ZUNZAM S2 by Ahmangaihi violette Khiangte (Completed)

Moderator: writers

Ngaia
Site Admin
Posts: 25813
Joined: April 30th, 2016, 4:07 pm

ZUNZAM S2 by Ahmangaihi violette Khiangte (Completed)

Unread post by Ngaia » March 6th, 2022, 7:42 pm

q1ruwei9.jpg
ZUNZAM S 2 - by Ahmangaihi violette Khiangte

CHAPTER - 1




Hun hi a kal chak a ni, hriatloh karin kum a liam zung zung a; Second khat lek pawh kan ko letin kan chelh ding thei hek lo. Kum a lo tam a; a tu a te pawn puitlin lam kan pan a, chutah chiah chuan kan hun hmanral tak kha a lo hlut zia leh a uiawm zia kan hre ta chauh ṭhin a, tun hun ngei pawh hi kan tawng nawn tawh lo ang.




Nula 28 mi naupang zawk zawk tawh lo tak chu ka ni, ngaihzawng ka nei lo a, biak ve deuh chu pakhat ka nei a, ani nen chuan hmaichhanah vawikhat chiah kan la inhmu bawk. Hmanah chuan duh zawng ka nei ṭhin a, kum a lo tam ve ta deuh aniang duhzawng ka neih awm pawh ka hre tawh lo, ka hmuh a piang ka duh tihna chu a ni hauh lo, chutiang thil ngaihtuah tur chuan ka buai lutuk bakah mipa ho hi ka phek en ni ta berin ka hria.




Favang hun rawn inher chho chuan engemaw tih zawng tak hian lung a ti leng rauh rauh a, Counter bawh chunga tukverh thlanglam ka thlir lai te chuan ka hnim ruih a, ral hla takah chuan Romei a zam paw chiai vei nen ngaihtur nei ve hawt si lo chu ka kur ve ruai tho mai.




"I va muthlu nasa ve" ka dawhkan ri dawp vang chuan ka tho kang hluai a, Usangzuala khi vun vun chu ka hmuh hmasak ber a ni, a hnungah Umawipuiin Mampuia a lo pawm lut ve mek bawk.




"Khawiah nge in kal a?" ka lo ti ve thuai a, an thil khai aṭangin an bazar tih chu ka hmu thiam mai bawk a, min chhan hma bawk chuan an thil khai chu ka lo bih sak a, Diaper leh kamram tih ang reng vel a ni.




"Kan ril a ṭam tawh lutuk, heta ei hram kan duh vangin kan rawn pan vang vang a nia, han ti zung zung teh u, dar thum a hnai leh mai dawn" Umawipuiin a lo ti sawk sawk a, ka ep chiah a dawhkan hmasa ber ah chuan an ṭhu phei thuai a, min rawn pan ve vang vang te hi ka tan chuan insenso na mai mai hi a nia, thil lawmawm em em phei chu a ni lem lo.




An eitur an chah mawlh mawlh laiin Mampuia chu ka lo laksak a, "A la muhil miah lo a nia, lo awi rawh, i puak nuam a tih em kha" a nu chuan a lo ti zat zat a, ka chhang buai peih vel lo.




"Inchung chu naktuk aṭangin an rawn khawih dawn kha aw" Usangzualan a lo tih vang chuan ka pen sawn uk tawh chu ka let leh rih a, "Thiam lo deuh i khawih tir ange aw, ka duh uluk teh mai a nia, dawr chung kan chei ṭhat hunah chuan Tv ah in Advertise te ka tum a" ka ti ve zung zung a, ka dawr chung hi tun hma chuan Stationery dawr a ni ṭhin a, hmanni lawk khan an ti tawp a, keiin dawr zauh nan hman ka lo rilruk ve a, keimah ngeiin ka chei ṭhat dawn vangin luahman pawh min tih hniam sak nghe nghe.




Inhnuai aimah hian a zau a, ka ti ta rau rau anih chuan changkang ve deuh hleka tih ka duh a, hnathawk ka lak belh bawk anga, Umawipuii lahin min nghahpui leh thei tawh dawn bawk nen; December thla hma ngeia luah theih ka in beisei a ni.




"Msa nen chuan in ṭha zel maw?" Usangzuala bawk chuan a ti leh a, Mampuia ka puak ṭhat mawlh mawlh laichuan an nupa in min lo en ve ran a, ka nuih liam mai thung.




"Be ṭha rawh, tlangval fel leh ruihtheihthil pawh ti lo a nih kha, tun laiah ani ang chu pasal tur ṭha ang van tawh em hi, a hlawh hnem bawk si a, i nei anih chuan i vannei viau ang" a ti zui mawlh mawlh a, Msa chu USangzuala ṭhenawm lawk a mi a ni a, Bank Manager a ni. Karhnih liamta mai khan ka u te in a zanriah ka ei ṭumin Usangzuala hian min in hmelhriat tir a, tlangval fel tak leh hawihhawm tak mai hi a ni a, a upa deuh tawh a; a hmel pawh a chhe lem lo.




"Kan inbe ve zeuh zeuh, kan buai dun lutuka kan inkawm vak hman lo" ka ti leh mai a, min hip loh thu hrilh chiam ka tum tawh lo, tu tu te emaw min tihpui nual tawh a, ka kawppui tur ngaihtuahin an nupa hian an hmanhlel a ni ber, lungleng khawhara kur ruai reng tur hian min ngai deuh nge mawni?



"A zeihawi vak nange chu, Tihdanthiama a tluk hmel nange?" Aumawiin a lo tih chuan ka melh rawm ringawt.




"Biak bawrh bawrh ngai chi a nih kha, nangmah te khan va be hmasa la" Usangzualan a ti leh a, "I ti awm ang lo emai a" ka lo ti hlak a, biak chak loh sa nak a laia, lo va biak hmasak te kher chu ka ti hauh lo ang le.




"Engtin nge ni dawn naktuk chu, a rawn lam dawn che nge?" Umawiin a ti leh a, naktukah hian Msa nen a ṭhiante inneihna ah kan kaldawn a, kan vawikhat kalchhuah dunna tur a ni, keichuan hnial ka duh ut ut a, ka u te nupa a lo hrilh hmasa vei nen ka hnial thei ta tlat lo, nizan aṭangin an ni nupa hian kalpui turin min rawn nawr tawh, vawiin a an rawn lan hlawl chhan pawh hi chutiang min sawipui duh vang chu a nih ka ring bawk.




"Tinge in nupa hian inbuai em em a, pasal min neih tira ka dawr hi neih in lo tum ru te a ni lo maw?" ka tih chuan an in en ren rawn a, an nui chhuak huk mai.




"A rilru chhiat thlak mange?" Umawiin a ti leh hlak a, keiin ka lo la melh rum hle thung.




"Eng nge a chhan dang vak tur ka hre lo" ka ti leh ngat a, nuihza insum deuh hian "I nulat reng te chuan miin an sawi sep sep dawn che a sin, Tihdanthiama te nupa inṭhen hun i nghak emaw an ti palh ang che" a lo ti a, Usangzuala a nui tet tet a, kei chu ka nuih a za lo hle.




"Engah nge chutianga an lo ngaih ngawt ang, an ni nupa nen te chuan kan inpawh lutuk alawm" ka ti leh mai a, tunlai tak chu U Famkima ka hmu khat khawp mai, thla khat dawn chu min rawn tlawh tawh lo zawkin ka hria.




"An nu kha a la rawn kal ṭhin a mi? A nupui te kha kawm kher lo la" Aumawiin a tih leh chuan lu ka thing a, U Rosy tak pawh chu ka hmuhloh na a rei leh deuh tawh, tunlai hi an buai deuh nge mawni dawn le?




"Naktuka ka chhuah dawn si chuan zing karah lo kal la, dawr pawh nangman hawng mai la" tiin Umawii chu a sawm a, "Ka lo sawm che anga kan kal rual thei a lawm" a lo ti then mai.




"Insiam ve te ka ngai dawn asin" ka tih leh pawh chuan "Dawrah Makeup vel chu intat mai rawh, ka lo sawm ang che" a ti tak ṭalh a, min puih hi chu tum lo tak hi a ni, naktuk pawh inhlawh a nia a tum leh ni, an nupa in min tihluih vanga kal tum ve chauh ka nih lam a ngaihtuah tawh lo.




"Zingkarah kal kher a ngai em ni, chaw ei khamah kal mai la" Usangzualan a tih chuan "Mampuia thawh hma a kal law law ka duh, nang pawh inchung te chu i rawn tih pui ang chu" Aumawiin a ti leh a, an nupa titi chu ngaithla zui tawh loin ka kalsan a, Mampuia pawh a mut a chhuak tawh viau aniang chu a ngawi hle hle mai.




Counter-ah let lehin pawisa ka va ti fel zung zung a, vawiin chu bang hma deuh mahila a pawi lo ang Customer an tam lo bawk a, hnathawh nan pawh hun remchan lai tak a ni.




Umawipuii te chhung haw hnu ah chuan a reh ta rih hle a mai, tlai dar 4 thleng chu kan inhawng ta tho a, ka Scooty a ka inkalh haw laichuan ka Phone a ri dar dar reng a, ka en mai thei lo. In ka thlen veleh Phone chu ka en a, ka rinlawk ang ngeiin Romawia a ni.




"Biak i va har ṭhin em?" ka nui ringawt a, min lo biak a tum hian a vawikhatna ah ka la thei lo ziah tak tak a, a vui nasa ṭhin a nia.




"Thla tharah kan rawn haw dawn a, kha lamah khan naute neih kan tuma" a tih chuan ka lo phul ve hlut a, "Aizawlah lo chho nghal ula, i nu pawn Aizawla awm a duh a ni lawm ni?" ka ti zung zung a, nikum kum tawp lama a rawn haw chhoh khan nupui a ru haw a, tunah fa an nei dawn reng tawh, ka sawi tawh kha, a tu a te pawh hian hmalam an pan a lawm.




Kan inbiak zawh hnu chuan ka inbual a, ka lusuk ni ni lo mah se; ka su ta hram a, zing karah dawr ka hawn pui dawn tho anih chuan ka suk hman ka ring lo. Msa lah chuan ka u te nupa a hrilh a a duhtawk em em ringawt a, lo tum ve ringawt pawh chu ka rilru a nuam zan lo khawp mai.




Inbual pahin ka ngaihtuah neuh neuh a, min rawn sawm anih hran loh chuan kal lo zawk ila ṭhain ka hre leh hnuhnawh a, a zia lo ka ti deuh tlat.




Zanriah eikhamah Sitting room a ṭhut pahin Umawii ka bia a, "Aman min sawm leh bawk si lo a, ka tum leh lo mai dawn em maw ni?" ka va ti dek dek chu "Kan bulah a sawi vek a lawm le, 'Lo hrilh rawh u aw' a rawn ti thlap a, mi puitling leh Polite ngang a nia, chhungte kaltlangin a rawn sawm zawk che a nih kha" a ti zat zat a, ka peih lo leh phur lo lutuk chu ka ner ka ner ringawt.




"Enteh Mimite, i Usangzuala ka zawt chiang a Msa chu a fel hmel khawp mai, nula ngaizawng tu pawh angah a ti mahse, nupui tur ang chi hmeichhia a duh a, a duhzawng i lo ni hlauh anih kha, nangpawh pasal neih hun i ni ve tawh a, lo inhawng ve deuh rawh aw, a hma a kan tihpui che ang mai mai khan ngai tawh lo la, i hnar zel chuan laklawh a awm ve ania, tum loh deuhin i leng tar ringawt mai ang, chu loah Prof.Tihdanthiama theihnghilh nan pawh pasal nei la ka duh, Kimkimi te ho lah hian i rilru nat vanga ngaihzawng dang nei thei lo angah an ngai che a, ka duh miah lo" a ti deuh duah a, em em ṭhin hian.




"Ufamkima vang a ni teuh lo mai" uar fe a ka tih laichuan "Ka bulah zep a ngai lo, a ho lutuk" alo ti fahran a, a sawi pawh ka sawi peih zozai tawh lo, ka sawi hnem tawh, min awih thei lo reng reng.




Ka mut dawnah Msa chuan min rawn be ve ta hram a, Usangzuala a lo va che leh pek em maw ni? "I u te bulah khan ka lo chah tawp a, keimah ngeiin ka hrilh leh loh che chuan a fel lo deuhin ka hria" a rawn ti dam thluam a, lo chhan dan lah chu ka khawr ru riau mai.




"Dar 10 velah ka rawn lam ang che aw, dawrah em ni min lo ngah ang?" a tih takah chuan ka aw ve ngawt chu a nia, a hmun tur ka zawt leh a; Biakin-ah an innei turah ka lo ngai a, Berawtlang lamah daih a lo ni!




Kan inbiak zawh chuan dar 10 a pel tawh a, hmanhmawh tut tut kan ngaih tak loh vang chuan ka awm a nuam ve huai a, zinga kal chhuah hma erawh a pawi lem lo ang, naktukah dawr chung an siam dawn vangin lo inhmakhua ka ngai reng reng bawk.




Dar 7 veleh Umawipuii a rawn thleng a, hmanhmawh deuhin Bathroom-ah a tlan lut a, a lo chhuak leh chu hmanhmawh kan ngaih loh thu ka lo hrilh a, duh ai ai chuan a muangchang leh lawi a, kan intur reng mai.




"Mimite, i hmaia Cream vel i hnawih bang i kuta la kai hi engtin nge i tih ve ṭhin?" ka inhak mawlh mawlh laia a tih chuan "Ka banah ka hnawih mai" ka ti sam et a, chutih laichuan a mawng a zen ruk ruk a.




"Kei chu ka mawngtamah ka tat" tih leh pah chuan a mawngtam a beng ri thuk thuk a, hahthlak ti fein thawk ka lo la hluai ringawt, ti hian pasal fanau nei chu a ni ve reng tawh sia maw....




Dawr kan thlen chuan hnathawk hoin an lo hawng diam tawh a, an lo che sang sang tawh a, keini pahnih va thleng chuan tih hmasak ber tur pawh kan hre lo, inchung vel chu ka han enfel leh a, Usangzualan hmanrua an neih ang ang a rawn ken dawn vangin engmah ka inchhawp lem lo a, aman a enpui vek dawn vangin ngaihtuah vak an ngai lo turah ka ngai.




Hmun hnawk zual chu ka hawl fai thuak thuak a, ka chhuk san leh thuai a, Umawii Coffee min lo thlit sak chu in pahin Counter-ah chuan ka ṭhu der der a, naute ho inchhaih fiam pawh choka lamah an ri le lu a, tleirawl te te an ni bawk a an thawm a ṭha ham ham ṭhin khawp mai.




Ka tho tur chiah chu Umawipuiin min rawn nghawk sawk a, Coffee ka intihbuak luai a, ka kawrhma chu a huhin a val nasa mai bawk. Choka ah tihfai mai ka tum laiin Msan min lo Phone a, "A hmunah thleng hma ila ka tia, ka rawn chhuak der mai a sin" a rawn tih chuan ka rilru a buai viau tawh, ka kawr lah chu hak chhuah chi pawh a ni lo, tihfai ka tumna lamah ka tih huh vek lo chauh tawh a, a huh hneh tawh ngang mai.




Hmanhmawh deuhin ka tlan chhuak leh a "Ṭhenawm dawrah ka kal dawn a nia, Msa a lo thlen hman chuan min lo nghak rawh se, hei hi lo sawi miah suh" tih leh chhuah ka rual a.




Step a ka pen thlak laichuan mi ṭhenkhat ka tawk a, a hmasa bera lo kal palian zet nen chuan ka insu lo chauh a ni ber, kawng min kian tur chu keiin ka lo kian ve chiah bawk a, vei lama ka tawlh rualin ani a lo tawlh ve a, ding lama ka tawlh leh a lo tawlh ve zel a, hmanhmawh tawh nak a laichuan min ti kalthei lawk lo.




Chutih laichuan a hnunga tlangval ṭhenkhat ho chu an lo nui huk a, chupa pui chuan min chhaih deuh em mawni ka ti rum rum a. Chutah, kawng laitakah chuan dingin "Kal rawh" a ti thawr a, melh buai map loin kei ka pen thla a, kawt ka thlen thlak rualin ṭhenawm te dawr lam ka panding a, anni pawh an lo inhawng ve mek anih hmel e.




Ka kawr hak tawk an lo nei hlauh mai a, a man erawh a to deuh, pawisa induh thawh nat lai laiin kawr man to tak han lei chu ka tha a na deuh a, tihngaihna dang lah chu a awm mang bawk si lo.




Ka kawr bal sa zawk chu ka fun ṭhat tir a, kan dawr lampana ka let leh laichuan kawtah Msa car a lo ding ve chiah a, min rawn hui zauh mai. A inchei Smart hle a, vawiin chu a hmel pawh ziaawm tak a ni, a Suit hak chuan a dul kiar lam lek lek pawh a thup mawi phian a lawm, a paliana a zahawm hle bawk.




"Coffee te i in ve phawt duh em?" ka tih chuan min hnial lo a, inneih chu dar 11 ani nain a hmun a hla lo a, rei tlan a ni lo. Dawr chhunga kan lut chu Umawipuiin inti hawihhawm fahran hian a lo be siam siam a, a ṭhutna tur Chair a lo pe sawk sawk a, a duhna ah hi chuan a zeihawi thei a nia.




Inchung lama thawm a awm vang chuan phawk deuhin Umawii chu ka melh a, "Hnathawk ho an lo thleng tawh a, Sangzuala a lo kalmek" a tih chuan ka bu nghat a, kan naute hnenah chuan dar 11 vela thingpui lo han pe turin ka chah a, a bak chu Umawipuiin ṭul atih anga a lo ngaihtuah turah ka dah thung.




"Kan haw har lo angem?" tiin Msa chu ka zawt a.



"Dar thum velah zanriah kan ei anga, kan haw thei chu a ni mai ang" a lo ti var a, kan tlaichhe dawn lo hlauh e.




Usangzuala a lo thleng thuai a "E, i lo awm tawh a law, vawiin chu inchungah hna ka thawk dawn a, makpa tha kan thawh ve lawk a nge" Kuhva seh suam suam pahin a ti a, thawk thiam ve tak tak ang ziazang chuan, dawhkan ke pawh kilh nghet thei tawp si lo hi, a thu hi chuan thiam a ngah rapthlak.




Kan chhuah chuan dar 10 a pel tawh, Traffic thawl lai a ni hlauh a, kan thleng chho rang khawp mai. "I thawhpui te em ni a?" ka tih chuan "Um, thawhpui anih bakah mipa zawk hi ka Cousin a nia" a ti a.




Motor aṭanga kan chhuk hnuah Present bawm lianpui hi a lo la chhuak a, midang pawh an lo awm nuk tawh a, a nalh hlawmin mihausa tak tak an ni ang tih chu an inchei dan aṭangin an hriat theih, mak ka tih zawk tak chu hnamdang an tam hle a, Saree khaih te pawh ka hmu tel nuk a, hmeichhe lam hi hnamdang an ni em mawni ka rilru neuh neuh a, ka bula mi erawhin sawi a nei lem lo.




Hall a kan luh rual chuan ka hrethiam ta chiah a, hnam dang inneihna chu a lo ni ngei e, Hall chhung pawh an chei nalh nangiang mai, pangpar a vuk chek chuk a, Christian inneih dan dik takin mizo Pastor ngeiin a inneih tir a, Mo neitu lam erawh Mizo an niin ka hria.




"After party hetah a awm nghal dawn a, kan tel ve duh angem" Ms-an a lo tih chuan a ngawi vung vung a, ka chak tehchiam lo tih chu ka hmel aṭangin a hmu a niang chu "Duh leh ka thlah che anga, ka let leh thei tho bawk a" a lo ti leh a, a inthlahrung ve deuh aniang.




"Chutiang chuan ti mai ang aw, dawr lamah ka buai angreng sia, ka u kha a fapa a la te ve bawk si a; a haw hma duh ka ring" ka ti ve luam a, a lo aw ve mai bawk.




Hun serh zawh ah chuan pawnah kan tei hawi a, thla te kan la dun ve ngial a, sawi tur a vang lutuk mawlh mai chuan boruak a ti rit a, haw thuai thuai ka chak tawh, Hall lama kan let leh laichuan vai putar pakhat hian Msa chu a rawn bia a, vai ṭawng a thiam kher mai, English-a an lo biak lahin English awphawi nalh lutukin a chhang thei zel bawk a, ṭawng chithum nal taka a hmang thei bik chu awhawm zawk tak a ni, Bank manger a ni tak a lawm, a hna leh amah pawh chu a inhmeh viau in ka hria.




Zanriah eidawnah chuan Dawhkan changkang deuh ah min ṭhuttir a, ka eitur pawh Msan min lo laksak thlap a, kan dawhkan kilpui mizo nupa chu an ti ti bawrh bawrh a, "Nupa ami innih?" Mipa zawkin a lo tih chuan kan nih loh thuin ka chhang thuai a, Msa erawh a nui suk suk a, ka lai nge ni ka awm a nuam vak lo.




"Dessert ka va la ange?" a tih chuan ka buk khum zauh a, kan dawhkan kilpui nu chuan nuisangin a lo chah ve bawk a, chutih laichuan mo leh moneitu kha Dining hall ah an lo lut a, mi an rawn chibai kual a, an English awphawi nalh lutuk vang chuan ka lo thlir dauh dauh reng.



"Mami, i ṭhianpa kawr kha a tla a nia" kan ṭhutpui nuin a lo tih chuan chhuata Msa Blazer tla chu ka chhar thuai a, ka la kang chiah chu a wallet a rawn tla thla nawlh a, a kilh nghet vak lo aniang a Card leh eng engemaw a zeh hi a lang hiang a, kilh ṭhat mai ka tum chu ka en nawn leh rang khawp mai.



Msa a ID chu dawhkan phenah chuan ka phawrh ru zal zal a, a hming tawp rawn lang khan ka mit a la tlat!




Ka hawi kual leh te te hnuah ID chu ka zuk bih a, karei leh..! MSA hi mizo a lo ni miah lo?



MANGAL SINGH tih a lo inziak kalh mai!




Ka en nawn leh a mahse, a ni tho, ka hmusual miah lo!



Rang lutukin Wallet chu ka khup thawk a, Blazer ipteah chuan ka khung rawk rawk a, chawp leh chilhin ka thaw te chu a sa nghal pup pup a, ka pangngai lo nasa mai. MSA tih hi Mangal singh tihna zawk maw? Ka lo rin dan chuan Malsawma tihna vel anih ka ring a. Mahse, a lo inpersan hle si...




Engtin nge engmah ka hriat loh theih? Ka U te nupa khan an hre lawk tihna nge, ka ngaihtuahna a buai nuai a; ka thaw te chu a hah zo vek tawh, ka awmdan chu hrehawm ngar ngar tak a ni.




Msa lo let leh laichuan dawhkan hnuaiah ke ka per et et a, ka ṭang ṭeuh mai, nuisanga min lo biak laite chuan lo nuih let ve har ka ti...




Dessert min lo pek chu ṭha deuh chuan ka lo ban ve mai a, ei chakna erawh ka nei hauh lo, ka engtih mah a tui thei tawh lo, ka bing deuh chuk chukin ka hria, rang deuh deuhin thawk ka la sek sek a, haw vang vang ka chak....




Haw a Usangzuala ben hrepa, Umawipuii chhuahchhal ka duh, min hrilh ve tal se la nitur a nia, hetiang em em a han inṭhawn te chu, a ni leh lo...min bum ringawt a lawm le.



"Dessert kha i duhzawng a ni nange?" Msan a lo ti chuan ka hau chung hian ka en a, tawi tein ka ṭhen sak ringawt.




Aumawii te nupa thil tih dan hi Ka Pain hria sela chuan a thinrim ve khawp ang le, mite chuan Racist angah min lo ngai pawh a ni maithei a mahse, tupawn duhthlan theihna kan nei a, keipawn ka duhthlan chu ka hnampui mipa ngei neih a ni, mi duhthlan na ka zahsak viau rualin keichuan engtik laimahin hnamdang neih tumna rilru hi a thawi pawhin ka la pu ngailo a, tuna thil thleng hi a zia lo ka ti khawp mai, keima felloh tak pawh a ni, Msa hi ka belchiang hmasa tlat lo a.




"I nuamsam vak lo em ni a?" a tih leh chuan ka bu sawk sawk a, "Aw, ka nuam vak lo a, min thlah tawh mai dawn em maw ni le, a pawi em?" ka ti tawl a, haw thuai thuai a boruak dang hip vat ka ngai.




"Pawi nang mahse, Cake an zai ṭep a sin, i ei ve duh.." a sawi zawh hma chuan lu ka lo thing leh a, "Anih chuan kal i la" a ti ta nge nge a, pawn a kan chhuah hnuah "I pum a nuam lo nge?" tiin min zawt leh a, ka riat nawi hle ringawt tawh.




Haw kawngah pawh chuan kan inbe tlem khawp mai, min lo en leh zauh ṭhin a, tawite hian kan innuih a, eng nge ka an min zawt a; ka ṭhat thu ka hrilh leh mai bawk a, sawi tur a vang kher mai. A hming dik tak ka hria tih hre ta sela amah pui hian engtin tak ngai ve ang maw, ngaihtuah tur a tam lutuka min ti hah zo.




Dawr kan thlen chuan "Ka lo lut kawi tawh lo mai ang aw, ka thlen hunah ka lo bia ang che" inthlahrung deuh hian a ti a, ṭha deuh chuan kan invai liam a, a tlan liam ta chu thawk ka la vang vang a, ka dawr kawngka lam chu rum theihtawpin ka han melh hmasa thawr a, Lalmawipuii te nupa chu ka va han.....ka kut ka hum ruh nghek a, tih vak ngaihna phei chu a hria a zeng pawh a ni lo.




Hmanhmawh deuhin dawrah ka pen lut hlawk hlawk a, Counter chu a lo ruak huai a, kil khatah Customer pahnih an lo ṭhu a, ka va lut thawr chu min melh hrek hrek a, tum ang reng renga ka thinrim thei lo chu ka hnual rawih mai.




"Pa Rel, khawiah nge Lalmawipuii te nupa hi?" Choka ah ka ti lut lawng lawng a, ka va lut thut chu thaw huai hmel an lo pu hlawm, dawhkan ah chuan eitur siamin an lo buai hle a, Customer pahnih chiah kan nei bawk si a; a ngaihna ka hre hauh lo.




"Order a awm a mi?" ka ti he haw a.



"I u te nupa kha, USangzuala nu a tlusuala an haw daih a" tiin kan nula pakhat chuan min lo hrilh a, an thil tih lai an la tih zawm mawlh mawlh reng.




"Inchunga hnathawk ho khi chhun eitur kan lo pek theihnghilh a, Mistiri kha a rawn thinrim lutuk, tun lawkah khan a lokal a, a chho chiah" a tih chuan thawk ka la hluai a, kal na lam apiangah chuan buaina a lo awm zel a, vawiin chu ka tan ni ṭha lo uchuak tak anih dawn hi.




"Engtin nge a rawn sawi a?" tih leh pahin kawngkharah ka va dak a, inchunglam kailawn chu ka thlir chho a, an thawm ka hre miah lo, an lo ṭamchhawl vek em mawni chu le? A va zia lo mai mai tak e aw...




"A rawn vin hluk hluk mai, nangmah kha han kal la, thupha te han chawi rawh" Pa Rela bawk chuan a lo ti leh a, ka ner nang ringawt, thupha chawi hi ka thiam lo a sin le..



"Engtin nge ka han tih ang? Ka ngam bik hleinem" ka ti nang nang a, "Aw, kan tlai chhan te chhuanlam han siam ve la, i awm loh thu te, hnathawk hoin nachang an lo hre lo a, ka hau hrep i ti dawn nia" Pa Rela chuan a ti a, ka va huphurh tak mahse, thupha chawi chu ka tih ngei ngei a ngai, tunah dar 3 a pel tawh a, thingpui no khat chauh an la in ania, zia lo tak a ni.




ZAWMNA



"Chow ringawt chu tih sak suh u, Artui leh chhang te kha ti tel ula" ka ti leh rih a, an eiduh zawng han zawh hmasak chi em mawni zawk le? Thupha chawi na ni pah fawmin an eiduh zawng tak chah tir zawk ila a a ṭhat ka ring.



"Lo nghak lawk rawh aw, an duhzawng kan Order tir dawn nia" tih leh choka aṭanga chhuah ka rual a, Counter a Menu chu lain phur fahran lo chuan inchung lam chu ka pan a, ka zam ru deuhin ka hria, ka inthlahrun vang te pawh a ni ta ve ang.



Ka han lang hlawl chu a tu mah chuan min lo uksak lem lo, an hna an la laklawh viau anih ka ring, "In thil eiduh lo thlang ula" ka ti chiah chu min rawn en ta ṭhap a, ka tim leh angreng. Rawlthar la upa lo te te an ni hlawm a, ka chhang pawh an rual pha lo deuhin ka ring.




Pakhat hnenah chuan Menu chu ka pe a, a ṭhiante pe chhawngin a thil tih lai a tih zawm leh mai a, midang pawh chuan chah mai tur an hre lo nge ni an inhlan kual zel a, "In duh duh chah rawh u" ka tih pawh chuan an thlang fel mai thei lo.



"USamu-a zawt rawh" an zinga pakhatin a lo tih takah chuan Menu kengtu chuan leihlawn sang deuha ding mek chu a han au a. "USamu, enge kan ei dawn?" a ti lauh a, hnuailama awm ho chuan kan lo ngaichang ṭhap a ni ber.



"An la rawn dah na cheu nge" a han biak pa chuan a rawn ti hluk a, khawl a ti rik reng vangin a hnu lama a thil sawi chu ka hre pha chiah tawh lo, rei vak lo ah rawlthar kha a lo let a, lo biak ve ka tum leh laichuan leihlawn aṭangin mi pakhat hi a rawn chhuk ve mek a, Mistiri ber chu anih ka ring.




"Ruata, ka ipteah khan Wallet a awm ang, chhang leh theitui in duhzawng va lei mai rawh u" tih pahin bang thlanglam kila Bag hlui lam tawh inkhai chu a kawk a, min hnung chhawn zawnga a din vangin a hmel ka la hmu thei lo a, ani pawn ka awm tih a hre lo anih hmel.



"Hei Menu min lo pe a" nichin lawka leihlawna han lawn ve rawlthar khan a lo tih laichuan ka lo ding mar ve viau tawh.



"An siamchhungin kan bang hman tho ang..dawr neitu te hi mizo an ni lo anih dawn hi an...." a rawn inher tak avangin a ṭawng tawp chawt a, kei ka lo ṭhen ṭha ringawt.




"Hmanmawian a bialnu a lo hruai leh tawh elaw..." a tih chuan an nui huk a, pakhat chuan "Ka bialnu a ni bawk lo" a lo ti vin ve hluk a, an nuihpui dar dar hlawm. Mistiri chu ka lo en reng a, puan chhia a a kut hrukfai mawlh mawlh pahin ka lam a lo hawi a, palian deuh leh dar hlai ṭha deuh mai a ni, a sam chu a thurin a paw hle a, Mask dum a vuah vangin a mitmeng dam thlup leh mithmul buk lam lek lek chu a langsar hle a, a mitsit chuar ralh aṭang chuan a nui tih ka hre bawk.



"Ei tur i rawn dah a mi?" ka lam hawi a a rawn tih chuan ka chang mai dawn a ka dang a awk ta tlat, "Aw, kha..khata..mi ka thlang rawh" ka ti bah nawk nawk a, engtin mah min chhang zui lem lo. Pakhat chuan Menu chu a lo pe vat a, mit ti zim suna bihin a keu kual thuak thuak a, chutah a nau te ho chu "In duh duh chah rawh u" tih leh Menu pek chu a rual a.



"Kei chu Rice Artui chhipchhuan ka lo duh ang, thingpui han ti tel bawk rawh" a rawn ti chuan ka lo bu nghat nghat a, ka rin aitaka an lo tawhkhirh lo chu ka lawm ru angreng, min lo ankhum hrep ka ring hman zawk a.




"Keipawh ka duh ve mai" an lo ti sap sap a, "Egg top rice vek maw?" ka ti leh kher a, chutih laimekin Mistiri chu ka lampana lo kalin Menu chu ka hmai zawnah a rawn lek kang vah a, min hau ngei dawn tih ka chiang viau tawh.




"I hmanhmawh thei angem, nau te ho hi an ṭam tawh viau a nia, hnathawk in chhawr reng rengin ngaihven ve ṭhin tur" chang khel khawl a a tih chuan nuam lo duh tak a ni, "A zia lo khawp mai vawiin chu ka chhuak daih a, tui deuhin kan lo siam dawn nia" ti a ka nuihsang chu min nuih let ve lo chiang khawp mai, a inher vut a, ka chhuk hnu chuan an nui dar dar thawm chu ka hre zui a, kei ka lo thaw huai huai thung.



An Chow siam sa chu Rice in ka thlak tir leh a, thingpui pawh kan dawr Special tea ka siamtir bawk, kan nula ten an han pe zo rawn let leh chu an in hrilh ru sar sar a, an nui tet tet hlawm a, a ngaihna ka hre lo khawp mai.



Ka chhuah dawn laichuan "Keiman ka seng dawn" tiin kal an inchuh vel niin ka hria, tleirawl lerh hre rual an ni bawk a, Pa Rela nen kan lo nuih liam mai mai thung.



Counter-a ka ṭhutfel leh hnu lawkah Msa phone call a lo lut ve chiah a, chet mai nachang hre loin Phone chu ka en reng ringawt, a ri zo ṭhak a, a ri a tawp rual chuan ka lo thaw hluai pek a, engtia han tih zui zel tur nge maw ni?



Ka ngaihtuah neuh neuh laiin kan nula pakhatin min lo au a "Umimi, Usangzuala te kha an lo let leh dawn em, Mistiri khian Usangzuala kha a awm chuan lo chho rawh se a tia" a rawn ti lang lang a, thil pawimawh a awm anih ringin inchung lam chu ka pan a, kan nula te thleng seng ka kalhpelh rual chuan "Misiri kha a hmelṭha ka ti" an tih sar sar ri chu ka hre leh hram pek a.




Ka han chhoh leh laichuan zial zuk chawlh an lo nei aniang an pak khu luai luai hlawm a, an ṭawng duh barh barh hlawm viau bawk. "Mistiri, Mamawh i nei em ni?" ka tih chuan min hnungchhawn zawnga ṭhu chu a rawn inher vut a, a zial zuk lai nung hleilo chu pet khawhvahin zawhna mitmengin min en bawk.




"Usangzuala te chu an rawn let leh mai lo ang, harsatna inneih chuan ka hnenah lo sawi zel rawh u, dawr neitu ber hi ka nia" ka ti leh a, sir zawng min chhawn chuan a ner suk ringawt. An Ceiling khawih laichu ka han thlek ṭhin a, a englai nge an khawih ber pawh ka la hrethiam chiah lo, a ṭhenlai chu a awng hiau huau a, a ṭhiat vek chuang si lo chu mak ka ti deuh.




"Hmanraw hlui hi hmang leh tawh loin a bul aṭangin ti law law ula, Electric wire te pawh hi thlak law law ang, a hlui in hman tam lutuk chuan rei lo teah Repair leh a ngai dawn a nia, inchung phui lo aṭang hian tui a far thei bawk" ka bulah rawn dingin Ceiling lam chu a hawi vung vung a, a kawhna zawn ka enchian chuan Ceiling rang riai chu ka han hmu ve mai bawk a, tui putna hnuhma a nih hmel.




"Bang chhak lamah khian khawilai emaw aṭangin tui a rawn put thei bawk a" Storage room lam a kawh vang chuan ka pan phei ruak a, kawngkhar ka hawng chiah chu tui luankawr rim a nam hukin ka hria, chhuat chu a hnawng hle a, bang rawng a ṭang pawhin tui a put tih hai theih rual a ni lo.



"Cement bang a ni sia engtin nge tui a lo put theih zawk le?" ka ti hluai a.



"Tunlai chu ruah a sur nasa a, bangin a dawl zawh aia tam a sur anih dawn kha" a lo ti niah niah a, min rawn chhan dan chuan min ti bang bo leh zual. Bangin a dawl zawh aia tam ruah a sur maw ni a? Ka nui huk lo chauh a ni, a sawi thutak phian bawk si, kawngkhar bula ding chunga a lo dak chu ka va en chuan a hmel ka hmuh vawikhatna a ni, ka rin loh lam daih hmel a pu.




"Bang hnung lamah hian Building neitute hi an cheng a, ruahtui luh theih ngaihna a awm dawn a mi?" ka ti leh a, min chhang mai lo chuan a inngaihtuah vung vung a, chutah lo lut vein chhaklam bang hrula kawr ni chiah silo tui luankawng tereuh te chu a han bih chiang a, keipawn ka lo thlek uluk viau mai.




Kawr te reuhte ah chuan tui tlem a tling a, a kawr chu kutphah bawk vel chauh a ni nghe nghe a, Storage room tluan chuan chhaklam hrulah a awm phei zui a, leirawhchana an daidan thlap vangin haikhuar chawp te pawh a ang lek lek zawk.




Bangkil lamah chuan thui deuhin a kaw phei rul a, Phone light a ka ve ên chuan tui lo hnam na laitur awm ang chu a hmuh theih a, hlam chen vela sei ah a ni a; mihring luh lenna chi a ni lo, Building inzawmna lai anih hmel bawk. A rimchhe bawk si a, Restaurant kan siam dawn anih chuan a tih chi loh khawp ang le.




Mistiri chuan tui lo luan chhuahna lam chu a bih uluk viau mai, "A hnungah hian Tanky a awm em maw ni le?" a tih chuan chhanna ka nei lo, "Bathroom a awm maithei a ni" a ti leh a, a sawi takah chuan ka ten deuh riau tawh.




"Bathroom thli anih chuan a tih chi loh viau ang, an Toilet pipe te hi a lo pawp a ni lo maw?" ka ti leh hap a, ka ngaih a ṭha vak tawh lo, hetianga tui a put reng anih chuan kawrte aṭang hian a rawn luang liam ngei ngei dawn tih chu a chiang reng, dawr luah hmasa tu te khan engtin nge an lo tih ṭhin ang aw?



"A siam theih a ngem, bang kha kan char ṭha mai dawn nge?" Ka tih chuan a ngawi vung vung ringawt. Min chhan mai loh vang chuan ka han thlek chho dak dak a, ka lam hawia a rawn inher thut vang chuan ka ding ngil rang kher mai.



"Tui put na lai tak saw a piah lutuka, char tur chuan chhaklam bang hi vuak ṭhiah vek a ngai ang, a hna khawih chhung a rei dawn a, Ceiling aia khawih hmasak induh chuan ka khawih thei tho" sawi mai tur pawh hre loin ka ka hau ringawt, Ceiling siam na ringawt ah pawh ka inseng hnem tawh viau dawn a, bang ka siam tir leh chuan bul ṭan hma hauhin ka tlachhe der mai dawn a sin.




"He laia a lo put chhuahna lai hi ping daih mai ila" ka tih chuan a nui suk mai. Bangkil tui lo luan luhna laiber chu kan hnawh chuan kan dawr chungah a lo lut thei lo nimai turah ka ngai.



"Tui hian putna tur a mamawh anih hi" a ti leh bauh a, ka melh rulh ringawt.



"Hetah hian Pipe kan zawm zawk mai dawn nia, inhnuai lam tuichhe pipe nen kan thlunzawm anga" a tih leh chuan ka hrethiam ve vak tawh lo. "Tui a rawn put theih loh na tur anih chuan a rem dan ang angin ti mai rawh. Mahse, insenso ngai tam lo thei ang ber turin min ngaihtuah sak la aw, a hma thei ang bera luah ve kan duh bawk sia" ka ti sap sap, tui luankawr a bih leh tak daih vangin ka thu sawi chu a ngaithla chiah em pawh ka hre lo.




Ka va bih ve dawn laitak chuan a rawn ding thut a, chhuat lo nal bawk si nen ka rap tleu zui chuan ka va bawh ruak a ni ber, a lo inring bik vak lo chu kawrte ah chuan a ṭhu thla hnawk a, kei khup sawh dawtin a hma chhuatah ka ṭhu a, Mistiri chuan ka darah min lo vuan ve reng bawk, a dulah lu ka nghat hlauh a; nilo se chu an kawr te daidanna leirawhchanah chuan ka lu ka sawh ngei ngei ang, mawng leng khawpa kawr lian chu nise ani pawh a ṭhu per chhuai in ka ring.



"I in sawh na em?" a tih laimek chuan a rawn eng thut a, kawngkhar rawn hawngin tlangval pahnih an lo dak a, keini lo awmdan an rawn hmuh chuan an khar leh rang kher mai?



Kan awmdan ka han ngaihtuah chiang chu rang lutukin ka tawlhsawn rawk rawk a, ka khup lah chu a hit mup mup a, ka thochhuak mai thei lo. Kawngkhar kha a inhawng sa reng emaw ka tih laiin a mahin a lo inkhar daih anih hmel. An rawn hawn laia kan lo awmdan mawlh mai kha, a va zia lo tak... Mistiri bawp pahnih inkarah sawp nuai a ṭhuin a dulah ka lu a nghat a nia, min hmutu te lah khan an ngai kawi tih hriat reng.




"Chhuat ah hian a liam fo anih dawn hi a huh emai" a rawn tih pawh chuan ka en ṭha vak ngam tawh lo. "Umhmm...ka kekawr a huh hram ka ti" a tih leh takah chuan ka ve en ta chauh a, a kekawr vut buak rawng chu a mawng a val phei kalh a, kawrte tui rimchhe zet chu a lo zuk ṭhut hram anih hmel a, inthlahrun tawh sa nak a lai chuan.




"Chhuat a lo nal lutuka, a van zia lo tak" ka tih laichuan min chhang tawh loin a chhuak daih a, ka ding chhuak tur chu ka khup a na ngut ngut mai, ka va chhuah ve laichuan puanchhia in a kekawr mawng a lo hru mawlh mawlh a, tlangval ho lah chuan nui pat pat chung hian min melh hlawm a, min en dan chu ka duh hauh lo, nichin a thil thleng kha an lo ngaikawi chiang lutuk.




"Usangzuala ka lo hrilh anga, tihdan tur chu insawi dun mai dawn nia" tih leh Step lam pan ka rual a, ka liam thla awrh tih a "Chhuatah an lo bei nasa mai maw le, Usamua kekawr a lo phelh dawn chiah a" pakhat chuan a ti lang lang a, ka ding chiang hle.




(End of Chapter - 1)




(Hello, Smile Squad....min lo ngai ve tet tet hlawm em....Thawnthu kan ṭan leh ta, kan va inhau leh ngun dawn tak, Ads cli
ck, post like leh comment kha in chan ve anih kha aw, tun ṭum kan thawnthu hi kan regu thei a ngem ka la hre lo a, tunlai chu ka buai deuh hlek a, nangmah ni lam kha han regu em em phawt ula, a tih dan dan a awm leh mai turah ngai ang aw, thawnthu chhiar nuam vek u le)


Show post links
Top



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 6th, 2022, 7:43 pm

ZUNZAM - by Ahmangaihi violette Khiangte

CHAPTER - 2

IMG_20211126_005720.jpg




Inhumruh ṭeuh chuan ka han hawi let a, thinrim in zak viau mahila han tih vak ngaihna lah chu ka hre mang si lo, an hmuh phak loh lamah ka lo inpet ruh fan fan ringawt. Chutih laichuan Mistiri ṭawng ri chu ka hre zui a "Awm ang lo lulai emai, hna ṭan leh tawh ru le, kan bang har tawh lo ang" dam thluam hian a ti a, midang ho chuan an lo fiam zui tak nain a uksak vak lo ni ngei tur a ni; a chhan letna ka hre zui tawh lem lo.




Counter-a ka ṭhut fel hnu rei lo teah Usangzuala a lo lut a, ka lo ding hluai chu phawk lek leka min lo enin "I va rawn let hma ve" a lo ti he haw a, ka melh no lem lo khawp mai.




"Hnathawk ho eitur in lo pe lo a" ka ti hmasa te te a, "Ehe! Chutia law" tih pahin a lei a chhuah zauh ringawt a, a inthiam lo tih hre tho mahila thinrimna dang ka la nei tlat. Min kal pelh nghal mai a tum chu "Usangzual" ka tih vang chuan a ding leh rih a, zawhna mitmenga min en lai chuan engthil emaw a vawm zawt ka chak a nia.




"Msa kha i hrechiang miah lo nge ni a, i hre sa vek zawk?" ka ti leh tawl ringawt.



"Eng nge i sawi awmzia?" Counter bawh chuan a rawn dinga, inhmatawnin kan inmelh ran tawh, a awmdan ah chuan engmah hre lo te pawh a ang lek lek a, hre chiang mang hlei lo a min sawi pui ringawt pawh chu a huatawm tawh hrim hrim.



"Hnamdang a nih kha, mizo a ni reng reng lo" ka aw chu a ring lem lo khawp mai, min ti hamhaih ve bawk em a ni.



"Hnamdang a? Tehdaih a!" Kei ai mah chuan mak a tih hmel zawkin ka hria, a, hahthlak hian...



"Hriatchian mang loh te in sawipui ringawt zel tur a ni hleinem?" ka ti leh hlak a, ka thinrim thar leh ut ut tawh.




"Eng hnam nge a nih a?" a tih chuan ka chek tlak a, "Chutiang ka hre si se lo, Mangal Singh-a a ni tih ka hria a a ni mai" ka ti leh hap a, Usangzuala chu a ner nang ringawt. "Msa tih chu Mangal singh tihna maw lo ni a, i hriat sual miah lo maw?" a rawn ti leh haw a, a chhan pawh ka chhang buai peih tawh lo.




"Mizo a van ang em em ve, Malsawmsanga, Malsawmzuala tih vel niturah ka lo ngai a, a va zia lo ve" a ti nuah nuah a, a nui tel sung bawk. Engmah pawh ka sawi leh hma chuan "Thlangkawr vai tawnah i liam ṭep anih chu a" nui pat pat chung hian a ti leh a, ham ham hian...




"In nupa hian in pawlawh emai a, tumah min sawipui rawn tum tawh suh u, ka peih tawh lo" ka tih hlak hnuah choka ah ka luhsan a, ka va chhuah leh chuan a lo awm tawh lo, inchung lamah a ṭawng lang lang ri ka hria a, Customer an awm tawh loh vangin haw tumin ka insiam a, Pa Rela hnenah chahbi hnutchhiahin ka hawsan zui bawk.




Ka Phone ka en chuan Msa Missed call dang a lo awm leh tawh a, ka thaw a ti ipik zual deuh deuh in ka hria, eng nge a bulah chuan va sawi tur pawh ka hre lo, a zahthlak ka tih rualin ka thinrim tho bawk si, Msa lakah erawh ka inthiam lo deuh a, sawifiah dan tur ka ngaihtuah ruai ringawt a, a rilru ti hrehawm lo zawnga sawi thiam ka duh takzet. Rilru nuam lo deuhin ka awm reng a, a Call lah chu ka chhang duh lo ringawt a, nuam lo ka ti telh telh mai.




Zanriah ei dawn chuan sitting room ah ka ṭhu a, ka lo inngaihtuah nasa deuh a niang chu ka epa ṭhu ka pa chuan min lo en vung vung hi a lo nia, a hmel ka hmuh rual chuan ka harh deuh kawk nghe nghe. "Chaw i ei leh dawn em?" ti a ka nuin min lo zawh chuan ka puar hauh lo nain chaw ka chak miah lo, ka engtih tha mah a tho lo a ni ber e.



"Dawr chung chu an khawih ta em?" Ka pa chuan a lo ti ve khauh a.



"Vawiinah an khawih ṭan a, bang leh inchung aṭangin tui a put a, a hautak hmel lutuk, duh angin ka ti thei lo ang tih ka hlau tak tak a ni" ka ti sap sap a, Usangzuala kutah engkim ka dah vang te chuan ka rilru a hah zual.




"Engtin nge tui a put theih a?" ka nu chuan a lo ti ve leh a, "Ka hrechiang bik lo, inchung lam chu a harsa lo anga, Storage room zawk ami kha khawih tur a tam hmel a, Building nei tu te Bathroom Leak nge ni?" ka sawi laichuan ka tuiloh zia ka hmelah a lang thei ang.




"Bathroom Leak a, a va tenawm duh awm ve, dawr chhungah a rawn luang lut tihna a mi, eitur zawrhna tur a ni sia" ka nu chuan a lo ti ve zung zung a, a ten chhe bawk a, a hmel a aṭang chuan kei aimahin a tuiloh hmel zawk.




"Ka hre chiah bik lo, an tui zem pawh a ni thei tho" ka ti niah niah a, keimah tak chuan Bathroom Leak anih ka ring zawk mah, Mistiri pawh khan a ring ve thoin ka hria.




"Sangzualan tihdan tur a hre mai lawm ni?" ka pain a tih chuan ka chhang lem lo, vawiin lam thil vang nge an nupa chungah hian ka innghat ngam meuh tawh lo, hlawhfa te phei chu vil ve ran an ngai a, Usangzuala chu a buai bawk si; a kuta dah chu a fel lo deuhin ka hria.




Ka chhungte chawei na bulah chuan ka va ṭhu phei ve ta tho a, chawhmeh tem zauh zauh pawh chuan vawiin lam thil chu ka sawi mawlh mawlh a, Msa chungchang erawh ka sawi tel lo thung, hnathawk ho eitur kan pek tlai em vanga ka zah thu chu hahipin ka sawi a, an ni pawn pawi an tih hmel khawp mai.




"Mawipuii a hman tho chuan dawr nghah tir la, nangin inchungah hnathawk vil ta mai la, vai Mistiri phei chu thut chilh chat tur, phakar deuh chhawr fuh te an awm ve ṭhin a nia" ka pain a tih laiin "Mizo Mistiri a nia kan chhawr chu, an hna chu a ṭhat hmel lutuk" ka lo ti ve thuai a, Mistiri lam hna hre ve vak lo mahila kan Mistiri chhawr kha chu mi fel tak niin ka hria, a hmel aṭang rengin ka mi rin zawng tak a ni ve tlat.




"Ṭhutchilh theih chuan ṭhutchilh a ṭha hrim hrim, eng ilo mamawh te pawh an nei thei a, chu loah an khawih laiin i duhdan te pawh i sawi ve zel anga, an kuta i dah mawl tawp chuan i duh dan lo a an lo siam palhin hna a rei duh, i tan leh i hnathawk te tan pawh a ṭha zawk" ka pain a tih chuan ka lo bu ve nghat nghat a, Msa chungchang kha hria se engtin tak sawizui ve ang maw?




Zan ka mu tur chu ka beisei loh deuh hnen aṭangin Call ka dawng ve hlawl mai, "Kan zin kan rawn haw tawh a, hei i Urosy-in Kurta a hawn che a, naktukah ka rawn pe kawi ang che" a rawn ti luam a, an reh ka lo ti viau kha a nia; an zin tih reng reng ka lo hre lo.




An zinna te zawtin kan inbe ve reng a, Ufamkima nu an lo zai ṭha leh niawm tak a ni, an chhungin Bangalore ah an kal a, niminah an lo thleng chiah tih te ka hre leh zel a, engmah chanchin min hrilh lo chu Ufamkima chuan ngaihdam te min dil nghal bawk nen lo vuina hun pawh min siam lo a ni ber.




"Nangmah i damṭha em?" Ka tih chuan zangkhai deuh hian a damṭhat thuin min lo chhang a, rei kan inbe lo, Phone kan dah hnu chuan khumah muin chunglam ka thlir vang vang a, keimah ah hian danglam a awm, ka sawifiah thiam hauh lo. Mahse, engthil emaw kim lo riaua inhriatna ka nei a ni. Ka lung a leng hauh si lo, Ufamkima ka biak zawh chiah vang em mawni dawn le?




Ani nen chuan ṭhianṭha tak ang chauh kan ni tawh a, ngaizawng rilru pu a ka en lohna pawh a rei tawh, chutih rualin ka duhsakna erawh tunhma ang thoin engmah ala danglam lo, mihringin a damchhunga thilṭha a dawn theih ang zawng zawng dawngin chhungkaw hlim tak nei sela, pasal ṭha tak leh Christa te unau tana pa ṭha tak ni bawk sela tih hi ka duhthusam a ni, chuan kei hi..a tana a ṭhian hlu tak ni ve bawk ila.....




Zingah chuan ka tho hma khawp mai, ka inbual rualin lu ka su nghal a, nidangah chuan tlai lamah zawk lu ka su tlangpui ṭhin a, chu pawh nikhat danah, tukin chu ka lu sukni a ni lo nain ka suk loh chuan ka awm a nuam thei tlat lo a ni.




Nidang aiin ka inchei te chu ka bei uluk a, ka kawr eng hak mil turin kekawr ka thlang a, ka sam chu ṭawn loin ka thlah bawk, darthlalang hmaah chuan ka ding vang vang a, thawk leh khatah ka tawt up up mai!



Hetianga awm tur hi ka ni tawh lo...



Ka sam chu ṭawn tumin ka hui khawm sawk sawk a, tuk danga samṭawn thlap ṭhin khan vawiin hian samthlah ka tum a, a chhan pawh sam thlah ka inhmeh thu min hrilh ṭhin tu kha min hmu tura a lo kal dawn vangin, hei chu zia lo tak a ni.




"Inngaihtuah harh rawh Saitluangpui" keimah leh keimah chu inhrilhin ka biang chu ka beng thawk thawk a, am zetin thawk ka la leh rih ṭhin, ṭhianṭha ang chauhin ka en tawh ka ti fo a mahse, ti nge hetiang hian ka la awm si, mi pasal a ni a, naupang duhawm tak tak te pa leh an tana mi hlu lutuk a ni, lo ngaih melh tur ka ni tawh lo, hetiang chuan engtin nge a nupui leh fa te ka hmachhawn theih ang, min ngaina em em vek a, chutih lai kara rilru le lo lutuk lo put hi thil dik lo tak a ni.




Ka sam chu ka ṭawn mawlh mawlh a, vawi thum lai ka ṭawn ṭhat hnuah sam thlah chung chuan ka chhuak ta tho chu a nia, danglam awm tlata inhriatna thleng hian ka paih bo a ngai a ni, ka sam ṭawn leh thlahin awmzia a nei tur a ni lo, tunah chuan kan paltlang zo tawh a lawm.




Dawr ka thlen chuan Pa Rela leh kan nula te pahnih an lo awm a, dawr chhung pawh an lo tifai diam tawh, rei vak loah Umawipuii a lo thleng a, ka lo sawi hma hauhin min rawn zawt zung zung mai, ka chhang hman meuh lo chu a ni.




"Sangzuala ka hau hrep, a ngaih a sam leh lutuk a, pasal nei rual tawh intihpui tur meuh te chu uluk ve tur ania, ka thinrim tak tak a ni, a nui a nui a, tukin phei chu ka hau nasa lutuk" a ti hlak hlak a, ṭawng na hun ka chang leh pek lo.




"A rawn be leh che em, nge maw chupa pui pawh chuan sawi nachang a hriat loh le? Mukesh singh-a a lo ni daih lehnghal a, ti awm ang lo.." a ṭawnglai chu lo pawt chatin "Mangal singh-a lawm" ka lo ti zauh a, a ner nang ringawt.



"Engtin nge i hriat chhuah reng reng?" a ti leh hluai a, sawi leh chak tawh loh nak a lai chuan.



"A ID ka hmu" tih zawngin ka chhang.



"Awi, inneih hmain i hrechhuak lo anga man hlan hun ah te i hre chauh ang tih a hlauhawm zawk anih chu" thawk ka lo la hluai a, phawr phawr zel hian...




"Engtik laiin nge ka nei dawn tih ka sawi a, kalpui rawh inhriat chian nan a ṭha in tia ka kalpui ringawt a lawm, kha tikhan ka kalchhan angin ka hrechiang a a ṭha a ni mai" ka lo ti hlak hlak a, Aumawii chu a ngawi dak tawh.




Ka bula rawn ṭhut pah chuan min thlek dak dak a, a nuih ruh ruh chu ka ngaithei vak lo. "Eng nge min nuih reng a?" ka tih rual chuan min rawn nghawk zauh a, "I puitling sawt riau" a ti mauh mai. Ka chhan veleh hma bawk chuan "Vawiin chu i van nalh ve, i hmelṭha set set riau mai" a ti leh zat a, hman aṭang tawhin serthlum rawng hi inhmeh min ti ve hrim hrim, ka melh rulha ka nui ṭha duh vak lo, lawm lo deuh anga lan ka la duh.




Coffee kan in laimekin hnathawk ho an lo thlenga, Mistiri ber chu a rawn tel lo, Helper ho hlir an ni, an bengchheng hle a, inchunga an chhoh hnu pawh chuan an thawm aṭha khawp mai.




UFamkiman min lo call em tih ngaichangin ka Phone chu ka bih khat tawk reng a, a rawn pen kawi hman ka rin chiah loh vangin a Motor lo chan a ngai maithei a, amah lah chuan engmah chanchin a rawn sawi si lo a, sana ka en chuan dar kua a lo pel fel der tawh, a kal tawh zawk em mawni dawn le?




"Msa a lo kal dawn a mi a?" Aumawiin a lo tih chuan chhang lawk loin pawn lam ka thlek dak dak a, "Awi be tawh suh, Sangzuala ka lo sawifel tir mai ang" tih pah chuan min rawn nghawk leh sawk a, ka Coffee in lai a ti baw lo chauh a ni.




Kawt maia Motor thawm ka hriat takah chuan Counter bawh chunga thokang meuhin pawnlam chu ka va thlek a, chutih laichuan Mistiri kha a rawn lang hlawl a, Ufamkima emaw tiin ka lo nuih hman pek a, a hmel ka han hmuh chian rual chuan ka nui tawp rang kher mai. An intiat angreng lutuka chuvang te pawh chu a niang.




Ka lo nuih vang chuan mak a ti tih hriat takin a hnung lam a lehhawi kher a, chutah a mah ngei ka nuih tih a inhria a ni chek ang chu, tawi te hian a rawn kiai ve suk a, Awi leh...min ti zak zawk e a.




"Mistiri kha a va chhe lo ve" Stepa a pen chho lai en ha ha chungin; ka beng bulah a rawn ti sur sur mai, "Tinge a nuih che a?" a rawn tih leh pawh chuan ka chhang duh miah lo.




"A va han chhe lo em em, nimin khan Mask a vuah a a hmel ka lo hmu miah lo a, a pian te kha.." ka ner nang a hmuh takah chuan a aw chu a zuih ral ti tih a, "I star a ni maw?" min ti ringawt nia, leh thawr zel a.



"I mawl a maw ni le?" ka tih hlak a, a la duhtawk mai lo. "I lo chan run dek dek kha" a la ti hram.



"Amah ka chang bawk lo e" ka ti vin leh hluk a, ṭawng tuma a an leh zuau laiin kawngkharah mipa khat a rawn lut a, kan hawi rual zawt a ni ber, Ufamkima ka hmu chiah chu ka ding hluai a, min rawn nuih var var ka hmuh rual chuan ka lungphu te chu a rang dup dup maiin ka hria.




Bag pawlah hian engthil emaw hi a rawn khai a, Counter lam a lo pan lai te chuan amah ngawt chu ka lo en a, a dam sam lo emaw ka ti rum rum a ni, a dawldang hle a, a mitkhur a thukin a lang upa ta sawt in a hriat a, a vun te chu a dik miah lo, ka ngaihbel zawk nge le, ka hmuh danah chuan dam lo a ang riau.




"Hei i thil tur chu, han enchhin teh le" a Bag khai min rawn pek pah chuan phur hmel deuh hian a ti a, ka lo ban ve thuai bawk, Kurta Sen nalh fahran hi a lo ni a, a chhungah chuan Snowball lem tereuhte awmna Key chain hi a lo awm bawk a, chu chu Ufamkima hnen aṭanga ka dawn ve anih ka ring.




"Aumawi, U rosy min lo hawn anih hi" ka bula Umawii ṭhu chu ka nek salh a, a lo nui lui ang sawng a, a duhloh lam hi chu a pe na ve thei a nia.




"Ka lawm lutuk tih min lo hrilh sak dawn nia aw, a zarah Kurta mawi tawk ka ha dawn a nia hei" tiin ka thiam tawkin lawmthu ka hrilh a, a nui hmel chu ka en rei duh vak lo, eng vang teh hrep nge ni, ka rilru le lo leh suahsual vang a niang Ufamkima chu ka khawngaih tlat a nih chu, a landan chuan min ti lungawi lo ve ringawt bawk a, zakthei lo hi ka in ti zawk.




"Hmuh loh chhungin i lo ṭhang a ni maw?" pawnah kan chhuah hnu a a tih chuan ka nui hak a, tunlai chu ka thau ve deuh a; a lo hmuthiam chat a nih chu.




"A mawi lo deuh tawh em?" Ka tih chuan lu a thing a, ngaihawm zetin min nuih bawk.




"I damṭha tih a lang zawk, i mawipui bawk a" a Motor kawngkhar hawn paha ti lehin lut mai lo chuan a ding vang vang a, sawitur ka van riau, ani pawh chu a ngawi vung vung a, "Kal tawh rawh, i tlai lutuk ange, dar kua a pel tawh a nia" ka tih takah chuan a lut ve chauh nghe nghe.




A tlan liam hnu chuan muangchangin ka inher a, Ufamkima landan mawlh chuan ani ka rilru tibuai, a zunthlum a sang deuh em mawni le, a vun te kha a nung loin a hil deuh bui in ka hria, a dang bawk si a, ahma a ti sen ang kha hmuh tur a awm tawh lo. An nupa kar a ṭha lo em mawni dawn le, nge a nu vang zawk ni ang aw?




Dawr chhunga ka luh leh rual chuan "Tihdanthiama kha i la be reng ṭhin ami a, kan inbe ngai tawh lo i ti emaw ka tia" Umawipuiin a lo ti sawk sawk a, "Be khat lutuk, an zin a, niminah an lo haw chauh" ka tih ve mai a, Bag a Keychain kha lo phawrh lehin "Hetiang thil Romantic te hi in la inpe bawk sia, nupui nei tawh chu kawm loh a ṭha asin, i bialpa hlui a ni bawk si a, vawikhat ṭawng sual palh hlek pawh a pawi thei" a ti mawlh mawlh a, a ngaih ang engmah a awm dawn lo tih erawh ka chiang, chutiang thil thlen tir chu ka duh loh ber kha a ni tlat.




"Engmah a awm tawh lo" ka tih pawh chuan "Kawm tawh lo ve mai la, a nupui pawn a ruk tak chuan a ngaithei miah lo ang che, kei ni ila ka pasalin a lo chuk a lo chuk tawh hnu nena an inkawm zui ka phal teuh lo mai" a ti leh zel a, mi mah rilru buai ve nak a lai chuan.




"Inchung ho ka han ngaihven lawk ange, tikhan lo ṭhu rawh" tih leh inchung lam pana kal ka rual a, ka awm reng chuan a ṭawng tawp leh mai lo ang, a zeldin thu mai mai pawh hrawk phiar tawn tawna an pui thei kha a ni miau a.




"USamu, i bialnu a lo kal" tih ri ah chuan ka ding dat a, kailawn ka chhuak chiah chu min lo nuih ṭha hlawm a, chutih laichuan leihlawn sang aṭangin Mistiri hmuihmulbuka khan min lo en ve reng a, min ti hamhaih lutuk chu sawi mai tur pawh ka hre lo, ka zah deuh chang lah hian ka dang a awk tlat zel lehnghal a.




"Sangzuala a lo kal dawn em?" a rawn ti thum deuh dut a, a nui lo a, a ṭawngkam a bul hle bawk.




"Dawn lo, vawiin chu keiman ka vil ang che u" pangngai thei ang bera ka tih chuan min rawn en leh ṭhap tawh.




Ka piah chiaha tlangval chuan "Chi nang a, hna kan thawk thei lo ang, Mistiri ber hi..." Mistiri in a lo melh dan vang chuan a ṭawng tawp chawt a, "Zela, nang ang rual fa a nei thei var var tawh rualpui chhaih suh" a lo ti nghut a, a lam ka hawi rang kher mai.




Eng ang hmuhin nge maw min lo hmuh le, mi zawng zawngin 'I lang upa thei lo, i lang tleirawl reng mai' min tih sup sup laiin Hmuihmulbuk-a hian fa tlangval nei rual hmuhin min lo hmu chu a nih hmel a, a mi biak lah chu kei aiin a naupang awrh chauhin a nia ka rin ni.



ZAWMNA



Ka lo melh tur deuh nge ni ka lam a rawn hawi chu tim deuh hian a lehhawi leh vat a, engtin phei chuan ka chhang zui bik lo, tlangval ho chu an titi pah bawrh bawrh reng a, Storage room en tura ka kal chu ka hnung maiah Mistiri chuan min rawn zui ve thuai bawk.




"Pipe lei la, tlai lamah kan siam dawn nia, Cement pawh a ngai ang" hnung lam aṭang chuan a lo ti thum dut dut a, kawngka ka hawng fel chiah chu chhuat ka rah na zawnah chuan tui a rawn luang chhuak zung zung a, kawrte ah chuan tui a lo tling khat vek tawh chu niin.



"Ekhai aw!.. avan tling chak ve maw le" ka pheikhawk a huh hlaua ka tawlh hnung tur chuan Mistiri chu ka va ngheng dawp a, ka tukkhumin a khabe ka han tauh sak a ni zawk mah.




"Awi...! I lo kun tih ka hre lo a" phawk lek lek a nuih tlawn deuh chungin ka ti leh rih a, a nui ve duh hauh lo, a khabe tuai rauh rauh chungin Room chhung chu a bih a, "Puanchhia in a hip chhuah theih ang, puan leh Bucket zuk la rawh" tih zawngin min chhang a, hmanhmawh deuh chuan kei ka tlan thla a, choka ah puanchhia hman mai tur an lo nei si lo, kut hrukna Towel lianpui chu ka pawt thla lawp a, Bucket kengin ka tlan chho leh hlawk hlawk a, ka han thlen chuan tui put chu dawr chhungah a lo luang kawi ngiai nguai tawh.




"Engtin maw ka tih dawn?" ka ten deuh reuh chuan ka khawih duh mai lo, chutih laiin ka Towel ken lai chu a rawn phih thla vut a, chhuat huh lai chu hru mawlh mawlhin Bucket chhungah chuan a sawr zel a, chhuat a hruk laichuan tlangval ho nen kan lo thlir ṭhap hlawm.




A hrechhuak thut a niang chu ka lam a rawn hawi vut a, "Lo ti rawh le" tih pah chuan chhuata Towel huh chu a melh zauh a, thuawih deuh chuan ka lo la ve leh mai bawk.




Storage room a tui tling zawng zawng la chhuak tur chuan hun a duh rei khawp mai, Bucket a khat zung zung a, Stepa ka khai thlakna lamah chhuat ka ti huh zeih zuih tawh.




"Tinge nangman i tih a, hnathawk ho kha tih tir ta che" Umawipuiin a tih chuan ka hrechhuak ve leh chiah a, mawl ka inti ve lek lek a ni. Ka han chhoh leh laichuan Ceiling siamin an lo la buai khawp mai. Khai peih tawh miau hek lo tu emaw ber chu ka tirh mai loh chuan.




Storage room bulah chuan dingin an hnathawk chu ka va en leh rih ṭhin a, ka tir ngam bawk si lo; tir duh bawk si chu ka inkhap buai khawp mai. Mistiri lo hawi laichuan zaizirin kan lo hrilh mawlh mawlh a, a nur nang ringawt a.




Rei vak loah a thil tih lai dah chuan a lo kal ve mai a, a naute tu emaw a tih tir ve mai ang chu ka tih laiin amah pui chuan a rawn ti nghal sawk sawk a, kawrte bula a kun duk duk lai chu inthlahrung ru deuhin ka lo thlir reng ringawt mai a ni.




Chawhma pum chu tui put kan buaipui a ni ber e, kan zawh hnuah thingpui an in a, keipawh inchungah ngawt chuan ka tap a, tlangval ho lah chuan min chhaih zuk zuk reng a, fiamthu an thawh a min ti nui min ti nui ve mai.




An Stool dah sang ir er ah chuan bawp khawkherh at a ṭhuin Phone ka khawih a, tlangval ho hnathawk chawl chu ka bul chhuatah an rawn ṭhu dar dar bawk. "Min lo vil ziah rawh aw nangman, anih loh chuan ril a ṭam thei emai" an zinga phawk berin a tih chuan "Vil ziah tawh ang" ka lo ti ve thuai a, chutih laiin Mistiri chu a lo chhuk ve mek a.



"Kum engzat nge i nih a?" rawn ti heu tu chu zing lama min lo chhaih tu kha a ni.



"Hmeichhe kum zat an zawt thawr thawr ngai lo, an thuruk ve a lawm" a ṭhianpa in a lo tih laichuan "Ka hre chak a lawm, kan inrual loh pawn kei aichuan a upa tam miah lo ang" chupa pui chuan a ti leh a, kei ka lo nui mai mai thung a.




"Nang angrual fa a nei thei tawh Usamuan a tih kha" pakhat zawkin nui chunga a tih leh chuan Mistiri chu ka va melh zawk a, kan inmelh fuh chiang thei em em mai lehnghal a, engtin emaw riau hian ka awm a ti nuam lo ṭhin, amah zawk chu a hawisawn vat zel bawk a, zak ang phei chuan a awm hauh lo.




Eng engemaw tiin a vei kual thuak thuak a, a che vel chu a hmuhnawm riauin ka hria, palian tak leh ṭawngtam lo tak anih na chuan engtin emaw zawng tak hian a ti zahawm riau a, a thinchhe viau dawn emaw ka tih laiin a dawhthei phian lawi a, a naute ho lah chuan a zai an ngai thiam em em bawk a, Mistiri ber a taimak em vang a nimahna tumah thatchhe fal leh awm awl mai mai an awm ngai miah lo.




"Kum engzat nge i nih zawk?" Tlangval bula ka tih chuan "19..nang ve?" a lo ti var a, hehh...kei aiin kum 10 dawnin a naupang a, chuti chung chuan a rualpui emaw amah aia upa awrh tur hmuhin min hmuh chu a nia, lawm loh chi pawh va ni suh.




"I nu rual anih kha" bang lam hawia ding chuan a rawn ti leh khauh mai, ka va hawi laichuan Wire a sam mual mual a, a tukkhum lam min chhawn tlat vangin a hmel ka hmu thei si lo a, a nui maithei a ni.



"Kum engzat nge i nih?" Ka bula mite chuan an lo ti leh a, Hmuihmulbuka min sawi dan kher kher vang chuan ka kum zat sawi chu ka duh ta tlat, kum 30 em pawh ka la tling hleinem, tunlai angah chuan nula Senior tih tur em em pawh ka niin ka inhre lo.




"Kum 28 ka nia, i rin aiin ka upa nge ka naupang?" ka sawi pah chuan Mistiri ka va melh kher a, a rawn lehhawi ka rin tehlul nen engtin mah zuk han danglam hauh lo chuan.




"I upa tho a..mahse....i naupan hmel! Kum 22 vel ni turah ka ngai che a" ka bula ding chuan a ti bah nak a, kei ka lo nuisang thung. Mistiri lam chu hawi ṭha lehin "Nang ang rual fa chu ka la nei pha chiah lo, ka rilru phei chuan Sweet sixteen a la pel miah lo zawk" nui pat pat chunga ka tih leh takah chuan a rawn inher ve ta hram e.




A Wire ken lai tum tel pahin a rawn kiai suk a, engmah phei chu a sawi lo, min ngai upa leh lutuk chu a tilui ni tlatin ka hria a, min chhaih ve deuh nge maw ni le, a awmdan ah lah chuan min chhaih tum hmel a pu mang bawk si lo a, a thutak run vei nen a mizia chu mak ka ti deuh riau a ni.




Tlangval ho chu tuichhe paihna tur hmanraw leitur chuan a tir a, ṭhenkhat an inzui chhuah tak hnu chuan kal ve lo mipa pahnih te nen kan lo awm a, sana ka en chuan dar 3 a lo ri leh reng tawh. Tlangval pahnih awm ve te chu Veranda lamah chhuakin zial an va zu a, an ṭawng lang lang ri chu ka hre pha a, Bike chungchang an sawi a nih hmel e.



"I ṭhutna kha ka lo hmang lawk ang chu" tih ri ah chuan ka hawi chhuak thuai a, ka hma zawnah lo dingin min lo en leh ran tawh a, a mitmeng hi a danglam riau a ni, mi thunun theihna mak deuh a nei niin ka hria, min tirh changa i he loa ka zawm zat zat ṭhin te hi hei vang hi a ni maithei, tunah pawh zawt buai miah loin ka tho leh tharh tawh chu ania.




"Ih..." ka lo tih chuan Chair-a a ding kang tawh chu a rawn hawithla leh a, a Tuboh ken lai chu lo melh vung vung chung hian "Ka upat hmel viau a mi a?" ka ti tawl mai.




A dar a chhin uk a, min ngaihsak zui loin bang chu a kilh ṭha mawlh mawlh a, min chhang tawh dawn lo emaw ka tih hnuah "Zela pawn a u rual emaw a tih che kha" a lo ti khauh a, chhan let mai dan tur chu ka bangbo hle.




"Nangmah khan upat hmel min tia mi?" ka ti leh ta ringawt a, ka lam a lo hawi leh laia a thutak hmel em vang chuan ka tim leh hnuhnawh a, thil ho mai mai a ni ka sawi ni, ani min hmuhdan mai mai te chu pawimawh tak pawh a ni lo a sin maw le.




"I thinrim em ni a?" a tih chuan lu ka thing rang viau a ni, "Thinrim lo e, fa tlangval nei rual tawh anga min ngai kha mak ka ti deuh mawle, ka lang upa viau aniang chu ka tia" lai deuh a tih pah chuan ka nui pat pat a, ani pawh a lo nui ve suk suk a, min hmuhdan chu sawifiah deuh se ka la ti ru hle thung.




"Kum 19 in a u rual anga a ngaih che chuan i lang upa vak lo aniang chu" a ti leh mai a, hepa pui hian lang upa min ti nge ka kum aiin ka lang naupang a ti zawk ka la hre thei hauh lo anih chu.




"Mahse, nangchuan..." ka tih leh laia min rawn enchian em vang chuan ka ṭawng a zuih ral khawp mai. "Ka hmuhdan che tinge hriat i duh a?" tiin min lo zawt let khauh a, ka ṭawng mai duh lo, ka dang a awk leh dawn tlatin ka hria.




"Ka rin aidaihin i upa?" nui sak chunga a tih chuan ka lawm leh lawm loh pawh ka hre lo, lan naupan chu engmah a lo ni leh silo te pawh a niang, a chhan chu ka upa tawh miau a.




"Nia, ka Senior tawh a lawm, mahni a Torch light nei chin kha ka ni tawh a" zah zela ka tih ham ham laichuan phawk fe hian min rawn en a, "Oh...mahnia Torch light nei hrang chin an tih ang rual kha ka nia" ka lo ti leh zauh a, a bu nghut ringawt.




"Keipawn Torch Light chu ka nei hrang a lawm mahse, a chhe tawh a" min en lo a, keiin ka en kiau thung, chhan let dan tur pawh ka hre lo.




"Kum engzat nge i nih ve?" ka ti thawr a, sir lam min chhawn mah se a kiai suk tih chu ka hria. "Nupui fanau te i nei tawh em?" ka lo tih zawm leh a, chutah muangchanga rawn chhuk te tein, ka hma ah chuan a rawn ding a, Mizo mipa ah chuan pianthiam pawl tak chu a ni ngei ang, a sang ṭhain dar rinawm hmel deuh a nei a, hna a thawk rim hle tih pawh hai theih a ni lo, a hmel erawh a hmulin a hliah ṭhen nasa ema ngaihdan ka siam mai thiam lo thung a; mahse, a mitmeng mawlh chu a ni, miten amah an Notice na hmasa ber a nih ka ring tlat.




"Nang aiin kum sawm in ka upa, nupui ka la nei lo a, ka nei ve ṭep tawh" tiin min chhang a, ka zawh tirha a hmel awmdan ang ai hian mi hi a chhang ṭha duh leh phian zel a, a dang zawh leh a chawh riau mai.




"Chutia law, kuminah em ni a?" nelawm taka nuisangin ka ti a, a mizia te hi ka kawm peih chi tak tur niin ka hria, hnathawk te tana nelawm tak nih chu ka tih tur niin ka hre ve bawk.



"Ni lo ang, hun thawl ka nei lo lutuka" a ti sam mai a, a kum zat a sawi danah a naupang zawk zawk tawh bik si lo a, nupui neih nana hun thawl nei lo a inti tlat chu ka hriat thiam loh zawng tak a ni.




"Ti nge...hunthawl vak a ngai chuang em ni, inneih te chu nikhatah a zo vek a lawm le, inbuatsaih leh neuh neuh tih nan karkhat vel ni bawk ta se, chutiang chhung lek te chu awm awl mai la" ka lo ti zat zat a, Chair-a a din leh tawh vangin dak vahin ka en chho bawk.




"Chutiang mai a awlsam a la ni lo a" a tih chuan zawhna dang ka la nei cheu.



"Eng ber nge buaithlak a?" kan Mistiri hian hna a duh hmel ka ti riau, a ngaihzawng tana hun pawh pe hleithei lo a hna duh chi anih teh chuan ka zilh deuh ang ka ti rilru a, chumi tur chuan min chhan lehna tur ka lo ngaichang ran tawh.




"Neih mai theih a ni lo, inbuatsaih tur a tam lutuk" ka lo chek tlak a, "Awi a...Mistiri i nia, khum te pawh nangman i siam zung zung thei dawn alawm, kar khat lek chhungin engtham mah in hlawh chuang nang" min rawn en dan vang chuan ka tim leh hnuhnawh khawp mai, a hna sawinep sak angah min ngaihloh hram ka beisei.




"Engtin nge an koh che" a rawn ti ta daih a, "Saitluangpuii ka nia Mimite tiin min ko ṭhin.." ka lo ti var a, engtak rawn sawi leh ang maw ka tih laiin "I sap hming maw" a ti bauh a, min en tawh loin hna a thawk zui mawlh mawlh a, ka chhang ta bik lo.



"Nang tunge i hming?" ka sawi zawh rual rual chuan Samuela a ni tih ka hre leh hnu hnawh a; mahse, ka zawt zo tawh.




"Lalrambeiseia ka nia..Samuel tiin min ko ṭhin..." a mi rawn chhan dan vang chuan ka nuih a za ta tlat a, ka nui chhuak hak nghe nghe a, a rawn hawi phawk ngei mai, min chhan dan kha naupang hnena a hmingpum zawt hi ka ang em a ni.




"I sap hming maw?" a tih dan chiah a ka lo tih leh chuan a bu nghut a, "Mistiri tih kha ka vai hming" tih leh pah chuan rang deuhin min hnungchhawn a, a hnung lama ding chungin ka nui ka nui mai, hepa hi a duhawm reuh ka ti, a landan leh a mizia hi a inpersan lutuk a, ka rinloh deuhin ka nel chi tak a ni bawk, biak tama nelawm tawlh tawlh chi ang kha a ni chiang a lawm, biak loh chuan ṭawng ṭha duh miah lo, biak chuan ṭha deuha mi chhang ṭhin ang kha.




"Hna chu ṭul viau mah se nupui chu nei phawt rawh, hmeichhe tan chuan upat deuh hnua pasal neih chi a ni lo ania, i bialnu dinhmun tur te ngaihtuah ve zawk la, kum engzat nge a nih ve reng reng a...?" ka ṭhutna siamrem pahin ka ti zung zung a, "A..." a rawn ti uk tawh nain tlangval ho thawm vang chuan min chhang zui ta lo.




"U Samu, i sawi ang tak kha a awm lo a, a aia lian hret kan lo la mai" an rawn ti lang lang a, "A hman theih tho" Mistiri in a lo tih hnu chuan an che zui sang sang a, ka ṭhutna Chair kha an hman tak daih vangin ka ding reng a, an chetna ka dipdal ve deuh bawk nen inhnuai lamah ka chhuk san zui a, inhnuai lam pawh an lo buai ve lai tak a ni.




Rei vak lo ah Usangzuala lo thlengin inchunglam chu a han enpui a, kan dawr ṭhenawm chiah te dawr chhung zawka tuichhe Pipe chu tui put na lainen a inhnaih zawk a, chu chu zawm an va dil a, dawr nei tu chuan min lo phalsak hlauh mai.




An siam rei tak em vangin dar 5 pelh hnuah an haw thei chauh a, kan Mistiri chuan a ngaihna a lo hre khawp mai a, tuiput vanga buaina chu a kiang ta duak a ni ber e, dawr kil bang hrulah chuan Pipe an kal tira, ṭhenawm te nena kan indaidanna bang chu chhete verhin tuichhe pipe an zawm tir a, Storage room a tui chu put reng tho mah se Pipe a a luanluh tak vangin kan dawr chhungah a rawn lut thei tawh lo thung a, sum tam tak sen angaih ka rin laiin awlsam tein min tih fel sak vek mai a, sawi hmaih theih loh a kuthnu a mam em em bawk.




Zanah Msan min rawn Phone leh a, Usangzualan a sawi tawh vangin lo pehhel reng chu a mawi awm lo e, Phone chu ka chhang a, "Mimi, ka van inthlahrung ve, engmah hrilh nghal nachang che ka lo hre lo a" a rawn tih chuan ka inthiam lo ve reng mai.




"A pawi lo, inthlahrung suh" ka lo ti ve thuai a, "Ngawirawh, thupa chawi ka ngai, ka ti lungawi lo viau ang che" a tih leh zel a, kan inbiak tak zelah chuan ngaihdam dil nan kawr min lei sak a tum mauh mai a, kan inhnial ṭawng ṭawng a ni ber.




"Ka hman veleh ah ka rawn leng ang, kan la inkawm zel tho ang chu tiraw?" tiin min zawt a, 'Aw' ti lo a chhan chi ni hek lo, ṭha deuh chuan ka chhang a, ka awm erawh a nuam zan lo khawp mai, hnarna ṭawngkam a hriat loh vangin amah ah khan thil danglam tehchiam awm awmin ka hre lo a, min la beisei tih ka hre thiam mai bawk.




Umawipuiin min rawn puih hman tak loh vangin kartluanin ka buai a, inchung lam pawh ka ngaihven hman meuh lo, Usangzualan zingah leh tlaiah a rawn enpui a, an hna a sawt viau aniang chu an zo thuai reng a, ka rin aiin an Bill a lo sang hrep lehnghal a, ka rin ang a lo ni hauh lo, Mistiri hna hi a lo hlawk hle tih ka hre ve chiah a ni, hetiang anih chuan sawrkar hna thawk ṭhenkhat aiin an hlawhtam zawk fe dawn anih hi.




Tlaibanah Ufamkima a rawn peng kawi ṭhin a, Coffee in pahin a rawn ṭhu ve reng zel a, an zin haw hlim ai kha chuan a hmel pawh hmuh a nuam sawt khawp mai, Christ-a ei tur Burger leh theitui tih ang reng ka lo hawn tir ve a, a Coffee man lah chu min pe lui tlat zel a, a thlawnin a in duh ngai lo.




A lo kal ngun ta deuh aniang, a lo kal hun awmah hi chuan ka lo beisei ru ran zel, hriat loh karin ka lo thlek leh dak dak ṭhin, ka awmdan hi Umawiin hria sela chuan min kamkhat leh nek ang chu, UFamkima lo leng ṭhin tih takngial pawh ka hrilh duh lo, min hau leh ngawt dawn tih ka hre ve tlat.




Ṭhian kan ni tawh a, kan inlaichinna hi tunhma ang a lo ni tawh lo anih pawhin inbiak duh loh zui a, in mihran kher ṭul ka ti ve lo a ni, tuna kan awmdan hi Ufamkima duhdan tak pawh a ni vein ka hria.




Tlaikhat a lo kal chu Counterah kan ṭhu dun a, a Kamis senduk hak chu inhmeh ka ti kher mai, a nu chanchin kan sawi laimekin Ukimkimi a rawn lang hlawl a, keini pahnih min rawn hmuh chuan min chhaih zurh zurh a, chhang lem loin kan lo nuihsan mai mai thung.




Ufamkima haw hnu chuan ka bulah a rawn ṭhu sawk sawk a, engmah pawh ka sawi hma chuan ka hnung zângah min rawn beng thawr mai!




"I mawl em ni a, fimkhur ve ta che u, i u ka zawt ang ka tia, a lo la hriat ve loh takah nangmah zawt chiang tur chein ka rawn kal a" a ti mawlh mawlh a, eng thil nge a sawi ka hrethiam hauh lo.



"Eng thil chu maw?" Ka lo ti he haw a.



"Famkima nen in lo inngaizawng ṭha leh a ni maw?" a tih chuan ka ka hau ringawt.



"Ti awm ang lo e...." ka sawi laklawh lai lo pawtchat lehin "In inthup lo lutuka, miin an sawi sep sep tawh che u a nia, veng chhung mi te phei chuan tun hma a in chanchin engmah an hre si lo a, 'Famkiman ngaihzawng a nei' an ti ringawt a, nangmah an sawi na che tih pawh ka lo hre lawk lo a, ka ṭhian ten 'Dawr nei ania, tlaitin a birh tluk tluk' a tih vangin nangmah i ni tih ka hre chauh a lawm, an sawi ang tak takin ka rawn hmu leh nghal che u a, in thup lo dun ropui si, in hming chhe har lo ang, fimkhur ve deuh rawh u" a ti hlak hlak a, a thil sawi chuan min ti dang lek lek zawk a ni.



"I ngaih ang kan ni teuh lo emai, haw pahin Coffee a rawn in ringawt a lawm, kan inkawp ṭha leh tawh lo hrim hrim" ka lo ti ve vat a, a la awih loh hmel viau thung a.



"Pan loah tho a fu ngai lo, in awm dan ka rawn hmuh khan ka hrethiam vek, ka bula engmah zep a ngai lo, tihpui tu che u ka nia, in hming chhiat pawn ka mawhphurhna chen a awm ve a lawm" a ti leh zel a, hahthlak hian....min tihpui tawp si lo hi, a mi ngaihdan te lah chu a...




"I sawi awm ang lo emai, an nupain hria se an nuih a za ngawt ang" ka lo tih san a, mi te hian tinge thil hrechiang mang lo a mi chanchin sawi chhawn hi an peih viau le, engmah an mi ngaihdan a awm lo tih ka chian em vangin ka ngai thutak viau duh lem lo, mi chuan eng ang pawhin lo ngai sela Ufamkima te nupa leh keiin kan inkar chu kan chiang a lawm, keini pathum inkarah buaina a awm loh phawt a hnu chu an duh duhin lo sawi mah se, pawi tihna ka nei lo bawk.




Tlaia ka bang tur chu Scooty ka ken loh vangin dawr kawtah Taxi ka chang a, Taxi ruak phar mai tur ka hmuh loh vang chuan ka hmanhmawh ru tawh khawp mai, chutih laichuan ka hmaah Datsun Redigo silver rawng hi a rawn ding zawt a, a khalh tu chu hmeichhia a ni.




A Sunglass vuah la thla a a rawn hawi chhuah takah chuan kan innuih var var tawh. "Ka hai dawn che a lawm, kan van inhmu khat ve" ka lo ti thuai a, "He lamah kan awm lo reng a, thla hmasa khan kan lo haw leh chiah a lawm, ka chhuak tlem ve lutuk a, ka lo thlah ang che" a lo ti var a, sawitur a ngah hmel em vangin ka hnial duh ta lem lo.




"Tunlai inhralh a nuam chho tawh em?" ka chhan hma hma chuan "Eitur dawr chu englai pawn a lun ang a?" a tih leh a, nui sang chungin kei ka lo bu nghat nghat a, "A zia ve zel e, dawr tih len ka tuma, a chung kan siam zo tawh, kan la luah chho lo deuh a" ka tih chuan a lo phur hmel khawp mai.




"Khai a, i van taima bik tak e aw, hausak chiah i hmabak tawh anih chu, sum thawhchhuah na tur hi keipawh dap ve ka ngai a ni" a ti zung zung a, "Nang te chu in pain sawrkar hna a thawk a lawm" ka lo tih chuan a ner nasa mai.



"In nei lo kan nih hi, mi in a lawm kan luah, Ramkamdinga hian insakna tur a tuak a; kawr thar pawh min leisak lohna a rei tawh lutuk; mah se, vawiin chu ka nu nen kan bazara ka lei ṭeuh mai, a ṭhen phei chu ka dah thukru ṭhen ang, kan pa pui reuh hian a hlawma bazar hi a phal lo zel a" a ti niah niah a, Suzanne-i nen kan inhmuh tawh hi chuan a thlun pelh ang zar zar kan ni ṭhin; ti ila ṭawng na hun ka chang ve ngai meuh lo zawk.




"Nang chu nula man to i ni ringawt tawh, mo a tana it fe fe che an tam awm mange" a tih chuan ka nuih a za kher mai, "Pasal pawh ka hmuh zawh loh hi" ka lo ti ve zat a.




"Sawi teh suh, i ngaihsak lo anih zawk kha, nangmah ang nih ka chak a nia, ka lerh hma leh lutuk a, nulat ka kham lo keichuan, ṭhian te nena bazar pawh ka ti thei tawh lo, kan pa hi ka tawng hma leh lutuk a, a pawi zo vek" tih pahin a nui har har a, ka ṭhiannu Suzanne-i hi kei aiin a naupanga, kei aichuan a sang zawk thung.




Hmeichhe hmelṭha leh kawmnuam tak a ni, a hmel en mai hi chuan pasal fanau nei hi a ang lo ṭhin a, nula harhvang tak hi a ang mah zawk a, han hrisel ṭha deuh phei sela chuan a tho thang a ṭha viauin ka ring.



"Engtikah nge chaw i lo ei ang, ka sawm ngun tawh che nen i la rawn kal miah lo a" vui hmuipu zeta a tih chuan "Lo ei zawk rawh u, in chhungin lo kal ula" ka lo ti var a, min hnial leh ngei ang chu ka tih rilruk laiin "Keini chu kan chhangchhia a, chhuahvah kan harsat a lawm, kar leh inrinni hi kan pa piancham a nia, i lo eidawn nia, dawrah keimah ngeiin ka rawn hruai ang che" a ti leh a, hetiang hian kan inhmuh a piangin an ina lengah emaw chaw eiah hian min sawm ṭhin.




Kan veng kan thlen chuan kawi zau laiah ka din tir a, "Kar leh chu aw" a rawn tih chuan ka nuih liam mai a, ka kal tak tak pawh ring lo chungin ṭha deuh chuan ka aw ve ta tho a, a tlan liam tak hnuah muang changin inlam ka pan a, ka inbul dawr ka thleng phei ṭep tih ah Message ka dawnga ka en chuan Urosy-i a ni.




"Tlaiah Ukima a lo kal em?" tih zawng hi min lo thawn a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 6th, 2022, 7:43 pm

ZUNZAM - by Ahmangaihi violette Khiangte



CHAPTER - 3




"A lo peng zawk a; a chhuah leh na a rei deuh tawh" tiin ṭha deuh chuan ka chhang a, in lampana ka pen leh hnu rei vak loah min lo Phone zui a, lut mai lo chuan ka ding leh rih a, Urosy call ka chhan rualin naupang ṭap rawng rawng ri ka hre thuai a, an thawm aṭang chuan an buai hmel khawp mai.




"Dawr i khar tawh a mi?" Urosy chuan a rawn ti leh a, ngaihṭha zan lo chung chuan ka khar tawh thu leh ka haw tawh thu ka hrilh ve mai a, engatan nge min zawh hriat ka chak viau mai, a rawn tih dan chuan thil awm ang lo deuh min ngaihtuah tir tlat a ni.




"Ukima chu a lo haw na a rei tawh em?" a rawn ti leh zel a, a awki chu a bung deuh riauin ka hria a, thinrim ang phei chuan a lang hauh lo nain nuisang hmel put erawh ka ring chuang lo. "Aw, rei ve tawh ang reng e, chhang leiin a rawn peng zawk a rei pawh a awm lo, tinge a?" tiin ka lo zawt let ve a.




"A...chhang a lei chuan a ṭhat chu, lo chah ka tum maw le...a ngai leh lo anih chu" a ti niah niah a, a ṭawng chu a riat nawi hle bawk.




Kan inbiak zawh chuan inchhungah ka lut zui a, ka chhung te chu an lo reh ṭhap a, inhnuai lama ka nu ṭawng lang lang ri ka hriat vangin au zui duh lem lo chuan ka pindan lam ka pan a, ka lut fel awrh tih ah ka Phone bawk chu a rawn ri leh a, ka en chuan Ufamkima a ni ve thung.




Inthlak ta mai lo chuan Phone chu ka chhang leh rih a, "Mimi, i dawrah khan Envelope ka thlauh em?" a rawn tih chuan ka bangbo hle ringawt.




"Ka hre miah lo, i ti bo a mi?" ka lo ti let ha a.



"Aw, ka kawrchung ipteah ka dah mai khan ka hria a, ka hmu zo tawh lo hei, Motor-ah ka thlauh bawk si lo a, i dawra ka ṭhutna velah khan em mawni dawn le, min han ensak lawk teh" a rawn ti leh a, keilah chu inah ka awm daih tawh si, Pa Rela pawh a haw tawh in ka ring, ka chhuah dawn khan haw a tum ve mek anih kha maw.




"Ufamkim ka haw tawh a sin" ka ti hap a, kan inkhar hma ve ni berkher a ni chu a pawi tak tak a ni, nidangah kan inhawn rei ṭhin tehlul nen.



"A va zia lo ve aw, zanin Committee na ah thehluh ka ngai tawh a sin le" a ti vang vang a, thil pawimawh tak chu a nih hmel e, "Engtin nge niang, zanin ah thehluh ngei ngei a ngai a mi?" ka ti nawn leh a, min chhang mai lo.




"I thleng thui tawh em, nge in i thleng der tawh?" a rawn tih leh chuan let leh se min ti tih ka hrethiam a, a hmanhmawh danah chuan a pawimawh viau chu a ni chek ang.




"Ka lo hawng leh lawk mai dawn a mi, a harsa chuang hleinem" ka ti ta ringawt a, "I tan a buaithlak viau em, ka ti buai lutuk lo che maw?" a aw chu a inthlahrun hmel hle a, a ṭawng dan aṭang chuan dawr chu hawn sak leh loh chi pawh a ni lo zawk ang.




"Buai lo e, Scooty pawh a awm reng a lawm, tunah khawiah nge i awm a?" ka ti leh a, "I dawr ka lo pan mek a, ka ṭhian te ka tlawh kawi e ka tia, ka thil thlauh ka hre leh sia hmanhmawh deuhin ka rawn chhuak a" a ti luam a, Phone la hmang reng chung chuan ka Bag leh kawrlum chu ka dah sawk sawk a, ka pheikhawk takngial pawh thlak tawh loin inhnuai lam ka pan zui a, UFamkima chu dawr kawtah min lo nghak mai turin ka hrilh bawk.




Inhnuai aṭanga ka nu lo chho nen kawtah kan intawk hlawl a, Helmet ka khum mawlh mawlh chu zawhna ngah hmel deuh hian min lo en a, "Dawr ah thil ka theih nghilh a" ka lo tih khalh vat thung, min zawh zui tak loah chuan ka inkhalh chhuak ta thuai a.




Kan veng leh kan dawr inkar a hla lo bawk a, ka thleng rang khawp mai, Ufamkima Motor pawh a lo ding ran tawh a, a bula ka va inhun ve laimek chuan a Motor aṭangin a lo chhuk a, "Vawiin chu ka tlaw luatah i buai phah hrep anih hi, zaninah thehluh ngai kher lo sela chuan naktukah pawh a pawi loh tehlul nen, zanin kher a lo nia" a lo ti zung zung a, "A ho lutuk, ka buaiphah lo ania" lo tih ve pahin dawr lamah kan inzui phei a, khua chu a thim ve chhulh tawh nain dar erawh chuti takin a la tlai awm lo e.




Kan thil zawn tum chu zawn buai pawh a ngai lem lo dawhkanah a lo awn ran a, a lo la in Seal ṭha thlap bawk. "Ka phawrh anga ka ah leh theihnghilh anih dawn hi" ka bula miin a lo tih laichuan a Phone a rawn ri a, a chhan hma a a rawn lek kan chuan Urosy-i a ni tih ka va hmu thei.




"Ka lo haw dawn chiah, ka rawn thleng har tawh lo ang" a ti thum dut dut a. Lehlam a mi chuan eng nge a rawn sawi ka hre pha ve tawh lo, "Mimitei dawrah ka awm mek a, Bawihpuia chhang duh kha ka lei kawi lawk maw le" tiin a chhang a, ka lo ip ru nasa ngang mai, Urosy bulah khan ina ka awm tawh thu leh dawr kan khar tawh thu kha ka sawi bawk si a, Ufamkiman chutia a sawi ve leh si chu a zia lo lam deuh a ni.




Ngawi rengin Ufamkima chu ka ngaichang ve ran a, chutih laia ka hming a rawn lam tel leh vang chuan ka beng ka chhi uluk viau tawh "Mimi chu i be duh a mi, hei a awm ve reng a lawm" a tih leh zel a, engthil tak Urosy chuan rawn sawi ang maw, Prof chuan min biak tir a tum ka rin laiin Phone chu a dah ta hlauh a, engmah thil danglam a awm lo niin ka hria a, ka awm a nuam deuh huai bawk.




Zawhna ngah hmel deuha ka lo en vang chu aniang za vak lo hian a ṭhen a, "Chhang min chah a lo tum a" a tih chuan keipawh ka lo bu nghat a, thilsual ti ang hrim a ka thinphu lo rang hman ringawt chu ka in ngei lek lek zawk a ni, vawiin lama Ukimkimi thil sawi khan min chenchilh deuh te pawh a nia nge.




Ufamkima nen kan invailiam hnu chuan keipawh In lampanin ka inkhalhchhuak veleh a, in ka thlen leh chuan ka pa pawh a lo awm tawh, damlo kan an duh vangin inthlak tawh lo chuan chaw ei ka siam a, chaw ka ei laiin ka pa nen dawr chung chang kan sawi dun a, kar thar lamah chuan a chhung bungrua leh eng ilo kan inhung fel thei tawh maiin ka ring, ka pa in pawisa min hman tir dawn bawk a; duh ang thalin ka chei ve thei ang chu.




Inrinni chu kan buai nileng zak a, kan nula te pawn mawng an hung hman meuh lo, chawhnu lamah kan Furniture siamtir na ah kalin ka va endik a, an lo peih fel thawkhat tawh a, a rawng khah nawn leh chauh a lo ngai tawh a ni awm e, ka haw lamah chuan Lalbuaia Shopping Complex ah ka lut kawi leh a, Ufamkima nen kan intawk hlawl mai! Tlereuh a lei dawn anih ka ring.




"Urosy ta tur a mi?" nui sanga ka tih chuan "Nangman han thlang mai teh, kan inneih cham ah pek ka tum a, tlereuh zuar a ni bawk sia, eng ang nge pek ṭha ang?" a lo ti var a, Urosy chuan Silver aiin Gold a in hmeh dawn a ka hriat vangin; Gold ṭhi a Locket a thinlung lem nalh deuha inker chu ka thlan sak a, a man pawh to ṭalh ṭalh tak a ni.




"I tan engemaw thlang ve la" a rawn tih chuan lu ka thing rang khawp mai.



"Silver hi i duh em?" a rawn ti leh zel a, "A ngai lo, tlereuh ka ngaina ve vak lo" ka ti chung pawhin dawr nghaktu chu Silver ṭhi a lakchhuah tir a, "I duhzawng a ni em?" a rawn tih leh chuan ka lo meng tal tap ringawt.




"Ufamkim, lei lo mai rawh, a to si.." ka ti niah niah a, chutih laichuan ka nghawngah min rawn awrh tir der tawh a, "Mi thilpek an hnar ngai lo, hmeichhia chuan tlereuh te chu in lawm vek a ni lawm ni" a ti bul bul a, dawr nghaktu chuan a lo thlawp ngang mai bawk.




"Silver leh Gold te chu ro thil a nia lawm, mamawh hunah tih ral a buaithlak ve si lo a" a lo ti siam siam a, pawisa an inpek laichuan Ufamkima ṭhi min awrh tir chu ka khawih rauh rauh a, a rit nulh mai hian ka hria, ka awm a nuam tehchiam lo, ka lawm lo a ni lo a 'Mahse' tih a awm, ka inthlahrun vang a ni mai thei.




Dawr aṭang chuan kan inzui chhuak a, a inneih cham chu kar thar mai a lo ni tawh a, lawm chiam an tum loh thu leh an chhungkua a chaw eia chhuah an tum thu te a sawi sap sap a, a phur ve hmel khawp mai. "A hna leh naupang enkawlin a buai rih lutuka, chuti ni lo sela chuan pangngai deuhin kan han lawm tur a nia, nang pawh chaw te lo ei la ṭha tur" a tih chuan ka nui mai a, a ṭhi min leisak te chu lawmthu ka hrilh ve luam bawk.




"Lo kal ve tho ta che, dawr nuam deuhah chaw kan ei dawn nia" a ti leh hluai a, lu ka thing rang hle. "Kar leh lamah chuan ka buai dawn lutuk, dawr chung kan hawng tawh dawn a" ka tih chuan a hrechhuak ve leh a, "Nitak maw, in dawrah chuan rawn eichhuak ila a ṭhat dawn chu" a ti ta hlauh a, chu erawh ka hnial lo nasa a ni.




"Tui deuhin kan lo buatsaih sak dawn che u nia" ka lo ti ve a, kan insawi phur dun hlut a ni ber.



Pathianni ah Umawipuii te nufa an lo leng phei a, zanriah an ei nghal bawk a, Mampuia leh ka pa pawh ṭhutkhawmna pindanah an in awi durh durh reng a. Ka nu hoin chana hring kan kheh a, dawr chungchang kan sawi bawrh bawrh a, Umawii pek chuan " Daily in min chhawr la, Counter-ah ka lo ṭhu ang" a ti mauh mai.




"Hnathawk kan mamawh belh lo" ka lo ti fiam chu a ner nang a, "Ka bul ṭan a nih saw aw, chhut duh ila chuan ka pawisa min la ba ṭeuh zawk ang, a neitu zah ve nih na la nei ang vel ka ni" a ti bai bai a, ka nu nen kan nui kan nui ringawt.




"December thla ah min lo pui dawn nia, dawr chungah Counter kan siam belh dawn a, hlawh chu a hranpa a neih kher pawh a ngai hleinem, i ta a la ni ve reng a lawm, kan inṭawm a lawm" ka tih takah chuan a nui pat pat tawh.




'Ka dawr' ka han ti fo tak nain 'Kan unau dawr' tih hi ka rilru ah a nihdan dik tak zawk a ni, ka nu leh pa te hian min khawihpui lo a, engemaw changa ka pa pawisa kan han hmansak zauh ṭhin pawh hi a bi kim thlapin kan rul leh ṭhin, unau pahnih chiah kan ni a, Umawii pasal te hi mi awmthei leh sang tak ni loin chungkaw pangngai ve mai an ni a, Usangzuala lahin hna nghet a la nei lo bawk.




Umawii nen hian inngeih lo tak angin inhau hlak hlak ṭhin mahila unau inngai tak kan ni zawk a, kei ngat phei chuan engkima ka rawn leh ka entawn a ni, ṭhian ka nei mang lo a, tunah pawh hian ṭhianṭha tih tur a bar pawh ka nei lo, Umawii hi ka ṭhianṭha ber pawh ti ila ka sawi sualin ka ring lo, miten an ṭhianṭha tak te tana an tihsak ang zawng zawng hi chu min tihsak ve vek a, a nau ka nihna angin min zilh lah a peih, ka tan hi chuan Everything-i a ni ber e.



"Dawr chung nangin chang la, keiin dawr hnuai ka chang anga" a rawn tih chuan ka melh rum khawp mai, ka lo in phal zau ve hman tehlul nen hian..



"I Chhimbuk rilru kha rawn chhuah suh" ka lo ti hlak a, "Chhimbuk rilru chu eng nge?" a tih chuan sawi mai dan tur ka hre hauh lo. "Nu Chhimbuk hi an phakar a mi?" ka nu bulah chuan a ti leh mauh mai a, ka nu nuih a lo za ngang mai.




"I phakar tih i inhriat chuan a ṭha" ka lo ti let zauh a, phakar tih chu a duh lo leh hle si, tihian a ṭawng phawng phawng zela; an ṭhenawm khaw veng te pawn an lo hlimpui viau ni tur a ni.




"I nau pawn kan inṭawm atih kha, a hranpa a pawisa insem pawh a ngai hleinem, in mamawh ah in inban tawn mai dawn a lawm, unau hmeichhia pahnih chiah in ni a, indawm kang tawn reng tur in ni, Mimitei chuan pasal fanau a la nei lo a, nakinah a neih ve hun te pawh a la awm anga; chutih hunah pawh chuan inngaihsak tawn reng ang che u, unau inhmangaih leh inngaihsak tak nih hi zahawmna a ni ngai, kan ṭhenawm pa te unau saw pasarih an ni a, chhiat ṭhatah an inṭawiawm ṭhat em vang te, an inngaihsak em vang te hian miten an hmuh dan a dang a, zah an kai phah bawk" tiin ka nu chuan min hrilh sap sap a, Umawii nen chuan kan inmelh leh ralh ṭhin.




"Pakhat chiah dawm kan te chu a harsa lo ang" Aumawii bawk chuan a rawn ti leh khauh a, "Keiman anih hi aw dawm mek zawk che" ka lo ti ve vat a, ka nu thil sawi a rawn chawk bam zo leh vek tawh. Min hnial leh dawn emaw ka tih laiin min rawn en vung vung a "I ṭhi kha ka duh, a thar a mi?" tih leh rawn ban a rual a, a kut ka lo vai thlaksak rang kher mai.




"Khawi maw ka lo enchiang teh ang" a tih pawh chuan ka hup bet tlat a, "I lei thar a mi?" ka nuin a lo tih chuan lu ka bu ringawt a, Umawiin a man zat min zawh leh chuan ka chhang duh tawh miah lo thung.




Ka nuin min thawhsan hnu chuan Umawii chu ka bulah a rawn tawlh hnai sawt sawt a, "Thil thar i nei reng bik mai, ṭhi man to leina i neih tho te chuan lian vak lo te pawh min lei ve tur a nia" a ti niah niah a, Ufamkima min pek kher chu ni lo sela ka pe chiang ngawt ang maw le, tun ṭuma a thil min pek hi chu amah hriat reng nana kawl ve ka duh tlat a, keipawn ka awrh chhuak mai mai dawn lo, hei hi chu a tawpna tur a ni tawh miau a.




"Nakinah a dang i ta tur kan lei dawn nia" ka ti ta ringawt a, a lungawi veleh mai bawk a.




Thawhṭan ni chu chaw chhun eihun laiin kan Furniture siamtir an rawn dah a, inchung lamah chhawhnu pumin ka buai a, ka duh ulukin ka insengso nasa bawk a, duhthu a sam ve zan mai.




Kawngpui lan theihna lai dawhkan chu en vang vang chungin thil ka ngaihtuah a, Ufamkima te lo kal hunah hetah ngei hian lo ṭhuttir ila, an inneih cham lawmpuina ni pah fawmin ei leh in man te pawh a thlawn a tihsak ka rilruk bawk a ni, keimah ber chu ka phur hle a, Pa Rela bakah eisiam thiam tak ramdang chaw siam thiam em em mai thawk thar kan nei bawk a, chu tak chuan min ti phur zual.




Tlaiah Ufamkima a rawn peng kawi leh zawk a, kan dawra lo kal ngei ngei turin keiin ka lo chah ve bawk, "Rosy ka lo hrilh dawn nia, dawr thar i nei dawn tih ka hrilh pawn a lo phur khawp kha" a lo ti var a, ka Present tur erawh engmah ka la hrilh rih lo thung.




An inneih cham chu zirtawpni a ni a, chumi hma chuan dawr chung chu hawn hman ngei ka tum ruh hle tawh, cheimawi tur neuh neuh a la tam hle a, ka hmanhmawh tawh em vang chuan thildang ka buaipui hman meuh lo. Umawipuiin min rawn puih vangin hun ka nei thei zawk mai pawh a, a zualpui tak tak chauh ka buaipui rih a ni ber e.




Kan Ceiling leh Wallpaper mawlh mai chu min fak sak hlawm a, min siamsak tu min zawt an awm nawk mai, kan Mistiri chhawr man kha to ka ti viau tak nain inchhir awmloh tak chu a ni.




Ningani tlaia inchung Light ka han ti thim tur chuan; tukverh darthlalang aṭangin ka beisei loh deuh ka zuk hmu a, koh ka tum zet tawh chu a awmdan chuan min ti tim leh rih a, a che zia chu a ngaihna hre lo deuhin ka thlir reng bawk.




Urosy chuan kan dawr kawt a ding chungin dawr lam chu a thlek dak dak a, mi zawn nei ang mai a ni, Ufamkima a rawn zawng anih ka ring deuh a, engah nge maw a rawn luh mai loh chu ka ti rilru a, a Phone leh kan dawr chu a bih tawn chhen reng bawk si, a awmzia ka hrethiam hauh lo, min lo biak a tum em maw ni tiin ka Phone ka bih ve thuai a, vawikhat mah min Call bawk si lo, inhnuaiah Ufamkima a awm a nih ka ring ta deuh.




Light ka Off hnu chuan ka chhuk thla thuai a, Ufamkima reng reng chu ka hmu ta bawk si lo a, pawn lama ka va dah chhuah chuan Urosy pawh chu ka hmu zui tawh chuang lo, nichin lawk khan a la awm reng si a, lo lut loa a kal leh daih chu mak ka ti zual bawk, nidangah chuan helai hnaia an lo kal chang apiangin min lo tlawh ziah ṭhin kha a nia, ti nge maw a let leh daih chu le?




"Ufamkima a lo kal a mi?" Umawipuii bula ka tih chuan "Kal nang, ka lo kal dawn a ti leh pek a mi?" bak deuh hian a lo ti a, ka chhang lem lo, pawnah chhuakin ka va hawikual vel a, hmuh ka neih tak loh ah chuan rilru buai deuhin ka dawrah ka lut leh a, ka lut fel awrh tih ah Ufimkima ngei mai chu a rawn lang ve leh hlawl mai!




"I bang chiah a mi?" ka lo ti hluai a, "Bang chiah lo deuh, Seminar-ah ka kal a" a ti sam mai a, chumi hnuah a chhang lei fo ṭhin chu min fun tir a, "Duh aiin ka tlai deuh a Coffee chu ka inrih lo mai teh ang" a tih chuan ngawirengin pawnah ka zui chhuak a, "Naktuk chu in lo kal dawnah min lo hrilh ula, dawhkan nuam ber kan lo ti awl dawn nia" tiin a kal tur chu ka chah sa thlap a, i he lovin a lo aw ve mai bawk.




A Motor lampana a kal lai chuan ka thlir zui reng a, Ufamkima hi mi rethei leh mi hnuaihnung a ni lo, ṭanpuina mamawh a nei a zeng pawh a ni lo, sum leh pai lamah ngat phei chuan keini nena khaikhin rual a ni lo bawk, mahse, enga tinge khawngaihna leh lainatna rilru hi a lakah ka put tlat mai le? Tun hma a ka rilru put ṭhin tho kha a ni, a hmel ka hmuh hian khawngaihna mak deuh ka nei ṭhin.




Motor a a lut tur ka thlir laimek chuan kawngpui chhaklam a ka thil hmuh chu ka en nawn leh ngat a, Urosy ngei a ni, ka hawi chho min hmuh veleh ah a hawisawn vat a, Footpath a a kal phei zui hlawk hlawk chu bangbo lutukin ka thlir reng ringawt.




Ufamkima a tlan liam hnu thleng chuan ka dinna ngaiah ka la ding a, thil a kal dik lo dawn tlata hriatna ka nei, enga tinge Urosy kha khatianga a awm, ka dawr kawta a lo ding te, lo lut lo a a kal leh daih te kha, engemaw thil fel lo chu a awm ngei a lawm, tunah pawh khan Ufamkima nena kan inzui chhuak kha Footpath a ṭangin min lo thlir reng a nih kha, ani pawh hian min lo ngai kawi tihna em ni ang?




Ka ngaihtuahna a buai ta map mai, Urosy kher hi chuan hetiang hian min ngai ve lo turah ka lo ngai a, venthawn nachang takngial pawh ka lo hre lo chu a nia, an nupa boruak a khaw loh phah mai angem tih te chenin ka ngaihtuah kual a, ka inthiam lo lutuk chu ka ipik ṭeuh mai.




Dawr kan khar dawn thleng chuan ka inngaihtuah buai hle a, ka thaw te chu a ipik mup a, thil dang ka ngaihtuahsan hleithei meuh lo, ka Phone chu a khat tawkin ka bih leh ṭhin a, Ufamkima lah chu a reh vung vung bawk si, an nupa kar a ṭhat leh ṭhatloh chu kei atan va zawh ngawt chi lah a ni si mang si lo a.




"Aumawi, Ufamkima kawm hi a mawi lo viau a mi a?" ka ti tawl mai, Kuhva ṭhial niau niau pahin min melh rulh a, "Zothankimin a rawn bia che a law?" phawk deuh hian a lo ti let a.



"Hmanni ah a lo kal a, i bulah engtin nge a sawi?" keiin ka lo ti let ve leh thung.



"Ani thil sawi mai mai engah mah ngai duh lem suh, ani pawh mipa ngaizawng reng rengin a lawm a khawsak" a ti sam mai a, ka zawhna chhanna erawh min pe hauh lo.



"Ka zawh che chu, thil mawi lo lutuk a ni em?" ka ti nawn leh ta kher a.




"Mawi lo khawp khawpa inkawm te chu a chi loh a lawm, Phone-a inbiak reng te, inhmuh zut te kha a ṭha lo a, hetah a rawn leng ngun viau a mi?" a tih chuan lu ka lo thing vat a, "Leng reng hran lo e, nichina a lo kal lawk ang kha a ni mai, a chang chuan Coffee in in a ṭhu khawmuang ve ṭhin bawk a" tiin ka lo insawifiah luam a, tunah tak hian mahni inthiam chawp ka tum hle tih chu a hriatthiam ve mai ka ring.




"Kawm tam tawh lo la chu ka duh, ka duh dan tak phei chuan ngaihzawng dang nei vat la ka ti, anih loh chuan mite hian an ngai kawi zel dawn che a, i nihna lo ang deuhin tunah pawh an chhuah ṭan der tawh che hi, ngaihzawng dang han nei la chuan Tihdanthiama nen tuman an sawi zawm tawh lo ang che u" thutak deuh a a tih pawh chuan ka rilru a zawhna awm reng chhanna chu ka la dawng chuang lo.




"Aumawi, Urosy hian a lo ngaikawi ve angem le, hetia Ufamkima nena kan inkawm hi a tan a ngeiawm angem?" ka ti leh thawr a, kan sawi kan sawi takah phei chuan ka rilru a buai takzet tawh.




"Ka hre lo le, a pasal ngaihzawng hlui i ni ve bawk si a thikna chen chu lo nei ve mah se a demawm loh ang, in inkawp lai pawh khan a lo thik fe tawh maithei che a" awmze nei deuh a min melh ralh ralh chungin a ti leh a, a thil sawi chuan ngaihtuah a ti thui viau a ni.




Zanah chuan mut hmunah ka ngaihtuah zui zel a, Ufamkima hi ka kawm tawh lo mai dawn em mawni ka ti ta hial a. Mahse, ani nena kan inkar ngaihtuahin lo biak duh lo ringawt chu, a chhan min zawt ta si se insawifiah a ngai nasa dawn hian ka hria.




Urosy chuan ka hnenah engmah a rawn sawi lo a, zawhna emaw pawh a rawn nei chuang lo, mi puitling ngang a ni a; ka hriatpui loh lamah a lo insum ru viau zawk te pawh a ni mahna, min lo zawt sela insawifiah te pawh ka duh rilru hle a, mahse, min lo zawt tak tak chu nisela ka zak ngawtin ka ring.




Zirtawpni chu hmanhmawh deuhin ka kalchhuak a, zing aṭangin dawr chungah ka tap leh chawt a, chhaklam tukverh bula dawhkan inhung chu lo tiruak reng turin kan nula ho ka chah thlap bawk.




Chawhnu lam thleng chuan Ufamkima te chhung an la rawn lang lo a, a hna ban hunah an lo kal dawn anih ringin ngaihṭha deuh chuan ka awm veleh mai bawk a, an tan eitur Special tak kan Menu a kan la telh loh chu ka siam tir a, an dawhkan tur pawh peihfel sa diamin kan dah awl ran bawk. Mahse, tlai dar 4 a rik thleng pawhin an la rawn lang lo a, engmah chanchin an rawn sawi bawk si lo chuan rilru a kap ru reng tawh.




Dar 5 a rik takah chuan a ni em em lo deuhin ka hria a, Ufamkima chu ka va Phone ta ringawt a, thawm a beng chhen deuh vangin a ṭawng ka hre maithei lo, a kalsawn a niang rei vak lo hnuah chhuan a aw ka hre fiah thuai a, "Mimi, ka lo hrilh dawn chiah che a, hei i Urosy-in Hotel-ah chaweina tur a lo Book tawh a, kan rawn kal thei dawn lo tlat mai" lehlam aṭang chuan a rawn ti a, a inthlahrun hmel khawp mai.




"Aw..a ni maw..ka lo ngaichang ru deuh che u a" tiin ka chhang a, ka lo inbuatsaihna erawh sawilan chi a ni tawh lo.



"Nidangah i dawr thar lawm pahin kan rawn kal zawk mai dawn nia aw, min lo Surprise ve bawk si a, ni lo sela chuan kan rawn hrilh vat tur che a nia" a ti niah niah a, a pawiloh thu ka lo hrilh ve thuai a, kan inbiak zawh hnu chuan ka hnual rawih rawih in ka hria, Urosy mawlh chu a ni ka ngaihtuah ni, mahni inthiam lohna lian deuh ka nei reng a, lo kal sela chuan hlim takin kan inbia anga, an inneih cham lawmpuina ka hlan hnu chuan kan boruak pawh tunhma ang a ni leh turah ka ngai a. Mahse, tum loh ang zawng hlirin thil a kal zel mai.



ZAWMNA



Inchung kan hawn ṭanni a ni bawk a dar 7 thleng kan inhawng a, Umawii chu an pain a lo lam vangin keimah chuan ka inkhalh haw a, ngaihtuahna ka lo kawm nasa deuh a ni mahna, ka nguaiin ka engtih tha mah a tho tawh lo, in ka thlen hnuah zanriah pawh ei tawh loin ka mutsan a, khuma ka mut hnu pawh chuan ka muhil thei leh lawk chuang lo.




Movie ka lo entui deuh a niang ka Message Tone chu ka hre mai lo a, ka en chuan Massage pathum lai a lo awm a, Urosy hnen aṭangin a ni, thlalak te pawh a rawn thawnin ka hria, zanin tlaia an chhuahna thlimthla vel min lo thawn anih ringin phur tak chuan Phone ka la kang a, a Message ka hawng chiah erawh ka tum loh lutuk thil ka hmu thung!




Ufamkiman dawr chhunga Silver ṭhi min awrhtir lai kha chiang lutukin thlalakah chuan a lang a, ka hmuh rual rualin ka lungphu chu a su dup dup a ni ber, ka hlauthawngin min ṭhawng lutuk chu ka bing mup mai.




Message dangah chuan sei deuhin engthil emaw a rawn sawi a, chhiar hreh eng ang mahila ka chhiar ngei a ngai si, a rawn sawi tur awm ang erawh rin dan ka nei thiam ruak tawh a, ka hlauthawng lehzual bawk.




"He thil hi sawifiah rawh, mi thil sawi rin mai hi ka duh tawh lo a, ahma a ka lo tihsual tawh vangin ka fimkhur zual bawk, nangmah ngei hian eng nge thil awmzia sawi la a ṭha ang, ka ring che a; hnunglam aṭanga min lo phiar ruk loh hram ka beisei a nia."




Message dang leh ah chuan "Ka ngaichang reng che u a mahse, ka beisei loh ang thil ka mit ngeiin ka hmu hnem tawh, ngawihbo pui mai chu ka thei tawh lo, kei leh ka fate tan hian eng pawh ka inhuam tawh a nia, tun hma ang kha chu ka ni tawh lo ang" tih ang reng a ni, a Message tawp lam phei chu a Type sual nasa hle a, a rilru tur awm ang chu ka ngaihtuah phak lo ang. Mahse, a rilru ka hliam nasa tih erawh ka hria.




Message chu ka chhiar nawn leh ṭhin a, tih ngaihna hre lo lutukin thawk ka la leh hluai ṭhin, Urosy chuan min haw viau dawn a nih hi, insawifiah dan tur mawlh chu ka bangbo a ni, Ufamkima nen kan inkarah engmah inngaihzawnna lampang thil a awm loh thu va hrilh ta ila min lo awihsak duh a ngem?




Ngun taka ka ngaihtuah hnuah min awih emaw awih duh lo emaw insawifiah chu ka tih makmawh a nia lawm tiin ka Call ta ringawt a. Phone chu ka bengah chuktuahin ka ngaichang ran bawk. Mahse, a rik zawh hma hauhin Call chu a tawp a, ka Call nawn leh pawhin lehlama mi chuan a hmet tawp nghal zel a, a ngaihna ka hre lo hle ringawt.




Rilru buai deuha ka awm laiin Message dang a rawn thleng leh a, "Kan mu tawh, Message-in sawi mai rawh" tih zawng hi a ni leh a, bul ṭan mai dan tur ka hre lo takzet, ka bangbo lutuk chu ka tawt up up mai a, ka thawk te thlengin a hah zo tawh.




"Urosy, i ngaih ang thil kha engmah a thleng lo, min ring rawh khatiang kha chu engmah a thleng ngai lo ang" tiin bul ka va ṭan hmasa te te a, a chhan letna ka nghak zui ran bawk.



"Thlalak khi eng nge a awmzia?" a rawn ti leh khawl mai.



Ufamkima nen dawra kan inhmuh fuh ṭum anih thu te, a ṭhi tur ka thlanpui thu te chu ka va sawifiah duah a, chumi rualin a ngaihang thil engmah a pasal nen kan inkara a awm loh thu chu uar takin ka sawi tel bawk a, min rin theih ngei ka beisei.




"Tlai tin a lo kal a, mi te hian min hrilh ve zel a, ka tan pawh a zahthlak ve riau a, in inkar chu engpawh lo ni se, a hmeichhia zawk mualpho awlsam zawk kan ni a, Ufamkima te chuan khati lam a rawn ngaihtuah thleng pha ve kher lo ang, chuvang chuan biak dan tawk leh kawm chin tawk lo hre mai rawh, mi sawisep kan kai ngun lutuk hi a hrehawm emai, nangma tan tak pawh a nuam bik lo ang" a rawn ti duah a, a ṭawngkam aṭang chuan a insum hle tih ka hria, kei erawh ka zak ngawih ngawih thung.



Urosy chu ka zah takzet, a awm ti nuam lo khawp a a pasal ka lo kawm chu ka tih loh tawp tur thil a ni, hetia ṭha taka min lo sawipui tu zawk ala ni thei hi a zahawm ka ti a, a lakah ka inthlahrun phah sauh bawk.




"Ka lo fimkhur dawn nia, i ngaih ti ṭha lo duh miah suh aw, in nupa kar ṭhat hi ka duh ber tih min lo hriatsak la" inthlahrung taka ka tih leh chuan a chhanna ka dawng mai lo, Minute sawm dawn ka nghah hnuah Typing tih a rawn lang leh a, eng tak rawn sawi leh ang maw tiin thinphu dep depin ka lo nghak ran a, chutih chhung zawng pawh chuan ka chungrila zahna chuan min hnawh tawt urh reng mai.




"Mimite, in inkawm ka huat vang hrim hrim a ni lo a nia. Mahse, kan tunhma dinhmun zawng zawng min hriatpui tu i ni a, ka awmdan hi min dem suh aw, ho teah pawh ka hlau thawng hma a, ka fimkhur tawh zia pawh i hriatthiam ka ring, Ukima lo kal ṭhin hi ka chhung te beng hial a thleng tawh a, nakin zela kan boruak a chhiat loh nan i kawm tawh lo thei mai angem, ka inthlahrung viau na a kan vaia tan a ṭhat zawk ka ring a" a tih leh chuan chhan let dan tur ka hre tawh lo.




Mit chhingin ka inngaihtuah vang vang a, engkim Urosy rawn sawi a piang chu i he lova zawm tur niin ka inhre bawk si a, hetiang thil ka laka ngen tur hial khawpa a rilru ka ti chiai erawh ka zak ngawih ngawih a ni.




"Ni e, chu chu a ṭha ber ang, mi sawisep kan kai tawh bawk si a" tiin a Message chu ka chhang let a, ka inbiakna ka chhiar let leh laite pawh chuan ka ṭah a chhuak hlur tawh, an nupa kar ṭha sela hlim takin awm sela tih kha ka duhthusam ber a nih laiin tlem a tlemah buaina zakhua ka thlen sak lo chauh zawk a, keimah vangin an nupa kar a chhia a nih ngat chuan ka inthiam thei ngai lo ang.




"Ukima hnenah ka rawn biak che hi sawi suh aw, kan pahnih thuruk ni rawh se" a tih chuan ka sawi loh tur thuin ka chhang leh a, "Tlangval pakhat hmelhriat tir tur che ka nei a, i Number ka lo pe ang aw" a rawn tih erawh ka chhang mai lo.



Rei vak lo ah min lo Call a, ka lak rual chuan "Bathroom ah ka lut a, midang an mu tawh sia, ka tih harh ka hlau a" a aw chu a zawiin a ṭial ruan a, Bathroom chhung a a awm vang a ni maithei.




Ka ṭawng ve hma hauhin a rawn sawizawm leh a "Ka hmelhriat tir duh che chu, Ukima te thawhpui a nia, Ukima aipawn a hlawh a sang zawk, a nupui hlui pawn pasal dang a nei tawh, fa an nei hman lo a, palian deuh sar veng vawng, i hmelṭha tih chi tak anih ka ring, a fel lutuk" a ti siam siam a, a rilru sukthlek ka hriat tawh miau vangin a ngaihṭhat nan ngaihzawng ka neih mek thu ka hrilh ta ringawt mai.




"Tu nge, ka hre ve thei em?" a rawn ti hluai a, "I hriat ngai a ni lo ang, mipa Simple deuh a nia, remchangah ka la hrilh ang che" ka ti leh ringawt a, ka ngaihtuahna chu a ruak zo vek tawh.



"Bialpa i nei tih ka lo hre miah lo a" a ti leh hap a, a aw chu a inthlahrun hmel tawh khawp mai.



"Nia, kan inzuina pawh a la rei vak lo" ka ti ve leh a, za lo zetin ka nui bawk.



"Ukiman a hmu tawh em?" ṭi daka a rawn tih chuan thawk ka ip ngar ngar a ni ber, "Hre lo e, ani chu a buaithei lutuka, kan inhmu tam thei rih lo a" ka aw chu a ri che che chauh a ni.



"Dawr thara kan lo kal hunah min hmuh tir ve la, hmuh ve te pawh a chakawm a lawm" a ti leh a, a phur hmel khawp mai, chu chuan ka awm a ti nuam lo hle thung.




"Ni e, kan la inhmu tlang dawn nia" ka ti ṭha veleh mai a, nichin lawkah khan Ufamkima kawm tawh lo tur khan min duh a, tunah inhmuh khawm a duh leh lawi si, heti tak hian a rilru ka lo ti chiai chu a ni veitak sia, a zia lo takzet.



Kan inbiak tawp dawnah chuan karthar lama an lo kal tur thu a sawi a, kan inbiak tirh ngawt aichuan biak a nuam sawt viau mai a, chu chuan tlemin ka awm pawh a ti nuam ve deuh, kan inbiak zawh hnuah erawh ka tawt ṭeuh mai, ngaihzawng nei anga ka insawi khan dawt chiang lutuk ka hrilh tlat a ni.




Ka mengrei hle a, ka muhil thei lawk lo, ngaihtuahna kawmin khumah chuan ka inlet tawn chhen reng a, a khat tawkin thawk ka la leh hluai ṭhin, chhan sawi fak tur awm si loin ka rilru a hah a, inbun ruahna tur leh thurawn lakna tur awm sela ka ti bawk, heng thil thuartham vel hi chu Umawipuii sawipui chi ah ka ruat tawh lo, min lo chhan dan tur ka hre sa tawh, midang hnena inbunruah aimah chuan Ufamkima te nupa laka inthiarfihlim chu ka buaina chinfel dan ṭha ber niin ka hre bawk.




Zinga dawr ka kal chu ka thleng fel awrh ang tih ah Msa a rawn lang hlawl a, a Office kal tur a rawn peng anih hmel e, "I mut a va chhuah hmel ve" nuisanga tiin ka bula ṭhutna awlah chuan a lo ṭhu a, "I va hma ve" tiin ṭha deuh chuan ka lo chhawn ve a, a hmel ka en chuan thil awm ang lo deuh ka ngaihtuah chhuak a, a tih chi ber angem tih ka hrethiam chiah lo.




"Zanah lo len i phal em?" min en vung vung paha a tih te chuan ka lo ka hau ringawt, ani hi ka buaina chinfel nan chuan a ṭha thei mai angem le?




Mipa fel leh zahawm tak chu a ni ngei mai a, a mizia pawh a ṭha viauin ka hria, hnam dang a ni tih lohah chuan inmil lohna em em kan neih awm ka hre lo mahse, min daidang tu hi a awm a ni, ka nu leh pa te bulah chhuang takin a hming ka sawi ngam dawn lo, ka mi hriat tawh a zawnga hnam Feelings pe na ber mai ka pa hian a pawm thei dawn lo tih chu chiang sa a ni.




"Zanin chu inkhawm zan ania" ka ti tawi tak a, a nui heu mai.



"Anih chuan zan dangah a ni mai, i hman hunah" a ti ve mai a, ka nuih liam mai thung, ka thil ngaihtuah mek hi hria se mak chu min ti ve khawp ang le.




Rei awm loin a kalchhuak leh thuai a, a chhuah hnu rei vak loah Umawipuii a lo thleng zui a, a ṭawng bawrh bawrh ri te chuan ka thawk a ti pik zual in ka hria, inchung lamah ka chhohsan ta thuai a, fianriala ka awm tak hnu chuan ka thaw huai huai mai a ni.




Chawhma chhung zawng chu inchungah ka tap chawt a, thil ei tur pawhin ka chhuk peih meuh lo, inchung lamah Customer kan nei ve reng a, kan nula ten an vil hneh bawka tiin kil khatah chuan ka ṭhu reng thung a, ngaihtuahna a kal thui duh ṭhin khawp mai.




Heng inngaihzawnna leh hmangaihna thil ah hian ka tluang lo nge ni a, ka tana ruat hi ka la tawng ve miah lo zawk tih te ka ngaihtuah kual a, tunah pawh a ṭulna in min nang ni berin ka hria, keimah vanga Ufamkima te nupa inkar a chhiat ka duh lo a, chumi pumpelh theihna anih phawt chuan ka inhuam thui hle bawk, ka tih makmawh ni a ka hriat lah chu a chauhthubarawh hle in ka hre bawk si a, Urosy ngaihṭhat nana dawt ka sawi ringawt mai kha ka ti fuh ta vak lo chu a ni.




Msan min duh zia ka hai lo, duh ngat ila chuan awlsam takin kan inkar chu thlunzawm mai theih pawh a ni, mipa dang ngaihven tur chuan hun neiin ka inhre lo a, Msa lakah Fair lo taka chet lak chu ka hreh riau mai bawk si, a chhan chu ka duh tak tak lo a, a tir aṭang phatin hman ṭangkai ka tum chu anih ber hi maw..




"Umimi, Umawipuiin a ko che" rawn ti ri ah chuan ka hawichhuak vat a, "I ṭhiannu a lo kal a" kan nula chuan a lo ti leh a, tu ka ṭhian nge lo kal ang ngaihruat ngaihna ka hre hauh lo, Ukimkim em mawni dawn le?



"Zothankimi maw?" ka lo ti he haw a.



"Ka hre lo, sang deuh hmelṭha tawk mai" a tih chuan ka bangbo leh zual. Nuntluangi ti dawn ila hmelṭha tawk ti a han sawi vul chuk tur niin ka hre mang si lo a.




Inhnuaia ka chhuk chu tum loh deuhin Suzanne-i kha ka zuk hmu nawlh a, Counter bulah Umawipuii nen ṭhuin an lo inbe mawlh mawlh a, min hmuh rual chuan a lo nuisang bawk.



"Tehhlawl che chuan!" ka ti hluai a, "Tehhlawl nang, hei ka bazar zo chiah a, uisa i ei ngai em?" a lo ti var a, zawhna ngah deuha ka en takah chuan "Chaw eiah ka sawm che kha, i aw vek tawh kha aw" a lo ti leh zat a.



"Mimitein sa a ngaina vak lo a, Uisa chu a ei ngai lo" Umawipuiin a lo ti chu ka khap hman lo.



"Bawngsa leh Arsa ka lei tel a lawm, inah pawh Vawksa rep kan la nei" Suzanne-i bawk chuan a lo ti leh a, hmanni khan a thuphungin min sawm mai mai emaw ka lo ti a, a lo ti tak tak anih hmel e, keilah chuan ka lo theihnghilh hmin der tawh.




"Eng chaw eikhawm nge, in in Classmate a mi?" Umawiin a tih chuan lu ka thing mai a, "Keini chu Soulmate zawk kan nia" ka ṭhiannu in a lo tih ve chuan ka nui tawi tak ringawt, kan la inkawm tam lo bawk nen an in a chawei chu ka hreh deuh riau mai.




"Kan pa Birthday a nia, ṭhian ṭha te kan sawm ve a nih hi" ka ṭhiannu chuan a ti leh a, ṭhianṭha a min ngai si chu kan ni lo lo tihsak chi a ni bik lo ang.




"I lo haw har a ngem?" ti a Umawiin min zawh chuan "Dawr lo khar mai la, ka haw tlang nghal mai ang" ka ti ta ngawt a, rilru tih thawven deuh nana chhuah harh chu mamawhin ka inhre ve reng reng, ka inngaihtuah na lamah ka lu a na zo tak ngial dawn.




Choka ah ka va inphih harh hmasa zeta, ka hmai ka chei leh thuak hnu chuan ka inpeih chu a ni zui der, chawei chhuah inring a kalchhuak ka nih loh vangin ka nalh fahran lo khawp mai, Umawipuii Bag ka ah sak a, tlem chuan ka ziaawm deuhin ka hria.



Suzanne-i Motor-ah chuangin an in lam kan pan vang vang a, Chanmari kawnah engthil emaw leiin a ding leh rih a, Birthday Cake nena a lo let leh laichuan Motor ah ka lo nghak ran a, "Cake hi lo pawm mai rawh, a pherh palh ka hlau" a rawn tih chuan ka lo ban ve thuai bawk.




Ka cake pawm laichu a chhin kau lai aṭang chuan ka bih dek dek a, thil inziak ka hmu chu ka nui huk lo chauh "RAMTUMBULIANA" tih hi lian fahranin a lo inziak a, a kum zat lah chu a han tam em em khawpa.




Ka ṭhiannu te in luah kan thlen chuan dar khat a pel tawh a, an inluah chu chhawng hnih niin a chung zawk an luah a, a hnuai chu Workshop niawm tak a ni, inchung chu a zau ṭha khawp mai, hmeichhe che fel leh thil changkang hre takin a enkawl tih hairual a ni lo. An inchhung bungrua en mai chuan chhungkaw khawsak nuam tawk tak an ni tih a hriat theih bawk.




"Engzat nge cheng che u?" ka tih chuan "Puitling pathum leh naupang pakhat" a lo ti var a, zawhna ka nei niin a hre deuh aniang "Kan pa u a awm ve a; mahse, hna thawkin a chhuak renga inah a awm ve vak ngai lo, nimimah Seling aṭangin an lo haw chiah a" a ti leh sap sap a, chutih laiin an Showcase a pangpar khawi te chu ka lo thlek kual a, an nupa thlalak a intar vang bawk.




Ka ṭhiannu Suzanne-i hi nulian ti a sawi ai chuan sang tia sawi a fuh zawk ngei ang, sapan lam niin a ngo vur mai a, a samdum chhah ṭha tak chuan a vun rawng a ti langsar zual a, a ngo vur mai bawk. A hmelṭha hle a, mizo hmeichhia ka hmuh tawh ah chuan hmelṭha pawl tak niin ka hria, chu zawng aia a ngainat awmna chu a mize nung tak leh hlim hmel a pu reng thei hi a ni, a ṭawng duh bawk a, la inhre rei lo viau mahila ṭhianṭha tak ang maiin ka kawm ve thei tlat a, ṭhian siam ka harsat ṭhin tehlul nen ani hi chu ka hmuhtirh phat aṭang khan ka nel nghal a, a sawi ang tak takin Soulmate te pawh kan lo ni maithei a ni.



"Uisa hi kan pa hian a duh lutuka, a eiturin kan siam anga, kan eiturin Bawngsa kan kang dawn nia, Áu ei tur chu vawksa rep ala awm tho bawk a" chet mawlh mawlh pah a a tih chuan "A va hautak duh awm ve, keichu a awm awm ka eithei a nia, sa kher pawh a ngai lo asin" ka lo ti thuai a.



"A harsa lo lutuk, eisiam te chu ka hnehsawh a lawm" tih pah chuan Youtube ah Uisa siamdan a en a, a inzir chawp dawn anih hmel.




Eirawng kan bawl duna, keiin thlairah bai leh Salad te ka lo siam a, ani erawh Uisa siamin a buai khawp mai, chaw ei ve tur midang lah chu ka hmu miah lo a, tumah midang an sawm lo zawk nge ni, a fapa lah chu "A pi ten a la phei a, zanah an lo dah ang" a ti chauh a, "Midang an lo kal dawn em?" ti a ka zawh leh chuan "Nangmah chiah ka sawm che, ka ṭhiannu te an zin lai a nia, Muantevela a hman bawk si lo a, duh leh nakinah a hranpain an lawm ve mai ang" a lo ti sam et a, chutia keimah chauh min sawm chu nuam ka tihna leh tihlohna a inzat velin ka ring.




Dar thum bawrah a pasal chu a lo haw a, min hmu chu a bangbo deuh riauin ka hria, "Happy Birthday" ka ṭhiannu chuan a lo ti hlut a, "Ringawt a" tih zawngin a lo chhang a, lawm hmel pawh a pu lem lo.




An pindan lamah an inzui lut a, an ṭawng ri erawh ka hrepha reng a, ka ṭhiannu zawk chuan a be seuh seuh reng, pakhat lah chuan Birthday lawm chu engteh ualah a ngai lo ni tur a ni. "I phuahchawp a ni lo maw, ka piancham te em chuh...ka Brith certificate te hi i lo thlak tawh hial ang a" a ti bul bul a, chumi hnu chuan an inchhaih nge ka hre lo an thawm a zawi sawt viau tawh.




An lo chhuah leh hnu chuan an pa chuan min lo chibai a, "I va fel ve, eirawng bawl te chu ti ve duh mahta che, lo ṭhu mai mai rawh" a lo ti sawk sawk a, Suzanne-i pasal hi College Professor a ni a, a hmel aṭang reng pawhin mahni thu duh ve chi leh in la pa ve tawk tak anih ka ring, a hmel chhe lo a, a zaidam viau chuan ka ring lo thung.




Dar li velah chuan tukverh thlang lamah thingpui in pahin kan ṭhu chhuak a, an pa chu a insu niin ka hria, a in lak pa viau ka rin nen, ka ring sual deuh nge maw ni!



"A thawmhnaw chu aman a su vek zel, i sufai zo lo a tia, kuta suk a duh ṭhin a" ka ṭhiannu chuan a ti leh mai a, "In la Boss deuh chi anih ka ring a" ka lo tih chuan a nuih a za ngang mai. "In la Boss tehreng mai mahse, ka kid a ni bawk sia lawm" nui chunga a tih laichuan a intithei deuhin ka hria.




Chutih laichuan "Pi Zari Dawrah Tumbu ka rawn hmu a, a tlai hmain han lei la" choka lam aṭangin an pa chuan a rawn ti lauh lauh a, ka ṭhiannu chu a ner nasa hle ringawt, an pa chuan Tumbu a ngaina hle aniang chu a hming pawh Ramtumbuliana a ti ngat kha a nia.




"Áu kha chah la, rawn lam thla mai rawh se" ka ṭhiannu chuan a ti let a, "Tumbu hi ka hne lutuk, SLE damdawiah a ṭha an tia, a tui bawk si lo a" ka lam hawiin a ti nang nang a, damdawi atan a hmang tihna a nih hmel.




Thingpui kan inzawh hnua kan lut leh chu tui intumin Fridge ka hawng a, chutih laichuan kawt lam Veranda ah mipa ṭawng thum bul bul ri ka hria a, "A va lo haw hma e" ka ṭhiannu in a tih laichuan kawngkhar lam chu ka va hawi a; chutah, rawn inpawt hawng rawkin mipa ruangam lian deuh hi a rawn lang hlawl a, ka hmu chu min ti phu chiang ngei mai!




"Ehe...Mistiri..!" ka lo tih hluai laichuan kei aimahin mak a tih hmel zawk.






(End of Chapter - 3)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 6th, 2022, 7:43 pm

ZUNZAM - by Ahmangaihi violette Khiangte


CHAPTER - 4




"Eng nge i lo tih a?" ti a min zawh laichuan min en chik khawp mai, ka chhan hmain Suzanne-i a rawn inrawlh a, "In lo inhre tawh a law, engtin nge in inhriat a?" phawk deuh hian a lo ti a, chhan mai nachang kan hre lo ve ve aniang chu kan ngawi reng ringawt.




"Mawh u, engtin nge in lo inhriat?" a rawn tih leh chuan ka nui ta ringawt a, Mistiri erawhin ka ṭhiannu nen chuan min entawn zak zak thung, zawhna ngah deuh hmel a pu tih pawh ka va hmu thiam a, tuna a landan chu ka hmuh hmasak dan aichuan danghlei tak a ni, a hmuihmul leh khabe bul buk zet kha a lo paih ṭhen tawh a, a fai vuk in ka hria, hnathawh kawr ha loin a inchei nalh hle a mahse, a landan danglam tak vang chuan ka hai chuang hauh lo.




"Kan dawr chung kha Ceiling min siam sak a?" tiin ka ṭhiannu chu ka lo chhang a, nuisanga Suzanne-i lam ka va hawi laichuan Mistiri nen an lo inmitmei ralh chu ka va hmu hman tlat, Mistiri lam ka hawi leh chuan ṭhutthlengah a lo ṭhu tawh a, a meng nur hle bawk.




"Mimitei hi a lawm ka hrilh ṭhin che kha" ka ṭhiannu in a tih chuan ka hrethiam ta meuh lo. "Kan pa u a nih hi" ka ṭhiannu chuan a ti leh var a, kei ka lo bu nghat thung a, tun maia a thil sawi dan erawhin rilru a ti buai deuh a, engthilah nge ka chanchin a lo sawi ang tih ka ngaihtuah rauh rauh a, a ngaihna ka hre lo hle mai.




"E, i va lo haw hma ve, chaw in ei nghal tur ah ka ngai a" rawn ti chu Ramtumbuliana kha a ni.




"Zopuiin 'Chaw ei nghal suh' min ti sia, an chaw ei dawnah ka rawn haw a lawm" pakhat chuan a lo ti thum dut a, a ṭawng lai zawng pawh chuan min la rawn en a, chutia min en reng vang chuan ka awmdan a lai deuh riau a, ka en ṭha ve vak ngam tawh lo.




"Âu hian Mimitei te dawr Ceiling a lo siamsak tawh a, an lo inhre sa tawh a lawm" Suzanne-in a tih chuan Ramtumbua chu a rawn hawi vut a, "Chuan engtin?" a tih zauh chu Suzanne-i zawk chuan ban a lo vai a, zaizirin sawi tawh lo turin a lo khap niin ka hria.




"Insuk tleuh ang le" an pain a tih laichuan lai deuhin Fridge bulah ka la dinga, tih tur awm bawk si lo chu Sitting room ah chuan ka va ṭhu phei ve a, ka hma zawna ṭhu pa chuan a pheikhawk savun aṭanga siam chu a phelh mual mual a, hmelhriat sa a ni tak nain han biak mai dan tur ka hre lo, biak loh ngawt lah chu dik hlel riauin ka hre bawk si.




Ka va melh laichuan a rawn hawi chhuak ve vut a, ka lo nuih tawi tak ringawt, "Tui chu a put leh em?" a tih chuan lu ka thing vat a, "Bang in a dawl zawh aia tam ruah a sur tawh lo a" uang deuh a ka lo tih chuan a kiai ve suk mai.




"Zopuii ṭhian i ni tih ka lo hre lo a" a ti leh sup a, "A u i ni tih ka lo hre bik lo a" ka aw chu a zawi mah mah maithei, hepa ka biak hian nel taka biak ka tum poh leh ka khawr tlat zel, a landan Simple tak phena zahawm ru riau hian min ti ṭi ni berin ka hria.




"Insuk kan han tleuh lawk ange, lo inkawm ru" tiin ka ṭhiannu chuan Bathroom ah min luhsan a, an nupa in insuk an tleuh dawn niawm tak a ni.



Kan ngawihdun rauh rauh laichuan ka ṭhiannu te nupa chu; ka ṭhutna bang hnung lama Bathroom chhungah chuan an inbe ru sar sar a, an inbe ru ti ila kan awmna inhlat lutuk anih loh vangin an ṭawng erawh a hriat theih, ka chungchang an sawi niin a lang.




"An inhmeh dawn zia saw, en mah ta che, Usamua duhthusam ang kha a nia lawm, nula fel deuh a nia, taima bawk si" Suzanne-in a tih chuan ka lo zak ru chem chem mai, ka hma a ṭhu pawh chuan a hre pha ve vek ang chu, a Phone a bih a, hre lo angin a awm mai mai zawk a ni ang.




"A duhzawng te chu aman chhai ve ang hmiang, lo buai ve chung ṭhin suh" an pa chuan a ti hluk a, chawei a min sawm chhan chu ka hre chiang viau tawh, ka ṭhiannu hian a pasal u hi min sawipui a lo tum lek chu niin, a zia lo ka ti mange.




"Zawn pui loh te chuan a buai em a lawm, chu loah Mimitei hi ka duhpui a, ani aia ṭha hi chu an vang viau ang" a ti leh a, "Ka nu nghalloh" an pa chuan a lo ti leh hluk a.




"Ka nu sawipui te chu a duhzawng an ni ngai lo aniang chu, engmah tak tak anih pui ngai hleinem" Suzanne-in a ti hlak hlak a, "Nurse nen pawh an inbiak ve reng kha" pakhat chuan a ti leh a, "An inbe tawh ngai loin ka hria, hmanni a ka zawh pawh ngaihzawng ka nei lo a tia lawm" Suzanne-in a tih laichuan ka ep a ṭhu chuan thawk a la hluai a, ka va hawi rang khawp mai, min en lo in a Phone a bih tlat a, a zak ve deuh anih ka ring.




"I ṭawng an hre pha ange" Ramtumbua zawk chuan a ti leh a, ka hma a mipa ṭhu kun ngul chu ka va en leh zauh ṭhin, thaw an ti ipik zo vek tawh.



Veranda thlanglam hawichuan ka ṭhu ngawi reng a, min be mang si lo a, biak sek bik chu ka duh lo, Veranda ah chuan ka va chhuak dawn em mawni ti tein ka ngaihtuah thul, thawh tuma ka che uk tawh chu a lo ṭawng vang chuan ka tawp leh rih a, "Thingpui i duh em?" a lo ti ve teh tlat a.



"Ka lo in tawh a" ka tih chuan a tho vut a, ka enzui zel laichuan choka lamah a pen phei thauh thauh a, a lan theih loh chin a thlen takah chuan ka tawh huai ringawt. Ka ṭhiannu rilru ka hriat tak vang nge a hma ang khan ka be hreh tlat tawh, amah pawh hian nel a duh vak lo niin ka hria.



Chutia ka ngaihtuah laimek chuan a rawn lang leh hlawl a, "Lo phei la" a rawn tih chuan zawhna mitmengin ka lo en vat a, "Thil lo in rawh" tih leh inher a rual a, a kal nghal daih vang chuan zui ve loh theih pawh a ni lo.




Dawhkan bulah lo dingin no ah hian engtui emawni hi a chawk rak rak a, ka va kal hnaih rual chuan dawhkan sira Chair chu mitmeiin min lo kawhhmuh a, engmah sawi buai lo chuan ka ṭhu ve mai bawk.




"Thil thak i ngam em?" a tih chuan ka bu nghat a, a nui deuhin ka hria, no a chawh mawlh mawlh laichuan a hmel chu chik deuhin ka lo en a, a hmulin a hliah tam ta lo bawk a mipa hmelṭha tak a ni tih ka hmu chiang hle tawh, mipa pianthiam leh hmelṭha tak mai ti ila a landan chu ka sawifiah berin ka ring.



Ka hma ah chuan no chu a rawn chhawp a, a dang a ta tur niawm tak chu a chawk leh mawlh mawlh a, ṭi deuh chunga no ka lo bih laichuan "A thak vak lo, i duh chuan telh belh rawh" a lo ti leh a, a thil min pek chu sertui niawm tak a ni. Chair dang pawt chhuakin ka bulah chuan a rawn ṭhu a, a mi uap a na ngei mai, ka awmdan chu ka sawifiah thiam hauh lo, nuam ka ti lo hle ringawt.




"In rawh" a tih laichuan ka lo en ha a "Chaw kan la ei si lo a, pum ruah laia thil thur in chu a chi dawn a mi?" ka lo ti a, a no bih a a ngawih vung vung hnuah "A thlum chi pawh a awm a lawm" tih pah chuan a tho leh nulh a, Fridge a va hawn laite chuan bangbo deuhin ka lo en zui a, a che chu a dam thlup mai.



"Theibuhfai aw" tih pahin theitui bur hi a rawn lek vah a, a ser tui min siam sak chu ka lo in mai lo a ni ka ti leh hnuhnawh a, ka inthlahrung deuh riau.



Thei tui chu no ah thliin min rawn chhawp ṭha leh a, lawmthu hrilh pawh chu ka ngam chiah lo, min en zauh zauh a min ngaichang a nih ka ring, a hmuh laichuan ka in ta ngei a, kan no dawm chungin kan ṭhu ngawi leh ran tawh.



"Tun lai i buai em?" ka ti ta ngawt a, min lo chhang rang ngei mai. "Ka buai zo chiah, kar khat vel chu ka chawl ang" a tih chuan ka bu nghat nghat a, eng nge ka zawh leh ang tih ka ngaihtuah laimekin "Seling ah kan riak a" a lo ti leh a, ka nui ta ringawt.



"Ceiling in siam a mi?"



"Um, Furniture tlem a zawng nen" thil tih leh tui zawng in ang si lo chu sawi tur a vang ngang mai, a hmingin hmelhriat a lo ni ve bawk si a, kan inhmelhriat dan lah hi heti zawng hi a ni mai si.



"Dawr tu i ngah em?" a lo ti ve leh bauh a.



"Aw, a zia ve zel e, kum tawp lam hi chu kan zia ṭhin a" a lam ka va hawi laichuan a rawn hawi ve a, in melh hnai tak kan ni, ka mitah tak min enin ka hria, ka hawi let leh rang hle bawk.



"A hahthlak em?" a ṭawng bung lek lek ṭhin a, a tih dan ve reng a niang.



"Customer tam chang chuan hahthlak ve ṭhin e, nang zawk?" ka va en leh a sir lam min chhawn thung.



"Helper ka ngah rih a, indaih chuan a hahthlak hran lo" a ti leh mai a, sawi tur pawh ka hre tawh lo.Thil zawh chak deuh mai ka nei a, chu erawh ka zawt ngam lo nasa mai, ka zawh duh chu Suzanne-in engtin chiah nge a hnenah min lo sawi tih a ni.




"Nupui chu i la nei ta chuang lo a mi?" ka ti ta daih a, chiang fahran a min rawn en vang chuan ka tim deuh a, ka zawt ta sa sa tiin ka en kar bawk. "A la buaithlak ka tih kha" a nui suk a, engtak chu buaithlak ang maw.




"I hna i atchilh ve hle a ni maw?" ka lo ti leh a, "Tuichilh" tih zawngin min chhang a, ka ṭawng duh tawh rih lo.




"I ril a ṭam tawh em?" a rawn tih leh takah chuan a ṭam loh thuin ka chhang a, kan thil in ruahna no senga a tho chu rawn let lehin ka bulah bawk chuan a rawn ṭhu leh a, dawhkan a kan kut dah a han inhnaih deuh chang te chuan ka hit sung sung in ka hria, tum loh deuh in ka melh leh ṭhin a, ka ṭhiannu khan min tihpui a lo tum tih ka hriat vang nge mawni, ka hmuhdan hi a dik lo riau a, ka ngaikawi zo a ni ber e.



Bathroom kawngkhar ri rak thawmah chuan ka hawi vat a, ka ṭhiani te nupa lo chhuak chuan nui ruh ruh chungin min lo en a, an pa zawk chuan Mistiri chu a rawn melh deuh kherin ka hria.




"Insuk hi kan zar anga chaw kan ei dawn nia" tiin ka ṭhiannu chuan Veranda thlang lam a pan a, sana ka en chuan dar 5 a ri thuak tawh, ka inkhawm hman dawn lo bawk a ka hman hmawh duh ta lo law law. Umawiin min lo be lo a; an inkhar dawn hnai tawhin ka ring.




Zanriah eilai chuan kan ti ti bawrh bawrh a, Suzanne-i pasal pawh ka rin aitakin a ṭawng duh, a hmel en aiin nelawm phian mai, Mistiri-a erawh a ngawi rauh rauh reng a, biak chuan ṭha deuhin a chhang a, sawi tur chu pai tam lem lo tak a ni.




"Kum thar lamah in sak kan tuma, Republic ah inhmun pawh kan lei fel tawh a, in ding sa Assam type in ṭha vak lo a awm a, mi in an luah rih a" tiin ka ṭhiannu chuan min hrilh a, "Thingpui dawr maw i neih?" ti a Ramtumbuan min zawh chuan "Restaurant changkang deuh a nei a lawm, a hma pawn kan kal tawh kha" ka ṭhiannu chuan a lo ti var a, "Lo la leng leh rawh u, Menu thar kan ngah a nia" ka lo tih laiin Phone a lo ri a, Suzanne-in a chhan laichuan midang chu kan lo ngawi ṭhap tawh.




"Chaw kan eimek chauh, kan lo phei nghal ang" a ti tak sawk sawk vang chuan kan ṭhu ngil hluai hlawm.



"Bawiha a luak vak anih chu, Casualty ah U Faka leh Lily ten an hruai a" tih pahin a tho sawk sawk a, "Eisual a nei a ni lo maw?" ka tih laiin a pasal chuan a zui ve thuai bawk.




"Ka hre lo, eng nge maw an lo pek leh ni, engtin nge niang, keimahin ka kal maidawn nge?" a tih chuan "Kan kal dawn nia" a pasal chuan a ti thuai a, chutah min rawn enin "Mimite, kan han ngaichang lawk anga, kan lo let leh thuai ang aw, Áu in a lo pui che anga, thleng chu ka sil turin i lo dah tawp dawn nia, kan rei lo ang" a ti zung zung, "Aw, kal ru..heng chu ka ti thei vek a lawm" ka lo ti ve vat a, an insiam te chu an hmanhmawh dun khawp mai.




"USamu, thil kha i dil theihnghilh ange" an chhuah dawn ah chuan a rawn ti ṭawk ṭawk a, "Ava mak e, kal mai mai rawh" ti a an pan a nawr chhuah laichuan zaizirin engemaw hi a la rawn sawi mawlh mawlh reng. Mistiri nen chuan lehhawi meuhin ka lo thlir liam a, an kal liam hnu chuan kan in en a kan nui ringawt a, chutia pahnih chauha kan awmdun hnu chuan a reh leh vung vung tawh.



Kham hmasa zawkah ka ṭang a, ka thawh hnu chuan rei vak a ṭhu tawh bik lo, thleng ka seng fel tur chu min lo pui leh vat a, a ti ṭhang viau anih ka ring thlengseng vel chu a zeihawi tlat, hmunphiah nena dawhkan a lo pan lai chuan "Awi, khawi keiman ka lo ti ang" tih pahin min pek hma hma chuan ka pawhthlak sak a ni ber.




Hmun ka phiah laichuan Veranda lamah a phei a, zial rim ka hre zui zat bawk. Ka ṭhianni te nupa lo ngah bak tih tur awm tawh hek lo thleng pawh chu ka sil ta tho a, chutih laichuan a rawn pen phei hlawk hlawk ri ka hre leh a, min rawn en danah thil ṭha lo deuh ti ru te pawh ka ang zawk.




"Thleng chu Zopuii silah dah rawh, i hah lutuk ang" a rawn ti a.



"Ka sil thei a lawm" nui sangin ti mahila thu tak deuh hian a la ding reng tho, "Thlengsil te chu ka hnehsawh lutuk" zah zelah ka ti leh ringawt a, a lo kal hnai chu phawk deuhin ka lo en a, eng thil nge rawn tih a tum chu ka tih rilruk laimekin ka bul chiaha Cabinet ngheng chuan a lo ding a, "Chaw i lo eizan berkherah damdawiin kal a ngai a, a zia lo hle mai, kan naute hi a hrisel lo ve lutuka" a ti nuah nuah a, hetianga a ṭawng chang hian a lawmawm ka ti.



"A damsam lo sa nge?" a bu nghut a, "A dam lo deuh reng, a nu a chhun ve na lam a niang, a nu pawh hi a dam hman meuh lo" a ti leh bul bul a, ṭawng leh ka tum laitak chuan "I Phone Number lo sawi teh" a lo ti tawl mai!



Keilah peknchuan hamhaih deuh hian "Maw..?" ka lo ti he haw a.



"I Phone Number?" a ti nawn leh a, chil ka lem khawlh nia, he pa pui hian min duh ringawt em mawni chu le? Ka Number te min dil vel a nia!



"Suzanne-in a neih kha" ka ti zawi sep a, a tih dan hi a naupang chhia ka ti deuh a, min ti zak dawn dawn a lawm, min biak zui a duh chuan Suzanne-i lo dil ru ve tal sela ni mai tur, a va zei lo tak.



"Nangman min pe rawh" a ti leh tawl a, deuh tlat chuan..



"Lo Type rawh.." a Phone phawrh ka hmuh loh vang chuan ka ti thawr a, chutah min rawn thlek hmasa zetin "I phal chiah maw?" thutak zetin a rawn ti kher a ni nih chu! Tlangval Senior si zei lo ṭet ṭut mange...



Ka buk nghat takah chuan Phone a rawn phawrh a, Number chu ka lo sawi a a Type mual mual mai. Kan inpek zawh hnu pawh chuan a Phone bihin a la ding reng a, engemaw chen kan ngawih hnu ah "Ngaihzawng i nei em?" a rawn ti leh khauh a.



"Nei.. chiah.. lo" ka ṭawng bah viau a ni.



"Nei chiah lo tih chu i nei deuh reuh nge ni a, i nei lo?" dam thlup hian a rawn ti a, ka thlengsil laichu a nal bawk nen ka thlauh lo chauh a ni ber, thawk la hmasa tetein ka va en a "Nei lo e" tiin ka chhang a, chuta ka lam hawia a rawn nui chu a nui mawi hrep lehnghal!




"Suzanne-in i bulah engtin nge min sawi a?" ka ti ve ta khawl a, ani pawn ka Number min dil ngam a, ka zak ṭut ṭut duh bik tawh lo.



"A sawi ngun viau che, nangmah i ni ang tih ngaihna ka lo hre lo a" a tih leh chuan zawhna ngah deuhin ka lo en a, "Ani hi chu hriatthiam a ngai a nia, a la naupang deuh a" a ti leh a, nui hmel a pu lek lek bawk.



Thleng ka sil zo kal mai ka tum chu kut hrukna min lo pe vat a, ka hma taka a rawn din chiah phei chuan a palen zia a hriat zual a, dak deuh vah a en a ngai. "Ka thlah dawn che nia, an rawn haw mai lo ang" a tih chuan sawi mai tur ka hre lo.



Ka Phone a rawn ti ta chiah a, ka ṭhiannu ngei a ni. "Mimite, hei Bawiha an Admit leh ta sia, ka rawn haw thei rih lo ang, kan thawmhnaw vel la turin kan pa a rawn haw mek a, a lo let leh rualin a thlah thei dawn che a , anih loh pawn Usamuela khan a thlah thei ang che, zanin chu kan khawlo zo vek anih hi, min lo hrethiam mai rawh" a rawn ti zung zung a, min ngaihtuah lo turin keiin ka lo hrilh ve thuai bawk.



"I hmanhmawh em?" a rawn tih chuan ka lehhawi vat a, engtik laiin nge ka hnung lama a lo awm hman pawh ka hre lo, Cake a rawn la chhuak a, dawhkanah dahin a zai mawlh mawlh a, "Eiṭeuh rawh, i tana a lei anih hi" nuihzat hmel taka a rawn tih chuan ngaihdan ka nei thiam vek tawh.



"I nau piancham a ni miah lo" ka tih chuan a nui huk a, "Ramdinzuala chu April thla ah a lawm a pian" a tih rualin thawk ka la hawk ringawt.



"Zopuii hian min sawirem a tum anih hi, engahmah ngai duh suh" tih pahin Cake chu eiturin min mitmei a, ka nuih a za vak tawh lo, puitling tih ah chuan ho riauin ka hria a, tlang deuh khan min han hrilh ve mai sela ni tur.



"Nupui ka nei ṭep tawh i ti sia, i Single bawk sia" ka ti bul deuh hmuk a, lungawi vak hek lo le, Cake pawh chu dawt min hrilh nana a lei anih vang hrim hrima ei ka ni.



"A la buaithlak deuh ka tih kha" tih pahin a lo kiai suk a, a hna lama a buaivanga kha thu kha sawi emaw ka tia, a buaithlak dan a lo la thui hle anih tak hi.



"Tinge, nula biak i nei miah lo a mi?"


"Nei ṭhin e" a ti leh tawp.



"Eng nge a awm zia?" ka tih leh chuan "Ka duhzawng ka la hmu lo aniang" a ti mai a, a khirh hmel ka ti.



"Criteria felfai tak nena kawppui zawng thlap thlap ṭhin chu an leng tar duh, an duhzawng an tawn pawhin hnualna tur an hmu leh zel Umawipuiin a ti, i duh tui lutuk a ni lo maw?" ka lo ti kher a, a haw deuh angem aw ka tih laiin "Inngaihzawnna hi inpawhna tak tak tel lo chuan a kim ngai lo ang" a lo ti ve leh khauh mai.



"Nia tiraw..." ka ti zawi sep a, chu thu chuan engtin emaw min ti hnual rawihin ka hria.



"I duhzawng niin min hria em ni a?" ka tih chuan a nui mai a, "Hmanah chuan duhzawng ka nei ṭhin a, tunah chuan ka nei tawh hran lo" a tih chu eng a sawitum na nge ka hre thiam ta hauh lo, a duhzawng a la tawn loh thu min hrilh zo chiah bawk sia.




"Anih eng nge ka lakah i beisei?" ka ti leh thawr a, ka Phone Number te kha min dil bawk si a, mipa rilru mumal lo lutuk laka inhambuai hman ka nih loh zia a hre lo anih dawn hi.



"I Phone number ka dil che?" a ti sam et a.



"Ka pek tawh che kha" ka lo ti ve leh vat.



"Um..kha kha ka beisei chu" tihzawngin min chhang a.



Ka haw tur chu min thlah a, Bullet bike a kan inphurh chhuah hnu rei vak loah Ramtumbua kha kan tawk a, an naute chu a khua a lo sik hluah a ni awm e, Mistiri chuan min thlah zawh hnua a tlang tur thu a lo hrilh a, kan tlan chhuah leh hnu pawh chuan kan inbe mang meuh tawh lo.



Dawrpui pheiah eitur zawrhna dawr a lo la inhawng a, min veivak pawh an la tam khawp mai, "Cigarette kan lam lawk ange" a tih vang chuan kan ding leh rih a, keipawn zana eitur lei ka duh vangin ka zui thuai a, ka thil leitur ka thlan khawm mawlh mawlh laichuan tu emaw hian ka hnungah min rawn kheuh zeuh zeuh a, ka va hawi chuan Lucy ka hmu hlawl a, a rui tih a mitmeng a ṭangin a haitheih loh.



"Kan va inhmu khat ve, vawiin i kal em?" tiin Countera nula chuan ka bula mi chu a lo bia a, a ṭhiannu niawm tak a ni. "Rei lo te ka kal, ka zin hmain chaw ka rawn ei ang" ka bula mi chuan a lo ti ve thuai bawk.




"Famkima nen in la ṭha maw?" ka thil leina man ka pek laia Lucy-in a rawn tih chuan kan inmelh no lo hle tawh. "In chanchin ka hre vek a nia, vengchhung in al hneh bawk a" a tih laichuan Samuela leh nula chuan min rawn melh vat a, kal mai lo chuan mi a nghak tlat bawk si.




Min tih mualpho a hreh dawn lo tih ka chian em vangin ka ngawi reng a, dawr nghaktu in pawisa min kir chhung chu rei ka ti takzet. "Nitin Famkima a rawn rim che tih te pawh kan lo hre vek a lawm, Lalrosy lah khan a ring em em che a, a ṭan hlur che a" tih pahin a nui hak hak a, "I duh hun hunah i chhuhsak thei tih kan lo hrilh hlak kha" a tih leh phei chuan ka Bag hrui ka hum nghet hle tawh a, dawr chhunga mite lah chuan engmah hrethiam hek lo, min en hrek hrek bawk si, ka bula ding lah chu..




"Pathlawi tharlam bawk a mi a?" Samuela melh zauh pah a a tih leh laichuan pawisa kir chu ka lo ban rawk rawk a, Samuela pawh nghak tawh loin ka kal chhuak vut a, Bike dahna bul ka thlen hma chuan min rawn umpha hman tho, min thlek deuh a, ka hawisawm rang hle thung.




Engmah min zawt lo erawh lawm tak ka ni, Bike tinungin kan inphur chhuak a, ka ngaihtuahna chu a bing mup a ni ber, Urosy-i awmdan zawng zawng ka ngaihtuah let leh a, a chhungte hnena lo hrilh tu chu a chiang ta viau mai, chhungkaw mualphona leh innghirngho theihna anih vangin Ufamkima te nupa kara Lucy tlakzeh dan kha Urosy chhungte hnenah an sawi lo a, chu chu Lucy khan remchangah a lo la hmang anih dawn kha.




"Famkim khan a nupui a ṭhen leh em ni..?" ka hma a ṭhuin a rawn tih chuan min ṭawng hle, engtin nge a lo hriat?



"I hria a mi a?" a zawhna chhang loin ka lo ti let a.



"I dawrah khan ka hmu ṭhin a, Ramdinzuala ṭhianpa a nia" a ti leh a, nidawn tak e, an inhre ve tak a lawm. Mahse, Ufamkima nena kan inkar hi engtianga thui nge a lo hriat ang aw, Suzanne-in a bulah eng tiang chiahin nge min sawi ka hre bawk si lo.




"An inṭhen leh nge..?" a tih laichuan "Ṭhen lo e" ka lo ti vat a, ka ngaihzawng hlui tih a hria anih teh chuan ani pawh hian min ngai dik lo ngawt in ka ring. Hna an rawn thawh chhung khan Ufamkima kha a rawn kal ngun ve si a, a lo hmuh ziah phei chuan ngaihkawi loh chi a ni lo ang.




Kan kawta ka chhuk hnuah a inkhalh let a, ka chhungte inkhawm an la rawn bang lo, ka inbual hmasa te te a chumi hnuah inchhung ka tifai a, ka inpeih rualin ka pa leh ṭhenawm te nupa an lo inzuilut a, thingpui te ka lum sak hnuah pindan lamah ka chhoh san a, ka Phone ka en chuan Suzanne-i Massage ka dawng nual a, a rawn a inthlahrung khawp mai.




Damdawiinah a muhil thei bik lo a, kei ka lo mengrei ṭhang bawk nen rei deuh kan inbia a, a pasal u min sawipui a tum thu te pawh a zep tawh lem lo, dawt min hrilh erawh a inthiam lo hle a, ka tan lo huat viau theih ni bawk si lo chu ka um e liam ta ringawt chu a nia.




A pasal u chu a fak ngang mai a, a sawidan aṭang chuan min duh tir ngei ngei a tum a ni ber, "Khawvel mihring ah ani tluka chenpui nuam an awm lo ang, a nupui chu a vannei ngawt ang" a ti thul, ngaihzawng pawh a hmu zo tawp si lo ka lo ti rilru a; ka nuih a za lek lek a ni.




Kan inbiak zawh hnu chuan ka ngaihtuah let neuh neuh a, Mistiri Samuela kha tlangval hmelṭha leh pianthiam tak a nih vei nen ti nge nupui a hmuh zawh loh le tih chuan ka rilru a luah rauh rauh a, a rukin a khirh zek anih ka ring ta ber, en maia mi fel tak anga lang te pawh hi belh chian an dawl kher lo ṭhin tlat a, midang te nena inlaichinna ṭha nei tur chuan keimahni lam kan insiamrem hi a ngai reng a ni, chutiang theihna chu mipa te aiin hmeichhia te hian kan ngah zawk bawk.




Kar a thar a, Ufamkima pawh a reh ta vang vang mai, Ukimkimi hnen aṭanga ka hriat leh danin veng chhung sawisep kan kai nasa hman hle a, Ufamkima pawh a lo kal ngam tawh lo a ni mai hmel e, kan tun dinhmunah chuan chu chu thil ṭha ber a ni, kan hriat hauh loin mi mit kan lo ti kham hman hle a, an nupa kar erawh a khik tawh loh hram ka beisei.




Mistiri khan min lo biak ka rin tehlul nen min be zui ta miah lo a, Suzannei nen erawh kan inbe zeuh zeuh, Damdawiin aṭanga an chhuah zana kan inbiak chuan Mistiri-a chu Lungleia a zin thu min hrilh a, a hna lam bawk a ni.




"Hmanzan chu Ufamkima nena in chanchin min zawt nual a, a ṭhiannu Chawitei dawrah hmeichhe pakhat nen in inhnial a mi?" a rawn tih chuan chhang ngaihna pawh ka hre lo.


(ZAWMNA)


Mistiri-a chuan Ufamkima nena kan inkar chu a hre tawh a ni ngei ang, chuvanga min lo be zui lo pawh anih ka ring, insawifiah ka ngai hranin ka hre lo bawk a, engteh ualah ka ngai zui duh lo, mite chuan eng ang pawhin kan lakah ngaihdan siam mahsela, Ufamkima te nupa inkar a ṭhat phawt chuan heng sawisep hi chu a reh veleh mai dawn a, ka ngaihthah luih ve te pawh a ngai zawk in ka hria, tun hnu ah erawh ka fimkhur chu a ngai dawn thung.




Umawipuii nen nitin kan inhrawn a, Christmas a hnai telh telh a buai a na zual ting bawk a, inchung leh inhnuai ka kar tawn zing deuh nge ni zan lamah chuan ka chau ve hle ṭhin, kan nula pakhat chhungkaw lama chhiat an tawh vangin an khaw lamah a haw a, kan indaih lo zual bawk nen ka pui veleh dawr dawr ṭhin a, ka awm awl hman bik meuh lo.




Christmas dawn kar khat chiah a awm tawh tih ah Hnahthial lam aṭangin thu lawmawm kan dawng a, ka nute Thanzuali fanu Rinkimin pasal neih tur thu a ni. Inneih hun atan kumthar January ni 23 an ruat a, an hmanhmawh angreng khawp mai, ka nuin dilchhut deuhin a chhan a lo zawt chiang a, URinkimi pasal tura pa hi Cancer Treatment la lai a lo ni a, a dinhmun ngaihtuahin inneih pawh an lo hmanhmawh phah a ni awm e.




"Eng ang mi nge a neih dawn a?" tiin ka lo zawt hmasa ber a, "BDO office ah a thawk an tia, a hna tak ka lo zawt chiang lo a" ka nu chuan a ti mai a, u Rinkimi chuan pasal a hmu ṭha viauin ka ring ṭhin a, amah High school zirtirtu a ni a, nula fel lutuk mai anih bakah hmel pawh chhe lem lo tak a ni.




"Biakzuala nupui neih ṭum khan i kal ve si lo a, tun ṭum chu kal ve ngei tawh rawh aw, i u Mawii a kal thei awm si lo a" ka nuin a tih chuan ka hnial lo khawp mai, kum thar lam chu kan buai a nep deuh tawh anga; han hawi thawven na remchang tak pawh a ni ngei ang.




Pathianni tukah ka nu nen eirawng kan bawl laiin Urinkimi chuan min lo Phone a a pasal neih tur thu te chu lo sawiin a rawn phul hlut a, "Enge min leisak ve dawn, Mawipuii nen inṭawmin engthil emaw chu rawn ti ve ang che u, in unau lakah hi chuan ka phut ngam ve a, Nunfeli te unau lakah ka phut ngam bawk si lo" a rawn ti luam a, "Ti lutuk e, UNunfeli te chu Nurse a nia, a thawk nghet tawh a ni lawm ni, pawisa a nei viau ang chu" ka ti chuan a ang zui hlak hlak mai.




"Teuh lo lutuk, UBiaka nupui neih a an lo kal pawhin an kawr hak tur thlenga tum sak an ngai zawk a lawm, UBiakan 'Invaiin ka leisak thei dawn si lo che u a, Theme in tih pawhin nangmahni intum rawh u min tia, Nunfeli te unau in Lunglei a mi puanthan an lo keng chho a, UBiaka aman an tum tir leh vek sia, engmah an lakah ka phut buai lo law law ang, chhiat ṭhatah insen an hlau thei emai, thlalak timawiah rawn tel ve sela a ni mai" a ti bawrh bawrh a.




Ka nu te unau hi hmeichhia hlir an ni a, Urinkimi nu(ka nutei) leh ka nu u (UBiaka nu) te hi Hnahthial ah pasal fanau neiin an awm a, Ununfeli nu ka nu Thanmawii hian naupang tein pasal a sun a, a fate ṭul puiin tunah hian Lunglei lamah an khawsa ve thung, a fate an puitlingin ei an tling hma bawk a, an khawsak pawh a harsa lem lo.




Ka nu te unau hi hmeichhe pathum niin fa pawh hmeichhia deuh hlir an nei a, UBiakzuala chauh hi ka nute lamah kan unau mipa awmchhun a ni a, Urinkimi te unau hmeichhia hlir pali an ni, Ununfeli te unau lah keini unau ang thoin hmeichhe pahnih tlawng an ni bawk.




Umawipuii bulah Urinkimi thil leisak chungchang chu ka sawi ta ngei a, "A hlawh nei zawk si" a lo ti hluk ringawt a, a phur ve tehchiam lo a niang chu. "Kan lo lei dawn nia ka ti vek tawh a, eng nge kan leisak ang, a hranpa a thawh pawh a ngai chuang lo a" tiin dawr pawisa hman mai chu ka rilruk a, hriat tham mang loh chuan a riat nawi niah niah a, a rawn tlak loh ngei mai.




"Eng chu nge kan lei dawn?" ka tih leh takah chuan "Ka hre nang, i duh duh lei rawh, kei te chu kal pawh ka kal ve thei dawn chuang lo a" a ti leh chiam a, ka lo rawn kher kher chu ka ti rilru rauh rauh tawh, engthil nge leisak ṭha ang tih ka hre mang si lo, rilru a ti buai ve nak mai.




"Keini aiin an nei daih zawk a sin maw le, keini te chu nei hleilo nghei hlei loin kan awm a, kan Bag ah pawisa awm ve bawk mah se, dawr enkawl nana kan indahṭhat angai zel a, ani te chu a thawh chhuah a piang a pumbilh thei alawm, han zin ila kan thil neih ṭha ṭha min dil a, neih zawng zawnga lei ve tho kan ni ti hi an hre duh mang si lo" a ti niah niah a, kawng lehlam zawnga ngaihtuahpui chuan a sawi dikna chhen a awm ve tho mai.




Urinkimi chu sawrkar hna thawk a ni tak a lawm, pasal sawrkar hnathawk a la nei dawn cheu a, thawmhnaw leh eng ilo pawh keini aichuan an nei ṭha zawk ngei ang, heti chung hian an lo zin emaw kan zin chang pawhin kan thil engemaw tal chu min chhuh leh nge nge ṭhin, Umawipuii ngat phei chu an thawmhnaw hak tawk a in an vangin a neihsak hnem viau tawh, Umawiin a pek phal loh chang te hian a phal hma chu a dil lui ngawng ngawng mai ṭhin a, a duh lo chung te kha a thawmhnaw dang nen a thleng sak lui ṭhin anih kha maw...




"To deuh tih sak duh suh, ka pasal neih pawhin No set bak min pek bik loh kha, No set pe ve rawh" Umawii chuan a ti leh hlak a, chutia an tih dan anga inthungrulh kher chu em a ka ti ve deuh.



"Ka nu ka zawt mai ang, lei awm ka hre si lo" ka tih chuan min melh ralh a, min chhang zui lo thung.



Msa khan min la rawn be zeuh zeuh ṭhin a, lo len a duh thu a sawi leh ṭhin, keimah zawk hian hun ka nei thei meuh lo, zan lam hi kan ban har ṭhin vangin inkhawm takngial pawh ka hman ta lo chu a ni ber a, ṭhalai hruaitu te lakah a inthlahrunawm ṭhin khawp mai.




Christmas pawh chu buai tak chungin kan hmang liam a, kum thar lamah chuan hnathawk te pawh ka lak belh anga kan heti lutuk tawh bik lo ang ka ti rilru a, dawrkai nih chuan hna a zo thei lo a ni ber e.




Suzanne-i nen kan inhmu leh zauh ṭhin a, kumthar hnu lawkah a pasal leh a fapa te nen dawrah thil an lo ei a, an naute pawh a damṭhat hmel viau tawh, kan inhmuh chang hi chuan Mistiri-a chung chang hi a sawi ngei ngei ṭhin, chumi ni pawh chuan min hmuh rualin a lo sawi leh nghal pang mai.




"Tunlai chu Mamit lamah a awm a, a ṭhianpa nen Furniture dawr an insiam ṭawm a, kar leh ah a lo chho ang, Lunglei lamah hna an nei dawn a" a tih mawlh mawlh laichuan an pa zawk chu a lo nur nang a, nghak loin an dawhkan tur lam a pansan daih bawk.




"A lo haw hunah ka rawn len tir ang" a ti leh zel a, a phur mai bawk si a, chhan dan tur pawh min ti hre lo zo ṭhin. "I ti zahthlak e, tlangval te chuan an duhzawng te an chhai ve ang chu, intihpui chiam chi pawh a ni nang, chuloah ngaihzawng nei hman pawn ka khawsa lo" ka lo ti sap sap a, min tihpui tum tawh lo sela ka ti tak zet, Lucy-in deuhsawh deuha min ṭawngkhum zan a ṭang khan ka hmu hreh riau tawh.




Mistiri-a lah khan ka chungchang a lo ngaihven a ni awm a, min hriatchian tak vanga min uksak zui ta lo anih ka ring bawk a, ka zak deuh riau a lawm, in biak emaw inhmuh leh ngaitawh lo sela ka duh zawk mah ang chu.




Thil an ei zo an chhuak leh tur chu pawn thlengin ka zui chhuak a "Usamua lo haw hunah ka rawn hrilh ang che" a rawn tih leh chuan ka nui hul hak tawh a, an pa zawk chuan ka awmdan a hria ni ngei tur a ni, an nu kawrah chuan a pawt zauh a, a mitmeiin a khap thuai bawk.




"I ṭhiannu tê kha ka kawm peih chi, a zak chuih chuih lo a, a Over chuang bawk si lo, mi langtlang deuh chi a nih kha" dawr a ka luh leh chuan Umawipuiin a lo ti ve ngei a, kawm peih chi a nei khat em a ka nuih a ti za lek lek zawk a ni.




"Inkawm ula chuan in hahthlak dun ngawt ang" ka lo ti chu a ner nasa ngang mai, "Nu kan ni ve ve tawh a, kan nulat laiin inkawm ila ka tih nak a lai a" a lo ti sam et a, ka ngaihtuah zawng ringawt pawn ka lo hah sa.




Ka nu nen kan ngaihtuah ngial hnu ah Dressing table leisak kan rilruk a, Furniture zawrhna hmunah a hranpa in kan siamtir thlap bawk. Umawii chuan ṭul lo a ti khawp mai a, ka nu erawhin "Kan duhsakna lan tir na tur a lawm, kan phak tawka ka lo tuam ve kha a ṭha a ni mai, mi thil kan tih sak reng rengin a let hi beisei lo ila, kan tihsak a te aimahin keimahni zawkin nuam kan ti zawk ang, thilpek chu thilpek a ni a, a let leh lam hi chu chunglam hnen aṭangin kan dawng leh zel a nia" tiin a lo hrilhfiah a, Umawipuii chu ala inhlan thei chiah lo ania nge a hmui a pet sawi duh lek chauh a ni.




Zirtawp tlaiah Ufamkima leh Mamuana an rawn lang ve leh nawlh a, an bawr khawp mai. "Inchung rawng hnawih ṭhat kan tuma, mamawh kan lama" Mamuan-an a lo ti zung zung a, Ufamkima chu a damṭha leh tawh lo nge ni ka hmu cher leh riau tawh.




"Kan va inhmu khat ve" ka biak hma chuan a lo ti var a, "Nia, tunlai chu kan buaitlang anih hmel" ka ti ve thuai a. A nui hmel te chu ka eirei duh lo, a landan chuan ka khawngaih thla a la leh tlat tawh a, damkawr chau chhe tak emaw rilru hah vanga talbuai hrep hmel hi a puin ka hria, chu chuan ka awm a ti nuam lo hle ringawt mai a ni.




"UFamkima hi a lang upa sawt e" Mamuana bulah ka ti ru zauh a, "Tunlai chu a nu damloh vangin a meng rim ve deuh a, a zunthlum a sang bawk nen a chau ve deuh a nih hi" a tih chuan Ufamkima lam chu ka hawi vat a, a rawn hawi ve chiah nen chuan kan in melh chiang hle.




A nui leh suk a, nuih let chu harsa ka ti takzet tawh, lo be ṭha viau tur hi ka ni lo tiin ka rilru chuan ka inhrilh a mahse, mi kan chunga sualna nei lo leh min ti ṭha tu te lo tihchhiat ngawt chhan tur a awm si lo, nidang ang erawhin ka be lumlam ta vak lo, ka fimkhur luat vangin nuih let takngial pawh ka insum a ni ber.




Zanah chuan a Message ka dawng nawlh a, Phone-a kan inbiak loh rei tawh vangin mak ka ti lek lek zawk a ni. "Sumdawnna lam te i tluang em?" tih te zawng hi min lo thawn a, chhan let loh ka tum zet nain ka chhang let ta tho a, ka chhan loh chhan min mawlh reng miau a, hmaichhana inhmuh emaw a fala awmdun kan nih loh vangin a pawi em lo turah ka ngai.




"Kan tluang e, i nu chu eng nge a an zel a?" ka ti let ve vat a, "Zai nawn leh a ngai dawn a, thla thar lamah chuan kan kal leh ang" a ti a, a rilru a hah ngawtin ka ring a ni, a nu a hmangaihzia leh a ngaih pawimawh zia kha ka hre chiang em a.




"Ka lo ṭawngṭaipui ve dawn nia, lo dam leh thuai teh se" tiin ka chhang a, chumi hnu chuan a nu chungchang ngawt sawiin rei deuh chhung kan inkawm ve a, kan inbiak dan chu a pangngai khawp mai, ṭhianṭha tak inbia a harsatna sawidun kan ni ber a, se se thu lam kan sawidun lo, a tu ve ve pawh chuan chutiang rilru chu kan puin ka ring lo a, mi sawisep kha han kai hman viau mahila kan Fair dun zia ka ngaihtuah let hian thiam intihna riau hi ka nei ve ṭhin.




Chumi zan aṭang chuan min rawn be ve ta zeuh zeuh a, mut hun awmah min lo biak ṭhin vangin a khua a har emaw, a rilru a hah viau anih ka ring bawk, ka awm a ti nuam ta vak lo, duh aiin kan inbe zing tlat, ngaihtuah a awl, chu chu a ṭha lo.




A Message chu chhan tawh loh mai tur em mawni ka ti rum rum a, hetia kan inbiak zel chuan inven sen loh hun awm thei a ni a, kei hian tum lo viauin fimkhur eng ang mahila, mi pahnih inkar a ni miau a, pakhat zawk rilru ringawt chuan awmzia a nei tam lo khawp ang.




A Message chu ka chhang lo zeuh zeuh a; mahse, chhan loh theih loh chin hi a awm leh ṭhin, anin ngaipawimawh taka a nu chanchin te min rawn hrilh laia lo ngaihthah chu a har ve ṭhin bawk em a ni.




Tlai khat chu dawra ka awm laiin Urosy hnen aṭangin Call ka dawng a, a thil rawn sawi chuan min deng dawt a ni ber. "Kan pa nen hian zan reiah in inbe nasa ṭhin khawp mai, in inbiak na hi ka Phone aṭangin ka lo hmu ve tih lo hre ve mai mai rawh, engkim kan sawidun tawh si a, eng thil nge i rilru ah hian awm le, min tihbuai i tum siloh chuan engthil nge duh i neih?" a rawn ti tawl mai!




"URosy i ngaih ang kha.." ka ti dek dek chu "Ka hria" a lo ti bak hlur a, dek pawh ka ti ngam tawh lo.




"In ngaizawng angin inkawm lo mah ula in inbiak reng hi ka duh lo, ka awmdan ah hian i hriatthiam ve mai ka lo ring a, Famkima hi tlangval a nih loh hi Mimi, mi pasal nangmah duh ṭhin tu che a nih hi" a tih chuan chhan ngaihna hre loin hmui ka pet fan fan ringawt.




"Engmah a awm tawh lo ti mah ula, hetia in inkawm reng chuan awm nuamin ka awm thei lo ang, in inbiakna a Delete zel ṭhin te hi ka duh lo, in dawra min hruai a duh loh laiin amah in a rawn kal fo a" a sawi laimek chuan kawngka ah Ufamkima a rawn lang hlawl a, min rawn nuih laichuan hmui ka lo hup rang khawp mai.




Min be loin dawhkan lam a pan a, Phone a ka biak lai chu a ngawi hmiah mai bawk, "I la vuan em?" ka aw chu a zawi tawh hle. "Kha a lo kal kha lo sawipui rawh, i hnen aṭanga inthiarfihlim tur pawn lo ti mai rawh, ka rawn biak che hi sawi lo la 'Mi sawisep kan kai nasa a, i nupui lakah a inthlahrunawm emai inkawm tawh lo zawk mai ang' ti la, a nih loh pawhin i bialpa kha i chhuanlam mai dawn nia, 'Ka bialpa in kan chanchin a lo hria a, a ngaihdan a ni vak lo' ti mai rawh" a aw chu a rangin a khur deuh hialin ka hria, thawk ka la dep dep ringawt mai a ni.




Pawn lama ka va hawi chhuah chuan kan ṭhenawm te dawr kawt kawngpui pheia Urosy ding chu ka va hmu a, ka en reng laichuan a Phone hmet chungin a kalsawn a, a pasal a lo umzui anih ngei dawn hi, engthil chiah nge an nupa inkarah hian thleng le, tel ve tawh loh hram ka duh takzet.




UFamkima pawh chu ngaihsak loin inchung lamah ka chho nal nal a, Umawipuii chu inhnuaia awm turin ka hrilh ta ringawt a, Urosy-in tirawh min tih ang kha chu ka ti theiin ka ring lo, ka mihring zah lutuk lakah leh lek phei chuan, ka ngaihtuah zawng ringawt pawhin ka thaw a ipik vek a lawm le.




Darkar chanve vel hnuah Umawipuii a lo chho a "Tihdanthiama a kal tawh, tinge a in inhau a mi a?" a rawn ti a, zawhna a ngah hmel khawp mai.



"In hauh chhan tur kan nei lo, hmelhriat satliah bak kan ni tawh lo" ka lo ti hlar a, ka duh aiin ka vin.




"Vak vak a che, i rawn tlan chhia emaw ka tia lawm" ka bula thut paha a tih leh chuan thawk ka la hluai a, ka rilru tawt lutuk chuan ngaihtuahna fim min puttir thei lo a ni ber.




"U Rosy nen kan inbia a, UFamkima nena inkawm tura min duh loh thu a sawi a" engtin tak min lo chhang ang maw ka tih laimekin "Ka rindan vel anih chu" a lo ti khauh a, min ti hamhaih zawk.




"A rawn tawng chiam che nge, ṭha te tein a rawn hrilh che?" a tih chuan ka lu ka thing vat a, "Ka hrethiam chiah lo, a lungawi lo hle a, ka lakah erawh a sual miah si lo a, ka tan hian a hrehawm zawk" ka ti leh a, kan inbiak laia a awki inthlak reng vang khan min hua tiin ka sawi thei lo tlat a ni.




"Ka hrethiam mai, hmeichhe fing deuh ania, i mawl zia a hrechiang khawp che anih chu" a ti deuh kher a, min va han chhawk lo ṭhin chiang tak.




"Ka tih zawk chu nang chu i rilru a tluangtlama, engmah a kawi zawnga lak i thiam ve bawk si lo a, i rilru thianghlim zia a hre chiang hle ka tihna zawk" a tih leh pawh chuan ka awm a tih nawm phah chuang lo.




"I thiam zawk ka ti thei lo, tu nupui mahin an pasal te leh nula inkawm hi an ngaithei lo ang, zing taka in inhmu emaw Phone-hmanga chanchin a kip a kawia in inhrilh ngat phei chuan ngeiawm ve deuh tur i nia lawm, a ngaihzawng hlui a nupui nen an inṭhen lai kar khera lo tlazep ve i ni bawk si a" zaidam takin Umawii chuan a ti sap sap a, ka rilru a mang duk tawh.




"Mahse, Aumawi...huat tur zawngin kan inbe ngai lo a sin le, a nu dam loh dan leh a nu vanga a rilru hahna te min lo hrilh ve ṭhin a ni mai a, ani pawn min ngaihzawnna rilru a pu miah lo ang, chutiang lam hawizawngin a ṭawng ngai lo..." ka sawilai chuan a ban a lo vai vut a.




"Mate...chu chu Tihdamthiama tih dik loh anih chu, tinge i bulah chutiang a rawn thlen, nupui a nei reng a lawm, a rilru hahna chhawk turin a nupui a awm, a nupui hnenah inbun ruak rawh se, i lakah tinge inhnemna a rawn zawn, a la duh reng che chu ka ti lo mahse, a phurrit i lo chhawk sak tawh ṭhin a, hnem tu a neih loh laiin i lo hnem a, beiseina a neih loh laiin beiseina i lo pe tawh ṭhin a, chuvang chu anih ka ring, tunah chuan amah ngaihsak em em tu nupui a nei a, a mamawh a phuhruk sak thei tih kha nangmah zawkin hre tawp la, a nupui kutah dahin hawisan rawh, ngaihthah la, tlansan la, hmangaihna lamhawi thil a awm lo takzet anih chuan a umzui zel bik lo ang che" a ti mawlh mawlh a, ngaihtuah a ti thuiin min ti hah hluah hluah a ni ber, ka tih tur chu ka hria a, chu chu hmanah khan lo ti daih tawh tur ka ni.




Chumi ni aṭang chuan Ufamkima nen kan inbe ngai ta lo a, an nupui pawh ka be ta lo, an Number chu ka Delete a, inchung lama ka awm ṭhin vangin Ufamkima chu a lo kal em tih tak ngial pawh ka hre lo.




Ni 20 ah inneihna a kal turin ka nu leh pa te nen Hnahthial lam kan pan a, URinkimi Dressing table kan leisak kha Sumo ah kan thawn diam tawh a, ani pawh a lo lawmthiam ngang mai, "I pasal neih ve hunah thil ṭha deuh ka lei ve ang che" min ti ve ngei kha.




Electric venga ka nu u te inah kan thleng a, kan thlen veleh ka inbual a, UBiakzuala nupui lah chu a fel em em mai bawk a, vawikhat inhmuhna ah kan inngaina nghal a tih theih ang, zanriah ei khamah Urinkimin an inlama leng turin min lo ko a, UBiakzualan "Motorin kan kal dawn nia" a lo ti hlauh mai.




Venglai kan thlen chuan zan dar 7 a ri tawh a, kan va thleng ta chu min lo chibai liam liam a, mi an lo ṭhahnem ngang mai, "Nuni te unau pawh an awm kha, Veranda lamah an awm aniang" Nu Thanmawiin a lo tih chuan Veranda lama URinkimi ṭawng lang lang pawh chu ka hre pha tawh, UBiakzuala kal thla chu ka zui ve thuai bawk.




Ka unau te hoin min hmu chu an lo phul hlut a, Rintein min lo kuah chung chung laichuan Urinkimi a lo inrawlh vat a, midang lo awm ve nuk lam chu hawiin "Hei hi kan chhungkaw nula chhuanvawr, Mimitei a nih hi, nula a nia, Hnahthial tlangval ho khan lo char tum teh u" a ti zat zat a, chutah midang awm ve ho chu min hmelhriat tir zui a, min chibai ve sap sap a; ka zak lek lek zawk a ni.




"Ka nau anih hi, chibai ve rawh" ti a Ununfelin min lo hmelhriat tir chuan phawk deuhin ka lo en a, ani pawn mak a ti tih hai theih a ni lo, 'Mistiri' tiin ka ko hman ṭep leh nghal a; mahse, Urinkimi thil lo sawi vang chuan ka ṭhulh leh thuai thung.




"AFeli bialpa anih hi, an ni pawh tihhuk a hnai tawh ania, in ha kha lo tibil hman reng reng suh u" nui har har chunga Urinkimin a tih laichuan Mistiri nen kan inmelh ran a, Ununfeli lahchuan a bialpa chu chhuan hmel zet hian a lo khi sang reng bawk.





(End of chapter - 4)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 6th, 2022, 7:44 pm

ZUNZAM - by Ahmangaihi violette Khiangte

CHAPTER - 5




"Lalrinkim, ham ham che hian...dawt sawi zuah zuah suh aw" Ununfelin nui ṭha chunga a tih lai pawh chuan Mistiri chuan min la en reng a, keimah zawk chu ka hawisawi thuai a, helai hmuna ka hmu tehnawlh chu mak ka tih viau tawh laiin Ununfeli bialpa a lo ni lehzel chuan min ti hamhaih zual bawk, a chhan chu ngaihzawng a neih loh thu a sawina kha ala rei lo lulai em a, Urinkimi sawi danah tunhnai maia inngaizawng chu an ang bawk si lo a ni.




"Mimi, hei i pu te hi han chibai rawh" ti a inchhung aṭanga ka nuin min lo koh vangin ka lut leh thuai a, Sitting room ah chuan chibai ka va sem kual dan dan a, 'Pasal nei ve thuai rawh' ṭhenkhatin a lo tih laiin 'Nang chu pasal nei loin la nula reng rawh aw, kan la ui che a nia' min lo ti tawk an awm bawk a, ka nutei lah chuan "Hei chu a chi ah kan dah chang dawn, kum 30 ral a kai hma chu neih kan phal lo ang" a lo ti ham ham bawk.




Nutei fa te, tleirawl te te ho chu choka lamah dawhkan kilin an ṭhu bial laiha, thingpui an lum anih ringin ka va pan phei ve a, ka va kal laichuan ser an lo vel mek a, "Umimi, tah hian lo ṭhu rawh" tiin ka nutei fa tlum ber Rintein ṭhutna tur min lo kawh hmuh thuai a, rei deuh chu an bulah chuan ṭhuin thingpui te ka siampui a, Veranda a ṭhu ho pawh an thawm a ṭha ham ham khawp mai.




Urinkimi leh a ṭhiannu lo lut chuan thingpui an rawn lam a "Veranda ah in rawn sem ve hleinem, paruk lai an awm ania" tiin tleirawl ho chu an rawn hrilh a, an ni ṭhiandun erawh pindan lamah an inzuilut a, tleirawl hoin thingpui an siam leh laichuan Phone ka lo en thung, Msa Message a awm nual a, Number hriat loh hnen aṭangin 'Khawiah nge i awm?" tih hi ka dawng bawk, a thlalak hmuhtur a awm loh vangin tu min thawn nge ka hre thei mai lo.




Msa-a Message chu chhangin ka zin thu ka hrilh a, "I lo haw hunah min lo hrilh rawh, ka lo leng tak tak tawh dawn" a tih chu chhang rih loin Phone chu ka dah a, ka hawichhuak leh chiah erawh Veranda kawngka bula lo ding nen chuan kan inmelh chiang viau a ni.




Phone a ken ve tho vang chuan phawk deuhin ka en a, chutah tun maia Number hriatloh hnen aṭanga ka Message dawn chu ka en ṭha leh kher bawk a, saw pa pui saw em mawni dawn le? Zawhna mitmeng nena ka va melh vung vung laichuan a rawn kal phei a, keimah min enin min rawn panding ngur ngur a ni ber.




Eng nge maw rawn sawi a tum chu le? bangbo deuh a ka lo en ve reng laichuan veilamah a inher a, choka lama lo kal ta lo chuan pawn bathlar lamah a chhuak daih lawi a, min ti hamhaih letling zawk!




Ka Message dawn chu ka en leh rih a, khapa kha chu a nih ka ring leh ta vak lo, min biak chhan tur awm hek lo le, tu emaw Message thawnsual anih ka ring ta deuh. Mahse, ka en laitak chuan Message dang a lo thleng leh a, "Lo kal lawk teh" tih hi a ni?




Pawn bathlar lam ka va hawi chuan Mistiri khan min lo hui zauh chu ka va hmu zui a, nichin khan ka lo ringsual miah lo. Ka hawi kual leh zet hnuah muangchangin ka va chhuak a, bathlar aṭanga a chhuk thla chu a hnungah ka zui ve ta ringawt chu ania, pawn tuizem bul êngin a chhun phak chinah chuan kan indinchilh ta ran a, sawi tur a vang duh ngei mai.




"Afeli te nen in lo inchhung a ni maw" min zawt em em pawh a ang lo, a sawi ve satliah niin ka hria.



"Aw, kan nu te unau an nia" ka ti mai a, ngawi rengin min en vung vung ringawt.




"Ka va hmu ve tehnawlh che sia, ka hamhaih deuh a lawm le" nuisanga ka tih takah chuan a ṭhen ve sak a, thawk a la deuh hluai bawk. Kawngpui lam hawia ding ṭha chung chuan "Ka Number kha lo Save rawh" a ti zawi deuh sup a, keiin ka lo mitsir ralh a, mak ka ti deuh tlat, engvanga a Phone Number chu Save tura min duh nge a nih ang tih ka ngaihtuah a, ka rilru ah zawhna a rawn lang zung zung mai.




"A chi dawn a mi?" uang deuh taka ka tih chuan min rawh melh rulh a, "Ka bialnu a ni lo a nia" a ti bung nghut a, kei ka lo ka hau thung.



"Eng nge i sawi awmzia?" uan hmel feiin ka ti leh a, ka nui tak nain hriat chian deuh erawh ka chak viau a ni, min melh dan lah chu...sawi thui vak a chak lo hle tih a hmelah a lang reng bawk.




"Afeli kha ka ṭhian a nih kha, ka Lunglei kal tur a remchang ema tiin ka rawn phur" naupang titau chunga insawifiah ang mai hian a ti nghut nghut a, ka nuih a za ru riau tawh, engvanga ka laka insawifiah ringawt nge maw anih chu le?




"Chutia law?" ka tihsak leh mai a, min en reng tih chu ka mitsirin ka hmu thei a, he pa pui hian min ngaizawng chu a ni em lo anga; mahse, a awm dan hi chu mak ka tih zawng tak a ni.




"I lo hriatthiam loh takin ka hrilh che anih chu" a tih leh chuan a lam ka hawi vut a, thil sawi tuma a lo ang hman zuau chu a tawp chiang ngei mai. "Hriatthiam loh tur a awm hleinem?" zawhna nei tih hriat takin ka en let a, in melh hnai tawh tak kan ni. Min chhang lo chuan a nui ta suk a, kawngpui lam hawi lehin a savun pheikhawk lawk zet chuan lungṭhil chu a chhir pah bawk a, eng thil tak ngaihtuah ang maw!




"UAfeli nen chuan engtin maw in inhriat a?" zangkhai takin ka ti leh a, "Kan inhriatna a rei tawh" tih zawng chuan min chhang a, "I bialnu a ni lo maw?" ka ti leh kher a, a chhan chu min koh chhuah chhan kha Ununfeli vang ni tlatin ka hria.



"Ni lo" a tawi tek tawk ngei mai.



"Nichin kha chuan.." nui chunga ka tih leh laimekin "An uang anih kha, engahmah ngai suh" ka dar a rawn tuai deuh thuak a, amah lah chu a han thutak em em lehnghal a, he pa hi ka ringhlel ru riau tawh, min ngaizawng tihna a ni thei a ngem?




"Ti nge ka ngaihdan chu...?" min chhan mai loh vangin "Ti nge i insawifiah kher a?" ka ti leh a, chuta min rawn nuih leh chiah chu a lawm amah ka hmuh dan a dang zo ta vekin ka hria! A mitmeng mawi danglam deuh khan ka mitah tak min en a, a nuihmel chu a hmelṭha hliah hliah bawk, chumai a la ni lo engthil emaw chhunglamah hian che a awm a, ka mur sung sung thei hial a ni.




"Ka insawifiah loh chuan ka bem hunah che min hnawl dawn a sin" a thil rawn sawi chuan min ṭhawng ngei mai, chhanna chang pawh hre lo a ka en reng laichuan a lai hle tih ka hai lo, zak lo ang taka lan tumin a nui ṭha duh miah lo a, a hmel lamah inthup tum viau mah se a ke a per at at reng tih pawh ka hria.




"Eng nge maw i sawi le?" ka ti hap a, ka nui tawh miah lo bawk.



"Ngaihzawng i nei tawh em?" ka hmai zawnah rawn kun hniamin ngunthluk zet hian min en a, zep ṭit ṭet nei lo a thil sawi phawng phawng chi a nih dawn hi, zahzum hmel deuh siin a nghal ru riau mai, a kumin a chaldelh tawh te pawh a ni mahna.



"Nang zawk?" ka ti let daih a, min chhang hauh lo.



Chutih laichuan Ubiakzuala leh putar pakhat hi an lo chhuak a, rang deuhin kei ka dingsawn bawk a, Ubiakzualan min hmuh rualin "E...Mimite, i unau ten an zawn che kha" a lo ti thuai a, Mistiri lam ka va hawi chuan zial ṭanin kawngpui chu a thlir vung vung a, Ubiakzuala a la ding ve reng bawk nen be tawh lo chuan ka luhsan thuai bawk.




URinkimi pindanah a chhawm tur te enin an lo ṭhukhawm laiah, ka nu nena kan thil leisak pawh kha kil khatah an lo hung ve ran a, a neihsa dang te lakah erawh engtham a ni lo, thil a duh changkang bawk a, a thuam chhawm tur pawh a ṭha nangiang mai a, mihausa fanu duat rawn pawn hei bak bak hi chu an chhawmin ka ring lo hial a ni.




Ununfeli chuan khuma mu chungin Phone a hmang a, "Khawiah nge i kal a, ka rawn zawng deuh che a, ka hmu mai si lo che a?" a tih chuan a mi biak chu rindan ka nei thiam mai a, khum tlanga ṭhut pah chuan ka va melh leh ṭhin.




"A ngai lo, naktuk zanah man an inhlan dawn a, duh leh inneih ni tlaiah i haw mai dawn a lawm Pa Ro-a te bang chu nikhatah i zo hman dawn a mi?" a ti sap sap a, midang an nuih rin em vangin a ṭawng chu hriat a har a, a hnu lamah chuan eng nge a sawi ka hre fum fe tawh lo, rei lo teah Ununfeli chu pindan aṭangin a chhuak a, pawnah a chhuak dawn anih ka ring.




"Afeli bialpa kha a van chhe lo tak" rawn ti tu chu mo ṭhiannu tur kha a ni.



"A fel hmel ka lo tia, a Cool bawk si ka duh zawng tak" midangin an lo ti ve leh a, an sawizui sap sap a, an thawm pawh a zawi hle tawh.




"Aizawl khua a mi?" midangin an tih chuan "Mamit khua niin ka hria, Feli nen an inhriatna a rei tawh, nikum pawh khan an thlalak Facebook ah a lo Post tawh a, an inzuina a rei ve tawh a niang" Urinkimin a lo ti sar sar a, Samuelan an inngaihzawn loh thu min hrilh zo chiah bawk si a, eng nge an awmzia chu ka la man pha mang lo, inngaizawng an ni lo anih ngat chuan ṭhian ṭha tak an nih ka ring.




"Mamit ah Furniture dawr lian deuh a nei, Felin a tia" Urinkimi bawk a ni, a thil chhawm tur zinga pakhat chu kawkin "A dawr a mi anih saw, tlaiah khan aman min Fit sak thlap a lawm" a ti leh zel a, midangin an lo fak tliar tliar laiin ka lo ṭhu ngawi reng ringawt.




Ununfeli nen chuan inhmeh an ti thu te an sawi luam a, "A nei anih chuan a ti fuh viauin ka ring, a mipa kha a hmel aṭangin a fel dawn tih a hriat reng, a dam dup bawk sia, a palian bawk si" tih ang reng a ni an sawi ni, an ṭawng bawrh bawrh laiin Ununfeli a lo lut a, an thawm a reh zui dak mai bawk.




"Fel, i bialpa kha heng ho hian an lo Star teh ania, vengṭha viau rawh, an lo ruk sak daih che a nge, an hisap nasa a nia" ti a Urinkimin a lo fiam chuan Ununfeli chu a nui kar kar a, "Kan pa chu ven buai ngai lo a rinawm bur chi a nia, an duhtawkin chhai mah se ngaihṭha deuhin ka awm thei ang" a lo tih laichuan ka va en zauh nghe nghe, kha Mistiri pa pui khan engvanga dawt min hrilh ve ringawt nge maw anih le? Ka zawt pawh a ni tawp si lo.




Kan haw dawn chuan Veranda lamah an ṭhu phei leh a, meilum aiin an ri laih laih reng, kei erawh rei lo te ka va ding tih loh chu inchhungah ka ṭhu a, Samuela mawlh khan ka ngaihtuahna a luah ta mai a, Ununfeli nena insiriala an ṭhu dun te kha a chhan sawi tur hre mang si loin ka lo ngei ṭhum ringawt a, a zia lo lam deuh chu a ni.




"I u Biaka kha va ko rawh, haw phei ang u" ka nu ten an lo tih vangin phur lo deuh chuan Veranda lamah ka phei leh a, kawngka a ka pen chhuak tur chiah chu Samuela nen kan intawk hlawl a, "In haw tawh dawn a mi?" a lo tih vang chuan ka ding leh rih.



"Aw, nang khawiah nge i thlen?" ka ti ve zat a.



"Hetah hian, inhnuaiah kan riak ang" a tih chuan ka lo bu nghat a, sawi duh nei hmel a puin ka hria, mahse, engmah a sawi zui takah loh vangin Veranda ah ka chhuak phei a, UBiakzuala chu koin ka let leh thuai bawk.




Kawngka bulah Samuela chu a lo la ding a, "Muttui aw" a lo tih vang chuan tawi tein ka han nuih leh rih a, ka hmu tam telh telh a ka hmuh dan a dang telh telhin ka hria, tunah tak hi chuan hnaih vak lo ila ka tan a ṭha zawk dawnin ka hre tawh, hmelhriat satliah angin kan in en tlat lo, min biak dan leh min en danah chuan ka hai bik lo a, ka en dang danglam deuh tlat hi a hai bik hauh lo ang, chu aia ka hnaih loh chhan tur ṭha zawk chu ka unaunu bialpa a ni tlat.




Kan haw kawngah pawh ka ngaihtuah zui reng a, ka mut hmun thlengin thil dang rilru ah a leng lo, ka nu te ho chu Sitting room ah thingpui hang in pahin an la ti ti hlawm a, bang a in hnaih avangin an ṭawng thawm chu chiang hle a, Samuela hming ka pa Ro-an a lam rik vang chuan beng ka chhi rang hle bawk.




"Feli ṭhianpa khan naktukah Electric wiring min tih sak dawn a, man hlanna ah pawh kan nu kal mai rawh se" pa Roan a tih chuar chuar laiin "Khapa kha Feli lo hruai maw, a ngaihzawng em ni?" ka nuin a lo ti let ha a.




"Anih dawn kha, a fel khawp mai, vawiin pawh bungrua kan rem thiam si lo a, an rawn thlen hlim aṭangin a che zung zung a, a ṭawngkam a fel thlup si a, tlangval fel tak anih dawn kha, Nunfeli nu rengin a fak mai a" Pa Roa bawk chuan a ti leh a, chutih laiin Ubiakzualan "Lunglei lamah hna ka thawk dawn a tia, i lo pawt khawtlai mai mai ange?" tiin a pa chu a lo hrilh a. "Pawt khaw tlai lo ang, Felin inneih ni awm tlang law law rawh se a tih vangin a lawm ka sawm, amah pawn a hnial hleinem" a lo ti sam mai a, an thilsawi ka ngaihthlak chhung chuan ka lo ṭang ṭeuh ringawt a, Mistiri an fak ar ek lutuk hlawm chu ka lo ngaithei lo a ni ber.




Zanin khan min bem tum ang tak khan min chhaih zuk lehnghal a, ngaihzawng ka nei lo ka hnenah a ti bawk a, puitling infiam nan chuan amah mah tlat, a lakah ka lo hawihhawm uchuak deuh nge ni, min zuam phah anih dawn kha.



Chutia amah ringawt ka ngaihtuah laichuan a Message ka dawng leh ta zui a, "I mu tawh em?" tih te zawng hi min lo thawn a, ka chhang let ta lo mai. Kan inhmuh leh hunah pawh pehhel zel tawh ila a ṭha ang tiin rilru ka siam ta bawk.




Zingah a Message ka dawng leh a, "Naktukah Lungleiah ka kal dawn a, engtia rei nge i cham ang?" tih a ni, chu pawh chu ka chhang lo reng a, chhan loh zel ringawt chu ka awm a nuam thei chuang lo, "Ni 26 ah kan haw ang" tih zawngin ka chhang let a, min lo chhan leh hun ngaichangin ka Phone lah chu ka bih khat tawk reng a, keimah tak pawh chu ka inhrethiam ta meuh lo, ka duh aiin ka ngaihven mah mah tlat tawh.




Man hlanna a kal turin kan insiam a, UBiakzuala te nupa nena kan chhuak chuan Samuela leh Pa Roa lo inzui kan tawk hlawl a, kawnga intawk kan nih vangin inbiakna hun a awm lo a, min rawn en deuh vung vung chu hmu lo derin UBiakzuala chu ka be pah bawk, "Tlaiah bang har suh u, sawtah chaw eitur anih kha" Ubiakzuala a pa hnena a tih laia ka va hawi chuan kan mit a intawng leh chat tawh.




A hma a thil pangngai tak ni si kha nizan aṭang khan a danglam zo ta vek a ni ber, min en dan thleng hian a danglam zo tawh, chu chuan ka awm a ti nuam thei meuh lo, ka zam ru riau a, hlauhthawnna ka nei bawk a, amah thleng chuan ka ṭih a ni ta ber e, hetiang khawp hian inngaihzawnna thila kal sual hi ka lo hlau a ni maw ka ti hial a, he ti em em hian ka lo inveng ru ang tih ngaihna pawh ka hre lo hial zawk a ni.




Urinkimi te in kan va thlen phei rualin "Usamu-a kha in inah hna a thawk dawn sia, tunge awmpui dawn a?" Ufelin a lo ti sawk sawk a, "Ka pa a awm a lawm, chaw ei hmanin an lo phei ang" Ubiak an a lo ti ve thuai a, Ufeli chuan thaw huai hmel a puin ka hria.




Man an inhlan laichuan Room-ah kan awm khawm laih a, tleirawl hoin mo kawr te ha chhinin thla an la a, tukverh bulah ṭhu chungin Romawia ka lo be ve thung. Inneihna a ka kal thu ka hrilh te chuan min lo fiam hlut a, "Hmanah te khan min duh mai la chuan pasal fanau i nei ve tawh tur a nia" tiin a nui huk huk a.




"Ka nei duh teuh lo mai che, vairamah ringawt min awmpui i tum anga, ka duh teuh lo mai, lunglengin kan thi thei ang chu, in nu pawh kha a thau theih miah loh kha" ka lo ti fiam ve luam a, a nupui lo nui ri kar kar pawh chu ka hre pha. Hetiang hian uang deuh deuhin min rawn be fo a, a chang phei hi chuan ka lo ip ru deuh ṭhin; mahse, an nu hian a haw ngai lem lo a, chuvang te pawh chu a niang kan inpawh phah khawp mai, Romawia te nupa nena kan inpawh em vang pawh hi a ni maithei Urosy mitmei ven nachhang hre lek lo a Ufamkima kha ka lo kawm ni.




Dar 3 bawrah chawei kan siam a, chhim lamah chuan thlasik khua chu vawt tak a la ni, puanlum ka sin hlun a, midang ho chuan min chhaih nan tak an hmang bawk, chaw kan eilai mekin Ufeli leh Mistiri-a lo inzui chu ka va hmu fuh leh a, "Lalnunfeli chu khawiah nge a awm ka ti ka tia, i tawih i lo va zui daih a ni maw?" Urinkimin a tih chuan ka va en leh a, min lo en reng tih ka hmuh rualin mit ka la sawn leh rang hle.




Dawhkan kilin an ṭhu dun a, keini Sofa ah kan ṭhu thung a, a hnunglam min chhawn vangin hmel kan inhmu thei lo hlauh a, a tihzia angreng. Ufeli chuan a be seuh seuh reng a, ka va en laipawh chuan an titi dun mawlh mawlhin ka hria.




Chaw eikham veleh aṭangin pindanah ka inkhung chawt a, ka nuin ṭhu chhuak ve tura min tih pawh chuan ka tawm lui tlat a, ka awm a nuam lo telh telh mai, chutih nak alai chuan Samuela message ka dawng leh pek a, "Naktuk ka cham dawn, a tuk leh lamah ka kal ang" tih a ni, engvangin nge a khawsak dan tur pawh chu min rawn hrilh sek chu le!




A Message chu chhang loin Phone chu ka dah hmak a, kan haw dawna ka va chhuah leh chuan mu turin inhnuaiah an lo chhuk tawh a, a tuk inneih ni chawhma lam thleng chuan kan inhmu leh ta lo, chawhnu lamah mo hruai an lo kal laiin inhnuaia a chhuk tur ka hmu a, ka pehhel ve deuh bawk nen kan inhmu khat khawp mai.




"Mate, i Nu Thani hi inentir tura lo tlang ve a duh sia, i Seat i kian mai dawn em mawni le?" ka nuin a tih chuan "Khawiah nge ka chuan ve ang, ka cham hman bik miah lo a nia" ka lo ti thuai a, cham rih rawh min tih mawlh ka hlau a, khawdanga zinchhuah hi nuam ka tih ngai loh bakah ka dawr ka ngaihtuah tawh lutuk.




"Sumo-ah i lo haw mai dawn nia?" ka nuin a tih leh chuan ka hreh ru khawp mai, hmel hriat loh karah lehnghal.



"Au Rinkimi Phone rawh, a pasal te chhung ho khan Bus an rawn hmang chho a, haw nghal lo tur an tam vangin an thawl dawn an tia, Bus chhuak thar ania, a nawm hmel lutuk" Rintein a lo tih chuan ka nu leh Nu Thani chu an lo phur khawp mai.



"Chu chu a remchan chu, i Nu Thani chu kan bulah chuang sela, nang Bus-ah chuang mai la" ka nuin a ti nghal zung zung a, min rawn ve leh tawh lo reng reng.




Zan lamah chuan moneitu te in lamah hun kan va hmang a, Samuela leh Ufeli pawh an lo kal ve a, an inzui chawt niberin ka hria, kan inhmuh fuh chang hian ka hmelhriat loh kalpelh zel a, a ruk tak chuan min ngei tawh viau maithei a ni.




Nutei te in lamah pawh let tawh loin kan haw tlang a, Urinkimi chu Bus min lo biaksak turin ka chah diam bawk, in ka thlen hnuah min lo Phone-in "Bus chu an zan tlan dawn a, Tuipui D-ah Picnic an duh sia, zanriah eikhamah an chhuak chauh ang; mahse, khaw thim hma chuan an chhuah hman chu ka ring" a lo ti a, phur lohsa nen chuan..




Tukṭhuan eikhamah ka nu te an chhuak anga, keini kan chhuah ve dawn meuh chuan anni ho chu an lo thleng fel diam tawh dawn anih hmel. Darkar 6 emaw 7 vel kan tlan chuan zanrei ah kan thleng velin ka ring, tha a za duh fahran lo khawp mai.




Ka nu te chu zinglam dar 8 velah an chhuak a, keipawh chhuah awlsam deuh turin Nutei te inlamah kan inkhai phei ve bawk a, Bag lian phei chu ka nu ten an hawn vek tawh zawk, kan chhungte khual khua a mi an haw ta hlawm bawk nen an reh duak tawh, Ununfeli pawh a hnathawhna Mamit lam pan turin a insiam ve mawlh mawlh a, a bialpa lah chu kal a la tum lo nge ni, Nutei pasal nen inhnuaiah an la ri bur bur reng a, ka hnena a sawi danah kha chuan vawiin hi Lunglei a pan hun tur niin ka hria.




"Mimite, ka nu kha in Motor-ah a chhuang ve ta daih sia, engtin nge i awm dawn?" Ufelin a lo tih chuan Bus-a ka haw tur thuin ka lo chhang a, "A tihzia hlauh chu, kei Ubiakzuala ṭhiante Motorin ka chhuk dawna in inah zankhat ka riak ang, ka nu kha ka ngaihtuah deuh" a ti niah niah a, a bialpa chungchang chu zawh ka chak ngei mai, zawt lo turin ka insum ngar ngar thung.




"URinkimi kha eng nge i leisak a?" ka ti hram a.



"Keimah tak chuan ka leisak chiah lo, ka nuin Drawer a leisak a, Mamit a ka ṭhiante dawr ka duh sia ka rawn buai phah lutuk" a ti luam a, ka lo buk nghat nghat laiin "Kumthar leh ah chuan pasal ka nei ve tawh maithei, lo inkhawl rawh" a ti zauh a, ka nui tawi tak ringawt.




"Nang le, Mawipuiin pathlawi a buaipui a ti che a" a tih laimekin Samuela chu thlantla hluamin a lo lut a, Ufeli thilsawi kha a rawn hre hman dawn tih a chiang reng, "Pathlawi kha maw, nupui a nei leh tawh, fa te pawh an nei leh tawh zawk a lawm" ka ti ve luam a, insawifiah tumna rilru ka pu chu a ni vei tak sia, ti nge maw hetiang hian ka awm tak tlat mai le!




"A zia lo emai, tlaivang pangngai zawn a ngai a nih chu, Doctor hmelhriat ṭha deuh ka nei a sin, ka lo sawipui dawn che a mi?" nui chunga a rawn tih chuan ka nur nang a, "Ngai lo, nula ka nia lawm, tlangvel chhe lo awmna te chu ka hre ve lutuk" ka lo ti fiamthu a, Samuela chuan tui in pahin min lo en reng tih ka va hmu zui a, ka zak lek lek a ni.




Pawn lam aṭangin Ununfeli chu an lo au a, "Chu an lo thleng tawh anih dawn chu, Usamu, dar engzatah nge i chhuah dawn?" a ti zung zung a, "Ka hrethiam lo, thlenin pa khuan tihtur dang a zawng leh mek a" tih pahin an inzui chhuak a, pawnah chuan an va invai liam ve ni ngei tur a ni.




Samuela a rawn lut leh chuan ka lam a rawn pan ding nghal a, "I cham dawn a mi?" a rawn ti thawr a, "Tlaiah chawei kham lamah kan chhuak ang" ka lo ti ṭha ve mai bawk. Ka zawh let ve hma hauhin "Keipawh" a ti zawi sup a, a Message ka chhan loh chung chang chu engmah min zawt miah lo.




Urinkimi pa nen inhnuaiah hna an thawk a, ka Pa Mawia a lo in la Mistiri ve tho bawk nen an tui dun hle a, Samuela nen pawh tlai thleng chuan ka inhmu zui tawh lo. Tlaia an lo chhoh chuan a inbual a, a inbual zo chu Veranda ah a rawn chhuak ve a, ka ṭhutna bulah chuan rawn ṭhuin kan chhuah hun tur min zawt a, ka la hriat bik loh thuin ka lo chhang thung.




"Tu Motor in nge i haw dawn a?" a tih chuan "Urinkim pasal chhung te rualin" ka ti mai a, "Hetah an lo lam dawn che a mi?" a ti leh pek a, ka bu zauh ringawt tawh.




"Lungleiah kal ngai lo ila chuan ka rualin i haw tur a nia" a ti thum dut a, ka va hawi chuan min en lem lo.



"Lungleiah eng nge i tih dawn a?" ka ti ve leh a, "Kan hnatawh tur ka en lawk dawn a, nikhat vel chauh ka cham ang" sawi tur ka hriat tawh loh vang chuan ka lo nui ringawt a, min en zui vung vung vang chuan ka hawisawn leh riai riai thung.




Zah zelah "Inneih cham turin an ti te te che a, an chhawr hrep che a ni maw" ka ti leh a, a nui ve suk mai.




"Ka cham chhan a lawm" a ti sam mai a, "Pawisa an pe che em?" ka tih chuan a bu nghat a, ka zawhna chu keipawn ho ka ti...




Hma deuhah chaw kan ei a, Samuela pawh chhuak turin a in peih diam tawh a, ka kal chhuah hun min nghak anih ka ring deuh, chuti ni lo se a la awm ve reng ka ring hauh lo, Bike a nei a; ani chu a duh huna kalchhuak mai thei a ni. Pa Mawia lah chuan a in sak dan tur chungchang mawlh chu a la sawipui a, a kalsawn te chu a zui zel bawk si, a ning tawh ngawtin ka ring.




Rei vak loah Bus chu a rawn thleng a, kal nghal mai ka tum chu Samuela chuan ka kawrah a rawn pawt a, min pawt let zawt a ni ber! Phawk deuha ka lo en laichuan "Tinge Bus-ah i chuang dawn tih min hrilh loh" a ti bung nghut a, ka hau chunga ka en laiin "Chuang lo mai rawh, ka phur mai ang che" a rawn ti leh mauh mai.




"Mimi, an nghak reng che a nia?" pawn aṭangin Nutein a lo ti lang lang a, "I ti ho emai a, ka kal dawn" tih paha ka che leh chiah chu ka banah a rawn vuan leh chawt tawh!



"Eng nge i hriat a?" ka ti hluai a.




"Lunglei ah chuan ka kal rih lo ang, ka rualin i haw dawn nia" a ti chang bawl a, a la thutak em em zui.




"Eng vang chuan maw, tih tur pawimawh i nei a ni lawm ni?" ka banah a vawnna chu a ti nghet sauh a, ka zawhna chhang loin "Bus-a chuan a ngai lo" a ti leh bur a, ka awih thei lo zawk!



"I va han thu em em ve!" ka ti leh hluai ringawt.




(Zawmna)



"Zana Bus chuan chu a hlauhawm, keiman ka phur mai ang che" pawn lampana kal nghal mai a tum chu ka lo ṭang ve leh tlat tawh, "Mutthluk palh te a hlauhawm, Bike in kan thleng rang zawk bawk ang" a ti leh zel a, a fiamthu chu a ni hauh si lo, ṭawng ve ngaihna pawh min ti hre lo zawk a lawm le!




"I ti awm ang lo emai, midangin min lo hmu a nge" ka tih tak fakah chuan min pawt lui ta em lo, chuti chung chuan ka kut erawh a la hum nghet viau tho.




Kawngka a Nutei lo pen lut ka hmuh takah chuan min vawnna chu ka thing thla vat a, ka din hlat nghal thuai bawk. "Bus in a nghak reng tawh che a nia" Nutei chuan a lo ti leh a, "Ka lo kal" tih leh chet ka rual bawk.




Pawna ka chhuak chu min rawn zui ta tho a, min pawh din leh ka hlau ru viau a; a zahthlak dawn em a ni. Mahse, min rawn umphak hmain Pa Ro-an a lo be ta hlauh a, kei Bus-ah ka lut nghal thuai bawk a, Seat hmasa berah chuan ṭhuin puanlum ka sin hlun a, tukverh darthlalang khar paha ka zuk hawi thlak lai te chuan Pa Roa bulah dingin min lo en vung vung a, a hmel chu lungngai hmel a puin ka hria, engti zia nge ni ka awm a ti nuam lo deuh riau mai!




Kan Bus chu a tlan chhuak a, chuang kan tam lo bawk nen tlar hnung lama nu pahnih titi bak chu midang ṭawng kan awm lo, thla bial zan anih vangin pawn lam chu a eng ṭha hle a, ral hla taka tlang te chu thla eng hnuaiah chuan a lang paw riai a, khua lah chu a vawt vin tuk mai bawk.




"Zai ngaithla teh ang u" Nu pakhatin a rawn tih takah chuan Driver chuan a rawn Play a, Lalhunchhungi Pachuau sak 'A rem lul lo' tih ngei mai chu kan ngaithla a, a boruakin a zir em bawk a lung a leng vawng vawng mai.




Seat ngheng chuan ka ṭhu awn diaia, ṭhutpui ka neih ve loh vangin ka Seat chu a thawl angreng hle a, a vawt deuh tih lohah chuan ka duhdan tak a ni zawk. Kan hla ngaihthlak chu zawi te tein ka lo phunrem ve a, chu hla chu ka tana phuah ni mai awma mawi a ni, a hla thumal tin chu ka chenpui pha ve a, a taka ka tawn ngei pawh ni ve in ka hria.




Ka tleirawl tirh a ta tawh khawhar rukna hi chu ka nei reng ṭhin, Ufamkima ka tawnga, kan inkar rem lo tak chunga beiseina ka lo neih ve ṭhin te, duhthu ka lo sam ve ṭhin te kha tunah chuan a ti zualkai tu chauh an ni bawk. A thim zawnga thil hlir ṭhin mi ka ni lo a, miten an nunhlui ngaia lunglen thu an hril laiin kei erawh hma lam hun tur dawnin ka lo kur ve ṭhin, hun lo la awmtura thil ṭha beisei tlat na hi mahni inhnem nan chuan a ṭha berin ka hre ta bawk.




Ka Phone ri chuan ka ngaihtuahna a la peng ta tlat a, ka en chuan min lo Phone tu chu Samuela a ni, he pa khawsa zia hi mak ka ti telh telh mai, min ngaihzawn thu a sawi hauh lo a, chutiang tur pawhin kan inkawm ngai a zeng pawh a ni lo, tun hnai ni hnih khat lek chhunga ka laka a awm dan hi a mak tih loh theih a ni lo ang.




Phone ka chhan rual rualin "Khawi nge in thlen tawh?" zawi ruih hian a rawn ti a, a aw ri aṭang chuan min ngaihtuah deuh te pawh a ang a, chu pawh chua ka tan zawhna tho a ni!




"Rawpui" ka tih laimekin "Muhil suh aw, in tih harh tum la, Bus Driver pawh kha a muthlu em ngaihven reng rawh" a thil rawn sawi chu chhan dan tur ka vai riau zel.




"I i thuam lum em?" a ti leh a, "Aw, puan ka sin a" phawk deuh lek lek a ka tih laiin "I nghawng kha ti lum la, i hritlang hlauh a nge" a tih leh chuan ka bangbo leh zo tawh. Mi hrang, chhung te pawh ni lem lo hnen aṭangin hetiang ngaihsakna hi ka la dawng ngai lo miau a.




"I la chhuak ve nange?" a zawhna chhang loin ka tih ta daih a, mi pangngai inhmelhriat satliah anga biak ka tum ngar ngar a ni ber e.




"Khaw pawnah ka ding rih a, ka ruala kal duh la chuan..." a ngawi zui dat a, chumi hnuah "Nikhat ka cham anga Aizawla ka lo let veleh ka rawn hmu ang che" a ti leh zat a, haider ṭalh theih pawh a ni lo, min ngaizawng tih ka hria, a ṭawngkain sawi lo mahsela a chet phungah a thup tlat lo a, tunah ngei pawh a ngaihzawng ang maiin a nia min biak leh tawh ni.




"I awmdan hi ka awm i ti nuam lo" ka ti tawl a, "Enga ti maw?" a lo tih chuan chhang mai loin ka ngawi vang vang thung.



"I duh loh zawngin ka awm em ni?" a ti thum leh dut a, a nui ri suk bawk.




"Ka hre lo, ka awm a nuam a lo tawp" mut chhuakin min zem ṭan tawh vangin ka aw chu a tham chhel a, Motor tlan ri nen a hre pha kher lo maithei.




"Tukverh ah te khan dak chhuak la, inthing harh deuh rawh; mahse, thli thaw kha in chhem rei tir lo la" a tih leh chuan ka nui ta ringawt a, min ngaihtuah tak tak te pawh a ang a lawm le, lawm taka lo pawm chi niin hre chiah lo mahila nuam chu ka ti ve kher mai.




"Ti nge mutthluk i phalloh a, i khalha chuang ka ni tawp si lo" ka lo ti fiamthu a, "Ka ti mah mah.." a nui leh suk a, keipawh chuti tho.




"Tluang deuhin i thleng dawn nia, i thlen hunah min lo hrilh la" a ti leh zel a, ka rilru ah chuan zawhna a rawn lut zut zut a ni ber. Engvanga min ngaihtuah em em nge a nih? Tinge ka ngaihzawng ni hauh si lo a ka ngaihzawng ang maia min rawn biak si? Eng ang hmeichhe hmuhin nge maw min hmuh ang le?




Kan inbiak zawh hnu chuan ka puansin chu ka pawt khawm sauh sauh a, Seat-ah chuan ka ke hlang kangin bang lam chu ka ngheng a, ka duh ang thala nuamsain ka muthlu thei tawh ang.




Mit chhing vang vangin Samuela nen kan inbiak dan chu ka ngaihtuah let a, a hmel pa leh damdup mai te, a aw thum dut mai te, a rim; siam chawp ni lo mipa rim bik hliah hliah te kha, engtin nge heti em em a chiang hian ka lo hriat theih! Keimah zawk hian ka lo chik ru hle a nih dawn hi, ka endan aṭangin zuamawm thil a lo hmu tihna nge maw ni dawn le?




Engtik laiin nge ka muthilh hman reng ka hre lo, thawm ri hrawk vang chuan ka harh zawk a, ka phu nasa ngang mai. Awmdawm meuhin ka hawikual a, midang ho pawn an ring an lo fan uak uak hlawm a, chutih laiin kan chuanna Bus chu a ding hmiah mai bawk.




"A ke thlak a ngai" an tih thawm ah chuan ka lo thaw huai a, engthil emaw kan su ah ka lo ngai hman a ni. Ka nu ka Phone a, Bus ke an thlak mek thu te chu ka hrilh a, "Hei, i u Afeli te nufa an awm a, Afeli i Room ah ka mut tir mai a nia, i lo thlen har hmel sia ka mut san mai ang che aw, i pa in inkhel en pahin ka lo nghak ang a ti che a nih chu" a lo ti luam a, kan inbiak zawh hnu pawh chuan an Motor siam chu rei deuh kan nghak a, pawn lah chu a vawtin kan khur chhe lo chauh hlawm.




Rinai takin an beirei a, Aizawl kan luh meuh chuan dar 2 a ri hnai thuak tawh, ka pain kan veng kawnah min lo hmuak a, ka kut leh ke vawt lutuk vang chuan mu pawh niila ka mulum thei pawhin ka ring lo, ka khumah Ununfeli a lo mu a, thawm dim deuhin Bathroom ah ka lut tlang a, tuilum sa ver vawrin ka ke chu chiah ila mutlum a awl deuhin ka ring.




Ununfeli bulah chuan inthawlhin ka Phone ka bih hmasa leh a, Samuela missed call pakhat a lo awm a, ka insil lai velin min lo call a ni ngei ang. Min lo hrilh rawh kha a ti ve bawk si a Message -in 'Ka thleng tawh' tih te chu ka va thawn a, chhanna pawh ngaichang loin ka mutsan zui a, ka chau bawk a niang ka muhil rang khawp mai.




Ka harh chuan ni a lo sa ut tawh a, ka Room chhaklam turverh inhawng aṭang chuan ni zungin chhuat chu a rawn chhun kalh a, Step a pen chho thawm leh Ununfeli ṭawng lang lang ri ka hre zui bawk.




"Mimite" a rawn tih laimekin ka ṭhu chhuak chu min rawn hmu chawpchilh a, "E, i lo harh tawh maw, Mawipuiin a lo Phone a, inchungah tui a put nasa a rawn tia, lo kal vat rawh se a ti a nih a chu" a rawn tih chuan ka tho rang hle a, ka hmuh remchan a piang ka ha sawk sawk a, Usangzuala Phone-in "Lo kal lawk mai rawh" ka va ti chul a, ruah tam vanga tui lo put ṭhin chu a ni lo tih a chiang reng tawh, Building neitu te tui rawn put a nih hmel.




Dawr ka thlen chuan "Usangzuala a lo thleng tawh em?" tih leh inchunglam pan ka rual a, inchungah Customer an awm lo hlauh chu a tih zia ngei mai, Storage room lam ka pan a, Pipe leak awm ang ka hmu der lo. Tui luanna ka han chhui takah chuan kil khatah kuttum leng vel tur hian kua a lo awm a, dawr ṭhenawm te tui chhe Pipe kan va zawmtir na lai kha a ni, Leak a lo awm a, chulai Pipe zawmna tura an verh kuak laiah chuan tui a lo tling khat pam bawk.



"Mimi, i buai em?" Umawipuii a ni.



"Siamsiami kha Bucket leh Towel nen lo chho teh se" tiin ka chhang a, "Lo chhuk lawk teh" anin a rawn ti ve thung.




Ka zuk chhuk chuan kan ṭhenawm dawr nghaktu URinmawii a lo awm a, min hmuh rualin Umawipuii zawk chuan "An dawrah tui a far a nih chu" a lo ti thuai a, kan tui Pipe Leak bawk chu em maw ni?




"Khawi laiah nge a far a?" ka phur lo ngei mai, siam thiam koh mai tur ka hre bawk si lo.




"Ka ṭhutna zawnah tak a rawn far a lawm, kan lehkha duhlai a lo far huh nual hman a, chhak lamah dawhkan ka pawt chho ringawt a, in tui Pipe verh vang kha a niang" a ti niah niah a, a hmel aṭang rengin a lawm vak lo tih a hriat reng.




"A van zia lo tak, keini pawh inchungah a lo put chhuak a, chhuat a huh zuih mai" Umawiin a tih chuan a ner duh lek chauh.



"Tih dan han ngaihtuah vat rawh u, tiang te chuan kan dawr a ti rimchhe vek dawn a sin" a ti leh a, chhan pawh ka chhan leh hmain a chhuak zui daih bawk.



"A va tihchi loh ve, a nu awm phei sela chuan a rawn ṭeu viau ang" Umawipuiin a tih chuan thawk ka la hluai a, "Usangzuala chu ko teh" ka ti leh ngawt a, a rawn siam thiam ngut pawhin ka ring chuang lo.




Siamsiami nen inchung chhuat kan hruk laimekin Samuelan min lo call leh hlawl mai, tun ṭum chu ka la rang em em lehnghal a, engmah pawh a rawn sawi hma chuan "Tui kha a put leh a sin" ka lo ti hluai a, a siam a ni bawk a angaihna a hre deuhin ka ring.




"A va zia lo ve, a Pipe a lian tho tiin ka char nghet lo a, a put tam deuh tawh anih dawn chu, Pipe kha vuah ṭha la, Cement-in in char dawn nia" a sawi laia Pipe invuahna lai ka va bih chuan a lo inthlunzawm miah lo tih ka va hmu chawp chilh a, "Pipe te hi a lo chhuak daih a nih hi" hmu thut ka ni bawk a ka ṭawng ring khawp mai.




"Pipe hi a lo invuah miah lo" ka ti ṭha leh a, "Vuah ṭha rawh le" a lo ti zawi ruih thung. Ka vuah ṭhat takah chuan a hnuaia tuitling Pipe-in a dan ho pawh a put ta zung zung a, ka thaw huai ringawt tawh.




"I chau em?" a aw aṭangin a thawhna a la rei lo anih hmel a, a hmel pawh a pawr ve phangin ka ring.




"Chau lem lo, i tho chiah a law?" ṭhutthleng remṭhat pahin ka ti liampuat a, "Ka la mu lo zawk a" a tih chuan ka lo chek hlak a. "Dar 9 a ri dawn tawh a nia, tinge i la mut loh a" ka ti hap a, a thleng tlai viau nge ni.



"Ka ngaihtuah che a" a rawn ti chu ka awih lo ngei mai, a nui suk ri ka hriat takah phei chuan min chhaih a nih ka ring mah zawk.




"Hna thawk rawh le, hun awlah kan inbe leh dawn nia" a ti leh mauh mai, tinge kan inbiak reng pawh hi ka hrethiam ta chiah lo, ngaihtuahna lah chu a luah rauh rauh reng a, chhunah te chuan a tho tawh angem tih te a nia ka ngaihtuah ni, ka Phone chu ka bih khat tawk reng a, min lo biak ka beisei ve ngawt mai bawk a, ka ngaizawng ve ringawt tihna em maw ni?




Tlai thleng chuan min lo be lo a, min biak loh vang chuan ka hnim ruih bawk a, mak ka ti lek lek zawk, Umawipuii lah chuan ka awmdan hrethiam hek lo "Haw hma la mu leh rawh, mut i kham lo anih kha" a ti sek sek a, chu ti na na na chu tiin dar 4 velah ka hawsan a. In ka thlen chuan Ununfeli leh ka nuin eirawng an lo bawl a, min lo chiauau ve hlut mai.




"Vawiin ah chhuk i tum emaw ka tia?" ka tih chuan "Ka nu hi ka inentir pui lawk ang, in tan a buaithlak ka hlau deuh maw le" a lo ti var a, "Buaithlak hran loh e, hruai a ngaih te chuan keipawn ka hruai thei a lawm, ngaihtuah lutuk suh" tiin ka chhang ve thuai bawk.




"Ka sawifo ṭhin kha aw Mafel, hei pasal nei rual i ni tawh a, pasal tur thlan thiam i ngai a nia, i nau aiin ka beisei sang zawk che a, i nu tana makpa nih tling tur leh chhungkaw khaiding thei tur chauh neih tum rawh, mipa hawklak mai mai i neih hi ka hlau ṭhin teh a nia" ka nuin a lo ti sap sap a, Ununfeli nuisang hmel chuan ka awm a ti nuam leh tawh lo. Samuela nena an inkar dik tak hi zawh chian phawt ṭhain ka hria, chuti anih loh chuan thil fel lo a awm thei dawn tlat.




"Ka ṭhianpa Hnahthiala ka lo hruai kha i hmu ve em?" tiin Ununfelin ka nu a zawt a, "Hmu e, khapa kha a neihtlak em ni a?" ka nuin a lo ti let vat a, an ti ti hriat zawm zel ka duh vangin an bulah chuan ka va ṭhu a, ka nuin thingpui min lo pe nghal thuai bawk.



"Chhe lo i ti em?" Ununfeli bawk a ni, ka thingpui chu ka lem pawp a, a sa em em lehnghal a!



"Hmelah buai reng reng suh, inneih hnu ah hi chuan mizia hi a pawimawh ber tawh" ka nuin a ti veleh a, Ununfeli nuih a zat hmel viau thung.



"Usamu-a te chu a fel lutuk, an khaw mite pawhin fel an tih rawn a lawm, a taima bawk sia" ka nu chuan "Eng hna thawk nge, i pa Ro-a khan Mistiri a ti tlatin ka hria" ka nu bawkin a ti leh a, Ununfeli chuan phur leh zual hmel hi a puin ka hria.




"Ni e; mahse, Mistiri satliah a ni lo a nia, Mamit-ah pawh Furniture dawr lian deuh a nei a, Aizawl ah pawh dawr siam a tum a lawm, a hausa ru zek ania" a tih chuan mak ka lo ti ve hle ringawt. "A va fakawm ve aw, mizo tlangval ten an thawh ṭhat peih mang loh thawkin sumdawnna bul a ṭan thei chu a ngaihsanawm hle mai" ka nuin a ti leh a, "Ka thlang thiam a lawm, mipa hawklak mai mai te chu ka duh bik hleinem" Ununfelin a tih laichuan ka bing mup in ka hria.



Ka inthlak lai te chuan ka thin a tawt urh mai a, Samuela sawi kha lo dik ta tehreng pawh nise Ununfeli zawk hian a ngaizawng hle chu a ni si, chutih lai kara lo tlakzeh ve chu thil dik a ni thei lo, ka chhungte zawng zawng pawhin Ununfeli bialpa angin an ngai a, ka nu ngei pawhin a pasal ni mai tur angin a hriatsak a nih kha.




Chutiang thuartham ringawt ngaihtuah chuan rei deuh ka inbual a, Samuela chu be tawh lo mai ila, thil a kal dik loh hma leh rilru kan inpek tak tak hma hian inthiarfihlim mai ila ṭhain ka hre ta bawk. Ka inbual zawh chuan a Message ka va hmu nghal a, ka haw ṭep tawh em tih min lo zawt a ni.




Message chu ka chhang ta lo, zanriah eikhamah "Vawiin i inhralh ṭha em?" tih ka dawng leh a, ka bula Ununfeli titi siam siam chuan a hmuh ka hlau hle ringawt.




Mut dawn thleng chuan a Message leh Call engmah ka chhang lo a, induh chan tak te pawh ka chan ka ring, Ununfeli ka bulah a mu leh a, mut hmunah kan titi dun a, a bialpa chungchang te chu min hrilh siam siam a, a duh hmel takzet a ni.




"Lunglei-ah a rawn kal fo a mi?" ka tih chuan "Kal fo nang, Mamit-ah ka awm daih a lawm, kan inṭhenawm a, amah tak hi chu Aizawl-ah a awm tam zawk a, kan inhmu zing thei bik vak lo" a ti sap sap a, "In neih intum hnai a mi?" ka tih chuan a nui hak a, chik deuhin ka lo en thung.




"Ka sawi uar a nih kha, chhungte hian pasal nei rawh min ti reng a, ka nin vangin tikhan ka sawi mai zel" a tih chuan min ti bangbo angreng. "Anih chuan in inngaizawng lo tihna maw?" ka lo ti he haw a.




"Chutiangin ka sawi loh kha, kan innei dawn rih lo ka ti mai a lawm, Usamua hi a buai lutuka, nupui nei hman a la inti lo aniang" a ti hap a, a rilru a buai hmel riauin ka lo hre leh pek a, thil hi ka ngaihruat nasa thei ṭhin a nia.




"Pasal neih i hun tawh tehreng nen, i dinhmun ngaihtuah ve sela" ti a ka lo vuipui chu min thlawp hmel khawp mai. Ununfeli nen hian kum 4 laiin kan inthlau a, pasal neih hun ve tawh tak chu a ni, a ṭawngkam aṭangin amah pawh hian neih a duh viau tawh maw le.




"Usamua hi ka nghak ve rih a, a chang chuan ka nghak thlawn ang tih ka hlau ṭhin, amah hian hmeichhia a ngaihsak lo lutuka" tih pahin a Phone chu a tuai let sek a, "Engtikah nge nupui neih a duh ve a?" ka lo tih chuan lu a thing ringawt a, "Chutiang a sawi ngai lo, a......" a hmui pet chungin min lo en a, a sawihreh hmel hle bawk a.




"Kan inkar hi i ngaih ang a ni lo, a tir chuan kan inbe zing ve deuh a, ani pawh ka lakah a fel lutuk; mahse, kan inbe khat tial tial a, inngaizawng ang chiah pawhin kan awm lo, ngaihzawng dang a nei lo tih chu ka hria a, keimah bak hi hmeichhia a be ngai lo bawk a, mahse, a awmdan ah hi chuan min neih tumna a nei lo niin ka hria" a ti niah niah a, a lungchhe deuh nge ni thawk a la leh hak ṭhin a, ka khawngaih zawk.




"Vawiinah in inbe tawh em?" ka tih chuan lu a thing mat mat a, ka inthlahrung ngei mai.



"A ṭawngmawh hmel reuh sia nangman be hmasa la" ka ti leh ngawt a, kei min lo bia tih hria sela a lawm lo viau ang chu. Kei lah chu ka inthiam lo em em lehnghal a, u te ngaihzawng chhuh ta te pawh ka ang dawn dawn a lawm le.



"Message a chhang thei lo, hna a thawkrim lutuk hi a lawm, a hna hi a Addict ni berin ka hria, hmeichhe lam a buaipui peih lo zo vek" a ti hlak hlak a, chil ka lem dak ringawt tawh, sawi nuam pawh ka ti tawh lo, hetiang hi a ni ang tih rindan ka nei phak miah lo bawk.




"Midang bulah chuan sawi suh aw, keichuan Samua bak hi ka duh lo, mipa dang hi chu ka ten tlat zel a" a ti niah niah a, hahthlak hian....



"Mahse, U Afel....a ngaihsak loh hmel che e" ka tih chuan min rawn en vut a, "Nia, a hna vang a nia, kut hnathawh hi chu a hahthlak em a lawm, a dawr siamna tur a intuak bawk sia, a zawh fel hunah kan ṭha chho ve mai ang, nakinah chuan Aizawl lamah pawh ka la rawn awm ve lo ang tih a sawi theih loh" a ti leh a, a ṭawng tawp lamah chuan a phur hmel leh viau tawh, Ununfeli zawk hian a duh takzet tih ka hre tawh a, Samuela rilru erawh hrethiam loin zawhna hlir chuan ka khat thung.




Ununfeli mut hnuah a Message min lo thawn ho chu ka en leh a, naktuka a lo haw tur thu a sawi a, a Message hnuhnung berah chuan "Pipe chu ka rawn char ṭha leh dawn nia" a rawn ti tel nghe nghe, ka rilru ka siam fel tawh a, inhnim hnai lo law law ila tih kha ka thutlukna a ni tawh a, chu chu tlang taka hrilh mai ṭha ka ti bawk.




Tihian a Message tur ka Type a, "Usamu, min ngaihsakna ah ka lawm khawp mai; eng nge i rilru hi ka hrethiam thei lo, i awmdan ah hian min duh ang maiin i awm ṭhin a, ka ringdik anih chuan invenlawk ngai tak thil niin ka hria, kan rilru put hmang a in ang tlat lo a, min lo hrethiam mai rawh" Message chu a tawi hle a, Ununfeli nena an chungchang va sawi chhuah erawh ṭul ka ti hran lo, mi â anih loh chuan Ununfeli vanga ka ngaihven theih loh zia pawh hi a hriat tawh tho ka ring a, zawhna a rawn neih zui ka ring lo bawk.




Mahse, zinga ka thawh chuan Message chhanna chu ka dawng leh ta tlat mai a, "Hriatthiamna tur che chhan ṭha tak rawn nei la, a chhan a ṭhat tawk leh ka lo hrethiam dawn che nia" tih hi ka dawng a, he pa zet hi chuh! A inti thú thei a nia.





(End of chapter - 5)

(COMMENT VE ULA, A NUAM VE MAI MAI A, MIT NA CHUNG CHUNG PAWN KA CHHIAR VE ZIAH A NIA, thawnthu a Boring, a kual ti ang chi chuan ka thawnthu kalphung ve reng anih vangin Complete hun nghah a fuh zel ang)

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 6th, 2022, 7:44 pm

ZUNZAM - by Ahmangaihi violette Khiangte



CHAPTER - 6




Nileng chuan ka ngaihtuah tluk tluk a ni ber, Umawipuii chu hrilh ka chak viau nain min lo hauh hrep ka ring a, ka hrilh mai ngam bawk si lo. Ka Phone chu ka en leh ṭhin a, a Message chu vawi engzat nge ka chhiar nawn leh tawh ang ni, eng rilru pua a rawn sawi nge anih ang tih chenin ka ngaihtuah kual a, thawk ka la hluai ṭhin a, nuam ka ti nge hrehawm ka ti pawh ka hrethiam ta chiah lo.




Tlai ka haw chu ka nuin "I Nu Thani te Pathianni an cham dawn a, naktuk chu lo bazar lo mai rawh, keimah ka lo chhuak mai dawn nia" a lo ti luam a, an inentir an la rawn haw lo niawm tak a ni.




Tlai thim dawn ruaiah an nufa chuan an lo haw a, zanriah pawh kan eitlai khawp mai. "Afeli chu i nau bulah i mu leh mai dawn em niang?" tih pahin ka nu chuan min rawn melh a, "I duh chuan lo mu leh la, khum a thawl a lawm" ka lo ti ve thuai a, mu tura kan chhoh chuan dar 10 a ri dawn thuak tawh.




Bathroom a a luh laichuan ka Phone a lo ri a, Samuela bawk a ni, ka chhang hreh ang reng, Ununfeli lah chu Bathroom ah a zai rat rat a, Phone chu ka lak hma rik a tum ni mai hian ka hre tawh, nidangah lem chutiang a rei chu a rik ngai pawh ka hre lo.




A vawihnih na ah chuan ka chhang ta hram a, pawn bathlar lam ka pan zui bawk. "Hello" ka tih laiin "I muhil tawh emaw ka ti a" thum deuh dut hian a rawn ti a, "Muhil... lo e" ka ti hap a, Bathroom kawngkhar ri ka hre zui bawk nen ka thingphu chu a rang dut dut mai.




"Ka lo thleng tawh a" a tih leh chuan sawi mai tur pawh ka hre lo, ka inngaihtuah deuh vung vung hnu ah "I tluang maw?" ka ti tawng a, ka ṭawngsual chiah chuan ka ring lo.




"Um..mahse, ka chau ve deuh" ka dang leh ta, ngaihsak deuh angin ka chhang ang tih ka hlau a, ka in ven a ngai tih ka hre leh lutuk chuan ka dang a ti awk zo vek bawk a, engtin nge ka chhan ang tiin ka rilru a buai nuai mai.




Ka chhan leh hma chuan "Vawiin lam dawrah i kal em?" a lo ti khauh a, "Aw" tih zawngin ka chhang.




"Naktukah i dawr ṭhenawm ah khan ka lo kal dawn a, ka lo pengkawi dawn nia" a ti leh zel a, lo 'Aw' chu hreh viau mahila 'Aih' tih chi ni hek lo le ka 'Aw' ve ta ringawt chu a nia, Ununfelin min man chhuak anga ka duh loh dan lutuka in sawifiah ka ngai ang tih mawlh chu ka hlau.




"Anih aw.." zawi te a tih pahin Phone chu ka dah a, engtin nge min lo chhan zui pawh ka hre hman tawh lo, ka hmet tawp rang em a; ani pawn mak a ti viau ngei ang. Inchhunga lut ta mai lo chuan bathlarah ka ding vang vang a, kan puansin tur siama Ununfeli che vel chu darthlalang chhanah chuan a hmuh theih a, rilru buai deuh chuan ka en ve reng bawk. Chutia ka en laireng chuan a Phone a phawrh a, nui chungin a hmet mual mual a, Samuela biak a tum anih ka ring.




Phone hmang chung chuan a nui hak hak reng a, a biak chhung chuan ka lut duh mai bik lo, engah nge maw tun lawka kan inbiak khan; tlang taka ka rilru ka lo hrilh mai loh ni ka ti leh hnuhnawh a. Chiang taka ka hrilh dawt anih loh chuan kan laklawh kual zo dawnin ka hre tlat tawh, tuna ka rilru put hmang te pawh hi a dik tawh miah lo, min rawn ngaihsak hian nuam lo tihna ka neih rualin engtin emaw zawng riau hian amah ka ngaihdan a danglam zel a, ka haw thei hauh lo te, ka lai deuh ṭut zel te hi a pangngai lo hle bawk.




Ka va luh chuan Phone a lo dah ve chiah a, min rawn nuih deuh nain engmah kan sawi lo ve ve a, engthil nge Samuela nen khan an sawidun ang tih ka ngaihtuah zui rauh rauh a, ka thil ngaihtuah duh zawng te chu a zia lo lam deuh chu a ni.




Kan muthnu chuan eng engemaw sawiin ka ti ti dun a, Samuela chungchang min sawipui lo hlauh chu ka lawm ru kher mai, a sawi chhuak ang tih mawlh ka hlau, engmah hre ve lo mah se, kei a hre tu tan chuan awm a nuam thei tlat lo.




Zingah chuan dawr kal turin ka insiam mawlh mawlh a, ka nu leh Nu Thanin ei an rel dun a, inhnuaia ka chhuk lai pawh chuan an lo ti ti bawrh bawrh a, Ralte nu tih takah an pahnih chauh pawh chuan an thawm a ṭha viau mai, ka sam huh chu Sitting room a Table Fan chuan ka chhem tir a, a vawt angreng hle a, zingkara lu ka su chu ka inchhir leh riau.




"Hair dryer ka nei a sin" Ununfelin a lo tih chuan ka ṭhu ngil hluai a "A ro ṭep tawh tho a chhem lo law law ang" ka tih lai mekin ka bulah a lo ṭhu a, tukin chu a tho fuh deuh nge ni a nuisang a, a hmel hmuh a nuam hle bawk.




"Hmanni ah Aumawii lo kal khan ka sam chhemro na a hawn daih a, ka lei leh hman rih si lo a" ka ti niah niah a, chutih laichuan a Phone a bih thunga, Samuela bawk chu ka ngaihtuah chhuak leh tawh, "Vawiin ah a lo haw dawn anih chu" ka rilru hria niawm taka a rawn tih leh chuan ka lo ka hau ringawt!




"Dawrah lo kal rawh ka ti mai dawn a sin, inah chuan a lo kal zak ang" a ti leh zat a, ṭawngka a chhang lo chuan lu ka bu ringawt a, min ti â deuh huih in ka hria.




"Ih...dawrah... i lo kal ve dawn a mi?" ka ti bah niai a, engemaw chang hian ka dang hi zuk awk leh tlat ṭhin chuan.




"Kal ve mai ang, vawiin chu..ka nuin Sunday cham a tum tho bawk a, ka lo pui ve rih ang che" midang hriat hlau deuh a min rawn ṭhut hnaih pahin "A lo kal dawn bawk sia" a ti leh sar sar a, a dar kan ak chungin a nui var var bawk a, a phur hmel te chuan ka awm a ti nuam lo zual hle tawh.




"A rawn hmu dawn che maw.." zawt em em pawh ka ni lo, ka sawi tur hre lo chu ka riat nawi a ni mah zawk. Phur fe hian "Thil a lo eikawi zawk anga a ni mai, Mamit ah ka chhuk san leh daih dawn sia, inhmuh na hun hi kan nei lo ve thei lutuka, tlai deuhah a lo thleng chauh ang" a ti leh zel a, za lo deuh chuan ka ṭhen ka ṭhen ringawt a, ka inthiam lo zawk tak tak a ni.




Inrinni a ni a, College naupang an awm loh vangin nidang ang em emin kan lun lo a, chhunah pawh kan awlthawng khawp, Umawii leh Ununfeli nen Counter-ah kan ṭhu a, ka ṭhutpui te pahnih chu an ṭawng duh dun bawk a, an titi ka ngaithla nileng a ni ber ang chu.




Dar li vel bawrah Samuela chu a rawn lang hlawl a, amah chauhin a ni lo thung, mipa cher lam hrisel loh hmel zet hian a rawn zui a, dawra an lo pen luh rual chuan Ununfelin a lo chiau au hlut bawk a, kan inmelh zawk tih loh chu engmah kan sawi lo, min be lo a; kei lahin biak hmasak ka tum bik hek lo, Ununfelin ṭhutna a kawhhmuh lampan chuan an inzui phei a, a lo kal dawn pawh a hrilh lawk vek anih ka ring.




An dawhkan lam ka va hawi laichuan min lo en reng tih ka va hmu zui a, ka mit ka la sawn leh rang viau a ni, engthil nge an sawi ka hre pha lo nain ka chungchang chu an sawi lo phawt ang, "Mate, Feli bialpa saw kan Mistiri kha a ni lawm ni?" Umawiin a tih chuan "Ni e, an inngaizawng chiah lo" ka lo ti hmanhmawh a, chutia ka sawi ngawt chhan pawh chu ka hre lo, engvanga lo phatsak ngawt nge maw ka nih le?




"Ka bialpa a lo kal dawn a ti sia, pakhat zawk saw tihna a mi?" hrethiam lo fein a lo ti leh a, ka va han ning tak, sawifiah dan pawh ka thiam teh nuai lo e a.




"Engmah ka hre ve lo" ka ti tawl a, min zawt zui ta bik lo. "Kan Mistiri hi hmelṭha ka tih zawng tak a ni, a hleitling si, a hmel te hi a pa riau, a zaidam hmel bawk si" a ti leh sap sap a, an ṭhutna lam ka va hawi leh kher chu ka inchhir chawpchhilh nghal bawk. Samuela chuan min rawn nuih a, dawhkan hnuai lam ka bih rang khawp mai, chumi hnu chuan an awm chhung zawng chu ka hawi chhuak leh tawh lo a tih theih ang.




An eiman an lo pek dawn takngial pawh chuan ka hawi duh lo a, min be lo chu lawm tak ka ni, ka u te pahnih awm laia inbiak chu ka duh lo hulhual a, lo inhre nel anga awm pawh ka duh hek lo, zawhna a tam leh dawn lutuk.




"Eng nge a?" Ununfelin a tih laichuan ka lo ip ru ṭeuh a, "Eng ni lo e" thum duta Samuelan a tih chuan ka lam a lo hawi tih ka chiang bawk. "Pawn thleng ka rawn thlah ang che u" tiin Ununfeli chuan a zui chhuak a, an kal chhuak ta chu ka thaw huai mai.




"Mistiri khan a va en nasa deuh che ve" Umawiin a lo tih chuan "Engtikah maw?" awihloh hmel zetin ka ti a, "A en vung vung che sia, a be dawn che a maw ka ti zawk a" a ti leh a, min en ni khan ka hre reng a ni.




"Hnahthial ah khan a lo kal ve a, kan inbe ve a lawm" ka ti sam mai a, "A lo kal a, Feli a rawn zui tihna a mi?" Mistiri chungchang a ngaihven lutuk chu tlemin mak ka ti deuh.




"Ununfeli te Furniture lei kha a siam a nia, a rawn dah sak ni in ka hria" ka ti leh a, Ununfeli bialpa anga ngaihtir loh hram ka tum ni ta berin ka hria, kei hi eng nge ka awmzia pawh ka inhrethiam tawh nek lo.




"Hman deuha kan dawra a lo thawh hnu lawk khan i U sangzuala bulah i chanchin a lo zawt a, a ngaihven deuh che em mawni kan lo tia, i Usangzualan 'Ka hrilh ṭha duh lo a, ka duhpui zawng a ni lo' a ti mai mai a, ka lo hau a lawm, keiin chhelo kan tih tehreng nen a" a sawi lai chuan ka hau chungin ka lo en a, chutiang thil chu them te pawhin ka lo hre ve hauh hleinem, Usangzuala lahin a sawi bawk si lo.




"Eng tin nge min lo sawi a?" ka lo ti he haw a, "Ka hrechiang tawh lo, i Usangzuala zawt rawh" a tih chuan ka hnual rawih thei.




"A mit i la deuh aniang nichin pawh khan a en nasa riau che" nui ruh ruh chunga a tih chuan thawk ka la hluai a, pawn lama Ununfeli te nena an ding chu ka va en pah a, Samuela chu min hnungchhawn zawnga a din vangin a hmel ka hmu thei lo, a kekawr ipte a zen ṭat a, hnunglam a ṭang phei chuan a pian a nalh viau in ka hria, nge ni a ka hmuh dan hi a khaw lo laklawh zawk ni!




"Feli nen hian an ni lo tak tak maw?" ka bengbula rawn tih pahin Umawii pawh chuan a lo en ve a, mak a ti ve deuh tih a lang reng.




"Ka hrethiam lo, mipa zawk hian kan inngaizawng lo a ti tlat a, UAfeli hi chuan a duh lutuk" zep buai tawh loin ka ti ta khawl a, chal chuar tapin ani a lo bu nghat nghat a, chutah zawhna ngah hmel deuha min en in "In inbe ṭhin a law?" a ti leh heu mai, Umawipuiin ngaihtuah hmaih a nei ngai lo.



"Aman min lo be zeuh zeuh"



"A ngaizawng che a mi?"



"Aniang" tih zawngin ka chhang a, ka zak dawn dawn mai.



"Engtin nge a lo biak che..?" lehzela, duh loh thleng thlengin min sawi tir leh dawn ta.



"Ka sawithiam lo, ṭha deuhin min bia..." min lo pawt chat lehin "A bem che em?" a ti leh mauh mai. "Bem chiah lo" ka ti leh a, Umawii bulah hian sawi vek law law ila, a thurawn te pawh la ila a ṭha zawkin ka ring ta tlat.




"Ka hrethiam mai" tih paha a nui ruh ruh chu a nakah ka va nghawk sawk a, "UAfeli bulah sawi miah suh, a tih chi loh teh mai ania, Samuelan min lo be ṭhin te hi ka inthiam lo lutuk, i lo sawi vaih chuan..." ka ti kha kha a, a ngaih hoh hmel hle thung.




"A mipa berin kan inngaizawng lo a tih te chuan.." mit min rawn siai sak a, hahthlak hian a..




"Khatiang zawngin lo ngai reng reng suh, min bem pawh nise ka tan chhan a mawi lo hrim hrim, unaunu te mipa duh em em lo nihpui te chu a" ka ti hlak hlak a, Ununfeli a lo luh thut ka hlauh vangin ka ṭawng zawi viau tawh.




"Midang veng thawng reng reng a han awm tawp mai chu i thlarau nun hi a rethei teh e, i vanglai a liam mai dawn aw ka nau, nangmah hi inhmangaih ve tawh zawk rawh" a ti charh charh a, eng a sawitum na nge pawh ka hre chiah lo.




"I lo hnar thawt thawt a nge, Feli a duh a zeng pawh a ni lo a, a duh che chuan ṭha deuhin lo be rawh, nangpawn i awmdanah khan i duh ve deuh anih kha, tun ang kum tawh ah chuan hetiang hun ṭha hi a vang riau tawh ania; bawhpelh miah suh, a chhe lo bawk si" a nui pat pat a, thu taka lak chi ni pawhin ka hre lo.




Ununfeli a lo luh tak vangin kan sawizui ta lo a, kan bula Ununfeli lo ṭhu chu "Tu zawk kha maw i bialpa?" a lo ti nghal thawr a, ka lo ip ru ṭeuh mai.



"Sawi ring vak vak suh, a palian zawk kha ania mahse..." a ti hap a, "Mahse chu eng nge?" Umawii bawk a ni, min puan fai leuh mai ang tih ka lo hlau ru ngang mai, ngaihven lo ang taka langin ka va ṭhuhnaih ve sauh a, an titi chu ka ngaithla ve kar bawk.




"Kan la ni chiah lo, ngaihzawng lam a ngaihven vak lo a mahse, a chhungten mo a tan min duh a maw, amah hi chhungte thu awih deuh chi a nia" a nui pah hawk a, a fiamthu ve ngei anih hmel.



"Aman a duh che em tih a pawimawh zawk" chiang kelh kawlhin Umawipuiin a lo ti ve leh a.




Chutih laichuan ka Phone a lo ri a, Samuela Number ka hmuh rual chuan ka ding rang khawp mai, ka bula ṭhu Umawii chu ka melh zawk a, a lo en hman lo chiah chiah. "Phone kan chhang lawk" tih leh kalsawn ka rual a, choka lam chu ka pan zui thuai bawk a.



"Hello" ka tih rual chuan thawm a ri ham ham a, Motor Horn a ri chuah chuah bawk.



"Zanah lo len i phal em?" a rawn tih chuan ka lo ip chawih thei, hei chu ka hnial ngei ngei a ngai, Ununfeli te awmlai a ni lehnghal.



"Ka hre nang, Ununfeli zawt la" ka ti ta zawk a, a nui nia maw le!



"Nangmah a lawm ka rim dawn che, engah nge Feli zawk ka zawh daih ang?" tiin min zawt let khauh a, a thil rawn sawi vang chuan ka lungphu chu a rang nghal dup dup thei.



"A chi loh ang" ka ti leh thawr a.



"Anih, Pathianni ah chaw lo ei ta che, i ṭhiannu ka rawn sawm tir.." a sawi zawh hma chuan "A chi loh..." ka lo ti leh a, nuam lo tih tawh sa nen a la rawn belh chhah deuh deuh mai chu a nia, insawi fihlim vat ka ngai anih hi.



"A...a fala thil sawipui duh che ka nei a" a rawn ti ta chiah a, kha maw...a buaithlak.




"Tunlai chu ka buai lutuka, hun awl pawh ka nei thei lo" a aw chu a bung deuh mah mahin ka hria, ka inthiam lo leh deuh chuan "Phone aṭang hian sawi mai la" nem deuh zawkin ka ti leh a, ani a ngawi vung vung thunga, ka tan tak pawh lo hnartu nih chu nuam lo duh tak a ni, len takngial pawh ka phal lo a, nula tih ah chuan a mawi lo hle tih pawh ka hria; mahse, ka tih loh chuan thil a kal khaw lo zo dawn bawk si a.




"Feli nen kan inkar hi i hriatsual a ni, chhuanlam a hman i tum bawk ni in ka hria a, a dik em?" fiah zeta a rawn tih leh chuan ka ngawi ta dak a, ka ngawih vung vung hnu ah "Aw" ka ti zawi sep a, engtin tak ngai ang maw.




"Engmah a awm lo, ṭhian chauh kan ni, nula fiamthu duh leh kawm nuam deuh mai ania; mahse, inngaihzawna thil vel kan inkarah a awm lo, inkilhtawih phah nan hmang suh; kei pawn hei vang ngawt chuan ka rilru ka thlak dawn miah lo a nia" a ti nghet charh a, a thutak hmel viau mai.




Duh aiin kan sawithui tlat tawh, kan inbiak dan pawh chuan awmzia a nei thui mah mah tawhin ka hria a, thawk leh khatah rilru ka siamfel mai thei lo bawk, inngaihtuah chian phawt ka mamawh a ni. "Anih mai..." ti a Phone dah mai ka tum laichuan "Lawk.." a rawn ti leh rih a.



"Eng nge?" duh aiin ka nelawm loh mah mah ṭhin a ni.



"Min duh lo em ni?" a rawn ti anih chu.



Awi leh! Deuh teh khawl chuan a, ka awmdan ah hian a hrethiam mai lo a maw ni le! Ka thaw lak lah chu a ti rang em em mai lehnghal a.




"Ka awmdan ah hian i hrethiam ve mai lo a mi?" ka ti hap a, chutih laichuan tu te nen emaw an inbia a, in an thleng tawh a ni maithei, rei lo teah thawm a zawi tial tial a, a aw ka hre zui zat bawk.




"Hrethiam e; mahse, tunah chuan ka ngaihtuah vak lo che, ka duhzawng i nia keimah chiah inngaihtuah in ka ṭanghma ka hai rih anih hi" a tih chuan chhan dan tur hre loin ka ngawi vung vung a, "Min duh suh" ka ti leh ngawt a, ani a lo nui hawk thung.




"Zanah chuan ka lo leng ang, ka lo rim ang che" a ti leh a, a chiang fek fawk viau; mahse, aw tiin ka chhang thei tlat lo. "Ka sawi tawh kha...." ka tih laiin "Nangmah chiah ka rawn rim ang che" nui lek lek hian a ti leh a, a rawn kal ngei dawn tih ka hria, ka rilru a buai nak a, chhan zel dan tur ka hre tawh lo.




"Nidangah lo leng zawk mai rawh, Ufeli awm loh hunah" ka ti ta ngawt a, a lo nui leh tawh. Ka awmdan chu naupang chhia a ti ve ngawtin ka ring, ka zak lek lek zawk a ni.



"I tih tlat chuan le" a tih takah chuan ka lo thaw huai mai.



Kan inbiak zawh chuan rei deuh ka chhuak phei duh lo a, Umawiin min lo koh takah chuan ka va chhuak phei chauh a, Counter a ka nu lo ṭhu ka va hmu nghal thuai bawk.




"Afeli nen kan bazar anga kan haw tlang nghal mai ang" a lo ti var a, rei pawh ṭhu loin an inzui chhuak a, an chhuah hnu rei lo teah Usangzuala a lo lut a, Samuealan a bulah engtin nge min sawi tih chu zawh chhuah vek ka duh. Mahse, ka sawi hmain Umawii zawkin min lo zawh khalh hlauh a.




"Chutin ka sawi loh kha, 'I nupui nau a mi?' a tia, 'Pasal a nei tawh em?' a ti bawk a, a Star aniang chu ka ti" a ti sam mai a, ka rin aichuan a ho leh angreng.




Kan haw hnu thleng chuan ka rilru ah thil dang a awm thei lo, Samuela nena kan inbiak dan te chu ka ngaihtuah let a, ka ngaihtuah zawng pawn ka mur sung sungin ka hria, ka zak deuh a; inthiam lo deuh chung siin nuam tihna riau ka nei lawi a, min duhthu a sawi lai ka ngaihtuah leh lek phei chuan ka inngei lek lek zawk.




Mut hmunah chuan Ufeli nen phone kan khawih ve ve a, Instagram ka luh rualin Ufamkima te chhungkaw thlalak a lo lang nawlh mai, ka bih laimekin Ufelin a lo en ve a, "Kha kha a mi?" a tih chuan ka chhang lem lo.




"A chhiat loh hi, a la duh che em, vawiina Mawipuii ka zawh khan a lo kal zauh zauh ṭhin a tia, in la inbia em?" a ti nghal mawlh mawlh a, Aumawii chu ka va ngei reuh tak, ngah nge maw Ufamkima chungchang kher kher a lo sawipui chu ni.




"Be ngai tawh lo, nupui a nei tawh a lawm" ka ti mai a, "A nupuiin a thik che a law?" a tih chuan ka hau chungin ka melh a, Aumawii chuan engtia thui nge maw a lo hrilh chu le?



"Teuh nang..."



"Ka hre vek aw Lalmimi, zep kher a ngai lo.." a nui hawk hawk a, thawk ka la hawk ringawt.




"I hriat sual anih chu, Umawii pawn engmah a hre lo" ka ti leh hap a, Ufamkima chungchang hi chu sawi chhuah fo ka duh lo, nunhlui a ni tawh a, tun hnaia thil thleng erawh tih sual liau liau; ka ngaihtuah tlem lutuk vang a ni a, theihnghilh daih ka duh bawk.




"A nupui chu i runluih hrep lo nia, mahni pasal rinna pawh nei lo, nangmah rawn tawng lo chein a pasal zawk kha hau mai sela, ka ngei zawng tak a ni, kei chu ni ila ka lo ti let hrep ang" a ti bawrh bawrh a, min ti dang lel mai.




Chhang tawh loin ka Phone chu ka hmetsawn a, a duhtawk mai dawn emaw ka tih laiin "Engtin nge a nupui chuan a lo tih che a?" tiin min lo zawt leh a, "Engmah a ni lo...in ngaih ang kha engmah a awm lo" ka tih chuan a awih vak lo tih a hmelah a lang reng thung.




"Kei chu niila ka runluih hrim hrim" a ti fahran chu ka ngaithei ta vak bik lo, "Engtin maw i tih anga?" ka lo ti let a, nur fein ka en pah bawk.




"Tiang hmeichhia kha ka huat zawng a nia, a rilru chawhbuai nan a pasal ka duh der vak zawk ang maw le, thil awm lo pui lo ngaikawi zel te chu awm angin ngaihtir ila amah tein buai hrep sela a ni mai a lawm" tih pahin a nui a nui a, kan ngaihdan chu a in ang lo kher mai, lo runluih te chu buaina zakhua kan thlen ringawt dawn a sin.




"Ni lo e, kan inkarah engmah a awm lo a, ṭhian chauh kan ni anih pawhin; a nupui mit ka tikham anih chuan inthiarfihlim chu ka tih mak mawh a lawm, mi nupa inkar buaina thlen tu nih ka tum anih loh chuan mi pangngai tih tur dik tak zawkah ka ngai" ka ti ve sap sap a, a Phone min khawihsan leh tak vangin ka sawi thui duh ta lem lo.




Ni thum an cham leh hnu ah Nu Thanin min haw san a, a haw ni chuan ka nuin "Nikhatah Chhim leh Hmar zawnga inṭhen a ṭha lo, Afeli chu naktukah kal rawh se" a tih vangin Ununfeli chu zan khat a cham leh a, Samuela nen an inbe lo nge ni a chanchin a sawi ta meuh lo.




Tlai kan haw dawn hnaihah hian min lo be leh zawk ṭhin tih loh chu Samuela nen kan inbe tam bik vak lo, Message anih chuan ka chhang lo a, a Call erawh ka chhang thung, Phone call ka dawn in a ri hrerenga lak loh hi ka hreh riau ṭhin.




UFeli kal hnu Pathianni zan hmasa berah min lo Call a, inkhawm tura ka insiam laimek a ni. "Inveng ṬKP kan rawn tlawh dawn a, lo len kawi a rem em?" tiin min lo zawt a, tun ṭum chu ka hnial ta bik lo, lo hnial ziah kha nula tan a mawi bik lo a tin a ni.




Baptist kohhran a nih hmel e, ṬKP ah a inhmang ve ngei anih ka ring a, ka rin ang chiahin a puitling hmel khawp mai, zam deuh riau na ka nei a, inkhawm chhung te chuan min mawlh reuh reuh mai a, eng dang a ni lo Samuela a lo leng dawn miau a lawm.




Inkhawm kan ban rual chuan Baptist kohhran pawh an bang ve chiah a nih hmel a, kawnah kan intawk sang sang a, khawmpui an nei nge ni inkhawm an ṭhahnem khawp mai. Hmanhmawh deuhin inlam ka pan hlawk hlawk a, kawngah kan inhmu nawlh ang tih te pawh ka hlau deuh.



In ka thlen chuan ka chhungte an lo la thleng lo, inchungah chhoin ka inthlak mawlh mawlh a, ka sam khuihin ka awmhmun kawr ṭha deuh chu ka ha bawk a, chutih laiin ka nu leh ka pa inkhawm bang lo haw thawm chu ka hre zui a, ka Phone ka bih leh rih a, eng Message leh call mah ka dawng lo, kan in awmna min zawt mang si lo a, a ngaihna ka hre lo khawp mai.




Inhnuaia ka chhuk thlak hnu rei lo teah kawngkhar an rawn kik ta karh karh a, ka pain a lo chhawn laichuan ka lo en ve reng bawk a, tum loh deuhin kan ṭhenawm nula Usangpuii a rawn lang hlawl a; mahse, zuitu a rawn nei tlat.




Smart zeta Samuela rawn pen lut chu thinphu dep depin ka lo thlir a, a lang danglam takzet. Mipa pathumin an rawn zui a, pakhat chu hmanni a a lo kalpui tlangval sa pan lam deuh kha a ni a, pakhat zawk chu Suzanne-i pasal Ramtumbuliana kha a ni.




" Hei, Mimitei inleng tur te ka rawn hruai a" U sangpuiin a tih laiin ṭhutna ka lo kawhhmuh ve thuai a, "Engtin nge in lo inhriat a?" ka tih chuan "Dawrah sawn kan lo zawt a, in ṭhenawm nula hi a lo awm remchang hlauh a" a cher ber khan a lo ti zung zung a, a ṭawngkam a zangkhai khawp mai. USangpuii chu rei awm loin a kalchhuak leh thuai a, ka nu leh pa an awm ve reng bawk nen sawi tur chu vang duh rauh rauh tak a ni.




"Ka hmu tawh tlat chein ka hria" hlauh ang ngeiin ka nu chuan a rawn ti ta reng a, "Hmu tawh a niang" tiin Samuela a lo nui mai thung, engtin nge ka hrilhfiah dawn ni.



(ZAWMNA)


"Afeli ṭhianpa kha i ni mial em?" ka nu hi chu aw, lo sawifiah dan tur ka ngaihtuah chhungin min ti dang hman a lawm maw le. "Ka ṭhianpa anih hi, Samuela a nia, kan dawr chung Ceiling kha min lo siam sak a" tiin ka lo inrawlh ta tho a, ka nu chu a bangbo deuh tih a hmelah a lang a, Ununfeli hming leh Hnahthiala kan inhmuh chungchang kha chu ka sawi lang duh miah lo bawk.




"Chutia law, ka hai che anih dawn chu, ka hmuh hnu i ang em a" ka nu chuan a ti leh hram a, Samuela kiai suk chu ka va hmu bawk, insawifiah a tum bik lo niin a langa; sawifiah loh chu a ṭha zawk bawkin ka ring, Ununfeli bialpa anga an lo ngaih tawhin min lo rim tih a hriat chuan zawhna chhan sen loh ka dawn bakah min kamkhat duh hialin ka ring a ni.




"Inchung chu tui a la put em?" Samuelan a rawn tih ve takah chuan ka hawi vat a, "Put tawh lo e; mahse, a kua kha hnawh lohin kan la dah reng a" ka lo ti var a, eng vanga nelawm taka chhang nge ka nih pawh ka hre lo, an vaia mitmei chu ka veng a ni ta ber awm e.




"Kan hna kal lai kan zawh hunah hian i dawr ṭhenawm ah khan hna kan thawk dawn a, remchangah ka rawn char ṭha dawn nia" zangkhai deuh hian a ti leh a, chutih laiin a ṭhianpa cher deuh khan "Karleh.. lehpek lamah chuan kan rawn ṭan thei tawh ang" a lo ti ve bawk a, kan dawr ṭhenawm a tih chu URinmawii dawr em maw ni?




"Bang lehlam ah khan maw?" ka ti deuh haw a, "Aw, in Building a mi tho kha" a ṭhianpa bawk chuan a ti leh a, Ramtumbuliana zawk kha chu a ṭhu ngawi ngul thung.




"Eng lam nge in khawih dawn a?" ka ti lehzel a, hmani khan Umawipuiin a sawi thawi tlatin ka hria, 'Urinmawiin, kan Mistiri chhawr te Number kha a duh a, Sangzualan a la nei angem aw' a ti zauh tak a lawm, kha mi ṭum khan ka haw tur ka hmanhmawh deuh vangin ka uksak zui lo a, an lo in dilsak ngei anih dawn hi.




Ka pa chuan an veng te a lo zawt luam a, Samuela leh a ṭhianpa cher deuh khan an in chhan chhawk a, a ṭhianpa zawk chu a ṭawng duh bawk a, a hmel a ṭang rengin mifel tak a ni ang tih pawh a hriat theih, "Muantea anih hi, hei hi ka nau Ramdina" tiin Samuela chuan min hmelhriat tir leh rih a, Muantea chu vengkhatah pawh mite zah ruk chin leh kohhran emaw khawtlanga nihna engemaw tak chelh chin a nih ngei ka ring bawk.




Rei vak lo hnuah ka nu leh pa chuan kan ṭhenawm chiah Usangpuii te in piah a putar damlo kan an rawt a, "Naktuk lamah phai kal te an tum si a, kan va lang ve lawk ange, lo la leng reng rawh u aw" tiin ka pa chuan ka inleng te chu a chah ve nghe nghe a, an chhuah hnu chuan ka inleng te chuan thaw huai hmel an puin ka hria, an ṭhut dan an siamṭha sap sap hlawm.




"Veng khat vek a mi in nih a?" ka ti hmasa ber a, "Muantea hi chu vengdang a nia, Ramdina nen hi chuan inkhatah kan chenga" zawi deuh supa Samuelan a rawn tih chuan ka nui chhuak ṭep a ni, thutak deuhin sawi lo sela chuan ka nui chhuak ngei ang. Ka rilru hria ni awm takin Ramtumbuliana chuan a u chu a melh rulh a, "Kan inah pawh chaw a rawn ei tawh reng kha maw aw" a ti deuh hluk a, "Ni tak e" dam thluamin Samuela chuan a ti ve leh mai bawk a, an unau chuan an mizia a inpersan dawn hle in ka hria.




"Suzanne-i te nufa an damṭha em?" tiin thil dangah ka pakaia, Ramtumbulianan min chhang dawn emaw ka tih laiin Samuela zawk chuan "Dam ṭha e, a sawi ngun khawp mai che" a ti lo ti leh a, ka rin aiin a ṭawng duh phian mai, a nui miah lo a, a hmel chu a thutak run bawk. Tv en pahin kan titi ve luam a, inkhel chungchang sawiin Muantea leh Ramtumbua chu an ṭawng bawrh bawrh tawh a, Samuela nen erawh kan inmelh leh zauh ṭhin, kan inmelh fuh a piang hian vei nei hi a angin ka hre ṭhin a, bet mang lo deuh a ṭhu te pawh a ang mah zawk.




Ka va hawi zawk laia an unaua an in Signal chu ka hmu chiang ngang mai, chumi hnu lawkah Ramtumbua zawk chuan Muantea chu Cigarette a dil a, anin a neih loh thu a a chhan hnuah dawr kal turin an inzui chhuak a, hetiang kum tawh ah hian an thil tih dan chu hrethiam lo turah min ngai chuan ka ring bik lo.




Kan ṭhiante pahnih an chhuah hnu chuan kan ṭhu ngawi dun rauh rauh a, kan inmelh leh tawh miah lo bawk, ka zam deuh nge ni ka thin te chu a phu rang ta sawt hian ka hria a, boruak chu a lum sawt riauin ka hre bawk, ka piah a ṭhu chuan min en tih pawh ka hre thei a, kan Sitting room zau zet chu a uap hneh ngang mai.




Chutah ka ṭhutna lamah chuan a rawn insawn phei a, ka lama a rawn tawlh hnaih rualin ka lo ṭhu ṭha ve zat a, ka awm a ti nuam lo dawn dawn a, ka thinphu pawh chu rang tawh tak a ni. A aw a thian kharh a, tum loh deuhin ka aw ka thian ve ringawt lehnghal a, ka zak leh hnuhnawh lutuk chu ka hmui ka pet fan fan ringawt, tun mai khan engvanga ka hrawk kha rawn za ve ngawt nge maw anih le, ka lo chhâwn emaw min ti ngei ang chu, a van zia lo ṭhin tak...




A lam ka hawi chiah nen chuan kan inmelh hnai ta khawp mai, tawi te hian min nuih a, a tih ang chiahin ka ti ve leh a, kei hi ka in thunun thei der lo nia! Ka khaw lo ka inti reuh tak tak a ni.




Tv lam hawi chuan ka heh ka pet fan fan a, ka awm a nuam tawh hlawl lo, min rawn ṭhut hnaih leh takah phei chuan ka vel boruak chu a danglam zo ni ta ber hian ka hria, ṭhutthleng ngheng chhanah chuan min kuah tur niawm taka langin a ban a rawn hlam duai a, kan taksa a insi hauh lo nain min khuap hneh viau tho, ka tukkhum lam chu a hit mem mem hian ka hria a, a hmel phei chu ka en ngam tawh meuh lo.




"Inkhel i en ve ṭhin a mi?" a ti thum dut a, "Aih, nang zawk" zangkhai thei ang bera ṭawng ka tum a ni.




"En nasa e, Volleyball lam hi ka tui mah zawk a" a ti leh a, kei ka bu nghat thunga, a rawn hawi leh nen chuan inmelh hnai tawh tak kan ni, a thaw lum hak chuan ka hmai a chhem pha hial tawh.




Zah zelah ka nuih ta ringawt a, anin ka mitah tak chuan chiang fahran hian min en a, hnai taka en phei chuan a hmelṭha ngei mai, enchian poh leh a hmelṭha anih dawn hi, a khabe hmul chhahlam lek lek chuan a ti lang rorum deuh a, a mitmeng erawh a damthluam lawi a, a hnar ngul sang lam deuh leh a khabe invuah fuh zet te chuan a ti lang pa hliah hliah thung.




A rawn kun hnai sauh a, ka thaw tawh mang pawhin ka hre lo!



Min fawp mai dawn emaw ka tih tawh laiin ka biangah a rawn dawm a, ngun lehzual a min thlekin a nui suk bawk, a tih dan chuan min ti bang bo hle a, "Hei, min thlah teh" ka tih chuan sawiloh ang hlauh a ni.




"Samuel.." ka ti leh hap a, "I chaitlai emai, min u rawh" nuichunga tih pahin min la en reng a, ka hmai ka la phih bawk si lo, ka Makeup hnawih te chu a kairual lo nuaih tawhin ka ringa, tal chhuah tuma beih chiam chu ka hreh ve deuh bawk si.




"Hei..." ka tih leh chuan "Usamu tirawh" uang deuh hmel puin a ti leh a, ka biang a dawmna chu a la thlah chuang miah lo, min en hnai bawk si a, chutianga rei in en chu nuam lem lo tak a ni. Naupang chhia taka min ngaih ka duh loh vang chauhin ka tal lo a, zam hmel put loh hram ka tum bawk.




"Eng nge ni a..?" lawm vak lo awka a ka tih takah chuan min thlah ta chauh a, "Min en chiang ngun tawh bawk a, ka enchiang ve che anih kha" a tih chuan ka ka hau ringawt. "Awi a..khatianga in en vak vak te chu..." ka tih bul bul laiin ka kawngah a rawn vuan chawt a, a lamah min hnuk hnai hrawk a, ṭhutthleng zau puiah chuan insi chawihin kan ṭhu ta, a ban tha han chak zia mai chu!




"I mak e...." min rawn en dan vang chuan ka ṭawng chu a zuih ral khawp mai, "Eng nge i hriat a?" ka ti zawi sep tawh. "I hre ve lo a mi?" a aw chu a zawi hle a, "Eng maw?" ka lo tih chuan a nui ringawt a, kan ṭawng zawi dun bawk a inbe ru te pawh kan ang lek lek.




"Min duh lo em ni?" a tih chuan chhan ngaihna pawh ka hre lo zawk, duh a duh lo tur pawn engmah sawidun kan la nei tawp si lo. "Ringawta..." zak ru deuh chungin hmui ka pet sawi nang a, pang insi renga ṭhut phei chuan ka khur thei mai dawnin ka hria!




"I zei lo si.." ka ti leh ringawt a, a lo nuih vang chuan ka nuih a za leh deuh a, kan nui chhuak hial lehnghal.




"Hetiang thuartham vel hi ka ning a ni, i ni ve tho em?" a tih chuan "Ni ve tho e" ka lo ti a, ka chhan dan vang chuan a nuih a za em em lehnghal a.




"Zanin chu i hmelṭha zual hle mai" Tv lam hawi pahin a nui suk suk a, kei ka lo lai ve em em bawk, ka biang te chu a sa hat hat a, a lam ka hawi leh chuan ani pawh a lai deuhin ka hria.




"Tunkar chu khawi lamah maw i thawh dawn?" ka tih chuan "Kan vengah choka lam thil khawih zawh loh ka la nei a" a ti sam mai a, hna chung chang zawhna ho te te inzawtin kan titi ve luam a, mak ve deuh pakhat chu Samuela ka biak hian pawh deuhin ka titi pui thei mai zel a, kan inhriat tirh a ṭang rengin keimah zawk hian biak tlangnel ka tum a, Usangzuala leh Romawia tih loh a mipa ka titi pui bawrh bawrh theih awm chhun a ni hial ang chu.




Aw thian kharh kharh thawm a rawn awm takah chuan kan inṭhut hlat rang ngei mai, Ramtumbua te ṭhian dun kha lo lutin kuhva an pawrh rak rak a, ei ve zauh ka chin vangin min lo pek pawh chuan ka ban ve a, Samuela ṭhutna sawn chu hria angin awm lo mahse, an hrethiam vek dawn tih chu chiang sa a ni.




Thingpui kan in ho laipawh chuan mipa pahnih chu an titi bawrh bawrh a, an awm ve hnu chuan Samuela chu a ṭawng ta meuh lo, an haw tur chu kawngkhar thlengin ka va zui a, "Ka lo bia ang che" midang hriat loh a a tih zauh hnuah kan in mangṭha a, an kal liam hnu te chuan ka ngaihtuahna a luah hneh ngang mai, phat rual lohin Mistiri-a kha ka duh a ni, pha pawh ni ila danglam a awm chuang lo ang, ni e...ka duh chiang a lawm.




Mi danglam tak a ni, duh dang ka nei leh tawh pawha ka rin loh laiin awlsam tein min hneh thei a, ka rilru hneh turin ṭawngkam thlum hman a nei lo, min duh tih a chetzia ah a lantir a, a ze duhawm leh ngainatawm lutuk lakah khan ka luangliam ta a ni ber e.




Ka nu leh pa te lo haw hnuah muturin ka room lam ka pan a, ka mu fel chiah tih ah Samuela Call a lo lut a, "Kan thleng tawh aw, khumah ka mu fel chiah" a rawn tih chuan a hmuh loh lamah ka ṭhen chiam a, he pa pui hian ka duhzawng hlira awm a tum em mawni le...




"Um..keipawh ka mu tawh" phur viau anga lan chu ka duh lo a, ka chhang nelawm leh lutuk ang tih pawh ka hlau angreng.



"I mulum tawh em?" a tih chuan ka nui sak a, "Mulum tawh e.." a nui ri ka hria, hriat nuam tak zawng a ni.



"Feet engzat khumah nge i mut?" tehdaih chuan..



"Feet 4, tinge?"



"I mangchhia em?" a ti leh zel a, eng nge maw a hriat chu!



"Mangchhe ve ang, mahni in ka mu ṭhang a" bangbo lek leka ka tih laiin "A pawi lo" a lo tih vang chuan sawi tur pawh ka hre tawh lo.




"Eng maw pawi lo?" ka ti leh hap a, ka zawhna chhang loin "Mut dawna inthiar i ching em?" a ti leh daih a, engthil nge maw min zawh chu le!




"Ka sawi duh lo e a" ka tih chuan a nui kur kur a, eng engemaw min zawt luam a, kan nui dun leh rih ṭhin a, kan inbiak tawh a kan la inbiak rei ber ṭum a ni, amah pawh ka hrechiang ve ta sawt a, ani pawh Feet li khumah a mu a, khum a siam thiam thu a sawi bawk, kha chu a sawi tur hre lo lutukin a rawn sawi tel a ni ber.




"Ka buai ṭhin a, chhun lamah biak ka har deuh a; pawi i ti lo ang chu ti raw?" ti a a zawhna erawh chhan thiam a har deuh, ka inngaihtuah vung vung hnuah "Ti hran lo" ka ti ta kha a nia, kha thu tawi te ka sawi khan kan inkar a ti danglam zo ta vek lehnghal a, a dawt leh a a rawn sawi chu "I tan hun awl insiam ka tum dawn nia, i dawhtheihna fiah ang aw" tih a ni, aw leh aih a chhan mai theih a ni nain chhanna ka pe thiam leh tlat lo.




Kan inbiak zawh hnuah ka ngaihtuah let a, 'I dawhtheihna fiah ang aw' a tih awmzia mawlh kha eng a sawi na nge ni ang ka ti rilru a, ka ngaihtuah fe hnuah rindan pakhat ka nei a, a ngaihzawng te chu an dawhtheih a ngai tih a sawi tumna anih ka ring ta, a buai thu leh ngaihzawng a neih hman loh thu ka hnenah a sawi tawh a, engtiang taka dawhthei nge ka nih hriat hmasak a duh a nih hmel. Lo dawhthei lo ta ila engnge thleng ang tih chu keichuan hriat ka chak daih zawk, engti zawng emaw riau hian min tiphur lehnghal a, mipa laka inringtawk taka ka awm vawikhatna a ni awm e, hei pawh ka tan chuan thil thar bawk a ni.




Bul ṭan na ho te, beisei ang aia ṭha leh phurawm tiin kan inlaichin na chu ka hrilhfiah ang, zangkhai takin kan inbia a, a lakah chuan thup leh danglam tum a ngai ve lo, keimah dik tak hi ka ni thei ṭhin.




Tukṭhuan eikham aṭanga zanriah eidawn thleng a buai ṭhin a, mut hun hi ka tana a hun neih remchan laiber a ni mahna a mut hnuah min lo be tlangpui a, ka dawhthei na zawng tak a ni, englai pawha inbiak reng ka hman bik tlat lo a. Mahse, chaw chhun eilai hi chuan biak theih se ka duh, rikrum thila biak theih miah loh ang te hi ka duh lo, kan kal thui zel anih chuan ka la sawi ang.




Mak deuh zawk chu mu tura ka khum lam pan ka phur thar riau a, kar khat chhung lekin ngaiah ka nei thei mai dawn a lawm, kan inbiak chuan ka chungchang leh chhun lama ka hun hman dan min zawt a, ka chanchin zawng zawng hriat vek a duh emaw tih tur a ni ṭhin, chutianga min ngaihven chu nuam ka ti bawk.




Samuela chu mi taima tak a ni, hunbi neiin engkim a ti ṭhin a, hun awl a neih chhun ang pawh hman dan tur a nei sa thlap zelin ka ring, kar khat tawp kan inbiak chhungin inngaizawng te sawi ṭhin thuthlum ang kha engmah a hnen aṭangin ka dawng lo a, chuti chung chuan ngaihtuah zui vawng vawng ngai leh min hneh riau thei thil a sawi leh ṭhin.




Hmeichhia zawng zawng ten an kawppui mipa te hnena an zawh ṭhin "Eng nge min duh chhan?" tih ka zawh ṭum chuan ti hian min chhang a, "Nangmah ah danglam ka zawng hleinem, keimah a danglam a awm vang zawkin a lawm ka duh che" tiin, ka ngaihtuah ngial hnu ah pawh eng a sawi tumna nge ni ang tih ka hre thei lo, ka zawt nawn leh a, chuta min chhan dan pawh chu ka hrethiam mang meuh lo "Ka mit i lak chhan ngaihtuah buai aichuan ka mit i la hle tih kha ka tan pawm a awl zawk a lawm" a ti leh mai a, ka rilru a ti buai telh telh zawk in ka hria.




Pathianni zan mut dawna kan inbiak chuan tihian min hrilhfiah a "A hma chuan duh zawng ka nei ṭhin a, tehkhawng ṭha tak nen; thinlunga inpawhna nei miah lo a inngaihzawnna hi ka tem tawh bawk. Mahse, tunah chuan a ni tawh lo, midanga ka zawn ṭhin kha keimah zawkah hian zawn a lo ngai a, mahni pawh inhre chiang loin midang ka lo teh ṭhin zawk a ni, ka duh zawng emaw ka tih nena kan lo inrem leh ngai loh chhan kha chu chu a ni bawk, inhrechiang hmasa la i duhzawng diktak chu i hre thei chauh ang" a ti charh charh a.




"I duh zawng dik tak ka ni ah i ngai em ni?" ka ti leh hram a, "Ka bul ṭanna hmuna kir leh ang mai ka ni, rei tak kal bo hnua mahni ina kir leh hi ka ang a, nang chu In ang mai i ni, ka awmna hmun tur dik taka awm angah ka inngai" thutak zetin a ti a, zawh leh chuan tur ka nei tawh lo, ka duh ber chu chhan leh vang neiin min ngaizawng lo se la, tlan tauhna emaw a ṭha nghahna ni lo bawk ila tih kha a ni a, min duh takzet tih ka hriat takah chuan ka hahdam huai huai bawk.







(End of chapter -6)

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)