*KAN CHHUNGKUA* BY Michael Angelo Jr.

Group siam tirh atanga like tu 1000 nei chin zawng zawng dahkhawmna
Ngaia
Site Admin
Posts: 25813
Joined: April 30th, 2016, 4:07 pm

*KAN CHHUNGKUA* BY Michael Angelo Jr.

Unread post by Ngaia » August 14th, 2016, 4:57 pm

*KAN CHHUNGKUA*
___________________
- _NunFela Sapkung_
.
Vanduaithlak takin ka nupui hian nau a pai thei reng reng lo mai a, thinrima han inhauh ve deuh chang pawhin kan nupa kar thu a chhiat phah lek lek fo mai a. Ka nupuiin ka lakah inthlahrunna lian tak a neih phah bawk. Thiante'n khawlaiah an fate an han kai diah diah kan hmuh changte hian kan rualawt em em thin a ni.
Chuti chung chuan tawngtaiin zantin Pathian hnenah 'fa' min pe turin kan dil awl lova, ka nupui phei chuan vawi tam mittui nen a dil tlawk tlawk a. Kum 7 zet chu a ni tawh; mahse kan dilna chu chhanin a awm si lo. Pathian chu milem biak ang chauh niin ka hre hial a, a reh vung vung ringawt mai a ni.

*THAWNTHU CHU*

Vawiin chu ni dang aiin ka chhuak hma a, ka car chu tidingin kawngpui kama naupang pakhat vaimim leh kawlbahra zuar thin bawk chu ka va pan leh a. A che vel hi a hmuhnawm tlat: a bula kutdawh putar zai ri rut rut chu faifukin alo zawm ve hlarh hlarh thin a. Thian dun te pawh an ang mah zawk.

"Bawiha, enge i hming?"

"Lalhruaisanga, Sangte min ti thin".

"Anih leh Sangte, Sikul i kal tawh lo em ni?"

"A chang changin ka kal thin a."

"Khawi vengah nge in awm?"

"Tuikhur vengah."

"I nu leh pa te enge an thawh thin, Sikul naupang ni siin engatinge hetiang hna hi i thawh?"

"A pa chu a thi tawh a, a nu chu a damlo a. A nu damdawi man tur ka thawh chhuah a ngai bawk si a,"

Mak tihnain ka khat a, chu naupang chu ka ngaisang ru reuh hle bawk. Chu hmeithai fapa chu a tawngkam felfai tak chuan a tizahawm thlarh mai. A antam zawrh tel hnih chu ka lei sak a. A bul maia Fu tui zuar hnenah chuan 'Fu tui' no thum ka lei a, a bula kutdawh putar ho chuan kan in khawlh khawlh hlawm a. Ka mita chiang taka min en chungin, "Ka lawm e, ka pu," a ti a, a lu a bu nghat a. A lawmthu sawina ringawt pawh hi ka hre zing ta hle.

Ka cheng sawm note pahnih pek chu a la a, a tihdan pangngaiin a kekawr ipte veilam leh dinglamah chuan pakhat ve ve a thun leh a. Hetiang chiah hian nidangah pawh a tiziah thin. Chhan engemaw tak a awm niin ka ring ta a.

"Sangte... Engatinge pawisa kha a hrang a i ah zel le??" ka ti chhuak phawng a.

"Ka ipte veilam a mi hi a nu damdawi leina tur a ni a. Dinglam ami hi (ka beng bulah zawitein) ka bula putar ta tur hi,"

Chu thu zet chuan min thawng a, he naupang ka tluklohzia hi ka hrechiang a, ka te rawih rawihin ka hre hial a.
Keini'n eisen loh neiin nuamsa takin kan khawsa a, keimah ni chauh kan inngaihtuah laiin he hmeithai fapa hian kutdawh putar tan pawisa a khawl sak a ni si a, mihring hi a va inan loh theih tak em!

Duty tura ka chhuah apiangin a thutna hmun, motor kawngpui kam remchang lai chu ka paltlang ziah a. Karkhatah ni hnih emaw ni thum emaw lek hi chu Sikul a kal ve ziah thin tih chu a lo thut loh ni atangin a hriat theih. A changin Vaimim a lo rawh hauh hauh a, a chang leh Kawlbahra; a hna chu a hnehsawh reuh viau lehnghal a, hmuhnawm thlirin ka thlir a ni ber thin. A Vaimim rawh a han let kual vel te chuan mit a la hliah hliah mai.
A vaimim leh kawlbahra rawh sa cheng 20 man vel ka lei sak hi chuan a bung emaw a te deuh hi min belh ve thlap thin, lak sak loh ka tum ngial pawha min pe lui ve tang tang thin chu ka rilru hnehtu pakhat a ni.
Tin, lawmthu sawi a theihnghilh ngailo bawk.

Mahse, nidang ang lo takin vawiin kha chuan Antam tel pherh zet zet hi a lo thutpui ve bam hlawm kha a ni a. A antam lah chu a hrisel lo tih hriat reng mai hian Pangang eina hnuhma leh a kau rau eng ruai te chu a let bal hlawm a. Tel sawm emaw lek chauh a nih ka ring.
Chik taka zawhna zawh teuh tak kha ka chak a. Mahse Damdawi Inah damlo tamtakin min nghak tih ka hria.
Ka Car-ah chuan ka luh san a, ka Car darthlalang atang chuan a lan theih tawp thlengin ka en zui zauh zauh a. Ani pawhin ka tlan liam hma chu min rawn enzui ve vawng vawng tih pawh ka va hmu thei a.
.
Ka tlan liam chauh tihah chuan a thutna veng huamchhung _*Local Council*_ tlangau ka hre zui a. Bazar a Seat nghet neilo leh motor kawngpui kam vel a inzuar ho chu insaseng vat turin thupek an rawn chhuah a. Thupek zawm lo chu pawisa chawi a ni mai.
"Chu naupang pawh chu a antam zawrh pawm bawr uaih chungin a insaseng ve ngei awm si a," ti rilru rauh rauh chung chuan rilru nuam lo takin Hospital lam chu ka pan ding ta vang vang a.

Damlo lah chu nidang aiin an lo tam zawk fe mai lehnghal.
Han thut hahdam deuh pawh nei hman lovin ka en zung zung hlawm a, tlai dar 3 thleng mai chu damlo en in ka buai tluan parh a, a tawpah chuan ka thaw huai a. In lama han haw mai nan chuan a la hma tho alawm tiin Dr. Davida ka va pawh ve rawih a. Nu pakhat cher chhe em em mai hi a lo buaipui mek a lo ni.
.
"A eng na ber nge ni a?" tiin Dr. Davida chu ka zawt ru sar sar a.

"Cancer a nih hi. Nizan khan an rawn hruai a, hei a fanu chauh a awm bawk si; chhungkhat laina hnai deuh pawh an neilo a ni mai thei. Hun tam a neilo, an rawn tlai lutuk, engmah tih theih a awm tawh lo. Engtin nge tun chen chen a dam theih hi a mak zawk. A taksa a chhe hneh tawh lutuk," a lo ti a.

Chu nu bulah chuan a fanu mitmeng bial kal mai leh sam thur bam mai hi Nurse pakhatin a lo pawm bawk a.
Engmah sawi lem lo chuan an bulah chuan ka thu ve chawt a, kum 6 emaw lek chauh a ni ang. A nu mitmeng chau ngawih ngawih chuan thei leh thei lovin a fanu chu a melh tlawk tlawk a.
A fanu chuan "A nu... a pa angin vanah min lawn san ve suh aw,!?"

"Bawihte vantirhkohte'n an awmpui reng dawn che alawm," tiin a fanu chu a hrilh a. A aw ri pawh a zawi hle tawh a.

"A nu vantirhkoh bulah ka awm duh lo; nangma bulah ka awm duh zawk,"

"Bawihte. .. a pa kha a khua a har tawh a lawm.
Bawihte, i hla zir kha i thiam chhuak tawh em?"

"Aih. . la thiam chhuak lo"

"Bawihte. . min han zai sak ta che, i thiam chen chen"

"Anu ka zai sak che chuan i dam tawh dawn mi?"

"Ka hrelo le bawihte. .han zai phawt la"

A fanu chuan a lu a bu nghat a, amah pawmtu Nurse mal chung atang chuan a chhuk a, a nu kut chu a vuan a. Inthlahrun hmel takin min en kual hrak hrak a. Chutah a thiam ang tawk chuan a han zai a, a aw chu a zawi thawp sat a.

"Ka chhandamtu min vengin a hnai reng,
Thil engpawh lo thleng se ka him a ni;
Thlipui leh ruahpuia'n min thukru a,
A kutphah ropui chhungah."
tiin a nu chuan hmui phunin a lo zawm ve bawk a. A mittui chu a luang ngiah ngiah a.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 14th, 2016, 4:57 pm

"A nu zai thiam min ti em?"

A nu chuan a chhang hman ta lo; a ka a ang zuai naa a chatthla ta. Monitor kiu vawng vawng leh hmeichhe naupangin a nu a ngen thawm chuan room chu a luah khat a.
Dr. Davida leh nurse thenkhat te nen chuan kan inen kual a kan hnuk a ulh teuh hlawm a.

Chutih lai chuan ka phone rawn ri ral ral a, Mapuii a lo ni reng a. Ka nupui hi chuan min ngaihtuah thin reng a ni.

"Aw.. duhtak"

"I lo thleng dawn tawh em?"

Hnuk ulh teuh chung chuan ka aw chu ka han thian kharh kharh a,
"Ka lo haw tep e. Ka intifel anga, ka lo haw a ni mai."

"Vawiinah thil diklo thleng a awm em?"

"Awm lo ve. Tinge?"

"A nih chuan thil mak deuh hmuh tur che ka nei a nia. Lo thleng vat rawh."

"A ni maw?? Ka lo haw nghal dawn e," tih pah chuan ka Jacket chu ka la a, midang ho pawh chu ngaihsak zui lem lo chuan ka chhuahsan ta a.
A tlai deuh tawh nen hmanhmawh takin ka inkhalh haw par par a. Kawng tluanin khami te nufa kha ka rilruah a awm ta reng a. Engemaw tal ti loa ka haw san ta mai chu ka inthiamlo lek lek a. Tih tur phei chu ka hria a zeng pawh chu a ni chuang lo.
.
Garrage-ah motor ka dah fel a. Kan kawngkhar pawnlamah chuan dingin, ka tihdan pangngaiin "Pi Monkey... I pasal duhlai a lo haw e. Kawngka lo hawng rawh. Nupui dang a rawn hawn a nia." tiin ka au lauh lauh a.
Ka nupuiin rang taka kawngkhar a rawn hawn pah chuan a hmuiah a kutzungchal a chuktuah a, thawm zawi turin signal min pe a ni. Mak ti tak chuan ka zui lut a.
Sitting room lam chu min pan pui a. Sofa chunga naupang lo muhil bam mai chuan min barakhaih kher mai. Kha naupang vaimim zuar ngei kha a ni.

"Engtinge kan Inah???"

"Vawiinah thil diklo thleng a awm em? ka tih kha. I la hrechhuak lo maw?"

Mak ka ti tawlh tawlh,
"Aih, enge diklo chu.??"

"He naupang bulah hian i wallet i theihnghilh a, a rawn dah vang vang a lawm."

Ka jacket ipte chu ka dap rawk rawk a.

"Ni dawn tak. A antam ka lei sak a."

"I fimkhur loh vangin i tihah hrep a lawm. Wallet-a i address dah nachang i hria chu i fel phian tho. Kan kaitho tawh ang e, a nu leh pa an mangang tawh dawn lutuk. Hei dar 6 a pel tawh."

Chutihlai tak chuan a rawn meng siar siar a. Hriatchhuah nei niawm tak hian a meng zau kawk a,
"A nu..." tih pahin a Slipper hrui chat lek lek tawh, sawi bam mai chu a bun sawk sawk a.

"Sangte.. hmanhmawh suh. Chaw kan ei phawt anga, motor-in ka thlah dawn che alawm," ka lo ti vat a.

"Tunah ka haw duh. A nu a damlo a ril a tam tawh ang."

"I nu nen chauh em ni in awm a, Sangte?"

"Aih.. Ka nau pawh"

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 14th, 2016, 4:57 pm

Chawpchilhin ka lung a phu nghal dup dup a, vawiin a nu kha he naupang nu hi a ni ngei ang le.
Tukin pawh khan a nu damloh thu a sawi tak kha mawle.
Ka rilruin, 'Lalpa he nau hi thlamuan mawlh ang che,' ka ti a.
.
Chaw ei lai chu kan tlansan a, Tuikhur veng lam pan chuan kan pathum chuan kan inkhalh chhuak ta vang vang a. An in kawng chu min kawhhmuhin kan thleng thla thuai a.
An in te tak teah chuan mi an lo pungkhawm laih laih a, a nu chu a lo ni ngei mai.

Thawk ka han la vang vang a, ''Sangte..i nu kha vawiinah a thi a. . ." ka han ti a, ka sawi zawm thei meuh lo.

"Anu....." tih leh tlan a rual a, ka nupui nen chuan kan umzui nghal a.
An inchhung kan va luh chuan kuang chhunga a nu ruang chu a lo sawi dat dat a.

"A nu. . i damdawi man tur pawh ka thawk chhuak teuh tawh a sin" a lo ti a. A pawisa nawi te chu a nu ruang chungah chuan a let bal hlawm a.

A nau hmeichhia leh an thenawm hnaite chuan ruang an lo kil ve bawk a.
Nurse pahnih leh Doctor Davida te pawh an lo awm nghe nghe.

Sangtea tap thawm leh a nau sam thur bam mai hrilhhai hmel kha ka theihnghilh thei lo. Mapuii chuan a fanu chu a va pawm vat a, engemaw sawiin a rilru tihzangkhai nan a titipui a nih ka ring.

Tuikhur Veng khawtlang hruaitute nen thil awmzia kan inhrilh hnu chuan chhungkhat laina hnai tumah an lo neilo tak tak tih kan hre ta a.

Kan nupa chuan kan han inrawna, kan rilru a inang ta chiah mai. Engkima mawhphurhna la vek turin thutlukna kan siam ta a ni.

Tichuan,Sangtea te unau chu zantin fa min pe tura kan tawngtaina Pathianin min chhannaah kan pawm nghet hmiah a ni. Ni e, a chang chuan kan tawngtai chhanna chu nghah chhuah tur ni loin zawn hmuh tur a ni fo thin. Chu chu a tak ngeiin ka chungah a thleng ta a ni.
Lalpa kan lawm e.
.
Hei, tunah chuan thla khat dawn kan cheng ho tawh a, a nu an ngai lutuk pawh a reh ve viau tawh. An tlangnelin min ngaina ve hle tawh a, an rilru tihzangkhai nan tiin kan chhuah vahpui tam hle bawk. An mizia a nemin a tawng pawh a dam dap a, a nu khan zirtirna a pe tha viau a nih ka ring.
.
Ni khat chu Pindan chhunga an unau inkawm thawm kan ngaihthla ru pek a.
Kan nupa chuan kan insik kan insik a, a changin kan nui bawk a. Chutah a nau Puipuii chuan, "A nu khan, 'A thih hunah pawh Vantirhkohten min enkawl dawn,' a ti ve si a. Van ami vantirhkoh an lo kal dawn emaw ka lo ti a, a nu leh a pa hi an lo ni reng si a, engatinge thla an neih miah loh le??" a ti niah niah a.
.
Sangtea chuan, "Pathianin leia vantirhkohte chu thla a siam sak ve lo alawm. Keichu a pa hi ka vantirhkoh; nang chu a nu" a lo ti zung zung a.

Pindan kawngkhar phenah chuan ka nupui nen chuan kan inkuah a, lawm avangin kan tap zawih zawih a. Min ngai ropui lutuk chu ka zak chem chem hial a.

Kan mut pindan lamah chuan pheiin ka kawrfual var chu ka ha vat a, ka nupui chu thil ka hrilh ru sar sar a, ani chuan tukverh Pardah zar lai chu a la thla lawk a, a sin bawk a.

Pindanah chuan inzui lutin, "Vantirhkohte an lo kal e. Thu pawimawh an lo puang dawn a, lo ngaithla rawh u," ka han ti a, an pahnih chuan nghakhlel em em hian min lo en reng a.
.
Chutah Marini chuan,
"Sangtea leh Puipuii an fel em avangin Vantirhkoh nupa kha an lawm lutuk a, chuvangin kan chhungkuain Cinema Hall-ah Vurvari film kan en ang, tunah insiam nghal tur," a lo tih zawm zat a.

Kan fate lawm avanga au ri chiah chiah leh hmanhmawh taka an insiam vel hmuhnawmzia kha a nu thlarau pawhin Van atangin a lo hlimpui ve ngei ang le

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)