SHERLOCK HOLMES - THE VALLEY OF FEAR (COMPLETED)

Hnuchhuina lampang chi ho
Rozami pachuau
Posts: 305
Joined: March 17th, 2018, 7:40 pm

Re: SHERLOCK HOLMES - THE VALLEY OF FEAR Chapter 1 - 6

Unread post by Rozami pachuau » May 22nd, 2018, 8:29 pm

SHERLOCK HOLMES
THE VALLEY OF FEAR
AUTHOR : SIR ARTHUR CONAN DOYLE
TRANSLATED BY : PL LIANDINGA
CHAPTER - 7
(Rozami Pachuau)

A CHINFELNA

Chumi tuk chuan tukṭhuan ei khamin Inspector leh White Mason-a chu chu lai police Sergeant, bathlara mûk âwm fêa an lo inbia hi kan han hmu a. An hmaa dawhkanah chuan lehkhathawn leh thirhrui lehkha ṭhahnem tawk tak mai hi a lo awm nuai a, chûng chu an thliar felin an phuah khawm mawlh mawlh a. Pathum chu an dah hrang bik a. Hlim hmel fe hian Holmes chuan, “Mi sual hnu chhuiin in la buai hle zel maw? Kan thirsakawr neitupa chanchin tharlam ber chu eng nge ni le?” a han ti a.

Mac Donald chuan a lehkha hmuh intiang khawm chu a’n kâwk a. “Tunah tak hi chuan, Leicester, Nottingham, Southampton, Derby, East Ham, Richmond leh hmun dang dang hmun sawmpali vela an hmuh thu a lo thleng. Hmun thum, East-ham, Leicester leh Liverpool-ah chuan amah ngei an man bawk. A ram pum hian kawrfual eng ha mihringin an khat ta emaw tih mai tur a ni,” a ti a.

Khawngaih âwm fe hian Holmes chuan, “Khai aw! Mr Mac, nang pawh Mr White Mason, uluk takin thurâwn ka’n pe teh ang che u. He thila ka lo inrawlh ve ṭantirh khan, thil awm dan hi a chanve emaw, a chhumbungin emaw in hnenah puangzar lovin, ka thil ngaih dan chu a dik tih ka hriat a, a kimchanga ka hriat theih hunah ka hrilh ang che u ti khan ka inṭawng delhkilh a.

“Chumi avang chuan tunah hian hria nia ka inngaih ang zawng zawng hi ka la hrilh lo che u a. A lehlamah chuan nangmahni hmang hian mawihnai takin he inkhelnaah hian ka lo tel ve ang ka ti a, chumi avang chuan in thâ leh tui hi a ṭangkai lo lamah mitkhap kar pawh in sên ka phal loh hi a dik ang. Chuti chuan ka thurâwn che u chu thumal pali lek a ni ta; 'Bansan rih rawh u,” a ti ta mai a.

Mac Donald leh White Mason chuan mak ti deuh mai hian Holmes chu an han thlêk ngial a. Inspector chuan, “A sâwtsâu lovin i hria a ni maw?” tiin a’n zawt a. Holmes chuan, “In thil tih dan hi a sâwtsâu lovin ka hria a ni. Thu dik hmuh chhuah chu thil theih lohvah ka ngai lo,” a lo ti a.

Inspector chuan, “Mahse, he thirsakawr nei pa hi, awm lo tawp thil kan hmuh chhuah chawp lah a ni loh. A pianhmang hrilh fiahna kan nei a, a zin-ip kan nei a, a thirsakawr kan nei bawk. Kan mihringa chu khawiah emaw hian a awm tur a ni. Eng vangin nge kan man loh ngawt ang?” a ti ta a.

Holmes chuan, “Ni e, ni e; khawi laiah emaw hi chuan a awm a, kan man ngei bawk ang, chumi avang maia in thâ leh tui hi East Ham emaw, Liverpool emaw lam lama in sên ral a ṭul lo ve. Pumpelh hnaivai a awm ngei ang,” a ti ta tlat a. Lungawi lo deuh hlek chung hian Inspector chuan, “Thil zêp i nei a ni. Mr Holmes, a nalh lo hle mai,” a ti ta ngat a.

Holmes chuan, “Mr Mac, ka hnathawh ve dan chu i hria alawm; mahse, a rei lo thei ang ber chhung chauh zêp ka tum ang. Thil han chin chhuah fai lêng mai ka duh hmasa phawt a, chumi chu a tih theih a ni tawh mai a, chutah kei chu ka inhnukdawk ang a, London lamah ka kir leh ang a, ka thil hmuh chhuah chu i kutah ka dah vek dawn a ni. I lakah hian ka ba nasa hle a ni, a chhan pawh tun hmain hetiang tluka thil mak hi ka la tawn ngai reng reng loh vang a ni,” a ti ta a.

Inspector chuan, “Mr Holmes, hei chu ka hriat phâk ve chi a ni ta hauh lo mai. Nizana Tunbridge Wells aṭanga kan lo kir khan kan ngaih dan kha a inang si a. Engti tihin nge hetianga ngaih dan thar hi i lo neih hman tak?” tiin a zawt a. Holmes chuan, “Min han zawh takah chuan han sawi ta mai ila, ka hrilh tawh ang che u khan nizan hun eng emaw ti chhung chu Manor House-ah ka va hmang a ni,” a ti a. Inspector chuan, “Eng thil nge awm ta?” a lo ti a.

Holmes chuan, “Tunah rih chuan chutiang zawhna chu tlangpui deuh takin ka chhang thei chauh ang che. Thu danga lai chuan he In hlui pui mai chanchin hi tawi tê, ngaihnawm deuh mai si, kawngkama kuhva khawr zuar hnen aṭanga ka lei ka chhiar a,” a han ti a. Chutia tih pah chuan lehkhabu thêmlêm deuh mai, a kâwm hma lama Manor House lem fiah lo ruaia chuang hi a kawrchung hnuai zawk ipte aṭang chuan a rawn phawrh a.

Holmes chuan, “Mr Mac, kan vela thil awm dan hriat kan tum tak tak chuan a chanchin hlui lamte pawh hi chhui a hlawk viau zel tih a lang asin. Ning hmel lo pho chhuak mai rih suh, hetiang lehkhabu thêmlêm pawh hian mitthlaah hian eng emaw min hmuhtir chuai chuai thei zel a nia.

"Han en mah che - James-I lal lai, a lal kum nga-naa din; a aia In hlui zawk fe hmuna sak, Birlstone-a Manor House hian hetiang hun laia an In sak ṭha ber ber tuna la hmuh theih nihna hi a hauh pha ve...” a tih lai tak chuan Inspector chuan, “Mr Holmes, min chhaih kual mai mai a ni,” a lo ti a.

Holmes chuan, “Ho mai mai, Mr Mac! I thin thawk ka hmuh hmasakna ber a ni. I ngaihthiam dawn loh chuan a bu chu ka chhiar tawh lo mai ang; mahse, kum 1644-ah mi pakhatin a luah a, Tualchhung Indo lai khan Lalpa Charles-a chu he Inah hian ni tam an thuk ru a, chutah George Pahnihna chuan a va tlawh a, tih thute hi chu a sawiin ka’n sawi ang e. Tichuan he In hlui tak mai hian makna leh danglamna eng emaw tak a nei tih i hre thei mai ang,” a ti ta a.

Inspector chuan, “Mr Holmes, chungte chu ka ringhlel pawh a ni hran lo; mahse, keini thu kal lai nen inzawmna a nei hlawl lo,” a ti ta tawl mai a. Holmes chuan, “A nei lo maw? Kan thu kal lai nen inzawmna a nei lo maw? Mr Mac, kan ei zawnna anga chaw hmuh tum tan hi chuan ngaih dan hi a dung leh vang pawhfan thiam a ṭul ṭhin asin. Ngaih dan inchawhchawrawi te, hriatna hman ril thiam te hi thil namai a ni hlei nem.

"Hetiang thu han hrilhtu che hi eng ka ni bik lo, suahsualna leh a kaihhnawih theih thila mahni mihlim phûra phûr ve mai mai ka ni a; mahse, i aia ka lo zawhte upat ve avang leh i aia thil chi hrang hrang tawng hnem ka lo nih ve avangin i ngaithiam hram a ni ang chu,” a ti a. Inspector chuan lungawi hmel fe hian, “Chu zawng, teh meuh mai. I thu sawi hian awmzia chu a nei alawm; mahse, a lungphûr thlêng tlâng hêl zawng hian thil i chhep chhuak ta ṭhin a, a kual thui deuh ṭhin êm a ni,” a ti a.

Holmes chuan, “A ni tak, a lo ni maw, tun hma thil mai mai sawi tawh lovin tuna thil thleng mek hi i buaipui teh zawk tak ang. Nizan chuan, ka sawi tawh angin, Manor House-ah chuan ka va lêng ta ngei a. Mr Barker-a emaw, Mrs Douglas emaw ka va hmu ta hlei lo va. A dik chauh chuan han len khung buaithlak vel kha a ṭulna ka hre tlat lo a ni; mahse, kan pi-i chuan lusûn a tina lem lovin ka hria, a zanriah ei reng a la tui mai.

"Ka va kalna chhan ber chu Ames-a zawk a nia. Ani chuan ka luh theih dan tur leh thil dang min buatsaihsak bakah lehkha chhiarna pindana ngawi renga eng emaw chen ka ṭhut theihna tur a lo ngaihtuah a, mi dang tu mah ka va zar buai lo va, inlêng hnawksak lo tak ka ni ta awm e.”

Chutih lai chuan kei chuan, “Eng a! Eng nge i va tih?” ka lo ti ve hluai a. Holmes chuan, “Khaih, khaih; tunah chuan thil engkim mai hi a nih tur ang a ni tawh alawm. Lehkha chhiarna pindan chu pindan a nih dan ang pangngai thliamin a lo awm a, minute sawm panga zet chu hlawk takin ka va ṭhu ta a ni,” a ti a.

Inspector chuan, “Eng nge i va tih?” a lo ti a. Holmes chuan, “Thil ho tê pawh hi han sawi ropui chiam a châkawm ṭhin, ka va tih chu ho tê maw le — Infiamna hmanraw khingbai lehlam kha ka va zawng a ni. He thilah hian tel ve-na lianpui nei angah ka ngai tlat reng mai a ni. Ka va hmu chhuak ta nghe nghe a,” a ti leh mai a.

Inspector chuan, “Khawiah nge i va hmuh?” a lo ti leh a. Holmes chuan, “Chu chu a ni ta ber mai! Tah chuan kan thil hmuh chhuah duh chu a tlang hmawr kan vuan pha ta chiah a ni; mahse, i han hêl kual rih deuh teh ang, a...i han hêl kual rih deuh fe teh zawk ang, ka hriat ang ang chu in hre ve ang tih erawh chu ka tiam a che u,” a ti a.

Inspector chuan, “I duh ang zâwng tê lo chuan tih ngaihna dang awm chuang hek lo le; mahse, a eng vang khan nge he thil hi bawhzui tawh lo tura min han hrilh ngawt chu le? Eng vangin nge kan bansan ang?” a ti ta a. Holmes chuan, “My dear Mr Mac, i bansanna tur chhan chu thil ho tê a ni, chu chu — eng nge i zawn tih i hre tlat lo alawm,” a tih khum ta sak mai a.

Inspector Mac Donald-a chuan, “Birlstone Manor-a mi, Mr John Douglas-a thattu leh a thah chhan kan zawng a ni,” a han ti a. Holmes chuan, “A ni tak, a ni tak; in zawng tak e; mahse, khawi lam mihring emaw ni, thirsakawr chunga chuang ringawt mai lakah zawng i tha leh tui seng ral duh suh. Eng mah i anpui lo vang tih ka hrilh a che,” a ti leh ta hmiah mai a.

Inspector chuan, “A nih leh eng nge ti se min tih?” tiin a han zawt a. Holmes chuan, “In tih duh dawn chuan tih tur chu chiang deuhvin ka hrilh ang che u,” a ti a. Inspector chuan, “I khawsak dan hi mak teh ṭhin mah se i chet dan mak tak phênah hian awmze eng emaw hi i nei ve ziah tih ka lo hre tawh ṭhin a; chuvangin, ti tura min râwn chu ka ti nang e,” a ti a.

Holmes chuan, “Mr Mason, nang ve hi?” a han ti a. Holmes-a thil tih vel dan chu Mason-a tan chuan a bangbothlak khawp a, a tih ngaihna hre lovin Holmes-a leh Inspector chu a melh tawn zawk zawk a, chutah, “A... Inspector meuh tan pawha zawm tlak a nih chuan ka tan chuan a zawm tlak em em ang chu,” a ti ve ta ngawt a.

Holmes chuan, “Ṭha lutuk! Chuti a nih zawngin, in pahnih hian hlim deuh mai leh nuam sa deuh maiin kea leng vel mai mai turin ka hrilh mai teh ang che u. Mi hian Birlstone tlang dung sang lai aṭanga Weald vel han thlir hi a mawizia an hrilhfak a. Chaw chhun erawh chu khawi laiah emaw indap chawp a ngai ngei ang a; mahse, he laiah hian mi thar ve mai ka ni a, khawi lai nge remchang ang tih chu a der pawha han sihhmuh tur che u ka hre lo. Tlai lamah chuan in chau deuh nain in hlim...,”

Chutah zawng, thinrim zet mai hian Mac Donald-a chu a ṭhutna aṭang chuan a zuang tho va, “Pu-a, hei zawng infiamnaah pawh a lutuk deuh a ni,” a ti ta mai a. Holmes chuan Mac Donald-a darah chuan hlim hmel tak hian a’n chûl a, “A nih leh, chuti a nih zawngin in duh ang angin ni khat chu hmang liam ta che u. In duh duh ti ula, in duhna hmun hmunah kal ula; mahse, matheilovin he hmunah hian khaw thim hmain min rawn kan dawn nia; Mr Mac, matheilovin aw,” a ti ta a.

Inspector chuan, “Chu zawng a ngaihthlak tlak deuh,” a lo ti hluk a. Holmes chuan, “Ka thurâwn che u kha chu a pawmtlak hlawm viau ang; mahse, in tih ngei ngei erawh chu ka phut lem lo, ka mamawh hunah che u he hmuna in lo kal hi ka duh tawk mai; mahse, kan inṭhen leh hmain Mr Barker-a hnena lehkha pakhat min ziahsak turin ka duh che a ni,” a ti a. Inspector chuan, “Eng lehkha maw?” a lo ti a.

Holmes chuan, “A ziah dan tur ka lo sawi ang e, i rem tih chuan ka tihna. I inpeih maw? ‘Pu duhtak, In hualtu dil tuiah eng emaw hmuh kan inbeisei avangin tui siak kang kha kan tih tur niin ka ngai...' ," Inspector bawk chuan, “A theih loh. Ka zawt chhuak vek tawh,” a lo ti leh ta a. Holmes chuan, “Ho mai mai, khawngaih takin, ka tih ang chuan ti ve mai mai teh,” a tihsan mai a.

Inspector chuan, “A nih leh sawi zel rawh le,” a ti ve leh ta a. Holmes chuan, " ‘..a, kan thil hmuh chuan kan thil chhui laiah hian pawimawhna a neih ve ka ring a ni. Thil tih dan tur chu ka ruat fel vek tawh a, naktuk zing takah hian hnathawktute chuan hna an ṭan dawn a, luitê tui kha an la pêng...,” a tih lai tak chuan Inspector chuan, “A theih loh,” a lo tihsak leh ta tlat a.

Holmes erawh chuan a thu sawi lai chhunzawmin, “ 'Luite tui kha an la pêng dawn a ni. Thil awm dan hi rawn hrilh hmasak che ṭhain ka hre ve mai a ni,’ " a ti ta a. Chutah, “I hming ziak rawh le. Chumi hnu chuan dar li velah tu emaw i va pektir ang a; chutih lai chuan he pindanah hian keini kan inhmu khawm ve thung ang. Chumi hma chuan i duh leh i in-uisalehlin ang a, i duh leh zai i zir dawn nia, kan thil chhui lai hi tiam chin bithliah fel taka kan chawlhsan rih a ṭul tlat a ni,” a ti ta a.

Kan han inhmuh khawm leh chuan khua pawh a lo tlai fe tawh a. Holmes-a chu a thutak kher mai; kei erawh chu thil kal zel dan hriat châk lutukin ka dingdihlip lo chauh va, kan sawrkar uibûk pahnihte erawh chuan Holmes-a hnial dan an châk a, an lung a awi zat lo tih pawh ka hria.

Ngui hmel pu lek lek hian Holmes chuan, “Khai le, pute u, in duh ang angin min han teh kual teh u le, chutah ka thil hmuh aṭanga ngaih dan ilo ka lo siam vete chuan belhchian a dawl leh dawl loh chu in ngaihtuah zui dawn nia. Hei zanin tlai hi khua a mawi vak lo va, kan ram chhuahnaah hian eng chen nge kan thang dawn ka hre lo, chuvangin, in thuamhnaw lum ber ber inbel rawh u. Thil pawimawh ber chu thim chhiat hmaa kan awmna tur hmun thlen a ni, chuvangin, rem in tih chuan tunah kan chhuak nghal ang,” a han ti zawm zat a.

Manor House hualtu huan angreng hungna pawn zawk hrulah chuan kan kal zar zar a, chutah hmun pakhatah hian a hungna chu a lo kaw deuh va, chutah chuan kan lut a, Holmes a hnung zuiin kan han kal leh ngial a, hmun pakhatah hian hnimbuk a lo awm a, chumi phen aṭang chuan kawngkharpui leh leilawn pheh theih chu kan hmu thei a. Leilawn pheh theih chu an la phet hman rih lo va, chutah Holmes chu pangpar buk phênah chuan a kun phei leh ta zauh zauh va, a tih dan ang chuan kan ti phei ve ta zel bawk a.

Lungawi vak lo tih hriat tak hian Mac Donald-a chuan, “Hei engtin nge ni zel dawn?” a ti a. Holmes chuan, “Dawhthei takin nghak hram la, phunnawi lovin,” ti ngawtin a lo chhang a. Inspector chuan, “A eng vang berin maw he hmunah hian kan han bihruk rik ngawt? Thil awm dan hi min hrilh fai vek ka lo beisei ve takzet asin,” a la ti ta cheu va.

Holmes chu a nui a, Mac Donald-a hnenah chuan, “Watson-a hian, ‘Lemchanna thinlung them i pai a nih hi,’ min ti ṭhin a. A hun dik taka a hring a hrana lemchan thawnthu ngaihnawm lutuk han chhuah bâka châk hi ka nei awm lo asin. Mr Mac, a ngaihnawm zawng hian kan hna hi bei ta lo ila chuan a ngui theih ngawt ang. Kan thil hmuh chhuah ve chhunte hi a ropui thei ang bera tar chhuah tur a ni ngai.

"Chuti ni lo se, hringnun hi a va’n hlim thlak âwm loh em! I phûr chang chuan ṭhiante darah i’n beng a, a nih loh leh ṭhenkhat chu mawlmang deuh deuhvin an tih duh loh ti-ah kan han inpuh a. Hengte hi kei chuan a hring a hrana lemchanna ang vekah ka ngai asin; mahse, a chanve chauh hmuha thil hre thiam thei nihna te, thil lo thleng tur hrilhlawk thei nihna te, ngaih dan phunglung pui ni âwm dik ta tlat si te hi hringnun tihlutu a ni ve lo maw?

“Tunah tak hi chuan thil lo thleng leh tur nghâkin i awm hle hle thei lo va, sapêltuin a sapêl lai a nghâk ang veng vengin i rilru pawh a zauthau a ni. A nih leh thil lo thlen dan tur leh thil kalphung hi a bu ang thlap thlapin lo hrilhlawk ta vek che ila chutianga rilru zauthauna chu i nei thei dawn em ni? Mr Mac, a ni lo ve, dawhthei taka awm turin ka ngen a che, a hunah chuan thil chu i la hre fiah vek tho vang,” a ti a.

Holmes-a thu sawi chu a dik tlat si avang leh tihngaihna dang a awm chuan loh avanga thinrim loh tum tak hian Inspector chuan, “A lo nih hlawm tak chu; mahse, khaw vawtin min hmeh hlum hmain hringnun tihlutu te, hringnun tinuamtu te leh thil dang reng reng pawh kan tawn hman hram ka beisei,” a ti ve ta a.

Kan awm dan chu a hahthlâkin a rei bawk a, hrehawm tia thaw kawih kawih âwm tak pawh kan ni. In hlui pui mai chu khaw thim chuan zawi muangin a tuam a; diltui aṭanga khaw vawt rawn insiam chuan min han tuam a, kan kha kan khawng hlawk hlawk mai. Lehkha chhiarna pindanah leh kawngkharpui zawnah chauh chuan khawnvar êng hmuh tur a awm a; a bâk chu midum kawchhung ang mai hian a thim map mai a.

Inspector chuan, “Hei eng chen nge hetianga awm ngai dawn? Eng nge kan nghah hi?” a rawn ti leh ta thut mai a. Holmes chuan, “A rei tur leh tur loh thu-hlaah chuan nang aia hriat bik eng mah ka nei hauh lo mai. Mi sualte hian an chet dan tur hi rêl kal hun ang maiin bithliah fel ta sela chuan keini tan a buaithlak lo sawt ang le. Eng nge kan nghah tih kha zawng ; saw saw a ni kan nghah chu,” a tih zawm ta a.

Chutia a sawi lai chuan lehkha chhiarna pindan tukverh zawna êng lo chhuak chu tu emaw hian a hliah a, tukverh zawnah chuan a vei vel ni ngei tur a ni. Kan awmna chu tukverh zawn siah chu a lo ni a, chutah tukverh chu tu emaw chuan a hawng a, a hawn zawng chuan tukverh kawpza pawh a chik ṭeih ṭeih mai. Tukverhah chuan In chhunga tu emaw awm chu a rawn dâk a, amah enthlatu an awm nge awm lo tih vel chu ngun takin a’n en hmasa te te ni awm a ni.

Rei vak lo a dah chhuah a, a hawi kual hnu chuan tlemin a rawn kûn hniam leh deuh va, chutah tui khawih rî ni âwm tak kan hre zui a. A rî aṭang chuan dîl tui chu engin emaw a zu chawk vel ni ngei tur a ni. Rei lo teah sangha mantuin nghakuaia sangha a man ang hian eng emaw hi a phih chhuak a, a thil phih chhuah pawh chu thil mûm deuh, lian tawk tak a ni a, tukverhah chuan a hnûk lut ta a.

Chu veleh Holmes chuan, “Khai le! A hun ta!” a han ti a. Kan vaiin kan tho va, ke tliak ang hne hnein Holmes-a hnungah kan bai phei selh selh a. A chhan pawh kan ṭhut rei tawh avangin kan ke a lo khawngin a lo mu zo tawh tlat a ni. Hetiang hunah hian alawm, Holmes-a hi mak ka tih em em ṭhin, a thau a khawh emaw tih mai tur hian a chevel hi a rang riau ṭhin.

Holmes chuan leilawn chu a tlan kai a, kawngkhar dar chu dim lo zetin a va hmet ri a, chhung lam aṭang chuan kawngkhar kalhna hawn ri a lo chhuak a, kawngkharah chuan Ames-a a lo ding ṭai a. Eng mah sawi lovin Holmes chuan Ames chu a kal pel a, tukverh aṭanga kan hmuh, In chhunga mihring awmna pindanah khan Holmes chu a lut ta a.

Dawhkanah chuan pawn lam aṭanga kan hmuh, khawnvar êng kha a lo awm a; mahse, kan luh veleh chuan chu khawnvar chu Cecil Barker-a chuan a la vat a, In chhunga kan lut lai min ên nân a hmang ta a. Cecil Barker-a chuan thîp zeta min lo melh chung hian, “Hei eng thil nge ni ta mai? Eng nge rawn tih in tum reng reng?” a lo ti rum al mai a.

Holmes chuan rang takin pindan chu a’n melh kual a, dawhkan hnuaia thil infun chu a han hmu a, chumi kawk chung chuan, “Mr Barker, hei hi kan rawn kal chhan a ni. He thil funah hian infiamna hmanraw khing lehlam kha a awm a, chu chu dîl tui aṭanga i phawrh chhuah hlim hlawt a ni bawk,” a ti leh ta zel a. Mak ti fe hian Barker-a chuan Holmes chu a’n melh a, “Engti tihin nge thil awm dan hi i lo hriat ve chu le?” a han ti a. Holmes chuan, “Ka dah a nih vangin ka hria maw le,” a lo ti mai a.

Barker-a chuan, “I dah maw! Nangmah hi!” te a ti ta nawk nawk mai a. Holmes chuan, “ ‘Ka dah’ ti lovin, ‘Ka dah leh’ ti ta ila a dik zawk âwm asin. Inspector, infiamna hmanraw khing lehlam bo khan min kap riau ka tih kha i la hre châwk ang a. I ngaihtuah zui hman ta lo a nih kha. Tui awmna a hnaih a, thil rit tak eng emaw a bo bawk si chuan tuiah eng emaw an thlâk a, a làn loh nan chu thil rit tak chu an hmang tih han chhût chhuah mai chu a harsa lo hle asin.

"Ka thil chhût chu a dik leh dik loh fiah a harsa lem lo bawk a, nizan khan Ames-a ṭanpuina azarah Watson-a nihliap hmawr kawmin he thil intêl hi ka khai chhuak thei ta a ni. Mahse tu dah nge tih finfiah a la ngai a, he dîl tui hi siak kang tur anga insawiin hetiang hi kan ni zo ta a nih hi. Naktuk hi dîl siak kang hun kha a ni a, chuvangin, a dahtu chuan khawthim laia a tih a ṭul tlat. Hei, a khai chhuaktu lah mi pali laiin kan hmu a, khai le, Mr Barker, i khabe liam kan chân ve thung tawh a dik ang,” a ti ta a.

Sherlock Holmes chuan thil fun chu a’n phelh a. Infiamna hmanraw tumtlang tak mai chu a la chhuak a, pindan kilah, a lehlam awmnaah chuan a theh phei a. Chutah pheikhawk bun khat a’n phawrh leh a, a keartui chu kawk chungin, “American-ho kut chhuak a ni tih in hmu mai ang,” a han ti a. Dawhkanah chuan chemte pai nei, sei ṭha tawk tak mai hi a rawn dah chhuak leh a. Chumi zawh chuan puan têl hi a’n phawrh a; chu puan intêlah chuan mawza te, tawnzau te, puan phawk kekawr leh kawr, rawng buang leh kawrfual tawi angreng tak, a eng hi a lo awm a.

Holmes chuan, “Thuamhnaw dang hi chu thuamhnaw dang ang bawk a ni ve mai a; mahse, kawrfual hi a danglam ta bik a ni. Khawi lai laiah emaw hian thil han chhui zui theihna tur âwm thil a awm thlih thliah a,” tih pahin êng thlârah chuan a’n lek lang a, a kutzungṭang sei deuh mai chuan a dap zat zat a. “Hei a ipte hi a chhung thuahnaah a lut nghal a, sava ilo veh dawna silai han paipawnna atana remchang turin an siam a nih hi. A nghawnga hi a ṭhuitute chhinchhiahna pawh a awm alawm - Neale, Outfitter, Vermissa, U.S.A.

“Chawhnu lam khan lehkhabu dahna Inah ka kal a, Vermissa hi United States-ah chuan kahpathir leh lungalhthei laih chhuahna hmun ṭha ber a ni tihte ka va hria asin. Mr Barker, Mr Douglas-a nupui hmasa zawk leh lungalhthei laih chhuahna vel kha i sawi pawlh dawn dawnin ka hria a,

"Chuti a nih chuan lehkhathema, V.V tih chuang khu Vermissa Valley tihna a ni ang tih ka’n ring ringawt a, chuta ṭang chuan tual that turin tute’n emaw tu emaw an rawn tir a, chu hmun vek chu Valley of Fear an tih te hi a nih ka ring rum rum mai. Chuti chin chu mumang ang ruai chuan ka hre ve a; mahse, a hre chiang lo zawk ka ṭawng ta zuah zuah a, nangma’n han sawi fiah ta che,” a ti ta a.

Holmes-a thu sawi lai vela Cecil Barker-a hmel inthlak dan vel lo thlir chu thil hmuhnawm a tling vein ka hria. Mak tihna te, thinrimna te, buaina te hi a rawn lang ṭhin a. A tawpah chuan a tukkhum tihchhah lamah ram ṭan a tum ta a ni ber ang chu, “Mr Holmes, i hre bawk a, thil dang pawh min han hrilh zawm zel la,” a ti ta daih mai a.

Holmes chuan, “Mr Barker, eng emaw chen chu ka la hrilh belh ṭeuh thei ang che u tih ka hria; mahse, hmuipui pu i awm alawm, tlawm han ngai ta che,” a lo ti ve ta tlat a. Barker-a chuan, “Chuti maw? Ka hrilh theih chhun che u chu, he thil hi zêp a ṭul a nih pawhin keima’n ṭul ka tih vanga zêp duh ka ni lo, tu mah ka phatsan dawn lo,” a ti leh a.

Inspector chuan, “Mr Barker, chuti zawnga i thlêkpui dawn a nih chuan man theihna che kan neih hma chuan kan hmuh phâka i awm reng a ṭul dawn a ni,” a lo ti ve ta a. Barker-a chuan, “In duh ang angin ti ula ti nia,” a ti leh mai a. Barker-a hmel han en reng reng chuan a duh loh zawng ti tura han beisei chi emaw, thlem chi emaw a ni hauh lo tih a lang reng mai a, thu a tawp a ang kher mai.

Mahse, tihngaihna hre lova kan ngawih ṭhap lai chuan hmeichhe aw a lo ri ve ta. Kan thu sawi chu pindan kawngkhar kau deuh phên aṭang chuan Douglas-a nupui chuan a lo ngaithla reng lo niin, pindanah a lo lut a, “Cecil, min tihsak tam tawk tawh. Thil eng pawh lo thleng sela, i tih tur chin chu i ti daih tawh,” a ti a.

Sherlock Holmes chuan, “Ti tawk tawh a, a ti lutuk mah mah. Ka pi, ka khawngaih ngawt mai che. Min ring tawkin police-te hi thil awm dan chu a kip a kawiin hrilh tur chein ka ngen duh bawk che a ni. Kei ngei pawhin thil ka tisual. Ka ṭhianpa Dr Watson-a hnena i thil sawihmuh kha lo bawhzui âwm tak ka ni a; mahse, khatih lai kha chuan he thilah hian tel ve-na i nei ang tih rin theihna tur chhan ṭha tak ka nei tlat a ni. Mahse tunah chuan chutiang chu in lo ni lo tih ka hre chiang ta a. Chu bakah, thil tam tak hriat loh kan la nei a, khawngaih takin amah, Mr Douglas-a ngei hian thil awm dan chu min han hrilh fiah se ka duh hle a ni,” a ti ta mai a.

Holmes-a thu sawi a’n hriat chuan Mrs Douglas chu mak ti lutukin a ṭê ṭhawt a. Keini pathum pawh chuan mak kan ti ve a ni ang, kan ṭê chhuak hialin ka hria, chutih lai chuan bang aṭang chuan mihring hi lo chhuak maiin ka hria a, pindan kil thim aṭang chuan a hmel kan hmu ta mai a.

Mrs Douglas-i chu a han inher a, a pasal chu a va kuah nghal a. Barker-a pawh chuan Douglas-a kut phar chhuah chu a lo dawm ve bawk a. Douglas-a nupui chuan, “Jack, heti hi a ṭhat dan ber a ni zawk, ka hria alawm, ti hian a ṭha zawk,” a ti mawlh mawlh mai a. Sherlock Holmes pawh chuan, “Nia, Mr Douglas, a dik a ni. Thil ṭha ber a ni tih i hre mai ang,” a ti a.

Rawn kal tharpa chuan mit khap sawk sawk chungin min han melh kual a, khaw êng chu ngaiah a la neih chiah lo ni âwm a ni. A hmel chu chhinchhiah tlak khawpa hmuhnawm a ni; mitmeng buang rum angreng tak, hmuihmul khauh deuh tan rual hmerh hmawrh, khabe bial deuh leh dawh deuh lek lek, chak hmel tak mai, nuih nana îtawm fahran kareh pu a ni a.

Rei ngial min han thlir kual hnu chuan ka hnen lam a rawn pan a, lehkha têl hi min pe ta a. Ka hnenah chuan, “Ka hre tawh ṭhin che alawm,” a han ti a. A awphawi chu English dik tak awphawi a ni lo va; American dik tak awphawi pawh a ni hek lo, a thâwp deuh sat a, a ngaihthlak a nuam hle bawk.

Douglas-a chuan ka hnenah chuan, “Hengho chanchin ziaktu hi i ni tih ka hria. Dr Watson, tun ṭum thil ang tluka mak leh ngaihnawm hi chu i la hre ngai bik lo vang, chu chu ka hrilh ngam che. I duh ang zâwng zâwngin ziak la; mahse, thil awm dan dik chu i tarlan phawt chuan i thu ziahchhiartu i hmai lo vang.

"Ni hnih chhung chu bâwm tâwtah ka inkhung a, chumi chhung chuan ka pindana khaw êng lo lut tlem tê ringin thil awm dan chu ka ziak ta char char a ni. I thu ziah chhiartu leh nang hi chu ka thu ziah chhiar tur chuan ka sawm che u a ni. Hlauhna Luiruam chanchin chu kha lehkha têlah khan a awm e,” a han ti a. Sherlock Holmes chuan zawi tê hian, “Mr Douglas, chu chu thil kal tawh a ni a, tuna thil awm dan hi a ni hriat kan duh chu ni,” a lo ti sap a.

Douglas-a chuan, “Ka pu, in hre mawlh ang. Ka sawi chhungin mei ka zu thei ang em? Ka zûk theih dawn chuan a va’n lawmawm ve. Mr Holmes, ka hriat sual loh chuan nang pawh mei zu mi ve bawk i ni a, i hriain ka ring. Iptea meizial ak reng si a, min man chhuah phahna a nih hlauh vang ngawta han zûk ngam tlat loh mai chu hrehawm tak a ni,” a ti a.

Holmes-an meizial a pek chu a han hîp vang vang a, chhuar nghengin a ṭhu âwn âl âl a. “Mr Holmes, i chanchin hi ka lo hre tawh ṭhin asin; mahse, hetiangin kan la inkâwm ang tih chu ka ring phak miah lo. Kha lehkha têl kha i chhiar zawh hunah zawng, thil thar eng emaw ka rawn thlen che tih i hre mai ang,” a han ti leh a.

Inspector chuan Douglas-a chu zawlbûka hmeichhe lut chhun ang mai hian mak ti deuh maiin a thlir vawng vawng a. Rei ngial a thlir hnu chuan, “He thil zawngin min barakhaih chiang kher mai! Nang hi Mr John Douglas-a, Birlstone Manor neitu i nih si chuan tun ni hnih chhung khan tu pa ruang avangin nge kan buai hrep ni? Tunah khan khawi aṭanga lo chhuak nge i nih? Lei khi kar aṭanga lo chhuak ni maiin i mawi e,” a ti ta a.

Holmes chuan kut zungchal thin pahin, “Mr Mac, he lai hnaia kuhva dawr vela an zawrh, he Birlstone Manor chanchin ngaihnawm lutuk mai kha i chhiar ve lo a ni ngei ang. King Charles-a an thuhrûk thu kha i hre ve lo a ni. Khatih lai hun khan bihrûkna ṭha tawk deuhvah lo chuan tu mah an biru bo mai hlei nem. Hmanlaia an bihrûkna ṭhin chu tun laiah pawh a la hman theih tho bawk. Mr Douglas-a hi he In hulhliap khuh phak bâka hmuh hi ka lo tum ngai reng reng hlei nem,” a lo ti a.

Inspector chuan thinrim deuh tak hian, “Mr Holmes, hetiang thil tenawm hi eng chen nge i lo hman tawh? Thil ṭangkai lo tur zawn nan eng chen nge kan tha leh tui kan sen i phal?”a ti ta khawl khawl mai a. Holmes chuan, “My dear Mr Mac, minute khat pawh a lo thlawna in tha leh tui in sen ral ka phal hlei nem. He kan thil buaipui awmzia hi nizan maia ka hriat kha a ni ve bawk a.

"Zanin tlaiah lo hi chuan ka tih dik leh dik loh a finfiah theih tlat loh avangin vawiin khan i ṭhianpa nena lêng khawthawng turin ka râwn ta che u a nih kha. Thil dang tih theih ka nei em? Dil tui aṭanga thuamhnaw ka phawrh achinah kha chuan kan ruang va ena kha Mr John Douglas-a ruang a ni thei lo tih ka hre nghal a, thirsakawr chuang pa ruang kha a ni ang tih ka ring bawk.

"Ngaih dan dang awm thei zawng zawng nena ka’n bûk kual velin a âwm ang thei teuh ber chu Douglas-a nupui leh Barker-a hian Dou-glas-a hi he In chhungah hian an thukru a nih ka ring ta ber a, hun ralmuang deuh zawkah a tlan chhuah mai an beisei ta a ni ang tiin ngaih dan ka siam nghet ta mai a ni,” a ti ta zel a.

Mr Douglas-a chuan, “I ti dik angreng ngawt mai. Ka lo ngaih dan chuan in Kumpinu dan leh hrai vel hi ka kûn pialsan mai theiin ka inring a, chu bakah, min ûmtu uisathiam rual hi ka thing thla fel theiin ka inring bawk a ni. A tir tê aṭang khan thil zahthlak eng mah ka ti lo reng reng a, chu mai ni lovin ka tih tawh ang chu ka ti nawn ngam bawk ang; mahse, ka chanchin ka’n sawi ang a, ka thil tih tawha chungah chuan ngaih dan in lo siam ang chu. Inspector, fimkhur tura min hrilh lam lo tum duh suh, thu dik tlawh chhana ṭan tlat chu ka hreh lo ve.

“A bul aṭanga sawi pawh ka tum lo, khatah khan a bul leh bâl chu a awm vek,” tih pahin ka lehkha têl ken chu a’n kawk a. “Tichuan, heti hi kan ni ta a nih hi; min thah châk ngawih ngawih an awm a, chu mite chuan kei mi tihhlum nan hian an kekawrtê thlengin an hralh fai ṭhak duh ang, an tan chuan kei mi huatna tur chhan ṭha tawk tak a awm tlat a ni. Anni an dam a, kei ka dam ve chhung si hi chuan he khawvelah hian ka tan hmun him tawk reng a awm lo.

"Chicago aṭangin California-ah min ûm lut a; chutah America ram aṭangin min ûm chhuak a; he lai hmun fianrial tak ka lo thlen hian ka hun hnuhnung lam chu lungmuang takin ka hmang ve thei dawn tawh niin ka ngai a. Ka nupui pawh thil awm dan ka hrilh ngai lo reng reng. Eng vangin nge ka hrilh ve kher ang? Ka hrilh vaih chuan lungmuangin engtik lai mahin a nui ngai lo vang.

“Mahse ka nupui hi chuan thil awm dan chu a hre thawi vuaiin ka ring tho, a chhan pawh khawi maw lai laiah ṭawng ka lo cheh palh ve leh zauh ṭhin tlat a ni; mahse, nimina in rawn luhkhung hnu tih chauh lo kha chuan thil awm dan a hre tak tak lo, nangni pawh kha a hriat zawng zawng a hrilh fai vek che u a nih kha. Chutiang bawkin Barker-a pawhin a hriat zawng zawng a hrilh che u a nih kha.

"A chhan pawh kan buai zan khan thil awm dan sawi fiahna hun a awm tlat lo a ni. Tunah chuan ka nupui hian thil awm dan a hre ve vek tawh a, hman hmanah khan lo hrilh tawh ila chuan a tihzia lehzual tur; mahse, a hun lai chuan thil ṭha ber leh finthlak ber hi hriat a harsa a ni, ti raw bawihte,” tih pahin a nupui kut chu a’n hmer vawng vawng a, chutah, “Ṭha bera ka hriat ang chuan ka ti ve bawk a nia,” a han ti zui leh a.

A thu sawi chhunzawmin Douglas-a chuan, “Tichuan Pute u, kan buai hma ni chiah khan Tunbridge Wells-ah ka va kal a, kawtthlerah chuan mi pakhat hi ka’n hmu vuai a; mahse, ka hmuh vuai chuan ka mihring hmuh chu tu nge tih ka hre nghal mai, a chhan pawh hetiang kawngah hian ka mit a var em em tlat a ni. Ka hmelma azawnga a hlauhawm ber mai, chinghne rilṭamin beramno a hmuh chhun a um tluk zeta mi chhui ngawrhtu a ni a.

"Thil awm dan a fel lo tawp tih ka hria a, eng ang buaina pawh lo thleng se, lo hmachhawn turin ka lo inpeih ve ta a ni. Ka tum dan phei chuan mahni chauhva chinfel vek mai ka tum a. Tun hmate pawhin ka vanneihzia hi America ram pumpui sawi hat hat khawp a ni ve reng a, ka vanneihna chuan min la thlah loh ka beisei tlat bawk a ni. Chumi ni chuan nilêngin ka invêng ru ta ran mai a, huanah takngial pawh ka leng duh ta lo va.

"A lo hlauhawm reng a, khati khawp kha chuan lo fimkhur ta lo ila chuan a lam hawia kut ka lek ve hma hauhvin a musep thun tling khan min phuh darh vek dawn a lo ni reng mai. Leilawn kan pheh hnu hi chuan ka ngaih hi a ngam deuh ṭhin reng bawk a, chumi ni pawh chuan leilawn kan pheh fel hnu chuan ka hmelmapa chu ka ngaihsak zui duh ta lo reng a; mahse, kan Inah lo lutin pindan aṭangin min lo châng reng ang tih zawng ka hre pha lo.

"Zana ka tih dan pangngaia kan In ka’n en kual vel chuan mut thuam ka inbel ringawt a. Lehkha chhiarna pindan ka luh veleh chuan thil hlauhawm lo thleng tur a awm a ni tih ka hre thei ta nghal mai a. Hetiang hi chu hlauhawm tâwk ṭhangte chuan in hre vekin a rinawm, hmuh leh hriat vang chiah pawh a ni lo, khawi lam aṭang hian emaw a lo thawk ve mai a ni. Thil hlauhawm a awm tih chu chutih lai chuan ka hria; mahse, ka hriat dan chu a sawia han sawi fiah rual a ni lo.

"Pindan chhungah chuan pen khat emaw chauh ka lut hman tih chuan puanzâr phêna pheikhawk hmawr lo lawr ka hmu zui ta mai a. Ka hriatna pawh chu a daw lo tih ka hre ta nghal bawk a ni. Chutih lai chuan ka kut lehlamin bati ka keng a; mahse, pindan zau aṭanga khawnvar êng, kawngkharpui aṭanga lo lut chuan pindan chu a tiêng viau tho va. Ka sathau khawnvar ken chu ka nghat vat a, chhuara ka tuboh hnutchhiah chu ka zuan ta nghal a.

"Chutih lai vek chuan ani pawh a rawn che chhuak ve a. A chemtê ken han de zawk hi ka hmu a, ka tuboh chuan ka’n vai nghal a, a eng laiah emaw chuan ka vai fuh ni ngei tur a ni, a chemtê ken chu chhuatah a tla ri bawl a. Dawhkan phenah rang lutukin a kun hniam a, a kawrfual haklai aṭang chuan a silai pai a rawn phawrh ta mai a. A silai kau ri chu ka la hre hman a, a hmeh per hmain ka va dawmpui ve hman ta hlauh mai a, a ngulah ka man tlat a.

"Che lo tawp khawpin eng emaw chen chu kan han inelh ngawt ngawt a. A thlah thlah chu kan thi tihna a ni mai. A thlah duh hauh lo mai a; mahse, a silai kâwm lam chu lei lam a hawitir rei lutuk hret a ni ang. A tu zawk nge a hmeh perna hmet ka hre lo, keimah pawh kha ka ni ta mai awm e, a nih loh leh kan pahnihin a hmeh perna kha kan lo nâwk ve ve emaw ni tehreng ni, a enga pawh chu lo ni se, a kaw hnih chuan a hmaiah a phuh ta a nih chu.

"Mak ti zet maiin ka hmaa Ted Baldwin-a thal reng chu ka en a, a hma lawkin Tunbridge Wells-ah ka hmu vuai a, ka hre nghal mai a, zaninah mi a rawn zuan laiin ka hmu ruai a, amah a ni tih ka hre leh bawk a; mahse, tunah chuan ama nu ngei pawhin a hre ngam tawh kher lo vang. Hna rum fe fe hi ka lo khawih ve tawh a; mahse, a hmel ka han hmuh chuan ka khua a sik ṭhelh zawng a ni.

“Dawhkan tlang vuana ka din lai chuan hmanhmawh taka Barker-a lo chhuk thla thâwm ka’n hria a. Ka nupui pen thâwm ka hre zui leh ta zel a, ka nupui lo dang tur chuan kawngkhar lamah ka phei ta vat a. Chutiang thil rapthlak chu hmeichhe han hmuh chi hi a nih hian a ni lo reng reng mai a. A hnenah ka kal ve thuai ang tiin ka hrilh a, ka kaltir leh ta a.

"Barker-a hnenah chuan thu kam hnih khat lek ka’n sawi a, Barker-a pawh chuan a hre thiam ve hle chuan ka hria. Mi dang lo kal kan han nghak a; mahse, keimahniho mai lo chu hretu dang an awm ve lo tih kan hre ta thuai a. Chutih lai chuan a nia, ka rilrua ngaih dan a lo luh tak thut ni. Ka han ngaihtuah a, ṭha hi ka ti tulh tulh mai a.

"Ka pindana ruang awm bânah chuan Lodge (Lodge - In hming a ni a, lo chhinchhiah ula, eng In nge tih a la hriat mai ang.Pll) chhinchhiahna ser chu a lang vah bawk a. Hei han en ta che u,” tih pahin a kawrban chu a han hlim chhing a, mitthi bâna chhinchhiahna inchhu, ser rawng buang deuh, rin bial chhunga rin kil thum nei ang chiah kha a lo inchhu ve kalh a.

Douglas-a chuan, “Ka ngaih dan neih thar chu he chhinchhiahna ka’n hmuh aṭanga ka siam chawp ve mai a nia. Baldwin-a bâna he ser ka’n hmuh hian fiah nghal vekin ka hre mai a ni. Amah lah keimah tluk vela sang, ka sam rawng ang pu, a sakruang pawh ka taksa tiat vel ve tho a ni a. A hmel ber lah tu ma han hriat rual a ni tawh si lo.

"Tuna ka incheina thuam hi ka han inbel a, chutah minit sawm panga vel chhungin Barker-a nen hian ka mut thuam zawng zawng chu Ted Baldwin-a taksaah kan bel fel thei ta vek a ni. A thuamhnaw zawng zawng kan têl khawm vek a, tuia tipil thei tur ka hmuh chhun hmangin dilah ka vawm pil ta a ni. Ka ruang bula hnutchhiah atan a lehkhathem rawn ken chu ama ruang bulah ka hnutchhiah ta zawk a nih chu.

“A kutzungṭangah chuan ka zungbun ka'n thawlh a; mahse, kan inneih zungbun kan han dah tel dawn chiah chuan ka ti thei ta tlat lo a nih chu. Kan inneih ni aṭangin vawi te khat mah ka la phelh lo reng reng a, ka kutzungṭang dek pha lova a awm theihna tur awm chhun chu kan inneihna chawh chhiat leh chauh hi a ni.

"Kan inneih zungbun phawi ta lo chuan tuna ka hmaia pangti pem tuamna puan ban ka belna angah chiah hian puan ban ka bel ta zawk a. Mr Holmes, fing elkhen mah la, chu zawng i chêt famkim lohna a ni ve ta. Mitthi hmaia puan ban inbel kha han khawk la chuan hliam i hmu hlek lo vang.

“Chutiang chu thil awm dan a ni ta a nih chu. Eng emaw chen ka bihruk bo theih chuan ka tlan chhuak ang a, ka nupuiin min rawn zawn hmuhna hmun tur bitukin ka lo nghak tawh mai dawn a ni. Chutia kan tlan bo chuan dam chhungin nun nuamin kan nung ve thei tawh ang.

"Kan mi thianghlim lo fuan khawmho hian he lei chungah hian ke pahnihin ka leng ve tih an hriat chhung chuan an thina chemtê riak tluk zetin min ngaimawh reng dawn a; mahse, chanchinbuah Ted Baldwin-an a mi zawn a that tih an lo hmuh erawh chuan ka buaina hi a tawp vek dawn a ni. Thil awm dan chipchiar chu Barker-a leh ka nupui hnenah hrilh hman lo mah ila, min pui thei tur tawk zawngin an hre ve tho bawk.

“He hmun kawkel hi Ames-a leh kei chuan a awm tih kan hre kiau va; mahse, Ames-a chuan chhui-dawn nachang a hre lo mai mai a ni. Tichuan, he pindan rûkah hian ka lut a, a bak chu Barker-a kutah vek a awm ta a ni. Barker-a thil tih dan chu in chhût thiam ve tawh maiin ka ring.

"Tukverh a hawng a, tukverh kawm hnuai lamah hniak hnu a va hnutchhiah a. Thil tih âwm zawk zawk phei chu a ni lo; mahse, leilawn pheh theih kha kan pheh hman tawh avangin tual thattu chuan tlan chhuahna dang a nei lo a ni ang tih ring tura kan duh vang mai che u a ni.

"Remruat sa anga thil a tihfel vek hnu chuan tihchhiat tum ni âwm fahrana dim lovin dar kha a tiri ta a, a bâk chu pute u in hriat tawh kha. In duh duhin thil ti rawh u le; mahse, thil awm dan dik chiah a nia ka hrilh che u kha. Tuna ka’n hriat duh ber chu, Kumpinu dânpui buah tuna ka dinhmun hi eng ang nge ni le tih hi a ni,” a ti ta a.

Kan ngawi ṭhap a, chutah Sherlock Holmes chu a lo ṭawng chhuak a, “Kumpinu dân hi chu dân ṭha leh dik tak mai a ni a, i phu bâk hremna chu i tawk hauh lo vang; mahse, ka hriat duh ve thung chu — he mihring hian engtin nge hetah i chêng tih a hriat a, engtin nge i inah a lo luh theih a, engti tiha bihrukna tur hmun hi hria nge a nih?” a ti ve thung a. Douglas-a chuan, “Chu zawng ka hre pha ta hlek lo mai,” a lo ti a.

Holmes-a hmel chu a lungngaih hmel hle a, a hmai chu a var pap mai a, “Kan thawnthu hi a la tawp lo vang tih ka va’n hlau ve. Kumpinu dânpui aia hlauhawm zawk tawn tur i nei maithei a, America ram aṭanga i hmelma chhar chhuah aia hlauhawm zawk a nih pawh ka ring hial mai. Mr Douglas, i hmabakah hian buaina ka hmuhsak tlat mai che. Ka thurawn hi ngai pawimawh la, la inveng fimkhur reng tho rawh,” a ti ta a.

Tunah zawng, chhiartu duh takte u, hla deuh maiah kalin, Sussex Manor House of Birlstone kalsanin, John Douglas-a chanchin ni awm tak kan buaipui hrep hi kalsanin i han pem bo titih teh ang. A hun thu-hlaah chuan kum sawmhnih ralta velah khan han zin lêt leh ila, khaw thlang lam, mel sang tama hlaah i zin teh ang. Tichuan thil mak tak mai leh rapthlak tak mai, awih harsa tham hial tur khawp ka’n sawi chhawng ang e.

Thawnthu kal lai a zawh hmaa thawnthu danga pakaisan angah che u min lo ngai hlek suh u. Chutiang hmun hla leh hun rei tawha thil awm dan ka sawi zawh hunah chuan he thil awmzia pawh hi in hre tawh ang a, Baker Street-a pindanah kan thu tawpna chu kan vai leh ang chu, tun hma pawhin a chutih fo ṭhin kha!



Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » May 23rd, 2018, 11:25 pm

SHERLOCK HOLMES
THE VALLEY OF FEAR
AUTHOR : SIR ARTHUR CONAN DOYLE
TRANSLATED BY : PL LIANDINGA
CHAPTER - 8
(Rozami Pachuau)

A CHANGTUPA

Kum 1875, February ni 4 a ni a. Chumi kum chuan thlasik a na bawk a, Gilmerton tlang velah chuan vûr a chhah hle a; mahse, an mei khu kawng rih faina hmangin rêl kawng chu rêl tlan theihna turin an la thianfai thei tho va; lungalhthei laih chhuahna hmun leh kahpathir laih chhuahna hmun inkara vei ṭhin rêl, tlai lama tlan ṭhin pawh chu Stagville aṭanga chhuakin Vermissa Luiruam hmawra awm, Vermissa khaw panin a rûm chho ṭuah ṭuah a. Vermissa aṭang chuan Barton’s Crossing, Helmdale lamah chhuk thlain buh leh bal hmunpui, Merton-ah a lut thla leh ta zel ṭhin a ni.

Chu rêl kawng chu rêl pakhat chauh tlan theihna tur, rêl kawng mal a ni a; mahse, rêl kawng hrûla lungalhthei leh kahpathir sahel intiang vel han hmuh chuan chu lai ram hausakna thurûk leh mite'n chu lai ram an bawh viauna chhan chu hriat a harsa awm lo ve. United States-a hmun kilkhawr leh thlaler ber pawl chu dawrpui hmun ang maiin a lûn tlat tawh a ni.

Chu hmun hmu chhuaktu hmasate tan chuan chu lai hmun thlaler lutuk mai chu phaizawl ram, vaimim leh buh leh bala hausakna ram ṭha ber ber leh van ruahtui leh leilung hnimin a tawk têa a chawm ramte ai pawhin a hlu ang tih rin phâk rual a ni lo vang. A chhan pawh chu lai ram vel chu lungpui hriam nelawm loh pui pui leh ngaw pik bawn tak tak vel mai maiin a khuh vang a ni.

Lung hriam leh ngaw pik khuh phâk bâk, a tlang sang lai velah chuan vur leh lung tlahlang ni âwm tak tak a awm a, a luiruam lai chu kikawi tak leh zawh huphurhawm zet mai a ni a, chu lai hmun chu rêl chuan a zawh mek a ni. Rêl chhunga mihring ṭhutna pindanah chuan khawnvar an chhi fel chauh va, pindan chhungah chuan mi sawmhnih emaw, sawmthum emaw vel an awm ta âwm e.

Chu pindan chhunga a tam zawk chu nilenga hah taka an hna lama an bûr hnua an chenna hmun pana kir leh turte an ni a. A lo berah pawh rêla chuang zinga dawrzawn khat vel chu an hmel han en reng reng pawhin eng ilo laih chhuahna lama thawk an ni tih a hriat hliah hliah mai.

Chung mite chu a khawmin an ṭhu a, meizu chungin zawi tê têin an ṭawng sap sap a, a khat tawkin an epa mi pahnih ṭhute chu an melh leh hrek hrek ṭhin a, chu mi pahnihte chu an thuamhnaw rawng leh an dâr mawi ilo bel vel aṭang chuan ‘police’ an ni ngei ang tih a hriat bawk a ni.

Chu mite bakah chuan hmeichhia, hnathawk mi ṭhahnem tham tak an la awm a, mi pahnih khat chu chu lai hnai vela dawr siama ei zawng ni âwm tak an ni a; a kila mi pakhat ṭhu erawh chu kan mi thlur bik tur a ni a, amahin a ṭhu ngat a. Ngun takin han en teh, belhchian a dâwl hle asin. Chu pa chu pa hmel tharlam deuh ser sawr, pa lian vak lo, te chhe hauh si lo, kum sawmthum hnaih lam tawh ni ngei tur a ni.

A mitmu rawng chu a buang a ni a, a meng fim em em a, chuti chung chuan a mitmeng chu a hahdam angreng tlat bawk si a, a mitmu pawh sai kah nana îtâwm khawpa lian ṭha a ni bawk. A han hawi kual vel zawng chuan a mit chu eng emaw ti tak hian a danglam ṭhin hian a hriat a. A tarmit vuah phên aṭang chuan fim zetin a bul vela mite chu a en kual leh diat diat ṭhin.

Chu pa hmel han hmuh chuan pa kawm nuam, pa hawizau, ṭhian atana siam awl tak a ni ang tih a rin theih nghal a. Ṭhen leh rual ngaina mi, mi biak nuam tak a ni ang tih chu a tu tan pawh han hai mai tur chi a niin a lang lo; a hmelah chuan nui hmel hmuh tur a awm deuh reng tlat a ni. Mahse ngun lehzuala bih chiangtu chuan a khabe vuah nghehzia te, a hmui chip phelh huphurhawmzia te chu an hmuh hmaih lo vang, en ang ngawt aia a mize thûkna pawh an hmu bawk ang.

Chu pa kawm nuam tak, tlangval sam buang chu a tlatna mualah chuan a sual vek vek chuan tu leh fate hnena sawi chhawn tlak hial khawpa sual a nih loh vek pawhin tu leh fate hnena sawi tlak khawpa mi-fel a ni ang tih a hriat mai. Biak lûmlâm tumin a bula eng ilo lai chhuak mi chu vawi hnih emaw vel a’n bia a, ani chuan bung zet zetin a lo chhang a, chu Irish-pa pawh chuan a tum zui duh ta lo va, rêl tukverhah dâkin a piaha an ram tlan pelh tur phe zut zut chu a thlir vel ta mai mai a.

A kalna tur hmun chu a kal pawh a châkawm vak lo. Khua a thim mek zel a, chutih lai chuan tlangpangah chuan thukpui tih hriat reng reng hi a sen hiam huam mai a. Chutiang thukpui bunna In bul velah chuan thir êk chhia leh a vâp vel chu a intiang khawn iaih uaih a, an thil laih chhuah sa dah ṭhatna In pawh sang pui puiin a to lerh lurh mai.

Chung lai velah chuan thing In chhe fe fe hi a inbawr khawm deuhvin an sa thliah thluah a, khua a thim tawh avangin a tukverh chu a chhunga an êng chhit chuan a tilangsar duh hle. Rêl a han din nikhua pawhin mi ṭawp tak tak hi rêl chawlh hmunah chuan hmuh tur an awm zel a.

Nawmchen tuma kal tan zawng Vermissa District chu a thlana han thlan tur chai hi a ni lo mai. Hmuntin maiah chuan hna hrâm tih hriat reng reng, mihring kut hnu hi hmuh tur a awm a, an hnathawh hmabâkte pawh chu han hmuh ngawt pawhin pa ruhno deuh tan chuan ṭim uai uaina tur a ni. Mahsela a thawktute chu pa khirhkhan, mi pawisak nei lo leh mi hlauhawm an ni ve tho mai.

Rêl chhunga pa mal ṭhu chuan a bul vela thil awm chu ning awm tak hian a changin a’n thlir a, a chang leh hmuhnawm ti awm tak mai hian a thlir thung a, a hmel han hmuh reng reng chuan chu lai hmun vel chu a tan chuan thil thar a ni tih a hriat mai. A chang changin a ipte aṭangin lehkha têl chhah fê hi a phawrh a, a chhiar leh ṭhin a, a lehkha phêk kena thu inziahna bak, a tlang velah chuan eng eng emaw hi a thai belh zeuh zeuh va.

Ṭum khat chu a kâwng hnung lam aṭangin thil pakhat a rawn phawrh a, ani ang, pa narân leh khawsa mawlin an pai âwm loh tak, puakruk a ni tlat mai. Puakruk lian ber pawl chi hi a ni a, a han kuai bung a, a mu thunna bawm chu a hmuhpuitu an awm a nih ngai chuan a mu a inthun khat ṭhap tih an hre mai ang. Mikhualpa chuan a thil phawrh chhuah chu rang takin a kâwngah a zep leh a; mahse, a bula pa pakhat chuan a lo hmu hman tho mai.

A hmutu chuan, “Iau, ṭhianpa, i va inring sa âwm êm?” a lo ti a. Mikhual chu nuam ti âwm lo takin a nui lui sâng a, “Ka lo kalna ramah chuan hetiang mamawh chang hi a awm tlat ṭhin,” a han ti zui a. A bula ṭhu chuan, “I lo kalna lam chu khawi lam tak ni ang maw,” a han ti a. Mikhuala chuan, “Tunah hi chuan Chicago aṭanga lo kal ka ni,” tiin a chhang a. A bula ṭhu chuan, “Heng laiah hi chuan mikhual ve bawk i ni maw?” a ti ta zel a.

Mikhual pa chuan, “Ni e,” a ti ṭha ve mai a. A bula ṭhu chuan, “Heng laiah pawh hian khatiang kha chu i mamawh ngei ang,” a tihpui ve ta a. Mak ti awm fe hian mikhualpa chuan, “E heu! Chuti a ni maw?” a’n ti a. A bula ṭhu chuan, “He lai vela thil awm dan hi i hre ve miah na nge?” a’n ti leh a. Mikhual chuan, “Thil danglam eng mah ka hre lo,” a ti mai a.

A bula ṭhu chuan, “A rampum khah hian a khat emaw ka ti mai asin. I la hre thuai mai ang. Engti turin nge hetah hian i lo kal?” a ti ta zawk a. Mikhual chuan, “A thawk peih tan chuan hnathawh tur a awm tih ka hria,” a ti mai a. A bula ṭhu chuan, “Labour Union zingah i tel ve em ni?” tiin a zawt leh ta a. Mikhual chuan, “Tel ve e a,” a lo ti a. A bula ṭhu chuan, “Chuti a nih chuan hnathawh tur chu i hmuh ka ring. Ṭhian i nei em?” a han ti a.

Mikhual chuan, “La nei rih lo; mahse, ṭhian siam dan ka hre tlat,” a ti mai a. A bula ṭhu chuan, “Engtin maw?” a ti ta zel a. Mikhual chuan, “Ancient Order of Freemen (Ansiant Awrder awf Frimen - pawl hming a ni. Pll) zinga pakhat hi ka ni a. Khawtinah he pawl hian hmun a nei a, chutiang hmun aṭang chuan ka ṭhiante chu ka hmu mai ang,” a ti mai a.

Chu a thil han sawi chuan a bula ṭhu chu a khawih danglam ta ni ngei tur a ni. An rêl chuanpuite chu a’n melh kual vel a. Eng ilo lai chhuaktuho chu an la titi khawm sar sar a, ‘police’ pahnih chu an muthlu bawk a. Chutah mikhual bulah chuan a ṭhu hnai sauh va, a kut a phar chhuak ta a. Chibai an han inbûk phawt a.

A pakhat zawk chuan, “Thu dik i sawi tih ka hre mai; mahse, tihchian vek hi a ṭha ber a ni,” a ti a. Chutia tih pah chuan a kut ding lam chu a mitko bulah a phar chho va; mikhualpa pawh chuan a kut vei lam chu a mitko vei lam bulah a phar chho ve bawk a. Mikhualpa ṭhianpa chuan, “Zan thim hi chu a nuam lo,” a han ti a. Mikhualpa chuan, “Nia, mikhual tan phei chuan zinvah nan a nuam lo,” a lo ti ve bawk a.

A ṭhianpa chuan, “A tawk e. Kei hi Brother Scanlan-a ka ni a. Vermissa Valley, Lodge 341-ah ka awm. Heng lai hmuna ka’n hmu che hi chu ka lawm ngawt mai,” a ti ta a. Mikhualpa chuan, “Ka lawm e. Kei hi Brother John McMurdo ka ni a, Chicago, Lodge 29-ah ka awm. Ka awmna hmunah chuan Tisachungathuneitu chu J.H.Scott a ni. Heti taka unau ka’n chhar hma hi chu ka lawm hle mai,” a ti a.

John Scanlan-a chuan, “He lai velah hian kan ṭhahnem viau a nia. Vermissa Valley aia Order a inhlawm ṭhatna hmun hi chu America ramah i hmu lo reng reng ang; mahse, nangni ang tleirawl hi chu kan mamawh hle a ni. Labour Union zinga tel si, nangni ang mi hrisel ṭhain Chicago-ah te hna in han hmu lo chu mak ka ti hle mai,” a ti a.

(Order ka tih tak mai khi Ancient Order of Freemen tihna tluk a ni. ‘Order a inhlawm ṭha’ tih chu ‘Y.M.A a chak’ tihna tluk vel ni ve awm a ni. An pawl hi tun hma Kristian hmasate ang deuh khan ‘Unau’ (Borther) an inti kual vel vek a. Tluanga pawh va kal se ‘Brother Tluanga’ a ni mai. An pawlah hian ‘President’ tih angreng awm ve lovin, a awp khawmtu chu ‘Tisachungathuneitu’
(Bodymaster) an ni mai.Pll).

McMurdo chuan, “Hna thawh tur chu ka hmu ṭeuh alawm,” a ti a. Scanlan-a chuan, “A nih leh engati nge i chhuahsan si?” tiin a zawt a. McMurdo chuan nui chungin a lu chu ‘police’ awmna lamah a thle zauhva, “Sawng mite sawn hriat an châk hlein ka ring,” a ti mai a. Scanlan-a chuan zawi tê hian, “Buaina i tawk a ni maw?” a ti a. McMurdo chuan, “Nasa fe a ni,” ti ngawtin a chhang a. Scanlan-a chuan, “Chu tân-In te pawh i hlat na nge?” a ti ta zel a.

McMurdo lah chuan, “A bâk pawh le,” a lo ti mai a. Scanlan-a chuan, “Tualthah lam te?” a ti zui ta zel a. McMurdo chuan, “Chutiang han sawi nan chuan khua a la hma em mai. Chicago chhuahsan duhna tur chhan ṭha tawk ka nei a, chu chu i tan tawk rih teh se. A tu nge maw nia i inhriata chutiang thilte zawt ngam tur nia i han inngaih le?” a ti ve ta thung a. A tarmit phêna a mitmeng chu a rum ta hle mai a.

Scanlan-a chuan, “A pawi lo ve, ṭhianpa. I pawisawi ka tum awzawng lo mai. A enga pawh lo ti la kan naute chuan an hnualsuat awzawng lo vang che. Kha tunah khawiah nge i kal dawn?” a ti a. McMurdo chuan, “Vermissa-ah,” ti chauhvin a chhang a. Scanlan-a chuan, “Chuti zawng, a din vawi thumnaah i chhuk tawh mai dawn a nih chu. Khawiah nge i chên ang?” a han ti a.

McMurdo chuan lehkhaip a’n phawrh a, lalṭin êng lo zet mai bulah chuan a’n lek hnai a, “Heta hi - Jacob Shafter, Sheridan Street a nih hi. Chicago-a ka hmelhriat pakhatin min hrilh a nia, mi chi hrang hrang chênna In a ni awm e,” a ti a. Scanlan-a chuan, “A nih tak chu. Vermissa hi chu ka khawvel chên lai piah lama mi a ni a, ka hre ve meuh lo. Kei chu Hobson’s Patch-ah ka chêng a, chu chu kan hmunpui ve deuh a ni; mahse, i kal hmain thurâwn pakhat han fah lawk che ka duh.

"Vermissa-ah chuan buaina i neih phawt chuan Union House-ah kal la, Hotupa McGinty-a hnen pan ang che. Ani chu Vermissa Lodge-a Tisachungathuneitu a ni a, heng lai velah hi chuan Black Jack McGinty-a duh loh zawng thil eng mah a awm ngai lo. Mangṭha le, ṭhianpa. Engtikah emaw Lodge-ah kan la inhmu mahna. Ka thu sawi chu hrereng ang che; buaina i neih chuan Hotupa McGinty-a hnen pan rawh,” a ti ta a.

Scanlan-a chu a chhuk a, McMurdo chu amah chauhvin a ṭhu leh ta a. Khua a thim takzet tawh a, an thukpui aṭanga meizang inhlap ri pawh chu hmun ṭhenkhatah chuan a ri hluap hluap a. Meipui êng thlârah chuan mihring che vel hmuh tur a awm nual a, a ri rawl rawl bawk a, meizang inhlap rî nen, thir inkhak ri nen, meipui êng nen a nih hian a ni mup mup mai a. Aw hian, “Hremhmun chu sawtiang vel saw a nih ka ring,” a han ti ngawt a.

McMurdo chu a han inher a, nuam ti âwm lo zeta ‘police’ pa lo ṭhu her chhên chu a va hmu a, chu ‘police’ pa chuan meipui chu a thlir vawng vawng a. ‘Police’ pakhat zawk chuan, “Hremhmun chu sawtiang ngei saw a ni tur a ni. Thlang lamah hian kan hriat theih aia ramhuai sual zawk an la awm a nih teh chuan ka beisei piah lam a ni ka ti ngei ang. Nauva, he lai velah hian mikhual
i ni maw?” tiin McMurdo chu a zawt ta a.

McMurdo chuan aw ngaihnobei lo fahran hian, “Lo ni ta ila?” a han ti hâ a. Police pa chuan, “Thil pakhat hrilh che ka duh ang, chu chu — Ṭhian thlang fimkhur deuh rawh. Nang chu ni ila Mike Scanlan emaw, abṭhiante emaw chu ṭhian atan ka duh lo sa phawt ang,” a ti a.

Chutah zawng rêl pindan chhunga mite zawng zawng hriat theih tur khawpa ring hian McMurdo chuan, “A engah phiangphihrit nge maw ka ṭhiante mi han ngaihvenpui chu le? I mi zilhna ka mamawh em ni? Nanga hrilh harh kher lova eng mah ti thei lo turah min ngai em ni zawk chu le? Miin an biak che chuan chhâng la; mahse, ka biak hun che i nghak a nih chuan i nghak rei phian ta ve ang,” a ti ta piap piap mai a. Ui thinrim ang mai hian a meng kawlh hra mai a.

Police pahnihte chuan chutia an thurâwn tluangtlam ṭha tak mai a ngai haw ta mai chu mak ti zetin an thlêk reng ringawt a. Police pakhat zawk chuan, “Ṭhianpa, i huatthu sawi kan tum lo ve. He laiah hian mikhual ve bawk i ni tih a lang a, nangma tana ṭha tur a nih vang maiin kan han hrilh che a nia,” a lo ti a.

Thinrim zet hian McMurdo chuan, “He laiah hi chuan mikhual ka ni; mahse, nangni ang hi ka lakah in mikhual lo tlat. Nangni ang mihring hi chu hmun tinah in awm a, in danglam lo, tu ma ngen hleih loh hian thurâwn hi vawrh chhuah teh in tum a,” a la ti ta cheuva.

Ṭhen ṭhâ chung hian police pakhat zawk chuan, “Nakin lawkah kan la inhmu leh maithei a ni. Hrilhlawk theihna lam hi dawng ve lem lo mah ila nang hi chu keini nena inhmu leh tur kan ni tih thu ka’n sawi hram teh ang,” a han ti ve ngat a. A ṭhianpa pawh chuan, “Kei pawh chu chu ka lo ngaih dan ve chiah a ni. Kan inhmuh leh ka ring tlat,” a lo ti ve bawk a.

McMurdo chuan, “Ka hlau miah lo che u, ka hlau che u emaw lo ti reng reng suh u. Ka hming chu McMurdo, Jack McMurdo a nia, in hria maw? Min hmuh in duh chuan Jacob Shafter-a Inah, Sheridan Street, Vermissa-ah min hmu thei ang, ka biru miah lo vang. Nangni ang mai mai hi chu khaw êng aiin ka zah lo zawk che u, a chhan pawh nangni hi chu zan lamah pawh ka hmu thei tlat che u. Lo chhinchhiah reng rawh u,” a ti ta bawih bawih mai a.

Eng ilo lai chhuaktuho chuan McMurdo chu an ngai sang kher mai. Tihngaihna hre lovin ‘police’ pahnihte chuan chhân zui pawh tum lovin thu dang an sawisan ta daih a. Rei lote hnuah chuan rêl chu rêl chawlh hmun thim deuh rip repah hian a ding a, chu lai hmun chu Vermissa a lo ni tawh a, mi pawh an chhuk hnem hle.

McMurdo chuan a zin-ip vel chu a khai a, thimthamah chuan a’n kal chhuak ve mai dawn a; mahse, eng ilo laih chhuahna lama thawk pakhat chuan, “Ṭhianpa, police-ho i’n chhan dan kha chu a ṭha ṭhak ṭhak hle mai. A ngaihthlaknawm takzet a ni. I ip kha ka lo khaipui ang che chu, Shafter-a In chu ka kalpel dawn tho alawm,” a rawn ti a.

Rêl chawlhhmun an han kalsan dawn chuan mi ṭhahnem tawk tak hian, “Mangṭha” tiin an vai liam sup sup a. Vermissa a thlen tak tak hma pawhin McMurdo chuan hming a chher hman hle mai.

Chu lai ram vel chu a ṭihbaiawm teh nain a Vermissa khua te angte hlei hlei chu a lungchhiatthlak mai. A lui ruam dung tluan mai chuan a ṭihbaiawm zâwnga thil nasa fe fe hi hmuh tur a awm zut mai a, mei a khu nguai nguai a, mihring thâ leh tui chu tlangramah, eng ilo laih chhuah nan a luang ral a.

Khuaah lah chuan mihring tingui thei leh tinêlawm lo thei thil hi a awm kim emaw tih mai tur a ni ṭhin. Kawtthler zau pui pui chu vurin a khuh a, chu chu lirtheiin a chîl khuar dêk dûk a, kawtthler sira mihring kalna tura an siam vete lah chu a zîmin a bumboh em em a.

Khawnvar êng de thliah thliah te chuan thing In, kawtthler lam hawia hulhliap nei a pho chhuak a, In reng reng chu a ṭawpin a tenawm hlawm hle bawk a. Kawtthler pui lai deuhvah chuan zu inna hmun te, lehkhadenna In te a awm a, chung hmunah chuan eng ilo lai chhuaktute chuan hah taka an thawh chhuah sa chu an khawhral mai mai ṭhin.

McMurdo-a hruaitu chuan, “Kha kha Union House a nia. Kha In hotupa kha Jack McGinty a ni,” tih pahin In pakhat hi a’n kâwk a. Chu In chu mihring chênna tura khualbuk ang pha teuh ber pawl a ni nghe nghe ang. McMurdo chuan, “Eng ang mihring nge maw a nih le?” tiin a’n zawt a. A hruaitu chuan, “Uai! Hotupa chanchin hi i la hre ve ngai na nge?” a ti a.

McMurdo chuan, “He laiah hi chuan mikhual ka ni a, engtin nge a chanchin ka hriat tehlul ang?” a lo ti ve thung a. A hruaitupa chuan, “A... a chanchin hi chu Union a tel zawng zawngte chuan an hre vek ang chu ka lo ti mai a. Chanchinbu lamah hian a lang fo si a,” a ti mai a. McMurdo chuan, “Eng vangin nge a lan fo?” tiin a zawt ta zel a.

A hruaitu chuan, “Ah, thil chungchangah hian maw le,” a ti a. A aw a zawi kher mai. McMurdo chuan, “Eng thil chungchangah maw?” tiin a zawt zui ta zel a. A hruaitu chuan, “Karei, Pu-a, i huat dawn loh chuan pa mak tak i ni tih ka sawi duh. He laiah hi chuan thil pakhat chauh chanchin i hria ang, chu chu Scowrers-ho chanchin a ni,” a ti ta a. (Scowrers- pawl hming bawk, chhiar zel ila a hriat mai ang Pll).

McMurdo chuan, “Iau, Chicago lama Scowrers chanchin chu ka chhiar tawhin ka hria. Tualthah ching rual an ni lo’m ni?” a han ti a. A hruaitupa chuan, “Bengchheng suh! Kawtthler ualau laia khatianga thu sawi i chin chuan heng laiah hi chuan i dam rei hauh lo vang. Kha aia nêp zawk avang khan mi tam takin nunna thlah khawpa vuak an hlawh tawh asin,” a ti a.

McMurdo chuan, “An chanchin chu ka hre hauh lo mai. A chhiara ka chhiar tlêm tê tih bâk chu eng mah ka hre lo,” a ti ta a. A hruaitupa chuan, “I thil chhiar chu a dik lo ka ti miah lo,” tih pahin a bul vel chu hlauhawm a awm dah law maw ti ni awm takin a’n thlêk vel a.

Chutah, “Inthah hi tual thah anga kan vuah ngai chuan tual thah zawng heng laiah chuan a awm ngei a, a that ve duh lote thah ai pawh hian tual thah zawng an ching ta ve ang; mahse, chutiang thil leh Jack McGinty-a hming chu sawi pawlh reng reng suh, inhrilhrûk rî pawh hi a thangkhâwk a, McGinty-a bengah a thangkhâwk chu a thleng pha zel a nia, ani lah hi chutiang ngaihthah mai mai tur chi a ni lo vei nen.

"Khai le, saw lai In saw a nia i kalna tur chu, kawtthlêr ân lova ding saw. He khaw chhunga mi rinawm ber pawl, Jacob Shafter-a enkawl a nih saw,” a ti ta a. McMurdo chuan, “Lawm thu ka hrilh a che,” a han ti a, a ṭhianpa nen chuan chibai an han inbûk a, a zin-ip khai chung chuan a thlenna tur In pan chuan a kal ta a. Dim vak lo hian kawngkhar a han kik a; a beisei loh tak mai mihringin kawngkhar chu a rawn hawng tlat mai.

Kawngkhar rawn hawngtu chu hmeichhia, naupang deuh, hmelṭha em em mai a ni a. Swedish mi a ang hle a,sambuang, sambu ṭha zet mai, mitmeng dum mawi em em mai a pu a. A mitmeng mawi zet mai chuan mikhual chu a’n thlek vang vang a, a zak lek lekin a hriat a, a hmai var pep pawp chu a lo sen ta ṭân ṭân a.

Kawngkhar aṭanga êng lo chhuak hliah deuh chiaha a ding hmel a’n hmuh chuan McMurdo chuan chutiang khawpa hmelṭha a hmuh ngai pawh a la hre lo hial a. Chu khaw hmelchhe lutuk khuhbo vek tur khawpa chutiang hmeichhe duhawm a lo awm theih ve chu thil rin harsa tak a ni. Chu hmeichhe hmel han hmuh chuan lungalhthei leh kahpathir laih chhuahna khur kotlang ṭawphnawk zinga ‘violet’ pangpar mawi lutuk vul chêk ang mai hi a ni a.

McMurdo-a mak ti lutuk chuan sawi tur reng a hre lo va. A hmeichhia zawk chuan, “Ka pa a nih ka ring. Amah hmu tura lo kal i ni maw? Dawrpuiah a kal. A lo hawn ka ring deuh reng tawh a ni,” a han ti a. A awphâwiah chuan Swedish aw a ni tih a hriat mai. McMurdo chuan chu nula chu rei ngial a’n thlek leh phawt a, nula pawh chu a chi-ai hman ṭhelh a.

Chutah, “Nula, i pa pawh ka hmu duh chuang lo. Ani hmuh zawng a hmanhmawh-thlâk lo ve. In In hi ṭhian pakhatin min kawhhmuh a, lo thlen a remchangin ka’n ring deuh a; mahse, ka thlen duhna hmun a ni tih ka hre ta e,” a ti ta hial a. Nui chung hian nula chuan, “I rilru i siam rang hle mai,” a han ti a. McMurdo chuan, “Mitdel lo tan chuan han siam ran lohna chi a ni hlei nem,” a ti mai a.

Chutianga fakna aw ri a’n hriat chuan nula chu a nui a, “Lo lut rawh khai ka pu. Kei hi Miss Ettie Shafter, Mr Shafter-a fanu ka nia. Ka nu a thi tawh a, kan Inah hi chuan nu chan ka chang ve mai a ni. Pindan pawnlawi zawkah hian meilum ai tur a awm hi, ka pa lo thlen hma chu lo ṭhu rih rawh. Hei, heta hi a lo kal e, i duh chuan i be fel nghal thei mai ang chu,” a ti a.

In panna kawngah chuan pa upa lam deuh, rih hmel tak hi a lo kal a. McMurdo chuan tawi tê hian a sawi duh chu a lo sawi a. Mi pakhat, Murphy-a, Chicago-a miin Shafter-a In chu McMurdo a lo kawhhmuh a. Amah Murphy-a pawh chuan mi dang hnen aṭanga a hriat ve leh chhawn mai a ni awm e.

Shafter-a pawh chu a dâwr a lo harsa lo va. A mikhual tur pa lah chu sum ngah fe ni awm hian thlen man leh ilo velah chuan a ngam sang hle mai a, a man âwm ang vawi khat han sawi tawh chuan a rem ti nghal thlap zel a. Chawlhkar khat atan dollar sawm pahnih a pe lâwk a, chu chuan riah man leh ei man a tum nghal dawn a ni.

Tichuan McMurdo, thil sual titu a nih thu mahnia puang chhuaktu chu Shafter-a Inah chuan a chêng ta a, thil hrang tam takin a la zui dawn a, a tâwpna chu hlate khuaah a ni daih mai.

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » May 24th, 2018, 7:48 pm

SHERLOCK HOLMES
THE VALLEY OF FEAR
AUTHOR : SIR ARTHUR CONAN DOYLE
TRANSLATED BY : PL LIANDINGA
CHAPTER - 9
(Rozami Pachuau)

TISACHUNGATHUNEITU

McMurdo chu pa thâwm na ve tawk a ni a. A awmna apiangah a bul vela mite hian an hre thuai mai zel a. Chawlhkar khat chhungin Shafter-a Inah pawh chuan mi pawimawh ber ber nihna a chang hman a ni. Shafter-a Inah chuan mikhual angrenga cheng, mi sawm emaw, sawm pahnih emaw vel tur an awm a, an vai chuan mi rinawm tak tak, hnathawhna hmuna hotu deuhte leh dawr vela eng ilo ziak feltute an ni nuai hlawm a. Tlaia an han ṭhut khawm changte hian McMurdo-a fiamthu sawi chu a nuihzatthlak ber a ni ṭhin a, a titi han vawrh chhuah reng reng chu a changkâng ber a ni ṭhin bawk a, a zai a mawi ber bawk ṭhin.

McMurdo-a chu ṭhenrual kawm thiam tur renga piang a ni ngei ang, a bula awmte hi chu a khabe liam châng hian an ngawi ṭhap reng mai a; mahse, a ṭul chuan amaha hlauhawmna leh chakna awm chu han lantir mai a hnial hauh lo va, mi dangte tan pawh han en tleu ngawt tur chu a ni lo reng reng si a ni. Dan keng kawhtute leh dan hrim hrim mai chu a hnualsuat vek a, a ngaina lo tih pawh a lantir hreh hek lo, chu chuan a ṭhian ṭhenkhatte chu a lo tilâwm ve leh tumhrang bawk ṭhin a ni.

A thlenna nula chu a hmelṭhat avang leh a chet dan a mawi em avangin a thinlung takin a duh tih pawh a tilang nghal mai a. Nula rîmnaa a kil thim lam chuh chi zawng a ni hauh lo mai. A hmuh tirh aṭanga ni hnihnaah nula chu a hmangaih thu a hrilh a, chuta ṭang chuan a khât tawk hian a hrilh chhunzawm zel a, nula chuan eng thu pawh sawi sela, a rilru a hnual lo reng reng a, a duhthu chu a hrilh ve hmiah hmiah reng mai a.

Nulain a han hnial châng pawhin, “Mi dang i ngaizawng maw! Chu mi dang chu a va khawngaihthlak dawn ve! Inveng fimkhur se a ṭhat dawn chu! Ka dam chhung hun ṭha hi hlohvin ka thinlung duhthusam hi ka chân ang maw? Ettie, i duh leh i peih chhung chu ‘Ka duh lo’ ti mai rawh; mahse, ‘Aw le,’ i tih ni a lo la thleng ang. Ka la upa lo va, chumi thleng chu ka nghak thei em em ang,” a ti mai ṭhin.

McMurdo chu nula kherhtu hlawhchham duh lo ber pawl a ni ngei ang, thu sawi a thiam si, mi han lêm vêl dan a thiam riau mai a. Chu bakah, hmeichhe rilru leh mit la zawng taka khawsak a thiam riau mai bawk a, hmeichhe hmangaihna chu chuta ṭang chuan a hla tawh si lo.

A lo kalna ram, Monaghan District vel chanchin leh lui ruam mawi lutuk mai chanchin te, thliarkar hmuhnawm em em mai chanchinte leh tlâng leh phûl mawi tak tak chanchin sawi tur te a hre em em a. A taka hmuh ai mahin a thu sawi ngaihthlak chu a manhla zawk ṭhin awm e. Chung bakah chuan khawpui nun hrang hrang, Detroit, Buffalo, Chicago te a hre leh em em bawk si.

McMurdo-a titi chuan Ettie chu tlangram aṭangin luipui phâiah a hruai lut a, thliarkar aṭangin khawpuiah a hruai lut zel a. Chutah khawpuia a awm laia ngaihzawng a neih thute leh a ngaihzawng a ṭhen tak thut thute a sawi zel a, chumi hnuah he lai lui ruam hrehawm zeta a lo tlûk luh dante a sawi zel a. Heng zawng zawng hi Ettie chuan khawngaihna thinlung nen a lo ngaihthla kiau va, khawngaihnain hmun a hauh ve tawhnaah lah hmangaihna a piang zel bawk si.

McMurdo chu lehkhathiam tak a nih avangin lehkhabu enkawltuah an ruai a. A hna chu nilenga a thawh ṭhin avangin Ancient Order of Freemen-ho awmna hmun, Lodge-ah pawh a va la inlan ve hman lo va. Tlai khat phei chu Lodge-a a hmel va inlan a ṭul thu Mike Scanlan-a, rêla a chuanpui pa khan a va hrilh a. Scanlan-a chu pa te tak te, hmai hriam deuh, lungphu chak vak lo hmel pu, mitmeng dum kil kel a ni a.

McMurdo a’n hmu leh chu a lawm hmel hle a. Zu no hnih khat an han dawm dun hnu chuan a kal chhan chu Scanlan-a chuan a sawi ta a. McMurdo-a hnenah chuan, “McMurdo, i chênna hmun ka hre bawk a, ngampa takin ka rawn pan mai che a ni. Engati nge tisachungathuneitu hnenah i la inhriattir loh? Engtiziaa Hotupa McGinty hi la hmu lo nge i nih?” a ti ta a.

McMurdo chuan, “Hna ka zawn a ṭul tlat a ka buai alawm,” a lo ti sam mai a. Scanlan-a chuan, “Thil dang eng mah ti hman lo mahla Hotupa chu i va hmu hman ngei ngei tur a ni. I thlen tuk khan Union House a va lan vat a, i hming va ziahtir tur hi a ni ngai ah! A ngaih dan piah lama i chêt chuan... a, i che tur a ni lo... chuti chu a ni mai!” a han ti tawp mai a.

McMurdo chuan mak ti awm zet hian, “Lodge-ah hian kum hnih chuang chu ‘member’ ka lo ni ve ta a, hetiang em ema intuk luih thil a ni ang tih ka la hre ngai lo reng reng, Scanlan,” a ti a. Scanlan-a chuan, “Chicago-ah chuan a ni lo mahna!” a ti ringawt a. Mc Murdo chuan, “Aw, hetah pawh pawl thuhmun tho a la nia lawm,” a ti ve thung a.

Scanlan chuan McMurdo chu rei ngial a’n melh a, “A ni maw?” a han ti ngat a. A mitah chuan thil duhawm vak lo a khap tel tlat mai. McMurdo chuan, “A ni lo vem ni?” a’n ti ve leh ngat a. Scanlan-a chuan, “A nih leh nih loh lam chu thla khat hnuah min la hrilh leh dawn nia. Rêl ka kalsan hnu khan ‘police’-ho kha i bia tih ka hria a,” a ti ta a. McMurdo chuan, “Engtin nge i hriat theih?” tiin a zawt a.

Scanlan-a chuan, “Thu hi a thang chak ve a ni. He lai velah chuan a chhe zawng leh a ṭha zawng hian thu a thang kual ṭhin,” ti chauhvin a chhâng a. McMurdo chuan, “An laka ka rilru put dan ka’n hrilh ve mai mai a nih kha,” a ti duh lek a. Scanlan-a chuan, “McGinty chuan a ngaina ngawt ang che,” a han ti ngawt a.

McMurdo chuan, “Uai! police-ho hi a haw ve elo?” a’n ti a. Scanlan-a chu a nui hawk hawk a. McMurdo-a hnenah chuan, “Ka nau, va kal la va hmu phawt teh. I kal loh chuan police haw lovin nangmah a nia a huat dawn che ni. I ṭhianpa thurâwn che hi pawm la, va kal nghal rawh!” a ti ta a.

Chumi tlai vek chuan McMurdo-a chuan mi dang a bia a, chu pawh chuan McGinty-a hnena kal a chawh leh hle pek mai. A dik chauh chuan Ettie chu McMurdo chuan a lo ngaihven ualau lutuk deuh ta a ni ngei ang; a thlen In pa, pa rilru kalmuang tak pawh chuan a lo ngaimawh ve ta hial a; McMurdo chu ama pindanah a ko lut a, pehhel awm miah lovin a sawi duh chu a sawi ta nghal a.

Shafter-a chuan McMurdo-a hnenah chuan, “Pu-a, ka Ettie hi i ngaihven lutuk deuh niin ka hria. Ka thu sawi chu a dik em?” a han ti nghal bawl mai a. McMurdo lah chuan, “Nia, ngaihven teh reng mai,” a lo ti ve hmiah mai a. A thlen In pa chuan, “Ka hrilh dawt mai ang che, i lo phêt buai ve chiam hian awmzia a nei chuang lo vang. Mi dangin an hmakhalh tawh che,” a han ti a.

McMurdo chuan, “Ettie pawhin a ti asin,” a ti duh lek a. Shafter-a chuan, “A sawi dik chiah a nih chu! Mahse, tu nge a tlangval pa chu tih a hrilh che em?” a ti ta zel a. McMurdo chuan, “Hrilh lo, ka zâwt a; mahse, a sawi duh lo,” a ti ve mai a. Shafter-a chuan, “Kei pawhin ka sawi ngam bik lo ve. Hlauh vanga i tlanbo a hlau a niang,” a ti ta a. McMurdo chu a sa nghal phat a, “Hlauh a?” a han ti a.

Shafter-a chuan, “Ni e ka ṭhianpa! Ani hlauh chu thil zahthlak a ni hauh lo. Teddy Baldwin-a a ni tlat!” a ti a. McMurdo chuan, “Tu nge maw a nih phiangphihrit le?” a han ti a. Shafter-a chuan, “Scowrers hotupa maw le,” a lo ti a. McMurdo chuan, “Scowrers maw! An hming hi chu ka hre fo tawh mai. Awmna hmun apiangah an lam ri a, lam ring ngam lah an awm hek lo! Eng nge in hlauh? Scowrers hi tute nge ni?” a ti ta khâih mai a.

Khualbûk neitupa chuan a aw a’n tihniam a, “Scowrers chu Ancient Order of Freemen hi an ni,” a ti ta a. McMurdo chu a phu zawk mai a. “Engah chuan? Kei pawh Order-ah chuan member ka ni ve alawm,” a ti a. A thlen In pa chuan, “Nang hi maw! Lo hria ila chuan ka Inah ka chêntir hauh lo vang che! chawlhkar khatah dollar za pawh min pe dawn mahla ka duh lo,” a ti ta mai a.

McMurdo chuan, “Order zinga tel chu eng nge a dik lohna? Vantlang rawngbawlna thil a ni a, inpâwl khâwmna thianghlim a ni lo vem ni? Dan Buah chuan chutiang chuan a inziak a ni,” a ti a. Shafter-a chuan, “Khawi hmunah emaw chuan chutiang chu a ni mahna; mahse, hetah chuan chutiang a ni lo,” a lo ti a.

McMurdo chuan, “Hetah hian engtiangin nge an awm?” a ti ta zel a. Shafter-a chuan, “Tual thah ching inbawrkhawm an ni mai — chu chu a nihna chu a ni,” a ti ta tawl mai a. Awih lo tih hriat reng hian McMurdo chu a nui a, “Engtin nge chu chu i finfiah dawn?” a ti ta a.

Shafter-a chuan, “Finfiah maw! Miruang sawmnga hi a finfiah nan a tawk ang em? A nih leh Milman-a te, Van Shorts-a te, Nicholson-a te chhungkua te, Pu Hyam-a te, naupang Billy James-a te leh mi dangte kha engtin nge? Finfiah maw! He lui ruama mihring tungchhova kal, naupang chhia ni lo chin tawh zingah hian chutiang chu a ni tih hre lo tunge awm?” a ti ta mai a.

McMurdo chuan, “Ngaithla teh! I thu sawi kha sût leh turin emaw, tlip mar turin emaw ka duh che a ni. He pindan ka chhuahsan hma hian a eng zawk zawk emaw chu i ti tur a ni. Ka dinhmunah han indintir ve ta che. He khuaah hian ka lo kal a, mikhual ka ni. Pâwl pakhat, pâwl pawisawi lo leh thianghlim nia ka hriat ka zawm a.

"Chu pâwl chu America ram pumpuiah hmun tinah an inhûng tih i hria ang a, ka hmuh ve chinah chuan pâwl nungchang ṭha tak a ni zel a ni. Tunah he lai hmun ka lo thleng a, chu pâwl chu ka zawm thu ka’n sawi a, nangin tual thah ching pawl, ‘Scowrers’ nen i sawi thuhmun ta tlat a nih chu. Mr Shafter, ngaihdam i dil loh vek pawhin min hrilh fiah chu i ba a ni,” a ti ta a.

Shafter-a chuan, “Pu-a, khawvel pawhin a hriat chin chauh lo chu ka hrilh thei lo vang che. Pawl khat hotu chu pawl khat dang hotu a ni ve tho va, pawl dang hotu pawh pawl lehlam hotu a ni ve bawk. Pawl khat i tihlungnih loh vaih chuan pawl dangin an chuk hlawk mai ang che. Kan finfiah zing tawh êm!” a la ti ta deuh deuh mai a. McMurdo chuan, “Chu zawng, tlangkam mai a nih chu! Fin fiahna ka mamawh ang,” a ti ta tlut mai a.

Shafter-a chuan, “He laia i awm rei ve zawngin fin fiahna chu i dawng mawlh ang; mahse, an zinga pakhat i ni ve tih kha ka lo theihnghilh a ni. Mi dang ang bawka mi sual hi i la ni ve thuai dawn. Pu-a, iptepui nghahna tur hmun dang i hmu tho vang, hetah chuan ka kawl thei lo che. An zinga pakhatin ka Ettie a rawn rîm ṭhin mah hi a lungchhiatthlak tawh vei nen mi dang han kawl lehzel chu a ni em em lo. Zaninah zawng hetah hian i riak hauh lo vang,” a ti khauh ta bur mai a.

McMurdo-a chuan a awmhmun nuam tak leh a nula hmangaih em em chu a kalsan a ṭul ta. Chumi tlai chuan a ngaihzawng chu inkawm khawmna pindanah amah chauhva a ṭhu a va hmu a, a thil tawn leh thil awm dan chu a hrilh ta mawlh mawlh mai a, “I pa chuan chhuak turin thu min pe a. Ka pindan chhuahsan mai chu ni sela chuan ka tuar na vak lo vang; mahse, Ettie, chawlhkar khat lek kan la inhre hman a, chuti chung pawhin ka nunna atan hian i pawimawh tlat a, i tel lo chuan khawsak theih ka inring lo a ni,” a han ti a.

Nula chuan, “Mr McMurdo, chutiang thu sawi suh! Ngawi mai mai teh! Ka hrilh tawh che kha, i tlâi lutuk a ni. Mi dang an awm tawh a, chu pa chu neiha ka tiam dawn lo a nih chuan mi dang tiam thei ka ni lo,” a lo ti a. McMurdo chuan, “Anih leh Ettie, i tawn hmasak zawkah lo ṭang ta ila ka dinhmun hi a ziaawm deuh ang em?” a ti a. Nula chuan a kutin a hmai a hup a, “Ka tawn hmasak zawkah lo ṭang hlauh la tih hi ka duhthusam lian ber a ni,” tih pahin a ṭap ta zawih zawih mai a.

McMurdo chu a ṭhingṭhi vat a, Ettie hnenah chuan, “Ettie, khawngaih takin chuti chin chu ni rawh se. I thutiam bawhchhiaa i nun leh ka nun hi thâp i ngam em? Duhber, i thinlung chhungril duhthusam chu zui zel ta che! Eng nge i sawi tih pawh hre lova i thutiam tawh zawm ai chuan a himthlak zawk asin,” a ti ta a.

A kut buang ther thawr, chak tak mai chuan Ettie kut ngo paw phiang mai chu a hmer ngawih ngawih a. Chutah, “Ka ta i ni ang a, harsatna eng pawh lo thleng se kan su kiang dun zel ang, ti raw?” a han ti a. Ettie chuan, “Hemi hmunah hian maw?” a ti a. McMurdo chuan, “Ni e, hemi hmunah hian,” a lo ti a. Ettie chuan, “Ni lo, Jack! Hetah chuan ni lo ve, a theih loh. Min hruai bo daih thei ang em?” a ti a.

McMurdo-a rilru chu a buai hle ni tur a ni, a ngaihna hre lovin rei fe a’n hawihai a; mahse, a rilru luhlulna a lo chhuak leh ta a ni ngei ang, “Ni lo ve, hetah hian a ni tur a ni. Ettie, vanpui pawh lo chim se kan do pawp ang. Kan awmna hmun aṭang ngei hian harsatna lo thleng chu kan lo chaltauh lêt dawn a ni,” a ti ta tlut mai a. Ettie chuan, “Engati nge kan tlan bo daih mai loh ang?” a han ti a. McMurdo chuan, “Ni lo ve Ettie, he hmun hi ka chhuahsan thei lo,” a ti leh ringawt a. Ettie chuan, “Engati maw?” a han ti a.

McMurdo chuan, “A ûma ûm chhuah anga ka awm phawt chuan ka lu hi khaw êngah ka dâk chhuak leh ngam tawh ngai lo vang. A reng thu-ah a eng hi nge maw han hlauh tur awm le? Zalen taka mitin chenna ramah zalen saa piang kan ni lo vem ni? Nangin min hmangaih a, keiin ka hmangaih che chuan tu nge kan karah lo tla ngam ang?” a ti ta a. Ettie chuan, “Jack, i hre lo va ni. He lai hmunah hian i la cheng rei lo lutuk a, he Baldwin-a hi i la hre ve lo a ni. McGinty-a leh Scowrers-ho pawh hi i hre hek lo,” a ti a.

McMurdo chuan, “Ni e, ka hre hlawm lo va, ka hlau hek lo va, ka ring hlawm bawk hek lo! Duhber, mi rothap pui pui zingah hian ka lo tâl ve tawh ṭhin a, keiin ka hlauh ahnekin anmahni’n min hlau ziah zawk a ni. Han ngaihtuah teh, a âtthlâk a nia! I pa sawi anga heng mite hian he lui ruamah hian thil sual an ti ṭhin a nih chuan engati nge mite hian rorelna hmaah an sualna an thailan loh chu le? Min han chhang teh,” a ti a.

Ettie chuan, “A chhan chu anmahni khing turin thu hretu tu mah an ding ngai hlei nem, an ngam lo. Thu hretu reng reng chu thla khat bâk an dam ngai lo. Chu bakah, anmahni mi leh sate hi an ṭhian chhan nan daw hreh an awm lo va, chhechham meuh hian thil sual an tih lai vela an ṭhianpa chu hlate khuaa a awm thu hi an sawi ngam tlat zel a ni; mahse, Jack, heng thil hi chu chanchinbu lamah i lo chhiar vek tawh ang. Heng lai chanchin reng reng hi chu America ram pumpuia chanchinbu tin mai hian a ziak vek tih ka hria,” a ti a.

McMurdo chuan, “Nia, chanchinbuah chuan eng emaw chu ka chhiar tawh ṭhin alawm; mahse, thawnthu ang mai mai turah ka ngai tlat a ni. Heng mite hian tih chhan neiin thil an ti pawh a ni mahna. A nih loh leh an khawsak a pial ve tawh hrim hrima mahni inhâi chhuah leh dan dang an nei tawh lo pawh a ni mahna le,” a ti a.

Ettie chuan, “Awi Jack! Chutiang thu zawng ka beng hriatah sawi lul suh khai! Pakhat zawk thu sawi dan chiah chiah a ni mai!” a lo ti a. McMurdo chuan, “Baldwin-a maw? Chutiang chuan thu a sawi ve maw?” a han ti a.

Ettie chuan, “Chutia a tih ṭhin avang chuan alawm ka ngei em em ni. Jack, thu dik ka hrilh tawh ang che, amah chu ka haw lutuk tlat a, ka taksa peng tin mai hian a hua a ni; mahse, ka hlau tlat alawm. Keima mimal thila hlau chu ni bawk mah ila, ka pa avang hian ka hlau lehzual a ni. Ka rilru dik tak hi a hnena ka hrilh mai chuan ka pa chungah hian lungngaihna nasa tak a thleng dawn tih ka hre reng mai.

"Chu vang chu alawm, thutiam chanve, thutiam kebai hmanga ka la dan beh rih mai mai. Mahse Jack, min tlanbopui duh chuan ka pa hi kan hruai ve ang a, heng mi sual tawm khawm khawih phak lohvah hian kan tlan bo daih ang a, kumkhuain an rim hre pha lovin kan nung mai dawn a ni,” a ti a.

McMurdo-a hmelah chuan buaina a lo lang leh a, a hmel chu tumruhna bawkin a luah leh ta a. Chutah, “Ettie, i chungah emaw, i pa chungah emaw, thil ṭha lo a thleng lo vang; an sual tih thu-hlaah chuan, an aiin ka sual thei zawk daih tih i la hre mai ang,” a ti a. Ettie chuan, “Ni lo, Jack, chutih thilah chuan khawi hmunah pawh ka ring tawk em em dawn che a ni,” a ti a.

Nêlawm loh zet hian McMurdo chu a nui a, “Min va han hre chiang lo tehlul em! Bawihte, i thinlung thianghlim lutuk mai khan tuna ka rilru put dan pawh hi a hmuhtir thei lo che a ni maw! Uai, tu nge lo leng?” a han ti a. Thawk leh khatah kawngkhar chu a rawn inhawng thut a, mi pakhat, thu ber thâwka thaw hi a rawn lut a.

Chu pa chu hmelṭha tak mai, McMurdo-a rual vel leh McMurdo-a pianphung ang maia duhawm sakruang pu hi a ni a. A lukhum parh khum pawh phawk duh lo chuan a lukhum hnuai aṭang chuan pindan chhunga lo ṭhu sa mi pahnih chu rum takin a’n melh a, a hnar chu a kawm deuh hlek a, a mitmeng chu a hlauhawm kher mai.

Chî-âi leh thlabar tih hriat deuh mai hian Ettie chu a ṭhuthmun aṭangin a zuang tho nghal zawk a, “Mr Baldwin, ka hmu che chu ka lawm hle mai. Ka rin aiin i lo thleng hma a. Ti rawh lo ṭhu rawh,” a han ti a. Baldwin-a chuan kâwng dawmin McMurdo chu a’n thlêk vang vang a, “Hei hi tu nge ni?” tiin bung deuhvin a zawt ta a.

Ettie chuan, “Ka ṭhianpa a nih hi, heta lo awm thar hi a nia. Mr McMurdo, Mr Baldwin-a nen hian inhmelhriat ve ta che u?” a han ti a. Anni pahnih chu phûr lo zetin an bu dun nghat a. Baldwin-a chuan, “Kan awm dan vel hi Miss Ettie hian a hrilh tawh che em?” a’n ti nghal chawt mai a.

McMurdo chuan, “In inhria tih pawh ka lo hre hlei nem,” a lo ti ve chhak a. Baldwin-a chuan, “I hre lo maw? Chuti a nih zawngin lo hre tawh ang che. Ka han hrilh dawt mai ang che a, he nula hi ka ta a ni e. Kea han lenvah vel i châk riauvin ka ring,” a ti ta mai a. McMurdo lah chuan, “Ka lawm e, ka khawlai vah kawr ka lo ha lo hlauh mai,” a lo ti ve mai a.

Baldwin-a chuan, “I ha lo maw ! Mikhualpa, i insual kawr chu i ha ang ka ti?” a ti a, a thinrim chu a meng sen ṭâwn ṭâwn mai a. Zuan thawh pahin McMurdo chuan, “Nia, ka ha alawm. Chu aia thu ngaihthlak nuam chu tun hmain tu hnenah mah i la sawi pawhin ka ring lo ve,” a lo ti ve ta hmiah mai a.

Ettie chuan, “Khawngaihin, Jack! Khawngaih takin! Jack, Jack, a tina ngei ngei ang che!” a lo ti ta lawm lawm mai a. Baldwin-a chuan lawm lo zetin, "Jack’ maw a lo nih hman tawh, heti thleng thleng hi maw in lo thlen tawh?” tih pahin hachang a ṭhial rawp rawp a. (McMurdo tia ko lo va, Jack tia inkoh chu inṭhian, innel, inngaina tihna a ni. Pll)

Chutah Ettie chuan, “Awi Ted, awmze neiin khawsa hram teh, ngilneihna lantir rawh! Ted, min hmangaih a nih chuan ka hmingin thinlung ropui tak pu i nihna te, i ngaihdam theihna te lantir rawh,” a ti leh ta lawm lawm a.

McMurdo chuan dam dap hian, “Ettie, he thil hi kan pahniha kan sawifel turin kan pahniha kutah dah ta mai la kan sawi fel ve maiin ka ring. Anih loh leh Mr Baldwin, saw lai kawtthler thlang deuhvah sawn min va kalpui lawk dawn em ni? Hei khua a thiang mawiin han infiam a chakawm hle a, piah deuhvah sawn hmun zawl nuam tak leh fai zau tak a awm asin,” a ti ta sak mai a.

Baldwin-a chuan, “Ka kut tibawlhhlawh kher lo pawhin inchhir khawpin ka la siam dawn tho che a ni. Ka duh tawk ka ngah hmain he In i lo dai ve ta kher kher hi chu inchhir ngawih ngawih khawpin hrehawm i ti ngei ang,” a ti ta a.

McMurdo chuan, “Chutiang tih nan chuan tun baka hun ṭha a awm dawn em ni? Eng nge i la tih dawn tih lam chu khawvelah a pawimawh ngai lo, tunah eng nge i tih? tih lam hi a pawimawh fo ṭhin,” a lo ti ve hmiah mai a.

Baldwin-a chuan, “Pu-a, a hun thu-hla chu keima thlan tur a ni. Lo buai ve duh reng reng suh, hei hi han en teh,” tih pahin a kawrban chu a’n hlim a. A banpuamah chuan ser ang tak bial chhunga rin kil thum nei hi a lo awm a. McMurdo hnenah chuan, “Khami awmzia kha i hria em?” a han ti zui a. Ani chuan, “Ka hre lo nâa; mahse, hriat pawh ka tum hek lo,” a lo tihsan a.

Baldwin-a chuan, “I la hre mawlh ang, chu chu ka hrilh a che. I tar huna la hriat chhawm ve mai te hi i lo inring ang e, a teuh lo vang. Miss Ettie hian eng emaw chen chu a hrilh thei mahna che le. Ettie, nang pawh kha, ṭhingṭhi chungin min la rawn pan dawn. I hria maw? Ṭhingṭhi chungin min la rawn pan dawn a nih chu! Chutah a hrem dan tur che ka la ngaihtuah chhawm ta ve ang. I tuh a, Lalpa thu ang zelin; i tuh chu i seng ang chu!” tih pahin a chhuak a, a chhuah pahin na fe hian kawngkhar chu a khar a.

McMurdo leh nula chu ngawi rengin rei lo te an han ding a, chutah nula chuan McMurdo chu a kuah ta chawt a. “Awi karei Jack, i va han huaisen teh reng em! Mahse, a sawt lo tlat, i tlanchhiat a ngai tawh! Zaninah Jack, zaninah. A bâk chu beisei tur dang i nei tawh lo. A that ngei ngei ang che. A mitmeng ka en khan ka hre mai. Hotupa McGinty-a leh Lodge chakna zawng zawng leh mi dang dawrzawn khat zet lakah chuan tih theih eng mah i nei lo vang,” a ti a.

McMurdo chuan amah kuahtu nula kut chu zawimuangin a phelh a, a han fawp a, chutah zawitein ṭhutthlengah chuan a ṭhuttir ta a. Nula hnenah chuan, “Duhber, ka duhber! Min hlauhthawnpui duh hlek suh. Kei pawh hi Freemen ve tho ka ni alawm. I pa ka hrilh zo hlim hlawt a nia. Mi dang aiin ka ṭha bik kher lo mai thei, chuvangin, mi thianghlim hmuhte hian mi lo hmu rawk ang e. Tunah pawh chu ka’n hrilh ta che a, huat te pawh min haw tawh hial ang chu,” a ti a.

Nula chuan, “Jack, nang hi ka hua ang che maw! Ka thâwk theih chhung chuan ka haw ngai lo vang che. Helai hmunah lo hi chuan Freeman nih hi a pawina reng reng a awm lo tih ka hria alawm, eng vangin nge ka han huat ngawt ang che? Jack, Freeman i nih ve si chuan engati nge Hotupa McGinty-a hnenah kalin amah chu ṭhiana i zuk siam mai loh? Jack, rang takin kal nghal rawh, thuai vat! Nangmahin i lo zu sawi hmasak a ngai a ni, chuti lo chuan uisathiamin a veh nghal che a ni mai,” a ti ta chul mai a.

McMurdo chuan, “Chutiang deuh chu ka lo ngaihtuah ve mek asin. Ka va kal ang a, ka va tifel vek ang e. I pa hnenah chuan zanin chu heta ka riah tur thu leh awmna tur hmun dang chu zing lama ka zawn tur thu i lo hrilh dawn nia,” a ti a. McGinty-a dawr lam panin a kal ta a.

McGinty-a zu zawrhna dawr chu chu khuaa mi hruanghrau deuh deuh chuan an bawh ber avangin a lun hle nghe nghe a, chumi ni pawh chuan mi an lo ṭhahnem hle a. A neitupa lah chu fiamthu tuihnai lo tak tak thawh lam thiam mi a lo ni vei nen, a mihring mihrinna dik tak pawh hriat a harsa lek lek mai. A fiamthu thiamna ai mah mahin amah an hlauhna chuan a dawr a tilûn zawk a.

Chu khaw chhungah chuan mi hlauhawm ber a ni a, thlang lam mel sawmthum bial zetah a lalna ram chu a pharh thla a, chu mai ni lovin lui ruam sir tuak eng emaw chen thleng chuan amah ṭihbaitute an awm lehzel a, a duhsakna hnial chu thil tih sa loh tak a ni tlat mai. Chu mai ni lovin mi zahawm nih theihna tur dang a la nei cheu mai.

McGinty-a chu vantlang inawpna lamah thu neitu sang tak a ni a, khawtlang inrelbawlna thilah hruaitu zingah a tel a, chu bakah, inkalpawhna kawng lamah ‘commissioner’ a ni bawk a. Amah thlang tlingtute pawh mi sual deuh hlir an ni. Chung mi sualte chuan a duhsak lêt ve an phut tlat bawk.

Chhiah chawi a tam em em a, vantlang hna lam chu an ngaihthah hlum lek lek a, an pawisa vawnna lehkhabute chu thamna pawisa ak chunga endiktute chuan an milembu keu chhuah vel ve mai mai a, mi nun ngil deuh awm chhunte pawh chu sum thianghlim lo theh chhuak turin an vau bet tlat bawk a.

Chutiang chu thil awm dan a nih avangin Hotupa McGinty-a lunghlu pin mawi vuahte chu a lian tual tual a, a rangkachak khaidiatte pawh a tle nalh tulh tulh a, a thuamhnaw inbelte pawh a kum telin a man a sang tual tual mai bawk a. A dawr lah chu a zauvin a tam tial tial a, an dawrpui hmun chanve chu McGinty-a ta a ni thawthang ta mai a.

McMurdo chuan kawngkhar inthên thei chu a han hawng a, dawr chhunga mi lo zi mup mup karah chuan a tek lut ve ta a, in chhung chu meizial khuin a bawh chuai chuai a, zu rim a nam vung vung a, an khawnvar êng ,ṭha zet zet chhitte chu banga an darthlalang hlai pui pui dah thliah thluah chuan a kâp lêt a, a ropui kher mai.

Zu dawr nghaktu ṭhahnem tawk tak hian a dawrtute chu in tur an pe zung zung a, an zu hun chhuahna dawhkan thira siam bawh chuan zu in turho chu an intlar zui a. Zu semna dawhkan hmawr lamah chuan pa sang deuh, chak awm tak mai, pa sa nghet tlet tlawt hi kamsira meizial pet uai zar chungin a lo ding a, chu pa chu tu dang han ni awm a ni lo, McGinty-a ngei a ni ang tih a rin theih mai.

McGinty chu sam dup hlep hlawp, biang hmul dur mai, sam sei deuh mai a ni a. A mit chu a siai lek lek em ni chu aw tih tur a ni a, a hmel han en reng reng pawhin a rothap tawk ang tih pawh a hriat theih bawk; mahsela, a hmel a chhiat loh avang leh pa thusawi tlang hrek hrawk, hlim thei tak a nih avangte chuan a tu tan mah pa nelawm loh leh pa rilru chhia anga han hmuh mai tur zawng a ni hauh lo.

A ṭawngkam chaltlai pui puite pawh chu a ṭawngkam thiam loh vanga puh vek âwm hi a ni a; mahse, a mitmeng thip em em mai, khawngaihna nei lo tawpa mi tu emaw a han mal melh chinah chiah hi chuan a tih duh tur chin leh chin loh chu sawi ngam har tak a ni tawh ṭhin.

Chu pa chu McMurdo chuan duh tawka a thlek chian hnu chuan a va pan a. McGinty-a bulah chuan amah ngai sangtu eng emaw zat an lo awm a, an hotupa fiamthu thawh chu nuihzatthlak loh tê pawh ni se an lo nuih tlawrh tlawrh zel a. McGinty-a chuan McMurdo chu na zetin a lo melh a, McMurdo chuan hlau hauh lo hian a melh let ve kal mai a.

McGinty-a chuan, “Uai, nauva, i hmel chu ka hmuh ngai awm ka va la hre lo em,” a han ti a. McMurdo chuan, “Mr McGinty, he laiah hi chuan mi thar ka la ni e,” a lo ti a. McGinty chuan, “Mi pangngai chinte hming leh an nihna hman kawp dan pawh hre lo khawp khawpa mi thar zawng i nih loh kha,”
a lo ti ngat a.

McMurdo-a bula lo ding zinga pakhat chuan, “Councillor McGinty a nih kha nauva,” a rawn ti a. McMurdo chuan, “Councillor, ka tihpalh a ni. He lai vela thil awm dan hi ka tan chuan a la thar deuh hlek a ni. Nangmah hi mi dangin min kawhhmuh a,” a ti ta a. McGinty chuan, “A nih tak chu. Hei min hmu ta a, heti zawng hi ka ni mai a, eng angin nge mi ngaih?” a han ti nghal a.

McMurdo chuan, “A, khua a la hma khawp maiah; i taksa phu tawka i rilru a len a, i hmel tluka i rilru a ṭhat chuan thil dang han beisei leh chuan tur ka hre mang lo ka ti,” a ti ta a. Zu dawr nghaktu chuan, “Uai, i awphawiah chuan Irish rim i nam ka ti,” a lo ti a. McGinty chuan, “Chu ka pianhmangah chuan i lung a awi tawk tihna em ni?” a han ti leh a. McMurdo chuan, “Teh reng mai,” a lo ti mai a.

McGinty chuan, “Min hmu tura tirh maw i nih a?” a han ti leh a. McMurdo chuan, “Ni e,” a ti ve mai a. McGinty chuan, “Tu’n maw?” tiin a zawt a. McMurdo chuan, “Unaupa Scanlan-a, Lodge 341, Vermissa-a miin. Councillor, i lo hrisel zawkna duhsak nan che zu ka tlak e, chu bakah, kan inhmelhriat tluan zel theih nan,” tih pahin a zu chu a han tlak a, chutia a zu a in pah chuan a kutzungtê chu tlemin a chawi sang deuh hlek a.

Ngun taka lo entu, McGinty chuan, “Khati kha maw ni dawn? He thil hi bihchian deuh ka duh ang Pu...?” McMurdo chuan, “McMurdo,” a lo ti a. McGinty chuan, “Pu McMurdo. Heng laiah hi chuan mi hi kan rin satliah avangin kan la lut mai lo a, kan thu hriat zawng zawng hi kan awih mai ngai bawk hek lo. Pindan hnung lamah hian lo lut lawk ta che,” a ti ta a.

Zu bur ruakin a hual pindan tê tak tê hi a lo awm a. McGinty chuan fimkhur tak hian kawngkhar chu a’n khar tê tê a, chutah zu bur pakhat chungah chuan a ṭhu a, inngaihtuah mûk awm tak hian a meizial chu a’n fawp a; chutih pah chuan a ṭhianpa chu ngun zetin a thlek vawng vawng bawk a. Minute hnih vel chhung chu ngawi rengin a ṭhu a.

McMurdo chu a hlim ru hle a, a kut lehlam chu a kawrchung ipteah a zen lut a, a kut lehlam chuan a hmuihmul buang thek thawk chu a zut nauh nauh va. Thawk leh khatah McGinty chuan puakruk a’n phawrh thut a, “Fiamthu thiampa, lo ngaithla teh; fiamthu min thawh khum i tum te a nih zawngin i nui rei lo kher ang,” a ti ta mai a.

McMurdo chuan intizahawm tak hian, “Freemen Lodge-a tisachungathuneituin unau mikhual a lo lawm luh dan atan chuan a va mak angreng ve,” a ti duh lek a. McGinty chuan, “Nangmah leh nangmah i insawifel a ngai tihna mai a ni. I theih loh chuan i chung a rip kher ang le. Khawia siam nge i nih?” a han ti a. McMurdo chuan, “Lodge 29, Chicago-ah,” a ti a.

McGinty chuan, “Engtikah?” a ti leh a. McMurdo chuan, “June ni 24, 1872,” a ti a. McGinty chuan, “Tisachungathuneitu tu nge?” a han ti leh a. McMurdo chuan, “James H.Scott,” tiin a chhang a. McGinty chuan, “In bial awptu tu nge?” a ti ta zel a. McMurdo chuan, “Bartholomew Wilson,” tiin a chhang leh a.

McGinty chuan, “I ekzamnaah i ti ṭha thawkhat e. Hetah hian eng nge i tih?” tiin a zawt leh ta a. McMurdo chuan, “Nangmahni ang bawkin hna ka thawk; mahse, ka hna chu a hniam zawk fe,” a ti a. McGinty chuan, “Mi i va chhang rang zung zung ve,” a han ti ngawt a. McMurdo chuan, “Ka ṭawng rang ve ṭhin reng a ni,” a ti mai a.

McGinty chuan, “A chêt lamah i rang em?” a’n ti a. McMurdo chuan, “Min hre chiangtute zingah chuan chutiang lamah chuan hming ka chher ve alawm,” a ti duh lek a. McGinty chuan, “I rin aia hmain fiahna i tawk mai thei a nia. Heng lai vela Lodge chanchin hi i hre tawh reng em?” a ti leh ta a.

McMurdo chuan, “Heng laiah chuan Unau zinga tel tur chuan mipa tak tak nih a ngai tih ka hria,” a ti a. McGinty chuan, “Chu zawng a dik zet ang Mr McMurdo. Chicago chu eng vanga chhuahsan nge i nih?” a ti ta zel a. McMurdo chuan, “Chungte zawng ka hrilh awm lo em mai che,” a ti ta mai a.

McGinty chu a meng zau kâwk a, chutianga chhanna chu a la tawng ngai zen zen lo va, mak a ti hle a. McMurdo-a hnenah chuan, “Eng vangin nge min hrilh loh vang?” a han ti a. McMurdo lah chuan, “Unau hnena dâwt sawi chu ṭha hek lo maw le,” a lo ti sam mai a. McGinty chuan, “Chuti, thu dik chu sawi tlak loh khawpa tenawm a ni maw?” a ti ta zel a.

McMurdo chuan, “I duh leh chutiang vel chuan i ngai thei ang,” a ti mai a. McGinty chuan, “Pu-a, ngaithla teh; Tisachungathuneitu ka ni tih i hria a, Lodge-ah hian ka mihring hriat chian loh, a tun hma chanchin pawh ka hriat ngai loh teltir ve mai mai âwm mi ka ni lo tih chu i hre thei ang,” a ti ta a.

McMurdo chu buai hle hian a lang a. Chutah a ipte aṭang chuan chanchinbu (aṭanga a) eng emaw lai cheh thlak hi a rawn phawrh a, “Ṭhiante i hêk lo vang chu maw?” a han ti nghal a. McGinty chuan, “Chutiang thu i sawi leh vaih chuan i hmai vunah khan ka kut bâl ka hrufai ngei ngei ang,” a ti vin ta tûk mai a.

McMurdo chuan, “Councillor, i ti dik a ni. I mi ngaihdam ka dil e. Inngaihtuah mang hlei lovin ka’n râk ve mai mai a nih kha. I kianga ka awm chuan ka him ang tih ka hria e. Kha lai kha han chhiar teh,” a ti ta zawk a,

McGinty chuan kum 1874, kum thar lai vel a, Chicago khawpuia, Market Street-a hmun pakhat, Lake Saloon chhunga mi pakhat, Jonas Pinto-a an kah hlum thu a’n chhiar a. A inziahna lehkha chu pêk lêt pahin, “I tih elo?” a’n ti a. McMurdo chuan a lu a bu nghat a. McGinty chuan, “Engati nge i kah a?” a han ti leh a.

McMurdo chuan, “Sorkar hian pawisa an siam chak lo em a, ka’n siampui alawm maw le; mahse, ka siam leh Sorkar siam chu a inang chiah lo va, an siam chu a ṭha zawk pawh a ni maithei; mahse, ka siam dan chu a hautak lo zawk a, a hmel han en phei chuan a inang deuh reng tho. He pa hian a thehthang lamah min puih...,” McGinty chuan, “Eng tihnaah maw a puih che?” a lo ti a.

McMurdo chuan, “Pawisa chu hmun hrang hranga dah darhna lamah min puih a tum ka tihna a nia. Chutah kan inzah sem ang a ti a, kan insem leh sem loh pawh ka hre mumal ta lo. Ka that a, lungalhthei laih chhuahna hmun lam hi ka pan ta mai a ni,” a ti a. McGinty chuan, “Engati nge lungalhthei laih chhuahna lam kher i pan?” a han ti a.

McMurdo chuan, “E le chanchinbua ka lo hmuh ve danin heng lai velah hi chuan mi hi an dîlchhût vak lo niin ka lo hria a,” a ti mai a. McGinty chu a nui hawk hawk a. McMurdo- a hnenah chuan, “Pawisa tualchher i ching zet a, chutah tual thah i ching leh ta a, tichuan, heng lai velah hian miin an lo ngainat che beiseiin i lo kal ta a ni maw?” a ti ta a.

McMurdo chuan, “Chutiang vel chu a ni,” a ti sam mai a. McGinty chuan, “I che thei bawk chuan ka ring. Pawisa lem siam chu i la thiam tho em ni?” a han ti a. McMurdo chuan a ipte aṭangin pawisa siam chawp, paruk vel a’n phawrh a, “Khangte kha, Washington-a Sorkar hmunpui aṭanga an siam chhuah chu a ni lo alawm,” a ti mai a.

McGinty chuan, “E heu!” tih pahin êng thlârah chuan a’n lek vel a, “A tak nen a dang miah hlei nem. Unaupa, i ṭangkai dawn hle mai. Ka ṭhian McMurdo, mi sual pahnih khat hi chu kan zingah kan zep thei zel a nia, mahni kawng zawh a ṭul chang riau hi a awm ṭhin. Min nawrtute hi kan nawr lêt ve loh zawngin nakinah chuan bui lung tâwk ang maiin kan la intlawh ping dawn a ni,” a ti a.

McMurdo chuan, “Mi dangte zingah, a nawr lêttu-ah ka ṭang ve ang tih ka ring,” a han ti a. McGinty chuan, “I thisen pawh a vawt ṭha ve tâwkin ka hria. Puakruka ka hawlh lai che pawh khan i thin pawh a phu ṭha duh lo,” a han ti a. McMurdo chuan, “Ka tan te chuan khatih lai khan thil hlauhawm eng mah a awm hlei nem,” a ti mai a.

McGinty chuan, “A nih leh tu tan nge hlauhawm ta a?” a han ti a. McMurdo chuan, “Councillor, i tan khan a hlauhawm a ni,” tih pahin a iptê aṭang chuan puakruk kau sa a rawn phawrh a, “Eng lai pawhin ka tin ru reng che alawm. Kei aia i kah ran bik ka ring lo tlat,” a ti ta mai a.

McGinty chu thinrim awm fein a meng tâl tawp tawp a; mahse, za awm deuh maiin a nui ta vak vak a. Chutah, “Khai aw! Kum eng emaw ti chhung chu chutiang hlauhawm thianghlim chu ka lo tawng tawh lo asin. Lodge hian a chhuang viau ang che tih ka beisei. Engnge i duh tak le? Mi pangngai chin biak nan tuibur hmuamda lek pawh hun fal ka nei thei lo vang maw?” a han ti thut mai a.

Zu dawr nghaktu chu a meng buai hle a. “Councillor, min ngaidam rawh; mahse, Mr Ted Baldwin-a a ni tlat. Tunah hian hmuh che a duh tlat a ni,” a ti a. Zu dawr neitu tan chutiang thu sawi chu a ṭul fahran lo. A chhan pawh chutih lai la la chuan Ted Baldwin-a hmel chhe lo tak, nunrawn hmel tak chu kawngkhârah a rawn inlâr nghal a. Zu dawr nghaktu chu a nam chhuak a, kawngkhar a khar ta nghal bawk a.

Thinrim âwm fe hian McMurdo chu a’n melh a, “Min lo thlen khalh a, ti raw? Councillor, he pa chanchin hi kam hnih khat lek sawipui che ka duh,” a ti a. McMurdo chuan, “Chuti a nih a hnu, ka hmaichhanah tunah hian sawi la,” a lo ti vat a. Baldwin-a chuan, “Ka duh hunah, ka duh dan ang thlapin ka la sawi ang,” a lo ti hlur a.

McGinty chuan a ṭhutna zu bûr ruak thawhsan pahin, “E heu, e heu! Heti zâwng chuan ni lo ve. Baldwin, hei unau thar kan nei a, khatianga chibai kha kan tan a mawi lo vang. I kut han phar la, inchibai rawh u,” a ti ta mai a. Thinrim sen ṭeuh chungin Baldwin-a chuan, “Teuh lo lutuk!” a ti ta tlat a.

McMurdo chuan, “A pawi ka sawi a nih chuan insuala sawifelpuiah ka sawm tawh a. A ṭul chuan kuttum nen pawh kan inbei ang, a nih loh leh a duh dan ang zawng zawngin, a lungawina tur a nih chuan kan inbei ang. Councillor, i kutah ka dah e, Tisachungathuneitu i nihna angin rorel ang che,” a ti ta hlauh mai a. McGinty chuan, “Eng thilah nge ni?” tiin a’n zawt a.

McMurdo chuan, “Nula alawm maw le. Nula chuan a duh chu a thlang thei tur a ni,” a han ti a. Baldwin-a chuan, “A thlang thei maw?” a han ti a. An hotupa chuan, “Unau pahnih, Lodge-a chêngte inkarah chuan a duh duh a thlang thei ang chu,” a lo ti a. Baldwin-a chuan, “Chu chu i rorel dan a nia maw?” a han ti a.

McGinty chuan, “Ni e, chu chu ka rorel dan a ni Ted Baldwin.BNangmah em ni rorel dawn?” a ti ta a. Baldwin-a chuan, “I ding leh veia awmpui ṭhintu che, kum nga chhunga i hrik ang maia zuitu che hi i la hriat ngai loh mikhual duhsakin i hnawl ang maw? Jack McGinty, dam chhung atana Tisachungathuneitu tura piang i nih bik loh hi, inthlan leh hun chuan...,”

Chutah zawng Councillor chuan a tuar zo ta lo a niang chu sakei ang maiin a va zuan a, a nghawngah a va rek a, a theh per ta nawl nawl mai a. McMurdo phei chu inrawlh lo sela a tihlum nghal mai awm e. McMurdo chuan, “Councillor, zahngai rawh zahngai rawh!” a ti a, chutia tih pah chuan McGinty chu a pawt sawn a. McGinty chuan a vawn a thlah a. Baldwin-a pawh chu boruak thaw lûtin a buai hle bawk a.

McGinty chuan hah thaw pawng zawrh zawrh chungin, “Ted Baldwin, khatianga sawisak kha i chona a rei tawh reng a ni. Chuvangin, i hmu ta a nih kha. Tisachungathuneitu ka nihna aṭanga ka tlâk huna, nang i chhoh ve chuan i pheikhawk liak turin min beisei a ni maithei. Chu zawng, Lodge pumpui rel tur a ni; mahse, a hotu ber anga ka awm chhung hi chuan a tu a mah hian in râwl min tihrin khumin ka rorelna hi in hnial kalh mai mai tur a ni lo,” a ti a.

Baldwin-a chuan hrawk dawm chungin, “Huatna che eng mah ka nei lo,” a ti sap a. McGinty chuan hmel hlim tak hian, “Chuti a nih chuan ṭhian ṭha tak kan ni tlang leh taBtihna zu nia. Chu chu kan thu tawpna ni rawh se,” a ti leh thei ta mai a.

Chhuar aṭangin zu man to um a la thla a, a hnawhna a’n hawng a, khat fe fein no pathumah a’n thli chhuak a, “Lodge a chêngte inhauhna hmingin i in ang u le. Zu kan in hnuah chuan lungawi loh a thiang tawh miah lo a nia. Ted Baldwin, a nih leh ka zâwt a che, eng nge ni buaina chu?” a ti ta a.

Baldwin-a chuan, “Chhûm a chhah hle,” a lo ti a. McGinty chuan, “Mahse khua a thiang zui chatuan dawn alawm,” a han ti a. Ted Baldwin-a chuan, “Nia, chhia pawh ka chham ngam,” a lo ti leh a. An zu thlit sa chu an han in a, Baldwin-a leh McMurdo pawh chuan an thu chham chu an chham leh chiah bawk a.

Kut nuai nawk nawk chung hian McGinty chuan, “Kha, kha kha kan inhuatna tawpna chu a ni. Unaupa McMurdo, i duh chuan Lodge inthununna hnuaiah hian i lo chêng thei ang, a rem chuan ka tihna. Heng laiah hi chuan, hei Unaupa Baldwin-a te angin an hriat angin inthununna hi a khauh teh a nia, nang pawhin i la hre chhawm ve thuai ang,” a ti ta a.

McMurdo chuan, “Teh meuh mai, a buaina zawng chi zawngin ka khawsa lo vang e,” tih pahin a kut chu Baldwin-a lamah a phar chhuak a, “Inhauh hi ka sam a, ngaihdam pawh hi ka sam a nia. Irish thisen ka put vang hi a ni ang e an ti ṭhin a, tak tak ni maw; mahse, ka tan chuan kan inhmuh thiam lohna zawng zawng chu a tawp tawh e, lungawi lohna eng mah ka nei lo,” a ti a.

Hotupa chuan a melh reng avang chauhvin Baldwin-a chuan McMurdo-a kut phar chhuah chu a’n dawm ve bawk a, mahse a mitmengah chuan han inchibai chu châkna chhe tê pawh a nei lo tih hi a lang reng mai a. McGinty chuan an pahniha dârah chuan a’n bêng a, “Pawnfen feng ho lah hi, an mak khawp. Ka naute hian pawnfen pakhat fengtu hmeichhia kher kher an han duh rawn a. A buaithlak a nih hi.

"Tisachungathuneitu remsak mai chi pawh in ni lo, nangmahni pahniha intihfel chi a ni. Hmeichhe tel lo pawhin buaina kan ngah tawk. Unaupa McMurdo, Lodge 341-ah ziah luh ve i ni dawn a ni. Chicago lama an tih dan ang ni lem lovin keimahni inlawm luh dan te kan nei ve a nia. Inrinni zan hi kan inkhawm hun a ni a, chuta i lo tel ve chuan Vermissa Valley-ah hian i zalen kumkhua tawh dawn a ni,” a ti ta a.

(Valley - Lui ruam tihna mai a ni. Mizorama tlâng bâwk te tak te te leh lui ruam zim te te ang hi a nih ve chiah loh avangin hriat thiam mai tur. McMurdo tih te, McGinty tih te, MacDonald tih te hi a lam dan a inang deuh vek - Mak- Mar- Daw, Mak-Gin-Ti, Mak -Daw-Nald tih tur an ni hlawm. Councillor tih pawh hi - Kaun-si-lawr - tih tur a ni; roreltu pâwla tel ve tihna mai a ni. Lodge tih hi chu ‘In’ tihna tluk a ni a; mahse, ‘Hostel’ lampang hian a pawl mah mah. Pll).

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » May 25th, 2018, 8:28 pm

SHERLOCK HOLMES
THE VALLEY OF FEAR
AUTHOR : SIR ARTHUR CONAN DOYLE
TRANSLATED BY : PL LIANDINGA
CHAPTER - 10
(Rozami Pachuau)

LODGE 341, VERMISSA

Chumi tuk chuan McMurdo chu Jacob Shafter-a In aṭangin a insawn chhuak a, hmeithai pakhat, Mac Namara-i Inah, khawpui thlafêmah a insawn lut ta a. Scanlan-a, rêla a chuanpuipa pawh kha a hnu lawk chuan Vermissa-ah a lo lut ve a, McMurdo nen chuan an awm dun ta a. Chu hmeithai Inah chuan chêng dang an awm ve loh avangin an duh duhin an lûtin an chhuak a, an titi duh zawng pawh inthlahrunna nei hauh lovin an sawi thei a.

McMurdo-a awmna hlui, Shafter-a pawh chuan a thinurna a tinêp a, a châk deuh chang apiangin McMurdo chuan Shafter-a Inah pawh chaw a lam leh thei tawh a, Ettie nena an inkawmna pawhin a awmhmun sawn chu a sukuk phah teh chiam lo. Ettie leh McMurdo inkawm dan chu a thûk tial tial a, anmahni pawh an inngaina sâwt hle mai.

McMurdo chuan a In luah tharah chuan a pawisa siam chawp ken chu pindanah a phawrh a, Lodge a chêng, unau eng emaw zât chu eng mah sawi lo tura an intiam hnuin an en ve a phalsak a. A en tura lo kal unaute chuan eng emaw zat an paipawn chhuak ṭheuh bawk a. McMurdo pawisa siam chawp kawlte chuan a tak a an hlawm em avangin han hman leh han leklam vel pawh a hlauhawm lo reng reng a.

A mak an tih ber chu chutianga pawisa siam thiam siin hna a’n thawk buangbar peih tlat chu a ni. Mahse McMurdo chuan hna a neih loh vaih chuan ‘police’ lamin an zarbuai thuai dawn tih chu a hrilh hlawm a. A dik chauh chuan ‘police’ pakhat chuan a zar buai der tawh mai; mahse, a vanneih nge ni, McMurdo chuan a hmingṭhat phah ta hlauh zawk a ni.

McGinty nena an inhmelhriat hnu chuan McGinty dawr lama a kal loh tlai chu chhiar tham leka tlem a ni a, chu lai hmun tiṭawphnawktu mi sual rual chu an hotupa tih dan takah ‘naupangho’ an ni mai a. Chutia McGinty dawr lama McMurdo a kal ziah ṭhin pawh chu ‘Naupangho’ nena inkawm nêl a duh vang a ni.

McMurdo chêtze duhawm takte leh a thu sawi tum tlang pui puite chuan a ṭhiante a tihlim ṭhin a, mi dangte chuan an ngaina phian mai. Chu bakah, mi hruanghrau deuh awmna zingah chuan rang tak taka amah lo hnialkalhtute a chhang fithla ṭhinte leh fing angreng tak taka a hnial dang ṭhinte chu a zahawm ve riau ṭhin.

Zan khat chu dawr chhunga mi an tam vanglai tak hian dawr kawngkhar chu a rawn inhawng a, ‘uniform’ dumpawl ha pakhat hi a lo lut a. Chu pa lukhum chhip zawl leh a inthuamna rawngte han hmuh chuan Coal and Iron Police a ni tih a hriat mai. Chung Police-ho chu Lungalhthei lai chhuaktute leh Rêl lama thawk ṭangrualin ‘police’ pangngai puibawm tura an din a ni a, a dik chauh chuan chu lai bial vela mi sualho chu ‘police’ naran chuan an ti thei chai lo a ni ber mai.

Chu ‘police’ pa chu a lo luh veleh In chhunga tîtî mur mur thâwm chu tlemin a reh deuh hlek a, ṭhenkhat chuan an melh hrek hrek a, mahse America ramah chuan mi sualte leh ‘police’ te hi eng emaw ti taka an inzâwl chang a awm avangin chumi ṭum pawh chuan McGinty chu a phût pawh a phu der eih lo.

Police Inspector chu zu in turin zu inna dawhkan hmaah chuan a rawn ding hnai a, “Whiskey eng mah pawlh loh ka duh e, khua a duai em mai,” a’n ti a. Chutah McGinty-a hnenah chuan, “Councillor, kan la inhmu ngai lo a ni maw?” a’n ti zui a.

McGinty chuan, “An ‘captain’ thar hi i ni maw?” tiin a’n zawt let ve thung a. Police chuan, “Ni e, Councillor, nang leh he khaw enkawltu lawk zualte hi chu dan kenkawhna lama min puibawm turin ka beisei che u a nia. Ka hming chu Captain Marvin a ni a; Coal and Iron-a mi ka ni,” a ti a.

McGinty chuan, “Captain Marvin, i tel lovin kan khawsak a tluang zawk ang. He khaw enkawl tur ‘police’ hi kan nei hran ve a, ‘foreign’ thil lakluh reng reng hi kan ngaina ve lo. Nangni, khawpui liana chêngte sum avanga mahni khua leh tui nihpuite pawh kâp hreh lo, inhlawhfa mai mai hi engah vak kan ti ta lo,” a ti ta chheu chheu mai a.

Captain Marvin-a chuan ngai haw duh lovin, “A, chuti a nih leh chutiang lamah chuan inhnial buai lo vang. Kan tih tur ṭheuh hi tluang takin kan tih ka beisei a; mahse, kan thlir dan erawh chu a hrang deuh pawh a ni thei,” a han ti a. A zu no dawm lai chu a in zova, kal mai turin a han inher a, chutih lai chuan McMurdo chu a va hmu a, “Iau! Heta hi! Ka ṭhian hlui ka chhar e,” a ti ta a.

McMurdo chuan, “Ka dam chhung hun hman tawhah i ṭhian emaw, ‘police’ rawkrai lo ṭhian emaw ka nih ngai reng reng ka la hre lo,” a lo ti bûl hmak a. Captain chuan, “Ṭhian han tih lêmah hei, motor chuanpui ṭhian tih ang vel mai mai hi maw le. Chicago a awm ṭhin, Jack McMurdo kha i ni tiraw?” Pha buai duh lo mai teh,” a ti ta mai a.

McMurdo chuan, “E é ê, ka pha hlek lo vang. Ka hming hi ka zahpui i lo ring deuh elo?” a ti a. Captain Marvin-a chuan, “Zahpuina tur chhan ṭha tawk chu i nei alawm,” a han ti ve ngat a. McMurdo chuan a kut a hûm ruh a, “Chu i sawi chu eng nge a awmzia ni ta ngai?” a ti rum ta âl mai a.

Captain Marvin-a chuan, “Khaih, khaih, Jack; kei mi khuainuai ngawt a sawt lo vang. He lai hmun, lungalhthei laih chhuahna hmun hrehawma ka lo kal hma daih hian Chicago-ah Officer hna ka chelh a, Chicago khawpuia suahsual bawl tawh hi chu an hmel ka hmuhin ka hre ve mai zel a nia,” a ti a.

McMurdo chuan, “Chicago Central-a Marvin-a an tih kha ka ni tihte i tum rawk elo?” a han ti a. Captain Marvin-a chuan, “Hmana Teddy Marvin-a bawk kha ka la ni ve hram hram e. Jonas Pinto-a an kah hlum thu kha kan la theihnghilh hlei nem,” a ti leh ta zel a. McMurdo chuan, “Ka kah a ni awzawng lo,” a ti a.

Captain Marvin-a chuan, “I kah a ni lo maw? Chu zawng, thu lai i tan hle a nih pek chu, lo’m ni? Mahse a thi ta kher kher chu i tan chuan a remchang hle a ni, ani chu thi lo se i vun an lihsak ang che chu. Mahse chu zawng, tun hma thil angah i ngai teh ang, nang i lo ni, kei ka lo ni bawk nen, hetiang sawisep hi ka tih tur a nih chiah pawh ka hre lo ve. I duh phei chuan naktukah pawh Chicago khawpuiah chuan i va tuallim ve thei ang chu, i lakah thubuai mumal han siam tur hre hlawm hek lo,” a ti ta a.

McMurdo chuan, “Ka awmna hmunah hian ka hlim tawk tho mai,” a lo ti a. Captain Marvin-a chuan, “Ka tih ṭhat vei nen lawmthu pawh min hrilh miah lo va,” a ti ta zel a. Chutah zawng, McMurdo chuan, “A nih leh ka lawm e. Rilru chhe pui chu i pai ru em lo’ng chu maw,” a ti ve ta a; a hmelah phei chuan lawm hmel reng reng hmuh tur a awm lo.

Captain Marvin-a chuan, “I awm ṭhat duh chhung chuan ṭawng thei lo ang maiin ka kâ ka chîp dawn a; mahse, pawi i khawih vaih zawngin thu dang daih a ni. Mangṭha le, mangṭha, Councillor,” a ti a, a chhuak ta a. Captain Marvin-a a han chhuah fel meuh chuan McMurdo chu mi dangte chuan an bawr nghal lat lat mai a. A chet dan leh a tun hma chanchin chu an han zawt ṭhin a; ani lah chuan sawi ṭha duh mang lo hian a riat ral khum vel mai mai a.

A zu heh heh chuan an chibai uluk mai lehnghal a. Captain Marvin-a chuan McMurdo chu chawimawina tangkapui a pe hi a ni ngawt mai. McMurdo chuan zu in lam pawh a lo hnehsawh ve kher a, no tam tawk fe a tlâk hnuah pawh rui lo ang chiah hian a la awm thei ṭhin a, chumi zan erawh chuan a in hnem lutuk deuh va, Scanlan-a’n hruai haw lo phei se chuan zu zawrhna dawhkan hnuaiah a tlaivar ngei ang.

Inrinni zan a lo ni a, McMurdo chu Lodge-ah an la lût ve dawn ta a. McMurdo chuan an tih dan pangngai zawh ve kher lova lâkluh mai a lo inbeisei deuh va, a chhan pawh Chicago lam chhuak a nih vang a ni. Mahse Vermissa-ah chuan tih dan phung pangngai, an lo chhuan ve em em an lo nei tlat a, mi thar tan palzut mai mai chi a ni awzawng lo.

An lakluhna inkhawm chu an Union House-a pindan zau deuh maiah an nghat a, chu pindan chu chutiang nikhua atana an zuah bik chu a ni nghe nghe a. Pindan chhungah chuan mi sawmruk vel an awm a; mahse, chuti zawng chu an ni hauh lo. Lodge hrang hrang a awm a, tlang bâwk piah lama anmahni pawl zinga mite pawh an lo tel lo ve ṭeuh tho.

An pawl chu a len tham em avangin buaina puitham deuh an neih hi chuan hmun hla deuh hlek aṭang pawhin an inpui zel a. Veng khata mi tukdaih ngai emaw an awm chuan chumi hna chu veng lehlama an pawl mi leh saten an thawk mai a, a titute chu a lo tuartu tan chuan hmelhriat loh hlir an ni thei tlat ṭhin. Chu lai lungalhthei laih chhuahna bial velah chuan an pawl mi leh sa chu a tlem berah mi zanga chu an awm ngei ang.

An inkhawmna pindanah chuan dawhkan sei fe hi a awm a, chumi kîl chuan a inkhawma te chu an ṭhu ṭhap a, chu dawhkan bulah chuan dawhkan dang pakhat a awm a, chu dawhkan chungah chuan zu an hung tlar tuar mai bawk a. A ṭhen phei chuan an zu hunna dawhkan lamah ngawt chuan an mit an lên tawh nghe nghe.

McGinty chu dawhkan hmawr lehlamah chuan a ṭhu a, a sam pheng zet chungah chuan buikelek puan lukhum chung zawl hi a khum a, a nghawngah chuan puanthem senduk hi a vêt bawk a; a hmel han en mai chuan thlarau suak puithiam, inthawina thianghlim lo daibawl turte pawh hi a ang ve rum rum mai. A vei lam leh ding lamah chuan Lodge-a an mi lawk deuhte an ṭhu a, Ted Baldwin-a sakhmel nunrawn hmel tak, ṭha ve vawr si pawh a to ve lâr a.

Chungho chuan an hna chanpual entir nan puanthem emaw, tangkapui emaw an inbel zel bawk a, an kumah pawh puitling an ni tih a lang reng mai. Mahse anni baka mi dang awm vete chu kum sawm pariat leh kum sawmhnih panga inkar vel an ni a, an aia û ten tih tur an tih chu sawi nawi hauh lova tuk ṭawlh zel mai tur an ni.

A rual û deuhho zingah chuan hmel han en reng reng pawha tihthinrim hlauhawm awm tak, dan pawisak lohna thinlung pai âwm hliah hliah hi an kat nuai a; mahse, a naupang deuhho zinga han hawi kual thung erawh chuan chung tleirawlho, hmai uang taka hawi kual a, an hmaa tih tur awm nghahhlelh hmel tak takte chu mi naran anna riau an nei tlat mai.

Tual thah ching hlauhawm tak rual tawm khawm, rilru leh thlarau ṭhang chhe tawh, an ute'n an tirhnaah chuan mi thah pawh hnial lo an ni ang tih rin a harsa lek lek mai. Chung tlangvalho tan chuan an rual uten tihtur an tuk, anmahni ṭawng taka ‘fel fai ṭhah’a han hlen chhuah chu eng hna pawh ni se thil nuam tak a ni tawh tlat.

Eng lai maha an pawi sawi ngai lo, a hmuh pawh an hmuh ngai loh laka kut lek tura an hotuten an tirh changa phûr taka kal a, tham lo taka hna va hlen chhuahte chu an tan chuan thil chapopuiawm tak a ni. An mi thah chhu hlumtu dik tak nih inchuhin an inhnial a, an mi tihhlumte thi tur râwl chhuah dan zirin an intihlim ṭhin a, an thih dawna an kut ke kawm vel leh an hmel inpawt sawi vel zirin fiamthu thawh nan an hmang zui ṭhin.

Tun hma chuan an chet dan chu an thup ve deuh ṭhin pawh aniang; mahse, he thu ziah hun lai vel hi chuan an chet dan chu thup pawh an tum tawh lo, a mualpho thei ang ber hlir emaw an zawn tih hial tlak a ni zawk. A chhan pawh dân leh hraiin anni chu phuar beh a tum zing tawh a, a hlawhtlin ngai reng reng loh vang a ni.

An thil sual tih hriatpuitu atana ding ngam an awm lo va, chutih laiin an tih lohzia hriatpuitu an duh zat zat an phawrh thei thung a; an pawlin sum a ngah tawk avangin America ram chhunga ukil thiam ber ber chu an lam ṭangah an ruai thei bawk si.

Inthlahrung lo lêka kum sawm chhung suahsual an bawl chhungin an pawl zinga mi tu mah an la tâng bo lo va, an tana hlauhawm awm thei ber chu an kut tuartute chu an ni mai. Chu lah a inrin loh hlanin an bei a, an tam hneh ziah bawk a, khawi maw lai laiah chuan an mi beihte chuan a beitute chu an lo sik pilh ve hman zeuh ṭhin lek a ni.

McMurdo chu engin emaw a hmuak tih thu chauh an hrilh a, engin nge hmuak tih erawh chu an hrilh duh miah thung lo. Pawn dep pindanah an pindan zau aṭang chuan an hruai chhuak a, an inkhawmna pindan chhunga an ṭawng ri mur mur chu a la hre phak a, vawi hnih khat phei chu a hming han lamrik hi a hre nghe nghe a; a sikul luh dilna an ngaihtuah dawn a nih a ring mai a.

Chutah an awmna pindanah chuan vengtu pakhat hi a lo lut a, chu pa chuan a âwmah rangkachak rawng leh rawng hring inchawhpawlh puanthem hi a kham zawngin a hreng a. Lo lut thar pa chuan, “Tisachungathuneitu chuan aikhirha, a mit tuam bawka hruai luh tur a ti,” a rawn ti a.

Chutah a kawrchung hak lai chu an hlihsak a, a kawrban ding lam chu an hlimsak a, a ban bul, a kiu chung lawkah chuan hruiin an aikhirh ta tlat mai a, chumi zawh chuan a mit chu puan chhah tawk lel lawl hian an han tuam zui a, eng mah a hmu thei ta lova. Chutia an tih zawh chuan an inkhawmna pindan zauvah chuan an hruai lut leh ta a.

Pindan chhunga an han luh chuan mi ṭawng mur mur thâwm chu a hria a, chutah McGinty aw chu dul ruih, thum deuh hlek hian a lo ri ta a. McGinty chuan, “John McMurdo, Ancient Order of Freemen member i ni tawh em?” a’n ti a. ‘Aw’ tih nan McMurdo chuan a lu a lo bu a. McGinty aw chuan, “I Lodge chu 29, Chicago a ni maw?” a ti leh ta a, ani chuan a lu a bu leh mai a.

Aw chuan, “Zan thim hi chu a nuam lo,” a han ti a. McMurdo chuan, “Nia, mikhual tan phei chuan zin vah nan a nuam lo,” a lo ti a. Aw chuan, “Chhûm a chhah hle mai,” a han ti leh a. McMurdo chuan, “Nia; thlipui a lo tleh dawn a ni,” a ti ve leh a. Tisachungathuneitu chuan, “Unaute lung a awi tawk em?” a han ti a. An lungawi tih hriat tak hian an phun mar mar a.

McGinty chuan, “Unaupa, i chhinchhiahna leh i chhinchhiahna tepêng aṭangin kan zinga mi ngei i ni tih kan hria,” a han ti a. McGinty bawk chuan, “Heng lai leh he lai chhehvelah hi chuan tih dan phung pangngai kan nei a, chu chu mi chhia leh ṭha kan thliar ve-na a ni a, chuvangin, chutiang thil chu tunah kan ti dawn a ni. Fiahna tawk turin i inpeih em?” a ti a.

McMurdo chuan, “Inpeih e,” a lo ti a. McGinty chuan, “I lung a lian em?” a ti leh ta a. McMurdo chuan, “Pa lunglian ve tawk chu ka ni alawm,” a lo ti a. McGinty chuan, “Chuti a nih chuan a nem ngheh nan hma lamah pen khatin pen rawh,” a ti leh ta zel a. Chutia a sawi rual rual chuan McMurdo-a mit khinghnih zawnah chuan thil zum ni âwm tak hian a do ta a, a mit chhiat huama hma lama pên chhuah a ngai ta tlat mai.

McMurdo chu a intipaukhauh lui a, a han pên a, a han pên luih takah chuan a mita dotu chu an la kiang ve ta mai bawk a. An lawm hle tih entir nan an phun mar mar a. McGinty aw bawk chuan, “A lung a lian e. Na i tuar thei em?” a ti leh ta a. McMurdo chuan, “Midang aia ka theih lohna bik ka hre lo,” a lo ti ve mai a. Chutah aw vek chuan, “Fiah rawh u,” a ti leh ta a.

McMurdo chu ṭê chhuak lo turin a insûm nasa hle mai, thil dang reng reng a ngaihtuah chang lo, ṭê chhuah loh ringawt chu a tum bulpui ber a ni. A banpuam chu a nat hian a na vawng vawng mai a, a thidang ṭhelh lehnghal; mahse, a hmui a pet ruh a, a kut a hum ruh tlat a, rawl chhuah hlek lovin a tuar chhuak a. Chu mai ni lovin, “Kha aia na pawh ka la tuar thei,” a han ti zui a. Chutia a’n tih takah chuan lawmin an lo haw haw dar dar a.

Chutianga ṭum khatnaa che ṭha chu Lodge-ah an la awm ngai lo. Lawmpui nan a hnungzangah an rawn beng zawt zawt a, a mit tuamna chu an hlip a, mit khap sawk sawk chungin chhuatah chuan a ding reng a. McGinty chuan, “Unaupa McMurdo, thil pakhat leh chauh. Rinawm tur leh thurûk vawng turin chhia i chham tawh a, chu i chhechham bawhchhiat chu mathei lova thih nghal hmiahna a ni tih i pawm em?” a ti a. McMurdo chuan, “Pawm e,” a lo ti a.

McGinty bawk chuan, “Tisachungathuneitu thu reng reng chu zawm vek i inhuam bawk em?” a ti ta zel a. McMurdo chuan, “Huam e,” a ti ve ta zel a. McGinty chuan, “Chuti a nih zawngin Lodge 341, Vermissa hmingin kan zinga lo tel a, nawmna a chan ang ang chu chang ve zela, a hrehawmna pawh tawrhpui turin kan zingah ka lawm lut a che. Unaupa Scanlan, zu kha dawhkan chungah han hûng rawh le, kan unaupa thar, mi tling tak mai lawm nan i han in teh ang,” a ti ta a.

McMurdo-a kawrchung chu an rawn laksak a; a hak hmain McMurdo chuan a ban ding lam chu a’n en a, a banrek chhak lawk, a ban-puam laiah chuan thir linga an dehna hnuhma, bial chhunga rin kilthum nei hi a lo awm a. A bula lo ding ve pahnih pathum chuan an kawrban an han hlîm a, chutiang chhinchhiahna chu an rawn tilang a, “Keiniho pawh hian kan pu ve vek; mahse, nang anga huaisen chuan kan tuar chhuak ve lo,” an ti a.

McMurdo chuan, “Ho mai mai! Khatiangte chu eng mah tham a ni hlei nem,” a han ti tak na a, a sawi lai ngei ngei pawh chuan a ban chu nat namen loh hian a nâ a. An zu in an han zawh hnu chuan Lodge tih dan pangngaiin rorel lam an ṭan a. Chicago lama an tih ve ṭhin dan chauh lo hre ṭhang, McMurdo chuan an thil tih dan chu mak a ti hle mai a; mahse, mak a tih leh tih loh chu eng mah a tilang duh hlek lo va.

McGinty chuan, “Kan thil tih tur hmasa ber chu he lehkha, Division Master Windle, Merton County aṭanga lo kal, Lodge 249 aṭanga rawn thawn chhiar chhuah hi a ni. Hetiang hi a ni :

‘Pu Duhtak,

He lai bul hnaia lungalhthei laih chhuahna neitu, Andrew Rae-a, Rae and Sturmash-a thawk lakah hian hna thawh tur a awm a. Nikum favang laia kan unaute pahnih tha in bat kha in la hre rengin ka ring a, ‘police’ pakhat laka hna thawh tur awm chungchangah in hawh a nih kha. Mi ṭha tawk pahnih in rawn thawn theih chuan he Lodge pawisa vawngtu, Higgins-a’n a lo buaipui thei ang, Higgins-a chênna hmun chu in hriat kha. Higgins-a chuan chet hun tur leh chetna hmun tur a lo kawhhmuh dawn nia.

Zalenna thlira i thawhpui,
J.W.Windle, D.M.A.O.F.

“Windle-a hian a ṭula kan dil phawt chuan a mite tha min hawhtir hi a la hnial ngai lo va, keini tan lo hnial chu thil mawi a ni hauh lo vang,” a han ti te te a. Chutah mi dang chu a’n thlêk kual a, “He hna thawk tur hian tu nge inpe dawn?” a ti ta a. Tleirawl ṭhenkhat chuan an kut an lo phar chhuak sap sap a.

Tisachungathuneitu chuan lungawi fein a nuih var var hlawm a. Chutah, “Tiger Cormac, nang kha i rintlak ang. I hna hnuhnung ber i thawh tluka ṭhaa i thawh theih chuan a tihzia hle ang. Nang pawh, Wilson, i ṭha tawk ang,” a ti leh ta a. Tlangval la naupang tak, a kut lo phar vetu pakhat chuan, “Puakruk ka nei hlei nem,” a ti a.

McGinty chuan Wilson-a hnenah chuan, “I hna hmasa ber tur a ni maw? Eng hunah emaw chuan thisen i tem a la ṭul dawn tho tho va, tun hi chutiang atan chuan i tan hun ṭha a ni e. Ka hriat sual loh chuan puakruk chuan a lo nghak reng tawh zawk ang che. Thawhṭanni-a in hna thawhsak turte hnena in va inlan hman chuan inbuatsaihna hun ṭha tawk in nei thei ang. In lo kir leh hunah zawng, ropui takin kan lo hmuak ang che u,” a ti a.

Pa hmai dur deuh, duh rum hmel zet mai, a hruanghrau avanga ‘Tiger’ (Tiger-Sakei Pll) tia a hming an phuah belh, Cormac-a chuan, “Tun ṭumah hian lawmman lam a awm dawn em?” a han ti a. McGinty chuan, “Lawmman lam chu lo ngaihtuah buai teh suh. Tling takin i hna thawk phawt mai rawh. I thawh zawh hunah zawng, i thingrem mawng luah tur tangka tlem azawng chu a awm mahna,” a tihsan mai a. Wilson-a chuan, “Kan mihringa chuan eng nge maw a tihsual le?” a han ti a.

McGinty chuan, “Chutiang zawhna chu nangni ang rual kâ aṭanga chhuak awm lek a ni. A chungchang chu saw lamin an rel fel vek tawh a, nanga lo buaipui ve a ṭul awzawng lo mai. Kan tih tur chu an mi ngenna tihhlawhtlin a ni mai a, anni pawhin kan tih ang chiah chuan an ti ve bawk ang. Chutiang han sawi tâk azarah chuan chawlhkar lo thleng leh turah hian Merton Lodge aṭangin unau pahnih an lo kal dawn a, eng emaw tihsak turin min rawn ngen dawn a ni,” a han ti zui a.

Tu emaw hian, “Tute nge an nih chu le?” tiin a lo zawt a. McGinty chuan, “Zawhna siam loh a finthlak ang. Eng mah in hriat loh chuan eng mah in fin fiah thei lo va, chuti a nih chuan eng mahin a tibuai thei lo che u tihna a ni; mahse, chung mite chu hna an thawh tawh vêka fel fai ṭhaka thawk chi an ni tih ka’n hrilh hram ang che u,” a ti a.

Ted Baldwin-a chuan, “A hun tawh reng a ni. Heng lai velah hian mite hi an khawsak a nalh lo sawt riau mai. Kar hmasa mai kha a ni lo’m ni Foreman Blaker-a’n kan mite pathum a lo hnar kha? A leibatna hi a rei tawh bawk a, kim ṭhapin a la rul ngei ang,” a ti a.(Foreman - mihring hming a ni lo, hnathawhnaa hotu tihna a ni.Pll). A bula ṭhu hnenah chuan McMurdo chuan, “Eng lei nge maw a bat le?” a han ti a.

A bula ṭhu chuan, “Musep maw le. Silai kaw hmawr aṭanga chhuak ngei a dawng dawn alawm. Unaupa, kan chet dan hi eng nge nia i ngaih?” a ti a, a nui hawk hawk a. McMurdo-a thisena sualna zâm tel ve chu a lo thawk ṭan ta tak tak a ang hle mai, a bula ṭhu hnenah chuan, “Ka duh zawng tak a ni. Tlangval thisen chak lai tana hmun thlannahawm ber zawng a nih hi,” a ti ve ta a.

A bul hnaia ṭhu, a ṭawng hre phate chu a thu sawi lawmin an nui ham ham a. Tisachungathuneitu chuan an nui thawm chu hriain, “Eng nge ni ta?” a rawn ti a. Mi dang chuan, “Kan unau thar hi alawm maw le. Kan chet dan hi a ngeih zawng tak mai a nia,” an ti a.

McMurdo chu a ding chhuak zawk a, “Hotu Zahtlak Ber, mihring kan indaih lo a nih chuan Lodge ṭanpui theitu nih chu ka thil thlakhlelh ber a ni e,” a ti ta mai a. A thu sawi chu lawmin kut an lo beng dar dar a. Kawlkilah lawmna ni êng mawi tak a lo chhuak dawn ta a ang hle mai; mahse, chung zinga rual u deuh tan chuan hmasawnna kawngah an tlan chak lutuk hrat a ang ve viau bawk a ni.

An ziaktu lu, Harraway, pa hmelṭha lo tak, mulukawlh ang deuh tak chuan, “Unaupa McMurdo hian Lodge-in a rawih duh hun taka hna a thawh ve hun a nghak tur niin ka ring a, chu chu ngaihtuahho ila ka duh hle mai,” a ti ta bauh mai a. McMurdo chuan, “Ni e le, chu chu alawm ka thu sawi awmzia kha. In kuta awm ka ni lawm,” a lo ti ve ta vat mai a.

An hruaitu chuan, “Unaupa, i hun chu a lo la thleng ve mai ang. Mi chhawrnahawm tak angah kan han ngai sa che a, kan hual ru reng che a nia, he lai bial velah hian hna ṭha tak i thawh ngei kan ring tlat bawk a ni. I châk viau a nih chuan zaninah thil tih tur tê tham deuh hlek a awm a, chutah chuan i tel ve dawn nia,” a ti ta a. McMurdo chuan, “Hna pui tham deuh thawh hun ka nghak zawk ang e,” a lo ti a.

McGinty chuan, “Zaninah pawh i tel ve a remchang tho alawm. Heng lai mite lakah hian eng ang dinhmunah nge kan din tihte pawh tlemin i hriat phah deuh ang a. I chhawr ṭangkai phian tur asin. Nakinah thil awm dan chu kan la puang chhuak ang chu. Tunah chuan, inkhawm hmaa thil sawi tur pahnih khat ka nei a.

"A hmasain, kan sum enkawltu kha, pawisa dahna Ina kan sum neih zah ka’n zawt ang a. Jim Carnaway-a nupui thihsan tak kha sum leh paia kan vûr a ngaih kha. Jim Carnaway-a chuan Lodge hna a thawk a, a boral phah ta a, chuvangin, a nupui chu kutbêngin a awm lo ngei ang tih hi keimahni mawhphurhna a ni ta a ni,” a han ti a. McMurdo-a bula ṭhu chuan McMurdo-a hnenah chuan, “Thla hmasa khan, Marley Creek-a awm, Chester Wilcos-a thah an tumna lamah Jim-a chu a thi ta a ni,” tiin a hrilh a.

An pawisa enkawltu chuan a hmaa an pawisa dahna Inah an sum dah luh vel ziahna bu pharh reng chung hian, “Tunah chuan sum leh paiah kan dinhmun a ṭha hle. Tun hnai deuh khan eng ilo laih chhuahna neitute leh mi dangte pawh an thilphal ta hle a. Max Linder and company-in cheng zanga fai ṭhah an pe a. Walker Brothers-in cheng za an rawn chhung lut a; mahse, keima thuin ka lo pe kir a, cheng zanga ka ngiat a.

"Thawhlehnia chanchin ka hriat loh chuan an thil tuaivirna khawl a hman theih loh a ni mai. Nikum khan an finchhuah hman hmain an kawih dinna ka hâl chhiatsak a ṭul a nih kha. West Section Coaling Company-in an kum tin thawhlawm an rawn chhung lut bawk a. Kan ṭha e,” a ti a. Unau zinga pakhat chuan, “Archie Swindon-a ve kha eng nge a chanchin?” a rawn ti a.

Sum enkawltu chuan, “He lai district hi a chhuahsan tawh. Kan mi tenawmpa chuan lehkha a hnutchhiah a, he laia lungalhthei laih chhuahna enkawltu hausa tak niha, mi sual thu hnuaia awm ai chuan New York-a awm a, mahni duh dan ang anga hmunphiattua ṭan a duh zawk thu a sawi. Lehkha rawn thawn buangbar kher lo pawha tlan bo ve mai awm. He lai lui ruamah hi chuan a hmel a rawn lar ngam tawh hauhvin ka ring lo,” a ti a.

Pa upa lam deuh, inmet fai veng vawng, ngilneih hmel tak mai, mithmul buk ṭha deuh hi dawhkan kil tawp aṭang chuan a lo tho va, “Pu Treasurer (Treasurer - sum vawngtu), kan mi um chhuah tak pa eng ilo vel chu tu nge lei ta?” tiin a zawt ta a. Sum enkawltu chuan, “A ni tak, Unaupa Morris, State and Merton Country Railroad Company-in an lei a nih kha,” a ti a.

A zawttu pangngai bawk chuan, “A nih leh nikuma chutiang bawka hralh tura an zawrh, Todman-a englo laih chhuahna khur leh Lee-a englo laih chhuahna khur kha tu nge lei ta?” a ti leh a. Sum vawngtu chuan, “Unaupa Morris, a leitu company pangngai bawk hian an lei a ni,” a ti a. Morris-a vek chuan, “A nih leh, tun hnai deuhva an pamṭul tak, kahpathir lam sawisakna hmun, Manson-a ta te, Shuman-a ta te, Vand Dend-a ta te leh Atwood-a ta te kha tu nge lei ta?” a ti ta zel a.

Sum enkawltu chuan, “Hengte hi chu West Gilmerton General Mining Company-in an lei vek a ni,” a lo ti a. Hotupa chuan, “Unaupa Morris, chung hmun hrang hrang chu tu nge lei a, tu nge hralh tih mai mai chu kan dulvun thep leh thep loh hriltu a ni hlekin ka hre lo mai. He lai bial aṭang hian chung thil laih chhuahnate chu an sawn chhuak theia zeng pawh a ni si lo,” a lo ti ta a.

Morris-a chuan, “Hotu Zahawm Ber, hei hi kan tan thil pawimawh tak a nih ka ring. Hetiang hian hei kum sawm chhung chu a awm chho ta zel a. Zawi zawiin a chekhnawkho hi an sumdawnna kan chhuhsak zel a ni.

"Hetia kan tih hian eng thil nge lo thleng ta le? An hmun chu ‘Company’ lianpui pui, Railroad tih angreng, General Iron tih ang rengin an rawn luah a; heng ‘Company’-te hi a thununtu chu New York-ah emaw, Philadelphia-ah emaw an awm daih a, anni chuan kan vaukhanna thute chu eng hu-ah mah an ngai si lo.

"He lai tualchhunga an sumdawnna hmun enkawltute chu kan duh angin kan kuaiher thei pawh a ni mahna; mahse, chu mite chu mi dangin an rawn thlak leh dawn tihna mai a ni. Chu bakah, kan dinhmun kan tihlauhawm sauh sauh tihna a ni bawk.

"A chekhnawkho hi chuan min tawk na ve dawn lo va; a chhan pawh sum leh pai an nei lo va, an chak tawk lo bawk. Kan hrawm nat luat lutuk loh phawt chuan kan thu hnuaiah an kun reng dawn a ni; mahse, heng ‘Company’ lianpui puiho hian an hnathawh hlawkna kan dal tih an hriat hnuah chuan rorelna hmuna khaidiat bun chunga min hruai turin tih duh loh a hleih an nei lo mai ang,” a ti ta a.

Chutiang thu ngaihthlak nuam lo tak mai an han hriat chuan hmel tam tak chu a ngui nghal a, ngui takin an inmelh hruk hruk hlawm a. Duh duh ti thei, nuam leng chin tawk hre lo leka lo tal ṭhang an nih avangin an dinhmun tiderthawng thei zawnga thu han sawi chu an tan thu ngaihthlak nuam lo ber a ni chiang hle a, a ngaihtuah thleng phak pawh a duhin an duh lo reng reng a. Duh lo hle mah se Morris-a thu sawi chuan an thazam a luh vek a, nuam an ti lo hlawm kher mai.

Morris-a bawk chuan, “Ka rawt ve dan chuan a chekhnawkho hrîn nêp deuh hi a ṭhain ka ring a ni. A chhan pawh kan um chhuah fai hun hun chu he pawl tha chakna a ral hun ni maiah ka ngai a ni,” a ti ta a. Dik mah se thu ngaihthlak nuam lo na nâ na hi zawngin lawm a hlawh ngai lo. Morris-a thu sawi pawh chu thinrim taka âng thawm hian a zui nawk nawk a.

McGinty chu a ṭhuthmun aṭangin a lo tho va, a hmel a dur kher mai. McGinty chuan, “Unaupa Morris, nang hi chu i phunchiar ve reng reng a ni. Lodge mi leh sate hi kan intêl ruh ṭhat chhung chuan America ram chhunga eng thil mah hian min khawih silawng thei lo reng reng ang.

"Rorelna hmunah chuan kan ding ve tawh ṭhin a ni lo’m ni? ‘Company’ lianpui pui i tihte pawh chuan inhel nuai ai chuan sum theh chhuah an duh ang tih ka beisei tlat a ni. Khai le, unaute u, zanin tlai atana kan tih tur chu kan zo ta, kan in ṭhen darh hunah thil pakhat erawh chu kan sawi ang. Inremna hun leh in-unauna entirna tura intihhlimna hun a thleng ta,” a ti ta a.

Mihring pianphung hi chu a mak ve ngawt mai. Tualthattu awm khawm, tual thah chu chil chhâk ang leka ngaitu; chhungkhat pa pawh a fate awm laia kuk hluma, kutzungtê pawh khûr chhin ngai miah lo; mimal thila huatna nei hlek lo va; khawngaihna chhe te pawh nei si lova mi chhungpuinute ṭahtir zawih zawih chingte leh naupang chumchiap ṭap chel chul khawpa chhungkhatpa sawisa duh ṭhin mihring, khawngaihna leh lainatnain an thinlungah hmun a chang ve lo vang e tih tur awm khawm chu rimawi avangin an hnuk a ulh a, an mittui a parawl kuang hlawm mai.

McMurdo-a aw chu tliang ṭha tak mai a ni bawk a, a hma khan Lodge-a chengte lawm a lo hlawh lo a nih hlauh pawhin, “Mary, In Sekawtrawlh Ka Lo Kai E” tih hla te leh, “Allan Luikam Phullengah” tih hla te a’n sak hnu chuan amah an lawmzia chu an thup seng lo a ni ber mai.

Lodge mi leh saa a ṭan tirh zan aṭangin McMurdo chu pa tlangtla ber, dinhmun sang chang tura hual ruk a lo ni ta mai a ni. Chu mai a la ni lo va, Freemen hlu tak tak han ni phak tur chuan tih tur leh tih theih dang McMurdo chuan a la nei ta fo va, chumi zan ral hma ngei chuan a hlutna chu a lan chhuahtir hman ta nghe nghe bawk a ni.

An zu um chu a kual chhuak zing tawh hle a, Lodge mi leh sate chu an hmai a sen ṭûn tawh a, pawikhawi tur an zawng ruai tawh a ni ber mai. Chutah Tisachungathuneitu chu a lo ding chhuak a, “Naute u, he khuaah hian mi pakhat, tlema zah daih deuh hlek ngai a awm a, chu pa thil mamawh ang chu a hmuh leh hmuh loh chu in kutah ka nghat e. Ka mihring sawi chu James Stanger-a, Herald chanchinbu enkawltu hi a ni. Kan chungchang sawia a chiar hiar duh dan chu in hriat tawh kha,” a han ti a.

An phun ta mur mur a. McGinty chuan a ipte aṭangin lehkhathem a’n phawrh a. “‘Dan leh Khawsak phung pangngai’ (Law and Order) tiin a nih hi a thupui a’n vuah pek ni. ‘Lungalhthei leh Kahpathir laih chhuahna Bialah Ṭihbaiawmnain ro a rel.

"'Kan zinga mi sual pawl awmzia tilang tura tualthahna hmasa ber chu kum sawm pahnih kalta kha a ni. Khata ṭang khan inpawngnêkna hi a reh ta lo reng reng a, tunah phei chuan nunphung pangngaia nun hi tih enah pawh en ngam a ni ta lo. Kan ram ropui tak hian ramdang aṭanga lo lutte a dan duh loh vang leh lungchim taka a ṭangnema a lo pawm zel vang hi em ni ang le?

“‘Kan mikhualte hi anmahni thlengtute lakah hian an inluling ta maiin, kan hnam puanzar, zalenna chhinchhiahna arsi ṭial biai buai hnuaiah hian kan rilru hi thlaphangin a rumin hlauhnain a khat dawn ta em ni? Hengte chu khaw chhak ram, mipuiin aw an neih ve lohna hmun, lal pakhatin duh ang thala lal a hrawt theihna hmun, ram inrelbawl dan sawngnawi bera thleng ṭhin ang leka kan ngaih a lo’m ni? A mihring chimawm zualte lah kan hria. An pawl pawh a langsarin a chak tawk bawk. Eng chen nge kan tawrh peih dawn? Heti hian kumkhuain...

"A tawk, he thu tenawm lutuk hi ka chhiar sei tawk ta e,” tih pahin McGinty chuan chanchinbu chu dawhkanah a theh thla tawp a. “Chu chu kan laka sawi tur a neih ve chu a nia. Tunah hian, ‘Eng thu nge a hnenah kan sawi ve dawn?’ tih hi ka zawt duh che u a ni,” a ti ta a. Mi sawm pahnih vel tur hian, “That rawh!” an lo ti a.

Brother Morris-a, pa inmet fai veng vawng, mithmul buk ṭha tak bawk khan, “Chu zawng a dikin ka ring lo. Unaute u, ka hrilh a che u, helai lui ruamah hian kan kut a hlei ta lutuk, engtik hunah emaw chuan heng laia mi zawng zawng hi an la intêl khawm ang a, keimahni laka inven tumin an ṭang rual ang a, min nawr chhuah an la tum ngei ang. James Stanger-a hi putar mai a ni a, he lai bial velah leh he khuaah ngei pawh hian an zahder ve em em a. A chanchinbu pawh hi a zahawm tawk ve hle a ni. He pa hi kan kuk thluk vaih chuan America ram pum hi a nghing ang a, kan chhiatna a thlen ngei ang,” a lo ti leh ta a.

McGinty chuan, “Pu Tlan-Duai, a engti zawng chuan nge kan chhiatna chu a lo thlen dawn? Police-ho vang hian maw? Police zahve hi chu kan sum eitute an ni a, a zahve dang hi chuan min hlau tlat asin. Thubuai remna hmunah leh roreltute avangin em ni ang? Tun hma pawhin thubuai leh ilo te chu kan lo nei ve tawh ṭhin lo vem ni? Tunah hian an laka kan dinhmun chu eng nge ni le?” a ti ta khur khur mai a.

Morris-a chuan, “Roreltu Khaihlum-an (Judge Lynch) kan thubuai hi a rem mai thei asin,” a han ti ve leh a. Chu thu chu thinrim au thawmin a zui nghal a, McGinty chuan, “Ka kutzungṭang pakhat pawh hi lek zeuh ila he khua hi bawngtuthlawh nen kan rît fai leuh mai ang, chumi ti tur chuan mi zahnih an awm reng a ni,” a han ti a.

A aw chu a vîn thut a, a mit a’n meng chuar a, “Ngaithla rawh, Unaupa Morris, ka lo enthla ru deuh reng tawh ṭhin che a; i thisenah hian patling thisen zâm lovin naute thisen a zâm a nih hi, i ṭhiante pawh hi naute thisen pu ve turin i duh em ni? Unaupa Morris, kan thu ngaihtuah tur ziahna lehkha pheka i hming a chuan ni chu i tan ni vanduaithlak tak a ni ngei ang; tunah ngei pawh hian chu lehkha phekah chuan i hming ziah tel ve ka duh rum rum tawh a nia,” a ti ta mai a.

Morris-a hmai chu a dâng nghal vek a, a ṭhutthlengah chuan a sawp thla hnawk a, a khup chu a zawi ta vek emaw tih mai tur a ni. Kut khur zawih zawih chungin a zu no chu a’n lek kang a, a’n khiat khawlh mai a. Chutah, “Hotu Zahawm Ber, ka sawi tur aia tam ka sawi palh te a nih chuan nang leh he Lodge unau zawng zawngte hnenah ngaihdam ka dil e.

"I mi hriat angin he Lodge mi leh sa rinawm tak hi ka ni a, he Lodge tana thil ṭha lo a lo thlen ka hlauhthawn thu-hlaah a chhuanchhe zawngin thil ka la mai ṭhin a ni,” a han ti a (Lodge - Kan hman danah hi chuan a In leh a chhunga chengte tihna tluk vel a ni a, ‘pawl’ tihna chi khat a ni mai e Pll).

Tisachungathuneitu mitmeng rum em em pawh chu chutianga thuhnuairawlh awka chuan tlemin a chhem dai ve a. “Unaupa Morris, a ṭha khawp mai. Zirtirna pek che hi ṭul hle pawh ni se, kei taka pawh hian pawi ka ti em em dawn a ni; mahse, he ṭhutthleng hi ka luah ve chhung si chuan a thuin emaw, a takin emaw, thu khat kan vuan tlangin kan pheikhai a rual tlang tur a ni.

"Chuti a nih chuan naute u,” tih pahin Lodge mi leh sa dangte chu a‘n thlek kual a, “He kan Stanger mihringa hian a phu tawk dik tak a chan mai chuan kan duh bak thlengin buainain min chîm ang tih a rinawm a ni. Heng chanchinbu enkawltute hi an inṭan ṭhêm a, America ram chhunga chanchinbu zawng zawng mai hian ‘police’ emaw, dan kengkawhtute emaw an ṭahawh tliar tliar mai dawn a ni; nimahsela, vaukhanna puitling deuh chu a la pek theih tho vang chu. Unaupa Baldwin, i lo ti thei mai dawn lo’m ni?” a ti a.

Baldwin-a chuan, “Teh reng mai !” a lo ti phur sarh a. McGinty chuan, “Mihring engzat nge i mamawh ang? a’n lo ti leh a. Baldwin-a chuan, “Dawrzawn chanve, kawngkhar lo veng tur mi pahnih tiamin ka mamawh ang. Gower, nang lo tel la, Mansel nang pawh, Scanlan-a pawh lo tel teh ang che, Willabys-a te unau kha in ni bawk ang a,” a han ti zat zat a. McGinty chuan, “Kan unaupa thar kha kal ve turin ka lo tiam tawh a,” a han ti leh a.

Baldwin-a chuan McMurdo-a chu a mit ngo râng a va hmuh ralh a, a mitmeng han hmuh chuan a hmaa an inhmuh thiam lohna chungchangah khan a la ngaidam famkim miah lo tih hi a lang reng mai a. Aw ngaihnobei lo zet hian, “A duh chuan lo kal ve ang hmiang. A tawk e. Hna lama kan bur hma leh a ṭha a ni mai,” a ti zui nghal a.

An inkhawm an han ṭin darh dawn chuan an áu va, an khêk a, zu hmun hla dukdak lo pui pui an sa lawng lawng a. Zu zawrhna hmunah chuan mi eng emaw zat an lo la awm a, unau zinga tam tak phei chu chutah chuan an awm ve bawk a. Hna thawk tura an ruat bikte chu kawtthlerah chuan pahnih pathum lek leka inkawpin an kal a. Chutia an kal hranna chhan pawh mi dang tihphawklek an hlauh vang a ni.

Chumi zan chuan khua a vawt kher mai a, thla chanve de chho lam chu a eng kalh a, vanzawlah chuan arsi a de zeuh zeuh bawk a. In sang tak pakhat hma lamah hian hna thawk turho chu an ding khawm ta a. Chu In tukverh leh tukverh inkarah chuan rangkachak hawrawp hian, “Vermissa Herald” tih hi a lo inchhu kalh a. A chhung aṭang chuan lehkha chhutna khawl ri bak bak hi a lo chhuak a.

Balwin-a chuan McMurdo-a hnenah chuan, “Nang kha, hetah hian kawngkhar bulah hian lo ding la, kan tlan chhuah lehna tur lo thlithlai rawh. Arthur Willaby a nen in awmdun ang. Midangte chu ka rualin lo kal r’u le. Naute u, hlau miah suh u. Tunah tak hian Union zu zawrhna dawrah kan awm a ni tih min hriatpui ngamtu mi dawrzawn khat zet an awm a nia,” a ti a.

Chutih lai chuan zanlai dar sawmpahnih a ri hnai thuak tawh a. Kawtthlerah chuan zu chhim haw pahnih khat bak chu mi dang kal hmuh tur pawh an awm lo. Hnathawk tura tirh chhuahte chuan kawngpui kawtthler chu an tan tlang a, chanchinbu pisa kawngkhar chu an va pawt hawng a, McMurdo-a leh a ṭhian awmna ep In chhungah chuan an tlan lut a, kailawnah an tlan chho ta zel a.

Chutah pindan chung aṭang chuan au thawm te, ṭanpuitu auva chiau thawm te, ke per ri te leh ṭhutthleng tlu thawm te a lo chhuak ta ṭawk ṭawk a. Rei lo teah pa sam ṭuak deuh tawh hi leilawnah chuan a lo chhuk hlawk hlawk a. Chu pa chu thui a tlan hman hmain an nangching a, McMurdo-a ke bulah chuan chu pa tarmit chu a tla ta bal a.

Chu tarmit tla ri bal thawm chu ri thum dawtin a zui nghal chiah bawk a. Chu pa hmai chuan lei a nawr a, a hnungzangah chuan tiang dawrzawn chanve vel tur hi an han rawn zawt zawt a, a hnungzangah chuan tiang leh tiang a inkhak nawk nawk a. Na ti em em hian chu pa chu a’n vial a, a fuke cher zet mai chu a khur zawih zawih a.

Chutah zawng, mi dangte chuan an chawlhsan a, Baldwin-a pek chuan chu pa lu-ah chuan dim lo lek hian a kut a la thlak ta a. Chu putar chuan thei leh thei lovin indan a lo tum ve; mahse, a sawt tam lo kher mai. An mi sawisak pa sam ṭuak pheuh pheuh tawh chu thisenin a bual nuai a.

Baldwin-a lah chuan a remchang lai apiangah na fe fe hian a zuk kuk ṭhin a, chu zawng, McMurdo-a ngaih dan a ni ta lo va, kailawnah chuan a tlan chho thuak a, Baldwin-a chu a nam kiang a, “I tihlum anga sin, bansan vat rawh!” a han ti ta a.

Mak ti zet hian Baldwin-a chuan McMurdo chu a’n en a. “Zawngchhepa! Tunge maw nia i inhriat a i rawn tel ve ngam chu le? Mi thar mai mai i ni lo’m ni? Tawlhsawn vat rawh!” tih pahin a tiang ken chu a’n lek chhuak
a.

Mahse McMurdo chuan a kawng aṭangin a puakruk a phawrh a, “Nang zawk kha tawlhsawn vat rawh. Mi han khawi teh dek, i hmai kha ka thlawh darh vek ang. Tisachungathuneitu khan he pa hi thah loh tur a ti a ni lo’m ni? Tunah khan eng nge i tih? I tihlum mek a nih kha?” a ti ta a. Mi pakhat chuan, “A sawi chu a dik a ni,” a lo ti ve a.

Chutih lai chuan In hnuai lama an ṭhian dah chuan, “Hmanhmawh rawh u! Tukverh zawng zawng a inhawng tawh a, khawnvar an chhi eng ṭuk ṭuk a nia, tuibur hmuamda pawh tling lovah a khaw nawtin an rawn chîm mai ang che u,” a lo ti bawk a.

Kawtthler lamah chuan au thawm a lo awm a, in chhungah pawh chuan khawl ha remtute leh thu phuahremtuho chu chet thawh dan tur relin an lo insang mar ve mek bawk a. An mi sawisakpa nikhaw hre lova let reng chu hnutchhiahin McMurdo leh a ṭhiante chu kawtthlerah an tlan chhuak ta vat a.

Ṭhenkhat chu Union House lam panin an kal a, McGinty-a tiamin mi ṭhahnem fe hian zu an lo in a, McGinty-a chu an hna an thawh zawh tawh thu an va hrilh a, McMurdo leh mi dang eng emaw zat chu kawtthlerah an pilbo nghal a, chuta ṭang chuan mahni riahna hmun lam an pan zui ta nghal mai a.

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » May 26th, 2018, 9:40 pm

SHERLOCK HOLMES
THE VALLEY OF FEAR
AUTHOR : SIR ARTHUR CONAN DOYLE
TRANSLATED BY : PL LIANDINGA
CHAPTER - 11
(Rozami Pachuau)

HLAUHNA LUI RUAM

A tuk zinga McMurdo-a han tho chhuak chuan Lodge mi leh saa an lakluh tak thu chu han theihnghilh zeuhna hun pawh a nei lo. A chhan pawh a zu in nasat avangin a lu a na bûr a, chhinchhiahna an chhutna, a bân lah chu a sa vung vung a, a vûng bûr bawk a ni.

Pawisa hmuhna ṭha tê, mak angreng tak a neih tlat avangin a hnathawh lamah pawh a mumal vak lo va, chumi tuk pawh chuan tuk pumin Inah a awm a, tukṭhuan pawh tlai ang reih rawihah a ei a, a ṭhian hnena thawn tur lehkha sei tawk fe a ziak a. Chumi hnu chuan Daily Herald chanchinbu a bih ta a.

Chu chanchinbuah chuan thu thar pawimawh bik, tlai khawhnua zeh tel leh an dahna ṭhin hmunah chuan ‘Herald pisa-ah Nunrawnna. Na takin Editor a hliam,’ tih hi a lo awm a. Thil awm dan chu tawi têin a sawi a, a tawpah chuan, "Hemi chungchanga buaina hi ‘police’ kutah a awm tawh a; mahse, tun hma aia pawikhawihtute kut a zum phahna tura beisei tur a awm chuan a rinawm lo hle. A titute zinga ṭhenkhat hi chu an hmel an chhinchhiah hman a, thiam loh changa mual mualte chu an awm ve mahna.

"He thil lo awmna chhan ber nia lang chu he pawl, tu ma lawm hlawh lo hian mipui an rapbet tlat a, Herald chanchinbu pawh hi an nawm an maka bawlzan an tum bawk a, an inhnuk hniam duh ta lo tihna a ni mai. Mr. Stanger-a chuan a lu velah hliam a tuar hle nain thih mai hlauhthawnawmah a awm lo tih a ṭhiante’n an han hriat chuan an lawm hle," Chumi hnuaiah chuan an pawikhawihna pisa chu Coal and Iron Police te’n Winchester Rifle nena an ven thu an ziak tel bawk a.

McMurdo chuan chanchinbu chu a dah a, a hma zana a zu inna avanga kut khûr deuh zeih zeih chunga a meizial a ṭan dawn lai tak chuan a kawngkhar chu an rawn kik a, a In luahna enkawltunu chuan a hma chiaha tleirawl pakhatin lehkha a rawn dah chu a rawn pe chhawng a. Chu lehkha chu a thawntu hming ziak chuang lo a ni a, hetiang hian a lo inziak a :

"I hnenah thu sawi ka duh a; mahse, i chenna hmunah chuan biak loh che ka duh zawk a. Miller Hill-a hnam puanzar zarna ngul bulah min hmu thei ang. Chumi hmunah chuan tunah lo kal nghal la, i tana thil pawimawh tak mai sawi tur ka nei ang bawkin ka tan pawh he thil hi i hnena sawi a ṭul ve hle a ni tih i hria ang,"

McMurdo chuan chu lehkha chu mak ti takin vawi hnih ngawt a’n chhiar chhuak a. A awmzia a hre lo hle a, a rawn thawntu âwm pawh a hre lo reng reng a. Chu lehkhaa kutziak chu hmeichhe kut chhuak chu ni sela chuan tun hmaa a thil lo tawn tawh ṭhinte kha a tawng thar leh ṭan dawn ta emaw a ti rum rum awm e. Mahse chu kutziak chu mipa kutziak a ni a, mi lehkhathiam tawk tak kut hnu a ni tlat bawk. Eng emaw chen a inngaihtuah buai hnu chuan thil chu a nih ang anga tawn rawk rawk a, fiah chhoh zel mai a duh ta ber a.

Miller Hill chu khaw laili lai taka vantlang hmun, hneh lo zeta an enkawl lai a ni a. Nipui lai chuan len khawthawn nan miin an hmang ve fo va; mahse, thlasik lai chuan thlanmual tluk zeta reh a ni thung a. Chu lai tlang chhip aṭang chuan khaw chhung mai a lang chiang lo va, a bul vela lui ruam kikiau chhuk te, eng ilo laih chhuahna hmun hrang hrang te leh an thil siamna hmun aṭanga mei khuin tlang pang vur a hliau man thial thual chenin a hmuh theih a. Chu bakah, khaw piah lawka chu lui ruam khuaptu, tlang dung, vur leh ngawin a khuh pawlhte pawh chu chiang takin a hmuh theih a ni.

McMurdo chu tlang chhip panna kawng kikawi tak maiah chuan a chho zel a, tlang chhipah chuan thingpui dawr ram tawh a han thleng a. Chu thingpui dawr chu nipui lai chuan a lûn ve thei hle a, a chhungah nui thawmte pawh hriat tur a awm ve rawi rawi ṭhin. Chu thingpui dawr ram tawh bulah chuan hnam puanzar zarna ngul a awm a, hnam puanzar erawh chu a inzar lo va.

Chumi bul lawkah chuan pa pakhat hi a lo ṭhu a, chu pa chuan a lukhum parh khum chu a kuai kun hle a, a kawrfual hak nghawng pawh a titung chho ut bawk a. McMurdo-a lam a lo hawi chuan chu pa chu nizan maia Tisachungathuneitu chhaih kawlhtu kha a ni tih a hria a. Unaupa Morris-a nena an han inhmuh chuan Lodge chhinchhiahna an han inhlan tawn phawt a.

Morris-a chuan inthlahrung aw leh dawih aw lek lek hian, “Mr McMurdo, biak zawk che ka duh a ni. I lo kal hlauh chu a tihzia hle mai,” a han ti a. McMurdo chuan, “Engati nge lehkhaah khan i hming i ziah loh?” a ti a. Morris-a chuan, “Pu-a, fimkhur a ṭul tlat ṭhin alawm. Hetiang hunah tawh hi chuan eng tiangin nge thil hi a sawhkhawk let dawn a hriat theih tawh ṭhin loh. Tu nge rin ngam tur chi ni a, tu nge rin ngam loh tur chi tih pawh a hriat a harsa em em a ni,” a ti a.

McMurdo chuan, “Lodge huang chhunga unaute chu kan inring tawn tur a ni dawn lo’m ni?” a lo ti ve thung a. Morris chuan, “Ni lah lo ve, chu zawng a teuh lo mai, chutiang ngawt a ni thei ngai lo. Kan thu sawi leh kan ngaihtuahnate hi kha mihring, McGinty-a hnenah khan a thleng vek zel ni hial awm a ni,” a ti ta mawlh mawlh a.

Chang fak hian McMurdo chuan, “Ngaithla rawh; nizan mai khan Tisachungathuneitu lakah rinawmna chhia ka chham a. Ka chhechham bawhchhe turin min kar dawn elo?” a ti ta a. Lungngai awm fe hian Morris-a chuan, “Chutiang chu i ngaih dan a nih chuan he lai thleng thlenga i ngal tha i rawn tihah hi chu a pawi ka ti khawp mai, ka thiam loh a ni. Khua leh tui, zalen saa piang, nun zalen neitute’n an rilru chhungril an phawrh tawn ngam loh chuan thil awm dan hi a uih lampang a ni ta ve ang,” a ti ta a.

A ruk taka a ṭhianpa hmel leh chet dan lo thlir rengtu, McMurdo chu tlema thawveng ta deuh hlek hian a lang a. “Nia, keima hmakhaw ngaia thu sawi ve mai ka ni. I hriat angin kei chu mi thar ka ni a, heng thil hi ka tan chuan thil thar vek a ni. Mr Morris, pa kamtam nih hi ka tan thil tih chi a ni lo va; mahse, ka hnena thusawi hi ṭhaa i ngai a nih chuan sawi ta che; ka lo ngaithla ang chu,” a ti ta a. Thinrim hmel tak hian Morris chuan, “Tichuan, McGinty-a i hrilh leh vek ang a,” a lo tih zawm a.

McMurdo chuan, “Chutah zawng, min hmu ṭhelh duai a nih chu. Lodge lakah hian ka rinawm tlat dawn a; mahse, keima mimal hnena a ruk a rala i thil mi hrilh mi dang hnena ka lo kamtampui chuan mi khawngaihthlak chi a piang ve hrim hrim ka ni ang. I thil min hrilh chu keimahah a tawp ang a; mahse, ka lak aṭangin ṭanpuina emaw, khawngaihna emaw i dawn phah miah lo vang,” a ti a.

Morris chuan, “Ṭanpuina zawn tih te leh khawngaihna dawn beisei tih te hi chu ka suangtuahna pawhin a phak tawh lo, ka hlawhchham hnem tawh lutuk. I hnena ka thu sawi avang hian ka nunna hi a derthawng sawt ang tih pawh ka hlau hlel lo; mahse, eng anga sual pawh ni la; nizan aṭang khan an anpuiah an chher ṭan ta che a; mi thar i la nih vang ngawt pawhin an thinlung tluka sak thinlung i la pu ve hman lo maithei a ni. Chu vang chauh chu a nia ka biak duh che,” a ti ta a.

McMurdo chuan, “Anih leh, eng nge sawi tur i neih?” a han ti a. Morris-a chuan, “Min hek zui leh si vaih chuan anchhiain zui zel che rawh se!” a’n ti tê te a. McMurdo chuan, “Teh reng mai, ka hêk dawn lo che ka tih kha,” a lo ti a.

Morris-a chuan, “A hmasain, Chicago khawpuia Freemen Society i zawm laia, mi dangte tana thawk tur leh rinawm tura chhia i chham chuan, i chhechham chuan suahsual bawlna khurah a hnuk lut thei ngai ang che tih i ngaihtuah phak em?” a ti a. McMurdo chuan, “Suahsual bawlnaah i ngai tlat a ni awm a,” a lo ti duh lek a.

Morris chuan a awki a’n san vak a, “Suahsual bawlna angah ka ngai maw! Lekfang hian! Thil dang anga i la ngai thei a nih teh chuan i la dai tlem hle tihna a ni mai. A nih leh nizana mi pakhat, i pa rual zet tura tar tawh, a samṭuak aṭanga thi far zawih zawih khawpa sawisakte kha eng nge i vuah ang? Suahsualna ti lovin thil dang i vuah dawn em ni? Nang zawngin ‘inbiakna’ te hi i lo ti daih pek ang e?” a ti ta bawrh bawrh mai a.

McMurdo chuan, “Ṭhenkhat chuan ‘Indona’ an ti ang chu. Pawl leh pawl indona a ni ve mai a, theih dan leh thiam dan ang zawng zawngin an inchhu a ni mai alawm,” a ti mai a. Morris-a chuan, “Chicago-a Freemen’s Society i zawm tirhin hetiang thil hi a awm ang tih i ngaihtuah pha ngai em?” a ti a. McMurdo chuan, “Chu zawng, ngaihtuah pha ngai lo, tia ka chhân che a ṭul ta tlat mai,” a lo ti a.

Morris-a chuan, “Kei pawhin Philadelphia-a ka zawm chuan ka suangtuah pha ngai bik lo. Philadelphia-ah chuan intihhlimna hmun ṭha tak a ni a, ṭhenrual inpawl zauna a ni ve mai. Chutah, he lai hmun chanchin hi ka’n hria a, he lamah he pawl hi a viak a ṭha hle tih ka hriatin mahni intuaihriamna a nih beiseiin ka lo kal a, he lai hmun chanchin ka hriatna, ka bengte hi a nia ka hmuh mawh ṭan tawh ni. Ka nupui leh ka fate pathum ka rawn hruai a, Market Square-ah hian bungraw hulhar chi dawr ka siam a, ka che thei viau va.

“Chutah Freemen ka nih thu a lo darh a, he lai hmuna an Lodge zawm ve tur hian min tilui a, nizana an tih dan ang chiah che kha a ni mai. Ka ban puamah hian i chhinchhiahna ang kha ka pu a, chu aia ṭha lo zawk, ka chhungrilah hian chhinchhiahna bawlhhlawh chu ka pai ta reng bawk a. Mi sual thu hnuaiah awmin suahsual bawlna thilah ka inpawt hnawk tel ve tlat tih ka hria. Eng thil mah ka tidanglam thei tawh si lo.

"A ṭha zawnga thil a kal chhoh theihna tura ka thu sawi ve reng reng chu phatsanna awka angah an ngai vek a, nizan pawh chutiang chu a nih kha. Ka neih zawng zawng chu ka dawrah hian a inphum vek avangin ka tlan bosan thei si lo. He pawl hi han chhuahsan pawh ni ila ka nupui fanau chunga thil thleng tur hi ngaihtuah chhin ngam pawh a ni lo. A va’n rapthlak em!” tih pahin a inhup a, a insût ta hlawp hlawp mai a. McMurdo chuan, “Hetiang pawla tel tur chuan i ruh a no lutuk a nih hi. Hetiang hna thawk ve tur chi hi i ni lo,” a han ti a.

Morris-a chuan, “Chhia leh ṭha hriatna leh sakhaw vawn lai ka nei ve tho si a, chuti chung chuan mi sualah min siam lui tlat ta mai a ni. Hna thawk tura thlan ka ni a. Ka hmaa tih tur chu ka phat chuan ka chunga lo thleng tur chu ka hre mai. Ka dawihzep pawh a ni ang, ka nupui fanau ka ngaihtuahna hian mi dawihzepah min siam pawh a ni ta ve ang. Eng pawh ni se, hnathawk tur chuan ka kal ve ta tho va. Kha thil khan ka dam chhungin min tibuai reng dawn a ni.

“Kan kalna chu In fal deuh, he lai aṭanga mel sawm pahnih laia hla, saw lamah sawn a ni a. Kawngkhar bula lo ding turin mi hrilh a, nizana an tih dan ang che kha a ni mai. Hnapui thawk turin min ring zo lo a ni ber e. Mi dangte chu In chhungah an lut ta a; an lo chhuah leh chuan an kutbawr, banrek chin hi chu thisenin a bual niau nuau tawh mai a. Kan kal dawn vel lai chuan In aṭang chuan naupang ṭap thawm a lo chhuak a. Chu naupang chuan a pa an that lai chu a thlir a nih awm chu.

“A rapthlakzia ka’n ngaihtuah ngawt pawh chuan ka thidang lo chauh mai; mahse, ka nui lui hram hram a. Chuti a nih loh zawngin a dawt lehah chuan kan In aṭangin kuta thisen kai niau nuau chungin an lo chhuak ve ang a, ka fapa Fred-a chu a pa ngaiin a chiau ve mai ang tih ka hlau tlat a ni. Nimahsela, mi suala chhiar ve ngei ngei tur ka ni ta, tel ve-na chin ka nei tlat a, he khawvel mite mithmuhah hi chuan mi bo ka ni reng mai.

"Katholik kohhran vuantu ka ni a, kohhranah chuan ka thatchhe teh chiam pawh a ni lo; mahse, kan puithiamin Scowrer zingah ka tel tih a’n hriat chuan a biak pawh min be duh lo va, ka u leh nau, rinnaa ka u leh naute lak aṭangin min hnawt chhuak ta nghal bawk a ni. Chutiang chu thil awm dan a ni a. Ka kalna kawng chu i zawh ve mek a ni, khawiah hian nge i tawp dawn tih ka zawt duh che a. Pawisawi lo mihring thattua ṭang tur hian i inpeih tawh em?” a ti ta a.

McMurdo chuan, “Engtin nge i tih ang? I sawichhawng leh lo vang maw?” a ti ta phut mai a. Morris chuan, “Chu zawng, pi leh pute lungbul-thingbul biak mai mai pawh khan a rem ti lo vang,” a ti a. McMurdo chuan, “A ṭha a nih chu. Mi chak lo tak i ni a, thil ho tê pawh hi i sawi vung mai mai zel niin ka hria,” a ti ta daih a.

Morris-a chuan, “Thil ho tê pawh ka sawi vung mai mai ṭhin maw! Han awm rei deuh la i la hre mai ang. Lui ruam khu han thlir teh. Khu, khaw chungah mei khu a zam chuai mai a; mahse, khu ai khuan thihna chuan thla a zar hniam zawk. He lui ruam hi Hlauhna Lui ruam a nih hi, Thihna Lui ruam. Mipui rilruah hian thimhmul aṭanga khawfingchah thlengin thlabârna a intuh ṭhin a ni. Nauva, ngawi tak rawh, nangma’n i la hre ve mai ang,” a ti ta a.

Ngaihsak awm lo deuh mai hian McMurdo chuan, “Ka hriat chin a tam deuh hunah ka la hrilh ve ang che. Thil chiang tak awm sa chu, he hmuna cheng ve tur hi i ni lo, i inhralh fai a, i kal chhuah hma leh i tan a ṭha a ni mai, i bungrua chuan dar tangka pakhat lek pawh man rawh se, i ti fuh zawk ang. Ka hnena i sawi tawh kha chu him takin ka vawng ang; mahse, enthlatu angreng i la nih...,” a tih lai chuan Morris chuan, “Teuh lo mai, a teuh lo lutuk,” a lo ti chul a.

McMurdo chuan, “Chuti chin chu ni rawh se. I thu sawi chu thinlungah ka’n vawng reng phawt ang a, engtikah emaw chuan ka lo la kir ve ang chu. Hetiang thu min han sawipui duh hi chu i ti ṭha ngawtin ka hria. Khai le, ka haw ve tawh ang e,” a ti a.

Morris chuan, “I kal hmain thu pakhat. Hetia kan inbia hi min hmu ru maithei a, kan thusawi pawh an hre duh maithei a ni,” a ti a. McMurdo chuan, “A ni tak maw,” a ti ringawt a. Morris chuan, “Ka dawra hnathawk turin ka sawm che a nih kha,” a han ti a. McMurdo chuan, “Nia, keiin ka lo hnial a nih kha. Unaupa Morris, dam takin le, tun hnuah i tan khua a var ka beisei,” a ti a, a kalsan ta a.

Chumi chawhnu vek chuan McMurdo chu a pindanah meizu chungin a ṭhu a, a inngaihtuah nasa hle a. Chutia a ṭhut lai chuan kawngkhar chu a rawn inhawng a, kawngkharah chuan Hotupa McGinty chu a rawn ding to ta lurh mai a. Chhinchhiahna an han inhlan tawn te te a; chumi hnu chuan Hotupa chu McMurdo-a ep siahah chuan a’n ṭhu a, McMurdo chu a melh ta veng veng mai a. McMurdo lah chuan zam
lo lekin a lo melh let ve bawk a.

McGinty chuan, “Unaupa McMurdo, mi Ina len zen hi ka ching lo viau a. Min rawn len khungtute pawh hi ka be mumal hman meuh lovah ka ngai; mahse, nangma In luah ngeiah rawn kawm chein thil pakhat ka’n sawipui ang che chu ka ti deuh va,” a ti a. Thingrem aṭanga zu um phawrh pahin McMurdo chuan, “Councillor, ka’n hmu che chu ka induh phah sawt mai,” a ti a, a hlim hmel kher mai. Chutah, “Hetiang chawimawina hi chu ka lo beisei ngam ngai hlei nem,” a ti a.

Hotupa chuan, “I bân nâ chu engtin nge?” a’n ti a. McMurdo chuan, “Mi ṭhoh deuh veng veng reng mai; mahse, a manhla bawk alawm,” a ti mai a. Hotupa chuan, “Nia, a man ve khawp asin. Lodge laka rinawm, thutiam vawng ṭhin, Lodge tana mi ṭangkaite tan chuan a manhla ṭhin asin. Tukin zing khan Miller Hill-ah Unaupa Morris-a hnenah khan eng thu nge i sawi le?” a ti ta a.

Chuti teh thuta a zawh avang chuan a chhânna tur lo duang lawk lo se chu McMurdo chu a buai ve ta viau awm e. Hlim deuh maia nui hawk hawk chung hian, “Morris-a hian mahni hrawk hlawh zo lovah min lo ngai deuh a ni awm a. Ka hlawh zawhzia hi hrilh kher pawh ka tum na hek lo. Keini ang rual tan chuan a vun hi a pan deuh hlek a ni; mahse, amah hi zawng pa ṭha pui chu a nih awm hi. Pa che thei vak lovah min ngai a, chuvangin, a bungraw hulhar zawrhna dawra ziaktu hna thawka min han sawm khan thil ṭha tak min tihsak taah a inngai a nih ve awm kha,” a ti a.

Hotupa chuan, “E heu, chuti lam a ni maw?” a ti a. McMurdo chuan, “Ni e, chuti lam chu a ni,” a ti mai a. Hotupa chuan, “Tichuan i hnial fithla ta a?” a ti leh ta zel a. McMurdo chuan, “Teh reng mai. Keima khum pindana ka awm mai mai hian a mi rawihna tur let sawma hlâwk chuan hna ka thawk thei lo vem ni?” a ti ve thung a. Hotupa chuan, “A ni ngawt mai; mahse, nang chu ni ila Morris-a te ang hi chu ka hnim hnai ṭha duh vak lo vang,” a ti leh ta a.

McMurdo chuan, “Eng vangin maw?” a han ti a. Hotupa chuan, “Chutiang thu ka sawi avang ngawt pawh chu a nih ka ring. Heng lai velah hi chuan chutia ka tih chu mi tam ber tan chuan chhan ṭha tawk a ni ve ṭhin asin,” a ti duh lek a. McMurdo chuan, “Mi tam ber tan chuan chutia i tih chu a tawk hle maithei; mahse, Councillor, keia tan chuan a tawk ve hauh lo mai. Mihring mizia hi i hriat chuan chu chu thil awm dan a ni tih i hre mai thei ang,” a ti ve ta ngat mai a.

Rum zet mai hian Hotupa chuan McMurdo chu rei ngial a’n melh a, chutah a kut chuan a zu no hûm lai chu a hmer nghet sauh sauh va, a ṭhutpuipa lu-ah chuan a zu no chu a vawm bei thlawp ang tih hlauhawm khawp a ni. Chutah za vak lo, ring zet hian a nui lui ta uar uar a. McMurdo-a hnenah chuan, “Pa mak danglam tak zawng i nih hi maw le. A chhan leh vang i duh chuan ka’n hrilh ang che. Morris-a chuan Lodge duhsak lo zawngin thil eng mah a sawi lo maw?” a ti ta zel a. McMurdo chuan, “Sawi miah lo,” a ti ve ta zel a.

Hotupa chuan, “Chu zawng, a rin ngam tawk loh vang che a nih dawn chu. He pa hi zawngin a thinlung chhungrilah hian a unau nihna rilru hi a pu nghet thei hlawl lo. Chu chu kan hre chiang em em a, kan enthla reng a ni. Kut man hun kan nghak mai chauh a ni. Kut man hun hi a hnai tial tial niin ka ngai. Kan huangah hian beram, chinghne vuna inthuam tan hmun a awm lo. Mi rinawm lo i kawp chuan nang pawh kan ring lo ve mai palh ang che. Hre thiam maw?” a ti ta a.

McMurdo chuan, “Amah hi ka ngaina vak lo bawk a, han inkawm ngeih vak theih tur a ni lo reng reng. Rinawm loh thu-hlaah chuan, nang kher chu ni lo la, khatin ka hmai chhanah ṭum khat bak an ti hlek lo vang,” a ti ve ta a.

A zu in lai tlak pah chuan McGinty chuan, “Chu zawng, a tawk e. Furpui thlen leh hma zawngin thurawn pe tur chein ka lo kal leh tawh zen zen lo vang,” a han ti a. McMurdo chuan, “Engtin nge maw Morris-a nena kan inbiak thu chu i hriat mai le, hriat ka châk ngawt mai,” a ti a.

McGinty chuan nui chung hian, “He khuaa thil thleng reng reng chu lo hriat ve vek hi ka hna a ni. A, thil awm dan zawng zawng ka hriat thu hi lo ngaihtuah buai ve vel mai mai teh. Khai, khua a tlai zel e, hei chauh hi ka’n sawi...,” McGinty-a thu hnuhnung sawi tur chu beisei loh deuh mai thilin a rawn pawtchat a. Kawngkhar chu a ri ṭhawt a, a intheh hawng nghal a. Police lukhum hnuaia meng fim rem rawm, mi pathum hian an rawn melh ta khai mai a.

McMurdo chu a zuangtho vat a, a puakruk chu a han phawi zuau tawh a; mahse, a lu zawnah chuan Winchester Rifle pahnih ngawt mai hi an lo tin a, a tum lui zui ngam ta bik lo va. Police pakhat hi puakruk hum chungin pindan chhungah chuan a rawn pen lut a. Chu pa chu tun hmaa Chicago a awm ṭhin, tuna Coal and Iron Constabulary a awm ta, Captain Marvin-a bawk kha a ni.

Nui deuh ṭhâ chung hian McMurdo chu a lu a’n thinkhum a. Marvin-a chuan, “Pu Mi sual McMurdo of Chicago, buainain a um phak ta che niah ka ngai. Buaina aṭanga tâl chhuah hi i nu leh pain an zirtir tel lo che a ni maw? I lukhum han keng la, min rawn zui nghal rawh,” a ti ta mai a.

McGinty chuan, “Captain Marvin, hei zawng i tawrh phah ve ngeiin ka ring. A tu mihring nge maw i nih a, hetiang khua leh tui ṭha pangngai, sawrkar thlazar hnuaia chengte Ina hetiang tea i rawn luh mai?” a lo ti a. Captain chuan, “Councillor McGinty, he thilah hian tel ve-na eng mah i nei lo. He pa, McMurdo-a hi kan duh mai a ni, nangin min lo dal buai leh ih a fel lo vang, min ṭanpui zawk tur i ni,” a ti ta hmiah hmiah mai a.

Hotupa chuan, “Ka ṭhianpa a ni a, a chet dan dik leh dik loh thu-ah chuan sawi tur ka nei ve ngei ang,” a ti a. Captain chuan, “Teh reng mai Mr McGinty; engtik niah emaw chuan nangma chet dan dik leh dik loh thu-hlaah pawh mahni i insawifel a la ul ve ang. He mihring, McMurdo-a hi heta a lo kal hma pawh hian mi sual a ni tawh a, tunah pawh hei mi sual a nih a la bansan lo a nih hi. Duty-te khan he pa hi ka dap vel chhungin silaiin min lo veng zel rawh u,” a ti ta a.

Zâm lo fe hian McMurdo chuan, “Heta hi ka puakruk a awm e. Captain Marvin, nang leh kei hi mal leh mal chuan inbei ta ila heti mai hi chuan min man miahin ka ring lo,” a han ti ve leh hram a. McGinty-a chuan, “Khawiah nge he pa in man theihna tur lehkha ‘Warrant’ in tih ve te hi? Hrep tak che u hian, nangni ang mihring hian ‘police’ kawr in hak ve fo zawngin Vermissa-a chen leh Russia rama chen hi a khirh zawng a inang reng dawn a nih hi. Mi hausaho inlulinna ram a nih ngawt hi le! In duh aia tam ka chiar hiar ngeiin ka ring,” a han ti leh a.

Captain lah chuan, “Councillor, i tih tur nia i hriat chu ṭha tak leh tlin takin ti la; keini’n kan tih tur lam kan buaipui ve thung ang e,” a tihsan mai a. McMurdo chuan, “Eng thil sual ti-ah nge hei min puh?” tiin a’n zawt a. Captain chuan, “Editor Stanger-a, Herald pisa-a mi sawisatuah kan puh che a ni. A thi lo hlauh va, i chung a rip nêp dawn a ni, i ṭawngṭai ngun avanga thi lo chu a ni miah lo mai,” a tih khum a.

Nui chung hian McGinty chuan, “Chu zawng tê chauh chu a thil sual tih in hria a nih zawngin intihah duh lovin se zawl chhuah nghal law law mai rawh u. He pa hi chuan khami zan khan ka dawrah zanlai dar sawm pahnih thlengin lehkha a deng a, an dennaah chuan kei ngei pawh ka tel nghe nghe alawm. A tel ngei a ni tih hretu mi dang dawrzawn khat vel tur chu ka rawn phawrh thei mai ang,” a lo ti a.

Captain chuan, “Chu zawng, keia lo inrawlh ve-na tur a awm lo ve. I duh leh naktukah rorelna hmun lamah i la sawi dawn nia. Tunah rih zawng, McMurdo lo kal phawt rawh le. I lu-a silai mawngphênga chhut deuh kher i duh loh chuan ṭha te tein mi rawn zui mai rawh. Nang pawh Mr McGinty, lo tawlh sawn deuh rawh, hna ka thawh lai hi chuan dipdaltu ka ngaithei miah lo a nia,” a ti zui nghal a.

Captain hmelah chuan tumruhna a lang tel fe bawk a ni ang, Hotupa leh McMurdo-a meuh pawhin tihngaihna an hre lo va, a thu chu zawmna rilru pu miah lovin an awih ve ta zel ringawt a. McGinty-a chuan an inṭhen hma lawk chuan eng emaw hi a’n sawi hman hram pek a, a kutzungpui a’n phut zeuh va, “Engtin nge ni dawn le?” a ti a, McMurdo chuan a lo hrethiam ve mai bawk a.

McMurdo chuan, “A fel vek e,” a ti ringawt a. A pawisa siamna hmanrua vel chu chhuat hnuai lama thuhruk dan a lo ngaihtuah chhuah tawh avangin a him tawk angreng viau a ni. McMurdo-a chibai pah chuan Hotupa chuan, “Ka mangṭha mai ang che. Ukil Reily-a ka va bia ang a, i ṭanna turah chuan ka’n ṭanpui ang che. An hrêng rei hlek lo vang che ka tih hi ring tlat rawh,” a ti ta a.

Captain chuan, “Chu zawng, inchawi thil chu ni se ka ṭan ngam lohna lam tur tak a ni tlat mai. Nangni pahnih khan mitang hi veng ṭha rawh u. Fiamthu thawh a tum chuan kap nghal pawp ang che u. In hi kan chhuahsan hmain ka’n dap phawt ang e,” Marvin-a chuan In chu a dap ta ngei a; mahse, pawisa siamna hmanrua âwm chi reng reng chu a them pawh a hmu lo. Rei vak lo hnuah In chu a chhuahsan ve a, a hote nen chuan McMurdo chu an hmunpui lam panin an hruai ta a.

Khua a thim tawh a, thli a thaw hiau hiau a, kawtthler pawh chu a reh angreng hle a; mahse, tih tur nei lo, mi eng emaw zat chuan an rawn zui tho va. Chung mite chuan zan thim chu denchhenin hmuh theih loh aṭangin, lung-In tâng chu an au duhdah vel a, “Scowrer anchhedawng kha khaihlum rawh!” “Khaihlum ang che aw,” tihte a ri nawk nawk a. Police hmunpui an va thlen a, kawngkhara an han nawr luh te pawh chuan an lo nuihsawh nasa hle bawk a.

Chutih laia ‘police’ hmuna ‘Inspector’ chuan dan pangngaiin a lo thlek chiang a, thute a zawt a, chutah tan-In pindan zauvah chuan an hruai lut leh ta a. Chutah chuan Baldwin-a leh mi dang pathum, a hma zana ram chhuahnaa tel dangte chu an lo awm ve bawk a. Anni pawh chu chumi ni chawhnu lama an man chu an lo ni a. A tuk zinga an thubuai sawi hun tur nghak chuan an ṭhu ta ṭhap a.

Mahsela, dan leh sawrkar rorelna hmunpui, pindan chhungrilah chuan Freemen thiltihtheihna chu a la bo ta chuang lo. Zan rei deuh hlekah chuan tan-In vengtu chu an mutna tur awngphah, buhpawl pawmin a lo lut a. Buhpawl kar aṭang chuan zu um hnih a’n phawrh a, zu inna tur rial no a rawn phawrh tel bawk a. Chu mai ni lovin lehkhaden a rawn keng tel leh ta zel a. A tuk zing lam hrechang lo leka hlimin chumi zan chu an hmang liam ta a.

An tan chuan thubuai sawi hun chu lungkham vak ngaihna a awm lo reng a ni. Roreltu chuan thu hretu thu sawi a’n ngaihthlak kualin mi tângte chu rorelna lian zawka han thawn zai rel hleih theih pawh niin a hre ta lo va. Chutih ahnekin khawl ha remtute leh thu phuahtute chu êng ṭhat loh vanga eng mah hmu chiang lovah an insawi a ṭul ta hlauh zawk a. Chu mai ni lovin an phili buai lutuk a, atu emaw chu a titu zingah chuan an tel an ring lekfang ta mai a.

McGinty-a ukil rawih thiam tawk chuan thu hretute thu sawi dikhlelhna lai chu a’n zawng ta tak tak mai a, an thu pawh a saisa sawt kher mai. A misual kut tuartu ber lah chu a inrin loh hlana beih thut a nih avangin a khawih hmasatu chuan a hmuihmul a zuah tih bak chu eng mah a sawi thei tawh lo va.

Stanger-a chuan a khawihtute chu Scowrer an nih a rin thu a sawi a, a chhan pawh amah han khawih duh em tur hmelma dang a neih a hre lo reng reng a, Scowrer-ho erawh chuan a chanchinbu Editor Kam Chhuak avanga hun rei tak ata tawh an lo vau tih a sawi bawk a.

A lehlamah thung chuan mi paruk lai maiin pawikhawihtu nia an sawite chu Union House-ah an pawikhawi hun lai ni awma an sawi hun daih thlenga lehkha an denpui thu an sawi a. Chutianga sawitu zingah chuan pa zahawm leh hna zahawm chelh, Councillor McGinty-a ngei pawh a tel a ni.

Roreltute chuan mi tângte chu an chhuah mai pawh a ni lo va, mi tângte hnenah chuan ngaihdam an dil titih hial ta mai a. Captain Marvin-a pawh chu ama hnaa ṭhahnem a ngaih avang ngawta pawngpaw chet lo turin an hrilh ta zawk hlauh va.

Roreltuin thu tlukna a’n puan chuan rorelna pindan chhunga mi ṭhahnem tawk tak chuan a lawm nan kut an lo beng hluah hluah a, chung zingah chuan a hmel hmuh zin tak takte pawh McMurdo chuan a va hmu a. Lodge a cheng, unaute chuan an kut an vai a, an au chel chul bawk a.

Mahsela, rorelna pindanah chuan mi ṭhenkhat, lungawi lo hmel tak mai leh ngui tak maia ṭhute pawh an awm ve bawk a. Pa pakhat, chenbeh angreng tak mai, hmuihmul dum ang hlep hlawp chuan a ṭhiante rilru chu a rawn sawi chhuak a ni ber ang chu, heti hian a’n ti a, “Nangni tual thattu anchhedawngte u; kan kut zawng in la tuar ve mawlh ang.”

(Sunday close kha aw, in lo chang leh ṭalh ang e.)

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » May 28th, 2018, 6:58 pm

SHERLOCK HOLMES
THE VALLEY OF FEAR
AUTHOR : SIR ARTHUR CONAN DOYLE
TRANSLATED BY : PL LIANDINGA
CHAPTER - 12
(Rozami Pachuau)

A THIM ZUAL LAI

Jack McMurdo-a tihlar dan ngaihtuah dawn ta ila chuan Lung-Inah tantir a, chhuahtir leh a tihchi ber hial awm e. An pawl chanchinah reng reng, miin an pawl a zawm zana Lung-Ina a luh a, a tuka a chhuah leh tak a la awm ngai lo. A tlangthan dan pawh pa kawm nuam, huau huau nikhuaa a phusa nasa thei ber pawl, pa lunglian, Hotupa meuh pawh a tih loh zawngah chuan chhang lêt ngam zel niin a thang tawh a.

Chu ai mah chuan thisen chhuahna kawnga a thluak ṭhatzia leh a kut leh kein a thluaka a thil ngaihtuah a phuh chhuah ran theihzia chuan a ṭhiante a hneh zawk a. Rual u deuhho chuan, “Hna tumtlang deuh thawkah a itawm mang e,” an ti vawng vawng ṭhin. A thawh tawk âwm deuh a thawh hun tur chu nghakhlel takin an lo thlir reng a. McGinty pawh chuan hna han thawk mai tura tirh chu a nei tih a inhria; mahse, McMurdo zawng, pa hnathawk thei chungchuang a ni tlat.

McMurdo-a lo tel ve chinah chuan McGinty-a chu uisathiam chak tak, duh duh sehtir mai theih kawl ta angah a inngai a. Lodge mi leh sa ṭhenkhat chuan chuti taka an mi thar a lâr chak mai chu an duh chiah lo va; mahse, an tilang ngam chiah lo. Ted Baldwin-a phei chuan McMurdo-a duhsakna han dawng vel ṭhinte chu hmuh hrehawm a ti ngei mai; mahse, Baldwin-a zawng, insual a peih tluk zeta nuih heh ve a ni a, McMurdo-a tai zawng chuan a awm duh hlek lo.

Thil dang pakhat a la awm, McMurdo-a chuan ṭhiante ngaih san leh duhsakna a hlawh a ni maithei; Ettie Shafter-i pa duhsakna erawh chu a tan beisei a har tawh viau ang. Ettie Shafter-i pa chuan McMurdo chu biak pawh a be ṭha duh tawh lo va, a Ina a len luh pawh a phal ṭhaṭhum tawh lo. Ettie erawh chuan McMurdo chu a lo hmangaih ve laklawh tawh a, a thlah mai thei tawh bik lo va; mahse, mi sual pawla tel nena han inneih ngat chu a ngaihtuah ngawt pawhin a ṭah a chhuak lek lek ṭhin.

Tuk khat chu Ettie chuan McMurdo-a chu hmuha, a kawng zawh lai aṭanga hruai pen dan ngaihtuah a tum a. McMurdo chuan a ṭhiante chu a thlah theih hlawl loh va, Ettie thu a ngaihthlak duh loh chuan Ettie chuan inthlah fel mai a rilruk bawk a. Chutiang thil vel a ngaihtuah nasat em avang chuan zan lamah pawh a muhil hlei thei meuh lo.

Ettie chu McMurdo-a chenna hmunah chuan a va kal a, McMurdo-a'n ṭhenrual kawmna pindan atana a hmanah chuan a va lut a. Chutih lai chuan McMurdo chu dawhkan pakhat kîlin a lo ṭhu a, kawngkharpui lam chu a hnungchhawn a. A hmaah chuan lehkhathawn pakhat hi a awm a. Chutah Ettie rilruah chuan hmeichhe naupang rilru herh, a hun lo taka fiamthu thawh duhna a lo lut ta thut mai a; nia, kum sawm pakua chauh a la ni tlat alawm.

A kawngkhar hawng ri pawh chu McMurdo chuan a lo hre hlek lo va. Chutah Ettie chu dîm deuh maiin a dingdihlip phei zai zai a, McMurdo-a hnung lam aṭang chuan McMurdo-a darah chuan a kutin a va khawih ta zauh mai a. Ettie chuan McMurdo chu barakhaih a tum a nih ngai chuan a hlawhtling hle ang; mahse, a hlawhtlinna chuan amah a barakhaih let ve ta mai a ni.

McMurdo chu sakei tluk zeta rangin a lo zuang tho va, inher pahin Ettie nghawngah chuan a kut ding lam chuan a’n rek nghal titih ta mai a. Chumi rual rual chuan a hmaa lehkhathawn inpharh chu a kut vei lam chuan a hmet hrual nghal vek bawk a. Rei lo te chu mitmeng bial pawp pawp chungin a ding a.

Chutah hlim âwm tak mai hian a han nui a, a hma lawka a hmela hlauhawmna zawng zawng chu nuihzatna hmelin a rawn thlak leh ta a; mahse, Ettie thinlung no tak mai chuan McMurdo-a hmel hlauhawm lai kha a theihnghilh mai thei lo, a chhan pawh chutiang hmel a put chu a la hriat ngai tlat loh vang a ni.

A mitko han tuai pawk pawk pah hian McMurdo chuan, “Duhber, nang i ni maw,! Khai, nang meuh ka Inah i rawn leng duh a, keiin thil dang zawng aia rehhlum che thlahlel ta ang maiin ka lo dawngsawng lehnghal vei che nen! Duhber, lo kal rawh le; a thawi damna min han siamtir leh teh,” a ti ta a.

Mahsela, Ettie rilru mitthlaah chuan nichin maia McMurdo-a thlaphang hmel leh thil sual rapthlak tak tih duhna hmel kha a reh thei lo. Hlauhlawp hmel satliah mai a ni tlat lo, thil sual tih duhna hmel a lang tel tlat. Hmeichheho hi chuan mahni chhungril aṭanga ngaihṭhatna leh ngaihṭhat lohna bik riau an neih tlat ṭhin hi. Ettie pawh a ngaih a ṭha thei tawh tlat lo.

Ettie chuan, “Jack, eng i ti ta nge? Engtiziaa mi hlau em em nge i nih? Jack, lungmuangin awm ni la chu khatiangin mi melh lo vang,” a ti ta a. McMurdo chuan, “Nia, thil dang ka lo ngaihtuah daih a, khatia i ke te tak tê tê, no hling hlenga thawm nei lo lêka...,” Ettie chuan, “Ni lo. Chu chauh a ni lo. Jack, thil dang a awm a ni,” a han ti a. Chutah a rilruah chuan rinhlelhna a lo lut thut a, “Khawi nge, i lehkhathawn ziah lai kha min lo entir teh,” a ti ta mai a.

McMurdo chuan, “Khaih, Ettie; chu zawng a theih loh,” a ti ta bur mai a. Ettie rinhlelhna thinlung chu a sosang zual sauh va, “Hmeichhe dang hnena i thawn tur a ni! Ka hre reng. Chuti ni lo se engati nge ka lak aṭanga thup i tum ang? I nupui lehkha tur em ni? Nupui i neih leh neih loh pawh hi engti tihin nge ka hriat theih dawn? Mikhual, tu ma hriat chian loh i ni si,” a ti ta deuh deuh mai a.

McMurdo chuan, “Ettie, nupui ka la nei lo. Chhia pawh ka chham ngam. He lei chungah hian ka tana hmeichhe awm chhun i ni. Isua Krista Kraws hmingin chhia ka chham e,” a ti ta a. McMurdo-a hmelah chuan tih mai maina a lang reng reng lo va, chuvangin, Ettie pawh chuan a thu sawi chu a awih viau bawk; mahse, McMurdo-a hnenah chuan, “A nih leh min han hmuhtir ta che,” a la ti ta hram a.

McMurdo chuan, “Bawihte, he lehkha puangzar lo tur hian chhia ka chham tawh a, i laka ka chhechham bawhchhiat ka duh lo ang bawkin bawhchhiat ka hreh a ni; ka chhechhamnate laka ka thutiam vawn hi ka tum tlat bawk. Hei hi chu Lodge thil a ni a, chu chu i hnenah pawh ka puangzar thei lo vang. Ka dara kuta min rawn dawma hlauhlawp hmel ka put pawh kha, sawrkar mi rawih kut ni tur anga han ngaih chuan, ka hlauhlawp viau pawh kha a awm ve bawk lo’m ni?” a ti ta a.

Ettie chuan a rilru chhungril aṭangin thu dik dawng nia inhriatna a nei leh ta tlat pek a. McMurdoa'n a han pawm a, a han fawh phei chuan a hlauhna leh a rinhlelhna zawng zawng chu a bo ta vek a.

McMurdo chuan, “Hetah hian ṭhu teh le. Lalnu ṭhutthleng atan chuan a zahpuiawm lam chu a ni; mahse, i ngaihzawng rethei tak mai hian kha aia ṭha hlui tur che a nei hauh lo mai. Engtikah emaw chuan hei ai ngawt hi chuan a la siam nuam ta ve ang che, ka rin danin. Tunah chuan i rilru phawklek a reh ta deuh maw, lo’m ni bawihte?” a’n ti a.

Ettie erawh chuan, “Jack, engtin nge ka rilru hi a thlamuan tak tak theih ang? Mi sual tawm khawm zingah i tel ve tlat a; engtikah nge tual i thah avanga rorelna hmaa i din hun tur tih pawh hriat ni hlei lo, Scowrer McMurdo; chu chu kan mikhual ṭhenkhatin nimina i hming an lam duh dan chu a ni asin. Chu thu chuan ka thinlung hi chemtea vih tlukin a chhun nâ a ni,” a ti ve thung a.

McMurdo chuan, “Khai, Ettie, thu mai mai zawngin tu ngal ruh mah a deng tliak ngai hlei nem,” a lo tihsan a. Ettie chuan, “Mahse thu dik a ni tlat si alawm,” a la ti ta fo va. McMurdo chuan, “Bawihte, i ngaih ang em ema khawlo hi chu ka ni lo ve. Mi rethei, kan chanvo dik tak chan tuma beitute mai kan nih hi,” a ti a.

Ettie chuan a ngaihzawngpa nghawngah chuan a’n kuah a, “Jack, bansan teh! Ka hmingin, Pathian hmingin, mawh, bansan teh! Chumi sawi tur chuan a nia vawiinah hian i hnenah ka lo kal ni. Jack, han ngaihtuah teh, ṭhingṭhia ka ngen che hi. Hei, i hmaah ṭhingṭhiin ka ngen che hi,” a ti ta lawm lawm mai a. McMurdo chuan Ettie chu a kai tho va, a lu chu a âwmah pawm beisakin a hnêm mawlh mawlh a.

Ettie hnenah chuan, “Ka duhber, i thil ngen hi eng nge a nih i hre lo a nih hi. Mahni chhechham bawhchhiaa ṭhiante phatsan a ngai tlat tawh tih i hre lo’m ni? Thil awm dan hi hre ve pha ni la chuan hetiang ti tur hian min ngen ngai lo vang. Duh mah ila engtin nge ka tih tawh ang? Lodge thuruk paipawn chung hian Lodge hian tu mah a chhuah duh dawn lo tih i hre lo’m ni?” a ti ta a.

Ettie chuan, “Chungte pawh ka ngaihtuah vek tawh. Rem ka ruat vek tawh alawm. Ka pa hian sum tlem azawng a lo nei ve a; heng lai hmun, mi suaksualte rikrapnain thla a zarna hmun hi a ning ve tawh a ni. Ka pa hian kal bo a duh a; chuvangin, Philadelphia-ah emaw, New York-ah emaw kan kal daih ang a, hengho hian min khawih pha lo reng reng ang,” a ti ta a.

McMurdo chu a nui hawk a, “Lodge bân hi a sei hle asin. Heta ṭang hian Philadelphia emaw, New York emaw hi an ban pha lovin i ring em ni?” a ti a. Ettie chuan, “Chuti a nih leh khaw thlang lamah emaw, England-ah emaw, Sweden-ah emaw kan kal mai anga a ni mai alawm. He Hlauhna Lui ruam tlansan theihna hmun hmun hi kan pan mai ang chu,” a ti ta zel a.

McMurdo chuan Unaupa Morris-a te a’n ngaihtuah a; Ettie hnenah chuan, “He lui ruam hming hi chutianga miin an sawi chu vawi khat ka hre tawh. He lui ruama mi ṭhenkhat hi zawngin, he lui ruam hi thil duhawm lo takin a thla a zar hliah ni âwmin in hre tlat mai zawng a nih hi,” a ti ta ngawt a.

Ettie chuan, “Eng lai pawh hian min tihlim lo reng mai a ni. Boruakah hian eng emaw, thil duhawm lo tak a châm bâng reng asin. Ted Baldwin-a hian min ngaidam ta emaw i ti elo? Hlau ta viau lo che sela chuan kan chan hian maian chan pawh a tluk lo vang. A mitmeng dum kel kul, râwp deuh maia min melh ṭum khan a mitmenga suahsualna inziak kha i lo chhiar ve thei lo vem ni?” a ti sauh sauh a.

McMurdo chuan, “Chuti maw! Chutianga a ti lai ka man hun hunah chuan nungchang mawi ka zirtir ang; mahse, hmeichhe naupang tê, lo ngaithla teh; he hmun hi ka chhuahsan thei lo. Ka chhuahsan thei lo a ni. Chu chu vawikhat chiah ka sawi ang a, hre reng ang che. Keima kuta thil i nghah ngam chuan mawihnai deuh hleka chhuahsan dan zawn chhuah ka tum ang e,” a ti ta tawl mai a.

Ettie chuan, “Hetiang thilah mawihnai leh mawihnai lo a awm ngai lo,” a lo ti a. McMurdo chuan, “I ngaih dan dan le; mahse, hnathawh nan thla ruk chhung min pe la, tichuan ṭhiante hmaia en lêt ve ngam lo khawpa zak lutuk lova he hmun chhuahsan dan hi ka zawng chhuak na’ng e,” a ti ta a. Hlim deuh mai hian nula chu a nui a, “Thla ruk maw? Chu, thu min tiam em ni?” a han ti a.

McMurdo chuan, “A..... thla sarih, thla riat pawh a ni mahna; mahse, a rei berah kum khat chhung chuan he lui ruam hi kan chhuahsan ang chu,” a ti a. Chumi baka han ngenngawl leh ngaihna pawh Ettie chuan a hre tawh lo; mahse, eng mah hre lova awm ngawt ai chuan a hahdamthlak ve e. Zan thim hnawtkiang turin kawlkilah êng chhe tê a de ṭan vê vê ang lek a ni.

Chumi tuk chuan Jack McMurdo-a nena an intawn hnua rilru hlim tak a put ve theihna hmasa ber, rilru hlim tak nen an In lam a pan ta a. Lodge chet dan chu Lodge member a nihna angin McMurdo chuan a hre ve vek zel ang chu a lo ti deuh rawk a; mahse, a ring sual chhiava a ni. Chu Lodge mawlmang tê-a lang chu a rin ai takin a lo inphiar thuk a; Hotupa McGinty-a ngei pawh chuan thil hriat loh a ngah ve mai.

Union House thlang deuhvah chuan mi pakhat a awm a. Chu pa chu Hobson’s Patch-ah a cheng a; chu lai bial vel palai chu a ni a, Lodge hrang hrang chungah thu a nei hle a, a thuneihna chu a râwngra zawngin a hmang lehnghal vei nen.

Chu pa chu McMurdo chuan ṭum khat chiah a la hmu ve a; pa pawikhawih ching hmel tak, pa tê deuh, sam buang deuh, a han kal vel pawh lei dai pawp hlau ni awm taka kal ṭham ṭham mai a ni a. A sir zawnga mi a’n melh te chu a huatthlala thei ve hrep mai. Chu pa hming chu Evans Pott-a a ni a; Vermissa khaw Hotupa meuh pawh chuan chu pa chu a ṭih ve a, a bulah chuan Sailo Lal thâwm na chi bula hnamchawm tlangval an awm ang dêkin a awm ṭhin.

Ni khat chu McMurdo-a In luahpui, Scanlan-a chuan McGinty-a hnen aṭangin lehkha a dawng a, chu lehkhaah chuan Evans Pott-a lehkha pawh a tel nghal a. Chu lehkhaah chuan Lawler-a leh Andrews-a an rawn tirh thu leh an ṭhenawm hnaiah tih tur an neih thu a chuang a; mahse, an tih tur chu eng thil nge tih thu an sawi hauh lo.

Evans-a lehkhaah chuan Tisachungathuneitu chuan chu mite pahnih chu an tih tur a lo ngaihtuahsak theih a duh thu a sawi a. McGinty-a lehkha ve thung chuan Union House-a mi an awm reng reng chuan a inthup theih si lo va, chuvangin, Scanlan-a leh McMurdo chu chu mite pahnih lo mikhual tur chuan a rawn hrilh a. Chumi tlai la la chuan mi pahnih chu an lo lang nghal a.

Chu mite chuan an ip khai an rawn keng ve ve a. Lawler-a chu pa upa lam deuh, fir hmel zet, ṭawng tuitam lo tak, mahnia tâl ngaithei âwm deuh mai, kawrfual dum, hlui tawngchham angreng tak inbel hi a ni a. A lukhum parh thlep ang zei zui te leh a khabe hmul buang deuh ther thur, pawr fuap maite han hmuh chuan thu hriltu inthlahdah tak hi a ang hle a.

A ṭhianpa, Andrews-a chu la tleirawl zet mai, hnute hnêk bang fel hlim hlawt emaw tih tur, hmai ualau zet mai leh hlim thei tak, chhuṭi hmanga kal ni awm tak maia thawveng hi a ni thung a. Chu mite pahnih chu zu in lo mi, thil ṭha lo laka insum thei, ṭhiante en tawn tlak khawpa fel an ni a, an ṭhat lohna ber erawh chu tual thah ching leh tual thah thiam an nihna mai chu a ni.

Lawler-a chuan an pawl duh dan ang thlapa nalhin mi sawmpali a that tawh a, Andrews-a chuan mi pathum a that ve tawh thung a ni. Chu mite chu McMurdo chuan a’n titi khawchanpui a, tun hma lama an hna lo thawh ṭhat tawh thu leh an thawh dan chanchin chu ṭhenkhatin buai hmaa an khawsak theihzia an sawi tui tluk zetin an sawi tui a; mahse, tun ṭuma an hna tur erawh chu an sawi duh reng reng thung lo.

Lawler chuan, “He hna thawk tura kan nauva nena min thlanna chhan pawh zu kan in ve loh vang a ni a, kan sawi tur chin bak sawi lo thei turin min ring tawk ve a ni. Lung lovah la duh lo mai rawh u, min tirtute’n min tirh chuan saphungah pawh kan kui mai ta lawng,” a ti mai a. Zanriah kila an pali-a an ṭhut lai chuan Scanlan-a chuan, “A ni khawp mai. In telna chu kan telna a ni ve zel alawm,” a ti mai a.

Lawler-a chuan, “Nia, in duh chuan Charlie Williams-a kan thah thu te, Simon Bird-a kan thah thu te leh kan hnathawh tawh dang chanchin chu dar vantlang pel rawk pawhin kan sawi ang chu; mahse, hna zawh hmaa kamtam chu a tihchi loh,” a ti a. McMurdo chuan, “Heng lai velah hian mi zilh tur dawrzawn chanve vel chu ka nei a ni,” a han ti a, a thinrim hle tih pawh a hriat a.

Chutah McMurdo chuan, “Ironhill-a mi, Jack Knox-a hi chu a ni em lo vang chu maw? Engtikah emaw chuan he pa hi chuan a phu tawk lek chu ka hnen aṭangin a la dawng dawn maw le,” a ti a. Lawler-a chuan, “Ani zawng a la ni lo deuh,” a ti mai a. McMurdo chuan, “Herman Strauss-a em ni?” a ti leh ta a. Lawler-a chuan, “Ani pawh a la ni chuang lo,” a ti ve leh a.

McMurdo chuan, “A, i sawi duh loh zawngin han sawitir ngaihna che pawh i awm lo ve; mahse, hriat ka châk kher mai,” a la ti ta hram a. Lawler-a chu a nui mai a. Pa thlemsam tak zawng a ni hauh lo mai. An mikhualte chu ṭawngmawh teh mah se Scanlan-a leh McMurdo chuan an ‘fiamthu’ thawh chu nuihpui ve theih an châk kher mai.

Chuvangin, a hnu deuh hlek zînga an mikhualte an vak chhuak ṭham ṭham a’n hmuh pawh chuan McMurdo chuan a ṭhianpa chu a kai tho vat a, an thuamhnaw an inbel a, an zui chhuak ve ta ngawt a. Chutih lai chuan khua a la var chiah lo va, khawnvar ênga an mikhualte pahnih kal chu kawtthlerah an zu hmu a. Mut chhuak angreng tak chung hian an zui ve ta zel a, thawm nei lo lekin vûr chungah chuan an pên thla ta chhat chhat a.

Khualbuk awmna chu khaw fêmah a ni a, chumi bulah chuan kawng intan tlang (cross-road) a awm a. Chumi bul lawkah chuan an kal ta zel a. Chu lai hmun an va thlen chuan mi pathum hian an lo nghak a, Lawler-a leh Andrews-a chu rei lo te an lo bia a, chutah an kal ta dial a. An chet dan han en chuan hna hautak deuh, mi eng emaw zah an tel ṭulna a ni tih a hriat mai. Chutah hmun pakhat, thil laih chhuahna khur hrang hrang panna kawng a lo thlur ta sung mai a.

McMurdo-ate hmaa kalho chuan Crow Hill panna kawng an zawh ta a. Crow Hill-ah chuan thil laih chhuahna hmun lian tak a awm a, a kilkawitu pawh Josiah H. Dunn, New England lam mi a ni a, pa fel tak mai leh viak ṭha zet mai a ni. Chutih lai chuan khua a êng ṭan tawh a, hnathawktute pawhin an hnathawhna lam an pan thliah thliah a. McMurdo leh Scanlan-ate pawh chuan an hmaa kalte hmuh phak loh aṭangin an zui ve zel bawk a.

Chutah chhûm leivak a lo zîng thim mup a, chumi karah chuan tuihu khawl kiu ri a lo ri rawl rawl a. Chu khawl chu hnathawh hun hma, minute sawmah chiah a kiu ṭhin a, a kiu aṭanga minute sawmah chuan thil laih chhuahna khurah an leivung khai chhuahna khawl an thlak thla ang a, hna an ṭan dawn tihna a ni. Thil laih chhuahna khurpui bul, hmun fai lai an va chuan chhuah chuan chu lai velah chuan hnathawktu za tam hi an lo zi vel a, khua a vawh em avang chuan an ke te perin an kutte an lo chhêm lum vel hlawm a.

McMurdo-ate hmaa kalte chu a khâwmin an ding bial laih a. Scanlan-a leh McMurdo-a chu an thir êkchhe paih vûm chungah an lawn a, an hma lama thil awm dan leh a hmunhma pawh chu an awmna aṭang chuan a lang chiang hle. Chu lai thil laih chhuahna hmuna an khawl thiam kawl, Scot mi, Menzies-a pawh chu khawl In aṭangin a lo chhuak a, an bawmpui khai luh a hun ta tih entir nan a hamrik chu ring fe mai hian a’n ham a.

Chutih lai vek chuan mi pakhat, sang deuh, cher lam lek lek, inmêt fai veng vawng, thutak hmel pu fahran hi an thil laih chhuahna khurpui lam pan chuan a kal ve mek a. Chutah mi ding khawm chu a hmu a, a ding chawt a, eng mah sawi lovin an khawl In hnuaiah chuan a ding ta hle hle mai a. Lawler-ate-ho lah chuan an lukhum an kai kun a, an kawr nghawng an titung chho ut bawk a, an hmel hmuh tur a tlem hle.

Thih hlauhna chuan chu lai thil laih chhuahna enkawltu chu rei lo te a’n tibuai lawk a; mahse, a hmaa tih tur awm hlen chhuah duhna chuan a rilru a hneh ta zawk a; chuvangin, mikhual ding khawm lam chu a pan a, “Tute nge in nih? Hetah hian engti tiha lo tek lut ve ngawt nge in nih?” a ti ta zawk a; anni chuan engtin mah an chhang lo, Andrews-a chu a lo pen chhuak a, a dulah chuan a’n kap ta pawp mai a.

Hnathawktu za tam chu a ngaihna hre lovin an ding reng a, an zeng ta vek a, an che thei ta lo emaw tih palh a awl rum rum mai. Thil laih chhuahna enkawltu chuan a kut khinghnihin a dul a’n dawm a, a han intipachang a, a’n ding mar leh hram a. Chutah pai ṭawk ṭawk chungin a’n pên a, chutih lai chuan tual thattu rual ding khawm zinga pakhat chuan a’n kap leh a; a tlu a, a tluk pahin eng ilo ṭin ruak vel chu a chhuih darh ur ur a.

Scot mi, Menzies-a chu thinrim ṭê tuar tuar chungin a lo tlan a, thir herh nghehna lek chungin tual thattute chu a rawn pan a; mahse, a hmaiah chuan silai mu hnih a’n lut leh a, a tlu ve ta tawp mai a.

Hnathawktuho chu hma lamah an rawn pên suau va, thinrim âng thawm a lo ri nghal bawk a; mahse, an inlêngte chuan an lu chung zawnah an puakruk an han kap chiam a, an tlan darh a, a ṭhen phei chu Vermissa-a anmahni In lama mu lum turin an tlan haw ta daih a. A huaisen deuhho chu an intipachang a, thil laih chhuahna khur lamah chuan an han inhawr khawm lat lat a.

Chutah tual thattuho chu an kal liam leh ta mai a. An hmel leh ruangam chhinchhiaha, rorelna hmuna khing hneh tur tu mah an awm leh ta lo. Scanlan-a leh McMurdo pawh chu In lam panin an haw ve ta a. Scanlan-a chuan tual thah a hmuh hmasakna ber a ni bawk a, a rin ang he hu pawh chuan chu ‘fiamthu’ chu a lawm ta lo. Thil laih chhuahna enkawltupa nupui ṭê thawm rapthlak tak mai kha a bengah a châm reng mai a ni.

McMurdo erawh chu a ngawi reng a, a ṭhianpa thisen lum luang nêm ta mai pawh chu khawngaih âwmin a awm hek lo. A ṭhianpa hnenah chuan, “Indona ang a ni mai. Anni leh keini kan indo va, a na thei ang ber turin kan khâwng lêt a ni mai alawm,” a tihsan mai a.

Chumi zan chuan Union House-ah chuan an bengchheng kher mai. Thil laih chhuahna enkawltupa an thah avang chauh pawh a ni lo; hmun dangah Lodge chuan a bân a phar chhuak a, hna dang a thawk hlawhtling tlat. Vermissa Lodge tana chu lai bial vel palaiin mi panga a rawn theh chhuah khan, Vermissa Lodge mi leh sa pathum a lo hmang lêt ve a lo ni a.

Chung mi pathumte chu Gilmerton District-a thil laih chhuahna khur neitute zinga lar ber mai, William Hales-a, Stake Royalu-a mi that tura tih an ni a. William Hales-a chu pa ṭha elhkhen mai a ni a, he khawvelah hian hmelma a nei ang tih pawh rin phak loh a ni hial a ni.

Mahsela, a mi rawihte zingah Lodge mi leh sa, hnathawk duh si lo, rui reng mai a lo tel a; chung mite chu a lo bân a ni awm e. A mi bân tawhte chu ruai leh tura an tih a, a kawngkhar pawn lama kuang lem an hnutchhiah chung pawhin a thu chu a sût leh duh lo va, mitin zalenna ramah chuan ama pawisa leh thuneihna a chungah thihna khawp thil sual a lo ti ta der mai.

Ted Baldwin-a hova an va tih a ni nghe nghe a. Chumi zan pawh chuan Baldwin-a chu hmai uang zetin Tisachungathuneitu bulah chuan a ṭhu a. An tih tur a hautak deuh avang leh zu an in nasata, mut an hmuh ṭhat meuh loh bawk avangin a hmel pawh a pawr kher mai. Hlim nui thawm ri rawi rawi leh chiau chêl chûl karah chuan an va chet dan chanchin chu vawi tam an sawi nawn a.

An mi va beihpa chu tlang pawng sang laiah an lo châng a, ani chuan a sakawr a rawn kai a, khaw vawt avanga a inthuam hnawk nasat avangin a puakruk pawh chu a chuh hlei thei lo va, anni lah chuan an dawm ang rên râwn a, an kap nawn pawp pawp mai a ni awm e. A va titute zinga a tu a mah chuan an mi thah chu tu nge a nih pawh an hre lo va, an ngaihtuah hek lo; mahse, an tan chuan tual thah tih angreng chu intihhlimna chi khat a ni ve mai a.

Chu bakah, Gilmerton biala Scowrer dangte chu Vermissa Scowrer rintlak an nihzia an va hriattir ve-na a ni mai. An va chetnaah chuan thil fel lo deuh pakhat chiah a awm a. Chu chu an mi thah ruanga puakruk mu dang an phûm belh lai mekin chu kawngah chuan nu pakhat leh mipa naupang tê tak tê hi an lo kal ve tlat mai a. An han thah ve ngawt dawn lah chuan ni thei meuhvin an hre si lo va; kal tlang zela, eng mah sawi lo turin an vau ta ringawt mai a ni.

Chumi ni chu Scowrer-ho tan chuan ni ropui tak a ni; mahse, an hotupa fing tak chuan anmahni do tura a hmelmate inhlawm khawm theih lohna tur thil dang a lo ngaihtuah leh daih tawh a. Anmahni dotute chhutzui dan tur a lo duang lawk ru leh vek tawh mai. An zu kutpui an han ṭin darh dawn chuan McGinty chuan McMurdo chu a kai hrang a, “Ka ṭhian, lo ngaithla teh. I thawh tawk tur hna ka zawng hmu ta e. Nangma thu ngatin i thawk dawn nia,” a ti ta a.

McMurdo chuan, “Chutiang thu lawmawm ka’n hria chu ka induh phah sawt mai,” a lo ti a. Hotupa chuan, “Mi pahnih, Manders-a leh Reilly-a hi i hruai ang a; anni pawh hna an neih tur thu kan hrilh thawi tawh e. Chester Wilcox-a hi kan dah ṭhat hma chuan he lai bialah hian thil a kal fel thei dawn lo; i dah ṭhat theih phawt chuan Lodge hian theih tawpin lawmthu a hrilh dawn che a ni,” a ti a.

McMurdo chuan, “Theih tawpin ka’n bei phawt ang e. Tu nge a nih a, khawiah nge ka hmuh theih ang?” a han ti a. McGinty-a chuan a meizial zuk lai chu a’n la thla a, a’n ṭhial nuau nuau a; a lehkhabu tê ken aṭang chuan lehkha phêk thler nual tawh hi a’n phawrh a, a hmunhma lem chu chhe zetin a’n thai kual a.

“Amah hi chu Iron Dyke Company-a an hnathawktuho kilkawitu lu a ni. Pa sek zet mai, indopui laia bel thum kai, ser leh sam ṭuak hlir a ni mai. Ṭum hnih kan bei tawh a; mahse, kan la vanduai ta zat zat zel a. Chu bakah, Carnaway-a'n a thih phah bawk a ni. Hei, nangin han bei ve la a ṭha ang e. A In chu he lai hmunah hian a awm a, a lem ka ziah ang hian a bul hnaivaiah thawm hre pha tur tu mah an awm lo.

“Ralthuam a nei a, silai a kap thiamin a che rang em em bawk a, thu inzawh lam a ching lo hle bawk. A nupui leh a fate pathum nen an awm a, chu lo mi dang pakhat, a mi chhawr a awm bawk a. Chuvangin, amah chauh thah tum chu thil theih a ni lo, an vaia mang vek a nih leh in hlawhtling tihna a ni mai a, chuti a nih loh chuan in hlawhtling lo a ni mai. Lung halna dip chi ip khat tê in neih a, a kawngkhar bula nawalh zît muang deuh nena...,” a tih lai chuan McMurdo chuan, “Chu pa chuan eng nge maw a tih le?” a lo ti a.

McGinty chuan, “Jim Carnaway-a a that tih kha ka hrilh lo che em ni?” a ti ve thung a. McMurdo chuan, “Engati nge a kah hlum a?” tiin a zawt ta zel a. McGinty chuan, “Chu chu i tan eng nge a ṭangkaina? Carnaway-a chu a In bulah zanah a va kal a, a lo kâp ta mai a ni. Chu chu nang leh keia tan a tawk. Leiba i rûl tur a ni mai,” a tihsan ta a.

McMurdo chuan, “Hei, nu pahnih leh an fate an awm ve si a, kan hmer tel vek a ṭul em ni?” a han ti leh a. McGinty chuan, “Ni e, an tel ve a ṭul tlat a ni. Tih dan dang i hria em ni?” a ti leh ta a. McMurdo chuan, “Thil sual eng mah an ti ve si lo va, an tan a na lutuk deuh vang tih ka’n ngaihtuah mai mai maw le,” a ti a. McGinty chuan, “Hei i thu sawi dan hi eng ti zai zia nge ni ta ngai? I pha dawn em ni?” a ti ta khur khur mai a.

McMurdo chuan, “Councillor, zahngai rawh khai. Ka awmna Lodge Tisachungathuneitu-ina tlanchhiat tum hial anga min han ngaih tak mai, eng thil nge maw ka sawia ka lo tih êm le? Ka thil sawi leh tihte chu a dik leh dik loh chu nangma rêl tur alawm le,” a ti ve ta ngat a. McGinty chuan, “Chuti, he hna hi i thawk ang maw?” a han ti a. McMurdo chuan, “Thawk dawn chiang e,” a lo ti a. McGinty chuan, “Engtikah?” tiin a zawt leh ta zel a.

McMurdo chuan, “A In hmunhma va en thlithlaia, rem han ruat vel nan zan hnih khat chu min pe la ka duh ngawt mai. Chutah...,” a ti a, a sawi zawm duh ta lo va. Chibai buk pahin McGinty chuan, “Chuti a nih chuan a ṭhat nasat chu. I kutah ka dah e. Chanchin i rawn thlen leh ni chu ni ropui tak a ni ang. A hmawr bawkna kutthlak hian inngaihtlawmna thinlung a puttir thei chauh dawn a ni,” a ti a.

McMurdo chuan a hmaa tih tur an hnutchhiah chu ngun takin a ngaihtuah a. Chester Wilcox-a chenna hmun chu an awmna hmun ep, tlang pangah a awm a, an awmna hmun aṭang chuan mel nga vel laia hla a ni a, In fâl tak a ni. Chumi zan la la chuan an thil tih tur an tihna hmun tur chu a va en thlithlai a, a lo kir leh meuh chuan zing khua a lo var der tawh mai a.

Chumi tuk chuan a thawhpui tur mi pahnih, Manders-a leh Reilly-a chu a han sawipui vel a, anni lah chu tleirawl thaza an ni a, sazuk pel tur ang maiin an hlim phian mai a. Zan hnih hnuah chuan an pathum chuan khaw pawnah an inhmu khawm a, an vai chuan ralthuam an keng ṭheuh va, pakhat chuan lunghalna dip chi hi ipah a thun a, a pu uaih bawk a.

An In beih tur an va thlen chuan zing lam dar hnih a lo ri tawh a. Chumi zan chuan thli a tleh deuh vûk vûk a, thla ral lam, seki varh tawh mai êngah chuan vanzawlah chuan chhûm tlahlang a tawlh leh ruak ruak ṭhin a. Uisathiam an kawl ni awma an sawi avang leh chumi laka fimkhur tura an hrilh avang chuan fimkhur zetin In lam chu an pan phei ṭham ṭham a; mahse, chu In aṭang chuan thâwm chhe tê pawh a lo chhuak reng reng lo .

McMurdo chuan chu In kawngkharah chuan a beng a va dawh a, thâwm eng mah hriat tur a awm lovin a chhung lam chu a reh ṭhiap mai a. Chutah lung halna ip chu a chemtêin a’n pir pawp a, chutah chuan a hal puaktu dâwt (fuse) a vuah ta a. Chumi hnu chuan a dâwt chu nawalhin an han hâl a, chu veleh hmun him lam panin anni pathum chu an tlan ta ngar ngar a, lei khuar lai deuhvah an han tawm kêk kâwk a.

Chuta ṭanga rei lo teah chuan beng tingawng rum rum khawpa ringin an thil tih chu a han puak ta a, In chim ri rum rum chuan a zui nghal bawk a. An thawh chin chu an dek nalh kher mai; mahse, an hnathawh chu a lo thlawnin a luangral ve tlat!

Scowrer-ho kut lo tuar tawh ṭhenkhatin an hrilh avangin Wilcox-ate chhungkua chu a hma ni lawk chuan hmun him zawk leh biru zawk, ‘police’ venna hnuaiah an lo insawn daih mai a lo ni a. McMurdo-ateho chuan In ruak an lo phîn darh lek lo niin, an sipai hranghlui mit tikhamtu ber lah chuan Iron Dyke-a eng ilo lai chhuaktute hnenah tih tur a la hrilh zut zut mai.

McMurdo chuan, “Ka kutah hian dah mai rawh u. Ka pual a ni ta. Duh leh a ṭul chuan kum khat pawh ka nghak mai ang a, kuk zawng ka la kuk thlu dawn tho tho mai,” a ti ta ngat a. A ṭhiante, Lodge mi leh sa pung khawm pawh chuan McMurdo chu lawm thu an hrilh a, chu thil chu an sawi zui ta lo va. Mahse chawlhkar khat hnu vel lekah chuan chanchinbuah Wilcox-a chu tute’n emaw an lambun a, an thah thu a lo lang ta mai a. McMurdo chuan a hna thawh zawh loh a thawk ta tih a chiang mai.

Chutiang chu Freemen pawl hnathawh dan chu a ni a; nia, chutiang chu Scowrer-ho chet dan chu a ni. An awm danah chuan hrehawmna te, thlabarna te, hlauhna te’n thla a zar reng ṭhin. An thil sual tih dan chanchin vel pawh han ziah thui buangbar a ngai lo. Lehkhapuan a hekin lehkhabu man a to duh mai mai a ni lo’m ni? Duh leh a ngaihven zual chuan chanchin hlui ‘History’ bu lam lo bih deuh mai teh se.

Mahse ‘police’ pahnih, Hunt-a leh Evans-a an thah thu hi chu ka’n sawi leh hram teh ang. Chu mite chuan he mite pawla mi, mi pahnih man an tum a, Vermissa Lodge-ah ngei chuan khawngaihna nei hlek lovin an that ta a nih kha. Hei lo pawh hi Pi Larbey-i, a pasal bawihsawmtu an that bawk. A pasal chu McGinty-a thu pek zawma thi lek leka an vuak a ni a, chumi a bawihsawm avang ngawt chuan an that a nih chu.

Chumi kum thlasik chhung chuan, Jenkins-a an that a; chumi hnu lawkah a unaupa an that leh a; James Murdoch-a pawh en hreawm khawpin a taksa an nghaisa bawk a; Staphouse-a te pawh an chhungkuain lung halnain an phîn mang vek a; Stendals-a pawh an that bawk. Hlauhna Lui ruam chungah chuan thihna chuan a thla a zâr chhah sawt hle.

Nipui a lo thaw a, luite tui luang ri te an lo mawi zualin pangparte an lo mawi ṭan a, leilung fate dang zawng zawng chuan nipui lo thaw chu an hlimpui a; mahse, patling, nutling tan erawh chuan hlimna kawng a kaw ve lo. Thlabarnain an thauvah a man a, kum 1875 kum, nipui thawtir vel tluka chu lai hmun tana nun hahthlak chu a awm kher lo vang.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)