LALRINCHHANA HAUHNAR By Havali Adam (COMPLETED)

[Havali Adam]

LALRINCHHANA HAUHNAR

By

Havali Adam





Last Chapter 7





Dar 4 leh a chanve dâwnah daih Hminga leh Rengtei an lo haw a, in an lo thlen hnu lawkah Doro-i a lo haw ve bawk a, mahse ani chu tlai dang zawng aiin a lo haw hma thung. Tlai dangah te chuan dar 5-ah emaw a pelh hret emaw velah a lo haw ṭhin tlangpui a, a hnathawh vang a ni miau a, keini unau paw'n kan hrethiam khawp. A lo haw hi chuan min pui nghal sawk sawk zel a, vawiin tlai pawh tlai dang ang chiahin a che nghal zung zung a, pa Rinchhana a be leh zeuh ṭhin bawk. Ani ren run lah hi û ka'n tum ve ngawt kha a nia, ka thei der lo. Ama bulah pawh ka sawi tawh nghe nghe a, ka koh ṭhan dan ngaia koh zawm zel chu pawi a tih loh thu a sawi ve mai a, nuam ti vak lo chungin ka ko leh ta tawp. Kan awm dun lai te, ka nau leh ṭhiante nena kan awmho lai te hi chuan nuam lo tihna ka nei em em lo, mi dang bulah erawh ka pasal tur êm han 'pa' deuh tawp chu nuam lo ka ti ve reng, a bikin a chhungte hriat laia 'pa Rinchhan' tih ka huphurh ru khawp.




Mi dang lo haw hmaa kan awm dan avang chuan ka ṭi deuh tlat leh ta nghal a, thil ti ru ang maiin ka awm a, ka awm dan vel chu pa Rinchhana chuan a hriatthiam viau ka ring. Zanriah kan ei a, ei pawh ka ei tui lo. Nupa nih hmaa kan lo che sual hman thawt thawt chu pawi ka ti tawlh tawlh a, a lan chhuah hun a la awm ngei dawn a, chumi hun chu ka huphurh a ni. Hmeichhia zawk ka ni a, ka hmingchhe nasa khawp ang. Dan tumna tal kha lo nei ila zawng min chet sualpui kher lo ang maw le, kei lah chuan ka mamawh ngawih ngawih zawk a nih kha! Hmeichhe hur her tak angin ka inchan dawn a, ka thei thlawt lo. A chhan chu ka hmangaih tlat alawm, ka pasal ni mai tawh tur leh ka mipa hmangaih em em nen hmangaihna kan chen dun a, hmeichhe hur her tak anga inngaih ngawt zawng a dik bik chiah lo, ka hmangaih miah loh mipa dangte chu ni se ka dang hrim hrim ang.




Pa Rinchhana chu a lêng tlang nghal a, pangngai taka a awm thei bik chu ka awt ru ngei mai. Engmah thleng lo ang mai hian a awm a, Hminga biakna a chhang a, Rengtei leh Doro-i biakna chenin a chhang ṭha em em a, keimah zawk ka dik hlei thei tlat lo a ni. A haw dawn chuan pawn thleng ka thlah a, zan dang ang bawkin min fawp a, ka tel lova awm thei lo ang maia a awm ṭhin chu ka rilru tihlim em em tu pakhat a ni chiang a ni. Pangngai taka awm tur leh ka thiam loh a awm loh thu sawiin a tlan liam a, a sawi chu rin tawp ka duh a, ka tum bawk, mahse chuti maiin ka rilru a dik thei chuang lo. Pangngai tak paw'n ka awm phah lem lo va, mahse min thlamuanna thu hriat hrim hrim chu a hahdamthlak ka ti tho tho.




A tuk zingah chuan hna kal turin min lo lam leh thlap a, engmah kan sawi tawh miah lo bawk. Ni dang ang lo zetin a nui hmel ka hmu reng a, mahse nui vur vur ang hi a ni ve lo. A nui tawi suk suk a, a nuih nghawr dat te hian inhmeh ka ti em em tawh, amah hi a mipa bik ngawih ngawih a ni. Ka bianga a fawh te hian ka nilêng hun hman a nuam vek zel, awlsam taka min tihlimtu leh ka nun thlamuang taka siamtu a ni ka ti lo thei lo. Hmun khatah awm dun reng mah ila kan inhmu mang lo va, bân dawnah kan inhmu ve chauh a, chu pawh tlai tin min hruai haw ṭhin lo se chu kan inhmu lo mai thei zawk a ni. Kan in kawt kan thleng a, zana lo lên a tum thu sawiin a tlan liam nghal a, in chhung ka luh aṭanga rei lo tê hnuah ei rawng ka bâwl zui nghal bawk.




Kan chet sual tlai aṭang chuan ka chik ru reng a, a hlim tawlh tawlh ni ber hian ka hria. Zanah a lo lêng ziah a, in a thlenin min be ziah a, min ngaihtuah mah mah ṭhin zawk a ni. Thla thar kan chuangkâi a, an ina zanriah ei turin min sâwm leh ta, tun ṭum erawh eng nge a chhan ber ka hre lo, ka 'aw' ve hmiah a, a hma zawnga ei ngam ngai lo leh mahni insit em em ṭhin kha ka ni tawh miah lo. Ka chapo ta viau e tihna pawh a ni chuang lo, ka inring tâwk ti ila a sual lo ber ang. Inrinni zana ei turin thutlukna ka siam fel a, ka naute pawh ka hrilh a, Doro-i phei chuan mo interview treat deuh reuh hian min treat a, min chhaih sék a, pa Rinchhana tak ngial pawh a nui tawp ringawt zel.




Ní a'n ral a, inrinni chu a rawn thleng thut ka ti mai, hun a kal chak ka ti hle bawk. Chawhma chu ka awm mai mai a, awm mai mai tih lemah ka insiam pah reng a ni zawk. A hun a rawn thlen hma te kha chuan ka inrin tâwk ve tehreng nen a hun a rawn thleng ta chèng a, ka zâm ru leh tlat tawh. Chhun thil kan ei laiin a lo kal a, ei ve nghal turin ka sâwm a, a duh lo thung. Ka insiam chhung zawng min nghak a, phei hma a ngaih loh thu min hrilh lâwk tawh avangin ka insiam hmanhmawh hran lo. Dar 3 leh a chanve velah kan chhuak a, muangchang hian kan tlan a, an in kawt kan thlen chuan zâm ru tak ka ni. Ka vawi hnih kalna chauh a la ni a, an hausa si, fel em em mah se keini ve mai tan chuan an zahawm ngawih ngawih.




A chhungte chuan mi tihtlângnel tum zet hian min lo be siam siam a, kei paw'n hawihhawm takin ka chhang ve zel a, pa Rinchhana chuan min ngaihtuah hle bawk. Kan unau chanchinte min zawt a, ka hnathawh nen lam ṭha takin ka chhang ve zel a, an fapa nuipui atan min duh lo ang tih ka hlau ta ber. Hlim tlâng takin zanriah kan ei a, kan ei hma khawp mai. Chawhmeh pawh ka suak mang lo, anmahni zawkin min suahsak deuh char char a, an awmpuinu chuan min vil tawp hi a ni mai. An chaw ni se puar a awl si, vawi tam min khawrh hman lo, ka rin ai ka puar hma daih. Chaw kan ei kham chu ka ni deuh ùl a, ka puar êm bawk a ni.




"Ka nu ka pa, thil sawi duh ka nei" pa Rinchhana chu kan en ṭhap a, sitting room-ah thei rah eiin kan ṭhu ṭhap a, kan kim viau bawk.



"Dampuii hi ka ngaihzawng ni mêk a ni a, in hre ru tho mai thei, kei hian nupuia neih ka duh a ni" dam deuh, nghet charh si hian a ti thum dap a, pu Zawnga hmela mak tihna chu ka hmuh hmaih lo chiang khawp mai.



"I ti tak tak em ni Rina? Puii nen hian in inngaizawng maw!? Zan tin deuh thaw i chhuak ṭhin tih chu ka hre ngei a, ngaihzawng pawh i neih ka ring, mahse Puii teh daih nena in inngaizawng hi awih a va harsa ve" pi Masiami zawk chuan a lo ti nghal a, a nuam em em hran miah lo.



"Puii hi nupuia neih ngei ngei ka tum tih min hriatpui ula ka duh, kan che sual tawh bawk" pa Rinchhana chuan a ti tlang leh ta pawp a, ka hawi chhuak ngam rih lo, en ber pawh ka nei chuang lo, awm dan tur hre lovin ka ṭhu ngawi tawp ringawt.



"Chuti ang thleng thleng chu in lo kal tawh a ni maw Rina, i mizia en chuan chuti ang tiawm i ni ngai bawk si lo va, a va mak zung zung ve le" pu Zawnga chu a rawn ṭawng chhuak ta nge nge e!



"Ka insum thei hleinem, ka nu ai chuan min hriatthiam zawk ka ring" pa Rinchhana chhan dan avang chuan ka zahna a zual a, ka zâmna a zual bawk a, ka thin phu dawt dawt ri te chu an hre pha hial ang ka ring.



"Hriatthiam loh theih pawh i ni nâng, i nau lah hian a nuihzat viau che a nih hmel" nui ri hak chunga titu pu Zawnga lam chu ka hawi zawk a, pa Sawma lam ka hawi leh a, a lo nui tak tak!



"Nangmah ngaihtuah chuan ka awih lo rum rum dawn che alawm, i thutak viau leh nghal. Nupui neih nawmzia ka awm dan aṭangin i hre tawh a, ka dem hran lo che a nia" nui var var pah hian pa Sawma chuan a ti a, pa Rinchhana pawh a nui tawi tak a, mahse a nuih a zat hmel em em hran lo.



"Ngawi teh u, i thusawi zawng zawng hian min ṭhawng hle mai Rina. Puii hi nupui atan i duh tak tak maw!? In lo che sual tawh leh nghal a, engtia rei nge in inngaihzawn tawh? Puii, Rina hi i duh ve hrim hrim em ni?" pi Masiami ṭhutna lam chu hawi ngei ngei a ngai ta.



"Ka nu, i zawhna kha zawhna ho tak a ni. Min duh lo se ka ngaihzawng ka ti lo ang, a zakzum zêk a nia" pa Rinchhana zawkin min ṭawng khalh a, chutah pi Masiami bawk chuan



"Lo ngawi rih teh Rina, nang ka be lo che" a ti deuh fak a, ka chil ka lem khawlh a, eng pawh ni se dawt tel miah lova ka chhan a ngaiin ka hria.



"Eng lo, ka duh alawm, ka sawi awmzia chu pa Rinchhana hi ka duh, ka hmangaih bawk. Keini unau tan chuan vantirhkoh a ni a, ka tan ngat phei chuan sawisel bo a ni" bahlah miah lovin ka ti a, min va han en chik hlawm mai mai tak!



"Pa Rinchhana a!? U Rin, chuti anga koh chu i duh reng reng em ni?" pa Sawma chu nui kur kur chung hian a lo ṭawng chhuak hmasa ber a, an awm dan chu ka hrethiam hlawm lo, mood hran veka cheng an ang ber.



"Min ko ve ringawt lo ang che, phal chin ka nei a, duh bik ka nei bawk" tiin pa Rinchhana chuan a nau chu a chhang lêt deuh hmuk a, pa Sawma mai ni lo a nupui chenin an nuih a zat hmel hle.



"Awi kei chu a! In mak teh thut êm mai, kan rin loh lutuk nen in lo inngaizawng reng a, nupui atan hial i duh a, i hmangaih ve àwm ngei chu a ni si a, min ṭhawng lutuk hi awm dan ka hre rih mai lo" pi Masiami chuan a ti a, a sawi dik ka ring, a hamhaih hmel tak tak!



"In zavaia hriatthiamna ka dil e, pa Rinchhana hi ka phu hlawl lo tih pawh ka hria, zak lo ka inti bawk. Amaherawhchu ka hmangaih tlat a, ka thunun theih piah lam thil a ni a, ni lo se chu heti ang hian thu thin ṭhawng tak in hre miah lo ang" ka sawi zawh rualin ka bula mi chuan



"Khati ang thu kha sawi a ngai hauh lo, inhmuh hniamna rilru pu suh" a rawn ti nghet charh a, chiang zet hian min melh chhuk run bawk.



"Ni e Puii, chhungkaw dinhmun lam chu dah ṭha rih phawt teh ang u. Kan tlangval neih chhun, ni leh lo, kan pathlawia hian a duh miau bawk si che a, nang eng nge i ngaihdan Masiam?" tiin pu Zawnga chuan a nupui lam a hawi zawm zat a, ka thin phu a pangngai tak tak thei rih lo.



"Tunah chuan ka hrethiam rih lo, min hrethiam dawn nia Puii, ka fapa nupui atan hian ka duh loh vang che pawh a ni lo, inngaihtuahna hun ka mamawh zawk a ni" pi Masiami chu a tho zui nghal daih a, room pakhatah a lut daih bawk.



"Nuam lo ti mah ta che Puii, Masiami te zawng a fapa nupui turah a buai lo tawp ang. A hmasaah khan Rina hian a lo tisual tawh khanglang bawk si a, a hlauthawng mai chauh a nih kha!" hriat nuam deuhin pu Zawnga chuan a lo ti a, ka awm dan aṭangin a hrethiam vek a ni ngei ang.



"Haw i duh hunah ka thlah dawn che a nia, nge in ina va awm mai mai i duh zawk em?" ti suptu chu pa Rinchhana a ni a, mahse pa Sawma chuan



"Ringawt a! Kan mo thar tur te chu kan belchiang ve châk alawm le, khati angin thlah lam la sawi ri rih suh" a rawn ti thuai thuai a, pu Zawnga a lo nui huah huah a, za em em lovin ka nui ve tawp ringawt.



"A teuh lo, nanga bawl mai mai turin ka lo hruai hleinem" ti deuh nghutin pa Rinchhana chuan min kai tho va, kawngkapui lam min pan pui laiin pu Zawnga chuan nui hek hek chung hian



"Rina tak hi chu âw, fimkhur ula, che sual nawn tawh rih s'u aw" a ti zui lang lâng a, a thusawi tawp ber chuan min tizak chem chem thei hial.



"Ka nu awm dan avang khan lungngai lo la, engkim a ṭha vek mai ang" motor-a kan chùan luh hnu chuan a ti sup a, ka kut la kángin a fawp zeuh bawk a, a thusawi leh a chet dan chuan ka awm a tinuam ru viau tho.



"Ka thû thua awm i ang ê pa Rinchhan, min ngaihtuah leh lutuk a, i chhungte khan ngaihdan min nei hrim hrim" kan tlan chhuah hnua ka tih chuan



"Nei ve bawk ang chú, ka nupui tur leh kan ina mo ni mai tur kha i ni miau a, an khel nasa khawp ang che" a rawn ti awlsam thán a, ṭawng tawh lovin ka ngawi zui ta daih.




Kan in kawt kan thleng a, in chhung kan lut chu min lo be nghal bawrh bawrh a, zawhna pawh ka dawng tam mawlh mawlh hle. Rengtein thingpui lúm a tum a, keimah zawk ka che chhuak a, a chhan chu pa Rinchhana ka ngaihtuah thlen vang a ni. Thla eng emaw zah chu kan inngaizawng ve tawh, mahse ka thingpui lúm leh siamsak chauh lo chu a la in duh lo tluang zel a, an inah pawh a in tur chu ama'n a siam hrang bik ṭhin hial a, min hrilh lo se chu ka hre kher lo ang. Eng vanga ka siam kher in duh ṭhin nge a nih ka hre lo, kawng leh lam zawng tak chuan min tihlim lawi a, mi dang hmai zah avangin nuam lo ti ru fô ṭhin mah ila nuam tihna chen ka nei tlat tho a ni.




"Dampuii nen hian kan innei ngei dawn a, nangni pawh kan bulah in awm ang. Inthlahrung lo ula, Dampuii nen kan inneih hnuah phei chuan chhungkhat kan ni tawh dawn a, in mamawh apiang min dil hreh lo ang che u" ti thum bul bultu chu ka en kar a, kan tan hi chuan thlamuantu hi a va'n ni chiang tak!



"Dorothy-i pawh i bang chuang lo a nia, ka en hrang hauh lo che" a tih zawm leh nghal a, Doro-i chuan nui ver ver hian a bân bulah a chum a, chhan erawh a chhang chuang lo.



"Kha u le" tiin thingpui chu ka chawi phei a, an lo ban sap sap a, Hminga chuan thil dang sawiin eng eng emaw ni an sawi chhunzawm bawk a, thisena inzawm ang mai kan ni tawhin ka hria.



Dar 10 rik dâwn chuan pa Rinchhanan haw a rawt a, a ding ûaih a, pawn thleng thlah turin ka chhuak bawk.



"Ka pate remtihna ka hmuh veleh palai ka rawn tir nghal dawn a nia, ka nupui ni thuai la ka duh" inkuah riala kan awm laiin a ti a, ngheng ar âr pah hian



"I hmanhmawh leh lutuk lo mâw? Eng lo, ka duh dan tak chuan Rengtei leh Hminga hian Matric Exam zo phawt se ka duh deuh a, i ngaihdan erawh ka hre chuang miah lo, ka hnial che tihna a ni lo a nia" ka ti ve sep a, min chhan ka rin nen a ngawi ta reng mai.



"Thil dang daih, Pathianin rem a tiha i chhungte duh zawng ka nih hlauh chuan kan innei tawh dawn tho va, engtin nge pathlawi i nih a? Ka sawi tum tak chu i pa khan i nih rei loh thu a sawi lang zel sia, ka hre châk, mahse ka zawt ngam ngai lo che a, tunah chuan ka ngam tawh thung" ka ti leh niah niah a, chu chu ka thil hriat châk tak pakhat a ni.




"Khang hun lai kha chuan ka la naupang, Delhi-a lehkha ka zir lai a ni a, min zui haw tlat bawk si, inru ang chu kan ni mai a, kei phei chuan duhna chhetê mah ka nei lo. Amah zawk khan min duh a, ka ṭhiante zinga mi chu a ni ngei a, mahse khati ang rilru kha a put ka ring ngai lo, sex pawh kan hmang hman lo hrim hrim, kan inṭhaṭhen leh tawp ringawt" a tih ve lûam chuan



"A va ti ho ve le, pathlawi virgin-ah a siam ringawt che alawm" ka ti a, ka nui ver ver a, chutah ka rin loh lutuk hian



"Ka virgin tawh hleinem, nang lo hmeichhe dang mutpui ka nei tawh, nang i ni a, engmah ka zep lo ang. Rilru dang daih kha i lo pu leh hman ang e, ka hmeichhe hmangaih ber i ni a, hmangaihna a tel vang a ni mahna kan chet sual tlai khan ka insum theihna zawng zawng i tichhe vek a ni" a rawn ti daih thung a, ka rilruah thil a inawm pawlh nuaih mai.



"A dik ka ring, pathlawi chu an luck an ti zel" ka ti sep a, chu chu ka sawi tum ber pawh a ni hauh lo, nui nghawr dat dat pah hian



"Eng thu maw i sawi reuh a!? Han sawi nawn leh teh!" tiin a lam hawi zawng chuan min kuai dâk a, ka hawi sawn vat a, ka sawi nawn tawh lo chiang hle.



"Nupa kan nih hunah chuan ka duat ngawt ang che, ka rilru i luah hneh lutuk avangin mut theih loh châng ka ngah ṭhin asin" a rawn ti leh a, rilru chhungril hlim veng vengin ka melh chho ral a, hmangaih loh a va'n harsa ṭhin tak êm.



"Min duat hun ka thlahlel tawh, kan inneih hun chu ngaihtuah ṭha leh rawh aw, kumin chu a tlai tawh mah mah ka ti ê. Kum thar lamah ni zawk se, Rengtei leh Hmingate Exam zawh lai velin" ka tih chuan



"Ka lo ngaihtuah dawn a nia, kan pahnih tan mai ni lo i unaute tan pawha ṭha ber tur ka ngaihtuah ang" a ti thum chhal a, nghet deuh, ka nât hlau deuh si hian min kuah a, a taksa lúm nuam lutuk chuan ka mut a tichhuak vek dawn alawm le.




A tlan liam thlengin ka thlir zui vawng vawng a, zanin chu zan dang ang lo takin keimah zawkin ka en liam a, engkima min dawm thiam lutuk hi ka hmangaihna tizualtu pakhat chu a ni chiang a ni. A tukah chuan hna kal turin min rawn lam a, kan kal dun ngun tawh tehreng nen ngaiah ka nei thei lo, amah hrim hrim hi ngaiah ka nei thei lo zawk. Keimah tak phei chuan pawi ka ti teuh lo, a hmel ka hmu hne lo te, a rim ka hre hne lo te, ka thlahlel ru em em zel te hi ka lawm a ni. Chhun thil ei laiin pi Masiami hnen aṭang phone call ka dawng a, ka zâm nghal vek thei. Rei pawh kan inbe lo, hriat nuam tak hian min hmuh a duh thu a sawi a, pa Rinchhana hrilh lovin ka chhuak a, ka hrilh a nih chuan min hruai a tum leh emaw kha a ni ang a, a buaina tur ni miah lovah ka ti buai mai mai.




"Lo kal rawh Puii, thingpui in ang aw, i inei puar tawh em?" in chhung ka luh rualin pi Masiami chuan a lo ti zung zung a, ngainatawm tak hian min lo chháwn a, pa Sawma nupui a awm ve bawk.



"Ka inei puar tawh e" tih bakin ka chhang lo va, ka zâm hi chuan sawi tur ka haihchham ṭhin.




"Thil sawipui che ka duh a, nizana ka awm dan avang khan min hrethiam hram dawn a nia, ka rilru kha a fim thei mai lo alawm maw le. A pa nen tukin khan kan sawi dun a, keini lamah chuan harsatna a awm hran lo, mahse kan fapa hi pasal atan i duh tak tak ang maw? Chu chu kan buaina ber a ni zawk, in inṭhen leh ang tih kan hlau a ni" a tih chuan thawk leh khatah ka zâm rukna zawng zawng a reh vekin ka hria.



"Pa Rinchhana hi ka hmangaih alawm pi Masiam, ka hrethiam bik lo, engtik lai khan nge ka hmangaih pawh ka hre chuang lo, ka phu lohzia hre reng chungin pasal atana neih ka thlang ta a ni" ka tih chuan



"Amah zawk hian alawm phu lo che chu le, ani te chu pathlawi a ni leh nghal, mahse a pathlawi nih dan kha chu i hriat tawh tho ka ring. Pathlawi a ni chiah kha chu veng chhungah a lar si, a nau phei chuan a fiam reng mai" a ti siam siam a, a nui var var bawk.



"Thingpui chu tui i ti na nge?" kun deuh ngula ka awm laiin pa Sawma nupui chuan a lo ti thuai a, ka awm dan chu ka hrethiam lo, bawnghnute rim nge thil thlum rim emaw ni zawk chuan ka luak pawt tlat.



"Ni lo, tui ti e, tui ka ti alawm" tiin in luih ka'n tum ngial a, ka no ken chhungah chuan ka phuh ṭhawt a, an mitmei pawh veng hman lovin thleng silna lamah ka tlan phei nghal a, tlêm tê bak ka luak hauh lo.



"I dam lo em ni?" pa Sawma nupui zawk chuan a rawn ti a, ka chal dawm pah hian min en reng a, min ngaihtuah hle tih pawh ka hria.



"Puii, nang hi, ka hre sual te a nih loh chuan i rai ka ring, in chet sual aṭang thla a liam tawh em?" pi Masiami thusawi avang chuan ka harh kawk thei alawm le.



"Ni tak! U Rina nen in che sual tawh a ni lo'm ni? Awi! A ni hrim hrim ka nu, kei pawh kha ka rai lai khan thingpui hi ka ngaithei lo ṭhin, i awm dan vel hi i rai chiang mai Puii" ti lawm lâwmtu pa Sawma nupui chu ka en a, nui ver ver hian min en a, kei erawh ka nuih a za lo hle.



"Hospital-ah va kalpui chhin teh Dini, Pregnancy Test Kit lei nghal bawk ula, a nih loh paw'n Doctor-in a nei tho ang" tih leh pi Masiami chuan min kaih a rual a, ka nawmsam leh sam loh pawh a ngaihtuah tawh lo a ni ber.



"Ka rai kher lo mai thei asin" ka tih pawh chuan an awih teuh lo, pa Rinchhana nen kan chet sual aṭangin thla khat chu a liam var var tawh ngei a, ka la period lo ngei bawk a, ka bula mite pahnih awm dan avang chuan ka rai ka ring ve ta ringawt.



"Scooty hian inphur phei ula, chanchin min lo hrilh leh vat ang che u" ti mawlh mawlhin pi Masiami bawk chuan pa Sawma nupui chu a hrilh a, ka ngaihtuahna an hruai pêng hneh lutuk a, ka luak chhuak zawng zawng pawh a reh fel vek tawh.




Hospital lam pana kan inphur phei lai chuan min be char char a, a rul tâwk chiah chiah hian ka chhang thung a, ka rilru a pangngai tial tial bawk. Hospital chu kan va thleng a, luh nghal mai theih turah ka ngai ngawt pek a, a lo ni lo nasa mai. Inentir tur an lo ṭhu ṭhap a, a ṭhen chu kum upa ve tawh tak tak te an ni hlawm a, keini paw'n kan nghak a, a hnung ber kan ni nghe nghe. Dar 1 dâwna chhuak kha dar 2 rik dâwnah kan lut thei chauh a, Doctor chuan test min neih tir neuh neuh a, ka lo rai ngei e. Thla hnih a la tling lo deuh a, dik tak chuan ka hlim a ni. Ka rilru chhungril a lawm veng veng a, pa Sawma nupui u Dini paw'n min lawmpui khawp.




"U Rina engmah la hrilh suh, i ṭhawng thut dawn a nia, inah haw leh phawt ang, ka nu pawh phone kaltlangin ka la hrilh dawn rih lo" a ti siam siam a, ka mipa hmangaih ber fa ka pai tih ka hre chiah bawk nen ka hlim lutuk chu ka nui tawp ringawt.




In kan va thleng a, pi Masiamin ka rai tih a hre chiah chu lawm tak a ni. An awm dan chu ka hrethiam lo, chuti ang em ema an lawm ka ring lo bawk. Pu Zawnga phone-a biain ka chanchin a hrilh nghal mawlh mawlh a, pa Sawma pawh u Dinin a hrilh ve nghal bawk a, pa Rinchhana leh ka chhungte erawh keima kutah an dah thung. A tir kha chuan hamhaih luatah ka lawm em em miah lo, mahse nu ka ni tawh tur te, fa ka nei ve mai tawh tur te chu ka ngaihtuah chiang a, ka lawm a ni. Dawrah ka lêt leh a, pa Rinchhana chu a office-ah a la ṭhu reng a, a fa ka pai mêk tih a hriat hunah chuan engtin tak awm ang maw! Kei lah chu ka awm mai mai thei tawh lo, rai chu nuam ka ti ta viau zawk ni berin ka hria. Hna kan bâng a, pa Rinchhana nen motor chhungah kan awm dun ta reng mai, mahse engmah ka la hrilh chuang lo.




"Zaninah kan inhmu dawn a nia" kan in kawt kan thlen chuan a ti hniam sup a, vawiin chu a thawk nasa zual a ni ang a hmel ka hmu bawrchhawr tlat.



"Eng nge?" nui ver vera ka en avangin a rawn ti leh sup a, a kut hrawl tak chu ka lâksak a, ka dulah ka nghat a, a la hriatthiam loh hmel khawp.



"Vawiin khan Doctor hnenah u Dini nen kan inentir a, ka pum chhungah hian nautê a awm mêk, nautê pa chu nangmah i ni" ka tih chuan min en deuh hâw a, a rilrua awm tur awm ang ka hre tlang nghal vek.



"Mak i ti ti raw? Kei pawh ka hriat tirh chuan mak ka ti lutuk, chhun chawlh lai khan i nu'n min hmuh a duh thu min hrilh a, in inah ka va kal a, engtin tin emaw ka rai tih kan hre chhuak ta a ni" hlim zeta ka tih leh chuan a rawn che thut a, min kuah ngeh dan chu pui tak a ni.



"Dawt i sawi hauh lo, nang hian dawt i sawi lo. Ka fa maw!? I pum chhungah hian ka fa a awm maw!?" ti phawlh phawlin a inla hrang a, ka dul chu a en vawng vawng a, a aw aṭang ringawt pawh a hamhaihzia a hriat hle.



"Thla hnih a tling ṭep tawh zawk alawm" ka ṭawng zo chiah tihah lungchim zet hian min fawp a, min fawp satliah a ni lo, min fawhna chuan a lawmzia te, min hmangaihziate min hrilh nawn mawlh mawlh a ni ber e.



"Naktuk aṭang chuan hna i rawn kal tawh lo ang, ka bân a che. Inah i awm tawp ang a, nautê tana pawi thei engmah i ti tur a ni lo" a thusawi avang chuan ka nui tawp ringawt.



"Chuti ang a ṭul em em lo, fimkhur takin hna ka thawk thei reng" tiin ka hnial ve viau a, awmzia pakhat mah a awm lo.



"Ka thu ber tih hre rawh, engkim, i mamawh engkim keima'n ka pe ang che" tih leh min fawh a rual nghal a, kan hmui chu a inbawhthuah rei ngei mai.




Haw lawk thei lovin thil kan sawi dun ṭeuh a, a hlim hmel chuan min tihlim veng veng thei. A nu'n mo atana min duh thu te, engkim ka hrilh vek a, ani chuan palai tirhna tur min zawt daih thung. Ni e, hei hi thil buaithlak tak pakhat a ni. A hma kha chuan tirhna tur hranpa pawh kan nei lo va, mahse tunah erawh ka nu pa, ka pute hnena tirh a fuh berin ka hre tawh. A chhan chu a piang thar tawh a, tih tak zetin ngaihdam min dil a, kan mamawh hun apianga bél turin min chah bawk a nih kha! A hmaa ka lo sawi tawh angin ka naute pahnih exam zawha inneih lampang rawt chu a pawm fel thlap a, ka lawm hle. Palai erawh rawn tirh hma a tum tho thung a, kan inneih loh a hlau ni maiin ka hria, kei pawh hian kan innei lo ang tih mawlh ka hlau a ni.




Zanriah kan ei laiin ka rai thu ka sawi a, ka chhungte chuan mak an ti hlawm teh e. An ngawih ngawih vung vung hnuah Doro-i chuan min lawmpui thuai a, a hnu lawkah ka naute pahnih paw'n min lawmpui ve nghal bawk. Nuam lo chu ka ti ve reng tho, mahse engkim a nih tur angin a ni vek tawh a, tih danglam theih pawh a ni tawh lo a ni. Zanah chuan pa Rinchhana a lo lêng leh ta ngei a, kan thil sawi pawh eng dang a ni thei tawh lo, inneih lampang ringawt a ni tawh. Doro-i chuan kum thar aṭang a nîtei pasal Aizawl lama an lo post dawn thu a sawi ve bawk a, an bula a awm tawh dawn thu a sawi zawm leh chuan nuam lo ka tihna a zual. Pa Rinchhana paw'n kan bula a awm reng theih thu a hrilh a, keini ang thova nu leh pa dik tak nei tawh lo a ni tih a hre ve vek a, chu vanga ngaihtuah em em pawh chu a ni.




Keimah ber hi a lakah ka inthiam lo, ka ṭhian ṭha ber mah ni se ka ngaihtuah tâwk lovin ka hria. Chu bakah nuam lo a ti ru thei ngawt ang, kei lahin ngaihzawng ka neihsan daih leh ta nghal a, kan inṭhian ṭhatna chhiat phah lo mah se a lakah chuan ka inthiam lo tlat a ni. Kei pawh ni ta ila ka inthlahrung tho ang, ka ṭhiannu leh a naute bulah awm ve ta ila ka inthlahrung lo thei lo ang. Ani erawh a puitling em em zawk a, tluk lohna tam tak ka nei a, a chang phei chuan ka khawngaih ṭhin. Unau tal la nei se ka ti, kan thlahthlam tihna lam ni lovin, thisen ngeia inzawm hi chu a dan a dang bik tlat ṭhin alawm, inzawmna satliah nen a inang thei tak tak ṭhin lo.




Pa Rinchhana chuan hna kal a phal tawh lo tak tak a, a sawi tirh kha chuan fiamthu hran lo mah se a thutak viau turah ka ring lo va, mahse a lo thutak khawp mai. Hnaah ka kal lo ta reng a, kum tawp lam a ni tawh bawk nen kan buai zual lai a ni leh nghal a, chutah thla tin hlawh min pek a la tum zel zui. Chung em em chu ti lo turin ka duh a, min pek pawh tum mah se ka duh kher lo ang. A neitu a nih vang nge ni, nitin hian ka bulah hun a hmang ziah a tih theih a, kal tura ka nawr luih te hian a kal hram hram zel zawk a, min hmangaih thu sawi chamchí lo mah se ka laka a awm dan aṭangin ka hrethiam mai ṭhin. Tin, CITY CAR BAZAR ringawt ni lo sumdawnna deuh reuh a lo khawih reng a, hmânah khan khawih kawp emaw thawh kawp a neih ka ring tawh kha a nia, phai lama a ṭhiante nen an lo thawk ho ngei e.




Thla te a'n liam zung zung tâkah chuan Krismas kan chuangkâi a, khawpuia ka vawi khat hmanna a ni a, ka naute pawh chuti tho, Doro-i chenin. Thingtlang mi nih hi chuan Krismas leh kum thar hmang tura mahni khuaa haw te hi a nuam ve riau a, tun ṭum pawh kan haw dawn leh dawn loh ka pute hnen aṭangin zawhna kan dawng awl lo va, kan unau chunga an ṭha ta lutuk hi a mak a, a awihawm loh lek lek zawk a ni. Kan haw dawn loh thu ka hrilh zan te chuan pawi an tih hmel hle a, pa Rinchhanan phal hek lo. A phal leh phal loh ka hriat hma te kha chuan haw pawh pawi tihna ka nei hran lo, mahse ka lo rai kher bawk nen pa Rinchhanan a phal lo bur a, min va han uap hneh mai mai tak!




Hlim tlâng takin Krismas boruak leh a vuakvet vel chu kan hmang hlawm a, pa Rinchhana phei chu an inah a awm lo tluk a tih theih. A chhungte paw'n an fiam phah nghe nghe a, keini pawh min fiam hial a, fel viau lo se chu inthlahrunawm duh ṭhin tak a ni. Pa Rinchhana ber lah chuan engah mah a ngai bawk si lo, chaw eiah te min sawm phei a, a vawi khatna kan hnial phawt a, a vawi hnihna erawh kan hnial lo thung. Kum hlui thlah zan te chu kum dang zawng aiin nuam ka ti a, ka bulah ka mipa hmangaih em em a awm tlat a, min veng reng tih theih khawpin ka bulah a tál hnem a, a awm loh hlek chuan ka awm thiam tawh lo zawk. Phone kaltlanga kan inbe ringawt te hi ka duh khawp tawh lo leh zel a, ka ngai ngawih ngawih ṭhin bawk a, Doro-i phei chuan ka rai vangah a puh ringawt.




Kum thar ní chuan kan inkhawm ṭhap a, kan zavaiin pa Rinchhana te veng lamah kan inkhawm phei a, chhungkhat ang maia kan awm dial dial te, kan inkawm thei te chu lawmawm ka ti. Tin, a bikin pu Zawnga leh pi Masiami te pahnih; ka nu leh pa ni mai tur te chu ka fak thlawt a, ka zah em em bawk. Keini ang mi rethei lutuk, buaipuitu pawh nei lo, an fapa rilru ṭhat luat azara intungding thei ve mai pawh mo atan min pawm a, min ngaina em em a, nu leh pa ṭha tak an va ni chiang êm. Chaw kan ei phei te hian an mo ang maiin min bia a, kan lên phei changte hian min be siam siam zel a, pa Rinchhanan a lo hrilh lâwk ṭhin nge ni, ka chet an phal lo em em ṭhin bawk.




"Pa Rinchhana chu fa i nei thuai dawn sia, i phur tawh áwm?" titu chu pa Sawma a ni a, kan rin lâwk ang ngeiin ka bula mi ren run chuan



"Khati ang khan min ko ziah suh Sawma, a ṭul tei vet lo" a ti deuh hmuk a, pa Sawma leh mi dang chu an lo nui a, kei pawh ka bang chuang lo.



"Eng nge i duh loh ngawt, Puii te unau paw'n an ko vek che alawm, i nau zawk zawk ka ni leh nghal" nui put put hian pa Sawma chuan a ti leh a, a u chhaih kawlh dan hi chu a thiam ve chiang a ni.



"In inang hleinem le, min ko tawh suh. I kal teh ang, in ina awm ka thlahlel zawk tlat" ti chang rút hian ka kutah a chelh a, min kai tho va, dimdawi zet hian min kalpui a, pu Zawnga zawk chuan a fapa chu a rawn chhaih leh hram bawk.



"Zanin chu lo riah mai ka duh" motor chhunga kan chuan luh hnu chuan a rawn ti thum dam dap a, a lam ka hawi thuai a, a fiamthu hmel loh em em leh nghal.



"A chi nâng, inru kan ni mai dawn asin" ka tih chuan



"Inruk mai ka duh tawh, Hminga te unau lah thla leh tawp lamah an exam ṭan dawn chauh a, ka nghak thei lo mai ang tih a hlauhawm" a ti sup a, kei tak hian a nia a bula awm châk tawh chu!



"Inruk êm chu i ti lo teh ang, dan khatna in kan innei dawn lo ta rau rau bawk a, thil sual tih belh tawh lo ang" ka ti ve leh mai a, ka kut hum lúm vung vung pah hian



"Rai lo ta pawh ni la dan khatna chuan inneih ka duh lo hrim hrim, kan che sual tawh tlat a, lem zeta inneih ai chuan dik taka inneih ka thlang zawk" a rawn ti a, a rilru hi chu a ṭha ve chiang alawm, a hmel te hlei hlei hi a ṭha a ni.



"Kal ila, mahse hetia ṭhut rih i duh chuan a pawi chuang lo" ka ti sep a, inpawh lehzual nân tiin an inah keimah bik min lênpui kha a nia, a ṭha phian, ka tana ṭha tur hi chu a hre khawp mai.




Ka sawi vang nge ni min tlan chhuahpui nghal a, kan in kan va thlen chuan ka naute pahnihin lehkha an lo zir malh malh a, kan awm chu an buai phah lo hrim hrim bawk. Rengtei hi Hminga aiin a upa zawk a, mahse an pâwl zat a inang chiah chiah thung a, Rengtei zawk bawk hi zirna lamah a hnufual ve ang reng a, pâwl a beinawn khanglang alawm le. Pa Rinchhana chu rei pawh a awm chuang lo, haw a rawt vat a, keimah hi min ngaihtuah em em ṭhin a, a dam chhan ang mai ka ni. Ka dul la puar lian lo ve tak hi a dawm awl lo va, fa hrinsak tawh phei ila chuan a hlim zual ngawt ang ka ring. Ei tur te hi nitin a ṭha ṭhâ a rawn dah ṭhin a, ka pasal a nih hun ka nghakhlel ru tawh, min duat dawn tih ka chiang ropui si.




February thla kan hman thlen chuan ka naute pahnih exam pawh a hnai nghal kuarh a, zan lamah pa Rinchhanan Maths leh English a rawn zirpui fô bawk a, an thiam chak phah viauin ka hria. Thla tawp kan thlen tâkah chuan an exam ní kan thleng ta nge nge a, an exam hmasa ber aṭangin an chhang chhe hran lo va, an ti ṭha lo ang tih mawlh ka hlau a, pa Rinchhana paw'n a ngaihven ve hle. Kâr eng emaw zah kan hman ral hnu chuan exam pawh an zo fel ta, chu veleh pa Rinchhana chuan ka pute in lamah palai a tir nghal vat a, a duhnaah chuan a che rang khawp mai. Ka pute pawh ka hrilh lâwk vek tawh a, an hrilhhai hran lo. Palai te nen inbe felin April thla tir kâr hmasa bera innei turin a hun leh hmun an ruat fel a, rilru a nuam veng veng thei.




Mo ṭhian atan Doro-i hman ka tum a, ani pawh a phur ve tawh khawp mai. January thla tir aṭang khan a nîtei te bulah a awm tawh a, han awm hran tâkah chuan ka ngai ṭhin khawp mai. Ka pute nupa chuan kan inneih hma tal an bula awm rih turin min ngen a, hnial miah lovin kan haw ta nge nge a, mahse pa Rinchhana a lo kal ve zel a nih chu! Pathlawi a ni a, kum lamah ni se naupang zawk zawk tawh lo, puitling ṭhan kin tawh a ni bawk a, naupangchhia taka a awm tlat chu a nuihzatthlak zawk. A chhungte paw'n vawi tam haw turin an ti ṭhin, mahse a them paw'n an thu a awih duh der lo. Ka pute inah a thleng ve tawp a, kan inah erawh tûmah kan awm lo tlang ta law law a ni. Ka pu ber chuan pa Rinchhana chu a ngaina thar em em a, a ruh langin pasal ka neih fuh dawn thu a sawi fô bawk a, ka pi leh ka nutei te chenin fel hlawm tak an ni.




April thla kan thlen leh meuh chuan kan inneih hun a lo thleng ta, chawhnu lamah kan innei a, puk lâwk kan nih avangin mi sawi kan kai khawp mai. Chutih rual erawh chuan mipui an tam em em thung a, Kohhran Hall chhungah kan leng lo hial a, mipui tam dan chu a mak zawk, ropui tak a ni. Inneihnaa lo kal tam tak paw'n an sawi ber chu mipui tam thu ringawt a ni a, kan chhungte lam erawh an beitham deuh thung. Chhun a ral a, zan hun hlimawm tak chu ám tak leh inhmangaih tawn takin ka pasal nen kan hmang dun a, ka pum pawh a puar lian ve ṭan tawh viau bawk. Mo thar túkah chuan ka che sual lo hlauh a, ka lawm tak tak a ni. Ni thum hnuah Honeymoon hmang turin kan zin nghal daih a, Hminga leh Rengtei erawh result nghak an ni tawh tho bawk nen kan khaw lamah an awm rih thung.




Honeymoon kan hmang chiah chu nuam ka ti em em a, ka rin phak bakin nupa nunah a zei bawk; zei tak a ni. Awlsam tê tê hian min tiphur thiam a, mahse hmangaihna chen dun ngawr lam nuam ka ti tihna a ni chuang lo, kawng engkima min ngaihtuah em em te chu nuam ka ti ber zawk a ni. Ka tan chuan vawi khatna vek a ni a, ka hmuh ngai loh hmun mawi tam tak min fanpui a, ka naute pahnih ka hre chhuak rum rum. Kal ve ta se, ka hmuh ang chu hmu ve ta se nuam an ti ve ngawt ang ka ring. Kâr hnih lai kan châm hnu chuan Mizoram lamah kan haw a, mo ka nih angin ka lawina inah chuan ka che nghal mial mial a, mahse ka chet an lo phal lo nasa mai. Kei lahin ka duh bik der si lo, ka che lui tho va, dik tak chuan ka inthlahrung a ni. Awmpui sawm pawh nei rawh se, ka che tho ang, a chhan chu mo ka ni a, mo chuan mo chanvo ṭha takin ka hlen ngei tur a ni.




Thlate chu a ral zung zung a, Rengtei leh Hmingate result a chhuak a, First division-ah ve ve an pass a, lawm tak ka ni. Ka pasal bawkin engkim a buaipui a, a fate angin a en tawp ni berin ka hre tawh. An pahnih hnîhin Shillong-a an kalna tur higher school a ngaihvensak nghal a, a laka ka inthlahrun rualin a chhungte hmai ka zah zual. A chhungte ni se amah ang chiah, an fel ngaiin an fel reng a, ka pa phei chuan ka naute pahnih zirna tur senso zawng zawng tumsak a tum hial a, mahse ka pasal zawkin a phal lo thung. Ka pum pawh a puar lian ve tawh hle a, ka pasal hnen aṭangin duatna ka dawng nasa zual a, min chawm ṭha lutuk chu ka thau vek tawhin ka hria.




School luh hun a rawn ni a, ka naute pahnih chu Shillong lama zirna chhunzawm turin kan vai liam ta nge nge a, Hostel-ah an awm ve ve dawn a nih hmel a, hmun khata kan awmho lo chiah chu ka ngai nghal em em ringawt. An chhuk aṭanga thla thum hnuah nautê ka hring a, mipa a ni leh nghal a, ka pasal leh ka pate ho chu lawm tak an ni. Ka pasal ber chu a lawm a, nau nei hlim ka ni bawk nen ka chau ve reng, chu chu hrethiam takin amah deuh chauhin min awmpui phawt a, ka chau zualpui a reh hnu chuan mi dang rawn luh a phal ve chauh a, keimah tak paw'n ka cher deuh kâwkin ka inhria. Nitin zantin ngaihtuahna sêngin hun ka hmang ṭhin a, ka nunah hlimna chhiar sen loh ka tawng a, ka nun bul ṭanna harsain hrehawm viau mahse a tawp erawh duhthusam phak bak a ni thung.




Ni e, nunah hi chuan a bul kan ṭanna hi a pawimawh na meuh mai, mahse kan tawp khar dan zawk hi a tlovin a hlu zawk ṭhin a ni. Nu leh pa nei tawh lo, vanduaina avang thihsan kan ni a, unau baihvai tak kan nih lai khan Pathianin min pui turin kan beisei phak baka ṭha a rawn tir a, chu pa chu ka pasal tur a ni tih reng ka hre si lo. Kei ve mai, rethei tak, nu leh pa pawh nei tawh lo leh nghal hi min hmangaih a, a nupuiah min siam bawk a, khawvela hmeichhe vannei berah ka inngai ta hial a ni. Ka thinlung zawng zawngin ka hmangaih a, ani paw'n min hmangaih a, fapa duhawm tak kan nei leh zel a, tunah chuan hun kal tawhah hrehawm lo tâwk ṭhin mah ila ka hlim em em tawh zawk a ni.





The End

(Ka thawnthu ziah chhiartu zawng zawngte chungah lawmthu ka sawi e)




.