KA DAMKHAWCHHUAK ANG.. BY Toni Râlte

Group siam tirh atanga like tu 1000 nei chin zawng zawng dahkhawmna
Ngaia
Site Admin
Posts: 25813
Joined: April 30th, 2016, 4:07 pm

KA DAMKHAWCHHUAK ANG.. BY Toni Râlte

Unread post by Ngaia » March 29th, 2017, 4:45 pm

KA DAMKHAWCHHUAK ANG..
.
_ Toni Râlte
.
"Sawi dun tur kan nei a ni" a ti sap a. Ni e, a dik. Thil tam tak sawi tur ka nei a. Ka lak atanga a hla ta em em leh min hel char char thin chu ka hriatthiam lohna a rei tawh mai. Mahse, thinlung taka ka hmangaih a ni ka tih theih awmchhun a nih avangin ka enliam lui a. A chhan dik tak hriat ka chak rualin ka huphurh bawk. Mahse, hei zanin chu a insum hleithei ta bik lo aniang e. Kan inah ngei min rawn hmuin, kan inchungah kan chho a. Thli vawt tak thaw heuh heuh te chuan ka sam chu a chhem leng siau siau a. Kan ngawih dun vang vang hnuah..
.
"Ruati khan ka fa a pai a ni!" Ka phu nasa lutuk chu ka tawlh kir dawrh ni mai hian ka hria.
.
" Dâwt a nih chu" ka ti hrâwk a. Ni e, a fiamthu a ni tih rin ka duh takzet.
.
"Min ngaidam turin ka ngen dawn lo che a. Mahse, ka thutlukna hi min pawmpui ka beisei"
.
"Eng thutlukna maw?" Dik tak chuan a mizia ka hriatchian êm avangin a thutlukna chu rin dan ka nei sa.
.
"Ka fa chu nu leh pa karah a piang tur a ni. Ruati hi ka nei dawn" a mitmengah chuan tawrhna leh tumruhna a inpawlh nawk mai.
.
"Ni e..nia" ka ti bah nak a. Ka tla vawn vawn ni mai hian ka inhria a. Ni e, tlawm ngawih ngawih nia ka inhriatna chuan min vaw na fe awm e.
.
Ka kut a rawn vuan a. Nghet zeta humin a aw a thian kak a. Kei erawh mualpho hlauin ka lo maimichhing thung. Ka beng bula zawi thawp sata," Tihpalh aw. Mangtha le" a tih chuan ka chhungril thlengin a fanchhuak a ni ber e. Khap kir tum sateh mah i la, dan rual lohin ka biangah mittui a luang a. Thli vawt thaw heuh heuh chuan ka chhungril so bulh bulh chu a chhem dai zo hauh lo.
.
Chhin khat mah chhing lo leh a message tur typea delete leh zel in ka zan hun chu ka hmang ral a. Kar khat a liam a. Kar hnih pawh a liam leh ta. Thian ten , "Râl i ngai tlat" tia fiamthu hmanga min hmachhawn chang pawh chuan a der tel lo va nuih harsa ka ti a, min fiamtu te chu a ruk tak chuan ka haw hlur ringawt mai.
.
Kum 3 liam taah khan ka let leh vawn vawn fô a. Kan intawn tirh atanga kan hun tawp thleng khan hmaih nei hauh lo va kan sulhnu chhui let chu ka nitin hna a ni a. Zanah erawh boruakah insang sain suangtuahna leh duhthusam atthlak avangin zahpuiawm takin ka biangah mittui a luang leh thin.
.
Ka hming a hriat hmain kei chuan nasa takin ka hre tawh a. A chhan chu kan Principal fapa neihchhun a ni a. Kan college ah chuan Basket ball a thiam vanga lar a ni mai lo va, a hmeltha a, a pa em em bawk. Chu zawng ai chuan a chapo lo va, tupawh a kawm thei chuan mi ngainat a hlawh tir a. Thian tam tak a nei.
.
Kei erawh Aizawl tlaklam veng mawng kil khawr tak atanga seilian ve mai ka ni a. Ka nunah chhuan tur zawng ve chiam dawn i la chuan, lehkha ka thiam theihna chu a ni mai awm e. School thaah ka lut lo na chungin college levelah pawh min chung en ve fe fe tur School tha leh lar atanga chhuak an tam ve em avangin a ruk tak chuan nuam ka ti ve. Ka hmai hi a bial meih a, ka nuih zawngin ka mit ka chhing vek thin. Ka sam chu a sei mawl tawp a. Ka naupan lai atangin incheina vel hi ka ngaihven lo va, chu chu ka la chhawm ta zel a nih hi. Ka hnute a te em em bawk, ka mawng bawr erawh hmeichhia ka nihna tilang ve tur ting chuan a lian tha ve viau.
.
Week kan hman atanga ni 2naah he mihring, min tihlima, min tiţap leh tu nen hian kan intawng a. Hmaichhanah. Ka ţhiannu Kti hi nui ring thei zet, tupawh in an ngainat, nelawm leh nulian zet mai a ni a. Rosangzela nen hian an veng a inang a. An lo inhre tha khawp a lo nia. Canteena kan thut ho laiin a thian 3 te nen kan dawhkan min rawn zawm ve a. (Dawhkan sei zut ang kha a nia) kei chu ka lo lai leh nghal em em a. Ka thiannu pakhat Rini hian a star khawp mai bawk a. Min rawn sik váwt vâwt a. Ka melg rum tha ngang mai. Kti te nen chuan an infiam a..an nui hawk hawk a. Chutah ka lam rawn hawi pahin, " Libaryah i awm lo ve teh mial a!" A ti satliah a. Ka lo ip chawih.
.
"Ka rilţam a lawm" ka lo ti deuh hmuk a. Chhan dan tur hre hek lo. Ni e, ka hun tam zawk chu Library ah ka hmang thin. Zik hut hutna hmun hi nuam ka ti lo va, reh raih leh fianrial hmun hi ka pan zawk fô!
.
"Kan House a inang sia..ti nge House dang bulah i thut daig zel a" a ti leh a.
.
" Kan house ah thian ka nei ve hleinem" a nui saih a. A ha var zia kha. A ngo a, a vun chu a nung sar a ni. A sam chu a dum hlap a, a buk lek lek a, a kawi ngil ngel bawk. A khabe hmul pawh a zuah ve lem lo naa a pa tho. A khabe phir ţaih chuan a ti lang innocent phian. A sang viau a, a chawn pawh a lian turh turh viau. Kan hawn dawn chuan Kti nen kan inzui a. Bus kan lo chan lai chuan a thianpa nen Bike in an lo thleng ve a.
.
"Kt, ka lo thlah dawn che u mi?"
.
"Pathum kan inphur thei si lo va" kti hi zawng thiante tana inpe zo a ni a.
.
"Johna nen inphur u la, i thiannu bialteii kha ka lo phur ang' a nui a. Ka hmai bial a sawi lang kher chu ka lo ner sawk. Kan inphur ta poh a. Kan inphurh chhan a sawi chuan, eng nge ka hriat pawh ka hre lo. Ka hnual ve ngawt a!
.
"Johna khan KtI kha a star a. Chance kan pe anih hi" hmm...hmelphak.
.
Kan in thleng min thlah thei lo. A chhan chu stepa chhuk thlak a ngaih vangin. Kan inthlahliam nawk nawk a. Ka tana inngaihbel theih tur chhete mah a phuhchhuak lo. Mahse, chutiang ka ngaihtuah te chu ka zak. Kei ka nu khawlai fa, kum 3 ka niha pasal min umsan tak avanga ka pi leh pu bula khawsaa, ka piteii ang thawm hre nitin ve mai hian college lar tak Principal fapa neihchhun chu engvanga ngaihzawnna mit nena thlir ve ngam nge maw ka nih le...tiin ka ngaihtuah a. Ka inhaw hlur mai.
.
Ka mimal chanchin chu sawi tur vak a awm lo. Sawi tawh angin pi leh pu bula awm ka ni a. Duat erawh min duat. Ka nu hian kum 16 anihin min pai a. Ka pa hi mi pasal a ni nghe nghe. Chutianga mi pawmlai sâwn pawm duh ka nu chu ka ngaina tehchiam lo va. Mahse, nu anih angin kei a fanu hian ka ngai fô! Ka pa chuan fanu a nei tih pawh inhre lo niawm takin a nupui fanau te tan pa a ni bik a. An hausak tehlul nen, vawiin thlengin kawr pakhat pawh min la leisak lo. Ka nu leh ka pa nundan dik loh vanga ka fahrahna chuan tum mumal tak min neihtir a. Lehkha tha taka zir a, hna tha ve tawk tak thawh a ka pi leh pute indanpui a ni tawp. Ka nu anga sâwn pai ka duh loh avangin vawiin thlengin ka la virgin a. Ngaihzawng pakhat erawh ka nei ve tawh.
.
In ka thlen chuan ka piteii chu a lo ang leh hmuar hmuar a. Ka putea hi Department pakhatah Hna sang lem lo a thawk ve a. Chu chu kan eibel ber a ni. Ka zirna senso erawh ka pu pension (sipai) hmangin kan rul ve thei zel a. Ka pu pension ka pumbilh nia a hriatna chuan ka piteii thin a tirim thin. Ka dem hran lo. Amaherawhchu ka pumbilh vek lo va. Kan thlatin bill zawng zawng pawh ka pu pek a ni. Tin, keipawn ka theih ang angin thil ka zuar ve thin. La ka phiar a, ka zuar a. Min khawngaihtu ten min lo leisak a. Chu mi hmang chuan ka thawmhnaw ka lei ve thin.
.
"Min lo confirm ve ta che" zan ka mut dawna ka fb inbox a ni. Amah a lo ni a! Thinphu dep depin ka confirm. Eng nge maw ka hriat ni. Hepa huhang hi ka zo lo ve ziah!
.
Ka pic te chu a lo comment ang zut zut a. Ka number min dil bawk. Ka pe ve mai. Whatsapp lamah tawi te tein kan inbia a. Danglam a la awm lo.
.
Nitin inhmu leh Kti te avanga inphur inphur ve ta chu kan innel tawhin keipawhin ka fiam bawrh bawrh ngam ve tawh a. A thian ni mahi la..min care thin. Chuan chu chu a nuam ka ti.
.
Zankhat chu Lil' zo concert naa kalpuiah min rawn sawm a. Pute ka dil a. A lo phal mai bakah a phur ve em em mai. Putea hi chuan a fanu ang tak tak hian min en a. Keipawhin ka pa neih ve tawp bawk. Kti te nen kan chhuak ho a. Mipui an lo tam tawh ngang mai.
.
"Hawh..helam hi a thawl deuh" tih pahin min kai a. Kan innek nulh nulh mai. Chutiang boruak chu ka zo lo ka tih kha..
.
"Khaih...Liz, i tha em?" Tih pahin ka luhai luak chhuak chu min rawn dawm vat a. Zaizirin chhuah ka dil a. Chutih lai tak chuan, "Ehem..Essa, kha kha mi in nu chu?" Hmeichhe aw fiak thakin a rawn ti a. Ka hawi hai hman viau.
.
"Ummhm..nih hi..in kal ve ni maw?" Ka thuhriat chu a dik lo. Dâwt a ni. Ka hnunga perfume manto tih hriat zet nam ham chu ka leihawi a. Chu chu Remruati ka hmuh hmasak berna a ni. A hmelthat bakah a vun nalh zia chu..a mitmeng cool tak leh sexy zet te kha..a hnute a lian bik si..
.
Bathlara kan din laiin, "Ka bialnu i ni tawh aw" teh thut a! A mawl anih hi. Ka lei ka chhuah khum ringawt. A nui a. Ka biang lehlam lehlam a dawm a. Min kiss dawn emaw ka lo ti hman a. Ka maimichhing tawp.
.
"Kha..min duh ve reng kha.." A ti. Ka va ngei tak. Mahse, ka hlim si.
.
Hote atanga kan bulţanna chu nitin kan hlimpui chho ve zel a. Remruati zara inngaizawng hmingpu thei niin ka inhria. College kan zo va, apa thu hnialin keimah vangin Mizoram University ah a lut ve bawk a. Keiin Geography ka lak laiin a niin Political Science a la thung. Kan inphur thla nitin a. Chimbuaitu kan nei ngai lo chu mak ka ti ru thin zawk hial. Ka piteii pawh mi hausa te awt reng renga khawsa a ni bawk a, Essa pawh a be tha kher mai. A lo len lai hi chuan a tawng duhin min duat thei ania. Piteii hi nu sual a ni hran lo va. Min hauh bawrh bawrh pawhin a thinrim rei ngai bik lo. Kei pawhin tih ve fawk fawk chang zawng ka nei ve tho mai. Hetiang chhungkua hi ka duh zawk. Inzah ru ţhěm leh hauha zilh ngam loh chhungkua nih hi ka awt lo. Putea hian mahni puala in leh lo neih a chak ve êm avangin Loan a puk a. Ka pu hunlaia an ram pek ve, kan awmna aia la mawng zawkah in kan sa ve ta a. Inchhawng tur ni mah se, a chung chu kan la sa zo hleithei lo va. A hnuai chu a zau tho bawk a. Kan awm ve ta naw naw a. Inchung ruak chu Essa nen kan chance neih ve na hmun a ni a. Arsi te thlir dunin thla eng te pawh kan lo lawm dun tawh thin.
.
Tlangval tha za rual ni na na na chu han awmhrana han infawh leh insik reng takah chuan a insum hleithei bik lo fô! Mahse, ka lo intiam tawhna min zahsak a. Mipa takin a inthunun thin. Sex hi hman ve mai chakna ka nei fo.. Ka thian ten an sawi danah thil tawrh hrehawm tak anih.hmel si loh a. Mahse, virgin erawh nuam ka ti leh zawk thin.
.
Zan khat chu a propic lo comment ah chuan ka mit tikham tak pakhat ka hmu tel tlat! Mi strict tak ka ni lo va. Ka thikthu a chhe hluah hluah lem lo bawk. Ani pawhin thik tut chi chu a thliar hrang thiam viau.
.
"Nizana i haw hnu khan Ropuii a lo leng a..a hmu chak ve lutuk che a" tih comment chu huat tur a awm lo angah i ngai maithei. Mahse, vawikhatmah dáwt min la hrilh lo nia ka hriat khan nizanah min lo bum tlat anih chu!
.
"Zanin chu ka nuamsam vak lo va. Ka lo kal lo mai ang. " a tih kha mawle..eng thil nge ka hmuh tak hi..a lo comment tu lah tudang ni loin Remruati a ni.
.
Phone ka off a. Ka mu ta daih. Va biaka va zawh chian vel ka tum hran lo. Chhuanlam lo siam se, ka thinur zual dawn si a. Zinga ka phone ka on rual chuan a text message tam tak ka dawng nghal a. A titau zawmah lehnghal. Ka thinrim tih a hre tlat lo alawm.
.
MZU lam pana kan inphur thla chu ka ngawi reng a. Tanhril pelh hnu kawng zau laiah chuan a ding ta nge nge a.
.
"Eng nge i awmzia hi..lungawi lohna i nei ami?"
.
"Nizan hmasaah dâwt min hrilh a ni" a meng buai deuh a. Mahse, a nui ta sak a.
.
"Ka nuamsam lo kha ka muzal a. Ka roomah. Chuan Ruati kha a lo kal a. (Inthenawm hnai te an ni) a nau hna hmuh thar an lawm dawn avangin ka peih lo chung min sawm anih kha" a ti ta a. Ka awih leh diam mai.
.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 29th, 2017, 4:46 pm

Chawhnuah ka lungawi lehzual a ti ni awm fahranin an inah min lenpui pek a! Ka vawihnih kalna. A nu leh an awmpuinu chauh an lo awm a. A nu chu mifing tih takah a lo tha khawp mai. An chhungkua hi an aia hniam te hmusita hnuaichhiah mi niin ka hre lo hrim hrim bawk. A roomah kan thu ta ran a. Min rawn fawp phawt. Min bawhthlu a. Khumah chuan kan inmelh ta ran mai.
.
"Liz, tihian nupa ni tawh i la tiraw?"
.
"Ummm" chutiang bakin ka chhang thiam lo.
.
Min rawn keih leh bawrh bawrh a. Ramsa koham tak ang mai a ni. Ka thinphu nasa lutuk chu a hriat ka hlau nasa. Ka hnute pawng ve auh chu a hmet pial relh relh a. Ka kawr hlimin ka bra chu a pawt chho a. A tih dan ngaiin ka hnute chu a fawp leh ta ngawng ngawng mai. Hetichin bak hi kan kal dun ngai lo. Mahse, duh aiin ka thaw a rang tlat. Ani pawh a ni tho.
.
Ka dul thuar vel te chu a hrawm nawk nawk a. Ka kekawr chhung zenluh a tum lai te chuan ka lo dang ikhaw lo mai. Mak ka inti. A chhan pawh ka hriat hauh lohin ka si hliam hliam a. Khamini khan sex hmang si loin a climax an tih fô thin chu kan thleng ve ve niin ka hria. Ka la him hram tho e.
.
Chumini atang phei chuan kan inpawh lehzual a. Awmdun loh pawh ngaia neih a harsa ta hial mai.
.
M.A kan zo va. Kan kawng tur ngaihtuaha hun kan hman buai laiin chhiatna azawnga tawrhhlelhawm tak chu ka chungah a lo thleng ta a ni.
.
Ka hmangaih em em leh min hmangaihtu nia ka hriat, Rosangzela chuan kan awm hran chhung reiloteah a hmangaih nih chak em em tu Remruati lakah min phatsan a. Kan dam dun chhung zawnga inzawm leh tawh ngai lo turin kan inlaichinna chu a pawt chat ta anih kha..thiamthu a sawi lo va. "Tihpalh" tih chauh a sawi a ni. Chu chu ka tan a tawk zo hlawl lo. Ka duhdan chuan, Ruati kha a duh ve vang reng ni loin an laklawh vangin a chetsualpui a, tichuan a lo rai ta si a..kawng dang a neih loh zia sawiin tlawm takin min kalsan tura phalna ka pek hun min dil se ka duh a. Mahse, chung ka ngaihtuahna te chu amah ka hmangaih vang leh kal bo lose ka duhna vang chauh a ni tih ka hria. Ngaihdam min dilin min kalsan theih loh thu sawi se..kei mi derthawng tak hian ka lo pawm leh mai awm si a! Chu chu Ruati leh a pumchhunga naute te tan tawrhna a ni thung dawn si. Ka hmangaihber thutlukna chu a dik ka ti a. Mahse, pawm harsa ka la ti fan a ni.
.
"A thuhrimin nang pawn ngawi reng loin i tawrh nat dan te sawi ve la. Dik tak chuan Ruati khan a zar hneh em a ni. Veng khat in ni si lo va, an ni tette atanga inkawm an nih bakah an inthenawm a. An inlenpawh zung zung bawk si. Essa tan pawh inven zawh a harsa ve dawn em asin. Nei lo turin nangman ti la chuan, a nei duh bik miah lo vang. Mite pawh an inngaihzawn laiin sáwn an thlak ve tho..an inthen phah vek lo." Kti'n a tih hlawk hlawk lai chuan awmze nei lo in ka lo nui a! Ka nuih a zat loh em vanga nui ka ni.
.
"Ruati khan kei aiin a hmangaih thiamin a duat thiam zawk a niange" keima hriat tham lekin ka ti a. Ţah vak vakin awmzia a nei lo tih ka hriat tawh avangin hul takin ni ka vuiliam thin. An inneih ni chuan kan inbula leivung chu kan vawksa chhumna tapchhak atan ka thiar tlauh tlauh a. Ka chau hle naa hah ka hre lo. A chhan chu ka rilru hmundangah a awm daih vang a ni.Zanah te khan chaw ei loin ka mu a. Rilţam hre miah lo khawpin nupa tuak tharten lawiţhat zan an hman dan tur ka lo zeldin a. Thinlung kehsawm tur chuang nei tawh si lo khan ka chhungril leh taksa hi a na ngawih ngawih a ni. Rosangzel chu mipa dik tak a ni. Ka laka a pelhe tak avang erawh kha chuan ka lakah thiam a chang thei lo mai pawh a..mipa dangte anga a mawhphurhna tlanchhiatsan ching mihring a nih ve loh avang pawhin ngaisangtu ka nih a ngai a sin. Mahse, mawhphurtu ni tura a inpekna khan tawrhna min pe kher lo nise chuan, lawm takin ka hmangaih kal liam lai chu ka thlir liam tur..
.
Vanduaina sâr zam chuan min la.kiansan loh zia tichiang turin, ka pi duhtak, ka nu ni bawk si chuan min boralsan ve leh ta. Thaw a va ippik em..ka pi vui niah chuan ka rin phak hauh lohin Essa a lo kal ve a! Mitthi ţaha ţap chungin ka hmaa thu Essa sûn pah siin ka thinlung chu kan bunruak ta mai a! Ka ţah nasat lutuk vanga ka khawng lek lek te chu keichuan mak ka ti lo. Thawl erawh ka thawl.huai e.
.
Ka pu chu kalsan hreh hle mah i la, Phaiah hna zawngin ka chhuk ve ta rawih a. Hna pawh ka zuk hmu a, ka rilru erawh chuan Mizoram a pel thei meuh lo. ka hlawh chu ka khawl ve bek bek zel a. Ka ziaawm chho ve viau. A dik adik chuan Essa vanga heta awm ta hi ka ni zawk mah a.Competitive Exam te chu ka han bei chho ve lawp lawp bawk a.
.
"Liz, ka rai a!" Ka thiannu ka roommate Zami a ni.
.
"Ka rilru a hah takzet. Sawma lahin titla turin min ti bawk si. Engtin nge ka tih ang le" a tih lai chuan ka lo.melh haw ringawt.
.
"A mak ka ti. Sawma chu ka hmangaih êm vang chauhin a tan engkim ka hlan a. Hetianga min phatsan leh mai hi rin harsa ka ti" a ti chuai raih a. Kei ka lo harh kawk thung! Ka thiannu tawrhna chu ka tawrhpui lo ni hauh loin, ka chhungril na vawng vawng thin kha mak tak maiin a kiang huai mai. A chhan chu ka thiannu vanduaina chuan ngaihdan dang min neih tir tak vang a ni ber. Ni e, hmangaihna hi a va pawimawh tehlul em..
.
Ruati ka huatna leh mi inkara tlakzeh pawti lo zakthei lo leh sihhnip tak hmuha ka lo hmuh thin ka ngaihdan pawh a dang ţan ta. Rosangzela ka hmangaih aia nasa khan ani chuan a lo hmangaihin enkawl a lo chak viau a ni thei. Kei leh ani kha kan inkawpa kan hlimdun em em tih hrereng chungin, a naupanlai thian leh a lo ngaihzawn chu midang ta ni turin a phal ngang lo aniang e. Zak leh huphurh tak chungin Essa a hnaih a. Kan nui dun a hmuh thin lai te khan engtiangin nge na a lo tawrh ve ang le..hnawl nih natzia hre tawh tu ka nih avangin Ruati rilru tur chu ka hmuthiam ta viau. Chutah mi ten engtiang in nge an sawi ang tih leh kei ngei pawhin engtiang chiahin nge ka huat ang tih ngaihtuah chungin a hmangaihna chuan a nawrlui a. A taksa hial a hlan ta. Chutah midang bialpa fa paiin, tihtlak a hnekin lawm taka a fa chu hrinsak a tum zui! Hmangaihna chak leh beiseinaa khat a va ni si em...
.
Kei chu mi zei hawi lo leh zakzum tak, tawnhriat nei tlem tak ka nih avangin ngaihzawn ka nuam lo viau maithei. Ka hmel lah a tha uchuak bik si lo. Kei aia tha leh fing fel zawkin over ni hauh si lo va ka.hmangaih laka chet a lakna chuan rah a chhuah ta ni maiin ka hria a, ka tlawm em em naa..Essa khan khatiang thutlukna ni lo kha siam ta se..ka damchhungin ka ring pumhlum thei tawh dawn chuang em ni? Hriatchhuah chang neiin, ka sawi chhuak fo anga, ka thinrim thar lehin natna ka insiam mai mai anga. Nun hlim tak nei dun thei meuh ange maw chu le..
.
Tin, sâwn ka ni a. Ka pa in ka nu a neih duh loh vangin pi leh pute karah ka seilian a. Duat ni ve hle.mah i la..thiante zinga inkiltawihna leh mahni inrintawk lohna ten min chimbuai reng a. Tum sang tak ka neih ve pawhin ti ve thei lo tura inngaihna lianpuiin min bawhbeh chang a tam thin. Chuvang chuan, ka hmangaih berin sâwn a thlak a. A sâwn thlakna nu tlanchhiatsan lo va..a bialnu a ni lo chunga "Tiam Tlat e" a tihpui theihna chu lawmpuia chhuang mai tur ka lo ni. Chutihruala min la tinaa hling ang maia min la chhun na tu erawh "Sex hi tihpalh a ni ngai lo" tih hi. Essa khan Ruati kha a ngaina ve a. Kei aiin a thlang ta tih hi pawm ka duh a. Harsa erawh ka ti. Mahse, mipakhat tawrhna avanga mi pathum ten hlimna an nei dawn anih si chuan, kei pawh hian Damkhawchhuak tura hringnun ka fight angai tih ka hria a ni.
.
Kum 4 lai a liam ta. Ka pu pawh nuamsa ve hmana ka siam hnuah thlamuang takin min chawlhsan ta a. Ka piteii pawhin min ankhum ngai ta lo. Mahse, ka la kim ta lo fô a! Ka nunah hian Rosangzela aiawh lalut turin ka la inpeih thei thlawt lo a ni. Mahse, ka hnuchhawn tawh khawvelah khan ka hawilet ngai lo.
.
Nikhat chu ka bazar a. Ni a sa in...ka chau viau mai. Restaurant pakhatah lutin, ka thu thlandai a.
.
"Liz" ka phu zawk mai. Engdang vang a ni lo. Chu aw chu ka la theihnghilh ngai hauh lo. Ka hmaah rawn thuin a nui sang a. A lo patling ve ta deuh e. A thau deuh tawh bawk. Ka hamhaih a talangin tawng nachang pawh ka hre lawk lo va.
.
"Ka hmu leh che chu ka lawm hle mai. I bo rei hle mai" ti el lek lek hian a ti a.
.
"Nia..hna vang ania. Indam tlang amaw?" Hmana nula zakzum over ang kha ka ni tawh bik lo va.
.
"Dam ve tawk tawk e. Nang, pasal i la nei lo mi?" Ka lu ka thing ringawt.
.
"La nei suh. Nu leh pa nih chu a hahthlak teh mai nia" a nui hak hak a. Ka lo nui ve ngawt a.
.
A chhuah dawn chuan ka number min dil a..ka pe.
.
Zanah min rawn bia a. Nupa hlim tak an ni em tih ka zawhna chu harsa ti hmel fe hian, "fate avang chuan a lo patlin theih ve mai e" a ti. Ka hrethiam alawm..ess..
.
"Vawikhat na reng reng chu hun thawl tak insiam i la...la inkawm ang aw" a tihna chu..Aih tia chhan harsa ka ti mang e.
.
Ka pitei'n "Inleng i nei " a rawn tih avangin ka dah a. Ka va chhuak a. Ruati nen chuan kan inhmachhawn ta ran a...
.
A tawp ta thut mai

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)