A TAWK TAWH EM EM LOVEM NI !? By Rosie L Ralte

Group siam tirh atanga like tu 1000 nei chin zawng zawng dahkhawmna
Ngaia
Site Admin
Posts: 25813
Joined: April 30th, 2016, 4:07 pm

A TAWK TAWH EM EM LOVEM NI !? By Rosie L Ralte

Unread post by Ngaia » May 13th, 2016, 7:12 pm

A TAWK TAWH EM EM LOVEM NI !?

Thuhma

Hetia thawnthu ningnel tete ziaka ka post ve tak zeuh zeuhah chuan an chanchin ziak tura min titu ka tawng ta zeuh zeuh a. Ka suangtuahna atanga ka ziahchhuah ngawt ai chuan a tak ngeia tute emaw hringnun thawnthu chu a ngaihnawmin lung a kuai zawk ngei ka ring bawk a. Kawng lehlamah thung chuan keini ang ziaktu puitling nilo, tui zawng a nih vanga hun remchanga ziak ve mai mai tan chuan ka suangtuahna ka duhtawka ka kaihkual angin a tak ngeia tute emaw chanchin ziah hi a lo awlsam reng reng lo hi a lo nia. Ka huphurh avangin bul ka tan lawk theih loh phah bawk a.

Tun tuma ka thawnthu post tur hi tu emaw chanchin behchhanin, amah hretuten amah a ni tih an hriat lohna tura tlem azawng phuah belh a ni e. Phone kaltlang chauha indawr kan ni a, a profile erawh ka hailet nual tih ka han inpuang ange. A changtupa hmel erawh tun thlengin ka hre ta chuanglo.

Part - I

Ka theihpatawpa nain ka nem let a. Ani lah chu ka chungah a rawn bawk titih deuh ur tawh bawk si. Kei hmeichhiah pawh nulian vaklo leh sa pan ve lam tan chuan awlsam taka han nemsawn mai theih a ni hauh lo. Ka tum a ruh em avangin ka nemsawn thei ta hram a. Ka thlan a sa phat phat bawk a, chu aimah chuan ka thinrimna chuan ka rilru a luah hneh zawk bawk.

Chutia ka han nemkian takah chuan thinrim avanga hmuihmai poh larh hian cho tak maiin ka en kal a, ani lah chuan thaw hulh hulh chungin min la kuah tak thuak thuak a! "Pasal ka neih hma chuan ka thianghlimna hi tu mipa mah ka pe dawnlo ka tih kha i theihnghilh pek elo?," thinrim sehchilh nawk nawkin ka han ti hrawk a. A lu a tuai vut vut a, "Kan inhmangaih tawna a tawk," tih pah chuan min rawn man bet leh thut a. Ka tal pit nghal phat a, ka ngaihdan a ni ta hauh lo mai a,"Vawiinah, tun darkar atang ngei hian kan inthen nghal ang," ka han ti leh thak a. Lungawi vaklo tih hriat deuh hian a inbeng that mawlh mawlh hnu chuan a chhuak ta a.

Hetiang hi ka vawikhat tawnna pawh a nilo. Mipa mizia hi a mak mange aw ka ti ru vawng vawng thin. Engatinge maw sex min hmanpui hi an tum kher zel le? Keima zirloh nge nianga mipa mizia ve hrim hrim? Ka theihtawpa ka invawn ve avangin mipat hmeichhiatna min hmanpui talh an tum avangin ka ngaihzawng ve tawh apiang tih theih deuhthaw ka then phah nia mawle! Mak tak a ni mak tak!

Mizoram chhimlam khaw pakhatah kan cheng a. Khawkhata nula langsar leh lar ber pawl ka nilo naa hriat erawh ka hlawh ve fu. Aizawl lamah college zo tawhin kan khaw lamah ka nu leh pate inchhung lam hna tul tula pui turin ka let leh a. Lehkhazir zawm emaw sawrkar hnathawh emaw ka tum lem lova, rualpawl nan college ka inzir chhuak ve a nih ber chu. Unau pali zinga a upa lam atanga chhiara pahnihna ka ni bawk.

Nikhua ka hriattheih tirh ata ti ila hmeichhiat mipatna lama ka rilru a thanharh ve tantirh atang tawh khan 'Pasal ka neih hma loh chuan ka invawng thianghlim ang' tiin ka intiam ve a. Ka thutiam vawnhim ka tumna lamah ngaihzawng erawh ka then phah fo ka tih tawh kha. Pawi tihna erawh ka nei em em chuang lo. Ka pasal tura ruat tak, inngaihzawn lai atanga sex min hmanpui phet tum velo, a hun tak nghak thleng thei khawpa mi insumthei hi khawilaiah emaw an awm khiau ka ring nghet ve bur.

Laltlanmawia nen hian thla thum vel awrh kan inzui ve hman a. Inchhungah kan rual neuh neuh a, a falin hun thawl tak kan la nei ngai lem lova. Kan khuaa dawrkai lianber pawl fapa a ni a. A larin ngaihzawng pawh a thlak awllo fo niawm a nia. An hausakna piah lamah a zei a, hmeichhe han tihlawm riau dan a thiam a. Kei ngei pawhin hriatloh karin ka rilru ka pe thuk hman fu.

Hunchep tak karah duhthawh deuha han infawh te chu thla thum ngawt inzui ve tawh ta chuan kan ti ve fo. A changa ka awmbawr han chul thuak thuak pawh a nei fo. Tunlai chhanah mi pawhin an ti alawm tih changchawiin ka ngaihaw ngai lemlo.

Vawiin hian a vawikhatna atan ka chhungte mo lawma an kalzawh avangin fianrial hunthawl tak kan nei hlauh a. Rin aiin a duhthawh ta zek a. Min fawh satliah bakah ka awmbawra a rawn zen luh pawh ka ngaihaw vak phal bik lova, a bak a tum zui ta kher erawh kha chu kan pahnih atana inthen hlenna tur a lo ni ta a nih hi.

Part -II

Laltlanmawia nena kan inthen hnuah thla a vei leh nual hman. Ngaihzawng dang han neih leh vat lam erawh a lang vak rihlo. Tunlai mi tawh phawt, khawpuia awm leh thingtlang kil zawka awm pawhin kan buaipui rawn 'Facebook' lamah ka tui thar ve hlauh a. Keima tawka ka inawmtleina tur tawk chu ka hmu ve em em mai a. Khawhar lo takin hun ka hmang zui zel a.

Nikhat chu ka thiannu Thuampuii a lo leng a. Nidang anglo takin kan titi bawrh bawrh hman ta hauh lo. Keimahni phone ve ve chu bih dun ngarin kan tuina lamah thudun reng siin kan bung dun ngat ngat a nih ber chu. A khat tawk hian a rawn nuichhuak leh kawr kawr thin a. Keipawhin chutia a rawn nuih leh thin takah chuan ka phone bih lai chu kalsanin a phone hmai lam chu ka va bih ve ta zeuh zeuh a. 'Sanga Chhangte' tih hian a thlalak thenkhatah nuihzatthlak deuh deuh, huatthlala silo hian a rawn comment thin a lo ni a. Keipawhin ka phone chu dawhkanah dah zuiin chumi lamah chuan ka rilru ka pe zui ta viau a.

A hnuah Thuampuii'n,"Amawi, hepa hi min rawn hnialpui ve teh. Ka hnial hneh reng renglo mai," a han tih takah chuan keiin,"Awi.. a zahthlak e a. Amah nen kan inhre ve silo," ka ti a. Aniin,"A ho lutuk. Keiman ka hria alawm," a tih tak tlatah chuan Thuampuii thlalak hovah chuan ka va comment zui ve ta nge nge a. Chumi chawhnu tluan, eirawngbawl hun hma zawng chu thildang ngaihtuah lek lovin kan inhnial tlang ta a. Kan nui zui kawr kawr reng bawk a.

Amah 'Sanga Chhangte' chuan friend request min rawn thawn nghal var a. Chutia darkar hnih khat chhung leka ka nel hman em vang nge pawh ka hrelo, lawm tak mai hian rang mangkhengin ka 'accept' zui ta nge nge a. Inbox lamah pawh kan inbe zui ta zeuh zeuh a. Kan innelin kan infiam chhunzawm bawrh bawrh reng a.

Mak deuh maiin chupa avang chuan online nuam ka ti zui ta viau nia! A online loh tum erawh chuan ka khua a har zui ta rauh rauh zel nia! A profile pawh ka ching let hneh ru fu bawk. A pa lian a, a hmel a tha vawr lo naa a hmel a ngainatawm khawp mai bawk a. Hmeichhe dangte nena an thlalak a dah em tihte mai mai chu ka chik zui ta em em mai a nih chu! A status leh thlalak vela comment atangtein hmeichhe dang a biak dante ka chik zui a, a dan pangaiin fiamthu deuh deuhin tupawh mai chu a chhang ni maiin a lang a. Inbox lamah a nghal ru fu a nih loh chuan han thik emaw mit han tikham em em tur ka hmu meuh lo.

Kan khuaah a nghet lova sawrkar hnathawkin Aizawl tlangval a rawn awm a ni awm e. Khaw khatah awm mah ila veng khat kan nih loh avangin a taka inhmuhna hun erawh kan la nei lemlo. A mi rawn biak thin danah pawh han huathlala zawng leh 'Duat' a pawng a puia rawn ti nghal duai duai chi emaw, a engahmah hmaa 'Muah' rawn ti nghal thawr chi a ni lemlo. Chuti chung chuan amah ngairu riau tura min siamdan erawh a thiam a nih hi hei a ruka ka vei zui tak viau danah hian.

Nikhat chu,"Zanah in veng lamah ka thianpa nula ka rawn rimpui dawn a. Ka rawn tlawhchhuak ve reng reng ang che ka tia. Rem i tih leh i no min lo pe la," tih hi inbox-ah a rawn thawn a. Inngaihtuah nawn eih lovin ka number ka pe nghal var a. Ka helhhawlh ru zui ta viau a. Ani erawh a ngawi zui ta veng veng thung. A online lova, min rawn be heklo.

Thimhlimah chuan an lo len takin tih thuah lo inchei vur anga lang si lova thing lo taka lan ka duh avangin ka inthlak sek a. A tawpah chuan ka lung a awi zui ve ta nge nge a. Ka mit erawh ka dan pangaiin ka hnawih dum tha leh viau. Ka inen sek a, lipgloss tlem ka han intah leh zeuh hnu chuan ka inpeih ru ta tawk a.

Ani lah a la ngawi zui ta vang vang a. Dar 8 a ri ta. Current a awmlo zui. Chutah a online loh bakah min la rawn biak loh fo avangin a ruka titau ru chungin mut mai ka tum ru ta ut ut a. Chutah zet chuan min rawn be ta hlawl a. Zan dar 8:20 ah, emergency light eng hnuaia kan thut thap laiin kan in kawngkhar rawn kik dat dattu tlangval pahnihte chu an rawn lut ta zan zan a.

Thuthmunte an han remfel hnuah chuan thingpuite ka lumsak a. Tunhma atanga innel tawn tak niawm tak hian kan titi zui bawrh bawrh a. A takah pawh fiamthu a duh em avang chuan kan nui ho leh dar dar thin nghe nghe a. Kan khua angah hi chuan a tlangpuia mi an la mut hma avangin zan dar 9 pelh awrhah min tinsan ta nghe nghe a.

An hawfel hnuah, kan thingpui inna te ka senghawi fel a, hmunte ka han phiahfel leh tete hnuah chuan ka mu zui ve ta a. Ka pain menrei min phalsak loh avangin rizai hnuaiah ka online zui leh hram pek a, ka dan pangai angin. Inbox lamah ama hnen ngei atangin,"I thlalak aiin a takah i tha fe. Ka rawn rim leh dawn khawp mai che," tih a lo awm ran a. Ka lawm ru vawng vawng hi a ni tawp mai a ni. Rei vaklo kan inbiak zui hnuah chuan a tuk zinga thawhhai ka hlauh avangin ka muhil ta nge nge a.


Part - III


A rawn bawhzui tha viau a, keilahin a ruka kha chen ka lo vei ruk ve ta chu a lawmna tur tawkin ka lo chhang ve zel a. A inhmuhte pawh kan inhmu zui chho ta zeuh zeuh a. A tir lamah tak chuan thiantha innel tak angin kan inen chho a. Mahse duh leh duh inang kan nih vang nge ni reirial lovin chumi khami ni atang khan kan inngaizawng tan tih fak tur awm chiah silovin hriat loh karin kan lo inzui ngun ta viau mai a.

Kan inzui satliah mai a nilo, zawiawiin kan lo kalthui hman viau a lo ni. Hun leh hmun remchang lah kan hredun thei viau lehnghal a; kan inhmuh sek bakah kan inhmuh loh karah fb lamah kan inbe awl lova. Zanrei tak tak thlengin kan 'chat' in thuthlum tinreng kan infah tawn a ni zui deuh ber mai. A tellova awm harsa ka ti ru tan ta riau a nih chu. Thildang vak ngaihtuah hleithei lovin ama lamah chuan ka rilru ka pe thuk zui ta viau a. A hnathawhna lamah an awl angreng a, hunawlah kan in a rawn thleng awl lova, a rawn kal hmanloh ni lahin chhuanlam ho tete siamin kei an office bul hnaiah ka inlan ve zeuh zeuh bawk a. Rei lote chhungin tute emaw mitkham khawp leh rinkai khawpin kan inzui ve ta der hi a lo ni a.

Nikhat insu turin kan pahnih chauhin kan khaw luite lamah kan inzui chhuak a. Khami ni tak khan insu ve an awm lo lehnghal a. Chaw pai meuha thawkchhuak kan nih avangin hmanhmawh lo fahran hian kan insu a. Kan insuk zawhah kan pho leh nghal vek bawk a. Ka insuk zinga ro hmasa bedsheet chu phahin kan chawpaite eipahin hahdam tak hian inngheng ar arin kan thu dun a.

Duh leh duh intawng, tuma mitmei ven tur awm ta bawklo chu duhthawh tak hian kan inkeih leh mawlh mawlh thin a. A kal thui telh telh a, mi chulkual ta ruai ruai a. Ka awmbawr velahte chuan a kut chu a vakkual ta ruai a. Keilahin han khapa han titawp turin ka insumtheihnate ka hlauh ve nasa tawh mai bawk si. Ka ngaihtuahnate chu sawmkhawmin ka lo invawn vena "Pasal ka neih hma loh chuan tu mipa mah ka chetsualpui lovang" ka tih thinte kha ka han hrechhuak veleh a. Chutah,"Sangte, tawp teh. Ka pasal hnenah chauh ka inpe ang tiin ka rilru ka siam tawh a nia," ka han tih chuan a aia uar sauh hian min fawp zui zel a, ka sawite chu hre awmin a awm lo. Lo danga titawp turin ka chakna zawng zawng ka hlauh zo tawhin ka inpe pumhlum tawp hi a ni tawh mai a; ka chhia leh tha hriatna tlem la awm ve chu sawmkhawmin, "A nih min nei ngei ngei rawh aw. Ka pasal tur nilo chetsualpui ka duhlo a nia," ka han ti leh tawk tawk a. Ka awte chu ngaithalatu neilo ang mai hian boruakah a thamral zui ta ni maiin ka hria.

Ka chhunga a rawn luh tak chiahah chuan ka na ti ka han eu zawk a; ka lo vawn ve fan thin, mipa tam tak ka lo then phah tawhna chu hun rei tak pawh ka la hriatloh mikhual tlangval hnenah chuan ka hlan fel ta der hi a lo ni a. Ka mittui a rawn luangchhuak ta ngiai ngiai a, lawm leh hlim vang nge rilru nat vang tih erawh ka hre thei chiah lo. Ka ngaihtuahnate chu a insual nuaih nuaih ni ber hian ka hria. Pawi ka tih rual rualin inchhirna em em ka nei zui tlatlo chu keimah ngei chuan mak ka inti. Ka roh ve ber ka chan tak avang chuan ka rilru a nain a hrehawm a, a tellova ka awmtheih lohna chhan mipa, ka hmangaih tak hnena ka thianghlimna ka hlan avang erawh chuan ka hlim ru viau lawi si!

Zan ka han mute chuan chhun lama kan hun hmandun dan kha ka chhuikir ta neuh neuh a. Inbox-ah,"Ka ta i ni, ka ta chauh," tih a rawn thawnte chuan mak tak mai hian phurna min siamsak a. Ka ngahtuah zawng ringawt pawhin ka mur seng seng thei nia! Mipa pakhat ta nia inhriatna chuan mak deuh maiin engemaw riau hian min fan tlat a, chu mipa 'Sangtea Chhangte' chu ka duh satliah mai a nilo, ka zawng zawngin ka hmangaih a ni tawp mai. A hma aia nasain ka ngaizual sauh a ni mai.

Vawikhat tihsualin vawi tamtak a hring an tih ang takin kha chen lo invawng ve mah ila chutia ka han temchhin ve takah chuan a hnu zel pawisak lohna a siam a lo ni a. Ani lahin a duh ka pek miau avangin hun remchang a bawhzui thiam nasa mai si a, kan inhmuin a remna hmun hmunah sex kan hmangzui a ni ta ngawt a. Keipawhin nuam ka ti telh telh a, chumi piah lamah chuan chu mipa chu ka hmangaih em vangin chutia kan awmdun chuan kan inhnaih zual sauha ka hriat avangin pawi tihna ka nei zui ta miahlo bawk a.

Kan thiante pawhin min chhaih zui peih viau a. Huat a hnehin ka hmangaih tak mipa nena min sawibel avang chuan ka lawm letling phian zel a. Keiin eng eng emaw sumdawnna tenau ka khawih a, ka mamawh ka intum thei viau a. Aniin hlawh a nei bawk a, kan pahniha kan khaw kawna thingpui dawra an neih tui tha tha han eidunte chu nuam kan ti a. Keipawh keima tawkah ka thau vei kawng kawng a. "Tunlai chu i va'n hmeltha," min titu ka tawng thei viau bawk. Ka thinlung hi hlimin a nui ru ver ver reng a, chu chu ka pawnlamah a lo langchhuak mai a lo ni si a.

Part - IV

Hetia inhnaih taka kan awm lai hian kan awmdan chuan ama fahrin ang tluk hiala min hmangaiha min enkawltu ka nutei beng a lo thleng ta tlat mai a. An ina kal turin phone-in min chah a, a pawimawh thu a sawinawn sek bawk a. Ngaihthat lohna engmah nei lovin rilru thawveng takin ka nutei te inlam chu ka pan a. Nidang ang bawkin thil thar min leisak leh emaw thil tui deuh eiturin min kovah ka ngai hmiah mai a.

Thawveng deuhin ka lut a, ka ri vei phar phar a. Ka nutei hmel erawh a thutak riau tih ka hmuh chuan tlemin ka tim leh ta deuh a. "Nute, i damsam nange?," tia ka han zawh chuan chiang deuha min rawn melh hrawk pah hian a hmaa thutna awm chu kawkin,"Thu rawh," ram hmak hian min han ti ta mai a. Ka phuzawk nghe nghe a.

Ngaihtha zatlo leh bet lo zeta ka thu chu chiang mangkhenga min enkal chung hian,"I ngaihzawng pain a duh duhnaah a hnuk kal mai che an tih hi a dik em?," min han ti leh ta hrawk mai a. Chhan ngaihna reng reng ka hrelo nia! Ka dangte chu a awk zota ni mai hian ka hria a; ka chhanna nghaka min melh khaitu chu a mitah pawh en let ngam tawh lovin"Aih," zawite hian ka han tichhuak thei ta hram a.

A thuthmun atang chuan a rawn inperh tho thak a,"Tette atanga beiseina sang tak nena ka lo thlir ve ngei kha i ni tak sia aw," tiin a han chek zui tlak tlak a. Chutah a ngawizui leh ta vang vang a. A veitawn thuak thuak bawk a. Kei lahin trik pawh ka ti ngam tawh der mai silo. "Nang kher kher chu hetianga mi sawikai tur hian ka lo ringlo che asin mawle. Mikhual tlangval, a mizia tak pawh tumahin an la hriatchian loh lehnghalin a duhna hmun hmunah, a duh hun hunah a mutpui che an tih hi a dik em?," thinrim awka vin thak hian a han tizui leh a. "Aih," ti chauha ka lo chhang chu englai takin nge ka bul a rawn thlen pawh ka hrelo, na tawk tak maiin ka biangah a rawn beng ta thuai mai a. Keia lo inringlo chu ka thutna thutthlengah chuan ka han tlu zui deuh nghe nghe a.

A hnuah pawh min beng zui nual nghe nghe a. Ka zak a; Sanga laka ka tlawm atanga a vawikhatna atan liau liau inchhirna rilru ka han pu zui ve ta nghe nghe a. "Nute, min ngaidam rawh," ka ti chhuak ta hram a. Ka tap zui ta hlarh hlarh a. Chumi hnuah chuan ka thutna ep thutthlengah chuan ngawireng hian a thu zui ta a.

A hnuah chuan dam deuh zawk hian,"Mi tumahin an hmulo che u emaw i tih lai khan Pathianin a hmureng che u tih i hria em? Mi tute emawin chiang taka in awmdan an sawitheih danah an lo hmu ru reng che u pawh a ni thei tih i hre lovem ni?," tiin zilh pahin min zawt zui leh a. La insut hraih hraih chung hian,"Nute, he pa hi ka hmangaih em a, khua ka hmulo a ni," ka han tichhuak ve hram a. Ani ka nutei erawhin a lu a thing zui nar nar a.

A hnu lamah chuan tha deuh hian min zilh chhunzawm a, zah avanga kimki chawih chawih chungin keiin ka lo ngaithla kar thung a. A nulian tha bawk a, a kutthlak a nat em avangin ka biang a ben nate chu a na tluk tluk mai bawk a. Ka nu leh pain hre ve ta se an rilru nat tur ziate; an fa hrin, kan unau zingah pawh an rin leh an nghahfak ve ka nih thute a sawizui a. Ka zawh ngial pawhin kan chanchin sawitu erawh min hrilh duh ta lo thung. Engemaw a awm leh a, ka nun khawloh chhunzawm zel chuan ka nu leh pate hnena a thlen tur thute, khawiahmah chhuak theilo tura min khuahkhirh tur thute leh ka phone min laksak tur thute sawiin min vau zui bawk a. A mi vauna chu engahvakmah ka ngailo zawk a, ka duhna lama ka tlan thui lutuk avanga min hmangaih em em tute rilru ka tihnatna erawh chuan zahna leh inthiamlohna nasa tak min thlen thung a. A hnua ka han hriat leh danin ka nutei hian an ina ka len tumin ka phone a lo en a, kan in text na a lo chhiar fuh palh a, chumi hnuah khawi khawi atangin emaw mi min sawina a lo hrebelh zel ni tur a ni.

Ka nutei kut ka tawrh hnu kha chuan keipawh tlemin ka han invawng fimkhur ta deuh a. A theih angin ka inla hrang lui hram hram a; harsa erawh ka ti ngang mai. Ani lahin thlem chitinin min thlem a, min kawih lunglen dan a thiam ngang mai si. Rei insum thei lova a hmaa kan lo dai fo tawh ramah chuan ka inhruai tir leh ta a, vawikhat mai nilo, vawi tam tak, a remna hmun apiangah a ni leh tawp mai. Inchhira inlamlet turin kan kal thui lutuk tawh tlat, awmzia a awm tawh lo.

Ka tan chuan mipa ka hmangaih ber hnena ka inhlan pumhlumna leh amah ka hnaih zualna, pumkhata min siama min phuar nghet zual sauh sauhtu a nih laiin a tan ve thung erawh chuan a tisa mamawhte phuhrukna, a chakna hrikthlakna ang lek, hmanrua ang mai chauh ka ni tih reng ka lo inhre silo!

Part - V

An contract a tawp lailawk avangin Aizawl lamah a hawphei a. Kan inbe chhunzawm zel naa engemaw network chianloh chhuanlamah a siamin, kan inbe tlem chho ta telh telh a. A rei zui ta vang vang mai a. Ka han phone ngial dawn pawhin ka be tlang hleithei ta hauh lo mai a. Ka ngaih a thalo ru ta hle mai a. A online ngai bawk siloh avangin han online chakna pawh ka neilo bawk a, ka online khat hle a. Ka khua a har vawng vawng hi a ni tawp mai. A tellovin engtinnge ka lo nun thin kha ka theihnghilh hmak deuhthaw a lo ni.

Ni engemawzah a liam hnuah, khawhar hnemah takmeuh, beiseina pawh nei em em chuang lo hian ka han online ve leh hram a. Ka fb loh reng avangin ka han keu kual thuak thuak a. Mikhual chante pawh ka chang rum rum hialin ka hria. Chutah le! Ka thilhmuh chuan min va han tiphuin min va han thawng kher kher em! Ka thinur bawk si chu ka alh pup pup ni ber hian ka hria a. Chu chu 'Sangtea Chhangte in a relationship with Bawihpuii Hnamte' tih hi a lo ni a.

Kha chen a reh vang vang a, min rawn ngaihvenin min rawn be miah lova, hetianga hmeichhe dang a lo hnimhnai kual hi ka beisei loh tawp a ni. Ka tlangvalpa a nih piah lamah ka pasal ang thawthangin keichuan ka ngai a. Ka hmangaih a, a lakah ui leh sumkar engmah nei lovin a mamawh ang angin ka inpe pumhlum tawp a nih laiin hetia ualau tak maia hmeichhe dang a han hnimhnai hian min ti zakin min ti thangtlawm a, ka na vawng vawng hi a ni tawp mai a ni. Kan thiante, kan awmdan engkim min hriatpuitute min ngaihdan tur zawng zawngte nen lam ka rilruah a rawn lut nghal chuai chuai a, na ka va han ti vawng vawng em!

Zah pawh dawn duh tawh lovin chu an status-ah chuan ka va comment ve ta ngat a. Chu hmeichhia, 'Bawihpuii Hnamte' chu inbox-ah ka va be zui a. Sangtea nena kan chanchin, kan kalthui tawh zia nen lam ka va hrilh vek a. Ani lah chuan tha tete hian engmah a lo hriat ve loh thu sawiin ngaihdam min rawn dil zui a. A hnuah chuan Sangtea pawhin a remove zui a, ngaihdam min rawn dil nghal bawk a. Mak tak maiin keilah chuan ka lo pawm leh thlap mai nia!

Ral atangin kan inbe zui tho naa khami ni hnulam atang kha chuan a taka min bum a ni, min phatsan han tih fak hleihtheih siloh khan ka rilru kha hlauhthawnnain a khat a. Ka thinlung zawng zawng ka lo pek miau tawh avangin ka hriselna thlengin a tuar zui ta zel a. Na ber sawi fak tur awm silo hian ka dam tha thei ta reng reng lo mai a, a ni telin ka awngrawp telh telh ta mai a. Chutia ka damloh thute a hriat chuan amah pawh chuan Aizawl doctor thate min lo rawn sakin damdawite thawnin min rawn ngaihsak zui viau a. A damdawi ka ngeih lam ai mahin min rawn ngaihsakna chuan min tilawm a, tlem chuan ka zia ve deuh phah a.

A hnuah min kan tur ringawtin a rawn zin leh vang vang a. Hemi tum hi chuan zah pawh ka dawn duh tawh lova, kan inah thlen tirin zan a riak nghe nghe a. Miin engtinnge min sawi ang tih lam ai chuan amah chan kha ka hlau em a, engmah ka ngaihtuah zui duh hauh lo. Tha takin kan inkawmin kan titi a, ka dam nghal sawng sawng hian ka hria. Mahse engati kher nge mawni tehreng ni a hma kan ang thei tlat lova, kan thu a inbat fu hleithei ta tlat lo mai a. Kan inhau chho titih ta hial a.

Chutah min runluih tur ngatin kha hmeichhia Bawihpuii Hnamte ngei kha min han biak khum ngat mai a. A hma pawha mahni lo maha rilru naa hrehawm sa nak laiin tawrh ngaihna reng reng ka hre lo nia! Ka thaw a hah zui a, ka talbuai ta vek mai a. Chutia amah avanga thawk pawh thaw hleitheilo mangang taka ka awm min hmuh chuan ngaihdam min han dil chhunzawm leh a. Keipawhin a hma ang bawka lo ngaidam lehin tha tetein kan awmzui leh ta a. Rei cham lovin min hawsan ta thuai a.

Aizawl lama a hawphei atanga kar hnih vel a ral leh meuh chuan ka ruak lo a ni tih ka inhrechhuak ta hlauh mai le! Kan pahniha inhmangaihna kara fa a nih avangin ka tan chuan a hlu em em a, ka hlimna leh lawmna belhchhahtu a ni. Ani thung chuan eizawnna nghet a la neih loh thu leh eng engemaw chhuanlam dang hmangin nupui nei thei dinhmuna a la din loh thu sawiin ka fa pai mek, ama fa chu titla turin min nawr ngat ngat thung a. Kei lahin engkim tawn huamin ka paitlang dawn tiin ka tang ve tlat a, naute pa ber erawh chuan a pawm thung silo. A hma aia rilru hahna leh thawpikna ruamah ka tlu lut thuk deuh deuh ni ta berin ka hria.


PART - VI

A pain a fa ka pai lai chu pai puitling lo turin min duh teh mahse pai puitlin ngei tumin ka rilru ka sawhnghet sauh sauh a. Chutih karah ka hriselna lam erawh a tlahniam telh telh thung a. Doctor kan rawn ngial hnuah ka naupai lai chu keima hriselna lamin a zir loh avangin ka pai puitling zo dawn chuanglo nia min hrilh tak avangin ui deuh chungin kawng dang awm heklo, thla thum hmel a hmu tan tihah kan titla ta nge nge a.

Ka hriselna erawhin zia lam a pan hleithei chuang ta reng reng lova. Ka thaw a hahin nikhua ka hrelo leh mai thin a. Ka rilrua hrehawmna nasa tak chuan min ti na telh telh mai niin a lang a. Nau ka tihtlak hnu thla khat velah khawpui, hmunpuiah doctor an tha nge nge tiin Aizawl lamah inentir turin kan kal ta nge nge a.

Kan chhungte inah kan thleng a. Ka inentir pawh doctor-in tha taka min lo dawngsawngin damdawite pawh min lo chawh nual a. Ngaihtuah leh vei nei runa awmlo turin min chah mawlh mawlh bawk a. Kei erawhin chu chu ka thei silo. Ka tlangvalpa ka ngaihna leh chan ka hlauhna chuan ka luchhip atanga ka ke ler thleng mai hian min fanin min sawisa ni berin ka hria.

Kan kal chhan tak inentir lamte kan tizo tawh naa Aizawlah ka zin khat deuh tawh avangin la cham deuh tumin kan intintuah a. Min mawlhtu awm ang maiin Sangtea te in tlawhchhuah ngei pawh ka tum ruh khawp mai bawk a. An address ka hriat lawk tawh avangin ka thiannu Baby nen va thawn thut kan tum ta nghe nghe a.

An in kawtah kan awm ta vang mai le! Chutah han pawngtawng luh ngawt mai chu tiin amah biak hmasak phawt kan rel leh a. Ani lahin ka phone a chhang thei mai lawk lo lehnghal. Chutah a chhan hnuah pawh chuan haw turin min ti a, keilahin zah buai ka tum peih tawh lova, "In inah hian ka rawn lut ngei ngei tur a ni," tiin ka kar ve tlat a. Amah ber erawh a rawn inlan duh ta hauhlo thung a. Baby-i'n hawsan mai a rawt naa keilahin chetsawn tumna reng reng ka neilo thung.

Khuain min thim hnan ta nge nge a. Kei erawh an in bulah amah nghakin ka la thu ta fan a. Zan tlai tawh takah a rawn inlan ve ta hlawl a. Chutia ka lo nghak tlat chu lawm lovin kut tepawh min thlak zui nual ta nghe nghe a. Hmangaihnaa tih atin ka awm a, ka à let tawp a ni ber. Chutianga kut hial min thlak hnuah pawh a hnuah ngaihdam min dil zuiin ka han ngaidam leh mai bawk a.

Chumi hnu chuan Baby te inlam panin kan inzui ta tham tham a. A tlai tawh avangin riak ve nghal mai turin kan sawm a. Ani pawhin rem a lo tive mai bawk a. Ka thiannu hi pasal nei tawh a ni a, a pasal a awmloh avangin an in luahah kan pathum chuan chhuatah mutna siamin kan mu tlang ta dal a. Chutah le! Zanlaiah ka han harh hlawl mai a. Ka tlangvalpa leh ka thiannu, pawmlai nei chu puan hnuaiah an lo inkhal a nih chu!

Ka thinur lutuk chu ka puakkeh dawn takngialin ka hria nia mawle! Thinrimna leh rilru nat vawng vawngna chuan min bual zo ta. Kan inhau zui ta chiam bawk a, kut min thlak zui leh nasa bawk. Chuti chung pawha he mipa ka la hmangaih ngawih ngawih hi a mak asin!

Hmana ka hriat thin tlangval fiamthu duh leh nelawm tak kha a duh leh mamawh ka pek a, a tellova ka han awm hleihtheih tak lohah chiah hian mithar hlawk, ka la hriat ngai loh ang hial zu ni a. Keiin chintawk nei lovin ka hmangaih miau si a, heng thil zawng zawng a thlen hnu pawh hian thlauhthla thei chuang hek lovi, kan la inngaihzawn chhunzawm ta zel a.


PART - VII

Kan khuaah a hnathawh lai contract an pawhsei sak leh avangin a rawn phei leh a. Kan inngaihzawn chhunzawm zel a. A hma ang tak tak erawhin kan inpawh thei tak tak tawhlo thung. Keiin a hma ang mai pawh nilovin a hma aia nasain ka hmangaih telh telh laiin ani erawh chuan min hlamchhiah telh telh thung niin a lang thung a. A hma aia nasaa ka ngaiha ka mamawh laiin sawifiah thiam theih chiah silo hian a nunah hlutna ka nei vaklo nia inhriatna ka nei chho ta zel a. Amaherawhchu ka hmangaihna a nasat em avangin a theih chhung ka nuna chelha phuarbeh tlat chu ka la tum ruh ta fan a.

Thla tam awm lovin Aizawl lamah min pheisan leh ta a. Tha deuhin kan inthlah liam a, a biakte pawh kan inbe pawp zui zel a. Ka ngaihzia leh lunglen zia chu sawilan kher ngai lovin min hriatsak awm e. Chutah thla tam pawh a la vei hmain facebook-ah bawk hmeichhe dang nena inkungkaih angin a rawn dah leh ta vung a nih chu! Hei bak baka min hnarna tha hi a awm thei tawh dawn em ni? Ka duh leh hmangaihzia a hrereng chunga min hmangaihna chu sawiloh tlem tala min lainatna chhete pawh a neilo emaw tih turin ka nat theih dan tur angin a han awm lui ngat zel hi chu haider zawh zozai a ni ta lo! Keiin eng ang pawhin min va awmsanin amah chan ka hlauhna avangin lo pawmin lo ngaidam zel pawh ni ila mihring induhtawkna hian chin tawk a lo neih ve miau avangin ka ui beh phak loh, ka thunun phak lohin kan inlaichinna chu a lo kehchhe ta nge nge a.

Nun thlakhlehna ka nei lova, hlim awmzia ka theihnghilh chhunzawm a. Ka hmelah nuihmel a langchhuak ngai ta lo! Nui ngai miau tawh hek lovi.. vawi engemawzah mahni intihhlum duhna rilru puin ka awmzui a. A changin ramhnuaiah te tih tur ber leh kalna tur ber pawh hre lovin ka tei rawlai a. Ka mihring puite bula awm chakna ka nei tlem ta hle a. Inawhhlum hial ka tum a nimahse Pathian hian ka nunah tum dang a nei nge ni ka thih a la rem tilo zawk, tute emaw hian min chhan hman leh tlat zel a nih chu! Vawikhat phei chu ka inawhhlum tum min chhan hmanin damdawiin min thlenpui avangin tlema tlemah ka nunna ka thlah lo chauh a ni. A chang chuan chutianga ka nunna lak ka tum min ti kaihhlaktute chungahte chuan ka thin a rim let lek lek thin nia!

Kan inngaihzawn lai khan, a duhthusam anga sex ka hmanpui hma leh hnu lamah pawh khan kan hmalam hun hmandun dan turte sawiin min tihlim em em thin kha a ni a. Kan pahniha chhungkua dina, kan kara fanau duhawm tak takte lo pian hun turte kha kan thlirin duhthu kan sam dun thin asin le! Dawt thu hmangin hmalam min thlir pui a, ka beiseina leh duhthusamte chu meikhu ang maiin an zamral zo ta a ni si a.

Ka na a, ka thinlung a kehsawm a. Chutih karah thian tia ka lo chhal ve ngei pawhin ama bulah,"I fa a pai tak tak tih pawh chianna a awm loh kha," titea a bulah min lo sawizuina hriat phei chuan a aia na lehchuang tur hi ka awmlo! A chang chuan ka natna zawng zawng dahthaa phuba lak duhna rilru tepawh ka pu hial thin. A damchhung zawnga hlimni hmel hmu bik hauhlo tura a nuna inrawlh hial ka duh ut ut thin. A lakah thinrim eng ang mah ila ka hmangaih bang chuang si lova, phuba lak chu ka tan chuan thil theih loh tluk a ni.

Heti hian ka nihna leh hming tak thup mah ila tu emaw, he thawnthu lo chhiartu zingah hian keimah ka ni tih hrethiama min hmehbel thei in awm mahna. Hetia ka chanchin a chhe lai ber thlenga tarlan a, ziahchhuah hi ka zaklo a ni bik lo; mahse hmangaihna avanga ka tuarna leh natnate tu ka ni tih hre lova min tuarpuitute leh he ka chanchin avanga ka hmeichhiatpui pakhat chauh pawhin finna in lo chhar phah a, keima dinhmun anga ding velo tura a hunlaia talchhuah nachang in hriat ka duhsak vang che u a ka chanchin hi ziahtir ka ni.

Kum khat zen zawn a liam ta, he mipa nena kan inthenna hi. Keimah leh keimah hi inzawtin mipa sang tam tak zinga pakhat avanga ka tawrhna zozai hi A TAWK TAWH EM EM LOVEM NI !? tiin. Tunah chuan khawvelin a hnem theih loh hi Pathianah beiseina thar neiin nun bul tan that leh tum mekin zawi tetein hmalam ka pan ve beuh beuh a ni e. Keimah anga natna rawn tuar ve turin ka hmeichhiatpui pakhat pawh ka duhlo che u. Chutiang bawkin chhiartu mipa zingah ka dinhmun anga hmeichhia tute mah dintir lo turin ka chah nghal bawk che u a ni e.

A tawp ta.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)