AN NU KA NI DUH BY Enchimloh Parte

[Ngaia]

"Uremruat" kawngka hawn pah chuan ka ti lut vak a, a ni chu sofa chunga thu awn duai pahin tv a lo en a,
"I va bengchheng tak, au vak kher angai mi bawihtei a mu nia bengchheng suh"
"Naaa ka lo kal dawn tih i hrilh lo mi? khawnge sawmtea?"
"A pi bulah i rawn thleng har e lawm"
"Thingpui ka lum dawn i in tawh em" tih pah chuan thingpui bel ka la nghal rawk rawk a,
"A va tam tawh awm ve i bialpa chuan a hrai puar na che nge" min rawn nuih sawng a, "Hey min deu kher suh aw, ka hmanhmawh vang a lawm engmah kan ei hman loh" tih pah in ka va melh a a hmui a lo ner nasa mai, "A ni reng engmah i hre lo" ka'n ti vak ringawt a!
Thingpui kan in lai chuan tu emaw nen a in tex ni awm tak hian phone a khawih reng a, Nutei anih ka ring kan thawhpui "Nutei hi nei daih la Uremruat aduh ve ropui che sia,"
"Engtinnge min duh tih i hriat?"
"Kha tunah pawh in in tex reng kha"
"Kan in tex lo e a,"
"A nih midang a mi, i van lerh tak bawihtei te duat deuh tur i neih angai a nia aw"
"Nangmah ni mai lawm" a ti sam et a

" Ve che a i mawl mi, khawmaw Nutei ni awm emai" tih pah chuan a phone chu ka lak sak thut a, a rawn ban let nghal ka lu chungah ka lek kang a,
" Rawn la teh i va a tak aw"

" Nutei nih leh nih loh ka fiah dawn" nuih uar uar pahin ka tia, athutna tang arawn tho a, keiin in chungah ka tlan chhoh pui a, min rawn um zel a, a room-ah ka tlan luh pui a, rawn lut ve nghal
" Rawn la teh Zopui engmah ni lo i va'n a tak" a ti leh a, kei lah chuan "Hahaha i van hlau tak, a thlum viau ani maw kan chhiar chhin" tih pahin phone chu en ka tum der a, a rawn che thut a, tlanchhiat ka tum leh chu min pawt let dawrh a, khumah min bawh thlu a, phone chu ka hnunglamah ka kutin ka keng a ka delh tlat a, " i a mai mai lutuk patling phone an en sak ngai lo" tih pahin ka hnung ah a kut a rawn zen chho a, kei lah "Nutei a ni chiang lutuk in zep vel a," tih pahin ka lo nui uar uar a, mahse phone a khawih fuh rual deuh thaw chuan, ka tal na sat vang nge ka hre lo, a hmui chuan ka hmui a rawn si zawk chu ka hria a, a ni pawn ahria ka tal zawi tial tial a, a ni pawh a tha athlah tial tial a, kan boruak a inthlak ta daih mai.
Engtiang a rei nge kan in melh ka hre lo. Ka harh chhuak thut a, ka zak lutuk hi ka hamhaih vek, a ni pawh a pangai lo tih ka hria, a tho thut a ka tho ve nghal a, " Kha" tih ringawt pahin a phone chu ka pe a, "Ka haw mai ang" tih pahin ka tlan chhuak a ni deuh ber.
Haw kawngah chuan ka inngaihtuah nasa lutuk hi ka hah vek, ngatinge khatiang khan kan awm le Uremruata hi ka lo duh ru reng em maw ni le, nge min lo duh ru reng zawk. Ni lo, a ni thei lo a ni te zawng hman atang a u anga kan neih a ni. Min ngaizawng hulhual lo ang....
Class viii ka zir kumin Uremruata hian kan inhnuai a rawn luah a, chunglai chuan a ni chu BA a zirg tan kum a ni. Kan unau hi hmeichhia vek kan ni a U ang maiin kan en a min duat thin hle, kan unau hian fel kan ti thei ngang mai. Thenawm khawveng te pawh khan fel an ti em em a, "tu emaw ber hian nei u la a tha ang" min ti thin. Kei phei hi chu min duat zual a a lakah te khan ka pangchang thei khawp a.
Class xii ka zawh hnuah Chennai-ah zirna chhunzawm turin ka kal a, ka kal dawn paw'n min zilh nasa a nia aw.. mipa lakah awmdan tur thlengin min hrilh vek. Tichuan ka zuk awm vang vang a kar lakah ka u te pasal neih vang te leh exam chawlhah te ka haw ve zeuh zeuh bawk. Final kan exam zawh niin ka nuin min rawn phone a, Uremruata nupui neih tur thu min rawn hrilh a, hetih hunlai hian kan in a luah tawh lo a, A pa a boral avangin an khua a an in leh lo an tiral a, Kanan vengah inding sa tha deuh an lei a, a nu nen anau hmeichhia nen an awm tawh a hna tha tak athawk tawh bawk a, bazarah a nu'n dawr a siam bawk. Mahse kan in aluah lai zawng zawng a khati khawp a in unau kha chu a insawn hnuah pawh kan la intlawh pawh reng.
Ka haw chang te paw'n an inah te ka leng a, chaw te ka ei a, chutiang reng chu kan ni tho. Phone te paw'n kan inbe zauh zauh a, kei lah hi ka nel tawh te chu nel em em chi ka lo ni bawk nen, " Nupui nei tawh rawh i hmu zo lo mi? Khawnge kan in a i awm lai a i nula inleng zozai te kha" te ka ti vak vak a, a nui mai zel, a ni reng lah tak a, kan in a luah lai khan a luck thei em a lawm.
Aizawl mi awm thei fanu a nei dawn tih ka hria a, a rai lawk lehnghal. Mak ka ti angreng hle a thu tha pui pui min hrilh a, a man a zawm leh tawp si lo te chu ka ngei angreng lutuk a, ka phone a "Nge nupui i neih tur min hrilh miah lo a," ka tia ka duh duh ka sawi khum a, ka hau ve e te ka tia, " ka lo kal lo ang" te ka tia, mahse ka kal ta tho....

An inneih niin kan chhungin kan kal a, chumi hnuah chaw eiah kan sawm a, chubak chu ka hmu tam ta vak rih lo.
Kei ka zirna chhunzawmin ka chhuk leh a, M.A ka zawh hnuah ka haw chho a, an fa pahnihna tur an lo pai mek a, chaw eiah min sawm a ka va ei a, an fapa sawmtea pawh a lo fel tawh khawp a, min nel nghal mai. Tichuan Aizawlah ka awm ve ren rawn a, hna a vang bawk nen phai lama hna zawn ka duh vangin ka chhuk leh ta a, thlaruk vel ka awm tihah Uremruata nupui Usawmtei boral thu ka hre ta a ni. Bawihtei a neih zawh hnu atang usawmtei chu a tha chhuak thei reng reng lo a, karkhat hnu lekah a boral ta a. Uremruata chu phone in ka thiam ang angin ka hnem ve a, ka khawngaih kher mai.
Kum thum ka awm leh hnuah ka haw chho a, dawr siam ka tum lai takin Uremruata chuan an office ah hna ruak awm thu leh dil ve tur a min duh thu a rawn sawi a, "I hnuaiah ka thawk peih lo e a" ka lo ti uang leh vak vak a,mahse ka dil a ka hmu ve hlauh. Uremruata chu kan pu a ni a, nuam hi kan ti khawp a. An inah pawh ka tlang nel leh tawh hle a, a fa te pawn min ngai a, school chawlh te hian an rawn leng phei fo mai.
Vawiin khan ka thianpa nen kan bazara kalna tur dang a nei a kei Uremruata te inah len ka duh bawk sia, kan hmanhmawh dun bawk sia, chuvanga riltam deuha an in thleng phei ta ka nia, Mahse khatiang thil kha a thleng ta si.
Ka ngaihtuahna chu achawllo reng reng in ka thleng a, a chang leh "Ho e mai ka tal vak vak vang aniang a lo kun nasa bawk si nen, a insi palh aniang" te ka tia, mahse lo insi palh nita se ngatinge khatiang khawp khan kan boruak a inthlak theih si huizzzz ka hah. Office pawh ka kal ngam dawn mi, hmu ta i la ka be ngam dawn mi engtinnge ka awm ang huihammmmm.
Kar tir atang ka hmu lo der char char a, a ni pawn min be chuang lo. Nutei lah chuan a chanchin min zawt chhen a ka ning angreng lutuk. Kar tawp lamah chuan hmuh loh der tur pawh a awm ta vak lo a, nilengin a room-ah a inkhung bo a, ban hnuah taxi kan chan laiin a rawn chhuak choh zel. A hma a in nel em em chutia vawi lehkhata inbe ta mang lo ringawt chu kan thawhpui te ho chuan mak min ti khawp a, Lalrina leh Uzuali phei chuan min zawt nghe nghe a, ka awmdan chu thlak ngaiin ka hria kei tal hian ka be tur ani, chuti a nih loh chuan kan in mihran thei mai ang. Dik taka sawi chuan a fate pawh ka ngai ru reuh tawh khawp a, mahse ka kal ngam der si lo.
Friday chuan ka scooty a that tawh vangin scooty in ka kal a, office ka thlen chuan a lo thleng ve chiah a, biak tum a in atang tawh a in puahchah lawk ka ni bawk a, "Good morning sir, i va hma ve" ka theihpa tawp a zang vah chuan ka'n tia, "Morning" ti chiahin min chhang. Mak ka ti ngang mai, chutah a ai a mak leh zual chu a motor atang chuan Nutei a rawn chhuak chiah a.
Nutei hian a duh hle tih kan hre ru vek a, mahse amah hian angaihsak pawn ka hre lo, duh se chuan kan office ah pawh hian nutei lo pawh hi a hmu teuh ang, pathlawi mah nise ala upa lo a, tunlai tlangval senior rual chauh a la ni, hmel pa hrak chi a ni a, a sang tha hle bawk, kan pu anih vang hian an zah hlawm hle a, mahse kei hi chuan ka'n nel khawp a, ka thawh tirh phei kha chuan Uremruat tih mai ka ching thin a. Mahse a hnuah chuan Sir an tih vek avangin nuam ka ti lova Sir ka ti ve ta mai.
Uremruata chuan min kal pel a, a hnungah Nutei'n a zui bawk a, ka tah a rawn chhuak ut ut a, ka mualpho mai dawnin ka hria a, hmun biru lai deuh ka zawng a, ka mittui rawn luang chu ka hru nghal mawlh mawlh a, a reh fel hnuah ka chho ve chauh.
Nilengin ka hlim lui hram hram a, ka hna ka thawk char char a, ban ahun chuan hmanhmawh takin ka chhuak a, ka tlan haw nghal vang vang.. ka tah achhuak leh tlat tawh.
In ka lut chu kan upa ber dawttu te chhungkua an lo leng a, bawihtei te unau an lo awm bawk. Ka pain riak turin a lo va sawm chu niin. Chutia bawihtei te unau ka hmu chu ka tah achhuak leh zual sauh va, ka room-ah ka tlan chhova, khumah ka bawk thlawp a ka tap ta zawih zawih a, ka hnungah hian tu emaw hian min lo chul a, ka hawi chhuah chuan ka u a lo nia, min lo zui chho a ka tap min lo hmu reng ani.
ka u bulah chuan thil thlen dan chu a tantir atang chuan ka hrilh ta vek a "U a pawi ka sawi ka hre si lova tinge khatiang ngawt khan min chhan enge achhan ka hre thiam lo, ka bang dawn" te ka ti tawn tawn a, chutah ka u chuan "Anih leh a biak that loh vang che chuan nge i rilru anat a Nutei a phurh vang chuan" a rawn ti koh a, ka harh zawk Nutei avang chuan ka na tel tih ka hre chhuak thut a, ka u chu ka melh a, ka chhanna ngaichangin min lo melh renga, "Ih.. aaa.. ka hre lo U" ka ti ta ringawt a, ka u chu atho a kawngka a chhuah pah chuan, "Engvanga rilru na nge i nih chiang takin hriat tum la, a biak that loh vang mai mai che a rilruna i nih chuan, ka lo hau dawn nia" a ti a, min chhuk san ta a.
Ngawi rengin ka thu tlawk tlawk a, ka rilru natna chhan chu ka hrechiang khawp mai, min biak that duh loh vang chauh a ni lova nutei vang ani tel tlat. Ahma khan ka thik tawp si lo, "Nei rawh" te kha ka ti sia ka inhre thiam tawh lo. Ka u chuan hau lo phawt mai rawh se.
"Nu zopui apa lo kal" sawmtea'n a rawn tih chuan ka lo inthlak mek a, pangai tak a awm tumin ka infuih ru sauh sauh a, ka chhuk ta a, "E heee i la haw nange Uremruat" min chhan hmain ka pa a lo tawng a, "Hei sawmtea te rawn hruai a tum a, chaw ei phawt se kan lo tih mek hi"
"An riak dawn maw ka tia, ngati leh si nge" ka melh tha ngam tlat lo, "Nia naktuk hian a piin apu thlan han tlawh lawk a duh a, zingkar kal angai dawn sia"
" Zingkarah kan lo dah mai ang" ka tia, ka u pawh chuan "Nia Rema zingah hei kapa pawh a tho hma thin tho a" a lo tih ve pawh chuan, a phallo deuh tlat a, ka thin a thawk deuh thut a, rilru nat ruk sa nen "Nia atha lawm haw rawh se, Ka pa te'n an ngai a an va hruai tawk tawk a, dik tak chuan ka u te ho fa an tu tak te ang chiahin an en a, an en hrang lo an duhsak em em a, mahse chuti tak a i ui a nih te chuan, hruai haw rawh" ka ti ta bawrh bawrh a min en thap, vawi khatmah chutianga ka tawng an la hre ngai lo, inchung lama naupang ho inkawm pawh step atang an rawn dak thla thap mai, ka nu a rawn rawn tawng chhuak a "Zopui enge i hriat a, khatia i an chiam a, awii he nu hi Remruat hre thiam rawh aw, adik lo tlat a rawn haw tang a room- ah a tawm char char a, zopui nidang i ang lo" tih pah chuan min rawn melh vak a, Ka pa pawh chuan "Ni e chaw ei se in phei dawn nia, nang pawh ei nghal mai rawh, ei ho pawh a khat tawh, hei mami te nufa ho an rawn leng hlauh lehnghal a, han siam rawh u" a rawn ti ve nghal a.
An haw thleng chuan ka in be ta lo. Bawihtei te'n room-ah min rawn mangtha a.
Zan dar 12 a pel tawh a, whatsapp ah a la online reng a, tunge a biak le? Nute i chu nge ni anga midang.. ngatinge tiang hian ka awm le.. thil chi hrang hrang ka ngaihtuah kual nasa lutuk a, ka meng rei khawp mai, dar khat leh chanve velah mutthilh tumin ka phone ka dah chiah tihin message a rawn thleng a, ka'n hawn chuan "Ka tih palh lutuk aw" tih zawng hi Uremruata chuan min lo thawn

"I tih palh maw"

"Aw" a rawn ti leh tawp a, a mak mang e thil tlen dan teh thut hi ka hre thiam lo.
"I awm dan hi ka hre thiam lo Uremruat min huatna i nei a mi?" "Enge ka huat ngawt ang che nang te chu ka naute alawm i nih" a rawn ti leh lawi si, "A nih chuan ahma ang khan awm ang" tih ka send zawh chuan a reh vang vang a, chutan "Zopui" tih ringawt hi a rawn thleng leh a "enge" ka tih chuan "Nutei hi ka fate tan athat i ring em?" a rawn ti a, chhan ngaihna ka van hre lo em! "Ka hre lo" tih ringawtin ka chhang tho a, "A hma khan nei rawh min ti sia, tha i ti a nih ka ring a" a rawn ti leh a, Ni e a hma khan ka ti ngei a, mahse tunah chuan nei se ka duh ta hauh lo. Reply dan tur ka hre tawh lo a, ka rilru a awm ka sawi ngam bawk si lo. Ka mut san ta ringawt a,
"Hey Zopui, nge nizan group ah i rawn luh loh a, chaw ei khawm kha" office ka luh rual rual chuan min lo ti nghal sup sup a, ka hre reng a ka tawng ve peih lo, nizanah chaw eikhawm an rel a, a thenin dine-out duh a,an sawi nuai nuai a, an rel thlu thei lo a, atawpah Uremruata a rawn tawng ve a, an in a rawn rawt a, an phur zia leh "Tu emaw chu best dress nen kal angai ang" an tih te kha ka hmu reng.
"Nia ka nuam lo lutuk a, ka lo sawi ve peih lo a nih kha" ka ti liam puat a, ka peih teh chiam lo.. tunlai phei chu engmah ka phur lo Uremruata vang hian. Nutei chungchang a rawn sawi atang khan an inzui awm ka hmu tawh lo a, mahse sawi tur ting chuan an awm aniang, thawhpuite'n an chhaih danah.
Kha tia min lo tex tawh hnu kha chuan, pangai takin kan awm tawh turah ka ngai a, atir khan ka buai deuh nak nain tunah hi chuan alaka ka rilru put hmang hi ka thup thei. Mahse chu chuan alakah awmzia a nei chuang lo. Min hlat telh telh emaw tih mai tur ani. Ka chhungte nen erawh an in be tha reng a, chu chuan harsatna min siam thin, office ah chuan, tih dan dan a awm a, amah zawk a in khung hrang tho va, mahse bawihtei unau an rawn len a, a rawn hruai thin hian, ka biak loh chuan ka nu te ngaih athat loh ka hlau thin si, ka lo be hram hram thin. Pasal then pa zawkin kan fate kawl angah te hian ka inchan deuh reuh.
Chaw eikhawm chu kal loh mai ka duh a, mahse ka kal loh avang a thil thleng thei awm hrang hrang ka ngaihtuah kual a, kal mai chu thain ka hre ta a. Bazara ka kual avangin midang zawng ai ka tlai a, ka thlen chuan bawihtei te unauin min lo lawm khawp a, ka kal khat tawh em ani, "i lo leng duh tawh lo e" min ti min ti tawh kha an nia.
Chaw kan ei a, chaw eikham a haw ve mai ka tum chu naupangte chuan an phal tlat lo a, Uremruata nu Nu sangzeli chuan "Nia Zopui hmanhmawh lo mai rawh, an la ngai ve che nih hi, i lo leng khat tawh bawk sia" a tih takah chuan, rei vak lo thut muan chu ka tum a, Uremruata chuan midang ho chu a va thlah liam a, ka thutna atang chuan Nutei nen an in be fal chu ka hmu thei.
Thil enge maw ka ngaihtuah chhuak thut a, zanin hian hetianga ka laka a awmna chhan hi ka hre chhuak tur ani. A rawn lut chu min rawn melh zawk a, chutah "Ka chau angreng e mai ka nu, ka han mu zal lawk ange" tih pah chuan room lama chhoh mai atum a, Nu sangzeli chuan "Hei Zopuii hi thlah angai dawn ania, bawihtei te'n haw an la phal lo anih hi" a tia, "Scooty i rawn keng a maw tia" min thlah hreh hmel deuh hian a rawn ti chu, ka rilru a na ru ngei mai, "Nia ka keng lo,mahse thlah ka ngai lo ang, ka phei tep taxi a la tam ang" ka ti chhuak hram a, Nu sangzeliy pawh chuan mak atih hmel khawp mai, nidanga kan inbiak dan nen a in ang tlat lo a lawm. Uremruata mut hnu chuan min zawt ta ngei reng a, "Chutiang a adanglamna pawh ka hre hran lo hna a thawh hah vang mai mai aniang, kei pawh tunlai chu hna kan ngah lutuk a ka mood a off thut thin alawm" ka ti tlat a.
Dar sarih leh a chanve a rik chuan bawihtei chu ka mal chungah a muhil tawh a, haw mai ka duh tawh a, an room-ah mut ka tum chuan a piin "Thutthlengah khan mut mai rawh, nakinah ka pawm chho mai ang e" a tia, mahse a pa kha biak ngei ka duh tlat a, "Ka han mut law law ang" tih pahin ka pawm chho ta a.

A pi room-ah ka mut zawh chuan, Uremruata room kawngkhar pawnah chuan ka ding a, kawngka chu ka kik a, "Lo lut rawh" a rawn tia, ka mu duh ti khan Laptop a lo khawih vel mai mai a, "E i haw duh tawh mi," tih pahin a rawn tho chhuak a, "Aw, mahse thlah ka ngai lo, ihh thil sawi lawk tur ka nei a, ka sawi zawhah ka kal ang" ka ti ve ngat a, "Sawi rawh" a ti leh tawp a, ka ngawi deuh vang vang a, ka tha chu a rawn khur der der a, " Ihh.. eng lo ania, min huatna i neih chuan min hrilh rawh Uremruat, i pawi ka sawi a mi, tuna i awm dan hi i tan chuan a nuam mai thei a, mahse ka tan hian a hrehawm lutuk a nia, hman ang khan awm leh rawh, ihhh...englo..
i nau angin min en leh rawh," ka rilru chhungril thup hram hram chung chuan ka sawi a, a ngawi reng a, ka tho a, kal mai ka tum a, "Chu zawng chu a mi" a rawn ti a, "Aw... hrehawm ka ti lutuk a, hetiang teh thut a i awm hi, a hma ang khan i awm leh thei angem... ih .. Nutei chungchang a..." ka sawi zo hman lo "Ka chhanna che chu ka thei tawh lo" mak ka ti lutuk chuan "i thei tawh lo maw, enge awmzia, ok.. a tha lawm ni e, i theih loh miau chuan tih theih ka nei ta lo a nih chu" tih pah chuan kawng khar ka hawng a, ka pen chhuak tur chiah tihin "Mi tu emaw hmangaih ta la, chu mi chuan unau angin en tlat ta che se la, engtinnge i tih ang?" a rawn ti chhuak hawk mai a, "Mawh engtinnge i tih ang Zopui," ka en reng ringawt... a thu sawi chu ka rin loh lam thil lutuk anih avangin mak ka ti lutuk a, min rawn pan hnaih lai leh kawngkhar ka vawnna kut la a kawngkhar a khar lai te chu ka lo en tawp a, "Tikhan i hre thiam tawh em Zopui" a ti leh a, a kal phei a khumah chuan a thu a, kei chu ka dinna ngaiah ka la ding reng.

"A nih chuan min hmangaih tihna a mi" ka lung a chhe thut a, ka van insum nasa ve, ani chuan "Aw nasa takin, chuvang chuan hetiang hian ka awm a nih hi, ka inthup rei viau a sin, mahse hmanni a thil thleng avang khan, i danglam phah a, min hmu hreh a, min hel a ni lawm ni, kha thil thleng kha...." ka lo pawt chat a, "I tih luih maw, tum reng vang a min fawp maw i nih" "Aw ni e, ka ti lui a nih kha, kha vang khan min hlauh phah a, chubakah insum zawh loh hun ka nei leh thin dawn Zopui chuvang chuan, ka tan chuan hlat che hi a tha ber..Nutei kha chu engmah a ni lo kan inkarah eng thil mah a awm lo, hmangaih ka neih thu leh thian ang a min en turin ka hrilh."
Tih pah chuan, tukverh lam a pan a, chu ve leh ka tlan phei a, hnuk ulh teuh chungin, "A nih chuan tuna tang chuan insum angai tawh lo, i hria em Uremruat" tih pahin hnung lam atangin a kawngah ka kuah a, "Ka hmangaih che lawm, min tih nat zia hi i hre lo a nih kha" ka ti a, a kawng a ka kut suih chu a phelh a a rawn in her a "Engtin maw min hmangaih maw, Zopui han sawi leh teh i ti tak tak em"mak tih hmel tawk a a ti chu ka mittui kar atang chuan ka hmu a, "Aw Uremruat, ka hmangaih che, nau anga en ka duh tawh lo a nia aw" nui chungin ka ti a, a ni pawh a nui.
Zawi muangin insum miah lo in min fawp ta a.

.
"Mama" nu sangzelin a rawn tih chuan kan inthlah rang lutuk a, min hmu hman lo chiah chiah hehe, kawngka a rawn hawng a "sawmtea khu a muhil a, zuk pawm chho ta che," a rawn ti dek dek a, kei lah chuan, "Nu sangzel min thlah peih lo" ka lo ti hmanhmawh a, a nuam leh tlat tawh, Uremruata chuan "mawinaah ka riak dawn a tia, mikhual room kha... nu lo en fel la" nui vur vur chungin a tia, lei kan chhuah khum vak ahhh.
..
Kum khat kan inzui tlinna kan lawm a, zamzo-ah dinner tui tawk kan ei a, chumi hnuah Hangi lunlen tlangah kan chho a, Chu ta tang chuan Aizawl kan thilr a, zanah chuan a nalh khawp mai,
"Zopui"
"Umm"
"Lo hawi lawk teh"
"Aa ka thu nuam rih ka che sawn peih lo" ahmaah a awm hnung zawng a ngheng ar ar i ka thu a.. ka kut chu a rawn la a, "enge" tih pahin ka hawi let chu zungbun nalh deuh mai hi, ka kut zung tangah chuan a rawlh lut a, sawi mai tur pawh ka hre lo, a biangah ka han fawp a, a hmui a dawh leh a ka fawp leh a, "ka van lawm tak Uremruat a nalh e, uii a nalh zia hi' ka ti chiam a, chutah thutak deuha "Zopui" a tih takah chuan ka kut chu dah thlain amah chu ka en a.... "Ka fa te tan hian Nu i ni duh angem" min ti a, "tehreng mai" tih leh chiam ka tum a mahse, thu tak deuh leh ngaih la takin "Aw, an nu ka ni duh" ka ti ta zawk a.