ÁNNCHHIA Chapter-7

Episode kal lai dah luhna

Moderator: writers

Hluhlutei
Posts: 430
Joined: January 12th, 2017, 8:44 pm

ÁNNCHHIA Chapter-7

Unread post by Hluhlutei » January 18th, 2021, 7:59 pm

30ead1f5876786007560a8a5af2a25a3.jpg
30ead1f5876786007560a8a5af2a25a3.jpg (47.95 KiB) Viewed 3500 times


Bathroom ah chuan tuisa ver vawrin ka in tleuh zuai zuai a, ka harh hawk mai, na em em pawh ka nei tawh lêm lo, mahse tlêm chuan ka chau deuh, bathrobe ha in ka inbual zo chu ka chhuak zui vat a, Jake pawh alo awm leh tawh lo, inthlâk tuma ka wardrobe ka hawng chu ka thawmhnaw ken ho kha engmah alo awm tawh lo, kawrfual 5 hlîr hi alo inkhâi dal a, rawng vâr atam hle bawk.



Ka kawr ka dahna bag chu ka zawng nghâl ruai a, ka hmu miah lo, chutia hrilh hai zeta ka awm reng lai chuan Maid pakhat leh ka pi hi an rawn lût thut a, ka bathrobe hâk chu ka taksa alan thui loh nân ka lo siam ṭha mawlh mawlh ringawt.


"I mu ṭha em?"

Ka pi chuan arawn ti deuh var a, nui lui sakin ka lo bu nghauh nghauh ringawt,


"I inthlâk zawh ah min rawn hmu dawn nia"


Tihpaha chhuah mai atum chu "Mahse Ka pi, ka kawr ho hi ka hmu miah lo a" inthlahrung zet chuan ka ti tawp a, rawn hawi lêt in "Ka paih tîr anih kha, ka kawr dah tîr ho kha tun aṭang chuan i ha dawn nia, he inah hian hmeichhia in kekawr hâk kan phallo, engtin nge khatiang kawr te hâk i tum theih zawk le?" tihpah chuan an chhuak zui nal nal nia, a ṭawngkam kha zet mak ti zetin ka en tlawk tlawk ringawt.


Min râwn miah lo in tinge an lo paih ngawt le? Ka nutei min leithar ka la hâk miah loh tepawh a awm ṭeuh sia, ka thinrim deuh ut ut chu thâwk ka la hawk a, wardrobe chu hawngin kawrvâr fual bân tluan chu la in ka ha ve tawp, Ka pi chêt dan chuan ka lung ati âwi lo takzet a ni, eng ang chhûngkua ah nge ka lâwi pawh ka hre lo, an mâwl nge an sual? Sual ti a sawi tûr ni si lo hian An awm dan leh khawsak phung hian min ti hlau lek lek zawk.


Inhnuai lamah chuan muangchângin ka chhuk thla a, Ei rawng bâwl thiam lo tawp chu ka ni lo na in eng ang nge an ei ṭhin lah ka hre dêr lo.


Maid pahnih chuan eirawng an lo bâwl dûn rak rak a, min hmu chu mak an tih hmêl deuh.

"Puih in ngai em?" Ka tih chuan in en in an lû an thing ringawt a, an thil tih lai chu an chhunzawm leh mial mial ringawt, ngawi reng chuan ka chhuak leh hna hna a, Ka pi chu common room ah ala ṭhu reng tawh, ka hmu thut chu ka la phu zawk zui, nichin khân ka hmu miah si lo a.



"Lo ṭhu ta che"


Tihpahin a bula sofa chu a kâwk zauh a, ngawi reng chuan ka ṭhu thla ve nghâl zat.


"Dar 9 a rîk hunah tûk ṭhuan kan ei ṭhin a, rawng bawl chu i tih angai lo ang, mahse chaw ei siam angaih hunah i pui zawk dawn nia"

Ati leh mai a, ahma ang khân a nêlawm tawh hran lo, reilo tê ah Jake leh apa pawh an rawn thleng chawpchilh ve mai a, Biak chu sawi loh melh pawh min melh lo in inchung lam apan daih nia, thinrim hmel a pu in ka hria, ngawirengin ka kut ka khalh niap niap reng ringawt.


Jake-pa chu ka bulah chuan rawn ṭhu thla in thâwk ala deuh hawk a, "Angel hrehawm iti em?" Nui deuh sâng hian a rawn ti a, "Ti lo e" nui lui sak pahin ka lo ti ringawt.



"Angel va pui tache dar 9 ari tawh ania" a piin arawn tih takah chuan rang takin ka tho a, choka lam ka pan nghâl.


An chaw ei dawhkân lian zetah chuan chawhmeh chi hrang hrang hi an lo chhawp dal a, sa lam deuh hlîr a ni leh nghâl, sa hi an duh chhûngkua viau anih ka ring, ka duh lo chuang lo na in nitin ei reng chu ka peih teuh lo, tih tûr ber pawh hre lo in maid pahnih che sawk sawk reng chu ka lo thlîr tawp a, an chê reng reng chu an uluk in fork leh fiante a hran in dawhkanah an chhawp thlap a, an chhawp na ah chuan puan thianghlim an dah zêl bawk.


Nutei nen kan chaw ei siam ṭhin ka lo mitthlâ hmanhmawh a, keini chaw ei siam ve chu thlêng ka ti ri ang ṭhuai ṭhuai a, kan ril aṭam tawh chuan ramhuai ril ṭam ang maiin kan che buan buan zel kha nia, a hun leh hun lo pawh kan sawi lo, dar zat ah lah kan buai hek lo, kan ril ṭam hun hun kha kan chaw ei hun chu ni mai.



An thlêng chhawp tûr chu ka lo chhawp sak ve mai a, sauce an uar hlê bawk, a rawng lah hi a duk ruih lehnghâl, thisen a ang ka tih êm vâng chuan ka luak ati chhuak ut ut thei nia.


Chaw ei dawhkân kîl chuan an lo ṭhu ta sap sap hlawm a,
"Angel rawn ṭhu ta che" pa berin dam thlupa atih tâkah chuan Jake-a bula ṭhutna âwl ah chuan inthlahrung zetin ka ṭhu thla ve a, ka ril ṭam lutuk ka pum lah chu ari ruk ruk lehnghâl, "Ei ang ule" Pi berin a tih veleh chuan fian leh fork chu an lek kâng va a, ka lo lek kâng risk ve pawp, chutah ring zet hian ka pum chu arawn ri ta nih chu, phâwk hrû hian min rawn en ṭhap hlawm a, awii...!!!....ka zah zia hi, Jake chuan min nuih deuh hak a, a pa pawh chuti tho, a pi erawh nui ve lêm lo in a áw a thiân kharh ringawt, ka thi der tawp mai dawn mawni le ka ti hman hial a ni.



"Ei ṭeuh rawh Angel" Apa chuan nuihza insûm tih hriat zet hian arawn ti a, nui lui sak pahin ka lo bu nghauh ringawt, Jake chuan chawhmeh chu ka suah ngam loh aring aniang min suah sak dan dan a, ka lo nui lui sak sak ringawt, ka zah tawh tehrêng nen chaw lem pawh a sak ṭalh mai, ka thil ei reng reng chu lem pawh ka lem ṭha thei lo, ka hrawkah hian a tâng ṭhup vek mai in ka hria, ka tum loh deuh ka hrawk tâwt lutuk chu ka khuh chhuak kharh a, Ka khuh zui nghâl bawrh bawrh mai.


Jake chuan ka hnunga rawn chum dat dat pah hian tui min rawn pe a, ngati nge maw tukin ber khera hetia ka awm le? Ka ril ṭam pawh a reh zo vek tawh.


Chaw kaw puar pawh ei lo in a mawi ah ka kham ve leh ringawt a, Ka thlêng chawi phei ka tum lah chuan Jake-a pi chuan a phal leh tlat tawh lo.

"Kan ei na thlêng kan seng ngai lo, ti khân kham tawp rawh" Lungâwi loh hmêl fe hian arawn ti chang fak a, "E...Awle" zâwi zeta tihpahin ka'n dah ri leh ṭhuai anih chu, ka tum lâwk pawh a ni lo, ka zak lutuk hi ka ṭap lo chauh, Hmanhmawh lutukin eirawng bawlna lamah ka tlân phei a, tui vawt an lo dah chu ka lem pawp ringawt.


Jake chu hmanhmawh zet hian arawn phei ve a, "I ṭha em?" Tihpahin ka tukhum samah chuan arawn chûl hliau hliau a, ka lû bûk nghauh nghauh pahin ka lo mengkhup lap ringawt, "Ka hrethiam che lawm, a zahthlâk loh ania" dam thlupa arawn tih takah chuan ka mittui rawn parawl ringawt chu ka hru zui zauh a.

"Ehe...i ṭap alaw?" Hnai zeta rawn kûn pah chuan arawn ti deuh hluai a, men ṭiau pahin ka lû ka lo thing ringawt, ka zak êm a ni, ka pian tirh ata tiang em em khân ka la zak ngai lo.


"Hey...Ṭap suh le" tihpah chuan min kuahin ka hnungah chuan a bêng zui thak thak ringawt.



______________



Common room ah chuan desert ei tûrin an ṭhu leh ṭhap a, an khawsak phung reng reng hian min ti hah takzet a ni, Nutei te nen kha chuan khawia desert mah kan ei ngai lo, kuhva hring a awm kha chuan mi rêl pahin ka seh sen vel mai mai ṭhin kha ni sia, Apple ka vel niap niap Lai chuan ka kut zungpui chu arawn thîp zawk, ka râk zui ṭhat a, midang chuan min lo buaipui nghâl vat, "Ehe!....ana em? Awi a thî nasa lutuk" tih chûl pahin Maid pakhat chuan ka kut chu arawn lek kâng a, rin ai takin a thî duh phian lehnghâl.


"A thî hi tih tâwp vat angai" tihpahin ka kut chu pakhat zawk chuan min rawn fawh sak chawt a, a thîp zual lutuk.


"Engthil nge i tih kha?" Vîn tuara rawn tih pahin Jake chuan chu nû chu arawn namsawn lawp anih chu, a thinrim hmêl rum lutuk chu hrilh hai zetin ka en tlawk tlawk ringawt.

Chunu chu inthlahrun hmêl zet hian a hmui vela thisen kai chu ati fai nghâl thuak thuak a, midang ho pawh rang mangkhêngin an rawn lût nghâl, maid hmuia ka thisen kai ka hmuh chuan ka ner sak, a chêt dan chu a maksak riau in ka hria.


"Ka tihpalh, ka tihpalh lutuk"

Ati zui mawlh mawlh a, "Min puih a tum mai anih kha, thinrim vak a ngai lo" dam dap chuan ka lo ti a, Jake -a'n ka kut thî sar sar arawn hmuh chuan a maimitchhîng zui sawk nia, thisûk a nei anih ka ring.


"Angel, i kut kha hmanhmawh in han tuam rawh" ka pi in arawn tih takah chuan rang takin ka chhuak a, kan room ah chuan First aid box ka zawng zui nghâl ruai a, avâng em em lehnghâl.




Ka kawr hâk lai chu pawtchhia in ka tuam ta ringawt a, khumah chuan ka ṭhu zui hnawk, ka chau nghulh thei nia, room techu ka enkual a, Nutei ka ngai takzet a ni.


Ka phone chu la in ka han hmet êng a, Nutei missed call vawi thum lai chu alo tlar dal mai, rang takin ka call nghâl vat.


"I buai ami?"


A rawn ti nghâl var a, ka lo nui hak, "Buai lo e, Nute ka lung a lêng lutuk" ka ti zui sap a, ka mittui rawn parawl kiang kiang chu van va dâk meuhin ka khap lêt fak fak ringawt. "I pasal khân a duat lo viau che mi? An sual viau em? I lakah an ṭhat vak loh chuan lo haw leh daih mai rawh" Ati leh chûk chûk tawh, ka mittui chu arawn far fap a, nui hak chungin ka hru zauh, chutih lai tak chuan Jake pawh arawn lût ve chiah bawk.


"Nute ka dah rih mai aw, nakinah ka lo be leh ang che" tihpahin ka off zui hmak a,


"Naktuk aṭangin college ka kal chhunzawm dawn a" ka bula rawn ṭhut thlâk pah chuan ati dul deuh ruih a, ka lo bu nghauh ringawt.


"Ka chhuak lawk dawn a, zanah chauh ka lo lêt ang, engemaw ei châk te i nei em?" Ati zui duah a, "Khawnge i kal dawn?" Ka lo ti nghâl vat, "Ka pa bulah mawle, Zanriah pawh kan ei nghâl ang" insiam zui mawlh mawlh pah chuan ati a, ka chhâng tawh lo, chawlh hahdam ka duh takzet a ni.



"Anih ka kal aw, ka pi khân a duat loh viau che chuan min hrilh dawn nia" tihpahin ka chalah chuan arawn fâwp zauh a, peih lo zetin ka lo nui lui sak ringawt.



______________
Nilêngin room ah ka mu a, ka khua ahar nilêng ṭhak ti ila ka sawi sual ka ring lo, phone nei ve mahila ṭhian biak tûr em em ka nei lo a, Nutei lah a buai thei bawk si.



Zan riah chu room ah min rawn pe a, ka ril aṭam bawk nen ka eihnem hle, ka ei fâi rât vek, a ṭam em bawk a ni.


Dar 7 rîk dawn thlengin a reh ṭhiap reng a, ka inbual a, khua a vawh em em hran loh vângin ka mutkawr chu ka ha a, ka mu nghâl daih, ka phone ah chuan Cinderella thawnthu ka play a, ka hriat loh kârin ka lo muhîl zui daih bawk.




Kawngkhâr in hawng ri ruk ruk ah chuan ka meng zawk a, Jake chuan ngawi reng hian bathroom lam alo pan mêk chu niin, a kamis hâk ah chuan thisen a kai hnuang in ka hria, rang takin ka tho a, bathroom lamah chuan ka zui lût ve nghâl zat.



Min hnungchhawn zawng hian alo ding zûn anih chu, che lo hian alo ding ngawi reng a, a kut aṭang chuan thisen afar tluk tluk bawk.


"Jake" ka tih rual chuan arawn hawi thut, ka ṭe chhuak ṭhawt thei, khum aṭang chuan ka lo ṭhu chhuak hluai chu niin, ka mumang lek!....Jake hmel rapthlâk lutuk leh a mit sen êng rûm mai mawlh kha.... ka hawikual a, sana ka en chuan 11 alo ri ṭep tawh, Jake chu alo la haw lo aniang ka bulah pawh a mu miah lo, tukverh aṭang chuan thlâ arawn êng dul ruih a, sihal rawn û chuah chuah techu ka râp takzet a ni.


Khum bula tui chu la in ka dâwt nghâl khawlh khawlh a, chiang taka ka mumang ka hriat tawh hi chuan awmzia a nei ngei ngei ṭhin, mahse enge awmzia ni ta ang? Rinthiam ngaihna pawh ka hre lo, bathroom aṭanga tui rawn in herh hâw chuan min ti phu zawk thei.


Rang takin ka tho a, bathroom lam ka pan zui nghâl vat, kawngkhâr kik dat dat pah chuan "Jake nangmah ami?" Hlauthâwng ru zet chuan ka han ti a.


Rûm hawk rî ka hre zui nghâl, Jake a ni chiang lutuk, thil ṭhalo a tâwk tihna em ni ang? Kawngkhar chu alo in kalh loh hlauh vâng chuan ka hawng rawk a, ka rei!....ka thil hmuh vâng chuan ka ding chawt,
Bathtub ah Jake chu alo inhnim pil vek a nih chu, thisen nen a ni nuaih mai, "Engthil nge a?" Tihpahin bathtub bulah chuan ka ṭhu thla hnawk a, tui aṭang chuan arawn chhuak vat, hah hmel zet hian thâwk ala deuh hawk hawk a, a hmêl rum ûl chuan min ti hlau in ka ngaih ati ṭha lo takzet a ni.


"I ṭha em?"

Tihpahin a kutah chuan ka vawn sak a, thisen nen ni nuai mahse a pem âwm leh hliam nei âwmin a awm pawn ka hre lo, "Ka chau lutuk Angel" awki hniam ruih hian arawn ti chuai ruih a, a awm dán chu mak ka ti takzet a ni.


"Hei hi enge thisen te hi? Hliam i nei ami?" Ngaih ṭha lo zet chuan ka enkual a, a taksa ka vawnna ka kut chu rawn vuan in mit meng thim khup hian min en vung vung a, muangchânga rawn thawh chhuah pahin min kai tho ve nghâl zat, hliam a neih âwm ka hmu miah bawk si lo.


"Ka chau lutuk" a ti leh ringawt a, a kawr huh hlup dek thlar chung chuan min kuah vang vang mai, keipawh ka huh zo vek tawh, ka kawr bah chu ti pial thlâ in ka dar ruak kângah chuan a fawp zauh a, a hmui techu a vawt vek nia,
"I vawt vek ania i damlo ange"

Aw khûr dar dar chuan ka han ti a, ka darah chuan a lu nghatin thâwk ala hawk, a rawn hawi chho leh a, ka hmui ah chuan dîm lo zet hian min rawn fâwp deuh tâwn tâwn nia, chhânlêt ngaihna pawh ka hre lo, ka nghâwng ah techuan a fâwp thla dun dun a, ka bân chu la kângin a fâwp thla dun dun mai, ka lungphu dat dat chu ngaithlâ in ka lo enkiau a, min rawn enkur pah chuan a nui deuh suk, a chêt dân chuan min ti hlau ru lek lek zawk.


Kiai suk pahin min kâng nawlh a, khum lamah bawk chuan min hruai leh tawh, khumah chuan dîm tê a min nghat riai riai pahin a in phelh zui sut sut a, a tih tum chu ka ring thiâm nghâl mai.


"Ka huh vek" ka sawi zawh hma in a kutzungchal chu ka hmui ah arawn dah a, ka kawrfual hâk chu hlîm chho in ka dulah chuan arawn fâwp vang vang a, ka lo îp châwih ringawt.



Ka awmbâwr chu ka kawrhnuai chhanah chuan arawn hup zui thak a, ka chalah chuan a fâwp zui vang vang mai, "I chungah ka thil tih tûr vâng hian ka tihpalh a ni" vawt ruih hian arawn ti a, a thusawi chu nupa nun min hmanpui vâng hi nih ka ring, nupa kan ni a kum kan tling ve ve bawk, a pawina pakhat mah keichuan ka hre ve lo, "Ni lo, hei chu i tih tûr dik tak alawm" ka lo ti ve mai a, "A dik chiah" tih pahin min rawn fâwp leh a, muangraih leh ril tak hian min rawn fâwp nia, ka thinlung a hneh takzet a ni, a lakah hian ka lawm a, in hre ngai miah lo in kan inneih ve tawp a, mipa a ni a, a hmelṭha in ngaihzawng pawh a neih ka ring, chuti chunga kei fahrah ve mai, lehkha pawh zir sâng em em lo, awm mawl satliah ve tawp apa thû a min nei a, duat taka min enkawl thei hi a puitling ka ti a, tlêm chuan hlauhawm deuh ṭhin mahse alakah hian vuina tûr ka nei lo, tûnah rih chuan ka hlim a, ka pasal hian a phû tawk nawmna lo pêk hi ka tih theih ve chhunah ka ngai tlat a ni.

Nûpa nun hlimawm tak hmang dun in inkuah rial chuan kan mu dun a, naktukah enge thleng dawn ka hre hauh lo, tûnah rih chuan ka hlim a ni, ka pasal míze hriatthiam har leh la naupang tak lakah hian ka hlim takzet a ni, kum 21 chauh la ni mahse, a rilru a puitlingin fapa ṭha tak leh pasal ṭha tak anih ngei ka ring tlat bawk.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)