SUDDEN - TAKES THE TRAIL AUTHOR : OLIVER STRANGE (1940) EPISODE - 18

[HLalthazuala]

Sudden-a'n Dave-a a zawn țuma Welcome khua a chhuahsan hnu khan Dumb-Bell Ranch a pan ding nghal a. Dave-a rilru tur a han suangtuah chhin a. Sark-a a ringhlel hmasa ngei dawna a hriat avangin Sark-a Ranch a Dave-a va zawn chu Sudden-a tum hmasak ber a ni. Ranch a va thlen chuan midang chu an lo bo vek tawh a, an chaw chhum chauh chu a lo awm a, Sudden-a kawrâwma Marshal Badge a lo hmuh chuan a meng phawk kher mai a. Sudden-a chuan, "I pu khawiahnge a awm?" tiin a han zawt a. Cook chuan, "Ka hre lo, ka pu, a chhuak a ni. An vaiin an chhuak vek," tiin a lo chhang a.
Sudden-a chuan a ipte ațangin pawisa tlang a la chhuak a, a pen kang a, a han dawng leh a. Rangkachak pawisa a ni tih a hmuh chuan cook chuan it deuhin a lo en reng a. Sudden-a chuan, "Juba, thudik sawi hi a hlawk ber tih i hria ang ti raw? Min pui thei ngeiin ka ring a ni. Niminah khan mi pakhat la naupang deuh Dave-a'n, i pu Sark-a chu a rawn tlawh a, enge an tih i hria em?" a han ti a. Juba chuan hlauh hmel deuhin a bul vek chu a han enkual chiam a.
Sudden-a chuan a pawisa chu a han vawrh a, a dawng leh a, chutah zawng Juba chuan a do zo ta lova. "A lo kal lai chu ka hmu ve lo. Mahse, țhutkhawmna pindan hnung lamah hian chaw ei pindan kan nei a. Chumi chhunga an țawngri chu ka hria a. An țawng ring hle a, an insual ta nghe nghe a, nakinah chuan a naupang zawk chuan ka pu chu a hneh ta a, ka pu chu a thi emaw ka ti nghe nghe a, che lovin chhuatlaiah chuan a mu reng a. Tlangval chuan a Lukhum leh puakruk chu a la a, pawnah faifuk chungin a chhuak ta niin ka hria, a hlim awm hle mai," a ti ta a.
Sudden-a chuan, "Hremhmun panna kawngah pawh a faifuk thovang," a ti zet a "Tlangval chuan khawi lam nge a pan?" tiin a han zawt leh a. Juba chuan, "Ka hre bik lo. Ka pu chu a lo harh leh thuai mai a ni," tiin a chhang a. Sudden-a chuan pawisa chu Juba zawnah a han theh thla a, "Tikhan i pu ruk theih lohin dah bo daih ang che, kan inhmuh thu hi sawi kher lo la, i tan a țha zawk ang," a ti a. Juba chuan lawmthu a hrilh dawn a, mahse, Sudden-a chuan ngaithla duh lovin a kalsan ta a.
Dave-a chuan khawinge a pan zel ang tih chu Sudden-a ngaihtuah ber a ni. Mullins-a te chu a zawng ngeiin a ring bawk a. Dum-Bell Ranch a chhuahsan hnu, hla vak lovah Sudden-a chuan sakawr hniak a hmu ve ta a. Dave-a sakawr hniak ni ngeia a rin avangin a chhui zui ta a. Mahse thuife a chhui hnuin, kawng chu lung hmun hlir a lo nih tak avangin sakawr hnu chu a hmu thei ta lova. A han ngaihtuah chiang a, a awmna bul vel ngun taka a en hnu chuan, a tira Dave-a kawng zawh hmasak ber kha a zawh ve ta a.
A vanneih asiamin tlang panga lawn chhohna kawng chhengchhe zet mai a va hmu chhuak a, tahchuan a kal ta zel a. Darkar hnih lai mai a kal hnuin sakawrin lung a rah rik chu a hre ta thut mai a, kawngkawi laiah chuan a lo ding a, rei a nghak hman lo tihin kawngkawiah chuan sakawr chungchuang pakhat hi a lo lang ta a. Sudden-a chuan a puakruka lo tin chungin, "I ban phar thuai rawh," a lo ti a. A tirah chuan sakawr chungchuang pa chu a phu deuh zawk a, mahse a ban chu a phar leh ta thuai a.

Sudden-a chuan a puakruk chu a va chhuhsak phawt a, "Thudik tak rang takin min hrilh nghal ang che, Mullins-a hi khawiah nge a awm?" tiin a zawt ta a. Chu pa chuan, "Ka hre.....," a ti hman chauh a, Sudden-a chuan a puakruk chu tlemin a han lek kang deuh a, "Chutiang thu mai mai i sawi zawngin i thlan tur laih a ngai nghal mai ang," tiin a vau zui a. Chu pa chuan hreh tak chungin, "Kan chhak deuh lawkah khian," tiin a chhang ta a. Sudden-a chuan, "Mi pakhat, Dave-a i lo hmu em?" tiin a zawt ta chawt mai a.
Chu pa chuan, "Nizan khan zankhuain in chhungah an kalh khum a, tukin zingah khan Mulins-a leh midang paliin an hruaichhuak a, a sakawr chu an rawn kai haw leh a, amah chu engtinnge an tih tak ka hre bik tawh lo," a ti ta a. Sudden-a chuan, "Kan pahnihin chu pa chu kan zawng dun anga, kan hmuh zawh loh vaih chuan i vanneihna a tawp ta tihna a ni ang," a ti a. Chu pa chu hmahruai turin a puakruk chuan zaizirin a hrilh ta a. Chu pa chuan, "Theihtawp ka chhuah ang. Mahse, Mullins-a hi ka hrechiang a, kan zawng hmu thei tawhin ka ring lo," a ti a. An awmna ațanga chhim lam hawi chuan sakawr chu a kaltir ta a.
Thui vaklo an kal hnuin sakawr hniak an han hmu a. Sudden-a chuan, "Dave-a chu a sakawrah an chuan tir em ni?" Tiin a zawt a. A ni chuan, "Tir e" ti a, achhan veleh Sudden-a chuan, "Heihi a sakawr hnu chu a nih ngei hi, Dave-a chuan, 'vanneihna' tiin a sakawr ke hnuai pakhatah Kraws chhibchhiahna a dah ziah a ni," a ti ta a. Tichuan, an kal zel a, lui an va thleng a, Sudden-a te pahnih chuan sakawr hniak chu an chhui ta zel a, hlavaklo an chhui hnuin Dave-a chu an va hmu ta a ni. Sudden-a hruaitu zawk chuan, "Fanghmirin an bawh nasa a nih hi. A thi tawh ngei ang," a han ti a.
Mahse Sudden-a chuan Dave-a hmui che hlek chu a lo hmu hlauh a. A sakawr ațangin a zuangthla thuai a. "A ban leh a ke phuarna hi phelh thuai ila, sawlai lawka dilah khan i va chiah thuai ang," a han ti a. Tichuan rang takin an phuarna hrute chu an phelh dun sawk sawk a, Dave-a chu pawm titih, kai titih hian lui awmna lamah lamah chuan an hruai ta a. Chutia an kalpui laite chuan an kutah fanghmirte chuan an lo seh ve hman a. Sudden-a hruaitu chuan, "An seh na ve hrep mai ka ti. An ha a hriam hle a nih dawn hi," a han ti a. Sudden-a chuan, "Tui hleuh an thiam leh thiam loh i han chhin teh ang," ti chungin Dave-a chu luiah chuan an chhuk pui a, an vaiin an inhnim pil ta vek a.
Tuiah chuan rei vaklo an awm a. Fanghmir chu an thi zo ta tih an hriat veleh vaukamah an chhuak ta a. An thawmhnaw te pawh chu pho ro pahin an chawl a, Dave-a pawh chu a lo harh sawt hle a, "Jim, ka ba nasa hle mai," a han ti a. Mahse, Sudden-a chuan, "Ka engmah i ba bik lo, Welcome khaw piah lawka thingzar awm kha i la hria em?" a han ti ve a. Dave-a chuan a chhang zui zel duh ta lova, Sudden-a rawn hruaitu chu a han en a, "Hmelțha, hmuh leh che ka lo inring tawh hauh lo asin le, engtizia nge?" a han ti a. Chu pa chuan, "Ka hming chu Rowley a ni. A hun takah kan rawn thleng hman chu a lawmawm ka ti ngawt mai," tiin a chhang a. Sudden-a chuan, "Heta min rawn hruaitu pawh amah Rowley hi a ni alawm," a han ti ve a.
Dave-a chuan thil awmdan ni awm chu a suangtuah thiam nghal mai a. "Mister, Setana pawh ni se, nichina ka thil tuar ațanga min rawn chhanchhuaktu a nih phawt chuan lawmthu ka hrilh duh thovang. Ka hmelma lama țang pawh ni mahla, i chungah ka lawm tak zet a ni," a han ti a. A kut chu a han pe a. Rowley-a chuan Dave-a kut chu dimtein a lo hmer thuai a, "I hmelma te zinga tel ka ni tawh bik lo. Nichina i awmdan ka hmuh ațang chiah che kha ka țhiante chu ka bansan nghal a ni. Mahni huat zawng tak te kahhlum mai chu thudang nise, mingo ve bawk ka ni a, intihduhdah a innghaisak kher hi chu ka ngaihdan a ni bik lo," a ti ta a.

Dave-a chuan, "Ngaina dawn hle che in ka inhria," a ti ta daih a. Chutih lai chuan Sudden-a chuan a lo hruhul vek tawh a, a puakruk chu a pai nghal a. Rowley-a ta erawh chu Rowley-a kutah a pe ve mai a, "Kan kawr pho chu a ro tawh emaw kan en ang e," tiin a kalsan leh mai a. Sudden-a'n rinhlelhna nei awm lo tak maia a puakruk a pek tak mai avang chuan Rowley-a chu mak tih hmel tak hian a lang a. Dave-a chuan harsa ti taka nui sang chungin, "Hmelțha, Jim-a khan a lamțang atan a duh ve che a nih kha," a lo ti a. Rowley-a chuan, "Ka kap lovang tih engtinnge a hriat, a rin aiin ka lo sual daih mai thei asin," a lo ti ve thung a. Dave-a chuan, "Mi a la rin țhelh ve ngai lo," a lo tihsan mai a.
Rowley-a chuan, "Insual pawh a thei hlein ka hria," a ti ta daih a. Dave-a chuan, "I hriat chian duh chuan Mullins-a zawt mai rawh," a lo ti thuai a. Rowley-a chuan, "Mullins-a hmuh leh hi ka tum tawh vak lo a ni," a lo ti mai a. A thusawi chu Sudden-a chuan a lo hre hman ve chiah a. "Hreh mahla i tan hmuh leh a ngaiin ka ring. I hre tawh phawt ang a, Mullins-a chuan Hmeichhe pakhat a ru bova, tunah hian a la kawl a ni. Kei leh Dave-a hi chuan kan va pawh mai thei dawn lova, nang erawh chuan sam takin i va pawh mai thei dawn a, an zingah rei i awm hmain Mullins-a leh a hote chu kan la rawn man vek theiin ka ring. I kir leh duh ang em?" tiin a zawt a.
Rowley-a chuan, "I tih tlat chuan duh mai e," a ti a. Dave-a lam chu a hawi a, "Puakruk pawh i nei si lova, ka puakruk hi hmang zawk mai ta che," a han ti leh a. Sudden-a chuan, "I ti lawmawm ngawt mai. Mahse, Dave-a hian puakruk a mamawh dawn lo. Sakawr a mamawh zawk ang," a lo tih khalh thuai a. Rowley-a chuan, "Ka sakawr hi a tlu palh hlauh a, a keruh a tliak si a, chuvangin ka kaphlum ta mai a ni. Chu chu phatna țha tak a ni. Kei chu kein ka thleng thei em em ang," a ti a.
Sudden-a chuan, "Mahse, i sakawr zin i put a ngai dawn asin. I put si loh chuan an lo ringhlel ngei ang che. Dave, zin phah lovin sakawrah i chuang thei ang em?" a han ti nghal a. "Hnungzang pawh nei lo mahse, ka chuang thei thovang," Dave-a chuan a lo ti a. Sudden-a chuan, "Chuti anih leh, hetah hian kan inţhen tur a ni. Welcome-ah va kalin puitu i va sawm dawn nia," Dave-a hnenah chuan a han ti a. Rowley-a hnenah chuan, "Mullins-a chuan ho engzat chiah nge a neih?" a han ti leh a. Rowley-a chuan, "Amah chhiar telin, mi sawmpathum an ni țhin a, mahse, tunah chuan pakhatin an tlem tawh a ni," a lo ti a.
Sudden-a chuan, "Khua-a mite chauh sawm lovin Bar 'O' Cowboy ho pawh rawn sawm nghal la a țha ang. Dumb-Bell ho beih ve an țul thut thei a ni," Dave-a hnenah chuan a ti leh a. Dave-a chuan a kawr chu a han ha a. Rowley-a hnenah chuan, "Hmelțha, i puakruk leh sakawr man atan hian engpawh i phut apiang pek che ka tum ang," a ti a. Sudden-a chuan, "Rowley, Dave-a thusawi kha ngaisang duh vak suh, naupang chhia a la nih hi. Dave, nang pawh i thinrim zia chu ka hria, mahse, Sark-a va bei tur chuan i la chak tawk lo. Vawikhat i hneh tawh.....," a han ti a. Dave-a chuan, "Engtinnge ka hneh tawh tih i hriat?" a lo ti thuai a.

Sudden-a chuan, "Dumb-Bell Ranch-ah khan ka rawn zawng che a, Sark-a chu ka hmu zo tawh lova, mahse, in chanchin Cook khan min hrilh vek a ni," a ti a. Dave-a chuan, "Anih leh Dumb-Bell Ranch-ah chuan va kal i tum em ni? I va kal a nih pawhin Sark-a kha chu lo khawih hlek suh. Ka chanpual tur a nih kha," a han ti a. Sudden-a chuan, "Engtinmah tih ka tum lo. Enge a tih, a chanchin hriat ka duh mai a ni, midangte nena in lo kir hunah chuan kei pawh chu ka lo kir leh hman daih tawh ang," a ti a, an ințhen ta nghal a. Sudden-a leh Rowley-a chu Sudden-a sakawrah an chuang a, Mullins-a te awmna an hnaih deuh veleh Rowley-a chu a chhuk a, Sudden-a pawh chu Dumb-Bell panin a kal ta zel a.
Dumb-Bell Ranch neitu Jesse Sark-a chu Ranch inchhungah chuan thil tamtak ngaihtuahin a ngaih a țha tehchiam tawh lova. Chawhnu lamah mipakhat hi lehkha kengin a lo kal a, lehkhaah chuan: 'I cousin, Mrs Gray-i chu ka kutah a awm tawh a. Dollar sangli min pek hunah ka rawn chhuah chauh ang. Mahni chauha i lo kal loh chuan kan inbe lovang. Dollar sangli chu ka hmuh thuai loh zawngin Mrs Gray-i hian a tuar ngei ang..... Jack Mullins," tih hi a lo inziak a. Sark-a'n a chhiar zawh chuan, "A tuar ang' a han tihdanah hian midang pawhin hmu ve se an hrethiam nghal vekin ka ring. Mary chuan min hmuh hun chuan a lawm ngawt ang chu. Dollar sanghnih kha kan intiamna a ni si a, i lo pun ta a ni maw, Mullins, kan la hria ang chu," a ti rilru a.
Lehkha chu a ipteah a ak a, a hote hnenah tihtur a hrilh leh rih a, chutia a vahvel lai chuan Lyman-a a lo kal hlauh mai a. Lyman-a chuan, "Buaina engnge i neih tak?" Sark-a hnenah chuan a rawn ti a. Sark-a chuan a sawi țha duh meuh lova. Lyman-a vek chuan, "Pathianin emaw ni, Setana'n emaw a pek che i hmai landan kha Marshal chuan tihdanglam sak che a tum a ni maw?" a ti leh a. Lyman-a chuan an inbeihna chanchin chu hre tawh ngeiin a ring bawk a, Sark-a chuan, "Marshal ni lovin a Deputy nen zawk ania kan inbeih ni. Ka inringlo lai min bawh thut mai a, a la tuar ve hle ang," a han ti a.
Sark-a vek chuan "Chu mai chu duhtawk lovin, a thin ka la khei chhuah sak ang," a han ti leh a. Lyman-a chuan, "A thin khei chhuahsak i tum a nih zawngin, muthilh tir phawt la, a himthlak zawk ang a, i tan pawh a samkhai zawk daih ang," a han ti a. "Engtin nge thil awmdan zel?" a han ti leh a. Sark-a chuan, "Engkim tluang takin a la kal zel e," tih pahin a ipte chhung ațang chuan Mullins-a lehkhathawn chu a han phawrh a. Lyman-a chuan, "Sum a ngiat tam hle mai. Hmeichhia chu engtikah nge hruaichhuah i tum dawn?" a han ti a.
Sark-a chuan, "Naktuk zingah ka la chhuak ang. Mullins-a kutah zankhat han awm leh phawt se, min hmuh hunah a lawm zual sawtin ka ring. A fa kan kawl avangin Mary chuan engmah a hnial ngam lovang. Green-a a awm tawh bawk si lo, tumahin min khawih ngam tawhin ka ring lo," a ti a. Lyman-a chuan, "Chu, ka sum i bat kha min rulh mai i tum dawn tihna em ni?" a lo ti a. Sark-a chu a hlim viau tawh teh lul nen, Lyman-a thusawi chu a han ngaihtuah chiang a, ngui zetin, "Seth, chu zozai sum ka nei lo tih i hria alawm," a han ti a. Lyman-a chuan, "Dollar sangli chu i neih chuan i awlsam phah deuh dawn tihna em ni?" tiin a zawt leh ta zel a.

Sark-a chuan, "Mullins-a pek a ngai dawn si alawm. Kawng dang ka hriatchhuah nghal loh chuan.....," a tih lai mekin a thusawi chu a tawp ta hmiah a. Lyman-a chu a lo dingchhuak a, thinur zetin Sark-a chu a en a, "I daw chiang hle a nih chu. Nichin lawka i hote hnena i thupek kha ka hre vek asin. I theih chuan Mullins-a chu bum ta mah la pawi ka ti lo. Mahse, Dollar sangli chu nangmahin chan i tum avangin ka pawi i sawi a, ka pawi i sawi avangin ka khaihlum tir dawn bawk che a ni," tiin a vau ta a. Sark-a chu nidang angin a zam teh chiam lova, "Kan inkawp anih kha hre reng ta che," a ti ve ta ngat a.
Lyman-a chuan, "ka rin aiin i lo â daih mai, ka thitih sual hriatchhuah enge an neih ang? Jesse Sark-a ka la hmu ngai lova, ka hmu tawh țhin ang tih pawh ring ngawt mahse an fiah thei dawn lo, nang hi ka hnenah i lo kal a, Jesse Sark-a chu i ni lo tih keiin engtinnge ka lo hriat theih teh lul ang che?" a ti ta a. Sark-a chuan, "Thurochhiah ziaktu i nih kha," a ti leh a. Lyman-a chuan, "I pami, Amos Sark-a duhdan angin ka ziak mai a ni. Ama hming ziak a ni lo tih tuin nge fiah thei tawh ang? I Ranch enkawl nan pawisa i mamawh a, ka lo puktir che a ni ve mai a, I Ranch chu ka hnenah i dahkham ta a, chu chu dan lo a ni miah hlei nem. I nih loh pui ni anga i rawn inchhal avangin keipawh hi min bum ve ta tihna a ni mai a, ka thiamloh engmah a awm lo," a ti ta a.
Sark-a chu a han inngaihtuah chiang a, Lyman-a chu a insawi ang chuan a inphamar thei mai dawn tih a hria a. Lyman-a a him si chuan amah Sark-a chu a tuartu a ni ngei dawn tih a hre bawk si a, rannung danchep laklawh tawhin chhuahna an zawng ruai ang mai hian Sark-a chuan nakin hnua a chunga thil lo thleng tur pumpelh theihna kawng chu a riruin a dap ve ta ruai a. Chutia a inngaituah buai viau lai chuan "Ezra Kent, ka thu hriat hi Court-a ka sawi hunah chuan kei chu him takin ka chhuak nghal anga, nang erawh hi chu thingzarah i nghawngin i uai ngei ang. Chumi hunah chuan ka leiba min rulh loh avangin Dumb-Bell Ranch chu ka nei tawh mai dawn a ni," Lyman-a chuan a han ti lehnghal a.
Chu thu a sawi avang chuan a chhe zawngin Sark-a chu a rilru a siam sak ta tih Lyman-a chuan a hre lo a n. Lyman-a a dam chhung chuan a tan hlauhawm a ni reng dawn tih Sark-a chuan a hria a, Lyman-a hian hmanrua ang lekin a lo chhawr ve mai a ni tih a hre ta a. Sark-a thinur beidawng pawisak nei tawh lo chuan, a chemte chu a phawi a, kawngkhara Lyman-chhuak tur chu a va bawh ta thut mai a. Lyman-a tlu tawh chu a va en a, "Hremhmunah duh tawkin i ka chu i la ang dawn ni," a han ti a.
Tichuan, Lyman-a chu a pu a, in chhawngah a chhoh pui a, pindan pakhatah a kalh hnan ta a. Lyman-a sakawr pawh chu Ranch pakhatah a thukru bawk a. "Naktukah Lyman-a leh a sakawr hi ka phum ve ve mai ang. Juba (chaw chhum) khan Lyman-a lo leng hi a hmuh hlauh chuan..." a ti a. A rirua a thil ngaihtuah chu a țha vak lo tih a hmelah a lo lang chhuak nghal a. "A lehkha pawimawh te chu khawiah nge a dah ang aw?" ti rilru chungin a kuta thisen kai te chu a hrufai a, a kawr hak laiah te chuan thisen a lo kai nual avangin a inthlak ta sawk sawk a.
Chumi ni vek tlailamah chuan Sudden-a chuan Dumb-Bell Ranch chu a va thleng a. Khua a thim teuh tawh hle a, Bunk House hnunglam chokaah chuan khawnvar pawh an chhi tawh nghe nghe a. Sudden-a chuan tumah a va hmuh loh avangin chokaah lutin Juba chu a hmu ta a. Juba hnenah chuan, "Vawinah lo leng an awm em?" tiin a zawt a. Juba chuan, "Ranch in kawtah khan Lyman-a sakawr chu hmuin ka inhria a, mahse a awm tawh lo," a ti a. Sudden-a chu kir leh mai tum niawm takin sakawrah chuan a chuang a, a lo kalna lamah chuan a let leh ta mai a. Mahse, a rukin a lo kir leh thuai a. Choka pan lovin Ranch lam chu a pan ta zawk a.
Khua a thim bawk a, Ranch in kawngkhar chu a han pawt chhin a, a lo inhawng ta mai a, tichuan in chhungah chuan a lut ta a. Dawhkana khawnvar chu a han chhi a, inchhung chu a han enkual a. Enge hmuh a inbeisei pawh a in hre hran lemlo, mahse, chhuatlaia thisen chu hmuh a inring hauh lo aniang, a han hmuh meuh chuan mak a ti hle mai a. Thisen pawh chu a la ro lo lehnghal si a. Kawngkhar bul ațangin thisen far chu hmuh tur a awm țan a. Sudden-a chuan a chhui zel a, inchhungah a lut a, inchhawngah a chhui chho zel a. Kawngkhar inkalhna bulah a chhui tawp ta a.
Kawngkhar chu a han tlawh vak a, a lo inhawng ve mai bawk a, inchhungah chuan a lut ta a. Chhuatlaiah chuan mi pakhat hi bawkkhupin a lo tlu reng mai a. Sudden-a chuan khawnvar nghat meuhin chu pa chu a han belchiang a. "A hnungzangah an vit a nih dawn hi" ti rilru chungin a han kuai zangthal a. "Uai, Lyman-a a ni reng mai," a ti ta a. Chokaah tlan pheiin a thil hmuh chu Juba a va hrilh ve a. "Lyman-a chu a thi tawh ni ngeiin ka hria, lo va ngaihven la, a vittu chu ka'n um ange," tih pahin Sudden-a chu pawnah a chhuak nghal a.
Sark-a chuan a kawl a thingthla ni ngeiin a lang a, a hote nen an bihrukna hmunah a kal ta a nih pawh a rinawm. Chuti a nih chuan thiltih tum engemaw tak a nei a ni ngei anga, an zinga Mary Gray-i tel vang pawh a ni maithei, tih te chu Sudden-a chuan a ngaihtuah zui zel a. "Dave-a kha tla lovin sakawrah chuang zel ta se ka ti ngawt mai, a tlak vaih chuan kan tlai lutuk ang tih hlauhawm tak a ni," a ti rilru a.
Dave-a chu sakawrah chuan a lo chuang thei teh meuh mai, chuang thei mai pawh ni lovin sakawr chu a theihpatawpa chakin a tlantir ve tho a, amaherawhchu a zin leh lakam phah loh a nih avangin Dave-a tan chuan a hreawm deuh hlek a, chau tak maiin Welcome khua chu a lut ta hram a. Red light Saloon a pan nghal a. Engkhaw sawi set set lovin mi pakhat zu no dawm lai chu a'n lak sak a, a'n tlak nghal pawp mai a. In chhunga mi sawmhnih lo awmte chuan an thil hriat chak chu an lo zawt sap sap a.

Dave-a chuan, "Mrs Gray-i chu sawlai tlangramah sawn Mullins-a'n a lo kawl a. Jim-a pawh a la awm. Mi rawn pun tum mai ka ni. Ned, Bar 'O' Ranch-ah ka va kal hlanin midang i lo sawmkhawm thei angem?" Nippert-a hnenah chuan a han ti a. Nippert-a chuan, "Nang chu chawl rih rawh, keiman engkim ka ngaihtuah vek mai ang. Sloppy, a mutna tur khum ngaihtuah sak rawh," a ti a. Sloppy-a leh Dave-a te chu Marshal Office panin an chhuak dun nghal a. Sloppy-a chuan, "Jim-a chu a la dam maw?" a ti a. Dave-a chuan, "Ka lo kal lai kha chuan a la dam e," tiin a chhang a. "A nih Mrs Gray-i?" Sloppy-a chuan a ti leh a.
Dave-a chuan, "Dam chu dam e, mahse Mullins-a te kuta awm a ni miau a, a ngaihtuah awm hle ang. Mrs Gray-i hi, Sark-a thu a rukbo a nih ka ring," a ti a. Sloppy-a chuan, "Sark-a a nih vaih zawngin ka.....," a tih lai chuan Dave-a chuan, "Engtin a ni?" a lo ti thuai a. Sloppy chuan, "Eng ni lo ve, ka țawng ve mai mai ania. Mu la, a hun takah ka rawn kaitho mai ang che," a ti ta daih a. Dave-a chuan, "Sakawr leh Rifle leh puakruk min lo ngaihtuah sak la a țha ang, ka ta min chhuhsak tawh si a," a ti a. Sloppy-a chuan, "A va pawi ve le," a han ti a. "A pawi ngawt ang chu, an tan," a han ti leh a.
Dave-a an man ațang khan Mrs Gray-i chu rilru nuam lo takin a awm reng mai a. An man ațanga nikhat hnuah chuan chaw an rawn pe a, chawthleng pek pah hian zawite hian, "I țhianpa kha a chhuak a, a rawn kal leh dawn," a ti sap a. Mary-i'n a biak zawm leh hmain chu pa chuan chawthleng a dah a, mahse Mary rilru chu a hahdam deuh sawt a ni. Zanlai pelh hnuin Mullins-a te bihrukna hmunah Sark-a chu a lo thleng ve a. Mullins-a chauh a lo awm avangin, "Midangte hi khawiah nge an awm?" a han ti a. Mullins-a chuan, "Henglai velah hian an awm, pawisa chu i rawn keng em?" a lo ti a. Sark-a chuan, "Eng ti tura lo kal nge ni a min rin? Hmeichhia chu i la awmpui zel maw?" a ti ve thung a.
Mullins-a chuan, "Engvanga ko che nge ni a min rin? Hmeichhia chu ka kawl leh kawl loh hriatchian kher i duh em ni?" a han ti leh a. Sark-a chuan, "ka hriat chian hma chuan ka hnen ațang hian engmah i hre lovang," a han ti a. Mullins-a chuan khua pawh a la var si lova.... tih leh, i lo kal chhan hi a hriat phawt chuan kaitho mahla a pawi tawh loang chu. Inchhawng pindan veilamah khian a awm," a ti a. Sark-a chuan, "ka tlanbo pui mai i hlau nange?" a han ti leh kher a. Mullins-a erawh chuan, "Thui i thleng hman chuang lovang," a tihsan mai a. Sark-a chu a nui sak a. Mullins-a ho te chu a bul hnaiah an awm ngeiin a ring a, mahse pawi a ti bik vak lo, amah (Sark-a) hote pawh an awm ve thova.
Mary Gray chu kawr ha chunga mu a ni a. Kawngkhar inhawng thawm chuan a tiharh a. Rang takin a tho vat a. "Mary min hlau suh, keimah keimah Jesse ka ni," a han ti a. Inchhungah chuan a lut a, khawnvar a chhi nghal a, inchhung chu a enkual vel a, "I chenna chu a hreawm hle mai maw? Mahse lungngai suh, ka hruai chhuak dawn che a ni. I chanchin hi vawin hian ka hre chauh a, pawisa han zawn khawm a ngai bawk si a......," a han ti a. Mary chuan, "Pawisa a....?" makti fe hian a lo ti ha mai a. Mullins-a lehkhathawn chu Sark-a chuan a han entir ve a. "Mullins-a hian Dollar sangli hu lekin a ngai che a," a ti a.
Mary chuan lehkha chu ngawi reng hian a chhiar a, thil awmdan chu a hrethiam lo hle mai a. Mary chuan, "A nih leh i chhuak ang hmiang," a ti ta a. Sark-a chuan, "Chuti maia chhuah theih a la ni hleinem, Mullins-a nen thiltih fel a la ngai asin, nang nen pawh," a ti ta a. Mary chuan, "Kei nen maw?" a han ti a. Sark-a chuan, "Ni e, Mary, ka thil duh chu i hria alawm. Drywash khuaah kan kal anga, kan innei nghal anga, tichuan Dumb-Bell Hotunu i ni tawh mai dawn a ni," a han ti a. Mary chuan, "Mullins-a chuan nang nei tur che hian min phut kher a ni maw?" a ti ta a.

Sark-a chuan, "Ni e mawle, sawi loh theih a ni si lova, hrilh kher che pawh ka chak loh tehlul nen; Mullins-a hian makna tak a nei a. Amos-a khan i chungah thil diklo a ti ni a a hriat avangin Dumb-Bell hotunu ni turin a duh tlat che a ni. A ngaina ve tlat che niin ka hria," tiin dawt hlir chuan a phamar ta vel a. "Min ngaina hle a nih chu. Dollar sangli in min hralh phal tlat a! Engpawhnise, min lei thei lovang," Mary chuan a ti ve ta tlat mai a. Sark-a chuan, "Mullins-a lehkha kha i lo chhiar chiang tawklo deuh a ni mai thei a, heng misual ho hian nangmah avanga pawisa hmuh an la in beisei a, an la tina lo mai che a ni, mahse, pawisa an hmu dawnlo tih an hriat vaih chuan.....," a han ti a. Sawizawm kher pawh ngaia a hriat loh a vangin a ngawi ta a.
Mary chuan, "Pawisa an hmuh loh chuan min that dawn tihna em ni?" a ti a. Sark-a chuan, "That lovang, mahse, an that nghal lo che chu hreawm i ti hle zawkin ka ring, chhanchhuah i beisei a nih zawngin Dave-a leh Marshal te chu an thi ve ve tawh a, Welcome khuaa mite lah chuan i awmna an hre miah bawk si lova," a ti ta zel a. Sark-a chu a daw a nih Mary chuan a ring tlat a, Dave-a chuan a la rawn chhanchhuak ngei dawnin a ring tlat a. Chuvang chuan hun khawh tlai dan ngawt a ngaihtuah zawk a, "ka fa tello chuan khawiah mah ka kal dawnlo," a ti ta tlat a. Sark-a chuan, "Chu zawng, thil awm tak a ni, ka va hruai nghal ange," a ti a, Inhnuai pindanah a chhuk ta nghal a.
Mullins-a hnenah chuan, "A fa tello chuan kal chhuah a duh lo," a zu ti a, Mary fa awmna chu a zawt nghal a. Mullins-a lah chuan, "A fa ka la tel hlei nem, Welcome khuaah a awm a nih ka ring. Kan hruai ve zel emaw a tih avangin kan thu a hnial ngam lova, chuvangin kan tihder hlen ta mai a nih kha," a lo ti si a. Sark-a chuan, "Thil i tisual leh ta pek a nih chu... Ka hrilh dan che khan....." a ti hman chauh a, Mullins-a chuan, "Engtik lai ațang khan nge i thupek apiang zawm tur ka lo nih? Hmeichhia chu i duhlo a nih zawngin Welcome khua mipuiin an tlan duh ngeiin ka ring, an ngaina hle tih ka hrechiang a ni," a ti ta a.
Chutia Mullins-a'n a pawisak loh em avang chuan engtikah emaw la sawisak tum ru ran chungin Sark-a chuan, "A nih leh engtinnge ka tih ang?" a han ti a. Mullins-a chuan, "In inneih phawt loh chuan a fa chu kan kuta awm tur angin hrilh la, chuti pawh a i thu a la awih duhloh fo chuan, phuarhlawm la, kal bo pui daih la a ni mai a lawm," nui chung hian a lo ti a. Sark-a chu inchung lamah a chho leh a. Mary hnenah chuan, "Kan inneih phawt loh chuan i fa chu Mullins-a'n min pe duh lo. Ka han hnial chiam pawhin, ka hnial hneh ngang lo a ni," a han ti a.
Chumi a hriat chuan Mary chuan Dave-a sawi angin a fa chu him takin a awm a nih a ring nghet ta a. Chuvangin a rilru a siam nghet sauh a. "Chuti a nih chuan, ti hian ka awm ngaiin ka awm reng zawk ang," Sark-a hnenah chuan a ti ta a. Chuti taka Mary-i'n a duh lo tih Sark-a'n a hriat chuan a insum zo ta lova. Mary chu a pawm a, a kuah ta chuk chuk mai a. Mary chu a han tal chiam țhin a, mahse, Sark-a chuan a pawm nghet sauh sauh mai si a. Chutihlai chuan kailawna penri lo chho chu an hre ta a. Kawngkhar chu a rawn hawng a, "Sark, fiamthu thawh a hun hlei nem mawle, biak che ka duh a, hmanhmawh rawh," Mullins-a chuan a rawn ti ta a. Sark-a chuan Mary chu a nam leng lawp mai a. Mullins-a chu a zui chhuak nghal a.
Pindan hnuai an thlen veleh Sark-a chuan, "Mahni nupui fawh hi a thianglo em ni? Engvanga min rawn tibuai nge i nih le?" a han ti a. Mullins-a chuan, "Nippert-a leh a hote, sawmpahnih aia tam mahin kan awmna an rawn pan tih thu ka hria a ni," a ti a. Sark-a chuan, "Sumdawng sawmpahnih rual ringawt i hlau teh chiam em ni?" a han ti a. Mullins-a chuan, "Ka hlau lo tih chu i la hre mai ang, mahse, an zingah silai kap thiam an awm ve thova. Chubakah Marshal in a rawn ho a ni awm a," a han ti a. Sark-a chuan, "Marshalin engtinnge a rawn ho theih, a thih tawh kha?" a han ti a.

Mullins-a chuan, "Amah a nih loh vek pawhin a phirpui tal chu a ni ang. A hmutu pawh Galt-a a ni a, a hai hauhin ka ring lo. ka hriatthiam loh erawh chu kan awmna hmun hi engtia rawn hrechhuak thei nge an nih mak ka ti ber a ni. Bar 'O' Cowboy ho pawh chu an lo tello em ni?" a han ti a. Sark-a chuan, "I hote chauh bei tura inringin an rawn thawk tlem a ni ngei ang, an inchhir hle ang chu. Ka hote pawh ka rawn hruai ve a, ka han ko nghal ang e," a han ti a. A ipte ațang chuan hamrik a phawrh chhuak a, Chu veleh Mullins-a chuan, "Hetiang hi a ni maw i rilru putdan lo ni? Sum min pe lova, hmeichhia hi ka kut ațanga lakchhuah i lo tum a ni maw?" tih pahin a puakruk a phawi chhuak ta mai a.
"Dollar sangli chu min pe rawh, min pek loh chuan," tih pahin Mullins-a chuan Sark-a chu puakruk chuan a tin ta a. Sark-a chuan han hnial chi a nilo tih a hria a, a ipte ațangin pawisa a phawrh ta a. Mullins-a chu a pe ta a. Mullins-a chuan nui chung hian a la a, a ipte a ah pahin Sark-a hnenah chuan, "I duh chuan i hote chu i ko thei tawh ang, i kiangah ka awm reng dawn a, diklo deuha i che ka hmuh vaih chuan i thi nghal ang," a ti a. Sark-a chuan hamrik chu a han ham a, "A tira kan intiam aia a leta tam ka pe tawh che a, chuvangin heta awm reng hi kan tan a țul tawh lo. Hmeichhia chu kan hruai anga kan chhuak mai ang," a ti a.
"Chuti mai tur em ni dawn ka țhian duhtak, nangmah vangin harsatna kan tawk dawn niin a lang a, nangmah vang bawkin chhuah leh ngei ka tum a ni. I hote nen kan țang tlang ang chu. Min man palh vaih zawngin ka lei phuarna hi ka phelh nghal dawn a, thil ni lo lo pawh ka sawi țeuh mai thei a ni. Ka sawi mai chuan i tan a pawi hle dawn si a, khawnge tlanchhuah maite a lo tum takin hmeichhia chu kan phuar ang e," a ti a, In chungah chuan a chho leh a. Mary chu Mullins-a chuan a phuar hlawm tlat a, khumah a muttir a. "Tun ațanga rei vak lovah silaimu lenglak tawn palh a hlauhawm viau mai thei a, chuvangin khumah hian mu tlat la i tan a țha hle ang," a ti a, a chhuahsan leh nghal a.
Sark-a hote leh ama hote pawh chu an lo thleng khawm tawh a. Chungho chu bengchheng lo turin Sark-a'n thu a pe a. "Naute u, Welcome khua a Marshal sual deuh mai kha tuna kan awmna hmun hi min chhuhsak a rawn tum dawn a ni awm e, chung thu-ah chuan sawi tur kan nei ve ngei dawn lawm ni?" a han ti a. Sark-a zawhna chu uar fe fe hian an lo chhang hlawm a. "A țha anih chu, chu chu i ngaihdan a nih chuan Marshal leh a hote chu meikhupin kan thawn haw leh vek tur a ni. Bihrukna tur hmun remchang leh țha zawng țheuh ula, hlah miah lo turin in silai hmet puak rawh ule, kan hneh loh chuan min hneh dawn tih hre reng ang che u," tiin Sark-a chuan a hote chu a'n chah a. Thinrim inhrosa chungin chungho chuan an awmna hmun tur lam chu an pan nghal a.
Mullins-a pawhin tih dan tur eng engemaw a lo hrilh ve nual hlawm a. Marshal leh a hote chu umchhuak thei ngeiin Mullins-a chuan a inring a, mahse, anni an bo hunah chuan Sark-a leh a hote chu buaipui tham an la ni dawn tih a hria a, a hote aiin Sark-a hote chu an tam zawk daih si a. Sark-a chuan a sum kawl tawh sa chu chhuh sakin hmeichhia pawh chu a tlanbo pui mai ang tih Mullins-a chuan a hlau ta ber a ni. "A hun lo thleng phawt sela, tihdan tur chu a awm ve mai ang," a ti rilru a, mahse, chutih lai ngei pawh chuan nakin hnua a thiltih dan tur chu a ngaihtuah lawk hman vek tho a ni.

ADVERTISEMENT CLICK