MY DESTINY BY Akimi Lr Man Utd

[Ngaia]

MY DESTINY.. (Based On True Story)
Episode 1

''Sir family case kan nei tlat mai, tun mai khan call kan dawnga kan chhuak nghal mai dawn ania'.. Min rawn betu Constable Pa Mawia chu melh hran lo chuan va kal rawh u, harsatna inneih tak leh min rawn be dawn nia ka ti liam puat a.. Kan Chess khelh lai chu ka en chhunzawm lehnghal a.

He khuaah hian kum 1 dawn chu ka lo awm ve tawh a. OC ka ni a, kum 7 zet chu Police department-ah hian ka lo awm ve ta. Ka naupan tet ațanga ka nih châk ber leh ka nih tum ka ni thei hi ka lawm thin. Lehkha thiam thei tak ka ni a, ka chhungte chuan Engineer ni turin min duh a. Amaherawh chu Police Officer nih hi ka naupan tet ațanga ka châk ber a ni tlat. Bsc ka zawh hnuah ka chhungte remti vak lo chungin Police department hi ka luhchilh ta a ni. Ka hleitlingin mahni tawkah ka taksa ka uluk bawk a, Police department ka luhchilh hma pawhin Arm Wrestling-ah pawh vawi tam Medal ka lo la ve tawh thin. Tin, Valley Ball ka khel nasa hle thin bawk. Police Officer nih i inhmeh hle mai min titu pawh ka tawng ve nual thin.. Ruihtheihthil, zuk leh hmuam engmah ka tih loh vang hian ania nge, ka kum phuloin mi hian min ngai naupang fo thin..

'Sir hei kan lo thleng, kan rawn la phei deuh vek mai' constable Rintea chuan a rawn ti a.. Buaina siamtu chu rawn luhtir hmasa ber teh u ka tia, a rawn lut chu a rawn pai lut khut khut a. Medical test nei kher lo pawn a rui tih hai rual a ni lo. An buai nachhan ber ka zawt chu a rui bawk nen engmah thu mumal a sawi hlei thei lo. A thinrim a la âng tawn tawn a, "Ka that vek lo kha an vannei, min mantir ve khanglang ka chhuah hun chu Lalduhawmi saw ka sat chhum hmawk ang" te a la ti ngam. Zaidam tia sawi thin ka ni ve a. Mahse Police hlau lo leh engah mah ngai lo a ka hmaa chutianga a la sawi ngam chu ka thinin a tuar ta bik lo. Constable ho ka ko a. Va hlap harh phawt teh u ka tita tawp a. An hruai sawn hnu chuan FIR rawn thehluttu ber kha rawn hruai ru ka tia. Nula hmeltha tak, tê lampang chu a rawn lut ta a. A hmelah chuan hlauhna a la lang a. A khur der der ka hmuh phei chuan Police Station ah a tlangnêl lo hle tih a hriat nghal.
"Khawngaihin inbuai chhoh dan han sawi ta che" ka ti a. Aw khur deuh dar dar chung leh hlauh thawn hmel tak chuan a u zu ruiin kut a thlak dan leh a nu leh pa pawh zah lova in ațanga hnawh chhuah a tum dan engkim chu a sawi ta a.
A hmain hetiang hian a awm thin em?
"Tehreng mai, a ruih apiang chuan kut min thlak thin" a mittui chu a rawn luang zawih zawih a.
Hmeichhe kutthlak hi danin a phal lo tih i hre ve reng awm sia, ngati nge i rawn report mai thin loh?
"Report mai chu ka duh thin, mahse min vau nasa thei si a. A rawn chhuah leh huna kan chan tur ka ngaihtuah hian ka ngam thin lo a.. A kut min thlakna hi chu ka tuar thei mai a mahse kan in hal a tum a. Khawnvartuite pawh a leih hman vek. Zanin pawh hian kan in hal chu tum lo se ka lo phone miah lo ang, ka hlauthawng em a ka rawn phone tawp mai a ni"
A hmeltha tak chu ka han enchiang a, a chal chu a pawng deuh a. A biang veilam chu a sen țun bawk. Ka ngaihtuah vang vang hnu chuan zanin chu lock up ah hian kan kawl phawt anga, naktuk dar 10-ah i pa nen inrawn kal leh dawn nia tiin ka haw tir ta a...

MY DESTINY..
Episode-2

An haw hnu chuan a u an vaw ri chu ka ngaithla kar a.. A mize chapo tak leh Police te engah mah min ngai lo chu kei chang nilo ka thawhpuite pawhin an haw ve hle. Mut hmunah chuan kha nula tê khan ka rilru a luah tlat a. kum 20 pel awrh tur chauh a ni a. Khatiang khawpa an inchhungah harsatna a tawk thin leh kut hial a tuar thin kha ka lainat hle a ni. A mize zãwi tak, pawisawi lo hmel leh sualna la tem chhin ngai lo hmel, a hlauhthawn luattuk avanga a thlabar hmel te kha ka mitthlaah a châm ta reng a. Ka nu leh pa thu min hrilh fo thin "Police Officer pawh ni mahla midangte khawngaihna leh lainatna thinlung pu fo thin rawh" tia an sawi kha he nula lainatawm em em vang hian ka hriat chhuah nawn phah uar uar thei nia.

Dar 9 ah Police Station ka thleng a. Ka rilrua lang hmasa ber chu dar 10 a lokal tura ka tih nizan lama nula kha a ni. Engvanga lo nghakhlel ve em em nge ka nih pawh ka inhrethiam nek love..

"Hei nizan Family case ami te kha an lo thleng tawha ka rawn luh tir dawn ania" phur takin ka Uniform te chu ka insiam tha sawk sawk nghal a.. An rawn lut chu ka phu zawk thei. Nizan lamah kha chuan buaina tam tak, rilru natna nen a tawrh fe hnua lokal an nih vang nge a hmeltha tho nain vawin ang em ema hmeltha chu a nilo.
"Lo țhu rawh u, zawhna tlem zawh tur che u ka nei a.." ka aw te chu a khur lek lek mai. Vawi khat mah ka mihringpuite hmaa zam ngai lo hi engvanga zam ru tlat nge ka nih le.. Apa tar tawh lam nen chuan ka hmaah chuan an țhu a..
"Case in file dawn nge file lo a inlak chhuah mai induh zawk? Tang tura induh chuan Central Jail ah kan thawn mai anga, tunah chuan a rui te pawh a reh tawh a.. Nizan kan naute'n an han zilh hlak nen tunah chuan a nungchang a țha tawh khawp ania" an pafa chuan an han inen ang ren rawn a. Chu nula hmel buai nak rilru chu ka hriatthiampui hle.
"Hriatthiam ava har ve, kan chhungkua kan han inrawn khawm lawk anga ka rawn hrilh leh ang che, reilote min lo nghak lawk" tih pahin phone hmang turin min chhuahsan a. Chu nula chu ka en vang vanga, a thawk dan muang fan raih leh a mit sen deuh râm te chuan a nun hlim lohzia a tilang chiang hle in ka hria. Apa awm loh lai chu chuhin lo biak harh dan kan ngaihtuah a. Mahse engin nge min mawlh ka inlhre thiam lo. He nula lian lem lo, a hawiher vel en reng reng pawha class sang lem lo hmaah hian Police Officer, khawpui nula huhâng ngah tak tak, pian nalh leh class tak tak lo dodai fo tawh tu hi ka zam tlat mai le.. A tawpah chuan harsa takin ka țawng chhuak ve ta..
"I u chu a zia lo hle mai.. Unau nangni 2 chiah hi ami innih?
'Nilo e.. Kan upa ber hi Sipai ania, hmun hranah an awm a.."
"An ruiha an inla luling ta tlat mai thin hi chu a pawi a ni"
" Nia, kan tuar hnem tawh lutuk a, ka nu leh pa an upa ve tawh bawk nen, tawngkam mawi lo tak taka a ânkhum chiam chiam hi chuan ka lo chhan lo thei thin lo a. Kut ka tawrh phah leh nge nge zel chu anih hi" a rilru a tawt tih hriat takin a thaw fân leh raih a.. A nu leh pa thlavang a hauhna avanga tuar a huam pawh chu a huaisen ka ti ru hle. A mitmengah huaisenna leh inringtawkna a lang hialin ka hria..
" Rei tak tâng tur pawn in tithei ania. Eng emaw chen han tâng bo se a rawn sim haw ve mai ang"
" Nitin a tan kan țawngțai thina, that chhuah hun chu a la nei ve em em ang"

Apa rawn lut chuan case chu siamsak mai kan rel thlu ta mai. Kan khawngaih lo a nilo, tunah rawn haw ngawt se kan tan a hlauhawm lutuk dawn a. Jail a tan chhungin a tan kan țawngțai reng anga, a rawn tha haw turah beisei zawk mai ang a rawn ti a. Tichuan buaipui ngai te an buaipui fel hnu chuan an haw san ta a. A u pawh chu chumi tlai la la chuan Central Jail lama tâng turin kan thawn liam ve ta a..

Chumi zan ka mut hmunah pawh chuan kha nula huaisen tak, inringtawk tak leh hmelțha tak, nu hnâp mai kha ka rilruah a cham reng a. Hetiang case dang tam tak hi chu zan tin deuh thaw kan tawng, mahse kha nula te kha a u in a tih hreawmzia ka hriat khan ka lainat a, ka khawngaih em em bik ka inhre thiam lo. Ka mitthlaah a hmel a cham reng a. An in awmna zawn chhuaha an ina len hial ka nâp a ni.. Heng ka'n sawi duah vang hian Police lerh takah min lo ngai lo ula. Kum 28 mi ka ni a, ka hnaah ka rilru ka pek nasat thin em vangin ngaihzawng hi ka nei ngai hran lo a, hman pawh ka hman lo. A hmingin 3 chu ka nei ve tawh a.. Kum 4 kalta ațang phei kha chuan ngaihzawng chu sawi loh nula han vei em em pawh hi ka nei ngai lo.

MY DESTINY..
Episode 3

Ka inbual zo ka phone ka han en chu Thanpuii miss call 5 ngawt a lo awm hman. Message 1 lo awm chu ka han en a. "Ka call i la duh lo thin hi chu na ka ti" hmmn he nu veleh ngawt ngawt zel hi. Thanphuhlipi zah theih lohzia hi chu aw ka ti rilru vawng vawng..

Thanpuii hi ka nau college kalpui thin a ni a. Nula hleitling leh pian nalh, hmeltha tak mai a ni a. MA tha taka a zawh hnuah a pa sikul Higher secondary ah zirtirtu hna a thawk mek a ni. An hausain lehkha a thiam bawk a, mi chunga leng an ni. Min ngaihzawn zia chetze tinrengin a tilang thin a. Ka mitmei hmu miah lo mahse a beidawng ngai lo. Ka nu leh pa leh ka naute ah țan a la nasa hle a, ka pa phei chuan nei mai turin min ti fo.. Thla 1 ah vawi 1 tal Weekend hmangin Aizawlah ka chhungte bulah ka haw thin a. Ka haw chang chuan a rawn lawr zing ber te zing ami a ni. Mahse a mize chapo ru tak leh a hawiher zamlo leh lutuk hian min hip thlawt lo.

Ka kawngka chu an rawn kik dawt dawt a. Ka va hawn nak chuan kan Department ah pawh ka kawm ve ber țhianpa Ruata lo ni reng in. He khua hi kum 1 tling lo deuh chiah ka la awm a. Hmelhriat ka nei manglo a. Nula pawh vawi 1 mah ka la rim lo. Thian pawh ka kawm ngai mang lo. Thianpa Ruata tih loh hi chu. Bazar pahin chhuak harh ve ang a tih tlat avang chuan kan inkhalh chhuak ve ta nge nge a..

Ka Car khalh lai chu ka ding dawt.. Ka thil hmuh chuan ka lung a ti phu dup dup thei nia. Hman zana nula hmeltha leh duhawm tak kha a ni. Amah ka hmuh rual chuan a u in "Lalduhawm ka rawn chhuah hun chu i châk lo khawp ang" a ti tawn tawn ri kha ka bengah a ri nawn awn awn a. A hming chu Lalduhawmi maw.. Ka van lo hrechhuak har tak! A hmel leh nungchang nen pawh a hming chu a inhmeh hliah hliah. Ka rilru luah hnehtu anih ve miau avang chuan be lova chhuah mai chu ka tum bik lo. A bulah chuan ka ding det a. Ruata chuan mak tih hmel takin min en hau ringawt a.
"Khawnge i kal a..? Lo chuang ve ta che" ka zam leh viau mai. Ngati nge he nula te reuhte hmaah hian ka zam ziah a. A mi uap hi anat reuh em em mai ni!
" Hei dawr bungrua inlak ka tum deuha mahse a lo la thleng silova ka haw leh hrih dawn anih hi, kan in a hla vak tawh lo a ka lo chuang lo mai ang" a nui sen sen reuh a. A zah hmel hle bawk. A hmel chu a hmaa ka hmuh lai aiin a lo țha lehzual tawh. Rilru hahna a tawk tlem deuh tawh pawh a ni mahna.. Țhianpa Ruata phawk a rawn chhuak.. " Awmte ka țhianpa hi rawn lenpui ka châk tlat" a rawn ti ta phawng mai. Ka va melh a lo khi sun lehnghal. "Kan in te chu rawn lenna tlak pawh a ni hleinem, induh phawt chuan in lo leng dawn nia" tih pahin a nui var var a. A van duhawm reuh tak em! Ruata hi he khuaah hian kei aia a awmna a rei tawh avangin Lalduhawmi nungchang leh mizia chu hriat a lo nei nual a. Nula fel tak leh hawihhawm tak a nih zia leh an chhungkaw tan zah pawh sawi lova hna a thawh nasat thin zia te, an chhungkaw harsatna vanga zirna chawlhsana dawrte siama a nu leh pa chawm a, a u an rawn mantir takin a pawisa thawhchhuah chhun pawh ruih nan a laksak thin dan zawng zawngte chu a sawi ta vek a. Ka ngaihtuahna a ti thui hle a. Amah ka khawngaihna leh ka ngaihsanna chu a intluk tawk vel hial ang.

MY DESTINY..
Episode 4

Ni hnih hnuah Ruata nen chuan an in chu kan chuangkai ta a. Kan len hmasak ber zan chuan Awmtei pa chu tapchhakah lo țhuin min hmu chu a hlauhthawn hmel hle a. "Vanlalfela Jail ațangin a tlan chhuak ami?" a rawn ti heu mai a, nuih aza duh hle. Ni e, Police nih hi chu mi ina han lenluh vel pawh a nawm loh chang a tam țhin. Ruata chuan chhang vatin "Thinlung tlan chhuak kan rawn zawng zawk, in inah hian a hnu kan rawn chhui tawp a.."
Kan thawm hriain Awmtei chu an in nena inzawm dawr ațang chuan a rawn chhuak vat a. Nui sang chung leh hawihhawm takin min lo lawm a. A naupan hmel ngaihtuahin a puitling takzet. An inchhung vel chu kan en kual thuak thuak a. An khawsak chu a sang lem lo a. An bungraw neih pawh tunlai tak a ni lo. Nimahsela uluk tak leh duat taka enkawl tih a hriat hliah hliah..

A tawi zawngin sawi ta ila chutia kan han len kan han len takah chuan kan miziate pawh kan inhrechiang tawn zela, ka duhna pawh a zual telh telh bawk. Zan 1 chu ka duhzia thu chu zak chung chungin ka hrilh ve ta. Hmeichhia hi ka la ngaizawng hmasa ngai miah lo a.. A hmaa ka ngaihzawngte pawh kha anmahni rawn tih hmasak vek a ni. Ka zam chhe hle a, khawsak phung leh dinhmun en chuan min hnar bikin ka ring lo. Mahse ka rin dan leh ka lo ngaih awlsam ang ngawt a ni lo tawp mai. Ka hmeichhe ngaihzawn ve hmasak ber chuan mawi hnai takin min hnar fithla țhak a nih chu!

Tlawmthlak ka ti hle a, ka englai hi nge a duh loh ang? Eng nge mipa dang aiin ka țhat loh bikna ka inngaihtuah ngut ngut a, ka zak hle bawk. Min hnar tak ațang chuan an in pawh ka chuangkai ngai ta lo. An veng lam kal takngial pawh ka hreh hlur tawh.. Ngaiin a hmel hmuh châk hle thin mahila thingtlang nula hnar nih chu ka la na hle a. Phone hmang takngial pawn ka be ngai ta lo..

Khawsik avangin ni 3 ngawt mai ka mu tawh a. Ka chhungte phei chuan chawlh la a haw mai turin vawi tam tak min chah tawh. Mahse ka dam veleh mai ka rin avangin ka haw duh ta bik lo a. Ka mutui lai chu ka phone riin min tiharh a. Ka han en chu Awmtei a lo ni a.. Ka damlo tih Ruata'n a lo hrilh chu niin, min ngaihtuah thu te chu a rawn sawi ve a. Mahse min hnartu anih avangin min ngaihtuah tak tak pawh ka ring chuang lo. Reife kan inbiak hnu chuan tim deuh dui chungin min duh loh chhan chu ka zawt ta hram a. Zanah Enkawli a hman chuan i damlo ka lo kan che anga, ka hrilh ang che ati ta a.

Zanah chuan an lokal ta ngei a. Ka inchhung hnawk nuaih mai te chu an țhian dun chuan min tih faisak a. A hmel hlim deuh sang reng chuan min tidam sawng sawngin ka hria a, hmuhnawm ti takin ka lo thlir leh reng thin. Enkawli'n dawr kal chhuanlama hun thawl min pek hnu chuan min duh loh chhan chu zah hmel tak leh inthlahrung takin a sawi ta a. Kan chhungkaw khawsak leh an chhungkaw khawsak inthlau lutuk vangte, ani pawl 12 pawh pass loin kei Police OC meuh ngaihzawn a hreh thu leh ka chhungte lam pawhin duha a inrin loh thute.. Tin a u sipai a țangin sum engmah a thawn ngai loh avanga aman inchhung khur ei tur thawhchhuah a ngaih thu leh anu leh pa tar ve tawh tak chu pasal neih chhuahsan chi nia a hriat loh thute nen chuan a sawi ta siam siam a. Min duh hmuh tirh atanga keimah ang bawka a thinlunga ka awm ve reng thu leh mahse phuloh pui ngaihzawn chu midangte hmai zah anat dawn zia leh ka laka ngei pawh a inthlahrung thute a sawi chuan ka khawngaih reuh hle..
Ka kuaha ka thiam ang tawk chuan hmeichhiain phuloh an neih loh thute, min hnar avanga ka zah zia thu leh hmuh pawh ka ngam loh thute chu ka hrilh ve a... Kan ngawih dun vang vang hnu chuan..
"U Lawmzual i lo len loh chhung khan ka lung a leng thei lutuk, ka hnar che kha inchhir chang ka ngah a sin"

"Anih tunah i la inchhir em?"

"Ka hre bik chuang nang" a nui sen sen a..

"Min duh lo tawp chu i nilo tiraw.. I inthlahrun vang chauh a ni tiraw.."

" Dik tak chuan ka hmuh hmasak ber zan ațang che khan ka duh tawh che.. Mahse kan inkar hi a zau" a sawi zawh hmain ka hmui chuan a hmui chu a chuktuah ta a. A dawh tawp a mahse kei erawhin duh thawh takin ka fawp thung. Hetiang hmeichhe nungchang tha, hawihhawm leh hmeltha tak hi chhuah ka phal teuh lo..

"U Lawmzual nakinah kan la buai tho ang, bul țan lo law law ila a tha zawk lo ami"

"Tha lo, min duh loh chuan ka damlo char char ang. Ka dam i duh loh ami?"

"I van naupang chhia tak! Keimah vanga damlo pawh i nih loh kha"

"Ni lo mahila min duh loh leh chuan ka na zual sauh anga, thi ta ila i inthiam thei dawn ami?

"I thih chu ka phal teuh lo. Mahse i chhungte'n min duh lo ta se..

"Chutiang sawi suh, kan pahnih kan induh chuan a tawk.." ka rilru tak tak ka sawi reng a ni. Bakah ka chhungte hian a mizia engkim hrechiang se an hmuhsit a, an duh loh ka ring miah lo...
He zan ațang hi chuan kan 2 nunah lung phum hlu tak inphun tawnsakin kan hlimna leh lunngaihna thlengin kan ințawm tawn a. Ka nuna mi pawimawh ber a ni ta...

MY DESTINY..
Episode 5

A ni telin ka duhna a zual telh telh a, kan hlim dunin kan inngaipawimawh thiam a, min duat thiam em em bawk.. Thla 4 kan inngaihzawn hnu chuan an inah te ka chuangkai tam bawk nen an khua ami te chuan kan inngaihzawn an hre fur tawh a. Inhmeh tia min lawmpui tam tak awm mahse Awmtei ertu leh sawichhetu pawh tam tak an awm bawk.

Ka cousin nupui neihna tur avangin ka haw a ngai dawn a. A hmaa thla khata vawi khat tal haw ngei ngei thin kha Awmtei ka tawn ațang chuan ka haw ngai ta meuh lo. Ka ngaih em avangin haw san ka hreh a ni. Ka chhungte pawh bialnu ka nei tih ka hrilh tawh a. Ngaihzawng ngaihsak ngai lo ka nih vang nge an lo phûr viau mai. Ka chhoh hma ni chuan a pain chaw ei tura min sawm avangin an inah ka va ei a. An chhungkaw bula awm hi a hahdamthlak tak zet a. A nu leh pain kei tehlul min thlamuanpuizia ka hmuh hian ka hlim thin. Kar khat inhmu lo a kan awm tur chu Awmtei chuan a huphurh hle a. Kei ngei pawhin ka huphurh a ni. Inhmuh leh vat intiam chungin atukah chuan ka haw san ta a. Aizawl ka thlen hma zawng Awmtei chauh chu ka rilruah a awm tluan parh nia. He nu zûnah hian ka uai na tawh hle a ni

In ka thleng chu ka chhungte pawhin min lo lawm thiam a. Mahni in han thlen chu a nuam dangdai viau. A hmaa keimaha ei rawng inbawl chawp thin khan siamsa ka ei a. Inbualna tur tui min siamsaktu ka nei ringawt pawh nuam ka ti. Ka farnute bulah hi chuan ka pangchang thiam viau zel. Awmtei thlalakte chu ka hmuh a. An rak tengtung a, hmeltha an ti ve hle. A mizia leh nungchang ka sawite chuan an ngaithla tui hle a, min zawt nawn deuh sek reng a. Ka nau Sangtei phei chuan an hna chawlh veleha Awmtei hmu tura rawn zin a tumzia a sawi nghal lawng lawng. An biak ve châk em avangin a phone number min dil a, atir chuan ka pe duh lo ngei a, ka farnute titau hmel tikawi sawi vel ka hmuh chuan ka pe leh ta nge nge..
Ka u Mami roomah kan unau 3 chuan kan titi khawm ziah a. An ngaihzawngte chanchin leh an hna chungchangte min hrilh ve thin. Kan unaua kan inkawm lai hi Awmtei ka ngaihtuah loh ve lai tak a nia. Keimaha rooma ka awm chuan Awmtei ringawt ka ngaihtuah a. Ka call reng bawk si, a buai thin zia hrechiangtu ber ka ni a. Ka inthlahrung ve deuh thin.

Ka muhil dawn țan tih chuan ka phone a rawn ri. Awmtei lungleng a muhil thei lo aniang chu tiin phûr takin phone ka en. Mahse Thanpuii a lo ni

"Thingtlang nula zûn ngai chu i lungleng awm si a ka rawn hnem dawn che" ka nau Sangtei'n a lo hrilh a ni maw... A aw ațang chuan a ruih hmel em em lehnghal

"I va mu har ve.. Hei ka mu tawh a naktuk lamah kan inbe dawn nia"

" Thingtlang nula rilru hi i hre nange? I sum bak a duh lo. Sawrkar hnathawk sum an duh avang hian an taksa pawh an ui ngai lo. Nakin lawkah i fa a pai anga, a neih theihna tur che anih chuan eng hmanrua pawh a hmang hreh lo ang. Ngati nge i mawl em em a.." a ang tawn tawn a, a inhnit faih faih a, a țap ni ngeiin ka hria..

"Thanpui nula dang ang a ni lo. Hmeichhe rilru thianghlim leh nungchang țha tak a ni." Ka bialnu chungchang hi a chhe zawnga sawi ka phal lo..

"Thingtlang nula Caliber hniam lutuk pawh ngaizawng duh kha leh chen ka lo vei a ka lo duh che kha ka inngai hniam vek, i lo nep hle mai. Kei min hnawlin thingtlang nula i thlang a maw? I la inchhir ang hre rawh. Tunge ka nih i la hre dawn khawp" a au ring ngang mai. Hetiang zu rui țawng ka ngaithla peih lo.

Phone ka off a, mutthilh ka tum chu ka muhil mai thei tlat lo. Awmtei mizia ka han ngaihtuah a, Thanpuii sawi ang kha chu a ni hlawl lo. Kan inngaihzawn ațangin sex hmanpui vawi 2 ka tum tawh. A kawng a chin chunglam bak ka khawihsak thei lo. Tin, nupa nih hmaa sex hman chu a duh lo bur bawk. A invawngin miin a chanchin a chhe zawnga an sawi turah a inveng lawk thiam em em a. Hmana ka damlo kana Enkawli nen an rawn kal bak kha kan inngaihzawn hnuah ka in hi vawi 1 mah a rawn la kal leh lo. Ka sum hi a beisei ngai miah lo a. Hlawh tam tak ka nei tih a hre ve renga ka hlawh lak nia eng emaw tal leisak ve ka tum pawn a duh ngai lo. A nungchang leh mizia hi khawpui nula inla chhelo, no loh hlaua nisa pawh tuar ngam lo, inla class ve tak tak ai chuan ka thlang zawk tho tho.
A bahsam sei hniang mai te, a mitmeng bial lam leh zahawm tak, a nuih zawnga a biangsum lo lang thin te mitthla reng chung chuan mutthilhzai rel ka tum ta a..

MY DESTINY..
Episode 6

Aizawlah pawh kar 1 dawn chu ka awm ta. Ka lungleng thei em em a. Ka thinlung Lalnu Awmtei lahin ni 3 chhung ngawt ka call a pick up ta lo, ka msg a reply ngai lo bawk. Thla 4 chuang kan inzui ve tawh a. Kan inngaihzawn ațangin vawi 1 mah kan la inhau lova, hmeichhe dang angin a titau ve bur bur ngai lo. A duh dan ang ni lova thil a kal chang pawhin dawhthei takin a nghak mai thin. A phone a bo emaw eng emaw harsatna a tawk anih ka ring ta ber. Naktukah ka haw leh tawh dawn thova hmaichhanah ngei inhmuin engkim a tha leh vek mai ang chu(h)

Tluang takin ka inkhalh thleng a.. Ka Bawihtei ka ngaih tawh em avang chuan ka indah fel sawk sawk a, anu Shawl tur ka hawn sak leh apa kawrlum tur nen chuan phûr takin an inlam panin ka inkhalh chhuak lehnghal a. A dawrtê vawi tam tak ka nghahpui ve thin chu a lo inkhar țhap a. An kawngkhar chu zimtein a lo inhawng bawk a, kik hranpa lo chuan ka lut tlang nghal tawp. Anuin min lo welcome a. "Awmtei hi khawnge a awm lo mi?" tia ka zawh chuan a damloh thu leh ni 3 chhung engmah a ei tawh loh thuin min lo chhang a. Ka thil hawnsak ka khai lai chu thutthlengah ka dah tawp a. A roomah ka tlan lut nghal a.. A chauh hmel hle a. Ni 3 ngawt engmah a ei tawh loh vang nge ni a hmel chu ni dang aiin a lang cher deuh. A dâng bei a, ka Bawihtei chu ka lainat ngei mai.
" Ngati nge i lo dam loh a, i eng nge na ber?"

Rei fe ka nghah hnu pawhin chhanna ka dawng lo..

"I hmel hlim sang leh duhawm tak nen nui sen sen chungin min lo hmuah ka lo beisei asin.. Damlo chung pawn ka phone call reilote pick up chu a har viau ami? I damloh te pawh min rawn hrilh ve tur ini asin" ka vui lo thei lo a ni. Ka hriat lohin ngati nge hreawm tam tak a lo tuar bik. A damlo tih chu hria ila ka hriat rualin ka haw nghal tur...

Engmah a la sawi ta chuang lo. A ngawi reng a, a mitah mittui a rawn luang chhuak ngiai ngiai a.

"Bawihte i bulah ka awm tawh ania, lungngai suh aw i dam vat mai ang, ka ngai tawh lutuk che"tih pah chuan ka zu kuah a, a chalah chuan dimtein ka zu fawp a. Chu veleh na thei ang berin min nam sawn ta dawrh mai. Rum takin min melh ngawt ngawt bawk. Khatiang hmel kha amah ka hriat tirhtê atangin Awmtei hmelah ka la hmu ngai ngailo. Eng nge a awmzia ni ta ang. A natna vang em ni tiang hian a awm tak? Nge nia ka ngaih em em leh ka thlakhlelh em em hian min ngai velo a min mamawh tawh lo em ni? Zawhna hlirin ka khat a. Ka bing chuk chuk thei!

"Awmte eng nge i awmzia hi?"
"Ka hmuh phakah awm tawh suh BUM HMANG PA, khawngaihin kal rawh, rawn kal tawh ngai suh" a mittui a luang nghal zawih zawih a..

"Tihsual ka nei em ni? Hetiang hian awm lo teh, pangngai takin sawi dun ang"

"Sawi tur ka nei velo. Kal vat rawh" a rizai sin lai chuan a inlukhup ta hmak a. A țap tih ka hria, eng nge ka tihsual ka inngaihtuah let ngial a, mahse kan inbiak hnuhnun ber thleng pawhin a pawi ka sawi awm ka hrelo a, hlim takin kan inthlah anih kha.. Ka unaute bula ka awm vangin a hma angin ka care lo deuh pawh a ni mahna, mahse theih anga tam ka be ziah a, ka call la duh lotu leh ka msg reply duh lo tu pawh amah zawk a nisi. Ka ngaihtuah fe hnu pawn ka hre chhuak thei lo.

"Hetianga i awm nachhan hi sawi teh khawngaihin.." ka aw chu a chang fak tawh

Darkar 1 dawn chu a khum bulah ngawirengin ka ding a, mahse rizai chuan a inkhuh tlat a. Min chhang dawn lo takngiala ka hriat hnu chuan ngawi rengin a room chu ka chhuahsan ve ta a ni.

Anu chu a damloh chhan ka zawt a, a natna ber pawh a hriat loh thu leh nidanga a khua a sik hluah hluah pawha dawr hawng hram hram thin khan ni 3 ngawt a hawn tawh loh thute, chaw ei tur leh tui in tur takngial pawha a room ațanga a rawn chhuah ngai loh thute chu min hrilh ta a. Ka ngaihtuahna a kal thui takzet. Eng nge a chhan ni ta ang????

MY DESTINY..
Episode 7

An ina kal ka bansan thei chuang lova, amaherawh chu ka la be țawng thei lo. Ka awm chhung chu a inlukhup char char thin a. Ngawirengin ka țhu a. Ka haw san leh mai țhin. Aman pangngai taka a sawi theih hun ka nghak mai a, tihluih ka duh lo a ni.. Engkim a tha leh tur vek tura beiseina ka la nei țawk țawk hi ka chakna neih chhun a ni mai. Ani ang bawkin chaw ka ei ngai bik lova, a tellova awm tura ka inngaihtuah ringawt pawhin ka zuam ngang lo a ni..

Ka call leh message a chhang ngai lova. Nitin a Whatsapp Dp leh Status erawh ka en lo ngai lo. Ni 4 ngawt an khuaa ka awm leh hnuah chuan zan 1 chu a phone call ka dawng nawlh mai. Ka call a pick up lohna a rei tawh em avangin ka mumang emaw ka ti hial a ni. A call chu rang takin ka la vat a. Awki hniamtê, chauh hmel zetin "Inhmu ang" a rawn tia. "Aw ka lokal nghal" tih leh tlan chhuah ka rual a.

An in kawtah chuan a lo ding a. A pawr fap a, a hmel a thim raih bawk. A hmui sen no chak thin pawh chu a duk deuh ruih a, a mit pawh a bui deuh lâk bawk. Han en reng reng pawn na tak tuar hmel a pu a ni. Nula hmeltha leh hlim hmel pu reng thin kha a nisi a. A hmelah hlim hmel reng a lang lo. Ngawi rengin Car ah chuan a rawn lut a, min melh miah lo a, hmalam a melh ngar ngar. Engmah sawi lo chuan hmalam panin ka tlan ngar ngar a. An khaw bul lawka lui luang delh delh, a chhehvel hmun nuam tak nisi, ka khawhar changa ka pan fo thin lam chu ka pan pui ta a.

Car chhung ațang chuan lui luang chu kan thlir reng a. Țawng hmasatu nih kan hreh ve vein ka hria. Mipa zawk ka nih angin a țawng chhuak hmasaah ka țang ta nge nge a.

"A chhan engkim sawi tawh rawh, tun thleng pawh hian hetianga ka chunga i awm chhan hi ka la hrethiam lo ania"

"I hria, i hre vek.. Engtia rei nge min bum i tum a.."

"Awmte, kan inngaihzawn ațang hian ka la bum ngai miah lo che, a chhan chiang takin sawi teh"

"Bumin ka lo awm char char tih ka inhriat hian na ka ti.. U Lawmzual ka ring em em thin che a sin.. Lehkha zir sang lo mi mawltê pawh ni ila ngati nge hetiang rilru hi ka chungah i put" a mittui a luang zawih zawih a. Ka hmangaih mittui tla chu hmuh hreawm ka ti takzet.. Mahse min mawhpuhna hi thudik a ni lo achhan ka hre ngei tur a ni.

"I țap kha bang nghal rawh, hmeichhe chak tak i nih kha khatia i awm kha ka hmu duh lo. A chhan chu sawi rawh, vatin" ka aw chu thinrim aw a ni tawh. A chhan hriat loh vanga ka buai rei tawh zia hi. Ka hnê vel vek..

Kan hmaa tui luang chu a melh ngar ngar a. A khat tawkin a biang mittuiin a bual huh chu a han khawih leh zeuh thin.

"Kei ai chuan engkim i hre chiang zawk vek. Mahse ka sawi chhuah kher i hre duh anih chuan ka sawi ang" a ngawi leh vang vang a. Sawi chhuah harsa a tih hmel takzet. A chil a lem leh khawlh a.. Zawitê fiah tak siin a rawn țawng chhuak leh a.

"Aizawl i la awmlai khan ka number hriat loh ațangin call ka dawnga. Ani chuan i fa a pai thu leh kum 5 ngawt in inzui tawh thu min hrilh. Nawmsip bawl nan leh khawhar hnemah chiah min ngaizawng tih te nen.. Chuan in inkara inrawlh tawh lo turin leh ka inrawlh buai anih chuan kan khuaa lokal a, min tih mualphoah min vau a ni. Ka mi rin ber, ka engkim ini asin. Engtin nge hetiang em em hian ka chungah i nunrawn theih?" a țap chhuak hawm hawm a. Ka thu hriat chu mak ka tih em avangin ka che châng thei lo. Ka bula ka hmangaih ber țap hawm hawm pawh chu thlem tumna ka nei lo. Tunge hetiang khawpa ka chunga rilru chhia lo putu hi hriat vat ka duh..

" Awmte, bang nghal rawh, dawt vanga i mittui tlak ka phal lo, ka finfiah vek dawn. Min ințhentir an tum anih hi" a mittui a bianga luang ngiai ngiai chu ka kut chuan ka tih hulsak mawlh mawlh a. Ka hmangaih hi anat ka phal tawh lo. Chu pawh dawt vang lehnghalin..

"I phone rawn la teh"

Min pek mai loh avang chuan a kuta a ken lai chu ka phihthlaksak a. Call list ka check nghal. Mak ka tih deuh chu Awmtei phone ah chuan miss call a tam hle. A rilru nat țan ațangin tu call mah a pick up ngai lo hrim hrim a nih dawn hi! Miss call hlir, Miss call hlir...

" Rawn call tu number ber rawn sawi teh" a rei ve deuh tawh avangin a Ni ka hre tawh mai silo. Muang changin a phone chu min rawn laksak a. A rawn hmet chhuak ta a. Tu number ber nge hriat tumin ka phone ah ka type vat a. Call ka han hmet chiah chu mak ka ti lutuk. Ka nau ka duat em em Sangtei maw???!
Engtin nge a nih theih?Sangtei khan Awmtei phone number chu min dil ngei a, ka bulah kha chuan min duhpui hmelin, ngaihzawng ka nei kha min lawmpui ve viau emaw ka tia. Ngati nge Awmtei hi a duh lo em ni? A thian tha tak Thanpuii lo hi chu ka neih a phal lo em ni ang? Awmtei nen chuan mak tih hmel takin kan inen rual țhawt a..

MY DESTINY..
Episode 8

Awmtei hmel chu a hnual nghal rawih rawih.. "Atir pawn ka sawi kha kan inkar hi a zau lutuk, i nu leh pa leh i unaute tan chuan duh chi ka nilo reng a ni" Car kawngkhar chu dimtein a hawng a, lui fim taka luang delh delh bulah chuan ava kal a, leia a țhu sawp niai chu ka thlir reng a. A inngaihtlawmna te hi amah min duh zualtirtu a ni tih reng a hre pha ve awm silo. Car ațanga chhuakin ka hmangaih ber chu ka va pan hnaia, hnung lam ațanga kuah pahin "Awmte, Sangtei a nih ka ring lo, engkim finfiah law law ang. Amah pawh lo ni tehreng se ka nei tho ang che. Nang anga hmangaih hi ka la nei lova, ka nei tawh hek lovang. Ka nei dawn che i hria maw?" ka ti mawlh mawlh a. "Lokal teh" tih pahin Car hmaah chuan ka pawt phei a. Ka phone la chhuakin Sangtei chu ka call ta a. Ka nau neih chhun vawi khatmah awka vin pawha ka biak ngai loh chu thinrim takin ka han hau nghal vak vak a. Mahse ani chuan thil awmzia engmah a hrelo thung. Kan chunga thil thlen dan engkim ka hrilh hnu chuan Sangtei chuan Thanpuii tih ngei anih a rin thu leh ka bialnu hming pawh vawi tam tak a zawh vanga hrilh chauh anih thu a sawi a. "Ka phone hi chu a duh hun hunah a khawih thin a, kei pawhin a phone chu ka khawihsak ve fo, amah bak a ni lovang. Ngaihzawng i nei tih a hriat ațang phei chuan a rui char char a. Pawisak a nei vakin ka ring lo" a rawn ti ta a. Thanpuii chu biaka hrawk hrep ka duh a. Ka tan engmah a ni ngai lo hrim hrim a, kan inkara tlazepa Awmtei rilru a tih natna zawng zawng ka ngaihtuah hian ka ngaidam thei lo. A châk lo khawp ang chu..!!

Sangtei leh Awmtei chu inbia in tunah phei chuan an lo nui dun hawr hawr a. Awmtei hmela nui hmel ka hmu leh ringawt pawh chu ka lawm a ni. Phone an dah hnu chuan Thanpuii number chu ka hmet chhuak a. Mipa chu nise ka hnek duh hial ang, ka ankhum hrep anga min lo tibuai tawh ngai lo turin chiang takin ka hrilh ang. Call ka tum chu Awmtei chuan ka phone kenlai chu min laksak daih a. " A ngai lo, mipa i nih kha, hmeichhia mai mai khing duh i nih te chuan i nêp dawn lutuk asin' zaidam takin min ti a. 'Mipa pawh a thinrim ve theih tho, i rilru a tihnat hnem zia kha i hrelo ami? Zak thei lo lutuk mai, ka be dawn' ka tia phone laksak ka tum chu a phal lo. ' Ka bialpa mipa rinawm leh mipa tha tak hian keimah anga duhtu a lo nei ve a ni mai a. Hmangaihna a bual âtin a awm a. Nangmahah a luang liam hi ka dem miah lo, i tha chung chuang em a ni.' a nui sen sen a. Avan duhawm tak em..

"Thanpuii chu ka khawngaih eee" henu khawngaihna ngahzia hi. Ti khawp khan a tina a ni sia

"I mawl ami? I haw miah lo ami?

"Teuh lo, ka bialpa ka en hian hetianga a awm hi ka dem lo, nang pawhin haw tawh suh. A duh em che vangah ngai la, ngaidam ang um"

"Ngaidam tur chuan inngaihtuah fe angai ang" ka tibul hmuk a

"A hrim hrimah kei aiin kawng engkimah a țha zawk awm si a. Ngati nge i duh loh a?" a dan pangngaiin zawhna mawl mang tak tak min zawt leh țan tawh..

"Tu hmeichhia mah hian an tluk lo che, an hmel leh piante chu a lo mawi zawkin, sum leh pai pawh an nei a ni mahna, midangte neih ve loh thinlung thianghlim tak i nei bik alawm.. Ka duh ber fovang ang che"

"Awi i inla zei ve lutuk, Thanpuii chu ngaidam ang, kan pahnih kan inrintawna kan induh phawt chuan ani chu han tih buai tha ka ti lo. Nangmah vangin rilru nain a awm ve tho si a. A natna i han belh chhah tur a ni lo"

Ka Bawihtei hi kum 23 chauh a ni sia, avan puitling si em.. Kum 5 ngawtin kan kum a inthlau a, mahse a ngaihtuah ang hi ka ngaihtuah pha ve tlat silo.. Ka kuaha ka lamah ka pawt hnai a, hun rei tak ka fawh tawh loh a hmui chu duh thawh takin ka fawp ta vawng vawng a.. Harh chhuak phut ni awm takin a phone a en vat. Awi a tlai tawh lutuk haw nghal ang a tia. Sana kan en chu dar 12 a lo ri țhelh tawh. Hman ațang tawhin a bula ka awm chuan hun hi a kal chak thin reng a ni. Hetiang zan rei tak thleng ka chhuahpui te chuan a nu leh pa ka pi leh pu la ni mai turte khan Makpa atan min duh nâng le.. Motor ka tinung a, tlan chhuah hmain a hmuiah ka va fawp leh zeuh a. An kawtah rei fe kan infawh leh vang vang hnu chuan ka haw san ta a. Zan tam tak kan buaina avanga mut mu tuah mumal tawh lo ka ni bawk a. Zanin zet chu ka mutui viau ang..

Ngai kan awh chho leh tawh a. An in pawh chhunah leh zanah nen ka hman chang apiangin ka leng thin. A dawrtê an sum hmuh ve na neih chhun chu ka ngahpui fo thin. Apa hi a hriselna a tha vak lo a. Tunlai phei chu a țha lo lehzual, Awmtei hian a duat thiamin a hmangaih thiam em em a. A that loh deuh hlek phei chuan a rilru a hah hle thin. Kei pawhin ka theihtawpin ka duatpui ve a. Bawnghnute leh a ei tur chi hrang hrang ka kensak ve thin.

Zan 1 chu Awmtei'n mangang takin min rawn phone a. Apa thawhah a nasat thu leh damdawiin kalpui mai chi nia a hriat thu a rawn sawi a, hmanhmawh takin ka va kal nghala. Apa chu ka Car ah pawm lutin damdawiin lam chu ka panpui ta a. Awmtei mangang hmel ka hmuh chuan ka khawngaih takzet a. Ka theihtawp chhuah zel pawh ka tum.

"U Lawmzual va haw tawh rawh, hei oxygen te an pe a, a thawk dan pawh a pangai leh tawh hi, kan ngaihtuahawm tawh loh ang" anu chuan lo tuihnih vatin "Nia Lawmzual i awm lo ang tih ka hlau thin. Ka fapa te ve lah engmah an ni silo, va haw la va mu hahdam rawh" an inthlahrung hmel ka hmuh chuan nuam ka ti lo.
Awm ve reng chu ka duh a, mahse atuk zingah ramri buai vel chung changa Minister zuia Assam kal tur ka ni a. Insiam pawh ka la insiam silo. Dar 11 vel chuan a tha lo leh deuh anih chuan min rawn hrilh vat tura ka chah hnu chuan ka haw san ta a..
Awmtei te unau hi 3 niin, an upa ber sipai lah kha nupui neiin Rajasthan ah an awm a. A chhungkua chu a rawn ngaihsak tawh lo hrim hrim a. Kum 5 vel chu an khuaah pawh a rawn haw tawh lo tih Awmteiin min hrilh tawh a. A u chiah Vanlalfela lah kha khatiang mi kha a ni bawk si. Awmteiin a theih ang angin a chawm a. Dawrtê a siam bakah Vawk a vulh bawk. Vawk chaw a phur pur pur lai pawh ka hmu fova, nula nisi engmah thawh a hreh lo te hi ka ngaihsanna leh ka duhna tizualtu a ni. Mipa ai chuan hmeichhia hian nu leh pa hmangaihna an lo ngah zawk em ni chu aw tiin ka ngaihtuah vang vang a. Nge nia Awmtei hi mi rilru tha leh thianghlim, hmangaihna thinlung pu tur renga khuanu'n a duan a lo ni zawk??

MY DESTINY..
Episode 9

Minister zuiin Assam-ah chuan kan kal a. Rilruah erawh Awmtei pa a awm ve reng a. Eng tak ang tawh ang maw ka ti rilru reng a. Tuang takin kan tih tur angte kan tih zawh hnuah chuan tlai dar 5 velah haw turin kan inbuatsaih a. Kan buai nak nak lai chuan ka phone a rawn ri a, Awmtei a lo ni a.
"Ka pain zing ațang khan hmuh che a duh thu a sawi reng a.. I lo haw dawn tawh em?" a aw ațang chuan a hlauhthawn hmel takzet..

"Umm kan lo haw dawn mek e, eng nge a an hrim hrim a?

"A țha vak lo. Tunah tak phei chuan mu leh mal pawh a nei vak lo, ka nu phei chu a țap a țap tawh mai. Lo thleng vat rawh aw.." pangchang aw tak chuan a han ti a.
"Awle dar 9 hma chuan kan lo thleng hman ang. I pa chu lo enkawl țha rawh aw.. Thlaphang lo la, nang pawh inenkawl țha ang che" tiin kan inthlah a.

Ka rilru chu hmanhmawh hle mahse Minister chhawm haw tur kan nih avangin mahni duh anga chakin a tlan theih siloh. Kalkawngah Signal a awm bawk silova, Awmtei te chu ka ngaihtuah hle a thlen hlan ka nghakhlel hle. Dar 8:40 ah kan thlenga. Ka phone ka en vat a, Awmtei min lo call tumna message chu a rawn thleng a. Vawi 15 ngawt mai a lo try avang chuan ka ngaih tha lo chuan ka call let nghal vat a. Mahse a pick up thei lo. Ka inthlak fela, a thiannu Enkawli ka call ta a. Enkawli chuan Awmtei te chhungkaw chunga chhiatna rapthlak thleng chu min hrilh ta a. Awmtei Pa, pa ngainatawm tak, ka len chang pawha min kawm ber thin tu Pa Dawnga chu dar 7 vel khan a thi a nih chu.. Mak ka ti a, rin harsa ka ti hle bawk. Awmtei te nufa ka ngaihtuah takzet a. Ruata nen an in lam panin kan tlan ve ta nghal a..

Kan va thlen chuan mi an lo awm luih luih a. An inchhung vel pawh an lo singsa fel vek tawh. A ruang an dahna lam chu kan pan ding nghal a. Awmtei apa ruang kuah chunga lungchhe taka a lo țap ka hmuh chuan mipa mah ni ila insum har ka ti. Anu in min rawn hmu chiah chu a hma aia uarin a țap a. "Pa-a han meng teh, hei Lawmzuala pawh a lo thleng tawh asin.. A hming i lam ngun em kha i thu hrilh tur chu hrilh tawh ta che" a ti lawm lawm a. Awmtei unau mipa te lah an awm silo. Mi pangngai tak niin tun angah te hian han uap ve thei se chu Awmtei te nufa pawh an thla a muang deuh tur...

Kan chhung hnai tak thi hi an la awm ngai lova. Ka pi boral lahin engvakmah kan la hrethiam ve lo.. Thihna nunrawngin chhungkaw inhmangaih tlang tak a han inthentir ka hmuh chuan hnem ngaihna ka hre lova. Awmtei pawh chu hnem dan tur ka thiam lo. Ka awm loh lai tak maia Pa Dawnga'n thihna a lo tawk chu pawi ka ti a. Aw.. Thihna nunrawng i laksak hma mah mah a ni, Awmtei te nufa hian an la mamawh che asin ka ti vawng vawng a.....

Awmtei te lusun chhung chuan an inah ka khawsa tam hle a. Khawhar in riak an inpu chhuak zo tawh bawk nen an khawhar hlauin a tam thei ang ber chu Ruata nen kan uap thin. Awmtei pawhin tawrh dan a thiam ve viau tawh a, Ruata fiamthu duh tak a ni bawk nen kan bulah chuan a nui a nui veleh tawh a ni.

Kan hriat loh karin thla 6 dawn chu kan lo inzui ve ta. A u Vanlalfela pawh naktuk mai hi a tâng rawn chhuah hun tur a ni tawh a. Awmtei chuan a huphurh hle tih a hmel ațangin a hriat theih a. A pa awm tawh lo nen engtin nge a rawn chet ang a hre silo. A awm loh chhungin a pa a boral a, Jail ah thla 6 ngawt a tâng bawk a. A nun a sim a, a rawn inngaihtuah chhuah ka beiseipui zawk mah..

Awmtei te inah Ruata nen kan leng a. Dawrtu a neih neuh neuh avangin a dawrtê ah chuan a buai ve hle a. Anu chu kan lo titipui a, anu chuan an pain a boral hmaa min hmuh a duhzia leh eng thu emaw min sawipui a duh thu chu min hrilh keuh keuh a. 'Eng thu nge ni ang le.. Ka awm loh lai a ni kher kher kha a pawi a ni. Damdawiin kan lokalpui vat lo te kha ka inthiam lo asin' tiin ka chhang a. "Nangmahah a thla a muanga, Awmtei hi thlahthlam lo tur leh enkawlsak tur chein a ngen duh che ni berin ka hria. Kei pawh tunah hian boral ve mai turah inngai ila chu Awmtei hi i kutah ka dah ngei ang" a ti ve siam siam a. Kei tehlul min ring ngam a, min thlamuanpui ve chu ka lawm hle a. Ka rilru chuan Pa Dawng i fanu hi ka enkawl anga, ka venghim tlat ang ka ti mawlh mawlh a.

Kan titi mawlh mawlh lai Awmtei u Vanlalfela chu a rawn lut hlawl mai. Awmtei nu chuan a țah khum nghal vak vak a. Ani pawh chu sual hle mahse a pa meuh a han chân chuan a insum thei bik lo. Room lamah an inzui lut a, an țap thawm chu kan ngaithla reng a. Awm ve reng nuama kan hriat loh avangin haw mai kan rawt a. Chutih lai tak chuan Fela chuan "Lalduhawmi vang vek a ni, ka awm loh laiin ka pa a thi. Lalduhawm ngati nge min mantir? Nangmah vang a ni" țap aw țuau chunga a tih ri chu ka hre thei a. Awmtei a mawhpuh leh chuan an inkar a tha leh theiin ka ring lo. Ruata a lo awm ve bawk nen Awmtei chu a zah hmel hle a. Engtin pawn ti che sela chhang miah suh aw.. Kut a thlak che anih erawh chuan min lo call vat ang che ka ti a, kan haw san ta a..

MY DESTINY..
Episode 10

A u rawn haw a chin chu Awmtei hmelah lungngaihna leh lawm lohna ka hmu fova, mahse ka bula a awm chuan a hlim loh thu a sawi ngai lo. Ka len chang pawhin a u chu inah hmuh tur a awm ngai lova, a awm ve chhunah pawh min be ngai lo. Zan khat chu ka len laiin rui takin a rawn haw a, "Lalduhawm chaw ei min va siam teh, vat" a ti vin țhak a. Ka awm ve avang chuan Awmtei chu a inthlahrun hmel hle. Awmtei chu a tho vat a, chaw ei chu ava siamsak a. A siamsak zo a rawn phei tur chu ko dingin "i inleng pa saw hmana min hlap tirtu kha a nia, a la chak lovang" a ti kher a. Awmtei chu zah hmel takin a rawn phei a.. A hmai a sen țawn țawn a, a țah a chhuah hmel ngawih ngawih. Ani a mi pangngai si a, ka awm ve reng chuan hreawm a tihna a nasa mai mai ka tia mut chhuak chhuanlamin haw ka rawt ta a. Ka haw tur an kawtlai thleng min thlah chu inchhung ațanga rawn koin Lalduhawm zui haw i tum ve ngawt ami?rawn lut vat rawh a la ti hram a. Ka thisen a lum ve pap, duh tawka na a dim dawihna tel miah lova sawisak ka châk a ni. Awmtei luh hnu chuan kal mai lovin ka Car bulah chuan ka ding a. Țawngkam na thei ang ber berin a hau a, hmeichhe nikhualo leh awmherh ber anga puhin i rai har lo tawp ang te ati tawn tawn a. Va luha va khawih hrep mai aia châk ka nei lo. Mahse mi inchhunga buaina siamtu nih chu Police Officer tih chi rual a ni silo. Police chu nilo ila eng pawh huamin ka va luh chilh duh ngei ang. Ka Bawihtei chu ka khawngaih hle a, hetiang a tuar reng chung hian ka bulah engmah a sawi ngai lova. A hlim hmel min hmuh hram hram thin tih ka hriat phei chuan ka lainat takzet.

"Sir, khawlaia buaina siam mi 3 kan rawn hawn" Constable Ramdina chuan a rawn ti a. Lo khung hrih ru.. Pu Malsawma'n rawn buaipui rawh se tih pahin ka inkhalh haw a. A tuk zinga Office ka kal chu ka Car ka park dawn mek tih chuan Police Station rawn chhuahsan mek chu mak ti takin ka en reng a. Awmtei ngei a ni. Eng nge a rawn tih ve, Tiffin a la khai zui. Ka va nuih seih a, mahse min hmu awm pawn a lang velo. Ka car ka park sawk sawk a, biak tuma ka va pan chu Taxi ah min luhsan nghal daih. Eng nge awmzia le.. Eng nge a rawn tih a tinge hmanhmawh deuha a kal nghal daih le...

Ka va lut chu a rawn kal chhan ka hrethiam chiah. A u Vanlalfela chu nizana an rawn man khawlai a insual buai zingah a lo tel ve chu niin.. Ka roomah ka lut a, ka phone kan en chu Awmtei message 2 a lo awm a. "U Lawmzual min bansan tawh mai rawh. I neih tlak ka nih lohzia i hre telh telh ang. I zahna tur bak kan chhungkua hian kan thlensak ngai lovang che. I thawhpuite min hmuh tura rawn kal kha ka duh lo lutuk a, nangma tan thleng pawn zahna tur a ni tih ka hria. Mahse chaw ka rawn pe lo thei si lova. Min hrethiam rawh aw.. Hrehawm ka ti lutuk. I thawhpuite'n an hmuhsit che a an en hniam phahna tur a thleng hi' tih min rawn thawn a. 1 zawk chu ka hawng leh a, " Min ban san pawh nila ka dem miah lo che" tih a lo awm bawk a. Ka nuih a tiza zawk. Awmtei vang anih phawt chuan engmah hi ka zak eih lo. A u sual lutuk hian Awmtei hi ava tirethei zo zai tak em.. "Ka tum ber chu nupui a neih che, ka then ngai lo ang che Bawihte" tiin ka reply a. A u te pawh chu Social work kan tih tir hnu chuan kan haw tir ta a.

An in pawh ka la chuangkai reng a. Lo leng ve tura ka sawm pawn a duh ngai lo. An ina ka len chuan fawh tak ngial pawh ka fawp thei lo thin a, duh tawka midang vengthawng miah lova fawh vawng vawnga khawsakpui ka châk ve thin. Hei hi mipa te'n kan ngaihzawngtea kan beisei a ni vek bawk. Hmeichhe dang chu nise an inah chance a awm miau loh chuan an rawn len ve duh mai ka ring. Mahse ka Bawihtei hi chuan hmingchhiat hi a hlau em em reng a ni.

Zing dar 8 velah chaw ei tura ka inbuatsaihlai tak chuan Enkawli thaw hlawp hlawp chungin a rawn tlan lut a. "Eng nge thleng ta" ka lo ti vat a. "Vanlalfela zu ruiin inchhunga buaina a siama, Awmtei pawh kut a thlak' zing kar karah zu ruiin buaina a siam anih chu.. Ka Bawihtei vawi 1 em pawh ka la pen loh, dimdawi taka ka enkawl thin chu a lo khawih a maw? Tun țum chu ka chhuah dawn lo..

An in lan theihna chin kan thleng chiah chu ka ding dawt. Kan hmaa mei alh saw Awmtei dawrtê, anu leh pa a chawm ve na, an ei bel ber kha a ni.. Enkawli chuan phawk tawkin min rawn en, "tlan vat rawh" atia ka harh chhuak zawk. An in kawt kan thlen chuan mi an lo awm nuaih nuaih a, a thenin tuiin an lo leih. Mahse ei chawp dawr na nâ na chu saranga pack deuh hlir an zuar a. A alh duh em avangin țhelh mih mai theih a nilo. Awmtei țap ri ka hre ta. Inchhungah ka lut a, tumah ka hmu mai lo. Room ka va en chu chhuatlaiah Awmtei chu a lo thusawp niai mai a. Fela chuan chemte a tinin thahah a lo vau anih chu. "Ka hal tih i sawi dawn ai chuan thi zawk mai rawh, tha takin pawisa min pe nila ka hal lo ang. I uikawm man i hmu a nih hi" a lo ti tawn tawn a. Ka thinrim lutuk ka so nghal bulh bulh a, tlan pheiin Fela chu ka va hnek thal țhuai a. Vawi 1 hnek mai ka duhtawk thei lo, ka țhutbeta a hmaiah chuan ka kuttum chu ka tlir a ni ber mai. Mu leh mal pawh ka nei thei lo, kan thawm hriain pawn lam a mite an rawn tlan lut a, min rawn bengdai ta hram a.. Fela chu țhutthlengah an țhuttir a, a hmai thisen vel chu an hruk faisak mawlh mawlh a. Țawngkam khat mah a chhak chhuak lo, a ngawi hle hle ringawt a. A hma zawnah țhuin " Awmtei hi ka venghim zel tawh dawn, i nawm i maka i kutthlak tur a ni lo. Ka hmangaih ber anih hi hre rawh. I pa khan min thlamuanpui țhin a, chutiang bawkin i nu pawhin.. I pa kha dam se tuna ka thil tihah khan min dem ka ring lo. Awmtei kut i thlak leh a i nghaisa leh anih chuan keimah min hmachhawn zel angai tawh ang" ka tichang fak a. Awmtei chuan țap zawih zawih chungin min rawn kuah vawng vawng a.

Ruata leh constable dang 5 ka kova, Awmtei leh anu duhdanin Vanlalfela chu Police kutah kan hlan ta a. Awmtei chuan a dawr kang chu a thlir vawng vawng a, țhelh vat lo se chu an in pawh a kang kai ngei ang. "Engtin nge ei kan zawn tak ang Nu"..?? Anu nen chuan an inkuah a, an țap dun ngawt ngawt ka hmuh chuan avan hreawm tehlul em.. An pahniha kuah pah chuan ka awm alawm, ka theihtawp ka chhuah anga innghei ngai lo ang" tiin ka hnem ve mawlh mawlh a. Awmtei hmai ka hmu chiang chu sawisakna hnuhma tih hriat ngawih ngawihin a biang chu a duk kulh a, a chal leh a mit sir a kak bawk. A ban veilam chu a duk nasa hle a, dinglam chu a tiche ngam lo. Ka van lainat tehlul em.... Hetiang em ema ka hmangaih lo nghaisatu hi ka la khawih nep deuh mah mah a ni. Ka pian a hnu lamah zanin ang em ema thinrim hi ka la tawng ngai lo. Awmtei'n a ban a chet ngam loh avang chuan Enkawli nen chuan damdawiinah kan hruai ta a. An Xray a, a tliah thu min hrilh phei chuan ka thin ava rim zual em.. Tun achinah tu mihring mah hian ka Awmtei taksa hi an tina tawh ngai lovang tiin ka insehruh țeuh a..

MY DESTINY..
Episode 11

An dawrtê kang bang vel chu Enkawli leh Ruata nen kan tih felsak mawlh mawlh a. Awmtei chuan a ban tuam lûk awrh chungin kan che vel chu min lo thlir reng a. A hmel han en mai pawhin a rilru a pik hle tih a hriat theih. Ni e, an eizawnna neih chhun, a pa damlai pawha a nu leh pa hna hahthlak thawk lova a lo siam ve na ber chu meivâpah a chang zo ta vek si a. An kawmthlangah chuan Vawk 2 chu an la kawl ve a. Chung lah chu han tih ral rual an la ni si lo. An rilru hahzia chu kei aia hriatthiampui leh tur chuang an awm bik lo.

"Awmte, Zan 2 vel châmin Aizawlah ka haw lawk dawn a nia"

"Thil hmanhmawhthlak a awm ami? Hetiang boruakah nang ber i awm loh te chuan"Enkawli chuan a lo tithuai a.

"Umm.. Hmanhmawhthlak angreng e... Ka lokir leh vat dawn alawm.Ka awm loh chhung chu lo ngaihsak ru aw.." Awmtei chu a ngawi reng a.A nu chuan thingpui a rawn siam a. Kan inzawh chuan Office lama kal ka ngaih avangin ka haw ta a.

Aizawl chu tluang takin ka thleng a. Ka chhungte lah chuan ka haw tur sawi lawk hmasa lova ka haw chu mak an ti hle a. Tlaia kan chhungkua kan kim hnu chuan Awmtei te chhungkaw chanchin zawng zawng leh tuna an dinhmun tawh mek nen chuan ka hrilh fai ta vek a. Ka nu leh ka farnute chuan an lainat hle a. Ka nu leh pa bulah chuan Awmtei chiah hmangaih ka la neih thu leh a rang thei ang bera nupuia neih ka duh thu ka sawi ta a. Ka pain a remtih thu a han sawi chiah chu ka farnute an țe ring ngei mai. Hman ata tawh nupui nei turin min nawr zing tawh bawk a, an phûr nghal em em mai pawh hi ka hrethiam lutuk. Sangtei chuan 'keima'n naute hming ka sa dawn ania' a rawn tichiah phei chu kan nui ta vek a. Tichuan phûr takin palai tirh dan tur chungchang chu ka rel ta a.

Ni 3 hnua ka lêt leh chuan nidanga mahni chiah ni thin khan mi 3 ka phur ta tlat mai. 1 chu ka nau Sangtei a ni a. 2 chu ka ni pasalte, Palai tur an ni. Ka chenna kan thlen chuan Sangtei nen chuan hmanhmawh takin rawng kan bawl sawk sawk a. Awmtei i haw thu hrilh suh min tih tlat avangin be chak hle mah ila ka insum hram hram angai si. Zanriah kan eikham chuan phûr tak leh thatho takin ka Ni pasalte chu ka phur chhuak a. Awmtei te in lan theihna chin ațang chuan ka len fona thin ka hmangaih ber chenna rûn chu hrilhin ka haw san leh ta a. An hna chu engtin tak rawn thawk ang maw?

Sangtei nen chuan awmngaihna reng kan hre lo. Mawnga hawlh ang maiin kan vir sek a, ka nute lam lahin ninawm khawpin min lo call sek bawk. Dar 9 rik hma deuh chuan kan palaite chu an rawn lêt ta a. Ka Ni Mawii pasal pa Kima chuan muang ban deuh charhin "Tun maiah chuan kan nei thei dawn lo anih hmel" a han ti a. Sangtei chuan "Eheee.. Ngati nge, a u hi an duh lo ami" a han ti chu za lutuk takin an rawn nui chhuak ta a. "In va â mai mai tak! Nghahhlelh tawh tehreng nen sawi vat vat teh u" ka lo tithuai a. "I palaite kan ni tih kan han sawi chu, a nu chu a insum hman lo. Awmtei a kuaha, a pasal hming lamin a țap zawih zawih a. An inneih hun nghak hian alawm ka la dam ve țawk țawk a ti a. Awmtei erawh chuan a nu kalsan thei anih loh thu a sawi ve thung. A nu chuan ka nuțate pawh ka lo rawn ve anga naktuk zanah in lokal leh dawn nia a ti" ka pa Muana chuan a han ti a. Sangtei chu ka nute chu a phone nghal a, chanchin chu a han hrilh a. Leng turin ka insiam a. 'Khawnge kal i tum' tia min zawh chuan 'in lo haw tawh tho a Awmtei te inah ka va leng ve tawh ang chu ka ti' ka han ti chu an nuih aza hle. Leng reng reng suh, tunah te lo va lan chi a ni hrih lo an ti a. Awmtei ka ngaih tawh tehlul nen avan ho tak! Kei tluk zetin Sangtei a lungngai, Awmtei a hmuh châk tawh tehlul nen. A tûm deuh bar bar a.

Ka phone rawn ri chu ka en a ka nui sak. Awmtei a lo ni a. "Eng nge hetiang em ema min surprise a" a rawn tinghal.. Sangtei chuan leng turin sawm la leng ho tal ang u a rawn ti sa sa a. "In inkawtah lo ding rawh aw.." tih pah chuan phone chu ka off a. Kan unau chuan kan tlan chhuak ta a. An inkawtah chuan a lo ding vanga.. "Lokal rawh le.." ka ti chu "khawnge kan kal dawn" tih pahin mak tih hmel deuhin Sangtei a rawn en a. "Sangtei anih hi, lo lut phawt la inla inchibai dawn nia" ka ti chu an innuih var var a. Sangtei chuan hre chhuak thut ni awm takin "aw...ka thutna a lo dik loh vang anih hi, helai hi chu changtunu țhutna tur alawm' tih pah chuan a hnung lamah a insawn a. Awmtei chuan "a ngai lo țhu zawk rawh" a ti chu "lo lut mai mai teh, ka ngaih tawh zia che hi" tih pahin a ban na lo lamah chuan dimtein ka kai alut a. Hmana kan lo kal dun tawhna lui luang nuam tak lam pan chuan ka khalh zel a. Awmtei leh Sangtei chu a hmaa inhre sa ang maiin an titi bawrh bawrh a. An nui dun leh vak vak thin. An mize inmil lutuk hi unau tur reng an lo ni. A hmun kan thlen chuan Sangtei chuan nuam a ti hle a. Awmtei chuan "thil sawi dun lawk ang" a tih avang chuan Car ah chuan kan inzui lut a. Sangtei tui bula a chetla chu kan thlir pah reng a...

" Hetiang i tih duh vang hi ni maw i lo han zin thut a.."

"Umm.. Min hnar lo ang tiraw"

"Ka nu hi.. Keimah ringawt inngaihtuah thei ka ni silo alawm"

"Nangmah ringawt ka neih duh che i ring reng reng ami? I nu tello te chuan ka nei teuh lo mai che"

"Mahse kan khawngaihthlak mah mah lo maw.. Heta i awmlai ringawt chuan a tih dan dan a awm mai a. Aizawlah te lo sawn ta che sela.. Engtin nge ka nu hi a awm ang"

"Kan hruai zel ang, kan awmna hmun apiangah a awm ang"

" I ngaih ang ngawt hi a nilo. Inthlahrung reng rengin kan awm dawn asin, i nu leh pa i chhungte laka dam chhunga ka nu nen inthlahrung taka kan khawsak i duh em ni?

" In inthlahrung lo ang, ka chhungte an fel a. I nu pawh an duat ve ngawt ang"

" Duh thlang thei dinhmunah kan ding lo tih ka hria. Mahse ka nu mizia leh ka mizia han en la, kn inthlahrun loh i ring tak tak ami? Engmah kan nih loh hi, an fel pauh leh inthlahrun ana duh zawk asin"

"Anih sual deuh turin ka lo hrilh mai ang"

Ka han ngaihtuah vang vanga, anu hi an ina kan len chang pawhin kan lakah a inthlahrung zawk emaw tih tur khawp mize pu a ni a. An mize inngaitlawm tak te ka han chhut ka han chhutin an harsatna a sawi hi ka hriatthiampui a. Mahse ani lo hi chu nupui neih ka tum si lo. Ka nei ngei ngei tur a ni. Ka hmangaih ber a ni tlat.

"U Lawmzual, min țanpui tawhna zawng zawngah ka lawm a. Mahse nupui dang nei zawk mai rawh. Kei chu pasal nei ve thei dinhmunah pawh ka ding lo anih hi"

"Chutiang sawi suh. I nu chu kan bula awm a inthlahrung anih pawhin In kan sak sak anga, kan chawm mai dawn nia"

"Kan inkar azau mah mah a ni. Ka pa tal kha chu la dam se țha tur.. Ka pasal neih vanga ka nuin a hreawm phah ai chuan pasal neih loh ka thlan mai angai.."

"Awmte, min hmangaih ve ngai miah lo ami? Ngaihzawng atan ringawt nilo nupuia neih che hi ka thil tum ber a ni asin"

"Ka hmangaih che. Mahse ka nu min hringtu pawh hi ka hmangaih asin"

Sangteii'n Car kawngkhar a rawn hawng ri rak a."Haw in la ti lo deuh ami? Ka mut a chhuak tawh ania. Nakinah chhunah tah hian kal leh ang u aw.. Sangha man dan țha deuh ka hria" a rawn ti lut bawrh bawrh a. "Engtin nge Sangha chu i man anga" ka lo tivat a. "Emping nen tui chhungah kan lut anga, kan chhuah chuan Empingah chuan a lo awm țeuh mai dawn alawm" a ti chu Awmtei nuih chu a za hle a. Nui suk chung chuan 'Ka nau hi chu idea nei tha thei deuh asin' ka tia. A tlai tawh bawk nen kan haw ta a. In kan thlen chuan Sangtei chuan "U in inkiss em" nui var var chungin a tia. "Kiss hman nang, i lokal hma lutuk a.. Ka kiss lohna rei tawh nen i tibam vek" ka tia.. "Hmmn thosi kara ka awm reizia kha.. Khatiang hun rei lutukah pawh i kiss hman lo anih chuan i zei lo ve hrim hrim anih chu" min la ti deuh deuh a. Unau zinga naupang ber chhungkaw duat rawn anih bakah â phuang chi a ni bawk a. Sawi hreh em em hi a nei ngai lo..

Mut hmunah chuan Awmtei nen kan thusawi kha ka ngaihtuah lêt a. Hetiang anih chuan engtin nge ka nupui anih theih ang. A thusawite kha anmahni lam ațang chuan a dik fu bawk si. Nufaa midang chawm tura han invawm luh chu mi pangngai tan chuan inthlahrunawm duh deuh tur asin.. Naktuk zana Palai an kal leh hunah chuan min lo hnar ngei awm si a. Duh reng chunga inthen zawng ka zuam lo. Awmtei ka nupui anih nan eng nge ka tih tak ang???

MY DESTINY..
Episode 12 (LAST)

Zan khua chuan mu miah lovin ka ngaihtuahna ka seng a. Ka duh ber chu Awmtei nupuia neih a ni. Ka nupui anih theih nan chuan eng pawh ka ti mai tur a ni. Eng pawh???

Khawvar veleh ka thawmhnaw ka pack mawlh mawlh a. Sangtei harh hlau takin in chu ka chhuahsan ta a! Awmtei te nufa chu an la tho lo a ni ngei ang, an kawngkhar chu a la inkhar phui țhap a. Rei tak ka din hnu chuan hreh tak chung chuan an kawngka chu ka kik a. Vawi 3 vel ka kik hnu chuan Awmtei nu chuan a rawn hawng a. Mak tih hmel taka min en pah chuan " ehe Lawmzual, ngati nge tun ang zing zingah te, zin i tum ami Airbag nen meuh i rawn inkhai a?" hâm bui bui chung chuan a ti a. Inchhunga inzui luh pah chuan "Awmtei a la tho lo mi? Ka rawn LUHKHUNG dawn..."
Awmtei nu chuan mak tih hmel takin min en hû a, "eng maw tuna i sawi kha? Eng nge a awmzia? Palai an rawn kal leh dawn a ni lawm ni?"
"Awmtei'n min neih a tum hleinem.. Kan dinhmun chhiatlai bera min neih chuan ka nu nen kan dam chhungin inthlahrung reng rengin hun kan hmang dawn a atia. Min hnial tlat anih kha.."

"Ava â mai mai tak em aw..! Ngaihtuah ka ngai hleinem, chutiang vang mai maia pasal neih loh te a lo tum mai mai" kan thawm hriain Awmtei a rawn tho vat a.. A nuin thil awmzia a han hrilh fiah a.
" I â lutuk, va haw lehnghal rawh mi hriat hmain"

"Hei ka rawn luhkhung tawh che lawm.. Nizanah ka inngaihtuah vek tawh"

"Inngaihtuah chiang rawh, hmeithai fanu engmah nilo ka nih hi.. Min luhkhung anih chuan i nu leh pa leh i chhungte mi zingah pawh an hawi ngam tawh nang.. Nangmah ringawt inngaihtuah suh"

"Ka luhkhung i nih chuan ka chhungte lakah pawh in inthlahrun angai dawn hleinem. Chutih ahnekin inchhuang takin in awm thei dawn asin. Chuan i nu pawh rilru nuamin kan bulah a awm zel thei anga.."

Awmtei chu a lungchhia tih ka hria, țap pur chungin.."Mawla, tiang em em hian a ni maw min lo hmangaih? ka âwmah min chum teih teih a. Ka lo kuah vat a.
"Va haw rawh, hetianga tlawma i awm hi ka phal lo"

"Hei ka lo haw tawh alawm, i pasal hi nizanah ka tlaivar a, ka mut a chhuak teh mai nia" a bianga piai pah chuan ka ti a.

"Va haw rawh, kohhranah ngei kan innei dawn nia. I remruatna ang ang ka pawm tawh ang. Hetiang thil atthlak ngaihtuah tawh miah suh" tih pah chuan ka thawmhnaw chu a khai a. Ka banah min kaiin pawnah min hruai chhuak ta a.
"Min nei ngei ang tih min tiam rawh"
"Imm.. Ka tiam a che"
"Awmte, Ka hmangaih lutuk che"
"Kei pawn ka hmangaih che"

Ka Car chhungah chuan ka lut leh ta nge nge a. Anu chuan kawngka biang vuanin min rawn nuih var var a. Ka nau Sangtei leh Ka Ni pasalte kha an lo tho hman ang tih ka van hlau tak! Ka vanneih a siamin in ka thleng chu an lo la mutui hlawm viau a. Ka luhkhung tum chu tuman an hre ta lo hlauh..hehe

Palai va kal leh te chuan kan inneih Ni tur nen an rawn ruat fel nghal thlap a. Ka hmangaih ber nupuia ka nei thei tur hi ka hlim a. Ka phûr em avangin ka ngaihtuahna te hi a chawmawlh vek a ni ber. Kan inneih hma hun awl zawng zawngah pawh thil ngaihtuah fel nachang ka hrelo a. Awmtei ringawt ka ngaihtuah a ni ber. Fapa mal nupui nei tur alawm ka nih le.. Ka nu leh pa leh ka farnute'n an ngaihtuah fel vek mai ang.

A tawi zawngin sawi tawh mai ila, Nov ni 2 ah chuan Pathian leh Kohhran hmaah Awmtei nen chuan 'Tiam tlat e' kan ti ve ta a. Kan inneih Ni a Awmtei hmelțhatzia leh duhawmzia mawlh kha aw... Kei aia mipa hlim leh tur chuang hi khawvelah an awm ka ring lo. Mahse kan Lawi țhat zanah anu leh a țhiante nen an mu ho daih..hihi An mu ho khât tawh dawn sia, zanin chiah chu ka la insum hram hram mai ang. Zantin ka bulah hlir ka damchhung chuan a mu tawh dawn tho a... Kei pawh ka farnute leh ka cousin te nen kan riak khawm a. Kan mu ho khat bawka kan hlim tlang ngei mai.

A tukah chuan kar 1 chhung Honey moon hmang turin ka pa picnic spot lamah Awmtei nen chuan kan inkhalh chhuak ta a. Ka pa picnic spot hi Mizoramah chuan Picnic Spot nuam bera an sawi ve thin a ni a. Nitin tlawhtu mi tam tak an awm reng a. A hmuna awmchilh a vil reng turin thawktu mi 5 kan dah bawk.

Kan thlen chuan hnathawk ho chuan min lo lawm thiam viau a. Thawktu 3 nupui fanau nei tawh te chu kar 1 chhung chawlh ka pe a, an lawm ngei mai. Rawlthar 2 chu kan eitur min siamsak tur leh a țul huna kan tirh theih turin kan awmtir thung a.

Kan room ațang chuan kan chhehvel chu a lang mawi leh zual a.. Pool pawl ruih ni tla turin a chhun tlet ser ser chu thlir pah chuan kan nupa chuan kan titi dun a. Kan intawn dan leh kan hun paltlang chhoh hrang hrangte chu kan sawi dun a. A sawi zawngte chuan a țap lek lek thin. Zan kan mut hma chuan Awmtei'n țawngtaina hun a hmang a. Nupa kawpchawi țha tak kan nih a, fanau maltluan chawia kan awm theih nan Pathian hnenah kan inhlan a. A inbual zo rawn chhuak chu ka fawp vawng vawnga. Hmana ka fawh thin kha chu ka bialnu Awmtei a ni a. Tuna ka fawh erawh ka NUPUI Awmtei a nita.
"Ih U Lawmzual, duh aiin kan innei hma mah mah ka ti deuh a..!"

"Hmmn ngati nge min neih i la duh lo ami? Min thlahlel ve tak tak lo anih hi" tûm bur chungin ka tia. Ka thinrim ve deuh tlat

"Aih chutiang pawh a ni lo. Vawi 1 pian ve mana Ex pakhatmah sawi tur ka nei ve ta lo zawk hi ania"
Ka nuih avan za reuh tak! Ka nupui hian keimah lo bialpa a la nei miah lo. Zo taka pawm kangin khumah chuan dimtein ka nghat a. A hmuiah chuan duh thawh takin ka fawp tawn tawn a, a thiam ang tawkin min lo chhang let ve a. Ka kut pawh a awm mai mai lo. Tichuan kan inneihna chu chiang lehzualin kan nemnghet ta a. Ka nupui ka hmangaih em em chu kuah pahin a chalah ka fawp zeuh a. "Bawihte, Ka Destiny chu ka puitlin ta" ka tisap a, a lo nui ver ver a. Ka nupui, hmeichhia a zawnga hmeichhe țha ber nen chuan inkuah rialin kan muhil ta a. THE END