THE LILACS By. Laura Sean Virgo

[Ngaia]

THE LILACS By. Laura Sean Virgo

Ruahsur buan buan pawh pawisa zo lovin chu hmun atang chuan ka tlanchhuak dawr dawr a. Ka hmuh tur pawh a ka rin ngailoh leh ka suangtuah phak ngai hauh loh ka hmu miau a. Ka dawngsawng thiam lova, engmah ngaihtuah fimin ka ngaihtuah hman heklo. Khawi lam panin nge ka tlan tih pawh ngaihtuah lo chuan chak zetin motor chu ka khalh pur pur a. Ka inrin hmain ka mit sulh a, ka chawl ta siai siai a…

-----------------------------------------------------------------------------------------------------

Ka pasal Lalhruaipuia (Mapuia) nen hian kum khat leh a chanve dawn kan innei ve ta. College ah kan senior ni thin in thiante zarah kan inbe ve zeuh zeuh thin tih loh chu kan inkawm vak ngai lemlo. An chhungkua in Lunglei ah an cheng a, chhungkaw hlun leh mi zahkai tak anni a, MA a zawh hnuah an chhungkaw sumdawnna thenkhat enkawl in Aizawl a an in leh lo nuam tawk takah a farnu te pahnih zirlai nen an khawsa a. MA ka zir zawh dawn hnaih ah mak tak maia suihzawm in kan awm a, kum chanve vel kan inzui hnuah kan innei ta ani. Mi tawngtam lo leh pa hrak mai, nun tluang tak nei ani a, ka zah in ka ngaisang a, kan in thlahlel tawn hle bawk. Hmeichhia in mipa lak atanga ngaihsakna leh hmangaihna an dawn tur anga ka lo ngaihtuah thin chu ka dawng niin ka inhria a, vannei ka inti em em thin. Keipawhin theihtawp a ngaihsak chu ka tihtur ani tih ka hria a, ka ngaihsak em em bawk. Nupa dang ang bawkin engemaw chang a inhnial deuh rap rap chu kan pumpelh biklo.



Umapuia nen kan inneih atangin thla ruk aral awrh tihah vanneihthlak takin hna tha tawk tak ah ka inziak tling veta hlauh a, ka bei hah nasa bawk a ka hlawhtlinna chu ka pasal, chhung leh khat thenrual thate, an zavai maiin min lawmpui takmeuh a. Hnathawk lova ka pasal thlazar hnuai a awm mai mai thei (insawi theihna nilo sela) ka ni nain, ka duhthusam thin chu mahni thawhrah ngei seng a nun anih ve miau avangin Umapuia pawn min hrethiam a, min dan talh atum biklo.



Pathian zarah tluang takin training ka zo a, Champhai lamah ka hna zawm tura ka kal angai ta a. Ka duhthusam thin hna thawk tur ni mah ila, kan inneihna ala reilo in nupa inthlakhlelh vanglai tak ala ni nen han awmhran thut mai chu kan thiamlo dunin hreawm kan ti dun nasa mai a. Thawk tan chauh a insawn dil chu thil tihchi a ni lemlo bawk nen, lungleng leh hreawm tiru takin kum khat chu kan awm hrang ta phawt a. Ralkhat atang chuan in ngaihtuah ana in hlauhthawn tur apui atam a, chawlh hlek ah chuan Aizawl leh Champhai kan kartawn dun sek mai ani. Champhai ah chuan quarter lian zetah mahni in ka awm a, ka pasal ka ngai viau thin tihloh ah chuan hna ah ka buai tawk a thildang tamtak ka ngaihtuah hman meuh lo.



Ka awmdan nuamlo nghulh thin avang chuan doctor ka pan ta nge nge a, ka rinhlelh ruk tak ka beisei ngam chiah siloh in nau ka pai thu minlo hrilh a, ka awmdan leh ka hlim zia chu tawngkam a sawifiah mai theih pawh ani lo. Thla chu nei ila ka thlawk kual nasa ngawt in ka ring. Pasal nei ve lem duh vang ni hauhlo a kum khat leh a chanve dawn mai naupai lo a awm chu thil hreawm ve tak ani reng a. Ka naupai thu chu Umapuia hrilh hlan ka nghakhlel takzet mai. ‘Reilote ah office kan chawl anga phone atang nilo hmaichhan ah ngei amah kuah chungin kan fa tur ka pai mek ani tih hi ka hrilh ang’ tiin ka in ngaihtuah phur nasa mai a. Chumi zan chuan ka muhil hleithei lo, ka dul la puar hleilo chu chulin ka nui ver ver reng mai a. Dan pangngaiin Umapuia nen zanrei tak thleng kan inbia a, ka naupai thu chu hrilh rihlo turin ka insum thei hram hram ani.

Hun aral a karhnih chhung chawlh hmang tura ka haw hun a thleng ta. Ka phur kher mai. Zing dar 4 ah ka alarm ri chuan min kaitho a, hmanhmawh hauhlo in Aizawl lam panin ka inkhalh chhuak ta a. Doctor khan motor chuan a hlauhawm tawh loh thu sawi mahse ka rilru chu a tim deuh dui tho mai.



‘ Khaw awmdan chu ka haw hle mai, tunang hun a ruahsur chu timing lo lutuk’ tiin ka phun sap a. Khaw awmdan dik tawklo nen, titi pui tur awm bawk silo, khua a har duh khawp mai. Khawzawl ah ka chawl a, vanneihthlak takin nu pakhat leh a fanu te pahnih Aizawl kal thut ngai nen kan intawng fuh a, ka lawm ngei mai. Kei ai mahin an lawm zawk in ka hria.



Hmeichhia tih takah kan titi bawrh bawrh a, muangchang in kan tlan zel a tlai lam dar 3:30 vel bawr ah Aizawl kan lut ta hram a. Ni arei duh khawp mai. Ka mi phurh te an chhuk hnu chuan rilru phur takin in lam panin ka inkhalh haw ta a. Traffic jam nen hmanhmawh hleihtheih pawh anilo.



Ruah ala sur cherh cherh a, khua a hnim in a thim deuh ruih mai bawk a. Khaw awmdan chu engpawh nise ka rilru a hlimna awm leh ka pasal hnen a thu thlen tur lawmawm tak ka neih avang chuan thil engkim a mawiin alang thar sur vek maiin ka hria.



In ka thlen chuan alo reh thiap a. Maria-i leh Adini (Umapuia farnu te) Lunglei lama an haw lai ani a, alo reh thap pawh chu mak ka ti tehchiam lo. Umapuia chuan min hmu thut anga mak ati ngawt ang, ka haw tur thu ka hrilh lawk si lova.



Hmanhmawh takin in ah chuan ka lut a ‘Umapui..’ tiin ka au lut lawng lawng a. Ala reh thap tho. Thenawm dawrah akal emawni le..? Inchhung light chu a thim thap a, mak chu ka ti deuh.



‘Umapui..’ tih pahin kan room kawngka chu ka hawng a.. Ka thil hmuh chu ka awih theilo…



Hmeichhia saruak deuhthaw a awm in ka pasal, ka hmangaih em em chu kuahin kan nupa khum ah chuan anlo mu dun a.. Umapuia pawh chuan kawra halo tih ka hmu nghal mai a.. An muhil ve ve niin alang.. Ka thil hmuh chuan min shock na takzet.. Kan nupa khum chu tih bawlhhlawh ani ang maw..? Ka mit deuh sulh a, ka dang a ro nghal huam huam a, ka luak a chhuak ut ut bawk a.. Chu thil chu en reng theilo in ka inher a hmanhmawh takin in atang chuan ka tlanchhuak dawr dawr a. Chak takin motor ka khalh chhuak a, ka inrin hmain ka mit sulh a, engmah hriat zui ka nei talo.

Helai hmun chu anuam hle mai, a reh raih in thli a thaw heuh heuh a, rilru hah leh hunawl neih chang apiang in kal ziah tawh tur anih hi.. Ngatinge ahma te khan kal nachang ka hriat loh le…. Ka van a tak..

Chutia hahdam taka ka thut veng veng lai chuan thawklehkhat ah current chak takin min man ang mai hian ka taksa chu a kang dawrh a, thahrui chak takin min hip kang vawng vawng ni maiin ka hria. Boruak inthlak thut in a lum pup pup mai a, ka taksa chu nalo lai reng reng a awm lo.. Ka kawchhung thleng chuan min pawt thip vawt vawt mai a..

“a serious khawp mai, a chhungte chu in be thei ta em?”

“Kan be thei tawh e, anlo thleng tep ang”

‘Minute 10 vel nghak leh ila ala danglam loh chuan ICU ah kan dah lut dawn nia’

An bengchheng hle mai..tawng ring hlawm lutuk… a hahdamthlak loh in a lum em em lehnghal. Helai ai chuan hmun reh deuh awm kha ka duh zawk.. Ka chau hluah hluah mai..

Hmm..ka hahdam leh ta e.. Helai hmun nuam tak hi Umapuia pawn nuam ati ve khawp ang.. Hmun hring dap, reh raih bawk si, thli thawt heuh heuh na…. Nilo.. Thawklehkhatah ka ngaihtuahna chu a rawn harh thut a.. Ka naute.. Ani theilo.. In ah ka haw leh vat angai.. Umapuia bula ka hriat ngailoh hmeichhia lo awm ve ringawt kha engtin nge ngawi reng a ka kalsan theih zawk chu le..? Naute..kan fa ngei ka pai ani tih Umapuia ka hrilh angai ani..

Khawnge ka phone..? Ka bag pawh a awm miahlo.. Hmanhmawh takin ka tlan niin ka inhria a, ti em em a chak hian ka tlan thei tih pawh ka lo inhre lo. Reilote ah in ka thleng a kawngkhar chu inkalh lovin alo in lock ringawt a. Ka kalsawn reiloh tehreng nen khawnge anlo kalbo hman a..? Hmanhmawh zetin room lam ka pan a kawngkhar ka va hawng nghal rawp a..



Khum chu hmanhmawh taka kalsan tih hriat reng hian alo chuar nuaih a, ka thinrim mgei mai. Ka phone ka hmu bawk silo.. ‘Kan in lamah tlai chaw ka ei mai ang’ tiin in chu ka chhuahsan leh ta ngawt a.. Ka ngaihtuahna chu a tawi tut in ka rilru a mang vek bawk a… Ka awmdan chu ka hrethiam lo in mumang ang ruai in ka awm a, chiang takin engmah ka ngaihtuah hleithei lo..

Kan in ka thlen pawh chuan tumah an awmlo tih hriat zetin kawngka chu pawn lamah a inkalh khap a. Amak kati in ka hrethiam lo takzet ani..

Khawi ah nge ka kal tak ang..? Ka chhungte leh ka pasal ngei pawh be mai turin ka phone ka hmuzo silo. Kawng a ka kal lai chu mahni pawh in control hleithei lo khawp in ka nghetlo a, thahrui reng reng ka neilo.. Ka inrin hmain thahrui chak takin min pawt lawp ang mai hian ka kang leh ta vawn vawn mai a.. Ka awmdan hi adik lo… ‘Mihring pangngai hetiang in a awm theihloh’ tiin ka rilru a mangang kher mai..



Boruak inthlak leh thut in ka lum pup pup a, ka awmdan chu ka hrethiam theilo.. Chianglo ruai in damdawiin khum a mi pakhat mu leh khum bula mipa ruangam ni awm tak thu ka hmu a, zawimuang in ka hmufiah telh telh a, ka bul vel kan en chuan kanu leh pa leh ka unaute ho chu lungngaih hmel takin an thu kun nghiai hlawm a..



‘Kapa enge thil awmzia hi? Engtin nge ka awm..?’ Ka tawng chu hre awm pawhin an awmlo..



Pindan chhung a mipa thu chu ka va en a.. Karei.. Umapuia ani.. abul khum a mu chu tudang nilovin keimah ngei ka ni.. Ava mak em..! Ka awmna atang chuan chiang takin ka va hmu thei tlat nia…



Mi pakhat tawng thawm ka hriat chuan ka thawm hriatna lam chu ka en vat a..



‘a lung a phu chang chang a, nghah tawp mai loh chu tihtheih dang kan nei rihlo..’ Kanu chu insum zolo in a tap chhuak hawk a, ka unau te pawh an insum thei heklo. Kapa chuan kan mangan changa atihdan thin ang bawkin kanu leh ka unaute chu a ahnem a, ani pawh a insum nasa hle tih ka hmu reng mai.. Ka tan engmah tihtheih reng reng annei lo…



Hetiang thil zawng zawng thlen chhan hi tudang vang mah anilo… Ka pasal Lalhruaipuia vang ah ka puh lo thei lo..

Awlsam takin room chhung ah chuan luttlang in khum bulah chuan ka kal hnai a, ka hmel ka in hmuh chian chuan ka in khawngaih ngei mai. Ka lu chu an tuam var vek a, ka mit bul vel chu a duk reih ruih bawk a.. Hmuh nuam tak ava nilo chiang em..



Umapuia chu ka en a, a mit chiah langin a hmai a hup a, hreawm ati viau anih hmel.. A mit chu a hnawng chap in a sen ram a..



‘Engvang tehchai in nge hreawm itih lehsi a..? Hetiang a ka awm hi pawi iti thlawt lo.. I duhthusam ala nilo zawk hial ta ve ang.. Min chhang rawh.? Nang mi tenawm lutuk hian engvangin nge hreawm ilo tih ve..? Khawnge I hmeichhe mutpui kha a awm?’ tiin ka au tuar tuar a.. Ka thawm a hrethei lo tih erawh ka hmu reng mai..



Khum bula monitor rikdan danglam thut avang chuan phawk zetin a hawichhuak a.. ‘Khawnge doctor kha’ tiin pawnlam a pan nghal ruak ruak a..



Ka harhchhuah hlau niawm fahran in… ‘Kei hian engkim ka hria alawm.. I awmdan tenawm lutuk hi ka hre vek tawh.. Ka damtha leh anga I chaklo khawp ang..’ tiin ka au zui bawrh bawrh a..



Ka chau ngei mai..Khum a ka taksa mu reng chu ka en a, chutia ka en renglai chuan ka tlu riai riai a engmah ka hre zui talo..

Engchen a rei nge engmah hrelo a ka awm ka hre lo. Ka harh hlawl a, ka taksa na tluk tluk chu tuar a har khawp mai. Ka che thei hauh lo a, ka mit takngial pawh ka meng thei lo.. K rilru erawh a harh…



Kut lum thar thar hian ka kut chu dimte in a vuan a, ka kut chu lakang in a fawp niin ka hria..



‘Kim…harh tawh rawh.. I muhil rei tawh lutuk..’



‘Lalhruaipui leh.. I va tenawm tak em.! Ka chhungte lak ah chuan lem I chang chhunzawm zel ani maw.. Duhtawk tawh rawh..’ tiin ka in ngaihtuah thinrim ngang mai. Engmah ka sawichhuak thei silo. Ka rilru harh mahse engmah ka ti theilo miau a, ka tan chhun leh zan in awmzia anei tlem khwp mai. Ka lungphu atha tawh a chu chu ka chhungte tana lawmna tur thil awmchhun ani rih.. Ka rilru a harh ani tih hriattir turin chakna ka nei silo.



Umapuia chu ka harh chang apiangin ka bulah a awm ani tih ka hre thei a.. A peih hi ka tia.. Mahse a awm tho mai.. Ka harhchhuah dawn leh dawn loh a hriatloh a, ka chhungte laka thatchhuah pawh aba ve reng reng alawm. Engkim hretu ber lah in engmah ka ti thei silova.. Kanu chuan ka harhlo ni a ngai chung pawhin min be mawlh mawlh thin a, kanu tawngkam atangin damdawiin ah chuan kar hnih lai ka awm tawh tih ka hre thei a, hmasawnna dang hmuh tur a awmlo.. Ka chhungte tan pawh beisei a asang mawh khawp ang..



Hmeichhe phun sar sar ri ka hriat chuan ka muhil lai chu min tiharh a, amah chauh in a awmlo tawp mai.. Mipa aw chuan



‘Duhtawk rawh.. chutiang sawi hun anilo..’ atih ri ka hria a, Umapuia aw ngei ani tih ka chiang.. Hmeichhia chuan



‘sawi tan dawn chauh a, nakin nghah ai chuan tuna tihfel law law a tha zawk..’ chu hmeichhe tawngri chu ka hriat ngai pawh ani lo..



‘Shhh…chhuak phawt rawh..’



Kawngkhar inhawng thawm ni awmtak in ari khap a.. Thawm dang hriat tur awmlo in areh zui vang vang a.. Inla duhtawk dawnlo emni..? Ka rilru natdan chu ka sawi thiamlo.. Rapthlak ka ti lutuk.. Pasal pawmlai nei rengin a nupui damlo khum a amut reng laiin hmeichhe dang a kawp thei dawn em ni..? An thusawi awmzia kha enge tih phei chu ka hre hauhlo nain thil tha lam anih ka ring theilo.. Ka thatchhuah vat vat angai ani.. Heti ringawt chuan athalo tawp mai.. Ka beidawng mai dawn emni..? Ka pasal in hmeichhe dang kawp in min uire san a, ka naute ka chan bawk a.. Dam chhuak tur a beih hah phu khawp damchhan tur ka nei tawh chuang emni..? Ka ngaihtuah na chu a buai mup mup in ka thaw a pik kher mai..



Kan intawn tirhte ka ngaihtuah let a, ka hlim loh hlau em em thin kha hetiang hian a danglam thei ang tih tuman an ring bikin ka ringlo. Ka thil hmuh leh hriatte hi ka mumang niin harhchhuak hlawl ila ka va ti em.. Mahse ka mumang mai ani silo…



Thla khat chuang damdawiin ah ka awm ta.. Ka ning hluah hluah tawh nangin in lam a hawn erawh ka duhlo bur. A tlem thei ang berin ka tawng bawk. Ka rilru natna hian ka ngaihtuah ati tam em ani. Umapuia bulah phei chuan tawngtheilo ang hmakin ka awm.. A hmel pawh hi ka hmu tui love.. Hma ka sawn ve hret hret a, ka nunna hlauhthawnawm in a awm tawhlo bawk a, ka taksa erawh ala chak tawklo hle.



Thil ri deuh rawp rawp hian ka muhil lai chu min tiharh a..



‘Ngawi hmak rawh.. Ka lakah hian engmah sawitur I neilo..’ Umapuia tawngri ani tlat.. A thinrim hmel hle bawk.. Hmeichhe aw chuan zamlo tih hriat zet hian



‘I nupui chetsual ni khan I bulah saruakin ka mu tih hi I hrelo tak tak tih sawilo mai rawh.. Nangpawn I duh ve tho tih ka hrechiang lutuk tlat..’



‘Nang hmeichhe tenawm lutuk hi.. Ka lakah hian beisei tur engmah I neilo.. Helai hmunah hian vawikhat pawh rawn lang tawh suh..’



‘Chu chu ka thu thu ni rawh se.. Ka enliam hauhlo ang che.. I nupui hi rawn thachhuak pawh nise I lakah rinna chhete pawh anei tawhlo ang tih hre ta che.. A chetsual chhan hi nangmah vang ani tih a chhungten anhriat hunah nang hian min la mamawh deuh deuh dawn..’



‘Chhuak mai rawh..I sawitur a awm love.. Ka nupui hnenah hian engkim ka hrilhfiah vek thei..’

An thusawi chu ka ngaithla reng a, mak kati lutuk chu ka thidang lo chauh.. Umapuia hian enge maw sawifiah tur a neih chuan ang lee.. Chu nu hmel hmuh tum chuan ka meng dere a, a hmel chu tunhmain ka la hmu ngailo hrim hrim.. Hmeichhe samkir, ngo lam deuh, inpen parh tak ani..



Ka chhungte hnenah engmah ka sawi lova, anni chuan chesual palh ve hrim hrim ah min ngai reng ani.. Eng thu pawh hria ila, ka thachuak anga ka pasal ka hmangaih em em hi ka then ngei angai.. Ka then lohna chhan tur reng reng ka hrelo.. Phatsan ching mipa hian min phulo…



Hun aral bek bek a, keipawh ka tha ta viau mai.. Umapuia chuan min awmchilh chawt a, a chhungte pawh an theih ang tawk tawkin an rawn lang reng bawk a. Umapuia chuan min be seuh seuh reng a, mahse tenawm lamah a kal tlat.. Ka harhchhuah atang khan vawikhat te pawh ka melh lo..min biakna chhan phei chu a teuhlo lutuk ani ringawt.. Min khawih hlek pawh ka duhlo.. Ka chhungte chuan ka hriat ang thil engmah hre ve heklo le, ka awmdan chu mak anti in ka chetsualna lamah khan ka insawh khawlo ah an ngai hmiah.. Ka bulah erawh engmah an sawi tam lo..



Nikhat chu nidang anglo takin kan chhungte tumah an rawn lang lo.. Umapuia chu ka mutna khum bulah chuan a thu reng a…. Kan ngawi dun char char.. Ka be awmlo emai..



‘Kim..ka laka I awmdan hi ka hrethiam lo.. Engmah I sawi duh bawk silo.. Minti mangang ania..’ a thusawi chu hre awmin ka awmlo.. Ka maimitchhin san hmak..



‘Kim..ka laka I awmdan hi hreawm kati takzet ania.. Keimah vang a chesual ini tak tak em..? Khami ni khan I rawn haw dawn tih pawh min rawn hrilh miah lova..’ Ka nuih aza zawk.. Thil hrethiamlo turah min ngai emaw ni le… Ka thinrimin ka haw takzet bawk..



‘Ka haw lutuk che.. Kan inthen bawk ang..’ Ka tawng chu a zawi hle.. Ka harhchhuah hnua a bula ka tawng hmasak ber ani bawk.. Awle.. Tunah chuan ka tha tawh bawk a engkim tihtawp hun ani ta e..

Thawk ala hak a, a ngawi ta vang vang.. Ka la meng duh chuang lo..



‘Joyce kha i hria em..?’ Ka chhang lo..



‘Kim.. Joyce kha I hria em..? Hetah hian a rawn kal fova, thu awihawm loh tak tak arawn sawi bawk a.. Nang hi then mai tur che in min rawn hrilh bawk a.. I chetsual ni khan kan in ah I rawn haw niin a sawi a.. Khami ni khan..’



‘Engmah ka hrelo.. I bengchheng.. I tawngri kha ka hre peihlo..!!’ Ka tawng ring peih der lo.. Dawt phuah pawh a thiam zek.. Ka pasal hi ka lova hrechiang lo em..!!



‘Tuna ka sawi lohin engtik ah nge sawina hun min pek tawh ang..? I pasal ka nia..min ring tur I nia sin..’



‘Engmaw I sawi.. Engang pasal nge I nih.. Min uire santu hi ka pawm thei tawh lo che.. In thusawi pawh ka hre vek tawh.. Engmah sawi belh tur a awmlo. Min hawsan rawh.. I in ah sawn ka rawn haw tawh dawnlo..’ An thusawite kha avaia ka hriat leh hriatloh chu ka hrelo..



‘A tha e.. Kan thusawi I hriat chuan engmah ka hrelo tih I hre ngei ang..’



‘Ka hrelo.. Haw rawh..’ Ka thu hriat zawng zawng ah khan ka rin lehna chhan tur ka hre lo.

Mapuia hian ka mizia a hrechiang a, min nawr luihin awmzia anei dawnlo tih pawh a hrechiang ngei ang.. Amah vanga ka rilru na bakah naute ka hloh chhan pawh ama vang vek ani.. Ka rilru awmdan leh a laka ka riru zawng zawng hi ama hriatlai a sawi chi pawh niin ka hre lo.. Amah berin engmah hrelo a inti miau a..



‘Enteh..i ngaithla peihlo anih pawn ka sawi tho ang.. I duh leh I beng kha lo hup rawh..’



Hmmm..ka hup awmlo emai.. A sawi anga ka awmna tur chhan ka hrelo..



‘I chetsual ni khan dawrah ka awm a, ka khua a sik avangin ka haw hma a. In ka thlen hnuah Joyce kha lo kalin eitur min rawn kensak a, rinhlelhna pakhatmah ka neilo.. Rei pawh awm lovin a chhuak lehnghal.. Lunglei lama ka hmelhriat ani a kan inkawm khawm vek thin. Ka ngaihzawng pawh ani ngailo bawk.. Ka dam tha chiahlo bawk nen thildang ka siam peih lova.. Kim..eitur ka siam peihloh zia I hriat kha.. Chuan..Joyce eitur rawn ken chu ka ei a, ka mu nghal.. Rawn phone che ka tum a ka phone tlang theilo che a.. Ka harh leh chuan kawr pawh ha lovin kalo mu a, khua a thim ruih tawh.. Ka mutthilh hlanin ka lo phelh anih ka ring.. Mazualtei’n (Ka nau chiah) min rawn bia a, damdawiin a I awm thu leh I that loh hle thu a rawn sawi a, hmanhmawh takin damdawiin lamah ka rawn kal nghal.. Chu zawng chu ka thil hriat chu ani.. Joyce helai arawn kal a thu mak deuh deuh arawn sawi a, a thusawite kha engmah ka hrethiam lo..’ A ngawi deuh vang vang a.. Engtin mah ka chhang lova, ka en duh hek lo…



‘Kim.. naute I hloh avangin pawi ka ti takzet.. Ngati nge naute I pai thu min hrilh miah loh..’ Ka kut a rawn vuan de de a.. Ka lo thing tla nghal..



‘I sawi zo em..? Haw tawh rawh.’



‘Kim.. ka ti tak tak ania..’



Ka rilru a buai vek.. A sawi ang hi ni tak tak ta se.. Ka pasal hi ka lo ring sual tihna ani dawn a.. Heti taka a inphah hniam thei hi thilmak ani.. Hetiang hian vawikhat mah ka lakah ala awm ngailo.. Mipa tak ani thin.. Nge min bum hlawhtlin theih ringin lem a chang.. Ka rilru a buai nuai nuai…



‘Haw tawh rawh.. I bulah ka rawn awm tawh dawnlo.. I nupui kani tawh lo..’ Ka rilru ana..ana takzet.. Umapuia hi ka then thei tak tak angem ka hre lo.. Mahse min bum ni a ka hriat chhung chuan abulah ka hlim dawn chuanglo tih ka hria.. Tawngtur awm ang ang chu kan tawng tawh mai aniang chu.. Ka rilru ka sawhsawn dawn chuanglo tih a hrethiam ani ngei ang; ngawi rengin Cabin atang chuan a chhuak ta a..



Ka ruak huai a, ka mal ta ngawih ngawih niin ka inhria.. Mahse min phatsan tu chu pawm leh thei niin ka inhre chuang lo.. A tel lova nun hman chu a harsa khawp ang.. Ka ngaihtuah zawm duhlo…



Ka pasal in lama ka haw duh miau loh avangin kan in lamah ka awm ta a. Umapuia chuan min rawn biak pawh atum reng a, mahse ka be duh ngailo.. Hetiang thil tehnuaih a thlen takah chuan ka chhungte pawh ka thil hmuh leh hriatte chu ka hrilh lo thei ta lo.. Ka thu chauh ngaithla lovin Umapuia pawh an va zawt chiang ani awm e..chu chu tun hnuah chauh ka hria.. Ka chhungte ka atangin Umapuia pawh Lunglei lamah a phei tih ka hria a, a chanchin tumah ka zawt ngai lo..



Thla hnih aral leh chuan ka hriselna chhuanlamin Aizawl a insawn kan dil a, vanneihthlak deuhin rei vak lovah min sawn thla ta a, mahni in atangin hna ka thawk thei ta a, a nuam khawp mai.. Umapuia pawh karkhat chhung zet chu min biak arawn tum ngai talo.. Ka lawm rualin hreawm ka ti.. Min phatsan niin ngai mah ila ka hmangaihna leh ka duhna te areh chuang silo.. Ngai ngawih ngawih chungin ka belo lui ve tang tang ani…



Nikhat chu ka office ah hmeichhe pakhat arawn lang hlawl a.. Khawiah emaw chuan ka hmu tawh chiang..



‘Joyce ka nia..’ Ka phu zawk.. Henu ka huat zia hi…chhut bawrh bawrh mai ka chak et et..



‘I hlim zel ang chu maw..?’ Ka aw chu ka rin aiin a chhuak dam..



‘Nilo..Ka thiltih sual man ka tel mek ani.. Mapuia hi ka ngaizawng thin a, ka hmangaih ani.. Nang ka thentir theih chuan ka neih theih ka ring a.. Mahse anilo...’ tahchhuak tak hmel a pu a, ngawirengin ka lo en tawp.. Sawitur ka hrelo..



‘I chetsual ni khan Mapuia nen engtin mah kan awmlo.. Nangin min rawn hmu ang tih pawh ka ngaihtuah phalo bawk.. Ka duhthusam tih puitlin tumin ka bei mai ani.. Vawikhat chauh pawh a bula mut kha ka chak em a..ka tihloh tawp tur ka ti ani.. In chungah..’ Chu nu chu leh.. Ka ten lutuk..



‘Khawngaihin ngawi reng khan min chhuahsan ta che..’ Ka tawngri pangngai pawh a anglo.. Ka tawng ringlo nain alo ngaithlatu tan chuan a kha fal fal khawp ang..



‘Kala sawi zolo..’ a tim khawp mai



‘Sawi zo suh..’ Ka thutna chair vir thei chu ka hmang tangkai teh e… Ka inher hmak..



Ka boruak tawn chu hnathawh zawmna chi pawh anih loh avangin ka haw hma ta ringawt a.. Chumi zan chuan Umapuia ka bia ang nge ka be lovang tiin zan dar 2 pelh rak thlengin ka in ngaihtuah a..

Tunah hian Aizawl ah a awm nge Lunglei lamah a awm ka hrelo… Ka phone tlang thei der lo lehnghal.. Min ngaihdan tur leh zah pawh dawn lovin Adini ka phone ta ringawt a..



‘Umapuia chu tunah khalam ah khan amahin a awm.. Kan awmve a phal lova.. Umakim..kan ngai lutuk che ania..’ Ka thaw huai mai.. Umapuia chhungte hian min huat ka rin tehreng nen, chutiang tawngkam ka hria chu ka beisei hauh loh thil ani... Thildang kan sawi kai hmain line a in cut ta daih. Ka phone nawn duh talo mai.. Ka hriat duh ber Umapuia awmna ka hre tawh tho..



Khua a var a, rilru phur ru tak huphurh bawk siin Umapuia hmu tur chuan ka insiam a, ka chhungte pawh engmah ka la hrilh lo..



Umapuia te in ka thlen chuan alo reh thiap a.. Tim ru takin door bell ka hmet a, chhanna ka hmu lo. Kawngkhar chu ka pawt a, alo inkalh lo hlauh.. Inchhung ah ka lut nghal.. Inchhung chu luah loh in ang maiin alo hnawk nuai a..



‘Umapui..’ ala reh thap tho



‘Umapui..i awm em..?’ chhanna a awmlo.. Ka hlauthawng thut.. Kan nupa room lam chu tlanin ka pan dawr dawr a, kawngkhar chu ka va hawng rawp a..



Karei…!! ka thil hmuh chu ka awih theilo



Room chhung chu a hnawk tih piah lam ani.. Thawmhnaw adarh nuai a, ama thawmhnaw leh ka thawmhnaw te nen… Zu bottle a thal pheng phung bawk a.. Umapuia chu bang kilah hian tukverh lam hawiin chhuatah alo thu a, a cherin a bawrchhawr hle a, ka thawm leh thildang reng reng hre awm pawn a awmlo.. A thil melh ngar ngar chu enge tih ka en chuan ka phu zawk…



Kan inneih tirha kan siam dun, ka pangpar ngainat em em Lilac pot chu hring duah hlap hian alo inhung a.. Ngawi rengin pot chu ka la a, a bulah chuan ka kalhnai a… Zawimuangin min rawn en a, a hmel chu ka enrei ngam lo.. Min demna mitmeng min thlahlel em em ani tih zawng zawng ten en ka hmutel vek.. A bulah chuan ka thuhniam a, ka insum thei tawh lo..



‘I mawl ami..? Ngati nge tihian I awm..’ tiin nghet zetin ka kuah a, ka tap hlawp hlawp bawk a.. Ngawi rengin min kuah let a, a thaw ham ham a..



‘Kim..Ka hmangaih che’



‘Ka tihpalh.. Ka tihpalh..’ Ka inthiam lohna avang chuan ka tah a chhuak zual…



‘Heihi ka mumang ani tawhlo tiraw..?’ Atawng chu a zawi hle..Ka kuah nghet zual sauh a..



‘Nilo..I mumang anilo.. Ka ringhlel leh tawh ngailo ang che..’



Darkar hnih aral leh hnu chuan fai sar leh thawven hmel takin ka bulah a thu a, hlim takin kan phun dun sep sep a.. Ka kalsan hlau niawm takin nghet takin in kuah bawk a..



A TAWP TAAAA….