MALSAWMDAWNGKIMA BY R Lalbiakdika Bda

Group siam tirh atanga like tu 1000 nei chin zawng zawng dahkhawmna
Ngaia
Site Admin
Posts: 25813
Joined: April 30th, 2016, 4:07 pm

MALSAWMDAWNGKIMA BY R Lalbiakdika Bda

Unread post by Ngaia » May 7th, 2016, 7:04 pm

MALSAWMDAWNGKIMA
.
(Fiction)
.
.
.
.

Kan kohhranin Krismas leh kumthar hlim takin kan hmang a. "Aw Lalpa i malsawmna hlu kan engkim chungah a lang" tih hla kan sak a, Pathian malsawmna ka dawn ka ngaihtuah laiin Durtlang naupang pakhat khan he hla hi hlim takin a sa ve thei ang em tiin ka ngaihtuah thin.
.

ATI hostel, Durtlangah ka awm a. Durtlang hi Mizoramah chuan Nipui tuarna hmun atan thlanawm ber niin ka hria. Mahse tui a harsa a. March thla tira lut kan nih avangin tui a harsa a, ruahtui tlak hma chuan Women's Polytechnic campus thlanga Hnârsarih lui chu kan insukna lui a ni thin. Ruahtui a tlak tam hnu chuan kan hostel thlang lawka Pûktui, tuikhur lian vak lovah kan kal thin.
.

Hnârsariha kan kal apiangin mipa naupang ti ila tleirawl a ni mah zawk awm e, kum 12-15 inkar vel tur hi a lo insu ve thin a. Insuk tur lah chu a ngah thin em em lehnghal a. Tlangval 40 rual kan kal chuan a zak a, tui a thal tha ngam lova, kan khawngaih hian tui kan thalsak a, insuk kan nuai pui bawrh bawrh fo. Kan ni niai nuai bakah hmanhmawh taka insu leh inbual kan nih thin avangin tumahin kan be ngai lem lo.
.

A hmel chu a fiah kak a, a meng kal a. A awmdanah mi inthlahrung tak leh zakzum tak tih a hriat. A thawmhnaw chu a tha lem lo, a fai viau reuh thung. Kan inbual apiangin a lo awm a, kawr pahnih, t-shirt sen da tawh lam leh Manchester United jersey, a hma lama AIG tih inziak pawh khawk tawh a inhak chhawk thin a. Kekawr erawh chu pathum a inhak chhawk thung. Ka rilru tak chuan hriatchian ka chak a, ka khawngaih viau bawk. Ka rin dan chuan nu leh pa fing vak lo, an enkawl theih chin tawk aia tam fa nei chhungkua ami anih ka'n ring ringawt- insuk tur a ngah thin danah.
.

Ruahtui a tlak hnu chuan kan hostel thlanga Puk tuiah kan insu thin a. Chu naupang pawh chu ka hmu leh ngai ta lo. Ka kumkhatna ka zawh thlengin naupang khawngaihthlak tak, insuk tur ngah deuh thin chu ka hmu nawn leh lo- mitthlaah lo chuan. Hostel atanga ka chhuah hnuah mitthlain ka hmu fo va, hriatchian ka chak tulh tulh. Hostel luh leh pawh min tichak a. Zankhat chu ka mumangah ka hmu hial a, ka harh chuan a tan ka tawngtai ringawt mai a ni.
.

A kum hnihna atan ATI ah ka lut leh a. Rilruin mipa naupang insu thin kha ka ngaihtuah roh roh thin. Hmuh leh a, kawm a, a chanchin zawh ka chak a. Ka hmu leh ang em tih ka hre si lo. Kum dang ang bawkin Hnârsarih luiah bawk kan insuin kan inbual leh a, naupang chu ka hmu lo. Vawi 3 kan kal thlengin ka hmu lo.
.

Kan luh atanga thlakhat hnu velah vawikhat chu kan inkhel zo kan inbual a, naupang insuk tur ngah thin deuh chu a lo awm a. Ka hmu chu ka lawm hle. A thawmhnaw suk nuaipui bawrh bawrh pahin
"Mama, i va insu khat ve a"
"Nia, KV school hostel amite thawmhnaw ka su thin a. An sikulah ka insu thin a."
"I va fel ve. Tui hi ka'n thal khahsak che ange aw."
"Ka lawm e."
Chaw ei hmaa hostel thlen leh tur anih vangin hmanhmawh deuhin kan haw chho a.

.

Hmuh leh chak tak chungin hmu thei si lovin ka awm a. Ka rilruin a chanchin turte ka ngaihtuah a. Hmuh han tum viau dawn pawh ni ila hostel-ah, discipline hnuaia awm kan ni si a; tih ngaihna a awm chuang si lo. Mahse tawngtaina meuha hmuh leh ka dilna chu Pathianin min chhansak a.
.

Tlai khat chu ka thianpa Duhsaka nen kan hostel bula field ah kan inkhel a. Chaw pawh ei lovin kan inkhel a. Zanah hostel ah inbualna tur a awm loh vangin Hnarsarihah inbual turin kan kal a. Ral atang kan han en a,
"Insu an awm a nih saw!"
"Tui a kang ang a."
"Kang lo turah ngai ang"
tih pahin ka kal a. Lui ka va thlen chuan tleirawl pakhat hi Emergency light eng hmangin a lo insu a. Kan va thleng a, kan thawm hriaa a rawn hawi chhuah chuan ka phu zawk a. Naupang insu thin kha a lo ni a.!
.

Kan inbual zawh hnu pawh chuan insuk tur chu a la inchhawp hnur a. Saktea bulah chuan
"He naupang hi kawm lawk ka duh a, lo han chho mai rawh."
"A chi dawn mi? Ka lo nghak zawk ang che."
"A ngai lovang. I awm ve chuan a chanchin min hrilh hreh zawk ang."
Hreh deuh chungin min hawsan a. Saktea haw hnu chuan naupang chu ka insukpui a. Thil chi hrang hrang ka sawipui a. A chanchin chu a sawi a (Ka tawngkam hman dan angin ka'n dah ange).
.

"Kan unau hi pathum kan ni a. Ka pa hi Aizawla private school ah a thawk a. Ka nuin in lamah puan a thui a, khawsak harsa vak lo kan ni thin. Mahse nikhat chu ka u leh ka pa chu Leitan thlang lawkah bike in an chesual a. Ka u chu a boral a. Ka pa chu a vanneih asiamin a dam a, mahse a kawng leh malpui a sawh nat avangin kea a kal leh a beiseiawm tawh loh. Ti chuan ka pa chuan a hna a chawlhsan a, ka nu puan thui hlawh chu kan ei ta ber a ni.
.

Ka nu puanthui hlawh a tam lova, ka pa enkawl a hautak bawk si avangin ka pa remti vak lo chung Leitana kan in chu kan hralh a, Suaka Vengah in kan luah ta a ni. Ka nu sawi dan chuan kan in hralhna chu bank ah kan dah ang a, ka pa enkawlna leh chhungkua intunnunna'n kan hmang ang a. A puanthui hlawh chu kan school kalna atan kan hmang dawn a ni. Ka pa pawh chuan rem a ti a. Kan rilru pawh a hlim viau a ni. Mahse ka nu chuan rilru dang a lo nei leh zawk a lo ni.!

.

Tlai khat ka school bang chu ka pa chauh hi a lo awm a, ka nu awmna ka zawh chuan Bazarah puanthan lei tura a chhuah thu a sawi a. Mahse tlai chaw ei hun pawhin a lo la haw lo. Naupang tih takah kan hlauthawng a, ka pa chuan Bawngkawnah Taxi a vâng a ni ang a ti a. Chaw ei turin kan nghak a, mahse dar 7 a rik pawhin a lo la haw lo. Ka pa pawh a mangang ve ta. Ka nu kha nu nalh ve tak, hmel fai vang mai a ni a, miin an lo ru bo ta a ni ang tih kan hlau hle. Kan phone a chhang thei bawk si lo, kan mangang chuan kan in bula tlangval fel tak chu kan hrilh a, ngaihven turin a chhuak a. A rawn haw a ka nu chungchang a sawi chuan min ṭhawng hle. Ka nu chu Leitana kan awm laia kan in bul lawka awm ṭhin tlangval awm awl ve satliah nen an lo tlan dun reng chu niin! Khatih laia ka pa rilru na lutuk mittui tla aia hmuh hrehawm kha ka la hre lo."
.

Hmeichhe hmangaihna hi chu aw. William Shakespeare-a'n "Dawrawmna tenawm, i hming chu hmeichhia a lo nih hi" a tih kha a lo va dik em! Ka khawngaihna leh ka thinrimna chu a inzat hial awm e.
.

A sawi zawm leh a:
"Ka nu chu a tlangvalpa nen chuan an tlanbp satliah a ni mai lova. Kan sum kawl leh kan bank passbook pawh chu a lo chhuahpui tel lehzel a. Naupang tê ni mah ila, kum phu lova puitling tia sawi ṭhin ka ni a, rilru natna leh manganna chang ka hre vek tawh a ni. Ka nu chu ka hua a, keini min kalsan chu thu hran, amah hmangaihtu ka pa, kal thei tawh lo inenkawlna tur pawisa tlemte tal pawh dah lova min kalsan chu ka dem a, na ka ti a ni. Mahse ka pa chuan, 'Mi dik lote avanga indawm kun mihring chuan siamtuin a siam zia a phak lo. Mi dik lote dik lohna avangin mi dik chu a intichak ang a, hnehna a chang bawk ang' a la ti fan a ni.
.

Ka nu ber kan sum neih nen a kalbo takah chuan English Medium aṭang sawrkar school-ah kan insawn a. Kohhran leh min khawngaihtute ṭanpuina pawisa chu bank ah kan dah a, kan rin ber a ni. A chang chuan chawhmeh nei lova chaw kan ei chang a awm a. Buhfai neih tlem avanga chaw tlemte kan chhum chang a awm ṭhin a. Naupang tan chuan a hrehawm duh hle. A ruka ka pa ṭap lai hmuh chu a hrejawm ṭhin hle. A ṭawngṭai a, a fate tan min dilsak ṭhin a. Ka pa a ṭawngṭai hi chuan ka thla a muang huai ṭhin.
.

Thawmhnaw leina kan neih loh avangin kan ṭhiante inkhawm kal tur hi mittui tla chungin kan thlir liam a, inkhawm chak ngawih ngawihin kan awm ṭhin. Hlim ta chang an zir te, nuam ti taka hla an zir te hi awt em emin kan thlir a, tih theih kan nei chuang si lo. Inkhel chak ve hle mah ila pheikhawk kan nei lova, nei pawh ni ila hun kan nei ve lo.
.

Mite min ṭanpuina sum ringawt chuan rei a daih dawn lo tih ka hre ve vek a. Kan in bul mi hausa deuh leh Durtlanga hostel ṭhenkhata awmte hnenah thawmhnaw sua inhlawh ka dil a, mi thawmhnaw suin ka inhlawh a. Kan inluahnaten an huanah thlai hmun siamna min pekah ka nauin thlai a ching a, a enkawl ve ṭhin a. Chu chu kan chawhmeh neih ve chhun a ni. Sa chu ka pa chetsual hmaa kan hmeh bak kha kan la hmeh leh lo."
.

Ka inrin hmain ka mittui a tla a, ka hnuk a ulh hle. Pathian hian hei aia nun kawng nuam zawk a buatsaihsak thei lo em ni le ka ti hial a ni.
.

Zan a rei tak deuh avang leh a insuk pawh a tleuh zawh tawh avangin kan haw ta a. A hnungah ka kal a, ka mittui a tla char char a. Kan hostel peng ka thlen chuan ka pawisa ah chhun cheng 50 pek ka tum a
"U Bd, ka lawm lutuk. A thlawnin pawisa ka dawng ngai lo."
.

Chu naupang zet chu! Mi tam takin an thawh hlawh ni miah lo umin dawt an sawi a, Pathian duh loh zawng ngaihtuah lek lovin sum an um dawr dawr ṭhin- an ina ei tur ṭha nei em üm chungin! Mahse a ni erawh chuan a duh lo. Rethei mahse mi hausa a va ni em!

Ka pe lui a
"A thlawnin i la hleinem. Tumruhna leh chhelna min zirtir hlawh a nih kha."
Hriatthiam loh hmel deuhin a hawi ha a. Lawm takin a la ta a.
.

Chumi hnu aṭang chuan min ngaina hle a, keipawhin ka ngaina, ni lo, ka ngaisang a ni zawk. Ka insukpui fo a. Pawisa a thlawna lak a duh ngai loh avangin ka thawmhnaw tlem ka suktir ve ṭhin. An inah kalin ṭawngṭaina hun ka hmanpui a. Ka theihtawkin Pathian thu ka hrilh fo. An huanah kalin hna kan thawk ho a. Vawksa kg chanve ka lei a, an ina kan ei laia an hlim hmel tluka hmuh nuam kha ka la hmu lo.
.

Graduation Day kan hman hma tlaiah an inah ka kal a. Hostel ka chhuahsan tur thu ka sawi chuan hrehawm a tih hmel hle. A pain lawmthu min hrilh a. Ṭap zawih zawih chunga ka lu chunga kut nghata min ṭawngṭai tluka chhan chakawm tur kha Pathian tan a awmin ka ring lo. An in aṭanga ka chhuah dawn chuan min rawn kuah a, a ṭap a, kei lah ka insum thei bik lo. Ka kuta vuan chungin naupang duhawm Malsawmdawngkima chuan
"U Bd, kan ngai ngawt ang che. Keini chu ṭawngṭaina hmanga nung kan ni a, min lo ṭawngṭaisak reng rawh aw" a ti a. Hreh tak chungin ka kalsan ta a.

.

Malsawmdawngkima te chhungkua vangin Pathian ka hnaih lehzual phah a ni. Malsawmdawngkima ni chung sia lei lam malsawmna dawn alawi a nei lo erawh a pamhmai ka ti a, inhmeh ka ti thei lo.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)