Lenglerhi Tawpna BY Toni DA Ralte Ahmangaihi

[Ngaia]

LENGLERHI TAWPNA



Insual Buaina!





A kekawr mar em em chu a taksa khal zet chuan a nek puar tang a, a kawr ngawng zau zet atang chuan a hnute lian pui chu a rawng zuang chhuak ang tih tur khawp hian a kal zawng chuan a fawn hlurh hlurh a; a tai chu a fek tehchiam lo na a, a mawngbawr lian tak erawh a thup hneh lo, mipa tam takin an enzui vawng vawng theih tur khawpa itawm a ni tih chu mitdel pawn dap se a hai hauh lovin ka ring. A sam chu a eng deuh thar a, a hmai chu a hlai mawi tawk chauh a, a mit hmul chu sin zet leh sexy tawk chauh a kiin a pawt a, a hnar ngul zum vatah chuan hnar beh tle set set hi a bet va a; a hmui chungah khuavang original ni lo a hring hi a chuang va bawk a, a hmui chu a chhah dan a sexy! A sen ling hlar mai a, fawh pawh a inthlahrunawm hial ang tih tur a ni.Tlereuh a uar phian ni tur a ni; a kut zungtangah chuan zungbun an fu fur a, a nghawngah chuan thi man to hmel ang reng fe hi a uai dalh bawk a; ngun mawi rih hmel zet pawh a bun ri chhang chhang tak e;a vun chu a ngo lutuk lo va, mahse a ngaihno bei tawka ngo erawh a ni. A pheikhawk chu kumkhaw chatuan pawha ka bun thiam loh tur, sang em em leh a heel sin zet mai a ni a; a la tlan pui thei chu ka ngaisang lek lek.



Chu hmeichhia chu ani ka thianpa ka tihpui tur chu, tukin khan thupek ka dawng a, tunah enchhin hna ka thawk mek a ni. A ler tih chu kei mimawl pawn ka hai bik lo va; a ck zeuh zeuh ang tih pawh ka hming ka hriat chian tlukin ka hria, inhmelhriattir chu thil phurawm zawk zawk a ni lo, a chhan chu hmeichhe in la no ve tak leh fashion atchilh a nihna chu ka mizia nen a inep tlat a ni. Mahse ka BRO tana thian tha ka ni em tih fiahna ni a ka hriat avangin ka tih ngei chu a ngai si a ni. Restaurant a a lut chu ka umzui nghal a, a bulah ka thu ta chawt; thutna dang a tam nen, a lungawi chiah lo niin ka hre nghal pang. Eitur ka chah a, nelawm hmel takin ka nui deuh sang reng a; ka meng no em tih zawng a entu a zir a ni, men no hi ka zir thiam theih loh langsar tak a ni miau a.



“Ka hmu tawh tlat che in ka hria..ee ..ngawi teh, ka thianpa laptop-ah i thlalak a tam lutuk, ka hrechhuak leh zawk mai,” tih pahin ka va nuih a; a nui sak a, ”Tu i thianpa maw?” a ti hu a, a aw chu a no reuh hle. ”Rin.*** a nia, a * thu che a sawi apiangin min entir ziah alawm,” ka ti a; mi dawthei ka va ni tak..a thlalak chu ka la hmu ngai lo a, bro laptop-ah amah ang hmeichhia pawh hmuh tur a awm tawp si lo, dawt var chu a pawi lem lo vang chu! ”Ka van hre ngai lo, i thianpa chu. Engtin nge min hriat zawk le?” tih pahin rice chu a chawk let a; “Inneihna-ah a hmu che a,” ka ti mawl tawp a. “Tute inneih nge? Eng kawr nge ka hak le?” tiin ngaihtuah zui niawm takin a chhing diar diar a..shit! Mipa ho tan hian hmeichhiate hi kan lo ninawm ve thin ngawt ang tih ka rinna chu zawhna kan ngah lutuk leh chhan ngei kan phut thin hi a ni; mipa ho tan chuan dawt sawi pawh a lo awm ve tho a nih hi a!! Chhan ngaihna ka hre tawh si lova, ka nui vur vur ringawt, “Amah la zawt la, in la inhmu ang chu,” ka ti a.



Kar khat a ral a, Hmuiseni leh bro pawh vawi hnih an inphur chhuak ve ta. Ka lawmpui hle. Mahse..Sunday zan khat chu bro chu ka muttui lai min kai thoin ka room tukverh atangin alo lut ru a, zu rim leh petrol rim a nam hum hum a; phak zetin ka lo chhawn a, “Hmuiseni kan ruk chhuah a ngai, kal ang,” a ti ta mai! Nupui ruk leh bawk chuh! Ka va za lo e aww..a bengchheng leh reng ang tih ka hlau si, tukverh atang bawk chuan kan chhuak leh ta a. Hmuiseni te veng kan thleng a, dar 11 a pel tawh a,mi veivak an awm tawh mang lo. Duty niawm tak mi pahnih hi an lo kal phei a; a ding a, ”Ka pu, J**.. te in hi khaw nge a awm le?” a ti! Khai aw!! An in awmna pawh a lo la hre lo a maw? A va han nep tak; ka tum bur a, ”An in pawh hre lovin kan ru dawn a maw?” ka ti chang fak a; “Len ap hal ngai lo va,” a ti a. Pu-a ten min kawhhmuhna lam chu kan pan a, a lo thim thiap a, an mu tawh a ni ngei ang. A phone a phawrh a, a khuh puak khurh lehnghal; hmuiseni number chu a han dial a, switchoff!



An kawtah chuan minute sarih vel kan thu a, ka ning ngang mai, tawng ka tum lahin ngawi turin min khap bawk si; kan nghah ber lah nghah chhuah tur a awm si lo. A tawpah a ning ve ngang a niang, kan tho a, haw kan tum ta a; bike a rawn ding chawt a, ka phu dawrh mai! Bike atang chuan hmuiseni ngei mai chu a lo tum thla chhak a, kan inhmachhawn ta ran mai. Bike pawh chu a la ding tho a, makti hmel leh hrilhhai hmel fe hian min entawn chhen a, a hlauthawng hmel pawh hmuh tur a awm! ”Inruk in tum emaw ka tia?” ka ti hmak a; “Awihawm loh,” a ti nghat a. Bro chu a melh run a, ani lah kawisawi zeta ding chungin a khuh leh khurh khurh ringawt a, eng nge awmzia ka hre hrep love a ! Bike a mi chu a lo chhuk a, bro hmachhawn zawnga dingin, “Tu nge i nih ve a? Eng nge hetah in tih? Ka bialnu hi ruk in lo tum vel amaw?” pawr zet hian a ti a; a zu in rim a lo nam huk lehnghal. LOCAL!!



Bro chuan, “I lo inrawlhna tur a awm lo, ka bialnu hi engvanga lo phur ve ngam nge i nih zawk a?” a ti let ve ta salh mai a, a dik dawn hauh lo mai le! In chhung atangin thawm alo chhuak a, hmuiseni chuan mangan hmel fein “kal ang” tih pahin bike a lawn a rual a, an lim chhuak nghal. Kan tih tur kan hai bik lo kher mai, rang zetin a bike ah a lawn kai a, a hnungah ka bei ve nghal a, kan um ta nghal. Ka phur thar ta riau, bro insual huai zia ka hriat avangin ka hlau eih lo. Hmun pakhatah kan in um lut a, mi huan a niin ka hria. Kan pali chuan kan indinchilh leh ta thap mai; hmuiseni chu a laiin awmdan a theihnghilh emaw tih turin a phi chung a; kan ngaihsak tawh der lo. ”Engvang a min lo um zui nge in nih a?” tih pahin bike khalhtu chuan bro kawrawm chu a tham thawr a; “Tehchai che chuan le! Kan bialnu intawm chu insualah kan hlawhchhuak dawn em niang?” an ti ve sak a, a va nuam tak; bro hi chu kan thian hovah a ler lo ber a, mahse a huai ber.



An inkhuainuai nghal a, hmuiseni a rak tuar a, kei lah, “Bro, a hahmai mawlh kha thlawh bo sak rawh aw,.come on, bro, tang rawh,” tiin ka lo au phur nasa mai a. ”In va raprthlak ve a, zawngi,” tih pah a min rawn kek tu hmuiseni chu ka nam let dawrh a, ka sam a til! Het, salaa! Rui lo hai lo pawn insual chu a lo phurawm tho mai, min rawn keh leh a tum chu a ke ka lo dai khalh zauh a, in la no zet in a tlu nuaih a; a thinrim hmel chu a ling vur mai. Bro te sirah chuan kan lo inchai ve ta thial thial mai. Kan hmuhnawm ngawtin ka ring, thing leh mau chauh thlirtu nei mah ila kan tang ve ngang mai. Bro chuan a khingpui bawh bet a, hnek chungin thei leh thei lo hian, “Bro, zawngi kha sawp rawh, a hnar kha a no lai ber, hnek rawh,” a lo ti tawk tawk a; a kawlh reuh zek a, mahse a no lua nge a in ti no zawk, a che chu a nawi lek lek thin; a hnar chu ka chum ngheng a, a rawn lum ta pap..THISEN.!!



Ka tho a, ka tawp san ta a, bro pawn kan thian ni ve lo-a pawh chu nui mawi vak thei tawh lo turin a hahmai a lo ruksak a, a rum dur dur lehnghal. Hmuiseni chu a tap nghur nghur a, bro nen chuan kan innuih sak a, kan kalsan daih. Ka khem ve nian nuan a, bro te inah ka riak a, dettol kan hmang tangkai ve tho mai. Kar thum a liam ang tihah bro leh hmuiseni inphur ka hmu leh tlat! Zanah ka va bia a, ka hau hrep hrep a; a ngawi reng a. A tukah kan thianho kan inhmuh khawmin ka sawi chhuak ta a, mak an tih loh hmel em avang chuan ka ngaih tha lo; mahse ka hriatchian hnu chuan ka thaw huai. PHUBA lek lo niin. Bro hian a sual vanga hmuiseni rulh let a tum pawh a nil o, hmuiseni khan lo be tha lehin a bum loh zia leh a hmangaih zia te a lo hrilh leh chiam a. Bro thin thawk thut chuan rulh let ve a tum ta a ni. Tin, hmuiseni bialpa kha thian ngah ve deuh a lo ni a, a thiante hnenah lo zual kovin an lo inngur nasa a lo ni a. Min hrilh ve loh avangin ka titau a, mahse hmeichhia ka nih avangin min lo vengthawng ve chu lo niin, mipa vek an ni sia, an hmuh loh laia min lo sawisak an lo hlau a, an lo zep a. Tin, hmuiseni han fiam kual chu ka phal loh an rin vangin an lo zep bawk, ka phal zan, ka ngei tlat, khatiang ang a chianga inman tawh hnu pawh a, la huangtau ngam hmeichhia chu zilh hlak a ngai ka ti ve tlat a ni.



Friday night a lo thleng ta, kan hmun ruatah kan kim ta thap mai, hmuiseni leh bro chu chance kan pe phawt a, an lo la lang hrih lovang. Bike nei-a te thianho chu inhrosa kuk kuk chungin an rawn kal a; an sek hlawm ngei mai, bro a awm si lo va, ka hlauthawng lek lek; mahse ka bro te hi an duai lo em! Ka chhuang ve thlawt. Bro chu an rawn zawng thuak thuak a, a awm oh avang chuan an nuihzat kual vel, kan plan an hre der si lo. Kan in pheksual tan ta, ex-a leh T-a ten min karcheh a, min khawih chak tak te lakah ka him phawt, mahse ka him rei bik lo, an buai nuaih nuaih a, insual lo thei lovin min siam ve tlat. Mipa cher ve deuh ber chu a hnunglam atangin ka chum nghek a, a tlu bawkkhup, a rawn tho chu a meng sen rum mai, “hmeichhia te te” tih pahin min hnek thal tawp a, ka mit ko a nih avangin ka mit chu a tur nghal ut ut a, mahse kan ti ta sa sa.. Min bawh bet a, min rek nawk nawk a, thahrui a lo nei phian, ka rak duh bik lova, an awmhmunah thahnem an ngai ve sia, tih buai ka duh lo. Ka zawi hnawk tawh a, ka hmanraw duh loh ber hman a ngai ta chu ka hreh ve khawp mai, mahse a loh theih tawh loh; a darah chuan na theihtawpin kan SEH ta a nih kha!! A te rawng rawng a, ka seh nghet ve fun si, a tal chhuak thei lawk lo va, min nghawk sawk sawk a, ka thlah ta a.



A kalsawn daih, "He nu hian min seh, a thi-in ka hria,” a ti chul a, ka en reng ringawt. Ka thiante pawh an inhneh tawk viau, chutah BRO aw ngei mai chu boruakah a rawn ri fiak ta thak mai, kan hawi thap a, a bulah chuan hmuiseni chu khur der der leh makti hmel zet hian a ding zum reng a, bike nei-a bula nam phei dawrh pahin, “Kha nu vang khan i hahmai i hloh a, sorry, khanu kha i ha aiah lo pawm mai ta che,” a ti a, a confi ngei mai. Hmuiseni chu en thuak pahin,”Ka duh lo, he nu hian kan pahnih chauh lo pawh sas a nei, bumin kan awm ve ve a ni,” tiin zawldawh deuh hmelpu hian a lo chhang let a; chuta hmuiseni hmel chu khawngaihthla a la ngei mai, ka inchhir tep. Mahse, “Eng atan mah ka ti lo che u, nangni lo pawh min atchilhtu hi an tam lutuk,” a ti tuar tuar a. Kan nui ta vek a. Min rawn en a,”Zawng chhenu, i ruahmanna a ni maw? Eng nge ka tih theih lo en rawh, i awmdan hi ka sawi chhuak khawp ang, tenawmnu,” min ti ta zek a! ”Aw le,” ka ti mawl tawp a, a sawi chhuah tur chu tupawn an hriat hnu a ni miau a, mahse ka ruahmanna a nih loh zia erawh bro in a hrilh tak kha.



Bro chuan,”Tun atang chuan ka hriat chian loh leh ka belhchian loh hmeichhia chu ka ngaizawng tawh lo vang, a ler lo berin ka tawng sual a, ka tuarna viau, mahse ka fin phah a, hmeichhia te hi en chik leh belh chian ngai an ni tih ka hriatphah a, an dawtheiin an zak lo tih te, min hneh nan mittui an hmang hreh lo tih te, in la virgin em em te pawh fa loh vanga thlawi lo an ni tih te,..ka hriat tul zawng zawng ka hriat theih phah avangin hmuiseni pawh lawmthu ka la hrilh ang. E, chuan CK [phone atanga ck pawh a huam] thinte hi an easy tlangpui tih pawh ka hria, ka nupui tur chu ka ck pui ve lovang,” tiin ka mit ko chu damdawi a hnawih a, a thip ngei mai. A tizo a, kan inen a, kan nui dun a, ”Mahse hei erawh hria la, HMEICHHIATE HI KAN INANG VEK LO tih hi," ka ti a, a bu nghut nghut a, “Good night,” tih pahin ka biang a rawn fawp zoh a, min chhuahsan ta a.