MARGARETH.. BY _Toni Râlte

Group siam tirh atanga like tu 1000 nei chin zawng zawng dahkhawmna
Ngaia
Site Admin
Posts: 25813
Joined: April 30th, 2016, 4:07 pm

MARGARETH.. BY _Toni Râlte

Unread post by Ngaia » March 29th, 2017, 4:41 pm

MARGARETH..
.
_Toni Râlte
.
"I tihsual te hi i pawm ngam em?" A mita melh chungin ka sawi.
.
"Pawm lo ta i la" a nui hmel phena huatna chu ka hmuhhmaih lo chiang kher mai. Thawh lawka chhip thlak bur a chakawm phian. Mahse, chutiang buan buana chetlak chu hmeichhe laka tihtur niin ka hre lo. Ka hmaa ţhu hmeichhia chu hmeichhia ka hmuh tawh azawnga pawisawi lo hmelpu chiang ber ani mai awm e. Tunah erawh a lemchanna hlipin anihna diktak, huatna leh khakna nen min hmachhawn ta chu a nia. Hmai tung lam, ngo tih aia dang lam hret, mitmeng lian kel kawl, hnar zum vat leh heh pan lek lek a ni a. Hmeltha vur tih tur chu a ni hauh lo. Mahse, mi hneh theihna riau, a thuhnuaia mi dah theihna riau a kawl niin ka hria.
.
Kan kuta a awm chhan lah awih harsa zet mai ani a. Aizawl pa hausa leh lar, Minister te hial pawh lo ni tawh thihna chungchangah a ni. Pu Lianlura thih hma thla 2 ah khan a nupui leh a fanu te chu motor accident in an lo thi tawh a. Tunah chuan Pu Lianlura leh a fapa, phaia awm reng thin, a nu te thih vang leh apa awmpui angaih tak vanga Mizoram University a lut ta te an ni a. Awmpui pa 2 an nei a. An awmpui pakhat zawk chu tuna ka hmaa ţhu Margareth hi a ni. A hmingpum lah a sawi duh der lo!
.
Pu Lianlura nizan hmasa khan rawng taka thah a ni a. A ma roomah ngei thisen nena inchiahpiah nuaia thah a ni.A lu chu silai luhna tih hriat takin a chal zawnah a kaw phâwt a. A dul chuan chemte hriam zeta zai thler a ni bawk. Rapthlak takin a sazu chu tan chhum a ni bawk a! Hei hian ngaihtuahna a hruai kual nasa ngang mai. An awmpui pakhat zawk hian hmu hmasa berin midang a kai tho a. Tuna ka hmaa ţhu hian bawihsawmin, midang a pun ta nghal a ni. Keini pawh a rang lamin kan va thleng phei nghal a. Rinhlelhtur an vang khawp mai. Amaherawhchu, chunglam puihna nge an awmpui pakhat zawk chuan Margareth rooma kawr thisen kai hnuang a chhar ta tlat! Margareth thawmhnaw ngei tih pawh a chiang. Tichuan, a room chu dap in a dunlop hnuaia puakruk lo awm chu kan chhar ta bawk. Awlsam tein tualthattu chu kan manchhuak thei a. Mahse, buaina erawh a inpuang duh hauh lo. Theihtawpin a ţang a. A changin a ţawng duh lo a. A luhlul leh ngawltawt a chhuah zia chu ka naute mak tih a tling hial..mahse..kei chu ka beidawng dawn lo.
.
Ka hriat chak ber erawh "engvanga a awmna pa chu that nge anih" tih hi. Min chhan mai ka ring si lo. A diary ah lah chutianga ngaihbel theih thu pakhatmah a awm si lo. Thinrim ţun chungin ka dawp ta ngat ngat mai a ni.
.
Pu Lianlura fapa James chuan a pa thihna chu a tuar kher mai. Bawrchhawr takin apa thattu, a farnu ang hiala a lo en chu Thana_ah a rawn hmu a. Mipui thinrim sosang kan beng dai zo chiah a. James hi ven a ngai leh ang tih ka hlau ru kher mai.
.
"Magie, engvang nge? Mawh..engati nge hetiang thil hi i tih? Awih harsa ka ti lutuk asin" magie chu a sawi nawk nawk a. Tihnat erawh a tum lo a nih hmel. Magie chu a ngawi kar a. Hnuailam a bih tlat bawk. A thuhrimin..tualthattu fimkhur lo tak a ni. A thawmhnaw thisen kai te kha dahbo ve mai awm..a hmanraw kawl te pawh..manchhuak se tih a duh niawm takin langsar takin a inpho ani ber mai. Chu chu alawm keini pawhin kan hriatthiam loh..
.
"I pa kha ka that lo" amak ţang
ţang mang e.
.
"Anih chuan thisen kai thawmhnaw te kha.."
.
"Ka thawmhnaw chu an ni ngei alawm..mahse.." A chil a lem khawlh a. A ngawi leh ta reng a.
.
"I that ngei a ni. A chhan ka hre duh..chu chauh zawng hriat ka phu ve lo mi?"
.
Verther zetin a nui a. Kum tamtak dam tawh ang mai ni hian ka hria. A hmelah chuan inchhirna leh lungchhiatna hmuh tur pakhatmah a awm lo.
.
"Ka u chu Lisa a nia. I hre ngai em? " teh daih a. James chu a tawlh hnung dawrh a! Chiâi hmel takin a hma ami chu a melh a.
.
"Ka chhungkua kha ka ngai thin. A der tel loin an kiangah khan ka hlim thin a..i pa in min chhuhsak hma kha chuan" a aw zawi leh tham deuh chal chuan boruak vawt tak a rawn keng emaw tih mai turin james chu a khur der der a. Makti zetin ka lo thlir ve ta reng a.
.
PU MANLIANA
.
Thingtlang chengker lutuka a nupui leh fate pathum chawm seilen chu thil harsa tak ani tih hmuthiam tur khawpa angaihna hre mi a ni ve a. Berh taka khawsak reng chu a tum bik bau lo. A in leh lo ramte hralhin khawpui lamah a rawn inbengbel ve a. A fate an la te si..a nupui lah zo nu mawl ve tak a ni a. Mahse, pa tumruh leh taima tak a nihna chuan an dinhmun chhe tak atang chuan a khaichho ve zel a. Vanneihthlak takin pa hausa tak huan enkawl hna a hmu ve ta a. Huan lam timi ani bawk a, a hna pawh thawh nuam a ti kher mai. A fanu leh fapa te chu chu mi hausa pa chuan awmpui atan a la nghal a. A fanu chu kum 12 ani ve tawh a. Khawpui naupang te aiin thiam thil a ngah zawk a, a che fel vei thlap reuh bawk..a fapa erawh kum 10 lek a la ni a. Tirhkah ah chuan a hmantlak ve tawh viau. Tin, an school kalna tur te an ngaihtuah sak bawk a, vannei hlein a inhria a ni. An ni nupa leh an fa naupangber te erawh huan thlamah an khawsa tam zawk a. An fa nau ber hi an nei har deuh a. Tunah chuan kum 4 chauh a la ni. School kaltir ve chu duh viau mahse..a u te buaipui a la ngai dawn si a. An la kaltir ngam lo a ni.
.
A hlawh hmuh ang angte chu bank ah a dah ve zel a. An tan kawl a eng chho ve zel a. A thawhna pa lah pa fel leh kawm nuam tak a ni a. A nupui erawh thip râm mai, a fate pawh hnawk tih hmel taka melh thin a ni a. Thingtlang mi an nih vangin a hmusit hle tih pawh a hmuh theih. An fanu lah chu anu siar anu siar a lo ni chhap a. An fapa erawh naupang chum biang buang, â phuang mai leh a fate nena inkawmngeih tak a ni thung.
.
Hun a liam ve zel a. Kum tawp lam pawh an lo hnaih ve ta reng mai. Pu Manliana te pawh huan thlamah an la khawsa zel a, a fanu leh fapa te chuan an rawn tlawh ngai meuh lo. Mi ina awm an ni miau a. Nikhat chu a thawhna pa hnen a tangin zualko thu a dawng ta tlat! Engdang ani lo..a fapa duhtak, a neihchhun chu a awmna te inchung sang tak atanga tlain, ka pawh chhawn loin a boral a lo ni. Pu Manliana rilru chu a mang vek. Awmdan thiam harsa a tiin a nupui leh fate tan pachang taka a tawrh a ngai bawk si.
.
A fapa chu a awmna pa hausak leh larna vang ni fahmiang, ropui taka vuiliam a ni a. A chetsual dan an han sawichian chuan, inchunga puan pho a seng tur chu rod lo lawrah inchhuihin, tlak dalna an kham chu a bawhliam a..a tla ta a ni. A lu lei vit zawngin a zuk insawh kher lahtak a! A hliam tuar loa a thi nghal pawh kha a mak lem lo. An fapa an vuiliam hnu chuan reilote chhung chawlh an la a. A thawhna te in tho..inhnuai hi an luah a..(a hma khan an luah tawh a. Mahse..thlam lama an chet tlat tam zawk vangin an luah lum lo hle) chutia an in luma an awm lai chuan an fanu kha an bulah a cheng ve hrih a. A awmna tura a phei hun a lo thlen pawhin a duh ta tlat lo mai le..
.
"Pa..ka awm duh tawh lo. In bula awm ka duh zawk" tiin a ţap zawih zawih a. Apa chuan a nau awm tawh lo tur avanga hreh angah a ngai a. Thinrim taka hauin, a hruai lui a. A chhan chu a hmangaih vang ani. School tha taka a kal theih nan leh a puitlin zawk nana a fanu hreh chung chung hruailui a ni. A thawhna pa chuan a lo thlem heuh heuh a. Nui huah huah chungin a lawmzawng lei nan pawisa a lo pe a. Ngaihtha takin a chhuahsan ta kha a nia.
.
Nikhat chu an fanu naupangber chuan a u a ngaih em vangin anu chuan a u awmna inah chuan a lenpui ve a. A fate pahnih infiam lai chu hmuhnawm ti takin a thlir a. Engmah tih loh ai chuan tiin chhuat te chu a lo nawh fai sak a. Awmpui nula pahnih an nei tho a. Chutia hlim taka an nufaa an awm lai chuan, a pasal chu thi hnuangin tlangval hoin an rawn zawn haw a! Huana a hnathawk lai chu ramvak mi tuemaw ten sa emaw tiin an lo kap palh(?) A lo ni. A darah kapin thisen a chhuak nasa khawp mai. Rang takin damdawiin lamah an kalpui ta a. A fate pawh a kalsan lo thei ta lo a. A fanu upa zawk chu a fel tawh tho bawk a..a ngaihtuah lutuk lem lo.
.
LISA..
.
"Aih..apu ka duh tawh lo. Ka duh lo.." Tia mangang aurawl chu Magie chuan makti zetin kawngka pawn atang chuan a ngaithla kar a. Kum 5 a tling ve tawh a. Chutia mangang taka awrawl chhuahtu chu a u a ni tih a hai bik lo. Apa kha thisen nena inchiahpiah nuaihin anu nen damdWiinah an kal daih si a. A u bulah lo chuan a awm ngam lo. Mahse, a u kha apu (a awmna pa) in roomah a hruai daih anih kha..
.
Kawngka chu a kik dat dat a. A u chu a ko chul bawk a. A u awrawl chu a zawi telh telh a. A tawpah phei chuan a reh ta tlawk tlawk a. Inchhung zau puiah chuan midang tumah an awm ve si lo. Pi ber chu a fate nen Shillonga an zin lai a ni. An awmpuite lah dawr lamah an kal daih si.
.
Kawngka chu a rawn inhawng
ţhuai a. Pu ber chu thinrim hmel deuh hian a lo chhuak a. A û lam chu a va pan thuai a. Che lo chang loin a u chu a lo mu reng a. A mit lah a khap si lo. A thawmhnaw chu chunglamah a inhlim vek a. Kekawrte pawh a ha si lo! "Û..a û" tiin a sawi dawt dawt a. Mahse..chhanna a dWng lo.
.
"Engvangin nge a darah in kah..a awmah kap rawh u ka ti ani lawm ni?" Patling thinrim inhrosa thawm avang chuan hmeichhe naupang chu a lo ip chawih a. Chu palian pui chu rawn lut lehin, "i ù hi miin an pawngsual a. A rilru na lutuk a intihlum anih hi" a ti zawi sup a. Kum 5 mi lek, school pawh la kal si lo leh mawlmang ve tak tana dawnsawn thiam a harsat zia hrethiam niawm takin, "Keimah hian i u chu ka chhan a..mahse. A nunna erawh ka chhan hman ta lo a ni. I pa pawh kha misualin an kap a. Misual ho chu ka man vek ang..tunah chuan i nu leh pa te bulah ka hruai ang che aw" tih pahin khuma a û mu lai chu a pawm nawlh a. Air bag lian zet chhungah hian a dah ta mai a! Chung zawng zawng chu hrethiam lo takin a lo thlir reng a.
.
Apu nen carah an chuang a. A û kha khaw nge a awm tak a hre lo. Damdawiin an thlena a nu a hmuh chuan thil thlengte kha a theihnghilh titih a. Anuin a u awmna a zawh chuan, "nia..hei inpa an kap tih ka hriat rual khan in lam ka rawn pan phawt a. MAGGIE chauh hi a lo awm a. A u awmna ka zawh lahin pawnlam a kawk ringawt a. A u room ka luh chuan bungrua chu tuten emaw an lo suasam niawm tak a ni. A lo darh nuaih a. Police pawh ka phone tawh a. LISA awmna chu kan hre thuai ang" zaidam zet hian pu LIANLURA chuan a ti a. Maggie chu a tawm chawih a. Apu chuan dawt a sawi reng si a. Mahse, a pu a han melh chuan, a mitmeng thim hmak mai avang chuan a kha a chih a..engmah a sawi ngam ta lo.
.
Apa bulah a tap hruah hruah a. Apa chu reilote a rawn harh a. A muhil leh mai. A û bo thu pawh an hrilh ngam hrih lo. Anu mangang leh thlabar hmel chu a hrethiam ve vek.
.
Chumizan dar 8:43pm ah chiah chuan a pa duhtak, amah hmangaiha duat em em tu chuan chatuan ram a lo pansan ta. Nurse tlan ri tlek tlek te, a nu ţap thawm te chu chiang takin a hria a ni. A pa chu khawvelah a awm tawh lo tih a hriatchian tluk zetin a ù pawh a pa awmnaah a awm ve ang tih a ring.
.
MAGGIE..
.
"Min hre tawh lo maw? A tha e. Min hriat loh hi ka duh ber reng a ni."
.
"Eng nge i duh a.."
.
"I nunna"
.
"Eng a?!" Pu Lianlura hmel inthlak dawrh chu hmuhnuam ti zetin a lo en a. Tun ţum hi a tawpna tur a ni ta bawk a. Zawi muangin a che ang chu. Hmanni maiah a thangkam pakhat a per ta kha a nia. Tunah chuan a bulpui leh a tlangkawmna tur a ni ta.
.
"Ka pu, Lisa tih hming i hre tawh ngai em? Hre ngai lo maw...anih leh Manliana tih tal..in huan enkawltu nupa leh an fate kha..awle..i hre ta maw..thawnthu ka sawi lawk anga..i beng hup loin lo lo ngaithla ang che.
.
Hmeichhe naupang duhawm leh hlim thei tak mai a awm a. Nau pahnih a nei a. A nau mipa nen chuan mi inah an awm a. Mi chhiahhlawhah an tang anih chu..tichuan..chu hmeichhe naupang chu a awmna pa putar chuan a it ta tlat a! Vawitam tak a pawngsual ta a! Vawitam tak..
.
Chu naupangte chuan a hlau hle mai a. Nikhat chu a nau nena an awm laiin chu pa chuan a hnungzang hmehsak turin a ti a. Hreh zetin a kal ta a. A rin ang ngeiin a pu chuan a lo pawngsual leh ta a..mahse, a nau mipa chuan a lo hmu reng a..a u chu a khawngaih em avangin putar chu a theihtawpin a bei ve a. Chutihlai chuan an awmna nu a lo haw a. Thil awmzia a hriat hma hmain mipa naupang chu a namthlu a. A chhuih ta hrep a! Naupang a rawn tho leh tur chu namthlu lehin dawhkan kil zumah tak a lu a zuk sawh a. A tlu zawi ta reng mai.
.
Mahse..chu mipa naupang chu inchung atanga mahnia chesuala thi ta a lo ni leh ta daih a! A u hmeichhia chu an vau a. A sawi chhuah vaih chuan a chhungte zawng zawng thahsakah an vau a.
.
Hun a lo kal a. Hmeichhe naupang chuan chu ina awm leh chu a hrehin a hlau em em a. Mahse apa in a tirh luih tlat avangin a kal ta a. Zankhat chu apu te nupa an zin avangin apa te bulah a riak a. Tuitaka a mutthilh laiin mangchhiain a rawn tibuai a. Mangang takin a rawn rumchhuak a. Apa ngaihtha lo chuan thil awmzia a zawt ta a. Inzep thei tawh hek lo. Apa bulah chuan engkim a sawi ta vek a. Chuta a pa thinlung nat dan leh thinrim zia chu...anu in chelhbet tlat lose chuan a zan azanin a awmna pa chu a zawng duh ngei ang.
.
.
Tichuan..rilru fim taka ngaihtuahin, FIR pawh thehlut eltiang mahse..finfiahna an neih miau loh avang leh a thawhna pa thiltihtheih zia a hriatin fiahna hmu phawt turin a fanu chu a nawrliam leh ta a. Vanduaithlak takin kha putar khan a fanu chu lo dawp chhuakin engkim a hre tawh tih a hre ta a. Buaina chu a lo intan ta.
.
Misual ruaiin, pa ber hnathawk lai chu kap palh angin a kah tir a. A fanu, nawmchen nana a hman thin pawh chu dahbo a hun tawh tih a hria. A nau kum 5 mi lek chuan engmah a hrethiam chuang lovang tiin a duhdanin a che ta a. Hmeichhe naupang chu rek hlumin, bag chhungah a khung a. Khamah a paih ta a ni. A mi rawih ten an kah hliam tak, pa ber pawh chu a damchhuak zo ta lo. Nu ber rilru na tawngkhawng chu mi á ang maia khawsain, amah leh amah intihlumin a fanu rethei tak leh naupangte chu a hnutchhiah ta.
.
Mahse..kha hmeichhe naupang, kum 5 mi lek kha apa in a thih hmain engkim a hrilh vek tih an hre lo. Tichuan, kha nau kha hnuchham inah awmin, vawiinah chuan mi hausa inah chhiahhlawh angin a lo awm leh ta a. A hming chu Lisa nau Margareth a ni"
.
Pu Lura chu a thaw hlawp hlawp a. Chu an awmpuinu thusawi te chu mangang takin a lo ngaithla anih kha. Kum tamtak liamtaa a tihsual te kha phumbo tawh anga inngaiin, engthawl takin a lo awm tawh a. Mahse, tunah chuan khang a sualna te khan amah rawn panin an rawn chhuilet leh ta si!
.
"I nupui leh i fanu, midang hmuhsit chinga mi rethei te hliam thintu te kha an chuanna motor brake a fail anih kha..tu tih nge tih chu sawi a ngai ta loin ka hria" a nui ver ver a. Rapthlak ti zet hian a lo en a.
.
"Chuan, tunah chuan ka that tawh dawn che. I fapa erawh kan chhungkaw chunga mi tha anih vangin ka zuah ang. Nang erawh i thiltih tawh te avangin dam reng tlak i ni ta lo"
.
Engtiklaiin nge a phawrh hman tih hriat miah lohin silai a rawn lekkawh a. Room chu sound proof vek anih bakah inchhunga awm ve te chu mutthilhna hlo hmanga a kah mutthilh vek tawh avangin thawm dim angai lo tih a hria. A chaldara a kah hnuah a chhungte hming lam chungin, chu putar, pawnlama mi zahawm..chhungril bawlhhlawh si taksa chu a vit in a zai ta hlawih hlawih a!
.
JAMES..
.
"Maggie, i duh chuan khang tualthahna te kha thupboin manchhuah i ni lo thei reng si a..engvanga..i thawmhnaw.." Tia jamesa'n a zawh mek lai chuan an bulah ka kalhnai a.
.
"Ka tihtur ka ti zo tawh alawm..engtin nge i chhungte thah saktu ka ni tih inhrereng chunga i bula ka chen reng theih ang? Khawiah emaw kalbo mah ila..man chhuah ka ni tho ang. Ka inthup avang khan ka nun a hrehawm zawk dawn a, chuvang chuan lawm taka ka phuba lakna kha i tan chânna a lo nih ve tho si avangin hremna ka tawrh a ngai alawm..ka pawm thlap a ni. Kalna tur leh min lo nghaktu chhungte ka nei chuang lo" ka mittui a lo hnam ve sawk thei mawle..
.
James chuan huatna tel miah lohin a kuah a. Mittui parawl kuangin a chhuahsan ta anih kha..
.
Police ka nih vang maiin ka thinlung a khauh bik lo a. Chu hmeichhia, thil a tisual tih inhre lo leh phuba a lak avanga hlim hmel pu zawk si chu lainat takin ka thlir vawng vawng a.
.
"Sir, central jail lamah kan phurh thlak a hun tawh a" ka harh zawk.
.
"A hlauhawm loh ania aw..james khan i chhuah vat theih nan hma a la ngeiin ka ring. Lo lungngai lutuk suh aw" ka ti ve ngial a.
.
"Ka pu, ka lawm e. Mahse. Ka awmna tur diktak a ni alawm..tumah dan chunga leng kan awm lo tih leh kan sulhnu te hian min chhui renga kan tihsualte hi phumbo hlen theih ani lo tih fiahtu ka nih avang hian ka tuar tur thil te chu lawm takin ka hmachhawn ange" a ti sep sep a. Ngaisang takin ka thlir liam ta a.
.
"Ka pu, maggie kha tualthattu a ni lo. Tualthattu zawk chu Lisa a ni. Lisa a la dam" jamesa'n thaw hlawp hlawp chunga phone atanga min rawn biak lai chuan, LISA RUANG KHA TUIN NGE CHHAR? tih ka ngaihtuah a. Hmabak a kô hle mai..
.
The End



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)