DUHTAK MIKE BY Akimi Lr Man Utd

[Ngaia]

DUHTAK MIKE...

Lecture ngawi reng leh tha taka a ngaithla bik chu ka dan pangngaiin ka va melh leh thin. Class lak laia kan titi sep sepa, a ruka thil kan ei mial mial pawn ani chu zirlai ngaihtuah em emin țha takin a awm reng thin. Hmelțha han tih tur chu a ni lo, mahse a nungchang a zawi a, a confi a, a pa hliah hliah bawk. Ruihtheih thil chu sawi loh zuk leh hmuam pawh a ti miah lo. Kohhran leh khawtlangah a phak ang tawkin a inhmang thin. Tunah pawh kan College Evangelical Union (EU) ah Leader a ni mek a ni. A nungchang hi a mawi em a ni!

Michael Lalrinhlua nen hian high school kan kal lai ațang tawhin school kan kal ho tawh a. Ka hriat theih tirh ațangin midang huat tur leh pawisawi zawnga a awm ka hre ngai lo. A nunnem em em a, a hmel a hlim sarh reng thin. Football a thiam hle a, kan School ah chuan Captain a ni reng thin. A rukin ka star em em thina, mahse ngaihzawng a ngaihsak ngai loh em avangin ka star na ka tilang ngai lova, ka thiante lakah pawh ka zep tlat. Tuna ka luhna college ah pawh hian a lut tih ka hriat vang chauha lut ka ni. Ka luhna hmun apiang ka thiante luhna chu a ni veleh mai.

Ka pa hi Doctor a ni a, ka nu hian dawr lian tak a nei bawk. Kan unau hi ka nau mipa Samuela nen chiah kan ni a. Duat sual ka nih vang nge ka nau ai hian inchhungah ka pangchang zawka, ka sual zawk fe a ni. Damdawi ruih hi chu ka tum lo bur a, mahse zu hi chu in thei ve pap pap tak ka ni. "Zu hi chu țhian kawm nan chiah a tlak" ka ti fova, ka țhian kawm duh te reng reng pawh in thei an ni tlangpui bawk. Ka hmeltha a, ka mawng bawr leh âwm bawr hi mipa tam tak hiptu a ni. Ngaihzawng pawh pahnih pathum chu ka kawp deuh reng. Sumah ka buai ngai lo a hei vang hian thian leh ngaihzawngah chuan ka buai ngai lo.

Kan dan pangngaiin class kan tlan bo leh a. Beer leh sehhmeh tur vel nen kan inchhawp leh hnuk tawh mai. Kan thian ho hi chu in thei vek kan ni bawka, kan college a thian inlungrual ber kan ni hial ang. Mahse a lang a pauin mi hmuhah kan in ngai lova, kan in dawn chuan hmun fal nuam tak kan pan thin. Kan in thin tih hria chu mi tlemte chauh an ni ang.

"Michaela hi Nutei'n a ngaizawnga mahse a hnar an ti" Feltei'n a ti chu ka phu zawk mai.

"Ani ang nungchang țha lutukin Nutei te chu a duh awm lo emai a, ruihtheih thil a duh bawk si. Michaela chu a la naupan nen tunah pawh an kohhran țhalaiah Asst. Secy a ni der tawh asin" Tetei'n a lo ti ve leh a.

"Ka nuihsawh.. Mize mil deuh te pawh zawn ve tur alawm.. Ani ang mizia a duh te lo inrin reng reng" Chhantei'n a ti leh tawn tawn a, eng eng emaw an sawi chho ta zela.

An thusawi chu ka bengah a lut tawh lo. Nutei pawh a duh loh chuan min van duh bik awm lo tak, ani aiin ka rui ngun fe zawk a, class lah ka tlan bo ngun bawk. Min ngainep dawn lutuk ka duhna tih lan loh hi ka tan chuan a țha ber ka ti rilru mawlh mawlh a. Chumi ni chu ni dang ang lo takin ka hlim ve tak tak thei lo.

Ruatliani nen class room ah kan awm a. Thian dang te chu common room lamah an awm thung. Michaela rawn lut chuan min rawn pan phei a. Vawi khatmah min be ngai lo khan min rawn be ve nawlh mai.

"Class zawhah EU hla zir tur ania, zir ve ula"

Chhan tuma ka ang zuai hman tih chuan Ruatliani'n min lo chhan khalh.." Kan evangelical viau lo, ni dangah aw" a ti ta mai. Rum deuhin ka melh a. Michaela chu a nui suk a. "Hla zir kan tlem thei lutuk a, zir ve hram rawh u. In zaithiam hmel si" a ti a. "Nia zir ve kan lo tum ang" ka ti a. Ka zak chem chem, mipa hmaa zam ngai lo hi ka lai ngei mai. Kan thian dangte kan han hrilh chu an duh lo nasa.. An fel hlawm si kan pawlh dal zo ang. Bakah EU member pawh kan ni ve reng reng ami an tia. Zir an tum lo bur. Midang min sawmna chu nise ka thiante ang thovin engah mah ka ngai bik lo ang. Mahse min sawmtu kha kum tam tak chhung ka lo duh ruk tawh Michaela a ni miau sia..

"Ngati nge nimin hla in lo zir leh loh" ka hnung lam atanga min rawn betu chu ka en vat. Michaela a lo ni a.

"Nia kan thian ho kan hman tlang lo lutuk a.. Kan tello pawn inzaithiam lutuk tho ang chu"

"Intel phei chuan kan phuisui sawt ang" a nui var var a.

"Zai lam hi chu kan timi vak lo a, nakinah i inkhel kan lo en zawk mai ang che"

"E ni dawn tak! Naktuk tlaiah college week inbuatsaih nan friendly match kan khel dawn asin, min lo en loh vaih.."

"En hrim hrim ang, ka lo au nasa viau ang"

Kum kha leh chen kha School khatah kan lut ho tawh a. Vawi khatmah tianga pangai tak hian kan la inbe ngai miah lo. Zah hre lem lo tak ni mahila Michaela hi chu ka zah ru tlat a, abul hnaia ka awm ringawt pawn a huhâng hi ka zo lo a ni ber mai. Mipa dang ang chu nise ka bem thlu leh daih tawh ang.

A tukah chuan inkhel en hmain Tetei roomah inkhel en huaina kan han ti phawt a. A phûr tawk vel lekin kan in bawka ka au nasa ngei mai. Field chhunga Michaela chetla vel chuan ka mit a la leh ber a. A telna ka en ve tawh hi chuan a Game ai mahin amah ka chik zawk thin. Michaela'n ball a rawn khalh pheia lehlam pawl Keeper leh Defender 1 chiah paltlang angai tawh tih chuan an Defender chuan a lo tithlu a. 'PENALTY' ka ti tuar a. Mahse Referee in a hâm lo, ka thin a rim kher mai. Ka inkhel en chu ka țang bawka ka thiante zawng zawng ka au kep vek ni maiin ka hria. Hun tawp dawn hnaihah chuan Michaela bawk chuan Goal chance a rawn hmu fuh leh ta. A tlan chak bawka, a rawn dawk chhuak zawk a, tuman an um pha lo. Mawi takin a pet goal ta! Kan au thawm chu a tha ham ham hle. Ka zuang tawr tawr a, "Mike i tha ber" ka tivak a.. A rawn hawia a rawn nui sak! Ka zak chem chem...

College week kan hmang chhoa, Michaela pawn startu a ngah sawt ngei mai. A football thiam vang mai maia star tute ai chuan high school naupang anih lai atanga star tu ka ni a, amah bikah chuan ka senior ber tho tho hihi.. Ka thiante lahin ka star tih hre hlek lovin miin an bem chanchin an la sawi ziah zui. "Mamawitei nen phei hi chuan an inzui ngun e, Michaela pawh hian a duh ve aniang" an ti phei chu ka sa zak. Ani aiin ka duh hmasa zawk daih. Tuman an chang tur a ni bik lo..

Tlai ațangin ka roomah keimahin zu ka in nghek nghek a. Ka pa Car duat em em mai chu ka la chhuak leh tawp. A fanu duat hi min hau leh ngam awm lo emai a. Thiante ho ka phone kual, 'Party tur lo insiam ru ka rawn lam vek ang che u' ka tia. Rui tak chuan Car chu ka khalh ta zel a. Ka thiante lah chuan chutianga ruia min hmu chu mak an ti em em a. An tel lovin zu ka in peih ngai si lo.

Feltei chuan "I bialpa te i then leh tawh ami?" min ti a.

"Then vek tawh, bialpa thar ka nei dawn. Ka duh lutuk hman ațangin.. Mahse ih maw min duh lo mai thei. Misual ka nia" ka tikual ta vel a.
Mak an ti chu an inen haw haw hlawm a. Duh tak tak ka neih an la hre ngai miau lova.

"Thiante laka thil thup neih hi ka ning tawh lutuk. Ka duhzia hi hria ulang chuan min tihpui daih tawh ang" ka ti leh a. Ka thusawi pah chuan ka tlu țep zui..

Ruatliani nghah theihnain a tlin ta lo. "Chu pa chu tunge? Sawi vat teh ka hre chak tawh ania" a rawn tia. Mahse han sawi dawn tak tak chuan thiante hmaah pawh ka zam. A chhan chu a ani mi fel lutuk kei hian engtin nge ka duh tlat theih!

"Ngawi reng suh. Sawi rawh tu pawh nise i bialpa a ni em em ang. A hnar tur che a ni lo hrim hrim i thiante kan awm alawm" Chhantei'n a ti leh a. Chutia an han tih vel chuan ka sawi hreh telh telhin ka hria. A tawp a tawpah chuan Michaela ka duhna rei tawhzia chu ka sawi ta vek a. Ka rin ang ngeiin mak an ti hle a. Ka ngaihzawngte reng reng ruihtheih thil duh lo an la awm ngai lova. Anmahni tawka street boy ve tak an ni thin. Mahse ka thiante bula ka inbunruak chu ka thawl hawk mai.

"Ka beidawng.. I mizia leh a mizia hi a inpersan lutuk" Tetei'n a ti sap a.

"A ho emai.. Kan zu in thin a hre chuang hleinem. A bulah keiman ka sawi dawn. A duh tur che a ni ringawt" Ruatliani'n a ti ve thung.

"A lo duh ve che anih pawn a bulah chuan i zia i thup viau angai dawn ania aw, zia thup hi pawimawh tawp" Feltei'n nui har harin a tia. Ka mize milpui ni lo lutuk ka duh tlat chu mak an ti ve ngang a ni. Thil dang engmah an sawi thei lo.

Țhiante zarah Michaela chuan ka duh tih a hre ta. Ka ruih laia ka lo sawi kher kher kha ka inchhir a ka zak hle bawk. Michaela ber kher ni lo se chu mipa han chhai hmasak te chu engah mah ka ngaih loh nen. Mahse ani kher a ni miau sia ka mizia ka hloh ta vek. Ka zah luat avangin class pawh ka kal ngai lo. Ni 3 College ka kal loh hnu chuan a msg ka dawng nawlh mai.
"Tak tak ami?" a rawn ti ringawt a. Chhan dan tur ka bangbo kher mai. A hnu feah chuan..
"Eng ber chu?" tiin ka reply ta ngawt a.
"Min duh tih hi" a tawi tiktek hle nain chhan a har ve duh khawp mai. Ka huaisenna zawng zawng sawm khawmin "Aw.." tih tawpin ka reply a.
"Hehe engtik ațangin"
"High School ațang tawhin"..
Min reply tawh dawn lo emaw ka tih hnu feah chuan "I bialpa ni turin min duh tak tak maw?" a rawn ti leh a.
"Um.. Chumi piahlam pawh" ka ti let a.
"Chumi piahlam chu eng nge? ava dil chhut reuh tak!
"Ka pasal ni turin.."
"Rinawm ang che" tih ringawtin min rawn chhang a. Chuta țang chuan Michaela bialnu ka ni ta.

A zei lem lova, college ah mi hmuh lai pawn kan inbiain kan inzui ngai lo. Kan inbiak ve na ber pawh text a ni mai. Inhmuh falpui tur pawn min sawm ngai lo, nachang a hre lo zawk nge! Mahse a thikthu a chhia tih chu ka hria. Chhunlama college a ka mipa kalpui a hmuh apiang chu zan lamah min rawn zawt leh deuh kher zel...

Kar 1 kan nih tlin hnu chuan Tetei te inah kan inhmu fâl ve ngei a. Ka zak dawn tih ka hriat avangin kan inhmuh hmain zu no 2 ka in a, ka rim a hriat loh nan rim thupna tur ka ei ve ngial bawk. A zakzum ema, a țawng tam silo. A puithu khup mai a a bulah chuan ka thil in pawh a thawk lem loin ka hria. Ka kimki ve tlat a ka lai ve hle bawk. Kan inhmuh dawn apiangin zu ka in hmasa kher zel. A chhan chu a huhang ka zo lo a, keima tih hmasak anih avangin ka zah a, harhfima a bula awm ka zuam lo a ni ber mai. A bulah chuan ngaihzawng la nei ngai lo ang mai ka ni.

Kan inngaihzawn hnuah pawh thiante nena class tlanbo zeuh zeuh chu ka la ching reng tho. Zan lamah min rawn zawt leh ngei zela dawtsawi ngai fo hi ka hnê. Kan inngaihzawn chu College ah pawh hria an awm ve nual tawh a. Chhaih ka tawk ve ta zeuh zeuh. Michaela chuan class la tha tur leh zan lama lehkha zir turin min tiziah a. A hma angin ka nun a tizalen lo riau a hriatna ka nei.

Zan 1 chu a tih ngai loh dan deuhin pawn lama min hmuh a duh thu min hrilh a. Hemi zan hi chuan zu in nghal mai tur a awm silova harhfim pangngaiin ka chhuak a. Min lo nghak reng tawh a. "Khawnge kan kal dawn" ka tia. "Kan tih ngei ngei tur tih loh kan la nei" a tia. Eng tak ni ang maw ti rilru chungin ka zui ve ta zel a. An biakinah min hruai chu niin. Mak tih hmel tak chuan ka va en, a nui sak a. "Lut rawh le, țawngțai ang" a ti ta a. Michaela te hi Catholic kohhran an ni a. An biakin chhung ka lut chu engtin emaw tih danglamin ka awm. A chhung boruak chu a ni ruih a, Pathian a awm hmel bik hliah hliah. Maicham lam min panpuia, țhingțhiin țawngțaina a nei ta a. A țawngțai tawp dawn lama a thu rawn chham chhuah chuan ka thinlung a deng dawt mai! "Lalpa, kan thinlungah hna thawk la, kan tana tha lo tur kan tih thin lakah min veng ang che. Heleni zu in thin pawh i hria e, i hnenah vawi tam tak a sim theih nan ka rawn dil tawh a, Lalpa khawngaihin sim duhna a neih theih nan a thinlungah hna rawn thawk ang che".. Ka maimitchhing lai chu ka meng a, mak ka ti lutuk. A lo hre vek thin maw? Ngati nge min la ngaihzawn renga, ngati nge vawi khatmah a sawi chhuah ngai si loh? A hmain vawi tam tak ka that theih nan a lo tawngtai tawh maw? Mak tihna hlirin ka khat. Biakin atanga kan chhuah hnu chuan ka inthlahrunga ka zak hle bawk. Min rawn kuah pah chuan "zanin chu i in loa ka lawm lutuk aw" a rawn ti. Sawi tur avang duh ngei mai. Thui fe kan kal hnu chuan ka thinlunga zawhna awm chu inthlahrung takin ka zawt ta.

"I lo hre vek thin sia ngati nge engmah i sawi ngai loh"

"Min țhen ka hlau"

"Min then zawk ta che.. Bialnu zu in neihte chu i tan a zahthlak dawn em asin"

"Hmeichhe dang ang chu nila ka then ang che. Hmeichhe zu in hi ka haw lutuk. Ka then loh nachhan che hi i hria"

"Aih hre lo"

"Kei pawn ka hre bik lo, mahse i tana ka țawngțai fo danah hian ka thinlungah hmun i luah thûk tawh hle a ni"

"Atir khan ka in thin tih hria la min duh tho angem?"

"Um.. Nangmah ang tho khan ka duhna che a rei tawh alawm. Mahse ka beisei phak i ni lova ka thup mai angai alawm"

"Beisei phak loh i nei lo. Nang hi chuan tu pawh i phû. Ka phû lo mah mah zawk che asin"

"I in tawh lo ang tiraw.. Vawi 1 a thlah mai chu a harsa ang tih ka hria. Zawi muangin kan bei anga i thei em em ang, i tan ka awm reng dawn ania"

Chumi zan chuan mut hmunah ka ngaihtuah let ngial a. Mak tihna hlirin ka khat. Ka zu in a lo hre thin te leh min lo duh ve reng thin te chu. Michaela hi sâwn a ni a. Anu in eichawp dawr siamin amahin a enkawl seilian a, anu nen chiah an khawsa a ni. Anu thu a awih a, a duat thiam hle bawk. Hemi zan atang hian zu in tawh loh tumna a vawi khat nan ka nei ve ta. Tumna tha tak chu a ni.

"Sawtiang em em lo pawh saw i hmu lutuk. Bansan nghal vang vang ang che, zah pawh i zak lawm ni. Mahni indahsanna te hi nei ve rawh. I mit ava hniam em em ve.. I bansan loh chuan a pawi khawp ang" ka nu chuan min ti tawn tawn a. Michaela nen kan inngaihzawn chu a thiannu Michaela te veng amiin a lo hrilh chu niin. A hmaa Michaela lo len pawn a ngaihnep hmel hle a. A haw hnuin i inleng ve chu leh min ti nghe nghe. Ka nu hi chu mahni indahsang chi, chapo ve tak, pasalte pawh thuhnuaia dah tum ran a ni a. Kan naupan tet atangin thian pawh mi hausa fa deuh kher min kawmtir thin. A fanuin hmeithai fa mai mai ka ngaizawng tih a hria chu a la na ve em a ni.

Michaela nu damloh avangin damdawiinah a awm a. A awmpui angaih avangin class pawh a lokal thei lova. Class ban veleh kan thianho chuan kan tlawh ve a. Anu hi nu fel tak leh hlim thei tak a ni a. Khawi hmunah pawh min hmu se biak hmasak kan chang ngai lo. A chauh hmel hle nâin hlim hmel min lo hmuh hram hram a. Kan ei tur kensak te chu a lawm thiam hle. Kan haw dawn hnaih chuan Michaela chuan min ko hrang a. Anu chu amah ngeiin enkawl reng a duh thu leh hrisel lo chung chung pawha a lehkha zirna senso tur avanga a thawh hah thin thu chu a sawi a. "College pawh ka chawlhsan mai loh chuan unau pianpui ka nei ve silo. Ka nu hian engtikah nge min kalsan dawn ka hre lova, nakin zela ka inchhir loh nan hmangaih leh duat taka ka enkawl angai a ni" a ti chu ka lungngai khawp mai. Ani pawh chuan hreawm a tih ve hmel hle. Thla 3 vel lek kan la inzui a. College-a a hmel ka hmu tawh ngai lo tur te ka ngaihtuah chuan hreawm ka ti a, ka khua a har nghal vawng vawng thei. Lehkha thiam thei tak leh ngaihtuahna seng peih tak a ni si a ka ui pui khawp mai. Mahse a dinhmun chu ka hriatthiampui ve angai si..

A tellova Class kal chu a khawharthlak ngawih ngawih a. Anu enkawl reng ngai a nisi zan lamah pawh a rawn leng hman meuh lo. A rawn len ve chhun pawhin reilote tak tak te a nia. Ka nu a awm chuan țawngkam mei nei takin a lo țawng ve ziah bawk. Kan buaina chu a punlun zel a. Hauh leh vau hial pawh ka dawng hnem mawlh mawlh tawh khawp mai. Mahse Michaela chu ka hrilh ngai lo.

A hnuai ah conti...
*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WEBSITE ENKAWLNA TUR LEH WRITER TE HLAWH MIN TUMSAK ZEL TIH I HRE DAWN NIA, KAN LAWM E***

[Ngaia]

Zan 1 a rawn leng chu kan 2 chiahin kan awm a. Anu a ziaawm ve tawh thu te chu hlim takin min hrilh a. Kan inhmu khat bawka kan inthlahlel em em a. Kan inkuah vawng vawng renga tudang mah kan ngai bik lo. Rei vak lo hnuah chuan ka nu a rawn haw a. "E nang hi i lo leng hlauh chu ava tihzia ve. Thil sawipui tur che ka neia, tikhan lo țhu rawh ka han inthlak phawt ange" tih pahin an room lamah a chho a. Eng tak sawi ang maw ti rilru chungin ka lo hlauthawng ru em em a. A rawn chhuk leh chuan thingpui ava thli tete a, Michaela a rawn thlit bawk. A hmela en kal chung leh zam miah lovin "Heleni nen hian inthen ula kan duh a.. Hmalam hun eng tak a nei a. Pasal tha tak nei turin kan duh bawk. Kan hrilh ngun tawh viaua luhlul a chhuah tlat a. Nang tal chuan hriatthiam tum rawh" a ti ta a. Michaela chu a hawi chhuak ngam lo. A hmai te chu a sen țawn țawnin ka hria. "Nu duhtawk teh. Ka inthen dawn lo" ka lo ti tuar a. Mahse ka thusawi chu engah mah ngai awm pawn a lang lo. Michaela lam bawk chu en pahin "Phû tawk hi an awm ve a. Nang pawn ani lo nupui tha tak i la hmu mai ang" a ti leh ngat a. Michaela chu a ding a. Melh pawh min melh miah lo chuan ngawi rengin kawngkapui lam chu a pan a. Ka um zui vat. Ka nu chuan Helen i zak lawm ni a ti tuar tuar a. Mahse pawn thleng chuan ka um lui ta zel a. Hnung lam ațangin a kawngah ka va kuah thlawpa, "Mike inthen ka duh lo. Min then suh aw" ka ti mawlh mawlh a. A mittui a tla tih ka hria kei pawh ka biangah chuan a luang nguai nguai a. Țap chungin kan inkuah ngawih ngawih a. Avan hreawm tehlul em.. "Va lut tawh rawh i nuin a hau ang che" min tia. "Aih ka haw dawn lo, i bulah ka lokal ve dawn" ka ti tlat a. "Inngaihtuahna hun ka mamawh, ka tha lawm min ngaihtuah suh" tichungin min kalsan ta a. Inchhung ka lut chu ka nu chuan "zakthei lo nu, ka um chhuak e i ti a law?" tih pah chuan min ankhum nghal bawrh bawrh a. "Naktukah an inah ka va leng anga anu pawh ka va hrilh dawn. Khatiang mai mai makpa atan ka duh teuh lo. Nang pawh Mizoramah i awm tawh dawn lo. Kan thawn bo dawn khawp che" a tia. Michaela thingpui tura a thlit, a in hman tâk loh chu a awm ngaiin a lo la awm reng a. Ka roomah ka la luta ka inkalh khum nghal hmak a. Ka nu chu ka haw takzet..

Kan boruak tawn chu a hahthlak tulh tulh a ni mai. Michaela chuan vawi tam tak "min then mai rawh, i chhungte duhthusam ang chu nei zawk rawh" a ti fova. Mahse then tur chuan ka hmangaih tawh mah mah. Ani pawhin harsa a ti ve tho. A rawn leng ngam tawh lova keimah zawk an inah ka leng mai thin. Anu pawn min duat a, ka nuin nasa taka a lo ankhum tawh chung pawn min be chhe ngai lo.

"Mami zaninah i thawmhnaw in pack fel vek ang che. Naktukah Bangalore ah inkal dawn. I nuin a hruai ang" ka pa chuan a ti thut a.

"Eng nge ka tih dawn. Ka zin peih teuh lo"

"I zin dawn lo. Lehkha i zir dawn. Ka duh lo han ti nateh i chak lo khawp ang. Ticket pawh ka tifel vek tawh" ka nu chuan a ti vin țhak.

"Ekhai.. I mak nghal buan buan thin. Țawngkam pangai taka sawi theih reng hi vin nghal ngawt zel lo teh. A duh dawn alawm, a hma pawn phaia awm a chak thin em kha" a tinem duai a. Ka pa hi chu a zaidam deuh, mahse ka nu hi a hlau zawk tlat. Hmeichhe rorelna in chhung hi ka hne ngawih ngawih.
Ka chaw ei thleng chu ka nawr sawk a. Ka roomah ka tlan lut nghal. Michaela tel lovin engtin nge ka awm theih ang. Ka kalsan thei lo. Ngati nge kan inhmangaihna kawng hi a bumboh em em bik? Ka țap hawm hawm a, dam châkna pawh ka nei tawh lo. Mahni intih hlum em chu ka ngam silo. Ka room tukverh atang chuan ka chhuak ru a, țap chungin kawngah chuan ka tlan ta ngar ngar a.

Michaela te inah chuan ka tlan lut tawp a. Anu chuan 'ngati nge ni ngai, eng nge awmzia?" tiin min lo kuah vat a. Kan thawm hriain room ațangin Michaela a rawn chhuak vat bawk. Michaela hmel ka hmu phei chu ka lung a chhe zual a. Engmah sawi thei lovin reife ka țap a. A hnuah chuan thil awmzia chu ka sawi ta a. Anu chuan "zir zo law law la, rinawm taka in awm chuan i chhungte pawn remtih hun an la nei ve maithei asin" a ti a. Michaela erawh chuan ka duh ang ngeiin "Kal suh" min ti thung. Michaela chuan a roomah min kuah lut a. Min kuah vawng vawnga a mittui a tla zawih zawih bawk.

"Kal suh, i tello chuan ka awm thei lovang" a ti a.

"Immm.. Ka kal miah lo ang, kei pawh i tello chuan ka awm thei lo. Ka ngai dawn em che asin" ka tia, ka țap zawih zawih a. Ka mittui hruk hul pah chuan "Ka duat haw tawh lo mai rawh aw" a ti ta a. Ka zirlai ka ngaihtuah peih tawh lo, a hma kha chuan MA ka zawh hunah chiah pasal ka nei ang ka ti ve thin a. Mahse hetiang hi kan dinhmun anih tâk si ah chuan engmah ka pawisa tawh lo. Ka ngaihtuah ngai miah loh danin ka awm mai a ngai. Michaela pawn a ruka bul țan hi a tum ngai bik ka ring lo. Hemi zan hian ka haw lo a kan inru chu a ni ta!

Zan lamah ka thiante ho Michaela'n kan hun tawn mek hrilhin a call vek a. Zing hma lutukah chuan Feltei, Chhantei, Ruatliani leh Tetei te chu an lokal a. Kan chanchin kan han hrilh chu min khawngaih ve hlein ka hria. "Ruatliani'n nizan chu inpa hi a bauh ve lo maw" a ti ru sar sar chu kan nui dar dar a. Tetei'n "Heleni hi chu i fing bik e. Pasal zawn i thiam ka ti lutuk. I la vannei ang" min tia. Chutih lai tak chuan ka nu aw ngei mai chuan "Khawnge kan mihur nu chu, nikhua lo lutuk mai" a ti tawn tawn ri chu ka hria a. Ka hlauthawng kher mai. Room kawngkhar chu a rawn nam hawng țhuaia, min rawn kek nghal bawrh bawrh a. Ka nutei te nupa nen an lokal a lo ni a. Ka thiante chuan min en țhupa a duhtawka kut min thlak hnu chuan Michaela lam chu hawiin "ka fanu hi i rawn beisei leh anih chuan i tan a pawi khawp ang. Hetiang inchhunga mo tur hi a ni lo" tih pahin min pawt chhuak a. Michaela te nufa chuan min dang turin tih theih a nei silo. An kawngkaa min hnuk chhuaklai chu lainat hmel takin min thlir vawng vawng a.

A hma aia nasaa khuahkhirh ka ni a. Chhun lamah pawh dawr a khar hmiah hmiah a. Ka phone min laksak a, roomah min kalh khum tlat thin. Ka thiante an lokal pawn tumah ka hmuh a phal lo a, ka khawvel a zim sawt hle a ni. Michaela ka ngai ngawih ngawih zel a, eng tin nge a awm ang tih ngaihtuah reng rengin ka ka nitin hun ka hmang liam a. Nitin mittui nen ka hun ka hmang a ni ber. Ka nu leh pa hian hmangaihna awmzia hi an hre ve mawlh lo a ni.

Ni 1 chu ka nu chhuah hlanin ka nau Samuela'n kawngka min hawnsak hlauh a. Hmanhmawh takin Feltei te in lam ka pan nghal a. Ka thiante rau rauah pawh kan in leh an in hi a inhnaih ber a. Ani chuan Michaela min phone saka. A rawn thleng chu mittui nen kan inkuah vawng vawng a. An in lamah bawk chuan ka zui haw leh ta a. Mahse an ina awm chu min rawn zawng lehnghal dawna kan hriat avangin a nuteii te inah min kalpui ta a. A nuteii te inah ni 3 vel kan awm hnu chuan ka nu te chuan min rawn zawng chhuak leh a. A hma ang bawkin kutthlak leh vauna ka dawng hnem leh khawp mai.

Hetiang an nih tawh si chuan ti a min inneihtir chu khawilamah. Pawn chhuak thei lovin min veng tlat reng a. Ka nu chuan "i rai hman vaih anih chuan kan titla tho tho ang. Sawtiang nena inzawmna neih saw chu ka duh țhak lo" a la ti ta deuh deuh. Min hringtu tak tak a nilo aniang tih rum rum chang pawh ka ngah. Ka pa chuan min lainat ve deuh chuan ka hria, ei tur tui țha țha min rawn hawn renga, mahse Michaela neih chu a phal phah chuang lo. Kan in chu thlan thim thuk tak nen ka tehkhin ber a, remchang awm veleh he thlan thim hi ka mangtha hlen tawh ang tiin ka rilru ka siam sauh sauh thin.

Ni 1 chu ka nutei fapa dam loh avangin ka nu chu damdawiin lamah kal a ngai hlauh mai a. Kan awmpuinu hnenah chuan "veng țha hle ang che. Samuela sikul bang pawh a u room hnaihah a kal tur a ni lo" a ti ri chu ka hria a. Ka thawmhnaw leh mamawh tur ang chu ka siam lawk vek a. A chhuah fel hnu chuan kan awmpuinu Teseni chu ka ko vak vak a. "Eng nge ni" a rawn tia. "Ka pum ana lutuk damdawi rawn la vat teh" ka tia. Room kawngka a rawn hawn rual chuan ka tlan chhuak a. "I pi lo haw hunah chuan a thiante'n an hawnsak ti mai rawh" tih leh kawngkapuia tlan chhuah ka rual a.

Michaela te in ka va thlen chuan anu pawh a mittui a tla tawp. "Dan zawh chi inni lo anih hi. I pute khaw lamah kal mai rawh u. An rawn hmu leh rang awm si che u a..." atia. Hmanhmawh takin Michaela thawmhnaw vel chu a tih felsak mawlh mawlh a. Pawisa hun rei tak a lo khawl ve tawh ni awm tak chu a thingrem mawng ațangin a rawn phawrh a. Ka kutah chuan min hlan ta a. Tichuan a pute khaw sumo counter awmna lam pan chuan kan inzui chhuak ta hnak hnak a.

A pute khuaah chuan thla 3 zet kan awm ta. Min duat em em a, a țul ang ang kan thawk ve bawrh bawrh thin. Ka țhiante leh Michaela nu chuan min rawn be reng a. Kan inah khan engmah inchhung sekrek khawih vel ka tih ngai loh avangin Michaela pi chuan eirawngbawl min zirtir thin a. Tunah chuan thiam tawh tak ka ni.

Ni 1 chu Michaela phone ah ka nuin min rawn be nawlh a. " Hetiang em ema kan thu awih lo, man bo țhak khawpin hmeithai fa i inruktir duh ania. Zahna min thlen hnem zozai lutuk. Kan tuithlar tawh che a, i duh dan danin awm tawh la. I thih leh dam pawh kan ngaihsak tawh lo ang. I nunah inrawlh buai kan tum tawh lo" a rawn ti a. Min hringtu ka nu ngei thusawi ngei chu a ni si. Ngati nge ka hmangaih hi an hriatthiam ve mai loh le.. Michaela hian an it ber sum chu a nei lo. Mahse hausakna nun dik tak chu amahah a awm a, mi tha tak a ni tih an hre lo a ni. Michaela pi leh pu chuan chutiang anih tawh ber chuan haw tawh rawh u. I nu a hrisel silova heta inawmsan reng chuan a ngaihtuahawm" an tia, a hnu ni 2 hnuah chuan kan haw ta a.

Thla 6 hnuah chuan ka naupai pawh a lian hle tawh a. Kan chhungkua chu kan hlim a, a hmaa kan inchhung sum ringawt ngaihtuaha buaina inchhung kha chu ka ngai lo kher mai. Michaela te nufa bulah chuan ka hlim a, ka thla a muang ngawih ngawih. Vanneihthlak takin Michaela chuan a football thiam zarzovin Mizoram Police ah a lut ve ta hlauh a. Sum tam tak la lut lo mahse kan ei khawp a tling a. Kan lungawi ve hliah hliah a ni.

Kan chhungkaw hlimna belh chhah turin June Ni 25 ah fapa duhawm tak Maximus Malsawmhlua kan nei a. A pa a chhun hle nghe nghe. Kan fapa kum 1 a tlin hnu chuan Catholic Kohhran thianghlim danin (kohhran dan thianghlim ni lovin hehe) Rev.Fr.Vincent Monis kutah kan innei ta a ni. Tunah chuan Pathian mit hmuha nupa tak tak kan ni ta.

Kan fapa duat em em hian a pa a ngaisang hle a. A sentet ațangin ball a lawm hle a. A pi phei chuan "a pa tetlai chiah chiah" a ti reng thin. A pa inkhel chu hmaih miah lovin ka enpui thin. A kal theih hnu phei chuan zing tin an pafain ball an pet duna. "Ka fapa footballer tur anih hi" tiin chhuang takin a thiante bulah a sawi thin. A nupui nih hi ava nuam tehlul em..

Bawihtea ka mutpui a, ka ngaihtuahna chuan kan intawn hmaa ka mizia leh kan hun tawn chhoh zawng zawngte chu ka ngaihtuah let neuh neuh a. Khatiang hmeichhia ka ni chunga ka nihna ang anga min pawm duhtu, awlsam taka ka nun siam țha thei leh ka nun khalh ngiltu pasala ka nei hi vannei ka va inti tak em.. Ka nu leh pate ka ngaihtuah chhuak a. An tupa hi hmu ve se eng ang rilru nge an la put ang le..? Ka pa phei kha chuan a lawm ve hlein ka ring. Ka nau neih chhun Samuela ka ngaihtuah chhuak chu ka mittui a tla zawih zawih a. Michaela rawn lut chuan "Ka duat i țap a law? Ngati nge ni ngai a" a rawn tia. "Ka chhungte ka ngai ve deuh a. Samuela khan Maximus-a hi hmu ve se a hlim ngawt ang" ka tia. Ka lunglenna chu min hrethiam hle ni tur a ni, min kuah vawng vawnga.. "Ka duat, min nei hi inchhir chang i nei thin em? Keimah vangin i chhungte i chân ta si a"

"Ka lung chu a leng ve zeuh zeuh a, mahse ka nei che hi ka la inchhir ngai lo. Pasal nei leh dawn pawh ni ila nangmah tho hi ka duh che" ka ti a, a nui saka. Ka bianga min fawh pah chuan

"Max-a Nu.. Khawvela nupui tha ber ini asin"

"Duhtak Mike, ka khawvel chu nang leh Bawihtea leh ka nu hi inni thung asin" ka ti let hnâp a. A TAWP TA..

(Ka nau hming ka hman avang khian a story tak tak a nilo a nia. Vawk chaw pekah vawi 3 vel tal min awl beiseina nen a hming ka hmang ta mai hehe.. Min chhiarsak thin tute inchungah ka lawm tak meuh meuh. Story ziah phûrna min petu chu nangni hi inni. Ka lawm e)