INRU MAI ANG!!! BY Toni DA Ralte Ahmangaihi

Group siam tirh atanga like tu 1000 nei chin zawng zawng dahkhawmna
Ngaia
Site Admin
Posts: 25813
Joined: April 30th, 2016, 4:07 pm

INRU MAI ANG!!! BY Toni DA Ralte Ahmangaihi

Unread post by Ngaia » May 17th, 2016, 5:01 pm

INRU MAI ANG!!!

Ka kekawr kawng chu ka han siamtha te te a, nui vur vur chungin ka han tlan a; ka hmalamah chuan, “Jenny, Jenny” tiin anlo au rual dual dual a. Ka bialpa Jacob-a pawh uar zet zetin a kut beng chungin a lo au ve tuar tuar a; ka hmaa hrui in kham chu zuankahlen tumin theihtawpin ka han invawrh vak a, lei a ka tla thla chu chiang zet hian ka tlusawp ta niah a. Ka ngum ka sawh niin ka hria; anlo au dur dur a, hrui chu ka lo la zuankhum thei hlauh mai! Nui chungin thawh ka han tum a, Karei! Ka tho thei ta hauh lo mai le! Na em em chu ka nei pawn ka hre hrih lo. A vawi2 nan inbenkan ka han tum leh a, ka hlawhchham leh ta thak, ka kawng hnuai lam chu a zawi nguai ringawt! Thahrui a awm reng reng lo mai! Ka mangang ta deuh a; nui chung bawkin insangmar teuh chungin ka han tum sai leh ngar ngar a, ka thlanfim rawn bawl tiam tiam chu ka hre thei. Ka mangang hmel chu anlo hmuthiam ni ngei tur a ni, rang takin min rawn pan hlawm a, Jacob chuan maktih hmel zetin min lo kuah tho a, a mah mai chuan min dawl zo lo nge a awn ta ruai ruai mai a, midangte chuan anlo pui ta vat hlawm a.

Kan veng KTP branch ten kan day hmangin, kan in tihlim a, keipawh High jump-ah kan group aiawhin ka chhuak ve ngei kha a ni a; mahse ka chesual ta hlauh a nih kha! Damdawiin min panpui laite chuan Jacob-a chuan thlaphan hmel takin min kuah chawt reng a; keilah chu ka ngum bawr vel a na ve deuh e tih lohah chuan na pakhatmah ka nei silo. Thlaphanna em em pawh ka nei lova. Damdawiin kan thleng a, Dotorin min han check vel a, min admit ta a! mak ka lo ti zawk hle.

“J, vawiin chu kan class kan picnic dawn a, kal ve I phal em?” ka hnungchhawn a vangin a hmel awmdan chu ka hmu thei lova.
“kal rawh, ka phalna lak kher a ngai em ni?” ka aw chu a chang mah mah.
“min ngaihtuah suh aw, zu pawh ka in miah lovang” ka hmaah a rawn thingthi a, ka kut chu a la a.
“va intihlim ta che; chuan engpawh ti dawn la, ka phalna rawn lak kher a ngai lo; min rawn hmuh fo pawh tul ka ti lo” ka ti leh nghat a. A hmel chu a lang zaidam hle; a mit chu a khap sak sak a, nui chungin, “ti ve ziah suh; ka thu thu, ka rawn kal awm tho e mai a” a tih thin dan ang bawkin a ti leh a. Tinge ka rilru hi a hriatthiam theih miah loh chu le!!

Damdawiin a thla chanve dawn ka awm dawn hnuah ka luh hma aia chhe zawkin ka chhuak ta kha ani a, ka beisei ngailoh leh ka rin phak ngai loh in ka hringnun chu wheel-chair a ka hman a ngai ta! Phai ah vawi 2 kan kal tawh a, a ngaite bawkin ka haw leh thin. Ka insawhna naran leh satliah tak anga lang khan rinaiin thil a lo khawih pawi a; ka kawng chin hnuailam chuan engmah a hre thei ta lo! Damna chu ka tan beiseiawm a nih tawh loh zia ka hriat ni a ka thinlung natzia leh beidawn zia kha aw! Tah pawh ka tap thei lo, ka chhungrilah min hnawh up up a, puahdarh vek ka va han chak tehreng em! Ka chhungkua ten min khawngaihna te chuan min tina sauh zawk a, nula kum 24, harhvang ve tak, hlim thei em em thin, thian tamtak neia hlimpui thin, Kohhran leh khawtlang ah pawh theihtawpa inhmang ve thin, zirna kawngah pawh mite rual pawl ve phak thin kha vawilehkhatah tih tliah in a awm a; a beiseina zawng zawngte chuan nitin a hliam ta!

Ka chhungte chuan min hmangaih em em, ka inthlahrun hlauin theihtawp anchhuah tih ka hria; ka zun leh ek thiarsak ka ngai a, ka nu mawlh mai hi a va hlu tehreng em! Min awm chawt a ni ber a, ka damloh tirh te kha chuan thiante an lo leng ve nak nak a, ka la khawhar em em lo, mahse hun a liam a, keimah chauh a hringnun ka fight a ngaih tak hunah chiah khan THIHNA hi ka thian ni turin sawm ka va han tum zing tehlul em! Ka na em a ni. Mahse heng buaina leh harsatna vawrtawp ka tawh lai pawh a khawvel chhuahsan theilo leh phallo tur khawp a min chelh thin tu mipakhat a awm, JACOB.

Keiain kum 4 laiin a naupang a, a cousin nen kan inngaizawng thin a, anlo leng thin, kan inkawmngeih em em a, a cousin nen kan inthen hnu pawn a lo leng fova; kan inzui nasa hle thin, a la naupan vang leh ka ex cousin a nih vangin ngaihzawn enin ka en ngailo. Mahse hmangaihna hian ramri a lo kham hlek lo mai a! kan inkawm rei tak hnu chuan hmeichhe enin min en tih ka hre ta a, keimahah chuan engmah a la thawk ve lem lo. Zan1 a lo leng chu a tihdan anglo takin ka kut a rawn hum ringawt a!
“J, min chik ngai miah lo mi?” a ti ta hlawl a!
“chik I ngai mi?” a ngawi leh daih. A hawn hnuah min rawn text a, a rilru min rawn hrilh a, keichuan fiamthu a lo laksak talh ka tum leh pek a; mahse a serious em vang chuan a thinrim lek lek hial a ni. Tichuan hmaichhanah ngei min hrilh ka phut vangin kanin hmuh leh hmasak berah min duh thu chu inthlahrung takin min hrilh ta a. Ka chhang lo. Naupang zakzum ang maiin a reh ta char char a, ka ngai thin hle.Ka be duh bik chuang lova, ka ngaizawng niin ka inhre lo miau a. Mahse zan1 chu fb ah a pic ka va comment ve a, chutah chuan hmeichhe tleirawl pa1 nen anlo in be duat nasa ta mai a! thinur teuh chungin ka comment lui ve zel a, a ni chuan min ngaipawimawh lo fahranin tleirawli chu a reply char char thung. Zep thu a cheng lo, ka thik ta em em mai a, amah chu ka haw bawk; min lo play mai mai niin ka hria a, ka zak kher mai.
“tibuai leh tawh ngai lovang che” tiin ka va inbox a, rehsan hmak zawk tur ka ni tih chu ka hre tho, mahse khatia elsen kha ka duh ve hrim hrim.
“min duh ve reng kha; I thikthu pawh a lo chhe hle mai; kan inngaizawng thei tawh em?” tiin min rawn reply a. Ka dang chiang ngei mai. Inngaihzawn hma ni 2 vel kan in tihtauhsan leh phawt hnuin kan inngaizawng ta nge nge a! ani chu ka nuna mi pawimawh ber te zing a mi a lo ni ta hial a ni. Wheel chair a ka thut a ngaih tawh dawn a vangin ka kaltir a ngai a ni tiin ka infuih fova; ka nat tirh a tang a vawiin thleng hian chhete pawhin min la thlahthlam lova, class tlanbo a min awm a rawn tum te hian na tak takin ka lo ankhum thin. Diktak chuan ka bulah awm se, ka kut vuan reng se tih tluk a duhthusam dang ka nei lo; ka ngai ngawih ngawih a, mahse ka hmangaihna hian mahni hma a sial thei thlawt lo; midang tan a a nun hmang ve tawh tur a thlahliam ka tum nitin thin. Mahse a harsa takzet a ni, a chhan chu chhete mah a ani hian min kalsan a tum loh vang a ni.

Kan veng te pawn kan inngaihzawn hi an hre deuh vek a, Jacob-a chu an khawngaih hle tih pawh ka hmuthiam ve. Mi te hmaizah a vang pawn then tawh tur hi chu ka ni mawle! Ni e, keichuan zantin ka then ziah, mahse zing a lo ni a, danglamna awm reng reng lovin a bialnu hi a ex angin a rawn be ngai silo. Mal tak nia ka inhriat chang pawn Jacob hming ka ngaihtuah chhuah rual hian thinlungah nawmna leh thlamuan rukna ka nei thin. Chu chu ka dahbo ringawt thei bik silo, innghah nan a hman ka duh lo, kei hi hmangaih tlak ka ni tawh lova; ngaihven tlak pawh ka ni tawh lo.

“vawiin chu lalmuana tuiah a tla a” tih pahin a nui sang a. Ka nute chuan anlo sawipui ve sap sap a. Ka pa erawh a ngawi reng thung.
“ehee! Mapui, chhuat nawhna kha lo la teh” tih pahin ka nu chuan ka chair hnuai chu a rawn bih duk duk a! ka harh zawk mai! Zun ka lo cheh reng a nih chu!! Ka rilru chu a mang vek. Ka zak ngawih ngawih; na ka ti thlawt. Ka bialpa awmlai kher kherin zun ka cheh a maw?! Ka insumzo thlawt lova, ka mittui chu a far zung zung mai. Jacob-a hmel a ngilneihna leh lainatna chu ka va hmu phe ruai a. Nuamlo ka ti tih a hriat vangin sawi mai tur a haihchham a ni ngei ang, a ngawi vang vang a, “zun ka cheh rei zia kha, keipawh” a ti ta ngawt a! a nui lui a. A hmel chu ka en ngam hlawllo. Ka nu chuan bathroom lamah min nawr phei a, ka kekawr chu min thlak sak a. Ka ngawi reng a, ka thinlung natzia chu a hrethiam a ni ngei ang, engmah a sawi thei bik lo.

“ka mu dawn” ka ti a, room ah ka luhsan ta a.Hrilhhai taka ka kalsan tak chu melh pawh ka melh ngam tawh lo. Ka pa chu room a ka luh hmain ka mitmei a; sawi tura ka duh chu a sawi hun nghakin khumah beng ka lo chhi ru kar reng a.
“Jacob, thil sawipui che ka duh a; hei kan fanu hi I hmuh ang hian rual a ban zo tawh lova; mahse nang hian hun rei tak chhung chu I la rawn ngaihven duh a, a lawmawm kan ti hle a ni.Mahse kan fanu hi neih tlak pawh a ni tawh lova, chuvang chuan kan fapa ang chiah a kan en che a vangin nupui tha tak nei la kan duh a, Jenny hi chu unau angin en tawh la kan duh a ni, I chung a kan lawmna hi sawi thiam ahar zawk; mahse kan inthlahrun bakah a mah hian hrehawm a ti em em a, a hmangaih che tih pawh kan hria, mahse hmangaih tlak a nih ve tawh loh vang hian bansan tawh la tih hi ka ngen duh che a ni” muang leh nghet charh a ka pa in a tih lai chuan ka hmai ka lo hup vawng vawng a. Awww…chumi tum ang reng reng a Jacob-a ka khawngaih hi a la awm awm love. A hrilhhai hmel ka hmu thei lo chu ka lawm hial zawk a, mahse tlaiah ka pa hnenah kha thu kha sawi turin ka lo ngen tawh a ni. Hetianga ka tih loh chuan kawng dang ka nei lo, thawm chu a reh tlawk tlawk a. Jacob-a hmel awmdan tur chu ka lo mitthla a; na hi ka ti ngawih ngawih, tinge kei kher min lo hmangaih le?! “Duat, I vanduai lutuk, I van khawngaihthlak em!” tiin ka rilru chuan amah chu ka be mawlh mawlh a.

“Ka haw phawt a nge” zawi te a a tih ri chu ka bengah a ri ring viau. Ni e, ani ang kum 20 mi lek tan chuan ngaihdan sawithiam a har ngei ang. Lunghnur taka a chhuak tur angin ka han mitthla a, ka duat em em thin; ka tellova hlim harsa ti thin leh keipawhin ka thlakhlelh em em kha a kal ta. A va reh tlawk tlawk em!

Ni 2 chhung chu a reh ta vang vang mai. Ka ngaihna leh ka lawmpuina chu a in zat thuak awm e. Midang ta tur anga ka ngaihtuah zawng ringawt pawn na chu ka ti a ni. Mahse ka kaltir a ngai a ni; kawng dang ka nei lova, duhthlan tur reng reng ka nei lo. Ka online deuh reng a, a chhan chu ka intihhlim ve theihna a ni miau a. A hma kha chuan ka khawhar hlauin leh ka rilru tiphur tu a tan thuziak tha deuh te hi min collect sak thin a. Min ngaihtuahna chu a theihna zawng zawngah a tilang thin. Mahse tunah chuan a online ngai tawh lova, eng nge a tih a? tu bulah nge a awm ka hre lo, hriat ka chak a, mahse hriat ka duh silo.
“Jen, ka nau hi a chhe vek” Jacob-a u in min lo call a.
“engtinmaw?” ka lo ti var a, hlauhthawnna namenlo hian min tuam nghal a.
“I pa in a kawm a tang khan a zia a dang vek; a rui char char a, nizan pawh a rawn haw lova, ka nu a mangang lutuk, hei tunah chuan roomah a in kalhhnan a, biak pawh hre lo ang maiin a awm, mi a ang chiahin” a rawn ti bawrh bawrh a. Ka mittui a hnam sawk.
“U tepui, keimah vang a ni, min ngaidam ru aw; khawngaihtakin zaninah min rawn hmu thei a ngem le? Jacob-a chuan” hnukulh teuh chungin ka ti a.
“awle, ka lo hrilh a nge aw, chuan Jen, I natna vang a ni tih chu ka hre tho a, mahse ka nau hian a hmangaih tak tak che tih hi chu hre ve hrim hrim rawh aw” ka tawng thei tawh lo, ka reh tak daih vangin phone chu a hmet hlum ta a. Khumah ka mu ngawi reng a, ka melh ngai ka melh ngawt ngawt a, ka ngaihtuahna chu a buai nuaih mai. A chang chuan hetiang khawp a min hmangaihtu chu a inhuam anih phawt chuan tinge ka then kher a ngaih lem ang le? Ka ti a. Lehlamah ka hmangaih tak tak a nih chuan nupui tha tak nei turin ka thlahliam thei zawk tur a ni dawn lawm ni? Ka ti thul.

“J, min then hi I thei chiah ang maw? Inthen lovang, inthen ka duh lo” ka khum ah a thu a, kei ka chair-ah. A rui lova, a mit erawh a sen hle.
“Jacob, I mawl lutuk, tinge engmah hi ihriatthiam duh loh a? ka then thei che; I tello pawh hian ka nui thei, ka hlim thei, diktak chuan ka hmangaih ngai lo hrim hrim che” ka ti hrawk hrawk a. Mahse ka mittui chuan ka dawt sawi zia chu a rawn pholang chiang ngang si! Ka kut a rawn vuan a, beisei nei mitmengin min en a.
“kan inthen lovang, kan innei ang” inringtawk tak hian a han ti a. Ka kut a vawnna chu ka thingthla phal der si lo.
“kei hian pasal ka nei dawn awzawng lo, midang tan phurrit nih ka duh lo, tin, fa ka hrinsak thei dawn lo che a, nupa nun pawh ka hmanpui thei kher lovang che; khatiang beiseina lem lutuk kha phumbo hmak rawh” ka ti ve ta a, ahma ai chuan ka inringtawk ve ta hlek e.
“chutiang ka care bawk lo, enkawl che ka duh a, inthlahrung miah lova duat che ka duh a ni mai”
“nang aiin ka upa a, chu chu thuhran kei hi min enkawl kumkhua ang maw? Ka thih hunah chauh I zalen ve chauh ang maw?! I tan a hnawksak leh ninawm nih hi ka duh ngai lovang, tunah chuan engpawh I huam em em ang, mahse hmalam hun ngaihtuah rawh, I chhungte pawh”
“kan pahnih chiah ngaihtuah zawk rawh”
“Jacob”
“J, tinge min then hi I duh em em a? mawh? I inthlahrun vang a ni tih ka hria sin, hmanni zan a zun I cheh te khan I nat ai khan ka na zawk ang, I zak lutuk hmel khan tun thlengin min la tina asin, khang ka hmuh te khan keimah ngeiin buaipui che a, I thawmhnaw te thlak ve ka duh a ni” a hmeltha tak phenah chuan ngenngawl takin min en a; kan in en vawng vawng a, nidang zawng aiin a hmeltha takzet a ni.
“duat, min hmangaih a vangin ka lawm e, mahse min hmangaihna hi ka tan a hnawksak a ni, mahni hmasial takin nei ta che ila, I chhungte leh nangma nun ngei hi ka la tichhe lovang tih a sawi theih loh; ka inthlahrunna pawh hian ka hmangaihna che a hliah zawk fovang”
“tawngkam lah hi ithiam sia a! tihdan ka hria, hawh INRU MAI ANG “ a rawn ti leh thawr mai! A thutak ve ngang si! Ngei ka tum pawn ka thei hlek lo. A inhuamna thuk zia ka hmuh chuan ka lawmna leh na ka tih tho na chu ka thinlungah a in buan mek a ni.
“chutiang ngaihtuah suh; awle, tihian ti ang, kan inthen lovang a, mahse hmeichhe dang I ngaizawng pah thei tho ang, chuan I hmei angah min ngai mai rawh” beidawng zetin ka ti ta a. Min rawn kuah a, ka hnung chu a chul hliau hliau a. A bulah hian tap lo turin vawitam ka insum tawh thin a; mahse tun tum zawng insum a tulan reng ka hre ta lo, naupangchhia takin ka tap ta hliam hliam mai a! mittui parawl teuh chungin ka lu a chul a chul a.
“duat, ka hmei I ni ngai lovang, ka nupui diktak ila ni dawn, min lo nghak hram hram la; nuamsa taka ka enkawl theih nan che thawhchhuah neih ka lo tum ang, min tiam rawh, ka nupui I nih hma chu min thihsan lovang tih hi” a ti dam diai a. Hepa hi ka lo va hrechiang lo em! Ani aia puitling zawk ang hrimin ka duhdanin ka lo kaihruai thin a, ka thu pawh a awih hle reng a, ka upat zawk vang pawh a ni maithei. Mahse tunah chuan mipa diktak angin a che ve ta; keichu hmeichhe derthawng tak ka ni tawh a, mipakut tha chak in a chelh ngai ka ni tawh, chu chu a hria, chuvang chuan mipa takin hmalam hun chu ka tan a fight dawn ta.

“mite chuan engtin pawn sawi se, engmah care suh, keimah chiah min ngaihtuah ang che aw, I hria em? Duat” a ti sa sa a. Ka lu ka lo bu nghat ringawt. A nui a, mawi takin. Min rawn fawp a; ka lo dawh mawl tawp, hmana kan hlimdun laite kha a rawn lang leh iar iar a. Infawh kan duh chang a kan inmitmei hmasa phawt thin te, ka hnute hmur tlum vek thin makti zet a kan nuihpui thin te, inlak sexy a kan in el laite, tunge in kiss zei zawk tih kan entir tum te kha..khangte kha nunhlui an lo ni ta.

Chhunah kan in text awl lova, zanah ka bulah a awm ngei ngei bawk, a chang chuan ka chhungte lakah ka inthlahrung hial thin. Sunday a ni a, inkhawm lovin a rawn leng a, ka khumah kan mu a. Hman ang tho khan kan in fawp a, ka natna theihnghilh titihin kan hlim dun ve hle.
“J, sex hi I hmang thei ngem le? Kan enchhin lawk dawn mi?” a ti ta roh a! ka lo hnual rawih mai.
“ka ring lo, engmah ka hre hleinem” ka ti ringawt a.
Ka mal vel hmehkual pah chuan ka kap zawn chu a dap thuak thuak a, ka hmu reng, mahse ka thengthawngah chhete pawhin a thawk eih lo. Ka na ngawih ngawih ringawt. Mahse ka han insawrbing ta deuh a. Ka tumna vang nge ka ngaihruat thil mai zawng ka hre lo; engtin emaw chuan ka awm a ni. Ka sawi hmaih tak pakhat chu thla 1 liamta ah khan ka taksa bung thenkhat chuan na a rawn hre thei tawh a ni, a na a rawn chhuah chuan awmngaihna ka hre ngai lova; ka pum nat a ni tawp. Mahse chutiang a na ka hre thei ringawt pawh chu lawm tak ka ni, Jacob pawh ka hrilh var reng a, a lawm hmel leh beiseina mitmeng kha ka theihnghilh tawh ngai lovang. Mahse a chang erawh chuan engmah hre lova a thih leh bul chang a awm tho.
“duat, kan hman theih mai ka ring, nghak deuh ila” a ti a. Ka lo bu ringawt a, kan nuidun a.

Zan1 chu ka thu chhiarin min hneh deuh nge ni tumruhna ka neih belh ta tlat a, harsa ti zetin ka ban tha hmangin ka han inbeng kang a, thawm chhuah loh hram ka tum a. Ka kut chuan ka bawp lian ve tak thin tuna lo te ta em em mai chu ka han chawi a, khum chu a ri tuah tuah reng a, ka khum bul maiah ka nute an mut vangin ka han thu leh vang vang a. Chutah thapui thawhin ka han chawi leh a, chhuatah chuan ka nghat ve thei ta hram a, ka thaw hlawi hlawi mai, ka hah takzet a ni. Thawk ka han la hmasa te te a, ka kephah hmang chuan din ka han tum tehreng a nih kha..a theih loh, a vawi1 nan ka hlawhchham ta phawt, mahse ka beidawng lo.

A tuk a tang chuan ka nu hmuh loh laiin din chu ka tum ngar ngar a; ka thlan fim in min bual hneh hle, Jacoba ka mitthla a, min tichak tu a ni tlat a lawm! “a ta nih I duh a nih chuan I dam a ngai, nupui tha tak I nih theih nan I ke hmanga I din theih ngei a ngai a ni” tiin ka infuih ru mawlh mawlh a. Mahse nilengin ka hlawhchham, a chhan chu ka ke chu rah ngam loh khawpa namen lova a nat vang ani. Zanah ka bialpa chu a lo leng leh ta ngei a, thawnthu min chhiarsak a, inleng neuh neuh kan neih ve thin vangin ka roomah kaninkawm mai thin a, a malchungah ka mu a, hahdam hmel zetin thawnthu ngaihnawm leh zirtir nei tha tak tak, ka tana an phuah emaw tih mai tur te hi min chhiarsak thin, a bulah hi chuan ka hlim lo phal lo.

Ni 2 na chu hlawhtlin ngei tawh tumin ka nu thlimin ka han bei leh ta a. Ka ke chu ka melh leh vawng vawng thin, a chak theih tehlul nen, min dinpui zolo nge kei a kungpui hian innghah nan ka hmang ngam lo zawk..ka han bei tang tang a, tukverh biang ka han vuan ren rawn a, then chak chak chungin ka sai ngar ngar a. Chairah ka thu leh hnawk thin. Ka mittui a rawn hnam tiam tiam a, mahse ka beidawng dawn lo, Jacob-a ka hmangaihna hi a chak tawk a lawm ! a ni pawn ka tan nun a fight a, kei hi ka lo awm mai mai bik tur a nilo, tlem tal a hmasawnna neih ve ka duh a ni.

“ka ke hman ka tum a”
“eng a?”
“tak tak”
“J, ti tawh suh, na I tuar ka duh lo”
“keiin pawi ka ti hleinem”

Ni 5 lai ka hlawhchham tawh hnu ah chuan ka beidawng lek lek tawh, ka chau em em bawk si a, tukverhah dakin ri siloin hmui phunin ka zai a, boruak chu a thiang nuam kher mai, Jacoba’n enge a tih mek ang aw? Tih ka ngaihtuah veleh tumna thar ka nei chawpchilh nghal a. A tawp na emaw a dawttu a tan emaw tal pawn kan bei leh a nge tiin inringtawk lem lo takin ka han insiamrem a, chair vawnban hmer ngawt ngawt chung chuan ka ke chuan chhuat chu ka han rap te te a, rang zet a din thut tumin ka insangmar thut a, Karei! A nat zia chu thihna ang mai a ni hial ang! Mahse chu ai a mak zawk chu ka ding!
“ka ding, ka ding” ka ti tuar tuar a, ka nu a rawn tlanlut a, khur zawih zawih chung chuan, “nu, min en rawh, ka ding, enrawh, I hmu tiraw?” ka ti mawlh mawlh a, ka tah nuih a, Ka nu makti hmel leh lawm hmel chu hmuh a va nuam em! Mahse ka ding rei lem lo, chau takin ka thu leh ta hnawk a, ka thaw hawk mai.
“Lalpa, ka lawm e, min kaltir leh dawn a vang pawn ka lawm e” ka ti sap a, ka nu chuan ka lu chul chungin min kuah a. Vanlam chu kan thlir dun vawng vawng a, ngawi rengin.

“ka ding, vawiinah”
“takzet!”
“aw, ka kal thei dawn bawk” ka confi mah mah, mahse ka lawmna chu a inhmakhua zawngin ka tilang ve a ni mai.
“ka rawn kal nghal”
“umm, lo nghak che”

Ka bialpa, min hmangaihtu nghak chuan khumah ka thu a. Ka ke chu ka zuk nuih vel a! hringnun hlutzia ka hrethiam dawn tan e. Room kawngka chu a lo inhawng riai riai a, ka nuna mi hlu tawpkhawk rim chu a rawn nam chiai chiai a…
TAWP LEH TA THUT MAI ! HEH..



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)