Mi zi nuaih nuaih kar ah chuan Nu pakhat hian “Sorkar zem zen ve meuh si, hmeichhe pangai deuh neih awm, mi awmpui lehnghal, a duh mak angreng hlemai a, a hmeichhia hi a zei viau a niang.” a rawn ti deuh zat zat a, a bul a Nula ding chuan, “I tawng ring lutuk, khi kan chhak a khi a mah a din reng khi, i tawng kha a hre vek ang.” tiin a rawn khap vei luam a, min tih dan tawngkam chu han sawi belh ve hlak ka chak viau na in, Mo pa/mo neitu ber han thinrim a han tawng chhuah chu a mawi dawnlo a ka hriat a vang chuan ka meizial zuk lai chu ka paih a, in chhung lam ah chuan ka luh san lehnghal a.
“Bawiha, Sangtei hi a dam tha meuh maw, a hlim loh hmel riau a ka hriat tlat chu le.” ka Nu chuan mi hriat hlau tak in ka beng bul ah chuan a rawn ti sar sar a, chutia ka Nu han sawi tak ah chuan Sangtei chu a ruk in. “Duhtak, i nuam lo deuh a mi?” kan ti sa sa a, chiang tak chuan min en a, nui ver ver chung chuan, “Duhtak, engtin mah ka awm lo, ka hlim lutuk, vawin ni hi khawvel ah ka hlim ni ber a ni reng ang, i Nupui thar hi ka hlim lutuk.” tiin min lo chhang vat a. Chu timaw, tihpah chuan a nak ah chuan kan kawm zauh a, “Hei, a la hun lo.” tihpah chuan a rawn nui var var a, a va han hmeltha chiang tak em. “Virgin a Nupui neih hlut zia an lo sawi fo chu, tun a tang a hun reilote ah ka tawng ve dawn ta,” ti rilru chung chuan bang a Sana in khai chu ka melh zauh zauh a, chu darkar chu nidang aiin a rei ta bik riau a hriat na te chu ka nei a, a chhan pawh kan zan hmasa ber zan a nih dawn a vang ani.
“Awle tun ah, Monu leh Mopa lo chhuak sela, Present hi an duh ber an lo hawng ang, chuan, an hawn hma in enge awm an ring chhin anga, an rin dik loh chuan, Mopa in Monu a fawp ang.” an rawn ti ta thut mai, kan inchhung a mo lawm lo kal khawm ho chuan kut an lo beng nghal dur dur a, Sangtei chu kan en vat a, a zak tih nemngheh na ni awm tak in a hmai chu a rawn sen nghal tawn tawn a, ka mit ah erawh a that tizual tu a la ni ta hram a, mipui hma ah chuan kan in zui chhuak ta, present bawm lian ber chu kan chawi chhuak nawlh a, “enge niang aw” kan ti a, Sangtei chuan “Tui khai na Buket a niang” a rawn ti a, chutah a kaihruaitu chuan, “Tui dah na Buket an ring a, tun ah an lo hawng ang.” an tinghal lang lang a, kutbeng thawm ri hut hut kar ah chuan kan hawng mawlh mawlh a, ka kheh zawh hma deuh chuan sangtei chuan a rawn keu dek dek a, “Awi..” tih leh ka hnung ben chu a rual a, kan en chu, Buket nilo in Bawlhhlawh bawm zawk alo ni, a vawikhat na a tan, ka chhungte leh mipui te mithmuh ah ka Nupui thar, Sangtei hmui ah chuan ka fawp ta a, a zahthlak in a va hlimawm si em.
Zan dar 10 a rik meuh chuan, thiante, thawhpui te lo ruahman lawk ang in, Hotel room fai leh nuam tak ah chuan kan Pahnih chauh chuan kan awm ta ran a, ka bag a tang chuan a mut kawr tur a tan a ka lo lei lawk, a rawng ngainat ber, a Sen dang ngei mai chu kan phawrh zal zal a, Nui var var chung chuan min lo en reng a, “Khang te hak a ngai a mi? phelh leh tur tho te chu.” nui sen sen chung chuan a rawn ti a, nui chung bawk chuan, “Ka lei tawh lak lawh, ha phawt la, phelh leh mai dawn nia,” ka ti ve zat a, “He he, inbual phawt ang, ka ban vek tawh in ka hria.” tihpah chuan a in hlip nghal sawk sawk a, ngawireng a ka lo thlir min hmu chu a phuzawk mai, “Tikhan min en suh ka zak ania,” tiin a in hup chawn chawn a, “Duhtak i nalh lutuk, zak suh, ka Nupui i ni tawh a lawm.” tihpah in ka kuah a, Present hawn lai aia nasa leh uar in a hmui ah chuan ka fawp ta vawng vawng a.
Khum zau leh dup nuam tak ah chuan inkuah chung chuan kan let dun ta riai riai a, zeilo viau e tilo chuan kan duhthawh nghal buan buan khawp mai, chutah dawhkan a ka phone dah chu a rawn ri ral ral a, Phone rik vang mai mai a tawp san mai phal chi lah ni silo, Vawikhat a ring ral a, vawihnih nan a ring ral leh a, vawithum na a ni ta, “Duhtak i chhungte an niang han en teh.” thaw halh halh chung chuan, Sangtei chuan a rawn ti a. Zankhua in hun kan nei tho a lawm, ti rilru chung chuan thuawih tak chuan ka tho nghal a, ka phone chu ka en a, ka Namber hriat ngailoh alo ni lawi si, a pawimawh tak ah tiin kan la a,
“Hello, Pu Faka i ni em aw,” Aw. Ni e, enge nita tun ang zan rei ah te” “A hei, tun mai khan chhiat kan tawk a, in awkhlum a nia, Police tel lo a, khawih mai chi ni in kan hre silo a, hei tun ah a ngai ang in kan la dah tawp rih a, tumah midang han biak nghal mai tur kan hre silo a, nangmah hi kan hriat chhun I ni sia, kan lo be tawp mai che ni, min lo tlawmngaih sak mai thei a ngem?” Patling aw thum lam lek lek chuan a rawn ti a. Thin a van rim duh tak em, kan hna ni mahse tiang ang zan kher kher ah, tu chuan nge ka namber lo nei reng reng ni. Ka pu, hei chawlh ka la a, chhungkaw thil ah nia, min lo hrethiam ula, kan thiante namber ka pe ang che u anga, in lo be mai dawn mi niang.? aw dam tak a kan tih hnu chuan “Awle” tiin phone chu a dah ta a, ka thaw huai mai.
“Duhtak engthil nge ni a, in hna lam thil a mi” Sangtei chuan alo ti vat a, thil awmzia chu ka hrilh a, Ka sawi zawh hma hma chuan, “A van mak tak em,” a ti tlawk tlawk a, ‘Nia, mak tak ani, tun hnai ah ringawt pawh mi Sawm chuang an ni tawh. Engvang nge maw ni, an dawi vang ti ila, an huai angreng bawk sia, an huai ti ila, an dawi vang a ni bawk sia, ka hre thiam tawh bik lo.’ kan tih zawm ve nghal a. Sangtei chuan, “Ka hrethiam, Nun beidawng tan chuan thil tih mai awlsam tak tur ani, mahse hei hi an hrelo ani. Ka tawrh hi, keimah chiah hian ka tuar lo, mi dang tawn tawh hnu, mi te pawn a an paltlang theih ani, tih hi an hrelo thin a, Mahni in khawngaihna leh vanduai ta bik a in hriat vang pakhat ni in ka hria.” a rawn tih zawm leh nghal a, kei chuan, “Nia, ngaihtuah tawh lo ang, kan inbual hmasa ange aw.” tiin a biang ah chuan ka fawp zauh a, in bual tur chuan ka luh san nghal a.
Hmabak tih tur awm hre ran chung chuan ka inbual a, a pawimawh zual a ka rin lai lai te chu kan tifai uluk zual deuh a, Present hawn lai a hun kal muang tak kha, tun ah zawng duh aiin a kal chak leh ta mah mah ani. Towel veng chung chuan phur tak in kan faifuk lut hlarh hlarh a, Nuisang a min lo melh ka rin lain Sangtei chuan ka Faifuk ri takngial pawh hrelo chuan a bih ngai chu a bih ngar ngar a, ngaihthalo tak chuan ngawireng in ka en a, a Mittui chu a hru a, insum tih hriat tak chuan a in hnit leh feih feih a, chu ka thil hmuh chuan min ti danglam in, ka suangtuah na chu a la kiang nghal a, rang tak in a bul ah chuan ka kal a, a hnung lam atang chuan dim tak in ka kuah a, a phu zawk a, a mittui chu a hru fai mawlh mawlh a, “Duhtak, enge nita, min hrilh teh enge i kut a i hum hi.” tiin a kut dinglam a a thil ken chu a kut chawp chuan kan lek kang a, Thlalak hlui tawh tak, cheh tet tawh ni awm tak lian lo tak chu a rawn lang a, “Duhtak, hei hi i Nu ani ang tiraw.” tiin duat tak chuan ka kuah a, “Aw ni e, ka Nu nih hi,” tih pah chuan ka lam ah in her in, ka kawng ah chuan a kut pahnih chu a suih a, ka awm ah a hmai a phum a, a tap ta zawih zawih a, hrilhhai tak in a hnung ah chuan ka chul heuh heuh a, ka theih tawp in ka hnem a, mahse awmzia awm silo, chutia Minutes engemaw zat kan awm hnu chuan, mit sen ram chuan min en a, a mittui hruk fai mawlh mawlh pah chuan, “Min ngaidam rawh aw Duhtak, ka tihpalh ka Nu ka ngai em ani, ka Nu kha la dam se chuan Vawin khan kei aiin a hlim dawn a sin.” a rawn ti tham tiak a, a sawi zawm thei tawh lo a tap leh ta tlawk tlawk a, a rilru tur chu ka suangtuah pui a, ka lainat in ka khawngaih thar em em a, “Duhtak, a pawilo insum suh. i Duhtawk in tap rawh, Tap vak vak rawh.” ka ti ta hial a.
Chutia hrethiam tak a kan kuah a, duhtawk a a tah hnu chuan, a rawn meng sen ram a, hmai zangthal ha min en chung chuan, “Duhtak, kan pahnih hlim ber zan tur ah, ka tah khum vak che sia, min hrethiam rawh aw, i hnen a ka la sawi chhuah loh ka Nu nen kan hringnun hman dan zawng zawng te ka chhui kir a, ka insum thei ngang lo ani.” in thiamlo hmel tak chuan a rawn ti chhuak a, “hrethiam tehreng mai, tirawh mu phawt ila, ka hnen a ila sawi ngailoh i Nu nen in hringnun chu, tap lo in zanin hian min han hrilh teh,” tihpah chuan khum ah chuan kan mu ta a. ka lam hawi a min kuah pah chuan, “Duhtak, thil dang tih phawt i duh chuan,” nuisang chung chuan a rawn ti a, a hringnun min la hrilh ngailoh hriat ka chak em a vang chuan, “Nilo e, hei zankhua hun kan la nei a lawm, kan ti dawn lutuk, hnehnawk khawp in, mahse chumi hma in, kan sawi ta sa sa, in
Nufa chan chin chu min hrilh phawt la,” nui chung bawk chuan kan ti let ve leh a, Sangtei chuan, “A... sawi dawn chuan a thui lutuk, mahse tumah ka la hrilh ngailo a, chutia sawitur a min duh chuan ka hrilh ang che, muhil miahsuh ang che, chuan min kuah nghet deuh hlek la.” a rawn ti a, “tehreng mai,” tihpah chuan kan kuah nghet sauh a.
Ka Nupui Sangtei chuan tihian an Nufa chanchin chu min hrilh ta a.
Zankhat chu tui tak a ka Mut lai in, thawm ring tak vang chuan ka mu chu ka harh hlawl mai a, kan room bang a Sana lian intar chu kan en a, zing lam Dar 1 alo pel reng tawh a, ka bul a mu ka Nu chu kawiahnge awm aw tia ka ngaihtuah lai mek chuan, bang phen lehlam ah chuan thawm ka hre ta a, eng thawm nge ti a kan ngaihthla chu, Ka Putea nupui Pitei Ang thawm chu lo ni in, zanrei tawhlam a ni bawk nen, a ring tha khawp mai, Thenawm ten an hriat veloh hlau ni awm fahran in, ka Nu chu alo an khum bawrh bawrh a, kan Nufa min hmuhsit zia leh min ning tawhzia chu kei naupang tan pawh hriatthiam loh rual anilo, ka Nu chu Tap chung in kan room ah a rawn tlan lut a, khum ah ngawireng a ka thu min hmuh chu, a phu deuh zawk a, insum tih hriat tak in a mittui chu a hru zauh zauh a, “Bawihte i thawmhnaw kha la la, insiam rawh. Kei ni Nufa tan hian he IN a chen ve hi a rem lo ani e.” tah aw tuau chuan ka Nu chuan a rawn ti chhuak hlawl mai, chutiang a zan rei tawh lam ah lehnghal han chhuah chu kei Hmeichhia naupang chuan ka hrethiam lo hle a, hrilhai tak chuan ka Nu chu ka en a, ka Nu lah chu a insiam mawlh mawlh a, chutia ka Nu insiam mawlh mawlh lai pawh chuan Pitei chu a la ang char char a, Ka Putea chuan khap tange pawh ti lo chuan alo ngawih san mai mai bawk si, Diktak chuan a ma thisen zawmpui, a pianpui a unau neihchhun Ka Nu thlavang pawh hauh ngamlo khawp a Nupui in hnuaichhiah tir tu, ka Putea chu ka hua in ka ten ngawih ngawih a, mahse ka sawi ngam silo, Biang a mittui luang zawih zawih chung chuan ka Nu chu a insiam a, a insiam zo chu ngawireng in ka ban ah min vuan a, kumkhua a kir leh tawhlo tur in ka Putea te in chu kan Nufa chuan kan chhuah san ta a.
Chu Thlasik boruak vawt tak hnuai ah chuan, khawnge kan kal anga, khawnge kan riah ang? tih ngaihtuah reng chung chuan ka Nu ban ah vuan in ka zui zel a, Ka Nu chuan a Bag a tang in a Mobile Phone chu a phawrh a, Phone hman a tum a,Balance engmah a lo awm silo, ka mangang chuan, “Nu khawiah nge kan kal dawn?” ka tit a tawp a, a mittui hruk fai mawlh mawlh pah chuan “Bawihte lungngaisuh. Pathian a awm a lawm, riah na tur chu kan hmu ve mai ang,” a rawn ti chuai raih a, a awmzia chu ka Nu rin na chu kan nufa innghah na awmchhun chu ani. Aizawl ah chhungte kan nei lo tih chu ka hre ve kar bawk si, ka Nu ban ah vuan chung chuan kan kal zel a, Khawlai chu a rehruih a, Taxi lo tlan zeuh zeuh leh Zu rui ka Nu lo au nawmnah a, tawngkam bawlhhlawh tak tak a lo fiam tu te tih loh chu khawlai ah hmuh tur an awm meuh lo, kan kal zel a Zarkawt Trafic poin bul ah chuan Mi pakhat, bike bul a meizial lo fawp khu hlet hlet mi nghah nei ni awm tak a lo thu chu kan hmu a, a zawn kan then chuan ka Nu chuan hlauh chu sawiloh, zah pawh dawn zo lo in phone hman a dil ta tawp a, kan chanchin te kan hrilh chuan min khawngaih ve hle a, ka Nu chu phone chu a hman tir ta a, Aizawl a chhung te kan neih loh vang chuan tu dang biak tur a hre silo, a Thiannu a naupang lai a school kal pui thin, Khatla a mi chu an phone dawn a, zan rei tawh mi muttui lai a ni bawk nen phone la thei silo, midang biak tur lah kan hre bawk silo, Phone chu kan pe let a, kan nufa chuan kan tap leh rih a, diktak chuan khawlai chu ka hlau tawh ani. Ka Nu chuan “Bawihte tap tawh suh engpawh nise hmundang kal na kan hre silo a, Phone la theilo mahse kan kaitho tawp dawn nia, Tap tawh lo la kal ang aw.” tiin ka nu chuan min kaitho a, tichuan ka Nu Bag ah puar luah hrui vuan chung chuan, mittui nen Khatla lam chu kan pan ta a.
Mittui nen khawvawt kar ah khatla a ka Nu thiannu te in luah chu kan thleng a, Gate lian tak chu chhunglam ah lo in kalh bur mai a, kawngka va sawi a, kai harh tur pawn luh a theih si lo, tihngaihna dang awm kan hre ta lo, kan chau in khawvawt in min hmet khawng zo tawh si, IN Bang kil khat ah chuan ka Nu puan ken chu kan phah a, ka Nu chuan duat tak in min kuah a, chu zan Lungngaihna in a tuam mek chu ka Nu nen in kuah rial in, khur hlak hlak chung chuan kan thu ngawi kar a, chutah ka Nu chuan ka hnen a ala sawi ngailoh ka Pa leh ka U Mama, a hmel pawh ka hriat hma a kan kalsan chanchin chu min hrilh ta a.
“Bawihte vawitam i Pa hmuh chak a, i U bul a awm i chak thu i sawi khan ka mittui min tih chhuahsak a, vawitam min ti Tap a sin, ka hrilh tawh che ang khan, an thlalak i hmuh fo kha i Pi leh Pu ka nu leh pa an ni a, i Putea nen sawn i Pi leh Pu nen kan pali in kan khawsa a, chhungkua kan hlim in tu dang kan ngai ngai lo, Mi nu leh pa mi fa te awh khawp a chhungkaw hlim kan ni thin a sin,” ka Nu mittui luang chuan ka hmai a rawn far a, “Ka Nu tap tawh suh.” tiin ka thiam ang tawk in ka hnem ve a, tichuan ka Nu chuan “Bawihte i Putea sawn min duat em em a, unau pahnih chiah kan ni na in Thian dang kawm in min kalsan ngailo, mi te ang in hausa lo mahila unau kan in hmangaih a, chhungkua hlim tak kan ni thin. Kan nula Tlangval chho a kohhran leh khawtlang ah te kan in hmang a, mi fak hlawh tak kan ni ve thin. Tumkhat chu kum 17 mi ka nih lai in ngaihzawng ka nei ve a, tun a i Pa hi a nia, ngaihzawng la nei ngailo tihtak ah awmzia em em ka la hre lo a, Sunday zan khat chu, ka nuamsamlo chu inkhawm lo in ka nghak a, i Pa hi a rawn leng a, chutia ka dam lo khum a ka mu chu “Damdawi ka lo ken che a” tih pah in tui nen min rawn pe a, eng damdawi nge tih pawh en lemlo chuan ka ei ve mai a, tichuan engmah hre lo in ka awmzui a, a tuk ka harh hnu pawh chuan ka lu ala hai nileng a, chutih rual chuan ka taksa chu ana em em a, i pa chuan ka thianghlim na chu min lo khawih chhiat sak chu lo ni in, na ti in rilru hreawm tak in awm mah ila i Pi leh Pu ka hrilh ngam si loa, tichuan vanduai na in tan nan tun a i U Mama hi ka pai ta a, Ka fa ka pumchhung a mi, ka Rilarah ngei chu thah a, tihtlak ka phal si lo.” Bawihte ka van vanduai tak em. “Ti chuan loh theih loh in i Pu ka Pa chuan min inneih tir ta a.”
“Bawihte ka sawi fo thin i Pi leh Pu i Pa nu leh pa, tun a Shilong awm te nen khuan shilong kan awm ho ta a, min ti duhdah in min hmusit em em a, Bawihte hre vek lo zawk la a tha zawk, chutih lai chuan i Pa hian zan tin mai in, zu in tur in min chhuahsan a, a chang leh a lo hawlo a, zan rei tak tak thleng pawh nise ka ngaihtuah in ka lo nghak tang tang thin a, alo haw a kut min thlak a, min sawisa a, chutih lai chuan i u Mama hi kum khat a ni ve tawh a, Mizoram a i Pi leh Pu ka nu leh pa ten hrewm ka tih leh tih loh vawitam min zawh pawn hreawm lo e ti in ka chhang mai thin, engmah ka sawi ngailo a, ka tawngtai a, ka Tap a, ka tuar tlawk tlawk mai thin, nakin ah ka la tuarchhuak ve ang tiin ka in hnem chawp a, ka tuar tang tang a Mahse, i pi leh pu ten min tih duhdah em vang chuan in hrang chang tur in i Pa chu ka tur a, tin i Pa te hi mi hausa chhungkua leh mi chapo chhungkua an ni a, tichuan in nuam tak luah in kan khawsa ve a, mahse kan hlim chuang lo, i Pa in a zu in a sim chuanglo a, chutih lai chuan nangmah hi Nausen thla ruk mi lek ila ni a, kut minthlak te, min ruihsan a min riah bo san pawn nang ni unau in fahhrah a in awm ka hlauh a vang in Mizoram a haw a, han chhuahsan hi ka tum ngai lo, ka fa te tan ka ti a, ka tuar tang tang thin.”
“Zan khat chu i u Mama hi damlo a, i Pa lah zu in tur in a chhuak deih bawk si, mangang tak in ka tawngtai a, chutakar ah Zan dar 12 vel ah i Pa chuan rui em em mai hian Nula a rawn hruai haw a, thinrim hle mah ila awmzia awm si lo, Bawihte.” a sawi zawm theilo ka Nu chu a tap a, kei lah chuan, “Nu engtin nge tih che? a vua che mi?” ka lo ti vat a, ka Nu chuan “Bawihte i pa chuan maw kan Nupa khum ah, i u Mama damlo mu pawh sawi lo in, ka hmuh lai ngei in a nula rawn hruai chu a mutpui a nih chu.” Ka nu insum zo lo tap chu ka khawngaih em em a, “Nu sawi tawh suh.” tiin ka kuah a, ka Nu chuan min lo kuah ve bawk a, ti chuan ngawireng in kan in kuah a, khawvar dawn lam ah chuan kan lo muhil hlek hman a niang chu, Ui bauh thawm ah chuan kan harh a, khua chu alo eng uar tawh a.
Ui bauh thawm ah chuan Gate chu an rawn hawng a, ka Nu thiannu chu a rawn chhhuak a, zingkar a keini nufa kawtlai a min hmuthut chu mak ti tak chuan min en vawng vawnga, thil awmzia pawh sawi hma chuan, “Lo lut ru in va hma em em ve” min rawn ti a, in chhung lam ah chuan kan in zui lut ta nghal a.
Ka Nu thian nu te hian Fa an neithei lo a, Nupa chiah a khawsa an ni a, dawr te nei in, an nu [ka nu thian nu] hian a enkawl a, an pa erawh hi chuan sawrkar ah hna lian vaklo thawk in nitin office a kal thin thung a, keipoh ka Nu in vawi engemawzat min kal pui tawh a vang in ka tlangnel ve em em a, “Nusawm, Patlan” tiin ka ko ve mai thin, An pa Patlana pawh in Fa neilo tihtak ah ka kal tawh hi chuan min duat thin hle a, keipawh in ka ngaina em em bawk, chutia ka Nu in a thiannu an hmu chu. Insum har ti tak chuan a kuah a, chhuak em em chuan a Tap ta hawm hawm a, chutia zingkar tap thawm awm ta chu Putlana ngaihthalo chu khum a tang in a rawn tho chhuak a, “Enge nita nangni nufa chu, enge Nu-i a tah tak chiam chiam a, enge thil awmzia?” tiin Patlana chuan hrilhhai hmel tak chuan ka Nu chu a en reng a, Tah chhuak insum tak si chuan thei leh theilo in ka nu chuan thil awmzia chu an hrilh a, min khawngaih ta em em a, Putlana chuan “Lungngai suh u, in nufa in hetah kan in ah hian in khawsa ve ang, Nu-i thingpui kha han siam la, an hmeh tur kan lei ange.” tih leh chhuah chu a rual a, chu hmangaihna aw kan nufa dawn ngailoh kan han dawng chu, lawm a vang in biang ah mittui chu a rawn luang nghal zung zung mai, chu mi tuk a tang chuan zah pawh sawilo in ka Nu chuan a thian te in ah chuan min chen pui ta rih a.
Nikhat chu ka Nu chuan ka Pi leh Pu te, an hmel pawh ka hmuh hma hauh a min thih san ta te thlan sam fai chu a rawt a, a chhan pawh an thih cham a nih vang ani. Patlana office kal hnu chuan ka Nu thiannu Nusawmi chuan, “Dawr ka lo nghak ange, va kal rawh u. Mahse nizan in mu tha silo a, va tap vak suh u aw, in chau lutuk ang.” tiin aw dam tak chuan min thlah a, tichuan ka Nu nen chuan thlan a kal tur chuan kan chhuak ta a, tuk dang ang bawk in ni chu a sa in van dumpawl bak chhum hmuh tur pawh a awm meuh lo a ni, nisa hnuai ah thlan tui luang zawih zawih a kan kal hnu chuan thlan chu kan thleng ta hram a, Tlangsam leh zapanhlo in a bawm khah luk hnuai chu ka Nu chuan a han keu eng a. “Kan Nu leh Pa THANGZIKA leh LALDENGI” tih chu fiah lo tak hian alo in ziak a, ka Nu chuan “Bawihte i Pi leh Pu te hian min hmangaih in min duat a sin, la dam se chuan” a ti hman chiah, ka Nu chu a zawi hnawk a,Thlan bawh chuan a tlu ta ruai ruai mai, tihngaihna ka hre silo, chhun pachang ah thlanmual bul vel ah tumah auh mai tur an awm bawk si lo, “Nu entinnge i awm?” tih pah chuan ka bawh a,a hmai ka chul a ka Tap a, tihngaihna dang ka hre si lo, ka mal chung ah a lu ka nghat a tap pur chung chuan ka au vak vak a, mi pun tur in hla tak kal ngai si, ka Nu kalsan ka hreh bawk si, ka mangang lutuk chuan a sam ah te chuan ka kek thul, a harh thei silo, ka au a, ka Tap a, ka sawi a, ka sawi harh thei si lo. Ka maimichhing a, Tap pur chung chuan, “Aw Lalpa ka Nu hi ti dam la, a chung a thilthleng a awm dan ang hian min awmtir zawk mai rawh, khawngaihtak in ka Nu hi ti dam rawh.” tiin ka tawngtai ta ringawt a, a la harh mai silo, chutia minutes 10 vel mangang tak a ka awm hnu chuan, thlanglam a tang in Pa pakhat chempui nen a lo chhuak hlawl a.
“Mami enge nita” tiin min rawn pan hnai a, “Ka Pu khawngaihtak in min pui rawh, ka Nu hi a thi mai ang, min pui rawh.” tap tuau a kan ti chu, hmanhmawh tak in a rawn tlan nghala ka Nu chu a pawm lawp a, daihlim hnuai ah chuan a mut a, hlauthawng hmel tak a min en chung chuan “Mami, i Nu hi hetiang hian a awm ngai em?” a rawn ti vat a, “aih awm ngailo, a Pu leh a Pi angaia a tap a, a tlu ringawt a” tiin tap pur chung chuan ka chhang a. “Mami tap tawh suh engtinmah a awm lo ang.” ti a min sawi thlamuan pah chuan, kan puan ken chu ala a, kan tui pai chuan a ti huh a,ka Nu chal ah chuan a dep a, tap chung chuan ka rilru in ka tawngtai mawlh mawlh a, ka Nu ban ah chuan ka vuan a, chutia buai tak a kan sawngbawl atang a reilo te ah chuan ka nu chu a rawn meng ta a, ka lawm lutuk chuan ka bawh a, “Nu min thih san suh aw…” tiin tap chung chuan a awm ah ka bei a, ka Nu chuan chau tih hriat tak in “Bawihte ka ti mangang che a min ngaidam rawh aw, ka chau em a, nizan ka mut loh vang ani.” a rawn ti chuai raih a, ka Nu tui tak a ka mutsan thin chu, rilru hah in a mu ve ngai lo tih min hriatchhuah tir a, “Nu ka hmangaih che.” tiin ka kuah a vawng vawng a, “Mami i Nu kha a chau a nihkha, bawh tawh lo la, hei puan hian a lu ah khan dep rawh le.” tihpah chuan min pui tu pa chuan a puan ken lai chu min pe a, ka Nu chuan thei leh theilo in lawmthu te an hrilh a, “A lawmthu sawi a ngailo, kha I harh tawh bawk a, tihtur ka la ngah sia ka kalsan mai ang che u.” tiin min kal san zui nghal a.
Darkar khat dawn kan thut vang vang hnu chuan Ka nu pawh chuan ngai a rawn awh chho veleh a, kan theih angtawk a fai chuan ka Pi leh Pu thlan chu kan han ti fai dun malh malh a, a khat tawk in ka Nu chuan a mittui chu a hru leh zeuh zeuh thin a, a insum em vang a tap chhuak lo mai mai tih chu hai rual a nilo. kan tihfai zawh hnu chuan “Bawihte tirawh, ni a sa emai daihlim hnuai ah hian i chawl rih ang.” tiin daihlim hnuai ah chuan ka Nu chuan min thut pui a, ka nu malchung ah chuan ka lu nghat in ka mu a, ka Nu chuan ka sam ah chul heuh heuh pah in, a thil min la hrilh ngailoh chu min hrilh ta a…
Bawihte zankhat chu i Pa leng lo hawhar lutuk chu ka nghak zo lo a, ka lo muhil a, Ruah lah chu a sur nasa bawk si, ka lo muhil nghet deuh a niang mumang ka nei ta a, ka mumang ah chuan thlan vung thar em em mai hi ka hmu a, “Hei hi in ta tur” an lo ti a, chutia tuitak a mumang ram a ka chenlai tak chuan ka sam ah kek in, “Engvang in nge min lo mutsan” ti in i Pa chuan min rawn tham tho zawk a, kutthlak ka tawrh than tawh em vang chuan eng vak ah ka ngai lo a, ka mumang zawk chuan ka rilru a luah tlat a, ka mumang chu ka chhui kir a, mak ka ti em em a, mut pawh ka mu meuh tawh lo, Zing khawvar hma deuh chuan ka phone a rawn ri a, hlauh na in min man nghal a, ka khur a, ka la ngam lo a, a rawn ri nawn leh chu ka la ta a, ka Pa, i Pu thih thu chu min rawn hrilh a, khum atang chuan ka tap chuak a, ka tho a haw tur chuan ka insiam nghal a, Bawihte i Pa chuan Mizoram a ka haw hlen a, a bul a ka let tawhloh chu a hlau em em a, i U Mama kum khat pawh la tlinglo chu hruai a phal tat lat lo a, ka insiam vek tawh si, i U Mama kalsan ka hreh bawk si, Bawihte i Pu ruang hmulo a awm ngawt chu ka hreh bawk si, ti chuan kan thenawm te in ah ka tlan phei a, i U Mama lo ngaihven tur in ka chah ta a, i Pu damchhung a a ka hmuh tawh dawn loh a vang in, hreh tak in mittui nen i U chu ka kalsan ta a, i Pu ka ngai si, i U Mama ka ngaihtuah si, rilru pangkhing leh mumal lo tak chuan Mizoram chu ka thleng a, i Pi te, i Putea te bul ah zep theih ani talo, ka taksa cher tak leh, ka hmui hmai khem na sa tak i Pa kut minthlak na chu zep rual ani talo, i Putea te thirim lutuk chuan kir leh tawh lo tur in min ti a, Mahse i U Mama ka ngaihtuah si, chhungte remti lo chung chuan i U mama vang in ka kir leh ta nihkha,”Bawihte vanduai tur a piang hi ka va ni bik tak em..” Ka Nu chuan a rawn ti chuai raih a.
Hmai zangthal ha a, ka Nu thusawi ngawireng a ka thlir reng lai chuan ka Nu mittui chu ka hmai ah a rawn far fap fap a, a mal chung a tang chuan ka tho a, “Nu tap tawh suh, i tlu leh palh ang.” tih pah chuan ka Nu mittui chu ka hruk sak a, ka Nu chuan, “Awle Bawihte ka tap tawh lo ang, hei khua a tlai tawh dawn haw zai rel tawh ang” mittui hruk mawlh mawlh pah chuan a rawn ti a, tichuan ka Pi leh Pu thlan chu hreh tak in kan haw san ta a, kan chau bawk aniang, muangchang chuan kan in zui haw hnek hnek a, Dar 3 vel ah in chu kan thleng hram a, kawngka chu alo in hawng huau a, kan lut a tumah hmuh tur an awm bawk silo, kawngka kalh bawk silo a chutia in lo in hawng huau chu ka Nu ngaihthalo chuan Nusawmi te room lam chu a va en a, Nusawmi chu rizai in alo in khuh luk a, kan va en chiang chu a khawsik alo sang lutuk chu niin, ka Nu chan “tiang ringawt chuan a thalo tawp mai, i Patlana kan phone nghal e,” tiin Nusawmi Phone an khum bul dawhkan a adah chu a la nghal a, ka Nu leh Patlana chu an in biak zawh hnu chuan ka Nu chuan, “Bawihte tikhan i Nusawmi kha lo awmpui la, taxi ka va zawng ange, damdawiin ah kan kal dawn nia, ka lo let lehnghal ang lo kalsan suh aw..” tihleh tlanchhuah chu a rual nghal a, a sawi ang tak tak in reilote hnu ah chuan ka Nu chu a rawn thleng lehnghal a, thei leh theilo in Nusawmi chu kan kuah chhuak a, motor ah chuan kan hlang a, Damdawiin lam chu kan pan pui nghal a, Nusawmi hi nu hrisel viau ang a lang si, hrisel lo ru tak ani a, damdawiin kan thleng chu an lo admit nghal a, chutia kan buai nak nak lai chuan Patlana pawh chu alo thleng ve nghal bawk a, thil tul ang ang kan buaipui zawh hnu chuan, Patlana chuan “Nangni nufa chu lo zu haw phawt rawh u, hei a zia tawh em hi, keipawh nakin deuh ah thil tul lam pah in ka lo haw ve ang,” a rawn tih tak ah chuan ka Nu nen chuan kan haw san ta a.
Hah leh chauh pawh sawi lo chuan ka Nu chuan rawng chu a bawl mawlh mawlh a, ka theih ang ang chuan ka lo pui ve bawk a, kan bawl peih fel hnu lawk chuan Patlana chu a rawn thleng ve leh zui nghal a, Patlana chuan “kal leh vat ka ngai dawn sia ei vat mai ang u aw” insiam mawlh mawlh pah chuan a rawn ti a, “A nih chuan kan siam nghal anga nimai a lawm” tiin ka nNu chuan chaw ei chu a siam nghal mawlh mawlh a, chaw chu kan ei zui nghal a, Patlana chuan, ka Nu melh pah chuan, “in nufa in in riah a ngai dawn sia, in hlaulo ang chu tiraw?” a rawn ti a, rang lutuk in ka Nu chuan “Hlau lo e, min lo ngaihtuah suh” alo ti vat a, chaw kan eikham fel hnu chuan thut pawh thu khawmuang lo in Patlana chuan, “Anih ka kalsan ang che u, in hi tha deuh in inlo nghak dawn nia.” tiin kal mai chu a tum a, ka Nu chuan, “Awle chanchin min lo hrilh ve zel dawn nia” tiin kawngka thleng chu a thlah a, min chhuahsan ta a.
Kan nufa chuan Tv en in thutthleng ah kan mu zal mai mai a, chutih lai chuan ka Nu phone chu a rawn ri a, ka Pa phone alo ni a, ka Nu chuan, “kha Bawihte i Pa in a be duh che.” tihpah chuan phone chu min rawn pe a, a hma pawn vawi tam kan in be fo tawh a mahse, ka Nu in ka Pa chanchin min hrilh hnu a tang chuan, ka Pa mah nise ka haw ngawih ngawih tawh a, biak chak na reng ka nei tawh lo, “Nu ka be peih lo” ka tih pawh chuan min biak a tum tlat bawk si, a tawp a tawp ah chuan ka be ta a.
Ka Pa chuan, “Bawihte i nu hnen ah khan maw, haw tawh ang tila.. lo kir leh rawh u, i u Mama pawn a ngai tawh lutuk che a, hetah kan awm ang a, school teI i kal ang a, a nuam iti viau ang, lo haw leh rawh u, i Nu kha hrilh rawh aw.” a rawn ti a, kei lo thinrim sa deuh bawk chuan, ka Pa kan lo haw tawh dawnlo. Ka Nu i tih duhdah zia kha ka hre vek a sin, i bul ah ka awm duh lo. tih chu ka chak hle a, mahse ka insum hram hram a. “Mama ka be duh” ka ti a, Mama chuan rang tak in phone chu a rawn la a, kum tamtak ka hmuh tawh loh ka u chu ka bia a, kan Nufa a kan thil tawrh zawng zawng chu hrilh a, ka Nu tawrh nate chu hrilh ve chu ka chak viau a, mahse arem rih silo, “Mama ka ngai lutuk che, lo zin rawh aw.” kan ti dek dek a, “Mate ka Pa in a phal lo a, kei pawn ka ngai lutuk che u, a Nu kha a dam tha em? a thu kha awih la, lo duat hle rawh aw, engtik ni ah emaw chuan kan in hmu em em ang. Mate hmani ah bazar kan kal na ah i bakkilh tur ka lei che a, nalh i ti viau ang, ka tlangval hun ah ka pa in phal lo mahse ka rawn kal lui tho ang, chu tih hun ah chuan nula ilo ni ve tawh anga, thil tha deuh ka lei ang che, i bakkilh tur pawh hi ka lo dahtha reng ang.” ka U Mama chuan Tah aw tuau chuan a rawn ti a. Ka u Mama thusawi chu ngawireng in ka lo ngaithla a, engmah ka sawi thei ve lo, “Mama anu nen” ka ti hman chiah a, ka insum theilo chu ka tap chhuak ta a, ka Nu chu phone ka pe nghal a, ka U chuan ka Tap ri alo hre hman si, ka Nu chu ka tah chhan a zawt a, ka Nu chuan a hrilh ngam silo, reilote an in bia a, phone chu an dah a, ka Nu chuan min kuah a, “Bwihte tap tawhsuh, in nula tlangval anga, i la zin anga i U pawh a lo zin anga, in la in hmu dawn lawm tap tawh suh le.” tiin ka Nu chuan min kuah chung chuan min hnem mawlh mawlh a.
Ka pa chuan vawitam tak kir leh tur in min thlem a, ka Nu lah chuan a tum lo bur tawh si. Ka Nu chu kir leh tur in ka tih ngam loh bak ah, a tawrh na zawng zawng ka hriat in, kir loh chu a tan tha in ka hria a, ka U Mama hi ka Nu chuan a ngaihtuah em em a, a damloh chang a, ka Pa in zu a ruihsan tih kan hriat chang hi chuan kir leh mai a duh thin, chutih lain kir leh mahse, ka Pa in zu ala nghei si lo a, a nula kawp ala sim chuang si lo, ka Nu rilru hah na leh mangan na chu ka hriatthiam pui a, eng tin mah ka sawi pui duh tawh ngai lo, Ka Pa chuan kir leh tur in a thlem a, a vau bawk a mahse, kir leh kan tum chuang lo.
kan awm na, Patlana te nupa chuan min duat in, kan chung ah an fel em em a, mahse mahni in tak ni lo ah chuan inthlahrung a na bawk si, ka Nu nise mi inthahrung chi alo ni bawk nen, min duat poh leh a nuamlo zawk a, ka Nu chuan a theih ang tawk in a pui a, dawr te nghah pui in, a tul apiang kan thawh pui ve thin a, ka Nu chuan “Bawihte nakin lawk ah nula tur ila nisi a, he ta kan awm reng hi a diklo. Pasal a chhia a tha ila nei ve anga, mi IN a tang ringawt chuan thil a fel lo ang.” an ti thin tak na a, hmundang kal na tur kan hre chuang si lo. IN luah in, han awm dawn pawh ni ila, engmah hnathawh, IN luahman tur takngial pawh kan nei si lo, bultan na tur chhete tal pawh neilo tan chuan a harsa si…
Nusawmi pawh thla khat dawnlai damdawiin a, a awm hnu chuan a rawn chhuak ve ta a, mahse a taksa chak lo nen, khum a mut bak engmah a la ti theilo a. chutih lai chuan Patlana chuan min duat thar em em a, a hma aimah chuan min duat in min ti tha a, kei naupang chuan engmah ka lo hrethiam lo a, Nusawmi a hrisel si lo a, Patlana chuan ka Nu chu a lo beisei thin chu ni in, ka Nu huat leh tihtheih loh zawng tak a lo ni si, a chhan pawh a ma tawn tawh. Ka Pa in ngaihzwng dang alo neih tawh thin vang ani. Nusawmi damlo chak lo tak chu ka Nu chuan a hrilh ngam si lo, taksa chak lo nen, a rilru tih nat a hlau si, Patlana lah in duat tinreng in a duat a, chutiang a kum khat dawn kan awm hnu chuan, Patlana duh ber ka Nu in a tih hlawhtlin sak bawk si loh vang chuan, engemaw ho te te ah min hau in, sawisel na tur min zawng tan a, mahni lomah a in thlahrung mi lo ni bawk nen, kan dinhmun chu a chep tial tial a, a tawp ah chuan a beisei tih hlawhtlin ai chuan ka Nu chuan chhuahsan chu a rawt ta a, ka hrethiam lo hle a, a chhan pawh engmah ka hriat loh vang ani. Kei aimah chuan Nusawmi chuan a hrethiamlo lehzual a, khaw dang kal na tur kan nei lo tih chu a hre chiang bawk si, fiamthu emaw te a ti zawk a,thil awmdan chu ka Nu chuan a hrilh ngam si lo, ka hrethiam lo lutuk chuan ka Nu chu ka zawt ta tawp a, ka Nu chuan a ruk chuan min hrilh ta a, mak ka ti lutuk chu ka awih lo lek lek zawk a, mahse ka Nu min hrilh a nih a vang chuan ka ring bawk si. Mipa lo tenawm zia hi ka tih phah ta hial a.
Tlai dang ang bawk chuan ka Nu dawr nghak chu a rawn haw a, chutih lai chuan chaw ei ka siam a, Patlana chu chanchinbu chhiar in thutthleng ah a thu thung a, ka Nu chuan, “Bawihte tikhan lo siam mawlh mawlh rawh, kan inbual lawk a nge.” tiin bath room ah chuan a lut a, ka Nu ala inbual chauh a vang chuan, muangchang in chaw ei chu ka siam a, Nusawmi erawh chu, a damdawi ei in a hneh vang nge tui tak in a muhil thung a, chaw ei ka siam zo chu keimah in ka thu a, lo kil ve nghal mai tur a ka ngaih, Patlana chu a awm ve reng emaw ka tih lai in lo bo deih a, ‘pawn ah chhuak lawk a niang’ tiin ngaihthat loh na pawh nei lo chuan chaw chu ka ei mawlh mawlh a, tam pawh ka la ei hma chuan te thawm ka hria a, kan Room lam ni tlat a ka hriat a vang chuan ka chaw ei lai pawh ngaihsak lo chuan ka tlan phei vat a, ka Nu au ri chu ka hre thei a, “Min chhan ru, Bawihte ka duh lo……” ti a au ri chu ka hria a, tlan luh nghal chu ka tum a, chhung lam ah lo in kalh tlat bawk si, ka mangang lutk chu Nusawmi kaihthawh tum in ka tlan phei a, Nusawmi te room ka thlen hma chuan ka Nu chu tap chung in, puan a in khuh in a rawn tlan chhuak a, a hnung ah chuan Patlana chuan kawr pawh ha lo in a rawn um a, min hmu chu a ding chawt a, ka Nu chuan tap chung in min kuah a, Thil awmzia chu ka hrethiam nghal a, ka thinrim lutuk chuan ka Nu kuah pah in Patlana chu chil ka chhak khum ta hial a, hmusit tak a min tawngkhum pah chuan kan lam chu ala rawn pan a, ka Nu hlau mangang lutuk chuan min kai lawp a, min tlanchhuah pui ta nghal a.
Min rawn umzui leh umzui loh pawh ngaihtuah hman lo chuan ka Nu chuan ka ban ah vuan a, khawnge kan kal anga, khawnge kan pan dawn tih pawh hrelo chuan kan tlan chhuak a, khua a thim deuh thut thut tawh a, motor veivak bak, ah khawlai ah mi an la tam em em a, ka Nu chu a inbual zo chiah la inthlak hman lo ani si, puan chauh veng a khawlai han kal pui chi a nisi lo, mi inhnuai kil thim ah hlau leh khur dar dar chung in kan thu a, kawvel a ka thil tih ngailoh leh ka tih hmasak leh hnuhnung ber ni tur in, ruk ru tur in ka chhuak ta a, ka Nu thuamhnaw tur mi thawmhnaw pho la seng loh chu zawng in ka chhuak ta a, khua tlai tawh vang nge ni, a vang duh khawp mai, nakin ah chuan hla fe a mi thil pho la seng loh chu ka hmu ta a, mipa thuamhnaw alo la ni zui a, mahse duhthlang thei kan ni tawh silo, ka la ta a, hmanhmawh tak in ka Nu awm na inhnuai chu ka pan lehnghal a, ka hlauthawng bawk nen, thaw hlawp hlawp chuan ka Nu hnen chu ka va thleng a, chutih lai chuan ka Nu chu alo tawngtai mawlh mawlh chu ni in, “AW LALPA KAN THIL TIHSUAL AH MIN NGAIDAM ANG CHE, EITUR LEH THAWMHNAW MIN PE TUR IN I HNEN AH KA RAWN DIL E.” Tiin khur hlak hlak chung chuan alo tawngtai a, ka thawmhnaw lak chu kan enchiang a, mipa Kamis leh mipa jeans alo ni A, mahse ka hmuh chhun a nisi, ka Nu chu ka hak tir ta a,
A hak mawlh mawlh lai chuan, “Khawnge kan kal tak ang? a nu..” ka lo ti a, “Bawihte kal na tur ka hria e, kan huan, zemabawk dai a kan huan kha hria em? kha hman ah pawh i Putea te nen kan kal tawh kha.” ka Nu chuan a rawn ti vat a, ka hrechhuak a “Aw ka hria e, Pi Luni te nupa pawh an awm tak kha.” ka lo ti ve vat a, chutia kal na tur kan hria chu kan hlim in kan hahdam sawng sawng a, hlim tak a tawng mawlh mawlh pah chuan kan kal chhuak ta, kawngpui kan han kal chu, ka Nu thawmhnaw in bel chu ‘hmuh loh luih’ a har viau a nichek a niang chu, kan kal pelh a piang chuan Min en zui vawng vawng zel a, zah in awmzia anei lo, ka Nu min hmangaih tu ani a, ka zahpui hek lo, kan inkai a muangchang in Zemabawk lam a kan huan thlam pan chuan kan kal ta a, kal pah chuan ka Nu chuan, “Bawihte kan huan saw i Pi leh Pu damlai a tang a kan huan neih tawh ani a, Saturday piang in kan chhungkua in kan kal thin a, Pi Luni te saw kan tetlai atang a kan chhawr tawh an ni a, an fel in an rinawm em em a, ti sawn tun thleng in kan la chhawr ta nih saw, ka Pa thih dawn khan huan saw kan Unau a insem tur in thu min hnutchhiah a, mahse Bawihte i Pitei sawn min huphur a, a vai in ka chantir ta nih saw, i Pu kha chu la dam se tiang hi thleng bik lo tur.” tiin ka Nu chuan min hrilh mawlh mawlh a.
Zan dar 8 pel tawh awm vel ah chuan kan huan chu kan thleng a, kan thlam chu alo eng set set a, kan thlam kan han lut thut chu an lo phu zawk a, keini nufa zan ah lehnghal mak titak in ka Nu chu an han en a, “Ka Pi enge tih dawn? zan ah te hetah ilo kal a? i va lo kal khat tawh ve, lo thu rawh u, voin tlai ah khan ka Pu lo kal a, Buhfai lo dah a, enge i lo tih ve dawn?” Piluni chuan alo ti luam a, ka Nu chuan Piluni hnen ah chuan “Hetah chen ve/awm ve kan duh a, mahse ka U te bul ah in sawitur anilo. Sawi su aw.” tiin kan nufa hun tawng chu an hrilh ta a, min khawngaih em em a, chaw ei min siam nghal a, Building lian tak hnuai a Buh leh sa tuihnai tinreng ei a, nun hlim si loh ai chuan, kan thlam riang te a, chawthing leh Maian hnah bai chu a va tui tehlul em. Rilru a hahdam a, vengthawn tur leh inthlahrun na tur awmlo bawk a, kan hlim ani, kan theih tawk in hna kan thawhpui a, kan ei in ho za a, tumah inhau leh buai kan awm ngailo, Rilru hlim leh hahdam tak a awmkhat kan ni bawk a, nuam kan tiin kan hlim takzet ani. Kan hlauh ber chu ka Putea ten thlam ah kan awm ve tih an hria ang tihchu kan hlau ber.i
Kan awm a tanga karkhat hnu vel ah chuan tukhat chu, ka Putea motor a lo lang thut a, kan thlam piah Ek in ah chuan ka Nu nen chuan kan tlan lut nghal a, min hmu hman lo hram a, Minutes 10 vel a awm hnu chuan a haw leh nghal a, kan va lut leh chu Piluni chuan “ka Pi ka Pu kha a mizia kha dang tawh e, zu rim te nam a, ka Pi pawh kha a lo hruai tawh ngailo, a mah in lo kal a, biak loh chuan a tawng ngailo, buhfai hi in va heh sawt ve min tia, mahse engmah kan sawilo, chuan Saturday ah kan lo kal anga, kan lo dah ang, kan chhungkua leh ka thian te nen chaw eikhawm kan nei dawn a, fai deuh in, in lo siam dawn nia a tia, a chhuak lehnghal daih nih a kha.” tiin ka Nu chu a hrilh mawlh mawlh a, Piluni bawk chuan “ka Pi an lo kal hun ah chuan sawtilai thingbuk hnuai ah sawn in lo biru dawn nia, chutilo chu an hmu palh angche u, an haw har lo ang. ka Pi pawilo tiraw…?” a rawn tih zawm lehnghal a. ka Nu chuan “Pawilo e, i Pi i Pu nupui khan min hmuh hlauh chuan, nangni nen lam hian a huat phah vek ang che u anga, in tan pawh a pawi ang,I sawi ang chuan kan biru deih dawn nia.” alo ti ve bawk a, tichuan huphurh tak in chu hun lo thleng tur chu kan nghak ta tawp a.
2
Ni te chu a liam ve zel a, kan thil hmuh chak leh huphurh tak hmuh chu a ngai dawn ta si, ka Putea fanu ka nau ka duat em em thin Kim kimi hmel chu hmuh chak tak si huphurh tak si chuan chu hun chu ka suangtuah ve a, Saturday ni chu a rawn in her chhuak ta, engtik nge anlo thlen dawn tih hriat lawk ni hek lo, chaw te kan eikham a, thlam leh a vel te chu kan tifai zung zung a, chutia mit kan len ruk reng lai chuan Motor thawm leh tape play thawm chu kan hre ta a, hmanhmawh tak in vau lam thingbuk lam chu kan pan phei nghal a, kan thu fel chiah tih chuan motor chu a rawn thleng zui ve nghal a, motor pathum a rawn thleng a, kan awmna thingbuk phen atang chuan ngawireng in kan thlir a, chutah ka nau Kim Kimi chu naute lem nen in pawm bawr ul chung chuan motor atang chuan a rawn chhuk a, a bul ah chuan kal ve mai chu ka va han chak tehlul em, thlam chhung ah chuan an lut a, Car Tape chu ring tak in an play bawk a, a then in zu an lo in bawk a, chutiang reng reng chuan tumah in ngaihsak awm hmel pawh an pu hran lo, Hmundang a kalsan rem hek lo, tichuan kan thu tlawk tlawk ta ringawt a.
Chutia kan nufa a inkuah rial a kan thut lai chuan, zawite a phun ri ser ser thawm chu kan hria a, min hmuh mai kan hlauh avang chuan kan thu hniam a, an lo chhuk hnai zel a, kan piah luang hung phen ah chuan an ding a, kan han bih chian chuan ka Pitei leh kan thenawm tlangval kha an lo ni reng a, thlam lam kan hawi phei a, a reh deuh thup bawk si, ka Nu nen chuan mak ti tak in ngawireng chuan kan thlir reng a, ka nu chuan kan pahnih hriat tham lek a zawi chuan, “Enge an tih dawn ni, an pahnih chu.” a rawn ti sap a, kan bangbo takzet a ni, chutia kan en reng lai chuan, mi in an hmu tih hre leklo chuan an in kuah a, in ngaih hmel tak chuan an in fawp ta ngawng ngawng a, rang lutuk in ka Nu chuan ka mit min rawn hup sak nghal a, “Awi leh” tiin ka nu chu a rum hak a, ka hmai a hup na chu a thlah a, induh hmel tak a, an in kuah vawng vawng lai chu ka hmu ve lehnghal a, mak kan ti lutuk chuan ngawireng chuan kan thlir tawp a, ka Nu thinrim lutuk chu a hmel ah pawh chuan hai rual anilo, anilahtak a, Ka Pute’an hmangaih leh duat em em in a enkawl a, mahse tlangval dang lak ah a rinawm loh san chu a ni si, ka Nu huat leh tihtheihloh zawng tak alo ni bawk nen, ka Nu thinrim lutuk chu a insum thei tawh ngang lo a, a tho thut a, ka hlauthawng chuan ka pawt thu a, a au tur chu a ka ah ka lo hup sak bawk a, chutih laitak chuan ka nau [Pitei Fanu] Kim Kimi chuan “Anu khawnge i awm….?” tiin a rawn au lang lang a, chutia a fanu rawn au thawm ah chuan an in thlah a, Pitei chu a kal hmasa a, thlam a thlen dawn ah chuan, a tawm pui pa chuan muangchang chuan a zui phei ve hna hna a.
Ka Nu rilru na lutuk chu chhuah a thlam lam a phei chu a tum a, ka phal silo, “Bawihte mihring hi kan va lo mak em.. Sawnu sawn ka unaupa a bum a, a sum leh thilneih bak a duhlo, i putea sawn engmah lah chu hresilo, Bawihte i Putea chu hrilh pawh ni ila, i Pitei a in sawifihlim thiam dawn ropui si, i Putea lah in a ringbur mai bawk si, Bawihte, i Putea saw ka va khawngaih tak em, hetiang hmeichhia hi engatinge an lo pian ve le, bawihte lo ngaireng rawh i Pitei saw a tluang bik hauh lo ang, keini nufa min awmpui theilo a, kan unau min then hrang a, chu mai ala duhtawk lo in, ka mithmih lai in a pasal a phatsan leh a a tluang chuang lo ang. Aw … i Putea sawn engmah a hre der si lo a aw, ka van lainat tak em.” thinrim tak si, engmah ti thei silo a dawmkun tlawk tlawk chung chuan ka nu chuan a rawn ti chuai raih a.
Kan tawm na hnim phen a tang chuan an haw hun nghak in thlam lam chu kan thlir reng a, kan thlam kawt ah chuan eitur tuihnai tak tak chi hrang hrang chu an chhawp tlar tuar a, a ei ve chu sawiloh, a hming pawh ka la hriat ve ngailoh, ei chakawm tak tak te chu ka nau Kim Kimi chuan a ei mawlh mawlh a, ngawireng in ka thlir a, diktak chuan dawr thil ka eiloh na pawh rei tak ani tawh, zep loh ah chuan ka it a, ka ei chak ve takzet ani. Mahse ei chak ang a ka Nu hma a awm chu ka duh bik lo a, en pawh ka en tha ngamlo, ka Nu chuan ka rilru chu hria ni awm tak in, “Bawihte, kan dam anga, saw aia tui saw ka la lei sak ve ang che aw, it reng reng suh.” duat tak a min kuah chung chuan a rawn ti a, ka Nu tawngkam chuan ka nopang rilru no chu a rawn ti chhuak a, ka tah a ti chhuak tat lat mai, mahse ka Nu rilru tih hreawm ka hlauh a vang chuan ka insum hram hram a, chu thil kan hmuh chuan kan retheihzia leh kan dinhmun min hriat nawn tir a, ka rilru chuan “Sawtiang ei in ve tur sawn kan dinhmun hian san lam a pan ve angem? ka damchhung hian ka ei ve thei tak tak dawn em ni” tiin a ngaihtuah ve neuh neuh a. Ei tur kan keng silo a, pum ri ruk ruk thleng chuan kan thu char char a, chawhnu lam Dar 2 pel tawh awm vel chuan min hawsan ta a, hmanhmawh tak chuan thlam lam pan in kan phei nghal a, khawvel awmchhung a, ka ei ve phak pawh a ka ruat loh, ei ve tur pawh a ka in rin ngailoh, eitur tuihnai tak tak an ei bang nawi chu duhthawh em em in kan ei a, chutih lai chuan ka Nu chuan ngawireng in minlo thlir a, “Nu ei ve ta che....” ka ti a, ka Nu chuan, “Bawihte ka ril a tam lo e, eiteuh rawh. Bawihte i tetlai chuan eitur kan hmuh ve phak chin ho chu i ei in ve thin a sin, i Putea khan a chhuah a piang in i ei theih tur tui tak tak a lo hawn thin che sin, Bawihte mi duhloh kalsan a bangnawi zut in kan awm ngailo sin, a bangnawi a in hnangfak ringawt tur che hian ka hring lo che sin, Bawihte ka va ti rethei tak che em.. Min ngaidam rawh aw, ka duh vang a thil thleng anilo tih i hria tiraw.” tiin ka Nu chu lungchhe em em chuan a tap ta zawih zawih a.
Pi Luni chuan ka Nu chu alo kuah vat a, a theihtawk in an hnem a, kei pawh chuan ka ei chhunzawm thei ta bik lo, ka Nu chu ka kuah a, “Anu i thiamloh engmah a awm lo, hreawm tisuh.” tiin ka hnem ve a, ka Nu ka kuah reng lai chuan tihian ka rilru ah alo lang a, “He hringnun retheih mangan na ata hi engtin nge kan talchhuah anga, he lei a nungchung a phum ang reng a kan awm hi engtin nge kan chhuahsan ang.” tiin ka rilru ah a rawn lang a, engtia bultan tur nge niang? bultan ngaihna ka hre der silo, a tawp ah chuan tah na bak min thlen lo, mi dinhmun leh mi fa te ka rualpuih mel hmulo a, awh nachang hrelo khawp a in khung chu ka tan thlan tur awmchhun ani si.
Zan khat chu tui tak a ka mut lai chuan mumang ka nei a, ka u Mama hi ka lo hmu a, mi lo zawng vak vak a min hmu thei silo a, tap zawih zawih in min lo zawng a, min hmu silo, min zawng tih ka nu nen kan lo hria a, kan au a, alo kal bo leh hman si, “Mama… Mama….” Ti in ka lo au vak vak a, chutia ka au chu ka lo au chhuak a, ka Nu chuan min rawn kuah a, “Bawihte i mumang ah i U i hmu nimaw…” tiinka Nu chuan ka lu ah chuan min chul heuh heuh a, ka insum zo ta lo,ka U ka ngai chu ka tap ta zawih zawih a, ka Nu insum theilo chuan min tah pui ve bawk a, Tap chung chuan ka Nu chuan “Bawihte i U chu ila hmu em em ang. Bawihte lungaisuh.” tiin min hnem mawlh mawlh a, muthil reng a lang tawh lo, chu zan chu min ti khawhar zual tur a ruat hran nilo mahse, kei ni Nufa tan chuan a belhchhah tu chu a ni ngei mai.
Zing ni chhuak pawh tuk dang ang bawk in a fiah fai nuam a, mahse rilru erawh a zing luk thung si, School kal ve chak na chuan ka rilru chu a luah a, mahse kan dinhmun nen chuan thil inpersan lutuk ani bawk si. Zan lam a ka mumang chu ka ngaihtuah kir a, ka U biak chu ka chak em em a, kan in biak loh na rei tawh bawk nen biak chu ka chak em em a, mahse ka Nu phone kan tlanchhiat san tawh bawk si, Pi Luni te phone hmang dawn ila an namber kan hre silo, “ka U chuan min lo biak ngei a tum awm sia, a mangang tawh ngawt ang, ka Putea te bul ah kan awm anga, School te kal in kan khawsa tur ah a ngai ngei awm sia, a rindan leh ngaihdan nilo lutuk a kan awm hi hria se zawng min khawngaih dawn lutuk, Hlim tak a awm tur ah min ngai awm sia aw” Chu ngaihtuah na khawvel a ka lo chen lai chuan “Bawihte chaw kan ei dawn tawh e, lo kal rawh.” tiin ka nu chuan min rawn au a, chaw ei tur chuan ka lut nghal a.
Chaw te kan eikham fel hnu chuan ka Nu chuan,”Bawihte chawhmeh vang sia, i Piluni te phurit kan siam dawn tlat, vawin chu chaw hmeh zawng in vakchhuak ila, tumbu leh thildang te awm tak mial tak in.” tiin min sawma, kan hma hma a thilthleng tur hremiahlo in ka Nu nen chuan, kan huan atang a hla lo te, kan huan kawr chu kan zawh ta a, tumbu pawh chu a lo tam ngang mai, kan nufa chuan hlimtak in kan hmuh hmasak a piang chu kan la zel a, hlim tak leh hlawhtling in ti tak in kan hmalam chu kan zawh thla zel a, “Bawihte fimkhur rawh aw, khawi ka lo kai ang che.” tiin ka Nu chuan ka ban ah min kai a, kham ko awihpang kan kal laitak chuan, ka Nu thil rah chu a pial thut a, “Awi leh Bawihte” tih pah chuan min vawn na chu a thlah a, awih pang ah chuan a lum ta.. Nu tih leh awih pang a tlan thlak ve chu ka rual nghal a, mahse a nih tur ang ani zo ta. Ka Nu chu a in pet ruh fan fan a, kawng leh ke chu na a ti em em a, mahse ka mangan hlau in a rawn meng lui hram hram a, kaihthawh mai tum chuan a ban ah chuan kan vuan a, a che thei tawh silo, “Bawihte kan kal na ah khan han let vang vang la, Pi Luni te han ko ta che, ihlau lo ang tiraw? ka ngaihtuah awm loh ani aw.” na titak in fet fan fan chung chuan ka Nu chuan a rawn ti chhuak hram a, ka Nu na tuar kalsan chu ka hreh takzet ani. “Nu zam reng reng suh.Lo tuar hram hram la, ka rawn kir leh nghal ang.” tiin lehlam ka hawi a, ka Nu hmuh loh tur chuan ka mittui chu ka hru zauh a, ka tlan ta nghal a, ka pian tirh ata ka la tlan chak ber tum a la ni hial ang, thlam ka han thleng a, thil awmzia chu ka han hrilh a, Hmanhmawh bakleng in kan tlan thla leh nghal a, hah reng ka hre hman tawh lo, ka Nu chu lung bang ngheng in alo mu bem a, “Nu engtin nge i awm?” tiin kan kuah nghal a, “Bawihte ka tha lawm, min ngaihtuah lutuk a nih kha..” chau tih hriat tak chuan a rawn ti tham tiak a, a na tih chu a hmel tang pawn hai rual anilo. a khawihchet that ngam si lo, dim tak chuan kan sawi rem a Pi Luni te Nupa nen chuan dim te in kan zawn a thlam lam chu kan panpui ta a.
Thlan far zawih zawih chuan thlam kan thlen pui hram a, ka Nu chu a chau in men pawh a meng hleithei tawh lo a, thlam chhuat ah chuan kan mut a, biak loh chuan a tawng peih ta lo, a muthil kan hlauha vang in kan be harh lui char char a, damdawi in pan pui ngei a ngai dawn si, engtin nge nita ang? ka insum thei tawh lo, pawn ah chuan ka tlan chhuak a, ka tap ta tlawk tlawk a, Ka pa huat na chuan ka khat a, chutih lain ka U Mama ka hrechhuak a, ka u Mama hming lam chuan ka tap leh leh a, a tawp ah chuan ka in ngaihtuah harh a, “Aw Lalpa ka Nu hi i hmu tiraw? ka mangang zia hi i hria tiraw? Pathian nung i nih tak tak chuan tun ah hian min tan pui rawh.” tiin tap chung chuan Pathianhnen ah chuan ka tawngtai mawlh mawlh a, chutia tah mawlh mawlh lai chuan motor lo kal thawm chu ka hria a, Piluni pasal chu khawchhung lam ah a han lo tlan nghal chu alo ni in,Taxi lo a hruai a, hmanhmawh tak in Hospital lam pan chuan kan tlan pui ta nghal a.
Damdawiin kan han thleng chu, kan bangbo in, Pi Luni te nupa phei chu an vawikhat kal na chiah ala ni si, kei lah Tleirawl ve tan, zak rual lek ka la ni si, zahzum vel chan awmzia a nei ta lo, a tul ang ang chu ka buaipui nghal a, ka Nu lah chu alo in sawhna viau mai chu niin, min Admit ta nghal a, Pi Luni te nupa chuan min awmpui hman tawh si lo, hak thlak leh thildang pawh engmah kan keng bawk si lo, Pi Luni chuan, “Bawihi hei a tul a piang ah ilo hmang dawn nia, hei bak kan nei sio a, hman veleh kan lo kal leh dawn nia,” tiin an neihchhun takmeuh cheng 500 chu min pe a, min kalsan ta, Doctor chuan ka Nu chu an en vel a, “Khawnge a chhungte in awm em?” a rawn ti lang lang a, “Aw awm e, ka Pu keimah hi ka nia,” ka lo ti vat a, Doctor chuan min en vang vang a, “Mami i chhungte, i Pa emaw tal pawh an awm lo a mi?” aw dam tak chuan min ti a, chu Doctor tawngkam chuan kan baihvai zia leh retheih zia chu min hriatchhuah tir a, insum viau mah ila ka mittui erawh ka dang zo lo, Doctor bawk chuan, “Mami ngun tak in ngaithla teh, i Nu hian a ke ruh ding lam hi a sawh tliak a,” a thil sawi chuan min ti phu zawk mai, chutah tihian a la rawn ti leh ta deuh deuh a, “A kawng hi a sawh na hle bawk a, Phai lam panpui a zai vat loh chuan a kawng a chin hnuai lam chu a che thei tawh lo maithei a, i chhung te hrilh la, a rang lam in phai lam pan pui tum ru aw,” tiin min han hrilh leh a, engmah ka sawi thei lo, Doctor pawh chhang lo chuan bang kil lam ka pan a, mi hriat hlau tak chuan ka tap ta tlawk tlawk a.
Engtin nge ka tih tak ang? ka Nu khum a mu chu kan en thin, a maimichhing a, zawi ngiai in a mu a, a dinhmun a hre der si lo, en pawh chu ka en tha ngam lo a, en lo a awm hreawm ka ti bawk si… tah leh tawp mai loh chu tih theih ka nei si lo, bathroom ah ka lut a, ka rilruhah beidawng chuan pathian ka au a, ka tap a, mi hriat ka hlau si, ka rilru chu a buai a, in tih hlum hial ka rilru ah awm a, mahse ka Nu enkawl tur in keimah chiah ka awm si, Ka u Mama chu ka ngai em em a, chanchin ka hrilh ngam si lo, a rilru hah lutuk tur chu ka khawngaih bawk si, “Aw Lalpa Pawisa min pe rawh ka nu in a mamawh ani, Lalpa min tanpui rawh.” tiin ka tawngtai a, chhan na ka hmu si lo, ka rilruhah lutuk chu pawn ah ka chhuak a, “Ruk ka ru mai dawn nge? eng thil nge Pawisa hmuh nan ka tih tak ang?” tiin ka ngaihtuah na chu a vak kual a, engpawh nise, ka Nu enkawl na pawisa ka neih na tur a nih phawt chuan engpawh ka ti ang. A dam na tur a nih dawn chuan ka nunna pawh ka hlan ang ti in ka rilru chu ka siam a.
Pawn a awm reng chu ka Nu ka ngaihtuah bawk si, a khattawk in ka lut leh thin a, ka Nu lah an damdawi pek chuan a ti muhil tui bawk si, tih harh ka duhloh a vang chuan a bul ah chuan ka thu a, ka in ngaihtuah lungpuam a, pawn ah bawk chuan ka chhuak leh a, chutiang reng reng a, darkar tam chaw pawh ei lo chuan ka vei tawn sek a, bang a, Sana lian in tar chu kan en a zan dar 11 alo ri reng tawh a, mutthil chhuah chu sawiloh, ka harh tulh tulh thung a, Damlo dang pawh chu an reh thiap tawh a, chu Damdawiin reh thuap khawharthlak tak chu chhuahsan in pawn ah bawk chuan ka thu leh a, ngaihtuah na a harh deuh theih takin tiin kawngpui lam pan chuan ka kal thla a, Bike chak tak tak a, tlan leh, a khat tawk a, Taxi tlan zeuh zeuh tih bak chu mihring hmuh tur an awm meuh tawh lo, hlauh na chang pawh hrelo chuan kawngsir ah chuan ka thu a.
Chutia in hnit feih feih pah a kawngsir a ka thut lai chuan, Nula pakhat ka lam pan in a rawn kal a, ka zawn a rawn thlen chuan min be chuan a kal tlang a, chutiang zan rei tawh lam a nula mahni chiah lehnghal a vak ka hmu chu, mak ti tak in ka thlir a, thui pawh a thlen hma chuan a rawn hawilet a, ka in hnit feih feih thawm chu a hria ni ngei tur ani, ka lam pan chuan a rawn kal hnai a, ka bul ah chuan a rawn ding a, ngawireng in min en a, chu nula chu ka bul a arawn din zawng ringawt pawn zu rim chu nam ham ham a, engmah pawh sawilo chuan min en reng a, ka hlau lek lek a, en pawh ka en tha ngam meuh tawh lo. Chutah, “Mami enge i tih a.?” a rawn ti bah nuai a, chhan pawh chu ka chhang duh mai lo a, aw dam nem tak chuan. “Khawnge i chhungte?” tih pah chuan ka bul ah chuan a rawn thu sut sut a, lehlam hawi pah chuan a Cigarettes chu a tan nghal bawk a, ka la ngawi reng a, ka khawhar rilru hah lai a ka bul a awmchhun a ni bawk a, ka hlau duh ta bik lo a, ka rilru tak phei chu a ti thlamuang lehling zawk a. chutak keimah zawk chuan, “Enge i tih a?” kan ti dek dek a, rang lutuk in, “Ka leng a, ka duh aiin ka tlai deuh ta a lawm mawle,” tiin tha deuh chuan min chhang a, thil dang ka sawi leh hma chuan a mah zawk chuan, “Nang zawk, enga tinge tun ang zanrei ah helai hmun ah mahni a i thut reng a? nghah i nei mi?” tiin min zawt let a, kei chuan “nei lo e, hei Damdawiin ah hian ka Nu a awm a, ka rawn chhuak harh mai mai a nih hi.” ka ti a, “chu i chhngte an awmlo mi?” a rawn ti leh hram a, “Aw, awmlo.” ti ringawt chuan ka chhang a, chu Nula chuan, “Kei chu ka vanduai a, Nu ka nei tawhlo a, i vannei bik hle mai Nu ila nei bik a,” a rawn ti sam et a, “Nia ka vannei khawp mai mahse, ka Nu chu tun ah hian thi chhawng in a mu reng a, enkawl na tur ka nei lo a, chhungte ka nei lo bawk silo, ka vanduai ve tho a sin.” tih pah chuan ka mittui chu a rawn sur zung zung a, chu Nula chuan chiangtak a min en chung chuan “Mami Tinge chhungte i neihloh a….?” aw nem dam tak chuan a rawn ti thawp sat a, chu zawh na chuan min ti buai ani. Engang mihring pawh ni se, ka harsat na hrilh tur in tumah min zawt tu ka la neih ve ngailoh vang chuan min zawt tu awmchhun chu, a mah ka mi rin zawng a nih vang pawh nilo in, engkim chu ka hrilh ta a.
Mittui tla zawih zawih in kan dinhmun chu ka hrilh ta a, ka biang a mittui luang hruk fai pah chuan, Pawisa ka Nu enkawl na tur ka mamawh thu chu ka hrilh ta ringawt a, a ngawireng a, a tawp ah chua, “Mami tanpui che duh mah ila, tanpui theih na che ka neilo, keipawh mi in a khawsa, fahrah ka ni a, ka nu in min boral san hnu in awm na tur ka nei lo a, mi in luah in ka khawsa a, ka ei leh in hak tur ngaihtuah tur in engmah thiam ka nei si lo, keimah in ka in ngaihtuah chawp a, ka thawh loh chuan ka nghei a ni zel si, ka hna ang hi i ti ve tur chuan ka duh hauh lo che a, mahse thil dang ka hre bik silo a, i duh ve chuan ka pui thei ang che,” a rawn ti chuai raih a. Rang tak in a lam ka hawi a, “Eng hna nge ? ka Nu dam nan a pawisa ka hmuh theihna a nih chuan eng hna pawh hna hnuaihnung mi thawh peihloh pawh nise, ka thawk hreh lo ang. Eng hna nge?” tiin ka ka zawt mawlh mawlh a, muangchang chuan ka lam a rawn hawi a, “Mami, kum ah pawh nopang te ila ni ang maw..? mahse i pumrua a lian in, i puitling ve tawh khawp mai,” muangchang chuan a rawn ti bauh bauh a, kei lah chuan, “Enge min hrilh teh eng hna nge ka ti a lawm,” ka lo ti thuai a, Nula chuan ka mit ah chiang tak a min en pah chuan, “Mami ka tanpui i duh si a, kawhhmuh tur che ka hre silo, ka tih ang, ka thaw hang i thawh ve duh chuan keimah ang hian i INZUAR ve ang.”
A thusawi chuan ming thawng in, mak ka ti lutuk chu ka phu zawk a, “Kei naupang, ngaihzawng pawh la nei ngailo, hmeichhe thianghlim hi ka in zuar ang maw? Nangmah pawh i inzuar maw?” thinrim aw vin hlar chuan kan ti deuh chiam a, Nula-i chuan “Aw ka tih a ngai si a lawm.” aw dam thlap chuan a rawn ti a, ka thinrim chuan “Kei chu ka ti theilo ang, ka duh lo.” tiin ka chhang bul hmak a. Lungawilo tih hriat tak chuan “i mamawh lo a nih chu, ka tihpalh, ti ngei ngei rawh ka tih na a ni hleinem, hei ka namber hi la la, min mamawh a, i rilru i thlak chuan min lo phone dawn nia.” tiin lehkha te a phone namber inziak chu min pe a, mangtha pawh in mangtha lo chuan, muangchang chuan min kalsan ta a, chu a lehkha min pek chu paih mai ka tum a, “Engpawh nise, ak tha phawt ang.” tiin ka ak tha a, ka Nu hnen lam pan chuan ka chho leh ta a, Damdawiin chhung chu alo reh ruih a, thawm dim tak chuan ka Nu khum bul ah chuan ka thu a, ka Nu kut ah chuan ka vuan a, mahni inkhawngaih na in ka rilru chu a rawn luah thar a, mi hriat hlau tak chuan ka tap ru kerh kerh a, “ka Nu i tello chuan engtin nge ka awm tak ang, hreawm tam tak tuar in min enkawl a, i tan tihtheih ka nei ve silo,” tiin keima hriat tham lek chuan tap chung chuan ka phun mawlh mawlh a, chutia ka tap chu, ka Nu khum bawh chuan ka lo muhil ve a.
Ka riltam lutuk pum na chuan, khawvar rual chuan min ti harh a, eitur engmah kawl kan nei silo a, Piluni Pawisa min pek chu ka hrechhuak a, ka ngaihtuah chiang a, chubak pawisa kan neilo tih chu ka hre bawk si, ka hmang ui bawk si, kan piahlawk a damlo dawhkan a, eitur chu ka melh ru zauh zauh a, ka dil ngam bawk silo. Pum tuai vat vat chung chuan chaw dawh hun chu ka nghak tan gat ngat a, chaw dawh hun alo thlen meuh chuan ka Nu pawh chu a rawn meng ve siar siar a, “Nu i ril a tam ve em?” ka ti vat a, ka Nu chuan “Bawihte, tam lo e, nangman va dawh la, ei teuh rawh aw, ka dawh sak thei silo che a, zak suh aw, va dawh teuh rawh.” min tih tak ah chuan chaw chu ka dawh ve nghal a, ka thleng chawi chung chuan ka Nu bul ah chuan ka kal a, ka Nu chuan a mittui a lo hru mawlh mawlh a, “Nu tap suh, i dam leh vat dawn a lawm, i tah chuan ka ei tui miah lo ang.” ka ti vet lat a, ka chaw ei chu ka Nu chuan min en reng a, ei verawh tlem tal ka tih pawh chuan ka ei chaklo a ti zel si, ka eikham vat vat a, ka eikham fel hnu reilote ah chuan Doctor a rawn kal a, Doctor chuan ka Nu taksa chak loh zia leh eitur tha , damdawi a mamawh zia chu, kan dinhmun hre miahlo chuan min hrilh mawlh mawlh a, rilru hreawm tawh sa nen, chu a thil min hrilh a vang chuan mittui bawk chu a rawn sur leh zung zung a.
Ka Nu hnen ah chuan chhuanlam siam in, pawn ah chuan ka chhuah san a, mi tam tak kar ah chuan in zep in, kan neihchhun cheng 500 keng chuan ka nu damdawi tur chu ka lei sak a, cheng 500 chu a tlem lua deuh chu ani, in ven nan cheng 100 tal dah that ve ka duh bawk si, a tul zual ka lei a sak hnu chuan rilruhah leh mangang tak in, ka cheng 100 hmanbang hum thlan dap chung chuan ka Nu hnen chu ka han thleng a, ka Nu chu chau tih hriat tak hian alo meng diar diar a, “Bawihte khawiah nge min kal san a.” min lo ti vat a, inthiamlo tak chung chuan, “Nu i damdawi ka lei lawk a, ka tihpalh ka kalsan tawh lo ang che.” tiin ka Nu kut chu ka vuan a, “Bawihte doctor chuan engtik ah nge kan chhuah dawn a sawi em? enge ka taksa chu a an a..?” ka Nu chuan a rawn ti chhuak hlawl a, ka theihtawp in ka insum a, ka Nu kut ka vawn na chu ka hum nghet sauh sauh a, “ih maw Nu, ih… Doctor chuan.” sawi zawm tur ka awm ta lo, ka insum thei lo chu pawn ah ka tlanchhuak a mi hmuh loh tur ah chuan ka tap ta zawih zawih a, ka Nu mangang hrilhhai lutuk tur chu ka khawngaih si, in pet ruh fan fan chung chuan ka lut leh a.
Ka Nu chuan thei leh thei lo in ka ban ah chuan vuan in, “Bawihte engkim min hrilh rawh. Ka tuar thei lawm, Bawihte min hrilh rawh. Doctor chuan engtin nge min tih?” kut a min vuan chung chuan min zawt mawlh mawlh a, a va hreawm duh take m. Ka theihtawp in ka insum a, ka Nu ban chu ka hmer nasa sauh a, “Nu” ka theih tawk in ka in sang ruh a, “Nu doctor chuan i ke ruh i ti tliak a, i kawng hi i sawh nah le bawk a, Nu ih.. i kawng hi a rang lam a phai a kan zai loh chuan.” ka mittui chu danrual ani ta lo. “Nu kan zai loh chuan damchhung in i kawng hnuai lam hi a che thei tawh dawnlo, Nu mahse lungai suh aw, kan ti thei ang.” ka sawi zawh rual rual chuan ka Nu hmel chu hmuh theih in a danglam nghal a, “Bawihte kei ni nufa hian kan thei lo ang. Aw, kan va rethei tak em, Bawihte ngaihtuah suh, engmah ngaihtuah buai a ngai lo, nula ve tawh mai tur i nih tawh kha, nangmah in ngaihtuah rawh, Keizawng pathian pawi ka sawi a niange.” ka Nu chuan a rawn ti chuai raih a. Ka Nu beidawng mittui tla chu hmuh hreawm ka va ti tak em, engmah tihsak theih ka nei silo, “ka Nu lungaisuh i dam ang, i dam tur ani, ka thawkchhuak anga phai ah chuan kan zai anga,i dam anga hlim tak in kan awm ang.” tiin ka Nu chu kan thlamuan ve ngial a, “Bawihte keini nufa tan hian khawia pawisa nge awm tehlul ang, ngaihtuah lo mai rawh. min hmangaih a ka lawme.” ka nu chu puan in a in khuh a, a tap ta tlawk tlawk a, “ka Nu tap suh ka ti thei ang.” tih pah in ka ipte a phone Nula in a namber min pek ka ah chu ka phawrh a.
Ka lehkha them te hum chung chuan pawn lam ah ka chhuak a, chhungte damlo kan tur anlo thu hmur a, ei tur leh in tur tuihmel tak tak chu an rawn hum far a, it viau mahila khawi mah hi kan ta tur anilo tih chu ka in hriatchian ang bawk in ka hrechiang si, a sir kil lam chu ka pan phei zel a, nu pakhat hmel en pawh a sual tak chu ani lo ang tih tur, ka Nu te rual awm vel bul ah chuan ka thu ve a, ka rilru ah chuan “Engtin nge ka tih ang?” tih chu a ri nawn tlut tlut a, ka thil tihtum chu thiltha anih loh zia chu ka hrechiang bawk si, mahse thlan tur dang a awm si lo, ka huaisen na zawng zawng sawmkhawm in, ka bul a thu nu pakhat phone ken lai chu hman ah kan dil thuai a, ka rinloh deuh in “E..hmang rawh hmang rawh.” tih pah in a phone chu mi pe a, ka phone namber ken chu ka en a, ka chhu a ka phone ta tawp a, hmeichhia mutchhuak aw ti hriat tak chuan, “Hello tunge?” a rawn ti nghal a, ka ngawi deuh vang vang a, ka aw te chu a lawi khawlo zo vek chuan ka hria a, ka aw chu kan thian khar kharh a, “Damdawiin thlang a i hmeichhe hmuh. Phone namber i pek kha ka nia, min la tanpui thei ngem.?” Ka zam bawk si chuan ka ti lai rut a, Nula-I chuan “i rilru i thlak tawh nih chuan zanin Dar 11 ah i lo awm na hmun ah khan lo awm la, kan inhmu dawn nia.” tih leh phone off chu a rual a.
Zan dar 10 a ri tawh a, ka Nu ala muhil silo, kei lah chuan ka thil tih tur chu ka huphurh tawlh tawlh a, duhthlan tur nei ila ka thlan loh tur zia chu, thih hlauh tak chuan ka hlau a, mahse, mahse a ni si, ka Nu dam na a nih dawn chuan, ka nunna pawh ka hlan ang ka lo ti tawh si, Aw.. A van hreawm tak em, Dar 10:55 ri ta, ka Nu muhil chu puan ka sin that tir a, engmah hrelo tui tak a mu kut chu ka vuan a, “Nu min ngaidam rawh aw, i duh loh zawng, mi lepchiah leh mi awmtha duhlo te tih thin a kan ngaih kha, tun ah i fanu in ka ti ve dawn ta, Nu min hau suh aw, ka duh vang a nilo, i tan a ka tih theih awm chhun a ni.” tiin mittui nen chuan ka phun sep sep a, ka Nu chu ka kalsan ta a, ka hawilet a, kal leh loh mai chu ka duh a, mahse ka Nu, damchhung a chetheilo, engmah tithei lo tur a a awm tur ka ngaihtuah erawh chuan hreawm ka ti si, hreh tak chuan ka chhuahsan ta hram a.
A hma a ka lo thut na ah chuan khur dar dar chung chuan ka thu a, pumpelh na kawng dang ka duh takzet a ni. Motor in tlanpel zut zut chu ka thlir a, in chil hlum tir mai te chu ka duh rum rum a, mahse ka Nu na tuar khum a mu enkawl tu tur neilo, chu mi vang chuan ka ti thei silo, ngawireng a ka thut lai chuan ka hma ah tak Taxi a rawn ding a, ka harh zawk mai, kawngka a rawn hawng a, a hma a ka hmuh nula ka va phone ngei kha alo ni a, tawng pawh tawng lo chuan min lo hui a, ka van hlau tak em, “khawvel hi tawp tawh mai se.” ti te chuan ka ngaihtuah a, luh pawh lut ta mailo chuan ka la ding reng a, “Mami rawn lut rawh le, a hmanhmawh thlak ania” tih pah chuan min rawn hui leh a, “Aw Lalpa min ngaidam angche, min veng la min awmpui ang che, ka Nu tan kawng dang ka hre silo.” tiin ka tawngtai mawlh mawlh a, ka lut ta a, kan hmalam pan chuan kan tlan nghal par par a, Driver leh Nula-i nen kan pathum chiah kan ni a, kan tlan zel a Hotel pakhat, a kawt pawh ka lo kal ve fo tawh na thin ah chuan kan ding a, nula-i leh Taxi driver chu an in be mawlh mawlh a, chutih lai chuan Motor chhung ah ka thu a, thlan fim in min bual a, kir leh duhna hlir in ka khat a, mahse “Ka Nu tan ani” tiin ka in sehruh a, Hotel chhung ah chuan min hruai lut a, alo reh ruih mai, a eng chhit te reng reng mai chu a ngainat awm lo em em a, “i ril a tam em?” ti a min be thut chu ka phu zawk mai, chhan pawh chhang lo chuan ka lu ka thing ringawt a, ka Tah chu a chhuak ta tlat mai, ka insum hram hram a, Room lianlo tak pakhat bul ah chuan an ding dat a. Nula-i chuan kawngka chu a han kik dat dat a.
Muangchang in Kawngka chu a rawn in hawng riai riai a, ka thil hmuh chuan min ti phuzawk a, chu ka thil hmuh chu tu dang nilo in, ka Putea te in a kan awm lai a, kan kawmchhak pa, Kohhran upa Puhruaia a lo ni reng a, mak ka ti lutuk chu luh pawh lut tamai lo chuan ka en reng a, min hre lo chiang hle tih chu a hriat a, a hmel nuisawng, lungawi tih hriat tak chu hlauh aiin ka ten zawk a, Nula-i chuan min signal zauh a, “Tikhan lo awm ula, nakin ah ka rawn lam leh ang che.” tih pah in min chhuahsan nghal a, room chhung ka lut chiah chu ka zam ta tlat mai, ka hlau ta a, ka khur a, ka Nu ka mitthla ah a rawn lang nghal bawk a, tichuan khum ah chuan ka thu a, Puhruaia a chuan, zu in tur chu a thli a, min rawn pek chu a tum a, ka lo hnar nghal hmak a, mak ti tak a min en chung chuan, “i danglam bik hlemai, ila naupan vang te pawh niang.” tih pah in zu no dawm chung chuan ka bul ah a rawn thu a, hlauh na nen, ten na nen ka khat a, a hmai a ben chawrh chu ka chak zek zek mai, “Nupui fanau pawmlai nei, kohhran leh khawtlang tan a, alang a in hmang ve, mi bum ching tenawm lutuk hma ah chuan ka Thianghlim na chu ka hlan lo chiang ngawt ang,” ka rilru chuan ka ti mawlh mawlh a, chutah min rawn kuah a, “Mami engtin nge ka koh ang che..?” a rawn ti bah nuaih a.
A hmel pawh ka en peihlo a, chhan pawh ka chhang hek lo. Min kuah na chu paihthlak tum in a kut chu ka pawt a, a thinrim ta thut mai, “Nang KS mai mai hian ka kuah duhlo in ka zawh na pawh min chhang duh lo vel a maw..? nang aia zei leh hmeltha kawm tur ka hre tam lutuk, i thiannu min sawihmuh vang chiah a kawm tum che ka nih hi, eng mihring nge i nih a.?” tiin min an khum ta bawrh bawrh a, hnuai lam ka en a, kun reng chung chuan ngawi reng in ka awm a, ka mittui chu a rawn far fap fap a, ‘KS mai mai’ min ti chu ka rilru a na ta lutuk a, ka Tap chhuak ta hial a, a ni zurui thinrim tawh si chuan mi rawn pan hnai a, min ben a tum ta mai, min ben hlau chuan ka theihtawk in ka insum a, “Chhuak rawh. chhuak nghal rawh.” a rawn ti vin tuar a, ka va lawm tak em, “ka huphurh na leh ka hlauh na te, ka thianghlim na chhe tur ka pumpelh dawn ta,” ka lawm lutuk chu kawngka lam pan in ka kal nghal a, mahse min hmusit lutuk leh a nupui fanau a bum vang chuan ka hua a, engtin emaw tal tih let ve chu ka duh tat lat mai, kawngka chu a hawng a “Chhuak rawh. Nang aia tha leh zei an tam lutuk.” tih pah in ka hnung ah chuan min nam a, kawngka bul ah ding in, thinrim hmel tak chuan min en kul a, ka thinrim lutuk chu ka in sum thei ta lo. “Puhruai i Nupui Pihriati te khan Pa tha tak tur ah an ngai ngei awm che sia,” kan ti zauh a, Puhruaia chu a rawn meng kawk a, ka ban ah chuan a rawn vuan a, min pawt ding chawt a, “Min hria e law…?” a rawn ti chuai raih a. kei lah chuan “Aw hria e, i fa te zawng zawng pawh ka hria, kohhran upa i ni a, khawtlang ah i in hmang hle bawk.” ka tih khum ta sak mai, rang lutuk in “Hei…. Tunge nih.” tiin ka dar ah chuan a vuan a, min sawi ta nawk nawk mai.
“A… Duhtak a tawi zawng in ka hrilh tawh mai ang che, tih tur kan nei sia.”
Tichuan Puhruaia chuan ka thil tawn chu zep tlat tur in min ti a, kei chuan, ‘ka zep anga, nangpawn i thil chin thalo hi i sim ve tur ani.’ ka ti thung a, tichuan kan inremsiam ta a, pawisa pawh thahnem tak min pe nghe nghe a, Chumi zan a tang chiah chuan Pathian ropui zia leh a remruat na chu a in tan chho a, ka Nu phai lam pan pui kan tum mek lai chuan ka Nu chuan min boral san ta a, ka tan khawvel chu a tawp a, engkim mai chi hlut na leh mawina reng neilo ang mai in ka hmu a, dam reng a tul tawhlo tiin thih chak na in ka khat a, Chutah chiah chuan Puhruaia a rawn lang a, an in ah min hruai haw a, tichuan khawvel thar chuang kai tur in nang ka tawng ta che a, mi vanduai ber ni a inhre thin kha tun ah chuan mi vannei ber ka ni ta nih hi, a chhan pawh, Nang in Khawvel leh Pathian mit hmuh ah Nupui a tan min nei hi ani. ka lawme aw, Ka Hmangaih che.” Sangtei chuan tap tuau chung a min kuah pah chuan a rawn ti a.
Lainat na nen, khawngaihna nen Hmangaih na nen, duat tak in ka kuah let vawng vawng a, ka Mittui chu a rawn hnam tiam tiam a, a bengbul ah chuan, “Duhtak ilo van tuar nasa em, engkim ilo tuar chhuak a, mi tam tak chu nise, mahni an in tihlum ngei ang. he i tawrh na, hmeichhe pakhat in a tuar chhuah ang hi, mi nun beidawngte hrilh chhawn a tan he i hringnun thawnthu hi ka vawng reng.” tih pah chuan bang a Sana in tar chu kan en zauh a, zing lam Dar 3 alo kawk va tawh a, ka tho thut a, Mak tih hmel tak chuan Sangtei chuan min lo en phawk hru a, ‘Enge duhtak, khatia I thawh thut a, ka Nu nen a kan chanchin chuan a ti lungawi lo che mi?” in thiamloh hmel tak chuan a rawn ti a. Kei lah chuan nui duh miah lo in, “Ka hre chhuak, ka hrechhuak, ka hrechhuak chiah.” ka ti mawlh mawlh a. Sangtei chuan “Enge, mawh enge ni?” mangang hmel tak chuan a rawn ti a, ka dar ah chuan min sawi nawk nawk a, chutah ka kuah thut a, a hmui ah chuan ka fawp zauh a, “Lawithat zan, ka hrechhuak chiah LAWITHAT ZAN” nui sang chung chuan ka ti a, Sangtei chuan “Ni tak maw..” ti chiah ila, tih pah chuan khum ah chuan min kuai mu ta riai riai a.
LAWITHAT ZAN BY Lbn Pachuau Mikhawhar
ADVERTISEMENT (A hnuai a milem hi a nia hmeh zeuh tur chu)