AFTER SEVEN YEARS BY Makima Ralte

Group siam tirh atanga like tu 1000 nei chin zawng zawng dahkhawmna
Ngaia
Site Admin
Posts: 25813
Joined: April 30th, 2016, 4:07 pm

AFTER SEVEN YEARS BY Makima Ralte

Unread post by Ngaia » September 25th, 2016, 6:55 pm

AFTER SEVEN YEARS – Part I
( Ka Thiannu’n a chanchin min hrilh chu..)

www.storyfb.com

Khawpui-ah pawh, Veng laili taka seilian nula ka ni ve, nimahsela, chumi avang chuan keimahah hian indah sanna emaw, chapona emaw engmah ka nei hran lo. Ka nu leh pa ten an theih tawp a lehkha min zirtir ve avangin, Khawtlang a mi vantlang tak nih ve theihna khawp hlawhin Sorkar hna ka thawk ve, nimahsela, Khawpuiah thawk lovin Sorkar in min dahna hmun, thingtlang kil khawr takah chuan hlim takin ka kal a, ka awm mai.
/
Mihlim thei tak leh mahni in enkawl zo ve tak ka nih avangin ka chhungte pawhin min ngaihtuah lutuk lem lova, ka hna thawhna hmunah pawh hian mahniin Quarters ka luah a, hmeichhe tamzawkte awm ngamlohna hmun turah fal deuh hlekin ka awm ve mai a, engmah ka hlau em em hran lo.
/
Nimahsela, Nu leh pa leh Unaute hmu phak lova awm chu, ka la tih than loh avangin ka thinlung chhungril takah hian khawhar rukna ka nei ve ta tlat mai a, hetiang hi tunhma in ka la hre ngai miah lo.
/
A hminga nula ve ta chu Tlangval inleng pawh ka nei ve ta neuh neuh a, Khawpui nula Sorkar hnathawk lehnghal chu, Tlangval thenkhat chuan tihtak deuh hian min bem ve thin a, ka zu hmuhsitna lam ni lovin, ka ngainat zawng leh ka hmel duh zawng ka hmu mai lo..
/
Kum 2 kum 3 dawn lai chu khua a ka thawh hnu chuan, zankhat chu lo la leng ngai hauh lo Tlangval pakhat hi a lo leng ve ta nawlh mai. Amah chu tlangval lian thelh thawlh, thau silo, sa in phut rual tawk, sang zeih zawih tak mai, ngo lam deuh, mitmeng fiah kal mai, a ni, a ha hmai a rual lutuk lo tih mai loh chu, he khua a tlangval zingah chuan a laktlak ber nihna a hauh vekin ka ring.
/
Kei hmeichhe khawhar leh mal ngawih ngawih a inhre reng thinlungah chuan hmun a rawn chang nghal ringawt mai a nih chu. Mahse ka tilang lem lo, ani pawh chu rawn leng zui zel se, ka tih rilruk lai chuan a rawn leng zui lem lova.
/
Zan dangah pawh chuan a rawn len beisei deuh hian ka zankhua fo mai, midang dangte chu an rawn leng zantin, nimahsela amah ka beisei rukna chuan ka nun a ti khaw har ve tlat mai a, zan tam ka beisei thlawn thin.
/
Chawlhkar tir lamah lo leng ta se, kar tawp lamah a rawn leng leh chauh thin, chuvang chuan, ka rilru tete in Ngaihzawng nghet a nei anih ka ring mai a, a thinlung ka chang lo a nih ka ring mai. Ka beiseina pawh chu a tlahniam chak hle a, ka thinlung atanga paih bo duhna pawh ka nei tan ta a...
/
Nimahsela mak tak maiin, theihnghilh a, ngaih loh ka tum nasat zawh poh leh ka thinlungah hian a chiang zual a, amah hmuh chakna leh duhna chuan ka thinlung hi a ruk tak hian a tuihal huam huam thin. A rawn len ve zanah hi chuan zante hi a tawi ka tiin, a reilo ka ti em em thin, Nimahsela, hming chhiat ka hlauh avangin engmah ka lantir ngam lova, midangte nena ka kawm dan lah ka ti danglam chuang hek lo.
/
Thingtlangah pawh in 200 vel lek khua, Lo nei a eizawng chhungkua 90% chuang awmna khua, zirtirtu leh keimahni ho lo chu Sorkarhna thawk awm lohna khua, Lo nei a ei zawng vek an nih avangin chhunah te hian a rehin a khawhar thlak thin hle. Aizawl Khawpui boruak nena khai khin chuan in-ang lo tak a ni.
/
Ei rawngbawl nan a Gas hmang chu tlemte an ni a, thing an hmang ber, keipawhin mei chhemna thuk ka neih avangin, Gas renchem nan thing ka hmang ve thin a, thing phurh hi hmeichhe hna a ni deuh mai thin. Mizo thawnthu thenkhat a Tlangval ten Nula thingphur an zui a, an fawm sak a, hlim takin hun an hmang thin, tih ka lo hriat thin tawh, tunlaiah awm tawh tur pawha ka rinloh kha, a takin ka tawng ve a nih chu. Lo lam hna an awl lai hian tlangval ho nen hian thing kan phur ho thin a, ka thian hmeichhe pahnih pathumte nen, mipa tlangval pali panga te nen hian thing kan phur thin a, a nuamin hlimawm tak a ni. Mipa in min fawm ngah sak vek a, eh chawp a ngaih pawhin phur leh hlim takin an ek mai a, an lakkhawm leh an eh sa chu kan phur haw tawp thin a, a hlimawmin a nuam ve em em thin. Nimahsela, chutiang a Tlangval thing ka phurh pui ho zingah hian a tel ve ngai miah lo thung a, chhun lamah hian eng hna nge a thawh thin ka hre lo, chhun lamah hian hmuh tur a awm ngai hauh lo thung.
/
Kei a thil hrelo tak mai chuan, thing rit tak tak phurh ai chuan, mau ro phurh hi ka duh zawk thin a, a alh duhin a zang zawk bawk si a, ka tia, mau phurh phet ka tum thin a, ka phurh haw tak tum pawh a tam mai. Nimahsela, Tlangval ka phurh puite an lo zak em em thin tih a hnu fe ah ka hre leh a, an ngaihdanah chuan mahni Nula thingphurh puite thing tha phurh tur zawn hmuh sak thei lo, mau thing mai mai phurh tir chu thil zahthlak tak a lo ni a. Ka hriat hnu chuan ka zakin ka khawngaih hlawm hle, ka nuih a za deuh bawk.
/
Chutiang a hun kan hmun fe hnu-ah chuan hun a lo liam ve zel a, ka thinlung luahtu Tlangval pawh chu kar khatah vawi khat emaw vawi hnih emaw chu ala rawn leng ve reng thin. Nimahsela amahah engmah ka nilo a inhriatna ka neih avangin ka en pangngai chho ve tial tial a, ka vei ngawih ngawihna pawh a zia awm ve tawh viau.
/
Zankhat chu, ka vanduai emawni, ka vanneih thil emaw ni, zan dang ang lo tak maiin ka in rawn lut hmasa ber a rawn ni ve ta nawlh mai a, a thu hahdam fel chauh tih chuan, tam mangkheng in ruah a sur ta char char mai a, midangte tan rawn kalna chi zia zang a ni lo, ruah sur a ban meuh chuan mut hun tak a ni tawh a, hemi zan hian midang tel hauh lovin kan pahnih chauh hian kan inkawm zankhua ta a. Mak tak maiin ka beisei ruk, nimahsela beidawnna in min tuam avang a ka beisei ngam tawh loh "Thu" azawng a thu mawi ber mai chu, ka beng hian a hre ta. Hemi zana a thu min hrilh hi, tun thleng a ka mittui sawr chhuaktu tur a nih reng hre lo in, naupang riltam tak an nu ten chaw an han pe a, an lem duak duak ang mai hian, hlim tak leh tui ti takin ka lem duak duak a ni ber. Hemi zan hian ka hlim lutuk chu a haw hnu pawhin keima khumah ka muhil thei lo reng reng.. zan thim tak nimahsela, ka Khawvel hi a par mawi em em a ni ringawt mai.
/
Ka thinglung hneh zual em em tu chu, khatiang hun fal leh remchangah khan a zahawmna hlauh miah lovin, zahawm takin, felfai takin a chanchin leh, a thinlung a min lo ngaih ve thin zia chu, a sawi mai a, dawhkan lehlamah a thu a, kei leh lamah, dawhkanah kan kut kan dah chhuak a, a vawn chu kan invuan chiang mai, nimahsela a bak thil zahawm lo engmah a ti lova, tih tum awm pawhin a lang lo. A tawp lamah vawikhat chu ka biangah dawmin, remchang lo zetin ka hmuiah a fawp a, ka kham lo tak meuh, mahse, ka ti lang lo.
/
Hemi zan hian a chanchin min hrilh vek a, kei erawhin sawi tur ka haihchham tak meuh. Ka zawh ngai lovin, zan tin a rawn len ve ngai lohna chhante, min hrilh a, chuti chung chuan englai pawha a thinlunga ka awm si zia a sawi lai phei chuan, a awmah khan va bei thlawp a, tah hlep hlep ka chak....
/
A dinhmun atang chuan, kei Khawpui Nula, mahni inchawmna khawp zan hlawh nei Sorkar hnathawk chu, han tin zawn chi rual ka lo nilo a nih chu... tun thleng hian khatih lai hun ka ngaihtuah let khan maw, ka tap lo thei lo ( A mittui lo luang chu a hru a..)
/
Hemi zan atang hian, ka khawvel hi a nuam em em a, ka nun hi a hlim em em a ni ringawt mai, ka sawi thiam lo, kum te chu hriat loh karin a lo ve leh ta mai a, Thingtlang khua tih takah nun fimkhur erawh a ngai tak meuh. Sawi tur an duh a, sawitur avang si, mi chanchin tha lo lam an hriat chuan sawi nuam an tih leh an titi tui ber a ni thin tih hria in uluk leh fimkhur takin kan nung chho a, sawi pawh kan hlawh lem lo. Amah a felin a Gentleman a, ka hmeichhiatna min tih bawrhban sak tumna a nei lova, zahawm takin a awm thin. Nula leh tlangval inhmangaih ngawih nngawih ve ve ta chu, hun remchang a awm tum chuan han inkuah a, han infawh vawng vawng changte chu a awm ve bawk, mahse, hun remchang hi a awm khat tak meuh meuh a ni. Min fawh pah hian ka hnute hi a khawih ve thin bawk a, mahse kawr chhanah chauh a khawih thin.
/
Kan inngaiin kan in hmangaih bawk a, Inneih zai kan rel ta a, thil pawh a kaltluangin a fel zung zung a, Inneih chu kan peih a ni ta der mai a, hun a liam a, Kan Inneih Ni chu a lo thleng a, hlim takin kan innei ta der mai. Kan inneih zan hian he khawvela ka la fan ngai miah loh ram chu ka Hmangaih em em chuan min fanpui ve ta, hemi atang phei hi chuan ka Nunna zawng zawng hi akutah thlamuang takin ka nghat a, ka damchhung in hlim takin ka Pasal rawng hi ka bawl tawh ang.. tiin hlim takin ka inngaihtuah thin...
/
Mi pasalte chanchin chu ka hre tam hauh lo, ka pasal hi pasal azawng a pasal fel leh chhuanawm a va ni tehlul em. Inchhung Furniture siam a thiam a, Electrict khawih turin midang koh ngai lovin a thiam a, a pumrua a tha a a chak a, thawh hreh a nei lova, thiam a ngah em em bawk. Chumai a la ni lova, a ram vachal a, lui lam sa leh sava leh ram sa engpawh mai hi a awkin a kap thei a, kan ei deuh reng, lui lam sa phei chu kan ei tha peih lo zawk a ni. Mite angin lo neih kan ngai lova, ka hlawh chu kan kham em em, chuvang chuan chawhmeh tuihnai leh ka chak zawng a piang hi min lakkhawm sak reng thin...
/
Chutiang reng reng chuan hlim em em in kum 3 lai hun kan hmang dun, khawtlang chhiatni that ni-ah kan inzui a, he khua a mi zawng zawng hian min awt hian ka inhre thin a, mite pawhin min nel a, rual kawm a thiam a, miin an nelin an fak em em bawk, a pumrua a hleitling a, a chak bawk a, hna thawh hreh a nei bawk si lo.. Ka thiante pawhin nupa awhawm ber in ni ang, min ti thin. Mahse, pawi ta em em chu "Fa" ka pai thei miah lo hi a ni.
/
Nikhat chu, kan Office lam atangin Transfare Order ka dawng ta tlat mai, hotute thu awih hram hram duh mi ka ni bawk nen, tin Aizawl khawpui hnaih deuh zawka awmna tur lo ni bawk nen, min Tranfare na lamah chuan kan insawn ta nge nge a, ka sawrkar hna thawh hmasak berna, ka nun a mi pawimawh em em lo seilenna khua, ka la hriat ngai loh, hlimna ka chharna hmun chu ngai tak chungin mittui tla zawih zawihin kan chhuah san ta. Kan thiante pawhin tap chungin min thlah liam ve...
/
Tichuan he hmun hi kan rawn thleng ta a nih hi. Makim, kha Tranfare Order khan ka hlimna leh lawmna zawng zawng pawh a lo Transfare tel dawn a ni, tih hi ka ring pha ngai lo...( A hmai a hup a, khur zawih zawih khawpin a tap a, awrawl chhuah a hlau si...)



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 25th, 2016, 6:56 pm

AFTER SEVEN YEARS – Part II

Makim, zan a rei dawn a tawi zawngin ka sawi tawh mai ang e aw... Heta kan rawn thawh hnu kum 3 kum 4 vel kha chu kan nundanah danglam engmah ka hre lo, ka hmangaih a, atan engkimah khan ka nung a, engkim ka hmuh leh ka hriat, ka tih zawng zawngah hian a pawimawh hmasa ber a ni reng thin. Ani pawhin min hmangaih a, min Care em em vek hian ka hria a, ka nun hi a dik tak chuan a hlim em em a ni top mai.
/
Chutiang a rilru thlamuang em em a ka awm avang chuan, eng hun atang khan nge ka hre thei tawh lo, a chhuakvak hi a rei ve tial tial a ni tih kha. Ka hriat chhuah meuh chuan zan lai thleng dawn dawn hian min lo len san thin tawh a, min Care em em bawk si avangin ngaih tih that lohna engmah ka nei thiam chuang lova, a lakah hian ka rinna zawng zawng hi ka nghat a, thil dik lo hi min tih khum thei ang tih hi ka ring ngai lo...( A mit tui a lo luang ngai ngai a..)
/
Zan lam a aleng rei thin pawh chu, thil dang zawng zawngah a fanu duat ngawih ngawih ang mai a min duat zui zel si avangin ka sawisel phal lova, a tul a ni ang, ka ti mai thin. Chhun lam a ahna thawkte hi a rawn thim haw fo tihte ka hre reng tawh a, mahse, mipa hnathawk chuan thim haw chang an nei fo thin, ka ti mai thin a, a rawn thlen hun hun a, hlim tak a lo welcome turin ka inbuatsaih mai thin... Engkim hi a duh ang thlapin ka lo awmtir a, a ei duh zawng ang chi ka neih phak ang angte ka lo siam a, fai taka inbualin, Varanda-ah hian Chair a thu in ka lo hmuak thin. A rawn thlen chuan ka hmuh veleh ka pan a, anin ka kutah min lo chelh a, thenawm khawvengte chu zah lo ila, kan inkuah thin ang.. keiin a ipte ka lak sak a, kalpah hian ka keuvin ka en lo thei lo, a chhan chu, ka ei duh zawng tak thei emaw.. engemaw tak hi a awm ziah thin a, hlim takin ka la chhuak a ei tawlh tawlh chungin he inah hian kan inkai lut thin... a thuam hnaw ka hlip a, inbualna tui ka siam sak a, a inbual dawn a Bath Room-a a luh dawn hian mathei lovin min pawm a, min fawp thin...
/
Thalai ve ve kan ni bawk a, thingpui hi inleng kan neih loh chuan kan in ngai meuh lova, thei tui lam hi Fridge ah kan nei reng thung a, kan in mai thin. A inbual zawh a a in tur hian dawhkanah ka lo chhawp chhuak thin a, fai taka a inbual zawh chuan a thu a, a in thin a, min tulh ve thin.. amah chauh chuan a in zo duh ngai lo... chutiang a a nundan chu a pangngai in a kal reng.. engmah ngaih tih thatlohna tur kei Hmeichhe mawl tan hi chuan a vang em asin...
/
Nimahsela, Makim, tun thlenga ka la awih theih ngai loh thil hi a lo thleng, ka nun zawng zawng a vuak darh vek tawh hnu-ah pawh hian awih har ka la ti a sin...( a mitah ka en kar a, a mittui a khap per sek sek a.. a inti pachang nasa hle a ni tih ka hre reng.. adik tak chuan tap hawm hawm mahse, ka hrethiam a sin aw.. mahse, a fel ve a, min zah vet lat a nih chu..)
/
Nikhat chu a dan pangngai in hnathawk turin a chhuak leh a, ka Office kal hma hian a chhuak thin a, engkim a mamawh tur zawng zawng ka buaipui zawh vek hnuah a chhuak chauh thin a, a kal dawn hian ka chalah hian min muah zeuh a, “lo inenkawl tha ang che aw” ti lo hian vawikhat mah min kalsan ngai lo. Hemi tuk pawh hian engmah danglam awm miah lovin, kum hei leh chen alo tih thin tawh chu ati kim vek a, hlim tak a tlai lama ka lo hmuah chhuah leh turin kan inthlah liam... a lan theih chhung zawng chu Varanda a ding chung hian ka thlir reng a, a lan theihna tawp chin hi ka hrilh tawh a, ‘sawlai i thlen sawn rawn hawi let ziah mah teh,’ ka tih avangin nitin a rawn hawi let a, kut kan invai thin...
/
Makim ka rilru hi a buai lutuk vang nge, tun hnu a ka han ngaihtuah let leh hian, kha mi tum khan, a rawn hawi let lo tlat hian ka hria nia maw le... Tichuan maw.. engmah thil danglam keimahah chuan a awm lo, tlai lam a lo ni a, ka Office ka bang a, ei rawng ka bawl a, ka bawl zawhin ka inbual fai a, ka tih thin pangngai zawng zawng engkim ka lo ti leh vek a,.. Varanda ah Chair ka hung chhuak dawn mek... ka phone a lo ri... ka va pick-up a, Makim.. kan pa farnu aw hian, min rawn kova, ka pasalin an in a thlen tawh thu leh kar leh a bungrua an rawn lak tur thu min han hrilh mai chu maw...
( a vanva dak a, a biangah hian mittui a lo luang ngiai ngai a... intih pachan tum takin a khap fak fak a.. ka va han khawngaih tak em.. engemaw chen a ngawih vang vang hnu chuan...)
/
Ha harh chhuah leh meuh chuan Damdawi in khumah hian ka lo mu tawh a, ka thawhpuite leh ka thenawm ten min lo kil laih laih a, thlaphang reng reng suh, hei i tha leh tawh lutuk a nia, tikhan mu hahdam rawh.. min lo ti tliar tliar a... Makim, ka thlaphang asin.. tinge ka thlaphan loh ang.. ka nun hi e, a buai a, a mangang a, ka thla aphang ngawih ngawih.. ka phal lo, ka pasal kha ka hmangaih, ka thih thlengin ka hmangaih ang a, atan ka awm ang a, a rawng ka bawl duh asin...min hmangaih a min khawngaihtu ka thawhpuite leh ka thenawmte hnenah chuan ka sawi mai ngam lo.. ka la awih thei lo, ka hre sual a niang, min betu kha midang a niang... midang hnena an sawi tum ka bulah an sawi palh a niang.. Makim, ka thei lo.. ni khat pawh a tel lova rei ngawih ngawih a ka hriat thin kha, a ban lukhamin ka mmuhil tawh ngai loving maw, a awma bei thlep khan ka sam min chul sak tawh lovang maw, min nuih sak chung a min en reng thin mithla chunga ka inchei thinte kha, tunge ka inchei chhan tak ang le, a tui tih zawng tur ngaihtuah chuang phur tak a rawng ka bawl thinte kha ka ban san ang maw... a theih loh, a ni thei lo....?
/
Chung zawng zawng chu second reilote chhung a ka thinlunga lo lang nghal zung zung chu a ni, ka mittui a lo luang a, ka thian ten an hmu hman hlauh mai... ka thiannu pakhat chuan.. Thiannu.. tinge.. na i nei em ni.. hei kan awm vek a nia.. thlaphang suh aw.. kan kalsan dawn lo che.. min han ti a.. Makim, ka lawm asin aw.. mahse, min kal san lo tur ka duh ber mai chuan min kalsan a tum mek si.. ka thiannu chu ka va en a, ka lu ka thing a, engmah ka sawi thei lo.. ka awrawl tawp a tah hawm hawm hi ka chak...mahse, a rem si lo...
/
Thawh thut a, ka in lama tlan haw daih ka duh..tuma awmlohna hmunah, hlim tak a kan inkuah thinna hmun; kan nupa khumah khan lungchim tak mai a tah hlawp hlawp ka chak ber, mahse, keimahin ka awm ngam lo.. vawikhat mah keimah in kan inah hian ka la awm ngam lo ngai lo..mahse, Makim hemi tum hian ka awm nagm hlawl lo... a mak lutuk..kan in kha ka hlau tlat nia maw le..
/
Chuti chung chuan mi zingah lengin ka inhre si lo, khumah chuan mu reng tur ka ni lo, ka taksa hi a zat hian a za chuai chuai a, sapatal vak hi ka chak ber..ka mittui a hul thei lo.. ka thiante mang a ang tan ta.. pakhat chuan a rukin Nurse duty hnenah a va sawi chu lo niin, Nurse in Doctor a ko, an rawn lut... Nurse chuan ka BP leh Pulse an check vel a, Makim a mak lutuk, chutih chhung zawng chuan Doctor chuan ka mitah chiang takin min en reng a nih chu. Nurse in a tih tur a tih zawh chuan, ‘a tha vek e.. Normal,’ a han ti a, Doctor chu ka khumah chuan rawn thuin, (Doctor khumah an thu ngai miah lo tiraw..?) ka kutah min vuan a, dam duai hian, “i duh chuan zanin chu hetah hian i riak thei ang.. i thu thu ni mai.. i tha leh vek tawh a nia aw... tikhan han mu hahdam la, i pangngai leh thuai mai ang.. i riah duh chuan i riak dawn nia..” min han ti a, min hmu tlang vek anih ka ring... chu doctor chuan min thlamuan huai nia mawle..thlaphang maih suh aw, pawh min ti ve miah silo..!! Ka thiannu nula pakhat hian min riahpui theih bawk si avangin kan riak dun ta a, mahse kan muhil lo, ka tap tlaivar a ni ringawt... ka thiannu fel zia leh keimah avang a a hreawm zia kha, ka va han khawngaih leh hnuhnawh tak em aw.. ka theihnghil tawh ngai lovang....
/
Damdawi in ka chhuah san, engmah thu sutna emaw a la awm lo.. mahse ka beisei reng thung, ka chhungte hrilh pawh ka phal mai lo.. ka ring lova, ka awih phal lo..Nitin kan hlimna run kha ka tahna run a lo ni ta, ka mittui hian ka in hi a luan huh zuih ni ber hian ka hre hial... engmah thu thar awm ta lo chu, min rawn thawng thut ang a, ka chhungte hrilh hai in min hau hrep ang tih ka hlau ve ta a, ka chhungte ka phone ve ta... thil tam tak an sawi loh danah an tuar na ve tih ka hre thiam mai...ka thiante leh ka thenawm te hnenah pawh zep a hun ta lo... mahse, ka va han zak em.. ka khua ahar a, ka mal ngawih ngawih a, ka zak em em bawk.. nunna hi a hlu lo asin khatih hunlai khan...
/
Ni a liam a hun akal zel, ka thianten min khawngaih, min hrethiam, min hnem an tum, ka thenawm ten min thlahthlam ngam lo, ka tan hian an va han hlu hlawm tak em... Mahe..Makim.........................
/
Chatuan pawhin rawn her chhuak lo se ka tih ka tan a “Ni Sakei” chu a rawn her chhuak ta.... nidang zawng aiin a in vawrh sang chak emaw tih turin.. an khua a tang a an rawn thlen hun Chhun dar 11 vel chu mitkhap kar lovah a lo ri ta der mai... an rawn tluang bawk a.. an lo thleng a ni der ... kawtah motor a rawn ding a, An khaw VCP Motor Driver aw ka hre ta... ka pindanah ka khumah, ka bawk a, lukhamin ka hmai ka hup a, ka chhungten an lo dawng sawng a, eng eng nge an sawi pawh ka hre lo... Maikim, engnge ka tih tak pawh ka hre mumal lo, ka la hriat theih chhun chu maw.. ka khum atang chuan ka tho chhuak a, ka pasal..( Chhuat a kawk a ) helai a ding reng hmaah chuan ka va thing thi a, kut suih in, a chang leh a ke ka vuan, “....” khawngaih takin ti suh, ka nunna hi nangmahah hian a innghat, i chhiahhlawh ah pawh ka awm mai ang.. i tel lo chuan ka nung thei lovang.. keimah chuan ka awm nagm lo.. ka ngai che ka hmangaih che, ka then thei lo che..khawngaih takin min then suh.. kir tir leh mai rawh..engmah hi tih danglam a ngai lo, engkim hi i ta vek a nih hi.. aw..khawngaih takin...’ tiin ka van gen a nih chu... mahse........ tawngkam khat mahin min chhang lova, a kut hmawr pawhin min khawih lova, a ke a la sawn a, pawnah chhuak in motor-ah min thut san daih..... Makim a na asin.. a nat zia hi sawi fiah zawh a nilo, a na ringawt pawh a nilo, a zahthlak a tel lehnghal... Chutah ka thinlung luhlul a lo tho ta phat mai.. ka mittui ka hru hul te te a.. ngawi rengin an bungraw la chhuak lai chu ka thlir ta kar mai le.. vawikahat mah ka tawng leh tawh lo..ka mittui pawh a tla tawh lo... Mahse, eng teh vakmah an la lova, a thuamhnaw awm ang ang zawng kha an la a ni mai a, inchhung bungrua engmah an la miah lo asin..
/
Motor a nung a, a lir tan ta... a hnathawk tur ka thlir liamna a rawn leh hawi a kut a rawn vai thinna hmun ah khan an liam ta... Makim... a zo tawh... engmah a awm tawh lo.....( a mittui chu dan rual lohvin a rawn luang ngiai ngiai a...ka romawl ka phawrh a, keipawhin ka mittui ka hru ve ta nge nge a...) Engchen nge chulai an tlan liam ka thlirnaah chuan ka din ka hre lo, ka mittui a tla lova, ka tawng hek lo... Ka pa in ka kutah min rawn vuan a, Boihte.. lokal rawh.. tia inchhung lama min kuah luh chuan ka harh chhuak chiah a ni. Ka nutate pawh an ngawi thiap a, engmah sawi tur kan hre lo.. pindan atangin ka nu a lo chhuak a, bag puar zet hi a rawn khai chhuak a, kal ang le.. a rawn ti a, ka pa in ka banah min kai a, ka u in ka darah min kuah bawk a, Motor-ah min kai lut a... kan kal ta.. ka in chu a in kalh ta..... a lan theih chhung chu ka thlir a, ka mitthlaah chuan a hnathawk lo haw ka lo hmuah thindan zawng zawng chu an lo lang zung zung a.. lungchhiatna chuan min rawn tuam leh ta.. ka nu leh pa, ka nutate bulah ka awm tawh bawk a, insum hauh lovin ka tap ta hawm hawm mai a... ka nu in a mal chungah min bawh tir a, duat takin ka samah min chul a, Ma-te.. a pawi em a ni.. tih theih kan nei si lo... a tihte chuan ka tah a ti zual a, ka pa leh ka Nutate erawh mipa tih takah engmah an sawi lo, ding takin an hmalam an en a....

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 25th, 2016, 6:56 pm

AFTER SEVEN YEARS – Part III
( Ka Thiannu’n a chanchin min hrilh chu..)
/
Chutia duat tak maia min kuahtu ka nu malchungah duhtawk mai a ka tap thei chu, ka thawl huai te hian ka inhria a, Ka taksa a lo chau ve ta ni tur a ni, ka lo muhil ta a niang, kAn motor han ding dawt thawm chuan min ti harh a, kan kawt kai kan lo thleng reng tawh chu niin...
/
Ka han harh a, rilru fim kan put leh chiah chuan rang lutukin, zahna, hrilhhaina, mal ngawih ngawiha inhriatna, khawharna leh lunglenna te chuan kar lovah min rawn luah khat leh nghal a, ka hnuk a ulh a, kan inneih dawn lai a min thlahna hun kan hman ni hlimawmzia te kha ka mitthlaah hian kawlphe anga rang hian an rawn lang zung zung a, ka nu chuan min kuah a, ka pa in ka banah min kai bawk a, inah chuan min kailut nghal a, ka khum lamah min luhtlang puiin ka khumah chuan min muttir ta a.
/
Keima nun chu thu hran, Ka nu leh pa leh ka nutate tan pawh chuan thenawm khawveng hnenah engtin tak ka awmdan hi sawifiah ang maw, an zakin sawi dan thiam har an va han ti dawn em? Tap chuangin ka pa hnenah chuan...” Ka pa min ngaidam ang che u aw, keimah vang hian in zak dawn si..” ka ti a, ka pa chu ka kuah a, a ni chuan min lo kuah letin, ka hnungah min beng thep thep a, “Boihte, i tihsual engmah a awm hlei nem, keini chuan englai mahin kan phatsan ve dawn hlei nem che, min vengthawng suh, kan thenawm khawvengte zawng zawng pawh hian a nihna diktak an hriat hunah chuan tumahin an hmusit hauh lovang che, an lainatin an tahpui zawk ang che.. engpawh lo nise, i kiangah kan ding reng dawn a lawm Boihte, ngaihdam dil a ngai reng reng lo..” tiin min thlamuan a. Aw... ka pa ka va han hmangaih tak che em, nang hi pa diktak zawng ilo ni e.. ka ti rilru vawng vawng a.
/
Hun akal zel a, ni a liam a, a hming a hna nei ve ta chu, ka chhungte chuan kan hotute hnenah chawlhte min dil sak a, kan hotute pawhin ka chanchin an lo hria chu min lainat ve em em a, khawngaihna leh mi hriatthiamna an ngah bawk nen, engemaw chen chu chawlh min pe bawk a, ka nu leh pa leh Nutate kiangah chuan hun ka hmang ta a. Nimahsela, a ni telin ka thil ei chu a tlem tial tial tih reng ka hre lo, ka nu ngun taka min chiktu chuan a lo hria a, ka nun chu nitin hian mittui nen ka hmang liam hi a ni hriam mai a. Ka thil ei lo bawk nen, zan lamah ka Nu in a bulah min muttir a, chuti chung chuan ka mu tlem tak meuh a ni.
/
Lunglen khawhar avang a thil ei theih loh hi a tawngtute tan lo chuan hriatthiam a har viau ka ring, nimahsela a tawngtute tan erawh thil harsa lote a lo ni reng mai. Ka vanneihna em em mai chu, mi beidawng dangte angin mahni intihhlum lam ka ngaihtuah miah lo mai kha a ni. Ka chhungte min duata min enkawltute kiangah ka awm a, ka thla chu muan khat chuan a muang ve a, chuvang pawh chu a ni maithei e. Nimahsela, engmah hi ka ei tui lova, ka lem thei lo a ni ber mai, engmah hian tuina an neih awm ka hre lova, ka kaah hian an da koh vek hian ka hria a, engmah ei mumal lo hian ka nileng ta fo mai.
/
In duata inenkawl tih vanga nileng lenga vena thutpui reng turin ka chhungte hun neih danin a zir seng bik lova, Bazar kalte leh hna thawkte a min chhuah bo san diak changte pawh a awm lothei lova, chutiang hun hreawm ka tih thin ziate kha aw.. mahni a ka awm chhung zawng hi chu tahna hun atan ka hmang hi a ni ringawt mai a, ei leh in lamin ka rilru a luah ngai hek lo, ka ril a tam ka hre ngai lova, a tui a hal hek lo.
/
Ni a liam a, Thla a lo vei leh meuh chuan, ka taksa chu Thlarau ang mai a lo ni zo ta. Zan mutmu tuah mumal lo, engmah ei a in bawk silo ta chu ka lo chau ta hle a lo ni... Tuk khat chu, tukthuan ei a hun dawn tawh a vangin, nidang ang a han thawh chhuah mai hi ka tum a, ka thei ta hauh lo mai a, khum a ka mu chu ka nget em em hian ka inhria a, khum chuan min hip bet tlat ni ber hian ka hria. Ka chhungte tawng leh inbiakna te chu ral lehlam hla tak a ri nimai hian ka hria a, ka hriatnate chu a tawi em em a,.. ral hla tak a khuangpui ri dup dup ang hi ka hre reng bawk a. Ka nu chuan, Mami, chaw ei a hun dawn asin.. a rawn ti a, kei chuan, tukin chu ka ei peih lo mai ang e, min lo eisan mai ta che u.. tiin ka lo chhang a, thil ei mumal lo sa ka nih avangin ka nu pawh chuan min tilui hran lem lo, A nih chuan tiin bawnghnute leh Apple zai sa min rawn chhawp a, hei hi lo ei ang che aw, ei luih ilo tum dawn a nia, kan han ei lawk ang e aw.. a ti a.
/
Khuangpui ri ka hriat chu a la ri reng a, min nghawr dup dup hian ka hria a, nakinah chuan a ri khat tial tial hian ka hria a, a zawi tial tial bawk a.. thawklehkhatah a reh ta duk mai....!!
/
“Boihte.. rawn meng teh, min chhang teh.. ka duatte...engatinge min chhan theih loh..vawikaht tal ‘Pa’ min han ti leh teh...” tih thawm hi ka hre riai riai a, ka biangah hian min sawi nawk nawk hian ka hre bawk a.. chu tap thawm chu a lo hnai tial tial a, midang thawm pawh ka hre thei ta a.. ka han men chuan, ka chhungte chuan min lo thut hual taih a, ka pa chuan min lo ko mawlh mawlh bawk a, ka nu erawh ka hmu hauh lo. Ka Nutate chuan min en thap bawk a, Damdawi inah ka lo mu reng tawhin chawhnu lam daih a lo ni tawh bawk a. Nileng in nikhaw hre lovin ka lo awm a lo ni. Ka ban lehlam lehlamah chuan thisen chaw hi an lo khai bawk a.
/
Natna hran nei ta lem lo chu Thisen chaw tha ber ber chi nena min han enkawl takah chuan ni 3 hnuah Damdawiin chu ka chhuah san ve leh ta mai a, chuta tang chuan ka chhungte chuan a theih ang ang a ei leh in lam tilui turin min tur ta reng a, kan hmuh phak china a tha ber ber ang chu min chhawp reng bawk a, thenawm khawveng leh thiante pawhin min duhsakna an ti lang nasa em em bawk. Ka va han lawm tak em.
/
/
Ka thianten min thlah thlam ngam tawh lova, nitin hian min kawm hlim tur leh ka kianga awm tur hi an inruat emaw ka ti hial. Tu emaw ber hi chuan ka khuma min mutpui mai mai tur ringawt pawhin an rawn awm nileng ve ta ziah a, kawm tur leh titi pui tur nei reng ta chu, inthlahrung mi lo ni sa bawk nen, ka chhungte ai mah chuan ei leh in kawngah pawh min ei in min in luih tir thei zawk phian lehnghal a. Chutia ei leh in te kan tih chhoh leh takah chuan ka lo chak ve leh ta viau mai a, Bazar-ah te leng chhuakin thian dangte inte pawh chu ka chuangkai ve thei ta a....Ka lo chak chho ve tial tial a, ka chawlhte pawh chu a lo zo chho ta bawk nen, ka hna zawm a hun leh dawn ta....
/
Ka hna zawm leh tura ka kal chu, ka thawhpuite leh ka thenawmte, ka thiante zawng zawng hian min lo hmuak a ni ber a, an lo ri luih luih mai a, naupang nen ei rawngte an lo bawl a, chuti zawng nilo se, ka va han tap tam leh dawn tak em.... Ka thawhpuite, ka thenawmte, ka thiante ngaihtuahna hman thiam zia kha, tun thleng hian mak ka la ti mawle. Ka nu in engemaw chen awmpui turin min zui bawk a, ka thiante leh thawhpui ten min thlahthlam lo bawk a, rin ai taka khawhar leh mal ngawih ngawih lutuk lo chuan kum kan vei chho ve leh ta mai bawk a, lunglen zual chang, khawhar zual chang a han tah ruk keuh keuh zawng awm lo tak tak thei a ni lo...
/
Hun a lo kal a, kum a lo vei ve zel a, Nuthlawi, Sorkar hnathawk, sum leh pai lama buai lem lo ka ni ve ta a nih chu. Ka nu pawh a ngaih a ngam tawh a niang, engemaw chang a a rawn zin leh zeuh thin tih loh chu, a rawn kal zen zen thei tawh bik lova, mahni a tlei tumin ka in chu ka luah lui chho ve ngar ngar a, nimahsela, khawhar lunglen zawng a bang mawlh lo. A tir leh a sarhu lai ang em khan tahpui tawh lem lo mah ila, nundan thiam a har.. awmdan thiam a har a ni.. engkim mai hi a ho hulh mai a, a chang chuan ka nun ngei pawh hi eng ual ni bik lo hian ka hre thin. Kum a lo vei a, hun a lo kal zel a, thian thar leh danglam tak tak te, thawhpui mi thar dangte kan lo nei ve zel a, Nuthlawi ve ta chu inlengte pawh kan nei chho ve leh ta bawk a.. Kan phu lo deuh deuhte pawh an awm ve leh tawh.....
/
KUM SARIH HNU-AH:
/
Chutiang a inleng han neih ve takah chuan, midang aia uluk deuh tak takte pawh an lo awm ve leh tawh a, han ngaihdam mai chakawm ve deuhte pawh an rawn inlar ve leh tawh a, kum a lo vei tamin hun a lo kal tawh ve deuh bawk nen, mite pawhin min thiam lo tawh lo mai ni lovin, min kawhhmuh tawh zawk a, chuti chung chuan, ka thinlung zawng zawng a ka hmangaih leh ka ngaih ngawih ngawih tur hi ka la hmu leh lo a ni ber mai.
/
Nikhat chu, ka Office ban in, chhuat vel ka lo nawt fai a, inchhung sekrek eng eng emaw ka tih mek lai chuan, ka kawngka ah hian mi pakhat a lo ding a, ka lo hmu mai lo lehnghal a, chu pa chuan, “i thutthleng hun dante, i fridge hun dante, i chhuar dahna leh i engkim chu a la ngai vek a ni maw..ti danglam ve tawh ta che..” min rawn ti thut mai a, a awri chu ka hai miah lo.. ka va en nak chuan, Amah ngei mai kha.. mangang vawrtawp a min siam a min tlan liam santu kha.. a lo ding reng a ni chu..!! A sual ka ti dawn nge, a zak theilo ka ti zawk dawn.. ka sa hut hut a, ka bing mup mup hian ka hria a.. chhan mai ngaihna pawh ka hre lo...
/
Khatia, hlim tak a kan inneih lai a, a hnathawk haw tlai thinte, a zan chhuak lo haw har thinte kha, engdang ni lovin, tleirawl hmeltha zet mai nen anlo in ngaizawng chu lo niin, kei lah khan Hmangaihna nen chauh a ka thlir avang khan ka hrethiam si lo.. Min haw luih san tak atang a rei vak lovah khan chu Tleirawli nen chuan an lo inru in, an lo innei zui a, tunah chuan fa pawh pahnih lai an nei tawh a..
/
U-Makim, enteh, enngkim hi tun thleng hian a ngai vekin ka la dah asin, a Nupui chu thenin min rawn neih leh tum ta se, ka duh tawh lo tih ka chiang, engtikawng mahin ka pawm thei tawh bik lo, nimahsela, kan pahnih a lungrual tak a kan rem, kan set fel sa, kha ka thinlungah hian tih danglam uina lian tak a awm tlat a, ka khawih danglam phal ngang lo a ni... A TAWP TA !!!
/
Kei chu, Thawnthu ziah a a harsa ka tihna ber chu a tawp dan tur hi a ni... ka ti tawp thiam lo thin e.. Ngaihnawm ti taka min lo chhiar saktute zawng zawng chungah lawmthu tihtak zetin ka rawn sawi e.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)