HENRY LALSANGZUALA By Havali Adam (Completed)

[Ngaia]

Chapter 25




Phone chu a awmna ngaiah ka dah let leh thuai a, ka chet dan chu a hawihhawm loh thlak ka ti ru ngei mai. Ka awm dan chu a dik lo nghal vek a, ka kut pawh langsar si lovin ka hum ruh ngar ngar hle.



Ka dinner kilpui pa phone-a Hlutei thlalak a awm daih chu mak ka la ti tawp thei lo va, zawh chian chu a ṭha ang em ka hre lo a ni.




Zawt chiang ringawt dawn ila Hlutei tan kei chu engmah ka ni tawh lo va, ka tan pawh ka hnena lo let leh tura beisei leh ngam chi a ni tawh lo.




Minute 3 hnu velah ka dinner kilpui pa Malsawmtluanga chu a rawn let ve leh mai a, rei pawh ṭhu tawh lovin haw tum chuan min thawhsan nghal bawk.




"Malsawm" thui pawh a kal hma chuan ka ti deuh tlawng a, ka kohna avang chuan ani pawh chu a rawn hawi let rang hle. Engmah ka sawi chhunzawm leh tawh loh avang chuan zawimuang hian a rawn phei leh a, min en chik hle bawk.




"Nupui nei tawh i ni mial em?" ka ṭhutna aṭanga tho chhuak chung chuan ka ti leh tawp a, han sawi kawi vel dan vak ka thiam lo, zawh tlang nghal tawp chu ka duh mah mah zawk.




"Nupui maw!? Nupui chu la nei chiah lo ve, engatinge pu Henry? Ka hmel hi a patling viau tawh em ni? Kan inuluk ve tehlûl nen ka hmel a lo upa nghal viau a ni mâw?" nui hak hak chung chuan a rawn ti zung zung a, keipawh chu ka nui ve ta ringawt.




"Chutiang lam chu ka sawi tum pawh a ni chiah lo, thil dang daih a nia zawh che ka tum zawk chu!" tiin ka ṭhutna ngaiah chuan ka ṭhu thla a, titi pui ka duh a ni tih hrethiam takin ani pawh chu a rawn ṭhu thla ve nghal.




"Eng thil nge min zawh duh chu ni a pu Henry? I hmel aṭang lah chuan i thu tak hmel viau leh nghal a, thil pawimawh tak a nih ka ring thiam mai e" a rawn tih chuan ka thaw hawk a, ka awm a nuam thei ngâng dawn lova ka hriat avangin zawh tawp chu a ṭha berin ka hre tawh.




"Eng lo a nia, bialnu i nei em?" ka ti leh tê tê a, ka awm dan leh ka ṭawngkam hman dan vel chu a hriatthiam loh telh telh hmel hle a, awm lo pawh ka ti hran lo.




"Aw bialnu te chu nei e, mahse tunah chuan London lamah zirna avangin a awm bo rih a, eng vanga chung thil te chu min zawt daih nge i nih pu Henry?"




"A ngai leh lo, ka zawt mai mai che maw le, lo leng lut ziah la a ṭha ang" ka ti ta daih a, a hmel aṭang chuan ka sawi tum tak ka sawi lo tih a hriatthiam hmel em em leh nghal. Ka sawi thei lo, Hultei chanchin hre tur chuan dikna ka nei lo a ni.



"Enge i sawi awmzia? Engatinge lo leng lut tur ang zawnga min sawm pu Henry? Hotel hi i ta a ni em ni?" tiin ani pawh chuan thu dang chu min zawh zawm ta daih a, a bialnu lam pang zawhna min zawt lo chu ka lawm ru hle.




"Aw ni e, Hotel hi ka ta a ni e" ka tih chuan a lo bu nghauh nghauh a, a awm dan vel chu a hna thawh nen pawh a inawm viau e.




"Aw le, nia lo len luh chu ka tum ṭhin dawn nia, mahse ka buai ve thei lutuk a, he lamah i awm reng tawh dawn em ni?" a rawn ti ve leh ta kauh a, a ṭawngkam leh awm dan vel aṭang chuan min zah hle tih ka hre thei.




"Awm reng dawn lo ve, kar leh velah khi chuan Mizoramah kan haw chhoh a ngai leh tawh zawk ang, Junior-a te'n class an ṭan leh tawh dawn a"




"Ni dawn tak! I fapa i lo hruai ve tak ang chû, i fapa hmel pawh a takah ka la hmu hleinem, mahse nakinah inhmuh hun chu a awm ve mai ang. A thu hrimin Mizoram lam chu School hawn leh hawn lovah in la buai viau a ni lo'm ni? Engtia class ṭan nge i sawi ber?"




"Ni e, keini lam khi chu kan la buai khawp mai. Sawrkar School ṭhenkhat chu hawn theih a ni zuai zuai a, mahse hri a darh leh vak ṭhin avang hian khar a ni leh vat zel tho"




"A dik ang, Mizoram lam chu a la harsa ve pawh a ni ang. Online-a tih lah hian naupangte ber hian an tuar a, phone te pawh hi an khawih tam phah sawt viau chuan ka hria. Hetianga zirna in lam kan khar reng dawn a nih chuan zirlaite tan pawh hmasawnna neih a har ngawt ang, mimal tin te kan fimkhura he hri hi kan nunpui thiam a ngai tawh a ni"




"Nunpui thiam hi kan zir ngei ngei a ngai, chuti lo zawng engtikah mah kan ram hian hmasawnna a hmu thei lo vang. A damdawi lah hmuh chhuah hleih theih a la ni si lo, a buaithlak khawp mai"




"Eng pawh ni se ka va haw tawh ang e, ni dangah kan la inkawm leh zawk dawn nia" tiin a ṭhutna aṭang chuan a tho a, keipawh ka ding chhuak ve nghal.




"Heti lama kan awm chhung chu i duh hûn hunah i lo leng lut dawn nia" hawihhawm tak chuan ka lo ti ve a, Malsawma chu fel viau mahse Hlutei bialpa a ni tih ka hriat tawh avang chuan titipui ka châk lutuk hran lo, ka sawm mawi ve mai mai a ni.




"Aw le, tehreng mai, ka kal phawt ang e" tiin a dinna aṭang chuan kawngka lam panin a kal zui nghal a, Hotel aṭanga a chhuah dawn thleng chuan ka en zui vawng vawng bawk. Tunah chuan Hlutei paw'n bialpa ṭha tak a nei leh tawh a, bialpa mai ni lovin pasal hual zawk a ni.





Junior- khan Hlutei chuan dawt a sawi thu min hrilh a nih kha! Amaherawh chu zanina ka dinner kilpui pa chu Hlutei bialpa ni lai mek a ni tih ka hriat hnuah erawh Hlutei thusawi chu dawt a nih ka ring ta lo, Malsawma chu pasal atana a neih ngei pawh ka ring nget bur tawh.





Bialpa a nei leh tawh a, pasal hual a nei leh tawh bawk a, hma lam panin nung tawh mahse kei erawh ka la nung ve thei si lo. Engtinnge ka nun theih reng ang ni! Ka thinlung neitu chu ka hmuh phak loh leh tawh phak lovah a awm a, chu pawh ka dawihzep vang a la ni zui, engkim hi a buai nuai tawh a ni e.




Ka hriatna nei kir tawh mah ila ka taa siam leh ringawt chu thil theih a ni tawh lo va, rilru na taka ka siam avangin ani chu ka hnenah a lo kir leh duh tawh ka ring lo a ni.




"Sir, Junior-a hi a lo la chhuk miah lo. Dinner a ei hun chu a ni tawh a, mahse a hmel a la rawn lang tlat lo mai, a dinner tur ka thawn chho mai dawn em ni?" tiin Manager Ishaan-a chuan min lo bia a, ka fapa ka lo theihnghilh hmin ṭhak avang ka inthiam lo nghal hle.




"A ngai lo vang, keima'n ka lo keng chho zawk ang e" ka tih chuan ka fapa ei tur chu a chah nghal a, rei lovah ken chhoh theih turin an rawn peihfel nghal bawk.




"Junior" tiin kan room-a ka luh hnu chuan ka fapa chu ka kai tho a, a lo la harh miah loh avang chuan tlêmin ka awm a nuam ta deuh.



"Dinner ei ka peih rih lo ê pa, ka ril pawh a la ṭam vak lo" a mit nuai chung chuan a rawn ti niah niah a, mahse kei erawh chuan a hun taka thil ei tir chu ka tum thung.




"Tlêm tal i ei ngei ngei a ngai, i taksa kha enkawl uluk a ngai alawm, ei rawh le" tiin dawhkana ei tur ka dah chu ka hun hnaih sak a, ani paw'n ka thu awih takin a ei ve leh mai bawk.




"A va'n tui em em, ka ei leh thei ang em pa? Ka ei leh châk deuh, ka ei tui phian a" khi ver ver chunga a rawn tih chuan ka lo nuih suk a, ka beisei loh deuha thil a ei tam chu a lawmawm ka ti hle.




"Tehreng mai, ka zu la leh ang e" tiin khum aṭang chuan ka tho chhuak a, room chu ka chhuahsan zui nghal.



Ei tur kenga kan room ka luh leh te chuan amah ang lo takin a lo phur phian a, a ze hlui anga a rawn awm leh thut avang chuan mak pawh ka ti hman hial.



"Ei ve la pa, dinner i tawh hrim hrim em ni?" ei tur ei mawlh mawlh pah chuan a rawn ti a, kei chuan ka inei puar tawh thu ka lo hrilh a, ani paw'n min sawm nawn tawh bik chuang lo.




"Junior, kar lehah chuan kan haw chhoh a ngai tawh tak tak ang aw, kar khat deuh thaw chu School pawh i kal tawh miah lo a nia" ka phone-a an Assigment tur a rawn thlen avang chuan ka ti a, Assignment lah chu an la nei hnem phian zui.




"Online in kan kal leh ṭep tawh i tih vek kha pa, online a nih chuan heta ṭang pawh hian ka kal thei mai lo em ni?" a hmui hru fai pah chuan a rawn ti a, a thil ei a tui ngâng a ni ang a plate-a eitur te chu a lo awm leh tawh lo.




"In teacher te paw'n i Assignment vel hi a Hard Copy-a submit turin an ti che alawm, online mode-a class in lak leh theih hunah duh leh he lamah kan chhuk leh zawk dawn nia"




"I ti tak tak em pa? Min promise la, chuan promise tawh chu sut leh awih tawh loh bawk" phur fê hian a rawn ti a, ka lo nuih suk ringawt.




"Min promise vat teh pa, kei chu Mizoram aiin he lai hmun hi nuam ka ti tawh zawkin ka hria" ka kut chelh chung chuan a rawn ti leh a, keipawh chuan




"Ka promise e" ka lo ti ve ta sup a, chutah lawm tih hriat zet hian ka fapa chuan min raw kuah thuai a, keipaw'n ka lo kuah let ve mai bawk.




Zanah chuan kan Hotel piah lawka Park-ah chuan kan leng kual a, zan ni mahse ka rin loh deuhin mi an lo awm tam phian. Junior-a chuan tui tak hian Hlutei nena an inhmuhna lai vel chu min hrilh melh melh reuh a, kum hnih hnua a la ṭawng duh ber a nih ka ring.





Ka kutah chuan a chelh ran a, tlai lama naupangho infiam dan te chu min hrilh char char a, a hlim em em chhan chu ka hre lo a ni. Kalna tur ka hriat chhuah thut avangin hmun dangah ka kalpui ta daih a, chu zan chu kum hnih hnua kan hlim dun zan ber a ni hial ang.




Kum hnih liam taa a ṭawng duh ṭhin angin Junior pawh Hotel-a kan let leh hnu thleng chuan a la ṭawng duh a, kei phei chuan a dam lo dawn emaw ka ti ringawt.




"Junior, engatinge i hlim em em a? Min hrilh thei ang em?" khum khata kan mut hnu chuan ka ti ta nge nge a, ani erawh a ngawi ta daih. A muhil emaw tiin a hmel chu ka en a, a lo la meng ve reng bawk si.




"A chhan chu Miss lo haw leh hunah kan lo hmuak thei dawn a, heta kan awm chuan kan inhmu leh thei dawn alawm pa" a aw aṭang chuan a lungngaih ruk hmel hle a, mahse a lungngaihna chu a thup ve hram hram a ni.




"Miss chu beisei tawh suh ka tih khâ Junior, ani chuan engtika mah i nu nih a duh dawn chuang lo, a chhan chu i pa hian ani chu na takin ka siam miau a tin ni! Chuvang chuan heti hian kan pahnihin awm kumkhua ila, kei chu nangmah nen kan awm dun dawn a nih phawt chuan ka hlim asin"




"I hlim bik lo pa, i hlim miah lo, dawt sawi suh pa. Engatinge i hriatna kha i lo hloh kher le? I hriatna hloh miah lo la chuan tunah te hian kan pathumin kan awm ho ang a, a nuam ngawt ang" nghet taka min lo kuah chung hian a rawn ti sep sep a, min hre chiang reuh lutuk chu mak ka ti hle.




"Thil dang engmah ngaihtuah lovin muhil daih ang aw" tiin kan ke lama rizai chu ka pawt chho a, muthilh tir vat tumin ka sin ṭhatpui nghal.




"Kei chu ka khua a har em mai em pa, ṭhian tih tur lah ka nei thei ngai bawk si lo, Miss paw'n min zinsan leh daih tawh bawk si" ka âwma a hmai nghat chung chuan a rawn ti leh sep a, ka fapa ṭawngkam avang chuan van vadakin ka thaw chhuak hawk.




"I pa ka awm alawm Junior, lungngai mah ta che. Engtik lai pawhin i ṭhian chu ka ni reng a, Miss pawh ngaihtuah tawh miah suh. I rilru a puitling chho ṭan ve tawh dawn a, i rilru natna tur lam chu ngaihtuah zui duh tawh suh aw" tiin a chhipah chuan ka fawp vang vang a, ani erawh a ngawi leh ta daih.




"Miss hi hruai let leh hram la pa, khawngaih takin Miss hi kan bula awm turin hruai let leh rawh" kan ngawih vang vang hnu chuan a rawn ti a, mittui tling pam hian min lo chhoh mel ral bawk.




"Ka thei tawh lo alawm, thei ila chuan i tan hian ka hruai let leh ngei ang" ka tih chuan ka kuahna aṭangin a tal chhuak zui daih a, ka kohna pawh ngai pawimawh duh lovin ngawi reng hian room chu a chhuahsan ta hmak.




"Ka tihpalh ka fapa, ka thil tihsual rah i lo seng tel ve zel avang hian i pa hi min ngaidam ang che" tiin keima hriat tawk lek chuan ka phun sup a, rilru nat lutuk avangin ka kut chu ka hum ruh hle.




"Sir, Junior-a kha pawnah a tlan chhuak daih a nia aw, ka koh paw'n min chhang duh lo a" in hnuai ka thlen thlak rualin Receptionist pakhat chuan a lo ti thuai a, ka thu hriat chuan nasa takin hlauthawnna min pe a, hmanhmawh takin ka tlan chhuak ve nghal.





Hotel bul vel chu hmanhmawh taka kal pahin ka en a, ka tlan a ni ber zawk, chuta karah ka fapa hmel reng ka la hmu lo zui. Ka rilru chu hlauhthawnain a khat a, ka chi ai vek tawh a ni ber.




Mizoram ang lo takin Vai ramah te chuan naupang ruk bo tih vel a tam bawk si, ka fapa chu ka chan mai ang tih ka hlau ngawih ngawih. Ani leh zel ka chan a nih chuan engtin nge ka awm ang? Dam châkna reng nei tawh lovin mahni ka intihlum duh hial a ni ka rin!





Hotel piah lawka Park chu ka ngaihtuah chhuak thut a, hmanhmawh takin Park awmna lamah chuan ka tlan phei nghal a, mahse a hmun ka va thlen chuan ka fapa taksa ruangam awm leh a hmel reng reng ka hmu lo.





A hming lama au vakin vakin kawngah chuan ka kal a, ka hawi kual deuh chhen bawk. Park piah deuha ṭhutthlengah chuan mihring ruangam ṭhu ang thân hi ka hmu a, mahse a thim tawh em avangin ka fapa a ni chiang em tih ka hre thei lo.



Ka thil hmuh en chian tum chuan ka kal phei phawk phawk a, khup bawh chunga ka fapa lo ṭhu kun tlawk tlawk chu ka hmu chiang thei ta.




"Junior!!!!!" thinrim aw taka ti chungin ka fapa chu a dar tawn tawnah ka chelh a, a ṭhutna aṭang chuan ka tung ding zui nghal vat bawk.




"Engatinge min tihhlauhthawn ṭhin!? Engatinge i pa hi min ngaihtuah ve miah loh!? Vawi khat mah hetiang awm leh tawh suh, i hria em!?" thing vak vak chung chuan ka ti vin leh ṭhawt ṭhawt a, ani erawh a rawn ṭap khur der der thung.




"Lo kal teh" tiin ka âwmah chuan ka kuah bet thuai a, ka âwma a beh rual chuan ring tak hian a rawn ṭah zawm nghal.



Keipawh chuan mittui tling pamin arsi te chu ka en vawng vawng a, ka pi leh ka pute tal la dam se chuan chuti taka kan khua a har chu ka ring lo a ni.




"Ka tihpalh Junior, ka vin vak vak che avang khan ka thiam loh a ni e. Haw ang aw, haw ila kan mu daih dawn nia" mittui khap let thuai thuai chung chuan ka ti dam dap a, a kal peih pawh ka rin loh avangin ka fapa chu ka paw ta ringawt bawk.




"Ka tihpalh pa, ka tihpalh" ka nghawnga min kuah ran chung chuan a rawn ti ṭuau a, a inthiam lo ve tak tak a ni ang min kuah nghet ang reng hle.




"A pawi lo, mahse tun chinah khatiang khan awm tawh miah suh aw, ka hlauthawng em mai Junior" ke pen tawp chuang lo chuan ka ti sup a, Hotel pawh kan hlat lutuk tawh lo.




"Aw pa, ka awm tawh lo vang" a rawn tih chuan ka rilru a hahdam nghal huai a, a tua mah chu kan ṭawng leh tawh lo bawk.





Hotel chhung kan thlen chuan Reception lama lo ṭhute chuan zah tak hian min lo bia a, Junior-a pawh an be ve ngei, mahse ka fapa chuan tûmah a chhang duh lo. Ka Hotel-a thawk zawng zawngte chu Vai vek an ni a, hna pawh an thiam hlawm khawp mai.





Ka fapa phei chuan English ṭawnga an bia te a nih loh chuan an biakna a chhang let ngai lo, a chhan chu kei anga Hindi ṭawng a thiam ve loh vang a ni. Amah hian thiam tumna pawh a nei hran lo va, English ṭawng a thiam chuan a duh tawk rih em em.



Keipaw'n Hindi ṭawng vel han zirtir ka tum lutuk chuang bik lo va, a duh hun leh a ṭul ka tih hunah chuan zirtir ka tum tho.





Tun laiah chuan keini hun lai ang em emin Hindi ṭawng a langsar lutuk tawh lo va, English ṭawng thiam chuan eng thil pawh a tih theih vek tawh tluk a ni.



Keini hun laite kha chuan Hindi ṭawng kan la hmang nasa em em a, College ka rah hnuah chauh pangai takin English ṭawng pawh khawlai velah ka hmang a nih kha!
Chumi avang chuan ṭawng ka thiam loh phah chuang lo va, kan in chhunga kan hman tam avangin ka thiam em em zawk a ni.




Ka nu leh pate nen kan awm ho lai kha chuan Mizo ṭawng hman ni atan Wednesday leh Sunday kha kan hmang ṭhin a, a bak zawng chu Hindi leh English ṭawng hman ni atan kan hmang ṭhin thung. Keimah ber khan a nuam ka ti a, ka nu leh pate kha ka ṭawng thiamna bulpui ber an ni bawk.





Kar khat a ral hnu chuan Mizoram lamah kan thlawk haw a, kan in chhung kan lut te chu a khawhar thlakin a reh ngei mai. Ni dang angte chu ni se ka pi leh pute an lo awm leh ang a, hlim takin kan haw chu min lo lawm leh ang a, ka pi phei chuan min be leh siam siam tawh ngei ang.





Tunah erawh chungte chu mitthla chauh an ni tawh a, a tak tak an nih loh avangin mitthla mai chu hlimpui a har ṭâlh tawh a ni. Junior-a chu ni tin School lamah a kal a, sawrkar lamin School khar an la tih rih loh avang chuan a hne lek lek zel.




Amaherawhchu School kal a peih loh vang a ni lo va, Delhi lama chhuk thlak leh thuai thuai a duh tawh vang zawk a ni. Zirna lamah rau rau chuan hma a sawnin a thiam thei fal hle a, ṭhian a lo nei mumal bik vak lo bawk nen lehkha zir leh keimah chu a ṭhiante kan ni mai.




Keipawh sawrkar hna emaw hna thawh lai emaw pawh ka neih tawh loh avang chuan inah ka awm nileng ṭhak ṭhak zel a, mahse zu in emaw meizial zuk lam ka ti ngai lo.




Vawi khat chu ka khua a har lutuk avangin zu ka in ve ringawt a, ka fapa Junior-a chuan a lo duh lo nasa mai. Ka zu in mek bottle chu lain in ve mai a tum a, chutianga ka fapain zu a in ve tur chu ka phal teuh lo, ka phal ngai lo bawk ang.




Chu ni aṭang chuan ka khua a hara ka lung a len châng pawhin zu lamah emaw ruih theih thil lamah emaw pawh ka ṭuan duh tawh lo va, ka fapa chuan rilru dang daih min put tir ta zawk a ni.




Naupang chhia ang taka han en dawn lahin Junior-a chu a puitling ru zek a, rilru puitling leh thil hrethiam vek tawh anga ngaih dawnin a naupanna chu a lang leh lawi si ṭhin.




School hawn leh khar a inchhawk deuh chhen avangin Delhi lamah pawh kan chhuk leh thei ta mai lo va, offline-a exam te a ngaih leh zel avangin kum 1 tal tawp chu Mizoramah kan awm leh ta hial zawk.




Junior-a paw'n ṭha takin class 8 a pass a, a hmaa a subject thiam loh ber ṭhin Mathematics-ah phei chuan a full mark teuh ther ther hle. Mathematics subject-a mark ṭha tak a hmuh hi chuan Hlutei ka hre chhuak lo thei lo, ka fapa chu Hlutei avanga tun thleng Maths thiam ta em em chu a ni tih ka hre chiang hle bawk.





Keini pafa nunah chuan Hlutei a bet vek a, engkimah chuan a tel lohna a awm lo tluk a ni. Zan laia ka ṭhanharhin amah chu ka hre chhuak a, ka fapa in zirna lama result a neih ṭhatin amah bawk ka hre chhuak leh a, ka mit ka chhin rualin ka bul hnai maia awm ang maiin ka hmu ṭhin bawk.





"Vawiin chu i thiam em Junior?" tiin a hmel ka hmuh rual chuan ka fapa chu ka lo be vat a, ani pawh chuan hlim aw deuh hian




"Aw thiam vek pa, chuan Delhi lamah Entrance pe turin kan chhuk thei tak tak tawh ti raw?" a rawn ti ve nghal vat a, keipawh chuan aw tihna'n ka lu chu ka lo buk khum nghauh nghauh.





Vawiin ni chu Class 9 zir thei tura ka fapa Entrance pek ni a ni a, ka beisei ang ngeiin a rawn thiam haw leh ngei e! A tuk khua a lo var a, Junior-a pawh a tho hma ngei mai. Kei aiin a tho hma zawk hial a, a phur lutuk chhan lah ka hre ran bawk si.




Tukṭhuan kan ei laite chuan a ṭawng siam siam reuh a, ka lo nuihpui leh hak hak ringawt ṭhin. Airport lama kan tlan laite chuan a hlim tih hi a hriat ngawih ngawih, keipawh ka fapa ber a hlim chuan ka hlim chawp ve thei zel mai.




Thlawhna chhunga kan chuan hnu rei lovah ruah a rawn sur a, van sanga kan thlawh lai takin kawlphe leh ṭek tla a rawn awm thut a, ka banah chuan Junior-a chuan a rawn hmer vak bawk.




Rang takin ka fapa chu ka kuah thuai a, a hlau lutuk chu a ṭap hial. Chawp leh chilhin keipawh chuan hun kal tawh ka ngaihtuah chhuak nghal a, Hlutei nena kan intawn tirh chu hriat chhuah loh a harsa a ni.




Ka mit chu ka chhing zui vang vang a, Hlutei nena kan intawn tirh lai vel chu ka suangtuah let vang vang bawk. Ka bul maia awm ang chuan ka ngaihruat a, maimitchhing reng chungin ka nui leh suk zel.


*

.

.
.

.

THANK YOU❤


Show post links
Top

[Ngaia]

Chapter 26





Delhi kan thlen thlak aṭanga kar khat hnuah Junior-a paw'n Entrance a pe leh a, Mizorama awm ai chuan Delhi-a awm chu a châk daih zawk tih pawh ka hria.



Delhi-a kan awm hnu aṭang chuan tlai tin Hotel piaha Park-ah chuan a kal ta ziah a, a chhan pawh Hlutei hmuh a inbeisei ṭhin vang a ni.



A awm âwm chuan ka awm tir tawp tawh a, a hlimna tur a nih phawt chuan hauh buai vel ka duh tawh lo, keimah vangin a rilru a na hnem tawk tawh êm mai.





Kei erawh kan room chhungah ka awm deuh tlawng zel a, Hlutei chu ka mitthla ta fô mai a ni. Eng thil dang nge ka tih chuan ang? Hlutei chu London-ah ka zu kalh chilh mai dawn em ni? Ka ta ni leh turin a duh lo chung ka hruai let leh mai dawn em ni? Pasal hual a nei tih hre reng chungin ka ta ka nih tir mai dawn em ni? A teuh lo mai, kei hian chutianga a laka chet theihna dan ka nei lo, dikna pawh ka nei lo. Ka chan tawk chu a hmel mitthla a, hlimpui a, ka thi lo tihsual avanga inchhir loh chu chan tur ka nei lo a ni.






Tuesday tlai a ni a, kan Hotel pawh a lun leh tawh hle. A tlai tin tih ṭhin angin Junior-a pawh Park lamah a kal leh daih tawh a, Park awmna Hotel nena a inhlat loh avangin ka ngaihtuah em em hran lo bawk.





Ishaan-a chuan thil chi hrang hrang min sawipui a, a ṭawng char char nâ chu kei erawh ka ṭawng ve lo tluk a ni. Chutia Hotel Manager nen kan titi lai chuan Malsawm hi Hotel chhungah a rawn lut a, mahse amah maiin a ni hauh lo.





Hmeichhe pakhat hi a rawn kai lut hmawk hmawk a, ṭhutna hmasa berah chuan a ṭhutpui nghal hmak. Ka taksa chhung chu a rawn sa pup pup a, Hlutei nena an inkawp reng laia hmeichhe dang kut a vawn leh si avang chuan ka awm a nuam lo, ka thin a rim ni berin ka hria.




Ka harh chhuah meuh chuan Malsawma te awmna bul chu ka lo thleng phei der tawh a, ka thin a rim lutuk avangin ka kal phei lai pawh chu ka hre lo hrim hrim hi a lo ni.




"Ka thei lo, tual ka that duh lo" hmeichhia chuan a rawn ti ṭuau a, Malsawma erawh a thaw hawk a, a awm dan aṭang chuan a beidawn hmel hle bawk.




"Engtin nge hetiang em ema awlsam hian i rai theih? Mi lah chu i la hre chat bawk si, engtin nge ka hmel hi i la hriat reng theih zawk? Enteh nangmah tê vang hian ka bialnu pawh kar tam tak ka be tawh lo, naute chu titla mai rawh, pawisa ka pe ṭeuh ang che"




"Pawisa ka duh lo, naute tihtlak pawh ka duh lo. Awlsam taka ka rai chhan min zawt vel a, nangma'n sex min hmanpui a nih khâ, ka thiam loh a awm miah lo"




"Ka rilru buai lai a nih vang a nih kha sex ka hmanpui che, engtia tih nge i tum? Ka thusawi chu i awih dawn em? Kei chuan titla mah la pawi ka ti lo, ka lo mutpui kher kher che kha ka inchhir hle a ni"




"Aw le, Mizo mipaah nang ang renga rilru hrisel lo hi ka la hre lo, hna sang tak pawh thawk mah la i tluang bik chuang lo vang. Ka pum chhunga naute hi titla turin min ti vela ti raw? A teuh lo mai, ka thawk ve ṭek ṭek chhung chuan ka titla ngai lo vang. Min lo ngaihtuah zui duh tawh suh ang che, tun aṭang chuan ka pum chhunga naute hi i fa a ni ve tawh lo ve" tiin hmeichhia chu a ṭhutna aṭangin a tho tharh a, Malsawma chuan




"La kal lo teh, kan la sawi zawi lo" tiin au lawm lâwm mahse chu nu tê erawh ṭawng hre lo ang maiin a kal sawn ta vang vang.




Chutah kei chu ka thu hriatte avang chuan ka thin rawn rim thar lehin Malsawma lam chu ka pan hnai sawt a, a kawr âwmah chuan ka ṭham ding nghal a, ka chet dan avang chuan mak a lo tih hmel khawp.




"Hmela, i bialnu chu a awm loh hlanin i lo phatsan kual leh vel si a maw!? Mipa i ni a ni lo'm ni?" tiin ka hnek tlu tawp a, ka thinrim dan chu pui tak hi a ni ringawt.




Chhuat laia a tlu tawh chu ka pawt tho leh vat a, ka hnek leh ta siah siah! Vawi ruk vel ka hnek hnu chuan ka duh tawk zui nghal a, ka thawte chu thinrim lutuk avangin a chham vek dawnin ka hria.




Malsawma chu chhuat aṭang chuan a rawn tho ṭuah ṭuah a, a hnar thi vel chu rawmawl chuan a hru deuh chhen a, kei lah chuan ka lo melh rum nasa mai.




"Pu Henry, engatinge kut min thlak chiam mai le? I pawi ka sawi em ni? Ni lo, nang hian ka bialnu chungchang hi i hre chiang ti raw? Kan inhmuh hmasak zawk ni pawh khan min zawt chik hle a, mak ka ti em em leh nghal" a hnar hru pah chuan a rawn ti ta chiah a, melh pawh ka melh rei peih lo.




"I bialnu ka hriat leh hriat loh chu i tan ṭangkaina a awm lo, i bialnu pawh chu hmeichhe dang laka i phatsan thu kha hrilh vek ang che" ka ti ram hmuk a, ani erawh ka thusawi avang chuan a meng phawk lehzual thung.




"Eng vanga ka bialnu chu lo ngaihtuah ve em em nge i nih?" pawr deuh taka a rawn tih chuan ka insum thei leh ta pek lo.




"A chhan chu i bialnu LALRINHLUI hi ka thinlung neitu a nih vangin" ti hrawkin ka hnek tlu zui leh nghal pawp a, kawng dawm meuh chuan ka van vadak a, ka rilru chu nat tak tê hian a na.




"Ka hrethiam ta e, nang hi Hlutei bialpa hlui kha i ni chiang mai. Engtin nge kut min thlak tirh te khan ka lo hriat loh theih zawk le, ka lo â hle mai. Inbe ṭha teh ang pu Henry, puitling lo pawh kan nih tawh loh hi!" a rawn tih chuan a lam chu ka hawi thuai a, ani erawh ṭhutthleng awmna lam a lo pan daih.




"Hlutei khan a lo sawi dik chiah a ni, kei hi tunah chuan ka beidawng tawh ni berin ka hria" ngawi renga kan ṭhut hnu chuan a rawn ti chhuak sup a, mipa mah ni se a hmel aṭang chuan a beidawng tih a hriat hle.





"Kum khat tawp chu a rilru hneh tumin ka bei a, a thinlungah mipa dang an awm reng tih hre chungin ka bialnu atan ka ṭan luih tir a, mahse ka tumna te chu tunah chuan a lo thlawn vek tawh a ni" a tih lai te chuan ka lo en kar a, nuihzat vang ni miah si lo hian a nui leh suk bawk.




"Hlutei hian a mipa hmangaih hmasa ber kha a la hmangaih reng a, chu a mipa hmangaih chu nang hi i ni ti raw pu Henry? Ni lo, sawi lo mah la tunah chuan i ni tih ka chiang tawh e. Ka lo â ngawt mai, ka ât avangin mi pahnih rilru ka tina dawn ringawt a nih hi!"




"A mipa hmangaih hmasa ber chu a la hmangaih maw!? Kei hi min la hmangaih reng i tihna em ni? A ni lo vang, a thusawi i hre sual zawk a ni ang e"




"Ka hre sual miah lo asin, kha leh chen kha kan lo inzui ve tawh a, mahse min duh thu tak ngial pawh a sawi ngai lo. Kei chuan ka duh em em a, nupui atan hial pawh ka duh nghe nghe. Hlutei zawk hian min duh lo va, min hmangaih lo va, ka nawr luihna avanga inngaizawng mai kan ni e" a rawn ti muang fan raih a, kei erawh ka lo ngawi reng ringawt.




"Tunah chuan Diploma Course pawh a zo fel tawh a, a lo haw ṭep ang. A laka ka beidawn ruk em em tawh avangin hmeichhe pakhat sex ka hmanpui a, chutah chu nu chuan ka fa a la pai zui, Hlutei chuan min haw ngawt ang ka ring. Thla 2 chhung vel chu a laka ka inthiam loh lutuk avangin ka be tawh lo, min duh ve miah lo tih hre mah ila a lakah chuan ka inthlahrung em em tho" a rawn tih zawm leh nghal zat a, ka rilru chhungril chu a lawm nge a lungngai tih pawh ka hre lo.




"A lo haw hunah chuan neih let leh tum ngei ang che pu Henry, a chhan chu kei chuan hmeichhe dang buaipui ngei ngei tur ka nei tawh tlat a tin ni! Zaninah Hlutei pawh chu ka lo bia ang a, engkim ka hrilh vek ang. Min chhan let dan tur chu hre rih lo mah ila a rilru a nat ve tho chu ka ring. Nang nena kan inbiak thute hi ka hrilh vek a, ani paw'n hlim takin nun a hmang ve thei tawh zawk ang" a rawn tih leh pawh chuan ka ngawi reng a, ka en ngai chu ka en tlawk tlawk a, Hlutei tih chauh lo chuan ka ngaihtuahna an luah thei tawh lo.





Inthing harhin Malsawma ṭhutna lam chu ka hawi a, mahse hmuh tur reng a lo awm tawh lo. Dawhkan bawh chuan ka kun ngul a, ka rilruah hlauhthawnna leh lawmna chu a inawm chhawk sek bawk. A lo haw hunah chuan min la pawm duh tak tak se ka ti a, min la hmangaih reng se ka ti a, ka ta ni kumkhua turin ka bulah lo let leh thei se ka ti ngawih ngawih.




HLUTEI POV




"Hei Hlute, engtikah maw i haw dawn? I ngaihawm awm reuh ê, mahse kan tihtur ber kan zo ve tawh miau bawk sia ti raw?" nui ver ver chung hian ka ṭhiannu ve em em Chloe-i chuan a rawn ti a, keipawh chuan ner nâwng chung hian




"Nang pawh i ngaihawm dawn alawm, in ramah i haw leh vang vang daih dawn bawk si, engtikah nge i haw zawk ang? Kei chu Next Week-ah khian ka haw ka ring, Ticket pawh ka book fel thlap tawh" tiin zawhna ka zawt let ve nghal thuai a, Graduation Gown kan la ha vek bawk sia hnawk ka inti ang reng hle.




"Kei chu Next Month-ah daih kan ramah ka haw ang, London hi nuam ka la ti rih tlat! Bialpa pawh ka nei dawn, ka nei lek lek tawh zawk" fiamthu rawngkai titak deuh chung sia a rawn tih chuan phur fê hian




"Oh My God! Bialpa maw!? Tu nge!? Tu nge i bialpa lek lek chu ni reng reng? Min hrilh ve vat ta che" ka lo ti thuai thuai a, kei ai daihin sang mahse a banah chuan ka chum vak vak tho.




"Gerard-a kha i hria em? Kha American tlangval ngei kha!" nui ver vera a rawn tih chuan rang zet hian



"Awi le! Gerard-a maw!? Engtin nge ka lo hriat loh theih zawk le, in inhnim hnai ka ti reng a ni" ka lo ti ve leh nghal a, Chloe-i leh Gerard-a inkawp tur chu ka rin loh lam tak a ni.




"Enteh Hlute, Gerard-a hi maw a sexy bawk sia amahah hian ka mipa duh ang chi zawng zawng a kim vek" nuam tih hmel zet hian a rawn ti leh a, Chloe-i leh Gerard-a chu an inhmeh dawn lutuk tih ka hre nghal.




"Awi nang chu Chloe, in inhmeh dawn vel ê, hmeichhe tam takin an thik luai luai dawn che a nih hi! Amah Gerard-a chuan a duh ve reng reng che em? Nge nang hi kan professor i ngaihzawn lai ang khan i suangtuahnaah i lo cheng leh mai mai zawk?"




"A teuh lo mai, khatiang khan ka awm tawh ngai bawk lo. Enteh Hlute, nizan khan Gerard-a chuan dinner kilpuiah min sawm vel alawm, a nuam hi a ni tawp"




"Awi nang chu a nuam awm ê Chloe, keiniho zinga Diploma Course zir zawng zawngah hian i ni hlawh ber ang ka ring. I bialpa tur lah a chhe lo bawk si, in awm dun lai ka hmu châk tawh che u"




"Nang pawh hian Research lam ringawt buaipui lo hian bialpa tur te ngaihsak ve la, American ho phei chuan Asian hmeichhia lam hi an duh phian a nia, in la chhe lo viau rawh" nui hek heka a rawn tih avang chuan ka lo nui liam ve mai mai.





Information Mic aṭang chuan Student te chu ṭhu khawm tawh turin min ti a, keini pahnih pawh titi zawm tawh lovin kan ṭhutna tur lam chu kan pan ve nghal. Darkar 1:30 chhung vel Graduation day chu kan hmang a, ka apartment ka luh te chuan ka chau hnawk thei.





Mu chung chuan ka khi ver ver a, Henry-a'n duhsak min hlan ang ngeia ka hlawhtling ta chu ka lawm a ni. Ni e, Henry-a khan rilru na takin min siam lo ta ang ni se chuan ka hlawhtlin pawh ka ring lo, mahse tunah chuan ka natna te chu ka zirna kawnga hlawhtlinna min petu te an ni tih ka hre tawh a ni.





Kar a ral leh meuh chuan India ram lam panin thlawhnaah ka ṭhu vâng tawh a, kan rama ka haw leh tawh tur chu ka hlim rualin ka hlim lo a ni. U Sawma chuan thla khat kal ta mai khan kan inṭhen a ngaih thu min rawn hrilh thut a, ka hriat tirh phei chuan mak ti tak ka ni.





A chhan ka zawh ngai lovin engkim min hrilh tlang nghal vek a, kan inṭhen chhan tak ka hriat chuan ka na ve det. Ka nat chhan erawh amah ka duha ka hmangaih vang ni lovin inngaihzawnna lama ka tluan loh lutuk vang zawkin ka na a ni.




Keipawh chuan u Sawma chu pangai takin ka lo chhang let a, ka nat loh thute ka hrilh a, mahse a thu min hrilh tawp ber chuan min va han barakhaih chiang tehlûl em.
Henry-a nena an titi dun thu leh engkim a hrilh vek thu min hrilh chuan awm ngaihna pawh ka hre lo, ka ni deuh hûihin ka hria.





Tin, u Sawma chuan India ram ka thlen huna min lo hmuah a tum thu a sawi leh hram a, mahse chu erawh ṭhian kan nihna ang zawngin a ni tawh thung. Kan inbiak tawp lamte chuan a rawn nui leh thei tawh a, kei erawh ka nui lui vel mai mai a ni.




Darkar 8 chuang kan thlawh hnu chuan India ram hmel pawh ka hmu ve leh ta, ka hah a dam sawng sawng nghal. A sawi lawk ang ngeiin u Sawma chuan min lo hmuak a, mahse a bulah chuan Junior-a ngei chu a lo ding ve ta tlat mai. Ka mi hmuh avang chuan ka ke pen pawh ka tawp deuh chat a, mahse intichak luiin ka kal pangai ve leh nghal vat bawk.





"Miss!" tiin Junior-a chu ka lamah a lo tlan thuai a, engtin nge India ramah ka haw dawn tih te chu a lo hriat reng reng ni! A ban phaka ka awm chiah chuan min lo kuah vat a, keipaw'n ka lo kuah ve mai.




"I kal bo tawh dawn lo ti raw Miss? Kal bo tawh suh aw? Kan bulah lo let leh tak tak tawh rawh aw? Khawiah pawh kal dawn la ka zui zel tawh ang che, ka ti tak tak Miss" a rawn ti nghal zung zung a, kei erawh ka ṭah a chhuak em em nghal ringawt.




"Ka lo let leh thei tawh dawn em ni? Kei te chu i pa paw'n in bula cheng turin min duh tawh nâng, ka lo let tawh lo law law zawk mai ang" ka tih chuan




"A theih loh Miss, lo let leh ngei ngei rawh, apa paw'n a hmu châk tawh lutuk che" a rawn ti leh nghal vat a, mahse a thusawi ber kher chu ka awih lo hle.




"Tunah chuan i pa min duhsak ang ngeiin zirna lamah pawh ka hlawhtling titih tawh a, heti hian kan inhmu thei reng tho alawm Junior. Engtin nge ka lo haw dawn tih te hi i hriat reng reng a?" u Sawma lo dinna lama kuah phei chung chuan ka ti a, ani pawh chuan pangai tak hian




"Pa Malsawma sawn min hrilh alawm, apa pawh a hrilh vek, mahse apa chuan i hmel a hmu ngam lo va, a lo kal ve duh lo" a rawn ti a, Henry-a'n ka hmel a hmu ngam lo maw!? A va mak ngai ve, eng vanga ka hmel chu hmu ngam lo nge a nih chiah?




"Junior-a sawi kha a dik" u Sawma chuan nui ver ver chung hian a rawn ti a, ka hmela mak tihna chu a lo hmu thiam leh vek tawh a ni ngei ang.




"Engatinge i pa chuan ka hmel chu a hmuh hreh Junior?" ka ti chhuak sep a, chu zawhna chu ka zawt lo thei lo a tin ni! U Sawma chuan ka luggage khai chu a lo ban vat a, min la kalsan zui nghal nal nal.





"A inchhir alawm, kan in aṭanga a chhuahtir che avang khan apa chu a inchhir lutuk, chuvang chuan kan bulah lo let leh hram rawh aw Miss?" lungngai aw taka a rawn tih chuan ka ngawi reng a, ka mittui te chu a tling pam a, ka ṭawng chhuak a nih vaih chuan ka ṭap ngei dawn tih ka chiang.




"Lo lut r'u le" kan bula motor tih din pahin u Sawma chuan a rawn ti hlauh a, chuti ni lo se chuan Junior-a chu ka chhan a ngai ngei ang.




Motor seat hnung lamah chuan kan ṭhu lut a, Junior-a chuan ka kut chu ka kal sawn leh hlau ang mai hian a vuan tlat a, kan inhmuh tirh phat aṭang khan a la thlah lo hrim hrim zawk.




Motor-a kan chuan laite chuan Junior-a chu ka dar nghengin a ṭawng malh malh a, an pafaa min ngaih tawh thute chu a sawi chamchî a, a ṭawng tui lutuk chu u Sawma lakah chuan ka inthlahrung dâwn dawn alawm. U Sawma hriat nuam loh tur anga ka lo ngaih thlêng thlengin Junior-a chuan a sawi chhuak a, u Sawma lah chuan a la lo la hlimpui em em zui.





Minute 30 vel kan tlan hnu chuan kan veng lamah kan tlan lo tih ka hre chhuak a, kan veng lama tlan tura ka tih pawhin u Sawma chu a tlan duh ṭhak lo. Ka biak pawhin min chhang lo va, ka ṭawng hre lo ang maiin motor chu a khalh mial mial. Kan tlanna lam Junior-a ka zawh lahin a sawi duh bik bawk si lo, an awm dan chu ka hrethiam lo hle a ni.





Rei lovah Hotel lian ang reng tak pakhat hmaah hian kan ding a, chu Hotel lah chu ka hriat ngai pawh a ni lo. Junior-a chuan ka kuta chelhin Hotel chhung lamah min kalpui a, u Sawma paw'n ka luggage khaiin kan hnungah min lo zui ve nghal. Anni pahnih awm dan chu ka ngaihtuah chet chet a, ka hrethiam lo hle a ni.





Lift-a kan chuan lai chuan ka ngaihtuah chhuak ta, Henry-a nena inhmuh tir min tum tih ka hriatthiam hnu chuan huphurh tak ka ni. Khawvela ka mipa hmangaih ber leh ka hlawhtlinna bulpui ber mipa chu hmu châk em em mah ila a hmel ka hmu hreh a, a chhan pawh kan hun kal tawh vang bawk a ni.





Kum 3 chhung zet inhmu lovin awm mah ila Henry-a chuan ka ngaihtuahnaa awm loh lai a nei ngai lo va, na takin min siam tawh mahse amah ka hmangaihna chu a reh thei chuang lo.




Lift aṭanga kan chhuah te chuan ka tha a khur hial a, ka zam dan chu pui tak a ni. Kawngka pakhat bulah hian Junior-a chuan min dinpui a, u Sawma pawh a lo ding ve nghal.




"Va lut rawh le Miss, i hmel a hmuh hunah apa chuan mak a ti ve ngawt ang" nui ver ver chung hian Junior-a chuan a rawn ti a, kawngka chu hawngin min nam lut zui nghal.





Room chhung ka luh hnu chuan khuma lo mu zangthal duai Henry-a chu ka hmu nghal zat a, a muhil a nih ringin thawm dim tak chuan khum lam chu ka pan ṭhem ṭhem a, a hmel ka hmu chiang chiah ka va han ṭap chhuak teuh tehreng em.





Ka ṭah chhuah thut ka hlauh avangin ka hmui chu ka hup vat a, Henry-a hmel chu nasa takin a lo danglam tawh a ni. A biang leh khabe velah chuan hmul a lo awm chhur tawh a, amah a ang lo tak zet. Maimitchhing reng chung chuan a nui leh suk suk ṭhin a, a awm dan avang chuan a muhil niin ka hre ta lo.




Khumah chuan dim tê hian ka ṭhu thla a, ka kut chu a hmai zawnah ka lek kang a, mahse a hmai chu ka la khawih duh lawk lo. A hmai khawih ta lo chuan ka aw chu ka thian kharh a, mahse ani erawh a la rawn meng chuang lo.




"Henry" ka ti sep a, ka kohna avang chuan a rawn meng chiang kher mai. A mitmeng khawharna leh lungngaihnaa khat chuan min lo en thuai a, chutah khi deuh suk chung hian




"Ka mitthla leh bawk maw" a rawn ti thum ṭial ruai a, a mit chu a chhing zui leh nghal daih. Ka insum thei tawh lo chuan mittui tling pam chung hian




"Henry pathlawi" ka ti nawn leh ngat a, a kut chu ka chelh zui nghal bawk. Ka chet dan leh ka koh dan avang chuan a rawn meng ve leh nghal vat a, rawn ṭhu chhuak chung chuan min en chiang tawh kher mai.




"Ka mitthla mai mai nge a tak tak i nih!?" tiin ka kut te chu a thlek vawng vawng a, ka hmel te chu chik tak hian a en a, a tak ka nih chu a la rinhlelh hmel ngâng a ni.




"HENRY LALSANGZUAL, Mawla, Suala, Pathlawi, engatinge ka awmna i hriat rengte chuan min hmu tur pawha i lo kal ngai loh?" ṭap chhuak hawk chung chuan ka ti ta nge nge a, chutah zet zawng a tak ngei ka ni tih hre chhuakin a âwmah chuan min va han kuah bet rang em.





Nghet taka kuah let chung chuan ka ṭap hawm hawm a, chutiang taka ṭah nasat chu ka la nei lo. A kawr âwm te chu ka mittui vangin a huh pur a, ani chuan min kuah nghet hle bawk. Ka chhip leh chal chu a fawh kar tawn chhen a, kei ang bawkin a lung chu a chhe ve tih ka hre thei.





"I ni tak tak ti raw Hlute? Hei hi ka mitthla a ni lo ti raw? A ni lo tih tal min han hrilh teh, ka mitthla mai mai atan chuan ka ui em mai" a âwm aṭanga min nam hlat hnu chuan a rawn ti ṭuau a, a mittui te chu a tling pam a, ka mit taka en chung chuan min chhuk melh ran bawk.




"I mitthla a ni lo Henry, keimah Hlutei ngei ka ni e" tiin a hmuiah chuan ka han fawp vang vang a, ka maimitchhin rualin ka mittui te chu ka biangah a baw nghal zawih.





Ka Henry-a hmui ngei a ni tih hriat takin a hmui chu a lo la nem lum nuam hle a, kum 3 kal taa ka hmui fawh ṭhin ngei kha a la ni e. Duhthaw tak hian min lo chhang let buan buan a, keipawh ka insum seng tawh bik lo. U Sawma min fawhna te chu nep te hi a ni ringawt, hmangaihte hmui han fawh leh zet zawng a dan dang tak a ni.





Min fawh uar em avang chuan ka thaw a chham lek lek a, a ka chhungah te chuan ka thaw lut hial. Ani erawh min fawp chawl lo va, a lei mawlh chuan ka taksa pumpui tiche dawt thei khawpa danglamin min siam a ni.


.

.

.
NOTE: IN NUI THEI TA


THANK YOU❤

[Ngaia]

Chapter 27





"Engatinge Henry? Engatinge hetiang em em hian i hmel a danglam tâk? Thil i ei ṭha lo em ni? I mit khur lah a thuk si, i taksa tal hi chu enkawl uluk ve ta che" inngai em ema kan infawh zawh hnu chuan ka ti zung zung a, amah ngaihtuahnaa khatin a biangte chu ka chul a, mittui tih tlak loh chu tum mah ila a harsa thlawt.




"Min chhang teh Henry, i hmel hian ka ṭah a tichhuak tak zet a ni" ngawi renga min en avang chuan ka ti leh a, rilru nat hmel fê hian min en reng a, chutah rawn che thutin a âwm aṭang chuan min nam hla ta daih.




"Henry! Engatinge hetiang hian i awm? Engatinge min hnung chhawn tlat?" tukverh bula a din tâk daih avang chuan ka ti lo thei lo, kan inkuahna aṭanga awm sawn duh tur khawpin eng thil chiah nge a rilruah chuan awm ang ka hre lo a ni.




"Henry pathlawi, engatinge i ngawih reng? Ka zawhna kha chhang rawh, kan inhmu leh te hi i lawm ve miah lo em ni? Kei chu ka hlim em em tawh zawk asin" a hnung lam aṭanga kuah chung chuan ka ti mawlh mawlh a, insum theihna tlachhamin ka ṭap leh ta nge nge.




"Min haw lo em ni?" a rawn ti tawi sup a, a aw aṭang chuan a inchhir hle tih ka hre thei, kei erawh chuan ka khawngaihin ka hmangaih ngawih ngawih tawh thung si.




"Haw bawk lo, ka haw phal tawh bawk lo che Pathlawi Senior pa" ka ti vak a, a awm dan vel chuan ka lung a tichhe zual. Amah chu ka kuah nghet em em ringawt a, ani erawh a ding khawng reng thung.




"Ni lo, nasa takin min haw zawk a ni. Min huatna kha thup tum mah la ka lakah chuan i thup thei ngai lo vang, a chhan chu ka hre chiang tawh lutuk che" a rawn tih thawp sup chuan ka kuahna chu zawimuangin ka thlah ta riai riai.




"Enge i sawi tum chiah Henry? A hma ang bawkin kan awm dun thei leh dawn lo i tihna em ni? Engatinge ka haw tawh lo che ka tih pawhin nangmah min huat tir ṭâlh chu i tum? I hriatna pawh i nei let leh vek tawh a, keipaw'n ka rilru ka lo siam fel hman vek tawh asin" ka tih chuan ka lam hawi zawngin a lo inher a, a mitmeng chu pakhat mah ka chhiar thiam lo.




"Nang chu ka beisei phak i ni tawh hleinem Hlute, ka hmuh tirh che khan hlim viau mah ila tunah chuan ka hlim leh tawh lo. Min hnaih buai duh tawh lo zawk mai rawh, i laka ka chet dan avang khan ka inchhir em mai" a thusawi mal tin chuan min tihamhaih a, inchhir hle mahse chutiang thu chu a sawi ka lo ring lo.




"I dawihzep leh tlat dawn em ni? Kum 3 kal taa mi ang bawk khan i dawihzep leh tlat dawn mâw? I taksa si leh theia ka awm ringawt pawh hi kei chu ka lawm asin, tunah hian inchhir avanga min kaltir leh a nih chuan in hnena lo let leh duhna rilru hi ka pu tawh ngai lo vang" rilru na tak chuan ka ti a, kan inkar engkim a ṭha vek tawh tura ka lo ngai chu ka tisual chiang hle mai.




"Ka hmangaih che asin Henry, kum thum lai ral tawh mahse ka mipa hmangaih hmasa ber i nih avangin ka theihnghilh ngai lo che" ka tih hnu pawh chuan a la rawn ṭawng chhuak duh miah lo va, ka beidawng ve ta tak tâk ta.




"Aw le, a ṭha e. Tun hi nang nena kan inhmuh tawpna ber tur a nih ka ring Henry, in bula awm châk em em mah ila in pafa nunah hian ka leng ve ngâng lo te pawh a ni ang e" tia inherin kawngka lam chu ka pan nghal a, ka rilru chu na tak a ni.




"Kal suh!!!!!" a rawn tih ṭhawt avang chuan ka ding deuh dawt a, ka kal leh tur chiah chu tha chak tak hian ka hnung lamah min pawt let ta dâwr. Insut feih feih chung chuan tal chhuah ka tum a, ani erawh chuan min kuah nghet hle thung.




"Min thla rawh HENRY LALSANGZUAL, dawihzep pa, min thlah nghal rawh" ṭap chung chuan ka ti vak vak a, ka thusawi ngai pawimawh lo tih hriat zet hian khum lamah min pawm phei nal nal a, ka tih ngaihna hre lo chu ka tal vak vak ringawt.




"Ka lak aṭang hian i awm bo leh tawh ngai lo vang, ka tisual leh tawh lo bawk ang" a rawn tih te hlei hlei chuan ka thin an tirim a, ka lung an tichhe zual a, min kuah nghet bawk si nen ka tawp up pui mai.




"Dawihzep pa, nangmah a ni lo'm ni hnaih buai tawh lo tur chea min hrilh zo chiah tu kha! Min thlah rawh! Henry min thlah hram te, tunah chuan ka hmangaih miah lo tur mipa ka lo hmangaih a ni tih ka hre chhuak tawh" ka ṭawng tawp lam chu lungchhiat lutuk avangin a zuih ral a ni ber.




"Ni lo, kum 3 kal ta ang mai mai kha chuan ka kal tir thei tawh lo vang che. Ka inchhir alawm Hlute, i duh lo chung kan in aṭanga ka haw luih tir che avang khan ka inchhir em em asin, i laka ka inthlahrun lutuk lûatah i bula awm ve tlakah pawh ka inngai tawh lo a nih hîiii"




"A nih chuan engatinge min kaltir law law loh? Ka la hmangaih reng che thu leh ka theihnghilh theih loh che thu ka sawi vek a ni lo'm ni? Ka laka i inchhir chuan min kaltir ta che, min tina zozai tawh em mai" thinrimna leh lungchhiatna inpawlh nuai chung chuan ka ti chhuak ṭuau a, min kuahna aṭang chuan tal chhuah pawh ka tum tawh lo.




"Ka thei tawh lo, i tel lovin ka awm leh dawn a nih chuan ka dam zo tawh lo mai ang. Ni e, kei hi mi dawihzep tak ka lo ni e. Tun lawkah pawh khan ka tisual leh ṭep a, mahse nang hi ka hlatah i awm leh tawh ngai lo vang" a rawn tih chuan ṭap pur chungin ka melh chho a, chutah amah vek chuan




"I tel lo chuan dam reng mah ila mitthi ang mai ka ni a, min huain thil chi hrang hrang min tawrh tir dawn pawh ni la i bula ka awm theihna tur a nih phawt chuan ka tuar vek ang. Ka tihpalh Hlute, i duh lo chung in aṭanga ka haw tir che avang khan nuamin hun ka hmang ngai lo" rawn tih zawm leh zatin dam fê hian ka hmui chu a rawn fawp a, mittui baw zawihin ka lo fawp let ve nghal.




"Min ngaidam rawh aw" rilru nat hmel tak hian a rawn ti leh sup a, ka hmui zawnah chuan a thaw sa ham ham a, kan chal chu a la insik tir reng bawk.




"Ngaihdam i ngai lo Henry, nang ngaidam tur khawp chein keipawh hi ka thiam reng reng bik lo. Ni lo, min en teh Henry, i ṭap ve maw!? Eng vanga ṭap nge i nih?" a bianga mittui lo luang thla ka hmuh avang chuan ka ti chhuak hluai a, ani ang mipa chu ṭap ve theiah ka ruat lo a tin ni!




"A chhan chu ka hmangaih lutuk vang che a ni" aw dam taka a rawn tih hnu chuan min fawp leh nghal a, tun ṭum min fawh dan zet zawng a hmaa mi nen chuan a inang lo kher mai.





Ka hmuia fawp reng pah chuan ka taksa te chu a zut kual a, ka dar a khawihna ringawt te chuan nasa takin tisa châkna min pe thei. Ka kawr chhunga lo zen lutin ka hnute te chu a ṭham tawn tâwn a, awm ngaihna ka hriat loh avang chuan a ka chhungah ka thaw lut ham ham ringawt.




Ka hmui chu duhthaw lutuk hian a fawp bawrh bawrh a, ka hmui mai ni lo ka ir te chu a fawp buan buan a, a kutin ka kap lam a thlen thlak rual chuan ka harh chhuak nghal.





"A chi loh Henry, duh tawk ang" thawk pangai lo zeta tiin a lu ah chuan ka nam ṭawng ṭawng a, ani erawh a tawp thei mai lo tih hriat zetin a la chet chhunzawm ngar ngar.




"Henry!" ti leh hluaiin a samah chuan ka kek vak a, kan inmelh chiang ta hle. Ka châk lo bik pawh a ni lo, kan awmna hmun leh hunin a zir loh êm avanga tawp tir mai ka ni.




"Duh tawk ang, pawnah Junior-a leh u Sawma an awm reng a nia, kan kal thui lutuk palh ang e" ka tih chuan a inlet tual a, chung lam melh reng chung chuan na zet hian thawk a la hawk a, a châkna a chhuak nasa ve hle tih chu a hai theih mawlh loh.




"Chuan Henry, ih, min hmangaih ve tak tak em? Nichin khan min hmangaih thu kha i sawi a, i sawi ngai bawk si lo nen ka ringhlel lo thei lo a ni. Ka rin dan chuan ka chunga i chet dan avang khan i inchhir lutuk a, i sawi mai mai a nih ka ring" ka ti leh chuan min rawn en vang vang a, ṭhu chhuakin ka bulah chuan a rawn tawlh phei zui nghal.




"Dawt ka sawi i la ring cheu maw!? Nang ka hmangaihna che hi a rei tawh, ka sawi rik ngai loh avangin i ringhlel mai mai a nih kha! I laka ka awm dan te, ka ṭawngkam leh ka biak dan che aṭangte khan i duh chuan chhut leh rawh, ka hriatna ka hloh hma daih khan ka hmangaih tawh che" a kut pahniha ka biang dawm chung chuan a rawn ti a, keipaw'n rang takin ka kuah nghal vat a, min lo kuah let ve nghal.




"A mak ka ti êm alawm, kei chuan lo hmangaih che pawh ni ila ka hrethiam, mahse nang chu hriatthiam i har ka ti Henry. I mitmeng leh i chezia aṭangte khan ka laka i rilru puthmang ka chhui ṭhin a, min duh ve em em tih chu hre tho mah ila min hmangaih ang pawhin i awm ve ngai lo"




"Hmangaih hi ka nunah ka nei khât khawp asin Hlute, ka thinlung leh tik tak zeta ka hmangaih thu ka hrilh hmasak ber chu ka fapa a ni a, a dawt chu nang hi i ni. Ka nu leh pate tak ngial pawh ka hmangaih thu ka hrilh ngai lo va, mahse ka hmangaih lo tihna erawh a ni lo"




"Aw le, ka awih tawh e, chuan min hmangaih ve avangin ka lawm e Henry" tiin nui ver ver chung chuan a hmui chu ka fawp zeuh a, ka awm sawn tur chu min pawt let rang kher mai.




"Pa, kan lo lut tawp, in rei tawh lutuk a, ka ke a kham vek tawh" kawngka hawn paha Junior-a'n'n a rawn tih chuan ka khi ṭhaw a, ka lai deuh bawk sia a nuam reuh tawp.




"Lo kal teh Junior, ka ngai hle che a ni" tiin Junior-a chu ka lama lo kal turin ka hui a, u Sawma hmel pawh ka hmuh zawm nghal zat a, an lo luh hmaa Henry-a nen kan lo inthlah fel hman diam avang chuan ka lawm rilru hle.




"In hlim tlang tawh bawk a, kei chu ka haw nghal mai ang, tihtur ka la ngah em mai" ka luggage hun ṭhat pahin u Sawma chuan a rawn ti a, keini pathum chuan khuma ṭhu chungin kan lo en ṭhap.




"Engatinge khati vaka min en hlawm a? In inang hlawm ropui si, chhungkaw din ho tur tak pawh in ni chiang e" ngawi renga kan lo en avang chuan a rawn ti leh nghal a, a khi zui suk bawk.




"Haw ringawt suh, thil eng emaw sawi teh ang u Sawm" ka ti ve ta thuai a, ka ngawih avanga ka bula mite pahnih an lo ngawi ve reng ringawt chu ka hrethiam lo hle.




"Eng thil nge sawi tur la awm chuang? Mi buaipui tur ka nei leh nghal" kal mai lo chuan a rawn ti ve leh mai a, chu tak chu a ni ka sawipui tum chu!




"Pa Hotel Kitchen Room-ah khan ka zu kal teh ang, kan lo haw lam pawh khan thil rimtui tawk ka hre tawh, ka ei châk lutuk, i phal em?" tiin Junior chuan apa chu a dil a, Henry-a pawh chuan




"Immm..... phal e, mahse hnathawkho kha tibuai suh ang che. Thil i ei dawn avangin pangai takin dil hmasa la, buaina siam lo vang che" a lo ti ve sup a, Junior chu khum aṭanga tho vatin a tlan chhuak zui nghal.




"Kut ka thlak che avang khan min hrethiam dawn nia" tiin Henry-a chuan u Sawma chu a biak zawm ta daih a, a thusawi ber kher chuan min va han ṭhawng chiang em.




"A pawi lo, a ho lutuk" u Sawma lah chuan a rawn ti awlsam et a, an pahnih inkarah chuan ka hriat ve si loh thil eng emaw tak thleng chu a awm chiang a ni.




"Henry, u Sawma hi kut i thlak maw!?" ka ti ta hâw reng a, Henry-a lah chu a lo la bu nghut zui. U Sawma lam chu ka hawi leh a, min lo nuih ver ver avang chuan mak ka ti zual.




"Engatinge Henry-a hian kut a thlak che u Sawm? Kut thlak tur khawpin chuan i awm ka ring si lo, min han hrilhfiah thuai thuai teh" ka tih chuan a rawn nui leh ringawt a, kei lah ka hre châk ropui tawh mai si.




"Pu Henry-a hian hmeichhe pakhatin ka fa a pai mek thu kha nang aiin a hre hmasa daih zawk alawm Hlute, a hriat tirh chuan a ngaihtuah lutuk che avangin kut min thlak hial a ni" a thusawi chuan a hma ai zawngin min ṭhawng lehzual.




"Engtin nge nangni pahnih hi in lo inhriat daih reng reng a? Inhmel hriatsa chu in ni hauh lo vang, ka ring lo bawk" ka mood chu a ṭha nge a chhia pawh ka hre tawh lo, a inpawlh nuai nuai a ni ber.




"I sawi ho tawh em mai Hlute, duh leh khatiang kha chu in pahniha in awm hunah i zawt zawk dawn nia, kal ka duh tawh. Min sawipui tur i neih tawh loh chuan ka kal dawn a nia" tia kal nghal mai a tum lai chuan




"La kal lo teh u Sawm, ka sawi tum ber pawh ka la sawi lo. A thu hrimin engatinge zanin hi i hmanhmawh em em a? Tun ang hunah office i kal ngai pawh a ni tawp si lo, thil thleng a awm zawk em ni?" ka lo ti vat a, ani pawh a ding ve leh mai bawk.




"Ka fa pai mektu hmeichhia tê hi maw le, a buaithlak reuh tak tak a ni. Thu a duh ve ngil ngel reuh bawk si, ka ṭawng sual lah chu a lo la la fuh em em zui, han thinrim khum vak dawn lahin ka fa a pai tlat bawk si"




"Eng thu nge i sawi sual a lo lak fuh em em chu ni a? Kei chu i fa pai mektu nen hian in inmil dawn riauva hriatna ka nei, nang lah chuan i dawm thiam nasa mai dawn bawk sia" nui ver ver chuan ka ti a, ka phur ruk em em chhan pawh chu ka hre chuang lo.




"Sawi lo zawk teh, ka sik pawh a duh lo, ka biak pawhin thinrim takin min chhang hmuk hmuk reuh zel. Ka fa a pai tih ka hriat tirh khan ka rilru buai lai a lo ni kher bawk nen titla mai turin ka hrilh a, pawisa pawh pek ka tiam nghe nghe. Ani erawh chuan a lo duh lo nasa mai, chu chu tun thleng hian ṭan chhanah a la hmang char char alawm"




"I va'n ti ho tak! Mite'n naute neih an duh em em laiin nang ve chuan tualthah tir i lo tum a, titla lova a pai tlang duh te chu lawm hlei hlei zawk ta che u Sawma, ani tan chuan thinrim lohna chi pawh a nih loh chu!"




"Ka tidik lo tih chu ka hria alawm, ka ṭawng sual tih pawh ka inhre bawk. Ka fa a pai miau avangin tunah chuan ka ngaihtuah a ngai tawh, mi hipna lah chu a la ngah reuh phian zui" tih pah chuan a rawn nui ri hak a, kei erawh ka lo nui ver ver.




"Kan inṭhen tawh tho bawk sia chu nu chu buaipui char char i ngai a nih chu! Chuan amah chu i duh hrim hrim em? Amah chuan a duh che em?" tiin zawhna dang chu phur takin ka zawh zawm leh nghal a, chutah ka beisei loh deuhin Henry-a zawk chuan




"Hlute, i zawhna kha a ṭul tawh miah lo" a rawn ti hmuk a, a hmel ka en lah chuan titau ang mai hian a lo tum deuh hmuk a, ka nui chhuak teuh ngei mai.




"A ho em mai a! Ka hre ve duh a ni mai alawm, ka hriat khan thil pawi pawh a thleng dawn tihna pawh a ni chuang hleinem. Han sawi teh u Sawm, i fa paitu chu i duh chiang ti raw?" tiin ka zawh zawm leh ta daih.




"A teuh lo mai, ka duh awzâwng lo. Ka hmeichhe duh chi a ni lo, a luhlul ngil ngel reuh bawk si, tunah pawh hian va thleng tawh ila chuan min melh rum leh mai mai khawp ang. Ka kal dawn, min zawh belh tawh suh" tiin kawngka lam chu a pan a, kei lah pek chuan




"Lo ding leh lawk u Sawm" tiin ka ko leh hram a, ani pawh nin hmel zet hian a ding ve leh mai bawk. Khum aṭanga thovin a lamah chuan ka tlan phei a, ka kuah ta thlawp.




"Henry-a nena min intawn tir leh avangin ka lawm e, pa ni tawh mai tur ni mah la ka u angin awm reng ang che" ka tih chuan min nam hla deuh hlek a, chutah rawn kun hniamin ka beng bul tê ah chuan




"Mawli le! Pu Henry-a min melh rumzia saw i hmu ve bawk si lo, hlim deuhin awm rawh u" a rawn ti daih a, ka dar a chelhna chu thlahin room aṭang chuan a chhuak zui nghal vat.




"Hlute, eng vangin nge ani kha i kuah kher? Lo kal teh, lo kal thuai teh" u Sawma a chhuak ta maw tihah Henry-a chuan a rawn ti ta ngei a, a aw aṭang chuan thikna ri ka hre thei.




"A ho em mai Henry, thil ho deuh deuhah thinrim tum ringawt suh. U Sawma te chu ka unaupa ang chiah alawm a nih, khang kum 2 chhung khan min pui nasa ṭhin asin" a bula kal phei pah chuan ka ti a, a ban phaka ka awm rualin a lamah min pawt nghal dâwr.




"I unaupa angin en mah la ka thik alawm, kei leh ka fapa leh i chhungte tih loh mipa dang tûmah si tawh lo vang che, kuah pawh kuah tawh reng reng suh, i ṭhiante pawh ni mahse" a rawn ti leh hmuk hmuk a, ka nuih chu za ru tak a ni.




"Awi thik thu i pe chhe vel êee, u Sawma kha chu thik buai duh suh ka ti vek tawh khâ, ka unaupa ang bakin ka en lo. Chu bakah ka zirna lamah pawh a ṭangkai em em a, a lakah khan bat ka ngah viau zawk asin" nui sen sen chuan ka ti a, ani erawh a ngawi ta daih.




"Naktuk chu i lu met rawh aw? I hmui hmul te hi met fai la, hmâna kan inngaihzawn lai ang chiah khan hmel fai leh pa tak nei leh tawh rawh, i bulah ka awm tawh hi!" a biang khawih paha ka tih chuan




"Malsawma ka lo thik em em kha ka thiam loh a ni e, ka tihtheih loh tam tak a tihsak ṭhin che tih ka lo hre lo a ni" a rawn ti daih a, a aw lah chu a zawi awi sawt em em leh nghal.




"Henry i dik leh tawh miah lo, engatinge i lungngaih reng mai le? I inchhir tih chu ka hria, keipawh hi nasa takin ka inchhir, mahse hun liam tawh avangin kan tun hun tibuai tawh lo zawk teh ang. Chuan i sawi tum nia ka hriat chu ka zirna lama ka hlawhtlinna hi a ni a, chu chu a dik em?" ka tih chuan ngawi rengin ka mitah a en a, a ṭawng dawn lo tih chu ka man thiam nghal.




"Enteh Henry, engkim hi nangmah vang vek zawk a ni. Mizoram ka chhuahsan aṭang kha chuan i mi duhsakna anga hlawhtlin ka tum bur a, in aṭang khan rilru na takin min haw luih tir lo ni ta la chuan tun dinhmun hi ka thleng ngai lo vang" ka kut pahniha a biang dawm pah chuan ka ti a, ani erawh chuan min en reng ringawt.




"I la awih chiah lo ti raw Henry? Engatinge rinhlelhna i la neih fô? Ni e, u Sawma chuan nasa takin min pui ngei alawm, mahse a tam zawk chu nangmah ka ngaihtuah ṭhin vang che a ni. Ka mipa hmangaih chu kalsan tawh mah ila a thusawi tal tihhlawhtlin ka la duh hram a, a chhan pawh ani ang em ema hmangaih dang ka neih theih ka inrin tawh loh vang a ni"




"Malsawma kha ka tluk lo tih ka hria, chuvanga mahni inhaw em em pawh ka ni. Heti chunga min la hmangaih theih avang hian ka lawm a, engtikah mah ka lak aṭang hian ka kal tir leh tawh lo vang che" a rawn ti thum chhal a, tunah chuan a nui hmel pawh ka hmu ve ta.




"Ka hmangaih che Henry, ka hmangaih kumkhua bawk ang che" tiin a hmuiah chuan ka fawp vang vang a, ani paw'n min lo chhang let ve nghal.




Rei pawh infawp lovin khumah chuan kan mu zâl a, a âwm delhin kan inhmuh ngai loh hun lai vela ka ngaih ṭhin thute chu ka sawi sep sep a, inbun ruah vek law law ka duh tawh a ni.




Kei ang bawkin ani pawh chuan ka tel lova an awm dan chanchin min hrilh ve a, mahse ani chuan ka zawh chin chiah chiah min chhang thung.




"Pa, ka mu ve duh" engtik laiin nge Junior chuan room chhung a rawn luh tih reng ka hre lo. Chet ka tum rualin Henry-a chuan min chelh thuai a, Junior-a pawh kan inkarah tak a rawn mu zui nghal.




"Junior, i rim chu le!" Henry-a chuan a ti sup a, a hmel te chu a ner sâwng a, kei erawh chuan Junior-a rim chu a tui ka lo ti daih thung a, ka ril a tiṭam nghal rawih rawih thei.




"Thil ka ei ṭeuh alawm pa, dinner pawh ka ei peih kher ka ring lo. E chuan Manager Ishaan-a khan Sap ṭawngin min be char char a, ka rin ai daihin a lo fel phian"




"I sawi tâkah chuan dinner ei pawh a hun ṭan tawh a nih hî, in hnuai lamah i chhuk thla teh ang u. Zanin chu kan chhungkua hian dinner kil ang u aw, a nuam phian ang" Henry-a chuan a rawn ti a, kan chhungkua a tih deuh kher avang chuan engtin emaw ni ka awm.




"Hlute" tia min kohna chuan min tiharh zawk a, Henry-a chuan min lo en ran a, Junior-a erawh ka hmu leh tawh lo, engtia rei nge ka ngaihtuahna ka lo kawm reng reng le, a va mawi lo ṭhin tak!




"Aw, nia, chhuk ila" tia thawh tharh ka tum chu min lo chelh leh ang lawi a, a awm dan vel chu ka hrethiam leh ta lo hle a ni. Ka dara chelh chungin khumah chuan a rawn ṭhu thla a, ka mitah tak a en ran bawk.




"Thil dik lo a awm ti raw Hlute? Sawi sual ka nei em ni?" a rawn ti ta chat a, ka hmel aṭanga thil dik lo a awm tih a hre nghal thei chu mak ka ti a ni. Tunah mai ni lo hmânah pawh khan min hre nghal chat chat ṭhin a, mak pawh ka ti thei hle a nih kha!




"Eng lo, kan chhungkua i tih khan engtin emaw ni ka awm zawk a, ka ngaihtuahna ka kawm zui ta a ni. Dik tak chuan Junior-a ber hi ka hlauthawng hnuhnawh leh tawh a, thil hrethiam rual a nih ve tawh avang hian min duh leh lo thut mai ang tih ka hlau" tiin ka rilrua awm dik tak chu ka sawi chhuak ta tawp.




"Hlauthawng duh suh Hlute, Junior-a hian nang lo hi chu nu atan tu hmeichhia mah a duh lo vang, a duh ngai ka ring lo bawk" chik taka min en chung chuan a rawn ti ve nghal a, ka lo nuih lui sak ringawt.




"Chhuk tawh ang? Ka ril a ṭam tawh teh mai a nia, thil ei thuai thuai ka châk tawh" ka tih chuan a rawn nui ve suk a, khum aṭanga min kai thovin room chu kan chhuahsan zui nghal bawk.





Dinner kan ei lai chuan ka phone-ah notification a lo thleng a, enge lo thleng tih hriat tuma ka en chu ka chaw ei ka tawp deuh nghal dawt.



Henry-a leh Junior-a chu ka va melh zeuh a, min ngaihsak miah lo hian an lo ei mial mial. Junior-a phei chu thil ei tawh mahse a tui ti ber berah a ṭang leh a, a pa chu thil ei pahin a be pah reng bawk.



Kei erawh ka thil ei a tui teh chiam tawh lo, a chhan pawh ka phone-a ka thil hmuh chu Henry-a hrilh ngei a ngai dawn a, engtin nge a lo dawnsawn ang tih ka hrethiam lo a ni.




ADS CLICK THEIHNGHILH LO LA, LIKE LA PE VE LO TE'N UAR ZUAL ANG AW, COMMENT ṬHEUH KAN TUM TLANG LEH VEK DAWN NIA ❤


COMMENT NA LINK


https://www.facebook.com/groups/9913546 ... 208808767/


THANK YOU GUYS ❤

[Ngaia]

Chapter 28





"Hlute" tia min rawn kohna avang chuan ka harh chhuak zawk a, ka phone chu rang takin ka bag chhungah ka khung nghal vat bawk. Nui lui sângin Henry-a chu ka en a, mahse ani chuan min lo en chik hle thung.




"I va hlauthawng ve, thil dik lo a awm em ni? Eitur pawh kha i ei miah lo a nia, thil thleng a awm em?" tiin zawhna min rawn zawh zawm leh nghal zat a, lu thing nâng nangin ka lo nui ve zaih.




"Awm lo e, ka message dawn ka lo chhiar tui deuh alawm maw le, chuan thil siam hi a tui bon hlawm tawp, tui tak a ni" tiin thik dang sawipui chu ka tum ta daih, hrilh a hun ka la ti rih lo.




"Dik chiah Miss, Hotel-a an thil siamte hi a tui thei lutuk, chuvang alawm nichin pawh khan Kitchen room-a ka kal tawpna chhan" Junior-a chuan a rawn ti ve nghal zet zet a, Henry-a erawh a hmel aṭang chuan a la pangai chiah lo tih ka hre thei.




"Ei leh tawh Henry, khatianga min en reng chuan ka lai chhe vek dawn a nia" nui ver ver chunga ka tih chuan a rawn khi ve suk a, Junior-a pawh a rawn nui ri ve hawk.




Dinner kan ei zawh chuan room lamah kan chho leh dial a, Junior-a chu min lo ngai tawh bawk a ni ang ka bulah a tal deuh chawt a, Henry-a phei chuan a ning lek lekin ka hria.




A mitmengah chuan a fapa chu a thik ru tih ka hmu a, ka nuih a va han za tak. Naupang tih takah Junior-a lah chuan a pa awm dan chu a hrethiam der si lo, chawl lovin thil chi hrang hrang min sawipui char char hi a ni ringawt.




A hma ang thovin engkim ka hria emaw a ti leh tawh a, zawhna leh sawi tur chu ngah tak a ni. Amaherawhchu kei chuan chutianga min be reng chu ka ning hran lo va, nuam ka tiin a hlimawm ka ti daih zawk.




Tin, ka laka Junior-a awm dan vel chu awm lo pawh ka ti lo, kum 3 lai inhmu tawh lo kan nih avangin sawi tur a ngah turah ka ngai hmiah.




A school kal dan chanchin te, school-a an insual thu leh an insual chhante chu min hrilh vek a, hlim tak angin sawi mahse a rilru chhungril chu a na ru reng tih ka hria. Henry-a chu ka en leh zeuh zeuh ṭhin a, ani chuan kei ni lovin a fapa ngawr ngawr chu a lo en vawng vawng thung.




Junior-a chuan a thil min tihpui châk zawng zawng chu a sawi vek a, kan inkawm tui bawk sia men pawh kan meng rei hle. Zan dar 1 dawn velah kan mu ve thei ta hram a, Junior-a chu a laiah muin kei leh Henry-a chu a sir tawn tawnah kan mu thung.





"Hlute, a muhil tawh emaw ni le" ka beng bul chêta rawn titu an awm avang chuan ka harh a, mahse ka la meng chhuak duh lo thung.




"Pawi lo mai, muhil tawh mah la i bulah hian ka mu tho ang" ti leh supin ka hnungah chuan a rawn mu thla a, tu dang ni lovin ka Henry-a ngei a ni.




"Ti hi chuan tui takin ka mu thei tawh ngei ang" amah leh amah a inbiak ve chhen avang chuan ka insum zo leh ta pek lo. Ka mut dan thlakin a âwmah chuan ka lu ka nghat a, mahse ka la meng chhuak lo hrim hrim.




"Hlute, i harh reng maw!? I va chimawm reuh tak" a aw aṭang chuan a hamhaih ve hmel hle, kei lah meng chhuak chuang lovin ka lo nui a, ka nui tih a hmu a ni ngei ang ka khabe chu a rawn chawi nghal.




"Han meng teh, ka fapa vangin i bulah pawh ka awm tam ve thei si lo, biak pawh min be ve duh si lo, a hrehawm ka ti teh a nia" a rawn ti leh chuan ka meng chhuak a, a âwmah chuan ka bet leh ta vat.




"Va mu phei leh rawh, Junior-a hi a lo harh chuan a chi miah lo vang" ti mah ila a kal sawn hlau takin amah chu ka kuah bet tlat thung a, ani paw'n min kuah nghet hle.




"A teuh lo mai, i taksa si lo hi chuan ka muthilh theih ka ring lo. Junior-a chu a lo harh a ni pawhin a harh a ni mai, a ho lutuk" a rawn ti mai a, a taksa si chunga han mut zet zawng a va han nuam chiang em.




"Naktuk chu i lu kha met rawh aw? I inhmeh lo, i hmui hmul vel pawh kha i inhmeh ka ti ve lo, ka Henry-a hmel ngei kha pu leh rawh" ka tih chuan




"Aih!" a rawn ti hmuk a, a âwm aṭanga awm sawnin a hmel chu ka en rang teh e! Ka melh rum vak a, ani erawh a rawn khi suk thung.




"Met ang che, i met lo a nih chuan i bulah pawh ka awm tawh lo vang, ka kalsan leh vang vang ang che" tiin Junior-a lam hawi chuan ka inher hmak a, a bula han tihtauh vel chu a nuam ka ti tlat.




"Keimah chauha min chhuahtir i tum bik a, i phakar em mai, i tel lo chuan ka met duh teuh lo" min kuah chung chuan a rawn ti bui bûi a, a ban dah sawn ka tum chuan a la phal der lo zui.




"Naupang chhia tak hian awm ziah suh, i upa tawh ropui si. Naktukah chuan met ngei ngei ang che, kei chu tihtur ka neih avangin hmun dangah ka kal dawn, Junior-a pawh ka hruai ka ring"




"Khatiang zawng khan fiamthu thawh miah suh aw, ka ngaina miah a lo a nia" tiin a lam hawi tur chuan min kuai her lâwp a, a hmel ka hmuh chuan a lo hlauhthawn hmel tak tak.




"Ka fiamthu miah lo a nia, tihtur chu ka nei tak tak alawm, Junior-a pawh hruai ka tum" tia ka ṭawng laklawh lai chuan rang zet hian




"Khawiah nge i kal dawn? Enge i tih dawn? Ka tel lova chhuah in tum maw!? A teuh lo mai, ka phal dawn teuh lo" a rawn ti ram hmak a, ka nui chhuak tawp.




"Nui suh, ka serious teh mai a nia aw Hlute, ka chan leh ang che tih mawlh hi ka hlau tawh a ni. Ka huaisenna zawng zawng sawm khawmin ka taa siam leh che ka tum a, min haw hle dawn mah la ka lak aṭang hian i awm sawn leh tawh ngai lo vang"




"I va han ngaihtuah mak thei tak! Ka kalsan dawn che ka ti reng reng lo, tihtur pawimawh deuh ka neih avangin ka chhuah a ngaih thu ka sawi mai alawm, chuan i lu met turin ka ti bawk che"




"Ni lo, min kalsan leh dawn ang tlata hriatna ka nei a ni. Ka awm dan hi ka hre lo, ka hlauthawng hma em em tawh a, ka thik thu a chhe hle bawk. Chuvang chuan min kalsan tum tawh suh Hlute, ka phal dawn bawk lo"




"Awi i ninawm a! Ka kalsan phal che i ring reng reng em ni? Kum 3 hnuah kan inhmu ve chiah a, ka kalsan tawh dawn lo che Mawla" ka ti ta hluai ringawt.




"A nih chuan lu min meh pui ang a, i kal tumnaah chuan ka kal ve bawk ang, ka fapa ringawt hruai tum lo vang che. A thu hrimah Junior-a pawh hi ka thik hle a nia, i be ṭha bik thei si" a rawn ti a nih chu! A thusawi avang chuan ring vak lo hian ka nui leh ta tawp.




"Ni leh kan pathum chuan kan chhuak ho dawn nia, chuan i biang hmul vel pawh hi met vek rawh aw, i inhmeh ka ti lo. Eeee chuan nangmah tilang naupang deuh hlek thei tur thawmhnaw pawh kan en dawn nia, ka lei ang che" ka thusawi tawp ber avang chuan min han melh rum mai mai khawp a!




"Khatiang khan min melh rul rul zel suh, min hmangaih tih hre lo ila chuan ka hlau thei ngawt ang che. I hria em hmelṭha em em pa, han nui teh" tiin ka kut pahnih chuan a hmui chu ka pawt vel a, nuih luih tir ka tum fê hnuah a rawn nui ve ta nge nge.




"I la ngai reng e, hmâna Hlutei chiah chiah kha i la ni. Danglam suh, danglam tawh miah suh" nghet zeta min kuah pah chuan a rawn ti ve hawk a, ka va han hlim mai mai tak!





Ṭawng tawh lova a ngawih reng avang chuan engmah ka sawi chhunzawm tawh bik lo va, khum sira tawt em ema kan mu dun chu a nuam letling phian, a taksa ngheng chunga ka mut avang chuan ka muttui dawn tih pawh ka hre nghal vek.




Che riai riaiin a lam chu ka hawi chho de de a, eng ang pawhin hmul te chu awm mahse a hmelṭhatna a la bo chuang lo. Ni lo, hmelṭha mai ni lovin a pa em em bawk.




Mipa dang ang lo takin mi hipna a ngah a, ani chu ka tan chuan khawvela ka mipa hmangaih awm chhun a ni a, a ni reng bawk ang.




Ka mit ka men leh chuan khua a lo var vek tawh a, kan mut dan pawh a lo danglam vek tawh. Khum laiah tak kan lo mu tawh a, Junior-a hmel reng hmuh tur a awm tawh lo.




Ka hnunga taksa lum nuam em em chuan min ur mut chhuak leh thuai a, ka lo muhil leh tak tak a ni ngei ang ka mit ka men leh chuan ka ruak huai tawh. Ka hnunga thil lum min ur cher chertu pawh a awm tawh lo va, kum 3 hnua ka muttui ber a nih hial ka ring.




Zi mar ât atin ka ṭhu chhuak a, khum aṭanga chhuk ta lo chuan thil dang ka ngaihtuah chhunzawm ta daih. Chutia ngawi renga thil ka ngaihtuah lai chuan bathroom aṭang Henry-a chu a lo chhuak a, a inbual tih hriat takin Towel chiah chu a veng a, en pawh en rei lovin ka hawi sawn daih.




Rei tak en lo mah ila a taksaa danglamna awm chu ka hmu hman vek a, kum thum chhung khan a taksa a sawizawi ṭha lo tih a hriat hle bawk.




"Hei, va inha rawh, Junior-a a rawn lut thut ang e, a lo luh vaih chuan min ngai dik lo palh ang" min kuah thut avang chuan ka ti a, a ban vuanin nam sawn ka tum ngar ngar a, mahse a sawt lo hle.




"Hetianga awm hi ka duh alawm" a rawn ti leh tlat tawh, mi lah chu a kuah nghet phian bawk si, ruak deuh thawin a awm bawk sia ka awm dan a dik lo ṭan nghal.




"Awm sawn thuai teh Henry, engtin emaw ka awm a nia, i thawmhnaw va ha vat rawh, chhuna chhuah kan ngaih dawn kha!" ka danglam thu chu ka zep buai peih lo, a bulah hi chuan thil ka zep hlei thei thlawt lo.




"Kei pawh hi engtin emaw ni ka awm ve tho alawm" ti supin ka nghawng leh ka dar vel chu a rawn fawp a, a thil tih chuan nasa takin min tidanglam a, ka mur chhuak vekin ka hria.




"Henry!!!" tiin ka tal vak a, ka chet a ring lo a ni ngei ang ka tal chhuak thei hlauh. A mitmeng aṭang chuan a rilrua awm tur awm ang ka hre nghal a, kei pawh ka pangai bik lo tih a hriat ve tho ka ring.




"Exercise la ṭha leh tawh rawh, kum 3 chhung khan i la ṭha miah lo tih ka hre thei. I kum a upat avangin i taksa sawizawi thlahthlam chuang suh, hmâna i taksa mawi tak ang kha nei leh rawh, tunah chuan i dul pawh a kiar ṭan lek lek tawh a" tiin lak lawk deuh chuan ka ṭawng tawp chat a, a ṭhutna aṭanga a din thut avang chuan ṭawng pawh ka ṭawng chhunzawm thei tawh lo.




"Mawla, Pathlawi, engatinge i din thut!?" tiin ka hnung chhawn thuai a, ka mitthlaah Towel chhana a kap pawng ul ka hmuh zawh chiah chu a rawn awm nghal a, chu chuan nasa taka a danglam ve zia a ti chiang.




"Zak ṭhin suh, i ta vek ka nih hî" tiin ka hnung lam aṭang chuan min rawn kuah leh ta nghal a, a mipatna khawng ṭha zet chuan ka kawng bawr chu a rawn do run a, khawihin hmu kher lo mah ila a hrawl dawn tih ka chiang.




"Min kuah rih lo teh Henry, min do run bawk si, a nuam ka ti miah lo a nia" ka ti ta tawp a, men pawh ka meng duh tawh lo, ka tum ni miah lovin ka tisa châkna chu a la rawn chhuak riai riai zui.




"Ka insum rei thei dawn lo a nia, nang hi nupuiah ka nei thuai dawn che a ni" ti thum chhalin ka chhipa a fawh vang vang hnu chuan a kal sawn a, ka thaw huai zui nghal bawk.





A lam pawh hawi buai tawh lovin bathroom-ah chuan ka tlan lut daih a, ka awm dan chuan a tihlim a ni ngei ang a nui ri hawk chu ka hre hman tho. Darthlalangah chuan ka inen vang vang a, ka hmai chu a lo sen vek, ka sa pup pup khan ka hre reng a ni!




Ka ha chu nawh ka tum a, mahse ka ha nawhna ka keng lut lo tih ka hre zui nghal. Thawm dim takin bathroom chu ka hawng a, room chhung chu ka bih dê de a, Henry-a lo inha fel diam tawh ka hmuh chuan lawm tak ka ni.




Pangai takin ka kal phei a, ka bag chhunga ka thil vel chu ka phawrh a, ka ha nawhna la chhuaka kal leh nghal mai ka tum chu min lo pawt ding leh tlat.




"Min thlah teh Henry, ha nawh ka duh a nia" ka tih lai chuan min rawn fawp vawng vawng a, rei ni lo mahse a lei chu a va han tiche thiam leh pek em.




"Ha i nawt lo chung pawh hian i thaw a rimtui bik reng mai" tiin ka chal leh ka biang vel chu a rawn fawp leh zeuh zeuh a, a thusawi chuan mi tilai tak a ni.




"Ka awih kher lo, ha nawt lo thaw rimtui ka hre ngai lo" tia bathroom lam pan ka tum chu min pawt let dâwr a, kan inmelh chiang leh ta hle.




"Nangmah, ha nawt lova thaw rimtui chu nangmah hi i ni" tiin ka hmuiah chuan a rawn fawp leh zeuh a, ka lai lutuk chu a dulah ka sik vak ringawt.




"I ninawm, i sawi ho si, ha ka nawh loh chuan ka thaw a rimtui bik lo" tiin ka tal chhuak thut a, bathroom chhunga ka luh chuan ka ṭhen ṭhaw.




Ka ha ka nawh lai te chuan ka khi reng a, ka nileng mood chu a fuh dawn tih ka hre chiang. Bathroom aṭanga ka chhuah te chuan ka lai ṭut reuh a, ani lah chuan min lo la en chik em em zui.




Ka chet dan chu ngawi reng hian min lo thlir a, ka tihngaihna hre lo chuan ka melh vak ringawt. Chutah zet zawng ani pawh a rawn nui ve ta suk a, ka kut chelhin in hnuai lamah chuan min chhuk thlakpui nghal daih.





Chhun lamah chuan ka sawi lawk ang ngeiin kan bazar a, Junior-a kawr tur vel pawh ka lei nual nghe nghe. Henry-a erawh kawr pahnih khat chauh ka leisak a duh a, pathum emaw pali emaw tal leisak ka tum pawh chuan tih ngaihna a awm thlawt lo.




A hmel tilang ṭha zual thei tura ka ngaih Kamis rawng dum leh a sen ṭial chu ka leisak a, a dum aiin a sen ṭial chu a inhmeh ka ti daih zawk.



Dawr chhunga a inha vel te chu mit tla lek lo hian ka lo thlir a, amah a palian bawk sia a va han inhmeh chiang kuang tak em, hmelṭha thlawta a nih ringawt alawm le.




Junior-a pawh a bang bik chuang lo, a pa a chhun miau avangin a hmelṭha a, a tlangval hunah phei chuan a la luck dawn tih ka hre nghal. Kan bazar zawh chuan Barbershop lamah ka kalpui nghal a, thawmhnaw kan lei hmaa ka inmeh fai tir duh loh chhan pawh hmeichhe dangin an en duh lutuk ang tih ka hlau a ni.




Inmet fai sa thlapin bazar na ila chuan dawr nghaktute khan an va han en duh dawn tak, a buk chhûr avang khan an en rei peih lo mai mai zawk tih ka hre vek, en rei dawn pawh ni se ka phal teuh lo.




Luh an meh lai chuan intithu takin a meh dan tur zawng zawng chu ka lo sawi zet zet a, chu Barber lah chuan Sap ṭawng a lo la thiam vak lo zui. Ka thusawi ṭhenkhat chu hriatthiam loh a ngah a, a tawpah phei chuan Henry-a kaltlangin kan inhrilh ta ringawt.




A meh dan tur chu Mizo ṭawngin ka sawi mial mial a, chu chu Henry-a chuan Hindi ṭawngin a lo let nghal zel a, Baber pawh chuan a hrethiam a ni chêk ang a met dik nghal khawp.




Uluk tura ka lo ti chhen avangin nui chung hian Henry-a chuan Barber chu a hrilh chhawng ve zel a, Junior-a pawh a lo nui chhuak hial. A awm reng, ka uluk em asin, Henry-a chu kum 3 kal taa ka mipa hmangaih hmel ang chiah chiaha awm tir leh ka duh a ni.




A lu an meh zawh chuan ka duhthusam loh lai vel chu ka sawi leh hram a, Instagram-a a thlalak te chu Barber ka hmuh leh tê te a, Henry-a chu ka ṭan lutuk avang chuan a lo nui ri hawk hawk bawk. Ka duhthusam ang thlapa an han met zo chiah chu lungawi vet vet tak ka ni!




A biang hmul vel te chu ka ziah fai tir nghal vek a, tunah chuan ka Henry-a hmel ngei a rawn pu leh ta. Kan bazar avangin ka tihtur neih ve pawh chu ka ṭhulh leh ta vek a, Henry-a te pafa bula hun hman chu a nuam ve bawk em a tin ni!




Junior-a chuan ka kawr leisak chu a ha nghal hmak a, a lawm thiam leh khawp mai. Henry-a ve thung chu a ngawi ngul a, lawm hmel pawh a pu lo va, lawmthu tal pawh min hrilh eih lo.




Hotel-a hnathawk te chuan Henry-a hmel an hmu chiah chu an ka hau hlawm a, a lang danglam ta lutuk chu mak an ti a ni ber. Reception lama duty hmeichhe ṭhenkhat phei chuan mit tla lek lo hian an thlir dauh dauh a, ka thinrim dan chu pui tak a ni.



An hmuh tur ngeiin Henry-a kutah chuan ka chelh a, ka bula mi ren run lah chuan hriatthiam loh hmel zet hian min lo la en chhuk zui.




Room chhunga kan luh hnu pawh chuan ka be duh ṭhak lo va, Junior-a hlir chu ka buaipui daih. Ka phone phawrhin ka chhungte ka bia a, ni dang ang bawkin haw turin min lo ti leh nghal tawh.




London aṭanga ka haw dawn khan ka chhungte chu India rama ka haw leh tawh tur thu ka hrilh ve vek a, rei pawh awm lo va Mizorama thlawk chho nghal turin min ti bawk a nih kha!




A hun lai kha chuan kei pawh khan haw chhoh nghal thuai ka tum a, mahse Henry-a te pafa hmel ka hmuh hnu kha chuan haw chhoh nghal tumna ka nei tawh lo. Ka chhungte lam reng ka ngaihtuah tawh lo va, a chhan chu ka rilruah Henry-a leh Junior-a te chauh an awm tlat vang a ni.




Room veranda-a dingin Delhi khawpui chu ka thlir a, thli a thawt heuh heuh avang chuan tlemin vawt ka ti deuh. Engtin emaw ni tak ka lung chu a rawn leng a, mahse eng thil nge ka ngaih pawh ka hre chuang lo.




Chutia khawipui eng tle sep sep ka thlir lai chuan ka hnung lam aṭangin thil lum nuam deuh hian min lo si a, Henry-a a ni tih ka hre nghal. A taksaah chuan min kuah khawm vek a, ka thla a muang hliah hliah.




"I muhil daih tawh emaw ka tia" ka beng bulah chuan a rawn ti sup a, chhang lem lo chuan a kut chu ka hum vang vang a, la kangin ka fawp zeuh bawk.




"Thil dik lo a awm em Hlute?" a rawn ti leh a, a taksa a lum nuam bawk sia vawt pawh ka ti tawh lo, ka awm dan chuan a nuam em em hi a ni tawp.




"Awm lo ve, mahse thil sawipui duh che chu ka nei" tiin a lam hawi zawng chuan ka inher a, a hmel aṭang chuan ka thil sawipui tum chu rin ngaihna a hre lo tih a hriat hle.




"Enge thil lam nge min sawipui duh chu ni a?" a rawn ti ta ngei a, a aw dam leh thum chhal ngaihthlak nuam lutuk avang chuan en chho hâ pahin ka nuih sen sen ringawt.




"Kan Department in Doctorate Degree ti turte zinga an thlanah selected list ka lo ni ve a, mahse ka ti dawn em tih chu ka la hre bik chiah lo. Nangmah vang hian zirna lamah ka tluang tak zet tih hre rawh Henry, tunah pawh hian ka tlin ka inring miah lo. Enge i ngaih dan? Doctorate Degree lam chu ti dawn ta ila ṭha i ti ang em?" ka ti sep sep a, a hmel aṭang chuan a phal dawn lo tih ka hre nghal.




"Hrilh che ka tum hrim hrim a, nizan khan kei paw'n selected list ka ni tih ka inhre ve chiah. Ngawi reng ṭhin lo la, i ngaih dan chu min hrilh vat mai rawh, ṭha deuhin ka biak che hi aw" a ngawi leh reng tâk avang chuan ka ti leh ta nge nge.




"Doctor Degree lam i tih leh phei chuan ka upa tawh awm" a rawn ti daih a, ka insum zawh loh avangin ka nui dir nghal cher cher. A hmel chu ka en chho leh ṭhin, a nui duh miah bawk si lova ka nuih a za tulh tulh.




"Nui ṭhin lo la, ka fiamthu miah lo" a rawn ti leh a, kei erawh ka la nui char char tho. A thusawi leh kan thusawi a inmilh loh mai bakah a thusawi nen chuan a inhmeh thlawt lo, chuvanga nuihza em em chu ka ni.




"Aw le aw le Boss, ka nui tawh lo vang" tiin a mitah chuan ka en a, mahse ka nuih chu la za tak a ni. Ka nuih a la za ru reng tih hriatthiam hmel tak hian min en a, a la ner sâwng zui.




"Chuan eng maw i ngaih dan chu!? Doctorate Degree lam chu ka chhunzawm i phal em? I phal leh phal lovah ka tih leh ka tih loh a innghat ang" ka ti leh nghal a, nuihza tak ka ni tawh lo bawk.




"Tih chhunzawm lo tur chuan ka duh ngei mai che, mahse i tih leh tih loh chu ka thu a ni lovin ka hria. Kum 3 kal taah khan keimah avangin zirna i chhunzawm tawh lo va, mahse tunah chuan i thutlukna ka pawm vek tawh ang"




"Hun liam tawh sawi chhuak ziah lo la Henry, hun liam tawh avanga nat leh ka duh tawh lo. Ka chhunzawm chu i phal nge phal lo? Sawi tawp mai rawh, chuan i phal loh chhan sawi ka phut tel bawk"
"Doctorate Degree lam chu chhunzawm tawh lo mai rawh, a chhan chu ka hlata i awm ka phal tawh lo. Nupuiah ka nei che ang a, ka ta chiah i ni ang a, i ni reng bawk ang" a rawn tih sup chuan




"Aw le Boss, i thu vek alawm, kei pawh hian i bula awm aia thlakhlelh ka nei bik hleinem" ka lo ti ve thuai a, nghet takin ka kuah zui nghal. Ani pawh chuan min lo kuah let ve a, ka chhip chu a rawn fawp vang vang bawk.




"Min hrethiam dawn nia Hlute, mahse a hma ang mai mai kha chu ka ni tawh lo vang, ka thusawiah hian ka ding nghet tawh viau ang tih hria la ka duh" ka hnung chul hauh hauh chung chuan a rawn ti leh a, ka laka a la inthiam lo reng chu hrehawm ka ti.




"I duh vang a ni bik hleinem Henry, Accident i tawh vanga kan inkar kha buai mai mai alawm a nih! Tunah chuan kan intawng leh tawh a, kan awm dun leh tawh a, inṭhen tawh loh tum phawt mai ang" ka tih chuan thawk a rawn la hawk a, rei pawh awmpui duh tawh lovin in chhung lamah ka luhpui zui nghal daih.





Mutnaah chuan a ngaite bawkin ka bulah a mu leh a, chep hle mah ila nuam chu kan ti dun hle thung. Junior-a erawh tui takin a muhil a, a tlai ve tawh em mai muhil tui awm reng pawh a ni!




Henry-a chuan ka kawr chhungah a rawn zet lut a, ka dulah chuan a kut chu a nghat a, a lamah min pawt tawl zui nghal bawk.



Sai sir zawng chuan kan mu ve ve a, ka dula a kut lum tak awm chuan ka mut a tichhuak zual. A kut hrawl zet chu kawr chhanah ka hum hnan a, ṭawng tawh lovin ka muhil ta riai riai.




Zing a lo nih chuan thu lawmawm zet mai kan hria a, Junior-a chu entrance ah a tling hi a lo ni a, ka lawmpui khawp mai. Delhi lama school kal chu a duh leh duh loh ka zawt a, mahse ani chuan ka awmna hmun apianga school kal a tum thu a rawn sawi daih.




Kei chuan a pa nena kan inneih dawn thu leh Mizoram lama kan haw ka rin thu ka sawi leh a, chu thu zet chuan a va tihlim lehzual chiang em. A lawm lutuk chu min kuah vak vak a, a lian ve tawh reuh bawk sia min kuah na ṭep nghe nghe.



_______________________________________________________

ADS CLICK MIN THEIHNGHILH SAK LO LA, LIKE LA PE VE LO TE'N UAR ZUAL ANG AW, COMMENT ṬHEUH KAN TUM TLANG LEH VEK DAWN NIA ❤


https://www.facebook.com/groups/9913546 ... 208808767/



THANK YOU ❤

[Ngaia]

Chapter 29




Wednesday a ni a, kan University lam panin kan tlan mek bawk. Mak tak maiin ka sawi ngai miah lovin Henry-a chuan kan University kawng a lo hre vek a, phone kaltlang pawhin Map pakhat mah a en eih lo, chu chuan min lo zawng hmu ngei a ni tih a ti chiang. Motor seat hnungah Junior-a nen kan ṭhu a, kan titi malh malh a, Henry-a erawh kan driver ang mai a ni.





Kan University Campus luh dawnah chuan security te'n min lo tiding a, ka Identity Card chu phawrhin ka hmuh a, rei pawh en lovin min tlan tlang tir nghal ve leh mai.




Kan Department Head of Department (HOD) nen chuan kan inbia a, thil tam tak min sawipui a, Ph.d ka chhunzawm lo tur min uipui thu ringawt chu a sawi bawk.




A ni ve chiah rêng a, interview leh ka proprosal aṭang pawh khan min duh ve deuh chuan ka hre sa tawh hrim hrim. London-a ka awm lai khan ka ti daih tawh zawk a, mahse ka tling dawn nge tling dawn lo tih lam ka ngaihtuah zui lem lo a nih kha!




Research lamah ringawt ka bur a, mahse ka rilruah Henry-a a awm lo ngai lo thung. U Sawma chu ka bialpa a ni ve na meuh mai, mahse biak pawh ka be hmasa ngai lo, amah zawk hlirin min lo be hmasa ṭhin.




Hmeichhe pakhatin a fa a pai thu leh kan inṭhen a ngaih thu min hrilh hnu kha chuan ka thawl huaiin ka hria, zep lovah chuan duh miah loh leh hmangaih miah loh bialpa han neih reng kha a hrehawm ve em a ni.





Henry-a hmu leh lo ni ngat ila chuan bialpa emaw pasal emaw neih ka tum tawh lo law law kha a nia, mahse Pathian remruatna ka ti dawn nge ni mak takin kan inhmu leh hlawl a, chutah ka bialpa hlui ni ta u Sawma chu Henry-a nen kan inhmuh theihna kawngah a la ṭangkai em em zui.





University Campus aṭanga kan tlan chhuah hnu chuan hmun hrang hrangah kan leng kual a, Henry-a chuan kalna hmun tur hre tak a ni. A naupan laia a lo tal tamna hmunah leh a kal ṭhinna hmunah te chuan min kalpui zel a, kan kalna hmun backround story a sawi tel zel bawk nen nuam kan ti tlang hle. Kei ang bawkin a fapa Junior-a chuan a pa thusawi chu ngaih thlak nuam a tih ve a, Henry-a ber chu a ṭawng hnem ve phian.





Restaurant changkang tak takah te chawlin thil kan ei a, kan chawlhna ah pawh chuan hmelhriat a lo nei leh hram. Restaurant-a hnathawk pakhat chu a naupan laia a ṭhian kawm ṭhin hi a lo ni a, Henry-a chuan a nupui angin min inhmel hriattir nghal hmiah.





A nupui anga min sawi ta mai chu mak ka ti a, nuam ka tih rualin ka lai ru em em tho. Junior-a muthilh hlanin nupuia min neih thuai a tum thu a sawi tawh a, kei paw'n amah lo chu pasal atana neih tumna ka nei bik lo.




Ka mitah chuan pathlawi ni eng ang mahse a famkim a, ka tana mipa ṭha leh rin tlak a ni dawn tih thlengin ka hre tawh. Kan thil tihsual chuan kan pahnih inkarah inrin ngam tawnna a siam a, ka hmangaih ang bawkin min hmangaih ve tih chu ka ringhlel duh tawh lo a ni.




Junior-a phei chuan inneih thuai thuai turin min ti reng a, chhan dan tur ka hre mai ngai lo bawk nen ka nui leh tawp zel. Vawi khat chu Henry-a chu ka chhungte hmel a hmuh hreh leh hreh loh ka zawt tawl a, ani chuan aw dam tak hian




"Ka hmu hreh na meuh mai, mahse nang ka ta i nih kumkhua theihna tur a nih dawn phawt chuan hreh neih ka duh lo. A ṭul chuan ṭhingṭhiin ngaihdam pawh ka dil mai ang, a chhan chu ka thinlung neitu i ni si a" a rawn ti a, a thusawi chuan min hnehin amah ka hmangaih zual phah sawt nghe nghe.





Min chhan dan avang chuan ka hlim a, ka hlim lutuk chu kuah chungin ka fawp vang vang a, kan infawp rei zui hle bawk. Inhmangaih tawn taka kan infawh tawh hi chuan kan kal thui hman lek lek zel a, ka danglam nasat lutuk ṭhin avangin ka kawr a phelh lai pawh ka hre ngai mang lo.





Amaherawhchu sex hman ka duh lo tih a hriat kar avangin pawi thui tak min thlenpui ngai lo va, a insum nasa thei lutuk chu ka khawngaih zawk ṭhin. Dik tak chuan dan khatna ngeia inneih kan duh ve ve a, chu chu tihhlawhtlin ngei pawh kan tum.





Delhi-a kar khat lai hun ka hman hnu chuan Mizoram lama haw ka rawt ta nge nge a, an pafa bula awm chu nuam em em mahse haw loh ringawt zawng a dik lo a ni. Haw ka rawt tirh chuan Junior-a bawk a phur leh a, Henry-a erawh chuan phur hmel emaw pawh min hmuh leh chuang lo.



Chutah Junior-a chu St. Paul's School-a class 9 zir turin entrance-ah a tling tih kan hre leh zel a, kan va han hlim tlang hlawm tak.





Ka chhungte pawh ka haw dawn thu ka hrilh lawk diam tawh a, mahse tute nge ka haw rualpui dawn tih lam engmah ka la hrilh duh lo thung. Henry-a te pafa leh kei min hmuh hunah chuan mak an ti dawn tih ka chiang, chuvanga surprise pawh tum bur ka ni!





Mizorama kan haw hma ni chuan bazar ka rawt leh tlat a, anni pahnih paw'n ka thu chu an awih ve mai bawk. Ka rin lawk ang ngeiin dawr nghaktute chuan Henry-a chu an reng zel a, ka lo thinrim rilru thei khawp.



Mask a vuah chung pawhin chhe lo an ti thei a nia, a hmel zawng zawng han hmu phei se chuan hmelṭha an va han ti dawn tak!





Keipawh khan kan inhmuh hmasak berin mask a vuah chung paw'n hmelṭha ka ti ru nghal em em a, Vai a nih ka rin avangin keimah leh keimah ka inhau nasa hle a nih kha!




Ni e, Henry-a hi chu a hmelṭhain a pa chiang alawm, tu hmeichhe mitah pawh a ṭhat lawr lak bik ka ring. Mi ṭhenkhat chuan duh zawng a inang lo tiin an sawi ṭhin a, mahse Henry-a hmel leh nungchang hmua hre tawh hmeichhiate hi chu kan duh a inang vekin ka hria, chuta karah ka la vanneih ber zui.




Mizoram lam pan thlawhnaa kan chuan lai te chuan amah ang lo takin mi a rawn fiam ve chhen reuh a, Junior-a nen kan ṭhu dun chu a thik leh tawh ni berin ka hria.




A chang chuan a kum lam upa viau tawh mahse a che naupang chhia leh thut zel a, chu erawh min hmangaih ve zia a tihlanna ah ka ngai hmiah.




Mihring ve tho a ni a, puitling ṭhan kin ni eng ang mahse naupang chhia taka awm châng te chu a neih ve a thiang alawm, tu paw'n naupang chhia taka awm châng kan nei vek!




Junior-a chuan min be char char a, a changin kan nui dun hek hek a, sawi tur a ngah vel reuh lutuk chuan min tihlim lehzual. Henry-a erawh ka va en zeuh zeuh chang chuan min lo melh run zel a, a bula pitar ṭhu ve lah chuan a be chhen bawk si, a nin hmel thei tawp.




A biakna pawh ngaisak lova mi rawn ban leh zuk zuk a ching ṭhin a, ka lo nuih tawp zel. A tawpah phei chuan a maimitchhing daih a, mahse a kut chu hum ruh ngar ngar tak a ni.




A bula ṭhu pitar reng reng pawh chu biak tawh loh ve mai awm ka lo tia, a awm dan aṭang pawhin biak reng a ning tih a hrethiam ve vek tho chu ka ring.




Darkar khat vel kan ṭhut hnu chuan Junior-a chu ka dar nghengin a muhil a, a ring a nat ka hloh avangin ṭhutthleng chu ka nghen tir ta daih.



Henry-a lam chu ka va hawi phei ve leh a, a muhil zui daih a ni ngei ang a kut pawh a hum ruh ṭung tawh lo, chutiang bawkin a bula pitar pawh a lo ṭawng tawh bik lo e!




Darkar khat leh a chanve kan chuan leh hnu chuan Mizoram hmel chu kan hmu thei ta, Junior-a pawh a harh tawh a, Henry-a erawh a la maimitchhing reng thung.



Kei ve thung chu ka meng tluan ṭhak a, Delhi leh Mizoram inkar hi chu darkar 2 leh a chanve vel lek a nih avang hian ka muhil ngai lo tluk a ni. India aṭanga London ka kal te kha chuan ka'n mu hnem mai mai khawp a, thlawhna a ṭum rualin ka harh chauh.





Thlawhna aṭanga kan chhuk te chuan boruak chu ka hip vang vang a, a thiang nuam tak zet. Aizawl lam chu khua a lo dur deuh khup a, ruah a sur ngei pawh ka ring.




Ka rin ang ngeiin Lengpui Airport lam pawh khua a rawn hniam nghal thuai a, Henry-a nen kan intawn hmasak ber tlaia ka dinnaah chuan ka ding vang vang bawk. Ka hun kal tawh te chu ka ngaihtuah let a, chiang tak hian ka mitthlaah an la rawn lang zui.




Ruah sur laia motor aṭanga min lo koh lai te chu ka mitthla a, a driver ṭawng thei zet hmel ka hmuh chuan ka nui nghal ver ver, hun liam tawh chu a ngaihawm thlawt a ni.




Thil lum nuam takin ka kut a rawn sik avang chuan ka ngaihtuahna aṭangin ka harh chhuak a, Henry-a chuan ka kut chu a lo hum vâng tawh. Ka ding lam sirah Junior-a chu a lo ding a, ka vei lamah Henry-a a ding thung.




Henry-a lam chu ka hawi chho a, ding takin hma lam chu a lo en reng a, kum 4 liam taa kan intawn dan chu a ngaihtuah ve a nih ka ring.




"Le! Haw tawh ang aw, ruah hian min dang palh reu reu ang e" rei tak kan din hnu chuan ka ti a, ka ding lama ka kut chelhtu chuan min lo en nghal mahse ka vei lama mi erawh a la che eih lo.




"Henry" tiin a kut chu ka thing a, min lo en chuan hun kal tawh a ngaihtuah let a ni tih chiang takin ka hre nghal.




"Haw ang, ruah sur hma hian haw vat ang u" ka tih leh chuan a rawn bu nghut a, thup tum eng ang mahse a hmelah chuan lungngaihna nasa tak ka la hmu thei tho.





Aizawl khawpui lam pana kan tlan lai chuan ka chhungte hnen aṭangin phone call ka dawng a, ka ṭhiante ina chaw ei tur angin ka insawi nghal zaih. Ka bula ṭhu te pahnih chuan mak tih hmel deuh hian min lo en nghal a, ka lo nuih lui sak ringawt.




Ka chhungte chuan in thleng hmasa lova chaw ka ei chhuak tur chu ṭul an ti lo hle a, mahse chaw ei kham vela ka haw nghal tur thu ka hrilh chuan an phal ve leh mai bawk.




Kan inbiak zawh veleh an ina chaw ka ei dawn thu Henry-a chu ka hrilh nghal a, Henry-a ni lovin Junior-a ber chu a rawn phur leh ta. Kei pawh chu ka phur a, an pafa bula chaw ei chu ka châk tawh lutuk, a nuam dawn tih pawh ka hre nghal.




Henry-a chuan ka kut la kangin a fawp vang vang a, a hmela lungngaihna la awm reng chu ka hrethiam tawh lo, eng vanga la lungngai reng nge a nih tih pawh ka hre lo.




Darkar chanve vel kan tlan hnu chuan Henry-a te in kawt chu kan thleng a, motor aṭang chuan chhuk rang tak ka ni. Junior-a kut chelh chungin in lam chu ka pan a, mahse kawngka chu a lo inkalh ṭhiap mai, enge a awmzia!?




Henry-a lam chu ka hawi let a, ani chuan Taxi driver chu fare a lo pe vel mek thung. A inpek fel zawh chuan Taxi pawh a tlan chhuak zui nghal a, chutiang bawkin Henry-a paw'n kan awmna lam a rawn pan nghal.




"Engatinge Henry!? Engatinge in hi a inkalh? Khawiah nge ka pi leh ka pute!?" kan awmna bul a rawn thlen rualin ka lo ti nghal a, mahse ani chuan min chhang lovin kawngka chu a hawng a, a lut zui nghal daih.




"Min chhang teh Henry? Khawiah nge ka pi leh ka pute hi?" in chhunga kan luh rualin ka ti leh a, min la chhang duh chuang lo. Choka lamah a lut a, ei rawng chu a bawl nghal mial mial.




"Nang tal hian min han hrilh teh Junior, khawiah nge pi Rinpuii leh ka pu hi an awm?" tiin Junior-a chu ka zawt leh ta tawp a, ka rilru chu hlauhthawnnain a khat tawh, thil awmzia lah ka man bawk si lo.




"Lo kal rawh Miss" tiin ka kutah chuan min kai a, ka pi leh pute room lam chu min panpui a, a ngaite bawkin kawngka chu a lo inkalh leh tawh.


Kawngka bula chahbi inkhai chu lain a hawng zui nghal a, room chhung kan lut chiah chu sawi mai tur pawh ka hre lo.



"Eng thil nge thleng Junior? Engatinge ka pi leh pute thlalak hi a va tam em em ve?" kan ngawih vang vang hnu chuan ka ti thawp raih a, thil awm dan chu ka ngainat chi a ni lo, hre reng chungin ka hre lo der tawp tawh.




"Api leh apute chu min chhuahsan kum khan an thi ve ve tawh alawm Miss, ka ngai thei lutuk, apa pawh sawn sawi lo mahse a ngai ve ṭhin tho tih ka hre vek" ṭah chhuak aw zet hian a rawn ti ṭuau a, rang takin ka kuah nghal vat.




"Âwwww engatinge ka lo chhuahsan kher kher che u ni!? Lo chhuahsan lo che u ila chuan ka pi leh ka pu pawh kha an la dam ve reng awm si a" ṭap feih feih chung chuan ka ti a, Junior-a pawh a rawn ṭap zui ve nghal.




"Engatinge min hrilh vat loh Junior!? Engatinge thil thleng te hi min hrilh ve miah loh? Delhi-a kan awm laite khan min hrilh ve ta che Junior, ka rilru an tina em mai" tiin ka ṭap chhuak leh hawk a, Junior-a chu ka kuah nghet hle bawk.




"Apa in hrilh rih lo tur chein min ti alawm, a chhan chu i rilru tihnat a duh loh a ni" a rawn tih chuan ṭah la chhuak em em chungin ṭah chu ka insum hmak a, Junior-a ka kuahna phelhin Henry-a awmna lam chu ka pan zui nghal.




"Mawla, min hrilh ve ta che, engatinge engmah min hrilh ve loh?" a ei rawng bawl lai a hnung lam aṭanga va kuah thlawp pah chuan ka ti a, ka ṭap nghal pur bawk. Ani pawh a thil tih lai a tawp chat a, a taksa chu a ṭang hle bawk.




"Ka tihpalh Henry, engkim hi keimah vang vek a ni ti raw? In kha chhuahsan lo ila chuan tunah hian ka pi leh pute pawh an la dam ngei ang" ka ti chhuak thei hram a, hrehawm ka ti ngawih ngawih.




"Ni lo, i thiam loh a ni lo" tiin a rawn inher a, nghet takin min pawm bet a, kei chu uar takin ka lo ṭap chhuak zui nghal hawm hawm.




"I thiam loh a awm lo, keima thiam loh vek zawk a ni. I duh lo chung haw luih tir lo che ila chuan engkim hi a la pangai vek ang" tiin ka chhip chu a rawn fawp vang vang a, ka hnung chu a chul pah reng bawk.




"Kei chu hrehawm ka ti em mai, ka rilru hi a na lutuk Henry. In pafa chauha khawhar taka in awm tur ka ngaihtuah hian ka inthiam thei lo, ka inthiam thei ngâng lo, mahni hmasial tak ka lo nih hi!" ṭap paha ka tih avang chuan ka aw chu a zuih ral deuh thaw a, Henry-a chuan min pawm kang lâwp a, kei paw'n ka kein a kawngah ka lo kherh ve nghal.




"Junior, tui lum chhuan saw lo en rawh aw" tiin choka aṭang chuan min chhuahpui a, ka inthiam loh lutuk avangin Junior-a pawh ka zah zo tawh lo.




In chung lamah chuan min pawm chho a, min kuah ngheh ang chiahin ka kuah nghet hle bawk. Room chhung kan luh chuan a rim aṭangin an pafa room tih ka hre thei a, chungte hlei hlei chuan ka ṭah an rawn ti chhuak zual. Khumah chuan min mutpui a, rizai chu min sinpui zui nghal bawk.





"Ṭap tawh lo la Hlute, i ṭah reng chuan ka awm a nuam bik miah lo a nia" ka chala fawp chung chuan a rawn ti sup a, mahse kei chuan ka mittui te chu ka dang seng thlawt lo a ni e.




"A har, a har lutuk, ka ṭap lo thei lo Henry. Engatinge min hrilh loh? Engatinge Delhi kan awm lai tal khan min hrilh miah loh? I sual ngaiin i lo la sual reng a nih hi! Ka rilru tihnat dan i thiam si, ka pi leh pute lakah hian ka inthiam thei thlawt lo, chutiang bawkin nang leh Junior-a lakah pawh" tiin ka ṭah ṭawng zuah zuah a, a lam hawi tur chuan min kuai dak ta vat.




"I thiam loh a awm lo ka tih khâ, nangmah inthiam lo zawngin rilru pu tawh suh. Delhi kan awm laia ka hrilh loh chhan che chu kan hlimna kha tihchhiat ka duh lo, hetia nangmah ngeiin i tawn hian a ṭhat zawk ka ring a, mahse ka ring sual leh ta a nih hi!" ka bianga mittui luang hru pah chuan a rawn ti dam thluam a, chutah amah vek chuan




"Ka tihpalh, engkim avang hian" tiin ka hmuiah chuan a rawn fawp vawng vawng a, min fawh zawh chuan a âwmah min kuah bei zui leh nghal.




Kei erawh ka la insut feih feih a, mahse ka awmna hmun chu a hahdam thlak lutuk avangin ka ṭah chhuak pawh a reh tial tial. Ka hnung a chul reng avang chuan ka mut a chhuak thuai a, tui taka mut vang vang tih chauh lo chu châk dang ka nei tawh lo.




Ka lo muhil tlang tak tak a ni ngei ang vawhna chuan min tiharh a, meng riai riaiin Henry-a chu ka zawng nghal a, mahse ka bulah a mu tawh lo tih hriat zetin a mutna chu a lo ruak huai.




Khum aṭanga ṭhu chhuakin ka zi mar leh tê te a, rei lo mahse ka mutui hman viau chuan ka hria. In hnuai lam pan chuan ka chhuk a, choka ka luh dawn chuan ka ding chat.




Ei rawng bawl pahin Junior-a chuan a pa chu a lo be neuh neuh a, an pahniha an chetla dun vel chu a hmuhnawm thlawt. Bang bula aṭanga dingin an awm dan chu ka thlir reng a, han nuih dun leh hak hak chang pawh an nei tam hle.




"Pa, engtikah nge Miss nen hian in inneih dawn? Kei chu innei thuai thuai ula ka ti ê, chu bakah Miss tia koh reng hi ka ning tawh, nu tia koh vat ka châk ve tawh a nia"




"Ka hre lo le, a chhungte lam hian an phal nghal ngawt pawh ka ring lo. Dil chu ka dil leh ngei dawn a, mahse lo lungngai lutuk duh suh, an phal loh chuan ka ru chhuak mai ang"




"An phal loh chuan a buaithlak leh dawn a ni mâw? Kei chu buaina neih reng hi ka ning tawh ê pa, chhungkua ni vat tawh ila ka ti ber. Miss pawh hian a hmangaih ve tho che si a, a chhungte chuan an phal ka ring ve ringawt"




"Ngaihtuah buai lutuk duh suh, keima'n engkim ka tifel vek mai dawn alawm, Miss hi i nu a ni ngei ngei ang tih ka tiama che. Alu kha a hmin tawh em?"




"Aw hmin dim diam tawh, engtin nge i siam dawn a pa? Ka duh chi deuh khan siam teh aw, kan Hotel-a mi ang khan min lo siam teh, ka ei leh châk"




"Aw ka siam dawn alawm, hmarcha vel kha lo va rawt leh rawh le, Miss lo chhuk hmain lo peih fel diam ang" ka nuih a za tho bawk si nen an pafa inbiak vel dan chuan ka lung a tiawi hliah hliah.




"In va fel ve a" lut chiah ang chuan ka ti hlaui a, an lo la hawi rang dun em em zui. Hamhaih zeta min lo en avang chuan ka nui leh ringawt a, chutah Junior-a zawk chuan




"Miss chu i lo va'n chhuk hma, apa nen plan kan lo nei asin le" a rawn ti nghal a, an ṭawng zawng zawng hre lo ang hmakin ka awm ve zaih.




"Eng thil nge ka hriat loh hlana in lo plan chu ni a? Ka hre ve duh tho alawm" tiin dawhkan bulah chuan ka ṭhu a, an pafa ei rawng bawla che vel chu ka en tawn chhen bawk.




"Apa nen hian i lo chhuk hma ei rawng lo bawl fel vek ka tum a, mahse kan bawl fel hmain i lo chhuk ta sia kan plan a flop ta a nih hi!" thil rawt chung chuan a rawn ti ṭha ve leh mai a, ka ṭhutna aṭanga thovin Henry-a thil siam chu ka en ta daih.




"Ehêeee, bai i siam thiam maw!? In va'n inhmeh lo ve Henry, mahse i thil siam hi a tui hmel tawp, chuan saw saw enge?" tiin hmun danga a thil chhuan mek chu ke en leh nghal a, a thil siam chu rimtui tak a ni.




"Engtin nge ei rawng i bawl thiam a Henry? I bawl ngai ka hre si lo" ti lehin a thil chhuan rim chu maimitchhing chungin ka hip lut vang vang a, ka ril a tiṭam nghal rawih rawih thei.




"Apa chuan api leh apute an thih aṭang khan ei rawng min bawlsak char char ṭhin alawm Miss, a changin ka pui ve ṭhin bawk" Junior-a zawk chuan a rawn ti a, ka meng chiang ngei mai.




"Nangmah i inthiam lo leh ringawt ang e!" a thil chhuan lai chawk mawlh mawlh pahin Henry-a chuan a rawn ti a, ngawi renga amah ka en tlawk tlawk vanga sawi a ni tih ka hre bawk.




"Inthiam lo leh chiang e maw le, mahse i sawia tlem chuan ka inthiam lo lo leh deuh" tiin a hnung lam aṭang chuan ka kuah a, min hmu lo mahse ka nui sen sen a, a chhan pawh pasal ei rawng bawl thiam tak ka nei dawna ka hriat vang a ni.




"Miss haw tawh lo la, kan bulah hian awm ve char char tawh la, chaw ei khama i haw leh daih chuan apa nen kan khua a har leh awm ê" Junior-a chuan a rawn ti a, a thusawi chuan thil sawi tur ka nei tih min tihre chhuak nghal.




"I sawi tâkah chuan thil sawi tur ka nei tak e!" tiin Junior-a bulah chuan ka phei a, ka thusawi tur chu an duh chiah ang em ka hre lo, mahse tih ngei ngei ka tum thung.




"Zaninah ka rualin kan inah lo phei ve r'u aw" ka tih chuan Henry-a chu ka lam hawi zawngin a rawn inher nghal a, a thil chawh lai tawp hmaka min en avang chuan ka lo nuih ringawt.




"Zaninah kan inah in lo leng phei ve ang a, kan pathum hian ka chhungte chu kan va ṭhawng thut dawn nia, anni pawh keiniho min hmuh hunah chuan mak an ti dawn tih ka hre chiang" nui chung chuan ka tih leh a, ka thusawi chu Junior-a pawh chuan mak a lo la tih hmel khawp.




"Henry lo phei ve r'u aw, in inthlahrung dawn tih chu hre tho mah ila lo leng phei ngei ula ka duh a ni. I ṭawng ve pawh a ngai lo vang, keima'n engkim ka sawi vek ang" ka ti leh ringawt a, kan ina lo len phei chu an duh lo mai ang tih ka hlau ta a ni.




"Aw le, kan lo leng phei dawn nia, chuan i pa pawh ka be fel nghal ang" a rawn ti nghet charh a, lawm avangin ka khi nghal ver ver. Ka phur lutuk chuan Junior thil tih lai te chu ka tihpui sawk sawk a, mak a lo ti teh e!





Zanriah kan ei lai chuan a hmeichhe awmchhun ka ni kher bawk nen ka ṭawng duh mawlh mawlh hle a, intihhlim chawp hram hram ka tum vang a ni pakhat.


Ka rilru chhungril takah chuan pi Rinpuii leh ka pu chu an awm reng a, chutiang bawkin Henry-a te pafa pawh. Ka awm loh chhunga an lo khawhar dan turzia chu ka ngaihtuah lo thei lo va, a chang phei chuan Junior-a min biakna pawh chu ka hre lo leh thut zel.




Henry-a erawh a ṭawng mang lo va, a chawhmeh siam lah chu ka beisei ang ngeiin a la tui em em zui. Chaw te chu ka ei ṭeuh a, a hmeichhia ber chuan ka ei hnem berin ka hria.



Chaw kan ei kham chuan ka seng fel nghal vek a, ei rawng an bawl tawh avangin an chet ve ka phal tawh lo thung.



Kan in lam pana kan tlan lai chuan tumah kan ṭawng lo va, kum 3 hnua kan in an chuan kai lehna hmasa ber tur a nih dawn avangin an huphurh ve hle tih pawh ka hria.



________________________________________________________


ADS CLICK MIN THEIHNGHILH SAK LO LA, LIKE LA PE VE LO TE'N UAR ZUAL ANG AW, COMMENT ṬHEUH KAN TUM TLANG LEH VEK DAWN NIA


COMMENT NA LINK


https://www.facebook.com/groups/9913546 ... 208808767/


THANK YOU ❤

[Ngaia]

Chapter 30





"Le! Chhuk ang aw, nangni pahnih an hmuh hunah che u phei chuan an va han meng phar nasa ve dawn tak" kan in kawta kan din rual chuan ka ti a, motor kawngka chu hawngin ka chhuak zui nghal.




"Leh lawk! Kan luh hmain kan call hmasa tê te phawt" kan in lam pana kan kal lai chuan ka ti leh hram a, a chhan pawh ka chhungte chu lo awm kim ṭhap se ka tih vang a ni.




"Hello, ka rin aiin i lo haw har leh phian, kan lo nghak kiau che a nia" ka phone call a pick up rualin Peksanga chuan a rawn ti thuai a, kei erawh ka nuih a za ru em em thung.




"Hei in kawtah ka ding reng tawh, ka lo lut chu a ni mai. In awm kim maw?" nui ver ver chuan ka ti a, Peksanga chuan an awm kim ṭhap thu a rawn sawi ve nghal. Rei pawh be duh tawh lovin phone chu ka titawp a, Henry leh Junior-a lam ka hawi chuan an lo ding ngawi reng.




"Lo kal ta che u, engmah zahna tur leh inthlahrunna tur a awm miah lo a nia, keima'n engkim ka sawi dawn ka tih khâ" tiin an lamah chuan ka kal phei a, an inkara dingin an kut ve ve chu ka vuan nghal.




"Miss kei chu nuam ka ti vak lo, kan kal khât tawh bawk si, apa nen phei chuan i awm loh aṭang khan kan kal ngai tawh lo hrim hrim" Junior-a chuan a rawn ti ta ngei a, motor chhunga kan chuan lai aṭang tawh a huphurh hmel ka ti reng a ni!




"A ho lutuk Junior, tunah chuan ka awm tawh alawm, ka awm tawh avangin in lo len ziah a ngai ang" nuih sen sen chung chuan ka ti a, an pafa kut chu nget taka chelhin kawngka lam ka panpui nghal.




Kawngka hmaa kan din chuan hawng nghal mai lovin thawk ka la hmasa leh tê te a, ka huphurh vang ni lovin ka hlim vang zawk a ni.




Henry-a chu chiang zet hian ka han en chho a, ani pawh chuan min lo en chhuk ve run mai. A kut ka vawnna chu thlahin kawngka ka hawng a, muangchang tawh lovin ka lut zui nghal hmak.




"Aw haw le! London inla kal zet mai a rawn haw ta e! London chu i ngeih hle" ka hnunga lo kal te hmel a hmuh rualin Peksanga chu a ṭawng tawp hmak a, nuih pawh a nui tawh lo, a ṭhutna aṭang chuan a ding chhuak nghal nghe nghe zawk.




"Bawhi, Hlute" ka nu leh pa pawh chuan an ṭhutna aṭanga ding chungin a rawn ti rual ṭhawt a, kei lah chu ka khi ver ver mai si, chu tak te chuan a tihamhaih lehzualin ka hria.




"Surprise! Ka mi rawn hruai haw te hi enge in ngaih dan? Kei pawh kan inhmuh tirh te chuan ṭap nasa tak ka ni, chuvang chuan mak tih hmel deuha min thlir reng lo khan thil sawi ho ang u nu, pa" nui chung bawk chuan ka ti leh a, Henry-a te pafa lam chu hawiin sitting room lama lo phei ve nghal turin ka signal zeuh bawk.




"U Hlute, eng vanga anni pafa hi kan ina lo kal leh nge an nih?" Peksanga chuan a rawn ti ram hmak a, a aw aṭang leh a hmel aṭang chuan Henry-a te pafa a lawm lohzia ka hre thei, mahse engah mah ka ngai duh lo lui ve tlat.




"Peksang, i ṭawngkam kha!" ka chhan hmain ka pa zawk chuan a rawn ti vat a, an lo phei mai duh loh avangin kei pawh Henry-a te chu va kaiin sitting room lamah ka hruai phei ta tawp.




"Nu, pa, thil pawimawh deuh sawipui che u ka duh a, zanin ngeia engkim sawipui che u hi ka duh a ni" pangai tak chuan ka ti a, tûmah chuan ṭawng emaw thawm neih emaw an tum lo, a reh ṭhiap mai.




"Henry-a hi pasal atana neih ka duh a ni. Kum 3 liam ta chhung khan keimah chauhin ka lo tuar emaw ka ti a, mahse a ni lo. Kei letin Henry-a hian a lo tuar a, amah mai ni lovin Junior-a paw'n nasa takin harsatna a tawh phah bawk a ni" ka bula mite kut vawn pah chuan ka ti leh a, ka rilru leh tih tak zeta sawi ka nih avangin ka thutak hle bawk.




"In ṭawng dawn miah lo em ni nu, pa? In rilrua awm tur awm ang chu ka hria alawm, mahse kei chuan ka thutlukna siam hi min pawmpui hram ula ka ti khawp mai. Ka Doctorate Degree tih chhunzawm tur ṭhulh ṭhak khawpin Henry-a te pafa bula awm hi ka thlang a, ka thlan sual ka ring tawh lo bawk. Tin, harsatna lo tawk leh ta pawh ni ila kalsan lovin ka awmpui reng tawh zawk ang, a chhan chu anni pafa hi ka thinlung leh tih tak zeta ka hmangaih vang a ni" ka tih chuan Henry-a chuan ka kut chu a rawn hum nghet nghal sauh.




"Pasal atan pathlawi i duh tak tak ang maw?" ka pa chuan mit tizim sun hian a rawn ti a, Henry-a chu pathawi ni mahse chutianga ka pa ber kherin a rawn sawi avang chuan ka haw tawp, ka rilru chu a lo na nghal veng veng




"Vawi tam lo pathlawi tawh pawh ni se kei chuan a ni lo hi pasal atan neih ka tum lo ka pa, ani ka neih in phal lo a nih chuan pasal ka nei lo mai ang" ka ti nghet charh a, thinrim ru deuh ṭuna sawi ka nih avangin ka aw chu a hriam lam lek lek a ni.




"Eng dan nge ni ngai Hlute? A hmeichhia zawkin pasal min han dil chu a nia, ka pian tirh ata ka vawi khat hriatna a ni" nui chunga ka pa'n a rawn tih chuan ka thaw huai a, nuihza vak lovin ka nuih chhunzawm ve nghal.




"Chuan i phal em pa? Henry-a hi pasal atana neih vat ka duh a nia, an pafa chauh hi chuan an khua a har tawh em mai. A thu hrimah engatinge pi Rinpuii leh ka pu kha an boral tih tal min lo hrilh ve loh? Ka hriat tirh kha chuan hrehawm ka ti teh asin, in ti awm ang lo em mai" nur nâng chuan ka ti a, chutah ka pa chuan




"Hrilh che chu kan tum tho a, mahse Peksanga khan hrilh rih lo vang a ti reuh tlat a, i zirna kalsana i rawn haw leh palh thut a hlauh vang a ni ber" a rawn ti dam dap a, ka pa leh kei tih loh chu tûma'n ṭawng an la tum lo niin a lang.




"LALPEKSANG, chutiang thute chu inhrilh loh mai mai chi a ni hleinem, i ti awm ang lo thei lutuk! Ching tawh reng reng suh, putlin te hi zir ve rawh" ka tih chuan




"Na!!! Nangmah ka ngaihtuah vang zawk che a nih khâ, lo hrilh hle hle che ila ṭha tur a nia, mi lah chu i la hau let zawk za mah a!" a rawn ti ve nghal a, a ṭawng theih ngaiin a lo la ṭawng thei reng a nih dawn hi!




"Engatinge i ngawih tlat? Hmeichhia zawk dilna chu ka pawm mai mai dawn hauh lo a nia, a awm ang lo leh lutuk em mai" tiin ka pa chuan Henry-a chu a en reng a, a nui nghawr zui nghal dat bawk.




"Kei hi engtin nge ni dawn? Engah mah min rawn ve dawn lo tihna em ni LALRINHLU? I nu ka nih hî, min rawn ve ik ta che, i pa chauh rawn lovin" ka nu'n a rawn tih avang chuan ka nui dir nghal char char a, a hmel aṭang chuan a la thinrim hmel em em zui.




"Âwww nu, nangte chu ka pa'n a phal chuan i phal leh tho tho dawn alawm, phal lo ve ringawt dawn mah la a tawpah ka pa thutlukna i pawm leh ngei ngei dawn tih ka hre sa vek" ṭhen ṭhaw chuan ka ti a, a chapal chu la kangin min tin ûai nghal.




"Nui, i che awm ang lo thei êm mai, kan boruak hi a hlimawm dawn nge a lungchhiat thlak dawn pawh a la hriat miah loh hi!" tiin ka pa chuan a lo khap vat a, ka la nuih char char avang chuan ka nu chuan min melh rum ṭha kher mai.




"Ka pu ka pi, in chhungkaw chungah leh in fanu chungah hian dik lo takin ka awm tawh tih ka hria e, mahse in fanu hi nupui atan ka duh a ni. A tel lovin ka hlim thei tawh lo va, a tel lovin ka fapa pawh hi a hlim thei tawh lo bawk a ni" tiin Henry-a chu a rawn ṭawng chhuak ve ta.




"Nupaa insiam tur chuan inhmangaih tawnna hi a pawimawh asin, a tel lova in hlim theih leh theih loh lam chu thu hran ni se. Ka fanu ka aṭang chuan a hmangaih che thu ka hre tawh a, nang erawh chuan i la sawi ve miah lo" tiin ka pa chu a tho ûai a, a men rum em avang chuan kan buai leh dawna hriatna ka nei.




"Ni lo ka pu, i fanu hi ka hmangaih alawm, ka thinlung zawng zawngin ka hmangaih a ni. Sawi mai nachang ka lo hriat loh avangin ka thiam loh a ni e, min ngaidam r'u" a ṭhutna aṭanga tho thuaiin Henry-a chuan a ti ve nghal a, ka pa chu a kal sawn daih dawn emaw kan ti vek tawh.




"Paa, eng thil nge i rilruah awm leh tawh? I phal mai dawn emaw ka tia, nge Henry-a hi i fiam mai mai" ka nu chuan a lo ti ve vat a, kei chuan hnuai lam ka bih ngul a, kan inneih thei lo leh thut ang tih chu ka hlau a ni.




"Ka pu min ring lo em ni? Ka thusawi kha i ring lo em ni?" a aw aṭang chuan Henry-a chu a hlauthawng ve tho tih ka hre thei, ka pa reng reng pawh chu a ti mak ka ti thlawt.




"Ka sawi chhuah hmaa i sawi loh avang khan ka fanu hi i hmangaih tak tak ka la ring thei lo, zanin atan chuan va haw leh phawt mai rawh u. In rawn len leh hunah chuan pangai taka kan inbiak theih ngei ka ring tawh" tiin an room lamah chuan a phei zui daih a, room chhunga lut ta mai lo chuan




"Muttui aw Junior, naktuk zanah in lo leng leh dawn nia" a rawn ti leh ang lawi a, a la nui sâng zui. Ka pa awm dan vel chu ka hrethiam lo hul hual, Junior-a pawh chuan mak a ti hle a ni ang chhan let nachang pawh a hre lo.




"Nu! Engatinge ka pa kha khatianga a awm thut a? A phal ka ring asin le, va titipui vat teh, zanin ngeia sawi fel ka duh a nia" ka ti ta thlawt a, ka nu pawh chuan ka pa awm dan teh thut chu a hrethiam lo ve hle.




"Kei chu ka pa awm dan kha ka hrethiam kiau mai si a, room-ah ka va luhsan daih teh ang che u" a ṭhutna aṭanga tho tharh pahin Peksanga chuan a rawn ti a, zawhna mitmenga kan en ṭhup lai chuan a room lam panin a lut zui nghal daih.




"Kan va haw phawt mai ang e ka pi, lo dam ṭha zel r'u" tih pahin Henry-a chuan Junior-a chu tho turin a signal zeuh a, keimah ber chu ka buai, ka plan zawng zawng a flop vek tur chu ka duh lo.




"Henry! Engatinge haw ringawt in tum? Kan la sawi fel hleinem, zanin ngeia sawi fel ka duh asin, haw lovin ka pa kha va be leh ang. Lo kal rawh, kan pahnihin va bia ang" a kut chelh chunga ka tih chuan




"Motor bul thleng min lo thlah la" a rawn ti daih a, nui hmel pakhat mah min hmuh loh avang chuan a thinrim ni maiin ka hria, kei lah ka rilru a buai nasa tawh mai si.




"Kal ang le" Junior-a kai chung chuan a ti leh sup a, ka ṭap chhuak thei mai dawnin ka hria. A kut ka chelhna chu ka thlah riai riai a, kawngka lam an pan lai chu ka thlir tawp.




Kan in aṭanga an chhuah dawn chuan Junior-a chuan min lo en leh hram a, an chhuak ta maw tihah ka mittui chu a rawn tla ta ngei e. Ka mittui tlak chhan ber chu ka sawi fak thei lo, a inpawlh nuai mai.




Harh chhuak thutin ka tlan a, pawn ka thlen chuan Henry-a te chu an lo tlan chhuak ve chiah. Hmanhmawh lutukin kawngpuiah chuan ka chhuk a, ka theih tawpa ring chuan ka ko vak a, anni pawh an ding ve nghal.




Motor aṭanga lo chhuakin Henry-a chuan ka lam a rawn pan phawk phawk a, kei erawh mittui nen ka lo la awm nuai thung.




"I ṭha em?" ka bul a lo thlen rualin a rawn ti vut a, ṭap chhuak feih feih chungin ka kuah nghal thlawp. Ani pawh chuan duat takin min lo kuah let ve a, kan inṭhen leh mai ang tih ka hlau a ni.




"Kei chu ka hlauthawng êm mai Henry, kan awm dun hi a rem ve lo tak tak a ni ang. Kan inkar boruak chhia zawng zawng kan su kiang tawh a, mahse nichin maia ka pa awm dan khan ka ngaih a tiṭha thei lo" nget taka kuah chung chuan ka ti ṭuau a, a taksa ka sikna chuan ka rilru a tino vekin ka hria.




"Hei, min en teh" tiin a âwm aṭanga chuan min nam sawn a, nui sukin ka mittui te chu a hru mawlh mawlh a, hlauhthawnna rilru ka neih laia min la nuih suk thei chu mak ka ti a ni.




"I ngaihtuahna a kal sual nasa lutuk a nih khâ, naktuk zanah kan lo leng leh dawn alawm, zanin kha chu keima thiam loh dik tak a nih kha!" dam tak hian a rawn ti a, chutah kei chuan




"Enge i thiam lohna? Enge i thiam lohna awm? Enge i tihsual? Tihsual i nei miah lo, ka pa awm dan khan min tilungawi thlawt lo" ka lo ti nghal zung zung a, ka aw pawh ṭap zo hlim ka nih avangin a la phelh phung.




"Ka tihsual chu maw i pa beng hriata ka hmangaih che thu ka sawi lo kha a ni, chuan i pa ngaih dan tur pawh ka hriatthiampui khawp mai. Ka lo ngaihtuah tawi mah mah ṭhin a, naktuk zanah chuan engkim a kal dik vek tawh ang" nui suk hian a rawn ti leh a, kei erawh ka lung a la awi famkim thei lo.




"Engatinge ka pa hian i vawi khat dilnaah hian a phal ngai miah lo le? Ka ning tlat, in bula awm thuai thuai ka châk tawh bawk si" ka tih chuan a rawn nui ri ta hawk a, fiamthu ka thawh pawh ka hre chai si lo.




"I châk ve lo em ni? In bula ka lo awm thuai thuai i duh ve miah lo em ni? Min lo hmangaih ve tak tak lo a nih dawn hi! Min thlahlel lo bik thei em mai, ka lut dawn" tia ka kal sawn tur chu min pawt let chiang kher mai.




"Thil ho tê teah hian titau ṭhin lo la, puitling i nih tawh hî, puitling mahni pate hnena pasal dil ngam rual ngat!" a rawn ti deuh kher a, a thusawi duh dan vel chu haw tak ka ni.




"I chhe vel e a! In inthlahrun lutuk ka hlauh avangin ka ṭawng ve em em a, nang lah chuan min tih letna'n leh fiamthu atan min hmang mai mai a, ka" ka hmui taka a rawn fawh thut avang chuan ṭawng pawh ka ṭawng zawm thei lo, zei taka min fawh ngawng ngawng hnu chuan ka lo chhang let ve leh ta nge nge.




"Duhawm nu, i vun a nalh si, i taksa chhungah hian ka lut châk tawh khawp mai" kan infawh zawh chuan nui ri suk pah hian a rawn ti sup a, a thusawi zawh chiah avang chuan ka sa chhuak vekin ka hria.




"Thlawi Senior, Hura, ka lut dawn, min thlah teh" tiin ka tal laih laih a, min thlah ve leh mai bawk. Thui pawh ka kal hmain ka mawngah tak chuan a rawn beng ri thlawrh a, ka hawi let rang teh e!




"Engatinge ka mawng kha i ben kher a Pathlawi? Khatiang ti rual pawh i ni tawh lo, Thlawi Senior pa" rum taka melh chung chuan ka ti a, ani erawh a dinna ngaia la ding rengin a nui ri hawk thung. A kut chuan lut turin min ti a, lut suh pawh ti se ka luh dawn chiang vai vai nen.





In chhunga ka luh chuan tûmah pawh be lovin ka room-ah ka lut nghal hmak a, ka chhungte chuan min lo ngai tak tak lovin ka hria. Mizoram pawna ka awm lai te kha chuan min ngai awm takin min lo be chhen a, haw tur te khan min ti chhen a, tunah lem kan inhmu ta cheng a, min lo ngaih hmel leh vak lo.





Pakhatah chuan ka mi hruai luh te khan an rilru zawng zawng a la peng tih pawh ka hria, chutiang bawkin kei pawh zanin la lâa sawi fel ka duh chu a theih leh si loh avangin ka lunghnur a ni.





Ka khuma ka mut hnu pawh chuan tûmah ka room-ah an lo lut lo va, ka nu tak ngial pawh. Mizorama ka haw ni te a ni ve a, pakhat tal chuan min lo kal chilh ka ring asin le.




Zing lah chu ka tho nuam phian a, mumang pawh nei chuang lovin ka muttui khawp mai. Tukṭhuan kan ei laiin ka pa chuan min zilh ta hrep a, chaw kan ei chhung zawngin a sermon tluan zak! Henry-a te in lama phei a phal lo leh ta zel a, a chhan ka zawh lahin





"Mipa a ni a, amah zawk a rawn che hmasa tawh tur a ni. A hma ang khan va leng phei dâw daw tawh lo la, hmangaih mah la nupa in la ni lo tlat" a ti hmak a, zan lama ka chet dan mawlh chu a sawi tawp thei lo.





Henry-a ni lova keima'n pasal neih ka dil ngawt chu a helh teh tlat a, a sawi dan kalhmang chu a dik ka ti hnuhnawh ve leh ta tho.




Mipa zawkin nupui neih an dil laia kei a hmeichhia zawkin pasal neih ka dil hmiah kha chu a mawi lo ve deuh tih ka hrethiam ve ta mai a, Sermon min pe ṭeuh lo se chuan ka hriatthiam pawh ka ring leh ta chuang lo.



Zirna lamah hlawhtlinna changin puitling tak emaw inti tawh mah ila nu leh pate hi chu kan la tluk thei lo, tluk tum mah ila kan tluk thei ngai chuang lo vang tih ka hriat phah ta bawk.




Ka pa berin Henry-a chu be hmasa miah lo turin min ti a, mahse ka pasal atana a duh loh thu leh a pawm loh thu a sawi tawh miah lo. Ka tihtur hre lo chuan Engzuali ka be leh tawp a, Aizawla ka awm tawh thu ka hrilh chuan lo zin thlak a tum hnaih thu min hrilh ve nghal. Mo ṭhiana sawm chu ka tum deuh ûk a, mahse pasal ka nei dawn em tih a la chian loh avangin ka sawm leh ta lo.





Ni lengin Henry-a te pafa chuan thawm an rawn nei lo va, phone kaltlang tal pawhin min rawn be eih lo. Ka thin chu a rim ru ṭun a, min lo biak ve em em ka ring kha a nia, ka ring sual chiang hle mai.




Zan lamah erawh an rawn lang ve ta hram a, ka pa chuan Junior-a nen ka room-a awm turin min ti leh ta tlat. An inbiak dan vel hre châk hle mah ila room-ah chuan ka awm ta tho a, an thusawi ngaihthlak ruk chu châk tak ka ni.




Darkar 1 leh a chanve vel ka room chhunga kan awm hnu chuan Peksanga'n min lo ko a, Junior-a chu ka chhuahpui rang kher mai.



Sitting room-a kan ṭhut ṭhap hnu chuan Henry-a hmel chu ka en a, a lo kun deuh ngul bawk sia ka pa chuan kan inneih a phal lo a nih ngei ka ring.




Ka pa lam ka hawi lahin a lo meng rum nasa mai bawk si, chutiang bawkin ka nu leh Peksang pawh an ngawi dâk a, ka hlauthawng ru tawh hle.




"Kan va haw ang e" tiin Henry-a chu a rawn ṭawng chhuak a, a ṭhutna aṭangin a ding zui nghal bawk. A pa ber a din avang chuan Junior-a pawh a ding ve nghal a, a pa bulah chuan a phei zui ta daih.




"Ka pa, thil awmzia tal min hrilh ve ula. Room-ah min tawm tir char char a, kan rawn chhuah veleh in ngawi leh ṭhap bawk si, ka awm in tinuam lo" ding chung chuan ka ti a, min la chhang lawk duh lo leh nghal.




"Khatia ṭe ṭe lo khan Henry-a te pafa kha va thlah rawh, nui nang thingpui min lo lum teh, ka in châk riau mai" ka zawhna pawh chhang lovin ka pa chuan a rawn ti daih a, ka nu pawh thingpui lum turin a tho zui nghal.




"Min lo thlah dawn em?" Henry-a'n a rawn tih chuan titau titihin pawn lam chu ka pan hmawk hmawk a, ka chet dan chu naupang chhia viau mahse ka thin a rim tlat a tin ni!




Pawn ka thlen chuan motor nghengin ka ding a, rei lovah Henry-a leh Junior-a hmel pawh ka hmu nghal. Ngawi reng hian motor lama an lo kal chu ka lo en ran a, Henry-a awm dan avang chuan ka pa'n kan inneih a phal reng ka ring tawh lo.




"Henry, engatinge i ngui hmel em em a? Ka pa khan kan inneih a phal lo ti raw? Ngawi reng lo khan min hrilh teh, eng vangin nge ka pa chuan a phal loh? Eng thil chiah nge a duh? Pathlawi i nih avang hian a duh lo che em ni? Ka pa chu âw, a ti mak thei ê, vawiin nileng paw'n a duh loh thu che a sawi miah si lo" ka ṭawng tawp lamah chuan amah pawh ka en tawh lo, van lam chu ka en daih.




"A pawi ka ti Hlute, kum thum liam taa i chunga ka chet dan avang khan min la ngaidam thei lo va, chuvang chuan nupuia ka neih che hi i pa chuan a phal lo a ni" a rawn ti thawp sup a, ka rilru a nat lutuk avangin ka mittui chu a rawn baw nghal zawih.




"Hei i ṭap maw!? Lo kal teh" tia min lo kuah a tum chuan ka tawlh sawn vat a, anmahni pawh ngaihsak tawh lovin thinrim tak chuan kan in lam ka pan a, ka pa ngaihdan leh rorel dan chu a dikin ka hre lo.




"Ka pa! Enge i hriat a? I sual em mai, Henry-a hi ka thinlung zawng zawngin ka hmangaih asin, engatinge kan inneih hi i phal loh kher? Tu paw'n thil chu kan tisual thei alawm, mahse thil kan tihsual avangin kan sual tihna a ni kher lo" sitting room ka thlen rual chuan ka ti nghal pawp pawp a, min lo nuih vak vak avang chuan ka thin a rim zual.




"LALPEKSANG, phone kha dah nghal rawh, mi thinrim lai lai a!" tiin ka Chapal chuan ka vawm zui nghal chawrh a, kawngka lam aṭanga nui thawm a rawn awm avang chuan ka hawi let chiang hle.




"Ṭawngthei kawlh em em nu, kan Prank che a nih khâ, London laia zu kal ve tawh si mi kutthlak i la sim lo tluang zel a nih dawn hi!" Peksanga'n a rawn tih chuan ka ngawi ta hmak.




Ka en kual hlawm diat diat a, an lo nuih vek avang chuan ka thin a rim thar leh ta. Kawngka lam chu panin Henry Pathlawia bulah chuan ka va ding a, thinrim tak hian




"Mawla, eng vangin nge dawt min hrilh a? Ka hlauhthawn hmanzia kha i hre lo em ni? Ka rilru a nat hmanzia te kha i hre lo em ni? Thlawia, Thlawi Senior, ka ngei lutuk che, hmuh pawh ka hmu peih rih lo che, va haw rawh" ka ti phiar phiar a, inherin ka room chu ka pan zui nghal hmawk hmawk.




"Henry-a saw dem viau suh Hlute, a sawi dan tur zawng zawng pawh kan By Heart chawp tir vek a nih kha âw, ani te chuan dawt hrilh che kha a hreh lutuk. Engkim hi i pa ruahmanna a ni tih hria la, kei leh Peksanga chu kan tel ve miah lo" sitting room ka kal pel dawn lai taka ka nu'n a rawn tih avang chuan ka ding chiang hle.




"I nei duh tak tak ang maw Henry? Hetianga titau rual mai hi a la nia, i duh chuan i thutlukna kha sut leh daih rawh" min en miah lo hian ka pa chuan a rawn ti ve nghal a, ka zahna leh ka thinrimna chu a inzat vel ang.




"I pasal ber tur kum ka ngaihtuah sawn a hmanhmawh thlak dawn riauvin ka hria a, tun kara man hlanna neih mai pawh pawi kan ti ta lo a ni. Nang lah i hmanhmawh bawk si, i pasal tur lah chuan min dil ngawrh bawk si, phal vak lo chungin in inneih chu ka phal ta mai a nih kha!" nui sun suna ka pa'n a rawn tih leh chuan




"Ka pa! I lo nghal hle mai" ti vakin ka kal sawn hmawk hmawk a, room chhung ka luh chuan ka inkalh khum nghal hmak. Junior-a a awm ve reng avanga zak ka ni a, a pa lel lulin dawt min hrilh avanga thinrim ka ni bawk.



________________________________________________________



ADS CLICK MIN THEIHNGHILH SAK LO LA, LIKE LA PE VE LO TE'N UAR ZUAL ANG AW, COMMENT ṬHEUH KAN TUM TLANG LEH VEK DAWN NIA


COMMENT NA LINK


https://www.facebook.com/groups/9913546 ... 208808767/


THANK YOU