MALSAWMZUALI BY Lalchhuanthanga Renthlei

Group siam tirh atanga like tu 1000 nei chin zawng zawng dahkhawmna
Ngaia
Site Admin
Posts: 25813
Joined: April 30th, 2016, 4:07 pm

MALSAWMZUALI BY Lalchhuanthanga Renthlei

Unread post by Ngaia » October 5th, 2016, 7:57 pm

MALSAWMZUALI
.
.
Dim taka min kawihher mek lai chuan ka meng peih hauh lo. Ka then tlawk tlawk a, ka ke lam chu a na hle tih ka hre thei mai. Chumi ai mah chuan phatsan ka nihna chuan min tina zawk fe.
.
.
‘Lalrinzual tho teh’ ka nu aw chuan ngaihno a bei lo kher asin. Zan lama ka fb rei lutuk chu ka meng phak kher mai. Nizan lama ka pa car kopang ka brass pui kha an hria a ni chiang mai.Ka han hawichhuah erawh chuan a lo ni i-khaw lo. Ka zu in bang a lo keng teu mai le. Inthlahrung hmel lantir ka tum lo. Faifuk rut rut chung chuan ka nu McDowells No. 1 um ken chu ka ban du du a, ‘Zahna chhete pawh i nei nange?’ ‘Eng vang ngawt chuan nge ka zah ang’ ‘Ka puan tha zawng zawng ni se i lo hralh vek lehnghal’ ‘I pho duhdah lutuk a, ui-in a pu ta a ni zawk ang’ tham lo tih hriat fahranin ka nui lui sak a ‘Lalrinzual, i va zak lo ve, eng ti tiha khatia i nu chhang ngam nge maw i nih le? Min en teh, ka beng mai tur che asin’ ka pa chu a lo teu nasa mai. Ka ngawi vang vang a, ‘Kohhran leh khawtlanga inhmang upa lai ni ve si, thenawm khawvengte ram nek ching, a tui ber ta emaw tih tur khawpa kohhrana mi pawimawh leh langsarte Pathian thu sawipui tum tlat, an awm loh kara keite, mite rel ching hi eng atan mah ka ngai love’ hmhm paha chhuak chung chuan ka ti hram a. Ka nu leh pa an nihnaah chuan ka zah takzet. Tunhnu thleng hian an chunga ka awm dan vang khan kala inthiam thei ngai lova, ka inthiam ngai hek lovang. Eng mi pawh ni se, ka nu leh pa an ni a, ka zah turte an ni. Ngaihdam dil hmana min la dampui vangin ka lawm hle.
.
.
A nihna takah chuan ka nu puan pawh chu ka hralh aw zawng lo. Silh sen loh a neih laia kan vengchhung maia harsa tak, incheina tur pawha pa 2/1 bak nei zo lo te ka pe a ni zawk. Kava fel tak em aw...

.
.
‘Awi! Ka duh lo’ chu mangang authawm chu khawi lam nge tih hre turin ruah tla cherh cherh hnuaiah tuihawk zuan kan thauh thauh paha ka motor ka pan mek lai chuan ka hawikual ruai a. Ka thlang maia thiin a bual hnuang lo sawngbawl mek tu hmeichhe hmel chu a thlabar kher mai. Putar 1 hi a lo tlusual palh niin. A theih ang anga kan sawngbawl hnu leh a chhungte an rawn thlen hnu chuan chu hmeichhia chuan a zui ve hauh lo. Mak ka ti rilru hle a. Ka ngaisang ru hle bawk. Ke-a a kal vang chuan ka motor-a chuang turin ka sawm ta ngawt a. Nurse a ni a, duty turin a lo kal dawn chu niin an hospital thleng chuan ka thlah ta a.
.
.
Ka ngaisang ngang a ni ang, ka be fo a, an inah pawh ka leng fo thin. Unau zinga hmeichhe awm chhun ni mah se a u te 2 chuan nupui te an neih tawh vangin an ngaihsak dan a dang deuh tawh niin ka hre ve mai mai thin. Kan rilru puthmang chuan midangte tanpui kawngah a thuhmun em vangin kan in nel chak viau. Mahse, a bula ka awm hi chuan rau ngun si lo hian Pathian thu hi min hrilh fo a, ka ning ru hle thin.
.
.
‘Lalrinzual, i mak em em lutuk’ ka pa chuan min melh rum kher mai. Engah vak ka ngai hlei chuang l’o. A eiruk sa ka lakchhuah hmangin midang ka tanpui a ni ve mai a.
.
.
‘M, ka ngaina sawt riau mai che, ka duh che a ni’ ‘ ka hria lawm’ ‘Nang paw’n’ ‘Mahna’ ‘Hm! Teh tawp chuan, ava tawi ve’ ‘Nih leh km 1 in message ka rawn thawn che’ ‘Em em a che, thutak ve deuh teh’ a reh vang vang a, ka sawi loh tur ka sawi ta em ni ang, nge mi karah ka lo tlazep zawk? Mahni tawka induh ve ta nafam chuan ka be zui duh ta bik lo. Mahse ka rilruah erawh a chamreng thung si.
.
.
Ni a liam a, ka hmu ngai ta bawk lo.
‘M’
‘Um’
‘I dam em?’
‘Dam e’
‘Hmuh che ka duh, hun i nei thei ang em?’
‘Ka tum dawn nia’
.
.
Ka sana ka bih chhen a, hah tih hriat takin min rawn pan hnak hnak mai. Ka lo thlir reng a. ‘Nihliap pawh ken nachang i hre leh pek nange’ ‘I ken sa ka ring mai ang chu ka ti’ a nui hak hak a, ka duh zia leh vei zia te ka hrilh hnu chuan ‘Rin, kei pawhin ka ngaina mah mah tawh chein ka hria, mahse min hrethiam la, i awm dan hi ka duh lo a ni, zu in mi hi ka ngaithei ngai lo. Ka pa hian zu vangin hma takah min boralsan vangin zu hi a huat in ka hua a ni, chumi chu i nghei thei dawn a nih loh chuan kan inkawp hi a rem thei lovang’ ‘Ka nghei, chuan ka bialnu i ni nghal’ ‘Kan la hre zel ang chu’ a nui seih a, ava mawi zual em. A hmel thatna lam aia a a nungchang duhin ngaina hmasa zawk mah ila ka hmangaihna chuan a mitmeng dum kal mai leh a sam dum tle siau te, a mit bul maia a khuavang neih te chuan min hneh kher asin. Hmangaihna chuan hmel te hi a hmu tha mai zel a, mite hmuh phak loh tha tha a rawn hmu zut zut zel a nih hi tiraw.
.
.
Zu ka in lohna pawh a rei ve ta hle mai, hmangaihna kawng chu kan zawh chho dun ve bauh bauh a, a chang chuan chu hmangaihna kawng chu a lo chhoh chang te, a thuk luat vanga han in hai chhuah zawh mang loh chang pawh kan nei ve fo thin, mahse chuti ang hun a lo thlen pawh chuan Pathian hnena chakna a lo dil thin vangin van angil-te fan ve phak loh ram erawh kan fang dun ngai lo’ he’ngte hi a nia ka ngaihsanna tizual thin tu. Mi hrisel pangngai, taksa lum a han in nek fo chuan tum loh ram han dai deuh chang awmin thaw te pawh han rang ve thin mah se, kan puitlin ngai lohna chuan kan inzawmna chu a tichak zual zawk thin nia. A chhan chu maw, chu chuan amah thlakhlelhna min pe daih zawk alawm. Ka duh angin awmtir thei vek ila chuan ka ngaisangin ka thlahlel em em pawhin ka ring lo. A duty naah thleng thleng chuan ka awm ve ta fo mai. Ke a kal kan duh ber thin a, chuti anga kan kal chuan kan duhna hmun hmunah hahdamin kan awm thei thin a, dar insi riala kal kha a romantic kan ti riau thin.
.
.
‘Rin, biak che ka duh a pawimawh khawp mai, DC – ah first day place ah 1:30’. Ka Birth Day a min present sana leh Jeans chu ka hachhuak a. Min lo nghak ve tlat. A vei tawn sek a, kuah hnaih ka tum, a tang deuh niin ka hria, a khuh deuh kherh kherh a. ‘Rin, min hrethiam hram rawh aw’ a meng hnual raih mai. ‘Eng vang ngawt chuan’ a chil a lem khalh a. ‘Ka nu thu ka hnial thei ngang lo a ni, pasal tur min lo zawnfel sak diam a’ ‘Ava mak dawn ve, nang pawhin i duh ve tho tihna a nih chu’ ‘Ni e, ka lo duh ve em em thin leh ka nu nen pawha kan sawi dun thin a nia’ ‘Eng a! Chu min lo phatsan tihna a ni maw?’ ka awki a sang hle mai. ‘Ni e, Rin, min ngaidam hram ang che’ ‘I hmangaihna ve chu leh, hei kum 2 tal tap kan inzui a, chumi chhung zawng chuan ka lakah zep nei tlatin i lo khawsa thin a nia... a theih pawh i lo thei hle zawk mai, ni e, liam rawh, i lo sihhnip em mai’ ka tawngkam ka duhtui lo kher asin. Ka kal nghauh nghauh a, ka hawikir lo.
.
.
Tlawm kava inti em aw. Ka rilru na chuan zu ah bawk ka tuan leh a, min hnem chuang si lo. Natna ziaawm beiseia ka beihna chuan natna bawk mi hnutchhiah a.Tlanbosan ka tumna chuan rih artui phur an sawi ang mai hian min kalsawt tir thei si lo.
.
.
A ni, ka bianga mittui luang leh thlantui min hruksaka min hahdam thintu ngei kha ka tan phurrit min siamtu leh chelh reng ka duh thin a a hlata awm duha min siamtu chu he phatsantu ngei hi a ni.
.
.
‘Kal rawh, kha keimaha i hnutchhiat engmah hi ka duh lo’ thei leh thei lova ka lukham hnuai ka dap tawk tawk laite chuan ka taksa natna ai chuan ka thinlung na chu thawhchhuahpui har ka ti zawk tlat. Ka Birth Day present dawn sana leh Jeans chu ka thehthla thuai a. ‘Min hliam nawn leh tur chuan rawn kal tawh suh. Eng atan mah ka ti lo che, ka ten hluah hluah che. Mi diriam tura lo kal i nih chuan ka lawm e, ka huatna che tizualtu a ni dawn si a. Kalbo vat teh, ka hmu tuitang nek lo a che’ mittui parawl kiangin min en a. A kal hna hna a. Nidang ang ni se a awm khan ka dam sawng sawng leh tur kha a nia.
.
.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 5th, 2016, 7:57 pm

Ka hmela hlimlohna a hmuh changa min tih hlim tuma bei thin khan ka hlim lohna chu a lawmah a tla ta zawk mai e maw tih turin status ngeiawm tak takin min update khum a. A status lah ka lo check hman ziah lehnghal. Status ngeiawm tak takin ka update chhunzawm ve ta a. Huat ka tum a, ka haw thei si lo. Mahse min phatsantu chu eng atan mah ka ti bik lo.
.
.
Kum a vei ta, ka rilru pawh a pangngai chho tan viau e. Eizawnna lam ka luhchilh ve leh thei ta bawk a, buai a lo na thin nen ka rilruah Mali pawh a reh sawt viau. ‘Ka kal a hun ta e’ hun rei tak a status ka lo check loh chu ka check fuh tlat mai, ka nui liam mai a.
.
.
‘Mali a boral’ ‘Hm! Ava pawi lo ve, ka hahdam huai dawn a nih chu’ ‘A hnuk chah dawn chuan a lam reng che asin’ ‘Ava zak lo ve, duh leh an pa lam mai mai tur alawm’. A ruang thlah tur takngial pawha kal ka tum bau lo. Ka nunphung chu eng vang maha kha phatsantu khan a tihbuai ka phal tawh lo.
.
.
‘Zuala, a tap hawm hawm a’ Mali nu aw ngei a ni. Phone ka dah hmiah, min duh lotu hi engah nge ka biakna tur ka hre bik love. Vawi 5 lai a call ka pick duh loh hnu chuan a beidawng ve ta a ni ang, a reh ta daih a, ka thaw huai thei.
.
.
‘Mam, i kawng i thlangsual a ni’ mittui parawl teuha ka farnu in min kaihthawh lai chuan mut ka kham lo tih ka chiang. Compact Disc ka hmaa let reng chu lain a play nghal a. Karei maw!
.
.
‘Rin, he thu i hriat hunah tal chuan min ngaidam thei ngei ang tih ka beisei’ ‘Titawp rawh, kha nu kha a aw pawh hriatnawn ka duh tawh lo’ ‘Mam, nghak hram teh’ a mit ata mittui a luang ngiai ngiai a, ka tilui ta bik lova. ‘Min ngaidam lo a nih pawhin ka rilru tal a dam mahna. Rin, ka chau takzet a ni. Nang chu awm la i kut chak takin min chelh anga, muang takin he ka khum laizawl hi ka luahlum mai tur’ thawk a la halh halh a, a aw chu a tham tiak mai lehnghal, ngaihthlak duh lo tu khan chiang zawka ka hriat theih nan a volume ka herh sang sauh sauh a. ‘Rin, min ngaidam rawh aw, duhtak, he ka natna hian min kiansan dawn lova, i tan hun ka hmang rei thei dawn lo tih ka hriat khan min kalsan theih dan tur ka ngaihtuah a, kei leh ka nu min huat a, kan in takngial pawh rawn kal duh lo leh ka chanchin i ngaihsak loh theih nan ka nu nen ruahmanna kan siam dun a nih kha. Chu chu i luhlulna leh induhna khan a thei a ni tih ka hria. Ka nu pawh i haw viau ang tiraw, mahse a thiam lohna a awm miah lo a nia. Mittui tla zawih zawih chunga he audio kan record lai hian na kan ti asin. Ka duh loh leh hmangaih loh vang che a min ngai a i rilru na ka hmuh khan ka inthiam thei thlawt lo.
.
.
Ka that deuh lai kha chuan engtiangin nge i awm tih hi ka thlithlai reng thin che a, ka hlimna ber i hmel hmu tur khan a rukin ka thlir reng thin che asin. Mahse, chu chuan natna min siam mai zawk a ni si a. Khatia i zurui i tlanliam lai pawh khan ka lo thlir reng che a, ka bawihsawm che asin. Mahse ngati nge ka hming lam reng chung khan min hriat theih miah si loh le. I lak ata kalbo tura min tih a, i sana i paihthlak laite khan ka va’n khawngaih teh lul che em. Mahse ka lantir thei si lo.
.
.
‘Rin, ka chau em mai, he Brain Cancer hian ka nunna chu a la thuai dawn a, chumi hunah chuan ka pa nen kan cheng dun tawh ang. Chu hmun i rawn thlen ve theih nan Pa hnenah ka lo dil thin anga, i rawn thlen ve hun chuan a hmasabera i ban chelhtu ni turin ka lo thlir reng thin ang che. Ka hmangaih, duhtak, mangtha ti a thlah che hi harsa kava ti tehlul em. Mahse a tul si a, dam takin awm zel la, kawppui tha tak neiin chhungkaw hlim tak din la, i hlim hmel hmuh kha a nuam thin a nia. Aw le, duhtak, chinlem ka nei dawn lo, engpawh ni se ka phat lo che a, ka hmangaih che tih hi min hriattharsak dawn nia aw’ a aw chhuak tur a awm lo nge a tap tih pawh hriattheih a ni ta lo.
.
.
Ka bing chuk chuk a, ka a vek ta a ni ber mai. Min hmangaih vanga hreawm tuara, a hmangaih hmakhua a ngaih vanga a nun hreawma siamtu chuan mual a liam ta. Chu chu hre lovin tihelna leh huatna hmangin a na thei ang ber turin ka siam a. Min hmangaihtu chu a dam reng lai pawhin ama thlankhur ka laihtir si.
.
.
‘M, min ngaidam rawh aw, ka lo va a tak em. I dawn chiang lo a ni, i mawl em mai, Malsawmzual, i a a ni. Harsatna te chu kan do dun anga, kan hneh mai dawn alawm, i na hi a lo na em a ni. Malsawmzual, i thil tih dan hi a fair miah lo a nia’ a thlanlung chu ka kuah ngawih ngawih a. Kohkir theih loh nunhlui chuan min vel a, a ruang takngial pawh thlah duh lova ka luhlulna te chuan min vel nawn reng a, inchhirin ban a chen zo ta.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 5th, 2016, 7:57 pm

*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)