29th APRIL - 2 BY PAPUII SAILO

Episode kal lai dah luhna

Moderator: writers

Ruatpuii Sailo
Posts: 100
Joined: November 22nd, 2020, 10:57 am

29th APRIL - 2 BY PAPUII SAILO

Unread post by Ruatpuii Sailo » March 7th, 2021, 10:16 pm

29th April
By Papuii Sailo


CHAPTER - 2




Hei hi chhiar hmasa phawt ru🧐


Ningani zan khan lo dah ka tum a, mahse zingkar atangin zan dar 10 vel thleng kha ka buai char char a, phone takngial pawh ka khawih tha hmanlo🤧ka chau ve bawk nen Zirtawp zanah ani mai ka tia,mahse zingkar atangin current kan neilo leh char char a😭 Tukinah khan kan nei ve chiah a, ka duhloh vanga rawn dahlo ka ni miahlo ania, diktak chuan Sunday hi chu awl ka tum a, mahse ka inthlahrung sia ka reh nghal daih bawk nen ka rawn dah hram🤧🤧


Angaihnawm loh viauna in a sei tha 😂
Chhiar nuam u💞💞💞




" Engtin nge hetiang hi ka nau chungah i tih theih? " Thawk la hawlh chung a a rawn ti chuan ka bing vek, khawvel vir lai hi a chawl ta a maw tih turin ka bul vel chu a reh thuap a, ka hma a thu chu mittui tling pamin ka melh ran bawk. Ani hi chuan min rin ka lo beisei ve kha ania, mahse chung ka beiseina tlem te neih ve chhun chu tun a a tawngkam tlemte khan a rawn chhem bo vek.





" Samu " Ka ti tham tiak a, ka biangah ka mittui a luang thla nghal pap bawk. Ka tih a ni lo tih hrechiang ber tur a ni a sin!





"Nang pawn ka tih anih i ring maw? " Sawitur ber ka hre lo, ka kawchhung hi kut hmang a duh tawk a tham kual nawk nawk ang hian ana ngut ngut a, mahni inkhawngaihna in min rawn luh chilh tup tup bawk. Ka rin dan kha chuan ka tih anih a rin loh thu leh thu dik chhui chhuak tur a police ho a ngen ka lo ring kha nia ! Mahse chutiang ka lo beisei chu ka mawl zia ka hrechhuak. Tun a hliam tuar hi a thisen zawmpui a nau ngei a ni a, Ruati nen kan inmil vaklo tih hrechiang tu pawh amah Samuela tho hi a ni. Chutiang anih chuan atan chuan anau vittu ang a min rin chu a har lo khawp ang.





" Ka nau i haw viau anih pawn hetia tih kher hi a tul em ni? Zothanpui " A hmelah a rilru buai ve tho zia a lang chhuak vek,mahse a tawngkam chhuakah a nau kha ka vih ani tih a ring nghet hmiah tih alang reng a, insawifiah eng ang mah ila min ring chuanglo ang.





" Zothanpui min chhang rawh engvanga ka nau chunga hetiang thil ti nge i nih? "Ka ngawih reng avang chuan a rawn ti vin thawt a, min rawn hnaih chilh nghal ruakin ka kawr awmah a rawn tham a, ka hamhaih bawk nen engtin mah ka inveng hman lo. Hlauhlawpin ka melh reng a, hetiang a che thut hian min thawng tak zet bawk. Ka hriat thin Samuela kha a ni tawh lo! Ka hriat Samuela kha chuan min duatin engtik lai pawn min ngaihsak a ka lam atang reng thin bawk.





Vawi leh khatah hnung lam atang hian police awm ve pa khan a rawn pawt let dawrh a,kei erawh a chetdanin min thawng lutuk bawk nen ka tha a khur ru hial.





" Helai kan luh hma khan enge i sawi kha i theihnghilh em ni? " Police awm ve pa khan a ti chang hrawk a,an lo luh hma in enge an sawi ka hre lo na'ng in Samuela chetdanah a lawm loh zia chu a aw ah chuan a lang chhuak thei. Rum ri nghut chungin a inher a, vawikhat pawh min rawn en leh tawh lohin kan awmna room atang chuan Samu-a chu a chhuak a, ka tap chhuak nghal hawk.





Midang zawng zawngin min kawh rawn luai luai lai pawh a ka thlavang hauh tlat thin tu khan min ring miah lo! Chu chuan min ti na tak zet. A farnu nen kan inmillo tih chu ka pawm thlap, a unaupa tan khan kei hi min îai miau a, vawitam kalsan tur a min ti in kei ang mi rethei leh hnuaihnung, mi dawr a inhlawh ve mai mai tan hian a unaupa kha a sang lutuk tiin hnuaichhiah takin min ankhum fo thin. Thenkhat ngaihdan pawh chu chu ani.Mi dawr a inhlawh chawp ve maiin mi hausa fa ka ngaizawng kha keiman ka thlem angin leh a lakah ka inphal rai angin thil hrechiang ber ang a sawi tawk an awm fo.Mahse anih loh zia hre tu chu kei leh ka thiantha ber Dingpuii kan ni.





Ruati leh a nu lah ka dawr thawhnaah pawh rawn kalin min rawn tawngkhum chang lah a tam,min hmuh changin min hnuaichhiah zia an tilang ngei ngei thin.A nu leh a farnu in min duh lohna an tilang hreh lo va, mihring pangngai ve mai tan chuan ngaih khatah ngaih a har chang a tam,mi hausa fa nilo mah ila chapo na ka nei ve tho bawk.Inthen mai a that zawk thu ka hrilh fo va, mahse inthen ka sawi changin ngaithla duh lo vin thildang a sawi char char a, a hriatloh der hmiah thin avangin tun thleng a la inthen lo kan ni.





Anu leh a farnu te nen buaina kan neih chang pawh a ka thlavang hauh thin tu Samuela kha tunah hian ka ngai tak zet, a dar hlai hlup a min kuah bet chungin ka tih anih a rin loh thu leh engkim a tha leh vek mai ang tih thu sawi turin ka duh ngawih ngawih.Chu erawh tuna a chet danah kha chuan a thlen ka ringlo hul hual. Mahse chuti chung pawh chuan ka thinlung hian a la beisei ru fan tho





Ka kawr awm tham tâwkin ka tap rawng rawng a, ka bulah tunge awm tih ka ngaihtuah buai peihlo, ka chhunglam natna te hi tah thawl hawk ka chak ber. Kut lum hlai hlupin ka hnung a chul heuh heuh rual chuan ka zuau sawt a, ka tap uar sauh,ka tah nasat avangin ka thawk a buai a, ka tap chhuak hlei theilo. Ka âng deuh hlawi hlawi a, ka thin zawnah hian min hnawh a, ana thip vin tak bawk, ka kut in ka awm ka chum vak vak a, awmzia a awm chuanglo. Hetiang chiah hian ka nu thih khan ka awm tawh.




"Min en teh" Dam thlup a tiin alam hawi zawngin min kuai her a, ka biangah a kut phah hlai hlup pahnihin a dawm a, chu chuan ka sawithiam chiah loh thlamuanna min pe,mahse boruak ka duh angin ka hip theilo a, ka thawk a sak talh.





" Min en la, ka rualin thawk la rawh le, ka tih ang zelin ilo ti dawn nia " Boruak a hip lut a muang changin a thawchhuak leh a, amah en chungin a tih ang chuan ka ti ve zel a, tlem tlem chuan ka thawk lak a dik tan.





♠︎ Lalhmahruaia Pov ♠︎



" Sir, a vih anih tak tak i ring em? " Sangpuia chuan a rawn tichhuak hlawl. Vanlalruati a harh tawh thu an sawi avangin a statment la turin kan pahnihin Civil Hospital lam kan pan mek a,motor tam hun lai a ni bawk nen kan station leh Hospital a inhlat lo viau na chu kan tawlh chak mawh khawp.Bolero-in kan chho a,motor dang ti kiangin duh chuan hma deuhah kan thleng chho thei, mahse keini aia tul zawk an lo awm thei a, kan victim lah a tlanbo dawn chuanglo bawk nen ka hmanhmawh em em hranpa lo.




"Apa Damdawi Inah a awm mek a, amah chauh enkawltu tur a nei lehnghal, bakah tun thleng a inpuanna tur ala neih loh danah hian... "



" Sangpui, mihring hian hmai hnih kan nei theuh a, kan hmai hnihna erawh midang hriatah kan phawrh ngailo, a nilawm ni? Chuvangin mi hi kan hmuh dan leh an lan danah hian teh ngawt loh tur ania,ani pawh hian a hmai hnihna ala thukru lo ang tih tu nge sawi thei? Victim nen hian an inbakkaih fo tih kha theihnghilh lo bawk la " A sawi zawh hma chuan ka lo tihkhalh a, a bu vei nghut nghut.




Dinhmun derthawng tak anih tawh loh avangin cabin lamah an dah lut nghal tih Sangpuia'n a sawi avangin an awmna cabin lam kan pan nghal a, pu Kaphlira'n min lo chiau au vat a, Samuela pawh room thlang lam tukverh bulah a thil ngaihtuah muk hmel zetin a ding run bawk. Kan lut chu hria ang pawn a awmlo. A rilru a buai ngawt ta ve ang! A bialnu pawikhawihtuah puh a ni a, hliam tuar lah a nau.





Anu in Ruati mu chu a ko a,a muhil lo nge a rawn meng nghal siar siar a, a lu a lo siam rem sak vat bawk. Sangpuia ka signal nghal zauh a, ziak maithei turin a inring nghal thlap.





" A la na em? " Ka tih chuan a then sak ringawt.





" Niminah khan Zothanpuii te vengah khan eng ti tur a kal nge i nih? " Ka ti nghal hmuk, ka tawngka chhuak hi thunun ve viau a ka inhriat pawh hian a bul leh hmuk thin.




" Ngaihdam dil turin " A rawn ti sap



" A chhan i sawi chiang thei a ngem? "




" Hmanniah a dawr thawhnaah kan inhau a, ilo hre tawh tho chuan ka ring a, Mama nen hian an inkawp a, mahse kan khawsak insanhleih lutuk vang hi ni ber ang chu ka duhpui lo va.. Kalsan turin ka hrilh fo bawk. Chumi ni pawh chuan kalsan turin ka hrilh leh a... "




"Muang changin sawi rawh, kan nghak thei che ania " Tawng a harsat hmel em avang chuan ka lo ti leh a, thawk ala zui nghal ham ham phawt.



" Mahse ani khan kalsan a tumloh thu a lo sawi ve bawk nen kan thu a inhmu lo chho a,ka thinrim insum zo lo in kut ka thlak a, ani pawh khan tuiin min theh ve tho, chuan a chunga ka chet dan avanga ka la inchhir tur thu sawiin dawr atangin a chhuak a, chuan kan inhauhna kha engtin tin a maw Mama hian alo hria a,ngaihdam dil turin min tia, mahse a tir chuan ka tum chuanglo, a hmeichhe hmangaih ka pawmpui loh chuan ka u nih a duh loh thu a sawi avangin niminah khan ngaihdam dil tur chuan ka kal a "




" Anih chuan nimin thil thlen dan chu i la hre thei em? "



"Ummm,,Dawrah a kalloh avangin amah ka phone a hmuh ka duh thu ka hrilh a,Damdawi In atanga a haw dawn chiah thu a sawi a,an veng lam ka pan a,an In ka thlen dawn tep khan hnunglam atang hian ka hmui hi a hup bet a, chuan min vit zui a, a bak engmah ka chiang tawhlo, mahse Thanpuii hmel hi chu ka mit ka chhin hma khan ka hmu tih chu ka la hria "




" Zothanpuii ani tih i chiang chiah maw? "


" Ka chiang alawm "



"Ok, a lawm awm e, ilo dam tha vat dawn nia " Tih pah chuan ka thutna atangin ka tho nghal vut.




" Ka pu, ka fanu hetianga ti tu hi a phu tawk hremna pe ngei ang che " Ruati nu chuan a rawn ti hluai a, tawngka a chhang lo in ka bu nghut ringawt. Cabin kan chhuahsan a, Zothanpuii pa tlawh kawi ka duh avangin a awmna ward lam kan pan thla nghal.




Zothanpuii khan Vanlalruati nen a an inhauh chung chang kha chu vawiin a Samuela chhuah hnu khan min hrilh, Ruati'n an chhungkaw dinhmun hmusit takin a sawi khum tih te nen.Tuiin a theh ve thu te,a inchhir tur thu a sawikhum pawh kha zep awm miahlo in min hrilh vek bawk. Atir kha chuan ama vih anih ka ringlo hman zet kha nia, mahse an inhauh a a thusawi khum nen Zothanpuii hian a vit lo tak zet em tih ka chiang tawh lo.






Ward chhung kan luh chuan police form kan ha bawk nen damlo dang awm ve chuan min enduh hlawm hle a,Zothanpuii pa ni a Sangpuia'n a sawi lam chu ka pan phei zel a, khumah chuan a lo thu mu a,hmeichhe pakhat Zothanpuii rual vel tur hi a khum bulah a lo thu bawk.





" Ka pu, ka fanu chu engtin nge a awm? He thil hi a tih a ni thei lo ang, Ran tak ngial chungah pawh zah ngai thin em em hian a mihring pui chu a ti na duh lul lo ang, khawngaih takin thu dik min chhui chhuah sak hram rawh " An bul ka thlen rualin a lo ti nghal mawlh mawlh a, hmeichhia khan lainat hmel lutukin a lo en ngawih ngawih bawk.




" Nangmah enge i an? " Ka tum aiin ka aw a chang lam hret.




"Kei chu ka tha, khawngaih takin ka fanu dik zia min chhuichhuah sak hram rawh " A hmelah pawh a rilru nat zia a hriat theih, a lo berah kum 50 bawr chu a ni tawh ang,a vun chu nisa do thang tih hriat takin a vun a uk deuh khuih a, mistiri a ni a, mi In sa leh furniture vel siamin a inhlawh thin a,In a sak naah a lu a hai thut a,lîangah a awm lai tak a ni bawk si nen a tla na viau a, a nak ruh a sawh khi a ni awm e.





" Ani ang hmeichhe nunnem lutuk hian hetiang thil a ti thei lovang, nilo a tih a ni lo tih ka hria... " Sawi zo thei lo in a khuh zui kharh kharh a, hmeichhia kha rawn che vatin " Pa, mu hahdam rawh le, I khuh nasat chuan i chau zual leh ang" A ti dam diai a, khumah chuan a mut that tir a, thil dang tih tur kan la nei bawk nen kan chhuahsan zui nghal a.


*



"Kut ze dang chu a awm miahlo a maw?"




" Awmlo, Zothanpuii kut ze thla chiah alang, a thil tih ngei anih hmel " Doctor, Ruati vihna chemte enchiang tu chuan a rawn ti let a.




"Awle " Ti nghutin ka phone ka off a, ka ak zui nghal hmiah. Finfiahna awm thei zawng zawngin Zothanpuii kawk vek a, midang hming ri eih a awmlo bawk.




" Khawnge min hruai dawn ? " A kut a hand cuff an bun tir rualin a ti ruai a, a aw ah a mangan zia a lang a, a hawi kual ruai bawk.





" Jail-ah kan phur thla dawn che, chutah chuan i awm rih ang a, karleh lamah i Court bawk ang " Cindy chuan handcuff lock mial mial pahin a ti sap a,





"Mah... Mahse ka tih a nilo tak tak, min ring rawh u, engkim ka sawi vek tawh kha, khawngaih takin min chhuah hram rawh u , ka pa in min mamawh tawh lutuk ,min ngai tawh bawk ang, keilo enkawltu a nei hlei nem" A rawn ti tiau a, a insut ri nghal feih.





Cindy ho in jail lamah an inphur thla a, kei erawh DC te nen meeting kan neih dawn avangin DC office lamah driver nen inkhalh chho a, Damdawiin In lamah kan awm rei deuh bawk nen tum dang ang lo takin a tlai pawl ka ni.




Darkar 3 vel zet kan meeting hnuin kan zo thei hram a,station lamah chhuk thla leh phawtin tihfel ngai ang ka tifel a, ka quarter lam panin ka inkhalh chho leh nghal a. Hna tul vel a kan chhuak anih loh hi chuan keimah hian Bolero pakhat tawp hi ka kawl a, office hour-ah tih loh hi chuan driver tibuai lo vin keimah hian ka khalh mai zel.





Inchhung reh ruaiah keimahin ka lut a,eirawngbawl tih vel hi chu ka hautak lem loh avang hian keimah hian ka ti ve mai a, mahse a tihfai lam pang hi chu kar khatah vawi hnih vel lokal thin a awm thung.





Ka intihfai zawh vek hnuin eirawng ka bawl a,mipa ni mah ila upa ber ka nih avang hian rawngbawl tih vel hi chu kan tleirawl chhuah atangin ka thiam vek tawh ti ila ka nu leh pa in min tih luih tir vang a ni zawk mah,awmpui an la duh ngailo va, hna an thawk ve ve thin bawk nen tlai lamah eirawng ka bawl zauh zauh.A hun lai kha chuan hreawmin lang mah se tun hnuah hian a tangkai zia ka hrechhuak a, zahah ka la lemlo bawk.




" Ka lo zin thut maithei ania " Phone ka khawih rualin Terini message lo awm chu ka hmu nghal a, kan buai a ta langin phone pawh nilengin call ka hman zeuh zeuh bak ka khawihlo. Ka call let nghal vat a, rei vaklo a in ring hnuin a la nghal mai.




" Eng ti turin nge i lokal dawn? " Ka ti nghal sup. Induh tak a innei kan ni lo nen tawngkam thlum tak a inbiak hi kan nei ngailo.





" College chawlh a ni dawn a, ka nu hian va zin phei rawh min tia, mahse ka hre rih lo " A rawn ti tha ve mai.




" I hman dawn chuan i thu thu a ni mai. " Ka ti a, eng eng a maw kan sawi hnuah kan inbiakna kan titawp a, a kum tel kan innei tawh a, hmeichhe sual a nilo a, ka chhungte pawn an ngaina vek bawk. Mahse tun thleng a alakah feelings danglam ka la nei miahlo hi thil mak ve tak chu a ni, chuti chung chuan kan la innei ve reng tho chu ania.




Kum 33 ka ni tawh a, hmeichhia ka kawp hnem ve viau tawh bawk. Mahse tumah han vei zui leh ka lungphu tidang lam khawp ka la tawnglo. Nilo vawiin khan ka tawng... Zothanpuii hnaih tak a ka awm lai khan ka thin hi a phut dan pangngai aiin a nasa, vawiin khan engvanga hnem tum a a hnunga ka kut nghat ve ngawt nge ka nih ka hre lo,hmeichhe tap lai hi khawvel a ka thil hmuh theih loh ber anih avang pawh a ni mahna. A tahna nasat avanga athawk lak a buai vek khan mak tak maiin ka lo hah ve vek. A chhan erawh ka hre der chuang lo.




*________COURT________*



Vawiin hi Zothanpuii Court ni a ni a,anmahni in Lawyer rawihna tur sum an neih loh avangin sawrkarin a tum sak a,Samuela te lam erawhin Lungleia lawyer tha ber an ruai thung.




An inkhing a, hnehna chan tumin an bei ve ve a, Zothanpuii pawn a theihtawpin insawichhuah a tum a, mahse a thusawi ve apiang lehlam lawyer-in a khing thla a, a hmaa Ruati a lo tawngkhum dan te leh evidence hrang hrang atangin amah vih ni thei ngeiin a lang bawk si. Keipawn midang an awm miallo maw tiin theihtawpin ka keimahin ka chhui leh vek a, mahse han rinhlelh tur dang an awmlo. Eng ti hawizawng pawn Zothanpuii ah hian a tawp vek.





Finfiahna awmthei leh thuhretu te statement zawng zawng nen Zothanpuii-ah a tawp vek avangin Court-in thiamloh a chan tir a, tualthah tum thubuaiah kum 10 lungin tang tur a tih a ni.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)