THIANNU..I PA HI KA EX! BY Akimi Lr Man Utd

[Ngaia]

THIANNU..I PA HI KA EX!

"Ding teh..ding teh.. Tlan tawh lo hram rawh" tia min au lawm lawmtu Adini chu ka ngaihsak thei tawh lo. Ka ngaihtuahna a buai veka, mu leh mal ka nei thei tawh lo. Ka mittui chuan ka biang a bual huh vek a. Keimah chiaha ka khawsakna ka inluahah chuan tlan lutin khumah ka let nghal tawp a. Ka thil tawn mek mak danglam tak chuan min țhawng em a ni. Kum 5 liam taa kei chauh nilo ka nu leh pa thlenga bumtu, hmuh leh ka duh tawh ngai loh mihring chu ka tum lawk leh ka rinphak lohin ka tawng leh a ni si a!

Kum 2010 khan kum 17 mi niin Class X ka zir a. Lehkha thiam thei tak ni thin mahila Class X ah hian Mathematics ka man lo a. Zirtirtu thar zirtir kan nih tak vang nge Mathematics chu ka hnê ngawih ngawih a. Sikul pawh ka kal țhat loh phah hle. First term leh Second term pawh Mathematics vangin ka fail ve ve. Class danga Top 5 a lang ziah thin ka nih vangin ka chhungte mai nilo kan zirtirtu ngei pawn min manganpui hle a ni.

Ka pa zing leng chhuak chuan kan thenawm lawka rawn awm thar Mathematics zirtirtu ni thin Taxation Office a thawk thar chungchang a rawn sawi lut bawrh bawrh a. "Tution pe hram tur chea biak ka rilruk a ni. Heti ringawt chuan Matric i pass dawn lo" min ti a. A sawi ang ngei chuan a lo bia ni tur a ni. A hnu kar 1 ah chuan ka thiannu Malsawmi nen tution kal tur chuan kan chhuak dun ta a. Kan kal hmasak ber zan chuan a in chhunga luh pawh chu kan zak hle a. Malsawmi chuan hma hruaiin kawngka an kik dat dat a. "Lo lut rawh u" min tih hnu chuan zak tak leh lai tak chung chuan kan inzui lut a. Kan zirtirtupa tur chu a inbual zo towel vengin bathroom ațangin a rawn chhuak chiah a. A hmel ka hmu chu engtin emaw ka awm nghal thei. A hmelțhain a fresh em em a. Vun hâng lam a ni nâin a vun chu a nung sar thung. A palianin a sang țha a. Feet 5'10 vel anih ka ring. Thau han tih tur ni lem lo mahse a sa chu a țha hle a. A banbul leh âwm bawr chuan ka mit a la nghal hle.. Nui sang chungin "in lokal tawh maw.. Ka thinchhe teh mai nia. In ri pawp pawp reng mai thei a ni" a han ti a. Pa fiamthu duh deuh anih dawn hi ka ti rilru a. A nui hmel ka hmuh phei chuan ka buai zo takngial dawnin ka hria. Ka mit pawh laksawn nachang hre lo chuan ka thlir reng a. Malsawmi'n min rawn nghawk tak zeuhah chuan ka harh chhuak ve chiah. Rooma a inthlak chhung chuan a pa zia leh a hmelțhat zia chu Malsawmi bulah ka lo sawi sa sa a. Ani erawh chuan a hmel chu a țha mahse a upat tawh hmel mah mah a ti thung. Tleirawl thawven hunlai, star neih nuam tih hunlai a ni bawk a. Ka hlim nghal veng veng thei nia. Hemi zan min zirtir pawh hi pakhatmah hriat a lawi ka nei lo. A țawng lai hmel te, a chezia leh a hawiher engkim chu ka thlir ngawt ngawt mai a ni.

Kar 1 kan kal hnu chuan Malsawmi chuan thiam a nei nual tawh a. Kei ve thung chuan thiam pakhatmah ka la nei lo. Chutih ahnekin tution kal ka phûr em em reng a, chhun lama sikula kan awmlai pawn zana tution kal ringawt ka rilruah a awm a. Chaw ei hma ka rawt ziah a, Malsawmi min lo sawm hun pawh nghak zo lovin ka lo kal khalh ziah bawk...hihi Mahse a bulah chuan ka star tih chu ka thup ve hle a. A hriatthiam theih tur angin ka awm ngai lo. A rukin min lo hrethiam ru reng te anih loh chuan..

Thla chanve kan kal hnu chuan zan 1 chu 'kan zir tawh ho hi test ang aw' U Remruata chuan a rawn tithut mai a. Ka mangang ngei mai. Amah chiah ka lo ngaihtuah țhin avang khan engmah ka thiam si lo. Min test tir chu min veng tlat a, a inla strict em em mai bawk si. Malsawmi ta entawn takngial pawh a theih loh. Ka test paper a check hun tur ka ngaihtuaha, ka zak lutuk chu ka țah te a chhuak rum rum. Malsawmi zawh hnu daihah chuan hreh chung chung chuan ka test paper chu ka pe ve ta nge nge a. "Haw phawt ula, ka lo check anga, naktuk zanah intih dik loh vel kan inzirtir leh dawn nia" ati a. Zan 1 chu ka him ta phawt.
Mahse chumi zan chuan ka muhil thei lo. Ka paper a check huna a thinrim lutuk tur ka ngaihtuahin ka zak ngawih ngawih a. A bula tution ka kal kher kher chu a vawi 1 nan ka inchhir hial. Ka chhungte lahin ka tution kal peih lutuk leh ka phûr em em reng mai chu ka man fuh ve taah ngaiin thiam viau turah min la ngai tawh zui...huizzz
A tuk zan chuan hreh tak chungin ka kal a. Zan dang ang lo takin a hmel pawh ka en ngam tawh lo. Min hau hrep ang chu tih naklaiin ka rin loh lutukin zaidam takin min bia a. Ka la man fuh lo chu ama thiam lohah ngaiin a bultê ațangin min țan țhatpui leh a. Ka inthlahrung ngawih ngawih. Mahse hemi zan ațang hi chuan ka inngaihtuah harh ta thung a. Ka theihtawpa ulukin a thusawi ka ngaithla a, thiam ngei ngei turin ka rilru ka sawh nghet sauh sauh a. Hemi hnu ațang hi chuan min zirtir apiang chu ka thiam ve ta zel a ni.

U Remruata bula tution kan kal pawh thla 3 a ni ve tawh a. Sunday zan tih loh chu zantin inhmu kan ni bawka, kan inngaina tlang tawh hle. Min duat thiam a, nuam ti taka kan zir theihna tura min treat dan a thiam em em bawk. Țawng tam vak lo mahse fiamthu thawh ve zeuh zeuh a ching a, a ngainatawm phah hle. Kan mize mil tawka min kawm dan a thiam em em bawk.

Class 12 ami ka bialpa nen kan inthen chu Malsawmi'n Maths kan chawh mawlh mawlh laiin a rawn sawi chhuak pek a. Mak tih hmel deuha min en chung chuan
"Bialpa i lo nei reng a maw?"
Bah deuh nakin "Um mahse ni lo ang mai kan ni, Phone ka nei silova, inhmuhna hun kan nei thei ngai bawk silova" ka tia..
"An class ami Mawitei nen an inzui nasa lutuk an tih kha"Malsawmi'n a lo ti leh vat a. U Remruata chuan min melh leh vung vung thin. Kan haw dawn chuan "i mu thei lo anga zanin chu, i rilru ana tih i hmelah a hriat vek ania aw" tih pahin min han fiam leh zeuh a. "Engah mah ka ngai lo. Inthen ka duhna a rei tawh lawm" ka ti ve ta ringawt a. Dik tak chuan ka la na thlawt lo. Ka duh vanga inngaizawng pawh kan nilo a, ka thiante'n min lo chhansak ve ringawt a. Kan laklawh vel vang mai mai. La na turah min la ngai zui.. Ani ai chuan ka thinlung a hneh zawk fe tih a inhre der si lo..

U Remruata damloh avangin zan 3 ngawt tution kan kal tawh lo a. Ka lunglen khawharzia chu sawiin a fiah zo lo ang. "Ka ziaawm tawh e, lokal tawh rawh se" ati ka pain a ti chiah chu ka phûr ngei mai. Malsawmi anu damloh avangin a rawn kal thei lova.. Rei vaklo min zirtir hnu chuan a khua a rawn sik leh ta vak mai a. "Ka haw phawt mai ang mu hahdam zawk rawh" ka tia haw ka tum chu "Ka ngai lutuk che haw suh" tih pahin ka banah a man a. Mak tih hmel takin ka en ta reng a.
"Kim kim bialpa tumah nei tawh suh aw.." mak ka titelh telh mai. A na â deuh aniang te ka tirum rum..
"Engvangin nge ka neih loh anga..?"
"Ka phal lo a ni mai, Ka duh che.."

Mak ka ti lutuk chu ka chechâng thei lo. Khaleh chen ka lo duha ka lo atchilh tawh khan min duh ve a maw?

"Eng emaw tal sawi ve la.. I ngawih reng chuan ka tan a nuam lo ania"

Ka țawng thei tlat lo. Ka rilru chuan 'Kei pawn ka duh che' ti mawlh mawlh mahse ka hrawkah hian hnawhtu a awm tlata ka țawng thei lo. A lamah min pawt hnaiin a awmah chuan min kuah bet a. Reife min kuah vang vang hnu chuan rawn kun hniamin min rawn fawp ta a. Ka mittui a tla tawp thei. Kei aia hmeichhe vannei hi an awm dawn em ni? Ka duh ngawih ngawih leh ka atchilh bur chuan min lo duh ve reng tih ka hriat hian ka hlim em a ni.

A tawi zawngin sawi ta ila U Remruata nen chuan tluang tak leh thianghlim takin kan inkawp chho a. Thla 2 kan inngaihzawn hnuah phei chuan ka chhungte lakah pawh kan thup seng ta lo. Mahse ka beisei loh lutukin ka pa chuan "Remruata chu mi țha tak, innghahna tlak a ni a. A puitling bawk a, mi ngaiha mawi lo khawpin inngaizawng lo ula, i zirna thlahthlam phah nan hmang suh ang che" min ti hlauh mai a. Chhungte hriatpuia ka ngaihzawng neih hmasak ber a ni bawk a, nuam ka ti ve thei hle. Pasal neih ka suangtuah apianga ka duhthusam chu kei aia upa fe, kum 10 pawn inthlau ila pawi ka ti lo. Duh duha pangchan theihna leh min duat em emtu a ni thin. U Remruata hian min duat thiama, ka tan chuan a thil phal em em a, ka ring em em a, ka engkim a ni tawp mai.

"Kha i phone tur" tih pahin Mobile Phone a rawn lek chhuak va va a.

"Ngati nge i lo lei? Ka pain Class X i pass hunah chiah kan lei ang che a ti asin"

"Zana in haw hnute hian ka khua a har thei lutuk alawm. Bakah thil pawimawhah pawh i pa phone-a lo biak zel che angai bawk si. Ka inthlahrung ve alawm"

"A to dawn tehreng nen.. Avan inthlahrunawm tak!"

"La mai mai teh.. Biak reng che ka duh vang anih hi.. Mipa dang biak nan i hman vaih" tih pah chuan ka kutah a rawn hmeh bel ta chawt chawt a.

Phone ka neih ve ațang phei chuan sikul kal lai tih loh chu chhum lo chat lovin kan inbia a. Zan rei tak tak thleng kan intext a. Kan inkham thei lo a ni ber e.

Sunday zan a ni a. Inkhawm tura ka chhuak chu ka luh hma deuhin U Remruata message a rawn lut a. "Ka pum ana, khawngaihin lokal teh" a rawn tia. Hmanhmawh deuhin ka tlan let leh ta a. A bul ka thleng chu khumah a lo mu bêm mai a, a taksa pum mai chu thlanin a lo bual huh vek bawk. Damdawite ka eitir hnu chuan a hnu deuhah chuan a rawn ziaawm ta a. Ruah nasa takin a rawn sur buan buan a, thli leh țek nen a bei nasa hle. A bulah chuan mu vein kan inkuah chial a. Min fawpte chu zan dang ang lo takin a duhthawh em em a. A awmdan engkim mai chu a uchuak a ni ber. Ka phal loh chin thleng thleng chuan a tilui ta zel a. A nupui ka nih ngei dawn thu min fah mawlh mawlh reng bawk. Min sawngbawl mektu chu ka mipa duh em em a ni bawk nen, a tawpah chuan ka țang zo lova, ka insum reng thei ta bik lo. A lakah chuan ka tlawm ta...

Ka taksa na leh sil țhum mai chuan min tiharh a. Khumah ka țhu chhuak hlawl a. Sana ka en chu zing lam dar 4 a lo ni tawh.. A bulah ka lo muhil tlang ve daih chu niin.. Ka hlauthawng takzet. U Remruata muhil hmel chu ngawi rengin ka thlir renga, avan hmelțha chiang tehlul em.. A hnu deuhah chuan ani pawh chu a rawn harh ve a. Ka chhungte hmachhawn ka hlau a ka huphurh takzet a ni. Mahse a sawi fel mai theih a inrin thu sawiin min thlah haw ta a. Khatiang dinhmunah kha chuan awm ve mai rawh min tih ka beisei nen... Hreh tak chung chuan kan in lam pan chuan kan inzui chhuak ta hnak hnak a...

Kan in chu a lo eng pap tawh a. An va tho hma em em ti rilru chungin hreh takin kawngka chu ka hawnga, ka nu leh pa chu zan lam an mu lo tih hriat ngawih ngawihin an lo pawr fap a. Ka pa phei chu rilru hahna a neih apianga a tih thin dan pangngaiin inchhung dungah chuan a lo vei tawn leh sek tawh. Kan inzui lut min hmuh rual rual chuan ka pa chuan min rawn pan nghal a, min rawn beng țhuai mai a. Ka hriat theih china ka pa kut min thlak vawi khatna a ni. A thinrim hle tih a hmelah a langa, a hmel pawh ka en ngam lo. U Remruata chu lo țawng chhuakin "ka thiam loh vek a ni, khawngaihin ti tawh suh" a lo tia. Ka pa thinrim chuan thip taka melh pahin "Lo va haw phawt teh" a ti bul hmuk a. A chhuak tur chu kawngka bula ding chung chuan "eng pawh tawk se, eng dinhmunah pawh ding se inphal anih phawt chuan nupuiah ka nei ang" a ti a.. Min lainat hmel taka min melh chung chuan a chhuak ta a. A chhuah hnu chuan ka nu leh pain min hau nasa ngei mai. Hetianga ka vawi 1 awmna a ni bawk a, thiam thu sawi tur pawh ka nei lo. Ka pain U Remruata bula tution ka kal tawh dawn loh thu a sawi chu hreawm ka ti khawp mai. Mahse hnial thei ziazang ka ni silo!

Tution ka kal tawh loh hnu chuan inhmuhna hun kan nei ta mang lo. Malsawmi erawh a la kal reng thunga. Ka ngai thei em ema, mahse ka chhungte'n min khuahkhirh tlat tawh si.. Phone erawh chuan kan la inbe reng thin.

Zan khat chu dar 8 velah hmanhmawh deuhin Malsawmi a rawn tlan lut a. A hah em avang chuan a thaw huam huam a. "I tution bang lam ami? Zanin chu i va bang hma ve" ka lo tia. Engtinmaha min chhang lo chuan "hmanhmawhin min lo zui vat teh" tih pah chuan pawnah min kai chhuak a. "Ngati nge khawnge min hruai dawn" ka tih pawh chuan engtinmah min chhang lo. U Remruata in kawt kan thlen chuan ngawi reng tura min hrilh nan zaizirin a kut chu a hmui zawnah a dah a. "Ngati nge" ka tih zawh hma chuan U Remruata in ațang chuan hmeichhe țawng ka hre ta a. A vin khawp lehnghal...

"Bialnu i nei ti lo se ka fate kalsanin ka rawn kal lo ang. A hmuna rawn kala rawn finfiah ngei hi ka tih tur a ni"

"Ka nei lo vawi engzat nge ka tih tawh? Ka thin a rim tawh khawp mai aw.."

"Ka ring hlawl lo che.. Naktukah mi thenkhat tlem azawng ka zawt anga ka haw lehnghal ang"

"Hetianga i pasal tih mualpho i chak viau anih chuan i duh duh chu ti rawh.. Mahse ka hrilh ang che bialnu ka nei lo"

U Remruata aw ngei chu a nisi.. Ka mumang a ni silo. Ka bing mup mup a, ka che chang thei lo. Ka lu a rawn hai muai muai a, leiah chuan ka țhu sawp nghal hnawk a. Malsawmi chuan min kaitho vatin kan mualpho hmain in lamah min hruai haw a. In ka thleng chu ka tliak hnâwp a ni ber mai. Ka thu hriat chu mak ka tih em vang leh min țhawn thut vang a nia nge ka mittui pawh a tla thei lo. Ka ngaihtuahna a fim lova. Ka â mai dawn ni berin ka hria. Ka chhungte chuan ka awmdan chu mak an tih em avang chuan Malsawmi chu a chhan an zawt a. A tution kal tur a luh hmaa an țawng thawm mak a tih em avanga a ngaihthlak tak reng thu leh a hnua min rawn koh tak dante, kan thu va hriat zawng zawngte chu a hrilh ta vek a. Mak an ti hle a, anni pawh chu kei ang bawkin a țhawng vein ka hria.. Ka nu leh pa chu an thinrim hle a. Ka unaute ai mahin min lainat zawkin ka hria. A chhan chu kan thuruk hretu an ni tlat si a. Nupuia min neih ngei tiamtu khan heti tak hian min lo bum nasa chu a lo ni si a. Ka nu leh pa hmaah ngei min neih a tum thu a sawi lai te kha ka mitthlaah a lo lang uar uar a. Engtin nge hetianga nasa hian min bum theih. Ka engkima ka lo ngaih thin, ka mi rin berte zing ami leh ka thianghlimna hial ka hlan ka hmangaih em em kha mi pa a lo ni maw..?

Kar 2 chhung chu buaipui ngai khawpin ka awm a. Zan lamah ka tlaivar țhak țhak a, chaw ka ei thei hek lo. Ka room ka chhuahsan ngai lova, ka țhiante min hnem tum tam tak lokal mahse tumah ka kawm peih lo bawk. A phone min lei kha ka vawm chhe vek a. La țha se chu a insawifiahna emaw ngaihdam min dilna tal a rawn thawn vein ka ring, Mahse chutiang thu chu ka hre peih lo. Ka huatzia hi sawiin a fiah zo lo. Ka nun phung engkim ka hloh a. Mipa vanga nat tum ngai lo, thiante pawh nuihsawhtua țang thin kha tunah hian ka kehchhe ta vek chu a ni si a. Engtin nge hetiang em ema dawt a sawi thiam mai le.. A hmel leh mizia han en mai chuan mipa rinawm tak hmel chiah a lang si. Khawpui mi an nih vang nge a kum phu lovin a hmel a naupang a. Kum 35 a ni tawh chung pawn kan veng tlangval 27/28 te nen an inupat hleih pawn a hriat ngai loh. Kan veng ami zawng zawng pawn mi pasal a ni tih tuman an hre lova, pa anih tawh ring pawh ka la hre ngai miah lo.

Thla 1 chiah kan exam nan hun a awm tawh a. Ka pa chuan ka pass phawt chuan Aizawl lama ka awm tur thu min tiam a. Chu chuan phûrna min siamin ka zir lui veleh thei ta chauh a ni. Khawvel chhuahsan em ka ngam silova kan khua tal chhuahsan hi tuna ka duh ber chu a ni mai. Tluang takin exam kan zo a, ti țha em em lo mahila a fail lo tawk chuan ka chhang vein ka hria. Exam kan zawh tuk chuan ka thlakhlelh em em ka thiante leh min hmangaihtu chhungkuate chu kalsanin kan khua, khua azawnga khaw nuam ber, zalen taka ka tualchaina hmun chu ka chhuahsan ta a. Kan khaw lan theih chhung zawng ka thlir renga, mittui nen Aizawl chu ka pan ta a ni. A hmel leh kan sulhnu vanga ka nat renga ka nih tur ka nih phak loh ai chuan hreawm chu ka tuar mai tur a ni. He khuaah hian LALREMRUATA a awm chhung chu ka haw tawh lo ang tiin ka rilru ka siam mawlh mawlh bawk a..

Aizawlah chuan Class 11 chhunzawmin ka patea te bulah ka khawsa a. Class 12 ka kal ațang chuan keimahin in ka luah thung. Hun harsa tam tak paltlang mahila ka nun pawh a pangngai chho ve viau tawh a. Class X ka exam zawh tuk ațang khan kan khua pawh ka la haw leh miah lo a ni. Min duhtu chu nei ve thin mahila ngaihzawng neih leh châkna ka nei lova. Hlauhthawn rukna tak ka nei thin..

Pathian zarah ka zirnaah ka tluang chho ve zel a. 5th Semester kan nih hian kan College ah pawh a senior ber kan ni tawh nen kan Junior ten min zah thiam a, mahni tawkah kan inti thu hle thin..

Kan veng thenawma awm kan college a kal ve, kan Junior Adini nen hian kan inthu rual fova.. Kan khuaa a pa a awm ve reng tawh vang nge min ngaina nghal hle. Mahse a pa chu an sawn leh tawh a ni awm e. Kei aiin kum 5 in a naupang zawk a. Khawpuiah awmin sikulte an luh hma bawk nen, kum 18 lekah 1st Semester a rawn ni der a ni. Mahni aia naupang zawkte kawm nuam ti mi ka nih vangin rin ai takin kan inkawm thei phian.. A hleitlingin a pian a nalh hle a. A vun a ngoin a hmelțha a. A hlim theiin a bula awm a nuam hle. Chhe lo titu lah a ngah, a luck thlawt a ni mai. College ah inkawm hman lo mahila haw lam leh kal lam chu kan inthurual hram hram thin..

Vawi khat chu ka inah a rawn leng kawi a. A bialpa chungchangte min hrilh ve nual a. Ngaihzawng ka neih leh neih loh min zawt a, ka neih loh thu leh ka tawn sual tawh avanga neih châkna ka neih loh thute chu ka hrilh ve a.. Hemi ni hian U Remruata nen kan chanchin zawng zawngte chu a vawi khat nan Adini bulah hian ka sawi chhuaka. Ka thawl huaiin ka inhre nghe nghe.. Min khawngaih hmel hle a. U Remruata a ten thu leh mipaa chhiar tlak anih loh thute chu sawiin mi țha tak i la tawng em em ang tiin min hnem ve mawlh mawlh a. Hemi ni ațang hian ka ngaina zual sawt a ni.

Adini chu ka țhian nisate ai mahin ka kawm tam a, ka chhuah vahnaah pawh a hman phawt chuan min kalpui ziah thin. A rawn leng fova, a chang phei chuan a bialpa a rawn lenpui a. Chaw te an ei nghal thin. Kei pawh an inah chuan vawi 1 ka leng ve tawh a, mahse ka len lai chuan a nu leh a nau chiah an awm a, min lo lawm thiam hle nghe nghe. Nau ang tak taka en ka nih avangin mipa laka fimkhur turin leh che sual ve lo turin ka fuih nasa ve hle thin.

Adini birthday a ni a. A bialpa Ramenga leh a thian thenkhatte nen an ina chaw ei turin min sawm a. Chhunah chuan ka thilpek tur leiin ka bazar zuai a. Tlaiah chuan nalh takin ka inchei a. Ramenga'n min rawn lam hnu chuan phûr takin an in chu kan pan ta a.

A thiante ho chu an lo awm far tawh a. A nu chuan min lo welcome tha hle. Nu hmelțha tak a ni a, mi fel tak anih pawh ka ring. Chaw ei dawn hnaih hun serh hman dawn chuan an sitting room lampan chuan ka kal phei a. Adini'n 'Pa hunserh chu rawn hmang la, kan inpeih a ni tawh mai" a tia. Bed room ațang chuan a pa ni ngei tur chuan Bible a rawn keng chhuak a. Ka lam a rawn hawi chiah chu ka ding chawt a, ka mitvai emaw ka ti hial.. Adini pa hmel chu mak ka ti lutuk! Ni e.. U Remruata ngei kha a ni!

A hnuai ah conti...
*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WEBSITE ENKAWLNA TUR LEH WRITER TE HLAWH MIN TUMSAK ZEL TIH I HRE DAWN NIA, KAN LAWM E***

[Ngaia]

Hun eng emaw chen chu ka thawk a tawpin ka hria. "U Kim kim, lokal la..' Adini'n a rawn tih chu ka hria, mahse ka che sawn thei lo. Che miah lovin ka ding reng a. Ka tha a khur der der a. Ka thinphu a inthûm rawn tluk tluk a. Ka ngaihtuahna a buai leh vek tawh. U Remruata hmel kan ennawn leh chu amah ngei kha a ni. Amah ngei kha! Khabe hmul a nei tawh tih loh chu danglamna a la nei lo. Ani pawh chuan min en reng a. Mak a ti ve ni ngei tur a ni, a meng phawk hle nghe nghe.

Ngaihtuahna fim pawh pu hman lovin ka tlan chhuak a. Eng nge ka hmaah awma tunge ka tawh tih pawh ngaihtuah lovin ka hma zawnah ka tlan ngar ngar mai a ni. Adini min koh lawm lawmna pawh chu ka hria . Mahse ka ngaihtuah thei lo, chhang thei ka ni hek lo.

Ka khumah chuan ka bawk thlawp a. Khati khawpa min tinatu kha engvanga hmu leh nge ka nih.? Ka aw rawl tawpin ka țap chhuak ta hawm hawm a. Thil thleng dik tak chu a ni si. Khatia ka tlan chhuak ta kha Adini leh U Remruata chuan min rawn umzui a lo ni a. Rizaia hmai phuma ka țap chu ka darah min rawn khawihin "a tawk, insum tawh rawh"

Ka aw hriat thin chiah chiah kha a ni. Adini'n "U Kim kim, eng nge a awmzia? Ka hrethiam miah lo ania" a tih pawh chu ka chhang thei lo. Engtin nge ka chhan theih tehlul ang.
"Min haw san ru ka tha, midang an lo hrilhhai lutuk ang" thei leh thei lovin ka ti hram.. Mahse Adini chu haw a tum bau lo.

"A chhan min hrilh hma chu ka haw dawn lo, i awmdan kha a mak lutuk"

"Adin nakinah kan sawi dawn nia.. Tunah chuan keimaha awm ka duh"

U Remruata chuan țawng zai rel lovin min melh vawng vawng reng a. Thil hriat chhuah tam tak a nei ve ngei ang.

"Pa lo va haw la, thiante ho kha chaw lo va eipui mai ula"

"I birthday anih kha nangmah ber i awm loh chuan.. Ka tihpalh lutuk Adin.. Ka tibuai vek che anih hi" ka ti sap a. U Remruata erawh a awm ngaiin a la awm reng thunga, phawk takin ka țawng lai chu min thlir reng a.

"Hetianga kalsan chi i nilo, eng ber khan nge tlan chhiattir che.."

"Adin, thil ka hre chhuak thuta chuvang alawm.. I birthday ah buaina ka thlen che u a pawi ka ti lutuk."

"Tinge ka pa lo chhuah veleh tikhan i awm?"

Chhan ngaihna ka hre tawh lo. Ka ngawi ta reng a..

U Remruata lam chu melhin "Pa nang talin a chhan i hria em?"

U Remruata pawh chuan chhan a tum lo aniang. A ngawi reng a...

Rei fe tumah țawng zai rel lovin kan ngawi reng a. U Remruata hmel ka va en apiang chuan ka mitthlaah thil tam tak a rawn lang zel a ni. Adini bawk chu a rawn țawng chhuak leh a

"Thil eng emaw tak chu a awm a ni. Khatianga awm thut kha chu chhan tha tak a awm ngei ang"

A dil chhut telh telh mai bawk si. Ka hrilh mai ang nge hrilh mai lo ang tih ka ngaihtuah lai chuan U Remruata chuan "ka lo va haw ange, an ngaih a lo țha lo lutuk palh ang" tih pahin min chhuahsan ta a.

Adini chuan a chhan chu min zawt reng a. Haw tura ka tih pawn a chhan a hriat hma chu haw a tum lo. Eng thil pawh nise a sawi chhuah dawn loh thu a tiam hnu chuan hreh tak chungin "THIANNU.. I PA HI KA EX" ka tita nge nge a.

A meng phawk nasa ngei mai, a hmaite chu a dâng nghal sawp sawpin a hriat. A chanchin ka hrilh thin, kum 5 chhung teh meuh mai ngaihzawng ka neih loh phah nachhan leh ka rilru hliamtu chu tu dang ni lovin a pa ngei a lo nisi.. Mak a ti chu ngawi rengin a awm a. A melh ngai a melh vung vung reng a. Țawng chhuah tum tawh pawn a lang lo, a khat tawkin min en leh vung vung thin. Kei pawh mak tihnain ka khat. Ka thiannu, ka nau ang tak taka ka en hi U Remruata fanu a lo ni reng maw? A hmel leh pumruaah chhun tur a lo neih țhat em vang anih hi a chhiat loh em em ni.

Tunah tak hi chuan engtin nge ka awm tak zel dawn ka hrethiam ta lo. Ka nun hlui theihnghilha, hmalam ka panna tur kawng nia ka hriat chu ka zawh leh zel mai aniang chu.. Adini chuan min rawn kuah a.. "U Kim kim, ka pa aiawhin ngaihdam ka dil che.. Ngaidam hram rawh aw" a ti a. "Ka ngaidam vek tawh alawm, ka theihnghilh thei tawh lo mai chauh a ni" tiin ka chhang a... The End

(Ka story min chhiarsaktute chungah thinlung takin lawmthu ka sawi e)

[Jerome anu lib]

hehe thil awmthei tak ani