TUALTHATTU BY Toni Râlte

Group siam tirh atanga like tu 1000 nei chin zawng zawng dahkhawmna
Ngaia
Site Admin
Posts: 25813
Joined: April 30th, 2016, 4:07 pm

TUALTHATTU BY Toni Râlte

Unread post by Ngaia » March 29th, 2017, 4:48 pm

TUALTHATTU..
.
_ Toni Râlte (Biangnoi)
.
"Nu, naute ka pai a. Min ngaidam rawh" lehkhathem chu ka thlauh tawp a. Chîai takin ka ding ngawi ta reng a.
.
Fapa pathum zingah fanu pakhat ka nei a. Ka fanu neihchhun, kum 19 mi lek chu a rai a maw?! Ka bing chuk chuk ani ber e. Thinrimna leh mak tihna nen ka khat a. Ka fanu chuan min tihder nise ka ti ngawih ngawih. Mahse, vawiin hi April Fool lah a ni si lo. Hmaichhana min hrilh ngam loh vang ani ngei ang, class kal tura a chhuah hnuah message in, "Nu, ka lukham hnuaiah khan thil engemaw ka dah a. I lo en dawn nia" tiin min rawn umzui anih tak kha le..eng nge ka tih ang tih ka hre ta hauh lo mai . Kan inhnuai luah tu te leh Kohhran hmeichhiaa ka thawhpui fate sâwn pai,thenawmnu bula ka sawi ruk sur sur thin te leh an nu te ka dem thu ka sawi fô te kha..tunah ka chungah a lo thleng ve ta. Dawnsawn thiam harsa ka va ti tehreng êm..
.
Aizawla College lar tak pakhatah Lecturer ka ni a. Ka pasal lah Police Inspector a ni. Ka fapa upa ber chuan nupui nei tawhin Lunglei lamah a hna avangin inhrang an chang tawh a. Ka fa û ber dawttu erawh Nikum hmasa mai khan motor accident ah ka pawh chhawn loin min boralsan a nih kha..a nau chiah erawh Chennai_ah M.Phill zir in a thang mek a. Kan te ber, kan fanu neihchhun LAWMNASANGZUALI erawh ka thawhna College ah a kal ve mek a ni. A hming hi apain duh taka a phuah a ni a. A chhan pawh fapa hlir kan neih vang ni pakhat mah se, a û nen hian kum 5 laiin an inthlau a ni. Duat rawn a ni a.IAS nih tir ngei tumin theihtawp kan chhuah a ni. Chutihlai kara sâwn a lo pai thu hriat chuan a mi den nat dan tur chu i hriatthiam ka ring.
.
"Tu fa nge ni ta ang"? Tih zawhna chuan min harh chhuah tir zawk a. Mateii hian ngaihzawng a neih ka la hre hauh lo va, a ruka a lo nei anih chuan thuhran. Kei lah mi buai tak, Kohhran leh khawtlanga nihna chelh thahnem ve fu ka lo ni a. Inah ka awm tam hman loh chu thuhran, ka awm ve pawhin ka chau a, hahdam ka duh a. Titina hun kan nei mang lo. Apa nen hun kan hmandun theihchhun a lo ni ve bawk nen. Ka fanu chu ka lo hrechiang tawk lo tihna em ni ang le?
.
Apa hi Police tih takah khirh leh inthununna ngaipawimawh tak a ni a. Kan fate hi an tetlai atangin khuahkhirhna hnuaia selian an ni a. Mipa ho erawh mipa nge nge an lo ni bawk nen. Mateii ang em chuan a thunun lo mai pawh a. Kan fapa milai thihchhan pawh kha a dik adik chuan, a ruih vang nia sawi a ni. Mahse, a pa nen chuan kan awih therte lo. A chhan chu kan fapa rui kha kan la hmuin kan la hre tlat lo a ni.
.
Mateii rai thu chu a pa in a hriat hunah eng nge thleng ang tih ka hmuthiam a. Zep hrih tur nge hrilh tlang mai tha ang tih thuah keimah leh keimah chu rei tak ka inhnial a. Apa thinrim tawrhhlelhawm zia hrechiangtu ka nih avangin ngaihdan thar ka nei ta a. Keimahin ka nui sak mai.
.
Zanriah kan kil lai chuan ka fanu chuan min rawn melh relh relh thin tih ka hria. Apa in a hrethiam ang tih ka lo hlauhthawnpui zawk mah a! Kan awmpuipa ti i la kan pa naupanlai thianpa fapa, Thingtlang atanga lo kal, kan lo awmpui tak Zova'n kar hmasa maia min hawnsan thut tak avangin awmpui dang lakbelh ka sawi siam siam a. A chhan chu kan buai tlang em a tin ni. Apa pawh chuan rem a lo ti mial a! Ka thaw huai mai.
.
A room kawngka chu ka kik dat dat a. Lut tura kohna ka hmuh rual chuan ka lut nghal a. Dawhkanah a zirlaibu a lo pharh diai a.
.
"Mate, thudik tak i sawi em?" Ka ti a. Theihtawpa insum chungin. Ka khur der der thung.
.
"Aw" a ti tawi tak mai. A chiang ta.
.
"Tu nge a pa?"
.
"Ka sawi thei lo" tim dai chungin a ti sap a. Ka thinrim thut. A mitah tak en kal chungin, "I sawi a ngai. Khawlai fa em ni i lo pai a" ka ti vin thak a. A ngawi ta veng veng mai. Kut ka thlak duh mai dawna ka inhriat vangin ka chhuak tau ta nghawng nghawng a.
.
Ka hlauhtawnna leh ka thinurna tizual turin room atangin a lo chhuak a. Apa hmaa ding chungin, "Pa, ka nu hian hrilh loh che a nei" a ti sap a. Ka lo hawi phawk hra mai. Kan pa chuan min rawn melh a. Zep chi ni tawh hek lo le..
.
Lawmnasangzual, i rai amaw?" Tih leh a chhip sama keh a rual ta nghal a. Kan boruak chu a ţang tha kher mai . ka fanu chu ngawi rengin a bu nghat a. Chhuata paihthlak chawrh pahin, "Tenawmnu, ka rin ang i va ni lo ve. I lo va tenawm ve le'hh" a ti tuar a. Sangzuali chu a ţap hauh lo. Luhlul takin a ngawi ran a. Kei atak pawh ka thin a lo sosang phat a.
.
"Tu fa nge i pai sawi vat rawh" ka ti a.
.
"Ka sawi dawn lo" a ti tham ţiak a! Hetiang taka ka fanu luhlul hi ka la hmachhawn ngai reng reng lo asin.
.
Mut hmuna apa nen kan titi chuan chhun lama ka ngaihtuah ang chiah kha a lo ngaihtuah ve tih ka hriat chuan ka thaw huai a. Rilru khawlhkham ţun chungin ka muhil ve ta hram a. Zingah chuan tukthuan ei laiin apa nen kan thutlukna chu ka han hrilh ta a. A tho phat a. Mittui tling piau chungin, "A teuh lo mai. Ka fa hi ka paih dawn awzawng lo mai" a ti ta hmiah mai le..apa nen chuan kan hawihai hman viau! Kan remruatna chu lawm taka a pawm mai kan lo beisei vang a ni ber.
.
"Ka thu thuin i awm ang. Ka chawm leh hrai i nih hi. I naupai chu vawiinah i nu nen inva titla ang. Tichuan, tuman an hre lo vang. Nang pawn lehkha tha takin i zir chhunzawm thei ang"
.
"Pa, i mihringpui i that ang maw? Ka thisen ringin a nung ve tawh a sin. Ka ta a nih hi. Ka pum chhung ami ani a, ka phalna tel lo chuan in labo thei ngawt lo vang" a zam loh hmel viau mai.
.
"Anih chuan ka in atangin chhuak rawh. Sáwn pawm fanu ka duh lo e. I khawlai fa nen khan vakvai u la ti nia" kan pa chu ka va melh kawk a. A ti lutuk mah mah niin ka lo hria a.
.
"U chhuan, insum ve teh. Kan fanu hi khawiah nge vakvai se i tih? Bawihte, ipa thin i tirim hle a ni. Chuvang chuan lo inngaihtuah la, kan thutlukna hi min pawmpui thei la ka duh khawp mai. Ngaihtuah teh..chhungkaw zahawm tak atangin i lo piangchhuak a. I pa pawh Kohhranah rawngbawltu a ni ve a, kei lah Hmeichhe pawlah Secretary ka ni bawk. Khawtlangah nise i pa, YMA Vice President a ni a, MHIP ah Treasurer ka ni bawk. Nang pawh SS kaikim lawmman dawng tam ber pawl i ni a. Kohhran zaipawlah i tel bawk a. Heng i nihna leh i nu leh pa nihna te hi ngaihtuah la, engtin nge miten kan chhungkua min sawi anga..min rel chhiat ang. Kan rawngbawlna i thaichhe vek dawn asin. Chuvang chuan tuna tuman an la hriat loh lai hian i paih mai ang aw.." Thlem titih leh vau titihin ka han bei a. Ngawi rengin a bag a la a. A chhuak ta daih a.
.
Kei chuan chawlh ka lak lai a ni a, class ka kal dawn lo a. Ka fapa te bula an farnu sawn pai thu hrilh chu ka pasalin a la remtih loh vangin ka la sawi chhuak lo. Inah chuan keimah chauhin khawhar leh ippik takin ka thu a. A naupai a tihtlak duh loh teh chuan keimah ngei pawh ka mualpho dan tur leh thenawm nu hoten min sawi duh dan tur ka ngaihtuah chuan ka thaw a tihah a, ka thinur ţûn ringawt mai. A fa paina pa lah a sawi duh thak bawk si lo. Chutah hriatchhuah ka nei ta thut. Kawngka ka kalh sawk sawk a. Rukru ang maiin ka fanu roomah chuan ka lut ta ţhem ţhem a.
.
A khum bul dawhkan pawhdawh chu ka han pawt a. Lehkhabu kawm sen, 2016 tih lo inziak kalh chu ka lachhuak ta a. Ka khur der der a. Engdang vang a ni lo. Ka fanu Diary hi chhiar enah ka en ngai lo, thil thiangah ka ngai lo va, rukru ang deuha ka inchan vang ani ber. Mahse, ka fanu chuan tu fa nge a pai tih leh engvanga ka rin loh dan lutuka khawsa nge anih hriat chakna chuan min nawr et et si a ni.
.
Khuma thu chung chuan ka han keu a. Thla 3 liam ta vel atanga chhiar tan chu fuh tur anga ka hriat avangin, July thla chu ka han bih ta a.
.
DIARY..
.
1: Awii vawiin chu Lalmathani'n thil mak deuh min hrilh a. Ka lo zak ve tawp..hahah..mahse, a sawi dan vel chuan a nawm hmel tawp. Het..ti nge chutiangte ka ngaihtuah le..U zova bai siam ka ei tui leh hle mai. Chawhmeh a siam thiam ve thlawt. Anu nen hmai kan chiah a..ka hlim ve tawp.
.
(Mathani thilmak sawi chu eng tak ni ang maw?)
.
Ni 2_ 5 chu thil danglam tehchiam a ziak lo va.
.
6: Vawiin chu ka inten tawp. Jonathana'n thil min entir a. p0rn film a lo nia. Ka ip chawih chawih mai. Mizo sex video a neih thu a sawi chuan en ka chak tlat a! Kei leh Debo_i nen kan en ru a. Kan nui kar kar mai. An zei tawp. Hmeichhia chiah a lang thung. Mizo te pawh hi kan lo va rapthlak tawh tak. Ka inzahpui, chutiang ka en ve chu. Anu sawi ang khan hremhmunah ka kal ngei ngei ang. Mahse, a mak lutuk. Vawiina kan thil en kha ka rilruah a cham tlat. Ka zakkkkk.
.
7: Vawiin chu U zova nen kan bazar a. Uzova te khua ami kan hmu a. A ţhin thin nen an inbe rei phian a. Ka ning tawp. Uzova sas anih ka ring. Ka fiam chak nen nen, ka mood a off laklawh a. Ka tum bur mai.
.
Thla tawp lama a ziahah chuan phut zawkna tur thil min hnutchhiah a ni.
.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 29th, 2017, 4:48 pm

29: Sex story a ka thil chhiar khan min luah hneh lutuk a, khur dawt dawt chungin p0rn site pakhatah ka lut ve tawp. En tur lo tam ngang mai a. Pakhat chu ka click ve tawp. An turu hi ka ti lutuk. Mahse, amak lutuk. Ka danglam tlat! Ka mur chuai chuai mai. Ka kap a lum vung vung a. A tur et et ni mai hian ka hria.
.
Dear Diary, zanin zet chu ka zak lutuk hi thih daih ka chak. Ka zunchhuak lutuk bathroom lama ka kal lai chuan ka nute room atang chuan nichina video ka en a an rak dan ang lek leka rak ka hre tlat! Ngaihthlak chian chakna in ka khat a. An room kawngka bulah ka va ding. Karei! Mom leh Dad chuan nupa nun an lo hmang chu niin. Mom chu a zei hmel tawp. Ka bihthla chak lutuk. Mahse, bihthlakna a awm lo. Bathroomah chuan ka va zung a. Ka mu leh a. Ka muhil thei lo.
.
30: Tunlai chu ka rilruah sex ringawt a awm. Ka thiante chuan engahmah ngai loin video pawh an en ve mai mai a. Kei chu ka danglam tlat zel. Ka ning ka awmdan hi. Vawiin tlaia ka inbual zo towel chauh ka bih laiin uzova a lo lut thut a! Ka rooma a lehkhabu dah a rawn la dawn a lo nia. A chhuah dawn tiha "In ha vat ta che. I hritlang anga sin" tih paha ka nghawng a lo khawih khan ka mur uaih mai. Nizana ka awmdan ang khan.
.
AUGUST
.
1: Naomi te inah ka leng a. Anu leh Naomi inkawm dan vel chu ka awt tawp. An inpawh hmel si, Naomi chuan a bialpa nen an inhauh dan te a sawi bawrh bawrh a. Ka lo zah tehlul nen, anu chuan tha takin tihdan tur a hrilh a. A fel ka ti . Anu bulah chuan tiang kha sawi ve i la chuan, min vin hrep loh pawn min zilh nek awm si a! Ngaihzawng neih pawh an la phal ve bawk si lo. Apa lah hi a meng khui reng a. A rawngbawlpuite thuhnuai hi a tum leh lutuk bawk si. A thu hi dik ber ah a ngai tawp zel a. Ka thiante pawn fiamthu thawh nan an hmang tawh. Len pawh an lo len ngam loh phah. Thian kawm tam an phal bawk si lo.
.
2: Zanin hi ka zaithiam ngaihsan leh duh em em, Dji concert neih zan ania. Kal ve ka va han chak tak. A sawi pawh ka sawi ngam der si lo. Ka thiante chu an kal vek dawn a. Anu ka dil ve tawp ang.
.
Ka thinrim, ka tah a chhuak, chaw ei laiin ka dil a. Apa in" A sawi pawh i sawi ngam zawk e a" a ti hmak. Ka titau a. Chaw pawh ka ei hmain ka tho daih. Anu leh apa te chu joint meeting neihna turah an kal. uzova nen kan inkawm a. Ka thinrim thu te ka hrilh. Tv kan en peih si lo va, inbonus min zirtir a. Kan inbonus a. Kan hlim phian. Kan nuih vak vak laiin anute an lo hawng a. Rum tawkin min melh a. Angaihna ka hre lo khawp mai. Uzova chu a roomah a lut nghal daih.
.
"Khatianga kan awmpui te mai mai nena inpawh hmel taka inkawm dun te kha thenawm ten hria se engtinnge an ngaih ang" ka nuin a ti! Mak ka ti tawp. Uzova hi a lo hmusit hle niin ka hria. Kan awmpui pawh ani lo, min rawn awmpui zawk a lawm. Kan tih peih loh engkim a ti a. Azirna senso kan tumsak ani ve mai a. A fel tehreng nen. Anu hi ka ngei tlat. A thawhpuite a rel reng a, kan inhnuai Urami'n sawn a pai te khan mihur te a tia! Ka lo zak ngawih ngawih.
.
(Ka mittui a tla. A chhan ka hre lo. Ka fanu in min ngaihdan ka hriat chuan na ka ti a ni)
.
A diary chu a blank char char a.
.
18: Uzova chu hnaih ka tum apiangin a tlanchhe zel. Ti nge min duh ve lo mi le? Ka rilru a na ee.
.
19: Anu leh apa te chu an thianpa nu ral turin an kal a. Uzova nen chauh kan awm. Zaninah hian engkim ka hrilh tawh ang. Ka intihrehawm peih tawh lo. A roomah ka lut a. A bulah ka thu a. Chhuah a tum a. Ka pawt tlat a. Tichuan, zak chung chungin ka rilru ka hrilh. A ngawi reng a. Min duh lo aniang. Ka chhuak daih.
.
20: "Sangzual, keipawn ka duh che. Mahse, unau angin awm zawk ang" tih thu a lo thawn. Ka hlim rualin ka lungngai. Ti nge unau anga awm chu a duh le..
.
Zanah inchungah ka ko chho a. Kan inkawm.
.
21: Tunlai chu ka hlim. Uzova nen inkhatah kan cheng dun bawk si. Anu leh apa te hriat loha insignal vel chu anuam tawp.
.
Uzova nen kan inkiss...ka zakkkk.
.
22: Tv kan en a. A sexy lai chu apa in a hmehsawn san zel. A ho ee..ka en ve tawh tho. Sex video ka en tawh tih hria se chuan min hlap duh ang mawle.
.
28: Ruah a sur nasa lutuk, tek a tla nasa bawk si. Anute room ka va kik. Riah ve ka dil. Ka hlau em alawm. Apain "Kum i tling tawh. Mahnia riah i ngam tur a ni" a ti a. Kawngka a khar hmak. Ka mittui a tla. Apa hi ka hua.!
.
Uzova roomah ka lut a. Enge ka hriat pawh ka hre lo. A bulah ka mu ve tawp. Min lo kuah a. A thaw ham ham a.
.
Khawvelah ka la zak ber ang.a na bawk si. Mahse, virgin hawn chu na an ti vek alawm.
.
30: Ka hnute a tang nasa lutuk. Anu bulah sawi ka tum tep a. Mahse, engemaw zawngin a ngai leh ang tih ka hlau a. Ka ngawi ta mai.
.
A awl leh char char a. Nizan maia a ziah chiah a lo awm.
.
"Uzo, min kalsan chhan hi ka hria alawm. Ka dem lo che. Engtikah mah ka chhungte hian an pawm ngai dawn si lo che a. Mahse, kan fa hi ka pawm lian ngei ngei ang tih ka tiam a che. Lo let leh vat rawh aw. Ka ngai lutuk che"
.
Ka luak a chhuak ut ut mai. Ka fanu chuan kan awmpuipa fa maw a lo pai a?! Ka zahna leh ka thinurna chuan min tikhawng lo chauh a ni. Apa phei chu hrilh ngam chi niin ka hre lo.
.
Karkhat hnuah chuan Sangzuali chuan a pum nat thu a sawi ta a. Rang takin damdawiin kan pan pui a. Kar kalta zawng khan tha takin kan bia a. Eitur kan pe a. Nau tihtlak lam chu kan sawi pui ngai tawh lo. A luhlul zia kan hrechiang si a. Doctor leh apa an inbiak lai chuan a pum chu ka lo chul heuh heuh a. A dul chu la puar chiah lo mah se..awm chu a awm ve a ni.
.
THLA KHAT HNUAH.
.
"Bawihte, mate, harh teh. Ti nge hetia i awm reng mai le?" Mangang takin ka sawi a. A mit chu a meng kuau a. Engmah a hmu lo ni mai hian ka hria. A pa pawh chuan mangang takin a rawn thlek ve a. Thla khat lai chu mi â ang maia khawsain zirna pawh chhunzawm chi ziazang lo in a khawsa tawh a ni. A tawng ngai lo va. A tawng ve chhunah lah, "Ka naute" tih zawng.
.
"Bawihte, i pawm thiam angai a ni. I naute chu mite ang bawkin i chhiat a ni. A pawi khawp mai' tia ka hnemna te chu, "Dáwt a ni. Nangni hian inthat a ni. Ka naute kha min thahsak a ni" tih chhanna chauh lo chu kan dawng ngai lo. Kan fanu neihchhun, a hmakhua kan ngaih avanga kan remruatna kan tihhlawhtlinsak tak chu kan fanu tan erawh chhiatna zakhua thlentu a lo ni ang tih rin ngaihna kan lo hre lo a tin ni. Kan va mangang tak em..ni e, zep thu a cheng lo. Khatia nau tihtlak a duh si lohah chuan apa nen kan vehthlem ta zawk a. Eitur tha tak tak kan pe a. Mahse, a eiturah chuan Doctor kan rawn hnu thlapa min chawh damdawi (Naute thihna hmanrua) chu kan telh thin a ni.
.
Nkhat chu fiah taka rawn mengin a tep chat chat a. Inrinni a nih avangin apa pawh a lo haw hma a. Kan lawm dun kher mai. Eng nge a ei chak zawng zawttu nih te kan inchuh a. Chutah zawhna chhan harsa zet min zawt ta tlat mai..
.
"Nu, pa, Âu Dina kum 1981ah a piang a. Mahse, kum 1982ah daih in innei sia! Eng nge a chhan?" Tih zawhna chu. Apa nen chuan kan inmelh tawn chhen ringawt a. Zahna leh inchhirna chauh lo chu kan hmachhawn ta lo.
.
A diary kha ru chhuakin apa ka chhiar tir ve a. Kan fanu hi ngaihtuah em em siin kan va thlahthlam rei em kan ti ta a ni. A pawi zo vek tawh si. Nu leh pa tha tak emae kan inti a. Khuahkhirhna hnuaia kan fa te seilentir chu thil tha ber leh tih makmawhah kan lo ngai a. Thawk tha inti takin, zalen taka an fate thlahthlam ho te chu kan lo hnuaichhiah a. Nu leh pa te bula ngaihzawng sawi te chu vanram kai lohna ang hialah kan fate kan ngaih tir a! Sex video en lah hremhmun tlakna ang hiala sualah kan chhuah a! Fate tana nelawm leh kawm nuam tak, titipui theih nih chu zahawm lohna angah kan ngai a! Kan fanu mawhphurhna hlen tir ai chuan kan mualpho kan hlauhna chuan min thunun zawk si..thian kawm tam chu sualna hmawr angah ngaiin a thian kawm tur te kan han thlansak ta dah a! Pawn lamah chhuaha thianhoa lehkhawthawn lah chu leplerna sualah ngaiin in chhungah kan khung bet a.khawhar leh mal takin ka lo awm tir thin a lo ni. Chu chuan a tih duh miah loh tur leh a ngaihtuah ngai loh suangtuahna ramah hruai lutin, a mi hmuh phak leh a kawm theih awmchhun zova lakah a khawharna te chu a hrithla ta a nih kha..
.
"Nu, Âu Johna( thi ta) kha maw a khua a har thin asin. A thiante kha tumah in mil si lo va. Misual angin inhmu tlat a. Khatia zalenna a neih ve khan a zo ta lo va. A rui a. Inhmuh phak lohah khan a rui nasa thei lutuk. Chuvangin a accident anih kha" tia ka fanu in a sawi sep sep te chu thinrimah a kal tawh lo, mahni inthiamlohna leh kan fate khawngaihna in ka khat a. Tisual ka intihna hian rahtha chhuah se ka tih em em laiin a tlai tawh si a.
.
"Ka naute kha ka mumangah ka lo hmu a. A hmeltha sin aw" tih te a ching chho a.
.
"Nu, Pathian rawng nge in bawl Kohhran rawng? Khawtlanga in inhman chhan hi thahnem inngaih vang nge lansarh in duh vang?" Tih fawk fawk te a ching a.
.
"Pathian thu awih ber nia miten an ngaih lai che u hian tual in that reng si a" a tih zan phei chuan apa nen kan ţap dun tlawk tlawk mai. A na a ni.
.
Kan fanu râwp ral mek chu tihtheih nei si loin kan thlir a. Zova kan chah thla tawp a. Ani in duat takin a enkawl a. Mualpho hlauh vanga thupbo kan tum chu kan fanu chuan a kilkhawr ber thlengin a rawn puangzar ta zawk si a!
.
Ka fanu tan hian nu ni ţha leh thei i ka chuan, ka pum chhunga ka pai lai atang khan...
.
"Bawihte, zalěn leh zahawm tak siin hringnun i hmachhawn tawh dawn nia aw" ka ti ngei ang mawle...a pelhe dawn nia ka hriat chuan kei a nu bak hi nawrkaltu tur a nei lo tih hretu ka ni chung khan a pelhe lo chung khan engvanga ka duhdan leh ngaihdan thunun vak mai nge maw ka nih le? Mihring a ni a. KA MIHRINGPUI ANIH AVANG KHAN ZAHNA KA LANTIR VE TUR A NI ASIN.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)