NIKHAT CHAUH! BY Peki Breezy Fanai

[Ngaia]

NIKHAT CHAUH!

Class Kal hi chu a hneawm ve tawh ngawt mai,project tam thei si, huiham! Professor te pawh hian min hriatthiam ve thin tur ania.

College kal mek,tlangval thothang tha,taima em em lemlo leh kei ka ni inti ve thin ngat,naupang chhia zawk zawk tawh lo leh confi ve thei em em hi ka nia. Bialnu hlui sawitur pawh ka ngah ve ngiang mai a haha mahse hmangaih leh duh em em han vei zui tur erawh ka la nei hauhlo thung.Insawithei chhunzawm ta zel ila,chhungkaw khawsak tlachawp luttuk atanga chawrchhuak ka nih loh bawk na hian min chawisang ka ti mai a,thil engkim (ti mai ila)thianho zingah te hian hotu nihna leh mi en bik nihna ka hauh deuh zel mai a,a hrehawm hauh lo.Ngaihzawng ka neih lahin rim hah ngailo hian anmahni zawkin min rawn pan ta thin a,ka inti luck ve thei khawp mai,khawsakna lamah hi Chuan tlakchham chu nei lo viau mahila mi tin hian kan nunah hian tlakchham chu kan lo nei vek ani.Keipawh hi dawhtheihna ka tlachham hle a,ka thinchhe viau bawk.

"Mama,lo chhuk tawh rawh,chaw ei a hun" ka farnu neihchhun anih leh tawh kha! Ka thil tih lai chu dahin room atang chuan ka chhuak a,inhnuai (sitting room&kitchen)lam pan chuan ka kal zui a.
"Mami,engtik ah nge in exam dawn?"

"Thla tharah! "
"Keini chu next week atang,ka zir nasa tawh tehmai nia,nangpawh zir ve fe chu I hun tawh alawm. "Inti lehkhazir deuh chuan ka han ti leh hram a.Ani chu alo ner sak."Online maimai hman ini tawh lo aw."ka la ti zui hram a.
Chutah, "I ninawm! Ei mai mai teh, Khawvel a mi fel ber ang hrim in,ei hlawllo che" kan nui ta dar dar a.

Chaw eikham hnu chuan sitting roomah ka han thu muang leh phawt a.Ka nau chu alo online leh der tawh. WHATSAPP? ? A phone chu ka han bihsak chhin a,hup bo alo tum ve ngei.Mahse rang luttuk in a kut chu ka phihthlaksak.A contact zing a pakhat chuan ka mit a la ta tlat!
"Hei hi I thiannu mi? " min en ta hû a, "khatin min en suh, hei hi tunge?"
"Hey! Khatiang hmeichhia (ka d hlui te ho) ani velo aw,I phulo" deuh hmak chuan.
"Eng hmeichhia nge anih vak bik a?"
"I hmeichhe kawp thin te ho ang mai mai chu anilo ang ka u! Pathian tih mi, kohhran mi luttuk anih hi"
"Hmmm! Thing emai a!"Ka tho a inchung lamah ka chhohsan ta daih a.Ka nihpui tawh te reng reng sakhaw mi an awmlo a,zep lo ah chuan ka mutpui theihloh tur khawp a fel chu ka nihpui thei ngailo.Kha tleirawl te pawh kha hmeltha viau mahse a mizia ka nau sawidan atang kha chuan hriatzui loh mai a tha in ka hria.

Class Kal ka nin tluk zetin zingthawh pawh hi ka natna benvawn tihdam harsa tak ani.Ka farnu zik zek hi lawm..w tho hma thei si,min kaitho ve nghal ziah a,ka la pen fawk ang.Class kal tur a insiam vel hi chu a ninawm viau a,college han thlen erawh hi Chuan a hrehawmna pawh ka hre tawh chuanglo.Class ka thlen hi Chuan ka thian kawm bik te ho hi chu an lo Kim vek tawh zel a,hemi ni pawh hian ka hmel an hmuh rual chuan sawitur an lo nei leh tawh tih an hmel atang chuan ka hre mai a,an bul a ka han thu chiah chu ka rin ang ngeiin Davida chuan "Bro,itan nula sess luttuk kan lo hual a,a pic pawh kan kawl ania,hei" tih pah chuan a pic chu min entir a,Kei lah chuan tham vaklo hian "anih kha..ti zawk ula" kati mai a.An lawm loh hmel kher asin.
"Iti anglo emai,a number te kan lo dil ve em em a itan.I duh chi ngei kha ania"
"Haha awle awle ka tan a tha tur ni a in ngaih te chuan ni ang hmiang.Khawi a number leh pic kha."chuveleh an lawm chuan min han ben rawn thak thak a.
"Khawi a awm nge anih a?"
"Saw alo lut" feeeeewwwwww!!! Mahni class ami ngei pawh ava hriatloh theih ve.Chhelo chu ka ti tho a,mahse hmeltha chu Kati fahran lo a mahse Ka thiante bulah erawh ka sawilo.Tifuh an inti ve si a.

Ka class bang inchhung ka lut chiah chu Kei leh keilo angin ka phu ve zawk! A chhan pawh ka farnu chu a thiante ho nen an lo awm leh luai luai tawh a,min tiphu tu ber zawk erawh lalhmelthai kha tun tum chu alo awm ve tlat atin ni.Ding meuh a ka melh zawk hnu chuan "nuam deuhin aw " ka ti a,ka chho tlang nghal mai a.Diktak chuan thutkhawmuan a Hmelthatei kha la hmuh ka duh viau a,mahse mahni farnu te rual zing a lo inlak mak vel chu ka tih chi ani ve lemlo.

Mahse engvang tehreng nge maw ni ka thluak ah chuan a lut laklawh a,ka mitthla ah lah a cham reng mai bawk si. Zah hmel deuh khan min lo en ve anih kha.Huiz! Lehzel hian!! A hmelthatna piah ah Khan a mizia hrim hrim kha a nu hnàp a,a nem em em bawk si.A danglam ani tawp mai.Thawk deuh hawk pahin khumah chuan ka han thal deuh tawp a,ka inbelchiang a,ka thlan te alo tla vel! Ka nau-i chuan hria se min eilo leh ngawt ang chu! Engpawhnise,a chanchin chu ka hrechiang tur ani .Ka farnu hi ka zawtchhuak dawn tho tho.

Ka sir a ka dah, ka cell phone chu a rawn ri ral ral,kan en nak chuan ka sas ani tlat! (Class ban hnuah Khan kan sawi fel vek a haha) "um bawihi"
"Engnge itih a? In ka thlen hunah kalo call ang che kha iti sia,I rei ta luttuk a"
"Hehe ka chau deuh a sorry aw "
"Um pawilo mai,zanin chu chhuak ila "
"Hehe itih te chuann "
"Awi ka lawm,i fel luttuk muah muah"
"Muah"
Phone dah pah chuan "tunah tak chuan ka ngaihtuah na I luah phalo tlat" kan ti zui ah! Inhnuai a tleitir hmelthai ngaihtuah pah chuan kalo muhil daih a.

Zanah chuan lehkha pawh ka zir hleitheilo.Ka nau ka zawh chian ngei angai ti chung chuan ka tho a,room atang a chhuakin ka nau room kawngkhar chu ka kik karh karh a.
"Eng nge?" Alo ti vin hlur.
"Thinchhenu,lo hawng vat" phun bul bul riin a zui a.Kawngka chu a rawn hawng,ala meng rum em em zui.Kei chu rang luttuk hian ka zuanglut a.
"Engnge i duh a?mi thil tih laklawh lai a"kan hawikual chu khum chung a laptop let reng chu ka hmu fuh a.Ka phur thut.
"Ehee! ! Lehkha I zir miahlo.I fb ani maw?" "Ka duh leh!"
"Iva zamlo reuh e..ka nu te ka hrilh anga,kitchen ah i zir tawh ngei ngei ang"
"I duh chi sawi mai rawh" ka mizia chu a hre thawkhat tawh.Amah atanga duh leh mamawh ka neih apiangin ka vau thin tlat a.Ka dang teuh kher mai.
"I thiannu khaa"
"Tu ber? "
"Nizan a kan sawi kha"
"Emily maw?"
"Hre ve nang,I phulo min tih kha"
"Engatan nge itih?"
"Ka hrechiang duh"
Chuveleh ka lam a rawn hawi a,ngawi rengin min han en vang vang phawt.A thaw halh.
"Ihmaw, ka hrethiam theilo che,tinge I hmeichhe duhzawng te hi i thlak kual reng a,changin sual deuh deuh i duh a, Chang leh fel 've pangngai tak tak te,engnge awmzia?"
Min ti zak ve tep alawm le.Ka nui hak a.
"I thiannu kha a danglam em atin ni mate,a mizia hrim hrim pawh Khan min hip bet tlat thei ang chu."
"Ve che hian,a duh chuanglo ang che, ngaihzawng anei ngailo."
"Chutia ngaihzawn nghal rum rum pawh ka tum hleinem. Ka belchiang duh a,eng ang chhungkua nge annih te pawh ka hre duh a,min hrilh lo anih chuan kitchen a lehkha i zir angai dawn ania"
Chutah "awle awle an harsa luttuk,pa annei tawh lo a,ka sawi awmzia chu amah hringtu a pa phei chu a naupanlai in a boral tawh a,a pahrawn in nikum khan a boralsan leh bawk,anu leh anau te pahnih nen an awm a, anu hian a ngaihsak vaklo bawk.Anu hi a tha vaklo a,inchhungkhur a ngaihsak lo,a fawr deuh reng ani mai, tichuan an dinhmun chu i hre tawh em?Hetiang vel hi a nu awmdan anih avang hian kohhranah te pawh han inhmang ve thin mahse mite hmuhsit an hlawh mai mai"
Ka rilru an khawih in ngaihtuahna ka neih thui phah khawp mai."A inkiltawih ve bawk thin ang chu,khawiah pawhnise" ka ti sup a.Ka unaunu chuan maktih hmel fe hian min en haw a,"engtik atang Khan nge inkiltawih tih tawngkam te chu ilo hriat ve tak a" min nuih ta chiam a.
"Tun mai atang khan " tih hmak pah hian ka tho a,ka chhuak ta daih a.Ka phone ka han en zet chu missed call leh message alo awm tuarh a.Ka bawihi lek ani. "Kan leng dawn em?" "Dawn lo mi? " "reply ta che" kalo theihnghilh daih alawm le.
"Ka insiam anga,ka rawn sawm phei ang che" ti let ve tawp.

Ka insiam ve nial nial a,ka chhuak ta a.Zankhua in Bawihi bulah chuan awm mahila Ka rilru ah erawh Emily chiah a awm thung a,amah ngaihtuahna chiahin ka khat anih ber mai chu.Ka hmangaih, ka tih dawn chuan ala hma mah mah in ka hre bawk si.Mahse thildang eng nge ni chuang ang le?

Nitin mai hian ka vei na tulh tulh a,ka nau Khan a number min pe a,whatsapp a hmang bawk a,nitin zantin amah chu be ngam silo hian a dp ka en tluk tluk a,a online khat hrep lehnghal.

A status erawh Pathian thu anih avangin ka en khat khawp mai.Hmalak dan tur pawh ka thiamlo a,bem pawp chi mihring chu niin ka hrelo.Zawi zawi a a rilru hneh angai niin ka hria.Ka tih hmasak ber tur chu amah biak a,kawm tlangnel ani.Ka nau hnenah chuan "inah lo lenpui la,kalo kawm ve ange" kati leh ta ringawt a.

Exam pawh kan tan ve ta a.Ka in enlawk nasa ve bawk a,thiamlo chu ka ni bik lemlo e.Exam chhung zawng chuan ka tan ve nasat em avangin Emily chu ka ngaihsak lo kher mai. Kalo theihnghilh vel thin zawk.Chutiang bawkin college lam a ka bawihi pawh.Mahse ani erawh hriat reng loh theih pawh anilo,kan class a inang miau a,hmuh reng fo ni hek. Exam chu kan zo ta a hnar a hlit phawi ang huai ani.Ka chawlh hmang ve chu lenchhuah nan hun ka hmang tam ber a,zanah nise inah ka awm tlem bawk.Ka chhungte hian min hau fo reng a,chhungte bulah pawh chaw ka kil khat hle a,a chhan chu chaw eikhawm kan huaihawt zing em ani.

Nikhat erawh chu chhunah hian inah ka tawm ve tehmial a,mahse roomah ani thung.Computer games khel hian keimah chohin kalo ri ve bur bur mai a,chutihlai tak chuan ka nau Khan min rawn ko thut!
"Nge? " a hmel pawh ka en lemlo.
"Inhnuaiah khuan a awm reng tawh ania"
"Tu chu?"
"Emily "
Chuveleh a hmel en chuan ka lehhawi nghal a." Ilo hruai maw?" Ka lawm kher mai.
"Hruai ang chu..min chah hek che" ti leh ta hluk mai.Ka game khelh lai chu ka dahfel sawk sawk a,phur fahran chuan inhnuai lam chu ka pan ta a.

Sitting room sofa ah chuan amah choh hian alo thu ngawi reng a,zamna tlem te chu ka nei ve chiang ani.Mahse in control ru reng pah hian ka zai phei vel a.A bulah ngei chuan thu ve In,t.v. te chu ka on ham ham a,melh zeuh pah hian "kawm tur pawh ilo nei nange? " a nui deuh sak a.
"A hrehawm chuang hleinem " a aw te chu a nalh kher asin." Lo thu rawh aw, coffee ka'n siam ange,i ngaina em?" Tih pah chuan ka tho leh a. "Ngaina luttuk" a rultawk te te a mi chhan a thiam phian mai.Coffee sa tha vet vawt in dun pah chuan kan titi zel a,an chenna hmun te kan inzawt chhuak ta hram lawm.Kan inkawm tui lai tak chuan Bawihi a rawn lang hlawl mai a.Hun lo thei teih teih ngei mai.
"Duat,zanin chu ka u ten chaw lo ei ula min tia,ka rawn sawm che"
"Um lo thu phawt teh. " a chhungte zawng zawng bulah hian chaw min eipui a tum emni aw? Kati rum rum.
"Emily, tikhan lo thu la,ka nau pawh a inbual zo tep ang,ka han insiam lawk ange"
"Awle,han insiam rawh"inchungah chuan ka chho nghal a.Ka chhuk leh erawh chuan Emily chu alo awm tawh lo a,bawihi bulah chuan "khawnge he ta nula kha?" Ka han ti a,bakhlak hian "a chhuak daih,nge ani pawh chu iva care ve"ka chhang peih tawh lo a.
"Mi in a chaw ei reng pawh hi a..mahni inah pawh a ei ve theih reng a" kati nuah nuah.Bawihi chu a sa teuh kher. "Zandangah pawh sawibuai ngai silo,engnge maw i hriat le? Nula i thutpui lai ka rawn man che a,i lungawilo nih kha"
"Ah haha..awm anglo thei emai" nia,ni e dikchiah.tunlai chu ka rilru ah hian i awmlo,i awm ngailo a,i awmlo lehzual. Chaw eikham rual chuan haw ka rawt ta tlat pek a,min melh ralh ralh hlawmin ka hria.Polite lo pawh min ti se, ka pawiti nek lo e.

A tuk class ah Bawihi chuan min chhuahchhal ta ngei mai a." Ka u te Khan i awmdan kha mak anti luttuk a,nangpawh iti mak ve hrim hrim, kha-"
"A tawk! I sawi hnem luttuk,min lo kalsan teh " thinrim hmel zet chuan min en tlawk tlawk a,a kal sawn ta hram a.Emily hi engtinge ka nunah ka seng luh anga,engtinge Bawihi hi ka thlahthlam theih ang tih ngaihtuah ringawt chuan ka buai ta fo mai.Chhuanlam tha tak awm silo a bialnute han then ringawt lah chu Pa lo ka tih bakah mi rilru tihnat ka duh bawk silo.Ka buai ve tawk hle ani.

Class ka bang hma bawk a tiin Emily te vengah chuan ka tlang nghal a,an in pawh harsa tak chuan ka zawng chhuak ta hram a.In tha vak chu anilo,alo reh thiap lehnghal a.Kawngka chu ka han kik karh karh a,a reh kher mai.Vawi engemawzat ka kik hnuah a ri rak rak a,Emily ngei mai chuan min rawn hawnsak ta a.Ka hmel a hmu chu mak atih hmel kher asin.Min hmuh rual rual khan a mengphawk nghal a,a hmelah chuan zamna ka hmu ani.
"Luh i phal vak nange?"

Chuveleh a tawlh hrut a, a lai chhe kher asin. "Ka tihpalh luttuk,lo lut rawh hawh" tiin kan inzui lut ta a.Inchhung lampang chu rinai tak chuan an tinuam a,a fai tha viau bawk.

"Khawnge i chhungte an awm?" Melh pawh min melh ngam hauhlo.
"Ka nu chu a thiante inah a kal a,ka naute chu school an la bang lo anih hi. Class i kallo mi? "
"Kal e, ka bang hma deuh a rawn hmuh che ka chak a ka rawn kalkawi mai mai anih hi" a nui leh ringawt a."Iva ti lawmawm ve,thingpui kan lum ange aw "
"Aih, a ngailo, tui a awm chuan a tawk mai" tui chu rang zet hian a rawn chhawp a,chutihlai vel chuan a nu chu a rawn lut ve ta chiah.Kalo awm ve chu a lawm hmel vak loh. Eng dang mah sawilo hian roomah a lut tlang nghal a,ka awm chhung khan alo chhuah leh pawh ka hrelo.Reivaklo ka thut leh hnu chuan ka haw ta a.

Zanah chuan chhuaklo in roomah ka tawm leh a,games khel a ka buai em em lai chuan ka nauvi leh bawk chuan hlauhthawn hmel zet hian "mama,vawiin i class ban hnuah Emily nen in inhmu emni?"
"Hmu e,engnge a?"
"An inah chuan eng ti turin nge ilo va kal reng reng a?"
"Kal ve mai mai"
"Anu in I haw hnu Khan alo hlap hrep anih chu mawle, mama,nangmah vang vek ania aw "
"Engtin a?" Ka thutna atang chuan ka tho chhuak zawt a."engvangin maw a hlap a?"
"Mipa ilo tawmpui atia, a hlap hrep a,chaw ei pawh a phallo,he thu hi nangmah chu hrilh lo tur che in min tia,mahse kal tawhlo turin chhuanlam tha tawk I neih phah dawn si a"
Ka nau chu chhan ngaihna pawh ka hre tawh lo.Ka ngaihtuahna chu a kal thui kher asin. Ka khawngaih luttuk tlat bawk.Phone hmanga ngaihdam dil chu ka han tum deuh thut thut a,mahse hrelo anga ka awm kha a pawimawh zawk bawk si avangin ka thulh leh ta a.Anmahni inchhung ngeiah pawh ka hmuh theih dawn siloh chuan engtin nge maw ka tih tak ang le?

Emily chu khatia a nu in keimah vang a atih hnu kha chuan hmuhtur a vang sawt a,whatsapp ah lah ka en apiang hian a online ngai bawk silo,keimah zawk chu ka awm thiamlo tak meuh.Lehlamah lah Bawihi chu ka ngaihsak ta lo luttuk a,alo lungawi lo ve em em zel bawk si.Vala hi ka thluak a buai zo vek tawh anih ber hi.Zankhat erawh chu ka insumthei tawh nganglo a ka va call ta ringawt.Min lo la hrelo zui ah! Ka insawichawp nawk nawk hnu chuan "ani maw" ati maia, min biak chu a chak vak hmelloh khawp mai.A vawikhatna ani bawk a tiin zah ka ngai a ka be rei hranlo.Chumi hnu atang chuan whatsapp atang te pawhin kan inbe chho zel a,a hma ai chuan min biak danah pawh min nel ve zel niin ka hria.Ka tan pawh a hahdamthlak chho zel.Mahse hmangaihna lampang erawh sawipui theih ala ni dawn lo tih ka hre lawk vek a.Min be ve duh hrim hrim pawh chu ka tan chuan a hlu tawk hrih viau ani.Kan inah te pawh a rawn chuangkai leh tan tawh a,a hmel pawh hmuh a nuam leh tawh viau mai.Min nel sawt viau chu ka ti tak na in tleirawl harh leh tawngduh tak anih loh avangin an thian dangte ang chuan min la ti ve bawrh bawrh ngam chuanglo.Ka duhzawng tak ani zawk.
"Em,naktuk chu bazaar ah min kalpui lawk la,class ban veleh um?"
"Awle,kan dam phawt chuan aw " ka lawm kher mai.A tuk class room ah pawh ka mutthlu miahlo.

Bazaar lam pan chuan kan inzui dun ta ngei a,a chhelo reuh bawk a mi reng reng chuan an en zui duh bikin ka hria.Kalo thik lek lek thin a,mahse a dik thei chiah bawk silo.Dawr hrang hrangah kan lut kual hnem kher mai.Restaurant ah te ka luhpui a,a nui ve har har reng chuan min tihlim a,ka bula awm chu hrehawm ati lo tih ka hre thei.MC chhungah phei chuan ka fiam nasa luttuk a,min chum leh awk thin a,mahse a na hauh silo.MC ah chuan kawr pakhat leh pheikhawk kan lei a,thil leisak ka tum chu alo duhlo bur mai a,ka tum lui duh ta biklo a.Chumi hnu chuan bazaar chhungah kan lut leh a,chutah erawh ka che chhe khawp mai.Bawihi dawr nghak bang tur nen Chiang luttuk in kan intawk chawt a! Keini pahnih lah kha kan lo inkai zui bawk si a.Chuveleh Emily Khan ka sas tih alo la hre ve ani ngei ang,ka kut chu rang fahran hian a thlah a,tlan mai a tum chu rang luttuk in a kutah chuan ka man leh a,bawihi chu a sat hmel kher.

Tun tum chu ka kalbo tir tawh lo ang.Emily chu ka theihnghilh tawh emaw ka ti a,a hmel ka hmuh rualin ka nunphung a danglam zo leh vek chu ani si a.
Zodin a ka zawn chiam hnuah chawlhkar khat chu alo ral leh ta reng mai.Hna lamah te ka buai theih em avangin ani chu kalo ngaihsak hman leh tawh lo a.Nikhat erawh chu ka awl bawk a tiin a phone number min pek kha hmetchhuakin ka call ta ringawt a.
"Hello " ka thinphu chu a rang kher mai.
"Emily "
"Emily a chhuak lawk a,a thiannu zawk ka nia tunge inih?"
"Oh!sorry! A thianpa ka nia,in awmna kha chiang deuhin min hrilh thei angem?"
"Thei tehreng mai" tichuan an address min hrilh chu ka chhinchhiah ta ran ran a.Ka nau hnenah chuan phur zet hian "Emily ka hmuchhuak tawh asin " ani pawh chu a hmelah chuan phurna tamtak a awm tih ka hria.
"Zanin hian a inluah ah len ka tum a"
"Nimaw,min hruai ve ang che"
Khua a thim tan tih chuan ka nau hruai chuan Emily te inluah lam chu kan pan ta a.An awmna hmun kan thleng chu a bo thlak khawp mai,mi inhnuai kawm zet leh tha vaklo ah hian a thiante hmeichhe pahnih nen in an lo inluah tawm chu niin.Inchhung kan lut,Emily'n kan unau hmel a han hmu thut chu a lai chhe vek a,ka nau chuan a be nghal bawrh bawrh thung a,tlem chuan a zia ta deuh.
"Umam,Bawihi,tinge inlo kal duh a,keini awmna te chu lenluh na tlak pawh anih loh hi" a kun deuh ngal bawk a.Kei chuan "I chenna hmu turin kan lo kal hleinem.Nangmah hmu turin alawm kan lo kal" ka mitah pawh min en ngamlo,a mittui chu a far kauh a,ka nau chuan alo hnem vat bawk.

Engpawhnise kan hawsan leh ta phawt chu ania.In kan thlen hnuah ka nau chuan "Ka van lainat tak e aw. .A nu nunrawn vang vek ani" ati hluk hluk a.Ka nau hi chuan a thiannu kha tha taka la awm turah a dah a,call girl niin mipa chi hrang hrang a kawp thin tih hre ve ta se a ngaihdan hi a thlak angem?Kei chuan hrilh kher pawh ka tumlo.Mahse mite hi an lo tawng duh viau mai a,mi diklohna,famkim tawkloh na laite hi sawinuam an lo ti viau mai niin.Ka nau pawh chuan a hriat mai ka rinloh nen nikhat a class bang chu lungawi lo zet hian ka bulah a rawn kal a,
"Emily chanchin hi hriatloh tamtak inei ania umam"
"Engnge ni ta?"
"Vawiinah ka thiante nen a chanchin kan sawi a,kan thianpa pakhatin Emily chu alo hrechiang khawp mai.Addict anih bakah call girl ala ni tel zui ani awm e.Mi awmtha duh lo tak ani tawh! Chuvangin nangpawh i kal thui leh hma hian thlah tum rawh.Hetiang mihring buaipui hi i inhmeh tawhlo.

Kei chu ka nui mai a,"alo nimaw, tunge i thianpa chu?rawn hruai la,ka lo kawm 've ang aw? "

Nihnih ral hnuah ka nau chuan a thianpa chu a rawn hruai haw ta ngei a.A hmel leh a hawiher atang chuan chapo lam rawng a kai deuh lehnghal. Ka thutchilh sauh sauh a."Tunge i hming?" Mi pawh en lemlo chuan "Ramdika"
"Ramdik,midang chanchin chhe lai mi bula inti hre deuh a sawi vel hi i nuam tih zawng ani em?" Chuveleh min en haw a,ka nau pawh chu alo awm ve reng bawk.

"Engnge i sawi awmzia? "
"A awmzia chu maw,Emily chanchin kha he Khawvel ah hian i hre ber pawh ani maithei a,mahse midang bula ilo puanzar vak khan hlawkna ineilo tih hre rawh aw. Mipa chu ngawih mai mai tur,keini pawhin kan hre ve tho a mahse a remna lai apiangah kan sawi chhuak zung zung biklo tih hria la,i ka kha ilo chip hle hle tawh dawn nia." Chutia ka han tih takah chuan a inthiamlo hle a,ngaihdam te min dil in a haw ta nal nal a.Ka nau chuan mak tih hmel zet hian min en reng ringawt a.

Ka hre laklawh a,Emily hmu tur bawk chuan a inluahah chu ka pan ta fo mai a.A thiante nen pawh chuan kan innel ve phian tawh nghe nghe.

Zankhat erawh chu amah choh hian alo awm a,thil han sawi vel nan a remchang khawp ang tiin ka lawm ru hle.A bulah chiah chuan thu in a kut chu ka la a,laksawn leh mai a tum chu ka kuah thlawp a,a hmui khur dar dar ah chuan lungchim takin ka fawp ta vawng vawng a.
"Umam,hetiang chu ka duhlo,ka phulo che,min awmtir mai mai rawh"
"Teuhlo,nupui atan ka nei ang che aw, i duh em?"

Engmah sawilo in kan inkarah chuan kan kut phelh tur kher in a rawn kaltlang a,a kal ta vang vang a,Emily hmel ka'n en chuan inthiamlohna hlir hian a khat tih ka hria.
"Engahmah ngai suh aw. Zanah chuan min rawn be tha lehnghal maiang."
"A nuamlo khawp mai,bialnu inei tih chu ka hre tho a,kalpui miahlo tur che hi ka nia
"Chutiang sawi angailo, Kalo paw dawn che emni?" Ka'n tih zawm zat a.Chuveleh rawn hawi chhuakin ka hnungah min beng leh pawp a.A hmai a sen tan tan mai bawk a. "Iti awm anglo luttuk.Kal ang." Ka nui hak hak a.An in thleng a thlah chu ka'n tum zet a mahse a chunnu kha ka awmloh hunah alo hrang leh vak ang tih ka hlauhpui leh deuh a,taxi ka kohsak a,ka thlir liam ta zawk a.

Inchhung ka lut chu ka nau chuan min lo en duh hlemai a."Nge min en reng?"
"I hmel kha"
"Nge?diklo awm mi?" Ka intuai nghal vut vut. Ani lah chu alo nui tak iarh iarh a."Ivan ho tak.I hmel hlim tih hriat deuh hi i class ban tirh ah phei chuan hmuh tur a awm ngailo,mahse vawiin chu danglam khawp mai" ati ta khauh a.
"Hlim hi tha" kati hul huk a,ka kalsawn daih a.Engmah lah hi I hre ve silo ah tih melh hian ka nau chu ka melh zui hram a.
"Naktuk chu lo leng la,thilpek tur che ka nei ania"
"Kalo tum ang" ka bazaar pui hrep a,engmah lah chu a duh bawk silo.Pe tawp ila a duh zawk ang tiin t-shirt, a inhmeh tur a ka rin deuh mai hi ka leisak a,ka tuam thlap bawk a,ka nau hnenah ka dah a,keima pek chu a duh ka rinloh bakah alo kal laiin ka awm hman dawn lo hrim hrim bawk.

A tukah chuan nilengin ka thianpa damlo buaipuiin hospital ah ka awm a,in ka thlen meuh chuan khua a thim chhalh tawh a.In ka thlen rual rual chuan ka nau chu chanchin ka zawt nghal a."A lawm luttuk,en pawh a phallo,a ak a,a haw nghal daih "atih chuan ka nuih te pawh a za zawk a.A hak ngam chuan ala ha ve chek anga,ka hmu Chak tawh kher mai.Ka'n online chiah chu a whatsapp alo thleng nghal a."Ka lawm e.A nalh luttuk tawp! Engnge ka pek ve ang che" ka nui sak. "Thil beiseiin ka pe hleinem che.I duh tak tak a I lawm chuan naktukah lo ha la,chu chiah chu ka beisei" "A harsa lo ang"

A tukah chuan alo kal beiseiin Sitting room ah ka thu chhuak a,mahse an class ban hun awm velah chuan mami chiah chu alo lut ta si a,"ehee!! Khawnge Emily?"
"Alo kallo a,a chhan pawh ka hre biklo" ka ngaih thalo chuan ka call nghal a,a pick miahlo.Darkar chanve hnuah ka call leh a,pick ve ta hlauh.
"Nichin kha chuan ka nu a awm 've reng a,ka pick ngamlo a haha"atia a aw pawh chu ala dik zanlo.
"Ilo kal dawn emaw ka tia,kalo nghak ve char char che a"
A thaw halh."Nia, ka damlo ve ringawt pek alwm mawle.Ka tihpalh luttuk"
"Aw. .van zialo thin.Lo dam thuai thuai teh. Naktukah i thiannu kalo kantir ang che aw.Ei chak te inei em?"
"Aih neilo,angailo, a ho luttuk, dam veleh maiang "

A dam chung pawhin ka ngaihtuah tehreng nen a damlo phei chu ngaihtuah tak ka ni ringawt mai.
A tukah chuan mami chu in a kan thei (fruit) kawl ang ang chu ken tirin Emily te in a kal nghal tur chuan ka chah a.Theihse chuan keimah ngei hi kal tur ka ni mawle.

Nilengin class ah pawh ka rilru ka pe theilo a,in a haw chiah ka ngaihtuah tawh.Chumi lai karah Bawihi lah chuan lenchhuah dan tur ringawt alo rel ve bawk.Hmeichhia leh ka sas chu nilo se ka lock bur duh tawh ang.Vanneihthlak zetin class chu kan zo ta.Rang zetin ka putchhuak a,in ka thlen chuan mami pawh alo haw tawh a,alo la inbual zui.Bathroom hmaah ka ding a,ka tur chhen a,a ning kher mai.A inbual te chu chatuan nimai hian ka hria,rei ka ti luttuk.

A inbual zo tih ka hriat rual rualin a roomah ka tlanlut a,ava lenna chanchin chu hriat ka chak tawh em atin ni."Engmah ka hrilhlo tawp maitur che asin,hneawm cheng chung luttuk mai" alo ti nghal hlak hlak.
"Engnge alo an a?alo dam deuh tawh em?"
"Huiz! Chutiang engmah a awmlo. A dam luttuk, a damlo reng renglo!!?"
"Enga?!"
"Lo ngawi la,(min tihder chu ka rilru alo na hman phiangsen )
"Min lo tihder reng ani maw?eng ang mi ah nge maw min ngaih chu le?"
"A tihder lo che..nuam itih loh hlauh vangin a thup mawi mai zawk alawm. (Engnge awmzia kalo ti leh a)

"I thawmhnaw pek kha a nu in a ha chhin lai vel alo hmu a,tlangval pek ah ngaiin a dawp ngat ngAt a,ani lah chuan a sawi duh silo a,kutthlak nge a duh thawmhnaw chu a kut a pek ti te in a vau a,mahse kutthlak chu a thlang ta zawk a,a sawisa hrep a,kawr pawh chu a laksak ta tho a,nang lah Khan a tuk a rawn ha turin ilo ti ve bawk nen hak tur a nei tawh silo a a rilru hah tihngaihna hrelo in a damlo der tawp ani awm a.I hmel hmuh pawh a hreh tawh khawp mai."Chutiang thu ka hriat rual chuan ka sa nghal pup a,ka khawngaih em em tho bawk.Tun tum chu a nu hian ati mah mah tawh ani.Ka nau room atang chuan ngawi reng in ka chhuak a,ka ngaihtuahna a kal ding kher mai.

Mut hmunah pawh tihdan tur chu ka ngaihtuah ta ngat ngAt a,tha ber tur a ka hriat chu ka nemnghet a ka muhil ta siai siai a.Chumi tukah chuan class pawh kallo in Emily te in chu ka pan ding ngar ngar a,an in ka thleng,inchhung ka lut thut chu Emily chu thidang mai tur hmel hi alo pu a,ka duhdan ang ngeiin a nu pawh alo awm e.Emily chuan biak pawh min lo be ngamlo hrim hrim a.A nu zawk chuan vin lek lek hian "engnge I duh?tunge inih a?" Alo ti hluk a.Kei erawh chuan zaidam tak hian "lo thu ve phawt la; thil engemaw ilo sawi dun lawk ang hmiang"tih pahin ka thu nghal a.An nufa chuan mak min tih hmel kher.
"Eng chu maw i sawi duh? Hun ka nei vaklo ania"Ka han khuh deuh kharh phawt a.
"Kapi,thil ngen duh che ka nei a" a hmel chu zawhna hlir a a khah sa avangin ka tawng chhunzawm zel a.
"I fanu hi ania ka ngen duh che! (Emily chu alo ding zum zat a,mak tihna hlirin a khat ve bAwk )ka hmangaih a,ka duh tAkzet bawk,a tello a awm hi har ka ti hle bawk a,mahse hetiang thu hi amah pawh ka la hrilh chuang lo .Ka duh luat ah thilpek te pawh ka rawn pek kha.Khawngaihin keimah vang hian lo hau lo la,ka hmangaihna hi min pawmsak la,nupui atan pawh ka duh ani tih hi min pawmsak hram rawh.khawngaih takin keimah vang hian lo hau tawh lo hram rawh.Amah hi i pawm theihloh hunah pawh kei chuan ka pawm reng dawn ani tih hi ka sawi tel duh bawk a" chiang set hian an nufa chuan min lo en reng a.

Rei zet kan ngawih tlan hnuah nu ber chuan "ka fanu ania,ka enkawl dan tur chu ka duhdan ani.Hrim hrim in naupang mai ala ni a,ngaihzawng neih pawh ka la phal heklo.Hmangaihna hian eng thil tha mah a hringchhuak ngailo tih hi hre ve se ka duh ani.Chuvangin tlangval,rawn beisei duh tawh suh.A nu ang hian hmangaihna vangin humsual dailo se ka duh ani"
"Ee kapi,,i hresual ani.Hmangaihna hi hman dik anih chuan i sawi ang kha a awmlo reng reng,ka-"
"A tawk! Engmah ngaihthlak ka duh tawh lo,tun atang chuan ka fanu hi a hmel pawh I hmu tawh lo ang tih ka tiam e,kal rawh! Min kalsan rawh!" Zawm loh chi ni tlatlo.Ka chhuah hma in Emily chu ka melh zawk a,a mittui alo tling piau mai a,ka va han lainat tak em! I mittui hru hul tur a I kianga awm a pawm vawng vawng che ka duh mang e.zangkhua hi ala bungbu ve chek ang.

Khami zan zet kha chu ka muhil theilo chiang kher mai.Emily ka text lahin a open thei miahlo lehnghal a.Ka rilru na leh hah luttuk thinrim bawk si chu zanrei pawh sawilo in ka inkhalh chhuak a,bar ah ka teilut ve tawp a.Ka zawh tawk bak a tam zu chu ka in ta ngheng mai a.Hmeichhe dangte pawh kalo ngaizawng tawh thin,mahse hetiang em em hian ka la na ngailo asin le.An chhungte pawhin min duh thei em em a,mahse keimah zawk hian kan inkar ka ti tawp zawk zel anih kha.Tunah hmeichhe pakhat ka tawng leh a,ka ngaihzawng pawh ala ni maplo, mahse Ka hmangaih ta bur mai si.Min duhlo tu ber ka hmangaih a,ka thlah thei silo te,a hmel hmulo a ka awm thei ta miahlo mai te hi ka hun kal tawh a ka tihsual rah ka seng emni?Eng chu nge maw ka tihsual em em le aw?

Zing ka harh chuan bar dawhkan bawk hian kalo muhil chu niin.Ka harh tih an hriat rualin a nghaktute chuan "nizan kha I rilru Nat hmel luttuk a,kan kaitho duhlo che a"anti a min nuih var var hlawm a.Ka zak ve det! Bill ka pe a,ka chhuak nal nal.Inchhung ka lut chu ka chhungte chuan min lo ngaihtuah kher.A bikin ka farnu,ka room thlengin min umzui a "nizanah khawnge I awm?phone pick duh bawk silo
"I ninawm! Ka lu hi a na luttuk , ka'n muhil phawt"

"He thu hi i hriat chuan i muhil thei chuanglo ang" chuveleh ka beng ka tun nghal hru a."eng thu" "Emily kha a nu in a hnawtchhuak a,a chhan chu min hrilh duh miahlo" ka mu lai chu ka tho zawt a. "Engtik ah " "Nizan Khan,kal mai na tur pawh a hrelo a,kan in a lo kal turin ka tia,mahse a duhlo bur bawk si a,engtinge a awm pawh ka hre tawh lo" "Keimah vang ani ngei ngei ang" chutia ka tih veleh chuan ka nau chu a danglam nghal a. "Eng thil pawi nge I itih leh tak a?" Min zawh sek avang chuan ka ning lutuk a,an in a ka kal dan leh kan thusawi zawng zawng te kha ka hrilh ta vek a."Awi leh! Nangmah vang anih chiah chu.Han call nghal teh. Kan bulah kan awmtir ngei ngei tur ani.A duhloh pawhin hruai luih kan tum dawn ania." Ka nau thuawih chuan ka call nghal a.A pick hlauh mai.A awmna ka zawh pawh chuan a sawi tha duh phian.Rang zetin kan unau chuan kan inkhalh chhuak a,a awmna ni a a sawina hmun; kan va thlen chuan kan hawikual ngial a, a awm bawk silo.Ka call leh a,"aw khawnge i awm a?hei kan lo thleng tawh a" "Lo kal duh su,kei chu ngaihsak tlak pawh ka awmlo,tihian ka awm awm in min awmtir ula,ka thihna hmun hmunah ka thi maiang" "Chutiang sawilo khan i awmna chu sawichiang mai rawh Emily " a off hmak.Call leh ka tum nghal vat a.Mahse a switch off ta daih a,ka thinrim kher mai.Phone ber a off tak si ah chuan tihngaihna a vang tawh em a rilru kimlo zet chuan kan haw san ta ani.Ka thinrim luttuk chuan mu leh mal pawh ka nei theilo a,chumi ni vek chuan a nu be turin an in chu ka pan leh ta tawp mai.Mahse alo inkalh thiap a.Emily pawh nileng deuhthaw in call ka tum a,mahse switched off a inti zel bawk si.A chang leh keimah chu ka inthiamlo a,a nu kha lo va hmu kher kher lo ila chuan hetiang hian kan buai hrep lo tur hi ani sia.Emily, ka tih dikloh vek ani i tawrh hi.Min ngaidam mawlh mawlh ang che.

NIKHAT CHAUH! ll

Hun te liam zelin kum 3 lai chu alo ral veleh ta reng mai.Ka zirna te pawh tluang takin ka zo fel a,training pawh shillong ah kum khat chhung ka zu bei ve a,Pathian zarah ka hlawhtling ve hram.Ka hna hmasa ber chhunzawm turin Mizoram chu kalo chuang chhuak leh a,alo danglam tawh hle in ka hria.Kum khat choh awm bo mahila mi ram a awm a kum khat tal tawp han hmuhloh chuan danglam ve thei tak ani.Ka chhungte chuan min lo ngai der ve hle a,ka Bawihi pawhin min ngai ve tho mai,mahse ka ngai ve em?tih chu ka chianglo.

Ka haw tih a hriat ni chuan a rawn leng ve nghal a,tlai lama chaw ei chhuak turin min rawn beisei leh tawh anih ber chu.Ka insiam a,tlaiah chuan kan chhuak dun leh ta phawt a."Duat, tinge ilo haw ngai miahloh a?"
"Sum a hautak mai mai alawm.Mahse hei kalo haw tawh hi..tha mai em?" A nui suk a.Dinner tuihnai tak kan ei zawh hnu chuan bar ah kalin tlem chu kan han lem dun leh sak a.An in a Min hruai chu a tum viau na in ka hnial ta tlat a,ka thlah a,ka haw san ta zawk a.Ka thlen tuk atang chuan ka hna ka zawm nghal avangin ka buai nghal char char ani ber mai.Inah pawh ka haw har theiin ka awm tlem khawp mai.

Zankhat office atanga ka haw tur chu ka bike a nuar ta tlat mai a,motor hman mai tur awm silo,ka thianpa two wheeler ah chuan ka bet haw ve ta ringawt a.Zodin kan thlen lai chuan streetlight in a chhun phak eng ah hian mipa leh hmeichhia, ngaihtuahawm hmel tak tak hi a an lo ther fir fer mai a,ngaihtuahna an ti kal thui thei khawp mai.Khatiang zanrei lamah an chhungte phalna la hmasa thlap a kal chhuak chu anni hauhlo ang le.Ka thianpa chuan ka ngaihtuahna hria niawm tak hian "An veiawm teh asin heng ho hi,an chhungte hian engtin tak enkawl ang maw?" A rawn ti zauh a.Chhan ngaihna reng reng ka hrelo.
"Nakzanah pawh in chhawm haw leh ila a tha ang,a hma aia chiangin ka enfiah hlawm chak tlat" ka thianpa chu a nui hak hak a.
"Tehreng mai"
In ka thlen meuh chuan zan a rei tawwh khawp mai.Ka pa chauh alo la meng a."Pa,lo mu rawh,ka'n inbual leh phawt teh ang"
"Umm ka mut pawh a chhuak em em lo" inbual turin ka luhsan a,inbual laite chuan ka rilru ah zodin square vel a thalai tlim hmur ho ringawt kha an awm lehpek a.Nakzanah a rem phawt chuan pakhat tal ka titipui tur ani tih ngaihdan chu ka nei leh ta bur mai a.

A tuk zanah pawh chuan sawi lawk tawh ngeiin ka thianpa ke pahnih ah bawk chuan ka bet leh ta a.Keimah a phur ruk riau na awm chu tihhlawhtlin ngei ka tum ani.Zodin kan thlen chuan kan ding ta reng a.Hemi zan hi chuan a hma zan ai Khan an lo tlem deuh a,mipa 2 leh hmeichhia 3 vel chiah hi an lo thukhawm a,anmahni chu pan hnaiin pakhat chu biak tum hian a darah ka'n vuan a,min rawn en rang kher mai.Chuveleh kei chu rang luttuk hian ka hnungtawlh dawrh a.Ka lungphu chu a danglam vek a,ka tha chu a khur nasa em em bawk.Chu tleirawl erawh chuan min enzui ngam lo in lehlam a hawi leh ta daih a.Ani hi Emily, hman a ka thinlung neitu Emily, tunah pawh ka thinlung ah a thi tawh emaw ka tih mahse la riak reng Emily, ka Emily ngei kha ani.Ka chiang ani.Khawvel mihringte hmel hi lo danglam ta thut pawhnise ani hi chu ka hrereng ang.Ka pan tha leh ngat a,a dar pahnih ah chuan vuanin ka kaitho ta a.A hmel chu Chiang zetin ka en vawng vawng a."Emily, ilo dam maw?" Ka kuah thlawp a,midang chu an awm ve tih pawh ka hre chang tawh lo hrim hrim.

Ka kuahna ata talchhuah tum chuan a tal fat fat a."Min kalsan rawh.Hriatzui tlak ka ni tawh lo,hman a Emily i hriat thin kha ka ni tawh lo,kalbo rawh "
"Ka tan nanglo chu Emily an awmlo,i laka ka rilru put dan hi ala danglam hleinem "
"Chupawhnise min kalsan phawt teh,midang an tam si. Ka number ka pe zawk ang che"tiin a phone number chu min pe ta a.

Harsa ti tak chung chuan ka kalsan ta a.Ka thianpa chuan maktih hmel fe hian a chanchin chu kawngtluanin min zawt a,keipawhin ka hrilh ta vek a.A lainat ta phian zawk a.

Chumi tuk atamg chuan ka bike a that tawh avangin keimahin ka haw ta ziah a.Mahse zodin ah chuan ka ding hram a,Emily ka zawng leh chiam thin.Mahse a pilbo leh hmak tawh.Ani hi ka hmuh leh a hlau anga,a kalbo leh dawn emni?

Tun tum chu ka kalbo tir tawh lo ang.Emily chu ka theihnghilh tawh emaw ka ti a,a hmel ka hmuh rualin ka nunphung a danglam zo leh vek chu ani si a.
Zodin a ka zawn chiam hnuah chawlhkar khat chu alo ral leh ta reng mai.Hna lamah te ka buai theih em avangin ani chu kalo ngaihsak hman leh tawh lo a.Nikhat erawh chu ka awl bawk a tiin a phone number min pek kha hmetchhuakin ka call ta ringawt a.
"Hello " ka thinphu chu a rang kher mai.
"Emily "
"Emily a chhuak lawk a,a thiannu zawk ka nia tunge inih?"
"Oh!sorry! A thianpa ka nia,in awmna kha chiang deuhin min hrilh thei angem?"
"Thei tehreng mai" tichuan an address min hrilh chu ka chhinchhiah ta ran ran a.Ka nau hnenah chuan phur zet hian "Emily ka hmuchhuak tawh asin " ani pawh chu a hmelah chuan phurna tamtak a awm tih ka hria.
"Zanin hian a inluah ah len ka tum a"
"Nimaw,min hruai ve ang che"
Khua a thim tan tih chuan ka nau hruai chuan Emily te inluah lam chu kan pan ta a.An awmna hmun kan thleng chu a bo thlak khawp mai,mi inhnuai kawm zet leh tha vaklo ah hian a thiante hmeichhe pahnih nen in an lo inluah tawm chu niin.Inchhung kan lut,Emily'n kan unau hmel a han hmu thut chu a lai chhe vek a,ka nau chuan a be nghal bawrh bawrh thung a,tlem chuan a zia ta deuh.
"Umam,Bawihi,tinge inlo kal duh a,keini awmna te chu lenluh na tlak pawh anih loh hi" a kun deuh ngal bawk a.Kei chuan "I chenna hmu turin kan lo kal hleinem.Nangmah hmu turin alawm kan lo kal" ka mitah pawh min en ngamlo,a mittui chu a far kauh a,ka nau chuan alo hnem vat bawk.

Engpawhnise kan hawsan leh ta phawt chu ania.In kan thlen hnuah ka nau chuan "Ka van lainat tak e aw. .A nu nunrawn vang vek ani" ati hluk hluk a.Ka nau hi chuan a thiannu kha tha taka la awm turah a dah a,call girl niin mipa chi hrang hrang a kawp thin tih hre ve ta se a ngaihdan hi a thlak angem?Kei chuan hrilh kher pawh ka tumlo.Mahse mite hi an lo tawng duh viau mai a,mi diklohna,famkim tawkloh na laite hi sawinuam an lo ti viau mai niin.Ka nau pawh chuan a hriat mai ka rinloh nen nikhat a class bang chu lungawi lo zet hian ka bulah a rawn kal a,
"Emily chanchin hi hriatloh tamtak inei ania umam"
"Engnge ni ta?"
"Vawiinah ka thiante nen a chanchin kan sawi a,kan thianpa pakhatin Emily chu alo hrechiang khawp mai.Addict anih bakah call girl ala ni tel zui ani awm e.Mi awmtha duh lo tak ani tawh! Chuvangin nangpawh i kal thui leh hma hian thlah tum rawh.Hetiang mihring buaipui hi i inhmeh tawhlo.

Kei chu ka nui mai a,"alo nimaw, tunge i thianpa chu?rawn hruai la,ka lo kawm 've ang aw? "

Nihnih ral hnuah ka nau chuan a thianpa chu a rawn hruai haw ta ngei a.A hmel leh a hawiher atang chuan chapo lam rawng a kai deuh lehnghal. Ka thutchilh sauh sauh a."Tunge i hming?" Mi pawh en lemlo chuan "Ramdika"
"Ramdik,midang chanchin chhe lai mi bula inti hre deuh a sawi vel hi i nuam tih zawng ani em?" Chuveleh min en haw a,ka nau pawh chu alo awm ve reng bawk.

"Engnge i sawi awmzia? "
"A awmzia chu maw,Emily chanchin kha he Khawvel ah hian i hre ber pawh ani maithei a,mahse midang bula ilo puanzar vak khan hlawkna ineilo tih hre rawh aw. Mipa chu ngawih mai mai tur,keini pawhin kan hre ve tho a mahse a remna lai apiangah kan sawi chhuak zung zung biklo tih hria la,i ka kha ilo chip hle hle tawh dawn nia." Chutia ka han tih takah chuan a inthiamlo hle a,ngaihdam te min dil in a haw ta nal nal a.Ka nau chuan mak tih hmel zet hian min en reng ringawt a.

Ka hre laklawh a,Emily hmu tur bawk chuan a inluahah chu ka pan ta fo mai a.A thiante nen pawh chuan kan innel ve phian tawh nghe nghe.

Zankhat erawh chu amah choh hian alo awm a,thil han sawi vel nan a remchang khawp ang tiin ka lawm ru hle.A bulah chiah chuan thu in a kut chu ka la a,laksawn leh mai a tum chu ka kuah thlawp a,a hmui khur dar dar ah chuan lungchim takin ka fawp ta vawng vawng a.
"Umam,hetiang chu ka duhlo,ka phulo che,min awmtir mai mai rawh"
"Teuhlo,nupui atan ka nei ang che aw, i duh em?"

"Nilo, ka phulo che ka tih kha,mi tenawm mai ka ni tawh. Diktak chuan hman atang khan nang hi chu ka phulo che tih ka hriaa,mahse ka ngainat em che avangin kalo hnaih leh mai thin zawk che a,ka tihpalh liau liau ani"
"Tun atang chuan keimah hian ka enkawl tawh che anga,mi pangngai diktak nilo a I inhriatna te pawh kha a bo vek tawh dawn asin.Thlamuang tak leh hlim takin ka siam ang che.Min ring turin ka duh che ani.Min ring ngam ang tiraw?"
A lu buk nghat pah chuan "Khawvel ah hian ka mi rin ber chu nang hi inia,keimah ka inrin aia nasa hian ka ring che asin"
"Anih chuan heng i thiltih tawh thalo tak tak te sim tur hian nangmah I inring tawk em?"
"Ka tum ve alwm, sim tluk a duh hi ka nei biklo,sim vang vang hi ka duh ani" a sawi zawh hma hma in a tap ta a.A mittui lo luang te chu kalo hrukhul sak a.Ka pawm leh ta vawng vawng a," ka hmangaih che.I sim thei em em ang,hun pawh i mamawh dawn tih ka hria alwm.Ka nghak ang che"
"Nikhat chauh! (Ka rilru chuan reilo ka ti lulai kher!! Mahse ka sawibuai sak duh silo) chu choh chu hun min pe rawh, ka tum ang,keipawh hian ka hmangaih na che hi a rei ve tawh tho asin"
"Um..nikhat chhung chuan i sim ang tih i ring anih chuan ka nghak ang che."

In ka thleng chu ka zangkhai vah mai.Ka chhungte pawh an lo la meng thap a.Thil sawi nan a remchang khawp dawn in ka hria.
"Nu,pa,thil dil che u ka duh ani" muangchang a min en pah hian ka pa chuan "Han sawi la"
"Englo ania" ti a bul tanin Emily ka hmangaih dan te leh a chanchin engkim chu hmaih nei maplo in ka hrilh ta vek a.Ka sawi zawh chuan ngaihthat loh khawp hian an ngawi ta vek a.Min chhang tawh dawn lo emaw ka tih hnuah ka nu zawk chuan "mama,ava lainatawm tak ve mawle, (kalo phur hurh hman )mahse chutiang mi mo atan a kan neih chuan miten engtin nge min sawizui ang tih hi ka ngaihtuah ani.Awmpui satliah anga lakluh i duh te anih loh chuan ava tihchi awmloh emm " ka pa chuan muang ban charh hian a rawn tuihnih ve nghal a.
"Tha taka enkawl chi chu ani nameuh mai,amaherawh chu he inchhung mo ni tur chuan a theihloh bur tih kha hria la,hrim hrim ah ka tute hring tu atan chuan ka pawm theilo hulhual.Damchhung a inchhirna tur thil chu min tihtir tumlo teh. Inu ngaihdan ang kha ani mai ka ngaihdan chu" sawitur ka vai ruai mai.Ka nu bawk chuan "hetiang ho hi Chuan ka sim ang pawh ti mahse an thisen hian a thanhnan tlat tawh a,an sim rei thei tak tak lo,i rilru kha ti nalo la siamfel thuai zawk rawh" ka ding hluai a.
"Ka rilru chu a natloh ring suh u.Ka nei tho ang,a tul chuan kan tlanbo anga nimai lawm!" Ka kalsawn nghal daih a.

Hmeichhe pakhat vanga kanu leh pa thu ka hnial vawikhatna..Ka awmdan leh rilru te chu ava danglam sawt tak em.Nu leh Pa thuhnial ngailo,harsa mahse zawm hram hram thin mi kha ka ni ve thin asin.Emily, heti hian ani maw i zun ngaih hi alo nat le.Ka theihnghilh leh tawh ngailo ang che.

Ka nu leh pa te'n an tihdan zawng zawng chu Emily hnenah chuan engmah ka sawi duhlo a,a duh vaklo chung chung kan inah chuan ka hruailut ta tho anih chu.Ka nu leh pa ten an hmuh rual rual chuan tawngkam chhe tinreng in an tawngkhum ta hrep mai a.
"Kan fapa hi i phulo,iva rawn zui haw ngam zawk ve mawle.Tunah hian min chhuahsan la,I hmel kha kan fapa leh kan chhungkaw hmuh tur hian rawn lan leh tawh suh,nang khawlai fanu!!" He tawngkam hi ka damchhung in ka hrereng tawh ang.Chutiang a an tih tak hrep avang chuan a tlanchhuak a,kei chuan ka umzui ve nghal vat.Ka um phak deuh nghal mai a,zah pawh ka dawn lo khawlaiah chuan ka man bet nawk nawk a,ani lah chu talchhuah tumin alo tangkawh ve nasa bawk.
"Eng tihnamah ka nilo,he saltanna khurah hian min pil tir mai mai rawh,ka chhuak thei ngailo ang,min kaltir rawh" a tap nasa hle a,ka inrinloh lai chuhin ka manna kutah chuan a seh thut a,a na reuh kher, ka thlah palh ta a,rang zet hian ka lak atang chuan a tlanchhe leh ta ani.Umzui mahila awmzia kan nei tam vak dawn lo tih ka hriat avangin ka let leh phawt a.Ka chhungte chuan min hauh an chak tih n.a. hre vek,mahse tumah ka be peihlo,roomah ka chho a,ka mu ta hmak a.

Zanriah kil tur pawh a ka hmel an hmuh tak loah chuan kanu chu a rawn chho ta nge nge a.Biak pawh kalo belo. Ka khumah chuan rawn thu in,ka chal te chu a dek chhin a,ka khua a siklo.Na ka neilo bawk,mahse maw ka thinlung hi a keh chhia ani.
"Hetianga awm maimai tur anilo asin.Nupui neih i duh tawh anih te chuan inu leh pa hian itana tha tur chu kan hria a,kan ngaihtuah sak mai dawn che alawm. Hetiang a tih hi chu a thalo asin "
"Ka hmangaih ber nei tur hian engmah in min dallo se ka duh.Vawikhat pian ve manah tinge hrehawm taka ka awm bik? "
"Hahdam rawh,kei chu sawi pawh ka sawi thui peih hrihlo" ti chung in min chhuahsan ta daih a.Ka ngaihdan hi chu ka sawhsawn ngailo ang tih hi ka pawm nghet bur ani mai.

Ngaihtuahna kawm a ka la mut bur lai chuan ka phone chu a rawn ri thut a,ka phu chhe teuh kher. Ka'n en nak chuan Emily number atang alo ni a. "Hello" lehlam atang chuan thaw hlawp hlawp chung hian "umama ni em?"
"Aw, ni e,engnge ni ta?"
"Emily thiannu kha ka nia,Emily hi thleng a sil laiin a lu a nat thu a sawi reng a,nichin lawk khan biak theihloh in a awm nghal a" ka inbeng kang nghal a.
"Lo khawih danglam suh u,kalo thleng nghal ang" insiam lemlo chuan hmanhmawh zet hian ka inkhalh chhuak nghal a.An inluah ka thlen chuan Emily chu alo mu bal mai a,a thiante chu an hmel atang chuan an mangang tih ka hria a,"lungngai su,hospital kan pan nghal anga,engkim a tha leh vek ang" ka pawm chhuak nawlh a,pakhatin taxi alo ko bawk a,tichuan hospital chu kan pan pui ta a.

Doctor te chuan an han check zung zung a.
"Tunge a chhungte? "
"Kan ni vek" doctor chuan min rinloh hmel kher.
"Damdawiin ah hian a harhchhuah hma chu a awm phawt angai dawn a,hlauhthawnawm chu anilo a,a rilru a hmang nasa luttuk a,chu chuan a taksa a ti chaklo ni berin a lang " kan thaw deuh huai mai.Engmah hrelo a a mu bam hmel chu ka en vawng vawng a,ka va lainat tak em.Keimah vang a hrehawm hei zozai i tawrh hi i tawrh tur pawh anilo asin.Khawngaihin lo harh chhuak leh hram teh. A harhchhuah hun hmuh ngei ka duh vang chuan ka hawsan lawk duhlo a.Ka chhungte hnenah erawh tihtur dang nei angin ka insawi thung a.

Zan dar 10 velah chuan muangchang hian a rawn meng ta a.Kan lawm kher mai.Kan ko mawlh mawlh reng a,harh chiang se kan duh ani.Kan duh ang takin a harh ve zel a,thu chhuak thei khawpin a harhchiang ta.A ei theih tur kan buaipui nghal char char a,mahse tam chu a ei theilo.Kei chu min en reng a,a mittui a tla leh ta."min la ngaihsak duh a ka lawm e"
"Emily, chutiang sawi suh, ka theih chhung chu buaipui che ka inhuam asin.Ka thlahthlam lo ang che " a hawi vut vut a. "Chhuah ka duh,hetah ka awm peihlo!"
"Ni love,i dam chian hma chu i chhuak theilo,ila thalo luttuk "
"Ka tha tawh,ka ning,a ninawm " a inhiat seuh seuh a,a damdawi tih chakna a chhuak tih ka hre mai.Ka khawngaih reuh hlemai.Ka chhungte lah chuan haw turin min lo ti ve sek bawk nen. Doctor hnenah chuan Emily awmdan chu ka hrilh a,damdawiin an jection a,a zal ta raih mai.Chutih hlan chuan hmanhmawh deuh hian ka haw ve ta a.In atang chuan a thiante chu chanchin ka zawt reng a,a chang leh a that thu min hrilh a,a chang leh haw tum a a talbuai chiam thu te min hrilh a,kei lah chu ka chhuah an remti mai bawk silo,ka awmdan chu ka ning kher mai.Lehlamah lah a hming a ka bialnu Khan min mi be buai ve chhen a,tihtur lah chu a hre thei phian bawk si.

A tawp a tawp ah dinner ei dun turin ka chhuahpui leh ta nge nge a.Zanriah kan killai chuan ka phone a rawn ri ral ral a,ka'n en nak chuan Emily number alo ni leh a,ka pick lo tep a mahse pawimawh te alo awm takin tiin ka pick hram a.
"Umam,Emily a bo daih ania"
"Enga?! Aw in awmnaah Khan lo awm ru,Kalo kal ang" ka tho rawk rawk a,
"Bawihi,nangmah in lo ei mai rawh,ka hmanhmawh " tih leh tlanchhuah ka rual a.

Hospital ka thlen chuan Emily khum chu alo awm hnawk nuaih tak tak a.A thiante hmel chu ka han en a,a ngaihna an hriat hmel bik loh khawp mai.Doctor leh nurse ho chuan hospital kil tin chu kan dap a,mahse hmuhtur a awm maplo. A thiante hnenah chuan "khawnge a kal in rin? Kal ngun deuh bikna te anei em?" Kati ta ringawt a.

A thian pakhat zawk chuan "zodin leh M.C ah hian a kal ber a,a dang chu kan hremai lo" atih avang chuan rang deuhin ka chhuak a,a hmasa berah m.c ka pan a.Mahse ka hmu zo lo,zodin chu beisei nei deuhin ka pan leh a,chutah pawh chuan alo awm chuanglo.Beidawng zet chuan ka inkhalh let leh ta a.Chutia ka tlanlai chuan kawngsir thim chin a tap fuih fuih thawm chu ka hria a,ka ding chawt .

Ka headlight chuan ka'n chhun kual vel a,hmun kawm thim zetah hian Emily ngei mai chu ka hmu ta a.Rang zet hian ka pan nghal a."Emily, Emily " a rawn hawichhuak vat a.Mahse min lo ngaihsak lo kher. "Emily duhtak,ti rawh le, kal ila" tiin kaihthawh mai ka tum chu alo tang tlat a,ka hmaiah min beng zui sawk bawk.Na pawh ka ti phallo.A tawrh chanve pawh ka tuar ve hleinem. "Min umzui zel suh,ka hua che.Ka hmu duh tawhlo che engvangin nge min umzui reng a,i mawl emni? Mi â inih hi" a tap reng bawk si a."Ka duat,bawihte,ka tihpalh,nia nangmah vang hian ka â zo vek tawh,ka nunphung pangngai pawh ka hloh zo tawh anih hi.Khawiah pawh awm la ka zui zel ang che.Ti rawh le,kal tawh ang"tiin ka kaitho a.
"Damdawiin ah chuan min hruai tawh lul suh in a haw is duh" atih tlat avang chuan inah ka hruai haw ta a.

A thian ten kan hmel an hmuh chuan an lawm hle a.A thiante pawh a zah zo lo,a mu nghal tawp a,a muhil zui mai a.Keipawh in a that ve mai tawh ka rin avangin ka hawsan a,rilru erawh chu a ngam chiah chuanglo.

Khatiang teh nuaih a kan buai hnu kha chuan tlemin boruak chu a ziaawm leh tawh a,mahse Emily chu a rui deuh reng tih thu ka hre thung.Lehlamah lah Bawihi'n min lo chhuahchhal ve reng bawk nen.Emily ka buaipui thin tihte chu mi tawngduh ho ka atang alo hre veleh pek a,a thinrim kher."Hetiang thu hriat reng hi i duh tawh loh chuan min kalsan thei ang,I thu thu ani e" ka tih hnu chuan a sawi tawh ngailo.

Zankhat chu inkhawm ve ngei tum a ka insiamlai hian Emily chuan min rawn call thut mai a.A tawngkam leh a awrawl atang hrim hrim chuan a harhfim lo tih ka hre thei.
"Umam, hehe ka tihpalh kalo be buai che a.Ka ngai luttuk che a" mak ka ti ve tep.
"Tun hun hi inngaih hun ani chiah emni?khawnge i awm a?"
"Nia ,tak tak chuan ka kal thei tawh lo a,min hruai haw tu tur ka zawng mek"
Nilo! Khawnge i awm?"
"Ka hre....loo..eee taka chandmari kawnah ka thu tawp hehe"
"Lo awm rawh"phone ka off a,ka tlanchhuak nghal a.

Chandmari kawn ka thlen phei chuan a sawi ang ngeiin alo thu muthlu lawp lawp mai a,rang zetin ka pan a,bike ah chuan remlo fahran hian ka thuttir a,ka hawpui ta nal nal a.A thiante pahnih pawh hi ka lakah hian an inthlahrung zozai tawh zawk a.Kei erawh chuan engahmah ka ngailo.
"Mama,a zahthlak zozai ta e,he nu hi buaipui tawh lo teh.Kan chhungkaw tan pawh a mualphothlak luttuk. I nei thei dawn chuanglo tih hrereng ta che.A phulo che,chuan hetiang buaipui hi i inhmeh lo bawk"
"Bawihi,ka hria,keipawh hian ka phu bik chuang hleinem. Keimah vanga a hrehawm tawrh zozai te hi ngaihtuah ta che u.Hetiang mi ni tur hian a inphal bik in ring emni?A bul ber chu keimah vek hi asin.Hrim hrimin kristian tha tak in inti ve tho sia,hetiang mi te hi in vei ve miahlo nge in rilru puthmang hi inthlak ve chu a hun tawh ani"

Ka chhungte leh ka thiante pawhin Emily vang hian min be tha peih tawh lo zo a,kawmtlak ah pawh min ngai tawh lo.Mahse inchhirna ka neilo a,pawi tihna pakhatmah ka nei lo.Mipa ka ni a,ka thutiam hi ka hlen tur ani.Ani hmangaih tur hian tuman mi tilui loa,amah buaipui pawh hi ka kut a awm ania,ka tihtur diktak ani bawk.Ka hmangaih a,hmangaih reng pawh ka tum a,ka duh bawk.Ka thlahthlam tawh ngailo ang.

Khua a thim thet thet a,kei chu ka hna ngai bawk Emily te run lam pan chuan ka inkhalh chhuak leh tawh a.Ka hmel a hmuhrual chuan alo lawm ve hlemai. Mahse a dam that vak loh avangin alo mu bal mai a,thei leh theilo chuan rawn thawhchhuah a tum ve a,kei chuan lo dangin "mu rawh,a ho luttuk, tipawh hian a nuam ka ti tho " kalo ti vat a.Mahse a luhlul ve em a a thu ta hram a.
"I chau viau em?" a lu a thing mai a.
"I damlo fo mai si a,damdawi te i ei tha em?"
"Umm ei tha luttuk, ka dam mai ang"

"Englo,i sim thei tih ka hriaa, i sim chuan i dam vat mai ang" a ngawi leh ta ker mai. "Min chhang dawn nange?"
"Umam,nikhat choh min lo nghak la"
"Hmm nikhat choh hi iti leh thin a,tun tum chu i hlen tawh tur ani aw "a bu leh ta ringawt a.Ka pawm bet a,a hmui vam hiam ah chuan ka fawp leh ta vawng vawng a.Tichuan ngaihtha takin ka hawsan leh ta ani.

Ka mu chu kalo mutui kher mai.Ka phone rik pawh kalo hre lawk lo a,ka harh chuan missed called vawi engemawzat hi alo awm a,Emily hnen atang vek ala ni zui.Call let ka tum lai takin amah zawk chuan a rawn ti leh a,
" hello "
Lehlam atang chuan hlau thlabar aw hian min rawn chhang a."umam, ...(A tap tih a hriat mai a inhnit hlawp hlawp a)ilo kal vat thei angem? "
"Aw, eng thil nge ni?I thiannu a tha vaklo emni?"
"Aw. .A marphu kan hmu zo lo.."
Ka puak darh nimai hian ka hria,ka inha lum sawk sawk a,ka tlanthla nghal puat, ka nu zan zung chuan min lo hmu a,min lo ko zui lawm lawm,mahse ka chhang hman tawh lo.Emily te inluah ka thlen chuan mi an lo tam tawh khawp mai.Inchhungah chuan rang zet hian ka tlanlut a.Ka thil hmuh avang chuan ka thinphu a rang hle a,ka thaw chu a tawp ta emaw Kati hial. Emily chu chhuatah hian alo tlu bal mai a,a thiante chuan an lo hual bawk a..Ka hmel an hmuh chuan an thlamuan hmel sawtin ka hria.
"Kan lo khawih danglam ngamlo ani" tiin an tap zawih zawih a.Ka emily bulah chuan ka thingthi rawp a,a hmel dâng bam mai chu ka en ngawih ngawih bawk.Ka mittui chu tla se, tah vak mai ka duh a,mahse ka thei silo.A marphu ka zawng chuk chuk a,ka hmu bik hauhlo mai.Ka thlaphang takzet a,hospital ah bawk chuan hruai mai ka duh a,thi mai tur chuan ka phallo.

Ka pawm lawp a,taxi ko in damdawiin chu kan pan ta a.Mahse Khawvel hi chu alo nunrawng em atin ni. Kan hmangaih te kan chan a,nung tur a kan duh ngawih ngawih te hi siamtu hian nung turin alo duh tawhlo aniang tih mai tur hian min lakbosak zel bawk si.Emily pawh chu a marphu hmuh tumin doctor te chuan an bei nasa in, theihtawp pawh an chhuah a,mahse khuanu ruat aniang e,awmzia a awm ta lo ani.A marphu an hmu zo lo tih ka hriat rual chuan ka tliak hnawp hian ka hria,Khawvel chu a reh duk thei nia.Emily chu ka thlir a,engmah a hre tawhlo chu ani mai si a,min be tur pawhin a a ka chu a ang tawh ngai dawn silo.A hmel dâng bam mai te chu hmu leh tawh ngailo turin an la zalh anga,min la phumbo sak mai dawn chu ani si a leh! Ka va lungngai lawk tak em!!Hospital atang chuan ka tlanchhuak a,kawngpui reh duk leh thin mup maiah chuan mal takin ka tei ruk ruk a,ka mittui tla chu dan sen pawh anilo a,hruk hul pawh ka tum heklo.Ka hmangaih ber tan a ka tih theih hnuhnung ber ani tawh tlat ani.

Emily, nangmah hmuh beiseina hian ka la khat reng a,i thlan khawhar tak tlawh tur hian tun thlengin hun ka la insiam hram hram zel asin.Khua alo tlai a,ka hrechhuak che a,zankhua alo thim a,hmuh che beiseiin hmun tin ka fang a,van lam ka thlir fo thin.Arsi tamtak zingah te khian ilo awm ve mial lo maw tiin mittui nen ka thlir che a,ilo lang ve ngai bawk silo.I intiam fo angin nikhat choh hun min pe leh la,engkim kha ka siamtha vek ang.Nang hmu leh tur che hian nikhat choh pawhnise ka inhuam a,ka mamawh ani.Emily, ka hmaah hian i rawn in lan thei lo emni?Ka ngai che,ka hmangaih che.Ka hmangaih reng bawk ang che.

‪#‎END‬

[Remi]

Ngaihnom ltk