ENDLESS LOVE. BY Sam Aquarius

Group siam tirh atanga like tu 1000 nei chin zawng zawng dahkhawmna
Ngaia
Site Admin
Posts: 25813
Joined: April 30th, 2016, 4:07 pm

ENDLESS LOVE. BY Sam Aquarius

Unread post by Ngaia » June 12th, 2016, 3:18 pm

(KUM 2001)

Ka hriat chak ber leh mi in an sawi thin chu a tak a ni ngei nge ni loh tih fiah duh a thla 1 dawn lai ka zawn tawh chu dawt a ni lo tih a tak ngei in ka hmu ta. Mahse chu ka thil hmuh chuan ka rilru a va ti na si em !!! Mi in an sawi thin chu hmuh ve ngei duh in zawng mah i la, a tawp a kan hmuh ve meuh chuan hmu tur a ka lo zawng hi ka in chhir leh zawk hle.
.
Ka first love leh ka hmangaih neih chhun, a mah pawh in a min hmangaih ve a maw ka lo tih thin ngei khan Lehkha zir a ka awm bo hlan in pasal min lo neih san mai a ni lo, tun ah chuan phei chuan hmeichhe in zuar a ni tawh tlat. Pasal min neih san tih kha chu a mah ngei in min hrilh a, ka rilru na pawh tun thleng in a la reh lo a, ka hmangaih na pawh a la reh hek lo. Hmangaih hle mah i la kei ai a mipa dang duh leh hmangaih zawk dang a neih miau a vang in ka tan a mah ah beisei tur a awm tawh lo a, a pasal nen a hlim tak a nun an hman dun theih na tur a mittui nen duhsak na hlan mai bak tih theih ka neih tawh loh a vang a chanchin hriat zui ka tum tawh ngai hek lo. Mahse nitin a ka rilru leh ngaihtuahna zawng zawng luah tu ber chu a mah Rintei a la ni tho. !!!
.
Hetiang a pasal min neih san a vang hian ka chhung te erawh lawm a vang in an tap hial ta ve ang. A chhan chu ka hmangaih Rinte-i nen a kan in then theih na tur a ka duh lo chung phai a lehkha zir tur a min dah ka ni. A pasal neih tur thu pawh nuam ti tak in ka nu in Phone ah min lo hrilh ngei kha !!
.
Mizoram a ka haw leh hnu ah pawh ka hriat ngei tur in mei nei tak a sawi nuam an tih ber chu Rinte-i KS a nih chung chang chu a ni. Chutiang a Rinte-i a awm tih pawh chu ka chhung te hian engtin nge an lo hriat leh hmanhmawh pek. An hua tih chu ka hria, mahse a chanchin hriat zel tum hian an lo la chhui zui reng peih a ni ang. Mak ka va ti tak em !!
.
A tir ah chuan ka chhung te hian a mah Rinte-i an huat em a vang in a mah an sawi chhiatna mai mai ah ka ngai a, ka hriat tur ngei in sawi lang thin mahse, ngaihsak awm ang in ka lang ngai lo a, zawh pawh ka zawh belh ngai hek lo. Hre lo ang hmiah in ka awm thin. Mahse a hnu ah ka thianpa ber in min hrilh ve tak ah leh a mah ngei pawh in zan rei tak ah khawlai a a in zuar lai a hmuh tawh ngei thu min hrilh hnu chuan ka chhung te thu sawi chu dawt a ni lo tih ka ring ve chiah.
.
Chutiang a ka thianpa ngei in min hrilh hnu chuan Rinte-i awm dan chu keimah ngei in hriat chian ve duhna ka nei ta a, a awm dan hrechiang a hmu ve tur chuan zan rei lam ah Aizawl kawtthler hmeichhe in zuar ho an awm na thin ni a an sawi ah te chuan hmu ve tur in zan rei lam ah Bike in ka tlan kual thin a. Thla 1 dawn lai chutiang a ka zawn kual hnu ah pawh chuan a mah Rintei awm ang hmuh ka nei ngai lo. Chuvang in ka thianpa pawh chu ka ringhlel rum rum thin. Mahse ka thianpa ka zawh leh thin pawh in a tang huai khawp mai. Ka thianpa hi engkim a ka rin ber leh ka tan engkim tih huam ve thin a nih a vang in dawt min hrilh em chu ka ring lo bawk a ni. Ka thianpa hi Rinte-i ka hmangaih zia hre chiang tu leh ka chhungten an duh loh zia hre tu, Rinte-i nen a kan in hmuh theih na tur a engkim huam a palai hna min thawh sak thin tu a ni a, dawt min hrilh duh tur ang mi a ni lo.
.
Mahse chutiang a thla khat dawn zawng a ka beidawn tawh tep hnu ah chuan ka hmangaih Rinte-i ngei mai chu a mah dawr tu tur nghak a pawnfen chhing tak leh nalh tak mai a a ding lai chu ka hmu ve ta !! Chutiang a a tak ngei a kan hmuh ve hnu ah pawh chuan ka la ringhlel rum rum tho. Ka mit vai te a nih ring in kan mai mit chhing vang vang a, mahse chuta ka men leh pawh chuan ka hma lawk a hmeichhe nalh tak a ding chu ka hmangaih Rintei a ni tih hai rual a ni. Hman a hmeichhe fel leh nungchang tha, hmeichhe inthlahrung, mi pawisawi hlau tak leh zakzum thin tak kha tun ah chuan a mah ah hmuh tur reng a awm tawh lo a, a rapthlak ka va ti tak em.
.
.

PANLAI NUN

Unau 4 zing a naupang ber dawt tu ka ni a. Ka u chiah hi hmeichhia ni in a bak zawng chu mipa vek kan ni. Kan unau zing a naupang ber Mapuia nen hian kum 4 lai in kan in thlau a, vanduai thlak tak in a ke lam ah leh taksa ah harsat na a neih a vang in a kal thei lo a. Ka pa hi officer duh tawk a ei ru ve thei chin a ni ve a, ka nu pawh High school zirtir tu a ni a, khawsak lam ah chuan kan harsa lo ve tak kan ni.
.
Kan veng a english medium school tha ber a an sawi ah zirna bul ka tan ve a. Chutah chuan kan veng zu zuar fanu Rinte pawh lut ve in kan class a in ang ah kan awm a. Mahse an chhungkaw zu zawrh hi khawtlang hriat a nih a vang in tu nu leh pa te mah in an fate kawm a tan Rintei chu an duh lo a. Chung zing ah chuan ka nu leh pa pawh chu tel ve in Rintei kawm lo tur chuan min hrilh nasa ve thin hle. Mahse thian nei lo a a mah chauh a a awm thin leh chhun ah te eng mah ei tur te nei ve lo a a awm thin ka hmuh chuan ka khawngaih a, ka chhung te hriat loh in ka ei tur pai te chu ka pe ve thin a. Chutiang a tumah in an kawm duh loh kawm tu ka nih a vang leh ei tur te pe thin tu ka nih a vang chuan a mah pawh in min ngaina a, chuvang in school a a thian kawm chhun ber ka ni thin.
.
Ka chhung te pawh in school vel a Rintei nen a kan in kawm nasat thin thu te chu an hre thuai a, inkawm lo tur in min hrilh in min hau nasa thin hle. Mahse naupang ta na na chu a tir ah han kawm lo deuh thin mah i la, chhung te thusawi theihnghilh in ni rei lo te hnu ah kan in kawm leh nge nge tho thin. A chang phei chuan kan in ah leng tur a han hruai luh chang te ka nei bawk a, a len rei deuh a, ka nu leh pa an rawn haw hman phei chuan an haw tir nghal thin mai bak ah a haw hnu in min hau hrep thin.
.
Chutiang chuan naupang rilru tha tak leh engmah la hrethiam lo kan nih lai a tang daih tawh in Rintei nen chuan kan in ngaina dun tawh a. Kan naupan lai a tang tawh a harsatna kan tawh chu kan puitlin hnu thleng pawh a min kian san lo in a ai a nasa harsatna tam tak kan la tawk dun zel dawn tih reng kan hre pha lo a, kan ngaihtuah phak ngai hek lo.
.
Rintei nu leh pa ten kan veng chhung a zu an zawrh chu veng chhung mipui te duh loh na a nasa tial tial tawh a, veng chhung hruaitu te pawh in sim tur in vawi enge maw zah an hriat tir tawh a, mahse an sim duh tlat si loh a vang in veng chhung a tang a in thiarfihlim mai tur in an ti thin a. Chutiang a kan veng chhung a tang a an chhuah theih na tur a hma la nasa tu ber te zing ah chuan ka pa pawh chu a tel nghe nghe a ni!!!
.
Class 6 kan nih kum lai hawl ah Rintei te chhungkua chuan kan veng chu an chhuah san ta nge nge a, naupang mai ka la nih a vang in khawi ah nge an awm zui tak zel tih ka hre tawh lo. Class a ka thian te ho lah in an awmna veng an hriat a in ang lo nuai hlawm bawk a, tumah han zawh chian tlak an awm lo. Rintei ten kan veng an chhuah san hnu chuan kan school ah pawh chuan a rawn kal ngai tawh lo a, ka ngai hle thin. Mahse hun te a lo liam zel a, kum te a lo vei meuh chuan Rintei ka ngaihna leh ka hriatna te pawh chu a lo bo ta ve tial tial a ni.
.
INTAWN LEHNA
.
High school chu St Pauls ah ka kal a, class 9 kan nih kum in nikhat chu kan class bang haw lam Bus tukverh bul ah ka thu a. Lower Khatla kan pelh hnu deuh in motor jam ah kan chuan na Bus chu rei vak lo a ding a, a kal leh tur chiah tukverh a kan hawi chhuak chu kan thutna zawn pel tur chiah hmeichhia JL School form ha kal ka hmuh chuan ka phu zawk a . Rintei ni tlat in ka hria a, mahse ka harh chhuah leh chuan Bus chu a lo kal chak leh tawh si a, kan hawi let lah in hmuh theih a ni tawh bawk si lo. A mah Rintei a ni ngei nge ni ngei lo tih fiah tur a Bus a tang a chhuk duh pawh ni i la, Bus a tawt em a vang chuan chhuk a buaithlak dawn lutuk. Chubak ah chhuk mah i la, bus dang a chuang leh tur in bus fare tur ka nei tawh lo hrim hrim.
.
Mahse in ka thlen hnu chuan ka rilru ah Rinte-i chu a awm ta reng a. Kan in hmuh hnuhnun ber kha class 6 kan nih lai daih tawh kha a ni a, tun ah class 9 kan ni tawh a, kum pawh a lo vei hnem leh ta khawp mai. Engtin nge khatiang kum chhung zawng khan Rintei hi ka lo theihnghilh theih zawk? Mak ka in ti zawk hle.
.
Kan naupan lai a kan in kawm nasat thin zia te, ka chhung ten kawm an phal loh chung pawh a ka kawm luih thin tlat dan te leh a ruk a kan in atang in ei tur te ka ken sak thin lai te, class 6 kan nih kum tir lam a a mah Rinte in an chhungkaw dinhmun a vang a mi zawng zawng hmusit a nih phah zia te leh thian tha keimah lo midang tumah a neih loh thu te mittui tla zawih zawih a min hrilh lai te chu ka ngaihtuah chhuak a. Ka hriat loh hlan in ka mit a tang chuan mittui a lo luang thla zawih zawih a ni. Thiantha ber a neih chhun hian eng tin nge ka lo theihnghilh theih le? Keimah leh keimah chu ka in thiam thei lo. Engpawh nise Rintei hi ka zawng chhuak leh ngei tur a ni.
.
A tuk atang chuan school kan ban apiang in Khatla thleng Bus fare ka pe a, Tennis court a bus dang a chuang leh tur in khatla a tang ke in Tennis court bul thleng chu Rintei hmu leh tum chuan ka kal tan ta a. JL school form ha hmeichhia ka hmuh tawh phawt chu ngun tak in ka lo en thin a, mahse Rintei hmel awm ang reng ka hmu ngai lo. Kar 2 chuang chutiang a Rintei hmel hmuh beisei a ka kal hnu chuan ni 1 chu min tawk zawng a hmeichhe lo kal chu hla deuh a tang pawh in Rintei ngei a ni tih ka hre ta nghal a. Ka hmuh tirh a tang chuan ka helhhawlh nge ka thinphu te pawh chu a rang thei hial. A hma ai a chak in ka kal a, kan in hnaih deuh hnu a min han hmu ve chu a mah pawh chu a ding chawt a, mak tih na in a hmel chu a khat a, kei pawh chutiang bawk chuan mak ti in ka ding ve chawt a. Mahse ka harh chhuak leh vat a. A bul a kal hnaih pah chuan "Rinte....i dam maw?" ti in ka chibai nghal a.
.
"E heee Mama nang mah a law i nih, ka dam a lawm, i dam zawk maw?" Lalruatdika ka ni a, mahse Mama ti ka chhung te leh ka thian ten min ko thin.
.
"Kei pawh ka dam e, Rinte khawi ah nge in awm tak a"
.
" Tun ah chuan Khatla Maubawk lam ah kan awm a. I chhung te an dam a maw?" A aw chu a khur deuh lek lek in ka hria.
.
"Aw kan dam tlang e, nang i chhung te an dam zawk maw?"
.
"Aw keini pawh kan dam tlang e. St pauls ah ni maw school i kal tak . Tun ah khawiah nge i kal dawn reng reng a ke in nangmah chauh leh nghal in school form nen"
.
A hma a Bus ka chuan lai a a mah ka hmuh leh a tang in a mah zawng chhuak leh tur a Khatla leh Tennis court inkar thleng ke a ka kal thin thu te, chutiang a kar 2 chuang beidawng lek lek tawh a ka zawn thin thu te chu ka hrilh vek a. A mah pawh chu a mittui a tla tep nghe nghe in ka hria.
.
Chu chu Rintei nen a kan in tawn leh dan chu a ni. Chumi hnu a tang chuan Rintei nen chuan kar tin Friday a piang in in hmuh ziah chu kan tum ta a. Khatla leh JL School pan thlak na inkar ah chuan innghahna hmun tur kan siam a, Friday a piang in a bang hmasa zawk zawk in a bang hnuhnung zawk chu kan lo in nghak ziah thin dawn a ni. Ruah pawh sur eng ang mahse nuam ti tak in kan in nghak chhuak hram hram zel a ni. Mahse thil buaithlak deuh mai pakhat chu ban har tum leh ban hma tum deuh te a awm a, khatih hun lai khan mobile phone te a la awm loh a vang in engmah chanchin in hrilh theih a ni si lo, kan in nghak mawl tawp ngawt ngawt zel mai a ni. A chang phei chuan beidawng lek lek a in nghah rei chang a awm a. Engemaw harsat na a vang a school kal loh thut chang a tu ve ve emaw in a kan neih phei chuan engmah chanchin in hrilh ngaihna a awm si lo, chung hun ah chuan kan in nghak thlawn fo a, tlai tak tak a in thlen chang pawh ka nei thin. Telephone landline nei mah i la, Rintei ten an neih ve tlat loh a vang in a buaithlak hle a ni. Mahse heti chung in a tu a ve ve mah kan phun nawi ngai lo.
.
Khang hun lai a tang daih tawh khan hmangaihna awmzia tak tak la hre lo mah i la, kan thinlung ah chuan hmangaihna a lo piang chhuak daih tawh tih a chiang hle. Thian kawm ang in in kawm thin mah i la, thian in hmangaihna ai a thuk daih in kan lo in hmangaih daih tawh tih phat rual a ni lo.
.
Thla khat chhung a Saturday hmasa ber ah hian harsatna dang a awm loh chuan kan chhuak dun ngei ngei thin bawk a. Chumi kan chhuahdun hun a restaurant ah te kan chawlh a thil vel kan ei na man tur te chu ka chhung te pawisa min pek hi a ruk in ka khawl char char thin.
.
Rintei chuan an chhungkaw dinhmun chu an naupan lai a mi ang tho a la nih thu leh hrehawm a tih thin zia te, a zah thin zia thu te, khawtlang ah leh kohhran ah pawh eng ah mah a in hman ve ngam ngai loh phah thu te min hrilh vek a. Chumai bak ah tun thleng a ka la hriat ngai loh a pa ang a ka ngaih hi a pa tak ni lo in a pahrawn a nih thu te min hrilh bawk a. A mah hi a nu nulat fa a nih a vang in tun thleng in a mah ngei pawh in a pa tak hi a la hriat loh thu te pawh min hrilh vek a ni.
.
Hun leh ni te pawh a dan pangai ang in an kal liam zel a. Kan in thian that na pawh chu tun ah chuan hmangaihna ah rawn chang chho ta bawk a. Kan hmalam hun a beiseina eng nei chung zel in kan zirlai te pawh kan zir ve ve zel a. Matric te pawh exam zo in result kan nghak ve ta reng mai. Rintei nen chuan kan zirlai te hlawhtlin ngei tum a tha tak a zir tur in kan in fuih tawn reng a. Class X kan nih tirh a tang in Rintei chu a pass tha lo ang tih hlau in St Pauls a kan zirlai ang ang te, exam kan neih a pawimawh ni a kan hriat ang te chu ka hrilh ve zel thin a. Mahse a ni tan a buaithlak ber chu an chhungkaw dinhmun chu a ni. A tan in ah lehkha zir na hun tha a neih loh a vang in a duh ang tawk in a zir thei lo a, mahse class x kan exam pawh chu tih that chu in beisei lo mahse fail chu a in ring bik lo.
.
Result chhuah ni tur a an sawi ah chuan hma deuh tak ah MBSE office Chaltlang ah chuan an tar chhuah hun nghak in Rintei nen chuan kan kal dun a. Dik tak chuan fail kan in rin loh ve ve a vang in hlauh thawnna kan nei lo a, tar chhuak vat vat se kan ti hle. Result an tar chhuah dawn hnaih ah chuan mi pawh an tam tawh hle, ka school kal pui te leh Rintei school kalpui te pawh hmuh tur an tam hle a. Result an tar chhuah chuan Distinction ah ka pass a, subject 3 lai ah letter ka hmu bawk a. Rintei pawh 2nd div ah a pass a, kan lawm dun ngei mai. Kan thiante in hmu remchang a piang chu kan in chibai sup sup a, kan hlim tlang a ni ber e. Mahse vanduai tak a hlawhtling zo ve lo hrehawm ti hmel te han hmuh chuan khatiang a lawm a vang a han in chibai a, han in kuah vak vak te kha a inthlahrun awm duh hle.
.
Result lawm nan restaurant ah kan chawlh dun hnu chuan a hma a ka lo tiam tawh ang in a duh ber lei na tur a pawisa ka lo khawl sa tawh chuan kawr ka lei sak a. Lawm a vang a a mittui tla te kha tun thleng in ka la theihnghilh thei lo. Kan hmalam hun a kan awm zel dan tur te kan sawi dun a. St Pauls a luh leh chu duh viau mah i la kan 2 a kan luh dun theih na tur Govt Mizo Higher Secondary School ah chuan lut ve ve tur in thuthlukna kan siam dun a.
.
Mahse tum ang ngawt chuan thil a kal lo khawp mai. Rintei nen a kan in kawp leh tih pawh chu ka chhung te beng a lo thleng leh a. Chuvang in phai ah lehkha zir zawm tur a min dah an tum a ni. Mahse kei lah in phai a zir zawm chu ka tum lo bur thung. Kan chhungkua ah chuan buaina leh in hauhna a thlen phah nasa hle. Mahse ka hmangaih Rintei bul a lehkha zir theih chu ka duhthusam ber a ni tlat a vang in Government a luh chu ka tum ruh hle thung.
.
Rintei hnen ah hian ka chhungten an duh loh zia hi chu a hma daih a tang tawh ka hrilh vek a. A ni pawh in kan tet lai a tang tawh a kan in kawm ringawt pawh ka chhung ten an phal ngai loh a vang in ka chhung ten an duh loh tur zia hi chu a hre sa hrim hrim bawk a ni. Chutiang bawk in a mah Rintei chhung te pawh in min duh bik chuang lo. A chhan chu kan veng chhung a tang a an chhungkua an chhuah theih na tur a hma la nasa tu ber te zing ah ka pa kha a tel a vang in an theihnghilh bik lo, chubak ah Rintei ka kawm an phal lo thleng te pawh in an hre ve vek tho a ni. Chu chu a mah Rintei pawh in min hrilh ve vek tho a. Chuvangin an in ah pawh ka tan len ngam na chi a ni bik lo a, chubakah a nu leh pa ten zu an zawrh hrim hrim bawk a vang hian an in chhung boruak chu ka hmuh a tan a mah Rintei pawh in a duh lo hrim hrim bawk a ni.
.
Tun a kan boruak ka chhung ten phai a min awm tir an tum pawh hi Rintei chu engkim ka hrilh vek a. A mah a vang a kan chhungkaw buaina chu hrehawm a ti hle a. A mah pawh in " Mama keimah a vang a inchhungkua a buai nasat hma hian in then mai ang" a ti hial ta a. Chuvang in tun ah chuan min hmu tur pawh in a rawn chhuak ngai tawh hek lo. Engkim ka lo hrilh kha ka in chhir in ka rilru chu a mangang tak zet a ni.
.
Rintei nen a kan chanchin zawng zawng hi mi pakhat ka ringam chauh ka hrilh thin a, chu chu ka nau Mapuia kal thei lo, wheel chair a a hun pum hmang thin chu a ni. Class X ka pass hian kum 16 mi ka ni a, ka nau chiah Mapuia nen hian kum 4 in kan in thlau a, kum 12 mi lek a la ni. Mahse kan inkawm ngeih a, a mah pawh in kan chhungkua ah chuan min ngaina bawk. A bul a thuruk ka sawi reng reng ka chhung te bul ah hian a sawi chhuak ngai hek lo. Kawng engkim ah ka lam tang tlat a ni thin. Chuvang in naupang te kum 12 mi lek pawh la ni mahse Rintei nen a kan chanchin leh ka chhung ten Rintei an duh loh zia hi a hre thiam ve vek a. Ka awm loh hlan a ka chhungte thusawi zawng zawng pawh min hrilh chhawng leh vek tu a ni thin. Ka tangkai pui hle.
.
Ka chhung te lah in vairam a min awm tir ngei ngei an tum nasa si a, ka u hi Bangalore ah a awm mek a, mahse ka u in ka nu te bul ah Delhi lam ah awm zawk rawh se a rawn tih a vang in Delhi lam a ka luhna tur thleng in ka tel lo chuan an buaipui a, ka chhukthlak na tur tlawhna ticket pawh an la vek tawh a ni. Rintei lah in amah a vang in kan chhungkua chu buai ah a in ngaih tlat tawh a vang in min hmu duh tawh hek lo. Chuvang in ka mangang ve tak zet tawh a, ka chhungte chuan duh lo mah i la, min nawr lui dawn tho tho tih ka hrechiang a ni. Ka mangan em a vang chuan ka thianpa class 8 kan zir a tang a ka kawm ber Zothana chu kan chanchin engkim ka hrilh ve ta vek a. A ni pawh chuan engtia hma han lak tur nge tih hre thiam bik chuang lo mahse min hnemna tawngkam ringawt pawh chu ka tan a hlu a ni.
.
Delhi ka chhuk thlak na tur chuan ni 2 chiah in min dang tawh. Engpawh nise Rintei chu hemi ni 2 chhung hian ka hmuh ngei ngei a ngai a ni. Ka thianpa veng hran daih a awm te in ah chuan ka va kal ta tawp a. Rintei te in a min va kal sak tur chuan ka ngen a. Naktuk ah Rintei nen a kan in hmuh theih dan tur leh rawn kal ngei ngei tur a min va ngen sak tur in ka ti a. Ka thianpa pawh chuan ka mangang zia chu min hriat thiam pui a vang in Rintei te in ah chuan hreh lo tak chuan min va kal sak ta nghal a. A rawn haw leh hma chu an in ah chuan ka lo nghak bawk a.
.
Ka rilru in Rinte in min hmu duh tawh lo a nih a, ka chhung ten Delhi a kal luih tir talh min tum a nih bawk chuan keimah leh keimah ka in tihlum zawk mai ang ka ti a. Ka tum tak tak reng bawk a ni. Mahse ka thianpa a lo let leh chuan Rinte chu naktuk ah chuan min hmu tur a a rawn kal tur thu a sawi mai bak ah ka thianpa chuan a pa bike a lo dil a nga, Rintei chu a va hruai a nga, chumi hnu ah Bike chu min hman tir a nghal dawn bawk a ni. Ka thianpa Zothana chung ah hian ka va lawm tak em.
.
A tuk ah chuan a hma a ruahman lawk ang ngei in ka thianpa chuan Rintei chu a va hruai a. A hnu ah Rintei nen Bike chuan kan in phur chhuak ta a. Han kal na tur ber pawh ka hre chuang lo. Mahse kan 2 a hun kan hman dun theihna tur hmun fal leh nuam deuh a ka hriat lam chu ka pan ta tawp a.

A hnuai ah conti...
*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WEBSITE ENKAWLNA TUR LEH WRITER TE HLAWH MIN TUMSAK ZEL TIH I HRE DAWN NIA, KAN LAWM E***



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 12th, 2016, 3:19 pm

Rintei nen chuan in si rial in kan thu dun a. Sawi tur tam tak nei dun mah i la chu kan boruak rit tak a vang chuan enge sawi tur ber pawh kan hre lo. Rintei chuan ka chhung te an in a an kal thu leh ka chhung ten "Kan fapa hi khawngaih in rawn ti buai tawh ngai suh ang che, i rawn ti buai leh a nih chuan a pawi viau ang" ti in an lo va vau thu chu min hrilh hmasa a. Ka thinrim ngei mai, chutiang a ka chhungte an in thleng thleng a lo va kal a, an lo va vau vel chu ka rin phak bak a ni.
.
"Mama chuvang in nimin a i thianpa Zothana i rawn tirh pawh khan rawn kal ka duh lo zet na a chu tha tak leh rilru dam deuh a in then hi tha zawk in ka hria a, a tawp nan tak meuh in hmuh tha zawk a ka hriat vang in ka rawn kal hram a nih hi" a ti nghal a.
.
"Rinte, tinge inthen lam i sawi leh tak? Kan naupan lai te kha i la hre ve reng thin em? Khang hun lai a harsat na kan tawh kha kan kum zat nen a ngaihtuah chuan tun a kan harsat na tawh nen hian a danglam bik chuang lo a sin !! Mahse khang harsat na kan tawh a vang khan inthen thu kan sawi ngai lo a, khang harsat na zawng zawng kha kan paltlang dun zel a nih kha. Tun ah pawh hian he harsatna hi kan 2 in kan paltlang dun leh dawn lawm ni?"
.
Engtin mah min chhang lo, a mit chu ka en a, a mittui rawn tla tur chu a mit ah chuan a parawl kiang a, kei pawh in ka mittui rawn tla tur chu ka dang zo bik lo.
.
"Rinte min hmangaih em? Min hmangaih ti raw?" ka ti chhuak leh hram a.
.
"Mama ka hmangaih che, ka nun ah hian nang tluk a hlu hi an awm lo a sin"
.
"Rinte naktuk tuk leh khi ka chhung ten Delhi a min chhukthlak tir ni tur a ni tawh a. Rinte ka kal san thei lo che, kan 2 hian tlan bo dun mai ang hmiang?!!"
.
"Mama... chutiang a tlanbo ringawt chu thil awlsam a ni hlei nem. Khawiah mah tlanbo na tur kan nei dawn chuang lo"
.
Ni e kum 16 mi ve ve chauh kan la ni a, tlanbo dawn mah i la pawisa khawlsa pawh kan nei lo a, tlanbo na tur hmun ber pawh kan hre dawn chuang lo. Engtin nge ei kan zawn a nga? eng hna nge kan thawh ang? In luah man tur zawng zawng nen. Mahse Rintei nen a kan awm dun theih na tur a nih phawt chuan engkim ka huam a ni.
.
"Rinte kan 2 a kan awm dun theih na a nih phawt chuan eng pawh ka thawk mai ang. Lei laih a ngaih pawn ka lai a nga, in sakna ah te pawh ka in hlawh thei vek dawn a lawm"
.
"Ni lo Mama, i ngaih ang a awlsam a ni dawn lo a sin. Min hmangaih vang a sawi i ni tih chu ka hrethiam. Mahse tun a tlanbo dun tur chuan kan la naupang lutuk deuh a ni"
.
"Rinte i tel lo a awm hi ka duh lo, ka chhung te hian Delhi a min kal luih tir an tum talh a nih chuan keimah ka in tihlum zawk mai ang"
.
"Nihleh Mama keimah a vang a i in tihlum a nih chuan ka chan tur leh hrehawm ka tih dan tur hi i ngaihtuah lo em ni? Khawngaih takin khatiang lam kha chu ngaihtuah tawh ngai suh"
.
"Rinte i tel lo a awm hi ka duh loh vang zawk a ni"
.
A ngawih deuh vang vang hnu chuan min rawn en a. "Mama Delhi a i kal hi kan 2 a thatna tur pawh a ni zawk mai thei a sin. Hlawhtling tak in zirna tha zawk ah i zuk zir chhuak a nga, i rawn haw hun ah hna tha pawh i thawh theih phah zawk a nga, chumi hun ah chuan tumah midang ngai lo in kan 2 in hlim tak in kan awm dun thei tawh dawn zawk a lawm. Tun a i kal hi kan in then hlen na tur a ni lo a, kan 2 a nakin hun a kan la nawmsak na tur zawk a a bul tan na tur chauh zawk a lawm"
.
Ka kum rualpui kum 16 ve lek tho si hi ka va tluk lo em. Ka ngaihtuah a, ka hma ka lo sial lutuk a ni. Lo thi ta i la, hrehawm a tih dan tur te engmah ka lo ngaihtuah ngai lo reng reng a ni. Ni e a sawi ang hian Delhi ah chuan chhuk in zirna tha zawk ah te zuk zir i la, tha tak a ka zir a ka hlawhtlin chuan hna tha zawk ka hmuh theih na tur a la ni dawn a, nakin ah kan 2 a kan la nawmsak theihna tur zawk pawh a ni.
.
Ka ngawih reng a vang chuan a mah vek chuan "Mama Delhi ah chuan khawngaihin kal hram rawh aw. Thinrim suh, ka hmangaih loh vang che a ni lo a, ka hmangaih vang zawk che leh nakin a kan 2 a kan nawmsak theih na zawk tur a tan a sawi mai ka ni" a rawn ti leh a.
.
"Ni e Rinte i sawi dik khawp mai. Delhi ah chuan nangmah vang liau liau in ka kal ang. Mahse ka awm bo chhung zawng ka tan rinawm tak in lo awm reng ang che aw"
.
"Mama i ta chauh ka ni a, i tan englai pawh in ka rinawm reng ang"
.
A hmui duhawm tak a ka fawh zawh chuan ka kuah vawng vawng a. Tun hi Delhi ka chhuk hma a kan 2 a kan hun hman dun theih hnuhnung ber a nih a vang in mittui nen a kan in kuah vawng vawng hnu chuan chulai hmun chu hreh tak chung in kan kal san ta a ni.
.

ENDLESS LOVE - 2

.
Delhi a class 12 zir tur a ka awmtirh chuan PG (paying Guest) ka zawm a, ka khua a har thin khawp mai. Kan chhungkua ah chuan ka nau Mapuia bak han ngaih ka nei lo. A ni pawh in min ngai ve ngei ang. Sawi ngai loh in Rintei chu ka ngai a, zan muthilh hma te hian "tun ah hian enge a tih ve ang, min ngai ve thin a ngem le" tih ringawt te chu ka ngaihtuah char char thin.
.
Khatih hun lai khan mobile phone tih vel kan la hre ngai lo hrim hrim. Landline telephone pawh kha Mizoram ah nei an la tam lo hle. Chuvang in Rintei nen chuan kan tan in biak ngaihna a awm lo. Khatih hun lai a inbiak pawh theihna awm chhun chu lehkha inthawn kha a ni tawp mai. Keipawh thla khat lai ka awm hnu chuan Rintei chu ka chanchin hrilh tur leh ka ngaihzia thu te hrilh tur in lehkha chu ka thawn ve ta a. Ka lehkha thawn ah chuan min rawn chhang let ve ngei tur in ka ti bawk a, ka address te chiang tak in ka ziak a.
.

Min rawn chhan let ve hun chu ka nghakhlel khawp mai. Ka lehkhathawn chuan khawnge a thlen tawh ang tih ringawt te chu ka rilru luah tu a ni thin. Ka lehkha thawn a tang a thla 2 dawn hnu ah chuan min chhanletna lehkha chu ka dawng ve ta a. Khami ni a Rintei lehkha min rawn chhanlet na ka hmuh a ka hlim zia te kha tun thleng in ka la theihnghilh thei lo. A ni pawh in min ngaihzia te a rawn sawi bak ah tha tak a lehkha zir tur te in min rawn fuih bawk a. Khami ni ringawt ah pawh khan vawi 10 ai a tam ka chhiar nawn a ni.
.

A zan ah chuan a chhanna tur lehkha chu ka ziak leh nghal a, a tuk ah ka post leh nghal a ni. Chutiang chuan lehkha kan in thawn tawn thin a, lunglen pawh a hnem ve hle thin. Mahse a mah Rintei min fuih ang in lehkha chu ka theih ang tawk a nasa in ka zir thin bawk. Summer holiday kan neih chu kan class ho tour a kan kal a vang in ka haw thei lo a, Christmas ah lah ka nau Mapuia in checkup pah in Delhi an an rawn hmang vek a, ka haw thei lo bawk. Kum 2 dawn hnu class 12 kan exam zawh chuan ka haw ve thei ta chauh a. Chuta Rintei nen a kan han in hmu leh chu kan va han hlim dun tak em. Khatih hunlai a kan hlimzia te kha engtik ah mah ka theihnghilh thei tawh ngai lo ang. Rintei chu a in hmeh tur a ka rin kawr ka hawn sak a, ka rin ang ngei in a in hmeh hle bawk. Ka thianpa engkim a ka tan a tangkai leh in pe zo tak Zothana pawh tshirt ka hawnsak bawk a ni. Kan 3 chuan result nghak tlang vek kan ni a. Pathian zar ah Zothana nen chuan 1st ah ve ve kan pass a, Rintei pawh in fail in ring hle mahse 3rd ah a pass bawk a, kan pass lawmnan Zothana te in ah kan 3 chuan chaw kan eikhawm nghe nghe a, kan hlim tlang hle.
.

Ka chhung te chuan Delhi ah bawk chhunzawn leh tur in min ti a. Rintei nen pawh kan sawi dun a, hna tha ka hmuh theih zawk nan zirna tha zawk Delhi lam a zir zawm leh nghal tur chuan thuthlukna ka siam a. Tun ah chuan college te a ni tawh dawn bawk a, rilru te pawh a lo puitling ve zel in ka chhuk thla leh tur pawh chu a hma a ka chhukthlak tur ang em em chuan ka huphurh tawh lo.
.
Ka chhukthlak leh hnu pawh chuan lehkhathawn bawk in kan chanchin te kan in hrilh tawn zel a. Rintei pawh in an awm na Maubawk a tang Bawngkawn ah an in sawn thu te, college kal chu an chhungkaw dinhmun nen a buaithlak tawh em a vang in chak hle mah se a kal chhunzawm theih tawh loh thu te min rawn hrilh a. Chutia college te hial a chawlhsan a ngaih thu a rawn sawi chuan ka khawngaih hle. A mah lehkha thiam thei ve tak a ni a, mahse an in ah zirna hun leh hmun a neih that loh a vang in in exam na ah te pawh ti tha lo mai zawk thin a ni. Chhungkaw pangai tak leh zirna hun leh hmun tha tak te chu nei thei se kei ni ai pawh in a ti tha zawk thin ngei ang.
.
Vanduai thlak takin kum tawp Christmas zawh December 28 ah exam ka neih a vang in ka haw leh thei dawn lo a. Mahse semester exam zawh summer holiday pah chuan haw theih na hun ka nei a. Ka haw theih hun tur ka hriat veleh ah chuan Rintei chu ka hrilh nghal a. Bawngkawn ah an awm tawh a vang in Train in ka haw a nga, guwahati a tang bus in Aizawl thleng, Bawngkawn kan luh hun ah min lo hmuak thei dawn a ni. Ka va phur tawh tak em.
.
Exam routine chhuah veleh exam zawh tuk a haw nghal tur in ticket ka la nghal a, Rintei pawh chu engkim ka haw hun tur te chu lehkhathawn in ka hrilh nghal vek bawk a. Exam zawh tuk ah chuan ka haw ta nghal a. Tluang tak in Bawngkawn chu chawhnu dar 3 vel ah kan lut a, ka phur lutuk chu ka helhhawlh a ni ber mai. In nghahna hmun tur kan ruat ah chuan ka chhuk a mahse kan hawi vel a, Rintei hmel reng ka hmu lo. Ka phur teh reng nen ka phur na zawng zawng chu a reh nghal vek. Mahse minute 10 vel hnu ah chuan hla deuh a tang hmanhmawh deuh a a rawn kal hi ka hmu a. Min lo hmu ve chiah chu a hma ai a chak in a rawn kal a. Ka bul a lo thlen chuan hah tih hriat tak in a thaw hlawp hlawp a. Engmah ka sawi hma chuan in thiam lo tak chung chuan "Mama dar 2 rik hma a tang tawh khan la lo awm tawh a, in lo thlen hun tur a hriat bawk si lo, ka awm rei tawh lutuk a, nachin lawk tak tak khan thingpui in in ka haw leh lawk a" a ti nghal a.
.
"Rinte ka rawn thlen tirh a i hmel ka hmuh loh kha chuan ka thinrim khawp mai, mahse tun a i hmel ka hmuh hian ka thinrimna zawng zawng min theihnghilh tir leh nghal vek tawh"
.
Lawm vang a a nui hmel han that zia te kha engtik ah mah ka theihnghilh tawh ngai lo ang. Ka thil hawn sak te chu ka pe nghal a, kei pawh taxi in kan in lam pan chuan ka haw a, kan in hmuh leh hun tur te leh hmun tur te chu kan sawi lawksa vek nghal a.
.
Kan chawlh chhung rei lo te ah chuan nitin in in hmu thei lo mah i la, kan in hmuh chhun chuan kan hlim dun thin hle. Tumah dang hi kan ngai bik lo. Mahse ka chawlh neih thla 1 chhung chu hriat loh chhung in a lo va ral chak tak em. Ka chhuk leh hma ni chiah chuan kum 3 dawn kal ta a Delhi ka chhuk hmasak ber dawn tum a kan 2 a hun kan hman dun na ah khan kan kal dun leh a.
.
Tlai ni tla tur in kawl kil a chhun engphut mai chu a lang chiang khawp mai. Thlifim thaw heuh heuh chuan Rintei sam pawh chu a chhem leng siau siau a. Kan in hmuh tawp na ber tur ni awm tak mai in kan in thlahlel a, chulai hmun chu kal san kan hreh dun a ni.
.
"Rinte ka zirlai hi zo vat vat tawh i la, hna te han thawk thei tawh i la, kan 2 a awm dun hi ka va chak tawh tak em"

"Mama kei hian nang ai deuh in ka chak tawh a sin, kan in chhung hrehawm tak chhuahsan hrim hrim pawh hi ka chak tawh lutuk, i bul a thlamuang tak a hun hman tluk a chak ka nei lo"

"Ni e i hrehawm tawrhna zawng zawng hi ka hre thiam a sin. Mahse Rinte lo tuar hram hram la, Pathian zar ah ka zirlai pawh ka zir zo ve vat a nga, nang nen hian tuma tih buai theih loh in kan la awm dun vat ngei ang"

"Mama chu hun thlen hlan chu ka va han nghakhlel tak em"

"Rinte kei deuh hian a sin nghak hlel, ka zirlai te hi i tan a zir vek ka ni a sin"
.
A ngawih reng a vang chuan a hmai chu kan en a, a biang ah chuan a mittui lo luang thla chu ka hmu nhal a. Ka kut a hruk hul sak pah chuan "Rinte tap mah ta che, ka hmangaih che, i hrehawm ti hmel leh i mittui tla lai hi hmuh ka duh ngai lo a sin, ka bul ah chuan hlim tak in awm thei reng la ka duh a ni"
.
"Mama.... keipawn ka hmangaih che, mahse mihring te hian kan hmalam hun a thil lo thleng tur hi engmah kan hre si lo a, tun a kan duhthusam zawng zawng te hi a thleng lo ang tih ka hlau thin"
.
"Rinte tinge chutiang a a hrehawm leh a thim zawng a i ngaihtuah thin? Rinte ka thusawi te hi sawi mai mai ka ni lo a sin, ka mit ah hian min han en teh, ka hmangaih zia che i hmu thei ang. Kan 2 a hlim tak a kan awm dun hun ah chuan engmah in a ti na leh tawh ngai lo ang che"
.

Delhi a ka chhukthlak leh hnu chuan lehkhathawn ah chanchin te kan in hrilh tawn leh zel a. 2nd year kan nih kum erawh summer holiday ah pawh project tih ngai te kan neih a vang in ka haw thei lo a, ka haw theih hun tur chu Final exam ka zawh hun ah chauh a ni tawh. Chuvang in Rintei nen pawh chuan kum 2 chhung zet chu kan in hmu leh thei dawn lo a ni. 2nd year kan nih kum hian ka thianpa Zothana pa a boral a, ka thianpa ber a nih a vang in hetiang a a pa boral ah pawh a mah hnem tur a ka awm thei lo chu hrehawm ka ti hle.
.
Hun leh ni te a lo liam a, kum te pawh chu hriat loh chhung in a lo vei ve zel a, tun ah chuan Final year ka ni ve ta. Thla 6 chauh in kan examna tur min dang tawh a. Mahse chumi kan exam tur ai a ka rilru luah tu zawk chu Rintei lehkha ka hmuh loh na thla 3 lai a ni tawh chu a ni. Ka ngaih chu a tha lo hle a, a chhan chu a damlo a nih te ka ring a ni. Ka zan mut dawn te hian a tan ka tawngtai ziah thin. Chutiang a thla 4 dawn engmah chanchin hre lo a ka awm hnu chuan ni 1 chu a lehkha ka dawng hlawl a. A lehkhathawn rawn thleng chu chhiar hlan ka nghah hlelh vei nen nidang zawng ai in a rawn ziak tawi a, chubak ah tun tum phei chu min ngaihna lam ai in min fuihna lam deuh hlir a rawn ziak a ni. Lehkha tha tak a zir tur te, hlawhtlin na ka neih ngei theih na tur a min duhsak na te a rawn ziak nasa hle. Mak tak mai in nidang ah kha chuan ka haw hun a nghahhlelh zia te kha a rawn sawih nasa hle thin a, tun ah chuan chutiang lam engmah a rawn ziak tel lo a. Kan 2 chung chang pawh engmah a rawn ziak lo bawk. Ka chhiar zo chu mak ka ti hle.
.
Rintei lehkha chhanna tur chu zan ah ka ziak leh nghal a, a tuk ah ka post leh nghal a, mahse kan exam dawn thleng pawh a a chhanna lehkha engmah ka hmuh loh a vang chuan keimah zawk chuan ka haw dan tur te, ticket ka lak dan te chu a hriat loh hlau in lehkhathawn ka ziak leh a, speed post in ka thawn leh ta ringawt a.
.
Exam pawh kan zo ve tep ta, engmah Rintei chanchin ka hre bawk si lo nen, ka rilru pawh chu a pawt peng nasa hle a, chuvang in exam pawh ti tha thawkhat chuan in hre mah i la, a hma chu ka tluk ka in ring lo. Gap ni 5 lai kan neih hnu ah subject 1 ka exam leh a nga, chumi ka zawh tuk ah chuan Mizoram lam ah awm tawh tur in ka haw tawh dawn a ni. Ka tan hna hmuh vat vat a pawimawh ber a, hna te kan zawng a nga, ka hmuh hma hlauh chuan Rintei nen a kan inneih hun pawh a hnai a ni mai a, ka ngaihtuah ringawt pawh in ka phur tawh tak zet. Hna zawn pah in IGNOU ah MA pawh zawm ka tum bawk a ni.
.
Ka chhung te hi 1st sunday of the month bak hi chu pawimawh zual bik ah lo chuan ka phone ngai lo. Mahse Mizoram lam a haw hlen ka tum tawh a vang chuan ka nau Mapui an duh mamawh min chah duh te a neih tak in ka ti a, a mah ka biak duh a vang chuan ka chhung te chu ka phone a. Ka nu in a rawn la a. Nidang ang bawk in eng eng emaw a rawn sawi duah hnu ah chuan Rintei pasal neih tur thu a rawn sawi lan zauh chuan min ti phu chiang kher mai. Engmah ka ngaihtuah lo chuan "Rinte in pasal a nei dawn maw? I hre sual a ni lo maw?" Ka aw pawh chu a khur der der tih ka hria, ka aw mai pawh ni lo, ka taksa pum chu a khur a ni. Ka nu thusawi chu a tak a nih loh hram ka beisei !!.
.
"Hresual lo e, thla leh ni 27 khian an in neih dawn a lawm, Bawiha kan hrilh kan hrilh thin che kha, i awih duh ngai lo a, tun ah chuan Rintei theihnghilh tum tawh rawh"
.
A ngai te bawk in a rawn sawi tan leh dawn ta. Rintei chanchin a chhe zawng a an sawi hi ka hre hne tawh lutuk. Eng pawh ni se ka nu thusawi a nih a vang in Rintei pasal nei tur a rawn sawi pawh chu ka awih mai duh lo. A sawi thui zel hma chuan ka nau Mapuia ka biak duh thu ka hrilh a. Mahse ka nau Mapui an Rintei pasal neih tur a rawn sawi ve tak ah chuan dawt a ni lo tih ka chiang ve ta. A va mak ngai em !! Phone a Mapuia ka bia tih pawh chu ka hre tawh lo, "helo helo" a rawn tih pawh chuan chhan na chang ka hre tawh lo, phone chu ka dah ta tawp a.
.
Ka room ka thlen chuan ka khum ah chuan ka bawk nghal thlawp a, hetia pasal min lo neih san dawn vang hi a ni maw ka lehkhathawn pawh min rawn chhan let tawh ngai loh. Mahse enge a chhan ni ang? Rintei khan min hmangaih ve thin in ka hria a sin !!! Engkim mai chu zawhna hlir in ka khat a ni. Ni e ka hre thiam thei lo, engvang a pasal dang min lo neihsan tum nge a nih ang? A der mai in em ni min lo hmangaih reng zawk? Kha leh chen kha bum in ka lo awm zawk reng em ni?
.
Subject khat exam tur ka neih leh pawh chu ka zir thei tawh lo. Ka rilru ah chuan engmah dang a lut thei tawh lo. A mah Rintei vang a Delhi a awm hi ka ni a, ka zirlai zawng zawng pawh a mah nen a hlim tak a kan awm dun theih nan a zir ka ni a sin. Kan pahnih a duhthu kan sam dun zawng zawng te kha eng ah mah lo mai a chang dawn ta a ni maw?
.
Rinte in lehkha min rawn thawn zawng zawng hi pakhat mah hmaih nei lo in ka la dah tha vek a, a dah that na tur bawm te reuh te tha deuh ka lei a, dah chuan ka la dah tha vek a ni. A lehkha min rawn thawn zawng zawng te chu ka la chhuak leh vek a, ka chhiar nawn a, min hmangaih thu leh min fuihna thu hlir a ni a rawn ziah thin, in then lam reng a lang ngai lo. Mahse eng vang a pasal min neih san tum nge a nih ang? A chhan awm ang reng ka hre thei lo.

Next....
http://storyfb.com/viewtopic.php?f=5&t=707

Link:
BBcode:
HTML:
Hide post links
Show post links

Xili
Posts: 8
Joined: April 10th, 2017, 10:19 am

Unread post by Xili » May 14th, 2017, 9:42 pm

Khawnge achhunzawmna dang chuuuu

Link:
BBcode:
HTML:
Hide post links
Show post links

ruata81
Posts: 2
Joined: June 20th, 2016, 12:01 am
Location: Kolasib

Unread post by ruata81 » August 28th, 2017, 12:21 am

Chhiar zawmna tur link chu

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)