*LALRENGPUII* BY Sora-i Nu

Group siam tirh atanga like tu 1000 nei chin zawng zawng dahkhawmna
Ngaia
Site Admin
Posts: 25813
Joined: April 30th, 2016, 4:07 pm

*LALRENGPUII* BY Sora-i Nu

Unread post by Ngaia » June 24th, 2016, 7:47 pm

Ka thiannu chuan Whatsapp Group pakhatah ka lo
add ang che, tiin member tlemte, 20 vel lek
awmna; mahse, inpawh tak takte awmhona Group
pakhatah chuan min lo add ve a.
Chu Group atang chuan ani *LALRENGPUII* ka
hmelhriatna chu..
Hmeltha ka tiin a, Dp vawikhat ka hmuh atangin
ka vei nghal tlat mai a. Ka bel chiang a, a fing a,
a tawngkam a felfai thlap a, thenrual kawm pawh
a thiam tih ka hre nghal mai a. Naupangchhia
lutuk chu a ni tawh bik lo tawp ang.
Henu hriatchian ka duhna chuan min bual a hneh
khawp mai.
Kei hi doctor zirchhuak hlim niin Aizawl veng
pakhatah kan awm a, keini ang rual hmelchhe em
em lo, a hminga doctor lo ni ve ta chu nula lamah
pawh ka luck ang reng hle a, duh duh thing thei
chu intingam chiah lo mahila hetiang lamah
chuan rual ka pawl ve hle ti mai ang.
Nula hmeltha tak tak kawp tur hi an awm ve fur
thin mai. Mahse, ka thinlungah *LALRENGPUII*
hian hmun tamtak luahin ka thinlung kawngkhar
chu a su hawng hneh kher mai.
Kan inbe tam telh telh a, ka duh tulh tulh a, ka
thikthu lah a chhe tulh tulh a, ka nawr zim tulh
tulh a, nupuia neih hial ka duh ta mai a!!
Amah pawn min duhin, min hmangaih ve viau
tawhin ka hria.
Hetih lai hian hmeichhe pakhat kawplai ang reng
deuh, ngaihzawng ni chiah silo pakhat ka nei a,
mi hausa fanu, phaia college kal niin, hmeltha tak,
a boruak tawn azira Zu pawh in ve mai thei chi
ka nei bawk a, hei erawh ka thianpa chauhin min
hriatpui thung.
*LALRENGPUII* nen chuan hun leh ni chhiarin
inneih hialte kan tum ta a, kan inhmuh changte
hian zuam-awm leh nep tak hian a awm ngai lo.
Zahawm takin, fel thlarh hian a awm a, kan inah
pawh vawi tam chu ka hruai tawh. Ka nu nen
phei chuan an inngaina tawh ang reng hle a ni.
Hun a liam zel a, kan induhna leh Hmangaihna
chu thup rual lovin a parchhuak a, tunah chuan
inneih hial kan tum ta.
Kan chungah hian eng nge lo thleng dawn tih
tuman kan hre si lo. Hre lawk ni ila, hringnun hi a
ngai angin ka chelh ding reng thin ang.
*LALRENGPUII* Chu ka nupui a ni ta.
Ka hlimna leh lawmna hian tawp chin a nei lo. Ka
Nupui chu ka atchilhin ka duh em em a, a ni lah
tak e, nupui nih a tlinin, a tih tur hi zo takin a tifel
thlap a, ka nu leh pa a tilawm thiamin,
duhawmna zawng zawng hi amahah hian a kim
vek tih tur a ni.
Zingah a tho a, ka biangah fawpin, 'Duhtak,
morning, a tiziah a. Hospital kal dawnah min
thlah a, ka hawin min lo hmuak a, ngai taka min
kuahin min fawp thin.
Zanlaiah emergency vanga hospital kal a ngaih
pawn a vui ngai lova, min thlah a, ka haw hma
min lo nghak leh thlap thin.
Ka nupui ang hmeichhia hi piang nawn leh pawh
ni ila, ka hmu tawh lovang.
Chuti si, tinge ka nupui hi na taka ka siam theih
le?
Hetiang mipa nep lutuk ka lo ni ta mai hi a
lungchhiatthlak a, ka inchhirna khua hi a va sei
dawn em!!
Thla nga kan innei ta, nikhat chu ka patient
pakhat hian ka nupui chanchin chu min zawt a, a
fel em tih te, kan inkawm a, 'In nu hi chu a
hmeltha a, a fel, a fin pawh a fing a, a pasal
hmasa kha a sual em a, chuti ni lo se, an inthen
miah lo tur a nia, mahse, nang a nei che hi a
vannei khawpin ka hria!!"
Chu thu ka hria chu ka nghing lawih a, ka bing
mup mup a, ka thinglung atang chuan thikna leh
thinrimna a lo chhuak a, eng vangin nge ka nupui
chuan ka lakah zep a neih?
Thinrim em em chuan in lam panin ka inkhalh
haw a. Ka ngaihtuahna chu a buai nuai mai, ka
ngaidam ang nge, ka then ang?
Mahse, ka hmangaih si, ka then thei ang em? ka
ngaihtuah ringawt pawn ka then phal lo.
Tinge a tunhma chanchin min hrilh lai khan he
thu hi a zep?
Ka na vawng vawng mai, eng pawh nise, ka
ngaidam ang... Ka theihnghilh ang a, hlim takin
kan awm zel ang.
In ka thleng a, a hmel ka hmuh chuan thikna,
thinrimna, rilru natna ka thinlung atang chuan a lo
chhuak a, min lo biakna chu bung nghutin ka
chhang a.
A hrilhhai hmel mawlh kha!! Ava duhawm tho si
em!!
Ka awmdan chu ka control thei lova, ka be tui
lova, amah ngaia thlahlel em em siin, a lakah ka
inchhu ngawng lui zel a, chuti chung chuan ka
ngaihna a bang thei chuang si lo.
Ka awmdan avang chuan hreawm a ti em em a, a
ngaihna a hre lova. A chhan min zawt thin a,
mahse, min be lo tur leh mahnia awm ka
duhthuin ka chhang thin.
Aww...... engatinge thudik hriat tuma ka lo zawh
mai loh le. Khang hun kha kokir thei ni ila ka va ti
em!!
Kan inkar boruak avang chuan rilru hah reng
rengin hun a hmang a, chaw a ei thei lova, a
muhil thei hek lo..
Zana a inhnit feih feih ri hian min tiharh fova,va
kuah a, va hnem a, lungchim taka va fawh vawng
vawng ka duh a, ka thinrimna chuan min dal thin
si...
Chutichung chuan ka nu leh pa, a thiante bulah
chuan a awmdan a pangngai reng a, a hlim reng
a, a nui lui a, a rilru erawh chemte zum takin ka
vih sak reng si...
Duhtak, ka ruak lo, nau ka pai asin"
Chu thu min hrilh chu ka lawm lutuk a, va kuah a,
va pawm vawng vawng ka tum a, mahse, ka rilru
chhiatna leh thikthu chhiatna avang chuan ka
hawisan a nih chu!!!
Mipa chu ka ni ve si amaw!?
Ka va nep tak em!!
"I lawm lo mi? Duhtak, engatinge ka lakah
hetiang hian i khawsak tak mai le? a chhan min
hrilh rawh, min hmangaihlo mi? a tap zawih
zawih a...



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 24th, 2016, 7:47 pm

Ka rilru a va na si em...
Engatinge tih ata ka awm a, ka nupui pawisawi lo
rilru ka hliam a, Pathian hmaa kan thu tiamte ka
bawhchhiat a, ramhuai ang maia ka awm a tak
le....??
Chhiartu duhtak, he thu hi i lo chhiar ve a nih
ngai chuan Pathian hmaa i tiampui tawh i nupui/
pasal kha Pathian atanga hmangaihna lo chhuak
chuan, a nuam emaw hrehawm emaw, a tunhma
hun kal tawh leh a thil tihsual chhete avang
chuan lo tinain, ka tih ang hian tu rilru mah hi lo
hliam ve suh aw..
Ka nupui chu a nun a chau tulh tulh a, a dang
tual tual a, a pum a lian zel a, mahse, natna tam
tak ka pek avangin a hrisel lo ta em em a, a mu
deuh chawt a.
Kei lahin ka be ngai lova, ka ngaihtuah ngai hek
lo. Zu ka in phah a, chu chuan min eichhe hneh
em em bawk a. A tawpah chuan an in lamah nau
nei turin min awmsan ta rih a.
Nupa nih tawh chuan engkimah tangrualin kan
tlinlohna laite sawi dunin hmalam kan pan tur a ni
sia...
Chutianga ti lova ka hmeichhe hmangaih rilru
hliam a, kei ngei pawh Zu ngawl vei titiha hun ka
hmang chho mai chu a rapthlak takzet a ni.
Nikhat chu hmana ka nupui chanchin min hrilhtu
kha lo kal lehin kan nupa chanchin chu min zawt
a, ka zep peih lo, kan nupa chungchang chu ka
hrilh ta a.
"Hmana ka thusawi kha dawt a nia sin, pawi ka ti
lutuk, min ngaidam rawh. Mahse, kei pawn dawt
tih ka hre bik lo, i bialnu hlui (Ka nupui nen kan
inngaihzawn tirha ka hmeichhe kawp, phaia
college kal ka tih, a tir lama ka sawilan nu khi)
khan chutiang chuan min hrilh a, hrilh rawh a tih
vang chein ka lo sawi ta mai a nih kha.
Mahse, a hnuah dawt a ni tih ka hria asin. I nupui
chu ngaihdam dil rawh" min ti ta mai a!
Ka puakkeh zo ta.... Ka rilru hi a va na em!
Hmeichhe pawisawilo pakhat nun chu ka tichhe
vek a, min ngaidam thei ang em?
Min pawm lehin ka hnenah a lo kir leh duh ang
em?
Hmanhmawh takin inah ka lut a, ka nu hnenah
"LALRENGPUII ka hruai dawn, chaw ka ei hman
lo, lo ei mai ru" tiin chhuah leh nghal ka tum chu
ka nu chuan...
"Mama, ding teh, i nupui chu...." ka ding chawt a,
"Eng nge ka nupui chu, sawi vat teh..." ka aw chu
a khur titih a, ka nu chuan, "Dar 3 vel khan a nuin
min lo phone a, damdawi inah nau neiin a awm a,
amah a tha vak lo a ni awm e". Kawngka vuan lo
ila chu ka nu thusawi avang chuan ka tlu thei hial
ang.
"Tinge min hrilh loh ka nu..."
"I nupuiin hrilh rih lo tur chea a ngen avangin anu
chuan kei pawh min rawn ngen si a ni, ka
hrethiam lo."
Hmanhmawh takin damdawi in lamah ka inkhalh
a, rilru mumal ka pu lo, ka tawt up up a, ka zak
em em bawk si.
Ka nupui hnenah ngaihdam ka dil ang a, min
ngaidam ang a, hlim takin kan naute nen kan
awm ho tawh ang a, ka tina nawn tawh ngai
lovang!!
Ka thlen chuan an lo awm laih laih a, mahse, an
hmel chu a va thlaphan hmel hlawm si em!
Ka kal phei ruak ruak a, ka nupui chu khumah a
lo mu zawi hniang a, a bula nurse chuan a mar a
lo dek a nih chu!!!
"Duhtak" ka aw chu a chhuak chang chang a ni.
Ka Aw ri a hriat chuan a phu zek a, a mit meng
mawi em em leh pawisawi lo zet chu a lo meng a,
mahse, a chhing leh vat a, a thaw chu a zawi em
em a, a awmdan chu ka hrethiam hle mai, ka
nupui chuan min lo nghak mai chauh a ni.
Ka ngaihdam dilna, ka inchhir thu te, ka
hmangaihzia thute ka hrilh hman ta lo!!!
Kei, patling meuh hi Awrawl chhuahin ka tap a nih
chu...
Mahse, tunge min dem thei? He khawvela ka
hmeichhe hmangaih chhun chu dawtthu avang
maiin ka that ta si...
Ka rilru na lutuk hi awm ngaihna ka hre lova, ka
inchhir lutuk hi awmdan ka thiam lova, ka thisen
hi a lum pup pup mai a ni..
Ka hmangaih kha engvanga tina phal nge maw ka
lo nih le?
Ngaihdam dil hman lova min kalsan mai hi na ka
ti ber bawk.
Ka fapa chu ka pawm a, ka mittui chu a far fap
fap a, "Bawihte, i nu hi ka thah a ni tih i hriat hun
chuan min ngaidam thei bik lovang tiraw?
Ka nupui nu chuan lehkha uluk taka thleh hi min
pe a, ka nupui kut ziak ngei a ni.
"Duhtak, i awmdanah demna reng reng che ka nei
ngam lo, kei hi ka tling lo em a, ka tihlim zo lo
che a, min ngaidam rawh aw.. kei chuan ka
thisen far tawp thlengin ka hmangaih ang che...
Hmangaihna hi a tawp thei ngai lova, kei hi min lo
hmangaih thin a nih chuan, kei min hmangaihna
aia nasa khan midang i la hmangaih thei asin...
Ka ngai thin che a, hei chauh hi ka sawi leh ang..
Kei chuan, ka thisen far tawp thengin ka
hmangaih ang che""
I nupui
*LALRENGPUII*
Ka na lutuk chu ka kun tlawk tlawk a, ka mittui hi
ka dang zo lo a ni...
He khawvelah hian inhmu leh ngai tawh lo turin
ka thlah liam ta...
Mahse, a na a ni...
Chhuartu duhtak...
Nang pawh nupui/pasal nei tur i ni emaw nei lai i
nih chuan ka tih ang hian tumah thu chiang hre
loin lo ringhel lo la, lo tina suh aw..
Zu hian hlimna aiin tahna min thlen a, Nupa nuna
inrintawk lohna hian natna min pe a, dawtthu
erawh a tlo ngai lo tih hi lo hre mawlh teh.
Keimah anga i inchhirloh nan mi thusawi fiah
hmasa lovin lo ring ngawt suh ang che...
Ka nupui *LALRENGPUII* kei pawn ka thisen far
tawp thlengin ka hmangaih ang che...
Zirtur tam tak leh hriattur tam tak min hnuchhiah
a, khawvela hmeichhe duhawm ber chu i va ni
em!!!

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)