KA ZINKAWNG By Rosie L Ralte

Group siam tirh atanga like tu 1000 nei chin zawng zawng dahkhawmna
Ngaia
Site Admin
Posts: 25813
Joined: April 30th, 2016, 4:07 pm

KA ZINKAWNG By Rosie L Ralte

Unread post by Ngaia » May 13th, 2016, 7:13 pm

PART - I

Ka han maimitchhing vang vang a. Ka thinlung chhunga hlimna ruk chuan ka pumin min tuam velin ka thla a muang hliah hliah bawk a. Naktuk hi ka pasal neih ni tur a ni a. Kan naupan laia 'fairy tale' thawnthu ka lo hriat thinte anga ka lo suangtuah ruk ve thin ka 'Prince Charming' ngei mai chuan min chhanchhuak dawn a ni si a. Ka helhhawlh chu ka let ka let a, ka bula ka thiante pahnih mu pawh chu an muttui thei bik lo aniang an rawn tal leh sat sat thin a.

Mi chuangtlai ve tak, fahrah, nuten keima tihsual reng vang ni lova ka chawrchhuahnain a zir tawk loh avanga an fate kawm atana an duh loh fo, ngaihsaktu mumal nei ngailo leh naupan tet atanga khawhar ru em em reng mai, tute tan maha tangkaina leh pawimawhna nei ve tak tak lova inngaia lo seilian ve kha khawtlangin pa thaa an sawi leh an zahkai nupui ka han ni mai dawn chu a ni si a! Ka hlimna nasat avang leh helhhawlh nasat avangin zan dar 12 ah pawh tihian muhil thei lovin ka la mu meng kar mai a nih hi.

Ka pa hi a hminga sawrkar hnathawk a ni a, zu a in nasa viau thin a, zu ngawlvei dik tak a ni a. Kei an fa neihchhun leh a nupui mamawh lamna tur zawng zawng a in zo leh mai zel a. Thla thar leh thla tawp lam hian kan inchhungah danglamna vak an nei ngai lova. Chaw em kan nghei lo naa kan dinhmun kha a tha lo ve hle thin a. Ka nu khan chawhmehte phurin a zual kuar thin a. Khang avang chauh khan chaw kan lo ngheilo a ni tih ka nuin min boral san hnu khan ka hrethiam ve chauh nghe nghe.

Ka nu lo tawrhchhel zia leh min lo hmangaih zia kha aw! Mi fate ei ang ka ei loh hlau leh ka rualawh hlauin zing leh tlaiah chawhmeh a zuar kual a, chhun lamah lah tute thawmhnawte emaw suk sakin emaw a tul ang ang thawkin a la inhlawh ziah lehnghal a. Ka pa khan min uap tlem emai a, zingkara rui lova a awm ve hunchhung bak kha chu ka pa nen khan kan intawng lo tih theih a ni. Zan lamah chuan ka mutthilh hnuah a rawn haw tlangpui a, ka nu khan inchhung sekrek khawih pahin zan rei tak tak thleng ka pa kha a lo nghak thin. Ka nu khan a phak ang tawk thawkin thiante rualawt lova min siam kha a tum ber a ni a, eng anga nasa pawhin thawk mahse kan ei leh in a lo hautak tham ve a, ka nu khan a hmuhphak tui tha tha kha min eitir a tum ve tlat zel avangin a thawhchhuah ang kha chu kan ei zo nghal zel a. A bak silhfen leh mamawh dang lamna kha kan nei ngai meuh lo.

Zankhat chu ka nu pum kha a na ta deuh thut ti ila a hma pawhin pum na a sawi zeuh zeuh tawh a, mahse a zia ve leh mai zel a. Khami zan tak khan a na a ti ta viau a. A mutheilo a tal a tal avangin keipawh ka muthei bik lova. Tui in turte suah sakin ka menpui ve ran a. Ka pa erawh kaihthawh zawh loh khawpin a muhil a hnar kuk kuk thung a. Ka nu na a vial a vial tawh bawk a, ka thlaphang khan ka pa kha kaihthawh theih inbeiseiin a hmaiah tuiin ka theh thul, a changin a samah na tak tak tein ka kek bawk a. Engmah lah a hrethei thak lo lehnghal. A tawpah ka nu mangangin kan thenawmte pun turin min tih takah chuan hlau hman ni tawh hek lovi, zan dar 12 pelh tawhah hmeichhe naupang kum 10 pel awrh kha ka kal ta nge nge a.

Kan thenawm chiahte in hi kan in atanga 20 ft awrh a ni naa zanlaia han kal nan chuan a lo hla khawp mai a. Ka nu ka ngaihtuah em avang erawh chuan ka inti huai chawp a, a tlanin ka tlan thleng ta thuai a. An in kawngkhar ka han kik tak det detah chuan an lo mu nghet vaklo nge ni U Mawitea ( an fapa tlangval) khan kawngkhar chu a rawn hawng ta thuai a. "Anu a dam lova, a pum a na lutuk lo tlan rawh," tih leh a bana pawh ka rual a. Kan thawm hriaiin a nu leh pa an rawn tho phei ve bawk a. An mi chhanna pawh nghak hman lovin kan in lam panin ka tlan haw leh ta nghal a. Anni pawhin min rawn zuinghal a ni ngei ang kan in kawngkhar kan thleng rual tlat. Ka nu chu khumah pawh mu tawh lovin chhuatah a lo vial a lo vial a. Kan thenawmte chhung chuan a rang thei ang berin ka nu chu damdawiin lam panin an hruai ta rum rum a. A hun tur reng a lo nih tawh vang nge ni damdawiin kan thlen chuan a mar an hmu ta lova.

Naupangtein ka neihchhun ka nu, khawvela ka awm ve a ni tih hriaa min ngaihsak tak taktu awmchhun ka chan ta! Ka tap tlawk tlawk a ni ber. Ka la naupan bakah fa mal ka ni a, ka pa ber kha beisei tur a awm ngai loh avangin ka nu kha ka engkima engkim a ni tawp kha a ni a. A tellova nun khingbai zia leh hrehawmzia kha vawiin ni thlengin sawifiah ngaihna ka la hrelo cheu! Zing thawhhlim atanga zan ka mut thleng khan ka tap ka tap mai a ni tawp.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 13th, 2016, 7:14 pm

PART - II

Ka nu boral hnuah chuan ka pa pawhin a tir chuan zu kha a han in tlem ve deuh ngial a. In lamah pawh a tawm phah ve deuh a. Rei phei chu a daih chuang hlei lova. Ka nu ber a han awm tak lovah khan a phak tawk chuan min han ngaihsak thar ve ngei a, mahse ka thinlunga amah huatna kha a awm ta deuh tlat a, ka hnaih hleithei reng reng lo. Amah vang chauha ka nu khan min boralsan nia ngaihna lian tak ka nei tlat a. Ka thinlung chhungril berah chuan ka pa kha ka ngaidam thei reng reng lo.

Thla khat erh awrh chauh a daih zui nghe nghe a. A ni telin a lo haw tlai leh ta telh telh a, hmeichhe naupang mahni chauha han awm rek rek kha chu thla hi a muang lo hluah hluah zel. Ka nu ka ngai lutuk kha ka tap muhil thak thak fo mai. Kan thenawmte bawk kha an fel a, min rawn ngaihtuahin min rawn thlithlai awllo thin. Keimahin eirawng ka la inbawl thiam si lova, ka pa haw hun hun kha eirawng kan bawl hun a ni mai a, zan dar 8 hmain in a lo haw ngai meuh lova, chutah a ruih thin em avangin eitlakin eirawng a bawl khat em em zui bawk si. Kan thenawmten an hriat fuh chinah tlai tin an ina chaweia min koh tak ziah avangin a tirah hreh ve teh mah ila ka ril a tam thin em avangin ka kal leh nge nge thin. Zing lamah erawh chuan ka pa a ruih ngailoh avangin eitur kan nei mumal ve thin deuh.

Ka nu kha pawl chhuak kohhran lam mi a nih avangin ka pa neih a duh tak tlatah khan a chhungten an tuithlar a, ka pa a neih ni atang khan vawikhatmah an inhmuin an inbe pawp leh ta lova. Ka piang ve tih pawh ka pite lam chuan an hre kherin ka ring lo. Ka pa erawh chu fahrah, a ni te ina lo seilian a ni thung a. Amahin zu a heh tak em avangin engemaw chinah ka nute khan an banbuai leh thin avangin an hrin loh fa na na na chu kan chhungkaw hnaih kha a hlauhin an hlau zui ta bawk a. Kan chhungkawte khan kan awm awmin kan awm ve naw naw a ni tawp mai.

Ka hriattheih chinah chhungkuaa hlim taka kan awma kan nuih tlan kha chu kutzungtang thliaka chhiar tham chauh a ni. Ka pa kha tlaktlailo teh mahse nupuite chunga kut lek mi a nilo hlauh a, innghahna tlak a awm nganglo tih lovah chuan harsatna em em a siam ngai hran lova. Ka nu khan rim takin hnathawk mahse hah hmel a pu ngai lovin a hlim reng thei thung a. Ka pa lakah pawh khan a thinrimin midangte bulah emaw ka bulah emaw ka pa sawichhe zawnga a tawng ka hre ngai hauh lo. Khavang khan a damlai na na na chuan ka pa kha ka mithmuhah rui chhe zawr reng ni mahse ka zah em em thova. Ka nuin min han boralsan takah erawh chuan ka pa kha ka nu thattu ang thawthangah ka ngaih zui phah ta hial a nih chu!

Ka piancham hrethiam rual ka nih ve tawh avangin ka nu boral hnua ka birthday a lo thlen hmasak berah khan zing atangin ka tap a, ka pa khan engtinngemaw a lo hriat ve tehreng ni tlaiah hma takah rui miah lovin a rawn haw a, arsa hi a rawn khai haw bawk a. Tlaiah kan pafain zanriah tuihnai tak kan kil dun ve ngat mai a. Khami ni khan ka pa kha mithar, ka la hriat ngai loh fate ngaihsaka hmangaih thei tak pa ang hialin ka hmuh phah nghe nghe a. A tukah erawh a ngai tein ka hriat thin ka pa bawk kha a han ni leh ta mai a, zanah ka nu ngaiin ka tap muhil leh ta zak zak zui a. Amaherawhchu khami kum atang khan ka pa khan ka piancham a lo thlen apiangin rui miah lovin a phak tawkin min lawmsak zui ta ziah thung.

Ka pa kha zu in mi a ni naa zing zu a in ngailo hlauh a. Zingkara ka pa kha nilengin ka ngai zui ngawih ngawih zel nia. Faifuk hlarh hlarha eirawngbawl pahin ka thuamhnaw leh ama thuamhnawte a su pah a, inchhung thlengin a phak ang tawkin a tifai bawk thin. Keiin inchhung chet ka zir chho ve bauh bauh bawk a, kan pafain zing karah khan kan in kha kan tifai vak thin. A dang beisei tur chuang neilo ta chuan ka pa kha haw ru mah ila ka thlahlel ve ngawih ngawih zel.

Kumkhat zet zawt a liam hnuah ka pa khan zankhat chu nupui a rawn ru haw ta tlat mai a. Ka pain ka muhil hnu kha min kai thovin,"Hei Rempui i nu thar tur ka rawn hruai haw a nia, ka nu han ti teh le," min tih tak sek sekah khan hreh chung chungin zawitein "Ka nu" ka han ti ve ngei a, min duat hmel takin ka biangah a rawn fawp zeuh a, "Muhil leh rawh naktuk lamah kan la inkawmchiang dawn nia," a han tih takah chuan thuawih takin ka muhil zui ve leh ta mai a.

Link:
BBcode:
HTML:
Hide post links
Show post links

Kimkimi Varte
Posts: 1
Joined: June 4th, 2016, 2:47 am

Unread post by Kimkimi Varte » June 5th, 2016, 10:41 pm

Khwi ge azwm naaa

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 6th, 2016, 8:59 pm

PART - III

Ka nu thar kha a hmel a tha roh khawp mai a, a ngo suah lehnghal a, "Engtinnge maw hetiang hian ka pa ang zu ngawlvei hi a neih duh le?," tiin ka inzawt ru ve nasa mai a. Ka mitah erawh chuan ka nu a tluklo nasa mai thung. "Ka nu mahin ka pa a neih duh chuan ani angin a neih duh lohna chhan tur a awm love," tihte ka ngaihtuah ta vel mai mai a.

A sual hranpa lova, nuhrawnin an pasal fate an tih duhdah ang boruak pawh ka tawng lem lo, min ngaihsak hlawl lo a ni tawl mai. Ka awm ve tih pawh kha a chang chuan a hrelo emawni tih tur a ni a, hnawk min ti awmin a awm ngai lo bawk a. Inah a tawm khat viau bawk a. Nu hausa tak a nih ka rin takna chu kan ei leh in a tui zuiin inchhung bungraw thar kan nei ta fo.

Ka pa erawh a la rui tluang zel a, a nupui thar nen pawh inthlahlel awm taka an awmzui ka hre meuh lo. Zing karah chuan a hmaa ka pa ang bawk kha niin kan pafain eirawngbawl pahin inte kan tifai dun leh a. Nu ber erawh kan pafaa kan chhuah dawnah a rawn tho chhuak chauh thin. Kei schoolah ka kal a, ka pa a hna lamah. Tlai lama in ka haw hi chuan eirawngbawl peih sa diam a lo awm thlap ta thung a, kha kha ka pa nupui neih leh zar ka zona awm ve chhun a ni deuh ber mai. Ka phak tawkin lehkha ka zir a, TV ka en leh zuai zuai hnua ka mitthilh hnuah an nupa khan an lo haw chauh thin.

Krismasa kawrthar ka neih bak pawh ka awm loh laiin ka nuhrawn khan thawmhnaw thar min lo lei ta zeuh zeuh a. Ka kutah erawh min hlan meuh lo, ka khumah a lo kalsan tawp thin. Chhungkua kha enge a niha a hlutna leh nawmnate kha ka theihnghilh titih ta deuh hialin ka hria. Keimaha awm melh melha lehkha zir char char kha ka hun hmandan nitin a ni ta mai a. Ka lehkha zirnaah erawh chuan hma ka sawn zui ta em em thung a. Kan school-ah khan thiantha deuh mai pahnih ka nei a, kan in a inhlat deuh avangin kan inkalpawh ngai meuh lova, inah thian ka kawmlo tluk a nih chu. Ka mamawh lamna tur tlem azawng ka pa khan thla thar hlawh a lak veleh min pe ve ta ziah bawk a. Ka mamawh zualpui lehkhapuan ilo keimahin ka inngaihtuah chawp mai zel a. Ka nuhrawn pawh khan a chang changin pawisa min pek phah ve ta zeuh zeuh bawk.

Khitiang khian tuma ngaihsak hlawh em em leh duat em em hlawh zui lovin ka lo thanglian a. A hnua ka han hriat leh danin ka nuhrawn kha zu supply thin leh a remchang a hmuh dan anga amah pawh inzuar mai thin a ni tih ka han hrezui a. Mak erawh ka ti vaklo, ka zah phah emaw ka rilru a nat phah pawh ka hrechuanglo. Ka pa ang pasala rawn nei chat duh kha chu hmeichhe tha tak a nih kha ka ringlo sa ve reng reng a nih kha.

Min ngaihsaktu ber thin kan thenawmte lah khan an pa ber hna avangin min pemsan ta daih bawk a. An in luah thin rawn luah tute lah khan ka nu leh pa chanchin an lo hriat atangin an fate ka hnaih an lo phal awkawng lova, keima tlat tlatin ka tla zui leh ta a. A hma aiin ka khua a har leh ta sawt tih mai a ni. Anni awm lai kha chuan an inah ka leng lut fova, anni pawhin min rawn thlithlai turin nikhata vawikhat ang talin a tu emaw ber kha an rawn dak lut ziah bawk kha a ni a.

Ka than thi neih tan ber khan hrehawm ka va han ti em! Zing ka tho sen ta luai mai si a, ka pa hnena han thlen chiah ka ngaih loh bakah ka hrilh ngam teuh mai si lova. Bathroomah lutin ka va tawm ta reng a, ka pa inthiar duhin min rawn ko leh dak dak thin a. A hnuah chuan tawm reng ngaihna awm heklo tap pur chungin ka chhuak ta a. Ka pa khan a chhan min zawt a, ka chhang ngam teuh si lova. A hnu deuah stayfree ngei hi a rawn hum lut ta tat tat a. Khatiang taka pa tlaktlai lo kha ni mahse ka mamawh vawrtawpah chuan 'ka pa' nge nge ka tih theihna turin min ngaihtuah ve chawk nia! A hmandan erawh min hrilh ngaihna a hriat loh avangin ka nu ( nuhrawn) kha kaithovin a va zawt dak dak a. Ani lah a la harh hleitheilo zui. A hnuah office lama an thawhpui hmeichhiate kha phone-in min zawhsak ta ngawt a.

Mihring tungchhova kal reng rengin an naupan lai kha an ngai chawk, vei leh enghelh engmah la nei lova zalen hunlai tiin. Kei vethung chuan ka naupanlai, ka nu min dampui chin zawng kha ka ngai em em thung. Ka nu chawhmeh chan ka puih rikngawt pawha ka nu hlim theih ziate kha aw! Thawnthu min hrilh peih em em a, ngaihnawm ti takin ka ngaithla deuh deuh thin a nih kha. Kan nufain fiamthute thawhin kan hlim theih ziate kha aw! Khang ang tluka ka damchhunga hun nuam kha awmin ka hrelo. Ka eichak zawng min zawt a, ka sawi apiang phur deuha min siamsak thinte, ka damloh tuma duat taka min enkawlte, lehkha min zirtir thin dan zawng zawngte kha ka tan chuan a aia ngaihawm awm leh chuang tawh lo tur khawpa hun hlu a ni tlat.

Link:
BBcode:
HTML:
Hide post links
Show post links

becky matei
Posts: 10
Joined: July 12th, 2016, 9:20 pm

Unread post by becky matei » July 16th, 2016, 9:28 pm

A ngaihnawm khawp mai.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 17th, 2016, 6:23 pm

PART - IV

Ka pa thawhchhuah ngawr ngawr kha chu nise college kal ñgaihna a awm kher lovang. A zu in kha a taksain a tuar bawk a, a in rei tawh bawk avangin a hma ang em emin a in nasa tawh lova. Tlemin pawisa pawh a nei ve thei deuh tawh naa a damdawi man leh kan ei leh inahte ral zel tur hi a ni a. High School ka kal tawp lamah lehkha zir pahin ar ka vulh a, vawkte pawh ka vulh pah lawp lawp bawk a. A note man erawh ka pa min tum sak a ni a. Ka nu (nuhrawn) erawh ka pawtbuai duhlo lui ve a. Hriatloh karin hun a lo kal ve duak duak a, college chu tluang takin ka zo ve thei ta hlauh mai a.

Khatia ka han graduate takah khan ka pa kha a hna lamah a thawk hlawk ta vaklo bawk nen khan an pute khan a aia kal turin rem min siam sak a. Ka kal zui ve ta lawp lawp a. Kum 2 erh awrh ka kal zui tihah tuna ka pasal tur lo nita U Ropuia pu, Pu Thantea ka pa te thawhpui khan a tupa nupui atana min awh thu min hrilhfiam zuk zuk thin a. Fiamthuah ngaiin ka nuih liam mai mai zel thung a, a chhan pawh ka tleirawl chhuahhlim atang tawhin tlema min hmu tai ve deuhtu pawh hian ka chawrhchhuahna an hriat khan min iai zui tlat zel tih ka hre ve miau a. "A hmel a chhe hranlo mawle, a pian pawh a nalh thlup thlup, a zia a zawiin a fel bawk si mahse..." tih kha ka hlawhzui zel a. Ngaihzawng em em nei lovin tihian ka tal ve nawk nawk a, hrehawm pawh ka ti hran lo. Khawhar rukna kha ka nuna bet tlat, ka thian tha ang maia ka lo nunpui tawh a ni tlat. Khatiang karah khan pahnih khat engkim hre chunga min iai lova min rim zui rengtu pawh an awm ve thova, keimah ber kha ka inringtawk lovin ka insit ru tlat si a, a hnua hnawl nih leh ai chuan bul tan pui loh law law kha tha zawkin ka hriat thin vangin thianthaah ka chhuah zui hlawm a ni ber mai.

Rin ai takin Pu Thantea khan a sawizui peih ta lehnghal a. A tupa pawh ka hriat loh bakah amah pawhin min hriat loh thu sawiin ka la nuih liam mai mai a. Ani Pu Thantea lah khan, "Ka tupa hi a lerh lo emai a, nupui nei tur hian kan chhungkuain kan nawr rawn luih luih a nia, officer ve meuh hian nupui tur nula pakhat pawh a rimthlu zolo ni tur a ni. Hman zanah pawh a beidawng ta deuh aniang "Ka pu min hmuhsak ang ang ka nei mai ang" a tih kha," tih pahin a nui zui huah huah a. "Kum 2 chhung ka thlithlai tawh che a, i fel zia leh i nuntlawm zia ka hmu a. Hei bak baka hmeichhe tha an awm lo ve ka lo ti ve hmiah mai asin," a tih takah chuan fiamthu zuina chiah ka ngai ta lova. "Pa Thante, ka pa i hriatchian em kha. Chutiang bawkin ka nu (nuhrawn) pawh. Tumahin min duh ve tak tak lo," ka ti ve ta nge nge a. A ngaihdan a lo nilo nasa mai a, a tupa chu kan ina a la rawn lenpui tur thu a sawizui ta nge nge a.

Enge beisei tur ni chiaha engtianga lo dawnsawn tur nge tih pawh ka inrin hman hmain a rawn lenpui ta nulh tak tak a. Chutianga mahni nupui tur pawh rimthlu zo theilo chu tlangval siniar (senior) lam, hmel pawh thalo ve thawkhat tak turah ka lo beisei sa mai a. Thlan tur dang nei chuanga ka inhriat loh avangin kei ve tehlul min nei duh chu ka nei mai tur alawm tih rilru hial ka lo pu ve ut ut hman tawh kha a ni a.

Ka rin ang leh beisei ang a nilo hulhual nia! A la upa lutuk hauh lova, kum 30 a pelhna a la tamlo tih a hriat viau a. A sang thain a inkhai thli zaih a. A hmel pawh a vantlang chunglam mah a ni nghe nghe a. A hawiher reng reng pawh chu a zang vah bawk a. Lo dawnsawn vak ngaihna pawh ka hre mai lo lehnghal. A tawng tam lo ngang mai thung a, a tawngchhuak chhun lah a khawng viau bawk. A chezia hrim hrim, a hawiher leh police officer a nihna kha a inrem hliah hliah nia. Ka zam chhe zui ta viau a, sawi tur ber pawh hre lovin ka ngawi zui rauh rauh a. Pu Thantea leh ka pa titi kan ngaithla dun a ni ringawt. Thingpui erawh tui takin ka lum thei hram a. Ka pain zu rim nam deuh ther thera a chibai lai pawh chuan hre awmin a awm hran lo bawk. Rei mawi tawk an len hnuah an haw ta a, kan inbe tlem khawp mai. Kei erawhin ka hmuh tirh atangin 'pa hliah hliah' hian ka hre nghal a, ka tuiral zui lo chauh a ni ber e.

An haw hnuah pawh ka vei zui ta deuh reuh reuh mai a. Ani vethung kha chuan min ngaihsak vak hmel pawh a put loh mai bakah a ngainat zawng ka nilo nge ni a engahmah kha min zawt mumal bawk si lova, ka lo ngaihdanah chuan chutia a pu ina a thlansak nei mai tur a nih chuan a kawppui awm mi ka ni em tih hre turin ka duhzawng leh ngainat zawngte min zawtin kan titi dun turah ka lo ngai a, a ni bawk silo. Beisei buai zuiloh mai chu thaa hriain ka ngaihtuahnaa a rawn luh apiangin thildang ka ngaihtuah san ta zel a.

A tuk tlai office kan bang, ka haw tur pawn ka chhuk chiah erawh ka phu nasa ngang mai. Kan office kawtah chuan a uniform ha apin bikeah a lo thu vang a, "Ka thlah ang che," a lo ti hmuk a. Ihe lovin ka inphurh tir zui ve mai a. Tlan pahin tlem tlemin kan titi ve a. Kan in kan thlena a bike hnung atanga ka chhukthlak chiah chuan,"Duty ka ngai a. Palai chu ka rawn tir dawn a nia, remlohna a awm em?," a ti leh hmuk a. Ka inrin hmain,"Awm lo," ka han ti ve ngawt a, engmah sawi zui lovin a tlanliam leh ta daih a. Ka hamhaih chu kan inchhunga luh nachang pawh ka hre lawk lo zui a.

Tichuan palai rawn tir rum rumin heti hian innei turin kan inpuahchah zui ta a. Amah nen phei chuan kan la inbe tlem zui viau a, mamawh ka nei em tih leh enge lei ngai awm tih vel hre tur ngawr ngawrin min rawn be zeuh zeuh a. A nelawm loh ngaihtuahin keilah chuan ka hmangaih nghal emawni tehreng ni nakin lawka ka pasal la ni mai tur a ni tih ka ngaihtuahna pawhin min ti phur tawk em em chu a ni si.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)