ALL OF ME BY Mami Chawngthu Dnu

[Ngaia]

Ka thiannu nen inhmuhna tur a kan ruat MC lam pan chuan ka inkhalh chhuak a, ka va thlen chuan alo la awm loh avangin ka han nghak deuh a, minute 10 hnu velah pawh alo la thlen loh avang chuan ka han call a,”Awi! Bawihno, hei Laldailoa(kan thianpa Dave-a) ka hmu hlawl a, ka rawn inphurh phei tir mai”a rawn ti a, ka ngei ru ngei mai. Amah vangin ka kual hrep phah kha a ni si a. Ka motor dahna lam pan tum chuan ka han ding a, ka phone chu ka la bih reng avang chuan ka kal na tur pawh ka lo en lem lova, mi pakhat nen chiang zet hian kan insu her sawk a, ka phone, ka taksa peng pakhat ang maia ka dim leh ka duat chu boruak ah a leng a, chhuata a tla tur pawh chu ka en ngam lo, ka maimitchhing ringawt a. Ka tah chu a chhuak nghakl tun a, “Ehe! A keh anih hi, a va han pawi tak em! “ tih ri ah chuan ka hawi chhuak a, ka hlauh ang tak thil chu a thleng ta ngei e. Thinphu dep dep chuan ka phone chu chupa kut atang chuan ka han la a, a lcd chu a lo rang thla nuaih a, ka thaw halh a,”Mami, ka tihpalh lutuk kawng ka lo en miah lo a”chu tlangval chuan a ti sawk sawk a, ngawi reng chuan kalsawn ka tum a,”Lo ding lawk” chu pa bawk chu a ni, “Eng?” bung deuh chuan ka han ti a, “Pawi ka ti takzet ani, hei hi ka phone number ania, ka tihsual chu ka chawi ngei tur ani. Tlaiah min lo bia la, kan siam tir dawn nia, tunah chuan meeting ka nei si a, ka tlai tawh a, ka kal phawt mai ang aw”a ti a, lehkha them phone number inziahna chu min pe a, a kal nghal a. Nilengin ka mood chu a fuh lo,ka thian te pawh chuan ka phone ka duat zia an hria a, min tuarpui hle a, tumah nui peih pawh kan awm lo. Ka thian tha ber Rinpuii chuan,”D..chupa chu call I tum em?”a ti a, ka lu chu ka lo thing a, “Call mai la, hnathawh nei anih hmel lehnghal, chawi tir ngei ngei rawh”Dailoa chuan alo ti a, “A..Ka thiam loh ani ve tho a, chutianga a chawina chhan tur a awm lo alawm”ka ti a. kawng kha lo en ilang chuan kan insu lo tur hi ani a, chutiang a mi thatna zar zo tuma mahni inthiam chawp chu ka duh lo a, ka mizia pawh ani hek lo. Ka chhungten min siamsak theih leh min siam sak anga, theih loh chuan scho ka lak hunah ka siam tir mai ang.
.
Chaw kan ei lai chuan ka phone chungchang chu huphurh zetin ka sawichhuak a, ka nu chuan kan fimkhur loh thin zia chu min hrilh leh hrep phawt a, ka pa erawh a ngawi thung. Ka u chuan a chaw thleng seng pah chuan,”Ka pa phone hlui torchlight support kha hmang rih mai la”a ti a, a nui sung a, ka chaw ei tuina a ti bo, ka tho hluai a,”I la puar lo kha, ei zo rawh”ka pa chuan a lo ti a, ka thu leh nge nge a. Engkim mai chu a ho zo vek hian ka hria,”Naktukah I siamtir dawn nia”ka pa chuan a ti a, tlemin ka rilru a nuam deuh, mahse a pangngai a ang pha tawh dawn chuang lo, ka rilru chu ala na tho mai. Ka lehkhabu chu ka inchhawp hnawk viau na a engmah ka rilruah a lut thei lo. Ka phone ah lah chuan whatsapp msg ka dawng zut zut a, engmah lah chu ka chhiar thei der si lo, ka off ta ringawt a. Zingah hma takah ka tho a, ka phone siamtir tura kal nghal mai chu ka tum a, mahse ka pa in class kal paha siam tir a tih leh tak tlat avangin zing kar chu rei ti viau chungin ka tlingtla ve ta hram a. Class kal tur chuan ka insiam a, ka chhuak zui nghal a. Phone siamtirnaah chuan ka han entir a, a sen ngai zat an sawi chuan ka nghing lawih thei, a thar man deuh thaw sen alo ngai anih chu! Sony phei chu a part hi a to an ti a, lunghnur zetin ka la let a, ka chhungten to an ti dawn lutuk, engtinnge ka sawi ngam ang?
.
“D..a pawi ka ti e, keimah vang ah ka ngai ka rilru hi nuam theilo”Rinpuii chuan alo ti siam siam a, “A ho lutuk D, thleng ve tur reng anih vang anih hi”ka ti a, “min lo nghak tur khan lo ti lo tawp che ila tha tur hi ania”a ti a, ka khawngaih zawk ngei mai. Class ka neih dawn avangin classroom lam chu ka pan a, ka va hawi let chuan rilru hah hmel deuh hian alo thu a, kei hi ka thiannu rilru ti nuam lo vek khawpin ka lo awm anih hi, ka insiam rem tur ani ti rilru chung chuan ka lut a. Ka p thil sawi fo thin chu ka hrechhuak zui nghal a,”Mahni mimal harsatna te, rilru natna te hi midang te tuartir ve kher tur ani lo”a ti thin. Keipawh ka phone ka ui luatah ka thiannu tana hrehawm khawpin ka lo awm reng alo ni.
.
Ka lehkha zir zo chu ka laptop la chhuakin fb ah ka online a, friend request lo awm ho chu vai nilo ho zawng chu ka han accept a, story group ah lutin an thil post thar chu ka chhiar kual mai mai a, chat chu ka on ngai lem lo. Ka inbox chu a rawn sen vat a, msg pakhat hi ka lo dawng a, en nghal chuang lo chuan ka thil chhiar lai chu ka chhiar chhunzawm a, nakin deuhah chuan inbox chu hawng ve reng reng ang tih pahin ka hawng a, Lalremmuana Chhangte tih hnen atanga ka dawn alo ni a-
.
“Hey, naupang, ka va zawng rei che ve”tih hi alo awm a, a ngaihna ka hre lo hle. Miin min hai ani ngei ang ka ti rilru a, ka ngaihtuah mek lai chuan a msg alo thleng leh a,
.
“I seen tih ka hrereng ania aw..Min hre tawh lo mi, I phone titla tu kha”
.
Ka hre chhuak chiah, ka phone ringawt ka ngaihtuah avang khan a hmel pawh ka lo en lo tih ka hrechhuak a, a profile ah lutin a thlalak chu ka en a, a lo chhiat loh dan chu mak tak a ni!
.
“Hey!! Puitling.. I tih tlak anih loh kha, ka tih tlak alawm, lo buai duh suh” ka han ti ve a,
.
“Inhmu ang”
.
“A tulna ka hre bawk lo e a”
.
“Luhlul zek, ka rin ang chiah l nih hi, ka zawng chhuak leh tho ang che, in ina lokal kher I duh chuan a tha alawm”
.
“A tul pit lo”
.
“Lets see”
.
Chhang tawh lo chuan ka out nghal daih a, engtinmah kan in hi a hre lo ange.
.
Practical kan tih rei avangin nidang ai kan bang tlai a, in ka thlen chuan kan kawtah i20 car la thar ver vawr tak hi alo ding a, confi zetin ka tlanpel a, garage ah ka in dah fel hnu chuan inchhungah luh nghal mai ka tum a, car kawngkhar chu a rawn in hawng a, “Naupang” tih ri ah chuan ka hawilet nghal thuai a, awi leh! Kan mihring pa chuan min rawn zawng chhuak tak tak anih hi,”Nang pa chu leh!”ka mak tihzia chu ka thup seng bik lo, alo nui suk a,”Ka thusawi tawh ka ti hlawhtling lo ngai lo, a ti hlawhchham tu nih chu tum buai lo mai rawh”a ti a. Ka lo ner sung a,”Motor ah hian ilo lut dawn nge I chhungte bulah ka rawn sawi dawn?” a han ti zui a,”Engmah sawi tur I nei lo, engvangin nge I thiam loh ah chuan I ngaih tlat a? keimah ngeiin kawng ka en lova, ka tihsual nih kha”ka ti a, min rawn pan a, hnai zet hian min rawn bih a,”Kal ang”ka banah min kai a,”Enteh, in hausa ang tih chu ka ring thiam mai, mahse a thlawnin tuma thil lak hi ka tum lo ania, min hrethiam zawk rawh..Um?”tlawn titih chuan ka han ti a. Ka rilru dik tak pawh a ni. Ka ban a vawnna chu a thlah a, min melh run a,”I la naupang viau na a I fel ka ti, mahse ka rilru hi a nawm phah der silo a, enteh, naupang” “Naupang ka ni ziah lo”ka lo tih khalh a, “Tupawh chu lo ni la a pawimawh ber lo, ka tihtur hi min tih tir la chu chiah chu ka duh ani mai”a ti a. Fb ah te pawh friend request min rawn thawn a, chutianga ka hming pawh hre lo anga a awm chu ka rilru alo na det a, ka tilang lem lo. Ngawi reng chuan ka zui tawp a, a motor chuan phone dawr lam chu kan pan a, kan thleng tep tih ah ka phone ka keng lo tih chu ka han hrechhuak a, “Ka phone ka keng reng reng lo”ka ti sap a, “A thar lei a hlawk zawk ta ve ang”tiin a nui suk a, rum zet chuan ka melh a, a hre duh thak lo.
.
Ka phone Sony Xperia Z2 ang chiah chiah, a rawng pawh danglam hleklo chu ka hum leh ta ran mai. Mahse ka inthiam chiah chuang lo, a thlawna mi thilpek dawng angah chuan ka in ngai a, nuam lo ka ti ru viau tho mai. Chumi ni kan inhmuh bak chu Remmuana nen chuan kan inhmu leh ta lova, biak pawh kan inbe ngai hek lo. A tihtur nia a hriat a tih zawh chuan a duhtawk viau niin a lang. Ka rin ang ngawt chu alo ni lo anih ka ring bawk a, phone lei tura kan chhuah dun khan a mize thenkhat chu ka hriatbelh a, a caring em em a, a smart tih ka hre thei nghal bawk. Min rawn biak leh thut chu ka han ring a, mahse ka beisei sang deuh a ni.
.
Kan thianho chu exam hma a chaweikhawm kan lo tum lawk tawh avangin Dailoa inluah lam chu kan pan tham tham a, amaha awm anih avang hian thil tihkhawm nana kan hman ber ani. Kan thianho hi paruk kan ni a, Rinpuii nen chiah hmeichhia kan awm a, mahse kan inkawmngeih hlawm a, high school atanga inkawmho tawh kan nih vang hian mizia pawh kan inhre chiang hlawm a, Rinpuii leh Dailoa hi higher kan kal atang an inngaizawng nghe nghe. Mahse thianho kan awmkhawm in mit ti kham in vawikhatmah an awm ngai lova, ka thiante mah nise ka fak ru ve thei hle. Thildang chu siam thiam viau lo mah ila bai chhuan hi ka thiam ve zek a, chaweikhawmnaah tawh phawt chuan ka kutah an dah hmiah zel. Dailoa chuan soda alo neih loh avangin a in piah dawr teah chuan lei turin ka kal a, mi chu an lo thut tam deuh avangin luh mai chu ka ngam lova, pawnah chuan ka tawi khawmuang hret hret a, ka rin ai an thut rei avangin ka thian dangte chu tirh mai tumin ka let a, thui pawh ka kal hma chuan,”Naupang” kawngchhak deuh atanga rawn ti ri hi ka hria a, ka hawi chho vat a, kawngpui kual lai ah chuan Remmuana chu a motor chhungah alo thu nui ver ver a, “I zakzum mah mah nih kha, mamawh pawh lei ngam lo khawpa awm te chu”a han ti zui a, min lo hmu reng a ni chiang mai. A motor atang a rawn chhuk a, min rawn pan a, “Zep lo chuan I mizia hi a cute thlawt” “I buai lohna turah hian I lo buai peih ve ngawt mai”ka ti hmak a, ka kuta cheng 10 ka ken chu a rawn la a, “Enge I lei dawn?” ka thusawi chu hre awm ang pawhin a awm lo, “Soda” ka tih rual chuan dawr ah a va lut a, rei vaklo hnuah a rawn chhuak a, soda chu a rawn hum ran a, ka nuih a za ru a, ka lawm bawk si, mahse ka tilang duh hran lo. A thil lei chu min pe a,”enge hetah I tih teh daih a?’a ti a, a buaina tur a awm loh thu bawk chuan chhan ka han tum a, mahse ka chunga a that em em laia sual lo chhuah chu ka inthiam leh chiah lova, “Chaw kan eikhawm dawn a?”ka han ti a, “Mipa an tel em?” alo ti nghal a, “Um..a nihna takah chuan hmeichhia pahnih chiah kan nia” ka tih chuan a hmel nelawm tak kha a danglam nghal vek,”Chawei tui ule”tih pah chuan a motor lam chu a pan a, rawn hawilet miah lo chuan a tlan liam nghal daih a. A chetdan teh thut chu mak ka ti a, sawi sual ka nei ti dawn ila ka sawi sual ka hre bawk silo. Rilru khingbai zetin ka let a, ka thiante chuan rei min lo ti hlawm a, a chhan erawh ka sawi lo.
.
Kan chaweikham zawh chuan rei awm lovin ka haw a, ka pa hi mi strict ve tak anih avangin ka thiante pawh hian min hrethiam a, tuman lung lo ah an la ngai lo. In ka thlen chuan ka nu chauh a lo awm a, ka pa chu committee turin a lo chhuak daih a, hmahmawh baklekin ka haw ve a, hresa ila chu ka haw hma tawp lo ang. Ka room ah ka lut a, exam a hnaih tawh avangin peih vang pawh ni lo chuan lehkha zir a ngai a, ka han keu ve leh thawr a, ka zir tak tak hma chuan ka phone chu a rawn ri a, en lem lovin ka pick up a,
.
“Naupang, I haw tawh em?”
.
Ka thu ngil nghal zawt a, ka haw tawh thu chu bah deuh nak in ka sawi a,
.
“A that chu, hmeichhia, mipa ho zingah lehnghal rei deuh awm tur anilo”
.
A va han thu lo chiang tak, ka ngawi reng a,
.
“Enteh, I laka thuneih ka tum viau vang pawh ani chuang lo” mahni inthiam vaklo chuan a rawn ti leh a,
.
“Puitling, ka nunah hian midang in thu an neih hi ka duh vak lo a, min hrethiam aniang chu, bakah exam a hnai a lehkha zir ka lo tum mek a” ka han ti a,
.
“Ok.. sorry lutuk, zir tawh rawh, tha deuhin I zir dawn nia” a ti, phone chu a dah nghal a.
.
Engatinge hepa hi mak deuh deuh a awm le? Ka rilruah a awm ta reng a, hetiang hi ka hlauh avangin ka hlat hram hram a, mahse min rawn hnaih leh viau thung thin si. Ka phone number thlengin a lo hre leh a, a hriat tum tawh chu engtianga harsa pawh nise a hre ngei ngei thin niin ka ring hial a, chu chuan min hneh leh ang lawi a!
.
Class kan kal tawh loh avangin in lamah lehkha ka zir a, Science ka lo la kher hi ka inchhir leh thin. Ka rilru hi chu a chak nameuh mai, mahse rilru chak ai chuan beih hram hram peihna hi a lo pawimawh si a, ka beidawng lek lek fo. Chhun thingpui in turin ka nu in min rawn ko a, ka in mek lai chuan kan kawtah motor insu ri bur ka hria a, rang zet hian ka tlanchhuak a, ka nu chuan min rawn zui ve bawk a, bike leh car hi alo ni a, bike khalh tu chu an lo bawr deuh laih laih a, “Bawihi, lo han zir zawm rawh, i buai leh ang”a ti a, thisen ka hmuh hian ka lu a hai vak thin vanga min khak a ni. A thu awih mai lo chuan ka han ding a, luh mai ka rilruk lai chuan pa pakhat hi a rawn au a,”Motor ah dah vat ru, thisen a hloh hnem emai”a ti a, an rawn zawn chu thisen baw nuaih chu hmuh loh theih ani ta lo, ka in ring hman lo ka te vak a, a bak engmah ka hre tawh lo. Ka han harh leh chuan damdawiinah ka lo mu reng a, ka nu leh pa leh ka u an lo awm kim thap a, mahse ka lu la vir muai muai chu ala reh loh avangin ka meng peih lo. Ka lo muhil zui leh ani ang, ka han harh leh chuan khua lo thim vek tawh a, ka bulah tumah an lo awm lo. Ka nu chu ka ko a, a awm hnai lo anih ka ring, ka khum bula mite ho an muthilh danah chuan zantir lam chu ani lo phawt anga, mahse khawnge ka chhungte hi an awm?
.
“I lo harh tawh ani maw? Pawnah zial ka lo zu lawk a?”
.
Ka mit chu ka han nuai a, ka thil hmuh chuan min thawng leh ta,
.
“Puitling…. Enge I tih?”
.
“I damlo ka awmpui che”
.
Ka maimitchhing ringawt a, ka men leh chuan hnai zet hian min lo en a,
.
“mak deuh deuh hian tinge I awm a?”amah pawh en lo chuan ka ti a,
.
“Naupang, ka hre bik lo. Tlaiah khan lo biakche ka tum a, I u in i phone alo chhang a, biak che ka duh thu ka sawi chuan damdawiiah I awm thu alo sawi ta mai sia, ka hlauthawng hman lutuk”a rilru tak tak a sawi ve pawh a ang, a ding a, tukverh chu a hawng a, a dak vang vang a.
.
“Khawnge ka chhungte? Ka chhungten min awmpui se ka duh”
.
“In ti luhlul duh suh, I chhungte phalna thlapna thlapin anih hi ka awmpui che, I mamawh chu lo sawi la, ka ti mai ang” a ti dam thluam a.
.
Ka hnial buai peih lo, vawi engzat chiah nge mak tak tak hian a chet ang tih chu ka ngaihtuah a, ka chhungte chu mak ka ti zual, an hmelhriat pawh ni lo kutah an fanu neihchhun hi an dah phal ania, ka rilru a na thut a, ka mittui chu a rawn luang chhuak a,
.
“I lung a leng viau mi? khawngaihin tap suh, ka thlem thiam lo ania.. um.. ?”ka mittui chu a rawn hru a, “Anihna takah chuan I pa te office a an pu ber hi ka pa ania, I pa nen hian mimal takin kan in hre tha hle bawk, ka thian I nih thu leh awmpui che ka dil a, an remti ve mai ani. Min ring tawk a, ka lawm hle bawk ani” a han ti a.
.
Thil ka hrechhuak chiah, ka pa in a sawi fo thin kha anih chuan a nupui hual motor accident a thi kha a ni ngei ang. Ka pa hi mite pawhin an harsatnaa an pan ve thin, mite harsatna ngaihthlaksak peih reng anih avanga an ngainat em em ani a, an pu fapa pawhin a ngainatzia a sawi ka hre tawh thinzawk. Han zawh tawp chu thil nuam ani lova, ka pa ka la zawt zawk mai ang tih ngaihtuah chung chuan ka lo muhil ve ta siai siai a. Zingah ka harh chuan ka nu chu alo awm reng tawh a, ka hawisan hmak a, ka lung a awi hlawl lo ani.
.
“Bawihi, Mamuana khan I pa a dil nasa si a, I pa mi hriatchian anih bakah tih takzetin a ngaihtuah ve che a”
.
“Ka mamawh em em zawk cheu sin” ka hnuk te chu a ulh teuh a, ka nu chuan ka hnung chu a chul heuh heuh a,
.
“Kan tihpalh lutuk aw..”a ti a, hrehawm a tihzia chu a aw ah ka hria, ka in her a, ka nuih sak a, min rawn kuah vawng vawng a, ka nu angchhung ah chuan ka thla hi a muang a ni.
.
Doctor chuan chhuah min phalsak avangin zankhat ka riah hnuah damdawi atang chuan kan chhuak a, taksa chak loh a sawi theih loh a, lehkha zir chu ka hna pui ber a ni. Ka phone ah chuan whatsapp tone a rawn ri a, data ka lo off theihnghilh ani maw tiin ka han en a, Remmuana msg alo ni,
.
“Damdawiin atang I chhuak tawh tih ka lo hria a, ka lawmpui a che. In enkawl tha la, damlo tawh suh ang che, naupang”
.
Ka nui sak a, ka data ka off a, engvanga min ngaihtuah viau nge maw anih le?
.
.
Exam kan tan tawh avangin ka phone ka khawih ngai lova, ka mizia ah chuan ka in thunun theihna hi ka chhuan ve ber pawh ani. Ka zirlai chu awlsam ka ti fahran lo bawk nen theihtawp tak meuh chhuah ka duh a, thiante hlawhtlin laia lo hlawhchham bik chu ka duh lo ani. Nilai zan ani a, chaw kan ei tlai avangin kan eikham meuh chuan inkhawm dar a ri nghal mai a, ka nu tan zan ani a, tin, ka u thupui hawn ani bawk a, an vai chuan inkhawm turin min chhuahsan vek a. Thleng seng pah chuan tv ah zai ka ngaithla a, ka sak pui bawk a, kawngka kik ri pawh ka lo hre lova, kawngka inhawng rawk ri ah chuan ka hawi phawk hra a, Remmuana chu a lo ding run a, “Kawngka I kik thiam lo mi a?”ka ti a, ka aw chu a nelawm hran lo,”Vawithum kik hnu pawha hre thei lo te chu ka lo luh mai loh nak ah”min melh rawm chung chuan a han ti ve a, ka duai duh bik lo, “Ka chhungte an awm lo” ka tih chuan pawisak loh hmel zet hian kan thutthleng ah a thu awn duai a,”I chhungte chu ka rawn kal chhan reng reng lo” a ti a. A ipte atang a zial a la chhuak a, “Zuk in phal em?” “Khi khi en la ti nia” a lu chung a “Zial zu lo hram rawh”tih in tar chu ka kawk a, thleng ka sil hmawk hmawk a, ngeiawm zet hian a nui hak a, ka va melh lai tak chuan a bengah a zial chu alo zep a, ka nuih a za ru viau, a chang hi chuan thu a awih ve mai thin bawk a, a mizia hi hriat a har a nih dawn hi. Ka thleng sil chhung chuan kan tawng tawh lo, ka sil zo ka kut ka hru hul a,”I zir tan nghal dawn mi?” a ti a, ka lu chu ka bu zauh a, “Rin ai tak chuan I puitling ve anih dawn hi”min en chuang miah lo chuan a ti a, a bulah chuan ka ding a,”I duh leh ka chhungte lo nghak la, lehkha ka zir tawh dawn” tih pah chuan kal ka tum a, a lo ding vat a, ka banah chuan min pawtlet pawp a, kan in dinchilh ta ran a, a palian bawk a, ka chhoh en ha a, a rim chu ka hip vang vang a, a rimtui takzet ani, chutianga hnaia kan indinchilh takah chuan amah hnaih ka hlauh chhan pawh ka hrechhuak, hepa hi mipa dang ang mai chuan ka en hauh lo a ni tih hi, min en kar a, ka mit chu ka la sawn duh bik lo, ka dar ah a kut a nghat a, enge thleng tur ka hre vek, mahse chetsawn nachang ka hrelo, a hmui chuan ka hmui a rawn si a, ka la chesawn chuang lo, chutah dim leh duat tak hian min fawp a, ka harh chhuak zawk, ka nem sawn dawrh a, room ah ka tlansan ta daih a. Ka room kawngka chu ka kalh a, ka thu hnawk a, ka awmah ka kut chu ka han dah a, ka zak lutuk chu khuk ral daih mai ka duh. Ka room chu a rawn kik dawt dawt a, hawn ka tum lo kher mai, “Naupang, lo hawng the, sawi dun tur kan nei” a ti a, engtinmah ka chhang lo. Minute 5 vel chu a dinna ngaiah a ding reng a, hawn ka tum lo tih chu a hrethiam ve ani ang, “Ka tihpalh lutuk, ka tum lawksa ani bik lo ania, engmah kha a thleng lo angah ngai ang che”a ti a, ke pen thawm ka hre zui a, a kalsawn ta ani ang. Ka kawngka chu ka hawng dek dek a, kan in atanga a chhuak chu ka va hmu phei vuai a, engmah thleng lo anga ngai turin min ti amaw? A va han zahthlak ngai ve!
.
Ka mu tui lai chu ka harh hlawl a, zanin a thil thleng khan min tibuai a, engvangin nge kha mihring khan ngampa taka khatia min tih? Ka mitmei pawh hmu lova a chet ngam danah khan keimah zawk hi ka lo zuam awm viau em niang le? Ka rilru chu a hrehawm takzet, ka hun kal tawha mipa pakhat vanga ka natzia leh ka zirna pawh ka hlawhchham thak dan te chu ka rilru ah alo lang nawn leh a. engtikawngmah in khatiang kha tawn nawn leh hi ka duh lo a ni. Ka tho a, ka lehkhabu chu ka han keu a, mahse ka rilruah a lut thei chuang lo. Ka phone ka switchoff reng tawh chu ka han la chhuak a, ka on a, whatsapp msg alo thleng nghal zut zut a, group ho chu chhiar lem lovin ka clear pawp pawp a, Remmuana msg chu alo awm nual a,
.
“naupang, min ti buai takzet anih hi, engvangin nge ka nunah hian I lo lan kher?”
.
“Mahse I lo lang lo ang tih chu ka hlau tho bawk si”
.
Tih te leh a dang a awm nual a, ka mittui chu a tla ve tawp,
.
“Puitling, mak deuh deuh hian ka chungah khawsa suh, ka in control theihna hi ka hloh ang tih ka hlau ani” ka phun chhuak sap a, ka duh tih hi ka pawm mai a ngai ani.
.
Thla khat dawn kan exam hnuah kan zo ve ta hram a, dik tak chuan ka thawven huai ka ring kha ania, chutiang pawhin ka awm chuang lo. Khami zana thil a thlen hnu khan Remmuana nen kan inhmu leh miah lo a, min rawn be hek lo. Ka scooty servicing tih tir turin ka chhuak a, reife ka awm hnuah an khawih ve thei tawk a, nghah pahin thlanglam kawngpui chu ka thlir dauh dauh a, motor rawn tlan chho mek chuan ka mit a la nghal var, ka hai lo chiang khawp lehnghal, Remmuana ani. Mahse a bulah chuan hmeichhia a thu tel ve tlat, an nui dun var var a, an hlim hmel kher mai, ka en reng a, min rawn hmu ve lem lo. An tlan liam chu ka zawi hnak a, ka rilru a na ve ani lo maw kei hi? Ka thiannu Rinpuii te inah ka leng kawi a, a room ah kan awm a, Dailoa nen an chanchin chu min lo hrilh nghal mawlh mawlh a, ngawi rengin ka ngaithla a, “D…rilru hahna I nei mi? I chhungten an hau che nge?”mak tih hmel tak hian min melh kar a, ka lu chu ka thing mai a, “Min bum lo chiang viau ang Zosangzual” min melh rum a, ka lo nui mai a,”Engineer-a a rawn che chu ni em lo maw?”a ti a. Ka bialpa hlui ka thinlung tikehsawm vektu, a hming pawh a kan koh ngai loh, Engineer a zir vanga kan koh hlen tak ani. Ka chhanna nghakin min melh kiau a, “D..Ka phone..”ka tih lai chuan a lo pawt chat a, “awi! Ka ring reng ani” “Hey! I rin ang kha ani lo” a lo then tha a a, “D…ka hrethiam lo lawm, mak deuh deuh hian a che a” ka han ti leh a, thutak deuh zawk hian min en a, a thutna chu a siam tha mawlh mawlh a, “Amah kha enge a thawk I tih kha?”a ti a. Ka han ngaihtuah a, engmah a hna lam chungchang ka hre hauh lo, “Ka hre lo, a pa chu father te office a an pu saw ania”ka ti a. Kan ngawi dun reng a, “D..”a phur hmel kher mai, “Enge?”ka lo ti a, “Ti khan awm tawp la, ngaihsak miah suh, han induh deuh larh la, a rilru chu a thup reng thei hauh lo ang” a ti a.
.
Ni thum lai a liam leh tawh, han induh khum tur pawhin hmuh tur a awm lova, ka rilru atang dah bo daih hi a tha ber tih ka hria alawm. Ka nu pangpar ho chu tui ka pe a, earphone vuahin ka phone a hla ka ngaithla pah bawk a, hmeichhia ni mah ila pangpar vel hi ka lawm lem lo. Ka nu pawh hian tui pe turin min phut khat khawp a, a hman loh tawpah erawh ka hreh hran lo. Kan in bula motor ding dat chu ka hria a, ka ngaihsak hran lo, horn a rawn rik chuan ka phu zawk a, ka earphone ka la thla a, Remmuana chu alo nui vur vur a, theihnghilh ka tum veleh a rawn in lan leh a, enge hepa khawsak dan hi a awmzia ni ngai? Ka rilru te hi a hre vek bik em ni,”Naupang, thingpui min lo lum teh a” kan garage bulah chuan a motor chu a hung tha nghal a, a rawn let leh hma in ka earphone chu ka bengah ka hnawh lut a, tui chu ka pek chhunzawm mawlh mawlh a. Ngawi rengin ka bulah a rawn ding a, hre lo ang in ka awm lui hmak a, ka pangpar tui pekna chu min rawn laksak a, “Thingpui va lum la , ka lo pe ang”a ti a, “Ka lum peih lo, in inah lum tir la ni mai lawm”ka ti a, min nek sawn a, “Um, ka han pe zo anga, keimah ka lum mai ang”a ti a, a nui tawh hauh lo. A thusawi chu a ti leh ngei ang tih ka ring a, phur lo zetin thingpui lum tur chuan ka kal a, ka va hawi let a, pangpar tui chu a pe mwalh mawlh a, ka nuih chu a za ru hle, “Ka leng chhuak dawn a, I lo in lum mai dawn nia”fiamthu in ka ti a, mahse ka nui duh lo thung. Min rawn melh hrawk a, ka luhsan nghal daih a, choka ah lut hmasa duh lovin ka room ka pan a, ka va chhuah leh chuan kan sitting room ah a lo ding run a, enge a rilru ah awm ka hre thei lo. Tv chunga ka scooty chahbi chu ka han la a, “Heyyyy!”a vin kher mai,”Chhuah I tum tak tak elaw?” a ti a, “Tum lo ila ka sawi miahlo ang”ka ti a, “Khawnge I kal dawn?”a ti a, “Tlangval te pawh kan hmu ve dawn te pawh ani thei a, I hriat vek a tul lo viau”ka ti a, a hmel chu hmuhnawm khawpin a danglam a, ka game khelh chu a nuam chho dawn riau in ka hria. Boruak chu a han hip vang vang a, “Naupang, kal pui duhna che ka nei” “Khawiah maw?”kei hi kal pui duhna min nei maw? Engvang nge nil eh pek ang? Ka kut chu ka kuangkuah a, cho taka hmachhawn hi ka duh ani, a chunga ka rilru hi a hre tur ani bik lo, “Min zui la I hre mai ang” a ti a. Chutih lai tak chuan ka nu alo haw a, Remmuana a rawn hmu chu an ri nghal hluai a, thingpui lum tur chuan min han tir zui nghal a, ka nu min tirhna anih vangin ka hnial ngam lo. Ka nu bulah chuan chhuahpui min duh thusawiin a han dil nghal a, ka nu lah chuan a lo remti ve hmak si, ngawi rengin a car ah chuan ka chuang a, kan tlan chhung zawng chuan kan inbe lo. Ka han hawi kual a, thlanmual lam kan pan tih ka hre mai a, hepa hi a nupui hual chuan alo thihsan tak tak em ni? Ka pa lah ka zawt chiang ngam ta ngang si lo a. Motor atang chuan ngawi rengin a chhuak a, kei erawh ka la thu reng a, rei vaklo hnuah kawngkhar chu a rawn hawng a, “Lo chhuak ve lawk la”dam thlup hian a ti a, ka chhuak ve mai a. Ka hmaah chuan a kal a, ka zui ve zel a, thlan lung mawi fahran in phunna ah chuan a tawp chat a, tunge tih hriat tumin hming in ziak chu ka han bih dak dak a, “Zosangzuali, kum 23” tih chu ka zuk hmu a, ka hming ang chiah chiah anih hi ka ti rilru a, a ngawih reng avangin sawi tur ka hre bik lo. Ni chu a tla dawn suar suar a, chu nit la tur sen eng chuan ka hmaa mipa ding mittui chu a rawn chhun de sar sar a, ka awm a nuam lova, awmdan tur pawh ka hre lo. Ngawi rengin engtia rei nge kan din ka hre lo, “Ka tihpalh lutuk naupang”ka darah chuan min rawn vuan a, “I nupui hual chu em ni?”ka ti a, a lu chu a han bu nghat nghat a, “A pawi hle mai”ka ti a, sawi tur dang ka hre lo. A mittui luang karah chuan a rawn nui sak a, ka sam chu a han tuai thur a, “Naupang, heta ka hruai chhan che hi I hria em?’ ka lu chu ka lo thing a, a thu a, min pawt thu ve a, “Dik tak chuan Sangtei nen hian tleirawl tirh atanga inzui a inkawp chawt kan ni a, thihna chauh lo chuan min pawt hrang lo ang kan ti thin a, thihna chuan min then hrang ta ngei chu anih hi” a han chawl dat a, “Ka hmuh hmasak ber che khan I mizia mahni induh tawk lutuk te, mahni inngaihlu taka thil in ti vel khan ka mit ala em em a, ka hriatchhuah hmasak ber pawh kum 5 kaltaa ka chan tak ka hmangaih Sangtei kha ani. Hmuh nawn leh che ka chak a, mahse ka hreh em em bawk a, a chhan chu ka rilru I ti thar leh dawn tih kha ka hrechiang tlat a, mahse ka umzui ta tho che a, ka ring sual hauh lo, in mizia a zawng zawng chu ka ti ngam hauh lo, a tam zawk hi in in ang ka ti ngam sak, ani nen khan innei turin kan intiam a, nupaa doctor nih a clinic hawn kha kan chak thei hle a, sawrkar a luh khan kan chak ngai lo reng reng” hul hak in a han hui a, “MBBS zir tur chuan entrance kan pe ve ve a, RIMS a zir tur in a in ziak tling a, kei erawh ka in ziak tling ve ta lo. Mahse private a zir chu ka tum tho a, Delhi ah ka awm a, ani pawh Imphal ah a awm ve ta a. Vawikhatmah kan la awm hrang ngailo a, a tirah chuan a harsa kan ti ve thin khawp mai. In hau ngai miah lo kha kar alo hlat chuan kan in hau ve bap bap fo a, mahse rei kan thinrim ngai lo. Ka nupui turah ka dah nghet hmiah a, ani pawhin a pasal turah min dah ve hmak bawk. Harsatna te chu tawk lo kan ni bik lo, mahse kan inthen na tur khawp khan engmah kan ti ngai lo. Kan chhungte ve ve pawhin an hriatpui kan ni a, kan pahnih a kan khawvel kha zim ve hle bawk, a chhan chu midang kan ngai lova, kan pahnih kan nih tawh chuan kan hlim em em thin. Hun a lokal ve zel a, kan zirlai pawh kan zo ve ta hlawl a, kan hlim dunzia kha ka la feel thiam”a maimitchhing vang vang a, ka lo thaw dep dep thung a,”Kan haw theih tur kan hriat atang khan ka helhhawlh hi ka mu thei lo reng reng, ka ngaihtuahna ah kan pahnih inneih bak engmah a awm ngai lo. Ka pa pawhin kan duh phawt chuan internship kan tih zawh veleh inneih min phalsak nghe nghe a, chumi zana kan hma hun kan suangtuah te kha kan zan hnuhnung ani tih reng kan suangtuah phak lo. Rei tak thleng kan inbia a, kan inbe zo thei lo, kan inbiak zawh meuh chuan zing lam dar 3 alo ri hial a, khatih lai khan kan hma hun lo hre lawk ni ilang tlaivar thak khan kan in be tal tur ania” a aw chu a han thian a, “Khua alo thim der tawh anih hi naupang” a rawn ti daih a, “Sawi zawm leh rawh, ka chhungte chuan min ngaihtuah lovang”ka lo ti a, a a thle bak a, “Chumi tuk ah chuan hospital ah emergency kan neih avangin zing atang ka duty a, phone khawihna hun pawh ka nei miah lo. Chhunah lunch ei tura ka kal chu ka phone ka han en a, Sangtei miscall alo awm ve nual a, ka han call back chuan a pickup thei lo. A buai anih ring in ka call nawn ta lo a, mahse a hnu reiloteah min rawn call chu phur fe hian ka lo pickup a, mahse ka thu hriat chuan min thawng lutuk, Sangtei te bazaar kal haw lam chu an chuanna auto leh truck a insu a, ka pawh chhawn lovin a hmunah a boral tih thu chu a roommate in min rawn hrilh anih chu! Ka phone ka thlauh a, engmah ka ti theilo, ka melh ngai ka melh ngawt ngawt a, ka phone rawn ri leh pawh chu lak nachang ka hre lo, ka Mizo thian ve ber Asa chu a rawn lut ve chiah a, min hmuh chuan ka normal lo tih hria in a rawn tlan vat a, ka phone ri reng pickup pawh tum lova ka lo melh ngawt ngawt chu a han la vat a, ka nu tih ka hre mai. Mahse ka tawng chhuak thei lo, ka a vek a, ka khawvel a tawp ta tih chiah ka rilru ah a awm a, ka thianpa in kan room min hruai thlen chu ka hre deuh riai ruai a, mumal in engmah ka hre lo. Kan upa ber hi Chandigarh ah a awm a, keimah vangin a promotion hmuhna tura exam pawh nei thei lovin a rawn kal a, Mizoram ah min hruai haw ta ani. Ka ngaihtuah let leh pawhin engmah hi chianga hriat ka neilo, kan inchhungah ka lut chu ka nu in min lo tahkhum a, mahse ka mittui hi a hul vek, ka tap chhuak thei lo a, ka chhaw chhuih ani ber mai. Ka thlen zan chuan Sangtei ruang paw halo thleng ve dawn a, an inah ka chhungte nen kan phei a, min hmu apiang an tap a, kei lah chu mi ang lo ang maiin ka awm bawk si, chu chuan an mittui a ti tla nasa zual a, khatih lai khan thih ve daih tluka chak ka nei lo. Khati khawpa mittui hul kha a ruang a rawn thlen meuh chuan awrawl chhuah in ka tap ta hawm hawm a, ka nupui ni mai tura ka lo ngaih, hlim takin an inah ngei hian kan in hmu anga, kan inkawm anga tia ka lo beisei chu a taksa lum na reng nei tawh lo zawk chu ka hmu ta si, awih har ka ti a, mumang anih ringin harh chhuah hram te ka han tum a, mahse a tuk khawvar chuan a tak anih zia a rawn lantir a, phum mai tura an kal pui lai te chuan ka hmangaih Sangtei ani tih chu ka ring phal lo ani. Kumkhua atan vawikhatmah hmu leh tawh ngai lo turin thlan khawhar ah amah in an zalh a, khawhar taka nung turin min kalsan hlen ta. Ka khawvel, ka engkim tia ka lo sawi thin chuan khawvela mal taka awm turin min kalsan a, ka thlah hauh lovang che min ti thin tu chuan kumkhua atan thenna awm tawh lohna hmunah chuan min lo hmuak turin min lo thlah ta ani” a mittui chu a hru zauh a, ka mittui chu ka dang seng lo, ka kuah thlawp a, “Puitling…..I va lo tuar nasa em em ve”ka ti a, ka tap zawih zawih a, ka hnungah a beng thak thak a,”Naupang, min ngaihthlaksak avangin ka lawm e aw, ka thawl hawk tawh” a ti a. Khua a thim tawh avangin kawng chu hmuh a har hle a, motor awmna lam pan chuan kan in kai chho ta hnak hnak a.
.

Ka muthmunah chuan ka ngaihtuah neuh neuh a, ka vanduai ka lo in tih ve em em kha engmah alo ni lo, Remmuana thil tawn chu rapthlak ka ti a, ka khawngaih a ni. Chutatang chuan kan inbe nasa em em a, ka pa nen hian a harsatna min hrilh awmchhun kan nih thu pawh a sawi a, a dik thlap ang tih ka ring. Mi pawh chi ani lova, mize ri zawk zawk chi hi a ngaihthei bau lo. Mahse a mize mak tak chu ala danglam chuang lo, a harsatna engkim min thlen atang khan ka tan unaupa ang maiin a awm a, a nau a duat em em angin min en ni berin ka hria. A lakah ka rilru pawh hi a haider hmak niin ka hria a, a chang chuan ka rilru a na ve thin. A lakah beiseina ka lo nei sang hman viau pawh ani mah na! Nikhat chu keimah chauh in ka nghak a, class kan la tan leh loh avangin in ak nghak deuh ber a, hemi ni pawh hian ka nu chu bazaar a kan in luah tu’n toilet vel complaint an neih avangin endik turin a kal a, mahni in ka awm a, ka khua a har ru hle. Tv en pah chuan ka mu a, ka lo muhil sek aniang doorbell ri ah ka harh a, ka va hawn chuan Engineer-a chu a lo ding reng a, kumhnih dawn kan inhmuh loh hnuah kan han inhmu leh hlawl a, a ti a, a lo luhna tur chu ka han kian a, ngawi rengin kan in zui lut a. Engineer a zir tirh a kan in zui ve lai ai khan tunah chuan alo puitling ve hmel ta hle a, a taksa zen sei thlarh thin pawh kha a lo danglam a, a chum ve hmaih tawh a, amah alo sang tha thin bawk a a taksa chu in phut mawi tak ani tawh. Ka rin loh dan deuha ka hmachhawn avang chuan ka hamhaih ve lek lek,”I hriselna te a tha em?” dam thlup hian a ti a, a miziaa ka ngainat em em thin kha ala pu reng niin a lang,”Aw tha e. Engtiknge I lo haw a?”ka ti a, “Nimin piah khan ka lo thleng, lokal nghal vat ka duh a, hun ka nei lawk lo a”a ti a. Engvanginnge lokal chu a duh kher? Khang kumhnih chhung khan a rawn haw apiangin a lokal beiseiin ka lo thlir thin a, vawikhatmah alokal lo. Tunah ka beiseina zawng zawng a bo hnuah a lo lang leh si, chhan awm lova min kalsan kha na ka ti a, chhan awma alo let leh pawh ka duh hek lo. Amah melh kanin tv chu ka en a, ka bulah a rawn in sawn a, “D..ka ngai thei lutuk che asin” a tih chuan,”Ka hming pangngaiin min ko rawh, ka awm I ti nuam lo tlat”ka lo ti a. A ner nak a,”Ka thei kher lo maithei, kha hming kha ka ngai tel tlat ani”a ti a. Ka ngawi reng a, dik tak chuan kan inthianho in kohna kha ani hian a phu ve tawh in ka hre lo ani. Ka thinlung zawng zawngin a ni hi ka ring thin a, mahse ka rinna kha a tichhe vek si,”I hnenah hian lo let leh ka duh”ka mitah chuan min melh ran a, “I tlai tawh”ka lo ti hmuk a, “D, ka lakah feelings I neih te kha ala danglam lo tih ka hria, khawngaihin min ngaidam rawh, ka tihsual zawng zawng kha siam tha leh turin hun min pe rawh”a ti a. Chutiang em em a a confi chu ka thin a ti rim zawk, “I hresual anih chu, nang hi engatanmah ka ti tawh lo che. Ka na thin em em a, mahse ka dam vek tawh”ka ti ta hmak a. Ka thutna atang ka tho a, “Min chhuahsan mai rawh, khatiang thil kha engmah sawi ka peih lo”ka ti a, “Ka hrethiam che alawm , ka tihnatzia che pawh kha ka hria, mahse khawngaih takin lo inngaihtuah rawh, ka lo nghak reng ang che”a ti a, muangchangin a tho a, a chhuak ta a.
.
Ka chunga thilthleng te hi a mak thin ngawt mai, ka duh em em laiin min kalsan a, tunah ka nuna ka dahbo hnuah lo let leh a duh a. Engvanginnge khang ka mamawh lai khan ka tan a awm loh? Tunah chuan midang ka nunah a rawn lang a, chu lah chu ka beisei ngam der si lo. Ka whatsapp tone ri chuan ka thil ngaihtuah lai chu a rawn ti tawp a, Engineer-a lek chu niin, a beidawng har leh zek dawn ani ang. Chhanglet lo chuan ka chhuak leh ringawt a, dik tak chuan Puitlinga ka tawn hma kha nise chuan ka ngaidam leh hial maithei, ka rilru thlak danglam nana Puitlinga ka tawng pawh hi ka lawm tawk reng reng e.
.
Kan thianho inhmuhkhawm kan rawt avangin kan in pui ber Dailoa in lam chu ka pan a, ka va thlen chuan an lo awm kim thap tawh a. Ka va luh chuan chaweikhawm nghal an lo rawt thlu leh hmak tawh a, bazaar turin Rony leh Siamtea an kal nghal a. Ka phur loh ber tum ani hial ang, mahse ka phur lohna chu tilang lo turin ka in thup hram hram thung. Thuthlenga ka mu chu ka lo muhil aniang, thawm ri hak ah chuan ka harh a, kan thiante bazaar kal pawh an lo thleng tawh a, rawng an lo bawl tan hi a lo ni. Ka va tho chhuak ve a, dawhkan bula Engineer-a lo thu chu ka han hmu nghal a, ka thin a rim kher mai. Rinpuii chuan ka mitmeng chu alo hai lo,”D, Engineer-a hi a lo haw lai te ania, Dailo-an a sawm ve a”alo ti sawk sawk a, ngawi rengin pawnah ka chhuak a, ka lung a awi lo takzet ani. Ka scooty bul ka thlen chuan Rinpuii chu alo chhuak vat a, “D, tihpalh, kan sawi chuan I lokal duh loh kan hlau si a”a ti niah niah a. ka thiannu chu chiang takin ka melh a, hnuai lam alo bih ngar a,”D, ka rilru tur hi in ngaihtuah miah lovem ni? Ka chunga a thiltihte kha I theihnghilh ta em ni?” thawk ka han la hak a,”Ka hmu peih thlawt lo, ka kal mai ang”ka scooty ah chuan ka chuang a, Engineer-a rawn chhuak chu ka hmu a, hmanhmawh takin ka ti nung a, ka tlan nghal a. Ka lama tang tlat thin ka thiante chu vawiin ni zet zawng ka thin an tirim a ni. Ka rilru tur pawh ngiahtuah lo leh min rawn miah lo khan engvangin nge kha mihring kha an sawm ve? Ka tah chu a chhuak hlur a, ka tlan chak bawk a, kan in chu ka thleng thuai a. Garage a ka tlan lut tur chu side glass atang ka hnunga tlan chu ka han bih a, Engineer-a chuan min lo zui zel hi alo ni. Ka in dah fel a, inah luh ka tum chu Engineer-a chuan min lo dang a,”D, sawi dun tur kan nei, khawngaihin reilote chiah”a ti a, “Engmah sawi tur ka nei lo, I hnenah hian lo let ka tum lo, a chiang em?”a mitah chuan ka melh kar a. Min vawnna a kut chu ka thingthla a, kan in luhna step ah ka chho a, Remmuana chu kuangkuah hian a lo ding a, min lo melh reng a. Ka han hmu thut chu ka phu zawk a, ngeiawm zet hian a nui sak a, inchhungah a lut a, ka zui lut ve a. Ka nu leh ka pa chuan tv an lo en a, ka lut min hmuh chuan ka nu in min lo ko vat a,”Kha I u Mamuana’n chawei turin a rawn sawm che a, kan rawn be tlang thei silo che a”a lo ti a. Engvanginnge an inah chaw ka ei ang, ka duh lo reng reng. Ka va melh a, tv chu a lo en daih a,”Ka hman hleinem, kan thianho chaw kan eikhawm dawn, rawng kan bawl vek tawh. Thil theihnghilh ka nei a, ka rawn haw leh lawk anih hi” ka han ti a. Vawikhat chu an inah ka kal tawh a, anu leh pa pawh an fel khawp mai, mahse chawei tur khawp chuan ka tlangnel lo ani. Chiang zet hian min melh a, ka mit ka la sawn nghal a, ka room ah ka lut a, reife ka awm hnuah ka phone a rawn ri a, Remmuana alo ni. Pickup loh chu ka tum zet a, mahse ni thei em in ka hrelo, ka han la a,”Naupang garage ah rawn kal rawh, tunah”tih pah in phone a dah hmak a. A duh dana a pawh phar tur ka ni lo hrim hrim, khawiah mah ka chhuak lo ang. Ka pheikhawk ka phelh a, ka phone ka off a, ka mu ta daih a. Dailoa inah khan ka mu tawh na a ka muhil leh ta tho a, ka harh leh chuan khua alo thim vek tawh. Ka tho vat a, ka chhungte chuan chaw an lo eikham tawh a, ka nu in thleng alo sil mek a,”Bawihi Mamuana nen in hauhna in nei em ni?”a lo ti a, “Neih pawh ka hre lo, tinge?”ka ti a, “A rilru kha a nawm loh hmel em a, tlaiah lah a sawmna che I ti hlawhtling bawk si lo a”a ti a. Ka chhang tawh lem lo, chawei ka in siam a, ka ei nghal mawlh mawlh a. Ka eikham hma deuh chuan ka thiante ho chu an rawn lut dam dam a, ka chaweina bulah chuan an rawn thu a, “D, kan tihpalh lutuk, Engineer-a khan min ngen nasa lutuk a, I rilru tur pawh kan lo ngaihtuah miah lova, kan thiam loh ani”Dailao chuan a ti a, midang chuan an lo tuihnih tliar tliar a, “A ho lutuk, sitting room ah lo va thu ru ka rawn eikham dawn”ka ti a. Rinpuii chu ka bulah a rawn thu a, ka chaw chu a rawn ei ve nghal a,”Nangmah vangin chaw pawh ka ei tui lo, khawi lo khawrh leh rawh”a ti a. A ei nghal bawrh bawrh a, “D, in in bulah sawn car pawl a ding char char, I sawi pa khan car pawl a nei tho ani lawm ni?” ka meng kawk a, “A la thar em car chu?”ka ti a. ka tho nghal a, mak tih hmel deuha min melh pah chuan,”La thar e, i20 ni in ka hria”a tih chu ka hre hman tawk, pawnah ka va chhuak a, car kawngka a in hawng a, Remmuana chuan min rawn pan a, ka banah min rawn kai a, “Zirlai pek I ngai deuh ani maw?”a ti nghut a. Min vawnna kut chu paihthlak ka tum a, min vuan nghet sauh a,”Tal chhuah chu tum buai lo mai rawh Nauvi”a mitmeng chu a sen deuh ram a, “Hetianga min tihtheihna dan hi I nei reng reng lo ania, min thlah rawh”car ah min nam lut sawk a. A rawn lut a, a tlan chhuak nghal a, a tlan chak lutuk a ka thaw tha ngam meuh lo. Khawiah nge kan kal dawn tih pawh ka hre lo, hmun reh deuh kan thlen chuan motor chu a ti ding a, ka hawi chhuak ngam chiah a, motor atang a chhuak a, a va au tuar tuar a, a khawsak dan chuan min rap takzet a ni. Ka thutna ah ngawi rengin ka thu a, lung a chhir pawp pawp chu ka en reng a, min rawn pan a, kawngkhar chu a hawng a,”Rawn chhuk rawh”a ti a, ngawi rengin ka chhuk a. Min melh run a, “Min hnial kha a nuam viau em ni?” a ti ram hmak a, ka chhang lo. Ka darah chuan min sawi vak vak a, “Min chhang ta che, I tawng theilo em ni?”a ti a, ka hlau lutuk chu ka mittui a rawn luang chhuak a, ka tap khur ta ngar ngar a, mangan hmel zet hian min kuah a,”Naupang, tap suh, ka tihpalh, ka tihpalh takzet”ka tah chu a chhuak zual sauh a, min pawm bet a, ka tap chhuak ta hawm hawm a. Ka lungchhe zualpui a reh chuan car nghengin kan thu a,”Ka in sum hman lo a, pawi ka ti lutuk, ka tumdan ani miah lo asin”a ti a. Hmun hla tak chu a melh a,”Vawiina mi pakhat nen ka hmuh cheu khan ka thinrimna chu a intan daih tawh”a ti a. Ka kut chu a la a, a hmer sawk a,”Ka sawmna min hnial fithlathak bawk a, I phone I off phei kha chuan ka puakkeh lo chauh ani”a ti a, “Puitling..” “Enge Naupang?”a lo ti vat a,”Engatinge hetiang hian I awm?”ka ti sap a. A ngawi reng a, a kut chu ala sawn a, a hmui chu a han tuai thuak a,”Ka duh che niin ka hria”a ti a, ka va en a, min lo en ve reng a. Tunah khan enge a sawi kha? Puitlinga hian min duh ang maw? Ka hresual chu ani em lo maw,”Emaw I tih vang mai mai anih chu”ka ti a, engmah sawi lo chuan min rawn fawp a, “Mipa dang hmu tawh suh”ka beng bulah chuan a ti a, “Hmu ta ila?” “Ka pawt sawm duh mai ang” thutak fe hian a ti a, ka lo nui sak a.
.
Inchhung ka lut chu ka thiante leh ka nu leh pa chuan phawk fe hian min lo melh thup a,”D, khawnge I awm daih a? I bo maw kan lo ti hman che asin” Rinpuii chuan alo ti a, ka pa chuan,”Ngawi renga chhuah chin loh tur”a ti hmuk a. Ka room ah ka thian te chu ka luhpui dial a, hriat chak an nei tih ka hria, ka sawi lawk duh lo vel chu min ngei hlawm hle a, a tawpah ka han sawi chuan min lawmpui hlawm hle a, Engineer-a chu tuman an sawi chhuak lo chiang hle. Ka thiante hi mi rilru tha tak ani vek a, ka rilru natlai zawng zawng pawha min fuih kal tute kha an ni a, Engineer-a pawh kha ka la duh leh mai an beisei vanga min suihzawm tum leh kha an ni. Rei tak thleng an leng a, an haw meuh chuan a tlai ve fe tawh a, mu pahin ka phone chu ka han en a, ka lo switchoff a, ka on vat a, msg a lo awm teuh a. KA han hawn chuan Engineer-a leh Remmuana msg deuh hlir ani. Ka chhiar mawlh mawlh lai chuan Remmuana call ka dawng a, rang takin ka pickup nghal a, eng engemaw kan sawi a, rei tak kan inbia a, zan dang zawng aiin ka mu tui in ka hria.
.

Class kan tan leh ni tih hria in peih lo fe hian ka tho a, ka lu chu a na bur mai. Sana ka en a, dar 8 alo pel der tawh, hmanhmawh takin ka tho a, inchhung ka tifai sawk sawk a. Ka inbual a chawl ka ei zawh meuh chuan alo tlai tawh viau mai. Ka chhuak nghal vat a, Electric veng ka thlenin ka scooty chu a thi ta hmak a, reife ka kick pawhin a nung thei tlat lo. Ka sana ka en a, ka tlai lo chauh ani tawh si, chutih lai tak chuan Engineer-a leh a nau chu bike in an rawn inphur a, a nau hi kan college a lut ve a ni a, min hmuh chuan an ding a, a rawn chhuk nghal vat a. Min han kick pui ngat ngat pawh chuan a nung thei chuang lo,”Hetah hian hung tha ila kan rualin kal phawt mai rawh, hei chu ka lo buaipui mai ang”a ti a, duhthlan tur ka nei lo. Kan pathum chuan kan inphur a, college kan thlen chuan ka chahbi chu min dil a, mahse chutianga aman a lo buaipui chu ngai ka ti lo. Min rawn zui zel a, “I tan tih theih ka neih tlem em hi, hei hi chu min phalsak hram rawh”a ti ngawih ngawih a, chutiang chung han hnial chu nuam ka ti bik chiah lova, ka pe ta nge nge a. Ka rilru chu a nuam chiah lo, chhuna kan break laiin college ah scooty chu min rawn dah pheisak thlap a, ka thiante chuan min melh thap a, thil awmdan chu ka han sawi leh hnuhnawh a, Dailoa chuan nui put put chung hian,” inpe sawt hle mai, ka lakah chuan a mark chu a tha tawh viau ania”a lo ti a, a hnungah ka han chum a, “ Ka A khawngaih ve reng, mihring te chu tihsual nei vek kan nia”a han ti leh a, “Kei chu Remmuana ka duh pui fe”Rinpuii chuan alo ti khauh a, min rawn siai zeuh a.
.
Zanah kan exam paper min sem tawh atanga hmasawn ka ngaihna te chu ka en vel a, ka u in inleng ka neih thu min rawn hrilh a, ka room a luhtir mai turin ka ti a. Ka thiante an nih ka rin vang ani, kawngkhar bulah chuan Remmuana chu a rawn ding run a, “Keimah ka nia, I room ah chuan ka rawn lut dawn tho em?”a ti a. Ka ding nghal vat a, ka lehkhabu inchhawp hnawk nuaih chu ka han remfel deuh a, “I rawn sawi lawk bawk silo a”ka ti niah niah a, sitting room lamah chuan kan in zui a. Ka bul chetah chuan a thu a, ka chhungte an awm chuan ka zak ve deuh a, mahse chutiang chu a ngaihtuah ve hmel lem loh,”I phone I off tlat chuan engtinnge ka rawn hrilh theih ang che?”a ti hmuk a. ka hrechhuak chiah, ka battery a low a, ka charge khan ka la on leh miah lo ani tak e. ka nui ta vel mai mai a,”Vawiina I scooty khalh tu kha tunge?” a ti a, min melh run a. Ka han hrilhfiah zung zung a, hrethiam awm tak chuan a han bu ve nghat nghat a. Ka phone chu ka la han on a, msg chu a rawn thleng nual a, kan thianho group ah chuan fiamthu an lo post leh nual a, ka nui kur kur chu ka phone min rawn laksak a, “In va han nawi hlawm ve”a ti a, a nui ve suk a. Ka phone chu min rawn entir a, “hei tunge?” a kawk va a, Engineer-a msg a lo ni a, a number ka save tawh lem lova, a dp ah erawh amah tih ka hre thung. Ka thian anih thu chu ka sawi mai a, engmah a sawi chhunzawm lem lo. Ka pa inkhawm bang nen an titi luam a, a phone a candy crush chu ka khelh sak mai mai a, ka pa awm chuan kawmna hun ka chang ngai lo. A haw dawnah a motor awmna thleng ka thlah a, lut mai lo chuan kan ding a, van lam chu a hawi vang vang a,”Naupang..””Tikhan min ko tawh lo la..”ka lo ti vat a, “Ka tan chuan Naupangtei hi ni reng la ka ti alawm”a nui ve sak a, “Engtia han koh nge I duh deuh a?”a ti a, “Hming pangngai ka nei reng alawm”ka tih chuan,”I thiante pawn an ko chuang hleinem che”a lo ti khauh a. Han chhan leh mai dan tur ka hre tawh lo, a nui tut tut a,”Lungawi takin eih mai mai la ni mai, keipawh Puitling tiin min ko ve tho alawm”a ti a. Ka hmui chu ka lo ti pawrh khum a, engahmah ngai lo chuan min rawn fawp zauh a,”Naktukah hna chungchangah ka zin dawn a?” a ti a, “I damlo te ai pawh hian min ngai pawimawh lo zawk”ka ti fiam a,”I pawimawh ber alawm”ka biangah a piai a, “Ka hrilh ang che chu ka ti tho a, ka hna hi ban ka tum a””Maw?”ka lo ti tuar a, “Clinic hawn ka duh a, chu chu full time a thawh theih ka duh zawk a, tuna ka zin na tur pawh hi Kolasib ah ka thianpa nen in hawn tawm kan tum deuh a, chumi chungchangah chuan ania”a han ti a. Ka rilru tak chuan ka lawm vak lo, a chhan chu a zin fo a ngaih hmel si a, a ngaihawm ve viau tawh tlat a ni.
.
Kan college kal loh ni chu remchangah la in ka pa chuan kan garage rawng min hnawih thar tir a, nilengin ka buai ve a, ka uluk ve bawk a a nalh ve thawkhat viau in ka hria. Ka inbual zawh chuan ka phone chu ka han bih a, engmah phei chu ka dawng lem lo. Zanhnih lai Kolasib ah Remmuana pawh a cham tawh a, an thlen hlima kan inbiak bak kan inbe lova, an chanchin pawh engmah ka hre lo. A lo haw hunah min hrilh a tum niin ka ngai mai a, an buai ka hlauh bawk avangin chanchin pawh ka zawt bik lem lo. Rinpuii chuan whatsapp ah min rawn bia a , kan assignment chungchang min rawn zawh pah chuan tlaiah Remmuana a hmuh thu chu a rawn sawi luam a, a rawn haw thu pawh min hrilh loh avangin a hmu sual anih ka ring a, ka sawi lang lem lo. Mahse zan thleng pawh chuan a hnen atang chanchin ka hriat loh avangin ka han call a, a ring quit a, miscall a hmuh chuan a rawn call back mai chu ka ring a ni. Ka lehkha zir chu ka lo muthluk san reng a, chhun lama ka hnathawh ve chhun chu ka lo chauh pui deuh ani maithei, ka phone ka ban a, whatsapp ah ka lut a, Remmuana chu alo online reng a. Chutia min rawn be bawk silo chu ka lungawi lo angreng viau a, biak ka tum bik lo. Rilru nuam vak lo chungin ka mu a, enge hepa hian a hriat tehreng ni, ka lakah a lungawi lo ti dawn ila a chhan tur awm ang ka hre bawk si lo. Hetiang hi ka huat dan ber ani, a kal dawnah pawh tha takin kan inthlah a, tuna hetia awm chhan tur hi a neih ka hre lo.
.
Remmuana chu a rawn haw tih ka hrechiang tawh a, nihnih kan inbe tawh lo. College canteen ah ka thiante nghah pahin magazine ka chhiar a, Engineer-a nau Kimtei chu ka bulah a rawn thu a, nidangah chuan kan inbe ngai lem lo. Ka thil chhiar lai chu a rawn bih ve dak dak a, “U Sangzual, thil hrilh tur che ka nei a”a ti a, ka thil chhiar lai chu dahthla in Kimtei chu ka han melh a, “Enge ni Kimte?”ka tih chuan,”Ka u nen in inthen chhan ah khan nangma thiam loh hi ani emaw ka lo ti char char thin a, ka lo ngei thei lutuk che a, mahse nizanah ka u in min hrilh a, ama thiam loh vek alo ni reng sia. Khawngaihin ka u ngaihdam hram turin ka ngen duh che a, a la duh takzet che ani”a ti a. Mahni induh tawk tak, in la pa ve larh thin in chutianga a nau bula a thiam loh na alo sawi vel tur chu a mak ka ti a, ka nuih a za hial zawk,”Kimte, I u te chu a luck a, keimah aia tha a hmu teuh alawm. Midang nei se a tha zawk daih”ka lo ti a, “Khawngaihin lo inngaihtuah ve reng reng rawh aw”a han ti leh hram a. Mihring rilru ngheh lohzia ka ngaihtuah a, khati khawpa ka ngen nasa chung khan min kalsan a, khatih lai khan lokir se chuan ka ngaidam ngei ang. Mahse tunah chuan ka danglam tawh, khang hun kha a liam tawh. A ruka ka buaina erawh Remmuana nen kan inlaichinna nghet lo lutuk hi a ni. Engpawhnise hetia rilru nuam lo deuh a awm ai chuan ka hmu anga, thui kan kal hma in kan inkar hi kan chinfel angaiin ka hria.
.
Last period ka neih avangin ka haw chuan a tlai deuh tawh a, inah haw tlang lovin Remmuana te in chu ka pan a, a chhunga luh erawh ka ngam lo. Pawnah ka ding a, ka call tlang theih loh avangin ka beidawng ve ta deuh a. Haw tuma ka scooty ka tih nun chuan min ko ri ka hria a, ka han hawi chuan Remmuana chu ka piah ah a lo ding reng a, ka thinrim tawh sa bawk nen chutia a hmel ka hmuh chiah chuan ka thinrimna a zual a, tha taka ka biak theih ka ring chuang lo bawk nen ka tlan daih a. Mahni inkhawngaihna in ka khat, ka hmaah Remmuana motor chu a rawn ding dawt a, ka tan tlan tlang theih ani lo. Motor atang a rawn chhuak a, mi kal vel chuan min en deuh hrek hrekin ka hria, ka tlan tawh na lamah chuan ka tlan let leh mai dawn em ni tih ka ngaihtuah lai chuan ka bul a rawn thleng nghal der a, “Inbia ang?” “Aih” ka banah min rawn pawt a, laksawn tumin ka lo tang thung,”Naupang, in ti luhlul lo mai teh”ka scooty chu a hung tha mawlh mawlh a. Ka lo en tawp a, sawi tur ka ngah viau nen ka hmu uta cheng a engmah sawi tur pawh ka hre lo. A motor chu kan ngheng a,”Naupang”ka chhang lo. Ka hmaah a rawn ding a,”Min ngaidam rawh aw..” inthlahrun hmel takin min melh a. A thil sawi tur chu ka hre lawk in ka hria, “Puitling, ka haw duh..”ka mittui chu a tlak loh nan ka dang hram hram a,”Ka in ringtawk lo ani, ka ti hlim zo lovang che tih hi”a kun lap a, “Sangtei nen ka tehkhin vang che ani lo ania, ka rilru natna zar zo hian I lo na ve ang tih ka hlau ani”ka nem sawn a,”Zawihzep pa! Hmuh che hi ka duh tawh lo”ka scooty ah ka chuang a, khua a tlai tawh avangin kawngah chuan mi vei vak an awm lem lo. Mipa hi rin ngam tur an awm lo, min rawn pawmbet tlat a, “Naupang, ka tihpalh lutuk aw…”a mittui chu a tling pam a, “Ka inrintawk hun min nghak thei angem?” a tih chuan ka lo thaw halh a,”Aih, ka thei lo, ka nghak thei lo ang che”ka scooty ka ti nung a, ka mualpho hma in ka kal a ngai. Mi lo kal an awm avangin min thlah a, chu chu remchangah la in ka tlan nghal a. Ka mittui chu dan rual loh in a rawn luang zawih zawih a, tah hawm hawm chu ka chak a ni. Inah ka haw chuan ka mualpho ka hlau bawk si, Dailoa in lam chu ka pan ta ringawt a. Kawngkhar bula mittui luang ngiai chunga ding a thiannu min hmuh chuan a phu zawk a, min kai lut a, engmah sawi lovin ka kuah a, ka tap ta zawih zawih a.
.

Ka thianpa remhriatna azarah chuan ka chhungte bulah a ina chawei nghal angin min sawi sak a, ka tah chhuak zual pui a reh hnuah kan in thleng min thlah leh thlap a, ka thiante hi an hlu thin ngawt mai. Ka room ah ka lut a, khumah ka thu a, ka rilruah hian engmah a lut thei lo. dailoa chuan Rinpuii a lo hrilh ani ngei ang, min rawn bia a, min rawn hnem a tum ve viau a, mahse eng ka ang thei lo. Kan duh vang pawh ni lo in kan duh loh dan te hian kan awm alo ngai ve fo alo ni. Dik tak chuan Engineer-a nen khan kumhnih tal tawp kan in zui a, kan inthen kha ka na ka ti a, tunah Puitling nen sawi tham pawh la nilo kan inkawp a, ka nat dan a dang chuangin ka hre lo ani. Ka phone rawn vibrate cher cher chu ka melh a, Puitlinga a lo ni. Ka en ngawt ngawt a, chhang turin huaisenna leh chakna ka nei lo. Ka mu a, ka muhil lo chiang kher mai. Engatinge heng hi ka chungah a thlen nawn leh kher? Hetiang tur si lo in tawng lo tawp ila tha tur, ka natna ngaiah khan nat nawn leh hi ka chak lo asin.
.
Ka nawmsam loh chhuanlamin nihnih chu class ka thulh tawh a, engtihmah hi ka phur hlawl lo. Ni thumnaah erawh ka chhungte ngaih a that loh ka hlauh avangin ka insiam a, ka chhuak a, mahse college erawh ka thleng lo. Ka tlan kual vel mai mai a, kal duhna bik pawh ka nei chuang lo. Tlaiah ka haw a, in chhung ka luh chuan Remmuana chu a lo thu reng a, natna min siam hnuah kan inah alo chuangkai ngam chu a huaisen ka ti a, ka haw ngawih ngawih. Engmah sawi lovin room ah ka lut tlang a, amah vanga ka tawrhna hi a hmuh kher a tulna ka hre lo. Ka nu in chawei turin min rawn ko a, ka ei peih loh thu ka sawi chuan room ah a rawn lut a, ka hmel chu uluk takin a en a, “Bawhi engkim ka hre vek alawm”ka nu chu ka melh a, lainat hmel tak hian min en a,”I u Mamuana hi dem ngawt theih pawh ani bik chuang lo ania”a tih chuan ka heh chu ka pet fan fan a, duat takin min kuah a,”Engatinge hetiang leh tur si kan lo inhmelhriat?”ka mittui chu a rawn luang ngiai a,”Engkim hi a tha leh vek mai ang, I paltlang theih loh tur thil chu I tawng miah lo ang”a ti a. Chawei tura choka lam kan pan chuan Remmuana chu alo la thu reng a, chaw a ei ve dawn a ni ngei ang ka tih rilruk lai takin chaw chu a kil ve nghal a. Ka hma zawnah tak a thu a, vawikhatmah ka melh lo. An clinic chungchang vel ka pa in a zawt luam a, engtinnge a chhan pawh ka hre mumal lo. Ka kham vat a, chawei thleng seng dawnah min ko turin ka nu chu ka chah a, ka room ah ka lut leh nghal a. Kha mihring kha ka hmu chak hlawl lo ani. Chawei thleng chu ka sil mawlh mawlh a, ka u leh Remmuana chuan tv an en a, ka nu leh pa erawh an inkhawm a. Ka thleng sil zo chu room ah luh leh mai ka tum a, ka u chuan min lo ko vat a,”Ka leng chhuak lawk dawn a, hei Mamuana hi thingpui lo lumsak rawh”a ti a, a chhuak nghal daih a. Engtikawngmahin thingpui chu ka lum lovang, tv en chuan ngawi rengin kan thu a, minute 5 vel a liam hnuah chuan a rawn chhuak ta nge nge a,”Naupang, ka inthiam thei thlawt lo, khatiang khan I lakah awm tur ka ni lo asin”a ti a, “Mahse a thleng vek tawh tho alawm”ka lo ti a. Min en reng a, ka melh duh lo lui tlat a, “Ka paltlang tawh emaw ka lo in ti a, mahse hun ka lo la mamawh deuh ani”zawi sap chuan a ti a, “Engpawhnise kan pahnih inkarah engmah a awm tawh lova, min rawn ngaihtuah pawh a ngai lova I hmuh ang hian ka tha vek e. kan inah pawh hian rawn lang tam lo la a that ka ring”mahni inringtawk tak chuan ka han ti a. Rei vaklo chu a hamhaih lek lek hmel hmuh tur a awm, mahse a in thunun leh vat a,”I ngaihtuah awm lo ang tih chu ka hria alawm, tha takin in enkawl rawh aw Naupang. Hun reilote chhung mah nise hlimna min thlen te kha ka hrereng ang. I lakah ka tihsual zawng zawngah min ngaidam dawn nia. Hlim reng ang che aw”a ti a. Ka chhang let tawh lo, a tho a, “Mangtha le Naupang”rawn hawilet miah lovin a chhuak a. Ka en reng a, kawngka a pel chiah chu ka mittui hi dan rual loh in a rawn luang nghal zawih zawih a, a hmuh laia ka mualpho lo chu ka lawm a ni. Kan thianho group ah ka lut a, an nawi lai takin ka rilru hahna ka sawi a, min rawn hnem nghal tliar tliar a, keimah pawh ka thawl ve hawkin ka hria.
.
Karkhat aliam chuan ka rilru na zual pui pawh a reh ve a, min duh lo tu avanga indawmkun reng chu ka tha a na ve a, hmalam pan chu ka tum a ni. Ka theihtawpin ka zirlaiah ka bei anga, chu chu ka hlawkna ah ka chhiar ve thei ang. Exam pui hmachhawn mai tur ka ni bawk a, ka rilru la peng thei thil chu dahbo hmak hmak ka duh a ni. Theihtawp chhuah in zirlai ah ka rilru ka seng a, ka rilru natna te pawh a vai chuan ni lo mahse an bo ve ta. Class kan kal tawh lem lova, in lamah ka hun tam zawk chu ka hmang a, inkhawm leh pawimawh bik thil tih loh ah chuan ka chhuak ngai lo. Nikhat chu ka u hman remchan loh vangin ka pa office kal tur ka thlah a, ka haw lamah chuan Rinpuii leh Dailoa petrol la tur nen kan in tawk hlawl a, kan inhmu khat ve deuh bawk nen kan in dinchilh a, kan titi luam a. Chutih lai tak chuan kan piah dawr atanga Remmuana leh hmeichhe pakhat rawn in kai chhuak chu ka va hmu a, ka mit deuh sulh in ka hria. Ka mit ka la sawn vat a, ka hmanhmawh thu sawiin ka thiante pawh chu ka kalsan vat a, “Lalremmuan leh! Kha kha maw I mize dik tak chu”ka ti chhuak sap a. Chumi zan chuan a hnen atang msg ka dawng nawlh bawk a,
.
“Naupang, hmuh lawk che ka duh”
.
“I duh huna I hmuh a I duh huna I hmuh duh loh huna i hmuh loh ni tur khawpa mahni pride dah bo chi ka ni ve lo tlat”ka ti let hmak a.
.
A reh vang vang a, a hnuah chuan,
.
“A pawimawh khawp asin , kan chungchang ania”a rawn ti leh hram a.
.
“min rawn tibuai tawh suh, I duh anga I tihkawi theih ah chuan min ngai ve hauh suh. Ka mipa ngaihsan te chu mahni in rintawkna a khat, huaisen taka engkim hmachhawn ngam te hi an ni” ka ti ve ta ngat a.
.
A reh zui nghal ta vang vang a, ka sawi duh tak ka sawi chhuah vang chu ani ang ka thawven phah sawtin ka hria.
.
Ka nu nen chakkhai lamin bazaar ah kan chhuak a, hetih lai hian exam kan zo ve tawh a, ka nun pawh ka hlim chho ve hle tawh. Inah ka awm deuh chawt a, ka nun hman chhoh dan leh ka thil tawn te ka ziak chho ve ta fo a, ka laptop chu ka thian thar ani ta deuh ber. Ka ngaihtuahnaa thu awm te chu ka thai ve zel a, keipawh ka tuibelh zel bawk a, pawn lam ai ka room chu ka ngaina emaw tih tur khawp ani. Thlifim dawng pahin inching zawlah chuan ka ding a, thlanglam a mi vakvel chu ka thlir pah bawk a, nula leh tlangval rwn in zui ral ral ka hmuh chuan lunglen rukna deuh chu ka nei ve in ka hria. Ka phone a rawn ri a, number hlang anih avangin tunge ka hre lo, ka han pickup chuan Engineer-a nau Kimtei alo ni a. Engineer-a bike in a accident a, damdawiin ah a awm thu chu a thuphungin min rawn hrilh a. Engtiklaiin nge chupa pawh chu a rawn haw leh reng reng ni, inhnuaiah ka chhuk a, Rinpuii leh Dailoa chu an rawn lut ve chiah bawk a. Chanchin chu ka la hrelo emaw tiin min hrilh a, kan an tum thu leh kal ve tura min duh thu an sawi a, anihna takah chuan a lakah engmah feelings ka neih tawh loh avang in hmuh hrehna pawh ka nei chuang lo. Ka kawr hak lai chu ka thlak a, hospital lam pan chuan kan inzui chhuak ta nghal a. Kan va thlen chuan a tam zawk an lo tindarh tawh a, kan thianho min lo hmuh chuan Kimtei chuan min lo ko vat a, doctor in luh a phal rih loh thu chu alo sawi siam siam a, “U Sangzual, ka u chuan a tawngvaih laiin I hming a lam nasa rap mawle”a han ti zui a. Ka thiante pahnih chuan min rawn en rual thawt a, ka lo hmu lo der thung a. Kan awmna piahlam chu ka thlir kual vel a, Remmuana pa tei vut vut chu ka va hmu a, an chhungte damlo a tlawh anih loh pawhin an hmelhriat a tlawh ve anih ka ring. Min rawn hmu vat a, min rawn pan phei nghal a, “Lalbawih, enge in tih ve a?”nelawm tak hian a rawn ti a. Ka pa min koh thin dan hian min ko ve mai a, “Hei kan thianpa tlawh kan tum ve lawk a, enge I I tih zawk?”ka ti a. ka bulah chuan a rawn thu a, “Kan nau pakhat a accident ve alawm mawle. Tunlai thangthar ho hi chu chak tak tak hian an tlan a, a buaithlak anih hi”a ti a. Chutihlai tak chuan a phone a rawn ri a, a han pickup a. Min rawn en zuai a, “A result vel a ngaihven theih anih hmel, ka va kal ange”a ti a, a tho nulh a. Keinipawh Kimtei’n a luh theih tih min rawn hrilh a, kan lut ve nghal a. Ka rin ai daihin Engineer-a chu a lo insawh na a, a nu leh pa leh Kimtei chiah a bulah an lo awm tawh a. Kimtei chuan a nu leh pa bulah kan thianho chu min han introduce zung zung a, “I hming hi chu kan hre bel tawh viau asin”A nu chuan a han ti a. An chhungkua chu ka hmuhdan chuan inkawmngeih tlang tak an nih ka ring, an titi kalhmang vel ngaihthlak a nuam a, Engineer-a ang maiin a chhungte dang pawh an bula awm a nuam niin ka hria.
.
Zanah chuan engengemaw ka ngaihtuah a, Engineer-a nen rei vaklo kan inbia a, damdawiin an la chhuahsan chiah lo na in a ziaawm sawt hle a. Vawihnih chu ka tlawh tawh a, a bak erawh ka thiante hman loh avangin ka kal thei bik lo. An chhuah hma ni chuan Rinpuii nen kan va tlawh leh a, a lo harh tha hle tawh a, a titi pawh ngaihthlak theih ani leh ta. Phone hmangin ka laka a rilru puthmang min rawn hrilh fo a, min la duh thu pawh min hrilh chamchi a, mahse thian ang baka ka en loh thu leh a thei ve dawn lo anih chuan ka thian ah pawh ka ngai thei dawn lo tih ka hrilh a. Chu em chu a ngaingam bik lo ani ang, a sawi nawn leh ta lo. Ruah a sur deuh reng avangin kan haw thei mai lova, damlo in kan hun a zo tawh bawk nen pawnah chuan kan thu a, khua chu vawt lutuk lo mahse ruah sur chuan khaw lum chu a ti nep deuh. Kimtei chu pawnah a rawn thu ve a, a cousin Kolasib atang a rawn haw thu leh a rawn riah pui tur thu chu a sawi a. Ka rilruah Remmuana lo lang zawk a, engtinnge a clinic te kha hawng tluang zel angem tih te ka ngaihtuah neuh neuh a. Gate a motor rawn tlan lut mek chuan ka ngaihtuahna chu a titawp chiang hle, tu motor nge a nih hrilh hran ka ngai lo. Ruah ala sur avangin huh hlau takin a rawn tlan a, Kimtei chu a ding vat a, “U Mamuan chaweikhamah I lokal dawn an ti emaw ka tia”a lo ti a. Rinpuii chuan min rawn melh a, ka lo ka hau ringawt a. Remmuana chuan min hmuh chuan a phu ve zawk in ka hria, “Naupang, I dam maw?”za vak lo hian nui a, “Ui! U Sangzuali te nen in in hria elaw?”Kimtei chuan mak tih hmel deuh hian alo ti a, “Aw, kan inkawm ve thin alawm” Remmuana’n a tih chuan ka lo ner sawk a, a ngaih ah chuan inkawm satliah kan lo ni pawh aniange.
.
Ruahsur chu a bang duh miau silo a, phur lo zetin Remmuana min thlah tur chu kan zui a, Rinpuii kan drop phawt a, kan in lam kan pan leh a. Ka rilruah chuan zawhna tam tak a awm, Remmuana hian Engineer-a nen kan chanchin hi a hria ani thei angem? Amah lah chu ka zawt ngam bawk si lo, “I exam te chu I tithe maw?”a rawn ti ve khauh a. Ka lu chu ka lo bu nghat rin

Ka mittui chu dan rual lovin a rawn luang a, ka chaklohna te hi a hmaah khan ka ti lang ang tih ka hlau ber a, zanin thleng kha chuan ka la insum thei a, mahse ka hmachhawn fo chuan ka la mualpho mai ang tih ka hlau a ni. Ka phone ri char char chu ka han en a, Rinpuii alo ni a, min ngaihtuah tih ka hria, ka aw chu pangngai thei ang berin kan bia a, ka thiante hian min hrechiang a, min ngaihtuah bawk a ka lawm thin. Engtin tin emaw ka lo muhil ve hlauh a, ka harh chuan khua alo eng ut tawh a, hmanhmawh lo takin ka tho chhuak ve a. Engineer-a damdawiin atanga a chhuah ni tur ani tih ka hria, mahse kal chu ka tum tawh lem lo. An hnen atang hian nat bak engmah ka hlawhchhuak ngai lo. Chaweikhama Kimtei’n min rawn biak pawh chuan chhungkaw thil chhuanlamin ka buai thu ka sawi a, hmaizah viau mah ila a u Remmuana ka hmachhawn ngam rih lo a ni ber.
.
Chhungkaw thilah karhnih vel chu Champhai lamah ka cham tawh a, kan result ala chhuak lo bawk a chutianga rilru tih thawven pah nana ka zin chhuak chu nuam ka ti viau mai. Ka naupanlaia ka zin bak kha Champhai ah hian ka zin leh miah lova, kan kal lai nen chuan alo danglam tawh hle. Ka nu te khua ani bawk a, chhungte pawh kan ngah a, ka nu te hi ka pa lam ai an chhungkua an hung zawk a, ka u phei hi chu chawlh aneih phawt chuan a zin chho ngei ngei tih tur khawp a ni. Ka putea fanu Eli hi kan in rual chiah a, kan inkawmngeih bawk a, kan hnenah high school a rawn kal thin bawk avang hian kan inngaina zual a. A rawn zinchang pawhin hmundangah a thleng ngai lo. An unau ah a naupang fal deuh a, midang hian nupui pasal an nei vek tawh a, an inah an upa ber U Ruata te nen an khawsa a, hna avangin inah an awm meuh lo thung. Haw leh vat tuma kal ka ni a, mahse kan result a chhuak a, ka beisei phak loh in first ah ka lo passed ve hlauh a. Ka hna dil phak tawk ka hmuh chhunzawm nghal avangin dil ve chu tha in ka hria a. Chung ka hna dil vel ka buaipui tlang tak avangin ka tum ai ka cham rei phah ani. KTP inkhawm zan ani a, Eli chuan inkhawm ve turin min sawm a, ka thlen tirh atang ka la inkhawm lo hrim hrim bawk nen inkhawm chu ka tum ve a. Biakin kawt velah chuan nula tlangval an lo awm deuh suau suau a, ka lo inkhawm kher chu ka zak leh hnuhnawh viau mai. Eli chuan a dan pangngai angin mi hrang hrang a be leh siam siam a, kilkhatah ka lo ding ngawi reng a, gate a rawn lut mek mipa pakhat chu kan din bialnaah chuan a rawn kal ve a, a sam khuih dan atang chuan a sual hauh lo ang tih ka ring nghal. Eli titi tui lai chu a mit a han hup thut a,”Hey!! Lal U Ruatpui..ka mit a pherh ange”a ti a, a nui har har a, chupa chuan,”Mit a pherh thei mi?”a ti a, an nui ta dar dar a. Biakin chhungah chuan kan inzui lut ta hlawm a, ka rilruah inkhawm chu a lang vak lo. Kan luh hmaa mipa ka hmuh khan Puitlinga min hriatchhuah tir tlat a; ka ngai a ni. Inkhawm banah chuan Eli chu a tawng tui leh ang tih hlau ru takin ka kai a, ka kal pui nghal a. Thui pawh kan la kal hma chuan Eli chu rawn au tu an awm a, kan han hawi chuan kha pa Ruatpuia ngei kha ni. Kan bul a rawn thlen chuan a rawn nui sang a,”Hla te rawn zir ve thin la”Eli melh pah chuan a ti a, “Hetia member nih hi ka duhtawk viau”nui har har chuan a lo chhang let a,”Hei I thiannu hi ka van hmu ngai love”min rawn melh zeuh pah chuan a ti a, “Aw! Ni dawn tak, ka cousin Sangzuali anih hi, Aizawla ka ni fanu anih hi. Sis, hei hi kan veng tlangval chhuanvawr U Ruatpuia anih hi, kan branch O.B fel anih hi”a han ti a. Ruatpuia chu alo ner deuh nung a,”Min fak vak kher lo la, nihna baka fel hian min chhuah thin a”a ti a, min han melh pah chuan,”Sangtei maw? Lo in chibai ve reng reng ila”tih pah chuan a kut chu a rawn phar chhuak a, “Ko duat vel bawk sia”Eli chu alo nui kur kur a. Kan han inchibai a, “I cham rei dawn em? Nge haw leh vat tura lo zin mai mai”Ruatpuia bawk chuan a han ti a,”Ka la hre mai bik lo, ka tum dan hmasa kha chuan nimin piah khan haw tur ka nia, mahse hei ka la remchang lo anih hi” ka ti han ti duah a. Eli nen chuan engengemaw an sawi a, an bulah chuan ngawi rengin ka kal ve a, a khat tawkin min melh leh zauh thin chu ka hmu ru reng a, ka hrelo der thung. Kan in kan thlen chuan Eli chuan leng turin a sawm a, an insawm lai chuan inchhungah ka lo lut tlang daih a, an rawn inzui leh zui loh pawh ka hre lo. Inthlak turin room ah ka kal a, ka chhuah leh chuan sitting room ah Ruatpuia chu a lo thu a, ka pitei nen an lo titi bawrh bawrh a. min hmuh chuan a nui suk a, engemawti takin ka awm ve deuhin ka hria. Eli chu bathroom atang a rawn chhuak a, “U Ruatpui engtiknge KTP sport kha?”a rawn ti lang lang a, “Karleh nilai atang khian ania, lo in la fit nasa rawh aw”a ti a. Eli pawh chuan fiamthu in a chhang hlut a, tawngkam a thiam ka ti thin. Ka pitei chu a tho a, “Lo inkawm rawh u, I putea kha a nuamsam lova a mu a, ka va awmpui ange”a ti a. Ruatpuia chuan,”Ava zia lo ve, a enge na?”a lo ti vat a, “a hritlang mai mai chu ani na a, damlo khat tih takah a zuau ve thin a”a ti a, room lam chu a pan ta nghal a. Eli chu inthlak turin room lam a pan a, ngawi rengin tv kan en a, dik tak chuan ka bula mipa ka hriat ngai pawh ni lo awm ve reng avang chuan ka confidence pawh ka hloh zo in ka hria. Rei vaklo hnuah chuan Ruatpuia chuan min rawn bia a, ka ngaihtuahna ka lo kawm nasa deuh aniang ka lo hre lawk lova, ka va en chuan alo nui vur vur a,”Maw?”ka ti hu a, “Engtiknge I haw ang?”a ti a, “Tunkar tawp lam hi anih ka ring”ka ti a, fiamthu ti tak deuh chuan sport huna awm ve turin min han sawm a, “Ka awm thut maithei ani. DRDA a an hna lak tur kha ka dil ve a, ka tih ve tak tak dawn chuan karleh thawlehni khi written test tih hun ania”ka ti a, phur hmel zet hian min melh a,”Tak tak maw? I application te i thehlut tawh em?”a ti luam a, chutihlai tak chuan Eli chu a rawn chhuak a, “Sis, U Ruatpuia kha a thawk tak alawm”a rawn ti a. Thingpuite ka lum a, kan in hnu ah a haw ve ta a. A haw hnu chuan Eli chuan Ruatpuia chanchin chu min han sermon khum leh a, DRDA ah Account Officer alo ni awm a, tlangval fel tak anih thu chu a sawi tam ber ani. Ka vawikhat hmuhna mah nise a sual lo ang tih chu ka hrethiam ve alawm.
.
Ka cham chhung chuan Ruatpuia chu a rawn lenglut fo a, ka nel ve thuai a. Ka hna dil ah pawh theihtawp min chhuahpui a, question pawimawh tur awm ang te chu min kawhhmuh ve nual a, a tira ka tum aiin keipawh ka tui thar ta viau a. Kan test ni pawh chuan ka rin ai ka chhang thei a, beiseina erawh ka nei sang lem lo. A tam zawk chu Master degree nei an ni a, kei graduate hlim hlawl tan chuan beiseina han tihsan vak pawh a theih in ka hre lo. Ka chhan zawh chuan office kawtah chuan ka ding a, a hmunhma chuan a zir bawk a, a nuam reuh phian mai. A awmna hmun chu khawchhung atang a hla ve deuh a, motor hmuh mai tur a vang a. Pawna awm thenkhat chuan DC office kawt atang motor chu hmuh a awm an tih avangin keipawh chulam pan tum chuan ka thutna atang ka tho a, chutih lai tak chuan Ruatpuia chu bike in a rawn tlan lut mek a. Min hmuh chuan a ding a, a helmet chu a han la a, “I chhang zo der tawh em ni?”a ti a, nelawm tak hian a nui leh var var a. Ka bulah a rawn kal a, “I haw theih chuan lokal rawh ka va thlah ang che’a ti a, “Aih a ngai lo, motor ka han chang ve zawk ang”ka ti a,”Motor a vang asin, lokal rawh chhuah phei ka ngai tho alawm”a ti tlat a. Kan inphur haw ta nge nge a, in thleng min dah a, thingpui in turin ka han sawm a,”Zanah tui deuhin min lumsak zawk dawn nia”a ti a, a tlan leh nghal a. Ka rilruah chuan a awm zui reng a, anihna takah chuan Puitlinga tih loh ah chuan ka mipa duhzawng tak ani ngei alawm. Engvanga Puitlinga nen chuan tehkhin nghal ringawt nge ka nih chu ka inhre lo.
.
Ka tum loh deuhin KTP Sport ah te chuan ka han tel ve a, branch nuam tak ani in ka hria. Mikhual mai mah nila min tlangnel tir thiam hle a, inthlahrung lo takin ka tel ve theih phah a ni. Ruatpuia nen chuan kan inzui deuh chawt a, midang pawh chuan an dem fiam nak nak chu ka hria a, thil nuam lo tak ni in ak hre lem lo. Hmeichhia ten an star rawn ani tih chu ka hai bik lova, thian mai mah ni ila a kianga hun ka hmang thei chu a rukin min awt tih ka hria. Sport tawp zanah chuan Kohhran hall ah function hlimawm tak kan hmang a, items hrang hrang tih zawh hnuah a tawp berah chuan Special Item chu a buatsaihtute an rawn chhuak a. Boruak chu an han siam hmasa a, tute pawhin kan ngakhlel niin a lang. Light chu an han off vek a, projector hmangin thlalak an han ti lang tan a, “Kan sport chhung zawng khan camera hian mi hrang hrang alo veh reng a, zaninah hian ‘Best Couple of the Week’ kan thlang dawn ani”an rawn ti a, mipui thawm chu a tha nghal hle. Kan sport laia nula tlangval thu tlang te , inhrilhru lai te chu an rawn lang chuai chuai a, kutbeng thawm pawh tha tak ani. Ka rin loh em em thil a thleng a, Ruatpuia nen field kan pan lai leh a bike a kan inphur lai chu a rawn lang ve nawlh a, kan lam chu an rawn hawi thup a, mikhual nih naklaiin chutiang thil tak tak pawh nilo a kan lo lang ve chu nuam lo ka ti ru hle a. Eli chu kut lo beng uar zingah a han tel leh ta nghal a, khuk ral theih nise ka tih ber awm e. Chu chu a tawpna pawh lo la ni lo fo, result an han puang a, ‘Best Couple of the Week’ah min han thlang chhuak zui nghal a. Stage ah min ko chho a, Ruatpuia chuan min kai a, min kalpui mai a tum a, mahse ka zak lutuk chu ka thu tlat a, kut an lo beng thap thap tawh bawk si, tihngaihna a awm tawh lo. Ka chhuak ve ta nge nge a, lawmman chu kan han dawng a, camera alo de ve reng bawk nen ka zam chhe lo chauh ani.
.
Kan haw kawngah pawh chuan ka ngawi reng a, Ruatpuia chu ka zah ru deuh ta tlat a. A tan engmah ani lo pawh ani maithei a tiin zah loh chu ka tum lui ve ngial a. Inah min zui lut a, Eli nen kan pathumin kan titi a, kan lawmman dawn chu an sawi kai zel a, “In inhmeh ve bawk tak em ani”nui pah chuan Eli chuan a ti a, ka lo melh hrawk a, a nuih a za zual sauh a. A phone a rawn ri a, intithei tak chuan a ding nghal a,”Changtupa nih hi kan bia ange, lo inkawm ru aw”tih pah chuan room ah a lut daih a. Ruatpuia chu ka bulah a rawn insawn a, nidang zawng aiin a thutak in ka hria, remote ka ken chu a la a, ka kut chu a han vuan a,”Sangte, zanin thil thleng kha a tak tak nise ka ti”ka mitah tak chuan min en a, rei ka en ve ngam lo,”Ka hmuh hmasak ber zan atang che khan ka hmeichhe zawn thin chu nangmah ngei hi I ni tih ka hria, thian ang mai chuan ka en thei tawh lo che”a ti a. Ka hriat chak em em chu ka hre ta a, hlim viau tur ka nih laiin hlauhthawnna zawk chuan min rawn tuam a, ka hriatchhuah chak loh ber thlengin ka mitthlaah an rawn lang a. KA maimitchhing ta ringawt a,”Sangte I rilru ka hre hauh lova, min huat phah ang tih pawh ka hlau khawp mai. Khulamah pawh ilo nei reng maithei a, engkim tlang takin min hrilh ve la ka ti khawp mai”a ti a. Ka han men chuan min lo la melh reng a, “Ruatpui..a va mak ve”ka han ti ngawt a. Mak tih hmel deuh hian min en a,”Engchu nge mak a?” “Kei I mi hriatchian pawh nilo min lo duh hi a mak ka tia, ka lawm bawk si”ka tih chuan a hmel chu a lang pangngai leh vek tawh a. Keipawh tlemin ka huaisen ve in ka hria,”Hriatchian belh che hi ka mamawh chiah pawh in ka hre lo, mahse min zir chian I duh a, min hriatchian belh I duh erawh chuan ka nghak thei reng che”mahni in ringtawk tak chuan a han ti a. Hei pawh hi Remmuana mizia pakhat ang chiah kha ani, mahni inrigtawk taka thil ati thin khan min hip riau anih kha. Inpawhtlang takin thu kan sawi a, ka duh ve tih pawh zep ka tum lem lo. Hlim dun takin chumi zan atang chuan bul kan tan ve ta a ni.
.
Ka pa in certificate vel buaipui turin min chah haw a, mahni ina haw ka chak loh ber tum ani ang. Mahse haw loh theih anih loh avangin ka haw a, Ruatpuia nen erawh kan phone a rim dun viau. Ka haw atanga karhnih a ral hma in kan written test result a chhuak a, ka lo tling ve hlauh a. Ruatpuia’n min rawn hrilh tirh ah phei chuan ka lo awih vak lo a, mahse ka chhan dan ka ngaihtuah erawh chuan a awm ka ti tho. Interview tura ka kal a ngaih leh takah chuan ka thiante an lungawi lo lek lek a, kan chawlh chhung zawng ka awm bo a, an lak atang hrang riau ah min ngai hlawm a. Hna chungchang velah engmah ka hrilh bawk loh avangin tumah chuan min be tha duh lo. Ka thiam loh liau liau ani a, an thianho ah thuruk a awm ngai miau lova. Mahse ka kal dawn zanah meuh chuan lungawi lo hmel pu hauh lovin min rawn thlah a, keipawh ka hlim leh ta. Champhai ka thlen chuan counter ah Ruatpuia chuan min lo nghak reng tawh a, kan han inhmu chu nuam kan hle. Interview ka hmachhawn vawikhatna tur anih avangin ka zam takzet a, a tak thei ang ber turin min han interview der vel a, zawhna ho tak tak min zawt a, chung ringawt pawh chuan min pui hle in ka ring a ni. Ka thlen tuk tuk leh ah interview nei turin kan kal leh ta a, min rintawk thu chu Ruatpuia min hrilh tam ber ani. keipawh ka zam lutuk kha a zia ve in ka hria a, a takah erawh ka ti tha thei kher angemaw chu? Board ho in an duhtawk a zawhna min zawt chu thlanfim te hi a bawl ve in ka hria, ka rin ai erawh in ka chhang tha thawkhatin ka hria a. Ka tlin leh tlin loh thuhran chutia ka zo fel chu ka thawveg ve hawk mai. Ruatpuia chu ka han call a, pawnah a rawn chhuak vat a, a dan pangngaii min rawn nuih leh var var a, “Engmah min zawt suh”ka lo ti nghal a, “Um…zawt miah lovang. Ka va thlah ang che”a ti a, ka lu chu ka lo thing a,”Office ban pawh ala nih loh hi, ka haw ve thei alawm”ka ti a. Min thlah chu a tum lui tlat a, kan inhnial vel lai chuan rickshaw a rawn tlan lut a,”Saw ka haw na tur a rawn kal mai alawm”ka ti a, driver chu ka han be nghal a. A passenger phurh a drop a, ka chuang lut ve nghal a, Ruatpuia chuan lungawi lo zet hian min melh a, ka bye bye pawh min chhanglet duh lovin a lut tau daih a. In ka thlen hnua ka thlen thu ka hrilh pawh min chhanglet duh lo, ka then sak a, a duhawm tho tho.
.
Inrinni chawhnu atang ka pum nuam lo chu ka mu reng a, ka that leh mai ka ring a. nidangah pawh hetiang hian ka awm ve zeuh zeuh a. Nachhawkna ka ei a a reh ve mai thin. Hemi ni erawh ka rin aiin ka na rei a, damdawi pawh chuan min chhawk mai thei lo. Ka pitei chuan doctor rawn tha a ti a, ka hnial duh ta bik lo. Eli leng chu a ko haw a, ka hming ziak turin a tir a, a rawn haw leh chuan ka lo la mu fo a. KA mutnaah a rawn inthawlh ve a,”Sis, I nuam lo satliah emaw ka lo tia”a ti a. Ka that leh mai tur thu chu ka hrilh a, “Kan doctor thar saw a thiam an ti khawp asin, thla khat a awm tling tawh ngem aw? A fel zia hi an sawi ve ziah lehnghal”a ti a. A na a rawn chhuah leh avang chuan ka thlan te chu a tla phung a, Eli chuan an alai chu a rawn hmet a, ana zualpui pawh a reh ve nghal sawng sawng in ka hria. Insiam turin ka han tho a, ka kekawr hak lai chu ka thlak a, kawr erawh ka thlak peih lo. Keini aia hma pali lai an awm a, kan nghak ve ta ran a. A hma ang em chuan ka na tawh loa, nuam tak phei chu a ni chuang lo. Ka hun alo thlen chuan Eli chuan min luh pui a, parda ka keu tur chiah chhunglama tawng ri ka hriat chuan ka tha ti khur dawt dawt a, ka che thei lo. Eli chuan ka natna vang ah a ngai ani ang, min kai a, min luhpui a, min hmachhawn zawnga lo thu chu tudang nilovin Puitlinga ngei ani. KA tum loh lutukin ka rin loh na hmunah ka hmu leh ta, ka phone hum lai chu ka thlauh bawl a, rang takin a rawn hawi chhuak a, a hmel mak tihnaa khat chuan min en a, “Naupang”zawi sap, fiah tak si chuan a ti a. Eli chuan mak ti lutuk hian min melh tawn ta reng a.
.
.
Ka phone chu ka chhar a, ka tha te chu a khur ru der der a, chu hmun atang chuan chhuah ka duh ber. Ka na avang erawh chuan keimahin ka insaseng thei der silo. Eli chuan ka pum nat thu chu a sawi mawlh mawlh a, a room a mutna tur khum awm ah chuan min mut tir a. Ka ngaihbel vang anih ka ring lo Puitlinga pawh chu a pangngai lo chiang lo ani. Min enchhung chuan tumah mah chu kan tawng lova, a hmaa thutna awmah chuan kan thu a, chiang takin min melh kalh a,”Naupang… zai I ngai dawn tlat mai”a ti ban charh a, “Zai a?”Eli nen chuan kan ti rual thawt a, “I rilphir paih angai a… I chhungte nen lo inbia ula, hetah pawh ka zai thei tho a, Aizawla in duh zawk pawhin in thu thu nise. Mahse a rang thei ang bera zai erawh I ngai dawn ania”a ti a. Damdawi min chawh chu kan lei a kan haw ta nghal a. Naupanlai atang hrisel ve tak ka ni avang hian damdawi ei pawh ka hreh thei hle a, chutianga zai hial ka ngai tur chu ka huhurh tak meuh a ni. Ka putea chuan Aizawl kher ah a ngai chuang lo hetah enkawl tur che kan indaih zawk a ti a, ka chhungte biak ve hrim hrim chu tha ka ti a. Zanah ka pa nen kan in bia a, rilphir zai chu thil hlauhawm anih loh thu in min rawn hnem a. Ka pa a hnaah a chawlh theih loh avangin ka pu Thingdawl a mi a that loh avangin ka nu leh ka u chu an kal angai a, hetah ka putea te an lo inhuam tho bawk avangin helama in zai turin thu kan ti tlu ta ani. Eli chuan a hriat chak tak hriat tumin min thutchilh ran a, kan chanchin chu ka hrilh ta vek a.
.
Ka in zai hun tur a thlen hma ni in hospital ah kan lut a, Ruatpuia leh Eli chuan min awmpui a. Tlai deuh hlekah Puitlinga a rawn kal a, min rawn pan vat a, a hmelthat ngaiin ala hmeltha reng a, chung ka ngaihtuahna te chu Ruatpuia’n ka rizai sin a rawn siamthat chuan an bo ta chauh a. Ka inthiam lo zawk,”Sangte, I chanchin vel hi I chhungte ka va hrilh ange, inchhungah hian signal a awm tha miah lo”tih pah chuan a ding a, a chhuak nghal a. Ka khum bulah Puiltinga nen an intawk chiah a, an lenzawng chu a in tiat tawk hle a, Ruatpuia sa a tha deuh zawk tih mai ani. Ka khum bula thuthlengah chuan a thu a, “Sis, thil ka han lei lawk ange aw”tih pah chuan khum atang a tho a, a kal ve daih a. A ruk tak chuan a nuam ka ti hlawl lo,”Naupang.. Thil huphurhawm tak ani lo ania aw. Kan zai zawh ah che phei chuan I rin ai daihin I tha chak ang”a ti a, han sawi leh mai tur chu a van ve hle tih ka hria,”Engtikahnge hetah I lo thawh a?”ka ti a, “Thlakhat vel chu a tling ve tawh. Ka vannei a regular tur khan post a ruak a ka hmu ve ta hlauh anih hi”a ti a, amah vek chuan,”Helamah I awm ang tih rin ngaihna pawh ka hre lo a”a ti a. Ruatpuia chu a rawn lut veleh chiah a, “Kan kal ange, tluang taka zai che ka inbeisei”a ti a, a kal ta nghal a. Kawngka a chhuah dawn chuan a rawn hawi let a, kan mit leh mit chu a intawk siah a, tihdanglamin ka awm leh ta.
.
In zaina room ah min nawr luh dawn chuan ka zam ve hle a, ka putea chuan hlau lo turin min hnem mawlh mawlh a, Ruatpuia pawh office chawl meuh in a rawn kal a. Remmuana hmela mahni inrintawkna awm ka hmuh chuan ka thla a muang huaiin ka hria. Ka banah a vuan a, “Naupang I tha leh vat ang”a tih chu ka hria a, a bak engmah ka hre tawh lo. Ka harh leh meuh chuan ward ah ka lo awm leh tawh a, ak chhungten min lo thut bial laih a, “Nu, a harh in ka hria”Eli tih ri chu ka hria a. Ka la men peih loh avangin ka maimitchhing vang vang a, ka lo muhil leh sek anih ka ring. Ka harh chiang ta khawp mai, Eli chuan ka ban a lo chul heuh heuh a,"El..." min rawn en vat a, "Sis... i lo harh chiang tawh ni maw?" A tho nghal vat a, a tlanchhuak a, reiloteah Ruatpuia a rawn lut a, hlim hmel sarh hian min nuih a, ka bulah arawn thu nghal a. A bana asana bun chu ka khawih a, "Dar 5 a pel chiah.."a khi sak a, "Hei thiante pawh an lokal ve a"a tih lai mek chuan ktp hruaitute ho chu an rawn lut a. Min rawn chhaih liam liam hlawm a, Remmuana rawn luh lai pawh ka lo hmu lo, U Duhawma kan branch leader chuan fiamthu a lo thawh mek a, "Ruatpuia meuh pawh awm hle hle theilo khawp kha chu rawn kal loh ngamna chi ani tawh lo hrim hrim"a ti suah suah a, an nui tha hlawm a, Remmuana'n min rawn en vel lai tak ani nghe nghe. Chiang zet hian min melh kawk a, "Zai zawh hlim te ani sia duh ai in bawr tam deuh ania, rei awm lo ang che u"a ti hmuk a, a chhuak nghak daih a. Ruatpuia te rawn kalpui hmeichhe awmchhun chuan,"An fak tehreng nen a thinchhiat hmel zek. Doctor Christy nen inkawp angin an sawi leh tawh mawle"a han tih zawm zat a. Chu lam chu an khel ta lem lo, rei pawh awm tawh lovin an tin ta dial a. Ruatpuia erawh ala awm a, Eli rawn thlen chuan haw ve tuein ka ti a, a ngaihsak duh der lo. Eli pawh chuan haw turin a ti ngial a, a duh chuang lo. Ka tir lui peih yawh lova, mutchhuakin min rawn zem leh chiai chiai a ka lo muhil leh ta siai siai a.
.
Tawng nak nak thawm ah ka harh a, khua alo eng ut tawh a, ka lo mutui hle ani ang zanah vawikhat chiah ka thangharh a. Nurse pakhat hian min jection na tur alo buatsaih mek a, ka meng tih a hriat chuan min be luam a, "Dr.Mamuana thiannu i ni tih ka lo hria a, a ngaihtuah che ka ti reng a"a ti a, a nui sang reng a. Lehlamah chuan heng nurse te pawh hi an hmelhriat lwh hmelhriat loh kar an ti hla lutuk hi ka haw thin. Keipawh hi Puitlinga hmelhriat ni lo ila hetiang tak hian min ti lo ang, zan lama ka khum piah a mite a tihdan reng kha mi tha tak anih ka ring lo sa reng tawh a. Chhan pawh ka chhang peih lo ka maimitchhing leh daih a. Ka pitei chuan chhun lamah min awmpui a, nu tawng tlem ve tak mai hi ani a, kan tawng tam lo khawp mai. Eli hian chhun na pakhatmah a neilo, ka putea hi pa vannei tak kan tih thin kha ani a. Ka pitei hi kan naupanlai atang reng tawh khan tute pawhin kan ngainat a ni a, tawmgkam in min tihlawm thiam lo mahse a takin a lantir thung a. Keioawh hian ka putea ai mahin ka ngaina zawk. A lehkhabu rawn ken chu a chhiar a, keipawh whatsapp ah Ruatpuia nen kan in bia a, zanah rawn riah a tum thu a sawi chuan ka lo hnial char char a. A tawpah phei chuan a thin a rim a, min reply duh lo. A chhungte ka hmaizah bakah thil mawi tak ani pawhin ka hre chiah lova,chuvang a hnial chu ka ni. Zanah erawh min rawn e leh ta tho a, hla zir a ngaih avangin kan inbiakna pawh kan ti tawp a, min riahpui turin Eli pawh a rawn thleng tawh a. Vengchhung thil a sawi tui leh hle a, ka hriat theih chhun anih avangin keipawhin ngahnawmti takin ka lo ngaithla ve dauh dauh a. Hriat loh karin Eli titi ah chuan ka lo muhil daih a, ka harh chuan ka bulah Eli pawh alo mu fel der tawh. Ka zun chhuak chu khawvar nghah thlen tir ka tum ngial a, a theih dawn lo anih hmel. Eli han tihharh chu ka tum zet na a a muttui em avang leh ka tih theih mai ka ein avangin muangchangin ka inher a ka tho chhuak ve hlawl a. Ka kalna tur erawh thui ka ti reuh khawp mai, muangchangin ka kal a, toilet atanga ka chhuah leh chuan khum thlenga in dawm kun phei tur chuan ka huphurh tawh ngang mai. Ka kal beuh beuh a , a tawpah ka thleng ve ta hram a. Ka dul phuar erawh ana ngut ngut a , nachhawkna min chhawp chu ka han ei ringawt a. Zing thleng pawh chuan a na chu a la awm reng a, nurse bulah chuan ka han sawi deuh thuak a, keimaha toilet ka kal erawh ka sawi lang lem lo. Remmuana chuan ward a rawn fang a, ka awmdanah min ringhlel ani ber ang chu,"Khawilai tak nge tunah khan na?" a ti a, ka khawih a, "I in her na lamah a na mi?"a tih chuan toilet a keimaha ka kal thu chu ka sawi tawp a. Thinrim hmel deuh jian min melh run a, "Damlohna thil hi chu in tih luhlulna chi ani miah lo ania aw, tuna i dam that loh chuan hnuhma a nei anga a pawi zawk thei ania"a ti nghut a. Damdawi a Iak mawlh mawlh a, "Hei hi in lo lei dawn nia"a ti a. Eli rawn luh leh hnu chuan a rawn tum deuh bar a, a chhan ka zawh chuan,"Kha doctor Puitlinga i tih khan min hau hrep alawm. Sis, i ti awm ang lo e min kaihthawh mai tur ania"a ti nuah nuah a. Ka inthiam lo letling zawk, chutianga lo hauh kher chu thil tul lo tak ani asin le.
.
Damdawiinah karkhat dawn ka awm a, a rei ka ti ngat ngat khawp mai. Ka nu pawh a rawn chho a, damdawiinah zankhat min riahpui hman a, a tukah inlamah kan haw ve thei ta hlauh a. Kan chhuah tlaiah Remmuana chu a rawn kal a, ka nu sawmna vanga rawn kal ani mah zawk. Kan pahnih inkar bik kha tawp mahse ka nu nen erawh boruak danglam miah lovin an inkawm bawrh bawrh a. Ruatpuia awm ve reng erawh ngaihtheih loh hmel zetin a rawn melh leh thin. Ka thinlungah chuan la thi bik lo mahse kan inthen dan kha a tha nat thlak ve thlawt a, a lam hawi hi ka tum lo ve hrim hrim a, ka paltlang ngei pawh ka inring a ni. Ka tan mi tha em em katawng bawk a, hlimna kawng ka zawhna tura ka tana ruat anih ka ring hman hial. Ka la that chian hma in kan interview resulta chhuak a, post hnih ruak ah post khat chu ka chang ve hlauh a, Ruatpuia'n phur fahranin min rawn hrilh a, ka chhungte ka hrilh nghal zung zung a, lawmpuina min rawn thawn zut bawk a. A hminga hna ka han nei ve tawh tur chu ka lawmzia ka sawi thiam lo. M.sc zir zawm ka tum pawh ka thulh fel vek nghal vek, ka phone rawn ri ah chuan ka phu zuk a, whatsapp msg alo ni. Ka han hawng a,
.
"Naupang khapa kha k unaupa aia a tha bikna enge awm?"
.
Puitlinga msg chu ka chhiar a, a zawhna min zawh chuan min ti na tih a in hre der silo. Ka rilru tur ngaihtuah miah lovin a unaupa ringawt a buaipui a, ka thin a rim a ni. Ka chhang let duh lova, ka phone rawn ri leh ah pawh chuan amah tho anih ring in ka ngaihsak lawk duh lova, mahse Rinpuii alo ni.
.
"D... vawiinah thil ka hre thar a. Engineer-a leh Puitlinga lampang ania"
.
ka thin chu a phu nghal dawt dawt a,eng thil nge tih ka zawt a,
.
"Dailoa pawhin ka hria tih chu ala hre kher lovang. Nizanah Dailoa inah Engineer-a te nen chaw kan eikhawm a, drinks kha a rawn kengsa aniang an lei lai chu ka hre miah lo. Engineer-a hian Puitlinga nena in inhmelhriat kha a ruahmanna anih thu a sawi a"ati a.
.
ka sa pup pup in ka hria,
.
"Hmeichhe luhlul tak i nih thu vel a hrilh a, a kherh thluk theih che chuan enge a sawi kha ka hre chiah lova, an lo inchawi ani awm e. Dailoa'n a hnek vung bur alawm"a tih phei chuan ka khawng lo chauh,
.
"Ka tha ana lutuk a, i rilru tihnat kha a tulna a awm miahlo tih hrilh che ka duh vang ania,hlim takin rilru nghet deuhin Ruatpuia kha kawp rawh"a han tih zawm a.
.
Ka rilru chu ana thar takzet ani, hmangaihna hi infiamna ang lekah an ni unau chuan an lo ngai a. Khang ka rilru natna te kha an va lo nuihzat nasa dawn tak em!
.
Keimah min dem zawk awm takin vawiin ni thlengin ka ngaihzawng thar chungchangah pawh a rawn inrawlh a, ka ngawi mai mai tawh tawp lovang.
..
Ka hna thar pawh ka zawm ve tawh a, Ruatpuia lo thawhna hmun anih bawk avangin hrehawm ka ti hran lo. A thawk sa te an fel hlawm bawk a, ka huphurh ang aiin ka tlangnel hma dawnin ka hria. Thian mumal tak ka la nei lo erawh kohhran a inhman ve duh chuan a buaithlak deuh hlek a. Ka kawm ber leh ka unaunu Eli lah chu M.A zir zawm tumin Aizawl lamah a kal leh daih tawh a, a khawharthlak thin hle. Eli te upa ber U Ruata te chhung pawh an nu an rawn transfer fel tawh avangin helamah an awm a. Mo karah an awm ve tawh avangin keipawh ka putea te ngaihdan ani dawn lo tih hre reng chungin in luah tur ka melh ru ve reng a. Ka putea te veng chhuahsan loh hram chu ka duh a, Ruatpuia chu min ngaihvenpui turin ka chah bawk a. Mahni veng alo ni bawk a, rei vaklo ah a hmu a, kan va en pawh chuan ka duhtawk viau. A lian lutuk lova, pakhat luah ah chuan a fel tawk ren rawn a, ka nu te pawh lokal se tawt hrehawm lutuk anih ka ring lo. Thlathar a luah lut turin ka han hauh fel a, chawei laia ka putea te bula ka sawi chuan ka rin lawksa angin insawn chu an phal lo bur. Mahse ka han awm ve rawih phawt anga ka belh ber tur an nih tho thu te chu ka han sawi ve a, in pawh ka hauh ve thu ka sawi chuan min hnial lui ta bik lo. Ka chhungte pawh ka rawn lawk vek a ka ngaihdan chu min tawmpui a, mahnia ka awm tir erawh tlem chuan min ngaihtuah ve deuhin ka hria.
.
Ka ina ka insawn luh dawn chuan ka nu pawh min luahpui turin a rawn chho a, ka hlauh ang ngeiin ka office bana ka haw chuan Puiltinga chu alo thu reng a. Ka nu nen an lo titi mawlh mawlh a, a hmel hmuh chu ka peih thlawt lo. Room ah ka lut tlang a, ka inthlak zawh hnu pawh chuan ka chhuak duh lova, a haw hunah chauh chhuah ka tum a ni. Ka nu chu a rawn lut a, khuma ka lo mu min hmuh chuan min ngaihtuah hmel takin a rawn lut a, ka that thu ka sawi pawh chuan Remmuana chu a ko lui ta hram a, rang takin a rawn lut a, “Mamuan, a in zaina nghawng te hi ani lo maw?”ka nu chuan a ti a,”Ka nu, engmah a na lo ka tih kha, ka chau deuh a ka mu mai mai ka tih chu”ka ti a. Remmuana chuan min melh run a,”Ngil tak khan han mu the”a ti a, “Ka na lo ka tih chu in va ninawm tak”tih pah in ka tho a, kal ka tum chu ka banah na zet hian alo hmer a,”Ka thusawi kha I hre lo mi”vawt raih chuan a han ti a. Han hnial hrep chu ka tum a, mahse ka nu a awm ve reng avang chuan ka ngawi ta hram a. Mut erawh chu ka mu ta em lo, ka na miau lova. Ka nu in chawei turin a ti leh bur a, phur lo zetin rawng ka bawl a, ka nu nen tv an en a, a khat tawkin an inbia a, an inbiakna pawh ka lo ngaihsak lo bawk a ka hre lem lo. Chaw kan eikham hnu chuan a haw mai dawn emaw ka ti a, a thut hmun chu a la rem tha sauh sauh a. Chanchinthar kan en zawh chuan ka nu in min mutsan a, kan pahnih in ngawi rengin tv kan en a, inbiak pawh chu kan tum lem lo. Ruatpuia rawn lut chuan kan boruak chu a rawn thlak danglam hlauh a, ka lawm khawp mai. Ruatpuia rawn luh hnu rei vak lo ah Remmuana pawh chu a haw a, kan inah a rawn lenglut a hmuh vawikhatna ni mahse damdawiin atang tawh khan inhresa kan ni tih a hria a, engmah min zawhbelh lo.
.
Ruatpuia haw tur chu a bike bul thleng ka thlah a, a kal dawn chuan ka biangah a fawp zeuh a, a kal liam thleng chuan ka thlir zui a. Inchhungah lut mai lovin ka han hawi khawmuang a, kawmchhak kawngpuia motor ding reng ka han hmuh chuan Remmuana ta tih ka hria, a rawn chhuak zui nghal a, min rawn zui luh leh hmaa inchhung luh chu ka tum a ni. Min um phak dawnin a hre ta bik lo aniang, min rawn ko ta vak a, he mihring luhlul pa hian engmah pawisak anei leh hlek lo vang. Kawngkhar ngheng chuan zial a zu vang vang a,”Zan a rei tawh va haw tawh teh, ka mu duh tawh ania”ka ti a. KA thusawi chu ngaihpawimawh loh hmel zet hian zial a phawrh leh a, ka nemsawn a inchhunga luh chu ka tum a, “Naupang, ka duh hunah lo chuan I mu bik lo ang”ngeiawm zet hian a han nui a. Min vawnna kut chu ka paihthla a,”I thu thu a awm tur ka ni em ni? Min van lo hmusit awm em em ve, engvanginnge ka nunah hian I rawn inrawlh?”ka hmuiah chuan a rawn fawp a, ka thaw chu a chham lo chauh, in lakhran pah chuan,”Tawng tam reuh lutuk mai”a ti sap a, ka insum thei tawh lo. A hmaiah chuan ka beng ta pawp a,”Zaktheilopa, I kuthmawr pawh khan min khawih leh tawh suh”ka in rin hma in ka mittui chu a rawn tla a, chutah meuh chuan inthiam lo hmel a pu ve ta,”Ka tihpalh Naupang, mawi lo taka chet ka tum miah lo ania”a ti a. Ka mittui chu ka han hru thuak a,”Nangni unau avanga ka mittui hi a tlak reng na chhan tur a awm love, ka nun atang hian kal bo vang vang rawh”ka ti a, “Naupang….”a ti hrawk a, “Khatianga min koh pawh kha ka duh hek lo, ka ngaina hlawl lo. Doctor zahawm tak I ni emaw ka lo ti thin, mahse I nihna dik tak hi ka hre tawh. I hmelhriat nih pawh hi ka duh tawh lo”ka ti hmawk hmawk a. Min en tlawk tlawk a, “Mi rilru tihnat pawitihna nei miah lo khawpa awm mihring hi nangni lo chu ka la hre lo”ka hmui chu a rawn hup a, “Eng ber nge I sawi tum?”engtiklai pawha hnehtu mitmeng pu thin kha hlauhthawnna in a khat ta thung,a kut chu zawimuangin a la sawn a”Nang leh Muanzuala thil tum chu ka rilru I hneh theih leh theih loh in chawi kha a ni lawm ni? Hah! Tenawm lutuk”ka ti a. A thaw halh halh a,”Engkim ka hrilhfiah thei che” “Engmah hrilhfiah ka ngai hran lo ve, nangmah vanga ka tawrhna te kha ka ngaihtuah let hian ka zak ngawih ngawih, tiang turah hian ka lo ngai lo che asin. Min then pawh khan chhan dang daih vang ah ka lo ngai a, mahse…. Nang leh kei hi inhmelhriat anga awm pawh ka duh lo”kawngka chu ka hawng thuai a, ka lut nghal a. Ka mittui chu a luang zung zung a, ka mualpho thui hmaa ka luh mai hi a tha reng ani.
.
Ruatpuia msg a rawn thleng zut zut a, reply thei pawhin ka khawsa lo. A call ka dawng chhunzawm a, mahse ka thil tawn chu hrelo se ka duh zawk a, chu pawh ka pickup lo. Kan inbia anih chuan ka inthup leh thei dawn der silo a, ngawih tlang mai chu a tha in ka hria ani. Engtin tin emaw zinglamah ka lo muhil ve a, ka nu in min kaihthawh chuan ni alo tlang sang urh tawh. Ka inbual a, chaw kan ei nghal a, ka nu chuan zan lama thil thleng kha a hria angem aw tih ka ngaihtuah zawk a, mahse engmah a sawi tak lem loh avangin a hrelo anih ka ring. Zan lam boruak fuh loh kual vel avang chuan Ruatpuia pawh chuan min rawn sawm ka ring lova, taxi in ka kal ta ringawt a. Office ka thlen chuan ka rin ang ngeiin Ruatpuia bike chu alo awm tawh. Kan room lam ka pan lai chuan General room ah Ruatpuia lo thu tum bur chu ka hmu a, a rawn hawi chhuah loh avangin min hmu lo. Hna ka ngah deuh avangin chawhma chhung chu ka thutna ka thawhsan lova, chhun thingpui in dawnah ka in chingfel ve ta hram a. Hawiharh pahin canteen a inhnawhpuar ka tum a, ka whatsapp tone rawn rik chuan ka han hawng vat a, Ruatpuia alo ni,”KA room ah lokal vat ang che”tih te hi alo ni a. Ka in her vut a, canteen lam pan lo chuan Ruatpuia room chu ka pan a, thingpui in tura an kal darh hlawm avangin min hmu an awm ka hre lo. Staff ten kan hun hman dan a lo hre ve kar ani ngei ang. Kan inngaizawng tih an hriat thum avang hian office ah chuan inhnimhnai lutuk a awm ka duh lova, hoteah hmingchhiat theih ani tih ka hria a, ka fimkhur ve viau thin. Room a ka va luh chuan tukverh lam hawiin min hnungchhawn zawngin a lo ding a, ka thawm ah chuan a rawn hawi a, a bulah ngawi rengin ka va ding a, “Enge?”ka han ti mawl tawp a. A ngawi reng a, min chhang dawn lo emaw ka ti hman hial,”Nizan chungchangah khan insawifiah tur I nei miah lo em ni?”min en chuang miah lo hian a ti a. Enge ka sawi ang, dawt sawiin ka mut tawh thu ka hrilh mai dawn em niang? Dawt ringawt hmanga han in sawifel lah chu ka duh chiah bawk silo, ka ngawi ve ta reng a, ka hmazawnah a ding a, kan inlen hleih bawk a min uap hneh kher mai, “Ka tihpalh, a thleng nawn tawh lovang”ka ti sap a. Ka dar lehlam lehlamah min vuan a,”Sangte, I harsatna I thleng ngam loh khawp hian I lakah hian ka lo inhawng lo viau em ni? Chutianga ka lo awm anih chuan ka tihpalh”a ti a. Ka kuah thlawp a,”Ruatpui, chutiang engmah a awm lo. Keimah zawk ka thiam lo alawm, a thleng nawn tawh miah lovang”ka ti a. A nui hmel ka hmu leh ta, “Nizan ka haw hnu khan a chhan pawh ka hrelo, ka rilru a nuam thei lova, rawn kal leh mai te kha ka duh a”a ti a. Chuvanga min rawn biak tum tluk tluk anih thu pawh a sawi lang a, engmah min zawhbelh lo. Kan boruak pawh a pangngai chhunzawm leh ta a, a hmaa a lungawi lohna pawh a hmelah hmuh tur a awm lo.
.
Mahnia han awm takah chuan chhungte hlutna pawh ka hriatbelh phah nasa khawp mai. Phak ang tawk in kohhran ah ka inhmang chho ve a, nuam pawh ka ti a, rei tak ka lo khawsak tawhna ang maiin ka tlangnel ve tawh a ni. Remmuana pawh kan inhmu ngai mang lova, bazaar ah ka hmu leh zauh thin tih loh chu ka hmu ngai lo. Kan tuanna hmun a in ang lo bawk a, kan inhmu ngailo pawh chu a mak hran lo. Ka thiante in rawt phur chuan min rawn tlawh an tum thu min rawn hrilh a, ka awmhmunah ka lo phur ve viau bawk a. Ka in a len loh avangin Rinpuii chiah a riak a, mipa ho erawh circuit house ah an riak a, chaw chu an rawn ei thung. Nihnih an cham chhungin Rihdil an tlawh a, kalpui chu chak ve mah ila kan hnaah ka buai vanglai ani a, ka chawl thei lo. An haw dawn zan chuan Ruatpuia chawei turin ka sawm ve a, ka thiante nen chuan ka inhmelhriattir bawk a. Dailoa hi kan zingah chuan a puitling deuh ber a, Ruatpuia pawh a titi pui leh thei nghal mai a. Rony leh Siamtea erawh Champhai kal manah an ti a, Champwine chu an lei a, in ngai lo an ni bawk a an kai hma khawp mai. An titi tui dun malh malh hle a, an tawng kal tluan lai chuan Siamtea chuan min rawn thlek vang vang a,”D… I Puitlinga kha vawiinah kan inhmu a, Chawngthu restaurant ah min chawlh pui taka sin . I that leh that loh te min zawt a”a ti a. Ruatpuia chu ka melh zawk a, hre awm angin a awm lo. Rinpuii chuan titi dang a rawn vawrh chhuak hlauh a, ka thiannu remhriatna avangin ka thawveng nghal hawk bawk. Ruatpuia haw hnuah Siamtea chu an hau liam liam a, ani lah hauh tlak pawh anilo, a sawi lai a hrechhuak zo tlat lova, kan nui liam ta mai mai a.
.
Zankhat chu tum loh deuhin damdawiinah kan thawhpui fanu damlo kan in thawhpui dangte nen kan kal a, Ruatpuia office thila a zin hlan ani nghe nghe. Motor neitu ber Mazawmi chuan quarter ah kan nau a awm a, tlawh lawk ang u a tih avangin kan zui ve ta zel a. Kan luh chuan Remmuana chu thuthlengah a lo mu a, tv alo en bawk a, a in tih pawh ka lo hre lo. Min hmuh chuan a phu ve zawkin ka hria, mahse a inthunun leh nghal vat a, “Hei kan nau Dr.Mamuana a nia, naupanlai atang kan inhmu tam lo bawk a, kan in pawh lutuk lo thin a, ka pa pa leh Mamuana nu pa hi unau an nia”a ti a, keiniho pawh kan hming te chu a han sawi diat diat a,”Sangte{Ruatpuia min kohdan hian min ko vek a} kan nau hi vacancy a awm phei chuan bawhzui chi viau ang”a han tih zawm a, Remmuana chuan min lo kelh kuau a, “Khawiah emaw kan inhre tawh em?”a rawn tih chuan ka thiante chu an rawn hawi thap a,”Kan la inhre ngai miah lo”a mah melh pah chuan ka ti a, “Ka hresual anih dawn chu. Ka hmelhriat thin nen in in ang lutuk a”a ti a, ka chhag let tawh lo. Haw kawngah chuan Remmuana chanchin chu an sawi phei nak nak a, Mazawmi pawh chuan a chhuang ve tawk hle tih a tawngkamah ka hre thei.
.
Biakin kawtah chuan Ruatpuia chu alo vei thuak thuak a, min hmuh chuan min rawn pan vat a,”Inkhawm banah hla zir lo mai ang, sawidun tur kan nei”a ti a. Midangin min rawn chim zui tak avangin engmah pawh sawibelh tawh lo chuan kan lut a. Inkhawm banah a sawi ang chuan ka haw tlang nghal a, ka inthlak zawh fel chuan Ruatpuia pawh a rawn lut ve chiah a. A hmel chu a thutak deuh raih in ka hria, a bulah min pawt thu a, “Sangte, kan hunliam tawh leh kan nunhlui te hi sawi chhuah a tul ka ti ber lo. mahse sawi loh theih loh thil hi chu alo awm ve reng te pawh ani thei a”a han ti hmasa a. A thusawi tum chu ka man chiah lo, “Kha doctor nena inkungkaihna in lo neih thin pawh kha ka hre vek a, chu chu ka buaina ani hran lo. Mahse in la inhmu fo tih ka hriat hian ka na ani”a ti a. Mak ti tak hian ka melh a, “Engvanginnge kan inhmuh fo ang?”ka han ti a,”Ka haider theih bak thil hi a awm ve ania, phat kher pawh a ngai lo. Engkim min hrilh thei ka ti ani lawm ni?”a hmaa tawng dam thlap kha a awki pawh a hriam ta hraih mai,”Chutiang sawi turin engmah thleng hek lo”ka ti a, thudik ni miau hek,”Zanah te pawh I han leng ani lawm ni?””Eng a!? Vawikhat chu kan kal ngei alawm , u Mazawmi ten en kan nih nghe nghe kha. A in tih pawh ka hre hek lo, I duh chuan u Mazawmi te pawh I zawt thei ang”ka ti a, ka thin chu a sa ve phat ani. A phone a rawn phawrh chhuak a, “Hei hi en la hriatchhuah I nei em?”ka han en chuan ka ina chaw a rawn ei zan a kawngkhar bula kan inhnial lai kha ani tih ka hria. Ka dara a rawn vuan lai tak leh ka ban a vawn na chu ani. A phone chu a la let a,”Khami zan khan eng tak hian nge min mawlh ka hrelo, in ka thlen hnu khan ka rawn kir leh a, mahse hepa nen hian in lo ding dun reng a. Khatih laia ka awmdan kha i hrethiam phak lovang, thla hi ka la a, rei pawh ka en thei lo che u, ka kal leh ta nghal ani”a hmui chu a han liak huh zeuh a,”A zawng zawnga rin che hi ka duh a, ka tum reng bawk a, mahse a har ve deuh chu ani”a ti a. chutiang khera min ti chu ka tha ana ve zak a,”Thil hrechiang lovin khatiang khan min sawi suh”ka ti a, “I awmdan hian a zir reuh em alawm”a ti fak a, “A lo ni maw? Chutiang em chuan ani maw nang hian min lo rin loh, min enthla a ka diklohna lai I lo zawng ran a, eng ang mipa nge maw I nih le?”mahni induhtawkna chu ka lo la nei lian ve hle alo ni. A ding a, min chhuk en ran a, “Tiang khan hmeichhia tumah in min la tawngkhum ngai lo”a ti a, “Tha taka sawi tum pawhin a theih miau loh alawm”ka ti ve a, thuthlenga a ipte chu a la a, kal a tum a,”Engtia awm nge I tum?”ka tih chuan a ding a, a rawn hawilet a,”Ka zawh tur che ni awm zawk tak nih kha, I chhanna ka hresa nih rawh se, doctor chu ka elphak ve lovang”ngeiawm zet hian a nui hak a, a chhuak zui nghal a.
.
.
Ka thin chu a rim takzet a, kum chanve vel kan inkawp ve chauh a, min ring zo lovin min lo enthla duh hial chu ka hua a ni. Zing khawvar hma deuhin ka phone ri chuan min tiharh a, ka’n en chuan Ruatpuia alo ni a, ka la duh lo. Office chawlh ani hlauh chu ka lawm kher mai, ka inkhuh tha sauh sauh a ka muhil leh vang vang a. Ka han thanharh leh meuh chuan ni chu alo tlangsang tawh hle a, ka tho ve nghal a. Pawna chanchinbu lak tumin kawngkhar chu ka han hawng a, veranda thuthlengah chuan Ruatpuia chu alo thu reng a. Min hmuh chuan alo tho vat a, chanchinbu chu ka la a ka lut leh nghal a, min rawn zui ve zel a,”Nizan thil thleng kha pawi ka ti lutuk, ngaihdam rawn dil che ka duh a”a ti a,”Engmah ka sawi peih lo”ka ti a. A hmel hmuh pawh chu ka chak hlawl lo,”Sangte, ka ti lutuk mah mah tih ka hria alawm, mahse ka hmangaih vang che leh chan che ka hlauh vang che ania, min hrethiam hram rawh”a ti a, ka ngawih reng avang chuan amah vek chuan,”Ka tawngkhum dan che kha a mawi lo tih pawh ka hria, thiam thu sawi tur ka nei lo, min ngaidam hram rawh”a han ti leh a. Dawhkanah chanchinbu chu ka pharh hluai a, ka bih ngar ngar a, ka bula chair ah chuan a thu ve reng bawk a,”Min rin lohzia ka hria a, rin ngam che harsa ka ti tawh, enthlak ngai khawp khan min lo hmu khawlo viau em ni?”ka ti a,”Ka tum lawk ani bik lo ka tih kha min rin sak hram rawh. Khapa nen khan a endan che ka hmuh khan engemaw tak a awm ka ring a, a hnuah ka hre ta reng bawk che a. I laka a rilru puthmang ala danglam lo tih pawh ka hmu thiam ve tho, ka thik ve alawm”a ti a, a meng dul raih a. Ka thilsawi chuan ka nuih a ti za ve lek lek a,”Thleng nawn atan ka duh tawh lo, a thlen leh chuan min rawn hmuh buai pawh a ngai tawh lovang”ka ti a, a nui sak a, “Min ngaidam tihna em ni?”a ti a, ka lo bu nghauh a, min rawn kuah chuk chuk a,”ka lawm e, ka lawm lutuk e”a ti a. Kan boruak pawh chu a tha leh viau a, ka chungah a fel zual emaw tih tur a ni. Keipawhin min ngaihsak a min duat tu chu ka haw reng thei bik lo a ni.
.
Krismas hmang turin Aizawl lamah ka haw a, ka thiante nen kan inzui chawt a, kan awmdarh hnua ka inhmuhkhawm leh hmasakna anih avangin kan hlim tlang bawk a, kan inthlah lo ani tawp. Chaweikhawm kan ti ve deuh reng bawk a, a tirah chuan Ruatpuia chuan engmah a sawi lem lo. mahse a hnuah chuan min khak ve deuh a, ka ngai thutak duh hran lo. A chhan chu ani nen kan intawn hma atanga ka thiantha te hi thlah emaw ka tum lova, a hmaa ka nundan pawh Urlawk zanah pawh chuan inkhawm dawnah kan inbia a, banah ktp programme ah a tel tur thu a sawi a, biakin ka thlen tep tawh avangin ka sawi lang lem lo. Kan thianho in hmankhawm kan tum a, chu chu ka rilru ah ka hre ran a, ban huna hrilh mai chu ka tum a. Inkhawm banah ka call a, a pickup theih loh avangin leh miscall a hmuh chuan min rawn call back mai ka ring a, msg pawh ka hnutchhiah hran lo. Kan inah kan kim thap tawh a, ka u in motor alo chhuahpui daih avangin kan nghak a, ka room ah kan titi a, kan hlim tlang leh viau tawh. Ka u rawn thlen chuan kan chhuak zui ve nghal a, kawn chei fankual chu hna hmasa ah kan nei a, Kulikawnah kan tawp a. thla te kan la a, chutianga kan lo rik laih laih chuan Remmuana te chu an rawn lang ve thut a, mipa pakhat nen hian an rawn inzui ve a. Ka lo hmu lawk lova, Dailoa’n a biak chuan ka hmu ve chauh a, chutianga min han hmu thut chu mak a ti ve deuh ani ang, a meng bial ve kawk a, keimah nen chuan kan inbe lo. Ka phone chu ka hmet eng a, khawih tur bik pawh hre chuang lovin ka hmet kual vel mai mai a, “A tha mai lawm tiraw?”Dailoa’n min rawn nghawk pah chuan a ti a, “Eng..Engmaw?”an thusawi chu ka lo hre miah lo, “Hmanna tur an nei lova, kan bula an rawn tel ve mai dawn anih chu”a han ti leh a, thu an lo pawhchah tawh avangin engmah pawh ka sawi lo. Kan in lam pan chuan kan let leh ta vang vang a, ka nu ten chutia Remmuana an hmu chu an lo phul leh hlut a, inchung ah kan chho tlang a, ani erawh ka nu tenen an la inbiak avangin a rawn kal ve mai lo. A thianpa Puipuia chu funny deuh hi alo ni a, kan vawikhat inhmuhna mah nise a nelawm reuh phian a, a titi kotlangah kan dak ani nghal deuh ber. Kan thil eitur vel buaipui turin inhnuai ah an chhuk dial a, kei erawh Ruatpuia call ka dawn avangin ka la awm a, rei tawk fang kan inbia a, in lama ka hman avang chuan a rawn lawm ve hle in ka hria. Biakin atang a haw tawh thu leh mut mai a tum thu a sawi a, tha takin kan inbiakna pawh kan titawp a, ka han hawichhuah chuan Remmuana chu alo ding reng a. Ka han hmu thut chu ka phu dawrh a, a lokal lai ka hre reng reng lo, amah kal pela inhnuai lam chu pan ka tum a, ka banah a lo vuan tlat a,”Naupang, ka ngai thei lutuk che”a ti a, min vawnna kut chu lak thlak ka tum a, a aia na in min han hmer a,”Khawi maw min thlah teh”ka ti a, “Puitling tia min kohna kha hriat leh ka chak ani”a ti sap a. A kut chu ala thla a, keipawh step a chhuk tumin ka ke ka pen chiah a,”Ka hmangaih che”zawi sap hian a ti a, ka hriat chu mak ka ti lutuk a, ka hresual zawk anih ka ring. Ka han hawi let a, chiangfe hian min lo en reng a, “Ka hmangaih che Naupang”a aia ring chuan a ti a. Min rawn pan hnai a,”Ka tlai lo tih hi min hrilh hram rawh, khawngaihin””Hmangaihna hi ifiamna ang lek ani lo asin. Ka nat hrep tawh hnuah engvanga min hrilh hnuhnawh nge I nih?”ka ti chhuak thei hram a,”I lakah hian tihsual lian tak ka neih vang ani, engkim hi siam that leh ka duh”a ti a, “Mahse ..i tlai tawh ani”ka lo ti a, mangan hmel tak hian min en a. Step ah chuan a thu hnawk a,”Ka damchhungin I chunga ka thiltih kha ka inchhir reng tawh ang. Ni e, a tirah kha chuan infiamna ang lekah ka ngai a, Sangtei thih atang khan engmah hi ka la serious ngai lo, nang ngei pawh a tirah chuan ka khawhar hnem nan ka hmang ngei che alawm. Mahse englai karah khan ka lo hmangaih che tih hi ka hre bik lo” a ti a. Van lam chu ka thlir vang vang a, “Min tin a takzet asin Puitling”ka phun sep a, a tho a, min rawn kuah a,”Bul tan tha leh ang, khawngaih takin hun min pe rawh. Nitin in khatianga min ko ri kha hriat leh ka duh ani”a ti a, “Puitling, midang ka tin a tel thei lo ani, min ngaidam rawh. Min duh ve ngawih ngawih tu leh ka khawharna te min hnem thin tu hi ka kalsan thei lo”min thlah a, “Khatiang kha sawi suh”min thing nawk nawk a,”Naupang…”a mittui chu a lo luang ngiai a,”I tan engmah harsa a awm lo, nang chu I chak a I paltlang theih kha. Ruatpuia rilru tihnat hi ka thei lo”ka hmui chu a hup a,”Ka tan pawh hian a harsa lo bik anga maw?”min thlah a,ka ngawi reng a, a hnu deuh ah chuan “Awle.. I laka ka tihsual hremna ah ka ngai mai ang”a ti a, a kal nghal a. Step ah chuan ka thu hnawk a, ka in sanmar chhung kha a rei bawk a, ka han thaw kawk kawk a. Inhnuaia ka chhuk ve chuan ka thianteho chu an lo ri deuh nak tawh a, Champhai atanga ka hawnsak Champwine chu dawhkan ah an lo hung a, an lo in tawh anih ka ring. An lo phul hlut a, ka han hawi kual a Puitlinga hmel hmuh tur a awm tawh lo. A thianpa Puipuia erawh alo la tawng suah suah a, min hmuh chuan min lo ko vat a,”Rawn in ve la”a ti a, ka lu ka thing a ka nuihsan mai a. Siamtea chu sitting room ah a rawn phei ve a, “D…Remmuana nen khan in in hau mi?”a ti a, “Ngatinge?”ka lo ti vat a,”A hmel kha tap zo hlim te pawh a ang alawm”a khi sak a, thildang sawibelh tawh lovin choka lam chu a pan leh mai a. Ka lo muthlu aniang Rinpuii chuan min rawn sawi harh a, an arsa kan chu alo hmin tawh a, ei mai theih in an lo suak tawh a. Ka thiante zarah urlawk zan pawh ka tlingtla ve ta.
.
Hritlang khawsikin min man bet ve a, Krismas zan atang ka mu char char a, a hrehawm ka ti ngei mai. Ruatpuia pawhin ral atang min rawn ngaihtuah em em a, Krismas leh kumthar inkarah rawn chhuk te chu a tum hial a. Chu em chu ni thei in ka hrelo a ka hnial thei ta hram a. Remmuana hmel hmuh tur a awm lova, ka thiante erawh tumahin min thlahthlam lo. Zanhnih chu Rinpuii pawh a rawn riak phei a, ka khawhar pawh min hnem khawp mai. Ni thum vel khumbeta ka awm hnuah ka tho chhuak peih ve ta a, ka khawsik erawh zan lamah a awm leh thin. Ka tui inchhawp a zawh avangin thun khat turin ka tho chhuak a, ka nu leh pa in tv an lo en a, Remmuana lo thu ve reng chu ka han hmu bawk a, ka chhungte nen hian an la inpawh em a keimah nen kan inkar chhe tawh mahse an ni nen erawh a pangngai reng tho. Min hmuh chuan a mitko a han san deuh ak a,”I zia deuh taw hem?”a ti a, “Um, zia tawh e”ka ti a. ka nu chuan a bula thu ve tur chuan min lo ko a,”I u Mamuana’n i damdawi ei kha thlak ngai a tia, naktukah I pa in a lei dawn nia”a ti a.,”Ka tha tawh lutuk alawm, ka dam ve mai ang”ka lo ti a. Ka pa chuan kumthar lama Champhai a chho rual tur te chuan min la ti ta deuh deuh a, engmah phei chu ka sawi ve lo.
.
Kumthar ruai chu ka theh ve thei ta hram a, ka inkhung rei bawk a, nuam pawh ka ti hle. Kumthar tuai theh tukah Ruatpuia hmel a rawn lang nawlh a, min surprise a tum bawk a, a hlawhtling chiang khawp mai. Kan in a rawn zawng chawp a, kan inchhunga arawn lut thut chu ka hamhaih zawk. Ka nu nen hi chuan an in hre sa a, an inkawm ve thei mai a. Ka bula a thu a, a han titi vel chu uluk takin ka lo en thin a, a lai hmel chu hmuhnawm ka ti. A haw dawnah ka thlah a, gate bulah kan ding tar eng a,”Kan chho rual mai dawn mi?”a ti a, keipawh chho tho tur ka nih avangin ka pawi ti hran lo. Mahse haw ve takah chuan a theih ang chen chen cham erawh ka duh a, ani pawhin min hrethiam tho a, min nawrlui hran lo. A cham chhung chuan a rawn leng deuh reng a, ka u phei chuan”Vengtu-a a ni ringawt alawm, nang nula tereuh te hi pa lian puiin a buaipui ve viau che sia, a lawmawm nagwt mai”a ti hial a, ka pa nuih pawh a za ve khawp mai. A haw chhoh dawn zan chuan a rawn leng phei leh a, karkhat vel cham ka la tum avangin alo han chho hmasa dawn ani. Tv kan en a, meilum kan ai pah bawk a, kawngka chu a rawn ri rawk rawk a, kan hawi vat a, Remmuana chu a rawn lut hlawl a. Kan thutna bulah a thu a, a meng sen deuh run a, Ruatpuia nen chuan min melh tawn chhen a, nuam ka ti tehchiam lo. Dar 9 a rik thleng pawh chuan a la thu tlat a, Ruatpuia haw tura ka thlah dawn chuan a rawn ding ve a,”Inbe lawk ang”Ruatpuia chu a melh ran a,”A hnenah hian sawi tur I nei lo e a”ka lo ti hluk a. Ruatpuia chuan dawhtheih hmel tak hian a lo en a,”Ruatpui, haw tlang nghal rawh”ka nawr chhuak a,”Thiana lokal rawh motor bulah hian sawi ang hmiang”a ti a. Remmuana pawh chuan a zui chhuak ve a, engthil tak chu ti leh dawn ni maw? Ka room tukverh atang chuan ka thlir reng a, an inbe rei khawp mai. Ruatpuia chuan a motor kawngkhar a hawng a, luh a tum lai chuan a Remmuana chuan a kawrah a man bet a. An intibuai dawn emaw tiin han tlanthlak mai ka tum a, mahse ka rin loh lutuk thil a thleng ta tlat, Remmuana chu a thingthi rawp a, Ruatpuia hawihai hmel chu keipawhin ka lo tawmpui a, engvanga chutianga khawsa nge anih rin ngaihna pawh ka hre lo. Ruatpuia chuan a kaitho a, an indinchilh leh ran a, rei vak lo hnuah a motor ah chuan a lut a, a tlan liam ta nghal a. Remmuana erawh a motor ngheng chuan a ding a, zial a pak khu vang vang a, mak sak taka chet hi chu a inhmeh tawh ngawt mai. Mutna ka siam fel a, ka mut dawn ah chuan Ruatpuia msg a lo thleng a, ka han hawng nghal vat a,
.
“I tana mipa tha ber hnenah zanin hian ka hlan let leh ta che, I hlim loh chuan ka lungawi lo viau dawn nia”tih hi alo ni a, angaihna ka hre lo.
.
Call ka tum a, a switchoff tlat bawk si, ka chungah hian an che maksak thei khawp mai. Remmuana call ka dawng a, sitting room ah min nghah thu a sawi a, ka han thu khawmuang leh phawt a, ka kal ta nge nge a. Inngaihtuah muk hmel deuh hian alo thu a, a thutna piah ah ka thu a, a rawn insawn phei a,”Zanin atang chuan Ruatpuia ni lovin keimah hlir min hmu taw hang”a ti a, a ngaihna hriat loh hmel deuha ka melh avang chuan a phur hmel sawt a,”Kan tlawm emaw kan tih pawh hian hnehtu kan lo ni reng thin si a”a ti duah a. Thil man har naklaia pehhel deuha an sawi phei chuan ka thin a rim urh thin,”A point ah tak lut rawh”ka ti a, “Thinchhe te. . ka sawi dawn reng alawm, nupui thinchhia ka nei deuh miah lo ania”a ti a, a nui var var a,”Tak tak ah Naupang, Ruatpuia hnenah nang hi ka dil let leh che ani”a ti a. KA phu zawk a, “I dil a maw?”ka ti tuarh a, “Duhthlan tur ka nei tawh miau lova, ka neihchhun ka apply mai loh chuan”a ti a. Rilru bet lo deuha ka thu chu min nawr sawn deuh a,”Khawngaihin bul tan min phalsak rawh”a ti a,”Ruatpuia bulah khan enge I sawi?”a thilsawi chu ka haider a,”Nang hi min pet turin ka dil, nilo a ngen in ka ngen zawk mawle. Tiang tak hian hmeichhe pakhat vang hian ka tlawm ang tih ka lo inring ngai lo. Naupang, min thlak danglam takzet ani” a ti a, “Ka duh leh duh loh che pawh I hre dawn em ni?”ka han ti a,”Chuti maiin in duhna te hi a reh thei em ni? Lo reh ta pawh chu lo nise min duh leh hun chu ka nghak tho ang”a ti a. A haw hnu chuan Ruatpuia ka call leh a, alo pickup ve ta hram a,thil awmzia chu ka zawt chiang a, “Nang pawhin ila theihnghilh bik lo tih chu ka hria alawm, Sangte, ani nen ka han in buk vel a, lehlam a rit tlat. Mahni in ti pa ve tawk tak chuan mahni mipa pui te hmaa thingthi thei kha an tam lo ang, keipawin kathei lo bur. Chuvang chuan I hlima tur anih ringin ka pe let leh mai che ani”a ti a. A in sut ri hraih a,”Hlim rengla, I hlim loh chuan ka lungawi dawn lo tih hria la, thatakin inenkawl dawn nia”a ti a, phone chu a dah daih a. Eng hi nge ka tana tha ber tur pawh ka hre lo.
.
Thla bial zan ani a, a eng pup a, inchung kawtzawl ah ka thu a, ka rilruah Ruatpuia a rawn lang zuai a, a hla duh em em thin ‘Lovers moon’chu ka ngaithla a, ka ngaithla tui hle lehnghal. Vawithum ka ngaihthlakna turah chuan REmmuana chuan min rawn fin ve a, ka bulah a thu a, “Naupang, inbia ang”a ti leh taw p a, ka earphone chu ka dah a, “enge sawi la”ka ti a,”Hmanzan khan pangngai deuhin min chhang lova”a ti a. A thilsawi lai chu ka lo pawtchat a,”Ruatpuia bulah khan engtak nge I sawi a?”ka ti a, “Ka hmangaihzia che leh neih che pawh ka duh tih ka hrilh a, a remti lo nasa khawp mai. Mahse ka beidawng duh bik lova, ka dil ngat ngat ringawt a ni mai. A tawpah a hmaa thingthi a ka dil thei anih chuan inrawlh a tum loh tur thu min hrilh a. Ka tan pawh ina harsa ve lutuk, mahse neih let theihna tur che anih chuan tih theih loh leh tih hreh ka neilo”a ti a, “Min la duh ve em?”a han ti zui nghal a,”Ka duh reng thin che, mahse tunah tak hi chuan ka confi lo”nui chung chuan ka ti a. Min melh ralh a,”Ka nghak leh mai aniang chu”a ti a. A aia thutak zawk chuan,”Naupang… ka zawng zawng hian ka hmangaih che, hma hun chu sawi theih loh thil ani an ti thin a, mahse I thinlung tikehsawm khawp chuan ka awm ngai lovang. I chak tawk lohna lai a awm anih pawhin I kianga ding nghet tlat tur te, I famkimlohna lai hlaihkhuh tur te in ani nang hi bul tan pui che ka duh”a ti a. A bula ka awm apianga ka lungphu rang thin te chu an la reh lova, a hma ang tho in an la che dut dut a, “Pangngai takin min propose rawh”sawi tur dang ka hrelo chuan ka han ti thawr a, a ding a, ka hmazawnah chuan a rawn thingthi a, ka kut chu avuan a,”Nang Zosangzuali hian kei Lalremmuana hi I bialpa atan min pawm thei em?”a ti a, “Tun atang chuan I nun dan in kan hma hun lo awm zel dan tur chu a hril ang chu”ka ti a. Min kuah ta hle hle a,”tun atang chuan I harsatna leh I hlimna te pawh I ta chauh an ni tawh lovang, min hrilh anga , chutiang bawkin keipawhin ka ti anga, kan hmachhawn dun zel tawh ang”a ti a. Kan hma hun tur te sawi dun in chumi zan chuan kan pahnih thawnthu chu ziah thar alo ni leh ta.

A tawp ta.