FULL MOON By Rosie L Ralte

Group siam tirh atanga like tu 1000 nei chin zawng zawng dahkhawmna
Ngaia
Site Admin
Posts: 25813
Joined: April 30th, 2016, 4:07 pm

FULL MOON By Rosie L Ralte

Unread post by Ngaia » May 13th, 2016, 6:39 pm

FULL MOON

( Tun tumah hi chuan thawnthu lawrkhawm ang deuhin ka thian thenkhatte nena full moon kan thlir dan, kan hmangaihna thawnthu han ziah chhuah ka tum dawn a ni a. A hmasa berah keima chanchin ka han sawi zuai zuai phawt ange. )

Part - I

Hmanhmawh phelengin ka insiam a, darthlalang hmaah ka inen sek hnuah chuan ka lung a awi ve ta deuh aniang pawna ka scooty hun nen chuan kan chhuak dun thei ta hram a. Nizan full moon vang vek! Ka neih duh loh, ngaihdan engemaw in an loh avanga ka then tak, hun rei tak chhunga ka lo kawp tawh leh kum thum kal taa ka then tak ngai khan full moon a lo thlen hi chuan tuma hriatpui loh hian ka meng vei kar zel!

Make up inbel hi ka uar lutuk lo naa kum lam a naupang chhe lutuk lo nen zankhat han men rei deuh hi chuan thup ngai hi a lo tam ve tawh ta thin a, chuvang vek chuan alawm vawiin pawh kei leh keilo anga darthlalang ka bih chhen ni. Lan nalh a, lan that ka mamawh lutuk tlat, keima tawkah. Kum 10 chuang ka hmuh tak loh leh ka hmuh zui zel tlem azawng, ka sikul kaipui, pawl sawm ka lo zirpui tawh te nen re-union kan nei dawn tlat. Keimah anga nula zui an awm meuh tawh pawhin ka hrelo.

Chhungkaw pangai tak, nei hlei lo nghei hleilo an tih ang deuh atanga chawr chhuak ka ni a. Ka pa sawrkar hna chhete thawh kha kan ei ber a ni a. Kan unau hmeichhe pathum leh mipa pakhat zinga a upa ber ka ni a. Mi nu leh paten harsa lem lova an fate lehkha an zirtir theih laiin keini tan erawh chuan chawlhni sa vawi tam tak kan ei loh phahna, ka pa rualawhna ber kan lehkha zir kha a nih miau avangin harsa ve tak chungin kan zir ve zel a.

Ka vanneihna em em chu Master Degree ka neih hnu lawkah, zir ngai zualpui ka zir zawh hnuah private college-ah lecturer hna ka hmu hlauh a. Chutah ka vanneihna a kal tluang nge Sorkar in ka thawhna college kha a la ta hlauh mai bawk a. Zirlai thiamthei fal em em lo, a suala sualchhuak ve ngar ngar thin khan hna zahawm tak ka chelh ve ta reng mai a nih chu!

Chutih laiin college ka kal chhoh tirh atanga ka ngaihzawng, ka chhiat ka that engkim hre vek khawpa lo inbelchiang leh min hrechiang vetu Matlana nen khan inneih tepawh kan sawi ri ve ta fuih fuih a. Ani Sawrkar officer tenauah a inziak tling ve ta bawk nen, kan hmabak pawh kha a thim bik lemlo. Harsatna pakhat chauh kan nei, chu chu harsa taka min lo zirtira min enkawltu ka nu leh pate tlem tala nuamsaa ka siam ve hmaa mahni hmasial taka pasal han neihsan kha ka thei ngang lo a ni.

Kan hmeichhe rual a, ka naute an la inzir mek a chuta karah ka pa thachhang dawl tur, kan te ber mipa lahin college a la chhuak lo a nih laia ka hlawh, kan chhungkaw tana tam tham ve tak han chhuahpui nawl nawl kha ni theiin ka hre ngang lo. Ka pate erawh chuan,"Ro dang pek tur che kan nei lova tikhan kan theihtawp chhuahin kan zirtir tawh che a, i naute pawhin an rawn zir chhuak veleh mai ang. Min ngaihtuah suh," min ti a.

Matlana nen pawh kan titi nasa a. Tu emaw talin hlawh an neih hma emaw ka nuta neihchhunin a zirchhuah hma chu ani Matlana'n hlawh a nei bawk a, ka hlawh chanve ka pate ka pe zel ang tiin ka rawt a. A ngaihdan a lo ni ve hauh thung silo! "Kan chhungkaw inzirtirnaah chuan kan ina mo emaw kan farnute pawhin hlawh an neih chuan nu leh pate kutah hlawh kan thehlut vek thin a. Kan mamawh tawkin kan dilchhuak leh mai. Kan farnute pawhin pasal an neih chuan an mo nate inah a bo a bang awm lovin an hlawh an theh lut mai. Nangpawhin chutiang chuan ti la, i nute chan tur chu kan dilchhuak leh mai anga, ka nute pawhin an hrethiam lutuk ang," a ti ta bur mai a nih chu!

Tlangval fel ber mai leh thil hrethiam bera ka lo hriat khan ka rilru zu hrethiam pha hauh lova mawle! Anni chu keini chhung ngaihtuah chuan khitah daih an ni, khawsakna lamah. Ka hlawh ve tello hian an nuamsa lutuk. Harsa taka min lo zirtir a, min enkawltu ka nu leh pate ka rulh let vena tur bei thamte; ka lehkhazirna atana senso cheng duli pawh thawh velo, lehkha puan phek khat leh pencil tlawn khat man pawh tum velo te hnen atanga han dil chhuah kha dik theiin ka hrelo bur. Aniin a ngaihdan a thlak theih loh ang bawkin keilah chuti tho. Thu a tawp e lumam kan ti ta nge nge a nih kha. Ka chapo ve a, ka lung a lengin ka khua a har ru ngawih ngawih fo, mahse tumahin an hriat ka rem tilo bur.

Kha leh chen lo inzui kan nih avangin han inthlah fel thak erawh kan thei lo ve ve a. 'Thian ang tala in en' chhunzawmin kan la inbe zeuh zeuh a. Vawi tam ka rilru thlak turin min ti naa ka theilo bur thung. Ka naute inzir chhuah ve hma chu min nghah a tiam thu thlengin a sawi naa ka ngaihdan mawlte, hlawh zawng zawng ka chhun luh a tulna ka hriat lohna chuan min ti hrang ta tho tho a.

Nizanah, tudang ngai lova kan lo lawm dun thin full moon zanah berkher khan whatsapp ah nupui a neih tur thu min rawn hrilh a nih chu! A nupui tur thlalak thlengin min rawn thawn pek! Let leh duh love ti lovin ka lo la tuar phian tho si a, mu thei lovin ka inhnit ruk ve hlap hlap kha!

Part - II

Tichuan ka tum ram chu ka thleng ta hlawl a. Thianteho chu an lo thleng deuh vek tawh hi a lo ni a. Inchhung lama ka han pen luh ve pawh chuan a thenin min lo fiam nghal bawrh bawrh a,"Fate buaipui hmasak ngaiho pawh an rawn thleng vek tawh a nia, buaipui tur neilo ber i rawn tlai viau manah thleng i sil vek ang," min lo ti lawng lawng pawh an awm a. Za fahran lo hian ka han then khum ve tha kha.

Chutia kan han inhmukhawm ta chu kan ri chel chul a. Kan thian hmeichhe zinga tlem azawng chuan an fate an rawn hruai bawk a. Naupang nen kan ri deuh luih luih a ni ber mai, chung zingah chuan naupang harh fal pawh ka chhinchhiah kar, nula siniar nih manah ka kherkhiap tawh lutuk a ni mahna! A then pawn verandah lamah guiter perha an zai ngang ngang laiin kil khata um lo sawhkeh tawk an awm bawk a. Lo nui khek ta rawi rawi pawh an awm. Tunlai tih dan takah 'Selfie' nge 'Wefie' tepawh kan buaipui nasa hle. Za vak lo chuan ka han then ve sang zel kha, hmui han tizum put put a, han meng phawk vel duh erawh kan awm meuh lo, kan naupang tawhlo tlang a ni ang e.

Kan school kal laia hmeichhia zawng zawngin kan star rawn, kan lo luanliam zawih zawihna thin Ricky a rawn thleng ve hlawl bawk a. A hmelthat ngaiin zuk la hmeltha reng a! A palen bakah a sa a lo inphut mawi tawh nen han ngaihzawnna rilru pu lemlo mah ila a chevel leh tawng vel han thlir erawh a la nuam hle nia! Chutah ka bula thu Thlengi chu a chanchin ka han zawt ru ta sar sar a. Ani lah chuan min han nuihzat fahran khawp lehnghal a!

Kan zinga mi Thomas-a, koh duhdah nana Thawmte kan tih thin khan,"Nizan full moon chu in hmang nuam hlawm em?," a han ti tak lar larah chuan kan ri vei hak a. Ricky chuan,"Dawn lawm ni? Duh berte bulah chuan thla mang leh bial hi angkhat reng a ni maiin ka hria. Khawiah thla lam kan en hman tak tak lo," a rawn tichhuak ta a. A hmela hlimna chu ka va chhiar thiam nghal a,"Heizawng ka chanpual tur a nilo leh phawt," tiin keimahin ka han innuihzat leh rih a.

Kan bul hnai thutthlenga thu Sangtei'n,"Keichu full moon hi ka hua. Thla hi bial theilo tawp se ka ti a nia," a rawn tih chhuah tak hlakah chuan ka han hawi tang nghal hra mai a. A hmel chu ka ve en nawn leh ngat a, amah tak hi ka lo chiang lutuk lo a ni mahna! Hmai sin lampang, hmaifang fel tak, sam ngil zan mai a niin pasal tha tak, sawrkarah hna zahawm tak chelh mek a nei nghe nghe a. A fanu kum 3 mi vel tur a rawn hruai ve nghe nghe a. Keimah ang thova khawhar rukna emaw a nei a ni tih ka man thiam nghal mai a. Chutia keimaha pahnih leh pahnih belh pali ti niawm taka Sangtei dinhmun ni awm anga ka rin ka ngaihtuah lai chuan Ricky bawk chuan ka ngaihtuahna a han la leh ta rih a.

Thlengi chuan min khawngaih deuh nge ni Ricky chanchin tlangpui chu min han hrilh ta thuak thuak a, ngaihnawm ti zetin keiin ka lo ngaithla thung a. Hei hi chu hun dangah hrilhchhawn che u ka tum ang. Tunah rih chuan kan chaweikhawm / re-union boruakah bawk let leh ila.

Englai pawha frank em em mai, mi pawi sawi bik chuang ngailo, à phuang anga lang fing ru viau lawi Zonuni chuan ring leng lung hian,"Keichu full moon apiang hian ka chhass ka then ziah a nih chu! A mak hi ka tia! Thla eng thlir dun hle hle theih hi mipa lam hian thla engin a chhun ve loh lai hi zu beisei ziah kher a! Keiin ka lo phal bik ngai der si lova, a tukah ka rian phah ziah. Hei full moon zana hnuailam beisei ve hauh lo, kan pa ni ta nen hian duhthusamin nizan chu kan han lawm tehreng a nih kha! A khuhtu awm ta lo na na na chu thla engin a chhun chiang kulh kulh teh mai asin," a han tih tak lawr lawrah chuan kan vai chuan kan nui ho ta bawk bawk a.

Kan zinga tlema a sihhnip deuha an sawi thin Remtluangi chuan,"Full moon te chu lawm theih dan chikimin lawm mai tur, hun dang anglo takin a romantic bik hliah hliah em," a han tih chuan tlema inla fekfawn zual pahnih khat han ner ru sak chu ka va hmuthei a. Khawvel a ni a, mihring kan in anglo ang bawkin ngaihdan hrang tete nei kan ni a, kan ngaihdan leh thlir dan theuh in zah tawn sak mai hi midang nena inngeih taka awm theihna a ni tih pawmtu kei erawh chuan ka hrethiam fu thung a.

Remtluangi chanchin tlem azawng ka han sawizui lawk ange. Ani hi kan venga awm a nih avangin kan zinga ka hriatchian pawl tak a ni nghe nghe a. Chhungkaw khirh elkhen atanga rawn chawr chhuak a ni a, a chhungte khauh lutuk zarah a zalenna neihchhun a hmang thiamlo tia mi sawi a ni fo thin. Amah thung hi chu mi lang tlang deuh, rilru tha em em mai a ni a, rilru kawi nget nget ang hi a neih sawitur a awm lem lo. Mi tupawh angkhata en thei a ni a, rualkawm pawh a thiam hle bawk. Kan sawi tawh angin a buan a chaklo ve deuh ni ngei tur a ni.

Vawikhat kan in kawm naah erawh a nun hman danah a inchhir ngai loh thu min hrilh mauh thung. "Nanu, mi min sawina hi ka hre ve vek asin. Mahse an sawi ang em ema sihhnip chu ka ni bik lo. Mipa ka hmangaih takte bulah ui nei lovin ka inpe mai a nia. Min mutpui chak nazawngin min mutpui theilo tih an inhre kar. Hmangaih ka tawng a, ka inpe pumhlum a. Ka hlauh leh a, ka kehsawm a. Chutah ka kehsawm min tuamdam thei ka tawng leh a, ka thinlung zawng zawngin ka inpe leh mai a ni. Ka ta lo tura ruat an nih avangin ka nei zuilo ta maiah ka ngai mai asin," a ti sam et a. Han tuihnih vak tur ka hriat loh avangin ka aw e kual vel mai mai ta kha a ni a. Pa lova a pawm mek a fanu lah chuan a nu a chhun phian zui.

Tichuan khamlo takin keini thian zaho inhmukhawm chu zan rei lamah kan inthendarh ta hram a. Ka theih anga a mal tetea tlawh chhuah a, kan inhmuh loh kara an hun lo hmanchhoh dan leh an dinhmun han hriatsak chu thaa ka hriat avangin an vai chuan remchang hmasa bera hmuh leh ngei tumin ka thlah ta hlawm a.

Part - III

Zan ka han mu chu a hma zan lama ka mut that loh ngaihtuahin ka muhil lawk thei ta mailo lehpek a. Mut ka duha muthilh lama harsatna ka neih ngailoh nen a mak ngawt mai. Mihring nun ka phak tawkin ka ngaihtuah chhunzawm ta vang vang a.

Ka muhil mai thei dawnlo tih ka chian takah chuan a tuk chawlh a ni bawk a tiin light ka on eng leh sauh suah a, kan school kal lai thlalakte leh eng eng emaw kan thiante nena kan ziah, paih mai phal lova ka dahthat tepawh ka hmuchhuak leh ta hlawl a. Chung zingah chuan Ricky hming kan lo ziak lang hnem viau tihte pawh ka hmu tel bawk a. Sap hla engemaw kan duh zual, tape recorder ngat atanga kan rewind nawn bur bur hnua kan ziahchhuah tepawh ka haichhuak nual bawk a.Vawiin lama Thlengi'n Ricky chanchin min hrilh kha ka han hrechhuak leh a.

"Ricky hi Aizawl-a contractor hlawhtling berte zinga mi fapa neihchhun a ni a. Engmah tlakchham hriaa nei ngailo a ni a. Farnu pahnih a nei nghe nghe a. Nu ber erawh Biak Ina lam peih tak, inla thlarau mi tak, ama inchhung leh a fate erawh dah pawimawh hmasak nachang hre leh silo ang hi a ni thung a. Pa ber a hna lama buai bawk, nu zawk lah bazar kal leh thian hote nena Pathian thu sawikhawm emaw Pathian thu hriltu tharlam deuhte kamliam chang reng peih, nalh taka inchei vur renga Pathian thu sawitui thei zet ni thung a.

Nu leh pa enkawlna mumal dawng lo, awmpuite kuta awm deuh tawp, sum leh pai hnianghnar em em bawk si an nih avangin a dai pawh an han dai pelh deuh phat phat reng a. Hmeichhiat mipatna lamah leh ruihhlo lamah pawh an ti lawr kual ve zul thei ta mai a.

Chutih lai chuan Ricky hi college kal lai a ni a. An college canteen nghaktu nuthlawi, amah aia kum 10 dawn thuaka upa zawk, fa nei thei tawhlo tura insiam tawh chu a han buaipui ta tlat mai a. Amah kha a hmeltha si a, nula lakah pawh a tovin kar hnih khat han kawpa han mutpui theih pawh a neih zut lai lehnghal kha a ni a. Kha nuthlawi kha mi aia hmel pawh han tha bik em em emaw a ni hranpa lova, amaherawhchu a mizia kha chu a ngaihzawnawm ru viau aniang a luck dan en khan. A zuamawm zawngah phei chuan amah ai khan nula tam tak an zuamawm zawk fe ang.

Hmangaihna dik tak a ni chek ang chu Ricky khan a chin thalo zawng zawng nen lam a sim phah ta vek a. An han inzui ta zak zak a. Ricky nu erawh chuan a iai ngang mai. A pa erawh chuan anni pahnih chungchangah khan aw a chhuah ve lemlo thung a.

Biaktei, Ricky ngaihzawng erawh kha chuan thil thui tak a ngaihtuahin bansan tumna rilru a pu ta zeuh zeuh a. Zankhat pawh tap chungin Ricky kha phone in a han bia a,"Fa pawh ka hrinsak thei dawn tawh loh che bakah ka fate kalsanin ka pawm thei lo bawk che a. Anni hi ka khawvel chu an ni mai a, an tan keipawh. Keiin ka kalsan chuan anmahni hringtupa tehlul hian a enkawl thei dawnlo sa nen. I hmel a thain i fel a, sum leh pai i nei bawk a.. tikhan nupui tha tak nei la, an hmingte pawh ka phuah i phal leh ka phuah anga rem i tih phei chuan i faten 'Anu' min tih ve ngei ka phut bawk ang," tiin.

Ricky lahin then a tum awzawng si lo. "I hrin i rila rahte hi ka hmangaih che avangin ka fate an ni ve mai, ka hmangaih che a a tawk," tiin a ngaithla tha duh hauh lova. Ama nu ngei pawhin pawh then a tum nasa mahse Ricky khan,"Kha leh chen awmpuite kutah min dah mai mai a. Tuna taka ka nuna inrawlh tum reng reng," tiin a ngaithla duh derlo bawk a.

Hmangaih leh hmangaih na na na chu tihian hlim takin an inkawp zui zelin an innei ta nge nge a. Ricky hian fa a awh thu hi vawikhat pawh a la sawi chhin miah lo. An siam tirna phelh leh mai pawh an rawt aniang midangin, lo ti tawh rai leh thei an awm thu tepawh an hrilh a. Amah Ricky ber hian Biaktei'n a tuar hlauin a phal tlat lova. Thlah nei lo tur atan chuan a uihawm viau naa a hmangaih ber a nei thei erawh hi chu a lawmpuiawm ngawt mai," tiin a tlip ta kha a ni a.

Part- IV

Kan inhmuhkhawm atanga kar hnih vel a liam hnuah 'Khawnge KFC hawn thar a ni bawk a chawl lut ve teh ang," tia ka bazar zo ka lut chu Sangtei te nufa lo thu ran nen kan inhmu leh ta hlawl a. Khami ni khan kan rik laih laih avang leh Ricky khan ka rilru a luah deuh avang khan a mimal takin ka bel bul hman ta lo kha a ni a. 'Full moon hi ka hua, thleng theilo tawp se ka ti a nia," a tih hlak erawh kha chu ka la hre kar thung.

Nui bawk bawk chungin arsa kan te chu kan han keih ho ta lawp lawp a. A chanchin han zawh zui viau pawh ka duh nain a fanu a awm ve khar avang chuan thil hluite sawiin kan nui liam ta mai mai a. Ka hman remchan veleha tlawhchhuah ngei erawh ka intiam thung a. Khami nia a tawngkam khan ka beng a verh riau a, ka tlawhchhuah ngei chu a ngai a ni tih ka inhre tlat.

Ni tam a liam hmain hun remchang insiamin ka lenchilh ta nge nge a. Ka len duhna chhan tak erawh ka sawilang hmasa duh bik lova. In nuam tak neiin an changtlung khawp mai a. A pasal chu naupang lam doctor a lo ni nghe nghe a. Ka hriatzawng erawh a ni lo hlauh thung a, mahniin fa la hring velo na na na chu hriat mai chi va ni suh.

An nula awmpuiten bengvar takin theitui in tur min lo chhawp nghal sawk sawk a. Amah tak erawhchu computer hmaah a lo thu vang thung a. Nui sanga min lo chhawn pah hian,"Keini ang nutling tan chuan nangni anga zalen taka hna han thawh ve mai mai theih pawh a ni ve tawhlo. Tihian internet atangin hunawl hnawhkhah pahin eng eng emaw tiin ka inhambuai ve a nih hi," tih pahin a computer thutchilh chu a han thawhsan nghal ta var bawk a.

Tichuan kan titi dun leh ta malh malh a. Ka hna lama ka buai ve bawk avangin han kal nawn fo kha ka tan pawh buaithlakna chin a awm ve avangin ka kalchhan tak chu ka zawt tlang ta rawih a. Mak tih hmel deuhin min en let ha chung hian,"E, kan chanchin i hre ve nange? Kan thiante chuan an hre vek nihmiang ka lo ti a?," tiin min zawt let ta mah a. Keilah ka bo viau thung. A chhan pawh Matlana nen kan inzui a chin kha ka lehkhazir nen kan vengchhung a awm vete bak kha chu ka biak zui meuh loh vang a ni pakhat a. Tichuan a chanchin chu min hrilh ta malh malh a.

"Class 8 kan nih lai atang tawh khan Sir Tetea khan min star thin a. Kan la nau em avang khan ngaihzawng ang zawng phei chuan min chhawnchhaih ngai miah lova, a rilru puthmang erawh a zep lemlo thung. Tichuan class X kan zawh hnu lawk khan chutia a zirlai ni talo chu tiin min rawn rim tan ta tak tak a. Keipawhin hnialna tur chhan hranpa ka neih loh bakah midang kan classmate tepawhin an star ve hat hat kha a nih avangin ka chhang ve nghal ta nghal a.

A mak lutuk 'First Love' diktak, ngaihzawng hmasa ber ni satliahlo 'Hmangaih hmasaber' han tawn kha chu a dan a dang asin! Thianghlim tak leh inthlahlel takin kan inngaizawng chho ta zel a. Ka kumin a la phak loh bawk avangin inneih thleng thleng chu kan la sawi lo thung a. Keini aia inngaizawng leh induh, inhmangaih kha an awm bikin ka ring hauh lo.

'Full moon' zan mawlh kha! Ngawi rengin insi riala thu chungin tukverh atanga thla rawn eng lut phuau mai thlirin rilru inhmu takin kan han thudun vang vang a! A chang leh zawitea titi sep sep pahin a khat tawkin lungrun fahran hian kan han in chuk thin a nih kha! Tumah dang kan ngai lo a ni satliah lo, khawvela mihlim ber pahnih kan ni hial ang chu! Kan chhehvel leh khawvel hmundanga chengte chungah enge thleng kan lungkham lova, kan aia neinung bik emaw pawh thikna eih kan nei heklo! Chutah a haw dawnah kawtah mi hmuh hlau tak siin inkhamlo em em maia kan han inpawm vawng vawng thinte kha aw!

Khatih lai khan a hnathawna an transfer ta hlauh mai a, thingtlang zawkah a han thawh a ngai ta nge nge a. Kan lunglen dun zia chu maw, i hrethiam phalo zawk ang. A leng lutuk hi a ni tawp. Phone-in kan inbe tluk tluk ringawt mai a nih chu. Kei ngaihzawng pakhat pawh la nei chhin lo phei kha chuan khatia kan han inthlah thut kha tuar har hi ka ti lutuk a, zanah te hian ka khawhar lutuk hi ka mittui a tla ru fo asin.

Mipa hi an lo mak asin, mak tak an ni mak tak! Midang an hmangaih em em lai reng pawh hian zarbuai chiamtu an neih chuan an thangah zu awk fova! Chung chiah chu a ni kan chunga thleng chu! Khatia hmun hrana parawla han awm ta chu zar taktea zartu a hmu nghal thuai a. Min hmangaiha min nghah rei tehlul nen khati taka zartu kha chu a chetsualpui ta nge nge a nih chu!

An chesual satliah a ni lova, chu nu chu a han rai zui ta ngat mai bawk a. A chhungte lam atangin a fa tih fahrah an ngaihngam loh avangin nei turin an nawr nasa ta a. Ani lahin vawikhat insum theih loh chetsual avanga a hmangaih ber chan hlen kha a lo ngaingam azawng si lova, neih a hnial bur thung a. Ka hnenah ngaihdam nasa takin min dil bawk a. Ka hmangaihna la ngai reng mahse a hma ang kan ni thei dawn tawh lovin kan karah ser a awm tlat dawn tawh bakah ka hmangaih tak thisen kai a han fahrah tur kha ka ngaingam thei hauhlo bawk a," a tawp ta chawih a.

Kawngkhar lam chu ka han hawiphei ve nghal a, a pasal a rawn haw a lo ni e. Min inhmelhriattir hnu chuan kan inchibai lawp lawp a, hun danga leng leh tura intiam chungin kan inthlah ta a. Ka eitura min chhawp cake tuihnai tak, a titi ka ngaihthlak tui luata ka ei theihnghilh tak pawh tih luihna nen min fun haw tir ta ngawt bawk a.

Part - V

Kan in kan chei tha nen, ka hna lama ka buai ve deuh bawk avangin Sangtei pawh chu ka hmu leh lawk hleithei lova. Whatsapp lamah phei chuan kan inbe awl lova. Amah pawh chuan chutia a chanchin min hrilh chu a duh ve reng nia ngaihtheihin kan sawi ri zeuh zeuh fova. Nikhat chu hunthawl insiam dunin chhun chaw ei turin restaurant pakhatah kan inhmu leh ta nge nge a. An in kan thlan lohna chhan pawh midangin kan titi an lo ngaihthlak ve kha kan duh loh vang a ni ber mai.

"Ka han sawi chhunzawm leh mawlh mawlh phawt mai ang. Zawhna i neih tak leh min lo pawt chat mai rawh aw," a han ti hmasa te te a. Tichuan a sawizawm ta zel a," Kan buai chho deuh ta nuaih nuaih a ni ber mai. Han neih em atan khan a duh ngang silo, midang nawrna nasa nen, keiin amah pawm mai ka lo harsat tawh bawk si! Vawi tam ngaihdam min dil ka tih tawh kha. Amaherawhchu keimahni pahnih inkar ringawt a ni tawh lova. Pawi sawi ve hauhlo leh engmah tihsual nei ve lo, naute pawisawilo lo piangchhuak tur chuan rilru a luah lo thei silo! Ka hmangaihber thisen kai han fahrah tir kha ka phal thei lo a ni e.

Keichuan ka hmangaihna avangin vawi tam pawh tisual se ka ngaidam nawn thei ngei ang! A tel lova nun han hman chhoh kha ka zuam ngang lo a dik taka sawiah chuan. A thinlung neitu ka la ni tih leh min la hmangaih em em mai tih inhre chunga midang, a hmangaih miah loh nei tura han tih kha a harsat zia chu ka dinhmuna ding vete bakin an hrethiam pha kher lovang! Mahse le ka sawi tawh angin lo la piang tur avang chauh khan ka hmangaihber chan ka huam ta chauh a nih kha! A na asin! A na vawng vawng mai!

Tichuan kei ka let duh tak ngang loh avang leh a chhungte nawrna avang chuan a fa pai mektu chu nupuiah a nei ta nge nge a. Hlim mawlh hek lo, zuk leh hmuam thlenga fihlim thak khan zu inte a chin phah ta hial a. A tlachhe rawk rawk a ni ber mai. A nupui kha erawh chuan engkim huama a beih, a neih tak a ni bawk a, a hahdam sawng sawng awm asin! Aizawlah bawk a hna an transfer leh tak avangin veng khatah kan han awmho zui ta bawk a.

Tichuan kan inhmangaihna pawt thentu, mihranga min siamtu naute pawh chu a lo piang chhuak ta a. Naute duhawm tak a nih thu Tetea chuan min rawn hrilh nghe nghe. Chu naute lo piangchhuak ta avang chuan a rilru pawh tlem chuan a dang ve deuh turah ka beisei bawk. Tunge mahni rila rah hmangaihlo awm ngai?

A fa lo piangchhuak ta a hmangaihlo tihna ni lovin a fa nu erawh a hmangaih hleithei thung silo! Min rawn be awl lova, a chang chuan chhuanlam hrang hrang siamin ka be duhlo lui thin. 'Full moon' zan mawlh kha a ni hrehawm thei ta chu! Kan in bul kawngah a thu ngat ngat thin a, keiin mittui tla chungin tukverh atangin ka thlir thin thung! A na asin, a na! Tisa chakna insum theih loh avanga kan tawrhna kha a na asin! A changin tap chungin kan inbe thul!

Ka college kal min thlir tur ngawtin min lo chang thin a nih chu. Hmaichhana inhmuh erawh ka duh lo bur thung, ka insum zawh loh ka hlauh avangin! Ral atangin kan inthlir vawng vawng thin a ni ber! Ni e, dik taka sawiah chuan a nupui kha ka haw ru vawng vawng thin. A hriatah leh midang bulah erawh ka sawi ri ngai hauhlo thung. Miin min dem palh kha a hlauhawm ve bawk a.

A nupui pawhin a tir chuan a thinlung hneh zui theih mai kha a inbeisei a. A lo ni hauhlo tih a han hriat takah kha chuan a tihngaihna hrelo nge ni keimah min tawng ta zeuh zeuh a. Kei erawhin ka tuang ka tichhah lui tlat a, engahmah ka ngailo lui zel thung. A pasal kha ka ngaizawng zuiin ka kawp zui lova, ka la hmangaih reng mai chauh a ni a. An fa lo la piang tur tan kan pahnih inhmangaihna dah thain ka kiansan mai tih ka inhrechiang emai a, ani min ngaihdan mai mai kha ka pawisa teuh lo mai. Duh ila chuan amah kha sawn pawmah chhuakin keini pahnih kha hlim takin kan inkawp zui thei chiang em asin. Ani erawh kha chuan a theihna apiangah min rel kualin ka chanchin kha dawt nen a sawikual zui nasa khawp mai. Amah a inti hah thlawnin a inchawk zero mai mai tih a hrelo kha a khawngaihthlak zawk asin!

Tihian hun a kal zel a. Pathianin ka pasal tura a lo ruat ngei, min hmangaih em emtu pasal tha tak min pein chhungkaw tha tak min din sak hi a lawmawm asin! Amaherawhchu 'hmangaih hmasaber' erawh theihnghilh hlawm hlawk a lo har emai. Ka nunah engmah han tlakchham nei lovin ka pasal, ka fate pa pawh hi hmangaih eng ang mah ila kan nunhlui khan min thing let fova, a rukin ka la na vawng vawng thin," a tih lai mek chuan ka lo pawt chat var a,"In pain in chanchin hi a hre ve em?," tiin.

A nui sak a,"Hre vek e. Amaherawhchu mi puitling leh pa tha tak ngang a ni a, tupawhin nunhlui kan nei theuhin hmangaih hmasa kan tawng vek tih hi a pawm mai a, thik enah pawh a en ngai lemlo. Min hrethiam khawp mai. Mahse hei hun engemaw atang khan Tetea nupui bawk khan kan pa thlengin zuah hek lo, kan pahnih inhmangaihna chanchin leh eng eng emaw a lo fah nasa a, thik chin chu a nei ve ta,"

"Anih leh vawiin thleng hian enge in rilru puthmang?," tia ka han zawh leh chuan thawk lain a han ngawi vang vang phawt a, chutah,"Tunah chuan veng khat nih nen hmaichhanah pawh kan inhmu zeuh zeuh. Thiante ina han intawn fuh nawlh tepawh a awm thin a. Kum 10 liam hnuah pawh a rilru a la ngai rengin atan chuan hmeichhe hmeltha ber ka la ni reng tih kan thiante a lo la hrilh asin! Inbiak zui loh tawp ka duh a, kan pahnih chhungkua ve ve tan a hrisel lova ka hriat avangin. Mahse a har khawp asin, upain,"Di hluite antam tel chu a lian bik," an ti emni kha? Midang ang ngawt zawng a ni theilo a ni, a nih theih ngai pawh ka ring love" a han ti chuai raih a. Keiin ngawirengin a kut ka hmersak vang vang thung a.

Part - VI

Mahni buai buaiin ka buai ve a, kohhran lamah tepawh ka phak tawkin ka inhman ve avangin thian hluite han tlawh zuina hun pawh ka nei zui ta lem lova. Whatsapp lamah erawh group te siamin zan rei tak tak thlengin inbiak chang kan ngah mai. Fiamthu kharchhawng tur nei tha deuh, nuih pui bawk bawk tur rawn thawh thei reng an awm laiin Pathian thu lam hawi deuh chauh sawi tur neite leh zahmawh rawngkai, ngialngan tak ni silo, ngaihruat theih mahse huata lak chi ni silo sawi tur hre deuh thlengin kan awm nuk awm asin.

Ka ngaihtuahna luah ta daih chu social media tepawh a hmang thiam tan chuan a hlu mange tih hi a ni. Fb leh whatsapp te hi awmlo ta se khaw hrang hranga awm darh ta nuk, hna hrang hrang thawk zui ta keini pawlrualpui te tan hian kan vai maia han inchhuizuia inkawmzui har tur ziate ka ngaihtuah a, a lawmawm ka ti hle bawk a. A hmang thiam loten chhiat phah nana an hman ang erawh keini hovah chuan a awmlo turah ka ngai thung.

Chutih lai vek chuan Matlana pawhin nupui a nei fel ta bawk a. Ka hriat tirhah ka tawrh nat ang huin ka la na zui ta lemlo! Chu tak chu ani mak ka intihna chu! Tuar viau awm ka nih tehlul vei nen! An inneih niah pawh ka tel pui thlap; mak takin ka thik miah lo nia mawle!! Nui hawr hawr chungin single ngatin an nupa chu thla ka lakpui thei nia! Zaktheilo min ti ru fe fe chu an tamin ka ring mahse kha chen lo inzui kan nihnaah leh thian ang deuh roha kan la in en zui zel avangin ka tih tur dik tak tiah ka inngai hmiah thung.

Ka inngaihtuah nasat phah ta hle bawk a. 'Hmangaihna' kan tih hi ang khat vek a nih si chuan Ricky-a, tlangval hmeltha leh tovin nuthlawi fa bik nei, a fa tur hrinsak thei lo chiang sa a pawm thlap theih lai leh; Sangtei'n naute lo piangchhuak tur tana an inhmangaihna a hlan hnu, chuti chunga vawiinah pasal tha tawpkhawk a neih hnu pawha a la hmangaih reng leh theihnghilh theih ngang loh mipa a tawn lai hian keia hmangaihna ve kha eng hmangaihna nge ni ta ngai? Keichuan dik nia ka hriat, ka chanvo nia ka hriat kha 'ka hmangaihna ve' nen khan ka thleng phal hauh lo a nih kha!

Ruah a sur avangin taxi lain kan college lam pana kan tlan lai chuan mi pakhat hian ka chuanna taxi chu a lo phar vah a. Ka hire a nih avangin driver chuan chu passenger chu a lak tur leh tur loh min rawn hmasa zet a. Chutiang ruahsur hnuaia din hrehawm tur zia hriatpuiin, a kal duhna lam zawta phur tel ve turin ka ti ta ngawt a. Kan kalna lam thova kal tur a nih avangin driver pawh chuan a phur tel ve ta a.

Ruah sur hnuaiah chu passenger thar, pa lian lampang chu a rawn thu lut ve ta a. A palian thawkhat bawk aniang kan chuanna taxi chu a hniam ta suai hian ka hre nghe nghe a. Chutah a tarmit bun laia tui far chu han hrukfai pah hian,"Vawiin khua zet chu ka ring sual hle mai. Hetiang a nih tur hriata lo inrin lawk ve tur a nia," a ti zui nuah nuah a.

A hmel takah pawh ka va en chuang lemlo naa a rim chuan mi hneh ru riau nia! Mipa rimtui zet hi ka ngaithei thak lova, chutiangin thlan rim leh zakkha rim pawh ka ngaithei chuang der lo. Mipa rim tak, a ruka nam veng veng thei chauh emaw an hman hian ka ngaithei viau thung.

Taxi driver nen chuan an titi zui bawrh bawrh a. Kei erawh chuan taxi tukverh darthlalang lamah chuan hawichhuakin chu darthlalanga ruah luang dem dem chu ka thlir veuh veuh thung a. Keimah leh keimah ka inkawm rilru melh melh pawh a ni chiah lo lungkham nei lemlo thawveng rilru takin ka thu mawl tawp mai a ni ber. Chutah ka phone a rawn ri ta thut a, ka phu chiang lutuk chuan ka malchunga file ka hum chu ka vawrh titih ta mai a. Ka bula thu awmah tak chuan a va fuh dawt lehnghal! Upat lamah ka che chhe ngang mai.

Ani chuan nuih hak pah hian,"Nichin atang tawh khan i melh ngai i melh rei ka ti reng a ni," tiin min han fiam ta zoh pek a. Amah tak chu ka en ta nge nge a. Patling kum 40 pel hret hmelpu, pa hmel zahawm leh ngainatawm tak hi a lo ni a. Chutah nui hak chungin ka phone chu ka chhan san ta a. Ka nu a lo ni a, ka thil dahthatna thenkhat a hriat mai loh vanga min rawn bia a lo ni a.

Ka tumram ka thleng ve ta hlawl a. Ruah chu a sur buan buan tawhlo naa a la tla phuar phuar a. Ka nihliap ah chu phawrhchhuakin ka kapparh nghal a. Chutah ka hnung atang hian,"Nihliap kha min zawn ve phal chuan I file kha ka lo kensak dawn che a mi?," fiamthu deuha rawn ti thawmah chuan ka han phu leh zuk pek a. Ka inchhuih thelh nghe nghe a. Ani chuan nui hak hak chung hian min rawn chelhin aw ka pawh ve hma hauh chuan ka nihliap hnuaiah chuan a rawn ding ve ta der mai a.

"Kan kal duhna a inan ka va ring lo em," ka lo ti hlak a. Ani chuan nui chung bawk hian,"Henglai thleng thlenga taxi-a kal chuan helai bak hi han kalna tur a tamin ka ring lemlo," tih pahin ka thawhna college lam chu a han kawk vah a. Mumal lo zetin ka bu liam ta ngawt a. Vawiin chu ka che chhe lutuk reng reng a, ngawih mai chu ka tan a tha ber awm asin. Ani pawh chu ngawi zuiin ngawirengin nihliap chu inzawnin kan kal dun ta a. A pa lian lutuk reng reng a, nu sang thlerh thlawrh nih loh nen min ti zam lutuk reng reng!

Part - VII

Ka kalpui pa nen chuan kan kalna a inang satliah mai a nilo, ka luhna staff room-ah thleng chuan a rawn lut zui ve ta zel a. Mak ti zeta hmai zangthal hawa ka han en chuan min nuih vur vur duh chauh lehnghal!

Chutah le, chu ka taxi chuanpui chu kan department head thar a nih thu an han sawi ta mai a nih chu! Chutah inhmel hriattirna an neih lai chuan zam angreng deuh hian ka kut chu ka han pharchhuak ve a, nghet charha min chibai pah hian, "Hei chu ka hria e," a han ti zui zat a. Kan thawhpuite chuan mak tih hmel deuh hian min lo en ha hlawm a. Za vaklo hian ka then vei sang a.

Mahni hna buai buaiin kan buai a, han inbiak lehna hun pawh nilengin kan nei mumal ta lova. Chhun chawlh lai, chu mithar chu kan Principal bula a awm hlana kan thawhpuite titi chuan rilru erawh a luah ru reuh reuh thung a. Amah chu mithiam tak, keini college ang, college naupang zawk leh te zawka an rawn dah ta mai mak an tih thute leh helaia an rawn sawn nachhanah politics leh thikthu a inrawlh thute an sawi ri nawk bawk a. Keimah ngeiin ka zawt chik a nih loh chuan midangin mi chanchin an sawi lai lo ngaihthlak vei kar hi ka ngainat zawng a nih loh avangin thildang ka buaipui san ta daih kha a nia.

Tlaiah ban a hun takah chuan kan thawhpuite nen chuan kan insiam sang sang a. Ke li nei an nih fur avangin chuang ve tura min sawm pawh an awm nual a. Kei erawhin ke li nei lei theia ka la inhriat loh avangin scooty ka hmang mai thin a. A tein traffic jam-ah pawh kan tlang zung zung bik a, khua a chhiain ruah a sur a nih loh chuan buaina ka nei ngai lem lo chu a nia.

Min sawm mahse kan veng kal tur erawh an nih hlawm loh avangin kawng laka chhuk ka ngaih leh tho dawn avangin lawm takin ka hnar hlawm a. Taxi ka chang leh ta nge nge a. Chutia taxi changa ka din lai chuan amah bawk chu a rawn lang leh nawlh a,"Vawiin chu kan pahnih bawkin taxi kan chang leh dawn a ni maw?," min zawt pawh ni chiah lo hian a han ti satliah a. Ka lo nuih sak ringawt a. Rei vak lovah chuan taxi a rawn kalin inthurual sa niawm tak hian kan lut dun leh mai bawk a.

Kal lam ang ngawt ni lovin kan titi ve zeuh zeuh a. A ngainatawmin mi han tawng chhuah tir dan riau a thiam a. Keimah hrim hrim hi mi tawng duh tak ka nih rualin hmelhriat vak loh bulah hi chuan han sawi mai tur ka hre ngailo tlangpui naa ani bulah chuan ka zam deuh naa ka titi ve ta bawrh bawrh a, hun rei tak lo inhre tawh ang maiin.

Kan veng thlen hma chiahah an awm nghe nghe a. A tlai tawh deuh avangin leh khua a thim tan deuh thet thet tawh avangin kan in thlenga min thlah hmasak phawt a tum thu a sawi tlat a, min thlah hmasa ta nge nge a, gentleman dik tak! Taxi fare lah chu ka pek ve a phallo bur bawk a. Tihluihnain a kutah cheng za ka hnawn lui a. An tlan liam dawnah chuan,"Naktukah kal hunah ruah a sur chuan min lo nghak ang che. Ka rawn lam dawn che nia," a ti deuh ngur mai a. Ka hnial naa,"I ho lutuk veng thenawm lawk kan nia, kan kalna tur lah thuhmun," a ti deuh tung si a. Ka hnial zui duh ta lova.

Ka hriat hauh lovin inchhungah chuan ka nui lut ver ver a. A chhan pawh a titi ka ngaihtuah chhuah vang a ni a. Ka nau pakhatin,"Eh! Vawiin chu i hmang nuam bawk a ni maw?," fiamthua min lo tih takah chuan ka zah zelah ka lei chhuah deuh tutin ka nui zui ta hmawn hmawn a. Mak tak chu nikhat chauh ka la hriat mipain min hneh em em chu a ni.

Zan mutnaah pawh ka ngaihtuahna atangin ka paih bo mai thei ta lo tawp! Ka let deuh tap tap a. Whatsapp lamah han tuan dawn ila ruah a sur avangin network lah chu a chhe em em bawk si! Nui vur vur chung,"Keini ang upa lam hi chu han inlak young viau pawh hi tum ila kum lam naupan tawh loh chuan a ngaihna a awmlo. Ka nau bike ka rawn khalhchhuak ve bawk a, ruahsur hnuaia invenna ken nachang hre velo ta chu khawlaiah ka kalsan a ngai leh ta mai mai kha a nia," a han tih satliah mai maite pawh kha ka hrechhuak vang vang mai a nih chu!

Ka ngaihtuahna atanga paih bo tumin ka han inthing ngial a. A kum ngaihtuahin tlangval a ni tawhlo tih chiang sa a nia, keiin hetia ka lo veia ka lo buaipui ve hi a hlawklo a ni tih ka inhrilh nawn mawlh mawlh a. Chutih rualin a tukah chuan ruah sur se, min rawn lam se ka ti ru em em thung lawi si! Ka ngaihtuah tak ber chu kum lam naupan lutuk tawh loh nen, nula senior tia an sawi kai hial nih ve tan lai, ka nuna mi pawimawh tumah an awm chuan si loh lai a nih avangin chu pa chuan ka rilru a hneh ru viau niin ka ngai. A hming ka sawi theihnghilh tak e 'Lalrinkima' a ni a. 'Sir Marina' tia hriat lar a ni.


Part - VIII

Zing ka han thanharh chuan ruah sur ri ka hre hmasa ber ti ila ka ngaichang hmasa ber a ni mah ang chu. Nui ru ver ver chung hian ka tho chhuak ta a. Rin aia ka thawh tlai deuh avangin ka chhungten chhung inkhawm hmang turin min nghak hial tawha ka rin avangin ka phe zui ta vat vat a.

Nidang anglo takin ka in uluk ru riau lehnghal! Keimah tak chu ka innuihzat ru viau naa zak kual rual ka ni tawhlo tih hi ka inhrilhru nawn mawlh mawlh a. Pawmlai nei a lo nih tak leh ka chawh deuh a ni mai a, a lo nilo a nih leh nikhat chauh ka la hriat pa chu ka rilru put hmang ka la hrilh mai dawn a ni. Nidanga ka hman duh zen zen loh lipstick sen hlar chu ka hmang zui nghe nghe a. Ka pian hi a inkhaithli thlarhin nalh lutuk lemlo naa keimah ngeiin thawmhnaw inhmeh intih deuh deuh leh chung thuamhnaw ka hak tawha ka inrintawk em em ziahna ka nei ve nual a. Rawng dum lam hi ka ngaina em em a, a chang zeuhin rawng lar vet vawt hi ka inbel ve zeuh zeuh bawk thin. Ka thuamhnaw tam zawk hi a dum lam an ni ber.

Han call dawnin a no ka nei miahlo bawk nen, ruah tla phuar phuar karah chuan amah chu ka nghak ru ve ta ringawt a. A hun takah kan kawta scorpio dum a rawn din takah chuan keipawhin nihliap khum chungin ka pan zui ta vat a. A palian tha bawk a, a motor rawn khalh nen chuan a inhmehin a pa hliah hliah hian ka hre pek. Min lo hmuh veleh nui sang chung hian 'Good Morning' a lo ti var a, keipawhin nui sang chung bawkin ka han chhang let ve a. Vawiin chuan nimin ang mai maiin ka in thunun theihnate ka hlauh mai mai tawh tur a nilo hi a ni tawp.

Chutah, "I lipstick rawng chu i inhmeh hle mai," a rawn tichhuak leh a. Ka va melh ralh a, min lo thlir vung vung hi a lo ni a. "Khua a chhe emai a, rawng lar deuh hian rilru ngui tur a veng deuh ang chu ka ti," tia ka chhan hnu chuan ka sawi chu min pawmpui niawn taka a han thlek bak hnuah chuan a motor chu a tinung zui ta a. Kawng tluanin kan titi ta zel a, keipawhin ka mize pangai chhuahin ka titi zui ta barh barh a. Fur lai kan ngaihdan leh ruahsur hnuaiah enge nuam kan tihzawngte kan sawi chul a. Kan rilru lah chu a la inang riau zui. In anglo chhun chu keiin ruahsur niin thatchhe taka mut zal mai mai paha thawnthubu chhiar ka duh laiin a ni erawh chuan thingpui leh a hmeh ilo nena intuituah paha board games engemaw ber khelh nuam a tih thu hi a ni.

Kar lovah kan college pawh kan thleng veleh ta mai bawk a. Tlaia ama ruala haw leh ngei turin min ti zui bawk a. Ka 'aw' rang kher asin. Kan hna lamah nilengin kan buai a, department khat ni mah ila mithar a nih avangin amah chu a buai zual emawni lehnghal ni. Han inkawm zuina hun pawh kan nei lemlo. Ka hriatchian erawh chu zirna lamah a tuiin mithiam dik tak a ni a, kalkawng velah pa kawm nuam leh fiamthu duh tak ni thin mahse a hun takah chuan a rilru zawng zawng zirna lamah a pe tih chu a ni.

Tlai lamah pawh kan haw rual leh ta ngei a. Sap hla nalh tak hi zawi tetein a play riai riai bawk a. Chhun lamah ka hah deuh vang nge kan music ngaihthlak vang zawk chuan ka tawng chak vak lova, ngawirengin ka thu hle hle mai a. Ka bianga zawitea rawn tawh zeuh pah hian,"I lung a va len hmel ve," a rawn ti sup a. Ama lama han thlek pah hian nui sak chung hian,"Leng hran love," ka ti tawi tak a. Kan ngawi zui leh ta mai bawk a.

"Fa engzahnge i neih tawh?," tiin ka zawt ta nge nge a. Nui vur vur chung bawk hian,"Ngawiteh fa nei turin nupui neih hmasak phawt a ngai a ni lawm ni?," tiin ka hriat chak leh hriat duh tak chu a rawn sawichhuak ta hlawl a. Mahse awihloh hmel taka ka ner lui sang chu a hmuhin,"Zawnglaiin zawn lai ka phur che tih i hre nange?," tiin min han zawt zui leh sak a. Keiin uar fahran hian,"I palianin i hmel lah a chhelo, i thiamna nena ngaihtuah chuan han tlangval hmel chu i pu vaklo alawm. Nula nangmah awh tum deuh deuh an tam awm tehlul nen," ka ti ve ngat a. "Ngawiteh, a hun laiin zirna lamah rilru zawng zawng ka pe a, ka zir zo ta maw tihah tlangval senior tiin min hlau leh hlawm si a," tiin amah chu a han insawisa zui a. A sawi ang chu a nilo tih ka hre kar thung. A chhan chu a mi hip a na lutuk reng reng a, kei ang thinlung sakhat tak pawh hetiang ka nih chuan hmeichhe dang phei chu chuti hlauh.

"Nang engatinge pasal i la neih loh?," tia min zawh takah chuan kei leh Matlana chanchin chu a tawi thei ang berin ka hrilh ta a. Mak ka inti! Ka chanchin midang bula sawi mai mai ngailo ka nih vei nen. A chek tlak tlak hnuah,"A zialo hle mai. A hmangaih che chuan i chhungte i hmangaihna rilru chu hriatthiamsak tur awm tak che chu a ni asin le," a han ti zui vung vung a. Keiin,"A.. kan inhmangaih tawklo a ni mahna khatiang vanga kan inthen theih chuan. Mite chuan an hmangaih takte pawm turin engkim an kalsan ngam thin a ni si a," ka han tih chuan min pawmpui ni awm takin a bu nghat nghat a.

Ka chhuk dawn tihah,"Matlana chu min inhmelhriattir ngei rawh aw," a han tih chuan zawhna zawt takin ka en let haw a. Nuisak chungin,"Lawmthu hrilh ka duh mawle," a han ti zui leh a. A ngaihna ka hrelo lehzual tih a hriat chuan,"Lo nei daih che sela chuan kei hian khawiah mah ka phurin ka titi pui lek awm silo che a," a han ti zui leh a. Ka rilruin 'Phurha titipui lek lek, pasal pawh nei ila thawhpuiten min phurin ka titi pui lovang tih pawh ni hleilo' ka tih zui nang nang lai chuan "Naktuk chu min lo nghak leh rawh aw," a han ti zui leh zat a. "Khua a that tawh ka va ring em," ka han tih chuan,"Ni 10 pawh lang se ka rawn lam thovang che," a ti zui ta hluk a. A thin pawh a ram ru ve fu a ni mahna, bakah a thu a duh ve hmel fu mai.

Part - IX

Tichuan hnial theih ni heklo nitin kan college lam pan chuan kan inphur ta zel a. Hun rei lote chhunga kan inhnaih lutuk erawh chu tha ka ti chiah lo naa keimah ka inthunun thei lawi silo. Kan inhnaih ka han tih hian taksa lamah han innek vel lam a ni lem lo. Ka hriat leh tawn china mipa gentleman ber mai, ni reilote chauh ka la hriat, hnathawhna lama ka chunga mi ni bawk nen innel tak leh inpawh em em maia kan han titi mawlh mawlh thinte chu a ni. Ka duh aiin ka rilru ka pe thuk der tawh mai si a thawhpui satliah, phungthluk satliah avang chauha kei hi hetianga min kawm a nih hlauh zawngin ka che chhe dawn em asin!

Tlaikhat kan haw lamah chuan mi hmuh lawk a ngaih thu leh muanchan kual lawk ka remchan leh chan lohte min zawt a. Ka aw ve mai bawk a. Restaurant pakhatah kan inzui lut ta zan zan a. Chutah chuan mi hmuh tur a neih vang a ni a. Amah ang rual vel pa pakhat leh a nupui leh an fate ni ngei awmte lo thutna lam chu kan pan ve ta a. An hmel leh incheina, hawiher atang hrim hrim pawh chuan an changkang thawkhatin ka han ring nghal ngawt pek a. A classmate hluite an nih thu leh London-ah an inbenbel thute leh Mizoram-ah an lo zin zawk thute sawiin min hmelhriattir a. Kei erawhchu a thawhpui leh thian ka nih thu a hrilh hlawm a. Chutah ka lama rawn siai sak chung hian,"A very special friend," tiin a han tlip leh ngat mai chu, ka thawk a chham lo chauh!!

Eng eng emaw eiin kan titi luam a. An felin kawm an nuam nupa hle bawk a. Kan thil ei tui viau vang nge chumite chhungkaw fel em vang nge a tawngkam tawite avang zawk chuan ni ka hlim ru em em ringawt mai. A ngaihzawng angin emaw min sawi chuanglo naa ka lawm thawkhat em asin! Ka hrechiang telh telh a, a hip a na ka ti telh telh mai zawng a nih hi!

Chutia ka ngaihtuahna kawm pah titiha ka awm lai chuan ka kutah chuan rawn vuanin,"Kan thiante hian engtikah nge an inah kan len theih ang an hre duh a nih chu?," tiin min rawn zawt ta thut a, ka phu zuk lo hlauh chu ka va lawm em! "In inkawmna ka dal mai mai ang che u. I remchan niah i leng mai ang chu?," ti a zawt pah titiha ka han chhan let takah chuan a nui sak a,"Tun achinah khawiahmah i tellovin ka kal tawh dawnlo," fiamthu hian a han ti hmasa te te a. Za vaklo hian ka lo nuih har har thung a. Chutah nu zawk chuan,"Nangmah nen ngat lo chuan a lo len kan phallo tawp ang. Chaw in rawn ei ngei a ngai ang," tiin min nawr ta tlat a. Pa zawkin a lo thlawp bawk si nen ka thutpui pa chuan min lo nuih titih bawk si a, ka aw ve ta nge nge a.

Chawlhni tlaiah chuan min rawn call leh ngat a, min rawn lam dawn thu leh kan tlai deuh a rin thute a rawn sawi bakah ka chhungte hrilhlawk turin min chah pah bawk a. Tichuan kan inphur chhuak leh ta nge nge a. Kan va lenna tepawh chu an lo fel leh em em a. Kan titi chul bawk a. An inpuia rawn haw an ni a, an chhungte an awm ve deuh laih laih bawk a. Dar 7:30 velah chawhmeh tuihnai tak tak tenen puar takin chaw kan ei bawk a. Chaw eikhama haw mai an lo phal awzawng lova. Kan thu hovin kan titi laih laih a. Nuam pawh ka tiin ka tlangnel vei viau.

Kan haw dawn meuh chuan zan dar 10 a lo ri tep tawh nghe nghe a. Haw kawngah chuan kan lenna chanchin sawiin kan titi zui bawrh bawrh a. Ka chak em em, ka tih ngam si loh chu ka chuanpuipa awma bei hle hle chu zu nia! Ka sawi theihnghilh, 'Fullmoon' a la ni zui! Thla eng em em hnuaiah chuan ka ngaihtuahnate chu a vakkual nasa ta mai a. Chutah motor a han din tak thutah chuan ngawireng hian ka va en ha a. Engmah sawi lo hian a lamah min pawt hnai thutin min fawp ta mial mial mai a. A tirah chuan ka hamhaih thut nen ka chechang lawk lova, a hnuah chuan ka theihtawpa uarin ka chhang ve ta nge nge a. Kan thawk a chham dun takah chuan kan inthlah ta hram a. Thaw hle hle chungin kan in en dun vang vang a, a ngai te bawkin bul kan tan tha leh ta nge nge a.

Kan inthlah hnuah pawh chuan kan la ngawi zui ta reng a. Ngawirengin thu kan sawidun a ni mahna! Chutah zawimuang zawk hian a kutzungtangin ka hmaite chu a han chhuikual ta den den a. Ka hmui a thlen chuan a tawp leh ta nge ngein a hmui bawkin a rawn chilh leh ta a. Rei mawi tawk hnuah chuan kan han inla hrang rih ta ve ve a. "Innei mai ang," a rawn tichhuak ta phut a! Chu kher kher zawng ka lo beisei lo tawp! Thla khat chauh kan la inhria! Thla khat chauh kan inngaizawng pawh a ni satliahlo thlakhat chuah kan la inhre takmeuh! Inneih a rawt chu a ni sia maw!? Chhan tumin ka ang zuau a, ngawi turin ka hmuiah a kut zungchal a rawn dah a. Ka ngawi zui ta hle hle a. Thla eng hnuaih chuan min thlir zui ta veng veng mai a nih chu! Ka hmuhtlak loh hian ka inring nasa si a, ka zam ngawih ngawih a ni tawp mai.

Rei tak min thlir hnuah chuan a hma anga bawka duhthawh hian min fawp zui leh ta a. Kan inthlah fel hnu chuan kan boruak tang lutuk tih reh tumin fiamthu hian,"Khatianga min thlir leh dawn chuan min hrilhlawk tawh ang che. Mahni tawka intuaihnum tepawh ka duh ve ang chu," ka han tih chuan nui hak chung hian,"Zanin ang tluka i hmelthat hi ka la hrelo," zawi sapin a ti ve mai a. "Tirawh i kal teh ang. Heta kan awm reng chuan a nilo lo kan ti palh ange," tih pahin a motor chu a tinung leh ta vat vat a. Kan tawng zui em em chuang lo. A duh dan angin a darah ka lu ka va nghat thlap mai a, zawimuangin kan tlan zui ta zel a. Min hmangaih leh min duh thu emaw pawh a la sawichhuak eih chuang lo naa amah chu ka hip ve tawk a ni tih ka hriatna avang chuan ka hlim veng veng tawp mai a ni.

Kan in kawt kan thlena chhuk ka han tum takah chuan min la thlehlel ngawih ngawih niawm hian min kuahbet ta tlat a. "Min zui haw mai rawh," a rawn tichhuak leh ta phut a. Chhan tumna pawh ka nei tawh lem lo, a chhan chu a rilru a sawichhuahna ve angah ka pawmsak mai. Chutah,"Thingpui rawn in ta che. Ka chhungte an la mengin ka ring. Kan mengrei thang a. Heitia kawta din reng chu a mawilo ang," tia ka sawm takah chuan min zui ve ta mai a. Ka kutah chuan a chelh tlat bawk a.

Inchhung kan han luh chuan an mu dawn hnai tawh a lo ni a. Ani pawh chu an bulah chuan thuin a titi zui nghal luam a. A hmain min rawn lam leh thlah pahin an inhmu zeuh zeuh tawh hlawm bawk a, inhmelhhriatlo ngawt chu an ni bik lemlo. Rei vaklo hnuah chuan min mutsan ta diak a. Matlana nena kan inthen hnuah phei chuan pasal nei turin min beisei zui vak ngam hlawm loh avangin chutia inleng ka nei ve chu an lawm ru viau pawh a ni mahna!

Thutthlengah inhnaih takin kan thu dun a, kan ngawi hle hle mai, ka kut zungtangte chu la hmu ngailo niawm tak hian hrual neuh neuh pahin a en veng veng a. Chutah han la kang zeuhin a hmuiah a han chuktuah vang vang mai a. A khat tawkin zanin atana a rilru luah ber nia lang chu a ti zeuh zeuh bawk a. Dar 12 a rik hnu chuan inthlahrung tak hian a dingchhuak ta nge nge a,"A zialo mange.. nula rim thanglo tih takah nangkher i lo ni nen dar zat enna chang pawh ka hre pek lova," a ti ta nuah nuah a. Kawngkhara a chhuah dawn chuan,"Naktukah ka rawn sawm ang che. Sawi tur tam tak ka nei naa zanin atan chuan han sawichhuah ngaihna ka hre tlat lo ka ngaihzawngnu," tih pahin a tawp nan zawitein ka biangah a rawn fawp zeuh a. Kan inmangtha ta a.

Part - X

Zan ka mutnaah techuan hlim lutuk vangin ka let ka let mai a nih chu! Matlana nen kha chen kan inzui chhung khan hetiang taka hlimna leh phurna hi ka neih ngai pawh ka hrelo. Ani nen kha chuan kan inkawmngeih a, inthianthat satliah kha duhtawk lovin kan inngaizawng zui ta mai nge ni ta tih keimah ka inzawt hial a, a chhanna phei chu tun maiah chuan ka hre chuang lem hlei lova. Ka hriatchian erawhchu ka awmdan leh ka lo dawnsawn dan a inang lo hle tih chu a ni. Marina khan a insumtheihna hloh ta se lo dang tur chuang leh tang tur chuang ka awmlo tih ka inhrechiang em em thung.

A tuk zingah thawh ka hai hlauh pek a, a biling a balangin ka insiam ta sawk sawk a. Lan that ka chak zual ni taka intuaina hun ka nei mumal talo chuan min ti lunghnur hle. A rawn thlen takah pawh chuan ka la inpeih lo fova, min nghah pahin ka nu thingpui hang dawm chungin ka pa a lo titipui thung a. Motor chhungah kan lut chiah tihah a indap ruk ruk a, nui var var chungin chocolate min pe ta mai! Lawm takin, no taka han melh sar sar pah hian ka nuih let sak a. Ngawi renga ka kut a hmer vang vang hnuah kan chhuak ta nge nge a.

Naupangchhia tawh lo ve ve, miin fiamthu deuha nula / tlangval siniar ( senior) an tih kaipha ve ve ngat ni mah ila kan la zam dun viau tho mai a nih chu! Tawngchhuak hmasa nih kan hlau nge ni kan ngawi dun reng a, kan rilru erawh a inhmu em em tho si. Traffic bengchheng tak hnuaiah chuan hla muang zawi dap ngaithla chungin kan tlan zel a, inbe miah lovin college kan thleng ta thak a. Kan chhuk dawnah erawh chuan tawi tek tawk tak hian,"Ka ngai che," min ti ta a,"Kei deuhin," uar tak hian ka lo ti let a. Staff room lam panin ngawirengin kan inzui lut ta a.

Khami ni atang khan karkhat zet a liam ta reng mai a. Min duh em em thu emaw min hmangaih thu emaw a la sawi ta lo cheu a, keipawhin. Kan rilru erawh a inhmu dun em em tih kan hre dun kar thung. A ngaihawmin min dawm thiam a, nitin chocloate min pe zui ngat ngat mai a. A chang changin rose par tlahlang nen. Kawng tluanin ka ngaihzawng a ni thin a, kan hnathawhna hmunah erawh chuan thawkho pangai angin min enin engemaw bik tak midang mit khamna tur angin emaw min cheibawl ngai hauhlo thung.

Tlailama khawilai emawa rei vaklo chhung han lenkual zeuh pawh kan nei bawk a. Zan hnih chu hemi karkhat chhung hian min rawn rim ve bawk a. Ka nuten min menpui chhung chuan satliah takin min kawm a, ka chhungte chu an pawimawh ber niawm takin a be lum lam a. An mut hnuah erawh khawvelah hian nungdam an awm ve talo emaw tih hial tur khawpin min duhna leh thlakhlelhna a lantir thin thung.

Tlaikhat kan hawlam chu lenkual paha inhnawhpuar nghal a rawt tlat mai a. "Ka thlah chauh che a, chawei tur ngawr ngawra haw hnuah rawn lawr leh nghal zel ka inthlahrung ve tho a, ka ngaih ang che pawhin ka rawn leng ngamlo zawk a. Vawiin chu pawnah inhnawhpuar ila, thlah pah chein ka lo leng zui mai dawn alawm," hnial theih hauh lovin a ti to mai a. Kan lengkual ta nge nge a.

Eng engemaw bazarah leikual ka ngaih avangin kan leikual zet a, chutah ama tul thilah kan inzui leh lawp lawp a. Nui huah huah chung hian,"Hmeichhe bazar zui hnu hnu hi a pa lo riauvin ka hre thin a, i bula awmrei theihna remchang a nih vang chauhin bazar pui loh mawlh che ka hlau ta vel a," tiin amah chu a insawisa a, "Nilengin inhmu phak leh inbe theiin kan awm ziah alawm. Pa lo deuha inhre chunga min zui kher a ngai chuang hleinem," tia ka han chhan chuan,"Kan hnathawhna hmunahte chuan midang mitmei ven kan ngai a, chuvangin lecturer dangte ang bakin ka be thei hleinem che," min ti let hluk a, keiin ka lo nuih let har har thung a. A fimkhur rah pawh kan tel reng a, tumahin min han dem fiam emaw han chhaih fiam emaw an la awm hauhlo.

Rin ai takin kan vakkual nasa angreng a, kea kal than vak tawh loh nen chuan ka hah deuh titih mai nghe nghe a. Ka hmel atangin a hrethei tehreng nge mawni inhnawhpuar tura kal a rawt ta vat a. Hmun thianghlim leh nuam tak, tlema mi zik hut hut lohna hmun a lo hre ru kiau a lo ni a. Fal nalhin tuma chimbuai lohvin kan thu fel ta a. Zawimuanga eiin pahin kan titi a, kan music ngainat zawng atangin kan eiduh zawng thlengin kan sawidun a. A bula awm hi a khamawm loh ngawih ngawih a ni deuh tawp mai a ni, a bak han sawifiah ngaihna ka hre biklo. Ka sawithiam dan berah chuan hmeichhiain kan duhthu kan han sam a, chutiang khatiang tak chuan kan ngaihzawngten min cheibawl se tia kan sam thin ang thlap hi a ni mai. A hriatnate a zau a, sawitur a ngah tehlul nen ka titi techu hrechak ber niawm tak hian min ngaichang thiam nia.

"Innei tawh mai ang," a rawn tichhuak leh phut a. "Engvangin maw?," tiin ka zawt let ve ngat a. "Engvannge ni chuang ang? Hneichhia leh mipa an inneiha pumkhata an insiam hialna thin chhan ang zawng zawng avang hian," a ti leh nghut a. Zan a rei tawh angreng a, ka chhungte pawh an mu reh thap tawh nghe nghe a. Min kuah behna atanga inlak hran hret pah hian,"Kan la inhriat rei loh chu thuhran, min hmangaih thu pawh vawikhat pawh sawi lovin inneih i han rawt hi chu a mak ka ti ve bawk a ni," tha takin ka ti leh a. "Nangpawhin min hmangaihthu i sawi bik a mi? Kan sawi leh sawi loh hian engmah a ti danglam lo. Ka awmdan atangin ka rilru i hre vek," a ti leh hmuk a. "Hria pawh ni tehreng ila i sawi avang khan i hek phah vak ami?," ka hnial hrat a chhuak leh ta. "Chutia ka sawi kher i phut chuan ka la hrilh khawp ang che," tih pah hian a tho thurh a, a kal ta daih a.

Part - XI

A tukah chuan dan pangai bawkin min rawn sawm leh a, a tihdan ngaitein "Good Morning," tih pahin chocolate bakah card lian vaklo hi min pe tel bawk a. Mak ti angreng deuh, zawhna zawt mitmeng taka ka han melh chuan zaizirin en mai turin min rawn a. Card min pe tel turin eng eng emaw day mah a nih loh bakah ka birthday pawh a nilo bawk nen mak ka ti rilru hle a. Ka han hawn chuan "I Love You Nanu," tih a lo ziak kalh a, a lam ka va melh chuan a lo faifuk raih duh chauh thung a. Hlim takin ka nuih ta sen sen a.

Tichuan a dan pangai bawkin hla a play in kan ngaithla leh dawn emaw tih nak laiin kawngtluan chuan engtika a lo record nge pawh hriat loh 'I Love You' a tihna chu kan ngaithla kawngtluan deuhthaw ta a nih chu! Tihtawp ka tumin ka kut a man bet tlat si a, ka titawp mai thei bik hauh silo. A em em lutuk hian ka hre bawk si a, kawng tluanin kan kut a insual thla a ni ber e. "Hmeichhia hi chu Pathian siam hnuhnun zawk tih takah in rilru te hian mipa hi a pha ve pek thin lova. A taka lantir ai chuan tawngkam thlum satliah hi in lawm zawk emawni tih tur emawni," min ti hluk duh lek a. "Ka tlawm e, ka tlawm e," ka tih chul hnuah chuan a hmet tawp ve ta hram a.

Nidang ang bawkin chumi ni pawh chuan kan hna lamah kan bur chawt ve ve a. Chumi ni chuan danglamna riau pakhat a neih pakhat erawh chu ka dawhkana lehkhabu ka dah pakhat karah chuan,"I love you Nanu," tih bawk hi ziakin a lo hnutchhiah leh ngat a. Ka va en phei chuan min lo siai sak a, hmui phun hian 'I love you too," ka va ti ve hram a. Ani a lo faifuk leh raih thung a, hehe!

Tlai kan haw kawngah chuan kan college chungchang leh kan department bika zirlai thenkhat chanchinte kan sawidun hlut a. Chutah thil hrechhuak thut ni awm tak hian a ngawi vung vung a, a dan pangai tein a thil record sa bawk chu min play khum leh ta a. "Em em a che, duhtawk ve em em tawh teh," ka ti vei hlak hlak a. A nui ruh ruh duh chauh lehnghal a. Pa zaidam leh kawm nuam, midangte leh a bikin hmeichhia kei chauh nilo pawh dah pawimawh thiam em em a nihnate chu ka hriatsa a ni naa vawiinah zet chuan pa luhlul leh ngeiawm thiam deuh a nihna chu ka hriat belhin ka hmachhawn a ni ber mai.

A duh chuan a ngeiawm thiam khawp mai. Em em a! Zan lamah thalai kan committee dawn avangin a tuka inhmu leh chauh tur kan ni a. Chutia kan committe lai chuan a khat tawkin whatsapp lamah thu ngaite bawk a rawn thawn leh ngat ngat pek a nih chu! Kan ban meuh chuan zan a rei viau tawh thin a, a la meng tih hriat tak hian a ngaitein a la rawn thawn ta zel a. Nikhat atan chuan a turu deuh chu a ni. Ka va call ta hial a, "Inneih chu i ngam tawh em?," min lo ti let tawng a. "Naktukah lamah hmaichhanah kan titi dawn nia hemi chungchangah hi chuan," tia mangtha ka tum chuan ngenngawl tak hian, "Hmet tawp rawh, ka rawn call let dawn che," a ti hmuk a, amah zawk chuan a titawp zui leh ta thova. Chutah a rawn call zui nghal zat a,"Muhil rawh, i thaw ri ka ngaithla dawn. I hnar rin leh rin lohte pawh inven lawk nan hriat lawk ka mamawh," fiamthu hian a rawn ti nghal hlut a. "I chhe roh," ka ti let hlak a,"Min duh tho kha," tiin min la rawn chhaih let zel a. "Duh e duh e.. ka hmangaih che mawle," thinrim deuh reuh hian ka ti zui leh hlak hlak a. "I hmel en aiin i thin a va chhe reuh," min la rawn ti let leh zel a. Engemaw a hriata zanin hian a chimawm em em le aw!? A tawngkam hawhin,"Min duh tho kha," ka ti let ve leh ngat a. Nui huk chung hian,"Hmeichhia hi chu in heti tlat! mipa nakruh atanga siam tih takah kan tihdan copy bak thiam in neilo," lehzel a!! A va han tawngtheiin a va han ngeiawm tehreng em, zing atanga zan thleng rak hian!!! Chhan ngaihna hre lovin ka ngawizui ta ngawt a, za deuh hian a rawn nuichhuak ta kur kur pek a nih chu! A va han chimawm uchuak tak em!

A tuk zingah chuan pangai takin kan indawngsawng a, ka thin erawh a la rim ru teuh thung. Ani erawhchu nimina mi nilo, a hmaa ka hriat thin pa tho kha a ni zui leh ta daih. Nimina ngeiawm thiam em em kha a phirpuipa niawm hiala mawi a ni! Ka insumthei ngang lova,"Nimin ang khan la chimawm zui zel la chuan aw..,"ka han ti thla ngawt a. A nui vur vur a,"Kha kha a ni lawm ni i beisei? An nagihzawngte tawh phawt an hmangaih thu hrilh kurluai thei mipa ang ka ni lo tih i hriat kha," a ti sam et a. "Chupawh nise min hmangaih thu sawichhuah chu enge harsa i tih em em?," ka ti let leh ngat a. "I a reuh lutuk. Vawi sang tam ka hrilh nawn thei che tih nikhat lek chhungin ka entir tawh kha. Thu maiina a sawichhuah zawh loh khawpa nasain ka nunah hian i pawimawh tih hre tur khawp chu i ni vein ka hria," dam thlup hian min ti zui leh a, ka ngawi ta hle hle a.

Thla hnih kan inzui tling ve ta hlawl mai. Kan thawhpuite pawhin engemaw han sawichhuah an chak tan viauin a hriat. Tlema mi chanchin sawi peih zual Jane-i phei chuan min zawt chak thin khawp tih ka hria. Mahse ka sawi tawh angin kan thawhpui dangte hmaah chuan anmahni nen ang khat thlapa min cheibawl avangin an tan pawh min rinhlelh ngawt nachhan tur a awm hleithei silo. Nitin kan kal leh haw dun chu veng inthenawm chet kan nih vangah an ngai ve deuh bawk si, min ringhlel ru deuh bawk si a ni ber e.

Marina chanchin min sawipui phet Jane-i chuan a tum zui zel a. A ngaizawng ru deuh emawni ka ti rilru hman rum rum a. Amah a chhelovin a inchei nalh thei si a, chuti taka a chanchin hriatchak bawk si chu ka thik ru ta deuh lek lek hial a. A atthlak angreng viau naa ka ngaihzawngpa chu kan college zirlai zawng zawng deuhthawin an star rawn bakah thakwtute lamah pawh a tla na viau tih ka hriatbelh zel bawk si a, ka rilru a hah ru vei phian a. Ama bula ka sawi lahin min nuih kur kur duh chauh lehnghal. "I à reuh lutuk emai a. Tute emaw ka mitmei ka hmuh deuh emaw nang aia ka biak that emaw an tana beiseiawma ka awm i hmuh chuah i duh tawkin i thik dawn zuk nia! Min star tih mai mai, intihtheih phah nan hmang ta che. Heng ho zawng zawng hi engahmah ngai eih lovin i tellovin ka awm theilo a nih lai laia," tiin min fiam let vel mai mai a.

Zankhat chu a rawn leng lut leh a. Dan pangaitein ka pa nen politics lam hawi sawiin an titi a. Chhungkua kan awmkim zan a nih avangin ka naute pawhin an lo zawm ve zeuh zeuh a. Chutah a ngawi vung vung a,"Palai rawn tir mai ta ila enge in ngaihdan ni ang le?," a rawn tichhuak phut pek a nih chu! Ka insum hmanlo ka lo te deuh that a. Ka pa chuan dam tak hian,"Nangni pahnih ngaihdan kha a pawimawh ber ang chu Marin. Naupang chhia in ni tawhlo ve ve a, in inngaina tawn tih pawh kan hrethiam ve thova. A innei turten hun in tih tawhte chuan i rawn tir mai a ni ang chu," a lo ti sam et a. "Mahse ka pa kan la inhre reilo lulai emai a. Mi pawhin em ema min ti anga sin," ka han tih chuan ka pa chuan,"Mi tana innei tur emawni in nih le?," min ti let thung a. Marina chuan min rawn nuih sawng a, ka tihngaihna hrelo chuan ka va chhiatkhum ta nghek ringawt a. Za fahran hian a nui zui ta chur chur a.

Innei turin rilru chu ka han pu ve chhin ta poh chu a ni a. Matlana ka neih lohna chhan, hlawh chungchang emaw kha kan pahnih karah hian kan sawiri chhin ngai lova. Amah hian engkim min hriatpui avangin sawidun tulah a ngailo a ni mahna. Ka naute zingah pahnihin Matlana nena kan inthen hnuah khan a nghet lem lovin hna chu an hmu ve ve tawh chu a nia, rinrawla han neih chi erawh an la hlawhchhuak em silo. Kan nuta neihchhun pawh hian kum hnih khat hnuah chuan a MCA zirlai hi a zo ve thei mai ang tihte ka rilruah a rawn lut zut zut a. Ka chhungte ka hmangaihna chuan kalsan harsa min tih tir em em mai a ni. A hmingin hna te hi lo nei velo ila pasal neih hi ka awlsam zawk hialin ka ring.

Chawlhni tlai a ni a, Marina nuin a fapa damloh thu sawiin min ngaih avanga min chah thu a rawn sawi ta mai! Kan inpawhin hun reilote chhungin inneih hial kan rel tawh lai, palai hmel hmuthei reng dinhmuna ka din lai hian a chhungte tumah ka la hmu lovin eng ang inah nge a seilen tih pawh ka lo la hriatpui miah lo tih ka hrechhuak zawk! Chung zawng zawng ka ngaihtuahnaa a rawn luh lai chuan chutia min ko meuh chu hlauhthawnnain ka khat lawi si!



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 3rd, 2016, 4:23 pm

Part - XII

Hlauthawng takin ka insiam sawk sawk a, ka inkhalh chhuak ta nghal a. An in awmna lai tak hi a hmain amahin min hrilh tawh a. Ka lenluh tepawh a phut ve thin a, a la hma lutuk tiin ka hnial zel thin kha a ni a. Zam ru em em chungin ka tlan ta zel a. Chawlhni a nih avangin inchei sa deuh rohin ka awm hlauh a, chuti nilo phei se chuan ka hmanhmawh lutuk khan ka nu ka hrilh hman awrh kha a ni si a.

An in kawt ka thleng ta chiah. Ka zam zual sauh. In lian tak leh mawi tak, kawtzawl zau taka pangpar chi hrang hrang vul chuk zingah chuan ka chuan fo na a motor chu hmulo ila an in ka hai emaw ka ti hial ang chu. Matlana nen khan kan dinhmun a inthlau emaw ka lo ti thin a, Marina nen chuan khiitaaah leh khuuutah tih ang vel kan ni pawnlam atanga han thlir mai pawhin. Mahse chung zawng zawng chu ngaihtuah thei ka ni rihlo, amah ka ngaihtuahna avang chuan hmanhmawh takin an kawtzawlah chuan ka tlan lut zui ta a.

Patling angreng tawh tak, sam tuak ve nual tawh, amah Marina ang tak hian pangpar tui a lo pe mek a. Min han hmuh velah chuan ka lam rawn pan nghalin a kut rawn pharchhuakin,"Nanu, chibai le. Marina pa ka nia," tiin min lo lawm a. Min lo hre nghal chat chu mak ka ti ru viau! A kut rawn pharchhuah chu lo chibai letin,"Chibai le. Enge a an Marina chuan?," tiin ka zawt let nghal vat a. Ka thlaphan rukna chu ka zep thei ngang lo. "E.. lehkhabu a chhiar lo maw?," tih pahin a ngawi det a. Ka zawhna chu hrethiam ta niawm tak hian,"A.. a zia ve zel e," a ti bah ta nak a, ka hlauthawn lutuk avang chuan an kawngkharpui lam panin ka tlan zui nghal a. A fapa chanchin min hrilha a zam dan atang khan a thalo viau niin a lang.

Chutah kawngkharah ka pen luh chiah chuan a nuin min lo dawngsawng ve ta thung a,"Nanu?," tiin a kut a rawn pharchhuak nghal a. Min chiang ngam chiahlo a ni mahna! Ka hnunga min rawn zui zel Marina pa chuan,"Khawnge i fapa?," tiin min lo dawngsawngtu Marina nu chu a han zawt nghal a. Kei lahin hlauthawng em em hian zawhnaa khatin ka lo melh ve kar bawk si. "Lo kal rawh helamah," dam thlapa tih pahin ka kutah a rawn kai a, ngawirengin ka zui zel a. Inchung lamah kan inzui chho ta a.

Chutah ka hmuh duhpa khuma a lo mu hlun ka hmuh chuan ka ding ta chawih a. "A eng chiah nge naa?," tih pahin khum lam chu ka pan nghal ta ruak ruak a. Chutah a nu chuan,"A engmah a na lo. Palai tirh hmaa hmuh ve che kan chak avangin lem a chang a nih kha," a rawn tichhuak ta mai. Pakhat nui kur kur chungin a rawn tho chhuak zui. Ka thinrim ka insum thei ta hauh lo! Ka bula lehkhabu awm remchang chuan ka vawm nghal bur! A nu chhuak thawmin a zui nghal. Pakhat lah nui chungin a kutin a lo indang hram hram a. Kei lahin tap purin ka vawm zui zel a. Engtik laiin nge ka bul a rawn thlen hman pawh ka hrelo, dam deuh hian min kuah bet ta hlu hlu a. Keilah ka tap zui fuih fuih a. "I chhe lutuk," tiin a awmah ka chum zui dawt dawt a. Ani thung chuan dim takin ka chalah te, ka samah techuan a fawp kual den den thung a.

A hnuah chuan ka zia ta deuh a. Amah chuan a bathroom lamah min hruaiin ka hmaite chu min phih sak ta nawk nawk a. Englai pawhin ka bag-ah make up ak lo ila chu ka che chhe khawp ang. Ka intuai that leh thuak thuak hnu chuan ngaihdamte min dil tha leh a. Keiin ka ngaidam mai duh bik der lo, khati taka hlauthawnga min siam avang khan ka thinrim tawn hi a phu ve em asin!

"Lokal rawh helamah hian, thlifim dawng la i zia sawng sawng mai ang," tiin a room zawmtu balcony lamah chuan min hruai chhuak ta nghal a. Chair buk thei inhungah chuan min nem thu nghalin ka bulah chuan a rawn thingthi a,"Keimah avanga khati taka i hlauthawng tih ka hmuh khan min hmangaih ve zia ka chiang zual sawt," a rawn ti sa sa a, la thinrim rilru takin lehlam ka hawisan hmak thung a. "I mawl tet tut emai a, khati zawng kher khera infiah," ka la ti tan tan a. "Tak takin maw ka chhungten an hmu ve chak che a. Sawm thatin i rawn kal duh si lova, ka bum chhuak ta mai che a nih kha," a ti dam ta thluam a. Ka sam thllin chhem len chu han huihthat zauh pah hian,"In ina i haw leh ka phallo ang tih erawh ka hlau khawp mai," a ti zui leh a. "Chutiang tak chuan kei hi i tan ka pawimawh takzet maw?," tiin ka zawt leh ngat a. "Tehreng mai. 'Love at first sight' an tih hi ka rinzawng a ni ngai eih lo a nia. Khami ni khan bike ka hawlchhuak lovang tih ka hlauhzia kha i hre kher lovang. Kha taxi-a ka rawn thut luh phat atang khan ka mitmei che a, pawn lam i hawi veng veng lai khan 'Hei hi ka nupui tur' tiin ka rilru ka lo siamfel daih tawh asin," a ti ta mai! "Ka va han awih em em love aw," uar fahran hian ka ti let nghek a. "Hei tak hi alawm mipa kan chungnun na chu. Kan rilru kan sawi chhuak ve mai mai ngailo mai mai alawm," tiin a nui var var thung a.

A hnu chuan a chhungte kan fin thla ve ta a. An felin an zau em em mai a, ka tei luh dan avang erawhchuan thupha an chawi mawlh mawlh thung a. Ka pualin zanriah an buatsaih a lo ni a. Ka zam ru viau naa an fel em avang chuan pangai takin, che chhe em em lovin ka awm theih phah a. Marina nu chuan perfume man to tham tak tur hi min pe bawk a. A zinna lama ka pual tur liau liauva a lei a ni awm e. An chhungkaw zei zia, an in leh lo, an bungrua zawng zawngte ka thlirkual erawh chuan ka te zual ngawih ngawihin ka inhre ru rauh rauh thung. He inchhung leh a chengte nen hian kan inmil chiah em tihte ka inzawt nawn mawlh mawlh a. An kawtah ke li nei ngawt pawh pathum a din laiin keini erawh ka hna kalna atana a tul avanga ka lei tak scooty bakah ka pain mi ta hlui a lei bike upa ve tawh tak bak kan nei der lo thung. Kan khawsak inthlauhna avang chuan ka zam thar leh ta riau mai pek a nih chu!

Pathian remruat ngei kan ni ange.. kan intawn atanga thla nga naah 'Tiam Tlat e' kan ti ve ta nge nge a. Min lawmpuitu thahnem takte zingah chuan ka bula palian tha tak, min chhuanga nalh ti taka min thlirtu hmel mawlh chu hmuh a va nuam em! "Zanin chu ka che na mai mai ang chu aw," tia min rawn hrilhruk su su lai chuan hawlo fahran hian ka lo ngaihmelh hnap thung a.

A tawp ta!

Link:
BBcode:
HTML:
Hide post links
Show post links

Freddy
Posts: 1
Joined: January 6th, 2017, 7:19 pm

Unread post by Freddy » January 9th, 2017, 12:54 pm

A va ngaih nawm thin tak em :)

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)