PRIDE AND PREJUDICE CHAPTER 2

Episode kal lai dah luhna

Moderator: writers

Krystal Vanchhawng
Posts: 127
Joined: October 5th, 2021, 4:42 pm

PRIDE AND PREJUDICE CHAPTER 2

Unread post by Krystal Vanchhawng » July 4th, 2022, 11:52 pm

PRIDE AND PREJUDICE

CHAPTER 2
☆☆☆☆☆☆☆


GEORGIA SMITH POV:


(After 13 years)


Ka message dawn chu ka enchiang a,a rawn thawntu number ka en leh,awihloh lutukin dawhkan ah ka thehthla tawp a. A vawihnih nan alo ri nawn leh,ka en chuan
'Lylia Best atana i tan ngei ka beisei' tih a ni.





He ka unaupa hrawn,nilo,ka Ramhuai hrawn hian eng rilru nge a put a,kum sawm chuang kan inhriat hnuah a vawikhat nan min rawn text a,chupawh,min diriam a,dawt rawn sawi tur ringawt in.





A thil min rawn thawn chu ka awihlo vangin chhan pawh ka chhang peihlo. Mahse,ka nu call alo thleng leh a. Ka thiltih lai dahthlaa ka lak chuan
"Honey,thlaleh chu ilo let angai tawh ang" tih a rawn sawi leh hmasa ber. Ka nu hian vawi engzat nge haw tura min rawn call pawh hi ka hre seng tawhlo.





"Mrs. Balgoni,ka buai tih ka sawi kha" thinrim duh miah si lova ka tih hap chuan
"Georgia,tikhan mi ti reng reng suh" ati leh nghal thak a.
"Engvanga haw tura min duh viau nge inih?" Tia ka zawh chuan
"I hria anga,i unaunu Lylia te inneih a ni tep tawh" hriat nuam deuh zawk chuan ati ta a. Hei vang anih hi,Ryle Balgoni pawhin min rawn deuhsawh. Mahse,ngawi teh lawk.





"Unau angin min enlo,nangpawh nu angin an enlo che. Engvanga an inneih chhim tura mel sang tam rawn thlawh khum nge ka nih ang,hna ka ngah viau" ka tih salh chuan
"Lylia vang anihloh pawhin,Steve vang tala i rawn haw angai" ati ta.





"Ka nu,fiamthu suh. Steve hming i sawi em?" Tih pahin ka ding ngil nghal zawk a.
"Georgia,ka fiamthu lo,ngaithiam rawh. I lakah Steve hi a thutak theilo" atih chuan thinrim zetin phone chu ka off a.





A teuhlo,Steve hian nupui a nei theilo,Lylia nen phei chuan a teuhlo lehzual. Hmanni lawk pawhin min hmangaih thu a sawi alawm. Bakah,lylia te chu nau ang bakin a en lo tih ka hria..





Ka phone tla chu chharin Chicago lama thlawk let turin flight ticket ka book nghal a. Ka mit ngeia ka fiah angai,Steve hian dawt min hrilh lo tawp ang.





Khua alo var leh meuh chuan Chicago Airlines ah ka chuang vang tawh,Steve call ka tum zet a,ala mut ka rin vangin ka thulh leh ta zawk a. Ka hlauthawng mai mai niin ka hria,tiang thil hi a ti theilo. Tun hnaiah a hna vangin kan inbe tam lutuk theilova,mahse,kan inkar a danglam phah chuanglo.





Chicago kan thlen chuan car in min lo hmuak reng tawh a,tu tirh nge ka zawh chuan
"Mansion atangin" ati ringawt a. Ka nu anih ka ring hmiah,kha mihring kha chuan a rawn tir dawnlo tih ka chiang.





Mansion kan thlen veleh chuan ka chhuk nghal sawk sawk a. Gate ka lut fel chiah,ding vang vangin Mansion chu ka thlir a,kum 13 liam ta kha ka ngaihtuah chhuak lo theilo. Ka la naupang a,rethei taka seilian ka ni bawk. Chuvangin,helai in ropui tak hi Mansion a ni tih pawh ka hrelo. Kha te hlei hlei kha min hmuhsitna tisualtu a ni.





Ngaihtuah zui duh tawhlo chuan ka kal ta vat zawk a. Kawngkhar ka pel chiah,maid anlo chhuak sap sap a,ka that leh thatloh te min zawt luam..





"Ka tha e,khawnge ka nu?" Tia ka zawhlaiin ka suitcase te chu rawn lak an rual a.
"Master pindanah a awm maithei" tia kal an tum rualin inchung lam atangin ka aw ngainatloh ber mai chuan
"Maid kha i maid an nilo tih hre rawh,Georgia Smith i bungrua chu nangmah ngeiin dah ta che" ngeiawm tak hian a rawn ti a.





Ka haw lutuk chu hawi pawh ka hawi chho duhlo. Maid ho chuan tihtur ber hrelovin min en tawm zak zak a.
"Khi ramhuai hi engvangin nge tun ang hunah inah a awm?" Zawi tea sawi paha ka suitcase ka ban chuan 1 chuan
"Vawiin chu inah a awm char char a,ala chhuaklo. Tunlai chu chawlh a nei aniang" Ryle Balgoni a'n alo hria ang tih hlau takin ati sep a.






Leh ta pek chuan,hotel riahna tur ka zawn mai angai dawn anih hmel. Ani nena indona chawhchhuah nawn leh ka duh tawh reng reng hleinem. Ni lehlo,indona tiin ka sawi theilo,ka beilet ve thei tlat lova.





Ka suitcase nawr paha elevator 1 zawk ka panlai chuan min en rengtu anla awm tih ka hria a,mahse,ka hawilet duh tawhlo. Min enzui chhan pakhat chiah a awm,a elevator ka hman leh hmanloh a en duh vang a ni. He Mansion ah hian elevator 2 a awm a,1 chu anni chhungkaw ho hman leh,1 ve thung chu Maid leh mansion a servants ho reng reng hman a ni.





'I nihna hriain i hman tur diktak hmang ang che' tia min vau hnuah runluih nan hrim hrim vawi1 ka hmang a,elevator kallai atangin min pawhchhuak lo chauh.




Ka pindan ka luh chuan alo thim khap a,ka khum khuhna te chu kum 10 chuang kalta ami vek kha ala ni.




Dah pawh ka indah fel hmain Steve ka call a,ala theilo
'Steve,ka lo haw a,inhmu ang' tih ka thawn a. Rei tak hnuah pawh min la chhanloh vang chuan
'Steve,ka lo let. Lokal rawh' tih chu ka thawn leh a.




Ni e,Balgoni chhungkua leh Harvard chhungkua hian eng inzawmna nge an neih hre ve chiahlo mah ila,Chhungkaw inpawh tak anni tih kan hre vek.




Kum 13 kaltaa,Steve nen he Mansion a kan inhmuh thut tum kha ka la hre reng. Maid zawng zawngin
'Master unaupa te chhungkua anlo kal dawn' anti a,an in buatsaih nasa hle. Keipawhin ka pui ve nghe nghe. Mahse,tudang annilo,Steve te chhungkua leh an thian zinga mi 1 te chhungkua anlo ni a.






Min hmu thut kha Steve chuan mak atih hmel vaklo,keimah ang em em chuan. Keichuan mak ka ti lutuk a,lawm chintawk pawh ka hrelo hial anih kha. Khami ni la la atang khan Steve Harvard hi min chhanhimtu leh ka tana mi pawimawh ber anih zawm ta a ni..





Zana ka mutnaah chuan mumang maksak zet mai hi ka mang a,an sawi ang takin Steve chuan nupui alo nei a,mahse,a nupui hmel erawh ka hmu tello. Steve nupui nei tur chu a tawpnan tiin duhthawh zet hian ka lo fawp a. Ka ngaih tawh em vang nge,kan infawhna chu a tak a ang em em a,ka hmuia lumna dang rawn belhchhahtu pawh chu ka feel thei hial. Steve pawh chuan ko ham takin min fawp let a,thawchham lek leka kan infawh hnu chuan a tawpnan tak tak ka hmuiah vawikhat a fawp leh zeuh a,tichuan min kalsan ta a..






Zing ka harh chuan ka hmui ka khawih hmasa ber a,ka mumang ka ngaihtuah zawm nghal bawk. Engtin nge khatiang tak khan a tak anga ka feel theih,ka mumang rama ka chenlai reng pawh khan atak emaw tiin ka kut phar ka tum a,mahse,Steve khan a man bet tlat anih kha..






Ka phone ka en hmasa ber a. Ka hmuh duh tak ka hmu ta.
'Vawiinah ka lokal ang. Kan inhmu dawn nia' tih alo thawn let a,ti hi chuan ka thlamuang ve thei ta deuh.





Breakfast ei hun a ni a,inhnuaiah chuan chhukin Maid ho thilsiam chu ka en a. Sweet bread,French toast,nutella pancakes leh a dang ka hmuh chuan pancake 1 chu ban zauhin ka ei a. Ka lem fel hman awrh tihah ka hnunglam atangin Ryle Balgoni misuala aw chuan
"Pancake siamsa kha paih vek la,Tamale emaw Monkey bread siam ang che" khauh farin a rawn ti thut a,ka thil lemlai ka hak tuarh lo chauh. Ka chhuk khan a awm tawp silo.






"Aw le,young Master" tih pahin Maid pakhat chuan ala sawn vat a,Ryle Balgoni bawk chuan mi tihel tawngkam taka
"Khalaia eitur rawp zet khan thuhruk atan a duh em zawt rawh,a duh chuan a thlawnin i pe dawn nia" atih leh chuan ka inher zawk a. Elhsenna a khat mitmeng nen chuan kan inhmachhawn ta a. Ka ngei em vang chuan a mit,min hmuh apianga dur khup reng leh a chal chuar nung nen chuan ka melh lui ve reng a. Ka huatna zawng zawng nena ka melh ve pawh hian zamna chhete mah a nei ngailo.






"Georgia Smith,tikhan min en hauh suh. I tihloh dan a nihloh kha" tiin ipte zen hmak chuan a inhek nghal a,a tukhum chhah te chu ka huat vang nge,a chhah zual bik hluah hluah in ka hria,ngam ngat ila saw mihring saw hmun sawm velah ka then hrang tawh ang.





Helai ka awmtirh khan Uncle Luke hriatpuina in Samoyed Dog pakhat ka adopt a,ka adopt chiah pawh a nilo,a neitute'n an awmbo san vanga la mai ka ni. Enkawl min phalsak mah se,inchhungah ka lalut thianglova,a eitur vel chu inhnuaiah ka ken thlaksak mai thin.





Nitina ka tihdan ang bawkin a eitur vel chu container ah ka khung mawlh mawlh a,ka zawh fel hmain Ryle Balgoni te unau hi anlo lut thut a,Ryle zawk chuan a hmu lawklo. Lylia zawk khan min rawn chhuh thutin,eitur lak ruk tumah min puh ta a. Ui ka vulh thu ka sawi a,mahse,an ngaithla duh chuanglo. Uncle Luke pawh khan eng emaw alo sawi ve ka beisei a,mahse,ka â let der a ni.






Breakfast kan ei chhung chuan maid ho kal ri leh kan fork dah ri vel bak chu eng thawm mah a awmlo. Thinrimna nei reng ang maiin tum hmur chuan chaw an ei mawlh mawlh a,kan misual chuan a sawi ang ngeiin Pancake chu a ei ta lova,Tamale leh coffee chu breakfast atan a hmang ta anih hmel. Tamale hi a ei ve ziah,Mexico lama a zin ka hre ngai tawp silo,an chaw chu a duh viau bawk sia. Ngaihtuah paha ka melh reng chu a hria nge,a rawn hawichhuak thut a,ka hawisawn rang hle,mahse,ka hawisawn hmaa min thamloh hmel zeta a nui kha ka hmu hman.





Lylia awm ve miahlo chuan ka ngaih a titha chiahlo. Ka ngaihtuah ang hi chu ni lul suh se.





"Georgia,i hna chu eng nge a an?" Rawn hawichhuak miahlovin Uncle Luke chuan min zawt a.
"A tha viau,master ka tihna a ni bawk a" ka tih chuan a bu nghut nghut a. Kan university atanga master ka zawh khan offer ka dawng nghal a,hna zawng buai vaklovin ka thawk zui kha ania. Hlawh a tam lemlo tih lovah chuan a tha vek.






"Engah nge Balgoni industry ah hian i rawn zawm tawh mailoh,i Unaupa hnuaiah hian hna tamtak a awm alawm" atih chuan ka tho thut tep a.
"Ni love,ka hnaah hian ka tui a" pangngai tak chuan ka ti thei a. Ka chhanna ah a lawmlo nge,ka nu chuan dawhkan hnuaiah min lo signal a,ka hre duhlo der ve tlat. Ryle Balgoni kianga thawh chu thih hrehin ka hreh a,ani pawh sawn min chhawr chak khu chuk lo tawp ang.




"Chutin ngaihtuah suh,Industry hnuaiah chuan thawk mai rawh,designer an mamawh em saw,tiraw Young Master?" Tiin ka nu chuan Ryle chu ava melh tlawn a. Kan misuala erawh chuan a rawn melh ve hleklo.





"Ni e,in ngaihtuah la,ram danga awm reng ai chuan,atha zawk" thu pe aw taka Uncle Luke an atih chuan
"Mahse" ka ti hman zawk a. Ka nu in ka mala min chum zawt rualin Ryle chuan min rawn melh zawk a. A hawisawn lehnghal. Hepa hi eng nge a rilru ah awm chiah ka hre theilo,min hua a,min ngai theilo hle si hian,min ngaihsak ve emaw tih mai awl hian awm a hrat tlat thin.





Ka pindanah ka awm a. Steve lokal hun nghakin shower te ka nei a,ka kawr hak tur pawh ka thlang uluk chiang hle. Floral skirt,summer laia deh nuam leh pian tilang nalh thei tak chu ka ha a. Makeup dawhkan hmaa thu in ka sam te chu ka blow a,ka makeup ka lo hnawih that mawlh mawlh lai chuan kawngka alo ri a.





Phur zeta thovin nui ver ver chung chuan ka va hawng a. Ka hmel hmuh zet vang chuan ka nui tawp nghal riai riai.
"I mi nghah ka ni meuh na nge?" Tih leh ka inthuam dan a melh thlaa,chutah,ka nghawnga tattoo ah chuan a mit a fu leh chat. A ner nawk a,ka tattoo hian a mit a tikham leh ngawt tawh anih hmel. Ani pawhin a taksa khat dawna a neih laiin 1 lek ka neih theihloh chhan ka hre love.





"In nufaa hmalak chu in thiam e" tih leh lehkha min hmehbel a,engmah sawi tawhlo chuan a kal leh nghal vang vang. Kum 13 hnuah,a duh thua ka pindan a rawn thlen leh hmasak ber a ni hial ang. A rawn kallam leh let lam chu a hmel danglam viau tawh mah se.





A lehkha rawn ken ka en chuan thinrim zetin ka hlum pawp pawp a,dustbin ah chuan ka vawmlut nghal pawp. Eng angah nge min ngaih,heihi alawm ka nu ka huat chhan chu,ka buaina min chinfel pui tum silovin ka nunah alo inrawlh ve sek a,buaina bak min thlen ngailo.




Tunah pawh eng nge atih leh tak hi,helai hremhmun a min hnuhluh chu duhtawk lovin,a hma hun a ngaihtuah vangin Balgoni industry ah luhtir min tum leh a. Ryle Balgoni lah khan kawng awm zawng zawngin alo ngai kawi leh tawh bawk. A hna min rawn offer hi han en ila,CEO secretary maw,tunge CEO,amah Ryle Balgoni kha maw le. Ani CEO nih ai chuan,interior designing lam kalsan vang vang pawh ka thlang zawk ngei ang.





Thinrim zetin khumah ka thu a,min hmu hniam tih chu ka hria. Mahse,Assistant mai mai atana hna min offer hi chu ka ring ngailo. Amah vanga hrehawm ka tawrh zozai te kha a theihghilh tawh nge,a hre duhlo der pawh ka hre hrep love. College kal rual ka nih hma atangin a thuhnuaiah kan awm a. He Mansion ah hian Ryle Balgoni aia lal an awmlo,apa,Luke Balgoni ngei pawhin a thu chu a hnial ngailo tluk a ni.





A kuta min tawrhtir lovin kawng dang tam takin min tawrhtir a,sazu chaw ah min zuah lo chauh anih kha. Hrehawm ka tih em vangin Uncle Luke chu a ngenin ka ngen a,ani chuan university ka rah hunah min sponsor tur thu a sawi a. Khawiah nge tih lam ka hrelo,Illinois state a nihloh phawt chuan ka duh vek.






Harsa takin University ka kai a,a sawi ang chuan min sponsor ve reng. Mahse,Summer Vacation hmanga ka haw tumin,Lylia Balgoni kawr ka tichhia a,ka titla ti ila a dik zawk ang.
'Engvanga ka kawr titla nge inih?' Tiin min nem kat dawrh a. Ka seng na lama ka tihtlak palh thu ka sawi chuan a thinrim telh telh a,ani chuan thi dawnin min haw thin reng a ni. A duhber Steve nen inzawmna kan nei miau a.





Ka inrinloh laiin ka samah a rawn tham a,Maid leh driver ho pawhin an hmu vek. Mahse,an Young Lady rapthlak zia an hria nge,tumah min chhan ngam an awmlo. Ka khawih letlova,ka dawh tawp,a tawk ka tih chinah ka nem pawp a,chutia ka nem laitak chuan Ryle leh Steve anlo lang thut a. Steve chuan min ngaihsakin ka that leh thatloh min zawt vat.





Lylia chuan a u kuah chungin a kawr ka tihtlak thu leh ka pheikhawk a ka rah thu a sawi a,a mittui a tla nasa bawk nen,sawi ve tur pawh ka hrelo. A pawimawh ber in min rin chhung chu tiin ka ngaih a tha hle a. Ryle Balgoni pawh chuan a hmingin ka tih leh tihloh te min zawt ve a,ka chhan hmain Lylia bawk chuan
'I nau ka nih hi,tinge min awihloh,i duh leh Maid ho pawh saw zawt rawh,an hre vek' tiin a aukhum tuarh tuarh a. Ryle pawh chu a thinrim tan ta deuh.




Maid leh awm ve ho chu a zawt a,anni hlauthawng chuan engmah an sawi ngam tawhlo. Tichuan,kawr chu ka duh thu ngeiin ka titla a,chhuatah he ka pheikhawk tenawm tak hian ka rap ta bawk a,chu chu thudik alo ni ta a. Khata tang chiah khan ka hrechhhak a,Balgoni chhungkua in an sawi chu thutawp,thu diklo pawh nise,an sawia chhung chu a dik vek a. A sen pawh a var antih chuan a var ah alo chang mai ni.





Ryle thinrim chuan ngaihdam dil turin min ti a. Steve lo inrawlh ve te chuan an thin a tirim lehzual bawk. Ka thiamlohna ni miahlovah vawitam ngaihdam ka dil a,ka ngaihzawng hmaah kher chuan tihnawn ka tum lo,ani pawhin dil turin min hrilhlo bawk a.





Steve chuan min kalsawn pui mai a tum a,Lylia chu ka kiangah lokal in
'He kawr man hi i hria em,i damchhung pawhin i lei zo lovang' min tihkhum leh a
'Ka rul dawn che nia,engzat man nge?' Tia tha taka ka chhan chuan min thamlo zeta nuiin
'I nu nen hian in damchhungin inzuar zui mah ula,in hlawh chhuak zo kher lovang' atih chuan ka thinrim lutuk in ka nem sawk a. A sira Vase an hun tlangah chuan ava in tauh zui bawk.






Midang anlo che suau a,Steve erawh a che ve chuanglo. Chutia ka nem tlu,Steve in a buaipui miahlo chu a thinrim lehzual a,a rawn ding a,ka hmaiah tak chuan a rawn beng siah anih kha. Steve chuan a nem sawn ve dawrh thung a,ben chu a beng ve emlo. Ryle Balgoni erawh chu hahdam huai hmel a pu emaw tih mai turin kuangkuah hlun in alo ding ngawi ngul a,misual tak anni. Tun thlengin min benna kha ka la theihghilh theilo.






Ka nu hian min duat teh huam ngailo,mahse,kut pawh min thlak ngai bawklo. Lylia hi ka hmaia min beng hmasa bertu leh hnuhnung ber ani.





Ka thinrim khan a kawr ka tihtlak ngei mai chu la in,bakcheh hriam ber chuan ka chep sawm vek anih kha. Ka damchhunga ka inzawrhna nen pawh ka rul thei dawnlo ati bawk a,ka zuah reng chhan tur ka hre biklo.






Englaiin nge ka lo mutthluk ka hre hauhlo. Ka hmaiah tu emaw in alo tawk a,a zut kual vel danah chuan tunge anih hrilh chawp ka ngailo. Ka la meng duh lawklova,a tih ziah danin ka nghawnga tattoo ah chuan a zut thla leh a,ka tattoo ang chiah hi ani pawhin a banbulah a nei ve a,ka kum 18 tlin lawmna atana kan chhut dun a ni nghe nghe.





"Steve" tih sep paha a kut ka vawn chuan
"Gi" ati sup a,engmah sawi tawhlovin a tho hluai a,Keipawh chu ka thuchhuak ve nghal.




"Ka mutlai ka hrelo,ka lo nghak reng che a" tiin a hmelah danglam a awm leh awmloh ka en a,mahse,engmah ka chhiar thiamlo. Nidang ang bawkin a dam leh em em a,a mitmeng pawh a dam dul leh ruih mai.





"Ilo va haw laklawh ve" tih pahin khumah alo thu a,ka lo kuah nghal vat. Ani pawh chuan min kuah let a,min ngaih tawh hmel zetin ka rim te chu a hnim vang vang a,keipawhin a tih ang chiah chuan ka lo ti ve bawk.





"Nia,ka ngai tawh lutuk che a,chawlh kan hman dun hun a ni tep tawh ania aw" ka tih chuan min thlah ve ta chauh a. Ka hmel chu en in hriatthiam har tak hian a thaw deuh hawlh a,ka hmai zartu sam te chu hui kiangin ka biang a chul leh a. A awmdan chu mak riau in ka hria.




"Ka ngai hle mai che" ati ve hawlh a,chu thu a sawi chu mak ti zetin ka lo en bawk. Kum tam kan inzui tawh,min ngaih thu hi hmaichhanah ala sawi ngailo,chezia in a tilang thin thung.





"Keipawhin ka ngai che alawm. Diktak chuan,ka nu in dawt mak deuh a sawi a,ka hlauthawng lutuk kha ka rawn haw ringawt anih hi" nuih deuh hak paha ka tih chuan a hawisawn zawk a.





"Steve,enteh,ka nu chuan maw" ka ti chiah ka hmui a rawn hup a.
"Shhh,engmah sawi rih suh. Gi,min ngaidam rawh" ati ringawt a.
"Enge maw i sawi le,ka thusawi hi ngaithla la,ka sawi phawt dawn alawm,a hnuah ngaihdam dilna chu aw" tia ka thut hnaih sauh sauh chuan beidawn hmel deuhin a kun ngul a..




Ngaih tha zan lova
"Steve,i damlo ami?" Ka tih chuan zawimuangin alo hawichhuak leh a.
"Gi,ka tihpalh takzet,inu khan dawt a sawilo" ati ta mai. A fiamthu emaw tiin a ban bulah chuan ka beng pawp a,ka nuih nghal hak bawk.





"In fiamthu amak hlawm emai" tiin ka thu tha nghal a.
"Kan fiamthu lo,zankhat tihsual vanga hetiang hi tawk kan ni. Min ngaidam turin ka tilui theilo che. Mahse,ka tihpalh takzet. Tun atanga reilotê ah inneihna a awm ang" kut suih chat paha atih chuan ngawi rengin ka en a. Ka la awih chuanglo.





"Engmaw,i zankhat tihsual chu eng nge,avaiin sawi la,engmah ka hrethiam lo" hnuk ulh lek leka ka tih rualin Lylia alo lang thut a
"Hi,unaunu" a rawn ti lut nghal.





Za lo takin ka nuih lui a,Steve ka en a,a inthlahrung hmel ka hmuh chuan Lylia lo pen lut mek ka en leh. Ka melh thlaa,a dul zawn ka melh thleng chiah ka phu zawk a. Nau a pai amaw?????






(Aw le,kan hriat angin school te kan tan leh tawh a,bakah,tun tum chu tum lawkloh deuhin Hostel ah te ka awm leh thut a,chumi vanga he thawnthu rawn tan lawklo pawh ka ni pakhat. Mahni tawkah te hian ka buai ve em em a,ka rawn dah tlai anih pawhin min lo hrethian hram hram thin dawn nia.



Kan college awmna a hlat deuh vangin chauh hi ana ve thei khawp mai a,Mihring rui chi nih phei chuan ami hrawm ana lehzual. Type peih ngangloh chang kan lo nei anih pawhin min lo hrethiam zel ula. Tunlai chu hringnun hi a VULCHÛK hrih lemlo a ni maw😂😂😂. In rawn COMMENTS țhatloh a,ADVERTISEMENT te in click thatloh phei chuan a VULCHÛK lo lehzual anga,kan vuai chhe zo vek mai ang🤣🤣🤣🤣).



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)