WAY BACK INTO LOVE By Havali Adam (COMPLETED)

[Havali Adam]

Lalremtluangi_Zosiamliana

"Kei chuan hmangaihna ka ngai pawimawh ber asin, nang erawhin huatna leh thinurna i la pai nung reng thung a, i lakah hian ka inthiam lo kumkhua tawh dâwn a nih hi!" chu thu ka sawi lai chuan ka thinlung chhung a rum vawng vawng a, duh tâwka ṭah hawm hawm ka châk tak zet bawk.
"Mangṭha le Zosiam, ka thinlung aṭang hian ka paih bo hlen tak tak tawh ang che, tun a chinah nang hnaih leh zawng che hian ka awm tawh ngai lo bawk ang" tih zawm leh nghal zatin ka hmaa ding ngawi run pa hmel chu ka chhoh en leh hram a, mittui tling pama nui lui sak pah hian ka inher ta riai riai a, keini zawng inkawp tura khuanu ruat kan ni lo a ni mahna le!



WAY BACK INTO LOVE


By


Havali Adam




Chapter 1





Chair-a ṭhu hahdam der der chungin ka thlang lawka tui cheng ri nuaih nuaih te chu ka thlir deuh veng veng a, an awm dan vel avang chuan a chángin ka nui leh sak ṭhin bawk. Kum tin, a bikin kum lai hawl angah hian chhungkaw picnic kan nei ṭhin a, kumin pawh kum dang ang bawkin kan nei leh a, mahse tun ṭum chu hna thil avanga Mizoram pâwna zin an awm nual a, kan kim lo ang reng hle.



"Terem, ti rawh, lo cheng ve ta che?" swimming pool aṭangin Puitei chuan min rawn ko lauh lauh a, kal pawh ka tum chuang lèm lo.



"Zu cheng ve la, a thuk lo laiah te khuan zu awm ve mai mai la, a nuam reuh asin" nitei chuan a rawn ti zauh a, chet erawh ka la che ta chuang lo tluang zel.



"Tui chen tak hi chu ka misa lo ve lutuk a, ka'n kal kual mai mai zâwk teh ang" ka ti ta thung a, ka tho zui nghal bawk.



"Khaw'nge i kal dâwn?" Puitei bawk chuan a rawn ti leh lauh lauh a, ani hi ka pa nau chiah patea fanu a ni a, kum lamah kan inrual chiah a, a kawm pawh kan inkawm ngeih hle.



"Ka kal kual mai mai dâwn" ti leh kal pelh ka rual a, ka phone chu ka phawrh a, thla ka là kual vel ta mai mai a, khaw awm dan pawh a thiang nuam khawp mai.





Kan picnic-na hmun hi NextCom a ni a, Aizawl khawpui aṭanga hla lutuk a ni lo va, mahse a hnai zawk zawk chuang lo hle. Picnic Spot a nih ang ngeiin thil danglam leh mit lá a awm vak lem lo va, swimming pool a awm a, ei rawngbawlna hmun a awm bawk a, intihfaina tur bathroom a awm tel leh bawk a, chungho deuh zawng chu a ni mai. Thla lá kual turin ka tei vel tak nà a, thla lâk tur pawh a awm vak lo.





Chawhnu lamah chuan nitei te ho ei rawng ka bàwlpui ta daih a, paho lam paw'n sa an siam laih laih a, kan hlimin nuam kan ti dar dar hlawm hle. Keini chhungkuaho hi in hranah vek awm tawh mah ila kan inlaichinna a la ṭha em em a, a ngheh pawh a nghet ṭha hle bawk.





Ka pate lam hi unau rual tak mai an ni a, unau 8 lai an ni a, nitei erawh pahnih chiah ka nei thung a, a dang zawng chu patea te vek an ni mai. Tin, ka pa hi an zingah chuan a upa ber a, an unauho ka fak ve em emna pakhat chu a hunah chuan an inzah tawn thiam hlawm ṭhin hle. Ka nute lam erawh vanduaithlak takin nutei emaw putea ka nei lo tawp a, ka pa ang lo takin ka nu hi fa mal a ni a, ka pi leh pute'n an thisan tawh nghe nghe.





Kan chhungkua leh kan thlahte ho hrim hrim hi Aizawlah chuan a awm thei pâwl tak kan ni hlawm a, ka pate ho ni se unau rual ṭha an ni bawk a, an fate pawh kan tam ang rang hle. Amaherawhchu, kei hi fa mal ka ni hlauh thung a, ka nu leh pate pawh fa dang neih leh tumin ṭan là nasa viau mah se chung lam remruatna a ni miau si a, kan tân tih theih a awm ngáng lo a ni e.





Ka patea te ho chhungkua erawh an rual ṭha hlawm em em a, ka pa pawh hian a awt ṭhin tih ka hria, mahse a tilang ngai lo thung. Ka nu hriselna a ṭhat tâwk loh avangin Doctor te'n fa neih leh ngamna chî a ni tawh lo an ti tlat bawk si a, khami hnu aṭang kha chuan ka nu pawh fa nei tawh lo turin a insiam zui nghal ta nghe nghe kha a ni a, mahse keimah chauh fa min neih avangin kan hlim loh phah chuang lo, kan hlim lutuk tho.





Tin, ka pa hna avangin a hma chuan thingtlâng lamah kan awm ṭhin a, kum 5 vel zen zawn chu kan awm a, kei paw'n High School ka kal hman nghe nghe bawk. Khatih hun lai khan pâwl 10 ka nih laiin Aizawl lamah kan insawn thla leh kha a ni a, zirna pawh khawpuiah ka chhunzawm nghal a, khawpui aṭangin pâwl 10 chu ka pass ta daih a, kalsanin awm tawh lo mah ila ka rilruah erawh thingtlâng lamin hmun a chang hnem zui em em thung.





Ni e, a chang hnem lo thei lo. Zosiama kha, ani kha engtin nge a la awm ve zel ang lè? Pâwl 8 ka zir lai khan kan inngaizawng ṭan a, a hma chuan amah kha tu nge a nih ka hre miah lo va, mahse ani erawhin pâwl 7 ka zir lai aṭangin min lo hre daih tawh kha a ni a, tun thleng hian ani kha chu ka la hre reng mai, ka 'first love' a nih vangte pawh a ni mah nà le!





Kan inngaihzawn chhung kha kum hnih leh a chanve tling lo deuh hret ni ta in ka hria, khami chhung zawng khan ka rilru tinâ zawngin a awm ngai lo va, a awm àwm khan a awm tawp a, a thikthu erawh a chhe ve ṭhin hle thung. Vawi khat phei chu kan ṭhianpa pakhatin min kuah avangin an insual phah hial a, mi dang laka min hauh nâtzia kha pui thei tak a ni.





Vanduaithlak takin nu leh pa a nei tawh lo va, a pute bulah a cheng a, a bikin a nutei khan a tidudah thei viauin ka hria. A ṭawng tam lem lo va, a nutei avanga a lungawi loh paw'n sawi chhuah ai chuan a hmelah a tilang zâwk ṭhin a, kei lah kha ka la naupang bawk si, hnem dan tur kha ka va'n thiam lo thei tak!





He khawvel zauh tehreng nen hian ani ang mipa, a mizia ang pû mipa kha tun thleng hian ka la tawng leh lo hrim hrim, a danglam bik êm vang a ni mahna kum tam tak a liam hnu pawha ka la hriat reng ni! Kan inṭhen dan erawh kha chu duhthu a sam vak lo va, a tua ve ve pawh kha kan nâ a, khatiang khawp khan min lo duh ve ang tih rin ngaihna pawh ka nei lo hial zâwk a nih kha!



Ni lo, kei hi engati nge maw hun kal tawh ka ngaihtuah kual vak vak mai le, a ṭul hlawl lo!



Ka ṭhutna aṭang chuan zawimuang hian ka tho riai riai a, thawm rikna lam chu ka hawi phei zui nghal a, Puitei ka hmu zawm zat bawk. Tlai dâr 4 leh tih a ni tawh a, chaw pawh kan ei kham vek tawh a, haw lam kan hnaih a ni mah tawh zâwk!





"Eng nge khatah khan i lo tih daih a, ka zawng che alawm" a rawn ti phei niah niah a, ka lo nuih deuh tawp ringawt.



"An hman tawh hlawm em? Kei chu haw a, mut daih ka châk tawh, ka mut a chhuak riau" ka tih chuan



"Teh ringawt a che, kalna tur kan neih khâ?" a rawn ti hliai a, thil hriat chhuah ka nei nghal zawk!



"Ni tak e, mahse ka peih leh lo ê Puite" ka ti dek dek chu



"A theih loh, min kalpui ngei ngei a ngai, nang paw'n min kalpui tur thu i sawi lâwk vek tawh" a lo ti deuh pang pang nghal a, ka lo sawi lâwk hman kher kher chu ṭul lo ka ti hnuhnawh ngei mai.



"A nih rei lo ang aw?" ka ti leh ta ringawt a, kan rei dâwn loh thu sawiin mi dangho awmna lamah min pheipui zui nghal bawk.





Aizawl khawpui lama pana kan chhuah fel meuh chuan khua a thim thet thet ṭan tawh a, mahni chhungkaw motor ṭheuhah kan chûang haw a, mahse Puitei erawh kan bulah a chûang haw thung a, a hnungah kan ṭhu dun a, sawi tur pawh kan tlachham lo leh teh e!





"Pa Rc, zanin chu Teremi nen hian kan chhuak lawk dâwn aw?" tiin a hmâa chûang ka nu leh pate chu a dil ham ham a, a nêl bawk a, ka nu leh pate pawh hian fanu ang chiahin an en ti ila a sual lo ang.



"Khawiah chuan maw? I nu leh pate'n an hre tawh em?" ka nu chuan a rawn ti a, keimah zâwk min en pah zeuh bawk.



"Hre tawh e, mahse keimah chauha kal an phal lo va, ka û lahin min kalpui peih bawk si lo, Teremi hi ka sâwm tlu thei hram" tia chawl deuh datin Puitei chuan



"Teremi hi chu a fel a, ka pate pawh a bula ka awm hi chuan an thla a muang thei tawp" a rawn tih zawm zat a, ka lo ner khum nasa mai.



"Dâwt sàwi sawi suh, ka pa hian a phal lo daih zâwk mai ang" ka lo ti deuh tan tan a, ani lah chuan



"Dâwt ka sawi bawk lo e a! A ni tak tak alawm, i fel bik sia, 'Teremi ang sawn awm ve rawh' min ti nasa thei lutuk, a châng chuan ka ning hial ṭhin" a la rawn ti ta deuh deuh a, chhan ngaihna pawh ka hre tawh lo.



"Khaw'nge in kal dâwn hrim hrim? Eng nge in tih dâwn?" ka pa pawh a rawn ṭawng chhuak ve ta nge nge e!



"Ka ṭhianpa birthday a nia, i phal em pate? I phal ti raw? Phal hram teh aw? Kan lo sawi lâwk nasa ve tawh si a, kal loh ngawt chu a dik lo ang" Puitei chu ka en hâ a, ṭawng hnem hman ka va ti tak!



"A hla em?" ka pa chuan a rawn ti leh a, a phal dâwn niin a lang.



"Zotlangah a nia, mahse scooty ka khalh thiam a, thlah leh lam kan ngai kher lo ang" Puitei chu ka sik deuh vak a, duh aiin a ṭawng chuangliam mah mah dâwn tlat!



"Ka hruai peih teuh lo che u" dilchut buai tawh miah lo hian ka pa chuan a rawn ti hlauh a, ngaih pawh a ṭha deuh sawt e!





Aizawl khaw chhung kan luh chuan khua a thim fel vek tawh a, Puitei chu an inah kan thlah a, keini pawh in kan thleng har lo hle. Ka mut chhuak a zia deuh nân tiin ka inbual harh a, ka awm a nuam deuh sawng sawngin ka hria. Khawl hmanga ka sam ka chhem ro laiin ka room-ah ka pa a lo lut a, min biak duhna a nei a nih ka ring.





"I phal chiah lo em ni pa?" ka khumah ngawi reng hian a ṭhu a, ka be hmasa tawp ringawt.



"Phal e, phal lohna ka nei hleinem. Thil dang daih a nia, i hna dil kha eng nge a àn zel, chanchin hi a reh rei tawhin ka hria?" a rawn tih tâkah chuan





"E.....kha kha maw, eng lo, tun kârah hian result a chhuak dâwn tih thawm a awm a, ka hre chiang bik chiah lo. Min ngaihtuah lutuk suh pa, hna te chu a la awm dâwn chauh alawm, ka hmu ve vat mai ang" ka ti zui nghal melh melh a, nui tawi suk pah hian



"Ni e, i hmuh thuai ka beisei, hna hmu rih lo mah la nuam lo ti miah suh ang che" tih leh thawh a rual a, a awm dan chu a dik chiahin ka hre lo.



"I ṭha maw pa? I chauh hmel ê, i dam lo em?" a hmel chu ka en chiang a, a dam lo tak takin ka hria.



"Ka awm a nuam chiah lo va, mahse i nu'n damdawi min pe ang a, ka zia ve leh mai ang" a nui lui hmel chuan ka ngaih a tiṭha lo zual.



"Khawi in room-ah ka va hruai ang che" tih leh kuah ka rual nghal a, a taksa lûmzia leh satzia chu pui tak a ni!



"Nu...!!!" tiin ka nu chu ka ko vak a, a rawn lang nghal vat bawk.



"Awi, engati vak vak nge?" a rawn tih chuan



"Ka pa hi a dam lo a nia" ka lo ti nghal thuai a, ka pa erawhin engah mah a lo ngai lo thung.



"Chutiang a ni hleinem Terem, ka chau deuh mai chauh alawm" min biakna chu ka chhâng lo va, ka nu nen chuan an nupa khumah kan muttir ta thuai bawk.



"Putei call la, kal thuai ula, lo haw leh vat zâwk rawh u" ka pa muhil thaw ri suk suk ka en laiin ka nu chuan a rawn ti a, kal pawh ka phur lo zo vek!



"Ka kalpui leh lo mai ang" ka tih chuan



"Chutiang ringawt tur a ni lo, lo haw har lo ula a ni mai" a lo ti thung a, rilru nuam zàn lovin Puitei chu ka call ve mai bawk.





Rei lo té hnuah a lo thleng a, Zotlang lam panin kan inphur chhuak zui nghal a, Helen Lowry School bulah daih a lo la ni zui, hla ka ti hnuhnawh khawp mai. Puitei lah chuan hmelhriat a ngah phiah leh ta nghal a, kei erawhin ka zui zel tawp ringawt a, birthday party tih vela kal hi chu nuam ka ti ve vak lo hrim hrim.





Kan haw leh thuai turah ka ngai a, mahse a lo ni teuh lo mai. Chutah Puitei chu a la rui zui a, ka lo kalpui kher kher chu ka inchhir tak tak a ni! Rui chhe lutuk lo, ṭawng duh tâwk chiah hian a rui a, kan haw lam te chu rilru nuamin ka chûang thei tawh lo. Accident hlau reng rengin ka ṭhu a, hauh pawh ka hau peih lo, a harhfim hun law law ah ka hau hrep dâwn chiang lutuk!





Vanneihthlak takin kan inphur thleng ve mai bawk a, in chhunga ka luh chuan ka pate room lam ka pan ding nghal a, ka chhuahsan chhung zawng khan ka rilru a nuam thei thlawt lo. Room ka lut chu ka nu zâwk a lo la meng a, ka pa erawh nghet deuhin a muhil tawh thung. Ka nu chuan damdawiin a chhâwk tawh thu a lo sawi bawk a, ka rilru a nuam huai mai.





"Terem, tho teh, i patea a lo kal a nia" ka nu aw chu ka hre vuai vuai a, men pawh ka la meng peih lo, ka mut tui lai hian min kai tho ve ziah!



"Tho thuai teh, nizanah engtin nge in awm?" ka nu aw bawk ka hre leh a, phak chuap hian ka meng diar diar a, khua chu a lo vár vek tawh nghe nghe.



"Patea chuan eng nge a lo tih a?" ka ti ṭial deuh ruai a, thawh tirhah hi chuan aw a dik hlei thei ṭhin lo.



"Lo tho phawt mai teh, thil zawh tur che a neih ngah hmel teh a nia" tih leh ka room aṭanga chhuah a rual a, kei pawh ka tho ve ta nge nge bawk.





Patea lo kal chhan ka hre chiah chu mak tiin ka meng lian kalh a, nizana Putei haw lam kha a lo accident chu niin, a bân ruh a ti auh nghe nghe a, mahse hliam dang leh nâ dang a nei lo a nih hmel. Min zawh zel si avangin zû a in thu te chu ka sawi ta tawp a, ka pa chuan min lo en reng a, nuam duh lo tak a ni; min rin ve tehreng nen!





Patea haw hnu chuan engmah a sawi lo va, hauh pawh min hau lo, min hau se a nuam daih zâwk, a awm dan chu hrehawm ka ti zual. Office a kal dâwnah erawh pangngai takin min bia a, ka nu zâwkin min zilh ta hlak hlak a, thiam thu sawi tur réng ka nei lo. Chutah beisei loh deuhin ka hna dil result a rawn chhuak hlawl a, ka lo tling ve reng a nih chu! Ka va han lawm tehreng êm, lawm tak ka ni!





Ka nu nen chuan result chu kan en dun a, ka pa pawh kan hrilh nghal a, a aw aṭangin a lawm tih hai rual a ni bik lo. Tunah hian M.Ed zir zo hlim hlawl ka ni a, rei pawh a la rial lo. Hna ka zawng nghal char char a, a nihna takah chuan Headmaster leh Teacher pangngai hna ka dil kawp a, Teacher pangngai hna zâwk ka hmu ta chu a ni a, mahse pawi ka ti lo, ka lawm em em tho.





Buaipui ngai zawng zawng ka pa'n min buaipuisak vek a, mahse a rilru tihahtu erawh thingtlâng lamah ka awm a ngaih hmel a, ka thawhna tur High School hi thingtlâng lam a nih tlat avangin tih theih kan nei tlêm bawk si a ni. Chutia keima pûala hna ka nei ve tawh mai tur leh pawisa ka thawk chhuak ve thei tawh tur chu ka lawm rilru em em a, ka nu leh pa hmelah erawh min ngaihtuahna a lang nasa hle thung.





"I hna hmuh thar hi i zawm lo mai dâwn emaw ni le Terem, hun remchang dang a awm leh zâwk lo maw" ka nu chuan a ti leh zauh ṭhin a, rilru a phîr duh khawp mai.





Kan result a chhuah aṭangin kâr khat a ral a, buaipui ngai buaipui fel vek tawh mah ila kan rilru erawh a la dam hlei thei tlat lo. Ka ngaihdan chuan tun ang lai, hna hmuh harsat em em tawhna khawvelah hian vanneihthlak takin zirtirtu hna ka hmu ve hlauh a, keimah tak phei chu thingtláng leh tlâng lo lamah ka buai lo, pawisa thawh chhuahna tur hna ka hmu hrim hrim a, ka lawm em em zâwk a ni.





"Thla eng emaw chen chu i han awmpui phawt ang a, in luah tur te pawh kan han zawng ang a, kei pawh ka lo chho zauh zauh thei turah ngai ang" tiin ka pa chuan thutlukna a siam fel ta nge nge a, hmeichhia ni kher lo ila chu a zia deuh ang maw lè.





"Office hna lam hi ka khawih zo law law ang a, ni tam a awh lo turah ngai phawt ang. Kan han kal dâwn a nia, Puitei paw'n a ṭhianpa chu lo han be lâwk rawh se" ti lehin kan pa chu a kal sawn a, ka hnathawhna tur School awmna khua hi Puitei hmelhriat pakhat te khua a lo ni hlauh a, mahse chu pa chu tu nge a nih pawh ka hre ve chuang lo.





Thli thaw heuh heuh dawng zawnga hawi chungin motor chhung aṭang chuan ka dâk chhuak a, ka pa hovin ka hnathawhna tur thingtlâng khaw lamah kan kal mêk a, ka nu leh ka pa chu an inbe mial mial a, kei erawh ngaihtuahna kawmin ka ṭhu ngawi reng thung.





Ka hna, zirtirtu hna ka thawhna hmun tur hi ka la kal ngai lohna khua a ni a, a khaw awmna hi chhim chhak lam a ni a, ka pa'n min ngaihtuah viau nà chu ka nu nen kan awm dâwn hlauh a, tlêm chuan a rilru pawh a zia deuhin ka hria. A tirah khan keimaha awm ka tum mai kha a ni a, mahse ka ngaihtuah chiang a, a tih hian a tih chî loh hrim hrim leh ta zâwkin ka hria, chutah hmeichhia ka ni leh nghal.





Muang marin kan tlan zel a, kawng sira han din châng kan nei leh zauh ṭhin tih loh chu kan tlan deuh par par a, kan tlan tluang hle bawk. Dârkâr eng emaw zah kan tlan hnu chuan ka hnathawhna tur khua pawh kan thleng ve ta nge nge a, a khaw dung a seiin khaw chhung hrim hrim pawh a thingtlâng lutuk lo, rin ai tak chuan a changkang phian mai.





"Puitei kha han call teh Terem, khaw'nge a ṭhianpa chu a lo awm dâwn?" kawngpui sira kan din rualin ka pa chuan a rawn ti a, ka call zui ve nghal mai bawk.



"Khaw'nge i ṭhiapa chu a awm a, hei, kan thleng tawh a nia" phone call a pick up chiah tihah Puitei chu zawhna ka zâwt nghal a, ani pawh chuan



"Lawk aw, kan call leh ang, lo nghak rih lawk r'u" tih leh kan inbiakna hmeh tawp a rual zui zat a, rei kan nghak lo turah ngai phawt ang.





Ka nu leh pa chu an inbe mial mial a, ka pa pawh kâr khat chhung chu min awmpui lawk a tum a, a pawi lo daih zâwk; min awmpui rawh se! A tel lo hi chuan engmah kan ti thei ṭhin lo, in luah tur pawh min zawnsak a tum a, a kutah engkim ka dah vek a ni ber e. Chutia motor chhunga kan ṭhut lai chuan kan awmna lam pan hian tlangval pakhat hi a rawn kal a, a hmel chu ka hmuh hnu a ang khawp mai.





"Teremi chhungte in ni mial em le ka pu?" tiin ka pa chu a rawn bia a, ka pa chuan



"Ni e, Puitei ṭhianpa chu i ni ang máw?" a lo ti ve nghal a, chu pa chu ka hmu tawh tlatin ka hria.



"Aw ni e, Thangmawia ka nia, lo kal r'u, kan in lamah ka hruai phei ang che u" hawihhawm zet hian a ti deuh luam a, min rawn en chuan ka lo nui lui seih ringawt.



"Min la hria em Terem?" motor bulah kan indin chilh ran a, min hriat hmel ang reng si a, kei lahin ka hre che che chauh bawk si.





"Hre deuh reuh che, inhmuh tawhna kan neih ka ring, mahse tu nge i nih tih leh khawiah nge kan inhmuh tih erawh ka hre chhuak thei tawh mai lo" ka ti ve siam siam a, a nui deuh sun sun a, a fel hmel ang reng viau mai.



"Min la hre chhuak chawpchilh ve zel mai ang, ti r'u, i phei ang u" tiin kan pathum chuan an in lamah min hruai phei a, inthlahrunawm viau mah se tumah hmelhriat neih loh tawp ai chuan a zia hrim hrim tho e.





Thangmawia te in kan lut chu a chhungte chuan min lo be nghal bawrh bawrh a, an rual ṭha bawk si, an fel hlawm khawp mai. Thangmawia chu ka bulah a awm deuh chawt a, a sâwi a sawi takah chuan Puitei nen birthday party-naa kan kal zan khan kan inhmu tawh tih ka hre chhuak ta nge nge a, khawpuiah hnathawkin a awm ṭhin ná chu khuaa a haw lai tak a lo ni hlauh a, lzû a in ve zauh zauh ṭhin thu a chhungte bula zep tura min tih nghal zat chuan ka nui tawp ringawt.





"In luah tur in hmuh hmâ te chu hetah an awm ve rih ang a, buaina a awm chuang hleinem" Thangmawia pa, pu Hneha chuan a ti dap dap a, ka pa pawh rawn ṭawng chhuak ve nghalin



"Chu, a va tizia dâwn ve le, keini lah heti mai hi kan ni a, hmelhriat leh chhungte emaw pawh kan nei mang si lo va, nangni in lo awm hlauh hi keini tân malsawmna a ni" a ti ve dut dut a, kan inpawh nghal viauin ka hria.





"Amaherawhchu, khawpui mi hausa te angin mutna ṭha leh pindan ṭha kan nei ve hauh lo tih min hriatsak ula, nangni tân pawh kan bula awm a hrehawm deuh mai thei a ni" pu Hneha chuan a rawn ti leh a, puitlingho an inbe char char a, keini erawh kan lo ngawi deuh ṭhap thung.



"Ti rawh, chhuak rih daih ila, tih tur a awm lo ê" Thangmawia min sàwmna chu hnar buai lovin ka zui chhuak a, a nélawm viau nà chu duh ang thálin ka la nêl chiah lo a ni e.



"Kan khaw High School zirtirtu thar tur maw i nih dâwn a?" meizial a pak khu laih laih a, kei pawh chuan pangngai tak hian



"Imm...ni e" ka ti ve mai a, zawhna dang erawh min zawh belh hran lo.





In chhunga kan luh leh hnu chuan ka pate ho pawh an lo nui hak hak a, inpawh tih hriat zet hian an ṭawng luam luam hlawm a, kan awm dan tur chungchang an sawi fel vek tawhah ka ngai hmiah! Thangmawia tak pawh chu ka nêl ṭan nghal ta viau a, amah a ṭawng duh bawk nen min be deuh reng a, an bula awm a nuam khawp mai.





Zanriah kan ei laiin pu Hneha chuan ka pa chu a hnathawh chungchang a zâwt a, ka pa erawhin 'sawrkâr hna chhe tê' tih chauhin a chhâng thung a, ka pa hi chu a mak ve ngawt mai. A hnathawh a sàn tehreng nen hian a zawng azà bulah a sawi ṭha duh ngai vak lo, pa inngaitlawm leh inphah hniam tak a ni ka ti lo thei lo ṭhin.





Kan zanriah ei boruak pawh a nuam dar dar hle a, an fiamthu pawh a sâng tih ka hrethiam nghal mai. Mut a hun tâkah chuan kan chhungkuain chhuatah kan mu tlar dul a, Thangmawia leh a naute'n khum min kian liam liam hlawm nà chu kan hnial tlat thung a, khuma mut nghal ringawt zawng thil mawi pawh a ni lo hrim hrim.





A tuk aṭangin ka pa chuan in luah tur pangngai deuh hlek min zawnsak nghal a, Thangmawia tak paw'n min zawnsak a, mahse kan hmu mai lo. Thingtlâng a la nih ve avangin in luah tur nei an awm mang tlat lo va, pakhat chu ka pa'n a hmu ngei a, mahse a neitu te zû zuar ṭhin an nih avangin a be chhunzawm ta lo thung.





Ka pa chuan in sa mêk te pawh min biaksak nual a, mahse a hmu zo rih chuang lo. Aizawl lama a chhuk nân ni khat chiahin a dang tawh a, a chhuk hma ngeia in luah tur min zawh hmuhsak a duh bawk si, a hmu lawk thei bawk si lo, a rilru a buai ruk thei hmel khawp mai.





Tih ngaihna a hre ta ngâng lo a ni mahna, pu Hneha hnenah chuan an in hnuai sak a rawt ta tawp mai a, a sakna tur zawng zawng leh senso ngai zawng zawng pawh a tum vek tur thu a hrilh nghal nghe nghe bawk. Pu Hneha erawh a phal chiah lo nge ni, a ngawi deuh vung vung a, ka pa zawhna leh ngenna pawh chu a chhâng mai lo.





A nihna takah chuan pu Hneha te in hmun hi a ṭha ang reng hle a, an inhnuai ni se a ruak huai a, awmna tur siam dâwn pawh ni se a hmun hmain a zir em em a, mahse in hnuai an sak loh danah ṭul an ti lém lo a nih ka ring.





Thil thleng zel chuan min va tihahdam hliah hliah chiang êm, Pathianin ka ṭawngṭaina a chhâng ka ti lo thei lo. Beisei loh lutukin pu Hneha chuan kan awmna tur atâna an inhuai chu sak a phal ta hlauh mai a, ka lawmzia chu pui tak a ni!





"Chutia kan khaw High School zirtirtu tur meuhin awmna tur a nei lo a nih te chuan kan sa chawp nawk nawk mai a ni ang chu lè" nui sun sun chung hian a ti dut dut a, ka lo nui ver ver ringawt, sawi vak ngaihna pawh ka hre lo, ka lawm a ni tawp mai.





Ka pa pawh rilru nuam deuhin Aizawl lamah a chhuk theih phah a, ka nu erawhin a tum lâwk tawh angin min awmpui thung a, Aizawl lam aṭangin ka pa chuan keini mai ni lo pu Hneha te pawh a rawn be deuh reng a, in sak chungchung lam deuh hlir an sawi dun ṭhinin ka hria.





Kâr hnih a ral leh meuh chuan kan awmna tur in pawh an sa mawp mawp tawh a, kei ngei pawh ka hna lamah ka kal ṭan tawh a, ka thawhpuite chuan min lo dawngsawng thiamin min lo nêl hlawm nghal hle a, an hawihhawm hlawm khawp mai. Tin, zirlai naupangte pawh zirtir an nuam a, an fel hmel hlawm viau bawk.





Ka thawhna School hi sawrkâr School a ni a, a nghetin thawk nghal chiah lo mah ila nakinah lawkah chuan ka la ngheh ve theih mai ka ring. Zirtirtu pangngai hi panga kan awm a, Headmaster nen paruk kan ni tihna a nih chu! Tin, Peon hi pakhat a awm leh bawk a, kei tih loh mipa vek an ni a, kan Headmaster paw'n fiamthu tak hian





"Tun ṭum chu hmeichhia kan awm tawh bawk a, Sir Chhuantea te paw'n nuam an tih deuh sawt ang ka ring" a ti leh zauh ṭhin a, Sir Chhuantea hi kan zinga tlangval awm chhun a ni a, chu vanga fiam nasa ṭhin em em pawh chu an ni.





Kâr lovah thla thar kan chûang kâ der a, keini paw'n awmna tur in pangngai tak kan nei tawh a, pu Hneha chuan in luah man pek ngai ti lo viau mah se ka pa'n rem a ti bau lo va, thla khata 1000-in in chu kan luah ta nge nge bawk. A tirah tak chuan 700 a ni zâwk a, mahse ka pa'n a laklawh a ti tlat a, pa hawihhawm leh tlawmngai ve ve tih takah an inbiak rem chhung pawh a rei viau a, a tawpah ka pa rawtna angin an inbe rem thei hram a ni.





Ka nu nen chuan kan awm ve ta rak rak a, zan tin ka pa nen kan inbe ziah a, a ṭawngkam aṭangin min ngai tih a hriat hle a, khawhar pawh a khawhar viau tak ang. Kan tlêm tawh nâk a laiin ka nu nen kan han awm bosan daih chu a ni si a, kei tak pawh hian ka ngai a ni. Ka nu pawh a bang bik chuang lo, ka pa nen chhun lamah an inbe deuh reng zel.





Kan awmna in hi tlachawp deuha sak nawk nawk mah ni se a ṭha viau thung a, ka pa khan sum a ren lo bawk nen an sak lai pawh khan hlawhfa kha an tam thei hle a, a rilruah kan nufa awmna tur in sak zawhtir vat vat kha a lian ber tawh tlat a tin a ni! Sum a ren lo ka ti tak nà a, a ṭha lo lam zawnga ren lo a ni lo va, ka pa phei hi chuan patea te ho ang lo takin sum a hmang thiam em em zâwk ṭhin.





Thla a'n vei leh deuh hret a, kei pawh School lamah leh khaw chhung hrim hrimah chuan ka tlângnêl sâwt ve ta khawp mai. Kan in luahna te'n an zir bawk a, Thangmawia phei chu Aizawl lamah a chhuk leh daih tawh, mahse a awm loh a hriat miah loh, chutiang khawp chuan kan lakah an fel a, an ṭha a, tlângnél loh theih pawh a ni meuh lo.





Tin, Thangmawia te unau zinga an naupang ber hi pâwl 9 zir lai mêk a ni a, a kum phû lovin a fel reuh em em leh nghal. A hun leh hmunah min zah thiam a, min nêl viau bawk. Zir lai lamah a hriatthiam loh lai a awm tê hian min rawn pan chilh mai zel a, engkim thiam vek tura min ngai erawh a chhungte lakah ka tân a inthlahrunawm lek lek ṭhin.





Ṭuanna tlâng dung a dan tawh avangin a châng chuan Aizawl lam ngaih veng veng châng ka nei leh ṭhin a, mahse kan han ti chho ve bek bek zel a, a reh ve mai turah ka ngai. Thla thum a ral hnu chuan ka nu paw'n min awmpui reng thei ta lo, ka pa a khua a har thei bawk si. An inhruai thla ta nge nge a, kei erawh pachang taka awm turin min fuih awl lo va, pu Hnehate in kher hi luah lo ta ila chuan ngaihngam taka min kalsan ngam ka ring chiah lo a ni.





"Miss?" aw lo chhuahna lam chu ka hawi phei a, Sir Chhuantea lek chu lo niin!



"Ti rawh, lo chûang rawh, ka lo phur ang che" a rawn ti leh nghal zat a, ani hi chu ka thawh tirh aṭang tawh ka lakah a hawihhawmin a fel ṭhin khawp mai.



"A va lawmawm dâwn ve" tiin kei pawh chu ka chûang ve nghal mai bawk.





High School hi vêng chhak tlâng sâng deuh laia awm a ni a, a thlang lawk zâwl zau laiah sawrkâr Middle School a awm bawk a, thingtlâng tih takah School Compound-ah hian thingkung a la tam ṭha hle a, Aizawl nen chuan inang lo tak a ni.





Tin, ka thawhpuite hian changkang viau turah min ngai deuh fur a, ka dem em em hran lo, mahse tleirawl chhuah chhoh tirh lai vela thingtlânga lo awm tawh ṭhin ka ni a, min la hre chiang chho ve zel mai a ni ang chu!





Chhun chawlh laiin thingpui leh chhang kan chah ṭhin a, khaw chhunga mi a nih mai bakah siam zawh hlim hlawl a ni ṭhin a, a tui pawh a tui thei hle. Zirlai naupangho erawhin tiffin an pai mai a, a pai ve lo leh a haw duh chu kan hawtir mai zel bawk. Mi puitling tawh tak ang maia zirtirtu hna ka han thawk ve ta mai te chu mak ka ti leh rum rum ṭhin a, ka hnathawh châk ṭhin ber ka thawk thei hrim hrim te chu ka hlim a ni.





"Saw ti lai, School piah deuh lawka mi saw! In an sa dâwn tihna emaw ni le Sir? Nge thil dang tur zâwk? " tiin chhun chawlh thingpui kan in lai chuan Sir Zaia chu ka zâwt a, ni dang ang bawkin kan thingpui in lai pawh a tui leh hle.





"In tur ni lo ve, vantlâng Tanky thar tur an sa dâwn a nih saw! Kan khaw Tanky hman lai mêk hi a chhe ve tawh ang reng a, kei tak phei chuan hmâna hmanah Tanky thar neih a ṭul ka ti tawh zâwk maw le" a rawn tih chuan





"A nih ngei dâwn chu! A hmun saw a zâwl zau ṭha ang reng si a, Tanky siamna tur tak pawh a ni" ka lo ti ve leh nghal mai a, vawiin chu Sir Chhuantea a rawn kal lo va, office chhung pawh a reh pha deuh riauin ka hria.





Tlai dâr 3-ah school kan bâng a, naupangho haw rem vek hnuah kan haw ve ta chauh a, vawiin chu Headmaster tih loh chuan lirthei an keng lo vek a, an inthurual emaw tih mai tur a ni. Khaw chhung mi leh sa vek an nih avang hian kan haw kawngah emaw School-ah emaw pawh ni se, an thil sawi reng rengte hi ka chik ru thei em em a, hriat ngai loh hriat pawh ka ngah phah hle bawk.





"Ai a!" ti ṭhawtin ka léng deuh lâwp a, tluk erawh ka tlu nâ lutuk lo hlauh!



"In va han mawl em em ve maw le? Tute nge in nih a? Hemi khua hi chu in ni lo tawp mai, in rui em ni?" kan thawhpui Sir Sena chuan a ti hluk hluk a, mi kawng kal ṭha hle hle lai min rawn sû ringawt chu ka thin a rim ru ve reng.





"Kan tihpalh lutuk ka pu, kan rui miah lo a nia" Scooty khalhtu zâwk chuan a rawn ti thuai thuai a, a la naupan hmel hle bawk.



"Ka bulah ni lovin in mi sut bulah khuan ngaihdam chu dil zâwk ta che u maw le, mawl leh lutuk mai" Sir Sena bawk chuan a ti leh hrawk hrawk a, ngaihdam min dil nghal mawlh mawlh tâkah chuan





"Ka nâ lutuk hleinem, mahse a leh pekah chuan fimkhur tawh ula aw" ka ti ve ta thung a, ngaihdam min dil lotu zâwk, hnathawk tih hriat zeta lukhum khum leh a rawmawla hmai tuam deuh tlat pa chuan min lo en chiang ngar ngar khawp mai.



"I kal ang u, ka ngaihtuahawm lo ve" tih leh kal ka rual a, min sutu te lam chu ka hawi lêt zawk a, hmai tuama bawk chuan min lo la en reng a nih chu!





Ka hmuh tawh hnu a ang chu ka ti ru ve reng, mahse ka hmu sual zâwk a nih ka ring. Muangchângin kan kal a, ka bula mite chu thil dang daih sawi leh tawhin an nui leh hawk hawk ṭhin a, kei erawh ka rilru leh mitthlaah kha pa, hmai tuama chiah kha a awm thung, eng nge a chhan pawh ka hre lo. A mit mawlh khan tu emaw ni àn deuh a nei, ka hmu tawh chiang alawm, mahse khawiah nge ka hmuh tawh ka hre chhuak mai thei bawk si lo.





'A ho êm mai, ngaihtuah zui tawh lo teh ang' ti rilru rauh rauha ka nui luih sak lai chuan chiang lutuk tak mai hian ka mitthlaah hun kal tawha ka hmuh ṭhan em em ṭhin mihring hmel a rawn lang a, ka thil hriat chhuah chuan ka tha hial a tikhur thei.





"Min hrethiam teh u!" tih leh School lam kawnga tlan chhoh ka rual nghal thuai thuai a, ka thawhpuite pawh chuan mak an ti ngawt ang ka ring.





Chawl miah lovin ka tlan chho char char a, Scooty-a min sutna hmun ka thlen chuan a khalhtu zâwk chiah kha a lo awm tawh a, Scooty chu a lo buaipui mual mual mêk bawk. Ka hmel a hmuh rual chuan nuam lo tih hmel deuh hian min en a, ka thinrim hnuhnawh emaw a ti a ni ngei ang, mahse chu lam chu a ni hauh si lo.





"Khawiah nge, khawiah nge kha pa kha!?" ka ti deuh thawr a, ka mi zawh pa chuan hriatthiam loh hmel tak a ni!



"Eng lo...i zawhna awmzia ka hre miah lo, tu nge i sawi?" a rawn tih chuan ka chil ka lem dawk a, hah avangin ka thaw pawh a rang dawt dawt hle.



"Nichina i mi phurh pa kha!? Hmai tuam tlat pa kha!?" pangngai deuh zâwk hian ka ti leh a, mahse ka aw chu a la dik hlei thei chuang lo.



"E....ani chu hnathawhna lamah a lêt lawk a, engati nge a?" mak tih hmel deuh hian min en a, chhâng buai tawh lovin Scooty bula ṭhutna remchang laiah chuan ka ṭhu tawp ringawt.





"Khi, a lo chhuk tawh alawm, eng lo, i hauh dâwn chuan keimah zâwk min hau thei ang. Khalh ka duh tlat avangin min khalhtir a, ani chuan engmah thiam lohna a nei lo" ka bula mi thusawi zawng zawng chu ka bengah lut ve teh mah se ka mit leh ka rilru erawh hmun dang daihah a awm thung.





Mit lá sawn lêk lova ka en ngawt ngawt pa chu a lo hnai zel a, ka thin phû te chu a rang dawt dawt a, ka zâm ru er er ni mai te'n ka hria. Ka hmuh hmasak zâwk ang chiah khan a hmai a la tuam a, lukhum pawh a la khum vek a, a mitmeng te hlei hlei chuan hun kal tawh min hriat chhuahtir nasa zual tak zet.





"Nangmah i ni em?" din hnaih nghal rawkin rawkin a mitah tak chuan ka en chho kàl a, min chhâng lo hrim hrim.



"I ni ti raw?" ka ti leh tawp a, min la chhâng chuang lo.



"Zosiam?" a hriat phâk tâwk tur vel leka ring hian ka ti sep a, hmai tuam tlat lo se chu amah ngei a nih leh nih loh ka chiang ngam tawh ngei ang, a mitmeng aṭang chuan amah chiah chiah kha a ni bawk si.





Min en chhuk runna ata a mit chu là sawnin min kal pel a, ṭawngkam khat lêk pawh a chhâk chhuak lo va, a mizia te hlei hlei chuan Zosiama ngei kha a nih rinna min neih lentir zual! Scooty buaipuia a che vel chu ka thlir tlawk tlawk a, ka zawhna a chhâng duh bawk si lo, ka ringhlel lo thei lo a ni.






End of Chapter 1





.

[Havali Adam]

WAY BACK INTO LOVE


By


Havali Adam




Chapter 2




"Zosiam?" ka ti nawn leh ngat a, a bula mi zâwk chuan



"U Zosiama nen hian in inhria em ni?" a rawn ti a, engtin mah ka chhâng lo, mahse tunah chuan amah ngei a ni tih ka chiang tawh!



"Kal ang" thum chhala ti hniam supin Zosiama chuan Scooty-a chùan a rual a, a ṭhianpa pawh chu a chûang ve nghal mai bawk.



"Nichin kha chu kan tihpalh lutuk aw, min hrethiam hram dâwn a nia" an tlan chhuah hmain Zosiama ni lo zâwk chuan a rawn ti leh a, ka lakah a inthlahrung tih leh a inthiam lo tih a hriat ngawih ngawih.




An tlan liam thlengin ka thlir zui vawng vawng a, Zosiama mawlh chuan ka rilru a luah ta a ni. Mi hre tawh miah lo ang maiin min be duh miah lo kha a ni a, rilruah thil chi hrang hrang a rawn lang zut zut a, ka hun tawn mêk chuan hun kal tawh min ngaihtuah chhuahtir zawm zat bawk.




Khatia kan han inngaizawng kha kan hlimin tu dang kan ngâi ngai bik lo va, a hmel chu thuhran ni se, ka mipa duh chî tak a nih vang nge pawh ka hre lo, a pá ka ti thei em em a, a chet dan leh a mizia hrim hrim khan min hip ṭhin hle a, mahse a pawi ta ber erawh ka pa hna avanga Aizawla kan insawn thla ta daih kha a ni.




Tin, khatih hun lai khan ka nu leh pa khan ngaihzawng ka nei tih pakhat mah an hre lo va, nei turah pawh min ngai lo hrim hrim. Chu bakah ka nu leh pa khan pâwl sawmpahnih Pass hmâ chu ngaihzawng neih a phal lo bur a, khami avanga a ruka inngaizawng char char pawh kan ni réng a, mahse ka nu leh pate kha ka dem hran lo.



Tu nge mahni fate tân thil ṭha lo duh reng reng ang ni!?




Kei an fanu tân hian thil ṭha leh hma hun êng tak ka neih an duh tih ka hai lo va, chu vanga tun thlenga an thu la awih zel pawh ka ni! A ruk thei ang ber leh ka nu leh pate hriat loh theih dan zelin Zosiama nen khan kan inngaizawng ve char char ṭhin kha a ni a, khami kha an thu ka awih lohna thilah chuan a la lian tham ber hial ang ka ring.




"Kha, i va ngaihtuah mûk hmel ve?" pu Hneha nupui pi Muani min biakna chuan ka ngaihtuahna ata min tiharh zawk a, chhán pawh ka chhâng lawk lo nghe nghe.



"Aaa...nia....pu Hneha a lo haw tawh em?" bah deuh nawka ka tih chuan




"Haw tawh e, chawhmeh pawh a rawn hawn tak asin, lo pêng lut lawk teh, i ta tur pawh a rawn hawn kep che alawm, i keng thla nghal daih dâwn a nia" a rawn ti siam siam a, an chhungkaw zârah hian chawhmeh lam hi chu ka hnianghar ve ṭhin khawp mai.



"A va lawmawm dâwn ve le, a lâkna a hautak àwm si a, ka lo lei zâwk ang chù?" tia an in kawngka lam ka pan lai chuan



"A ngai lo, a ngai lo, i ti awm ang lo ṭhin êm mai" a lo ti thuai thuai a, in chhungah kan inzui lut nghal bawk.




Pu Hneha chuan chawhmeh tur thlai hnah leh thlai rah min hawn thlaktir a, lei ka tum ngial paw'n an phal tlat lo. An fel lutuk hi ka inthlahrunna chhan ber a ni ṭhin a, an in hnuai ka luah ta mai te hi ka lawm thar leh ṭhin. Mi dang in hnuai luah ta ila chuan ka pate tân tak pawh ngaihtuah ka nâ ang a, kei pawh ngaihngam takin ka awm theih ka ring lo.




Pu Hneha te chhungkua ve thung hi chu an fel em em a, ka lakah mai ni lo ka nu leh pate chungah pawh an ṭha leh zel a, buaina leh harsatna tâwk miah lova ka awm theih chhan hi anmahni vang ka ti lo thei lo a ni.



Tin, Thangmawia nen pawh Phone kaltlangin kan inbe ve leh zauh ṭhin a, nuam ka tih leh tih loh te, harsatna ka neih leh neih loh te min rawn zâwt ṭhin a, a fel suam suam ṭhin khawp mai.




Hna avanga ka awmna khuaah hian in 700 dâwn chu a awm a, sawi tawh ang khan Aizawl aṭangin hla ve viau mah se a thingtlâng chhe zawk zawk tawh lém lo va, a mi chenga te pawh an changkang ru phian a, mahse ka naupan lai khan thingtlângah lo awm zuaih hman tawh lo ila chu khawsak leh nunphungah ka buai deuh mai thei a ni.




Thingtlâng leh khawpui hi chuan kawng tam takah inan lohna an nei a, incheinaah te, hnathawh kawngah leh ei leh bar zawnna kawngah te, nun danah te, ṭawngkamah te thleng hian, sawi sen a ni lo, engkimah a ni deuh vek mai. A inang lo nasa em em a, khawpui hlira awm ṭhang tân chuan insiam rem a theih loh chu ka ti dawt lo ang a, mahse hun rei lo tê chhunga insiam rem nghal zung zung erawh a harsa ve deuh ang ka ring.




"Aw pa" tiin phone call chu ka pick up a, mut a hun tawh viau ná chu an la mu lo a ni ngei ang.



"Eng nge i tih a? I mu tawh dâwn em?" a rawn tih chuan



"Mu hnai chu a ni mai, nangni zâwk? In la mu dâwn lo em ni?" ka ti ve nghal mai a, Scooty min sutna avanga ka mal chhung nâ deuh riai riai erawh ka hrilh duh lo ta law law.



"Mu dâwn tawh e, ka rawn be lawk che maw le, a nih mut tui aw?" a rawn ti leh chuan



"Immm...muttui u le!" tiin ka lo chhâng a, kan inbiakna pawh kan titawp zui nghal chu a ni mai.




Khumah ka lâwn vek tawh ná chu ka kâin thei a châk deuh thut a, tho chhuak lehin khô têa nimbu pum khat chu ka vel nghal mial mial a, chi leh hmarchha ka inchhawp bawk a, ka ei zo chiah chu ei leh ka châk khawp mai. A pum a tê ang reng bawk si a, ka kham chiah lo a ni ber e.




Zunram thiar lehin khumah chuan ka mu ṭha ta hle hle a, ka mitthlaah chiang lutuk tak mai hian Zosiama hmel a rawn lang a, tunah rih chuan ka ngaihtuahna ah thil dang a awm thei lo. Ani ka ngaihtuah chhuah apiangin hun kal tawha kan lo awm dun ṭhin dan a ngaihtuah chhuah loh theih lo va, ani leh kan hun kal tawh kha chuan inzawmna an nei tlat a tin a ni!




A tuk zinga ka harh chu ka mal chhung nâ chuan min kam deuh ṭul a, nimin tlaia Scooty-a min sut vang a ni tih pawh ka hre chiang hle. Ka kal zawng te chuan ka bai deuh sawih sawih a, School kal ṭhulh ka hlau bawk si, nâ chhawkna damdawi ka ei tawp ringawt a, tlêm chuan a nâ pawh a zia deuhin ka hria.




School ka thlen chuan ka thawhpuite'n min lo be suam suam hlawm a, nimin thil thleng avanga nâ ka neih leh neih loh te min zâwt a, nâ nei lo ang hmakin ka insawi daih thung. Nuamsam zán lovin Class chu ka là deuh mawp mawp a, chhun chawlh hun a rawn thleng thuai te chu ka lawm ru ang reng hle.




Class ṭan leh nân minute 15 vel a la awm a, tih tur a vâng rih bawk nen vantlâng Tanky an sak mêk awmna lamah chuan ka phei zel a, zep thu cheng lo, Zosiama ka hmuh ka inring tlat a ni! A hmun ka va thlen chuan hnathawk pangnga vel hi an lo awm a, ka mitin Zosiama hmel a zawng ru nghal a, mahse ka hmu mai lo.




"I lo kal leh elo?" min rawn betu hmel ka hmuh chuan Scooty-a min sutu kha a ni tih ka hre chawpchilh nghal.



"Aw, High School-ah sawn ka thawk a, i hming min hrilh thei ang em?" ka tih chuan



"Rina ka nia, nimin avang khan nâ i nei em?" a rawn ti deuh zung zung a, ka lo nui sak ringawt.



"Eng lo a nia, Zosiama kha khaw'nge? Ka va'n hmu ta lo ve?" ka zawhna chu a mawlmang tih ka hria, mahse ka hmu châk miau bawk si a ni.



"E....u Zosiama maw, ani chu kan chhun thingpui in tur a là lawk a, a lo thleng ṭep ang ka ring" tih leh hna chu thawh zawm a rual a, ka hmuh duh ber a awm rih bawk si lo, tih tur a vâng ta hle mai.




Hnathawkho vil ang mai hian an hnathawhna bulah chuan ka kal kual vel a, Tanky sakna tur chhak deuh lawkah siam chawp tih hriat zet buk tê hi a lo awm a, an riah chilh a ni ngei ang.


Ni e, khaw mi leh sa dik tak an ni lo tih chu nimin khan ka hre tawh tak alawm, mahse an riahna hmun ber kher chu a tuitang lo ka ti, hmun dang ṭha deuh hlek a awm lo emaw ni le, a bulah hnim a ṭo tam bawk si.




Scooty rum ri ka hriat rualin ka hawi chhuak nghal a, amah Zosiama ngei kha ka hmu leh ta! Hmanhmawh lutuk lovin ka pan hnai a, min rawn en zawk tih loh chu min hria ang leh min hmu ang paw'n a awm lo. A dai hlim lai deuhah chuan ṭhuin an thingpui in lai vel chu ka thlir ta ringawt a, va pawh ka tum viau tak nà a, nuam ka ti leh chiah lo a ni.




A lukhum leh a hmai tuamna rawmawl sen a phelh vek tawh a, a hmel chu chiang takin ka en a, hun a liam hnem ve tawh bawk nen a lo danglam ve ta khawp mai. Kan inngaihzawn lai ang lo takin a biang a thau lam lek lek tawh a, a mit erawh danglam pakhatmah a awm lo thung.




A taksa ni se a hrawlin a lian em em a, an zingah chuan a lian ber nghe nghein ka hria. San zawnga chen chu an awm mai thei, mahse pumrua ah erawh tuma'n an tiat lo.


Nimina min sutu pa Rina khan a ṭhut hnaih hle a, a be deuh reng bawk a, Zosiama pawh kan inhmachhawn lai ang lo takin a phun ve leh sup sup ṭhin a, ṭawng erawh a ṭawng tam lo khawp mai.




Chutia ka thlir dauh dauh lai chuan min rawn en a, ka phu deuh zawk nghe nghe. A ṭhutna aṭanga tho vutin ka awmna lamah a lo kal phei a, a rawn hnai zel a, ka thin phu te chu rang dawt dawt tak a ni. Ka ṭhutna aṭanga ding chhuak thuaiin ka lo en kiau a, ka hma lawka a din tâkah chuan ka zam lutuk pawh kha a reh deuh duak te'n ka hria.




"School dâr a ri tawh" a thusawi teh daih avang chuan ka nui sak a, mahse ka va nui tawp chiang kher êm.



"Enga!? Awi, a ni maw!? Engtikah!? A ri tawh tak tak em?" rei pawh ngawi lovin ka ti zui nghal mawlh mawlh a, ani lah chuan min chhâng lêt tawh hauh lo leh nghal.



"A ri tawh tak tak em Zosiam? Awi, f
Fisrt Period ka la nei zui, sawi chiang teh!" a inher tur a bâna vuan thawr pah chuan ka ti leh a, kei min en lovin ka kut zâwk chu a en daih a, ka thlah leh rang hle bawk.



"Ri tawh" ti vawt ruihin min hnung chhawn zawng hian a kal sawn zui nghal nul nul a, kei pawh ka che muangchâng tawh lo hle.




Office ka va thleng chu ka Period-a Class là an lo awm tawh a, Sir Sena chuan Sir Zaia nena kan period kan inthlak thleng thu min lo hrilh zui nghal bawk a, nuam lo ti ru tak ka ni! A bul ber chu Zosiama vang vek, ka rilru leh ngaihtuahna tibuai turin rawn inlan leh lo se chu hetiang hian ka awm miah lo ang.




Period khat chhung tawp ngaituahna buai ru zetin ka ṭhu ngawi reng a, nichin maia ka awm dan kha ka ngaihtuah lêt leh ṭhin a, mak ka la ti reng mai. Engtin nge School dâr rik lai pawh ka hriat loh theih zâwk le, Zosiama kha ka thlir reng vang tih chu ka pha lo va, mahse khatiang em em khan ka ngaihtuahna a kal pêng nasa ang tih rin ngaihna ka hre lo thung.




School dâr a rawn rik leh tâkah chuan ka ṭhutna aṭangin ka tho nghal tharh a, ka Jeans hak lai iptê zena ka Phone phawrh ka tum chu a awm ta hauh lo mai! Ka titla palh a nih ringin ṭhutthleng hnuai leh ka dawhkan bul vel chu ka thlek kual nasa hle a, mahse ka hmu chuang lo.




"Eng thil nge i zawn a Miss?" tiin Sir Chhuantea Class là zo lo ut chuan min rawn bia a, nui lui sak chung hian



"Ka phone maw le, ka hmu mai lo va, nakinah ka zawng ṭha leh mai ang" tih leh zirlaibu chu pawm ka rual a, Office-a Sir Zaia a rawn luh ve leh tâkah chuan Class lá turin ka chhuak zui nghal bawk.



Naupangho ka zirtir lai te chuan ka rilru kil khatah ka Phone ka hmuh loh ringawt chhan chu a awm ru reng a, Zosiama te hnathawhna bula ka ṭhut lai khan ka thlauh palh a nih ka ring nghet bur tawh bawk.



Zirlai naupangho chu ka chhiar rualtir a, a chhiar dik leh dik lo ngaihven ru rengin ka vei kual a, tukverh aṭanga Zosiama te hnathawhna lang pha chin lam ka hawi leh zauh ṭhin tih loh chu ka vil deuh chawt a ni ber.




School bán rual rualin Zosiama te hnathawhna lamah chuan ka kal nghal a, Sir Chhuantean min kalpui nghe nghe bawk. A hmun kan va thleng a, kan kal tih pawh hre miah loh hian hna an lo thawk mual mual hlawm a, khawtlâng VCP leh a ṭhiante hmel pawh kan hmu tel a, a hma kha chuan ka hmuh àwm ka hre miah lo.




"Eng lo..." tiin ka ngawi leh dat a, ka bul maia awm; a hnathawh lai chawl chuang miah lo leh ka bia tih pawh hre lo ang maia awm Zosiama chu ka din hnaih deuh sawt bawk.



"Enteh Zosiam, in búk sakna bul velah sawn ka Phone in lo hmu mial em?" ka tih leh chuan a thil tih lai chu a tawp chat a, rawn ding chhuakin a kekawr chu a bêng khu rum rum a, hmai a lo tuam tlat ṭhin kha a chhan ka hrethiam ve ta chiah!



"Fimkhur tawh ang che" ti thum ruihin a kekawr iptê aṭang chuan ka Phone ngei mai chu a rawn phawrh a, min pe zui nghal bawk.



"Awi, ka va'n lawm, ka lawm lutuk aw" ka ti ta mawlh mawlh a, ani erawh min chhâng lêt lo chiang khawp mai.




"Kan kal dâwn em ni ang Miss?" Sir Chhuante lam nui chunga hawiin ka buk khum zeuh a, lawmthu sawi nawn leh tuma Zosiama lam ka hawi lêt leh chu ngunthluk zet hian min lo en tawn deuh ngur a, ka thusawi tum pawh ka sawi leh loh phah ringawt nghe nghe.




Bike-a ka chûan fel hnu chuan ka hawi phei leh hram a, ani erawhin min ngaihsak lo tih hriat zet hian hna a lo thawk leh mual mual daih tawh! Sir Chhuantea nen chuan eng eng emaw ni kan sawi thla melh melh a, mipa kawm nuam tak a ni. Mipa ṭhian hi ka nei mang lo va, Sir Chhuantea erawh hi chu a dan a dang khawp mai, a fel tih hian a fun kim berin ka hria.




In ka thleng chu eng khaw sawi set set lo leh thil dang engmah ti nghal mai lovin khumah ka mu zangthal thlawrh a, ka mitthlaah Zosiama hlir a awm a, dik tak chuan kum tam tak hnua kan han inhnaih leh ta viau chu nuam ka ti chiang alawm, a laka ka rilru puthmang pawh hmân ang chiah khan a rawn thar leh ni mai te'n ka hre bawk.




Ni e, phat rual lovin ka la duh ngei alawm, a mit hmang chauh pawha ka lung phû ti rang dawt dawt thei mipa a nia, ani ang mipa hi ka nunah vawi khat chiah ka la tawng, chu pa chu amah a ni. Kan inkâr erawh tunah chuan lei leh van inkâr ang vela zau a ni tawh thung a, hun liam tawhin thil a lo her danglampui nasat tawhzia chu hrilh nawn ka ngai lo chiang hle a ni.




Ka mit chu ka chhing vang vang a, hun kal tawhah bawk suangtuahna nen chuan ka kir leh ta nge nge. Kan inṭhen nîa Aizawl lam kan pan tur min rawn um hram hram lai te kha ka mitthlaah chuan a rawn lang fiah em em a, ka pa Motor Seat hnung aṭanga mittui tling pam chunga ka en ṭawk ṭawk lai te thleng chuan ka hmu chiang hle a, engkim mai chu hun liam tawh leh suangtuahna chauh a ni tawh tih ka hria, mahse a tak ang chiahin ka hmu fiah em em vek thung si.



Nî te chu an ral zel a, ni tin School-ah ka kal tlauh tlauh ṭhin a, Zosiama nen pawh kan inhmu ta fô mai. Kan inhmuh dan erawh a holam ang reng thei hle a, kan inbe ngai meuh lo. Amah ai chuan a ṭhuihhruai ni àwm tak Rina nen zâwk kan inbe deuh char char zel a, a fel reuh em em leh nghal.





'U Terem' tiin min ko mai zel a, ka rin ai a lo la naupang daih bawk. Pâwl 12 zir rual vel lek a la ni a, zirna a chhunzawm tawh loh chhan min hrilh te chuan ka khawngaih reuh khawp mai. Ka ngaihven leh ka mit làtu ber Zosiama erawh ka lakah chuan lung tum ang mai a ni a, biak pawh ka be ṭawng thei ngai meuh lo.





A mizia a lo danglam tawh lutuk chu mak ka ti leh rum rum ṭhin a, mahse amah ngei kha a ni bawk si. Chhun chawlh apiangin an hnathawhna lamah ka phei ta ziah a, sawi tawh ang khan an hnathawhna hi School aṭangin a hla lém lo va, hmuh phâk vel hleka hla a ni ti ila a sual lo ang.





Ni tin han inhmuh reng tâkah chuan keimahah danglam a awm zual zel a, a hmel, a chet dan leh a pianphung hrim hrim chuan keimahah bú a khuar nghet tial tial a, zep thu cheng lo, ka duhin ka ngaizawng thar leh ni ta berin ka inhria!



A va zahthlak tak, mahse ka duhin ka vei miau si alawm le!





Hmeichhia zâwk tih atân chuan a mawi lo tih pawh ka hria, mahse a bul hnaiha ka awm tawh chuan ka rilru a buai tlat a, sawi mai tur pawh ka hre lo lek lek ṭhin hial! Chutiang khawp chuan keimahah a thawk nâ a, sawifiah vak ngaihna pawh ka hre lo, hlim taka inngaihzawna inkawp ṭhat leh ka duh a ni ber.





Tin, a hmel ka hmuh apiang hian hun kal tawh ka hre chhuak leh nge nge ṭhin a, kan inngaihzawn ve lai khan pâwl sawm zirlai a ni a, kei pâwl riat zirlai ka ni thung a, khatih hun lai kha chuan tun lai ang lo takin pâwl riat kha High School-ah a la bet a, kei ai kum 2- ngawtin upa zâwk mah se 'u' a duh tlat loh avangin ka û ngai ta bik lo a nih kha!





Tunah hian kum 28-na ka hmang mêk a, Ber thla lamah ka pum dâwn chauh a, ani erawh ka hriat sual loh chuan tun thlaah hian kum 30-na a pum dâwn thung a, tun thlenga a Birthday nen lam ka la hre reng te hi a mak zâwk, khang kum liam ta chhung zawng pawh khan ka thinlungah a awm reng ṭhin ti ila a sual tampui lo ang.





B.A ka pass hnu khan zir zawm nghal mai lovin eng eng emaw ni ka ti kual a, a hnuah M.A ka zir zawm leh a, chumi zawhah B.Ed ka zir ṭha leh kha a ni a, khatih chhung zawng khan engtin nge a lo awm ve ṭhin ang lè! Ka rin dan chuan pâwl sawm a Pass hnu khan lehkha a zir zawm ka ring tawh chiah lo, mahse ka ring sual ve thei tho.





"Êeee khai, nula chhe lo zetin min vilpui bawk a, hna pawh an thawk ṭha sawt sawt alawm le, min rawn vilpui ziah la a ṭha ang" VCP chuan fiamthu tih hriat tak hian a ti lauh lauh a, a ṭawng zawi lo hle bawk.





"Ni e, kan bulah hian rawn awm ziah tak tak se a ṭha ang" hnathawk zinga pakhat chuan a rawn ti ve nghal a, mi dangho chu an nui leh vur vur ṭhin a, Zosiama erawh kan thawm leh kan ṭawng ri hria ang paw'n a awm lo hrim hrim.





"Zanin aṭang chuan ni 100-inah in rawn riak thla thei tawh dâwn a nih chu aw Zosiam, chawhma lamah khan bungrua awm te kan dah chhuak a, heti laia awm ngawt ai chuan nawm pawh a nuam deuh ang ka ring" tiin VCP chuan a be deuh luam a, Zosiama pawh a rawn ṭawng chhuak ve ta nge nge.





"A va lawmawm dâwn ve, heti lai hmun pawh hi hrehawm kan ti chuang hleinem" a ti thum dam dap a, chutianga aw dam leh nélawm chuan min be ve se tih lam ka lo ngaihtuah hram!



"He lai hi zawng a tih chî loh êm mai, hmun danga hna in thawh hunah min sawi duh lutuk palh ang" tia nui deuh hak hakin



"Kan Head Mistiri Zosiama hi be ṭha hle rawh, a hlawh hnem teh a nia" a rawn ti fiamthu zawm zat a, min biakna chu chhan pawh ka chhâng lo, nui sakin ka ngawi reng ringawt.





An zinga ka awm ve a ṭul lutuk loh avangin School lamah ka phei ta daih a, Zosiama nena inngaihzawn leh lam chu ka ngaihtuah zui rauh rauh a, a awlai vakin ka ring lo. Nge ni a, kei hian engmah ka hre lo zâwk?! Ngaihzawng a lo nei reng mai thei asin, ka va han mawl tak, a neih leh neih loh hre chiang hmasa phawt tur ka ni asin maw le.



"Eng thil nge i ngaihtuah a? I va ner nasa em em ve maw le?" Sir Chhuantea chu ka en thuai a, za lo zetin ka nui ta ringawt, sawi chî ni hek lo!





Ni dang ang bawkin a hun ngaiah School kan bâng a, in ka thlen rualin ei rawng ka bâwl zui nghal melh melh a, eng emaw chen chu mahniin ka tal hrang ve ta bawk a, hrehawm tihna ka nei em em tawh lo. A tirah kha chuan ka nu leh pa ka ngai ṭhin lutuk kha a hrehawm ber a, tunah erawh ka zia chho ve ta khawp mai.





Khua a thim fel a, tih tur a vâng leh ta hle. Zan lamah hi chuan tih tur ka nei lutuk ngai lo va, a chângin Lesson Plan ka siam a, a châng leh in chungah ka lêng chho leh zauh ṭhin bawk a, chu zawng chu a ni mai. Chutia engmah pawh ti lova ka ṭhut ngawih veng veng lai chuan kawngka a rawn inkik a, lut turin ka chhawn zui nghal bawk.





"E hêee....lo lut rawh, engtin nge ka awmna i hriat?" ti deuh nghal mawlh mawlhin Rina chu ka en kiau a, ani pawh chuan



"Ka záwt kual nasa alawm, engmah pawh rawn tih ka tum lo, ka lo kal mai mai, i awmna hriat ka duh ve hrim hrim a" rawn ti ve nghal maiin a nui vur vur a, ani teh daih a lo lén luh chu ka beisei lo hle.



"A nih chû, khaw'nge mi dang?" ka tih chuan



"Tak tak a! Min tir a, i awmna an hre duh a, chu vang alawm i awmna ka zawn kual char char" a rawn ti ta mai.



"I va ho reuh tak!" tih leh nuih ka rual a, chutah ani lah chuan



"Nakinah an la rawn rim mai thei che a nia aw u Terem, naupang ber lo ila chu hetiang hian min tir kual miah lo ang maw le" a la rawn ti nui nui zui!



"In Head Mistiri Zosiama pawh maw!?" zawh loh ka tum zet nâ chu ka zâwt lo thei lo.



"Ani ber kher chu ka hre lo, mi dang zâwk a nia ka sawi" a tih laia a hmel chu ka en reng a, dâwt a sawi hauh lo niin a lang.



"A nih leh nupui a nei tawh ém?" ka ti leh ta nge nge, ka hre châk tlat bawk si a ni.



"Nei lo ve, i awmna ka hre tawh tho bawk a, ka haw leh nghal mai ang" tia haw nghal mai a tum chu



"Nimbu ka bâwl dâwn asin, ei ve phawt la i haw dâwn a nia" tiin ka chelh mawihnai a, mahse a haw lui ta tho.





A rawn kal chhan chu ka ngaihtuah a, ka nuih a tiza ang reng. Thil pakhat hriat belh ka nei ta phawt chu a ni a, Zosiaman nupui a la nei lo tih hriat ringawt pawh tunah rih chuan a hlimawm viau e. Ka ngaizawng viau nà chu tih huam huam a fuh vakin ka ring lo, a mizia nen phei chuan a inmil lo lutuk, min ning thuai mai ang.





Nimbu ka ei lai te chuan ngaihtuahna kawmin ka nui leh var var ṭhin a, Rina kâ aṭangin Zosiama paw'n ka awmna a hre dâwn tih ka chiang a, chu chu ka hlim ruk chhan pawh a ni a, engtik nî ah emaw chuan a la rawn lén ve ngei ka ring bawk.





Ka mu tui ngâng a ni ang, zinga ka harh chu thawh ka hai chiang hle a, ei rawng ka bâwl chawp nghal nawk nawk a, keimah chauh ka ni hlauh a, chawhmeh siam vel erawh a harsa hran lo. Tin, kan ṭhenawm lawkah hian ei chawp dawr tê reuh tê a awm bawk a, dal, alu leh neutrela tih vel te pawh an zuar ve vek a, ka chawhmeh leina ṭhin ber a ni nghe nghe.





Tukṭhuan ka ei dâwnah pu Hneha te'n chawhmeh min rawn suah thla leh ta zui a, a tlai a tlaiin chawhmeh pawh ka nei tam leh ta phian! Nizana ka mumang lah kha, hmuh loh tur nge hmuh tur dik tak ka hmu pawh ka hre lo. Nge ni a, kei hian ka ngaihtuah nasa mah mah zâwk em ni ang, chu pawh chu a ni thei tho mai.





A ngai tê bawkin School-ah ka kal leh a, zirtirtu hna hi ka hna thawh châk ber leh nuam ka tih ber te zinga mi a ni a, ka ngaihdan tak phei chuan tute pawh hi, eng hna pawh thawk ila, zirtirtu kan ni vekin ka hria.





Officer lian tak tak te pawh School-ah zirlai naupangte lehkha zirtir lo mah se an hnuaia hnathawk te an kaihruai tho va, an hriat tur ṭul an zirtir ve zel tho va, chu vang chuan mi zawng zawng hi mi pakhat tal tân zirtirtu kan ni ka ti ve tlat!





Chhun chawlh a lo hun a, kan inei puar hnu chuan ni danga ka tih ṭhin ang bawkin Zosiama te hnathawhna lamah ka phei leh a, a hnathawk lai mai mai pawh hmuh ka thlahlel chu a ni si a, ani hian engtin tak min ngai ve ang maw!



A ṭawng tam loh tawh sa nák a laiin ka bulah ngat phei chuan a ṭawng mawh lehzual a, a hnathawhpuite bulah erawh a ṭawng ve leh zauh ṭhin tho.





Amah ai a ṭhiante, a hnuaia a chhawrte chuan min be nasa daih zâwk a, kei paw'n hawihhâwm takin ka chhâng ve mai zel a, ka hre sual te a nih ngawt loh chuan an sual hran lovin ka hria. Mipa an nihna erawh a lan châng a tam a, mi han fiam zauh zauh te pawh an ching ṭhin, mahse ka ngai haw hran lo, huat tur a awmin ka hre lo hrim hrim bawk.





School dâr rik nân minute 5 vel a la awm a, beisei loh deuhin Zosiama chu an che vel thlira ka ṭhutna lamah a rawn phei nulh nulh a, ka awm dan chu ka sawifiah thiam chiah lo, ka zàm a ni tawp mai. Mi dang erawh VCP hovin eng eng emaw ni an sawi a, an nui leh dar dar ṭhin a, an thil sawi erawh keia hriat phâk pawh va ni suh!





"I chau em?" min hnaih lutuk lova ṭhu ngawi run pa chu ka melh zauh a, en pawh min en lo, ka zawhna pawh a chhán duh leh ka ring lo e a!



"I danglam tawh hle mai" hma lam en dauh dauh pah chuan ka ti leh sep a, ngawi reng hian a iptê aṭangin zozial a là chhuak a, a zu zui nghal zat bawk.





"Kan inhmu leh hi ka beisei tawh miah lo asin, ni lo, beiseina tlêm tê chu ka nei tho va, mahse hetianga kan inhmuh leh hi ka beisei miah lo zâwk" ka ti leh ta nge nge a, ka thil sawi dan vel chu insawifiah te pawh ka ang alawm le.



"A ngai rengin mihring kan awm thei hleinem" thum dam dap, mahse nghet ru deuh charh tho si hian a rawn ti a, a sawi dik viauin ka hria.



"Engtik thleng nge in awm ang?" ka tih leh chuan



"Hna kan thawh zawhah kan haw ang" ti hniam chhal hian a zozial zûk lai chu a pak khu zawm zat a, ka lo hip lut fuh bawk nen ka khuh zui kharh kharh a, min rawn en rang ngei mai.



"A nih chû" tih chauh ka sawi hman a, ka khuh zui leh kharh kharh nghal bawk.





A zûk tirh chauh mah ni se ngawi reng hian a kuta zozial hmawr ling vât vât chu leiah a nawr thi ta daih a, ka lo en reng ringawt. Engmah sawi chhunzawm tawh lovin kan ṭhu ngawi dun ta char char a, ka biak chhen chuan ti huam huam lutuk emaw min tih ka hlau bawk si, a nin zawnga awm ka duh bawk si lo, awm dan chin tâwk thiam a ngai ang reng hle.





"Ka va phei ang e" zawi sepa tih leh thawh ka rual a, chutia ka din uaih lai chuan School dâr pawh a lo ri ve chiah bawk.





Engtin min chhâng lo va, ka kal tur chu min en reng thungin ka hria. School ka va thlen chuan Class là turin ka inbuatsaih nghal a, ka thawhpuite paw'n min lo be leh suam suam hlawm tawh a, Zosiama te hnathawhna hmuna ka phei ta ziah chu min fiam chhan ber pawh a ni a, ngaiah ka nei der tawh, ka hmelhriat an awm avanga phei ṭhin ka nih thu ka hrilh satliah mai ṭhin.





Zan lamah chuan ka nute nen kan inbia a, ka chanchin te, hrehawm ka tih leh tih loh te min zâwt nual a, remchang hmasa bera rawn zin chhoh an tum thu min hrilh nghe nghe bawk. Puitei nen pawh kan inbe deuh reng zel a, kan inbiak tawh hi chuan a thil tawn chungchang leh rawn zin chhoh lam hlir a sawi ṭhin a, a pa'n a phal mai bawk si lo, a rawn vui nasa ṭhin khawp mai.





"Lo lut rawh" tiin kawngka inkik ri karh karh chu ka lo chhawn a, Rina leh a ṭhiante ho lek chu lo niin!



"Lo léng r'u" pangngai tak hian ka tih zawm leh nghal a, Zosiama tih loh chu an kim vekin ka hria.



"Kan rawn lêng ve tawp mai asin, i buai lo ang chu màw?" an zinga upat hmel deuh ber chuan mawihnai tak hian a rawn ti a, Rina lah chu a lo khi heu a, eng nge a nuih chhan pawh ka hre lo.



"Buai lo ve, lo ṭhu r'u, thingpuite kan lûm dâwn a nia" tiin ka ṭhut dan chu ka siam rem sauh sauh a, han sawipui vak tur erawh ka ván ru kher mai.





Amahni zâwkin zawhna leh sawi tur an hre hlauh a, an chanchin te kan inzawh kai zel tâkah chuan Zosiama te khuaa mi vek an lo ni a, kan tleirawl laia kum 5 chhung kan awm ve tawh thu te, school ka kal tawh thu te chu ka sawi chhuak ve ta nge nge a, chutia hun kal tawh nen lam thil chi hrang hrang kan sawi hnu chuan kan inpawh deuh sawtin ka hria.





Khaw chanchin lam te kan sawi chhunzawm zel a, rei awm hman lo mah ila tlêm azawng chu ka lo hre ve nial nual tawh bawk a, hmun hming te pawh ka lo la theihnghilh hmin ṭhak bik tawp lo e! Ka han insawi ngial tak nà chu min hre chiang ṭha ṭhum lo hlawm hle a, kei paw'n tute kha nge an nih ka hre tawh chuang lo, ka nu leh pate erawh an hre vuai vuai thung.





"In Head Mistiri chu a lo lêng chhuak peih ve meuh na nge?" ngaihsam hmel deuh hian ka ti a, dik tak chuan eng vanga rawn lêng lo bik nge a nih ka hre châk a ni.



"Ani te zawng inah a tawm thei ṭhin êm mai, e....tak a! Rina hian in lo inhriat tawh thu a sawi tak alawm, engtin nge in inhriat reng reng a?" pakhat chuan a rawn ti ta khauh mai.





"In khuaa kan awm lai khan High School-ah kan kal ho ṭhin alawm, pâwl riat kan nih laiin anni kha chu pâwl sawm an nia, ti daih ila, a zir zawm zel ta em le?" ka tih zawm ta zaih a, keia rin thu vel mai mai ai chuan anni hian an hriat chian zâwk ka ring.





"Zir zawm tawh náng, pâwl sawm a Pass hlim hlawl khan a pu hriselna a chhe zual a, khami avang khan zirna chhunzawm thei lovin a awm a, Mistiri lamah hian a kal ta ngar ngar a, mahse hei, a tifuh cher cher khawp mai" in chhung an lo luh tirha min be hmasa bertu khan a rawn tih chuan





"Aw hâw, a va'n zia lo ve le, a nih chuan a pute nen khan an la awm ho reng tihna a ni maw?" ka ti leh nghal zat a, ka mitthlaah chuan Zosiama hmel a lang nasa zut zut hle bawk.



"Awm ho reng e" a rawn ti ṭha ve leh mai a, zawh zui zel chîah ka ngai tawh rih lo, ka rilru an hrethiam ang tih a hlauhawm tlat!



"Mahni chauha awm a khawharthlak dâwn tehreng nen, engati nge in ruala a rawn chhuah ve mai loh?" tiin thu dangah ka pakâi ta daih a, chutah Rina ber chuan



"U Zosiama te chu a khua a har hman teuh lo mai, vêng sâng nula khan a rawn be leh deuh chhen ang ka ring" a rawn ti ta khauh mai, chu thu ka hre zet chu ka rilru leh ngaihtuah a va kal pêng chiang êm.





End of Chapter 2




.

[Havali Adam]

WAY BACK INTO LOVE


By


Havali Adam




Chapter 3




"Chu, ani zawng nupui tur ṭha deuh a lo nei reng tawh a ni maw?" ngaihsam hmel zet hian ka ti hliai a, a rukin keimah leh keimah chu ka inthunun lui nasa viau thung.




"Nupui tur ang zawng pawh a ni chiah lo, u Zosiama tak phei hi chuan a uksak lutuk lêm lovin ka hria, mahse a hmeichhia zâwk hian a ngaizawng bur a, kan khuaah chuan inngaizawng angin kan ngai vek tawh" engmah sawi zawm tawh lovin Rina thusawi chu ka ngaihtuah zui rauh rauh a, ngaihtuahna a kal ding duh khawp mai.




Keimah pawh min be em em lo hian eng eng emaw ni an sawi luam hlawm a, an thil tawn nuihzatthlak chungchang te, an khaw chanchin ṭhenkhat te, nula an rimnaa an chet chhiat ṭum te thlengin an sawi chhuak a, rilru pe lutuk lo hian an thil sawi chu ka ngaithla ve ran a, an thusawi kâr laka min rawn biak chuan ka chhâng ve leh zauh ṭhin bawk.




"Thingpui ka'n lûm tawh ang e" tih leh thawh ka rual a, bu nghat nghata mi chhâng lêtin an thil sawi lai an sawi zawm leh mual mual hlawm a, khaw khat vek an ni bawk a, an inkawm ngeih hlawm hlein ka hria.




Thingpui an infel zawh hnu aṭanga rei lutuk lovah haw zâi an rél nghal mai a, dâr zat ka en chuan a lo tlai ve duai tawh, rin aiin hun a kal chak ang reng. An haw dâwn chuan in chung kawt thleng ka thlah a, an hman châng changa lo lêng ziah tur te paw'n ka chah nghe nghe a, Zosiama ṭhian leh a thawhpuite an nih vang nge pawh ka hre lo, ka nêl hlawm nghal ringawt a nih chu!




Khuma ka mu chiah chu ka rilruah Zosiama bawk a rawn awm leh nghal a, ani hi zawng theihnghilh nî ka nei dâwn lo a ni ang. Khang kum liam ta chhung zawng pawh khan ka theihnghilh ngai chuang lo, ka hre reng ṭhin zâwk, mahse kan inngaihzawn ve lai ang em em khan ka rilruah a lian lo thung a, tun hnua kan han inhmu leh erawh a thawh dan keimahah a dan a dang tawh khawp mai.




Ka la duhin ka ngaizawng thar leh tih hi chu ka pha lo, mahse amah zâwk hian eng atân mah min ti tawh lo ang tlata hriatna ka nei thung a, chu thil chu a tak a ni ang tih leh a thleng dik ang tih ka hlau hle bawk.



Rina sawi danah lah khan keimah ni lo hmeichhe dang ngaizawngtu a nei a nih hmel leh nghal a, ani nena kan inngaihzawn leh ka duh tak tak a nih chuan ka beih ve fê a ngai tawh mai thei a ni.




A pawi lo, beih nasat a ngaih leh ka bei nasa mai a ni ang chu! Ka duh miau alawm le, a tâna hnawksak nih erawh ka tum bau lo, ka tân tak pawh a mawi chuang lo, ka awm dan zawng zawng hi ka nu leh pate'n rawn hre phei se chu mak an ti ngawt ang ka ring.




Kei lah chuan ka ngaihzawng hmasa ber leh a awm chhun mipa, kum tam tak liam hnua kan inhmuh leh avangin ka ngaizawng thar leh chu a ni si a, eng nge ka hma hunah thleng zel dâwn hre hawt lo mah ila ka tumah erawh ka chiang em em thung.




"I phei leh dâwn em ni?" Sir Zai chu nui chungin ka buk khum zeuh a, Lunch Break a nih tawh hi chuan Zosiama te hnathawhna lama phei loh ka thiam tawh lo a ni ber.



"Nang hi eng emaw ni a awm deuh a ni lo maw? Eng emaw ni a lo awm hlauh a nih chuan Sir Chhuantea a va hawihil duh awm ve?" Sir Zaia bawk chuan a rawn ti leh a, ka nui var var ringawt.



"Chutiang lam pawh a ni hleinem Sir, ka hmelhriatte an nia, chu vang alawm ka phei ṭhin" nui paha ka tih chuan



"Hmelhriat satliah hi an lo ni lo mai ang a!?" a rawn ti leh ta khauh mai.



"Hmelhriat satliah chu ni chiah lo ve, High School-a ka kalpui ṭhin te an ni hlawm a" ka ti ve leh ta nge nge a, mahse thu dik erawh sawi chhuah chî pawh va ni suh!



"Ka rei lo ang" zawhna dang min zawh leh hmain ka ti nghal thuai a, Office aṭang chuan ka chhuak zui nghal bawk.




"Khaw'nge i kal leh pek dâwn? A ngaiah em ni?" theihai kung bula Sir Chhuantea meizial zù nen kan inhmuh rual rualin amah zâwkin min rawn be nghal a, nui chunga ka buk khum zeuh chuan a hrethiam nghal vekin ka hria.



"Kei pawh nakinah ka lo phei ang" a rawn tih leh chuan ka nuih zeuh a, Zosiama te hnathawhna lam chu ka pan ding zui nghal ta nal nal.




Kâr lovah ka thleng phei nghal chu a ni mai a, Zosiama tih loh chuan min lo be ṭha em em vek a, an bula awm a nawm reuh em em chhan nia ka hriat chu ngaihzawng enin min en ngai lo va, ṭhian ṭha tak ang maia min lo be bawrh bawrh nghal mai ṭhin leh min lo fiam nghal mai ṭhin te chu anmahni ka nèlna chhan dik tak pakhat a ni.




A dang lehah chuan an hawihhawm em em a, ka nau rual pahnih vel an awm tih loh chu kan inrual tlâng hlawm viau a, an khuaa ka lo awm ve tawh ṭhinna hrim hrim te chuan kan inkârah inpawhna a siam nasa zualin ka hre bawk.



Chutih rual erawh chuan ka rilru leh ngaihtuahna luah khattu ber Zosiama lah chu a ngawi ngul zel thung a, hetiang tak hian a lo ṭawng duh lo sâwt ang tih rin ngaihna pawh ka hre lo.




"I hah tawh em?" ka tih chuan a lû a lo thing mai a, kan ṭhut dunna chu mi dangho awmna aṭangin a lang thei vek a, mahse a va fân deuh hlek thung.



"Nizanah an rawn lêng hlawm a, i pu chanchinte ka lo hria a, a va'n zia lo ve?" ka tih chuan engtin mah min chhâng lo va, a ṭawng châk loh hmel hle bawk.



"I chanchin nen" ka tih zawm leh zauh tâkah chuan min en chiang ta khawp mai.



"Engtikah nge nupui i neih ang?" hma lam thlir dauh dauh pahin ka ti leh nghal daih a, min en run avanga ka sawi tur haihchham chu engmah ngaihtuah chiang hman lovin ka ṭawng chhuak tawp a ni ber.



"Engati nge?" a rawn ti thum bul a, za lutuk lovin ka nui lui sak ringawt.



"Ka zâwt mai mai che maw le, i lo danglam tawh tak zet, a mak záwk" tháwk là hak paha ka tih leh chuan



"Nang pawh i danglam lo bik em ni?" a rawn ti nghet deuh charh a, a châng hi chuan mi ning hluah hluah a ang ka ti leh thut ṭhin.



"Nia, a dik reng, hun hian mihringte hi min lo her danglam nasa thei khawp mai. A nih, i pu chu tunah eng nge a àn?" ka ti leh ta siam siam a, ṭawng duh lo viau mah se a bula awm chu nuam ka ti ru viau thung si.



"A ṭha" tih chauh hian min rawn chhâng a, sawi dan tur a hre tlêm hle a ni mahna le!



"Eng lo, nizan khan i ṭhiante sawn ngaihzawng i nei an tia?" ka ti leh ta ringawt mai, a laka ka rilru put hmang dik tak hi a hre tlang nghal vek ang tih ka hlau hnuhnawh ang reng.



"Buaina a awm em ni?" beisei loh lam daiha min chhánna avang chuan ka kâ hau ringawt!



"Maw?" zawiawi deuh hian ka ti hniam sep a, ṭawng ring lém lo tak ka ni!



"Ka ngaihzawng neih leh neih lovah chuan i buaina tur a awm em?" chiang zeta min en chung hian a ti nghet charh a, ka va han inthlahrung tehreng êm.



"A....ih.....eng lo....awm lo ve, awm lo lutuk" ka ti bah nawk nawk a, ka thin phut dan a rawn rang zual sauh a, ka thin phû ri chu a hriat phâk hial te ka ring.



"A nih a hnu" a rawn ti leh lék phei chu zawh zui chî ah ka ngai tawh lo, duh ai chuan ka ṭawng tamin ka mawl deuh mah mah a ni.



"Tihpalh" ka ti leh ringawt a, a mi uap a nâ ren run bawk si, kal sawn daih mai te ka duh rum rum a, mahse ka phal leh chiah bawk si lo.



"Eng vangin?" a awm dan leh a ṭawng dan vel chuan min tizâm zual tak zet!




"Ka hre lo, ka sawi awmzia chu, eng lo, ka...ih...thil ṭul lo deuh ka zâwt che a, i lungawi loh hmel bawi si a, chu vang a nia ka tihpalh ka tih tawp" chu thu ka sawi zo chu ka thaw chhuak deuh ham ham a, ka thin phû pawh a la rang dawt dawt tluang zel e!



"Lungawi lohna ka neih pawh ka lo hre hleinem" min en tawh lo nà chu a lam ka hawi ngam tawh rih lo.



"A nih, ka phei mai" tih leh thawh ka rual a, chutah ka kê ka la chhep sual zui!



"Fimkhur ta che!" ngaihno bei lo zet hian a rawn ti vawt ruih a, ka bân rek chu a kut lian leh hrawl zet chuan a chelh ran bawk.



"Nia, ih...eng lo, tihpalh" ka awm dan aṭang chuan ka buai zo vek tawh tih hai theih a ni mawlh lo, tun atâna ka tih tur ṭha ber leh awm chhun chu a bul hnaiha awm rih loh a ni.



"I kalna en fimkhur tawh ang che" a hma aia aw dam deuh záwk hian a rawn ti hniam sup a, ka bân rek a chelhna chu zawimuang hian a thlah riai riai a, kei erawh a rang a rangin ka kal sawn nghal thuai thuai thung.




Office-a ka ṭhut luh hnu thleng pawh chuan ka la dik hlei thei lo va, ka thawhpuite'n an hriat ka hlauh avangin office bul lawka thing din tlar ṭhupna ah chuan ka kal ta daih nghe nghe a, ka rilru, ka ngaihtuahna leh ka mitthlaa awm chu tu dang ni lovin Zosiama bawk a ni leh tawh, nichin lawka kan awm dan leh kan inbiak dan te kha ngaihtuah zui loh theih pawh a ni lo.




Thli fîm dawng heuh heuh chungin ka ṭhu ngawi ran a, Zosiama lakah hian beiseina ka nei sáng mah mah ang tih ka hlau, ni lo, ka nei sâng mah mah tawh zâwk mai thei. Ka awm dan hi hmeichhe awm dan atân chuan mawi ka ti miah lo, ṭha pawh ka ti lo, mahse ka chán tawh mipa hi chán nawn leh ka hlau a, ka chán nawn leh loh nân hmâ ka là ṭan mêk bawk a, thil awlâi tak erawh a va ni lo chiang êm.




Ka rilru ka siam fel tirh lai khan a awlâi dâwn lo tih chu ka hre lâwk sa vek a, mahse ka lo ngaihtuah lâwk dan ai lêt khan a harsa ka ti zâwk, bul ka ṭan chauh tih erawh ka inhre reng thung a, hlawhchham mai ka tum teuh lo.


A mawi tâwk chiah leh a ngaimawhawm loh tâwk chiah zelin awm ila a fuh ber ka ring, chu chuan kawngro a sû deuh zâwk ngei bawk ang.




Ka lawm ruk ve em emna pakhat erawh chu chhun chawlha ka va phei apiang hian ka ṭhutna lamah a rawn phei ve ziah zel a, kan inkârah engmah awm tawh rih lo mah se kan lo inhmelhriat ve tawh hrim hrimna avangin a lo phei ṭhin ni berin ka hria, mahse ka lawm tho tho. A ṭhiante tak paw'n min hrethiam a, ngaihdan dang an neih phah chuangin ka hre lo bawk.




Zan lamah chuan Zosiama tih loh mi dang zawng an rawn lêng leh a, dik tak chuan lo lêng ve se ka ti ru vawng vawng ṭhin, hnathawh thawmhnaw inbel miah lovin ka hmu châk a ni.


Mi dangho thil sawi laih laih lai leh an nuih dar dar laia ngaihtuahna lo kawm daih châng lah ka ngah a, min chîk duh tân chuan mak chu an ti ve deuh mai thei a ni.




Chumi zan ka mu lah chu ka muhil lawk thei lo leh ta nghal a, ka pate lam ka be ta ringawt a, anmahni ka ngaih chu thuhran ni se, thil dang avanga muhil thei lo ka ni tih erawh ka inhre chiang viau thung.


A tuk zinga ka tho te reng reng chu ka ni deuh lûk a, zan lamah ka mu ṭha lo bawk nen zingkâr aṭangin ka mood a dik lo nghal khawp mai.




Chhun chawlh a rawn ni leh tâkah chuan rilruah Zosiama te hnathawhna lama phei a lo lang hmasa ber nghal a, mahse ka phei ang nge phei lo ang tihah erawh ka rilru a insual nasa hle thung.


Nimin lamah khati kha ka ni a, hriatthiam nghal vek thei khawpa langsarin ka awm a, ka inpuang vek law law lo chauh a nih kha!




Khua lah chu a dul deuh ruih leh nghal a, tun ṭum chu phei ai phei loh ka thlang ta law law mai. Ka thawhpuite nen zirna chungchang lam kan sawiho ta daih a, ka hun hman dan chu a ṭha lehling phian!



Headmaster pawh a ṭawng duhin sawi tur a ngah hle a, Sir Chhuantea erawh pâwna mei a zuk rih avangin Office chhungah a awm ve lo thung.




Rei lo tê hnuah ruah chu a rawn sûr ta nge nge a, Class ka lâk lai tak a ni nghe nghe a, a sûr tam miah miah khawp mai. Zirlai naupangte'n Class Work an tih malh malh lai chuan tukverh bulah ka ding a, Zosiama te hnathawhna lamah bawk ka mit a fù leh ta ngar ngar a, amah pawh chiang takin ka hmu thei, mahse kan awmna a inhlat ang reng hle.




Chawhnu pum chu ruah a sûr a buan buan a, Zosiama te tak paw'n hna an thawh theih bik chuang lo. Keini erawh kan awmna School a ni hlauh a, thli leh ruah laka tawm himna tur hulhiap ṭha tak a ni bawk a, buaina kan nei hran lo.



Tlêma ruah a hàn deuh lai chuan Headmaster-in bán hma a rawt ta hial a, khua a duk ṭha chur chur êm a, bàn hma tawp chu a finthlak zâwk ka ring.




Tin, thli tleh hun lai a ni tawh lo nà chungin ruah mai bakah thli a tleh tel tlat a, kei paw'n ka hlau ru ang reng. Sir Chhuantea chuan vung zet hian min phur thla a, ka in luah ka thlen aṭanga rei lo tê hnuah namên lovin ruah chu a rawn baw leh ta hawk hawk mai.


Ka rilruah Zosiama leh a thawhpuite an lo lang nghal a, tawm hulna tur an nei ṭha àwm bawk si lo, rilru a va han nuam lo duh tehreng êm.




Ruah chu ei rawngbàwl hun thleng paw'n a sûr chawl lo hrim hrim a, Zosiama leh a thawhpuite ho chuan ka rilru an luah ngut ngut a; a bik takin Zosiama! A dam loh vaih chuan hna an la ngah si a, a ṭha miah lo ang.



Ngaihtuah ru reng chungin ei rawng chu ka bâwl ta melh melh a, chawhmeh pawh lei a lo ngai leh tawh nghe nghe a, mahse zanin tlai chu ho lam deuhin ei mai teh ang, pâwna chhuahna chî ziazâng a ni lo e!




Khua a thim fel meuh chuan ruah paw'n han zâi a rêl ve ta nge nge a, mahse a la han famkim chuang lo. Tam lutuk lovin a la tla ser ser a, tlaia a súr dan ngaihtuah chuan han tawh ang tluk chu a ni tho mai.




Zanah pawh tu mah an lo léng lo va, an dam ṭhat leh ṭhat loh hre turin an Phone Number ka nei der bawk si lo, keima tâwkah, ka awm hmunah ka lo buai ve em em a ni ber e.




Zing khua a rawn vâr a, zan lama ka inbàwl lâwk deuh sa thlap avangin ei rawngbàwl thar a ngai tawh lèm lo va, chawhma lam chu ni dang ang bawkin School-ah hun ka hmang leh a, chawhnu lam pawh chutiang tho chu!




Ka hlauhthawn ruk ang ngeiin Zosiama erawh hnathawhna hmunah ka hmu ve ta hauh lo mai, mi dang zawng chu an dam ṭha vek a, Rina kâ aṭanga Zosiama dam loh thu ka hre leh zel te chuan amah min tingaihtuah zual lo thei lo.




An awmna hmuna kal chilh êm chu mawi ka ti chiah bawk si lo, ka ngaihtuah em em tho bawk si, awm dan tur ka va'n vàn tak! School kan báng a, Sir Chhuantea ruala haw tlang nghal mai lovin Zosiama te hnathawhna ṭhin lamah bawk ka phei leh a, ka hmel an hmuh chuan min lo be leh lûam hlawm a, ka rilru a nawm theih ngáng loh avangin Rina chu a hna thawk lai ka ko pêng ta ringawt bawk.




"Eng lo a nia, in chawhmeh tur ka siam kep dâwn che u a, in bàn hunah rawn lam kawi la" chutiang thu chu sawi ka tum lâwk bik reng reng lo, mahse ka sawi laklawh tawh tlat, ka sawi ang ngeia ka awm a ngai ngei ang.



"A va lawmawm dâwn ve, ka lo lam kawi dâwn a nia, kan lawm lutuk aw u Terem" a ti nghal zung zung a, kei erawh ka nui lui deuh var var thung.



"Ka zu haw ang e, lo lam rawh aw" ti leh hramin ka kal sawn zui nghal a, ka hmel an hmuh theih loh tur zawnga ka inher tâkah chuan ka nui tawh lo chiang kher mai.




In ka thlen rual rualin ei rawng ka bâwl nghal mawlh mawlh a, ka chawhmeh neih ho lah chu a beitham ang reng hlawm bawk si, Zosiama ka ngaituah avang leh ka hmuh châk avanga dâwt ka sawi ringawt chu ka tifuh chiah ang em ka hre lo.




Bawkbawn leh samṭawk ka bai pawlh a, chingit leh bahkhawr ka telh leh a, purun vâr rawt dip leh hmarchapui sen vût ka thlak tel bawk a, a hmin hnua ka hâwp chhin chu a tui phian leh nghal.



Khawpuia awm ṭhang leh khawpui nula ni mah ila ka nu hnen aṭangin ei rawngbàwl hi chu ka thiam pangngai ve hle a, chutih rual chuan chawhmeh siam thiam loh leh siam ngai loh erawh ka la nei nual tho.




Khua a hniam ṭan a, kan inhrilh lâwk tawh ang ngeiin Rina chu a lo pêng kawi ta ngei a, Scooty a rawn khalh nghe nghe a, chhuanlam ṭha tak siamin an awmna lama min hruai tur chuan ka ti nghal mai a, ani paw'n ngaihtuah thui lém lo tak hian min phur zui ve nghal mai bawk.



An awmna lam pana kan inphurh lai chuan a la khalh thiam lutuk loh thu a sawi deuh reng a, a sawi dik chiah, kan tlu ṭep tak tak, Zosiama ngaihtuah lo ila zawng a khalhah ka chûang hauh lo ang maw lè.




"Eu...kan nula hmelṭha leh fel chuan chawhmeh min lo suah tak tak dâwn a ni maw?" an awmna in chhung ka luh rualin pakhat chuan a lo ti nghal a, Rinan chawhmeh ka suah dâwn thu a lo hrilh vek tawh a nih ka ring.




"Eng teh lûa chu ni lo mah se ka lo suah ve tawp che u, in duh leh duh loh pawh ka hre lo, in ei duh loh leh in paih daih mai dâwn a nia" ka ti lut ve siam siam a, ka aw a hriat rualin Zosiama chuan min rawn en zawk a, a hawi sawn leh nghal daih thung.




"Chutia han paih phal ngawt chî a ni náng, kan tân liau liau i rawn siam ve a, kan ei ṭeuh zâwk ang chu maw le" ka luh tirha min lo betu bawk khan a rawn ti ve leh a, ka chhâng tawh ta lo mai.



"Chhûang lûm leh hrim hrim r'u aw" tih leh Zosiama lam chu hawi ka rual a, kan thawm hre lo ang mai hian a ṭhu ngawi ngul a, ka luh tirh ata min la hnungchhawn char char bawk.




A bul hnaih deuh tak, mahse hnaih ṭha ngam lutuk bawk si lo hian ka ṭhu a, mi dangho chuan min be suam suam a, a mawi tâwkin ka chhâng ve leh zauh zauh tih loh chu Zosiama ka en deuh ngar ngar a, ka bia ang nge be lo ang tihah ka rilru a insual buai nasa leh tawh khawp mai.




Ka biak deuh bik chuan mi dangin an lo hriatthiam ve ka ring bawk si, a chanchin zâwt miah lova ngawih reng ringawt zawng a dikin ka hre chuang bawk si lo, awm dan thiam a har lam hret chu a ni.




"I dam ṭha deuh tawh maw?" ka ti ta nge nge a, ṭawng pawh ka ṭawng ring lo.



"Kha, kan khaw lamah ngaih tur an awm ṭha deuh nge ni, a lung a lêng riauin ka hria" pakhat chuan a rawn ti nui vur vur a, mi dangho pawh chu an ṭhen deuh suk suk a, Zosiama erawh lung tum ang mai a ni thung.



"Damdawi ei tur i neih loh chuan ka nei a nia, eng damdawi nge i ei? Eng nge in kawl?" ka la ṭawng ri chuang lo hle a, tun ṭuma ka biakna chu amahah engtin nge a thawh pawh ka hre lo, min en chiang ta khawp mai.



"Pâwnah lo chhuak teh!" ti vawt ruihin a tho zui nghal a, mi dang mitmei vêng zet hian ka nui lui ngial a, ani lah chu a chhuak daih tawh leh nghal, ka tân chuan zui chhuah loh chî pawh a ni lo.



"Eng vanga lo kal nge i nih?" a bula ka din rual rualin a rawn ti nghal hmuk a, aw nèlawm loh tak chu a va ni chiang êm.



"Engati nge? I phal vak na nge?" pangngai deuh hian ka ti a, min rawn en chhuk run dâwna ka hriat rual chuan ka hawi sawn nghal daih bawk.



"Lo kal tam lo la a ṭhat ka ring" a rawn ti leh hmuk a, a dam ṭha vak bawk si lo nen a Mood a Off ve hle a ni ang.



"Chawhmeh ka lo suah che u a nih khâ" thup nei deuh taka ka tih chuan



"Chu chauh chu màw?" a lo tih zawm nghal a, ka ngawi chiang teh e!



"I danglam tawh a, kei pawh ka danglam tawh" rawn ti leh nghal zatin min en deuh run a, kei paw'n ka lo en lêt ve kal bawk.



"Nia" ti thawp sepa ṭawng zawm zatin



"Dik tak chuan, ka ngaihtuah che alawm, i hre vek tho tih ka hria, kum tam tak liam ta khan kan lo inhre tawh a" ka tih laklawh lai chuan



"Duh tâwk rawh!" a rawn ti deuh chhur a, a aw a thum ṭha bawk si, ka ngawi chiang khawp mai.



"Ka sawi kha hre reng rawh, ka danglam tawh, nang pawh i danglam tawh" tia inher a tum lai chuan a bâna ka chelh thuai a, mahse ka thlah leh rang hle.



"Engati nge heti taka min huat tâk a?" ka ti ta thlawt a, min hua tih hi chu hai rúal a ni tawh lo va, a chhan erawh chiang takin ka hre bik rih lo.



"Zosiam?" kal mai a tum chu ka ko ding leh hram a, engati nge min chhàn a tum miah lo lè?



"Haw tawh rawh, khua a thim dâwn" min ngaihtuah ni àwm fahran hian a ṭawng daih a, kei lahin ka zawhna chu chhâng se ka duh bawk si.



"Ka zawhna kha i chhàn hma chu ka haw dâwn lo a nia" nuih luih ngial ka tum a, ka thei thlawt lo.



"Kha zawhna kha ka chhàn i duh chiang a màw?" min tham lo zet hian a kiai zui suk a, a mitmeng te reng reng chu a ling vekin ka hria.



"Sawi rawh! I zawhna kha ka chhán i duh tak zet em?" a rawn ti khauh leh hmuk a, min din hnaih sawt bawk.



"Duh tho e" zawi sepa ka tih rual rualin ka bân rekah a rawn chelh chat a, min kai sawn zui nghal dawr dâwr a, duh ai chuan ka bân chu a hmer nâ lam hret a ni.



"Khaw'nge min hruai i tum?" ti ve teh mah ila min chhâng lo chiang khawp mai.



"Min hmer nâ mah mah a nia Zosiam, min thlah tawh teh, keimah paw'n ka kal thei" ka ti niah niah a, min lo hmutu tân chuan pafa inkai sawn hlawk hlawk kan ang ngawt ang ka ring.



"Zosiam?" ring deuh hlek hian ka ti leh tâkah chuan thingkung bulah min theh phei titih a, ka bân chu ka tuai zui nauh nauh nghal bawk.



"Eng nge i hriat a?" ka ti leh chiah chu min rawn hnaih chilh a rual nghal a, bangbo zet hian ka lo meng kimki chawih ringawt.



"Eng atân mah min ngai lotu hi ka nunah seng luh leh che ka tum tawh lo" khauh fahrana chu thu a sawi lai chuan ka lo en kal a, ka tiril a khur a, ka thin phû pawh rang dawt dawt tak a ni.



"I sawi awmzia ka hre lo" ka tih chuan



"LALREMTLUANG!" a rawn ti vawt ruih a, a hmel chu a hlauhawm lutuk tak zet!



"Kei leh nang hian kan hre chiang khawp mai" a awah chuan thinrimna hlir a khat a, tunah chuan ka laka a lungawi loh chhan pawh ka chhuidawn thiam ta e!



"Ka tum a ni bik hlenem, ka duh dan pawh a ni bik lo" ka tih zuah zuah lai chuan



"Ngawi hmak rawh!" ti chhumbung hmukin a kut hrawl zet chuan ka biang a rawn hmer sawk a, a mitmeng aṭang chuan min that duh mai dâwnin ka hria.



"Min tinâ a nia Zosiam" mittui tling pama ka tih chuan min thlah pawh a tum chuang lo.



"Kei min hnaih zawnga i awm lui zel a nih chuan i nâ zel ang" tih leh ka biang a hmerna chu thlah a rual a, ka mittui tihtlak loh hram hram ka tum zet nà a, ka thei thlawt lo a ni e.



"Hetiang khawp hian a ni maw min lo huat a?" ka ti ta nge nge a, a hmel tak run chu ka en tlawk tlawk a, min that daih mah se pawi ti hmel a pû lo hrim hrim.




"A thiam lo zâwk chu i inhriat chian ka ring, tun bak hi hun kal tawh kan sawi chhuak leh tawh tur a ni lo" tih leh min hnung chhawn zawnga kal sawn a rual zui nghal a, kei ve thung chuan a kal liam thlengin ka en zui vawng vawng ringawt.




Ka in luaha ka lut te chu ka ni deuh nghulh a, chaw ei châkna pawh pakhat mah ka nei tawh lo. A hming chauhin chaw chu ka ei lui hram a, ka chaw ei erawh tui lo tak a ni!



A thusawi zawng zawng kha ka bengah a ri nawn tluk tluk a, ka ngaihtuah chian pôh leh sawi dik loh a nei lo tih ka hre chiang tulh tulh a, engkim kha ka thiam loh chu a ni chiang alawm, mahse khatianga inṭhen kha ka duh bik lo tih tal min hriatsak ve se a ṭha tur!




Khumah mu hle hlein hun kal tawh bawkin ka ngaihtuahna leh ka mitthla chu an rawn luah zut zut a, Zosiama nen kan inṭhen lai mawlh kha ngaihtuah chhuah loh a har a ni.



Tlaiah khan eng atân maha ka ngaih loh thu te kha min sawi khum a, a hmel leh a ṭawngkâ chhuak tinah khan min demna hlir a lang a, thiam thu sawi ve tur reng ka hre lo a nih kha!




Ni e, ani tân chuan dem ngawih ngawih tlâk alawm ka nih, kan inṭhen chhan pawh kha keimah ka ni a, mahse a hun lai kha chuan tih theih dang ka nei ngâng bik si lo a tin a ni!



Ka nu leh pate'n pâwl 12 zir chhuah hma chu ngaihzawng neih an phal si lo va, Zosiama nena kan inngaihzawn thu pawh kha ka zep char char zel kha a ni a, an hriata min hauh ai chuan mawlmang zeta inṭhen kha a finthlak zâwka hriatna ka ngah a, mahse khatih hun laia ka thil lo tihsual khan rah chhuahin tunah min vaw lêt mêk ta thung si.




"U Terem?"


"I awm em?"


"A mu tawh emaw ni lè?" kawngka bul maia mipa ṭawng nuah nuah ri chu ka hre reng a, mahse ka chhâng lêt lo hrim hrim.



"A mu tawh a ni ang, zanin chu lêng lo mai ang u" rawn ti lehtu chu Rina aw bawk niin ka hria, rawn lèn an tum a ni mah nà, mah se inléng lo chhawn turin tunah rih chuan phurna leh châkna pakhat mah ka nei lo.




Hun kal tawh bawk ka ngaihtuah chhuak leh ṭhin a, ka mittui pawh a tling deuh reng mai. Zosiama nen kan inngaihzawn lai khan Handset Mobile Phone a la awm lo va, Landline chauh kha a ni mai a, engkim kha a harsa vel vek a ni ber.



Tun lai angin duh hûn huna Phone hman tur te awm tawh se chu ka ṭhen miah lo ang, ka ṭhen ka ring miah lo, a chhan chu khatih hun lai daih aṭang tawh khan ka duh satliah lo va, ka lo hmangaih reng tawh zâwk a ni.




Ni e, a dik chiah, khatih hun lai khan ka hmangaih tawh, mahse kan hun tawn leh kan inkârin a zir loh avangin khati kha kan ni a, kum tam tak hnuah kan intawng leh a, hmâna amah ka lo hmangaih tawhna kha tunah pawh hian keimahah a la awm reng a, a la nung reng a, a inchhit én dan erawh a dang tawh em em thung si.




Eng pawh ni se, eng pawh thleng dâwn se, eng pawh tawrh ngai dâwn se, neih lét leh ka tum ngei tur a ni. Ka thiam loh a ni tih ka hria, ka pawm thlap, a ṭul chuan tlai khawhnu viau tawh mah se ngaihdam pawh ka dil mai ang, ka hreh reng reng lo. Ka la hmangaih reng a, ka mipa hmangaih hmasa ber leh awm chhun a ni a, a tawp ber pawh ni se ka duh bawk.




Engtik laiin nge ka muthilh pawh ka hre lo, ka harh chuan khua a lo vâr vek tawh a, Phone hmet êngin dâr zat ka en nghal thuai a, thawh ka hai tih ka hre zui nghal bawk. Khum aṭanga tho sawk sawkin ka hmai te chu ka phih zung zung a, chutiang em ema ka thawh tlai chu a la awm lo, tun ṭum chu thawh ka hai chiang tak zet a ni.




"Eu..Miss Teremi chu, duh aiin a muttui a va nih hmel ve?" ka thawhpuite chuan an lo ti sap sap a, an nui deuh sun sun hlawm a, phat ngaihna pawh ka hre lo.



"Awi, ka lo mu nghek alawm le" fiamthu titak deuh hian ka ti ṭha ve mai a, Sir Chhuantea ber chuan min nuih reng mai.



"I inhmeh lo reuh é" a tih loh leh



"I mit a bui nasa ngei mai" a ti thul, ka nui tawp ringawt.




School hi ka tlai ngai mang lo va, tukin erawh thawh ka hai chian êm avangin zirlai naupangho Drill laiin ka thleng hman chauh a, chutah ka mit a la bui em em leh ta nghal a, a bui chhan tak erawh sawi chhuah chî pawh a ni lo.



Nizan khan ka ṭap muhil ngei a nih ka ring, ni lo se chu ka muthilh dâwna ka awm dan ka hre hrim hrim ang, zù rui chatthla hmak ang maiin ka ṭap muhil a nih ka ring nghet bur.




Chhun chawlh dâr a rawn rik chuan Zosiama te hnathawhna lamah mit ka lèn leh nghal a, ka tumah ka chiang tawh bawk a, mi dang paw'n hrethiam dâwn mah se pawi tihna ka nei em em tawh lo.


A hrethiamin hrethiam se, a hrethiam lovin hrethiam lo se, a ṭha a ni mai. Mahni chauhin ka phei hnak hnak a, Zosiama hmel pawh ka hmu ta ngei e.




"U Terem, nizan khan kan lo kal a, mahse i lo mu tawh a?" Rina chuan a rawn ti lang lang a, a lam panin ka kal phei zui nghal bawk.



"Nia, nizan kha chu ka mu hma tawp, ka chau deuh a ni ang" tiin a bulah chuan ka ṭhu thla a, ani erawhin tubohin perek a la chhu tlauh tlauh thung.



"Eng tur nge?" ka tih chuan




"Thil danna tur mai mai maw le, chawlh hmain ka siam lawk a nih hi!" a rawn ti ṭha ve mai a, Zosiama lam ka va hawi chu min lo en run a, ka nuih lui var var a, chhe tê paw'n a hmel a danglam eih lo, nin hmel zet hian min en run ringawt.



"Ai a!" ka chal thip zawk avang chuan ka ti chhuak ṭhawt a, dawm zui zatin ka kut chu ka en a, thisen ka hmu ta mai.



"E hê....ka tihpalh lutuk u Terem!" Rina thil sawi dan chuan min tihlauthawng zual!



"Fimkhur ta che Rina!" khauh fiah hmuka rawn titu ve thung chu hai rual lovin Zosiama ngei a ni a, engtik lai khan nge a lo thlen phei hman pawh ka hre lo.



"Thlah teh!" nem fahran lova tih leh ka chal ka dawmna kut chu phih thlak deuh sawk a rual nghal a, ka chal aṭang lah chuan thisen a la chhuak duh em em zui!



"Lo kal tawh suh ka ti a ni lo'm ni? Engati nge i luhlul tlat!?" mi dangho zawng zawng awm lai min ṭawngkhum dan chuan ka lâi a chhun zawk a, mahse ka nui lui hram hram thung.



"Lo kal teh!" ti lehin min kai tho deuh lâwp a, min kai kal zui nghal chu a ni mai a, ka bân rekah chelhin a kut leh lam chuan ka chal a dawm pah ran bawk.





End of Chapter 3




.

[Havali Adam]

WAY BACK INTO LOVE


By


Havali Adam




Chapter 4




Ngawi reng hian Scooty inhùnna lamah min pheipui mawp mawp a, duh ai chuan min kai kal nasa mah mah, ani a pa lian ang reng si, kei lah ka lian lèm si lo, a ke pen hlawk ang zata pen hlawk turah min ngai a nih ka ring.



Chuta kârah ka chal lah chu a nâ reuh em em leh nghal a, Rinan tihpalh thil thu tak meuhin perek min chhut per palh kha a ni a, thisen ni se a chhuak duh phian bawk si, ka hlauthawng ru reuh khawp mai.




"I chal kha dawm ang che" ti nghutin Scooty-ah chuan a chûang zui nghal a, kei erawh a che vel chu ka lo en deuh hû ringawt.



"Chûang rawh!" dam teh chiam lova a rawn tih leh chuan ka harh chhuak zawk a, ngaihtuahna dang pu tawh lovin a hnungah chuan ka chûang zui nghal tharh bawk.




Muangchâng lèm lo tak hian min tlanpui a, Health Sub-Centre awmna lam chu a pan ding nghal chawt a, thlen pawh kan thleng har lo. Kan thlen rual rualin min lo buaipui nghal zung zung a, damdawi an hnawih chiah phei chu nâ ti ru tak ka ni!



A tur zek zek reuh a, damdawi an hnawih zawh chuan Bandage vâr hian an tuam zui nghal a, damdawi an hnawih lai ai khan tlêmin a zia ta deuhin ka hria.




"Min en teh" ti supin Zosiama chuan ka chal chu a en vung vung a, min ngaihtuah tih ka hriatna ringawt te chuan engtin emaw ni tak hian min tihlim ru veng veng thei.



"Inbe lawk teh ang" tih zawm leh nghalin min kai sawn a, a hma ang em em chuan min kai kal hlawk hlawk tawh bik lo e!



"Chawhnu first period-ah Class ka nei a nia, i sawi tur chu kan chhoh pahin a sawi theih mai êm?" ka zawhna chu hria ang paw'n a awm leh duh tawh lo.



"Zosiam?" ka tih leh pawh chuan engtin mah min la chhâng lo tluang zel a, a hmel tak run chu ka en reng ringawt.



"Khawiah nge min hruai i tum? Hun ka ngah tawh lo a nia, nang paw'n hnathawh i la ngaih khâ?" ka ti leh tawp ṭhin, awmzia erawh a awm lo teh e!




Scooty bul lawka min dinpui hnu chuan ka kut a vawnna pawh a thlah ve ta hram a, kawng dawm meuha van vadak pah hian a thaw chhuak ham ham a, rilru ipik lutuk leh hah lutuk hmel te pawh a pu hialin ka hria, mahse keimah vang a nih chiah ka ring em em tawh lo, ngaihtuah chu min ngaihtuah ru reng tih ka hria, mahse tunah hi chuan thil dang vanga rilru hah hmel a pu zâwk!




"Ngaithla teh LALREMTLUANG!" seh chilh deuh nawk hian a rawn ti khauh hmuk a, nichin lawka a rilru hah hmel kha thinrim hmelin a luah khat zo va, min huat hmel ngawih ngawih leh ta hle mai.



"Chhun chawlh a ni emaw ni lo emaw, hnathawhna hmunah lo kal tawh ngai suh!" ngaihno bei lo zet hian a rawn tih zawm nghal a, a aw chu a vin lam mah mah a ni.



"Engati maw?" a chhan ka hre reng a, mahse ka hre lo der tlat thung.



"LALREMTLUANG!" rum mangkheng hian min en chhuk run a, ka hmingpum ngeia min koh tawh hi chuan ka thinlung chhung a dek zar zel.



"Thu ho mai mai sawi nân hun ka nei lo a nia, min phur chho leh tawh rawh" a thusawi engah mah ngai lo ang zet hian ka hawi sawn daih a, min en reng tih pawh ka hria.



"Hmanhmawh teh Zosiam?" thawm a reh tlawk tlawk tâkah chuan ka ti leh ta nge nge a, hmâna hmanah khan a luhlulzia hi chu ka hre tawh a, mahse a ṭawngmawh ta lutuk hi ka hrethiam lo lek lek ṭhin.



"Class lâk ka la ngai a nia" ka tih leh chuan



"Class lâk chu i duh tak zet a maw?" a rawn ti ve nghal a, tlêmin a aw pawh a dam ta deuh e!



"Duh loh chî pawh a ni hleinem, ka tih tur alawm a nih" ka ti lêt tan tan zo chiah chu



"I duh a thu le!" tih leh Scooty-a chùan a rual a, kei pawh ka chûang zui ve nghal mai bawk.




Inbe miah lovin School lamah kan inphur chho va, ka lû lah chu a nâ ru zek leh nghal, mahse hna ka nei a, nâ deuh mah se ka tilui thei ngei tur a ni. School ka thleng chu Sir Chhuantean min lo be hmasa ber a, mi dangho paw'n mak tih hmel deuh hian min lo en hlawm a, ka chal mawlh chu an mit látu a ni a, ka tihnât dan leh a chhan ka sawi hnu chuan Headmsater-in chawlh min pe ta ringawt mai.




"Class ka lá thei tho ang Sir" ka tih luih ve ṭang ṭang hnuah pawh haw turin min ti lui ta tho va, Sir Chhuantea chu ka in luah thleng min thlah thlap turin a hrilh zawm nghal zat bawk.




Headmaster berin haw tura thu min pêk tâkah chuan tih theih dang awm hek lo, inah ka awm ta hle hle a, nuam lo erawh ka ti lo ang reng khawp mai. Ka chal pawh a tira nâ lutuk ang kha awm tawh lovin a nâ a zia chho ve zel a, nâ lutuk a ni hran lo va, mahse awm tinuam lo thei khawpa nâ chu a ni ve tho.




Khua a thim fel rualin zanriah ka ei a, in chungte hnen aṭang paw'n chawhmeh ka dawng leh nual a, ka chala pem awm an hmuh chuan a chhan min zâwt nghal mawlh mawlh a, pi Muani phei chuan ka mita min tihperh fuh lo hlauh zâwk te chu vanneithlak a tih thu a sawi a, a sawi dik chiahin ka hria.




Rina khan ka mitah min chhut per palh ta zâwk se chu tun ai hian a hlauhthawnawm zâwk ngei ang ka ring, mahse ka chalah a ni hlauh zâwk a, chu bakah ka mawl ve hrim hrim bawk. Ka ṭhut hnaih mah mah a, ni dang angin ka ṭhut ṭhinna hmunah khan lo va ṭhu hle hle ila chuan pem ka nei miah lo ang maw lè.




"Lo lut rawh" kawngka inkik thawm ka hriat rual chuan ka ti a, Rina leh a ṭhiante hmel ka hmu zui nghal bawk.



"I chal chu eng nge a án a u Terem? Ka inthiam lo lutuk a, kan lo kal tawp" a rawn ti lut zui mawlh mawlh a, a hmelah chuan a inthiam lo tak tak tih ka hmu thei.



"Inthiam lo lutuk duh suh, intihpalh châng leh chet sual chângte chu a awm ve ṭhin alawm" ka lo ti mai a, mahse a rilru a la nawm hmel vak chuang loh.



"Rina reng reng pawh engati nge maw vawiin ber khera i chet sual le" an zinga pakhat chuan a rawn ti nuah nuah a, min ngaihtuah hlawm lutuk chu ka tân a nuam lo lek lek zâwk!




Zan danga an rawn lèn ṭhin anga rei tho an lo lêng a, min rawn kan a ni ber zâwk ang chu! Ka chet phal lovin anmahni zâwk chuan thingpuite an lûm nghe nghe a, an chet dan vel chu a nuihzatthlak bawk si, beisei loh deuhin kan hlim ta phian!



An haw tur pawh kawt thleng ka thlah leh thlap a, mi dangho zawng kal liam tawh dâwnah Rina chu a rawn lêt leh a, thil theihnghilh a nei a nih ka ring.




"Engati nge?" nui chung hian ka lo ti hliai a, ani erawh a nui ve hauh lo.



"Zanin khan u Zosiaman min hau a" a thusawi avang chuan ka nui tawp riai riai nghal.



"Hau pawh a ni leh chiah lo, inzilhna a ni mah zâwk" amah bawk chuan a tih zawm leh nghal zat a, lungawi lo hmel pawh a pu chuang lo.



"Engati maw? Chhuna thil thleng avang khan maw?" ka tih chuan



"Ni e, mahse ka thiam loh a nia, ka chunga a thinrim pawh hi a àwm lutuk tho" a lo ti ve leh mai a, chutah amah bawk chuan



"Eng lo a nia, thil eng emaw ni zawh duh che ka nei a, ka hriat erawh a ṭul kher lo mai thei a ni" a rawn tih zawm leh nghal zat a, eng thil nge min zawh a tum chu ka hre hauh lo mai.



"Eng chu maw?" ka ti deuh hâ a, hrethiam hek lo.



"U Zosiama nen hian inhmelhriat satliah leh High School-a lo kal ho tawh ṭhin nazawng chiah chu in ni lo ti raw?" a rawn ti ta mai.



"Engati maw?" ka ti ve nghal a, hun kal tawh sawi chhuahna hmun tur niin ka hre chiah lo bawk.



"In awm dan hi maw le, ka sawi thiam lo, ka zâwt lo angah che ngai mai rawh, ka haw a nia, mut tui le" ti hnuhnawh zung zungin a haw ta daih a, kei erawh ka dinna ngaiah ka la ding reng thung.




'Ka awm danah a hriat viau emaw ni le' ka ti rilru neuh neuh a, Rina paw'n a lo hriatthiam theih chuan Zosiama ka duhna leh ka ngaihtuahna hi ka ti lang nasa mah mah a ni mai thei.



Ka fimkhur zual a va ngai êm, Zosiama tân tak pawh a nuam lo ang. Ani lah chuan engah mah min ngai tawh lo leh nghal a, a rilru hneha amah nei lêt leh tur chuan awm dan chin tâwk ka thiam a ngai a ni mai.




Chutih rual chuan bialnu a neih leh neih loh ka hriat chian hmasak phawt a ngai ang, amah zâwt ringawt ta ila min hrilh duh àwm der si lo. Rina emaw mi dang zâwt dâwn ila Zosiama laka ka rilru put hmang an hrethiam nghal vek dâwn bawk si, tun atân chuan dawhthei taka awm a ni rih mai.


Hun kal tawh avangin ka tal buai lo ang a, ka inthiam lo reng lo bawk ang a, ka hun hman mêk leh tawn mêk hi ṭha takin ka hmang zâwk tur a ni.




Zan dang ang bawkin mut hmunah chuan thil chi hrang hrang ka ngaihtuah kual a, ka ngaihbel deuh nge pawh ka hre lo, ka mumangah Zosiama ka lo hmu nghe nghe a, tûma awm lohna hmunah kan pahnih tê chiahin hlim deuh hian kan lo awm dun a, a taksa khana ka ṭhut awn duai laiin ani ve thung chuan min kuah run a, thawm dang avangin ka harh ta daih a, ka mit ka men chuan khua a lo vâr vek tawh bawk.




"I ṭha deuh tawh maw?" Sir Chhuantea lam hawi pah chuan



"Ṭha tawh lutuk, ka ngaihtuahawm loh a nia" ka ti nghal siam siam a, ka nui deuh var var a, hliam nâ lutuk tuar angah min ngai hlawm ni berin ka hria.



"Vawiin chu Headmaster birthday a nia, ei tur tui deuh a show dâwn a nih hmel" Sir Zaia chuan nui chung hian a rawn ti ve leh a, kan Head ber pawh a lo nui ruh ruh mai.



"Awi, Sir chu, i birthday tih ka hre miah hleinem, hria ila chuan present tur che eng emaw tal ka ngaihtuah ang maw le" ka ti hliai a, ka thusawi chu mi dang chuan lo lá fuh chatin




"Aw hâw, Sir chu i va chân ropui ve le, khawpui nula hmelṭha hnen aṭangin birthday present i dâwn ṭhelh tlat mai" an lo ti zui sap sap a, an fiamthu hi a sâng a, ka thawh tirh khan ka man pha vak ṭhin lo va, mahse tunah chuan ka nuih pui bawk bawk thei tawh!




"Ni ngawt mai, kâr hmasa te khan lo hrilh ila a ṭha tur, mahse kan nu'n a thik nasa lutuk palh ang" kan Head chuan a rawn ti ve leh luam a, kan nui ho dar dar a, chhun thil ei tur pawh a lo thleng chu a ni nghal mai a, ni danga kan ei ṭhin nen chuan a inang lo ta ngei e!



"E hêeee" thil kan ei mial mial chuan ka ti chhuak hluai a, min lo en nghal ṭhap a, an mitmeng aṭang chuan mak an ti tih leh zawhna an nei tih ka hrethiam nghal.



"Eng lo, thil ka hre chhuak thut a, chu mai mai chu maw le" tiin ka insawi fiah zawm zat a, min nuih sun sun hlawm a, zawhna engmah min zâwt ta lo hlauh bawk.




Thil ka ei zo chu pâwnah ka chhuak zui nghal a, vawiin chu Zosiama te hnathawhna lamah phei lo phawt teh ang, thil ngaihtuah a ngai tlat! Ka hre sual a ni ngawt loh chuan naktuk mai khi Zosiama birthday a niin ka hria, engtin nge ka la hriat reng theih zâwk pawh ka hre lo, chutih rual chuan keimahah hian a awm reng tih erawh a chiang thawkhat hle.




Thil ṭha tak present turin sum leh pâi ka ngah hran lo va, ngah pawh ni ila kan awmna hmunin a zir loh avangin lei tur ṭha a awm chuang lo. Ka ngaihtuah chet chet hnu chuan tih dan tur ṭha deuh ka hre chhuak ta, an zavaiin zanriah eiah sawm ila a ṭha ang, mahse ka ti mah mah ang tih ka hlauthawng ru ve tho.




A hnathawhpuite awm laiin min ṭawngkhum chhur chhur palh ang tih a hlauhawm ang reng, chuti maiin ka sâwmna pawh a remti dâwn lo tih ka hre tlang nghal vek, mahse kan inkâr khi zau tawh tak siam ṭhat leh duhtu zâwk ka nih mai bakah a thiam lo zâwk ka ni tlat a, eng pawh tawrh huama ka beih a ngai a ni.




'Min zawng ru reng ang em le' tih lampang ringawt chu ka ngaihtuah ngut ngut a, School kan bán fel vek tawh avangin ka in luahah ka awm dim diam tawh bawk. Min zawn ruk reng ka rinna chhan pakhat chu ni dangah ka kal ziah a, mahse vawiinah kha chuan ka phei miah lo a nih kha!




Ka thil ngaihtuah kual vel avang chuan ka nui leh sak ṭhin a, min lo zawng ru ve tak tak se ka ti, ka rilru dik tak phei chuan min la duh ve reng se ka ti hle bawk. Min la theihnghilh hmin ṭhak bik lo tih erawh ka hre chiang viau a, ka hmingpum nen lam a lo la hria kha mak ka ti hnuhnawh ang reng, mahse thinrim zeta min koh hrawk tawh kha chuan hriat a nuam miah lo.




A tukah chuan tum nei sa ranin School ka kal a, chhun chawlh lai paw'n Zosiama te hnathawhna ah chuan ka phei leh ta ngei a, ka phei tirh hian min lo en zawk ṭhin a, a hawi sawn leh mai a, min biak pawh a tum ngai chuang lo.



Thingpui in chawlh an neih lai chuan dai hlimah ka lo ṭhu ngawi reng a, an thil ei zawh ka nghak a ni ber. A ṭhutna aṭanga thawh paha Zosiaman min lo en lai tak chu remchangah làin ka kut chuan ka hui zeuh a, mit tizim sun chung hian min en chiang sàwt hle bawk.




Kut zaizira ka kôh ka koh tâkah chuan thingpui no keng pah hian a rawn phei ve ta nge nge a, a lung erawh a awi loh hmel ngei mai. Kal tawh lo tur leh a hnaiha awm tawh lo turin min ti tawh kha a ni a, mahse ka thei lo a chhâ chu a ni e.




"Happy Birthday" ka tih chuan thutak deuh hian min en a, a ngai tê bawkin engtin mah min chhâng lo leh tawh!



"Mak i va'n tih hmel ve a, vawiin hi i birthday a ni tih ka la hre reng a nia aw, ti hian kum 30 i tling chiah ti raw?" ka ti leh ta siam siam a, ka ṭawng lai te chuan ka nui deuh reng bawk.



"Eng lo a nia, zanin tlai chu i birthday lawm nân ka in luahah chaw lo ei ula?" ka tih leh chuan



"Thil ṭul lovah ka inhnamhnawih buai peih lo ni rawh se" ti hmukin mi dangho awmna lamah chuan a phei nul nul a, ka zui phei ve nghal bawk.




"Zanin tlai chu in Head Mistiri birthday lawmna ni pah fàwmin ka in luahah chaw in lo ei dâwn a nih chu aw ṭhiante u, mahse thleng erawh pahnih khat in lo ken belh a ngai ang aw Rina" mi dangho hriata ka ti chiah chu ka bán rekah chelh chatin min kai sawn dawr dawr nghal a, lungawi lo zetin min be leh dâwn tih ka hre tlang nghal vek!




"Eng vanga hetianga awm hi nge i nih LAREMTLUANG!?" ka hmingpum bawkin min ko leh ta lawl mai.



"En teh Zosiam, min hua tih ka hria, mahse kan inkâr hi siam ṭhat ka duh" zep nei hauh lovin ka ti ta riap a, hmeichhia zâwk ka ni a, ka awm dan chu a mawi loh bakah zak thei lo pawh ka inti ru ve reng tho, mahse ka zah theih loh vang a ni hauh si lo.



"Min hre chiang lo deuh chu a ni" ti thum bul hian a kiai deuh suk a, a nuih a za lo tih erawh a hmel aṭang chuan a chiang ngàng mai.



"Ni e, a dik alawm, hre chiang tur che paw'n kan inkârah engmah a awm tawh lo tih ka hai bik reng reng lo, mahse" ka tih laklawh lai chuan



"Mahse a awm tawh lo, min tibuai lo zawngin nung la, hun hmang la, ka mit tikham zawngin awm tawh ngai bawk suh!" a rawn tih zawm hmuk a, a hmel chu en reng chî pawh a ni lo, rum el ul tak a ni!



"Min ngaihtuah ru reng ṭhin tih ka hria asin" ka tih leh chuan a meng rum zual nasa ngei mai.




"I rilru ah khan ka la awm reng tih pawh ka hre thei Zosiam, kum tam tak liam tawh mah se i thinlung aṭang khan min thai bo thei bik lo tih nen lam ka hre vek!" ka tih zawm nghal mawlh mawlh a, dik tak chuan ka thusawi engkim chu ka rin thu vek a ni a, mahse inringtâwk tak leh a rilru hre chiang em em angin ka awm lui tlat thung.




"I ngaihtuahna mawlmang zet kha paih bo rawh" a lo ti hluk a, ka thusawi chu pakhat mah a awih lo tih a hriat hle bawk.



"Min ngaihtuahin min ngaihven tawh miah lo la chuan ka chala hliam ka neih ṭum te khan engtin mah min buaipui hauh lo ang, khami ṭum kha chuan buaipui loh a hnékin i hlauthawng hle a nih kha!" ka ti leh ta tan tan a, a meng buai deuh nakin ka hre nghe nghe.




"Ka tân hian engmah i ni tawh lo" nghet churha a rawn tih chuan ka awm a nuam lo nghal rawih rawih a, thu dawnsawn nuam tak chu a va ni lo chiang èm.



"A nih chuan engati nge hmanni khan min buaipui si? Engati nge min ngaihven em em? Engati nge thinrim khawpa i hlauhthawn si?" tiin ka melh chho kal a, a hmaah tak ka ding ran bawk.



"Engmah a ni lo, i ngaihtuahna vak rawlai vel mai mai kha a tak emaw ti suh!" a rawn tih chuan ka awih lo nasa mai.



"Dâwt i sawi tih i awm dan aṭang hian ka hre thei a nia Zosiam, tuna i thu sawi zawh chiah kha awih pawh ka awih lo" tia ṭawng chhunzawm zel ka tum lai chuan



"Duh tâwk rawh LALREMTLUANG!" a rawn ti vin deuh hrawk a, a sawi anga ngawih erawh ka tum teuh lo.



"A chhan dik tak sawi ta rèng che, min hrilh rawh, eng vanga min buaipui kha nge i nih? Eng vanga hlauthawng em em kha nge i nih?" ka ti tawn tawn a, ka din hnaih zual sauh bawk.




"A chhan chu ka hmelhriat i lo ni ve tawh avangin, ka hmelhriat satliah mai chauh i ni tawh tih hre rawh, a chiang em?" thinrim zeta min en chung hian a rawn ti ta nge nge a, ka taksa chhung lam chu a sa deuh pup pup a, engmah sawi belh tawh lovin ka thaw chhuak ham ham ta ringawt.




"I thil tih tum kha ṭhulh bawk ang che" ti chang leh rûtin kal sawn a rual nghal a, ka en zui vawng vawng a, duhin hmangaih lo ila chuan ka bansan hmak tawh ngei ang, mahse ka hmangaih tlat si a ni.




Zosiama chu ka en deuh bik ngar ngar a, a thawhpuite ṭawng mawlh mawlh lai paw'n a ngawi reng a, kei pawh an awmna lam pan chuan ka phei ve leh ta nge nge. Ka kal phei lai te chuan min lo en deuh run a, a mitmeng thip zet leh zim sun te chu hmâna ka hriat ṭhin, ka duha ka hmangaih hman hial mipa kha, amah Zosiama ngei kha a ni tih ti chiangtu pakhatah ka ngai hmiah tawh!




"Ṭhiante u, zanin tlai chu aw? Ka lo ring dâwn che u a nia, ei rawng ka lo bàwl kep vek ang che u" ka ti leh ta siah a, Zosiama chuan min en reng tih ka hria, ka hmu lo der hmak thung.



"I zârah leh Zosiama zârah zanriah tui tak kan ei dâwn a nih chu a, lo kal ngei kan tum dâwn a nia, ni lo'm ni Zosiam?" an zinga upa deuh bera ka hriat pa Ngaiha chuan a lo ti ve nghal a, Zosiama chu a nghawk deuh zawk bawk.



"Imm....nia" tih chiahin Zosiama chuan a chhâng a, ka luhlul rah chu a chhuak ṭanin ka hria.



"A nih u, ka va phei ang e" tih leh kal ka rual a, office ka va thlen phei tâkah chuan hahdam deuh hian ka ṭhu ta hle hle a, harsa dâwn viau mah se a tahtawl tê têin kan che zel mai a ni ang chu!




Chawhnu ah chuan class vawi hnih ka là a, last period ka neih loh avangin ka haw hma ta daih a, zanriah eipui tur ka neih dâwn avanga haw hma ka ni a, kan Head phalna thlapa haw hma ka ni nghe nghe bawk. In ka thleng chu 'eng chawhmeh nge ka siam ang' tihah ka buai rilru nghal a, in chungah chhovin pi Muani chu sa leina tur ka zâwt ta tawp bawk.




Ka hnathawhna khua ah hi chuan Aizawl khawpui te angin ni tina sa lei tur a awm ve lèm lo va, inrinni hian an sat mai ṭhin a, mahse chu pawh chu an sat tam ngai em em lo. Pi Muani min hrilh dan chuan khaw chhungah sa lei tur a awm rih lo a nih hmel a, a bikin vawksa, vawksa ka tih deuh tlatna chhan pawh mipa hi chu vawksa ah an inlungrual tlangpui a, sa dang erawh hi chu ei thei lo te an awm ve leh zauh ṭhinin ka hria.




Sa lei tur ka dâp ka dap kual tâkah chuan arsa lei tur ka hmu ta hlauh a, a hmul puah fai sa vek a ni a, a pum tawpin ka lei hmiah a, kei leh Zosiama leh a thawhpuiteho nena kan kham ka ring ve hmiah bawk. Ka lei ve ringawt nà chu a siam danah ka buai leh ta hle thung a, ka nu ka call tawp a, phone kaltlanga inhrilh erawh hriatthiam a har duh khawp mai.




In chungte han pun èm chu ka duh chiah bawk si lo, a tawp a tawpah chuan Zosiama te lo kal hun ka nghak ta tawp ringawt. Chawhmeh dang erawh ka siam lâwk nghal zung zung a, engkim chu a tui thei ang bera siam ka duh a ni.




Tlai dâr 5 rik dâwnah Zosiama leh a ṭhiante pawh an lo thleng ta nge nge a, ka buaina ka sawi chuan an nuih a za hlawm ngei mai, Zosiama erawh engtin mah a awm ve lo, nuih pawh a nui ve lo hrim hrim, a ngawi ngul tawp ringawt.




"Rina, kan awmna ah khan zu kal la, kan buhfai kha zu là lawk ta mai che, arsa hi tui deuhin kan siam dâwn a nia" pa Ngaihan a tih chuan



"A ngai lo a ngai lo, buhfai te chu ka ngah alawm" ka lo ti thuai thuai a, Rina chu kal lo turin ka ti vat bawk.



"I ngah tak tak maw?" an tih chuan buhfai ka ngah thu ka sawi nawn leh a, gas leh buhfai tak hi chu ka hnianghnar ve rèng bawk a ni.



"A nih chuan khawi nge, kan siam ang e" tih leh pa Ngaiha chuan chet a rual zui nghal a, ani hi nupui fanau nei tawh a ni a, Zosiama aiin kum lamah a upa zâwk nghe nghein ka hria.




Pa Ngaihan buhfai a sil mual mual lai chuan Zosiama chu a ṭhutna aṭangin a ding deuh uaih a, kawng dawm meuha min en chung hian thâwk a là ham ham a, kan chet sap sapna lamah chuan a rawn phei ve ta nge nge bawk. Engmah sawi lovin kei leh Rina arsa khawih lai chu a rawn ban a, a là sawn zui nghal daih bawk.




"Lo khawih suh" puih tuma ka ṭhut hnaih sawt lai chuan a rawn ti thum bul a, amah en reng chungin ka nui deuh tawp ringawt.



Arsa chu chempuiin a chan ri chawrh chawrh a, pa Ngaiha chuan buhchiar a tui dâwn thu te a sawi lûam a, kan boruak pawh a tir ang em em chuan a rit tawh lo hle. Kan ri deuh laih laih a, Zosiama tih loh chu kan nui ho dar dar a, a nuam lehling phian mai.




Arsa chu pa Ngaiha leh Zosiaman an buaipui deuh châwt a, mi dang chuan a ṭûl ṭul kan lo ti ve mial mial hlawm thung a, ka in luah a lian lutuk bawk si lo nen kan tawt lam lek lek chu a ni.



Arsa chu an buhchiar ta ngei a, mahse an buhchiar hma chuam tui neiin an chhum hmin vek phawt a, a tui hâng hawp theih turin a tak zawng chu an la chhuak a, chumi hnu chuan arsa hlang leh buhfai an kang ta chauh a, aieng tam dan a tâwkin a hmel hmuh ringawt paw'n a tuihnâi tih a hriat nghal hle.




"Ti r'u le, i ei ang u hmiang" pa Ngaiha chuan a ti dap dap a, khua a thim fel vek tawh a, zanriah ei pawh a hun tawh viau e.



"Khawi, keima'n ka lo ti ang, lo awm tawp rawh u" tiin Rina leh mi dang che tur chu ka chet khalh nghal zung zung a, chutia ka che vel chu Zosiama ber chuan min lo en leh reng tawh, min lo ngaimawh leh tawh a ni mai thei.



"A ei theih e" chawi ei ka siam zawh hnu chuan ka ti hliai a, an lo phei nghal sap sap bawk.




Chaw ei dawhkan a len lem loh avangin Zosiama leh kei leh pa Ngaiha tih loh chu an inchâwi dual a, chawhmeh chhawp chhuah sa pawh anmahniin an insuah mai a, chaw dawh nawn an zah ka hlauh avangin chaw bel chu ka chang chawt bawk. Chawi ei lai chuan Zosiama pawh a ṭawng ve nual a, pa Ngaihan be deuh reng lo se chu a ṭawng leh vak ka ring chuang lo.




A châng hi chuan min huat hmel tak hian a awm ngai lo va, a cháng leh min haw deuh angin a awm leh lawi a, kan inkâr siam ṭhat ka duh luatah hmeichhia zâwkin hma ka'n là ta pôh chu a nia, hma hun kan hre thei der si lo, keimah leh keimah ka intinâ mai mai ang tih ka hlau ru ang reng.




Ni lo, ka intinâ lo vang, ka hlawhtling ngei tur zâwk a ni. Ka theihtawpin ka bei fan fan ang a, engtik ní ah emaw chuan min huatna zawng zawng thai bovin kan inkâr pawh a ṭha leh ngei ang tih ka ring tlat!




"Kan chaw eina hmunin a zir vang te pawh a ni ang, ka chaw ei tawh zawng zawngah a la tui berin ka hria" pa Ngaiha chuan ti suam suamin a nui zui vur vur a, mi dangho pawh chuan an rawn tuihnih ve nghal sap sap bawk.




"A awihawm kher loh êm mai aw, in chawhmeh siam vek a nih hi kan ei" ka ti ve tak nà a, ka thusawi ngaipawimawh lovin fiamthu an phuh chhuak zawm zat a, kan boruak a ṭha bawk nen chaw ei pawh a tui duh ngei mai.




"Lo che ve ziah s'u, lo awm mai mai rawh u, keima'n ka ti thei vek alawm" tiin chaw ei kham rual ruala kan chaw eina tih fel an tum chu ka khap leh ta nge nge a, kan inngam tlâng hlawm tawh bawk a, ka aw pawh a nêm tehchiam lo hle.



"Engtia rei nge hna in thawh in inrin deuh? A la rei ve fû lo maw?" thleng sil paha pa Ngaiha ka biak chuan




"Ka hre lo le, kan hnathawh a sâwt leh sàwt loh azir te pawh a ni ang a, a lo berah thla khat vel chu kan thawh ka'n ring ve deuh ringawt a, rin ai takin Tanky sak hi a lo hautak reuh a" a lo ti ve nghal mai a, mi dang erawh ṭhutthlengah ṭhu ṭhapin eng eng emaw ni an sawi laih laih a, an zingah chuan Zosiama pawh ṭawng lovin a ṭhu ve run mai.




"In ei tuiin in ei puar tak tak hlawm maw?" ka tih leh chuan



"Tui tehreng mai, kan puar lutuk tlat" an lo ti liam liam hlawm a, zanriah ei kham hlim deuh chiah a la ni bawk a, thingpui pawh ka la lûm ta rih lo law law.



"I haw dâwn em ni u Zosiam?" Rina aw ka hriat rualin an ṭhutna lam chu ka hawi nghal a, Zosiama chuan en pawh en lo hian



"Ka'n chhuak lawk" tiin a chhâng liam puat a, ngawi rengin a chhuak zui nghal daih bawk.




"Zosiama hi hmâna ka hriat ṭhin kha a ang tawh lo ê, a puitlin ve tawh vang nge pawh ka hre lo, a ṭawngmawhin a ngawichawi sâwt ka ti, a hma kha chuan ṭawng tam vak lo mah se tun ang em em hi a nih ka hre ngai lo, ka sawi mai mai a nih chu!" thleng ka sil zo an ṭhut khawmna bula ka ṭhut hnu chuan ka ti niah niah a, an zinga pakhat chu rawn ṭawng ve nghalin




"U Zosiama te chu bialnu pawh a nei ngai lovin ka hria, duhtu chu langsar tak tak paw'n a tawng nual a, mahse an beidawng zel, a pu sawi kha a dik tak tak a ni ang" a rawn ti a, chu thu a sawi lai chuan ka lo ngaithla uluk ngar ngar hle.




"Ni e, kei pawh a pu sawi ṭhin kha a dik a nih ka ring ta ber mai, mahse ngaihzawng han nei lo ngawt tur hi chuan a uiawm mah mah, nupui fanau te han nei se duhthusam maw le, neih pawh a hun ve reng tawh" pa Ngaiha chuan a lo tih zawm ve leh a, Zosiama ber lah chu a chhuah aṭang khan a reh ta hmak bawk si.



"Engtin nge a pu chuan a sawi ṭhin a? A pu kha pu Thanngura ti raw khà? Ka hriatna a rei tawh lutuk a, ka hre chiang tawh chiah lo" ka tih chuan




"Aw ni e, i la hre rei khawp alawm le. A pu sawi ṭhin dan kha chuan Zosiama hian a tleirawl chhuah hlim chho bâwr velah khan ngaihzawng nghet deuh a nei a ni awm e, mahse a ngaihzawng khan engmah hrilh lovin a ṭhen tawp a, Zosiama lah chuan a lo vei hman viau tawh bawk si, chutiang vel chu niin ka hria, a dik em Rina? Nang an ṭhenawm lawkah in awm bawk a, i hriat chian zâwk ka ring" tiin pa Ngaiha chuan Rina chu a zâwt zui zat a, kei erawh hawi pawh ka hawi chhuak tawh lo, ka thil en ngai en tlawk tlawk paha ngaihtuahna kawmin ka ngawi kar ringawt.




"Pu Thanngura sawi dan chuan chutiang chu a nia, u Zosiama reng reng pawh hi kha nu kha a duh àwm ka ti, tun thlengin ngaihzawng dang neih loh phah nân a hmang a nia, a khawngaihthlak lehling zâwk" Rina thusawi te, pa Ngaiha thusawi te leh mi dangho thu rawn sawi te chuan ka ngaihtuahna an luah ngut ngut a, sawi tur ber pawh ka hre lo.




Thil dang an sawi ta daih a, chutih lai chuan Zosiama a rawn lut a, chiang deuh hian ka lo en a, a thawhpuite thusawi zawng zawng kha a dik a nih ngat chuan keimah ka inngaihbel lo thei lo.



Zosiama nen kan inngaihzawn lai khan tleirawl kan la ni ve ve a, ka tân chuan lo inngaihbel loh theih pawh a ni lo, tun thlenga ngaihzawng dang a neih miah lo chhan te hi ka nih tak tak phei chuan ngaihdam dil mawlh mawlh tur ka ni ngei ang.




"Ka ṭawng i hria em?" mipa aw thum chhah ṭha zet chuan ka ngaihtuahna ata min tiharh chhuak zawk a, Zosiama mitmeng tak run leh ka mit chu a intawng chiang hle bawk.



"Maw? Eng lo, ih...eng nge i sawi, thil dang ka lo ngaihtuah daih a?" ka ti bah nawk nawk a, sawi ta mai lo chuan min la en chiang zual ta deuh deuh, min ti zâm ru er er thei alawm lè.



"Ka'n haw ang e, mi dang chu an peih chen chen lêng rih rawh se" thum dam dap hian a rawn ti sup a, chutiang em ema hriat nuam chuan min la be ngai lo, ka tuiral lo chauh a ni.



"Engati maw? La awm ve rih la?" nui sen sen paha ka tih chuan ṭawngkâ mi chhâng tawh lovin a lû chu a lo thing deuh nghut thung.



"A nih, khawi ka lo thlah ang che, thingpui ka la lûm dâwn chauh asin, i in hman ang chu ka lo tia" ka ti leh niah niah a, ani erawh kawngka lam panin a kal zui nghal der chu a ni mai.



"Mut tui aw?" pâwn kan thlen ruala ka tih chuan min buk khum leh nghut a, hmuh phâk loh china a kal liam thleng ka thlir zui vang vang a, amah chauh paw'n a tlei hmel teh e!





End of Chapter 4





.

[Havali Adam]

WAY BACK INTO LOVE


By


Havali Adam




Chapter 5




In chhunga ka luh leh hnu chuan an zinga ṭhu khawmuang tawh lovin thingpui ka lûm zui nghal a, han inkawma thil chi hrang hrang han sawiho tâkah chuan rin ai hun a kal chak ang reng, Zosiama a haw tawh kher bawk nen mi dangho pawh chu an haw har vak ka ring lo.




Gas bulah chuan thingpui chhùan lai vilin ka ding ta reng a, Rina leh mi dangho erawh thil an sawi liam liam hlawm a, fiamthute thawhin an nuiho leh dar dar ṭhin a, kei ve thung chu thingpui chhûang e ti lo chuan ka rilruah Zosiama hlir a awm leh tawh a, hetiang tak hian mipa ka vêiin ka duh ang tih leh ka hmangaih ang tih hi rin ngaihna pawh ka hre lo a ni.




A mizia ni se hmeichhe tam tak tâna nêl theih lo chî a la ni zâwk za mah a, mahse kei lah chuan ni tin a tharin ka duh zual zel mai bawk si, a mak ve ngawt mai!


A chhan nia ka hriat pakhat chu kan inngaizawn lai pawh khan ka duh ve em em kha a ni a, kum tam tak a ral hnuah kan inhmu leh hlawl a, hmâna amah ka lo duh ve tawhna te, ka lo ngainatna te leh ka lo thlakhlelh em em ṭhinna te khan thar an rawn thawh leh a ni ber e.




"A va tui lek pek ve, i zârah zanriah tui tak kan ei tawh a, thingpui leh zel pawh a tui ngei mai, nang nge nge" pa Ngaiha thusawi avang chuan ka khi deuh sak a, puitling lung fing chin tawh tih takah ṭawngkam pawh a thiam ngei mai.



"Ka zâr a ni hleinem, Zosiama birthday a nia, chu vang mai mai chu alawm" nui paha ka ti zo chiah chu an zinga pakhat chuan



"U Zosiama nen hian in inhriatna a rei tawh sia, in inhriat ṭhat hmel ê?" a rawn ti ve nghal zat a, ka nui tawp chiang hle.



"School an kal ho ṭhin alawm, a sawi vek tawh khâ" Rina chuan min lo ṭawng khalh hlauh lo se chu chhàn dan tur ka hre rih mai lo.



"Ka hre tho a, ka sawi mai mai maw le" zawhna min zâwttu pa chu a inthlahrung deuh sàwtin ka hria.



"School kan kal ho lai khan kan inhre ṭha ve a" ka ti ve ta nge nge a, mahse engkim a ruh langa sawina chî ah pawh ka ngai lo.



"A nih vel ka ring" tiin a ngawi zui ta daih a, pa Ngaiha zâwk chuan



"Ti r'u, thingpui kan in zo deuh chiah nà chu kan haw hnai dâwn em ni ang? Naktukah Cement Bag a lo thlen belh dâwn bawk si a, thawh hma kan ngaih kha!" a rawn ti hluai a, mi dangho pawh chu an che zui nghal sap sap bawk.



"Hriat loh kârin hun a lo kal chak zêk mai a, kawt thleng ka lo thlah ang che u" tiin ka zui chhuak ve nghal mai a, min mangṭha sap sap a, an fel liam liam hlawm leh pek hle.




In chhung ka luh rualin kawngka ka kalh nghal daih a, mut hun pangngai a ni tawh a, kei pawh thingpui inna no sil zawha mut nghal daih ka tum nghe nghe. Rei pawh sil lovin no chu ka sil fai zo zung zung a, mut dâwn tak takah ka nute ten kan inbe leh zeuh a, ka mu zui nghal chu a ni mai.




A tukah chuan ka tih ṭhin dan ngai tê bawkin School ka kal leh a, thingtlâng khua mah ni se nuam ka ti tawlh tawlh tawh niin ka hria. Tin, favang thla tawp lam kan hmang mêk bawk nen boruak hrim hrim chu a thiang nuam thei em em a, School Compound-ah thingkung a tam bawk si, thli thaw pawh kan dawng ṭha thei hle.




Zosiama nena kan inkâr erawh siam ṭhat nghal mai chî ziazâng a la ni rih lo va, amah zâwk hi tlêmin han inhawng leh deuh hret se chu a zia awm deuh ang maw lè. A thinglungah kei min huatna a chawr lian em em a, huat áwm rèng pawh ka ni!




Kan inṭhen dan mawlh kha min huat chhan a ni tih ka hai lo, mahse keimah avanga kum tam tak chhung hmeichhe dang ngaihzawng a nei leh tawh miah lo tih ka hriatna chuan min tihlim ru veng veng tlat thung si.




Ni khat chu tum loh deuhin Zosiama te hnathawhna hmunah hmeichhe pakhat hi ka hmu a, zep thu cheng lo, Zosiama bul hnaihah a ṭhu deuh tlat bawk si a, ka thik ru vawng vawng khawp khawp mai.


Rina te bulah ka ṭhu daih ta ringawt a, Rina chu ka zâwt nghe nghe a, a sawi dan chuan chhun thingpui in tur leh chhang an lâk ṭhinna dawr neitu a nih hmel.




"Kan Zosiama hi chu a luck phian asin, khaw danga hna kan thawh te pawh hian lo ngaizawngtu hi an awm hman châwk ṭhin alawm" pa Ngaiha thil sawi chu ngaithla ranin ka nui lui sak a, nuih erawh a va za tehchiam lo êm.



"Saw nu pawh sawn a ngaizawngin ka hria pa Ngaih, dawra kan ei tur ka zu lâk te hian u Zosiama chanchin min lo zâwt nasa thei lutuk" Rina chuan a rawn ti ve leh nghal a, ka thin phùt dan a dik hlei thei tawh lo.




"Âw, a chiang reng alawm saw, a ngaizawng chu a nih saw lè, Zosiama pawh sawn duh ve mai se a ṭha ang" pa Ngaiha thusawi hre reng chungin Zosiama te lam chu ka melh ran a, kei nena kan awm dun lai ai thlawt chuan a ṭawng duh hmel daih zâwk te'n ka hria.




"Kei chu a duh ka ring leh lo e a! Chu bakah kan khuaah amah be ṭha deuhtu an awm ve reng a, u Zosiama hi chu ngaihzawng nei lâwr duah chî a ni lo a nih dâwn hi! Ni se zawng a duh chuan a kawp ṭeuh thei ang ka ring, tuna mi pawh saw a thutak leh vak chuang lo ang" Rina thusawi chuan tlêmin ka ngaih a ti ṭha deuh, mahse an khuaa mi zâwk chu ka thik ru leh nghal tho.




"Kan sawi ho êm mai, i duh tâwk teh ang u" pa Ngaihan a rawn ti ve leh dap dap tâkah chuan kan sawi chhunzawm tawh lo va, ka ngaihtuahna erawh a kal ding vut vut hle.



Zosiama te pahnih awmna lam chu ka hawi leh ṭhin, a hmeichhia zâwk chuan a ngaizawng tih a chiang ropui bawk si, ka tih theih awm chhun chu ral khat aṭanga lo thik a ni mai. School lama ka phei dâwn thlengin ka en leh hram a, eng thu chiah nge an sawi ka hre ve châk tak zet, an inhuat loh hmel bawk si, ka thik a ni!




Office chhung ka lut chu sir Chhuantean min lo be nghal a, haw hma ngei ngei a ngaih avangin chawhnu first period lâk min dil a, ka remti ve mai bawk. First Period ka awl chhung chuan kan Headmaster nen kan lo titi mai mai a, thil chi hrang hrang kan sawi a, tun lai zirlai naupangte enkawl harsat tawhzia te kan sawi kâi nual a, ka vei zawng tak a lo ni kher bawk nen sawi tur ka ngah ve khawp mai.




Naupang hi a tir tê, a bulṭhut tê aṭang hian enkawl uluk an ngai em em a, tun laiah chuan naupang awm tlei nân phone te kan han kháltir ringawt ṭhin a, an tân a ṭha lo tih hre reng chungin nu leh pate paw'n kan khawih tam luihtir a, ngaihtuah chian chuan a ṭha lo tak zet a ni.




'An hlimna alawm, an tleina alawm' tiin kan han ngai liam mai zel te hi a dik lo, an hlim leh tlei kan duh rual hian an hlimna chu a ṭhat leh ṭhat loh kan ngaihtuah thlen ve tho a ngai bawkin ka hria. Tualthah nuam ti tlat se, a nuam tih avang khan tual kan thahtir reng dâwn tihna em ni? A teuh lo, thil tih chî pawh va ni suh!




Ka ngaihtuah ka ngaihtuah hian tun laia kan lo piang lo te hi vannei ka inti lehling tawh zâwk, khawvel changkannain min chiahpiah tawh viau e ti lo hian kan changkan dan hi a ṭhatna sawi tur aiin a chhiatna sawi tur a tam zâwk tlat a ni.




Nun dan phung tam tak kan hloh mêk zel a, ngaihdan mak tak tak a piang a, chapona te, mahni chauh inngaihtuahna te kan nei chho ta zel bawk a, kan ram mai ni lo keimahni pawh hi kan dam lo tawh a ni.




Sir Chhuante leh mi dang an rawn luh sap sap tâkah chuan keini pahnih paw'n kan sawi duh tâwk thei ve ta hram a, kan sawi tui lutuk vang nge pawh ka hre lo, School dâr rik lai àwm réng pawh kan lo hre hleinem lé. Rei ṭhu tawh lovin Class lá tur chuan ka chhuak zui nghal a, vawiin chu Class Test an nei dâwn bawk a, an entawn tur vèn deuh tawp a ni mai.




Classroom chhunga ka awm hnu chuan Zosiama te hnathawhna lam ka va hawi zeuh a, chhun chawlh an neih laia ka hmuh nu kha a lo la awm a nih chu! Mit khap fak fakin ka en deuh vang vang a, an thil sawi hre pha lo mah ila chu nu lah chu a lo nui sâng zui! Zosiama hnathawhna bul chêtah a ding deuh chawt bawk a, ka thik lutuk chu en pawh ka en rei peih lo.




Dâr a rik dâwn meuh chuan naupangho paw'n Test Paper an rawn dah ta sap sap a, an zingah chuan naupang ngawichawi deuh pakhat hi a awm a, a hming pawh Ruatsanga a ni a, ka thawh tirh phat aṭang khan ka chîk ru thei em em a, Sir Chhuantea kâ aṭangin zu zuar chhungkua aṭanga seilian a nih thu ka hre tawh a, tun ṭuma kan Test pawh hi a tih ṭhat vak ka ring lo, mahse thil tum dang ka nei tawh thung.




"Ruatsang, Office-ah min lo hmu lawk rawh aw" ka tih chuan hlauhthawn hmel zet hian min rawn en a, nui lui zeuhin classroom aṭang chuan ka chhuak zui ta nghal bawk.




Ka sawi ang ngeiin rei lo tê hnuah Office-ah min rawn hmu a, ṭi deuh hian a kut hnung a suih tlat a, a kun deuh ngul bawk. A hmel ni se hlauh nei hmel a pu reng a, a awm dan chuan ka rilru a tikal thui khawp mai. A zia a zawi chu thuhran ni se class-ah pawh han kawm bik a nei vak ngai lo va, zirtirtu tân chuan hmuh hmaih theih pawh a ni lo.




"Harsatna i nei em?" ka tih chuan a lu a lo thing thuai a, a hmelah chuan min zah tih a hriat tak zet.



"Harsatna i neih chuan min hrilh hreh suh aw?" dam diaia ka tih leh chuan min en zawk a, mahse a hawi sawn leh nghal.



"Ṭha deuhin lehkha zir la, pâwl 10 hi pass ngei i tum dâwn a nia, i kal thei tawh e" nui paha ka tih chuan min buk khum zeuh a, ngawi rengin a chhuak ta nal nal bawk.



"Engati nge a Miss? I Subject-ah buaina a nei deuh em ni?" Sir Sena chuan a rawn ti a, lu thing nak pah hian




"Nei hran lo ve, a vantlâng pâwl tak a ni zâwk alawm, chu ai chuan amah kha harsatna nei a ang ka ti, Class chhungah pawh a ṭawng ngai meuh lo" ka ti ta lûam a, ka mitthlaah chiang takin kan zirlai naupang Ruatsanga hmel chu a rawn lang nghal bawk.



"En liam mai mai rawh, nakinah chuan ngaiah i nei ve mai ang" tiin Sir Sena chuan a Phone a khawih zawm mual mual a, min rawn chhan dan teh daih chu mak ka ti ru ang reng.




Kâr lovah School bán a lo hun a, haw tlang ta mai lovin Zosiama te hnathawhna lamah ka phei leh hram a, hmeichhe dang thikna tel miah lova ka hmuh leh phawt loh chuan ka rilru a nuam thei tlat lo. An hnathawhna bul ka va thleng chu min lo en zawk a, min en rei vung vung viau leh nghal.




"Eng nge i rawn tih dâwn?" chhumbung deuh hian a lo ti deuh tawp a, chhâng ta mai lovin ka nuih ringawt.



"In bâng tawh a ni lo'm ni?" amah bawk chuan a rawn ti leh a, tlai dangah ka kal ngai si lo va, a bikin School bán tawh hnu angah hian, mak a ti deuh ni ngei tur a ni.



"Eng nge? I lung ka tiâwi lo leh ringawt tawh em ni a? I lungàwi lohna a ho thei si, chhan a awm em em hran lo, ka lo kal a ni mai" tiin ka nui var var a, ani erawh nuih lam chu khawi lamah!



"A nih chuan haw ta che? Eng nge i rawn tih?" a rawn ti leh deuh hmuk a, a mizia hi chu ka pawm thiama ngaia ka neih a fuh tawh berin ka hria.



"I va'n sual ren run roh tak, ka lo hmu leh lawk che maw le" nui sak pah hian ka ti ta nge nge a, a ban bulah chuan ka chum deuh taih bawk.



"A nih ka haw a nia, fimkhur la aw?" tih leh kal sawn ka rual a, a ngai tê bawkin min chhâng lêt lo hrim hrim.



"Min chháng ve la Zosiamlian?" nêl tak ang mai hian ka ti leh hram a, dik tak chuan nêl hmel deuhin bia bia ila, min nél chawp ve zel ka ring a ni.



"Zosiamlian, i luhlul dan em em hi âw, i la ngai reng mai" nui chunga ka ti leh chuan



"I hre sual, haw tawh rawh" ti deuh hmukin an hnathawhna lamah a kal phei zui nghal nul nul a, kan hmakhua a la thiam viau chuan ka hria.




Chutia ani ber a kal sawn tâkah chuan kei pawh ka haw ta hnak hnak a, mahniin ka nui leh ringawt ṭhin a, Zosiama ngaihtuah chhuak lo ila chuan ka nui kher lo ang. A ṭawng hmuk hmuk ṭhin te, mi a en deuh run ṭhin te, a awm dan leh ka awm dan inthlau lutuk te chuan ka nuih a tiza hnuhnawh a ni ber e.




In ka thleng a, ei rawng ka bâwl zui nghal a, ka bâwl zo har lo hle bawk. Zanriah ei dâwn hnaihah in chungte'n chawhmeh min rawn suah a, chaw ei hmain ka tem chhin a, pi Muani siam a nih ka ring nghal hmiah! Pi Muani leh ka nu an inna pakhat chu chawhmeh siamah hian a ni a, eng chawhmeh pawh siam se a tui lo ngai lo.




Zanah chuan Rina te ho an lo lêng leh a, zan dang ang bawkin Zosiama a rawn tel ve lo leh pek a, mahni chauha a tlei ṭhin lutuk hi chu ṭha ka tih zawng a ni lo. A châng chuan keimah zâwk hian lèn chilh mai te ka duh rum rum ṭhin, mahse hmeichhe tih atân a mawi bawk si lo, chu bakah min huat tawh sa nàk a laiin min ngaithei lo zual ang tih ka hlau a ni.




Favang thla kan han hmang zo chiah chu thla tir tê aṭang boruak awm dan a thlasik ṭan nghal ruih a, Zosiama te pawh hna an thawk zo thawkhat tawh chu a ni ber a, an khaw lama an haw daih tawh tur erawh ka ui ru ang reng.



Anni tân haw loh theih a ni bawk si lo, pa Ngaiha sawi dan phei chuan khaw dangah hnathawh tur an hmu lâwk vek tawh a, chumi hma chu an khuaah an haw hmasa phawt dâwn a nih hmel.




Tin, an Tanky sak pawh a lianin a ṭhat hmel hle a, kâr tin VCP leh khawtlâng hruaitu ṭhenkhat te'n an rawn vil reng ṭhin bawk a, an thawk zo hma viauin ka hria. Ka rilru tibuai bertu pakhat chu Zosiama nen kan inkâr a ni a, min hawsan daih phei chuan ka tân hmalak ngaihna a awm tawh lo ang.




Kum tam tak liam hnua kan inhmuh leh nî aṭang khan thla khat leh a chanve vel chu a ral tawh a, khami chhung zawng khan a ṭha lam zawng leh a chhe lam zawng thil a thleng nual hman a, mahse ka duhthusam ber, kan inkâr erawh tun thlengin siam ṭhat a la ni chuang si lo. A rilru hneh ka duh a, kawng pawh ka dap nasa, mahse a harsa lam hret chu a ni.




Nge ni a, kei hian theih tawp ka chhuah lo zâwk nì? Ni lo, tum chu ka tum nasa ve ngei alawm, a châng phei chuan min ning hial ṭhin a nih kha! Kan inkâr siam ṭhat ka duh luat avanga ka beih hahna te khan rah ṭha tak chhuah rih lo mah se a tir ang em em chuan ka lakah a awm tawh ngai bik lo tih ka hria, huat erawh min la haw reng thung a, hun tam nei ila chuan a rilru ka hneh leh theih mai ka ring.




A chhan chu min la theihnghilh hmin ṭhak bik lo tih ka hre tlat alawm, a thinlung kil khatah ka la awm ve reng tih nen lam ka hria, mahse mipa rilru nghet tak a nih avangin kei min hnaih zawnga awm a tum tawh lo bur a, chu tak chu ka tâna thil buaithlak a ni thung.




Ka hriat sual loh chuan min duhna leh min ngainatna a nei tawh lo va, hmangaih phei chu khawi lamah, mahse hmelhriat satliah ang ngawt chuan min enin ka hre bawk si lo. Zawhna ka zawh lah hian ṭha taka inchhàn ai chuan chhàn loh tawp te a hrat bawk si, an haw tawh dáwn vang nge pawh ka hre lo, ka beidawng ṭan derin ka hria.




"Ruatsang!?" ka mi hmuh avang chuan ka ding deuh dawt a, ani pawh a rawn hawi rang hle.



"Lo kal teh" ka tih leh chuan ngawi reng hian a lo phei ve mai a, mahse ka mitah min en ngam lo hrim hrim.




"Engati nge School i rawn kal tawh ngai loh a? Kâr hnih lâi i chawl tawh a nia, kum tharah Board Exam in hmachhawn dáwn leh nghal a, School kal ṭhata lehkha zir tam a ngai asin" ka ṭhahnem ngaihpui avangin ka ti ta duah a, ani erawh a ngawi reng thung.




"Eng nge i tih hrim hrim?" ka tih leh chuan ring lo zet hian



"Ramah ka kal a" a lo ti zawi raih a, a awm dan aṭang chuan kal sawn thuai thuai a duh niin ka hria.



"Min lo zui teh, ka inah inbe lawk teh ang" ka ti leh chiah chu



"Miss!" a rawn ti nghal thuai a, kei paw'n a lam ka hawi rang hle bawk.



"Eng nge?" dam deuh zâwka ka tih leh tâkah chuan



"Ka thei lo" tih ringawt hian min chhâng a, zawhna dang zawh belh duh viau mah ila a hun rih lovin ka hria.



"Ti rawh, haw phawt ang, kan rei dâwn hleinem, biak lawk che ka duh mai chauh alawm" ka ti lui deuh ṭalh a, ka kal sawn zui nghal tâkah chuan min lo zui ve mai bawk.




Haw kawng tluanin kan inbe leh tawh lo hrim hrim a, School kal tur a nih tehreng nen hnathawh kawr ha chunga ka hmu teh daih chu mak ka ti a, chu vanga biak duh pawh chu ka ni réng, mahse min chhan ṭhat vak ka beisei lo. Ka in luah kan thlen chuan lut hmasa turin ka hrilh a, ngawi reng hian a lut ve mai a, an ziritirtu ni ila zawng ka thu anga a awm chu ka ring miah lo.




"Le, min han hrilh teh le!? Harsatna i nei em? Ka puih theih che chuan puih che ka duh a nia Ruatsang, harsatna i neih chuan min hrilh rawh" dam diai hian ka ti a, ani erawh chuan sawi a tum loh hmel khawp mai.



"A nih engati nge School i lo kal ngai tawh loh? Eng nge i tih ṭhin?" ka tih leh chuan



"Vawk chaw ka zawng ṭhin" a rawn ti teh hlawl a, dik tak chuan min chhán ka ring em em lo.



"Engati nge School ṭhulh khawpa vawk chaw i zawn a? Lehkha zir a pawimawh zâwk asin, i chhungte'n vawk chaw zawng turin an ti che em ni?" tiin ka ṭhut hnaih deuh sawt a, chhuat en reng pah hian



"Aw" a rawn ti ve leh mai a, ka zirlai naupang a ni bawk si, ka khawngaih ru tak zet!



"A nih leh i chhungte chu School kal i ngaih thu i hrilh ṭhin em?" ka tih leh chuan



"Ka hrilh ṭhin alawm, mahse awmzia a awm lo" tiin min chhâng a, ngaihtuahna a tikal thui duh khawp mai.



"Aw le, va haw phawt la, naktuk chu School lo kal tum tawh rawh aw" thaw hap paha ka tih chuan



"Ka lo kal theih ka ring lo Miss, zanin hian kan tlaivâr a ngai dâwn a, naktuk chu ka chau ngawt ang" a rawn ti thàn a, zawhna ka nei chhunzawm nghal bawk.



"Engati maw?" ka ti deuh hû a, sawi ta mai lo hian a ngawi vang vang a, a sawi hreh deuh a nih ka ring.



"A pawi lo, min hrilh lo mah la a pawi lo a nia, va haw tawh rawh" nelawm zeta ka ti zo chiah chu



"Tlaivâr deuh thawin zû kan chhûang dâwn a" a rawn ti ta mai, ka mak ti lutuk chu ka mit ka khap fuk fuk ringawt.




In aṭanga a chhuak lai te chu hmuin hre vek mah ila thawm pakhat mah ka chhuah lo va, ka ngaihtuahna a kal dìng lutuk avangin biak pawh ka be tawh lo hrim hrim. Thawm chu a reh deuh ṭhiap a, ka ṭhu ngawi reng a, kan zirlai naupang Ruatsanga hun tawn mék chuan ka rilru a luah lo thei lo a ni.




Kum naupang tê ni siin a hma hun a thim nghal em em chu a nia, ka va'n khawngaih reuh tak! Âw, mihringte hi kan lo va inang lo êm, a ṭhenin nun nuam tak an neih laiin ṭhenkhat erawh chuan hun harsa tak an tâwk a, mahse engkim hi a nih dan tur dik tak vek a ni bawk si. A châng hi chuan kei ngei pawh hian Siamtu hi demawm tih châng ka nei ṭhin, kei chauh lo mi dang paw'n dem châng an ngah ka ring.




Ka zan hun hmang te reng reng chu Ruatsanga ka ngaihtuah luatah a dik hlei thei lo, naupang têa zû a chhûang tur chu ka ngaingam lo a ni ber. Chhungkaw ṭha tak kâra seilian leh cheng te chu ni se ngaihtuahawm a ni miah lo ang, mahse ani lah chu ka thawhpuite min hrilh dan takah van laia tla an tih ang chî hi a la ni leh ta nghal a, a hringnun kawng bumboh dan turzia chu ka suangtuah buai duh lo zâwk!




Ka mu meng kar a, muthilh ka tum lo pawh a ni lo, ka muhil thei thlawt lo a ni. Ka rilru chuan Ruatsanga puih dan tur kawng a dap kual char char a, a ṭha ang em ṭha lo ang em tih thlengin ka ngaihtuah a, ka khawngaih tak zet a ni.




A tukah chuan a sawi lâwk tawh ang ngeiin School a rawn kal lo va, ni lêngin ka ngaihtuahna kil khatah a awm reng a, ka thawhpuite lah chuan an ngaihsak lém vak bawk si lo. Khaw mi leh sa dik tak an ni zâwk zâwk a, ngaihven áwm te ka lo ti mai mai a, mahse mihring hi kan rilru a lo inang lo hlawm khawp mai.




"Khaw'nge Zosiama?" tiin Rina chu ka zâwt deuh phawng a, ani pawh chuan



"Phone a hmang lawkin ka hria" a lo ti ve mai a, Zosiama chu ka zawng deuh nghal ruai bawk.




A awmna ka hmuh tâkah chuan ka kal phei nghal a, vawiin chu ka thik deuh nu kha a rawn lang lo ve teh mial a, ka nî hman pawh a nuam sawtin ka hria. Zosiama dinna lam pan chuan ka phei zel a, kâr leh maiah khian an khaw lamah an haw tawh dâwn leh nghal a, eng thil emaw ni tak chu ka tih a ngai a ni.




"Eng nge i an? Damdawi i ei ṭha em? Engati nge i lo chhuah leh ṭhin? Awm mai mai ta che?" tu nge a biak hre chiah lo mah ila a ngaihtuah hle tih erawh a hriat viau!



"Kan lo haw ṭep, lo awm mai mai rawh" a ti thum leh bul bul a, a hnungah ka ding reng tih a hre miah lo a nih hmel.



"Kha lam kha chu ngaihtuah buai duh suh, ka dah dâwn, kan inbe leh dâwn a nia" a tawp lam chu dam dap hian a ṭawng a, an inbiakna pawh a hmet tawp zui nghal bawk.



"Eng nge?" min hmuh rual chuan a ti deuh hmuk a, Phone-a mi dang a biak dan leh kei min biak dan chu lei leh van ang vel a ni.



"Ka lo kal" nui var var hian ka ti sam et a, kal sawn nghal mai a tum chu



"Enteh Zosiam, thil hrilh duh che ka nei a" tiin a bânah ka chelh a, mit tizim sun hian min en a, hetianga min en tawh hi chuan a Zosiama ngawih ngawih ka ti ṭhin!




"Nimin tlai khan kan zirlai naupang pakhat ka hmu a, School kal lovin vawk chaw a lo zawng daih a, ka khawngaih tak tak a ni. Nizan pawh amah ka ngaihtuah avangin ka muhil lawk thei lo va, chhungte tia sawi tur a nei miah lo leh nghal a, chutah a awmna te hian zû an la zuar ṭhin zui" ka ti ta melh melh a, ani ve thung chuan




"Eng nge min hrilh chhan?" a lo ti daih a, ka va ner khum nasa mai mai tak!



"Ka sawi tum tak chu puih ka duh a, mahse puih a ṭha ber ang em ka hre lo. A chhungte nen kan inhmu thiam lo daih ang tih ka hlau ve tho bawk si, eng nge i ngaihdan?" pangngai deuha ka tih chuan



"Mi nuna inrawlh vak hi a ṭha lo, chutiang bawkin ka nunah pawh hian inrawlh tam suh" a rawn ti leh ta hmuk hmuk mai, a la kal sawn nghal daih zui!



"Heih, min lo nghak teh, chhun thil ei tur rawn pe deuh thlap thlap ṭhintu che u kha ka thik teh mai a nia aw, be ṭha tawh suh" ti niah niahin ka um phei dat dat a, a ding deuh thut chu ka sû ṭep leh nghal.



"A tua chu màw?" a rawn tih chuan




"I hre reng, i hre lo der, chuan eng atân mah min ngai lo ang hian awm tawh suh, min la duh reng tih ka hria, keimah avangin ngaihzawng pawh i nei tawh ngai lo tih ka hre vek" ka tih zawm nghal bawrh bawrh a, ngaihnep hmel zeta min melh chhuk run pah hian



"I mawl hle mai" a ti sup a, thu dang sawi belh tawh lovin a kal sawn zui nghal daih bawk.




Khua a thim thet thet rualin zanriah ka ei a, chaw ei khama chhuah nghal ka duh vang a ni pakhat. Chaw ka ei kham chuan khua a thim fel vek tawh a, zan dâr 6 leh a chanve chauh a la ni a, ka kalna tura kal nân chuan hma ka ti leh deuh a, ka ṭhu khawmuang leh rih a, dâr 7 a pelh tâkah chuan in aṭangin ka chhuak ta nge nge a, ka thil tih tur chu ka huphurh ru ve reng tho.




"In awm em?" tiin kawngka chu ka kik ri karh karh a, thil ri deuh chawrh chawrh hi ka hre zawm zat bawk.



"In awm em?" ti ṭha leh ngatin kawngka chu a hma aia ring zâwk hian ka kik nawn leh a, ka chum titih a ni mah zâwk ang chu!




"I zak na chai nge!" patling aw hian a ti vin khauh hrawk a, thawm dang a rik chhunzawm leh ṭhawt ṭhawt ṭhin a, ka thil hriat chuan ka ngaih a tiṭha thei tawh lo, kawngka ka nam hawn ruala ka thil hmuh phei chuan min va ṭhawng tehreng êm.



"Duh tâwk teh ka pu" tiin ka ṭawng chhuak vat a, Ruatsanga chu ri lo hian a lo ṭap khur bauh bauh a, thing fàka invuak zawng ṭah lohna chî niin ka hre lo.



"A tu chu nge maw i nih phiangsen le?" Ruatsanga hlap chawrh chawrhtu min biak dan chuan min tiṭim uaih thei!



"Ruatsangate zirtirtu hi ka nia, engati nge i vuak vak vak mai le? I tinâ mai ang asin?" inthun deuhin ṭawng mah ila ka inthunun hlei thei lo chu a ni e.



"I inrawlhna tur a awm lo ve, chhuak rang rawh!" tiin min nam sawn dâwrh a, ka tlu lo chauh nghe nghe.




Pâwn aṭang chuan invaw ri ṭhawt thawm ka hre reng a, ka awm ngaihna hre lo chuan an ṭhenawmte ka pun tawp a, tih ngaihna dang ka hre tawh lo tlat a tin a ni! A tawpah erawh Ruatsanga chuan vuak a tuar tawh lo thei ve ta hram a, mahse ka thil hriat chu rapthlak lehzual tak a ni!




"Chhuak nghal ang che, nang naupang awm ṭha duh lo lutuk hi ka awmpui thei tawh lo che, i tal tálin tal rawh!" ti vin phiar phiarin Ruatsanga chu a theh hian a rawn theh chhuak a, a thawmhnaw bâwm chhe ve tawh tak nen lam a rawn chhuih chhuak a, mipa ni ila ka ti ngawih ngawih.




"Insum teh khai" an ṭhenawm te'n han ti ve teh mah se awmzia a awm chuang lo, mipa ni ila chuan tharum thawh zawnga ka chet tawh ka ring, a rapthlak êm mai.



"Lo kal rawh Ruatsang" tih leh a bâna kaih ka rual a, ka in luah lam ka panpui nghal pawk pawk a, nakin zelah eng nge thleng dâwn hre lo mah ila tunah rih chuan Ruatsanga hian ka puihna a mamawh tak zet, ka pui ngei bawk ang.




Ka in luaha kan luh rual rualin a kawr ka hlihtir nghal a, a hnung hmun tin mai chu a thi ser ser vek a, a nât dan turzia chu ka hriatthiampui pha lo zâwk!




Chutah beisei lo deuh thil a rawn la thleng zui, Ruatsanga vaw hrepa hnawt chhuaktupa khan min rawn kal chilh a, Ruatsanga chu hruai lêt leh a tum chu niin, Ruatsanga lahin a duh tawh bawk si lo. Ka lo danna lamah a kut ka tawrh phah ta hial a, min nam thlu rawkin ka hmaiah vawi eng zat emaw ni a hnek hman a, kan thawm hriain in chungte lo chhuk thla thuai lo phei se chu min that duh hial ang ka ring.




Engkim chu a buai nuaih a, ka theih tawpin Ruatsanga chu ka hum a, ka bula awmtir ka tum tlat bawk. Ruatsanga sawisatu pa pawh khawtlang hruaitu te'n hreng betin Police an be pawp zui nghal a, man daih mah se pawi ka ti teuh lo, a sual dan a rapthlak chiang ém mai.




Ruatsanga chu Health Sub-Centre-ah ka kalpui thuai thuai a, a hnunga hliam mawlh chu ka rap zual tak zet a ni. Keimah pawh ka inngaihtuah hlei thei lo, chutah ka hnâr thi lah chu a reh lawk thei lo leh ta nghal a, ka hmai ni se a vûng deuh lûk bawk a, hmeichhe tawrh atân chuan a nasa mah mah tih ka hria, mahse ka tawrhna chuan rah ṭha a chhuah tal alawm, chhungril lamah ka lawm tho tho.




Chumi zan aṭang chuan Ruatsanga chu ka awmpui ta chawt a, hliam ka neih avangin kei pawh kan Headmaster-in chawlh min pe rih a, ka dam chian hûn huna kal leh mai turin min ti a, khaw chhungah pawh kan thang nasa hle a, mahse ka rilru a dam thei thlawt lo, a chhan chu tu dang ni lovin Zosiama a ni.




Mi kut ka tuar tih te, buaina ka tâwk tih te a hre ve vek tawh a, mahse a hnen aṭangin ngaihsakna ṭawngkam khat lêk pawh ka la dawng lo tluang zel a, Rina leh mi dangte'n min rawn kan liam liam tawh hnuah pawh ani chu a reh hian a reh tlawk tlawk a, awm ve lo leh hre ve lo ang mai a ni a, ka hun tawn mêk chu a tikhirh zual tak zet!




A lak aṭangin thil tam pawh ka phùt lo, ka ṭhat leh ṭhat loh hre tur tal te'n lo kal ve se chuan ka rilru a nâ miah lo ang, ka hlim viau zâwk ang ka ring, mahse ani chuan chutiang chu a ti hauh si lo. Ka rilru leh ngaihtuahna a kal thui zel a, rilru nâtnain min tuam hlawp hlawp a, ka hun tawnin a zir thlâwt bawk si lo nen ka beidawng tawh ni berin ka hria.




Hun kal tawh suangtuah kirin kan tleirawl laia kan inngaihzawn lai te, kum tam tak a liam hnua kan inhmuh leh dan te, amah neih lêt leh tuma ka beih dan zawng zawngte chu ka ngaihtuah chhuak a, lungngaihna nen hun kan hmang niléng zan tin ṭhin ta ziah a, hmangaihin thlahlel viau mah ila ka intinâ mai mai zâwk dâwnin ka hre tawh a ni.




Nî te chu an liam zel a, Zosiama hnen aṭang pawh engmah ka la dawng lo tluang zel a, tunah chuan eng atân mah min ngai tawh lo tak tak niin a lang. A nihna takah chuan ka thiam loh alawm, a thinlungah huatna ka tuh a, chu ka thil tuh chuan nâ takin min siam lêt ve ta thung a, ka tlin lo chu a ni ber e.




Ka thil tawn chu ka nute lam hrilh loh hram ka tum tehreng nen pu Hneha kâ aṭangin ka buaina tawh chungchang an lo hria a, an hriat rual rualin min rawn call nghal a, ka pa phei chu a thin a rim khawp mai.




Kâr tawpah an rawn zin chho nghal nghe nghe a, ka thil tawn mai ni lo Ruatsanga chungchang nen lam chuan ka hrilh fai ta vek a, nu leh pate kianga ka awm zet chu ka ṭah a chhuak ru reng ringawt a, Zosiama nena kan inkâr ni se a beidâwn thlak tawh bawk si, engkim chu ṭahna tur hlir ni maiin ka hria.




Kâr thar kan chûangkai a, Zosiama te an haw dâwn tih pawh ka hre reng a, mahse hre lo ang hmakin ka awm thung. Vawi khat phei chu ka inngaihtuah lungpuam laklawh bawk nen ka ṭap tawp a, ka nu ngaih a ṭha lo hial a, ka pa paw'n min ngaihtuah viau a, mahse ka ṭah chhan tak erawh ka sawi duh lo tlat thung.




"Lo lut rawh" pâwn lam aṭanga kawngka an lo kik rualin ka nu chuan a lo chhawn nghal lang láng a, Rina hmel ka hmu teh hlawl chu mak ti tak ka ni!



Chutah amah mai ni lovin pa Ngaiha te, mi dangte pawh chu an lo lut ta zel mai, a tawp berah Zosiama hmel ka la hmu ta cheu zui, ka hrethiam lo hman hle a, mahse pa Ngaiha chuan thawhlehni tuka haw an tum zâwk thu a sawi suam suam a, an vawi khat inhmuhna chauh mah ni se ka nu leh pate pawh a be thiam nghal viau bawk.




Mi dang erawh an ngawi deuh ṭhap hlawm a, kei lah zan dang angin ka ṭawng châk tehchiam bawk si lo. Ruatsanga phei chu a zak deuh nge ni, pindanah a lut daih nghe nghe. Ka nu leh pa bulah chuan ka ṭhiante an nih thu ka sawi a, ṭawng erawh ka ṭawng tam lo khawp mai. Rei lêng lovin haw zâi an rél ta thuai a, ka zui chhuak ve nghal mai a, pâwna kan din ṭhap lai chuan




"Zosiam" tiin ka ko ding ta nge nge a, min rawn en vut a, mi dangho pawh chuan min en tih ka hre ru reng.



"Thil hrilh duh che ka nei a" ka tih chuan min rawn pan hnai a, ka lo en chiang hle.



"Ka rilru tinâ ṭhin viau mah la" tia chawl datin ka din hnaih ve ta hret a, tu mitmei mah vêng lo luiin a kut chu ka hum vang vang zui nghal zat bawk.




"Ka hmangaih che, ka la hmangaih reng che, hmâna kan inngaihzawn ṭhin lai ang chiah khan ka la hmangaih reng che" ka tih zawm ta mawlh mawlh a, thawm chu a reh ṭhiap a, naktuk maiah an haw tawh dâwn bawk si, ka hmangaih thu ka hrilh hman dâwn lo tlatin ka hria a ni.




"Hun kal tawh avang khan i rilru a la ngai reng ti raw?" ka tih leh chuan thum dam dap hian



"Ka piancham min lawmsak avang khan ka lawm e" a rawn ti daih a, sawi lo mah se ka laka a rilru puthmang chu sawh sawn a tum tawh lo tih chiang takin ka hrethiam nghal vek!




"Ka tihpalh, ka tihpalh lutuk, thil thleng zawng zawng kha ka duh dan a ni bik lo, inṭhen kha ka duh bik reng reng lo, mahse a hun lai kha chuan" sawi zawm thei lovin ka kuah thlawp a, ka aw ah chuan lungngaihna hlir a khat a, min kuah lêt ve chiah phei chu ka ṭah a chhuak ngei mai.




"A tâwk e, ṭap tawh suh" ti hniam ruihin ka hnung chu a chûl dan dan a, eng thu mah a sawi belh leh tawh lo hrim hrim bawk.



"Aw le, a ṭha e....." amah ka kuahna ata ka inlâk hran hnu chuan ka ti zâng vah a, ka nui lui deuh sâng a, mahse ka ṭah a va chhuak ru si êm!



"Ih e....." ti thawp sepin ka van vadàk vang vang a, ka mit ka chhin rual chuan ka mittui chu ka biangah a rawn baw ta zawih mai.




"Kei chuan hmangaihna ka ngai pawimawh ber asin, nang erawhin huatna leh thinurna i la pai nung reng thung a, i lakah hian ka inthiam lo kumkhua tawh dâwn a nih hi!" chu thu ka sawi lai chuan ka thinlung chhung a rum vawng vawng a, duh tâwka ṭah hawm hawm ka châk tak zet bawk.




"Mangṭha le Zosiam, ka thinlung aṭang hian ka paih bo hlen tak tak tawh ang che, tun a chinah nang hnaih leh zawng che hian ka awm tawh ngai lo bawk ang" tih zawm leh nghal zatin ka hmaa ding ngawi run pa hmel chu ka chhoh en leh hram a, mittui tling pama nui lui sak pah hian ka inher ta riai riai a, keini zawng inkawp tura khuanu ruat kan ni lo a ni mah na le!






End of Chapter 5





.

[Havali Adam]

WAY BACK INTO LOVE


By


Havali Adam




Chapter 6




In chhunga ka luh hma chuan ka hmai chu ka tûai hul deuh puat puat a, ka nu leh pa'n ka ṭap tih an hriat chuan zawhna an nei leh ngei dâwn tih ka hria, chumi chu pumpelh ka duh a ni. Thawk ka là leh vang vang phawt a, hmel pangngai tak pù lui hram hramin kawngka chu ka nam hawng a, Ruatsanga leh ka pa lo ṭhu dun ka hmu zawm zat bawk.




"Lo kal teh Bawihi, hei, thil kan lo sawiho a" tiin ka pa chuan min lo bia a, kei pawh an bulah ka ṭhu thla ve nghal mai a, eng thu nge an lo sawi ka hre chiah lo nà chu an awm dan aṭang chuan a pawimawh hmel ang reng viau.




"Hei, i nu nen kan lo sawi tawh a, Ruatsanga hi kan bulah awm mai se kan lo tia, eng nge nang i ngaihdan ni hrim hrim? I bula awmtir i duh deuh tlat em?" ka pa chuan a rawn ti leh dap dap a, chháng nghal mai lovin Ruatsanga zâwk chu ka en deuh phawt a, a inthlahrun hmel em em leh nghal.




"In tih dan dân a ni mai, ka hre lo le, awmpui chu ka duh viau a, mahse a tân he lai hmun hi a him ka ring chiah bawk si lo" ka ti sep sep a, ka nu pawh lo ṭawng chhuak ve nghal zatin



"Ruatsanga tân heta awm a chî tawh lo hrim hrim, kan bulah awm rawh se, khutah zirna a chhunzawm thei bawk ang a, ama tân tak pawh hian a ṭha daih zâwk ang" a rawn ti zung zung a, ka pa pawh chuan




"Ni e, kan bulah awm se ka duh khawp mai, chhungte tûmah i nei tawh lo tak tak ti raw Ruatsang? Min hrilh hreh lo la, i lo la neih tâk hlauh chuan kan thil tih tum hi a mawi chiah lo va, kan hriat chian hmasak phawt loh chuan kan mualpho thei tlat a ni" a tih zawm leh dap dap a, Ruatsanga erawh a ngawi ngul thung.




"Sawi la Ruatsang, zahna tur a awm lo, sawi hreh miah suh" tiin a darah chuan ka chelh a, a kut pahnih insualtir neuh neuh pah hian



"Ka nei tawh lo, tûmah ka nei tawh lo, mahse ka chunga in tih tum hi ti lo mai rawh u, a buaithlak ang" tih leh thawh a rual a, pindan lamah a lut ta daih a, zui nghal ka tum chu



"Keimah ka va kal ang" tiin ka pa chuan min thawh khalh a, ka rilru hmun tin kil tin chu a buai nuaih a ni ber.




"Kei zawng Ruatsanga hi ka khawngaih êm mai, naupang tê si hian engtin nge hetiang zawng zawng hi a tawrh theih zâwk lé" ka nu chu a indawm kun ngal a, a hmel aṭang chuan a ngaihtuahzia leh a thutakzia a lang chiang hle bawk.




"I tân pawh hian fimkhur a ngai teh mai a nia Terem, kei chu i hnathawh lai hi chawlhsan leh mai la ka duh, kan awm loh hunah mi kut i lo tuar leh mai ang tih ka hlau" ka nu bawk chuan a rawn ti leh a, a ngaihṭhat nân tiin ka nuih lui sak a, mahse a thil sawi chu thil thleng thei reng a ni tih ka hai hauh lo.




"Min ngaihtuah lutuk a nih khâ nu, Pathian zârah eng êm a thleng lo turah ngai ang" tia chawl deuh datin




"Chu bakah kum chanve pawh ka la thawk tling ṭha ṭhum lo a nia, bán leh daih te chu a, tih chî ah pawh ka ngai lo" ka tih zawm leh nghal zat a, pindan lam aṭanga Ruatsanga insut feih feih thawm ka hriat tâkah chuan ka ngawi zui ta daih bawk.




"Lungngai reng reng suh, kan bulah i awm ang a, engkim a ṭha vek mai ang" ka pa chuan a ti thum dam dap dap a, Ruatsanga erawh a la insút ri feih feih thung.




Ka pa aw thum dam thluam chuan Zosiama min tihre chhuak zawm zat a, tho deuh uaihin tukverh bulah ka va ding ta daih a, ka hringnuna ka tawn miah loh tur ka lo tawng palh tih ka hriat chhuah tawhna te chuan min tinâ zual a, ka thinlung chhungril chu vih sawk sawk ang mai hian a nâ nawn awn awn a, ka pâwn lam lan dan erawh ka inthunun nasat êm avangin mi dang tâna hriatthiam theih a ni lo.




Zanin khan 'ka hmangaih che' tiin thumal pathum pawh kha chhak chhuak ni se chuan engkim a danglam ang a, kan inkâr khi zau tawh em em pawh a ṭha vek ni mai tur, mahse ani chuan hma lam min pansan tawh mai bakah kei nena awm dun leh a duh tawh lo a nih kha!




Kan inkâr siam ṭhat tuma ka thawh hahna zawng zawng te leh zah pawh dâwn lova ka beih ve ṭang ṭangna te kha tunah chuan engmah lo mai a ni tawh a, chuti maiin ka rilru leh thinlung chhungril nâ em em chu a kiam mai ka ring lo hulhûal bawk.




Ka zan mu te chu ka mu meng kar a, hun kal tawhin ka mitthla leh ka suangtuahna an luah lûm vut vut a, mahse engkim chu a tak ni si lo, min tinâ em em thei suangtuahna vak vel mai mai a ni tawh thung si.



Ka mit ka chhin rual te chuan ka biangah mittui a baw leh zawih ṭhin a, ka men lahin mittui nen bawk engkim ka hmu phê ruai a, engkimah chuan lungawina tur ka hmu hlawl lo a ni.




A tukah pawh chuan School ka kal lo leh a,ka taksa a la dam chian loh chu thuhran ni se, ka rilru nen lam ka la dam lo êm a, School kal chî ziazâng niin ka inhre lo. Ka pate pawh kâr khat min awmpui hnua chhuk an tum a, hna lamah buai hle ṭhin lo se la chu awm reng an duh ngei ang ka ring.




Tin, Ruatsanga chungchangah pawh thutlukna kan siam fel ta nge nge a, Aizawl lamah ka pate'n awmpui daih se tiin thu kan titlu ta law law a ni. Ka pa chuan Ruatsanga ti tawh lovin Ruata tia koh tur a ti leh ta zel a, an awm dun lai hmuh chu a nuamin a hahdamthlak tak zet, ka pa chuan thisen zawmpui dik tak ang mai hian a en nghalin ka hria, chutin Ruata vek paw'n a ngaina lo chuang miah lo.




Chawhnu her a ni a, ka nu leh pate chu pu Hneha hovin an chhuak lawk a, Ruata erawh ka bulah a awm thung. Ka be deuh reng a, an zirtirtu ka nih avangin min zah tih pawh ka hria, mahse chu thil chu ṭhiah ka duh a ni.



A nihna takah chuan unau anga awm ka duh, innél takin awm ila, ani paw'n û ang chiahin min en bawk se, chu chu ka nu leh pate thil tum leh duhthusam pawh a nih ngei ka ring.




"Miss?" Ruata lam chu hawi zeuhin kawngkaa mipa ruangâm lian zet lo ding run chu ka hmu zawm zat a, ka mi hmuh erawh ka beisei loh tawp khawk a ni.



"Eng nge i lo tih dâwn?" mak ti deuh hian ka en a, ka ṭhutna aṭang chuan ka tho zui nghal thuai bawk.



"Inbia ang" ti supin a rawn pen lut a, a thusawi awmzia hrethiam lawk lovin



"Eng chungchangah máw?" ka lo ti deuh hû a, inbiakna chhan tur kan neih áwm ka hre tawh lo hrim hrim.



"Kan chungchangah" a rawn tih chuan ka lû ka lo thin khum thuai a, nizan khan a nih tur ang a ni vek tawh a, sawi ṭhat tumna leh duhna pakhat mah ka nei tawh lo.



"Thingpui i duh ang em? Ka'n lûm dâwn em ni ang?" ka ti ta daih a, chiang tak hian min en run a, dik tak chuan a haw daih tawh turah ka ngai a, mahse a la haw lo chu a nih hmel.



"Lo ṭhu la, ka'n siam zung zung ang e" tih leh chet ka rual a, ngawi reng hian ṭhutthlengah chuan a ṭhu ve mai bawk.




"Engati nge i la haw loh? Theihnghilh i nei em ni? Mi dang an haw tawh nge an la haw bik chuang lo?" thingpui pêk pah chuan ka ti siam siam a, kan inkârah engmah a awm tawh lo bawk a, ṭhian satliah leh hmelhriat satliah ang baka biak ka tum tawh lo bur.




"Terem" hniam ruiha min koh dan avang chuan a lam ka hawi zawk a, mahse ka hawi sawn leh nghal vat thung.



"Ruata, i inbual duh em? Ka nute lo haw hmain inbual daih la ti raw?" tiin Ruata zâwk chu ka be ta daih a, ani pawh inbual turin a tho zui ve nghal mai bawk.



"Thil hrilh tur che ka nei" Zosiama aw thum chhah ṭha tak chu ring hran lo mah se ka thinlungah leh ka bengah chuan a fiah ṭha hle a, en erawh ka en duh lo hrim hrim.



"Terem" a rawn tih leh chuan thaw chhuak hakin a lam ka hawi ta nge nge a, mit ko sàn âk paha en chung hian



"Aw, eng nge ni ta?" ka ti dam diai a, sawi nghal ta mai lo chuan ka ṭhutna lamah a rawn ṭhu phei a, ka kut a hum chiah chu ka inseh ruh nasa khawp mai.



"A va'n lûm ve ti raw?" tiin ka tho zui nghal daih a, dik tak chuan boruak lûm vang pawh a ni chiah lo, Zosiama nena kan inhnaih ta lutuk chu ka zo lo ni berin ka hria.



"Terem" dam dapa a rawn tih leh chuan




"Ka hria, sawi suh, khawngaihin in aṭang hian chhuak tawh rawh!" ka lo tih zawm nghal thuai a, ka hnung chhawn deuh tlat a, a chhan pawh ka ṭah mai ka hlauh vang a ni.



"Ka thusawi tur hi i hre duh lo maw?" a aw aṭang chuan ka hnung lawkah a ding tawh tih ka hre nghal mai.



"Hre duh lo ni rawh se" tia ngawi vang vangin




"Enteh Zosiam, ka tawn loh tur ka lo tawng palh che hi pawi ka ti ta ber, hmân aṭang tawh khan lo inhre lo law law ila chuan tun ang hian nâ ka tuar miah lo ang" ka tih zawm leh mawlh mawlh a, ka rilru nâ viau mah se tunah chuan pawm dan ka thiam a ngai tawh a ni.




"Kal tawh rawh, i thusawi engmah ka ngaithla duh tawh rih lo" ka tih leh chuan urhsun deuh hian min melh chhuk run a, thaw chhuak ham hamin ka nui lui sak ta ringawt bawk.




Motor ding thawm kan hriat aṭanga rei lo tê hnuah ka pate hmel kan hmu zui zat a, in chhunga Zosiama lo ding run an hmuh chuan mak an ti deuh tih pawh ka hria. Nizan khan an hmu thuak tawh a, mahse mi dangho zawng zawng nen khan a ni a, a mimal zawng taka an hriat hran ka ring tawh chiah lo.




Ka nu leh pa bulah chuan theihnghilh a neih thu leh an haw hmaa min rawn mangṭha nawn leh zuaih thu chu ka sawi ta tawp a, dâwt chiangbal a ni tih pawh ka hria, mahse chutianga ka sawi lo a nih chuan sawi dan tur ka hre tawh lo. Ngaihtuah ila chuan a awm mai ka ring, mahse inngaihtuahna hun takngial pawh a awm tawh lo tlat a tin a ni!




Zosiama chu a chhuah lai pawh ka hre lo, ka inbualsan lai khan a chhuak daih a nih ka ring. Ka nu leh pate chuan ka ṭhian satliah leh ka hmelhriat satliah mai chauh emaw an ti a, engmah an sawi zui lém lo va, ka tâna a pawimawhzia leh ka hmangaihzia hria se chu an awih lo hial zâwk ang ka ring.




Hunin nî a her liampui zel a, ni tin zan tinin Zosiama ka ngai ngawih ngawih a, rem ve se chuan hlim takin kan awm dun ngei ang maw lè. Ani leh kei chu lei leh van ang vel kan ni tawh a, nâ taka min siamtu a nih rualin nâ taka siamtu ka ni ve tho va, ka ngaihtuah chiang a, kan inrul tâwk chiahin ka hria.




Tin, ka nu leh pate paw'n Aizawl lamah min chhuksan leh tawh a, Ruata chu an hruai thla ta ngei a, ka nu sawi dan chuan kum thar law lawa zirna chhunzawm turin ka pa'n a buaipui dâwn a nih hmel.



Lungngaihna chhum pik tak kâra ka hlimna pakhat chu ka nu leh pa leh Ruata te chanchin ṭha lam hriat a ni a, a bikin Ruata nun dang ta dâwrh chuan min tihlim a ni.




Favang thla kan hmang zo va, thlasikin boruak chu a rawn luah zui zat a, thla tir phat aṭangin a vawt nghal súk a, Krismas rim a nâm chem chem nghal viau bawk. Ni tin School-ah ka kal leh tlauh tlauh tawh a, ka hna a ni a, nuam ka ti a, chutih rual chuan hlim loh châng ka va ngah ṭhin si êm.




Ka hlim loh chhan erawh ka hnathawh vang ni lovin Zosiama vang zâwk a ni a, chhun chawlh apianga an hnathawhna bula ka phei ṭhin lai te kha ka ngai a, hmun tin kil tin chuan lunghlui thlengin min ngaihtuah chhuahtir ṭhin bawk.




Hma lam pan tumin ka rilru ka siam fel tawh a, ngaihzawng neih leh emaw pawh ka tum tawh lo, ka tum ber chu ka hna ṭha taka thawh a ni.



Kan thawhpui Sir Chhuantea pawh hian a ruh lang rawtin min hrilh dawt lo mah se min ngaizawng tih ka hre ru reng a, Sir Sena leh Sir Zaia paw'n min hrilh tawh nghe nghe. Inngaizawng daih tura min tih châng lah a tam, mahse kei chuan ka nuih liampui mai mai ṭhin.




"Lo lut rawh" ka tih hnu lawkah kawngka a rawn inhawng a, ka mi hmuh avang chuan ka ding rang teh e!



"Eng nge i lo tih dâwn?" ka tih chuan ngawi reng hian a rawn pen lut a, hawihhawm taka be tur ka nih vei nen ka thei lo a chhá chu a ni e.



"Engati nge i lo kal?" ka ti leh a, ṭhutthlenga ṭhut thlak riai riai pah hian



"I ṭha em?" a rawn ti daih a, hmel pangngai deuh hi a pû a, a awm dan chu ka hrethiam lo khawp mai.



"Zan zanah eng nge i lo tih dâwn?" ka ti nawn leh ngat a, nelawm fahran lo hian ka melh chho kal bawk.



"Eng nge i lo tih dâwn?" ka ti leh hlak a, ka zawhna hre lo ang maiin ngawi reng lo se chu ka zâwt nawn leh kher lo ang.



"Nula ina tlangval a lênin eng a tih i rin?" a rawn ti thum dut a, min chhán dan chu ka huat zâwng tak a ni.



"Rawn lén chhan tur i neih áwm ka va hre si lo ve" ngaihnobei lo zet hian ka ti deuh salh a, ṭawngkam mawihnai leh hawihhawm taka biak chî ah pawh ka ngai lo.



"I inhre lo lian hle mai" a rawn ti leh a nih chu!



A va han zak lo tak!



"Zosiam, i awm dan hi ka hrethiam miah lo a nia, rawn lêng tur pawh i ni tawh lo" ka lo ti nghal thuai a, ka aw pawh a hma ai chuan tlêmin a dam ta deuh bawk.



"Thingpui min lûm hreh em?" aw dam thluam hian a rawn ti leh daih a, thawven hmel deuha a awm te hlei hlei chuan ka ngaih a tiṭha lo zual!



"Thingpui in la, haw thuai ang che" thingpui chhùan tuma kal pah chuan ka ti hlak hlak a, ani erawh ka thusawi hre lo ang mai hian Phone a khawih mual mual thung.




Thingpui a in chhung zawng chuan ka en reng a, engtin mah kan inbe lo va, a ngawih theih chhung chu ngawih ka tum bur. Haw tawh turin ka duh bawk si, ani lah chuan haw a la tum hmel loh em em thung bawk si, a va han luhlul ren run tak!




"Riah i tum ringawt êm lo ang chu ti raw?" kha fak hian ka ti leh ta nge nge a, ṭawng hmasa zâwka ṭan loh ka tum nasat tehreng nen a bulah hi chuan a harsa thlawt a ni.



"Haw a lo hun der tawh a ni màw" ti thum dutin a tho zui nghal uaih a, tun ṭum a lo kal dan teh thut chu ka hrethiam lo bawk nen thlah pawh ka tum lèm lo.



"Khawi aṭangin nge i lo kal?" ka tih chuan



"Kan khua aṭangin" a lo ti sam mai a, engtin nge an khua aṭang daih daiha a lo kal peih zâwk pawh ka hre lo e a!



"Engin nge i rawn kal?" ka tih leh chuan



"Bike-in" a lo ti ṭha ve leh mai bawk.



"La kal rih lo teh" tiin kawngka lam a pan lai chuan ka ko ding hnuhnawh leh lawi a, tunah zan dâr 9 a ri tawh dáwn a, inkhalh hawna chî ah pawh ka ngai tawh lo.



"Eng ti tur berin nge i lo kal tak tak? Min hrilh chiang teh Zosiam, ṭha deuhin min hrilh rawh" ka aw chhuak aṭang chuan ka ngaihtuah a ni tih a hriat khawp mai.



"Lo léng turin" chu thu a sawi lai chuan ka melh vak a, ka thin a rim ru bawk si, sawi mai tur ka hre bawk si lo, ka chhung lam chu a tawp up upin ka hria.



"I mawl hle mai ZOSIAMLIAN!" ka ti ta thlawt a, ani erawh a ngawi leh reng tawh!




"Engati nge hetiang hian i awm hnuhnawh leh si a Zosiam? Nâtna dang min pe leh turin em ni? I nun aṭangin min paih chhuak tawh a, kei paw'n ka paih chhuak tawh bawk che a, hetianga awm tur hi i ni miah lo asin" ka ti zawi raih a, ka thil en ngai ka en tlawk tlawk a, ka mittui chu a rawn hnai kuarh nghal bawk.




"Mihring rilru leh ngaihtuahna hi chaponaa a khah tawh chuan engkim a buai ṭhin tih i hre ve tawh em?" ka thusawi lai nena inzawmna pakhat mah nei lo a rawn sawi lai chuan mittui tling pam hian ka en a, ka ṭah a tichhuak zual tak zet!




"Mut tui le" tih thum dut leh in aṭanga chhuah chu a rual nghal a, a Bike rum ri te, a tlan chhuak thawm te, a tlan hla tial tial tin nen lam a thawm chu ka hre vek a, mahse che chang lovin ka dinna ngaiah ka ding ngawi reng ringawt.




Kawngka ka kalh fel hnu chuan khumah ka mu meng kar a, ngaihtuahna a va kal kual nasa duh tehreng ém! A lo kal chhan lah kha a sawi ṭha duh bawk si lo, chutah an khua aṭang daih daih a rawn la kal zui, eng rilru pûa lo kal nge maw a nih reng reng le?




Ka hnathawhna khua leh Zosiama te khua hi a inhlat ve ang reng a, chhim chhak lam ni ve tho mah se kawng hel ngai a tam hle thung. Ka rilruah leh ngaihtuahnaah chuan amah hlir a awm ngut ngut a, tawhsual a tâwk palh mai ang tih te ka hlau hnuhnawh hle bawk. Zan zanah a haw phah chu a ni si a, a lo kal peih ka va'n ti tak!




Ani kalsana hma lam pan ka tum veleh amah zâwk a rawn lang hnuhnawh leh lawi a, a awm dan hi ka hrethiam thei rih lo. A hnathawhpuite mitmei pawh zah zo lovin ka hmangaih thu ka hrilh hmiah kha a ni a, chhànna erawh ka dawng lo a nih kha, mahse, ni e, 'mahse' a awm tlat! Engati nge a lo kal leh si? Engati nge an khua aṭang daih daih keia in luahah a rawn lén?




Mi â tak a ni!




Zingah chuan ka tho nuam phian a, School kal dâwnah Sir Chhuantean min lo lam thlap a, ani pawh hi ka la hrilh chiah lo nà chu ka che zia aṭangin ngaihzawng neih ka inpeih tawh rih lo tih leh ka mipa duh chî a ni lo tih a hriatthiam ve mai zel ka ring a, mahse a hrethiam lo der nge a hrethiam lo tak tak pawh ka hre tawh lo.




A fel chu a fel lutuk, a hawihhâwm a, a ṭawng duh a, sawi tur ni se a hre thei em em bawk a, hmeichhe tam tak tân chuan ngaihzawn tlâk pawh a ni reng, mahse ka tân chuan ṭhian leh hnathawhpui mai chauh a ni thung.


A chhan chu ka thinlungah hian mi pakhat chiahin hmun a la chang a, a hmel ka hmuh loh lai leh a bula ka awm loh lai paw'n a luah lûm reng ṭhin.




Ka hmangaih Zosiama hi duh loh emaw hmangaih tawh loh hmak ka tum reng reng lo, kan rem lo tih ka hrethiam tawh a, khuanu lêng ruat loh dí ka tawh tih ka pawm thiam tawh a, tunah chuan ngaia neih ka tum tawh mai zâwk a ni.



Chu thil chu ka tâna ṭha ber leh thil finthlak ber a ni rèng a, nâ tur mai mai chuan vei ngut ngut te, ngaihtuah ngut ngut te, thlakhlelh ngawih ngawih te ka tum tawh lo a ni ber.




A harsa dâwn tih pawh ka hria, ka thei kher ang em ka hre lo, mahse ka thil tum lian ber te zinga pakhat chu hma lam pan a ni. Ani chuan hmâna hmanah hma lam min pansan tawh a, ka tel lovin, min ngaihtuah miah lovin hringnun a lo hmang daih tawh a, an khuaa amah ngaihzawng deuhtu nen pawh khan an la inneih thuai ka ring.




Hun a liam zel ang a, ka hmangaihna leh ka duhna te pawh hi hunin a la her liampui ve mah ná! Tin, hun vek hian ka tâna mipa ṭha tak, ka hmangaiha ka duh em em tur leh ka pasal tur chenin a la rawn her chhuahpui ngei ka ring tlat bawk.




"Engtin nge Ruatsanga chu ni ta Miss Terem? In awmpui ta tak em em ni? In hre chiang lo mai pawh a, in la inchhir ang tih ka hlauhthawnpui ngawt mai che u" Sir Zaian a rawn tih chuan



"Nia, awmpui ta mai" tih chauhin ka chhâng a, anni pawh hi ka rin ang an ni lo, ka thawh tirha an fel hlawm tehreng nen, han inhriat chian tâkah ka ngainat zawng an ni tawh lo.



"Chawr chhuahna a dik loh chuan engmah hi a dik thei tawh lo" Sir Sena zâwkin a rawn ti ve leh a, Sir Chhuantea leh mi dangte chu an lo ngawi deuh ṭhap thung.




"Sawi ta mai mai ila, ka sawi hlauhthawnpui ah che ngai lo la, Ruatsanga kha chu thil ruk te a ching ve ṭhin a, naupang tê si khan zû chenin a khawih ve reuh a, han khawngaih viau dâwn pawh hian amah tê khan a zir lo tlat zel a, chu vang alawm khaw chhung mite paw'n an en liam mai mai hlawm nì!" Sir Zaia bawk chuan a rawn ti leh a, chutah Sir Sena chu rawn ṭawng chhunzawm ve leh nghal zatin




"Chu vang alawm chawr chhuahna a dik loh chuan engmah hi a dik thei tawh lo ka tih, engkim a buai vek zel" a rawn ti a, ka ngawi reng thei ta bik lo.




"Hringnunah chuan a tawp kan khar dan hi alawm pawimawh lè, kei te, nang ni te pawh a ni ang, kan hun kal tawha thil sual kan lo tih hnem ṭhin zia kha, mahse hei, tunah chuan heti hi kan ni daih tawh, tumah hi a ngai rengin kan awm thei tak tak lo, kan danglam tial tial ṭhin. Chu vang chuan kan tawp khar dan hi a pawimawh berin ka hria, in ti ve em?" ka ti deuh salh salh a, za lo zetin ka nui lui sâng bawk.




"A dik khawp mai, ka tun hun hi kan tawp khar dan chu a ni mai a, kan tun hun hman ṭhat tluka hlu hi khawvelah a awm kher lo ang" kan Head chuan a rawn ti ve hlawl a, Sir Sena leh Sir Zaia erawh an lungawi chiah lo nge ni, engmah sawi tawh lovin an ngawi ta ran mai.




Thil dang sawi chhunzawm daihin thingpui chu ka in zawm zat a, rei lo tê hnuah chuan kan ri leh ta hluai hlawm a, thingpui kan in zo chu ka chhuak ta daih bawk.



Thli fim dawngin office bulah chuan ka ding mai mai a, ka thawhpuite'n Ruata chanchin an sawi dan kha ka ngaihtuah nasa hle a, dik tak chuan an sawi lai khan ka tha a lo nâ tawp, a chhan chu ka nau dik tak ang chiaha ka en tawh vang a ni.




Tin, Ruata hi an sawi ang em em kha chu a ni lo tih ka hria, a nun bul ṭan dan erawh a fuh vak lo va, chu chuan a nunah nghawng tam tak a nei bawk. A sual lo tih ka hriat tluk zetin a rilru chhungrila ṭhatna ka hmu thei a, kei ang chiahin ka nu leh pate paw'n chu thil chu an hmu fiah ve tho bawkin ka hria.




Phone kaltlanga kan inbiak te hian min nêl ve tawh tak zet a, ka nu kâ aṭanga ka hriat danin Class 10 a Pass veleh ka pa'n Phone thar a lei dâwn a, Ruata tak pawh a nun a hlim tawh hmel hle.



Ka nu min hrilh zel dan phei chuan ka pa'n a awmpui deuh chawt zel a, a be deuh reng bawk a, mipa leh mipa na nâ na chu ka pa paw'n a ngaina tawh hle a nih ka ring.




Ka têt lai aṭang tawha fa dang awt ru reng ṭhin kha a ni hrim hrim a, ka rilru tak takin Ruata kan awmpui chu ka lawm a, ka hlim ru tak zet bawk. A hun kal tawh chanchin ni se a khawingaihthlak êm em bawk si, kei chuan Pathianin unaupa thar, fapa thar min pe ni maiin ka ngai tawh!




Ka nu bulah pawh chutiang chuan ka sawi tawh nghe nghe a, ani paw'n a lo thlawp khawp mai. Puitei takngial paw'n Ruata fel reuhzia leh hawihhawm reuhzia min hrilh tawh a, zep thu cheng lo, ka hmuh tirh phat aṭang Ruata hi naupang sual a nih ka ring lo bur a nih kha! Tunah chuan ka rin ang chiah a ni ta réng a, kan bula a awm daih te hlei hlei hi ka láwm a ni.




"Miss, apa'n a be lawk duh che a, i hman ang èm?" pu Hneha fanu Duati, High School-a kan zirlai naupang ni mêk chuan a rawn ti a, ka hman thu hrilhin in chung lamah ka zui chho ve nghal mai bawk.



"I lo léng chho khât ta lutuk a, kan ngai tawh che alawm" in chhung ka luh rualin pu Hneha chuan a lo ti huah huah a, pa nélàwm tak hi chu a va ni ve chiang êm!



"Nia, tun lai chu tih tur dang neuh neuh hi a awm ve a" ka ti ve siam siam a, pi Muani zâwk chuan



"Léng ve reng rih rawh aw Terem, lakhuih kan siam dâwn a nia" a rawn ti ve leh nghal zat a, an bula awm hi chuan tlángnel loh hi a har ṭhin.



"Tak tak a, biak duhna che ka nei a" thutak deuh zâwk hian pu Hneha chu a rawn ṭawng ve leh a, kei pawh chuan



"Eng lam nge ni a?" ka lo ti pangngai ve nghal mai bawk.



"Eng lo a nia, hei i pi Muani nen hi chuan kan lo sawi dun tawh tho va, mipa hi khâwi tam vak lo la kan lo duhpui deuh che maw le" a rawn tih leh chuan ka nui tawi ta sak mai.




"Ngaih loh lamah ngai lo la, ngaih loh lama han ngaih ngawt thu pawh a awm chuang lo. Keini phei chuan kan mi hrang en lo hrim hrim che a, hmeichhia i nih avangin mipa zuam theih zawngin awm lo hram la kan duh a ni" tia chawl datin




"Mipa te hi chu kan mak ve a, thil ṭul lo leh ṭha lo tih châkna rau te hian mi man awl ang reng a, chutah mipa zawng zawng kan inang bawk si lo. A ṭhen fel tak tak an awm rualin sual tak tak pawh an awm ve tho va, hmeichhe tán chuan mipa te laka fimkhur thiam tluk hi a awm lo, a bikin pasal neih hma hian" a rawn tih zawm leh dap dap a, a sawi dik ka ti khawp mai.




"I pu Hneha sawi awmzia hi i hrethiam ang ti raw Terem? Kan ṭhahnemngaih vang leh kan ngahtuah vang che a nia, dik tak chuan School-a i thawhpui ṭhenkhat te pawh hi nêl lutuk suh aw, patling deuh ṭhuau ni tawh mah se hmeichhe lamah hi chuan an 'chu e kha e' ve hlawm teh mai a nia" pi Muani chuan a rawn ti ve leh a, buk khum nghat nghat pah hian




"Ka hrethiam lutuk alawm, ka lo fimkhur nasa zual dâwn a nia, in bul hnaiha awm hi chu a thlamuanthlakin a hahdamthlak ngawt mai" tiin ka nui var var a, ṭawng chhunzawm leh nghalin



"I sawi dik chiah alawm pu Hneh, hmeichhia phei chu kan mualpho hma ropui si, in zârah ka fing leh ta sawt e" ka tih leh a, chutah pi Muani zâwk chuan




"Kan sawi ta sa sa, ka'n sawi tlang law law mai ang e. In thawhpui tho Chhuantea pawh hi hnaih lutuk suh aw, nakinah i chungah hian eng emaw a thleng palh ang tih ka hlau" a rawn ti leh a, Sir Chhuantea ber kher a sawi kâi leh zel chu mak ka ti ang reng.




"Sir Chhuantea te chu a fel viauin ka lo hria asin" ka ti ta ringawt a, sawi dan tur dang ka hre lo hle.



"A fel lo pawh a ni lo, a fel lutuk tho, mahse damdawi a ti ve leh zauh ṭhin a, sum han chelek dâwn se an hausa tho bawk si nen ka lo hlauhthawnpui deuh che mai mai maw le" pi Muana inthiam lo hmel chu ka hmuh hmaih lo nasa mai.




"Sawi thui tawh lo teh ang u, hriat tur ṭul kan inhrilh vek tawh tho alawm, nang pawh Terem, kan thusawite kha ngaihtuah ngut ngut lo la, awm nawm loh phah nân hmang lo bawk la, kan duh ber chu fimkhur la a ni mai" dam zet hian pu Hneha chuan a rawn ti ve leh a, an nupa thu min hrilh zawng zawng chu theihnghilh mai mai chî ah ka ngai lo.




"Ni e, sawi tawh lo ang u, kei pawh lakhuih ka va siam ang e" tia pi Muani a tho chu



"Khawi ka lo siampui ang che" tiin ka tho zui ve nghal a, lakhuih siam pah chuan thil dang kan sawi chhunzawm ta daih bawk.




Rei lutuk awm lovin lakhuih ei zawh hnu lamah ka chhuk a, lakhuih pawh pum 3 lai min hawn thlaktir nghe nghe a, pu Hneha te chhungkaw chungah hi chuan lawmthu sawi sen loh kan bâ a ni.




Mut hmunah an thu min hrilh zawng zawngte kha ka ngaihtuah lêt rauh rauh a, sawi dik loh pakhat mah an neih àwm ka hre lo. Ka nu leh pate pawh ni se an sawi ang tho kha an sawi ka ring, pu Hneha te chhungkua hi chuan min mi hrang en lo tih a chiang thawkhat viauin ka hria.




Sir Chhuantea an sawi dan erawh kha chu mak ka la ti báng thei lo va, ka ngaihtuahna kil khatah a awm reng a, kum chanve dâwn kan thawk ho tawh a, mahse damdawi a lo ti ve ṭhin tih ka hre ngai miah lo.


Mi dang chanchin an sawi dan leh hnaih chî vak an nih loh hlawm thu an sawi erawh kha chu a dikin ka hria, a pawimawh ber chu ka fimkhur a ngai a ni.




Ka ngaihbel deuh nge pawh ka hre lo, a tuka ka School kal te chu ka fimkhur ru nghal em em ringawt a, ka thawhpuite ṭawngkam chhah chhuah hrim hrim lah chu hmeichhe hriat ve atân pawha mawi chiah lo a awm nual leh ta nghal a, ka inhrethiam chiah lo, ka hmuh dan leh ka ngaihdan a dang vekin ka hria.




Sir Chhuantea min sâwmna pawh mawihnai takin ka hnar ta zel a, ani ngat phei hi chu damdawi a ti ṭhin tih ka hriat zan aṭang khan loh theih lovin ka hlau a ni.


Damdawi ti ṭhin te awm dan ka hre ve nual tawh a, damdawi an ruih lai phei chuan chhia leh ṭha hriatna an nei mumal tawh ngai bawk si lo, ka awm dan hrim hrim chu ka fimkhur thar hi a ni tawp mai.




Thawkhat lai khan khaw chhung tlangval inlêng ka nei ve leh zauh zauh ṭhin a, Zosiama te haw tâk hnu aṭang khan Sir Chhuante pawh ka in luahah a rawn chûang kâi deuh fô va, a rawn lêng hnem ber hial ang ka ring, mahse khatih hun lai khan damdawi a ti ṭhin tih ka hre ngai reng reng lo, tun ang hian hlauh rukna pawh ka nei ngai lo a nih kha!




Hun chuan kâr lovah kâr thar a rawn her chhuahpui a, kum tawp lam kan hnaih ang zelin Krismas rim pawh a nam chêk chék ṭan tawh a, ka rin ai hun chu a kal chak daih mai. Zan lamah lah ka chhungte nen kan inbe deuh ziah bawk a, tun lai chu kan inbe ngun ang reng, zep thu cheng lo, ka ngai a ni; Ruata chenin, ka hmu leh châk tawh!




Zan khat chu lehkhabu chhiara ka awm mai mai lai hian kawngka an rawn kik a, inlêng ka neih dâwn apianga ka tih ṭhin dan ang bawkin lut tur chuan ka lo chhawn a, ka in luaha lo lut pa hmel erawh ka rin loh lam daih a ni thung.




"Eng nge ni ta?" a ngaihna hre lo aw zet hian ka ti hliai a, ngawi reng hian min rawn pan a, ka lo tawlh hnung ve zel bawk.




"Eng nge i rawn tih dâwn?" chang faka ka ti leh chiah chu ka inrin hma hauhin a rawn che deuh thut a, puan hian ka kâ chu a hup bet tlat a, theihtawp chhuaha ṭe ka tum lai chuan dawhkan tlâng kilah tak ka lû chu ka tauh chawrh a, ka tauh pawh a ni chiahin ka hre lo, min tauhtir a ni mah zâwkin ka hria.




"Nang nu hian ka pawi i sawi tih i hria em? Kha naupang lâk tlâk loh zet i thawn bo avang khan i rin phâk baka nasain i tuar ang, hre rawh, i tisual chhiava a ni" ti chhur chhurin ka samah a ṭham hrawk a, ka hmaia a rawn hnek leh chiah phei chu nâ tak a ni!




"Ka that duh hial chein ka ring" thimrim zet hian a ti leh a, ka lû leh hmai nâ lutuk avang chuan engmah ka ti ṭha thei lo va, ka aw pawh a chhuak ṭha thei meuh lo.




"Ṭe tum lo law law rawh hmeli, kan thawm hi tûma'n an hre pha dâwn chuang lo; in chunga awm phiangsen te nen lam khian!" ti lehin kawngka chu chhung lamah a kalh ta daih a, thawm a dim thiam bawk si, ka hlauh dan chu pui tak a ni.




"That daih che pawh ni ila a sual lo ang, ka hmanraw ṭangkai lutuk i thawn bo tlat alawm" chu thu ka hre zo chiah chu ka hmai a ri sawk sawk zawm nghal zat a, ka lû leh hmai aṭang chuan thisen a chhuak hnem tawh hle bawk.




Chutia ka mi hriat chian loh, ka hriat dan pawh Ruata sawisa ṭhintu tih chauha ka hriat pa'n kut min thlak mawlh mawlh lai chuan pâwn lam aṭangin kawngka an rawn kik a, ka theih tawpa ringa thawm chhuah ka tum a, mahse min sawisa mêk tu chuan puanin ka kâ a hup bet tlat a, tih theih ka nei tlêm lutuk chu hrehawm ka va'n ti ngawih ngawih tak êm!




Kawngka inkik thawm chu reh ta mai lovin an rawn kik nawn leh ṭhin a, pâwn lama mi chuan nam hawn a tum tih pawh ka hria, mahse in chhung lama a inkalh tlat avangin hawn theih a ni tlat lo.



A tawpah phei chuan kik mai chauh ni lovin a chum deuh dat dat ta hial a, ka tal vak vak a, theih tawp chhuah tak meuh meuhin ka tal a, mahse ka tal chhuak thei ngâng lo.




"Terem?" chu aw, Zosiama aw ngei ka hre chiah phei chu mittui tla zawih zawih hian thawm chhuah ka tum lui leh hram hram a, a va'n harsa ngawih ngawih si êm.





End of Chapter 6




.