange..?" ka ti sar sar a, ka hawikual chuan tumah phei chu ka hmu lo.



A kekawr ipte zena a ding khawng luah chu enin ka nuih ringawt a, a hmui a pet sawi zauh mai, a titau a nih hmel. "Lut rawh, ka thlen hunah ka lo hrilh ang che" tih paha kal mai a tum chu a banah ka pawt leh rih a, kan Tanky awmna lam thim deuh laiah chuan pawt pheiin; a hma ah tak chuan ka ding ran a, ka thil tih tum a hria aniang chu a mit ko a san ralh mai.



Chutah, a Necktie ah chuan vuanin ka pawt hniam sauh sauh a, duhthawh zeta ka fawh takah chuan a hamhaih deuh nge ni min chhang let lawk lo. Chumi hnuah ka kawngah rawn vuanin min chawikang lawp a, a tan chuan hmeichhe naupang ang leka zang ka ni ta ve ang.



A hmui hnuai ka seh sak chuan a nui suk a, min fawp uar sauh thung, thawchham dawn khawpa kan am hnuah min nghatthla a, thawk la hak hak chungin kan in en a, kan innuih var var bawk.




A tlan liam thleng chuan ka thlir zui a, inneih puia min sawm dan kha mawlmang viauin keiin chhang awlsam viau mahila ka rilru tak takin ka chhang a, neih ngei pawh ka duh. Chumi hmain Ununfeli erawhin engkim hria sela, lungdam takin awm thei bawk sela ka duh a ni.




Lut tura ka inher leh chiah chu aw thian kharh ri ka hria a, ka han hawi chhoh nak chuan ka Room bathlar aṭangin Ununfeli leh Urampuii ten min lo thlir reng chu niin...!



Urampuii zawk chuan min rawn nuih tet tet a, Ununfeli erawhin min melh thip hle thung, a hmel a ṭang rengin ka laka a lungawi lohna chu haitheih a ni lo.



(Zawmna)



Inchhung ka luh rualin hmanhmawh deuha kailawna lo pen thla thawm ka hria a, "Mimi.." Sitting room aṭanga ka pain a lo tih laiin Ununfeli chu kailawnah a lo ding fel der tawh. Engmah sawi loin kan in en ran a, ka pa min kohna chu chhan mai nachang ka hre lo.




"Mimite..nangmah em ni?" a rawn tih leh takah chuan Ununfeli chu ka inher san a, Sitting room lam ka pan laichuan min en zui rengin ka ring. Engtiang pawhin min ngaiin; engthil pawh sawi sela ka inti paukhauh ve tlat ang tiin rilru ka siam a, kan boruak chu Usamua chinfel mai theih ah ka ngai a ni.




"Ka nu a mu tawh a mi?" ka tih chuan a mut deuh chiah thu min lo hrilh a, inkhel en pahin min lo nghak a nih hmel e, ka pa bula ka ṭhut hnu rei vak lo ah Ununfeli chu Sitting room-ah a lo lut a, "Afeli pawn a lo nghak che anih hi, Afel...i chauh awm nen lo mut san daih tur a lawm" ka pa chuan damthluam hian a ti a. "Ka mut a chhuak lo a" min en ran chunga Ununfelin a tih chuan en rei duh loin ka hawisawn a, min la en zui ta reng niin ka hria, ka inthlahrung ti ila ka awmdan chu a sawifiah ber maithei, min zawt lo sela ka ti takzet a, min zawt ngei dawn tih erawh ka chiang hle thung.




"Zing chhuah hma i ngai lawm ni, nangpawh han mu dawn rawh" ka hnunga rawn ben thak thak pahin ka pa chuan a ti leh a, Room lama chhoh chu ka hreh ru riau mai. Tv lam hawi chuan ka la ṭhu ve ta reng a, chutih laiin ka Phone chu a lo ri a, Usamua Call a ni bawk.




Chhang mai loin ka tho chhuak a, kailawna chhoh pahin Call chu ka chhang a, "Ka thleng tawh e, i mu tawh dawn em?" a lo ti var a. "Aw, ka inthlak dawn chiah a" kailawn hmawr lama pen thawm vang chuan ka hawi let a, Ununfelin min lo zui tih chu ka zuk hmu a, rang deuhin ka Room lam ka pan a; mahse, awmzia a nei lem lo ang, a chhan chu Room kan inṭawm rih tlat a.




"Ka inthlak zawh ah ka lo hrilh ang che aw" tiin min chhanna pawh nghak lo chuan Phone chu ka dah a, Room kawngkhar inhawng thawm ah chuan ka hawi rang hle. Urampuii nen an lo inzui lut a, ka khumah chuan ngawi ṭhiap hian an ṭhu dun a, kei ka inthlak mawlh mawlh thung.




"Mimite, bialpa i nei tih ka lo hre miah lo" Urampuiin a lo tih chuan min dem hle tih a awki ah a lang a, za lo zeta ka nuih bak chuan ka chhang lo.




"Kan Mistiri a chu a zei viau a niang maw, unauin a chhai thei mai che u a" a ti leh nghat a, an mahni hnungchhawn zawnga dingin thawk ka la vang vang ringawt. Ka che chu ka muang lui a ni ber tawh, thawmhnaw chu ka hai kual sek a, Ununfeli lo ṭawng chhuah hun chu ka ngaichang pah bawk a, a ngawih tlat danah a insum ve hle chu a ni chek ang.




"Kei chu ka va mutsan daih teh ang che u" nui kar kar chunga tih pahin Urampuii chu a kal chhuak a, a tu amah chuan kan chhang zui lo ve ve. Room kawngkhar a khar fel chiah tih ah Ununfeli chu a rawn tho chhuak a, thawmhnaw ka hai laichuan ka bulah a lo ding a, kan boruak chu a hahthlak lam mah a ni.




"Min va bum chiang ve" a rawn ti nghal pang mai, chhanna pek loh tawp chu ka ti ta bik lo. A lamah inherin "Nia, kan inbum thui teuh khawp mai" ka ti ve ta ngat a.




"Mi bialpa lo chhai chu inthlahrunna pawh i la nei miah nange?" a tih chuan ka inhumruh sauh a, "Chutak chu a nia ka sawitum ve tho, Usamua nen kan inngaizawng i tia, in inngaizawng miah si lo a, tinge dawt i sawi?" ka ti leh tawl a, a hmelah chuan zam hmel emaw inthlahrung hmel a lang lo a, thinrim hluah hluah hmel a lang zawk.




"I bulah kan inngaizawng lo a lo ti em ni a?" a tih chuan "Aw, in la inngaizawng ngai miah lo tih a sawi" a mitah tak en a ka ti leh chu a lawm lo hle tawh, thawk a la sek sek a, min beng mai duh tur hmel a pu a, chhang zel tawh lo ila ṭha in ka hria, kan boruak a khaw lo zo dawn tlat.




Khum lam ka pan laichuan "Mipa hi chu an lerh a, hmeichhe dang bulah ngaihzawng an neih loh thu an sawi zel a lawm, kei chauhin ka ngaizawng emaw i lo ti a ni maw, Samuela khan a nu hnenah ka Number a lo dila, min lo be hmasa tih te a hrilh tel che em, Mamita ka awm tirh aṭang daih tawhin kan inbe tawh" a ti leh zel a, a aw ki pawh a sang lam hret a ni.




"Chung thleng thleng chu ka hriatpui lo, Usamua nen sawi dun zawk rawh u" pangngai thei ang ber turin ka ti a, kei leh zel ka lo pawr ve anih chuan kan boruak chu alh hluai thei reng a ni tlat.




"Ka bia ang; mahse, nangpawh ka dem khawp mai che, ani'n kan inkar chu eng ang pawn lo sawi sela, i u ka nih hi...engtin nge mahni unaunu te mipa duh em em chu lungmuang deuhin i lo kawp theih zawk?" a rawn ti chhuak hap a, min ti dang lek lek. Chu thil ah kher chuan thiam ka inti thei lo, ṭhiante emaw hmelhriat ṭha te ngaihzawng hlui pawh kawp duh ngai lo ka ni a, tunah ka unaunu mipa atchilh em em chu ka kawp mek si.




"Min chhang rawh, hrehawm tihna te innei miah lo a mi, nge ni a i lo intithei hle zawk?" a lam ka va hawi chuan chhuatah dingin min la melh ngar a, "Ka intithei lo, chutiang rilru ka pu lo" ka ti zawi sep a, ka rilru chu a mang duk tawh, tunah tak hian mahni a awma; ngun taka inngaihtuah ka duh.




"Nangman i ngaizawng hmasa tiraw?" a tih leh chuan phawk deuhin ka va en a. "Aih..UAfel...Usamua nen in be rawh u" ka ti ta thlawt a. Kei nena lo sawidun chiam hian awmzia a nei lo a, insawifiah dan tur pawh ka hre lo, chutih rualin a lawmloh zawnga ṭawng palh ka hlau bawk si a, insum ngai bawk si nen kan inbiakna chuan min ti hrehawm em a ni.




"I lo mak reuh hle mai, hetiang mi niturah ka lo ngai miah lo che, i bulah te khan engtia tam nge ka lo sawi tawh, khatih laite khan min lo nuihzat viau dawn anih hi" ka lakah a thinur em a; a ṭawng pawh a sehchilh nak tawh. A ngaih ang rilru ka pu lo lutuk chu engtia hrilhfiah chi nge ni ang, nuihzat maw..? Chutiang zawngin vawikhat te pawh rilru ka la pu chhin miah lo.




"In inkarah engmah a awm lo tih ka hriatchian hnuah chauh a lawm, amah pawh ka zawt a..." ka tih laimekin, "A awm emaw awm lo emaw ka duhzia i hre reng" a tih tak hlur vang chuan ka ṭawng tawp chiang hle, a hmel ka va en chuan a meng sen ram a, a mittui a parawl deuhin ka hre bawk a, rei pawh ka en ngam lo. Kan ngawih dun vang vang hnuah "Min hrethiam dawn nia, i duh ang chiah khan Usamua hi ka duh ve a" ka ti zawi ta sep a, chhuanlam tur dang reng ka nei tlat lo, Usamua ka duh em vanga Ununfelin a duhna pawh ngaihthah lui kha ka ni miau a.




"Huhh...hmeichhe mak leh lê lo tak chu i lo nih hi, ka lo chhuan rilruk theih tehreng che nen; mi nupa kara i tla zep pawh kha i lo hetih vang anih dawn hi" a ti ta salh salh a, a ṭawngkam chuan min vilh ngut ngut thei, "I tluang chuang lo ang, hetiang mihring hi an tluang ngai lo" a tih leh hnuah kawngkhar lam a pan a, na zeta kawngkhar a khar ri chu a thawm ka hriat leh chhun a ni.




A chhuah aṭanga rei deuh thlengin a thilsawi chu ka bengah a cham a, 'Mi nupa kara tla zep' min tih ri kha, thil thlen dan hi a mak ṭhin ngei mai, mi pawi kan sawi miah lo emaw kan intih lai pawh hian, nasa takin mi huatthu kan lo sawi reng ṭhin a, ngawi mai mai chung pawhin mi pawi hi kan van lo khawih thuk thei si em...




Bathlar ah chhuak pheiin thawk ka va la vang vang a, Urampuii mutna room lama Ununfeli ṭawng ri chu chiang lo ruai hian ka hre pha a, Phone a hmang niin ka hria, Usamua kha ka la be leh miah lo tih ka hre chhuak a, ka Call nghal thuai bawk a; mahse, a Busy a ti tlat. Minute nga hnua ka Call leh pawh chuan a la Busy ta fo a, tu nge a biak ve dawn ni!




Ununfeli ṭawng ri ka hriat leh takah chuan Usamua nen an inbia anih ka ring ta deuh a, kan chungchang a hriat vang khan a va be nghal anih ka ring. A ṭawng ri ka hre thei tak nain eng tak nge a sawi ka hre fumfe thei lo a, an inbiak dan chu hriat ka chak viau mai, Usamua chuan engtin nge a lo hrilhfiah tih te pawh..




Corridor lamah chuan chhuakin thawm chu ka va ngaithla chiang a, a reh vung vung hnuah "Engmah min hrilh si lo a, min ṭhawng ve deuh maw le.." nui har har chungin i Nunfeli chuan a ti a, ka beisei loh lam tak a ni, an inbiak dan a zângkhai hmel tlat.




"Mahse, kan chhungte ho hian ka bialpa emaw an ti vek che sia, zawhna a tam ve viau maithei aw; insawifiah mawlh mawlh tawh mai rawh u" zângkhai tak bawk chuan a ti leh a, ka bula a ṭawngkam leh Usamua bula a ṭawngkam inpersan lutuk chu ka hrethiam ta chiah lo. A rilru a dam ta viau tihna em ni, anih ka ring...Usamua chuan hrilhfiah dan a thiam kha ka ring reng a, ka lo ring sual lo ngei anih dawn hi.




Ka Room lama ka let leh chuan ka thaw a veng ve huai tawh a, Ununfeli berin a pawm thiam chuan kan chhungte zawhna pawh awlsam takin kan chhang thei ang, kan inzuina la rei lo viau mahse inneih pawh min remtih sak mai ka ring a ni.




Ka mu fel awrh ang tih ah Usamua chuan min lo Phone a "Feli chu ka hrilh tawh kha, engmah inthlahrun chhan tur a awm lo, neih che ka duh thu pawh ka hrilh a, min phur pui khawpin ka hria" a lo ti charh charh a, "Nangin i hrilhfiah chuan a hriatthiam mai kha ka ring deuh renga, amah berin buaina a neih loh chuan a lawmawm" ka ti ve luam a.




"Ka hrilh che kha, engmah inthlahrun chhan tur a awm lo ka tia, a hnena kan insawifiah pawh hi ngai ka ti ve lem lo" a tih chuan "Ngai e, a duh che tih kan hre ve ve a lawm, kei lah a unaunu ka nia" ka lo ti thuai a. "Umm, i awm nawm phah na anih chuan a ṭha mai zel e" a aw ri ah chuan a nui deuh tih ka hria.




"Khumah i mu tawh em?" ka ti a, mitthla ah a khum lianpui leh a Room thim ruih kha a rawn lang a, amah tein eng nge a tih ve ṭhin ang le?



"Bawkkhup zawngin ka mu a, ka be mek che" thum dut a tih laichuan a dar hlaipui; thlamuanpui awm hliah hliah kha mitthla ah a lang ruak bawk.



"A vawt em?" ka ti leh zel a.



"Vawt lo e, a vawh viau laipawn kawr ha chung hian ka mu thiam lo" a tih chuan ka ṭhen ṭha ringawt, tunah tak hian kawr ha loin bawkkhup zawngin a mu a maw...khai a...



"I hritlang a nge.." ka lai deuh ṭut nia, ka thil mitthla vang vek a ni.



"Ka bula i mut hunah pawh kawr ha a mut a rem lo ang" a rawn tih phei chuan ka lo zak!




"Ti awm ang lo e a, keite chu kawr ha loin ka mu thiam ve lo thung a..." ka tih chuan a nui suk a, "Buaina a awm loh chu, i muthilh huna phelh a ni mai" ka lo chek tlak a, "Chuvang a ni maw, a hma pawh khan ka kawr i lo pelh" ka ti kha kha a.




"Aih, kha chu i chilthli i thlauh vangin ania ka phelh" thu tak deuh in a rawn ti a, ka va awih lo tak.




"Ka bula i mut dawn chuan kawr ha a mut i thiam a ngai dawn anih chu" ka ti fiamthu a, "Hlip zawk rawh, thil i thiam hma zawk ang" a ti ve tlat, zei thei reuh mange..



"USamu...."



"Awih ah..." ka nui a, ani pawh a nui ve tho.



"Ka ngai che..." ka sawi tum tak pawh a ni lo; mahse, chu thu chu a rawn lang tlat a ni.



"Ka van vannei ve" a tih chuan ka nui hak a, "Eng vangin maw?" ka lo ti let ha a.



"Ka mi ngaih deuhin min ngaih thu i sawi a" ka hmui petin ka nui leh rih a, a aw thum dut dut leh a ṭawngkam ngaihawm zet chuan min fan hneh takzet.




Kan inbiak zawh hnuah chuan thlamuang deuhin ka muhil a, ka mutui viau a niang mumang ka neih awm pawh ka hre lo, ka harh leh chuan ni a lo tlangsang viau tawh. Ka tho chhuak thuai a, ka pain Gas-a Cooker chhuanlai a lo suan mek chu ka zuk hmu a, midang lah chu tumah ka hmu hauh lo lehnghal a!




"Khawnge an awm vek a?" phawk lek leka ka tih chuan "Damdawiinah an kal a, i Nu Thani kha a rawn chhuah thut sia, khum an indaih lo deuh nge ni kha...a pawi lo....in lama in enkawl theih tawh tho chu a nia, a tan pawh a nuam zawk ang" a ti zui luam a, ka nu pawh a kal ve anih hmel e.




"An lo haw har a ngem le, dawr kal hma ka duh a" ka ti leh chuan "Ei hmasa mai ta che, lo nghah ve kher pawh an ngai hleinem" a ti leh mai a, tun hnai aṭang hian zinglam hi chu chaw ei ve hram ka duh a, dawr thil ka ei nasa mah mah deuh nge ni pum nuam lo hi ka nei leh ṭhin.




Chaw chu ka eisan a, ka insiam zawh hnu pawh chuan an la rawn thleng hlawm lo, "Health care vel an ti fel aniang" ka pa chuan a ti leh mai a, engmah sawi zui loin kei ka chhuak thung.




Dawr ka thlen hnu rei vak lo ah Umawipuii a lo thleng a, "Vawiin chu len chhuah te i duh em?" a ti seuh seuh a, dawr ah chuan awm ve lo se min tih hmel em em mai bawk a, eng a hria chu ni maw!




Usamua nen kan inbiak chuan Suzanne-i te lo haw thu min hrilh a, "I lo kal duh chuan ka lo hruai ang che" a ti tak nain Scooty ka ken ve ni a ni tlat, hruai ka ngaih loh thu leh chawhnu lama ka kal tur thu ka hrilh a. "Inah lo awm rawh aw, ka lo kal laiin zawn ngai miah loin lo awm rawh" tiin ka chah thlap bawk.




Dar 12 em pawh a rik hma chuan Umawipuii chu a za ruai a ni ber "I la kal dawn lo a mi?" a ti leh ṭhin a, "Eng nge i tih dawn?" ti a ka zawh lahin min chhang fum fe duh lawi si lo.




"Mate, ka nu tlereuh hmana a dahṭhat ho kha i la hria em, Gold ṭhi leh zungbun vel te kha" a tih chuan ka bu nghat a, ka nu hian tlereuh hi pawisa peipun nan a hmang ṭhin a, phaia a zin hian a lei vak a, a hnu rei deuh hnuah to deuh deuhin a hralh leh ṭhin a, tunah pawh a thingrem mawngah engemaw zat chu a la neih ka ring.




"Kar leh ah ka pa chhungte inneih naah kan kal dawn a, a rukin ka hawh duh e, amah ka dil chuan a phal awm si lo a" a ti niah niah a, ka nuin a tlereuh hi Umawipuii khawih a phal vak lo, a chhan chu a tih bo loh leh a hralh ru emaw a ni ziah a, 'Ka ti bo' a tih tam tak pawh hi a hralh a nih ka ring mah zawk.




"I dil loh ten engtin nge i tih chuan ang?" ka ti liam satliah a.



"A chahbi lo la chhuak la, chhuna a awm loh hlanin lak ka duh" ka tih chuan ka ner nasa mai. "Ṭul lo emai a" ka ti hlak laiin "Sunday ah ka lo leng anga, chawhnu inkhawm hlanin ka la ang" a la ti tak deuh deuh a, 'Ti suh' ti pawh ni ila awmzia a neiin ka ring lo, a tih tawh hi chu a tum ngar ngar zel.




Chawhnu lamah muang changin ka inkhalh chhuak a, kawnga thei tharlam deuh deuh an lo zawrh chu damlo kan nan ka lei phei bawk a, an kawmthlang kawngpui ka thlen chuan bathlar aṭanga Usamuan min lo vai zauh chu ka han hmu bawk.




Phur leh zam ru deuh chungin ka pen chho a, Usamua nu kha a la haw lo a, chuvanga zam chu ka ni berin ka hria, bialpa te nu lakah hian tinge maw zam a awl bik em em le!




Kawngka ka kik tur chiah chu chhunglam aṭangin an rawn nam hawng rawk mai a, ka chal ka va tauh chawrh lehnghal!



"Aw haw haw....Niniau..!" ka chal tuai vut vut chung chuan ka hawi chhuak a, ka mittui a rawn far fap zui a, a na ve ngat ngat em a ni.




"I in tauh na lo maw..?" Nu Rengpuiin a tih leh laichuan "Tunge a?" Suzanne-in a lo tih ri ka hria a, nui lui zet chungin ka chal chu ka la tuai sek sek reng.




"Lo lut rawh, i awm tih ka lo hre lo anih kha" a tih leh hnuah kan inzui lut a, Suzanne-in min hmu chu a lo phul hlut a, "Mimite...awi..kan lo sawi zo chiah che a, hrilh tur che ka ngah teh a nia" a ti nghal bawrh bawrh a, "Nakinah kan sawi dawn nia, chaw ei ve nghal rawh aw, Tumbu kan ngah rapthlak" tih paha a pasal a va melh chuan kan nui dar dar hlawm.




"Lengpui ah Tumbu an lo zuar ṭeuh a, thla khat daih kan lei" a ti lehzel a, a hmel ka en chuan a dâng hle a, a cher zual hle tawh, amah a sang ṭha bawk si a; chuvang te pawh chu aniang a lang cher zual a ka hriat.




"Ka awm loh chhungin in va lo inthlung nghet hman awm ve" a rawn ti leh sar sar a, min ti lai dawn dawn mai.




"In va in nel sa awm ve nangni pahnih hi, lehkha in zir dun em ni?" Nu Rengpuiin a lo tih chuan "Ka Aihnahphahpui ngat anih hi" Suzanne-in a lo ti var a.




"iiii...Zosangpuii ve ringawt chuh, Aihnahphahpui pawh a awmzia i hriat tawp loh kha" an pain a lo tih chuan "Soulmate tih na.." a lo ti mauh mai a, midang ho chu kan nui leh dar dar hlawm.




"Eng nge innuih a, ÂuSamu-a pawn UChawitei ka aihnahphahpui atia lawm le" dik intih hmel zeta a tih chuan "An ni te chu tette aṭanga inkawm an nia lawm" an pa chuan a ti leh a, engtin phei chuan a chhang zui tawh lo.




"Niniaui nen inkawm rual lek in lo nih tak hi a" Nu Rengpuii chuan a ti leh zauh a, chuveleh..."I Nurse hual ve ai kha chuan a hmelṭha daih zawk lo maw, keimah min zawn tir rawh ka tia; min ring duh lo hmasa vel a, hei ka hmuh ṭhat em ni.." Nu Rengpuii lamah chuan va kun hnaiin "Ka hmuh ngat anih hi aw" a va ti leh kher a, ka lo zak zawk....




Usamua leh Ramtumbuliana chu an lo nui kur kura, chutih laiin Nu Rengpuii thung chuan a hmui a petsawi duh vel lek a. "Ka fapa te ve hi zawngin ka duhzawng hi an nei dawn lo ve ve anih hi" a ti nghut a, ka lo ip chawih thei..




"Awi a..min sawi tel ve kher lo la, ahma pawn ka mo tur dik tak min tih vek tawh kha" Suzanne-in a lo ti leh pek a, an pa nuih a za ngang mai.




"Nang te hi...lo ngawi churûk reng rawh..." Nu Rengpuiin a tih laiin Suzanne-i chuan a lo nuihtlawn sâng a, "Ka nu chu mo hmelṭha deuh deuh pahnih i nei dawn a nia, fapa neih hmelṭhat manah..." a tih chuan Nu Rengpuii pawh a nui ve ta nge nge.




An chhungkua hi a nawm hmel ka ti, a tu a te pawh hi an inpawh hmelin; an in hriat chian hmel a, kan in chhuahsana hmun danga ka awm dawn anih ngat chuan hetiang chhungkua hi ka awm chak na zawng tak a ni, ka ngaihtuah neuh neuh a, ka hlim ru veng veng thei.



"I chal chu enga tinge a?" Usamuan a lo tih chuan ka khawih vat a, a lo pawng luau tawh chu niin..




"Kawngkhar ah ka intauh palh a" ka tih laiin "Ka nuin a va Spin maw le" Suzanne-in a lo ti leh hmanhmawh a, "Awih awm loh loh" Nu Rengpuii chuan a ti tlat thung, ka nuihsan mai a, "A na lo, a reh leh vat mai ang" ka ti chu Usamua chuan a pawm ve vak lo ni tur a ni; choka lamah min phei pui a, vur tlangin min dehsak a, ka chal a deh laichuan keiin ka lo thlir dauh dauh reng a, a hmel ṭha ka ti takzet, tun anga min en duh lo der chunga a nuih phei hi chuan....




Midang an lo kal hnai em tih a en thuak a, chumi hnuah ka hmuiah a rawn fawp zauh a, vawithum lai a ti nawn, a kekawr ipte aṭang hian eng thil emaw hi a rawn phawrh chhuak a, Silver zungbun mit tereuh te nei a ni! A mawi reuh lutuk...




"Suzanne-i ka chah a, i bun tawk kan hre si lo a" tih pah chuan min buntir mawlh mawlh a, tlem chuan ka thawl deuh, ka kut zunglaiah chuan ka bun thei a, chutah pawh chuan a la thawl lam mah.




Phelh leh mai a tum chuan ka lo phal lo a, "A pawi lo, a laiah hian ka bun mai ang" ka lo ti var a, "Nidangah a aia nalh kan leidawn nia" a tih chuan ka lo bu ve nghat a.




"Chaw chu i ei dawn em?" ti a min zawh chuan "Ei lo mai ang, mikhual kan ngah rih a, dawr pawh ka khar hma ang" tiin ka chhang a. Dar thum rik hma deuhin ka inkhalh chhuak leh a, kawmthlang kawt thleng min lo thlah thlap bawk.




Ka kal dawn chuan "Zaninah ka chhungte ka lo sawipui dawn a, min lo beisei dawn nia" thutak fe hian a ti a, ka lo nuih var var thung. "Kal rawh le" a tih leh hnuah chuan ka tlan chhuak ve chauh a, dawr lampana ka inkhalh haw laichuan ka hlim tak zet, ka thinphu te chu a rang thei hial a ni, thinphu ti rang thei khawpa hlimna hian min van chenchilh khat tehlul em, ka zungbun chu ka en leh ṭhin a, ka lung a awi ve em a sin.




Dawr ka va thlen chuan Counter a lo ruak huai a, choka ah lah chuan Umawii chu ka hmu hauh lo, kan nau pakhat lah chu thleng silin a buai em em a, Customer lah an tlem nasa mai si!




"In lo buai em?" ka va ti hmasa zet a, "Buai zo chiah, UMawipuii pasal chhungte an rawn kal a, an tam rap...." ka thlengsil tuin a lo tih laiin "Ei an thei hlawm nasa mai, vawiin hlep tur leh naktuk hlep tur chu an Quit vek ang" kan eisiamtu thar khan a lo ti ve a, Pa Rela ka va melh ralh ringawt.




"Mawiin a Free a nih kha" a ti chiah chu ka sa pup pup in ka hria, an thil ei te chu ka zawt a, eihnem tak an ni. Amah lah chu tlai thlengin a rawn let tawh lo a, ka Call lahin a chhang duh der si lo.




Lungawi lo deuhin inah ka haw a, inchhung ka lut chu min lo melh hrek hrek hlawm a, tumah lah chuan min lo biak pawh an tum lo. Ngaih ṭha zan lo a choka lam ka pan laiin ka pa inbual zo nen kan intawk a, "I nuin inchungah lo chho rawh a ti chein ka hria.." a lo tih chuan "Eng nge a?" ka ti he haw a.




"Ka va hre mai lo ve" a tih laichuan Sitting room aṭangin Urampuii leh Ununfeli an lo chhuak a, en pawh min en loin min kalpel a, kailawn a an pen chho lai chu ka en zui vung vung ringawt. UBza takngial pawh chuan min be chak vak lo niin ka hria, "Ka nu Thani chu eng nge a an?" ti a ka zawh chuan "A zia" tih zawngin min chhang a, eng nge maw an awmzia chu le?




Kailawna ka chhoh laiin ka nuin min ko ri ka hria a, "Ka lo kal" tih leh an Room lam pan ka rual a, ka va luh laichuan khumah puan a lo thlep mawlh mawlh a, "Hetah lo thu teh" bung zet hian a lo ti bawk a, khum sir a melh na lam chu ka pan ve mai bawk.




Ka ṭhu fel chauh tih ah "I bialpa kha ṭhen ang che" a rawn ti fak mai.



"Ti nge a..?" ka ti let ha a, min ti bang bo lek lek zawk.




"I u Afeli ngaihzawng a ni a, a rem lo a ni tawp mai" a tih chuan "An inngaizawng hleinem..in hriatsual anih kha" min lo melh rum em vang chuan a aw chu a zuih ral hle.




"Sawibuai hlek loin ṭhen rawh, Afeli chu ka bia a, a duh hneh lutuk, an inkawp tawh lo anih pawhin i unaunu a ni a, a rem lo" a ti leh bur a, a va buaithlak tak..




"Mah se, nu..Usamua chuan.." ka ti leh dek dek chu "Ka sawi ang chuan ti ringawt la a ni mai" a lo ti vin hlur a, 'Ununfeli vang' tih ringawt chu ka duh bik lo, nakin lawkah palai hmel an lo lang a, ka sawifel vat loh chuan thil a kal khaw lo zo mai ang.




"Usamuan Ununfeli a duh lo, an la inngaizawng ngai lo bawk, Ununfeli pawn a pawm thiam vek tawh a lawm, nizanah pawh Usamuan a hrilhfiah.." ka sawi zo hman lo ka biang a ri sawk a, ka lu a hai chhulh thei...!




Ka biang sa hat hat chu dawmin, mittui nen ka nu chu ka melh a, "Ṭawng thei lutuk emai" a inthiam lo leh deuh nge ni a hawisawn vat a, a aw a zawi viau bawk.



"Ti nge min ben ringawt..?" ka rilru a na em a, ka aw pawh a khur dar dar a, ka ṭah a chhuak lutuk.




"Kha tlangval nu khan kum tawpah palai kan lo tir ang tiin Afeli bulah a sawi a, nang inrawlh lo la chuan engkim a kaltluang dawn a ti bawk, i unaunu hmakhua i ti chhia tih te i hria em, a rilru i hliam nasa viau bawk a, ṭap zawih zawih khawpin i siam kha, chu loah kha tlangval kha i tan ka duh lo, tun aṭangin thlahfel hmak ang che, Afeli vang chauha sawi ka ni lo a, i tan ka duh loh vang a ni pakhat, unau a mipa inchuh hi a zahthlak piah lamah kumkhaw innghirngho na thlen thei a ni a, chhungkua ngaihtuah la ṭhen hmiah mai rawh" a ti nghat nghat a, min thawhsan lai te chuan ka ṭhu ngawi ran a, min ben na vanga ka biang chhah tup chu dawmin ka inpetruh ṭeuh a, ka awmchhung chu ana ngut ngut mai.




Nichin mai kha chuan hlimna zawng zawng neitu emaw tih tur khawpin ka hlim a, hma hun pawh thui tak thleng ka thlir pha hial anih kha. Tunah lém, phek khat pawh daih lo tur thu tlem te khan a rawn vaw ṭhiat zo leh vek a, beisei tur enge min pek tak hi.



Chaw pawh ei loin ka Room ah ka inkhung chawrh chawrh a, tumahin min rawn ko lo. Hringnun hi a mak mange ka ti! Ka nun hi thawnthu ziaktuin a thawnthu a beidawnna ti fiah tura a hmanrua ang mai ka ni.




Chu ka hringnun thawnthu ziaktu chuan duhthlan tur pahnih min pe a, rawng sen leh rawng pawl te...pakhat zawk chuan ṭhinurna nasa tak ka tawn tur a entir a, chu chu ka chhungte lak aṭanga ka dawn tur a ni.
Rawng pawl chuan lungngaihna, rawng sen lam kalsana ke ka chheh ruala min chenchilh tu tur chu, chutah chuan ka thil hlauh ber a thleng bawk ang.




Ka thil hlauh ber chu maw....tu emaw ka mi hmangaih em em chân hi a ni. Eng rawng chu nge ka thlan tak ang?







(End of chapter -10)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 6th, 2022, 7:45 pm

ZUNZAM - by Ahmangaihi violette Khiangte


CHAPTER - 11




"Mimi.." ka Room kawngkhar kik thawm leh ka pa aw ri ka hre zui a, "Chaw rawn ei ta che, midangin an ei vek tawh a nia" a rawn ti nawn leh a, chaw ei chu ka chak lo kher mai, midang ho zuk hmachhawn pawh chu ka chak hek lo. Ka chhawn mai loh vang chuan kawngka chu a rawn hawng a, a lo pen lut chu ngawireng chungin ka lo en a, ka pa hmel chu a ngui nghiai a, ka nuin thil awmzia a hrilh tawh a ni ngei ang.



"Ti rawh, chaw lo ei la i mu leh vat zawk dawn nia" a hmel damthluam ka hmuh chuan ka ṭah a chhuak hlur ringawt a, kan buaina hi min chinfel sak thei se ka ti tak zet a ni.




"Ka ril a ṭam lo, ka nuam sam vak lo a" tiin chhuanlam ka siam a, ka bulah a lo ṭhut lai pawh chuan puan ka sin ṭha sauh sauh a, a rilru a buai ve viau a ni ngei ang thawk a la leh hluai ṭhin.




"I nu khan thil awmzia min lo hrilh a" a tih chuan "Eng nge a sawi a?" ka ti let thuai a, "A...Feli pawh kha ka zawt a" a tih chuan rin dan ka nei thiam mai tawh. "Thil awmzia dik tak in hre lo a ni, Ununfeli sawi ang kha a ni miah lo a nia" beisei nei deuhin ka pa chu ka melh a, rilru buai hmel tak bak chu a hmelah chuan thildang ka hmu lo, min ring angem tih tak ngial pawh chu hriat har tak a ni.




"I u Feli hi a fahrah si a.." a ti dek dek chu "Ti nge amah chiah in rin a, Usamua nen an inngaizawng miah hleinem, amah zawkin.." sawi zo loin ka ngawi leh rih.




"Pa, Usamuan kan inkar a hrilh pawhin a hrethiam vek a lawm; mahse, ka nu bulah a nilo zawngin a lo sawi leh daih a nih kha..." ka pa chuan min ring se ka duh em vangin ka en tlawk tlawk a, ani erawh a ngawi vung vung thung. "In ngaih ang kha a ni miah lo a sin" ka ti leh ringawt ṭhin.




"A...Felin a ngaizawng ve tlat si kha a nia buaithlak chu, i nu pawhin ṭhen mai turin a duh zawk che a, unau in innghirngho phah a hlauh vang a nia" a ti leh charh charh a, ka chhungte hian ka rilru tur hi min dawn pui ve miah lo tih a lang vek a, Ununfeli chauh an thupui hlur a nih ber hi maw.




"Usamua chuan palai rawn tirh vat a tum a sin" ka tih laichuan ka pa hmel chu a phawk deuh a, chutianga thui kan kal tawh tih chu a beisei lo te pawh a niang.




"Nupui a min neih a duh a, a bulah chuan engtin nge sawi se min tih, ka 'Cousin in a duh vang chein ka chhungten neih che an rem ti lo' ka ti dawn a mi, an ni lah an inngaizawng der si lo a" za lo zetin ka nui a, ka pa bulah hi chuan ka lungawi lohna ka ti lang hreh ngai lo, lungawi lo taka sawi ka nih vangin ka ṭawngkam chuan ngeiawm lam a kai viau bawk.




"Kawng engkimah hian chhungkua hi dah pawimawh a ṭha ngai, chhungkaw kehchhiat theihna thil a ni a, ngaihzawng vang mai mai a chhungte rilru hliam sak a ṭha ngai lo" ka pa chuan a ti dam leh duam a, chu tak chu ka hrethiam pha ve lo, engvang a he thil hi ngai thutak viau nge an nih hi, Usamua ka neih vangin chungkaw dah pawimawh lo ka ni ringawt ang maw...?




"Engah nge chhungkua kan kehchhiat ngawt ang, nula ka nia pasal te chu ka la nei ang chu, Ununfeli in ṭan em vangin in ngaithiam lo mai mai a ni, a bialpa emaw a pasal hlui neih tum pawh ka ni hleinem..." ka ti tan tan a, kan sawi kan sawi takah chuan keimah ka inthiam lohna te kha a bo duak tawh, mahni ṭanghma hai takin tunah pawh ka pa ka chhang mek a ni, dik ka inti a, Ununfeli dawt sawi vang ngawta Usamua ṭhen chu ka tum hauh lo.




"Chutiang ngawt a ni ṭhin lo a lawm, i nu pawn a hrilh che kha, hetah i Nu Thani te chhung nen kan cheng ho tawh dawn a..." ka pa ṭawnglai chu lo pawt chatin "Anih Usamua hi ṭhen ila eng thil nge in beisei, Ununfeli hi a nei dawn chuang em ni, nangmahni zawk hian awm lo pui awmtir in tum a ni lo maw" hre chhuak thutin ka pa chu ka en leh a "Tinge ka nu hian Ununfeli thusawi a awih em em laia min rin ve miah lo a, kut min thlak duh hial khawpin Ununfeli kha a ṭan bawk a.." ka nuin min ben lai ka ngaihtuah let a; ka aw te a lawi rat tawh, ka ṭah a chhuak thar leh takzet.




"I nuin a beng che a maw...?" phawk deuhin ka pa chuan a lo ti a, kei ka lo bu nghat nghat thung a. "Khatianga ben rual pawh kha ka ni tawh lo, hmeichhe lerh leh awmherh ang maiin min ngai a niang" ka ti tham ṭiak a, ka pa chuan engmah sawi zui loin min en vung vung ringawt.

"Ṭhen rawh ti mah ula ka ṭhen dawn lo a nia, mipa in a duh a thlang ah keichuan ka ngai lui tlat dawn, Ununfeli thil tih dan hi ka duh lo, hrethiam ang taka a lan hnuah min phiarru anih hi" inhumruh ṭeuhin ka pa chu ka en a, tih vak ngaihna a hre lo tih a hmelah a hmuh theih.

"Eng pawh ni se, chaw chu lo ei phawt la, i nu pawh ka sawipui leh dawn nia" a tih leh pawh chuan ka la hnial ta tho a, beidawng zeta ka pa in Room a chhuahsan hnu chuan ka tho chhuak thuai a, Room kawngkhar chu kalhin Bathroom ah ka va ṭhu a, ka pa bulah khatiang thil kha ka sawi tak nain ka rilru erawh a nawm phah hauh lo, ka luhlul chhuahin ka duh lam kawng zawh lui ta ila, eng ang hun nge ka hmachhawn ang tih te chu ka ngaihtuah kual a, thaw a ipik em em ringawt mai a ni.


Ka mut hnu rei vak lo ah midang ho lo chho thawm ka hria a, Ununfeli leh Urampuii nui ri te pawh chu ka hre pha a, "Mawipuii Pindan ah hian Afeli leh a nu chu mu mai rawh se" ka nuin a tih ri te pawh. Rei deuh thleng chu an thawm ka ngaithla a, ka muhil dawn siar siar ang tih ah ka nuin min ko ri ka hria a, "Lukham chuang i nei em?" a rawn tih ri chu ka hre reng nain ka chhang duh lo a, "A muhil tawh em maw ni?" ti niah niah chungin a kalsawn a, chutih laichuan ka Phone a lo eng ve chiah bawk.

"Keini lam chu kan inpeih tawh viau mai, kan nghakhlel tlang bawk che a niang kar thar kan tinzawn tawh mai a sin" tih hi Samuelan min lo thawn a, lo chhan let dan tur pawh ka hre lo, ka rilru a na veng veng mai.

Ka hrilh vek mai dawn em ni ang tiin ka ngaihtuah a, sawi dan thiam a harin zahthlak pawh ka ti, ka nuin min tih dan te phei kha chu a hriat ve chi a ni hauh lo ang. Mahse, palai an lo kal huna an beidawn lutuk loh nan hrilh chu ka tihmak mawh a ni lawi a, anin thutlukna te pawh a siamthiam zawkin ka ring.




Message chu chhang loin ka call a, rei a ri hman lo a lo la thuai a, "I muhil tawh emaw ka ti hman a" a tih laia a aw ri chuan ka lung a ti chhe lek lek hial a, ka inpetruh ṭeuh ringawt.




"I chhungte chuan engtin nge an tih a?" ka ti zawi sep a.




"Ka hrilh ang che khan lo len theih hun tur min zawt nghal mai maw le, an mit i tlung khawp a niange" a nui suk ri ka hre zui a, ka kut ṭanga zungbun thawl angreng tak chu enin za lo zet chuan ka lo nui ve a, 'He zungbun hi ka tan a lian lutuk em ni aw' tih te a ni ka ngaihtuah ni.




"Ka la rawn chuangkai tlem si a, i chhungte chu kan ṭhawng viau ang a, naktuk zanah ka lo leng dawn em ni ang?" a aw ah chuan a phur hmel hle a, thu lawmawm loh hrilh chu ka hreh tak zet.




"I haw har a ngem naktuk hi ?" a tih chuan ka haw har loh tur thu ka hrilh ve mai a, "Muantea ka lo sawm anga, kan rawn leng dawn nia" a ti leh zel a, engmah ka hrilh ta lo. Ka hrilh thei rih ngang lo a ni, nakinah hmai chhanah ngei ka hrilh tawh mai aniang chu.





Mut hmunah rei deuh thleng ka meng a, ka muhil pawh chu ka mu nghet lo hle a, ka harh zing khawp mai, zing hma deuhah thoin ka insiam zung zung a, inhnuai ka chhuk chuan Ubiakzuala chiah a lo la tho chhuak a, "Thingpui lo lum la" a lo tih vang chuan ka lum leh rih a, vawiin an haw ni tur anih vangin a tho hma ve anih hmel e.



"Sumo in maw in haw dawn?" ka tih chuan a bu nghat nghat a, "Chawhnu chhuakah i Urampuiin a ti tlat a, bazar leh phawt a duh aniang kha" a tih chuan ka chhang lem lo, dawhkan kilin thingpui kan indun a, kan ngawih dun vang vang hnuah "Engtin maw Afeli nen in intih a?" a tih chuan phawk deuh hian ka en a, han sawi chhuah fo pawh chu thil nuam a ni lo maw le.




"Amah zawt mai rawh" tih pahin ka nui tawi tak a, "Ka zawt tawh tho a lawm" a thingpui in pahin a ti sam mai a, engtin tak lo inhrilh ang maw.



"A zia lo emai kha u te bialpa i chhuh ringawt mai a.." a tih chuan ka ṭhu ngil hluai a, Ununfeli chuan engthil chiah nge maw a lo sawi le?



"Rampuiin min lo hrilh a.." a tih chuan ka ner nang a, "In ngaih ang a ni lo" tih bak chu chhan vak ngaihna ka hre lo.




"Kumin chu pasal a nei tawh ang chu kan lo tih laiin..." a kiai suk a, ka no beng chu ka hum nghet hle tawh. Ubiakzuala pawh chuan min thiam lo hle tih a chiang reng a, an lakah chuan hmeichhe tenawm tak ka lo nih dawn hi. Insawifiah chu ka tum tawh lo, Ubiakzuala lakah leh lek phei chuan awmzia a nei tlem khawp ang, zaninah Usamua lo kal sela, ka chhungte chuan thil awmzia an hmu mai dawn a, an rilru pawh an thlak ngei in ka ring.




"Ka hman hmawh tawh a, ka chhungte bulah ka kal tawh tih lo hrilh mai rawh" ka tih leh hnuah ka thawhsan a, ka chhuah dawn chuan ka nu a lo tho chhuak ve mek a, min biak hmain ka kal chhuak thuai bawk.




Dawr ka thlen chuan Pa Rela a lo thleng tawh a, choka ah kan che dun a, pa ṭawng tam a ni lo bawk a kan ngawi dun chawrh chawrh a ni ber. Umawipuiin a lo kal theih loh tur thu a lo sawi a, khua a chhiat vangin Customer kan ngah loh ni tak a ni bawk a, kan buai lo nileng a tih theih ang.




Tlai lamah Romawia a lo kal a, inluah tur an hmuh thu leh kar tawpa insawn pui turin min lo sawm a, tlai lam deuh anih vangin ka hman ve mai ka ring a, ṭha deuhin aw ka lo pawh a, "Chaw te i einghal dawn nia, ka nu pawhin a hmu chak viau che a nia, i pa nen lo kal thei ula a duh a" a ti luam a, ani pawh thla thar lamah chuan Delhi lamah a let leh tawh dawn a ni awm e.




Tlai ka haw chu ka nu leh Ununfelin eirawng an lo bawl a, an lo ti ti bawrh bawrh a, Ubiakzuala te nupa erawh an kal ta anih ka ring, "I va lo haw hma ve, Customer i ngah vak nange?" Ununfelin a lo tih chuan "Khua a chhe em a" tih zawngin ka chhang a, inchung lamah ka chhohsan thuai bawk.




Zanriah kan kil lai te chuan Ununfeli chu ka nu bulah a ṭhu a, a be seuh seuh reng a, kei erawh ka ṭhu ngawi reng a, ka pain min lo biaka ka chhang tih loh chu ka ṭawng ve meuh lo. Nu Thani chuan min en chik thei hle a, ani pawn min ngai dik lo tho a ka rin vangin a lakah ka inkiltawih lo thei lo a, eng nge a an tih tak ngial pawh ka zawt lo, kan inchhung boruak chu a nuam lo takzet a ni.




Ka inleng te chu Dar 8 dawn ah an lo thleng a, an lo lut chu ka pain a lo chhawn a, Sitting room ah kei ka lo ṭhut sa vangin Usamua chu ka bulah a lo ṭhu a, Ununfeli erawh a nu mutur buaipuia inchung lama a awm lai mek a ni thung.




"A insiam rei lutuka kan rawn tlai phah a lawm" Muantean a lo tih chuan Usamua chu ka lo thlek vat a, zanin chu a sam pawh a rawn ti nalh riauin ka hria. "Suzanne-in min inthlak tir ngun lutuka" nui suk suk chunga a tih laichuan ka nu a lo lut phei a, "E, in lo leng a ni maw, Afeli chu a nu a han muttir lawk a nih kha" a lo ti mauh mai a, kan inleng te chuan an chhang lem lo a, ka nu ṭawngdan ki chu hrethiam awm pawhin an lang lo.




"Mimi, i UMawipuii a dam ṭha si lo a, Bawiha i va la lawk dawn em ni" a lo tih leh chuan kan ep chiaha ṭhu ka pa pawh chu a rawn hawi phawk ngang mai.



"Nakinah, mut dawnah ka va la dawn nia" ka ti ve mai a, chutih laiin Muantea chuan "Unau engzat nge in nih?" a lo ti ve thuai a, "Pahnih kan nia, u hmeichhia ka nei a, pasal a nei tawh" tiin ka chhang a, ka nu chu kal ta mai loin Tv remote chu a rawn ban a, a hmeh kual lai te chuan ka awm a nuam lo viau tawh, min uap run mai hian ka hria.




"Makpa chhungkhung a pasal neih mai chi ava nih hmel ve" Muantean fiamthu a a lo tih chuan Usamua nen kan lo nui a, ka nu lo hawi chiah nen kan mit a intawn zui vang chuan ka nui tawp rang leh viau thung.




Tv Remote chu ka pa a pek hnuah rei ding tawh loin a kal chhuak a, ka lo thawk huai huai laiin Ununfeli a au ri ka hre zui a, "Afel i la zo dawn nange, hei in leng i neih hi" a ti lang lang a, Usamua hmel chu ka en ngam lo, ka zak takzet a ni. Muantea pawh chu a ṭhu ngil deuh hluai tih ka va hmu thei a, Sitting room piah lama thawm chu a ngaichang tih ka hre bawk.




"In leng i nei a?" Inchung aṭanga Ununfelin a lo tih laichuan ka pa chu a tho vut a, rei vak loah choka lama ka nu nen an thawm bul bul chu ka hre zui a, eng nge sawi tak erawh a hriat phak loh thung.




"I nu hian kan nula rim a hai a ni lo maw?" nui chunga Muantean a lo tih chuan ka nui ve hleithei meuh lo. Usamua chu ka thlek ringawt a, engmah sawi loin a ṭhu ngawi ngul a, engthil emaw ngaihtuah rauh rauh hmel a pu bawk, mi pangngai tan chuan thil awmzia chu haitheih ni tawh hek lo le, hrehawm ka ti zia chu pui tak a ni. A lakah chuan ka inthlahrunga; ka te chem chem mai hian ka hria.




"In lo leng duh lo lutuka, Ufeli hi Usamua ṭhian a ni bawk sia, chuvangin a hriatsual aniang" pangngai thei ang ber turin ka lo ti a, Muantea chuan a awih a ni chek ang a bu nghat nghat a, chutih laia Samuelan min lo thlek chuan ka tim ru angreng hle, chutah...tawi te hian min nuih a, "Hmachhawp kan va la ngah ve" a tih zawi sup a.




Ni e, ngah tak kan ni, keimahni kan inpeih hle ringawt a, kan vel boruak hi a la inpeih ve mawlh si lo, chutihlai karah buaina a lo inṭham ve mek bawk a, engtia sut kian tur nge tih ah chuan duhthlan tur kan nei chhe hle bawk si.




"Tu te nge lo leng a?" tih leh Ununfeli lo pen thla ri kan hre zui a, "Saw i inleng te saw va kawm rawh, Mimi kha Bawiha la tura a kal a ngai a nia, a kal vat loh chuan an lo mu hman mai ang" ka nu chuan a lo ti leh zung zung a, Sitting room a Ununfeli lo lut chu a rawn hawi phawk viau mai.




"Ka inleng emaw a ti che u a niang" nui chunga tiin Muantea sirah chuan a lo ṭhu a, "Thingpui te in in tawh em?" a ti zui zat bawk.




"A la hma a lawm, nakinah le" Muantean a lo ti var a, "I nu chu eng nge a an a?" Usamuan a lo ti ve bawk a, zawhna chhanga a ṭawng siam siam laichuan engthil mah amah ah chuan danglam a awm lo a, keini pahnih ṭhu dun pawh chu enghelh awmin a lang miah lo bawk a, hmeichhe nelawm leh zangkhai tak chu an lan a ni.




Suzanne-i eng nge a an a zawt a, "A ṭha zel ani pawh, tih thut hi chu a nei ve reng a" tiin Usamua chuan a chhang a, Phone hmang chunga ka nu lo lut mek chuan Umawipuii a bia niin ka hria. "Tunah a lo kal dawn a lawm, Scooty in a rawn kal a nga, a rei nang" tih pahin min rawn thlek a, "Tunah kal nghal rawh" tih melh tak hian min rawn melh tawh.




"Mimi, Bawiha chu a mut a chhuak tawh lutuk a nih chu, a nu pumna a reh thei si lo a, Injection tura kal an duh a; va lak sak thuai teh" a lo ti leh pek a, chutia thil pawimawh tak anga lang si han tih duh miah loh chu inleng te mithmuh ah pawh a mawi lo ve riau a, anih na takah chuan inleng neih laia chhuah daih chu a mawi lo zual zawk. Mahse, kha taka kha ka nu duhdan a ni tlat si.....



(Zawmna)



"Kan kalpui dawn che em ni?" Usamu-an a lo tih chuan ka in en hnai viau a, "Khawiah nge i u te in chu a awm a?" Muantea chuan a lo ti ve zat bawk. Ka nu chuan min rawn en vung vung a, tunah zet chuan Usamua nen kan in laichinna chu a tak anih zia a hriat tawh ngei ka beisei.




"Veng ṭhenawm ah mai sawn a nia, nakinah Scooty in ka kal mai dawn a lawm" ka ti mai a. "Zanah nula mahnia chhuah chu a ṭha lo ang" Usamuan min thlek chunga ka tih leh laiin Ununfeli chu a lo inrawlh a, "Thingpui kan lum a nge aw, Mimitei chu kal a ngai lo ang, an in ka hre tawh tho a, keiman ka va la ange" phur hmel deuh hian a lo ti zung zung a, eng nge a rilru ah hian awm hi ka hrethiam ṭhin lo.




"I chhungte bulah hian kan chungchang hi i hrilh em?" ka mitah tak min enin ka bula ṭhu chuan a ti leh a, "Aw, nakinah kan sawi dun dawn nia, sawi tur a tam" ka ti sap sap a, kan ṭawng rin loh vangin kan piaha ṭhu te chuan an hre pha ve lem lo a, ka nu erawhin min en zauh zauh reng.




"Afel, thingpui chu va siam rawh, Flask ah tuilum ka dah zawh chiah kha" ka nuin a tih leh chuan thawk ka la hluai a, "Keiman ka siam ange" tih leh thawh ka rual a, Ununfeli tho uk tawh chu kal pelin choka lam ka pan zui a, zanin ka nu awmdan chu hriatthiam har ka ti takzet a ni. Min do ngar ngar ni ber hian ka hre tawh.




Thingpui nena ka va let leh laichuan ka nu pawh a lo la ṭhu ve reng a, Ununfeli leh Muantea chu an lo ti ti bawrh bawrh a, Bawihpuia chu "Ka va la ang" a ti ve tak nain kal mai tum hmel pawh a pu chuang lo. Kan boruak rit tak tikiang tur chuan engthil emaw ka tih a ngai tih ka hria a, ka inngaihtuah buai viau mai.





Ahmasa berah chuan Ununfeli leh Usamua inkar hi ka nu hian hre chiang sela ṭha berin ka hria a, chu chu ka tih hmasak ber tur niin ka hre bawk. Usamua chu thingpui pek pahin zangkhai thei ang ber in ka han nuih a, tawi tein min lo nuih let ve nghe nghe.




"Ka nu hian Ununfeli ngaihzawng emaw a ti che a, Hnahthiala i lo kal vang khan a niang" ka tih chuan min en ṭhap hlawm a, ka nu chu a rawn meng thip ṭha khawp mai, "Chuvang anih dawn chu, nichin khan ka lo buai hman ṭep a lawm" Muantean a lo ti thuai a, "Kei pawh min ti hamhaih deuh a, inleng ka nei tak tak emaw ka lo tia" Ununfelin a lo ti ve thuai bawk a, hetianga ṭha taka a ṭawng vang hian ka rilru a ti buai leh nak ṭhin.




"Keima thiamloh te pawh anih zawk chu" Usamuan a tih chuan Ununfeli chu ka va en leh a, nuam a ti vak tawh lo tih a awmdan ah chuan ka hre thei. A ngawih rauh rauh hnuah "Insawifiah a ngaih pawh ka lo ring lo a, in inzui tih ka hre ve chauh sia" a rawn ti zawi sep a, a nui reng tak nain a mitmeng chu a tlan chhe viau tawh.




"Kar tharah ka nu dahin Ramdinzuala a chhuk dawn a, i zui duh chuan ka lo biaksak dawn che nia" Usamua chuan a ti ta daih a, "A ṭhat hlauh chu, i nu pawh ka rawn tlawh ta si lo a, a vui ngawt ang a" a ti niah niah a, a sawi dan ah chuan Usamua nu nen an lo inhre ṭha viau ni tur a ni.




"Engtin nge nangni pahnih chu in inhriat a?" ti a ka nuin Ununfeli a zawh chuan "Mamita ka awmna te ṭhenawm lawk hi an nia" Ununfelin a lo ti var a. "Mamit chu nuam i ti em?" Muantean a lo tih chuan "Ti hran lo khawp mai, ka hmelhriat ṭha ve ber Samua te lah hi an awm ṭha duh bawk si lo a" a ti leh mai a. Chutah Usamua chu rawn enin "I awmloh hi chuan i nu nen kan lo inkawm nasa ṭhin alawm, i nu hi chuan mi hi a ngaihtuah ve riau a, kan induhsak ṭhin a nia" nuisang chungin a ti leh a, Usamua pawh a nui ve suk suk mai.




Thingpui no ka seng laiin Usangzuala chu Bawiha pawm chungin a lo lut a, "In rei lutuka, ka rawn kal ringawt a lawm, Diaper ka rawn theihnghilh daih a, lo lei mai teh u" ti sawk sawkin Bawiha chu min lo pe a, a hmanhmawh em vangin Umawii chanchin pawh ka zawt hman ta lo.




Ka nu chuan Bawiha chu a lo la thuai a, inchunga a chhopui takah chuan boruak chu a muang ruih tawh. "Tih huk lam te hi a hnai em?" zangkhai zeta Ununfelin a lo tih chuan Usamua nen kan in en ringawt a, Ununfeli awm dan hi ka duh hauh lo, ka hnena a ṭawng duh dan leh Usamua hriat a ṭawngkam hi a inpersan lulai em a, a bulah hian fimkhur taka awm a ngai dawn tlat.




"Chu chu nia kan lo len chhan, palai rawn tirh vat ka duh a, Mimi chhungte lahin ka ngaihzawng emaw an lo la ti mek che ania hei, a hrilhfiah tu lamah nang lo ṭang ta che" thutak zeta Usamuan a tih chuan a nui var var a, "Lungngai suh, ka lo hrilhfiah vek dawn nia" a lo ti thuai bawk a, a sawi awlsam viau nain a ti tak tak duh angem tih chu hriat har tak a ni. Mi inthup thei leh inthunun thei tak niin ka hria.




An haw tur chu kawt thleng ka zui chhuak a, an Bike dahna lam pana Muantea a kal laichuan ka banah vuanin min pawt ding a, "Engthil emaw zep i nei lo maw?" a ti ta khauh mai. "Zep lo e, hrilh vek che ka tum a lawm" ka tih lai pawh chuan sawi hreh tak ka la ni.




"Hmanhmawh viau lo mai ang aw, i rawn hmuh ang kha kan la ni rih a, ka nu kha a rilru a dam zan lo bawk a, a chhan pawh i hriat angin Ununfeli bialpa emaw a tih vang che a nia" ka ti duah a, a duh ang ka sawi lo emaw tihtur hian min la en ngur ngur reng.




"Zanina i lo kal chu a tih zia khawp mai, ti kha chuan ka nu pawn a hrechiang tawh anga, buaina a awm tawh lo ang" nuih sak pahin ka ti leh a.




"A hmain buaina a awm em ni?" a tih leh chuan lu ka thing leh lawi a, anin thaw huai hmel a pu thung.




"Anih chuan kar hnih khat vel chu kan nghak dawn nia, ka lakah zep nei lo la, thu tlukna engpawh kan siam dun ang" a ti charh charh a, chu chu keipawn ka duh dan tak a ni.




An kal tak hnu chuan muang changin inchhung lam ka pan a, Sitting room aṭanga Ununfeli lo chhuak chiah nen chuan kan intawk hlawl a, min hmuh rual a a lo nuih hawk vang chuan phawk fe in ka en a, eng a hria chu ni maw?




"Samuela kha i tih tir a ni maw?" a rawn ti mauh mai, hahthlak hian....




"Engvangin nge ka tih tir ngawt ang, mi â a ni lo a, thil fel lo chu a hmu thiam ve vek a lawm" ka tih laiin "A awm laia i ṭawngkam te kha tum lawk vek i nih ka ring tlat" ner sak hian a ti leh a, thawk ka lo la hluai thung.




"I ngaih ang angin ngai teh, nang nena buai hi ka peih lo, ka nu bulah a ni lo zawngin thil lo sawi tawh hauh suh, engmah i thil neih ka chhuhsak lo che, ka chungchangah rawn inrawlh lo la, keipawn ka rawn buaipui bik lo ang che" ka tih zui duah a, min chhan tuma a ang hman zuau chu inher sanin inchung lamah ka chho a, "Saitluangpui" a rawn tih pawh chuan ka hawi let tawh lo.




Ka naupan lai aṭang ṭawhin mi nena inhauh hi ka ti ngai mang lo a, ka thinrim tawh hi chuan ka ṭah a chhuak mai ṭhin a, ka natna te pawh midang hnena bun ruak lo a paidam mai chi ka ni, chutih lai kara Ununfeli nena lo inbakkhaih chu ka ti hleithei meuh lo a, rilru leh taksa thleng hian ka chau zo vek zel.




Zing karah Umawipuii a lo kal a, ka nu leh ka pa ten inhnuai room an then fai lai anih vangin Bawiha thingpui ka lo siam mek a, Ununfeli te nufa inchung lamah an awm thung, choka a a lo lut chu "Eng nge i an a?" tiin ka lo zawt ve thuai a. "Ka zawi.." a ti mai a, pum na chu a nei tawh lo anih ka ring.




Rei vak lo ah ka pa a lo chho a, "Mimi tuilum sa ver vawrin min thlit teh, ka hrawk hi a nuam lo riau mai" a lo ti a, "I Tonsil a vung a niang, Company damdawi ṭha deuh ka hria a sin, hmanni a ka tih thar a nia, a ei tawh ten an ngeih an ti riau a" Umawiin a lo ti zung zung a, eng Company thar nge maw a lo buaipui leh tawh ni.




"A rawn na a tihian a zia veleh zel mai, tui lum ka in tam anga a dam leh mai ang" ka pa chuan a ti sam mai a, Umawiin ka nu awmna min zawh chuan inhnuai room a tihfai thuin ka chhang a, "Ṭhat chu, a lo chhoh chuan min lo au vat dawn nia" tih leh inchung lam pan a rual ta mai a, a thil tih tum ka hriat chian em vangin ka umzui lo thei lo.




"Pa, Bawihpuia hi lo en teh" tih leh Umawii chu zui ka rual a, a hmanhmawh bawk a che rang tak a ni. Ka nu te Room a ka va luh laichuan Drawer a lo hawng rak rak a, a hmu zo lo a niang thir thingrem lianpui chu a hawng leh a, "Mahni nu te thil ruk tum chu a va nutling tih chi loh ve, a hriat vaih chuan a vaw hrep dawn che a nia" ka lo ti kha kha a, "Lo bengchheng suh, nikhat chiah a lawm ka hawh dawn, pawnah lo va awm rawh" a lo ti sam et thung.




Thingrem a hai hnawk na chu a dahfel leh hman loh hlauin ka lo rem ṭha nghal zel a, keimah zawk chu ka lo hmanhmawh em em mai bawk. "Immm...tu thlalak nge" a rawn tih chuan a lo ban ve vat a, thlalak hlui zet tawh niin a rawng pawh a fiah lo ruai tawh a, Thingkung hnuaia nula leh tlangval la naupang tak te ṭhu dun lai hi a ni a; hmeichhia zawk chu ka nu a ang viau mai.




"Ka nu leh pa inngaihzawn lai anih dawn hi" ka tih chuan a lo bih ve leh rih a, "An va hmelchhe teh bai ve" a ti liam puat a, "Hai hai lo khan dah teh, ka nuin a thukru ṭha viau ang" ka lo tih chuan a beidawng ve ta deuh a niang, min rawn en vung vung a, "Ka va ngei tak" a ti leh hluk a.




Thawhsan mai ka tum laichuan ka kut chu a rawn ban thut a, ka inrin hmain ka zungbun a lo pawtthla fel der tawh, "I va thawl ve" tih paha a bun mawlh mawlh chu lak sak tumin ka lo ban ve vat a, "Ngawih rawh, rei lo te ka lo hawh rih ang" a ti leh zel a, inhawh sak chi pawh ni nghal lo chuan.




"A chi loh, Usamua min lei anih kha" ka tih chuan tim dai hian min en a, min pe mai dawn emaw tih laiin "Inneih ni thleng chiah" a ti leh hram a, chhuh sak ṭalh tum pawhin a chhuhsak theih hauh loh, thinrim dawn dawnin a ṭang a "I uikawm lutuk" min ti zek bawk a, a haw dawn te chuan min pek leh mai ka beisei tehlul nen, "Karleh ah ka pe let ang che" tih zawng a sawi a, a ti bo ang tih mawlh mai chu ka lo hlau.




Zirtawp tlaia dawr aṭanga ka haw chu ka nuin choka aṭangin min lo ko nghal a, "I bialpa khan palai rawn tirh a tum em ni a?" a lo ti tawl a, Ununfelin a lo hrilh leh tawh a ni ngei ang. 'I bialpa' a tih vang chuan a pawm thiam ta anih ka ring. "An lo len vat chu ka ring, kan hmanhmawh hran..." ka tih laichuan a bai chawhna fian chu a rawn lek zuau a , keipawh ka ṭawng tawp chawt nghe nghe.




"Ka thusawi kha engah mah i ngai lo a ni maw, i tlangval pa chu hrilh rawh, palai pawh rawn tir vawi sawm sarih mah se, in innei chuang lo ang, i khawsak dan hi i zahpui awm emai Saitluangpui" a ti hlak hlak a, ka pa lo lutin thil awmzia a rawn zawh chuan "Kha tlangval kha Feli a lo kamkhat tir ngam ngat a nia, zak thei lo tak a ni, Feli zawkin naute tiin ṭha takin a dawh hram hram a" a ti leh a, ka thil hriat teh nuai chu a awmzia pawh ka hrethiam lo, Ununfeli lakah engthil emaw ti ah min ngai chu a ni chek anga!




"Chu bawk chu maw in lo buai leh tawh, Mimi bialpa a ni tih i hre tawh reng si a, engah nge maw..." ka pa chuan a ti bul bul a, "Chu ringawt a ni bik lo, Feli nen an inkar i hriat loh vang mai mai a nih zawk kha, Mamit a a awm tirhin an in zui daih tawh a lawm, a mipa nu khan mo a tan a duh a, a fapa a sawipui a, kumin pawn kumtawp lamah palai kan lo tir tawh ang a ti vek a lawm mawle, Feli hian atchilh lo chauh khawpin a duh si a, kan Saitluangpuii hian a ti khaw lo zo zawk a nih hi" ka beng hriatah ngei ka nu chuan a ti sak sak a, 'A tan hian eng chiah nge maw ka nih ve le?' tiin ka inzawt ru hial.




"Palai chu rawn tir buai reng reng suh se, kan rem dawn chuang lo" a tih leh takah chuan ka thin in a tuar meuh tawh lo, inhumruh sauh sauhin ka nu chu ka melh ran a, "Palai chu an rawn tir lo ang, palai tir kher lo pawhin a inneih theih a lawm, a ṭul anih chuan ka inruk tir mai ang" ka ti ve ta ngat a, min melh rum hle chungin ka en let ve ran tawh.




"Enrawh, i fanu hi..zahna chai a hriat loh hi, Mawipuii takngial pawhin hetiang hian min chhang ngai lo" tih pahin a fian ken lai chuan min rawn kawk sawk sawk a, heti khawpa ka nu thin ka ti ur mai hi mak ka ti a ni. Eng ka tih hi nge maw a huat em em le, Ununfeli vang ti dawn ila kei a fanu ngei huat phah ṭhak nan chuan a ho lulai deuh chuan ka hria.




"Enga tinge Ununfeli ringawt hi i ngaihtuah a, ka rilru tur te hi i ngaihtuah ve lo a mi, ka bialpa chu ṭhen ila, engtia tih nge in tum, Ununfeli nena suihzawm i tum chu a ni em lo maw.." ka thinrim luatah ka aw chu a khur thei hial a ni.




"I rilru te mai mai chu le...in unau tana ṭha tur anih hi ka ngaihtuah, ngaihzawng in chhuhsak hi ka haw teh a nia, i u ngaihzawng i chhuh vangin i neih ka rem ti lo a ni mai" a ti leh hluk a, chu thu ringawt pawh chuan min ti lungawi lo zual tawh.




"A ngaihzawng ka chhuhsak hauh lo, a engmah ka chhuhsak lo" a ti vin hlar a, ka pain min lo khap laichuan ka ṭah chhuak lutuk chu ka insum hram hram a ni ber, an hmuh laia ṭap lo turin ka inpetruh ve fan fan a, Ununfeli lo lut pawh chu melh duh loin ka inhersan a, choka ka chhuahsan dawn a Ununfelin thil awmzia a zawt ri ka hriat chuan ka kalsan thei ngang lo, ka nu hriat laia chhuahchhal ngei ka duh, ka inher leh vut a, ka pa chuan min lo zui ve thuai bawk.




"Ka nu bulah hian engthil nge lo i sawi ṭhin a, i bialpa ka chhuhsak che em ni, Samuela hi engtik laiin nge i bialpa a lo nih, Nu Rengpuiin palai a lo tirh tur thu a hrilh che maw...dawt sawi loin ka nu hi..." ka sawi zawh hma chuan ka bek a ri ṭawk a, ka nu chuan engthil emaw hian min lo vawm a, a hmel chu rapthlak zawk khawpiin a rum bawk.




Ka nu ka hriat ṭhin kha amah ah chuan ka hmu tawh hauh lo, a mitah chuan huatna hlir ka hmu a, a kamchhuak chu ka tan chuan tur ang maia mi fan na a ni. "I u khatiang zawng khan be hlek tawh suh, i ngaihzawng pa chu i duh phawt chuan va um rawh, ka inchhung i pen chhuah rual rualin ka tuithlar ang che" a ti khawl mai.




"A tawk a nih chu" tih zawng sawiin ka inher a, ka hnunga ka pa lo ding zum zut chu kalpelin ka Room lam ka pan hlawk hlawk a, inthlak loin Bathroom ah ka lut tlang a, ka hmai ka phih lai te chuan mittui a sur zung zung a, ka ṭah nasat nalamah ka luak lo chauh bawk.




Lu na bur khawpa ka ṭah hnuah ka mu a, ka pik ṭup mai. Ka phone chu hmet engin Usamua a ka call a, a lo lak rualin thawk ka la leh vang vang phawt a, engmah a lawi chu ka sawi chhuak thei lo. "I ṭap em maw ni le?" a lo tih chuan ka insut ri faih a. "Mimi.." phawk deuh a a lo tih chuan ka rilru a na zual ting mai.




"Palai chu lo tir suh, an rem dawn lo" ka ti chhuak thei hram a ni.



"Eng nge thil awmzia" zawi ruih a a tih chuan ka ngawi leh rih a, sawi hreh eng ang mahila ka sawi ngei a ngai tawh.




"Ka nuin ṭhen tur chein min ti a, Ununfeli vangin kan neih che an rem ti lo.." ka aw chu a zuih ral ti tih der a, a khabe khur nasa lutuk vang chuan ka hmui ka hup ngar ngar ringawt.




"Feli chuan engthil nge a tih a, a hrethiam viau khan ka hre si a.." a tih chuan "A hrethiam lo" ka ti leh hap a.




"Kan bia ange" a tih chuan "Be lo ang" ka lo ti vin hlur a. Vawikhat mah be leh tawh lo sela ka duh, ka nu khan Ununfeli kamkhat tir ang hialin min chhuah anih hrep kha.




"Ṭap tawh lo khan engthil nge thleng chu han sawi chiang teh" dam thluama a tih leh chuan ka inhru hul sawk sawk a, chuti chung pawh chuan ka aw chu a la lawi viau tho.




"I bula a awm ang kha a ni lo, ka nu bula a thil sawi dan chu a dang lutuk, in innei tur tibuai ang hialin min chhuah a, i nuin palai tirh a lo tum tawh reng reng em ni..." a chhan na pawh nghak loin "Ka thil sawi hi i ring em, min awih em.." ka ti nghal mawlh mawlh a, min rin loh ka hlau lutuk chuan hlauhthawnna min siam ruai bawk.




"Ring e, ka ring che a lawm" a tih chuan ka ngawi ta hle hle a, ka awm a nuam huai huai thei.




"Eng nge ti sela min duh?" a tih leh chuan chhan mai ngaihna ka hre lo. "I nuin ununfeli hi.." ka ti leh chiah chu "Chutiang ngaihtuah buai duh reng reng suh, i duh anih phawt chuan tunah ka lo hruai ang che" a ti leh hmiah a, a tan chuan thutlukna siam awlsam tak anih hmel e.




Rei deuh chu kan ngawi dun vang vanga, keimah ber chu buaina ka ni ta, thutlukna pakhat te pawh ka siam thei lo, ngaihtuah tur tam tak a awm a, chutih laiin rilru a mang duk lawi si.




"Aw le, lo inngaihtuah la, ka nawr lo ang che aw, i duh hunah ka lo hruai ang che" a tih leh charh charh a, kan inbiakna kan tihtawp hnu chuan ka rilru a buai hle tawh.




Pasal ka neih hun tur ka lo suangtuah dan leh tuna ka ngaihtuah mek hi chu inpersan tak a ni, ka duhna lampanin ke pen ta ila ka inchhir leh angem tih mawlh mai chu...chhungte kalsan a tuithlar nih chu engtiang chiaha hremna rapthlak nge ni ang? Hmeichhe tam tak chuan tuna ka din hmunah hian dingin he thutlukna hi an lo siam tawh ngei anga, enga tinge ka tan hian a harsat bik em em mai le..




Ka muhil ka ṭhanharh chuan dar 12 a lo pel tawh a, inchhung chu a reh tlawk tlawk a, ka rilṭam pumna in min ṭham harh a nih hmel e, thawm dim deuhin inhnuaiah ka chhuk thla a, kailawn tawp ka rah rual chuan choka lama thawm ri barh barh chu ka hria a, let leh mai ka tum laiin ka pa thawm ni tlata ka hriat leh vang chuan ka pan phei a, ka pa chu a lo ni ngei bawk.




Tui khawihna ah chuan dingin no a keng a, a hrawk a ṭhuah ni mai hian ka hria. "I la muhil na nge pa?" ka tih chuan a rawn lehhawi zawk a, "E, i va mengrei ve nang pawh chu" phawk lek lek hian a lo ti a, a hmel landan ah chuan a nuam sam lo emaw tih tur a ni.



"I hrawk chu a la na reng a mi?" ka ti leh a.



"A nuam lo zual riau a, ka Tonsil a vung nasa anih hmel, ka khua te a ti sik a" a ti bul bul a, "Naktuk ah in entir la damdawi te an lo chawh dawn che a lawm" a hrawk bawr ka ve thlek sak chuan a mar ṭang a, a pang lah chu a sa em em bawk.




"Nachhawkna i ei tawh em?" ka tih chuan a ei zawh chiah thu a sawi a, han tih vak ngaihna hre hek lo, inentir tur chuan ka hrilh mawlh mawlh a, "Chhunah ka lo kal anga, min kalpui hman a ngem?" a tih chuan ka aw ve thuai a, Romawia te ka puih ni tur a ni nain tlai lamah daih a ni bawk a, ka hman thoin ka ring.




Thingpui ka luma, chhangthawp ah Butter ka tah mawlh mawlh laichuan ka bulah a lo ṭhu a, "Mimi, i nu thusawi kha ka lo ngaihtuah a" a tih chuan ka melh ralh a, a sawitur chu ngaihdan ka neih thiam nghal vang nge ka sawipui chak fahran lo chu a ni.




"A...chhungkua hi kawng engkimah dah pawimawh hmasa la ka duh, i nu hlauhthawn ber chu chhungkua kan keh chhiat hi a ni a, an unau hi tun hmain inpawh lo deuhin an awm ve ṭhin tawh a, a hreawm zia a hriat vang a nia khatianga a chet chhan chu, hei tunah pawh kan heti ṭan der a ni a..." a ti sap sap a.




"Chhungkaw boruak chhia leh hlim lo hi inhremna ang mai hi a ni a, eng tiang pawhin sum leh pai neiin khawsa thei mahila chhungkua kan hlim loh chuan awmzia a nei tak tak ngai lo, chhungte duhloh nupui pasal nei te hi an tluang mawh viau bawk a nia" a ti leh charh charh a, ka rilru hneh chu a tum ve hle a, hei hi ka pa zia a ni, englai pawh hian ka nu hi a thlawp reng ṭhin a, chhungkua hi a thupui ber a ni bawk.




"Vawiin kha chu ka thinrim ve em a ni, ka nu hi ka do hrim hrim a ni lo a, ka duh dan te hi min zah sak ve sela ka duh a, ka fanu lo zawk Ununfeli a ṭan tlat kha ka hrethiam lo bawk a" pangngai deuh chuan ka ti ve a, dik min tih na chen chu a nei vein ka ring.




"I nu hi hmangaihna ngah tak a ni tih i hriat kha, Afeli te unau pawh a hrin ang chiahin a ngai a, a dah hran bik lohzia a lantir naah ngai zawk rawh, a fanu i nia i tana ṭha lo tur a duh lo tawp ang, unau inhmangaih leh inngeih taka in awm a duh vang zawk a nih kha" a tih leh chuan ka chhang zui tawh lem lo.




Tui lum a in zawh chuan Sitting room ah a ṭhu phei a, keiin muturin ka chhoh san leh a, ka harh laklawh bawk nen khawvar thleng chuan ka chhing leh ta lo a, ka inngaihtuah nasa bawk a, thutlukna pawh ka siam thei ta in ka hria. Mihring nun hi chu Risk ngai vek a ni, nupui pasal neih thlengin a Risk fuh fuh tih na khawvelah kan awm miau a.




Hma deuhah tho chhuakin ka insiam zung zunga, in ka chhuahsan chuan ka chhungte pawh an la tho lo, dawr ka thleng hma em a; Pa Rela takngial pawh a la thleng lo a, tih tur ṭul hmasa ka ti sawk sawk a, midang an lo thlen chuan eng engemaw ka lo ti hman nual tawh, chaw hma bak ka ṭhut hman dawn loh vangin Umawipuii ka Phone a, ani pawh a lo thleng hma khawp mai.




Chhunah ka pa a lo kal a, a Doctor hmelhriat a lo biak lawk diam tawh vangin a hma lamah a lut thei hlauh a, chuti chung chuan Test neuh neuh tih ngai a lo awm vangin kan rei hrep tho a, kar thar lamah Test dang tih a la ngai dawn cheu bawk.




Dawra kan let leh hnu chuan ka pa chu hmun danga chaw ka eitur thu ka hrilh a, Romawia nu chu a ṭhianṭha tak anih vangin a lo remti khawp mai a, "Ka pain min rawn tlawh rawh se a ti han tih rawh" tiin min chhah thlap bawk a, Romawia Nu Nuzikpuii hi a naupan tet aṭanga a School kalpui ṭhin a ni awm e.




Dar 3 velah Romawian min rawn lama, Khatla bungkawn venga an inluah thar tur chu a lian lo nain an ni nufa ho tan chuan a tawk thawkhat viau mai, "Ka awm tlem dawn si a, hmeichhe pahnih leh naute an ni mai dawn a" ka ṭhianpa chuan a ti ve luam a, bungrua an la ngah vak lo bawk a; inthiar luh chhung pawh a rei lem lo.




A nupui pawh a fel khawp mai, a hmel pawh ṭha ka tih zawng tak a ni, a nu mawlh chuan min lo lawm thiam a, ka pa chanchin te min zawtin min lo be seuh seuh a, nu lianpui leh hmelṭha deuh mai a ni nghe nghe.




Thlairah ka chan mawlh mawlh laichuan kan chhungkaw chanchin te chu min lo zawt a "Tunah engzat nge cheng che u?" a tih chuan Lunglei lama ka nu Thani ten min fin rih thu te ka lo sawi ve luam a, "Lungleia pasal nei ta kha maw, engtik aṭangin nge an lo in tihṭhat leh a?" a lo tih vang chuan phawk lek lekin ka va en a.




A sawi zawm leh dawn emaw tih laiin "Unau engzat nge in nih kha?" a ti leh daih lawi a.




"Pahnih chauh, ka u hmeichhia khan pasal a nei tawh a, fa pawh a nei tawh" ka tih chuan "In hnen aṭangin a mi a neih?" a ti leh khauh a, "Aw ni e" ka tih laia a hmel buai nak chu ka va hmu a, kan zawhna inchhan dan chu kan in man fuh zan loin ka hria.




"Lungleiah a mi pasal a neih a?" a tih leh takah chuan "Ni lo e, hetah..kan veng piah lawkah" ka ti leh mai a, "I pa khan Nurse a ti sia, helam ah a thawk tihna nge?" a tih leh vang chuan min ti dang ti tih der mai.




"A...Umawipuii chu Nurse a ni hleinem, eng hna mah a thawk lo" nui var varin ka ti a, Ununfeli zawk nen a hriat pawlh anih ka ring.




"Nurse kha chu Mamit ah a lawm a thawh, tunah ka pa ten Transfer turin an buaipui mek a" tiin ṭha deuh chuan ka hrilh leh a, a hrethiam ta a niang a lo bu nghat nghat a, "Engtik aṭangin nge in hnenah a awm?" a tih chuan a la rei lo thuin ka chhang mai a, kan inhnuai an luah tur thu te pawh ka hrilh a, hmeichhia hi chu titi a kal laklawh hi chuan kan sawi leh duah ṭhin.




"A naupan deuh laikhan awmpui tlang mai sela ka ti ṭhin a, i nu khan Lungleiah a dah leh ṭhin a, I pa lah in fa angin a pawm thlap tho si a" a tih takah chuan ka bo deuh riau a, "Tu chu maw..?" ka va ti nawn leh nghe nghe.



"I u chu maw le" a tih chuan mak ka ti riau tawh.



"Ka pa in fa angin a pawm thlap maw?" ka ti let ha a.



"Pawm e a, i pa te chu pa ṭha ngang hi a nia, a tirah kha chuan i nu Nuthlawi kha kan hrehpui deuh a, i nu lah khan Lungleiah a pa bulah ka dah mai ang a ti hmiah sia, i pa kha chuan ngai pawh a ti miah lo zawk a" a tih leh chuan ka nghilh dup thei!




"Mahse, Ununfeli chu a naupan laiin kan bulah a awm a sin" ka ti hap a, hriat belh duh ka neih vanga sawi ka ni mah ang.




"I pa khan awmpui a duh reng a lawm, i nu zawk khan a hreh a, a fa neihna pa lah kha a unaunu nen an in nei leh ta daih sia, kha vang pawh kha a ni mai thei" a tih leh lek phei chuan sawi tur reng ka hre tawh lo.




Ka thil hriat chuan min ṭhawng tak zet a ni, min hrilh tu chuan dawt sawi hmel a pu lo a, a hriat sualah ngai ngawt dawn ila kan chhungkaw dinhmun hre tur khawpin inzawmna kan nei lawi si. Chuti anih chuan Ununfeli hi ka nu fa a lo ni reng tihna maw!...engtin nge anih theih?




Nu Thani fa emaw ka tih kha ka nu fa zawk maw lo ni a? Chuvang chu em ni ka nu khan khati khawpa a thlavang a lo hauh sak, engthil nge maw ka hriat tak hi le...min ṭhawng a, ka hamhaihin; ka rilru a na tel bawk. Hei kher hi chu dawt ni se ka van ti tehlul em.







(End of chapter - 11)

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 6th, 2022, 7:45 pm

ZUNZAM - by Ahmangaihi violette Khiangte


CHAPTER - 12




Zanriah eikham chuan ṭhu khawmuang tawh loin haw ka duh thu ka sawi a, leng rih tur chuan min sawm tak nain chhuanlam ka siam a, Bike-a Romawian min thlah a tum chuan ka rilru a buai deuh riau a; tunah chuan Umawipuii hmuh a heng thil hi a lo hre ve tawh em tih zawh ka duh a ni.



"Taxi ka la mai ang, kawi na tur ka nei a" ka tih chuan ka ṭhianpa chu a lawm hmel fahran lo, "Ka hruai thei reng che a lawm, khawia kal nge i ngaih a?" a ti deuh hmuk a, "Ka u te inah tlang lawk ka ngai" ka ti ṭha ve mai a, "Chuang rawh, ka hruai ang che" a ti leh zel a; chutia min thlah tum ve tlat si chu ka tan lo hnial luih zel pawh a mawi awm lo e.




Ka u te in lampan chuan kan inphur chhuak a, kan veng lam aṭang lo a kalna a awm vangin chuti lam kawng zawkah chuan kan tlan a, "Ti nge i Mood a va ṭhatloh hmel ve a?" ka ṭhianpa in a lo tih chuan "Chutianga ka awm pawh ka hre lo" ka tihsan mai a, zep loah chuan ka rilru a buai a, ka thawk ipik lutuk te chuan min hnawh ul bawk a, ka hmelah pawh a lang chhuak viauin ka ring.




"Chawei hma deuh a ṭang khan i dik tawh lo, i bialpa in a rawn ṭhen che a mi?" thutak fe hian a ti leh a, kei za lo zetin ka lo nui ve thung.




"Kan nu khan a ngaina viau che, ka bialnu hlui i ni tih hria sela chuan a ngaina awm tawp si lo che a tiraw" nui kur kur chungin a ti leh a, tunah hi chuan ka rilru a buai rih em a, a fiamthu te pawh ka nuihpui hleithei meuh lo chu a ni.




Ka u te in kawt kan thlen chuan ka chhuk sawk sawk a, ka mangṭha nghal mawlh mawlh chu mak min ti viau ta ve ang, a tlan liam pawh nghak hran loin ka luhsan a, Usangzuala leh a nu Tv en a lo ṭhu chuan; chutia ka va lang hlawl chu phawk deuhin min lo en a.



"Umawipuii a awm nange?" ka va ti he haw a.



"Sawtah, ṭhenawm te inah sawn Secondhand bale an hawng thar a, an rawn ko a" a tih chuan Phone mai ka tum a, ka call chu Room lam aṭangin a rawn ti ral ral a, "Min koh sak teh a" Usangzuala bulah chuan ka ti leh rih a, muangchanga rawn tho ṭuah ṭuahin "Engatan nge i tih a, pawisa lam a mi?" nur nang chunga a tih chuan a nih loh thu leh biak lawk ka ngaih thu ka sawi a, a kal chhuak ve mai bawk.




"Lo ṭhu rawh, eng maw i lo kal chhan ni a?" Usangzuala nuin a lo tih chuan ka nuih let var ringawt a, zan zan a ka kal chuan a ngaih a ti ṭha vak lo tih a hmelah a hriat theih, "A Company thil zawrh chah duh ka nei a" ka tih takah chuan a ngaih a ṭha ta a niang, min zawt zui ta bik lo a.




Rei vak lo a phun bul bul thawm ka hria a, kawngka a Umawipuii te nupa lo lan rual chuan ka ding hluai a, "I thil Stock ho ka lo en" tih leh a lam pan ka rual a, "Stock pawh ka nei vak rih hleinem, thla a tawp em hi..." a tih nuah nuah laiin a ban ah ka pawt dawr dawr a, Usangzuala chuan min rawn zui lo hlauh mai.




Room a kan luh rualin a thil dahna pan a tum chu ka pawt let zawt a, "Aumawi...Ununfeli hi kan u tih i hria em?" ka tih chuan min en ran ringawt a, a lo hre vek tawh zawk a nih ka ring.



"I hre tawh a law.." ka ti leh hluai a.



"Hmmp...kei aipawn kum thum ngawtin a lawm a upat" a ti heu mai.



"Ni lo, chutiang lam a ni lo, ka nu fa a ni tih i hria em?" ka ti leh zat a.



"Awihawm loh emai a, tu nge chutiang sawi a" a ti hluk a, engtin nge maw ka hrilhfiah dawn ni. "Lokal teh" tih pahin khum lamah ka pawt phei te te a, ṭha deuh chuan min zui ve mai bawk a.




"Vawiin ah ka pa ṭhiannu te inah chaw ka ei a, min lo hrilh a lawm, keipawn ka awih thei lo mak ka ti lutuk..." ka ti vang vang a, ka sawi zawng te chuan ka hnuk a ulh deuh hial.



"Ka nu i zawt mai lo a mi?" a hmelah chuan mak a ti ve tho tih ka hria, a ring chiah loh tih pawh a hriat theih. "Zawt lo, ka zawt duh chiah lo, Nu Zikpuiin a sawi takah chuan ka ringhlel, a chhan chu ka nuin a duhsak lutuk" ka ti leh sap sap a.




"A duhsak reng ṭhin a lawm mahse, a fa anih chu ka van awih chiah lo e" a ti nuah nuah a, engkim hrilh vek law law a ngai, anih loh chuan atan han rin mai chu a harsa dawn tih ka hriatpui a, ka hriat leh tawn zawng zawng te kha a rawn hmu ve tlat lo a ni.




"Nu Zikpuii chuan ka nu leh pa te inneih hma hian ka nu hi Nuthlawi fa nei tawh a ni a tia, ka pa nena an inneih dawnah Ununfeli hi a pa bulah a dah a, Ununfeli pa chu Nu Thani pasal kha a nia, kan tet laipawn kan inpawh vak loh kha, Pa Zuala boral hnuah chiah kan intlawhpawh ṭanin ka hria" ka tih chuan a ngaihtuah ve rauh rauh a.




"Feli kha a pa boral hnuah rei lo te kan hnenah a rawn awm ve kha" a tih ve takah chuan ka lo bu nghat nghat a, chu chu ka rilru buaina bulpui ber a la ni lo, Usamua nena kan inkar te, engkim a kal dik lo zo dawn in ka hria a, ka rilru a hah hlui reng tawh.




"Engtin nge ka tih tak ang.." beidawng zet a ka tih chuan "Tih vak a ngai a mi, i ro chan tur a rawn chuh che anih chuan kan ti let rap rap dawn nia, ka nu pawh chu a va khawlo tak" a ti hluk a, lung a ti zing zual deuh deuh mai.




"Usamua nen inneih ka tum a sin.." thawk ka la hak a, "Umawi.." ka ti leh ringawt ṭhin.



"A lo la ngaizawng ve a mi a, Mistiri khan a duh chuang lo a ni lawm ni" tiin min zawt leh a. "Duh lo; mahse, tunah chuan engkim a buai tawh, ka nu bulah a lo zualko zel a, ka nuin a ṭan bawk si a, tunah pawh ka nuin ṭhen turin min ti a, Usamuan palai rawn tirh a tum ve mek bawk si, engtin nge ka tih tak ang" ka zawt em em pawh a ni lo, ka rilru buaina te hi min hriatpui ve sela ka duh vanga sawi ka ni.




"Engtin nge ka nu bulah chuan a sawi a, ka nu pawh chu a va ti awm lo e, leng tar turin a duh che a maw ni le" ner nang chungin a ti a, ka rilru buaina chu a la rawn pawh pha lo kher mai.



"Ununfelin engtin nge a sawi chiah chu ka hre lo; mahse, ka nu chuan min haw khawp mai, Ununfeli ngaihzawng chhuhsak ah min ngai a, tunah chuan min tuithlar pawh pawi a ti tawh lo" ka sawi zawng pawhin ka rilru a na veng veng thei.




"Mai mai a, Zawngnunfeli chuan a lo fuih pawrh a ni chu...a va han zakthei lo" pawr zeta a tih laiin "Vawiinah nufa an lo ni reng tih ka hre leh chauh sia.." ka lo ti zuai raih a.



"Duh leh lo in nufa mai mai rawh se, pasal nei ve daih rawh, dawr saw chhawm la, eizawnna neih tho te chuan eng nge rilru buaina tur awm" a ti leh hmarh hmarh a, a tan hi chuan thil hi a awlsam ṭhin bik a ni.




"Chhungte nena intuithlar chunga pasal neih te chu engtin nge ni ang, a rapthlak emai.." ka ti leh hap a, Umawii ngaihdan erawh a ni ve vak lo. "An tuithlar awzawng lo ang che, Lalnunfeli chuan thiltum ruk a nei a ni lo maw, i ro chan ai neih a tum a ni ngei ngei ang, hetah an Transfer dawn lehnghal.." tih pahin a ṭhu ngil hluai a, "Ngawiteh, ka nu chu ka lo bia ange, Nu Thani fa a ni tawh a, kan unau ro chanai a pe tur a ni lo..." a ti hlak hlak a, hahthlak hian....




"Lalmawipui, enga tinge Ro ringawt chu i lo ngaihtuah a, ka nuin kut min thlak a sin" ka tih takah chuan ṭawng leh a tum chu a tawp chiang hle.



"Kut a thlak che maw, engtikah.." a ti vin hlur a, sawi pawh ka sawi peih lo, ka ṭah a chhuak hlur ringawt.




"Usamua nena inṭhen turin min duh, palai pawh rawn tir buai suh se a ti, ka inruk tir chuan min tuithlar dawn bawk, ka pa lahin ka nu thu awih turin min duh a, a hma kha chuan Ununfeli zawk aṭan tlat kha ka hrethiam lo a, tunah chuan ka hrethiam tawh, a fanu a lo ni reng a, kei chu min ngaihthah hmak anih hi, Ununfeli vangin..." sawi zawm loin ka ngawi vang vang a, chawhmeh a min vawm lai te kha chu sawichhuah pawh ka duh lo, ngaihtuah let ringawt pawhin min ti hrehawm lutuk.



"Ka pa chuan engmah a sawi ngam leh lo a ni maw.." a tih chuan ka chhang lo.



"I bialpa chu ṭhen reng reng suh, Zawngnunfeli chu duh leh pasal zawn sak ve mai sela ti nia, a va duat lo em em che ve, a fa bik a rawn langa min ensan a tum ringawt a nia nge; kei chu ka nasa khawp ang" a ti leh hlak hlak a, ka inhnem na neih ve chhun chu a ni tak sia maw...




"Usamua chu palai lo tir rih lo mai turin ka ti a, chhungkaw chanchin zawng zawng hi chu a hnena sawi chi a ni si lo a.." ka tih laiin "Hrilh vek rawh, inruk mai tur" a ti leh hmiah mai a, chu tak chu a ni ka rilru ti buaitu.




"Ka inruk tir chuan ka nu in min haw ngawt ang" ka tih chuan "Ho lutuk, damchhungin an kiangah i awm dawn hleinem, bakah nu leh pa te nen a in huat rei tak tak theih loh, a tirah an thinrim anga; an lungawi leh thuai mai ang" a lo ti zung zung a, chutiang chuan ngaihtuahna ka nei lo a ni bik lo; mahse, engthil emaw min mawlh tu hi a awm tlat a, beisei angin thil kal lo ta sela, hmeichhia chu mak chhiat tawk thei pawh kan ni...chutiang thleng chuan ka ngaihtuahna a vak kual a, ngaihtuah a thui poh leh rilru hahna a tam ting mai.




"Mate...nang chu i dawih thei lutuka, midang te tih lungawih loh hi hlau suh, mi zawng zawng kan ti lungawi thei lo, i sawi danah ka nu pawhin a fa bik a ṭan zawk a, mahni inhmangaih ṭheuh an nih chu, nangpawh in hmangaih ve la, i nawmsakna tur chu pan hmiah mai rawh" thu tak zeta a rawn tih takah chuan kan in en ran a.




"I bialpa kha neih hreh deuh chhan dang te i nei anih loh chuan" a ti nawn leh a, "Nei lo, Usamua aia mipa ṭha hi chu ka tawng tawh lo ang" ka ti nghal thuai a, chutah kher chuan ka chiang, mak chhiat ka hlau a maw, Usamua kher chuan chutiang ka chungah a tih ka ring lo, tinge chu chu ka ngaihtuah chhuah miah loh le...




Palai chu lo tir pawh nise ka nuin 'Kan rem dawn lo' a ti tawh bawk a, inruk chu kawng awmchhun a ni mai, Umawipuii sawi angin tu te pawn an duh lam kawng an zawh a, ka nu ngei pawhin duh chu a thlang ni ah ka ngai, keipawn chutiang chuan ka ti ve tawh ang.




"Haw pui i ngai em?" a tih chuan ka ngaih loh thuin ka chhang a, "Anih chuan naktukah ka lo kal ang, ka nu chu rawn biak ka duh, Lalnunfeli vanga kut a thlak che kha ka duh miah lo, kan inhnuai pawh luah chi an ni dawn a mi, ka pa pawh hi a...nep.." a ṭawnglai chu lo pawt chatin "Buaina siam loh a ṭha, kan thil hriat te pawh hi ka nu thuruk a ni a, puan chhuahsak a ṭha ber lo ang, kan chhungkaw hming a chhiat phah thei a nia" tiin ka khap a, "A ṭul dan a zir" a ti duh lek chauh.




In ka thlen chuan Sitting room ah an lo ri laih laih a, ka pain "Puakzo kan kanga lo ei ve rawh" tiin min rawn au a, ka chak loh thu hrilhin inchung lam ka pan a, ka Phone ka en chuan Samuela message a lo awm nual a, a Missed call pawh pa thum lai a awm, a rawn rik lai reng reng ka lo hre lo.




Message ah chuan Suzanne-i damdawiina a luh thu min lo hrilh a, ka Call let leh nain a tlang thei lo a, Suzanne-i phone lah chu a ri tak nain an rawn chhang thei chuang lo, zan rei deuh thleng ka nghak a, an reh vung vung thung.




Pathianni tuk a ni a, Urosy hnen aṭangin Call ka dawng a, Ufamkima chanchin leh a hmasawn dan te min rawn hrilh luam a, "In lamah kan awm tawh a, lo leng thuai rawh" a rawn tih chuan ka len vat tur thu ka lo hrilh ve a. Tunlai chu ka lakah a ṭha ṭhin khawp mai, hman deuha kan boruak kha chu a reh fel ta anih ka ring.




Chhun inkhawm banah Usamua nen chuan kan inbe thei ta chauh a, a pa hruaiin Mamit-ah a lo kal chu niin.. "Suzanne-i pawh a zia, zanin an riak anga, naktukah an lo chhuah theih ka ring" a tih chuan ka lo thaw ve huai mai.




Tlaiah Umawipuii a lo kal a, ka nu nen Room ah rei deuh an inbia a, an thawm ka lo ngaih chan reng lai chuan ka nu chu a rawn vin hluk a, "Saitluangpuii fuihpawrh a awm rual i ni lo" a tih ri chu ka hre chiang hle, Umawipuii chuan ro chungchang a sawi loh hram ka beisei.




Hmanhmawh deuhin ka nu te room lam chu ka pan a, kawngka in keu sa chu hawn mai ka tum laiin ka nu ṭawng ri vang chuan ka tawp dat a, a thil sawi chuan min ṭhawng takzet a ni. "Feli hi i thisen zawmpui zawk a ni a, Mimi hi chu kan falak mai a ni" a tih ri chu ka bengah chuan a thangkhawk ta emaw tih mai tur a ni.



Kawngkhar bulah chuan ka ding ngawiran a, ka bing chuk chuk ringawt a; mahse, mak deuhin ka ṭah a chhuak miah lo thung. Ka laka ka nu awmdan mak ka tih kha hrilhfiahna ka dawng ta ni berin ka hria, a chiang lutuk mah mah a ni.




"Anih Mimi chu ka pa fa pawh a nih loh chuan tu fa nge ni a?" Umawipuiin a ti leh a.



"I pa farnu fa maw le, a pa pawh tuman an hre lo, a nu hi raichehin a boral a, kan inneih dawn hian i pa chhungte hian min iai em a, chuvangin i u pawh a pa bulah ka dah phah a, i pian hnu hnute pawh i la nghei hmain Mimi hi kan hnenah an rawn dah leh si a, ka enkawl ṭha ve tawk chuan ka hria, ka fahrin anih lohna hi ka tilang ngai lo mahse, min zah lo lulai em mai a, min do zawnga a khawsa lui anih chuan keichuan ka thlauhthla hmiah mai ang" a ti leh sak sak a.




Eng thil nge maw ka chungah hian thleng ta hi le, nimin mai kha chuan nu leh pa nei lo dinhmun ah hian ka ding ang tih hi ka ngaihtuah thleng phak lo, chumai ni loin ka ni ang tih ngaihna pawh ka hre lo hial zawk a ni, thawk leh khatah ka neih zawng zawng min chhuhsak ni mai hian ka hria, ka nu min hringtu emaw ka tih kha a lo ni lo a, ka pa min hmangaih em em tu ni a ka ngaih pawh ka pa a lo ni chuang lo a maw? Na ka van ti tehlul em...ka hriat miah loin fahrah ka lo ni reng zawk a nih chu..




"Chuvangin i unaunu diktak zawk hi hmusit hlek tawh suh, nang leh Mimi ka tihsak ang hi engmah tihsak ka nei lo, nangni nuamsa taka in awmlaiin i u Feli chuan hrehawm tam tak a tuar ṭhin, nangni chu a tui ṭha ṭha eiin nuamsa takin lehkha te inzir a, Afeli te chu a zirna pawh inhlawhchawp in a khawsa a, i Nu Thani hrisel lo nen nun nuamin a khawsa ngai hleinem, thikna rilru te kha paihbo hmak rawh" ka nu chuan a ti zui mawlh mawlh a,




"I duh duh chu tihsak rawh pawi pawh ka ti lo, i duh leh i ro zawng zawng khawm tir la, ka rawn chuh buai lo khawp ang che u; mahse, Mimi pasal nei tur hi in lo tibuai anih teh chuan Nunfeli hi a chak lo khawp ang, ka u angin ka ngai dawn reng reng lo, ka nau tana a hnawk sak anih ngat chuan a samah ka hnuk hrep a ni mai" Umawiin a ti pang pang a, chutih laiin ka mittui a rawn far fap a, ṭah tawh loh ka tum tehlul nen.




"Mai mai a che, engmah hre ve hawt lo che hian, hetiang dinhmun hi i pianhma khan ka lo tawng tawh, ka pasal nimai tawh tura ka ngaih kha ka unaunu nen an lo inkawp a, tunah i U Afeli chungah chutiang chiah chuan a thleng leh a, ka enliam mai mai lo tawp ang, nang chuan i pasal fanau te chiah kha ngaihtuah la a tawk" ka nu chuan a ti leh kha kha a.




Hetiang taka a nulat lai thil thleng leh tun hun a la hmehbel anih si chuan ka nu hian ka pa hi a hmangaih miah lo a nih ka ring, ka pa'n a hmangaih zia ka ngaihtuah let a ka khawngaih zawk hial a ni, kei aipawhin ka pa chu a khawngaihthlak daih zawk.




Ka mittui hnam chu hruhul sawk sawkin ka Room lam ka pan a, ka thawmhnaw bawm hawngin ka ding vang vang a, tunah chuan ka tih tur chu ka chiang tawh, ṭha taka thlahna chu ka mamawh kherin ka hre tawh bik lo.




USamua ka Phone a "Engtikah nge i lo let dawn?" ka va ti tawl a.




"Thawhṭanni ah a niang" a tih chuan ka ngawi rauh rauh a. "Eng thil nge ni? Insum loin sawi rawh le" a rawn ti leh khauh mai, min hmu miah lo chungin ka awmdan danglam chu a hre chiang viau a ni ngei ang.




"I lo haw hunah chuan min lo hruai dawn nia" ka ti a, ka aw chu a ring lo, ka zuih ral hle bawk.




"A hmanhmawh thlak chuan zaninah pawh ka lo haw thei a nia" ngaihṭha zan lo tih hriat deuh hian a lo ti leh a, "Hmanhmawh thlak loh e, i lo haw hunah a ni mai, lo haw hma phah kher suh" ka ti chungin a ngaih a ṭha vak lo a niang, "Engthil nge thleng a, Feli bawk em ni?" a ti leh chuan "Ni lo, he inah hian ka awm duh tawh lo, i bula awm ka duh tawh" tih zawngin ka chhang a, "Naktukah ka lo haw anga, tlaiah ka rawn hruai dawn che nia" tih chu a hnen aṭanga chhanna ka dawn a ni.




Zanriah kan eilai pawh chuan ka ṭhu ngawi ran a, ka pa takngial pawh ka be sawm peih lo, "Chaw hi a rum mah mah anih hi, Mimite...rum i ti ve em, ka lem ṭha thei miah lo?" a rawn tih chuan chhang loin ka tho zui daih a, ka nu chuan min en zui vung vung mai.




Mut dawnah Umawipuiin min lo biain ka nu thu zawm diak diak lo turin min lo hrilh a, ka nu fanu ka nih loh thu lam erawh engmah a sawi lo a, zep ṭhain a hria a ni mahna. Ka ngaihbel nge ni Umawipuii lakah pawh chuan hla ta riauin ka inhria a, he inchhung lian takah hian leng ve tawh lo tlata inhriatna ka nei bawk.




Thawhṭan ni a ka kalchhuak tur chu ka mamawh zualpui ho Bag ah ka khung mawlh mawlh a, haw leh tawh lo turin kan in chu ka chhuah san zui a. Tuk dangah chuan ka pa hi a tho hma ṭhin viau a mahse, tukin chu a mu rei ve hlauh a, Bag ak a ka chhuak chu min hmu hman lo hlauh mai.




Dawr ka hawng a, Umawii pawh ka hrilh lawk sa vangin a rawn thleng har lo, min fuih ve mawlh mawlh reng a, a hnuk a ulh deuh nge ni a aw te chu a lai ve rut mai a, ka thil ti lai te chu min lo en leh vung vung ṭhin.




Chhunah Ufamkima kan turin ka kal a, an ṭhutthleng seiah lo muin eng thil emaw hi a lo sawi a, a aw chu duh angin a la fiah lo a, ka hre fuh thei meuh lo. A hmel aṭang erawhin ka va kal chu a lawm viau tih ka hre thei thung.




"Mimite, i awm laihian kan insu lawk ange, be bawrh bawrh rawh, ṭawng a hrethei vek tho a nia" Urosy in a lo tih chuan chhuatah ka ṭhu thla nghal thuai a, "I ban hi ka lo hmehsak ang che aw" ka tih leh pawh chuan a bu nghut nghut a, a ban te chu a lo cher ve riakin ka hria.




"Ufamkim, pasal ka nei dawn a sin.." ka tih chuan zawhna nghah hmel deuhin min en a, "Duh deuh mai ka nei a, ka chhungte remti lo chungin zui ka tum a" ka tih chuan min chhang loin a ṭhu ngawi ran a. A hmel ka han en chuan lungngai hmel lek lek hi a pu a, tawi tein ka nuih ringawt mai.




"Ka chhungte chuan ṭhen turin min duh a; mahse, ka ṭhen lo ang, mahni hmasial takin tunah chuan ka zui dawn.." ka ti leh sap sap a, a ban ka hmehna a rawn vawn takah chuan ka hawi chhuak rang viau a ni. A mitmeng damthluam ah chuan min pawmpui zia ka hmu a, duhsakna min hlan mawlh mawlh ni berin ka hria.




"Lo damṭha leh vat la, nangpawh hlim takin awm ang che aw.." nui var var a ka tih chuan a mit a khap sak a, a kut che thei lam chuan a Phone rawn phawrhin a hmet mual mual a, chutah ka lam lo hawi lehin a Phone chu ka beng bulah a rawn dah a, 'Have you ever seen the rain' tih hla hi min ngaihthlak tir a, a lung len thlak reuh khawp mai, nau ka awmsak ṭhin laikhan he hla hi a ngaithla fo ṭhin anih kha.




Urosy lo luh leh hnuah thingpui te kan in ho a, rei tak pawh ka awm lo, ka let leh chuan dar 2 a la ri lo a, Usamua te chu an lo thleng tawhin ka ring. Message ka thawn a tlaiah min lo hruai turin ka ti a, Umawipuii lah chuan ka zungbun kha inah a lo dah daih pek a, ka han inhau leh rih ṭhin.




Ka rin aia hmain Usamua chu a lo kal a, a lo thlen chuan dar 4 a la ri lo, Denim jacket inhmeh ka tih deuh mai rawn hain a sam chu chunglamah a hui chho a, a inbual zo chiah a ni hmel e, Umawiin a lo fiam zuk zuk a, a lai hauh lo lehnghal. "Khawiah nge kan kal dawn?" ti a ka zawh chuan "Mamitah, tumah an awm lo" a ti sam et a, naktuk maiah Ununfeli a lo chhuk ve dawn si a, ka phur fahran lo khawp mai.




"A pawi hleinem, a ṭha zawk daih a lawm" Umawipuii chuan a lo ti then a, Usamua hi ka dinhmun engkim hrilh lawk ṭhain ka hria, umzui ka ni lo maithei, min umzui chu ka ring lo zawk mah, a chhan chu ka nu mizia ka hrechiang a; a tih tawh loh lamah chuan a inlamlet mai mai tawh ngai lo.




Dar 4 bawr ah kan chhuak a, kalkawngah chuan thil awmzia chu ka hrilh mawlh mawlh a, "Man pawh ka nei lo maithei, ka Bag chiah hi ka bungraw neih chhun pawh a ni maithei" ka tih laichuan ka hnuk a ulh ru ṭeuh mai.




"Nangmah i lo kal a lawm hei, thuam chhawm engmah a ngai lo, min ring em em phawt mai rawh" ka kut rawn banin a kawngah min vawn tira, a hnungah chuan ka beithlam bawk.




"Engtin nge kan khawsak ang tih pawh ka suangtuah thiam lo, ka nawr mah mah chein ka hria.." ka ti leh hap a, zep loah chuan ka inthlahrung a ni, heti em em a pachhia hi ka nih ka lo inbeisei bik lo a.



"Nawr lo e, ka duh dan tak vek a ni" tih pahin ka kut chu a rawn hum rauh rauh a, ka kut ṭang a khawih laichuan zungbun ka bun lo tih a hria nge ni a bih vut a, engmah phei chu a sawi lo, kei erawh ka inthlahrung ru hle thung.




Kawng lakah dingin kawngsir phulah chuan kan ṭhu duna, thla lak ka rawt chuan "Ka lo hmeh ang che" a ti zel a, a lang ṭha ve duh vak lo, kan eitur pai ka ei mawlh mawlh laiin anin ka sam min lo ṭawn khawm sak a, chutih laia ka Phone lo rik vang chuan ka thinphu a rang nghal em em ringawt a; mahse, Umawipuii hming ka hmuh chuan ka thaw huai thung.




"Khawi nge in thlen tawh?" a rawn tih chuan Usamua chu ka melh vat a, "Kawng chanve kan thleng tawh" a lo ti var a, "Kawng chanve kan thleng tawh, kan thleng har vak lo ang.." ka sawilai chu min lo pawt chatin "Lo haw leh mai rawh" a rawn ti mauh mai!




A ngaihna hre lo deuh a ka ngawih vung vung laiin "Ka pa a Cancer, a hrawk ah bawk a awm, zai vat a ngai dawn a Stage pawh a sang tawh..Mimi chawkawng cancer chu maw a dam chhuak miah lo ang, kan ṭhenawm pa pawh kha" ṭap pur hian a rawn ti a, chu thu chuan min ṭhawng tih piah lam a ni.




"Mimi...nang i awm loh te chuan engtin nge niang..." a rawn tih leh pawh chuan chhan ngaihna ka hre lo hle a, ka rilru a mang duk ringawt a. 'Ka pa a Cancer ' tih thu chu a ri nawn tluk tluk mai bawk.




Ka nu kutah ka dah thei lo, hmangaih miah lo tu ka nu kutah khan engtin nge ka kalsan theih ang; mahse, tunah kawng chanve lai ka thleng tawh...


(Zawmna)



"Koh kir che chu ka inthlahrung lutuk mahse, zai vat a ngai dawn a, nang i awm loh chuan kei lah hi ka laktlak mang dawn si lo a, in khatah kan cheng ho tawh bawk si lo, lo kir leh phawt mai rawh aw, i awm ngei ngei a ngaih chhan a awm a; hmaichhanah ka hrilh vek ang che" a ti mawlh mawlh a, kan belebut lutuka rilru siam nghal mai har ka la ti a ni.




"Tunah dawrah i la awm a mi, Usamua bulah ka kal tih an hre tawh em, an hriat tawh tho chuan ka lo let tawh lo law law ang" ka tih lai mekin Usamua chuan ka Phone ken lai chu a rawn pawt thla a, kawngthlang lam hawi chuan Phone chu a chhang a, Umawii chu thil awmzia a zawh laichuan eng nge an sawi hriattum in ka din hnaih ve thuai bawk.




"Lo let rih lo phawt rawh se, i pa pawh eng em a ti hman lo turah ngai ila, an mamawh viau leh an rawn lam leh thei a lawm.." Usamu-an thutak zeta a ti chu ka lo beisei loh lam daih a ni.




"Mimi tan zawk a ni, an rawn sezawl chhuah anih tak leh an mamawh lo tihna ah ka ngai anga, an rawn lam anih pawhin thu delhkilh neilo chuan ka let tir dawn lo, i chhungte hnenah i lo hrilh dawn nia" a ti hmiah mai.




A ṭawngdan chuan min ti hamhaih ti ila ka sawi sual lo ang, rilru pawh ka siamfel hma hauhin ani chuan thutlukna a siam nghal a; a thutlukna lo pawm chu ka tih makmawh niin ka hria; mahse, a ṭha ber angem tih erawh ka chiang lo, ka pa mawlh mai kha a ni ka ngaihtuah chu, natna tuara a awm laiin duat taka enkawltu a mamawh dawn a, engmah tih sak thei lo a awm chu ka hlau takzet.




"Ni e, i laizawnnu hian awm ngaihna min ti hre meuh ṭhin lo chu a ni, inneih kan duh anih chuan kan kaltlang pui rih a ngai a, i lo hrethiam rih aniang chu nangpawn" a ti leh charh charh a. Umawii chuan ṭha takin a lo chhawn a ni mahna. Ka ngaihtuahna a vak kual ruai a, heti hian let lo a ka zui anih chuan thil thleng thei tam tak a awm, ka chhungte chuan min lo lam a ngem tih chu ka chiang thei miah lo lehnghal a, tunah zet chuan min lam duh lo a min tuithlar mai ka hlau a ni, ka pa kha heti mai chuan ka kalsan thei lo ang.




"Usamu.." a kawrah chuan ka va pawt a, min melh zawk bak chuan min chhang lem lo. "Chanchin i rawn sawi leh dawn nia, kan lo ngaichang ang che" tiin Phone chu a dah a, ka lam a lo hawi hnu pawh chuan a hmel chu a la thu tak em em reng. Phone chu ka kutah min rawn hmehbel a, muang changa a lamah min pawt hnaiin a rawn kun hniam a, ka mitah tak min en laichuan zawhna mitmengin ka lo en let ve ran bawk.




"Kal tlang ang aw, let leh i duh lo ang chu ti raw?" a aw chu a bulin lo hnial pawh inthlahrun awm tak a ni. Ka chhan hma hauhin ka biang a rawn dawm a, "In inah khan i hlim lo tih ka hria, vawiin a min zui chhan pawh hi a nih ka ring a, tuna kan let leh hian ṭangkaina a nei thui vak dawn lo bawk ..." a ti leh a, ka chhanna beiseia min en takah chuan lu ka lo thing rang hle.




"In chhunga ka hlim loh vangin ka zui miah lo che a nia, pasal a neih ka duh vang zawk chein a nia ka zui che, ka nu khan palai chungchang kha a sawi ping bawk si a.." tiin ka zui chhan dik tak chu ka sawi hmasa a, in chhungkhur boruak ka nin vanga neih tum ka ni tlat lo a lawm, tunah pawh kan inchhung hrehawm ka tih vanga zui ka ni hek lo, inneih pangngaia kan inneih theih ka ring lo a, hei hi ka duhthlan tur awm chhun ni a ka hriat vang zawk a ni.




"A chhan kha chu ka ngaih pawimawh ber a ni lo ania, i hlim lo hmel hmuh reng hi ka duh loh vang zawk a ni" a tih chuan ka bu nghat a, a thilsawi tum chu ka hrethiam viau tho.




"Usamu, kan chhungkaw chanchin hriat loh i nei a.." ka tih chuan min en ran a, engkim ka hrilh anga anin thutlukna chu siam sela ka duh, kei aithlawt chuan a thutlukna chu a pawm tlak zawk ngei ang.




"Ka nu leh pa fa ka ni lo, Ununfeli hi ka nu nulat fa a ni a, kei chu ka pa farnu fa an enkawl mai chauh ka ni.." ti a bul ṭanin thil thlen dan chu ka sawi mawlh mawlh a, ka nuin ka pa a hmangaih lo ni a ka rin thu te thlengin ka hrilh fai kelh mai, ngawirengin ka thusawi chu a lo ngaithla a, zawhna a nei miah lo chu mak ka ti lek lek a ni.




"Umawipuii an kiangah a awm si lo a; ka nu enkawl tur ringawt a ka pa kalsan hi a ṭha ber a ngem ka hre lo, ka tan chuan chhungkua a thisen zawm ka neih chhun a ni a, ka bawihsawm loh a min kalsan anih chuan..." ka ngawi vang vang a, ka mittui a rawn hnam leh ringawt tawh.




"Engtia awm nge i duh a?" a rawn tih chuan "Ka hre lo" tih zawngin ka chhang a, eng thutlukna mah hi keimah a siam ka duh tawh lo, aman kan awmdan tur sawi sela, a tih ang angin kei chu ka awm tawh mai ang, tunah chuan a hnenah ka tlu lut tawh a lawm, ka ti lunghnur tam tawk tawh a, tunah lah rilru buai takin ka siam leh mek chu anih hi.




"Ka duh dan chu i U bulah khan ka sawi tawh a, let tir che ka tum miah lo, ka ngaih hlut ang che a i hlut ve lohna hmuna let tur phei chuan inngaihtuah ngun viau ka ngai ang.." thawk la ham hamin ka sam chhawl leng chu ka bekah a rawn hui chho a.




"Chutiang thil chu tuna lo ngaihtuah vak pawh ṭul ka ti lo..an rawn lam che anih tak leh ka ngaihtuah chauh zawk ang" tih pahin tawi te hian min rawn nuih a, sawi ve tur reng ka hre lo, a chhan chu min râwn lo miau a, a thil tih tur min hrilh chauh zawk a ni, pasalin a nupui hnena a zawm tur thu a hrilh hi kan ang ber.




"Ti rawh le, kan tlai zo mai dawn" tih pahin Bike lamah chuan min kuah phei a, Bike a tih nun lai te chuan ka lo en reng a, lungawi lo hmel pu lo mah se, zuam sual hlauhawm tak hmel a pu thung a. Thil a sawi ve mai mai ngai lo tih ka hriat chian em vangin; tun maia a thil sawi te pawh kha a ti mai maiin ka ring lo bawk.




Chuang tura min rawn mitmei takah chuan ka pan thuai a, pheikhai a zang fahran lo kher mai, rilru a phir ru tlat a, let ka duhna leh kal zel ka duhna chu a inzat hial in ka ring.




"Vawt i ti em?" ti a min zawh chuan "Aih" tih leh a kawnga kuah ka rual a, a hnungah chuan zawi zetin ka bei hle hle bawk a, engkim chu muang ruih a ka hriat laiin ka thinphu chu a rang em em lawi a, ka thaw a ipikin chhungril lama min mawlh tu chuan tawrh har dawn khawp hian min rawn hnawh tawt a, am zetin thawk ka la leh hluai ṭhin.




Kan tlan chhuah leh hnu chuan boruak a vawt lek lek tawh, ngawi rengin ngaihtuahna ka kawm a, kan naupan lai leh Umawii pasal neih hma te mitthla ah a rawn lang thar leh a, Shillong-a ka kal dawn te thlengin a rawn thar uar uar mai. Engkim pangngai lai kha ka ngai a ni, khang hun ang kha tunah hian la ni reng sela vawiin te hi tawng lo zawk ta ila...




Ka pa han awm lo leh ngat phei sela engtin nge kan awm ang le, chhungkua kan keh darh vek dawn tih chu chiang sa a ni, tunah pawh kan heti reng tawh zawk chu a nia, ngaihtuah thui ngam pawh a ni lo. Ka pa chuan ka awm lo tih a hre tawh ngei anga, keimah vangin a hnual ve rawih a ngem? A natna vanga rilru buai taka a awm laiin ka kalsan tih thu hian a ṭhawng viau ngei ang...a hrehawmna ka van belh chhah nasa dawn ve le...




Insum hman loin ka ṭap chhuak hawk a, a rilru natna chu a rawn puakchhuak emaw tih mai turin ka khabe te chu a khur a, tawp ka tum pawhin ka thei lo, "Mimi.." a rawn tih rual chuan a hnungah hmai ka nawr bet sauh sauh a, ṭap chhuak tur pawn tha ka nei lo a niang ka khur ngar ngar ringawt tawh.




Kawngsira Bike a din rual chuan ka inla hrang sawk sawk a, a chhuk lai chuan ka mittui chu ka lo hru hul zung zung bawk a, ka inthunun thei lo lutuk chu ka inhaw kher mai, ka ti hrilhhai hle tih a hmelah chuan a lang reng a, a lakah chuan ka inthlahrung takzet a ni.




"Bang rawh le, i rilru tihnat ka tum miah lo ania" inthiam loh hmel fea tiin ka bianga mittui luang chu a rawn tuai hul a, a kut chu la sawn mai loin ka biang a dawm zui vang vang bawk.




"Ka tihpalh a ni..kan let leh dawn nia" a tih leh rual chuan a kut chu ka vuan ve vat a, "A ngai lo, chuvanga a ni lo a nia, thil ka lo ngaihtuah nasa lutuka..kal leh vat zawk ang" ka ti ve sawk sawk a, ani erawhin inthiam loh hmel zetin min la en ta reng a, kal leh mai tum hmel pawh a pu chuang lo.




"Duatte.." thuk raiha tiin a kutzungpui chuan ka biang a tuai pah rauh rauh a, engthil emaw vei lian tak nei hmel a pu bawk, a rilru ka ti buai leh hle tawh a nih dawn hi.




"Nichina ka thilsawi kha chu theihnghilh daih rawh, i awmna hmun tur chu ka buaina ber a ni lo, i hlim hi a nia ka duh ber zawk chu" a ti leh sup sup a.




"Ka hlim a lawm, i bula ka awm chuan..." ka sawi laichuan a lu a thing mat mat a, "Ka lakah inthlahrung ṭhin suh, ka hrethiam che ka tih tawh kha, ka hrethiam lo che anih pawhin hriatthiam che hi ka tum reng tho ang, ka hnena awm aiin tih duh hmasak i nei a tiraw, i duh chu sawi la i duh angin kan ti dawn nia" a tih leh takah chuan ka hnuk a ulh ṭeuh a, ka mittui a luang zung zung mai.




"Ṭap tawh suh le" mangang zeta a rawn tih rualin a nghawgah ka lo kuah rawk rawk a, nghet lutukin ka pawm bet tlat bawk.




"Rei lo te min lo nghak leh rawh aw, ka pa an zai anga, Chemo te kan khai zawh ah chuan.." ka aw chu a zuih ral vek mai. Hma hun chu kan hre lo; mahse, tunah ka tihsak theih loh hi nakin ah ka la tihsak ngei ang, ka tana a inpekna te pawh ka la chhang let ve ngei bawk ang.




"A zia lo emai, ka thiam loh vek a ni, ka ṭahbelh leh lutuka" la insut faih faih chunga ka tih laichuan ka sam a rawn chul hliau hliau a, "Rilru hahdam deuhin awm la, hlim lo tak i awm hi ka duh lo ka tih kha..." a ti bul bul a, a aw ri a min duatna lang chu ka hai lo, tun dinhmunah hian chu aia mamawh chu ka nei lo bawk.




"I haw anga; kan duh angin thil pawh a kal chhunzawm lo maithei, kei ka awm a; ka hnenah engkim rawn thlen ṭhin ang che, i Mistiri hian a thinlungah i tan In lian tak a sak sak tawh che tih hria la, chu In ah chuan i duh ang thil ṭha zawng zawng kha a dah lawk vek tawh bawk a, i lo tlai deuh a nih pawhin i tan a lo awm reng tawh dawn a, i duh hun hunah i rawn pan thei ang, theihnghilh ngai suh aw, duhthlan tur nei lo a i inhriat chang apiangin he In hi i thlan ṭhin tur ni rawh se" a ti charh charh a.




Engtikah mah ka theihnghilh ngai dawn lo, ka tana duhthlan tur ṭha ber a ni reng fo ang, he mihring hi...ni lo ka tan chuan Angel ang mai a ni, ka kawng zawh thim tak rawn en tur a khawnvar min chhit saktu Angel ka ti lo thei lo, ka tan hian a hlu em a sin...




Rilru a ruahmanna bak hi chu mihring chan a nih loh zia nitin ka hmu mawlh mawlh mai anih hi. Mihring te hi chuan thu kan lo nei lo hle tih te ka hre thar a, fahraha min siam tur pawhin Siamtu khian Minute tam a mamawh lo, fahrah ka nih zia min hriattir tur pawhin ṭawngkam khat kha a tawk em em bawk anih kha.




Engtin nge ka nun hi min hruai A tum ka hre lo a, ngaihdan lah ka nei thiam hek lo, eng ang hun nge ka hma chhuah dawn hre lo mahila beiseina sang tak erawh ka nei tlat thung, engtikah emaw chuan heng lungngaihna; chhum anga zing mup reng te hi a la kiang anga, hun ṭha zawk kan ṭawng leh ngei ang. Ka kiangah Usamua a awm a, ka ngaihhlut engkim chan ta anga ka inhriat laiin ka tana hlu em em Usamua hi pek ka ni, thilpek hlu tak a ni bawk.




Kawng lakah chuan Umawii ka Phone a, dawr a khar zo in lampana a haw lai mek a ni nghe nghe, kan let leh thu ka hrilh chuan a rawn phul hlut a, "A pawi ka ti lo zawk, Mate...Mistiri-a lakah khan ka inthlahrung viau nain ka pa hian a mamawh nasa dawn che a nia, ka nu lah hi e... a ngaihzawng hlui a ngai thar emaw tih mai turin a awm a, ka ring zo lo lutuka maw, ka pa hi ka lainat emai..." a rawn ti vang vang a, a aw aṭang ngawt pawhin a rilru a na ve hle tih a hriat theih.




Umawipuii nen kan ngaihtuahna chu a lo in ang hle a nih hmel e, ka nu hian ka pa hi hmangaih tak tak ni sela U Nunfeli pa chungchang kha kan buaina ah hian a rawn kai lut hauh lo ang.




Umawipuii chu ka chhungte hnenah ka kalna a sawi leh sawi loh ka zawt a, a lo la hrilh lo hlauh mai. "Tlaiah khan ka pa a lo peng a, i chhuah lawk thu ka hrilh ringawt a, midang chuan an la rawn Phone lo, dawr ka khar chauh bawk a" a ti leh a, chhuanlam siam vak a ngai dawn lo chu a tizia ang reng, dawr ka khar har thu hrilh a ni tawh mai.




"I lo leng lut dawn em?" tiin khawchhung kan luh dawn chuan ka zawt a, "Zanin chu ka lo lut lo anga, zan dangah chuan ka rawn lang zut tawh ang" a lo ti mai a, pawi ka tih loh zawng tak a ni. Tu mitmei mah ven ka tum tawh lo, midang chuan an duh duh lo sawi mahsela, ka ngai pawimawh tawh hek lo, ka pa enkawl turin ka kir a, ka tih tur ka tih zawh ah ka chhuahsan leh thuai bawk ang tiin rilru ka siam a, tum angin kan awm thei a nge maw chu...






(END OF CHAPTER - 12)

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)