WAY BACK INTO LOVE By Havali Adam (COMPLETED)

[Havali Adam]

WAY BACK INTO LOVE


By


Havali Adam




Chapter 13




Hun te chu an inher danglam zel a, Ruata pawh a tir ang em ema taksa nâ lutuk nei tawh lovin ka pa nen School kal lam ringawt an sawi dun ṭhin a, ka nu sawi dan chuan ka pa'n khawi ilo kalna apiangah hruai a tum ṭhin a ni áwm e.


A fapa thar ni ta Ruata a ngaihsak zual lutuk chu ka nu nen kan nui leh ringawt ṭhin a, Ruata chuan kan chhungkua a tiphuisui sawt te'n ka hre hial a ni.




Ṭuanna tlâng a dang a, kei pawh thingtlâng lamah ka awm chho leh daih tawh a, kâr hnih dâwn chu a liam leh tawh nghe nghe. Ka nu'n min awmpui a tum viau nà chu Aizawl lamah tih tur ṭul a neih avangin lo chho ve tawh lo mai turin ka hrilh ta tawp a, chu bakah Zosiama a lo lêng zauh zauh ṭhin tho bawk a, hlauh em em pawh ka nei tawh lo, fimkhur erawh a la ngai reng tho.




Aizawla kan thil tawn Zosiaman a hriat zan te khan a va'n hlauthawng mai mai tak, a zawhna hmasa ber chu hliam ka neih leh neih loh a ni a, vanneihthlak takin hliam ka nei lo hlauh zâwk a, ni lo se chu a rilru a buai leh khawp ang ka ring.


Ruata chanchin nen lam ka hrilh fai vek a, kan chhungkaw mi leh sa dik taka Ruata kan là lut ta chu ṭha a lo ti ve hle a, ka pa thutlukna pawh a pawmpui khawp mai.




Thla a ral a, keini pawh matric exam kan hnaih tial tial a, February thla tawp lama nei tur kan ni tawh a, zirlai naupang te paw'n an zir ngawrh tawh hle bawk.


Ka tân tak pawh a awm mai mai theih loh, kum danga question chhuah dan te, mark an puttir dan te nen lam ka zir chiang vek a, a nihna takah chuan nikum aṭang daih tawh khan ka lo zir chiang lâwk vek tawh zâwk a ni.




Bike rum ri vut vut thawm ka hriat rual chuan chik zet hian ka ngaithla kar a, Zosiama ngei niin ka hria. Rei lo tê hnuah Zosiama hmel ka hmu ta thuai réng a, in chhunga a lo luh lai chuan ngai ru zet hian ka lo melh ral a, min rawn pan hnai zelin ṭhutthlengah kan ṭhu dun zui nghal bawk.




"I va buai àwm ve?" tiin dawhkan têa lehkha inchhawp hnawk nuaih chu a en run a, nui var var chung hian



"Buai lutuk lo ve, ka buai zo ṭep tawh zâwk" ka lo ti ve hliai a, ani erawh ṭawngkâa mi chhâng tawh lovin a lo bu nghut ringawt.



"Engtikah chuan nge i lo zin ang?" ṭawng tuma ka án zuau lai chuan a rawn ti leh sup a, ka sawi tum pawh ka sawi leh ta lo law law mai.



"Ka hre lo le, ka lo zin kher chu i phùt tak tak em ni?" tiin a hmel chu ka en reng a, ani paw'n min rawn en ve ta chiah!



"Immm....phùt e, ka pu paw'n a hmu duh che alawm" thum bul bula a tih chuan hun kal tawh ka ngaihtuah kir a, hmânah khan a sawi tawhin ka hria.



"Naupang exam te hi han zo phawt se, kan ngaihtuah ṭha dâwn a nia" ka lo ti ve mai a, exam zawh hun chu hun thawl ka ngah ka inrin vang a ni pakhat.



"Thingpui ka'n lûm ang e aw" tih leh thawh ka rual a, mahse min pawt ṭhu chiang khawp mai.



"Eng nge a?" khi var var hian ka ti hliai a, a mal chungah tak min ṭhuttir kher bawk si.



"Thingpui ka in châk rih lo" ti thum dutin ka kawngah a kuah run a, ner sak pah hian



"A nih chuan eng nge i in châk?" ka ti ve leh nghal zat a, a nui duh miah lo te chu ka nuih a tiza ru ang reng.



"Nangmah" a rawn ti chiah chu



"Awi, Zosiamlian, i over vel lutuk" ti hluaiin ka khi zui nghal ver ver a, chutiang teh tawpa min chhán chu ka beisei lo hrim hrim a tin a ni!



"Ka in theih bawk loh" ti lehin a mal chung aṭanga chhuk chu ka tum nawn leh ta ringawt a, lo phal lo nasa tak a ni.



"Zanin hi eng nge i hriat a?" nui var var chunga ka tih lai chuan min dinpui thut a, min la pawm reng bawk.



"Zosiam?" ka ti hman ṭâwk a, min rawn fawp thut a nih chu!




A tirah chuan thlek sawn ka tum ve tak nà a, mahse chu a hmui fawhna ngawl vei awl zet chu ka hlat hlei thei miah lo, ka bet tlat ni berin ka hria.


A nghawnga kuah meuhin ka fawp lêt ve ta nge nge a, ani paw'n min la pawm kang reng a, kan thil tih mêk avang chuan mu leh mal ka nei thei lo, a nuam tih chauh lo chu engmah ka hre lo a ni ber.




Min la fawp reng chung si hian min nghat thla riai riai a, ka chungah a rawn bawk zui nghal a, ka ir leh a chheh vel a fawh kual lai te chuan ka lo thawh halh halh a, ka thin phû te chu rang ṭha dawt dawt tak a ni.


A kut hrawl zeta ka awm bâwr a ṭham salh salh lai te chuan ka mur uaih uaih a, ka chhia leh ṭha hriatna zawng zawngte pawh an bo duak ni maiin ka hria.




Fiah lo ruai hian ka meng diar diar a, ka awm bâwr lama thil danglam tak thleng chuan tur chak tak ang mai hian min fan rawih rawih a, chawp leh chilhin ka harh zui nghal thuai bawk.




"Zosiam!" tia thaw hlawp hlawpin a lû chu ka nawr sawn vat a, harh chhuak hman hlauh lo ila zawng eng nge thleng ang tih pawh ka sawi thei lo.



"Zosiam, tho rawh, kan....kan awm dan hi a dik lo....a ṭha lo" ka ti bah deuh nawk nawk a, tho thuaiin ka thawmhnaw chu ka siam ṭha zung zung a, khumah kan lo awm daih tawh chu niin, mak ka va ti tehreng ém!



"Terem" ti thum dutin ka mal chunga ka kut ka hum ngawt ngawt chu a rawn hum lûm vung vung a, ka lo melh nghal ràl bawk.



"Min hrethiam teh" ti hniam ruihin min ṭhut hnaih sauh a, chutah amah bawk chuan



"Ka ngai êm che a ni" a rawn tih zawm leh nghal zat a, ka la pangngai lo lutuk chu sawi tur pawh ka hre lo, ka buk khum tawp ringawt.



"Zosiam!?" khuma min kawih mut a tum chu ka lo ti hluai a, dam zet hian



"Engmah a thleng lo ang, hlauthawng suh" a ti thum chhal a, thawk leh khatah ka hlauhthawnna zawng zawng chu a bo nghal duak ni maiin ka hria.



"Mahni chauha awm hi a hrehawm em?" pangngai tak hian a rawn ti ta daih a, a aw chu hriat a nuam dap dap hle bawk.



"Immm...." tih chauhin ka chhâng a, dik tak chuan ka la pangngai ve thei lo a ni.



"A nih chuan remchang hmasa berah palai ka rawn tir ang aw?" a tih leh chiah chu a lam ka hawi chho nghal thuai a, nui suk hian ka biangah a piai zeuh a, chutah amah bawk chuan



"I va hlauhthawn hmel ve a?" a ti leh sup a, ka thaw chhuak ham ham a, a ngaih tih ṭhat tum tak hian ka kuah ta hle hle a, mahse ka dul zawna thil indo run ka hmu chiah chu ka va han tho chiang mai mai tak!



"Kan awm dan hi a ṭha lo, ka dik lo va, nang pawh i dik bik chuang lo" ka ti ta tawp a, ani lah chuan nui suk pah hian



"Mipa ka ni a, a tur ve reng alawm Terem, hlauthawng tawh suh, i duh loh zawngin ka che lo ang" a rawn ti dam dap dap leh ta nghal a, ka ngaihtuahnaa awm ngut ngut chu a hretthiam ni ngei tur a ni.



"Chhuak tawh ang, thingpui ka va lûm ang a, kan in dâwn a nia" tih leh chhuah ka rual a, ani pawh ngawi reng hian a lo chhuak ve nghal mai bawk.




Thingpui chhûanga ka din ngawih reng lai chuan ka hnung lam aṭang hian min rawn kuah a, ka phu deuh uih nghe nghe a, mahse engmah a thleng dâwn loh tih ka hriat chianna chuan ka ngaih a tiṭha tawh hle thung. Thingpui ka siam laia min la kuah run erawh chet harsa ka ti ta deuh a, ka kawng zawna a kut chu nam pial tum pah hian




"Min thlah tawh la" ka ti dam diai a, mahse awm sawn a tum awzawng lo, min kuahna chu a tinghet sauh zâwk!



"Ka ngai che ka tih tawh khâ" ti supin ka darah a khabe a nghat run a, engmah sawi zui lovin ka thaw chhuak hak a, naupangchhia zeta a awm tlat chu ka nuih a tiza hnuhnawh ang reng.



"A nih chuan awm ṭha mai mai rawh" ka ti ve leh ta nge nge.




Min ngai tak tak a ni ang, thingpui ina kan titi melh melh lai te chuan a taksa si chet hian min ṭhut hnaih deuh run a, kei tak pawh hian ngaih chu ka ngai ve tho.


A tlangpuiin kâr khatah vawi hnih a rawn lêng ṭhin a, nilaini zan leh inrinni zanah a ni deuh ber a, zan dang erawh a hnathawh avangin a hman lutuk ṭhin lo.




A lo lèn loh zanah hi chuan phone kaltlangin kan inbe mai zel a, kan inbe rei thei viau bawk. Thu thlum tak tak han sawi chî a ni lem lo va, chet ziaa tilang tam zâwk ṭhin mipa a ni a, mahse pawi ka ti hran lo, kan inbiak te hian sawi tur a tlachham ve ṭhin khawp mai.




A haw tur chu kawt thleng ka thlah a, a tlan haw tak tak hmain min fawp leh vang vang a, riak turin sâwm ila chuan a hnial ka ring hauh lo, mahse sâwm chî ah ka ngai lo thung.



An khua a thlen hnuah min rawn hrilh ve leh thlap a, hei pawh hi a tura ka tur chhuah a ni a, ka ngaihtuah ṭhin bawk si a, a hma te kha chuan mi rawn hrilh pawh a tum ngai lo hrim hrim, mahse tunah erawh tih dan nghet pangngaiah a nei tawhin ka hria.




Tui takin ka mu a, hma takah ka tho leh bawk a, rilru hahna lian tham ka tâwk tawh ngai lo hrim hrim chuan ka nun a tihahdam ka ti lo thei lo. School-ah ni se Sir Chhuantea pawh a pangngai leh tawh viau a, mahse a tir ang em em kha chuan ka nêl thei tawh miah lo thung.




Ka thawhpuite zingah rau rau chuan kan Head a fel berin ka hria, a tir tê aṭang tawh khan mize nghet tak leh belhchian dawl tak a nei a, mi dangin a chhe lam zawngin eng pawh sawi se a êng zawng emaw a ṭha zawng lam hlirin a sawipui ṭhin a, tun hnu hian a ngaihsanawm ka ti thar tak zet.




Hun a kal bek bek emaw tih laiin matric exam hun kan thleng ta der a, zirlai naupangte pawh an theih tawpin an inbuatsaih ve nasa bawk a, ṭha taka exam an chhàn theih nân ka duhsak hlawm hle.



Exam Centre atân kan school hman a ni a, khaw ṭhenawm aṭang exam tur zirlai naupang pawh an lo kal hnem ang reng hle a, zirlai naupang tih takah a tua te pawh chuan an huphurh ve hlawm khawp mai.




Kâr thum chhung exam-na hun atân kan hmang a, exam zawh nî te chuan an phur em em vek a, kan han exam zo chu keini zirtute tân tak pawh a thawventhlak huaiin ka hria. Ka zawh tawh chinah kan zirlai naupangte chu chhâng chhe lutuk an awm lo niin a lang a, result ṭha tak kan neih ngei pawh ka beisei.




Zan khat Zosiama lo lêng chu a vawi thumna atân an khuaa zin turin min sâwm nawn leh a, ṭum dangah kha chuan ka chhâng liam mai mai zel kha a ni a, mahse tun ṭum erawh ka awl lai tak a nih bakah school ṭan hma chu Aizawl lamah ka chhuk leh rih daih dâwn tho bawk nen zin ka remti ve ta nge nge a, ani leh ni lovin a phur em em leh nghal.




Nilaini a ni a, zingkârah an khua aṭanga min rawn lam turin Zosiama chu a lo kal vang vang a, kei paw'n tukṭhuan ei nghal turin ka ring tawp bawk. A rawn thlen chuan dâr 7 leh a chanve vel a ri tawh a, kan zin dâwn thu chu ka chhungte pawh ka hrilh chuang lo, ka riak dâwn chuang lo va, hrilh loh law law a fuhin ka hria a ni.




"Tûma hriat lova tlan bo daih tur kan ang ê, i ti ve em?" tukṭhuan kan ei lai chuan ka ti ta ringawt a, ka khi deuh reng bawk.



"Àn pawh ka lo hre hleinem, ka pu lah chuan a hmu châk tawh mai si che a, riak tura a sâwm hial che ka ring" nui suk pah hian a lo ti thum bul bul a, ka riak dâwn lo tih erawh kan hre chiang dun hle.



"Ka zak reuh ê, interview tur ka ang àwm te ka tia, mahse ka lo zin châk ve tho bawk si" ka ti leh niah niah a, ka thil sawi chu a ho tih ka hria, mahse ka rilru a luah tlat si a ni.



"I pu chuan min lo la hre ve reng ang em lè?" ka ti leh a, hmâna Zosiama nen kan inngaihzawn ve lai khan vawi hnih khat chu kan inhmu tawh a nih kha!



"Hre tawh lo mai thei" tih chauh hian min chhâng a, kei lah chuan



"A nih engtin nge a bulah min sawi? Engtin nge ka chanchin i hrilh ṭhin?" ka ti leh zung zung a, chaw pawh ka ei hlei thei lo.



"Bialnu ka neih thu ka hrilh" ngaihsam hmel deuh hian a lo ti mai a, chutah amah bawk chuan



"Chu ka bialnu chu ka nupui tur a nih thu nen lam ka hrilh a, mahse nangmah hi i nih a ring lo mai thei, a hriat kher che ka ring tawh lo" a rawn tih zawm leh zat a, ka ngaihtuah zui vang vang lai chuan



"Chaw kha ei tawh rawh le, nge ni a, ka barh kher dâwn che?" a rawn ti leh a, ka va han ner khum nasa mai mai tak!



"Ka ril pawh a ṭam tawh lo" ka tih chuan a lo nui thum dut a, eng ber chu nge a nuihzat pawh ka hre lo.




Chaw kan ei kham a, kan ei inna ka tifel nghal zung zung a, bike-a kan chùan fel meuh chuan dâr 10 a lo hnai kuarh tawh a, keini pawh Zosiama te khaw lam panin kan tlan chhuak zui nghal chu a ni mai.




A khalh dam ang reng viau nà chu kan thleng zung zung ni berin ka hria, kan tlan chak pawh a ni chuang lo. Han chawlh zawk pawh nei lovin kan tlan char char a, kan inbe khât hle bawk.


Inbiakna vak chî pawh a ni lo hrim hrim a, hrehawm ka tih leh tih loh min zâwt tih loh chu min be mang lo va, kei paw'n zawhna ka zâwt leh zauh ṭhin tih loh chu ka be tam hran chuang lo.




Dârkâr eng emaw zah kan tlan hnu chuan khaw chhung kan tlan thleng ta nge nge a, hawkdâk zet hian khaw chhung in leh a vel chu ka en kual chhen a, hmâna kan awm ve lai nen kha chuan inang tawh lo tak a ni.




Engkim chu a danglam vek tawh ni berin ka hria, kan mi tlan pelh te lah chuan min en duh hlawm em em leh nghal a, min hria te pawh an ang zâwk; min hre tawh áwm tawp si lo, chutiang bawkin kei paw'n ka hre bik chuang lo.




Zosiama te veng kan tlan luh lai te chuan ka hawi kual chhen a, kum a lo vei tam ve tawh bawk nen hmuh loh kârin a lo danglam nasa tawh hle tih chauh loh chu rilru ah pawh a awm thei rih lo a ni ber e.




Tin, Zosiama te in chenin a lo danglam tawh a, kan hun laia assam type in ni ṭhin kha tunah chuan cement-a sak vek a lo ni diam tawh a, an in leh a hmun hmâ pawh hmuh a nuamin a ṭha ang reng khawp mai.



"Kha, in lo thleng ta màw?" Zosiama pu ngei mai, pu Thanngura chuan in chhung kan luh rualin a lo ti a, min en chik hle bawk.



"Ka hmuh hnu i va ang ve? Kan inhmu tawh mial em?" kan inchibai lai chuan a ti leh a, nui sak chung hian ka bu nghat ringawt.



"I hriat pawh ka lo ring tawh chiah lo asin" Zosiama chuan a rawn ti ve sup a, pu Thana min en chik dan chu pui tak a ni!



"Khawiah emaw ni chuan ka hmu tawh chiang che alawm, mahse ka hre chhuak zo tawh lo" tiin pu Thana chu ṭhutthlengah a ṭhu zui zat a, mahse min la en reng tho.



"Hun kal tawh te kha han ngaihtuah la, i hre chhuak thei mah nà" Zosiama chuan nui chung hian a lo ti khanglang a, ka nui ve tak nà chu ka àwm a nawm loh phah ṭep nghe nghe.



"Engtia hun kal tawh màw?" pu Thana hmelah chuan a hrethiam lo tih a hriat hle.



"High School ka kal lai te kha ngaihtuah chhuak la" Zosiama chuan a ti leh a, an inbiak dan vel chu an innél tih a hriat ngawih ngawih.



"Aw hâw....hmâna Zosiama ngaihzawng kha nangmah hi elo?" ti vutin pu Thana chu a rawn tho thut a, chutah amah bawk chuan



"I sawi tâkah chuan Zosiam, amah ngei kha niin ka hria, engtin nge in awm dun leh theih zâwk?" a tih zawm nghal suam suam a, a hmel aṭang chuan a hlim nge mak a ti tih pawh ka hrethiam lo e a!



"Sawi dâwn chuan sawi tur a tam lutuk, ani hi nakin lawka ka..." tia Zosiama ṭawng laklawh lai chu a mal hnung lam ka sik vak a, ka zak tlat a tin a ni!



"Zanriah kan kilpui tur a nih hi" tiin thil dang a sawi zawm ta hlauh a, a nupui ka nih tur thu a sawi dâwn tih ka chiang a, a sawi lo erawh ka thaw deuh huai thei, ka zak ru veng veng a ni tawp mai.



"Ni e, zanriah tui tak kan kil ho dâwn a nia, ding reng lo khan lo ṭhu teh u khai" tiin pu Thanngura chuan min nuih vur vur a, ka nui lui ve tak nà chu nuih a za lo ang reng.



"Min la hria em? Min hre tawh chiah lo ang a?" ngainatawm taka pu Thanan min biak chuan



"Ka la hria che alawm" ka lo ti ve sep a, a mit ko a kàn ák a, ka hriat a ring tawh chiah lo a nih hmel.



"Min la hre tak tak maw!?" a rawn ti nawn leh ta réng a, nui var var chung hian



"Hria e" ka ti ve leh mai a, bu nghut nghutin Zosiama chu a en leh daih a, chutah amah bawk chuan




"Zosiama hnen aṭang hian i chanchin ka lo hre ṭhin a, mahse nangmah i ni tih rin ngaihna reng ka hre lo" a ti deuh charh charh a, hun kal tawh ngaihtuah chhuah loh theih a ni bawk si lo, inthlahrun a nâ duh ṭhin khawp mai.




"Ti rawh le Terem, khawiah emaw ni i kal lawk teh ang" Zosiaman a rawn tih chuan a din rualin ka ding ve nghal a, chutah a pu chu biak zawm leh nghal zatin



"Kan rei lutuk lo ang" a ti leh sup a, mi dang bula a ṭawng dan leh a pu a biak dan chu inang lo tak a ni.




Zosiama nen chuan bike-in kan inphur chhuak leh ta vang vang a, khaw pâwn lamah kan tlan zel a, kan kalna tur pawh ka zâwt hran chuang lo, a duh duhna ah min hruai teh se ka ti rilru ta mai.




Kawngpui aṭanga kawng pêng pakhat, Link road-ah hian min tlanpui ta daih a, hnathawk ni àwm tak te pawh kan tâwk a, Zosiama phei chu an be nghe nghe a, rei tlan tawh lovin thingkung zâr duai hnuaiah hian min dinpui a, kei pawh chu ka chhuk ve nghal mai bawk.




"Kan huan a nih hi" ti supin thlang lam chu a hawi a, chutah amah bawk chuan



"Ti rawh, i chhuk ang hmiang" ti lehin a kut a rawn phar a, ka lo vuan ve nghal chat a, min vêng deuh reng nà chu tluk ka hlau ang reng hle a, kal pawh ka kal chak thei lo.



"Awi!" ti ṭhawtin ka ke chu ka khâi dâwrh a, mahse ka tlu lo hlauh, min man bet hman lo se chuan ka thal chiang khawp ang.



"Ka paw mai dâwn che em ni?" a rawn tih chuan



"Aih, a ngai lo, ka kal thei alawm" ka lo ti vat a, ka sawi zawh rual chuan chiang lutuk tak mai hian ka ke ka vâwr leh dâwrh a, ka tlu teuh lutuk chu ka ngheng rawk rawk nghe.



"Kawng hi a nal deuh a" ti supin min pawm kang lawp a, tal pawh ka tum bik chuang lo, ka tlu leh ang tih ka hlau tawh zâwk a ni.



"Ka kal ngai lo a" ṭhen deuh saka ka tih chuan



"Ka hria alawm" a lo ti dam dap a, a nghawnga kuah ran pah hian ka khi sâng a, ani pawh a nuih a zat hmel hle.



"Eng nge khatia i awm vel kher a?" nui var vara ka tih chuan



"Engmah a ni lo" a ti mai a, ei loh hmel taka ka ner khum nasa lutuk chu ri meuh hian a nui chhuak ta hawk hawk.



"Han tlu reuh la ka tih nen nen" a rawn tih leh kher chu ka melh nasa rawm rawm hle.



"Awi Zosiamlian, sual suh aw, tlu ta ila chuan ka insawh nâ ngei ang a, a buai ber berah i ṭang mai tur a nia" ngampa zeta ka tih tan tan chuan



"Buaipui che ka châk vang alawm tlu reuh la ka tih, buaipui dan che pawh ka thiam viau ang" a lo ti ve zut zut a, mi en run chung hian a la nui sun sun zui!



"Suala" tiin a beng chu nâ vak lo hian ka pawt ta ringawt.



"Duhawmnu" a lo ti ve leh dut a, min en chiang ngâng bawk si, ka lài leh ringawt tawh, ani hi chuan min tilài reng mai zawng a nih hi!




Thing a tam bawk a, huan chhung chu a dai deuh raih a, a nuam ka ti ang reng. Thlâm bul kan thlen chuan leiah min nghat thla ve leh mai a, thlâm ka ti tak ná a, thlâm pawh a ang chiah lo.



A chung rangva ni si, a bang leh a ban vel chu dap leh thing hmang veka siam a ni a, kawngka chen chuan in kawngka ang mai hian thing a ni nghe nghe a, in tênau a ang ka ti ber.




"Hrehawm i tih chuan kan haw leh daih thei tho a nia" a rawn ti sup a, ka hawi kual nasa lutuk chu hrehawm ka tih a ring a ni mah nà.



"Hrehawm ti lo ve, a nuam reuh ka ti, a hmun hi a awih vak bawk si lo va, zawngṭah kung te saw a va'n tam em em" ka ti ta luam a, thlâm aṭang chuan huan chhung chu ka en kual chhen reng bawk.



"A rah kan hralh ṭhin alawm, a hlawk phian asin" a lo ti ve mai a, ka bul chétah hian a rawn ṭhu phei a, ka kut chu a hum zui nghal nghe nghe.



"A nih chuan tu nge a rah chu lo ṭhin?" ka ti leh ta zel a, kan awm dan chu a nuam reuh tawp!



"Keima'n" a rawn tih chuan



"I hlau lo em ni? A sàn hlawm tehreng nen?" ka lo ti nghal thuai a, a hmel chu ka en ran bawk.



"Hlau lo ve" a lo ti ve leh mai a, zawngṭah kung chu ka en leh vang vang ṭhin a, han làwnna atân chuan a sâng deuh mah mah a ni.



"Ka nupui i nih hunah chuan sum leh paiin ka vur thei àwm si lo che a, ka bulah, thingtlâng khuaah i awm a ngai ngei bawk ang a, i huphurh em?" a rawn ti leh daih a, ka lû ka lo thing vat thung.




"Teuh lo mai, chu bakah sum ngawr ngawr hi ka duh ber lo, a hlutzia leh a ṭangkaizia erawh ka hria, mahse nangin min hmangaih chhung chu ka hlim dâwn tih leh sum hman dan kawngah kan buai dâwn lo tih ka chiang" ka ti ve dat dat a, min en chiang viau nghe nghe.




"Khawpuia awm ṭhang i ni si a, kan awm dun huna i awm dan tur ka ngaihtuah deuh che maw lè" ti supin ka chhip sam chu a fawp vang vang a, min hmangaih tih a va'n hriat ngawih ngawih tak!




"I van ngaihtuah ho reuh ê âw, kan awm dun hunah chuan nghakhlel takin i hnathawk rawn haw hun ka lo nghak ṭhin che ang a, a ṭul leh kan feh lâwp lawp bawk ang a, kei chu thlai thar ṭeuh te hi ka châk ve thei tawp, khawpui lamah kan ti ngai bawk si lo" nui sen sen chung hian ka ti siam siam a, lungawi hmel taka min enna te chuan min tiphur zual!




"Chuan, kan fate nen huanah te hian kan kal ṭhin bawk ang a, awi, ka châk tawh ê" ka tih zawm leh melh melh a, chutah keimah bawk chuan



"Fa engzat nge nei ila i duh?" ka ti leh niah niah a, chutiang lam sawi chu nuam ka ti hem hem khawp mai.



"Tam deuh, dam loh ni khua pawha min zawn luai luai thei tur" a rawn ti a nih chu!



"I duh tam em em ê, ka tlin nâng" ka tih chuan



"Keima'n ka tlin dâwn alawm" a lo ti sam mai a, hmui tipawrh târha melh hrep chung hian



"Zosiamlian!" ka tih hlak phah nghe nghe bawk.



"Kan dama Pathianin rem a tih phawt chuan ka tlin dâwn hrim hrim, tlin ka tum nasa mai" a la rawn ti ta deuh deuh!



"Awi Zosiamlian, duh tâwk teh, chuti fakauva fa neih tam i duh te chuan i duh leh rai la ti nia, em em lutuk che hian, sawi pawh sawi" ka tih laklawh laiin min rawn fawp tawk a, ka va ngawi chiang êm.



"Ka fiamthu mai mai a nih kha, duhawm tan tan nu" kiai suk hian a ti thum bul a, min fawp zui leh nghal zat bawk.




Thlâm chhuatah chuan a zàngthal zawng hian a mu thluang duai a, keiin a chungah ka bawh ran thung a, chutin kan hmui pawh a la inbawhthuah tui miah miah khawp mai.




A biang tawn tawn dawm meuhin ka fawp lêt a, ani paw'n ka hnunga kuah bet run chung hian khawvela thil dawnsawn hrehawm loh ber te zinga mi chu min fah mawlh mawlh a, insum hun leh chin tâwk kan hre hlauh zâwk a, ni lo se zawng kan kal thui hman viau mai thei a ni.




Huan chhung chu a zau ṭhain a zâwl ang reng hle a, kan tei kual vel ta mai mai a, serṭawk kung te, nimbu kung te pawh ka hmu ta zel a, hmun pakhat phei chu lakhuih hmun deuh tawp hi a ni a, zawhna pawh ka ngah khawp mai.




Hmâwng kung lian ṭha zet hnuai daihlimah chuan kan ṭhu dun ta hle hle a, thli a thaw heuh heuh reng bawk a, boruak chu a thengthaw nuam tak zet a ni.


Dârkâr eng emaw zah kan awm a, kan haw leh meuh chuan tlai dâr 3 a lo ri dâwn reng tawh a, nuam kan tih dun lutukna lamah hun rèng kan lo hre chang tawh lo a ni ber.




In kan thleng chu pu Thana chuan min lo be leh nghal suam suam a, kan thlen tirh khan a lakah ka inthlahrungin ka hmaizah viau kha a ni a, mahse tunah chuan khatiang em em kha ka ni tawh lo.




Pangngai takin ka awm a, ṭawng pawh ka ṭawng ve bawrh bawrh tawh a, hun kal tawha Zosiama laka ka chet dan avang khan min huat ka ring hle kha a nia, mahse chutiang zawng chuan pu Thana chu a awm lo hrim hrim.




Zosiama nen chuan ei rawng kan bâwl dun a, thum bul bula thil a sawi chu ka nuih leh hak hak ṭhin a, nupa ni tawh te pawh kan ang ka ti, kan la ni der si lo. Pu Thana a chhuah lawk lai phei chuan mi a kuah deuh run a, ei rawngbáwl lai leh lai pawh a sawi lo, chutah a la nghal zêk zui!




Hlim takin zanriah kan kilho a, chaw ei kham hnu lawkah kan inphur haw leh ta hna hna a, kal lam ang bawkin a kawngah ka kut ka suih bet ran a, a hnungah chuan ka bei thlep bawk.



Khawiah mah tawi khawmuang lovin kan tlan par par a, ka in luahna khua kan thlen chuan zan dâr 8 leh a chanve a lo ri thuak tawh a, kal lam ai kan tlan chak deuh bawk nen kan thleng hma ang reng viau.




"I haw leh nghal dâwn nge i awm rih ang?" ka tih chuan



"Ka lêng rih ang" a lo ti ve mai a, ka ngaih a ṭha deuh sawt nghe nghe.



"Ka bulah hian lo ṭhu teh" dam dap hian a rawn tih leh sup a, ka ṭhu zui ve nghal mai bawk.



"Tuna i hnathawh lai hi ka nupui i nih hunah bansan ta la pawi i ti ang em?" a tih chuan ka en deuh hâ a, chhánna ka pe nghal lawk lo.



"I tih dan dan a ni mai" ka ti thawp sep a, a dara mi kuah bet run pah hian




"Ka tum ber chu nang leh kan fate hlim taka siam a ni a, i hlim dâwn loh ai chuan basan lo mah la pawi tihna ka nei lo, mahse kan awmna hmun kan siksawi danglam a ngai thung ang" a ti dam thluam a, mi â nilêng lo tân chuan a rilrua awm chu hriat loh chî pawh va ni suh!




"I inthlahrung ê" nui var varin ka ti ta ringawt a, ani erawh a nui ve hauh lo thung.




"Hetiang thil i ngaihtuah reng chhan hi kan dinhmun vang a ni ti raw? Tun lai chu hetiang lam hi i sawi reng mai, eng nge i rilru tibuaitu ber min hrilh la Zosiam?" ka ti leh ta nge nge a, a darah chuan ka bei nghet sauh bawk.



"I chhungte ngaihdan tur ka ngaihtuah lo thei lo a ni" ti thum ruihin



"Ka nupui i nih hunah chuan ka mawhphurhna lian ber i ni dâwn a, i hlim lo ang tih mawlh ka hlau a ni" a tih zawm dap dap a, min ngaihtuah leh lutuk chu ka tân pawh a nuam lo hial zâwk!




"I rilru i sêng nasa mah mah a nih khâ, hlim châng a awm ang a, hlim loh châng te pawh a awm bawk ang a, nang paw'n i sawi khâ, mihringte chu ngai rengin kan awm thei lo. Hun harsa pawh tâwk ila, kan inhmangaih phawt chuan hma chhawn dan te pawh kan thiam ve zel mai dâwn alawm, ni lo'm ni?" ka ti deuh duah a, ngawi reng hian ka chhip sam chu a fawp vang vang a, ka thusawi zawh chiah chu a ngaihtuah zui a ni hrim hrim.




"Thingpui ka va lûm ang aw?" tia thawh mai ka tum chu min kuah bet run a, kal luih pawh ka tum bik ta chuang lo.



"I thawhpuipa khan a la tibuai ṭhin che em?" a rawn ti daih a, Sir Chhuantea a sawina a ni tih ka hrethiam nghal bawk.



"Tibuai tawh lo ve, engmah buaina ka nei tawh lo" ka tih chuan a lo bu deuh nghut a, ngaihṭha hmel pawh a pu leh chuang miah lo.



"Palai ka lo tir tawh mai dâwn asin?" a thu rawn sawi teh daih avang chuan ka en chho kiau a, mit zim sun hian min lo melh chhuk ve run a, a va han Zosiama hliah hliah tak!



"I remti tawh em?" a tih nawn leh chuan ṭawngkâa chháng lovin ka buk khum nghat a, zep thu cheng lo, ani nena awm dun baka thlakhlel ka nei lo a tin a ni!



"Ka pu ka lo bia ang a, rei kan rial lo turah ngai ang" ti thum dam dap dapin amah bawk chuan



"In khata chen dun ka duh tawh a, nang i ni ve em?" a rawn ti leh sup a, nui var var hian



"Immm...." ka lo ti deuh tawp a, a ṭawngkam ka là tawh lutuk chu a nuihzatthlak lehling zâwk!



"Immm....chauh maw?" a rawn ti leh ta rèng a, ka rin tâwk vel chiah a ni.



"Engtin nge i awm ka en chhin che a nih kha!?" tiin ka nui sen sen a, ei loh hmel zeta a hmui min tihsawih khum lai chuan ka nui nasa ngei mai.



"Chuan....kei nen in khata chen dun chu i châk ve tawh em?" a rawn tih nawn leh ngat tâkah chuan



"Châk tawh e lè, nang ai paw'n ka châk tawh zâwk ang ka ring" ka ti zat zat a, ka uar fahran lutuk chu min nuih suk ta ringawt.




Dâr 10 dâwnah a haw ve ta chauh a, a haw har viau nà chu a awm lai khan kan hlim êm a, haw lo law law mah se pawi ka ti miah lo, mahse pawi tih loh avanga riahtir ringawt chî a ni si lo a ni.


Tun atân chuan dawhthei taka nghah hram hram chiah a ngai ta, ka rin sual loh chuan nakin lawkah palai a rawn tir ngei ang a, ka chhungte'n palai hmel an hmuh hunah ṭha taka an lo dawnsawn ngei ka beisei.




Mut hmunah chuan ka ngaihtuah zui rauh rauh a, ka chhungte paw'n an fanu pasal atân Zosiama hi an iai bik ka ring lo. A chhan chu a bulah chuan ka hlim tih an hria a, ka him tâwk tih an hre bawk a, an fanu hlimna hi an duh ber dâwn tih lah ka hai lo, ka hlimna leh ka himna chu Zosiama a ni tih an hriat avangin harsatna a awm lo turah ka ngai hmiah a ni ber.




Hun tam a vei leh hmain Zosiama chuan palai a rawn tir ta ngei a, kei pawh school kal loh lai a nih avangin Aizawl lamah ka awm leh daih tawh nghe nghe a, Pathianin ka ṭawngṭaina a chhâng ni ngei tur a ni.




Ka nu leh pate chuan Zosiama nena kan inneih chu rem tih lohna an nei miah lo va, harsatna pakhat mah awm lova thil a kal tluang parh te chuan ka lawm a tikim a, kan inneih ni tur nen lam ka hre ta te chu ka hlim tak zet!



Tin, ka nu leh pa bulah chuan Zosiama nen kan inneih hnua ka hnathawh lai ka bansan tur thu ka hrilh tlang nghal vek a, anni paw'n ṭha an lo ti daih zâwk nghe nghe a, kawng engkima min thlâwp leh min pawmpui zel thei chu ka lawm a, Zosiama te khuaa ka awm daih hunah phei chuan ka ngai thei ngawt ang ka ring.




Zosiama te lam ve thung erawh an buai mawp mawp reng a, min hrilh dan chuan kan inngaihzawn tirh lai vel aṭang daih tawh khan a lo inbuatsaih ru reng tawh zâwk hi a lo ni a, awih loh pawh tum ila a awih loh theih loh.




Thla a ral a, a tawp tawapah chuan kan inneih nî pawh a rawn inher chhuak ve ta nge nge a, mo ṭhianah Puitei ka hmang a, zingkârah Zosiama te khaw lam panin kan chhuak a, an khua kan thlen chuan ka pa ṭhiante inah kan innghat a, kum 5 chhung vel hna a lo thawh ve tawh avangin hmelhriat a nei nual sa hrim hrim a, ka pa ṭhiante inah chuan kan inchei nghal vek nghe nghe bawk.




Dâr 2-a innei tur kan ni nà chu dâr 1 velah kan inpeih fel thuak tawh a, dâr 1 leh a chanve ah dâr hmasa a ri a, dâr ri te chuan ka thin a tiphû dep dep a, kan inneih hun a hnai tel telh a, ka zâm tawh tawlh ni berin ka hria.




Biak in lam kan pan lai te chuan ka thaw dep dep a, min en duh hlawm bawk si, a zám loh theih loh!


Mo thuam nen biak in chhunga kan luh tâkah chuan Zosiama leh a ṭhianpa kan hmu nghal a, ka zám lutuk chu ka rilruin ka ṭawngṭai mawlh mawlh reng a, Zosiama nen kan ṭhut dun hnuah erawh tlêmin ka zám lutuk pawh a zia ta deuh!




Ka kutzungṭanga Zosiaman inneih zungbun a rawlh luh lai te chuan ka rilru chhungril a hlim veng veng a, Pathian hriatpuina ngeia kan innei thei chu a famkim bik ka ti ngawih ngawih!


Kan innei min hriatpuitute ni se an sawi dan chuan a khaw nawtin an rawn inkhawm a, biak in chhungah pawh kan leng lo, tam ṭha hem hem tak kan ni!




Inneih hunserh kan hman zawh chuan biak in kawtah thlalakna hun kan hmang zui leh nghal a, ka pasal ni ta Zosiama nen erawh zawi tê têin kan phun sep sep tih loh chu ka inbe mang lo va, ka mitmeng hmangin kan inbia a ni ber. In enin kan innuih leh ringawt ṭhin a, kan chhungte ve ve pawh an hlim hlawm khawp mai.




"I chau em?" Zosiama lam chu hawiin nui chung hian ka lû ka thing a, ka chau miah lo tak tak!



"A mak ê ti raw, tunah chuan i nupui ka ni ve tawh tak tak chu a ni sia" ka tih hliai chuan



"Mak pawh ka lo ti ve hleinem" a lo ti dut thung a, fiamthu hmel a pu miah lo leh nghal.



"Engati maw?" chík zet hian ka en ngar a, pindan chhungah kan pahnih chiahin kan awm tawh bawk a, kan ṭawng ring lo dun hle.



"Nangte chu i pian tirh aṭang tawh khan ka nupui tur alawm i nih" a rawn tih chuan hnâr tum dat hian ka nui ri hak a, inla zei vel lutuk mai!



"Heih, eng nge tih i tum a?" ka dara min nem rual chuan ka lo deuh hû a, a chet dan teh thut chu ka beisei loh lam tak a ni.



"I hre mai ang" ti supin a nui sun sun a, khumah chuan min nem mu zui nghal bawk.



"Ka hmangaih che" ril ruiha a tih chuan



"Kei paw'n" ka lo ti thawp sep a, dam leh zun nei em em hian min fawp vang vang a, zámna pakhat mah ka nei tawh lo va, ka hmangaih ka pasal hnena ka thianghlimna ka hlan thei tur chu ka hlim hliah hliah tawh zâwk a ni.





End of Chapter 13





.

[Havali Adam]

WAY BACK INTO LOVE


By


Havali Adam




Last Chapter 14




Tunah chuan pasal ka neih aṭangin kâr khat lai a lo liam ve leh ta reng mai, ka ngaihtuah chian pôh leh mak ka la ti fàn! Pasal ka nei ve ta mai te, Zosiama nen nupa kan ni ve ta mai te chu ka hlim rualin mak ka la ti lo thei lo a ni.




Tin, ka nu leh pa leh Ruata te pawh Zosiama te khua, kan khua ni ta ah chuan ni thum chàmin Aizawlah an chhuk fel leh diam tawh a, ka nu nen phei chuan hnuk ulh ṭunin kan inthlah nghe nghe a, min ngai dâwn tih ka hriat tluk zetin kei pawh hian ka ngai dâwn chiang tih ka hre tlang nghal vek thei.




Pasal ka neih tâkah chuan ka sawi lâwk tawh ang ngeiin ka hnathawh lai chu ka bansan ta nge nge a, Zosiama tak pawh a hahdam huai hmelin ka hria. A hma khan a sawi ṭha duh lo mai mai zâwk a lo ni a, dik tak chuan ina awm tawp turin min duh a ni ber.




Tin, ka pu nen pawh hmân aṭang tawha lo inhre sa kan ni bawk a, kan innêl nghal viau a, a sual lo khawp chuan ka hria. A ṭawngkam hriat a nuamin a dam thei em em a, mahse a hriselna erawh a pan ve tawh ang reng hle thung.




Ka ti ta mai mai, thingtlâng mi hi chu hrisel loh hmel deuha lang si hian an hrisel phian zel a, ka pu pawh hi kum 78-a upa a ni daih tawh a, a hmel en chuan a zûr ve tawh tho, mahse khawpui mi tam tak te dam thlen loh tur kum zat a la dam thleng thei tlat te hi ei leh in avang leh ni tin khawsak rel danah a innghat ka ti ve tlat!



A ni lah tak a!



Khawpuiah chuan hmuihmer te, mawm te, sa chi hrang hrang te, ram dang aṭanga lak luh ei tur chhuak thâr thar te leh a changkâng kang te kan ei tlangpui a, kan intihhmuh a ni pakhat ve bawk.




Thingtlâng lamah ve thung chuan chutiang a ni ve hauh lo va, a tam zâwkin thlai hnah, thlai rah leh buh an ei mai a, thil mawm ei chângte pawh a awm ve tho ang, mahse khawipui ang em emin an ei tam lo thung.
Chu mai a ni lo, thlan tlaa hna an thawk ṭhin te, kea an kal tam hrim hrim te hi an hriselna tifeitu niin a lang.




Khawpuiah te chuan khawiah pawh kal dâwn ila, hnai te pawh ni se, lirthei hmangin kan tleng zut zut a, nawmsak leh awlsam kan zawn lutukna lamah kan taksa mamawh angin ke paw'n kan kal tam ngai máng lo va, chu chuan kan hriselna a nghawng leh nge nge ṭhin.




Thingtlâng lamah hi chuan kea an kal tam hrim hrim te, hna an thawk hrim hrim te hi hahthlak châng awm mah se a ṭhatna kawng a tam em em thung a, taksa hriselna atâna ṭha a nih leh nih loh pawh an hre bik chuang lo, an tih tur leh an khawsak ei rel zawnna pakhat a nih avangin an thawk mai a, chu tak chu hriselna atân a lo ṭha em em si a ni.




"Chu, an lo thleng tawh a va nih hmel ve" ka pu'n a rawn tih chuan tho chhuakin pâwn lam kan pan zawm zat a, Zosiama nutei leh a pasal hmel pawh ka hmu zui nghal.



"Ê....kha, in lo thleng tawh màw? In chuang nuam em?" tiin ka lo be siam siam a, nelawm tak hian ka nui deuh sâng bawk.



"Ken luhpui te in ngai em?" min chhán mai loh avanga ka tih leh pawh chuan min la chhâng ta chuang lo.



"Khaw'nge Zosiama?" Zosiama nutei min biakna chhán tuma ka án zuau laiin ka hnung lam aṭang ka pu zâwk chuan



"Huanah a kal lawk, a lo haw ṭep ang" a rawn ti a, Zosiama nutei chu ngampa lutuk lo hian ka melh zeuh zeuh a, min bia khan ka hre lo rèng a ni.



"Lo lut r'u, in va rawn thleng hma phian ve?" ka pu bawk chuan a ti leh suam suam a, kei pawh chu ka lut ve nghal daih bawk.



"In chau em? Thingpui ka'n lûm nghal ang e aw?" tih leh chet ka rual zui nghal a, Zosiama nutei ber chu mak ka ti, min chhâng duh miah lo.




Thingpui lûm pahin Zosiama ka call a, a nutei te nupa lo thlen tawh thu te chu ka hrilh melh melh a, lo haw vat turin ka chah nghal nghe nghe bawk. Rei kan inbe lo va, lo haw a tum hnai chuan ka hria, huan awmna a hla lutuk lo bawk nen rei a thang pawh ka ring lo.




"Kha u le, a in theih e" tiin thingpui chu ka châwi phei a, Zosiama nutei pasal chuan a lo ban ve mai a, mahse amah Zosiama nutei ber erawhin a lo lá duh hauh lo.



"Ka in châk ringawt hleinem" a rawn tih deuh fak chuan mak ti zet hian ka en hû a, za lo takin ka nui lui ta ringawt bawk.



"Thei tui a awm zâwk em? Min lo siam teh, vawt deuh hlekin aw?" a ṭawngkam reng reng chu hriat a nuam lo, min ngainep ni maiin ka hria.



"Aw le, ka va siam nghal ang" tiin ka kal sawn ve mai a, thei tui ka siam lai chuan Zosiama a lo thleng ve chiah a, beisei ang ngeiin a lo thleng har lo.



"Thingpui siam sa a awm asin, in ve nghal rawh aw?" ka tih chuan a lo bu nghut a, inthlak pawh inthlak lo hian ka pute bulah a ṭhu zui nghal bawk.




Zosiama thingpui ka pek fel hnu chuan fridge lamah ka phei leh a, thei tui chu ka siam zawm mial mial a, an titi ka ngaithla pah reng bawk a, ka pu ber chuan nuam a tiin ka hria.


A ṭawng lûam a, a nui leh hak hak ṭhin bawk a, Zosiama tak pawh a ngawi ngul bik lo va, a nutei pasal nen chuan an inbe ve mual mual a, a nutei nen erawh an la inbe miah lo thung.




Thei tui ka va pek laia Zosiama nutei awm dan chu tu paw'n mak kan tih ka ring, a lo là lawk duh lo va, second eng emaw zah chu ka ding ngawi reng nghe nghe a, a in theih tawh thu ka sawi paw'n ka pu a la be mawlh mawlh reng a, a hre lo der ti dâwn ila a nih ka ring chiah bawk si lo, a tawpah erawh a là ve ta hram a, mahse ka awm a nuam lo veng veng thei.




Ka mood inthlak danglam hlawk avang chuan bathroom-ah ka lut ta daih a, engmah tih tur pawh ka nei chuang lo, ka thil tawn zawh chiah khan min luah khat hneh lutuk ni berin ka hria.


Hmai ka phih ta ringawt a, rei pawh awm lovin bathroom aṭang chuan ka chhuak ve leh mai a, bathroom aṭanga ka chhuak chu Zosiama nen kan inen chiang khawp mai.




Tawi tê hian ka nuih zeuh a, ani erawh a nui miah lo thung. A mitmeng aṭang chuan min ngaihtuah tih ka hmu thiam nghal vek a, an thingpui inna no leh thei tui inna no te chu sengin ka sil zui nghal zung zung a, pangngai taka awm ka tum lui hram hram a, mahse a harsa ang reng hle.




Ka sil zawh hnu chuan an zingah ka va ṭhu ve a, chet reng zawng dika ka hriat loh vang a ni pakhat. Zosiama ṭhut thluang duahna chhuat bula ṭhutthlengah chuan ka ṭhu a, an thil sawi ngaithla ve ranin Zosiama tukhum sam chu ka khàl niap niap a, ṭawng ve a mawi tih ka hria, a bikin Zosiama nutei chu hawihhawm taka biak bawrh bawrh ka duh a, mahse min chhâng duh leh miah lo ang tih ka hlau ru bawk si.




Engmah sawi lovin an titina kârah chuan ka awm ve ta reng a, Zosiama chu ka kap kârah a ṭhu deuh run a, inbual turin ka hrilh ru sar sar tawh kha a nia, a la inbual peih lo a nih ka ring ta ringawt, a la ṭhu nghet ren run êm mai.




Zosiama nutei nen chuan biak khat paw'n kan inbe ta miah lo va, a pasal nen erawh kan inbe nêl nghal viau a, a fel hmel ang reng, a ṭawng duhin a nui vur vur zel bawk si. Ka pu paw'n a ngaina tih hai theih a ni lo, Zosiama nen tak pawh an innêl lo miah lo, mahse a nutei ber chuan ka awm a tinuam lo a ni.




Tlai dâr 3 a pelh tâkah chuan ei rawng ka bâwl zui nghal melh melh a, Zosiama nutei leh a pasal erawh an ṭhiante inah an lêng rih a, ka pu pawh a chhuak lawk a, sawi tawh ang khan upa ve tawh viau e ti lo hian a zuan a la zâng khawp mai a, a kum rualpui tam tak te ai chuan a la hrisel zâwk ngei ka ring.




Zosiam ve thung chu pâwnah thing a ek tlauh tlauh a, a lo haw tirha a ṭhu hahdam zuaih tih loh kha chu a la che deuh char char a ni ber. A thingpui tur pawh ka siam zo chu a ni mai a, pâwnah ka keng chhuak zui nghal a, thing a eh laklawh lai chuan thingpui in turin ka hrilh a, a lo ban ve nghal mai bawk.




"I hah tawh em? Duh táwk tawh la, i ek tam tawh tho alawm?" ka tih chuan



"Ka zo ṭep" a lo ti mai a, ka ti lui duh ta lo law law, a ek zo ṭep tak tak tawh tho.



"Ka lut dâwn asin, chaw ka chhûang a, a ut palh ang tih ka hlau, no kha chu lo dah tawp mai rawh, ka rawn là leh ang" ka tih chuan a lo bu nghut a, kei pawh in chhungah ka lut zui nghal chu a ni mai.




Alu ka vel laiin a thing ek zo chu a rawn lut a, thingpui no a lo keng lut nghal nghe nghe a, ngawi reng hian inbual turin bathroom-ah chuan a lut zui nghal bawk.


Tui vawta inbual a duh zâwk ṭhin avang hian inbualna tur siamsak a ngai hran lo va, a awlsam ang reng phian. Rei pawh a ral hmain bathroom aṭang chuan min rawn ko bul bul a, mamawh a nei a nih ngei ka ring.




"Eng nge?" tiin bathroom kawngka chu ka pawt a, a lo inkalh miah lo leh nghal.



"Lo kal lawk teh" a lo ti dut a, ka lut ve mai a, ka luh ruala bathroom kawngka a kalh nghal daih erawh ka hrethiam lo kher mai.



"Eng nge tih i tum a Zosiam?" ka ti hû a, ka melh chho kiau bawk.



"Inbual dun ang" a rawn ti ringawt a nih chu!



"I ti àwm ang lo êm mai a!" tia chhuah ka tum chu min vuan bet vat a, chutah min la vuan nghet em em zui!



"A chî miah loh a nia Zosiam" ka tih tan tan lai te chuan nui sun sun hian ka thawmhnaw hak lai chu min phelhsak mual mual a, tha kan inngah hleih bawk si.



"Ka pute an lo haw thut thei a nia" ka ti leh a, enghelh nei miah lo hian



"Haw lo ang, thil chhuan lai i neih loh lai tak a ni bawk" a rawn ti daih a, ka melh chho deuh vang vang a, tih ngaihna hre lo zet hian ka nui ve ta ringawt.



"Saw lam hawi rawh le" ti leh supin tui chu ka taksaah a rawn leih a, a kut hrawl tak chuan a chûl den den pah reng a, kei erawh nuam ti ru zet hian ka lo chhing diar diar thung.




Ka taksaa sahbawn a hnawih lai te chuan ngawi rengin ka lo dawh tawp ringawt a, nautê ang mai hian min bual a, ka dul leh ka âwm bâwr a khawih tâk chinah erawh ngaihtuahna a kal hê duh khawp mai.


Ni lo, ngaihtuahna mai ni náng, ka taksa a chùlna avang te chuan ka mur uaih uaih a, ka pasal mah ni se a mi khawihna chu ka la dawngsawng thiam ṭhaṭhum lo ni berin ka hria.




"Le, i tih ve hun" ti hniam supin a lam hawi zawng hian min kuai her a, min fawp vang vang zui zat bawk.



"Ṭhu la" ka tih chuan



"Ka ding duh zâwk" a ti deuh tlat a, ruak ngal ngata a ding chiah chu ka en ṭha ngam lo lek lek zâwk, hmuh ngai loh hmu thut ang mai ka ni!



"Ka....ih....eng lo.....i din chuan....i lian sia....ṭhu zâwk rawh" ka ti bah nawk nawk a, nui suk hian a ṭhu ve leh mai bawk a, ka thin chu a phu dep dep a, ka zâm ru er er ni maiin ka hria.



"I pasal ka nih tawh hi Terem, i va inthlahrun hmel ve?" a âwm poh chhah ṭha taka sahbawn ka hnawih phuan lai chuan a rawn ti hniam sup a, za lo zet hian ka nui ta ringawt.



"Inbual dun ziah ila a ṭha ang" a la ti ta deuh deuh!



"Ka chhuak dâwn, nangmahin inbual chhunzawm tawh mai rawh" tih leh inher ka rual a, mahse min chelh ding vat thung.



"Engati maw? Min bual ve phawt ang chû?" a lam hawi zawnga min kawih her hnu chuan a ti thum chhal a, min din hnaih sawt bawk.




"Zosiam..." zàm ru em em hian ka ti thawp raih a, kan indin hnaih tawh si, a taksaa thil danglam langsar tak aṭang lah chuan engkim hriatthiam loh rual a ni bawk si lo, a mi uapna nâ tak chu ka zo lo lek lek a ni e.



"Immmm...?" thum dam dap hian a lo ti hniam ruih a, ka biang chu chelhin min fawp zui nghal zat a, chutiang teh thlawta chiang chuan ruak ngal ngatin kan la awm dun ngai bawk si lo, ka thin phû ri te chu a hriat phâk vek ka ring.



"Sawi la" ti dam thluamin min fawp leh nghal a, min din hnaih sauh ruala ka dul rawn nâwktu chuan namên lovin awm ngaihna min tihre lo zual nghal!



"Ih.....ka....ka chhuak duh, ka chhuak dâwn..." ti bak nawk nawkin ka inla hrang lui thei ta hram hram a, bathroom kawngka ka hawn lai chuan



"A leh pekah kan chhunzawm thei" a rawn ti ruh ruh a, hawi pawh ka hawi lêt duh tawh rih lo, ka lái nasa êm mai.




Bathroom aṭanga ka chhuah fel hnu chuan ka inthlak zui nghal zung zung a, mi dang tumah an lo la haw lo hlauh chu tizia ka ti ang reng. A bikin Zosiama nutei te nupa kha lo haw hman ta se chu engtin nge min sawi duh ang, min ngainat loh sa nen, min sawi nasa duh khawp ang ka ring.




"Terem, Towel min lo pe lawk mai" alu ka vel zawm mial mial laia a rawn tih chuan a Towel ken luh ka bih chhuahsak daih tih ka hre chhuak ve chiah!



"Min lo nghak lawk aw" tiin room-a towel chu ka va lá a, ka pek lai chuan min lo nuih suk a, lái zet hian ka ner khum sak ringawt.




Thawmhnaw a hâk fel hnu chuan ka bulah a ṭhu ngawi run a, sawi duh nei hmel a pû tih ka hre ru reng a, mahse ka zâwt mai duh bik lo. Kan awm dan chu nupa ni ve si ah chuan a naupangchhia ang reng ka ti hnuhnawh viau a, chutih rual chuan a nuam reuh phian bawk si.




"Ka rawn haw hma khan i chungah engtin nge ka nutei a lo awm?" a rawn ti ta nge nge a, mahse chutiang lam daih min zawh chu ka beisei lo hrim hrim.



"Engtin vak mah, engati nge?" engmah thleng lo ang mai hian ka ti hliai a, ngaihsam hmel zetin alu chu ka vel zawm mial mial bawk.



"Zep nei lo la?" a rawn tih leh chuan a lam ka hawi a, kan inen chiang ta khawp mai.



"Sawi rawh le" ti dam leh dapin ka kuta chemtê chu a rawn là daih a, dâwt hrilh emaw thu zep neihna chî ah ka ngai ta bik lo.



"Min la nêl vak lovin ka hria, mahse hun a ral ang a, min nêl chawp ve zel mai ang, engah mah ka ngai lo a nia, rilru nawm lohna engmah ka nei lo hrim hrim bawk" ka ti melh melh a, bu nghut pah hian



"A nêl lawk lo ang che, hmân ata tawh a ngaina vak lo hrim hrim che alawm" a rawn ti sup a, high school kan kal lai kha ka ngaihtuah chhuak a, ka pasal sawi chu a dik chiahin ka hria.



"Nia ti raw, mahse min ngaihtuah phah lutuk suh aw, ka tân pawh a nuam miah lo a nia" ka ti ve leh ta ringawt a, ani pawh a lo nui suk a, chemtê chu ka lâksak zawm zat bawk.



"I tân nawm lohna tur a awm hleinem, ka nupui i ni a, ka ngaihtuah ve bawk loh chein" ti deuh nghut hian a bân vei lam chuan min kuah run a, ka lo nui tawp ringawt.




Chutia inhnaih taka eng eng emaw ni kan sawi dun melh melh lai chuan ka pu a lo haw a, rei lo tê hnuah Zosiama nutei te nupa pawh an rawn haw ve leh a, chutin Zosiama ber pawh ka bulah a ṭhu reng ta bik lo.




"I tlin meuh ang maw?" min betu lam chu ka hawi nghal a, Zosiama nutei hmel ka hmu zawm zat bawk.



"Nangni ang khawpui nula ni ṭhin tân chuan a harsa ve ngawt lo máw, i peih rei pawh ka ring chiah lo" amah bawk chuan a rawn ti leh a, ngaihthlak liam mai mai ka tum a, mahse ngawih reng zawng a hawihhawm loh thlak ka tihnuhnawh leh ta thung.




"Harsa lo ve" tih chiahin ka chhâng ve ta sep a, ei rawngbàwla kan awm hran daih avangin mi dangho chuan kan thil sawi chu an hriat phâk ka ring chiah lo.



"I la mo rei lo êm a, hun han liam deuh se a hriat mai dâwn alawm" a ṭawngkam hrim hrim chu hriat a nuam lo vel vek!



"Eng rilru pûin nge Zosiama hian a neih reng reng che lè?" ngainatawm loh zet hian a ti leh salh a, min ngaina lo tih a chiang ngawih ngawih.



"Bâwl tur a tam lo bawk a, nangmahin bâwl law law mai ta che?" hriat nuam deuh hlek zâwka a rawn tih chuan



"Tehreng mai, lo va mu hahdam daih rawh, keimah paw'n ka bâwl thei lutuk a nia" ka lo ti zung zung a, ani pawh chu a kal sawn zui nghal daih bawk.




A awm loh tâkah chuan ka thaw a veng huai theiin ka hria, min biak dan te reng reng kha a ngaihnatawm hlawl loh, Zosiama nupui ni tur hian min duh lo ni maiin ka hria. Zanriah ei hmâ chu a hmel ka hmu lo ta vang vang a, hmu tur paw'n ka hman lo hrim hrim.




Zanriah ei dâwnah erawh room aṭangin a rawn chhuak a, a hmel aṭang chuan a mu tih a hriat hle bawk. Chaw kan han ei chiah chu a tir phat aṭang a ṭawngkam hriat a nuam lo hlawm hle a, a bikin ka tân, mo nih tling lo tak anga inngaihbel theih khawp hian a ṭawng siam siam a, a nui lui sâng bawk si a, ka pu leh Zosiama paw'n an khap deuh nghe nghe a, mahse awmzia pakhat mah a awm lo.




Ka chaw ei tuina zawng zawng a bo vek a, ṭhut pawh ka ṭhu rei thei lo, ka kham ta daih a, ka kham lai chuan ka pu'n a zilh deuh hluk hluk a, hrehawm ti tak ka ni! Titau anga lan ka hlau bawk si, awm dan tur hriat a har tak zet.




Ka tih tur hre lo chuan ṭhutthleng te chu ka pawt mar vel ta ringawt a, Zosiama nutei pawh ka tâna hriat nuam loh lam zawngin a ṭawng tawh bik lo va, an chaw einaa ka awm ve kha a ngaithei lo zual ni berin ka hria.




"Teremi chu i lung a lêng a ni maw?" pâwna ka awm veng veng laiin kan ṭhenawmnu chuan a rawn ti lang lang a, ni dang anga min biak lai ang chiahin a nui sâng bawk.



"Lêng lo ve, lêng rual pawh a ni tawh hleinem le, chaw in ei tawh em?" ka ti ve ta siam siam a, ani pawh chuan



"Ei chiah lo, pa ber a lo la haw lo deuh a" a rawn ti ve leh mai bawk a, kan inhriatna a la rei lutuk lo nà chu nu fel tak a niin ka hria.




In chhunga ka luh leh chuan chaw an lo la ei hlawm a, room lamah ka lut ta daih a, Zosiama nutei ṭawng siam siam thawm te, ka pu ṭawng ri te chu ka ngaithla kar a, kan nupa khumah ka ṭhu ngawi reng deuh tawp a, thawm riva chuan ka beng a luah reng bawk.




Chaw an ei kham sap sap hlawm tâkah chuan tifel turin ka phei zui nghal a, tûma'n min be lo va, kei paw'n ka be bik chuang lo. Zosiama nutei nen phei chuan inbe lo tak kan ni, sitting room lamah a ṭhu phei daih a, min puih pawh a tum lo va, min pui lo se ka duh mah zâwk!




Dawhkan senghawi fel phawtin thleng ka sil zawm mial mial a, thleng sil pah chuan thil dang daih ka ngaihtuah a, ka mona a la rei loh vang nge pawh ka hre lo, ka chhungte ka ngai ru ang reng khawp mai.




Thleng ka sil zawh chuan kan nupa room-ah lutin ka phone chu ka là a, room aṭanga ka chhuak chu Zosiaman min lo en zauh a, a nutei pasalin be deuh reng lo se chuan min rawn pan hrim hrim, min biak duhna nei àwm hmel tak hi a pu a, hawi sawnin frigde lam chu ka pan ta daih nghe nghe.




"Thingpui in duh ang em ka pu?" ka tih chuan



"Duh rih lo ang, nakin deuhah a ni mai Terem, che reng lo la, awm hahdam ve rih rawh" a rawn ti dap dap a, Zosiama nutei zâwk chuan min lo melh nasa rawm rawm khawp mai.



"A nih chuan pâwnah ka'n awm mai mai teh ang, nakinah thingpui chu ka lo lûm dâwn a nia" tih leh chhuah ka rual a, tunah tak chuan ka nute bia ila ka awm a nawm deuh ka ring a ni.




Pâwn dai nuam takah chuan ka ṭhu ngawi ta reng a, ka chhuah tirha ka nute biak ka tum pawh kha ka la be leh ta rih lo va, ka ngaihtuahna a kal ding êm a, Zosiama nutei mawlh chuan ka rilru a kamki tlat a, ka nél loh chu thuhran ni se, a bula awm nuam ka ti hlawl lo.




"Hello" ka nu aw ka hriat rual chuan



"Aw nu, chaw in ei tawh em?" ka ti dam diai a, ka ṭhutna bula thing hâwng pho ro sa ho chu ka khawih neuh neuh pah reng bawk.



"Aw ei tawh e, nangni zâwk?" a rawn ti ve mai a, kei pawh chuan kan ei tawh thu ka lo hrilh ve nghal a, ka pa leh Ruata aw ka hre zui zat nghe nghe.



"I aw aṭang chuan i va nawm loh hmel ve?" a rawn tih leh chuan



"Nuam lo lo ve, ka lung a lêng deuh mai mai maw le, ka ngai che u a ni ber" ka ti sep sep a, ka mit ka chhing zui vang vang a, ka mitthlaah chuan chiang tak hian an hmel a rawn lang zut zut bawk.



"Keini paw'n kan ngai che alawm, mahse pasal nei tawh i ni tih inhre reng la, i pasal leh mi dang hmuha lungléng lutuk anga awm te kha a mawi dâwn miah lo nia" ka nu thu min hrilh chu ka ngaithla liam puat a ni ber.



"A la rei lo êm a, nakinah chuan ngaiah i nei mai ang" a rawn ti leh siam siam a, ka lung chu a la lêng veng veng tho.



"Terem" aw lo chhuahna lam ka hawi phei rual chuan Zosiama hmel ka hmu zui nghal a, ka bul a rawn thleng phei har lo hle bawk.



"A nih aw nu, ka dah mai dâwn asin, nakinah kan inbe leh dâwn a nia" ka tih hnu chuan kan biakna pawh kan titawp a, Zosiama lam chu hawiin



"Lut ila, thingpui pawh in induh tawh tak ang" tih leh thawh ka rual a, ka bâna chelh chat pah hian



"Pâwnah hian awm rih lawk ang" a lo ti deuh nghut a, kei pawh chu ka ṭhu ṭha ve leh mai bawk.



"Ei châk i nei em?" a rawn ti dut a, ka lo nui sak ringawt.



"Sawi la" thutak hmel deuha a tih leh chuan



"Kan chaw ei khamna pawh a la rei loh khâ, ka ril a ṭam i ring reng reng emaw ni le?" ka ti hliai a, a darah chuan ka lû ka nghat zui nghal zat bawk.



"Chaw kha i ei mang lo tih ka hria alawm" a rawn tih chuan ka ngaihtuahna a kal pêng chiang hle.



"Naktukah an haw thla leh nghal dâwn tho va, i tân a lo hrehawm deuh a nih paw'n tuar hram hram la ka duh" dam dap hian a ti leh a, ṭawng ka tum zet nà chu ka ngawi leh ta rih zâwk!



"Sawi rawh le, eng nge i ei châk?" min kuah run paha a rawn tih nawn leh ngat tâkah chuan



"Ka ril a ṭam rih lo tak tak" ka lo ti ṭha ve ta nge nge a, mahse a la duh tâwk mai lo.



"A awmzia chu nakin lawka ril ṭam thei reng dinhmunah i ding tihna" a rawn ti leh khauh a, nêk talh talh hian ka khi ver ver a, ka rilru a hre chiang êm a tin a ni!



"Ti rawh le" tih leh min thawhpui a rual a, mak ti taka en chho kiau chung hian



"Khawiah máw?" ka ti hû a, min kuah reng pah hian min kalpui zui nghal daih bawk.



"Eng nge kan tih dâwn?" ka tih leh chuan



"Dawrah kan kal dâwn maw lè, ka nupui ei tur hi kan lei dâwn, a ei châk apiang chu ka leisak vek ang, a pasal ngei pawh hi min ei châk a nih chuan ka inphal vek" a rawn ti lûam vel ve khanglang a nih chu!



"Awi Zosiamlian, i chhe lutuk" tiin ka nui var var a, ani lah pek chuan



"Ṭha min tih êm kha!" a lo ti ve leh khauh a, intihtheih hmel deuh hian a la awm zui!



"Hmmm...." ka tih khun hlak ta ringawt, chhàn lêt dan tur hre tawh rih lo miau hek le!




Dawrah chuan kan kal ta ngei a, ril ṭam lo inti si kha dawr chhunga kan han awm chiah chu ei tur hlirin ka rilru a luah a, ei tur pawh min leisak ṭeuh nghe nghe a, ka ei châk ho lah chu a naupangchhia hlawm bawk si.




Haw kawngah te chuan kan inchhaih nui leh var var ṭhin a, ka khi deuh reng mai, a hmaa ka rilru nuam zân lo te kha chu tunah chuan bo hneh tawh tak a ni.




In chhung kan lut chu Zosiama nutei chuan min lo melh deuh ran a, mahse mena thlak chí ang ka ngai tawh lo hrim hrim. A duh tâwkin min ngaina lo mah se ka pasal leh ka pu berin min ngainat chuan tâwk ka ti ve tlat tawh!




Zosiama thil min leisak te chu ei châk ve ang hrim hian a en deuh reng a, Zosiama lah chu ka pute ho titina bula awm tawh lovin ka bulah, thingpui ka lûmna bulah a rawn awm ve daih leh nghal a, a nutei ber chuan min ngaitheih loh hmel ngawih ngawih a, min pawh ṭhen a châk hmel viau bawkin ka hria.




"Lo kal rawh le, khawiah emaw ni kal lawk ang" kan thil eina ka sil zawh rual chuan a rawn ti dam dap a, mi dang erawh an mu vek tawh thung.



"Khawiah màw? Eng nge kan tih dâwn?" ka tih chuan



"Bike sil lawk ang" a lo ti sam mai a, tun ang zan zana chutiang tih a rawt chu mak ka ti hman ang reng.



"I va'n bei tlai ve, khi dâr 9 leh a chanve a ri tawh dâwn a nia, naktukah sil zâwk mai ila" tlawn titih pah deuh hian ka ti dam diai a, han ṭawng rin vakna chî pawh a ni tawh lo hrim hrim.



"Zaninah le" a tih tlat avangin kei pawh chuan ka hnial duh ta bik lo.




A bike rawng sen ngei mai chuan vêng tawp tuikhur lamah kan inphur chhuak a, zan boruak chu a nuam ang reng phian bawk.


Tuikhur kan thlen hnu chuan kan sil zui nghal mial mial a, inbe siam siam pah reng hian kan sil dun a, mi a fiam leh zauh ṭhin te chu nuam ka ti, fiamthu thawh thiam tak ni lo mah se a che zia chuan min tihlim zâwk mahin ka hria.




"Le, han khalh haw ve chhin teh le" kan haw dâwn chuan a rawn ti ta mai.



"Ka khalh thiam teuh lo" ka ti thuai a, engah mah a la ngai lo zui!



"Min han phur haw ve hrim hrim teh" a ti deuh tlat a, mahse khalh haw ka tum teuh lo, bike a ni leh nghal.



"Ka thiam lo, ngam pawh ka ngam lo, scooty pawh ka khalh ngam lo a nia, engtin nge khalh haw se min tih lé" ka ti tan tan a, a lo nui suk duh lek chauh!



"Ka khalh thiam lo tak tak a nia aw Zosiam" ka tih leh chuan



"Immmm....a nih chuan a hmaah i chuang thei" a la rawm ti hram a nih chu!



"Engati maw?" en kiau chunga ka tih chuan



"Khalh ka zirtir dâwn che maw lè, hlau suh, ka vêng tlat dâwn che alawm" a ti mual mual a, amah zâwkin bike-ah chuan min hlâng kâi a, ani pawh ka hnungah a rawn ṭhu zui ve nghal bawk.



"Kan tlu ang e aw Zosiam" kan tlan chhuah ruala ka tih chuan a ngawi reng a, bike steering-ah ka kut chu a hum hnan run a, khalh pawh ka khalh lo, min khalhsak a ni mah zâwk ang chu!




Rei tlan lovin kan in kawt chu kan thleng ve mai bawk a, amah zâwk chhuk hmasain ka chhuk zui ve nghal a, in chhung kan lut chu bathroom aṭangin Zosiama nutei a lo chhuak chiah a, min melh deuh râwm a, a zung ni ngei tur a ni.




Ka be lo va, ani paw'n min be lo va, Zosiama nen pawh an inbe chuang lo. Bike silna hmanrua vel dah felin zunram kan thiar leh tê tê a, chumi hnu chuan kan nupa room-ah kan lut inzui ve ta chauh bawk.




A tukah chuan hma takah ka tho va, mi dang erawh an la muttui hlawm hle a, pasal ka neih hnua zing thawh ka hre ta lutuk hi kei ngei pawh hian a mak ka ti, a hma te kha chuan dâr 6 leh a chanve emaw dâr 7 velah ka tho tlangpui ṭhin kha a ni a, pasal ka neih hnuah erawh dâr 6 hma hi chuan ka tho zat zat ṭhin ti ila a sual tampui lo ang.




"I che hautak nghal hle mai maw?" aw rawn chhuahna lam ka hawi chuan Zosiama nutei hmel ka hmu nghal a, chhán pawh ka chhâng lawk lo nghe nghe.



"Tui lum min lo thlit teh" nem fahran lo hian a ti leh hlak a, ngawi rengin ka thlit ve mai bawk.



"I pasal hnathawh hi hre reng la, i khawsak tihniam bawk ang che, chuti lo zawng in inṭhen leh thuai lo vang tih pawh a sawi theih hleinem" a ṭawngkam tinrengah chuan min demna hlir a lang ka ti mai.



"Thingtlângah i awm tih inhre tel bawk la" a rawn ti zui leh hlak a, ṭawng tuma ka kâ ka àn zuau laia



"Duh tâwk teh" rawn ti thum ruihtu lam chu kan hawi rual ṭhawt a, Zosiama hmel kan hmu zui zat a, a thawh fuh loh hmel em em leh nghal.



"Teremi hi ngaina lo eng ang mah la ka nupui a ni tih hre reng ang che" Zosiama aw chu a zawi viau ná a, a nghet ṭha charh charh hle thung.



"Khawsak dan tur ka lo zirtir mai chauh alawm, engati nge maw i ṭan nghal hlur ringawt mai lè" a nutei chuan a ti lêt ta hlauh a, an inbiaknaa inrawlh loh law law chu a fuhin ka hria.



"I buai lohna turah i buai a nih chu!" Zosiama chuan a ti nghut a, a nutei ngaihdan erawh a ni loh hmel nasa ngáng mai.



"Nupui vui kawi peih deuh i nei tih i la inhre chhuak ve mah na" Zosiama nutei min sawi duh dan chu ka rin phâk bak a ni.



"Ka lakah eng vuivaina mah a la thlen lo, a laka i awm dan hi hai theih a ni hleinem" ti nghet charhin Zosiama chu bathroom lamah a kal phei zui nghal nul nul a, a nutei pawh room-ah a va lut leh daih nghe nghe.




Bathroom aṭanga Zosiama lo chhuak chu ka lo en reng a, min rawn en ve tâkah chuan ka nui lui sak a, mahse ka nuih erawh a za em em hran lo. Ka bulah a ding ngawi run a, a tho fuh loh hmel bawk si, ngawi rengin kan awm dun deuh tawp a, mahse ka thei rei lo khawp mai.




"Tukin chu chawhmeh ṭhing bakah eng nge kan siam belh ang?" pangngai taka ka tih chuan



"I duh duh" a lo ti chhumbung deuh hmuk a, thil dang daih ngaihtuah hmel hi a pu run bawk.



"Siam tur pawh ka hre bik chuang lo, a awm awm a ni mai lawm ti raw?" ka tih leh chuan a bu nghut a, ka be zui reng duh ta bik lo, a nutei min biak dan avang khan a lungawi chiah lo ni ngei tur a ni.




Tukṭhuan ei khamah Zosiama nutei te nupa chu Aizawl lam panin an haw thla a, châm rei lo ka ti khawp mai. Châm rei se ka tihna pawh a ni chuang lo, dik tak chuan a pa, pu Thana chu a ngâi lo ka ti mai, ka sawi thiam chiah lo, an châm chhung pawh khan chuti vakin an inbe miah lo, a pasal nen an inbe tam daih zâwk.




Zan khat chu Rina te, pa Ngaiha te leh mi dang an rawn lêng khawm huk a, ka hmelhriat sa te vek an ni bawk nen sawi tur kan ngahin nuam kan ti dar dar hlawm hle a, Zosiama pawh ka bulah a ṭhu reng a, an thil sawi avang chuan a nui leh ruh ruh ṭhin bawk. Rei tak an lêng lo va, an haw hnu chuan keini pawh mut zâi kan rél zui ve nghal chu a ni mai.




Ni te chu an liam zel a, thla hial a ral tâkah chuan Zosiama pawh hna ṭul avangin min zinsan a ngai ta! Thla khat chhung kha chu chawlh a la tawp kha a ni a, tunah erawh hnathawh tur an ngah tawh bawk nen min zinsan lo thei a ni ta lo.




Nilaini zan leh inrinni zan apiangin a lo haw ziah thung a, an hnathawhna khua hi kan khua aṭang chuan kilometre 40 vel a ni a, chhim chhak lam ai chhim thlang lam a pâwl mah zâwk a, hla lutuk a ni lo bawk nen kâr khatah vawi hnih a lo haw hram hram ṭhin chu ka àwm pawh a nawm theih phah ṭhin hle.




Inrinni zana a lo haw hi chuan châm tlangin thawhṭanni tukah a kal leh mai zel a, ṭawngkâin min ngaih thu sawi lûam ngai lo mah se a che ziaah a hriat thei hle thung. Ka pu paw'n a fiam leh zauh zauh ṭhin a, mi dang ang lo takin ka pu biakna leh fiamthu hi chu a nuihpui hawk hawk thei tlat a, hmangaih pawh a hmangaih viauin ka hria.




Kan inneih aṭanga thla hnih a ral hnu chuan ka rai ta nge nge a, ṭan lâk lamah Zosiama a taima ṭauh ṭauh bawk a, rai har ka inti ru tawh hle zâwk a ni. Ka rai tih a hriat zan chuan an hnathawhna khua aṭangin a lo tlan haw vang vang a, a lo haw zan a ni bawk si lo, lo haw rih lo law law turin ka ti ve tak nà a, awmzia awm lo tak a ni!




Kan nupa khuma mu dun rialin kan fa lo piang tur chu mipa a ni emaw ni lo emaw, a duat dâwn thu hlir a sawi ve mual mual a, zep thu cheng lo, fa neih a phur ve tawh tak zet tih hai theih a ni mawlh lo ve!



Zinga an hnathawhna khuaa lêt leh tur a nih avangin kan titi laklawh lai chuan muthilh ka rawt ta ringawt a, mut a kham lo ang tih ka hlauh vang a ni pakhat a, ani lah chu muhil ta mai lo chuan a meng kur leh nghal a, ka dul chu a chûl deuh chhen bawk a, ka nuih leh tawp ṭhin ringawt.




Inngai tawn tak leh inngaihtuah reng rengin hun chu kan hmang chho ve mawp mawp zel a, chhun chawlh an neih laiin min rawn be ziah a, zanah kan inbe ziah bawk a, min ngaihtuahna awkâ te chu hriat a va nuam ṭhin tehreng êm!




Tin, ka nute lam paw'n ka rai tih an hriat phat aṭang khan min rawn ngaihtuah zual em em a, ka nu ngat phei chuan che fimkhur tur te'n min hrilh deuh reng zel a, ka pa tak pawh a bang chuang lo; ka nau Ruata chenin!




Puitei nen pawh kan inbe leh zauh zauh ṭhin a, pasal ka neih hnu hian kan inbe tam ta vak lo va, a inthlahrung deuh emaw ni, mahse kan inbiak chhunah erawh kan inbe rei ṭhin hle thung.




Hun te chu an liam zel a, ni leh thla a her liam ang zelin ka pum pawh a ṭhang lian ve telh telh a, thla 7 dâwn a nih tâkah chuan a puar lian tawh khawp mai. Ka mamawh ber Zosiama hnen aṭangin ngaihsakna leh ngaihtuahna ka dawng awl lo va, a lo haw ṭum phei hi chuan ka chet a phal lo tawp zel.




Zan khat an hnathawhna khua aṭanga a lo haw chu hmeichhe rim nâ zet hi a rawn nam haw ta tlat mai a, ni dangah a rawn nam haw ngai bawk si lo nen ka ngaih a ṭha lo ru nghal viau a, mahse ka zâwt duh lawk bik lo. A inbual fai hnu chuan ka bul chètah hian a rawn ṭhu thla a, ka pu erawh a mu daih tawh thung.




"I rawn thlen tirha i rim kha eng eng a awmzia?" ka ti ta nge nge a, ngaihsam hmel deuh hian



"Eng rim maw?" a lo ti mai a, ka thusawi chu hrethiam àwm ang paw'n a awm lo.



"Hmeichhe rim i rawn nam haw chhan kha eng nge?" ka tih leh fak tâkah chuan min en chiang ta hle.



"Engmah a ni lo, a ho lutuk" tia min kuah a tum chu ka lo dang vat a, thil thup a nei tlatin ka hria.



"Min hrilh ṭha mai mai rawh Zosiam" tiin a mitah chuan ka en kal a, nui suk paha min kuah a tum leh ngat chu a âwmah ka lo nam deuh tlat a, ani pawh a nui tawp riai riai zui nghal bawk.



"Ti rawh le, mu tawh ang hmiang?" ti dam dapin ka kut chu a rawn vuan a, ka zawhna a chhâng ṭha duh miah lo te chuan ka rilru a tidanglam vek thei.



"Ngaihzawng i nei lo ti raw?" ka ti ta tawp a, chu thil chu ka rilruah a awm ngut ngut a, hmeichhe rim a rawn nam haw kher bawk nen ka ngaihtuahna a kal péng vek tawh a ni ber.



"Khumah ka hrilh dâwn che a nia, ti rawh lè, phei ang le" tih leh min dinpui a rual a, ngaihzawng min neihsan tak tak ang tih ka hlau ru tak zet!




Kan nupa room lam pana kan phei lai te chuan ka ngawi ngal a, ka rilru leh ngaihtuahna chu hmun hrang hrangah a vak kual a, ka rai lai a ni kher bawk nen ka thin pawh a rim hma khawp mai, mahse ka indem miah lo, a chhan chu hmeichhe dang pawh ni se ka awm ang chiah chuan an awm ve tho ka ring.




"Sawi tawh rawh" nem fahran lova ka tih chuan a lo nui suk a, khumah kan mu fel diam tawh bawk.



"Tuna kan in sak mêk neitu fanu hian min ngaizawng tlat alawm le" dam dapa a rawn tih chuan ka sa nghal zak!



"A nih nangin?" ka lo ti nghal thuai a, a nuih za hmel te hlei hlei chuan ka rilru a tikal dik lo vek tawh!



"Ngaihzawng ka neihsan duh che i ring em?" chhànna ni lova zawhna min zâwt lêt daih chu ka run khawp mai.



"Zosiam!?" ka ti deuh ṭhat a, thaw chhuak hakin ka hnung chhawn ta daih nghe nghe.



"Hlauthawng duh suh, ani te chu ka tân chuan hmeichhe satliah ve mai alawm a nih" ti thum chhalin a taksa si chet hian min kuah bet run a, ka rilru erawh a la nuam tak tak thei chuang lo.




"Kei te chuan hmangaih pakhat chiah ka nei alawm, ani chu ka nupui a ni a, kârah fate lo awm ta pawh ni se ani chu ka hmangaih kumkhua tur hmeichhia a ni" dam ruiha a tih leh chuan ka thaw chhuak ham ham a, ka lo hlauthawng hma mah mah te pawh a ni mah nà!




"I ngaizawng ve lo tak tak ti raw?" a lam hawi zawnga ka inher hnu chuan ka ti thawp raih a, a hmel pà zet chu ka melh chho kiau bawk.



"Immm....ngaizawng ve náng, hahdam deuhin awm tawh rawh le" ti supin min fawp zui vang vang a, kei pawh chu inlet ṭha sawk sawkin amah hnung chhawn zawng bawk chuan ka mu leh a, ka ngaih pawh a ṭha ta huai e!




A muhil thaw ri sûk suk te chuan ka beng a titlai em em a, hna hahdam tak thawk a ni bawk si lo nen a chau ve thei ngawt ang ka ring. Kei lah chuan ngaihzawng min neihsan te ka lo ring vel a nia, ka mawl ngawt mai, a mi zia hre chiang bertu te zinga mi ka ni asin maw lè; ngaihzawng dang min neihsan ngai dâwn lo tih nen lam!




Hun te chu an inher danglam zel a, ka pum chhunga nautê paw'n thla 9 hmel a hmu ve ta, nau vei thei reng dinhmuna ka din tawh avangin Aizawl lamah kan awm thla diam tawh nghe nghe a, kan chhungte paw'n min ngaihven hlawm khawp mai.




Zosiama pawh an hnathawh lai kalsan meuhin min ngaihsak a, min ngaihtuah a, min buaipui awl lo va, pasal ṭha tehna hi awm ta se, a tlin vek ka ring. A tawp a tawpah chuan a nih dan tur ang takin nau ka vei ta nge nge a, nautê hring chhuak tura ka beih fan fan lai te chuan ka taksa kil tin mai chu a nâ chhuak vekin ka hria.




Chutah pakhat mai ni lovin phir ngawt ka hring chhuak leh ta nghal a, mipa ve ve an la ni zui! Ka pasal Zosiama hmelah chuan hlimna te, hmangaihna te leh lungawina te chu a inlan chhawk zut zut a, hai rual lovin a lungawi hliah hliah a ni.




Kei tak pawh ka lawm a, ka hlim a, ka lung a âwi em em bawk. Fapa pahnih ngawt kan han nei nghal ṭhawt chu ka pa'n Zosiama a fiam deuh chhen phah leh ta nghal a, za taka nuih a har khawp mai. Zosiama erawh kei ang lo takin a nui leh sun sun ṭhin a, ka melh deuh hrawk te chu a nuih tiza zualtu ni maiin ka hria.




Kan khaw lama kan haw chhoh zan chuan ṭhenawm khawvêng te an lo léng lut sap sap a, lawmpuina thu hla kan dawng awl lo va, ka pu pawh a hlimin a lawm khawp mai.


A bikin Zosiama ngat phei chu sawi vak ngaihna pawh ka hre lo zâwk, engkimah a phur sârh em em vek a, kan fate a duat nghal lutuk te chu nuih a tiza lehling thlawt a ni.




Kâr lovah kan fate chuan thla an tling thuai a, Zosiaman a awm chilh hnem bawk a, kan fate paw'n an pa aw chu an hre hrang tawh hle. Tin, Zosiama pawh khaw danga hna thawk tawh lovin pa Ngaiha te kutah a dah rih tawp a, ani ang em ema nupui fanau te tâna inpe zo mipa hi ka la hre ngai lo, ka la tawng ngai lo bawk.




An hnathawh lai kalsanin chawlh a là rih ná chu khaw chhungah hnathawh tur a hmu reng thung a, mi kâ aṭanga Mistiri ṭha tak a nih thu hriat te chu ka tân a nuam dap dap ṭhin hle bawk.



A ni lah tak a, Zosiama hi thiam lo emaw ṭha lo emaw titu ka la hre miah lo, thiam an la ti zel, hrethiam ve pha em em lo mah ila a hnaah hian a thiam thawkhat tih erawh a chiang hlein ka hria.




"An muhil tawh elo?" ka inbual zo bathroom aṭanga ka chhuah rual chuan ka ti dam diai a, kan fate, Zuala leh Sanga chu an pa darah beiin an muttui hmel tawh hle bawk.



"Immmm....a nih hi" ti supin kan fate chu a awi dalh dalh a, nui sak pah hian



"I awi muhil rang bik thei é, i awlsam bik ka ti" ka ti niah niah a, ani pawh chu a lo nui sun sun a, chhán erawh min chhâng lèm lo thung.




Kan nupa room-a ka inthlak lai chuan an rawn inpawm lut a, mut zâi kan rel zui nghal chu a ni mai. Kan inkârah kan fate chu tui tak hian an muhil barh barh reuh a, hmangaih tih hriat fahran hian Zosiama chuan a thlir dauh dauh reng bawk.




"Khaw'nge i kal dâwn?" khum aṭanga a chhuk rual chuan inbeng kang deuh ák hian ka ti hliai a, nui sun sunin ka bulah a rawn mu thak a, ka en hâw ringawt.



"An tla palh ang e aw, va mu ṭha mai mai rawh" kan fate ngaihtuah taka ka tih leh chuan



"Tla lo ang, an muttui ém saw" a lo ti sam mai a, chutah amah bawk chuan



"Min ngai em?" a rawn ti leh daih a, ka nui hak a, chhán pawh ka chhâng nghal mai lo nghe nghe.



"Sawi la" naupangchhia zeta a tih thum leh ruih tâkah chuan



"Ngai e" ka lo ti ṭha ve mai a, a nui hmel pà zet te chuan ka lung a dum hliah hliah, ka en ning thei mawlh lo, a chhan chu ka hmangaih 'ka Zosiama' kha a ni tlat a tin a ni!





The End





.