DINPUII - MI LUHLUL By Rosie L Ralte

Group siam tirh atanga like tu 1000 nei chin zawng zawng dahkhawmna
Ngaia
Site Admin
Posts: 25813
Joined: April 30th, 2016, 4:07 pm

DINPUII - MI LUHLUL By Rosie L Ralte

Unread post by Ngaia » May 13th, 2016, 7:15 pm

DINPUII - MI LUHLUL By Rosie L Ralte


Mizo nuah chuan hleitling pawl tak, sam sei, hang chhe lemlo, vun keu ve tak a ni a. A cher chhe zawk zawk lemlo bawk a. Kum 30 ral kai zet zawt a ni a. Inbual zo hlim tih hriat tak hian a samte chu a la huh hniang a. Han en mai chuan 'a va hmeltha e' tih ai mah chuan 'a nu hnup mai' tih a inhmeh mah zawk a. A hmaiah chuan make up pakhatmah a inbel lo bawk a.


Hmeichhe naupang 2 inang zet mai, kum 12 vel bawr chu an school uniform nen thaw deuh hiam hiam hian an rawn tlan lut hlawl a, "Anu.. anu" tih pah chuan an rawn pawm chang chang a. Ani chuan nui ver ver chung hian an pahniha biangah chuan a han fawp a. Anni pahnih chuan hlim tih hriat tak mai hian a biang lehlam lehlamah chuan an han fawp ve bawk a. "In ril a tam tawh awm si a, inthlak thuai thuai ula in eitur tui tak mai ka lo siam dim diam tawh a nia," tih pah chuan an school bag chu a lakthlak sak mawlh mawlh a.


A fanute pahnih eitur chhawp sak mawlh mawlh pah chuan, "Mampui, Bawihpui, u Ramtei thu lo awih rawh u aw, hei ka kal a hun tawh a, ka lo nghak char char che u a," a han ti leh thliam thliam a. Anni pawh chuan thuawih tih hriat takin nui ver ver chungin an lu an bu nghat nghat a. An ril a tam tih hriat takin an nuin chow a lo kan sak chu an ei nghal bawrh bawrh a.


A taxi chah a lo thleng ta bawk a, a eitur siam sa chu an nula awmpui Ramtei leh amah puitu an thenawm nula Tluangzeli nen chuan an hlang mawlh mawlh a. An han inhlan fel chuan zanriah rawn order tute inlam pan chuan an tlan ta vang vang a. Taxi hma lama darthlalangah chuan a han in en thuak a, a hmai engmah hnawih lo chu a va hmu thut a, nui hak chung hian,"Enteh, TZ, engmah ka inhnawihlo tih pawh ka lo theihnghilh leh hman alawm. A va buai theih char char ngai ve. Lehlamah chuan Pathian malsawmna kan dawn zara buai thei leh buaina tur nei chu kan ni lawi si a," zang vah hian a han ti a. Tluangzeli chuan, "Nia, U Mapuii chu i taima em a, malsawmna dawng tlak hi chu i ni ve chiang ngawt mai," a lo ti var a. Chutiang fakna a dawn avanga lawm avanga nui har har chungin a bag chu a han hai rak rak a, hmai hnawih ilo fahran chu phawrh chhuakin a han inhnawih mawlh mawlh a. "Enteh, taxi chuang chunga lipstick inhnawihte mai mai ka hnehsawh tawh asin," tih pahin a nula hruai chu a han nuih leh rih a. Tluangzeli chuan,"Taxi chuang chung lova inhnawihna hun nei ngawt lo che chuan," nui ar ar chung bawkin a lo ti a.


A hmel hlim tak leh a tawng chhuah apianga fiamthu duh hmel leh zaidam hmel tak a put avang chuan harsatna tam tak paltlang tawh a ni tih amah la hre ngai lotu tan chuan han hriat mai theih a ni lova. Farnu neih chhun duat sual, mi luhlul tak a ni thin tih reng a hriat tawh lo bawk. A hmel atang chuan mut kham vaklo hmel a pu a, a mitmeng pawh a dul deuh. Mahse a mitmenga hlimna erawh a hliah khuh zolo thung.


Catering service ti vein miin ruaitheh tenau, thianho leh chhungkaw chaw ei khawm nikhua, birthday leh pass lawm nikhuaahte hriat leh koh a hlawh ve em em a. Awl ni a nei meuh lo. A chang chuan hmun hla takah kal a ngaih chang a awm a, chung niah chuan hma takah a chhuak fo. An kal mekna pawh hi Aizawl chhim lamah daih a ni a, ani hmar lama awm tan chuan traffic jam tur ngiahtuah chunga hma taka a chhuah hi a awm viau a ni.


A rin lawk ang ngeiin traffic jam-ah an tang rei viau. Address a neih sa chu a han bih leh leh thuak a. Pu Rinzuala te in chu kawng kam mai a nih avangin hmuh a har dawnlo tih phei chu a hre sa tho. In rawng hnawih thar vuk mai, lian tha zet mai, chhawng thum lai mai kawta an han din dat takah chuan hmanhmawh takin an han inhlang thla sawk sawk a. Door bell chu a han hmet ri ral ral a. Pi Thangpuii, a hmaa Bawngkawn lama mi dinner ei tur a siam sak tuma tel ve, a eisiam fak zet maitu, chumi avanga order a hmuh phah takna chuan kawngka a lo hawn sak var a. Hlim hmelpu takin a lo chiau au a.

"In va rawn thleng hma thei zawk ve, tunlai traffic a jam nasat theih tehlul nen, lo lut rawh u," a lo ti nghal bawrh bawrh a. A tawng chhunzawm bawrh bawrh a,"Ka haihawt lutuk a, vawiina kan dinner ei chhan ber pawh hi ka hrilh mumal ta mang lo che a," a han tih chuan Mapuii chuan,"Ekhai, a chhan leh vang hriat kher a ngai hleinem, in tlai in puar chuan ka duhtawk viau a nia," a lo ti vat a.


Inchhungah chuan nula tlangval la naupan hmel deuh an lo kat nak a. An lo ri laih laih bawk a. Bedroom kawngkhar ni awm tak atang chuan pa hleitling tak, kum 40 mi vel awm hi a rawn chhuak a. Thangpuii chuan,"Mama, hei kan eitur pawh a rawn thleng der tawh a nih hi," a lo ti nghal bawrh bawrh a. Unau an ni tih chu a lo thlirtu tan chuan hai rual lohvin a hriat theih a. An hmai fang chu a inang viau. Unau hmeltha tak an ni. "A va lawmawm em! Kei hi hetiang lamah hian ka rual pawl vak lova. Hei Benjamin hian Class XII a rawn passed ve hlawl a. Phai lamah zir chhunzawm a tum si a, a ni hian chaw eikhawm a rawt a, ama han huaihawt vek hi a nia, a tello chuan keini pafa hi eng kan nilo a nia," dam thlupa tih pah hian Mapuii te lam chu a han melh thuak duh chauh a.


Part-II


Thangpuii chu a titi bawrh bawrh a. An eitur pekte chu a han tem chhin dan dan a,"Ka tih reng kha maw Mama, a siam tui asin," tiin a fak pah mawlh mawlh bawk a. Pawisa an inhlan fel lai chuan nu pakhat, kum 50 ral kai tawh hmel pu hi a rawn lut hlawl a. Mapuii chuan, "Awi, ka ni teh hlawl hi," a han ti a. Lo lut thar nu chuan,"Dinpui, nang elo? I bial a lo va zau ta ve," tiin a chhawn ve bawk a. An tihtur an zawh fel chuan Mapuii te pahnih chuan in lam an ngaihtuah bawk avangin an hawsan ta a.


Zanriah an eikham chuan Pu Rinzuala te sitting room-ah chuan Thangpuii, Pu Rinzuala leh Pi Latei chuan chaw eikham thingpui hang an dawm a. Pu Rinzuala chuan muang dap hian,"Ka u, kha i sawi ang ngei ngeiin eisiam a thiam hle mai a. Kan ti fuh khawp mai. Benjamin te thianho pawhin an ei hnem ve khawp kha," a ti a. "Ni dawn reng asin, Mazuii te inah reng kan ei hnem mai. Ti daih ila U Late, Mapuii khan 'Ka ni' ti tlat che a ka hriat chu," a lo ti zawm zat a.

"Nia, kan monu hlui alawm,"

"A ni maw? A chanchin hriat chian a va chakawm ve, pawi i tih loh chuan han sawi la"

"Pawi ti nang. He hmeichhe chanchin hi sawi dawn chuan sawi tur ka ngah lutuk a, in ngaithla peih dawn a mi?"

"Dawn lawm ni? Kan in ei puar peng pawng tawh bawk a, hetia thut muan diai diai bak tih tur pawh kan neih hran loh hi"


"Dinpuii hi ka u min chhangtu chiahte monu hlui a ni a. Amah hi unau 3 zinga a naupang ber, hmeichhe awmchhun, tlema piang hnufual deuh a ni nghe nghe a. Chhungkaw khawsak pangai tak an ni a. A pa hi High School-ah Head Master a ni thin a, a nu Primary School-ah zirtirtu. Duat rawn a hlawh a, puitlin pawh a puitling har khawp mai a. College a kal tan tirhah pawh a u te leh a nu leh pa malchunga la mu huat huat mai, intih nulat nachang pawh la hre lo, a duh apiang an lam sak ang kha a ni ve a. Mihring mihrinnaah a sual lova, a luhlul zia erawh a naupan lai atanga sawi hat kha a ni a.


Kan nau Lawmzuala erawh a aia u deuh a ni thung a. A hmel pawh chhe lem lo, ria sang deuh thlarh mai a ni a. Ruihtheih thil tilo, a phak tawka khawtlang leh Kohhran lama inhmang ve a ni a. A tleirawl chhuah ngaihzawng Linda nen hian veng chhung mite hriat vek khawpa inngaizawng nasa an ni a. MA an han passed rual a, kan nauva'n inneih tawh mai a duh laia Linda chhungte'n phai lamah lehkha zir zui tura an han tih boruakah khan an inti tau kual ta a. Linda lah a naupan lai atanga lehkha thiam em em, ngaihzawng urhsun taka a neih lai pawha a zirlai tih bahlah tir duh miahlo kha a lo ni ve bawk si a. Eng doctorate degree ber emaw neih kha a lo tum ruh ve nasa mai a. Khati khawpa inngaizawng nasa kha an inthen phah ta nghe nghe a.


Lawmzuala lungleng chuan a thianpa Thara (Dinpuii u) chu a han kawm ngeih chho thar leh a. An inah pawh a tal nasa ta viau a. Ani lungleng leh thinrim rilru teuh chuan tleirawl tuai tha ve tak Dinpuii chu a hmu tai chho tan ta deuh a. A han chhaih a han chhaih takah chuan ani Dinpuii, kum 18 tling ve uaih tawh; ngaihzawng la nei chhin miahlo chuan a lo haw phal vak bik lova, reilo te hnuah phei chuan a nep thei ta bik lova. An inngaizawng chho tan ta a.


Thara'n a hriat chuan a lawm lo nasa mai a. Lawmzuala chu a titi pui te te hnuah a farnu chu a zilh ta nghe nghe a,"Lawmzuala hian Linda bak a ngaihtuah thei chuang lovang, engahmah tak tak a ngai reng reng lovang che. Thlah hmak rawh. Ka farnu neihchhun tan hian amah aia tha, hmangaih taktu tur an awm em em ang," tiin. An hmangaih em mai a, a awm viau. Linda hi tello ta se chuan amah Lawmzuala ngawr ngawr chu a iai awm bik lem lova.


Ani tleirawl lung la fing lo ta chu Dinpuii run zawng tak a lo ni a; a u Thara'n Lawmzuala'n a duh tak tak lovang a han tih kha a duh tak tak zia nemngheh nan tan lak dan tur a ngaihtuah nasa ta mai a. Lawmzuala chu a han hrilh mai bawk a. Ani Lawmzuala lahin Linda han run luih a, a rilru tih nat sak kha a lo chak nasa mai a. Ani lung fing zawk ta na na na chuan phuba lak duh vang liau liauin inruk puiah a lo sawm ta ngat ngat mai a. Dinpuii rilru la thianghlim tak ngaihdan chuan Lawmzuala tan a tling tawk tih nemnghehna ang deuh kha a ni a. Thla thum awrh an inzui tihah an inru ta mai a.


Dinpuii chhungte tawrh nat zia chu maw.. khatih lai khan Dinpuii kha thi ta se, chu ai chuan an tuar na bik kher lovang. Hmel hlim tumahin an pu thei lova, khawtlang leh kohhran thiltihah an inkiltawih tlat a. A luhlul leh at vang a ni tih an hria a. Lawmzuala kha tlangval fel ve tak ni mahse Linda nena an chanchin tlang hriat a nih bakah Thara thianpa a lo ni nen an hrechiang em em mai si a. An han pawt then ren rawn a, an inneih pawh an remti ta chuang lova. La nula se, a rilru te han puitling deuhin college tal han kalchhuak se, pasal tha tak a la hmuh mai kha an beisei pui deuh a. Vanduaithlak nge kan tih dawn vanneihthlak takin Dinpuii a rai zui ta mai si a. Kan Lawmzuala neih loh hlau lah a phe sek mai bawk si a. An fate tih fahrah ai chuan tiin a chhungte pawhin lungsi vak lovin an inneih an remti ta nge nge a.


Part-III


Chawp leh chilh deuh maiin an inkutsuih ta rum rum a. Dinpuii a la a phiang phuang bawk a, an han inkutsuih ta rum rum mai leh inbuatsaihna mumal pawh an nei tha hmanlote kha eng teh ualah a ngai der lova. A ngaihzawng neih hmasak ber a lo ni bawk nen, an han innei ta kha a hlim hle ringawt mai a nih chu, khawngaihthlak hian! A pasala nu leh pa a han ko tirte khan a lei sei takin a han chhuah zui tut pek a, lawm a hlawh nghal hle.


Eirawngbawl thiam eih lo, thingpui lum thiam tawrh kha a ni a. A nuin,"Pasal nei rual pawh i la ni lova, eirawngbawl pawh i thiam reng reng si lova, min rawn pun fo suh," thinrim deuha a tih kha a la na viau mai bawk a. A mo thar tukah behlawi bai buhchiar turin an ti a, buhfai no 1 in behlawi tel khat a bai tehreng alawm. Chaw ei laiin an nui put put vek ni awm asin. Ka u nupui hi a bengvar hlauh a, buhfai tlawm zia leh ren a ngaih loh thute a sawi chul mai a ni awm asin.


Chutiang chuan kar khat chhung a thang tlawm deuh nge ni eirawngbawl a thiamlo tih a sawi duh thak lova, tumah lah a zawt duh hek lo. Siam tura an tih ang apiang erawh engtin tin emaw a siam ve zel a. Chawhmeh ei tlak thin hek lo, artui a hek duh hle an ti bawk, hehe. A luhlul vangin a sawi duhlo tih ka u nupui bawk hian a hrethiam hlauh mai a. Eirawngbawl hun laiin a zirtir tih tilang dawt lovin a bulah a tap ta deuh chawt a, eitlakin a siam ve thei thuai mai asin.


Ka u nupui, U Mamawii bawk hian a zir em em a. Hmeichhe tlawm tak mai, Pathian bel bul tlat mai, pasal fanaute ngaihtuah zet mi a ni a. Dinpuii fa mo hmasa ber a lo ni nen a hmangaih thiam viau mai bawk a. Amah Dinpuii a nute lakah a lo titau ve tum hrang nen an in mil ta phian a. Engkimah "Ka nu" a ti mawlh mawlh reng mai a. U Mamawii lawmah a tla thung a. Ka u tak pawh a tawng tlema a nih chuah chuah ngaihtuahin han tihlawm dan riaute kha a thiam a. Rin phak bakin mo nih a thiam daih mai a ni ber. A tul hunah a inthlahrun thiam viau laiin a inti neitu thiam viau lawi a. Ka u te nupa thinlung pawh a hneh nghal viau. Vawi hnih khat a raino lungno deuh nen a han titau ngut ngut tih loh phei chu han sawisel zuina tur vak a awm hauh lo.


Lawmzuala'n hna a han hmu zui ta hlauh a. A nupui pawh a ngaihsakin a duat thiam khawp mai a. An inngeih chho viau a. Keini pawhin kan beisei lawk loh ang takin nupa kawp chawi hlim tak an ni dawnin kan hria a. Kan lawm ve khawp mai a. Dinpuii hi a luhlul a chhuah chuan a rilru a kawih her mai mai theih loh tih lohah chuan a lo fel ve zek a. An pahnih han awm dun pawh an hmuhnawm fu. An inchhaihin an han inumkawi zuai zuai chang lah a tam bawk. Kan Lawmzuala tak pawh ani bulah chuan a naupangchhe tha leh a ni ber. Ama chhungte pawh an rilru a nem ta viau.


Nau a han veite kha kan chhung buai luaih luaih mai a. A na ti a tap pur tawh mai si a, Lawmzuala pek khan, "Kelpui nau vei i ang," ti mai maiin a la fiam zui a. A haw ngang mai a, a hnuah phei chuan kan nauva chu kan khap ta hial reng a. Rin phak bak khan a lo puiting lova, nupuite nau vei na tuar lo fiam kha chu a lutuk ve bawk a. Ani Lawmzuala thlaphang tihngaihna hrelo a lo ni a.


Nau a han nei ta a, phir a han hring hlauh mai a. Lawmzuala te unau mipa hlir 4 kara hmeichhe naute pahnih han awm ve ta ran mai kha chu a lawmawm ve bawk em asin. Inchhungah tu hmuh hmasak ber an lo ni a. Kan vaiin kan lawm em em vek mai a. Lehlamah Dinpuii phur erawh a rit ta viau thung. Kum naupangtein fa phir a han pawm hlauh mai a, engkim inzir chawp ngai vek a han ni a, nau pahnih pawm rual kha thil namai lo tak a ni. A tirah phei chuan han tah tak pir per chang pawh kha a nei zeuh zeuh awm asin.


Thudang deuhah ka han peng leh lawk ange. Ka hriatreng thin, vawiin thlenga ka ngaihtuah chhuah apiang maia min la tinui fotu hi a awm a. Ka ute nupa hi nupa inngeih deuh, inhau zen zen lo an ni a. Khatia Lawmzuala'n hna a han nei ve ta kha ka u khan an pafa hlawh tang kawpa Lawmzuala naute kha phai lama lehkhazir zawm ve turin rual a awh pui ta deuh a. U Mamawii ngaihdan a lo ni ve hauh lo mai a. Hun danga pasalte thu zawm thlep thin khan,"Hei nupui neiin fa an nei thar ve chauh a, ani hlawh rinchhana a naute tirh zawng engtinnge a nupui fanaute a enkawl ang? Amah pawhin phai lama zir miah lovin hna tha tak a hmuh theih chuan a naute pawhin an hmu ve em em ang," a ti kawh ve tlat mai a. Ni hnih vel chu an inbe hleithei meuh lova.


Hetih lai hian Dinpuii pain thingtlang a zin tuma mizo arpui tui lai a hawnsak kha an thlung tha ran mai a. Kar khat lai an kawl tawh nghe nghe a. Dinpuii'n,"Ka ni, zo-ar kan talh dawn chaw rawn ei rawh u," tia min sawm takah chuan kan phur khawp mai a. Chaw kan han ei ta alawm mawle. Ka u hi pa chaw lak tha deuh mai a ni a, zo ar buhchiarte phei chu a ngainat zawng tak a ni a. Dinpuii khan chaw bel vil a chuh tlat mai a. Ka u, titau ngawi run reng mai khan a chaw khawrh sa kha a han bar zo thuai mai a. "I pa'n chaw a duh belh e," kan han tih pawh khan,"Duh belh se chuan a lam ve mai ang," tih tanin a tang tlat mai a. Ka u pawh a ngawi reng thei ta bik lova, bul hmukin chaw a lam belh ta nge nge a.


Chumai a ni nang. U Mamawii hi sa duhtui deuh, a ti tha hlak lo ei duh hauh lo a ni a. Ka U erawh arsa a nih tawh chuan a thial, a thla ki leh a nghawng ilo ei ngei ngei tum a ni thung a. Dinpuii pek khan a pa kha duhsak em emin a ti tha tha kha a han suah sak a, a nu lah a pa duhzawng hlir. An nupain an inthleng tawn ta zak zak a; an boruak chhia a kian phah daih asin le.


Ka u te chhung mi ti khip khep deuh mai, ze zawi awi tak pawh a chawk phul hneh khawp a. Han zai awl awl te kha a ching a. A nuite kha a za bik ngawih ngawih hian a hriat thin. Zan khat lek ama nute in lama an han riah ve pawh hian ka u pui kha a awm theilo thin a, "A khawhar thlak emai," tiin a ko haw zung zung mai zel.


PART- IV


Engkim tluang deuhin a kal dawn emaw tih laiin beisei loh lamin thil a inher ta deuh tlat a. Khatia Dinpuii fa phir han pawm leh inchhung khurah hmeichhe dang a nu bak awm ve ta lo chu a hah em em mai a.Midang zawng, Lawmzuala leh ka u tih loh zawng lah nitin zirna lamah an kal a ngai bawk nen. Amah mi lerh chi a lo ni lo nen han intuai deuh hlarh hlarhte pawh a han inthlahdah chho ta deuh a. A pasal nitin a hna lama a kal a ngai bawk si a, ina a awm chhunah pawh tun hma anga han inchhaih a, han induatna hun ang kha an nei ta meuh lo a ni ber. Zawi zawiin Lawmzuala’n a nupui a thlakhlelhna a kiam tan ta a. Khawtlang leh Kohhran lama mi inhmang ve tak kha a ni bawk a, zan lamah pawh ina a nupui fanaute bula han awm ai chuan pawn lama chhuah kha a thlahlel ta viau a. Amah Dinpuii tak phei chuan a vir buai hneh em avangin a pasal mize han inthlak chho deuh ta leh in lama a awm tlem ta viau te pawh kha a hrethiam lawk lo nghe nghe a.


Khatiang boruak karah khan Linda chawlh hmangin a rawn haw chho hlauh ta lehnghal a. An thiante inah chaw an eikhawm tumin tum lawk loh deuhin an han inhmu fuh hlauh leh ta nghal a. A tir chuan an thinrim inbiak pawh an inbe mumal lova. Mahse veng khat na na na chu engemaw tiin an han intawng fuh ve leh nawlh zel a. Khati khawpa lo inngaizawng ve tawh ta chu an lo la inhaw phal tak tak lo hi a lo ni a. Thian satliah ang chuan an inen leh thei thuai nghe nghe a. Linda a zirna lam chhunzawma a chhuk thlak leh hnu pawhin an inbe chhunzawm ta zel a nih kha.


An fate kum an han tling chhova, buaipui an ngaih nep tak deuh hnuah khan Dinpuii khan a pasal mize han inthlak ta deuh kha a man thiam ve tan chauh nghe nghe a. Dik tak chuan khatih lai khan Lawmzuala kha pawn a chhuak nasa em em a, ina a awm ve chhunah pawh a mobile phone a hum ran reng ta vei bawk nen. Khatih lai khan tunlai angin facebook te an la buaipui lo naa text message hmangin an duh tawkin an titi thei ve bawk a. Dinpuii pawh a han titau ti tih ngut ngut a, mahse tunhma angin Lawmzuala’n a ngaihsak zui ta tlat lova.


Dinpuii a chhungte lama tlan tau mi a ni lova, a pasala nu nen an inpawh bawk a, an pa awmdana a lungawi vak loh thu pawh a han hrilh ta mai nghe nghe a. U Mamawii lahin han tih ngaihna vak a hre bik lova, an nupaa titi turin a rawn ta ngawt a. Dinpuii’n an pa han titi pui viau a tum pawhin ani lah a ne ne kual vel mai mai si a. An nufain an mang a ang ru viau a, kei an ina lut chhuak ta reng chu min han rawn ve nghe nghe a. A hma aia a pasal nasa lehzuala ngaihven turin ka rawn nghe nghe a.


Dinpuii la naupang viau mahse a pasal neih hnu hian a puitling chho ta riau a. Nupa nun zirtirna lam hawi lehkhabu te a khawn khawmin amah tak pawh a inchhiar zau phah hle a. Nupa hlawhtling tak nih theih dan thil tam tak a zir chhuak a ni ber e. U Mamawii’n fing takin a fapa ina a awm ve tawh chuan an fate a lo chuh ta zung zung a. Chutia a nupuiin a han ngaihven thar leh tak viauah chuan Lawmzuala pawh a nem chho leh ta viau. A hnaa a kal bak chu tul zualpui tih lohah chuan in lamah a tawm leh ta hrut hrut a. Chhungkaw hlim tak an han ni chho leh ta mai reng a. Hlim takin kum thum chhung ngawt mai an innei ve ta nghe nghe a.


Amah Dinpuii bawk hian pasal college lecturer neih uaih laiin amah berin college pawh zawh lohte kha a pasal hmai balh a hlau a. Nau pawm chungin a lehkhazir tepawh a han chhunzawm leh ta nghe nghe a. A buai si a, an pa pawhin tul kherin a hriatpui lem lova, mahsea tum a ruh em a, engtin emawni a han sual chho ve leh thei mai bawk a.


A ai ve reng kan ti dawn nge ni Linda bawk a rawn lang leh ta hlawl mai a. Hemi tum hi chuan Lawmzuala pawh a inveng thei viau. Amaherawhchu Linda hian an inthen hnuah ngaihzawng dang pakhat pawh han neisan hleithei lo khawpin a lo hmangaih ve tum hrang si a. Han chan hlawm tawp kha a lo phal awzawng lo a lo ni a. “Mi pasal i ni tawh a, tih buai che u ka tum love. Thian tha ang talin inbe chunzawm ang,” tiin a lo kar ve ngat ngat mai a. Lawmzuala pawhin khawngaihna rilru a pu tan leh ta mai nghe nghe a.


An inbe chho leh ta a. Engkimah mize inhre chiang sa, duhzawng leh ngainat zawng inang ta chu Lawmzuala tum lawk loh ang deuhin an lo inpawh hman leh ta viau nghe nghe a. Hemi tum hi chuan Dinpuii pawhin a man thiam thuai nghe nghe a. A theih tawpin tan a la a, a pasal pawh thlem titih hau titihin Linda nen inbe tawh lo turtein a han ngen bawk a. “Thian ang bakin kan inen lo ve, hlauthawng suh,” tih bak chhanna mumal erawh a dawng lo thung. Lehlamah chuan Lawmzuala chhanna pawh a dik fu lawi a. Han inngaizawng thar leh ta pawh an ni chiah chuang lova, thian hming puin an inhnaih chho leh tan hret hret a ni ber mai.


Mipa hi an lo mak khawp a, khati khawpa Dinpuii’n a hmangaiha a ngaihsak chung khan kan Lawmzuala zek zuk khan Linda kha zuk hnaih telh telh a mawle. U Mamawii nen pawh kan titi pui a, a pha zung zung mai a. Kei hi mi thin ram tih takah ka han hau deuh vak nghe nghe a. Linda chungah tak pawh ka thin a rim a, zu hauh maite kha ka duh nghe nghe a. Mahse amah Dinpuii’n, “Ka ni, U Linda thiam loh vek a ni bik hleinem. U Lawma hian zir lose u Linda hian eng a ti thei bik nang. Ka pasal thiam loh tel venaa midang zuk hauh a mawi love,” tiin min khap tlat mai si a, engtinmah ka zu ti ta bik lova.


A pasalin a thlakhlehna han tlahniam chho leh ta erawh a haider hlei thei bik si lova. A phak ang tawka tan a la chunga an inkar han zau leh chho ta khan a vaw na khawp mai a. Zan a mu hlei thei lovin chaw lah a ei hlei thei lo. A cher kiam mai a. A lainatawm asin. Kan Lawmzuala phiangsen lah khan chungte chu zu han hriatsak duh reng reng lova mawle!

A nuta te erawh chuan an farnu han cher chho ta viau chu an hmu thiam thuai a, a hah vangah ngaiin eitur tha tha an rawn inkhai luh chhawk sek a. Dinpuii lahin a nutate bulah a harsatna a sawi duh bik der silo. Amah ber khan a nuta ten an duat leh hmangaih zia a hrechiang ber si a, han hrilhin a pasal kha han zilh sak se ka tih tehreng nen. Ani lahin, “An remti lo chung ka at a leia ka neih a nia, aman chu ka tel tur alawm,’ tih tanin a tang tlat thung a.


Ni khat phei chu kan inah a rawn leng a, “Ka ni, ka bei dawng ta der mai. Ka theih tawp ka chhuah chunga rui lo hai lova midang ngai zawk na na na chu ka kian san mai a that ka ring,”a han ti hlawl nghe nghe a. Ka va han lainat kher em aw!


PART - V


Khatih chhoh lai tak khan kan veng Biak Inah Gospel Crusade an rawn nei hlauh mai a. Kan chhungkaw hovin kan chhim dal dal thin a. Dinpuii khan a la fuh ta em em mai a. “Mihring theihna hmangin ka pasal thinlung hneh tumin ka bei a, Pathian auvin ka dil ve thung tawh dawn a ni,”a ti a. Rilru na takin a tawngtai tan ta a.


Thla khat em pawh a vei hmain amah khan Pathian awmpuina a chang a, a innngaihtuah kun reng duh ta lova. A hmaa kan hriat thin, Dinpuii mi hlim thei tak bawk kha a han ni leh thei ta mai a. Hmuh theihin a taksate pawh a mam kawng kawng mai nghe nghe a. A pasal thinlung a la nei let reng reng lo, mahse ama tihdan takin, “Pathian hnenah ka pasal thinlung neih let nan ka dil a, ka dil loh zawk nun hahchawlhna min pe a ni,” a tih kha a takin a hmuh theih a.


Kan nauva kha ruihtheih thil mai nilo, zuk leh hmuam lamah pawh fihlim thah a ni a. Mihring mihrinnaah mi tha ve tak, mize zawi awi deuh mai a ni nghe nghe a. Nikhat chu kan inah a rawn tei lut hlawl mai a. A hna lama a buai ta nen, a hmain an nupa chungchangah ka lo lim hrep tawh avangin min tlawh khat ta khawp mai a. “Ka ni, a ngaihna ka va han hrelo tak em! Heti khawpa nupui fel leh min hmangaihtu ka nei chung hian Linda hi kan inthen atang khan nikhat pawh ka ngaihtuahna atang hian ka la paih bo theilo reng reng a nih chu! Ka theih patawpin ka inveng ve naa ka hlawhchham zel mai hi hrehawm ka ti. Dinpuii pawh hi ka zah zozai tawh lutuk. A la naupan tehlul nen kei a pasal, amah aia upa zawk min hmangaihna a lantir dante hi ka phu thlawt lo,” a han ti hlawl pek a nih kha! Kei lah ka lo ling nghal phat, “A ni reng ang chu, engahnge in inbiak pawh leh dawk dawk reng reng ni. Tullo leh lutuk emai,” ka lo ti bak hlar a. “Ka ni, kan inbiak leh vang a nilo. A tir phat atangin Linda hi ka la hmangaih reng asin mahse Dinpuii hian a zir em a, zawi zawiin ka theihnghilh chho mai dawn emaw ka inti a, a lo ni teuh silo. Ka phuloh nupui leh fanu hmeltha tak takte ka bula an mut tlar dal lai reng pawh hian Linda han ni zawk ta se tih hi ka ngaihtuahnaah a rawn lut zel a ni e” “I va han lak tlak loh ber mai em! Hmeichhe dang hmangaih chunga hmeichhe pakhat pawisawilo nun tih chhiat hi pawi i ti chai nange.” Ka han ti leh hlawih hlawih a. “Ka ni, pawi ka ti, hrehawm ka ti, ka inthiamlo ve tho asin,” tih bak chu min chhan ngaihna vak a hre bik lo.


Kum a vei a, Dinpuii chu an nupa karah thil thleng engmah awm lo ang maiin a awm chhunzawm zel a. A hlimin a nui bawrh bawrh a, eisiam lamah a tui thar ta vei bawk nen. Ama tawkah a inhambuai em em reng thei a. A pasal chu a hlim reng renglo tih erawh chu hmeichhe a lo ta chuan a hai reng reng lo thung. Lawmzuala erawh a inthlahrung tawlh tawlh thung a. Linda nen pawh an inbe meuh ta lo.


Tuk khat chu ka u in kan nupaa an ina kal vat tura min rawn tih takah chuan ngaih tha zat lovin kan va phei a. An lo thu ngawi thap hlawm a. Chhuanlamah Mampuii te unau chu ka han lam chul a, a pi (Dinpuii nu) zing karah a lo phei a, an in lamah a hruai phei tih min lo hrilh a. Dinpuii te nupa chu an room atangin mit bui lak hian an rawn chhuak bawk a. A ngaihna ka hrelo telh telh a. Ka u in, “Mapuii’n kan vaia hnenah thil sawi duh a nei a ni awm e,” a han ti boh a. Dinpuii chu ka va melh zauh a, tap nghek zo hlim hmel a pu a, chutiangin Lawmzuala pawh.


Kan vain an sitting room-ah chuan kan thu thap a. Dinpuii chuan a aw a han thian kharh kharh a, “Ka pa tak hi chu a bo viau maithei. Mahse ka nu leh ka ni chuan ka sawi tum hi min hriatthiampui ka ring thung,” a han chawl leh det a. “U Lawma leh u Linda innngaihzawn thin chanchin chu kan hriat hnu vek tho a nih kha. Kei ngei pawhin kan inneih hma atangin ka hre thova, mahse ka luhlulin ka chapo em avangin ‘Mipa pakhat na na na chu min hmangaih lo thei lovin ka siam tur a ni’ tih chang chawiin tun hun hi kan thleng a nih hi. Hetia pasal ka han neih hnu hian thil tam tak ka zir chhuak a, a then chuan min tih hlim rualin a thenin min vaw na bawk a. U Lawma hian ka bula awm reng chungin u Linda hi a la hmangaih reng a ni tih ka hriat tirh chuan ka na em em mai a nih kha. Tlawm ka inti a, ka chapo ve nate hnuh hniamin a awm a. Mahse Pathianin min hmangaih zia ka hriat chian hnu hian ka na ta hauh lo kha mak ka inti. Ka theih tawp ka chhuah tawh a, U Lawma thinlung erawh ka nei thei chuang silo a nih hi. Nizanah kan nupain zan khuain kan titi a, kan nui a, kan tap dun bawk a. Kan hma lam hun turte kan sawi dun a, kan in lama ka kir leh mai hi tha zawkin ka hria , nupa inhauva inti tau kan ni lova, kan inhrethiam dun em em a ni tih erawh min hriat pui dawn nia,” a han ti zawi raih a.


“Lallawmzual?” rawn ti tuarh tu chu tudang ni lovin ka u a ni. Ka pian a hnu lamah chutianga ka u rawl a chhuah ka la hre ngai lo, ka tim sung sung thei hial nia mawle. Dinpuii bawkin dam thlap hian, “Ka pa, i ngaihthlak zawh chiah kha kan nupa thuthlukna a ni e. U Lawma hian min nei duh tawh lovin min pet chhuak a ni lova, keima duhthu ngeiin, kan nupa tana tha ber tura ka rin vanga ani hi kian san tum ka ni. U Lawma hi ka hmangaih awmchhun a ni a, ka fanute pa a ni bawk a. U Linda a la hmangaih zia leh a theihnghilh theih loh zia ka hriat hian mi pahnih inhmangaih inkara kei ka lo tlak zeh reng khan keimah ngei hian hlimna tluan tling ka chang thei tak tak dawn chuang lova, U Lawmate pahnih chu thuhran. Ti hian mi pathum hlim loh ai chuan mi pahnih tal an hlim hi tha ka ti zawk a ni,” a han tih leh chuan mittui kar atangin ka hawi chhuak a, U Mamawii lo tap hliam hliam leh Lawmzuala nauten tap chuanga an lo kuah chu ka va hmu hmasa ber a. Hrep tak hian!


“Lawmzuala hi a duh leh chhuak zawk rawh se, in nufa chhuah erawh ka phal lo bur,” rawn ti leh hmuar hmuar tu chu ka u bawk a ni. “Ka pa, U Lawma lakah khati takin thinrim lo hram rawh. Ka thuthlukna pawh hi ani chuan a pawm ve reng reng hleinem. Bul tan that leh pawh a inhuam em em asin. Mahse hei kum 4 chuang erh awrh kan innei tawh a, ka hrechiang ve thawkhat tawh bawk a, bul tan tha leh eng ang mah ila awmze thui tak kan nei thei dawn chuang lo. Hlim se tih hi ka duhthusam ber a ni a, keima ngenna angin kan intha then dawn tihna a nih ber chu. Ka thuthluknaah hian ka na lo tih ka sawi tawh kha,” dam dep hian a han ti leh pek a. “In nufa tellovin kan chhungkua kan awm thei loving,” ka u in insut hruih chungin a han tih chhunzawm leh chuan “Kapa, tunge kan nufa tel lovin in awm dawn ti? Mo angin ka lo lut a, fanu angin ka chhuak ang, I fanu neih chhun angah min ngai zui thei ang,”


Dam thlapa a tawng chhunzawm zelte chu ngaihthlak a har ka ti telh telh a. Lawmzuala kil khata lo inhru mawlh mawlh reng chu ka va melh zauh a, sawi tur reng zu hre ve hauh pek lova! Kan zawng chhepa chu! Hmangaih theih loh khawpa hmelchhia leh misual pawh nilo, hmangaih phu em em nupui a nei chunga a ngaihzawng hlui han hmangaih reng mai chu(h)! Ka bula pangpar khawina bawm inhung chuan va vawm bur mai a nia ka duh nghe nghe ni.


Ka u te nupa pawhin han tih zui vak ngaih na an hre lo hle. Kan vaiin a thuthukna chu sut leh turin kan ti a, mahse pen khat pawhin hnung tawlh a tum lo thung. Lawmzuala tak pawhin nasa takin a ngen a, mahse a tu a te pawh chuan a rilru kan sawh sawn thei dawnlo tih kan hrechiang sa hle. Hlim awm deuhin a awm zui zel a, kan tapte kha min la hau nghe nghe zui a nih kha. Hmeichhe mak tak chu a tling ve a ni.


“Inhauh ka thiam velo, chu ai chuan ka lungawi loh chhung zawng ka ngawi mai ang,” ti thin kha a nih avangin an nupa kara a ruka boruak chhia emaw a awm lai chhung zawng pawh khan han sawi tham ema han inhauh emaw kha zu nei hauh lova. Chumi avang tak chuan ka u ber mai khan hriatthiam leh pawm har a ti em em a. U Mamawii rilru erawh a lo inpeih ru a nih ka ring mak a tih vak loh danah, mahse a rilru nat zia erawh a hriat theih thung. An neih loh fanu angin an en a ni si a, Dinpuii’n a lo zir em kher bawk nen.


Khami ni tlai khan a pa bulah ama chhungte zanriah eia ko turin a ngen a. A ngen lawk angin engmah thleng lo ang maiin kan zanriah hnuhnung ber tur kan kil hova. Amah berin “He inah hian fanu angin emaw in mo hlui ang pawhin ka lo kirin chaw hlui ka la rawn kil leh fovang amaherawhchu tun hun hi mo ka nihna anga in bula zanriah ka kil hnuhnun ber tur a ni si a; hlim takin, damchhunga kan hriatreng turin i kil ho ang u” ti miau hek. Insum erawh a va har si em! Ka u te nupa an mut pindan lama an va inhru zeuh zeuh pawh kha a awm viau mai.


Zanriah eikhamah Dinpuii bawkin a chhungte chu thil awmdan a han hrilh ve ta a. Ka u aiin mak an tihna a nep chuang kher awm love. Vawi khat pawh a pasal leh a pasal chhungte laka a lungawi loh thu la thlen chhin miau hek lo! A tu a te mah lah chu Lawmzuala laka thinrim lo turin a la ti zui a! Khatiang hun an paltlang mek lai pawha a pasal a dem duh manglo leh midang laka a la hum him talh mai kha chu ka damchhunga ka thil tawn mak ber pawl a la ni a nih hi.


PART - VI


Ka u kha mizo paah pawh inla pa ve tak, mittui tih tlakte hi thih hreha hreh ngawih ngawih a ni a. Dinpuii te nufa vang erawh chuan a tap tlawk tlawk mai asin! Nasa taka a ngen avangin khami zan khan Dinpuii chu a anmahni in lama haw lovin a han cham leh rih a. Eng an ti nge ni an chhungkuain sitting room chhuat zau pui maiah khan mutna an siam te te a, an riak tlar put ti ila, an titi tlaivar deuh thaw a ni ber e. Hlim taka a hun tawp hman ral kha a duh miau si a, fiamthu nen, a changa tap bawkin an ri zankhua mai a ni awm asin.


Khatia an han chhuah dawn tak takah chuan Lawmzuala khan a ngai ngam ngang lova, nasa takin hun pe turin kan vaia hmaah tap chungin a ngen ta hial a. Mahse Dinpuii'n rilru erawh a hmin zo lo thung. A chhanna, "U Lawm, min hmangaih em em tih ka hria. Amaherawhchu min hmangaih dan erawh mipain hmeichhe dangte an va hmangaih ang nilo, farnu hmangaih angin min hmangaih a ni. Chuti ni lovin min khawngaihna rilru pu eih lo la chuan hman hmanah khan min ma daih tawh ang. Awm hovin innei zel mah ila hei bak hian hma kan sawn chuang lovang. Vawi khat pian ve manah nang talin i hmangaih ber leh nangmah hmangaih lettu che i nei ang chu le," tih a ni tawl mai. Ama ngaihdan a ni miau a, tu han sawh sawn theih ni hek lo.


Zing karah ka u te nupa leh Lawmzuala ngeiin an inah ama duh dan ang takin an va dah nghe nghe a. An inneih khan ka u in a thuamhnaw hak thlakna bak rawn ken luh a phal loh avangin bungraw lak tur chuang pawh an nei lova. A man te pawh an mahni ngeiin an va hlan let ta nghe nghe a.


Dinpuii pa khan a fanu lo kir leh lawm nan tiin khami ni tlai khan chawhlui a han buatsaih ve leh sak nghe nghe a. Ani leh a fanute chawi tlei pui mai mai an lo huphurh lo nasa mai a, an han inthen kha an lawm viau emaw tih tur hi an ni lehnghal. Keini chhung pawh min nawr miau hek phur fahran lovin kan vaiin kan va tel phei leh ta nge nge a.


Khatia an in lama an han let ta kha an upa ber Sangtea te chhung, a nupui leh a fate pahnih leh a u Thara leh a nupui neih hlim deuh chauh nen an han awm ho ta dal dal a. Pasal neia kir leh pawh ni mahse a nutate leh a nu leh pa mitah chuan naupang chhe chan kha a la chang miau si a, duat rawn a hlawh leh nghal em em a. A u Sangtea nupui Puitei kha chu a pasal neih hma atanga an ina mo sa kha a ni a, Dinpuii han let leh pawh a ngaithiamin a duat thiam viau. Amaherawhchu Thara nupui Remi erawhin a ngaithei vak lo tih Dinpuii khan a hrethiam thuai a. A hrethiam khawp mai a, a chhungten an duat emai a, Remi, an ina mo thar hlim tan chuan ani a fate pahnih nena an han let leh kha an hnawk ru duh viauin a ring a.


Vawk vulh a ngen ta mauh mai a. A chhungte lahin an lo remti lo nasa mai. "I fate enkawl la a tawk," an ti vek a. Lawmzuala khan a nupui fanaute inenkawlna tur pawisa thla tin a pe bawk nen, ama nu leh pa leh nutate hlawh nei an lo ni vek bawk a, an han phallo pawh kha a awm khawp mai. Mahse a tum ruh emai a, vawk note pahnih an han man sak ta nge nge a.


Lawmzuala awm loh lai, a hna lama a kal kar lakah ka u te pawh a la tlawh zeuh zeuh a, anni lahin an la thlahlel ngang mai bawk a. Lawmzuala naute khan anni nufa an len tur an hriat chuan an class kal te pawh an han thulh phah zeuh zeuh bakah anmahni lam hian an tlawh awl lova. Chawhmeh tui deuh han nei se U Mamawii hian a monu hlui hi a va suah tang tang zel bawk a. A sawi lawk ang ngeiin ka u te chhung nena an inlaichinna a tha chho ta reng a nih hi.


Hetih lai hian Lawmzuala erawh a inthiam thei lova. Linda lam pawh a awn hleithei leh ta chuang lova. Dinpuii khan kian kha duh tlat lo se chuan vawiin thleng hian an la innei reng mai awm asin. Tunhma zawnga pawn chhuah nuam ti ve tak khan thenrual kawm nuam a ti ta lova. A fate chhuanlamah anni nufa kha a tlawh deuh zeuh zeuh reng bawk a. Rin ai takin a lung a leng ta zek a. Dinpuii'n a pasal hlui hming chhiat a hlauh avangin an inthen chhan tak thupin mite zawhna, "A.. ka la naupang em a, mo leh nupui tha nih dan ka la thiam tawk lo a ni," tiin sawi zel mahse Lawmzuala khan mite hmai eng a hmu tha ngam lova. Dinpuii a that zawh poh leh ani a inthlahrung telh telh a ni ber.


Linda a rawn chhuak chhova, a thiamnain a tlin bawka sawrkarah hna tha tak a han chelh nghal mai a. Khatia Lawmzuala han pathlawi leh ta chu ani nula naupang chhe tawh lo ve tak, mahni induh tawk ve tak ta chuan a han zar ta viau reng a. Mahse a rin aiin hma a sawn chaklo thung. Lawmzuala te inthen atangin kum khat a vei zet zawt tihah Linda khan a han luh khung ta rap mai nghe nghe a. Khatiang hnuah kha chuan ka u te pawhin lungsi lo deuhin an han sawirem ta nghe nghe a.


Ka u ber kha a khirh ta viau a. Dinpuii te nufa awm loh hnuah a khua a har em em a. Khatia Linda ber a han luh tak rapah khan Dinpuii a luah lan ang deuha ngaihna chin kha a nei tlat a. U Mamawii erawhin nu tha ngang tih takah a tur ve rengah ngaiin pawn lawi takin a han pawm ve thei mai bawk a. Linda tak kha a tha a na viau. Hmel leh thiamnaah pawh amah el pha nia a hriat loh Dinpuii avanga a pasala nu leh paten thinlung dam taka an pawm thei lo kha hriatthiam har a ti a.


Nikhua a han rei leh deuh a, engti tihin emaw Linda pawh ka u ten an mo chei thei ve tan ta a. Mahse ka u kher kher khan Dinpuii "Ka monu" a la ti ngat zel leh amah Linda "Lawma nupui" tih baka a sawi duh der lo erawh a ngai haw viau. Thinrima han ti deuh bar bar turin kan nauva kha a duh ve emai a, a thinrimna a tilang ngamlo mai chauh niin ka hria.


Part - VII


Min thawng deuhtu thildang a han awm leh pek a! Dinpuii'n in hrang chan a tum thu a ni ta mauh mai. Lawmzuala'n thla tina pawisa a pek thin hman ngai lovin a chhungten engkimah an ngaihtuah bawk a, a lo inkhawl zel a lo ni a. Khatia a vawk vulh an han talh takah khan a lo khawl tawh sa nen indan a cho ta viau a. A indan duhin vawk pawh kha vulh a lo ngen a lo ni reng a nih chu.


A chhungten an ngaithiamlo em em mai a. Amah khan, "Chhungkaw pakhat a keh tawh a, a dang tih khawloh leh zel zawng," a ti vei lan bawk si a. A u fate naupang lo awm ve nen, ama fanute nena an han awm ho dal dal takah khan naupang inkar neuh neuh avangtein a u nupuite nena inhmuh thiam loh palh awm theiin a hria a. Chumai ni lovin engemaw a awm palhah amah ber mai kha a nutaten an nupuite ai pawhin an tan dawn tih hrechiangtu ber a ni bawk a.


In dan chungchang thu hi a nu leh pate a lo sawi pui tawh avangin leh a tum chhante a sawi fiah tawh avangin anni chuan ui deuh chungin an remti tawh a lo ni a. A u Sangtea ber mai kha an unau zinga upa ber a ni bawk a, a ngaithiamlo zual em em mai a. Thara nupui vang a nih a han ring nghal deuh ngawt mai bawk a, a chhan pawh a chhungte leh thiante bula phone-a a vui vai lai a lo hriat tawh vang a ni a. "Ka nute leh Sangtea te nupain inpui nghak se, keini Mapuii te nufa nen kan indang ang," a han ti ngat reng a. Dinpuii'n a lo pawm awzawng lova. Thara nupui vang a nihna chen awm bawk mahse nikhua reiah a u Puitei te tan pawh an mit tikhamtu ni theiin a inhre bawk a.


Thiamna lamah a hminga graduate kha a nih mai avangin a tan sawrkar hna beisei chiah a ngai lova. Ka sawi tawh kha, an inthen hma kum atangin eisiam a tui chho viau ka tih kha. Chuvangin a phak tawkin eisiam lam kha a tuina a nih bawk avangin eizawnna tlak turin anmahni in lama a let hnu khan a lo buaipui ru chho viau ni tur a ni. A chhungte phal lo chungin kan veng bazar lun laia in an neihah khan an nufain an han insawn chho ta a. In hnung lamah an mahni nufa chengin in hma lamah thingpui dawr lian lemlo, te fel kher khawr deuh kha a han hawng ta nghe nghe a.


Kan vaiin puih kan inhuam em em vek kha a ni a, puih erawh a duh vaklo thung. Nula awmpui a nei a, a dawr leh a inchhungkhur pawh a enkawl zo viau. An nufa chauha awm erawh an nei tlem hle, a tu emaw ber khan an han fin chawt mai a. Ama chhungte mai a ni nang, ka u te lam pawh an ni tho. A fate sikul an lut tan ve tawh a, naupang tih nuam deuh an han ni kher bawk a, a zia phian.


Eizawnna lamah tluang takin a kal chho beuh beuh a. Han ngui deuh emaw hlimlo hmel emaw a pu ngai lova, a rukin a rilru a nain a lung a leng ve a nih pawhin a thup hneh hle a ni maithei hriat tur emaw ngaihbel theih tur a awm hauh lo. A bula awm a nuam reng a, mite ngainat a hlawh chho zel a. Keini chhung mai nilo midangte, a dawra leng lutte rilru han hneh riau dante kha a thiam riau a. A eitur siam a tuihnaiin a tui mai piah lamah a tu a te pawh hlim hmel deuha a lo dawngsawng thei rengte, tute pawh a ngaipawimawh thiam em em maite kha a hlawhtlinna chhan tha tak a tling a nia. Mi inanglo tak tak a dawrah an leng lut a, tuipui zawng leh huat zawng inanglo tak tak an ni fur a. Amahin sawi ve vaklo mahse a ngaihthlak lam a peih a, buai em em chung khan tute mai pawh kha lungawi deuha siam dante kha a thiam a. Thingpui dawr lian leh lun sa a awm nual naa nilenga a vir buaina tur tawk, an nufa ei tawk a thawhchhuahna khawp amah dawrtu a hmu thuai reng a ni.


Ka u te chhung nen la inpawh em em mahse a pasal hlui tak kha chu a theih chinah a pum pelh hram hram a. Mahse fate pa na na na chu pumpelh reng theih a lo ni bik lova, a khat mawi tawkin an inkal pawh reng a. Midangte mitmei erawh a la naupan ngaihtuahin a veng thiam viau. Mite sawi kai khawpin a pasal hlui a hnaih lova. Hmangaih ber nei ta cheng kan Lawmzuala erawhin a hlat hleithei lo chu a nih kha.


Linda pawh khan a han thik letling ta mah a. Chumai bakah ka u te chhungkuain a bikin eng emaw nikhuaah an nufa an ko zel si a, khangte kha Linda khan a run viau a. Dinpuii te nufa awm laiin a phun chhuak nghe nghe a. Ani Dinpuii ngaihdan a lo ni em em ta bik lova, "U Linda, ka pasal duhlai kha ama min ngen leh pet chhuah pawh ni lovin in pahnih hlim nan ka kian che a. Ani ka pasal ni tawh lo mahse he in hi ka fanute pi le pu, an pa in a la ni ve bawk a, he in leh chhungkuaah hian tel ve turin dikna kan nei thlap a nia. Min nek lutuk palh ange," a han ti ve ta khoh a ni kha. Linda lah a ngawi duh biklo," I fanute chuan chanvo an la nei teh meuh mai, nangin i nei ve tawh hleinem. I fanute rualin i lo tel ve zel a ngai lo," a han tih zui tak sakah khan Dinpuii chhan ngai lovin ka u in,"Lallawmzual, he in chhunga Mapuii te nufa hmumawhtu nen chuan chaw bel khat kil ho a har ang. I nupui hi indan pui la a tha ang," bul hmukin a han ti ta a. "Mapuii hi ka monu, ka fanu ni zui ta a nih hi," a han ti zui hmuar hmuar a. U Mamawii'n engtin emawni an boruak rit zual kha a han zap dai thei ta hram a.


A naute lehkha an la zir vek avangin a pa puih a la ngaih zia a hria a, anni nupa indang ta se a pa ko a rip dawn lutuk tih a hriat avangin indan mai kha an tana tha zawkin hre ve tho mahse khami tum kha chuan Lawmzuala khan chhuah a tum bik lova. A chhungte tana Dinpuii hlutzia a hriat avangin a nupui pawh a vuipui ngam bawk hek lova, tuilairapin a ding chho ta a ni ber mai.


Part - VIII


Ka sawi hnem tawh lutuk a, in lo ning tawh hial ang. Dinpuii chanchin kher kher hi chu sawi tur ka ngah lutuk ka tih tawh kha. Ka han kai tawi mai ange..


Harsatna leh buaina em em awm lovin hun a kal ve zel a. A tute pawh kan tha tlang a ni ber mai.


Dinpuii pawh a eizawnna, a fate sikul kal hlana a nghah, a dawr leh a fate enkawlin a phe buai em em a, lunglen pawh a hre hman meuhin ka ring lo. Mi hlim thei tih takah khan a hringnunah khan a vui lo mai ni lovin amah hmangaihtu zozaite avang khan Pathian hnenah lawmthu a la sawi thei reng nia. A bula awm a hahdam reng a, tu lakah mah khan a vui lovin eng dinhmun pawh kha a pawm thiam em em mai zel niin ka hria.


A fate pawh an han lian chho ve zel a. A changa zawhna chhan harsa a tih ve em em ngenngawl taka an han zawt thin erawh hrehawm a ti ve thin. Mampuii tak kha chuan a nu a chhun a, a à deuh huat a, a hlim theiin a tawng duh a, engmah kha a dawn thui vak lova, zawhna pawh a ngah vak lo. Han chhawnchhaihte kha a nuam em em a. An ina han kal nikhuaah pawh min lo kawm hlimtu ber a han ni thuai a. Bawihpuii ber khan a pa a chhun a, a zia a zawi a, thil chhut neuh neuhte kha a peih a, a nu hi zawhna chhan sen loh a zawt reng mai a ni. Engatinge a pate nen an awm ho loh? Nu Linda hi engatinge a pa nupui an tih zel? Ruat-Ruati (A pu Thara fanu) te pawh a pite bulah an la awm vek si a, engatinge anni hi a nu nen chauh an awm bik? A pu ( Ka u) te hian an duat hle si a, an lente hian an haw an ui thei hle si a engatinge an awm ho mai loh? Engatinge an chhungkuaah mipa an awm ve loh? A pa in an unau a kuahin engatinge a mittui a tlak fo? Engatinge a pa hian Nu Linda a kuah anga a nu hi a kuah ve ngai loh?


Amah a lo chhe hran lova, mi biangbiak a lo thiam bawk nen han beiseitua han ngaizawngtute kha a hmu thei em em mai a. Amah tak khan a fiamthu pui hlut zel a. "Ka ni, enteh ka nulat laia ngaizawngtu ka hmuh vak loh nen khan ka hmu ta mawlh mawlh mai. Nuthlawi hi luck a awl a nih hi," te hi a han ti liam mai mai a. Engemaw nuthlawi a nih avanga sih hnip tura an ngaih avanga rawn beisei tawk kha pahnih khat awm bawk mahse han duh tak taktu kha an ni nawk a. Rawn zar buai ta viau tawk pawh an han awm nghe nghe a, mahse amah a fel em a, mawi hnai tak khan a hnar thei zel a.


Khang ho zingah khan doctor pakhat fel deuh mai hi a awm a. Amah pawh khan a chhang ve mai dawn emaw ka ti hman nghe nghe a. Mahse thawklehkhatah a rilru a thlak thut niin ka hria. Ka han zawh ngial pawhin,"Mai mai a, nula hnahkhat pawh ni ila kei hian khawilai doctor mah ka phu hleinem. Nuthlawi fa pahnih pawm lehnghal min duh tak tak i ring a mi?," min ti let thek a, engmah a sawi tha duh mang lo.


A hnu deuhah, "Pasal hi ka nei leh dawnlo ka tithei hauh lo naa ka neih aiin ka fate ka tulpui mai hi ka ring deuh a. Ka fate nena thinlung taka min pawm thlaptu mipa ka tawn hlauh chuan ka la nei mahna. Nuthlawi ka nih avanga min hmu hniam lotu leh an fapa tana min pawm thlaptu chhungkua an awm a nih chuan an mo ka la ni lovang tih pawh ka sawithei lo," fiamthu ti takin a han ti ta nghe nghe a. Hei a duhthusam ang tak a la tawng leh lo a ni chek a nih hi.


Lawmzuala chhang chiah khan nupui a han nei ve ta a. Ka u bawk kha Linda tan a chimawm leh em em mai a. Ani a raipuar ul mai a. Inneih inkhawm zawha thla an han lakte leh a hnua an in lama mo thar lawmna hun an hman laite khan Dinpuii kha 'Ka monu upa ber' tiin engkimah khan a han rawlh ta tehreng a. Dinpuii tak khan a han khap nghe nghe a. Mahse inti mipa tak, rilru kal khat nghut mai kha a ni a, khap daih mai mai theih a ni lova. Amah hrechiangtute pawhin hriatthiamna chin an nei a, tlema tlemah an mualpho lo chauh zawk a nih kha.


A hnu rei vak lovah an fa pahnihna an hrin hma deuhin Lawmzuala te nupa pawh an indang ve ta nge nge a. An hlim chho viau chuan ka hria a, mahse pa tawng mawh ve tak tih takah kan nauva khan eng ang rilru chiah nge a put phei chu ka va hriat sak lova. A chang chuan Dinpuii hi a ngai thinin ka hre tlat pek a. Linda mahni induhtawk ve tak a lo ni a, Dinpuii'n a dawhtheiha a ngaihsak thin ang chuan a pasal kha a va ngaihsak ve lem lo deuhin ka hre thin a. Chapo pui tur tawk kha a lo nei ve am bawk nen engemaw han lin deuh phat leh a pasal kha a hmangaihin a duh em em chunga han inchhuan khum kha chu a nei fo. Khangte avang khan Lawmzuala'n hrehawm a ti fovin a nupui hlui kha ngaih em em chang a nei fo.


Hei in hmuh angin Dinpuii hian nikum lam atangin a dawr kha a han titawp ta rih a. A paten an inhnuai an siam a, ral khata atanga inngaihtuah deuha awm reng kha thain an hriat loh avangin an nawr lui chu ni bawk mahse amah ber hian a fate an lian ve zel a, tunlai khawvelah enkawl mumal lohva an seilente kha a phal bik lova. Tihian tuna a eizawnnaah hian a tluang chho leh ta em em a, an nufa intuamhlawmna tur tawk hi chu a thawk chhuak ve zel a nia," tih pahin Pi Latei chu a han thaw ham ham a.


Mittui tling kanga lo ngaithlatu Thangpuii chuan,"Awi, a ngaihnawm e. Amah Dinpuii angah ka inchan zel a, movie hmuhnawm deuh en angah ka inngai titih hial mai. A hrim hrimah U Late, i titi ngaihthlak a nuam emai. Nu titi thiam tak i nih hi," a han ti hluai a. "Ka hriatthiam loh chu Mapuii tih hian kan hria a, i sawi hmangah midang pawhin Mapuii ti vekin an ko si a, a chanchin i sawi khan Dinpuii i ti zel bawk si a?," tiin zawhna a han zawh chhunzawm a. "A... tumah hi ka ko duat ve thiam lova, hming tha nei reng han koh deuh hluai hluai hi ka tih mi a ni ve lova," nui tha chungin Pi Latei chuan a lo tih chhunzawm a.


Ngawi renga a tir atanga lo ngaithla ve rengtu Pu Rinzuala chuan nui suk hian,"A duhthusam ang mipa chu ka va ni mai awm em," a rawn tih chhuah takah chuan chung hmeichhe pahnihte chu an te dun hlut a.


Part- IX


“Awi.. a va han tih chi dawn ber mai em! Engahnge maw ngaihtuah chhuah nachang ka lo hriat loh zawk le,” naupang chhia ang maia hlim avanga phul hlut chung hian Thangpuii chuan a han ti zui chul a. Pi Latei lahin, “Awi..dik chiah. Kan pahnihin i tihpui ang aw,” tih pahin ring takin an han nui khek dun uar uar a. Anni pahnih hi chu an office thawhnaah pawh an nuih rin em avanga mi zawng zawng hriat hlawh ti a an sawi thin kha an ni ve reng a. “A hmel pawh a that kha. A bawih hnup alawm,” Pu Rinzuala’n a han tih takah chuan a aia ringin an han nui dun leh rih a. “Awihawm loh emai, a hmel tak pawh i en that ngam loh kha. Ka hmu reng che alawm mawle,” Thangpuii chuan a han ti salh a. A nau erawh a ngawi mai duh bik ta lo, “Hmeltha hmuh nan engtia rei nge thlek ngai chuang a? Keite chu ka rilru a chak a, ka en thuak khan ka hmu kim vek hman mawle,” nui vur vur cungin a han tih chhunzawm leh a.


Pi Latei chu a pasal, Mission Venga mitthi ralnaa kalin a rawn lam takah chuan haw turin a han ding chhuak hluai a. Nu tawng duh dun tak tih takah an naute changchin bawk chu phur fahran hian an han sawi khawmuang leh rih a. Pu Rinzuala’n, “Lo phi chuk suh u. Mipa ka ni alawm le, ka hmakhuate chu ka su kaw ve mai ang,” fiamthu titak deuha a han tih takah chuan lo inrawlh ve rih loh mai thaa hriain an han inmangtha ta rih a.


Midangte harsatna hrethiam tur khawpin Pu Rinzuala, Zuala tia an koh ber pawh hian thawnthu dang, lung kuai deuh a nei a. College an kal tan kumah Benjamin-a nu Rohlui nen an intawng a. Guiter perh thiam tak a nih bakah infiamna lam a tuipuiin a engapawh kha a rualpawl tawkin a tithei ve zul a. College week-ah pawh an hawlh lawr nghal hle a. Amah a lo hmelchhiat lem loh avangin hmeichhiate star rawn a han hlawh nghal reng a. Rohlui kha chu a hmelthat leh pian nalh avanga khawiah pawh mi mit la nghal em em zel a ni a. Amah pawhin a inhre chiang a, a induh ngalh nghe nghe a. Khami kum tho khan ani pawh chu an college Miss atan an han thlang ta lehnghal a. House khat an lo ni bawk a, engemaw han tih ho kha an ngah a. Lar leh lar ta chu an inkal pawh thuai a. An chhelo dun bawka an lo in iai lo khawp a, rei rial lovin an inngaihzawn chhunzawm nghal mai reng a.


Mite mit an la dun hle a, an inkara han inrawlh ngam pawh an awm lemlo. Langsar deuhin an han inngawizawng chhova. Inkai rial riala college chheh vela an han kal dunte chu an hnung lamah zawi tetein an sawi sep sep ngam tawk a. Kum la naupangte vevea khati taka inzui nasa chu an awm hrang hleithei lo thuai a, an chhungte bulah inneih an ngen ta tlut tlut a. Final exam an zawh veleh an innei nghal ta chuk chuk a.


Zuala kha officer nih tum a ni a, a tum lawk aia hmain nupui a han nei ta mai si a. Inchhungkhurah mawhphurhna lak a lo ngaih ve tak avangin an chhungkaw eizawnna, Bazar-a thawmhnaw dawr an neihah chuan nitin a nu leh pate puiin a kal tan ve ta a. Rin ai takin sumdawn a lo ti mi a, a nu leh pa aiin thawmhnaw chhuak thar leh mi duhzawngte a hre zawk bawk a, engkimah a vir berah tangin an dawr pawhin hma a sawnin a kan phah awk awk nghe nghe a. Fapa duhawm tak an han nei chhunzawm leh zat bawk a. An hlimin chhungkaw awhawm tak an han ni nghal mai reng a.


Kum a han vei leh a, a nu leh pate pawisa lo khawl sa nen an in luah lai Assam type bula an ram awlah chuan in dang sak an tum ta nge nge a. Tuna an in luah mek hnuai ber kawngpui an hi an han sa tan ta a. Rin ai takin an sum khawl sa pawh an khawh ral chak a, mahse mut mawh hnar mawhah an nei lem lo. An dawr a kal tluang a, an lakluh belh ve zel bawk nen. Thangpuii sawrkar hna a han hmu hlauh ta lehnghal a.


Mihringte hi englai apwhin kan venneihna hi a kaltluang reng lem lova. Rin loh lamah a pa a dam hleithei ta tlat lo mai a, damdawi inah te pawh a han lut zak zak thin a, damin a han chhuak thin naa rei vak lovah a na leh thin a. A hnuah chuan cancer a nih an han ring ta nghe nghe a. Zuala chuan Tata Memorial Cancer Hospital, Mumbai lamah a pa chu a zuk hruai ta zak zak a. In an sa mek bawk nen, a pa han damlo chho ta bawk nen, amah berin a pa a hruai zel a ngaih avangin an dawr an han hlamchhiah chho ta viau bawk nen khan sum leh pai lamah harsatna an han tawk chho ta viau a. Chhiatna hlirin a tlakbuak emaw tih turin an dawra thawmhnaw rawn supply tu berten buaina an lo tawh ve avangin a hmaa ba thlau deuha indawr thin khan an thawmhnaw pek tawhna pawisa a chuangliam awm lova pe turin an han nawr leh ta mauh mai a. Kut bengin an han awm titih ta der mai a.


Thangpuii a hnaah a la junior bawk avangin a hlawh lah a la bei tham ve si a, khami deuh ngawr ngawr ring khan an han nung ta tehreng a. Rohlui, chhungkaw hausa tak atanga seilian, retheih awmzia hre miah lotu khan hrehawm a ti ta em em mai a. Chu mai bakah a pasal a vir buai em avangin a thlakhlelh angin hun pawh an nei dun hleithei ta mang lo bawk a. Zuala’n zaidawh tak mai a, “Hlu, min hrethiam hram rawh aw, hetiang dinhmunah hian kan ding reng bik dawn lo a nia,” a tithe chu a ngai pawimawh hleithei ta lova. An in lamah a tlan tau ta nghe nghe a. A chhungte lam lahin an lo vui pui nasa bawk si a, Zuala te beisei miah lovin bungrua an han la ta chuk chuk a. Ui beh theih an nih tak lovah chuan Zuala ngaihdan a pel ve ta a. A um zui duh ta bik lova.


A pa chu pumpui cancer a ni tih an hmuchhuakin an enkawl chho ta ngat ngat a. An dawr ber enkawl hleithei lova an han awm ta bawk nen a pa damna kha pawimawh hamsa bera ngaiin an bungraw la neih chhun chhun nen an dawr kha mi an han khar chhawn tir ta ngawt a. A pa lah a ni telin a chaklo telh telh thung a. Kum khat chhung an inbuaipui hnuah a han boral zui ta nghe nghe a.


Khatia a pa damlo Mumbai-a a hruai thin lai khan mi pakhat Rohit Sharma, a pu enkawla rawn hruai ve thin nen an inhmelhriat hlauh mai a. Ani pawh khan guiter perh lamte a lo tuipui ve bawk avangin an inkawm ngeih chho ta viau a. Rohit-a kha mi hausa chhungkua ami a ni tih chu a nunphung, a thawhnaw ilo atang khan a hrethiam mai a. Eizawnna lam erawh an sawi chhuak ngai lo thung.


A pa boral hnuah pawh Zuala chuan tih mai tur hre lovin a han awm ren rawn a. A bei a dawng em em a, Pathian lakah pawh a vui titih hial a. An dawr an chan a, a nupui nen an inthen bakah a fapa a hruai tel daih ta lehnghal a.A khua a har em em bawk a. An in pawh sak zawh thuak, a chhung vel chei mam ngaiin a ding to ringawt mai a. A thianpa Rohit-a khan Aizawla rawn zin a, rawn tlawh a tum tih a han hrilh thut mai a. A inthlahrung ru em em a, engmah phei chu a sawi chhuak chuang lova.

Chutia a rawn zin takah chuan zan rei tak tak thleng, tlaivar deuh thaw thawin an titian an inkawm ta thin a. Zan khat chu an chhungkaw album an in entir a, an nupa chanchinte leh harsatna an tawh dante a han sawi chhuak ta nge nge a. A thianpa lah chu a lo chek tlak tlak a, “Engah nge a hmain min hrilh loh? Puih theihna che ka nei asin. Nupui hmeltha tak leh fapa duhawm tak i chan phah lehnghal. Nang anga ka rilru mil pui thian hi ka la tawng zen zen lova, ka puih chak zawng tak i ni,” tiin an chhungkaw eizawnnate chu a han hrilh zui suah suah a. Zuala erawhin thutakah a ngai ngam lo thung a.


A tuk zingah pawh an in sak zawh tep lamah chuan Zuala chu kai pheiin tih dan turte hrilhina kawhhmuh zung zung a. In chu a sa zo vat anga, aniin dawr bungrua cheng khat mah pek lawk ngai lovin a rawn supply anga, an sumdawnna a kal tluan hnuah chauh ba a rul tan ang tih vel bawrte chu a han hrilh zung zung a. Zuala ber chuan awih har a ti a, awih loh theih niin a hre bawk silova, beiseina ti sang ngam chuang lovin beiseina chhete chu a han nei ve leh tan ta a.


A thianpain a hawsan hnu chuan a pa thianpa hlun tak hnenah an in sak han tuai mamna tur chu pawisa puk a va dil ta ngawt a. Aniin phal takin a lo puk tir a; thla hnih khat a vei hnu chuan in chu an han peih ta mai reng a. A thianpain a hrilh lawk tawh angin a zu hriattir var a. A hnu kar khat lekah electronics bungraw chi hrang hrang chu a rawn thleng ta zut zut a. A mit ngeia a hmuh hnuah pawh a vanneihna chu awih har a ti hial.

A sumdawnna chu theihtawp chhuahin a han kalpui leh ta a, amah a ti mi bawk a, rei vak lovah dinhmun tha pangai takah a han ding chho leh mai nghe nghe a. A nupui leh a fapa a la ngai thei em em a. ‘Tunah chuan kan dinhmun a zia ta bawk a, Rohlui te nufa koh haw leh dan kawng zawn a ngai a ni’ ti a a innngaihtuah mek lain Rohlui’n pasal a dang a um thu a han hre ta mai a. A rilru a na thar leh em em a, mahse a rilru natna chu thinurnain a thlak ta hlauh thung a. A fapa pawh a va chuh ta nge nge a. A nuin pasal a um san na na na chu an lo ui bet thei bik lova.


Rohlui kha a la naupang bawk a, amah hmeltha hmingthang sa a lo ni bawk a, a han nula tha leh kha vir buaitu a nei nghal thuai a. Fa pakhat chauh hring na na na chu han chuai deuh chu sawi loh, a hma ai mahin a mam nalh zawk emaw tih tur kha a ni a. Mi hausa chhungkua tih takah an thian han kawm vete leh amah rawn beisei pha ngam chin pawh mi neinung tak tak thah an ni a. Zuala kha duh ve viau thin mahse, ani dinhmun bet ngawih ngawiha ding mek ngaihtuah thei lovin beiseitu a neih ho khan an vir buai hneh a. Mawilo ve deuha a hriat avang chauha pasal um leh rum rum lo mai a lo ni a. Rei mawi ve pangai ngaihzawng bul fuk tak a neih hnuah an inru ta nge nge a lo ni a.


Zuala erawh a farnuin tihtak zeta hmeichhe dang a han tih pui dawn ngial pawhin a sumdawnna leh a chhungte bak ngaihtuah duh miah lo, sawi rik pawh duhlo bur kha a ni a. Nupui lamah vanduai ta deuh mahse a eizawnna lamah a tluang ta em em a. Pa khawsak nuam tak niin a dinhmun pawh a sawh nghet tha ta hle a ni.


A mut pindan lama mu tura a phei hnu chuan sana a han bih thuak a, “A la tlai chhiat loh hi,” ti nuah nuah chungin a phone chu a han lek chhuak a. A biak duh tak number chu a han dial ta a. Hmeichhe awin zangkhai taka, “Hello,” a rawn tih takah chuan, “Mapuii a ni em aw? Vawiina zanriah i buatsaih sak Zuala kha ka nia,” a han ti ta a.


Part – X


“E, a ni maw? Ka thilsiam kha sawselna tur a awm deuh tihna nge aw?”

“Ni nang aw… A tui kan ti lutuk a, lawmthu sawi pahin order rawn siam leh turin ka rawn bia che a”

“A ni tak chu… a va lawmawm em aw! Engtikni atan nge niang order chu?”

“Pathianni lo awm tur tlai atan khian a rem ka han ring ve ngawt a?”

“Awi, a pawi e. Pathianni hi chu ka serh ve a. Order ka la ngai lova. A la thin ka hria asin, an number ka rawn hrilh dawn che a mi?”

“Midang a ngai love. I eisiam ngei kha kan eichak leh deuh a. I hmanni remchang atan keini chu kan insiamrem mai ang”

“ Awi.. a inthlahrunawm roh e. Keimah avanga in programme han sawn chu”

“Mai mai a, inthlahrunna tur a awm loh chu. Inrinni tlailam atan a rem angem?”

“Aw.. rem e. Order ka hmu tawh naa an chhungten chhiat an tawh vangin an cancel leh rih a, nangniin in chang chiah dawn a ni mai”

“A lawmawm chu. A nih chuan Whatsapp i hmang ngeiin ka ring a, menu thlak a, a dang han eichhinte pawh a chakawm deuh a. Nangin min kawhhmuh thei ang chu tiraw?”

“E..aw.. hmang e. Thlate pawh ka la nual asin. Kan inbe rawn dawn nia”

“A lawmawm e! A nih mangtha tha le”

“Nangpawh mangtha le”


A phone chu bihin a nui vur vur a. A hmuh leh duh chhuanlamah order a han siam rawih a, tutenge a sawm anga engvangnge tih pawh chu amah pawhin a hre der si lo. A phun zui nuah nuah a, “Naupangchhia ang maiin ka tha a khur deuh emawni lehnghal ni! A tute nge maw ka han sawm ang aw? Ka sawm teuh chuan amah Mapuii ka biak that mumal hman loh ka hlau si a, tlem remrawm tutenge sawm ila tha ang aw? Mi sawmhnih chin a pek theih chuan ka thiantha zualte an nupuite nen sawm ta mai ila nge maw ni ang aw?,” tiin khumah chuan a inthawlh ta kuk a.


Lehlamah Mapuii pawh a nui ve var var tho mai. Mu turin a inbuatsaih mek a, a hmai phih saah chuan eng eng emaw chu a han hnawih thuak thuak a. Hmelthat a chak thar ta deuha inhriaiin darthlalanga ama thla lo lang chu a han nuih sak a. A dar a thing ak a, a nui zui hak hak a. A phone a rawn rik tak tetah whatsapp mesg a dawng a ni tih hriaiin a han bih thuai a. A nau hruai ber TZ-i a lo ni a.


“U Mapui, a man (pa) tiah tiah tiraw?”

“Nia… awi.. hahaaa ka zak deuh roh grin emoticon ”

“Engati maw? Mi va star hi sual a nih loh hi aw tongue emoticon ”

“Nia.. wink emoticon Nichinah tu emaw chuan min rawn phone ngei mai a(h)”

“Awiiiiiiiiiii.. a ni maw? Ka va’n be ve chak tak. Enge a sawi?”

“Lawmthu. Chubakah Inrinni atan order a siam bawk. Lo inring viau mai teh”

“Hiiii.. Mi pa hmu tura inrin vakte chu a…”

“E… I lawm ngawt ang, ka hrilh theihnghilh daih che. Ka niin min rawn bia asin. Zawnglai a nih kha, pathlawi..hiiiii”

“Awiiiiiiii.. U Mapui, a nuam eeee.. Ka thiiiiii… :P

“Thi loving… I tellovin engmah ka nih loh hi :D

“ A nih ka dammmmm”


Nui var var chungin a lukham chu han delh thlak riai riai pahin a inngaihtuah chhunzawm a. TZ-i chu a va han hrethiam kher kher em! Amah meuh pawhin kha pa, pa run mai kha a ngaihtuah zui a nih phei chuan ani TZ-i tleirawl phei chuan a va han vei zui dawn em tihte chu a ngaihtuah neuh neuh a. Amah Zuala lah khan en pawh a enchiang tawp silo. Sumdawnnaa an indawr satliah ang bakin han biak zui pawh a nei bawk silo. Mahse a rawn biak tak avang chuan a lawm ru viau tho, chupawh sumdawnna lam hawi bawk tia inngaihtuah chungin a han let tau deuh nghat a. A titau titih tih a inhriat chhuah rual chuan a nui chhuak leh ta hak a. “Kei ve mai mai hi.. ka inthunun theih tehlul nen, min dawrtu mipakhat vang maia hetia kan awm chu a va han zahthlak em!” ti chhuak sapin a mit a chhing ta chial a. Chhun lamah a che hah bawk a, mumang bo thak khawpin a muhil ta a.


Zing a han thawh chhuah chuan a phone chu a han ban nghal vat a. Amah chu a han inthiamlo chawpchilh nghal a. “Kei ve tehlul hi Pathian tellova ka nun theih loh nen amah ka biak hmaa mihring lam ka han ngaihpawimawh hmasak chu!” ti nang nang chungin khum bul dressing table-a a Bible dah chu a han la kang a, a chhiar zawh chuan a han tawngtai leh tete a. A phone hum chungin bathroom lam a pan ta nge nge a. Amah chuan mak a inti hial. Tuk dangah a phone a ban hmasa ngai si lova, a engatia tukin kher khera a han ban le aw? Engemaw a hriat le? Tih ngaihtuah neuh neuh chungin a phone chu a han bih zeuh a. Karei! “Tuk chhuah nuam le” tih mesg chu a han hmu ta chat mai. Hei hi ami a lo beisei ruka a phone kha a ban le aw tih inngaihtuah pahin “Nang pawh le” tihte mai chu a han thawn ve nghal var a.


Nilengin a awm a nawm phah a. Zing lama a mesg dawn a ngaihtuah chhuah apiang chuan a khi ver ver a. Mahse nidang ang bawkin chumi ni chuan mi dinner buatsaih pe turin a vir buai lehpek hle a. A nu a rawn chhuk ve bawk a, a niin chawhmehte chu han chanpui bawrh bawrhin an anaute nula pahnih nen chuan mawng vawm ba an sawi ang maiin an han phe lawp lawp a.


Zana a fate lehkhazir zo an muthhilh hnu chuan a phone lam bak chu a han bel bul ve leh ta a. “Vawiin chu i buai leh char char em?” tih zawhna tawite lo awm chu a chhiar rualin a hahdam sawng sawngin a han inhre hial a. “Buai ve leh khawp mai. Buai theiin malsawmna ka dawng hi ka vannei ngawt asin,” a han ti deuh ta duah a.

“Dik chiah. I thilsiam a tui emai a, I buai ve phah khawpin ka ring”

“Hehe.. Chuti emawni le? Pathian khawngaihna zar liau liau a ni e”

“U Latei kha i ni a lo ni reng elo? Ka u Mami kaltlangin kan inhriatna a rei ve tawh asin”

“A nih kha” tlemin a tim ta deuh. An inhre tha a nih si chuan a ni Latei khan a chanchin a hrilh a ring deuh a. Amah a insitna ngai, nuthlawi a ni tih chu a rilruah a rawn lang nghal thuai a.


A chhana tawi tek tawk tak avang chuan lehlamah Zuala pawh chuan tisual a inti ve tho. Engatia an inbe tan chauh a, a han sawi chhuah kher kher aw! An titi chu thlak a hun tih a hria a, Inrinnia an eitur chungchangte chu a han sawipui ta daih a. Pangai takin a rawn chhang zel a, mahse a hma angin a inhawng zat lo tih chu a hrethiam ta thova.


A tukah pawh a ngai tein mesg a han hnutchhiah leh a. Pakhat pawhin lawm takin a han chhang var a. Engtin emawni inpawh rukna riau an nei tih anmahni pahnih chuan an han inhrethiam thei mai a. Tawi tetein an inbe chho tan ta zeuh zeuh a. A rukin an han inngai ru viau nghal mai reng bawk a, sawi chhuaktu nih erawh an tum loh dun hmel rih hle.


Zirtawpni zingah chuan mesg dang a lo hnutchhiah tel a“I chanchin ka hre nual. Ka ngaihsan zawng tak i ni” tih mesg tawite chu a han chhiar tel chuan channa mai tur a van viau. “Ka chanchinah ngaihsan tlak lai enge awm?” tiin a han reply ve a.


“Mapui, vawi khat chauh ka la hmuh che avang khan ka hre lovah che ngai ngawt suh”

“Min hmu reng reng emawni le? I hmaa ka ding chung pawhin min melh that duh loh kha a :D

“Hmm.. I hmelhmang ka sawi dawn a mi?”

“Sawi tur i hriatte chuan”

“I sam a sei a, a tam vak lo naa a ngil tha hle. I colour ve zeuh zeuh a nih ka ring a dum tak vak loh danah. Bengbeh, rangkachak mum tetakte , a bet i beh a. I hmai a hlai ve deuh a. Khami ni khan i mit tlemin i dum raih a, a lian vak lo naa a zim chhe lo. I hnar ngul a zum van lem lo naa hnar nalh thawkhat tak a ni. I hmui erawh a mawi tawkin a chhah thung”

“Awiiiiiiiii….. I mak roh”

“Ka melh che tih i chiang tawh em?”

“Chiang e mawle…Ka hlau deuh roh hial che.. hehe.. Inrinniah chuan eng eng chu maw ka rawn dah ang”

“Mi 22 tan a nia aw. A tui dawn tih ka hre sa”

“Eng eng chu maw ni ta? Pic ka rawn thawn che atang khan han thlang fel tawh la. Inlamkhawm lawk ka ngai dawn e”

“Ka hre bik nang. A awm i tih ang kha rawn remkhawm tawp rawh”

“Aw.. I hriat duh vanga helam, whatsapp lama inbia kan ni emaw ka tia?”

“Chhuanlam mai mai a nih kha” tih chiah chhana a hmu let a. “A va ho mai mai roh e” ti rilru nang nang chungin a fate muhil lai kaitho turin a thutna atang chuan a tho chhuak ta a. A ngaih erawh a tha ru viau. “Hepa hi ka ngaizawng ta tak tak emawni le? ti rilru neuh neuh chungin a fate pahnih muhil mek lam chu a pan ding ta a.


Part- XI


Inrinni tuk zingah chuan tukdang ang bawkin a vir buai leh viau. A fate school chawlh ni a ni hlauh erawh a zia viau. A phone bih hman pawh a nilo, a vei thuak thuak a. Tlemin a hna tul zualpui a han zawh chuan a han thu hahdam vang vang a. A phone a bih ve hman ta hram e. Karei! Whatsapp mesg a lo tlar dul mai.


“Good Morning” 6:00 am

“I la mu elo!?” 7:00 am

“I la dam chiah maw? tongue emoticon ” 7:30 am

“Min be duh talo a nih ka ring a, ka mittui hrukna tur ka zawng duk duk mai grin emoticon tongue emoticon ” 7:45 am

“Ka fiamthu ta lo. ENGE THIL AWMZIA???????” 8:10 am

“Ka ngaihtuah zia che hi i hre nange? Min chhang teh” 9:00 am


A nui hak hak a, “Good Morning Lo boral palh ta ila min ui ve deuh tho angem tih ka chhin a nih kha tongue emoticon ”tih chu a han thawn let a. “Laldinpui…. Fiamthuna hun leh hunlo hre rawh” tih chhanletna a dawng nghal zat a. “Ngaidam… ngaidam… Tukin chu tlai lamah in puar loh hlauvin ka han phe deuh alawm le. Inrinni hi chuan inlam hna hi a lo tam ve thin bawk si a” tih a zuk thawn takah chuan ....


“Min ti hlauthawng lutuk. Nidangah chuan I thawh veleh ka mesg chhang ziah rawh”

“Eh! I va han intithu deuh ve? grin emoticon ”

“Engemaw in tawk ta a nih ka ring a, U Latei te in ka hre tho bawk a, in in a hlalo a tih avangin rawn kal tumin car ka la chhuak mek asin.. Mawl reuh lutuk”

“Chutiang takin ka pawimawh elo?”

“Ka rilru puthmang i hriat vek kha. Nang pawhin ka rilru ang tho i pu tih ka hria”

“Teh tawl a. I rilru hre turin vawi khat pawh i sawi tawh a mi ngawt? grin emoticon ” fiamthua lak luih zel a tum a, a biak pa chu a thutak zia erawh a hrethei thung.

“Sawi fawk kher a ngai a mi? Phone atang nilo i hmaichhanah ka la hrilh khawp ang che. In inah ka rawn kal dawn a nia, in address chiang deuhin han sawi teh”

“Engati maw? Kan buai rih lutuk ka kawm hmanlo ang che. Tlaiah kan rawn kal dawn tho kha”

“Eirawng ka rawn bawlpui ang che”

“Kan customer apiang hian min rawn puih inhuam ve se ka va’n ti grin emoticon ”

“Vawiina dinner ka order kha ka hmuh leh duh che chhuanlam mai mai a ni ka tih tawh kha. Hrilh nawn i la ngai elo?”

“I fiamthu emaw ka ti alawm”

“Fiamthuna hun leh hmun a awm. Ka rawn kal dawn?”

“Ka kawm hmanlo tak tak che. Puih ka ngailo bawk, min tibuai zovang wink emoticon ”

“A nih chuan i fate tlaiah rawn hruai la, chaw ei ve nghal rawh u”

“I va intithu nghal ve mawle tongue emoticon Vawiin chu kan sawi tawh angin sumdawnna vanga inhmu tur kan nih kha”

“Chhuanlam ka tih chu”

“I duh duha thu i peka i kawihher theih ka nih loh hi aw smile emoticon ”

“E… Sorry Ka best-te an nupuite nen ka sawm a, ka hmelhriattir duh che mawle”

“Eng angin nge min hmelhriattir ang? Zanin tlaia kan caterer?”

“Ka tihpalh lehpek. Min chhang har lutuk a, ka ngaihtuahna a kal khawlo zo vek. Min hrethiam rawh”

smile emoticon


Amahin a nui hak hak a, a engamah hmaa a rawn intih thu viau ngawt le. Mahse a va haw phal silo em! A nunah rawn intithu a, uap lum a, thunun tur an awm lohna a va han rei ta em! Amahin khawvel a hmachhawn a, a rukin a rum ve thin. A fate tan innghahna tlak nu tha nih tumin theihtawp a chhuah a. A pasal hlui avangin a tlu sawp biklo a ni tih nemngheh nan a mittui a thukru a, mahse a rukin a va han tap ngun tak em! Amah hrechiang bertu a nu leh pate pawhin an hraitthiam loh tur khawpin a inthup a, a ruka a nat vawng vawng laiin hlim hmel a pu lui a. Ngawi renga mahni chauha inngaihtuah veng veng a thlakhlelh em em lain hlim hmel nena mite hmachhawn a, titipui a ngaih chang a awm a nih kha.


A thutna ngenchhan ngheng chungin a han chhing diar diar a. A innngaihtuah chhunzawm zel a. A pasal hluite nupa chu a thik hauh lo, a sawi ang taka an hlimdun tih a hriat hian a inpekna rahchhuah a ni tih a hria a, a lawm. Lawma nen pawh thian tha tak angin an inen zui zel thei a nih hi. Mahse a khua a va har ve thin tak em!


Kha doctor, Dr Richard-a’n khati tak maia a vir buai lai khan chhan ve mai tumin a rilru a siamfel a nih kha. Tuma hnena a la sawi chhin loh, amah Richard ngei pawh a hrilh tak loh chu, Richard-a nu ngeiin an fapa kiansan turin a ti a nih kha! A dawrah a rawn leng lut a, inhnawhpuar duhah a ngai satliah a, mawihnai takin a lo dawngsawng a. Pangai takin an indawr a; mi tlem lai chuhin a fapa chu nuthlawi fa pahnih nei tawh tana a phalloh thu polite takin a hrilh a nih kha. Sawi ve tur a haihchham a, ngawirengin a lu a bu nghauh ngauh a nih kha. Kawngkhara a fanute eitur apple khaibawr teuha lo ding reng, makti taka lo enrengtu a pasal hlui a hmuh khan a insum thei lova, a mittui a tla hial a nih kha! Ani khan ngaihdam a dil nawn mawlh mawlh a, rilru hrehawm takin a awm phah a nih kha. Amah a indem a, amah vang tiin a inmawhpuh nawn leh a nih kha. Khawngaihthlak zawk hian!


Tunah chuan kar khat awrh chauh a la hriat, vawi khat chauh a la hmuh mipa, amah iai lo tura a an pui, pathlawi a nunah a rawn intithu ta viau mai. A duhthusam ang chiah mipa a ni lehnghal. A hmelthain a pa a, a tawng tam lo naa fiamthu a duh hle tih a hrethei bawk a. A rawn intithu nghal viaute chu a lawm letling a. Hmeichhia, Pathian siam hmangah pawh chaklo zawk a ni a, a nghenchhan tura mipa a mamawh ang tak, inti tatu, amah ngaihsak bawk si, a innngaih nu phah hliah hliahna khawpa a mipatna lantir thiam ni berin a hria. Mipa diktak a tawng ni a ber.


A innngaihtuah a, “Naupangchhia pawh ka ni tawh lova, heti taka ka duh ve a nih si chuan zah tut tut a ngai hran a mi? Mahse he pa zuam theih hian ka awm tur a ni lo,” tiin amah chuan a phun malh malh a.“Anu, enge i sawi?,” Mampuii’n a rawn tih takah chuan a nui chhuak leh ta har har a, “Ka at hmel em Mampui? Mahnia phun mawlh mawlh mi rawntlak an awm pawh ka hrelo. Tirawh min pui la… khawnge Bawihpuii hi?,” tiin a thutna atang chuan a tho chhuak ta a.


Pakhat lah a vei thur thur a. A car, garage atanga a khalh chhuah tawh chu a han dah lut leh tete a. A hlauthawng lutuk chu mak a inti ngawih ngawih. Nupui pakhat na na na hmu leh lo a ni lova, a hmu teuh. Zak miah lova a sum leh pai it avanga rawn ngaizawng ngawng ngawng, a laka engkim phal pawh an awm nual kha le. Kha nula, Zovi phei kha chuan a neih theihna a nih dawn phawt chuan tiin a hmaah a inphelhruak kelh a ni lawm ni? Retheihna vanga kalsantu a nupui hlui Rohlui laka a thinurna avang khan hmeichhiate hi engahmah a ngai ta lo a ni lawm ni? Engatinge he hmeichhia, vawi khat chauh a la hmuh hian heti khawp hian a rilru a luah le? An inhmuh tum khan a u leh amah Mapuii ngei pawhin en chiang duh lo angin an sawi vek. A room atanga a chhuah phei hmaa parda phen atanga a hmuh a, a mit a lak zia leh uluk taka a luchhip atanga a ke ler thleng a thlir lai kha tunge hmu reng? Mi nu nge nula a nih a hriat loh avanga an hmuh laia ngaihsak anga lang duhlo mai a nih zia amahin a inhrechiang ber.


A sana chu a bih awl lova, hun chu kalmuang hian a hre khawp a. A thiante an buai tlan avanga dar 7 hnua an eitur pe chauh tura a tihte chu amah a inhaw letling ta hial. A T-shirt reng a thlak ngun ta. A chhan pawh, a rimtui inhnawih chu Mapuii’n a ngaihtheih loh a hlauh avangin a thlak kual sek tlat a. A sana chu a han bih leh thuak a, a hmai tlema rang deuh a hmuh chuan a sana thlak turin aroom lamah a phei leh ta nge nge a. Ngawi renga lo thlir rengtu a farnu, a u Thangpuii erawh a lo nui ver ver thung.


Part – XII


Nidang zawng aiin an hna, an eisiam chu an zo hma hlauh. Engati tehreng nge mawni vawiin chu a inrintawkna a hlauh zo nge ni, a thilsiamte chu a tui chiah em tih vawi tam tak a check nawn a, TZ-i’n, “U Mapui, nidang zawng aiin vawiin chu kan siam tui daih,”a han tih takah chuan a hahdam ve thei ta deuh a. Anmahni dawrtute lam an hmanhmawh loh avangin zanriah an han ei hmasa tete a, a nau TZ-i chu an in lama va inpeih turin a tir phei thei ta hram a. A fanute chu an pi bulah lehkhazir turin an chho tawh a.


Nidang ang lo takin vawiin chu an kal hmain hunawl an la nei ngah bawk a, muangmarin a han inpuahchah ta a. A wardrope chu a han hawng a, a thawmhnawte chu a han ching let kual a. Chutiang taka nalh a chak chu a la inhre ngai lo. A rilru a siamfel mai theilo. A inchei hluai dawn chuan hnathawk an ni a, ni meuhin a hre bawk silo, a inchei vak loh leh lan nalh loh a hlau bawk si. A rilru a inkhap buai khawp mai a, a tawp a tawpah chuan thawmhnaw mawlmang tak, nidangah pawh a ngainat sa reng chu a han inbel ta nge nge a. A hmaite chu a han tuai leh thuak thuak a, a rilru tetein,”Min melh tha duhlo chung pawha khati taka min hmuchiang a nih chuan vawiin phei chu chinagkuang deuhin min melh ngei awm si a,” tiin a han inchhut ta neuh neuh a.


A inpeih fel thawkhat ta tihah chuan buaina a han tawng ta hlauh mai, chupawh a thuah hnihin! A taxi hman ber thin driver-in a rawn bia a, Civil Hospital lamah damlo hruai a ngai thut a, midang lo be mai mai turin a rawn ti ta! Chutah TZ-i’n a a rawn be vet hung, “U Mapui, ka inbual laiin bual inah ka ke ka bilh a, ka kal hleithei derlo,” a rawn ti mauh mai bawk! A phurna leh helhhawlhnate chu a kiam nghal duak duak hian a hria. A lu a hai nghal chhawk bawk. TZ-i’n theilo mahse a nau awmpui Ramtei a la awm tal a, a zia. Mahse Taxi ber mai hi, tam mahse zan thil a ni a, hmelhriat tha nilo chu hman chi niin a ngai bawk silo. A tlai zo vek dawnin a hria a, a rilru a hrehawm khawp mai a. A hnathawhnaah hian a theih tawpin hun vawn dik a tum ve ngar ngar kha a ni si a. Pawilo a ute a inthlah tir mai ang tia a rilru a siamfel rual rual chuan a ute pahnih thla thar KTP Committee lamah an tel daih tih a han hrechhuak leh a. A thlan a sa phat phat ta hial a.


A managan ruk nak laiin phone a lo ri, “Hello,” enchiang lovin a han ti liam puat a. Amah ngei kha a lo ni, “I va tlai ve,” teh tawng chuan. A mangang rilru bawk nen a zaidamnain a tlin ta bik lova, “Ka buai a nih hi. Driver leh ka nau hruaiin min theih loh san a. Ka rawn thleng thla ve mai ang. A hrim hrimah dar 6:30 pm chauh a la rik hi,” vin thakin a ti ve ta nge nge a. Lehlama mi chuan a dinhmun chu a hriatthiam sak thei mai a, zaidam takin, “Ka hrelo a ni e. Ka tihpalh,” a han ti duai a, chutah, “Ka rawn lam ang che, in address sawi rawh le,” a han ti leh vut a. Han inhruai kual tir vel chu tuna tan chuan tul hian a hrelo khawp mai a, mahse a harsatna han sutkian mai dan tur a hre bawk si lo! Amah chu a han inthiam chawp leh rih a, “Pawi lo, sumdawnna vang chauh alawm,” tiin a hrilh ta nge nge a.


An awmna kar a hlat nen rei rial lovin a rawn thleng thuai a. Tleirawl thar leh ta ang maiin a hamhaih zova, “I va rawn thleng hma thei zawk ve,” a han ti thei tawk a, mi a biaka hlim hmel pu hram hram thin khan tun tum chu han nuih seih dante kha a theihnghilh zovin a hria a. Harsa titakin a han nui lui hram a. “Hey, ka lai ve tho a nia khatiang hmel kha pu teh suh,” a beng bula a rawn tih tak supah chuan a nuihza a nui chhuak ta hawk a, a pangai leh thei ta hlauh e.


“Ka thlah leh ang che, nau hruai a ngai lo,” ti miau hek an pahnih chuan motorah chuan an chuang dun ran a. Sawi tur tam tak an nei, mahse hei leh chen kawppui nei tawhlo veve an nih vang nge ni tleirawl chhuak inngaizawng an sawi ang maiin an lai ru tut a. An han ngawih dun deuh vang vang hnu chuan a aw thum zawk na na na chuan bul a tan ngai niin a hre nge ni, “Kha taxi driver kha ka hmuh velah a biangah ka fawp ang,” a rawn tichhuak hlawl a. “Engati maw?,” a chhan a hrereng, mahse sawi mai tur a hre tlat lo. “I hriat reng kha aw..,” nui suk chungin a han tih chuan “Hria e,” tih pahin za deuhin a nui chhuak ta nge nge a. “Kan awmdan hi… tunlai chhanah naupang tete pawh an han zah theih loh tehlul nen,” Ani pawh chu a nui chhuak ve ta nge nge a. Kawng tluanin titi holam tete an sawi dun a, an titi duhzawng a inmil a, an lawm zawng pawh a inang viau. An boruak rit teuh pawh khan a kiansan ta nge nge a, hun rei tak atanga lo inhre tawh ang maiin an thinlung a inpawh nghal thlap mai. A changa nui dun hak hak chungin an titi chhunzawm ta mawlh mawlh a; rin loh karin an tum ram chu an thleng thuai a.


Zuala in an thlen chuan a thiante ho an lo awm laih laih tawh a. Amah Zuala ber chuan mak a ti letling viau. Nidanga call nawn mawlh mawlh ngai thin a thiante chu an lo phusa viau tawh a. Anni pahnih an han luh ve takah chuan a theiin an lo pui a, an lo ri lelu mai a. An indah fel hnu deuh lawkah chuan Zuala thianpa Hmaa pek chuan ring leng lung hian, “Vawiin chu i T-shirt vawi engzah maw i thlak a?,” a han ti lung lung a. Midang an lo nui deuh tha nen, Zuala han lai hmel nui puh puh nen chuan Mapuii pawh chu a awm a nuam vaklo ta deuh a. “Ka hawsan mai ang che u,” a ti ta nge nge a. Anni lahin an lo phallo nasa mai a, an zinga mi tho Kima chuan, “Kan thianpa hi a zeilo tet tut a nia. Hmeichhe bem dante pawh a theihnghilh tawh a ni roh ang. Hetia chhuanlam siam buai lo hian rawn rim ve mai awm che a nia. Chaweiah min sawm thut hlawm sia, amah lah min sawm chhan ber sawi tur hre lovin a ne ne kual vel mai mai si a. U Mami (Thangpuii) kan dawp ta ringawt a,” a han tih takah chuan a nui ve ta nge nge a.


An chelh miau si a, rei vaklo chu a han thu khawmuang ve ta nge nge a. Thangpuii’n, “Mama, nangmah khan chaw ei hmasa la, Mapuii hi han thlah leh rawh. Midang chu in tello pawhin kan lo inkawm hlim thei lutuk a nia,” a han tih takah chuan midang pawhin anni pahnih rilru tur chu hrethiamin an lo amen pui vat a. Mapuii mak tih tur takin Zuala thiante leh an nupuite ho chuan amah chu an zinga mi ve reng ang maiin an be bawrh bawrh a, inthlahrung hmanlo khawpin an siam a. Zuala’n chaw a eikham chuan midang ho chu mangthain an inphur chhuak leh ta nge nge a.


“Pa lo min ti em?,” tih chu a tawngka chhuak hmasa ber a ni.

“Engati maw?”

“E.. Ka thiltih kual dan vel hi?” a nui pah huk huk a.

“Ti hran love”

“Kan indawrna chu tikhan a tawp tawh bawk a, ka lo leng zui ang in inah”

“I thiante kha?”

“Zan khat lek na na na chu lo awm ve mai mai rawh se”

“Keimahah hian enge i hmuh?”

“Hmeichhia, ka ngaihsaka ka duat mamawh. Nang”

“Ka nghenchhan theih mipa”

“Love at first sight hi i rin zawng a ni em?”

“Ka hre lo le. Kan pahnih boruak vang hian min zawt tihna a mi?”

“Ni e. Kei chuan ka ring mai nilovin ka tawng tih ka pawm thlap. Khami ni khan ka en duhlo che emaw i ti a, parda phen atangin chiang takin ka en che tih i hre der si lova. Zawnglai i nih leh nih loh ka hriat loh avangin ka inthup a nih kha,” tih pah chuan a nui hak hak a. “U Latei khan i chanchin kha sawi zui lose chuan a rukin ka vei zui che anga, tun hun hi kan thleng kher lovin ka ring”

“Ni e. TZ-I, ka rawn kalpui nen khan kan sawizui ve nasa che alawm” tlemin a lai deuh hlek.

“Takzet?” cho deuh hian a rawn melh a.

“Hmm.. I pa kan ti a, kan star che a”

A rawn en vang vang a, “Ka rilru hre thei rawh”

“He hmeichhia hian min phu takzet em tih i ngaihtuah” a uan a chhuak thut.

“Ka awmah hian ka pawm bei vawng vawng chak che. Chumi hun tur chu ka ngaihtuah tih hre mai teh” a lo ti bak deuh hluk a. Rilru inhmu takin an inen deuh vang vang a, an tlan zel a.


Mapuii te in an thlen chuan a faten TV an lo en mek a. Mapuii’n a hmuh pui miah loh a bag khai atang chuan Chocolate box pahnih hi a ngaihzawngpa chuan a han phawrh chhuak ta a. A fanute chu pe pahin a han be nghal bawrh bawrh a. Mak deuh maiin anni lah chuan an hriat fo hnu ni awm fahranin an zirlai leh thiante chanchin a zawhnate chu an chhangin an titi pui nghal bawrh bawrh a. A ngaihbel nge ni a fate nen chuan in pafa ni awm hliah hliah hian a han hmu pek a. Thlamuang takin a nui sak a, chu chu ani chuan lo hmu vein a rawn kiai khum sak a.

Nidang ang bawka a fate mut a chhuah hma leh avang chuan mu turin an nufa chuan pindan lamah an inzui phei ta nge nge a. Tawngatainate a hman pui zawh chuan a thianpa hahdam taka lo thu duai hmachhawn tur chuan a han thu ve nghal a. Zuala’n, “Engahnge khatia a hranga i thut kher? Ka bulah hian lo thu ve rawh,” tiin a han sawm takah chuan thuawih takin a thu phei ve ta nge nge a.


A kutah a rawn vuan chat a, a thaw ham ham a, muang changin ama lamah chuan han pawt hnaiin nghet tak, dam thlap si hian awmah chuan a han kuah bet ta vawng vawng a. Ngawi rengin an han awmdun ren rawn a, an thin phu inthum rawn tluk tluk bak chu thawm dang a awm lemlo. Zawi tein a khabeah chuan a han kuai dak leh te te a, duat tak leh dimdawi takin a han fawp ta vawng vawng a. Rei mawi tawk an infawh hnu chuan an inthlah thei ta tawk a. “Ka khamlo che,” a han ti sup a, pakhat zawk erawh a hmeichhe rilru no a chhuak ta. Hun hei leh chen a lo thlakhlelh leh a lo mamawh ve thin mipa a han tawng ta chuan a tilawm em a, a mittui a rawn luang chhuak ta ngiai ngiai a. Lawm vanga mittui tla a nih avangin dan buai pawh a tum duh ta lova.


Zuala’n a han hmu chu inthiamlo takin, “Engatinge i tah? Ka tina che a mi?,” tiin a han zawt nghal chuk chuk a. Mittui kar atangin a han nuih ta ver ver a, chutih lai tak chuan a ngaihzawngpa mitah chuan nuthlawi fa pahnih pawm hmel ni lovin amah mamawh em emtu hmeichhe thianghlim hmel a pu a. “Ti na love, hei leh chen ka lo thup bo tawh ka natna leh ka khawharnate tikiang tura nang ka tawng che hi ka lawm em a ni,” a han ti a. Pakhat chuan a han kuah nghet zual sauh a, lungchim takin a han fawp leh ta vawng vawng a.


“Haw tawh rawh zan a rei tawh” a han tih takah chuan ani chuan “Ka hawsan phal reng renglo che. Heti hian i bulah ka thu tlaivar dawn,” nui hak hak chungin a han ti let a. “A hrim hrimah inpui sang kai manah thingpui no khat talte chu ka hlawh ve dawnlo a mi?,” fiamthu hian a han ti zui a. “Thingpui lumna hun min pe emawni le?,” a han ti let ve ngat a.

Thingpui lum tura choka lama a phei takah chuan a hnungah a rawn zui zel a lo ni a, a hnunglam atanga a kawnga nghet taka rawn kuah pah hian, “Hetiang hian ka inchhungah ngei han che kual vel tawh la ka va han ti em!,” a beng bulah chuan a rawn ti sa sa a. “Hmm..” A lamah bawk a kuai her a, chiang deuh hian a han en vang vang a, “A la hma i ti maithei, mahse palai rawn tirh nghal chuk chuk ka duh ber mai,” a rawn tichhuak ta hlawl a. “Ni em em rih love, inhriatchian nan hun kan la mamawh veve niin ka hria,” ti bawk mahse a hlim ru veng veng thung. A han dingdihlip kang ak a, amah thlir vawng vawngtupa hmuiah chuan a han fawp ta zeuh a. Ani chuan, “Ka thlah phal tawh lo che Mapui.. innei mai ang. Kan khawhar dun rei tawk bawk e,” a han ti leh sup a. A thingpui lum so ri bawrh bawrh ri chuan a tibuai lova, inthlahlel takin an inpawm zui vawng vawng a.


A TAWP TA...



Link:
BBcode:
HTML:
Hide post links
Show post links

Rosie L Ralte
Posts: 2
Joined: May 24th, 2016, 12:51 pm

Unread post by Rosie L Ralte » May 24th, 2016, 1:10 pm

He thawnthu hi a ziaktu keimah ngei thinlung hnehtu, ngaihnawm ti taka ka chhiar nawn fo a nih avangin a tam thei ang berin chhiarin tahpuiin, nuihpui ve se tih hi ka duhthusam a ni

Link:
BBcode:
HTML:
Hide post links
Show post links

zirahauhnar
Posts: 1
Joined: December 12th, 2016, 12:58 am

Unread post by zirahauhnar » December 12th, 2016, 1:09 am

A va ngaihnawm tehlul ve le. A ziaktu hian a thil tawn tawh a ziak chuak em maw tih mai turin hringnun a rawn ziak chhuak thiam khawp mai. Ka ngaihnawm tih zawng tak a ni.

Link:
BBcode:
HTML:
Hide post links
Show post links

Emestlaisun
Posts: 2
Joined: July 7th, 2019, 4:21 pm

Unread post by Emestlaisun » July 15th, 2019, 8:05 pm

Chhiar anuam in a tha hle mai.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)