LALNUNSANGA By Chhangte Boih Zomuan Zuali

[Ngaia]

LALNUNSANGA

"Min kalsan rawh, i tello hian ka hlim zawk, kal nghal rawh" tih pah chuan min nam sawk a. Kal lo tura dan ka duh, mahse ka ngam thlawt silo. Ka mittui tla zawih zawih chuan ka rilru natzia chu a puanchhuahtir a, mahse a hre duh tawh silo.

Hmun dangah lehkha zira rei fe ka awm bo hnuah ka haw ve leh chauh a, kawng engkimah ka mikhual ru hle a, kan awm bo tirh a kan nau te pawhin min hriatloh pelh mai mai niin a lang. Mahse ka pa kohhran upa anih avangin inkhawm thulh a remti ngailoa, phur lo chung pawhin inkhawm chu tih ngei ngei ngai a ni. Ka haw atanga thla khat a ral chuan kan veng pawh nuam ka ti ve leh ta hle a.

Chhunah chuan ka nu dawr nghak ka pui deuh ber thin a, sawrkar hnate han beisei ve thin mah ila ka la hlawhtling thei rih lo thung a. Amaherawhchu chhungkaw khawsak harsa kan ni lem loa, ka pa hi High Sikul Headmaster a ni a, zirtirtu anih ang ngei hian kan unau min enkawlna kawngah pawh a strict hle. A hunlai khan hrehawm in lang mah se kan tan alo thatzia tun hnuah kan hre chauh a ni. Ka nu erawh kan unau kan leikan hnuah thawmhnaw dawr a siam a, Pathian zarah a hlawhtling ve hle a. Kan upa ber hian khawhranah pasal anei tawh a, ka u chiah mipa hi doctor niin Lunglei ah an post ve thung a ni. A naupang ber tih takah tlemin ka pa pawh hian min enkawl dan a dang deuh a, alakah ka pangchang hle thin.

September thla kan chuankai chuan Ktp hruaitute lo rel angin sports kan nei dawn a, group hrang hrangah insem darhin keipoh upa Kaia group ah asst.leader ah min dah ve a, kan theihtawpin kawng hrang hrangah inbuatsaihna kan nei ve mup mup mai a, a hlimawm hle a ni. Inbuatsaih nana karkhat kan hman hnu in intihsiakna nei turin kan veng field chu kan pan a, hemi ni hi ka nun ah rahbi thar ka rahna tur tih reng reng ka hre bik lo. Inelna hrang hrang kan neih hnuah volleyball chu kan khel dawn ta a, kan group leh upa Rela group kan intum dawn a, keipawh kotlang A team ah au nasat tumin thut hmun ka lo rem ve sauh sauh a. Pu Rela group te an lo chhuah chuan hmel thar ka hmu ta tlat mai, karei! Avan hmeltha kher em! Ka rilru chu a tibuai nghal vek nia. Hetiang taka vawikhat ka hmuhnaa ka rilru luahtu hi ka la tawng ngai lova, ka la hmu ngai hek lo.

Kan pawlte chu chak se tihna rilru chu la pu mah ila chu hmelhriat loh tlangval, hmel fai sar mai, hlei tling zet mai chuan ka thinlung a luah hneh em a, rilru dang ka pu thei mawlh lo ani . Ka suangtuahna rama ka lo chen mek lai chuan ball chuan ka hmaiah tak min rawn per a, ka thal chiang hle mai. Nui ri dur dur ka hre chhunzawm nghal a, ka zak lutuk chu thawh mai nachang ka hre lo. Rang takin kut chak zetin min kaitho a, inthlahrun hmel taka min melh pah chuan,"I na em? Ka tihpalh lutuk aw" a ti mawlh mawlh a, kha pa ngei kha ani. Engtinnge ka chhan tih pawh mumalin ka hre chhuak zo tawh lo. Ka naupanlai atanga hrisel lo em em mai ka lo ni lehzel nen, ka luhai thin a lo chhuah leh bawk avangin kan leader chuan min thlah haw ta a. Nuam ti viau mah ila ka zak ru em em mai a ni.

Zanah chuan ka khawsik te a tel tak zel avang chuan sports naa ka item neih ve pawh ti thei lo chuan ka awm a, ka inthlahrung hle nghe nghe. Mahse kan duh vanga thil thleng a ni bik silo. Dar 9 a ri tep tih ah chuan ka fon chuan msg ka dawng tih min rawn hriattir a, kan en chuan ka phu nasa hle mai."Vawiin avang khan i damlo tih ka lo hria a, pawi ka ti takzet, i mut tawh ka rin avangin msg ka lo hnutchhiah mai, rem i tih chuan naktuk zanah ka lo kan dawn che ania, Lalnunsanga" tih hi min lo thawn a. Ka hlim lutuk chu ka au chhuak lo chauh a ni. Lalnunsanga tih chu ka hre ve nual tawh, amah anga inhmeh erawh ka la hre lo thung!

Ka tih tawh lamah chuan mahni inringtawk tak ka lo ni ve reu a, Lalnunsanga nen pawh kan innel ta vat a. Kawm tur vak ka lo nei lo bawk lo nen kan in zui ve ta fo a. Mahse thian mai nih chu ka duh tawk ve hauh lo. Thian thaah kan inchhuah mai ang tih chu ka lo hlau ru ve viau tawh a, mahse mipa fing ve tak ani bawk a, ka chezia engkim chu a hai bik lo, pangai takin kan inkawp ta thuai renga. Kawng engkimah ka tan a inpe zo em em a, ka pa tih loh ah chuan ka mipa thlamuanpui ber ani hial ang.

Kan veng chhungah pawh chuan kan inngaizawng tih chu an hre fur tawh a, ka chhungte erawhin kan inkawm satliah ah an ngai thung. Ka u hmundanga pasal nei tawh chu engkim ka hrilh a, nidanga min phur pui thin nen tun tum chu atui lo riau a hriatna ka neia, min duhpui loh thu a sawi chuang bawk silo. Ka hrethiam chiah lo na a tawngkamah chuan ngaihzawng neilo a awm turin min duh ni berin ka hria. Ka mizia erawh an hrechiang thung; thutlukna ka siam tawh ka sawhsawn mai mai ngai lo. Ka pa fanu ka ni tlat a!

Mi zaidam hi ka ngaisang a, keimah ka thinchhiat em avang hian, Lalnunsanga bula awm pawh ka kham thei thin lo, a zaidam in a hmel a hlim sarh reng a. Kei chauh hi alaka luangliam ka nilo tih pawh ka hrechiang. Tute hian nge rawn bia a, thilpek enge a dawn tih engkim ka hriatpui a, ka thikthuchhiat luatah kan in hauh phah fo thung.

A chhungte chu veng dangah inneihnaah ankal vek a. An inah leng tura min sawm tlat avang chuan ka leng ve ta nge nge a, a room ah chuan awm in kan inkuah rial renga, kan hmui pawh a rim mawlh mawlh e. Ka hnute hmur chu a hrual ne ne a, a hmui nen chuan a fawh chhawk reng a. Kan infawp rei telh telh a, a kut a hlei tial tial bawk a. Ka hnungah min zut thla in ka kap lam rawn khawiha tum chuan ka phu zawk a, meng de sawr sawr chuan min chul a, a lak atang chuan inthiarfihlim chu ka duh, mahse thirhipthei ang maiin ka bula ka hmangaih em em chuan min hip bet tlat a. Ka kawr a phelh lai pawhchuan tang turin chakna ka neilo , ka kawrhnuai hlip in ka hnute chu a tham nawk nawk a, ka kekawr pawtthla in a hmaah chuan ruak in ka mu ta reng mai. Min en ngawih ngawih a, a thawmhnaw chu a hlip ve ta sawk sawk a, hmun hla zawk lam chu kan pan ta vang vang a.

Hun akal ve zel a, kan thil tih sual chuan keimahah nghawng tha lo tak mai a nei a, thilsual ti chunga kohhrana inhman vel chu harsa ka ti takzet. Chutiang bawkin Sanga pawhin inkiltawihna chu a nei ve a. Khami ni a kn chetsual bak kha chu chetsual nawn kan tum lo a, kan in veng tawn thin. Alaka ka inpumpek avang khan min hmuhsit ngai loa, nitin hian min hmangaih deuh deuh niin ka hria a, tiang taka mipa nih tling hi an awm theih ka lo ring ngailo. Hmabak hlimawm tak neiin kan in hre ve thin; chhungkaw inhmuhkhawm kan neih hma kha chuan.

Chhungkaw inhmuhkhawmna kan neih tum chuan ka hriat ngailoh chhungkua an lo tel ve tlat mai. Ka nu leh pa te nen chuan khunkhan hmel takin an titi a, reife an inbiak hnuah ka pa chu lo ding in pasal ka neih tur thu a sawi ta thut mai anih chu! Nilo, a theih loh, engtikawng mahin ka neilo ang. Ka hriat ngai pawh nilo chu kan inneih thuthlung an siam pui ang maw? Ka ring thei thlawt lo. Ka pa chuan muang fan reih rawih chuan,"Apuii pawh nula pasal nei rual i ni ve ta a, Mamuana pa nen in tet lai atang hian innei tur in kan lo ruat fel diam tawh che u a, kan thutlukna lo siam tawh chu a tihhlawhtlingtu in nih ngei hi ka beisei ani" a tih chuan mumanga cheng ang mai ka ni, tawng chhuah ngaihna pawh ka hre lo. Ka hma hun ka suangtuah zawng zawng te kha, ka mipa hmangaih Lalnunsanga chauh asin pasal atana ka duh ka duh chu. Ka pasal tur atana an tih chu Doctor niin ka u nen Lungleiah an thawk tlang alo ni a. A hmel chu la hmu lo mah ila ka haw nghal hluah hluah ringawt! Nu leh pa tha ber ka nei emaw tiin hlim takin ka hringnun ka hmang chho ve a, mahse ka duhdan leh ngaihdan pawh la miah lo in ka nun chu an tichhe hreh lo maw? Na ka van ti em.!

Ka room ah ka lut a, dan rual loh in ka mittui chu alo tla zung zung a, ka nu leh pa pawhin min zui lut a, ka nu chuan dam thlap in,"bawihte, kan thu i hnial i ngai loh kha, i pa te thutlukna lo siam tawh chu kan sut thei tawh lo ang, nangpawh i hlim em em ang tih ka hria ani" "mahse nu, hmangaih leh duh te pawh ka lo nei ve asin. Hetiang ngawt chuan ka nei thei lovang" ka lo ti vat a. Ka pa chuan,"tupawh chu lo ngaizawng in lo hmangaih la, then turin thutlukna lo siam ang che," thawk ala hak a,"i pa hi min hnial lo la, i thatna tur vek ani tih hi pawm tawp la, Mamuana nei tur chuan i rilru lo buatsaih ang che" a ti leh nghat a. Ka pa hi ka naupanlai atang ka hnial ngai lo, mahse he thil ah hi chuan an ti dik lo tih ka hria,"Pa, ka hmangaih lo chu ka nei lo ang, Lalnunsanga nen sawn kan inhmangaih asin, kan innei bawk ang" ka ti ve ta a. Chutah zet chuan ka pa thin in a tuar ta lo, min beng ta pawp mai a,"Thian satliah emaw tiin ka lo thlir liam mai mai che u a, kan inngaizawng te in lo tia maw, Lalhlimpui, saw pa saw engtikahmah i nei ngai lo vang," a ti ta tuar mai a, tap chungin ka tlanchhuak a, hla takah tlanbo chu ka duh ani. Ka nu chuan min umzui tih ka hria, mahse a umphak rual ka nilo. Ruah lo tla sep sep te chuan ka lungngaihna min tawmpui ni mai in ka hria a, ka rilru nat apianga ka kalna thin Pu Ruma park ah chuan ka tlan lut a, thingkung hnuaiah thu in ka theihtawpin ka tap chhuak ta hawk hawk a. Engtia rei nge ka thut tih pawh ka hre lo, ka bulah chuan nihliap nen Sanga chu alo ding reng a, ka insum hman lo ka kuah bet thlawp a, ka tap ta zawih zawih a. A ngaihna hre lo zeta min kuah pah chuan thil awmzia chu min zawt a, ka sawi mai thei lo, ka lungchhiat zualpui a reh hnu chuan thil awmdan chu ka sawi ta vek a. Tawng a tum lo a, a rilru ah enge awm ang tih ka chhut thiam pha hauh lo.

Reife ngawi renga kan thut hnu chuan a thaw hawk a, a kun ngal a, sawi tur ka hre lo takzet, ka rilru ana a, sawi tur ka hre bik si lo. A tawng dawn ta lo emaw ka tih hnu chuan alo dak chhuak a,"Apui, i chhungte thu chu awih la a tha zawk ang, kan inkara thil thleng kha chu i theihnghilh zawk mai ang" a ti chuai raih a. Ka mittui chu a tla zung zung a,"Sang, ka thei lo tih i hriat kha, nang kalsan che hian tumah ka nei lo ang", ka mittui tla chu a kutin a hru fai a, "Khuarel thil hi kan tih danglam theih ani lo ang, ka hmangaih che a, ka hmangaih reng ang che. Apui, keipawn then che hi harsa ka ti asin, anih leh i nu leh pa te chu i hmin theih i inring em?" Beidawn hmel zet chuan a ti a. Ka theihtawp chhuah tura intiam in in lamah kan inzui haw ta a.

Chhungte remruatna in Mamuana pawh chawlh te la in a rawn haw a, ka hmuh vawikhatna ah chuan thineimna in ka khat vek a, rei tak a hmel ka hmu thei lo. A hma atang ani chuan engkim a hre tawh tih ka hre mai; a awmdan atang chuan. A rawn len luh tam leh Sanga ka ngaihna a zual a, ka chhungten an sawiselna a nasat pauh leh ka hmangaihna a zual zel zawk a, chu mipa Lalnunsanga nena kan thawnthu chu ti hian em ni a tawp ang? Tiin mittui tla zawih zawih in ka ngaihtuah thin. Ka nu chu Sanga ka hmangaihzia ka hrilh fo a, mahse ka pa thinlung hneh turin tih theih anei bik silo. Mamuana lah chuan ka rilru hneh tumin min lenchilh tluk tluk a, Sanga nen pawh inhmuhna hun tha nei theiko khawpin min siam fo thin. Mahse ka thinlung hi mi pakhat tan chauh ani, Lalnunsanga tan chauh.

Nikhat chu ka peih lo chung min nawr nasat em avangin Mamuana nen chuan Lammualah inkhel kan en ve a, rilru pe lo takin ka en ve a, ka hawi vel lai chuan Lalnunsanga ka hmu thut a, ka phu nasa kher mai. Zingah kan in biak khan a kal tur thu engmah a sawi silo, min rawn hmu ve tih hriat nan a lu a bu zauh a, min nuih sak a. A nui hmel ka hmuh chuan ka na zawk thung a! Vawikhatmah min rawn melh nawn lo. Kan haw dawn chuan a thutna lam chu ka en leh zauh a, a thut ngai chuan a la thu reng a, kalsawn tum hmel pawh a pu hek lo. Motor bul kan thlen chuan ka rilru anuam theilo, ka tlan let thut a, Mamuana pawh ka zah zo tawh lo, gate ka pel thla chiah tih ah ani chu muangchangin alo kal a, min hmuh chuan a ding a, min kal pelh mai a tum a,"Sang, tinge hetiang hian i awm?" Ka mittui chu ka in rin hma in a lo far zawih a, sawi duh ka la nei mahse min hnawh tu awm ang maiin ka tawng chhuak thei lo. Ka mitui ka hru zauh a, hla tak a melh a,"Apui, ka beidawng takzet tawh a ni" a ti zuih raih a. Chutih lai tak chuan Mamuana chuan min rawn ko a, "Han kal tawh rawh, nghaktu che i neih khi, Apui... " a hmui a pet fan fan a, "Ka thlah zalen tawh zawk mai ang che. I pa lakah chuan hnehna ka chang zo lo ni mai rawh se" tiin min kalsan ta a. Ka khaw hmuh a fiah lo zo a, ka khawvel chu a chawl nghal vek niin ka hre ber. Nilo, ka thei lo, ka kal tir tur anilo. Ka um a, a kutah ka chelh a, "ka theilo, chu chu ka thlen tir theilo ang" Mamuana pawh a rawn thleng chawpchilh nghal a,"Mamuan, hei hi ka hmangaih ber Sanga anih hi, ka then dawn lo, ka then thei lo" ka tih chuan an pahnih chuan mak tih hmel takin min en rual thawt a.

Nihnih chhung Mamuana hmel a rawn in lan tak loh ah chuan ka thaw aveng hawk a, ka chhungte erawh an ngaihtha zan lo tih ka hria. Sanga chu kan inah lo leng theilo mah se ka thiannu Siami te inah chuan kan in hmu fo a, Pathian hnenah kan inhlan thin. Beiseina sang tak nen kan pahnih hma hun chu kan thlir ve reng a . A chhungte pawhin kan chungchang chu engkim an hria a, min huat ka rin nen mi an khawngaih em em zawk a, kan tan an tawngtai reng thu te min hrilh ve fo thin.

Zankhat ka inkhawm bang chu sitting room ah ka nu leh pa leh ka putea te lo inkawm chuan ka inthlak zawha an bula kal turin min ti a. Ka putea chuan min fiam hlut a, a tih dan ve reng ani a, thu pawimawh sawi tur anei anih ka ring lawk a, ka rin sa ni mah se an thusawi chuan min thawng hle. Mamuana nen kan inneih hun atan kumin chhung ngei tha an tih thu min hrilh anih chu. Ka kun a, ka in ring hman lo ka pa chu ka melh a,"mahni fate an hlimna tur pawh ngaihtuah theilo pa ka lo nei hi ka vanduai ka in ti, chuan pute, ka hmangaih chauh ka nei dawn" ka mittui ka khap per sawk a,"Lalnunsanga saw ka hmangaih ani, ka hmangaih lo chu ka nei lo ang" ka ti leh ngat a. Hmangaihna hian huaisenna min lo pe tel tih hi ka lo hre ngai lo, hmangaihna hian thil ava ti thei tak em!

Ka pa chu a tho a, ka mit takah chuan min melh kalh a, "A ni hi rawn der ka mamawh lo, ka thu chu ka kaltlangpui dawn. Ka thutiam tawh hi vawikhatmah ka la sawhsawn ngai lo tih hre tu vek in ni" tih leh room a luh a rual a,"Ka thutlukna siam hi ka sawhsawn ngai lo vang" ka ti sap a. Ka nu leh ka putea chuan nasa min tih hmel tak chuan min melh dun a, engmah phei chu an sawi lo.

Ka room ah ka lut a, ka mittui chu a tla zawih zawih a, ka fon alo ri a, Sanga alo ni, rang takun ka mittui ka hru fai a, ka han pickup chuan kan kawt ah a awm thu leh min nghah thu a rawn sawi a, ka in ha lum sawk sawk a, ka chhuak vat a. Kan garage bulah chuan min lo nghak reng a, min hmuh veleh rang takin min kai a, a bike ah chuang tur chuan min ti a, a hmel ka hmuh khan zawhna zawh chi ah ka ngai rih lo. Thuawih takin ka chuang a, khawi lam nge kan pan dawn tih ka hre lo. Minute 15 vel kan tlan hnu chuan in pakhat kan thleng a, tah chuan kan ding a, min kai vat a, ka ngaih a that zan loh vangin"Sang, enge kan tih dawn" ka han ti a, min chhang lo. Kan dinna bula inchhungah chuan kan lut a, tlangval pakhat alo awm a, "Tete, hei Apuii chu anih hi, Apui hei Tetea, ka thianpa, heta hnathawka rawn awm anih hi" tiin inhmelhriattirna chu a nei a. Kan titi luam hnu chuan Tetea chuan chhuahna tur aneih chhuanlamin min chhuahsan ta a. Sanga nen chuan kan inpawm chial a, kan infawp leh vawng vawng thin. Sanga chuan min pawm kang a, room lamah chuan min luhpui a, khum pakhat lo awm ah chuan min nghat a,"Apui, inru mai ang" a ti hlawl a, "Sang, kawng kan zawng zel ang kan tih kha, nghak leh rih phawt ila" ka hmui chu a hup vat a,"Ka thei tawh lo. Apui...kawng dabg hi kan nei tawh chuang in ka hre lo" a thu tha nghal vat a. Sawi tur ka hrelo kher mai, ka pa hian engtikawng mahin kan inneih hi a remti dawn loa, kan awmdan hi hria ni phei selang Mamuana nena kan inneihna tur tihfel a duh nghal hial ngei ang. Min pawm a, min fawp a, a duhthawh tan viau lehnghal, ka kawr a hlip a, ka hnute hmur chu a hrual ne ne a, a fawp leh vawng vawng thin. Hnuai lam a dap thla zel a, harh chhuak phut ni awm takin a kut ka chelh vat a,"Sang ... nilo, kan ti thei loo ang" "Engvangin maw.. Apui.. ka fa hi pai vat la ka duh ani" a ti nghat a. Mahse chutiang ngawt chu a ni bik silo,"Sang, vawikhat kan dai sual tawh a, ti sual nawn tawh lo tura kan thutlukna kha ila hre reng em? Tunah chuan nilo e, kan inneih hunah chauh kan tih kha hrereng ang aw?" Ka han ti a, rang takin a in la hrang vat a, min nuih sak a,"Ka hmangaih ber thu chu ka awih tur alawm" a ti zui sap a. Hepa hi ka hmangaih em em nachhan chu mipa dik tak anih na hi a ni. Min nawr lui selang tang tur ka awm chuang lo ang tih ka hria, mahse min zah na a lantir thin hian min hneh takzet a, ka hmangaih deuh deuh ni ber hian ka hria.

Ka kawr chu min hak tir fel zo tih ah chuan kawngka chu an rawn kik a, muangchanga inzui in kan va hawng a, rin loh tak maiin ka pa leh ka putea chu an lo ding reng mai. Ka pa chuan min beng sawk a, "Mi hur nu, i va zaktheilo em em ve a" min khawih a tum leh chuan Sanga chuan a lo dang a, ka pa lah a thinrim tulh tulh si,"Nang kha lo inrawlh suh, nangmah avanga kan chhungkaw buai zia hi i hria em? Rawn tibuai tawh suh, ka fanu hian pasal a nei dawn" a han ti tun tun a. Sanga chuan dam thlap hian,"Ka pu, Apuii nen hian kan inhmangaih asin. Khawngaih in min neih tir rawh, retheiin ka siam ngai lo vang" a ti a, ka pa chuan kohhran upa anihna theihnghilh rak khawpin he thu hi a sawi a,"Nangni hmeithai inchhungah hian ka fanu hi ka rawn luh tir ngai lo vang. Zanin atang hi chuan in hre ngailo angin awm ang che u, Mamuana nen hian innei lo mah se Nang nen hi chuan in innei ngai lo vang" a ti anih chu. Rapthlak ka ti lutuk a, ka pian ahnu lamah ka pa hi demna tur ka hmu ngailo, mahse hei hi maw a nun chhungril dik tak chu, mahni aia dinhmun hniam zawkte hnuaichhiah ching mi hi! Sanga thlavang chu hauh ve pawh ka duh, mahse ka pa ngei chuan min va ti thang tlawm chiang em! Engmah ka sawi ngam lo, ka hmaa rilru nat hmel taka ding reng chu ka melh zauh a, ka zak ngawih ngawih. Ka pa chu a chhuak nghal a, ka putea pawh chuan min kai a, min chhuahpui a tum a, mahse ka duh lo, "Apui.. va haw tawh rawh. Kan inkar thu hi chu ti hian a tawp vek ah ngai tawh rawh" Sanga thu sawi a ni. Ka awih thei lo, inthiarfihlim ahun tih a hria ani chek ang chu ka putea chu a chhuak vat a,"Sang, engthu nge maw i sawi le? Min then thei ani thei e, kei chuan ka thei ve lo" ka mittui a far zawih zawih a, min khawih a tum a, ka duh lo. "Apui, kan chhungkua min hmusittu hi ka nei thei bik lo che, min hrethiam rawh a ti chang ta kalh mai, chu chu a ni ka hlauh ber chu. A banah ka vuan a,"Sang .... ani thei lo.." ka sawi zawm theilo, amah zawk chu alo tawng chhuak a,"I pa thusawi kha k theihnghilh thei dawn chuang lo. An thu chu awih la, pasal atana an lo hualsak chu va nei ang che." Room lamah luh a tum a ka pawt tlat a, vawikhat pawh tawngkam vina min tawngkhum ngai lo khan ka pa avangin he thu hian ka rilru min hliam ve ta,"Kal nghal rawh, min kalsan rawh, i tello hian ka hlim zawk ang" tiin.

Hun a liam anga, i rilru pawh a dam ve mai ang an ti a, engtia rei nge hun liam nan hian ngai ang le? Nitinin ka ngai zual a, ka ngai deuh deuh a ni. Kha pa, khatiang khawpa rilru sak a pu tih pawh ka lo hriat ngai lo khawpa zaidam leh ka lo innghahna, ka hmangaih Lalnunsanga kha ka mamawh. Mahse inhmuh nikhua pawhin min hre ang in a awm duh ngai loa, chu mawlh chu tawrh har ka ti thin. Min hlat pauh leh ka thinlung in amah ka hnaih a, min theihnghilh tura ka ngaihtuah apiangin ka thinlung hian a hming ka lam ngun ani mai si. Engmah tih chak ka nei lo va, nilengin room ah ka inkalh hnan a, ka hringnun a thil thleng tam tak ziah nan ka hun chu ka hmang thin.

Ka chhungte pawhin ka rilru dam hun chu an nghak ve ani mahna, inneihna chungchang chu an sawi ri leh lo. Ka rilru dam hun hi an nghak a nih chuan an nghak chhuak ngai lo vang. Kohhrana ka chanvo neih ve pawh ka pha vek a, ka pa in min hau nasa hle mah se lemchan nun chu ka kham a, ka peih tawh lo tih tlang takin ka hrilh a, ka ngawhnhawl zia a hre tawk ve bawk a, min nawr lui lo. A lawm lo hle tih erawh ka hre reng; ka chunga an thil tih hi ka lawm bik lo tih hi hre tak maw? A chang changin ka inkhawm ve zeuh zeuh thin a, Sanga chu KTP ah pawh a active leh tawh tih ka hria, a nun chu awhawm ka ti a, mi zawng zawng ngainat a hlawh reng mai bik te chu thikawm rum rum chang a nei. A hriat loh hian ka lo chhuang ru veng veng zel a, min hre duh lo mahse a thinlung khawi emaw lai ah zawng ka hming hi a in ziah loh bik chu ka ring lo.

Kan venga awm reng chu ka tan a hrehawm em avangin leh coaching kal pah ka duh avangin Delhi lamah chhuk leh ka tum a, ka chhungte pawm zawng tak alo nih takah chuan rei rial lovin ka kal nghal a. Hnawksak chan ka chang mai mai a ka hriat vanga inthiarfihlim ka ni pakhat a, mi rilru hliamtu fanu hian min hmuh apianga a thinlung na tih thar leh chu ka zuam lo ani ber e. Reilo te emaw tih chhungin kum chanve dawn ka awm ve ta reng mai. Thinlungah thi lo mah se a hlimchhawn ai chuan rilru na pawh tlem chuan alo zia ve ta deuh a, ka call a pickup duh loh atang khan biak tum na ka nei ta bik lo. Tibuai lova hetia zalen taka awm tir hi ka bat ni in ka hre ve tlat a, biak pawh theihna ka neih zawng zawng pawh ka delete fai vek a, ka zirlaiah nasa zawkin ka inbuatsaih a, rilru natna tihbo na tha bera ka hriat angin ka nung mai a ni.

Nikhat chu kan veng lama ka thianten Delhi an rawn kal thu an rawn sawi a, mizoram house a an awm thu te, kal ngei ngei turtea min tih avang chuan ka kal ve a, han inhmuhkhawm takah chuan lung alo leng hle tih ka hre ve chauh nghe nghe. Vengchhung chanchin eng engemaw an sawi hnu chuan Lalnunsanga chanchin an sawi chhuak ta hlawl mai a, hre chak si, hlauthawng si chuan ka ngaithla ve ta kar a, ka thu hriat chu mak ka ti, zu a in nasa an ti mauh mai! Ka kal hma thleng pawh khan ktp ah ala active em em si a, hun reilote chhunga chuti khawpa a awm chu mak ka ti hle a, a chhan awm ang tur an hriat loh zia te, kan inthenna vang tih dawnin hun a liam leh fe tawh bawk si, mak an tih zia hahipin an sawi a. Ngawi rengin chung zawng zawng chu ka lo nhaithla ve kar a, mahse ka hriat Lalnunsanga kha chuti maia a awm ka ring theilo. Rilru hnual takin ka in luahna panin ka haw a, rilru ah engdangmah a lut thei lo. Ka chau deuh bawk a, ka lo muhil siar siar tih ah ka fon chu alo ri ral ral a, ka hriat hnu no.chu ang viau mah se ka lo save loh avang chuan tunge ka hre thei lo, ka pickup duh ta lo a. A ring quit hnu lawk chuan msg alo thleng chawpchilh nghal a,
"Apui.. i dam m.. felin i chnchn te a lo soi a, i ngaihom m a lo biak ce ka tuma, i buai nh k ring" tudang mah nilo in Lalnunsanga ani.. ka thin chu a phu zawih zawih a, heti taka ka lungphu ti rangtu hi pakhatmah ka la tawng lo; hepa chauh lo hi chu.

Amahah hian beisei ka nei ngam tawh lo, ka chan hi chau hle mah se ka tawrh tur chu tuar mai turin ka rilru pawh ka buatsaih kha a ani a, mahse chu thu kamhnih khat lek chuan thinlung a ti thar leh vawng vawng mai. Chu msg chu chhang chak hle mah ila chhan loh chu tha zawka hria in ka chhang ta lo. Vawi engzat tak nge ka chhiar nawn tih ka hre lo va, ka,ngaihtuah hek lo. A,rawn thawntu zawka kha a ni ka ngaihtuah zui chu. Mahse chumi ni atang chuan nitin mai hian msg min lo thawn a, ka in thunun seng ta bik lo a, ka reply ve ta ziah a. A tirah chuan thu ho mai mai leh veng chhung chanchin sawiin kan inbe ber a, a rei tial tial a kan pahnih inkarah bawk kan let leh thin . Zankhat chu min rawn call a, ruah a sur deuh reng avangin ka mu a, ka lung aleng hle a, amah ka ngaihtuah lai taka min rawn call chu mak ka ti hle,
"Apui.. ka rui lutuk. Ka haw ngam lo" a rawn ti bawl mai a. Zu chu alo in tak tak ani maw, avan pawi em ka ti vawng vawng a. Engtin tin emaw kan inbiak hnu chuan kan dah ta a. Mak ka ti a awih har ka ti, khati khawpa mi in vawng leh in uluk, zu chu sawi loh beer pawh vawikhat a in ka la hriat loh, min thawng takzet a ni. A chhan chu hre lo mah ila kan chhungkua hi kan tel ve ka rin tlat avangin hrehawm ka ti. Ka pa a hmuh apianga a rilru tur te ka ngaihtuah hian ka khawngaih ngawih ngawih thin.

Ni a ral a, hun a liam ve zel a, a chang zeuh a kan inbiak tih loh chu kan inbe khat ta khawp mai. Hlim takin thiante karah han awm thin mah ila thinlung hliam erawh a dam mai bik lo. Reilote emaw tih chhungin ka zirlai chu course ka zawh tawh avangin haw turin ka inbuatsaih ve thei ta hram a. Ka cousin te chuan haw hmaa an vocation ang tur chandigarh ah an kal dawn avangin min sawm ve ta tlat a. Ka college life ka hman zawh na hmun anih vang chuan ka lo hreh lem lo va, ka kal ve ta a. Kan college hlui Punjab university te chu ka tlawh kual a, lung a leng in lungkham nei lo leka ka lo chettlatna hmun chu nuam ka ti a ni. Haw ta mai lo chuan principal te chu ka tlawh leh hram a, rei tawk tak ka awm hnuah ka cousin te nen inhmuhna tur hmun kan ruat lam pan chuan ka chhuak a, thil tam tak ka ngaihtuah lai chuan ka darah min khawihtu an awma ka hriat vang in ka han hawi let a, ka beisei loh thil ka tawng ta thut mai, Lalnunsanga chuan mak tih hmel takin min lo en a, keilah mak ti bawk, "nang hetah maw?" Kan ti rual thawt a. Sawi mai tur hre lovin kan nui a, heta ka hmu hlawl chu a chhan te ka han zawh chuan a patea fapa college kal tur a hruai thu leh helai hmun hi ka nuna hun pawimawh ka lo tawn ve na thin anih thu a hriat vanga va tlawh ve hrim hrim a duh thu te a sawi a. In hmangiah tak, inhmangaih hlei thei si lo nih hrehawm zia hi aw! Ka mittui chu tla lo turin ka dang hram hram a, a ni pawh a pangngai zan lo tih chu ka hre thei. Mahse a chak lohna chu ka hmuh ah a lan tir duh lo mai chauh niin ka hria. Kan in zui ta zel a, ka cousin te kan inhmangaihzia hrechiang em em tu te chuan min han hmu dun chu mak an ti tih ka hre mai, mahse Sanga chu an lo be bawrh bawrh a, a hmaa lo innel sa an nih vang chuan ani pawh a inthlahrung bik loa, min zui ve ta zel a. Hotel kan thlenna a innghat ve mai tur chuan ka unaute chyan an ti a, alo hnial bik lem lo a, hlim tlang angreng tak chuan kan inzui kual a. Tlai takah kan thlenna lam chu kan thleng a, kan vak nasa bawk a ka hah phian lehnghal. Mahse ka kiangah ks duh ber a awm miau a, ka hah tih reng pawh ka hre hman lo. Dinner kan ei zawh chuan ka cousin(Ruata) chuan Sanga chu kan room ah alo hruai lut a, kan titi vel mai mai a, engemaw kan sawi hnu chuan Duhtei(a nau) chu tihtur neia insawiin a room lamah a hruai phei ta daih a, chance min pek ve ngei chu an tum a ni, an sweet ngawt mai ka unaute hi chu
smile emoticon

Sawi mai tur kan haihchham ve ve a, kan in en a, kan nui leh ringawt zel. A mipa zaek na na na chuan tawng hmasak chu a tihtur ah a ngai ve ani chek ang, "Engtiknge i lo haw dawn?" Lai angreng tak chuan a han ti a. Haw ka tum thu leh heta ka kal chhan te chu ka sawi a, "A mak e... Khuanu pawh hian kan intawnna tur hi a ruat zel aniang" ka kut a vuan a, "Ka ngai thei lutuk che" a tih zawm zat a, sawi mai tur ka hre lo. Ka ngai a ka thlahlel ngawih ngawih tih ka hria, mahse.... he mahse hi hnawk ka van ti thin em. Ka kut chu a thlah a,"Tlem tal chuan min ngaih ve ka lo ring a" hnuai lam a melh ran a,"Ka ring sual niin ka hria" a ti zui sap a, nilo, hepa hi ni lawmni la thlakhlelh em em kha, ka insum zo lo, ka kuah thlawp a,"Sang, ka ngai reng che. . Ka ngai lutuk che" ka mittui a tla zawih zawih a, a ni pawh a insum thei bik lo, a mittui chu dan a tum bik lo. Lungchim takin kan in fawp vawng vawng a. Kan inthlah phal lo a, kan tum hek lo. Kan in pawm chial a, tawng pawh kan tum chuang lo. Sawi duh ka nei a, ka sawi chhuak mai ngam silo.

Reife kan ngawih hnu chuan kan awmdan tur chu ka zawt ta hlawl a, hetia kan inhmu hi kan duhtawk mai dawn nge tih ka hre miau lo va! Min chhang lo chuan min thlah a, pawn lam chu a thlir vang vang a, a ngaihtuahna chu a sawrbing hmel hle. Ka rilru chu a nuam bik lo hle a, sawi mai tur ka hre tawh silo, a tawng hun chu ka nghak ta tawp mai a. A tawp ah chuan hla tak melh chung chuan,"Apui... ngun takin ngaihtuah ila, kan inkawp leh hi a rem thei tawh in ka hre lo a ni. I pa hi ka ngaidam thei lo, ani pawn min pawm chuang lo vang" a ti ban charh a. ka lo rinlawk anih deuh avang chuan min thawng lutuk lo, mahse ka pa a ngaihdam theih loh tur thu a sawi chu na ka ti ve a, "Ni e, khawvelah hian pa pakhat chauh ka nei a, i chungah a thil tih kha ka hrethiam i rilru nat dan tur te pawh, mahse i ngaidam thei dawn chuang silo..." kan ngawi vang vang a, "I duhdan ang chuan ni rawh se, ka kalsan hlen tawh ang che. Mangtha le" room chu ka chhuahsan vat a, ka in sehruh nasat luat ah ka taksa chu a na vek a, ka chhuak ta maw tih ah ka mittui chu a luang ta zawih zawih a. Engvang kher nge inkawp rem lo tur hi kanlo intawn a, kan intawn nawn leh thin? Hmangaihna khawvelah hian ka tan beisei tur a awm ve lovem ni le?

Mahni khua han thlen chuan thla te pawh a muang sawng sawng mai. Di zunzam chuan min phuar reng mah se ka thinlung hi inhneh tur ka tum bik lo, inkawp rem lo tur kan nih hi tiin ngaihdan fel tak ka siam ve ta a. Na hle mahse ka tuar chhuak thei tih ka hrechiang a ni. Lehlamah Lalnunsanga pawh zu rui chungin ka hmu zeuh zeuh a, ka chhuah tam loh vang pawh ani ang ka hmu khat angreng hle. Kan inhmuh chang pawhin kan inkal pel mai zel a, inhre ngai angin kan awm tawh lo. Chu chu kan inthen hlenna tur chuan a ngai tlat si a. Ka chhungte pawh a hma ang khan an rilru a sak tawh lo, an fanu nungchang an hmuh hian an ngaihdan kaltlangpui ngawt chu tih mi ah an ngai lo ani ang, kawng engkimah min dah pawimawh ta em em vek a. Ka u mama pawh Aizawl lamah an rawn transfer ve ta a, Kohhran bel mi tak anih avangin min kaihruai hneh hle a, KTP ah pawh ka inhmang veleh tan a. Aruk tak chuan ka inthlahrung, chu vang ngawta han hlamchhiah erawh ni theiin ka hre bik silo. Zankhat chu Bilble chhiar a tawngtaina te ja neih lai chuan Pathian chuan ngaihdam theih loh a nei lo, enganga sual pawh ni ila kan sim a a hnen kan pan chuan min ngaidam dawn tih ka hria a. Kraws thisenah silfai ka ni ta tih chu chiang takin ka thinlungah alo lang a, zankhua in lawm avangin ka mu thei lo a, a chang in ka tap a, hei hi a nih hi ka lo mamawh ka zawn thin, ka hmuh ngai loh chu.

Phur taka kohhran ka bel leh ta chu ka chhungte pawh an lawm em em a. Zankhat kan hla zir bang chu ka u Mama nen kan haw a, kan in bulah hian mi pakhat alo thu reng a, tunge kan hre mai thei lo a, chiang zawk a kan han en chuan Lalnunsanga alo ni reng mai, min hmuh veleh a tho vat a, a rui tih ka hre mai, rui chhe lutuk erawh a ni lo. Ka u Mama chuan zan a rei tawh a, haw tawh tura atih chuan muangchang in a kal ve mai a, ka thlir reng a, kawng kawi a thlen chuan a lo hawi let a, ka lo la awm min hmuh chuan min hawisan nghal vat a, a kal liam tam ta. Aw! Ka va han lainat tak em! Tinge a nun hi a tihchhiat kher le ? Tanpui theihna ka nei mawlh silo ti rilru vawng vawng in ka lut ve ta a. Room ah ka lut tlang a, ka theihnghilh tan ve tawh emaw ka lo tih chu ka thinlunga alo la tlak natzia ka hre thar leh ta. Bible te chhiar a ka tawngtai zawh hnu chuan ka fon chu alo khur cher cher a, msg ka dawng tih ka hria, ka han en chuan Sanga alo ni,
"Apui..... mipa dang chu in thlah tir miah sh o, k hmu thei lo ag ce" tih zawng hi min lo thawn a. Engvanga,amah leh amah in ti hrehawm reng nge aw ni ang tiin ka ngaihtuah zui reng a. Ka thawk ve tek tek chhung hi chuan ka hmangaihna hi a reh tawh dawn lo tih ka hria.

Engtikahmah ka thlah thei dawn lo a, ani pawn min thlah thei dawn chuang lo tih ka hria. A tawp nan kan inkar chu ka siamtha anga, a thei ve lo anih chuan kumkhua atan ka thlah hlen tawh ang, chu chu ka thutlukna tawp chu a ni. Zankhua in ka ngaihtuah a, chhin khat pawh ka chhing lo. Zing lamah chuan ka chhungte tho thawm ka hriat hnu chuan ka lo muhil zui ve ani ang, ka harh chuan kan awmpui nula chiah ka hmu a. Sanga chu msg thawnin kan ina kal tur chusn ka ti a, thil sawipui tur pawimawh deuh ka neih thute ka sawi tel a, ka inbual zui nghal a. Ka inbual zawh chuan Mamuana chu sitting room ah alo thu reng a, reife ka inthlak leh hnu in ka zu fin ve a. Ala pangngai reng, a hmel chu chhia ani hauh lo, a hlei tling a, a rin ngam takzet ang tih pawh ka hria, mahse ka tan chuan Lalnunsanga tluk tur khawp anihna a awm chuang lo. Ka nu leh pa ten kawm tura an tih thu te, tin kan pahnih awm dan tur sawi pui min duh thu te chu a sawi bawk a. Ka ngaihdan tlang takin ka hrilh a, "Mamuan, dinhmunah pawh nise ka phu lo em em che tih ka hria, heti chunga min ngaihven ve te hi a lawmawm ka tia, mahse i hriat angin hmangaih ka lo nei tawh a, ka chhungten an duh lo tih pawh i hre ve tho anga mahse ka thinlung atang hian ka paih thei chuang lo. Midang thinlunga dah reng chung hian tumah ka nei thei lo a, min hrethiam la, kei ai tha leh i kawppui tur dik tak chu zawng zawk mai rawh" ka ti a. A hma kha chuan chhungte avangin min neih a tum ve ringawt ni khan ka lo hre thin a mahse a hmel ah chuan rilru natna thuk tak ka hmu tel tlat nia! A hmel chu rei ka en ngam lo, ka kut chu a vuan a, "Apui.. a tir kha chuan kan nu leh pate avang chauh khan neih che ka lo tum ve thin a, mahse hmeichhe dang ka kawp ang i ni ve lo, nang chu i danglam tlat a ni. Englai khan nge ka lo hmangaih che a, ka duh che sawi tur ka hre lo. Mahse ka hmangaih takzet che a ni" ka kut a vawn chu a thlah a, a tukhum a dawm a, ka khawngaih kher mai, kei tehlul hetia min lo duh der ve hi. Kan ngawih reng hnu chuan amah vek chuan,"Anih chuan Sanga nen chuan in lo innei thei ta,ngang lo anih chuan, i tan ka lo awm reng ang, ka lo nghak ang che" "min lo nghah kher angai hleinem, midang kei ai tha an tam hi... zawng zawk rawh" ka lo ti a, a lu a thing a, "ka lo nghak reng ang che, Apui, thil pakhat chiah ka tih min phalsak rawh aw.. min ngaidam ang che" tih pah chuan ka hmuiah tak min rawn fawp a, ka lo inring lo lutuk chu ka tlu tep nghe nghe, chutah thil ri chawrh ka hriaa ka han en chuan Lalnunsanga chu mak ti em em in kan pish ah a lo dinga,,a helmet chu a thlauh a lo ni. Mamuana chu ka nam sawk a, Sanga chu ka pan vat a, harh chhuak thut niawm takin a helmet chu a laa, a tlan chhuak nghal a, ka umzui a, ka,au bawk a, a bike a alawn chiah chu a kawrah ka pawt bet a "Sang, khawngaihin la awm teh" min en a, a nui sak a, mahse a mittui tla chu a thup zo ta lo, "Apui... i khawsak dan hlimawm tak hmuh tir min tum vang ni maw min lo koh phei a, i hlim tawh em? Ka na lai hi ani lawm ni hmuh i chak chu?" A kawr ka vawnna kut chu phelh a tum a,"I thil hmuh kha thudik anilo. Sang, khawngaih takin min ngaithla teh," "Nilo e. Ka kal zawk hi a tha. Kha inleng i neih kha va lut tawh rawh" a bike a start a, a tlan a, min tlan liam san ta.

Inchhung ka lut chu inthlahrun hmel takin Mamuana chuan min lo en a,"Apui, ka tihpalh takzet.." ka beng ka hup a,"Engmah ka ngaithla duh lo. Min chhuahsan rawh ka hmu duh lo che" room ah ka tlan chho a. Khumah ka bawk thlawp a, ka mittui chu a tla zawih zawih a. Ka mitthlaah chuan Sanga rilru na hmel a cham reng a, ka rilru hi a na ngawih ngawih. Fon ka tum a, ka call chu a reject char char a, ka beidawng duh bik lo, ka call nawn zel a, mahse a tawpah a switch off ta hmak a. Ka beidawng kher mai.

Chaw ka ei thei lo a, ka mutui lo a, ka chhungte ngaih pawh a tha lo ta vat reng a. Ka nu chuan thil awmzia min zawh ni chuan mittui nen Lalnunsanga nena kan chanchin zawng zawng chu ka htilh ta bek a, ka nu pawh a mittui a tla ve zawih zawih mai,"Mamte, ka van laibat tak cheu em! Sanga pawh hian a hmangaih ve tak tak che tih hi ka ringhlel lo mipa tam tak te chuan an ngaihzawng te sex an hman pui hian an duhtawk a, an kalsan mai thin. Mahse ani chu ani ve lo. In inneih ngei theih nan keipawhin i pa rilru hi lo hneh ka tum dawn ania" a ti a. Ka lawm kher mai. Ka u Mama pawhin ka pa bulah chuan a thiltih hi a dik lohzia a sawi lai hi ka hre ve fo ta mai, ka pa tanfung ah chuan Mamuana paten innei lo tura an thu an sut anih loh chuan a ni chuan a sut ngawt thei lo tih a sawi nghe nghe. Tunah chuan Mamuana rilru hneh chiah tih theih ka nei ta. A chhungte bulah min neih duh loh thu a hrilh an ngai ani. Ka lo nghak reng ang che min titu hian chu chu a ti duh kher angem le? Engpawhnise ka ngen mai ang.

Mi sual tak ani bik lo a, mahni hmasial tak ani lo bawk a, ka ngen ang chuan a chhungte a hrilh ve ta mai a. An hauh nasat zia min hrilh lai te chuan ngaihsan hmel takin ka lo melh a. Tunah chuan Sanga nena engkim kan sawidun hi a pawimawh ber chu a ni tawh. Nikhatchu dawr ka nghak haw lam chu Amawia, Sanga thianpa ve ber nen chuan kan intawk a. Eng engemaw kan sawi hlut a, Sanga chanchin te ka zawt a, a hmuh vak ngai loh thu leh zu a in nasa a, kawm hleih theih anih loh thu chu min hrilh a. Amah hmuh ngei ngei ka ngaih thu ka hrilh chuan min kalpui a hreh loh thu a sawi a. Sanga awmna tur ni a a rin Pi Duhi(hmeithai zu zuar) in lam chu kan pan a. Kan va thlen chuan mi an lo tam leh hle tawh a, mahse Sanga hmel hmuh tur chu a awm lo. Amawia chuan Pi Duhi chu Sanga kal leh kal loh a han zawt a, Siama(Pi Duhi te kawmchhak) te inah an awm thu alo hrilh a, chulam pan chuan kan kal nghal a. Kan han thlen chuan an lo awm deuh laih laih a, inchhung kan lut chu ka thinphu chu a rang kher mai, Sanga chuan hmeichhe pakhat hi alo kuah nasa hle a, chunu pawh chuan a kawngah a kuah a, ka puakkeh dawnin ka hria tlan chhuah ka tum a, Amawian min lo pawtbet vat a a thianpa lam chu nin pan pui a, "Sang, lo chhuak lawk teh. Apuii hian sawi duh anei ania" a han tih chuan ngaih pawimawh loh hmel zetin a nui suk a,"Sawi tur ka nei ve lo, Amawi, kohhran upa fanu len ve na chi anih loh hi, hruai haw rawh" melh pawh min melh loh chuan a ti a. Ka thinlung ana ngei mai, a tawp vek tawh tih hi ka rilru ah alo ri nawn tluk tluk a. Sanga bula hmeichhia chuan min rawn melh pah chuan,"Sang, kal ang" min nuih leh kher a. Ka run ngei mai. Amawia chuan a thianpa chu a pawt tho a,"Va chhuak ru, Sanga, vawikhat chauh tal chu va sawi teh u" a ti a, Sanga chusn chiang zetin min melh a,"Henu hi ka hre ngai lo, ka thinlungah hian a thi tawh. Chuan Amawi, amah avanga ka dinhmun hi i hmu a i hre vek, engmah a tha tawh dawn chuang lo" a ti ta fak mai a. Ka hrethiam ta e, kan inkar hi siamthat theih ani tawh lo. Ka tlanchhuak a, he hmun ka pan dawn kha chuan beiseina tlem ka nei kha a ni a, mahse ka beiseina chu an thamral ta. Harsa taka kan inkar siamthat ka tumna chu ka hlawhchham ani tih ka pawm angai tawh. Kan inkar kha alo chhe thuk em tawh a, siamthat leh mai theih ami tawh lo.

Ka chhungte remtihna in kan khua chu ka chhuahsan leh dawn; a vawihnihna atan. Tunah chuan ka rilru na zawng zawngte an dam kim hma loh zawng ka kir leh tawh lovang. Sulhnu fan tur awm lohna hmun Shillong ah ka patea te hnen lam ka pan a. Ka naupanlaia ka lo chettlat than na hmun anih avangin he hmun hi ka ngaina hle thin. Ka patea fate lah Delhi a awmho reng kan nih avangin kan inkawm ngeih sa em em a, Ruata chu Delhi lamah a la awm a, Duhtei erawh a hrisel loh em avangin B.A a zo a, a chhunzawm ta lo. Hnate kan zawng dun a, kan pahnih chuan eng engemaw kan ti kual a, nun pawh a hlim ve sawt hle. Ngaihzawng neih leh chakna hi ka nei lo hrim hrim a, kan chhungkaw thian hnai tak pakhat hi a hna avangin kan inbul lawkah in a rawn luah ve a, kan in hi a chuankai na ber a ni. Kan inkawmngeih hle a, kan tui zawng leh ngainatzawng pawh a in ang. Ahnu lawkah min ngaihzawn thu a sawi thuai a, keilahin nui uar uar in ka thiante ka nihpui ngai loh thu te ka hrilh a, a nuih a za lo hle ta lehnghal. Chutatang chuan tlemin min zah ve deuh nge ni min hlat deuh tlatin ka hria. Ka nun ruak tak kha a ti ziawm ve viau tih chu ka hria, chumi vang ringawta ani kawp kha ka thei lo. Keimah pawh ka la inringtawk hek lo.

Kartawp apiang hian ka rilru ti zangkhai turin wards lake ah ka kal thin a, he hmun hi zin mite hipkhawm bertu pakhat a ni a. Nikhat ka kal leh chu ka thutna ngaiah thut hmun ka rem a, earphone in hla ka ngaithlaa, ka lo chhing siar siar a, min kotu awma ka hriat avang chusn ka earphone chu ka dah a, ka han hawichhuak a, khasi putar pakhat hi alo ding reng a, ka lo welcome vat a, ani chuan he hmuna ka kal ziah leh khawhar hmel taka ka awm min lo hmuh thin thute a sawi a, ka bula thut min dil chuan thu turin ka lo ti vat a. Eng engemaw kan sawi a, he dil chanchinte min hrilh mawlh mawlh a, Sir William Ward, Assam Chief Commisioner hmasa khan he dil hi a sakdan tur alo ruahman a, kum 1894 ah Col.Hopkins a hnuaiah zawhfel ani, a hmingah hian Mr.William Ward-a hming chawiin Ward's lake an ti ta bawk a ni.Shillong rawn tlawhtu te chuan an tlawh ngei ngei thin ani tih te chu a sawi mawlh mawlh a. Ngaihnawm ti takin ka ngaithla a. Keipawhin thawveng taka ka awm ve theihna hmun anih avanga ka ngainatzia te chu ka han hrilh ve a. Rei tawk tak kan titi hnu chuan min kalsan ta a.

Nula leh tlangval inngaizawng an tam thei hle a, in hmangaih hmel taka an inkai rial han hmuh chang hi chuan Lalnunsanga kha ka hrechhuak leh thin. Engvang kher nge a ni nen kan lo intawn le? Khuanu ruat loh di tawn zawng thinlai ana ngei e. Ka hmangaih khan min han hre ve reng thin angem le? Ka theihnghilh theih loh lai hian ani chu khawilaiah emaw chuan nula dang nen hlim takin an nui leh awm si a, kei ve hi chu min theihnghilh daih emaw a ni anga. Chung ka ngaihtuah lai te chuan kan nunhlui te chu a indawtin alo lang zut zut a. Ka inrin hma in ka mittui chu a rawn tla a, rang takin ka hru a, in lam chu ka pan leh ta hnak hnak a.

Ka hlim ve na tur anih beisei chuan min ngaizawng ve em em tu Dave-a chu ka chhang ta a. Mi fel tak, kawm nuam tak a ni. Ka patea nen office khatah an thawk tlang a, mite zah kai tak anihzia a sawi fo thin. A dik ang, a tawngkam hman reng reng te hi a fimkhur em em a, mi rilru tihnat hi a hlau a, mi tan hnawksak nih a tum ngai lo. Ka nunhlui zawng zawng a hre vek a, Duhtei'n engkim alo sawi tawh a. Min khawngaih a min hmusit ngai lo. Ka chaklohna a hre em em a, Lalnunsanga ka nei theilo anih chuan ani tluka ka tana tling hi an awm tawh chuang lo ang. Mahni chauha khawhar taka ka kalna thin Ward's lake chu ka la tlawh awl lova, mahni a kal tawh lovin Dave nen kan kal thin. Min khawngaih em em thin tu khasi putar pawh chuan min lawmpui hmel ve hle a, hlim takin min lo be thin. La hmangaih mai thei lo mah ila ka hmangaih chhoh ve theih chu ka inring khawp mai.

Zankhat chu Dave-a alo leng a, hlim takin kan inkawm a, Duhtei nen kan pathum chuan pawnah thla eng hnuaiah kan thu a, Dave chuan guitar a perh a, kan zai tui ve hle. Hlim taka kan zai lai chuan ka fon alo ri a, no.ka hriat ngai loh ani. Ka han pickup a,
"I dam maw"
Ka theihnghilh lul lovang, Lalnunsanga aw ngei a ni. Heti khawpa ka nunphung ala tibuai thei hi a mak ka va ti tak., hmangaihna thiltihtheihzia hrelo tu tan chuan nep min van ti dawn em! Ka nu nghal but ani ber, Dave chuan ka fon chu min laksak vat a, ava be ta nghal a. Engmah ka ngaihtuah theilo, ka thu hnawk a, Duhtei chuan tui min laksak vat a. Dave chu ka va en leh zauh thin a. An inbe rei kher mai. Reife an inbiak hnu chuan kan bulah a lokal a, a dan panngaiin hlim hmel takin min nuih sak a. Ka bulah a lo thu a min kuah ta hle hle a. Duhtei pawh kan boruak in a zir ta silo a, inchhung lamah min luhsan ta a.
"Dave, ka nep tiraw?"
"Chutiangin sawi suh, ka hrethiam che ka tih kha, i hlimna hi ka duh ber alawm Apui" a ti dam thlap a. A awmah ka hmai ka phum a, ka tap ta zawih zawih a. He pa hi hmangaih ka van duh tak em! A haw dawn chuan kan in fawp vawng vawng a, a mizia chu a dang deuhin k hria, ka ngaihbel phei chu ka hre lo a. Inthlahna ni awm takin min fawp vawng vawng a, ka han melh ru zauh a, a mittui tling pam chu ka hmu ruai a. Ka pawm thlawp a, nitinin ahma ai nasa in ka nhaihsak ang tiin ka rilru ka siam nghal a. Gate thleng ka thlah a, lut hmasa tura min tih avang chuan ka kal a, kawngkaa ka lut tur chu ka han hawilet a, a ban a rawn vai lauh lauh a, ka nuih sak a, ka luhsan ta. Ruak huai in ka inhria ka ti!

Hna avangin Dave chuan min zinsan a, ka ngai ve thei hle. Kan inbe reng a, a rawn haw tur thu te a sawi chuan ka phur hle a, zana lo len nghal atum avangin keipawh ka lo inbuatsaih nasa ve hle a. Nghakhlel takin pawnah chuan ka lo thu a, reilote hnuah chuan a motor ri chu ka hria a,ka tlan vat a, gate ah chuan ka lo hmuak a ni. A rawn chhuak chu hlim hmel takin a nui sak a, amah mai ani tlat lo! Mipakhat a lo tel ve nia, kha pa Lalnunsanga ngei kha. Inthlahrun hmel takin a rawn zui a, mak ka ti lutuk chu ka ka hau ringawt. Dave chuan,"Ka thianpa Sanga anih hi , in chibai ula" a ti a, min siai suk a. Ka kut chu ala, Sanga kut ala leh a, min in vawn tir ta ngawt a," i patea te ka va kawm ve thung ange, lo inkawm rawh u" tih leh kal arual a. Kan lai dun hle a, tawng hmasa tu nih chu kan hreh ve ve niin a lang. Reife kan ngawih hnu chuan Sanga chu a tawng ta nge nge a, thil awmzia ka han zawh chuan Dave-a thiltih chu ka hre ta. Min hmangaih em em a, mahse kei hian hmangaih tak ka lo nei tih a hriat khan kan inkar,siamtha turin a theihtawp a chhuah alo ni. Aw! Dave, i van ropui em!

Inhmangaih tak pahnihte chu kan in kuah rial a, kan in fawp leh vawng vawng thin a. Kha zan, Sangan min rawn biak zan pawh khan ka no.kha Dave-a pek hian alo han pe a lo ni. A mak ka ti reng a, no.thar ka hmang daih tawh si a. Ka fon atang hian a no.ka la delete lo a, chu chu Dave hiab alo haichhuak a, alo han bia a, ka la hmangaih reng thu te alo han hrilh vek a, chance vawikhat a pek thu leh a bawhpelh chuan min neih a tum thu te thlengin a hrilh a, chu chu bawhzuiin Sanga hi alokal ta a ni, Dave mi ropuia chu.

Kha leh chen in ngai leh inthlahlel reng renga lo awm tawh, harsatna khirh takin a man beh tlat te inhmangaih thar leh chu a mawi ngei ang. Harsatna leh buaina hrang hrang tawh hnu a hlimna chu a ropui bik a, a hlimawm lehzual a ni. Tunah chuan inneihna buaipui turin Kan khaw lam panin kan haw ta vang vang a....

~The end~