THE END..! By Laura Sean Virgo

[Ngaia]

THE END..!!

By. Laura Sean Virgo



Nilai zan dar 9:30 vel ania, October thla full moon zan ani nghe nghe.. Kan in hmun sang veh vawh atang chuan thla eng in a chhun phak chin tlang mawi tak tak inkham dum ruih maite chu ka thlir vawng vawng a. Ka ngaihtuah thin ngai bawk…mal riau a ka inhriatna chu ka thinlung ah arawn thar leh nghal..

In ngaihtuah khawhar leh dawn tan.. Ka phone riin rilru arawn la peng hlauh..

‘Hello..’

‘Remruat..i hman dawn tawh em? Zanin chu I rawn happening viau angai dawn ania..’

WOW…angaihna ka bo thaks..

‘ngawi rawh..i tisual palh aniang.. Remruati kani lo..’

‘Oopss.. Sorry..sorry.. Tunge ka biak? I van chhiatloh hmel..’ ala rawn ti ham ham.. A tawngdan phawr phawr atang chuan a rui thawkhat ang tih a hriat reng mai. Thawm ri nuai nuai ka hriat pawh chu ka ngainat zawng ani bur bur lo..

‘chhia I tih tur chi..’ tiin phone ka off hmak. Mahni tawka lunglen ve naklaiin.. Khatiang mi hriat ka neih awm pawh ka hrelo.. Engtin nge ka phone number an rawn dial ngawt theih.. Ka biak rual pawh anilo tawp ang.. Tunlai naupang ho nungchang nasat tawh dan hi chu..tikhan nu leh pate hriatpui lohin an party ani ngei awm sia.. tiin ka lunglen theihnghilh thakin ka ngaihdan danin ka buaina tur pawh ni hleilo ka ngaihtuah zawm chiam a.

Ka phone riin ka rilru arawn lapeng leh ta.. Ninawm reuh tih pahin en lemlo chuan ka pick up mai a. Mipa aw bawk..

‘Thanpui..nichin kha tihpalh aw.. Ka phone ka thianten an hmang a, tihsual palh anih kha.. Tanpuia ka nia..’

Tunge Tanpuia..? Ka hmelhriat ala nita chuanglo tho tho.. Zanin chu van mak tak..

‘tihpalh anih chuan pawilo e… Hello....’

‘Hello..hello..ka tawng I hre thei em..?’

‘Aaa.. a van mak atawp ringawt..’ nui pawt pawt chungin phone ka off nghal zeih.. Ka hriat ngai pawh nilo ka be duah thiam lo.. Chutiang thawm nuai nuai a awm chu mitha tak pawh va ni suh.. Ninawm..hmelhriat hleihlohin ka lungleng mood an rawn ti chhe zo vek.. Sana ka en a dar 10 alo pel leh duai tawh, ka mu nghal daih.

Kumin August ni 29 khan kum 23 ka pum ve ta chiah.. Rin aiin kum hi atam chak.. Unau 5 kanni a, upa ber dawttu ka niin kan unau hmeichhia vek kanni. Pathian zarah ka zirlai ka thluang a MA (Eng) ka zo tawh. Kan chhungkaw khawsak anuam tawk hle bawk. Hnathawh tur zawng em em lo, zawng miahlo ni si lovin ka awm deuh mai mai.. A tul chang a kan dawr nghah zeuh zeuh bak chu ka nuam tih ber eisiam a in lama buai ani deuh mai.. Ngaihzawng ka ngaihsak tehchiam lo..

Mak pawh inti maithei mahse ngaihzawng hi pakhat chiah ka la nei. Ka la serious em em a, hmeichhe pangngai chuan min beiseitu kan nei deuh zut vek a, mahse nat hlauhna in min hneh zawk thin avangin ka neilo leh nge nge thin. Chutianga awmtur khawp chuan ka neih ve chhun hian natna bak min hnuchhiah lo.. Ka rilru a ka duhna leh ka thalkhlelh ve nate tilang thiam si lovin ka tawt up up thin.. Ka hriat ve chhun chu natna bak min hnuchhiah lo tih zawng hi ani... Chu pawh kan inthen atangin kum hnih dawn aliam tawh..

Zankhat chu ka cousin Mahriata’n a thiante a rawn lenpui hlawl a, a thiante hming a sawi diat diat.. Heihi Michaela..heihi Tanpuia.. chu chu ka hre tawh.. Ka hre leh lo..!!

‘Phone ah pawh ka rawn be tawh che..’ Tanpuia atih chuan nui sangin arawn ti var a.. Tunhmain ka la hmu ngailo.. Amah chu palian lam, pian inphut mawi tak ani..a fai sar.. a hmai a sawl deuh in a chhelo hle… Ka lo judge dan chu ka inthiam chiah lo.. Ka lo nui ve tawp…

Ni dawn tak.. Nizan hmasa khan Tanpuia tih hming pu chuan ka number hriat ngailoh atangin min rawn be tawh tak.. Ka lunglen rawn hnawt triau tute kha.. Ka nuih aza ru hle.. Tiang hian a chhelo tih lo hria ila lo biak that deuh tur hi ania.. Sawt tawhlo ee.. Kan inkawm ho a, kan hlim ta phian..

Chutatang chuan ania Tanpuia nen kan inhriat tan tak. Kan inbe ta zeuh zeuh.. Pawi kati vaklo.. Ngaihzawng ka neihloh na pawh arei thawkhat tawh. Ngaihzawng then rilru nat vanga ngaihzawng mai mai neih ka duh ngailo a, rilru a midang la ngaihven reng chung a mi ngaihzawn pawh ka duh hek lo. Mahni ka inbum rualin midang ka bum tel ve dawn nia ka inngaih vang ani. Inngaihzawnna hi a der maia tihchi anilo tih ngaihdan nghet taka vuantu ka ni ve tlat.

Inbiak inbiak takah chuan kan inngaizawng nghet chu ani ta deuh der a. A thian dangte leh midang amah hretute sawi dan atang pawhin mi feltak ani anti theuh a, ni awmtak pawh ani. A zia a nghet charh a a pa ru riau bawk.. Ka duh ber chi vek.. Mi thalo tak chu nise ka unaupa mi hmangaih thei tak mai hian warning min pe ngei ang.. Mak tak maiin tun tum chu hlauhna ka nei miahlo.. Ka hlauhloh vang ngawtin engkim a that thlap ka ring chuang lo thung. Thla thum liamta a kan cousin pasal neihna a kan kal tumin min lo hmu a, min hrilh leh danin ka phone number chu Mahriata alo dil ani awm e.. Ka lo sawi hmaih dawn.. Tanpuia te chhungkua hi Aizawl mihlun anni a, sumdawnna lian tak tak an hung tleh tluah a, ani pawh hian an chhungkaw sumdawnna thenkhat chu Msc.(Chemistry) a zawh hnuin a enkawl a, kei aiin kum 4 in a upa bawk..

Dawra ka awm niin chawhnu la hma deuh takah hmeichhe pakhat nen an rawn lang hlawl mai. A college kalpui thin anih thu sawiin min inhmelhriat tir a. Amuani chu a phul hlut mai ..

‘Thianpa..hetiang ang bialnu tha nei si I van ngawi thei em em’

A tihdan pangngaiin Tanpuia chuan min en a, a nui suk ringawt..

‘Thanpui.. in pa hi I ven deuh loh chuan zar buaitu a ngah tehmai nia.. Ka lo ven sak ang che aw..’ anui uar uar a, a bengchheng zek mai..

‘Luck te chu a tha viau alawm..’ tiin ka lo nuihpui a.. Ka nuih pawh aza tak tak chiah lo. Mi ri phur phur bula awm hi ka tithang lova, a dawnsawn dan vak ka thiam lo.. Rei vak pawh awm lovin tihtur tul dang a neih thute sawiin a kal ta hram a. A kal dawn chuan Tanpuia chu a kuah ang thuak thuak a, thian angin a enlo tih chu mimawl ber tan pawh hai chi anilo… A kal hnu chuan

‘Kha kha zar buaitu a sawite zinga pakhat ani chiang’ ka lo tifiam zeuh a.

‘Ka sawi zawm peihlo.. Ka ngai tawh lutuk che’ tih pahin min hnaih thei ang berin a rawn thu nghal a.

Hmm.. hepa hi chu ka rilru hneh tura mihring hun mamawh tamlo ber ani chiang alawm. Ahma a ngaihzawng kalo neih ve tawh kha ka duh viau tih chu ka inhria; mahse Tanpuia laka ka rilru putdan nen ka khaikhin chuan adang daih. Thil thalo thleng thei zawng zawng… chetsualna tawkin mi pangngai pha lovin awm tase tih thlenga ka ngaihtuah pawn ka rilru a danglam chuang lo a, ka phatsan theih ka ring lo…aman min hnawl tawp te anih loh chuan…! Ani hian ka lakah eng rilru chiah nge a put ang tih chu mite tawng thin ang bawkin ka hrekim thlap lo vetho. Mahse ka lakah chauh nilo ka chhungte laka a awmdan zawng zawng atang hian a serious hle tih erawh ka hre thei. Ka rindik dawn leh dawnloh erawh ka hre lo…!

Zankhat rui chunga min rawn biak chuan min barakhaih chiang hle. A rui ngai hauh silova…

‘Lalthanpui..heti hian maw ka chungah I tih dawn?’

‘Enge a awmzia..? Eng thil nge ka tih a..’

‘Sawi buai duh suh..tenawm nu..i hrelo der dawn maw..?’ a thaw ri hrawp hrawp a..

‘Ka hrelo tak tak.. Ngati nge tihian I awm?’

‘Ha…alo ni e.. Atawk.. Ka rindan chiah..’ Ngeiawm thei ang ber hian anui zui bawk a, ka thinrim ve phat.. Athu rawn sawi awmzia hi ka hre reng reng lo bawk..

‘Thil awmzia ka hriatloh chuan enge sawitur ka neih..’ alaka ka vin ber tum ani chiang

‘Engmah..’ phone a off zui bawk. Ka bangbo takzet, a thu rawn sawi kha enge ni ang tih han rinzawn tur pawh ka hrelo. Theihtawp a rinawm ve naklaiin.. Ka ngaihtuah zawm a mak kati telh telh.. Ka mu thei dawn chuang lo.. Ka call a a ring quit thak thak.. A rui a engmah ka sawipui thei rih chuanglo ang tic hung chuan ka call nawn tlauh tlauh a, chhanna ka dawng lo.. Ka missed call a ahmu anga naktuk ah min rawn call back mai ang..tiin vawi 10 chuang ka call hnu chuan ka duhtawk ta a. Kan in ngaihzawn hnua ka muttui loh ber zan ani chiang khawp mai..

Nidang zawng zawng aia hma ah ka tho a, ka phone rik hun ka chang.. Rilru lakpen nan tihtur ka dap ruai a.. Nilengin ka chang chhuak lo. Ni a rei duh khawp mai. Missed call khati zat ka hnuchhiah chung pawh a min rawn be miahlo chu mak kati takzet. Nidang ah chuan 1 missed call lekah pawh min rawn be ziah thin. Thil enge maw tak chu a athleng ani.

Zan ah chuan ka insum thei nganglo..ka call leh ta nge nge.. A pick up chuang lo a, message pawh engmah arawn reply lo bawk.. Amak kati em em ani tawp.. Ka chapo vena zawng zawng pawh dahtha in a hnu ni 3 chhung chu ka call tlauh tlauh a, chhanna ka hmu ngailo..

Awle..atha e.. Ka tihtheih zawng chu ka tit a.. Nilo ka la tih ngai hauhloh te pawh kati tawh alawm le. Min be duhlotu biak tuma vir buai hi ka la ti ngailo hrim hrim. Ka induhna te pawh dah bovin tlawm takin ka bei ani lawmni.. ‘Atawk tawh’ arawn ti reng tawh alawm. Ka na viau dawn tih ka inhria. Thil awmzia ka hriat hauhloh vanga inthen chu ana in mak ka ti. Min then duh vangin chhuanlam tur awmlo arawn siamchawp mai mai pawh ani thei.. A chhantur awmang ngaihtuah in ka in ngaihtuah nileng zankhua a, engmah ka ngaihtuah chhuak chuang lo.. Min be duhlotu chu ka be tawhlo ang..hetiang a tawp hi ka thil hlauh ber thin ni mahse alo tleng tho tho si a’ tiin ka rilru ka siam ve ta a. Ka rilru chu ana thlawt.. Atan engkim ka huam asin le.. Mahse ka tap loving..

Karkhat a ral hnuah ka bazaar haw lamin Tanpuia leh hmeichhe pakhat chhelo zet inzui ka hmu thut.. An hlim hmel hle. Chu nula chuan Tanpuia chu ngaihsan hmel taka enin a nuihsang a. Intawk zawnga ka kal ngei angai si.. Ka thin aphu dup dup mai.. Laklawh asawi theih tawh loh.. Ka hnaih ber dawrah chuan ka lut rawp a, ka tlanchhia ani ber e.. Min rawn hmuhloh hram ka beisei.. Ka tawntlang ngam nganglo ani. Ka luhna chu steel works dawr ala ni zui.. thir an kap tek chhuai chhuai a, hnathawk thenkhat chuan minlo en deuh hu hu lehnghal..

Min kal pelh hnu awm velah dawr atang chuan muangchangin ka chhuak leh ta a. Ka ngaihtuah chu thildang daih ani.. Laltanpui leh..! Thil awmzia ka hriat miahloh vanga min then in min be zawm duh miahlo a, karkhat awrh arala hmeichhe dang nen ka hmu lehnghal pang che a.. Kha hmeichhia khan inti neitu takin I banah a kuah alawm.. Mahni inkhawngaihna in ka khat a.. In ka thleng chu ka insum theilo.. Ka tap lovang tiin ka intiam na a; ka rilru ana em a ka tap lo theilo ani.. Ahma a kalo up beh tawh zawng zawng nen, ka ngaihtuah kual zut zut a. Ka la na dawn chauh niin ka inhre hial mai.

Chhan felfai tak vanga ngaihzawng then kha ana viau a, chhan awmlo a then nih erawh anatdan a dang daih.. Zah ngawih ngawih na leh tlinglo riau a inhriatna a awm a chu chu a tuar tihartu ani. Chhanna ka hriatloh zawhna ka inzawt tawp theilo. Tlawm taka va biak pawh leh erawh ka tum tawhlo chiang. Thil awmzia hretura ka rin a thiante pawhin engmah an hre lo nge min hrilh duhlo pawh ka hre tawh biklo.. Mahriata hmundang ah hnathawkin a awm ta daih sia..Mahse ani pawh zawt ila engmah a hriat ka ring lo.

Tanpuia nen chuan khawi ilo kalna ah kan inhmu fuh zauh thin, mahse atu mah mahin inbiak kan tum ngailo.. A chanchin hriat zui vak ka neilo. Ka ngaihven duhlo lui ani ti ila a chanchin hria a ngaihven turin huaisenna ka neilo ni zawk rawh se.. Chu chu thudik ani.. Ka rilru ana zual zel a, ka taksa ah alang tan. Ka chhungte ka ti mangang a, hreawm kati takzet..

Zankhat chu zanrei tawh takah Mahriata’n min rawn bia a. Tanpuia’n min thendan ah hian ka zah em avangin mi hnenah engmah ka sawilo..

‘Pui.. Thianpa Mikea’n min rawn bia a, Tanpuia’n nupui anei dawn atia.. Tinge news min rawn hrilh ve loh.. Rawn haw ve ngei ka duh dawn ania..’

Ka nghing dawt.. ‘Ani maw..? Ka hrelo… Engmah.. Keimah ka nilo..’ kati bah nuai a

‘Engmaw..?’

‘Mahriat.. min then tawh alawm..’ engmah ka sawizawm theilo. Ka hrawk atawt vek. Phone ka off ta ringawt a. Min biak zawmna chi ah angai biklo aniang message in arawn chhunzawm a

‘Pui, next week ah ka rawn haw dawn, kan sawi tha dawn nia.. Don’t worry..’

‘Engmah sawizawm loh ka duh zawk, atawp vek tawh. Min then chhan ka hrelo.. I hnenah enge maw sawi anei em?’

‘Nope..engmah sawilo.. I chanchin ka hrilh vaklo. Ka duhpui vetho che tih a hriat ka duh hleinem.. Mipa ho chu hmeichhia nen kan inang lo. Lo lungngai lo phawts..’

Kar thar kan chuangkai a, kan chanchin hriat chu ava duhawm loh tehlul em..! Mahriata lo haw tur airport pana a kal motor chesual ah a thi..

Mahriata ruang lo thlen ni chuan a thiante an rawn kal thap. Tumah ka belo.. Tanpuia ngei pawh hmeichhe nalh zet nen an rawn inzui leh tak kha.. Ahma a ka hmuh tawh nu tho kha ani. Heihi a nupui tur chu ani ngei ang. Melh ru hram lo turin ka in control hram hram.. Henu vang hi ani ngei ang chhan engmah sawi lova min then.

Ka lam pana Tanpuia lo kal ka hmuh chuan thildang chhuanlamin inchhung ah ka lut daih.. Be turin huaisenna ka neilo.. Khawnge ka inrintawkna zawng zawng te kha a kalbo zawh tak pawh ka hrelo. Ka unaute chuan an be liam liam hlawm a, tul kati tehchiam love. Min then atanga thla thum pawh ral em lova nupui nei mai tur chu ka biak atulna reng reng ka hre lo. Ka hua erawh anilo.. Ka tah khum anga ka mualpho ang tih ka hlau ani.

Hun aral hlek a ka rilru thlak thutin Mphil. zir turin Bangalore lamah ka chhuk ta daih a. Hostel ah pawh awm lovin in ka luah a. Diktaka sawi chuan ka tlanchhia ani. Tanpuia hmel hmuh chu sawi loh a chanchin hriat theihna zawng zawng pawh ka pumpelh vek hi a tul takzet ani.. Hetiamg a awm hi tha kati hauh lova, mahse duhthlan tur dang ka nei rihlo. Ka rilru adam deuh hunah ka zia ve mai ang tiin ka inhnem ve tawp. Ka zirlai erawh ka tluang e..

Zankhat chu message ka dawng nawlh..

‘Tlanchhia hi tunge..?’

Ka number hi engtin nge a neih ka hrelo. Ka awma chhut chawrh ang mai ka ni. Min then mai duhtawk lova min diriam zawm anih chuan ka tawrh theih chin a pel ang. Ana ka ti lutuk.. Ka in ngaihtuah fim hmanlo..

‘Duhtawk rawh..nupui pawmlai nei biak nan hun ka neilo..’

In ah chuan ka awmthei ngang lo, ka ngaihtuahna a tawi vek a, in ngaihtuah thawl turin pawn lamah ka tei chhuak a..

Bar zawnah chuan ka ding deuh vang vang a, enge ka ngaihtuah pawh ka hrelo dawr ah chuan ka lut a ka chhuak leh thuai a… Zu bottle ka khai ta ran mai.. Eng chi nge ka lei ber pawh chu ka hre chuang lo.. Zu hi vawikhat te mah ka la in chin ngai lova, mite hian an rikru hah chhawk nan an in thin niin an insawi fova, enge a an ka hre chak tlat..! Ka in anga ka rilru hahna a hnem theih chuan ka in zawm char char ang..a hnem chuanglo anih erawh chuan vawikhat pawh ka in tawhlo ang.. Ka theihtawpin ka invawng ve a, chuti chung pawhin ka duhber in min la hnawl tho alawm le.

In ka thleng a, khum ah thu in ka zu lei chu uluk tawkin ka in ta karh karh a.. Ka pum a sa hut hut a, ka taksa zawng zawng a sa vek mai.. Ka in ngaihtuah lungchhia a ka tap ta hliam hliam a. Eng vak mah hre lovin ka muhil ta daih a..

Ka luna leh rit bur chuan min tiharh a, phurlo zetin ka thochhuak a, intihfai nghal ka mamawh lutuk tlat… Zu hian rilru natna engti zawng mahin a hnem lo tawp tih ka hrechhuak bawk.. Ka in nawn tawhlo chiang ang chu. Nizan lamah khan ka tap nasa hle tih bak thil hriat ka nei lova, ka phone kan check chu missed call leh message alo awm teuh mai. Ka chhungte ho chu ka call back zung zung a, message pakhat chuan min ti phu chiang kher mai…

‘I naute enkawl tha ang che..’ tih te mai hi..

Enge maw a awmzia ni thin le.. Thil hriat fuh loh a awm nge, message arawn thawn sual aw.. Mahse ka reply nguar ang.. Heti khawp a na hian min siam a, tunah chuan thil thleng tur ang zawng zawng a thleng vek tawh tho tho..

Thla 3 a ral leh chuan ka project report siamin ka buai hle. Diktaka sawi chuan thildang ngaihtuah buai nan hun ka neilo. Ka research beihna lamah ka kal tlut tlut reng a..

Ka phone a rawn ri ral ral a… Tun ang hun zan dar 12 pelh tawh ah min be turin tumah ka beisei lo…

‘Hello..’

‘Thanpui.. Michael-a’

‘Aw..enge nita?’ Kan inbiak lohna a rei ta hle mai..

‘Thil awmzia I hriat hunah min hrethiam dawn nia aw.. Kei chuan enge thil awmzia tak ka hrilhfiah thei lovang che’

‘I thusawi awmzia ka hrelo..’

‘Nakin ah I la hre tho ang.. A nih leh phawt aw..’ Phone a off nghal a. Hemi te thian dun hian thu awmze awmlo hlir mai min rawn hrilh a nih hi.. Ka hnathawh lai chu dahin ka mu ve ta hram a…

Hun a liam bek bek a, Michael a thu rawn sawi pawh ka vei zui vak lo.. Thu mak deuh deuh min rawn hrilh zing tawh a ngai ah ka neih tawh anih ka ring.. Ka project huntiam chhung a tihzawh loh ka hlauh avangin hna ka thawk rim em em a, ka hrisel nain a tuar ta reng a, damdawiin awm ngai em chu nilo mahse ka taksa a chau in ka pawr angreng khawp mai.

Door bell a ri ral ral a… Tunge lo kal tih chhawn turin muangchangin ka tho a, kawngkhar ka hawn chuan ka ip chawih mai.. Ka hamhaih vek, sawi mai tur pawh ka hre lo… Ka sawmna pawh ngaichang lo chuan inchhung ah a rawn pen lut nghal a..

‘Enge I rawn tih dawn..?’

Ka zawhna pawh chhang talo chuan ‘I va cher ve..’ ati daih a

‘Enge I duh..?’ Ka awki a sang tawh hle..

‘I naupai chu ava lang si love..! Nge..? Nang hi..’

‘Kei hi enge..? Tanpui.. I duh duh rawn sawi turin helai ah hian thuneihna I nei lo.. Chhuak rawh… Tunah..’

‘I naute pa tur pawh I mamawh ang chuu..’ a tawngdan chuan min hnuaichhiah hle niin ka hria..

‘Chu chu I nupui hnenah sawi ta che.. Chhuak rawh..’

Min rawn hnaihin min en chiang hle.. A hmel atang chuan thlarau hmu ang mai ani.. Ka lang chhe viau ani ngei ang.. Chutiang ngaihtuah hun anilo tiin keimah leh keimah ka inhrilh a.. Min hnaih ta hle mai..

‘Engmaw I sawi..? Eng nupui nge I sawi chu..?!’

‘Chhuak mai teh.. Nang biak nan hun ka nei lo..’

A ngawi deuh vang vang a, chhuah tum hmel a pu lo..

‘Kan inbiak a ngai ani.. Nau I pai niin ka lo hria a..’

‘Naupai a..?’

‘Hlimawmi khan nau I pai tih chiang takin min hrilh a, in chesual lai ngei pawh a hmu che u.. Kei min kawp lai rengin engtin nge min phatsan a hetiang thil tenawm I tih theih..?’

‘Hlimawmi chu tunge ka hre ve lo.. I mumang anih chu..’ a thilsawi te hi thu mak tak tak hlir ani.. Engmah ka hrethiam lo..

‘Thanpui…’ a ngawi vang vang a uluk takin min en ngawt ngawt a.. ‘Naupai hmel chu I pu silo.. I titla ami..?’ Eng thu nge a sawi hi.. Thinrim lova thu kan sawi dun a ngai niin ka hria..

‘Thu phawt teh ang..’ kati ta ngawt a.. Ka dam thalo nen ka chau takzet.. In hmatawnin kan thu ta ran a..

‘Naupai chungchang I sawi chu engmah ka hre lo.. Chhan awmlo a min then atang khan thu mak tak tak hlir min hrilh fova.. Engmah ka hrethiam lo..’

Ka rilru a natna ka pai zawng zawng te tunah hian ka phawrh vek anga tichuan ka hmangaih em em Laltanpuia hi ka thlah thei tawh ang.. Ka na em em ani tih a hriat hi pawi tihna tur a awmin ka hre lo.. Makti takin min en reng a..

‘Chhan awm lova then ah che min ngai amaw..? In ngaihzawn lai reng a midang fa ilo pai chu inthen chhan tling ania sin…’

‘I sawi chu ka hre lo.. Nau ka pai lo..’ Ka insum theilo..ka tap titih tawh.. Nilo.. Ka tap pawh ani chiah lo.. Ka mittui a rawn tla ve ringawt ani… ‘Engpawh nise I nupui kalsan a min hmu tura helai hmun I rawn thleng hi thilmak ani..’ Ka inhnit hraih a, tahchhuak anga awm chu ka duhlo ve tang tang..

‘Nupui ka nei tih tunge sawi..? Eng nupui mah ka neilo.. Nang hian min hrem nasa hle ani..’

‘Nang nen kan chesual lova.. Tu fa nge ka pai ang.. Ngati nge nupui chu I neih loh..?’ Amah bia pawh ka anglo.. Ka phun zawm mawlh mawlh a..

‘Nang inih loh chuan eng nupui mah ka nei ngai lovang… Nupui nei ka nih hun tur chu nangin min neih hunah chauh ani bawk ang.. Tu fa pawh lo pai la ka nei tho ang che tiin ka rilru ka siam vek tawh.. Khawi hmunah pawh awm la ka umzui zel ang che..’

Ka bulah rawn thu hnaiin min rawn kuah a tum a..

‘Tawngkam hnih khat vanga duh duh a kuah theih ka ni hleinem’ ka lo tichang fal a.. A inla hrang lehnghal…

Kan boruak tawn chuan min tichau zual hluah hluah a, ka awmdan chu ka duh lo.. Ka khawhmuh a fiah lova, ka khur hlawk hlawk bawk in ka hria. Ka thutna nghenchhan chu ka ngheng riai riai a, ka meng lui theilo bawk.. Ka chau takzet ani.. Ka bulah chuan tawng mawlh mawlh thawm chu ka hria mahse enge a sawi ka hre theilo.. Tawng thawm chu a zawi tial tial a, a reh ta thiap a…

Ka harh chuan ka mutna chu ka khum anilo tih ka hriat rualin ka ngaihtuahna a harh nghal bawk.. Ka mit ka meng a ka hmuh hmasak ber chu Tanpuia ani.. Ka harh tih a hmuh chuan thawveng huai hmel a pu in min nuih sak a

‘Doctor chuan rilru hman rim lutuk vanga chau I nih thu a sawi a, I tha leh vat mai ang.. Na dang I nei em..?’

‘Ka tha e..’ ka ti sap a

In lamah min hawpui lehnghal turin ka tilui a, remti chiahlo chungin min hawpui leh ta a.. A bulah chuan engmah ka la sawi zawm lo. Ka chauh chu thuhran, sawi mai tur pawh ka hre lo.. Kan boruak hi sawifel tur a tam em a.. Sawifel vek theih ani chiah em tih pawh ka hre lo..

Ka in luah kan thlen chuan mut ka duh thu leh min hawsan tura ka duh thu ka sawi a, keimah chauh a min kalsan chu a tum hmel loh kher mai.. Ka hnial buai peih talo.. Ka taksa a chau bawk a reilo ah ka muhil lehnghal mai a... Ka harh chuan zan dar 1 alo ri reng tawh.. Choka lamah chuan a ri rek rek a Tanpuia chuan enge maw a tih le..

Room a arawn luh leh chuan mu lovin ka thu a. Khum bulah chuan a rawn thu hnai a

‘A hun chiahlo I ti maithei a, mahse tunah hian engkim sawifiah angaiin ka hria..’

‘Sawi rawh..’

‘Ka ngaihtuah nawn leh hian ka hrethiam chiah ani.. A hmasa berin Hlimawmi khan min ngaizawng thin a. Michaela nen in chesual lai a hmuh thu leh nau I pai thu min hrilh a, Michaela ka zawh chuan engmah a sawilo.. Zanah ka rawn biak che khan Hlimawmi sawi lawk ang chiahin min rawn chhang a, ka rilru ana in ka thinrim takzet a, ka rawn be zawm duh talo che ani.. I chanchin hriat tumin ka ngaihven reng che a, ka haw hle bawk che..’

Ka thaw hak a engmah ka sawi lo… Amah chu chiang takin ka en kal a, zam hmel apu ve deuh in ka hria.. Engmah sawi ka la tum chuan loh avang chuan asawi zawm leh a..

‘Nupui ka neih tur chungchang chu tunge hrilh che..?’

‘Mahriata..Michaela’n a hrilh..’

‘Chu mihring chuh..ala hre khawp ang..’

‘Tumah mawhchhiat tur an awmlo.. Min ringtawk nila hetiang thil zawng zawng hi a thleng lovang..’

Kan ngawi dun vang vang a..

‘Ka tihpalh.. Ka atchilh lo chauh che a, khatiang chanchin ka hriat thut khan min shock na em ani..’

‘Chhan awm miah lova min then nia ka inngaih na khan min tizak in tlinglo bik niin ka inhria.. Tu tan mah ka thatawk velo niin ka inhre bawk..’

‘Shhh.. Ka hmangaih che…’ tiin nghet takin min kuah a, min fawp ta vawng vawng a. Min kuahna chu thlahin min en ren rawn a

‘Laklawh deuh in steel works dawra I luh angai tawh lovang..’ tiin a nui hak hak a

‘Ngawi hmak rawh..’

Ka thinrimna leh ka rilru nat thute ka sawi zo thei dawnlo niin ka inhria… Tanpuia chuan dawhthei takin min ngaithla khuau a.. Ka bulah chuan rawn mu in duat takin min kuah a, ka thla a muang veng veng.. He mihring hi ka hmangaih takzet ani.. Ka la tawng mawlh mawlh lai chuan min chhang ta miah lo… Ka inher rem hret a alo muhil daih chu niin.. A muhil hmel chu hmuh a nuam kher mai.. Hmana min hmangaihtu leh ka hmangaih Laltanpuia kha ani leh tain kan buaina pawh a tawp ta e.. Aduh angin a nupui ka la ni ngei anga atana ka rinawm leh rinawm loh chu kan inneih zanah ala hrechiang ang chu… Ka confi ve tlat..

THE END….