VINCENT By Havali Adam (COMPLETED)

[Havali Adam]

VINCENT
(Mizo Romantic Novel)

By

Havali Adam



Chapter 7



"Dawra mi kha tu nge?" ka aw chu a dam viau lo va, tlaia thil thleng kha ka ngaihtuah chhuak lo thei lo a tin a ni!



"Ka hre bîk lo, mahse thil leiin a rawn kal ngun ang reng" a rawn ti pangngai ve nghal mai a, ka pang si chètin ka la kuat bet run bawk.



"A nih chuan ka rawn thlen hmâin a lo kal ṭhin a ni maw?" ka ti deuh nghut a, kha pa kha ka vawi khat hmuhna bak a la ni lo va, chuvangin ka awm lâi chuan a rawn kal zing thei lo hrim hrim, kal zing se zawng ka hre em em ang.



"Chutiang vel chu....." tih chiahin min chhâng a, ka kuahna ata ka nam hla deuh hlek nghe nghe!



"In inhmuh leh hunah bialpa i neih thu hrilh ang che" ka ti thum chhal a, mak a tih chu thuhran ni se, a nuih a za tel tlatin ka hria.



"Eng vang ngawtin maw?" a rawn ti zo chiah chu



"Mipa dang lakah beiseiawmin i awm thiang lo, tu mipa dang mah i beisei thiang lo bur bawk, a chhan chu ka bialnu i ni tawh tlat!" ka ti bul nghut nghut a, ka ṭawngkam a bul viau náin chutianga han thinrim ka ni lo tih erawh a hrethiam vek tih ka chiang hle.



"I awm dan hi a mak e" tiin a ṭhen zui sak a, a hmelṭhatzia chu pui tak a ni.



"A mak pawh ka hre hleinem" tih leh fawh ka rual nghal a, ka fawh tirh chuan a ṭang ru deuh fat tih ka hre thei a, mahse rei erawh a ni lo thung.



Duhthawh zet hian ka fawp ta ngawng ngawng a, ka engkim mai chuan mu leh mal a hre thei tawh lo va, Zualbawihi tak pawh kei ang bawkin a danglam nasa hle tih a awm dan aṭangin ka hre vek a, chungte hlei hlei chuan phurna min pe zual a, a biang tawn tawn dawm chunga ka fawh leh vawng vawng hnuah ka inla hrang ve thei ta chauh bawk.



"Hetah riak rawh aw?" ti supin a hmui fawh nuam zet mai chu ka kutzungpuiin ka tuai neuh neuh a, kan thil tih zawh chiah chuan keimahah nghawng a la nei nasa miah miah khawp mai.



"Aih.....ih.....a chì loh....ka duh lo....ka phei dâwn...." a rawn ti deuh nawk nawk a, kal sawn zui nghal mai a tum chu ka chelh ding rang hle.



"A chì lohna a awm lo" tih leh keimah záwk chet ka rual a, ka room kawngka chu ka va kalh hmak a, ani nena khum khata mut dun tluka châk ka nei rih kher lo ang.



"Kan awm dan hi a dik miah lo a nia u Vincent" ti hliaiin min en kal reuh a, kei erawhin engah mah ka ngâi duh lo lui tlat thung.



"Ti rawh le, mu ang" tia khum lam panpui mai ka tum chu



"Ka duh lo" a lo ti vat a, lungàwi hmêl rèng a pu tawh miah lo bawk.



"Engmah a thleng dâwn lo Zualbawih, hlauthawng suh, ka kianga mu turin ka duh mai che a ni" ka ti ta dap dap a, ani pawh chu a ngâwi ran a, chutah keimah vek chuan



"Mu ang le, ka bulah i mu dâwn bawk si a, chuti maia ka muthilh theih pawh ka ring lo" ka ti leh thlup thlup a, ka thusawi chu awih lo tih hriat tak hian a rawn ner sak reuh a, ka nui zui sun sun nghe nghe!



"A nih....zîngah min kai tho ang che" a rawn ti ve ta sap a, kei pawh chuan



"Tehreng mai, ka tho hmâ ṭhin tih chu i hriat kha!" ka lo ti ve leh nghal zat a, ka khum lama kuah phei ka'n tum leh chu a hmâ angin a ṭang ṭung tawh bîk miah lo bawk.



Khumah chuan kan mu dun ta ngei a, ka lo suangtuah fô ṭhin angin a hnung lam aṭang ka kuah run a, a kut chu ka hum reng bawk a, rizai pawh kan sin lo.



Ka beisei loh deuhin a ke chu ka ke pahnih inkârah a rawn rawlh lut sat sat reuh a, hrilh chawp ngâi hauh lovin ka lo khuap nghal thuai a, kan awm dan tê chu holam viau angin lang mah se a nuam dangdai tak zet!



"Muttui aw.....?" tiin a beng bul chètah chuan ka phun sup a, ka lam lo hawi ngat se chu ka fawp tawk duh maithei a ni.



"Immm.....muttui le" a rawn ti thawp sep a, hmeichhe duhawm leh hmelṭha a nih mai bakah a rim te chen chuan ngawl vei awl tak ang mai a ni a, ka muthilh theih ka ring lo tak tak bawk.



A chhan chu chutiang chuan kan awm zen zen dâwn lo tih ka hre chiang a, kan awm chhuna boruak duhawm tak han muthilhsan daih chu ka ui a ni.



Tin, amah paw'n ka bula mut ṭul a ti chhen dâwn lo tih ka hai lo va, bul kan ṭan zan a ni kher bawk nen ka bula mut chu a remti ve mai niin ka hria.



Minute tam pawh a liam hmâin a rawn thaw ri sâk sàk reuh a, lungâwi zet hian ka khi suk a, zep thu a cheng lo, ka duh ve thlawt a ni. Ka ngaihzawng hlui te nen ka khaikhin vel ta hial a, pian leh kum lamah chuan a hnufual vek a, mahse a hmâa mite zawng zawng ai khan ka thinlung a hneh a, ka duh a nei kim vek a ni ber e.



Keia insum thei lo leh ta pek chuan a biang chu ka fawp zeuh nghe nghe a, ka bân khama a muhil hmêl te hlei hlei chu enchim loh thlir tak hian ka thlir vung vung a, ka bân a kham mêk, rit delh avanga kham deuh ṭuah ṭuah te chu ka lá sawn phal teuh lo, a duh a nih phawt chuan ka bân mu chuah chuah khawpin kham rawh se, ka phal lutuk tlat!



Lungkham nei lo zet hian a dulah chuan ka kuah run a, ka taksa si chetin ka pawt hnai zui salh bawk. A sam rimtui tak te chu ka hip lut vang vang a, a sam mai ni lo, a taksa, a engkim rim chu ka hnârah zawng rimtui famkim a ni vel vek tawh a, chutiang taka lungâwina chu ka nunah ka la tawng ngai lo hrim hrim bawk.



Hun lah chu a ral chak phian leh ta nghal a, kâr lovah khua a rawn vâr thuai a, kan hun hman dun mêk chu chelh din theih ni se zawng kum khua leh chatuan paw'n chelh din ka nàp hial ta ve ang.



Nî a rawn chhuak a, ka tukverh darthlalang chhun tlanga nî éng lo lut chuan a hmai no tak, duhawmnaa khat chu a rawn èn paw siar siar a, a harh palh ka hlauh avangin ka mut dan ka siam rem a, nî chuan keimah zâwk min chhun a, ka bialnu ni ta, ka duh leh ka ngainat em em, ka Zualbawihi ngei mai chu ka hlimah a la muhil thaw ri sak sak reuh a, mihring azawnga duhawm ber pawh ti se sawiselna tur rèng ka hre lo.



Zîng dâr 6 a rik meuh chuan kaih thawh a hun tawh tih ka hre ran a, mahse chuti maiin ka kai tho phal tlat lo. Kan hun hman dun mêk, ral mai tur chu ka ui a, ui tak têin ka ui a, mahse ka kai tho lo a nih chuan thil pawi thleng thei a awm tih ka hre tel ran bawk si, kai tho tur ringawt paw'n thutlukna ka siam har viau nghe nghe!



"Zualbawih....." ti supin a biang no tak chu ka nûl thuak a, kaih thawh tum e ti lo chuan kai thawh tum pawh ka ang lem lo, ka ṭawng zawi mah mah chu a ni.



"Zualbawih....." ti thum leh chhalin a sam chu a bengah ka zehsak a, awm hle hle thei lovin a biang chu ka nûl zui riak riak bawk.



"Morning....." a rawn harh rual chuan ka lo ti sup a, ani erawh a meng buai nak thung.



"Khaw'nge ka awm? Engati nge ka bulah i mut?" a rawn ti hliai a, thin ṭhawng tak hmêl te pawh a pu lek lekin ka hria.



"Nizana thil thleng kha i theihnghilh em ni?" nui suk pah hian ka ti dut a, ngaihtuah lèt tih hriat takin a ngâwi vang vang reuh a, intihlawmawm vel tum lo eng ang mah se ka mitah chuan a lawmawm thlawt a ni.



"E......ih......ka hre leh si....." ti fân raihin zà lutuk lo hian a nui zui sak a, chu a hmêl thlir ninawm loh zet chuan ka thinlung tituiralin ka insum theihna zawng zawng a vaw chhe leh ta nge nge bawk.



A hmui fawh nuam zetah chuan ka fawp ngawng ngawng a, a muthilh chhûng zawnga ka tih châk em em mai kha a ni bawk a, chutia ka'n fawp ta chu a duh pawh ka duhthaw kher mai, ka âwmah rawn nam deuh ṭai lo phei se chu inlàk hran nachâng pawh ka hriat ka ring nek lo!



"I muttui em?" dam dapa ka tih chuan



"Immm....." a lo ti ve mai a, ka khi suk a, ka en run avanga a lài hmêl te hlei hlei chu a duhawm ngawih ngawih!



"Muttui chhan te i nei em?" nui sun sun paha ka tih leh chuan



"Nei ve e" a rawn ti reuh a, chutah a la nui sen sen zui, a lawmawm hliah hliah lutuk chu piai nawk nawk ka chàk rum rum hial a ni.



"A nih....i muttui chhan chu eng nge?" ka ti leh dut a, kan awm dan té chuan phàt rual lovin min tihlim ru tak zet!



"Ka mumangah dawra lo kal pa kha ka hmu asin" a rawn ti chiah chu chawp leh chilhin ka nui tawp nghal hmak a, ka lung a âwi lo hle bawk.



"I awih em?" amah vek chuan nui var var chung hian a rawn ti leh hliai reuh a, kei erawh lungni lo tih hai rual lovin ka ngâwi run thung.



"I awm dan hi a lawmawm reuh e u Vincent" tih leh ri meuha nuih a rual a, chutah amah bawk chuan



"Ka fiamthu a nih khâ......." a rawn ti leh ta nge nge a, ka awm dan chu ka sawi thiam chiah lo, ka thâwl huai ni maiin ka hria.



"Hmmm....!!!" ti nghutin ka ner zui sawk a, ka awm dan chuan a nuih a tiza zual tih hriat tak hian a nui hak hak reuh a, chu a nui hmêl chu ka tân thlir nin har tak a ni fel leh diam tawh bawk.



"Tho ang" tiin chet a rual nghal zat a, kei pawh chu ka tho zui ve mai a, nizan aṭang tawh ka mood a fuh cher cher bawk a, ka nilêng hun hman dan tur pawh a fuh viau dâwnin ka hria.



In hnuaia kan chhuk thla te chu engtin emaw ni tak hian ka awm a nuam veng veng a, Zualbawihi leh ka nu chuan ei rawng an bâwl dun mawlh mawlh a, keiin ka pu exer ka làkpui bawk a, nizan lamah muhil lovin ka meng tlaivâr ṭhak e ti lo chuan ka mut pawh a chhuak der lo lehnghal a, exer chena ka làk lohna chhan lian tak chu Zualbawihi vang ka ti lo thei lo.



Nilêngin ka rilru leh mitthlâah amah ngawr ngawr a awm ngut ngut a, file ka en dik lâi te, statement siam ṭhat tur ka buaipui lâi te paw'n ka thluak chhûng kil khatah a awm ru reng a, biak mai te ka duh rum rum a, mahse phone a nei hauh si lo. Ka rilruah phone leisak chu a lang lian ta hle a, chutih rual chuan a duh dan zawh hmâsak phawt erawh ka tum thung.



Hna bàn hun a rawn inher chhuak chiah tihah station aṭangin dawr lam ka pan nghal a, kan dawr chhûng ka luh lâi chuan Zualbawihi mit leh ka mit a intawng chat a, lài ru ang reng tak hian min lo nuih sen sen reuh a, mitmei vén tur mi dang awm lo se chu ka va kuah ang a, duhthaw zetin ka fawp leh ngei ang.



Minute eng emaw chen chu ka pa titi ka ngâithla a, tui zet hian a ṭawng suam suam a, ka mit leh rilru erawh Zualbawihi awmna lamah hlir a awm daih thung a, customer ṭhenkhat, a bîkin mipain thil lei paha an han be vel te chu ka lo thik ru tlat zel a, keimah leh keimah ngei pawh ka inhrethiam hrep tawh lo!



Nî a tla fel ta maw tihah haw zâi kan rêl a, ka pa chuan Zualbawihi a phur a, keiin an hnungah bike-in ka zui reng bawk a, ka pa chu awm lo se zawng ka phur haw ngei àwm si a, ka pa mah ni se ka ngei rilru khawp mai.



In kan thleng chu in chung lamah ka chho vut a, Zualbawihi a chhoh nghal daih avanga chho hmanhmawh chûk pawh ka ni a, zep thu a cheng lo, ka kuah emaw ka fawp lo emaw a nih chuan awm ngaihna ka hre lo mai dâwnin ka hria.



Kawngka pawh kik mang lovin ka lut nghal thawr a, Zualbawihi chuan min rawn en deuh hau a, ka kut chuan a kawng hnung lamah ka kuah nghal chawt a, eng thu mah a sawi hmâin ka fawp zui nghal vawng vawng a, a tir lamah ṭah deuh ṭung mah se a hnu lamah erawh a inthlah dul tial tial thung.



"Ih....eng lo....i che thut zel a.....?" a rawn ti niah niah reuh a, zawhna nei mitmeng fiah fahran hian min melh chho deuh ran nghe nghe!



"Min thlah teh u Vincent" ti leh sapin ka kut chu nawr kian tumin tha a thawh zui zat a, engmah ngaihtuah chiang hman lék lovin ka lo che leh rum rum ṭhin tih ka hriat chhuah zawk avang chuan ka thlah ve nghal mai bawk.



"Phone leisak che ila a ṭha ang" ka ti thum chhal a, mak tih hmêl tak hian min en kiau a, chutah keimah bawk chuan



"Nilêng deuh thawa i aw hriat loh ngawt zawng a dik lo" ka ti leh dap a, a mak ti hmêl pawh kha a kiam ta deuhin ka hria.



"Phone leisak ka ngâi lo, lei ka tum sa reng alawm, tun thla hlawh ka làk hunah lei ka tum" a rawn ti zo chiah chu



"Chutiang chen chen ka nghah theih beisei suh Zualbawih, naktukah i phone tur chu kan lei nghal dâwn a nia, ka nu leh pate pawh ka lo hrilh ang" ka ti nghal nghut nghut a, zep thu a cheng lo, tunah thla lâi hawl bak a la ni lo va, thla thar hun ka nghah thlen peih ka ring bau lo!



"A ngâi lo tak tak, chu bakah ka tân a nuam lo, min buaipuiin min chhawmdawl nasa tawh bawk si, ka duh lo" a rawn ti fiah fel fai thlap thlap a, ka ngaihdan nen erawh a la inperhsan viau thung.



"Ka bialnu i ni tawh tih i theihnghilh em ni? Ka nu leh pate'n an buaipui che a ngâi reng reng lo, keima'n ka buaipui vek thei che, anni lètin ka ngaihtuah zàwk bawk che" ka ti deuh chhur chhur a, ka aw chu a dam fahran lo viau bawk.



"Luhlul tlat lo teh u Vincent....." ti hliain min melh chho râm a, kei ve thung chuan ka rilru sawhsawn ka tum lo hrim hrim!



"Luhlul lam a ni lo, ka be châk miau si che a, nang lahin phone i nei bawk si lo, chuvanga a rang thei ang bera phone leisak che tum pawh chu ka ni!" ka ti leh ta nghut nghut a, chutah keimah bawk chuan



"Ka rilru tur hi i hriatthiam ngei ka beisei" ka ti zui leh dap a, ka aw pawh a hmâ ai chuan hriat a nuam ta deuh!



"Ka inthlahrung tlat si alawm, a nuam ka ti lo" a rawn ti zo chiah chu



"Ka lakah inthlahrunna tur a awm lo" ka lo ti nghal vut a, ani erawhin a lû a thing nghal nawk nawk thung.



"Ni lo, chutiang ngawtin ka awm thei lo, i hrethiam lo ang u Vincent. Nang leh i chhûngte avanga dam khaw chhuak ve hram hram ka nihna te hi ka tân chuan theihnghilh theih a ni lo va, in laka inthlahrung lo thei pawh ka ni hek lo, ka rilru tur ngaihtuah la, min hrethiam hram záwk rawh" awkâ dam diai hian a rawn ti dat dat a, ka rilru kal vung nghet nghut lutuk kha a reh tial tial tih ka hre chiang hle bawk.



"A ṭha e...." tih leh room aṭanga chhuah chu ka rual zui zat a, thinrimna emaw lungawi lohna engmah ka nei lo va, ka ngaihdan ringawt kalpui ka tum bur chu a dik lo tih ka hre chhuak nghe nghe!



Ka room-a ka lut chu ka inbual fai nghal a, ka inbual zawh chuan in hnuai lamah ka chhuk thla a, Zualbawihi pawh ka nu bulah a lo che leh malh malh tawh a, kei erawh ka pa leh ka pute nen sitting room-ah kan ṭhu a, ka pa leh ka pu inbiakna chu ka ngâithla liam vel mai mai a ni ber a, phone ka khawih loh leh Zualbawihi awmna lam ka hawi phei leh zauh ṭhin a, mahse langsar takin ka awm lo thung.



Minute a liam leh hlek tihah chuan zanriah pawh kan ei zui nghal chu a ni mai a, ka pu a ṭawng tuam tuam a, ka nu leh pate'n an lo tuihnih ve zel bawk a, kei leh Zualbawihi erawh kan ngâwi reng a tih theih a, kan mit pawh a intawng leh chat ṭhin a, tum rèng vanga inhmu fuh ṭhin chu ni lo mah ila inen erawh kan tum rilru ve ve niin ka hria.



Zanriah kan ei kham a, Zualbawihi chu a che zui mawlh mawlh a, kei paw'n kan chaw eina dawhkante ka tifai ve mual mual bawk a, sawi tawh angin heti lam kawngah hi chuan Zualbawihi ka hriat hmâ aṭang daih tawh ka nu ka pui fô va, Zualbawihi rawn awm tâk avanga ei inna senghawi hnuhnawh thar vel chu ka ni lo tih mi dang paw'n an hre chiang hle.



Kan chet zawh hnu chuan sitting room-ah kim ṭhep ṭhawpin kan ṭhu dial a, chanchin thar kan ngâithla ṭhap a, chanchin tharah chuan Siaha lama tualthahna a thlen thu leh a thattu a tlan bo thu chu an rawn pûang a, tualthattuina a thah lah chu a nupui ngei a la ni zui a, Siaha lam a rik hrim hrim avang chuan Zualbawihi chu ka thlithlai ru deuh a, hlauhthawn hmèl zet hian min rawn en hrek hrek a, a awm dan chuan ka ngaih a tiṭha zàn lo khawp mai.



Chanchin thar chu kan ngâithla zui zel a, tualthattu chuan ṭhuihhruai a neih nûal thute kan hriat belh ta zel a, an tlan bona kawngah pawh amah chauha tlan bo a nih loh thu an rawn pùan chuan Zualbawihi lam ka hawi leh zauh a, ani erawhin min rawn en lèt ngam tawh lo hrim hrim thung.



"Thingpui ka va lûm ang e" ti sapin a tho zui nghal daih a, kal phei ve nghal mai ka chàk viau nà chu mi dangin an hriatthiam ka hlau ru ve tho bawk si nen ka ṭhut ngaiin ka ṭhu hle hle ta záwk a, mahse phei chu ka chàk ru zek zek tho.



Rei rial lovin Zualbawihi chu tray-a thingpui châwi chung hian a rawn phei a, thingpui chu min pe hmâsa ber a, ka ṭhutnain a zir êm vang a ni pakhat a, mi dangte pawh chu a pe kual zel a, mit lá sawn lék lova ka thlir leh tlawk tlawk palh loh nân ka en rei duh lo lui ngar ngar a ni ber a, kan awm dan, a ruka kan inngaihzawn dan leh kan inthup dan chu a nuam ru vei phian bawk.



Zan a rei tial tial a, ka nute paw'n mut zâi an rêl chu a ni der a, ka pu phei chu a mu daih tawh nghe nghe a, kei leh Zualbawihi pawh in chung lamah kan zui chho ve nghal mai a, room-a a luh dâwn chuan ka mangṭha thlap a, ani paw'n ngainatawm taka mi en chung hian min rawn mangṭha lèt dam diai a, kuaha fawh te chu châk teh mah ila min ning palh ang tih ka hlauh avangin kan insum hram hram záwk a ni.



A tukah chuan ni dang ang bawkin ka tho hmâ leh viau a, ka exer là zo ka haw chu kan in piah deuh lawkah pu Rochana nen kan intawk hlawl a, zîng kâr hmâ tak ni tawh lo mah se a la hmâ ang reng viau a, chutia kan inhmu nawlh chu a be hmâsa záwkah ka ṭang a, ani paw'n min chhâng ṭha viau a, mahse zù erawh a in tih ka hre ru reng thung.



Khatia a nupui kut a thlak vak ṭuma ka zu chhuk tih loh kha chu an inah ka kal leh tawh lo hrim hrim a, anni paw'n thawm an neih zui loh danah buaina an nei tawh lo ni turah ka ngâi hmiah a, thil dang buaipuia ka buai chu thuhran ni se, ka ngaihsak zui lutuk lem lo ti ila a sual tam lo ber ang.



Ngaihtei hnen aṭanga engmah ka hre tawh ngai lo te, pu Rochana hmêl te, a rim te chen chuan ka ngaihtuah zui rauh rauh a, 'anni hian an buaina an rawn thlen ngam tawh lo em ni?' tih ngawt chu ka rilruah a lian ta hle a, pu Rochana kal liam lâi ka thlir zui dauh hnu chuan an in lamah ka tei chhuk vut vut a, thil zawh chian tur ka neih vang a ni pakhat!



Ngaihtei te in ka zu lut chu pi Awmtei chiah a lo awm a, min lo be nghal siam siam a, beisei loh deuhin a lo hrisel ṭhat hmèl phian lehnghal a, Ngaihtei a la mut thu te, tho hmâ min tih thute chu a sawi barh barh a, kei pawh chuan tunlâi an chhûngkaw awm dan chu ka zàwt tlang nghal ve mai bawk a, ani paw'n ka zawhna awmzia chu a man rang khawp mai.



Pi Awmtei chuan pu Rochanan zú a in tlèm sàwt tawh thu chu min hrilh melh melh a, in chhûngkhura buaina a siam tawh ngai loh thu te, chutih ruala zù in a la sim hleih theih loh thute chu zep sî sê awm miah lo hian min hrilh a, ka beisei loh lam daih a nih bakah chanchin hriat hrehawm loh tak ka han hria chu ka lawm ru ve em em a, mahse ka lawmna chu anni nufa lawmna lakah chuan nep tè a nih ngei ka ring.



Rei ka awm lo va, kan in lamah ka lèt chho hnuk hnuk a, in kawta ka bike bal paw deuh ruai chuan ka mit a là hle a, silfai a mamawh tih ka hrethiam nghal mai bawk. In ka luh rual chuan bucket-in tui ka khâi chhuak a, nî pawh a rawn lang vek tawh a, ka chhûngte pawh an tho kim vek tawh bawk.



Chutia bike ka sil lâi chuan Zualbawihi a rawn chhuak teh hlawl a, ngâwi reng hian ka hnungah a ding a, eng vanga lo chhuak nge a nih pawh ka hre chuang lo. Kei tak paw'n ka lo be em em bîk chuang hlei lo va, mahse a be hmâsatu záwkah erawh ka ṭang ta tho.



"I tho nuam maw?" ka ti sup a, ani pawh chuan



"Immm.....nuam e" a rawn ti ve mai a, pâwna a rawn chhuah danah ei rawng an bâwl zo tawh a ni ngei ang.



"I thin a rim ti raw?" a rawn ti teh hlawl chu ka melh nghal zawk a, mitmeng fiah zet hian min lo en reng chu niin!



"Phone min leisak lo tura ka tih che avang khan i lungâwi lo ti raw?" amah bawk chuan a rawn ti leh sap a, a thutak hmèl viau lehnghal!



"Thinrim nàng, engati nge?" ka ti zo chiah chu



"Thinrim i ang ém alawm, i lungnih loh ai chuan min leisak mai rawh" a rawn ti ta malh malh reuh a, ka ṭhen deuh suk nghe nghe!



"Ka thin a rim hleinem Zualbawih, lungawi lohna pawh ka nei lo" ka tih lâi te chuan min en ran a, ka awm dan avanga hrehawm a lo ti leh hman tawh chu nuam ka ti bîk der lo.



"Min pehhel zel i tumin ka hria" hmui ti pawrh deuh tarh paha a rawn tih chuan ka nui chhuak huk a, ka insum hman lo a ni ber.



"Chu.....ka biak lo thlahlel ru em em bialnu ka lo nei reng a ni maw?" tiin ka fiam zui zat a, bike sil e ti lo chuan bike lam réng ka rilruah a awm tawh lo thung.



"Chutiang lam a ni lo, ka sawi tum i hre vek" a rawn ti leh tan tan reuh a, ka nuih a tiza zual ting a, mahse ka insum hram hram a ni.



"A nih....eng lam nge?" awkâ dam thlupa ka tih chuan



"I sual....." rawn ti nghalin min chum zui taih a, amah pawh a lawmawm tih tawh nàk alâia a ṭawngkam lehzel a'n lawmawm chu ka tân zawng nuih loh theih pawh a ni lo.



"Ka sual i tih miah loh kha aw....." ti leh hramin ka nuih sun sun a, ani erawh a nuih a za vak lo a ni ang, nui hmêl pakhatmah a pu lo, min ngei hmèl viau záwk, mahse min ngei tak tak lo tih ka chiang hle thung.



"Nang chû......i sual thiam ê......" ti vawng vawngin a kal sawn hnak hnak reuh a, mi dang hriatthiam phak hauh si lova min tihlim ru lutuk chu remcháng hmâsa berah ka fawp lo a nih paw'n ka kuah tal ang.



Bike sil e ti lo chuan mahniin ka khi leh suk ṭhin a, Zualbawihi zet zawng a danglam chiang a ni. A dinhmun ka hre chiang a, chhuanchham taka hringnun zingkawng a zawh chhoh dan zawng zawng nen lam ka hre vek a, chuvanga ngaihven leh a rin ngam mipa nih tum bur pawh chu ka ni rèng a, a rilru thianghlim lutuk te hian min tihlim ṭhin tak zet!



In chhûng ka luh hnu chuan ka zawng ru deuh a, mahse ka hmu mai lo thung. A hnu fêah insuk tur nen in chung lam aṭangin a rawn chhuk thla tharh tharh a, ka nu chuan su rih lo tur leh chhuna a suk theih thu a lo sawi nghal a, mahse Zualbawihi erawhin a hnial ve tlat thung a, ka nu pawh chuan a en liam vel mai mai ta tawp ringawt!



"Vawiin chu bike keng lovin Zualbawihi nen dawrah min va thlah la a ṭha ang, i rawn pêng kawi ziah tho a, bike ken buai ngâi lovin haw rual mai ila a ṭhat ka ring" tukṭhuan ei lâiin ka pa chuan a rawn ti dap dap a, ka hnar phal loh lam tak a ni.



"Immm....." ka ti ve dut a, Zualbawihi chu ka melh zeuh nghe nghe a, ani paw'n min lo en ve chiah chu niin, mahse a hawi sawn rang hle thung.



"Siaha lama zin chu i tum leh ta miah lo tihna em ni?" ka pu chuan a rawn ti khauh a, ka rilru a kal pêng nghal hlawk bawk.



"Tum leh ta lo mai, heti lamah buaina neuh neuh chin fel tur a tam si a, hna kalsana zin bo chì ah ka ruat lo" ka lo ti ve leh nghal mai a, dik tak chuan Zualbawihi min ngenna avang chauha engmah buaipui zawm lo ka ni!



"Tunlâi chu khawiah pawh hian sual a hluar ni maiin ka hria, rukruk leh tualthah chu thuhran ni se, ei ruk thleng hian a nasa em em vek a, mi chal lang leh lawk tak tak te pawh hian tum viau mah se an inthup sêng tak tak bîk lo a ni tawh ber e!" ka pu bawk chuan a rawn ti leh a, ram hmâsawnna lam vei mi tih takah a thusawi dan leh a thil thlir dan hi chu dik lo a awm khât khawp mai.



"Ni e, mahse heng sualna kan tih te ang chì hi chu a reh mai ka ring lo, khawvel pian ken a ni ve pakhat a, sual a awm hian ṭha leh dik kan hriat phah a, ei ruknate pawh hi a reh ngawt a rinawm loh! A chhan chu ei rukna nia kan ngàih leh ngàih loh hi a lo inang lo nasa khawp a, rilru hlemhletna kan nei te hi mihring kan nihzia tichiangtu te pawh ti ila a dik hlelin ka ring lo" ka pa chuan a rawn ti ve leh thlup thlup a, an pahnih hnih thusawi dan kalhmang chu dik ka ti viau mai.



Chaw kan ei kham a, ka nu leh Zualbawihin chawi eina an seng fel mial mial a, kei erawh hna kal tura insiam ka ngaih avangin ka room-ah ka chho daih a, puih pawh ka pui ta lo. A thu hrimin zîng lamah hi chuan ei leh inna seng hawi kawngah ka pui zen zen lo va, anni paw'n min hrethiam viauin ka hria.



Ka insiam zo ka room aṭanga ka chhuak chu Zualbawihi room lut tur nen kan intàwk chat a, ngâwi rengin room-a a lut chu ka zui lut ve nghal zat nghe nghe a, sawi duh nei hmêl taka min en lâi chuan ka fawp thut a, chaw ei hmâ daih aṭanga ka tih châk tawh kha a ni miau a, hun remchâng a rawn inher chhuak chiah bawk nen bawhpelh ka tum chhe tê them lo!



"Min hrilh duh i nei em?" ti supin a hmai chu ka nûl riak riak a, ka fawh zawh chiah vang nge ni, a thin a la phut ran mai bakah a awm dan chu a la pangngai lo hle.



"Immm......" tih bakin min chhâng lo nghe nghe a, chu chuan a mumal lohzia a tichiang viau bawk.



"Sawi la, ka lo ngâithla ang" ti dam dapin keimah záwk chuan ka awm dan ka siam rem a, chuti lo zawng keimah avangin a awm a nuam lo palh reu reu ang tih ka hlau a ni.



"Ih.....eng lo....." tia chawl datin a chil chu a lem dawk a, lungâwi zet hian ka en reng a, zám ngawih ngawih te pawh a ang hialin ka hria.



"Nizana mi kha.....ih.....eng lo....ka pa chu a nia, tualthata tlan bo pa kha, chuan....eng lo....a nupui, a thah tâk kha ka nu a ni bawk. Nizan khan hrilh nghal che chu ka tum reng a, mahse kei min venhim i duh luatah i bawhzui ka la hlau ru tlat si a, ka hrilh leh ta lo che a ni" a rawn ti deuh nawk nawk a, tukverh lamah a phei ta daih bawk.



"I sawi awmzia chu chanchin thara an púan pa kha a ni maw?" thil dang hriat belh chàk ru zeta ka tih chuan a lo bu nghauh a, dáwt a sawi loh tih pawh a chiang khawp mai.



"Engtin mah inrawlh suh aw u Vincent? Ka pu bulah pawh inhnamhnawih i tum tawh loh thu i sawi vek kha, min tiam rawh u Vincent, i inrawlh lo ang tih min tiam rawh" a rawn ti leh ta mawlh mawlh a, ka hmâah rawn dingin ka kut pahnih chu a chelh ran a, a pa leh a ṭhuihhruaite chhui kawnga chet là lo tur chuan min duh hle ni tur a ni.



"Ka sawi tawh ang khan in khua emaw Siaha lama zin ka tum tawh lo hrim hrim, mahse Aizawl khawpui chhûnga an rawn lut a nih erawh chuan ka tân haider theih a ni dâwn lo thung a, nang paw'n min hrethiam tawh mai a ni ang chu!" ka ti dut dut a, chu veleh nghet zet hian min rawn kuah nghal ringawt a, kei pawh chuan ka kuah lèt ve mai bawk.



"Nizan aṭang tawh khan ka hlauthawng nghal em em a, min rawn zawng chhuak ang tih hlauhnain ka khat a, dawra kal pawh ka chák tawh lo, ka pa leh a ṭhiante'n min hmu ang tih mawlh ka hlau!" a rawn ti deuh hlawp hlawp a, nizana chanchin thar kan enho lâi khan hlauhthawn rukna nei hmêl a pu khan ka hre rèng a ni.



"Eng pawh ni se, hlauthawng lo phawt la, i kiangah ka awm reng dâwn tih hria la, ka bula i awm chhûng chu i him dâwn tih hre bawk ang che" ka ti dam thlup thlup a, engmah a rawn sawi tawh lo va, kei tak pawh chuan han ṭawng thlamuan vak dan ka hre tawh bîk chuang lo.



"Le....insiam rawh le, ka lo nghak ang che" awkî hniam supa ka tih leh chuan kan inkuahna ata inla hrangin a insiam zui nghal melh melh a, ka uniform huh deuh kalh chu en zeuhin a lam ka hawi zawm zat a, hlauhthawn luatah a mittui a dang zo lo te pawh a ni mahnà!



In hnuai kan thlen thlak aṭanga rei pawh ni lovah dawr lam panin kan inphur chhuak zui nghal a, ka pa leh Zualbawihi chu dawr thleng thlahin kei erawh station lamah ka tlan tlang zui zat a, ka rilru kil khatah chuan Zualbawihi ta tur phone leisak a awm ru reng bawk.



A lakah ka lungâwi lo emaw a tih avangin phone ka leisak a remti hnuhnawh leh si kha a ni a, leisak ngei pawh ka tum ru ran a, mahse a duh dan ka ngainep vang erawh a ni lo hrim hrim thung. Tin, a zahawmna leh a zalenna pawh hnuaichhiah emaw dip dal ka tum hek lo.



Nilêngin ka buai leh mawp mawp hle a, kan pu nen minute eng emaw zah chu kan titi a, case hrawl deuh hlek lo lut pakhat chu ka naute bawhzuitîr a ngam loh thu leh keimah ngei chhui tura min duh thu a sawi awl lo va, chu case lo lut pawh chu a namai lo khawp mai.



Damdawi tawlhruk lampang hi a ni a, chhui dan tur leh chhui chin tur erawh min tuksak nghal thlap thung a, chu chuan ka ngaihtuahna a kuai pêng nasa hle bawk. Report leh file pawh ka hmuh hmâ hauhva bituk min siamsak diam chu mak ka ti ru hle a, mahse zawhna engmah ka záwt lo thung.



Station ka chhuahsan hnu chuan phone lei turin phone dawr lam kan pan ding nghal chat a, lei pawh ka lei awlsam viau a, thil dah luh ngâi leh khawih ngâi zawng zawng ka tifel nghal vek a, ka pek hunah chuan a lo lawm thiam leh viau ka ring.



Kâr lovah dawr ka thleng thuai a, ka pa'n phone a hman lâi tak chu remchângah làin Zualbawihi hnenah chuan phone chu ka hlan ta ngei a, chuti zung zunga ka leisak a ring chiah lo te pawh a ni ang, phawk zet hian min en kal a, a thu rawn sawi hmâsak ber pawh



"A va'n to hmél em em" tih a ni a, kei erawhin engtin mah ka uksak duh lem lo thung; a chhan chu ka leisak vek tawh tlat!



In lam pana kan inphur haw lâi te chuan lungâwi tih hriat tak hian a ṭawng ve barh barh reuh a, darthlalang aṭangin ka melh leh zeuh ṭhin a, a hlim tih chu hai rual a ni lo. Zanriah kan ei lâiin ka phone leisak thu chu mi dang a hrilh a, haw kawnga ka pa a hrilh duh miah loh chhan kha ka hrethiam ve ta chiah bawk.



Zan mut dawn thlengin lawmthu min hrilh awl lo va, a lawm tak tak tih pawh ka hre chiang hle. Keimah ber pawh ka bang chuang lo, ka mu nui leh suk ṭhin a, ka rilru leh ngaihtuahna chu Zualbawihi bakin a luah lo va, ka thluak chhûngah thil dang a leng hlawl lo a ni ber.



Chutia lungthu kim zeta ka mut men ran lâi chuan thawk leh khatah a ṭe ṭhawt thawm ka hre thut a, inperh tho nghal zawkin room aṭang chuan ka chhuak nghal thuai a, a room-a luh nghal mai ka tum chu chhûng lamah a lo inkalh tlat a, room chhûnga mi Zualbawihi lah a ṭe deuh ruah ruah bawk si, awm ngaihna ka hre lo lutuk chu ka â zo mai dâwnin ka hria.



End of chapter 7


.

[Havali Adam]

VINCENT
(Mizo Romantic Novel)

By

Havali Adam



Chapter 8



"Zualbawih....!!?" tiin kawngka chu ka chum ri dawt dawt a, ṭe thawm pawh a reh nghal hmak a, chu chuan beiseina min pe zut zut nghal bawk.



"Eng nge thleng Zualbawih!? Kawngka hi lo hawng teh!" ti leh churh churhin kawngka chu ka chum zui chawrh chawrh a, ka rilru a buai ru tawh bawk nen chum nâ tawh tak ka ni!



"Zualbawih.....!?" mangang ru zeta ka ti leh chiah chu kawngka a rawn inhawng thut a, ka Zualbawihi ngei mai chuan ṭap pur hian min rawn kuah nghal thlawp a, him dam taka ka hmuh avangin ka awm a nuam huai nghal nghe nghe!



"Engati nge? Eng nge thleng?" ka ti mawlh mawlh a, ani pawh chuan insut feih feih chung hian



"Ka mumangah ka pa ka hmu leh tawh, ka hlau lutuk, ka hlau tak zet u Vincent" a rawn ti thâm ṭiak a, ka kuah nghet sauh a, pawm kang nghal nawlhin ka room-ah ka luhpui ta daih bawk.



"Min la rawn zawng hmu ngei dâwn, ka thi duh lo" ṭap reng chung hian a rawn ti leh hlawp hlawp a, ka khawngaih dan chu pui miah miah tak a ni!



"I thi dâwn reng reng lo, ka bula i awm chhûng chu engtikah mah i thi dâwn lo, a ṭha em?" ti thum chhalin khumah chuan ka ṭhutpui a, ka sukpui dalh dalh a, ani erawh a la ṭap feih feih reng thung.



"Zanin chu ka bulah mu mai la a ṭhat ka ring" ti leh supin a sam hnawk niai chu ka hui kiang thuak thuak a, thlanin a taksa pum a luah khat vek a tih theih a, thinlung takin ka lainat khawp mai.



"Ṭap tawh suh le, a hlauhawm tawh lo a nia, i him tawh tih inhria la, thlamuang deuhin awm rawh, i thei ang em? I thei ang ti raw?" ka ti dam dap dap a, ani pawh chu a lo bu ve mai a, mahse a hlau tih erawh a la hriat hle.



Ka ṭawngkam thiamin a tlin tawh miau loh avangin ṭawng thlamuan pawh ka tum zui tawh lem lo va, ngâwi reng hian ka kuah deuh tawp a, ani pawh chu zawi zawiin a pangngai tial tial a, engmah a sawi tawh miah lo bawk.



Rei fê chu kan ngâwi dun vang vang a, thawm pawh a reh ṭha ṭhiap ṭhiap hle a, kan thawmah mi dang an harh miah lo a nih hmêl!



Khumah chuan ka mutpui riai riai a, ka pawm dan pawh thlakin ka taksa si chet hian ka kuah bet ta záwk a, thawm engmah a la chhuah chhunzawm loh zel avang chuan hlauhna nasa tak pai ru ṭun turah ka ngâi hmiah nghe nghe!



"I zia deuh tawh em?" ka ti hniam sup a, min chhâng eih lo va, chutah keimah bawk chuan



"Zualbawih....?" ti dam leh thlup hian a hmêl chu ka thlek dèk dek a, ani erawh a lo muhil daih chu niin!



"Hetiang mi i nih avangte hlei hlei hian ka duh tulh tulh záwk che tih i hre mang si lo a!" ti thum chhalin a biangah chuan ka fawp zeuh a, muthilh pawh ka tum tawh lo hrim hrim!



Zan boruak chu a reh dam ruih a, hriau pawh tla se a ri lawl thei ang tih tur vel hi a ni a, ka pang si cheta muhil siai siai hmeichhia chu lainat ru tak hian ka en leh vawng vawng ṭhin a, mihringte dinhmun inthlau lutuk chuan ka tha a tinâ ru veng veng bawk.



Kan dinhmun chanve chanve leh ang pawh nei se ani tân chuan nun nuam tak a ni pha dâwn tih ka chiang a, fahrah ni lovin a nu leh pate dik tak hnuaiah tal awm se zawng a hringnun zingkawng a va'n inthlak dâwn chiang rua èm!



Zankhuain ka muhil miah lo ta ngei a, Zualbawihi chu a rawn phu leh zawk ṭhin a, mahse a harh tawh miah lo thung. Khua a vàr hnu chuan ka ngáih pawh a ṭha deuh sawt a, tui taka a muhil thaw ri sat sat chu ka en vawng vawng a, kaih thawh tumna pawh ka nei chuang lo, a harh hun hunah rawn harh tawp mai rawh se!



Dim tak chung si hian ka kuah nghet deuh salh a, hlauhnaa khat kha tunah chuan thlamuang takin a muhil siai siai tawh a, chutianga a muhil hmêl chu engtik lâi paw'n ka thlir peih hial ta ve ang. Tin, ka bula thlamuang taka a muhil thei chu ka lawm a ni.



Chutia ngaihtuahna sênga ka mut men ran lâi chuan a rawn che ṭiah ṭiah a, ka ngaihven nghal thuai a, mitmeng phak chuap hian min rawn en a, kei erawhin ka lo nuih suk thung a, ka nuih a za pawh a ni chuang lo, a ngàih a ṭhat nân ka nuih a ni ber.



"A hrehawm em?" a rawn ti thawp sap a, a aw chu a chhang lek lek bawk.



"Hrehawm loh e" ka ti ve nghal dut a, chutah amah bawk chuan



"Nizana thil thleng kha mi dangin an hria em?" a rawn ti leh a, engmah an hriat loh thu ka sawi chuan a thaw huai a, kei tih loh mi dang hriat chu a duh vak lo ni tur a ni.



"Thil ngen duh che ka nei a....." a ngáwih deuh vang vang hnua a rawn tih leh chuan



"Sawi la...." ka lo ti sup a, a mut dan siam remin ka lam a rawn hawi a, ka âwmah a kut pahnih a nghat deuh ran bawk.



"Eng lo.....a theih chuan dawra kal ka duh tawh lo, hlawh pawh ka nei lo mai ang" a rawn ti chiah chu thutak zet hian ka en nghal a, ka rin loh lam daih a rawn sawi vang a ni pakhat!



"A chhan chu ka hlau, ka pate'n min hmu palh ang tih ka hlau a ni. Min hmuh vaih chuan min that ngei dâwn si a, mahse chu chu thlentír ka duh lo" amah vek chuan a rawn tih zawm zat a, engtia han ṭawng thlamuan tur nge pawh ka hre chiah tawh lo.



"Chutiang engmah a thleng lo ang" ka ti zo chiah chu



"Ni lo, thil thleng thei reng a ni záwk!" a rawn ti nghal thuai a, sawi tur ka tlachham ta hle bawk.



"Eng pawh ni se, dawrah chuan la thawk la ka duh, i tân paw'n hmâsawnna pakhat a ni a, i pate hmuh i hlauh avang ngawtin chutiangin awm tum suh, zalen takin awm zàwk rawh, ka sawi tawh kha, ka bula i awm chhûng chu i him ang" ka ti thum dut dut a, thaw chhuak hak hian min rawn kuah ta ringawt a, hlauhna a neih tlat avangin a awm dan pawh chu ka hrethiam khawp mai.



"I bula ka awm hian ka him a, ka thla a muang tih pawh ka hria, mahse kan awm dun reng thei lo, chu chu nang paw'n i hria" tiin min kuah nghet salh a, kei pawh chuti tho chu!



"Awm dun reng thei lo mah ila tunah chuan phone i nei tawh alawm, min mamawhna i neih phawt chuan min rawn call la, eng ang pawhin buai mah ila ka rawn kal nghal zel ang" ka ti ve leh thlup thlup a, tlêmin a awm dan pawh a zia ta deuh!



"I ti tak tak em?" a rawn ti hliai a, min melh chho kal nghe nghe!



"Ti tak tak e, i tân chuan engmah tih hreh ka nei reng reng lo" ti dam thluamin a chalah chuan ka fawp vang vang a, a fala hun hman dun reng mai chu ka duh hial a ni.



"Tho tawh ila?" kan ngáwih dun vang vang hnu chuan a rawn ti sep a, kei pawh chu zi mar ṭuih ṭuihin ka tho zui ve nghal mai bawk.



Ka room aṭanga kan chhuak chu in hnuai lamah kan chhuk thla a, kan pahnih chiahin kan la tho va, hmà pawh a la hmâ ang reng viau nghe nghe!



Thil dang daih sawiin Zualbawihi chuan min be melh melh a, ngaihngam tak leh hlauhthawnna nei tawh lo tih hriat taka a awm leh thei ta chu ka lawm rilru kher mai.



Chumi nî aṭang chuan sawifiah thiam chiah si loh, mahse hriat fiah theih leh thinlunga chiang em em si hian kan inpawhna, kan inngainatna leh kan inthlakhlelhnain kan hringnunah ro a rêl chho va, a hmâ zawng khan kan inngaina lo e tihna lam ni lovin, a hmâa kan awm ṭhin dan nen a inang tawh lo nasa hle tihna mai záwk a ni.



Ka ngàih châng leh a aw ka hriat châk châng paw'n phone-in ka be mai zel a, kan inkârah chuan inpawhna nghet takin bu a khuar a, kan hlim a, kan hun hman dan a hahdam a, han infiam deuh barh barh châng pawh kan nei fô va, chungte hlei hlei chuan kan inzawmna a sawh nghet lehzual hialin ka hre ṭhin.



Zan khat chu inkhawmpuiah ka sâwm a, thawhṭanni zan a ni nghe nghe a, KṬP inkhawm a nih avanga inkhawma sáwm chu ka ni pakhat hrim hrim a, Pathianni tih lovah hi chuan a inkhawm lo tluk a tih theih a, hriat pawh ka hrethiam viau mai.



Keimah ber pawh hi ka inkhawm tam hran lo va, ka pa'n inkhawm uar deuh tura min tih châng pawh hian ka 'aw' liam vel mai mai ṭhin a, ka hman loh chu thuhran ni se, ka inkhawm peih vak ṭhin lo a ni ber.



Amaherawhchu, khatia Zualbawihi nen inzawmna kan neih tâk aṭang kha chuan ka rilruah inkhawm lam a awm ve ta rauh rauh a, zep thu a cheng lo, a chhan tak pawh ka hre bîk lo, keimahah kim lo anga hriatna ka nei tlat a, Zualbawihi nena han inkhawm dun vel chu ka chàk hrim hrim pakhat bawk.



Inkhawm ṭan hmâ, minute 15 vel la awmah biak in kan thleng a, mipa leh hmeichhia an lo ṭhu hrang vek chu niin, mahse ka bul lova ṭhuttîr erawh ka tum teuh lo, amah tak paw'n a duh bîk ka ring chuang hek lo.



Mipa lênah ka ṭhutpui ta hmiah a, ṭhenkhat chuan min rawn en leh zauh zauh ṭhin tih pawh ka hre reng, mahse ka hre lo der hmak thung. Zualbawihi ber chuan hrehawm a ti ang tih mawlh ka hlau a, ka hruai ang ànga a awm ve tawp chu a rukin nuam lo a lo ti viau ang tih ka hlau a ni.



Inkhawm programme chu short sermon a ni a, branch hruaitute aṭangin mi pahnihin thu an sawi a, an sawi rei lo dun hle nghe nghe a, inkhawm pawh kan bâng thuai rèng a, inkhawm kan han bâng chu kohhran hall lamah thingpui inhona kan nei zui leh a, Zualbawihi nen chuan kan awm dun deuh chawt a, nuam lo han tih em emna tur a awmin ka hre lo bawk.



"Vincent......?" min rawn kotu lam chu ka hawi nghal zawk a, Mâmi lo ni rengin!



"I rawn inkhawm ve hman teh mial elo?" nui var var pah hian a rawn ti leh a, kei pawh chuan



"Immm.....a nih hi...." ka lo ti ve mai a, Bial Zâipâwl member a ni bawk a, a ṭawngkam a felfaiin hriat a nuam zaih zaih khawp mai.



"Hei hi i ṭhiannu em ni?" rawn ti lehin Zualbawihi chu a en ta ran a, kan sawi chhuak tam lo bawk a, kan bulah a khawsa tih a la hre lo ni ngei tur a ni.



"Immm...." ka ti thum dut a, chutah amah bawk chuan



"A nih chû......lo inkhawm ziah rawh aw? Vincent-a hi rawn hruai harh deuh la a ṭha ang, inkhawm a thatchhe lutuk....." tiin Mâmi chuan a be zui nghal bawrh bawrh a, Zualbawihi pawh a lo nui ve sak nghe nghe!



"Kan kal dâwn em ni ang?" tia Zualbawihi ka bia chu Mâmi záwk chuan



"A ngâi lo, la haw s'u, hla zir a awm alawm, in zir ve nghal law law ang chû.....?" a rawn ti nghal zat zat a, Zualbawihi chu ka en nghal vut a, ani paw'n min rawn melh ve chiah bawk.



"Zài lamah hi chuan ka thawhhlawk lohzia i hriat kha, kan haw záwk ang e" ti dutin Mâmi chu tawi té hian ka nuih deuh suk a, ka nuih a za pawh a ni chuang lo.



"Han zir ve thei ula chu ka duh asin le, i ṭhiannu pawh hi ka bulah a ṭhu mai ang a, hrehawm a ti miah lo ang" a rawn ti leh hliai a, mahse ka lo hnial fithla ta tho tho thung.



Kan in lam pana kan haw lâi chuan Zualbawihi kut chu ka chelh ran a, rilru engthawl hmèl zet hian a hawi kual lauh lauh reuh a, inbe miah lo e ti lo chuan kan inhaw lo dun khawp mai.



Rei lovah kan in pawh kan thleng thuai a, ka nu chuan Zualbawihi chu kan inkhawm dan chanchin a lo zàwt nghal malh malh a, hmeichhia tih takah an thil hriat duh záwngte hi a ho ka lo ti ṭhin; an inzàwt chìk nasa thei bawk si!



Ka room-ah chhovin ka inthlak a, ka phone ka'n en chu Thansanga hnen aṭang missed call vawi hnih lâi a lo awm a, ka call back zui nghal a, kan inbiak tirh aṭang hawt min hmuh a duh thu leh kan thil buaipui mêk lâia inhnamhnawih an tam a rinzia a rawn sawi nghal mawlh mawlh a, kei tak paw'n a ngaihdan ang chiah chu ka putna a rei tawh!



Tun hnai hian damdawi tawlh ruk chîngte chhui hna kan thawk mêk a, chhun lam ai mah chuan zan lamah kan buai záwk mah a, kan pu ber chenin kan hnathawh lâiah chuan rilru kan sâwrbing hlawm hle a, kan thil chhui lâi chu thil tam tak inthupna leh innghahna niin ka hre nghe nghe bawk.



Chhuak tura ka insiam zo chu in hnuaiah ka chhuk thla a, ka nu záwk chuan ka kalna tur min lo zàwt nghal chat a, Zualbawihi paw'n zawhna mitmengin min lo en ralh a, thil pawimawh tia ka chhuah a ngàih thu ka sawi zo chu fimkhur turin min rawn ti nghal pang a, Zualbawihi erawh ka nu a awm ve reng vang nge ka hre lo, a ngâwi ran thung.



Motor hawl chhuah ka tum deuh uk tawh chu ṭhulh lehin bike záwk ka khalh chhuak a, Thansanga nena kan inhmuhna hmun tur lam panin kan tlan par par a, ka naute zînga ka mi rin ber a ni bawk a, ka thil chhui leh buaipui mêk kawngah pawh hian a fin leh taimàk zâr ka zo nasa tawh khawp mai.



Kan han inhmu ta chu duh leh mamawh hmu ang hrim hian thil pawimawh kan sawi dun nghal malh malh a, a lan dan chuan kan MLA te zîngah pawh inhnamhnawih an lo awm a nih hmêl a, kâr hmâsa khan an mi chhawr, damdawi phur kuala pe chhawng ṭhin pakhat chu kan man tawh ngei a, mahse a lang lo ruamah inrawlh dang an lo awm hrawl hre hraw viau dâwn niin a lang.



A mi rinhleh te zînga pakhat hming chu Mizo hming pangngai a ni ta hauh lo mai a, chu chuan ka ngaihtuahna a tikal thui viau nghe nghe!



Mara hnam hming rawngkai a ni kher bawk nen Siaha lam ka rilruah a rawn lang nghal a, chu a mi rinhlelh pa chu chhuia bawhzui hmâsak ber ka ti tlu ta hial a, ka rilruah chuan Zualbawihi pa ṭhuihhruaite lam ni tlata hriatna ka nei a, chuvanga thutlukna siam nghal hmiah pawh chu ka ni!



Eng emaw chen chu thil kan sawi dun a, kan inṭhen fel meuh chuan dâr 12 a lo ri hnai thuak tawh a, khawmuang tawh lovin in lam ka pan ding nghal ta vang vang bawk.



In ka thlen chuan thawm a lo reh ṭhiap tawh a, an lo mu vek tawh tih a hriat hle a, ka room-ah chhovin ka inthlak zui mual mual a, zan dang ang bawkin Zualbawihi room-ah ka phei leh zuaih a, a mut ṭhat leh ṭhat loh ka thlithlai a ni ber a, ka en dik thlap lo a nih chuan ka awm thiam tawh meuh lo záwk a ni.



Lungkham nei lo tih hriat tak hian Zualbawihi chu a lo muhil siai siai a, room kawngka kalh tawh lo tura ka tih aṭang khan kalh a mang a nei tawh lo a tih theih a, chu pawh mangṭha lo a man chânga ka ngaihven vat theih nân leh bawk a ni a, zep thu a cheng lo, ani tluka ka hmeichhe ngaihven leh ngaihsak hi an la awm kher lo ang.



Minute eng emaw zah chu rilru leh ngaihtuahna sêngin hun ka khawhral hmâsa leh tê tê a, dâr 2 dâwnah ka mut a rawn chhuak ve ta chauh a, ka muhil ta ngei a ni ang, ka harh meuh chuan khua a lo vâr fel diam tawh!



Exer là tura thawh mai ka'n tum chu ka rilruah Zualbawihi thusawi, zan ka men rei ṭhin avanga zîng tho hmâ tawh lo tur leh exer pawh là fô tawh lo tura min tih lâi kha a rawn lang zawk a, chawp leh chilha mut ṭhat leh nghal mai ka tum chu ka inngaihtuah chiang a, za vak lo hian ka khi suk a, Zualbawihi ang em ema min thunun awlsam thei mihring hi an la awm paw'n ka hre lo hial a ni.



Chutia mut ṭhat leh ka'n tum chu ka rilruah thil dang a rawn lut a, tho tharhin a room lamah ka phei ta záwk a, room ka luh rual chuan chhûng lamah kawngka ka kalh nghal a, a taksa si cheta mut chu ka chák thar thut a ni ber.



A hnung lamah muin ka kuah run a, rei lovah a rawn harh thuai a, mahse hlauthawng hmêl leh mak ti hmêl pawh a pu chuang lo. Ka tinâ dâwn lo tih a hre chiang em em tawh a, a duh loh zâwngin ka awm dâwn lo tih nen lam a hre vek a, chutih rual chuan kei erawh insum a ngâi nasa ṭhin khawp mai.



Inhaw lo tawn taka kan taksa a insik rial tawh hi chuan ka mipa nihna a rawn lang leh nge nge ṭhin a, cháknain min hneh zo ang tih hlau ru renga insum ngar ngar châng pawh ka ngah a, duhthaw taka fawh ngawng ngawng ngawt loh chu tih theih ka nei der si lo, insum ve nasa ṭhin tak chu ka ni!



"Nizanah i lo haw lâi ka hre miah lo" a rawn ti ban deuh chuap a, ṭawngkâa chhâng lovin ka khi suk a, chutah amah bawk chuan



"Nghah chhuah che ka tum nen ka mut kha a chhuak lutuk a, ka muthilh lâi pawh ka hre lo" a rawn ti thâm leh raih raih a, ngâwi rengin a lamah ka awn riai riai a, lungchim zet hian ka fawp ta vawng vawng a, ka hahdam sawng sawng bawk.



"Mi dang an lo kal thut ang e aw, a zahthlak dâwn lutuk" ka inlàk hran rual rual chuan a rawn ti leh nghal zat a, hlim rilru takin ka nui ta tawp ringawt!



"Tho ang" tih leh thawh mai chu a tum zui nghal a, mahse ka kuah bet deuh run thung.



"Tho ang u Vincent, nî pawh a chhuak ṭan tawh a nia, tho tawh ang" a rawn ti leh zat zat reuh a, lungâwi fahran hian ka nui nghawr dat a, ani pawh a bang chuang lo, tawi têin a rawn nui ve nghal zat bawk.



Thawh a tum apiang chuan ka kuai mu lehzel a, thinrim ni chiah si lo, titau deuh reuh sia a'n awm vel te hlei hlei chuan ka lung a dum ngawih ngawih a, ka ngàih a ṭha hliah hliah a, rei fé ka fiam luih ngar ngar hnuah erawh kan tho ve ta nge nge a, in hnuaiah inzui thlain thingpui min siamsak nghal a, che reng chungin min be melh melh a, kan zîngkâr boruak hip dun chu a nuam leh pek hle.



Mi dang an rawn thawh ve chinah erawh a tîm ru deuh nghal tih ka hrethiam vek a, ka nu nen an titi zui ta daih a, Zualbawihi nena kan inkâr chu kan pahnih tih loh chuan an la hre lo hrim hrim a, unau inkawm ngeih tak ang thawthangin min ngâi ni maiin ka hria.



Dârkâr tin chu an liam zut zut a, kei pawh station lamah ka buai mawp mawp leh tawh hle a, min hmu turin Lucy-i a rawn kal leh ta nghal a, han hnar hluk hluk ṭhin mah ila a zak der bawk si lo.



Amah avangin hna pawh ka thawk ṭha hlei thei meuh lo va, a nu leh pate bula ka laka a rilru puthmang dik tak sawi chhuah chu ka duh rum rum tawh a ni.



Min kiansan theih nân tiin bialnu ka neih thu ka hrilh tlang ta rawt a, mahse Zualbawihi nena kan inngaihzawn thu erawh ka hrilh duh lo hrim hrim thung.



Ka hrilh a nih ngat chuan ka chhûngte'n an hre chhuak nghal dâwn chiang a, chu mai bakah Zualbawihi tak pawh a lo va ṭawngkhum hrep duh dâwn tlata hriatna ka nei a, ka hrilh chiang duh lo chu ka tisualin ka ring miah lo bawk.



Bialnu ka neih thu a hriat tirh chuan tlêmin a awm dan a danglam deuh a, ngaihtuah zui veng veng hmêl hi a pû a, mahse rei erawh a ni lo chiang khawp mai.



Min bansan mai a tum loh thu a sawi piap piap a, ka changkham lutuk chu hrawk hrep ka duh hial a, mahse chutianga hmeichhia han ṭawngkhum chiam chu a mipa hna lo ka ti leh lawi tlat bawk si, hna lamah kan buai bawk nen buaina a thuah hnih hi a ni ringawt!



Ka hna bâng, dawr lam ka pan lâi chuan Thansanga hnen aṭangin phone call ka dawng a, ka là nghal mai a, thlithlai zui tura ka tih mihring kha Aizawlah ngei a lo hmu chu niin!



Rang tak hian ka inkhalh lèt nghal a, Thansanga awmna lam chu ka pan thuai a, chu kan mi chhui mêk pa chu kan man a, a kâ kan àntîr thei a nih ngat chuan buaina tam tak a kiang dâwn tih ka chiang a ni.



Rei tlan lovin Thansanga awmna chu ka thleng thuai a, dawr pakhatah hian min lo nghak a, kan mi chhui mêk pa chu building pakhata a luh thu leh a luhna building nen lam chuan min kawh hmuh a, uniform ka hak loh nî a ni kher bawk nen Pathianin min ṭanpui se, man ngei ila ka ti khawp mai.



Kan mi chhui ruk pa lo chhuah leh hun nghah pahin thingpui kan in khawtawi a, kan in man chu chhuak thut thei kan nih avangin kan pe láwk diam nghe nghe a, chutia kan chan ruk ran lâi chuan Zualbawihi hnen aṭangin phone call ka dawng a, ka làk rual chuan



"I lo la haw dâwn lo em ni?" a rawn ti nghal sap a, dawr ka thleng har tawh a ti te pawh a ni mahnà!



"Ka lo haw ṭep, a rei tawh lo ang" tiin ka chhâng ve mai a, chutih lâi tak chuan kan mi chan ruk pa ngei mai chu a rawn chhuak ta hlawl a, phone pawh chu ka hmet tawp zui nghal thuai nghe nghe!



"Lawk! Nghak lawk ang!" tiin Thansanga tho uaih tawh chu ka pawt ṭhu a, va man nghal pawp ai chuan a kalnaah zui zel ila, thil dang pawh kan thur chhuah ṭeuh theih ka rin vang a ni.



Kan mi chhui ruk pa chu car vâr pakhat bulah dingin phone a hmang tê tê a, a awm dan aṭang chuan mi pangngai ang mai a ni a, mahse a lan ang ngawt a ni hauh si lo. Car-ah chuan lutin a inkhalh chhuak zui nghal a, keini pawh kan che chhuak ve nghal zat bawk.



Lêngpui lam pan tum ni àwm hrim hian a tlan zel a, zuitu a nei tih a inhriat rual rual chuan a speed a sàn nghal vak a, keini pawh kan tlan chak sawt hle a, eng ang paw'n harsa dâwn se chuti maia chhuah erawh ka tum der lo!



Kawng chhak lamah car chu a tiding dawt a, bag ak chung hian ramhnuai lamah a tlanchhe nghal hlawk hlawk a, keini paw'n kan um zel a, chutah silai a lo keng reng chu niin!



Mizo ṭawng ni miah lova ṭawng tuarh tuarh pah hian min rawn kap fua fua a, duh ang paw'n kan hnaih chilh thei ta bîk lo, pawngpaw ngam chì a ni tlat lo a tin a ni!



Chutiang vel chuan minute eng emaw zah chu kan inveh a, Thansanga ning tawh chu a che chhuak thut a, dan pawh ka dang hman lo.



Silai a puak ri zui nghal zat a, Thansanga chuan a bânah a kap hliam nghal a, kei pawh insum thei ta bîk lovin ka pistol chu ka phawrh a, ka hmet puak ve ta nge nge a, a ke ah ka kap fuh nghe nghe a, Thansanga chuan a va hnaih chilh nghal thuai a, kei pawh ka che muangchâng lo khawp mai.



A bul kan va thlen chuan silai pawh a lo khawih peih mang der lo va, a ke mawlh chu nâ a ti tih a hriat hle a, chutah phone call a la dawng leh ta nghal a, a phone chu ka láksak vat a, ka chhâng zui nghal zat bawk.



Mizo ṭawng ni miah lo hian a rawn ṭawng nghal zuah zuah a, Thansanga chuan kan mi man pa chu ngâwi turin a lo ti ran bawk. Phone-a mi chuan kan mi man pa hming ni ngei tur hian a rawn ko chiam a, chu lâi tak chu remchângah làin kan mi man pa chu a rawn rak zui zat a, an ṭawng kan hrethiam lo ber chuan hrilh a tihai khawp mai.



Phone chu a rawn tawp thut a, ka phone záwk phawrhin station lam ka be pawp a, ka nauteho chu kan awmna hmuna lo kal turin ka chah zui nghal a, kan mi man pa, Mizo pawh ni hrep lo chu dawp chhuah ka tum ruh bur bawk.



Rei rial lovin ka naute ho pawh an rawn thleng thuai a, station lamah an lèt nghal a, zanin hna a awm leh ta phawt chu a ni a, mahse ka awm a nuam huai tawh, a chhan chu an mi rin ber te zînga mi leh an mi chhawr ber kan man tawh miau a tin a ni!



Ka phone chu a rawn ri ral ral a, phone call lo lut ka'n en chu Zualbawihi bawk hi a lo ni a, thil dang buaipuiin hun ka hmang leh daih si a, biak pawh ka be ṭha hman lo a ni ber.



"I va'n rei tawh em em u Vincent? I buai em ni?" phone call ka làk rual chuan a rawn ti nghal a, rei min ti tur pawh chu a ni réng a ni.



"Ka lo kal mêk e" tih bakin ka chhâng lo va, ani pawh chuan thil dang min zàwt zui hran chuang lo.



Aizâwl khaw chhûng lam panin ka tlan par par a, eng pawh ni se, tunah rih chuan kan dawr thleng phawt ila, Zualbawihi tak pawh a awm a nawm deuh huai ka ring.



Ka tlan muang lo ang reng bawk a, Aizawl khaw chhûng chu ka thleng thuai a, kâr lovah kan dawr pawh ka thleng ta nge nge a, Zualbawihi lo hlauthawng ru hmêl chu ka hmuh hmaih lo chiang hle bawk.



In kan thlen hnuah pawh Zualbawihi chuan zawhna mitmeng zet hian min en leh zauh zauh ṭhin a, in chung lamah chhohpuiin tlaia ka hun hman dan chu ka hrilh ta vek a, ka thil buaipui mêkah chuan fimkhur turin min chah awl lo va, kan mi man pa chanchin kimchang erawh ka hrilh duh rih lo thung.



Ka hrilh a nih chuan a pa leh a ṭhuihhruaite a ngaihtuah chhuak nghal dâwn tih ka chiang a, hlauhthawnna a nei leh ngei bawk ang a, mangṭha lo thlengin a mang zui leh lo ang tih pawh a sawi theih loh, chuvanga hrilh kim vek duh lo pawh chu ka ni!



Zanriah kan ei lâi chuan zana ka chhuah tur thu leh damdawi tawlh ru ṭhin pakhat kan man thu chu ka chhûngte bulah ka sawi a, chaw ei kham vela chhuah ka sawi zo chiah chu Zualbawihi a kham nghal daih a, mi dang awm lo ngat se zawng ka en zui dauh dauh ngei ang.



Chaw ka ei kham chu ka room lamah ka chho nghal a, insiam ka ngái hran lo va, Zualbawihi a chhoh avanga chho ka ni záwk mah a, khumah a lo ṭhu ngâwi reng a, a room-a ka lut thawm pawh chu a hre vek tih ka hria, mahse a lo hawi eih lo va, room-a lut chu keimah ka ni tih a hre chiang viau te pawh a ni mahnà!



"Tunlâi hi i buai ê......" a bula ka ṭhut thlak rual chuan a lo ti sap a, en pawh min en chuang lo.



"I lo haw har thei bawk si" a rawn tih zawm zat a, ka kuah ta ringawt nghe nghe!



"Min ngâi em ni?" a rilru hre chák ru ang reng taka ka tih chuan



"Immm....." a lo ti hniam raih reuh a, zep nei miah lova a rilru min hrilh tlang tawp ṭhin hi ka lawmna leh hlimna pakhat a ni.



"Kei paw'n ka ngâi che alawm...." ti thum dutin a chalah chuan ka fawp vang vang a, min ngâi a ni tih hai rual loh hian min rawn kuah ve nghal chial bawk.



"Ka hnathawh lâi hi a serious ang reng a, ka chinfel zawh hunah chuan hun pawh kan hman dun tam thei tawh ang ka ring" ka ti leh dap a, rei awm thei ka ni lo tih inhre ran mah ila ani nena awm dun reng mai chu ka thlahlel ru khawp mai.



"Fimkhur hram rawh aw.....?" ṭum dang ang bawkin a rawn ti leh ta nge nge a, kei pawh chuan



"Tehreng mai" ka ti ve nghal sup a, ka nu leh pa leh ka pute min ngaituahna ai mahin a mi ngaihtuahna chu ka thinlungah a ri lian záwk hial te'n ka hria.



"I lo haw har leh ang em?" a rawn ti sep a, ka fawh cho zet ang hrim hian ka lam a rawn hawi chho a, mahse chutiang lam rèng a rilruah a awm lo tih ka hre chiang viau thung.



"Ka hre lo le" pangngai taka ka ti zo chiah chu



"Ka lo nghak ang che" a rawn ti dam diai a, ka insum thei leh ta ngàng lo.



Duhthaw leh lungchim zet hian ka fawp a, ka inlàk hran hnuah pawh ka fawp nawn leh ngawng ngawng ṭhin a, a kut pahniha ka nghawng a kuahna te hlei hlei chuan ka awm a tinuam a, ka rilru a tizàngkhai a, a thinlungah bu ka khuar thuk ve tawh hle a ni tih min hriattîr ni mai te'n ka hre hial a, kan awm dan engkim chu a hahdamthlakin a nuam dangdai tak zet!



Ka haw hmâ zawng min lo nghah a tum bawk si nen in chu ka chhuahsan thuai a, station lam pawh ka thleng phei har lo hle a, kan mi dawp tur dawp vat vat a, haw leh thuai chu ka rilruah a lian ta ber a, a chhan pawh eng dang vang a ni leh pek lo, min ngâitu ka Zualbawihi vang bawk a ni.



Kan mi man pa chu kan han dawp ta ngei a, a tir lamah chuan a sawi ṭha duh der lo va, ka naute thinrimin kut an thlak sawk sawk a, a thawhpui leh amah tîrtu te chu tute nge an nih kan záwt awl lo va, ani lah chuan sawi a hnekin ngàwih a chuh tlat mai bawk si, beisei ang ngawtin thil a awlâi viau dâwn lo niin a lang!



"Vincent, inbe lawk teh ang" rawn titu kan pu ber hmêl ka hmu thut mak ka ti ru hle a, tun ang zanah a hmêl a rawn lan chhe tê them ngai bawk si lo, mak ka ti pawh chu a àwm lo hran lo.



"Eng nge ni ta Sir? I rawn lang ve peih a ni maw?" tiin hawihhâwm tak leh zah tak hian ka bia a, ani pawh chuan



"I case buaipui lâi hi a theuneu si lo va, ka rawn thlithlai deuh mai mai che maw le, eng nge kan àn dáwn? In la dawp chhuak lo em ni?" a rawn ti lûam a, ṭum dang ang lo taka ka thil chhui lâi a rawn ngaihven uluk ve peih hrim hrim pawh chu thil mak a tling tho mai.



"Rin ai a harsat hmêl phian, mahse a bul ṭanna chauh a la ni a, kan dawp chhuah hunah chuan kawng pawh a insu kiang huai ang ka ring" ka ti thlup thlup a, ka inringtàwk viau bawk.



"Kut in thlak nasa lutuk ang e, a tàwk a awm a nia" rawn ti hniam charhin amah bawk chuan



"Ka kal ang e, fimkhur hle ang che" a tih zawm leh nghal zat a, pâwn lamah zui chhuakin station kawt thleng ka thlah a, an tlan liam hnu thleng chuan ka thlir zui vung vung nghe nghe!



Station chhûnga ka lut leh chu kan mi dawp mêk pa pawh a lo chaurau tawh ang reng hle a, thih huam meuhin a lo ṭang kawh tlat ni tur a ni. Ka naute zînga ṭhenkhat chu an beidawng titih der a, keimah ngeiin dawp záwk ila ṭhain ka hre ta bawk.



Kan inhmachhawn ran a, mi dang erawh kan bul hnaia awm rih lo turin thu ka pe a, an chhuak diak a, kan mi man pa chuan thinrim tih hriat tak hian min en reng a, ka che vel hrim hrim chu mit là sawn lêk lo hian a en a, min tham lo ni berin ka hria.



"Tu nge tir che? Tu nge hetiang thil titur hian thu pe che?" pangngai takin ka ti a, english-in ka be nghe nghe a, a chhan pawh Mizo ṭawng a thiam lova ka hriat avang leh a hrethiam lova ka hriat vang a ni.



"Khang police phiangsenho ai khan thuneihna i nei tih leh i lal záwk tih ka hria, min chhuah lo a nih chuan zanin là lâ lá hian buaina nasa tak in tàwk ngei ang!" Mizo ṭawng pai miah lova a rawn ṭawng chhuak chiah chu ka meng zim nghal sun a, ka thutak zual hle bawk.



"Sawi rawh le, tu tâna damdawi hi tawlh ru nge i nih?" Mizo ṭawng ngeiin ka ti ve leh ta nghut a, ka nauteho bulah kha chuan a kâ a àn ve chhunah pawh ṭawng dangin a rak chiam chiam a, ka bulah erawh mi dang ai ka thu záwk tih a hriat vang nge pawh ka hre lo, a awm dan a dang hlawk ti ila a sual tam lo khawp ang.



"Eng ang paw'n min dawp mah la ka sawi dâwn chuang lo, chuvangin min chhuah hle hle záwk rawh, buaina pawh i tawh loh phah ang" huaisar zet hian a rawn ti chhar chhar a, ka dawhtheihnain a tlin bîk der lo.



Kan awmna hmun aṭangin ka chhuak vut a, ka nauteho bulah chuan vaw turin ka hrilh nghal a, zawhna a chhán hmâ zawng vaw turin ka hrilh a ni ber a, mahse vaw hlum lo turin ka chah uluk hle thung.



Ka rilru tifîmin station kawtah chuan ka awm deuh vang vang a, ka sana ka'n en chu dâr 11 a lo pel fel leh diam tawh der a, Zualbawihi ka hre chhuak nghal zawk a, min lo nghah tur thu kha a sawi ngei a, tun ṭum chu min lo muthilhsan mai mai ka ring tawh lo, min lo nghah a tum ruh hmèl êm mai.



Ka inngaihtuah deuh vang vang a, va haw zuaih a, Zualbawihi muthilh hnua station lam pan leh chu ka rilruk ta záwk a, ka haw dâwn chuan Thansanga ka hrilh a, mi dang erawh ka hrilh lem lo thung. Rei rial lovin kan in pawh ka thleng thuai a, thawm a lo reh ṭhiap tawh nghe nghe!



In chung lamah ka pen chho khup khup a, ka chho thawm a lo hria a ni ngei ang, ka room ka hmu pha ta maw tihah Zualbawihi chu a room aṭangin a rawn chhuak thuai a, min rawn pan nghal chat a, min lo ngaihtuah viau a ni mahnà, ka âwmah a bei thlawp a, kei paw'n ka lo kuah lèt nghet hle.



A room-ah ka luhpui a, ka rin leh beisei ruk ang ngeiin min ngaihtuah thu chu a sawi melh melh a, thlahlel zet hian ka kuah run a, chutianga ka kuah tawh chuan a awm a nawm veng veng ṭhin thu min hrilh tawh kha a ni a, ka tân lah nuam bawk, kan inkâr chu a thukin a nghet tawh tak zet a ni tih hai rual a ni mawlh lo.



"Muhil tawh rawh le" dam dapa ka tih chuan a mut dan a siam rem sat sat a, lungâwi zet hian ka nui suk nghe nghe!



A sam leh a hnung chu ka chûl tawn hliau hliau a, rei pawh ni lovah a muhil ta thuai a, mahse ka buaina ber chu tiharh lova thawh dan mawlh a ni.



Ka bân ka lák sawn riai riai lâi te chuan a harh palh ang tih ka hlau hle a, harh vaih se zawng station lama ka lèt leh a phal dâwn lo tih ka chiang si, tihharh chu hlau tak ka ni!



Rei fê ka beih hnuah tiharh miah lovin ka thawhsan ve thei ta hram a, minute pawh ka khawhral hnem hman khawp mai. Station lam chu hmanhmawh fahran lo hian ka pan a, mahse ka muangchâng em em hran chuang lo.



Station kawt ka thleng ta maw tiha luh zui nghal mai ka'n tum chu vawi leh khatah thil eng emaw ni a rawn puak nghal dur a, keimah ngei pawh ka lêng deuh lawp a, ka bike chu ka delh tlu rawp a, ka tluk pah chuan ka tukhum sawhin ka lû a hai deuh nghal chhap bawk.



Mipa aw ri hrawk hrawk chuan ka beng a verh zar a, ka tho nghal ṭuah ṭuah a, ka pangngai ta deuh bawk nen building chhûnga luh mai chu ka tum a, mahse hai rual lovin bomb bawk a rawn puak leh ṭhuai a, lo inthiarfihlim hman chiah chiah lo phei ila chuan ka nâ viau maithei a ni.



Station chu kangmeiin a luah khat zui nghal hluah hluah a, mihring rak thawm leh ṭe thawp hriat tur a awm chuah chuah bawk a, kangmei a chhuak e ti lo chuan building chhûngah ka lut ta tho va, a theih ang angin chhuata mihring lo let bâm ho chu ka pawt chhuak sawk sawk a, an zîngah chuan Thansanga pawh a tel ve nghe nghe lehnghal a, rilru leh ngaihtuahna a phili duh khawp mai.



Pâwna ka pawt chhuak fel chiah chu phone call ka dawng nghal zat a, number lawng tawp a nih avangin làk loh ka tum deuh uk a, mahse ka là ta tho va, hmanhmawh ruk nen ka lá thuai thuai a ni ber.



"I him hlauh chu i vannei hle mai tlangval, ka sawi kha i la hria em? Ṭha taka min chhuah tura ka tih lâi che khan min chhuah hle hle la ni mai tur, tunah chuan a vawtuin ek i cheh dâwn e" rawn ti tu chu ka hre lawk lo va, mahse a ṭawngkam aṭang chuan ka hre chhuak nghal thuai thung.



"Ngâwi hmak rawh! Ka man leh ngei ang che! Phiangsen che hian!" ka ti hrawk a, insumkàrna rèng ka nei tawh lo.



"Ni e, ka'n ngâwi ang e. Thil pakhat leh, kan pu fanu duat lâi i lo enkawl avangin lawmthu ka sawi ni rawh se, zanin aṭang erawh i buaipui a ngâi tawh lo ang" a rawn ti leh chiah chu ka sa nghal zak a, ka ngaihtuahnaah leh mitthlâah Zualbawihi hmêl a rawn lang chawpchilh nghal a, a thusawi tawp ber chuan min chhun zawk zawk a ni ber.



"Hmela! A sam zâi khat pawh i tawk a nih vaih chuan ka that ang che, ka that chiang khawp ang che!" ka ti vin hlur a, ka thinrim lutuk chu awm dan tur pawh ka hre lo.



"A ni maw....ka va hlau ve.....a nih chuan hei hi lo ngâithla teh le!" tiin eng ṭawng emaw ni hian a ṭawng zawm zat a, keimah min be tawh paw'n ka hre lo, chutah a la ṭawng vin em em zui!



"U Vincent......min rawn zawng suh aw.....min rawn zâwng a nih chuan an that dâwn che" rawn titu Zualbawihi mangang aw ngei mai ka hre chiah chu ka thin a phu dawt dawt a, ka rilruah eng thil dang mah a awm thei tawh lo va, phone chu nâ zet hian ka hmet tawp nghal vat bawk.



End of chapter 8


.

[Havali Adam]

VINCENT
(Mizo Romantic Novel)

By

Havali Adam



Chapter 9




Rilru hmanhmawhnaa khatin ka bike chu ka tung ding thuai a, ka lâwn kâi zui nghal vat a, ka tlan chhuak tur chiah chu phone call ka dawng leh a, kan kawm thlang Ngaihtei hnen aṭang daih a ni a, mak pawh ka ti ru viau nghe nghe!



"U Vincent, khawiah nge i awm? Lo haw thuai rawh, in in a kang a nia....." phone call ka làk ruala Ngaihtein a rawn tih chuan ka bing mup a, sawi mai tur pawh ka hre lo.



"Hmanhmawh rawh....." a rawn ti leh chiah chu kan inbiakna hmet tawpin ka tlan chhuak nghal vut a, ka hun tawn mêk avang chuan ka phili buai kher mai.



Speed sâng takin bike chu ka khalh a, kan in kawt pawh ka thleng har lo hle a, ka thil hmuh zet chuan rilru a va'n tibuai zual tehreng èm!



Kan in chu a lo kang mêk a, ṭhelh tumin mi an lo phu sup sup bawk a, ka nu leh ka pa leh ka pute'n ka thluak chhûng an luah ngut ngut a, ka hlauhthawn dan chu pui tak a ni.



"Lut suh Vincent!" tia min autute chu engah mah ngâi zo tawh lovin kan in chhûng chuan ka tlan lut thuai a, mei khute chu a tàwnin ka tâwn a ni ber a, ka chhûngte chauh lo chuan ka rilru an luah thei tawh lo a ni ber.



Ka nu leh pate room ka hawn rual chuan a tua mah ka hmu lo va, mei alh sa kârah hmanhmawh tak hian khum bul te chu ka en kual zung zung a, mahse pakhatmah ka hmu chuang lo.



Room aṭanga ka tlan chhuah rual rual chuan ka pu room-ah ka lut zui nghal thuai a, khum bulah a lo let reng chu niin, ka pan hnai vat a, ka pawm kang chiah chu a lû aṭangin thisen a far nghal zawi zawih a, hlauhthawn tawh sa nen, ka mangang tak zet a ni.



Mei alh kârah ka pu chu ka pawm chhuak thei hram a, pâwn ka thlenpui rual chuan ka khuh nghal bawrh bawrh a, ka kuta thisen kâi te chu ka manganna leh hlauhthawnna tizualtu an ni a, mi dangin min rawn buaipui lâi te chuan mi â ang maiin ka awm tawp a, ka thinlungah thinurna nasa tak a inmung mawp mawp reng bawk.



Ambulance motor thawmah chuan ka harh chhuak zawk a, mi dangin an lo ko chu niin, mu leh mal pawh hre lo hian ka che nghal phawlh phawlh a, ka pu chu damdawi in lam kan panpui thuai a, mahse damdawi in kan thlenpui hnua doctor te thu min hrilh erawh chuan min va tinâ ngaih ngaih si èm!



Mihring chang zo tawh lo ka pu, dam lo khuma mu mêk chu ka en ngawt ngawt a, a lûa hliam tuar lovin a boral tawh tih doctor te'n an sawi lâi te chuan thinrim eng phiara inhum ruh bak tih theih ka nei lo va, chutiang taka rawnga ka pu chunga thil titu chu ka hre tlang nghal vek a, ka rilruah chuan phubâ làk chàkna bak a awm tawh lo a ni ber.



Chutia thinurnaa khata ka awm lâi chuan Ngaihtei hnen aṭang bawk phone call ka dawng leh a, ka làk hnua a thu rawn sawi chuan ṭawng nachâng pawh hre lovin min siam a, mi â ang maiin ka awm a, ka mit nghal sulh bawk.



Ngaihtei chuan kan in sira ruang pahnih an chhar thu leh chu ruang pahnih chu ka nu leh pate ruang ngei a nih thu a rawn sawi mawlh mawlh a, a thusawi tawp lamah chuan ka hming a lam zui awl lo va, mahse chhán tumna ka nei lo hrim hrim thung.



Ka thin a so bulh bulh a, tualthah hrehna réng ka nei lo va, thinurnain min luah khat zo va, ka nu leh pa leh ka pute thih avanga lungngâi leh manganga rum tur paw'n ka rilruah eng thil dang mah a lut thei tawh lo; chung thil zawng zawng thlentîrtute thah mih vek tih mai loh chu!



Ka ngaihtuah chian pôh leh thil thleng mêk chu mangchhia ang mai a ni a, mahse a tak ngei a ni tih ka hre chiang em em bawk si, zan khat thil thua thil thleng atân chuan a rapthlal lulâi tak zet a ni.



Ka pu kalsanin station lamah ka lèt thuai a, in lama lèt chákna pawh ka nei zo tawh lo a ni hawt e! Ka ṭhiante ka be pawp zung zung a, anni paw'n kan station-in beih a tawh thute chu an lo hre ve vek tawh chu niin, mahse ka chhûngte chunga thil thlen dan erawh engmah an la hre ve lo va, hrilh pawh ka tum chuang hek lo.



Station ka thleng chu an lo ṭhelh mit vek tawh a, beisei loh deuhin Thangsanga ka hmu pangngai viau a, min rawn pan nghal chat a, engtin nge a awm tih leh a ṭhat leh ṭhat loh thu pawh ka zàwt chuang lo. Amah záwk chuan min rawn be vat a, mahse ka chhâng eih lo hrim hrim!



"Lungngâi suh Sir, kan chhui chhuak leh em em ang, an lehkha pawimawh ka la kawl vek alawm, an tawm bo rei lo tawp ang" Thansangan a rawn tih chuan ka beng a verh nghal zar a, ka rilru a kal ding nghal hle bawk.



"A rang lamin min pe thuai teh, zanin là lâ lá hian kan che chhuak nghal ang" ka ti bul ve ta hmuk a, ani pawh chu a che deuh sawk sawk a, kan mi man pa file kan man tel kha a lo la kawl ṭha vek chu niin!



Chutia kan chet vel lâi chuan ka ṭhiante pawh an lo thleng chawpchilh ve nghal a, station danga mi an ni hlawm nà chu police ṭheuh tih takah kan ril a inrem nghal viau a, ka ngaihdan ka sawi lâi te chuan ṭha an tih thu an rawn sawi nghal sap sap a, kan buaina pakhat erawh engtin nge kan chhui chhuah ang tih a ni.



Kan station-in beih a tawh lâia min lo call tu lah kha call lèt paw'n switch off a inti tlat tawh bawk si, track dâwn takngial paw'n awmzia a awm tawh der lo lehnghal a, kan mi man tlan chhuak ta file-a hming leh phone number chi hrang hrangte chu a tlang theih mial tâkah tiin kan call kual reng a, kan awm dan chu a sawt lo ka ti kher mai.



Thaw hluaiin list-a hming tawp ber, Vâi hming lehnghal phone number chu beisei nei lo zet hian ka call leh a, number dang zawng zawng anga call tlang theih loh a lo nih leh ngat phei chuan tingaihna ka hre tawh bîk lo!



Phone number chu ka phone-ah ka chhu lut mawlh mawlh a, call ka tum ruala hming lo lang vâ chu ka hmu sual emaw tiin ka en chiang ngat a, mahse ka hmu sual lo, hmu sual lo chiang tak ka ni!



"Hrep tak hian le!" ti hlukin ka che vut a, phone ring lâi chu hmet tawpin bike-ah ka lâwn kâi thuai a, ka ṭhiante min kohna pawh engah mah ka ngâi thei tawh lo hrim hrim!



Chak zet hian bike chu ka khalh a, rei lovah ka kal tumna pawh ka thleng thuai rèng a, mahse engtin nge ani daih daih a lo inhnamhnawih ve theih tih réng ka hre lo, rin ngàihna pawh ka hre lo.



Ka thlen rual deuh thawin Thansanga leh ka ṭhiante pawh an rawn thleng ve nghal thuai a, in pakhat hmâah kan ding ṭhap a, kawngka kik tuma ka che tur chu Thansanga chuan thil awmzia min záwt a, min tikhawtawi a ni ber a, kan kalna hmun daih daih avang chuan mak a tiin a ṭhawng ve hle ni tur a ni.



Engtin mah ka chhâng lem hlei lo va, thinrimnaa khat rilru pu ran chung hian kawngka chu ka kik zui nghal a, min chhângtu leh chhawntu an rawn awm har lutuk te hlei hlei chuan ka thin a tirim zual a, muttui hunlâi tak a ni tih te chu ka theihnghilh hmin vek tawh a ni ber.



Insum thei lovin kawngka chu ka chum ta dawt dawt a, ka chum satliah pawh a ni tawh lo, tihchhiat ka duh rum rum tawh záwk a ni. Rei rial lovin in chhûng lam aṭang chuan an rawn hawng ta nge nge a, kawngka rawn hawngtu hmêl ka hmu chiah chu insum theihna hlohin ka hnek thal ṭhuai a, ka hnaih chilh zui nghal rang hle bawk.



"Khawiah nge an awm!? Sawi rawh, sawi nghal rawh! Khang mi phiangsenho teh hrep kha khawiah nge an awm sawi nghal rawh, i sawi lo a nih chuan nang leh i chhûngte chungah hian engmah tih hreh ka nei lo tih hria ang che!" ka ti vin ṭhawt ṭhawt a, ka man chhuak chiang lutuk chu mi chhàn ngaihna pawh a hre lo.



"Sawi rawh!" ka ti leh nghal chhur a, a kawrah ṭhamin ka pawt tho lâwp a, ṭawng thei lo ang hrima a awm vel te hlei hlei chuan ka thin a tirim zual tak zet!



"Awi, engati nge? Engati nge paa?" tiin a nupui chu an room aṭangin a rawn chhuak thuai a, an fate pawh an rawn lang har lo khawp mai.



"Tualthah ka hreh teuh lo a nia, sawi vat rawh!" ka ti khauh leh hmuk chu beidawn ruk hmél zet hian a mit a chhîng deuh vang vang a, Thansanga leh mi dangho chuan min thlir ṭhup a, chutia kan pu ber mai zahna chhe tê mah nei map lova ka hrawk ngam leh kut ka thlak ngam chu mak pawh an ti ru viau ta ve ang.



"Inrawlh miah lo leh inhnamhnawih miah lo angin i lang a, i nihna thup nân Vâi hming i hmang bawk a, engtin nge i theih záwk!? Engtin nge ram siam ṭhat hna thawk ngei ngei tur ni si dan lova sum làkluh kawngah i lo inrawlh theih záwk!? Hrep che hian, thi tlàk i ni!" ka ti leh ta chhur chhur a, ka nu leh pa leh ka pute thih chhan ka ngaihtuah chhuah bawk nen ka thinrim lutuk chu ka puak keh thei mai dâwnin ka hria.



"Paa, eng thu nge Vincent-a sawi hi? Eng nge a awmzia?" a nupui chuan a lo ti zui nghal zat a, mahse a mi biak erawh kâ âng lovin a la ngâwi reng thung.



"A ṭha e! I sawi loh leh i thu a ni tawh e!" ti vin hlur hian ka pistol chu ka phawrh a, a nupui ngei mai chu ka tin nghal chat a, an fate pawh an lo ṭe nghal ṭhawt nghe nghe!



"Khang mi lawi lo ho awmna kha i sawi dâwn nge i nuipui hi tun dârkâr là lâ hian ka kap hlum nghal dáwn? I duhthlang rawh!" tiin vauna thu ka chhuak zui hmuk hmuk a, chutih lâi vek chuan a nupui chuan ka hming lam meuh hian a hmui hup a, thil pawimawh avangin an inah ka lêng lut fô va, hriat pawh ka inhre ṭha, mahse tun ṭuma kan inhmuh dan zet zawng a dan a dang deuh chu a ni e.



"I silai kha dahthla vat rawh Vincent!?" tiin kan pu chu a rawn ṭawng chhuak ve ta nge nge a, mahse kei erawh a thusawi anga awm lovin ka rilru a lian thut a, tum réng vangin ka silai chu ka hmet puak ṭhuai a, banga an chhûngkaw thlalak intâr a tla keh ri chuaih nghal bawk.



"Vincent!?" vin zeta a rawn ti leh chiah ka hnek let tawp a, ka pawt tho zui leh nghal a, thah ka chák ngawih ngawih lutuk chu hre ngat se zawng min vin lèt ngam pawh ka ring nek lo e!



"Sawi mai rawh! Engkimah i inrawlh tih ka hre chhuak vek tawh! Nangmah avang hian ka chhûngte thlengin an tuar asin, chuvangin nang leh i chhûngte hi thah ka hreh reng reng lo" ka ti buan buan a, rilru nâ leh thinrim avanga ka rilru buai zo mai tur chu ka khap dai hman lo ang tih mawlh a hlauhawm; ka that hreh der si lo!



"A ṭha e" a rawn ti chuai ta raih a, a maimitchhìn deuh vang vang hnua a men leh rual chuan a thaw chhuak zui halh a, chutah amah vek chu rawn ṭawng zawm zatin



"Hetiang hian thil a thleng dâwn tih rèng ka hre bîk lo, ka duh lo hrim hrim bawk" a rawn ti hniam chhal a, a thil sawi dan kalhmang aṭang chuan station kan thu pawh a lo hre ru vek tih a hriat hle.



"Ṭha takin min hrilh rawh, khawiah nge an awm? Tunah hian ka tâna mi pawimawh tak an hruai bo mêk lehnghal a, chuvangin tih hreh ka nei lo tih i hriatthiam ka ring" ka ti deuh chhur chhur a, mahse ka aw chu a hmâ ang em ema vin leh khauh hmuk hmuk ang kha a ni tawh bîk lo.



"A fanu kha a ni ang maw?" a rawn ti dek dek chu



"Sawi thui a ngâi lo, ka nu leh pa leh ka pute thihnaah pawh nang hi i inrawl chiang a ni" ka lo ti nghal nghut nghut a, chutah keimah bawk chuan



"Sawi tawh rawh, khawiah chiah nge an awm?" ka ti zui leh nghal zat a, sawi hreh hmêl takin awm mah se sawi lo thei lo dinhmunah a ding miau a, a tawp a tawpah chuan a rawn sawi chhuak ve ta nge nge bawk.



Pâwn lamah kan inhruai chhuak zui nghal a, motor-ah nawr lutin kan inṭhut chilh ran a, in chhûng zawng zawng dap chhuak vek turin Thansanga chu ka chah a, ka bike pawh kan kalna hmuna a rawn kal zui nghal mai theih nân ka hnutchhiah nghe nghe a, ka ṭhiante'n an naute an koh belh bawk a, a siruk là teh meuhin kan thawk chhuak a ni ber.



Lêngpui lam panin kan tlan thla vawng vawng a, Zualbawihi pa ṭhuihhruaite zînga mi man tuma kan um ṭuma thil thleng kha ka mitthlá zut zut a, Lengpui hnaih lam khawi lâi emaw tak velah chuan an awm dâwn tih ka ring thiam nghal ta kuarh bawk.



Kan pu chu rum eltiang hian ka melh run a, engtin nge police officer hna chelh reng chunga chutiang thil tenawm leh ṭha lo chu a tih theih záwk pawh ka hre lo. Ka ngaihtuah chet chet a, engkim mai kha a sahimna tura min chhuitîr ni ta vekin ka hria.



Chhui chin tur min tuksak dan te, a pawi thui lo chin lâi bak kan chhui chhuah theih lawk loh dan te, engkimah khan a lo inrawlh fai vek ka ti lo thei lo. Chutah Zualbawihi pa nen an lo thawk dun leh ta nghal a, ka rilru tifîm lui hram hram lo ila chuan ka that tawh ngei ang.



Ka mitthlâah chuan ka chhûngte leh Zualbawihi hmêl a rawn lang zui zut zut a, ka chhûngte mawlh chu a ni ka thinlung chhûngril taka ka lung tichhe ru vawng vawngtu chu!



Tunah chuan hring an chang zo tawh lo va, nát pawh ka ná réng a, mahse chumi avang ngawta phuba lák leh ka hnathawh ngei ngei tur ṭhulh chu ka tum lo hulhual thung!



Ka putea leh ka nutei te hnen aṭang paw'n vawi eng emaw zah phone call ka dawng tawh tih ka hria, mahse là buai îkhaw hman ka ni lo. Chu bakah an thusawi tur zawng zawng ka hre tlang nghal vek a, thil thlen dan engkim ka hre vek bawk.



Kan tlan zel a, Lengpui lamah kan kal dâwn emaw ka tih chu Lengte lamah kan pêng ta daih a, rei pawh kan tlan tawh lo. Motor aṭang chuan kan chhuak sap sap a, kawng chhak lamah kan inzui chho diah diah hlawm a, thawm erawh kan dim nghal viau thung.



Chutih lâi vek chuan Thangsanga hnen aṭangin phone call ka dawng a, kan awmna hmun te inhrilhin kan inbiakna chu ka hmet tawp thuai a, zan mah ni se kan awmna hmun chu a zawn hmuha a rawn thlen thuai ka beisei!



Kan pu chu a hmâ tâwngah dahin ka kaltîr a, keiin ka dawt a, kan kalna hmun chu huan ni maiin ka hria. Thui kan kal hmâin in pakhat, assam type-a sak ngei mai chu kan hmu ta a, a awmna hmun ngaihtuah chuan thlâm te pawh ti ila a sualna a awm lo ang.



A vehin kan veh phei den den ṭan ta a, kan pu phone chu ka phawrh a, number pakhat chu ka call nghal zat a, mahse keimah ni lovin kan pu záwk chu ka biaktîr thung a, an inbiak tirh phat aṭangin an inhrawk nghal a tih theih a, chumi hlan chuan kei tih loh mi dangho chu lo kal sawnin in an hual bek bek a, a lan dan chuan chung mi sualho chu in chhûngah an tawm ṭhap hlawm a nih hmêl!



Kan pu hnenah chuan pâwna ko chhuak tur leh an awmna hmuna a kal thu chu hrilh turin ka ti a, a hrilh ve nghal mai bawk a, loudspeaker-a ka dahtîr vek avangin a mi biak pa chu thawveng zet hian a rawn nui huah huah leh ta vel ang lawi a, pawisa a sawi ri chhen a, an inbiak dan aṭang chuan inzawmna thut tak an lo nei tawh tih a hriat hle bawk.



Phone-a an inbiak zawh hnu chuan a lo chhuak ve mai a, kan pu pawh ka sawi ang thlapin a awm a, kei erawh hmuh awlsam lo takah ka lo biru daih thung. Kan pu dinna lama rawn pen phei chhat chhat pa hmêl ka hmu chiang chiah chu kah hlum nghal chaknain ka khat a, chu erawh a hun rih hauh si lo.



Silai keng pakhat hian a rawn zui chhuak a, mahse kan pu leh a pu indin chilh thawthanga an inbiak chinah erawh a ding hlâ ta thung a, a hawi kual deuh chhen lehnghal a, min rawn hmu ang tih chu a hlauhawm khawp mai.



Rei inbiak fàltîr chì a ni lo tih ka hriat reng avangin thawm dim tak hian ka che chhuak zal zal a, èng a awm tam lo bawk a, thawm a nih ngawt loh chuan chutianga min hmuh ngawt theih pawh ka ring bîk lo.



Vawi leh khatah che chhuak thutin kan misuala ngei mai chu ka pawm chilh nghal rawk a, inherpuiin a lû ah chuan ka tin zui ran a, rawn zui chhuaktu pain min rawn kah a tum chiah chu ka lo kah khalh vat a, kâ pawh chhawn lo hian a let nghal ruah a, chu kan thawm siam chuan boruak a tichingpen ta vek bawk.



Thawm dim taka luhchilh tum kha kan ni a, mahse awmzia a awm tawh lo. Kan pu lah chu hriat loh kârin a lo tlan chhe daih leh ta nghal a, ngaihtuah pawh ka ngaihtuah sî sê hman tawh lo a ni ber.



Kan misuala chu a kawr nghawnga ṭhamin ka hmâah ka kaltîr a, a bekah tak silaiin ka chuktuah ran a, in lam chu kan pan phei zel a, a nauteho bulah chuan silai hmet puak tawh lo tura thupe turin ka hrilh a, anmahni ṭawng ngei hian a au lang lang zui nghal a, silai puak thawm chu a reh ta diak bawk.



In chhûng kan lut chiah chu silaiin min lo tin ṭhap a, mahse hlauhna chhe tê mah ka nei eih lo. Hual beh vek an nih tawh thu chu ka sawi chhur chhur a, ka mitmengin Zualbawihi ka zawng pah reng bawk a, mahse ka hmu ta hauh lo mai.



Khawiah nge a awm tia zawh mai chu ka duh rum rum a, mahse chutiang ngawt zawng thil tih chì ber a ni hauh si lo. Kan misuala hnenah chuan a nauteho chu an silai dahthla vek tura thupe turin ka hrilh chhumbung hmuk a, chutih lâi tak chuan ka police puite an rawn lut ve chiah bawk a, mahse thil thlen zui dan chuan min va han ṭhawng chiang ém!



In pâwn lamah silai puak ri a rawn awm thut a, chutah hmeichhe ṭe thawm kan hre zawm zat leh ta nghal a, chu chuan ka rilru zawng zawng a kuai pêng hnehsawh hle bawk.



Chu lâi tak chu ka chetsualna a ni ta chiah a, kan misuala chuan a nauteho chu a signal zeuh a, silai chu a puak ri zui ta chuah chuah a, thih huamin min rawn kap hmâsa a ni ber a, kei paw'n ka kut ka chet nghal zawk a, silai mua kan misuala lû ka verh tlang rual rual chuan ka ke ah kah hliam ka ni ve nghal a, chutianga thil a thlen chu keini lam chuan kan beisei hlawl lo a ni ber.



Hmun leh hmunah kan insài chilh hmiah hmiah a, kei erawh ka vanneiha siamin kan misualpa taksa chuan kawng tam takah min hum a, an pu taksa mah ni se ka thah tawh miau avangin ka lamah silai mu a rawn thlawk phei fua fua a, an pu taksain indang lo phei ila chu ka thi tawh ngei ang.



Kan tam hneh hrim hrim a, a chan ṭha záwkah ka ding te pawh ti ila a sual tam lo ang. A rang thei ang berin pâwn lamah ka tlan chhuak thuai a, ka kea hliam awm chuan tlêmin ka tha hman a tinèp deuh a, mahse nâ tak han tih tur chì erawh a ni lo, ka thisen a la lúm ṭhat êm vangte pawh a ni ang.



Kawngpui lam pana mi pakhatin Zualbawihi ngei mai a hnuk ṭe dawt dawt lâi chu ka va hmu nghal a, thinrimnaa khatin ka so bulh bulh a, an awmna lamah chuan ka tlan phei nghal thuai a, ka silai chu phawrhin Zualbawihi mantu pa darah chuan ka kap hliap nghal zat nghe nghe bawk.



Ka tlan phei zel a, an awmna hmun ka va thleng chiah chu Zualbawihi chiah ka hmu tawh a, chaurau zet hian a lo thle ngial ngial a, buaipui tuma ka kun hniam lâi tak chuan ka lû a rawn hai nghal chhup a, beih ka tâwk tih ka hre ruai ruai a, chu ka lûa hliam teh hrep lah chu a nât hian a nâ vawn vawn lehnghal a, ka engkim a pawt chau nghal rawih rawih ni maiin ka hria.



Che tur paw'n tha ka sêng thei ta reng reng lo mai a, chutah chu mihring phiangsen chuan Zualbawihi, ka Zualbawihi ngei mai chu a rek âng chawn chawn a, ka bul lawka lung, kut tuma aia lian chu lá rawkin a lû ah tak a chhu ta siah siah mai, ka mit hmuh ngeia thil thleng atân chuan a va han rapthlak ngai ém!



Thawm ka chhuah ruah ruah a, mahse tha réng ka nei tawh si lo. Ka taksa chu a bet tlat a, Zualbawihi chhan tur takngial paw'n engmah ka ti thei lo va, thinurnain ka thinlung a rum vawng vawng a, chuti taka hliam nâ, engmah ti zui thei lo khawpa nâ ka nei kher kher chu ka inhaw hluah hluah bawk.



Vawi leh khatah silai a rawn puak ri ṭhuai a, Zualbawihi lû chhu chawrh chawrhtu pawh chu chawp leh chilhin a awn riai riai nghal a, chu veleh Pathian hnena ṭanpuina dil meuhin Zualbawihi lamah chuan theih tawp chhuah tak meuh hian ka bawk vak phei ṭai ṭai a, kan awmna a inhlat loh tehlûl nen thlen pawh ka thleng phei der lo.



Ka ban phak ta maw tih àwm velah chuan ka tha a ṭhum zo va, ka bawk ruah a, Zualbawihi kut chu thei leh thei lo hian ka ban ṭawk ṭawk a, ka kut leh a kut a insi chiah chu khawngaih namên loh hian ka khawngaih a, a kut chu nghet lo zet hian ka hum che che a, eng thil dang mah ka rilruah a awm thei tawh lo; amah ka khawngaihna tih chauh loh chu!



Ka mitmeng a zuai ruai ruai a, chutih lâi vek chuan Thansanga aw ngei ka hre zui zat bawk a, mahse ka taksa chuan engmah a hre tawh lo a ni ber. Ka rilru erawh a la harh ve ṭawk ṭawk a, ka taksa mu chuah chuah chuan zawi zawiin a pawt pil riai riai tih pawh ka hria, mahse intihharh hram hram ka la tum lui fan fan thung.



"Sir....." tia Thansanga min koh mawlh mawlhna te chu ka rilru lam chuan a la hre ve det det a, ka taksa erawh nunna nei tawh lo ang maiin a awm mawl tawp a ni ber.



"A ṭha miah lo a nia, hmanhmawh r'u...!!!!!" ti chuah chuah ri te chuan ka rilru lam a rawn ti harh leh zawk ṭhin a, mahse rei erawh a ni ngai lo.



"Kha lamah khan.....doctor va ko thuai rawh u!" tia hmeichhe ṭawng thawm chu ka harh deuh zawk zawk hnua ka hriat hnuhnun ber a ni zui ta bawk.



End of chapter 9



.

[Havali Adam]

VINCENT
(Mizo Romantic Novel)

By

Havali Adam



Chapter 10

(Epilogue Chapter)



Engkim mai chu a reh hian a reh duk a, thawm réng a awm lo va, ka awmna hmun lah chu mihring thisenin a luah khat vek lehnghal a, in a kang hluah hluah bawk a, eng thawm mah ka hre thei lo e ti lo chuan engkim ka hmu thei vek lawi si; ka awmna hmun teh hrep chu khawi lâi nge a nih ka hre lo chiang khawp mai.



Ka hawi kual vel a, ruang lo let phung avangte chuan chet mai ka tum ṭhin a, mahse ka taksa erawh thlun beh tlat ang maiin ka tiche thei hauh si lo. Ka ke takngial pawh ka pen thei lo va, engkim hmu thei vek chung sia engmah tithei lova ka awm tlat chu hrehawm ka ti ngawih ngawih!



Police officer ka ni a, chung ruang, ka hmâ lawka let phungte chu ngaihvena ṭanpui ngâi ṭanpui thuai thuai ka duh a, mahse ka rilru leh mit chauh lo chu ka thunun thei reng reng si lo.



Ka theihna zawng zawng sâwngkhawma chet ka tum paw'n ka thei chuang der lo va, ka nu hmêl te, ka pa hmêl te, ka pu hmêl te, Zualbawihi hmêl chenin ka hmu fiah em em vek a, mahse anni chu vanneihthlak takin an him dam a, anmahni záwk chuan min ngaihtuah hmêl takin min rawn en a, ka awm dan chu an hrethiam te pawh a ni ta ve ang.



Zualbawihi leh ka chhûngte chu ka en tlawk tlawk a, an zînga awm ve chàknain ka khat a, a bîkin Zualbawihi phei chu hnaih chilh a, kuah a, fawh vawng vawng ka châk a, mahse chung ka rilru leh ngaihtuahnaa awm ang te chu engmah ka ti thei der si lo.



Ka thaw chhuak leh hawk ṭhin a, beidawng rilru zet hian ka awm mawl ta tawp a, ka hmâ deuh lawka ding ka chhûngte chu ban phak ngaihna ka hre tawh lo va, keimah leh keimah ka inen leh ngawt ṭhin a, ka taksaah thlungtu engmah a awm chuang hauh si lo, thil thleng mêk chu ka hrethiam lo tak zet a ni.



Ka mit chhîng deuh vang vanga ka meng leh chiah chu chiang tak hian Zualbawihin min lo en a, min lo nuih sen sen a, kei paw'n ka nuih lèt nghe nghe a, pawm vawng vawng a, duhthaw zeta fawh ngawng ngawng ka châk a, mahse chutih lâi vek chuan ka rin loh lam daihin thil a thleng ta tlat mai.



Zawimuang hian Zualbawihi leh ka chhûngte chu an inher a, an hlâ riai riai a, ka ko vak vak a, Zualbawihi phei chu ko nasa tak ka ni! Ka pa hming ka lam vawn vawn a, theih tawp chhuahin ka nu hming ka lam bawk a, ka pu lehzel paw'n min hnungchhawn ta chu ka hrethiam lo tak zet!



Vawi leh khatah ka ding lâi chu ka let hlawm tawp a, ka hmâ lawkah chuan Zualbawihi taksa zawi hniang ka hmu leh hlawl a, ka kut leh a kut chu insiktîr ka tum ngar ngar a, tha ka sèn nasat tehlûn nen Zualbawihi kut lah chu ka vuan che che thei chauh leh ta nghal a, ka awm dan zawng zawng, engkim mai chu ka hrethiam hlawl lo.



Zualbawihi chu ka en ṭhin, nâ a tuar tih hriat tak hian a phu euh euh a, thi tur ang mai hian a khur det det a, a lû te chu thisenin a luah khat a ni ber a, chungte hlei hlei chuan pan hnaih a, bawihsawm châkna min neihtír a, mahse eng thil mah ka ti thei si lo, keimah leh keimah ka inhuat dan chu pui tak a ni.



Mit khap kâr lékin ka khaw hmuh a rawn thim nghal mup a, nàt namên loh hian ka lû chu a rawn nâ ngut ngut bawk a, ka awmna hmun chen chuan a vawt hit ta raih a, men leh tuma ka han bei chu ka thei lawk lo leh ta nghal a, thawm dang daih ka hre zui ta mawlh mawlh bawk.



"A harh a nia.....a harh.....doctor va ko vat rawh u" tia hmeichhe au lang lang thawm chu ka thawm hriat hmâsak ber a ni a, men ka'n tum leh ngawt ṭhin; ka thei chuang bawk si lo, hrehawm tak a ni!



Khâwl ri chuah chuah thawm te, mihring ṭawng thawm te, thawm ri va hrim hrim chu ka hre thei vek a, mahse ka hmui ka chet theih loh bakah ka mit takngial pawh ka meng thei lo va, ka lû nâ lutuk erawh kha chu a reh ta daih thung.



Zawimuang hian ka thawm hriat a hlâ tial tial a, ka awmna chu thim chhah zetin a rawn tuam hlawm zui nghal a, ka rilru leh ngaihtuah chenin a chawl diak a, ka hriat theih hnuhnun ber chu khawiah emaw ni ka mu tih leh fan ngai loh hmunah ka awm tih zawng a ni.



Thawm bawkin min tiharh leh zawk a, chutah erawh ka kut ka chet thei ta! Rilru ṭawngṭaina nen men tumin ka bei a, Pathian hnenah ṭanpuina ka dil a, a hmâ ang ngawta engkim hre thei vek si, meng chuang thei bawk si lo ang kha chu nih nawn ka duh tawh lo, a hrehawm dan a chiang êm mai.



Theih tawp chhuaha ka mit ka'n chet chu Pathianin ka rilru ṭawngṭaina a chhâng tih hre chawpchilh nghalin ka meng ta riai riai a, ka thil hmuh hmâsak ber erawh ceiling vâr a ni a, ka awm dan chu ka hrethiam chiah lo, ka rilru leh taksa zawng zawng ka thunun thei tawh ni berin ka hria.



Ka kut tihchet ka duh paw'n ka tiche thei mai a, ka ke pawh ka tiche thei vek a, ka mitmeng nen lam a fiah chho tial tial a, ka bul lawka khâwl vu ri chuan ka beng a verh reng bawk a, mahse ka awmna hmun chu khawi lâi nge a nih ka hre thei mai lo thung.



Ka rilru leh ngaihtuahnain ngai a rawn awh chho tial tial a, ngaihtuahna sêngin ka mu zàngthal duai a, chutih lâi tak chuan kawngka a rawn inhawng ri khep a, mipa pakhat, doctor uniform ngei mai ha hi ka hmu nghal zat a, chumi rual chuan khawia awm nge ka nih ka hrethiam ta chiah bawk.



"I lo harh chu a lawmawm hle mai, eng nge i an? I lû a nâ em?" tiin min rawn bia a, ka taksa check pahin ka bul lawka khâwl thil vel chu a buaipui reng bawk a, ngaihtuah tih hriat tak hian min melh leh záwk ṭhin a, chhán pawh ka tum em em lo.



"Ngawi teh, chet tum rih suh, i taksa hi a la chak lo viau a nia...." ka kut ka chet rual chuan a rawn ti vat a, ka kut chu a awmna pangngaiah min dah thlaksak thuai nghe nghe!



"Engtin chiah nge ka awm?" ka ti thawp sup a, ka aw chu a fiah lo deuh ruai a, ka aw a zàwih tehlûl nen ka ṭawng chu a lo hre pha a nih hmèl!



"Accident i táwk alawm, mahse lungngaihna tur a awm miah lo a nia, ka rin phak bakin i taksa hi a lo in-recover chak daih mai, Pathian zârah i ṭha leh thuai ang" a rawn ti dap dap a, kei erawh ka ngaihtuahna a kal thui nghal viau thung.



Accident ka tawh chungchâng chu ka ngaihtuah lèt vang vang a, ka mitthlâah engkim a rawn lang zut zut a, station-a beih kan tawh dan te, kan in kang hluah hluah te, thil thlen dan zawng zawng ka ngaihtuah chhuak chiah chu ka che phat a, ka nâ nghal zawk bawk.



"Min chhuahtîr rawh" ka ti thum zawi chhal a, mahse doctor chuan a lo phal lo nasa mai.



"Chhuak thei dinhmunah i la ding hleinem, damdawi ina i awm rih hi a ṭha záwk, ka beisei phak bakin i rawn harh ṭha daih mai, nakinah cabin lamah kan sawn dâwn che a nia" a rawn ti zung zung a, mahse a thusawi chu ka rilrém záwng a ni ve hauh lo.



"Min chhuahtîr rawh" ka ti nawn leh ngat a, ka ṭawng zâwng ringawt pawh chuan ka hah hluah hluah thei a, ka taksa a la chak ṭha táwk lo viau te pawh a ni ang.



"Mu hahdam leh tawh rawh" ti dam dapin min en reng a, eng thil chiah nge ka chungah chuan a tih pawh ka hre lo, ka mut a rawn chhuak nghal riai riai a, engmah ka hre zui ta lo vang vang bawk.



Eng emaw chen chu ka lo muhil a ni ngei ang, hmeichhe ṭawng melh melh thawm hian min tiharh a, ka mit pawh ka meng nghal a, ka harh hmâsak záwk ai khan ka harh chu a chiang daih záwk a, chau ru ngawih ngawih ang kha ka ni tawh paw'n ka hre lo.



Tin, ka awmna hmun hrim hrim chu a lo danglam vek tawh bawk a, doctor khan cabin-a min sawn te kha a sawi ri a, min sawn ta ngei te pawh a ni mahnà! A nih chuan ka harh hmâsak záwk khan khawiah nge ka awm?



"U Vincent....." ka hming ngeia min kotu chu ka nu nau fanu Nutei a ni a, min rawn pan nghal vat bawk.



"Awi, Vincent Bawiha, i lo harh tawh a ni maw? I ṭha em?" tiin ka bul lawka ṭhu reng ka nitei chuan a lo ti thuai a, an hmêl chu ka en deuh dan dan hlawm a, min lo ngaihtuah viau a ni tih a hriat hle.



"Nute, doctor va ko rawh" ka nu nau chiah, nute Sawmi chuan lo ti zui zatin a fanu Nutei chu a tîr nghal a, an zînga ka nu leh pate ka hmu miah lo erawh mak ka ti ru kher mai.



"Khaw'nge ka pate?" ka ti thâm deuh chhal a, mi pawh chhàn tum lo ang hrim hian an ngâwi ṭhap a, min tihrilhhai lek lek chu a ni.



"Khaw'nge an awm? An lo kal ve lo em ni?" ti leh zatin ka patea lam chu ka hawi a, ka pa nau chiah a ni bawk a, ka pate awm dan pawh a hriat ngei ka ring.



"Aw....a.....ih....an lo kal mêk, an haw lawk a...." a rawn ti bah deuh nawk nawk a, ka harh tirha ka nu leh pate hmêl ka hmu ve lo chu tlêmin ka rilru a nâ zawk nghe nghe!



"Lo va chhuak rih teh u, thil ka'n sawipui lawk ang e" ka patea chuan a rawn ti leh nghal zat a, mi dang chu an chhuak ta sap sap a, mahse nîtei leh nute Sawmi erawh an chhuak duh miah lo thung.



"Enteh Vincent....." ti hmâsa tê té phawt hian patea chuan min rawn ṭhut hnaih a, ka kut chu a chelh nghal chat bawk.



"Hetianga i awm chhan hi i hre tawh miah lo em ni?" a rawn ti daih a, za lo zet hian ka kiai suk nghe nghe!



"Awi, kei chu a hun rih lovin ka va'n hre ém" nutei Sawmi chuan a rawn tih zawm zat a, an awm dan leh an thil sawi chu ka hrethiam chiah lo chu a ni.



"Thil thlen dan zawng zawng kha i la hre vek nge engmah i hre tawh lo?" ka patea bawk chuan a rawn ti leh thlup a, a zawhna chu ho ka ti kher mai.



"Engkim ka la hria" tih bakin ka chhâng lo va, ka ṭawng thui peih rih thlawt lo a ni ber.



"A nih chuan engati nge i nu leh pate awmna min zawh?" ka patea chu a ṭawng dam dap a, ka melh deuh ran a, chutah nîtei záwk chuan



"Awi, kei chu ṭul ka ti rih lo, sawi tawh lo ang, engmah sawi tawh rih lo ang, Vincent-a hi dam ṭha phawt záwk rawh se" a lo ti nghal zung zung a, eng thu mah chhahchhuah tum lovin ka ngáwi vung vung a, ka rilru leh ngaihtuahna a kal kual nasa hle bawk.



"Ni lo.....!" ka thil ngaihtuah chhuah avang chuan ka ti khur dat dat a, ka kut chu ka theih tawpin ka hum ruh a, ka nu leh pa leh ka pute'n hring an chang zo tawh lo tih ka hriat chhuahna chuan a denin min dêng dawt dawt a ni ber.



"A ni thei lo....!" ka ti bul leh hmuk a, ka ngaihtuahnaah thil chi hrang hrang, engkim, khami zana thil thlen dan zawng zawng kha chiang takin a rawn lut zut zut a, ka mitthláah nen lam an châm a, ka thinlung nàt dan chu pui hliah hliah tak a ni.



"Ni lo, min thihsan thei lo, an thi thei lo, a theih loh!" ti leh ṭhawt ṭhawtin ka thaw hlawp hlawp a, nute Sawmi chuan min rawn kuah thuai nghe nghe!



Ka thinrim lutuk leh lungchhe lutuk chuan nute Sawmi chu ka nam sawn a, ka patean min rawn buaipui nghal vat a, doctor a lo lut chiah bawk nen min buaipui rawn a ni hawt a, ka tha tawp chhuah meuhin an mi khawih tumna hrim hrim chu ka lo bei lèt chîam a, mi â ang maiin ka awm a ni ber.



Ni e, ka â zo tawh, ka thinlung a nàt ém avangin ka â zo tawh a ni.



Zualbawihi pawh kha, ka Zualbawihi ngei mai kha, engtin nge a awm? Ani tal chuan min thihsan tawh lûl suh se!



Rilru buai zet hian ka patea bawk chu Zualbawihi chanchin ka záwt leh phawlh phawlh a, ka ṭawng te reng reng chu a phuailuai vek a, chutah ka patea kâ ngei aṭanga Zualbawihin khang thil rapthlak tak tak a thlen zana nunna a chan zui nghal thu ka'n hre leh chiah phei chu nát namên loh hian ka nâ a, awm ngaihna réng ka hre tawh lo.



Thinlung kehsawm leh rilru nâ em em hian ka au khawk rum rum a, dam lo ka ni tih réng ka inhre tawh lo va, chhe tê them mahin dam thlakhlelhna ka nei tawh bawk hek lo, a chhan chu ka tâna mi pawimawh, he khawvela ka dam chhan te'n min kalsan fai vek tawh miau a tin a ni!



Chumi nî aṭang chuan mi â dik tak ang maiin ka che bawraw chho ṭan a, mahni inthah tumin vawi tam ka bei a, nung dama awm thlakhlelhna rèng ka nei tawh lo va, thla khat dâwn ICU-a ka lo awm te, Zualbawihi leh ka chhûngte vui liam an nih lâi pawha engmah ka ti thei lo leh engmah ka hre lo te chu ka indem ngawih ngawih a, nung ve tlàkah rèng ka inngâi thei tawh lo.



Damdawi hmanga buaipui ngai meuhin ka awm a, thinlung kehsawm leh lungchhiatnaa khat mihringah ka chang zo va, an tih theih awm chhun chu min chiu mut tawp a ni mai.



Ka chhûngte thihna chu thuhran, Zualbawihi thihna mawlh chuan ka thinlung a tirum a, nâ tawpkhawkin min siam a, a dam lâi khan ka hmangaih a ni tih tal lo hrilhin lo hriattîr hman ila chuan a nun a nuam sawt ngei àwm si a, eng vanga lo hrilh vat loh nge maw ka nih reng reng lè!



Engati nge ka mawl em em? Engati nge a thih hmâ tal khan ka hmangaih thu ka lo hrilh loh? Khawvela mipa â ber leh mipa nep ber ka ni, a thih dâwn dârkârah pawh amah chhan thei lo khan ka awm a, khawvela mipa làktlak loh ber chu ka va'n ni chiang ém!



Nitin zantin ka mangah ka hmu a, kan hun hman dun lâi te, kan hlim lâi te, kan intawn dan thlengin a tak ram ang maia mang cháng ka ngah a, mahse engkim chu mitthlâ leh suangtuahna mawlmang mai chauh a ni tawh si!



A beng hriat ngeia 'ka hmangaih che' tih te ka duh a, 'nupuia neih che ka duh' tih te pawh ka châk ngawih ngawih a, mahse chung zawng zawng chu duhthusam, a taka thleng thei ngai tawh lo turah a chang zo va, kei mi lawilo leh láktlâk loh lutuk avanga ka hmeichhe hmangaih em emin thihna a hmâchhawn ta chu ka indem lo thei lo a ni.



Thih châkin ka tuihal a, ka rum a, nun nuamin ka awm ngai lo va, mi â ang maiin ka khawsa a, enkawl hran bîk ngâite an dah ṭhinna hmuna min dah hial te an tum rum rum a, mahse chung èm erawh a la thleng lo tluang zel thung.



Ṭhen leh rual, ṭhian leh ṭha te'n min rawn kan awl lo va, eng thu pawh sawi se, eng zawhna pawh min zàwt se, emaw min biak ṭawng hram hram pawh tum se, a tua te mah ka thengthawngah an thawk thei tawh lo va, ka nung mawl satliah ve tawp tawh a ni ber.



Ka thawhpuite chenin min rawn ngaihven an ṭhahnem thei hle a, Thansanga phei chuan ka rilru hlim nân ti ni àwm fahran hian engkim a fel tawh thu te, kan pu ber pawh man a nih tawh thu te chu min hrilh chamchî ṭhin a, mahse ka tân êngmah a sawt tawh lo.



A chhan chu thinlung leh tih tak zeta ka mi hmangaihte ka chàn tawh tlat vang a ni.



Ka nun khua a ngui a, mi nung ram chhuahsana thih ve daih chu ka chák ngawih ngawih a, a chhan ber pawh ka thih chuan ka chhûngte bula ka awm theih mai bakah ka hmeichhe hmangaih em em, ka nupui atân hiala ka duhthusam Zualbawihi bulah ka awm thei dâwn tlat a, thih hnu piah lamah chuan thihna rèngin ro a rel thei tawh dâwn lo tih ka hre chiang a, chu nun zalen leh nun nuam baka thlakhlelh chu ka nei thei tawh lo.



Thla tam a ral hnuah pawh ka nunin ngai a awh hlei thei tawh lo va, nunhlui ngâiin ka kur a, ka hawina lam apiangah ka nu leh pa, ka pu leh Zualbawihite hlir ka mitthlâah an châm a, ka nun beidawng leh baihvai lutuk chu inthah tumna pawh ka nei tawh ngai lo va, mahse thih erawh ka la thlahlel nitin reng tho.



Chutiang chuan hringnun hunbi ka chhiar chho va, ka nu leh pate lama kan chhûngte ve ve paw'n min rawn ngaihtuah bâng lo tih ka hria, ka patea te inah phei chuan damdawi in ka chhuahsan hnu khan kan awm deuh reng nghe nghe a, mahse kan in an sak ṭhat chinah erawh mahnia awm ka thlang ta záwk a, chuti chung chuan a khawi lam ve ve paw'n min ngaihtuah bâng chuang lo va, ka û nupui chhûngte lam thlengin ngaihtuah ka hlawh ṭhin.



Thla mai ni lo, kum hial a vei a, ka hna, police officer hna pawh ka bansan pumhlum ta ṭhak a, nun hlimawm leh duhawm tak ka neih lâia ka patea fate'n 'kei chu u Vincent-a anga police officer nih ve ka duh' an tih ṭhinna te kha tunah chuan keimahah a awm tawh lo va, engkim a danglam a, ka nungchang zawng zawng ka hloh a, ka bula awm hrehawm khawpin ka nunphung a danglam tawh a ni ber.



'Police officer lo ni kher lo ila chuan ka hmangaihte'n nunna an chân lo ang' tih chu ka indemna thu hla lian ber a ni a, kum khua leh chatuanin a ni reng bawk ang.



Ka nu leh pa, ka pu leh Zualbawihite thlan ka tlawh awl lo va, nilêng zankhuaa awm chilh châng, riah chilh tawp chângte pawh ka ngah a, an thlan ka tlawh hmâsak ber nî ah phei chuan mahni inthah ve nghal tumin ka tal buai chîam a, ka bulah ka ṭhiante awm lo hlauh se zawng khami nî là lâ khan nunna nei lovin ka boral tawh ngei ang.



Vawi tam ka hna lama lèt turin koh ka ni a, thuneitu sâng záwk te aṭang paw'n biak leh sâwm ka ni awl lo va, ka ṭhiante phei chuan a ngenin min ngen lawm lawm hlawm a, hna thawk ṭha lawmman an semah pawh a dawng zîngah ka tel nghe nghe a, mahse engkim chu engmah lo mai a ni.



Chung sàwmna te, ngenna te, ṭawngkam ṭha te, lawmman te chu ka tân thil hlu a ni ve tawh lo va, ka nun ruak hnawk khat theitute chu han ni ngat se zawng tlémin ka rilru te pawh a danglam deuh mahnà; mahse chutiang thil chu a ni hauh si lo!



Ka hun hman tamna ber chu thlanmual a ni deuh chawt a, engtik lâi paw'n ka awm ti ila a sual lo ber ang. Min zawngtu an awm paw'n min hmuhna hmun chu thlanmual bak a ni ngai lo va, tukṭhuan leh zanriah ei mang lova awm chilh châng pawh ka ngah ṭhin hle.



Chutiang hlir chu ka hun leh tha ka hman ral dan a ni a, kum a vei hnuah pawh ka nunphungin ngai a awh tak tak thei tawh lo va, in leh dawr lian tak te chu ka la nei ngei alawm, mahse chung chuan hahdamna min pe lo va, thlamuanna min pe lo va, hlimna min pe lo va, khawvel mit hmuha mâwina leh sum erawh min pe thung a, mahse chu chu ka nuna ka mamawh loh ber te zînga mi an ni!



A hming chauhin kan chhûngkaw dawr ka enkawl chhunzawm a, a tirah phei chuan tih riral vek ka duh hial kha a ni a, mahse ka patea leh nute Sawmite'n an phal loh tlat avangin tun thlenga la enkawl chhunzawm ve ta mai mai pawh ka ni a, zep thu a cheng lo, ka eng tih tha mah a tui thei tawh lo a ni ber.



Kha zana thil thleng rapthlak tak, ka hmangaih em em te ka chan zana thil thleng khan Mizoram a deng chhuak a, kan chanchinin mi zawng zawng beng a fan ta emaw tih theih turin khawngaihtu leh lainatu pawh ka ngah hle a, an mi khawngaihnate chuan keimahah hna thawk se, lungàwi dan te thiam phah ila, emaw hun kal tawha lèta engkim kha siam ṭhat theih se te ka ti vawng vawng ṭhin a, mahse chung ka duhthusam atthlak tak tak te chu thil awmze nei lo mai a ni tih ka hre chhuak leh ṭhin.



Kum te chu an liam zung zung a, ka chhûngte leh ka hmangaih Zualbawihi ka chánna pawh tunah chuan kum 5 lâi a lo ni ve ta, ka rilru leh ngaihtuahna erawh a sârhu lâi ang mai kha a la ni a, ka nun a la ruak reng a, mi dang bula awm ai chuan hun kal tawh ngâia suangtuahna lipuia chen veng veng ka thlang záwk ṭhin a, chu chu ka hahdamna pêng pakhat a ni hial ṭhin bawk.



Zirtawpnî a ni a, thlanmualah hun ka hmang leh chawt a, maimitchhíng vang vang hian ka ngaihtuahna ka kawm a, thlan lung palî inrem tlar ṭhap chu nghengin ka ṭhu awn duai a, ka mitthlâ leh rilruah chuan hun kal tawha kan chhûngkaw awm dan te, ka hmangaih Zualbawihi nena hun kan hman dan te kha a châm reng a, ka ngâi ngawih ngawih hlawm lutuk chu mittui dang zo lovin ka ṭap leh ta nge nge bawk.



Ka rilru chuan Pathian hnenah an zavaia ka hmuh leh theih nân ka ṭawngṭai mawlh mawlh a, tlawh pawh theih talin awm se ka la duh fan a, anmahni hmuh theih dan awm ngat se chu eng pawh tih huam leh chan huamin theih tawp ka chhuah ngei ang.



Chutiang chuan rei fê hun ka hmang a, ka awm dan siam rema ka hawi chhuak chu chawhnu her a lo ni der tawh a, hmai tuai puat hian thawk ka là leh huai ṭhin a, haw a hun tih hre reng mah ila chu lâi hmun chu han kalsan ngawt ka ui a, ka duh dan tak phei chuan an zînga awm ve reng ka châk hial záwk a ni.



Amaherawhchu, min ngaihtuah em em tu ka patea te, nute Sawmi te, nîtei te ka ngaihtuah lo thei lo va, ka haw lo a nih chuan min rawn zawng leh ngei dâwn tih pawh ka hre chiang em em a, an mi ngaihtuahna avang chauha haw zâi rèl ta pawh chu ka ni!



Chutia haw tuma ka inher ruai ruai lâi chuan ka thlang lawka thlan hmâah chuan hmeichhe pakhat hi a lo ṭap khur beuh beuh a, a ṭah ṭawng ṭiau ṭiau a, mahse rei erawh a ni lo thung.



A hmai te chu a tuai thuak thuak a, ding mar zui nghalin a inbeng fai leh thak thak a, chutah thlan hnung chhawna a kal sawn ruala min rawn hmu thut chu ring ang reng tak hian a ṭe chhuak nghal ṭhawt a, a phu lutuk chu a ke chhep sualin a thlangah chuan thui vak lo a lum thla a, puih pawh ka tum chhe tê eih lo; ka en reng ringawt!



"Thawm nei ta che, min tiphu alawm!" tiin min rawn vin kha kha reuh a, ṭap zo chiah e ti lo chuan lungchhe hmêl réng a pu tawh lo hrim hrim!



"Awi, ka ke chu âw, nangmah vang vek!" a rawn ti leh hlak hlak a, bai suih suihin ka awmna zawn chu a rawn thleng chho va, ner nawk hian mi a melh ram ram reuh leh ta nghal a, a mizia tê chu mak ka tih zâwng tak a ni.



"Tun hnuah khatiang khan awm tawh miah suh, nangmah avangin ka ke ka bilh lehnghal a, chutah mi puih pawh i la tum miah lo zui, i hawihhâwm lo hle mai" ti chhar chhar hian min rawn melh hrâ a, min kal pelh lâi te chuan ka en zui deuh ren rawn a, ka en rengna chhan pawh chu ka hre hauh lo.



Haw mai tum kha eng emaw chen chu ka awm khawtawi leh vang vang phawt a, nî tlak dâwnah ha haw ve ta chauh a, dawr lama ka kal kawi hmâsak phawt hnuah in lam ka pan a, in ka thlen chuan a lo reh duk a, chu in chu ka tân chuan in ni lovin mal ngawih ngawiha ka inhriatna hmun leh ka lungngaihna hmunah a chang zo tawh a, duhthusam, a tak ram chang thei lo tur ka suangtuah ṭhinna hmunpui ber a ni ta bawk.



A tawp ta.

(VINCENT thawnthu lo chhiartute zawng zawng chungah lawmthu ka sawi e)



.