PHATSANTU TENAWM BY Lalchhuanthanga Renthlei

[Ngaia]

Ka hreawmna kalsan tuma Fb leh whatsapp kartawna an thu post ho te ka chhiar laia ka fb messenger ri keuh ka hawn chuan tu nge a nih hrilh nawn ka ngai lo teh asin. "Ka lak atang hian hla takah inthiar fihlim rawh, min be lo la, ka hlim zawk" ti a mi hmaa minti mualphotu ngei kha a ni. “Ila hre mai ang” tih zawng a ni. Ka chhang dawn lo bur.
.
.
.
Chhungkaw hlim thei ve tak kan ni a, Kristian chhungkua an tih anga seilian ka ni ve in ka inhre thin. Ka pa hi High School ah thawkin kan lawina Kohhran-ah Upa a ni nghe nghe. Ka nu pawh Primary ah a thawk ve bawk. Unau 3 niin kei hi a upa ber dawt ka ni, ka unaute chu mipa ve ve an ni. Hmeichhe awm chhun ka nih vang chuan duat pawh min duat hle nghe nghe.
.
.
.
Mi han biak vak ai chuan mahnia zai ngaihthlak mai te, thawnthu phuaha hun hman te hi nuam ka tihzawng a ni tlat pek a. Tour kalnaah pawh Ear phone ka vuah a, ka bula mi pawh be lumlam lo leh zi luai luai karah pawh mahniin ka inawm tlei mai thei.
.
.
.
“Tuitla an awm a nia” mangang aw tih hriat tak chuan a au chul a. Tui hleuh hi chu ka tetlai atanga ka thiam a nih vangin rang takin lui lamah ka zuangthla thuai a, ka hnukchhuak thei mai dawn em maw ka tih lai chuan min lo vai nasa mai, min puitute lo theng vat lo se chuan min tibuai hman ngei ang. Ka bula thu Ramtea ngei kha a ni.
.
.
.
“Rinte, kan chhuang hle mai che” tih ri ka hriat chuan kawngkhar lam ka en thuai a, ka nu chu a lo nui sang a, tuitla ka chhanchhuah thu chu kan Lecturer ten an lo hrilh hmanhmawh niin. “Khu, inleng i nei a nia, rawn chhuk lawk ta che” mut ka duh tehlul nen aw, ava hun lo tak em. Ramtea leh pa upa lam deuh tawh an ni. Lawmthute an sawi luam a, rei pawh thu lovin an chhuak leh thuai a, ka lawm rilru hle mai.
.
.
.
Min rawn text deuh reng a, tha takin ka chhang ve mai zel bawk a. “Ka lo thu ve thei angem?” ka en chhoh chuan a lo nui seih a. “Iva mal ve” min ti chhunzawm nghal var a, “Nia” “I phal meuh nange?” ka harh thut “E ni tak, lo thu ve rawh”. Phur hmel fahran lo thuin a tawng siam siam a. Khawvel pianken mawina leh a siamtu themthiamzia hahipa a sawi takah chuan kan ti ti duhzawng pawh a inmil hle. Nitin mai chuan kan inkawm tlangnel chho zel a, Facebook a ka status leh Photo upload tinreng mai chu a like a, a comment zauh fo bawk a. Fiamthu ni thei tura ngaihin a thikthu a pechhe der vel tan ta tlat.
.
.
.
“Ka’n insil lawk ange” rei pawh thang lovin ka insil zo thuai a, “Ka hre mai, Rintea nen hian in lo inhnaih hle tawh mai, a tha ka ti” Ka phone lock lovin ka kalsan tih ka hria. “I lo en elo! I van chak dawn lo tak” tih pah chuan Rina chu ka melh rum kher mai. Thil awm dan leh nih dan a sawi hnu chuan Ramtea chuan min lo sawi fo thin tih ka hre thiam mai a. Dik tak chuan kei pawhin ka haw bik vak lo a nih kha, hman deuhva fb lama a nula biak that deuh vang pawhin ka titau tawh a nih kha maw.
.
.
.
Chumi ni chuan Class kal kan tha lo hle mai. Têk a tla reng bawk si nen ka thla a muang thei lo. Ka ip leh chawih thin, ka bulah a rawn thu a, min hnaih deuh a, ka lo va kuah leh thut thin. Min nuih sen sen a, “ka bialnu i ni thei ang em?” ka bu nghut ringawt. Ka zah vanga ka hmai sen awp awp chu a hmuh loh bik ka ring lo. Chu te mai chu a ni kan bultanna.
.
.
.
Class kal reng rengin kan kal tlang lo ngai lova, kut inchelha kal chu tha kan tih loh vangin nihliap kan khum mai zel a, chu chuan insi rialin min awmtir thin, ka tehkhin ber chu inngaizawng ni lovin unau inkawmngeih tak kan ang ka ti thin. Achang leh ka tah khum a, achangin ka beng ang lawp lawp a, chu ti ang hunah pawh chuan min dawh mai thin.
.
.
.
A cool deuh raih reng a, Mizo mipaah chuan a hnar bang a mawi ber ang tih theih tur khawpin a sang zum nalh a. A mitmeng dumpawl raihte chu nulate awh ava tling chiang em. Amah a hleitling thawkhat bawk a, sek tia sawi tur ni hauh lo mah se, a sa a inphut tawk a, a sam chu a buang lam mah a ni zawk. A mitmengah zahngaihna a khat leh mi inthlahrung mi a nihna chu a hriat theih mai a, a dar pharh leh a tai fek rât maite chu mipate awh a ni thin. Mite chanchin a chhe zawngin a sawi ngai lova, an thatna lai a hmuhsak thiam tlat thinna te chuan ka mit tlung zual hle thin.
.
.
.
“Hmuh che ka duh, thu pawimawh sawi tur kan nei, tun atanga minute 15 ah ..... hmunah ka lo nghak ang che” a tawi chang kher mai. Harsatna kan nei em ni ang? Hmun danga inhmuh kan duh ngai lo a ni si a, eng vanga min ko ta mai nge a nih ang tih zawhna chu ka rilruah a awm nghal a, phone ka tum lahin a switch off nghal tlat. Hreh tak chungin chhuanlam siamin ka chhuak ta zal zal a.
.
.
.
A hmel hmuh tur pawh a awm chuang lo. Ka hawikual vel ruai a, chutah ring lutuk maia ‘May be’ tih hla, Enrique sak lo ri thut chuan min ti phu chiang kher mai, ka hnungah a lo ding reng tawh chu niin he hla hi duh viau mah ila khami tum berkher kha chuan ka haw teh asin. Min ti phu chiang em lah taka. “Happy Anniversary” nui sang paha a rose min pek chuan ka tûm tlat. “I tum hian i hmel a tha zual” he mihring hi chuan min tihlawm dan tawk hi chu ava thiam tak. A na ang tih hlau tak chunga ka chum taih taih lai chuan hnehsawh takin min pawmin min fawp vawng vawng a. Lunch hlim takin kan ei dun a. Kan In thlengin min thlah a. Inchhungah a lo lut duh hauh lo. Vawikhat te mah a rawn hawilet hek lo. Ka ngei rilru hle.
.
.
.
“Kan inthen hi thaiin ka hria, hun hlimawm tak min hmanpui avang khan ka lawm e. Ka theihnghilh tawh ngai lovang” chu message tawite chuan ka nunah thuk takin thu a sawi a, a sawi thui kher mai. Ka bing chûk a, zawhna namen lo keimah ka inzawt a, eng vanga min then duh nge a nih ang tih ka ngaihtuah ngial chung pawhin inthen duhna tham tura ka awm ka hre lo. Sex hman beisei vang a ni mahna le! Mahse chu pawh a hunlai kha chuan thiam takin a pawm a nih kha. “D, eng vangin nge kan inthen ang?” “A chhan hriat a ngai lo, ka rilru ka siamfel tawh” a data a off nghal nge ka message a dawng thei ta reng reng lo.
.
.
.
Third months anniversary kan lawm zan chuan min kuah chial a, insum viau mah se a rim chu ka hre thei mai, ramri kham pelh pawh a tum niin ka hria, a rui chhe lo tih ka hriatin ka hau a, ka tum khum a, a duh anga a awm ka phal loh tum khan a inthiam lo hle a nih kha. Khami bak kha han nam leh a zu in awm ka hre ngai lo.
.
.
.
Kan hmaa ram rai dup mai chuan min ti hahdamin sava chi hrang hrang hram chuan thlahlel taka min kuah vawng vawngtu thathona pawh chu a ti zual hle niin ka hria. Tukverha thifim rawn thaw lut heuh heuhte chuan pawi an va sawi lo tehlul em. Duhthawh taka min fawpin ka kawr a phelh riai riai a, hnar turin chakna reng ka nei lo. Ka hnute a hne dek deka, min chul vel ruia bawk a, rilru fim ka pu hleithei der lo. Kan thaw pawh a rang dun khawp mai. Ka kekawr a ban da da a, dan tuma a kut ka chelh fan lai chuan a tho thut a, a lehhawi vut a, “D, ka lawm e, ka tih loh tur ka ti hman tep a ni” in thiam lo tih hriat takin a ti khur hlak hlak a. A thiam loh a nih bik loh zia ka hria, nghet takin ka kuah a, lungchim taka infawp vawng vawngin Nihliap inzawn rialin kan haw dun leh ta.
.
.
.
Kan inhriatthiam tawnna chuan kan kar boruak a ti thain, kum lamah kan inrual reng chung si a a puitlinna chuan min tihlim thin a, mipa a nihna anga han pangchan chang nei ve thin mah se a nihna takah chuan kawng engkima min kaihruaia min dawh thintu a ni zawk fo. Nitinin a nuna zir tur ka neih ang ang te ka zir chho ve thin a. A ni tel mai chuan ka hmangihin ka duh sawt hle a nih kha, chu chu ka chhungte pawhin an hai hauh lo.
.
.
.

[Ngaia]

Ani kha chu awm se duat taka min kuahin thawnthu bu te min chhiarsak leh anga. A ni lo, ani kha ka thinlung atanga ka nawhreh a ngai, min duhlotu ngaiin engahnge ka kun reng bik ang. Nula hmel fai leh nu leh pa te pawhin an mo atana an it loh ka nihna bik a awm lo tih ngaihtuaha han intih pachan viau tum mah ila ka bianga mittui luang thin chuan ka thei lo a ni tih a tifiah leh thin si. He hmangaihna zet hi chu aw, mi tam tak ten an hlimpui lai hian ka tan chuan tahna bak min thlen dawn lo a nih hi. A status leh dp ka check loh nan vawi eng emaw zat ka block a, chu pawh chuan rei a daih thei si lo. Mahse ka huat a ngai si.
.
.
.
“HIV positive a nih saw, hlau hle rawh, ani pawh hian a kai ve ang ka ring tlat” tia ka bul lawk amite inhrilh ru ser ser chuan ka beng a verh zar mai. “Lalramlian, i lo tenawm hle mai, nang nena kan in nei ta lo hi Pathian malsawmna a ni, Positive ka lo ngaizawng che hi ka inhua” ka tawngkam chuan ngaihno a bei lo kher mai. Fiah takin min melh kal a, a insehruh hle tih pawh ka hria. “Bawih, lo kal rawh melh pawh ka melh peih lo” a hmaa ka hrilhlawk angin a tihel nan ka ni fapa khaw danga awm rawn zin nen chuan induh hmel taka inkai rialin ka kalsan ta a.
.
.
.
Chu ka thungrulhna chuan min tihdam huai ka beisei laiin a teuh lo mai. Keimah natna ka insiam zawk a ni. Ka mit sen ram leh ka taksa dang lap mai chuan ka nu ngaih a ti tha thei lova, a theihtawp tak meuhin min hnem a tum a, chu min hnem tuma a beihna chuan natna bak min pe lo niin ka hria. A hming chu engkima nawhreh ka duh a, phatsantu tenawm a nihna bak hriat ka duh lo.
.
.
.
“Rinte, Ramliana a accident a, a na khawp mai, i hming a lam zing lutuk a, khawngaihin Civil Hospital ah rawn tlanphei teh” “Phatsantu tenawm hi ka pan ang maw, hnai love” ka awki a sang kher mai “Rinte, vawikhat chiah, i thian ka nihna angin ka ngen che a ni” ka mi rin ber Mami kher ni lo se chuan ka kal miah lovang. Phur lo fahranin ka kalphei a.
.
.
.
Biak tlak a lo awm tawh lo, ka hming chu a lam reng a, zawi zawiin a thaw a muang tial tial a, a zo fel der mai. “Hei hi ka thih hunah min lo peksak dawn a nia a ti a” tia Pu Ngakan Diary min pek chu ka la a, phatsantu tenawma hmel chu vawikhat pawh thlir zui tawh lovin ka liamsan ta. Ka thaw a veng huai mahna le.
.
.
.
Ka chau kher mai. Ka harh meuh chuan zinglam dar 2 a lo pel tawh. Room a ka muzal mai mai chu ka lo muhil der a nih hi le. Muthilh leh ka tum a, ka harh tlat thung si. Pu Nghaka Diary min pek kha ka hrechhuak thut. Chhiar hman lovin ka mutsan ta a nih kha.
.
.
.
A har ka ti hle mai, duh reng chunga then a ngai hi. Mahse ka hrilh thei si lo a ni. Dear my diary, tuna ka thusawi tur hi a thlenna tur hmun taka a thlen hun chuan kei chu fam ka lo chang tawh anga, huat tlak pawh ka awm tawh lovang. Ka chhiar chhunzawm chak tlat.
.
.
D, tunah takte hian ka ngaih che ava zual tak em, ka taksaa natna tur chuan min fan reng a, nakin lawkah ala langchhuak dawn a ni. Chumi i hriat huna i kehchhe tur chu ka ngaingam lova, min hua la, min diriam la, min then thei anga, i nuna nawhreh ka nih beiseiin i hnena thenna thu sawi tur khan tum engzat nge ka mittui a tlak a, i hriat lova ka tah thin. He ka natna hian engtik niah emaw chuan ka nunna leh i nunna hi min la laksak dawn a ni a, mi ten hmusita an nuihzat hunah che i thinlung kehchhe tur ka ngai ngam lova, khatia ka chet mai kha a ngai ta a ni. I thinlung kehchhiaa ka siam vang khan min ngaidam ang che aw.
.
.
He ka natna hi nang vang chauhin dam takin ka pawm thiam asin. Kha hun tawite kan hmandun chhunga hlimna min pek kha hlu ka ti a, ka kham lo takzet a ni. Lungchim taka pawm che a, fawh leh che kava chak tak em.
.
.
Awm herh vanga he natna hi kai ka ni tih ringa min theihnghilh theih nan tum khat pawh i hmuh leh hriat ngei turin Call Girl ka ko a nih kha. Ka positive ngei a ni tih i rin ngheh theih nan Siamtei te pawh i hriat ngei theih tura sawi turin ka ti a nih kha. Mahse maw, ila hria em? Hman deuhva Accident ka buaipuina atanga he natna hi kai ka ni asin.
.
.
A tawp ber atan chuan maw D, ka ngai ngawih ngawi che a, i kianga ka damchhung hun hmanral duh mah ila a theih ta si lova, Pathianin kan tana a buatsaih Vanram atang khian ka lo thlir thin che anga, hlim taka i awm theih nan Pa hnenah ka dil thin dawn nia. Hlim takin awm la, Pasal fanau te neia hlim taka i awm chuan kei pawh ka thlarau muang takin a chawl ve ngei ang. Phatsantu tenawm, Ramtea.
.
.
Dan rual lovin ka biangah mittui a luang a, a hmangaih avanga a hmangaih kalsan ngam, mipa ti mipatu nun huaisen nei si a mittui nena a damchhung ni chhiarliam ta khan Vanramah min lo nghak dawn. Phatsantu tenawm tak zawng ava ni em. Engkim kan sawidunin kan tuar dun thin kha a nia, eng vangin nge he harsatna hi amah chauhva paltlang a tum bik. Aw! Theih ni se i ruang dai tal hmuh leh theih kava chak tak em. A laka ka awmdan zawng zawng chu ka inchhir a, siamthat leh theih a ni si lo. A thlan vung chunga ka mittui tal hian kokir leh thei se kava duh em.

Phatsantu tenawm, min ti hrilhhai takzet.