DOCTOR MAREMA By Havali Adam (Completed)

[Ngaia]

Chapter 37





Marema POV





Thinrim tak chuan ka kal hmawk hmawk a, motor ka nei rih bawk si lo nen Taxi stand lam chu ka pan ta char char. Ka ngaihtuahna a kal bing lutuk vang nge ni mi han nek deuh chawrh te pawh ka nei a, mahse min rawn au zui lem lo.






Rawn pawrin min rawn hau vel nâ se chuan ka ngawi mai mai hauh lo vang, tunah tak hi chuan engtik lai pawha insual peih at reng ang maiin mi khawih leh sawisak chu ka châk a, ka thinrim hlur mai.






Ka nu lah chuan ka pianchama min present IGNIS car rawng pawl chu chhuahpui a la phal lo leh ta nghal a, a fapa hian 10 pawh ka lei thei tih a hre lo emaw ni! Ama min pek a nih avangin ka roh ve em em a, enkawl pawh ka enkawl uluk hle.





Ka bike erawh min present a ni lo hlauh a, ni leh ngat se chuan a sawi tel leh ngei ang. Min present a ni emaw ni lo emaw bike kher chu ka mamawh hran tawh lo, ka mamawh a nih tâk leh ka lei mai ang, anni puihna ka mamawh hrep lo ve.





"Taxi, i tlan hman em?" ka ti ram deuh hmuk a, Taxi driver lah chuan meizial pak khu pâk pak chung hian




"I hire dawn te a nih ngawt loh chuan ka tlan thei lo, ka lo thleng ve chiah sia, mi dang contri tur lo nghak la" a rawn ti a, kei chu ngawi rengin a motor hnung seat-ah ka ṭhu lut nghal hmak.




"Ramhlun South" ka ti leh hmuk a, ka hire dawn a ni tih hrethiam takin driver pawh chuan motor chu a tinung ve nghal.





Taxi driver chuan min be lo hrim hrim a, min bia pawh ni se ka chhang peih kher lo vang. Ka phone tak ngial pawh ka khawih peih eih lo va, a rawn nghawr leh dat dat ṭhin chu ka hre reng tho. Ka phone rawn nghawr chhen ka ning lutuk chu ka ipte aṭangin ka phawrh a, ka pate lam a nih avang chuan chhang lovin ka switch off ta hmak.






Ka pa khan min beng vel a, ka tet tê aṭang tawha kut min thlak ngai miah lo ka pa'n kut min han thlak thut kha chu ka la na thlâwt a ni. Chutah ka nu kha a la ṭan leh ta nghal a, LALRINMAWII pawh dik miah lo mahse ka nu chu ka dem lo thei lo.





A tir berah a sual em em a, LALRINMAWII nena kan inngaihzawn lai zawng zawng pawhin min dodaltu leh ka nupui atana duh lo ber bertu kha a ni hrim hrim a, engtinnge ka nupui nen hian inpawh taka awm kumkhua thei turin ka lo ngaihtuah theih zawk ni!





Ni e, an dik lo ve ve. Ka nupui pawh mi dang lakah a uire a, chutiang bawkin ka nu pawh ka nupui lakah sual a chhuah tlat bawk. A bik takin ka fapain kum a tlin hnu khan ka nu chu a rawn sual ṭan berin ka hria a, ka nupui pawh khan min hrilh ṭhin a, mahse ka nu ni lovin ka nupui a nih kha ka ngaihtuah tlat zawk ṭhin.





Ka nupui LARINMAWII chuan mipa dang lakah min uiresan a, chiang takin a uire tih ka hre bawk. A chhan chu a ka ngei aṭangin a uire thu ka hria alawm. Khatia khuma a taksa khuh hram hrama a lo mu khan ka buai a, ka chi ai a, ka hlauthawng tak zet bawk.






Ka nu thusawi kha chu a them paw'n ka awih duh lo, thu belh emaw a nei dawn tih ka hre chiang. Rilru hlauthawng em emin room-ah ka chhohpui a, mahse ka zawhna min channa kha chuan insum theihna min titlachham ta a nih kha!






Amaherawhchu engmah ka hre lo a tih lai tak khan tlem chuan beiseina min la pe a, LALRINMAWII chu uire ni lovin hrai ruih avanga khatianga lo awm kha ni se ka la ti fan. Ka hmangaih a, ka thinlung leh tih tak zetin ka hmangaih a, a nat ka phal lo ṭhin.





Ani ve thung erawh chuan na takin min siam a, min hmangaih ve tawh lo ti dawn ila min hmangaih loh chu ka ring phal bawk si lo. Na taka siam ve ka châk rualin amah ka hmangaihna chuan tina thei lovin min siam a, a nat chuan keimah bawk ka na leh dawn tih ka hria.






"Ramhlun South chu kan thleng a, khawi lai velah hian nge ka drop ang che?" Taxi driver chuan a rawn ti a, chhukna tur ka hriat bik miau loh avangin a rem lai laiah chuan tiding turin ka hrilh ta tawp.





Ka hawi vel a, khawiah chuan nge kan mihring phiangsena chu a awm ang tih ka hre ta hauh lo. Ka â reng reng ka ti, ka chhuah dawn te khan a thlalak emaw a address kimchang emaw te kha lo ken awm zawk tak!





Kha tih hun lai erawh kha chuan ka thinrim lutuk kha engmah ka ngaihtuah fim hman lo a nih si khâ. A hming pum tal ka hriat tho avangin dawr nghaktu te leh Ramhlun South mi ni awm te chu ka zawt ta tawp tawp a, tûmah lah chuan an lo la hre lo zui.






LARINMAWII chu call a ṭhat zawk ka ring ta a, ka phone chu phawrhin ka switch on a, ka call ta vat. Ka call lah chu a la la thei mai lo zui, phiangsen hian! Chutia ka phone ka ken lai chuan Doctor Tetei hnen aṭangin phone call ka dawng a, ka biak chuan ka kal dawn leh dawn loh mai mai a lo sawi thung.





A ṭul ber ka va han ti lo tak, min hmuh loh te chuan ka kal dawn lo tih hriatthiam ve mai awm. Doctor Tetei nen kan inbiak zawh chuan LALRINMAWII chu ka call nawn leh ngat a, bîak biak pawh ka peih rih vak lo a ni.





"Aw u Marem, i lo haw tawh dawn em?" a rawn ti thuai thuai a, a hlauhthawn hmel hle bawk.




"Haw dawn rih lo, min uiresanna pa awmna dik tak hi min hrilh thuai teh, a phone number emaw a thlalak emaw tal pawh lo thawn nghal ang che" ka lo ti hrawk a, ṭawngkam nem chu ka hmang duh lo hrim hrim.




"U Marem, khawngaihin ti suh, tualthat miah suh aw" hlauthawng aw leh ṭap aw deuh chuan a rawn ti leh vat a, a awm dan avang chuan ruahmanna an lo neih dun te ka ring ta hial.




"Khatiang thu ṭangkai lo sâwi sawi lo khan ka thil duh chu min pe vat mai rawh, ka hmanhmawh teh a nia" ka ti leh hmarh a, min pe vat mai se ka ti.




"Ka hre lo, an awmna chiang takin ka hre bik lo. A phone number pawh ka nei lo, mahse a thlalak chu ka nei" a rawn ti sep a, chutah kei chuan awih loh hmel fê hian




"Nang hian dawt i sawi leh a ni lo maw, dawt sawi mai lah hi i awlsam ang reng si a" ka lo ti kher a, elhsen takin ka nui ri zui hak bawk.




"Dawt ka sawi lo u Marem, ka ti tak tak. A thlalak chiah ka nei, a phone number chu kei ni lovin ka nuin nei zawk maithei a ni" a rawn ti leh a, a ṭawngkamah chuan min hlauhna nasa tak a awm tih ka hre thei.




"Ka nu chu ka biak ring hauh suh, i neih ang ang chu min lo thawn phawt mai teh. Ka hmanhmawh a nia, muangchang lo vang che" tiin phone chu ka off khum hmak a, a aw ka hriat ringawt pawh chuan ka thinrim hlur thei.





Zankhuaa ka inngaihtuah lai kha chuan Sawmtea an tih chu thah ka tum tak tak a, ka that châk lutuk tlat. Zinga ka chhuah dawn thleng khan thah tumna rilru ka nei a, mahse ka nupui thusawi khan thah ai chuan police lam hrilh lam fuh zawkin min hriattir ta a ni.





Police hrilh ka tum lehna chhan pawh hrai rui anga a insawi vang a ni a, duh vang renga uire ni lovin hrai ruih vanga uire ni hram se ka ti ngawih ngawih.






A uire avangin ṭhen emaw hnawh chhuah emaw ka tum lo va, karah fa a lo tla ve tawh bawk nen thil a buaithlak duh khawp. Ni lo, kan fapa vang chauha ṭhen lo ka ni lo va, amah ka hmangaih em em vang zawk a ni. Mi dang tan ka phal lo va, ani chu ka hmeichhia leh ka ta chauh a ni kumkhua ang.






Kan inbiak aṭanga rei lovah thlalak chu ka dawng a, tlem chuan ka rilru pawh a hah lutuk tawh lo deuh. Ka phone-a thlalak chu mi ka hmuh zel a, ka zawh ho lah chu Ramhlun South-a cheng an lo la ni lo zel leh ta nghal. Grocery dawr lian ve pangai takah chuan ka lut tawp a, luh dawna address intar ka en khan Ramhlun South tih a lo inziah kuau avangin an hriat ngei ka ring tawh a ni.





Dawr lo nghaktu awmna lam chu pan a, a lo la buai hmel em em zui. Mi chi hrang hrangin an thil leina man an lo pe a, cash memo a pe tel zel bawk sia a rei ka tih tawh khawp.





"Ka pu, he tlangval hi i hriat zawng a ni em? Ramhlun South-a cheng a nia, mahse a awmna tak hi ka hre lo a, ka rawn zawng a nih ber hi" ka thinrimna thup hram hram chuan ka ti a, dawr nghaktu pawh chuan ka phone-a thlalak chu a rawn en zui ve nghal.




"Sawma a va ang ve, khu lai lawkah khuan a awmin ka hria. Kan dawr sirah hian step chhuk thla a lo awm ang a, i chhuk thla zel ang a, building rawng pawl leh var khu a in luahna a nia, khawi floor ber nge a luah chu ka hre tawh lo" a rawn tih chu ka phur ta sârh a, chutah kal sawn lawk lo chuan




"Amahin in a luah em ni ka pu? Awmpui dangte a nei em?" ka ti leh hram a, hmuh ngei ngei tuma kal ka nih avangin thil chu ka hriat chian a ngai tlat.




"Aw amah mai khan a luahin ka hria, inkhawm pawh a inkhawm ve ṭhin alawm" a rawn ti leh chuan lawm thu hrilhin ka chhuahsan nghal.





Dawr nghaktu sawi ang chuan ka chhuk thla zel a, building rawng pawl leh var pawh ka hmu ta ngei e. Khawi floor ber nge a luah ka hre lo va, ka hriat loh miau avangin zawn buai vak ai chuan tiin building bula mite chu ka zawt leh ta tawp.





An building ṭhenawm te'n 3rd floor a luah thu min lo hrilh chuan lawm thute sawiin ka chhuak leh nghal a, eng pawh ni se ka hmuh hunah chuan kut ka thlak dawn chiang hi a ni tawp.





Building chhunga step chhuk thlaah chuan ka chhuk thuai thuai a, 3rd floor pawh chu ka thleng thla rang hle. Mahse eng thil phiangsen nge ka hmuh leh tak hi! Kawngka chu Tala lian zet hian a lo inkalh a, ka thinrim lutuk chuan kawngka chu ka tlawh ri ṭhuai.





Kan mihringa chu a lo tlan bo hman a nih chu! Ni lo, kei hi beidawng thei ka ni lo. Beiseina tlem te ka la neih kha a tak ni mawlh zawk teh se, thudik hre tur erawh chuan Sawma hi ka zawn chhuah a ngai thung.





In neitute chu ka be chho nghal a, engkim erawh ka hrilh vek kher lo. An hriat a ṭul lo va, an inrawlhna tur pawh a ni lo. A in luahna in neitute sawi dan chuan thingtlang lam mi a lo ni a, tukin zingah an khaw lamah a haw a lo ni awm e.





Ni zan te khan lo va zawng ila chuan ka hmu hman ang a, ka sawisa hman ang a, ka that hman hial maithei a ni. Kan inbiak zawh hnu chuan rang takin police station lamah ka kal a, Sawma thlalak chu hmuhin a chanchin kimchang chu ka zawt nghal bawk.





Buaina ka va theh luhna ber police chuan lo ngaih hoh viau a tum mai bakah a chhungkaw chinfel chi mah mah lo maw a lo ti a, mahse kei chuan chhui chian ngei ni se ka duh avangin hrai ruih a nihna lai tak chu ṭanchhanah ka hmang ve ta hmiah.






Ka nupui thusawi chu awih duh lo hle mah ila ka awih ru tlat a, chutak chuan beiseina min la pe tlat bawk si. A lan dan chuan thingtlang lamah zawng tura kan zin a ngaih hmel a, SP chuan ka buaina te lo hriain police pakhat chu min chin felsak turin a ti ta bawk.






Ka hna lam erawh ka ngaihven tawh lo tluk a ni a, dam lo enkawl ngaite chu awm tho mahse Doctor Tetei'n a lo buaipui theih mai ka ring. Kei erawh chuan thil dang tihtur pawimawh tak mai ka nei a, chu chu ka tih loh chuan hna pawh ka thawk ṭha thei lo zawk ang.





Chuvangin ka tihtur neih chu tih vat vat a, zawh thuai thuai ka duh zawk a ni. Haw lamah chuan haw tlang nghal mai ka tum a, mahse mamawh ka nei tih ka hre chhuak nghal. Showroom lam chu Taxi bawkin ka pan leh a, showroom chhung ka luh chuan dealer te chuan motor thleng thar a tam thu an lo sawi nghal mawlh mawlh.





SUV Car, a dum leh var chuan ka mit a la ta em em a, a man pawh nuai 13 lai a kai ve. To ang reng viau mahse ka mamawh tlat avangin ka lei ta nge nge a, chu bakah a ṭhat hmel ka ti.





Ka car hmasa IGNIS kha chu ka tan chuan a te deuh ti chang kha ka nei a, SUV erawh hi chu chuan pawhin ka thawl nuam tawk vel chiah ang ka ring. Pawisa inpe felin ka motor thar chu ka khalh haw nghal a, a thar a la nih vang nge ni khalh paw'n a dam raih a, a smooth zia chu a hriat theih.





Lalpa le! Kei hi ka â ta em ni? Engtinnge ka nupui leh ka fapa chu an lo awm ang? Nizan maiah in tharah kan awm a, eitur vel engmah inah khan a la awm hleinem. Kawng sira chawhmeh lo zuar ho chu ka en phei den den a, chawhmeh lei haw tur e ti lo chuan Mambawihi nena kan inngaihzawn lai vel chu ka hre chhuak daih.





Tunah chuan chawhmeh a zuar tawh lo va, ka nupui a ni tawh a, fa hial kan nei tawh bawk. Kan hlimin kan inhmangaih tawn em em a, mahse thawk leh khatah kan hlimna chu lungngaihnain a rawn thlak vek si.





Ka inkhalh haw pah chuan buhfai lam chu ka chah a, home delivery an theih dawn tho avangin bag 5 chu kan ina dah turin ka order zui ta bawk. Kan in pangai ang em em kha chuan tuna kan in chu lian lo mahse chhungkaw awmna atan chuan a tawk chiah a, in kawtah pawh motor park-na tur hmun ruak a awm ve thlap a, la chei ṭhata la siam danglam pawh ka tum ru reng.






Kan in ka thlen chuan chhuatah buhfai bag vel chu a lo let rum a, ka nupui leh ka fapa erawh ka hmu mai lo. In chung a awm ve tawh loh avangin room-ah chuan ka lut phei a, ka thil hmuh avang chuan ka meng phawk hle.





Ka nupui leh ka fapa chu inkuah chiai hian an lo mu a, an muttui hmel khawp. Chung ai zawng chuan khum bula Noodles kawr leh Waiwai kawr tih vel chuan ka mit a la a, ka thin a rim rualin keimah chu ka inhua. Mambawihi khan a sawi dik a ni.





A lakah ka thin a rim a nih paw'n ka fapa tal chu ngaihtuah em em tur zawk ka ni asin, mahse kei chuan ka ti hauh lo. An muttui em avang chuan ka kai tho duh ta lo va, choka lamah ei rawng bawl turin ka phei san leh ta ringawt.





Eng pawh ni se kei hian Sawma chu ka zawn hmuh thuai thuai a ngai, a lo hrai rui tak tak a nih ngat chuan ka chet dan tur pawh ka sawi lawk thei lo.




Gas bur lo inhung chu ka vuah ṭha sawk sawk a, buhfai chu a bag aṭangin ka suak chhuak a, bel lain ka chhum zui nghal. He in ka lei tirh khan in chhungkhur bungrua vel a chhawm vek dawn thu min hrilh tawh a, a man nen pawh a inhen viau chuan ka hria.





Tomato leh artui chu ka kang a, thuk pakhatah chuan Bean ka chhuang leh nghal bawk. Gas thuk thum nei chi a nih avangin vawi khatah a inbawl ṭeuh theih a, ka inbawl zawh vat pawh ka ring.





Rei lovah chaw chu a rawn phit a, vawi thum a phit hnu chuan ka Sim deuh a, vawi thum vel bawk a phit leh hnu chuan ka off ta daih. Chutia chawhmeh vila ka din ngawih reng lai chuan ka hnung lam aṭang hian





"U Marem" rawn ti tu an awm a, a aw aṭang chuan ka nupui ngei a ni tih pawh ka hre nghal. A awmna lam chu ka hawi let zawk a, gas lamah ka hawi let leh nghal.




"U Marem tual i that lo tih min hrilh teh, min hrilh hram teh. I zing chhuak kha i lo haw har bawk si a, ka lo ngaihtuah lutuk che asin" ṭah chhuak aw deuh hian a rawn ti a, a lam chu hawi pawh ka hawi peih rih lo.




"A lo tlan bo, ka va hmu hman lo. Chuan naktukah ka zin dawn a, ka cham rei dawn nge dawn lo chu ka la hre lo" ka ti deuh hmuk a, min be tawh lo hram se ka ti ru hle.




"Khawiah? Engati? Engatinge i zin dawn? Enge i tih dawn?" tiin zawhna hlir chu a rawn chhak chhuak nghal a, kei lah chuan a lam hawi meuhin




"Ka thil tihtur leh ka kalna tur chu i hriat kher a ngai lo ve, ka zin dawn tih chu lo hre tawp mai rawh" ka lo ti khum hmuk.




"Aih ka duh lo, ka hlau u Marem, Marcus-a nen chauh phei chuan a hlauhawm lutuk" lu thing nang nang chung chuan a rawn ti a, a mitah chuan zin lo tura min duhzia ka hmu thei.




"A hlauhawm loh, kawngka i kalh ṭhat chuan tûmah an lo lut lo vang, nangma'n mi tu emaw i hruai lut te a nih ngawt loh chuan" meinei fê chuan ka ti a, a hrethiam a ni chêk ang min en ta ran mai.




"I zin dawn si chuan ka pate bulah kan lo va phei leh rih mai ang, keini nufa ringawta awm tur chuan a hlauhawm lutuk, tun laiah mi an sual tawh bawk si" a la rawn ti hram a, a thusawi avang chuan ka thin a va han rim mai mai tak em.




"A teuh lo, saw inah sawn ka thu lo chuan in lut leh tawh lo vang. Chuan ka sawi tawh kha a hlauhawm loh, kawngka i kalh ṭhat chuan a tawk" tiin ka hnung chhawn ta daih a, tomato leh artui kan chu ka off zui nghal bawk.





Chutia kan ngawih dun reng lai chuan Marcus-a chu a rawn ṭap a, Mambawihi pawh room lamah chuan a phei ta vat. Ka fapa chu a ṭap uar em em a, Mambawihi chuan thlemin a be char char a, chuti chung pawh chuan a ṭap bang duh der lo.





Room chhunga va kala va buaipui ka tum deuh ûk a, mahse ka ti leh ta lo. Ka thil chhuan chu fork hmangin a hmin tawh leh tawh loh ka en a, ka duh ang takin a lo la hmin lo. Chutah ka fapa chuan ṭap hawm hawm chung hian





"Apa, apa, apa" a rawn ti a, kei chuan ka thil tih lai chu tawp chatin room lam chu ka pan ta nghal.




"Khawi ka lo pawm ang" room chhunga ka luh hnu chuan ka ti a, mahse ka fapa pawm mai ka tum chu Marcus-a chuan ṭap reng chung hian




"Duh lo, duh lo, apa sual, anu apa duh lo" a rawn ti leh ang lawi a, ka pawm a duh lohzia lantirna'n a tal zui vak vak bawk.




"Marcus-a hian nimina i lo haw hma pawh khan a ngai em em tawh che a, a mut laia a rawn harh pawh khan a ngaih thu che a sawi chhuak hial asin u Marem. Tlai lamah lah i thinrim em em tih a hmu ve vek a, chutah vin takin i la be zui. Ka lakah chuan i duhtawkin i thinrimna i hritla thei, mahse i fapa hi chu tihlauthawng tawh miah suh u Marem, ka ngen ngawih ngawih a che" a bianga mittui luang zawih zawih chungin Mambawihi chuan a rawn ti a, Marcus-a chu kawngka lam a panpui a, chutia room aṭanga chhuah an tum lai chuan Marcus-a bawk chuan




"Anu, apa duh, apa ngai" a rawn ti leh hram a, ring vak lo hian a ṭap zui nghal a, a chil a hak a ni ngei ang a rawn khuh ta bawrh bawrh.




"Ka fapa ṭap tawh suh le, i ṭah leh chuan chil hakin i khuh leh vak vak mai ang" tiin Mambawihi chuan a hnungah a lo beng thek thek a, a khuh pawh chu a zia ve leh mai.





Chaw kan ei lai te chuan tui tihna reng ka nei lo va, ei loh aiah ka ei ve mai mai zawk a ni. Ka nupui leh ka fapa erawh chuan tui ti tak hian an ei mial mial a, ka awm loh hlana an ril lo ṭam tawh dan tur zia chu ngaihtuah pawh ka ngaihtuah thiam lo zawk.





Ka hmangaih em em a, ka khawngaih em em a, mahse chumi avang ringawt chuan va ngaihsaka va biak vel chu ka tum chuang lo. A chhan chu a uire tlat a, a pasal hi min phatsan tlat a, chu a thil tih chuan ka chapona a kai chhuak lo thei lo a ni e. Mambawihi chuan ka fapa chu chaw a barh ve zel a, a duh ang pawhin a ei ṭha hman lo zawkin ka hria.






Marcus-a ber chu a ni ka khawngaih tak reuh ni! Anu'n chaw a barh lai te chuan en pawh min en ṭha ngam lo va, min en duh miah lo ti ila a dik zawk ang. Anu chu chaw ei tira keiin ka fapa chu chaw lo barh ka châk a, mahse ka fapa chuan ka barh a duh dawn lo tih ka hre chiang ropui mai bawk si.





Chaw kan ei kham chuan ngawi rengin ka che zung zung a, keimah ang lo takin dawhkan vel chu ka tifai ve a, enge a chhan pawh ka hre lo ka fapa leh Mambawihi lakah chuan ka inthlahrung ru tlat.





Chaw eina thleng leh dawhkan vel kan tih felfai hnu chuan Marcus-a chu a nu bulah a tal leh nghal chawt a, ka fapa chu ka ngai ve tak zet a ni. Anu chuan room chhungah a luhpui a, ka va luh ve chuan hnute a lo hne leh dâwk dawk tawh.





Ṭawng chuang miah lo hian an bul hnaiah chuan ka va ṭhu a, ka fapa chuan hnute hne reng chung hian min lo en kar a, keimah ka ni leh nih loh a chik te pawh a ang mah zawk alawm le. Min en reng avang chuan ka lo nuih sak a, chutah ka fapa chuan





"Apa" a rawn ti thut a, a hnute peh lai tawp meuhin ka lam a lo hawi a, min en chiang tawh tak zet.




"Engenita ka fapa? Heta hi ka awm e" dam zet chuan ka lo ti ve thuai a, ani chuan min en leh vang vang phawt. A awm dan avang chuan ka nuih leh ta suk a, chutah zet zawng a pa ka ni ngei a ni tih a hre chiang ta a ni ang ṭap chung hian




"Apa, apa, apa" tiin a ban chu ka lamah a rawn lek a, chutah kei chuan rang lutuk tak maiin ka lo pawm kang nghal vat.





Uar tak hian a rawn ṭap a, chu erawh min ngaih lutuk avanga ṭap a ni tih ka thinglung hian a hria a ni. Ka thisen, ka fapa ngeiin chuti taka min lo ngai tih ka hriat chuan ka hnîm ruih a, ka mittui te chu an lo hnam zui nghal. Hmangaih taka kuah chung hian room chhungah chuan ka kal kualpui a, ka fapa pawh chu a la ṭap reng bawk.





A chalah te, a biangah te, a samah te chuan ka fawp kual den den a, chu ka thil tih avang chuan ṭap tawp hmakin min kuah leh nghal thuai. A sen lai aṭang tawha ka tih ṭhan a ni a, kei chauh lo chuan chutiang chu an ti ngai lo.






"Anu, anu, apa awm, apa awm tawh" tiin ka fapa chuan hlim hmel tak hian a nu chu a va bia a, Mambawihi pawh chu lo bu nghutin a lo nui ve a, mahse a nui lui tih chu chiang takin ka hria.




"Apa, duh leh" tiin ka fapa chuan amah ka lo fawh tawh ang chiah chuan min lo fawp kual ve den den a, ka hmuiah tak chuan a rawn fawp leh zeuh bawk.




"Duh leh maw!?" tiin ka fawp kual leh den den a, a khabe hnuai velah chu ka fawhsak leh vak vak a, ka thil tih avang chuan ka fapa chu a rawn nui chhuak leh ta uar uar mai.




"Ka ngai tawh lutuk che ka fapa, inbuan ang aw" tiin khumah chuan ka bawh thlakpui a, ka fapa nen tala kan inkar a ṭhat tâk avang chuan ka zâng deuh hawk mai.






Mambawihi chuan kan awm dan vel chu min lo en reng a, a hmel ka va en thut chuan a lo nui tawp riai riai nghal. Rei pawh min en ngam lo hian tukverh lam chu a hawi ta daih a, a kut chuan a kawr tlang chu a hmer ṭawng ṭawng bawk. Ka khawngaih dawn ûk a, mahse ka rilru chapona avang chuan ka khawngaih duh leh ta lo.

[Ngaia]

Chapter 38





Zan mut hun a lo ni a, muhil lovin ka meng tlaivar tluan leh ta zak a, ka muhil thei thlawt lo a ni. Kei ang bawkin Mambawihi chu a muhil bik lo va, kan fapa erawh a muhil tui khawp mai. Zing kar thleng chuan ka nupui chu ka be lo va, ani pawhin min be lo hrim hrim.





Kan fapa chu kan veng a ni deuh ber a, zan lama ka infiampui leh chiam hnuhnawh avangin a chau ve te pawh a ni maithei a ni. Kan inkara mu a nih avang chuan ka en reng a, a sam buk ve tawh tak te chu ka chul a, ka fapa tal hi chuan min hlau tawh lo se ka duh a ni.





Khatiang taka ka thinrim inhrosa lai kha Mambawihi tak ngial paw'n min la hmu ngai lo va, ka fapa tan phei kha chuan hluah loh chi zia zâng ka ni lo tih ka hre chhuak. Anu uirena avangin ka fapa chu ka vin hrep a, min hlau tura ka lo hrawk khum vak vak te kha mawl ka inti tak zet tawh.





A nu chu a nu a ni a, ani erawh ka fapa a ni tlat. Min ngai lutuk tih ka hriat te khan keimah leh keimah ka indem a, pa sual tak ni maiin ka inhre hial.






Ka bana ka sana bun lai chu ka en zeuh a, zing dar 6 a lo ri vang tawh mai. Thawh chhuah ka tum lai tak chuan Mambawihi chu khum aṭang chuan a chhuk a, kan nupa room aṭang chuan a kal chhuak zui nghal.





Kei erawh chu thawh tum uai tawh si kha ka ṭhu ṭha leh rih a, eng dang en lovin ka fapa bawk chu ka en leh ta vawng vawng. Ka fapa chu ka en reng tak naa thil dang daih ka ngaihtuah a, Sawma ber chu a ni ka rilru luah leh ta chu!






Eng pawh ni se an khuaah ka zin ang a, a chhungte bulah a lo awm ngei pawh ka ring. A chhungte'n ka nupui nena an uire dan chu an hriat ka la ring chiah lo va, hrilh pawh a duh kher ka ring lo.





An hriat hunah erawh an fapa chu an dem ve hle dawn tih ka hria, chutiang bawkin ka hmuh hunah chuan keipawh hian ka thinrimna zawng zawng a reh hma chu khawih ka tum ruh tlat a ni. Ka kut thlak avanga a thih leh dam lam ka ngaihtuah lo va, ka khawih dawn hi a ni hrim hrim.





Marcus-a a la mutui em mai tiin room aṭang chuan ka chhuak a, Mambawihi chuan min hnung chhawn zawngin ei rawng chu a lo bawl mial mial. A awmna chu ka pan hnai a, ka pan hnai zel a, a hnunga va kuah chu ka châk kher mai.






Ka thinlungah erawh a uirena bawk chu a rawn lang leh a, chu chuan ka rilru chapona kai thovin ka kuah leh lo ta nge nge. A bula chaw phit reng chu a hre lo emaw tih turin a Sim duh lo hrim hrim a, a chawhmeh vil lai pawh chu a ngaihsak chuangin ka hre lo.







Chaw ut rim a rawn nam tâkah chuan ka phei thuai a, chaw chhuanna gas thuk chu ka off ta vat bawk. Chutia ka va chet avang chuan min lo en nghal vat a, a inthiam loh hmel tak zet.





A bianga mittui luang chu a hru sawk sawk a, a thil kan pawh chu a chawk ta zung zung. A mittui chu hmuh kana hriat loh der hram hram ka tum a, mahse ka thei thlawt lo.





Mipa dang lakah min uiresan mahse ka khawngaih a, a duh vanga uire chu ni lo hram se ka ti ngawih ngawih. Tih luihna vang emaw hrai ruih a nih avanga uire ni se ka la ti fan a, lo ni hlauh se chuan ka pawm vek ang.






Chutiang ni lova ama duh thu ngeia uire a nih si chuan hmangaih loh hlen vang vang ka tum tawh ang, mahse thu dik erawh a uirena pa ber ka hmuh hunah chauh a hriat dawn thung a ni.





A duh thu vang leh min hmangaih ve tawh loh avanga uire pawh lo ni se ṭhen emaw hnawh chhuah emaw ka tum lo va, vawi sang sarih za sarih pawh uire mahse ka nupui a ni kumkhua tho ang. Ka fapa Marcus-a tan pawh chu chu a ṭha a, ka fapa chu a nu leh pa inkar ngeia seilian turin ka duh a ni.





"I chau a nih kha, lo va ṭhu hahchawl rawh" tiin Mambawihi chu pangai tak hian ka bia a, zan hnih lai a mu tawh lo bawk nen a hmelah a chauhzia ka hmu thei.




"Ka ṭha alawm" a rawn ti ve sep a, mahse dawt chiang takin a sawi tih chu ka hre chiang em em thung.




"U Marem, zin chu i la tum lui ṭalh em ni? Keini nufa hi min kalsan i tum em ni?" a rawn ti thawp leh raih a, ka lam pawh lo hawi lo chuan bang chu a en tlawk tlawk.




"Ka zin dawn, mahse ka lo haw leh ang" ka ti ta ringawt a, thinrim pawhin ka sawi em em tawh bik hran lo.




"Aw le, min kalsan miah suh aw u Marem, kei leh i fapa hi min kalsan miah suh aw" min en chung chuan a rawn ti a, amah ka lo en lai tak a ni bawk nen kan in melh chiang ta hle.




"Engatinge min hnawh chhuah mai loh? Engatinge kei uirenu hi in bulah min la chentir ve reng u Marem? Min hnawt chhuak la, min ṭhen la, chu chu ka tan chuan a hlimawm zawk daih asin" ngawi renga ka en avang chuan a rawn ti leh sep a, a mittui te chu a biangah an rawn baw leh ta zawih zawih.




"I thil chhuan kha" ti daihin a thil kan mek chu ka chawhsak ta ringawt a, ka sut avang chuan a lo per deuh dâwr bawk.





Min en reng tih chu hre tho mah ila a hmel chu ka en duh tawh rih lo, a chhan chu a hmel ka hmuh khan ka na lutuk, ka sawifiah thiam phak bakin ka na a ni. Ka nat rual rualin thlema hmangaih taka kuah chu ka thei bawk si lo, ka awm dan chu ka tawt up up ni berin ka hria.






Ani pawh chu a dinnaa ka din tlat tawh avang chuan dawhkan lamah chuan a phei ve mai a, thil kan chu chawhsak lo ila chuan a ut leh hman ngei ang.





Chutia inbe leh tawh miah lova kan awm lai chuan room lam aṭangin Marcus-a ṭap thawm a rawn awm a, Mambawihi pawh chu a phei ta vat.





Marcus-a chu a rawn pawm chhuak a, a rawn thlem mawlh mawlh a, ka fapa pawh chu rei lovah a ṭap bang zui ve leh ta mai bawk. Inhera an awm dan ka va en chuan Mambawihi chuan kan fapa chu a lo awi hliau hliau a, Marcus-a pawh a lo muhil leh der tawh.





Mambawihi chuan zawite hian hla eng emaw ni a sa pah reng a, a fapa muthilhna'na a zai ri rêt ret chu ngaihthlak a nuam ka lo ti phian. Thawk leh khatah Marcus-a chu a rawn harh thut a, a ṭap leh ta chiam mai. A mumang lam a ṭha lo a nih ka ring a, anu pawh chuan a thlem bang thei mai bik ta lo.





"Apa, apa" tiin a rawn ṭap a, ṭap chunga ka fapain ka hming a lam tawh hi chuan ka thinlung chhung hi a rawn che nghal dawt zel.




"Apa duh, anu apa, apa duh" ṭap chung chuan a rawn ti leh a, Mambawihi chuan awi hliau hliau pah leh aw dam zet hian




"Apa chu a buai a, a hman lo alawm, nakinah apa chuan a pawm ngei ngei dawn che a nia aw. Le! ṭap tawh suh le, anu hian ka awi mu leh daih ang che aw" tiin a suk pui leh hliau hliau a, mahse Marcus-a chuan uar taka rawn ṭap chung hian




"Duh lo, anu, duh lo, apa, apa" a rawn ti leh a, chutah erawh kei chu ka insum thei ta lo va, ka fapa chu keimah ngeiin awi mu ila a ṭhat ka ring ta zawk.




"Khawi ka lo pawm zawk mai ang e, chawhmeh chhuan lai saw lo va vil rawh" tiin a pawmna aṭang chuan Marcus-a chu ka laksak a, ka fapa erawh a lo la ṭap uar hle.




"Ngaihtuah loh tur tûr kha ngaihtuah lo la, i thil vil lai kha ngaihven tawh ang che" a phei hnu chuan ka ti leh hram a, ka fapa ṭap lai chu pawn lamah ka chhuahpui ta daih.





Ka pawm tâkah chuan rei pawh ka thlem ngai lovin Marcus-a chu a ṭap bang ve leh mai a, ka motor lei thar chhungah chuan ka chuan luhpui zui nghal bawk. Motor chhunga kan lut chiah chu a hawi kual vak vak a, a thar a ni tih hrethiam ve ang fahran hian a awm reuh a, kei chu a awm dan lawmawm zet avang chuan ka lo ṭhen suk mai.





Ka pawmna aṭang chuan tal chhuakin a Gear te chu a khawih a, chu mai duh tawk lovin a Steering te chu a khawih leh nghal zet zet a, kei chuan a awmna aṭanga a tlak mai hlauin ka lo veng ru reng thung.






Motor chhung aṭanga chhuahpuiin kawngpui velah chuan ka kalpui leh a, hma lutuk chu ni tawh lo mahse a la zin ve tho avangin motor tlan leh mihring kal vel chu hmuh tur an vang hle.





Chaltlang te chu ka veng kal ngun ve na a ni a, kal kualna vel tur leh a veng awm dan vel chu ka bel hle. Ka koki chhuan a duh tlat avangin Marcus-a chu ka koki chhuan a, zing lama ṭap uar em em si kha tunah chuan a hlim leh tawh khawp.





Ka sana chu ka en leh zeuh a, dar 8 a lo ri reng tawh mai. Ka fapa la koki chhuan reng chung chuan kan in lam chu ka pan a, Mambawihi ka ngaihtuah vang ni miah lo leh Marcus avang zawk chuan tlemin zin chu ka huphurh leh ta deuh.





Kan in kawt kan thlen chuan Mambawihi chu hlauhthawn hmel fê hian a lo hawi kual chhen a, a awm danah chuan min lo zawng tih ka hrethiam mai. Kei leh Marcus-a min hmuh tâkah hahdam huai hmel hi a pu a, min be chuang lo chuan in chhung lamah a lut ve leh mai bawk.





Chaw kan ei lai te chuan ka fapa chu ka ṭhutpui a, chaw te ka barh a, a ei ṭha duh phian leh nghal. Mambawihi erawh melh khat pawhin ka melh lo va, chaw chu a ei ve ngei chuan ka hria.





"U Marem khawngaihin zin leh lo mai teh a, Marcus-a hi i tel lo chuan a awm thei lo ang" chhuak tura ka insiam mawlh mawlh laiin Mambawihi chuan a rawn ti a, mahse zin chu ka ngai ngei si a ni.




"Ni lo, ka zin ngei ngei a ngai. Bawiha chu engtin tin emaw ni i lo thlem mai dawn nia, ka cham dawn nge ka lo haw leh nghal dawn tih ka hriat miau loh vangin ka awm dan tur ka sawi lawk thei lo" ka ti a, chhuak tur chuan ka inpeih titih tawh.




"Ṭha deuhin kan fapa saw lo enkawl la, buaina emaw harsatna i nei a nih chuan min lo call ang che. Chuan rilru fim tak puin awm la, heng kan boruak tawn mek hneawm tak avang hian nangmah kha lo intihhlum i tum leh ang e, i fapa saw i thinlungah khan awm reng rawh se" tiin kawngka lam chu ka pan a, ka chhuak ṭep tawh tihah Mambawihi chuan




"I fapa tal saw i hmu dawn lo em ni? A mamawh lai chea i awm lo tih a hriat hunah chuan a ṭap leh ngei dawn a, va hmu hmasa phawt la ka duh ngawt mai" a rawn ti a, toys khalha ka fapa lo ṭhu thluang duai chu ka en zui nghal.




"Hmu lo law law zawk mai ang, min hmuh chuan ka kal hun tawhah khan min ngen leh vel ang a, ka kal ngei ngei a ngai bawk si" ka ti ve ta sup a, chhuak tura ka leh hawi leh rual chiahin Mambawihi bawk chuan




"Lo haw leh vat rawh aw u Marem, kei nupui tlak tlai lo tak hian ka ngai lutuk che" tiin ka hnung lam aṭang chuan min lo kuah thuai a, ka dulah chuan a kut a suih ran bawk.




"Ka tipalh, i phalna pawh la hmasa lova ka kuah ringawt che avang hian min ngaidam dawn nia, ka kuah châk lutuk che a" rawn ti lehin min kuahna chu a phelh vat a, a hmel en tuma a lam ka hawi chuan Marcus-a lam chu a lo pan daih tawh.





Chutia min kuahtu ber a awm tawh loh tâkah chuan thaw deuh hawkin ka chhuak a, ka kalpui tur ber nen zan lama kan inbiak fel vek tawh avangin zin leh loh chu a chi loh hrim hrim.





Motor ken ve a tum tho avangin innghahna tur kan sawiah chuan ka lo nghak a, a lo thlen chuan rei pawh inbe lovin kan tlan chhuak nghal. A hmaah ka tlan a, ka tlan chhung zawng chuan Mambawihi leh Marcus-a chu ngaihtuah loh lai pawh ka nei lo.





Darkar 3 vel kan tlan hnu chuan kawng sira Restaurant-ah kan chawl a, kan kalna tur khua pawh kan hlat vak tawh lo. Kan inei puar hnu chuan kan tlan ve leh mai a, rei pawh tlan tawh lovin thingtlang khaw pakhat chu kan thleng zui ta nghal.





Chutah an in ber chu kan hre leh ta tlat lo va, mi kan tawh remchang ho chu kan zawt nghal zung zung tawp. Kan mi zawhte'n an in awmna min kawhhmuh hnu chuan kan pan ta vat a, kei phei chu ka ṭang ru ṭung tawh zawk a ni.





Assam type in pakhatah chuan kan lut a, nula pakhat leh nu pakhat hi an lo awm a, keini min hmu chu mak an lo ti hle mai. Sawma chu an chhungte a nih leh nih loh kan zawt a, anni chuan a nih thuin min rawn chhang nghal.





Thil awmzia ka sawi hma chuan an lo hlauhthawn hmel em em a, engmah an lo la hre bik tih ka hrethiam mai bawk. Thil nih dan leh thlen dan ka sawi chuan a hma ai zawngin an meng phawk a, Sawma chu a awmna kan zawt zawm zat nghal.





A chhungte erawh chuan Sawma chu an in lama a haw loh thu leh Aizawl lama a la awm thu an lo sawi daih a, chu chuan ka rilru a tibuai ta hle. Aizawl lama a awm loh thu kan sawi leh a, chutah zet zawng an buai tak zet tawh a ni.





Kan mi zawn ber kan hmuh leh tâk si loh avang chuan ka thin a rim zual a, insual chu ka châk zek zek hi a ni tawp. In aṭanga kan chhuah dawn chuan Sawma nu ni ngei tur chuan ngaihdam min dil mawlh mawlh a, min dil pawh chu a awm ka ti hliah hliah.





Aizawl lam pana motor ka khalh lai chuan tih ngaihna mai ka hre tawh lo va, chutiang bawkin min kalpuitu police pawh chuan a hre bik lo. An ina kan awm lai khan a chhungte khan phone an tum nasa hle a, mahse Sawma chuan a phone chu a lo switch off tlat a nih hmel. Chu chuan beidawn mai duhna rilru min pe a, mahse beidawng maithei ka ni bawk si lo.





Thu dik hre turin ka zawn hmuh a ngai a, Mambawihi ka aṭangin an mut dun thu hre tawh mah ila ama ka aṭang erawh ka la hre ve hauh lo thung.





Tlai lam dar 4 bawr vel a ni tawh a, Aizawl pawh kan hnaih leh tawh hle. Zan riak lova kan haw leh ta mai chu a lawmawm rualin ka lawm lo hle a, a chhan pawh kan kalin awmzia a neih loh vang a ni.





Chutia Falkawn vel kan tlan lai chuan ka pa hnen aṭangin phone call ka dawng a, la lo chuan ka ring ral tir ta ṭhak. A hnu rei lote ah a rawn call leh a, peih lo zet chuan ka la ve ta nge nge.





Ka pa chuan an bula haw leh tawh turin min lo ti a, mahse kei chuan ka nupui leh ka fapa chu letpui ka tum tawh hauh lo. Let leh kan tum tawh loh thu ka sawi chuan a rawn thaw hawk a, thu dang rawn sawiin kan in awmna hmun chu min zawt ta daih.





Kan awmna chu ka hrilh ve mai a, a rawn len ngei pawh ka ring. Kan inbiak zawh hnu chuan thil ka ngaihtuah rauh rauh a, ka pa chu kan inah chuan lo han leng mahse pawi ka ti miah lo.





Ani tal a lo han awm chuan Marcus-a paw'n min ngai lutuk lo deuh ang a, Mambawihi tan pawh a nuam zawk ang. Aizawl khaw chhung kan thlen chuan ka kalpui pa nen chuan kan inbia a, a tuk lama chhui ṭhat leh chu kan titlu ta a ni.





Kan veng ka thlen chuan hlim lo viau mah ila tlem chuan hahdamna ka nei tho a, ka fapa chu ka hmu châk tawh tak zet a, ka pawm châk tawh tak zet bawk a ni.





In chhung ka luh chuan ka pa chu a lo awm ngei a, Marcus-a pawh a pu bulah a lo awm ran mai. Ka thawm a hriat rualin ka fapa chu chak lutuk lo hian ka lamah a rawn tlan phei thuai a, min ko lawm lâwm bawk.





Ka ban phak chin a lo thlen chuan ka pawm kang lâwp a, ka kuah ta vawng vawng. Ani pawh chuan min kuah bet ve ṭai a, kuah reng chung chuan sitting room lam chu ka pan phei nghal.





Ṭhutthlenga ka ṭhut thlak lai chuan ka pa chuan min lo en reng a, a mitmengah chuan min lainatna chu ka hmu thei. Ka nu ka aṭangin engkim a hriat vek tawh ka ring a, chuvanga min khawngaih hmel em em pawh a nih ka ring.





Bathroom aṭangin Mambawihi chu a lo chhuak a, kei min hmu thut chu mak a ti teh e. Zing lamah lah khan ka cham dawn leh dawn loh ka hriat loh thu ka sawi a, zan ka riah kha ka inring hman hial a nih kha! Beisei loh takin kan haw thla leh hma si a, Mambawihi tan chuan mak tih loh theih pawh a ni lo vang.





Rei lovah a hmel buai nak chu a siam ṭha vat a, min nuih seih a, mahse nuih let lova ka lo en reng avang chuan a nui tawp leh nghal riai riai. Ka pa chu chaw eiah ka sawm a, mahse a ei duh ta chuang lo.





Ka nu nena an pahnih chuaha awm chu a khawhar thlakzia a sawi a, an bula let turin min sawm chhen mai. Tun atan erawh kei leh ka nupui fanau te chu let mai kan tum lo va, nakin hunah erawh ka hre lo le!





A tukah chuan police station lamah ka kal leh a, thlalak te chu District dangah kan thawn kual ta vek a, SP pawn'n police station hrang hrang phone in Sawma chu lo zawng turin a chah zui nghal zung zung bawk. Kha mihring phiangsen avang khan kan nupa inkar a chhia a, ka fapa nen pawh a chhe hman ṭep zawk a nih kha!






Ka zawng hmu ang a, thu dik tak sawi turin ka zawt ang a, a lo mutpui tak tak a nih leh ka nupui a lo mutpui avangin kut ka thlak nasa khawp ang le. Police lam chuan min buaipuisak mahse hna an thawh chak ka rin loh avangin a ruka mi chhawr ka nei ta tho a, an hlawh pawh ka pe chhe lo hle.






Tunah chuan kan in dan aṭang thla khat lai a liam leh tawh, kan mi zawn lah chu kan hmu thei bawk si lo. Mizoram chhungah a awm lo hial emaw ka ti tawh a, mahse Mizoram chhung ringawt pawh kan la zawng ṭha fum fe bawk si lo, ka rilru a hah tawh tak zet a ni. Chutiang zelin kan nupa inkar chu a chhe telh telh a, zanah pawh muhil thei lovin ka ṭhu tlaivar zak zak zel.






Ka hnathawhna hmun aṭangin tlai tak taka haw ka ching ta a, mahse ngaihzawng neih tih vel lam pang chu ka tum lo hrim hrim. Ka fapa chu ngai viau ṭhin lo ila chuan Hospital-ah ka riah mai ṭhin ka ring a, mahse ka fapa avang chuan ka haw leh ta nge nge zel.






Mambawihi chu ka ngai lo pawh a ni lo, ka ngaiin ka thlahlel em em zawk, mahse kan inkarah chuan thil eng emaw ni min daltu lian tak a awm tlat bawk si. Ka awm loh hlana mahni lo intihhlum chu a tum ang tih ka hlau ru thei hle a, mahse Marcus-a vang tal pawhin chutiang thil chu a tih duh ka ring bik ta lo.





Min biak châk hmel zet hian min en ṭhin a, min be ta chuang lo chuan thil dang a ti leh daih zel tho. Marcus-a chu kan buaipui rawn a ni ber a, inhnaih taka awm si hian kan inhlat em em si. Hrehawm ka ti lo bik pawh a ni lo, mahse uirena kher hi chu a tha nat thlak ka ti ve thlawt a ni.





"U Marem" bathroom aṭanga a rawn chhuah rualin a rawn ti hluai a, a hmel ka en chuan a lo hlauhthawn hmel em em leh nghal.




"Aw" ka lo ti ve mai a, kan in dang hnuah chutiang taka a hlauthawng hmel chu ka la hmu lo va, ka vawi khat hmuhna a ni zawk.




"Ka rai" a thusawi avang chuan chiang lehzual hian amah chu ka en a, a kuta a test kit ken chu ka melh thla leh ta vat bawk. Hmanhmawh ang reng taka a awmna lam pan pah chuan




"Khawi maw" ka ti thuai a, a kuta test kit chu lak sakin ka en dik nghal ta vat bawk.





Test kit aṭang chuan chiang takin a rai tih ka hria a, mahse damdawiin lama check ṭhat leh ka duh hrim hrim avang chuan amah chu ka pawt dawr dawr a, Marcus-a chu ka ban leh lamin ka pawm ran bawk. Motor chhungah chuan lut turin ka hrilh a, a hnung lama ṭhut luh a tum chuan ka melh hrawk ta mai.





Ka mitmeng aṭangin a hmaa lo ṭhu turin ka duh tih a hrethiam a ni chêk ang a hmaah chuan a lo ṭhu ve leh mai a, Hospital lam pan chuan ka tlan chhuak ta vat. Ka fapa chuan engmah hrethiam lo hian motor khalh chunga ka pawm chu nuam a lo ti em em a, motor steering vawn te chu nuam a ti em em bawk.





Hospital kawt kan thlen chuan kan chhuk vat a, zan tlai lam ni tawh mahse Hospital chhungah chuan duty leh mi vei vak an lo la tam khawp mai. Ka rilru dik tak erawh chuan rai lo se ka ti ngawih ngawih a, a rai vaih chuan ka fa ni lovin kha mihring fa kha a ni dawn tih ka chiang lutuk tlat.





Pregnancy test kit thar hlak chu ka pe a, in lama a pregnancy test kit lo hman kha chu ka ring zo thlawt lo a ni. Test kit pakhat mai ni lovin pathum lai ka ken tir a, ani pawh ka sawi ang chuan a va in test ve leh mai bawk.





A rawn chhuah chuan en pawh min en ṭha ngam lo va, kun ngul hian test kit te chu min pe a, chuta ka result hmuh zet chuan min va tilungngaiin min va tibeidawng tak em.





Ka ṭhu thla hnawk a, test kit pathum chuan a rai a ni tih chiang takin min hrilh a, rai lo se ti eng ang mah ila a nih dan tur ang chu a ni zo vek tawh si. Ka ṭhutna aṭanga thovin ka inthing harh a, nau pai mek a nih avangin ka check chu a ngai tho tih chu ka hria.





Ka mut zangthal tir a, rilru na leh hah zet chuan ka check mial mial a, a hmel ka en chuan in chung ceiling lam melh hian a mittui a lo dir zung zung a, kan va na dun tak em. Kei chu ka fa a nih dawn loh avangin ka na a, ani erawh engvanga rilru nat hmel ve ringawt nge a nih pawh ka hre lo.






Kan haw lam te chuan tûmah kan ṭawng lo va, kan fapa tak ngial pawh kan chhaih vel peih lo. Ani pawh a tal talin a tal a, a hlim hlimin kan hlim tir tawp. In chhung kan luh te chuan zan dang zawng aiin hrehawm ka ti a, zan dang pawh nuam lo ṭhin tho mahse chu zan ber kher chu a va nuam lo chiang tehreng em.





Thawm engmah chhuah lovin Marcus-a chu ka awi muhil a, a muthilh hnu chuan khumah ka mut ṭhat tir nghal. Mambawihi chuan tukverh lam hawiin a en ngai a lo en tlawk tlawk a, ṭah erawh a ṭap miah lo thung. Chu zan hrehawm tak chu zan dang ang bawkin kan meng tlaivar leh ṭhak a, mu tura ka tih pawhin a mu duh ngai bik chuang lo.





Mambawihi chu a mut ngai bik miau loh avangin hmuh theih khawpin a taksa chu a rawn cher ṭan a, a hmel a dângin thil pawh a ei tam lo sawt hle. Kan boruak tawn mek avang chuan ei tur ṭha leisak leh amah enkawl chu ka tawpsan chuang lo va, mahse ka be ngai lo hrim hrim.





Keia tak pawh chuan thil ka ei hlei thei lo va, kan fapa ber chuan chaw chu a ei hnem ber ziah ta zawk ang ka ring. A hma aiin ṭawng a thiam hnem leh tawh bawk a, fiah lutuk lo hian thil hi a sawi ve nasa ṭhin khawp mai.





Ka pa pawh tlai lama lo len a ching ta viau a, mahse a lo kal hi chuan ka hahdam sawng sawng zel. Marcus-a paw'n a pu nena inkawm vel chu nuam a ti thei em em a, kei leh Mambawihi tan chuan chutia kan fapa ka pa bula a awm chu a ngaih ṭhat thlak tak zet a ni.





Thawhlehni tlai a ni a, in ka thlen chuan Marcus-a leh ka pa chuan toys an lo khalh dun leh ran tawh. Mambawihi erawh ei rawng bawlna hmunah pawh a awm lo va, bathroom-ah emaw room-ah emaw a awm ka ring. Kan nupa room khawngkhar chu a lo inkhar chip lo va, hawnga luh ka tum chu ka thil hmuh avang chuan ka tawp chat.





Mambawihi chuan ka kawr tam tak te chu a bulah a lo dah hnawk nuai a, a mal te tea la kangin a kuah a, a hnim den den a, ring lo tak hian a ṭap feih feih bawk. Ka leather jacket te chu a kuah vawng vawng a, a awm dan chuan min ngai hle a ni tih min hriattir nghal.





Chu a leather jacket kuah mek chu thawmhnaw dang zawng aiin a kuah rei a, a dah thla phal ve lo ni mai hi a ang zawk. A âwmah nghet takin a kuah a, a hmer ṭawng ṭawng a, ka en chian chuan chu jacket chu kan inngaihzawn laia ka hak uar ber ṭhin kha a lo ni.






"A! Ka tihpalh, i lo haw tawh maw!? A, ih, suk ka lo tum hlawm a" min hmuh thut avang chuan a rawn ti thuai thuai a, a ṭhutna aṭanga thovin a bianga mittui la chambang te chu a hru tawk a, thuamhnawte chu pawm ṭunin kei min kal pel chuan room chu a chhuahsan ta vat vat.





Khumah chuan ngawi reng hian ka ṭhu thla a, ka tidik lo chuan ka inhre ve ta. Ka fa pawh ni dawn lo mahse rai lai a ni a, rilru na taka awm tir chu a nau pai lai tan leh ama tan a ṭha lo a ni. Ka thuamhnaw pawh thlak ta lo chuan room aṭang chuan ka chhuak leh ta ringawt a, Mambawihi chuan en pawh min lo en ngam lo.





Ka pa leh Marcus-a erawh eng eng emaw ni an sawi a, ka pa chu a rawn nui leh hawk hawk zel. A ngaite bawkin ka pa chu chaw ei lovin a haw leh a, pawna ka zui chhuah chuan an bula haw tawh tur bawkin min ti leh tawh. Ka rilru a hriat sa vek tho avangin ka chhang buai lo hrim hrim zawk a, pangai tak chuan kan inthlah ve leh mai bawk.





Zirtawpni a ni a, Hospital lama ka kal peih thlawt loh avangin inah chuan ka awm ta ringawt. Chawhma lam dar 11 pawh a la ri lo vang tihah ka pa chuan min lo call a, ka lak chuan file a theihnghilh thu a lo sawi daih. Chutah ka buai leh buai loh thu min zawt hnuhnawh leh a, kei chuan ka chawlh thuin ka lo chhang ve leh mai bawk.





Ka pa chuan a file theihnghilh chu la turin min tir a, ka nu be tura ka tih chuan dawr lama a kal thu a sawi leh tlat bawk si. Keipawh chu kan inbiak zawh chuan ka tlan chhuak ve mai a, kan in lo ni ve tawh ṭhin mahse kal leh chu ka phur teh chiam lo a ni.






In kawt ka thlen chuan peih lo rilru takin motor aṭangin ka chhuk a, ka che zawi ang reng hle bawk. Tûmah an awm dawn lo emaw ka tih kha kawngka a lo inkalh miah loh avang chuan mak ka ti hle a, ka nu a awm ka rin avangin ka luh peih lohna chu a zual.





Kawngka chu hawngin ka lut a, tûmah ka hmu mai lo. Ka nu nena inhmu lova chhuah leh daih chu a fuh dawn phianin ka hria a, hawi kual zawk zawk chuan ka pate room chu ka lut nghal. Mahse enge ka hmuh tak hi! Ka thil hmuh avang chuan ka ding khawng reng a, chet mai nachang pawh ka hre lo.

---------********----------
La like ve lo leh comment ve lo te khan Like in Comment suau suau ang aw.......

[Ngaia]

Chapter 39






"Marem" meng phawk hra chung hian ka nu chuan a lo ti hluai a, a hlauhthawn hmel em em bawk.






Min hnung chhawn zawnga mipa pakhat lo ding chu ka nu min kohna avang chuan ka lam a rawn hawi a, a hmel ka hmu chiah chu rang lutuk tak mai hian a bul ka thleng phei nghal.





Engmah pawh sawi lovin ka hnek tlu tawp a, a tlu tawh chu ṭhut chilhin ka hnek zawm mial mial a, ani pawh chuan min lo sual let ve nghal. Min sual let ve tak na a, min khan lo vet vet tak a ni.





Hnek mai duh tawk lovin ka pawt tho lâwp a, a nghawng hnung lam nghet taka man bet chung chuan hmun lo awm remchang chu ka toh tir chawrh chawrh a, vawi thum vel ka theih tawpa naa ka toh tir hnu chuan a chal aṭangin thi a rawn chhuak ta zawih zawih.






Ka thil tih lai tawp thutin chhuatah chuan ka theh tlu leh tawp a, ka nupui a lo mutpui vel vang leh ka nupuiin a fa hial a pai tâk avanga ka thinrimna zawng zawng chu a hmaiah ka bun chhuak ta chawrh chawrh. Ka nu chuan ṭe vak vak chung hian ka hnung lam aṭangin min lo ṭhelh a tum a, ka phih leng lawp a, ka nu mah ni se kut thlak ve ka châk dan chu pui tak a ni.





Ṭhut chilh meuha ka khawihpa chu chet pawh a rawn che hlei thei tawh lo va, thaha phum bo vang vang chu ka tum ruh hle. Ka thawhsan pawh chuan a tal ṭaih ṭaih a, ṭhutthleng lo inhung chu lain a lu taka vuak pawp chu ka tum a, mahse Mambawihi aw ngeiin





"U Marem" a rawn ti ri chu ka hria a, chu erawh ka thinlung lamah a ni daih thung.





Ka thinlunga ka nupui aw lo lang chuan ka thil tih tum pawh min tih tir leh ta lo va, ṭhutthleng pawh chu ka la chawi kang vu mai. Kan mihring suak suala pawh chuan hlauh hmel zet hian min lo en a, ka that mai ang tih chu a hlau ve tak zet te pawh a ni ang.





Ka rilruah chuan Mambawihi'n tual that lo tura min duhna te leh ka fapa ngaihtuah tura min tihna te chu an lo lang zut zut a, chu thil avang chuan muang changin ka thil ken chu ka dah thla ta riai riai. Ka nu chu a lo ṭap hawm hawm a, tual ka that tawh dawn emaw tiin a lo au nasa ve hle chu a nih khâ.






Sawma chu a kawr âwmah ṭhamin ka tung ding a, bang deng ri dawp chuan ka theh phei leh chawrh a, a chau tawh tih hriat tak hian thawh pawh a tho hlei thei tawh lo. A bulah chuan pawisa a lo tla darh nuai a, a ipte aṭanga rawn tla a nih duh hmel.





A awmna lama kal phei lehin ka pawt tho a, ka hnek tlu leh ta tawp. Thi daih mahse pawi tihna reng ka nei tawh lo va, a chal leh a ka leh a hnar vel aṭang chuan thisen pawh a chhuak nasa tawh khawp mai.





Amaherawhchu chungte chu la enkawl dam theih a ni zawk a, ka rilru chhungril natna erawh hi chu enkawl dam mai mai theih chi pawh a ni ve lo, a nat dan hi a chiang lutuk tlat.





"Duh tawk rawh LALREMRUAT" ka hnek leh tur chiah chu ka nu chuan a rawn ti tuarh a, a thu ka awih vang pawh ni miah lovin ka hnek leh ta lo.




"Han sawi teh hmel a, ka nupui kha i mutpui chiang em? Tunah sawn i fa a pai mek asin" a bula ṭhut hniam pah chuan ka ti hrawk a, ani chuan min lo en rang ngei mai.




"Enga!? Ka fa a pai maw!? Thil theih a ni lo" a rawn tih chuan ka hnek leh ta nge nge a, thah mai chu ka duh tak tak a ni.




"Phatsan leh tur si chuan engvangin nge i mutpui? Ingaizawng pawh lo ni ula pa mawhphurhna i lak ngam dawn loh chuan engvangin nge i mutpui kher?" ka ti leh hrawk a, ka thinrim dan chu pui tak a ni.




"Ni lo, a theih loh. Mambawihi khan ka fa a pai thei ringawt lo, ka pi engkim hi ka hrilh tawh mai dawn, ka nute paw'n min lo call nasa tawh lutuk" tiin ka nu chu a biak chhunzawm ta daih a, ka nuin inrawlhna a lo nei chu ka hriatthiam loh ber pakhat a ni.




"Eng thu maw i sawi kha!? Ka nu hi a inrawlh ve tihna em ni? Khang uirena thil velah khan ka nu hi a inrawlh ve tihna maw!? Ka nu, i rawlh ve tak zet em? I ka ngei khan thu dik min han hrilh teh" ding uai chung chuan ka ti a, ka nu erawh chuan mittui tla zawih zawih chung hian min lo en thung.




"Marem, thil kha ka tum angin a kal bik lo" ṭap chunga a rawn tih chuan sawi kher lo mahse engkim kha a lo hre lawk vek tih a chiang ta khawp mai.




"Ka nu le! Min hringtunu i ni hi ka awih thei lo, hetiang em em hian a ni maw ka nupui kha i lo huat?" ka ti ta thlawt a, chutah ka bula mi chuan chau aw tak hian




"U Marem Mambawihi kha ka mutpui lo, engkim kha ka pi ruahmanna vek zawk a ni. Chuvangin tuna a nau pai mek chu ka fa a ni thei lo hrim hrim, i duh chuan naute lo pian hunah DNA test pawh kan ti thei ang" a rawn ti a, a chal vel chu a la dawm pah reng bawk.




"Han sawi leh teh, ka nupui Mambawihi chu a uire lo i tihna em ni? In mu dun lo maw!? Tuna a naute pai lai mek hi i fa a ni lo maw!?" ka ti zung zung a, a thu min hrilh avanga ka rilru a buai lutuk chu awm ngaihna pawh ka hre lo.




"Uire lo, a thingpui in tura damdawi ka pawlh avangin engmah kha a hre lo va, engkim kha ruahman sa vek zawk a ni. I duh chuan i nu hi i zawt thei ang, tunah chuan ka lo â tak zet a ni tih ka hre chhuak tawh" a rawn ti leh a, ka lawm tho rualin ka thin a la rim em em bawk si.




"I phu tawk hremna chu i hmu khawp ang" thinrim aw tak chuan ka ti phiar a, police lam chu ka call zui nghal bawk.




"Ka nu, i mak ka ti hle mai. Mambawihi kha kut thlak hial ka tum phah asin, khang i thil lo ruahman avang khan ben ka tum phah asin" thinrimna leh lungngaihnaa khat aw chuan ka ti chhuak vak a, ka nu chuan khawngaih hmel zet hian min lo en ran bawk.




"Nangni pahnih thil tih avang hian kan chhungkua chuan nasa takin kan tuar asin, zan pawh kan muhil ngai miah lo zawk asin, engtinnge in tih theih zawk? Mi nun tichhetu leh mi chhungkaw tichhetu nih hi a nuam viau em ni? In hlim phah em? Min han hrilh teh u, in hlim phah chiah em?" bang ngheng dawt chung chuan ka ti ta sup a, Mambawihi lakah chuan ngaihdam dil tlak pawh niin ka inhre tawh lo.




"Ka tihpalh u Marem, a tirah kha chuan dawra min khawih kha ka lak nat em avangin ka thin a rim a, engtin emaw ni taka i rilru tihnat ve kha ka duh a" a rawn tih chuan mit tizim sun hian ka lo melh a, chutah amah vek chuan




"Uire ang zawnga Mambawihi lantir kha chu ka ngaihtuahnaah pawh a awm lo, mahse i nu khan a lo ngaihtuah chhuak ta zawk a ni. Min tih tirna chhan kha ka hre lo va, kei lah kha ka thinrim lai a lo ni kher bawk nen i nu chu pawisa hlawhin thil ka tihpui ta a ni" a rawn tih zawm leh zat a, chutia ka en ngawt ngawt lai chuan ka phone a lo ri a, tunge min lo call tu ka en chuan ka pa a lo ni.




"Ka pa, tunah hian inah i rawn haw nghal a ngai. Hmanhmawh rawh, ka thil hmuh leh ka thu hriat hi a rapthlak tak zet" ka lak rualin ka ti nghal a, ka aw pawh chu a ring tawh lo hle.




"Engvang ringawt chuan maw? I rei tawh lutuk a, ka lo call tawp che a nih hi!" thil thleng engmah hre lo chuan a rawn ti a, a aw aṭang chuan a lungawi vak lo tih pawh ka hre thei.




"Ni lo, tunah hian inah i rawn haw nghal ngei ngei a ngai, police rawn thlen hma hian inpuiah zawk lo kal ang che" ka ti ta tawp a, chutah ka pa chuan hlauhthawn hmel fê hian




"Police a! Eng thil chiah nge thleng han sawi teh" a rawn ti leh nghal a, kei lah chuan ṭawng ṭha peih tawh lo zet hian




"I lo thlen hunah i hre mai ang ka pa" ka ti thawp sup a, kan inbiakna pawh chu hrilh lawk lovin ka off ta hmak.





Rei lovah ka pa chu a rawn thleng ta thuai a, pindan chhung a lo hnawk nuai avang chuan a meng buai hman hle. Zep awm si se lovin engkim chu ka hrilh ta vek a, Mambawihi ka khawngaih lutukna lamah ka sawi zawngte chuan ka thate chu a khur hial a ni. Ka pa chuan mit sen ramin ka nu chu a en a, hnai takah a kal chilh a, ka nu erawh chuan melh khat pawhin a lo melh ngam lo.





Sawma erawh ka khawih tawh miau loh avangin ṭhutthlengah chuan a ṭhu chho tawh a, tlan chhiat emaw pawh a tum buai duh law law niin a lang. Ka khawihna avanga a hmai thi vel chu a hru deuh chhen a, Doctor ni mah ila ani kher chu ka buaipui peih der lo.





Police te pawh an lo thleng ve thuai a, Sawma chu pawt dawr dâwrin an kalpui nghal vang vang. Kan chhungkaw mi ni lo an liam ta maw tihah ka pa chu a rawn ṭawng chhuak ve ta.





Ka nu chu a vin hrawk hrawk a, a thil tih tenawmzia leh a tih dik lohzia te chu a sawi a, chutiang em ema ka pa thinrim hmel chu ka la hmu ngai bik lo. Ka nu chuan hlau em em hian a lo ngaithla a, a hlau lutuk chu ṭik pawh a ti ngam lo hrim hrim.





Ka pa chuan a thinrim lutuk avangin kut a thlak mai dawn emaw ka ti a, a thlak chuang lo. Kei erawh chuan beng se, kut chu thlak sawk sawk se ka lo ti rilru khawp. Ka nu ka hmangaih loh vang a ni lo va, mahse ka nu chu tunah chuan hmangaih pawh ka duh tawh lo zawk a ni.





Ani chu ka nu ni tlakah pawh ka ngai tawh lo va, kei leh ka nupui fanaute inkara khi siam duhtu hi ka nu atan ka pawm leh thei tawh ang em tih ka hre lo, tunah hi chuan ka hre tawh lo tak zet a ni.






Zawi muangin ka pate room aṭang chuan ka chhuak a, ka pa chu a ṭawng ring ṭha bawk a ni ang kawngka pui ka thlen pawh chuan a ṭawng ka la hre pha vek. Kut thlak tur khan ka lo ti rilru vel khawp a, mahse ka pa chuan a nupui chu kei ang bawkin kut a thlak duh bik kher lo vang tih ka hre chhuak leh nghal. Eng ang pawhin thinrim mahse a nupui chu kut a thlak lo vang a, ṭawngkain a ankhum hrep hrep zawk dawn tih pawh ka hre chiang ta hle.





Pawna ka chhuah chuan Zira hian mak tih hmel zet hian min lo en a, ṭawng tuar tuar thawm chu a lo hre ve a ni ngei ang. Hawihawm tak chuan min lo bia a, amah chu ka en vawng vawng a, chhang chuang lo chuan motor chhungah ka lut ta daih.






Tunah chuan ka ngaihtuahnaah ka nu a awm thei tawh lo va, Sawma pawh a awm thei tawh lo va, Mambawihi chauh chu a awm tawh a ni. Ka va inchhir tehreng em, a laka ka chet dan tenawm zet avang khan ka inchhir lutuk hi ka puak keh thei mai dawnin ka hria.






Motor seat ngheng chuan ka ṭhu ngawi reng a, ka ngaihtuahna chu a vak vel ruai ruai mai. Ka fapa tak ngial paw'n ka ngaihtuahna an luah thei tawh lo va, Mambawihi chu ka va han khawngaih ngawih ngawih tawh tak em.





Ka thinrim lutuk insum zo lovin kut thlak ka tum laia min hlau hmel te chu ka mitthlaah an lo lang zut zut a, mahni nupuite hlau thlabara siamtu pasal tlak tlai lo tak chu ka va han ni chiang em.





Motor-a ka chuan hnu pawh chuan ka tlan chhuak mai lo va, tunah tak hi chuan khawi hmun emaw nia au vak vak ka châk lutuk. Ka rilru chu a na em em a, chu erawh ka nupui uire anga ka hriat vang a ni tawh lo.





Ka rilruah chuan Mambawihi hmel a lo lang a, min ngai lutukin ka kawr a lo kuah lai te chu ka mitthlaah an rawn awm zui leh nghal bawk. Steering bawh run chuan ka maimitchhing vang vang a, a nupuiin a mamawh lai pawha awm duh lo lui tlat pasal ka ni chu ka zak a ni.





Ka zak ngawih ngawih a, thil thleng tawh lah chu siam ṭhat theih a ni tawh si lo. Ka tha zawng zawngte chu an bo vek emaw tih theih tur khawpin ka che chu a muang a, che ṭual ṭûalin motor chu ka tinung ve ta hram.






Ka nupui hmel chu ka hmu zak a, ani chuan thu dik hre ta se min ngaidam duh tawh kher ang em ka hre lo. Kei chuan ka ṭhen ngai dawn lo tih leh uire eng ang mahse ka nupui a ni kumkhua dawn tih kha ka sawi nasa hle a, mahse tunah zet zawng Mambawihi thutlukna chu eng pawh ni se ka thutlukna a ni tawh ang.





Thu dik a hriat hnua min ṭhen a duh phawt chuan ka remti ang a, ka fapa pawh a bulah ka hlan nghal ang. Pa leh fapa enkawl tlak pawh niin ka inhre tawh lo va, keimah leh keimah chu ka inhaw lutuk hi a ni ringawt.





Ka motor khalh lai pawh chu ngaihtuahna mumal lo zet pu chung chuan ka khalh a, kan in lam pan chuan ka tlan duh rih ta lo zawk. Thu dik chu ka hrilh ngei a la ngai ang a, a hriat huna a lo dawnsawn dan tur mawlh chu a ni ka hmuh hreh em em.





Rangvamual veng lamah ka inkhalh thla a, zu in tura chhuk pawh ka ni chiah lo. Zu an in ṭhinna dawr hmaah chuan ka motor chu ka tiding a, pa hmel deuh deuh tawh te lo ṭhut khawm laihna hmunah chuan ka va inrawlh a, an zinga pakhat chu ka hnek ta chawrh.





Chu veleh an vai chuan min lo hnek rawn ta sup sup a, mahse pawi tihna pakhat mah ka nei lo. Ka eng lai pawh chu na se ka duh a, chu chu ka phu tawk chiah a ni bawk.





Patling leh tlangval rual zu rui tawh ho chuan ka hmai chu an rawn inhnek chhawk a, kei chuan ka lo dawh ta mai mai thung. Ka dulah te chuan min pet a, ka tukhum lamah chuan an rawn chhir hrep hrep bawk.





Hmeichhe pakhat hi a lo ṭe vak a, chumi hnu chuan min khawih rawn duh tawk ta chauh. Hmeichhe pakhat chu tui nen ka awmna lam a lo pan vat a, ka hmui thi ser ser leh ka hnar aṭanga thi lo chhuak te chu a hru fai zung zung. A bulah chuan mipa kum 17 vel awm hi a lo ding ve a, an pahnih chuan min kuah tho ta bawk.





"Zu i inin i rui der bawk si lo va, engatinge khatianga buaina i rawn siam ringawt?" dawr chhung lama min hruai luh hnu chuan ka hmel hriat loh hmeichhia chuan a lo ti a, mahse ka chhang buai vel peih lo.






Ka ṭhutna aṭang chuan ka tho a, ka motor awmna lam chu ka pan ta daih. Ngaihtuah muk deuh chuan ka inkhalh haw leh a, mahse kan ina hawa Mambawihi hmel hmuh chu ka la ngam ta lo cheu.





Zing lama ka chawlh dawn thu sawi lawk vel si kha Hospital lamah bawk chuan ka inkhalh thleng a, ka office chhungah chuan ka ṭhu ngawi ta reng mai. Hun kal tawh chu ka ngaihtuah let a, a rai thu min hrilha a hlauhthawn hmel em em te chu ka mitthlaah an lo lang leh nghal.





Kei chuan ka fa a nih loh ngawt kha ka'n lo ring vei pek a, ka fa lo piang tur chu khawvel a hmuh hma hauhin ka lo haw em em ringawt a nih kha!





Tlai dar 4 leh a chanve vel a ni tawh a, Doctor Tetei'n ka office aṭang ka chhuak min hmuh chuan mak a lo ti khawp mai. Eng eng emaw ni min zawt a, mahse kei chuan thil pawimawh lak tur ka neih thu te ka lo sawi ta vel mai mai. Thil tam pawh min sawipui hmain haw ka ngaih tawh thu ka sawi daih a, mahse haw ka châk vang ni lovin inbiak reng chu ka peih loh vang a ni zawk.





Doctor Tetei chuan ka hriselna a tlak hniam hmel thu min hrilh leh ta hram a, a ni pawh a ni ve tak ang. Thla khat chuang zet kha chu zan pawh ka muhil ngai mang lo va, chutiang zelin Mambawihi pawh a muhil ngai bik lo a nih kha!





Inchhirnaa khat leh Mambawihi hmel hmu hreh em em chung chuan ka inkhalh haw leh ta hna hnâ a, kan inkawt ka thlen pawh chuan lut mai lovin motor chhungah chuan ka ṭhu khawtlai leh ta hram.





Rilru inthlahrung dek chuan ka lut a, thu dik a hriat hnuah Mambawihi chuan engtinnge min tih ang tih mawlh chu kan ngaihtuah a, a laka ka lo chet dan avang chuan ka inchhir ngawih ngawih hi a ni tawp. In chhung ka luh chuan tumah ka hmu lo va, room lamah an awm a nih ka ring ve tawp.




Marcus-a thawm tak ngial pawh ka hre lo va, ani chu a muhil te pawh a ni maithei a ni. Kan nupa room kawngka hawnga luh ka tum chuan Mambawihi ṭawng ri hi ka hria a, amah leh amah inbia a ang mah zawk.





"Lalpa, khawngaih takin tuna ka pum chhunga naute awm hi u Marema fa nih tir hram teh aw, ka ngen tak zet a che. Thil theih a ni lo tih chu ka hria, mahse nang chuan tihtheih loh i neih loh khâ, khawngaih takin Lalpa nih tir hram rawh aw" tiin Mambawihi chu a ṭap feih feih a, kei chu lut ta lovin pawn lam aṭang chuan a thawm chu ka lo ngaithla reng a, ka khawngaih lutuk chu ka na ve vek thei hial a ni.




"Nu, pa, ka va'n ngai tak che u em. In fanu hi ka khua a har lutuk, min hmu thei em? Ka fapa hi ngaihtuah miah lo ila chuan ka lo kal ang, in bulah khan ka lo kal ve tawh ngei ngei ang" rawn ti lehin a ṭap chhuak hawk a, ṭah rin a hlauh danah Marcus-a chu a muhil a ni ngei ang.




"Ni lo, ni leh lo" tiin a ṭap chu a tawp hmak a, a thawm chu a reh zui vawng vawng a, kei chuan a rawn ṭawng chhuah leh dan tur chu ka lo ngaichang reng thung.




"Marcus" thawm a neih loh vang vang hnuah chuan a rawn ti chhuak leh sep a, va luha va kuah thlawp chu ka châk lutuk, mahse a taksa si tlakah pawh ka inngai tawh si lo.




"Marcus ka fapa, ka hmangaih em em te, i pa chhun takin lo ṭhang lian zel la, lo hmelṭha em em ang che aw. Chuan i pa kha ka hmangaih lutuk tih min lo hrilhsak dawn nia aw, ka thinlung zawng zawngin ka hmangaih tih min lo hrilhsak hram dawn nia. Kei uirenu ve mai hi zawng i nu ni tlak ka ni lo va, i pa nupui ni tlak pawh ka ni tawh lo. Mangṭha ka fapa, mangṭha aw u Marem" rawn ti lehin thil hi a rawn ri pawp a, chu thawm avang chuan kawngka chu ka hawng vat a, ka thil hmuh zet chuan min va han ṭhawng chiang tak em.





Hmanhmawh takin ka tlan phei vat a, a keah chuan chawi kangin a nghawnga nuate puak puan lo insuih bilh bawlawk chu ka la chhuak thuai a, Mambawihi erawh chuan engmah a hre tawh lo.




A biangah te chuan ka beng a, a harh thei tawh bawk si lo, ka va han hlauthawng mai mai tak em. A mar chu ka en a, a lo la awm ṭawk ṭawk avang chuan rang takin ka thawhpui nghal.




A zawi vek tawh avangin ka pu lâwp a, ka fapa chu muhil lai a ni leh nih loh pawh ngaihtuah tawh lovin ka ban leh lam chuan ka pawm tho nawlh bawk.





Motor chhungah chuan Mambawihi chu ka mut tir a, ka fapa pawh lo harhin min hmuh chuan mak a tih hmel hle. A ṭap miah lo va, ka hma lama ṭhut tir chung chuan ka tlan chhuak zui nghal. Mambawihi chu darthlalang aṭang chuan ka en a, engmah hre lova a mu ringawt te chuan nasa takin inthiam lohna min pe.





Hospital kan thlen chuan Mambawihi chu ka pu leh tawp a, Marcus-a pawm a lo ngai bawk nen ka bawr ang reng hle. Ka hmanhmawh em avang leh ka bawr em avang chuan min en duh hlawm hle a, kal pawh kal lovin ka tlan hi a ni ber zawk.





Doctor Tetei'n min lo hmuh chuan a meng buai ve nak a, ka lam chu a lo pan ta vat bawk. Marcus-a chu min pawm thlaksak thuai a, Marcus-a lah chu a lo la ṭap zui. Doctor Tetei chu ka fapa min lo buaipuisak tur chuan ka ngen tawp a, kei erawh Mambawihi pu chung chuan Cabin lam chu ka pan ta vat vat.





Khumah chuan ka nghat thla a, a kut leh taksa velah chuan khawl thil vel ka vuah nghal zung zung a, ka bula Nurse te pawh chu an lo hlauthawng ve hle.




Doctor Tetei pawh a rawn lut ve thuai a, ka fapa chu Nurse pakhatin a awm tlei thu a lo sawi nghal bawk. Chutah Mambawihi chu ka check leh a, a mar ka hmu zo ta miah lo mai.





"Ni lo, a theih loh. Mambawih, ka Mambawih, harh hram teh. Khawngaihin min thihsan suh, khawngaih takin lo harh leh rawh" ka ti hlawk hlawk a, ka chi aiin ka buai vek tawh hi a ni ber.




"Doctor, a mar hi ka hmu zo tawh bik miah lo" Doctor Tetei chuan a rawn ti ve vat a, a mar chu a awm leh hram beiseiin ka check ṭha leh ṭhin a, mahse ka hmu tawh bawk si lo.





Ka tawlh sawn dâwr a, bang ngheng chuan ka ṭhu sawp nghal duai bawk. Ka mittui chu ka biangah a rawn luang zawih zawih a, ka Mambawihi'n min thihsan tur chu ka phal thei lo a ni.





Doctor Tetei chuan beidawng hmel fê hian min lo en dauh dauh a, Doctor tan chuan ka nupui chu a thi lo tih chi reng a ni tawh lo. Nurse te pawh chu an buai zui duh tawh lo va, ka awm dan an hmuh phei chuan min en ṭha ngam lo hrim hrim.





"A theih loh, a thi thei lo" tiin ka ṭhutna aṭang chuan ka tho chhuak a, inthing harhin ka nupui mutna lam chu kan pan nghal.




"A rang thei ang berin khawl kha va la nghal rawh u" ti hrawkin Nurse te chu ka melh a, chutah Doctor Tetei chuan




"A chi loh Doctor, a chi miah loh. A hmanna tur a ni lo, tuna mi nen hi chuan a hmanna tur kha a inang lo" a lo ti vat a, kei erawh chutiang ka ngaihtuah buai kilh kelh peih tawh lo.




"Mi mawl ho, kal rawh u ka ti a ni lo'm ni? Engatinge in la din reng?" ti leh hrawkin Nurse ho chu ka melh a, Doctor Tetei bawk chuan




"Ni lo, kal suh u. Doctor ngaihtuah chiang rawh, kan hmang lui a nih chuan Mambawihi hian a tuar thei zawk a ni. Tunah hian a mar kan hmu tawh loh avangin a thi tihna a la ni kher lo, a lo la dam maithei asin" a rawn ti vin ve leh ta tuar a, kei chu a thusawi avang chuan ka lo ṭhen suk.




"Min dodal zawngin awm reng reng suh, i senior ka nih hi i hria em? Min zah ve deuh ta che" tiin ka vin ta hrep a, ka ṭawng chhuak reng reng chu ka thunun theih piah lam thil vek a ni tawh.




"In hna aṭangin ban in duh zawk em ni mi mawl tlak tlai lo ho? Phiangsen che u hian, tunah khawl chu va la nghal rawh u" ka ti leh hrawk a, Nurse te chu rang takin an tlan chhuak nghal.





Khawl an rawn nawr luh rual chuan ka lo buaipui vat a, hmanhmawh takin ka tinung a, ka siam rem nghal zung zung bawk. Mambawihi kawr chu ka pawt thler hrawk a, ka bula mite chuan ka che vel chu min lo thlir tawp.




Mambawihi awm ngo takah chuan khawl chu ka zu dep phu ta zawk zawk a, a lung chu rawn phu leh hram se tiin Pathian ka ngen rilru mawlh mawlh. Khawl hnathawh tih hriat zet hian Mambawihi chu a rawn che dawt dawt a, mahse harh hmel reng a la pu thei bawk si lo.





Vawi tam khawl hmanga a lung tih phut leh ka tum hnu pawh chuan thi hlen tawh ang mai hian a la maimitchhing reng a, a lu bula khawlah lah chuan a nung tawh lo tih a lang chiang ropui mai bawk si.





Beidawng duh lovin khawl chuan ka charge pawp pawp a, ka bula Doctor Tetei phei chu ka awm dan avang chuan a rawn ṭap chhuak ta hawk.





"Harh rawh, harh hram rawh. Lalpa khawngaihin, khawngaih takin ka nupui hi min kalsan tir lul suh" ti vak vak chung chuan a zawnin ka charge leh ta pawp pawp a, chutah a lu lama khawl chu a rawn ri chhuak ta zawt zawt mai.




"A la dam, Doctor a la dam chiang a ni" Doctor Tetei chuan a rawn ti thuai a, keipawh chu lawm avangin ka mittui a tling zui nghal.




"Min kalsan dawn lo tih hi ka hria alawm Mambawih, ka hre chiang a ni. Ka hmangaih em em nu, min kalsan ta la engtinnge awm se min tih reng reng? Â reuh lutuk mai" tiin a chala sam lo uai thla ho chu ka hui kian sak a, lungchim zeta a hmel en chung chuan a chal chu ka chul hliau hliau a, mi dang erawh chuan ka nupui chu an lo buaipui nghal zung zung.





Mithi ni mai tawh tura ka lo ngaih hman ka nupui chu a hmuiah ka fawp zeuh a, ka bulah chuan tute nge lo awm ve tih pawh ka ngaihtuah buai peih tawh lo. A biangah te, a hnarah te, a chalah te chuan ka fawp kual den den a, min kalsan lova a lungphu kan hmu leh chu ka lawm em a tin ni!





Ka mittui chu hru tawkin ka tho a, Mambawihi chu Nurse ho chuan dam lo kawr an hak tir zui ta zung zung. Engkim chu an vuah ṭha nghal vek a, oxygen pawh kan pe zui nghal bawk. A lu bula khawl lo awm chu ka en a, a lungphu rate chu la hniam viau mahse a thi lo a ni tih ka hriatna chuan min tilawm em em tho.





Doctor Tetei erawh ka hmu tawh lo va, ka ngaih a ṭhat tawh em avang chuan keipawh pawn lamah ka fapa ngaihven turin ka chhuak ve nghal.





Room kawngka luhna bula ṭhutthleng lo awmah chuan Doctor Tetei chu a lo indawm kun ngul a, a la hlauthawng reng niin ka hria. A bula ka va din chuan a lo hawi chhuak a, a mit bul vel chu a lo la huh deuh pur.





"Ka tihpalh Doctor, ka hlauthawng lutuk kha ka buai vek a ni. Khatiangah kan la hmang ngai bawk si lo va, Mambawihi dinhmun ang kha ka vawi khat tawnna a lo ni bawk nen ka hlauthawng em a ni" inthiam lo tak chuan a rawn ti a, ka khawngaih reuh hle.




"A pawi lo, ka vin vak che avang khan min ngaidam zawk dawn nia. Tunah chuan pangai takin awm leh tawh zawk rawh, haw zawk la a ṭha ang. Zanin chu ka lo duty chhawk ang che, hetah ka awm tluan hmel tho sia" ka ti ve ta zung zung a, ani pawh a lo bu ve ta nghauh.




"Ka thate thleng hian a la khur thei, min hrethiam hram dawn nia Doctor" tiin a rawn ding chhuak a, a kal liam lai chu ka thlir reng a, a hlauthawng ve lutuk chu ka khawngaih tak tak a ni.


------******------
La like lovin Like i la, la Comment lovin Comment zel ang aw

[Ngaia]

Chapter 40





Ka fapa bul ka thlen chuan min au chung hian min lo ban vat a, keipawh chuan ka lo pawm ve nghal. A kutah chuan chocolate rawng chi thum vel hi a lo hum ran a, chu chu a ṭah miah loh chhan a nih ka ring. Ka fapa lo awmtu Nurse chuan ka fapa hmelṭhatzia leh duhawmzia ringawt chu min hrilh a, kan inan thu a sawi tel leh hram bawk.




Keipawh chuan Nurse hnenah chuan lawm thute ka sawi a, ka fapa chu ka office lam ka pan phei pui zui nghal daih. Office chhunga kan luh chuan min be leh neuh neuh reuh a, ka hriatthiam ang ang chuan ka lo chhang ve zel. Chutia ka fapa nen kan inkawm melh melh lai chuan ka phone a lo ri a, caller ID ka en chuan ka pa bawk a lo ni.






"Khawnge in awm? In in kawngka lah a inkalh bawk si lo, engatinge tûmah in awm loh?" phone call ka lak rualin ka pa chuan a lo ti a, kan chhuah khan kawngka ka kalh reng reng lo tih ka hre chhuak chiah.




"Nia ka pa, kan hmanhmawh lutuk kha kawngka pawh kan kalh hman ta lo a ni" ka lo ti ve mai a, Marcus-a erawh min ngaihsak lo zetin a thil ken chu a khal niap niap.




"Engatinge chuti taka in hmanhmawh? Thil thleng a awm em ni? Marcus-a kha ka hmu châk a nia"




"Ka pa, tunah hian Hospital-ah kan awm mek. I duh chuan i lo kal ve thei ang, ka nu erawh hrilh miah lo vang che. A hmel kha ka hmu peih rih lo, kan chanchin hre tlak pawh a ni lo"




"Enga!? Engvanga Hospital-a lut thut nge in nih? Marcus-a a a ṭha lo em ni? Nge Mambawihi zawk?" a aw aṭang chuan a rawn hlauhthawn ve hmel khawp.




"Mambawihi hi intihhlum a lo tum a, ka chhan hman hram a ni ka pa. Phone-a sawi sen pawh a ni lo, ka nu erawh kan chanchin hrilh lo hram ang che"




"Âwwwww ava han mangan thlak ṭhin em, ka lo kal nghal ang. I nu chu hrilh ve a ṭha lo maw? Tunah hian huain hmu peih lo viau mahla i nu a ni tho tho a, engtikah mah a thisen i nihna hi a bo dawn chuang lo"




"Ka hria alawm ka pa, mahse hrilh rih lo turin ka duh che a ni. I duh chuan i hrilh thei ang, mahse i hrilh chuan nang pawh i rawn kal a ngai lo e. Min ngaihtuah lo ula, kei chuan ka chhungkua hi ka venghim tlat tawh dawn" tiin kan inbiakna chu ka titawp hmak a, ka ngaihtuah zawng ringawt pawh hian ka nu chu ka la haw hlur mai.





"Apa, apu hmu châk ê" min en reng chung hian ka fapa chuan a lo ti a, ka phone dawhkana dahin amah chu ka ngaihven ta vat.




"Apu kha i hmu châk maw!?" a bianga dawm pah chuan ka ti a, ani pawh a lo bu ve nghut nghut.




"Apu chu a lo kal dawn alawm, a lo thleng ṭep tawh ang" ka ti leh chuan a rawn nui ver ver a, ka pa chu a rawn kal ngei dawn tih ka chiang a ni.





Ka fapa chu a dawhkan ṭhutna aṭang chuan a tho a, min lo bawh zui nghal. A hmel ka en chuan lungngaih hmel zet hian min lo en reuh a, a awm dan chu ka en chik hle. Ka pawm kang a, a nu awmna room lam chu ka panpui ta daih. Room chhunga kan luh chuan Nurse pahnih chu an lo awm a, an zinga pakhat ei tur lei turin ka tir zui nghal.





Marcus-a erawh ka dar bawhin a lo muhil leh hman tawh a, a ril pawh a ṭam tawh viau ka ring. A kuta a chocolate ken chu a thlauh dawn avangin ka laksak ta daih a, ka kekawr ipte ah ka thun nghal hmak. Chutah ka phone chu a rawn ri leh a, caller ID tunge a nih tih ka hmuh chuan room aṭangin ka chhuak zui leh nghal.





"Marem, eng thil chiah nge thleng min han hrilh teh?" ka bul a rawn thlen rualin ka pa chuan a lo ti a, ka beisei ang ngeiin amah chauhin a lo kal.




"Kei hi ka lo nunrawng tak zet a ni ka pa, kei hi pasal sual tak ka ni" tiin ṭhutna awmah chuan ka ṭhu thla a, ka pa pawh chu a rawn ṭhu thla ve nghal.




"Mambawihi chu a ṭha tawh maw? A harh tawh hrim hrim em?" ka pa chuan a rawn ti leh a, Marcus-a muhil chu a samah leh a hnungah a rawn chul zeuh bawk.




"Aw ṭha tawh a ni mai, mahse ven uluk a la ngai hle. Harh erawh a rawn la harh lo va, a harh hun tur lah ka sawi lawk thei lo"




"A zia lo khawp mai, engtia lo intihhlum nge a tum hrim hrim? Ani hi a rilru beidawng hian lo inthah a tum a ni mai ang em?"




"Ni e, i sawi chu a dik ka pa. Mambawihi hi rilru beidawn tawh lutuk avanga intihhlum tum a ni a, kei lah chuan ngaihsak a hnekin ka lo ensan vel mai mai a, engkim hi ka thiam loh vek zawk a ni. A lo inkhai asin ka pa, keimah avang hian nun châk lohna neiin a inkhai phah hial asin, khawvela pasal sual ber chu ka ni chiang a ni" ka ti chhuak sup a, ka en ngai chu ka en tlawk tlawk a, ka mittui tling pam te chu ka biangah an rawn baw zui nghal.




"Thihna êm kan tawng lo hi Pathian vang liau liau a ni. Nang pawh intilungngai lutuk lo la, i nupui chu hmangaih leh duat takin i la enkawl thei alawm" ka dara lo chelh pah chuan a rawn ti a, kei erawh chuan ka lu ka thing vat thung.




"Ni lo ka pa, a pasal ni reng tlak pawh hi ka ni tawh lo zawk. Thu dik a hriat hunah chuan a rilru a na ang a, a rilru a nat lutuk avangin kei chu min ṭhen a duh ngei ang. Chu erawh keia lo sawi theih a awm lo va, min ṭhen a duh phawt chuan kei chuan hmangaih em em chungin ka ṭhen ang, a nun a hahdam theih zawkna'n ka ṭhen ngei ngei ang"




"I fapa hi i ngaihtuah miah lo em ni? Engvanga inṭhen chungchang te sawi ringawt nge maw i nih le? Fate hi nu leh pa kara seilian tur an ni a, chu chu an tan chuan a ṭha ber bawk a ni"




"Ka ngaihtuah, ka fapa hi ka ngaihtuah lutuk, mahse kei hi a pa ni tlak pawh ka ni lo. Kei hian ka nupui leh ka fapa chu hlau thlabarin ka siam a, khang thla kalta chhung khan ka nupui chuan mi pawh en ngam lovin hun a hmang ṭhin asin. Engvangin kei hi ka sual em em? Engatinge thu dik hre hmasa hauh si lo khan Mambawihi kha kut thlak te ka lo tum ni!? Âwwwww, ka tih sual rah chu ka seng mek a ni si a"




"Marem, khatiang khan nangmah in thiam loh em em lo teh. I thiam loh a awm lo va, Mambawihi thiam loh pawh a awm lo, engkim hi i nu thiam loh vek zawk a ni"




"Ka nu kha ka lo dem viau tak na a, kei hi dem tur ber zawk chu ka ni e. Ka nupui, ka hmangaih em em khan ka taksa pawh si ngam lovin ka kawrte kha a kuah vawng vawng a, ka awm loh lai te khan a lo va tuar nasa dawn tak em"




"Marem, i lungngaih lutuk avang hian nagmah intihhlum lam tum ve miah suh ang che. I hria em? Kan boruak tawn mek hian a zir lo em a, nakinah chuan engkim a ṭha leh vek turah ngai phawt mai teh ang. Ti teh, Mambawihi chu va hmu teh ang, ka khawngaih hle mai" tiin a ding nghal uai a, ka la ṭhut reng avang chuan




"Lo kal rawh le Marem, i rilru na hmel hmuh hi hrehawm ka ti teh a nia. Nang chu ka fapa fing leh rilru zau tak i nih kha, khatianga i awm reng chuan mi paw'n Doctor Marema tiin an ko tawh lo mai ang che" a rawn ti leh a, min tihhlim a tum tih chu hre tho mah ila ka hlim thei der si lo.




"Doctor nih pawh hi ka phu tawh lovin ka hria ka pa, Sawma ang khan Jail bang zut ve tlak lek ka ni tawh, kei hi Mambawihi pasal ni tlak ka ni tawh lo"




"A va mak tak! Lo kal rawh le Marem, tuna kan tih theih zawng chu Pathian hnena ṭawngṭai a ni mai. Khaw maw i rilru a hah rih em mai ka tupa chu ka lo pawm ang e, lo tho rawh le" rawn ti dam diaiin ka banah chuan min lo kai tho a, keipawh chu tho kangin ka fapa chu ka pawm tir zui ve leh ta mai.





Room chhunga kan luh chuan Mambawihi chu khawl chi hrang hrang nen a lo muhil bam a, ka en dik leh nghal zung zung. Zan lama a rawn harh nghal chu ka ring lo va, mahse naktuk lamah chuan a rawn harh theih tawh ka ring.





Khawl aṭang chuan a lungphu rate ke en leh a, dam pangai lungphu rate ang a lo nih tawh avang chan ka lawm hle. A bul hnaih takah chuan ka ṭhu a, a hmel chu en dauh dauhin a kut chu ka hum vang bawk. A chang leh ka fawp vawng vawng a, a lo harh huna min huat dan tur mawlh chu a ni ka rilru zawng zawng luah ta chu!





Ka pate nen room chhunga kan awm lai chuan ka eitur lei tir Nurse chu a lo lut a, kan inpek fel zawh chuan Nurse pawh chu a chhuak ve leh mai. Eitur chu ka pa lamah ka dah a, ka pa'n ei tura min tih pawh chuan ka ei duh ṭhak lo.





Engtinnge ka ei theih reng ang ni!? Ka bul lawkah chaw pawh la ei lova dam lo a awm a, khawvela ka mihring hmangaih berin thih ṭhelha min dam loh san hnu hi chuan ka kaah engmah a lut thei tawh lo. Rilṭam pawh ka hre lo va, a lo harh hma chu rilṭama thih pawh ka thlang zawk.





I nupui hi khawvela i mihring hmangaih ber a ni maw!? I fapa hi i hmangaih ve miah lo em ni? I fapa hi i thlahtham tihna em ni? tih zawhna pawh in nei ngei ang. Kei chuan Mambawihi hi ka hmangaih a, ka hmangaih kumkhua bawk ang. Ka fapa erawh ka hmangaih lo a ni lo va, ka hmangaih em em tho, mahse Mambawihi ai thlawt chuan ka hmangaih lo a ni.





Ka nupui leh ka fapa chu tehkhin chi ah pawh ka ngai lo va, loh theih lohvin duh thlante ngai se chuan ka fapa ni lovin ka nupui zawk chu ka thlang ngei ang, a chhan chu Mambawihi hi ka nunna leh ka engkim a ni. A hlim chuan ka hlim a, a lungngaih chuan ka lungngai a, a chhan chu ani leh kei chu Pathianin pumkhatah min siam tawh miau alawm.





Marcus-a a lo harh chuan ka pa chu ka office lama phei pui turin ka ti vat a, hetianga a nu a awm lai hi hmu turin ka duh lo a ni. Ka pa pawh chuan thil hrethiam takin a thawh pui vat a, ei tur chu a keng phei zui nghal bawk. Mambawihi muhil mek chu ka en reng a, chutah a dul lam chu ka en leh nghal zat.





A beidawng leh lungngai lutuk khan ka fa ni turin Pathian te kha a dil a, tu dang fa ni lovin a pum chhunga naute awm chu ka fa a lo ni reng si. A dul chu kawr chhanah chuan ka chul a, a pum chhunga naute awm chu ka rilruin ngaihdam ka dil ta mawlh mawlh.





Ka check tirh kha chuan ka buai em em a, a chhan pawh thla khat mi lek naute a lo pai vang a ni. Sawma nena an mut dun hun nen ka ngaihtuah a, kei ni lova Sawma fa a nih theihna chance kha a sang hle bawkin ka hria.





Chutah Sawma lah khan an mut dun loh thu leh ka nu ruahmanna vek a nih thu a sawi leh a, kha tah te khan ka hlim ru nghal hle. A nihna takah chuan ka nu khan ngaihzawng a nei emaw ka ti a, khatianga mipa dang nena an lo awm dun kha mak ka ti em a ni.





Amaherawhchu a bula mipa lo awm ve hmel ka hmuh kha chuan ka mak tihna aiin ka thinrimna kha a rawn lian ta a, kha tah kha chuan tual thah kha ka hreh tawh miah lo tak tak.





Mak tak maiin Mambawihi aw ngei mai khan ka thinlungah thu a rawn sawi a, tual that lo tura min duhna thu khan tual min thahtir leh ta lo a ni. Ka ngaihtuah let hian ka thinrim insum zawh loh avang khan tual ka lo that hman tak tak ang tih ka hlau hnuhnawh hle a, ka lo ngaihtuah tawi hle a ni tih ka hre chhuak ta bawk.





Mambawihi hi awm lo se chuan tual ka that ang a, Jail ka tang kumkhua tawh ngei ang. Chu chuan ka nupui leh ka fapa tan hma hun thim tak a siam ang a, tun let hian ka pawi tihna a zual fê bawk ang.





Amaherawhchu Pathian zarah leh ka nupui zarah tual ka that leh ta lo hlauh a, nupui atana Mambawihi ka lo nei mawlh chu a ni ka lawmna leh ka hlimna tikimtu chu!






Zanah chuan ka lo sawi lawk tawh ang ngeiin Doctor Tetei ward fan tur ho chu ka fansak a, keimah ka nih vang nge ni an lo harh ṭha phian a, hlim hmel tak hian min lo be zel. Kei erawh an hmuh atan chauh ka nui a, ka hlim der a, ka thinlung chhungril hahzia leh natzia chu an hre tawh bawk si lo.





Ward ka fan zawh chuan Mambawihi awmna lamah ka let leh a, a lo harh hma chu ṭul dang a awm te a nih loh chuan kalsan ka tum tawh lo. Ka pa chu ka fapa pawm muhil chung hian a rawn lut a, ka fapa chu an in lama hruai a tum thu a rawn sawi bawk. Kei erawh chuan ka lo phal lo va, ka duhdan chu min phalsak turin ka ngen ta ringawt bawk.





Ka pa chuan lungawi hmel vak lo hian min en ran a, a tawpa tawpah chuan ka fapa chu min rawn pawm tir ta tawp. A kal dawn tak takah chuan ka rilru hah avanga mahni intihhlum lam ti lo turin min chah leh hram a, keipawh chuan ka tih ngai loh tur thua lo chhangin kan in mangṭha zui ta bawk.





Ni e, kei leh zelin intihhlum ka lo tum a nih chuan ka fapa tan hian a baihvai thlak dawn lutuk. Lo intihlum ve ta ringawt ila tunge ka fapa enkawl ang? Tunge ka nupui chu enkawl ang? Chuvang chuan kei chuan mahni inthah lam pang tih ka tum lo hrim hrim a, kan inṭhen ta a nih paw'n ka nupui leh ka fapa enkawl chu ṭhulh ka tum chuang lo. An duh lo a nih leh an hriat loh hlan tala puih chu ka la tum fân a, ka nupui leh ka fapa chu baihvai takin ka awmtir thei lo a ni.





Zing a nih chuan tlaivar ta na nâ na chu ka fapa a lo harh chuan ka lo en reng a, ka hmui hmul leh ka hnar vel chu a rawn khawih leh nghal tawh. Ka lo nuih suk a, ani pawh a rawn nui ve leh ta ver ver mai.





Ka kamis hmaa ipte awmah chuan a kut a rawn thun a, a rawn ti che neuh neuh a, mak a tih hmel hle bawk. Kei chuan duat tak leh hmangaih takin ka lo pawm a, a kum a lo upa ve deuh tawh bawk nen ka ti a tiza lek lek zel.





Insum leh ṭhin lo ila chuan inbuanpui bawrh bawrh ka châk a, mahse chu erawh thil tih hun lo tak a ni rih. Mambawihi dam lovin kan bulah a awm reng a, lo inbuan vel chu tih chi loh lutuk.






"U Marem, Marcus, a tawpna'n min hmuh tir leh hram emaw ni le?" rawn titu aw lo chhuahna lam chu ka hawi vat a, Marcus-a chu chhuatah ka nghat thla ta vat.




"Mambawih, Mambawih, i lo harh tawh maw!? Âwwww Lalpa, ka va han lawm tak em" tiin a oxygen hipna chu ka phelh sak a, ani chuan mak ti deuh hian min lo en thung.




"A tak tak em ni in nih a? Ka va'n hrethiam lo ve" a rawn ti sep a, a meng buai ṭan hle bawk. Chutah kei chuan rang tak hian




"Aw Mambawih, a tak kan ni e. Min khawih teh, i pasal hi min han khawih teh" ka lo ti zung zung a, a kut chu la kangin ka biang leh ka hmu vel chu ka khawih tir nghal.




"Ni lo, ka thi lo em ni?" tiin a kut chu ka vawnna aṭang chuan a phih thla vat a, thil hre chhuak ṭan tih hriat tak hian a hmel chu a rawn lungngai nghal viau.




"Thi mai mai lo, thi ta la engtinnge kei hi i tel lovin awm se min tih a? I fapa te hi i ngaihtuah ve miah lo em ni? Engatinge mahni inthah te kha i lo tum reng?" ka ti duah a, a kut chu ka hum ran tawh bawk.




"A chhan chu maw kei hi i nupui ni tlak ka ni lo va, Marcus-a nu ni tlak pawh ka ni lo u Marem. Ka nu khan a lo sawi dik a ni. Kan inneih hma aṭang tawh khan nang ka phu lohzia che min hriattir ṭhin a, a thu min hrilh te kha lo zawm ila chuan buaina hi kan tawk miah lo vang maw le" a rawn ti thawp raih a, ka mit pawh en ngam lo chuan a thle sawn daih.




"I sawi dik lo, i sawi dik miah lo Mambawih. Nang hi ka nupui tur dik tak i ni a, kei hian ka phu lo lutuk zawk che asin. Min en teh Mambawih, min en hram teh" tiin a hmai chu ka lam hawi turin ka kuai her a, ani chuan hlauh hmel deuh hian min lo en thung.




"Khawngaihin, khawngaih takin hlauh hmel deuh khan mi en tawh suh Mambawih. Ka tiam a che, ka tina miah lo vang che" ka ti ve ta thlawt a, min en dan chuan a laka ka lo awm tawh dan dik lohzia min hriat chhuahtir nghal zawt zawt.




"U Marem" tiin a rawn ṭap chhuak a, ding kang vatin a lu leh ka lu chu ka insik tir a, ka kut chuan a biang chu duat takin ka dawm ran bawk.




"Aw keimah, i pasal, i u Marema ngei kha ka ni e. Mambawih, i chunga ka chet dan avang khan min ngaidam hram ang che aw, min ngaidam thei lo a nih paw'n ka dem miah lo ang che. I thutlukna chu eng pawh ni se ka pawm ang, ka pawm vek ang"




"Engatinge ngaihdam min dil u Marem? Kei hi asin ngaihdam dil mawlh mawlh tur zawk che chu! Ka tihpalh, ka tihpalh lutuk, uire kha ka tum bik miah lo" ṭap hawm hawm chung chuan a rawn ti a, ka thinlung chhungril chu a va na tak em.




"I thiam loh a awm lo Mambawih, engkim kha ruahman lawk vek a lo ni. Engkim kha ka nu lo ruahman lawk vek a ni a, nangmah kha inthiam lo miah suh. I bulah ka awm reng ang a, ka thlahthlam leh tawh ngai lo vang che"




"Ka nu maw!?" ka thusawi zawh chiah avang chuan a rawn ti a, a mak tih vang nge ni a ṭap pawh chu a bang deuh hmak.




"Aw, ka nu rilru chhiat lutuk avangin keini chhungkuain kan tuar a ni. Engkim kha Sawma nena an lo ruahman vek a ni a, chuan i pum chhunga naute hi tu dang ni lovin ka fa ngei a ni"




"Maw? Enge i sawi awmzia? Engtinnge i fa a nih theih?" mak ti deuh chuan min lo en a, kei chuan hmangaih tak hian ka lo fawp vang vang thung.




"A chhan chu Sawma khan a mutpui lo che, a awmzia chu i uire lo Mambawih. Kei ang mihring sual leh pasal nihna pawh chelh zo lo hian ben che te kha ka lo tum vel a, ka kut te hi tan hial asin ka duh. Ka ke te khan ka phih lâwp vel che a ti raw? Kei hi ke nei lova awm tlak ka ni, i chunga ka chet dan avang khan ka tihpalh lutuk Mambawih" tiin ka mittui chu a rawn tla a, chu thu a hriat tâkah chuan a rawn ṭap ri ta hawm hawm.





Awm kang leh deuhin ka âwmah a lu chu ka bei tir a, ka kawr chu pawt ṭawng ṭawngin a rawn ṭap a, ka letin a rilru chu a na dawn tih ka hria. Keia rilru lo na ve mai mai te chu a nep lutuk, ani te chu dam pawh thlahlel tawh lo hialin asin a nat.





Ka hmangaih em em hmeichhia chu ka âwm nghengin a ṭap a, a rilru nat dan tur chu ka hriatthiam phak rual a ni lo. A dam ṭha tawh chu ka lawm rualin a thutlukna min hrilh tur chu ka hre huphurh ru em em tawh thung. Eng pawh sawi se sawisel thei ka ni lo va, lo pawm hliah hliah tur zawk ka ni.





"Apa, anu" tiin kan fapa chuan khum tlang aṭang chuan min lo en hâ a, a la dingdihlip ve ngar ngar zui.




"Lo kal teh ka fapa, ka duat leh ka hmangaih em em te" tiin Mambawihi chuan Marcus-a chu a ko a, keipawh chu che vatin ka fapa chu ka pawm kang nghal.




"Âwwwww ka fapa duat em em te, nun hi a lo va mak ngai em" tiin Mambawihi chuan Marcus-a chu ṭap chung hian a kuah vawng vawng a, kei chuan khawl thil vel chu a taksa aṭangin ka lo hlip fel ta zung zung.




"I ṭha tawh ti raw Mambawih? Vawiinah hian kan chhuak nghal thei ang em?" tiin ka ding ngil a, Mambawihi pawh chuan mittui kar aṭangin min lo en ta kar.




"Aw ṭha tawh e, kan haw thei nghal ang" a rawn ti a, min enna aṭanga hawi sawnin a fapa chu a fawp zui mawlh mawlh.





Hospital aṭanga kan chhuah hnu chuan in lamah kan inkhalh haw nghal a, kan haw lamah te chuan Marcus-a chu a chhaih nui uar uar a, an awm dan avang chuan ka va'n hlim tak em. In kan thlen chuan kal lawkna tur ka neih thu sawiin ka kal chhuak leh nghal a, ka kalna tur ber ka thlen chuan ka thil duh chu ka la a, ka tlan haw leh ta vat.





Kan in chhung ka luh chuan sitting room-ah ka nupui leh ka fapa chu hmuh tur an lo awm lo va, room lamah an awm a nih ngei ka ring. Room ka luh chuan tukverh lam hawi vang vang lo ding Mambawihi chu ka hmu a, Marcus-a erawh khumah a lo muhil leh bam tawh.





"Mambawih" ka tih chuan a lo hawi thuai a, lungngaih hmel zet hian min en a, a bul chu ka thleng phei ta vat.




"U Marem" tia min koh rual chuan a hmaah ka ṭhinṭhi thla rawp a, ka chet dan chuan a ṭhawng hle pawh a ni ang a rawn meng buai hle.




"I chunga ka chet dan avang khan ka tihpalh Mambawih, min ngaidam hram dawn nia. Chuan he lehkha hi i thutlukna a ni a, nangin inṭhen i duh phawt chuan ka inṭhen ang. Amaherawhchu kan inṭhen avangin ka ngaihsak loh phah dawn lo che u a, ka neih zawng zawng hi in ta a ni tih i hre dawn nia" tiin inṭhenna paper chu ka pe a, mittui tling pam hian min lo en ve ran.




"Sign rawh Mambawih, kei hi i pasal tlak pawh ka ni tawh lo" tiin amah chu ka en chho a, a rilru damna tur a nih dawn phawt chuan eng pawh ka chungah ti se tawrh ka huam a ni.




"Ni lo u Marem" tiin a kuta lehkha awm chu a pawt thler hmiah hmiah a, chutah ṭap hawk chung hian




"Ka thei lo, ka ṭhen thei lo che, a chhan chu ka hmangaih lutuk che a ni. Ka ngaihdam i ngai lo va, ka pasal ni kumkhua zawk turin ka duh che" a rawn ti ṭuau a, rang mangkhenga thovin Mambawihi chu ka kuah ta vawng vawng.




"Ka hmangaih che Mambawih, ka hmangaih lutuk che. Min ṭhen i duh loh avang hian ka va han lawm em, ka lawm lutuk Mambawih" tiin nghet tak chuan ka kuah a, ani erawh ṭap ring ngam si lo hian a lo ṭap khur char char.




"Engtinnge ka thih loh theih zawk? Engkim kha ka ti hman vek sia" a ṭah ban hnu chuan a rawn ti a, ka âwmah chuan ka la kuah bet ran bawk.




"Ka hre vek alawm, i ṭawng zawng kha ka hre vek alawm. Kha tah khan thu dik lo hrilh tur chea lo kal ka ni a, mahse nep ka intih lutuk avangin ka rawn pawh lawk ngam lo che a ni. Nang lah chuan khawvela ka thil duh loh ber mai i lo ti a, kha ta ka buaizia kha i hria em? Thih ta la chuan kan fapa kalsan hian ka rawn zui ve theih mai che ka ring, engtinnge i tel lova awm turin min ngaih theih zawk? Ka nunna i ni asin, ka engkim i nih hi Mambawih" tiin ka âwm aṭang chuan ka nam hla deuh a, ka fawp ta vawng vawng.




"Nang pawh hi ka tan chuan ka nunna i ni asin u Marem, khatiang taka i thinrim hmel kha min hmuh tawh miah suh aw? Ka hlau lutuk che, ka hlau tak zet che" ka hmui ka lak sawn rual chuan a lo ti a, chuta keimah leh keimah ka inhuat dan chu pui tak a ni.




"Ka tihpalh, ka tihpalh lutuk Mambawih. Vawi khat mah ka thinrim khum leh tawh miah lo vang che, min mamawh laia ka awm thei lo te kha ka inchhir lutuk" ka tih chuan




"Ka ngai thei lutuk che asin, he i taksa lum nuam tak hi ka thlahlel a, mahse min hlat taka i awm kha hrehawm ka tih rualin ka dem thei bawk si lo che a, engkim kha ka thiam loh a ni vek bawk si" a rawn ti ve nghal a, ka kut pahnih chuan a biang chu ka dawm ta vat.




"I thiam loh a awm lo tih hre reng rawh Mambawih, kan bul hnaia rilru chhe zet te ruahmanna ka tawng palh mai a ni. Min ngai ti raw? Keipawh hian ka ngai em em che a, mahse kha tih hun lai kha chuan rilru chapona ka ngah lutuk a tin ni!"




"Ka ngai lutuk che kha i kawrte ka kuah hial asin, i rim ringawt pawh kha ka ngai lutuk"




"Ka hmu vek che alawm Mambawih, khata ka rilru lo natzia kha sawi fiah thiam theih pawh a ni lo. Min mamawh laiin i bulah pawh ka awm duh lo lui tlat a, ka hel lui tlat che a, pasal sual tak chu ka ni chiang alawm. Thu dik i hriat hnu pawha min ṭhen lo te, min hmangaih thu i la sawi theih avangte hian ka zah lutuk che, i lakah hian te chem chemin ka inhria"




"Ni lo u Marem, khawngaihin khatiangin nangmah kha in ngai suh. Min en teh u Marem, ka lam lo hawi teh" tiin a kut chuan ka biang chu a rawn kuai kun a, mittui tling pamin ka lo en thung.




"Nangma'n min hnawt chhuaka min ṭhen te a nih ngawt loh chuan kei hian ṭhen che ka tum lo. I hria em? Ka pasal i ni a, ka mipa hmangaih hmasa ber i nih ang bawkin i ni kumkhua bawk ang" tiin min kuai kun chung leh rawn dingdihlip chung hian min lo fawp a, maimitchhinga ka fawh let rual chuan ka biangah ka mittui chu a baw nghal zawih.


--------******--------
La Like lo khan Like ila, la Comment lo khan Comment zel ang aw

[Ngaia]

Chapter 41





Kan mi zawn ber kan hmuh tawh avang chuan a ruka ka mi chhawrte chu zawng tawh lo turin ka ti a, anni pawhin min lo lawmpui khawp mai. Kan hmuh theih mai loh avang khan ka beidawng tluan lek lek tawh a, mahse Pathian chuan a hun takah min hmuh tir ta a ni.





Engtinnge Sawma chuan hremna a tawrh dawn ka hre lo va, chutiang bawkin ka nu chuan hremna a hmuh ve ngei ka ring bawk. A chhan chu pawi khawihtu ber Sawma ni mahse a ruahmantu chu ka nu a ni a, pawi khawihnaa a inrawlh ve miau avagin keini lo sawi theih a awm lo.





Kei tak phei chuan Sawma rual khan hruai ve nghal se ka lo ti a, mahse Sawma berin engmah a sawi rik loh vang leh sawi nachang kan lo hriat bik loh avangin an hruai ve nghal lo mai chauh zawk a ni.





Kar khat a ral leh meuh chuan Mambawihi paw'n rilru pangai a pu leh thei tawh a, chutiang bawkin keipawh ka pangai chho ṭan tawh viau. Amaherawhchu ka nupui laka ka inthiam lohna chu a la reh hlei thei chuang lo va, hmangaih em em mah ila a pasal ni reng tlakah ka inngai tawh lo a ni.





Mahni inthiam lohnain ka khat reng a, mahse ka nupui chu ka hlat phal tawh mawlh si lo. Mambawihi chuan a laka ka inthiam lohzia leh ka inthlahrunzia chu a lo hrethiam nghal thuai a, min hmangaih thu leh mahni inthiam loh lutukna rilru pu reng lo turin min hrilh ta chamchî.





Kei erawh chuan hma chu sawn ve deuh mah ila ka sawn em em hran lo va, a laka ka inthiam lohna te pawh chu tireh tum buai lovin a reh hûn huna reh turin ka ngai ta tawp.





Tin, ka hna chelh lai Doctor nihna chu hliha bansan ka tum nasa hle a, a chhan pawh ka chhungkua mi dang lakah ka venghim zo lo leh ang tih ka hlau a ni. Chu erawh Mambawihi chuan a lo phal lo hle thung a, Doctor nih ropuizia leh a hlutzia te chu min hrilh a, ka hmangaih em emi chuan Pathian tih lova mi tidam thei awmchhun mihring ka nihzia te min hrilh a nih chu!





A thusawi chu a dik vek a, a thusawi tawi fel tak chuan ka thinlung chhungril a fan nghal vawng vawng thei. Chutia ka nupui berin ka Doctor nihna bansan lo tura min tih tlat avang chuan ka bansan leh ta em bik lo va, mahse thla khat chhung chu chawlh ka la hmiah.





Ka chhungkaw tan chuan ka engkim leh ka nun zawng zawng chu ka hlan a, a hmaa ka tihpui ngai loh tam tak te chu tihpui ka duh tawh a ni.






Mambawihi chu rai lai a nih avangin a chet pawh ka phal lo va, a thinrim lek lek zawk ṭhin. Ni e, a tan chuan thinrim pawh a awm ve tho mai. Thla tam pawh a la rai lo va, kei lah chuan a chet vel ka phal lo bur bawk si. Insuk ngai awmte chu keima'n Washing Machine in ka su vek zel a, kei chauh ni lo Marcus-a pawh a insu ve ṭhin zawk.






Ani te reuh hi chu ka hmangaih a, ka duat a, chung chu a lo hre ve kar te pawh a ni maithei ka bulah hi chuan engpawh a ti ve thei zel mai. Amah ber ber chuan nuam a ti a, Surf phuan vel chu khawih nuam a ti thei hle. Chutah Machine chhunga inbual chu a duh leh tlat a, a nu phei chuan a lo phal lo nasa hle.





Naupang fing tih takah kei chu min han tlawn vel a, min ngaih thu sawiin ka hmuiah te chuan a lo fawp vel a, a awm dan lawmawm reuh lutuk avang chuan Machine chhungah ka bual ta tawp. Kei chang ni lo Mambawihi pawh chu a lo nui ve leh ta tawp a, tih ngaihna a hre bik lo ni tur a ni!






Vawi khat chhuna kan in awmni chuan sakawr a rawn ngen ta chiam a, ṭah te chu a la tum leh ta nghal. Khawi aṭangin nge sakawr te chu a lo hriat pawh ka hre lo, kan fapa hi zawng a nu leh pate min tihamhaih reng a nih ber hi!





Sakawr a awm mai loh avang chuan a rawn ṭap ta nge nge a, amah thlemna'n tiin sakawr lemah chuan ka ṭang ta tawp. Ka chungah chuan ka ṭhut tir a, ka beng leh ka sam buk lutuk lo chu ka vawn tir a, ka'n bawkvak kual vel mai a nih kha!





Chu ni chuan fate tan hi chuan kan thil tih duh loh leh tih ngaih loh pawh kan tih a lo ngai ṭhin tih min hriattir ta zawk. Mambawihi'n chutia ka fapa nena kan awm dan a rawn hmuh chuan a nui ta chiam a, kei chu ka nuih pawh a za em em lo. Ka fapa lah chu a chak tawh reuh si a, ka beng chu a pawt parh vek dawnin ka hre hial.





"Anu anu, apa sakawr, sakawr chuang, nuam tuk. Chuang ve lawh, anu lo chuang ve lawh" tiin ka fapa chuan Mambawihi chu a la ko leh ta nghal a, mi tute emaw an lo lut thut ang tih mawlh ka hlau.




"Aw le aw le, ka lo kal nghal Marcus" Mambawihi chuan a rawn ti ta mai, ka fapa te zikzek lah chu a lo la hlim em em zui.




"Mambawih" ka lo ti thluk deuh duai a, mahni fapa pawh tih tawh nak a laia ka nupui lehzel han phur kual vel chu ka châk lo hle a ni.




"Enge? A ho êeee, apa chungah hian kan chuang ve duh a ni mai a, ti raw Marcus?" tiin a fapa chu a be zawm daih a, kan naupang ṭawng thei em em tawha chu a lo bu ve nghauh nghauh.




"Apa sakawr, kal ang le! Tlan rawh le, tlan tawh rawh le" tiin ka chunga a lo ṭhut rualin Mambawihi chuan ka mawng chu a lo beng a, anmahni ka zawh loh vang pawh ni lovin ka nupui leh ka fapa phur kual vel chu nuam ka ti vak lo a ni.




"Tlan zel rawh" tiin ṭhingṭhi chunga ka bawkvak kual reng chu ka mawngah Mambawihi chuan a lo beng ri thak thak a, a nui uar uar bawk.





A tawpa tawpah chuan ka nui chhuak ve ta hawk a, a nu leh pate kan nuih ve vang nge ni Marcus-a pawh chu a lo nui ve leh vak vak tawh. A tira peih lo ber ber kha a rei tak hnuah chuan a nuam ti ber berah ka ṭang a, sakawr lema ṭan vel chu nuam ti tawh tak ka ni. Sitting room chin mai ni lo choka leh bedroom thleng te chuan ka kal kualpui a, ho te mah ni se kan va hlim si em.





Chutia bedroom aṭanga ka chhuahpui leh lai chuan Doctor Tetei chu kan choka bulah a lo ding ta reng mai, nui miah lo hian min lo la en zui. Kei min enna aṭang chuan a mit la sawnin ka chunga ṭhu vungte pahnih chu a en a, chutah a rawn nui chhuak ta uar uar mai.





"Engenita?" tia lo zawt vatin ka chunga mite chu ka beng mawlh mawlh a, anni lah chu chuk turin ka hrilh tih hre lo ang mai hian an la ṭhu ran zui.




"Mambawih chhukpui thuai teh, a nih loh chuan ka ding thut dawn a nia" leh hawi chung chuan ka ti a, ani erawh a lo nui char char a nih chu!





Thinrim hmel taka ka melh hnu chuan la nui char char chung hian a chhuk ve ta nge nge a, Marcus-a pawh chu a pawm thla zui ve nghal mai bawk. Ka din ngil hnu chuan Doctor Tetei lam chu ka hawi thuai a, ani erawh a chhan ber pawh ka hriat si loh hian a lo la nui dir char char.






Ka tihtur hre lo leh sawi tur hre lo lutuk chuan fridge-a tui vawt te chu ka in ta ringawt a, an nuih chhan ber lah chu ka hrethiam ve der si lo.





"Enge i lo tih dawn?" tia ka zawh pawh chuan Doctor Tetei chuan min la chhang thei chuang lo va, a nui reng ka hmuh avang chuan ka nui ve ta tawp a, chu erawh ka nuih a zat vang a ni lo.




"Eng lo a nia, paper-ah hian i hming i sign a ngai a, kan pute'n sign mai ka tum khan an phal bawk si lo va, ka lo pan ta tawp che a nih hi!" a rawn ti ve thei ta hram a, a nuih erawh a la za tih chu a lang reng.




"Khawi maw, chawlh te ka la ve em em asin le" ti deuh hmukin a paper lo lek chu ka la a, sitting room lamah chuan ka phei ta daih bawk.




"Engatinge in in dang tih pawh min hrilh ve duh miah lo, ka lo kal kual phah nasatzia chu!" ṭhutthlenga rawn ṭhut thlak pah chuan a lo ti a, a chhan erawh hrilh kher a ṭulin ka hre lo.




"Kha le, ka sign zo" tiin a lamah paper chu ka theh phei a, ani paw'n dawhkana paper chu a lo la ve nghal vat.




"Thingpui ka lum mek a nia, lo la haw suh aw" choka lam aṭangin Mambawihi chuan a rawn ti lawng lâwng a, a mi biak chu kei ni lovin ka bula mi chu a ni tih ka hrethiam nghal bawk.




"Aw le aw le, chuan heiiii......... ka sawi dawn a nia, ka thawhpui te hnenah nichin lawka i awm dan kha ka sawi châk tawh lutuk" tiin Tetei chuan min lo be chhunzawm nghal a, a thil tih tum chu ṭul ka va'n ti ber lo tak!




"A chi hauh lo vang aw, i sawi vaih chuan a ni mai, i châk lo vang" nui duh miah lo chuan ka lo ti a, ani erawh ka thinrim tak tak lo tih a hria ni chêk ang a rawn nui leh ta vak vak.





Minute 10 hnu velah Mambawihi chu thingpui leh chhangte nen a lo phei a, a hmel ka en chuan kei min en lovin ka kut lam chu a lo en daih. Chutah Tetei ka vawnna kut chu ka la thlah vat a, a mitah chuan rilru natna leh thikna ka hmu nghal zat.





Tetei nena kan lo inchhaih thinrim fiam vel lai tak a ni bawk si a, a bana ka lo vuan vel kher chu ṭul lo ka ti hnuhnawh leh ta hle. Mambawih erawh pangai takin a awm a, Tetei nen chuan titiin an nui dun hak hak bawk. Kei chuan Mambawihi chu ka lo en char char thung a, a nui te chu a lem a ni tih ka hre vek bawk.





Kan hlim leh ṭan dawn chauh a, ka ngaihtuah thui loh luatah Mambawihi chu a rilru a na leh ta. Sawi lo mahse a awm dan aṭangin ka hria a, a hmel aṭangte chuan a rilru a na tih ka hre thei vek a ni.






Tetei a haw fel hnu chuan Mambawihi chuan no vel chu a lo sil mawlh mawlh a, lungawi lo hmel min hmuh miah lo va, mahse kei chuan a lungawi lo tih chiang takin ka hre si.





A hnung lam aṭang chuan ka kuah a, a no silna kut pahnih chu ka zu hum ta hmiah bawk. A kut chu ka humna aṭanga lak chhuah tumin a tiche nghal a, mahse kei chuan ka lo hum nghet sauh.





A rawn thaw hak a, a kut pawh chu lak chhuah a tum zui duh ta bik lo. A chhip samah chuan ka fawp vang vang a, kun thla deuhin a biangah chuan ka fawp leh zeuh a, chutah a hriat tawk lek hian





"Ka tihpalh Mambawih, i rilru ka tihnat avangin, mahse nang lo chu he khawvelah hian hmeichhe hmangaih ka nei lo tih i hre dawn nia" ka ti sup a, a darah chuan ka lu chu ka nghat thla zui nghal bawk.




"Ngawi reng lo la Mambawih, hrehawm ka ti teh mai a nia aw. Kan infiam lai tak kha a lo nia, a kut kha vawn ka tum em em pawh a ni lo" tiin ka insawifiah ta zung zung a, ani erawh a rawn thaw leh hak.




"Min en teh, ka lam lo hawi teh" tiin ka lam hawi tur chuan ka kuai her a, rilru nat hmel zet hian min lo en ve ta ran.




"Ka hmangaih che, ka hmangaih lutuk che. Hmeichhe dang lakah ka phatsan dawn lo che a, ka dam chhungin nang hi ka nupui leh ka mihring hmangaih ber i ni reng ang" tiin a hmuiah chuan ka fawp a, ani pawh chuan min lo chhang let ve leh mai bawk.




"Min hmangaih tih chu ka hria alawm u Marem, mahse Doctor Tetei hian a duh che tih ka hria. Ka hmeichhiatpui a ni a, i bula a awm dan aṭang hian ka hrethiam vek. Chuvang chuan nang hian hmeichhe dang lakah min kalsan palh mai ang tih ka hlau a, kei ang bawk khan bum i ni ve ang tih ka hlau bawk" kan infawh zawh hnu chuan a rawn ti a, a ngaihtuah ang chu ka lo la ngaihtuah pha miah lo.




"Doctor Tetei chuan min duh ka van ring chiah lo ê, ani te chu ka thawhpui leh ka ṭhian mai chauh alawm a nih" ka ti zo chiah chu




"A duh che tih ka hre thei asin, nangni anga lehkha zir sang ka nih ve loh avang hian ka thusawi te hi awih a har ṭhin bik em ni u Marem? A ṭha a, ka inrawlh tawh lo vang" tiin kal sawn mai a tum a, ka lo chelh ding ta vat.




"Hei hei hei, ka ring lo che pawh a ni lo. Aw le, i thusawi hi ka awih e. Tetei chu ka lo be dawn nia, min hnaih vak tawh lo se a ṭha ang" ka ti ta ringawt a, chutah Mambawih chuan




"I ti ho thei em mai u Marem, chutianga hrilh tlawng chi pawh a ni lo. Nangmah hian i zir a ngai a, i bula a tlangnel theih lohna'n i awm a ngai. Chumi a nih avang erawh chuan thinrim khum kher lo la, Doctor Tetei paw'n a hrethiam ve vat mai ang" a rawn ti leh vat a, kei erawh ka lo nui ringawt.



"Nui ringawt suh, inbumna hmang bawka kan nupa inkar a chhiat leh chuan tun ang hian kan pangai theih ka ring tawh lo a ni u Marem" a rawn tih chuan ka nui tawp riai riai a, a thusawi chu a dikzia ka hre nghal.




"Aw le, ka hrethiam e. Eng pawh ni se ka hmangaih che tih hria la, ka thlahthlam ngai dawn lo che tih hre bawk ang che. Khawi maw awm sawn teh, i rilru ka tina leh bawk sia ka lo sil chhunzawm ang e" tiin ka pawm sawn nawlh a, no vel chu ka sil ta sawk sawk.




"Ka hmangaih che u Marem, chan che hi ka hlau em a ni. Mahni inthah ka lo tum leh ringawt te kha ka inchhir em em tawh a, ka rilru buai mangang lutuk thil tih a ni tih min hriatsak hram dawn nia" ka hnung lama aṭanga min kuah chung chuan a rawn ti a, a kut chu ka hma lamah a suih ran bawk.




"Ka sil zo ta" tiin ka inher thut a, Mambawihi chu ka pawm kang nghal nawlh.




"Ka duat ang che aw, ka hmangaih em em nu" tiin ka fawp a, kal kawng ka hriat chian em avang chuan kawng pawh en lovin ka fawp ta reng.






Bedroom kan lut chiah chu kan meng phawk dun hle a, kan room chu hnawk namen loh hian a lo hnawk a nih chu! Chutah Marcus-a chuan ka thuamhnaw zawng zawng chu chhuatah a lo pawt tla a, Hunger tliak deuh phung pawh a tam hle. Ka Tshirt chu a lo ha a, ani chuan a lian turu ngei mai.





Mambawihi chu ka la pawm kang reng a, kan fapa che vel chu ngawi rengin kan en ta tawp. Marcus-a chu inla buai zet hian a che a, ka kawr te chu a duh dûh danin a ha kual vel a, ka bag khai ṭhin chu zo leh zo lo hian a lo khai ve ngar ngar a, kan fapa te chuan ka tih dan chu a hre ve chiang alawm.





Mambawihi'n min ben zeuh zeuh avang chuan ka dah thla a, ngawi reng hian Marcus-a lam chu kan pan phei nghal.






"Anu, nu, pa kawr, apa, kawr kawr ha" a nu leh pate min hmuh rualin kan fapa chuan a rawn ti a, a la rawn nui ver ver zui.




"Marcus le! I tlei ka ti reng a ni" ti hluaiin Mambawihi chuan kawng dawm meuh hian a en ta ringawt a, ka fapa lo awm dan chuan kei chu min tihlim leh ta daih.




"Ka fapa duat te, apa kawr kha i lo ha châk vela maw!?" tiin Marcus-a chu ka pawm kang vat a, ani lah chu aw ti ni awm fahran hian a lo la bu nghauh nghauh reuh zui, lawmawm lutuk mai.






Ka fapa chu ka infiampui leh ta hrep a, Mambawihi erawh chuan a lo tih hnawk zawng zawng chu a tifel fai leh ta vek. A thinrim viau dawn a, mahse a fapa chet dan dangdai lutuk avang chuan thinrim pawh thinrim rei lovin a nui leh ta vak vak zawk.





Marcus-a pawm reng chung chuan a awmna lam ka pan a, Marcus-a nen chuan khumah ka bawh tlu rual a, Mambawihi chuan ka chet dan chu a lo hriatthiam loh hmel hle. Chutah an pahnih chuan an khabe hnuai vel chu ka'n fawh chhawk ta tak tak mai a, an hlimin an va rawn nui nasa dun tak em.





Mambawihi phei chu buaina chhum pik tak kan tawn hnua a la nuih nasat ber ṭum a ni hial maithei zawk a ni. Keipawh ka bang chuang lo, a chhaih nuitu ber ni mah ila ka nui ve nasa hle.






Zan a lo ni a, Marcus-a chu a harh leh teh ê. Zan dang ai zawngin a harh a, a nu nen chuan hlim takin an inum kawi leh zar zar tawh. Pakhat tea lah chu hlim tih hriat zet hian a tlan nui uar uar reuh a, an nufa inchhaih hlim chuan ka thinlung chhungril chu a tihlim ngawi ngawih.






Dar 8 vel bawrah ka pa chu a rawn lang hlawl a, kar kal ta chhung khan vawi khat mah ka pa chu kan inah a lo kal lo hrim hrim bawk. Marcus-a chuan a pu chu a lo pan leh nghal chat a, Mambawihi paw'n a thingpui tur a lo siam ve nghal.





"I nu chu zanin khan Police lamin an lo hruai a, Sawma khan thurualpui a neih thu a lo sawi a ni awm e" ka pa chuan thingpui in pahin a rawn ti sup a, mi pawh en lovin Marcus-a sam chu a chûl a chul bawk.




"A pawi ka ti ka pa, mahse a pawi ka tih rualin ka nu hian a phu tawk hremna chu hmu ngei se ka ti a ni. Khatiang khawpa nasa khan kan chhungkua tihchhiat tum mahse ka nu a nih tho tho avangin ka la hmangaih reng a, mahse ka nu chu ka haw em em bawk" ka lo ti ve ta nge nge a, kan bulah chuan Mambawihi chu a lo ṭhu ve ran.




"Ka duh chuan ka ṭhiante hmang pawhin ka kaltir lo thei reng a, mahse keipawh hian hmangaih em em chungin ka kaltir ta a ni. Ani tan pawh inhmuh chhuahna te a neih phah mial maithei a, mihringte hian khawdur hi kan tawn a ngai ve ṭhin bawk alawm, sawi tawh lo vang u" a rawn ti a, ka pa chu a rilru a na ve hle tih pawh ka hria.




"Ka pa, ka nu an man ve leh zel chu a pawi ka tihpui khawp mai che" Mambawihi chuan a lo ti ve thuai a, a hmela inthlahrunna ka hmuh chuan a kut chu ka humsak ta vat.




"Sawi tawh lo vang Mambawih, kan sawi hian awmzia a neih thui loh avangin kha lam kha chu min sawipui tawh suh u. Chuan lo chhuk leh tawh rawh u, keimah chauhin ka awm leh nghal" hlim luih hram hram tumin ka pa chuan a rawn ti leh a, ka khawngaih ve tak zet a ni.




"Ka pa ka rilru chu i hriat khâ, kan lo chhuk thei mai mai tawh hleinem, heti lamah min lo awm chilh zawk mai rawh" ka ti zo chiah chu ka pa chuan thinrim deuh ṭung hian




"I va mak tak! Nupui fanau i neih tawh avang hian min hnîal min hnial ṭhin lo teh Marem, ka fapa i la ni tho tho. A hrim hrimin ka ngai tawh che u alawm, fapa thil chi hrang hrang titipui turte ka duh leh a, mo fel tak hmel nui sânga thingpui min petu tur te ka duh leh a, chu bakah tupa infiampui tur te pawh ka duh bawk. Min hrethiam ve ta che, ka khua a har teh mai a nia, awmpui kan nei tawh bawk si lo" a rawn ti a, a thusawi laia aṭang lutuk chu a nuihzat thlak zawk.




"Ka pa le!" tiin ka ṭhutna aṭang chuan nui vur vur hian ka tho a, amah chu va kuah thuakin a luah chuan ka fawp pah zeuh bawk.




"Kan lo haw ang ka pa, i bulah kan lo chhuk dawn nia, zaninah kan lo chhuk nghal ang. Ka lo ngaihtuah tawh miah lo che a, ka thiam loh a ni e" tiin ka nui chhuak hawk a, ani pawh a rawn hlim hmel ta hle.




"Marcus, apu bulah awm tawh ang aw" tia kan bul lawka ka fapa awm chu ka zu bia a, chutah Marcus-a te reuh chuan




"Yesss!" a rawn ti vak a, a ṭawngkam lo chhah chhuah ber kher chuan keini puitling ho chu min barakhaih chiang hle.




"Ka tupa, khang ṭawngkam te kha khawi aṭanga i lo hriat nge ni reng reng? In zirtir em ni?" ka pa chuan a pawm chho nghal a, Mambawhi nen chuan inenin kan lo nui tawp.






Ka pate in lama chhuk tur chuan kan insiam malh malh a, ka pa chu Marcus-a nen an lo inchhaih leh char char tawh. Ka pa chuan Marcus-a chu a phur thla a, keiin Mambawihi ka phur bawk.




A zana zanin Kulikawn lamah chuan kan inkhalh thla ta chu a ni a, an phur hlawm em avang chuan ka phurin ka hlim ve ta vek. Kan tlan thlak lai te chuan Mambawhi kut chu ka hum vang vang a, ani chu ka nupui a ni lo vang tih ka hlau tawlh tawlh.





Ani ang mo ṭha lutuk, nupui ṭha lutuk leh fate tana nu ṭha lutuk chu ka phu miah lo va, ama'n phu lova min ngaih letin kei hian amah chu ka phu lo zawk a ni.





"Hetiang hian kan awm leh thei ang tih pawh ka ngaihtuah pha lo" Mambawihi chuan a rawn ti sep a, kan nupa khumah chuan inkuah rialin kan mu dun leh reng tawh.




"Ni e, a mak khawp mai. Ka huata ka thin i tihrim em em lai pawh khan ka hmangaih tlat che a, vin tak taka ka biak che avanga i ṭap hmel ka hmuh te khan ka na ru tlat zel asin Mambawih"




"Keimah khan ka lo zir lo ve em bawk alawm, mahse Sawmtea kha khatiang mi a nih ka lo beisei lo hrim hrim. Ka bula a lo mu ringawt ka hmuh khan mak ka ti a, ruak vekin ka mu tih ka hriat hnu phei kha chuan ka hlauthawng em em tawh a ni"




"A pawi ber chu maw ka lo in dang pui vat lo che u kha a ni. Lo in dang pui hman che u ila chuan buaina kan tawk lo vang a, tawk ta pawh ni ila tun ang em em hian kan buai ka ring lo. Buaina kan tawh chhan ber hi ka ngaihtuah tawk loh vang che a ni a, tun aṭang chuan engkimah nang hi ka ngaipawimawh hmasa ber tawh ang che"




"A chi nâng u Marem, Pathian alawm ngaihpawimawh hmasak ber tur" nui hek hek chung hian a rawn ti a, chutah kei chuan




"Pathian te chu sawi lova lûm a ni a, amah paw'n ka rilru a hre vek alawm. Inchhir lehna tur engmah tih leh ka duh tawh lo tih pawh ka hrilh vek tawh asin, chuvang chuan i lakah hian ka fel tawh ngawt ang. Chuan kan fapa leh kan fa lo piang tur tan pawh ka fel ang a, pa ṭha tak nih ka tum bawk ang" ka lo ti ve leh nghal a, a pum chu ka dawm ran bawk.




"Pa ṭha tak, nupui leh fate hmangaih thei tak i ni alawm u Marem. Ti daih ila kan ṭawngkam hrethiam chak em ema chu kan tel lovin a mu theih ang em âw?" ṭhen sak hian a rawn ti a, keipawh ka lo nui chhuak ve leh ta hawk.




"An inthlem nasat teh khâ, ka pa lah khan riahpui a châk nasa mai si. A mut theih loh leh keima'n ka zu buaipui mai dawn alawm, nang chu rai lai te i ni bawk sia ka duat em em phawt mai ang che" tiin a chalah chuan ka fawp vang vang a, ani pawh chuan eng dang sawi lovin min lo kuah nghal chiai.






Ka bula mi chu rei lovah a thaw ri ta sek sek a, kei erawh rilru chhungril hlim lutuk avangin ka la meng kar thung. Dar 1 lai a ri tawh a, thawm pawh an rawn neih miah loh avang chuan Marcus-a chu a mu thei turah ka ngai ve ta hmiah. Mambawihi chu a chala fawp leh vang vangin ka kuah ṭha sauh suah a, tui taka mut tumin ka mit chu ka chhing zui ve ta vang vang.

[Ngaia]

Chapter 42





Tunah chuan kan in danna in ni lo kan in pangai zawka kan awmna chin pawh thla 6 lai a lo ni leh ta reng mai, hunte chuan ni duhawm leh hlimna hlir kan chhungkuaah a rawn her chhuahpui a, Mambawihi pawh a pum a puar lian leh tawh khawp.





Marcus-a a pai lai ang lo takin huat a ngah em em a, kan naute chu kei chuan hmeichhia a nih ka ring ta tlat a nih chu! Ka pa ve thung chuan mipa bawk a nih leh a ring a, Mambawihi chuan mipa nge hmeichhia a nih ang a hrethiam mai lo.





Kan fapa Marcus-a ber mai chuan nau neih chu a châk tawh a, a nau tur chu a lo chhuah hma hauh aṭangin a duat ve hle.






Ka nu erawh a thil tihsual avangin thla 7 chhung zel a tang a, chutiang bawkin Sawma pawh kum 3 chhung Jail tang tura a chung thu relsak a ni bawk. District Jail-ah ka nu chu a awm a, Sawma erawh Central Jail lamah a sawnin ka hria.






Tlawh theih hun apiangin ka pa chuan ka nu chu a tlawh ṭhin a, ka pa ber chu ka khawngaih ta a ni. Keini chuan ka nu chu tlawh kan duh ve tak zet, mahse ka pa ka aṭangin amah zawkin min hmu duh tlat lo.





A hun lai kha chuan ka nu kha ka haw em em a, mahse tunah erawh chuan ka ngaidamin ka haw lo leh vek tawh zawk a ni.






Chutiang bawkin Mambawihi chuan ka nu chu a khawngaih a, a ngaihdam vek tawh thu ka pa chu a chah lawm lâwm ṭhin. Ka nu ber a awm tâk lovah chuan a dawr pawh khar fel vek a ni tawh a, mi dang hnenah kan hralh a ni mah zawk. Chu pawh ka nu remtihna vek a ni a, keini chuan a lo chhuah huna a enkawl leh theihin awm se kan la ti hle.





Amaherawhchu ka pa sawi dan chuan ka nu chuan buaina chhuah ṭanna ber chu a dawr a nih thu a sawi a, kei leh Mambawihi chuan dawr daih daih a mawhpuh chu kan hrethiam lovin mak kan ti dun hle thung.






Tin, Mambawihi sawi ang tak takin Doctor Tetei chu ka chik lehzual a, a awm dan aṭang chuan kei chu min ngaizawng ru tih ka hre ve ta.
Hospital-a thawk dun kan ni bawk sia min ngaizawng tawh lo tura han hrilh tawp chu a mawi chiah si lo, tih ngaihna kha ka va han baihvai hman tak.




A tawpa tawpah chuan Lunch eipui atan ka sawm hrang a, chutah chuan a hriatthiam theih ang ber turin ka hrilh tlang ta tawp.
Ka fiamthu emaw tiin a rawn nui chhuak vak vak a, mahse ka fiamthu lo tih a hriat chinah chuan a zah hmel ta hle. A kun ngul a, a awm dan chu ka khawngaih reuh tak tak a ni.





Doctor Tetei chuan zep awm miah lo hian min duh thu leh min ngaihzawn ruk thu chu a rawn sawi ta nge nge a, Mambawihi nena kan nupa inkar chhe khawpa thil a la thlen loh avang chuan ka demin ka haw hran chuang lo.





Min ngaihzawn chu pangai tak leh zahawm takin bansan turin ka ti ta a, ani pawh chuan a lo pawm thiam khawp. Kan inbiak aṭanga kar khat a ral leh meuh chuan bialpa a neih thu chu ṭhian ṭha kan nihna ang zawngin min hrilh a, mak pawh ka ti hran lo.





Ani ang nula fing leh nunze mawi, nupui atan pawha iai awm loh chu kei tih loh tu mipa ma'n an hnar phal ka ring lo. Kei erawh chuan ka hnar phal a, ani aia hmelṭha leh ka hmangaih em em Mambawihi chu ka nei tawh thung si.





Hun a kal leh deuh hnu chuan Jail aṭanga ka nu rawn chhuah hun pawh kan thleng leh reng tawh mai. Ka pa chuan amah tih loh lo hmuaktu a duh lo thu a sawi a, mahse ka pa nena kan remruatna hmangin keini chhungkua chuan hmuah kan tum lui ta tho.





Kan kal hma aṭang tawh Mambawihi chuan Marcus-a chu ka nu thlalak a hmuh chhen a, kan fapa chuan a pi chu a theihnghilh ang tih a hlau ni berin ka hria. Marcus-a lah chuan a lo la hre em em leh nghal a, a pi thlalak keng chuan a pu bulah a tal reng zel.





Ka nupui thil tih chu a chhuanawm tak zet ka ti a, chutiang chuan mo dangte hian an pasal nute lakah an ti ṭhin em tih erawh ka hre chuang lo.





Armed veng lamah ka nu hmuak tur chuan kan inkhalh thla a, ka pa pawh motor keng kher lovin ka motor chuan a chuang ve a, a tupa nen an inbe leh char char tawh. Kei leh Mambawihi chu a hma lamah kan chuang a, ka pa leh Marcus-a erawh a hnungah an chuang dun thung.





Chutia kan inkhalh thlak lai chuan ka fapa chuan a pu bulah sakawra ka ṭan vel thu chu fiah lutuk lo leh kimchang lutuk lovin a sawi leh ta reuh a, ka pa pawh a rawn nui chhuak ve ta hawk hawk. Kei leh Mambawih pawh kan lo nui ve nasa a, mahse kei erawh ka nuih chhan a dang daih thung.





Ka pa chuan min han nuih ve vel tak na a, Marcus-a chuan sakawrah a ṭan tir ve dawn tih ka hre chiang ropui mai si. Chu tak chu ka nuih chhan ber a ni a, ka pa peih lo hmel vel tur chu ka nuih a lo za lawk a ni ber.





"Lo kal rawh u le, kal ang u" tiin ka pa chuan keini chu min lo hui a, ka nu erawh Jail chhung lam aṭangin a lo chhuak vel mek a ni ang a hmel hmuh tur a la awm rih lo.




"Api hmu ang aw, api i hmuh veleh khan api api i ti vak vak dawn nia aw" tiin ka fapa chu ka pawm kang a, ka kut leh lamin Mambawihi kut chu ka chelh pah reng bawk.





Minute 15 hnu velah ka nu chu a rawn chhuak ta. Ka pa chuan a lo kuah thlawp a, chutah chiah chuan ka pa'n ka nu a lo ngaih tawhzia chu ka hre ve chiah. Ka pa chan ang chu kei hian chang ve ta ila, ka nupui Mambawihi chu thla 7 chhung Jail tang ve ta se la, ka pa ang chuan ka pachan rei theih ka ring lo, ka inring mawlh lo.




A âwmah nghet takin ka nu chu a kuah bet ran a, ka nu pawh a rawn ṭap ri hawm hawm. Ka pa chuan ka nu chu a âwm aṭangin a nam hla deuh a, a mittui te chu a kutin a hruk hul sak thuai thuai bawk. Ka pa chuan a dinna a sawn a, chutah ka nu chuan keini pathum chu min lo hmu ta.





Rang tak hian ka nu chu a lehhawi vat a, ka pa chuan a lo buaipui thuai bawk. Kan lam hawi zawngin ka pa chuan ka nu chu a kuah a, ka nu chuan keini chu min la en duh chuang lo. Ni lo, ka nu chuan min en duh lo ni lovin min en ngam lo zawk a ni.





Chutah Marcus-a chuan a rawn ko ta chiam a, chu chuan ka nu chu a rawn ṭah chhuah tir leh ta hawk. Ka pa chuan ka pawmna aṭangin Marcus-a chu a rawn la a, ka nu lamah chuan a pheipui leh nghal. Ka pa chuan ka nu chu hlim hmel tak hian a be reng a, ka nu erawh hlim hmel reng a la phu thei meuh lo a ni.





Ka nu chuan Marcus-a chu a pawm ve ta nge nge a, Marcus-a lah kum 3 lai a lo tling ve tawh bawk nen a pi awm dan chu mak a ti em em a, a dil chhut hle bawk. Marcus-a chu ka lo khap vat a, ka hmuia ka kutzungchal dah a hmuh chuan engmah a zawt zawm em ta bik lo.





Keini chuan in lamah law law biak kan tum leh ta zawk a, tuna rih chuan biak ve ngawt pawh tum ila ka nu chuan min chhan duh ka ring lo. Ka nu chu kei leh Mambawihi lakah a inthlahrung em em tih a hmel aṭang a hriat reng a, chu chu kei chuan hrehawm ka lo ti hle. Kei chauh ni lo Mambawihi pawh ka nu awm dan avang chuan hrehawm a lo ti a, ka nu chu a khawngaih thlak tak zet a ni.





In lama kan inkhalh haw laite chuan ka nu chu a la ṭawng lo hrim hrim a, Marcus-a chu a pi leh a pute'n an karcheh ran bawk. Ka nu chu darthlalang aṭang chuan ka en zeuh zeuh ṭhin a, ka en apiangin pawn lam chu a lo melh vawng vawng zel. Kan in chhunga kan luh chuan ka nu chu an room lamah a lut daih a, ka pa chuan a zui lut ve nghal.





Marcus-a erawh Mambawihi'n a pawm muhil leh tawh rih a, keini pawh ka pate room-ah chuan kan lut zui ve nghal. Ka nu chu ka pa'n a lo ṭhutpui ran a, ka pa chuan be reng mahse ka nu chu a la rawn ṭawng chhuak lo hrim hrim. Ka nu chuan keini min lo hmuh chuan a thaw hawk a, a ṭah a chhuah hmel tak zet.





"Marem, Mambawih, khawngaihin min ngaidam hram teh u" ka nu chuan mittui tling pam hian a rawn ti a, ka chhan hmain Mambawihi zawk chuan




"Kan ngaidam vek tawh che alawm ka nu, hrehawm i tih ang chiah khan i lungngai reng hmel kha hmuh hrehawm kan ti a nia" a lo ti thuai a, chhan tuma ka ang zuai pawh chu ka chip leh ta hmak.




"Kei zawng in bula awm reng tlak pawh hi niin ka inhre lo, ka rilru kha a lo sual em a ni. Ka moin ka dawr aṭanga pawisa a la lut zung zungte kha ka thik a, kei aia sumdawn a thiam aṭang khan ka mo chu ka hmu mawh ṭan ta a ni. Tlanzoi pawh kha ka ban a, chu pawh ka mo laka tihtur tam tak pek ka duh avangin. Chutah ka fapa kha min laksak ang tlatin ka hre leh a, a hma zawnga ka duh dûha ka tihkawi theih ṭhin kha a theih tawh loh avangin ka mo lakah te khan sual ka chhuah ta a ni" ka nu chuan a rawn ti a, keini chu mi pawh a en ngam leh tawh lo.




"Tunah erawh thil hi ka hrethiam ve tawh a, ka fapa chuan chhungkaw thar a din tawh avangin keini a nu leh pate aiin a nupui fanau te chu a hmangaih zawk tur a ni tih ka hrethiam ve tawh a ni" ka nu bawk chuan a rawn ti leh a, ka pa chuan a dar ngheng turin a lo kuah ta vat.




"Ka nu chhungkaw thar pawh din tawh mah ila nangni min hringtute hi chu ka thlahthlam dawn hleinem che û, ka nu leh pa in nih avang hian ka hmangaih em em zawk che u asin. Amaherawhchu ka nupui leh ka fate ka hmangaih dan leh nangni ka hmangaih dan che u chu a inang thei lo va, tehkhin chi pawh a ni lo. I thil tih avang khan lungngai lutuk tawh lo la, inngei tlang takin awm ho leh tawh zawk ang u" ka ti ve dap a, ka bula ding Mambawihi pawh a mittui a lo tling pam mai.




"Ni e nui, Marema sawi kha a dik chiah a ni. Tunah chuan chhungkaw hlim tak i ni leh tawh zawk ang u. Anni paw'n an ngaihdam thu che an sawi tawh a, chuvang chuan nang paw'n inchhir reng lova hma lam i pan a ngai ve tawh a nia" tiin ka pa chu a lo ṭawng chhunzawm a, ka nu erawh a la pangai thei meuh lo.






Chu ni, Jail aṭanga a lo chhuahni vek aṭang chuan ka nu chu a danglam em em a, Mambawihi phei chu chet a phal lo hrim hrim. Ka nu chu kan lakah a la inthlahrung lutuk ni berin ka hria a, awmpui ang maiin in chhungkhur engkim chu a khawih vek ṭhin.





Ka pa chuan chutiang taka a che ta bawrh bawrh chu a ngai thiam thei ngâng lo va, awmpui lak leh a tiltu ta tawp a ni. Awmpui kan nei leh ta chu a pawi ka ti lo khawp a, ka nu tan a hahdam thlak mai bakah Mambawhi tan pawh a hahdam thlak a ni.





Ka nu chuan dawr a neih tawh loh avangin in lam chu a enkawl tawp a, ka pa pawh a MLA nihna chu bansanin in lamah a awm ve ta hle hle.





Ka pa hi kum upa tak a la ni lo va, la pavalai tak a ni zawk. A nihna kalsana MLA aṭanga a ban chhan ber pawh ka nu chuan Mambawihi thil lo tih tawh ang chu a ti ve mai ang tih a hlau a, chu thu min hrilh tlai chuan ka pa'n ka nu a lo hmangaihzia chu ka hre chiang lehzual a ni.





Engkim ka kuta a awm tawh thute min hrilh a, anni chu ka chawmhlawm mai mai an nih tawh thute a sawi a, mahse chawmhlawm a tih lai tak chu ka helh ta tlat. Ka pian tirh ata ka puitlin thlenga min chawm sei liantute chu chawmhlawm an nih lohzia leh anni chawm let chu ka dam chhung hna a nih thu ka sawi ve ta nge nge a, chuta ka pa mitmenga min hmangaihna leh min rinna ka hmuh chuan ka rilru chhungril chu a hlim nghal veng veng thei a ni.





Hun a kal leh fê hnu chuan ka pa pawh dawr siamsak ka tum thu ka hrilh a, a chhan pawh ka nu nena khawhar taka an awm chu hmuh hrehawm ka tih vang a ni. Chaltlanga kan in chu dawr atan ka thlak ta zawk a, chu chu ka nu leh pate enkawl atan ka buatsaih tawp a ni. Chu ka thil tih tum chu ka duh thu maia tum satliah ka ni lo va, Mambawihi min remtihpuina tel veka ka tih a ni zawk.





Ka tum dan vel ka hrilh tirh chuan Mambawihi chu a lo phur em em a, kei ang bawka ka nu leh pate hmangaiha ngaihtuahtu nupui ka nei chu ka lawm a, amah ka hmangaih nasat zual phah sawt bawk. Mambawihi ang hmeichhe tuarchhel leh rilru ṭha nupuia ka nei chu vannei ka inti a, ani chu khawvela ka neih rohlu ber a ni.





"Vawiin chawhnu kha kan inkhawm a ngaih kha aw, kan tlai hlauh ang e" insiam malh malh pahin ka nupui chuan a rawn ti a, kei chuan ngawi reng hian a hnung lam aṭangin ka lo kuah thung.




"Va insiam ve tawh la u Marem, kan ṭhutna lai tur kha a zahthlak thei si. Rosy-i phei hi chu Marcus-a ang a ni miah lo leh nghal, a ṭah vaih chuan i lo pawm vat dawn nia" ka nupui chuan a rawn ti nang nâng a, kan fanu ROSY VANLALLAWMI khuma lo tal ṭaih ṭaih reuh chu ka en zui nghal.





Ka nu Jail aṭanga a lo chhuah aṭanga thla 2 hnu velah Mambawihi chuan fa duhawm tak a hring leh a, ka rin ang ngeiin kan fa chu hmeichhia a lo ni. A hming kan phuah dawn chuan ka nu chu a intithu em em a, ka pa chuan fiamthu hian a lo chhaih buai ve char char.





Ka nu lah ka pa chhaih fiamna avang chuan a titau titih dawn ṭhin a, kan va han hlim tlang tak em. Doctor Tetei bawkin Mambawihi naute chu min chharsak leh a, keimah min duh tlat lo ṭhin chu hrethiam lo viau mah ila pawi pawh ka ti hran tawh lo. Tin, a nau neih hmasak zawk ang lo takin a ṭe ring lo hle a, mi pawh a vin tawh em lo e!






"Mawh u Marem, min kuah reng lo hian va insiam ve vat teh" Mambawihi chuan a rawn ti thluk awn duai a, keipawh ka ngaihtuahna aṭanga harh chhuakin ka kal sawn ve mai bawk.




Kan insiam zawh chuan biak in lamah kan inzui dual a, ka nu leh pate'n Marcus-a an kalpui a, keini'n kan fanu Rosy-i chu kan kalpui thung. Kan fanu chu ka pawm a, baptisma chang rual a lo ni ve leh reng tawh chu Pathian malsawmna kan dawn vang liau liau a ni.





Biak in chhunga kan luh chuan ka nu chu hmeichhe lênah a ṭhu a, ka pa chuan Marcus-a chu pavalai lênah a ṭhutpui bawk. Keini erawh mi dangte ang thovin baptisma chang turte ṭhutna hmun bikah chuan kan ṭhu a, kan fanu te pawh a nuin a pawm ran.





Hlauhthawn ruk ang ngeiin basptisma an chantir laiin Rosy-i chu a rawn ṭap a, Mambawihi chuan thlem ṭhin mahse a ṭap bang duh der lo.





Mambawihi chuan a nghawng aṭanga kei min hmuh thei turin a rawn pawm kang a, an hnunga ding kei Rosy-i'n min hmuh chuan a rawn la ṭap uar sauh zui.





Mawi leh mawi lo pawh dawn lovin ka'n lo ṭhen khum vel a, ka fanu ṭah belh em emi ṭah tir tawh loh tum chuan ka hmel ka tidanglam vel ta ringawt.





Chutiang ka hmel ka tih danglam hnu chuan a hma zawnga ṭap kha a rawn nui leh a, a nui lah chu a zawi der si lo. A nu leh pa chuan tih ngaihna mai kan hre tawh lo va, a zahthlak piah lamah a nuihzat thlak ka ti hle.





Chutah le Marcus-a chu a rawn che bawn ve leh ta. Kristian Hlabu ami 'Min ngaidam rawh LALPA, min ngaidam rawh' tih hla kan sak lai chuan ka nu chu lamtualah a rawn lam a, chu chu lo hmuin Marcus-a chuan a pu chu lampuiah a sawm ve leh ta tlat mai.





Ka pa meng mangang buai vel chu ka lo hmu ru reng a, pakhat lah chuan lampui turin a pawt ṭawng ṭawng tawh bawk si. Ka pa chuan min lo en thuaiin a hmui phun hian Marcus-a chu va laksak tur chuan min lo ti a, mahse kei chuan nuih sukin ka hawi sawn ta daih.





A tawpa tawpah chuan a fapa meuh pawhin a lam lai ka la hmuh ngai loh ka pa chu a rawn lam ve ta, lam pawh ni lovin kal mai mai zawk a ang. Zah hmel zet hian a kal kual ve a, a tupa lah chuan nuam a ti ropui mai bawk si.





"Lal Marcus le! Ka inkhawmpui tawh ma lek ang che" kan in kan thleng fel chiah tihah ka pa chuan a rawn ti bui bûi a, puitling ho chu kan lo nui ṭhaw hlawm mai.




"Paa, a ho êm mai. Lamte chu a zahthlak na a awm hleinem" ka nu chuan nui ver ver hian a lo ti ve vat a, mahse ka pa mawlh chu a la lungawi thei chuang lo.




"Apu engatinge lamte chu i zah? Pathian ringtute chu an lam ṭhin alawm, Pathian i ring lo em ni?" Marcus-a chuan a rawn ti leh ta kauh a, ka nu leh Mambawihi chu nui ri ngam si lo hian an lo nui dir char char a, keipawh ka ṭhen ve ṭhaw mai.




"Ṭawng lah chu i ṭawg thei phian zek tawh leh nghal, khang thute kha khawi aṭanga i hriat nge? Lam kha ka zak ka ti reng reng lo, lam kha ka peih lo mai a ni" ka pa chuan a rawn ti a, chutah Marcus-a te chuan




"Biak ina kan teacher te'n min hrilh vek, kan teacher te chuan Pathian zahpui loh tur an ti" a rawn ti leh ta kauh mai, ka pa pawh a dang chiang hle.




"Marcus lo kal rawh, api nen thingpui siam daih ang. Apu chu sawi tur a hre tawh lo em mai, a ṭawng thei tawh lo a ni ang" tiin ka nu chuan Marcus-a chu a lo kai sawn a, an kal liam tawh mai dawn emaw tihah Marcus-a bawk chuan




"Dik chiah" a rawn ti leh hram a, ka pa tih ngaihna hre lo chu a rawn nui chhuak ta hawk hawk.





Zan lamah chuan kan fanu chu a laiah kan mut tir a, Marcus-a erawh a pi leh pute inkarah a mu leh thân tawh. Mambawihi nen chuan kan nun hluite kan sawi a, kan nuih dun hak hak chang pawh a tam hle.





Chhun lama kan boruak vel chu ka ngaihtuah let a, hlimna tur a va'n tam si em. Mambawihi chuan chawlh lawk a duh avangin fa neih leh lam pawh kan ngaihtuah ta lo va, a tana a hahthlak zia chu ka hriatthiampui khawp mai.





Marcus-a chuan a nau chu a duat thiam reuh em em a, Rosy-i lah chuan a u chu a lo hre ve em em bawk. An inchhaih nui ve uar uar ve thei reuh a, ka fate hlim tak an awm ka hmuh hi chuan ka hlim veng veng zel.




Rosy-i chuan a u tih dan chu a ti ve zel a, Hospital aṭanga ka haw te hian kei min kuah hmasatu nih inchuh ni awm tak hian an lo tlan ṭhin a, Rosy-i erawh a la kal ve theih loh avangin min kuah châkin a lo bawkvak phei ve tlauh tlauh zel.




Ani hi chu hmeichhia tih takah a nu a chhun em em a, a nu nena an inan lohna chu tlem tê a ni. Ka fate pahnih chu a tua te mah ka hmangaih lo zawk lo va, ka hmangaih dan a inang ve ve a ni.





Amaherawhchu mipa zawk na nâ na chu ka ngaina a, Marcus-a paw'n min lo thlakhleh ve tho ṭhin avangin kan inawmpui tam deuh a ni. Chumi a nih avang chuan ka fanu chu ka duat loh phah lo va, ka hmangaihin ka ngaihven em em tho.





Kumte a vei leh meuh chuan Marcus-a paw'n kum 6 a rawn tling chho ta vat a, school kal tur paw'n kan admit fel nghal bawk. Chutiang zelin kan fanu Rosy-i pawh chuan kum 3 hmel a rawn hmu ve ta, kan fanu hi zawng a u ai daihin a ṭawng thei dawn tih ka hre nghal.





A kum phû lovin thil a lam fiah a, Marcus-a pawh tih tawh nak a laiin Rosy-i zet chu a pui khawp mai. A pi thil a zawt peih si, a nu phei chuan a ning lek lek zel zawk. Kei erawh hmeichhia a nih vang nge ni Marcus-a ang em em chuan min pan tam lo va, kei aiin a nu bulah chuan a awm hnem zawk a ni.





Chumi a nih avang chuan ka duat loh phah lo va, ani paw'n min ngaina lo tihna pawh a ni chuang lo, kan inawm tam lo deuh tihna mai chauh a ni.





"Apa, vawiin chu school ka kal peih lo êeee" a nuin school kal tura a siam mawlh mawlh laiin Marcus-a chuan a rawn ti nang nâng a, kei erawh ka lo nui suk thung.




"Engatinge school chu i kal peih lo? School-ah te chu kal tur alawm, lehkhate ṭha deuhin in zir ang a, a nuam ngawt lo em ni?" khuma ṭhu awn duai chung chuan ka lo ti ve a, Hospital lama kal turin insiam pawh ka la insiam lo.




"Ka ngai ṭhin che alawm apa, school-ah chuan i hmel ka hmu thei tawh ngai bawk si lo, a nuam pawh ka ti lo" ka fapa chuan a rawn ti reuh a, a thusawi chuan min tihlim nghal veng veng.




"Lo kal teh" ka ti zeuh chuan a nu buaipuina aṭang chuan a talpit a, ka awmna lamah chuan a rawn tlan phei nghal vat.




"Keipawh hian ka ngai lutuk che alawm" tiin ka hmui chu ka lo dawh a, ani pawh chuan lo fawp zeuhin ka lo kuah ta hle hle.





Mambawihi pawh hian tihpui tawh lo turin min hrilh nasa ṭhin a, a chhan pawh khawlai vela a ṭhiante'n an chhaih a hlauh vang a ni. Marcus-a chu kum 6 lai lo ni ve leh reng tawh mahse chutianga inhmangaih taka infawh chu kan la sim hlei thei der lo.




A nuam a la ti reng a, kei lah chuan ka lo phur em em zel mai bawk si. Kan fanu ṭawng ve thei em em tawh Rosy-i pawh chuan chutia a u nena kan awm dan a hmuh chuan min lo bawh vat a, chutah fiah deuh tak hian





"Apa, duh ve" a rawn ti ve nghal vat a, a mutna aṭanga lo thovin ka hmuiah chuan a lo fawp ve leh nghal.





A nu berin lehkha zir a ngaihpawimawh em avang chuan Marcus-a chu a zirlaibu te nen lam ka office-ah ka hruai ta ringawt a, a phur pawh a phur khawp mai. Mambawihi chuan school kal loh mai mai chu ṭha a ti lo hle a, mahse keimah zawkin pawi ka tih loh avangin Marcus-a chu a chawl ta tawp a ni.





Ka fapa chuan min ngai a nih phawt chuan ka bulah awm se la, mahse school kal loh tir zen zen chu ka tum hran chuang lo, a vawi khatnate a nia tiin ka phal mai zawk a ni.