DOCTOR MAREMA By Havali Adam (Completed)

[Ngaia]

Last Chapter 43



KUM 13 HNUAH





Mambawihi POV





Ka beisei phak bakin ka nun chu a hlim tawh em em a, ka hlimzia chu sawi pawh ka sawi fiah thiam lo zawk a ni. Ka pasalin min hmangaih a, fa ṭha tak tak kan nei a, a hmaa harsatna kan neih ṭhin zawng zawngte chu bo vek tawhin kan hlim tlang tawh em em zawk a ni.





U Marem pawh a hnaah a kai sang tawh a, tunah chuan Hospital-a a hna sang ber thawkin a awm tawh a ni. Amah tak chuan phu lo a inti hle a, mahse ka pasal chuan a thawhrim rah a seng tih ka hre chiang em em.





Keini a nupui fanau leh a nu leh pate chawmna'n rim takin hna a thawk ṭhin a, tû lungawi lohna mah a siamsak lo va, kan zavai mai chuan min tihlimin min hmangaih thiam em em vek mai.





A sawi fô ṭhin dan takah min hmangaih dan chu a inang lo ṭheuh a, mahse keini chu min hmangaihtu pasalte, pate, fapate kan nei tih kan hriat chian em avang chuan kan laka a awm dan chu kan vui ngai lo hrim hrim. Rosy-i leh Marcus-a pawh zirna lamah an tluang em em a, Marcus-a phei chu a pass ṭha thei hle.





Tin, kan in chu kan sa ṭha vek tawh a, a hma aia lian leh nalh zawkin kan sa tawh a ni. Room pawh a tam ang reng khawp a, Marcus-a pi leh pute chuan in hnuai lam bawka awm leh an duh a, keini ho erawh in chung lamah kan bet fur mai. Kan room vei lamah Rosy-i room a awm a, ding lamah Marcus-a room a awm bawk.





Kan fate chu an rawn leng phei ṭhin a, thil hrethiam rual vek ni tawh mah ila kan inhlat ngai mang lo va, kan inngai hlawm em em zawk a ni. A chang leh infiamna mak pui pui hi kan ti ho a, chu pawh u Marema rawt vek.





"Rosy, i u hian bialnu te a nei ve tawh lo maw? BA lai te a kal ve tawh bawk si a, a neih chuan lo la lenpui se a ṭha ang" ka fate pahnih nena kan awm lai chuan ka ti a, Marcus-a chuan min lo melh rang teh e!





"Nu, ka u hian bialnu a neih i ring reng reng em ni? A bialnute chu ka pa alawm a nih, ani te chu ka pa tel lo chuan khawiah mah a awm thei nâng" Rosy-i chuan a rawn ti awlsam et a, chutah kan tlangvala chuan




"I zak lo mai e a! Ka nei reng aw, bialnute chu ka duh duh zat ka nei thei, nangmah zawk hian bialpa pawh i la nei lo" a rawn ti nghal vat a, a nau thusawi chu a lo la na hle.




"Euuuu, chu bialnu i lo nei reng a ni maw? I nu tal hi chu min hrilh ve ta che" ṭawng fuh inti zet chuan ka lo ti vat a, Marcus-a lah chuan




"Ka nei bawk lo" a lo ti leh ang lawi a, chutah kan Rosy-i a u ai pawha ṭawng thei zawk chuan




"Ka nei i tih zawh chiah khâ, ka pa ka hrilh vek dawn" tiin a ṭhutna aṭang chuan a tho ta uai a, Marcus-a chuan a lo pawt ṭhu leh vat nghal.




"Eng maw ka fanu kei min hrilh i tum chu!?" kawngka lam aṭangin u Marema chuan a lo ti a, aw lo chhuahna lam chu kan hawi phei nghal ṭhap.




"Pa u Mama hian bial" a tih mek laiin Marcus-a chuan a nau hmui chu a lo hup vat a, Rosy-i lah chuan nghal zet hian thawm rawn siam hram a la tum tho.




"Eng maw min han hrilh chiang teh u, bial tih ringawt ka hrethiam lo" tiin u Marema chu kan bulah chuan a lo ṭhu thla a, kei erawh an pafa inbiaknaa lo tel ai chuan lo thlir tawp chu nuam ka ti rih zawk.




"Pa, u Mama hian bialnu a nei" a uin a kut a la thla fel chiah tihah Rosy-i chuan a rawn ti vat a, a u chuan a melh nghal hraw mai.




"Bialnu i nei em ni Marcus? I neih te chuan a hre hmasa ber tur ka ni asin, engatinge min hrilh vat loh?" nui sûng hian u Marema chuan a lo ti daih a, chutah Marcus-a chuan




"Engatinge in phur em em hlawm a? Ka nei hauh lo, nei emaw min ti mai mai a nih kha" a rawn ti tan tan a, Rosy-i chu a lo insum leh thei ta lo.




"A awihawm loh, pa nichin lawk pawh khan a neih thu min insawi theih khum zuah zuah" Rosy-i chuan a rawn ti ta hmak mai.




"Le! Han sawi teh le Marcus, bialnu chu i nei em?" tia a pa'n a zawh leh takah chu Marcus-a chu a thaw hawk a, a sawi hreh hmel ve reuh lutuk.




"Ka nei chiah lova maw pa, mahse ka nei ve châk deuh. Ka bialnu atana ka duh nu chuan min duh thu a sawi a, mahse keimah zawk chu ka sen vekin ka hria" Marcus-a pawh chuan a rawn ti ta nge nge a, u Marema chuan




"Marcus le! Mipa te chu hmeichhe hmaah an lai ngai hleinem, nep an ti lutuk che ang asin. A hrim hrimin bialnu te chu neih tur alawm, mahse kei anga i zei deuh a ngai ang" a rawn tih zawm daih a, nui chung hian min lo en kher bawk.




"Eissss, ka pa chu inla zei leh mai mai" Rosy-i chuan a lo ti ve leh nghal a, u Marema lah chuan sawi chhunzawm a la phur hmel em em zui.




"Pa min han hrilh teh, engtinnge ka chhan ang? Aw ka ti tawp mai dawn em ni?" Marcus-a chuan a rawn ti ta thuai a, Rosy-i erawh a lo nui vak vak.




"A duh tho che chuan i kuah tawp ang a, a hmuiah tak i fawp leh ang a, chuan engkim chu a ṭha vek a ni mai. I duh thu pawh sawi a ngai lo, i chezia aṭang chuan a hrethiam vek mai ang, i nu ang hi an ni ve ngawt te a nih loh chuan" a rawn ti leh kher ang a, kei min tel ve phet a tum chu a nuihzat thlak zawk.






Chutah Rosy dil chhuti bawk chuan a pa chu kan inngaihzawn lai vel chanchin a zawt ta ngei a, u Marema chuan a sawi phur em em leh nghal. Kan infawh hmasak bera ka ben ringawt thute a sawi chhuak a, kan chhungkua chu kan hlim tlang hle.





Zan rei tak thleng kan nupa room-ah chuan kan fate chu an awm a, hnai hle mahse an room lama an phei peih tawh loh avangin kan vai chuan khum khatah kan mu ta ringawt bawk.




Mipa pahnih chu inhnaih takin an mu a, keini hmeichhe pahnih pawh chuti tho, kan awm dan chu a hlimawm tak zet. Kan mut hnuah pawh u Marema chuan kan inngaihzawn lai chanchin a la sawi reng a, kan fate lah chuan an ngaithla tui mai bawk si. A thusawi tawp lamah chuan a hrilh fo ṭhin mipat hmeichhiat lama fimkhur a ngaihzia chu a hrilh leh hram bawk.






U Marema ka ngaihsan em emna pakhat chu kan fate Sex Education lam a zirtir ziah chu a ni. Thil hrethiam rual an nih aṭangin a hrilh ziah a, keini pahnih kan lo chesual tawh kher bawk nen kan fate chu fimkhur lehzual turin a chah lawm lawm ṭhin.





A tirah khan kei chuan Sex Education lam tlang tak taka a sawi chu ṭha ka ti vak lo va, a sawitu ni miah si lo kha ka lo ip chawih chawih zel. Puberty lam thlengin kan fate chu a hrilh uluk hle a, a sawi fiah thiamin sawi tur a hre bawk sia an taksa enkawl dan tur thleng chuan a hrilh fai vek ṭhin.





Amaherawhchu tunah chuan chung a thil lo hrilh ṭhin te chu a ṭhatzia ka mit ngei hian ka hmu tawh a, fate Sex Education lam zirtir chu a lo pawimawh hle tih ka hmu chhuak tawh bawk a ni.





Kan fate chuan an pa thu chu a kipa kawiin an zawm ta reng a, chu chuan an nun pawh a hruai ngil phah hle. Marcus-a kum 16 vel a nih lai phei kha chuan an inbuaipui deuh reng zel a, mipa zawk na nâ na chu inbuaipui dan pawh an thiam khawp mai.





Kan taksaa thil inthlak danglam lo awm ṭhin chu Marcus-a chuan a hrethiam lo thei hle a, mahse a pa chuan engkim a hrilh fiah vek zel. A tih dan tur te, a enkawl dan tur te pawh a hrilh ṭhin a, sawi zah pakhat mah a nei ngai lo.





Chutah Marcus-a a buaipui fel zo ta maw tihah Rosy-i chu buaipui a ngai ve leh a, ani phei chu a ṭap leh tawp zel. Ka fanu awm dan chu ka tawn hnu vek ni mahse kei ai aiin ka pasal chuan buaipui dan a thiam a, Rosy-i pawh a pa thu zawmin rei lovah a pangai ve leh mai bawk.






Nilaini a ni a, kan thil tih tum chu a pawimawh em avangin Marcus-a leh Rosy-i paw'n class an ṭhulh ṭhak a, chutiang bawkin u Marema nu leh pate paw'n Chaltlang lama an dawr chu an khar hmak bawk. Tlai dar 4 a ri tawh a, u Marema pawh chu a lo haw ṭep tawh. Ka phone phawrhin ka call leh hram a, ka phur tawh em a tin ni!





Dawra pen kawi lawk a tum thu a rawn sawi a, kei chuan lo haw thuai thuai turin ka ti thung. Chutia hlauhthawn hmel taka ka ṭawng avang chuan min rawn ngaihtuah nghal hle a, a lo haw vat tur thu pawh a sawi nghal nghe nghe. A sawi ang ngeiin rei lovah a motor thawm kan hria a, kawngka hawnga in chhung a lo luh chiah tihah






"HAPPY BIRTHDAY" kan lo ti rual ṭhap a, ani erawh chu thil awmzia hre lo ang maiin a la meng buai hle.




"Ka fapa, hna i thawk nasa lutuk a nih hi i piancham pawhi i hre tawh lo chu a nia" tiin Marcus-a pu chuan a va kuah a, a birthday gift ken chu a pe nghal bawk.






Chutiang zelin keini ho chuan u Marema lam chu kan inpan chhawk a, kuah pahin birthday gift chu kan pe zel ta bawk. Keiin ka pek lai chuan min lo nuih suk a, ka kuah te chuan mi dang ang lo takin min kuah rei bik a, awm sawn ka tum tawh hnuah pawh min kuah bet leh ta tlat.





Chutah min kuahna aṭang chuan min nam sawn deuh a, ka hmuiah tak a rawn fawp nghal. Mi dang ho chuan kut an lo beng dur dur a, Marcus-a phei chu a lo au phur leh tawh khawp mai.





"Pa i zei vel reuh êeee, i tlangval lai ka hmu chhin châk" Rosy-i chuan nui ver ver chung hian a rawn ti chhuak tawl a, kan zavai chuan kan nui leh ta vek.





Ka pasal piancham chu hlimawm leh inpawh tlang takin kan hmang ho a, u Marema pawh a hlim ve khawp mai. Zan lamah chuan a fate chuan chhun lama an lo zir lawk ang ngeiin an pa tan chuan thil eng eng emaw ni an ti a, u Marema pawh a nui nasa hle.





Kan mu thei tawh ang chu tih nak a laiin a pa ber chuan infiam a rawt leh tlat pek a, a fate pahnih lah chuan an lo phur em em zel bawk si. U Marema leh Marcus-a chu an inbuan a, an intina palh ang tih ka lo hlau thei khawp. Rosy-i lah chu fuihpawrh ang hrim hian a lo ṭawng ve deuh chhen a, video chuan a cover reng bawk.





Chutah mipate pahnih chu an inban elh leh a, Marcus-a chu a beidawng titih ta mai. A pa a hneh thei bawk si lo hneh a duh bawk si, a pa lahin a lo chak tir phal bik bawk si lo nen a titau ta ringawt.





Chu zan chuan fapa tlangval kan nei tawh emaw ka tih chu kan lo la nei reng reng lo tih min hriat chhuah tir a, a hnu rei lote ah an pafa chuan an nui dun leh vak vak tho.






"Le! Phei tawh rawh u le, zanin chu i nu hi ka ta a ni tlat" u Marema chuan a ti a, kan fate pawh an lo nui ṭhaw mai.



"Pa nua kan duh leh tawh a nia, chuan mipa ka duh aw, i siam thiam dawn tih ka chiang. Kan lo muhil vang vang ang, lo kal rawh Rosy, phei vat ang" kawngka bul an thleng tawh tihah Marcus-a chuan a rawn ti lawng lawng a, a ṭawng zawi lo bawk sia in hnuai lama mite'n an lo hria ang tih ka hlau hle.




"Lungngai suh Bawiha, mipa in duh te chuan mipa a ni mai alawm" pakhat lah chuan a lo ti vei rauh a, nu ni mah ila ka zak em em tho.




"Pa kei chu hmeichhia ka duh" Rosy-i'n a rawn ti leh chuan ka thinin a tuar ta lo. Thinrim hmel tak hian




"In room-ah phei vat vat mai teh u" ka lo ti hrawk a, ka fate pahnih pawh nui vak vakin an phei ve mai bawk.




"Zanin chu ka ti tak a nia aw, ka nghei rei tawh lutuk" tiin u Marema chuan min pawm kang lawp a, khumah chuan min nghatin min fawp ta mial mial.




"Lawk lawk, kawngka saw i kalh em?" a âwma nam ṭai chung chuan ka ti a, ani erawh phur deuh hian a rawn bu nghauh nghauh a, min lo fawp zui leh nghal.






Hmanhmawh takin a thuamhnawte chu a inphelh sawk sawk a, keipawh chu zawi muang hian ka lo inphelh ve bawk. A inphelh zawh chuan min lo phelh leh nghal zung zung a, tunah chuan ka kawr a phelh lai ka hre ve ta alawm.





Nui sun sun hian min lo fawp a, insum theihna tlachham tawh ang maiin min fawp duhthaw nghal em em bawk. Ṭum dang ang thovin min sawngbawl dan chu a nuamin a dangdai leh hle a, ka taksa chhunga a lo luh lai te chuan amah ka lo mamawh tawhzia chu ka hre nghal.





A sir lam aṭang bawkin ṭan a rawn khawh leh zawt zawt a, ka insum rei thei lo ta hle. Rei lote ah a vawr tawp chu ka thleng thuai a, ka pasal erawh chuan a lo la thleng ve leh pek lo a ni ngei ang a rawn la che mial mial.




Vawi leh khatah a chungah chuan min bawh tir thut a, min kuai kunin ka hmui chu a fawp zui bawrh bawrh bawk. Hnuai lam aṭang chuan muang changin a rawn che a, a muang emaw a rang emaw a mi tawhna hrim hrim chu ka thlahlel em em vek a ni.




A tira muang fan raih si kha rei lovah a rawn che rang tial tial a, ka ṭe chhuah mai lohna'n ka hmui chu ka hup ta tawp. Rang em em mai hian a rawn che a, a tawpa tawpah chuan vanram tla fual tawngin thlan tui nen kan awm ta hle hle.





"Kha zet chu! A va'n dangdai ve, mipa a nih ngei ka ring" a rawn ti sup a, amah chu en lo mah ila a nui tih ka hre thei.




"Muhil ang" tiin ka insiam ṭha a, a sir zawngin a awmah chuan ka bei a, ani pawh insiam ṭhain min lo kuah ve nghal.





A tukah te chuan zan lama thil thleng vang nge ni ka fate hmaah chuan ka lai vel a, ka pasal lah chuan engah mah a ngai ve der si lo. Marcus-a chuan a pa chu a ko hrang a, eng tak sawi dun leh ang maw? Rosy-i chuan a room aṭangin min lo ko lawng lawng a, ka va thlen chuan ka rin lawk ang chiahin a thawmhnaw hak turah a lo buai leh hle.




Sport an nei dawn a, inthuam dan tur chu a lo bo leh hle a, Rosy-i hi chu keima lam deuh a nih avangin buaipui thiam a ngaihzia pawh ka hria. Thin butut hi a nei ve ṭhin reuh a, chutak chu keimah leh a pa a chhun kawpna a ni.





Thawhṭanni zan a ni a, Rosy-i nen kan awm dun leh reng tawh. U Marema erawh a inbual a, ni dang aia a lo haw tlai deuh vang a ni pakhat. Rosy-i chuan a zirlaibu a lo keng lut nual a, a pa chu a thiam loh lai zawh a tum leh tawh a ni ngei ang.




Kei a nu ve hi chu zir sang lo tih takah ka lak tlak loh em em a, mahse ka fate chuan min hmusitin ka thu an zawm loh phah chuang lo. A chhan pawh ka pasal chuan kan fate chu thu ṭha tinreng a hrilh a, nu leh pa hmangaiha zah a pawimawhzia a hrilh fô ṭhin.





Fate chu nu leh pate zara awm ve mai mai leh lehkha zir thei mai mai an nihzia te a hrilh a, kan fate kaihhruai dan a thiam lutuk avang chuan ka pasal chu ka hmangaih zual phah ngawih ngawih a ni.





Ka rin ang ngeiin Rosy-i chuan a pa chu a hriatthiam loh lai leh a chawh thiam loh lai te chu a zawt ta ngei a, ka pasal pawh chuan ṭha deuh chuan a hrilh ve mai bawk. U Marema chuan Marcus-a chu a zawng ru deuh hian ka hria a, keipawh chuan kan room-a a lo lang har lutuk chu a mak ka ti tawh.





Zan dangah te chuan a nau nen an lo lut ziah a, a awm lo chiah chu kan ruak deuh huaiin ka hria. A thawm lah hriat tur a awm mai bawk si lo, ka insum thei ta lo chuan





"Rosy, khawnge Marcus-a hi? A hmel a lo va lang har bik ve" ka ti ta tawp a, thinrim erawh ka thinrim hran lo.




"A hrilh lo che u mi nu? A ṭhiante nen an leng lawk dawn alawm, kei chu min hrilh vek asin" Rosy-i chuan a rawn ti a, kei ang bawkin ka pasal chuan mak a lo ti hle.




"Ani hi tawh sualte a lo tawk ang e aw? Zan dangah a leng ngai si lo, a hrim hrimin engatinge kei min hrilh lova a lo len reng reng ni?" ka pasal chuan a lo ti deuh hmuk a, chutah kawngka lam aṭang chuan Marcus hmel a rawn lang hlawl mai.




"Khawiah nge i kal Marcus? Engatinge keini pawh min hrilh hmasa lova i lo chhuah?" tiin a lam chu ka pan vat a, a bul ka thlen chuan a rim a dik lo tih ka hre nghal.




"A ho em mai nu, tu nu mahin an fate lenna lehzel an hre kilh kelh ngai hleinem" a rawn ti deuh hmuk a, a awm dan chu a dik lo tih ka hre chiang ta khawp.




"Marcus!" ka ti deuh hrawk a, chutah amah vek chuan min nin hmel zet hian




"I ninawm mai e a!" a rawn ti leh hmuk a, chutah zet zawng u Marema chu a insum thei ta lo.




"Enge i buaina? Sawi rawh LALRINKIM, chuan i nu hnenah hian ngaihdam dil nghal ang che, i dil lo a nih chuan i lakah hian ka lungawi lo khawp ang" u Marema chuan a rawn ti nghet charh a, kan awmna lam pan chuan a rawn phei zui nghal bawk.




"Chu chu eng rim nge? Zu i in em ni? LALRINKIM ka thin hi tirim miah suh aw, min chhang rawh LALRINKIM zu chu i in em?" kan bul a rawn thlen rualin u Marema chuan a rawn tih leh nghal a, kei chu ka lo ṭawng duh tawh rih lo.




"Min vin reng suh, chuan ngaihdam dilna tur ka neih awm ka hre lo ve" Marcus-a chuan pawr tak hian a rawn ti phiar a, chutah u Marema chuan thinrim em em hian




"Enga!? I zak lo em ni?" tiin Marcus-a chu ben a tum a, ka lo ṭe tuar a, Marcus-a pawh chuan a hlau hle a ni ang a mittui chu a tling nghal pam.




"He inah hian ka riak dawn lo" ti vakin Marcus-a chu ṭap chungin a tlan chhuak a, u Marema pawh chuan a kut chu eng vung vungin a dah thla ta riai riai.





Chu zan la lâ chuan u Marema chuan a fapa chu a zawng a, mahse phone call tak ngial pawh a lak duh bawk si loh avangin kan hmu ta lo. U Marema chu a fapa ben a tum avang chuan a inchhir ta em em a, Rosy-i pawh kan boruak tawnin a zir lo bawk nen kan bulah a riak ta tawp.





Zan dar 2 velah u Marema chu amah chauhin a lo haw a, a beidawn hmel hle. Ka lo muhil palh a ni ngei ang ka harh leh chuan khua a lo eng ṭan dek dek a, u Marema erawh zan lama a ṭhut dan ngaiin a lo la ṭhu reng.





Rosy-i min kuahna chu dim tein ka la sawn a, tih harh hlau takin ka tho ṭhem ṭhem a, u Marema chu ka pan vat bawk. Ka pasal taksa chu ka kuah a, a thiam loh a awm loh thu leh Marcus-a zawk a dik loh thu chu ka hrilh mawlh mawlh a, mahse ani erawh a ngawi reng ringawt.





Chhun thleng chuan Marcus-a hmel chu kan la hmu lo hrim hrim a, khawnge a awm tih reng kan hre lo. A ṭhian kawmte lah kan hre ve der si lo, a chhan pawh ṭhian kawm tam mi a nih loh vang a ni.





A pa nen hian an inkawm deuh chawt zel a, Rosy-i phei chuan a pa avangin Marcus-a chuan bialnu a neih theih a ring lo hial a nih kha! Tlai lama u Marema a lo haw chuan a hun hman nawm lohzia chu a sawi reng a, a fapa ben a tum avanga a inchhir leh ta lutuk chu ka khawngaih zawk.





A lo haw ve mai ka rin avangin u Marema chu ka thlamuan ṭhin a, mahse a thla a muan pha chuang der lo. Zan thleng chuan a hmel kan la hmu lo lehzel a, Rosy-i paw'n a u chu a ngaihtuah ve khawp. A ṭhiante kaltlangin a u awmna chu a zawng ve a, mahse a hre ta bik chuang lo.





"Marcus!" kan room kawngka bula ka hmuh thut avang chuan ka ti hluai a, ka bula a fapa zawng tura insiam mek u Marema pawh chuan ka hawina lam chu a hawi rang kher mai. Marcus-a chu chak zet hian a lo kal phei a, a pa ke bulah chuan a rawn ṭhingṭhi nghal thlawp bawk.




"Pa ka tihpalh, ka tihpalh lutuk, min ngaidam rawh" ṭap chhuak hawk chung hian a rawn ti a, a pa ke chu a vuan tlat bawk. U Marema chuan Marcus-a chu a chhuk melh vawng vawng a, a rilru a nat hmel hle.




"Tho teh le ka fapa, keipawh hi ka dik lo ve tho alawm. Engatinge nizan khan zu i in ve? Ka phal lo tih i hre vek si a" tiin aw dam tak hian u Marema chuan a fapa chu a bia a, a ṭhingṭhitna aṭang chuan a pawt tho zui nghal bawk.




"Ka hre lo, ka ṭhiante khan nep min ti a, zu pawh in ve ngam lo te min ti a, chuvang pawh chu a ni maithei" tiin Marcus-a chu a rawn ṭah ṭawng zuah zuah a, u Marema chuan a biang vela mittui hru chung hian




"Chungho chu kawm tawh suh aw, i tan an ṭha lo. Nang chu ka fapa ka hmangaih em em i ni a, mi dang chuan zu inin an taksa tichhe mahse nang chu ka phal ve lo che a ni. I hria em?" a tidam leh dap a, Marcus-a erawh a lo ṭap khur char char thung.




"Aw pa, ka in tawh lo vang. I thu ka awih lo leh tawh lo vang, min ngaidam rawh pa" la ṭap reng chungin Marcus-a chuan a rawn ti leh a, a pa chu a en chho ran bawk.




"Ka ngaidam che alawm" a pain a ti zo chiah tihah Marcus-a chuan a kuah nghal thlawp a, a rawn ṭap chhuak hawm hawm bawk.




"Lo kal teh u Mambawih, Rosy, ka lo kuah vek teh ang che u" u Marema'n a lo tih chuan keini hmeichhe pahnih chuan kan mittui chu kan hru zeuh a, u Marema chu kan va kuah ta vat.




"Nu ka tihpalh aw, zah lo taka ka biak che avang khan" Marcus-a chuan a pa âwma la bei reng chung hian a lo ti a, keipawh chuan ṭah insum zetin ka lo buk khum ve nghauh nghauh.




"Nangni hi ka nunna in ni a, in nat chuan ka na ve zel a, in hlim chuan ka hlim ve zel tih in hre reng dawn nia. Ka hmangaih em em che u a, ka rilru tina zawngin awm lo hram ula ka duh a ni" u Marema chuan aw khur dat dat hian a lo ti chhuak thum dup a, keiniho chu a âwmah chuan min kuah nghet hle bawk.




Chu zan aṭanga thla 1 a liam leh meuh ka danglam tih ka inhre chhuak a, mahse u Marema chu engmah hrilh ka la duh rih lo thung. A rukin ka in test a, ka beisei ruk ang ngeiin ka lo rai ta ngei. U Marema chu a buai zual a, thil tih neuh neuh tur a ngah thei khawp mai.




Zirtawpni zan a ni a, ka bag chhunga pregnacy test kit chu ka phawrh riai riai a, ka pasal leh ka fate erawh an titi tui hle. U Marema chuan thawnthu mak deuh leh History lam pang a sawi a, kan fate chuan a ngaithla tui hle bawk.






"Lo hawi teh u" khum aṭang chuan ka ti chhuak phawng a, Marcus-a leh Rosy-i chu ka awmna lam an rawn phei nghal.




"Pa saw saw enge?" tiin Marcus-a chuan u Marema ka awmna lam lo hawi ve lawk lo chu a zawt a, a rawn hawi loh chhan pawh a sawi tui em vang a ni.




"Ka hre bik nâng" min lo en zeuh a, rei pawh hawi let lovin ka lam chu chik tak hian a rawn leh nghal ta vat. A ṭhutna aṭanga thovin khumah chuan a rawn lawn kai a, ka kuta thil awm chu a en chiang hle.




"Mambawih, i rai leh maw!? Âwwww ka nupui duh tak, hmelṭha leh ka hmangaih em em nu" tiin u Marema chuan khumah min bawh thlu a, ka hmuiah chuan a rawn fawp vang vang bawk.




"Yessss!!!! Nau kan nei dawn ta tak e! Pa, i va'n che rang leh si ve, mipa a nih chuan ka va han sawp nasa dawn thei tak" tiin Marcus-a chuan a pa chu a rawn bawh ve nghal a, chutah Rosy-i ve thung




"Nu, mipa a nih chuan fa nei leh rawh aw? Nau hmeichhe fel deuh ka duh ve dawn a nia, i neih leh loh chuan ka lungawi lo ngawt ang" a rawn ti nang nâng a, an vai chuan min bawh ta vek mai.




"Tho thuai teh u, in rit a nia, nau neih leh kha chu sawi tawh suh u. Ka hrehawm tawrh tur a zual mai mai, insiam te a nia ka duh tawh zawk ni!" anni pathum nam ṭang ṭang chung chuan ka ti a, chutah u Marema chuan




"Fate u awm sawn rawh u, i nu hi kan delh rit lutuk palh ang" a rawn ti ve ta nge nge a, mahse kan fate awm sawn hnuah pawh amah ber chu a awm sawn duh leh chuang miah lo.




"I phakar em mai pa, kan kuah ve duh tho alawm" tiin kan fate pahnih chu a ngai te tein min rawn kuah leh a, hauh pawh ka lo tum tawh bik lo.



A TAWP TA!!!!!!!

A HMAWR KAN BAWK THLENGA DOCTOR MAREMA THAWNTHU LO CHHIARTU ZAWNG ZAWNGTE IN CHUNGAH KA VA LAWM SI EM, THAWNTHU KAN HAN ZO FEL THEI TA HI PATHIAN LEH NANGNI ZAR LIAU LIAU A NI E.

COMMENT SECTION LAMAH INHMUH LEH ṬHEUH TUM ANG AW, COMMENT LO BIK NIH AWIH LOH KAN TI ANG.


ADS CLICK THEIHNGHILH LO LA, I LO LA LIKE LO A NIH CHUAN MIN LO LIKE SAK VE LA, COMMENT NGEI NGEI BAWK TUR.