PETER,..! By Toni DA Ralte Ahmangaihi

Group siam tirh atanga like tu 1000 nei chin zawng zawng dahkhawmna
Ngaia
Site Admin
Posts: 25813
Joined: April 30th, 2016, 4:07 pm

PETER,..! By Toni DA Ralte Ahmangaihi

Unread post by Ngaia » May 17th, 2016, 4:46 pm

PETER,..!

Field chhung hmun khatah chuan an bawr taih a, an zi hut hut a; thenkhat mengphawk hra leh hrilhhai hmel chuan ngaih a ti tha lo hle. Minute 1 liamta maiah kha chuan hlimna authawm riiin a khat kha ania; tunah erawh thawm chu a reh duk a, mipui lah chu thehmeh angmaiin an reh thuap hlawm a, an lo thaw dep dep hlawm a! kil khatah chuan hmeichhe tleirawl ngo ving veng, mitmeng lian kelkawl, duhawm zet hi mangan hmel zetin alo ding khur zawih zawih a; a thiannu chuan ava kuah a, ani chuan mual chhung lam chu a melh ngawt ngawt a, a mittui rawn hnam tiam tiam chu a khap per sak sak a. Mual chhung a tlu reng chu an zawnchhuak ta a. Chuveleh tleirawlte chuan a thiannu chu a kai lawk a, chak zetin chu damlo natuar an zawnchhuahna lamah chuan a kalpui ta a.

“Wendy, hepa hi chu ka van * chiang tak” tih pahin Seni chuan a ph a thlalak lo lang chu a bih a, a nui har har a. Wendy chuan, “I lerh ve ngawt mai, I chang awm lo e mai; a luck viau ang. Inkhelh a thiam bawk sia” alo ti ve sep sep a. A thiannu ph chu laksakin a han bih ve a, a thiannu * bula lo lang ve pakhat zawk chuan a mit a la riau! A hmel chu a thutak ran mai a, a nui lova, mahse a nelawm ru tho si; ala naupang ve thawkhat tih chu a hriat mai a.
“Sen, hepa hi tunge a?”
“Petera anih kha, ivan hrelo, tlaiah pawh an rawn practise ziah zel hi, Mama nen anin kawmngeih lutuk, pakhat zawk kha Sangtea ania” alo ti hmawk hmawk a. A rilru chuan “PETER” alo ti sap a.

Wendy hi a a rualpui te zingah danglamna tak a nei a; a kum phu lohin a puitling riau a; hmaifang chhelo tak, heh sen hiam, thangduang tak, cher lampang leh sam dum hlap mai, hmeltha tih aia duhawm lam pawl mah zawk ani a; 1st year B.A {Hist} zirin HBC-ah nitin class akal ve thin. Ngaihzawng lam hi a ngaihsak vaklo na a a tleirawl chhuah hlim hian 2 chu a nei ve tawh a, chhungkaw pangngai leh zahawm tak anni a; a nungchang pawh a tha thawkhat viau. A tuk maia class test tur zirin a roomah chuan a tawm chawt a, mipa rual ni ngei tur rawn tawng lawng lawng chu bengchheng a tiru hle. A n in chhakah chuan an ri mam mam a; football chungchang an sawi ni ngeiin a lang.
“Bawihi, I laklawh viau na a, tirh mai tur an awm silova, hei iputea lehkha hi a pawimawh hmel sia; iva pe lawk dawn mi? inleng ka lo nei bawk si” a rawn tih chuan phur fahran lo in a tho a, a chhuak ta a. An kawmchhak dawr step-ah chuan a hlauh ang ngeiin mipa pa 5 vel hi an lo thu thap a, an titi tui hmel hle, bengchheng a tih deuh te kha anni tih a hria a, an lo chhaih ang tih a hlau hle.
“ehem! “ pakhat chuan a la rawn ti hram a, hawisawn miah lovin hmalam a bih ngur a, a kalpel a a thaw huai mai. A let leh lamah chuan chung mipa ho lam chu a va melh ve zauh a, mipakhat a hmu ta bik a! chhuna a thiannu Seni phone a thlalak a mi ngei kha ani tih a hre nghal hmiah. Rang takin a hawisawn nghal a, chupa pawh chuan a rawn en ve tih a hria; a zak ru hle.

“Wendy, I chhungte an awmlo tiraw?” Seni chuan a ti su su a. A lo bu nghat a, a thiante lo leng chu a lawm hle, kar 1 chuang a damlo a, class pawh a kallo rei hle; a khua a lo har tawh em bawk ani. Mahse a rinloh taka mipakhat lo tel ve chuan a chet velna ah a tibuai ru hle, a lai takzet ani. Chupa pui roh lah chu a ngawi ngul mai a, a rawn melh leh zauh zauh thin a. Seni leh Mama lo inngaizawng ta chu a lawmpui hle, Seni hian a atchilh ve em bawk a lawm.Chumini a tang chuan tlaitin football practise tur lo bihthlak a ching ta tlat! Hepa hian a tibuai takzet ani; * hi a nei khat khawp mai, mahse Peter hi chu a mize danglam vang nge a vei bur! Tumah a hrilh ngam silo, Seni a vangin anin hmu fova; vawi1 phei chu Peter inluahah an leng nghe nghe. Mahse an pa2 tak hi chu anin be khat em em a, anin biak chhunah pawh nula leh tlangval inbiakna rawng a kai ngailo; a puahkeh mai a hlau rum rum thin hial.
“Sen, Peter hi sas a nei ve ngailo mi?” a tih chuan a khur ru der der, a lo hlauthawng em em ringawt anih chu!
“Mama kha chuan ngaihzawng nghet deuh a nei chu a tia, mahse a ngaihsak awmlo ka ti, a biak lai awm vel ka la hrelo re re”

Khumah chuan a let tawn chhen a, a hui leh pap thin, alo vei ruk em em, a ngaihzawng ni tura alo suangtuah thin mipa chuan hmangaih a lo nei si a! a rilru a puangchhuak hmanlo chu a lawm angreng, a zahthlak dawn em a a hriat vangin. Mahse midang ta ni kumkhua tura a ngaihtuah ringawt pawn na tih vangin a tap hial thei si anih kha! Tih kian dan a hre lova, theihnghilh theih duh hle mah se a hrereng dawn tih a chiang si, a mah lo duh der ve tu te ho a han ngaihtuah a, Petera tlukzo reng reng awmin a hre lova; mahse a chan phak loh mipa chu chelhding turin tihtheih a neilo tih a hre si, a ma tawkah buai ve tak ani.

“Sen, Upuia hi ka chhang ve mai dawn aw”
“a tha lawm, Upuia te chu a fel a lawm, bakah a duh ve tak tak che in ka hria”

Petera a ngaihna leh amah vanga a natna chuan mumal neilovin a awmtir a, hman atanga lo ngaizawng thintu tana a thinlung chu hlan a tum ve ta a.Petera vang chauh a ti ani tih erawh a hrechiang hle. An thiannu pa1 B’day an lawm a, Puia erawh a hman ve loh vangin mal takin a awm a. Eirawng an bawl laiin Peter leh a thianpa an lo kal ve ta hlawl mai! Kar1 liamta atang kha chuan hmuh loh hram tumin a lo pehhel tang tang thin a, hmu chak em em leh hmu duhlo lui siin alo inhrem fe tawh ani. A han hmu thut chu a buai leh vek, a rawn hria ang tih a hlau kher mai.
“Wendy, I va vang em em” titu chu melhtha ngam lovin “nia, ka buai ve lutuk a” tiin a han pha a.
“I awmlo emaw ka tia, zanah pawh lenna tur ka hre ve ngailo” a tawngkam thiamlo tak chu alo nuih a.
“Ka awm reng a lawm” alo ti leh tawp. Chaw an ei a, a hmazawn a athut tlat a vangin a dakchhuak khat hle, chaw heh ber ang hrimin a kun ngur a, a puar leh puar loh pawh a hre ta chuanglo.
“Wendy, ka lo thlah ang che” a khur der der tih a hria ngem le? An in chu a hla tawh lova, an ngawi rei ta hle mai, ava melh zawk a, alo en ve chiah chu niin, an mit leh mit intawng sak avang chuan rang takin an hawisawn rual nghal a, a sa ap ap mai. Chutah a phone number a zawt a, alo pe ve mai; an in an thleng a, anin mangtha ta a.

“Wendy, ka rilru hi a mak lutuk” a sms dawn chu a chhiar nawn sek a.
“tinge a?”
“ka sawithiam lo, ih,englo, ka ngaihtuah thin che a” khai aw! A phone a thlauh thelh ani, a lawm bawk si leh pawiti bawk si chu a vai ruai ringawt.
“engtizawngin”
“I hrethiam mai lo mi?”

“aih”
“sas inei tiraw?” dawt zawng a sawi thei hauh lovang le.
“aw” a reh ta vang vang a. Mahse chu chu a bultanna chauh la ni zawk. Hun a liam a, an in be ngun tial tial a, an han inpuang dun ta chu pawi tiin an chek tlawk tlawk! A ruka lo in vei dun ve ve thin te chu anin ngaizawng ringawt thei tlat lo! Wendy hi mi fair ve tak ani a, a luhlul hle bawk. A sas Puia chu awlsam taka then mai theih ani biklo tlat! Peter vanga a khawharna leh lunglenna zualpuite tihkiansaktu leh a tan a inhuam famkim em em thin thinlung chu phatsanna vanga hliam a duh biklo, a rilru chuan a phatsan tawh tih zawng a hria, mahse thenna tur chhuanlam siamsak ngai reng reng lo khawpa a tana inpezo chu engtinnge a then nghal mai theih bik ang le?! Petera pawn a hre vek, then turin a nawr ngai hauh lo, kan induh tak tak anih chuan Pathianin rem min ruatsak mai ang tih chu an inhnemna ani.
“ka lo nghak ang che, Min duh ve tak tak anih chuan kawng a la in hawng mai ang, keimah vang chuan tumah tina suh aw, ka ngen che” tih thu hmanga rawn mangtha ziah thin tu chu zahawm a ti em em a, a nun invawng leh inthunun thei tak, ruihhlo zunzamin a pawlhbuai ve phak loh, Kohhran bel tlat reng leh Pathian thu a ma phak ang tawk a zir peih a nihna te chuan a duhthusam a tikim hliah hliah thin, mahse chupa ta liau liau a la ni theilo chuan na takin a hliam fo thin, vawi2 lai chu Puia lakah chhuanlam fahrah tak hmangin inthen a rawt tawh a, mahse hmangaihtu in mittui tla chung a a ngen leh meuh chuan luhlul taka Petera angchhung pan talh chu harsa ani thin, hmeichhe derthawng leh tihnat awlsam tak anihna chuan Puia a khawngaihna chu a belhchhah ta thin a, tuilairapin a awm ta reng anih hi!

“vawiin chu kan inkhel dawn a, minlo en ve ang che” a tih avangin class kallovin a en ve ta a, diktak chuan football nilovin Petera chetla lai chu a hmu tam zawk a, midang inkhel ve te chu a hmu zeuh zeuh chauh ani, chhuang ru em em in a kut alo hum ruh a, a chetthat a piangin hlim takin alo nui thin.
“vawiin kha chu I che tha takzet”
“ka van lawm..heh”
“* tu che I ngah belh ngawt ang”
“nghal suh aw”
“I ex pawh khan a lo en ve chuan a rawn let leh duh ngei ngei ang”
“heiii, over e mai, ka neilo ka tih mawlh mawlh khaaa. Seni sawi nge I rin keima sawi?”
“zep kher a ngai ami”
“ngaihzawng nghet nei ila * ka nei dawn a mi?”
“tumaw I * “ a biangah a rawn piai zauh a, chuaia thui kal pawh a duh ve ngei ang, mahse aninkar daidangtu bang chu tuemaw zawk zawk pawn sut tlang tum se mipa1 a nat a ngai dawn tho tho. Chu chu a ni ang mipa rilru nghet leh tluang, Pathian tih em em tu chuan hmangaihna vang pawh nise harsa a ti ani. Engchennge chu hmeichhia chu a ngah dawn tih a hre biklo, mahse kawng erawh ala in hawn ngei a beisei tlat ani.
“Upuia nen kan inthen a”
“eng a!?”
“umm, tak tak, hmangaih ka neihthu ka hrilh tawp mai, ka tuar thei tawh lo”
“Wendy”
“a pawi viau a mi? nang chuan min nghak thei pawh ani maithei, mahse engtinnge ka in nghahtir reng theih ang che? A fair lo dawn a sin” Nia, hringnun hi a fair ngai reng reng hleinem tiraw? Hmangaihten malsawmna an chan theihnan hmangaihtun a tuar a tul si thin tih anih kha maw!!
“naktuk zanah ka lo kal ang” a rawn ti ta a.

Damdawiin khumah chuan a mu bal a, nikhua a hre miah lo tih a lang reng mai. A na tawrh chu a na ve tawk a nia ang tih a rin theih bawk, mi tamtak a vangin a bulah a thu thei lova, a kut a vawnsak theilo bawk. Hmeichhia a zawng a nunnem leh derdep tak anih na chuan midang hmuh laia a ta anga han sawngbawl chu a tih tir thei thlawt silo. Seni chuan a khawngaih hmel kher mai.
“zanin chu I rawn kal dawn lo mi?ka nghak reng che nia” tiin a phun sep sep a, tukverh chu hawngin a han dak vang vang a. Dn ruallohin a mittui chu a dir zung zung a. A thiltawn chu a hrethiam lo ani, a buai vek. Inah a tawm ngawt ngawt a, thu thinthawng hriat a hlau ngawih ngawih, a phone a rik hlekin a phu zawk zel a, a la ngam lawk lo thin; damdawiin a kal chu a duh lutuk, mahse a mualpho dawn tih a hria, Peter anga inthunun thei a ni ve si lova. Chumi kar chu mumang ang ruaiin a hmang a, a chhungte lakah pawh inthup sen a ni ta lo.

“Wendy, hawh, kal ang” Seni chu a thaw hlawp hlawp a. A ngaihna hre lo zetin alo en haw a.
“kal ang ka tih chu, tun bak a hmel I hmu tawh dawn lo asin”
A lo nui ringawt! Seni chuan makti zetin a lo en a, mi a ang maia khawsa a thiannu chu a lainat takzet ani.
“Wendy, a kal tawh, Peter chu a thi tawh” tap chungin a ti a.
“a thilo, a thi theilo hrim hrim, dawt anih chu”
“ka thian, tihian awmlo teh, khawngaihin” Wendy tlu riai riai chu a va dawm a, a rak chul a.

A harh chuan khumah alo mu a; a hawikual a, a nu leh Seni’n ngaihtuah hmel taka anlo en reng chu a nuih lui sak a.
“thihna hi a na ngem le?” a nu leh Seni chu anin melh hrek hrek a.
“tinge a thih kher? A nilo midang thih phu an tam lutuk, mi tha tak anih kha, hmabak tamtak ala nei ve asin, Pathian pawh hi ava fair lo ve..mawh..nu, tinge a thih?” tah hawm hawm a duh, mahse a thei tlat lo, a tawt up up a, puahdarh vek a va chak tehreng em!
“minlo nghah tawh thin ang khan minlo nghak leh ang che aw..PETER, Wendy hian a theihnghilh ngai lovang che” a khawhmuh a fiah lo tial tial a, a muhil leh ta a.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)