SUDDEN - TAKES THE TRAIL AUTHOR : OLIVER STRANGE (1940) EPISODE - 19

[HLalthazuala]

Khua a lo var țan a, arsi te pawh chu a ral tawh a, Sudden-a chuan Welcome khuaa mite ai chuan Bar 'O' ho chu an tam zawk hle a ni tih a hria a, Mullins-a te awmna bul tlangah chuan an awm khawm a. Nippert-a chuan, "Jim, engtin nge ti ila țha ang?" a han ti a. Sudden-a chuan, "Mullins-a te buk panna kawng hnih a awm a, chuvangin ințhen darh ila a țha ang. Pawl khat in hmalam ațanga an beih laiin pawl khatin hnunglam ațangin an bei ve anga, chu chuan an mahni a ti zamin ka ring a ni," a ti a.
Owen-a chuan, "Chutia chet chu kei pawn țhain ka ring. Keini Bar 'O' hian kawng khat chu kan rawn zawh anga, nangni'n kawng dang chu in rawn zawh dawn nia," Sudden-a hnenah chuan a ti a. Tichuan, Sudden-a, Dave-a leh Welcome khua mipui te chu tlangah chuan an lawn chho ta a. Bar 'O' Cowboy te erawh chuan kawng dang an zawh thung a. Ni a la chhuak lova thinghmun te phei chu a la thim vek a, Sudden-a chuan hma a hruai a, tlangpang kawng chhengchhe deuh maiah chuan a mal malin sakawr chung chuangin an inzui chho ta a.
Kawng a chhiat em avangin an fimkhur em em a, an tumna hmun an thlen meuh chuan Ni zungin thing ler te chu a rawn chhun ve tawh a. Mullins-a te in ațanga hla vak loah chuan sakawr ațangin an chhuk ta a. An sakawr chu hmun biru laiah an thlun fel hnuin Mulins-a te awmna in chu ke in an pan ta a. In lan theihna an va thlen chuan Nippert-a chuan, "In kianga thingbul lian tak tak an lo dah chu a tih zia hle a ni, behchhan atan a remchang ngawt ang. Tumah lah chu an lang si lova, bawh thut mai ila a țha mai lawng maw, Jim?" a han ti a.
Sudden-a chuan, "Min lo chang reng mai thei a, fimkhur a țha zawkin ka ring. Inzarpharh ula, mahni awmna tur hmun remchang lo zawng țheuh rawh u, mihring kah tur in hmuh ngawt loh chuan silai hmet puak ngawt suh u," a ti a. Chumi hnu chuan an han in zarpharh sang sang a, In chu zawi zawiin an pan hnaih ta zel a, a țhiante chu inpeih vek tawha a hriat hnuin Sudden-a chuan vanlam hawiin a puakruk chu a hmet puak ta a. Chuveleh, Mullins-a te tawmna in kawngkhar chu a rawn in hawng a. Mullins-a chu Rifle kengin a lo chhuak a, "Tutenge in nih? Enge in duh?" a rawn ti ta a.
Sudden-a chu a han ding lang a, Mullins-a hnenah chuan, "Tunge kan nih i hria, Mrs Gray-i rawn hruaichhuak tur a rawn kal kan ni," tiin a chhang a. Mullins-a chuan, "Engvangin nge Mrs Gray-i chu ka kawl ni a i rin?" a han ti leh a. "Keiman ka hrilh avangin," tih pahin Dave-a chu a rawn ding lang ve ta nghal a. Dave-a hmel a hmuh lai a Mullins-a mak ti lutuk chu a meng bial nasa ngei mai. Aw tham deuh țuak hian, "Sark-a a lo kal a, Mrs Gray-i chu a hruaichhuak tawh. Drywash khuaah innei turin an kal ta anih kha," a han ti a.
Chu thu a hriat veleh Dave-a chu a in hrosa chiam a, Sudden-a erawh chuan, "Mrs Gray-i awm leh awm loh chu rawn fiah ngei kan duh a ni," a ti leh a. Mullins-a chuan, "Chuti a nih zawngin silai hmet puak chungin lo kal ula a ni mai. Hei, a țan nan," tih pahin a silai chu a lek kawh a, Sudden-a lam hawiin vawikhat chu a han hmet puak a, Inchhungah a lut leh ta a. Sudden-a pawh chuan a hmet puak ve a, mahse, Mullins-a chu a lo pil hman tawh a, Sudden-a te pahnih pawh chu an pilbo thuai a, tukverh ațangin Rifle a lo lawr chhuak a, inkah chu an țan ta nghal a.
Reivaklo an inkah hnuin tukverh ațanga Rifle lo lawr chhuak chu Sudden-a chuan a va hmu a, a va kap nghal thawr a, Rifle chu pawn lamah chuan a lo tlachhuak ta nawlh a, a kengtu erawh chu hmuh tur a awm ta chuang lova. Sudden-a chuan, "Pakhat a an kiam phah ngei ka ring," a han ti a. Dave-a chuan, "Kan kalna aiin an kalna kha a letin a thuiin ka ring," a lo ti a. Ni a lo sang deuh deuh zel a, khua pawh a lum sawt hle a, Sudden-a chuan, "Kawngkhar saw kap turin inhrilh chhawng theuh rawh u," a han ti a. Kawngkhar chu an kah rawn ta chiam mai a. Inchhunga Mullins-a leh a hote pawh chuan an rawn kap let ve thuai a.

Sudden-a chuan, "Dave, kawngkhar saw i tum ve lo ang, Kawngkhar ringawt emaw kan tum an ti maithei a, an fimkhur tawklo mai thei a ni," a ti a. Sudden-a rin ang ngeiin Mullins-a hote chuan kawngkhar an rawn tum ni a hriain tukverhah an rawn inlan ta a. Mahse, rei an inlar hman lo, Kawngkharpui pawh chu a rawn inhawng a, a kawpza lehlam chu a chhe tawh nghe nghe a. Mullins-a ho te chuan kawngkhar chu chhunglam ațangin thil dangin do an rawn tum a, mahse, chutih lai chuan in hnunglam ațangin silai a rawn ri ve ta a. Mullins-a pawh chuan an rawn hual dawn ni a ringin, "Sark-a hi khawiah nge a awm?" a hote hnenah chuan a han ti a. Galt-a chuan, "Inchhawnga a lawn chho lai ka hmu," a lo ti thuai a.
Mullins-a chuan thinrim tak maiin inchhawng lam chu a pan chho thuai a. Kailawn a han kai chhoh lai chuan Mrs Gray-i awmna pindan kawngkhar chu a lo inhawng a. Sark-a chuan, "Tun hi kan tan tlanchhuahna hun remchang tak a ni, ka sakawr pawh sawti lai lawkah sawn ka thlung ru a, midangte lah kawt lamah hlir an inkap buai a, in hnunglama kan chhuah phawt chuan min hmu miah lovang," tiin Mrs Gray-i chu tlan chhuah pui atan a lo sawm vel mek a. Mary chuan, "I hote phatsan i tum ta mai a ni maw?" a han ti a.
Sark-a chuan, "Anni ngaihtuah an ngai ve lo, nang hi ka ngaihtuah ber che i ni," a han ti a. Mrs Gray-i chuan, "Pawnah sawn ka țhiante an awm a, ka nghak dawn," a ti ta a. A hmanhmawh thlak zia ngaihtuahin Sark-a chu a thin a rim em em mai a. Tichuan, vin zet hian, "An lo thlen meuh chuan a tlai lutuk ang, duh la, duh suh la, ka hruai tho tho dawn che, kan pahniha kan awmfal hunah chuan, ka.....," a tih lai mekin pawnlama mite chuan silai an lo hmet puak vak a, Sark-a thusawi pawh chu a hriat theih ta lova. Chu chang ni lovin inchhunga lo lut thawm pawh chu Sark-a chuan a hre thei ta lo bawk a.
Mullins-a chuan hnunglam ațangin Sark-a chu a va zuan a, a bekah puakruk kawmin a chhu ta chawrh mai a, Sark-a chu nikhaw hre lovin a tlu ta nghal a, a tlu tawh hnu chu Mullins-a chuan a han pet zui leh nghal a. "Țhiante bum tum reng mai, nung tlak pawh a ni lo, a thusawi pakhat chauh kha a dik a ni, heta awm reng hi i tan a him tawk lo niin ka hria, keia tan pawh," a ti a. Mary chuan, "A thi em ni?" a han ti a. Mullins-a chuan, "Thi lovang, thi se i tih chuan ka that nghal mai ang chu," nui țhen țhu chung hian a han ti a. Mary chuan han chhan mai ngaihna pawh a hre lova, a ngawihsan ta daih a.

Pindan hnunglamah chuan silai a la ri reng a, mahse, Mullins-a te awmna pindan erawh chu tumahin an la rawn kap ve lova. Mullins-a chu tukverh bulah chuan a va ding a, a lukhum chu a va tar chhuak ta a, tumahin an rawn kah loh avangin ngaihțha tak chuan a tawlhkir leh a, chhuatlaia hruizen chu a chhar a, Mary zak hnuaiah chuan a vet a, "I bengchhen vaih chuan hei hi a ni mai," a ti a, a puakruk chuan a tin a, tukverhah chuan Mrs Gray chu hrui chuan a thlakthla ta a. Reiloteah amah pawh chu a chhuak ve ta a.
An awmna ațanga ramhnuaia luttur chuan hmun fai lai yards sawmhnih lai kal tlang a ngai a. Mullins-a chuan Mrs Gray chu a kokiah a pu lawk a, a kalpui ta mai a. Mrs Gray chu kah palh an hlauh dawn avangin an rawn kap lovang tih chu a hrechiang em em a. Mullins-a'n hmun him a thleng hman chiah tihin silai mu pawh pawisa lovin Sudden-a leh Dave-a chuan an umzui ve ta nghal a. Him takin ramhnuaiah chuan an va lut ve ta a. Mullins-a'n Mary, sakawr chunga a hlangkai lai chu an va hmu hman a, mahse, Mullins-a chuan a tlanpui ta daih mai a.
Dave-a chuan, "Kan tlai lutuk ta a nih hi," a han ti a. Sudden-a chu a țhingțhi rawp a, a Rifle chu a hmet puak nghal a, Mullins-a leh Mary te chuanna sakawr chu a kap fuh a, an pahnihin sakawr ațangin an tla dun ta a. Chutih lai chuan Mullins-a chu a lo tho leh ta mai a, Mary ke phuarna hrui chu a zai chat a, "Tlan thuai rawh, min rawn man hman vaih chuan i thi ang," a han ti a, chemte in Mary chu a tin a, a tlan pui leh ta vak mai a. Mullins-a chuan that duh tak tak dawn a a rin avangin Mary pawh chu a theih anga chakin a tlan ve ta zel a.
Reife an tlan hnu chuan Mary chau lutuk chu a han ding zuai a, mahse, Mullins-a chuan, "Thih i duh loh chuan kal thuai la a ni mai," a ti si a. Chutihlaia an kalna te chu tlangpang kawng mumal lo deuh mai a ni a, chetsual palh hlauh chuan a hnuai chu thihna ngei tur hi a ni a. Mary chuan an thlanglam kham chu a zuk thlek zawk a, a hlau lutuk chu a khur lo chauh hi a ni tawh a. Mullins-a chuan, "Fimkhur hle rawh, i tlak palh vaih chuan Mulukawlh chawah i inpe a ni mai," a la ti leh ta nghal a.
Chutih lai chuan Sudden-a te pahnih chuan Mullins-a te hnu chu an rawn chhui ve zel bawk a. Mullins-a chu ramhnuai pik lai leh hnuhma lan theihlohna lai hlira kal a nih avangin Sudden-a te tan chuan hmanhmawh taka kal a theih ve si lova, a chang phei chuan an hnuchhui lai chu an han hloh leh rih țhin a. Chutianga an bo an bo lai chuan hlinga kawr them kai hi an hmu ta a. Dave-a chuan, "Mary kawr them ngei a nih hi," a han ti a.
Chuta țanga hlaloteah chuan kawr them dang an hmu leh ta a. A khat tawk a kawr them an hmuh zel tak avangin hma an sawn chak ve ta sawt a. Thuife an kal hnu chuan an thlang, tlang kara Mullins-a leh Mary liam tur chu an zu hmu ta a. Sudden-a chuan, "Tikhan um zel la, lehkhalh dan awmin ka ring. Tlangpang lehlamah sawn chhuk ka tum dawn a ni," a ti a, an in țhen ta a.
Mullins-a chuan a vau reng avangin Mary pawh chu a theihtawpa chakin a kal ve zel a. Mahse, an kal thui ta bawk a, an kal chau ta hle mai a, Mullins-a chuan tuman an rawn umzui tawh lo ni a ngaiin Mary chu a chawlh a phal sak ta a. Rei pawh an chawlh hman hmain Mullins-a chu a han hawikir a, an awmna ațanga yards sawmnga vela hla a Dave-a lo chhuk chu a hmu ta a. A puakruk a phawi a, Dave-a chu a kap ta a. Dave-a chuan Mullins-a chu a rawn hmu ve a, Rifle chuan a rawn kap ve a, a vanneih a siamin Mullins-a puakruk ken lai chu a rawn kap fuh a, a per lawp mai a.

Mullins-a chuan thildang ngaihtuah lovin a sa himna chauh chu a ngaihtuah tawh a. Chemte chauh chu a hmanraw neih chhun a ni tawh mai si a. Mary chu a pawt ding lawk a, a kaithla ta dawr dawr mai a. Dave-a'n a rawn kah ngam loh nan Mary phenah hlir chuan a kal a. Hmun awih vaklo hi an zuk thleng a, an kalna kawngthlang hla vaklo hi an zuk thleng a, an kalna kawngthlang hla vak lovah chuan far thing lian vak lo hi a ding a, chumi thlang lam chu kham awih chhe zet mai hi a ni a. Far thing dinna ațanga chhak lam erawh chu mual awih pangngai mai, mihring pawh kal theihna mai tur ni awm hialin a lang a.
Mary kut chu a la inphuar reng a, Mullins-a chuan Mary chu kawngkoah chuan kawng dung zui zawngin a mut a, awih pangah chuan a nam lum ta mai a. Mary chu a lum zel a, kham kovah far thing bulah a zuk innghat ta a. Mary lum lai chu Dave-a chuan chhak deuh ațangin a rawn hmu ve reng a, Chutihlai tak chuan Mullins-a pawh a hrechang tawh lo a ni. Mary chu a chesawn anga, a thlang khamah chuan a tla liam hman ang tih ngawt chu a ngaihtuah tawh a, Mullins-a pawh chu a tlanchhe ta zel a.
Dave-a chu hmanhmawh takin a tlan thla a, awih pangah chuan vawn tur zawng chung zelin a chhuk thla a. Mary awmna bul a zuk thlen chuan a lo chesawn hman ang tih hlauin a zuk kuah chawt mai a. Mary chu a rawn meng chhuak a, "Dave, i la him maw? Ka va lawm em," a lo ti sap a. Mahni dinhmun hlauhawmzia pawh ngaihtuah lova Mary chuan amah Dave-a chu a lo ngaihtuah hle a ni tih Dave-a'n a hriat chuan a lawm hle a, Mary chu a fawp ta a, "Mary, khawvelah hian phu tur che hi an awm lo, mahse, min nei duh angem? Ka fawp che kha pawi i ti em?" a han ti a.
Mary chuan, "Pawi tiin thinrim viau mah ila he ti chung te chuan i biangah ka beng thei chuang dawn che em ni?" nui chung hian a han ti a. Dave-a chuan, "Min ngaidam rawh, ka â hle mai," ti chungin Mary kut phuarna chu a phelhsak ta a. An awmna ngaia awm reng chu a fel dawn lo tih Dave-a chuan a ngaihtuah chhuak thut a, Mullins-a chu a lo kir leh pawh a ni thei a, kawng ko a chhuah chhoh phawt chu țha in a hria a, mahse, kalchhoh leh chu thil huphurhawm tak a ni. Mary hnenah chuan, "A hla vak lo bawk a, chhoh theih i inring em? I hmaah ka kal zel anga," a han ti a.
Mary chuan, "Ka huphurh khawp mai, mahse, nang nen kan nih dawn chuan," tiin a chhang a. Dave-a chuan a kawnghren a phelh a, Mary banah a hrensak a, fimkhur takin an chho dun ta a. A khat tawkin Dave-a chuan chemte in rahbi tur a kher chho zel a, harsa fein kawng koah chuan an chhuak chho dun ta a. Kawng ko an chhuah veleh Dave-a chuan, "Jim-a chu ka ngaihtuah hle mai,..... kai che ila i kal thei angem?" a han ti a. Mary chuan, "Kaih kher ngai lovin ka kal ve thei tawh ang," a ti a. Tichuan zawi zawiin an kal dun ta a.

Sudden-a thiltih tum chu a awlsam teh chiam lo. Kawng mumal pawh awm lohna tlang pangah chuan a chhuk thla zel a. Chuta a kal lai chuan Dave-a Rifle ri leh Mullins-a puakruk ri kha a han hria a, ngaihțha lo tak chungin pumpelh ni a a rin, kawng mumallo tak chu a zawh ta zel a. Kal thui tawk tawh nia a inhriat hnuin Dave-a te kalna kawng tan tur zawngin a peng ta a. Thui fe harsa taka a kal hnuin kawng chu a zu pawh ta hlawl mai a, Mullins-a chu a lo nghak ta a.
Mullins-a chu a lo lan lawk loh avangin a awmna lai chu a kal pel tawh niin Sudden-a chuan a ring hial a, mahse, chutih lai chuan Mullins-a pen ri niawm tak chu a hre ta a. Puakruk a phawi a, Mullins-a chu a lo lan chian veleh, "Mullins, ban phar rawh," tih pahin Sudden-a chu lung phen ațang chuan a lo zuang chhuak nghal a. Mullins-a chu silaia kah ang maiin a ding chawt mai a. A ban a phar a, mak ti deuh maiin Sudden-a chu a en reng a. Ani chuan, "Khawnge Mrs Gray a awm?" a ti a,
"Ka buai phah em a, ka kalsan ta mai a ni, Sark-a kut ațanga chhanchhuah tum chauh ka ni reng a," a han ti a. Sudden-a chuan, "A ni ang. Ui thil ruk sa, Ui dangin a chhuhsak leh ang chauh hi a ni ang chu. Mrs Gray chu zawng turin i kir thuai ang, khaihlum atana man tur che hian lo intiam lo ila chuan khaihlum nghal mai che hi ka duh tehlul nen, a pawi ngawt mai. Kal rawh, ka rilru min sawhsawn sak tur zawngin che hlek suh," a ti a, an inzui chho ta a. Mullins-a chuan a dinhmun hlauhawm zia chu a hrechiang hle a, pumpelh dan tur a ngaihtuah chhuak thei mai si lova, a tawpah zawng thi tho tho dawna a inhriat avangin a rilru a siam nghet ta a.
Tichuan kham ko sanna lai tak an thlen chiahin a pum a dawm a, natuar niawm takin a kun ta tlawk tlawk mai a. Sudden-a chu a rawn hnai vat a, chu veleh Sudden-a Rifle ngul chu Mullins-a chuan a veilamin a hnawl kiang a. Mullins-a chuan a dinglamin a chemte pai lai chu a phawi a, Sudden-a chu vih tumin a bawh ta thut mai a, Sudden-a chuan hnunglam a tawlh sawn pahin Mullins-a chemte chu silai ngulin a dang tleu a, mahse, Mullin-a kutthlak chu a nat em avangin an thil ken chu an thlauh ve ve ta a, Sudden-a chuan a puakruk a phawi hmain Mullins-a chuan a ban a va vuan zui a.

A chaklo zawk chu thi mai tur ni a inring ve ve chungin an inbuan ta thial thial mai a. Kawngthlanga an liam vaih chuan an thlang khamah chuan an lum hlum ngei dawn tih pawh an hre ve ve a ni. An thaw ri leh rahchhan țha zawnga an ke in lei an han phiat ri tih mai loh chu thawm dang hriattur pawh a awm lo. Reife an inbeih hnuin, Sudden-a chuan lung a rap hrual hlauh mai a, țhingțhi titih deuh hian a tlu ta a. A tlukna lai chu khamko ințanna lai tak a ni lehnghal a. Mullins-a chuan, "Sudden-a ka ni i ti maw kha? Thi nghal rawh," tih pahin Sudden-a chu nam liam mai a han tum a. Mahse, Sudden-a chuan a lo nam kir thei hram a.
Thih dun pawh pawisa tawh lovin Mullins-a chuan Sudden-a chu a pawm bet leh ta tlat mai a. Chu chu Sudden-a pawhin a hria a, chet dan kawng hrang a hriat chhuah thuai loh chuan an thi dun ngei dawn niin a ring a. Tichuan, "Dave, rawn kap suh," a ti ta țhawt mai a. Mullins-a chuan hnunglam a hawi ta zawk a, Sudden-a a vawnna kut pawh tlemin a thlah dul deuh a. Chu chu remchangah hmangin Sudden-a chu a tal thut a, a kut dinglam a tal chhuak a, rem vaklo chung chuan Mullins-a khabeah chuan a hnek sak a, rem vaklo hle mahse a theihtawp tak meuh meuha hnek a nih avangin a na hle tho a niang, Mullins-a chu a tlu ta nghe nghe a, "Ka in pe e, min ti tawh suh," tiin ngaihdam a dil ta hial a.
Zawimuangin a han ding chhuak a, mahse a tlukna bula Sudden-a Rifle thlauh chu a chhar a, Sudden-a chu a kap ta thut mai a. Mullins-a Rifle chhar tur kun chu a hmuh veleh Sudden-a chu a bawk thlawp a, puakruk a phawi nghal a, Mullins-a chu a kap ta zawk a. Mullins-a chuan Sudden-a chu kap fuh lo mahse Sudden-a erawh chuan a hlah ve ta lo a ni. Mullins-a chu a ding char awrh a, a thlang khamah chuan a tla liam thla ta a. Sudden-a chu kawngsir hnim hling neiah chuan a han țhu a, "Awmdan pangngaia awm nawmzia hi ka lo la hre miah lo a nih hi," a ti ta hial a. Chuta a chawlh lai chuan Dave-a te pahnih pawh chu an rawn thleng ve ta a.
Dave-a chuan, "Khama Mullins-a tla lai kha kan rawn hmu hman a, i tla ve ngei dawn a nih hi kan rawn ti hman hial a sin," a han ti a. Sudden-a chuan, "Nangman min chhan a nih kha," a lo ti a, Dave-a chuan a ngaihna hrelo fe hian, "In bul ka lo thleng hman si lova, engtinnge ka chhan theih ang che?" a han ti a. Sudden-a chuan, "Ka tihder a, i lo thleng tawh emaw a tih avangin a thi ta zawk a nih kha, nangni enge in chanchin?" a han ti a. Dave-a chuan thil awmdan chu a hrilh vek a, Sudden-a chuan, "A thi hma lutuk a, a pawi ngawt mai. Mahse, a aia sual zawk buaipui tur kan la nei tho," a ti a.

ADVERTISEMENT CLICK